𑁧𑁦. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀯𑀡𑁆𑀡𑀦𑀸𑀬𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀯𑀡𑁆𑀡𑀦𑀸𑀬 𑀘𑀲𑁆𑀲 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄𑀢𑀺 𑀏𑀢𑁆𑀣 𑀧𑀦 𑀓𑁄 𑀅𑀬𑀁 𑀓𑁄𑀓𑀸𑀮𑀺𑀓𑁄, 𑀓𑀲𑁆𑀫𑀸 𑀘 𑀉𑀧𑀲𑀗𑁆𑀓𑀫𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀬𑀁 𑀓𑀺𑀭 𑀓𑁄𑀓𑀸𑀮𑀺𑀓𑀭𑀝𑁆𑀞𑁂 𑀓𑁄𑀓𑀸𑀮𑀺𑀓𑀦𑀕𑀭𑁂 𑀓𑁄𑀓𑀸𑀮𑀺𑀓𑀲𑁂𑀝𑁆𑀞𑀺𑀲𑁆𑀲 𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀧𑀺𑀢𑀭𑀸 𑀓𑀸𑀭𑀸𑀧𑀺𑀢𑁂 𑀯𑀺𑀳𑀸𑀭𑁂𑀬𑁂𑀯 𑀧𑀝𑀺𑀯𑀲𑀢𑀺 ‘‘𑀘𑀽𑀴𑀓𑁄𑀓𑀸𑀮𑀺𑀓𑁄’’𑀢𑀺 𑀦𑀸𑀫𑁂𑀦, 𑀦 𑀤𑁂𑀯𑀤𑀢𑁆𑀢𑀲𑁆𑀲 𑀲𑀺𑀲𑁆𑀲𑁄. 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄 ‘‘𑀫𑀳𑀸𑀓𑁄𑀓𑀸𑀮𑀺𑀓𑁄’’𑀢𑀺 𑀧𑀜𑁆𑀜𑀸𑀬𑀺.

𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀸 𑀢𑁂 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀢𑀁 𑀦𑀕𑀭𑀁 𑀧𑀢𑁆𑀯𑀸 𑀢𑀁 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀢𑁂 𑀓𑁄𑀓𑀸𑀮𑀺𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀢𑀁 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀫𑀬𑀁 𑀇𑀥 𑀢𑁂𑀫𑀸𑀲𑀁 𑀯𑀲𑀺𑀲𑁆𑀲𑀸𑀫, 𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑁂𑀫𑀸𑀲𑁂 𑀅𑀢𑀻𑀢𑁂 𑀇𑀢𑀭𑀤𑀺𑀯𑀲𑀁 𑀧𑀕𑁂𑀯 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀆𑀭𑁄𑀘𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀅𑀕𑁆𑀕𑀲𑀸𑀯𑀓𑁂 𑀇𑀥𑀸𑀕𑀦𑁆𑀢𑁆𑀯𑀸 𑀯𑀲𑀫𑀸𑀦𑁂 𑀦 𑀚𑀸𑀦𑀺𑀢𑁆𑀣, 𑀦 𑀢𑁂 𑀓𑁄𑀘𑀺 𑀧𑀘𑁆𑀘𑀬𑁂𑀦𑀸𑀧𑀺 𑀦𑀺𑀫𑀦𑁆𑀢𑁂𑀢𑀻’’𑀢𑀺. 𑀦𑀕𑀭𑀯𑀸𑀲𑀺𑀦𑁄 ‘‘𑀓𑀲𑁆𑀫𑀸 𑀦𑁄, 𑀪𑀦𑁆𑀢𑁂, 𑀦𑀸𑀭𑁄𑀘𑀬𑀺𑀢𑁆𑀣𑀸’’𑀢𑀺. 𑀓𑀺𑀁 𑀆𑀭𑁄𑀘𑀺𑀢𑁂𑀦, 𑀓𑀺𑀁 𑀦𑀸𑀤𑁆𑀤𑀲𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑁂, 𑀦𑀦𑀼 𑀏𑀢𑁂 𑀅𑀕𑁆𑀕𑀲𑀸𑀯𑀓𑀸𑀢𑀺. 𑀢𑁂 𑀔𑀺𑀧𑁆𑀧𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀧𑁆𑀧𑀺𑀕𑀼𑀴𑀯𑀢𑁆𑀣𑀸𑀤𑀻𑀦𑀺 𑀆𑀦𑁂𑀢𑁆𑀯𑀸 𑀓𑁄𑀓𑀸𑀮𑀺𑀓𑀲𑁆𑀲 𑀧𑀼𑀭𑀢𑁄 𑀦𑀺𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀫𑀧𑁆𑀧𑀺𑀘𑁆𑀙𑀸 𑀅𑀕𑁆𑀕𑀲𑀸𑀯𑀓𑀸 ‘𑀧𑀬𑀼𑀢𑁆𑀢𑀯𑀸𑀘𑀸𑀬 𑀉𑀧𑁆𑀧𑀦𑁆𑀦𑁄 𑀮𑀸𑀪𑁄’𑀢𑀺 𑀜𑀢𑁆𑀯𑀸 𑀦 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺, 𑀅𑀲𑀸𑀤𑀺𑀬𑀦𑁆𑀢𑀸 𑀅𑀤𑁆𑀥𑀸 ‘𑀆𑀯𑀸𑀲𑀺𑀓𑀲𑁆𑀲 𑀤𑁂𑀣𑀸’𑀢𑀺 𑀪𑀡𑀺𑀲𑁆𑀲𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀁 𑀮𑀸𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀘𑁆𑀙𑀸𑀫𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺, 𑀣𑁂𑀭𑀸 𑀤𑀺𑀲𑁆𑀯𑀸𑀯 𑀧𑀬𑀼𑀢𑁆𑀢𑀯𑀸𑀘𑀸𑀬 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑁂 𑀧𑀘𑁆𑀘𑀬𑀸 𑀦𑁂𑀯 𑀅𑀫𑁆𑀳𑀸𑀓𑀁 𑀦 𑀓𑁄𑀓𑀸𑀮𑀺𑀓𑀲𑁆𑀲 𑀯𑀝𑁆𑀝𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀆𑀯𑀸𑀲𑀺𑀓𑀲𑁆𑀲 𑀤𑁂𑀣𑀸’’𑀢𑀺 𑀅𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂𑀦 𑀓𑁄𑀓𑀸𑀮𑀺𑀓𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀢𑁆𑀢𑀦𑀸 𑀅𑀕𑁆𑀕𑀡𑁆𑀳𑀦𑁆𑀢𑀸 𑀫𑀬𑁆𑀳𑀫𑁆𑀧𑀺 𑀦 𑀤𑀸𑀧𑁂𑀲𑀼’’𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺.

𑀢𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀪𑀕𑀯𑀸 𑀘 𑀧𑀯𑀸𑀭𑁂𑀢𑁆𑀯𑀸 𑀲𑀘𑁂 𑀅𑀢𑁆𑀢𑀦𑀸 𑀚𑀦𑀧𑀤𑀘𑀸𑀭𑀺𑀓𑀁 𑀦 𑀕𑀘𑁆𑀙𑀢𑀺, 𑀅𑀕𑁆𑀕𑀲𑀸𑀯𑀓𑁂 𑀧𑁂𑀲𑁂𑀢𑀺 𑁋 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬𑀸’’𑀢𑀺𑀆𑀤𑀻𑀦𑀺 (𑀫𑀳𑀸𑀯. 𑁩𑁨) 𑀯𑀢𑁆𑀯𑀸. 𑀇𑀤𑀫𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀢𑁆𑀢𑀦𑀸 𑀅𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣 𑀔𑁄 𑀇𑀫𑁂 𑀧𑀼𑀦𑀤𑁂𑀯 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀘𑀭𑀣 𑀘𑀸𑀭𑀺𑀓’’𑀦𑁆𑀢𑀺. 𑀢𑁂 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀢𑀫𑁂𑀯 𑀦𑀕𑀭𑀁 𑀅𑀕𑀫𑀁𑀲𑀼. 𑀦𑀸𑀕𑀭𑀸 𑀣𑁂𑀭𑁂 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑀳 𑀧𑀭𑀺𑀓𑁆𑀔𑀸𑀭𑁂𑀳𑀺 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼, 𑀣𑁂𑀭𑀸𑀦𑀜𑁆𑀘 𑀧𑀭𑀺𑀓𑁆𑀔𑀸𑀭𑁂 𑀉𑀧𑀦𑀸𑀫𑁂𑀲𑀼𑀁. 𑀣𑁂𑀭𑀸 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀓𑁄𑀓𑀸𑀮𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑀸 𑀅𑀳𑁂𑀲𑀼𑀁, 𑀇𑀤𑀸𑀦𑀺 𑀮𑁄𑀪𑀸𑀪𑀺𑀪𑀽𑀢𑀸 𑀧𑀸𑀧𑀺𑀘𑁆𑀙𑀸 𑀚𑀸𑀢𑀸, 𑀧𑀼𑀩𑁆𑀩𑁂𑀧𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀧𑀯𑀺𑀯𑀺𑀢𑁆𑀢𑀲𑀤𑀺𑀲𑀸 𑀫𑀜𑁆𑀜𑁂, 𑀇𑀫𑁂 𑀧𑀸𑀧𑀺𑀘𑁆𑀙𑀸 𑀅𑀲𑀦𑁆𑀢𑀕𑀼𑀡𑀧𑀭𑀺𑀤𑀻𑀧𑀓𑀸 𑀧𑀸𑀧𑀪𑀺𑀓𑁆𑀔𑀽’’𑀢𑀺. 𑀲𑁄 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀧𑀯𑀺𑀯𑀺𑀢𑁆𑀢𑀸 𑀯𑀺𑀬 𑀅𑀳𑀼𑀯𑀢𑁆𑀣, 𑀇𑀤𑀸𑀦𑀺 𑀧𑀦𑀢𑁆𑀣 𑀧𑀸𑀧𑀪𑀺𑀓𑁆𑀔𑀽 𑀚𑀸𑀢𑀸’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀸𑀯𑀤𑁂𑀯 𑀢𑀭𑀫𑀸𑀦𑀭𑀽𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 ‘‘𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀲𑀸𑀯𑀢𑁆𑀣𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀅𑀬𑀫𑁂𑀢𑁆𑀣 𑀓𑁄𑀓𑀸𑀮𑀺𑀓𑁄, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺𑀆𑀤𑀺.

𑀪𑀕𑀯𑀸 𑀢𑀁 𑀢𑀼𑀭𑀺𑀢𑀢𑀼𑀭𑀺𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀆𑀯𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀸𑀲𑀺 𑁋 ‘‘𑀅𑀕𑁆𑀕𑀲𑀸𑀯𑀓𑁂 𑀅𑀓𑁆𑀓𑁄𑀲𑀺𑀢𑀼𑀓𑀸𑀫𑁄 𑀆𑀕𑀢𑁄’’𑀢𑀺. ‘‘𑀲𑀓𑁆𑀓𑀸 𑀦𑀼 𑀔𑁄 𑀧𑀝𑀺𑀲𑁂𑀥𑁂𑀢𑀼’’𑀦𑁆𑀢𑀺 𑀘 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀦 𑀲𑀓𑁆𑀓𑀸, 𑀣𑁂𑀭𑁂𑀲𑀼 𑀅𑀧𑀭𑀚𑁆𑀛𑀺𑀢𑁆𑀯𑀸 𑀆𑀕𑀢𑁄, 𑀏𑀓𑀁𑀲𑁂𑀦 𑀧𑀤𑀼𑀫𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀏𑀯𑀁 𑀤𑀺𑀲𑁆𑀯𑀸𑀧𑀺 𑀧𑀦 ‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀧𑀺 𑀦𑀸𑀫 𑀕𑀭𑀳𑀦𑁆𑀢𑀁 𑀲𑀼𑀢𑁆𑀯𑀸 𑀦 𑀦𑀺𑀲𑁂𑀥𑁂𑀢𑀻’’𑀢𑀺 𑀧𑀭𑀽𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀅𑀭𑀺𑀬𑀽𑀧𑀯𑀸𑀤𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀫𑀸 𑀳𑁂𑀯’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀲𑁂𑀥𑁂𑀲𑀺. 𑀢𑀢𑁆𑀣 𑀫𑀸 𑀳𑁂𑀯𑀦𑁆𑀢𑀺 𑀫𑀸 𑀏𑀯𑀫𑀸𑀳, 𑀫𑀸 𑀏𑀯𑀁 𑀅𑀪𑀡𑀻𑀢𑀺 𑀅𑀢𑁆𑀣𑁄. 𑀧𑁂𑀲𑀮𑀸𑀢𑀺 𑀧𑀺𑀬𑀲𑀻𑀮𑀸. 𑀲𑀤𑁆𑀥𑀸𑀬𑀺𑀓𑁄𑀢𑀺 𑀲𑀤𑁆𑀥𑀸𑀕𑀫𑀓𑀭𑁄, 𑀧𑀲𑀸𑀤𑀸𑀯𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀬𑀺𑀓𑁄𑀢𑀺 𑀧𑀘𑁆𑀘𑀬𑀓𑀭𑁄, ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀯𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀧𑀓𑁆𑀓𑀦𑁆𑀢𑀲𑁆𑀲 𑀲𑀢𑁄 𑀦 𑀘𑀺𑀭𑁂𑀦𑁂𑀯 𑀲𑀩𑁆𑀩𑁄 𑀓𑀸𑀬𑁄 𑀨𑀼𑀝𑁄 𑀅𑀳𑁄𑀲𑀻𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀑𑀓𑀸𑀲𑀁 𑀅𑀯𑀚𑁆𑀚𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀸𑀳𑀺 𑀧𑀻𑀴𑀓𑀸𑀳𑀺 𑀅𑀚𑁆𑀛𑁄𑀢𑁆𑀣𑀝𑀁 𑀅𑀳𑁄𑀲𑀺. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑀣𑀸𑀭𑀽𑀧𑀁 𑀓𑀫𑁆𑀫𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀯𑀺𑀧𑀸𑀓𑀁 𑀦 𑀤𑁂𑀢𑀺, 𑀤𑀲𑁆𑀲𑀦𑀽𑀧𑀘𑀸𑀭𑁂 𑀧𑀦 𑀯𑀺𑀚𑀳𑀺𑀢𑀫𑀢𑁆𑀢𑁂 𑀤𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀧𑀻𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀘 𑀓𑁄𑀓𑀸𑀮𑀺𑀓𑀲𑁆𑀲𑀸’’𑀢𑀺. 𑀅𑀣 𑀓𑀲𑁆𑀫𑀸 𑀢𑀢𑁆𑀣𑁂𑀯 𑀦 𑀅𑀝𑁆𑀞𑀸𑀲𑀻𑀢𑀺 𑀘𑁂? 𑀓𑀫𑁆𑀫𑀸𑀦𑀼𑀪𑀸𑀯𑁂𑀦. 𑀑𑀓𑀸𑀲𑀓𑀢𑀜𑁆𑀳𑀺 𑀓𑀫𑁆𑀫𑀁 𑀅𑀯𑀲𑁆𑀲𑀁 𑀯𑀺𑀧𑀘𑁆𑀘𑀢𑀺, 𑀢𑀁 𑀢𑀲𑁆𑀲 𑀢𑀢𑁆𑀣 𑀞𑀸𑀢𑀼𑀁 𑀦 𑀤𑁂𑀢𑀺. 𑀲𑁄 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀘𑁄𑀤𑀺𑀬𑀫𑀸𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀓𑀴𑀸𑀬𑀫𑀢𑁆𑀢𑀺𑀬𑁄𑀢𑀺 𑀘𑀡𑀓𑀫𑀢𑁆𑀢𑀺𑀬𑁄. 𑀩𑁂𑀮𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄𑀢𑀺 𑀢𑀭𑀼𑀡𑀩𑁂𑀮𑀼𑀯𑀫𑀢𑁆𑀢𑀺𑀬𑁄. 𑀧𑀪𑀺𑀚𑁆𑀚𑀺𑀁𑀲𑀽𑀢𑀺 𑀪𑀺𑀚𑁆𑀚𑀺𑀁𑀲𑀼. 𑀢𑀸𑀲𑀼 𑀪𑀺𑀦𑁆𑀦𑀸𑀲𑀼 𑀲𑀓𑀮𑀲𑀭𑀻𑀭𑀁 𑀧𑀦𑀲𑀧𑀓𑁆𑀓𑀁 𑀯𑀺𑀬 𑀅𑀳𑁄𑀲𑀺. 𑀲𑁄 𑀧𑀓𑁆𑀓𑁂𑀦 𑀕𑀢𑁆𑀢𑁂𑀦 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀯𑀸 𑀤𑀼𑀓𑁆𑀔𑀸𑀪𑀺𑀪𑀽𑀢𑁄 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀲𑀬𑀺. 𑀅𑀣 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀆𑀕𑀢𑀸𑀕𑀢𑀸 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀥𑀺 𑀓𑁄𑀓𑀸𑀮𑀺𑀓, 𑀥𑀺 𑀓𑁄𑀓𑀸𑀮𑀺𑀓, 𑀅𑀬𑀼𑀢𑁆𑀢𑀫𑀓𑀸𑀲𑀺, 𑀅𑀢𑁆𑀢𑀦𑁄𑀬𑁂𑀯 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄𑀲𑀻’’𑀢𑀺 𑀆𑀳𑀁𑀲𑀼. 𑀢𑁂𑀲𑀁 𑀲𑀼𑀢𑁆𑀯𑀸 𑀆𑀭𑀓𑁆𑀔𑀤𑁂𑀯𑀢𑀸 𑀥𑀺𑀓𑁆𑀓𑀸𑀭𑀁 𑀅𑀓𑀁𑀲𑀼, 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀏𑀓𑀥𑀺𑀓𑁆𑀓𑀸𑀭𑁄 𑀉𑀤𑀧𑀸𑀤𑀺.

𑀢𑀤𑀸 𑀘 𑀢𑀼𑀭𑀽 𑀦𑀸𑀫 𑀪𑀺𑀓𑁆𑀔𑀼 𑀓𑁄𑀓𑀸𑀮𑀺𑀓𑀲𑁆𑀲 𑀉𑀧𑀚𑁆𑀛𑀸𑀬𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑁄 𑀳𑁄𑀢𑀺. 𑀲𑁄𑀧𑀺 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑁄 𑀢𑀁 𑀥𑀺𑀓𑁆𑀓𑀸𑀭𑀁 𑀲𑀼𑀢𑁆𑀯𑀸 𑀆𑀕𑀫𑁆𑀫 𑀓𑁄𑀓𑀸𑀮𑀺𑀓𑀁 𑀑𑀯𑀤𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀧𑁆𑀧𑀲𑀸𑀤𑀚𑀦𑀦𑀢𑁆𑀣𑀁. 𑀲𑁄 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀤𑀢𑁆𑀣𑀼 𑀢𑀫𑁂𑀯 𑀅𑀧𑀭𑀸𑀥𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀤𑀼𑀫𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀦𑀸𑀳 𑁋 ‘‘𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀢𑁂𑀦𑁂𑀯𑀸𑀩𑀸𑀥𑁂𑀦…𑀧𑁂… 𑀆𑀖𑀸𑀢𑁂𑀢𑁆𑀯𑀸’’𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀻𑀢𑀺 𑀓𑁄 𑀅𑀬𑀁 𑀩𑁆𑀭𑀳𑁆𑀫𑀸, 𑀓𑀲𑁆𑀫𑀸 𑀘 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀸𑀢𑀺? 𑀅𑀬𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀳𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀦𑀁 ‘‘𑀲𑀳𑀫𑁆𑀧𑀢𑀺 𑀩𑁆𑀭𑀳𑁆𑀫𑀸’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀲𑁄 𑀧𑀦 ‘‘𑀅𑀳𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀤𑀼𑀫𑀦𑀺𑀭𑀬𑀁 𑀓𑀺𑀢𑁆𑀢𑁂𑀲𑁆𑀲𑀸𑀫𑀺, 𑀢𑀢𑁄 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑁆𑀲𑀢𑀺. 𑀓𑀣𑀸𑀦𑀼𑀲𑀦𑁆𑀥𑀺𑀓𑀼𑀲𑀮𑀸 𑀪𑀺𑀓𑁆𑀔𑀽 𑀢𑀢𑁆𑀣𑀸𑀬𑀼𑀧𑁆𑀧𑀫𑀸𑀡𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀪𑀕𑀯𑀸 𑀆𑀘𑀺𑀓𑁆𑀔𑀦𑁆𑀢𑁄 𑀅𑀭𑀺𑀬𑀽𑀧𑀯𑀸𑀤𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘. 𑀪𑀕𑀯𑀸 𑀢𑀣𑁂𑀯 𑀅𑀓𑀸𑀲𑀺, 𑀅𑀜𑁆𑀜𑀢𑀭𑁄𑀧𑀺 𑀪𑀺𑀓𑁆𑀔𑀼 𑀧𑀼𑀘𑁆𑀙𑀺. 𑀢𑁂𑀦 𑀘 𑀧𑀼𑀝𑁆𑀞𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀻𑀲𑀢𑀺𑀔𑀸𑀭𑀺𑀓𑁄𑀢𑀺 𑀫𑀸𑀕𑀥𑀓𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑁄 𑀧𑀢𑁆𑀣𑁄 𑀳𑁄𑀢𑀺, 𑀢𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀆𑀴𑁆𑀳𑀓𑀁, 𑀘𑀢𑁆𑀢𑀸𑀭𑀺 𑀆𑀴𑁆𑀳𑀓𑀸𑀦𑀺 𑀤𑁄𑀡𑀁, 𑀘𑀢𑀼𑀤𑁄𑀡𑀸 𑀫𑀸𑀦𑀺𑀓𑀸, 𑀘𑀢𑀼𑀫𑀸𑀦𑀺𑀓𑀸 𑀔𑀸𑀭𑀻, 𑀢𑀸𑀬 𑀔𑀸𑀭𑀺𑀬𑀸 𑀯𑀻𑀲𑀢𑀺𑀔𑀸𑀭𑀺𑀓𑁄. 𑀢𑀺𑀮𑀯𑀸𑀳𑁄𑀢𑀺 𑀢𑀺𑀮𑀲𑀓𑀝𑀁. 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺 𑀅𑀩𑁆𑀩𑀼𑀤𑁄 𑀦𑀸𑀫 𑀓𑁄𑀘𑀺 𑀧𑀘𑁆𑀘𑁂𑀓𑀦𑀺𑀭𑀬𑁄 𑀦𑀢𑁆𑀣𑀺, 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀦𑁄𑀓𑀸𑀲𑁄 𑀧𑀦 ‘‘𑀅𑀩𑁆𑀩𑀼𑀤𑁄 𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼.

𑀢𑀢𑁆𑀣 𑀯𑀲𑁆𑀲𑀕𑀡𑀦𑀸𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑁂𑀯 𑀳𑀺 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀳𑁄𑀢𑀺, 𑀏𑀯𑀁 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫 𑀳𑁄𑀢𑀺, 𑀲𑀢𑀁 𑀲𑀢𑀲𑀳𑀲𑁆𑀲𑀧𑀓𑁄𑀝𑀺𑀬𑁄 𑀓𑁄𑀝𑀺𑀧𑁆𑀧𑀓𑁄𑀝𑀺 𑀦𑀸𑀫, 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑁆𑀧𑀓𑁄𑀝𑀺𑀬𑁄 𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑀁 𑀅𑀩𑁆𑀩𑀼𑀤𑀁, 𑀢𑀢𑁄 𑀯𑀻𑀲𑀢𑀺𑀕𑀼𑀡𑀁 𑀦𑀺𑀭𑀩𑁆𑀩𑀼𑀤𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑁂𑀘𑀺 𑀧𑀦 ‘‘𑀢𑀢𑁆𑀣 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸𑀦𑀢𑁆𑀢𑁂𑀦𑀧𑀺 𑀓𑀫𑁆𑀫𑀓𑀭𑀡𑀦𑀸𑀦𑀢𑁆𑀢𑁂𑀦𑀧𑀺 𑀇𑀫𑀸𑀦𑀺 𑀦𑀸𑀫𑀸𑀦𑀺 𑀮𑀤𑁆𑀥𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 ‘‘𑀲𑀻𑀢𑀦𑀭𑀓𑀸 𑀏𑀯 𑀏𑀢𑁂’’𑀢𑀺.

𑀅𑀣𑀸𑀧𑀭𑀦𑁆𑀢𑀺 𑀢𑀤𑀢𑁆𑀣𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑀁 𑀕𑀸𑀣𑀸𑀩𑀦𑁆𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀸𑀞𑀯𑀲𑁂𑀦 𑀯𑀼𑀢𑁆𑀢𑀯𑀻𑀲𑀢𑀺𑀕𑀸𑀣𑀸𑀲𑀼 𑀳𑀺 𑀏𑀢𑁆𑀣 ‘‘𑀲𑀢𑀁 𑀲𑀳𑀲𑁆𑀲𑀸𑀦’’𑀦𑁆𑀢𑀺 𑀅𑀬𑀫𑁂𑀓𑀸 𑀏𑀯 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀤𑀻𑀧𑀺𑀓𑀸, 𑀲𑁂𑀲𑀸 𑀯𑀺𑀲𑁂𑀲𑀢𑁆𑀣𑀤𑀻𑀧𑀺𑀓𑀸 𑀏𑀯, 𑀅𑀯𑀲𑀸𑀦𑁂 𑀕𑀸𑀣𑀸𑀤𑁆𑀯𑀬𑀫𑁂𑀯 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀦𑀺𑀘𑁆𑀙𑀺𑀢𑀧𑀸𑀞𑁂 𑀦𑀢𑁆𑀣𑀺. 𑀢𑁂𑀦𑀸𑀯𑁄𑀘𑀼𑀫𑁆𑀳 ‘‘𑀯𑀻𑀲𑀢𑀺𑀕𑀸𑀣𑀸𑀲𑀽’’𑀢𑀺.

𑁬𑁬𑁩. 𑀢𑀢𑁆𑀣 𑀓𑀼𑀞𑀸𑀭𑀻𑀢𑀺 𑀅𑀢𑁆𑀢𑀘𑁆𑀙𑁂𑀤𑀓𑀝𑁆𑀞𑁂𑀦 𑀓𑀼𑀞𑀸𑀭𑀺𑀲𑀤𑀺𑀲𑀸 𑀨𑀭𑀼𑀲𑀯𑀸𑀘𑀸. 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀁 𑀅𑀢𑁆𑀢𑀦𑁄 𑀫𑀽𑀮𑀁𑀬𑁂𑀯 𑀦𑀺𑀓𑀦𑁆𑀢𑀢𑀺.

𑁬𑁬𑁪. 𑀦𑀺𑀦𑁆𑀤𑀺𑀬𑀦𑁆𑀢𑀺 𑀦𑀺𑀦𑁆𑀤𑀺𑀢𑀩𑁆𑀩𑀁. 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄𑀢𑀺 𑀬𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀲𑀁𑀲𑀸𑀭𑀳𑁄 𑀧𑀼𑀕𑁆𑀕𑀮𑁄, 𑀢𑀁 𑀯𑀸 𑀲𑁄 𑀧𑀸𑀧𑀺𑀘𑁆𑀙𑀢𑀸𑀤𑀻𑀦𑀺 𑀆𑀭𑁄𑀧𑁂𑀢𑁆𑀯𑀸 𑀕𑀭𑀳𑀢𑀺. 𑀯𑀺𑀘𑀺𑀦𑀸𑀢𑀻𑀢𑀺 𑀉𑀧𑀘𑀺𑀦𑀸𑀢𑀺. 𑀓𑀮𑀺𑀦𑁆𑀢𑀺 𑀅𑀧𑀭𑀸𑀥𑀁.

𑁬𑁬𑁫. 𑀅𑀬𑀁 𑀓𑀮𑀻𑀢𑀺 𑀅𑀬𑀁 𑀅𑀧𑀭𑀸𑀥𑁄. 𑀅𑀓𑁆𑀔𑁂𑀲𑀽𑀢𑀺 𑀚𑀽𑀢𑀓𑀻𑀴𑀦𑀅𑀓𑁆𑀔𑁂𑀲𑀼. 𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸𑀢𑀺 𑀲𑀩𑁆𑀩𑁂𑀦 𑀅𑀢𑁆𑀢𑀦𑁄 𑀥𑀦𑁂𑀦𑀧𑀺 𑀅𑀢𑁆𑀢𑀦𑀸𑀧𑀺 𑀲𑀤𑁆𑀥𑀺𑀁. 𑀲𑀼𑀕𑀢𑁂𑀲𑀽𑀧𑀺 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸, 𑀲𑀼𑀦𑁆𑀤𑀭𑀜𑁆𑀘 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀼𑀕𑀢𑀦𑀸𑀫𑀓𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀲𑀼. 𑀫𑀦𑀁 𑀧𑀤𑁄𑀲𑀬𑁂𑀢𑀺 𑀬𑁄 𑀫𑀦𑀁 𑀧𑀤𑀽𑀲𑁂𑀬𑁆𑀬. 𑀢𑀲𑁆𑀲𑀸𑀬𑀁 𑀫𑀦𑁄𑀧𑀤𑁄𑀲𑁄 𑀏𑀯 𑀫𑀳𑀢𑁆𑀢𑀭𑁄 𑀓𑀮𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁬𑁬. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀢𑀁 𑀲𑀳𑀲𑁆𑀲𑀸𑀦𑀁…𑀧𑁂… 𑀧𑀸𑀧𑀓𑀁, 𑀬𑀲𑁆𑀫𑀸 𑀯𑀲𑁆𑀲𑀕𑀡𑀦𑀸𑀬 𑀏𑀢𑁆𑀢𑀓𑁄 𑀲𑁄 𑀓𑀸𑀮𑁄, 𑀬𑀁 𑀓𑀸𑀮𑀁 𑀅𑀭𑀺𑀬𑀕𑀭𑀳𑀻 𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀧𑀸𑀧𑀓𑀁 𑀦𑀺𑀭𑀬𑀁 𑀉𑀧𑁂𑀢𑀺, 𑀢𑀢𑁆𑀣 𑀧𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀳𑀺 𑀲𑀗𑁆𑀔𑁂𑀧𑁂𑀦 𑀧𑀤𑀼𑀫𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡𑀁.

𑁬𑁬𑁭. 𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀦𑀬𑁂𑀦 ‘‘𑀅𑀬𑀫𑁂𑀯 𑀫𑀳𑀢𑁆𑀢𑀭𑁄 𑀓𑀮𑀺, 𑀬𑁄 𑀲𑀼𑀕𑀢𑁂𑀲𑀼 𑀫𑀦𑀁 𑀧𑀤𑀽𑀲𑀬𑁂’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀪𑀽𑀢𑀯𑀸𑀤𑀻’’𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀽𑀢𑀯𑀸𑀤𑀻𑀢𑀺 𑀅𑀭𑀺𑀬𑀽𑀧𑀯𑀸𑀤𑀯𑀲𑁂𑀦 𑀅𑀮𑀺𑀓𑀯𑀸𑀤𑀻. 𑀦𑀺𑀭𑀬𑀦𑁆𑀢𑀺 𑀧𑀤𑀼𑀫𑀸𑀤𑀺𑀁. 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀻𑀢𑀺 𑀇𑀢𑁄 𑀧𑀝𑀺𑀕𑀦𑁆𑀢𑁆𑀯𑀸 𑀦𑀺𑀭𑀬𑀽𑀧𑀧𑀢𑁆𑀢𑀺𑀬𑀸 𑀲𑀫𑀸 𑀪𑀯𑀦𑁆𑀢𑀺. 𑀧𑀭𑀢𑁆𑀣𑀸𑀢𑀺 𑀧𑀭𑀮𑁄𑀓𑁂.

𑁬𑁬𑁮. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲𑀸𑀢𑀺. 𑀢𑀢𑁆𑀣 𑀫𑀦𑁄𑀧𑀤𑁄𑀲𑀸𑀪𑀸𑀯𑁂𑀦 𑀅𑀧𑁆𑀧𑀤𑀼𑀝𑁆𑀞𑁄, 𑀅𑀯𑀺𑀚𑁆𑀚𑀸𑀫𑀮𑀸𑀪𑀸𑀯𑁂𑀦 𑀲𑀼𑀤𑁆𑀥𑁄, 𑀧𑀸𑀧𑀺𑀘𑁆𑀙𑀸𑀪𑀸𑀯𑁂𑀦 𑀅𑀦𑀗𑁆𑀕𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑁆𑀧𑀤𑀼𑀝𑁆𑀞𑀢𑁆𑀢𑀸 𑀯𑀸 𑀲𑀼𑀤𑁆𑀥𑀲𑁆𑀲, 𑀲𑀼𑀤𑁆𑀥𑀢𑁆𑀢𑀸 𑀅𑀦𑀗𑁆𑀕𑀡𑀲𑁆𑀲𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.

𑁬𑁬𑁯. 𑀏𑀯𑀁 𑀲𑀼𑀕𑀢𑁂𑀲𑀼 𑀫𑀦𑁄𑀧𑀤𑁄𑀲𑀲𑁆𑀲 𑀫𑀳𑀢𑁆𑀢𑀭𑀓𑀮𑀺𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀯𑀸𑀭𑀺𑀢𑀯𑀢𑁆𑀣𑀼𑀕𑀸𑀣𑀸 𑀦𑀸𑀫 𑀘𑀼𑀤𑁆𑀤𑀲 𑀕𑀸𑀣𑀸 𑀆𑀳. 𑀇𑀫𑀸 𑀓𑀺𑀭 𑀓𑁄𑀓𑀸𑀮𑀺𑀓𑀁 𑀫𑀻𑀬𑀫𑀸𑀦𑀫𑁂𑀯 𑀑𑀯𑀤𑀦𑁆𑀢𑁂𑀦𑀸𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀯𑀼𑀢𑁆𑀢𑀸, ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑀸’’𑀢𑀺 𑀏𑀓𑁂. 𑀢𑀸𑀲𑀁 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀲𑀗𑁆𑀕𑀳𑀢𑁆𑀣𑀁 𑀅𑀬𑀫𑀼𑀤𑁆𑀤𑁂𑀲𑁄 ‘‘𑀬𑁄 𑀮𑁄𑀪𑀕𑀼𑀡𑁂 𑀅𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬 𑀢𑀸𑀯 ‘‘𑀕𑀼𑀡𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀢𑁆𑀢𑀸 𑀯𑀸 𑀮𑁄𑀪𑁄𑀬𑁂𑀯 𑀮𑁄𑀪𑀕𑀼𑀡𑁄, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀯𑀤𑀜𑁆𑀜𑀽𑀢𑀺 𑀅𑀯𑀘𑀦𑀜𑁆𑀜𑀽 𑀩𑀼𑀤𑁆𑀥𑀸𑀦𑀫𑁆𑀧𑀺 𑀑𑀯𑀸𑀤𑀁 𑀅𑀕𑁆𑀕𑀳𑀡𑁂𑀦. 𑀫𑀘𑁆𑀙𑀭𑀻𑀢𑀺 𑀧𑀜𑁆𑀘𑀯𑀺𑀥𑀫𑀘𑁆𑀙𑀭𑀺𑀬𑁂𑀦. 𑀧𑁂𑀲𑀼𑀡𑀺𑀬𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀅𑀕𑁆𑀕𑀲𑀸𑀯𑀓𑀸𑀦𑀁 𑀪𑁂𑀤𑀓𑀸𑀫𑀢𑀸𑀬. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄, 𑀆𑀯𑀼𑀲𑁄 𑀓𑁄𑀓𑀸𑀮𑀺𑀓, 𑀢𑀼𑀫𑁆𑀳𑀸𑀤𑀺𑀲𑁄 𑀅𑀦𑀼𑀬𑀼𑀢𑁆𑀢𑀮𑁄𑀪𑀢𑀡𑁆𑀳𑀸𑀬 𑀮𑁄𑀪𑀕𑀼𑀡𑁂 𑀅𑀦𑀼𑀬𑀼𑀢𑁆𑀢𑁄 𑀅𑀲𑁆𑀲𑀤𑁆𑀥𑁄 𑀓𑀤𑀭𑀺𑀬𑁄 𑀅𑀯𑀤𑀜𑁆𑀜𑀽 𑀫𑀘𑁆𑀙𑀭𑀻 𑀧𑁂𑀲𑀼𑀡𑀺𑀬𑀁 𑀅𑀦𑀼𑀬𑀼𑀢𑁆𑀢𑁄, 𑀲𑁄 𑀯𑀘𑀲𑀸 𑀧𑀭𑀺𑀪𑀸𑀲𑀢𑀺 𑀅𑀜𑁆𑀜𑀁 𑀅𑀪𑀸𑀲𑀦𑁂𑀬𑁆𑀬𑀫𑁆𑀧𑀺 𑀧𑀼𑀕𑁆𑀕𑀮𑀁. 𑀢𑁂𑀦 𑀢𑀁 𑀯𑀤𑀸𑀫𑀺 ‘‘𑀫𑀼𑀔𑀤𑀼𑀕𑁆𑀕𑀸’’𑀢𑀺 𑀕𑀸𑀣𑀸𑀢𑁆𑀢𑀬𑀁.

𑁬𑁭𑁦. 𑀢𑀲𑁆𑀲𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑁄 𑁋 𑀫𑀼𑀔𑀤𑀼𑀕𑁆𑀕 𑀫𑀼𑀔𑀯𑀺𑀲𑀫, 𑀯𑀺𑀪𑀽𑀢 𑀯𑀺𑀕𑀢𑀪𑀽𑀢, 𑀅𑀮𑀺𑀓𑀯𑀸𑀤𑀺, 𑀅𑀦𑀭𑀺𑀬 𑀅𑀲𑀧𑁆𑀧𑀼𑀭𑀺𑀲, 𑀪𑀽𑀦𑀳𑀼 𑀪𑀽𑀢𑀺𑀳𑀦𑀓, 𑀯𑀼𑀟𑁆𑀠𑀺𑀦𑀸𑀲𑀓, 𑀧𑀼𑀭𑀺𑀲𑀦𑁆𑀢 𑀅𑀦𑁆𑀢𑀺𑀫𑀧𑀼𑀭𑀺𑀲, 𑀓𑀮𑀺 𑀅𑀮𑀓𑁆𑀔𑀺𑀧𑀼𑀭𑀺𑀲, 𑀅𑀯𑀚𑀸𑀢 𑀩𑀼𑀤𑁆𑀥𑀲𑁆𑀲 𑀅𑀯𑀚𑀸𑀢𑀧𑀼𑀢𑁆𑀢.

𑁬𑁭𑁧. 𑀭𑀚𑀫𑀸𑀓𑀺𑀭𑀲𑀻𑀢𑀺 𑀓𑀺𑀮𑁂𑀲𑀭𑀚𑀁 𑀅𑀢𑁆𑀢𑀦𑀺 𑀧𑀓𑁆𑀔𑀺𑀧𑀲𑀺. 𑀧𑀧𑀢𑀦𑁆𑀢𑀺 𑀲𑁄𑀩𑁆𑀪𑀁. ‘‘𑀧𑀧𑀸𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. ‘‘𑀧𑀧𑀤’’𑀦𑁆𑀢𑀺𑀧𑀺 𑀧𑀸𑀞𑁄, 𑀫𑀳𑀸𑀦𑀺𑀭𑀬𑀦𑁆𑀢𑀺 𑀅𑀢𑁆𑀣𑁄.

𑁬𑁭𑁨. 𑀏𑀢𑀺 𑀳𑀢𑀦𑁆𑀢𑀺 𑀏𑀢𑁆𑀣 𑀳-𑀇𑀢𑀺 𑀦𑀺𑀧𑀸𑀢𑁄, 𑀢𑀦𑁆𑀢𑀺 𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁. 𑀅𑀣 𑀯𑀸 𑀳𑀢𑀦𑁆𑀢𑀺 𑀕𑀢𑀁 𑀧𑀝𑀺𑀧𑀦𑁆𑀦𑀁, 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀯𑀸𑀫𑀻𑀢𑀺 𑀲𑀸𑀫𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸. 𑀲𑁄 𑀳𑀺 𑀢𑀁 𑀓𑀫𑁆𑀫𑀁 𑀮𑀪𑀢𑁂𑀯, 𑀦𑀸𑀲𑁆𑀲 𑀢𑀁 𑀦𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀘 𑀮𑀪𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀔𑀁 𑀫𑀦𑁆𑀤𑁄…𑀧𑁂… 𑀓𑀺𑀩𑁆𑀩𑀺𑀲𑀓𑀸𑀭𑀻.

𑁬𑁭𑁩. 𑀇𑀤𑀸𑀦𑀺 𑀬𑀁 𑀤𑀼𑀓𑁆𑀔𑀁 𑀫𑀦𑁆𑀤𑁄 𑀧𑀲𑁆𑀲𑀢𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀬𑁄𑀲𑀗𑁆𑀓𑀼𑀲𑀫𑀸𑀳𑀢𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀼𑀭𑀺𑀫𑀉𑀧𑀟𑁆𑀠𑀕𑀸𑀣𑀸𑀬 𑀢𑀸𑀯 𑀅𑀢𑁆𑀣𑁄 𑁋 𑀬𑀁 𑀢𑀁 𑀅𑀬𑁄𑀲𑀗𑁆𑀓𑀼𑀲𑀫𑀸𑀳𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀸𑀭𑀡𑀁 𑀓𑀭𑁄𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦; 𑀅. 𑀦𑀺. 𑁩.𑁩𑁬) 𑀯𑀼𑀢𑁆𑀢𑀁, 𑀢𑀁 𑀉𑀧𑁂𑀢𑀺, 𑀏𑀯𑀁 𑀉𑀧𑁂𑀦𑁆𑀢𑁄 𑀘 𑀢𑀢𑁆𑀣𑁂𑀯 𑀆𑀤𑀺𑀢𑁆𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀦𑀺𑀭𑀬𑀧𑀸𑀮𑁂𑀳𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀆𑀓𑁄𑀝𑀺𑀬𑀫𑀸𑀦𑀁 𑀢𑀢𑁆𑀢𑀁 𑀔𑀺𑀮𑀲𑀗𑁆𑀔𑀸𑀢𑀁 𑀢𑀺𑀡𑁆𑀳𑀥𑀸𑀭𑀫𑀬𑀲𑀽𑀮𑀫𑀼𑀧𑁂𑀢𑀺, 𑀬𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 ‘‘𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀻’’𑀢𑀺𑀆𑀤𑀺. 𑀢𑀢𑁄 𑀧𑀭𑀸 𑀉𑀧𑀟𑁆𑀠𑀕𑀸𑀣𑀸 𑀅𑀦𑁂𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑀸𑀦𑀼𑀪𑀯𑀦𑀢𑁆𑀣𑀁 𑀅𑀦𑀼𑀧𑀼𑀩𑁆𑀩𑁂𑀦 𑀔𑀸𑀭𑁄𑀤𑀓𑀦𑀤𑀻𑀢𑀻𑀭𑀁 𑀕𑀢𑀲𑁆𑀲 𑀬𑀁 𑀢𑀁 ‘‘𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀫𑀼𑀔𑁂 𑀧𑀓𑁆𑀔𑀺𑀧𑀦𑁆𑀢𑀺, 𑀢𑀢𑁆𑀢𑀁 𑀢𑀫𑁆𑀩𑀮𑁄𑀳𑀁 𑀫𑀼𑀔𑁂 𑀆𑀲𑀺𑀜𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀢𑀺 𑀮𑁄𑀳𑀁. 𑀕𑀼𑀴𑀲𑀦𑁆𑀦𑀺𑀪𑀦𑁆𑀢𑀺 𑀩𑁂𑀮𑀼𑀯𑀲𑀡𑁆𑀞𑀸𑀦𑀁. 𑀅𑀬𑁄𑀕𑀳𑀡𑁂𑀦 𑀘𑁂𑀢𑁆𑀣 𑀢𑀫𑁆𑀩𑀮𑁄𑀳𑀁, 𑀇𑀢𑀭𑁂𑀦 𑀅𑀬𑁄𑀕𑀼𑀴𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀢𑀺𑀭𑀽𑀧𑀦𑁆𑀢𑀺 𑀓𑀢𑀓𑀫𑁆𑀫𑀸𑀦𑀼𑀭𑀽𑀧𑀁.

𑁬𑁭𑁪. 𑀢𑀢𑁄 𑀧𑀭𑀸𑀲𑀼 𑀕𑀸𑀣𑀸𑀲𑀼 𑀦 𑀳𑀺 𑀯𑀕𑁆𑀕𑀽𑀢𑀺 ‘‘𑀕𑀡𑁆𑀳𑀣, 𑀧𑀳𑀭𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀦𑀺𑀭𑀬𑀧𑀸𑀮𑀸 𑀫𑀥𑀼𑀭𑀯𑀸𑀘𑀁 𑀦 𑀯𑀤𑀦𑁆𑀢𑀺. 𑀦𑀸𑀪𑀺𑀚𑀯𑀦𑁆𑀢𑀻𑀢𑀺 𑀦 𑀲𑀼𑀫𑀼𑀔𑀪𑀸𑀯𑁂𑀦 𑀅𑀪𑀺𑀫𑀼𑀔𑀸 𑀚𑀯𑀦𑁆𑀢𑀺, 𑀦 𑀲𑀼𑀫𑀼𑀔𑀸 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀦𑀬𑀩𑁆𑀬𑀲𑀦𑀫𑀸𑀯𑀳𑀦𑁆𑀢𑀸 𑀏𑀯 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀢𑀸𑀡𑀫𑀼𑀧𑁂𑀦𑁆𑀢𑀻𑀢𑀺 𑀢𑀸𑀡𑀁 𑀮𑁂𑀡𑀁 𑀧𑀝𑀺𑀲𑀭𑀡𑀁 𑀳𑀼𑀢𑁆𑀯𑀸 𑀦 𑀉𑀧𑀕𑀘𑁆𑀙𑀦𑁆𑀢𑀺, 𑀕𑀡𑁆𑀳𑀦𑁆𑀢𑀸 𑀳𑀦𑀦𑁆𑀢𑀸 𑀏𑀯 𑀉𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀗𑁆𑀕𑀸𑀭𑁂 𑀲𑀦𑁆𑀣𑀢𑁂 𑀲𑀬𑀦𑁆𑀢𑀻𑀢𑀺 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀭𑁄𑀧𑀺𑀢𑀸 𑀲𑀫𑀸𑀦𑀸 𑀅𑀦𑁂𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀦𑁆𑀣𑀢𑁂 𑀅𑀗𑁆𑀕𑀸𑀭𑁂 𑀲𑁂𑀦𑁆𑀢𑀺. 𑀕𑀺𑀦𑀺𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀚𑀮𑀺𑀢𑀁 𑀲𑀩𑁆𑀩𑀤𑀺𑀲𑀸𑀲𑀼 𑀘 𑀲𑀫𑁆𑀧𑀚𑁆𑀚𑀮𑀺𑀢𑀁 𑀅𑀕𑁆𑀕𑀺𑀁. 𑀧𑀯𑀺𑀲𑀦𑁆𑀢𑀻𑀢𑀺 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀢𑁆𑀢𑀸 𑀲𑀫𑀸𑀦𑀸 𑀑𑀕𑀸𑀳𑀦𑁆𑀢𑀺. 𑀫𑀳𑀸𑀦𑀺𑀭𑀬𑁄 𑀦𑀸𑀫 𑀬𑁄 𑀲𑁄 ‘‘𑀘𑀢𑀼𑀓𑁆𑀓𑀡𑁆𑀡𑁄’’𑀢𑀺 (𑀅. 𑀦𑀺. 𑁩.𑁩𑁬) 𑀯𑀼𑀢𑁆𑀢𑁄, 𑀦𑀁 𑀬𑁄𑀚𑀦𑀲𑀢𑁂 𑀞𑀢𑁆𑀯𑀸 𑀧𑀲𑁆𑀲𑀢𑀁 𑀅𑀓𑁆𑀔𑀻𑀦𑀺 𑀪𑀺𑀚𑁆𑀚𑀦𑁆𑀢𑀺.

𑁬𑁭𑁫. 𑀚𑀸𑀮𑁂𑀦 𑀘 𑀑𑀦𑀳𑀺𑀬𑀸𑀦𑀸𑀢𑀺 𑀅𑀬𑁄𑀚𑀸𑀮𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀫𑀺𑀕𑀮𑀼𑀤𑁆𑀤𑀓𑀸 𑀫𑀺𑀕𑀁 𑀯𑀺𑀬 𑀳𑀦𑀦𑁆𑀢𑀺. 𑀇𑀤𑀁 𑀤𑁂𑀯𑀤𑀽𑀢𑁂 𑀅𑀯𑀼𑀢𑁆𑀢𑀓𑀫𑁆𑀫𑀓𑀸𑀭𑀡𑀁. 𑀅𑀦𑁆𑀥𑀁𑀯 𑀢𑀺𑀫𑀺𑀲𑀫𑀸𑀬𑀦𑁆𑀢𑀻𑀢𑀺 𑀅𑀦𑁆𑀥𑀓𑀭𑀡𑁂𑀦 𑀅𑀦𑁆𑀥𑀫𑁂𑀯 𑀩𑀳𑀮𑀦𑁆𑀥𑀓𑀸𑀭𑀢𑁆𑀢𑀸 ‘‘𑀢𑀺𑀫𑀺𑀲’’𑀦𑁆𑀢𑀺 𑀲𑀜𑁆𑀜𑀺𑀢𑀁 𑀥𑀽𑀫𑀭𑁄𑀭𑀼𑀯𑀁 𑀦𑀸𑀫 𑀦𑀭𑀓𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀭 𑀓𑀺𑀭 𑀦𑁂𑀲𑀁 𑀔𑀭𑀥𑀽𑀫𑀁 𑀖𑀸𑀬𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀪𑀺𑀚𑁆𑀚𑀦𑁆𑀢𑀺, 𑀢𑁂𑀦 ‘‘𑀅𑀦𑁆𑀥𑀁𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀺𑀢𑀢𑀜𑁆𑀳𑀺 𑀬𑀣𑀸 𑀫𑀳𑀺𑀓𑀸𑀬𑁄𑀢𑀺 𑀢𑀜𑁆𑀘 𑀅𑀦𑁆𑀥𑀢𑀺𑀫𑀺𑀲𑀁 𑀫𑀳𑀺𑀓𑀸𑀬𑁄 𑀯𑀺𑀬 𑀯𑀺𑀢𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀺𑀢𑁆𑀣𑀢’’𑀦𑁆𑀢𑀺𑀧𑀺 𑀧𑀸𑀞𑁄. 𑀇𑀤𑀫𑁆𑀧𑀺 𑀤𑁂𑀯𑀤𑀽𑀢𑁂 𑀅𑀯𑀼𑀢𑁆𑀢𑀓𑀫𑁆𑀫𑀓𑀸𑀭𑀡𑀫𑁂𑀯.

𑁬𑁭𑁬. 𑀅𑀣 𑀮𑁄𑀳𑀫𑀬𑀦𑁆𑀢𑀺 𑀅𑀬𑀁 𑀧𑀦 𑀮𑁄𑀳𑀓𑀼𑀫𑁆𑀪𑀻 𑀧𑀣𑀯𑀺𑀧𑀭𑀺𑀬𑀦𑁆𑀢𑀺𑀓𑀸 𑀘𑀢𑀼𑀦𑀳𑀼𑀢𑀸𑀥𑀺𑀓𑀸𑀦𑀺 𑀤𑁆𑀯𑁂𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀕𑀫𑁆𑀪𑀻𑀭𑀸 𑀲𑀫𑀢𑀺𑀢𑁆𑀢𑀺𑀓𑀸 𑀢𑀢𑁆𑀭𑀮𑁄𑀳𑀧𑀽𑀭𑀸 𑀳𑁄𑀢𑀺. 𑀧𑀘𑁆𑀘𑀦𑁆𑀢𑀺 𑀳𑀺 𑀢𑀸𑀲𑀼 𑀘𑀺𑀭𑀭𑀢𑁆𑀢𑀦𑁆𑀢𑀺 𑀢𑀸𑀲𑀼 𑀓𑀼𑀫𑁆𑀪𑀻𑀲𑀼 𑀤𑀻𑀖𑀭𑀢𑁆𑀢𑀁 𑀧𑀘𑁆𑀘𑀦𑁆𑀢𑀺. 𑀅𑀕𑁆𑀕𑀺𑀦𑀺𑀲𑀫𑀸𑀲𑀽𑀢𑀺 𑀅𑀕𑁆𑀕𑀺𑀲𑀫𑀸𑀲𑀼. 𑀲𑀫𑀼𑀧𑁆𑀧𑀺𑀮𑀯𑀸𑀢𑁂𑀢𑀺 𑀲𑀫𑀼𑀧𑁆𑀧𑀺𑀮𑀯𑀦𑁆𑀢𑀸, 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀫𑀸𑀦𑀸 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀯𑀤𑀽𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁬𑁭𑁭. 𑀧𑀼𑀩𑁆𑀩𑀮𑁄𑀳𑀺𑀢𑀫𑀺𑀲𑁆𑀲𑁂𑀢𑀺 𑀧𑀼𑀩𑁆𑀩𑀮𑁄𑀳𑀺𑀢𑀫𑀺𑀲𑁆𑀲𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸. 𑀢𑀢𑁆𑀣 𑀓𑀺𑀦𑁆𑀢𑀺 𑀢𑀢𑁆𑀣. 𑀬𑀁 𑀬𑀁 𑀤𑀺𑀲𑀓𑀦𑁆𑀢𑀺 𑀤𑀺𑀲𑀁 𑀯𑀺𑀤𑀺𑀲𑀁. 𑀅𑀥𑀺𑀲𑁂𑀢𑀻𑀢𑀺 𑀕𑀘𑁆𑀙𑀢𑀺. ‘‘𑀅𑀪𑀺𑀲𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀬𑀁 𑀬𑀁 𑀤𑀺𑀲𑀁 𑀅𑀮𑁆𑀮𑀻𑀬𑀢𑀺 𑀅𑀧𑀲𑁆𑀲𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀮𑀺𑀲𑁆𑀲𑀢𑀻𑀢𑀺 𑀩𑀸𑀥𑀻𑀬𑀢𑀺. ‘‘𑀓𑀺𑀮𑀺𑀚𑁆𑀚𑀢𑀻’’𑀢𑀺𑀧𑀺 𑀧𑀸𑀞𑁄, 𑀧𑀽𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀨𑀼𑀲𑀫𑀸𑀦𑁄𑀢𑀺 𑀢𑁂𑀦 𑀧𑀼𑀩𑁆𑀩𑀮𑁄𑀳𑀺𑀢𑁂𑀦 𑀨𑀼𑀝𑁆𑀞𑁄 𑀲𑀫𑀸𑀦𑁄. 𑀇𑀤𑀫𑁆𑀧𑀺 𑀤𑁂𑀯𑀤𑀽𑀢𑁂 𑀅𑀯𑀼𑀢𑁆𑀢𑀓𑀫𑁆𑀫𑀓𑀸𑀭𑀡𑀁.

𑁬𑁭𑁮. 𑀧𑀼𑀴𑀯𑀸𑀯𑀲𑀣𑁂𑀢𑀺 𑀧𑀼𑀴𑀯𑀸𑀦𑀁 𑀆𑀯𑀸𑀲𑁂. 𑀅𑀬𑀫𑁆𑀧𑀺 𑀮𑁄𑀳𑀓𑀼𑀫𑁆𑀪𑀻𑀬𑁂𑀯 𑀤𑁂𑀯𑀤𑀽𑀢𑁂 ‘‘𑀕𑀽𑀣𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑀸, 𑀢𑀢𑁆𑀣 𑀧𑀢𑀺𑀢𑀲𑁆𑀲 𑀲𑀽𑀘𑀺𑀫𑀼𑀔𑀧𑀸𑀡𑀸 𑀙𑀯𑀺𑀆𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀔𑀸𑀤𑀦𑁆𑀢𑀺. 𑀕𑀦𑁆𑀢𑀼𑀁 𑀦 𑀳𑀺 𑀢𑀻𑀭𑀫𑀧𑀢𑁆𑀣𑀻𑀢𑀺 𑀅𑀧𑀕𑀦𑁆𑀢𑀼𑀁 𑀦 𑀳𑀺 𑀢𑀻𑀭𑀁 𑀅𑀢𑁆𑀣𑀺. ‘‘𑀢𑀻𑀭𑀯𑀫𑀢𑁆𑀣𑀻’’𑀢𑀺𑀧𑀺 𑀧𑀸𑀞𑁄, 𑀲𑁄𑀬𑁂𑀯𑀢𑁆𑀣𑁄. 𑀢𑀻𑀭𑀫𑁂𑀯 𑀏𑀢𑁆𑀣 ‘‘𑀢𑀻𑀭𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀫𑀸 𑀳𑀺 𑀲𑀫𑀦𑁆𑀢𑀓𑀧𑀮𑁆𑀮𑀸𑀢𑀺 𑀬𑀲𑁆𑀫𑀸 𑀢𑀲𑁆𑀲𑀸 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺𑀪𑀸𑀕𑁂𑀧𑀺 𑀦𑀺𑀓𑀼𑀚𑁆𑀚𑀺𑀢𑀢𑁆𑀢𑀸 𑀲𑀩𑁆𑀩𑀢𑁆𑀣 𑀲𑀫𑀸 𑀲𑀫𑀦𑁆𑀢𑀢𑁄 𑀓𑀝𑀸𑀳𑀸, 𑀢𑀲𑁆𑀫𑀸 𑀅𑀧𑀕𑀦𑁆𑀢𑀼𑀁 𑀢𑀻𑀭𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁭𑁯. 𑀅𑀲𑀺𑀧𑀢𑁆𑀢𑀯𑀦𑀁 𑀤𑁂𑀯𑀤𑀽𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀜𑁆𑀳𑀺 𑀤𑀽𑀭𑀢𑁄 𑀭𑀫𑀡𑀻𑀬𑀁 𑀅𑀫𑁆𑀩𑀯𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀅𑀣𑁂𑀢𑁆𑀣 𑀮𑁄𑀪𑁂𑀦 𑀦𑁂𑀭𑀬𑀺𑀓𑀸 𑀧𑀯𑀺𑀲𑀦𑁆𑀢𑀺, 𑀢𑀢𑁄 𑀦𑁂𑀲𑀁 𑀯𑀸𑀢𑁂𑀭𑀺𑀢𑀸𑀦𑀺 𑀧𑀢𑁆𑀢𑀸𑀦𑀺 𑀧𑀢𑀺𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀙𑀺𑀦𑁆𑀤𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀢𑀁 𑀧𑀯𑀺𑀲𑀦𑁆𑀢𑀺 𑀲𑀫𑀼𑀘𑁆𑀙𑀺𑀤𑀕𑀢𑁆𑀢𑀸’’𑀢𑀺. 𑀢𑀁 𑀧𑀯𑀺𑀲𑀦𑁆𑀢𑀺 𑀢𑀢𑁄 𑀲𑀼𑀝𑁆𑀞𑀼 𑀙𑀺𑀦𑁆𑀦𑀕𑀢𑁆𑀢𑀸 𑀳𑁄𑀦𑁆𑀢𑀻𑀢𑀺. 𑀚𑀺𑀯𑁆𑀳𑀁 𑀩𑀴𑀺𑀲𑁂𑀦 𑀕𑀳𑁂𑀢𑁆𑀯𑀸 𑀆𑀭𑀚𑀬𑀸𑀭𑀚𑀬𑀸 𑀯𑀺𑀳𑀦𑀦𑁆𑀢𑀻𑀢𑀺 𑀢𑀢𑁆𑀣 𑀅𑀲𑀺𑀧𑀢𑁆𑀢𑀯𑀦𑁂 𑀯𑁂𑀕𑁂𑀦 𑀥𑀸𑀯𑀺𑀢𑁆𑀯𑀸 𑀧𑀢𑀺𑀢𑀸𑀦𑀁 𑀫𑀼𑀲𑀸𑀯𑀸𑀤𑀻𑀦𑀁 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑀧𑀸𑀮𑀸 𑀚𑀺𑀯𑁆𑀳𑀁 𑀩𑀴𑀺𑀲𑁂𑀦 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀬𑀣𑀸 𑀫𑀦𑀼𑀲𑁆𑀲𑀸 𑀅𑀮𑁆𑀮𑀘𑀫𑁆𑀫𑀁 𑀪𑀽𑀫𑀺𑀬𑀁 𑀧𑀢𑁆𑀣𑀭𑀺𑀢𑁆𑀯𑀸 𑀔𑀺𑀮𑁂𑀳𑀺 𑀆𑀓𑁄𑀝𑁂𑀦𑁆𑀢𑀺, 𑀏𑀯𑀁 𑀆𑀓𑁄𑀝𑁂𑀢𑁆𑀯𑀸 𑀨𑀭𑀲𑀽𑀳𑀺 𑀨𑀸𑀮𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀏𑀓𑀫𑁂𑀓𑀁 𑀓𑁄𑀝𑀺𑀁 𑀙𑀺𑀦𑁆𑀤𑁂𑀢𑁆𑀯𑀸 𑀯𑀺𑀳𑀦𑀦𑁆𑀢𑀺, 𑀙𑀺𑀦𑁆𑀦𑀙𑀺𑀦𑁆𑀦𑀸 𑀓𑁄𑀝𑀺 𑀧𑀼𑀦𑀧𑁆𑀧𑀼𑀦𑀁 𑀲𑀫𑀼𑀝𑁆𑀞𑀸𑀢𑀺. ‘‘𑀆𑀭𑀘𑀬𑀸𑀭𑀘𑀬𑀸’’𑀢𑀺𑀧𑀺 𑀧𑀸𑀞𑁄, 𑀆𑀯𑀺𑀜𑁆𑀙𑀺𑀢𑁆𑀯𑀸 𑀆𑀯𑀺𑀜𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑀫𑁆𑀧𑀺 𑀤𑁂𑀯𑀤𑀽𑀢𑁂 𑀅𑀯𑀼𑀢𑁆𑀢𑀓𑀫𑁆𑀫𑀓𑀸𑀭𑀡𑀁.

𑁬𑁮𑁦. 𑀯𑁂𑀢𑀭𑀡𑀺𑀦𑁆𑀢𑀺 𑀤𑁂𑀯𑀤𑀽𑀢𑁂 ‘‘𑀫𑀳𑀢𑀻 𑀔𑀸𑀭𑁄𑀤𑀓𑀸 𑀦𑀤𑀻’’𑀢𑀺 (𑀫. 𑀦𑀺. 𑁩.𑁨𑁬𑁯) 𑀯𑀼𑀢𑁆𑀢𑀦𑀤𑀺𑀁. 𑀲𑀸 𑀓𑀺𑀭 𑀕𑀗𑁆𑀕𑀸 𑀯𑀺𑀬 𑀉𑀤𑀓𑀪𑀭𑀺𑀢𑀸 𑀤𑀺𑀲𑁆𑀲𑀢𑀺. 𑀅𑀣𑁂𑀢𑁆𑀣 𑀦𑁆𑀳𑀸𑀬𑀺𑀲𑁆𑀲𑀸𑀫 𑀧𑀺𑀯𑀺𑀲𑁆𑀲𑀸𑀫𑀸𑀢𑀺 𑀦𑁂𑀭𑀬𑀺𑀓𑀸 𑀧𑀢𑀦𑁆𑀢𑀺. 𑀢𑀺𑀡𑁆𑀳𑀥𑀸𑀭𑀔𑀼𑀭𑀥𑀸𑀭𑀦𑁆𑀢𑀺 𑀢𑀺𑀡𑁆𑀳𑀥𑀸𑀭𑀁 𑀔𑀼𑀭𑀥𑀸𑀭𑀁, 𑀢𑀺𑀓𑁆𑀔𑀥𑀸𑀭𑀔𑀼𑀭𑀥𑀸𑀭𑀯𑀢𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲𑀸 𑀓𑀺𑀭 𑀦𑀤𑀺𑀬𑀸 𑀉𑀤𑁆𑀥𑀫𑀥𑁄 𑀉𑀪𑀬𑀢𑀻𑀭𑁂𑀲𑀼 𑀘 𑀢𑀺𑀡𑁆𑀳𑀥𑀸𑀭𑀸 𑀔𑀼𑀭𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸 𑀯𑀺𑀬 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀦 𑀲𑀸 ‘‘𑀢𑀺𑀡𑁆𑀳𑀥𑀸𑀭𑀸 𑀔𑀼𑀭𑀥𑀸𑀭𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀢𑀺𑀡𑁆𑀳𑀥𑀸𑀭𑀔𑀼𑀭𑀥𑀸𑀭𑀁 𑀉𑀤𑀓𑀸𑀲𑀸𑀬 𑀉𑀧𑁂𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀉𑀧𑁂𑀦𑁆𑀢𑀸 𑀘 𑀧𑀸𑀧𑀓𑀫𑁆𑀫𑁂𑀦 𑀘𑁄𑀤𑀺𑀢𑀸 𑀢𑀢𑁆𑀣 𑀫𑀦𑁆𑀤𑀸 𑀧𑀧𑀢𑀦𑁆𑀢𑀺 𑀩𑀸𑀮𑀸𑀢𑀺 𑀅𑀢𑁆𑀣𑁄.

𑁬𑁮𑁧. 𑀲𑀸𑀫𑀸 𑀲𑀩𑀮𑀸𑀢𑀺 𑀏𑀢𑀁 𑀧𑀭𑀢𑁄 ‘‘𑀲𑁄𑀡𑀸’’𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀸𑀫𑀯𑀡𑁆𑀡𑀸 𑀓𑀫𑁆𑀫𑀸𑀲𑀯𑀡𑁆𑀡𑀸 𑀘 𑀲𑁄𑀡𑀸 𑀔𑀸𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀓𑁄𑀮𑀕𑀡𑀸𑀢𑀺 𑀓𑀡𑁆𑀳𑀓𑀸𑀓𑀕𑀡𑀸. 𑀧𑀝𑀺𑀕𑀺𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀜𑁆𑀚𑀸𑀢𑀕𑁂𑀥𑀸 𑀳𑀼𑀢𑁆𑀯𑀸, ‘‘𑀫𑀳𑀸𑀕𑀺𑀚𑁆𑀛𑀸’’𑀢𑀺 𑀏𑀓𑁂. 𑀓𑀼𑀮𑀮𑀸𑀢𑀺 𑀓𑀼𑀮𑀮𑀧𑀓𑁆𑀔𑀺𑀦𑁄, ‘‘𑀲𑁂𑀦𑀸𑀦𑀫𑁂𑀢𑀁 𑀦𑀸𑀫’’𑀦𑁆𑀢𑀺 𑀏𑀓𑁂. 𑀯𑀸𑀬𑀲𑀸𑀢𑀺 𑀅𑀓𑀡𑁆𑀳𑀓𑀸𑀓𑀸. 𑀇𑀤𑀫𑁆𑀧𑀺 𑀤𑁂𑀯𑀤𑀽𑀢𑁂 𑀅𑀯𑀼𑀢𑁆𑀢𑀓𑀫𑁆𑀫𑀓𑀸𑀭𑀡𑀁. 𑀢𑀢𑁆𑀣 𑀯𑀼𑀢𑁆𑀢𑀸𑀦𑀺𑀧𑀺 𑀧𑀦 𑀓𑀸𑀦𑀺𑀘𑀺 𑀇𑀥 𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀏𑀢𑁂𑀲𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀕𑀢𑁆𑀢𑀸 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬𑁮𑁨. 𑀇𑀤𑀸𑀦𑀺 𑀲𑀩𑁆𑀩𑀫𑁂𑀯𑁂𑀢𑀁 𑀦𑀭𑀓𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀦𑁆𑀢𑁄 ‘‘𑀓𑀺𑀘𑁆𑀙𑀸 𑀯𑀢𑀸𑀬’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀓𑀺𑀘𑁆𑀙𑀸 𑀯𑀢 𑀅𑀬𑀁 𑀇𑀥 𑀦𑀭𑀓𑁂 𑀦𑀸𑀦𑀧𑁆𑀧𑀓𑀸𑀭𑀓𑀫𑁆𑀫𑀓𑀭𑀡𑀪𑁂𑀤𑀸 𑀯𑀼𑀢𑁆𑀢𑀺, 𑀬𑀁 𑀚𑀦𑁄 𑀨𑀼𑀲𑀢𑀺 𑀓𑀺𑀩𑁆𑀩𑀺𑀲𑀓𑀸𑀭𑀻. 𑀢𑀲𑁆𑀫𑀸 𑀇𑀥 𑀚𑀻𑀯𑀺𑀢𑀲𑁂𑀲𑁂 𑀚𑀻𑀯𑀺𑀢𑀲𑀦𑁆𑀢𑀢𑀺𑀬𑀸 𑀯𑀺𑀚𑁆𑀚𑀫𑀸𑀦𑀸𑀬 𑀇𑀥 𑀮𑁄𑀓𑁂 𑀞𑀺𑀢𑁄𑀬𑁂𑀯 𑀲𑀫𑀸𑀦𑁄 𑀲𑀭𑀡𑀕𑀫𑀦𑀸𑀤𑀺𑀓𑀼𑀲𑀮𑀥𑀫𑁆𑀫𑀸𑀦𑀼𑀝𑁆𑀞𑀸𑀦𑁂𑀦 𑀓𑀺𑀘𑁆𑀘𑀓𑀭𑁄 𑀦𑀭𑁄 𑀲𑀺𑀬𑀸 𑀪𑀯𑁂𑀬𑁆𑀬. 𑀓𑀺𑀘𑁆𑀘𑀓𑀭𑁄 𑀪𑀯𑀦𑁆𑀢𑁄𑀧𑀺 𑀘 𑀲𑀸𑀢𑀘𑁆𑀘𑀓𑀸𑀭𑀺𑀢𑀸𑀯𑀲𑁂𑀦𑁂𑀯 𑀪𑀯𑁂𑀬𑁆𑀬, 𑀦 𑀧𑀫𑀚𑁆𑀚𑁂 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀧𑀫𑀸𑀤𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀬𑀫𑁂𑀢𑁆𑀣 𑀲𑀫𑀼𑀘𑁆𑀘𑀬𑀯𑀡𑁆𑀡𑀦𑀸. 𑀬𑀲𑁆𑀫𑀸 𑀧𑀦 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀧𑀤𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯, 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀸 𑀦 𑀓𑀢𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.