𑁧𑁨. 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀢𑀚𑁆𑀛𑀸𑀲𑀬𑀢𑁄 𑀉𑀧𑁆𑀧𑀢𑁆𑀢𑀺. 𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀳𑀺 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀲𑁂𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀧𑀼𑀩𑁆𑀩𑀸𑀭𑀸𑀫𑁂𑀢𑀺 𑀲𑀸𑀯𑀢𑁆𑀣𑀺𑀦𑀕𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀆𑀭𑀸𑀫𑁂. 𑀫𑀺𑀕𑀸𑀭𑀫𑀸𑀢𑀼 𑀧𑀸𑀲𑀸𑀤𑁂𑀢𑀺 𑀏𑀢𑁆𑀣 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸 𑀅𑀢𑁆𑀢𑀦𑁄 𑀲𑀲𑀼𑀭𑁂𑀦 𑀫𑀺𑀕𑀸𑀭𑁂𑀦 𑀲𑁂𑀝𑁆𑀞𑀺𑀦𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀢𑁆𑀢𑀸 ‘‘𑀫𑀺𑀕𑀸𑀭𑀫𑀸𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑀁 𑀫𑀳𑀸𑀮𑀢𑀸𑀧𑀺𑀴𑀦𑁆𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀸𑀭𑀸𑀧𑀺𑀢𑁄 𑀧𑀸𑀲𑀸𑀤𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀧𑀜𑁆𑀘 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀺 𑀓𑀢𑁆𑀯𑀸 𑀲𑀳𑀲𑁆𑀲𑀓𑀽𑀝𑀸𑀕𑀸𑀭𑀕𑀩𑁆𑀪𑁄, 𑀲𑁄 ‘‘𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀫𑀺𑀕𑀸𑀭𑀫𑀸𑀢𑀼 𑀧𑀸𑀲𑀸𑀤𑁂.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸𑀢𑀺 𑀬𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼 𑀧𑀸𑀲𑀸𑀤𑁂 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦. 𑀢𑀤𑀳𑀼𑀧𑁄𑀲𑀣𑁂𑀢𑀺 𑀢𑀲𑁆𑀫𑀺𑀁 𑀅𑀳𑀼 𑀉𑀧𑁄𑀲𑀣𑁂, 𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀦𑁆𑀦𑀭𑀲𑁂𑀢𑀺 𑀇𑀤𑀁 𑀉𑀧𑁄𑀲𑀣𑀕𑁆𑀕𑀳𑀡𑁂𑀦 𑀲𑀫𑁆𑀧𑀢𑁆𑀢𑀸𑀯𑀲𑁂𑀲𑀼𑀧𑁄𑀲𑀣𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸𑀢𑀺 𑀧𑀦𑁆𑀦𑀭𑀲𑀤𑀺𑀯𑀲𑀢𑁆𑀢𑀸 𑀤𑀺𑀯𑀲𑀕𑀡𑀦𑀸𑀬 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀢𑁆𑀢𑀸 𑀭𑀢𑁆𑀢𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀼𑀡𑁆𑀡𑀢𑁆𑀢𑀸 𑀧𑀼𑀡𑁆𑀡𑀸𑀬, 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀢𑁆𑀢𑀸 𑀧𑀼𑀡𑁆𑀡𑀫𑀸𑀬 𑀘 𑀭𑀢𑁆𑀢𑀺𑀬𑀸. 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀫𑀺𑀕𑀸𑀭𑀫𑀸𑀢𑀼 𑀭𑀢𑀦𑀧𑀸𑀲𑀸𑀤𑀧𑀭𑀺𑀯𑁂𑀡𑁂 𑀅𑀩𑁆𑀪𑁄𑀓𑀸𑀲𑁂 𑀉𑀧𑀭𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀅𑀢𑀻𑀯 𑀢𑀼𑀡𑁆𑀳𑀻𑀪𑀽𑀢𑀁, 𑀬𑀢𑁄 𑀬𑀢𑁄 𑀯𑀸 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀢𑀢𑁄 𑀢𑀢𑁄 𑀢𑀼𑀡𑁆𑀳𑀻𑀪𑀽𑀢𑀁, 𑀢𑀼𑀡𑁆𑀳𑀻𑀪𑀽𑀢𑀁 𑀯𑀸𑀘𑀸𑀬, 𑀧𑀼𑀦 𑀢𑀼𑀡𑁆𑀳𑀻𑀪𑀽𑀢𑀁 𑀓𑀸𑀬𑁂𑀦. 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸𑀢𑀺 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀅𑀦𑁂𑀓𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀫𑀸𑀡𑀁 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 ‘‘𑀏𑀢𑁆𑀢𑀓𑀸 𑀏𑀢𑁆𑀣 𑀲𑁄𑀢𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀲𑀓𑀤𑀸𑀕𑀸𑀫𑀺𑀦𑁄, 𑀏𑀢𑁆𑀢𑀓𑀸 𑀅𑀦𑀸𑀕𑀸𑀫𑀺𑀦𑁄 𑀏𑀢𑁆𑀢𑀓𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀻𑀤𑀺𑀲𑀻 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸’’𑀢𑀺 𑀲𑀧𑁆𑀧𑀸𑀬𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸.

𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀬𑁂 𑀢𑁂 𑀆𑀭𑁄𑀕𑁆𑀬𑀝𑁆𑀞𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀇𑀝𑁆𑀞𑀨𑀮𑀝𑁆𑀞𑁂𑀦 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀘 𑀓𑀼𑀲𑀮𑀸 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸, 𑀢𑀚𑁆𑀚𑁄𑀢𑀓𑀸 𑀯𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀲𑀫𑁆𑀩𑁄𑀥𑀕𑀸𑀫𑀺𑀦𑁄𑀢𑀺 𑀉𑀧𑀕𑀦𑁆𑀢𑀩𑁆𑀩𑀝𑁆𑀞𑁂𑀦 𑀅𑀭𑀺𑀬𑀸, 𑀮𑁄𑀓𑀢𑁄 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀦𑀺𑀬𑁆𑀬𑀸𑀦𑀺𑀓𑀸, 𑀲𑀫𑁆𑀩𑁄𑀥𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀕𑀫𑀦𑀝𑁆𑀞𑁂𑀦 𑀲𑀫𑁆𑀩𑁄𑀥𑀕𑀸𑀫𑀺𑀦𑁄. 𑀢𑁂𑀲𑀁 𑀯𑁄 𑀪𑀺𑀓𑁆𑀔𑀯𑁂…𑀧𑁂… 𑀲𑀯𑀦𑀸𑀬, 𑀢𑁂𑀲𑀁 𑀪𑀺𑀓𑁆𑀔𑀯𑁂 𑀓𑀼𑀲𑀮𑀸𑀦𑀁…𑀧𑁂… 𑀲𑀫𑁆𑀩𑁄𑀥𑀕𑀸𑀫𑀻𑀦𑀁 𑀓𑀸 𑀉𑀧𑀦𑀺𑀲𑀸, 𑀓𑀺𑀁 𑀓𑀸𑀭𑀡𑀁, 𑀓𑀺𑀁 𑀧𑀬𑁄𑀚𑀦𑀁 𑀢𑀼𑀫𑁆𑀳𑀸𑀓𑀁 𑀲𑀯𑀦𑀸𑀬, 𑀓𑀺𑀫𑀢𑁆𑀣𑀁 𑀢𑀼𑀫𑁆𑀳𑁂 𑀢𑁂 𑀥𑀫𑁆𑀫𑁂 𑀲𑀼𑀡𑀸𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀯𑀤𑁂𑀯 𑀤𑁆𑀯𑀬𑀢𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀸𑀬𑀸𑀢𑀺 𑀏𑀢𑁆𑀣 𑀬𑀸𑀯𑀤𑁂𑀯𑀸𑀢𑀺 𑀧𑀭𑀺𑀘𑁆𑀙𑁂𑀤𑀸𑀯𑀥𑀸𑀭𑀡𑀯𑀘𑀦𑀁. 𑀤𑁆𑀯𑁂 𑀅𑀯𑀬𑀯𑀸 𑀏𑀢𑁂𑀲𑀦𑁆𑀢𑀺 𑀤𑁆𑀯𑀬𑀸, 𑀤𑁆𑀯𑀬𑀸 𑀏𑀯 𑀤𑁆𑀯𑀬𑀢𑀸, 𑀢𑁂𑀲𑀁 𑀤𑁆𑀯𑀬𑀢𑀸𑀦𑀁. ‘‘𑀤𑁆𑀯𑀬𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄. 𑀬𑀣𑀸𑀪𑀽𑀢𑀁 𑀜𑀸𑀡𑀸𑀬𑀸𑀢𑀺 𑀅𑀯𑀺𑀧𑀭𑀻𑀢𑀜𑀸𑀡𑀸𑀬. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀤𑁂𑀢𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀤𑀺𑀪𑁂𑀤𑁂𑀦 𑀤𑁆𑀯𑀺𑀥𑀸 𑀯𑀯𑀢𑁆𑀣𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀬𑀣𑀸𑀪𑀽𑀢𑀜𑀸𑀡𑀁, 𑀏𑀢𑀤𑀢𑁆𑀣𑀸𑀬 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺, 𑀲𑀯𑀦𑁂𑀦 𑀳𑀺 𑀏𑀢𑁆𑀢𑀓𑀁 𑀳𑁄𑀢𑀺, 𑀢𑀤𑀼𑀢𑁆𑀢𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑁄 𑀪𑀸𑀯𑀦𑀸𑀬𑀸𑀢𑀺. 𑀓𑀺𑀜𑁆𑀘 𑀤𑁆𑀯𑀬𑀢𑀁 𑀯𑀤𑁂𑀣𑀸𑀢𑀺 𑀏𑀢𑁆𑀣 𑀧𑀦 𑀲𑀘𑁂, 𑀯𑁄 𑀪𑀺𑀓𑁆𑀔𑀯𑁂, 𑀲𑀺𑀬𑀸, 𑀓𑀺𑀜𑁆𑀘 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀤𑁆𑀯𑀬𑀢𑀁 𑀯𑀤𑁂𑀣𑀸𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄. 𑀧𑀤𑀢𑁆𑀣𑁄 𑀧𑀦 ‘‘𑀓𑀺𑀜𑁆𑀘 𑀤𑁆𑀯𑀬𑀢𑀸𑀪𑀸𑀯𑀁 𑀯𑀤𑁂𑀣𑀸’’𑀢𑀺.

(𑁧) 𑀢𑀢𑁄 𑀪𑀕𑀯𑀸 𑀤𑁆𑀯𑀬𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑀬𑀢𑀸𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 ‘‘𑀇𑀤𑀁 𑀤𑀼𑀓𑁆𑀔𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀏𑀯𑀁 𑀮𑁄𑀓𑀺𑀬𑀲𑁆𑀲 𑀏𑀓𑀲𑁆𑀲 𑀅𑀯𑀬𑀯𑀲𑁆𑀲 𑀲𑀳𑁂𑀢𑀼𑀓𑀲𑁆𑀲 𑀯𑀸 𑀤𑀼𑀓𑁆𑀔𑀲𑁆𑀲 𑀤𑀲𑁆𑀲𑀦𑁂𑀦 𑀅𑀬𑀁 𑀏𑀓𑀸𑀦𑀼𑀧𑀲𑁆𑀲𑀦𑀸, 𑀇𑀢𑀭𑀸 𑀮𑁄𑀓𑀼𑀢𑁆𑀢𑀭𑀲𑁆𑀲 𑀤𑀼𑀢𑀺𑀬𑀲𑁆𑀲 𑀅𑀯𑀬𑀯𑀲𑁆𑀲 𑀲𑀉𑀧𑀸𑀬𑀲𑁆𑀲 𑀯𑀸 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀧𑀞𑀫𑀸 𑀘𑁂𑀢𑁆𑀣 𑀢𑀢𑀺𑀬𑀘𑀢𑀼𑀢𑁆𑀣𑀯𑀺𑀲𑀼𑀤𑁆𑀥𑀻𑀳𑀺 𑀳𑁄𑀢𑀺, 𑀤𑀼𑀢𑀺𑀬𑀸 𑀧𑀜𑁆𑀘𑀫𑀯𑀺𑀲𑀼𑀤𑁆𑀥𑀺𑀬𑀸. 𑀏𑀯𑀁 𑀲𑀫𑁆𑀫𑀸 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀺𑀦𑁄𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀸 𑀤𑁆𑀯𑀬𑀥𑀫𑁆𑀫𑁂 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑀲𑁆𑀲, 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀺𑀦𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀢𑁆𑀢𑀸, 𑀧𑀳𑀺𑀢𑀢𑁆𑀢𑀲𑁆𑀲. 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸𑀢𑀺 𑀅𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀭𑀳𑀢𑁆𑀢𑀁. 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸𑀢𑀺 ‘‘𑀉𑀧𑀸𑀤𑀺𑀲𑁂𑀲’’𑀦𑁆𑀢𑀺 𑀧𑀼𑀦𑀩𑁆𑀪𑀯𑀯𑀲𑁂𑀦 𑀉𑀧𑀸𑀤𑀸𑀢𑀩𑁆𑀩𑀓𑁆𑀔𑀦𑁆𑀥𑀲𑁂𑀲𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀯𑀸 𑀲𑀢𑀺 𑀅𑀦𑀸𑀕𑀸𑀫𑀺𑀪𑀸𑀯𑁄 𑀧𑀝𑀺𑀓𑀗𑁆𑀔𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀺𑀫𑀨𑀮𑀸𑀦𑀺𑀧𑀺 𑀏𑀯𑀁 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀺𑀦𑁄𑀯 𑀳𑁄𑀦𑁆𑀢𑀺, 𑀉𑀧𑀭𑀺𑀫𑀨𑀮𑁂𑀲𑀼 𑀧𑀦 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀏𑀯𑀫𑀸𑀳.

𑀇𑀤𑀫𑀯𑁄𑀘𑀸𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀁 𑀯𑀘𑀦𑀁. 𑀢𑀢𑁆𑀣 𑀇𑀤𑀦𑁆𑀢𑀺 ‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀼𑀢𑁆𑀢𑀦𑀺𑀤𑀲𑁆𑀲𑀦𑀁. 𑀏𑀢𑀦𑁆𑀢𑀺 𑀇𑀤𑀸𑀦𑀺 ‘‘𑀬𑁂 𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀺𑀯𑀢𑁆𑀢𑀩𑁆𑀩𑀕𑀸𑀣𑀸𑀩𑀦𑁆𑀥𑀦𑀺𑀤𑀲𑁆𑀲𑀦𑀁. 𑀇𑀫𑀸 𑀘 𑀕𑀸𑀣𑀸 𑀘𑀢𑀼𑀲𑀘𑁆𑀘𑀤𑀻𑀧𑀓𑀢𑁆𑀢𑀸 𑀯𑀼𑀢𑁆𑀢𑀢𑁆𑀣𑀤𑀻𑀧𑀺𑀓𑀸 𑀏𑀯, 𑀏𑀯𑀁 𑀲𑀦𑁆𑀢𑁂𑀧𑀺 𑀕𑀸𑀣𑀸𑀭𑀼𑀘𑀺𑀓𑀸𑀦𑀁 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀅𑀲𑀫𑀢𑁆𑀣𑀢𑀸𑀬 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀬𑀤𑀺 𑀯𑀤𑁂𑀬𑁆𑀬 𑀲𑀼𑀦𑁆𑀤𑀭’’𑀦𑁆𑀢𑀺 𑀆𑀓𑀗𑁆𑀔𑀦𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀜𑁆𑀘 𑀅𑀢𑁆𑀣𑀸𑀬 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀢𑁆𑀣𑀤𑀻𑀧𑀺𑀓𑀸 𑀯𑀸𑀢𑀺 𑀅𑀯𑀺𑀧𑀲𑁆𑀲𑀓𑁂 𑀯𑀺𑀧𑀲𑁆𑀲𑀓𑁂 𑀘 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀯𑀝𑁆𑀝𑀯𑀺𑀯𑀝𑁆𑀝𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸 𑀯𑀺𑀲𑁂𑀲𑀢𑁆𑀣𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀇𑀢𑁄 𑀧𑀭𑀫𑁆𑀧𑀺 𑀕𑀸𑀣𑀸𑀯𑀘𑀦𑁂𑀲𑀼.

𑁭𑁩𑁦. 𑀢𑀢𑁆𑀣 𑀬𑀢𑁆𑀣 𑀘𑀸𑀢𑀺 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀦𑀺𑀩𑁆𑀩𑀸𑀦𑁂 𑀳𑀺 𑀤𑀼𑀓𑁆𑀔𑀁 𑀲𑀩𑁆𑀩𑀲𑁄 𑀉𑀧𑀭𑀼𑀚𑁆𑀛𑀢𑀺, 𑀲𑀩𑁆𑀩𑀧𑁆𑀧𑀓𑀸𑀭𑀁 𑀉𑀧𑀭𑀼𑀚𑁆𑀛𑀢𑀺, 𑀲𑀳𑁂𑀢𑀼𑀓𑀁 𑀉𑀧𑀭𑀼𑀚𑁆𑀛𑀢𑀺, 𑀅𑀲𑁂𑀲𑀜𑁆𑀘 𑀉𑀧𑀭𑀼𑀚𑁆𑀛𑀢𑀺. 𑀢𑀜𑁆𑀘 𑀫𑀕𑁆𑀕𑀦𑁆𑀢𑀺 𑀢𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁.

𑁭𑁩𑁧-𑁩. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀳𑀻𑀦𑀸 𑀢𑁂, 𑀅𑀣𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀡𑁆𑀳𑀸𑀘𑀭𑀺𑀢𑁂𑀦 𑀯𑀸 𑀅𑀧𑁆𑀧𑀦𑀸𑀛𑀸𑀦𑀩𑀮𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀨𑀮𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀤𑀺𑀝𑁆𑀞𑀺𑀘𑀭𑀺𑀢𑁂𑀦 𑀉𑀧𑀘𑀸𑀭𑀚𑁆𑀛𑀸𑀦𑀫𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀢𑁆𑀯𑀸 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀨𑀮𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀓𑀸𑀫𑀭𑀸𑀕𑀁 𑀲𑀦𑁆𑀥𑀸𑀬 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀭𑀳𑀢𑁆𑀢𑀨𑀮𑀁 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺. 𑀅𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑀡𑀢𑁆𑀣𑀸𑀬. 𑀚𑀸𑀢𑀺𑀚𑀭𑀽𑀧𑀕𑀸𑀢𑀺 𑀚𑀸𑀢𑀺𑀚𑀭𑀁 𑀉𑀧𑀕𑀢𑀸, 𑀚𑀸𑀢𑀺𑀚𑀭𑀸𑀬 𑀯𑀸 𑀉𑀧𑀕𑀢𑀸, 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀚𑀸𑀢𑀺𑀚𑀭𑀸𑀬𑀸𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑁂𑀢𑁆𑀣 𑀆𑀤𑀺𑀢𑁄 𑀧𑀪𑀼𑀢𑀺 𑀧𑀸𑀓𑀝𑀫𑁂𑀯. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀢𑀁 𑀤𑁂𑀲𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼.

(𑁨) 𑀅𑀢𑁄 𑀏𑀯 𑀪𑀕𑀯𑀸 ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀁 𑀆𑀳. 𑀢𑀢𑁆𑀣 𑀤𑀼𑀢𑀺𑀬𑀯𑀸𑀭𑁂 𑀉𑀧𑀥𑀺𑀧𑀘𑁆𑀘𑀬𑀸𑀢𑀺 𑀲𑀸𑀲𑀯𑀓𑀫𑁆𑀫𑀧𑀘𑁆𑀘𑀬𑀸. 𑀲𑀸𑀲𑀯𑀓𑀫𑁆𑀫𑀜𑁆𑀳𑀺 𑀇𑀥 ‘‘𑀉𑀧𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀅𑀲𑁂𑀲𑀁 𑀯𑀺𑀭𑀸𑀕𑁂𑀦 𑀦𑀺𑀭𑁄𑀥𑀸, 𑀅𑀲𑁂𑀲𑀯𑀺𑀭𑀸𑀕𑀲𑀗𑁆𑀔𑀸𑀢𑀸 𑀯𑀸 𑀦𑀺𑀭𑁄𑀥𑀸.

𑁭𑁩𑁪. 𑀉𑀧𑀥𑀺𑀦𑀺𑀤𑀸𑀦𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀸. 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀓𑀸𑀭𑀡𑀁 ‘‘𑀉𑀧𑀥𑀻’’𑀢𑀺 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀏𑀯𑀁 𑀅𑀬𑀫𑁆𑀧𑀺 𑀯𑀸𑀭𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀻𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀯𑀼𑀢𑁆𑀢𑁄. 𑀬𑀣𑀸 𑀘𑀸𑀬𑀁, 𑀏𑀯𑀁 𑀲𑀩𑁆𑀩𑀯𑀸𑀭𑀸.

(𑁩) 𑀢𑀢𑁆𑀣 𑀢𑀢𑀺𑀬𑀯𑀸𑀭𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑀫𑁆𑀪𑀸𑀭𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸. 𑀤𑀼𑀓𑁆𑀔𑀁 𑀧𑀦 𑀲𑀩𑁆𑀩𑀢𑁆𑀣 𑀯𑀝𑁆𑀝𑀤𑀼𑀓𑁆𑀔𑀫𑁂𑀯.

𑁭𑁩𑁫. 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑀦𑁆𑀢𑀺 𑀔𑀦𑁆𑀥𑀦𑀺𑀩𑁆𑀩𑀢𑁆𑀢𑀺𑀁 𑀚𑀸𑀢𑀺𑀁 𑀔𑀦𑁆𑀥𑀪𑁂𑀤𑀁 𑀫𑀭𑀡𑀁 𑀔𑀦𑁆𑀥𑀧𑀝𑀺𑀧𑀸𑀝𑀺𑀁 𑀲𑀁𑀲𑀸𑀭𑀜𑁆𑀘. 𑀯𑀚𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺 𑀉𑀧𑁂𑀦𑁆𑀢𑀺. 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀇𑀫𑀁 𑀫𑀦𑀼𑀲𑁆𑀲𑀪𑀸𑀯𑀁 𑀇𑀢𑁄 𑀅𑀯𑀲𑁂𑀲𑀅𑀜𑁆𑀜𑀦𑀺𑀓𑀸𑀬𑀪𑀸𑀯𑀜𑁆𑀘. 𑀕𑀢𑀻𑀢𑀺 𑀧𑀘𑁆𑀘𑀬𑀪𑀸𑀯𑁄.

𑁭𑁩𑁬. 𑀅𑀯𑀺𑀚𑁆𑀚𑀸 𑀳𑀸𑀬𑀦𑁆𑀢𑀺 𑀅𑀯𑀺𑀚𑁆𑀚𑀸 𑀳𑀺 𑀅𑀬𑀁. 𑀯𑀺𑀚𑁆𑀚𑀸𑀕𑀢𑀸 𑀘 𑀬𑁂 𑀲𑀢𑁆𑀢𑀸𑀢𑀺 𑀬𑁂 𑀘 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸𑀬 𑀓𑀺𑀮𑁂𑀲𑁂 𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀸 𑀔𑀻𑀡𑀸𑀲𑀯𑀲𑀢𑁆𑀢𑀸. 𑀲𑁂𑀲𑀫𑀼𑀢𑁆𑀢𑀸𑀦𑀢𑁆𑀣𑀫𑁂𑀯.

(𑁪) 𑀘𑀢𑀼𑀢𑁆𑀣𑀯𑀸𑀭𑁂 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀢𑀺 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀧𑀘𑁆𑀘𑀬𑀸.

𑁭𑁩𑁮-𑁯. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀬𑀤𑀺𑀤𑀁 𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸, 𑀏𑀢𑀁 𑀆𑀤𑀻𑀦𑀯𑀦𑁆𑀢𑀺 𑀜𑀢𑁆𑀯𑀸. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀢𑀺 𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀫𑀕𑁆𑀕𑀜𑀸𑀡𑁂𑀦 𑀲𑀫𑀣𑀸, 𑀉𑀧𑀳𑀢𑀢𑀸𑀬 𑀨𑀮𑀲𑀫𑀢𑁆𑀣𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀜𑀸𑀦𑀦𑁆𑀢𑀺 𑀓𑀸𑀫𑀲𑀜𑁆𑀜𑀸𑀤𑀻𑀦𑀁 𑀫𑀕𑁆𑀕𑁂𑀦𑁂𑀯 𑀉𑀧𑀭𑁄𑀥𑀦𑀸. 𑀏𑀢𑀁 𑀜𑀢𑁆𑀯𑀸 𑀬𑀣𑀸𑀢𑀣𑀦𑁆𑀢𑀺 𑀏𑀢𑀁 𑀤𑀼𑀓𑁆𑀔𑀓𑁆𑀔𑀬𑀁 𑀅𑀯𑀺𑀧𑀭𑀻𑀢𑀁 𑀜𑀢𑁆𑀯𑀸. 𑀲𑀫𑁆𑀫𑀤𑁆𑀤𑀲𑀸𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀸. 𑀲𑀫𑁆𑀫𑀤𑀜𑁆𑀜𑀸𑀬𑀸𑀢𑀺 𑀲𑀗𑁆𑀔𑀢𑀁 𑀅𑀦𑀺𑀘𑁆𑀘𑀸𑀤𑀺𑀢𑁄, 𑀅𑀲𑀗𑁆𑀔𑀢𑀜𑁆𑀘 𑀦𑀺𑀘𑁆𑀘𑀸𑀤𑀺𑀢𑁄 𑀜𑀢𑁆𑀯𑀸. 𑀫𑀸𑀭𑀲𑀁𑀬𑁄𑀕𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀲𑁂𑀲𑀫𑀼𑀢𑁆𑀢𑀸𑀦𑀢𑁆𑀣𑀫𑁂𑀯.

(𑁫) 𑀧𑀜𑁆𑀘𑀫𑀯𑀸𑀭𑁂 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀲𑀳𑀚𑀸𑀢𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸.

𑁭𑁪𑁧. 𑀦𑀺𑀘𑁆𑀙𑀸𑀢𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺. 𑀲𑁂𑀲𑀁 𑀧𑀸𑀓𑀝𑀫𑁂𑀯.

(𑁬) 𑀙𑀝𑁆𑀞𑀯𑀸𑀭𑁂 𑀨𑀲𑁆𑀲𑀧𑀘𑁆𑀘𑀬𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀏𑀢𑁆𑀣 𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀢𑁆𑀢𑀩𑁆𑀩𑀸𑀦𑀺 𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀸𑀦𑀺 𑀅𑀯𑀢𑁆𑀯𑀸 𑀨𑀲𑁆𑀲𑁄 𑀯𑀼𑀢𑁆𑀢𑁄. 𑀢𑀸𑀦𑀺 𑀳𑀺 𑀭𑀽𑀧𑀫𑀺𑀲𑁆𑀲𑀓𑀢𑁆𑀢𑀸 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀸𑀦𑁂𑀯 𑀦 𑀳𑁄𑀦𑁆𑀢𑀺, 𑀇𑀤𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀁 𑀓𑀫𑁆𑀫𑀢𑁄 𑀯𑀸 𑀲𑀫𑁆𑀪𑀯𑁂𑀬𑁆𑀬 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄 𑀯𑀸𑀢𑀺.

𑁭𑁪𑁨-𑁩. 𑀪𑀯𑀲𑁄𑀢𑀸𑀦𑀼𑀲𑀸𑀭𑀺𑀦𑀦𑁆𑀢𑀺 𑀢𑀡𑁆𑀳𑀸𑀦𑀼𑀲𑀸𑀭𑀺𑀦𑀁. 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀅𑀜𑁆𑀜𑀸𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀬 𑀜𑀢𑁆𑀯𑀸. 𑀉𑀧𑀲𑀫𑁂 𑀭𑀢𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀸𑀦𑁂 𑀭𑀢𑀸. 𑀨𑀲𑁆𑀲𑀸𑀪𑀺𑀲𑀫𑀬𑀸𑀢𑀺 𑀨𑀲𑁆𑀲𑀦𑀺𑀭𑁄𑀥𑀸. 𑀲𑁂𑀲𑀁 𑀧𑀸𑀓𑀝𑀫𑁂𑀯.

(𑁭) 𑀲𑀢𑁆𑀢𑀫𑀯𑀸𑀭𑁂 𑀯𑁂𑀤𑀦𑀸𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀯𑁂𑀤𑀦𑀸𑀧𑀘𑁆𑀘𑀬𑀸.

𑁭𑁪𑁪-𑁫. 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀳𑀸𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑁂𑀦 𑀲𑀳. 𑀏𑀢𑀁 𑀤𑀼𑀓𑁆𑀔𑀦𑁆𑀢𑀺 𑀜𑀢𑁆𑀯𑀸𑀦𑀸𑀢𑀺 𑀏𑀢𑀁 𑀲𑀩𑁆𑀩𑀁 𑀯𑁂𑀤𑀬𑀺𑀢𑀁 ‘‘𑀤𑀼𑀓𑁆𑀔𑀓𑀸𑀭𑀡’’𑀦𑁆𑀢𑀺 𑀜𑀢𑁆𑀯𑀸, 𑀯𑀺𑀧𑀭𑀺𑀡𑀸𑀫𑀝𑁆𑀞𑀺𑀢𑀺𑀅𑀜𑁆𑀜𑀸𑀡𑀤𑀼𑀓𑁆𑀔𑀢𑀸𑀳𑀺 𑀯𑀸 𑀤𑀼𑀓𑁆𑀔𑀁 𑀜𑀢𑁆𑀯𑀸. 𑀫𑁄𑀲𑀥𑀫𑁆𑀫𑀦𑁆𑀢𑀺 𑀦𑀲𑁆𑀲𑀦𑀥𑀫𑁆𑀫𑀁. 𑀧𑀮𑁄𑀓𑀺𑀦𑀦𑁆𑀢𑀺 𑀚𑀭𑀸𑀫𑀭𑀡𑁂𑀳𑀺 𑀧𑀮𑀼𑀚𑁆𑀚𑀦𑀥𑀫𑁆𑀫𑀁. 𑀨𑀼𑀲𑁆𑀲 𑀨𑀼𑀲𑁆𑀲𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑁂𑀦 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸. 𑀯𑀬𑀁 𑀧𑀲𑁆𑀲𑀦𑁆𑀢𑀺 𑀅𑀦𑁆𑀢𑁂 𑀪𑀗𑁆𑀕𑀫𑁂𑀯 𑀧𑀲𑁆𑀲𑀦𑁆𑀢𑁄. 𑀏𑀯𑀁 𑀢𑀢𑁆𑀣 𑀯𑀺𑀚𑀸𑀦𑀢𑀻𑀢𑀺 𑀏𑀯𑀁 𑀢𑀸 𑀯𑁂𑀤𑀦𑀸 𑀯𑀺𑀚𑀸𑀦𑀸𑀢𑀺, 𑀢𑀢𑁆𑀣 𑀯𑀸 𑀤𑀼𑀓𑁆𑀔𑀪𑀸𑀯𑀁 𑀯𑀺𑀚𑀸𑀦𑀸𑀢𑀺. 𑀯𑁂𑀤𑀦𑀸𑀦𑀁 𑀔𑀬𑀸𑀢𑀺 𑀢𑀢𑁄 𑀧𑀭𑀁 𑀫𑀕𑁆𑀕𑀜𑀸𑀡𑁂𑀦 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑁂𑀤𑀦𑀸𑀦𑀁 𑀔𑀬𑀸. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁮) 𑀅𑀝𑁆𑀞𑀫𑀯𑀸𑀭𑁂 𑀢𑀡𑁆𑀳𑀸𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀲𑀫𑁆𑀪𑀸𑀭𑀢𑀡𑁆𑀳𑀸𑀧𑀘𑁆𑀘𑀬𑀸.

𑁭𑁪𑁭. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀦𑁆𑀢𑀺 𑀏𑀢𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁 𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀜𑀢𑁆𑀯𑀸. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁯) 𑀦𑀯𑀫𑀯𑀸𑀭𑁂 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀲𑀫𑁆𑀪𑀸𑀭𑀉𑀧𑀸𑀤𑀸𑀦𑀧𑀘𑁆𑀘𑀬𑀸.

𑁭𑁪𑁮-𑁯. 𑀪𑀯𑁄𑀢𑀺 𑀯𑀺𑀧𑀸𑀓𑀪𑀯𑁄 𑀔𑀦𑁆𑀥𑀧𑀸𑀢𑀼𑀪𑀸𑀯𑁄. 𑀪𑀽𑀢𑁄 𑀤𑀼𑀓𑁆𑀔𑀦𑁆𑀢𑀺 𑀪𑀽𑀢𑁄 𑀲𑀫𑁆𑀪𑀽𑀢𑁄 𑀯𑀝𑁆𑀝𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺. 𑀚𑀸𑀢𑀲𑁆𑀲 𑀫𑀭𑀡𑀦𑁆𑀢𑀺 𑀬𑀢𑁆𑀭𑀸𑀧𑀺 ‘‘𑀪𑀽𑀢𑁄 𑀲𑀼𑀔𑀁 𑀦𑀺𑀕𑀘𑁆𑀙𑀢𑀻’’𑀢𑀺 𑀩𑀸𑀮𑀸 𑀫𑀜𑁆𑀜𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀤𑀼𑀓𑁆𑀔𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀻’’𑀢𑀺. 𑀤𑀼𑀢𑀺𑀬𑀕𑀸𑀣𑀸𑀬 𑀬𑁄𑀚𑀦𑀸 𑁋 𑀅𑀦𑀺𑀘𑁆𑀘𑀸𑀤𑀻𑀳𑀺 𑀲𑀫𑁆𑀫𑀤𑀜𑁆𑀜𑀸𑀬 𑀧𑀡𑁆𑀟𑀺𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸 𑀚𑀸𑀢𑀺𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀜𑁆𑀜𑀸𑀬 𑀦 𑀕𑀘𑁆𑀙𑀦𑁆𑀢𑀺 𑀧𑀼𑀦𑀩𑁆𑀪𑀯𑀦𑁆𑀢𑀺.

(𑁧𑁦) 𑀤𑀲𑀫𑀯𑀸𑀭𑁂 𑀆𑀭𑀫𑁆𑀪𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀧𑀘𑁆𑀘𑀬𑀸.

𑁭𑁫𑁧. 𑀅𑀦𑀸𑀭𑀫𑁆𑀪𑁂 𑀯𑀺𑀫𑀼𑀢𑁆𑀢𑀺𑀦𑁄𑀢𑀺 𑀅𑀦𑀸𑀭𑀫𑁆𑀪𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑀲𑁆𑀲. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁧𑁧) 𑀏𑀓𑀸𑀤𑀲𑀫𑀯𑀸𑀭𑁂 𑀆𑀳𑀸𑀭𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀸𑀳𑀸𑀭𑀧𑀘𑁆𑀘𑀬𑀸. 𑀅𑀧𑀭𑁄 𑀦𑀬𑁄 𑁋 𑀘𑀢𑀼𑀩𑁆𑀩𑀺𑀥𑀸 𑀲𑀢𑁆𑀢𑀸 𑀭𑀽𑀧𑀽𑀧𑀕𑀸, 𑀯𑁂𑀤𑀦𑀽𑀧𑀕𑀸, 𑀲𑀜𑁆𑀜𑀽𑀧𑀕𑀸, 𑀲𑀗𑁆𑀔𑀸𑀭𑀽𑀧𑀕𑀸𑀢𑀺. 𑀢𑀢𑁆𑀣 𑀏𑀓𑀸𑀤𑀲𑀯𑀺𑀥𑀸𑀬 𑀓𑀸𑀫𑀥𑀸𑀢𑀼𑀬𑀸 𑀲𑀢𑁆𑀢𑀸 𑀭𑀽𑀧𑀽𑀧𑀕𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁂𑀯𑀦𑀢𑁄. 𑀭𑀽𑀧𑀥𑀸𑀢𑀼𑀬𑀸 𑀲𑀢𑁆𑀢𑀸 𑀅𑀜𑁆𑀜𑀢𑁆𑀭 𑀅𑀲𑀜𑁆𑀜𑁂𑀳𑀺 𑀯𑁂𑀤𑀦𑀽𑀧𑀕𑀸 𑀨𑀲𑁆𑀲𑀸𑀳𑀸𑀭𑀲𑁂𑀯𑀦𑀢𑁄. 𑀳𑁂𑀝𑁆𑀞𑀸 𑀢𑀺𑀯𑀺𑀥𑀸𑀬 𑀅𑀭𑀽𑀧𑀥𑀸𑀢𑀼𑀬𑀸 𑀲𑀢𑁆𑀢𑀸 𑀲𑀜𑁆𑀜𑀽𑀧𑀕𑀸 𑀲𑀜𑁆𑀜𑀸𑀪𑀺𑀦𑀺𑀩𑁆𑀩𑀢𑁆𑀢𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀲𑁂𑀯𑀦𑀢𑁄. 𑀪𑀯𑀕𑁆𑀕𑁂 𑀲𑀢𑁆𑀢𑀸 𑀲𑀗𑁆𑀔𑀸𑀭𑀽𑀧𑀕𑀸 𑀲𑀗𑁆𑀔𑀸𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀯𑀺𑀜𑁆𑀜𑀸𑀡𑀸𑀳𑀸𑀭𑀲𑁂𑀯𑀦𑀢𑁄𑀢𑀺. 𑀏𑀯𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀳𑀸𑀭𑀧𑀘𑁆𑀘𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭𑁫𑁫. 𑀆𑀭𑁄𑀕𑁆𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀗𑁆𑀔𑀸𑀬 𑀲𑁂𑀯𑀻𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑁂𑀯𑀫𑀸𑀦𑁄, ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲𑀥𑀸𑀢𑀼𑀬𑁄’’𑀢𑀺 𑀏𑀯𑀁 𑀯𑀸 𑀮𑁄𑀓𑀁 𑀲𑀗𑁆𑀔𑀸𑀬 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀜𑀸𑀡𑁂𑀦 𑀲𑁂𑀯𑀫𑀸𑀦𑁄. 𑀥𑀫𑁆𑀫𑀝𑁆𑀞𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀞𑀺𑀢𑁄. 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀻𑀢𑀺 ‘‘𑀤𑁂𑀯𑁄’’𑀢𑀺 𑀯𑀸 ‘‘𑀫𑀦𑀼𑀲𑁆𑀲𑁄’’𑀢𑀺 𑀯𑀸 𑀆𑀤𑀺𑀓𑀁 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁧𑁨) 𑀤𑁆𑀯𑀸𑀤𑀲𑀫𑀯𑀸𑀭𑁂 𑀇𑀜𑁆𑀚𑀺𑀢𑀧𑀘𑁆𑀘𑀬𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀓𑀫𑁆𑀫𑀓𑀺𑀮𑁂𑀲𑀇𑀜𑁆𑀚𑀺𑀢𑁂𑀲𑀼 𑀬𑀢𑁄 𑀓𑀼𑀢𑁄𑀘𑀺 𑀓𑀫𑁆𑀫𑀲𑀫𑁆𑀪𑀸𑀭𑀺𑀜𑁆𑀚𑀺𑀢𑀧𑀘𑁆𑀘𑀬𑀸.

𑁭𑁫𑁭. 𑀏𑀚𑀁 𑀯𑁄𑀲𑁆𑀲𑀚𑁆𑀚𑀸𑀢𑀺 𑀢𑀡𑁆𑀳𑀁 𑀘𑀚𑀺𑀢𑁆𑀯𑀸. 𑀲𑀗𑁆𑀔𑀸𑀭𑁂 𑀉𑀧𑀭𑀼𑀦𑁆𑀥𑀺𑀬𑀸𑀢𑀺 𑀓𑀫𑁆𑀫𑀁 𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑁂 𑀘 𑀲𑀗𑁆𑀔𑀸𑀭𑁂 𑀦𑀺𑀭𑁄𑀥𑁂𑀢𑁆𑀯𑀸. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁧𑁩) 𑀢𑁂𑀭𑀲𑀫𑀯𑀸𑀭𑁂 𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀦𑁆𑀢𑀺 𑀢𑀡𑁆𑀳𑀸𑀬 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑁂𑀳𑀺 𑀯𑀸 𑀔𑀦𑁆𑀥𑁂 𑀦𑀺𑀲𑁆𑀲𑀺𑀢𑀲𑁆𑀲 𑀲𑀻𑀳𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁭𑁮) 𑀤𑁂𑀯𑀸𑀦𑀁 𑀯𑀺𑀬 𑀪𑀬𑀘𑀮𑀦𑀁 𑀳𑁄𑀢𑀺. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁧𑁪) 𑀘𑀼𑀤𑁆𑀤𑀲𑀫𑀯𑀸𑀭𑁂 𑀭𑀽𑀧𑁂𑀳𑀻𑀢𑀺 𑀭𑀽𑀧𑀪𑀯𑁂𑀳𑀺 𑀭𑀽𑀧𑀲𑀫𑀸𑀧𑀢𑁆𑀢𑀻𑀳𑀺 𑀯𑀸. 𑀅𑀭𑀽𑀧𑀸𑀢𑀺 𑀅𑀭𑀽𑀧𑀪𑀯𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀯𑀸. 𑀦𑀺𑀭𑁄𑀥𑁄𑀢𑀺 𑀦𑀺𑀩𑁆𑀩𑀸𑀦𑀁.

𑁭𑁬𑁧. 𑀫𑀘𑁆𑀘𑀼𑀳𑀸𑀬𑀺𑀦𑁄𑀢𑀺 𑀫𑀭𑀡𑀫𑀘𑁆𑀘𑀼 𑀓𑀺𑀮𑁂𑀲𑀫𑀘𑁆𑀘𑀼 𑀤𑁂𑀯𑀧𑀼𑀢𑁆𑀢𑀫𑀘𑁆𑀘𑀼𑀳𑀸𑀬𑀺𑀦𑁄, 𑀢𑀺𑀯𑀺𑀥𑀫𑁆𑀧𑀺 𑀢𑀁 𑀫𑀘𑁆𑀘𑀼𑀁 𑀳𑀺𑀢𑁆𑀯𑀸 𑀕𑀸𑀫𑀺𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁧𑁫) 𑀧𑀦𑁆𑀦𑀭𑀲𑀫𑀯𑀸𑀭𑁂 𑀬𑀦𑁆𑀢𑀺 𑀦𑀸𑀫𑀭𑀽𑀧𑀁 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀮𑁄𑀓𑁂𑀦 𑀥𑀼𑀯𑀲𑀼𑀪𑀲𑀼𑀔𑀢𑁆𑀢𑀯𑀲𑁂𑀦 ‘‘𑀇𑀤𑀁 𑀲𑀘𑁆𑀘’’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁 𑀤𑀺𑀝𑁆𑀞𑀫𑀸𑀮𑁄𑀓𑀺𑀢𑀁. 𑀢𑀤𑀫𑀭𑀺𑀬𑀸𑀦𑀦𑁆𑀢𑀺 𑀇𑀤𑀁 𑀅𑀭𑀺𑀬𑀸𑀦𑀁, 𑀅𑀦𑀼𑀦𑀸𑀲𑀺𑀓𑀇𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀢𑀁 𑀫𑀼𑀲𑀸𑀢𑀺 𑀏𑀢𑀁 𑀥𑀼𑀯𑀸𑀤𑀺𑀯𑀲𑁂𑀦 𑀕𑀳𑀺𑀢𑀫𑁆𑀧𑀺 𑀫𑀼𑀲𑀸, 𑀦 𑀢𑀸𑀤𑀺𑀲𑀁 𑀳𑁄𑀢𑀻𑀢𑀺. 𑀧𑀼𑀦 𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀮𑁄𑀓𑁂𑀦 𑀭𑀽𑀧𑀯𑁂𑀤𑀦𑀸𑀤𑀻𑀦𑀫𑀪𑀸𑀯𑀢𑁄 ‘‘𑀇𑀤𑀁 𑀫𑀼𑀲𑀸 𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁. 𑀢𑀤𑀫𑀭𑀺𑀬𑀸𑀦𑀁 𑀏𑀢𑀁 𑀲𑀘𑁆𑀘𑀦𑁆𑀢𑀺 𑀢𑀁 𑀇𑀤𑀁 𑀅𑀭𑀺𑀬𑀸𑀦𑀁 𑀏𑀢𑀁 𑀦𑀺𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑀸 𑀲𑀼𑀪𑀪𑀸𑀯𑀸, 𑀧𑀯𑀢𑁆𑀢𑀺𑀤𑀼𑀓𑁆𑀔𑀧𑀝𑀺𑀧𑀓𑁆𑀔𑀲𑀗𑁆𑀔𑀸𑀢𑀸 𑀲𑀼𑀔𑀪𑀸𑀯𑀸, 𑀅𑀘𑁆𑀘𑀦𑁆𑀢𑀲𑀦𑁆𑀢𑀺𑀲𑀗𑁆𑀔𑀸𑀢𑀸 𑀦𑀺𑀘𑁆𑀘𑀪𑀸𑀯𑀸 𑀘 𑀅𑀦𑀧𑀕𑀫𑀦𑁂𑀦 𑀧𑀭𑀫𑀢𑁆𑀣𑀢𑁄 ‘‘𑀲𑀘𑁆𑀘’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁.

𑁭𑁬𑁨-𑁩. 𑀅𑀦𑀢𑁆𑀢𑀦𑀺 𑀅𑀢𑁆𑀢𑀫𑀸𑀦𑀺𑀦𑁆𑀢𑀺 𑀅𑀦𑀢𑁆𑀢𑀦𑀺 𑀦𑀸𑀫𑀭𑀽𑀧𑁂 𑀅𑀢𑁆𑀢𑀫𑀸𑀦𑀺𑀁. 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀫𑀜𑁆𑀜𑀢𑀻𑀢𑀺 𑀇𑀤𑀁 𑀦𑀸𑀫𑀭𑀽𑀧𑀁 𑀥𑀼𑀯𑀸𑀤𑀺𑀯𑀲𑁂𑀦 ‘‘𑀲𑀘𑁆𑀘’’𑀦𑁆𑀢𑀺 𑀫𑀜𑁆𑀜𑀢𑀺. 𑀬𑁂𑀦 𑀬𑁂𑀦 𑀳𑀻𑀢𑀺 𑀬𑁂𑀦 𑀬𑁂𑀦 𑀭𑀽𑀧𑁂 𑀯𑀸 𑀯𑁂𑀤𑀦𑀸𑀬 𑀯𑀸 ‘‘𑀫𑀫 𑀭𑀽𑀧𑀁, 𑀫𑀫 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀜𑁆𑀜𑀦𑁆𑀢𑀺. 𑀢𑀢𑁄 𑀢𑀦𑁆𑀢𑀺 𑀢𑀢𑁄 𑀫𑀜𑁆𑀜𑀺𑀢𑀸𑀓𑀸𑀭𑀸 𑀢𑀁 𑀦𑀸𑀫𑀭𑀽𑀧𑀁 𑀳𑁄𑀢𑀺 𑀅𑀜𑁆𑀜𑀣𑀸. 𑀓𑀺𑀁 𑀓𑀸𑀭𑀡𑀁? 𑀢𑀜𑁆𑀳𑀺 𑀢𑀲𑁆𑀲 𑀫𑀼𑀲𑀸 𑀳𑁄𑀢𑀺, 𑀬𑀲𑁆𑀫𑀸 𑀢𑀁 𑀬𑀣𑀸𑀫𑀜𑁆𑀜𑀺𑀢𑀸𑀓𑀸𑀭𑀸 𑀫𑀼𑀲𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀣𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀫𑀼𑀲𑀸 𑀳𑁄𑀢𑀻𑀢𑀺? 𑀫𑁄𑀲𑀥𑀫𑁆𑀫𑀜𑁆𑀳𑀺 𑀇𑀢𑁆𑀢𑀭𑀁, 𑀬𑀲𑁆𑀫𑀸 𑀬𑀁 𑀇𑀢𑁆𑀢𑀭𑀁 𑀧𑀭𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀢𑀁 𑀫𑁄𑀲𑀥𑀫𑁆𑀫𑀁 𑀦𑀲𑁆𑀲𑀦𑀥𑀫𑁆𑀫𑀁 𑀳𑁄𑀢𑀺, 𑀢𑀣𑀸𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑁆𑀢𑀺. 𑀲𑀘𑁆𑀘𑀸𑀪𑀺𑀲𑀫𑀬𑀸𑀢𑀺 𑀲𑀘𑁆𑀘𑀸𑀯𑀩𑁄𑀥𑀸. 𑀲𑁂𑀲𑀫𑀼𑀢𑁆𑀢𑀸𑀦𑀫𑁂𑀯.

(𑁧𑁬) 𑀲𑁄𑀴𑀲𑀫𑀯𑀸𑀭𑁂 𑀬𑀦𑁆𑀢𑀺 𑀙𑀩𑁆𑀩𑀺𑀥𑀫𑀺𑀝𑁆𑀞𑀸𑀭𑀫𑁆𑀫𑀡𑀁 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀮𑁄𑀓𑁂𑀦 𑀲𑀮𑀪𑀫𑀘𑁆𑀙𑀫𑀓𑁆𑀓𑀝𑀸𑀤𑀻𑀳𑀺 𑀧𑀤𑀻𑀧𑀩𑀴𑀺𑀲𑀮𑁂𑀧𑀸𑀤𑀬𑁄 𑀯𑀺𑀬 ‘‘𑀇𑀤𑀁 𑀲𑀼𑀔’’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁. 𑀢𑀤𑀫𑀭𑀺𑀬𑀸𑀦𑀁 𑀏𑀢𑀁 𑀤𑀼𑀓𑁆𑀔𑀦𑁆𑀢𑀺 𑀢𑀁 𑀇𑀤𑀁 𑀅𑀭𑀺𑀬𑀸𑀦𑀁 ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁫𑁦; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁩𑁬) 𑀦𑀬𑁂𑀦 ‘‘𑀏𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁. 𑀧𑀼𑀦 𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀮𑁄𑀓𑁂𑀦 𑀓𑀸𑀫𑀕𑀼𑀡𑀸𑀪𑀸𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁. 𑀢𑀤𑀫𑀭𑀺𑀬𑀸𑀦𑀦𑁆𑀢𑀺 𑀢𑀁 𑀇𑀤𑀁 𑀅𑀭𑀺𑀬𑀸𑀦𑀁 𑀧𑀭𑀫𑀢𑁆𑀣𑀲𑀼𑀔𑀢𑁄 ‘‘𑀏𑀢𑀁 𑀲𑀼𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁.

𑁭𑁬𑁫-𑁬. 𑀓𑁂𑀯𑀮𑀸𑀢𑀺 𑀅𑀦𑀯𑀲𑁂𑀲𑀸. 𑀇𑀝𑁆𑀞𑀸𑀢𑀺 𑀇𑀘𑁆𑀙𑀺𑀢𑀸 𑀧𑀢𑁆𑀣𑀺𑀢𑀸. 𑀓𑀦𑁆𑀢𑀸𑀢𑀺 𑀧𑀺𑀬𑀸. 𑀫𑀦𑀸𑀧𑀸𑀢𑀺 𑀫𑀦𑀯𑀼𑀟𑁆𑀠𑀺𑀓𑀭𑀸. 𑀬𑀸𑀯𑀢𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀸𑀯𑀢𑀸 𑀏𑀢𑁂 𑀙 𑀆𑀭𑀫𑁆𑀫𑀡𑀸 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀘𑀦𑀩𑁆𑀬𑀢𑁆𑀢𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂 𑀯𑁄𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑁭𑁬𑁭-𑁮. 𑀲𑀼𑀔𑀦𑁆𑀢𑀺 𑀤𑀺𑀝𑁆𑀞𑀫𑀭𑀺𑀬𑁂𑀳𑀺, 𑀲𑀓𑁆𑀓𑀸𑀬𑀲𑁆𑀲𑀼𑀧𑀭𑁄𑀥𑀦𑀦𑁆𑀢𑀺 ‘‘𑀲𑀼𑀔’’𑀫𑀺𑀢𑀺 𑀅𑀭𑀺𑀬𑁂𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀭𑁄𑀥𑁄 𑀤𑀺𑀝𑁆𑀞𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀦𑀻𑀓𑀫𑀺𑀤𑀁 𑀳𑁄𑀢𑀻𑀢𑀺 𑀧𑀝𑀺𑀮𑁄𑀫𑀫𑀺𑀤𑀁 𑀤𑀲𑁆𑀲𑀦𑀁 𑀳𑁄𑀢𑀺. 𑀧𑀲𑁆𑀲𑀢𑀦𑁆𑀢𑀺 𑀧𑀲𑁆𑀲𑀦𑁆𑀢𑀸𑀦𑀁, 𑀧𑀡𑁆𑀟𑀺𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀧𑀭𑁂𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑁂 𑀲𑀦𑁆𑀥𑀸𑀬𑀸𑀳. 𑀧𑀼𑀦 𑀬𑀁 𑀧𑀭𑁂𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑀁.

𑁭𑁬𑁯-𑁭𑁧. 𑀧𑀲𑁆𑀲𑀸𑀢𑀺 𑀲𑁄𑀢𑀸𑀭𑀁 𑀆𑀮𑀧𑀢𑀺. 𑀥𑀫𑁆𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀁. 𑀲𑀫𑁆𑀧𑀫𑀽𑀴𑁆𑀳𑁂𑀢𑁆𑀣𑀯𑀺𑀤𑁆𑀤𑀲𑀽𑀢𑀺 𑀲𑀫𑁆𑀧𑀫𑀽𑀴𑁆𑀳𑀸 𑀏𑀢𑁆𑀣 𑀅𑀯𑀺𑀤𑁆𑀤𑀲𑀽 𑀩𑀸𑀮𑀸. 𑀓𑀺𑀁𑀓𑀸𑀭𑀡𑀁 𑀲𑀫𑁆𑀧𑀫𑀽𑀴𑁆𑀳𑀸? 𑀦𑀺𑀯𑀼𑀢𑀸𑀦𑀁 𑀢𑀫𑁄 𑀳𑁄𑀢𑀺 , 𑀅𑀦𑁆𑀥𑀓𑀸𑀭𑁄 𑀅𑀧𑀲𑁆𑀲𑀢𑀁, 𑀩𑀸𑀮𑀸𑀦𑀁 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀸𑀦𑀁 𑀑𑀢𑁆𑀣𑀝𑀸𑀦𑀁 𑀅𑀦𑁆𑀥𑀪𑀸𑀯𑀓𑀭𑀡𑁄 𑀢𑀫𑁄 𑀳𑁄𑀢𑀺, 𑀬𑁂𑀦 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀢𑀜𑁆𑀘 𑀯𑀺𑀯𑀝𑀁 𑀳𑁄𑀢𑀺, 𑀆𑀮𑁄𑀓𑁄 𑀧𑀲𑁆𑀲𑀢𑀸𑀫𑀺𑀯𑀸𑀢𑀺 𑀲𑀢𑀜𑁆𑀘 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀜𑁆𑀜𑀸𑀤𑀲𑁆𑀲𑀦𑁂𑀦 𑀧𑀲𑁆𑀲𑀢𑀁 𑀆𑀮𑁄𑀓𑁄𑀯 𑀯𑀺𑀯𑀝𑀁 𑀳𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀦𑁆𑀢𑀺𑀓𑁂 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀕𑀸 𑀥𑀫𑁆𑀫𑀲𑁆𑀲𑀓𑁄𑀯𑀺𑀤𑀸𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀢𑀘𑀧𑀜𑁆𑀘𑀓𑀫𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯 𑀅𑀥𑀺𑀕𑀦𑁆𑀢𑀩𑁆𑀩𑀢𑁄, 𑀅𑀢𑁆𑀢𑀦𑁄 𑀔𑀦𑁆𑀥𑀸𑀦𑀁 𑀯𑀸 𑀦𑀺𑀭𑁄𑀥𑀫𑀢𑁆𑀢𑀢𑁄 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀁, 𑀢𑀁 𑀏𑀯𑀁 𑀲𑀦𑁆𑀢𑀺𑀓𑁂 𑀲𑀦𑁆𑀢𑀫𑁆𑀧𑀺 𑀦 𑀯𑀺𑀚𑀸𑀦𑀦𑁆𑀢𑀺 𑀫𑀕𑀪𑀽𑀢𑀸 𑀚𑀦𑀸 𑀫𑀕𑁆𑀕𑀸𑀫𑀕𑁆𑀕𑀥𑀫𑁆𑀫𑀲𑁆𑀲 𑀲𑀘𑁆𑀘𑀥𑀫𑁆𑀫𑀲𑁆𑀲 𑀯𑀸 𑀅𑀓𑁄𑀯𑀺𑀤𑀸, 𑀲𑀩𑁆𑀩𑀣𑀸 𑀪𑀯𑀭𑀸𑀕…𑀧𑁂… 𑀲𑀼𑀲𑀫𑁆𑀩𑀼𑀥𑁄. 𑀢𑀢𑁆𑀣 𑀫𑀸𑀭𑀥𑁂𑀬𑁆𑀬𑀸𑀦𑀼𑀧𑀦𑁆𑀦𑁂𑀳𑀻𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁 𑀅𑀦𑀼𑀧𑀦𑁆𑀦𑁂𑀳𑀺.

𑁭𑁭𑁨. 𑀧𑀘𑁆𑀙𑀺𑀫𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑁄 ‘‘𑀏𑀯𑀁 𑀅𑀲𑀼𑀲𑀫𑁆𑀩𑀼𑀥𑀁 𑀓𑁄 𑀦𑀼 𑀅𑀜𑁆𑀜𑀢𑁆𑀭 𑀫𑀭𑀺𑀬𑁂𑀳𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀞𑀧𑁂𑀢𑁆𑀯𑀸 𑀅𑀭𑀺𑀬𑁂 𑀓𑁄 𑀦𑀼 𑀅𑀜𑁆𑀜𑁄 𑀦𑀺𑀩𑁆𑀩𑀸𑀦𑀧𑀤𑀁 𑀚𑀸𑀦𑀺𑀢𑀼𑀁 𑀅𑀭𑀳𑀢𑀺, 𑀬𑀁 𑀧𑀤𑀁 𑀘𑀢𑀼𑀢𑁆𑀣𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑁆𑀫𑀤𑀜𑁆𑀜𑀸𑀬 𑀅𑀦𑀦𑁆𑀢𑀭𑀫𑁂𑀯 𑀅𑀦𑀸𑀲𑀯𑀸 𑀳𑀼𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀲𑀫𑁆𑀫𑀤𑀜𑁆𑀜𑀸𑀬 𑀯𑀸 𑀅𑀦𑀸𑀲𑀯𑀸 𑀳𑀼𑀢𑁆𑀯𑀸 𑀅𑀦𑁆𑀢𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀅𑀢𑁆𑀢𑀫𑀦𑀸𑀢𑀺 𑀢𑀼𑀝𑁆𑀞𑀫𑀦𑀸. 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀁𑀲𑀼. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑁄𑀴𑀲𑀫𑁂 𑀯𑁂𑀬𑁆𑀬𑀸𑀓𑀭𑀡𑁂. 𑀪𑀜𑁆𑀜𑀫𑀸𑀦𑁂𑀢𑀺 𑀪𑀡𑀺𑀬𑀫𑀸𑀦𑁂. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑀏𑀯𑀁 𑀲𑀩𑁆𑀩𑁂𑀲𑀼𑀧𑀺 𑀲𑁄𑀴𑀲𑀲𑀼 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀲𑀝𑁆𑀞𑀺𑀫𑀢𑁆𑀢𑁂 𑀲𑀝𑁆𑀞𑀺𑀫𑀢𑁆𑀢𑁂 𑀓𑀢𑁆𑀯𑀸 𑀲𑀝𑁆𑀞𑀺𑀅𑀥𑀺𑀓𑀸𑀦𑀁 𑀦𑀯𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼, 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀘𑀢𑀼𑀲𑀝𑁆𑀞𑀺 𑀲𑀘𑁆𑀘𑀸𑀦𑁂𑀢𑁆𑀣 𑀯𑁂𑀦𑁂𑀬𑁆𑀬𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑁂𑀲𑀺𑀢𑀸𑀦𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀝𑁆𑀞𑀺𑀢𑁆𑀢𑀸.

𑀦𑀺𑀝𑁆𑀞𑀺𑀢𑁄 𑀘 𑀢𑀢𑀺𑀬𑁄 𑀯𑀕𑁆𑀕𑁄 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑀢𑁄, 𑀦𑀸𑀫𑁂𑀦

𑀫𑀳𑀸𑀯𑀕𑁆𑀕𑁄𑀢𑀺.