𑁧𑁧. 𑀦𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮𑁫. 𑀆𑀦𑀦𑁆𑀤𑀚𑀸𑀢𑁂𑀢𑀺 𑀦𑀸𑀮𑀓𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀓𑀺𑀭 𑀪𑀕𑀯𑀢𑁄 𑀲𑀸𑀯𑀓𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀢𑀣𑀢𑁆𑀢𑀁 𑀅𑀪𑀺𑀓𑀗𑁆𑀔𑀫𑀸𑀦𑁄 𑀢𑀢𑁄 𑀧𑀪𑀼𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀲𑀺𑀢𑀲𑁆𑀲 𑀇𑀲𑀺𑀦𑁄 𑀪𑀸𑀕𑀺𑀦𑁂𑀬𑁆𑀬𑁄 𑀦𑀸𑀮𑀓𑁄 𑀦𑀸𑀫 𑀢𑀸𑀧𑀲𑁄 𑀪𑀕𑀯𑀦𑁆𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 ‘‘𑀅𑀜𑁆𑀜𑀸𑀢𑀫𑁂𑀢’’𑀦𑁆𑀢𑀺𑀆𑀤𑀻𑀳𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀁 𑀩𑁆𑀬𑀸𑀓𑀸𑀲𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑁂𑀦𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀫𑁂𑀯 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀝𑁆𑀞𑁄 𑀬𑁂𑀦 𑀬𑀤𑀸 𑀘 𑀲𑀫𑀸𑀤𑀧𑀺𑀢𑁄 𑀦𑀸𑀮𑀓𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀢𑀁 𑀲𑀩𑁆𑀩𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀆𑀦𑀦𑁆𑀤𑀚𑀸𑀢𑁂’’𑀢𑀺𑀆𑀤𑀺𑀓𑀸 𑀯𑀻𑀲𑀢𑀺 𑀯𑀢𑁆𑀣𑀼𑀕𑀸𑀣𑀸𑀬𑁄 𑀯𑀢𑁆𑀯𑀸 𑀅𑀪𑀸𑀲𑀺. 𑀢𑀁 𑀲𑀩𑁆𑀩𑀫𑁆𑀧𑀺 ‘‘𑀦𑀸𑀮𑀓𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀆𑀦𑀦𑁆𑀤𑀚𑀸𑀢𑁂𑀢𑀺 𑀲𑀫𑀺𑀤𑁆𑀥𑀺𑀚𑀸𑀢𑁂 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁂. 𑀧𑀢𑀻𑀢𑁂𑀢𑀺 𑀢𑀼𑀝𑁆𑀞𑁂. 𑀅𑀣 𑀯𑀸 𑀆𑀦𑀦𑁆𑀤𑀚𑀸𑀢𑁂𑀢𑀺 𑀧𑀫𑀼𑀤𑀺𑀢𑁂. 𑀧𑀢𑀻𑀢𑁂𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁂. 𑀲𑀼𑀘𑀺𑀯𑀲𑀦𑁂𑀢𑀺 𑀅𑀓𑀺𑀮𑀺𑀝𑁆𑀞𑀯𑀲𑀦𑁂. 𑀤𑁂𑀯𑀸𑀦𑀜𑁆𑀳𑀺 𑀓𑀧𑁆𑀧𑀭𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀸𑀦𑀺 𑀯𑀲𑀦𑀸𑀦𑀺 𑀭𑀚𑀁 𑀯𑀸 𑀫𑀮𑀁 𑀯𑀸 𑀦 𑀕𑀡𑁆𑀳𑀦𑁆𑀢𑀺. 𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸𑀢𑀺 𑀇𑀥 𑀤𑀼𑀲𑁆𑀲𑀲𑀤𑀺𑀲𑀢𑁆𑀢𑀸 ‘‘𑀤𑀼𑀲𑁆𑀲’’𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀤𑀺𑀩𑁆𑀩𑀯𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀅𑀲𑀺𑀢𑁄 𑀇𑀲𑀻𑀢𑀺 𑀓𑀡𑁆𑀳𑀲𑀭𑀻𑀭𑀯𑀡𑁆𑀡𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄 𑀇𑀲𑀺. 𑀤𑀺𑀯𑀸𑀯𑀺𑀳𑀸𑀭𑁂𑀢𑀺 𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑁂. 𑀲𑁂𑀲𑀁 𑀧𑀤𑀢𑁄 𑀉𑀢𑁆𑀢𑀸𑀦𑀫𑁂𑀯.

𑀲𑀫𑁆𑀩𑀦𑁆𑀥𑀢𑁄 𑀧𑀦 𑁋 𑀅𑀬𑀁 𑀓𑀺𑀭 𑀲𑀼𑀤𑁆𑀥𑁄𑀤𑀦𑀲𑁆𑀲 𑀧𑀺𑀢𑀼 𑀲𑀻𑀳𑀳𑀦𑀼𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀲𑀼𑀤𑁆𑀥𑁄𑀤𑀦𑀲𑁆𑀲𑀧𑀺 𑀅𑀦𑀪𑀺𑀲𑀺𑀢𑁆𑀢𑀓𑀸𑀮𑁂 𑀲𑀺𑀧𑁆𑀧𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀅𑀪𑀺𑀲𑀺𑀢𑁆𑀢𑀓𑀸𑀮𑁂 𑀧𑀼𑀭𑁄𑀳𑀺𑀢𑁄𑀬𑁂𑀯 𑀅𑀳𑁄𑀲𑀺. 𑀢𑀲𑁆𑀲 𑀲𑀸𑀬𑀁 𑀧𑀸𑀢𑀁 𑀭𑀸𑀚𑀼𑀧𑀝𑁆𑀞𑀸𑀦𑀁 𑀆𑀕𑀢𑀲𑁆𑀲 𑀭𑀸𑀚𑀸 𑀤𑀳𑀭𑀓𑀸𑀮𑁂 𑀯𑀺𑀬 𑀦𑀺𑀧𑀘𑁆𑀘𑀓𑀸𑀭𑀁 𑀅𑀓𑀢𑁆𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀫𑀢𑁆𑀢𑀫𑁂𑀯 𑀓𑀭𑁄𑀢𑀺. 𑀥𑀫𑁆𑀫𑀢𑀸 𑀓𑀺𑀭𑁂𑀲𑀸 𑀧𑀢𑁆𑀢𑀸𑀪𑀺𑀲𑁂𑀓𑀸𑀦𑀁 𑀲𑀓𑁆𑀬𑀭𑀸𑀚𑀽𑀦𑀁. 𑀧𑀼𑀭𑁄𑀳𑀺𑀢𑁄 𑀢𑁂𑀦 𑀦𑀺𑀩𑁆𑀩𑀺𑀚𑁆𑀚𑀺𑀢𑁆𑀯𑀸 ‘‘𑀧𑀩𑁆𑀩𑀚𑁆𑀚𑀸𑀫𑀳𑀁 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀭𑀸𑀚𑀸 𑀢𑀲𑁆𑀲 𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 ‘‘𑀢𑁂𑀦 𑀳𑀺, 𑀆𑀘𑀭𑀺𑀬, 𑀫𑀫𑁂𑀯 𑀉𑀬𑁆𑀬𑀸𑀦𑁂 𑀯𑀲𑀺𑀢𑀩𑁆𑀩𑀁, 𑀬𑀣𑀸 𑀢𑁂 𑀅𑀳𑀁 𑀅𑀪𑀺𑀡𑁆𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀬𑀸𑀘𑀺. 𑀲𑁄 ‘‘𑀏𑀯𑀁 𑀳𑁄𑀢𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀭𑀜𑁆𑀜𑀸 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀉𑀬𑁆𑀬𑀸𑀦𑁂𑀬𑁂𑀯 𑀯𑀲𑀦𑁆𑀢𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁄 𑀢𑀢𑁄 𑀧𑀪𑀼𑀢𑀺 𑀭𑀸𑀚𑀓𑀼𑀮𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀕𑀦𑁆𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀭𑀢𑀦𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑀺𑀩𑁆𑀩𑀭𑀢𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀲𑀫𑀸𑀥𑀺𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀼𑀝𑁆𑀞𑀸𑀬 𑀯𑀺𑀫𑀸𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀦𑁆𑀢𑁄 𑀲𑀝𑁆𑀞𑀺𑀬𑁄𑀚𑀦𑀸𑀬 𑀫𑀳𑀸𑀯𑀻𑀣𑀺𑀬𑀸 𑀘𑁂𑀮𑀼𑀓𑁆𑀔𑁂𑀧𑀁 𑀓𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀕𑀼𑀡𑀧𑀲𑀁𑀲𑀺𑀢𑀸𑀦𑀺 𑀣𑀼𑀢𑀺𑀯𑀘𑀦𑀸𑀦𑀺 𑀯𑀢𑁆𑀯𑀸 𑀓𑀻𑀴𑀦𑁆𑀢𑁂 𑀲𑀓𑁆𑀓𑀧𑁆𑀧𑀫𑀼𑀔𑁂 𑀤𑁂𑀯𑁂 𑀅𑀤𑁆𑀤𑀲. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀆𑀦𑀦𑁆𑀤𑀚𑀸𑀢𑁂…𑀧𑁂… 𑀤𑀺𑀯𑀸𑀯𑀺𑀳𑀸𑀭𑁂’’𑀢𑀺.

𑁬𑁮𑁬. 𑀢𑀢𑁄 𑀲𑁄 𑀏𑀯𑀁 𑀤𑀺𑀲𑁆𑀯𑀸𑀦 𑀤𑁂𑀯𑁂…𑀧𑁂… 𑀓𑀺𑀁 𑀧𑀝𑀺𑀘𑁆𑀘. 𑀢𑀢𑁆𑀣 𑀉𑀤𑀕𑁆𑀕𑁂𑀢𑀺 𑀅𑀩𑁆𑀪𑀼𑀦𑁆𑀦𑀢𑀓𑀸𑀬𑁂. 𑀘𑀺𑀢𑁆𑀢𑀺𑀁 𑀓𑀭𑀺𑀢𑁆𑀯𑀸𑀦𑀸𑀢𑀺 𑀆𑀤𑀭𑀁 𑀓𑀢𑁆𑀯𑀸. 𑀓𑀮𑁆𑀬𑀭𑀽𑀧𑁄𑀢𑀺 𑀢𑀼𑀝𑁆𑀞𑀭𑀽𑀧𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁬𑁮𑁭. 𑀇𑀤𑀸𑀦𑀺 ‘‘𑀬𑀤𑀸𑀧𑀺 𑀆𑀲𑀻’’𑀢𑀺𑀆𑀤𑀺𑀕𑀸𑀣𑀸 𑀉𑀢𑁆𑀢𑀸𑀦𑀲𑀫𑁆𑀩𑀦𑁆𑀥𑀸 𑀏𑀯. 𑀧𑀤𑀢𑁆𑀣𑁄 𑀧𑀦 𑀧𑀞𑀫𑀕𑀸𑀣𑀸𑀬 𑀢𑀸𑀯 𑀲𑀗𑁆𑀕𑀫𑁄𑀢𑀺 𑀲𑀗𑁆𑀕𑀸𑀫𑁄. 𑀚𑀬𑁄 𑀲𑀼𑀭𑀸𑀦𑀦𑁆𑀢𑀺 𑀤𑁂𑀯𑀸𑀦𑀁 𑀚𑀬𑁄.

𑀢𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀁 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀲𑀓𑁆𑀓𑁄 𑀓𑀺𑀭 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑀯𑀸𑀲𑀻 𑀢𑁂𑀢𑁆𑀢𑀺𑀁𑀲𑀫𑀦𑀼𑀲𑁆𑀲𑀲𑁂𑀝𑁆𑀞𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀲𑀢𑁆𑀢 𑀯𑀢𑁆𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬. 𑀢𑀢𑁄 𑀧𑀼𑀩𑁆𑀩𑀤𑁂𑀯𑀸 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸, 𑀲𑀓𑁆𑀓𑀸𑀭𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀤𑀺𑀩𑁆𑀩𑀧𑀤𑀼𑀫𑀸𑀦𑀺 𑀉𑀧𑀦𑀸𑀫𑁂𑀲𑀼𑀁, 𑀉𑀧𑀟𑁆𑀠𑀭𑀚𑁆𑀚𑁂𑀦 𑀘 𑀦𑀺𑀫𑀦𑁆𑀢𑁂𑀲𑀼𑀁. 𑀲𑀓𑁆𑀓𑁄 𑀉𑀧𑀟𑁆𑀠𑀭𑀚𑁆𑀚𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀲𑀓𑀧𑀭𑀺𑀲𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀼𑀭𑀸𑀫𑀤𑀫𑀢𑁆𑀢𑁂 𑀢𑁂 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑀧𑀸𑀤𑁂 𑀔𑀺𑀧𑀺. 𑀢𑁂𑀲𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀤𑀲𑀲𑀳𑀲𑁆𑀲𑀬𑁄𑀚𑀦𑀁 𑀅𑀲𑀼𑀭𑀪𑀯𑀦𑀁 𑀦𑀺𑀩𑁆𑀩𑀢𑁆𑀢𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀝𑀺𑀘𑁆𑀙𑀦𑁆𑀦𑀪𑀽𑀢𑀸𑀬 𑀘𑀺𑀢𑁆𑀭𑀧𑀸𑀝𑀮𑀺𑀬𑀸 𑀉𑀧𑀲𑁄𑀪𑀺𑀢𑀁. 𑀢𑀢𑁄 𑀢𑁂 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀅𑀳𑁄 𑀭𑁂 𑀦𑀝𑁆𑀞𑀸 𑀫𑀬𑀁 𑀧𑀸𑀦𑀫𑀤𑀤𑁄𑀲𑁂𑀦, 𑀦 𑀤𑀸𑀦𑀺 𑀫𑀬𑀁 𑀲𑀼𑀭𑀁 𑀧𑀺𑀯𑀺𑀫𑁆𑀳𑀸, 𑀅𑀲𑀼𑀭𑀁 𑀧𑀺𑀯𑀺𑀫𑁆𑀳𑀸, 𑀦 𑀤𑀸𑀦𑀺𑀫𑁆𑀳𑀸 𑀲𑀼𑀭𑀸, 𑀅𑀲𑀼𑀭𑀸 𑀤𑀸𑀦𑀺 𑀚𑀸𑀢𑀫𑁆𑀳𑀸’’𑀢𑀺. 𑀢𑀢𑁄 𑀧𑀪𑀼𑀢𑀺 ‘‘𑀅𑀲𑀼𑀭𑀸’’𑀇𑀘𑁆𑀘𑁂𑀯 𑀉𑀧𑁆𑀧𑀦𑁆𑀦𑀲𑀫𑀜𑁆𑀜𑀸 𑀳𑀼𑀢𑁆𑀯𑀸 ‘‘𑀳𑀦𑁆𑀤 𑀤𑀸𑀦𑀺 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁂𑀫𑀸’’𑀢𑀺 𑀲𑀺𑀦𑁂𑀭𑀼𑀁 𑀧𑀭𑀺𑀢𑁄 𑀆𑀭𑁄𑀳𑀺𑀁𑀲𑀼. 𑀢𑀢𑁄 𑀲𑀓𑁆𑀓𑁄 𑀅𑀲𑀼𑀭𑁂 𑀬𑀼𑀤𑁆𑀥𑁂𑀦 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀦𑀧𑀺 𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀇𑀦𑁆𑀤𑀧𑀝𑀺𑀫𑀁 𑀫𑀸𑀧𑁂𑀢𑁆𑀯𑀸 𑀞𑀧𑁂𑀲𑀺. 𑀢𑀢𑁄 𑀅𑀲𑀼𑀭𑀸 ‘‘𑀅𑀧𑁆𑀧𑀫𑀢𑁆𑀢𑁄 𑀯𑀢𑀸𑀬𑀁 𑀲𑀓𑁆𑀓𑁄 𑀦𑀺𑀘𑁆𑀘𑀁 𑀭𑀓𑁆𑀔𑀦𑁆𑀢𑁄 𑀢𑀺𑀝𑁆𑀞𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑁂𑀯 𑀦𑀕𑀭𑀁 𑀅𑀕𑀫𑀺𑀁𑀲𑀼. 𑀢𑀢𑁄 𑀤𑁂𑀯𑀸 𑀅𑀢𑁆𑀢𑀦𑁄 𑀚𑀬𑀁 𑀖𑁄𑀲𑁂𑀦𑁆𑀢𑀸 𑀫𑀳𑀸𑀯𑀻𑀣𑀺𑀬𑀁 𑀘𑁂𑀮𑀼𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀁𑀲𑀼. 𑀅𑀣 𑀅𑀲𑀺𑀢𑁄 𑀅𑀢𑀻𑀢𑀸𑀦𑀸𑀕𑀢𑁂 𑀘𑀢𑁆𑀢𑀸𑀮𑀻𑀲𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀫𑀢𑁆𑀣𑀢𑀸𑀬 ‘‘𑀓𑀺𑀁 𑀦𑀼 𑀔𑁄 𑀇𑀫𑁂𑀳𑀺 𑀧𑀼𑀩𑁆𑀩𑁂𑀧𑀺 𑀏𑀯𑀁 𑀓𑀻𑀴𑀺𑀢𑀧𑀼𑀩𑁆𑀩’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁂 𑀤𑁂𑀯𑀯𑀺𑀚𑀬𑀁 𑀤𑀺𑀲𑁆𑀯𑀸 𑀆𑀳 𑁋

‘‘𑀬𑀤𑀸𑀧𑀺 𑀆𑀲𑀻 𑀅𑀲𑀼𑀭𑁂𑀳𑀺 𑀲𑀗𑁆𑀕𑀫𑁄,

𑀚𑀬𑁄 𑀲𑀼𑀭𑀸𑀦𑀁 𑀅𑀲𑀼𑀭𑀸 𑀧𑀭𑀸𑀚𑀺𑀢𑀸;

𑀢𑀤𑀸𑀧𑀺 𑀦𑁂𑀢𑀸𑀤𑀺𑀲𑁄 𑀮𑁄𑀫𑀳𑀁𑀲𑀦𑁄’’𑀢𑀺.

𑀢𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀏𑀢𑀸𑀤𑀺𑀲𑁄 𑀮𑁄𑀫𑀳𑀁𑀲𑀦𑁄 𑀧𑀫𑁄𑀤𑁄 𑀦 𑀆𑀲𑀺. 𑀓𑀺𑀫𑀩𑁆𑀪𑀼𑀢𑀁 𑀤𑀝𑁆𑀞𑀼 𑀫𑀭𑀽 𑀧𑀫𑁄𑀤𑀺𑀢𑀸𑀢𑀺 𑀅𑀚𑁆𑀚 𑀧𑀦 𑀓𑀺𑀁 𑀅𑀩𑁆𑀪𑀼𑀢𑀁 𑀤𑀺𑀲𑁆𑀯𑀸 𑀏𑀯𑀁 𑀤𑁂𑀯𑀸 𑀧𑀫𑀼𑀤𑀺𑀢𑀸𑀢𑀺.

𑁬𑁮𑁮. 𑀤𑀼𑀢𑀺𑀬𑀕𑀸𑀣𑀸𑀬 𑀲𑁂𑀴𑁂𑀦𑁆𑀢𑀻𑀢𑀺 𑀫𑀼𑀔𑁂𑀦 𑀉𑀲𑁆𑀲𑁂𑀴𑀦𑀲𑀤𑁆𑀤𑀁 𑀫𑀼𑀜𑁆𑀘𑀦𑁆𑀢𑀺. 𑀕𑀸𑀬𑀦𑁆𑀢𑀺 𑀦𑀸𑀦𑀸𑀯𑀺𑀥𑀸𑀦𑀺 𑀕𑀻𑀢𑀸𑀦𑀺, 𑀯𑀸𑀤𑀬𑀦𑁆𑀢𑀺 𑀅𑀝𑁆𑀞𑀲𑀝𑁆𑀞𑀺 𑀢𑀽𑀭𑀺𑀬𑀲𑀳𑀲𑁆𑀲𑀸𑀦𑀺, 𑀨𑁄𑀝𑁂𑀦𑁆𑀢𑀻𑀢𑀺 𑀅𑀧𑁆𑀨𑁄𑀝𑁂𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀯𑁄𑀳𑀦𑁆𑀢𑀺 𑀅𑀢𑁆𑀢𑀦𑀸 𑀆𑀯𑀚𑁆𑀚𑁂𑀢𑁆𑀯𑀸 𑀜𑀸𑀢𑀼𑀁 𑀲𑀫𑀢𑁆𑀣𑁄𑀧𑀺 𑀢𑁂𑀲𑀁 𑀯𑀘𑀦𑀁 𑀲𑁄𑀢𑀼𑀓𑀸𑀫𑀢𑀸𑀬 𑀧𑀼𑀘𑁆𑀙𑀢𑀺. 𑀫𑁂𑀭𑀼𑀫𑀼𑀤𑁆𑀥𑀯𑀸𑀲𑀺𑀦𑁂𑀢𑀺 𑀲𑀺𑀦𑁂𑀭𑀼𑀫𑀼𑀤𑁆𑀥𑀦𑀺 𑀯𑀲𑀦𑁆𑀢𑁂. 𑀲𑀺𑀦𑁂𑀭𑀼𑀲𑁆𑀲 𑀳𑀺 𑀳𑁂𑀝𑁆𑀞𑀺𑀫𑀢𑀮𑁂 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀅𑀲𑀼𑀭𑀪𑀯𑀦𑀁, 𑀫𑀚𑁆𑀛𑀺𑀫𑀢𑀮𑁂 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑀸 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑀸, 𑀉𑀧𑀭𑀺𑀫𑀢𑀮𑁂 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀪𑀯𑀦𑀁. 𑀢𑀲𑁆𑀫𑀸 𑀤𑁂𑀯𑀸 ‘‘𑀫𑁂𑀭𑀼𑀫𑀼𑀤𑁆𑀥𑀯𑀸𑀲𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀸𑀭𑀺𑀲𑀸𑀢𑀺 𑀤𑁂𑀯𑁂 𑀆𑀫𑀦𑁆𑀢𑁂𑀢𑀺, 𑀦𑀺𑀤𑀼𑀓𑁆𑀔𑀸 𑀦𑀺𑀭𑀸𑀩𑀸𑀥𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁬𑁮𑁯. 𑀅𑀣𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀦𑁆𑀢𑁂𑀳𑀺 𑀤𑁂𑀯𑁂𑀳𑀺 𑀯𑀼𑀢𑁆𑀢𑀸𑀬 𑀢𑀢𑀺𑀬𑀕𑀸𑀣𑀸𑀬 𑀩𑁄𑀥𑀺𑀲𑀢𑁆𑀢𑁄𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑁄, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀕𑀦𑁆𑀢𑀼𑀁 𑀅𑀭𑀳𑁄 𑀲𑀢𑁆𑀢𑁄 𑀭𑀢𑀦𑀯𑀭𑁄𑀢𑀺 𑀯𑀭𑀭𑀢𑀦𑀪𑀽𑀢𑁄. 𑀢𑁂𑀦𑀫𑁆𑀳 𑀢𑀼𑀝𑁆𑀞𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀬𑀁 𑀢𑀼𑀝𑁆𑀞𑀸. 𑀲𑁄 𑀳𑀺 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀬𑀣𑀸 𑀫𑀬𑀜𑁆𑀘 𑀅𑀜𑁆𑀜𑁂 𑀘 𑀤𑁂𑀯𑀕𑀡𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫. 𑀫𑀦𑀼𑀲𑁆𑀲𑀸𑀧𑀺𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀧𑀭𑀺𑀦𑀺𑀩𑁆𑀩𑀸𑀢𑀼𑀁, 𑀢𑁂 𑀤𑀸𑀦𑀸𑀤𑀻𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀓𑀺𑀭 𑀦𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 ‘‘𑀢𑀼𑀝𑁆𑀞𑀸 𑀓𑀮𑁆𑀬𑀭𑀽𑀧𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀧𑀤𑀤𑁆𑀯𑀬𑀁 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀁, 𑀢𑀣𑀸𑀧𑀺 ‘‘𑀓𑀺𑀫𑀩𑁆𑀪𑀼𑀢𑀁 𑀤𑀝𑁆𑀞𑀼 𑀫𑀭𑀽 𑀧𑀫𑁄𑀤𑀺𑀢𑀸, 𑀓𑀺𑀁 𑀤𑁂𑀯𑀲𑀗𑁆𑀖𑁄 𑀅𑀢𑀺𑀭𑀺𑀯 𑀓𑀮𑁆𑀬𑀭𑀽𑀧𑁄’’𑀢𑀺 𑀇𑀫𑀲𑁆𑀲 𑀧𑀜𑁆𑀳𑀤𑁆𑀯𑀬𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁯𑁦. 𑀇𑀤𑀸𑀦𑀺 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀩𑁄𑀥𑀺𑀲𑀢𑁆𑀢𑁂 𑀚𑀸𑀢𑁂 𑀢𑀼𑀝𑁆𑀞𑀸 𑀅𑀳𑁂𑀲𑀼𑀁, 𑀢𑀁 𑀆𑀯𑀺𑀓𑀭𑁄𑀦𑁆𑀢𑁂𑀳𑀺 𑀯𑀼𑀢𑁆𑀢𑀸𑀬 𑀘𑀢𑀼𑀢𑁆𑀣𑀕𑀸𑀣𑀸𑀬 𑀲𑀢𑁆𑀢𑀕𑁆𑀕𑀳𑀡𑁂𑀦 𑀤𑁂𑀯𑀫𑀦𑀼𑀲𑁆𑀲𑀕𑁆𑀕𑀳𑀡𑀁, 𑀧𑀚𑀸𑀕𑀳𑀡𑁂𑀦 𑀲𑁂𑀲𑀕𑀢𑀺𑀕𑁆𑀕𑀳𑀡𑀁. 𑀏𑀯𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀜𑁆𑀘𑀲𑀼𑀧𑀺 𑀕𑀢𑀻𑀲𑀼 𑀲𑁂𑀝𑁆𑀞𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀺𑀭𑀘𑁆𑀙𑀸𑀦𑀸𑀧𑀺 𑀳𑀺 𑀲𑀻𑀳𑀸𑀤𑀬𑁄 𑀅𑀲𑀦𑁆𑀢𑀸𑀲𑀸𑀤𑀺𑀕𑀼𑀡𑀬𑀼𑀢𑁆𑀢𑀸, 𑀢𑁂𑀧𑀺 𑀅𑀬𑀫𑁂𑀯 𑀅𑀢𑀺𑀲𑁂𑀢𑀺. 𑀢𑀲𑁆𑀫𑀸 ‘‘𑀧𑀚𑀸𑀦𑀫𑀼𑀢𑁆𑀢𑀫𑁄’’𑀢𑀺 𑀯𑀼𑀢𑁆𑀢𑁄. 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀧𑀦 𑀬𑁂 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸, 𑀢𑁂𑀲𑀼 𑀉𑀪𑀬𑀳𑀺𑀢𑀧𑀝𑀺𑀧𑀦𑁆𑀦𑁄 𑀅𑀕𑁆𑀕𑀧𑀼𑀕𑁆𑀕𑀮𑁄 𑀅𑀬𑀁, 𑀦𑀭𑁂𑀲𑀼 𑀘 𑀉𑀲𑀪𑀲𑀤𑀺𑀲𑀢𑁆𑀢𑀸 𑀦𑀭𑀸𑀲𑀪𑁄. 𑀢𑁂𑀦𑀲𑁆𑀲 𑀣𑀼𑀢𑀺𑀁 𑀪𑀡𑀦𑁆𑀢𑀸 𑀇𑀤𑀫𑁆𑀧𑀺 𑀧𑀤𑀤𑁆𑀯𑀬𑀫𑀸𑀳𑀁𑀲𑀼.

𑁬𑁯𑁧. 𑀧𑀜𑁆𑀘𑀫𑀕𑀸𑀣𑀸𑀬 𑀢𑀁 𑀲𑀤𑁆𑀤𑀦𑁆𑀢𑀺 𑀢𑀁 𑀤𑁂𑀯𑁂𑀳𑀺 𑀯𑀼𑀢𑁆𑀢𑀯𑀘𑀦𑀲𑀤𑁆𑀤𑀁. 𑀅𑀯𑀲𑀭𑀻𑀢𑀺 𑀑𑀢𑀭𑀺. 𑀢𑀤 𑀪𑀯𑀦𑀦𑁆𑀢𑀺 𑀢𑀤𑀸 𑀪𑀯𑀦𑀁.

𑁬𑁯𑁨. 𑀙𑀝𑁆𑀞𑀕𑀸𑀣𑀸𑀬 𑀢𑀢𑁄𑀢𑀺 𑀅𑀲𑀺𑀢𑀲𑁆𑀲 𑀯𑀘𑀦𑀢𑁄 𑀅𑀦𑀦𑁆𑀢𑀭𑀁. 𑀉𑀓𑁆𑀓𑀸𑀫𑀼𑀔𑁂𑀯𑀸𑀢𑀺 𑀉𑀓𑁆𑀓𑀸𑀫𑀼𑀔𑁂 𑀏𑀯, 𑀫𑀽𑀲𑀸𑀫𑀼𑀔𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀲𑀼𑀓𑀼𑀲𑀮𑁂𑀦 𑀲𑀼𑀯𑀡𑁆𑀡𑀓𑀸𑀭𑁂𑀦 𑀲𑀗𑁆𑀖𑀝𑁆𑀝𑀺𑀢𑀁, 𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀢𑀸𑀧𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀤𑁆𑀤𑀮𑁆𑀮𑀫𑀸𑀦𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑀁. 𑀅𑀲𑀺𑀢𑀯𑁆𑀳𑀬𑀲𑁆𑀲𑀸𑀢𑀺 𑀅𑀲𑀺𑀢𑀦𑀸𑀫𑀲𑁆𑀲 𑀤𑀼𑀢𑀺𑀬𑁂𑀦 𑀦𑀸𑀫𑁂𑀦 𑀓𑀡𑁆𑀳𑀤𑁂𑀯𑀺𑀮𑀲𑁆𑀲 𑀇𑀲𑀺𑀦𑁄.

𑁬𑁯𑁩. 𑀲𑀢𑁆𑀢𑀫𑀕𑀸𑀣𑀸𑀬 𑀢𑀸𑀭𑀸𑀲𑀪𑀁 𑀯𑀸𑀢𑀺 𑀢𑀸𑀭𑀸𑀦𑀁 𑀉𑀲𑀪𑀲𑀤𑀺𑀲𑀁, 𑀘𑀦𑁆𑀤𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑀼𑀤𑁆𑀥𑀦𑁆𑀢𑀺 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀭𑀳𑀺𑀢𑀁. 𑀲𑀭𑀤𑀭𑀺𑀯𑀸𑀢𑀺 𑀲𑀭𑀤𑁂 𑀇𑀯. 𑀆𑀦𑀦𑁆𑀤𑀚𑀸𑀢𑁄𑀢𑀺 𑀲𑀯𑀦𑀫𑀢𑁆𑀢𑁂𑀦𑁂𑀯 𑀉𑀧𑁆𑀧𑀦𑁆𑀦𑀸𑀬 𑀧𑀻𑀢𑀺𑀬𑀸 𑀧𑀻𑀢𑀺𑀚𑀸𑀢𑁄. 𑀅𑀮𑀢𑁆𑀣 𑀧𑀻𑀢𑀺𑀦𑁆𑀢𑀺 𑀤𑀺𑀲𑁆𑀯𑀸 𑀧𑀼𑀦𑀧𑀺 𑀧𑀻𑀢𑀺𑀁 𑀮𑀪𑀺.

𑁬𑁯𑁪. 𑀢𑀢𑁄 𑀧𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑁂𑀯𑁂𑀳𑀺 𑀲𑀤𑀸 𑀧𑀬𑀼𑀚𑁆𑀚𑀫𑀸𑀦𑀲𑀓𑁆𑀓𑀸𑀭𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀅𑀝𑁆𑀞𑀫𑀕𑀸𑀣𑀸𑀬 𑀅𑀦𑁂𑀓𑀲𑀸𑀔𑀦𑁆𑀢𑀺 𑀅𑀦𑁂𑀓𑀲𑀮𑀸𑀓𑀁. 𑀲𑀳𑀲𑁆𑀲𑀫𑀡𑁆𑀟𑀮𑀦𑁆𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀲𑀳𑀲𑁆𑀲𑀫𑀡𑁆𑀟𑀮𑀬𑀼𑀢𑁆𑀢𑀁. 𑀙𑀢𑁆𑀢𑀦𑁆𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑀁. 𑀯𑀻𑀢𑀺𑀧𑀢𑀦𑁆𑀢𑀻𑀢𑀺 𑀲𑀭𑀻𑀭𑀁 𑀩𑀻𑀚𑀫𑀸𑀦𑀸 𑀧𑀢𑀦𑀼𑀧𑁆𑀧𑀢𑀦𑀁 𑀓𑀭𑁄𑀦𑁆𑀢𑀺.

𑁬𑁯𑁫. 𑀦𑀯𑀫𑀕𑀸𑀣𑀸𑀬 𑀚𑀝𑀻𑀢𑀺 𑀚𑀝𑀺𑀮𑁄. 𑀓𑀡𑁆𑀳𑀲𑀺𑀭𑀺𑀯𑁆𑀳𑀬𑁄𑀢𑀺 𑀓𑀡𑁆𑀳𑀲𑀤𑁆𑀤𑁂𑀦 𑀘 𑀲𑀺𑀭𑀺𑀲𑀤𑁆𑀤𑁂𑀦 𑀘 𑀅𑀯𑁆𑀳𑀬𑀫𑀸𑀦𑁄. 𑀢𑀁 𑀓𑀺𑀭 ‘‘𑀲𑀺𑀭𑀺𑀓𑀡𑁆𑀳𑁄’’𑀢𑀺𑀧𑀺 𑀅𑀯𑁆𑀳𑀬𑀦𑁆𑀢𑀺 𑀆𑀫𑀦𑁆𑀢𑁂𑀦𑁆𑀢𑀺, 𑀆𑀮𑀧𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀡𑁆𑀟𑀼𑀓𑀫𑁆𑀩𑀮𑁂𑀢𑀺 𑀭𑀢𑁆𑀢𑀓𑀫𑁆𑀩𑀮𑁂. 𑀅𑀥𑀺𑀓𑀸𑀭𑀢𑁄 𑀘𑁂𑀢𑁆𑀣 ‘‘𑀓𑀼𑀫𑀸𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀸𑀞𑀲𑁂𑀲𑁄 𑀯𑀸 𑀓𑀸𑀢𑀩𑁆𑀩𑁄. 𑀧𑀼𑀭𑀺𑀫𑀕𑀸𑀣𑀸𑀬 𑀘 𑀅𑀳𑀢𑁆𑀣𑀧𑀸𑀲𑀕𑀢𑀁 𑀲𑀦𑁆𑀥𑀸𑀬 ‘‘𑀤𑀺𑀲𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀳𑀢𑁆𑀣𑀧𑀸𑀲𑀕𑀢𑀁 𑀧𑀝𑀺𑀕𑁆𑀕𑀳𑀡𑀢𑁆𑀣𑀁 𑀉𑀧𑀦𑀻𑀢𑀁, 𑀢𑀲𑁆𑀫𑀸 𑀧𑀼𑀦 𑀯𑀘𑀦𑀁 ‘‘𑀤𑀺𑀲𑁆𑀯𑀸’’𑀢𑀺. 𑀧𑀼𑀭𑀺𑀫𑀁 𑀯𑀸 𑀤𑀲𑁆𑀲𑀦𑀧𑀻𑀢𑀺𑀮𑀸𑀪𑀸𑀧𑁂𑀓𑁆𑀔𑀁 𑀕𑀸𑀣𑀸𑀯𑀲𑀸𑀦𑁂 ‘‘𑀯𑀺𑀧𑀼𑀮𑀫𑀮𑀢𑁆𑀣 𑀧𑀻𑀢𑀺’’𑀦𑁆𑀢𑀺 𑀯𑀘𑀦𑀢𑁄, 𑀇𑀤𑀁 𑀧𑀝𑀺𑀕𑁆𑀕𑀳𑀸𑀧𑁂𑀓𑁆𑀔𑀁 𑀅𑀯𑀲𑀸𑀦𑁂 ‘‘𑀲𑀼𑀫𑀦𑁄 𑀧𑀝𑀺𑀕𑁆𑀕𑀳𑁂’’𑀢𑀺 𑀯𑀘𑀦𑀢𑁄. 𑀧𑀼𑀭𑀺𑀫𑀜𑁆𑀘 𑀓𑀼𑀫𑀸𑀭𑀲𑀫𑁆𑀩𑀦𑁆𑀥𑀫𑁂𑀯, 𑀇𑀤𑀁 𑀲𑁂𑀢𑀘𑁆𑀙𑀢𑁆𑀢𑀲𑀫𑁆𑀩𑀦𑁆𑀥𑀫𑁆𑀧𑀺. 𑀤𑀺𑀲𑁆𑀯𑀸𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀕𑀦𑁆𑀥𑀸𑀭𑀭𑀢𑁆𑀢𑀓𑀫𑁆𑀩𑀮𑁂 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀯𑀺𑀬 𑀓𑀼𑀫𑀸𑀭𑀁 ‘‘𑀙𑀢𑁆𑀢𑀁 𑀫𑀭𑀽’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀺𑀬𑀦𑁆𑀢𑀁 𑀫𑀼𑀤𑁆𑀥𑀦𑀺 𑀤𑀺𑀲𑁆𑀯𑀸. 𑀓𑁂𑀘𑀺 𑀧𑀦 ‘‘𑀇𑀤𑀁 𑀫𑀸𑀦𑀼𑀲𑀓𑀁 𑀙𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀪𑀡𑀦𑁆𑀢𑀺. 𑀬𑀣𑁂𑀯 𑀳𑀺 𑀤𑁂𑀯𑀸, 𑀏𑀯𑀁 𑀫𑀦𑀼𑀲𑁆𑀲𑀸𑀧𑀺 𑀙𑀢𑁆𑀢𑀘𑀸𑀫𑀭𑀫𑁄𑀭𑀳𑀢𑁆𑀣𑀢𑀸𑀮𑀯𑀡𑁆𑀝𑀯𑀸𑀴𑀩𑀻𑀚𑀦𑀺𑀳𑀢𑁆𑀣𑀸 𑀫𑀳𑀸𑀧𑀼𑀭𑀺𑀲𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦 𑀢𑀲𑁆𑀲 𑀯𑀘𑀦𑁂𑀦 𑀓𑁄𑀘𑀺𑀧𑀺 𑀅𑀢𑀺𑀲𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯 𑀲𑀼𑀦𑁆𑀤𑀭𑀁. 𑀧𑀝𑀺𑀕𑁆𑀕𑀳𑁂𑀢𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀲𑀺. 𑀇𑀲𑀺𑀁 𑀓𑀺𑀭 𑀯𑀦𑁆𑀤𑀸𑀧𑁂𑀢𑀼𑀁 𑀓𑀼𑀫𑀸𑀭𑀁 𑀉𑀧𑀦𑁂𑀲𑀼𑀁. 𑀅𑀣𑀲𑁆𑀲 𑀧𑀸𑀤𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀇𑀲𑀺𑀲𑁆𑀲 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑁄 𑀢𑀫𑁆𑀧𑀺 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄 𑀧𑀝𑀺𑀕𑁆𑀕𑀳𑁂𑀲𑀺.

𑁬𑁯𑁬. 𑀤𑀲𑀫𑀕𑀸𑀣𑀸𑀬𑀁 𑀚𑀺𑀕𑀻𑀲𑀓𑁄𑀢𑀺 𑀚𑀺𑀕𑀻𑀲𑀦𑁆𑀢𑁄 𑀫𑀕𑁆𑀕𑀦𑁆𑀢𑁄 𑀧𑀭𑀺𑀬𑁂𑀲𑀦𑁆𑀢𑁄, 𑀉𑀧𑀧𑀭𑀺𑀓𑁆𑀔𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀓𑁆𑀔𑀡𑀫𑀦𑁆𑀢𑀧𑀸𑀭𑀕𑀽𑀢𑀺 𑀮𑀓𑁆𑀔𑀡𑀸𑀦𑀁 𑀯𑁂𑀤𑀸𑀦𑀜𑁆𑀘 𑀧𑀸𑀭𑀁 𑀕𑀢𑁄. 𑀅𑀦𑀼𑀢𑁆𑀢𑀭𑀸𑀬𑀦𑁆𑀢𑀺 𑀅𑀦𑀼𑀢𑁆𑀢𑀭𑁄 𑀅𑀬𑀁. 𑀲𑁄 𑀓𑀺𑀭 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀸𑀕𑀢𑁂𑀲𑀼 𑀫𑀳𑀸𑀲𑀢𑁆𑀢𑀲𑁆𑀲 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀤𑀺𑀲𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀲𑁂𑀲𑀮𑀓𑁆𑀔𑀡𑀸𑀦𑀺 𑀚𑀺𑀕𑀻𑀲𑀦𑁆𑀢𑁄 𑀲𑀩𑁆𑀩𑀁 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀏𑀯𑀫𑀸𑀳.

𑁬𑁯𑁭. 𑀏𑀓𑀸𑀤𑀲𑀸𑀬𑀁 𑀅𑀣𑀢𑁆𑀢𑀦𑁄 𑀕𑀫𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀭𑀽𑀧𑀕𑀫𑀦𑀁. 𑀅𑀓𑀮𑁆𑀬𑀭𑀽𑀧𑁄 𑀕𑀴𑀬𑀢𑀺 𑀅𑀲𑁆𑀲𑀼𑀓𑀸𑀦𑀻𑀢𑀺 𑀢𑀁 𑀅𑀢𑁆𑀢𑀦𑁄 𑀅𑀭𑀽𑀧𑀽𑀧𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀦 𑀤𑀸𑀦𑀸𑀳𑀁 𑀅𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑁄𑀢𑀼𑀁 𑀮𑀘𑁆𑀙𑀸𑀫𑀻’’𑀢𑀺 𑀅𑀢𑀼𑀝𑁆𑀞𑀭𑀽𑀧𑁄 𑀩𑀮𑀯𑀲𑁄𑀓𑀸𑀪𑀺𑀪𑀯𑁂𑀦 𑀤𑁄𑀫𑀦𑀲𑁆𑀲𑀚𑀸𑀢𑁄 𑀳𑀼𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀸𑀢𑁂𑀢𑀺 𑀕𑀴𑀬𑀢𑀺. ‘‘𑀕𑀭𑀬𑀢𑀻’’𑀢𑀺𑀧𑀺 𑀧𑀸𑀞𑁄. 𑀬𑀤𑀺 𑀧𑀦𑁂𑀲 𑀭𑀽𑀧𑀪𑀯𑁂 𑀘𑀺𑀢𑁆𑀢𑀁 𑀦𑀫𑁂𑀬𑁆𑀬, 𑀓𑀺𑀁 𑀢𑀢𑁆𑀣 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀬𑁂𑀦𑁂𑀯𑀁 𑀭𑁄𑀤𑀢𑀻𑀢𑀺? 𑀦 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀓𑀼𑀲𑀮𑀢𑀸𑀬 𑀧𑀦𑁂𑀢𑀁 𑀯𑀺𑀥𑀺𑀁 𑀦 𑀚𑀸𑀦𑀸𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑁂𑀯𑀲𑁆𑀲 𑀅𑀬𑀼𑀢𑁆𑀢𑀸 𑀲𑀫𑀸𑀧𑀢𑁆𑀢𑀺𑀮𑀸𑀪𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀢𑀺 𑀘𑁂? 𑀦, 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀏𑀯. 𑀫𑀕𑁆𑀕𑀪𑀸𑀯𑀦𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀸 𑀳𑀺 𑀓𑀺𑀮𑁂𑀲𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀁 𑀧𑀦 𑀩𑀮𑀯𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀭𑀺𑀳𑀻𑀦𑀚𑁆𑀛𑀸𑀦𑀢𑁆𑀢𑀸 𑀓𑀼𑀢𑀲𑁆𑀲 𑀅𑀭𑀽𑀧𑀕𑀫𑀦𑀦𑁆𑀢𑀺 𑀘𑁂? 𑀅𑀧𑁆𑀧𑀓𑀲𑀺𑀭𑁂𑀦 𑀧𑀼𑀦𑀸𑀥𑀺𑀕𑀫𑀢𑁄. 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀉𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀩𑀮𑀯𑀯𑀻𑀢𑀺𑀓𑁆𑀓𑀫𑀁 𑀅𑀦𑀸𑀧𑀚𑁆𑀚𑀦𑁆𑀢𑀸 𑀯𑀽𑀧𑀲𑀦𑁆𑀢𑀫𑀢𑁆𑀢𑁂𑀬𑁂𑀯 𑀓𑀺𑀮𑁂𑀲𑀯𑁂𑀕𑁂 𑀧𑀼𑀦 𑀢𑀁 𑀯𑀺𑀲𑁂𑀲𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯𑀸𑀥𑀺𑀕𑀘𑁆𑀙𑀦𑁆𑀢𑀺, ‘‘𑀧𑀭𑀺𑀳𑀻𑀦𑀯𑀺𑀲𑁂𑀲𑀸 𑀇𑀫𑁂’’𑀢𑀺𑀧𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀺, 𑀢𑀸𑀤𑀺𑀲𑁄 𑀘 𑀏𑀲𑁄. 𑀦𑁄 𑀘𑁂 𑀓𑀼𑀫𑀸𑀭𑁂 𑀪𑀯𑀺𑀲𑁆𑀲𑀢𑀺 𑀅𑀦𑁆𑀢𑀭𑀸𑀬𑁄𑀢𑀺 𑀦 𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀓𑀼𑀫𑀸𑀭𑁂 𑀅𑀦𑁆𑀢𑀭𑀸𑀬𑁄.

𑁬𑁯𑁮. 𑀤𑁆𑀯𑀸𑀤𑀲𑀸𑀬𑀁 𑀦 𑀑𑀭𑀓𑀸𑀬𑀦𑁆𑀢𑀺 𑀅𑀬𑀁 𑀑𑀭𑀓𑁄 𑀧𑀭𑀺𑀢𑁆𑀢𑁄 𑀦 𑀳𑁄𑀢𑀺. 𑀉𑀢𑁆𑀢𑀭𑀕𑀸𑀣𑀸𑀬 𑀯𑀢𑁆𑀢𑀩𑁆𑀩𑀁 𑀩𑀼𑀤𑁆𑀥𑀪𑀸𑀯𑀁 𑀲𑀦𑁆𑀥𑀸𑀬𑀸𑀳.

𑁬𑁯𑁯. 𑀢𑁂𑀭𑀲𑀸𑀬𑀁 𑀲𑀫𑁆𑀩𑁄𑀥𑀺𑀬𑀕𑁆𑀕𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀅𑀯𑀺𑀧𑀭𑀻𑀢𑀪𑀸𑀯𑁂𑀦 𑀲𑀫𑁆𑀫𑀸 𑀩𑀼𑀚𑁆𑀛𑀦𑀢𑁄 𑀲𑀫𑁆𑀩𑁄𑀥𑀺, 𑀓𑀢𑁆𑀣𑀘𑀺 𑀆𑀯𑀭𑀡𑀸𑀪𑀸𑀯𑁂𑀦 𑀲𑀩𑁆𑀩𑀜𑀸𑀡𑀼𑀢𑁆𑀢𑀫𑀢𑁄 ‘‘𑀅𑀕𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀲𑀺𑀲𑁆𑀲𑀢𑀻𑀢𑀺 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀧𑀭𑀫𑀯𑀺𑀲𑀼𑀤𑁆𑀥𑀤𑀲𑁆𑀲𑀻𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀻. 𑀢𑀜𑁆𑀳𑀺 𑀏𑀓𑀦𑁆𑀢𑀯𑀺𑀲𑀼𑀤𑁆𑀥𑀢𑁆𑀢𑀸 𑀧𑀭𑀫𑀯𑀺𑀲𑀼𑀤𑁆𑀥𑀁. 𑀯𑀺𑀢𑁆𑀣𑀸𑀭𑀺𑀓𑀲𑁆𑀲𑀸𑀢𑀺 𑀯𑀺𑀢𑁆𑀣𑀸𑀭𑀺𑀓𑀁 𑀅𑀲𑁆𑀲. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀸𑀲𑀦𑀁.

𑁭𑁦𑁦. 𑀘𑀼𑀤𑁆𑀤𑀲𑀸𑀬𑀁 𑀅𑀣𑀦𑁆𑀢𑀭𑀸𑀢𑀺 𑀅𑀦𑁆𑀢𑀭𑀸𑀬𑁂𑀯 𑀅𑀲𑁆𑀲, 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑀺𑀢𑁄 𑀑𑀭𑀢𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀲𑁄𑀲𑁆𑀲𑀦𑁆𑀢𑀺 𑀦 𑀲𑀼𑀡𑀺𑀲𑁆𑀲𑀁. 𑀅𑀲𑀫𑀥𑀼𑀭𑀲𑁆𑀲𑀸𑀢𑀺 𑀅𑀲𑀫𑀯𑀻𑀭𑀺𑀬𑀲𑁆𑀲. 𑀅𑀝𑁆𑀝𑁄𑀢𑀺 𑀆𑀢𑀼𑀭𑁄. 𑀩𑁆𑀬𑀲𑀦𑀁 𑀕𑀢𑁄𑀢𑀺 𑀲𑀼𑀔𑀯𑀺𑀦𑀸𑀲𑀁 𑀧𑀢𑁆𑀢𑁄. 𑀅𑀖𑀸𑀯𑀻𑀢𑀺 𑀤𑀼𑀓𑁆𑀔𑀺𑀢𑁄, 𑀲𑀩𑁆𑀩𑀁 𑀤𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀫𑁂𑀯 𑀲𑀦𑁆𑀥𑀸𑀬𑀸𑀳. 𑀤𑁄𑀫𑀦𑀲𑁆𑀲𑁂𑀦 𑀳𑀺 𑀲𑁄 𑀆𑀢𑀼𑀭𑁄. 𑀢𑀜𑁆𑀘𑀲𑁆𑀲 𑀲𑀼𑀔𑀩𑁆𑀬𑀲𑀦𑀢𑁄 𑀩𑁆𑀬𑀲𑀦𑀁, 𑀲𑀼𑀔𑀯𑀺𑀦𑀸𑀲𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀘 𑀲𑁄 𑀘𑁂𑀢𑀲𑀺𑀓𑀅𑀖𑀪𑀽𑀢𑁂𑀦 𑀅𑀖𑀸𑀯𑀻.

𑁭𑁦𑁧. 𑀧𑀦𑁆𑀦𑀭𑀲𑀸𑀬𑀁 𑀯𑀺𑀧𑀼𑀮𑀁 𑀚𑀦𑁂𑀢𑁆𑀯𑀸𑀦𑀸𑀢𑀺 𑀯𑀺𑀧𑀼𑀮𑀁 𑀚𑀦𑁂𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀦𑀺𑀕𑁆𑀕𑀫𑀸𑀢𑀺 𑀦𑀺𑀕𑁆𑀕𑀢𑁄. 𑀏𑀯𑀁 𑀦𑀺𑀕𑁆𑀕𑀢𑁄 𑀘 𑀲𑁄 𑀪𑀸𑀕𑀺𑀦𑁂𑀬𑁆𑀬𑀁 𑀲𑀬𑀦𑁆𑀢𑀺 𑀲𑀓𑀁 𑀪𑀸𑀕𑀺𑀦𑁂𑀬𑁆𑀬𑀁, 𑀅𑀢𑁆𑀢𑀦𑁄 𑀪𑀕𑀺𑀦𑀺𑀬𑀸 𑀧𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀤𑀧𑁂𑀲𑀻𑀢𑀺 𑀅𑀢𑁆𑀢𑀦𑁄 𑀅𑀧𑁆𑀧𑀸𑀬𑀼𑀓𑀪𑀸𑀯𑀁 𑀜𑀢𑁆𑀯𑀸 𑀓𑀦𑀺𑀝𑁆𑀞𑀪𑀕𑀺𑀦𑀺𑀬𑀸 𑀘 𑀧𑀼𑀢𑁆𑀢𑀲𑁆𑀲 𑀦𑀸𑀮𑀓𑀲𑁆𑀲 𑀫𑀸𑀡𑀯𑀓𑀲𑁆𑀲 𑀉𑀧𑀘𑀺𑀢𑀧𑀼𑀜𑁆𑀜𑀢𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀜𑀢𑁆𑀯𑀸 ‘‘𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀧𑀫𑀸𑀤𑀫𑁆𑀧𑀺 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀦𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀪𑀕𑀺𑀦𑀺𑀬𑀸 𑀖𑀭𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀦𑀸𑀮𑀓𑁄’’𑀢𑀺. ‘‘𑀩𑀳𑀺, 𑀪𑀦𑁆𑀢𑁂, 𑀓𑀻𑀴𑀢𑀻’’𑀢𑀺. ‘‘𑀆𑀦𑁂𑀣 𑀦’’𑀦𑁆𑀢𑀺 𑀆𑀡𑀸𑀧𑁂𑀢𑁆𑀯𑀸 𑀢𑀗𑁆𑀔𑀡𑀁𑀬𑁂𑀯 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀫𑀸𑀤𑀧𑁂𑀲𑀺 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀓𑀣𑀁? ‘‘𑀩𑀼𑀤𑁆𑀥𑁄𑀢𑀺 𑀖𑁄𑀲𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀲𑁄𑀴𑀲𑀫𑀕𑀸𑀣𑀫𑀸𑀳.

𑁭𑁦𑁨. 𑀢𑀢𑁆𑀣 𑀬𑀤 𑀧𑀭𑀢𑁄𑀢𑀺 𑀬𑀤𑀸 𑀧𑀭𑀢𑁄. 𑀥𑀫𑁆𑀫𑀫𑀕𑁆𑀕𑀦𑁆𑀢𑀺 𑀧𑀭𑀫𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑀁, 𑀥𑀫𑁆𑀫𑀁 𑀯𑀸 𑀅𑀕𑁆𑀕𑀁 𑀲𑀳 𑀧𑀝𑀺𑀧𑀤𑀸𑀬 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀫𑀡𑀥𑀫𑁆𑀫𑀁.

𑁭𑁦𑁩. 𑀲𑀢𑁆𑀢𑀭𑀲𑀸𑀬𑀁 𑀢𑀸𑀤𑀺𑀦𑀸𑀢𑀺 𑀢𑀲𑁆𑀲𑀡𑁆𑀞𑀺𑀢𑁂𑀦, 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂 𑀲𑀫𑀸𑀥𑀺𑀮𑀸𑀪𑁂 𑀘 𑀲𑀢𑀺 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑁂𑀦 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀕𑀢𑁂 𑀧𑀭𑀫𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀦𑀸𑀢𑀺 ‘‘𑀅𑀬𑀁 𑀦𑀸𑀮𑀓𑁄 𑀅𑀦𑀸𑀕𑀢𑁂 𑀓𑀸𑀮𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀭𑀫𑀯𑀺𑀲𑀼𑀤𑁆𑀥𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀢𑁆𑀢𑀸 𑀲𑁄 𑀇𑀲𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 ‘‘𑀅𑀦𑀸𑀕𑀢𑁂 𑀧𑀭𑀫𑀯𑀺𑀲𑀼𑀤𑁆𑀥𑀤𑀲𑁆𑀲𑀻’’𑀢𑀺 𑀯𑀼𑀢𑁆𑀢𑁄. 𑀢𑁂𑀦 𑀅𑀦𑀸𑀕𑀢𑁂 𑀧𑀭𑀫𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀦𑀸. 𑀉𑀧𑀘𑀺𑀢𑀧𑀼𑀜𑁆𑀜𑀲𑀜𑁆𑀘𑀬𑁄𑀢𑀺 𑀧𑀤𑀼𑀫𑀼𑀢𑁆𑀢𑀭𑀢𑁄 𑀧𑀪𑀼𑀢𑀺 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑁄. 𑀧𑀢𑀺𑀓𑁆𑀔𑀦𑁆𑀢𑀺 𑀆𑀕𑀫𑀬𑀫𑀸𑀦𑁄. 𑀧𑀭𑀺𑀯𑀲𑀻𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀢𑀸𑀧𑀲𑀯𑁂𑀲𑁂𑀦 𑀯𑀲𑀺. 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀭𑀓𑁆𑀔𑀺𑀢𑀲𑁄𑀢𑀺𑀦𑁆𑀤𑁆𑀭𑀺𑀬𑁄 𑀳𑀼𑀢𑁆𑀯𑀸. 𑀲𑁄 𑀓𑀺𑀭 𑀢𑀢𑁄 𑀧𑀪𑀼𑀢𑀺 𑀉𑀤𑀓𑁂 𑀦 𑀦𑀺𑀫𑀼𑀚𑁆𑀚𑀺 ‘‘𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀦𑀸𑀲𑁂𑀬𑁆𑀬, 𑀢𑀢𑁄 𑀥𑀫𑁆𑀫𑀲𑁆𑀲𑀯𑀦𑀩𑀸𑀳𑀺𑀭𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸.

𑁭𑁦𑁪. 𑀅𑀝𑁆𑀞𑀸𑀭𑀲𑀸𑀬𑀁 𑀲𑀼𑀢𑁆𑀯𑀸𑀦 𑀖𑁄𑀲𑀦𑁆𑀢𑀺 𑀲𑁄 𑀦𑀸𑀮𑀓𑁄 𑀏𑀯𑀁 𑀧𑀭𑀺𑀯𑀲𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀪𑀕𑀯𑀢𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀥𑀫𑁆𑀫𑀘𑀓𑁆𑀓𑁂 𑀧𑀯𑀢𑁆𑀢𑀺𑀢𑁂 𑀢𑀁 ‘‘𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀚𑀺𑀦𑀯𑀭𑀘𑀓𑁆𑀓𑀯𑀢𑁆𑀢𑀦𑁂 𑀧𑀯𑀢𑁆𑀢𑀖𑁄𑀲𑀁 𑀅𑀢𑁆𑀢𑀦𑁄 𑀅𑀢𑁆𑀣𑀓𑀸𑀫𑀸𑀳𑀺 𑀤𑁂𑀯𑀢𑀸𑀳𑀺 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑀺𑀢𑀁 𑀲𑀼𑀢𑁆𑀯𑀸. 𑀕𑀦𑁆𑀢𑁆𑀯𑀸𑀦 𑀤𑀺𑀲𑁆𑀯𑀸 𑀇𑀲𑀺𑀦𑀺𑀲𑀪𑀦𑁆𑀢𑀺 𑀲𑀢𑁆𑀢𑀸𑀳𑀁 𑀤𑁂𑀯𑀢𑀸𑀳𑀺 𑀫𑁄𑀦𑁂𑀬𑁆𑀬𑀓𑁄𑀮𑀸𑀳𑀮𑁂 𑀓𑀬𑀺𑀭𑀫𑀸𑀦𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 ‘‘𑀦𑀸𑀮𑀓𑁄 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀘 𑀅𑀪𑀺𑀲𑀦𑁆𑀥𑀺𑀦𑀸 𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀦𑀺𑀲𑀪𑀲𑀤𑀺𑀲𑀁 𑀇𑀲𑀺𑀦𑀺𑀲𑀪𑀁 𑀪𑀕𑀯𑀦𑁆𑀢𑀁. 𑀧𑀲𑀦𑁆𑀦𑁄𑀢𑀺 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸. 𑀫𑁄𑀦𑁂𑀬𑁆𑀬𑀲𑁂𑀝𑁆𑀞𑀦𑁆𑀢𑀺 𑀜𑀸𑀡𑀼𑀢𑁆𑀢𑀫𑀁, 𑀫𑀕𑁆𑀕𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀕𑀢𑁂 𑀅𑀲𑀺𑀢𑀸𑀯𑁆𑀳𑀬𑀲𑁆𑀲 𑀲𑀸𑀲𑀦𑁂𑀢𑀺 𑀅𑀲𑀺𑀢𑀲𑁆𑀲 𑀇𑀲𑀺𑀦𑁄 𑀑𑀯𑀸𑀤𑀓𑀸𑀮𑁂 𑀅𑀦𑀼𑀧𑁆𑀧𑀢𑁆𑀢𑁂. 𑀢𑁂𑀦 𑀳𑀺 𑁋 ‘‘𑀬𑀤𑀸 𑀯𑀺𑀯𑀭𑀢𑀺 𑀥𑀫𑁆𑀫𑀫𑀕𑁆𑀕𑀁, 𑀢𑀤𑀸 𑀕𑀦𑁆𑀢𑁆𑀯𑀸 𑀲𑀫𑀬𑀁 𑀧𑀭𑀺𑀧𑀼𑀘𑁆𑀙𑀫𑀸𑀦𑁄 𑀘𑀭𑀲𑁆𑀲𑀼 𑀢𑀲𑁆𑀫𑀺𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀦𑀼𑀲𑀺𑀝𑁆𑀞𑁄, 𑀅𑀬𑀜𑁆𑀘 𑀲𑁄 𑀓𑀸𑀮𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑀸𑀕𑀢𑁂 𑀅𑀲𑀺𑀢𑀸𑀯𑁆𑀳𑀬𑀲𑁆𑀲 𑀲𑀸𑀲𑀦𑁂’’𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑀅𑀬𑀁 𑀢𑀸𑀯 𑀯𑀢𑁆𑀣𑀼𑀕𑀸𑀣𑀸𑀯𑀡𑁆𑀡𑀦𑀸.

𑁭𑁦𑁫. 𑀧𑀼𑀘𑁆𑀙𑀸𑀕𑀸𑀣𑀸𑀤𑁆𑀯𑀬𑁂 𑀅𑀜𑁆𑀜𑀸𑀢𑀫𑁂𑀢𑀦𑁆𑀢𑀺 𑀯𑀺𑀤𑀺𑀢𑀁 𑀫𑀬𑀸 𑀏𑀢𑀁. 𑀬𑀣𑀸𑀢𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀁. 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑀁 𑀅𑀲𑀺𑀢𑁄 ‘‘𑀲𑀫𑁆𑀩𑁄𑀥𑀺𑀬𑀕𑁆𑀕𑀁 𑀨𑀼𑀲𑀺𑀲𑁆𑀲𑀢𑀸𑀬𑀁 𑀓𑀼𑀫𑀸𑀭𑁄’’𑀢𑀺 𑀜𑀢𑁆𑀯𑀸 ‘‘𑀩𑀼𑀤𑁆𑀥𑁄𑀢𑀺 𑀖𑁄𑀲𑀁 𑀬𑀤 𑀧𑀭𑀢𑁄 𑀲𑀼𑀡𑁄𑀲𑀺, 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑁄 𑀯𑀺𑀯𑀭𑀢𑀺 𑀥𑀫𑁆𑀫𑀫𑀕𑁆𑀕’’𑀦𑁆𑀢𑀺 𑀫𑀁 𑀅𑀯𑀘, 𑀢𑀤𑁂𑀢𑀁 𑀫𑀬𑀸 𑀅𑀲𑀺𑀢𑀲𑁆𑀲 𑀯𑀘𑀦𑀁 𑀅𑀚𑁆𑀚 𑀪𑀕𑀯𑀦𑁆𑀢𑀁 𑀲𑀓𑁆𑀔𑀺𑀁 𑀤𑀺𑀲𑁆𑀯𑀸 ‘‘𑀬𑀣𑀸𑀢𑀣𑀫𑁂𑀯𑀸’’𑀢𑀺 𑀅𑀜𑁆𑀜𑀸𑀢𑀦𑁆𑀢𑀺. 𑀢𑀁 𑀢𑀦𑁆𑀢𑀺 𑀢𑀲𑁆𑀫𑀸 𑀢𑀁. 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀦𑁆𑀢𑀺 𑀳𑁂𑀫𑀯𑀢𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀙𑀳𑀺 𑀆𑀓𑀸𑀭𑁂𑀳𑀺. 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀸𑀭𑀕𑀢𑀁.

𑁭𑁦𑁬. 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲𑀸𑀢𑀺 𑀅𑀦𑀕𑀸𑀭𑀺𑀬𑀁 𑀉𑀧𑁂𑀢𑀲𑁆𑀲, 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀸𑀘𑀭𑀺𑀬𑀁 𑀚𑀺𑀕𑀻𑀲𑀢𑁄𑀢𑀺 𑀅𑀭𑀺𑀬𑁂𑀳𑀺 𑀆𑀘𑀺𑀡𑁆𑀡𑀁 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀪𑀺𑀓𑁆𑀔𑀸𑀘𑀭𑀺𑀬𑀁 𑀧𑀭𑀺𑀬𑁂𑀲𑀫𑀸𑀦𑀲𑁆𑀲. 𑀫𑁄𑀦𑁂𑀬𑁆𑀬𑀦𑁆𑀢𑀺 𑀫𑀼𑀦𑀻𑀦𑀁 𑀲𑀦𑁆𑀢𑀓𑀁. 𑀉𑀢𑁆𑀢𑀫𑀁 𑀧𑀤𑀦𑁆𑀢𑀺 𑀉𑀢𑁆𑀢𑀫𑀧𑀝𑀺𑀧𑀤𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁭𑁦𑁭. 𑀅𑀣𑀲𑁆𑀲 𑀏𑀯𑀁 𑀧𑀼𑀝𑁆𑀞𑁄 𑀪𑀕𑀯𑀸 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀉𑀧𑀜𑁆𑀜𑀺𑀲𑁆𑀲𑀦𑁆𑀢𑀺 𑀉𑀧𑀜𑁆𑀜𑀸𑀧𑁂𑀬𑁆𑀬𑀁, 𑀯𑀺𑀯𑀭𑁂𑀬𑁆𑀬𑀁 𑀧𑀜𑁆𑀜𑀸𑀧𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀦𑁆𑀢𑀺 𑀓𑀸𑀢𑀼𑀜𑁆𑀘 𑀤𑀼𑀓𑁆𑀔𑀁 𑀓𑀬𑀺𑀭𑀫𑀸𑀦𑀜𑁆𑀘 𑀲𑀫𑁆𑀪𑀯𑀺𑀢𑀼𑀁 𑀲𑀳𑀺𑀢𑀼𑀁 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀳𑀁 𑀢𑁂 𑀫𑁄𑀦𑁂𑀬𑁆𑀬𑀁 𑀧𑀜𑁆𑀜𑀸𑀧𑁂𑀬𑁆𑀬𑀁, 𑀬𑀤𑀺 𑀦𑀁 𑀓𑀸𑀢𑀼𑀁 𑀯𑀸 𑀅𑀪𑀺𑀲𑀫𑁆𑀪𑁄𑀢𑀼𑀁 𑀯𑀸 𑀲𑀼𑀔𑀁 𑀪𑀯𑁂𑀬𑁆𑀬, 𑀏𑀯𑀁 𑀧𑀦 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀁 𑀧𑀼𑀣𑀼𑀚𑁆𑀚𑀦𑀓𑀸𑀮𑀢𑁄 𑀧𑀪𑀼𑀢𑀺 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄. 𑀢𑀣𑀸 𑀳𑀺 𑀦𑀁 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀏𑀓𑁄𑀯 𑀲𑀸𑀯𑀓𑁄 𑀓𑀭𑁄𑀢𑀺 𑀘 𑀲𑀫𑁆𑀪𑁄𑀢𑀺 𑀘𑀸𑀢𑀺.

𑀏𑀯𑀁 𑀪𑀕𑀯𑀸 𑀫𑁄𑀦𑁂𑀬𑁆𑀬𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀁 𑀤𑀼𑀭𑀪𑀺𑀲𑀫𑁆𑀪𑀯𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀦𑀸𑀮𑀓𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀢𑀫𑀲𑁆𑀲 𑀯𑀢𑁆𑀢𑀼𑀓𑀸𑀫𑁄 𑀆𑀳 ‘‘𑀳𑀦𑁆𑀤 𑀢𑁂 𑀦𑀁 𑀧𑀯𑀓𑁆𑀔𑀸𑀫𑀺, 𑀲𑀦𑁆𑀣𑀫𑁆𑀪𑀲𑁆𑀲𑀼 𑀤𑀴𑁆𑀳𑁄 𑀪𑀯𑀸’’𑀢𑀺. 𑀢𑀢𑁆𑀣 𑀳𑀦𑁆𑀤𑀸𑀢𑀺 𑀩𑁆𑀬𑀯𑀲𑀸𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂 𑀦𑀁 𑀧𑀯𑀓𑁆𑀔𑀸𑀫𑀻𑀢𑀺 𑀢𑀼𑀬𑁆𑀳𑀁 𑀢𑀁 𑀫𑁄𑀦𑁂𑀬𑁆𑀬𑀁 𑀧𑀯𑀓𑁆𑀔𑀸𑀫𑀺. 𑀲𑀦𑁆𑀣𑀫𑁆𑀪𑀲𑁆𑀲𑀽𑀢𑀺 𑀤𑀼𑀓𑁆𑀓𑀭𑀓𑀭𑀡𑀲𑀫𑀢𑁆𑀣𑁂𑀦 𑀯𑀻𑀭𑀺𑀬𑀽𑀧𑀢𑁆𑀣𑀫𑁆𑀪𑁂𑀦 𑀅𑀢𑁆𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑀬. 𑀤𑀴𑁆𑀳𑁄 𑀪𑀯𑀸𑀢𑀺 𑀤𑀼𑀭𑀪𑀺𑀲𑀫𑁆𑀪𑀯𑀲𑀳𑀦𑀲𑀫𑀢𑁆𑀣𑀸𑀬 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸𑀬 𑀣𑀺𑀭𑁄 𑀳𑁄𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀸 𑀢𑁆𑀯𑀁 𑀉𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑁄, 𑀢𑀲𑁆𑀫𑀸𑀳𑀁 𑀏𑀓𑀦𑁆𑀢𑀩𑁆𑀬𑀯𑀲𑀺𑀢𑁄𑀯 𑀳𑀼𑀢𑁆𑀯𑀸 𑀏𑀯𑀁 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀫𑁆𑀧𑀺 𑀲𑀫𑀸𑀦𑀁 𑀢𑀼𑀬𑁆𑀳𑀁 𑀢𑀁 𑀫𑁄𑀦𑁂𑀬𑁆𑀬𑀁 𑀧𑀯𑀓𑁆𑀔𑀸𑀫𑀺, 𑀲𑀦𑁆𑀣𑀫𑁆𑀪𑀲𑁆𑀲𑀼 𑀤𑀴𑁆𑀳𑁄 𑀪𑀯𑀸𑀢𑀺.

𑁭𑁦𑁮. 𑀏𑀯𑀁 𑀧𑀭𑀫𑀲𑀮𑁆𑀮𑁂𑀔𑀁 𑀫𑁄𑀦𑁂𑀬𑁆𑀬𑀯𑀢𑁆𑀢𑀁 𑀯𑀢𑁆𑀢𑀼𑀓𑀸𑀫𑁄 𑀦𑀸𑀮𑀓𑀁 𑀲𑀦𑁆𑀣𑀫𑁆𑀪𑀦𑁂 𑀤𑀴𑁆𑀳𑀻𑀪𑀸𑀯𑁂 𑀘 𑀦𑀺𑀬𑁄𑀚𑁂𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀕𑀸𑀫𑀽𑀧𑀦𑀺𑀩𑀤𑁆𑀥𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀸𑀦𑀪𑀸𑀕’’𑀦𑁆𑀢𑀺 𑀉𑀧𑀟𑁆𑀠𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀫𑀸𑀦𑀪𑀸𑀕𑀦𑁆𑀢𑀺 𑀲𑀫𑀪𑀸𑀕𑀁 𑀏𑀓𑀲𑀤𑀺𑀲𑀁 𑀦𑀺𑀦𑁆𑀦𑀸𑀦𑀸𑀓𑀭𑀡𑀁. 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑀦𑁆𑀢𑀺 𑀅𑀓𑁆𑀓𑁄𑀲𑀜𑁆𑀘 𑀯𑀦𑁆𑀤𑀦𑀜𑁆𑀘.

𑀇𑀤𑀸𑀦𑀺 𑀬𑀣𑀸 𑀢𑀁 𑀲𑀫𑀸𑀦𑀪𑀸𑀕𑀁 𑀓𑀬𑀺𑀭𑀢𑀺, 𑀢𑀁 𑀉𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑁄𑀧𑀤𑁄𑀲’’𑀦𑁆𑀢𑀺 𑀉𑀧𑀟𑁆𑀠𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀓𑁆𑀓𑀼𑀝𑁆𑀞𑁄 𑀫𑀦𑁄𑀧𑀤𑁄𑀲𑀁 𑀭𑀓𑁆𑀔𑁂𑀬𑁆𑀬, 𑀯𑀦𑁆𑀤𑀺𑀢𑁄 𑀲𑀦𑁆𑀢𑁄 𑀅𑀦𑀼𑀡𑁆𑀡𑀢𑁄 𑀘𑀭𑁂, 𑀭𑀜𑁆𑀜𑀸𑀧𑀺 𑀯𑀦𑁆𑀤𑀺𑀢𑁄 𑀲𑀫𑀸𑀦𑁄 ‘‘𑀫𑀁 𑀯𑀦𑁆𑀤𑀢𑀻’’𑀢𑀺 𑀉𑀤𑁆𑀥𑀘𑁆𑀘𑀁 𑀦𑀸𑀧𑀚𑁆𑀚𑁂𑀬𑁆𑀬.

𑁭𑁦𑁯. 𑀇𑀤𑀸𑀦𑀺 𑀅𑀭𑀜𑁆𑀜𑀽𑀧𑀦𑀺𑀩𑀤𑁆𑀥𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀘𑁆𑀘𑀸𑀯𑀘𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀭𑀜𑁆𑀜𑀲𑀜𑁆𑀜𑀺𑀢𑁂 𑀤𑀸𑀬𑁂𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀯𑀲𑁂𑀦 𑀉𑀘𑁆𑀘𑀸𑀯𑀘𑀸 𑀦𑀸𑀦𑀧𑁆𑀧𑀓𑀸𑀭𑀸 𑀆𑀭𑀫𑁆𑀫𑀡𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀘𑀓𑁆𑀔𑀸𑀤𑀻𑀦𑀁 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀢𑁂 𑀘 𑀔𑁄 𑀅𑀕𑁆𑀕𑀺𑀲𑀺𑀔𑀽𑀧𑀫𑀸 𑀧𑀭𑀺𑀴𑀸𑀳𑀚𑀦𑀓𑀝𑁆𑀞𑁂𑀦. 𑀬𑀣𑀸 𑀯𑀸 𑀟𑀬𑁆𑀳𑀫𑀸𑀦𑁂 𑀯𑀦𑁂 𑀅𑀕𑁆𑀕𑀺𑀲𑀺𑀔𑀸 𑀦𑀸𑀦𑀧𑁆𑀧𑀓𑀸𑀭𑀢𑀸𑀬 𑀉𑀘𑁆𑀘𑀸𑀯𑀘𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀥𑀽𑀫𑀸𑀧𑀺, 𑀯𑀺𑀥𑀽𑀫𑀸𑀧𑀺, 𑀦𑀻𑀮𑀸𑀧𑀺, 𑀧𑀻𑀢𑀸𑀧𑀺, 𑀭𑀢𑁆𑀢𑀸𑀧𑀺, 𑀔𑀼𑀤𑁆𑀤𑀓𑀸𑀧𑀺, 𑀫𑀳𑀦𑁆𑀢𑀸𑀧𑀺, 𑀏𑀯𑀁 𑀲𑀻𑀳𑀩𑁆𑀬𑀕𑁆𑀖𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀯𑀺𑀯𑀺𑀥𑀯𑀺𑀳𑀗𑁆𑀕𑀯𑀺𑀭𑀼𑀢𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑀸𑀬 𑀤𑀸𑀬𑁂 𑀉𑀘𑁆𑀘𑀸𑀯𑀘𑀸 𑀆𑀭𑀫𑁆𑀫𑀡𑀸 𑀦𑀺𑀘𑁆𑀙𑀭𑀦𑁆𑀢𑀺 𑀪𑀺𑀁𑀲𑀦𑀓𑀸𑀧𑀺, 𑀭𑀚𑀦𑀻𑀬𑀸𑀧𑀺, 𑀤𑁄𑀲𑀦𑀻𑀬𑀸𑀧𑀺, 𑀫𑁄𑀳𑀦𑀻𑀬𑀸𑀧𑀺. 𑀢𑁂𑀦𑀸𑀳 𑁋 ‘‘𑀉𑀘𑁆𑀘𑀸𑀯𑀘𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀤𑀸𑀬𑁂 𑀅𑀕𑁆𑀕𑀺𑀲𑀺𑀔𑀽𑀧𑀫𑀸’’𑀢𑀺. 𑀏𑀯𑀁 𑀦𑀺𑀘𑁆𑀙𑀭𑀦𑁆𑀢𑁂𑀲𑀼 𑀘 𑀉𑀘𑁆𑀘𑀸𑀯𑀘𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀸 𑀓𑀸𑀘𑀺 𑀉𑀬𑁆𑀬𑀸𑀦𑀯𑀦𑀘𑀸𑀭𑀺𑀓𑀁 𑀕𑀢𑀸 𑀲𑀫𑀸𑀦𑀸 𑀧𑀓𑀢𑀺𑀬𑀸 𑀯𑀸 𑀯𑀦𑀘𑀸𑀭𑀺𑀦𑀺𑀬𑁄 𑀓𑀝𑁆𑀞𑀳𑀸𑀭𑀺𑀓𑀸𑀤𑀬𑁄 𑀭𑀳𑁄𑀕𑀢𑀁 𑀤𑀺𑀲𑁆𑀯𑀸 𑀳𑀲𑀺𑀢𑀮𑀧𑀺𑀢𑀭𑀼𑀤𑀺𑀢𑀤𑀼𑀦𑁆𑀦𑀺𑀯𑀢𑁆𑀣𑀸𑀤𑀻𑀳𑀺 𑀦𑀸𑀭𑀺𑀬𑁄 𑀫𑀼𑀦𑀺𑀁 𑀧𑀮𑁄𑀪𑁂𑀦𑁆𑀢𑀺, 𑀢𑀸 𑀲𑀼 𑀢𑀁 𑀫𑀸 𑀧𑀮𑁄𑀪𑀬𑀼𑀁, 𑀢𑀸 𑀦𑀸𑀭𑀺𑀬𑁄 𑀢𑀁 𑀫𑀸 𑀧𑀮𑁄𑀪𑀬𑀼𑀁. 𑀬𑀣𑀸 𑀦 𑀧𑀮𑁄𑀪𑁂𑀦𑁆𑀢𑀺, 𑀢𑀣𑀸 𑀓𑀭𑁄𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁧𑁦-𑁧𑁧. 𑀏𑀯𑀫𑀲𑁆𑀲 𑀪𑀕𑀯𑀸 𑀕𑀸𑀫𑁂 𑀘 𑀅𑀭𑀜𑁆𑀜𑁂 𑀘 𑀧𑀝𑀺𑀧𑀢𑁆𑀢𑀺𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀻𑀮𑀲𑀁𑀯𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀭𑀢𑁄 𑀫𑁂𑀣𑀼𑀦𑀸 𑀥𑀫𑁆𑀫𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀳𑀺𑀢𑁆𑀯𑀸 𑀓𑀸𑀫𑁂 𑀧𑀭𑁄𑀧𑀭𑁂𑀢𑀺 𑀫𑁂𑀣𑀼𑀦𑀥𑀫𑁆𑀫𑀢𑁄 𑀅𑀯𑀲𑁂𑀲𑁂𑀧𑀺 𑀲𑀼𑀦𑁆𑀤𑀭𑁂 𑀘 𑀅𑀲𑀼𑀦𑁆𑀤𑀭𑁂 𑀘 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸. 𑀢𑀧𑁆𑀧𑀳𑀸𑀦𑁂𑀦 𑀳𑀺 𑀫𑁂𑀣𑀼𑀦𑀯𑀺𑀭𑀢𑀺 𑀲𑀼𑀲𑀫𑁆𑀧𑀦𑁆𑀦𑀸 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀳𑀺𑀢𑁆𑀯𑀸 𑀓𑀸𑀫𑁂 𑀧𑀭𑁄𑀧𑀭𑁂’’𑀢𑀺. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀯𑀺𑀭𑀼𑀤𑁆𑀥𑁄’’𑀢𑀺𑀆𑀤𑀻𑀦𑀺 𑀧𑀦 𑀧𑀤𑀸𑀦𑀺 ‘‘𑀦 𑀳𑀦𑁂𑀬𑁆𑀬, 𑀦 𑀖𑀸𑀢𑀬𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀬𑀸 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀧𑀭𑀧𑀓𑁆𑀔𑀺𑀬𑁂𑀲𑀼 𑀧𑀸𑀡𑁂𑀲𑀼 𑀅𑀯𑀺𑀭𑀼𑀤𑁆𑀥𑁄, 𑀅𑀢𑁆𑀢𑀧𑀓𑁆𑀔𑀺𑀬𑁂𑀲𑀼 𑀅𑀲𑀸𑀭𑀢𑁆𑀢𑁄, 𑀲𑀩𑁆𑀩𑁂𑀧𑀺 𑀲𑀢𑀡𑁆𑀳𑀦𑀺𑀢𑁆𑀢𑀡𑁆𑀳𑀢𑀸𑀬 𑀢𑀲𑀣𑀸𑀯𑀭𑁂 𑀧𑀸𑀡𑁂 𑀚𑀻𑀯𑀺𑀢𑀼𑀓𑀸𑀫𑀢𑀸𑀬 𑀅𑀫𑀭𑀺𑀢𑀼𑀓𑀸𑀫𑀢𑀸𑀬 𑀲𑀼𑀔𑀓𑀸𑀫𑀢𑀸𑀬 𑀤𑀼𑀓𑁆𑀔𑀧𑀝𑀺𑀓𑀽𑀮𑀢𑀸𑀬 𑀘 ‘‘𑀬𑀣𑀸 𑀅𑀳𑀁 𑀢𑀣𑀸 𑀏𑀢𑁂’’𑀢𑀺 𑀅𑀢𑁆𑀢𑀲𑀫𑀸𑀦𑀢𑀸𑀬 𑀢𑁂𑀲𑀼 𑀯𑀺𑀭𑁄𑀥𑀁 𑀯𑀺𑀦𑁂𑀦𑁆𑀢𑁄 𑀢𑁂𑀦𑁂𑀯 𑀧𑀓𑀸𑀭𑁂𑀦 ‘‘𑀬𑀣𑀸 𑀏𑀢𑁂 𑀢𑀣𑀸 𑀅𑀳’’𑀦𑁆𑀢𑀺 𑀧𑀭𑁂𑀲𑀁 𑀲𑀫𑀸𑀦𑀢𑀸𑀬 𑀘 𑀅𑀢𑁆𑀢𑀦𑀺 𑀅𑀦𑀼𑀭𑁄𑀥𑀁 𑀯𑀺𑀦𑁂𑀦𑁆𑀢𑁄 𑀏𑀯𑀁 𑀉𑀪𑀬𑀣𑀸𑀧𑀺 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀻𑀦𑁄 𑀳𑀼𑀢𑁆𑀯𑀸 𑀫𑀭𑀡𑀧𑀝𑀺𑀓𑀽𑀮𑀢𑀸𑀬 𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸 𑀧𑀸𑀡𑁂𑀲𑀼 𑀬𑁂 𑀓𑁂𑀘𑀺 𑀢𑀲𑁂 𑀯𑀸 𑀣𑀸𑀯𑀭𑁂 𑀯𑀸 𑀧𑀸𑀡𑁂 𑀦 𑀳𑀦𑁂𑀬𑁆𑀬 𑀲𑀸𑀳𑀢𑁆𑀣𑀺𑀓𑀸𑀤𑀻𑀳𑀺 𑀧𑀬𑁄𑀕𑁂𑀳𑀺, 𑀦 𑀖𑀸𑀢𑀬𑁂 𑀆𑀡𑀢𑁆𑀢𑀺𑀓𑀸𑀤𑀻𑀳𑀻𑀢𑀺.

𑁭𑁧𑁨. 𑀏𑀯𑀫𑀲𑁆𑀲 𑀫𑁂𑀣𑀼𑀦𑀯𑀺𑀭𑀢𑀺𑀧𑀸𑀡𑀸𑀢𑀺𑀧𑀸𑀢𑀯𑀺𑀭𑀢𑀺𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀢𑁆𑀯𑀸 ‘‘𑀳𑀺𑀢𑁆𑀯𑀸 𑀓𑀸𑀫𑁂’’𑀢𑀺𑀆𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀺𑀢𑁆𑀯𑀸 𑀇𑀘𑁆𑀙𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀸𑀬𑀁 𑀢𑀡𑁆𑀳𑀸 𑀏𑀓𑀁 𑀮𑀤𑁆𑀥𑀸 𑀤𑀼𑀢𑀺𑀬𑀁 𑀇𑀘𑁆𑀙𑀢𑀺, 𑀤𑁆𑀯𑁂 𑀮𑀤𑁆𑀥𑀸 𑀢𑀢𑀺𑀬𑀁, 𑀲𑀢𑀲𑀳𑀲𑁆𑀲𑀁 𑀮𑀤𑁆𑀥𑀸 𑀢𑀤𑀼𑀢𑁆𑀢𑀭𑀺𑀫𑁆𑀧𑀺 𑀇𑀘𑁆𑀙𑀢𑀻𑀢𑀺 𑀏𑀯𑀁 𑀅𑀧𑁆𑀧𑀝𑀺𑀮𑀤𑁆𑀥𑀯𑀺𑀲𑀬𑀁 𑀇𑀘𑁆𑀙𑀦𑀢𑁄 ‘‘𑀇𑀘𑁆𑀙𑀸’’𑀢𑀺 𑀯𑀼𑀘𑁆𑀘𑀢𑀺, 𑀬𑁄 𑀘𑀸𑀬𑀁 𑀧𑀝𑀺𑀮𑀤𑁆𑀥𑀯𑀺𑀲𑀬𑀮𑀼𑀩𑁆𑀪𑀦𑁄 𑀮𑁄𑀪𑁄. 𑀢𑀁 𑀳𑀺𑀢𑁆𑀯𑀸 𑀇𑀘𑁆𑀙𑀜𑁆𑀘 𑀮𑁄𑀪𑀜𑁆𑀘 𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄, 𑀬𑀲𑁆𑀫𑀺𑀁 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂 𑀢𑁂𑀳𑀺 𑀇𑀘𑁆𑀙𑀸𑀮𑁄𑀪𑁂𑀳𑀺 𑀧𑀼𑀣𑀼𑀚𑁆𑀚𑀦𑁄 𑀲𑀢𑁆𑀢𑁄 𑀮𑀕𑁆𑀕𑁄 𑀧𑀝𑀺𑀩𑀤𑁆𑀥𑁄 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀢𑀁 𑀉𑀪𑀬𑀫𑁆𑀧𑀺 𑀳𑀺𑀢𑁆𑀯𑀸 𑀧𑀘𑁆𑀘𑀬𑀢𑁆𑀣𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀯𑀺𑀭𑁄𑀥𑁂𑀦𑁆𑀢𑁄 𑀜𑀸𑀡𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀸 𑀳𑀼𑀢𑁆𑀯𑀸 𑀇𑀫𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀏𑀯𑀜𑁆𑀳𑀺 𑀧𑀝𑀺𑀧𑀦𑁆𑀦𑁄 𑀢𑀭𑁂𑀬𑁆𑀬 𑀦𑀭𑀓𑀁 𑀇𑀫𑀁, 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀦𑀭𑀓𑀲𑀜𑁆𑀜𑀺𑀢𑀁 𑀫𑀺𑀘𑁆𑀙𑀸𑀚𑀻𑀯𑀳𑁂𑀢𑀼𑀪𑀽𑀢𑀁 𑀇𑀫𑀁 𑀧𑀘𑁆𑀘𑀬𑀢𑀡𑁆𑀳𑀁 𑀢𑀭𑁂𑀬𑁆𑀬, 𑀇𑀫𑀸𑀬 𑀯𑀸 𑀧𑀝𑀺𑀧𑀤𑀸𑀬 𑀢𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁧𑁩. 𑀏𑀯𑀁 𑀧𑀘𑁆𑀘𑀬𑀢𑀡𑁆𑀳𑀸𑀧𑀳𑀸𑀦𑀫𑀼𑀔𑁂𑀦 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀫𑀼𑀔𑁂𑀦 𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀻𑀮𑀁 𑀢𑀤𑀦𑀼𑀲𑀸𑀭𑁂𑀦 𑀘 𑀬𑀸𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺, 𑀢𑀸𑀯 𑀧𑀝𑀺𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀊𑀦𑀽𑀤𑀭𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑁂𑀲𑀼 𑀇𑀢𑀭𑀻𑀢𑀭𑀘𑀻𑀯𑀭𑀸𑀤𑀻𑀲𑀼 𑀧𑀘𑁆𑀘𑀬𑁂𑀲𑀼 𑀆𑀳𑀸𑀭𑀁 𑀢𑀸𑀯 𑀆𑀳𑀸𑀭𑁂𑀦𑁆𑀢𑁄 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩) 𑁋

𑀯𑀼𑀢𑁆𑀢𑀦𑀬𑁂𑀦 𑀊𑀦𑀉𑀤𑀭𑁄 𑀅𑀲𑁆𑀲, 𑀦 𑀯𑀸𑀢𑀪𑀭𑀺𑀢𑀪𑀲𑁆𑀢𑀸 𑀯𑀺𑀬 𑀉𑀤𑁆𑀥𑀼𑀫𑀸𑀢𑀼𑀤𑀭𑁄, 𑀪𑀢𑁆𑀢𑀲𑀫𑁆𑀫𑀤𑀧𑀘𑁆𑀘𑀬𑀸 𑀣𑀺𑀦𑀫𑀺𑀤𑁆𑀥𑀁 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀊𑀦𑀽𑀤𑀭𑁄 𑀳𑁄𑀦𑁆𑀢𑁄𑀧𑀺 𑀘 𑀫𑀺𑀢𑀸𑀳𑀸𑀭𑁄 𑀅𑀲𑁆𑀲 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽, ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀕𑀼𑀡𑀢𑁄 𑀤𑁄𑀲𑀢𑁄 𑀘 𑀧𑀭𑀺𑀘𑁆𑀙𑀺𑀦𑁆𑀦𑀸𑀳𑀸𑀭𑁄. 𑀏𑀯𑀁 𑀫𑀺𑀢𑀸𑀳𑀸𑀭𑁄 𑀲𑀫𑀸𑀦𑁄𑀧𑀺 𑀧𑀘𑁆𑀘𑀬𑀥𑀼𑀢𑀗𑁆𑀕𑀧𑀭𑀺𑀬𑀢𑁆𑀢𑀺𑀅𑀥𑀺𑀕𑀫𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀺𑀘𑁆𑀙𑁄 𑀅𑀲𑁆𑀲. 𑀏𑀓𑀁𑀲𑁂𑀦 𑀳𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀅𑀧𑁆𑀧𑀺𑀘𑁆𑀙𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀲𑁆𑀲𑀦𑀸 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑀢𑀸. 𑀥𑀼𑀢𑀗𑁆𑀕𑀥𑀭𑀲𑁆𑀲𑁂𑀯 𑀲𑀢𑁄 ‘‘𑀥𑀼𑀢𑀯𑀸𑀢𑀺 𑀫𑀁 𑀧𑀭𑁂 𑀚𑀸𑀦𑀦𑁆𑀢𑀽’’𑀢𑀺 𑀅𑀦𑀺𑀘𑁆𑀙𑀦𑀢𑀸 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑀢𑀸. 𑀩𑀳𑀼𑀲𑁆𑀲𑀼𑀢𑀲𑁆𑀲𑁂𑀯 𑀲𑀢𑁄 ‘‘𑀩𑀳𑀼𑀲𑁆𑀲𑀼𑀢𑁄𑀢𑀺 𑀫𑀁 𑀧𑀭𑁂 𑀚𑀸𑀦𑀦𑁆𑀢𑀽’’𑀢𑀺 𑀅𑀦𑀺𑀘𑁆𑀙𑀦𑀢𑀸 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑀢𑀸 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀅𑀥𑀺𑀕𑀫𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀲𑀢𑁄 ‘‘𑀅𑀥𑀺𑀕𑀢𑁄 𑀅𑀬𑀁 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀫𑀁 𑀧𑀭𑁂 𑀚𑀸𑀦𑀦𑁆𑀢𑀽’’𑀢𑀺 𑀅𑀦𑀺𑀘𑁆𑀙𑀦𑀢𑀸 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑀢𑀸. 𑀲𑀸 𑀘 𑀅𑀭𑀳𑀢𑁆𑀢𑀸𑀥𑀺𑀕𑀫𑀢𑁄 𑀑𑀭𑀁 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀳𑀢𑁆𑀢𑀸𑀥𑀺𑀕𑀫𑀢𑁆𑀣𑀜𑁆𑀳𑀺 𑀅𑀬𑀁 𑀧𑀝𑀺𑀧𑀤𑀸𑀢𑀺. 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄𑀧𑀺 𑀘 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀡𑁆𑀳𑀸𑀮𑁄𑀮𑀼𑀧𑁆𑀧𑀁 𑀳𑀺𑀢𑁆𑀯𑀸 𑀅𑀮𑁄𑀮𑀼𑀧𑁄 𑀅𑀲𑁆𑀲. 𑀏𑀯𑀁 𑀅𑀮𑁄𑀮𑀼𑀧𑁄 𑀳𑀺 𑀲𑀤𑀸 𑀇𑀘𑁆𑀙𑀸𑀬 𑀦𑀺𑀘𑁆𑀙𑀸𑀢𑁄 𑀅𑀦𑀺𑀘𑁆𑀙𑁄 𑀳𑁄𑀢𑀺 𑀦𑀺𑀩𑁆𑀩𑀼𑀢𑁄, 𑀬𑀸𑀬 𑀇𑀘𑁆𑀙𑀸𑀬 𑀙𑀸𑀢𑀸 𑀳𑁄𑀦𑁆𑀢𑀺 𑀲𑀢𑁆𑀢𑀸 𑀔𑀼𑀧𑁆𑀧𑀺𑀧𑀸𑀲𑀸𑀢𑀼𑀭𑀸 𑀯𑀺𑀬 𑀅𑀢𑀺𑀢𑁆𑀢𑀸, 𑀢𑀸𑀬 𑀇𑀘𑁆𑀙𑀸𑀬 𑀅𑀦𑀺𑀘𑁆𑀙𑁄 𑀳𑁄𑀢𑀺 𑀅𑀦𑀺𑀘𑁆𑀙𑀢𑁆𑀢𑀸 𑀘 𑀦𑀺𑀘𑁆𑀙𑀸𑀢𑁄 𑀳𑁄𑀢𑀺 𑀅𑀦𑀸𑀢𑀼𑀭𑁄 𑀧𑀭𑀫𑀢𑀺𑀢𑁆𑀢𑀺𑀧𑁆𑀧𑀢𑁆𑀢𑁄. 𑀏𑀯𑀁 𑀦𑀺𑀘𑁆𑀙𑀸𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄 𑀳𑁄𑀢𑀺 𑀯𑀽𑀧𑀲𑀦𑁆𑀢𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑁄𑀢𑀺 𑀏𑀯𑀫𑁂𑀢𑁆𑀣 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁭𑁧𑁪. 𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺, 𑀢𑀸𑀯𑀧𑀝𑀺𑀧𑀤𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀦𑀺𑀝𑁆𑀞𑀁 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀁 𑀲𑁂𑀦𑀸𑀲𑀦𑀯𑀢𑁆𑀢𑀜𑁆𑀘 𑀓𑀣𑁂𑀦𑁆𑀢𑁄 ‘‘𑀲 𑀧𑀺𑀡𑁆𑀟𑀘𑀸𑀭’’𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀲 𑀧𑀺𑀡𑁆𑀟𑀘𑀸𑀭𑀁 𑀘𑀭𑀺𑀢𑁆𑀯𑀸𑀢𑀺 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀯𑀸 𑀓𑀢𑁆𑀯𑀸. 𑀯𑀦𑀦𑁆𑀢𑀫𑀪𑀺𑀳𑀸𑀭𑀬𑁂𑀢𑀺 𑀅𑀧𑀧𑀜𑁆𑀘𑀺𑀢𑁄 𑀕𑀺𑀳𑀺𑀧𑀧𑀜𑁆𑀘𑁂𑀦 𑀯𑀦𑀁 𑀏𑀯 𑀕𑀘𑁆𑀙𑁂𑀬𑁆𑀬. 𑀉𑀧𑀝𑁆𑀞𑀺𑀢𑁄 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀦𑁆𑀢𑀺 𑀭𑀼𑀓𑁆𑀔𑀫𑀽𑀮𑁂 𑀞𑀺𑀢𑁄 𑀯𑀸 𑀳𑀼𑀢𑁆𑀯𑀸. 𑀆𑀲𑀦𑀽𑀧𑀕𑀢𑁄𑀢𑀺 𑀆𑀲𑀦𑀁 𑀉𑀧𑀕𑀢𑁄 𑀯𑀸 𑀳𑀼𑀢𑁆𑀯𑀸, 𑀦𑀺𑀲𑀺𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀦𑀻𑀢𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀏𑀢𑁆𑀣 𑀘 ‘‘𑀧𑀺𑀡𑁆𑀟𑀘𑀸𑀭𑀁 𑀘𑀭𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑁄 𑀲𑀧𑀤𑀸𑀦𑀘𑀸𑀭𑀻 𑀏𑀓𑀸𑀲𑀦𑀺𑀓𑁄 𑀧𑀢𑁆𑀢𑀧𑀺𑀡𑁆𑀟𑀺𑀓𑁄 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀘 𑀳𑁄𑀢𑀺𑀬𑁂𑀯, 𑀢𑁂𑀘𑀻𑀯𑀭𑀺𑀓𑀧𑀁𑀲𑀼𑀓𑀽𑀮𑀫𑁆𑀧𑀺 𑀘 𑀲𑀫𑀸𑀤𑀺𑀬𑀢𑁂𑀯, 𑀢𑀲𑁆𑀫𑀸 𑀇𑀫𑀸𑀦𑀺𑀧𑀺 𑀙 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. ‘‘𑀯𑀦𑀦𑁆𑀢𑀫𑀪𑀺𑀳𑀸𑀭𑀬𑁂’’𑀢𑀺 𑀇𑀫𑀺𑀦𑀸 𑀧𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀯𑀼𑀢𑁆𑀢𑀁, ‘‘𑀉𑀧𑀝𑁆𑀞𑀺𑀢𑁄 𑀭𑀼𑀓𑁆𑀔𑀫𑀽𑀮𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁, ‘‘𑀆𑀲𑀦𑀽𑀧𑀕𑀢𑁄’’𑀢𑀺 𑀇𑀫𑀺𑀦𑀸 𑀦𑁂𑀲𑀚𑁆𑀚𑀺𑀓𑀗𑁆𑀕𑀁. 𑀬𑀣𑀸𑀓𑁆𑀓𑀫𑀁 𑀧𑀦 𑀏𑀢𑁂𑀲𑀁 𑀅𑀦𑀼𑀮𑁄𑀫𑀢𑁆𑀢𑀸 𑀅𑀩𑁆𑀪𑁄𑀓𑀸𑀲𑀺𑀓𑀬𑀣𑀸𑀲𑀦𑁆𑀣𑀢𑀺𑀓𑀲𑁄𑀲𑀸𑀦𑀺𑀓𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺𑀬𑁂𑀯 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀢𑀸𑀬 𑀕𑀸𑀣𑀸𑀬 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 𑀓𑀣𑁂𑀲𑀺.

𑁭𑁧𑁫. 𑀲 𑀛𑀸𑀦𑀧𑀲𑀼𑀢𑁄 𑀥𑀻𑀭𑁄𑀢𑀺 𑀲𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀦𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂𑀳𑀺 𑀘 𑀛𑀸𑀦𑁂𑀲𑀼 𑀧𑀲𑀼𑀢𑁄 𑀅𑀦𑀼𑀬𑀼𑀢𑁆𑀢𑁄. 𑀥𑀻𑀭𑁄𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑁄. 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸𑀢𑀺 𑀯𑀦𑁂 𑀅𑀪𑀺𑀭𑀢𑁄 𑀲𑀺𑀬𑀸, 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀦𑀸𑀪𑀺𑀭𑀫𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀛𑀸𑀬𑁂𑀣 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀅𑀢𑁆𑀢𑀸𑀦𑀫𑀪𑀺𑀢𑁄𑀲𑀬𑀦𑁆𑀢𑀺 𑀦 𑀓𑁂𑀯𑀮𑀁 𑀮𑁄𑀓𑀺𑀬𑀚𑁆𑀛𑀸𑀦𑀧𑀲𑀼𑀢𑁄𑀬𑁂𑀯 𑀲𑀺𑀬𑀸, 𑀅𑀧𑀺𑀘 𑀔𑁄 𑀢𑀲𑁆𑀫𑀺𑀁𑀬𑁂𑀯 𑀭𑀼𑀓𑁆𑀔𑀫𑀽𑀮𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑁂𑀦 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑁂𑀦𑀸𑀧𑀺 𑀅𑀢𑁆𑀢𑀸𑀦𑀁 𑀅𑀢𑀻𑀯 𑀢𑁄𑀲𑁂𑀦𑁆𑀢𑁄 𑀛𑀸𑀬𑁂𑀣. 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑀺𑀬𑀸 𑀳𑀺 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑁂𑀦𑁂𑀯 𑀘𑀺𑀢𑁆𑀢𑀁 𑀅𑀢𑀻𑀯 𑀢𑀼𑀲𑁆𑀲𑀢𑀺, 𑀦 𑀅𑀜𑁆𑀜𑁂𑀦. 𑀢𑁂𑀦𑀸𑀳 𑁋 ‘‘𑀅𑀢𑁆𑀢𑀸𑀦𑀫𑀪𑀺𑀢𑁄𑀲𑀬’’𑀦𑁆𑀢𑀺. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀛𑀸𑀦𑀧𑀲𑀼𑀢𑀢𑀸𑀬 𑀯𑀦𑀦𑁆𑀢𑀲𑁂𑀦𑀸𑀲𑀦𑀸𑀪𑀺𑀭𑀢𑀺𑀁 𑀅𑀭𑀳𑀢𑁆𑀢𑀜𑁆𑀘 𑀓𑀣𑁂𑀲𑀺.

𑁭𑁧𑁬. 𑀇𑀤𑀸𑀦𑀺 𑀬𑀲𑁆𑀫𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀸𑀮𑀓𑀢𑁆𑀣𑁂𑀭𑁄 𑀯𑀦𑀦𑁆𑀢𑀫𑀪𑀺𑀳𑀸𑀭𑁂𑀢𑁆𑀯𑀸 𑀦𑀺𑀭𑀸𑀳𑀸𑀭𑁄𑀧𑀺 𑀧𑀝𑀺𑀧𑀤𑀸𑀧𑀽𑀭𑀡𑁂 𑀅𑀢𑀻𑀯 𑀉𑀲𑁆𑀲𑀼𑀓𑁆𑀓𑁄 𑀅𑀳𑁄𑀲𑀺, 𑀦𑀺𑀭𑀸𑀳𑀸𑀭𑁂𑀦 𑀘 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀚𑀻𑀯𑀺𑀢𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀓𑀺𑀮𑁂𑀲𑁂 𑀧𑀦 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁂𑀦 𑀆𑀳𑀸𑀭𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀅𑀬𑀫𑁂𑀢𑁆𑀣 𑀜𑀸𑀬𑁄. 𑀢𑀲𑁆𑀫𑀸 𑀢𑀲𑁆𑀲 𑀪𑀕𑀯𑀸 𑀅𑀧𑀭𑀸𑀧𑀭𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀓𑀺𑀮𑁂𑀲𑀸 𑀧𑀦 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀦𑀺𑀝𑁆𑀞𑀁𑀬𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀓𑀣𑁂𑀦𑁆𑀢𑁄 ‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂’’𑀢𑀺𑀆𑀤𑀺𑀓𑀸 𑀙 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀢𑀢𑁄𑀢𑀺 ‘‘𑀲 𑀧𑀺𑀡𑁆𑀟𑀘𑀸𑀭𑀁 𑀘𑀭𑀺𑀢𑁆𑀯𑀸, 𑀯𑀦𑀦𑁆𑀢𑀫𑀪𑀺𑀳𑀸𑀭𑀬𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀺𑀡𑁆𑀟𑀘𑀸𑀭𑀯𑀦𑀦𑁆𑀢𑀸𑀪𑀺𑀳𑀸𑀭𑀢𑁄 𑀉𑀢𑁆𑀢𑀭𑀺𑀧𑀺. 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂𑀢𑀺 𑀭𑀢𑁆𑀢𑀺𑀲𑀫𑀢𑀺𑀓𑁆𑀓𑀫𑁂, 𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀸𑀫𑀦𑁆𑀢𑀫𑀪𑀺𑀳𑀸𑀭𑀬𑁂𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑁂𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀕𑀸𑀫𑀁 𑀕𑀘𑁆𑀙𑁂𑀬𑁆𑀬. 𑀅𑀯𑁆𑀳𑀸𑀦𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬𑀸𑀢𑀺 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀫𑀦𑁆𑀢𑀦𑀁, ‘‘𑀤𑁂𑀢𑀺 𑀦𑀼 𑀔𑁄 𑀦 𑀤𑁂𑀢𑀺 𑀦𑀼 𑀔𑁄 𑀲𑀼𑀦𑁆𑀤𑀭𑀁 𑀦𑀼 𑀔𑁄 𑀤𑁂𑀢𑀺 𑀅𑀲𑀼𑀦𑁆𑀤𑀭𑀁 𑀦𑀼 𑀔𑁄 𑀤𑁂𑀢𑀻’’𑀢𑀺 𑀏𑀯𑀭𑀽𑀧𑀁 𑀯𑀺𑀢𑀓𑁆𑀓𑀁 𑀪𑁄𑀚𑀦𑀜𑁆𑀘 𑀧𑀝𑀺𑀧𑀤𑀸𑀧𑀽𑀭𑀓𑁄 𑀪𑀺𑀓𑁆𑀔𑀼 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀧𑀦 𑀩𑀮𑀓𑁆𑀓𑀸𑀭𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄, 𑀥𑀼𑀢𑀗𑁆𑀕𑀁 𑀦 𑀓𑀼𑀧𑁆𑀧𑀢𑀺, 𑀢𑀤𑀼𑀧𑀸𑀤𑀸𑀬 𑀧𑀦 𑀢𑀁 𑀕𑀸𑀫𑀁 𑀦 𑀧𑀯𑀺𑀲𑀺𑀢𑀩𑁆𑀩𑀁. 𑀅𑀪𑀺𑀳𑀸𑀭𑀜𑁆𑀘 𑀕𑀸𑀫𑀢𑁄𑀢𑀺 𑀲𑀘𑁂 𑀕𑀸𑀫𑀁 𑀧𑀯𑀺𑀝𑁆𑀞𑀲𑁆𑀲 𑀧𑀸𑀢𑀺𑀲𑀢𑁂𑀳𑀺𑀧𑀺 𑀪𑀢𑁆𑀢𑀁 𑀅𑀪𑀺𑀳𑀭𑀦𑁆𑀢𑀺, 𑀢𑀫𑁆𑀧𑀺 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀢𑀢𑁄 𑀏𑀓𑀲𑀺𑀢𑁆𑀣𑀫𑁆𑀧𑀺 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀅𑀜𑁆𑀜𑀤𑀢𑁆𑀣𑀼 𑀖𑀭𑀧𑀝𑀺𑀧𑀸𑀝𑀺𑀬𑀸 𑀧𑀺𑀡𑁆𑀟𑀧𑀸𑀢𑀫𑁂𑀯 𑀘𑀭𑁂𑀬𑁆𑀬𑀸𑀢𑀺.

𑁭𑁧𑁭. 𑀦 𑀫𑀼𑀦𑀻 𑀕𑀸𑀫𑀫𑀸𑀕𑀫𑁆𑀫, 𑀓𑀼𑀮𑁂𑀲𑀼 𑀲𑀳𑀲𑀸 𑀘𑀭𑁂𑀢𑀺 𑀲𑁄 𑀘 𑀫𑁄𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀓𑁄 𑀫𑀼𑀦𑀺 𑀕𑀸𑀫𑀁 𑀕𑀢𑁄 𑀲𑀫𑀸𑀦𑁄 𑀓𑀼𑀮𑁂𑀲𑀼 𑀲𑀳𑀲𑀸 𑀦 𑀘𑀭𑁂, 𑀲𑀳𑀲𑁄𑀓𑀺𑀢𑀸𑀤𑀺𑀅𑀦𑀦𑀼𑀮𑁄𑀫𑀺𑀓𑀁 𑀕𑀺𑀳𑀺𑀲𑀁𑀲𑀕𑁆𑀕𑀁 𑀦 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀖𑀸𑀲𑁂𑀲𑀦𑀁 𑀙𑀺𑀦𑁆𑀦𑀓𑀣𑁄, 𑀦 𑀯𑀸𑀘𑀁 𑀧𑀬𑀼𑀢𑀁 𑀪𑀡𑁂𑀢𑀺 𑀙𑀺𑀦𑁆𑀦𑀓𑀣𑁄 𑀯𑀺𑀬 𑀳𑀼𑀢𑁆𑀯𑀸 𑀑𑀪𑀸𑀲𑀧𑀭𑀺𑀓𑀣𑀸𑀦𑀺𑀫𑀺𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀧𑀬𑀼𑀢𑁆𑀢𑀁 𑀖𑀸𑀲𑁂𑀲𑀦𑀯𑀸𑀘𑀁 𑀦 𑀪𑀡𑁂𑀬𑁆𑀬. 𑀲𑀘𑁂 𑀆𑀓𑀗𑁆𑀔𑁂𑀬𑁆𑀬, 𑀕𑀺𑀮𑀸𑀦𑁄 𑀲𑀫𑀸𑀦𑁄 𑀕𑁂𑀮𑀜𑁆𑀜𑀧𑀝𑀺𑀩𑀸𑀳𑀦𑀢𑁆𑀣𑀸𑀬 𑀪𑀡𑁂𑀬𑁆𑀬. 𑀲𑁂𑀦𑀸𑀲𑀦𑀢𑁆𑀣𑀸𑀬 𑀯𑀸 𑀯𑀺𑀜𑁆𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀑𑀪𑀸𑀲𑀧𑀭𑀺𑀓𑀣𑀸𑀦𑀺𑀫𑀺𑀢𑁆𑀢𑀧𑀬𑀼𑀢𑁆𑀢𑀁, 𑀅𑀯𑀲𑁂𑀲𑀧𑀘𑁆𑀘𑀬𑀢𑁆𑀣𑀸𑀬 𑀧𑀦 𑀅𑀕𑀺𑀮𑀸𑀦𑁄 𑀦𑁂𑀯 𑀓𑀺𑀜𑁆𑀘𑀺 𑀪𑀡𑁂𑀬𑁆𑀬𑀸𑀢𑀺.

𑁭𑁧𑁮-𑁯. 𑀅𑀮𑀢𑁆𑀣𑀁 𑀬𑀤𑀺𑀤𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀦 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀺𑀲𑁆𑀫𑀺𑀜𑁆𑀘𑀺 𑀮𑀤𑁆𑀥𑁂 ‘‘𑀅𑀮𑀢𑁆𑀣𑀁 𑀬𑀁 𑀇𑀤𑀁 𑀲𑀸𑀥𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀮𑀤𑁆𑀥𑁂 ‘‘𑀦𑀸𑀮𑀢𑁆𑀣𑀁 𑀓𑀼𑀲𑀮’’𑀦𑁆𑀢𑀺 𑀢𑀫𑁆𑀧𑀺 ‘‘𑀲𑀼𑀦𑁆𑀤𑀭’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀪𑀬𑁂𑀦𑁂𑀯 𑀮𑀸𑀪𑀸𑀮𑀸𑀪𑁂𑀦 𑀲𑁄 𑀢𑀸𑀤𑀻 𑀦𑀺𑀩𑁆𑀩𑀺𑀓𑀸𑀭𑁄 𑀳𑀼𑀢𑁆𑀯𑀸 𑀭𑀼𑀓𑁆𑀔𑀁𑀯𑀼𑀧𑀦𑀺𑀯𑀢𑁆𑀢𑀢𑀺, 𑀬𑀣𑀸𑀧𑀺 𑀧𑀼𑀭𑀺𑀲𑁄 𑀨𑀮𑀕𑀯𑁂𑀲𑀻 𑀭𑀼𑀓𑁆𑀔𑀁 𑀉𑀧𑀕𑀫𑁆𑀫 𑀨𑀮𑀁 𑀮𑀤𑁆𑀥𑀸𑀧𑀺 𑀅𑀮𑀤𑁆𑀥𑀸𑀧𑀺 𑀅𑀦𑀦𑀼𑀦𑀻𑀢𑁄 𑀅𑀧𑁆𑀧𑀝𑀺𑀳𑀢𑁄 𑀫𑀚𑁆𑀛𑀢𑁆𑀢𑁄𑀬𑁂𑀯 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀁 𑀓𑀼𑀮𑀁 𑀉𑀧𑀕𑀫𑁆𑀫 𑀮𑀸𑀪𑀁 𑀮𑀤𑁆𑀥𑀸𑀧𑀺 𑀅𑀮𑀤𑁆𑀥𑀸𑀧𑀺 𑀫𑀚𑁆𑀛𑀢𑁆𑀢𑁄𑀯 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺. 𑀲 𑀧𑀢𑁆𑀢𑀧𑀸𑀡𑀻 𑀢𑀺 𑀕𑀸𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀯.

𑁭𑁨𑁦. 𑀉𑀘𑁆𑀘𑀸𑀯𑀘𑀸𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑁋 𑀏𑀯𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺 𑀢𑀸𑀯𑀢𑀓𑁂𑀦𑁂𑀯 𑀢𑀼𑀝𑁆𑀞𑀺𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀧𑀤𑀁 𑀆𑀭𑁄𑀥𑁂𑀬𑁆𑀬. 𑀧𑀝𑀺𑀧𑀢𑁆𑀢𑀺𑀲𑀸𑀭𑀜𑁆𑀳𑀺 𑀲𑀸𑀲𑀦𑀁. 𑀲𑀸 𑀘𑀸𑀬𑀁 𑀉𑀘𑁆𑀘𑀸𑀯𑀘𑀸…𑀧𑁂… 𑀫𑀼𑀢𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀸 𑀘𑀸𑀬𑀁 𑀫𑀕𑁆𑀕𑀧𑀝𑀺𑀧𑀤𑀸 𑀉𑀢𑁆𑀢𑀫𑀦𑀺𑀳𑀻𑀦𑀪𑁂𑀤𑀢𑁄 𑀉𑀘𑁆𑀘𑀸𑀯𑀘𑀸 𑀩𑀼𑀤𑁆𑀥𑀲𑀫𑀡𑁂𑀦 𑀧𑀓𑀸𑀲𑀺𑀢𑀸. 𑀲𑀼𑀔𑀸𑀧𑀝𑀺𑀧𑀤𑀸 𑀳𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀉𑀘𑁆𑀘𑀸, 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀅𑀯𑀘𑀸. 𑀇𑀢𑀭𑀸 𑀤𑁆𑀯𑁂 𑀏𑀓𑁂𑀦𑀗𑁆𑀕𑁂𑀦 𑀉𑀘𑁆𑀘𑀸, 𑀏𑀓𑁂𑀦 𑀅𑀯𑀘𑀸. 𑀧𑀞𑀫𑀸 𑀏𑀯 𑀯𑀸 𑀉𑀘𑁆𑀘𑀸, 𑀇𑀢𑀭𑀸 𑀢𑀺𑀲𑁆𑀲𑁄𑀧𑀺 𑀅𑀯𑀘𑀸. 𑀢𑀸𑀬 𑀘𑁂𑀢𑀸𑀬 𑀉𑀘𑁆𑀘𑀸𑀬 𑀅𑀯𑀘𑀸𑀬 𑀯𑀸 𑀧𑀝𑀺𑀧𑀤𑀸𑀬 𑀦 𑀧𑀸𑀭𑀁 𑀤𑀺𑀕𑀼𑀡𑀁 𑀬𑀦𑁆𑀢𑀺. ‘‘𑀤𑀼𑀕𑀼𑀡’’𑀦𑁆𑀢𑀺 𑀯𑀸 𑀧𑀸𑀞𑁄, 𑀏𑀓𑀫𑀕𑁆𑀕𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀦𑀺𑀩𑁆𑀩𑀸𑀦𑀁 𑀦 𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑁂𑀦 𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂𑀲𑀁 𑀧𑀼𑀦 𑀅𑀧𑁆𑀧𑀳𑀸𑀢𑀩𑁆𑀩𑀢𑁄. 𑀏𑀢𑁂𑀦 𑀧𑀭𑀺𑀳𑀸𑀦𑀥𑀫𑁆𑀫𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀦𑀬𑀺𑀤𑀁 𑀏𑀓𑀕𑀼𑀡𑀁 𑀫𑀼𑀢𑀦𑁆𑀢𑀺 𑀢𑀜𑁆𑀘 𑀇𑀤𑀁 𑀧𑀸𑀭𑀁 𑀏𑀓𑀓𑁆𑀔𑀢𑁆𑀢𑀼𑀁𑀬𑁂𑀯 𑀨𑀼𑀲𑀦𑀸𑀭𑀳𑀫𑁆𑀧𑀺 𑀦 𑀳𑁄𑀢𑀺. 𑀓𑀲𑁆𑀫𑀸? 𑀏𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀪𑀸𑀯𑀢𑁄. 𑀏𑀢𑁂𑀦 𑀏𑀓𑀫𑀕𑁆𑀕𑁂𑀦𑁂𑀯 𑀅𑀭𑀳𑀢𑁆𑀢𑀸𑀪𑀸𑀯𑀁 𑀤𑀻𑀧𑁂𑀢𑀺.

𑁭𑁨𑁧. 𑀇𑀤𑀸𑀦𑀺 𑀧𑀝𑀺𑀧𑀤𑀸𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲 𑀘 𑀯𑀺𑀲𑀢𑀸’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀘 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀸𑀬 𑀧𑀝𑀺𑀧𑀤𑀸𑀬 𑀧𑀳𑀻𑀦𑀢𑁆𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀪𑀸𑀯𑁂𑀦 𑀯𑀺𑀲𑀢𑀢𑁆𑀢𑀸 𑀯𑀺𑀲𑀢𑀸 𑀢𑀡𑁆𑀳𑀸 𑀦𑀢𑁆𑀣𑀺, 𑀢𑀲𑁆𑀲 𑀓𑀺𑀮𑁂𑀲𑀲𑁄𑀢𑀘𑁆𑀙𑁂𑀤𑁂𑀦 𑀙𑀺𑀦𑁆𑀦𑀲𑁄𑀢𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀧𑁆𑀧𑀳𑀸𑀦𑁂𑀦 𑀓𑀺𑀘𑁆𑀘𑀸𑀓𑀺𑀘𑁆𑀘𑀧𑁆𑀧𑀳𑀻𑀦𑀲𑁆𑀲 𑀭𑀸𑀕𑀚𑁄 𑀯𑀸 𑀤𑁄𑀲𑀚𑁄 𑀯𑀸 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀻𑀢𑀺.

𑁭𑁨𑁨. 𑀇𑀤𑀸𑀦𑀺 𑀬𑀲𑁆𑀫𑀸 𑀇𑀫𑀸 𑀕𑀸𑀣𑀸𑀬𑁄 𑀲𑀼𑀢𑁆𑀯𑀸 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺 𑁋 ‘‘𑀬𑀤𑀺 𑀏𑀢𑁆𑀢𑀓𑀁 𑀫𑁄𑀦𑁂𑀬𑁆𑀬𑀁 𑀲𑀼𑀓𑀭𑀁 𑀦 𑀤𑀼𑀓𑁆𑀓𑀭𑀁, 𑀲𑀓𑁆𑀓𑀸 𑀅𑀧𑁆𑀧𑀓𑀲𑀺𑀭𑁂𑀦 𑀧𑀽𑀭𑁂𑀢𑀼’’𑀦𑁆𑀢𑀺, 𑀢𑀲𑁆𑀫𑀸𑀲𑁆𑀲 𑀪𑀕𑀯𑀸 ‘‘𑀤𑀼𑀓𑁆𑀓𑀭𑀫𑁂𑀯 𑀫𑁄𑀦𑁂𑀬𑁆𑀬’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀜𑁆𑀜𑀺𑀲𑁆𑀲𑀦𑁆𑀢𑀺 𑀉𑀧𑀜𑁆𑀜𑀸𑀧𑁂𑀬𑁆𑀬𑀁, 𑀓𑀣𑀬𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀼𑀭𑀥𑀸𑀭𑀸 𑀉𑀧𑀫𑀸 𑀅𑀲𑁆𑀲𑀸𑀢𑀺 𑀔𑀼𑀭𑀥𑀸𑀭𑀽𑀧𑀫𑁄. 𑀪𑀯𑁂𑀢𑀺 𑀪𑀯𑁂𑀬𑁆𑀬. 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀫𑁄𑀦𑁂𑀬𑁆𑀬𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀔𑀼𑀭𑀥𑀸𑀭𑀁 𑀉𑀧𑀫𑀁 𑀓𑀢𑁆𑀯𑀸 𑀧𑀘𑁆𑀘𑀬𑁂𑀲𑀼 𑀯𑀢𑁆𑀢𑁂𑀬𑁆𑀬. 𑀬𑀣𑀸 𑀫𑀥𑀼𑀤𑀺𑀤𑁆𑀥𑀁 𑀔𑀼𑀭𑀥𑀸𑀭𑀁 𑀮𑀺𑀳𑀦𑁆𑀢𑁄, 𑀙𑁂𑀤𑀢𑁄, 𑀚𑀺𑀯𑁆𑀳𑀁 𑀭𑀓𑁆𑀔𑀢𑀺, 𑀏𑀯𑀁 𑀥𑀫𑁆𑀫𑁂𑀦 𑀮𑀤𑁆𑀥𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀘𑀺𑀢𑁆𑀢𑀁 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀢𑁄 𑀭𑀓𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀬𑀸 𑀳𑀺 𑀧𑀭𑀺𑀲𑀼𑀤𑁆𑀥𑁂𑀦 𑀜𑀸𑀬𑁂𑀦 𑀮𑀤𑁆𑀥𑀼𑀜𑁆𑀘 𑀅𑀦𑀯𑀚𑁆𑀚𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀜𑁆𑀘 𑀦 𑀲𑀼𑀔𑁂𑀦 𑀲𑀓𑁆𑀓𑀸𑀢𑀺 𑀪𑀕𑀯𑀸 𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀫𑁂𑀯 𑀩𑀳𑀼𑀲𑁄 𑀪𑀡𑀢𑀺. 𑀚𑀺𑀯𑁆𑀳𑀸𑀬 𑀢𑀸𑀮𑀼𑀫𑀸𑀳𑀘𑁆𑀘, 𑀉𑀤𑀭𑁂 𑀲𑀜𑁆𑀜𑀢𑁄 𑀲𑀺𑀬𑀸𑀢𑀺 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀉𑀧𑁆𑀧𑀻𑀴𑁂𑀢𑁆𑀯𑀸𑀧𑀺 𑀭𑀲𑀢𑀡𑁆𑀳𑀁 𑀯𑀺𑀦𑁄𑀤𑁂𑀦𑁆𑀢𑁄 𑀓𑀺𑀮𑀺𑀝𑁆𑀞𑁂𑀦 𑀫𑀕𑁆𑀕𑁂𑀦 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑁂 𑀅𑀲𑁂𑀯𑀦𑁆𑀢𑁄 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸.

𑁭𑁨𑁩. 𑀅𑀮𑀻𑀦𑀘𑀺𑀢𑁆𑀢𑁄 𑀘 𑀲𑀺𑀬𑀸𑀢𑀺 𑀦𑀺𑀘𑁆𑀘𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀝𑁆𑀞𑀺𑀢𑀓𑀸𑀭𑀺𑀢𑀸𑀬 𑀅𑀓𑀼𑀲𑀻𑀢𑀘𑀺𑀢𑁆𑀢𑁄 𑀘 𑀪𑀯𑁂𑀬𑁆𑀬. 𑀦 𑀘𑀸𑀧𑀺 𑀩𑀳𑀼 𑀘𑀺𑀦𑁆𑀢𑀬𑁂𑀢𑀺 𑀜𑀸𑀢𑀺𑀚𑀦𑀧𑀤𑀸𑀫𑀭𑀯𑀺𑀢𑀓𑁆𑀓𑀯𑀲𑁂𑀦 𑀘 𑀩𑀳𑀼𑀁 𑀦 𑀘𑀺𑀦𑁆𑀢𑁂𑀬𑁆𑀬. 𑀦𑀺𑀭𑀸𑀫𑀕𑀦𑁆𑀥𑁄 𑀅𑀲𑀺𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄 𑀘 𑀳𑀼𑀢𑁆𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀓𑀺𑀲𑁆𑀫𑀺𑀜𑁆𑀘𑀺 𑀪𑀯𑁂 𑀅𑀦𑀺𑀲𑁆𑀲𑀺𑀢𑁄 𑀲𑀺𑀓𑁆𑀔𑀸𑀢𑁆𑀢𑀬𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄 𑀏𑀯 𑀪𑀯𑁂𑀬𑁆𑀬.

𑁭𑁨𑁪-𑁫. 𑀏𑀓𑀸𑀲𑀦𑀲𑁆𑀲𑀸𑀢𑀺 𑀯𑀺𑀯𑀺𑀢𑁆𑀢𑀸𑀲𑀦𑀲𑁆𑀲. 𑀆𑀲𑀦𑀫𑀼𑀔𑁂𑀦 𑀘𑁂𑀢𑁆𑀣 𑀲𑀩𑁆𑀩𑀇𑀭𑀺𑀬𑀸𑀧𑀣𑀸 𑀯𑀼𑀢𑁆𑀢𑀸. 𑀬𑀢𑁄 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀻𑀪𑀸𑀯𑀲𑁆𑀲 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀸𑀲𑀦𑀲𑁆𑀲𑀸𑀢𑀺 𑀘 𑀲𑀫𑁆𑀧𑀤𑀸𑀦𑀯𑀘𑀦𑀫𑁂𑀢𑀁. 𑀲𑀫𑀡𑀽𑀧𑀸𑀲𑀦𑀲𑁆𑀲 𑀘𑀸𑀢𑀺 𑀲𑀫𑀡𑁂𑀳𑀺 𑀉𑀧𑀸𑀲𑀺𑀢𑀩𑁆𑀩𑀲𑁆𑀲 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀲𑀫𑀡𑀸𑀦𑀁 𑀯𑀸 𑀉𑀧𑀸𑀲𑀦𑀪𑀽𑀢𑀲𑁆𑀲 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀪𑁂𑀤𑀲𑁆𑀲𑁂𑀯. 𑀇𑀤𑀫𑁆𑀧𑀺 𑀲𑀫𑁆𑀧𑀤𑀸𑀦𑀯𑀘𑀦𑀫𑁂𑀯, 𑀉𑀧𑀸𑀲𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀏𑀓𑀸𑀲𑀦𑁂𑀦 𑀓𑀸𑀬𑀯𑀺𑀯𑁂𑀓𑁄, 𑀲𑀫𑀡𑀽𑀧𑀸𑀲𑀦𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀢𑁆𑀢𑀁 𑀫𑁄𑀦𑀫𑀓𑁆𑀔𑀸𑀢𑀦𑁆𑀢𑀺 𑀏𑀯𑀫𑀺𑀤𑀁 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀯𑀲𑁂𑀦 ‘‘𑀏𑀓𑀢𑁆𑀢𑀁 𑀫𑁄𑀦’’𑀦𑁆𑀢𑀺 𑀅𑀓𑁆𑀔𑀸𑀢𑀁. 𑀏𑀓𑁄 𑀘𑁂 𑀅𑀪𑀺𑀭𑀫𑀺𑀲𑁆𑀲𑀲𑀻𑀢𑀺 𑀇𑀤𑀁 𑀧𑀦 𑀉𑀢𑁆𑀢𑀭𑀕𑀸𑀣𑀸𑀧𑁂𑀓𑁆𑀔𑀁 𑀧𑀤𑀁, ‘‘𑀅𑀣 𑀪𑀸𑀳𑀺𑀲𑀺 𑀤𑀲𑀤𑀺𑀲𑀸’’𑀢𑀺 𑀇𑀫𑀺𑀦𑀸 𑀅𑀲𑁆𑀲 𑀲𑀫𑁆𑀩𑀦𑁆𑀥𑁄.

𑀪𑀸𑀳𑀺𑀲𑀻𑀢𑀺 𑀪𑀸𑀲𑀺𑀲𑁆𑀲𑀲𑀺 𑀧𑀓𑀸𑀲𑁂𑀲𑁆𑀲𑀲𑀺. 𑀇𑀫𑀁 𑀧𑀝𑀺𑀧𑀤𑀁 𑀪𑀸𑀯𑁂𑀦𑁆𑀢𑁄 𑀲𑀩𑁆𑀩𑀤𑀺𑀲𑀸𑀲𑀼 𑀓𑀺𑀢𑁆𑀢𑀺𑀬𑀸 𑀧𑀸𑀓𑀝𑁄 𑀪𑀯𑀺𑀲𑁆𑀲𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀢𑁆𑀯𑀸 𑀥𑀻𑀭𑀸𑀦𑀦𑁆𑀢𑀺𑀆𑀤𑀻𑀦𑀁 𑀧𑀦 𑀘𑀢𑀼𑀦𑁆𑀦𑀁 𑀧𑀤𑀸𑀦𑀁 𑀅𑀬𑀫𑀢𑁆𑀣𑁄 𑁋 𑀬𑁂𑀦 𑀘 𑀓𑀺𑀢𑁆𑀢𑀺𑀖𑁄𑀲𑁂𑀦 𑀪𑀸𑀳𑀺𑀲𑀺 𑀤𑀲𑀤𑀺𑀲𑀸 𑀢𑀁 𑀥𑀻𑀭𑀸𑀦𑀁 𑀛𑀸𑀬𑀻𑀦𑀁 𑀓𑀸𑀫𑀘𑀸𑀕𑀺𑀦𑀁 𑀦𑀺𑀖𑁄𑀲𑀁 𑀲𑀼𑀢𑁆𑀯𑀸 𑀅𑀣 𑀢𑁆𑀯𑀁 𑀢𑁂𑀦 𑀉𑀤𑁆𑀥𑀘𑁆𑀘𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀪𑀺𑀬𑁆𑀬𑁄 𑀳𑀺𑀭𑀺𑀜𑁆𑀘 𑀲𑀤𑁆𑀥𑀜𑁆𑀘 𑀓𑀭𑁂𑀬𑁆𑀬𑀸𑀲𑀺, 𑀢𑁂𑀦 𑀖𑁄𑀲𑁂𑀦 𑀳𑀭𑀸𑀬𑀫𑀸𑀦𑁄 ‘‘𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀸 𑀅𑀬’’𑀦𑁆𑀢𑀺 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀢𑁆𑀢𑀭𑀺 𑀧𑀝𑀺𑀧𑀢𑁆𑀢𑀺𑀫𑁂𑀯 𑀩𑁆𑀭𑀽𑀳𑁂𑀬𑁆𑀬𑀸𑀲𑀺. 𑀫𑀸𑀫𑀓𑁄𑀢𑀺 𑀏𑀯𑀜𑁆𑀳𑀺 𑀲𑀦𑁆𑀢𑁂 𑀫𑀫 𑀲𑀸𑀯𑀓𑁄 𑀳𑁄𑀢𑀻𑀢𑀺.

𑁭𑁨𑁬. 𑀢𑀁 𑀦𑀤𑀻𑀳𑀻𑀢𑀺 𑀬𑀁 𑀢𑀁 𑀫𑀬𑀸 ‘‘𑀳𑀺𑀭𑀺𑀜𑁆𑀘 𑀲𑀤𑁆𑀥𑀜𑁆𑀘 𑀪𑀺𑀬𑁆𑀬𑁄 𑀓𑀼𑀩𑁆𑀩𑁂𑀣𑀸’’𑀢𑀺 𑀯𑀤𑀢𑀸 ‘‘𑀉𑀤𑁆𑀥𑀘𑁆𑀘𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀦𑀤𑀻𑀦𑀺𑀤𑀲𑁆𑀲𑀦𑁂𑀦𑀸𑀧𑀺 𑀚𑀸𑀦𑀸𑀣, 𑀢𑀩𑁆𑀩𑀺𑀧𑀭𑀺𑀬𑀸𑀬𑀜𑁆𑀘 𑀲𑁄𑀩𑁆𑀪𑁂𑀲𑀼 𑀘 𑀧𑀤𑀭𑁂𑀲𑀼𑀘 𑀚𑀸𑀦𑀸𑀣. 𑀲𑁄𑀩𑁆𑀪𑁂𑀲𑀽𑀢𑀺 𑀫𑀸𑀢𑀺𑀓𑀸𑀲𑀼. 𑀧𑀤𑀭𑁂𑀲𑀽𑀢𑀺 𑀤𑀭𑀻𑀲𑀼. 𑀓𑀣𑀁? 𑀲𑀡𑀦𑁆𑀢𑀸 𑀬𑀦𑁆𑀢𑀺 𑀓𑀼𑀲𑁄𑀩𑁆𑀪𑀸, 𑀢𑀼𑀡𑁆𑀳𑀻 𑀬𑀦𑁆𑀢𑀺 𑀫𑀳𑁄𑀤𑀥𑀻𑀢𑀺. 𑀓𑀼𑀲𑁄𑀩𑁆𑀪𑀸 𑀳𑀺 𑀲𑁄𑀩𑁆𑀪𑀧𑀤𑀭𑀸𑀤𑀺𑀪𑁂𑀤𑀸 𑀲𑀩𑁆𑀩𑀸𑀧𑀺 𑀓𑀼𑀦𑁆𑀦𑀤𑀺𑀬𑁄 𑀲𑀡𑀦𑁆𑀢𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀸 𑀉𑀤𑁆𑀥𑀢𑀸 𑀳𑀼𑀢𑁆𑀯𑀸 𑀬𑀦𑁆𑀢𑀺, 𑀕𑀗𑁆𑀕𑀸𑀤𑀺𑀪𑁂𑀤𑀸 𑀧𑀦 𑀫𑀳𑀸𑀦𑀤𑀺𑀬𑁄 𑀢𑀼𑀡𑁆𑀳𑀻 𑀬𑀦𑁆𑀢𑀺, 𑀏𑀯𑀁 ‘‘𑀫𑁄𑀦𑁂𑀬𑁆𑀬𑀁 𑀧𑀽𑀭𑁂𑀫𑀻’’𑀢𑀺 𑀉𑀤𑁆𑀥𑀢𑁄 𑀳𑁄𑀢𑀺 𑀅𑀫𑀸𑀫𑀓𑁄, 𑀫𑀸𑀫𑀓𑁄 𑀧𑀦 𑀳𑀺𑀭𑀺𑀜𑁆𑀘 𑀲𑀤𑁆𑀥𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀦𑀻𑀘𑀘𑀺𑀢𑁆𑀢𑁄𑀯 𑀳𑁄𑀢𑀺.

𑁭𑁨𑁭-𑁯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀤𑀽𑀦𑀓𑀁…𑀧𑁂… 𑀧𑀡𑁆𑀟𑀺𑀢𑁄𑀢𑀺. 𑀢𑀢𑁆𑀣 𑀲𑀺𑀬𑀸 𑁋 𑀲𑀘𑁂 𑀅𑀟𑁆𑀠𑀓𑀼𑀫𑁆𑀪𑀽𑀧𑀫𑁄 𑀩𑀸𑀮𑁄 𑀲𑀡𑀦𑁆𑀢𑀢𑀸𑀬, 𑀭𑀳𑀤𑁄 𑀧𑀽𑀭𑁄𑀯 𑀧𑀡𑁆𑀟𑀺𑀢𑁄 𑀲𑀦𑁆𑀢𑀢𑀸𑀬, 𑀅𑀣 𑀓𑀲𑁆𑀫𑀸 𑀩𑀼𑀤𑁆𑀥𑀲𑀫𑀡𑁄 𑀏𑀯𑀁 𑀥𑀫𑁆𑀫𑀤𑁂𑀲𑀦𑀸𑀩𑁆𑀬𑀸𑀯𑀝𑁄 𑀳𑀼𑀢𑁆𑀯𑀸 𑀩𑀳𑀼𑀁 𑀪𑀸𑀲𑀢𑀻𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁂𑀦 ‘‘𑀬𑀁 𑀲𑀫𑀡𑁄’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀩𑀼𑀤𑁆𑀥𑀲𑀫𑀡𑁄 𑀩𑀳𑀼𑀁 𑀪𑀸𑀲𑀢𑀺 𑀉𑀧𑁂𑀢𑀁 𑀅𑀢𑁆𑀣𑀲𑀜𑁆𑀳𑀺𑀢𑀁, 𑀅𑀢𑁆𑀣𑀼𑀧𑁂𑀢𑀁 𑀥𑀫𑁆𑀫𑀼𑀧𑁂𑀢𑀜𑁆𑀘 𑀳𑀺𑀢𑁂𑀦 𑀘 𑀲𑀁𑀳𑀺𑀢𑀁, 𑀢𑀁 𑀦 𑀉𑀤𑁆𑀥𑀘𑁆𑀘𑁂𑀦, 𑀅𑀧𑀺𑀘 𑀔𑁄 𑀚𑀸𑀦𑀁 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀤𑀺𑀯𑀲𑀫𑁆𑀧𑀺 𑀤𑁂𑀲𑁂𑀦𑁆𑀢𑁄 𑀦𑀺𑀧𑁆𑀧𑀧𑀜𑁆𑀘𑁄𑀯 𑀳𑀼𑀢𑁆𑀯𑀸. 𑀢𑀲𑁆𑀲 𑀳𑀺 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 ‘‘𑀇𑀤𑀫𑀲𑁆𑀲 𑀳𑀺𑀢𑀁 𑀇𑀤𑀫𑀲𑁆𑀲 𑀳𑀺𑀢’’𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀁 𑀲𑁄 𑀩𑀳𑀼 𑀪𑀸𑀲𑀢𑀺, 𑀦 𑀓𑁂𑀯𑀮𑀁 𑀩𑀳𑀼𑀪𑀸𑀡𑀺𑀢𑀸𑀬. 𑀅𑀯𑀲𑀸𑀦𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 𑁋 𑀏𑀯𑀁 𑀢𑀸𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑀲𑀫𑀡𑁄 𑀚𑀸𑀦𑀁 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀚𑀸𑀦𑀁 𑀲𑁄 𑀩𑀳𑀼 𑀪𑀸𑀲𑀢𑀺. 𑀢𑁂𑀦 𑀤𑁂𑀲𑀺𑀢𑀁 𑀧𑀦 𑀥𑀫𑁆𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂𑀦𑁂𑀯 𑀜𑀸𑀡𑁂𑀦 𑀬𑁄 𑀘 𑀚𑀸𑀦𑀁 𑀲𑀁𑀬𑀢𑀢𑁆𑀢𑁄, 𑀚𑀸𑀦𑀁 𑀦 𑀩𑀳𑀼 𑀪𑀸𑀲𑀢𑀺, 𑀲 𑀫𑀼𑀦𑀺 𑀫𑁄𑀦𑀫𑀭𑀳𑀢𑀺, 𑀲 𑀫𑀼𑀦𑀺 𑀫𑁄𑀦𑀫𑀚𑁆𑀛𑀕𑀸𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀢𑀁 𑀥𑀫𑁆𑀫𑀁 𑀚𑀸𑀦𑀦𑁆𑀢𑁄 𑀲𑀁𑀬𑀢𑀢𑁆𑀢𑁄 𑀕𑀼𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀬𑀁 𑀪𑀸𑀲𑀺𑀢𑀁 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀦 𑀳𑁄𑀢𑀺, 𑀢𑀁 𑀚𑀸𑀦𑀁 𑀦 𑀩𑀳𑀼 𑀪𑀸𑀲𑀢𑀺. 𑀲𑁄 𑀏𑀯𑀁𑀯𑀺𑀥𑁄 𑀫𑁄𑀦𑀢𑁆𑀣𑀁 𑀧𑀝𑀺𑀧𑀦𑁆𑀦𑀓𑁄 𑀫𑀼𑀦𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀫𑁄𑀦𑀁 𑀅𑀭𑀳𑀢𑀺. 𑀦 𑀓𑁂𑀯𑀮𑀜𑁆𑀘 𑀅𑀭𑀳𑀢𑀺𑀬𑁂𑀯, 𑀅𑀧𑀺𑀘 𑀔𑁄 𑀧𑀦 𑀲 𑀫𑀼𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀫𑁄𑀦𑀁 𑀅𑀚𑁆𑀛𑀕𑀸 𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀢𑀁 𑀲𑀼𑀢𑁆𑀯𑀸 𑀦𑀸𑀮𑀓𑀢𑁆𑀣𑁂𑀭𑁄 𑀢𑀻𑀲𑀼 𑀞𑀸𑀦𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀅𑀳𑁄𑀲𑀺 𑀤𑀲𑁆𑀲𑀦𑁂 𑀲𑀯𑀦𑁂 𑀧𑀼𑀘𑁆𑀙𑀸𑀬𑀸𑀢𑀺. 𑀲𑁄 𑀳𑀺 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀯𑀦𑀁 𑀧𑀯𑀺𑀝𑁆𑀞𑁄, 𑀧𑀼𑀦 ‘‘𑀅𑀳𑁄 𑀯𑀢𑀸𑀳𑀁 𑀪𑀕𑀯𑀦𑁆𑀢𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀮𑁄𑀮𑀪𑀸𑀯𑀁 𑀦 𑀚𑀦𑁂𑀲𑀺. 𑀅𑀬𑀫𑀲𑁆𑀲 𑀤𑀲𑁆𑀲𑀦𑁂 𑀅𑀧𑁆𑀧𑀺𑀘𑁆𑀙𑀢𑀸. 𑀢𑀣𑀸 ‘‘𑀅𑀳𑁄 𑀯𑀢𑀸𑀳𑀁 𑀧𑀼𑀦 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺 𑀮𑁄𑀮𑀪𑀸𑀯𑀁 𑀦 𑀚𑀦𑁂𑀲𑀺. 𑀅𑀬𑀫𑀲𑁆𑀲 𑀲𑀯𑀦𑁂 𑀅𑀧𑁆𑀧𑀺𑀘𑁆𑀙𑀢𑀸. 𑀢𑀣𑀸 ‘‘𑀅𑀳𑁄 𑀯𑀢𑀸𑀳𑀁 𑀧𑀼𑀦 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀮𑁄𑀮𑀪𑀸𑀯𑀁 𑀦 𑀚𑀦𑁂𑀲𑀺. 𑀅𑀬𑀫𑀲𑁆𑀲 𑀧𑀼𑀘𑁆𑀙𑀸𑀬 𑀅𑀧𑁆𑀧𑀺𑀘𑁆𑀙𑀢𑀸.

𑀲𑁄 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄 𑀲𑀫𑀸𑀦𑁄 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀯𑀦𑀲𑀡𑁆𑀟𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀦 𑀯𑀲𑀺, 𑀏𑀓𑀭𑀼𑀓𑁆𑀔𑀫𑀽𑀮𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀦 𑀦𑀺𑀲𑀻𑀤𑀺, 𑀏𑀓𑀕𑀸𑀫𑁂 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀧𑀺𑀡𑁆𑀟𑀸𑀬 𑀦 𑀧𑀸𑀯𑀺𑀲𑀺. 𑀇𑀢𑀺 𑀯𑀦𑀢𑁄 𑀯𑀦𑀁, 𑀭𑀼𑀓𑁆𑀔𑀢𑁄 𑀭𑀼𑀓𑁆𑀔𑀁, 𑀕𑀸𑀫𑀢𑁄 𑀕𑀸𑀫𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀦𑀼𑀭𑀽𑀧𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀅𑀣 𑀬𑀲𑁆𑀫𑀸 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀉𑀓𑁆𑀓𑀝𑁆𑀞𑀁 𑀓𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀪𑀺𑀓𑁆𑀔𑀼 𑀲𑀢𑁆𑀢𑁂𑀯 𑀫𑀸𑀲𑀸𑀦𑀺 𑀚𑀻𑀯𑀢𑀺, 𑀫𑀚𑁆𑀛𑀺𑀫𑀁 𑀓𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺, 𑀫𑀦𑁆𑀤𑀁 𑀓𑀢𑁆𑀯𑀸 𑀧𑀽𑀭𑁂𑀦𑁆𑀢𑁄 𑀲𑁄𑀴𑀲 𑀯𑀲𑁆𑀲𑀸𑀦𑀺. 𑀅𑀬𑀜𑁆𑀘 𑀉𑀓𑁆𑀓𑀝𑁆𑀞𑀁 𑀓𑀢𑁆𑀯𑀸 𑀧𑀽𑀭𑁂𑀲𑀺, 𑀢𑀲𑁆𑀫𑀸 𑀲𑀢𑁆𑀢 𑀫𑀸𑀲𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀁 𑀜𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀤𑀲𑀩𑀮𑀸𑀪𑀺𑀫𑀼𑀔𑁄 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀳𑀺𑀗𑁆𑀕𑀼𑀮𑀓𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀸𑀢𑀼𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀦𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.