𑁯. 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸 𑀅𑀢𑁆𑀣𑀯𑀡𑁆𑀡𑀦𑀁 𑀧𑀦𑀲𑁆𑀲 𑀯𑀼𑀢𑁆𑀢𑀦𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀘 𑀧𑀤𑀸𑀦𑀺 𑀧𑀭𑀺𑀳𑀭𑀦𑁆𑀢𑀸 𑀓𑀭𑀺𑀲𑁆𑀲𑀸𑀫. 𑀇𑀘𑁆𑀙𑀸𑀦𑀗𑁆𑀕𑀮𑁄𑀢𑀺 𑀕𑀸𑀫𑀲𑁆𑀲 𑀦𑀸𑀫𑀁. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀘𑀗𑁆𑀓𑀻 𑀢𑀸𑀭𑀼𑀓𑁆𑀔𑁄 𑀢𑁄𑀤𑁂𑀬𑁆𑀬𑁄𑀢𑀺 𑀯𑁄𑀳𑀸𑀭𑀦𑀸𑀫𑀫𑁂𑀢𑀁. 𑀧𑁄𑀓𑁆𑀔𑀭𑀲𑀸𑀢𑀺 𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀦𑁂𑀫𑀺𑀢𑁆𑀢𑀺𑀓𑀁. 𑀢𑁂𑀲𑀼 𑀓𑀺𑀭 𑀏𑀓𑁄 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀧𑁄𑀓𑁆𑀔𑀭𑀡𑀺𑀬𑀸 𑀧𑀤𑀼𑀫𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀢𑀁 𑀧𑀤𑀼𑀫𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀲𑀬𑀺𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀲𑀁𑀯𑀟𑁆𑀠𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀧𑁄𑀓𑁆𑀔𑀭𑁂 𑀲𑀬𑀺𑀢𑀢𑁆𑀢𑀸 ‘‘𑀧𑁄𑀓𑁆𑀔𑀭𑀲𑀸𑀢𑀻’’𑀢𑀺 𑀘𑀲𑁆𑀲 𑀦𑀸𑀫𑀫𑀓𑀸𑀲𑀺. 𑀏𑀓𑀲𑁆𑀲 𑀞𑀸𑀦𑀦𑁆𑀢𑀭𑁂 𑀦𑁂𑀫𑀺𑀢𑁆𑀢𑀺𑀓𑀁. 𑀢𑁂𑀦 𑀓𑀺𑀭 𑀚𑀸𑀡𑀼𑀲𑁆𑀲𑁄𑀡𑀺𑀦𑀸𑀫𑀓𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀮𑀤𑁆𑀥𑀁, 𑀲𑁄 𑀢𑁂𑀦𑁂𑀯 𑀧𑀜𑁆𑀜𑀸𑀬𑀺.

𑀢𑁂 𑀲𑀩𑁆𑀩𑁂𑀧𑀺 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀓𑀲𑁆𑀫𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀧𑀝𑀺𑀯𑀲𑀦𑁆𑀢𑀻𑀢𑀺? 𑀯𑁂𑀤𑀲𑀚𑁆𑀛𑀸𑀬𑀦𑀧𑀭𑀺𑀯𑀻𑀫𑀁𑀲𑀦𑀢𑁆𑀣𑀁. 𑀢𑁂𑀦 𑀓𑀺𑀭 𑀲𑀫𑀬𑁂𑀦 𑀓𑁄𑀲𑀮𑀚𑀦𑀧𑀤𑁂 𑀯𑁂𑀤𑀓𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀸𑀦𑀁 𑀲𑀚𑁆𑀛𑀸𑀬𑀓𑀭𑀡𑀢𑁆𑀣𑀜𑁆𑀘 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀡𑀢𑁆𑀣𑀜𑁆𑀘 𑀢𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀢𑁂𑀦 𑀢𑁂𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀢𑁄 𑀆𑀕𑀫𑁆𑀫 𑀢𑀢𑁆𑀣 𑀧𑀝𑀺𑀯𑀲𑀦𑁆𑀢𑀺.

𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀦𑀦𑁆𑀢𑀺 𑀯𑀸𑀲𑁂𑀝𑁆𑀞𑀲𑁆𑀲 𑀘 𑀪𑀸𑀭𑀤𑁆𑀯𑀸𑀚𑀲𑁆𑀲 𑀘. 𑀅𑀬𑀫𑀦𑁆𑀢𑀭𑀸𑀓𑀣𑀸𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀳𑀸𑀬𑀓𑀪𑀸𑀯𑀸𑀦𑀼𑀭𑀽𑀧𑀁 𑀓𑀣𑀁 𑀓𑀣𑁂𑀦𑁆𑀢𑀸 𑀅𑀦𑀼𑀯𑀺𑀘𑀭𑀺𑀁𑀲𑀼, 𑀢𑀲𑁆𑀲𑀸 𑀓𑀣𑀸𑀬 𑀅𑀦𑁆𑀢𑀭𑀸 𑀯𑁂𑀫𑀚𑁆𑀛𑁂𑀬𑁂𑀯 𑀅𑀬𑀁 𑀅𑀜𑁆𑀜𑀸 𑀓𑀣𑀸 𑀉𑀤𑀧𑀸𑀤𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄𑀢𑀺 𑀲𑀁𑀲𑀼𑀤𑁆𑀥𑀓𑀼𑀘𑁆𑀙𑀺𑀓𑁄, 𑀲𑀁𑀲𑀼𑀤𑁆𑀥𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 𑀏𑀯 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸’’𑀢𑀺𑀆𑀤𑀻𑀲𑀼 𑀳𑀺 𑀉𑀤𑀭𑀕𑁆𑀕𑀺 ‘‘𑀕𑀳𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺. 𑀬𑀸𑀯 𑀲𑀢𑁆𑀢𑀫𑀸𑀢𑀺 𑀫𑀸𑀢𑀼 𑀫𑀸𑀢𑀸, 𑀧𑀺𑀢𑀼 𑀧𑀺𑀢𑀸𑀢𑀺 𑀏𑀯𑀁 𑀧𑀝𑀺𑀮𑁄𑀫𑁂𑀦 𑀬𑀸𑀯 𑀲𑀢𑁆𑀢 𑀚𑀸𑀢𑀺𑀬𑁄. 𑀏𑀢𑁆𑀣 𑀘 𑀧𑀺𑀢𑀸𑀫𑀳𑁄 𑀘 𑀧𑀺𑀢𑀸𑀫𑀳𑀻 𑀘 𑀧𑀺𑀢𑀸𑀫𑀳𑀸, 𑀢𑀣𑀸 𑀫𑀸𑀢𑀸𑀫𑀳𑁄 𑀘 𑀫𑀸𑀢𑀸𑀫𑀳𑀻 𑀘 𑀫𑀸𑀢𑀸𑀫𑀳𑀸, 𑀧𑀺𑀢𑀸𑀫𑀳𑀸 𑀘 𑀫𑀸𑀢𑀸𑀫𑀳𑀸 𑀘 𑀧𑀺𑀢𑀸𑀫𑀳𑀸𑀬𑁂𑀯. 𑀧𑀺𑀢𑀸𑀫𑀳𑀸𑀦𑀁 𑀬𑀼𑀕𑀁 𑀧𑀺𑀢𑀸𑀫𑀳𑀬𑀼𑀕𑀁. 𑀬𑀼𑀕𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁. 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯 𑀘𑁂𑀢𑀁, 𑀅𑀢𑁆𑀣𑀢𑁄 𑀧𑀦 𑀧𑀺𑀢𑀸𑀫𑀳𑀸𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀚𑀸𑀢𑀺𑀁 𑀆𑀭𑀩𑁆𑀪 ‘‘𑀓𑀺𑀁 𑀲𑁄’’𑀢𑀺 𑀓𑁂𑀦𑀘𑀺 𑀅𑀦𑀯𑀜𑁆𑀜𑀸𑀢𑁄. 𑀅𑀦𑀼𑀧𑀓𑁆𑀓𑀼𑀝𑁆𑀞𑁄𑀢𑀺 𑀚𑀸𑀢𑀺𑀲𑀦𑁆𑀤𑁄𑀲𑀯𑀸𑀤𑁂𑀦 𑀅𑀦𑀼𑀧𑀓𑁆𑀓𑀼𑀝𑁆𑀞𑀧𑀼𑀩𑁆𑀩𑁄. 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄. 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀜𑀸𑀧𑁂𑀢𑀼𑀁 𑀩𑁄𑀥𑁂𑀢𑀼𑀁, 𑀦𑀺𑀭𑀦𑁆𑀢𑀭𑀁 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀸𑀫𑀸𑀢𑀺 𑀕𑀘𑁆𑀙𑀸𑀫.

𑁬𑁦𑁦. 𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑀸𑀢𑀺 ‘‘𑀢𑁂𑀯𑀺𑀚𑁆𑀚𑀸 𑀢𑀼𑀫𑁆𑀳𑁂’’𑀢𑀺 𑀏𑀯𑀁 𑀫𑀬𑀁 𑀆𑀘𑀭𑀺𑀬𑁂𑀳𑀺 𑀘 𑀅𑀦𑀼𑀜𑁆𑀜𑀸𑀢𑀸 𑀅𑀢𑁆𑀢𑀦𑀸 𑀘 𑀧𑀝𑀺𑀚𑀸𑀦𑀺𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀫𑀸𑀢𑀺 𑀪𑀯𑀸𑀫. 𑀉𑀪𑁄𑀢𑀺 𑀤𑁆𑀯𑁂𑀧𑀺 𑀚𑀦𑀸. 𑀅𑀳𑀁 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲, 𑀢𑀸𑀭𑀼𑀓𑁆𑀔𑀲𑁆𑀲𑀸𑀬𑀁 𑀫𑀸𑀡𑀯𑁄𑀢𑀺 𑀅𑀳𑀁 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀻 𑀅𑀕𑁆𑀕𑀲𑀺𑀲𑁆𑀲𑁄, 𑀅𑀬𑀁 𑀢𑀸𑀭𑀼𑀓𑁆𑀔𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀡𑀢𑀺 𑀆𑀘𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀜𑁆𑀘 𑀤𑀻𑀧𑁂𑀦𑁆𑀢𑁄.

𑁬𑁦𑁧. 𑀢𑁂𑀯𑀺𑀚𑁆𑀚𑀸𑀦𑀦𑁆𑀢𑀺 𑀢𑀺𑀯𑁂𑀤𑀸𑀦𑀁. 𑀓𑁂𑀯𑀮𑀺𑀦𑁄𑀢𑀺 𑀦𑀺𑀝𑁆𑀞𑀗𑁆𑀕𑀢𑀸. 𑀅𑀲𑁆𑀫𑀲𑁂𑀢𑀺 𑀅𑀫𑁆𑀳 𑀪𑀯𑀸𑀫. 𑀇𑀤𑀸𑀦𑀺 𑀢𑀁 𑀓𑁂𑀯𑀮𑀺𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 𑁋 ‘‘𑀧𑀤𑀓𑀲𑁆𑀫𑀸…𑀧𑁂… 𑀲𑀸𑀤𑀺𑀲𑀸’’𑀢𑀺. 𑀢𑀢𑁆𑀣 𑀚𑀧𑁆𑀧𑁂𑀢𑀺 𑀯𑁂𑀤𑁂. 𑀓𑀫𑁆𑀫𑀼𑀦𑀸𑀢𑀺 𑀤𑀲𑀯𑀺𑀥𑁂𑀦 𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀼𑀦𑀸. 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀲𑀢𑁆𑀢𑀯𑀺𑀥𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀲𑀦𑁆𑀥𑀸𑀬 ‘‘𑀬𑀢𑁄 𑀔𑁄 𑀪𑁄 𑀲𑀻𑀮𑀯𑀸 𑀳𑁄𑀢𑀻’’𑀢𑀺 𑀆𑀳. 𑀢𑀺𑀯𑀺𑀥𑀁 𑀫𑀦𑁄𑀓𑀫𑁆𑀫𑀁 𑀲𑀦𑁆𑀥𑀸𑀬 ‘‘𑀯𑀢𑀲𑀫𑁆𑀧𑀦𑁆𑀦𑁄’’𑀢𑀺 𑀆𑀳. 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

𑁬𑁦𑁨-𑁫. 𑀇𑀤𑀸𑀦𑀺 𑀢𑀁 𑀯𑀘𑀦𑀦𑁆𑀢𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀅𑀳𑀜𑁆𑀘 𑀓𑀫𑁆𑀫𑀼𑀦𑀸 𑀩𑁆𑀭𑀽𑀫𑀻’’𑀢𑀺. 𑀔𑀬𑀸𑀢𑀻𑀢𑀦𑁆𑀢𑀺 𑀊𑀦𑀪𑀸𑀯𑀁 𑀅𑀢𑀻𑀢𑀁, 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀧𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀦𑀫𑀲𑁆𑀲𑀦𑁆𑀢𑀻𑀢𑀺 𑀦𑀫𑁄 𑀓𑀭𑁄𑀦𑁆𑀢𑀺. 𑀘𑀓𑁆𑀔𑀼𑀁 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂 𑀮𑁄𑀓𑁂, 𑀢𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑁂𑀦 𑀘𑀓𑁆𑀔𑀼 𑀳𑀼𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀁.

𑁬𑁦𑁬. 𑀏𑀯𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀯𑀸𑀲𑁂𑀝𑁆𑀞𑁂𑀦 𑀬𑀸𑀘𑀺𑀢𑁄 𑀪𑀕𑀯𑀸 𑀤𑁆𑀯𑁂𑀧𑀺 𑀚𑀦𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀳 𑁋 ‘‘𑀢𑁂𑀲𑀁 𑀯𑁄 𑀅𑀳𑀁 𑀩𑁆𑀬𑀓𑁆𑀔𑀺𑀲𑁆𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀩𑁆𑀬𑀓𑁆𑀔𑀺𑀲𑁆𑀲𑀦𑁆𑀢𑀺 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺. 𑀅𑀦𑀼𑀧𑀼𑀩𑁆𑀩𑀦𑁆𑀢𑀺 𑀢𑀺𑀝𑁆𑀞𑀢𑀼 𑀢𑀸𑀯 𑀩𑁆𑀭𑀸𑀳𑁆𑀫𑀡𑀘𑀺𑀦𑁆𑀢𑀸, 𑀓𑀻𑀝𑀧𑀝𑀗𑁆𑀕𑀢𑀺𑀡𑀭𑀼𑀓𑁆𑀔𑀢𑁄 𑀧𑀪𑀼𑀢𑀺 𑀯𑁄 𑀅𑀦𑀼𑀧𑀼𑀩𑁆𑀩𑀁 𑀩𑁆𑀬𑀓𑁆𑀔𑀺𑀲𑁆𑀲𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀏𑀯𑀁 𑀯𑀺𑀢𑁆𑀣𑀸𑀭𑀓𑀣𑀸𑀬 𑀯𑀺𑀦𑁂𑀢𑀩𑁆𑀩𑀸 𑀳𑀺 𑀢𑁂 𑀫𑀸𑀡𑀯𑀓𑀸. 𑀚𑀸𑀢𑀺𑀯𑀺𑀪𑀗𑁆𑀕𑀦𑁆𑀢𑀺 𑀚𑀸𑀢𑀺𑀯𑀺𑀢𑁆𑀣𑀸𑀭𑀁. 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄𑀢𑀺 𑀢𑁂𑀲𑀁 𑀢𑁂𑀲𑀜𑁆𑀳𑀺 𑀧𑀸𑀡𑀸𑀦𑀁 𑀚𑀸𑀢𑀺𑀬𑁄 𑀅𑀜𑁆𑀜𑀸 𑀅𑀜𑁆𑀜𑀸 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀅𑀢𑁆𑀣𑁄.

𑁬𑁦𑁭. 𑀢𑀢𑁄 𑀧𑀸𑀡𑀸𑀦𑀁 𑀚𑀸𑀢𑀺𑀯𑀺𑀪𑀗𑁆𑀕𑁂 𑀓𑀣𑁂𑀢𑀩𑁆𑀩𑁂 ‘‘𑀢𑀺𑀡𑀭𑀼𑀓𑁆𑀔𑁂𑀧𑀺 𑀚𑀸𑀦𑀸𑀣𑀸’’𑀢𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀁 𑀢𑀸𑀯 𑀓𑀣𑁂𑀢𑀼𑀁 𑀆𑀭𑀤𑁆𑀥𑁄. 𑀢𑀁 𑀓𑀺𑀫𑀢𑁆𑀣𑀫𑀺𑀢𑀺 𑀘𑁂? 𑀉𑀧𑀸𑀤𑀺𑀦𑁆𑀦𑁂𑀲𑀼 𑀲𑀼𑀔𑀜𑀸𑀧𑀦𑀢𑁆𑀣𑀁. 𑀅𑀦𑀼𑀧𑀸𑀤𑀺𑀦𑁆𑀦𑁂𑀲𑀼 𑀳𑀺 𑀚𑀸𑀢𑀺𑀪𑁂𑀤𑁂 𑀕𑀳𑀺𑀢𑁂 𑀉𑀧𑀸𑀤𑀺𑀦𑁆𑀦𑁂𑀲𑀼 𑀲𑁄 𑀧𑀸𑀓𑀝𑀢𑀭𑁄 𑀳𑁄𑀢𑀺. 𑀢𑀢𑁆𑀣 𑀢𑀺𑀡𑀸𑀦𑀺 𑀦𑀸𑀫 𑀅𑀦𑁆𑀢𑁄𑀨𑁂𑀕𑁆𑀕𑀽𑀦𑀺 𑀩𑀳𑀺𑀲𑀸𑀭𑀸𑀦𑀺. 𑀢𑀲𑁆𑀫𑀸 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄𑀧𑀺 𑀢𑀺𑀡𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀭𑀼𑀓𑁆𑀔𑀸 𑀦𑀸𑀫 𑀩𑀳𑀺𑀨𑁂𑀕𑁆𑀕𑀽 𑀅𑀦𑁆𑀢𑁄𑀲𑀸𑀭𑀸. 𑀢𑀺𑀡𑀸𑀦𑀺 𑀘 𑀭𑀼𑀓𑁆𑀔𑀸 𑀘 𑀢𑀺𑀡𑀭𑀼𑀓𑁆𑀔𑀸. 𑀢𑁂 𑀉𑀧𑀬𑁄𑀕𑀩𑀳𑀼𑀯𑀘𑀦𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀺𑀡𑀭𑀼𑀓𑁆𑀔𑁂𑀧𑀺 𑀚𑀸𑀦𑀸𑀣𑀸’’𑀢𑀺. 𑀦 𑀘𑀸𑀧𑀺 𑀧𑀝𑀺𑀚𑀸𑀦𑀭𑁂𑀢𑀺 ‘‘𑀫𑀬𑀁 𑀢𑀺𑀡𑀸, 𑀫𑀬𑀁 𑀭𑀼𑀓𑁆𑀔𑀸’’𑀢𑀺 𑀏𑀯𑀫𑁆𑀧𑀺 𑀦 𑀧𑀝𑀺𑀚𑀸𑀦𑀦𑁆𑀢𑀺. 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀦𑁆𑀢𑀺 𑀅𑀧𑀝𑀺𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀘 𑀢𑁂𑀲𑀁 𑀚𑀸𑀢𑀺𑀫𑀬𑀫𑁂𑀯 𑀲𑀡𑁆𑀞𑀸𑀦𑀁 𑀅𑀢𑁆𑀢𑀦𑁄 𑀫𑀽𑀮𑀪𑀽𑀢𑀢𑀺𑀡𑀸𑀤𑀺𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀁? 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄, 𑀬𑀲𑁆𑀫𑀸 𑀅𑀜𑁆𑀜𑀸 𑀢𑀺𑀡𑀚𑀸𑀢𑀺, 𑀅𑀜𑁆𑀜𑀸 𑀭𑀼𑀓𑁆𑀔𑀚𑀸𑀢𑀺; 𑀢𑀺𑀡𑁂𑀲𑀼𑀧𑀺 𑀅𑀜𑁆𑀜𑀸 𑀢𑀸𑀮𑀚𑀸𑀢𑀺, 𑀅𑀜𑁆𑀜𑀸 𑀦𑀸𑀴𑀺𑀓𑁂𑀭𑀚𑀸𑀢𑀻𑀢𑀺 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀁 𑀚𑀸𑀢𑀺𑀯𑀲𑁂𑀦 𑀦𑀸𑀦𑀸 𑀳𑁄𑀢𑀺, 𑀢𑀁 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀁 𑀧𑀭𑁂𑀲𑀁 𑀯𑀸 𑀉𑀧𑀤𑁂𑀲𑀁 𑀯𑀺𑀦𑀸𑀧𑀺 𑀅𑀜𑁆𑀜𑀚𑀸𑀢𑀺𑀢𑁄 𑀯𑀺𑀲𑁂𑀲𑁂𑀦 𑀕𑀬𑁆𑀳𑀢𑀺. 𑀬𑀤𑀺 𑀘 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬, 𑀲𑁄𑀧𑀺 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀁 𑀧𑀭𑁂𑀲𑀁 𑀯𑀸 𑀉𑀧𑀤𑁂𑀲𑀁 𑀯𑀺𑀦𑀸 𑀔𑀢𑁆𑀢𑀺𑀬𑀢𑁄 𑀯𑁂𑀲𑁆𑀲𑀲𑀼𑀤𑁆𑀤𑀢𑁄 𑀯𑀸 𑀯𑀺𑀲𑁂𑀲𑁂𑀦 𑀕𑀬𑁆𑀳𑁂𑀬𑁆𑀬, 𑀦 𑀘 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀦 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀧𑀭𑀢𑁄 𑀧𑀦 ‘‘𑀬𑀣𑀸 𑀏𑀢𑀸𑀲𑀼 𑀚𑀸𑀢𑀻𑀲𑀽’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀏𑀢𑀫𑀢𑁆𑀣𑀁 𑀯𑀘𑀻𑀪𑁂𑀤𑁂𑀦𑁂𑀯 𑀆𑀯𑀺𑀓𑀭𑀺𑀲𑁆𑀲𑀢𑀺.

𑁬𑁦𑁮. 𑀏𑀯𑀁 𑀅𑀦𑀼𑀧𑀸𑀤𑀺𑀦𑁆𑀦𑁂𑀲𑀼 𑀚𑀸𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀸𑀤𑀺𑀦𑁆𑀦𑁂𑀲𑀼 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀓𑀻𑀝𑁂’’𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁆𑀣 𑀓𑀻𑀝𑀸𑀢𑀺 𑀓𑀺𑀫𑀬𑁄. 𑀧𑀝𑀗𑁆𑀕𑀸𑀢𑀺 𑀧𑀝𑀗𑁆𑀕𑀸𑀬𑁂𑀯. 𑀬𑀸𑀯 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑁂𑀢𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁬𑁦𑁯. 𑀔𑀼𑀤𑁆𑀤𑀓𑁂𑀢𑀺 𑀓𑀸𑀴𑀓𑀓𑀡𑁆𑀟𑀓𑀸𑀤𑀬𑁄. 𑀫𑀳𑀮𑁆𑀮𑀓𑁂𑀢𑀺 𑀲𑀲𑀩𑀺𑀴𑀸𑀭𑀸𑀤𑀬𑁄. 𑀲𑀩𑁆𑀩𑁂 𑀳𑀺 𑀢𑁂 𑀅𑀦𑁂𑀓𑀯𑀡𑁆𑀡𑀸.

𑁬𑁧𑁦. 𑀧𑀸𑀤𑀽𑀤𑀭𑁂𑀢𑀺 𑀉𑀤𑀭𑀧𑀸𑀤𑁂, 𑀉𑀤𑀭𑀁𑀬𑁂𑀯 𑀬𑁂𑀲𑀁 𑀧𑀸𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀻𑀖𑀧𑀺𑀝𑁆𑀞𑀺𑀓𑁂𑀢𑀺 𑀲𑀧𑁆𑀧𑀸𑀦𑀜𑁆𑀳𑀺 𑀲𑀻𑀲𑀢𑁄 𑀬𑀸𑀯 𑀦𑀗𑁆𑀕𑀼𑀝𑁆𑀞𑀸 𑀧𑀺𑀝𑁆𑀞𑀺 𑀏𑀯 𑀳𑁄𑀢𑀺, 𑀢𑁂𑀦 𑀢𑁂 ‘‘𑀤𑀻𑀖𑀧𑀺𑀝𑁆𑀞𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀧𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀆𑀲𑀻𑀯𑀺𑀲𑀸𑀤𑀺𑀪𑁂𑀤𑁂𑀦.

𑁬𑁧𑁧. 𑀑𑀤𑀓𑁂𑀢𑀺 𑀉𑀤𑀓𑀫𑁆𑀳𑀺 𑀚𑀸𑀢𑁂. 𑀫𑀘𑁆𑀙𑀸𑀧𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀭𑁄𑀳𑀺𑀢𑀫𑀘𑁆𑀙𑀸𑀤𑀺𑀪𑁂𑀤𑁂𑀦.

𑁬𑁧𑁨. 𑀧𑀓𑁆𑀔𑀻𑀢𑀺 𑀲𑀓𑀼𑀡𑁂. 𑀢𑁂 𑀳𑀺 𑀧𑀓𑁆𑀔𑀸𑀦𑀁 𑀅𑀢𑁆𑀣𑀺𑀢𑀸𑀬 ‘‘𑀧𑀓𑁆𑀔𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀢𑁆𑀢𑁂𑀳𑀺 𑀬𑀦𑁆𑀢𑀻𑀢𑀺 𑀧𑀢𑁆𑀢𑀬𑀸𑀦𑀸. 𑀯𑁂𑀳𑀸𑀲𑁂 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀳𑀗𑁆𑀕𑀫𑀸. 𑀢𑁂𑀧𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀓𑀸𑀓𑀸𑀤𑀺𑀪𑁂𑀤𑁂𑀦.

𑁬𑁧𑁩. 𑀏𑀯𑀁 𑀣𑀮𑀚𑀮𑀸𑀓𑀸𑀲𑀕𑁄𑀘𑀭𑀸𑀦𑀁 𑀧𑀸𑀡𑀸𑀦𑀁 𑀚𑀸𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀢𑀁 𑀤𑀲𑁆𑀲𑁂𑀲𑀺, 𑀢𑀁 𑀆𑀯𑀺𑀓𑀭𑁄𑀦𑁆𑀢𑁄 ‘‘𑀬𑀣𑀸 𑀏𑀢𑀸𑀲𑀽’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀲𑀗𑁆𑀔𑁂𑀧𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑀯𑀡𑁆𑀡𑀦𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁬𑁧𑁪-𑁬. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀬𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀲𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀁 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀧𑀼𑀣𑀽’’𑀢𑀺, 𑀢𑀁 𑀏𑀯𑀁 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁, 𑀦 𑀓𑁂𑀲𑁂𑀳𑀻𑀢𑀺. 𑀦 𑀳𑀺 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀈𑀤𑀺𑀲𑀸 𑀓𑁂𑀲𑀸 𑀳𑁄𑀦𑁆𑀢𑀺, 𑀔𑀢𑁆𑀢𑀺𑀬𑀸𑀦𑀁 𑀈𑀤𑀺𑀲𑀸’’𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀫𑀺𑀕𑀸𑀤𑀻𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀦𑁂𑀯, 𑀬𑀣𑀸 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀽𑀢𑀺 𑀇𑀤𑀁 𑀧𑀦 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀬𑁄𑀚𑀦𑀸 𑁋 𑀢𑀤𑁂𑀯 𑀬𑀲𑁆𑀫𑀸 𑀇𑀫𑁂𑀳𑀺 𑀓𑁂𑀲𑀸𑀤𑀻𑀳𑀺 𑀦𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀧𑀼𑀣𑀼, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀩𑁆𑀭𑀸𑀳𑁆𑀫𑀡𑀸𑀤𑀺𑀪𑁂𑀤𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀦𑁂𑀯 𑀬𑀣𑀸 𑀅𑀜𑁆𑀜𑀸𑀲𑀼 𑀚𑀸𑀢𑀻𑀲𑀽’’𑀢𑀺.

𑁬𑁧𑁭. 𑀇𑀤𑀸𑀦𑀺 𑀏𑀯𑀁 𑀚𑀸𑀢𑀺𑀪𑁂𑀤𑁂 𑀅𑀲𑀦𑁆𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀺𑀬𑁄𑀢𑀺 𑀇𑀤𑀁 𑀦𑀸𑀦𑀢𑁆𑀢𑀁 𑀬𑀣𑀸 𑀚𑀸𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀢𑁆𑀢’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀏𑀢𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀯𑀺𑀬 𑀬𑁄𑀦𑀺𑀲𑀺𑀤𑁆𑀥𑀫𑁂𑀯 𑀓𑁂𑀲𑀸𑀤𑀺𑀲𑀡𑁆𑀞𑀸𑀦𑀸𑀦𑀢𑁆𑀢𑀁 𑀫𑀦𑀼𑀲𑁆𑀲𑁂𑀲𑀼 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀭𑀻𑀭𑁂𑀲𑀼 𑀦 𑀯𑀺𑀚𑁆𑀚𑀢𑀺. 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀦 𑀏𑀢𑀲𑁆𑀫𑀺𑀁 𑀬𑀤𑁂𑀢𑀁 𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀺𑀬𑁄𑀢𑀺 𑀦𑀸𑀦𑀢𑁆𑀢𑀯𑀺𑀥𑀸𑀦𑀧𑀭𑀺𑀬𑀸𑀬𑀁 𑀯𑁄𑀓𑀸𑀭𑀁, 𑀢𑀁 𑀯𑁄𑀓𑀸𑀭𑀜𑁆𑀘 𑀫𑀦𑀼𑀲𑁆𑀲𑁂𑀲𑀼 𑀲𑀫𑀜𑁆𑀜𑀸𑀬 𑀧𑀯𑀼𑀘𑁆𑀘𑀢𑀺, 𑀯𑁄𑀳𑀸𑀭𑀫𑀢𑁆𑀢𑁂𑀦 𑀯𑀼𑀘𑁆𑀘𑀢𑀻𑀢𑀺.

𑁬𑁧𑁯-𑁬𑁨𑁫. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀪𑀸𑀭𑀤𑁆𑀯𑀸𑀚𑀲𑁆𑀲 𑀯𑀸𑀤𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀬𑀤𑀺 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬, 𑀆𑀚𑀻𑀯𑀲𑀻𑀮𑀸𑀘𑀸𑀭𑀯𑀺𑀧𑀦𑁆𑀦𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀧𑁄𑀭𑀸𑀡𑀸 𑀩𑁆𑀭𑀸𑀳𑁆𑀫𑀡𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀦 𑀇𑀘𑁆𑀙𑀦𑁆𑀢𑀺 𑀮𑁄𑀓𑁂 𑀘 𑀅𑀜𑁆𑀜𑁂𑀧𑀺 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸, 𑀢𑀲𑁆𑀫𑀸 𑀯𑀸𑀲𑁂𑀝𑁆𑀞𑀲𑁆𑀲 𑀯𑀸𑀤𑀧𑀕𑁆𑀕𑀳𑀡𑀢𑁆𑀣𑀁 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀽’’𑀢𑀺𑀆𑀤𑀺𑀓𑀸 𑀅𑀝𑁆𑀞 𑀕𑀸𑀣𑀸𑀬𑁄 𑀆𑀳. 𑀢𑀢𑁆𑀣 𑀕𑁄𑀭𑀓𑁆𑀔𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔𑀁, 𑀓𑀲𑀺𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻 𑀳𑀺 ‘‘𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀪𑁂𑀤𑁄 𑀘 𑀔𑁂𑀢𑁆𑀢𑀁. 𑀧𑀼𑀣𑀼𑀲𑀺𑀧𑁆𑀧𑁂𑀦𑀸𑀢𑀺 𑀢𑀦𑁆𑀢𑀯𑀸𑀬𑀓𑀫𑁆𑀫𑀸𑀤𑀺𑀦𑀸𑀦𑀸𑀲𑀺𑀧𑁆𑀧𑁂𑀦. 𑀯𑁄𑀳𑀸𑀭𑀦𑁆𑀢𑀺 𑀯𑀡𑀺𑀚𑁆𑀚𑀁. 𑀧𑀭𑀧𑁂𑀲𑁆𑀲𑁂𑀦𑀸𑀢𑀺 𑀧𑀭𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑁂𑀦. 𑀇𑀲𑁆𑀲𑀢𑁆𑀣𑀦𑁆𑀢𑀺 𑀆𑀯𑀼𑀥𑀚𑀻𑀯𑀺𑀓𑀁, 𑀉𑀲𑀼𑀜𑁆𑀘 𑀲𑀢𑁆𑀢𑀺𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑁄𑀭𑁄𑀳𑀺𑀘𑁆𑀘𑁂𑀦𑀸𑀢𑀺 𑀧𑀼𑀭𑁄𑀳𑀺𑀢𑀓𑀫𑁆𑀫𑁂𑀦.

𑁬𑁨𑁬. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀲𑀫𑀬𑁂𑀦 𑀘 𑀮𑁄𑀓𑀯𑁄𑀳𑀸𑀭𑁂𑀦 𑀘 𑀆𑀚𑀻𑀯𑀲𑀻𑀮𑀸𑀘𑀸𑀭𑀯𑀺𑀧𑀦𑁆𑀦𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀏𑀯𑀁 𑀲𑀦𑁆𑀢𑁂 𑀦 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄, 𑀕𑀼𑀡𑁂𑀳𑀺 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀬𑀢𑁆𑀣 𑀓𑀼𑀮𑁂 𑀚𑀸𑀢𑁄 𑀬𑁄 𑀕𑀼𑀡𑀯𑀸, 𑀲𑁄 𑀩𑁆𑀭𑀸𑀳𑁆𑀫𑀡𑁄, 𑀅𑀬𑀫𑁂𑀢𑁆𑀣 𑀜𑀸𑀬𑁄𑀢𑀺 𑀏𑀯𑀫𑁂𑀢𑀁 𑀜𑀸𑀬𑀁 𑀅𑀢𑁆𑀣𑀢𑁄 𑀆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀜𑀸𑀬𑀁 𑀯𑀘𑀻𑀪𑁂𑀤𑁂𑀦 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀳𑀁 𑀧𑀦 𑀬𑁆𑀯𑀸𑀬𑀁 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀸𑀢𑁄, 𑀢𑀢𑁆𑀭𑀸𑀧𑀺 𑀯𑀸 𑀯𑀺𑀲𑁂𑀲𑁂𑀦 𑀬𑁄 𑀩𑁆𑀭𑀸𑀳𑁆𑀫𑀡𑀲𑀫𑀜𑁆𑀜𑀺𑀢𑀸𑀬 𑀫𑀸𑀢𑀭𑀺 𑀲𑀫𑁆𑀪𑀽𑀢𑁄, 𑀢𑀁 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁 𑀬𑀸 𑀘𑀸𑀬𑀁 ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁦𑁩; 𑀫. 𑀦𑀺. 𑁨.𑁪𑁨𑁪) 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀼𑀤𑁆𑀥𑀉𑀧𑁆𑀧𑀢𑁆𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑀸 𑀬𑁄𑀦𑀺 𑀓𑀣𑀻𑀬𑀢𑀺, ‘‘𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄’’𑀢𑀺 𑀇𑀫𑀺𑀦𑀸 𑀘 𑀫𑀸𑀢𑀼𑀲𑀫𑁆𑀧𑀢𑁆𑀢𑀺, 𑀢𑀢𑁄𑀧𑀺 𑀚𑀸𑀢𑀲𑀫𑁆𑀪𑀽𑀢𑀢𑁆𑀢𑀸 ‘‘𑀬𑁄𑀦𑀺𑀚𑁄 𑀫𑀢𑁆𑀢𑀺𑀲𑀫𑁆𑀪𑀯𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀫𑁆𑀧𑀺 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁 𑀇𑀫𑀺𑀦𑀸 𑀘 𑀬𑁄𑀦𑀺𑀚𑀫𑀢𑁆𑀢𑀺𑀲𑀫𑁆𑀪𑀯𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀁 𑀦 𑀩𑁆𑀭𑀽𑀫𑀺. 𑀓𑀲𑁆𑀫𑀸? 𑀬𑀲𑁆𑀫𑀸 ‘‘𑀪𑁄 𑀪𑁄’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀅𑀜𑁆𑀜𑁂𑀳𑀺 𑀲𑀓𑀺𑀜𑁆𑀘𑀦𑁂𑀳𑀺 𑀯𑀺𑀲𑀺𑀝𑁆𑀞𑀢𑁆𑀢𑀸 𑀪𑁄𑀯𑀸𑀤𑀻 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄. 𑀬𑁄 𑀧𑀦𑀸𑀬𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀚𑀸𑀢𑁄𑀧𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀪𑀸𑀯𑁂𑀦 𑀅𑀓𑀺𑀜𑁆𑀘𑀦𑁄, 𑀲𑀩𑁆𑀩𑀕𑀳𑀡𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀘 𑀅𑀦𑀸𑀤𑀸𑀦𑁄, 𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀩𑀸𑀳𑀺𑀢𑀧𑀸𑀧𑁄𑀢𑀺.

𑁬𑁨𑁭. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸’’𑀢𑀺𑀆𑀤𑀺𑀓𑀸 𑀲𑀢𑁆𑀢𑀯𑀻𑀲𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀩𑁆𑀩𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀁 𑀲𑀁𑀬𑁄𑀚𑀦𑀁. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸𑀬 𑀦 𑀢𑀲𑁆𑀲𑀢𑀺. 𑀢𑀫𑀳𑀦𑁆𑀢𑀺 𑀢𑀁 𑀅𑀳𑀁 𑀭𑀸𑀕𑀸𑀤𑀻𑀦𑀁 𑀲𑀗𑁆𑀕𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀲𑀗𑁆𑀕𑀸𑀢𑀺𑀕𑀁, 𑀘𑀢𑀼𑀦𑁆𑀦𑀫𑁆𑀧𑀺 𑀬𑁄𑀕𑀸𑀦𑀁 𑀅𑀪𑀸𑀯𑁂𑀦 𑀯𑀺𑀲𑀁𑀬𑀼𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁨𑁮. 𑀦𑀤𑁆𑀥𑀺𑀦𑁆𑀢𑀺 𑀦𑀬𑁆𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 𑀓𑁄𑀥𑀁. 𑀯𑀭𑀢𑁆𑀢𑀦𑁆𑀢𑀺 𑀩𑀦𑁆𑀥𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 𑀢𑀡𑁆𑀳𑀁. 𑀲𑀦𑁆𑀤𑀸𑀦𑀁 𑀲𑀳𑀦𑀼𑀓𑁆𑀓𑀫𑀦𑁆𑀢𑀺 𑀅𑀦𑀼𑀲𑀬𑀸𑀦𑀼𑀓𑁆𑀓𑀫𑀲𑀳𑀺𑀢𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀲𑀦𑁆𑀤𑀸𑀦𑀁, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀅𑀯𑀺𑀚𑁆𑀚𑀸𑀧𑀮𑀺𑀖𑀲𑁆𑀲 𑀉𑀓𑁆𑀔𑀺𑀢𑁆𑀢𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀁 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑁆𑀦𑀁 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁨𑁯. 𑀅𑀤𑀼𑀝𑁆𑀞𑁄𑀢𑀺 𑀏𑀯𑀁 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀜𑁆𑀘 𑀧𑀸𑀡𑀺𑀆𑀤𑀻𑀳𑀺 𑀧𑁄𑀣𑀦𑀜𑁆𑀘 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑀦𑀜𑁆𑀘 𑀬𑁄 𑀅𑀓𑀼𑀤𑁆𑀥𑀫𑀸𑀦𑀲𑁄 𑀳𑀼𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺, 𑀔𑀦𑁆𑀢𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀔𑀦𑁆𑀢𑀻𑀩𑀮𑀁, 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀻𑀓𑀪𑀽𑀢𑁂𑀦 𑀢𑁂𑀦𑁂𑀯 𑀔𑀦𑁆𑀢𑀻𑀩𑀮𑀸𑀦𑀻𑀓𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀩𑀮𑀸𑀦𑀻𑀓𑀁 𑀢𑀁 𑀏𑀯𑀭𑀽𑀧𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁦. 𑀯𑀢𑀦𑁆𑀢𑀦𑁆𑀢𑀺 𑀥𑀼𑀢𑀯𑀢𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀻𑀮𑀯𑀦𑁆𑀢𑀁, 𑀢𑀡𑁆𑀳𑀸𑀉𑀲𑁆𑀲𑀤𑀸𑀪𑀸𑀯𑁂𑀦 𑀅𑀦𑀼𑀲𑁆𑀲𑀤𑀁, 𑀙𑀴𑀺𑀦𑁆𑀤𑁆𑀭𑀺𑀬𑀤𑀫𑀦𑁂𑀦 𑀤𑀦𑁆𑀢𑀁, 𑀓𑁄𑀝𑀺𑀬𑀁 𑀞𑀺𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀅𑀦𑁆𑀢𑀺𑀫𑀲𑀸𑀭𑀻𑀭𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁧. 𑀬𑁄 𑀦 𑀮𑀺𑀫𑁆𑀧𑀢𑀻𑀢𑀺 𑀏𑀯𑀫𑁂𑀯 𑀬𑁄 𑀅𑀩𑁆𑀪𑀦𑁆𑀢𑀭𑁂 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀦 𑀮𑀺𑀫𑁆𑀧𑀢𑀺, 𑀢𑀲𑁆𑀫𑀺𑀁 𑀓𑀸𑀫𑁂 𑀦 𑀲𑀡𑁆𑀞𑀸𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁨. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀔𑀦𑁆𑀥𑀤𑀼𑀓𑁆𑀔𑀲𑁆𑀲. 𑀧𑀦𑁆𑀦𑀪𑀸𑀭𑀦𑁆𑀢𑀺 𑀑𑀳𑀺𑀢𑀓𑁆𑀔𑀦𑁆𑀥𑀪𑀸𑀭𑀁 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀸 𑀯𑀺𑀲𑀁𑀬𑀼𑀢𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁩. 𑀕𑀫𑁆𑀪𑀻𑀭𑀧𑀜𑁆𑀜𑀦𑁆𑀢𑀺 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁, 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀫𑁂𑀥𑀸𑀯𑀺𑀁, ‘‘𑀅𑀬𑀁 𑀤𑀼𑀕𑁆𑀕𑀢𑀺𑀬𑀸, 𑀅𑀬𑀁 𑀲𑀼𑀕𑀢𑀺𑀬𑀸, 𑀅𑀬𑀁 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑁄, 𑀅𑀬𑀁 𑀅𑀫𑀕𑁆𑀕𑁄’’𑀢𑀺 𑀏𑀯𑀁 𑀫𑀕𑁆𑀕𑁂 𑀅𑀫𑀕𑁆𑀕𑁂 𑀘 𑀙𑁂𑀓𑀢𑀸𑀬 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑀁, 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀁 𑀉𑀢𑁆𑀢𑀫𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁪. 𑀅𑀲𑀁𑀲𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀲𑀯𑀦𑀲𑀫𑀼𑀮𑁆𑀮𑀸𑀧𑀧𑀭𑀺𑀪𑁄𑀕𑀓𑀸𑀬𑀲𑀁𑀲𑀕𑁆𑀕𑀸𑀦𑀁 𑀅𑀪𑀸𑀯𑁂𑀦 𑀅𑀲𑀁𑀲𑀝𑁆𑀞𑀁. 𑀉𑀪𑀬𑀦𑁆𑀢𑀺 𑀕𑀺𑀳𑀻𑀳𑀺 𑀘 𑀅𑀦𑀕𑀸𑀭𑁂𑀳𑀺 𑀘𑀸𑀢𑀺 𑀉𑀪𑀬𑁂𑀳𑀺𑀧𑀺 𑀅𑀲𑀁𑀲𑀝𑁆𑀞𑀁. 𑀅𑀦𑁄𑀓𑀲𑀸𑀭𑀺𑀦𑁆𑀢𑀺 𑀅𑀦𑀸𑀮𑀬𑀘𑀸𑀭𑀺𑀁, 𑀢𑀁 𑀏𑀯𑀭𑀽𑀧𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁫. 𑀦𑀺𑀥𑀸𑀬𑀸𑀢𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀑𑀭𑁄𑀧𑁂𑀢𑁆𑀯𑀸. 𑀢𑀲𑁂𑀲𑀼 𑀣𑀸𑀯𑀭𑁂𑀲𑀼 𑀘𑀸𑀢𑀺 𑀢𑀡𑁆𑀳𑀸𑀢𑀸𑀲𑁂𑀦 𑀢𑀲𑁂𑀲𑀼 𑀢𑀡𑁆𑀳𑀸𑀪𑀸𑀯𑁂𑀦 𑀣𑀺𑀭𑀢𑀸𑀬 𑀣𑀸𑀯𑀭𑁂𑀲𑀼. 𑀬𑁄 𑀦 𑀳𑀦𑁆𑀢𑀻𑀢𑀺 𑀬𑁄 𑀏𑀯𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀯𑀺𑀕𑀢𑀧𑀝𑀺𑀖𑀢𑀸𑀬 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀦𑁂𑀯 𑀓𑀜𑁆𑀘𑀺 𑀲𑀬𑀁 𑀳𑀦𑀢𑀺, 𑀦 𑀅𑀜𑁆𑀜𑁂𑀦 𑀖𑀸𑀢𑁂𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁬. 𑀅𑀯𑀺𑀭𑀼𑀤𑁆𑀥𑀦𑁆𑀢𑀺 𑀆𑀖𑀸𑀢𑀯𑀲𑁂𑀦 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀮𑁄𑀓𑀺𑀬𑀫𑀳𑀸𑀚𑀦𑁂𑀲𑀼 𑀆𑀖𑀸𑀢𑀸𑀪𑀸𑀯𑁂𑀦 𑀅𑀯𑀺𑀭𑀼𑀤𑁆𑀥𑀁, 𑀳𑀢𑁆𑀣𑀕𑀢𑁂 𑀤𑀡𑁆𑀟𑁂 𑀯𑀸 𑀲𑀢𑁆𑀣𑁂 𑀯𑀸 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑁂𑀲𑀁 𑀧𑀳𑀸𑀭𑀤𑀸𑀦𑀢𑁄 𑀅𑀯𑀺𑀭𑀢𑀢𑁆𑀢𑀸 𑀅𑀢𑁆𑀢𑀤𑀡𑁆𑀟𑁂𑀲𑀼 𑀚𑀦𑁂𑀲𑀼 𑀦𑀺𑀩𑁆𑀩𑀼𑀢𑀁 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑀁, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 ‘‘𑀅𑀳𑀁 𑀫𑀫’’𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀲𑀸𑀤𑀸𑀦𑁂𑀲𑀼, 𑀢𑀲𑁆𑀲 𑀕𑀳𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀤𑀸𑀦𑀁 𑀢𑀁 𑀏𑀯𑀭𑀽𑀧𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁭. 𑀆𑀭𑀕𑁆𑀕𑀸𑀢𑀺 𑀬𑀲𑁆𑀲𑁂𑀢𑁂 𑀭𑀸𑀕𑀸𑀤𑀬𑁄 𑀅𑀬𑀜𑁆𑀘 𑀧𑀭𑀕𑀼𑀡𑀫𑀓𑁆𑀔𑀡𑀮𑀓𑁆𑀔𑀡𑁄 𑀫𑀓𑁆𑀔𑁄 𑀆𑀭𑀕𑁆𑀕𑀸 𑀲𑀸𑀲𑀧𑁄 𑀯𑀺𑀬 𑀧𑀧𑀢𑀺𑀢𑁄, 𑀬𑀣𑀸 𑀲𑀸𑀲𑀧𑁄 𑀆𑀭𑀕𑁆𑀕𑁂 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀏𑀯𑀁 𑀘𑀺𑀢𑁆𑀢𑁂 𑀦 𑀢𑀺𑀝𑁆𑀞𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁮. 𑀅𑀓𑀓𑁆𑀓𑀲𑀦𑁆𑀢𑀺 𑀅𑀨𑀭𑀼𑀲𑀁. 𑀯𑀺𑀜𑁆𑀜𑀸𑀧𑀦𑀺𑀦𑁆𑀢𑀺 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀺𑀁. 𑀲𑀘𑁆𑀘𑀦𑁆𑀢𑀺 𑀪𑀽𑀢𑀁. 𑀦𑀸𑀪𑀺𑀲𑀚𑁂𑀢𑀺 𑀬𑀸𑀬 𑀕𑀺𑀭𑀸𑀬 𑀅𑀜𑁆𑀜𑀁 𑀓𑀼𑀚𑁆𑀛𑀸𑀧𑀦𑀯𑀲𑁂𑀦 𑀦 𑀮𑀕𑁆𑀕𑀸𑀧𑁂𑀬𑁆𑀬. 𑀔𑀻𑀡𑀸𑀲𑀯𑁄 𑀦𑀸𑀫 𑀏𑀯𑀭𑀽𑀧𑀫𑁂𑀯 𑀕𑀺𑀭𑀁 𑀪𑀸𑀲𑁂𑀬𑁆𑀬. 𑀢𑀲𑁆𑀫𑀸 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁩𑁯. 𑀲𑀸𑀝𑀓𑀸𑀪𑀭𑀡𑀸𑀤𑀻𑀲𑀼 𑀤𑀻𑀖𑀁 𑀯𑀸 𑀭𑀲𑁆𑀲𑀁 𑀯𑀸, 𑀫𑀡𑀺𑀫𑀼𑀢𑁆𑀢𑀸𑀤𑀻𑀲𑀼 𑀅𑀡𑀼𑀁 𑀯𑀸 𑀣𑀽𑀮𑀁 𑀯𑀸 𑀫𑀳𑀕𑁆𑀖𑀅𑀧𑁆𑀧𑀕𑁆𑀖𑀯𑀲𑁂𑀦 𑀲𑀼𑀪𑀁 𑀯𑀸 𑀅𑀲𑀼𑀪𑀁 𑀯𑀸 𑀬𑁄 𑀧𑀼𑀕𑁆𑀕𑀮𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀦𑀸𑀤𑀺𑀬𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁦. 𑀦𑀺𑀭𑀸𑀲𑀸𑀲𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁. 𑀯𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀬𑀼𑀢𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁧. 𑀆𑀮𑀬𑀸𑀢𑀺 𑀢𑀡𑁆𑀳𑀸. 𑀅𑀜𑁆𑀜𑀸𑀬 𑀅𑀓𑀣𑀁𑀓𑀣𑀻𑀢𑀺 𑀅𑀝𑁆𑀞 𑀯𑀢𑁆𑀣𑀽𑀦𑀺 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀅𑀝𑁆𑀞𑀯𑀢𑁆𑀣𑀼𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄. 𑀅𑀫𑀢𑁄𑀕𑀥𑀫𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀑𑀕𑀳𑁂𑀢𑁆𑀯𑀸 𑀅𑀦𑀼𑀧𑁆𑀧𑀢𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁨. 𑀉𑀪𑁄𑀢𑀺 𑀤𑁆𑀯𑁂𑀧𑀺 𑀧𑀼𑀜𑁆𑀜𑀸𑀦𑀺 𑀧𑀸𑀧𑀸𑀦𑀺 𑀘 𑀙𑀟𑁆𑀟𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀦𑁆𑀢𑀺 𑀭𑀸𑀕𑀸𑀤𑀺𑀪𑁂𑀤𑀁 𑀲𑀗𑁆𑀕𑀁. 𑀉𑀧𑀘𑁆𑀘𑀕𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑁄. 𑀢𑀫𑀳𑀁 𑀯𑀝𑁆𑀝𑀫𑀽𑀮𑀲𑁄𑀓𑁂𑀦 𑀅𑀲𑁄𑀓𑀁, 𑀅𑀩𑁆𑀪𑀦𑁆𑀢𑀭𑁂 𑀭𑀸𑀕𑀭𑀚𑀸𑀤𑀻𑀦𑀁 𑀅𑀪𑀸𑀯𑁂𑀦 𑀯𑀺𑀭𑀚𑀁, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀼𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁩. 𑀯𑀺𑀫𑀮𑀦𑁆𑀢𑀺 𑀅𑀩𑁆𑀪𑀸𑀤𑀺𑀫𑀮𑀯𑀺𑀭𑀳𑀺𑀢𑀁. 𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀯𑀺𑀧𑁆𑀧𑀲𑀦𑁆𑀦𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀁. 𑀅𑀦𑀸𑀯𑀺𑀮𑀦𑁆𑀢𑀺 𑀓𑀺𑀮𑁂𑀲𑀸𑀯𑀺𑀮𑀢𑁆𑀢𑀯𑀺𑀭𑀳𑀺𑀢𑀁. 𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀧𑀭𑀺𑀓𑁆𑀔𑀻𑀡𑀢𑀡𑁆𑀳𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁪. 𑀬𑁄 𑀪𑀺𑀓𑁆𑀔𑀼 𑀇𑀫𑀁𑀭𑀸𑀕𑀧𑀮𑀺𑀧𑀣𑀜𑁆𑀘𑁂𑀯 𑀓𑀺𑀮𑁂𑀲𑀤𑀼𑀕𑁆𑀕𑀜𑁆𑀘 𑀲𑀁𑀲𑀸𑀭𑀯𑀝𑁆𑀝𑀜𑁆𑀘 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀓𑀫𑁄𑀳𑀜𑁆𑀘 𑀅𑀢𑀻𑀢𑁄, 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀺𑀡𑁆𑀡𑁄 𑀳𑀼𑀢𑁆𑀯𑀸 𑀧𑀸𑀭𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀻, 𑀢𑀡𑁆𑀳𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑁄, 𑀓𑀣𑀁𑀓𑀣𑀸𑀬 𑀅𑀪𑀸𑀯𑁂𑀦 𑀅𑀓𑀣𑀁𑀓𑀣𑀻, 𑀉𑀧𑀸𑀤𑀸𑀦𑀸𑀦𑀁 𑀅𑀪𑀸𑀯𑁂𑀦 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁫. 𑀬𑁄 𑀧𑀼𑀕𑁆𑀕𑀮𑁄, 𑀇𑀥 𑀮𑁄𑀓𑁂, 𑀉𑀪𑁄𑀧𑀺 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀦𑀸𑀕𑀸𑀭𑁄 𑀳𑀼𑀢𑁆𑀯𑀸 𑀧𑀭𑀺𑀩𑁆𑀩𑀚𑀢𑀺, 𑀢𑀁 𑀧𑀭𑀺𑀓𑁆𑀔𑀻𑀡𑀓𑀸𑀫𑀜𑁆𑀘𑁂𑀯 𑀧𑀭𑀺𑀓𑁆𑀔𑀻𑀡𑀪𑀯𑀜𑁆𑀘 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁬. 𑀬𑁄 𑀇𑀥 𑀮𑁄𑀓𑁂 𑀙𑀤𑁆𑀯𑀸𑀭𑀺𑀓𑀁 𑀢𑀡𑁆𑀳𑀁 𑀚𑀳𑀺𑀢𑁆𑀯𑀸 𑀖𑀭𑀸𑀯𑀸𑀲𑁂𑀦 𑀅𑀦𑀢𑁆𑀣𑀺𑀓𑁄 𑀅𑀦𑀸𑀕𑀸𑀭𑁄 𑀳𑀼𑀢𑁆𑀯𑀸 𑀧𑀭𑀺𑀩𑁆𑀩𑀚𑀢𑀺, 𑀢𑀡𑁆𑀳𑀸𑀬 𑀘𑁂𑀯 𑀪𑀯𑀲𑁆𑀲 𑀘 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀢𑀡𑁆𑀳𑀸𑀪𑀯𑀧𑀭𑀺𑀓𑁆𑀔𑀻𑀡𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁭. 𑀫𑀸𑀦𑀼𑀲𑀓𑀁 𑀬𑁄𑀕𑀦𑁆𑀢𑀺 𑀫𑀸𑀦𑀼𑀲𑀓𑀁 𑀆𑀬𑀼𑀜𑁆𑀘𑁂𑀯 𑀧𑀜𑁆𑀘𑀯𑀺𑀥𑀓𑀸𑀫𑀕𑀼𑀡𑁂 𑀘. 𑀤𑀺𑀩𑁆𑀩𑀬𑁄𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑀘𑁆𑀘𑀕𑀸𑀢𑀺 𑀬𑁄 𑀫𑀸𑀦𑀼𑀲𑀓𑀁 𑀬𑁄𑀕𑀁 𑀳𑀺𑀢𑁆𑀯𑀸 𑀤𑀺𑀩𑁆𑀩𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀁 𑀲𑀩𑁆𑀩𑁂𑀳𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁮. 𑀭𑀢𑀺𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺𑀁. 𑀅𑀭𑀢𑀺𑀦𑁆𑀢𑀺 𑀅𑀭𑀜𑁆𑀜𑀯𑀸𑀲𑁂 𑀉𑀓𑁆𑀓𑀡𑁆𑀞𑀺𑀢𑀢𑁆𑀢𑀁. 𑀲𑀻𑀢𑀺𑀪𑀽𑀢𑀦𑁆𑀢𑀺 𑀦𑀺𑀩𑁆𑀩𑀼𑀢𑀁, 𑀦𑀺𑀭𑀼𑀧𑀥𑀺𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁, 𑀯𑀻𑀭𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀲𑀩𑁆𑀩𑀁 𑀔𑀦𑁆𑀥𑀮𑁄𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀁 𑀯𑀻𑀭𑀺𑀬𑀯𑀦𑁆𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁪𑁯. 𑀬𑁄 𑀯𑁂𑀤𑀻𑀢𑀺 𑀬𑁄 𑀲𑀢𑁆𑀢𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀘𑀼𑀢𑀺𑀜𑁆𑀘 𑀧𑀝𑀺𑀲𑀦𑁆𑀥𑀺𑀜𑁆𑀘 𑀧𑀸𑀓𑀝𑀁 𑀓𑀢𑁆𑀯𑀸 𑀚𑀸𑀦𑀸𑀢𑀺, 𑀢𑀫𑀳𑀁 𑀅𑀮𑀕𑁆𑀕𑀢𑀸𑀬 𑀅𑀲𑀢𑁆𑀢𑀁, 𑀧𑀝𑀺𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸 𑀲𑀼𑀕𑀢𑀁, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑀸𑀬 𑀩𑀼𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁫𑁦. 𑀬𑀲𑁆𑀲𑀸𑀢𑀺 𑀬𑀲𑁆𑀲𑁂𑀢𑁂 𑀤𑁂𑀯𑀸𑀤𑀬𑁄 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀢𑀫𑀳𑀁 𑀆𑀲𑀯𑀸𑀦𑀁 𑀔𑀻𑀡𑀢𑀸𑀬 𑀔𑀻𑀡𑀸𑀲𑀯𑀁, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀳𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁫𑁧. 𑀧𑀼𑀭𑁂𑀢𑀺 𑀅𑀢𑀻𑀢𑀓𑁆𑀔𑀦𑁆𑀥𑁂𑀲𑀼. 𑀧𑀘𑁆𑀙𑀸𑀢𑀺 𑀅𑀦𑀸𑀕𑀢𑁂𑀲𑀼. 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼. 𑀓𑀺𑀜𑁆𑀘𑀦𑀦𑁆𑀢𑀺 𑀬𑀲𑁆𑀲𑁂𑀢𑁂𑀲𑀼 𑀞𑀸𑀦𑁂𑀲𑀼 𑀢𑀡𑁆𑀳𑀸𑀕𑀸𑀳𑀲𑀗𑁆𑀔𑀸𑀢𑀁 𑀓𑀺𑀜𑁆𑀘𑀦𑀁 𑀦𑀢𑁆𑀣𑀺. 𑀢𑀫𑀳𑀁 𑀭𑀸𑀕𑀓𑀺𑀜𑁆𑀘𑀦𑀸𑀤𑀻𑀳𑀺 𑀅𑀓𑀺𑀜𑁆𑀘𑀦𑀁. 𑀓𑀲𑁆𑀲𑀘𑀺 𑀕𑀳𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁫𑁨. 𑀅𑀘𑁆𑀙𑀫𑁆𑀪𑀺𑀢𑀢𑁆𑀢𑁂𑀦 𑀉𑀲𑀪𑀲𑀤𑀺𑀲𑀢𑀸𑀬 𑀉𑀲𑀪𑀁, 𑀉𑀢𑁆𑀢𑀫𑀝𑁆𑀞𑁂𑀦 𑀧𑀯𑀭𑀁, 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀯𑀻𑀭𑀁, 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀺𑀢𑀢𑁆𑀢𑀸 𑀫𑀳𑁂𑀲𑀺𑀁, 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 𑀯𑀺𑀚𑀺𑀢𑀸𑀯𑀺𑀦𑀁, 𑀦𑀺𑀦𑁆𑀳𑀸𑀢𑀓𑀺𑀮𑁂𑀲𑀢𑀸𑀬 𑀦𑁆𑀳𑀸𑀢𑀓𑀁, 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀢𑀸𑀬 𑀩𑀼𑀤𑁆𑀥𑀁 𑀢𑀁 𑀏𑀯𑀭𑀽𑀧𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁫𑁩. 𑀬𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀚𑀸𑀦𑀸𑀢𑀺, 𑀙𑀩𑁆𑀩𑀻𑀲𑀢𑀺𑀤𑁂𑀯𑀮𑁄𑀓𑀪𑁂𑀤𑀁 𑀲𑀕𑁆𑀕𑀁, 𑀘𑀢𑀼𑀩𑁆𑀩𑀺𑀥𑀁 𑀅𑀧𑀸𑀬𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺, 𑀅𑀣𑁄 𑀚𑀸𑀢𑀺𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁬𑁫𑁪. 𑀏𑀯𑀁 𑀪𑀕𑀯𑀸 𑀕𑀼𑀡𑀢𑁄 𑀩𑁆𑀭𑀸𑀳𑁆𑀫𑀡𑀁 𑀯𑀢𑁆𑀯𑀸 ‘‘𑀬𑁂 ‘𑀚𑀸𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺 𑀅𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀤𑀁 𑀯𑁄𑀳𑀸𑀭𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑀸, 𑀲𑀸 𑀘 𑀦𑁂𑀲𑀁 𑀤𑀺𑀝𑁆𑀞𑀺 𑀤𑀼𑀤𑁆𑀤𑀺𑀝𑁆𑀞𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀜𑁆𑀜𑀸 𑀳𑁂𑀲𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 ‘‘𑀬𑀤𑀺𑀤𑀁 𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀺𑀬𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄’’𑀢𑀺 𑀦𑀸𑀫𑀕𑁄𑀢𑁆𑀢𑀁 𑀧𑀓𑀧𑁆𑀧𑀺𑀢𑀁, 𑀲𑀫𑀜𑁆𑀜𑀸 𑀳𑁂𑀲𑀸 𑀮𑁄𑀓𑀲𑁆𑀫𑀺𑀁, 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀫𑁆𑀫𑀼𑀘𑁆𑀘𑀸 𑀲𑀫𑀼𑀤𑀸𑀕𑀢𑀁 𑀲𑀫𑀦𑀼𑀜𑁆𑀜𑀸𑀬 𑀆𑀕𑀢𑀁. 𑀢𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀓𑀸𑀮𑁂𑀬𑁂𑀯𑀲𑁆𑀲 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀧𑀓𑀧𑁆𑀧𑀺𑀢𑀁 𑀓𑀢𑀁. 𑀦𑁄 𑀘𑁂𑀢𑀁 𑀏𑀯𑀁 𑀧𑀓𑀧𑁆𑀧𑁂𑀬𑁆𑀬𑀼𑀁, 𑀦 𑀓𑁄𑀘𑀺 𑀓𑀜𑁆𑀘𑀺 𑀤𑀺𑀲𑁆𑀯𑀸 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀸 ‘‘𑀪𑀸𑀭𑀤𑁆𑀯𑀸𑀚𑁄’’𑀢𑀺 𑀯𑀸 𑀚𑀸𑀦𑁂𑀬𑁆𑀬.

𑁬𑁫𑁫. 𑀏𑀯𑀁 𑀧𑀓𑀧𑁆𑀧𑀺𑀢𑀜𑁆𑀘𑁂𑀢𑀁 𑀤𑀻𑀖𑀭𑀢𑁆𑀢𑀫𑀦𑀼𑀲𑀬𑀺𑀢𑀁 𑀤𑀺𑀝𑁆𑀞𑀺𑀕𑀢𑀫𑀚𑀸𑀦𑀢𑀁, ‘‘𑀧𑀓𑀧𑁆𑀧𑀺𑀢𑀁 𑀦𑀸𑀫𑀕𑁄𑀢𑁆𑀢𑀁, 𑀦𑀸𑀫𑀕𑁄𑀢𑁆𑀢𑀫𑀢𑁆𑀢𑀫𑁂𑀢𑀁 𑀲𑀁𑀯𑁄𑀳𑀸𑀭𑀢𑁆𑀣𑀁 𑀧𑀓𑀧𑁆𑀧𑀺𑀢’’𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀳𑀤𑀬𑁂 𑀤𑀻𑀖𑀭𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀫𑀦𑀼𑀲𑀬𑀺𑀢𑀁, 𑀢𑀲𑁆𑀲 𑀅𑀦𑀼𑀲𑀬𑀺𑀢𑀢𑁆𑀢𑀸 𑀢𑀁 𑀦𑀸𑀫𑀕𑁄𑀢𑁆𑀢𑀁 𑀅𑀚𑀸𑀦𑀦𑁆𑀢𑀸 𑀢𑁂 𑀧𑀩𑁆𑀭𑀼𑀯𑀦𑁆𑀢𑀺 ‘‘𑀚𑀸𑀢𑀺𑀬𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺, 𑀅𑀚𑀸𑀦𑀦𑁆𑀢𑀸𑀬𑁂𑀯 𑀏𑀯𑀁 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁫𑁬-𑁭. 𑀏𑀯𑀁 ‘‘𑀬𑁂 ‘𑀚𑀸𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺 𑀅𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀤𑀁 𑀯𑁄𑀳𑀸𑀭𑀫𑀢𑁆𑀢𑀫𑀚𑀸𑀦𑀦𑁆𑀢𑀸, 𑀲𑀸 𑀘 𑀦𑁂𑀲𑀁 𑀤𑀺𑀝𑁆𑀞𑀺 𑀤𑀼𑀤𑁆𑀤𑀺𑀝𑁆𑀞𑀻’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀚𑀸𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀓𑀫𑁆𑀫𑀯𑀸𑀤𑀜𑁆𑀘 𑀦𑀺𑀭𑁄𑀧𑁂𑀦𑁆𑀢𑁄 ‘‘𑀦 𑀚𑀘𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀓𑀫𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀅𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀇𑀫𑀺𑀲𑁆𑀲𑀸 𑀉𑀧𑀟𑁆𑀠𑀕𑀸𑀣𑀸𑀬 𑀅𑀢𑁆𑀣𑀯𑀺𑀢𑁆𑀣𑀸𑀭𑀡𑀢𑁆𑀣𑀁 ‘‘𑀓𑀲𑁆𑀲𑀓𑁄 𑀓𑀫𑁆𑀫𑀼𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀫𑁆𑀫𑀼𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀓𑀲𑀺𑀓𑀫𑁆𑀫𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀘𑁂𑀢𑀦𑀸𑀓𑀫𑁆𑀫𑀼𑀦𑀸.

𑁬𑁫𑁯. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀲𑁆𑀲𑀸𑀢𑀺 ‘‘𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀏𑀯𑀁 𑀳𑁄𑀢𑀻’’𑀢𑀺 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀲𑁆𑀲𑀸𑀯𑀺𑀦𑁄. 𑀓𑀫𑁆𑀫𑀯𑀺𑀧𑀸𑀓𑀓𑁄𑀯𑀺𑀤𑀸𑀢𑀺 𑀲𑀫𑁆𑀫𑀸𑀦𑀸𑀯𑀫𑀸𑀦𑀸𑀭𑀳𑁂 𑀓𑀼𑀮𑁂 𑀓𑀫𑁆𑀫𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀅𑀜𑁆𑀜𑀸𑀧𑀺 𑀳𑀻𑀦𑀧𑀡𑀻𑀢𑀢𑀸 𑀳𑀻𑀦𑀧𑀡𑀻𑀢𑁂 𑀓𑀫𑁆𑀫𑁂 𑀯𑀺𑀧𑀘𑁆𑀘𑀫𑀸𑀦𑁂 𑀳𑁄𑀢𑀻𑀢𑀺 𑀏𑀯𑀁 𑀓𑀫𑁆𑀫𑀯𑀺𑀧𑀸𑀓𑀓𑀼𑀲𑀮𑀸.

𑁬𑁬𑁦. ‘‘𑀓𑀫𑁆𑀫𑀼𑀦𑀸𑀯𑀢𑁆𑀢𑀢𑀻’’𑀢𑀺 𑀕𑀸𑀣𑀸𑀬 𑀧𑀦 ‘‘𑀮𑁄𑀓𑁄’’𑀢𑀺 𑀯𑀸 ‘‘𑀧𑀚𑀸’’𑀢𑀺 𑀯𑀸 ‘‘𑀲𑀢𑁆𑀢𑀸’’𑀢𑀺 𑀯𑀸 𑀏𑀓𑁄𑀬𑁂𑀯 𑀅𑀢𑁆𑀣𑁄, 𑀯𑀘𑀦𑀫𑀢𑁆𑀢𑀫𑁂𑀯 𑀦𑀸𑀦𑀁. 𑀧𑀼𑀭𑀺𑀫𑀧𑀤𑁂𑀦 𑀘𑁂𑀢𑁆𑀣 ‘‘𑀅𑀢𑁆𑀣𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸…𑀧𑁂… 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁪𑁨) 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀦𑀺𑀲𑁂𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀫𑁆𑀫𑀼𑀦𑀸 𑀳𑀺 𑀯𑀢𑁆𑀢𑀢𑀺 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀉𑀧𑁆𑀧𑀚𑁆𑀚𑀢𑀺 𑀮𑁄𑀓𑁄, 𑀢𑀲𑁆𑀲 𑀓𑁄 𑀲𑀚𑀺𑀢𑀸𑀢𑀺? 𑀤𑀼𑀢𑀺𑀬𑁂𑀦 ‘‘𑀏𑀯𑀁 𑀓𑀫𑁆𑀫𑀼𑀦𑀸 𑀉𑀧𑁆𑀧𑀦𑁆𑀦𑁄𑀧𑀺 𑀘 𑀧𑀯𑀢𑁆𑀢𑀺𑀬𑀫𑁆𑀧𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑁂𑀤𑁂𑀦 𑀓𑀫𑁆𑀫𑀼𑀦𑀸 𑀏𑀯 𑀧𑀯𑀢𑁆𑀢𑀢𑀺, 𑀲𑀼𑀔𑀤𑀼𑀓𑁆𑀔𑀸𑀦𑀺 𑀧𑀘𑁆𑀘𑀦𑀼𑀪𑁄𑀦𑁆𑀢𑁄 𑀳𑀻𑀦𑀧𑀡𑀻𑀢𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑁄 𑀧𑀯𑀢𑁆𑀢𑀢𑀻’’𑀢𑀺 𑀤𑀲𑁆𑀲𑁂𑀢𑀺. 𑀢𑀢𑀺𑀬𑁂𑀦 𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑁂𑀢𑀺 ‘‘𑀏𑀯𑀁 𑀲𑀩𑁆𑀩𑀣𑀸𑀧𑀺 𑀓𑀫𑁆𑀫𑀦𑀺𑀩𑀦𑁆𑀥𑀦𑀸 𑀲𑀢𑁆𑀢𑀸 𑀓𑀫𑁆𑀫𑁂𑀦𑁂𑀯 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀦 𑀅𑀜𑁆𑀜𑀣𑀸’’𑀢𑀺. 𑀘𑀢𑀼𑀢𑁆𑀣𑁂𑀦 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀺 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄𑀢𑀺. 𑀬𑀣𑀸 𑀭𑀣𑀲𑁆𑀲 𑀬𑀸𑀬𑀢𑁄 𑀆𑀡𑀺 𑀦𑀺𑀩𑀦𑁆𑀥𑀦𑀁 𑀳𑁄𑀢𑀺, 𑀦 𑀢𑀸𑀬 𑀅𑀦𑀺𑀩𑀤𑁆𑀥𑁄 𑀬𑀸𑀢𑀺, 𑀏𑀯𑀁 𑀮𑁄𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑁄 𑀘 𑀧𑀯𑀢𑁆𑀢𑀢𑁄 𑀘 𑀓𑀫𑁆𑀫𑀁 𑀦𑀺𑀩𑀦𑁆𑀥𑀦𑀁, 𑀦 𑀢𑁂𑀦 𑀅𑀦𑀺𑀩𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀺 𑀦𑀧𑁆𑀧𑀯𑀢𑁆𑀢𑀢𑀺.

𑁬𑁬𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀯𑀁 𑀓𑀫𑁆𑀫𑀦𑀺𑀩𑀦𑁆𑀥𑀦𑁄 𑀮𑁄𑀓𑁄, 𑀢𑀲𑁆𑀫𑀸 𑀲𑁂𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀲𑁂𑀝𑁆𑀞𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀧𑁂𑀦𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀢𑀧𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦. 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀲𑀺𑀓𑁆𑀔𑀸𑀦𑀺𑀲𑁆𑀲𑀺𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀲𑁂𑀝𑁆𑀞𑀘𑀭𑀺𑀬𑁂𑀦. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑁂𑀦. 𑀤𑀫𑁂𑀦𑀸𑀢𑀺 𑀧𑀜𑁆𑀜𑀸𑀬. 𑀏𑀢𑁂𑀦 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁂𑀦 𑀓𑀫𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀏𑀢𑀁 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫𑀁, 𑀬𑀲𑁆𑀫𑀸 𑀏𑀢𑀁 𑀓𑀫𑁆𑀫𑀁 𑀉𑀢𑁆𑀢𑀫𑁄 𑀩𑁆𑀭𑀸𑀳𑁆𑀫𑀡𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀩𑁆𑀭𑀳𑁆𑀫𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀩𑁆𑀭𑀳𑁆𑀫𑀁 𑀆𑀦𑁂𑀢𑀻𑀢𑀺 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀪𑀸𑀯𑀁 𑀆𑀦𑁂𑀢𑀺 𑀆𑀯𑀳𑀢𑀺 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁬𑁨. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀦𑁆𑀢𑁄𑀢𑀺 𑀲𑀦𑁆𑀢𑀓𑀺𑀮𑁂𑀲𑁄. 𑀩𑁆𑀭𑀳𑁆𑀫𑀸 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀸 𑀘 𑀲𑀓𑁆𑀓𑁄 𑀘. 𑀬𑁄 𑀏𑀯𑀭𑀽𑀧𑁄, 𑀲𑁄 𑀦 𑀓𑁂𑀯𑀮𑀁 𑀩𑁆𑀭𑀸𑀳𑁆𑀫𑀡𑁄, 𑀅𑀧𑀺𑀘 𑀔𑁄 𑀩𑁆𑀭𑀳𑁆𑀫𑀸 𑀘 𑀲𑀓𑁆𑀓𑁄 𑀘 𑀲𑁄 𑀯𑀺𑀚𑀸𑀦𑀢𑀁 𑀧𑀡𑁆𑀟𑀺𑀢𑀸𑀦𑀁, 𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.