𑁩. 𑀫𑀳𑀸𑀯𑀕𑁆𑀕𑁄

𑁧. 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁮. 𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑀺 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀦𑀁 𑀫𑀳𑀸𑀲𑀸𑀯𑀓𑀸𑀦𑀁 𑀧𑀩𑁆𑀩𑀚𑁆𑀚𑀸 𑀓𑀺𑀢𑁆𑀢𑀺𑀢𑀸, 𑀢𑀁 𑀪𑀺𑀓𑁆𑀔𑀽 𑀘 𑀉𑀧𑀸𑀲𑀓𑀸 𑀘 𑀚𑀸𑀦𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀅𑀓𑀺𑀢𑁆𑀢𑀺𑀢𑀸, 𑀬𑀁𑀦𑀽𑀦𑀸𑀳𑀁 𑀓𑀺𑀢𑁆𑀢𑁂𑀬𑁆𑀬’’𑀦𑁆𑀢𑀺. 𑀲𑁄 𑀚𑁂𑀢𑀯𑀦𑀯𑀺𑀳𑀸𑀭𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀪𑀕𑀯𑀢𑁄 𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀬𑀲𑁆𑀫𑀸 𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑁂𑀦𑁆𑀢𑁂𑀦 𑀬𑀣𑀸 𑀧𑀩𑁆𑀩𑀚𑀺, 𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀬𑀣𑀸 𑀘 𑀧𑀩𑁆𑀩𑀚𑀺, 𑀢𑀁 𑀓𑀺𑀢𑁆𑀢𑁂𑀦𑁆𑀢𑁂𑀦 𑀬𑀣𑀸 𑀯𑀻𑀫𑀁𑀲𑀫𑀸𑀦𑁄 𑀧𑀩𑁆𑀩𑀚𑁆𑀚𑀁 𑀭𑁄𑀘𑁂𑀲𑀺, 𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀢𑀲𑁆𑀫𑀸 ‘‘𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀬𑀣𑀸 𑀧𑀩𑁆𑀩𑀚𑀻’’𑀢𑀺𑀆𑀤𑀺𑀫𑀸𑀳. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀘𑀓𑁆𑀔𑀼𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀫𑀸𑀤𑀺𑀕𑀸𑀣𑀸𑀬 𑀉𑀢𑁆𑀢𑀸𑀦𑀫𑁂𑀯.

𑁪𑁦𑁯. 𑀇𑀤𑀸𑀦𑀺 ‘‘𑀬𑀣𑀸 𑀯𑀻𑀫𑀁𑀲𑀫𑀸𑀦𑁄’’𑀢𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀩𑀸𑀥𑁄𑀬’’𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀩𑀸𑀥𑁄𑀢𑀺 𑀧𑀼𑀢𑁆𑀢𑀤𑀸𑀭𑀸𑀤𑀺𑀲𑀫𑁆𑀧𑀻𑀴𑀦𑁂𑀦 𑀓𑀺𑀮𑁂𑀲𑀲𑀫𑁆𑀧𑀻𑀴𑀦𑁂𑀦 𑀘 𑀓𑀼𑀲𑀮𑀓𑀺𑀭𑀺𑀬𑀸𑀬 𑀑𑀓𑀸𑀲𑀭𑀳𑀺𑀢𑁄. 𑀭𑀚𑀲𑁆𑀲𑀸𑀬𑀢𑀦𑀦𑁆𑀢𑀺 𑀓𑀫𑁆𑀩𑁄𑀚𑀸𑀤𑀬𑁄 𑀯𑀺𑀬 𑀅𑀲𑁆𑀲𑀸𑀤𑀻𑀦𑀁, 𑀭𑀸𑀕𑀸𑀤𑀺𑀭𑀚𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀅𑀩𑁆𑀪𑁄𑀓𑀸𑀲𑁄𑀢𑀺 𑀯𑀼𑀢𑁆𑀢𑀲𑀫𑁆𑀩𑀸𑀥𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀆𑀓𑀸𑀲𑁄 𑀯𑀺𑀬 𑀯𑀺𑀯𑀝𑀸. 𑀇𑀢𑀺 𑀤𑀺𑀲𑁆𑀯𑀸𑀦 𑀧𑀩𑁆𑀩𑀚𑀻𑀢𑀺 𑀇𑀢𑀺 𑀖𑀭𑀸𑀯𑀸𑀲𑀧𑀩𑁆𑀩𑀚𑁆𑀚𑀸𑀲𑀼 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀲𑀼𑀝𑁆𑀞𑀼𑀢𑀭𑀁 𑀘𑁄𑀤𑀺𑀬𑀫𑀸𑀦𑀳𑀤𑀬𑁄 𑀆𑀤𑀻𑀦𑀯𑀫𑀸𑀦𑀺𑀲𑀁𑀲𑀜𑁆𑀘 𑀯𑀻𑀫𑀁𑀲𑀺𑀢𑁆𑀯𑀸, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀔𑀕𑁆𑀕𑁂𑀦 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸, 𑀢𑀸𑀯𑀤𑁂𑀯 𑀘 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀲𑀡𑁆𑀞𑀺𑀢𑀲𑀫𑀡𑀲𑀸𑀭𑀼𑀧𑁆𑀧𑀓𑁂𑀲𑀫𑀲𑁆𑀲𑀼 𑀳𑀼𑀢𑁆𑀯𑀸 𑀖𑀝𑀺𑀓𑀸𑀭𑁂𑀦 𑀩𑁆𑀭𑀳𑁆𑀫𑀼𑀦𑀸 𑀉𑀧𑀦𑀻𑀢𑁂 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 ‘‘𑀏𑀯𑀁 𑀦𑀺𑀯𑀸𑀲𑁂𑀢𑀩𑁆𑀩𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺 𑀓𑁂𑀦𑀘𑀺 𑀅𑀦𑀦𑀼𑀲𑀺𑀝𑁆𑀞𑁄 𑀅𑀦𑁂𑀓𑀚𑀸𑀢𑀺𑀲𑀳𑀲𑁆𑀲𑀧𑀯𑀢𑁆𑀢𑀺𑀢𑁂𑀦 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀘𑀺𑀡𑁆𑀡𑁂𑀦𑁂𑀯 𑀲𑀺𑀓𑁆𑀔𑀸𑀧𑀺𑀬𑀫𑀸𑀦𑁄 𑀧𑀩𑁆𑀩𑀚𑀺. 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀏𑀓𑀁 𑀘𑀻𑀯𑀭𑀁 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀅𑀁𑀲𑁂 𑀆𑀮𑀕𑁆𑀕𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀯𑁂𑀲𑀁 𑀅𑀥𑀺𑀝𑁆𑀞𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁪𑁧𑁦. 𑀏𑀯𑀁 𑀪𑀕𑀯𑀢𑁄 𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀩𑁆𑀩𑀚𑀺𑀢𑀧𑀝𑀺𑀧𑀢𑁆𑀢𑀺𑀁 𑀅𑀦𑁄𑀫𑀸𑀦𑀤𑀻𑀢𑀻𑀭𑀁 𑀳𑀺𑀢𑁆𑀯𑀸 𑀧𑀥𑀸𑀦𑀸𑀬 𑀕𑀫𑀦𑀜𑁆𑀘 𑀧𑀓𑀸𑀲𑁂𑀢𑀼𑀁 ‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦𑀸’’𑀢𑀺𑀆𑀤𑀺𑀁 𑀲𑀩𑁆𑀩𑀫𑀪𑀸𑀲𑀺. 𑀢𑀢𑁆𑀣 𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀯𑀺𑀯𑀚𑁆𑀚𑀬𑀻𑀢𑀺 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀚𑁆𑀚𑁂𑀲𑀺. 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀆𑀚𑀻𑀯𑀁 𑀧𑀭𑀺𑀲𑁄𑀥𑀬𑀻𑀢𑀺 𑀫𑀺𑀘𑁆𑀙𑀸𑀚𑀻𑀯𑀁 𑀳𑀺𑀢𑁆𑀯𑀸 𑀲𑀫𑁆𑀫𑀸𑀚𑀻𑀯𑀫𑁂𑀯 𑀧𑀯𑀢𑁆𑀢𑀬𑀺.

𑁪𑁧𑁧. 𑀏𑀯𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀲𑁄𑀥𑁂𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑀢𑁄 𑀢𑀺𑀁𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀲𑀢𑁆𑀢𑀸𑀳𑁂𑀦 𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑀤𑀸 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺, 𑀢𑀤𑀸 𑀩𑀼𑀤𑁆𑀥𑁄 𑀦 𑀳𑁄𑀢𑀺, 𑀢𑀣𑀸𑀧𑀺 𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑀘𑀭𑀺𑀬𑀸𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺 𑁋 ‘‘𑀇𑀥 𑀭𑀸𑀚𑀸 𑀚𑀸𑀢𑁄, 𑀇𑀥 𑀭𑀚𑁆𑀚𑀁 𑀅𑀕𑁆𑀕𑀳𑁂𑀲𑀻’’𑀢𑀺𑀆𑀤𑀺 𑀮𑁄𑀓𑀺𑀬𑀯𑁄𑀳𑀸𑀭𑀯𑀘𑀦𑀁 𑀯𑀺𑀬. 𑀫𑀕𑀥𑀸𑀦𑀦𑁆𑀢𑀺 𑀫𑀕𑀥𑀸𑀦𑀁 𑀚𑀦𑀧𑀤𑀲𑁆𑀲 𑀦𑀕𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀺𑀭𑀺𑀩𑁆𑀩𑀚𑀦𑁆𑀢𑀺 𑀇𑀤𑀫𑁆𑀧𑀺 𑀢𑀲𑁆𑀲 𑀦𑀸𑀫𑀁. 𑀢𑀜𑁆𑀳𑀺 𑀧𑀡𑁆𑀟𑀯𑀕𑀺𑀚𑁆𑀛𑀓𑀽𑀝𑀯𑁂𑀪𑀸𑀭𑀇𑀲𑀺𑀕𑀺𑀮𑀺𑀯𑁂𑀧𑀼𑀮𑁆𑀮𑀦𑀸𑀫𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀕𑀺𑀭𑀻𑀦𑀁 𑀫𑀚𑁆𑀛𑁂 𑀯𑀚𑁄 𑀯𑀺𑀬 𑀞𑀺𑀢𑀁, 𑀢𑀲𑁆𑀫𑀸 ‘‘𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀺𑀡𑁆𑀟𑀸𑀬 𑀅𑀪𑀺𑀳𑀸𑀭𑁂𑀲𑀻𑀢𑀺 𑀪𑀺𑀓𑁆𑀔𑀢𑁆𑀣𑀸𑀬 𑀢𑀲𑁆𑀫𑀺𑀁 𑀦𑀕𑀭𑁂 𑀘𑀭𑀺. 𑀲𑁄 𑀓𑀺𑀭 𑀦𑀕𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀅𑀢𑁆𑀢𑀦𑁄 𑀆𑀕𑀫𑀦𑀁 𑀦𑀺𑀯𑁂𑀤𑁂𑀬𑁆𑀬𑀁, ‘𑀲𑀼𑀤𑁆𑀥𑁄𑀤𑀦𑀲𑁆𑀲 𑀧𑀼𑀢𑁆𑀢𑁄 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀓𑀼𑀫𑀸𑀭𑁄 𑀆𑀕𑀢𑁄’𑀢𑀺 𑀩𑀳𑀼𑀫𑁆𑀧𑀺 𑀫𑁂 𑀧𑀘𑁆𑀘𑀬𑀁 𑀅𑀪𑀺𑀳𑀭𑁂𑀬𑁆𑀬. 𑀦 𑀔𑁄 𑀧𑀦 𑀫𑁂 𑀢𑀁 𑀧𑀢𑀺𑀭𑀽𑀧𑀁 𑀧𑀩𑁆𑀩𑀚𑀺𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀧𑀘𑁆𑀘𑀬𑀕𑀳𑀡𑀁, 𑀳𑀦𑁆𑀤𑀸𑀳𑀁 𑀧𑀺𑀡𑁆𑀟𑀸𑀬 𑀘𑀭𑀸𑀫𑀻’’𑀢𑀺 𑀤𑁂𑀯𑀤𑀢𑁆𑀢𑀺𑀬𑀁 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀖𑀭𑀁 𑀧𑀺𑀡𑁆𑀟𑀸𑀬 𑀅𑀘𑀭𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀧𑀺𑀡𑁆𑀟𑀸𑀬 𑀅𑀪𑀺𑀳𑀸𑀭𑁂𑀲𑀻’’𑀢𑀺. 𑀆𑀓𑀺𑀡𑁆𑀡𑀯𑀭𑀮𑀓𑁆𑀔𑀡𑁄𑀢𑀺 𑀲𑀭𑀻𑀭𑁂 𑀆𑀓𑀺𑀭𑀺𑀢𑁆𑀯𑀸 𑀯𑀺𑀬 𑀞𑀧𑀺𑀢𑀯𑀭𑀮𑀓𑁆𑀔𑀡𑁄 𑀯𑀺𑀧𑀼𑀮𑀯𑀭𑀮𑀓𑁆𑀔𑀡𑁄 𑀯𑀸. 𑀯𑀺𑀧𑀼𑀮𑀫𑁆𑀧𑀺 𑀳𑀺 ‘‘𑀆𑀓𑀺𑀡𑁆𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀆𑀓𑀺𑀡𑁆𑀡𑀮𑀼𑀤𑁆𑀤𑁄 𑀧𑀼𑀭𑀺𑀲𑁄, 𑀥𑀸𑀢𑀺𑀘𑁂𑀮𑀁𑀯 𑀫𑀓𑁆𑀔𑀺𑀢𑁄’’𑀢𑀺 (𑀚𑀸. 𑁧.𑁬.𑁧𑁧𑁮; 𑁧.𑁯.𑁧𑁦𑁬). 𑀯𑀺𑀧𑀼𑀮𑀮𑀼𑀤𑁆𑀤𑁄𑀢𑀺 𑀅𑀢𑁆𑀣𑁄.

𑁪𑁧𑁨. 𑀢𑀫𑀤𑁆𑀤𑀲𑀸𑀢𑀺 𑀢𑀢𑁄 𑀓𑀺𑀭 𑀧𑀼𑀭𑀺𑀫𑀸𑀦𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀦𑀕𑀭𑁂 𑀦𑀓𑁆𑀔𑀢𑁆𑀢𑀁 𑀖𑁄𑀲𑀺𑀢𑀁 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀁 𑀧𑀦 ‘‘𑀦𑀓𑁆𑀔𑀢𑁆𑀢𑀁 𑀯𑀻𑀢𑀺𑀯𑀢𑁆𑀢𑀁, 𑀓𑀫𑁆𑀫𑀦𑁆𑀢𑀸 𑀧𑀬𑁄𑀚𑁂𑀢𑀩𑁆𑀩𑀸’’𑀢𑀺 𑀪𑁂𑀭𑀺 𑀘𑀭𑀺. 𑀅𑀣 𑀫𑀳𑀸𑀚𑀦𑁄 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺. 𑀭𑀸𑀚𑀸𑀧𑀺 ‘‘𑀓𑀫𑁆𑀫𑀦𑁆𑀢𑀁 𑀲𑀁𑀯𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀩𑀮𑀓𑀸𑀬𑀁 𑀧𑀲𑁆𑀲𑀦𑁆𑀢𑁄 𑀢𑀁 𑀧𑀺𑀡𑁆𑀟𑀸𑀬 𑀅𑀪𑀺𑀳𑀸𑀭𑁂𑀦𑁆𑀢𑀁 𑀫𑀳𑀸𑀲𑀢𑁆𑀢𑀁 𑀅𑀤𑁆𑀤𑀲. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀢𑀫𑀤𑁆𑀤𑀲𑀸 𑀩𑀺𑀫𑁆𑀩𑀺𑀲𑀸𑀭𑁄, 𑀧𑀸𑀲𑀸𑀤𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁄’’𑀢𑀺. 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣𑀸𑀢𑀺 𑀇𑀫𑀁 𑀅𑀢𑁆𑀣𑀁 𑀅𑀫𑀘𑁆𑀘𑀸𑀦𑀁 𑀅𑀪𑀸𑀲𑀺.

𑁪𑁧𑁩. 𑀇𑀤𑀸𑀦𑀺 𑀢𑀁 𑀢𑁂𑀲𑀁 𑀅𑀫𑀘𑁆𑀘𑀸𑀦𑀁 𑀪𑀸𑀲𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀇𑀫𑀁 𑀪𑁄𑀦𑁆𑀢𑁄’’𑀢𑀺. 𑀢𑀢𑁆𑀣 𑀇𑀫𑀦𑁆𑀢𑀺 𑀲𑁄 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀪𑁄𑀦𑁆𑀢𑁄𑀢𑀺 𑀅𑀫𑀘𑁆𑀘𑁂 𑀆𑀮𑀧𑀢𑀺. 𑀦𑀺𑀲𑀸𑀫𑁂𑀣𑀸𑀢𑀺 𑀧𑀲𑁆𑀲𑀣. 𑀅𑀪𑀺𑀭𑀽𑀧𑁄𑀢𑀺 𑀤𑀲𑁆𑀲𑀦𑀻𑀬𑀗𑁆𑀕𑀧𑀘𑁆𑀘𑀗𑁆𑀕𑁄. 𑀩𑁆𑀭𑀳𑁆𑀫𑀸𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑁄. 𑀲𑀼𑀘𑀻𑀢𑀺 𑀧𑀭𑀺𑀲𑀼𑀤𑁆𑀥𑀙𑀯𑀺𑀯𑀡𑁆𑀡𑁄. 𑀘𑀭𑀡𑁂𑀦𑀸𑀢𑀺 𑀕𑀫𑀦𑁂𑀦.

𑁪𑁧𑁪-𑁫. 𑀦𑀻𑀘𑀓𑀼𑀮𑀸𑀫𑀺𑀯𑀸𑀢𑀺 𑀦𑀻𑀘𑀓𑀼𑀮𑀸 𑀇𑀯 𑀧𑀩𑁆𑀩𑀚𑀺𑀢𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀓𑀼𑀳𑀺𑀁 𑀪𑀺𑀓𑁆𑀔𑀼 𑀕𑀫𑀺𑀲𑁆𑀲𑀢𑀻𑀢𑀺 𑀅𑀬𑀁 𑀪𑀺𑀓𑁆𑀔𑀼 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀺, 𑀅𑀚𑁆𑀚 𑀓𑀢𑁆𑀣 𑀯𑀲𑀺𑀲𑁆𑀲𑀢𑀻𑀢𑀺 𑀚𑀸𑀦𑀺𑀢𑀼𑀁 𑀭𑀸𑀚𑀤𑀽𑀢𑀸 𑀲𑀻𑀖𑀁 𑀕𑀘𑁆𑀙𑀦𑁆𑀢𑀼. 𑀤𑀲𑁆𑀲𑀦𑀓𑀸𑀫𑀸 𑀳𑀺 𑀫𑀬𑀁 𑀅𑀲𑁆𑀲𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳. 𑀕𑀼𑀢𑁆𑀢𑀤𑁆𑀯𑀸𑀭𑁄 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀢𑀸𑀬, 𑀲𑀼𑀲𑀁𑀯𑀼𑀢𑁄 𑀲𑀢𑀺𑀬𑀸. 𑀕𑀼𑀢𑁆𑀢𑀤𑁆𑀯𑀸𑀭𑁄 𑀯𑀸 𑀲𑀢𑀺𑀬𑀸, 𑀲𑀼𑀲𑀁𑀯𑀼𑀢𑁄 𑀧𑀸𑀲𑀸𑀤𑀺𑀓𑁂𑀦 𑀲𑀗𑁆𑀖𑀸𑀝𑀺𑀘𑀻𑀯𑀭𑀥𑀸𑀭𑀡𑁂𑀦.

𑁪𑁧𑁬. 𑀔𑀺𑀧𑁆𑀧𑀁 𑀧𑀢𑁆𑀢𑀁 𑀅𑀧𑀽𑀭𑁂𑀲𑀻𑀢𑀺 𑀲𑀫𑁆𑀧𑀚𑀸𑀦𑀢𑁆𑀢𑀸 𑀧𑀢𑀺𑀲𑁆𑀲𑀢𑀢𑁆𑀢𑀸 𑀘 𑀅𑀥𑀺𑀓𑀁 𑀅𑀕𑀡𑁆𑀳𑀦𑁆𑀢𑁄 ‘‘𑀅𑀮𑀁 𑀏𑀢𑁆𑀢𑀸𑀯𑀢𑀸’’𑀢𑀺 𑀅𑀚𑁆𑀛𑀸𑀲𑀬𑀧𑀽𑀭𑀡𑁂𑀦 𑀔𑀺𑀧𑁆𑀧𑀁 𑀧𑀢𑁆𑀢𑀁 𑀅𑀧𑀽𑀭𑁂𑀲𑀺. 𑀫𑀼𑀦𑀻𑀢𑀺 𑀫𑁄𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 𑀅𑀧𑁆𑀧𑀢𑁆𑀢𑀫𑀼𑀦𑀺𑀪𑀸𑀯𑁄𑀧𑀺 𑀫𑀼𑀦𑀺𑀇𑀘𑁆𑀘𑁂𑀯 𑀯𑀼𑀢𑁆𑀢𑁄, 𑀮𑁄𑀓𑀯𑁄𑀳𑀸𑀭𑁂𑀦 𑀯𑀸. 𑀮𑁄𑀓𑀺𑀬𑀸 𑀳𑀺 𑀅𑀫𑁄𑀦𑀲𑀫𑁆𑀧𑀢𑁆𑀢𑀫𑁆𑀧𑀺 𑀧𑀩𑁆𑀩𑀚𑀺𑀢𑀁 ‘‘𑀫𑀼𑀦𑀻’’𑀢𑀺 𑀪𑀡𑀦𑁆𑀢𑀺. 𑀧𑀡𑁆𑀟𑀯𑀁 𑀅𑀪𑀺𑀳𑀸𑀭𑁂𑀲𑀻𑀢𑀺 𑀢𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺. 𑀲𑁄 𑀓𑀺𑀭 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀩𑁆𑀩𑀚𑀺𑀢𑀸 𑀓𑀢𑁆𑀣 𑀯𑀲𑀦𑁆𑀢𑀻’’𑀢𑀺. 𑀅𑀣𑀲𑁆𑀲 𑀢𑁂 ‘‘𑀧𑀡𑁆𑀟𑀯𑀲𑁆𑀲 𑀉𑀧𑀭𑀺 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀧𑀩𑁆𑀪𑀸𑀭𑁂’’𑀢𑀺 𑀆𑀭𑁄𑀘𑁂𑀲𑀼𑀁. 𑀢𑀲𑁆𑀫𑀸 𑀢𑀫𑁂𑀯 𑀧𑀡𑁆𑀟𑀯𑀁 𑀅𑀪𑀺𑀳𑀸𑀭𑁂𑀲𑀺 ‘‘𑀏𑀢𑁆𑀣 𑀯𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸.

𑁪𑁧𑁯-𑁨𑁩. 𑀩𑁆𑀬𑀕𑁆𑀖𑀼𑀲𑀪𑁄𑀯 𑀲𑀻𑀳𑁄𑀯 𑀕𑀺𑀭𑀺𑀕𑀩𑁆𑀪𑀭𑁂𑀢𑀺 𑀕𑀺𑀭𑀺𑀕𑀼𑀳𑀸𑀬𑀁 𑀩𑁆𑀬𑀕𑁆𑀖𑁄 𑀯𑀺𑀬 𑀉𑀲𑀪𑁄 𑀯𑀺𑀬 𑀲𑀻𑀳𑁄 𑀯𑀺𑀬 𑀘 𑀦𑀺𑀲𑀺𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀏𑀢𑁂 𑀳𑀺 𑀢𑀬𑁄 𑀲𑁂𑀝𑁆𑀞𑀸 𑀯𑀺𑀕𑀢𑀪𑀬𑀪𑁂𑀭𑀯𑀸 𑀕𑀺𑀭𑀺𑀕𑀩𑁆𑀪𑀭𑁂 𑀦𑀺𑀲𑀻𑀤𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀉𑀧𑀫𑀁 𑀅𑀓𑀸𑀲𑀺. 𑀪𑀤𑁆𑀤𑀬𑀸𑀦𑁂𑀦𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀲𑀺𑀯𑀺𑀓𑀸𑀤𑀺𑀦𑀸 𑀉𑀢𑁆𑀢𑀫𑀬𑀸𑀦𑁂𑀦. 𑀲𑀬𑀸𑀦𑀪𑀽𑀫𑀺𑀁 𑀬𑀸𑀬𑀺𑀢𑁆𑀯𑀸𑀢𑀺 𑀬𑀸𑀯𑀢𑀺𑀓𑀸 𑀪𑀽𑀫𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀦𑀸 𑀬𑀸𑀦𑁂𑀦 𑀲𑀓𑁆𑀓𑀸 𑀕𑀦𑁆𑀢𑀼𑀁, 𑀢𑀁 𑀕𑀦𑁆𑀢𑁆𑀯𑀸. 𑀆𑀲𑀚𑁆𑀚𑀸𑀢𑀺 𑀧𑀢𑁆𑀯𑀸, 𑀲𑀫𑀻𑀧𑀫𑀲𑁆𑀲 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀯𑀺𑀲𑀻𑀢𑀺 𑀦𑀺𑀲𑀻𑀤𑀺. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑀲𑀫𑁆𑀧𑀦𑁆𑀦𑁄. 𑀤𑀳𑀭𑁄𑀢𑀺 𑀚𑀸𑀢𑀺𑀬𑀸 𑀢𑀭𑀼𑀡𑁄. 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑁄 𑀲𑀼𑀲𑀽𑀢𑀺 𑀢𑀤𑀼𑀪𑀬𑀯𑀺𑀲𑁂𑀲𑀦𑀫𑁂𑀯. 𑀬𑀼𑀯𑀸 𑀲𑀼𑀲𑀽𑀢𑀺 𑀅𑀢𑀺𑀬𑁄𑀩𑁆𑀩𑀦𑁄. 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀧𑀞𑀫𑁂𑀦𑁂𑀯 𑀬𑁄𑀩𑁆𑀩𑀦𑀯𑁂𑀲𑁂𑀦 𑀉𑀝𑁆𑀞𑀺𑀢𑁄. 𑀤𑀳𑀭𑁄 𑀘𑀸𑀲𑀻𑀢𑀺 𑀲𑀢𑀺 𑀘 𑀤𑀳𑀭𑀢𑁆𑀢𑁂 𑀲𑀼𑀲𑀼 𑀩𑀸𑀮𑀓𑁄 𑀯𑀺𑀬 𑀔𑀸𑀬𑀲𑀻𑀢𑀺.

𑁪𑁨𑁪-𑁫. 𑀅𑀦𑀻𑀓𑀕𑁆𑀕𑀦𑁆𑀢𑀺 𑀩𑀮𑀓𑀸𑀬𑀁 𑀲𑁂𑀦𑀸𑀫𑀼𑀔𑀁. 𑀤𑀤𑀸𑀫𑀺 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀽𑀢𑀺 𑀏𑀢𑁆𑀣 ‘‘𑀅𑀳𑀁 𑀢𑁂 𑀅𑀗𑁆𑀕𑀫𑀕𑀥𑁂𑀲𑀼 𑀬𑀸𑀯𑀺𑀘𑁆𑀙𑀲𑀺, 𑀢𑀸𑀯 𑀤𑀤𑀸𑀫𑀺 𑀪𑁄𑀕𑁂. 𑀢𑀁 𑀢𑁆𑀯𑀁 𑀲𑁄𑀪𑀬𑀦𑁆𑀢𑁄 𑀅𑀦𑀻𑀓𑀕𑁆𑀕𑀁 𑀦𑀸𑀕𑀲𑀗𑁆𑀖𑀧𑀼𑀭𑀓𑁆𑀔𑀢𑁄 𑀪𑀼𑀜𑁆𑀚𑀲𑁆𑀲𑀽’’𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀚𑀼𑀁 𑀚𑀦𑀧𑀤𑁄 𑀭𑀸𑀚𑀸𑀢𑀺 ‘‘𑀤𑀤𑀸𑀫𑀺 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀼, 𑀚𑀸𑀢𑀺𑀁 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺 𑀏𑀯𑀁 𑀓𑀺𑀭 𑀯𑀼𑀢𑁆𑀢𑁄 𑀫𑀳𑀸𑀧𑀼𑀭𑀺𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄 𑀅𑀲𑁆𑀲𑀁, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄𑀧𑀺 𑀫𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑁂𑀬𑁆𑀬𑀼𑀁, 𑀕𑁂𑀳𑁂 𑀞𑀺𑀢𑁄 𑀏𑀯 𑀯𑀸 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀬𑁆𑀬𑀁. 𑀅𑀬𑀁 𑀧𑀦 𑀭𑀸𑀚𑀸 𑀅𑀚𑀸𑀦𑀦𑁆𑀢𑁄 𑀏𑀯𑀫𑀸𑀳 𑁋 ‘𑀳𑀦𑁆𑀤𑀸𑀳𑀁, 𑀢𑀁 𑀚𑀸𑀦𑀸𑀧𑁂𑀫𑀻’’’𑀢𑀺 𑀩𑀸𑀳𑀁 𑀉𑀘𑁆𑀘𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀤𑀺𑀲𑀸𑀪𑀸𑀕𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀉𑀚𑀼𑀁 𑀚𑀦𑀧𑀤𑁄 𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺𑀫𑀯𑀦𑁆𑀢𑀲𑁆𑀲 𑀧𑀲𑁆𑀲𑀢𑁄𑀢𑀺 𑀪𑀡𑀦𑁆𑀢𑁄 𑀲𑀲𑁆𑀲𑀲𑀫𑁆𑀧𑀢𑁆𑀢𑀺𑀯𑁂𑀓𑀮𑁆𑀮𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀳𑀺𑀫𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀧𑀸𑀲𑀸𑀡𑀯𑀺𑀯𑀭𑀲𑀫𑁆𑀪𑀯𑀸 𑀫𑀳𑀸𑀲𑀸𑀮𑀸𑀧𑀺 𑀧𑀜𑁆𑀘𑀳𑀺 𑀯𑀼𑀤𑁆𑀥𑀻𑀳𑀺 𑀯𑀟𑁆𑀠𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀔𑁂𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀲𑀲𑁆𑀲𑀸𑀦𑀺. 𑀥𑀦𑀯𑀻𑀭𑀺𑀬𑁂𑀦 𑀲𑀫𑁆𑀧𑀦𑁆𑀦𑁄𑀢𑀺 𑀪𑀡𑀦𑁆𑀢𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀅𑀯𑁂𑀓𑀮𑁆𑀮𑀢𑁆𑀢𑀁, 𑀧𑀭𑀭𑀸𑀚𑀽𑀳𑀺 𑀅𑀢𑀓𑁆𑀓𑀦𑀻𑀬𑀁 𑀯𑀻𑀭𑀧𑀼𑀭𑀺𑀲𑀸𑀥𑀺𑀝𑁆𑀞𑀺𑀢𑀪𑀸𑀯𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑀺. 𑀓𑁄𑀲𑀮𑁂𑀲𑀼 𑀦𑀺𑀓𑁂𑀢𑀺𑀦𑁄𑀢𑀺 𑀪𑀡𑀦𑁆𑀢𑁄 𑀦𑀯𑀓𑀭𑀸𑀚𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀯𑀓𑀭𑀸𑀚𑀸 𑀳𑀺 𑀦𑀺𑀓𑁂𑀢𑀻𑀢𑀺 𑀦 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀦 𑀆𑀤𑀺𑀓𑀸𑀮𑀢𑁄 𑀧𑀪𑀼𑀢𑀺 𑀅𑀦𑁆𑀯𑀬𑀯𑀲𑁂𑀦 𑀲𑁄 𑀏𑀯 𑀚𑀦𑀧𑀤𑁄 𑀦𑀺𑀯𑀸𑀲𑁄, 𑀲𑁄 𑀦𑀺𑀓𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸𑀭𑀽𑀧𑁄 𑀘 𑀭𑀸𑀚𑀸 𑀲𑀼𑀤𑁆𑀥𑁄𑀤𑀦𑁄, 𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀓𑁄𑀲𑀮𑁂𑀲𑀼 𑀦𑀺𑀓𑁂𑀢𑀺𑀦𑁄’’𑀢𑀺. 𑀢𑁂𑀦 𑀅𑀦𑁆𑀯𑀬𑀸𑀕𑀢𑀫𑁆𑀧𑀺 𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺.

𑁪𑁨𑁬. 𑀏𑀢𑁆𑀢𑀸𑀯𑀢𑀸 𑀅𑀢𑁆𑀢𑀦𑁄 𑀪𑁄𑀕𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑁆𑀯𑀸 ‘‘𑀆𑀤𑀺𑀘𑁆𑀘𑀸 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀸𑀓𑀺𑀬𑀸 𑀦𑀸𑀫 𑀚𑀸𑀢𑀺𑀬𑀸’’𑀢𑀺 𑀇𑀫𑀺𑀦𑀸 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 𑀭𑀜𑁆𑀜𑀸 ‘‘𑀤𑀤𑀸𑀫𑀺 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀽’’𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀢𑀫𑁆𑀳𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬’’𑀦𑁆𑀢𑀺. 𑀬𑀤𑀺 𑀳𑀺 𑀅𑀳𑀁 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑁂𑀬𑁆𑀬𑀁, 𑀦 𑀈𑀤𑀺𑀲𑀁 𑀥𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀁 𑀤𑁆𑀯𑀸𑀲𑀻𑀢𑀺𑀲𑀳𑀲𑁆𑀲𑀯𑀻𑀭𑀧𑀼𑀭𑀺𑀲𑀲𑀫𑀸𑀓𑀼𑀮𑀁 𑀓𑀼𑀮𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁪𑁨𑁭. 𑀏𑀯𑀁 𑀭𑀜𑁆𑀜𑁄 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄’’𑀢𑀺. 𑀏𑀢𑀁 ‘‘𑀧𑀩𑁆𑀩𑀚𑀺𑀢𑁄𑀫𑁆𑀳𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀢𑁆𑀣 𑀤𑀝𑁆𑀞𑀽𑀢𑀺 𑀤𑀺𑀲𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀼𑀭𑀺𑀫𑀕𑀸𑀣𑀸𑀲𑀼 𑀘 𑀬𑀁 𑀬𑀁 𑀦 𑀯𑀺𑀘𑀸𑀭𑀺𑀢𑀁, 𑀢𑀁 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀏𑀯 𑀦 𑀯𑀺𑀘𑀸𑀭𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀸𑀳𑁂𑀢𑀼𑀁 𑀯𑀢𑁆𑀯𑀸 𑀧𑀥𑀸𑀦𑀢𑁆𑀣𑀸𑀬 𑀕𑀦𑁆𑀢𑀼𑀓𑀸𑀫𑁄 𑀭𑀸𑀚𑀸𑀦𑀁 𑀆𑀫𑀦𑁆𑀢𑁂𑀦𑁆𑀢𑁄 𑀆𑀳 𑁋 ‘‘𑀧𑀥𑀸𑀦𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑁂 𑀭𑀜𑁆𑀚𑀢𑀻 𑀫𑀦𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸𑀳𑀁, 𑀫𑀳𑀸𑀭𑀸𑀚, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀫𑀸 𑀢𑀁 𑀧𑀭𑀫𑀢𑁆𑀣𑀦𑁂𑀓𑁆𑀔𑀫𑁆𑀫𑀁 𑀦𑀺𑀩𑁆𑀩𑀸𑀦𑀸𑀫𑀢𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀕𑁆𑀕𑀝𑁆𑀞𑁂𑀦 𑀧𑀥𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀧𑀥𑀸𑀦𑀢𑁆𑀣𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑁂 𑀧𑀥𑀸𑀦𑁂 𑀭𑀜𑁆𑀚𑀢𑀺 𑀫𑀦𑁄, 𑀦 𑀓𑀸𑀫𑁂𑀲𑀽𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀆𑀳 𑁋 ‘‘𑀧𑀼𑀩𑁆𑀩𑁂𑀯 𑀫𑁂𑀢𑀁, 𑀪𑀦𑁆𑀢𑁂, 𑀲𑀼𑀢𑀁 ‘𑀲𑀼𑀤𑁆𑀥𑁄𑀤𑀦𑀭𑀜𑁆𑀜𑁄 𑀓𑀺𑀭 𑀧𑀼𑀢𑁆𑀢𑁄 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀘𑀢𑁆𑀢𑀸𑀭𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’𑀢𑀺, 𑀲𑁄𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀅𑀥𑀺𑀫𑀼𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀯𑀁𑀧𑀲𑀦𑁆𑀦𑁄 ‘𑀅𑀤𑁆𑀥𑀸 𑀩𑀼𑀤𑁆𑀥𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀣𑀸’𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀯𑀸 𑀧𑀞𑀫𑀁 𑀫𑀫 𑀯𑀺𑀚𑀺𑀢𑀁 𑀑𑀓𑁆𑀓𑀫𑁂𑀬𑁆𑀬𑀸𑀣𑀸’’𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁮. 𑀢𑀁 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑀦𑁆𑀢𑀺 𑀧𑀥𑀸𑀦𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? ‘‘𑀧𑀥𑀸𑀦𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑁂 𑀭𑀜𑁆𑀚𑀢𑀻 𑀫𑀦𑁄’’𑀢𑀺 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀧𑀢𑁆𑀣𑀬𑀫𑀸𑀦𑁂𑀦 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀓𑀢𑀸, 𑀢𑀁 𑀅𑀚𑁆𑀚 𑀪𑀺𑀓𑁆𑀔𑀽𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀢𑀁 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢’’𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀢𑀁 𑀫𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀯𑀘𑀦𑁂𑀳𑀺 𑀅𑀢𑁆𑀢𑀸𑀦𑀫𑁂𑀯 𑀦𑀺𑀤𑁆𑀤𑀺𑀲𑀢𑀺. 𑀧𑀥𑀸𑀦𑀧𑀳𑀺𑀢𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑁂𑀲𑀺𑀢𑀘𑀺𑀢𑁆𑀢𑀁 𑀧𑀭𑀺𑀘𑁆𑀘𑀢𑁆𑀢𑀅𑀢𑁆𑀢𑀪𑀸𑀯𑀁 𑀯𑀸. 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀻𑀢𑀺 𑀮𑀓𑁆𑀔𑀡𑀁 𑀦𑀺𑀤𑁆𑀤𑀺𑀲𑀢𑀺. 𑀮𑀓𑁆𑀔𑀡𑀜𑁆𑀳𑀺 𑀧𑀥𑀸𑀦𑀧𑀳𑀺𑀢𑀢𑁆𑀢𑀸𑀬 𑀦𑁂𑀭𑀜𑁆𑀚𑀭𑀸 𑀦𑀤𑀻. 𑀢𑁂𑀦𑁂𑀯 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀁. 𑀅𑀬𑀁 𑀧𑀦𑀢𑁆𑀣𑁄 ‘‘𑀦𑀤𑀺𑀬𑀸 𑀦𑁂𑀭𑀜𑁆𑀚𑀭𑀸𑀬𑀸’’𑀢𑀺, 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀭𑀓𑁆𑀓𑀫𑁆𑀫𑀸𑀢𑀺 𑀅𑀢𑀻𑀯 𑀧𑀭𑀓𑁆𑀓𑀫𑀺𑀢𑁆𑀯𑀸. 𑀛𑀸𑀬𑀦𑁆𑀢𑀦𑁆𑀢𑀺 𑀅𑀧𑁆𑀧𑀸𑀡𑀓𑀚𑁆𑀛𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀁. 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀫𑀢𑁆𑀣𑀁.

𑁪𑁨𑁯. 𑀦𑀫𑀼𑀘𑀻𑀢𑀺 𑀫𑀸𑀭𑁄. 𑀲𑁄 𑀳𑀺 𑀅𑀢𑁆𑀢𑀦𑁄 𑀯𑀺𑀲𑀬𑀸 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁂 𑀤𑁂𑀯𑀫𑀦𑀼𑀲𑁆𑀲𑁂 𑀦 𑀫𑀼𑀜𑁆𑀘𑀢𑀺, 𑀅𑀦𑁆𑀢𑀭𑀸𑀬𑀁 𑀦𑁂𑀲𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀦𑀫𑀼𑀘𑀻’’𑀢𑀺 𑀯𑀼𑀘𑁆𑀘𑀢𑀺. 𑀓𑀭𑀼𑀡𑀁 𑀯𑀸𑀘𑀦𑁆𑀢𑀺 𑀅𑀦𑀼𑀤𑁆𑀤𑀬𑀸𑀬𑀼𑀢𑁆𑀢𑀁 𑀯𑀸𑀘𑀁. 𑀪𑀸𑀲𑀫𑀸𑀦𑁄 𑀉𑀧𑀸𑀕𑀫𑀻𑀢𑀺 𑀇𑀤𑀁 𑀉𑀢𑁆𑀢𑀸𑀦𑀫𑁂𑀯. 𑀓𑀲𑁆𑀫𑀸 𑀧𑀦 𑀉𑀧𑀸𑀕𑀢𑁄? 𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀩𑁆𑀩𑀤𑀸 𑀆𑀳𑀸𑀭𑀁 𑀧𑀭𑀺𑀬𑁂𑀲𑀫𑀸𑀦𑁄 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑁄 𑀳𑁄𑀢𑀺, 𑀦 𑀘 𑀲𑀓𑁆𑀓𑀸 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑁂𑀦 𑀅𑀫𑀢𑀁 𑀅𑀥𑀺𑀕𑀦𑁆𑀢𑀼’’𑀦𑁆𑀢𑀺. 𑀢𑀢𑁄 𑀆𑀳𑀸𑀭𑀼𑀧𑀘𑁆𑀙𑁂𑀤𑀸𑀬 𑀧𑀝𑀺𑀧𑀚𑁆𑀚𑀺, 𑀢𑁂𑀦 𑀓𑀺𑀲𑁄 𑀤𑀼𑀩𑁆𑀩𑀡𑁆𑀡𑁄 𑀘 𑀅𑀳𑁄𑀲𑀺. 𑀅𑀣 𑀫𑀸𑀭𑁄 ‘‘𑀅𑀬𑀁 𑀲𑀫𑁆𑀩𑁄𑀥𑀸𑀬 𑀫𑀕𑁆𑀕𑁄 𑀳𑁄𑀢𑀺, 𑀦 𑀳𑁄𑀢𑀻𑀢𑀺 𑀅𑀚𑀸𑀦𑀦𑁆𑀢𑁄 𑀅𑀢𑀺𑀖𑁄𑀭𑀁 𑀢𑀧𑀁 𑀓𑀭𑁄𑀢𑀺, 𑀓𑀤𑀸𑀘𑀺 𑀫𑀫 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀪𑀻𑀢𑁄 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀯𑀢𑁆𑀯𑀸 𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀓𑀺𑀲𑁄 𑀢𑁆𑀯𑀫𑀲𑀺 𑀤𑀼𑀩𑁆𑀩𑀡𑁆𑀡𑁄, 𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀯𑀸’’𑀢𑀺.

𑁪𑁩𑁦. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀣𑀲𑁆𑀲 𑀫𑀭𑀡𑀲𑀦𑁆𑀢𑀺𑀓𑀪𑀸𑀯𑀁 𑀲𑀸𑀯𑁂𑀦𑁆𑀢𑁄 𑀆𑀳 𑁋 ‘‘𑀲𑀳𑀲𑁆𑀲𑀪𑀸𑀕𑁄 𑀫𑀭𑀡𑀲𑁆𑀲, 𑀏𑀓𑀁𑀲𑁄 𑀢𑀯 𑀚𑀻𑀯𑀺𑀢’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀳𑀲𑁆𑀲𑀁 𑀪𑀸𑀕𑀸𑀦𑀁 𑀅𑀲𑁆𑀲𑀸𑀢𑀺 𑀲𑀳𑀲𑁆𑀲𑀪𑀸𑀕𑁄. 𑀓𑁄 𑀲𑁄? 𑀫𑀭𑀡𑀲𑁆𑀲 𑀧𑀘𑁆𑀘𑀬𑁄𑀢𑀺 𑀧𑀸𑀞𑀲𑁂𑀲𑁄. 𑀏𑀓𑁄 𑀅𑀁𑀲𑁄𑀢𑀺 𑀏𑀓𑀁𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀁 𑀅𑀧𑁆𑀧𑀸𑀡𑀓𑀚𑁆𑀛𑀸𑀦𑀸𑀤𑀺𑀲𑀳𑀲𑁆𑀲𑀪𑀸𑀕𑁄 𑀢𑀯 𑀫𑀭𑀡𑀲𑁆𑀲 𑀧𑀘𑁆𑀘𑀬𑁄, 𑀢𑀢𑁄 𑀧𑀦 𑀢𑁂 𑀏𑀓𑁄 𑀏𑀯 𑀪𑀸𑀕𑁄 𑀚𑀻𑀯𑀺𑀢𑀁, 𑀏𑀯𑀁 𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀯𑀸𑀢𑀺. 𑀏𑀯𑀁 𑀫𑀭𑀡𑀲𑁆𑀲 𑀲𑀦𑁆𑀢𑀺𑀓𑀪𑀸𑀯𑀁 𑀲𑀸𑀯𑁂𑀢𑁆𑀯𑀸 𑀅𑀣 𑀦𑀁 𑀚𑀻𑀯𑀺𑀢𑁂 𑀲𑀫𑀼𑀲𑁆𑀲𑀸𑀳𑁂𑀦𑁆𑀢𑁄 𑀆𑀳 ‘‘𑀚𑀻𑀯 𑀪𑁄 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺. 𑀓𑀣𑀁 𑀲𑁂𑀬𑁆𑀬𑁄𑀢𑀺 𑀘𑁂. 𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀸𑀳𑀲𑀻𑀢𑀺.

𑁪𑁩𑁧. 𑀅𑀣 𑀅𑀢𑁆𑀢𑀦𑀸 𑀲𑀫𑁆𑀫𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀘𑀭𑀢𑁄 𑀘 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺. 𑀢𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀫𑁂𑀣𑀼𑀦𑀯𑀺𑀭𑀢𑀺𑀁 𑀲𑀦𑁆𑀥𑀸𑀬𑀸𑀳, 𑀬𑀁 𑀢𑀸𑀧𑀲𑀸 𑀓𑀭𑁄𑀦𑁆𑀢𑀺. 𑀚𑀽𑀳𑀢𑁄𑀢𑀺 𑀚𑀼𑀳𑀦𑁆𑀢𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁪𑁩𑁨. 𑀤𑀼𑀕𑁆𑀕𑁄 𑀫𑀕𑁆𑀕𑁄𑀢𑀺 𑀇𑀫𑀁 𑀧𑀦 𑀅𑀟𑁆𑀠𑀕𑀸𑀣𑀁 𑀧𑀥𑀸𑀦𑀯𑀺𑀘𑁆𑀙𑀦𑁆𑀤𑀁 𑀚𑀦𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀅𑀧𑁆𑀧𑀸𑀡𑀓𑀚𑁆𑀛𑀸𑀦𑀸𑀤𑀺𑀕𑀳𑀦𑀢𑁆𑀢𑀸 𑀤𑀼𑀓𑁆𑀔𑁂𑀦 𑀕𑀦𑁆𑀢𑀩𑁆𑀩𑁄𑀢𑀺 𑀤𑀼𑀕𑁆𑀕𑁄, 𑀤𑀼𑀓𑁆𑀔𑀺𑀢𑀓𑀸𑀬𑀘𑀺𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀢𑁆𑀢𑀸 𑀤𑀼𑀓𑁆𑀓𑀭𑁄, 𑀲𑀦𑁆𑀢𑀺𑀓𑀫𑀭𑀡𑁂𑀦 𑀢𑀸𑀤𑀺𑀲𑁂𑀦𑀸𑀧𑀺 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀤𑀼𑀭𑀪𑀺𑀲𑀫𑁆𑀪𑀯𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀇𑀫𑀸 𑀕𑀸𑀣𑀸 𑀪𑀡𑀁 𑀫𑀸𑀭𑁄, 𑀅𑀝𑁆𑀞𑀸 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀅𑀬𑀫𑀼𑀧𑀟𑁆𑀠𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀸. 𑀲𑀓𑀮𑀕𑀸𑀣𑀸𑀧𑀻𑀢𑀺 𑀏𑀓𑁂. 𑀪𑀕𑀯𑀢𑀸 𑀏𑀯 𑀧𑀦 𑀧𑀭𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀦𑁆𑀢𑁂𑀦 𑀲𑀩𑁆𑀩𑀫𑁂𑀢𑁆𑀣 𑀏𑀯𑀁𑀚𑀸𑀢𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀢𑀢𑁆𑀣 𑀅𑀝𑁆𑀞𑀸𑀢𑀺 𑀅𑀝𑁆𑀞𑀸𑀲𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁪𑁩𑁩. 𑀙𑀝𑁆𑀞𑀕𑀸𑀣𑀸𑀬 𑀬𑁂𑀦𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀧𑀭𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑀡𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑁂𑀦 𑀢𑁆𑀯𑀁, 𑀧𑀸𑀧𑀺𑀫, 𑀆𑀕𑀢𑁄𑀲𑀻𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁪𑁩𑁪. ‘‘𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀸𑀳𑀲𑀻’’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀅𑀡𑀼𑀫𑀢𑁆𑀢𑁄𑀧𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀼𑀜𑁆𑀜𑁂𑀦𑀸𑀢𑀺 𑀯𑀝𑁆𑀝𑀕𑀸𑀫𑀺𑀁 𑀫𑀸𑀭𑁂𑀦 𑀯𑀼𑀢𑁆𑀢𑀁 𑀧𑀼𑀜𑁆𑀜𑀁 𑀲𑀦𑁆𑀥𑀸𑀬 𑀪𑀡𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑁪𑁩𑁫. 𑀇𑀤𑀸𑀦𑀺 ‘‘𑀏𑀓𑀁𑀲𑁄 𑀢𑀯 𑀚𑀻𑀯𑀺𑀢’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀆𑀭𑀩𑁆𑀪 𑀫𑀸𑀭𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀲𑀤𑁆𑀥𑀸’’𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀅𑀭𑁂, 𑀫𑀸𑀭, 𑀬𑁄 𑀅𑀦𑀼𑀢𑁆𑀢𑀭𑁂 𑀲𑀦𑁆𑀢𑀺𑀯𑀭𑀧𑀤𑁂 𑀅𑀲𑁆𑀲𑀤𑁆𑀥𑁄 𑀪𑀯𑁂𑀬𑁆𑀬, 𑀲𑀤𑁆𑀥𑁄𑀧𑀺 𑀯𑀸 𑀓𑀼𑀲𑀻𑀢𑁄, 𑀲𑀤𑁆𑀥𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑀫𑀸𑀦𑁄𑀧𑀺 𑀯𑀸 𑀤𑀼𑀧𑁆𑀧𑀜𑁆𑀜𑁄, 𑀢𑀁 𑀢𑁆𑀯𑀁 𑀚𑀻𑀯𑀺𑀢𑀫𑀦𑀼𑀧𑀼𑀘𑁆𑀙𑀫𑀸𑀦𑁄 𑀲𑁄𑀪𑁂𑀬𑁆𑀬𑀸𑀲𑀺, 𑀫𑀬𑁆𑀳𑀁 𑀧𑀦 𑀅𑀦𑀼𑀢𑁆𑀢𑀭𑁂 𑀲𑀦𑁆𑀢𑀺𑀯𑀭𑀧𑀤𑁂 𑀑𑀓𑀧𑁆𑀧𑀦𑀲𑀤𑁆𑀥𑀸 𑀅𑀢𑁆𑀣𑀺, 𑀢𑀣𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀫𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁, 𑀯𑀚𑀺𑀭𑀽𑀧𑀫𑀸 𑀧𑀜𑁆𑀜𑀸 𑀘 𑀫𑀫 𑀯𑀺𑀚𑁆𑀚𑀢𑀺, 𑀲𑁄 𑀢𑁆𑀯𑀁 𑀏𑀯𑀁 𑀫𑀁 𑀧𑀳𑀺𑀢𑀢𑁆𑀢𑀁 𑀉𑀢𑁆𑀢𑀫𑀚𑁆𑀛𑀸𑀲𑀬𑀁 𑀓𑀺𑀁 𑀚𑀻𑀯𑀫𑀦𑀼𑀧𑀼𑀘𑁆𑀙𑀲𑀺, 𑀓𑀲𑁆𑀫𑀸 𑀚𑀻𑀯𑀺𑀢𑀁 𑀧𑀼𑀘𑁆𑀙𑀲𑀺. 𑀧𑀜𑁆𑀜𑀸 𑀘 𑀫𑀫𑀸𑀢𑀺 𑀏𑀢𑁆𑀣 𑀘 𑀲𑀤𑁆𑀤𑁂𑀦 𑀲𑀢𑀺 𑀲𑀫𑀸𑀥𑀺 𑀘. 𑀏𑀯𑀁 𑀲𑀦𑁆𑀢𑁂 𑀬𑁂𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀢𑁂𑀲𑀼 𑀏𑀓𑁂𑀦𑀸𑀧𑀺 𑀅𑀯𑀺𑀭𑀳𑀺𑀢𑀁 𑀏𑀯𑀁 𑀫𑀁 𑀧𑀳𑀺𑀢𑀢𑁆𑀢𑀁 𑀓𑀺𑀁 𑀚𑀻𑀯𑀫𑀦𑀼𑀧𑀼𑀘𑁆𑀙𑀲𑀺? 𑀦𑀦𑀼 𑁋 𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀯𑀻𑀭𑀺𑀬𑀫𑀸𑀭𑀪𑀢𑁄 𑀤𑀴𑁆𑀳𑀁 (𑀥. 𑀧. 𑁧𑁧𑁨). 𑀧𑀜𑁆𑀜𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀦𑁆𑀢𑀺 (𑀥. 𑀧. 𑁧𑁧𑁧, 𑁧𑁧𑁩).

𑁪𑁩𑁬-𑁮. 𑀏𑀯𑀁 𑀫𑀸𑀭𑀁 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀳𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀤𑀻𑀦𑀫𑀧𑀻’’𑀧𑀺 𑀕𑀸𑀣𑀸𑀢𑁆𑀢𑀬𑀫𑀸𑀳. 𑀢𑀫𑀢𑁆𑀣𑀢𑁄 𑀧𑀸𑀓𑀝𑀫𑁂𑀯. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀯𑀡𑁆𑀡𑀦𑀸 𑁋 𑀬𑁆𑀯𑀸𑀬𑀁 𑀫𑀫 𑀲𑀭𑀻𑀭𑁂 𑀅𑀧𑁆𑀧𑀸𑀡𑀓𑀚𑁆𑀛𑀸𑀦𑀯𑀻𑀭𑀺𑀬𑀯𑁂𑀕𑀲𑀫𑀼𑀝𑁆𑀞𑀺𑀢𑁄 𑀯𑀸𑀢𑁄 𑀯𑀢𑁆𑀢𑀢𑀺, 𑀮𑁄𑀓𑁂 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀦𑀤𑀻𑀦𑀫𑁆𑀧𑀺 𑀲𑁄𑀢𑀸𑀦𑀺 𑀅𑀬𑀁 𑀯𑀺𑀲𑁄𑀲𑀬𑁂, 𑀓𑀺𑀜𑁆𑀘 𑀫𑁂 𑀏𑀯𑀁 𑀧𑀳𑀺𑀢𑀢𑁆𑀢𑀲𑁆𑀲 𑀘𑀢𑀼𑀦𑀸𑀴𑀺𑀫𑀢𑁆𑀢𑀁 𑀮𑁄𑀳𑀺𑀢𑀁 𑀦 𑀉𑀧𑀲𑁄𑀲𑁂𑀬𑁆𑀬. 𑀦 𑀓𑁂𑀯𑀮𑀜𑁆𑀘 𑀫𑁂 𑀮𑁄𑀳𑀺𑀢𑀫𑁂𑀯 𑀲𑀼𑀲𑁆𑀲𑀢𑀺, 𑀅𑀧𑀺𑀘 𑀔𑁄 𑀧𑀦 𑀢𑀫𑁆𑀳𑀺 𑀮𑁄𑀳𑀺𑀢𑁂 𑀲𑀼𑀲𑁆𑀲𑀫𑀸𑀦𑀫𑁆𑀳𑀺 𑀩𑀤𑁆𑀥𑀸𑀩𑀤𑁆𑀥𑀪𑁂𑀤𑀁 𑀲𑀭𑀻𑀭𑀸𑀦𑀼𑀕𑀢𑀁 𑀧𑀺𑀢𑁆𑀢𑀁, 𑀅𑀲𑀺𑀢𑀧𑀻𑀢𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑀁 𑀘𑀢𑀼𑀦𑀸𑀴𑀺𑀫𑀢𑁆𑀢𑀫𑁂𑀯 𑀲𑁂𑀫𑁆𑀳𑀜𑁆𑀘, 𑀓𑀺𑀜𑁆𑀘𑀸𑀧𑀭𑀁 𑀢𑀢𑁆𑀢𑀓𑀫𑁂𑀯 𑀫𑀼𑀢𑁆𑀢𑀜𑁆𑀘 𑀑𑀚𑀜𑁆𑀘 𑀲𑀼𑀲𑁆𑀲𑀢𑀺, 𑀢𑁂𑀲𑀼 𑀘 𑀲𑀼𑀲𑁆𑀲𑀫𑀸𑀦𑁂𑀲𑀼 𑀫𑀁𑀲𑀸𑀦𑀺𑀧𑀺 𑀔𑀻𑀬𑀦𑁆𑀢𑀺, 𑀢𑀲𑁆𑀲 𑀫𑁂 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀫𑀁𑀲𑁂𑀲𑀼 𑀔𑀻𑀬𑀫𑀸𑀦𑁂𑀲𑀼 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀲𑀁𑀲𑀻𑀤𑀢𑀺. 𑀲𑁄 𑀢𑁆𑀯𑀁 𑀈𑀤𑀺𑀲𑀁 𑀘𑀺𑀢𑁆𑀢𑀫𑀚𑀸𑀦𑀦𑁆𑀢𑁄 𑀲𑀭𑀻𑀭𑀫𑀢𑁆𑀢𑀫𑁂𑀯 𑀤𑀺𑀲𑁆𑀯𑀸 𑀪𑀡𑀲𑀺 ‘‘𑀓𑀺𑀲𑁄 𑀢𑁆𑀯𑀫𑀲𑀺 𑀤𑀼𑀩𑁆𑀩𑀡𑁆𑀡𑁄, 𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀯𑀸’’𑀢𑀺. 𑀦 𑀓𑁂𑀯𑀮𑀜𑁆𑀘 𑀫𑁂 𑀘𑀺𑀢𑁆𑀢𑀫𑁂𑀯 𑀧𑀲𑀻𑀤𑀢𑀺, 𑀅𑀧𑀺𑀘 𑀔𑁄 𑀧𑀦 𑀪𑀺𑀬𑁆𑀬𑁄 𑀲𑀢𑀺 𑀘 𑀧𑀜𑁆𑀜𑀸 𑀘 𑀲𑀫𑀸𑀥𑀺 𑀫𑀫 𑀢𑀺𑀝𑁆𑀞𑀢𑀺, 𑀅𑀡𑀼𑀫𑀢𑁆𑀢𑁄𑀧𑀺 𑀧𑀫𑀸𑀤𑁄 𑀯𑀸 𑀲𑀫𑁆𑀫𑁄𑀳𑁄 𑀯𑀸 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀯𑀸 𑀦𑀢𑁆𑀣𑀺, 𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀯𑀺𑀳𑀭𑀢𑁄 𑀬𑁂 𑀓𑁂𑀘𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀢𑀻𑀢𑀁 𑀯𑀸 𑀅𑀤𑁆𑀥𑀸𑀦𑀁 𑀅𑀦𑀸𑀕𑀢𑀁 𑀯𑀸 𑀏𑀢𑀭𑀳𑀺 𑀯𑀸 𑀑𑀧𑀓𑁆𑀓𑀫𑀺𑀓𑀸 𑀯𑁂𑀤𑀦𑀸 𑀯𑁂𑀤𑀬𑀦𑁆𑀢𑀺, 𑀢𑀸𑀲𑀁 𑀦𑀺𑀤𑀲𑁆𑀲𑀦𑀪𑀽𑀢𑀁 𑀧𑀢𑁆𑀢𑀲𑁆𑀲 𑀉𑀢𑁆𑀢𑀫𑀯𑁂𑀤𑀦𑀁. 𑀬𑀣𑀸 𑀅𑀜𑁆𑀜𑁂𑀲𑀁 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀸𑀦𑀁 𑀲𑀼𑀔𑀁, 𑀲𑀻𑀢𑁂𑀦 𑀉𑀡𑁆𑀳𑀁, 𑀉𑀡𑁆𑀳𑁂𑀦 𑀲𑀻𑀢𑀁, 𑀔𑀼𑀤𑀸𑀬 𑀪𑁄𑀚𑀦𑀁, 𑀧𑀺𑀧𑀸𑀲𑀸𑀬 𑀨𑀼𑀝𑁆𑀞𑀸𑀦𑀁 𑀉𑀤𑀓𑀁 𑀅𑀧𑁂𑀓𑁆𑀔𑀢𑁂 𑀘𑀺𑀢𑁆𑀢𑀁, 𑀏𑀯𑀁 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀏𑀓𑀓𑀸𑀫𑀫𑁆𑀧𑀺 𑀦𑀸𑀧𑁂𑀓𑁆𑀔𑀓𑁂 𑀘𑀺𑀢𑁆𑀢𑀁. ‘‘𑀅𑀳𑁄 𑀯𑀢𑀸𑀳𑀁 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀔𑀲𑁂𑀬𑁆𑀬𑀁 𑀲𑀬𑁂𑀬𑁆𑀬’’𑀦𑁆𑀢𑀺 𑀈𑀤𑀺𑀲𑁂𑀦𑀸𑀓𑀸𑀭𑁂𑀦 𑀫𑀫 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀧𑀲𑁆𑀲, 𑀢𑁆𑀯𑀁 𑀫𑀸𑀭, 𑀲𑀢𑁆𑀢𑀲𑁆𑀲 𑀲𑀼𑀤𑁆𑀥𑀢𑀦𑁆𑀢𑀺.

𑁪𑁩𑁯-𑁪𑁧. 𑀏𑀯𑀁 𑀅𑀢𑁆𑀢𑀦𑁄 𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦𑀺𑀯𑀸𑀭𑁂𑀲𑁆𑀲𑀸𑀫𑀺 𑀢’’𑀦𑁆𑀢𑀺 𑀆𑀕𑀢𑀲𑁆𑀲 𑀫𑀸𑀭𑀲𑁆𑀲 𑀫𑀦𑁄𑀭𑀣𑀪𑀜𑁆𑀚𑀦𑀢𑁆𑀣𑀁 𑀫𑀸𑀭𑀲𑁂𑀦𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀸𑀬 𑀅𑀧𑀭𑀸𑀚𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺𑀓𑀸 𑀙 𑀕𑀸𑀣𑀸𑀬𑁄 𑀆𑀳.

𑀢𑀢𑁆𑀣 𑀬𑀲𑁆𑀫𑀸 𑀆𑀤𑀺𑀢𑁄𑀯 𑀅𑀕𑀸𑀭𑀺𑀬𑀪𑀽𑀢𑁂 𑀲𑀢𑁆𑀢𑁂 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀸 𑀫𑁄𑀳𑀬𑀦𑁆𑀢𑀺, 𑀢𑁂 𑀅𑀪𑀺𑀪𑀼𑀬𑁆𑀬 𑀅𑀦𑀕𑀸𑀭𑀺𑀬𑀪𑀸𑀯𑀁 𑀉𑀧𑀕𑀢𑀸𑀦𑀁 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀧𑀩𑁆𑀩𑀚𑀺𑀢𑁂𑀦 𑀔𑁄, 𑀆𑀯𑀼𑀲𑁄, 𑀅𑀪𑀺𑀭𑀢𑀺 𑀤𑀼𑀓𑁆𑀓𑀭𑀸’’𑀢𑀺 (𑀲𑀁. 𑀦𑀺. 𑁪.𑁩𑁩𑁧). 𑀢𑀢𑁄 𑀢𑁂 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀔𑀼𑀧𑁆𑀧𑀺𑀧𑀸𑀲𑀸 𑀩𑀸𑀥𑁂𑀢𑀺, 𑀢𑀸𑀬 𑀩𑀸𑀥𑀺𑀢𑀸𑀦𑀁 𑀧𑀭𑀺𑀬𑁂𑀲𑀦𑀢𑀡𑁆𑀳𑀸 𑀘𑀺𑀢𑁆𑀢𑀁 𑀓𑀺𑀮𑀫𑀬𑀢𑀺, 𑀅𑀣 𑀦𑁂𑀲𑀁 𑀓𑀺𑀮𑀦𑁆𑀢𑀘𑀺𑀢𑁆𑀢𑀸𑀦𑀁 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺. 𑀢𑀢𑁄 𑀯𑀺𑀲𑁂𑀲𑀫𑀦𑀥𑀺𑀕𑀘𑁆𑀙𑀦𑁆𑀢𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑁂𑀲𑀼 𑀅𑀭𑀜𑁆𑀜𑀯𑀦𑀧𑀢𑁆𑀣𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀢𑀁 𑀉𑀢𑁆𑀭𑀸𑀲𑀲𑀜𑁆𑀜𑀺𑀢𑀸 𑀪𑀻𑀭𑀼 𑀚𑀸𑀬𑀢𑀺, 𑀢𑁂𑀲𑀁 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀁 𑀤𑀻𑀖𑀭𑀢𑁆𑀢𑀁 𑀯𑀺𑀯𑁂𑀓𑀭𑀲𑀫𑀦𑀲𑁆𑀲𑀸𑀤𑀬𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 ‘‘𑀦 𑀲𑀺𑀬𑀸 𑀦𑀼 𑀔𑁄 𑀏𑀲 𑀫𑀕𑁆𑀕𑁄’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀁 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀳𑀭𑀢𑀁 𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀫𑀸𑀦𑀫𑀓𑁆𑀔𑀣𑀫𑁆𑀪𑀸 𑀚𑀸𑀬𑀦𑁆𑀢𑀺, 𑀢𑁂𑀧𑀺 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀳𑀭𑀢𑀁 𑀢𑀢𑁄 𑀅𑀥𑀺𑀓𑀢𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀦𑀺𑀲𑁆𑀲𑀸𑀬 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀮𑀸𑀪𑀸𑀤𑀺𑀫𑀼𑀘𑁆𑀙𑀺𑀢𑀸 𑀥𑀫𑁆𑀫𑀧𑀢𑀺𑀭𑀽𑀧𑀓𑀸𑀦𑀺 𑀧𑀓𑀸𑀲𑁂𑀦𑁆𑀢𑀸 𑀫𑀺𑀘𑁆𑀙𑀸𑀬𑀲𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀢𑁆𑀣 𑀞𑀺𑀢𑀸 𑀚𑀸𑀢𑀺𑀆𑀤𑀻𑀳𑀺 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑀺, 𑀧𑀭𑀁 𑀯𑀫𑁆𑀪𑁂𑀦𑁆𑀢𑀺, 𑀢𑀲𑁆𑀫𑀸 𑀓𑀸𑀫𑀸𑀤𑀻𑀦𑀁 𑀧𑀞𑀫𑀲𑁂𑀦𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁪𑁨-𑁩. 𑀏𑀯𑀫𑁂𑀢𑀁 𑀤𑀲𑀯𑀺𑀥𑀁 𑀲𑁂𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀬𑀲𑁆𑀫𑀸 𑀲𑀸 𑀓𑀡𑁆𑀳𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀡𑁆𑀳𑀲𑁆𑀲 𑀦𑀫𑀼𑀘𑀺𑀦𑁄 𑀉𑀧𑀓𑀸𑀭𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦𑀁 𑀢𑀯 𑀲𑁂𑀦𑀸𑀢𑀺 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 𑁋 ‘‘𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻’’𑀢𑀺. 𑀢𑀢𑁆𑀣 𑀅𑀪𑀺𑀧𑁆𑀧𑀳𑀸𑀭𑀺𑀦𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀖𑀸𑀢𑀦𑀻 𑀦𑀺𑀧𑁆𑀧𑁄𑀣𑀦𑀻, 𑀅𑀦𑁆𑀢𑀭𑀸𑀬𑀓𑀭𑀻𑀢𑀺 𑀅𑀢𑁆𑀣𑁄. 𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀮𑀪𑀢𑁂 𑀲𑀼𑀔𑀦𑁆𑀢𑀺 𑀏𑀯𑀁 𑀢𑀯 𑀲𑁂𑀦𑀁 𑀅𑀲𑀽𑀭𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀲𑀸𑀧𑁂𑀓𑁆𑀔𑁄 𑀧𑀼𑀭𑀺𑀲𑁄 𑀦 𑀚𑀺𑀦𑀸𑀢𑀺, 𑀲𑀽𑀭𑁄 𑀧𑀦 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀫𑀕𑁆𑀕𑀲𑀼𑀔𑀁 𑀨𑀮𑀲𑀼𑀔𑀜𑁆𑀘 𑀅𑀥𑀺𑀕𑀘𑁆𑀙𑀢𑀺. 𑀬𑀲𑁆𑀫𑀸 𑀘 𑀮𑀪𑀢𑁂 𑀲𑀼𑀔𑀁, 𑀢𑀲𑁆𑀫𑀸 𑀲𑀼𑀔𑀁 𑀧𑀢𑁆𑀣𑀬𑀫𑀸𑀦𑁄 𑀅𑀳𑀫𑁆𑀧𑀺 𑀏𑀲 𑀫𑀼𑀜𑁆𑀚𑀁 𑀧𑀭𑀺𑀳𑀭𑁂𑀢𑀺. 𑀲𑀗𑁆𑀕𑀸𑀫𑀸𑀯𑀘𑀭𑀸 𑀅𑀦𑀺𑀯𑀢𑁆𑀢𑀺𑀦𑁄 𑀧𑀼𑀭𑀺𑀲𑀸 𑀅𑀢𑁆𑀢𑀦𑁄 𑀅𑀦𑀺𑀯𑀢𑁆𑀢𑀦𑀓𑀪𑀸𑀯𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀲𑀻𑀲𑁂 𑀯𑀸 𑀥𑀚𑁂 𑀯𑀸 𑀆𑀯𑀼𑀥𑁂 𑀯𑀸 𑀫𑀼𑀜𑁆𑀚𑀢𑀺𑀡𑀁 𑀩𑀦𑁆𑀥𑀦𑁆𑀢𑀺, 𑀢𑀁 𑀅𑀬𑀫𑁆𑀧𑀺 𑀧𑀭𑀺𑀳𑀭𑀢𑀺𑀘𑁆𑀘𑁂𑀯 𑀫𑀁 𑀥𑀸𑀭𑁂𑀳𑀺. 𑀢𑀯 𑀲𑁂𑀦𑀸𑀬 𑀧𑀭𑀸𑀚𑀺𑀢𑀲𑁆𑀲 𑀥𑀺𑀭𑀢𑁆𑀣𑀼 𑀫𑀫 𑀚𑀻𑀯𑀺𑀢𑀁, 𑀢𑀲𑁆𑀫𑀸 𑀏𑀯𑀁 𑀥𑀸𑀭𑁂𑀳𑀺 𑁋 𑀲𑀗𑁆𑀕𑀸𑀫𑁂 𑀫𑁂 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀧𑀭𑀸𑀚𑀺𑀢𑁄, 𑀬𑁂𑀦 𑀚𑀻𑀯𑀺𑀢𑁂𑀦 𑀧𑀭𑀸𑀚𑀺𑀢𑁄 𑀚𑀻𑀯𑁂, 𑀢𑀲𑁆𑀫𑀸 𑀚𑀻𑀯𑀺𑀢𑀸 𑀢𑀬𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁂 𑀫𑀢𑀁 𑀫𑀫 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄.

𑁪𑁪𑁪. 𑀓𑀲𑁆𑀫𑀸 𑀫𑀢𑀁 𑀲𑁂𑀬𑁆𑀬𑁄𑀢𑀺 𑀘𑁂? 𑀬𑀲𑁆𑀫𑀸 𑀧𑀕𑀸𑀴𑁆𑀳𑁂𑀢𑁆𑀣…𑀧𑁂… 𑀲𑀼𑀩𑁆𑀩𑀢𑀸, 𑀏𑀢𑁆𑀣 𑀓𑀸𑀫𑀸𑀤𑀺𑀓𑀸𑀬 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀧𑀭𑀺𑀬𑁄𑀲𑀸𑀦𑀸𑀬 𑀢𑀯 𑀲𑁂𑀦𑀸𑀬 𑀧𑀕𑀸𑀴𑁆𑀳𑀸 𑀦𑀺𑀫𑀼𑀕𑁆𑀕𑀸 𑀅𑀦𑀼𑀧𑀯𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀤𑀺𑀲𑁆𑀲𑀦𑁆𑀢𑀺, 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀦𑀧𑁆𑀧𑀓𑀸𑀲𑀦𑁆𑀢𑀺, 𑀅𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀳𑁄𑀦𑁆𑀢𑀺. 𑀏𑀢𑁂 𑀏𑀯𑀁 𑀧𑀕𑀸𑀴𑁆𑀳𑀸 𑀲𑀫𑀸𑀦𑀸 𑀲𑀘𑁂𑀧𑀺 𑀓𑀤𑀸𑀘𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀦𑀧𑀼𑀭𑀺𑀲𑁄 𑀯𑀺𑀬 ‘‘𑀲𑀸𑀳𑀼 𑀲𑀤𑁆𑀥𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀫𑁆𑀫𑀼𑀚𑁆𑀚𑀦𑁆𑀢𑀺, 𑀢𑀣𑀸𑀧𑀺 𑀢𑀸𑀬 𑀲𑁂𑀦𑀸𑀬 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀢𑀜𑁆𑀘 𑀫𑀕𑁆𑀕𑀁 𑀦 𑀚𑀸𑀦𑀦𑁆𑀢𑀺 𑀔𑁂𑀫𑀁 𑀦𑀺𑀩𑁆𑀩𑀸𑀦𑀕𑀸𑀫𑀻𑀦𑀁, 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀬𑁂𑀦 𑀕𑀘𑁆𑀙𑀦𑁆𑀢𑀺 𑀲𑀼𑀩𑁆𑀩𑀢𑀸𑀢𑀺. 𑀇𑀫𑀁 𑀧𑀦 𑀕𑀸𑀣𑀁 𑀲𑀼𑀢𑁆𑀯𑀸 𑀫𑀸𑀭𑁄 𑀧𑀼𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀏𑀯 𑀧𑀓𑁆𑀓𑀸𑀫𑀺.

𑁪𑁪𑁫-𑁬. 𑀧𑀓𑁆𑀓𑀦𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀫𑀳𑀸𑀲𑀢𑁆𑀢𑁄 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀓𑀺𑀜𑁆𑀘𑀺𑀧𑀺 𑀯𑀺𑀲𑁂𑀲𑀁 𑀅𑀦𑀥𑀺𑀕𑀘𑁆𑀙𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 ‘‘𑀲𑀺𑀬𑀸 𑀦𑀼 𑀔𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸’’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀴𑀸𑀭𑀺𑀓𑀸𑀳𑀸𑀭𑀁 𑀆𑀳𑀸𑀭𑁂𑀢𑁆𑀯𑀸, 𑀩𑀮𑀁 𑀕𑀳𑁂𑀢𑁆𑀯𑀸, 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀕𑁂𑀯 𑀲𑀼𑀚𑀸𑀢𑀸𑀬 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸, 𑀪𑀤𑁆𑀭𑀯𑀦𑀲𑀡𑁆𑀟𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀩𑁄𑀥𑀺𑀫𑀡𑁆𑀟𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀲𑁄𑀢𑁆𑀣𑀺𑀬𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀩𑁄𑀥𑀺𑀫𑀽𑀮𑁂 𑀯𑀺𑀓𑀺𑀭𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀤𑁂𑀯𑀢𑀸𑀳𑀺 𑀓𑀢𑀲𑀓𑁆𑀓𑀸𑀭𑀩𑀳𑀼𑀫𑀸𑀦𑁄 𑁋

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼;

𑀉𑀧𑀲𑀼𑀲𑁆𑀲𑀢𑀼 𑀦𑀺𑀲𑁆𑀲𑁂𑀲𑀁, 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺. 𑁋

𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ‘‘𑀦 𑀤𑀸𑀦𑀺 𑀩𑀼𑀤𑁆𑀥𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀢𑀁 𑀜𑀢𑁆𑀯𑀸 𑀫𑀸𑀭𑁄 𑀧𑀸𑀧𑀺𑀫𑀸 ‘‘𑀅𑀚𑁆𑀚 𑀲𑀺𑀤𑁆𑀥𑀢𑁆𑀣𑁄 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀅𑀚𑁆𑀚𑁂𑀯 𑀤𑀸𑀦𑀺𑀲𑁆𑀲 𑀲𑀸 𑀧𑀝𑀺𑀜𑁆𑀜𑀸 𑀧𑀝𑀺𑀩𑀸𑀳𑀺𑀢𑀩𑁆𑀩𑀸’’𑀢𑀺 𑀩𑁄𑀥𑀺𑀫𑀡𑁆𑀟𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀫𑀸𑀬𑀢𑀁 𑀤𑁆𑀯𑀸𑀤𑀲𑀬𑁄𑀚𑀦𑀯𑀺𑀢𑁆𑀣𑀸𑀭𑀁 𑀉𑀤𑁆𑀥𑀁 𑀦𑀯𑀬𑁄𑀚𑀦𑀫𑀼𑀕𑁆𑀕𑀢𑀁 𑀫𑀸𑀭𑀲𑁂𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀁 𑀕𑀺𑀭𑀺𑀫𑁂𑀔𑀮𑀁 𑀳𑀢𑁆𑀣𑀺𑀭𑀸𑀚𑀸𑀦𑀁 𑀆𑀭𑀼𑀬𑁆𑀳 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀕𑀡𑁆𑀳𑀣, 𑀳𑀦𑀣, 𑀧𑀳𑀭𑀣𑀸’’𑀢𑀺 𑀪𑀡𑀦𑁆𑀢𑁄 𑀆𑀴𑀯𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀼𑀝𑁆𑀞𑀺𑀬𑁄 𑀫𑀸𑀧𑁂𑀲𑀺, 𑀢𑀸 𑀫𑀳𑀸𑀧𑀼𑀭𑀺𑀲𑀁 𑀧𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀯𑀚𑀺𑀭𑀗𑁆𑀓𑀼𑀲𑁂𑀦 𑀳𑀢𑁆𑀣𑀺𑀁 𑀓𑀼𑀫𑁆𑀪𑁂 𑀧𑀳𑀭𑀺𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀫𑀻𑀧𑀁 𑀦𑁂𑀢𑁆𑀯𑀸 ‘‘𑀉𑀝𑁆𑀞𑁂𑀳𑀺, 𑀪𑁄 𑀲𑀺𑀤𑁆𑀥𑀢𑁆𑀣, 𑀧𑀮𑁆𑀮𑀗𑁆𑀓𑀸’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 ‘‘𑀦 𑀉𑀝𑁆𑀞𑀳𑀸𑀫𑀺 𑀫𑀸𑀭𑀸’’𑀢𑀺 𑀯𑀢𑁆𑀯𑀸 𑀢𑀁 𑀥𑀚𑀺𑀦𑀺𑀁 𑀲𑀫𑀦𑁆𑀢𑀸 𑀯𑀺𑀮𑁄𑀓𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 ‘‘𑀲𑀫𑀦𑁆𑀢𑀸 𑀥𑀚𑀺𑀦𑀺’’𑀦𑁆𑀢𑀺.

𑀢𑀢𑁆𑀣 𑀥𑀚𑀺𑀦𑀺𑀦𑁆𑀢𑀺 𑀲𑁂𑀦𑀁. 𑀬𑀼𑀢𑁆𑀢𑀦𑁆𑀢𑀺 𑀉𑀬𑁆𑀬𑀼𑀢𑁆𑀢𑀁. 𑀲𑀯𑀸𑀳𑀦𑀦𑁆𑀢𑀺 𑀕𑀺𑀭𑀺𑀫𑁂𑀔𑀮𑀦𑀸𑀕𑀭𑀸𑀚𑀲𑀳𑀺𑀢𑀁. 𑀧𑀘𑁆𑀘𑀼𑀕𑁆𑀕𑀘𑁆𑀙𑀸𑀫𑀻𑀢𑀺 𑀅𑀪𑀺𑀫𑀼𑀔𑁄 𑀉𑀧𑀭𑀺 𑀕𑀫𑀺𑀲𑁆𑀲𑀸𑀫𑀺, 𑀲𑁄 𑀘 𑀔𑁄 𑀢𑁂𑀚𑁂𑀦𑁂𑀯, 𑀦 𑀓𑀸𑀬𑁂𑀦. 𑀓𑀲𑁆𑀫𑀸? 𑀫𑀸 𑀫𑀁 𑀞𑀸𑀦𑀸 𑀅𑀘𑀸𑀯𑀬𑀺, 𑀫𑀁 𑀏𑀢𑀲𑁆𑀫𑀸 𑀞𑀸𑀦𑀸 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀸 𑀫𑀸𑀭𑁄 𑀫𑀸 𑀘𑀸𑀮𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀧𑁆𑀧𑀲𑀳𑀢𑀻𑀢𑀺 𑀲𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀸𑀪𑀺𑀪𑀯𑀢𑀺 𑀯𑀸. 𑀆𑀫𑀁 𑀧𑀢𑁆𑀢𑀦𑁆𑀢𑀺 𑀓𑀸𑀘𑀚𑀸𑀢𑀁 𑀫𑀢𑁆𑀢𑀺𑀓𑀸𑀪𑀸𑀚𑀦𑀁. 𑀅𑀲𑁆𑀫𑀦𑀸𑀢𑀺 𑀧𑀸𑀲𑀸𑀡𑁂𑀦. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑁪𑁪𑁭-𑁮. 𑀇𑀤𑀸𑀦𑀺 ‘‘𑀏𑀢𑀁 𑀢𑁂 𑀫𑀸𑀭𑀲𑁂𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀲𑀫𑁆𑀧𑀢𑁆𑀢𑀥𑀫𑁆𑀫𑀭𑀸𑀚𑀸𑀪𑀺𑀲𑁂𑀓𑁄 𑀇𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀲𑀻𑀓𑀭𑀺𑀢𑁆𑀯𑀸’’𑀢𑀺. 𑀢𑀢𑁆𑀣 𑀯𑀲𑀻𑀓𑀭𑀺𑀢𑁆𑀯𑀸 𑀲𑀗𑁆𑀓𑀧𑁆𑀧𑀦𑁆𑀢𑀺 𑀫𑀕𑁆𑀕𑀪𑀸𑀯𑀦𑀸𑀬 𑀲𑀩𑁆𑀩𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀧𑀳𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲𑁂𑀯 𑀧𑀯𑀢𑁆𑀢𑀦𑁂𑀦 𑀯𑀲𑀻𑀓𑀭𑀺𑀢𑁆𑀯𑀸 𑀲𑀗𑁆𑀓𑀧𑁆𑀧𑀁. 𑀲𑀢𑀺𑀜𑁆𑀘 𑀲𑀽𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀲𑀢𑀺𑀜𑁆𑀘 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀁 𑀓𑀭𑀺𑀢𑁆𑀯𑀸 𑀏𑀯𑀁 𑀯𑀲𑀻𑀓𑀢𑀲𑀗𑁆𑀓𑀧𑁆𑀧𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲𑀢𑀺 𑀭𑀝𑁆𑀞𑀸 𑀭𑀝𑁆𑀞𑀁 𑀯𑀺𑀘𑀭𑀺𑀲𑁆𑀲𑀸𑀫𑀺 𑀤𑁂𑀯𑀫𑀦𑀼𑀲𑁆𑀲𑀪𑁂𑀤𑁂 𑀧𑀼𑀣𑀽 𑀲𑀸𑀯𑀓𑁂 𑀯𑀺𑀦𑀬𑀦𑁆𑀢𑁄. 𑀅𑀣 𑀫𑀬𑀸 𑀯𑀺𑀦𑀻𑀬𑀫𑀸𑀦𑀸 𑀢𑁂 𑀅𑀧𑁆𑀧𑀫𑀢𑁆𑀢𑀸…𑀧𑁂… 𑀦 𑀲𑁄𑀘𑀭𑁂, 𑀢𑀁 𑀦𑀺𑀩𑁆𑀩𑀸𑀦𑀸𑀫𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁪𑁯-𑁫𑁧. 𑀅𑀣 𑀫𑀸𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀲𑀼𑀢𑁆𑀯𑀸 𑀆𑀳 𑁋 ‘‘𑀏𑀯𑀭𑀽𑀧𑀁 𑀧𑀓𑁆𑀔𑀁 𑀤𑀺𑀲𑁆𑀯𑀸 𑀦 𑀪𑀸𑀬𑀲𑀺 𑀪𑀺𑀓𑁆𑀔𑀽’’𑀢𑀺? ‘‘𑀆𑀫, 𑀫𑀸𑀭, 𑀦 𑀪𑀸𑀬𑀸𑀫𑀻’’𑀢𑀺. ‘‘𑀓𑀲𑁆𑀫𑀸 𑀦 𑀪𑀸𑀬𑀲𑀻’’𑀢𑀺? ‘‘𑀤𑀸𑀦𑀸𑀤𑀻𑀦𑀁 𑀧𑀸𑀭𑀫𑀺𑀧𑀼𑀜𑁆𑀜𑀸𑀦𑀁 𑀓𑀢𑀢𑁆𑀢𑀸’’𑀢𑀺. ‘‘𑀓𑁄 𑀏𑀢𑀁 𑀚𑀸𑀦𑀸𑀢𑀺 𑀤𑀸𑀦𑀸𑀤𑀻𑀦𑀺 𑀢𑁆𑀯𑀫𑀓𑀸𑀲𑀻’’𑀢𑀺? ‘‘𑀓𑀺𑀁 𑀏𑀢𑁆𑀣 𑀧𑀸𑀧𑀺𑀫 𑀲𑀓𑁆𑀔𑀺𑀓𑀺𑀘𑁆𑀘𑁂𑀦, 𑀅𑀧𑀺𑀘 𑀏𑀓𑀲𑁆𑀫𑀺𑀁𑀬𑁂𑀯 𑀪𑀯𑁂 𑀯𑁂𑀲𑁆𑀲𑀦𑁆𑀢𑀭𑁄 𑀳𑀼𑀢𑁆𑀯𑀸 𑀬𑀁 𑀤𑀸𑀦𑀫𑀤𑀸𑀲𑀺𑀁, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀙𑀳𑀺 𑀧𑀓𑀸𑀭𑁂𑀳𑀺 𑀲𑀜𑁆𑀚𑀸𑀢𑀓𑀫𑁆𑀧𑀸 𑀅𑀬𑀁 𑀫𑀳𑀸𑀧𑀣𑀯𑀻𑀬𑁂𑀯 𑀲𑀓𑁆𑀔𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺 𑀪𑁂𑀭𑀯𑀲𑀤𑁆𑀤𑀁 𑀫𑀼𑀜𑁆𑀘𑀫𑀸𑀦𑀸, 𑀬𑀁 𑀲𑀼𑀢𑁆𑀯𑀸 𑀫𑀸𑀭𑁄 𑀅𑀲𑀦𑀺𑀳𑀢𑁄 𑀯𑀺𑀬 𑀪𑀻𑀢𑁄 𑀥𑀚𑀁 𑀧𑀡𑀸𑀫𑁂𑀢𑁆𑀯𑀸 𑀧𑀮𑀸𑀬𑀺 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀢𑀻𑀳𑀺 𑀬𑀸𑀫𑁂𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁…𑀧𑁂… 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀫𑀸𑀭𑁄 𑀉𑀤𑀸𑀦𑀲𑀤𑁆𑀤𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀅𑀬𑀁‘𑀩𑀼𑀤𑁆𑀥𑁄 𑀅𑀳’𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀳𑀦𑁆𑀤 𑀦𑀁 𑀅𑀦𑀼𑀩𑀦𑁆𑀥𑀸𑀫𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀧𑀲𑁆𑀲𑀺𑀢𑀼𑀁. 𑀲𑀘𑀲𑁆𑀲 𑀓𑀺𑀜𑁆𑀘𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀔𑀮𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀯𑀺𑀳𑁂𑀞𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀢𑀁 𑀏𑀓𑀁 𑀯𑀲𑁆𑀲𑀁 𑀅𑀦𑀼𑀩𑀦𑁆𑀥𑀺. 𑀢𑀢𑁄 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀔𑀮𑀺𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀢𑁆𑀢 𑀯𑀲𑁆𑀲𑀸𑀦𑀻’’𑀢𑀺 𑀇𑀫𑀸 𑀦𑀺𑀩𑁆𑀩𑁂𑀚𑀦𑀻𑀬𑀕𑀸𑀣𑀸𑀬𑁄 𑀅𑀪𑀸𑀲𑀺.

𑀢𑀢𑁆𑀣 𑀑𑀢𑀸𑀭𑀦𑁆𑀢𑀺 𑀭𑀦𑁆𑀥𑀁 𑀯𑀺𑀯𑀭𑀁. 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀦𑁆𑀢𑀺 𑀦𑀸𑀥𑀺𑀕𑀫𑀺𑀁. 𑀫𑁂𑀤𑀯𑀡𑁆𑀡𑀦𑁆𑀢𑀺 𑀫𑁂𑀤𑀧𑀺𑀡𑁆𑀟𑀲𑀤𑀺𑀲𑀁. 𑀅𑀦𑀼𑀧𑀭𑀺𑀬𑀕𑀸𑀢𑀺 𑀧𑀭𑀺𑀢𑁄 𑀧𑀭𑀺𑀢𑁄 𑀅𑀕𑀫𑀸𑀲𑀺. 𑀫𑀼𑀤𑀼𑀦𑁆𑀢𑀺 𑀫𑀼𑀤𑀼𑀓𑀁. 𑀯𑀺𑀦𑁆𑀤𑁂𑀫𑀸𑀢𑀺 𑀅𑀥𑀺𑀕𑀘𑁆𑀙𑁂𑀬𑁆𑀬𑀸𑀫. 𑀅𑀲𑁆𑀲𑀸𑀤𑀦𑀸𑀢𑀺 𑀲𑀸𑀤𑀼𑀪𑀸𑀯𑁄. 𑀯𑀸𑀬𑀲𑁂𑀢𑁆𑀢𑁄𑀢𑀺 𑀯𑀸𑀬𑀲𑁄 𑀏𑀢𑁆𑀢𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀓𑀝𑀫𑁂𑀯.

𑀅𑀬𑀁 𑀧𑀦 𑀬𑁄𑀚𑀦𑀸 𑁋 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁 𑀑𑀢𑀸𑀭𑀸𑀧𑁂𑀓𑁆𑀔𑁄 𑀅𑀦𑀼𑀩𑀦𑁆𑀥𑀺𑀁 𑀓𑀢𑁆𑀣𑀘𑀺 𑀅𑀯𑀺𑀚𑀳𑀦𑁆𑀢𑁄 𑀧𑀤𑀸𑀧𑀤𑀁, 𑀏𑀯𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸𑀧𑀺 𑀘 𑀑𑀢𑀸𑀭𑀁 𑀦𑀸𑀥𑀺𑀕𑀫𑀺𑀁. 𑀲𑁄𑀳𑀁 𑀬𑀣𑀸 𑀦𑀸𑀫 𑀫𑁂𑀤𑀯𑀡𑁆𑀡𑀁 𑀧𑀸𑀲𑀸𑀡𑀁 𑀫𑁂𑀤𑀲𑀜𑁆𑀜𑀻 𑀯𑀸𑀬𑀲𑁄 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑁆𑀲𑀸𑀤𑀁 𑀅𑀯𑀺𑀦𑁆𑀤𑀫𑀸𑀦𑁄 ‘‘𑀅𑀧𑁆𑀧𑁂𑀯 𑀦𑀸𑀫 𑀏𑀢𑁆𑀣 𑀫𑀼𑀤𑀼 𑀯𑀺𑀦𑁆𑀤𑁂𑀫, 𑀅𑀧𑀺 𑀇𑀢𑁄 𑀅𑀲𑁆𑀲𑀸𑀤𑀦𑀸 𑀲𑀺𑀬𑀸’’𑀢𑀺 𑀲𑀫𑀦𑁆𑀢𑀸 𑀢𑀣𑁂𑀯 𑀯𑀺𑀚𑁆𑀛𑀦𑁆𑀢𑁄 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀓𑀢𑁆𑀣𑀘𑀺 𑀅𑀲𑁆𑀲𑀸𑀤𑀁 𑀅𑀮𑀤𑁆𑀥𑀸 ‘‘𑀧𑀸𑀲𑀸𑀡𑁄𑀯𑀸𑀬’’𑀦𑁆𑀢𑀺 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀫𑁂𑀬𑁆𑀬, 𑀏𑀯𑀫𑁂𑀯𑀸𑀳𑀁 𑀪𑀕𑀯𑀦𑁆𑀢𑀁 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀧𑀜𑁆𑀜𑀸𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀺𑀚𑁆𑀛𑀦𑁆𑀢𑁄 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀕𑀸 ‘‘𑀅𑀧𑁆𑀧𑁂𑀯 𑀦𑀸𑀫 𑀓𑀢𑁆𑀣𑀘𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀫𑀼𑀤𑀼𑀪𑀸𑀯𑀁 𑀯𑀺𑀦𑁆𑀤𑁂𑀫, 𑀓𑀼𑀢𑁄𑀘𑀺 𑀅𑀲𑁆𑀲𑀸𑀤𑀦𑀸 𑀲𑀺𑀬𑀸’’𑀢𑀺, 𑀢𑁂 𑀤𑀸𑀦𑀺 𑀫𑀬𑀁 𑀅𑀲𑁆𑀲𑀸𑀤𑀁 𑀅𑀮𑀪𑀫𑀸𑀦𑀸 𑀓𑀸𑀓𑁄𑀯 𑀲𑁂𑀮𑀫𑀸𑀲𑀚𑁆𑀚 𑀦𑀺𑀩𑁆𑀩𑀺𑀚𑁆𑀚𑀸𑀧𑁂𑀫 𑀕𑁄𑀢𑀫𑀁 𑀆𑀲𑀚𑁆𑀚 𑀢𑀢𑁄 𑀕𑁄𑀢𑀫𑀸 𑀦𑀺𑀩𑁆𑀩𑀺𑀚𑁆𑀚 𑀅𑀧𑁂𑀫𑀸𑀢𑀺. 𑀏𑀯𑀁 𑀯𑀤𑀢𑁄 𑀓𑀺𑀭 𑀫𑀸𑀭𑀲𑁆𑀲 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀦𑀺𑀧𑁆𑀨𑀮𑀧𑀭𑀺𑀲𑁆𑀲𑀫𑀁 𑀦𑀺𑀲𑁆𑀲𑀸𑀬 𑀩𑀮𑀯𑀲𑁄𑀓𑁄 𑀉𑀤𑀧𑀸𑀤𑀺. 𑀢𑁂𑀦𑀲𑁆𑀲 𑀯𑀺𑀲𑀻𑀤𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀩𑁂𑀮𑀼𑀯𑀧𑀡𑁆𑀟𑀼 𑀦𑀸𑀫 𑀯𑀻𑀡𑀸 𑀓𑀘𑁆𑀙𑀢𑁄 𑀧𑀢𑀺𑀢𑀸. 𑀬𑀸 𑀲𑀓𑀺𑀁 𑀓𑀼𑀲𑀮𑁂𑀳𑀺 𑀯𑀸𑀤𑀺𑀢𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀫𑀥𑀼𑀭𑀲𑁆𑀲𑀭𑀁 𑀫𑀼𑀜𑁆𑀘𑀢𑀺, 𑀬𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑁄 𑀧𑀜𑁆𑀘𑀲𑀺𑀔𑀲𑁆𑀲 𑀅𑀤𑀸𑀲𑀺. 𑀢𑀁 𑀲𑁄 𑀧𑀢𑀫𑀸𑀦𑀫𑁆𑀧𑀺 𑀦 𑀩𑀼𑀚𑁆𑀛𑀺. 𑀢𑁂𑀦𑀸𑀳 𑀪𑀕𑀯𑀸 𑁋

𑁪𑁫𑁨. ‘‘𑀢𑀲𑁆𑀲 𑀲𑁄𑀓𑀧𑀭𑁂𑀢𑀲𑁆𑀲, 𑀯𑀻𑀡𑀸 𑀓𑀘𑁆𑀙𑀸 𑀅𑀪𑀲𑁆𑀲𑀣;

𑀢𑀢𑁄 𑀲𑁄 𑀤𑀼𑀫𑁆𑀫𑀦𑁄 𑀬𑀓𑁆𑀔𑁄, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸’’𑀢𑀺.

𑀲𑀗𑁆𑀕𑀻𑀢𑀺𑀓𑀸𑀭𑀓𑀸 𑀆𑀳𑀁𑀲𑀽𑀢𑀺 𑀏𑀓𑁂, 𑀅𑀫𑁆𑀳𑀸𑀓𑀁 𑀧𑀦𑁂𑀢𑀁 𑀦𑀓𑁆𑀔𑀫𑀢𑀻𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀁. 𑀅𑀢𑁆𑀢𑀚𑁆𑀛𑀸𑀲𑀬𑀢𑁄 𑀘𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀪𑀕𑀯𑀸 𑀳𑀺 𑀲𑀼𑀪𑀸𑀲𑀺𑀢𑀧𑁆𑀧𑀺𑀬𑁄, 𑀲𑁄 𑀅𑀢𑁆𑀢𑀦𑁄 𑀲𑀼𑀪𑀸𑀲𑀺𑀢𑀲𑀫𑀼𑀤𑀸𑀘𑀸𑀭𑀧𑁆𑀧𑀓𑀸𑀲𑀦𑁂𑀦 𑀲𑀢𑁆𑀢𑀸𑀦𑀁 𑀤𑀼𑀩𑁆𑀪𑀸𑀲𑀺𑀢𑀲𑀫𑀼𑀤𑀸𑀘𑀸𑀭𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺. 𑀢𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁. 𑀢𑀢𑁆𑀣 𑀢𑀢𑁆𑀭 𑀔𑁄 𑀪𑀕𑀯𑀸…𑀧𑁂… 𑀪𑀤𑀦𑁆𑀢𑁂𑀢𑀺 𑀢𑁂 𑀪𑀺𑀓𑁆𑀔𑀽𑀢𑀺 𑀏𑀢𑀁 𑀅𑀧𑀼𑀩𑁆𑀩𑀁, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀲𑁆𑀫𑀸 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀢𑁆𑀣𑀫𑀺𑀤𑀁 𑀯𑀼𑀘𑁆𑀘𑀢𑀺 𑁋 𑀢𑀢𑁆𑀭𑀸𑀢𑀺 𑀤𑁂𑀲𑀓𑀸𑀮𑀧𑀭𑀺𑀤𑀻𑀧𑀦𑀁. 𑀢𑀜𑁆𑀳𑀺 𑀬𑀁 𑀲𑀫𑀬𑀁 𑀯𑀺𑀳𑀭𑀢𑀺, 𑀢𑀢𑁆𑀭 𑀲𑀫𑀬𑁂, 𑀬𑀲𑁆𑀫𑀺𑀜𑁆𑀘 𑀆𑀭𑀸𑀫𑁂 𑀯𑀺𑀳𑀭𑀢𑀺, 𑀢𑀢𑁆𑀭 𑀆𑀭𑀸𑀫𑁂𑀢𑀺 𑀤𑀻𑀧𑁂𑀢𑀺. 𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂 𑀤𑀻𑀧𑁂𑀢𑀺. 𑀦 𑀳𑀺 𑀪𑀕𑀯𑀸 𑀅𑀬𑀼𑀢𑁆𑀢𑁂 𑀤𑁂𑀲𑁂 𑀓𑀸𑀮𑁂 𑀯𑀸 𑀥𑀫𑁆𑀫𑀁 𑀪𑀸𑀲𑀢𑀺. ‘‘𑀅𑀓𑀸𑀮𑁄 𑀔𑁄, 𑀢𑀸𑀯, 𑀩𑀸𑀳𑀺𑀬𑀸’’𑀢𑀺𑀆𑀤𑀺 (𑀉𑀤𑀸. 𑁧𑁦) 𑀘𑁂𑀢𑁆𑀣 𑀲𑀸𑀥𑀓𑀁. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑀸𑀤𑀺𑀓𑀸𑀮𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀧𑀭𑀺𑀤𑀻𑀧𑀦𑀁. 𑀪𑀺𑀓𑁆𑀔𑀽𑀢𑀺 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀧𑀭𑀺𑀤𑀻𑀧𑀦𑀁. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀮𑀧𑀺 𑀅𑀪𑀸𑀲𑀺 𑀲𑀫𑁆𑀩𑁄𑀥𑁂𑀲𑀺.

𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑀦𑀸𑀓𑀸𑀭𑀧𑀭𑀺𑀤𑀻𑀧𑀦𑀁. 𑀢𑀜𑁆𑀘 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀦 𑀦𑁂𑀲𑀁 𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺. ‘‘𑀪𑀺𑀓𑁆𑀔𑀯𑁄’’𑀢𑀺 𑀇𑀫𑀺𑀦𑀸 𑀘 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑁄𑀫𑁆𑀫𑀳𑀤𑀬𑀦𑀬𑀦𑀦𑀺𑀧𑀸𑀢𑀧𑀼𑀩𑁆𑀩𑀗𑁆𑀕𑀫𑁂𑀦 𑀯𑀘𑀦𑁂𑀦 𑀢𑁂 𑀅𑀢𑁆𑀢𑀦𑁄 𑀫𑀼𑀔𑀸𑀪𑀺𑀫𑀼𑀔𑁂 𑀓𑀭𑀺𑀢𑁆𑀯𑀸 𑀢𑁂𑀦𑁂𑀯 𑀓𑀣𑁂𑀢𑀼𑀓𑀫𑁆𑀬𑀢𑀸𑀤𑀻𑀧𑀓𑁂𑀦 𑀯𑀘𑀦𑁂𑀦 𑀢𑁂𑀲𑀁 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺, 𑀢𑁂𑀦𑁂𑀯 𑀘 𑀲𑀫𑁆𑀩𑁄𑀥𑀦𑀢𑁆𑀣𑁂𑀦 𑀯𑀘𑀦𑁂𑀦 𑀲𑀸𑀥𑀼𑀓𑀲𑀯𑀦𑀫𑀦𑀲𑀺𑀓𑀸𑀭𑁂𑀧𑀺 𑀢𑁂 𑀦𑀺𑀬𑁄𑀚𑁂𑀢𑀺. 𑀲𑀸𑀥𑀼𑀓𑀲𑀯𑀦𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺. 𑀅𑀧𑀭𑁂𑀲𑀼𑀧𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 𑀪𑀺𑀓𑁆𑀔𑀽 𑀏𑀯 𑀆𑀫𑀦𑁆𑀢𑁂𑀲𑀻𑀢𑀺 𑀘𑁂? 𑀚𑁂𑀝𑁆𑀞𑀲𑁂𑀝𑁆𑀞𑀸𑀲𑀦𑁆𑀦𑀲𑀤𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀸 𑀳𑀺 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸, 𑀦 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸. 𑀧𑀭𑀺𑀲𑀸𑀬 𑀘 𑀚𑁂𑀝𑁆𑀞𑀸 𑀪𑀺𑀓𑁆𑀔𑀽 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸, 𑀲𑁂𑀝𑁆𑀞𑀸 𑀅𑀦𑀕𑀸𑀭𑀺𑀬𑀪𑀸𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀢𑁆𑀣𑀼 𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀓𑀮𑀲𑀸𑀲𑀦𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸 𑀘. 𑀆𑀲𑀦𑁆𑀦𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀲𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑀢𑁆𑀢𑀸, 𑀲𑀤𑀸 𑀲𑀦𑁆𑀦𑀺𑀳𑀺𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸. 𑀢𑁂𑀦 𑀪𑀕𑀯𑀸 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀪𑀺𑀓𑁆𑀔𑀽 𑀏𑀯 𑀆𑀫𑀦𑁆𑀢𑁂𑀲𑀺. 𑀅𑀧𑀺𑀘 𑀪𑀸𑀚𑀦𑀁 𑀢𑁂 𑀇𑀫𑀸𑀬 𑀓𑀣𑀸𑀬 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄𑀢𑀺𑀧𑀺 𑀢𑁂 𑀏𑀯 𑀆𑀫𑀦𑁆𑀢𑁂𑀲𑀺. 𑀪𑀤𑀦𑁆𑀢𑁂𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁. 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁂 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺, 𑀢𑁂 𑀏𑀯𑀁 𑀪𑀕𑀯𑀦𑁆𑀢𑀁 𑀆𑀮𑀧𑀦𑁆𑀢𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺.

𑀘𑀢𑀽𑀳𑀺 𑀅𑀗𑁆𑀕𑁂𑀳𑀻𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀯𑀬𑀯𑁂𑀳𑀺 𑀯𑀸. 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀻𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀲𑀼𑀪𑀸𑀲𑀺𑀢𑀯𑀸𑀘𑀸𑀬 𑀓𑀸𑀭𑀡𑀸𑀦𑀺. 𑀲𑀘𑁆𑀘𑀯𑀘𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀅𑀯𑀬𑀯𑀸, 𑀓𑀸𑀭𑀡𑀢𑁆𑀣𑁂 𑀘 𑀅𑀗𑁆𑀕𑀲𑀤𑁆𑀤𑁄. 𑀘𑀢𑀽𑀳𑀻𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀳𑁄𑀢𑀺, 𑀅𑀯𑀬𑀯𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀦𑀼𑀆𑀕𑀢𑀸 𑀧𑀯𑀢𑁆𑀢𑀸 𑀬𑀼𑀢𑁆𑀢𑀸 𑀘. 𑀯𑀸𑀘𑀸𑀢𑀺 𑀲𑀫𑀼𑀮𑁆𑀮𑀧𑀦𑀯𑀸𑀘𑀸. 𑀬𑀸 𑀲𑀸 ‘‘𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄’’𑀢𑀺 (𑀥. 𑀲. 𑁬𑁩𑁬) 𑀘, ‘‘𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺 (𑀤𑀻. 𑀦𑀺. 𑁧.𑁯; 𑀫. 𑀦𑀺. 𑁩.𑁧𑁪) 𑀘 𑀏𑀯𑀫𑀸𑀤𑀻𑀲𑀼 𑀆𑀕𑀘𑁆𑀙𑀢𑀺. 𑀬𑀸 𑀧𑀦 ‘‘𑀯𑀸𑀘𑀸𑀬 𑀘𑁂 𑀓𑀢𑀁 𑀓𑀫𑁆𑀫’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁧 𑀓𑀸𑀬𑀓𑀫𑁆𑀫𑀤𑁆𑀯𑀸𑀭) 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺 𑀘, ‘‘𑀬𑀸 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀯𑀸𑀘𑀸’’𑀢𑀺 (𑀥. 𑀲. 𑁨𑁯𑁯; 𑀯𑀺𑀪. 𑁨𑁦𑁬) 𑀏𑀯𑀁 𑀯𑀺𑀭𑀢𑀺 𑀘, ‘‘𑀨𑀭𑀼𑀲𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀆𑀲𑁂𑀯𑀺𑀢𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀢𑀻’’𑀢𑀺 (𑀅. 𑀦𑀺. 𑁮.𑁪𑁦) 𑀏𑀯𑀁 𑀘𑁂𑀢𑀦𑀸 𑀘 𑀯𑀸𑀘𑀸𑀢𑀺 𑀆𑀕𑀘𑁆𑀙𑀢𑀺, 𑀲𑀸 𑀇𑀥 𑀦 𑀅𑀥𑀺𑀧𑁆𑀧𑁂𑀢𑀸. 𑀓𑀲𑁆𑀫𑀸? 𑀅𑀪𑀸𑀲𑀺𑀢𑀩𑁆𑀩𑀢𑁄. 𑀲𑀼𑀪𑀸𑀲𑀺𑀢𑀸 𑀳𑁄𑀢𑀻𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸 𑀳𑁄𑀢𑀺. 𑀢𑁂𑀦𑀲𑁆𑀲𑀸 𑀅𑀢𑁆𑀣𑀸𑀯𑀳𑀦𑀢𑀁 𑀤𑀻𑀧𑁂𑀢𑀺. 𑀦 𑀤𑀼𑀩𑁆𑀪𑀸𑀲𑀺𑀢𑀸𑀢𑀺 𑀦 𑀤𑀼𑀝𑁆𑀞𑀼 𑀪𑀸𑀲𑀺𑀢𑀸. 𑀢𑁂𑀦𑀲𑁆𑀲𑀸 𑀅𑀦𑀢𑁆𑀣𑀸𑀦𑀸𑀯𑀳𑀦𑀢𑀁 𑀤𑀻𑀧𑁂𑀢𑀺. 𑀅𑀦𑀯𑀚𑁆𑀚𑀸𑀢𑀺 𑀯𑀚𑁆𑀚𑀲𑀗𑁆𑀔𑀸𑀢𑀭𑀸𑀕𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀸. 𑀢𑁂𑀦𑀲𑁆𑀲𑀸 𑀓𑀸𑀭𑀡𑀲𑀼𑀤𑁆𑀥𑀺𑀁 𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀅𑀦𑀦𑀼𑀯𑀚𑁆𑀚𑀸 𑀘𑀸𑀢𑀺 𑀅𑀦𑀼𑀯𑀸𑀤𑀯𑀺𑀫𑀼𑀢𑁆𑀢𑀸. 𑀢𑁂𑀦𑀲𑁆𑀲𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀯𑀺𑀜𑁆𑀜𑀽𑀦𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀁. 𑀢𑁂𑀦 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀩𑀸𑀮𑀸 𑀅𑀧𑁆𑀧𑀫𑀸𑀡𑀸𑀢𑀺 𑀤𑀻𑀧𑁂𑀢𑀺.

𑀓𑀢𑀫𑁂𑀳𑀺 𑀘𑀢𑀽𑀳𑀻𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀪𑀺𑀓𑁆𑀔𑀯𑁂𑀢𑀺 𑀬𑁂𑀲𑀁 𑀓𑀣𑁂𑀢𑀼𑀓𑀸𑀫𑁄, 𑀢𑀤𑀸𑀮𑀧𑀦𑀁. 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀸𑀘𑀸𑀪𑀸𑀲𑀦𑀓𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀻𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀘𑀢𑀽𑀲𑀼 𑀯𑀸𑀘𑀗𑁆𑀕𑁂𑀲𑀼 𑀅𑀜𑁆𑀜𑀢𑀭𑀗𑁆𑀕𑀦𑀺𑀤𑁆𑀤𑁂𑀲𑀯𑀘𑀦𑀁. 𑀦𑁄 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑀸𑀘𑀗𑁆𑀕𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀲𑀦𑀦𑀺𑀯𑀸𑀭𑀡𑀁. 𑀢𑁂𑀦 ‘‘𑀫𑀼𑀲𑀸𑀯𑀸𑀤𑀸𑀤𑀬𑁄𑀧𑀺 𑀓𑀤𑀸𑀘𑀺 𑀯𑀢𑁆𑀢𑀩𑁆𑀩𑀸’’𑀢𑀺 𑀤𑀺𑀝𑁆𑀞𑀺𑀁 𑀦𑀺𑀲𑁂𑀥𑁂𑀢𑀺. ‘‘𑀦𑁄 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑀸 𑀫𑀺𑀘𑁆𑀙𑀸𑀯𑀸𑀘𑀧𑁆𑀧𑀳𑀸𑀦𑀁 𑀤𑀻𑀧𑁂𑀢𑀺, ‘‘𑀲𑀼𑀪𑀸𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀳𑀻𑀦𑀫𑀺𑀘𑁆𑀙𑀸𑀯𑀸𑀘𑁂𑀦 𑀲𑀢𑀸 𑀪𑀸𑀲𑀺𑀢𑀩𑁆𑀩𑀯𑀘𑀦𑀮𑀓𑁆𑀔𑀡𑀁. 𑀢𑀣𑀸 𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀁. 𑀅𑀗𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀧𑀦 𑀅𑀪𑀸𑀲𑀺𑀢𑀩𑁆𑀩𑀁 𑀧𑀼𑀩𑁆𑀩𑁂 𑀅𑀯𑀢𑁆𑀯𑀸 𑀪𑀸𑀲𑀺𑀢𑀩𑁆𑀩𑀫𑁂𑀯𑀸𑀳. 𑀏𑀲 𑀦𑀬𑁄 𑀥𑀫𑁆𑀫𑀁𑀬𑁂𑀯𑀸𑀢𑀺𑀆𑀤𑀻𑀲𑀼𑀧𑀺.

𑀏𑀢𑁆𑀣 𑀘 ‘‘𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀺𑀲𑀼𑀡𑀤𑁄𑀲𑀭𑀳𑀺𑀢𑀁 𑀲𑀫𑀕𑁆𑀕𑀓𑀭𑀡𑀯𑀘𑀦𑀁 𑀯𑀼𑀢𑁆𑀢𑀁, ‘‘𑀥𑀫𑁆𑀫𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀥𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀨𑀤𑁄𑀲𑀭𑀳𑀺𑀢𑀁 𑀥𑀫𑁆𑀫𑀢𑁄 𑀅𑀦𑀧𑁂𑀢𑀁 𑀫𑀦𑁆𑀢𑀸𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀨𑀭𑀼𑀲𑀸𑀮𑀺𑀓𑀭𑀳𑀺𑀢𑀸𑀦𑀺 𑀧𑀺𑀬𑀲𑀘𑁆𑀘𑀯𑀘𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀫𑁂𑀳𑀺 𑀔𑁄𑀢𑀺𑀆𑀤𑀺𑀦𑀸 𑀧𑀦 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑁄 𑀢𑀁 𑀯𑀸𑀘𑀁 𑀦𑀺𑀕𑀫𑁂𑀢𑀺. 𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 ‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀻’’𑀢𑀺 𑀪𑀡𑀦𑁆𑀢𑁄 𑀬𑀤𑀜𑁆𑀜𑁂 𑀧𑀝𑀺𑀜𑁆𑀜𑀸𑀤𑀻𑀳𑀺 𑀅𑀯𑀬𑀯𑁂𑀳𑀺 𑀦𑀸𑀫𑀸𑀤𑀻𑀳𑀺 𑀧𑀤𑁂𑀳𑀺 𑀮𑀺𑀗𑁆𑀕𑀯𑀘𑀦𑀯𑀺𑀪𑀢𑁆𑀢𑀺𑀓𑀸𑀮𑀓𑀸𑀭𑀓𑀸𑀤𑀻𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁 𑀯𑀸𑀘𑀁 ‘‘𑀲𑀼𑀪𑀸𑀲𑀺𑀢’’𑀦𑁆𑀢𑀺 𑀫𑀜𑁆𑀜𑀦𑁆𑀢𑀺, 𑀢𑀁 𑀥𑀫𑁆𑀫𑀢𑁄 𑀧𑀝𑀺𑀲𑁂𑀥𑁂𑀢𑀺. 𑀅𑀯𑀬𑀯𑀸𑀤𑀺𑀲𑀫𑁆𑀧𑀦𑁆𑀦𑀸𑀧𑀺 𑀳𑀺 𑀧𑁂𑀲𑀼𑀜𑁆𑀜𑀸𑀤𑀺𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸𑀯 𑀳𑁄𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀸𑀯𑀳𑀢𑁆𑀢𑀸. 𑀇𑀫𑁂𑀳𑀺 𑀧𑀦 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀘𑁂𑀧𑀺 𑀫𑀺𑀮𑀓𑁆𑀔𑀼𑀪𑀸𑀲𑀸𑀧𑀭𑀺𑀬𑀸𑀧𑀦𑁆𑀦𑀸 𑀖𑀝𑀘𑁂𑀝𑀺𑀓𑀸𑀕𑀻𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸 𑀯𑀸 𑀳𑁄𑀢𑀺, 𑀢𑀣𑀸𑀧𑀺 𑀲𑀼𑀪𑀸𑀲𑀺𑀢𑀸 𑀏𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸. 𑀲𑀻𑀳𑀴𑀤𑀻𑀧𑁂 𑀫𑀕𑁆𑀕𑀧𑀲𑁆𑀲𑁂 𑀲𑀲𑁆𑀲𑀁 𑀭𑀓𑁆𑀔𑀦𑁆𑀢𑀺𑀬𑀸 𑀲𑀻𑀳𑀴𑀘𑁂𑀝𑀺𑀓𑀸𑀬 𑀲𑀻𑀳𑀴𑀓𑁂𑀦𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀻𑀢𑀁 𑀕𑀸𑀬𑀦𑁆𑀢𑀺𑀬𑀸 𑀲𑀼𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀲𑀝𑁆𑀞𑀺𑀫𑀢𑁆𑀢𑀸 𑀯𑀺𑀧𑀲𑁆𑀲𑀓𑀪𑀺𑀓𑁆𑀔𑀽 𑀘𑁂𑀢𑁆𑀣 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀢𑀺𑀲𑁆𑀲𑁄 𑀦𑀸𑀫 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀲𑀭𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄 𑀧𑀤𑀼𑀫𑀲𑀭𑁂 𑀧𑀤𑀼𑀫𑀸𑀦𑀺 𑀪𑀜𑁆𑀚𑀺𑀢𑁆𑀯𑀸 𑀪𑀜𑁆𑀚𑀺𑀢𑁆𑀯𑀸 𑁋

‘‘𑀧𑀸𑀢𑁄 𑀨𑀼𑀮𑁆𑀮𑀁 𑀓𑁄𑀓𑀦𑀤𑀁, 𑀲𑀽𑀭𑀺𑀬𑀸𑀮𑁄𑀓𑁂𑀦 𑀪𑀚𑁆𑀚𑀺𑀬𑀢𑁂;

𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀕𑀢𑀸 𑀲𑀢𑁆𑀢𑀸, 𑀚𑀭𑀸𑀪𑀺𑀯𑁂𑀕𑁂𑀦 𑀫𑀤𑁆𑀤𑀻𑀬𑀦𑁆𑀢𑀻’’𑀢𑀺. 𑁋

𑀇𑀫𑀁 𑀕𑀻𑀢𑀁 𑀕𑀸𑀬𑀦𑁆𑀢𑀺𑀬𑀸 𑀘𑁂𑀝𑀺𑀓𑀸𑀬 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀩𑀼𑀤𑁆𑀥𑀦𑁆𑀢𑀭𑁂 𑀘 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀢𑁆𑀢𑀳𑀺 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀯𑀦𑀸 𑀆𑀕𑀫𑁆𑀫 𑀅𑀜𑁆𑀜𑀢𑀭𑀸𑀬 𑀇𑀢𑁆𑀣𑀺𑀬𑀸 𑀫𑀼𑀲𑀮𑁂𑀦 𑀢𑀡𑁆𑀟𑀼𑀮𑁂 𑀓𑁄𑀝𑁆𑀝𑁂𑀦𑁆𑀢𑀺𑀬𑀸 𑁋

‘‘𑀚𑀭𑀸𑀬 𑀧𑀭𑀺𑀫𑀤𑁆𑀤𑀺𑀢𑀁 𑀏𑀢𑀁, 𑀫𑀺𑀮𑀸𑀢𑀙𑀯𑀺𑀘𑀫𑁆𑀫𑀦𑀺𑀲𑁆𑀲𑀺𑀢𑀁;

𑀫𑀭𑀡𑁂𑀦 𑀪𑀺𑀚𑁆𑀚𑀢𑀺 𑀏𑀢𑀁, 𑀫𑀘𑁆𑀘𑀼𑀲𑁆𑀲 𑀖𑀲𑀫𑀸𑀫𑀺𑀲𑀁.

‘‘𑀓𑀺𑀫𑀻𑀦𑀁 𑀆𑀮𑀬𑀁 𑀏𑀢𑀁, 𑀦𑀸𑀦𑀸𑀓𑀼𑀡𑀧𑁂𑀦 𑀧𑀽𑀭𑀺𑀢𑀁;

𑀅𑀲𑀼𑀘𑀺𑀲𑁆𑀲 𑀪𑀸𑀚𑀦𑀁 𑀏𑀢𑀁, 𑀓𑀤𑀮𑀺𑀓𑁆𑀔𑀦𑁆𑀥𑀲𑀫𑀁 𑀇𑀤’’𑀦𑁆𑀢𑀺. 𑁋

𑀇𑀫𑀁 𑀕𑀻𑀢𑀺𑀓𑀁 𑀲𑀼𑀢𑁆𑀯𑀸 𑀲𑀳 𑀧𑀼𑀢𑁆𑀢𑁂𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀢𑁄, 𑀅𑀜𑁆𑀜𑁂 𑀘 𑀈𑀤𑀺𑀲𑁂𑀳𑀺 𑀉𑀧𑀸𑀬𑁂𑀳𑀺 𑀅𑀭𑀺𑀬𑀪𑀽𑀫𑀺𑀁 𑀧𑀢𑁆𑀢𑀸 𑀦𑀺𑀤𑀲𑁆𑀲𑀦𑀁. 𑀅𑀦𑀘𑁆𑀙𑀭𑀺𑀬𑀁 𑀧𑀦𑁂𑀢𑀁, 𑀬𑀁 𑀪𑀕𑀯𑀢𑀸 𑀆𑀲𑀬𑀸𑀦𑀼𑀲𑀬𑀓𑀼𑀲𑀮𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀕𑀸𑀣𑀸𑀬𑁄 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀅𑀜𑁆𑀜𑁂 𑀘 𑀔𑀦𑁆𑀥𑀸𑀬𑀢𑀦𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀲𑀼𑀢𑁆𑀯𑀸 𑀅𑀦𑁂𑀓𑁂 𑀤𑁂𑀯𑀫𑀦𑀼𑀲𑁆𑀲𑀸𑀢𑀺. 𑀏𑀯𑀁 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀘𑁂𑀧𑀺 𑀫𑀺𑀮𑀓𑁆𑀔𑀼𑀪𑀸𑀲𑀸𑀧𑀭𑀺𑀬𑀸𑀧𑀦𑁆𑀦𑀸, 𑀖𑀝𑀘𑁂𑀝𑀺𑀓𑀸𑀕𑀻𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸 𑀯𑀸 𑀳𑁄𑀢𑀺, 𑀢𑀣𑀸𑀧𑀺 ‘‘𑀲𑀼𑀪𑀸𑀲𑀺𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀪𑀸𑀲𑀺𑀢𑀢𑁆𑀢𑀸 𑀏𑀯 𑀘 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀢𑁆𑀣𑀺𑀓𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀢𑁆𑀣𑀧𑀝𑀺𑀲𑀭𑀡𑀸𑀦𑀁, 𑀦𑁄 𑀩𑁆𑀬𑀜𑁆𑀚𑀦𑀧𑀝𑀺𑀲𑀭𑀡𑀸𑀦𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀲𑀼𑀪𑀸𑀲𑀺𑀢𑀮𑀓𑁆𑀔𑀡𑀁 𑀪𑀕𑀯𑀸 𑀅𑀯𑁄𑀘. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄, 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸𑀢𑀺 𑀇𑀤𑀜𑁆𑀘 𑀮𑀓𑁆𑀔𑀡𑀁 𑀯𑀢𑁆𑀯𑀸 𑀅𑀣 𑀅𑀜𑁆𑀜𑀫𑁆𑀧𑀺 𑀏𑀢𑀁 𑀅𑀯𑁄𑀘 𑀲𑀢𑁆𑀣𑀸. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀕𑀸𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀫𑁂𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑀸 𑀆𑀳𑀁𑀲𑀼. 𑀢𑀢𑁆𑀣 𑀅𑀧𑀭𑀦𑁆𑀢𑀺 𑀕𑀸𑀣𑀸𑀩𑀦𑁆𑀥𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑀢𑀺. 𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑁋 𑀧𑀘𑁆𑀙𑀸 𑀆𑀕𑀢𑀧𑀭𑀺𑀲𑀁 𑀅𑀲𑁆𑀲𑀯𑀦𑀲𑀼𑀲𑁆𑀲𑀯𑀦𑀆𑀥𑀸𑀭𑀡𑀤𑀴𑁆𑀳𑀻𑀓𑀭𑀡𑀸𑀤𑀻𑀦𑀺 𑀯𑀸 𑀲𑀦𑁆𑀥𑀸𑀬 𑀢𑀤𑀢𑁆𑀣𑀤𑀻𑀧𑀓𑀫𑁂𑀯 𑀘. 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀭𑀺𑀳𑀸𑀧𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑁂𑀦 𑀅𑀢𑁆𑀣𑀯𑀺𑀲𑁂𑀲𑀤𑀻𑀧𑀓𑀜𑁆𑀘 ‘‘𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀲𑁆𑀲, 𑀓𑀼𑀞𑀸𑀭𑀻 𑀚𑀸𑀬𑀢𑁂 𑀫𑀼𑀔𑁂’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁬𑁬𑁨) 𑀯𑀺𑀬. 𑀇𑀥 𑀧𑀦 𑀢𑀤𑀢𑁆𑀣𑀤𑀻𑀧𑀓𑀫𑁂𑀯.

𑁪𑁫𑁩. 𑀢𑀢𑁆𑀣 𑀲𑀦𑁆𑀢𑁄𑀢𑀺 𑀩𑀼𑀤𑁆𑀥𑀸𑀤𑀬𑁄. 𑀢𑁂 𑀳𑀺 𑀲𑀼𑀪𑀸𑀲𑀺𑀢𑀁 ‘‘𑀉𑀢𑁆𑀢𑀫𑀁 𑀲𑁂𑀝𑁆𑀞’’𑀦𑁆𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀘𑀢𑀼𑀢𑁆𑀣𑀦𑁆𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑁂 𑀦𑀺𑀤𑁆𑀤𑀺𑀝𑁆𑀞𑀓𑁆𑀓𑀫𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀦 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀪𑀕𑀯𑀢𑁄 𑀲𑀼𑀪𑀸𑀲𑀺𑀢𑁂 𑀧𑀲𑀻𑀤𑀺.

𑀲𑁄 𑀬𑀁 𑀧𑀲𑀦𑁆𑀦𑀸𑀓𑀸𑀭𑀁 𑀅𑀓𑀸𑀲𑀺, 𑀬𑀜𑁆𑀘 𑀯𑀘𑀦𑀁 𑀪𑀕𑀯𑀸 𑀅𑀪𑀸𑀲𑀺, 𑀢𑀁 𑀤𑀲𑁆𑀲𑁂𑀦𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑀸 ‘‘𑀅𑀣 𑀔𑁄 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀧𑀝𑀺𑀪𑀸𑀢𑀺 𑀫𑀦𑁆𑀢𑀺 𑀫𑀫 𑀪𑀸𑀕𑁄 𑀧𑀓𑀸𑀲𑀢𑀺. 𑀧𑀝𑀺𑀪𑀸𑀢𑀼 𑀢𑀦𑁆𑀢𑀺 𑀢𑀯 𑀪𑀸𑀕𑁄 𑀧𑀓𑀸𑀲𑀢𑀼. 𑀲𑀸𑀭𑀼𑀧𑁆𑀧𑀸𑀳𑀻𑀢𑀺 𑀅𑀦𑀼𑀘𑁆𑀙𑀯𑀺𑀓𑀸𑀳𑀺. 𑀅𑀪𑀺𑀢𑁆𑀣𑀯𑀻𑀢𑀺 𑀧𑀲𑀁𑀲𑀺.

𑁪𑁫𑁪. 𑀦 𑀢𑀸𑀧𑀬𑁂𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀦 𑀢𑀸𑀧𑁂𑀬𑁆𑀬. 𑀦 𑀯𑀺𑀳𑀺𑀁𑀲𑁂𑀬𑁆𑀬𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀦𑁆𑀢𑁄 𑀦 𑀩𑀸𑀥𑁂𑀬𑁆𑀬. 𑀲𑀸 𑀯𑁂 𑀯𑀸𑀘𑀸𑀢𑀺 𑀲𑀸 𑀯𑀸𑀘𑀸 𑀏𑀓𑀁𑀲𑁂𑀦𑁂𑀯 𑀲𑀼𑀪𑀸𑀲𑀺𑀢𑀸. 𑀏𑀢𑁆𑀢𑀸𑀯𑀢𑀸 𑀅𑀧𑀺𑀲𑀼𑀡𑀯𑀸𑀘𑀸𑀬 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀺.

𑁪𑁫𑁫. 𑀧𑀝𑀺𑀦𑀦𑁆𑀤𑀺𑀢𑀸𑀢𑀺 𑀳𑀝𑁆𑀞𑁂𑀦 𑀳𑀤𑀬𑁂𑀦 𑀧𑀝𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀦𑀦𑁆𑀤𑀺𑀢𑀸 𑀲𑀫𑁆𑀧𑀺𑀬𑀸𑀬𑀺𑀢𑀸. 𑀬𑀁 𑀅𑀦𑀸𑀤𑀸𑀬 𑀧𑀸𑀧𑀸𑀦𑀺, 𑀧𑀭𑁂𑀲𑀁 𑀪𑀸𑀲𑀢𑁂 𑀧𑀺𑀬𑀦𑁆𑀢𑀺 𑀬𑀁 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀧𑀭𑁂𑀲𑀁 𑀧𑀸𑀧𑀸𑀦𑀺 𑀅𑀧𑁆𑀧𑀺𑀬𑀸𑀦𑀺 𑀧𑀝𑀺𑀓𑁆𑀓𑀽𑀮𑀸𑀦𑀺 𑀨𑀭𑀼𑀲𑀯𑀘𑀦𑀸𑀦𑀺 𑀅𑀦𑀸𑀤𑀸𑀬 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀁 𑀧𑀺𑀬𑀫𑁂𑀯 𑀯𑀘𑀦𑀁 𑀪𑀸𑀲𑀢𑀺, 𑀢𑀁 𑀧𑀺𑀬𑀯𑀸𑀘𑀫𑁂𑀯 𑀪𑀸𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀧𑀺𑀬𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺.

𑁪𑁫𑁬. 𑀅𑀫𑀢𑀸𑀢𑀺 𑀅𑀫𑀢𑀲𑀤𑀺𑀲𑀸 𑀲𑀸𑀤𑀼𑀪𑀸𑀯𑁂𑀦. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁩; 𑀲𑀼. 𑀦𑀺. 𑁧𑁮𑁪). 𑀦𑀺𑀩𑁆𑀩𑀸𑀦𑀸𑀫𑀢𑀧𑀘𑁆𑀘𑀬𑀢𑁆𑀢𑀸 𑀯𑀸 𑀅𑀫𑀢𑀸. 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀬𑀸𑀬𑀁 𑀲𑀘𑁆𑀘𑀯𑀸𑀘𑀸 𑀦𑀸𑀫, 𑀏𑀲 𑀧𑁄𑀭𑀸𑀡𑁄 𑀥𑀫𑁆𑀫𑁄 𑀘𑀭𑀺𑀬𑀸 𑀧𑀯𑁂𑀡𑀻, 𑀇𑀤𑀫𑁂𑀯 𑀳𑀺 𑀧𑁄𑀭𑀸𑀡𑀸𑀦𑀁 𑀆𑀘𑀺𑀡𑁆𑀡𑀁, 𑀦 𑀢𑁂 𑀅𑀮𑀺𑀓𑀁 𑀪𑀸𑀲𑀺𑀁𑀲𑀼. 𑀢𑁂𑀦𑁂𑀯𑀸𑀳 𑁋 ‘‘𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀅𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀢𑀢𑁆𑀣 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀯 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑁆𑀣𑁂 𑀧𑀢𑀺𑀝𑁆𑀞𑀺𑀢𑀸. 𑀅𑀢𑁆𑀣𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀯 𑀘 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀁 𑀯𑀸 𑀤𑁆𑀯𑀬𑀁 𑀲𑀘𑁆𑀘𑀯𑀺𑀲𑁂𑀲𑀦𑀫𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸. 𑀓𑀻𑀤𑀺𑀲𑁂? 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀬𑀁 𑀧𑀭𑁂𑀲𑀁 𑀅𑀢𑁆𑀣𑀢𑁄 𑀅𑀦𑀧𑁂𑀢𑀢𑁆𑀢𑀸 𑀅𑀢𑁆𑀣𑀁 𑀅𑀦𑀼𑀧𑀭𑁄𑀥𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑀺𑀧𑀺 𑀘 𑀅𑀦𑀼𑀧𑀭𑁄𑀥𑀓𑀭𑀢𑁆𑀢𑁂 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁, 𑀬𑀁 𑀥𑀫𑁆𑀫𑀺𑀓𑀫𑁂𑀯 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀸𑀬 𑀕𑀸𑀣𑀸𑀬 𑀲𑀘𑁆𑀘𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺.

𑁪𑁫𑁭. 𑀔𑁂𑀫𑀦𑁆𑀢𑀺 𑀅𑀪𑀬𑀁 𑀦𑀺𑀭𑀼𑀧𑀤𑁆𑀤𑀯𑀁. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂? 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀬𑀲𑁆𑀫𑀸 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑀺, 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘 𑀅𑀦𑁆𑀢𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀁 𑀩𑀼𑀤𑁆𑀥𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀤𑁆𑀯𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀥𑀸𑀢𑀽𑀦𑀫𑀢𑁆𑀣𑀸𑀬 𑀔𑁂𑀫𑀫𑀕𑁆𑀕𑀧𑁆𑀧𑀓𑀸𑀲𑀦𑀢𑁄 𑀔𑁂𑀫𑀁 𑀯𑀸𑀘𑀁 𑀪𑀸𑀲𑀢𑀺, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸𑀢𑀺 𑀲𑀸 𑀯𑀸𑀘𑀸 𑀲𑀩𑁆𑀩𑀯𑀸𑀘𑀸𑀦𑀁 𑀲𑁂𑀝𑁆𑀞𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀸𑀬 𑀕𑀸𑀣𑀸𑀬 𑀫𑀦𑁆𑀢𑀸𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀽𑀭𑀴𑀸𑀲𑀲𑀼𑀢𑁆𑀢-(𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢)-𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑀽𑀭𑀴𑀸𑀲𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀸 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀩𑁆𑀭𑀸𑀳𑁆𑀫𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀢𑀢𑁄 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀘 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀦𑀁 𑀯𑀘𑀦𑀁. 𑀓𑀺𑀁𑀚𑀘𑁆𑀘𑁄 𑀪𑀯𑀦𑁆𑀢𑀺𑀆𑀤𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀦 𑀩𑁆𑀭𑀸𑀳𑁆𑀫𑀡𑁄 𑀦𑁄𑀫𑁆𑀳𑀻𑀢𑀺𑀆𑀤𑀺 𑀪𑀕𑀯𑀢𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀧𑀽𑀭𑀴𑀸𑀲𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀅𑀯𑀼𑀢𑁆𑀢𑀁 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀢𑀜𑁆𑀘 𑀔𑁄 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀅𑀦𑀸𑀫𑀲𑀦𑁆𑀢𑀸. 𑀓𑁄𑀲𑀮𑁂𑀲𑀽𑀢𑀺 𑀓𑁄𑀲𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸. 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 ‘‘𑀓𑁄𑀲𑀮𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀧𑀼𑀩𑁆𑀩𑁂 𑀫𑀳𑀸𑀧𑀦𑀸𑀤𑀁 𑀭𑀸𑀚𑀓𑀼𑀫𑀸𑀭𑀁 𑀦𑀸𑀦𑀸𑀦𑀸𑀝𑀓𑀸𑀤𑀻𑀦𑀺 𑀤𑀺𑀲𑁆𑀯𑀸 𑀲𑀺𑀢𑀫𑀢𑁆𑀢𑀫𑁆𑀧𑀺 𑀅𑀓𑀭𑁄𑀦𑁆𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀆𑀡𑀸𑀧𑁂𑀲𑀺 ‘𑀬𑁄 𑀫𑀫 𑀧𑀼𑀢𑁆𑀢𑀁 𑀳𑀲𑀸𑀧𑁂𑀢𑀺, 𑀲𑀩𑁆𑀩𑀸𑀪𑀭𑀡𑁂𑀳𑀺 𑀦𑀁 𑀅𑀮𑀗𑁆𑀓𑀭𑁄𑀫𑀻’𑀢𑀺. 𑀢𑀢𑁄 𑀦𑀗𑁆𑀕𑀮𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺. 𑀢𑁂 𑀘 𑀫𑀦𑀼𑀲𑁆𑀲𑀸 𑀅𑀢𑀺𑀭𑁂𑀓𑀲𑀢𑁆𑀢𑀯𑀲𑁆𑀲𑀸𑀦𑀺 𑀦𑀸𑀦𑀸𑀓𑀻𑀴𑀺𑀓𑀸𑀤𑀬𑁄 𑀤𑀲𑁆𑀲𑁂𑀦𑁆𑀢𑀸𑀧𑀺 𑀢𑀁 𑀦𑀸𑀲𑀓𑁆𑀔𑀺𑀁𑀲𑀼 𑀳𑀲𑀸𑀧𑁂𑀢𑀼𑀁. 𑀢𑀢𑁄 𑀲𑀓𑁆𑀓𑁄 𑀤𑁂𑀯𑀦𑀝𑀁 𑀧𑁂𑀲𑁂𑀲𑀺, 𑀲𑁄 𑀤𑀺𑀩𑁆𑀩𑀦𑀸𑀝𑀓𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀸𑀧𑁂𑀲𑀺. 𑀅𑀣 𑀢𑁂 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀸𑀪𑀺𑀫𑀼𑀔𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂 𑀧𑀝𑀺𑀧𑀣𑁂 𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀤𑀬𑁄 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀓𑀁𑀲𑀼 ‘𑀓𑀘𑁆𑀘𑀺 𑀪𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄 𑀓𑀼𑀲𑀮’𑀦𑁆𑀢𑀺. 𑀢𑀲𑁆𑀫𑀸 𑀢𑀁 ‘𑀓𑀼𑀲𑀮’𑀦𑁆𑀢𑀺 𑀲𑀤𑁆𑀤𑀁 𑀉𑀧𑀸𑀤𑀸𑀬 𑀲𑁄 𑀧𑀤𑁂𑀲𑁄 ‘𑀓𑁄𑀲𑀮𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂𑀢𑀺 𑀲𑀼𑀦𑁆𑀤𑀭𑀺𑀓𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂.

𑀢𑁂𑀦 𑀔𑁄 𑀧𑀦𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀺𑀦𑁂𑀢𑀼𑀓𑀸𑀫𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺. 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀦𑀤𑀺𑀬𑀸 𑀢𑀻𑀭𑁂 𑀯𑀲𑀢𑀺 𑀅𑀕𑁆𑀕𑀺𑀜𑁆𑀘 𑀚𑀼𑀳𑀢𑀺, 𑀪𑀸𑀭𑀤𑁆𑀯𑀸𑀚𑁄𑀢𑀺 𑀘𑀲𑁆𑀲 𑀕𑁄𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀅𑀕𑁆𑀕𑀺𑀁 𑀚𑀼𑀳𑀢𑀻𑀢𑀺 𑀆𑀳𑀼𑀢𑀺𑀧𑀓𑁆𑀔𑀺𑀧𑀦𑁂𑀦 𑀚𑀸𑀮𑁂𑀢𑀺. 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀢𑀻𑀢𑀺 𑀅𑀕𑁆𑀬𑀸𑀬𑀢𑀦𑀁 𑀲𑀫𑁆𑀫𑀚𑁆𑀚𑀦𑀽𑀧𑀮𑁂𑀧𑀦𑀩𑀮𑀺𑀓𑀫𑁆𑀫𑀸𑀤𑀺𑀦𑀸 𑀧𑀬𑀺𑀭𑀼𑀧𑀸𑀲𑀢𑀺. 𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀫𑁆𑀳𑀺 𑀚𑀼𑀳𑀺𑀢𑁆𑀯𑀸 𑀅𑀯𑀲𑁂𑀲𑀁 𑀧𑀸𑀬𑀸𑀲𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀕𑁆𑀕𑀺𑀫𑁆𑀳𑀺 𑀢𑀸𑀯 𑀧𑀓𑁆𑀔𑀺𑀢𑁆𑀢𑀧𑀸𑀬𑀸𑀲𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀪𑀼𑀢𑁆𑀢𑁄, 𑀅𑀬𑀁 𑀧𑀦 𑀅𑀯𑀲𑁂𑀲𑁄 𑀅𑀢𑁆𑀣𑀺. 𑀢𑀁 𑀬𑀤𑀺 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀤𑀤𑁂𑀬𑁆𑀬𑀁, 𑀏𑀯𑀁 𑀫𑁂 𑀧𑀺𑀢𑀭𑀸 𑀲𑀳 𑀧𑀼𑀢𑁆𑀢𑁄𑀧𑀺 𑀲𑀦𑁆𑀢𑀧𑁆𑀧𑀺𑀢𑁄 𑀪𑀯𑁂𑀬𑁆𑀬, 𑀲𑀼𑀯𑀺𑀲𑁄𑀥𑀺𑀢𑁄 𑀘 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑁄 𑀅𑀲𑁆𑀲, 𑀳𑀦𑁆𑀤𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀕𑀯𑁂𑀲𑀸𑀫𑀻’’𑀢𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑀤𑀲𑁆𑀲𑀦𑀢𑁆𑀣𑀁 𑀉𑀝𑁆𑀞𑀸𑀬𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺 𑁋 ‘‘𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺.

𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂𑀢𑀺 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀲𑁂𑀝𑁆𑀞𑀭𑀼𑀓𑁆𑀔𑀫𑀽𑀮𑁂. 𑀲𑀲𑀻𑀲𑀁 𑀧𑀸𑀭𑀼𑀢𑀦𑁆𑀢𑀺 𑀲𑀳 𑀲𑀻𑀲𑁂𑀦 𑀧𑀸𑀭𑀼𑀢𑀓𑀸𑀬𑀁. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀓𑀸𑀲𑀺, 𑀓𑀺𑀁 𑀦𑀸𑀭𑀸𑀬𑀦𑀲𑀗𑁆𑀔𑀸𑀢𑀩𑀮𑁄𑀧𑀺 𑀳𑀼𑀢𑁆𑀯𑀸 𑀦𑀸𑀲𑀓𑁆𑀔𑀺 𑀳𑀺𑀫𑀧𑀸𑀢𑀁 𑀲𑀻𑀢𑀯𑀸𑀢𑀜𑁆𑀘 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺? 𑀅𑀢𑁆𑀣𑁂𑀢𑀁 𑀓𑀸𑀭𑀡𑀁. 𑀦 𑀳𑀺 𑀩𑀼𑀤𑁆𑀥𑀸 𑀲𑀩𑁆𑀩𑀲𑁄 𑀓𑀸𑀬𑀧𑀝𑀺𑀚𑀕𑁆𑀕𑀦𑀁 𑀓𑀭𑁄𑀦𑁆𑀢𑀺 𑀏𑀯, 𑀅𑀧𑀺𑀘 𑀪𑀕𑀯𑀸 ‘‘𑀆𑀕𑀢𑁂 𑀩𑁆𑀭𑀸𑀳𑁆𑀫𑀡𑁂 𑀲𑀻𑀲𑀁 𑀯𑀺𑀯𑀭𑀺𑀲𑁆𑀲𑀸𑀫𑀺, 𑀫𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀓𑀣𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀅𑀣𑀲𑁆𑀲 𑀓𑀣𑀸𑀦𑀼𑀲𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀁 𑀏𑀯𑀫𑀓𑀸𑀲𑀺. 𑀤𑀺𑀲𑁆𑀯𑀸𑀦 𑀯𑀸𑀫𑁂𑀦…𑀧𑁂… 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄, 𑀇𑀫𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀤𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀲𑀜𑁆𑀜𑀻 𑀳𑀼𑀢𑁆𑀯𑀸 𑀏𑀯 𑀉𑀧𑀲𑀗𑁆𑀓𑀫𑀺. 𑀫𑀼𑀡𑁆𑀟𑁄 𑀅𑀬𑀁 𑀪𑀯𑀁, 𑀫𑀼𑀡𑁆𑀟𑀓𑁄 𑀅𑀬𑀁 𑀪𑀯𑀦𑁆𑀢𑀺 𑀲𑀻𑀲𑁂 𑀯𑀺𑀯𑀭𑀺𑀢𑀫𑀢𑁆𑀢𑁂𑀯 𑀓𑁂𑀲𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀼𑀡𑁆𑀟𑁄’’𑀢𑀺 𑀆𑀳. 𑀢𑀢𑁄 𑀲𑀼𑀝𑁆𑀞𑀼𑀢𑀭𑀁 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀢𑁆𑀢𑀫𑁆𑀧𑀺 𑀲𑀺𑀔𑀁 𑀅𑀤𑀺𑀲𑁆𑀯𑀸 𑀳𑀻𑀴𑁂𑀦𑁆𑀢𑁄 ‘‘𑀫𑀼𑀡𑁆𑀟𑀓𑁄’’𑀢𑀺 𑀆𑀳. 𑀏𑀯𑀭𑀽𑀧𑀸 𑀳𑀺 𑀦𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀝𑁆𑀞𑀺. 𑀢𑀢𑁄 𑀯𑀸𑀢𑀺 𑀬𑀢𑁆𑀣 𑀞𑀺𑀢𑁄 𑀅𑀤𑁆𑀤𑀲, 𑀢𑀫𑁆𑀳𑀸 𑀧𑀤𑁂𑀲𑀸 𑀫𑀼𑀡𑁆𑀟𑀸𑀧𑀻𑀢𑀺 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀫𑀼𑀡𑁆𑀟𑀺𑀢𑀲𑀻𑀲𑀸𑀧𑀺 𑀳𑁄𑀦𑁆𑀢𑀺.

𑁪𑁫𑁮. 𑀦 𑀩𑁆𑀭𑀸𑀳𑁆𑀫𑀡𑁄 𑀦𑁄𑀫𑁆𑀳𑀻𑀢𑀺 𑀏𑀢𑁆𑀣 𑀦𑀓𑀸𑀭𑁄 𑀧𑀝𑀺𑀲𑁂𑀥𑁂, 𑀦𑁄𑀓𑀸𑀭𑁄 𑀅𑀯𑀥𑀸𑀭𑀡𑁂 ‘‘𑀦 𑀦𑁄 𑀲𑀫’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑀯𑀺𑀬. 𑀢𑁂𑀦 𑀦𑁂𑀯𑀫𑁆𑀳𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀭𑀸𑀚𑀧𑀼𑀢𑁆𑀢𑁄𑀢𑀺 𑀔𑀢𑁆𑀢𑀺𑀬𑁄 𑀦𑀫𑁆𑀳𑀺. 𑀦 𑀯𑁂𑀲𑁆𑀲𑀸𑀬𑀦𑁄𑀢𑀺 𑀯𑁂𑀲𑁆𑀲𑁄𑀧𑀺 𑀦𑀫𑁆𑀳𑀺. 𑀉𑀤𑀓𑁄𑀘𑀺 𑀦𑁄𑀫𑁆𑀳𑀻𑀢𑀺 𑀅𑀜𑁆𑀜𑁄𑀧𑀺 𑀲𑀼𑀤𑁆𑀤𑁄 𑀯𑀸 𑀘𑀡𑁆𑀟𑀸𑀮𑁄 𑀯𑀸 𑀓𑁄𑀘𑀺 𑀦 𑀳𑁄𑀫𑀻𑀢𑀺 𑀏𑀯𑀁 𑀏𑀓𑀁𑀲𑁂𑀦𑁂𑀯 𑀚𑀸𑀢𑀺𑀯𑀸𑀤𑀲𑀫𑀼𑀤𑀸𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀲𑁆𑀫𑀸? 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀢𑀸 𑀯𑀺𑀬 𑀳𑀺 𑀦𑀤𑀺𑀬𑁄 𑀧𑀩𑁆𑀩𑀚𑁆𑀚𑀽𑀧𑀕𑀢𑀸 𑀓𑀼𑀮𑀧𑀼𑀢𑁆𑀢𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺. 𑀧𑀳𑀸𑀭𑀸𑀤𑀲𑀼𑀢𑁆𑀢𑀜𑁆𑀘𑁂𑀢𑁆𑀣 (𑀅. 𑀦𑀺. 𑁮.𑁧𑁯) 𑀲𑀸𑀥𑀓𑀁. 𑀏𑀯𑀁 𑀚𑀸𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀪𑀽𑀢𑀫𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 𑁋 ‘‘𑀕𑁄𑀢𑁆𑀢𑀁 𑀧𑀭𑀺𑀜𑁆𑀜𑀸𑀬 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀅𑀓𑀺𑀜𑁆𑀘𑀦𑁄 𑀫𑀦𑁆𑀢 𑀘𑀭𑀸𑀫𑀺 𑀮𑁄𑀓𑁂’’𑀢𑀺. 𑀓𑀣𑀁 𑀕𑁄𑀢𑁆𑀢𑀁 𑀧𑀭𑀺𑀜𑁆𑀜𑀸𑀲𑀻𑀢𑀺 𑀘𑁂? 𑀪𑀕𑀯𑀸 𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀲𑀺, 𑀢𑁂𑀲𑀼 𑀘 𑀧𑀭𑀺𑀜𑁆𑀜𑀸𑀢𑁂𑀲𑀼 𑀕𑁄𑀢𑁆𑀢𑀁 𑀧𑀭𑀺𑀜𑁆𑀜𑀸𑀢𑀫𑁂𑀯 𑀳𑁄𑀢𑀺. 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀦𑀁 𑀧𑀦 𑀅𑀪𑀸𑀯𑁂𑀦 𑀲𑁄 𑀅𑀓𑀺𑀜𑁆𑀘𑀦𑁄 𑀫𑀦𑁆𑀢𑀸 𑀚𑀸𑀦𑀺𑀢𑁆𑀯𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀘𑀭𑀢𑀺. 𑀢𑁂𑀦𑀸𑀳 𑁋 ‘‘𑀕𑁄𑀢𑁆𑀢𑀁…𑀧𑁂… 𑀮𑁄𑀓𑁂’’𑀢𑀺. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀘𑁂𑀲 𑀘𑀭𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀫𑀦𑁆𑀢𑀁 𑀘𑀭𑀸𑀫𑀺 𑀮𑁄𑀓𑁂’’𑀢𑀺 𑀙𑀦𑁆𑀤𑀯𑀲𑁂𑀦 𑀭𑀲𑁆𑀲𑀁 𑀓𑀢𑁆𑀯𑀸.

𑁪𑁫𑁯-𑁬𑁦. 𑀏𑀯𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸 𑀇𑀤𑀸𑀦𑀺 ‘‘𑀏𑀯𑀁 𑀑𑀴𑀸𑀭𑀺𑀓𑀁 𑀮𑀺𑀗𑁆𑀕𑀫𑁆𑀧𑀺 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀸𑀧𑀼𑀘𑁆𑀙𑀺𑀢𑀩𑁆𑀩𑀁 𑀦 𑀚𑀸𑀦𑀸𑀲𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀦𑁆𑀢𑁄 𑀆𑀳 𑁋 ‘‘𑀲𑀗𑁆𑀖𑀸𑀝𑀺𑀯𑀸𑀲𑀻…𑀧𑁂… 𑀕𑁄𑀢𑁆𑀢𑀧𑀜𑁆𑀳’’𑀦𑁆𑀢𑀺. 𑀏𑀢𑁆𑀣 𑀘 𑀙𑀺𑀦𑁆𑀦𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 ‘‘𑀲𑀗𑁆𑀖𑀸𑀝𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀢𑀸𑀦𑀺 𑀦𑀺𑀯𑀸𑀲𑁂𑀢𑀺 𑀧𑀭𑀺𑀤𑀳𑀢𑀻𑀢𑀺 𑀲𑀗𑁆𑀖𑀸𑀝𑀺𑀯𑀸𑀲𑀻. 𑀅𑀕𑀳𑁄𑀢𑀺 𑀅𑀕𑁂𑀳𑁄, 𑀦𑀺𑀢𑁆𑀢𑀡𑁆𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀯𑀸𑀲𑀸𑀕𑀸𑀭𑀁 𑀧𑀦 𑀪𑀕𑀯𑀢𑁄 𑀚𑁂𑀢𑀯𑀦𑁂 𑀫𑀳𑀸𑀕𑀦𑁆𑀥𑀓𑀼𑀝𑀺𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑀓𑁄𑀲𑀫𑁆𑀩𑀓𑀼𑀝𑀺𑀘𑀦𑁆𑀤𑀦𑀫𑀸𑀮𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀁, 𑀢𑀁 𑀲𑀦𑁆𑀥𑀸𑀬 𑀦 𑀬𑀼𑀚𑁆𑀚𑀢𑀺. 𑀦𑀺𑀯𑀼𑀢𑁆𑀢𑀓𑁂𑀲𑁄𑀢𑀺 𑀅𑀧𑀦𑀻𑀢𑀓𑁂𑀲𑁄, 𑀑𑀳𑀸𑀭𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄𑀢𑀺 𑀅𑀢𑀻𑀯 𑀯𑀽𑀧𑀲𑀦𑁆𑀢𑀧𑀭𑀺𑀴𑀸𑀳𑀘𑀺𑀢𑁆𑀢𑁄, 𑀕𑀼𑀢𑁆𑀢𑀘𑀺𑀢𑁆𑀢𑁄 𑀯𑀸. 𑀅𑀮𑀺𑀧𑁆𑀧𑀫𑀸𑀦𑁄 𑀇𑀥 𑀫𑀸𑀡𑀯𑁂𑀳𑀻𑀢𑀺 𑀉𑀧𑀓𑀭𑀡𑀲𑀺𑀦𑁂𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀫𑀦𑀼𑀲𑁆𑀲𑁂𑀳𑀺 𑀅𑀮𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀏𑀓𑀦𑁆𑀢𑀯𑀺𑀯𑀺𑀢𑁆𑀢𑁄. 𑀅𑀓𑀮𑁆𑀮𑀁 𑀫𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁆𑀯𑀸𑀳𑀁 𑀏𑀯𑀁 𑀲𑀗𑁆𑀖𑀸𑀝𑀺𑀯𑀸𑀲𑀻…𑀧𑁂… 𑀅𑀮𑀺𑀧𑁆𑀧𑀫𑀸𑀦𑁄 𑀇𑀥 𑀫𑀸𑀡𑀯𑁂𑀳𑀺, 𑀢𑀁 𑀫𑀁 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀧𑀸𑀓𑀢𑀺𑀓𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺 𑀅𑀢𑀻𑀢𑀁 𑀧𑀩𑁆𑀩𑀚𑀺𑀢𑀁 𑀲𑀫𑀸𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀕𑁄𑀢𑁆𑀢𑀧𑀜𑁆𑀳𑀁 𑀧𑀼𑀘𑁆𑀙𑀲𑀻𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀉𑀧𑀸𑀭𑀫𑁆𑀪𑀁 𑀫𑁄𑀘𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 𑀧𑀼𑀘𑁆𑀙𑀦𑁆𑀢𑀺 𑀯𑁂, 𑀪𑁄 𑀩𑁆𑀭𑀸𑀳𑁆𑀫𑀡𑀸, 𑀩𑁆𑀭𑀸𑀳𑁆𑀫𑀡𑁂𑀪𑀺 𑀲𑀳 ‘‘𑀩𑁆𑀭𑀸𑀳𑁆𑀫𑀡𑁄 𑀦𑁄 𑀪𑀯’’𑀦𑁆𑀢𑀺. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄 𑀦𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 𑀦𑀽𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑀸𑀳𑀁 𑀪𑁄 𑀅𑀓𑀮𑁆𑀮𑀁 𑀧𑀼𑀘𑁆𑀙𑀸𑀫𑀺. 𑀅𑀫𑁆𑀳𑀸𑀓𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀲𑀫𑀬𑁂 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀳 𑀲𑀫𑀸𑀕𑀦𑁆𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑁄 𑀦𑀼 𑀪𑀯𑀁, 𑀪𑀸𑀭𑀤𑁆𑀯𑀸𑀚𑁄 𑀦𑀼 𑀪𑀯’’𑀦𑁆𑀢𑀺 𑀏𑀯𑀁 𑀚𑀸𑀢𑀺𑀫𑁆𑀧𑀺 𑀕𑁄𑀢𑁆𑀢𑀫𑁆𑀧𑀺 𑀧𑀼𑀘𑁆𑀙𑀦𑁆𑀢𑀺 𑀏𑀯𑀸𑀢𑀺.

𑁪𑁬𑁧-𑁨. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀺𑀢𑁆𑀢𑀫𑀼𑀤𑀼𑀪𑀸𑀯𑀓𑀭𑀡𑀢𑁆𑀣𑀁 𑀫𑀦𑁆𑀢𑁂𑀲𑀼 𑀅𑀢𑁆𑀢𑀦𑁄 𑀧𑀓𑀢𑀜𑁆𑀜𑀼𑀢𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 𑁋 ‘‘𑀩𑁆𑀭𑀸𑀳𑁆𑀫𑀡𑁄 𑀳𑀺 𑀘𑁂 𑀢𑁆𑀯𑀁 𑀩𑁆𑀭𑀽𑀲𑀺…𑀧𑁂… 𑀘𑀢𑀼𑀯𑀻𑀲𑀢𑀓𑁆𑀔𑀭’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀘𑁂 𑀢𑁆𑀯𑀁 ‘‘𑀩𑁆𑀭𑀸𑀳𑁆𑀫𑀡𑁄 𑀅𑀳𑀁’’𑀢𑀺 𑀩𑁆𑀭𑀽𑀲𑀺, 𑀫𑀜𑁆𑀘 𑀅𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀲𑀺, 𑀢𑀲𑁆𑀫𑀸 𑀪𑀯𑀦𑁆𑀢𑀁 𑀲𑀸𑀯𑀺𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀺 𑀢𑀺𑀧𑀤𑀁 𑀘𑀢𑀼𑀯𑀻𑀲𑀢𑀓𑁆𑀔𑀭𑀁, 𑀢𑀁 𑀫𑁂 𑀩𑁆𑀭𑀽𑀳𑀻𑀢𑀺. 𑀏𑀢𑁆𑀣 𑀘 𑀪𑀕𑀯𑀸 𑀧𑀭𑀫𑀢𑁆𑀣𑀯𑁂𑀤𑀸𑀦𑀁 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀆𑀤𑀺𑀪𑀽𑀢𑀁 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀧𑀓𑀸𑀲𑀺𑀢𑀁 𑀅𑀢𑁆𑀣𑀲𑀫𑁆𑀧𑀦𑁆𑀦𑀁 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀜𑁆𑀘 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀇𑀫𑀁 𑀅𑀭𑀺𑀬𑀲𑀸𑀯𑀺𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺. 𑀬𑀤𑀺𑀧𑀺 𑀳𑀺 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀁 𑀯𑀤𑁂𑀬𑁆𑀬, 𑀅𑀤𑁆𑀥𑀸 𑀦𑀁 𑀪𑀕𑀯𑀸 ‘‘𑀦𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀲𑀸𑀯𑀺𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀢𑀲𑁆𑀲 𑀅𑀲𑀸𑀭𑀓𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀥𑁂𑀯 𑀧𑀢𑀺𑀝𑁆𑀞𑀸𑀧𑁂𑀬𑁆𑀬. 𑀩𑁆𑀭𑀸𑀳𑁆𑀫𑀡𑁄 𑀧𑀦 ‘‘𑀲𑀸𑀯𑀺𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀺 𑀢𑀺𑀧𑀤𑀁 𑀘𑀢𑀼𑀯𑀻𑀲𑀢𑀓𑁆𑀔𑀭’’𑀦𑁆𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀲𑀫𑀬𑀲𑀺𑀤𑁆𑀥𑀁 𑀲𑀸𑀯𑀺𑀢𑁆𑀢𑀺𑀮𑀓𑁆𑀔𑀡𑀩𑁆𑀬𑀜𑁆𑀚𑀦𑀓𑀁 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀦𑀺𑀘𑁆𑀙𑀸𑀭𑀺𑀢𑀯𑀘𑀦𑀁 𑀲𑀼𑀢𑁆𑀯𑀸𑀯 ‘‘𑀅𑀤𑁆𑀥𑀸𑀬𑀁 𑀲𑀫𑀡𑁄 𑀩𑁆𑀭𑀸𑀳𑁆𑀫𑀡𑀲𑀫𑀬𑁂 𑀦𑀺𑀝𑁆𑀞𑀁 𑀕𑀢𑁄, 𑀅𑀳𑀁 𑀧𑀦 𑀅𑀜𑁆𑀜𑀸𑀡𑁂𑀦 ‘𑀅𑀩𑁆𑀭𑀸𑀳𑁆𑀫𑀡𑁄 𑀅𑀬’𑀦𑁆𑀢𑀺 𑀧𑀭𑀺𑀪𑀯𑀺𑀁, 𑀲𑀸𑀥𑀼𑀭𑀽𑀧𑁄 𑀫𑀦𑁆𑀢𑀧𑀸𑀭𑀕𑀽 𑀩𑁆𑀭𑀸𑀳𑁆𑀫𑀡𑁄𑀯 𑀏𑀲𑁄’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 ‘‘𑀳𑀦𑁆𑀤 𑀦𑀁 𑀬𑀜𑁆𑀜𑀯𑀺𑀥𑀺𑀁 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀥𑀺𑀜𑁆𑀘 𑀧𑀼𑀘𑁆𑀙𑀸𑀫𑀻’’𑀢𑀺 𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀁𑀦𑀺𑀲𑁆𑀲𑀺𑀢𑀸…𑀧𑁂… 𑀮𑁄𑀓𑁂’’𑀢𑀺 𑀇𑀫𑀁 𑀯𑀺𑀲𑀫𑀕𑀸𑀣𑀸𑀧𑀤𑀢𑁆𑀢𑀬𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀓𑀺𑀁𑀦𑀺𑀲𑁆𑀲𑀺𑀢𑀸 𑀓𑀺𑀫𑀥𑀺𑀧𑁆𑀧𑀸𑀬𑀸 𑀓𑀺𑀁 𑀧𑀢𑁆𑀣𑁂𑀦𑁆𑀢𑀸 𑀇𑀲𑀬𑁄 𑀘 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀅𑀜𑁆𑀜𑁂 𑀘 𑀫𑀦𑀼𑀚𑀸 𑀤𑁂𑀯𑀢𑀸𑀦𑀁 𑀅𑀢𑁆𑀣𑀸𑀬 𑀬𑀜𑁆𑀜𑀁 𑀅𑀓𑀧𑁆𑀧𑀬𑀺𑀁𑀲𑀼. 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀓𑀧𑁆𑀧𑀬𑀺𑀁𑀲𑀽𑀢𑀺 𑀲𑀁𑀯𑀺𑀤𑀳𑀺𑀁𑀲𑀼 𑀅𑀓𑀁𑀲𑀼. 𑀧𑀼𑀣𑀽𑀢𑀺 𑀩𑀳𑀽 𑀅𑀦𑁆𑀦𑀧𑀸𑀦𑀤𑀸𑀦𑀸𑀤𑀺𑀦𑀸 𑀪𑁂𑀤𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑁂 𑀧𑀼𑀣𑀽 𑀯𑀸 𑀇𑀲𑀬𑁄 𑀫𑀦𑀼𑀚𑀸 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀘 𑀓𑀺𑀁𑀦𑀺𑀲𑁆𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼. 𑀓𑀣𑀁 𑀦𑁂𑀲𑀁 𑀢𑀁 𑀓𑀫𑁆𑀫𑀁 𑀲𑀫𑀺𑀚𑁆𑀛𑀢𑀻𑀢𑀺 𑀇𑀫𑀺𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺.

𑁪𑁬𑁩. 𑀅𑀣𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀬𑀤𑀦𑁆𑀢𑀕𑀽 𑀯𑁂𑀤𑀕𑀽 𑀬𑀜𑁆𑀜𑀓𑀸𑀮𑁂. 𑀬𑀲𑁆𑀲𑀸𑀳𑀼𑀢𑀺𑀁 𑀮𑀪𑁂 𑀢𑀲𑁆𑀲𑀺𑀚𑁆𑀛𑁂𑀢𑀺 𑀩𑁆𑀭𑀽𑀫𑀻’’𑀢𑀺 𑀇𑀤𑀁 𑀲𑁂𑀲𑀧𑀤𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀬𑀤𑀦𑁆𑀢𑀕𑀽𑀢𑀺 𑀬𑁄 𑀅𑀦𑁆𑀢𑀕𑀽, 𑀑𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀤𑀓𑀸𑀭𑁄 𑀘 𑀧𑀤𑀲𑀦𑁆𑀥𑀺𑀓𑀭𑁄 ‘‘𑀅𑀲𑀸𑀥𑀸𑀭𑀡𑀫𑀜𑁆𑀜𑁂𑀲’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁮.𑁯) 𑀫𑀓𑀸𑀭𑁄 𑀯𑀺𑀬. 𑀅𑀬𑀁 𑀧𑀦 𑀅𑀢𑁆𑀣𑁄 𑁋 𑀬𑁄 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀅𑀦𑁆𑀢𑀕𑀢𑀢𑁆𑀢𑀸 𑀅𑀦𑁆𑀢𑀕𑀽, 𑀘𑀢𑀽𑀳𑀺 𑀘 𑀫𑀕𑁆𑀕𑀜𑀸𑀡𑀯𑁂𑀤𑁂𑀳𑀺 𑀓𑀺𑀮𑁂𑀲𑁂 𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀢𑁆𑀢𑀸 𑀯𑁂𑀤𑀕𑀽, 𑀲𑁄 𑀬𑀲𑁆𑀲 𑀇𑀲𑀺𑀫𑀦𑀼𑀚𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀬𑀜𑁆𑀜𑀓𑀸𑀮𑁂 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀆𑀳𑀸𑀭𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀅𑀦𑁆𑀢𑀫𑀲𑁄 𑀯𑀦𑀧𑀡𑁆𑀡𑀫𑀽𑀮𑀨𑀮𑀸𑀤𑀺𑀫𑁆𑀳𑀺𑀧𑀺 𑀆𑀳𑀼𑀢𑀺𑀁 𑀮𑀪𑁂, 𑀢𑀢𑁄 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑁂𑀬𑁆𑀬, 𑀢𑀲𑁆𑀲 𑀢𑀁 𑀬𑀜𑁆𑀜𑀓𑀫𑁆𑀫𑀁 𑀇𑀚𑁆𑀛𑁂 𑀲𑀫𑀺𑀚𑁆𑀛𑁂𑀬𑁆𑀬, 𑀫𑀳𑀧𑁆𑀨𑀮𑀁 𑀪𑀯𑁂𑀬𑁆𑀬𑀸𑀢𑀺 𑀩𑁆𑀭𑀽𑀫𑀻𑀢𑀺.

𑁪𑁬𑁪. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀪𑀕𑀯𑀢𑁄 𑀧𑀭𑀫𑀢𑁆𑀣𑀬𑁄𑀕𑀕𑀫𑁆𑀪𑀻𑀭𑀁 𑀅𑀢𑀺𑀫𑀥𑀼𑀭𑀕𑀺𑀭𑀦𑀺𑀩𑁆𑀩𑀺𑀓𑀸𑀭𑀲𑀭𑀲𑀫𑁆𑀧𑀦𑁆𑀦𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀲𑀽𑀘𑀺𑀢𑀜𑁆𑀘𑀲𑁆𑀲 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 ‘‘𑀅𑀤𑁆𑀥𑀸 𑀳𑀺 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀇𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀁 𑀯𑀘𑀦𑀁, 𑀲𑁂𑀲𑀁 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀢𑀲𑁆𑀲𑀢𑁆𑀣𑁄 𑁋 𑀅𑀤𑁆𑀥𑀸 𑀳𑀺 𑀢𑀲𑁆𑀲 𑀫𑀬𑁆𑀳𑀁 𑀳𑀼𑀢𑀫𑀺𑀚𑁆𑀛𑁂, 𑀅𑀬𑀁 𑀅𑀚𑁆𑀚 𑀤𑁂𑀬𑁆𑀬𑀥𑀫𑁆𑀫𑁄 𑀇𑀚𑁆𑀛𑀺𑀲𑁆𑀲𑀢𑀺 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀫𑀳𑀧𑁆𑀨𑀮𑁄 𑀪𑀯𑀺𑀲𑁆𑀲𑀢𑀺 𑀬𑀁 𑀢𑀸𑀤𑀺𑀲𑀁 𑀯𑁂𑀤𑀕𑀼𑀫𑀤𑁆𑀤𑀲𑀸𑀫, 𑀬𑀲𑁆𑀫𑀸 𑀢𑀸𑀤𑀺𑀲𑀁 𑀪𑀯𑀦𑁆𑀢𑀭𑀽𑀧𑀁 𑀯𑁂𑀤𑀕𑀼𑀁 𑀅𑀤𑁆𑀤𑀲𑀸𑀫. 𑀢𑁆𑀯𑀜𑁆𑀜𑁂𑀯 𑀳𑀺 𑀲𑁄 𑀯𑁂𑀤𑀕𑀽, 𑀦 𑀅𑀜𑁆𑀜𑁄. 𑀇𑀢𑁄 𑀧𑀼𑀩𑁆𑀩𑁂 𑀧𑀦 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀯𑁂𑀤𑀕𑀽𑀦𑀁 𑀅𑀦𑁆𑀢𑀕𑀽𑀦𑀜𑁆𑀘 𑀅𑀤𑀲𑁆𑀲𑀦𑁂𑀦 𑀅𑀫𑁆𑀳𑀸𑀤𑀺𑀲𑀸𑀦𑀁 𑀬𑀜𑁆𑀜𑁂 𑀧𑀝𑀺𑀬𑀢𑁆𑀢𑀁 𑀅𑀜𑁆𑀜𑁄 𑀚𑀦𑁄 𑀪𑀼𑀜𑁆𑀚𑀢𑀺 𑀧𑀽𑀭𑀴𑀸𑀲𑀁 𑀘𑀭𑀼𑀓𑀜𑁆𑀘 𑀧𑀽𑀯𑀜𑁆𑀘𑀸𑀢𑀺.

𑁪𑁬𑁫. 𑀢𑀢𑁄 𑀪𑀕𑀯𑀸 𑀅𑀢𑁆𑀢𑀦𑀺 𑀧𑀲𑀦𑁆𑀦𑀁 𑀯𑀘𑀦𑀧𑀝𑀺𑀕𑁆𑀕𑀳𑀡𑀲𑀚𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀯𑀺𑀤𑀺𑀢𑁆𑀯𑀸 𑀬𑀣𑀸𑀲𑁆𑀲 𑀲𑀼𑀝𑁆𑀞𑀼 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑁂 𑀧𑀓𑀸𑀲𑁂𑀢𑀼𑀓𑀸𑀫𑁄 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀫𑀬𑀺 𑀧𑀲𑀦𑁆𑀦𑁄𑀲𑀺, 𑀢𑀲𑁆𑀫𑀸 𑀧𑀦 𑀇𑀳 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙𑀸𑀢𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀇𑀤𑀸𑀦𑀺 𑀇𑀢𑁄 𑀧𑀼𑀩𑁆𑀩𑀁 𑀅𑀢𑁆𑀣𑁂𑀦𑀅𑀢𑁆𑀣𑀺𑀓𑀧𑀤𑀁 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑁋 𑀅𑀢𑁆𑀣𑁂𑀦 𑀅𑀢𑁆𑀣𑀺𑀓𑁄 𑀢𑀲𑁆𑀲 𑀅𑀢𑁆𑀣𑀢𑁆𑀣𑀺𑀓𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀁 𑀓𑀺𑀮𑁂𑀲𑀕𑁆𑀕𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑀁, 𑀓𑁄𑀥𑀥𑀽𑀫𑀯𑀺𑀕𑀫𑁂𑀦 𑀯𑀺𑀥𑀽𑀫𑀁, 𑀤𑀼𑀓𑁆𑀔𑀸𑀪𑀸𑀯𑁂𑀦 𑀅𑀦𑀻𑀖𑀁, 𑀅𑀦𑁂𑀓𑀯𑀺𑀥𑀆𑀲𑀸𑀪𑀸𑀯𑁂𑀦 𑀦𑀺𑀭𑀸𑀲𑀁 𑀅𑀧𑁆𑀧𑁂𑀯𑀺𑀥 𑀏𑀓𑀁𑀲𑁂𑀦 𑀇𑀥 𑀞𑀺𑀢𑁄𑀯 𑀇𑀥 𑀯𑀸 𑀲𑀸𑀲𑀦𑁂 𑀅𑀪𑀺𑀯𑀺𑀦𑁆𑀤𑁂 𑀮𑀘𑁆𑀙𑀲𑀺 𑀅𑀥𑀺𑀕𑀘𑁆𑀙𑀺𑀲𑁆𑀲𑀲𑀺 𑀲𑀼𑀫𑁂𑀥𑀁 𑀯𑀭𑀧𑀜𑁆𑀜𑀁 𑀔𑀻𑀡𑀸𑀲𑀯𑀤𑀓𑁆𑀔𑀺𑀡𑁂𑀬𑁆𑀬𑀦𑁆𑀢𑀺. 𑀅𑀣 𑀯𑀸 𑀬𑀲𑁆𑀫𑀸 𑀫𑀬𑀺 𑀧𑀲𑀦𑁆𑀦𑁄𑀲𑀺, 𑀢𑀲𑁆𑀫𑀸𑀢𑀺𑀳, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑁂𑀦 𑀅𑀢𑁆𑀣𑀺𑀓𑁄 𑀲𑀫𑀸𑀦𑁄 𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙 𑀲𑀦𑁆𑀢𑀁 𑀯𑀺𑀥𑀽𑀫𑀁 𑀅𑀦𑀻𑀖𑀁 𑀦𑀺𑀭𑀸𑀲𑀦𑁆𑀢𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀏𑀯𑀁 𑀧𑀼𑀘𑁆𑀙𑀦𑁆𑀢𑁄 𑀅𑀧𑁆𑀧𑁂𑀯𑀺𑀥 𑀅𑀪𑀺𑀯𑀺𑀦𑁆𑀤𑁂 𑀲𑀼𑀫𑁂𑀥𑀁 𑀔𑀻𑀡𑀸𑀲𑀯𑀤𑀓𑁆𑀔𑀺𑀡𑁂𑀬𑁆𑀬𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁬𑁬. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀬𑀜𑁆𑀜𑁂 𑀭𑀢𑁄𑀳𑀁…𑀧𑁂… 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺. 𑀢𑀢𑁆𑀣 𑀬𑀜𑁆𑀜𑁄 𑀬𑀸𑀕𑁄 𑀤𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀲𑁆𑀫𑀸 𑀤𑀸𑀦𑀭𑀢𑁄 𑀅𑀳𑀁, 𑀢𑀸𑀬 𑀏𑀯 𑀤𑀸𑀦𑀸𑀭𑀸𑀫𑀢𑀸𑀬 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄, 𑀦 𑀧𑀦 𑀚𑀸𑀦𑀸𑀫𑀺, 𑀏𑀯𑀁 𑀅𑀚𑀸𑀦𑀦𑁆𑀢𑀁 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁. 𑀅𑀦𑀼𑀲𑀸𑀲𑀦𑁆𑀢𑁄 𑀘 𑀉𑀢𑁆𑀢𑀸𑀦𑁂𑀦𑁂𑀯 𑀦𑀬𑁂𑀦 𑀬𑀢𑁆𑀣 𑀳𑀼𑀢𑀁 𑀇𑀚𑁆𑀛𑀢𑁂 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀬𑀣𑀸𑀳𑀼𑀢’’𑀦𑁆𑀢𑀺𑀧𑀺 𑀧𑀸𑀞𑁄.

𑁪𑁬𑁭. 𑀅𑀣𑀲𑁆𑀲 𑀪𑀕𑀯𑀸 𑀯𑀢𑁆𑀢𑀼𑀓𑀸𑀫𑁄 𑀆𑀳 𑁋 ‘‘𑀢𑁂𑀦 𑀳𑀺…𑀧𑁂… 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀑𑀳𑀺𑀢𑀲𑁄𑀢𑀲𑁆𑀲 𑀘𑀲𑁆𑀲 𑀅𑀦𑀼𑀲𑀸𑀲𑀦𑀢𑁆𑀣𑀁 𑀢𑀸𑀯 ‘‘𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙𑀻𑀢𑀺 𑀬𑀤𑀺 𑀳𑀼𑀢𑀲𑀫𑀺𑀤𑁆𑀥𑀺𑀁 𑀤𑀸𑀦𑀫𑀳𑀧𑁆𑀨𑀮𑀢𑀁 𑀧𑀘𑁆𑀘𑀸𑀲𑀻𑀲𑀲𑀺, 𑀚𑀸𑀢𑀺𑀁 𑀫𑀸 𑀧𑀼𑀘𑁆𑀙. 𑀅𑀓𑀸𑀭𑀡𑀜𑁆𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀸𑀭𑀡𑀸𑀬 𑀚𑀸𑀢𑀺. 𑀘𑀭𑀡𑀜𑁆𑀘 𑀧𑀼𑀘𑁆𑀙𑀸𑀢𑀺 𑀅𑀧𑀺𑀘 𑀔𑁄 𑀲𑀻𑀮𑀸𑀤𑀺𑀕𑀼𑀡𑀪𑁂𑀤𑀁 𑀘𑀭𑀡𑀁 𑀧𑀼𑀘𑁆𑀙. 𑀏𑀢𑀜𑁆𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀸𑀭𑀡𑀸𑀬 𑀓𑀸𑀭𑀡𑀁.

𑀇𑀤𑀸𑀦𑀺𑀲𑁆𑀲 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀦𑀺𑀤𑀲𑁆𑀲𑀦𑀫𑀸𑀳 𑁋 ‘‘𑀓𑀝𑁆𑀞𑀸 𑀳𑀯𑁂 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄’’𑀢𑀺𑀆𑀤𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀇𑀥 𑀓𑀝𑁆𑀞𑀸 𑀅𑀕𑁆𑀕𑀺 𑀚𑀸𑀬𑀢𑀺, 𑀦 𑀘 𑀲𑁄 𑀲𑀸𑀮𑀸𑀤𑀺𑀓𑀝𑁆𑀞𑀸 𑀚𑀸𑀢𑁄 𑀏𑀯 𑀅𑀕𑁆𑀕𑀺𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀲𑀸𑀧𑀸𑀦𑀤𑁄𑀡𑀺𑀆𑀤𑀺𑀓𑀝𑁆𑀞𑀸 𑀚𑀸𑀢𑁄 𑀦 𑀓𑀭𑁄𑀢𑀺, 𑀅𑀧𑀺𑀘 𑀔𑁄 𑀅𑀢𑁆𑀢𑀦𑁄 𑀅𑀘𑁆𑀘𑀺𑀆𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀢𑁆𑀢𑀸 𑀏𑀯 𑀓𑀭𑁄𑀢𑀺. 𑀏𑀯𑀁 𑀦 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀤𑀻𑀲𑀼 𑀚𑀸𑀢𑁄 𑀏𑀯 𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀺, 𑀘𑀡𑁆𑀟𑀸𑀮𑀓𑀼𑀮𑀸𑀤𑀻𑀲𑀼 𑀚𑀸𑀢𑁄 𑀦 𑀳𑁄𑀢𑀺, 𑀅𑀧𑀺𑀘 𑀔𑁄 𑀦𑀻𑀘𑀸𑀓𑀼𑀮𑀻𑀦𑁄𑀧𑀺 𑀉𑀘𑁆𑀘𑀸𑀓𑀼𑀮𑀻𑀦𑁄𑀧𑀺 𑀔𑀻𑀡𑀸𑀲𑀯𑀫𑀼𑀦𑀺 𑀥𑀺𑀢𑀺𑀫𑀸 𑀳𑀺𑀭𑀻𑀦𑀺𑀲𑁂𑀥𑁄 𑀆𑀚𑀸𑀦𑀺𑀬𑁄 𑀳𑁄𑀢𑀺, 𑀇𑀫𑀸𑀬 𑀥𑀺𑀢𑀺𑀳𑀺𑀭𑀺𑀧𑀫𑀼𑀔𑀸𑀬 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀚𑀸𑀢𑀺𑀫𑀸 𑀉𑀢𑁆𑀢𑀫𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀺. 𑀲𑁄 𑀳𑀺 𑀥𑀺𑀢𑀺𑀬𑀸 𑀕𑀼𑀡𑁂 𑀥𑀸𑀭𑀬𑀢𑀺, 𑀳𑀺𑀭𑀺𑀬𑀸 𑀤𑁄𑀲𑁂 𑀦𑀺𑀲𑁂𑀥𑁂𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀳𑀺𑀭𑀺𑀬𑀸 𑀳𑀺 𑀲𑀦𑁆𑀢𑁄 𑀦 𑀓𑀭𑁄𑀦𑁆𑀢𑀺 𑀧𑀸𑀧’’𑀦𑁆𑀢𑀺. 𑀢𑁂𑀦 𑀢𑁂 𑀩𑁆𑀭𑀽𑀫𑀺 𑁋

‘‘𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙𑀻 𑀘𑀭𑀡𑀜𑁆𑀘 𑀧𑀼𑀘𑁆𑀙,

𑀓𑀝𑁆𑀞𑀸 𑀳𑀯𑁂 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄;

𑀦𑀻𑀘𑀸𑀓𑀼𑀮𑀻𑀦𑁄𑀧𑀺 𑀫𑀼𑀦𑀻 𑀥𑀺𑀢𑀻𑀫𑀸,

𑀆𑀚𑀸𑀦𑀺𑀬𑁄 𑀳𑁄𑀢𑀺 𑀳𑀺𑀭𑀻𑀦𑀺𑀲𑁂𑀥𑁄’’𑀢𑀺. 𑁋

𑀏𑀲 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀅𑀲𑁆𑀲𑀮𑀸𑀬𑀦𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 (𑀫. 𑀦𑀺. 𑁨.𑁪𑁦𑁧 𑀆𑀤𑀬𑁄) 𑀯𑁂𑀤𑀺𑀢𑀩𑁆𑀩𑁄.

𑁪𑁬𑁮. 𑀏𑀯𑀫𑁂𑀢𑀁 𑀪𑀕𑀯𑀸 𑀘𑀸𑀢𑀼𑀯𑀡𑁆𑀡𑀺𑀲𑀼𑀤𑁆𑀥𑀺𑀬𑀸 𑀅𑀦𑀼𑀲𑀸𑀲𑀺𑀢𑁆𑀯𑀸 𑀇𑀤𑀸𑀦𑀺 𑀬𑀢𑁆𑀣 𑀳𑀼𑀢𑀁 𑀇𑀚𑁆𑀛𑀢𑁂, 𑀬𑀣𑀸 𑀘 𑀳𑀼𑀢𑀁 𑀇𑀚𑁆𑀛𑀢𑁂, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄’’𑀢𑀺𑀆𑀤𑀺𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀘𑁆𑀘𑁂𑀦𑀸𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑁂𑀦. 𑀢𑀜𑁆𑀳𑀺 𑀧𑀢𑁆𑀢𑁄 𑀤𑀦𑁆𑀢𑁄 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄’’𑀢𑀺. 𑀤𑀫𑀲𑀸 𑀉𑀧𑁂𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀯𑁂𑀤𑀦𑁆𑀢𑀕𑀽𑀢𑀺 𑀯𑁂𑀤𑁂𑀳𑀺 𑀯𑀸 𑀓𑀺𑀮𑁂𑀲𑀸𑀦𑀁 𑀅𑀦𑁆𑀢𑀁 𑀕𑀢𑁄, 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀁 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑀁 𑀕𑀢𑁄. 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄𑀢𑀺 𑀧𑀼𑀦 𑀯𑀲𑀺𑀢𑀩𑁆𑀩𑀸𑀪𑀸𑀯𑀢𑁄 𑀯𑀼𑀢𑁆𑀣𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁄. 𑀓𑀸𑀮𑁂𑀦 𑀢𑀫𑁆𑀳𑀺 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂𑀢𑀺 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀝𑁆𑀞𑀺𑀢𑀓𑀸𑀮𑀁 𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀓𑀸𑀮𑀜𑁆𑀘 𑀉𑀧𑀮𑀓𑁆𑀔𑁂𑀢𑁆𑀯𑀸 𑀢𑁂𑀦 𑀓𑀸𑀮𑁂𑀦 𑀢𑀸𑀤𑀺𑀲𑁂 𑀤𑀓𑁆𑀔𑀺𑀡𑁂𑀬𑁆𑀬𑁂 𑀤𑁂𑀬𑁆𑀬𑀥𑀫𑁆𑀫𑀁 𑀧𑀯𑁂𑀘𑁆𑀙𑁂𑀬𑁆𑀬, 𑀧𑀯𑁂𑀲𑁂𑀬𑁆𑀬 𑀧𑀝𑀺𑀧𑀸𑀤𑁂𑀬𑁆𑀬.

𑁪𑁬𑁯-𑁭𑁧. 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘. 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀇𑀦𑁆𑀤𑁆𑀭𑀺𑀬𑀸, 𑀅𑀯𑀺𑀓𑁆𑀔𑀺𑀢𑁆𑀢𑀇𑀦𑁆𑀤𑁆𑀭𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀦𑁆𑀤𑁄𑀯 𑀭𑀸𑀳𑀼𑀕𑁆𑀕𑀳𑀡𑀸 𑀧𑀫𑀼𑀢𑁆𑀢𑀸𑀢𑀺 𑀬𑀣𑀸 𑀘𑀦𑁆𑀤𑁄 𑀭𑀸𑀳𑀼𑀕𑁆𑀕𑀳𑀡𑀸, 𑀏𑀯𑀁 𑀓𑀺𑀮𑁂𑀲𑀕𑁆𑀕𑀳𑀡𑀸 𑀧𑀫𑀼𑀢𑁆𑀢𑀸 𑀬𑁂 𑀅𑀢𑀻𑀯 𑀪𑀸𑀲𑀦𑁆𑀢𑀺 𑀘𑁂𑀯 𑀢𑀧𑀦𑁆𑀢𑀺 𑀘. 𑀲𑀢𑀸𑀢𑀺 𑀲𑀢𑀺𑀲𑀫𑁆𑀧𑀦𑁆𑀦𑀸. 𑀫𑀫𑀸𑀬𑀺𑀢𑀸𑀦𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀫𑀸𑀬𑀺𑀢𑀸𑀦𑀺.

𑁪𑁭𑁨. 𑀬𑁄 𑀓𑀸𑀫𑁂 𑀳𑀺𑀢𑁆𑀯𑀸𑀢𑀺 𑀇𑀢𑁄 𑀧𑀪𑀼𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀓𑀸𑀫𑁂 𑀳𑀺𑀢𑁆𑀯𑀸𑀢𑀺 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬. 𑀅𑀪𑀺𑀪𑀼𑀬𑁆𑀬𑀘𑀸𑀭𑀻𑀢𑀺 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀯𑀢𑁆𑀣𑀼𑀓𑀸𑀫𑁂 𑀅𑀪𑀺𑀪𑀼𑀬𑁆𑀬𑀘𑀸𑀭𑀻. 𑀚𑀸𑀢𑀺𑀫𑀭𑀡𑀲𑁆𑀲 𑀅𑀦𑁆𑀢𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀬𑁄 𑀯𑁂𑀤𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦 𑀅𑀜𑁆𑀜𑀸𑀲𑀺. 𑀉𑀤𑀓𑀭𑀳𑀤𑁄 𑀯𑀸𑀢𑀺 𑀬𑁂 𑀇𑀫𑁂 𑀅𑀦𑁄𑀢𑀢𑁆𑀢𑀤𑀳𑁄 𑀓𑀡𑁆𑀡𑀫𑀼𑀡𑁆𑀟𑀤𑀳𑁄 𑀭𑀣𑀓𑀸𑀭𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄 𑀫𑀦𑁆𑀤𑀸𑀓𑀺𑀦𑀺𑀤𑀳𑁄 𑀲𑀻𑀳𑀧𑁆𑀧𑀧𑀸𑀢𑀤𑀳𑁄𑀢𑀺 𑀳𑀺𑀫𑀯𑀢𑀺 𑀲𑀢𑁆𑀢 𑀫𑀳𑀸𑀭𑀳𑀤𑀸 𑀅𑀕𑁆𑀕𑀺𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑁆𑀢𑀸 𑀦𑀺𑀘𑁆𑀘𑀁 𑀲𑀻𑀢𑀮𑀸, 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀉𑀤𑀓𑀭𑀳𑀤𑁄𑀯 𑀲𑀻𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀓𑀺𑀮𑁂𑀲𑀧𑀭𑀺𑀴𑀸𑀳𑀢𑁆𑀢𑀸.

𑁪𑁭𑁩. 𑀲𑀫𑁄𑀢𑀺 𑀢𑀼𑀮𑁆𑀬𑁄. 𑀲𑀫𑁂𑀳𑀻𑀢𑀺 𑀯𑀺𑀧𑀲𑁆𑀲𑀺𑀆𑀤𑀻𑀳𑀺 𑀩𑀼𑀤𑁆𑀥𑁂𑀳𑀺. 𑀢𑁂 𑀳𑀺 𑀧𑀝𑀺𑀯𑁂𑀥𑀲𑀫𑀢𑁆𑀢𑀸 ‘‘𑀲𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀢𑁆𑀣𑀺 𑀢𑁂𑀲𑀁 𑀧𑀝𑀺𑀯𑁂𑀥𑁂𑀦𑀸𑀥𑀺𑀕𑀦𑁆𑀢𑀩𑁆𑀩𑁂𑀲𑀼 𑀕𑀼𑀡𑁂𑀲𑀼, 𑀧𑀳𑀸𑀢𑀩𑁆𑀩𑁂𑀲𑀼 𑀯𑀸 𑀤𑁄𑀲𑁂𑀲𑀼 𑀯𑁂𑀫𑀢𑁆𑀢𑀢𑀸, 𑀅𑀤𑁆𑀥𑀸𑀦𑀆𑀬𑀼𑀓𑀼𑀮𑀧𑁆𑀧𑀫𑀸𑀡𑀸𑀪𑀺𑀦𑀺𑀓𑁆𑀔𑀫𑀦𑀧𑀥𑀸𑀦𑀩𑁄𑀥𑀺𑀭𑀲𑁆𑀫𑀻𑀳𑀺 𑀧𑀦 𑀦𑁂𑀲𑀁 𑀯𑁂𑀫𑀢𑁆𑀢𑀢𑀸 𑀳𑁄𑀢𑀺. 𑀢𑀣𑀸 𑀳𑀺 𑀢𑁂 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀽𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀦 𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀺, 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑁄𑀴𑀲𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀦 𑀘. 𑀅𑀬𑀁 𑀦𑁂𑀲𑀁 𑀅𑀤𑁆𑀥𑀸𑀦𑀯𑁂𑀫𑀢𑁆𑀢𑀢𑀸. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘 𑀯𑀲𑁆𑀲𑀲𑀢𑀸𑀬𑀼𑀓𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂. 𑀅𑀬𑀁 𑀦𑁂𑀲𑀁 𑀆𑀬𑀼𑀯𑁂𑀫𑀢𑁆𑀢𑀢𑀸. 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀬𑀁 𑀓𑀼𑀮𑀯𑁂𑀫𑀢𑁆𑀢𑀢𑀸. 𑀉𑀘𑁆𑀘𑀸 𑀯𑀸 𑀳𑁄𑀦𑁆𑀢𑀺 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀸, 𑀦𑀻𑀘𑀸 𑀯𑀸 𑀧𑀦𑁆𑀦𑀭𑀲𑀅𑀝𑁆𑀞𑀸𑀭𑀲𑀳𑀢𑁆𑀣𑀧𑁆𑀧𑀫𑀸𑀡𑀸. 𑀅𑀬𑀁 𑀧𑀫𑀸𑀡𑀯𑁂𑀫𑀢𑁆𑀢𑀢𑀸. 𑀳𑀢𑁆𑀣𑀺𑀅𑀲𑁆𑀲𑀭𑀣𑀲𑀺𑀯𑀺𑀓𑀸𑀤𑀻𑀳𑀺 𑀦𑀺𑀓𑁆𑀔𑀫𑀦𑁆𑀢𑀺 𑀯𑁂𑀳𑀸𑀲𑁂𑀦 𑀯𑀸. 𑀢𑀣𑀸 𑀳𑀺 𑀯𑀺𑀧𑀲𑁆𑀲𑀺𑀓𑀓𑀼𑀲𑀦𑁆𑀥𑀸 𑀅𑀲𑁆𑀲𑀭𑀣𑁂𑀦 𑀦𑀺𑀓𑁆𑀔𑀫𑀺𑀁𑀲𑀼, 𑀲𑀺𑀔𑀻𑀓𑁄𑀡𑀸𑀕𑀫𑀦𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂𑀦, 𑀯𑁂𑀲𑁆𑀲𑀪𑀽 𑀲𑀺𑀯𑀺𑀓𑀸𑀬, 𑀓𑀲𑁆𑀲𑀧𑁄 𑀯𑁂𑀳𑀸𑀲𑁂𑀦, 𑀲𑀓𑁆𑀬𑀫𑀼𑀦𑀺 𑀅𑀲𑁆𑀲𑀧𑀺𑀝𑁆𑀞𑀺𑀬𑀸. 𑀅𑀬𑀁 𑀦𑁂𑀓𑁆𑀔𑀫𑁆𑀫𑀯𑁂𑀫𑀢𑁆𑀢𑀢𑀸. 𑀲𑀢𑁆𑀢𑀸𑀳𑀁 𑀯𑀸 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀅𑀟𑁆𑀠𑀫𑀸𑀲𑀁, 𑀫𑀸𑀲𑀁, 𑀤𑁆𑀯𑁂𑀫𑀸𑀲𑀁, 𑀢𑁂𑀫𑀸𑀲𑀁, 𑀘𑀢𑀼𑀫𑀸𑀲𑀁, 𑀧𑀜𑁆𑀘𑀫𑀸𑀲𑀁, 𑀙𑀫𑀸𑀲𑀁, 𑀏𑀓𑀯𑀲𑁆𑀲𑀁 𑀤𑁆𑀯𑀺𑀢𑀺𑀘𑀢𑀼𑀧𑀜𑁆𑀘𑀙𑀯𑀲𑁆𑀲𑀸𑀦𑀺 𑀯𑀸. 𑀅𑀬𑀁 𑀧𑀥𑀸𑀦𑀯𑁂𑀫𑀢𑁆𑀢𑀢𑀸. 𑀅𑀲𑁆𑀲𑀢𑁆𑀣𑁄 𑀯𑀸 𑀩𑁄𑀥𑀺𑀭𑀼𑀓𑁆𑀔𑁄 𑀳𑁄𑀢𑀺 𑀦𑀺𑀕𑁆𑀭𑁄𑀥𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄. 𑀅𑀬𑀁 𑀩𑁄𑀥𑀺𑀯𑁂𑀫𑀢𑁆𑀢𑀢𑀸. 𑀩𑁆𑀬𑀸𑀫𑀸𑀲𑀻𑀢𑀺𑀅𑀦𑀦𑁆𑀢𑀧𑀪𑀸𑀬𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀩𑁆𑀬𑀸𑀫𑀧𑁆𑀧𑀪𑀸 𑀯𑀸 𑀅𑀲𑀻𑀢𑀺𑀧𑁆𑀧𑀪𑀸 𑀯𑀸 𑀲𑀩𑁆𑀩𑁂𑀲𑀁 𑀲𑀫𑀸𑀦𑀸, 𑀅𑀦𑀦𑁆𑀢𑀧𑁆𑀧𑀪𑀸 𑀧𑀦 𑀤𑀽𑀭𑀫𑁆𑀧𑀺 𑀕𑀘𑁆𑀙𑀢𑀺 𑀆𑀲𑀦𑁆𑀦𑀫𑁆𑀧𑀺, 𑀏𑀓𑀕𑀸𑀯𑀼𑀢𑀁 𑀤𑁆𑀯𑀺𑀕𑀸𑀯𑀼𑀢𑀁 𑀬𑁄𑀚𑀦𑀁 𑀅𑀦𑁂𑀓𑀬𑁄𑀚𑀦𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀫𑁆𑀧𑀺, 𑀫𑀗𑁆𑀕𑀮𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀧𑁆𑀧𑀪𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀅𑀕𑀫𑀸𑀲𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀦𑀲𑀸 𑀘𑀺𑀦𑁆𑀢𑀸𑀬𑀢𑁆𑀢𑀸𑀯 𑀲𑀩𑁆𑀩𑀩𑀼𑀤𑁆𑀥𑀸𑀦𑀁, 𑀬𑁄 𑀬𑀢𑁆𑀢𑀓𑀫𑀺𑀘𑁆𑀙𑀢𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀕𑀘𑁆𑀙𑀢𑀺. 𑀅𑀬𑀁 𑀭𑀲𑁆𑀫𑀺𑀯𑁂𑀫𑀢𑁆𑀢𑀢𑀸. 𑀇𑀫𑀸 𑀅𑀝𑁆𑀞 𑀯𑁂𑀫𑀢𑁆𑀢𑀢𑀸 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀧𑀝𑀺𑀯𑁂𑀥𑁂𑀦𑀸𑀥𑀺𑀕𑀦𑁆𑀢𑀩𑁆𑀩𑁂𑀲𑀼 𑀕𑀼𑀡𑁂𑀲𑀼, 𑀧𑀳𑀸𑀢𑀩𑁆𑀩𑁂𑀲𑀼 𑀯𑀸 𑀤𑁄𑀲𑁂𑀲𑀼 𑀦𑀢𑁆𑀣𑀺 𑀦𑁂𑀲𑀁 𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀲𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀫𑁂𑀢𑁂𑀳𑀺 𑀲𑀫𑁄 𑀲𑀫𑁂𑀳𑀺.

𑀯𑀺𑀲𑀫𑁂𑀳𑀺 𑀤𑀽𑀭𑁂𑀢𑀺 𑀦 𑀲𑀫𑀸 𑀯𑀺𑀲𑀫𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀸. 𑀢𑁂𑀳𑀺 𑀯𑀺𑀲𑀫𑁂𑀳𑀺 𑀅𑀲𑀤𑀺𑀲𑀢𑀸𑀬 𑀤𑀽𑀭𑁂. 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀽𑀭𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑁂𑀦 𑀧𑀮𑁆𑀮𑀗𑁆𑀓𑀁 𑀲𑀗𑁆𑀖𑀝𑁆𑀝𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺 𑀳𑀺 𑀕𑀼𑀡𑁂𑀳𑀺 𑀏𑀓𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁, 𑀓𑁄 𑀧𑀦 𑀯𑀸𑀤𑁄 𑀲𑀸𑀯𑀓𑀸𑀤𑀻𑀲𑀼. 𑀢𑁂𑀦𑀸𑀳 𑁋 ‘‘𑀯𑀺𑀲𑀫𑁂𑀳𑀺 𑀤𑀽𑀭𑁂’’𑀢𑀺. 𑀢𑀣𑀸𑀕𑀢𑁄 𑀳𑁄𑀢𑀻𑀢𑀺 𑀉𑀪𑀬𑀧𑀤𑁂𑀳𑀺 𑀤𑀽𑀭𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀦𑁆𑀢𑀧𑀜𑁆𑀜𑁄𑀢𑀺 𑀅𑀧𑀭𑀺𑀫𑀺𑀢𑀧𑀜𑁆𑀜𑁄. 𑀮𑁄𑀓𑀺𑀬𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀧𑀜𑁆𑀜𑀁 𑀉𑀧𑀦𑀺𑀥𑀸𑀬 𑀅𑀝𑁆𑀞𑀫𑀓𑀲𑁆𑀲 𑀧𑀜𑁆𑀜𑀸 𑀅𑀥𑀺𑀓𑀸, 𑀢𑀲𑁆𑀲 𑀧𑀜𑁆𑀜𑀁 𑀉𑀧𑀦𑀺𑀥𑀸𑀬 𑀲𑁄𑀢𑀸𑀧𑀦𑁆𑀦𑀲𑁆𑀲. 𑀏𑀯𑀁 𑀬𑀸𑀯 𑀅𑀭𑀳𑀢𑁄 𑀧𑀜𑁆𑀜𑀁 𑀉𑀧𑀦𑀺𑀥𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸 𑀅𑀥𑀺𑀓𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀁 𑀧𑀦 𑀉𑀧𑀦𑀺𑀥𑀸𑀬 𑀢𑀣𑀸𑀕𑀢𑀲𑁆𑀲 𑀧𑀜𑁆𑀜𑀸 𑀅𑀥𑀺𑀓𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀅𑀦𑀦𑁆𑀢𑀸 𑀇𑀘𑁆𑀘𑁂𑀯 𑀧𑀦 𑀯𑀢𑁆𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀅𑀦𑀦𑁆𑀢𑀧𑀜𑁆𑀜𑁄’’𑀢𑀺. 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀅𑀮𑀺𑀢𑁆𑀢𑁄. 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀥𑀮𑁄𑀓𑁂 𑀯𑀸 𑀧𑀭𑀮𑁄𑀓𑁂 𑀯𑀸. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑁋 𑀲𑀫𑁄 𑀲𑀫𑁂𑀳𑀺 𑀯𑀺𑀲𑀫𑁂𑀳𑀺 𑀤𑀽𑀭𑁂 𑀢𑀣𑀸𑀕𑀢𑁄 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀦𑀦𑁆𑀢𑀧𑀜𑁆𑀜𑁄 𑀅𑀦𑀼𑀧𑀮𑀺𑀢𑁆𑀢𑁄 𑀇𑀥 𑀯𑀸 𑀳𑀼𑀭𑀁 𑀯𑀸, 𑀢𑁂𑀦 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀦𑁆𑀢𑀺.

𑁪𑁭𑁪. 𑀬𑀫𑁆𑀳𑀺 𑀦 𑀫𑀸𑀬𑀸𑀢𑀺 𑀅𑀬𑀁 𑀧𑀦 𑀕𑀸𑀣𑀸 𑀅𑀜𑁆𑀜𑀸 𑀘 𑀈𑀤𑀺𑀲𑀸 𑀫𑀸𑀬𑀸𑀤𑀺𑀤𑁄𑀲𑀬𑀼𑀢𑁆𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀤𑀓𑁆𑀔𑀺𑀡𑁂𑀬𑁆𑀬𑀲𑀜𑁆𑀜𑀸𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀅𑀫𑀫𑁄𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 ‘‘𑀇𑀤𑀁 𑀫𑀫𑀸’’𑀢𑀺 𑀧𑀳𑀻𑀦𑀫𑀫𑀸𑀬𑀺𑀢𑀪𑀸𑀯𑁄.

𑁪𑁭𑁫. 𑀦𑀺𑀯𑁂𑀲𑀦𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀁. 𑀢𑁂𑀦 𑀳𑀺 𑀫𑀦𑁄 𑀢𑀻𑀲𑀼 𑀪𑀯𑁂𑀲𑀼 𑀦𑀺𑀯𑀺𑀲𑀢𑀺, 𑀢𑁂𑀦 𑀢𑀁 ‘‘𑀦𑀺𑀯𑁂𑀲𑀦𑀁 𑀫𑀦𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣𑁂𑀯 𑀯𑀸 𑀦𑀺𑀯𑀺𑀲𑀢𑀺 𑀢𑀁 𑀳𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀢𑀸𑀬. 𑀢𑁂𑀦𑀧𑀺 ‘‘𑀦𑀺𑀯𑁂𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀕𑁆𑀕𑀳𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀏𑀯, 𑀢𑀸𑀳𑀺 𑀧𑀭𑀺𑀕𑁆𑀕𑀳𑀺𑀢𑀥𑀫𑁆𑀫𑀸 𑀯𑀸. 𑀓𑁂𑀘𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀸𑀧𑀺. 𑀅𑀦𑀼𑀧𑀸𑀤𑀺𑀬𑀸𑀦𑁄𑀢𑀺 𑀢𑁂𑀲𑀁 𑀦𑀺𑀯𑁂𑀲𑀦𑀧𑀭𑀺𑀕𑁆𑀕𑀳𑀸𑀦𑀁 𑀅𑀪𑀸𑀯𑀸 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀼𑀧𑀸𑀤𑀺𑀬𑀫𑀸𑀦𑁄.

𑁪𑁭𑁬. 𑀲𑀫𑀸𑀳𑀺𑀢𑁄 𑀫𑀕𑁆𑀕𑀲𑀫𑀸𑀥𑀺𑀦𑀸. 𑀉𑀤𑀢𑀸𑀭𑀻𑀢𑀺 𑀉𑀢𑁆𑀢𑀺𑀡𑁆𑀡𑁄. 𑀥𑀫𑁆𑀫𑀁 𑀘𑀜𑁆𑀜𑀸𑀲𑀻𑀢𑀺 𑀲𑀩𑁆𑀩𑀜𑁆𑀘 𑀜𑁂𑀬𑁆𑀬𑀥𑀫𑁆𑀫𑀁 𑀅𑀜𑁆𑀜𑀸𑀲𑀺. 𑀧𑀭𑀫𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦.

𑁪𑁭𑁭. 𑀪𑀯𑀸𑀲𑀯𑀸𑀢𑀺 𑀪𑀯𑀢𑀡𑁆𑀳𑀸𑀛𑀸𑀦𑀦𑀺𑀓𑀦𑁆𑀢𑀺𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀸 𑀭𑀸𑀕𑀸. 𑀯𑀘𑀻𑀢𑀺 𑀯𑀸𑀘𑀸. 𑀔𑀭𑀸𑀢𑀺 𑀓𑀓𑁆𑀔𑀴𑀸 𑀨𑀭𑀼𑀲𑀸. 𑀯𑀺𑀥𑀽𑀧𑀺𑀢𑀸𑀢𑀺 𑀤𑀟𑁆𑀠𑀸. 𑀅𑀢𑁆𑀣𑀕𑀢𑀸𑀢𑀺 𑀅𑀢𑁆𑀣𑀗𑁆𑀕𑀢𑀸. 𑀦 𑀲𑀦𑁆𑀢𑀻𑀢𑀺 𑀯𑀺𑀥𑀽𑀧𑀺𑀢𑀢𑁆𑀢𑀸 𑀅𑀢𑁆𑀣𑀗𑁆𑀕𑀢𑀢𑁆𑀢𑀸 𑀘. 𑀉𑀪𑀬𑁂𑀳𑀺 𑀧𑀦 𑀉𑀪𑀬𑀁 𑀬𑁄𑀚𑁂𑀢𑀩𑁆𑀩𑀁 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼.

𑁪𑁭𑁮. 𑀫𑀸𑀦𑀲𑀢𑁆𑀢𑁂𑀲𑀽𑀢𑀺 𑀫𑀸𑀦𑁂𑀦 𑀮𑀕𑁆𑀕𑁂𑀲𑀼. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀲𑀔𑁂𑀢𑁆𑀢𑀯𑀢𑁆𑀣𑀼𑀦𑁆𑀢𑀺 𑀲𑀳𑁂𑀢𑀼𑀧𑀘𑁆𑀘𑀬𑀁, 𑀲𑀤𑁆𑀥𑀺𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁭𑁯. 𑀆𑀲𑀁 𑀅𑀦𑀺𑀲𑁆𑀲𑀸𑀬𑀸𑀢𑀺 𑀢𑀡𑁆𑀳𑀁 𑀅𑀦𑀮𑁆𑀮𑀻𑀬𑀺𑀢𑁆𑀯𑀸. 𑀯𑀺𑀯𑁂𑀓𑀤𑀲𑁆𑀲𑀻𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀻. 𑀧𑀭𑀯𑁂𑀤𑀺𑀬𑀦𑁆𑀢𑀺 𑀧𑀭𑁂𑀳𑀺 𑀜𑀸𑀧𑁂𑀢𑀩𑁆𑀩𑀁. 𑀤𑀺𑀝𑁆𑀞𑀺𑀫𑀼𑀧𑀸𑀢𑀺𑀯𑀢𑁆𑀢𑁄𑀢𑀺 𑀤𑁆𑀯𑀸𑀲𑀝𑁆𑀞𑀺𑀪𑁂𑀤𑀫𑁆𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀆𑀭𑀫𑁆𑀫𑀡𑀸𑀢𑀺 𑀧𑀘𑁆𑀘𑀬𑀸, 𑀧𑀼𑀦𑀩𑁆𑀪𑀯𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁮𑁦. 𑀧𑀭𑁄𑀧𑀭𑀸𑀢𑀺 𑀯𑀭𑀸𑀯𑀭𑀸 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀸. 𑀧𑀭𑀸 𑀯𑀸 𑀩𑀸𑀳𑀺𑀭𑀸, 𑀅𑀧𑀭𑀸 𑀅𑀚𑁆𑀛𑀢𑁆𑀢𑀺𑀓𑀸. 𑀲𑀫𑁂𑀘𑁆𑀘𑀸𑀢𑀺 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀥𑀫𑁆𑀫𑀸𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀬𑁄 𑀥𑀫𑁆𑀫𑀸. 𑀉𑀧𑀸𑀤𑀸𑀦𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑁂 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀯𑀺𑀫𑀼𑀢𑁆𑀢𑀺𑀮𑀸𑀪𑀻𑀢𑀺 𑀅𑀢𑁆𑀣𑁄.

𑁪𑁮𑁧. 𑀲𑀁𑀬𑁄𑀚𑀦𑀁𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻𑀢𑀺 𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀤𑀲𑁆𑀲𑀻 𑀚𑀸𑀢𑀺𑀓𑁆𑀔𑀬𑀦𑁆𑀢𑀤𑀲𑁆𑀲𑀻 𑀘. 𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑁂𑀦 𑀘𑁂𑀢𑁆𑀣 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀚𑀸𑀢𑀺𑀓𑁆𑀔𑀬𑀦𑁆𑀢𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸 𑀯𑀼𑀢𑁆𑀢𑀸. 𑀔𑀬𑀦𑁆𑀢𑁄𑀢𑀺 𑀳𑀺 𑀅𑀘𑁆𑀘𑀦𑁆𑀢𑀔𑀬𑀲𑁆𑀲 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀘𑁂𑀢𑁆𑀣 ‘‘𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀓𑀢𑁄. 𑀬𑁄𑀧𑀸𑀦𑀼𑀤𑀻𑀢𑀺 𑀬𑁄 𑀅𑀧𑀦𑀼𑀤𑀺. 𑀭𑀸𑀕𑀧𑀣𑀦𑁆𑀢𑀺 𑀭𑀸𑀕𑀸𑀭𑀫𑁆𑀫𑀡𑀁, 𑀭𑀸𑀕𑀫𑁂𑀯 𑀯𑀸. 𑀭𑀸𑀕𑁄𑀧𑀺 𑀳𑀺 𑀤𑀼𑀕𑁆𑀕𑀢𑀻𑀦𑀁 𑀧𑀣𑀢𑁆𑀢𑀸 ‘‘𑀭𑀸𑀕𑀧𑀣𑁄’’𑀢𑀺 𑀯𑀼𑀘𑁆𑀘𑀢𑀺 𑀓𑀫𑁆𑀫𑀧𑀣𑁄 𑀯𑀺𑀬. 𑀲𑀼𑀤𑁆𑀥𑁄 𑀦𑀺𑀤𑁄𑀲𑁄 𑀯𑀺𑀫𑀮𑁄 𑀅𑀓𑀸𑀘𑁄𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀢𑀸𑀬 𑀲𑀼𑀤𑁆𑀥𑁄. 𑀬𑁂𑀳𑀺 ‘‘𑀭𑀸𑀕𑀤𑁄𑀲𑀸 𑀅𑀬𑀁 𑀧𑀚𑀸, 𑀤𑁄𑀲𑀤𑁄𑀲𑀸, 𑀫𑁄𑀳𑀤𑁄𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀁 𑀅𑀪𑀸𑀯𑀸 𑀦𑀺𑀤𑁄𑀲𑁄. 𑀅𑀝𑁆𑀞𑀧𑀼𑀭𑀺𑀲𑀫𑀮𑀯𑀺𑀕𑀫𑀸 𑀯𑀺𑀫𑀮𑁄, 𑀉𑀧𑀓𑁆𑀓𑀺𑀮𑁂𑀲𑀸𑀪𑀸𑀯𑀢𑁄 𑀅𑀓𑀸𑀘𑁄. 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀦 ‘‘𑀲𑀓𑀸𑀘𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀤𑁆𑀥𑁄 𑀯𑀸 𑀬𑀲𑁆𑀫𑀸 𑀦𑀺𑀤𑁆𑀤𑁄𑀲𑁄, 𑀦𑀺𑀤𑁆𑀤𑁄𑀲𑀢𑀸𑀬 𑀯𑀺𑀫𑀮𑁄, 𑀩𑀸𑀳𑀺𑀭𑀫𑀮𑀸𑀪𑀸𑀯𑁂𑀦 𑀯𑀺𑀫𑀮𑀢𑁆𑀢𑀸 𑀅𑀓𑀸𑀘𑁄. 𑀲𑀫𑀮𑁄 𑀳𑀺 ‘‘𑀲𑀓𑀸𑀘𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀫𑀮𑀢𑁆𑀢𑀸 𑀯𑀸 𑀆𑀕𑀼𑀁 𑀦 𑀓𑀭𑁄𑀢𑀺, 𑀢𑁂𑀦 𑀅𑀓𑀸𑀘𑁄. 𑀆𑀕𑀼𑀓𑀺𑀭𑀺𑀬𑀸 𑀳𑀺 𑀉𑀧𑀖𑀸𑀢𑀓𑀭𑀡𑀢𑁄 ‘‘𑀓𑀸𑀘𑁄’’𑀢𑀺 𑀯𑀼𑀘𑁆𑀘𑀢𑀺.

𑁪𑁮𑁨. 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀦𑀸𑀦𑀼𑀧𑀲𑁆𑀲𑀢𑀻𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀅𑀜𑁆𑀜𑀁 𑀅𑀢𑁆𑀢𑀸𑀦𑀁 𑀦𑀸𑀫 𑀦 𑀧𑀲𑁆𑀲𑀢𑀺, 𑀔𑀦𑁆𑀥𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺. 𑀬𑀸 𑀘𑀸𑀬𑀁 ‘‘𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀢𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲𑀸 𑀅𑀪𑀸𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀦𑀸𑀦𑀼𑀧𑀲𑁆𑀲𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀜𑁆𑀜𑀸𑀬 𑀔𑀦𑁆𑀥𑁂 𑀧𑀲𑁆𑀲𑀢𑀺. 𑀫𑀕𑁆𑀕𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁄, 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀅𑀪𑀸𑀯𑀸 𑀉𑀚𑁆𑀚𑀼𑀕𑀢𑁄, 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀦𑀻𑀬𑀢𑁄 𑀞𑀺𑀢𑀢𑁆𑀢𑁄, 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀏𑀚𑀸𑀬 𑀧𑀜𑁆𑀘𑀦𑁆𑀦𑀁 𑀘𑁂𑀢𑁄𑀔𑀺𑀮𑀸𑀦𑀜𑁆𑀘 𑀅𑀝𑁆𑀞𑀝𑁆𑀞𑀸𑀦𑀸𑀬 𑀓𑀗𑁆𑀔𑀸𑀬 𑀘 𑀅𑀪𑀸𑀯𑀸 𑀅𑀦𑁂𑀚𑁄 𑀅𑀔𑀺𑀮𑁄 𑀅𑀓𑀗𑁆𑀔𑁄.

𑁪𑁮𑁩. 𑀫𑁄𑀳𑀦𑁆𑀢𑀭𑀸𑀢𑀺 𑀫𑁄𑀳𑀓𑀸𑀭𑀡𑀸 𑀫𑁄𑀳𑀧𑀘𑁆𑀘𑀬𑀸, 𑀲𑀩𑁆𑀩𑀓𑀺𑀮𑁂𑀲𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀘 𑀜𑀸𑀡𑀤𑀲𑁆𑀲𑀻𑀢𑀺 𑀲𑀘𑁆𑀙𑀺𑀓𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄. 𑀢𑀜𑁆𑀳𑀺 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁, 𑀢𑀜𑁆𑀘 𑀪𑀕𑀯𑀸 𑀧𑀲𑁆𑀲𑀺, ‘‘𑀅𑀥𑀺𑀕𑀢𑀁 𑀫𑁂’’𑀢𑀺 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀘 𑀜𑀸𑀡𑀤𑀲𑁆𑀲𑀻’’𑀢𑀺. 𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁. 𑀲𑀺𑀯𑀦𑁆𑀢𑀺 𑀔𑁂𑀫𑀁 𑀦𑀺𑀭𑀼𑀧𑀤𑁆𑀤𑀯𑀁 𑀲𑀲𑁆𑀲𑀺𑀭𑀺𑀓𑀁 𑀯𑀸. 𑀬𑀓𑁆𑀔𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑁆𑀲. 𑀲𑀼𑀤𑁆𑀥𑀻𑀢𑀺 𑀯𑁄𑀤𑀸𑀦𑀢𑀸. 𑀏𑀢𑁆𑀣 𑀳𑀺 𑀫𑁄𑀳𑀦𑁆𑀢𑀭𑀸𑀪𑀸𑀯𑁂𑀦 𑀲𑀩𑁆𑀩𑀤𑁄𑀲𑀸𑀪𑀸𑀯𑁄, 𑀢𑁂𑀦 𑀲𑀁𑀲𑀸𑀭𑀓𑀸𑀭𑀡𑀲𑀫𑀼𑀘𑁆𑀙𑁂𑀤𑁄 𑀅𑀦𑁆𑀢𑀺𑀫𑀲𑀭𑀻𑀭𑀥𑀸𑀭𑀺𑀢𑀸, 𑀜𑀸𑀡𑀤𑀲𑁆𑀲𑀺𑀢𑀸𑀬 𑀲𑀩𑁆𑀩𑀕𑀼𑀡𑀲𑀫𑁆𑀪𑀯𑁄. 𑀢𑁂𑀦 𑀅𑀦𑀼𑀢𑁆𑀢𑀭𑀸 𑀲𑀫𑁆𑀩𑁄𑀥𑀺𑀧𑀢𑁆𑀢𑀺, 𑀇𑀢𑁄 𑀧𑀭𑀜𑁆𑀘 𑀧𑀳𑀸𑀢𑀩𑁆𑀩𑀫𑀥𑀺𑀕𑀦𑁆𑀢𑀩𑁆𑀩𑀁 𑀯𑀸 𑀦𑀢𑁆𑀣𑀺. 𑀢𑁂𑀦𑀸𑀳 𑁋 ‘‘𑀏𑀢𑁆𑀢𑀸𑀯𑀢𑀸 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀻’’𑀢𑀺.

𑁪𑁮𑁪. 𑀏𑀯𑀁 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀳𑀼𑀢𑀜𑁆𑀘 𑀫𑀬𑁆𑀳’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀫𑀳𑀁 𑀇𑀢𑁄 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀸𑀦𑀁 𑀆𑀭𑀩𑁆𑀪 𑀅𑀕𑁆𑀕𑀺𑀫𑁆𑀳𑀺 𑀅𑀚𑀼𑀳𑀁, 𑀢𑀁 𑀫𑁂 𑀳𑀼𑀢𑀁 𑀲𑀘𑁆𑀘𑀁 𑀯𑀸 𑀳𑁄𑀢𑀺, 𑀅𑀮𑀺𑀓𑀁 𑀯𑀸𑀢𑀺 𑀦 𑀚𑀸𑀦𑀸𑀫𑀺. 𑀅𑀚𑁆𑀚 𑀧𑀦 𑀇𑀤𑀁 𑀳𑀼𑀢𑀜𑁆𑀘 𑀫𑀬𑁆𑀳𑀁 𑀳𑀼𑀢𑀫𑀢𑁆𑀣𑀼 𑀲𑀘𑁆𑀘𑀁, 𑀲𑀘𑁆𑀘𑀳𑀼𑀢𑀫𑁂𑀯 𑀅𑀢𑁆𑀣𑀽𑀢𑀺 𑀬𑀸𑀘𑀦𑁆𑀢𑁄 𑀪𑀡𑀢𑀺. 𑀬𑀁 𑀢𑀸𑀤𑀺𑀲𑀁 𑀯𑁂𑀤𑀕𑀼𑀦𑀁 𑀅𑀮𑀢𑁆𑀣𑀁, 𑀬𑀲𑁆𑀫𑀸 𑀇𑀥𑁂𑀯 𑀞𑀺𑀢𑁄 𑀪𑀯𑀦𑁆𑀢𑀭𑀽𑀧𑀁 𑀯𑁂𑀤𑀕𑀼𑀁 𑀅𑀮𑀢𑁆𑀣𑀁. 𑀩𑁆𑀭𑀳𑁆𑀫𑀸 𑀳𑀺 𑀲𑀓𑁆𑀔𑀺, 𑀧𑀘𑁆𑀘𑀓𑁆𑀔𑀫𑁂𑀯 𑀳𑀺 𑀢𑁆𑀯𑀁 𑀩𑁆𑀭𑀳𑁆𑀫𑀸, 𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀕𑀯𑀸, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘 𑀪𑀼𑀜𑁆𑀚𑀢𑀼 𑀫𑁂 𑀪𑀕𑀯𑀸 𑀧𑀽𑀭𑀴𑀸𑀲𑀦𑁆𑀢𑀺 𑀢𑀁 𑀳𑀩𑁆𑀬𑀲𑁂𑀲𑀁 𑀉𑀧𑀦𑀸𑀫𑁂𑀦𑁆𑀢𑁄 𑀆𑀳.

𑁪𑁮𑁭. 𑀅𑀣 𑀪𑀕𑀯𑀸 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀕𑀸𑀣𑀸𑀤𑁆𑀯𑀬𑀫𑀪𑀸𑀲𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀬𑀁 𑀅𑀢𑁆𑀢𑀦𑀸 𑀦 𑀇𑀘𑁆𑀙𑀢𑀺, 𑀓𑀫𑁆𑀧𑀺 𑀘𑀜𑁆𑀜𑀁 𑀲𑀦𑁆𑀥𑀸𑀬 ‘𑀓𑁂𑀯𑀮𑀺𑀦𑀁 𑀫𑀳𑁂𑀲𑀺𑀁 𑀔𑀻𑀡𑀸𑀲𑀯𑀁 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀲𑁆𑀲𑀽’𑀢𑀺 𑀪𑀡𑀢𑀻’’𑀢𑀺 𑀏𑀯𑀁 𑀕𑀸𑀣𑀸𑀬 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀁 𑀜𑀸𑀢𑀼𑀓𑀸𑀫𑁄 𑀆𑀳 ‘‘𑀲𑀸𑀥𑀸𑀳𑀁 𑀪𑀕𑀯𑀸’’𑀢𑀺. 𑀢𑀢𑁆𑀣 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀣𑀸𑀢𑀺 𑀬𑁂𑀦 𑀢𑁆𑀯𑀫𑀸𑀳, 𑀢𑁂𑀦 𑀧𑀓𑀸𑀭𑁂𑀦. 𑀯𑀺𑀚𑀜𑁆𑀜𑀦𑁆𑀢𑀺 𑀚𑀸𑀦𑁂𑀬𑁆𑀬𑀁. 𑀬𑀦𑁆𑀢𑀺 𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀬𑀜𑁆𑀜𑀓𑀸𑀮𑁂 𑀧𑀭𑀺𑀬𑁂𑀲𑀫𑀸𑀦𑁄 𑀉𑀧𑀝𑁆𑀞𑀳𑁂𑀬𑁆𑀬𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀧𑀧𑁆𑀧𑀼𑀬𑁆𑀬𑀸𑀢𑀺 𑀧𑀢𑁆𑀯𑀸. 𑀢𑀯 𑀲𑀸𑀲𑀦𑀦𑁆𑀢𑀺 𑀢𑀯 𑀑𑀯𑀸𑀤𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀥𑀸𑀳𑀁 𑀪𑀕𑀯𑀸 𑀢𑀯 𑀑𑀯𑀸𑀤𑀁 𑀆𑀕𑀫𑁆𑀫 𑀢𑀣𑀸 𑀯𑀺𑀚𑀜𑁆𑀜𑀁 𑀆𑀭𑁄𑀘𑁂𑀳𑀺 𑀫𑁂 𑀢𑀁 𑀓𑁂𑀯𑀮𑀺𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄 𑀤𑀓𑁆𑀔𑀺𑀡𑀁 𑀪𑀼𑀜𑁆𑀚𑁂𑀬𑁆𑀬 𑀫𑀸𑀤𑀺𑀲𑀲𑁆𑀲, 𑀬𑀁 𑀘𑀸𑀳𑀁 𑀬𑀜𑁆𑀜𑀓𑀸𑀮𑁂 𑀧𑀭𑀺𑀬𑁂𑀲𑀫𑀸𑀦𑁄 𑀉𑀧𑀝𑁆𑀞𑀳𑁂𑀬𑁆𑀬𑀁, 𑀢𑀣𑀸𑀭𑀽𑀧𑀁 𑀫𑁂 𑀤𑀓𑁆𑀔𑀺𑀡𑁂𑀬𑁆𑀬𑀁 𑀤𑀲𑁆𑀲𑁂𑀳𑀺, 𑀲𑀘𑁂 𑀢𑁆𑀯𑀁 𑀦 𑀪𑀼𑀜𑁆𑀚𑀲𑀻𑀢𑀺.

𑁪𑁮𑁮-𑁯𑁦. 𑀅𑀣𑀲𑁆𑀲 𑀪𑀕𑀯𑀸 𑀧𑀸𑀓𑀝𑁂𑀦 𑀦𑀬𑁂𑀦 𑀢𑀣𑀸𑀭𑀽𑀧𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀭𑀫𑁆𑀪𑀸 𑀬𑀲𑁆𑀲𑀸’’𑀢𑀺 𑀕𑀸𑀣𑀸𑀢𑁆𑀢𑀬𑀫𑀸𑀳. 𑀢𑀢𑁆𑀣 𑀲𑀻𑀫𑀦𑁆𑀢𑀸𑀦𑀁 𑀯𑀺𑀦𑁂𑀢𑀸𑀭𑀦𑁆𑀢𑀺 𑀲𑀻𑀫𑀸𑀢𑀺 𑀫𑀭𑀺𑀬𑀸𑀤𑀸 𑀲𑀸𑀥𑀼𑀚𑀦𑀯𑀼𑀢𑁆𑀢𑀺, 𑀢𑀲𑁆𑀲𑀸 𑀅𑀦𑁆𑀢𑀸 𑀧𑀭𑀺𑀬𑁄𑀲𑀸𑀦𑀸 𑀅𑀧𑀭𑀪𑀸𑀕𑀸𑀢𑀺 𑀓𑀢𑁆𑀯𑀸 𑀲𑀻𑀫𑀦𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸, 𑀢𑁂𑀲𑀁 𑀯𑀺𑀦𑁂𑀢𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀫𑀦𑁆𑀢𑀸𑀢𑀺 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸 𑀲𑁂𑀓𑁆𑀔𑀸 𑀘 𑀧𑀼𑀣𑀼𑀚𑁆𑀚𑀦𑀸 𑀘, 𑀢𑁂𑀲𑀁 𑀯𑀺𑀦𑁂𑀢𑀸𑀭𑀦𑁆𑀢𑀺𑀧𑀺 𑀏𑀓𑁂. 𑀚𑀸𑀢𑀺𑀫𑀭𑀡𑀓𑁄𑀯𑀺𑀤𑀦𑁆𑀢𑀺 ‘‘𑀏𑀯𑀁 𑀚𑀸𑀢𑀺 𑀏𑀯𑀁 𑀫𑀭𑀡’’𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀁. 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀁, 𑀓𑀸𑀬𑀫𑁄𑀦𑁂𑀬𑁆𑀬𑀸𑀤𑀺𑀲𑀫𑁆𑀧𑀦𑁆𑀦𑀁 𑀯𑀸. 𑀪𑀓𑀼𑀝𑀺𑀁 𑀯𑀺𑀦𑀬𑀺𑀢𑁆𑀯𑀸𑀦𑀸𑀢𑀺 𑀬𑀁 𑀏𑀓𑀘𑁆𑀘𑁂 𑀤𑀼𑀩𑁆𑀩𑀼𑀤𑁆𑀥𑀺𑀦𑁄 𑀬𑀸𑀘𑀓𑀁 𑀤𑀺𑀲𑁆𑀯𑀸 𑀪𑀓𑀼𑀝𑀺𑀁 𑀓𑀭𑁄𑀦𑁆𑀢𑀺, 𑀢𑀁 𑀯𑀺𑀦𑀬𑀺𑀢𑁆𑀯𑀸, 𑀧𑀲𑀦𑁆𑀦𑀫𑀼𑀔𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀚𑀮𑀺𑀓𑀸𑀢𑀺 𑀧𑀕𑁆𑀕𑀳𑀺𑀢𑀅𑀜𑁆𑀚𑀮𑀺𑀦𑁄 𑀳𑀼𑀢𑁆𑀯𑀸.

𑁪𑁯𑁧. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀣𑁄𑀫𑀬𑀫𑀸𑀦𑁄 ‘‘𑀩𑀼𑀤𑁆𑀥𑁄 𑀪𑀯’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀆𑀬𑀸𑀕𑁄𑀢𑀺 𑀆𑀬𑀚𑀺𑀢𑀩𑁆𑀩𑁄, 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀯𑀸 𑀬𑀚𑀺𑀢𑀩𑁆𑀩𑀫𑁂𑀢𑁆𑀣𑀸𑀢𑀺𑀧𑀺 𑀆𑀬𑀸𑀕𑁄, 𑀤𑁂𑀬𑁆𑀬𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀼𑀭𑀺𑀫𑀕𑀸𑀣𑀸𑀲𑀼 𑀘 𑀬𑀁 𑀦 𑀯𑀡𑁆𑀡𑀺𑀢𑀁, 𑀢𑀁 𑀲𑀓𑁆𑀓𑀸 𑀅𑀯𑀡𑁆𑀡𑀺𑀢𑀫𑁆𑀧𑀺 𑀚𑀸𑀦𑀺𑀢𑀼𑀦𑁆𑀢𑀺 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸𑀬𑁂𑀯 𑀦 𑀯𑀡𑁆𑀡𑀺𑀢𑀁. 𑀇𑀢𑁄 𑀧𑀭𑀁 𑀧𑀦 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀧𑀽𑀭𑀴𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀸𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀸𑀖𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸. 𑀅𑀬𑀜𑁆𑀳𑀺 𑀫𑀸𑀖𑁄 𑀫𑀸𑀡𑀯𑁄 𑀤𑀸𑀬𑀓𑁄 𑀅𑀳𑁄𑀲𑀺 𑀤𑀸𑀦𑀧𑀢𑀺. 𑀢𑀲𑁆𑀲𑁂𑀢𑀤𑀳𑁄𑀲𑀺 𑁋 ‘‘𑀲𑀫𑁆𑀧𑀢𑁆𑀢𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀉𑀤𑀸𑀳𑀼 𑀦𑁄𑀢𑀺 𑀲𑀫𑀡𑀁 𑀕𑁄𑀢𑀫𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀚𑀸𑀦𑀸𑀢𑀻’’𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀪𑀕𑀯𑀸 𑀘𑀲𑁆𑀲 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀩𑁆𑀬𑀸𑀓𑀸𑀲𑀺. 𑀢𑀬𑀺𑀤𑀁 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑁄𑀢𑀺 𑀢𑀺𑀡𑁆𑀡𑀫𑁆𑀧𑀺 𑀯𑀘𑀦𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀫𑀸𑀖𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀜𑁆𑀳𑀺 𑀫𑀦𑁆𑀥𑀸𑀢𑀼𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀁 𑀢𑁂𑀳𑀺, 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲? 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂 𑀘 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺, 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀺 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀲𑀁 𑀯𑀲𑀦𑁆𑀢𑀯𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦𑀫𑀸𑀳 𑁋 ‘‘𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂’’𑀢𑀺. 𑀲𑁄 𑀘 𑀕𑀺𑀚𑁆𑀛𑀸 𑀢𑀲𑁆𑀲 𑀓𑀽𑀝𑁂𑀲𑀼 𑀯𑀲𑀺𑀁𑀲𑀼, 𑀕𑀺𑀚𑁆𑀛𑀲𑀤𑀺𑀲𑀸𑀦𑀺 𑀯𑀸𑀲𑁆𑀲 𑀓𑀽𑀝𑀸𑀦𑀺, 𑀢𑀲𑁆𑀫𑀸 ‘‘𑀕𑀺𑀚𑁆𑀛𑀓𑀽𑀝𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀔𑁄…𑀧𑁂… 𑀅𑀯𑁄𑀘𑀸𑀢𑀺 𑀏𑀢𑁆𑀣 𑀫𑀸𑀖𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁. 𑀫𑀸𑀡𑀯𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀯𑀸𑀲𑀁 𑀅𑀦𑀢𑀻𑀢𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀚𑀸𑀢𑀺𑀬𑀸 𑀧𑀦 𑀫𑀳𑀮𑁆𑀮𑀓𑁄. ‘‘𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦𑀸’’𑀢𑀺 𑀏𑀓𑁂 𑀧𑀺𑀗𑁆𑀕𑀺𑀬𑁄 𑀫𑀸𑀡𑀯𑁄 𑀯𑀺𑀬. 𑀲𑁄 𑀳𑀺 𑀯𑀻𑀲𑀯𑀲𑁆𑀲𑀲𑀢𑀺𑀓𑁄𑀧𑀺 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 ‘‘𑀧𑀺𑀗𑁆𑀕𑀺𑀬𑁄 𑀫𑀸𑀡𑀯𑁄’’ 𑀢𑁆𑀯𑁂𑀯 𑀲𑀗𑁆𑀔𑀁 𑀅𑀕𑀫𑀸𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫…𑀧𑁂… 𑀧𑀲𑀯𑀸𑀫𑀻𑀢𑀺 𑀏𑀢𑁆𑀣 𑀤𑀸𑀬𑀓𑁄 𑀤𑀸𑀦𑀧𑀢𑀻𑀢𑀺 𑀤𑀸𑀬𑀓𑁄 𑀘𑁂𑀯 𑀤𑀸𑀦𑀧𑀢𑀺 𑀘. 𑀬𑁄 𑀳𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀢𑁂𑀦𑀸𑀡𑀢𑁆𑀢𑁄 𑀤𑁂𑀢𑀺, 𑀲𑁄𑀧𑀺 𑀤𑀸𑀬𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀦 𑀤𑀸𑀦𑁂 𑀇𑀲𑁆𑀲𑀭𑀺𑀬𑀸𑀪𑀸𑀯𑀢𑁄 𑀦 𑀤𑀸𑀦𑀧𑀢𑀺. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁𑀬𑁂𑀯 𑀤𑁂𑀢𑀺. 𑀢𑁂𑀦𑀸𑀳 𑁋 ‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀤𑀸𑀬𑀓𑁄 𑀤𑀸𑀦𑀧𑀢𑀻’’𑀢𑀺. 𑀅𑀬𑀫𑁂𑀯 𑀳𑀺 𑀏𑀢𑁆𑀣 𑀅𑀢𑁆𑀣𑁄, 𑀅𑀜𑁆𑀜𑀢𑁆𑀭 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑀘𑁆𑀙𑁂𑀭𑁂𑀦 𑀅𑀪𑀺𑀪𑀼𑀬𑁆𑀬𑀫𑀸𑀦𑁄 𑀤𑀸𑀬𑀓𑁄 𑀅𑀦𑀪𑀺𑀪𑀽𑀢𑁄 𑀤𑀸𑀦𑀧𑀢𑀻𑀢𑀺𑀆𑀤𑀺𑀦𑀸𑀧𑀺 𑀦𑀬𑁂𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀤𑀜𑁆𑀜𑀽𑀢𑀺 𑀬𑀸𑀘𑀓𑀸𑀦𑀁 𑀯𑀘𑀦𑀁 𑀚𑀸𑀦𑀸𑀫𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 ‘‘𑀅𑀬𑀫𑀺𑀤𑀫𑀭𑀳𑀢𑀺 𑀅𑀬𑀫𑀺𑀤’’𑀦𑁆𑀢𑀺 𑀧𑀼𑀭𑀺𑀲𑀯𑀺𑀲𑁂𑀲𑀸𑀯𑀥𑀸𑀭𑀡𑁂𑀦 𑀩𑀳𑀽𑀧𑀓𑀸𑀭𑀪𑀸𑀯𑀕𑀳𑀡𑁂𑀦 𑀯𑀸. 𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑀺𑀢𑀼𑀁 𑀬𑀼𑀢𑁆𑀢𑁄. 𑀬𑁄 𑀳𑀺 𑀬𑀸𑀘𑀓𑁂 𑀤𑀺𑀲𑁆𑀯𑀸𑀯 𑀪𑀓𑀼𑀝𑀺𑀁 𑀓𑀢𑁆𑀯𑀸 𑀨𑀭𑀼𑀲𑀯𑀘𑀦𑀸𑀤𑀻𑀦𑀺 𑀪𑀡𑀢𑀺, 𑀲𑁄 𑀦 𑀬𑀸𑀘𑀬𑁄𑀕𑁄 𑀳𑁄𑀢𑀺. 𑀅𑀳𑀁 𑀧𑀦 𑀦 𑀢𑀸𑀤𑀺𑀲𑁄𑀢𑀺 𑀤𑀻𑀧𑁂𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀦𑀺𑀓𑀢𑀺𑀯𑀜𑁆𑀘𑀦𑀸𑀤𑀻𑀦𑀺 𑀯𑀚𑁆𑀚𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀸𑀬, 𑀬𑀸𑀘𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀸𑀘𑀦𑀸 𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀕𑀧𑀭𑀺𑀬𑁂𑀲𑀦𑁂 𑀥𑀫𑁆𑀫𑁄, 𑀬𑀸𑀘𑀫𑀸𑀦𑀸𑀦𑀜𑁆𑀘 𑀦𑁂𑀲𑀁 𑀧𑀭𑁂𑀳𑀺 𑀅𑀦𑀼𑀕𑁆𑀕𑀳𑀓𑀸𑀫𑁂𑀳𑀺 𑀤𑀺𑀦𑁆𑀦𑀸 𑀪𑁄𑀕𑀸 𑀥𑀫𑁆𑀫𑀮𑀤𑁆𑀥𑀸 𑀦𑀸𑀫 𑀥𑀫𑁆𑀫𑀸𑀥𑀺𑀕𑀢𑀸 𑀘 𑀳𑁄𑀦𑁆𑀢𑀺, 𑀲𑁄 𑀘 𑀢𑀣𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀪𑀺. 𑀢𑁂𑀦𑀸𑀳 𑁋 ‘‘𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀸𑀫𑀺…𑀧𑁂… 𑀥𑀫𑁆𑀫𑀸𑀥𑀺𑀕𑀢𑁂𑀳𑀻’’𑀢𑀺. 𑀪𑀺𑀬𑁆𑀬𑁄𑀧𑀺 𑀤𑀤𑀸𑀫𑀻𑀢𑀺 𑀢𑀢𑁄 𑀉𑀢𑁆𑀢𑀭𑀺𑀧𑀺 𑀤𑀤𑀸𑀫𑀺, 𑀧𑀫𑀸𑀡𑀁 𑀦𑀢𑁆𑀣𑀺, 𑀏𑀢𑁆𑀣 𑀮𑀤𑁆𑀥𑀪𑁄𑀕𑀧𑁆𑀧𑀫𑀸𑀡𑁂𑀦 𑀤𑀤𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀕𑁆𑀖𑀸𑀢𑀺 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄. 𑀏𑀓𑀁𑀲𑁂𑀦𑁂𑀯 𑀳𑀺 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀧𑀲𑀢𑁆𑀣𑀁 𑀤𑀸𑀦𑀁 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀤𑀻𑀬𑀫𑀸𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀲𑀩𑁆𑀩𑀢𑁆𑀣 𑀯𑀡𑁆𑀡𑀺𑀢𑀁 𑀤𑀸𑀦𑀁, 𑀦 𑀤𑀸𑀦𑀁 𑀕𑀭𑀳𑀺𑀢𑀁 𑀓𑁆𑀯𑀘𑀻’’𑀢𑀺. 𑀢𑀲𑁆𑀫𑀸 𑀪𑀕𑀯𑀸𑀧𑀺 𑀏𑀓𑀁𑀲𑁂𑀦𑁂𑀯 𑀢𑀁 𑀧𑀲𑀁𑀲𑀦𑁆𑀢𑁄 𑀆𑀳 𑁋 ‘‘𑀢𑀕𑁆𑀖 𑀢𑁆𑀯𑀁 𑀫𑀸𑀡𑀯…𑀧𑁂… 𑀧𑀲𑀯𑀲𑀻’’𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀏𑀯𑀁 𑀪𑀕𑀯𑀢𑀸 ‘‘𑀩𑀳𑀼𑀁 𑀲𑁄 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀤𑀓𑁆𑀔𑀺𑀡𑁂𑀬𑁆𑀬𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀁 𑀲𑁄𑀢𑀼𑀓𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀉𑀢𑁆𑀢𑀭𑀺 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀢𑁂𑀦𑀸𑀳𑀼 𑀲𑀗𑁆𑀕𑀻𑀢𑀺𑀓𑀸𑀭𑀸 𑁋 ‘‘𑀅𑀣 𑀔𑁄 𑀫𑀸𑀖𑁄 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀻’’𑀢𑀺. 𑀢𑀁 𑀅𑀢𑁆𑀣𑀢𑁄 𑀯𑀼𑀢𑁆𑀢𑀦𑀬𑀫𑁂𑀯.

𑁪𑁯𑁨. 𑀧𑀼𑀘𑁆𑀙𑀸𑀫𑀳𑀦𑁆𑀢𑀺𑀆𑀤𑀺𑀕𑀸𑀣𑀸𑀲𑀼 𑀧𑀦 𑀯𑀤𑀜𑁆𑀜𑀼𑀦𑁆𑀢𑀺 𑀯𑀘𑀦𑀯𑀺𑀤𑀼𑀁, 𑀲𑀩𑁆𑀩𑀸𑀓𑀸𑀭𑁂𑀦 𑀲𑀢𑁆𑀢𑀸𑀦𑀁 𑀯𑀼𑀢𑁆𑀢𑀯𑀘𑀦𑀸𑀥𑀺𑀧𑁆𑀧𑀸𑀬𑀜𑁆𑀜𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀚𑁆𑀛𑁂𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀲𑀼𑀤𑁆𑀥𑀁 𑀫𑀳𑀧𑁆𑀨𑀮𑀁 𑀪𑀯𑁂𑀬𑁆𑀬. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑁋 𑀬𑁄 𑀬𑀸𑀘𑀬𑁄𑀕𑁄 𑀤𑀸𑀦𑀧𑀢𑀺 𑀕𑀳𑀝𑁆𑀞𑁄 𑀧𑀼𑀜𑁆𑀜𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀧𑀭𑁂𑀲𑀁 𑀅𑀦𑁆𑀦𑀧𑀸𑀦𑀁 𑀤𑀤𑀁 𑀬𑀚𑀢𑀺, 𑀦 𑀅𑀕𑁆𑀕𑀺𑀫𑁆𑀳𑀺 𑀆𑀳𑀼𑀢𑀺𑀫𑀢𑁆𑀢𑀁 𑀧𑀓𑁆𑀔𑀺𑀧𑀦𑁆𑀢𑁄, 𑀢𑀜𑁆𑀘 𑀔𑁄 𑀧𑀼𑀜𑁆𑀜𑀧𑁂𑀓𑁆𑀔𑁄𑀯 𑀦 𑀧𑀘𑁆𑀘𑀼𑀧𑀓𑀸𑀭𑀓𑀮𑁆𑀬𑀸𑀡𑀓𑀺𑀢𑁆𑀢𑀺𑀲𑀤𑁆𑀤𑀸𑀤𑀺𑀅𑀧𑁂𑀓𑁆𑀔𑁄, 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀬𑀚𑀫𑀸𑀦𑀲𑁆𑀲 𑀳𑀼𑀢𑀁 𑀓𑀣𑀁 𑀲𑀼𑀚𑁆𑀛𑁂𑀬𑁆𑀬𑀸𑀢𑀺?

𑁪𑁯𑁩. 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂𑀪𑀺 𑀢𑀸𑀤𑀻𑀢𑀺 𑀢𑀸𑀤𑀺𑀲𑁄 𑀬𑀸𑀘𑀬𑁄𑀕𑁄 𑀤𑀓𑁆𑀔𑀺𑀡𑁂𑀬𑁆𑀬𑁂𑀳𑀺 𑀆𑀭𑀸𑀥𑀬𑁂 𑀲𑀫𑁆𑀧𑀸𑀤𑀬𑁂 𑀲𑁄𑀥𑀬𑁂, 𑀫𑀳𑀧𑁆𑀨𑀮𑀁 𑀢𑀁 𑀳𑀼𑀢𑀁 𑀓𑀭𑁂𑀬𑁆𑀬, 𑀦 𑀅𑀜𑁆𑀜𑀣𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀲𑁆𑀲 ‘‘𑀓𑀣𑀁 𑀳𑀼𑀢𑀁 𑀬𑀚𑀫𑀸𑀦𑀲𑁆𑀲 𑀲𑀼𑀚𑁆𑀛𑁂’’ 𑀇𑀘𑁆𑀘𑁂𑀢𑀁 𑀩𑁆𑀬𑀸𑀓𑀢𑀁 𑀳𑁄𑀢𑀺.

𑁪𑁯𑁪. 𑀅𑀓𑁆𑀔𑀸𑀳𑀺 𑀫𑁂 𑀪𑀕𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑁂𑀢𑀺 𑀏𑀢𑁆𑀣 𑀬𑁄 𑀬𑀸𑀘𑀬𑁄𑀕𑁄 𑀤𑀤𑀁 𑀧𑀭𑁂𑀲𑀁 𑀬𑀚𑀢𑀺, 𑀢𑀲𑁆𑀲 𑀫𑁂 𑀪𑀕𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀓𑁆𑀔𑀸𑀳𑀻𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁯𑁫. 𑀅𑀣𑀲𑁆𑀲 𑀪𑀕𑀯𑀸 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀦𑀬𑁂𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑁂 𑀧𑀓𑀸𑀲𑁂𑀦𑁆𑀢𑁄 ‘‘𑀬𑁂 𑀯𑁂 𑀅𑀲𑀢𑁆𑀢𑀸’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀅𑀲𑀢𑁆𑀢𑀸𑀢𑀺 𑀭𑀸𑀕𑀸𑀤𑀺𑀲𑀗𑁆𑀕𑀯𑀲𑁂𑀦 𑀅𑀮𑀕𑁆𑀕𑀸. 𑀓𑁂𑀯𑀮𑀺𑀦𑁄𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀸. 𑀬𑀢𑀢𑁆𑀢𑀸𑀢𑀺 𑀕𑀼𑀢𑁆𑀢𑀘𑀺𑀢𑁆𑀢𑀸.

𑁪𑁯𑁬-𑁭. 𑀤𑀦𑁆𑀢𑀸 𑀅𑀦𑀼𑀢𑁆𑀢𑀭𑁂𑀦 𑀤𑀫𑀣𑁂𑀦, 𑀯𑀺𑀫𑀼𑀢𑁆𑀢𑀸 𑀧𑀜𑁆𑀜𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀳𑀺, 𑀅𑀦𑀻𑀖𑀸 𑀆𑀬𑀢𑀺𑀁 𑀯𑀝𑁆𑀝𑀤𑀼𑀓𑁆𑀔𑀸𑀪𑀸𑀯𑁂𑀦, 𑀦𑀺𑀭𑀸𑀲𑀸 𑀲𑀫𑁆𑀧𑀢𑀺 𑀓𑀺𑀮𑁂𑀲𑀸𑀪𑀸𑀯𑁂𑀦. 𑀇𑀫𑀺𑀲𑁆𑀲𑀸 𑀧𑀦 𑀕𑀸𑀣𑀸𑀬 𑀤𑀼𑀢𑀺𑀬𑀕𑀸𑀣𑀸 𑀪𑀸𑀯𑀦𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑀦𑀬𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀯𑀺𑀳𑀭𑀢𑁄 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 ‘𑀅𑀳𑁄 𑀯𑀢 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑁂𑀬𑁆𑀬𑀸’𑀢𑀺 (𑀅. 𑀦𑀺. 𑁭.𑁭𑁧), 𑀅𑀣 𑀔𑁆𑀯𑀸𑀲𑁆𑀲 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀇𑀤𑀁 𑀘𑁂𑀢𑁆𑀣 𑀲𑀼𑀢𑁆𑀢𑀁 𑀲𑀸𑀥𑀓𑀁.

𑁪𑁯𑁮-𑁫𑁦𑁨. 𑀭𑀸𑀕𑀜𑁆𑀘…𑀧𑁂… 𑀬𑁂𑀲𑀼 𑀦 𑀫𑀸𑀬𑀸…𑀧𑁂… 𑀦 𑀢𑀡𑁆𑀳𑀸𑀲𑀼 𑀉𑀧𑀸𑀢𑀺𑀧𑀦𑁆𑀦𑀸𑀢𑀺 𑀓𑀸𑀫𑀢𑀡𑁆𑀳𑀸𑀤𑀻𑀲𑀼 𑀦𑀸𑀥𑀺𑀫𑀼𑀢𑁆𑀢𑀸. 𑀯𑀺𑀢𑀭𑁂𑀬𑁆𑀬𑀸𑀢𑀺 𑀯𑀺𑀢𑀭𑀺𑀢𑁆𑀯𑀸. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸𑀤𑀺𑀙𑀩𑁆𑀩𑀺𑀥𑀸. 𑀪𑀯𑀸𑀪𑀯𑀸𑀬𑀸𑀢𑀺 𑀲𑀲𑁆𑀲𑀢𑀸𑀬 𑀯𑀸 𑀉𑀘𑁆𑀙𑁂𑀤𑀸𑀬 𑀯𑀸. 𑀅𑀣 𑀯𑀸 𑀪𑀯𑀲𑁆𑀲 𑀅𑀪𑀯𑀸𑀬 𑀪𑀯𑀸𑀪𑀯𑀸𑀬, 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀤𑀁 𑀧𑀦 ‘‘𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺 𑀇𑀫𑀲𑁆𑀲 𑀯𑀺𑀢𑁆𑀣𑀸𑀭𑀯𑀘𑀦𑀁.

𑁫𑁦𑁪. 𑀬𑁂 𑀯𑀻𑀢𑀭𑀸𑀕𑀸…𑀧𑁂… 𑀲𑀫𑀺𑀢𑀸𑀯𑀺𑀦𑁄𑀢𑀺 𑀲𑀫𑀺𑀢𑀯𑀦𑁆𑀢𑁄, 𑀓𑀺𑀮𑁂𑀲𑀯𑀽𑀧𑀲𑀫𑀓𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀫𑀺𑀢𑀸𑀯𑀺𑀢𑀢𑁆𑀢𑀸 𑀘 𑀯𑀻𑀢𑀭𑀸𑀕𑀸 𑀅𑀓𑁄𑀧𑀸. 𑀇𑀥 𑀯𑀺𑀧𑁆𑀧𑀳𑀸𑀬𑀸𑀢𑀺 𑀇𑀥𑀮𑁄𑀓𑁂 𑀯𑀢𑁆𑀢𑀫𑀸𑀦𑁂 𑀔𑀦𑁆𑀥𑁂 𑀯𑀺𑀳𑀸𑀬, 𑀢𑀢𑁄 𑀧𑀭𑀁 𑀬𑁂𑀲𑀁 𑀕𑀫𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑁄 𑀧𑀭𑀁 ‘‘𑀬𑁂 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀕𑀳𑀸 𑀘𑀭𑀦𑁆𑀢𑀺, 𑀲𑀼𑀲𑀜𑁆𑀜𑀢𑀢𑁆𑀢𑀸 𑀢𑀲𑀭𑀁𑀯 𑀉𑀚𑁆𑀚𑀼’’𑀦𑁆𑀢𑀺 𑀇𑀫𑀫𑁆𑀧𑀺 𑀕𑀸𑀣𑀁 𑀓𑁂𑀘𑀺 𑀧𑀞𑀦𑁆𑀢𑀺.

𑁫𑁦𑁬-𑁮. 𑀚𑀳𑀺𑀢𑁆𑀯𑀸𑀢𑀺 𑀳𑀺𑀢𑁆𑀯𑀸. ‘‘𑀚𑀳𑀺𑀢𑁆𑀯𑀸𑀦𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀅𑀢𑁆𑀢𑀤𑀻𑀧𑀸𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂 𑀏𑀯 𑀅𑀢𑁆𑀢𑀦𑁄 𑀤𑀻𑀧𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀔𑀻𑀡𑀸𑀲𑀯𑀸 𑀯𑀼𑀘𑁆𑀘𑀦𑁆𑀢𑀺. 𑀬𑁂 𑀳𑁂𑀢𑁆𑀣𑀸𑀢𑀺 𑀳𑀓𑀸𑀭𑁄 𑀦𑀺𑀧𑀸𑀢𑁄 𑀧𑀤𑀧𑀽𑀭𑀡𑀫𑀢𑁆𑀢𑁂. 𑀅𑀬𑀁 𑀧𑀦𑀢𑁆𑀣𑁄 𑁋 𑀬𑁂 𑀏𑀢𑁆𑀣 𑀔𑀦𑁆𑀥𑀸𑀬𑀢𑀦𑀸𑀤𑀺𑀲𑀦𑁆𑀢𑀸𑀦𑁂 𑀬𑀣𑀸 𑀇𑀤𑀁 𑀔𑀦𑁆𑀥𑀸𑀬𑀢𑀦𑀸𑀤𑀺 𑀢𑀣𑀸 𑀚𑀸𑀦𑀦𑁆𑀢𑀺, 𑀬𑀁𑀲𑀪𑀸𑀯𑀁 𑀢𑀁𑀲𑀪𑀸𑀯𑀁𑀬𑁂𑀯 𑀲𑀜𑁆𑀚𑀸𑀦𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀚𑀸𑀦𑀦𑁆𑀢𑀸. 𑀅𑀬𑀫𑀦𑁆𑀢𑀺𑀫𑀸 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄𑀢𑀺 𑀅𑀬𑀁 𑀦𑁄 𑀅𑀦𑁆𑀢𑀺𑀫𑀸 𑀚𑀸𑀢𑀺, 𑀇𑀤𑀸𑀦𑀺 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄𑀢𑀺 𑀏𑀯𑀜𑁆𑀘 𑀬𑁂 𑀚𑀸𑀦𑀦𑁆𑀢𑀻𑀢𑀺.

𑁫𑁦𑁯. 𑀬𑁄 𑀯𑁂𑀤𑀕𑀽𑀢𑀺 𑀇𑀤𑀸𑀦𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀢𑀺𑀫𑀸𑀢𑀺 𑀙𑀲𑀢𑀢𑀯𑀺𑀳𑀸𑀭𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑀫𑁆𑀩𑁄𑀥𑀺𑀧𑀢𑁆𑀢𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄. 𑀲𑀭𑀡𑀁 𑀩𑀳𑀽𑀦𑀦𑁆𑀢𑀺 𑀩𑀳𑀽𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀪𑀬𑀯𑀺𑀳𑀺𑀁𑀲𑀦𑁂𑀦 𑀲𑀭𑀡𑀪𑀽𑀢𑁄.

𑁫𑁧𑁦. 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀅𑀤𑁆𑀥𑀸 𑀅𑀫𑁄𑀖𑀸’’𑀢𑀺. 𑀢𑀢𑁆𑀣 𑀢𑁆𑀯𑀜𑁆𑀳𑁂𑀢𑁆𑀣 𑀚𑀸𑀦𑀸𑀲𑀺 𑀬𑀣𑀸 𑀢𑀣𑀸 𑀇𑀤𑀦𑁆𑀢𑀺 𑀢𑁆𑀯𑀜𑁆𑀳𑀺 𑀏𑀢𑁆𑀣 𑀮𑁄𑀓𑁂 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀁 𑀬𑀣𑀸 𑀢𑀣𑀸 𑀚𑀸𑀦𑀸𑀲𑀺 𑀬𑀸𑀣𑀸𑀯𑀢𑁄 𑀚𑀸𑀦𑀸𑀲𑀺, 𑀬𑀸𑀤𑀺𑀲𑀁 𑀢𑀁 𑀢𑀸𑀤𑀺𑀲𑀫𑁂𑀯 𑀚𑀸𑀦𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄𑀢𑀺 𑀢𑀣𑀸 𑀳𑀺 𑀢𑁂 𑀏𑀲𑀸 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑀸 𑀬𑀁 𑀬𑀁 𑀇𑀘𑁆𑀙𑀲𑀺, 𑀢𑀁 𑀢𑀁 𑀚𑀸𑀦𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁧𑁧. 𑀏𑀯𑀁 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀧𑀲𑀁𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀤𑀸𑀬 𑀬𑀜𑁆𑀜𑀲𑀫𑁆𑀧𑀤𑀁 𑀜𑀢𑁆𑀯𑀸 𑀤𑀸𑀬𑀓𑀲𑀫𑁆𑀧𑀤𑀸𑀬𑀧𑀺 𑀢𑀁 𑀙𑀴𑀗𑁆𑀕𑀧𑀭𑀺𑀧𑀽𑀭𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀢𑀼𑀓𑀸𑀫𑁄 ‘‘𑀬𑁄 𑀬𑀸𑀘𑀬𑁄𑀕𑁄’’𑀢𑀺 𑀉𑀢𑁆𑀢𑀭𑀺𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑁄 𑀬𑀸𑀘𑀬𑁄𑀕𑁄 𑀤𑀤𑀁 𑀧𑀭𑁂𑀲𑀁 𑀬𑀚𑀢𑀺, 𑀢𑀲𑁆𑀲 𑀅𑀓𑁆𑀔𑀸𑀳𑀺 𑀫𑁂 𑀪𑀕𑀯𑀸 𑀬𑀜𑁆𑀜𑀲𑀫𑁆𑀧𑀤𑀦𑁆𑀢𑀺.

𑁫𑁧𑁨. 𑀅𑀣𑀲𑁆𑀲 𑀪𑀕𑀯𑀸 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀅𑀓𑁆𑀔𑀸𑀲𑀺. 𑀢𑀢𑁆𑀣𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀬𑀚𑀲𑁆𑀲𑀼 𑀫𑀸𑀖, 𑀬𑀚𑀫𑀸𑀦𑁄 𑀘 𑀲𑀩𑁆𑀩𑀢𑁆𑀣 𑀯𑀺𑀧𑁆𑀧𑀲𑀸𑀤𑁂𑀳𑀺 𑀘𑀺𑀢𑁆𑀢𑀁, 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺. 𑀏𑀯𑀁 𑀢𑁂 𑀬𑀸𑀬𑀁 𑁋

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 𑀲𑀫𑁆𑀧𑀤𑀸’’𑀢𑀺. (𑀅. 𑀦𑀺. 𑁬.𑁩𑁭; 𑀧𑁂. 𑀯. 𑁩𑁦𑁫) 𑁋

𑀬𑀜𑁆𑀜𑀲𑀫𑁆𑀧𑀤𑀸 𑀯𑀼𑀢𑁆𑀢𑀸, 𑀢𑀸𑀬 𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑁄 𑀪𑀯𑀺𑀲𑁆𑀲𑀢𑀺. 𑀢𑀢𑁆𑀣 𑀲𑀺𑀬𑀸 ‘‘𑀓𑀣𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀩𑁆𑀩’’𑀦𑁆𑀢𑀺? 𑀤𑁄𑀲𑀧𑁆𑀧𑀳𑀸𑀦𑁂𑀦. 𑀓𑀣𑀁 𑀤𑁄𑀲𑀧𑁆𑀧𑀳𑀸𑀦𑀁 𑀳𑁄𑀢𑀺? 𑀬𑀜𑁆𑀜𑀸𑀭𑀫𑁆𑀫𑀡𑀢𑀸𑀬. 𑀅𑀬𑀜𑁆𑀳𑀺 𑀆𑀭𑀫𑁆𑀫𑀡𑀁 𑀬𑀚𑀫𑀸𑀦𑀲𑁆𑀲 𑀬𑀜𑁆𑀜𑁄 𑀏𑀢𑁆𑀣 𑀧𑀢𑀺𑀝𑁆𑀞𑀸𑀬 𑀚𑀳𑀸𑀢𑀺 𑀤𑁄𑀲𑀁, 𑀅𑀬𑀜𑁆𑀳𑀺 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀤𑀻𑀧𑀯𑀺𑀳𑀢𑀫𑁄𑀳𑀦𑁆𑀥𑀓𑀸𑀭𑁂𑀦 𑀘𑀺𑀢𑁆𑀢𑁂𑀦 𑀬𑀚𑀫𑀸𑀦𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑀗𑁆𑀔𑀸𑀢𑁄 𑀬𑀜𑁆𑀜𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀲𑁄 𑀏𑀢𑁆𑀣 𑀬𑀜𑁆𑀜𑁂 𑀆𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀸𑀬 𑀤𑁂𑀬𑁆𑀬𑀥𑀫𑁆𑀫𑀧𑀘𑁆𑀘𑀬𑀁 𑀮𑁄𑀪𑀁, 𑀧𑀝𑀺𑀕𑁆𑀕𑀸𑀳𑀓𑀧𑀘𑁆𑀘𑀬𑀁 𑀓𑁄𑀥𑀁, 𑀢𑀤𑀼𑀪𑀬𑀦𑀺𑀤𑀸𑀦𑀁 𑀫𑁄𑀳𑀦𑁆𑀢𑀺 𑀏𑀯𑀁 𑀢𑀺𑀯𑀺𑀥𑀫𑁆𑀧𑀺 𑀚𑀳𑀸𑀢𑀺 𑀤𑁄𑀲𑀁. 𑀲𑁄 𑀏𑀯𑀁 𑀪𑁄𑀕𑁂𑀲𑀼 𑀯𑀻𑀢𑀭𑀸𑀕𑁄, 𑀲𑀢𑁆𑀢𑁂𑀲𑀼 𑀘 𑀧𑀯𑀺𑀦𑁂𑀬𑁆𑀬 𑀤𑁄𑀲𑀁 𑀢𑀧𑁆𑀧𑀳𑀸𑀦𑁂𑀦𑁂𑀯 𑀧𑀳𑀻𑀦𑀧𑀜𑁆𑀘𑀦𑀻𑀯𑀭𑀡𑁄 𑀅𑀦𑀼𑀓𑁆𑀓𑀫𑁂𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑀁 𑀅𑀧𑀭𑀺𑀫𑀸𑀡𑀲𑀢𑁆𑀢𑀨𑀭𑀡𑁂𑀦 𑀏𑀓𑀲𑀢𑁆𑀢𑁂 𑀯𑀸 𑀅𑀦𑀯𑀲𑁂𑀲𑀨𑀭𑀡𑁂𑀦 𑀅𑀧𑁆𑀧𑀫𑀸𑀡𑀁 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀪𑀸𑀯𑁂𑀦𑁆𑀢𑁄 𑀧𑀼𑀦 𑀪𑀸𑀯𑀦𑀸𑀯𑁂𑀧𑀼𑀮𑁆𑀮𑀢𑁆𑀣𑀁, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀢𑀢𑀁 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀢𑀫𑁂𑀯 𑀫𑁂𑀢𑁆𑀢𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀲𑀩𑁆𑀩𑀸 𑀤𑀺𑀲𑀸 𑀨𑀭𑀢𑁂 𑀅𑀧𑁆𑀧𑀫𑀜𑁆𑀜𑀦𑁆𑀢𑀺.

𑁫𑁧𑁪. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀫𑁂𑀢𑁆𑀢𑀁 ‘‘𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑁄 𑀅𑀬’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀯𑀺𑀲𑀬𑀸𑀢𑀻𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀁 𑀲𑀼𑀢𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀲𑀜𑁆𑀚𑀸𑀢𑀲𑀩𑁆𑀩𑀜𑁆𑀜𑀼𑀲𑀫𑁆𑀪𑀸𑀯𑀦𑁄 𑀪𑀕𑀯𑀢𑀺 𑀅𑀢𑁆𑀢𑀦𑀸 𑀩𑁆𑀭𑀳𑁆𑀫𑀮𑁄𑀓𑀸𑀥𑀺𑀫𑀼𑀢𑁆𑀢𑀢𑁆𑀢𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀫𑁂𑀯 𑀘 𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀜𑁆𑀘 𑀫𑀜𑁆𑀜𑀫𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑁄 𑀲𑀼𑀚𑁆𑀛𑀢𑀻’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀭 𑀘 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀁 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀓𑁄 𑀲𑀼𑀚𑁆𑀛𑀢𑀺 𑀫𑀼𑀘𑁆𑀘𑀢𑀻’’𑀢𑀺, 𑀅𑀓𑀭𑁄𑀦𑁆𑀢𑀁 𑀲𑀦𑁆𑀥𑀸𑀬 ‘‘𑀩𑀚𑁆𑀛𑀢𑀻 𑀘𑀸’’𑀢𑀺. 𑀓𑁂𑀦𑀢𑁆𑀢𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀲𑀓𑁆𑀔𑀺 𑀩𑁆𑀭𑀳𑁆𑀫𑀚𑁆𑀚𑀤𑀺𑀝𑁆𑀞𑁄𑀢𑀺 𑀩𑁆𑀭𑀳𑁆𑀫𑀸 𑀅𑀚𑁆𑀚 𑀲𑀓𑁆𑀔𑀺 𑀤𑀺𑀝𑁆𑀞𑁄. 𑀲𑀘𑁆𑀘𑀦𑁆𑀢𑀺 𑀪𑀕𑀯𑀢𑁄 𑀩𑁆𑀭𑀳𑁆𑀫𑀲𑀫𑀢𑁆𑀢𑀁 𑀆𑀭𑀩𑁆𑀪 𑀅𑀘𑁆𑀘𑀸𑀤𑀭𑁂𑀦 𑀲𑀧𑀣𑀁 𑀓𑀭𑁄𑀢𑀺. 𑀓𑀣𑀁 𑀉𑀧𑀧𑀚𑁆𑀚𑀢𑀻𑀢𑀺 𑀅𑀘𑁆𑀘𑀸𑀤𑀭𑁂𑀦𑁂𑀯 𑀧𑀼𑀦𑀧𑀺 𑀧𑀼𑀘𑁆𑀙𑀢𑀺. 𑀚𑀼𑀢𑀺𑀫𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀫𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀼𑀚𑁆𑀛𑀢𑀺 𑀫𑀼𑀘𑁆𑀘𑀢𑀺 𑀘, 𑀢𑀣𑀸𑀭𑀽𑀧𑁄 𑀘 𑀩𑁆𑀭𑀳𑁆𑀫𑀮𑁄𑀓𑀁 𑀦 𑀕𑀘𑁆𑀙𑀢𑀺. 𑀬𑁄 𑀧𑀦 𑀫𑁂𑀢𑁆𑀢𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀦𑁆𑀢𑀸 𑀏𑀲𑀸 𑀲𑀫𑀸𑀧𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀁 𑀅𑀲𑁆𑀲𑀸𑀤𑁂𑀢𑀺, 𑀲𑁄 𑀩𑀚𑁆𑀛𑀢𑀺. 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀘 𑀢𑁂𑀦𑁂𑀯 𑀛𑀸𑀦𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀬𑁄 𑀲𑀼𑀚𑁆𑀛𑀢𑀺 𑀫𑀼𑀘𑁆𑀘𑀢𑀺 𑀘, 𑀢𑀲𑁆𑀲 𑀩𑁆𑀭𑀳𑁆𑀫𑀮𑁄𑀓𑀕𑀫𑀦𑀁 𑀅𑀦𑀦𑀼𑀚𑀸𑀦𑀦𑁆𑀢𑁄 𑀅𑀦𑀸𑀫𑀲𑀺𑀢𑁆𑀯𑀸𑀯 𑀢𑀁 𑀧𑀼𑀕𑁆𑀕𑀮𑀁 𑀬𑁄 𑀩𑀚𑁆𑀛𑀢𑀺. 𑀢𑀲𑁆𑀲 𑀢𑁂𑀦 𑀛𑀸𑀦𑁂𑀦 𑀩𑁆𑀭𑀳𑁆𑀫𑀮𑁄𑀓𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀧𑁆𑀧𑀸𑀬𑁂𑀦 𑀦𑀬𑁂𑀦 ‘‘𑀬𑁄 𑀬𑀚𑀢𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳.

𑁫𑁧𑁫. 𑀢𑀢𑁆𑀣 𑀢𑀺𑀯𑀺𑀥𑀦𑁆𑀢𑀺 𑀢𑀺𑀓𑀸𑀮𑀧𑁆𑀧𑀲𑀸𑀤𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦 𑀤𑀸𑀬𑀓𑀢𑁄 𑀅𑀗𑁆𑀕𑀢𑁆𑀢𑀬𑀁 𑀤𑀲𑁆𑀲𑁂𑀢𑀺. 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂𑀪𑀺 𑀢𑀸𑀤𑀻𑀢𑀺 𑀢𑀜𑁆𑀘 𑀲𑁄 𑀢𑀸𑀤𑀺𑀲𑁄 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀲𑀸𑀥𑀓𑁄 𑀧𑀼𑀕𑁆𑀕𑀮𑁄 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀤𑀓𑁆𑀔𑀺𑀡𑁂𑀬𑁆𑀬𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀲𑀸𑀥𑁂𑀬𑁆𑀬 𑀲𑀫𑁆𑀧𑀸𑀤𑁂𑀬𑁆𑀬. 𑀇𑀫𑀺𑀦𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀅𑀗𑁆𑀕𑀢𑁆𑀢𑀬𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀬𑀚𑀺𑀢𑁆𑀯𑀸 𑀲𑀫𑁆𑀫𑀸 𑀬𑀸𑀘𑀬𑁄𑀕𑁄𑀢𑀺 𑀏𑀯𑀁 𑀫𑁂𑀢𑁆𑀢𑀚𑁆𑀛𑀸𑀦𑀧𑀤𑀝𑁆𑀞𑀸𑀦𑀪𑀸𑀯𑁂𑀦 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀬𑀜𑁆𑀜𑀁 𑀲𑀫𑁆𑀫𑀸 𑀬𑀚𑀺𑀢𑁆𑀯𑀸 𑀲𑁄 𑀬𑀸𑀘𑀬𑁄𑀕𑁄 𑀢𑁂𑀦 𑀙𑀴𑀗𑁆𑀕𑀬𑀜𑁆𑀜𑀽𑀧𑀦𑀺𑀲𑁆𑀲𑀬𑁂𑀦 𑀫𑁂𑀢𑁆𑀢𑀚𑁆𑀛𑀸𑀦𑁂𑀦 𑀉𑀧𑀧𑀚𑁆𑀚𑀢𑀺 𑀩𑁆𑀭𑀳𑁆𑀫𑀮𑁄𑀓𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀩𑁆𑀭𑀸𑀳𑁆𑀫𑀡𑀁 𑀲𑀫𑀼𑀲𑁆𑀲𑀸𑀳𑁂𑀦𑁆𑀢𑁄 𑀤𑁂𑀲𑀦𑀁 𑀲𑀫𑀸𑀧𑁂𑀲𑀺. 𑀲𑁂𑀲𑀁 𑀲𑀩𑁆𑀩𑀕𑀸𑀣𑀸𑀲𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀢𑁄 𑀧𑀭𑀜𑁆𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀫𑀸𑀖𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀪𑀺𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸. 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁂𑀧𑀺 𑀘𑀲𑁆𑀲 𑀧𑀼𑀩𑁆𑀩𑀲𑀤𑀺𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀅𑀧𑀼𑀩𑁆𑀩𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀺𑀳𑀭𑀦𑁆𑀢𑀸 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀦𑀸𑀫𑀁. 𑀢𑀁 𑀓𑀺𑀭 𑀯𑁂𑀴𑀽𑀳𑀺 𑀘 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀘 𑀧𑀸𑀓𑀸𑀭𑁂𑀦, 𑀕𑁄𑀧𑀼𑀭𑀤𑁆𑀯𑀸𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁, 𑀢𑁂𑀦 ‘‘𑀯𑁂𑀴𑀼𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼, 𑀢𑁂𑀦 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸 𑀦𑀸𑀫 𑀓𑀸𑀴𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀢𑁆𑀣 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀆𑀕𑀢𑁄 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀺𑀯𑀸𑀲𑁂𑀬𑁆𑀬𑀁 𑀲𑀼𑀧𑀺. 𑀧𑀭𑀺𑀚𑀦𑁄𑀧𑀺𑀲𑁆𑀲 ‘‘𑀲𑀼𑀢𑁆𑀢𑁄 𑀭𑀸𑀚𑀸’’𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀸𑀫𑀺. 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀲𑀼𑀲𑀺𑀭𑀭𑀼𑀓𑁆𑀔𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑀸𑀴𑀓𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺, 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀫𑀫 𑀓𑀸𑀴𑀓𑀸𑀬 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 𑀢𑀢𑁆𑀣 𑀦𑀺𑀯𑀸𑀧𑀁 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀦𑀜𑁆𑀘 𑀖𑁄𑀲𑀸𑀧𑁂𑀲𑀺. 𑀢𑀲𑁆𑀫𑀸 𑀢𑀁 𑀢𑀢𑁄 𑀧𑀪𑀼𑀢𑀺 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧𑁄’’𑀢𑀺 𑀲𑀗𑁆𑀔𑀁 𑀕𑀢𑀁.

𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀢𑀺 𑀲𑀪𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀩𑀸𑀳𑀺𑀭 𑀧𑀩𑁆𑀩𑀚𑁆𑀚𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬𑀸𑀢𑀺 𑀦 𑀫𑀸𑀢𑀸 𑀦 𑀧𑀺𑀢𑀸, 𑀅𑀧𑀺𑀘 𑀔𑁄 𑀧𑀦𑀲𑁆𑀲 𑀫𑀸𑀢𑀸 𑀯𑀺𑀬 𑀧𑀺𑀢𑀸 𑀯𑀺𑀬 𑀘 𑀳𑀺𑀢𑀚𑁆𑀛𑀸𑀲𑀬𑀢𑁆𑀢𑀸 𑀲𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸 𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀺𑀭 𑀓𑀲𑁆𑀲𑀧𑁂 𑀪𑀕𑀯𑀢𑀺 𑀧𑀢𑀺𑀝𑁆𑀞𑀺𑀢𑁂 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀘𑀭𑀺𑀬𑀸𑀦𑀼𑀭𑀽𑀧𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀘 𑀦𑀕𑀭𑀁 𑀕𑀘𑁆𑀙𑀦𑁆𑀢𑀺. 𑀅𑀧𑀭𑁂𑀦 𑀘 𑀲𑀫𑀬𑁂𑀦 𑀢𑀸𑀯𑀢𑀓𑀫𑁆𑀧𑀺 𑀅𑀭𑀜𑁆𑀜𑁂 𑀯𑀺𑀧𑁆𑀧𑀯𑀸𑀲𑀁 𑀅𑀭𑁄𑀘𑀬𑀫𑀸𑀦𑀸 𑀢𑀢𑁆𑀣𑁂𑀯 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀁𑀲𑀼, 𑀏𑀯𑀁 𑀯𑀺𑀳𑀭𑀦𑁆𑀢𑀸𑀧𑀺 𑀦 𑀘 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀁𑀲𑀼. 𑀢𑀢𑁄 𑀦𑁂𑀲𑀁 𑀅𑀳𑁄𑀲𑀺 𑁋 ‘‘𑀫𑀬𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑀸 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑀸 𑀳𑁄𑀫, 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑁂𑀦 𑀘 𑀦 𑀲𑀓𑁆𑀓𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀥𑀺𑀕𑀦𑁆𑀢𑀼𑀁, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀸𑀧𑀺 𑀤𑀼𑀓𑁆𑀔𑀸, 𑀳𑀦𑁆𑀤 𑀫𑀬𑀁 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼.

𑀅𑀣 𑀦𑁂𑀲𑀁 𑀫𑀳𑀸𑀣𑁂𑀭𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀤𑀳𑁂𑀯 𑀙𑀴𑀪𑀺𑀜𑁆𑀜𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀇𑀤𑁆𑀥𑀺𑀬𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀅𑀦𑁄𑀢𑀢𑁆𑀢𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀽𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀼𑀦 𑀅𑀜𑁆𑀜𑀫𑁆𑀧𑀺 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀦𑁄𑀢𑀢𑁆𑀢𑀉𑀤𑀓𑀜𑁆𑀘 𑀦𑀸𑀕𑀮𑀢𑀸𑀤𑀦𑁆𑀢𑀧𑁄𑀡𑀜𑁆𑀘 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀧𑀲𑁆𑀲𑀣𑀸𑀯𑀼𑀲𑁄 𑀫𑀫𑀸𑀦𑀼𑀪𑀸𑀯𑀁, 𑀅𑀬𑀁 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑁄, 𑀇𑀤𑀁 𑀳𑀺𑀫𑀯𑀦𑁆𑀢𑀢𑁄 𑀉𑀤𑀓𑀤𑀦𑁆𑀢𑀧𑁄𑀡𑀁 𑀆𑀪𑀢𑀁, 𑀇𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣, 𑀏𑀯𑀸𑀳𑀁 𑀢𑀼𑀫𑁆𑀳𑁂 𑀲𑀤𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀁 𑀲𑀼𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀓𑀢𑀓𑀺𑀘𑁆𑀘𑀸, 𑀢𑀼𑀫𑁆𑀳𑁂𑀳𑀺 𑀲𑀳 𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀅𑀫𑁆𑀳𑀸𑀓𑀁 𑀧𑀧𑀜𑁆𑀘𑁄, 𑀫𑀸 𑀤𑀸𑀦𑀺 𑀢𑀼𑀫𑁆𑀳𑁂 𑀧𑀼𑀦 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀫𑀺𑀢𑁆𑀣𑀸’’𑀢𑀺. 𑀲𑁄 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑁂 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀓𑁆𑀓𑀸𑀫𑀺.

𑀢𑀢𑁄 𑀢𑁂𑀲𑀁 𑀏𑀓𑁄 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀧𑀜𑁆𑀘𑀸𑀪𑀺𑀜𑁆𑀜𑁄 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀲𑁄𑀧𑀺 𑀢𑀣𑁂𑀯 𑀅𑀓𑀸𑀲𑀺, 𑀇𑀢𑀭𑁂𑀦 𑀘 𑀧𑀝𑀺𑀓𑁆𑀔𑀺𑀢𑁆𑀢𑁄 𑀢𑀣𑁂𑀯 𑀅𑀕𑀫𑀸𑀲𑀺. 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀧𑀩𑁆𑀩𑀢𑀁 𑀆𑀭𑀼𑀳𑀦𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀦𑀥𑀺𑀕𑀦𑁆𑀢𑁆𑀯𑀸𑀯 𑀓𑀸𑀮𑀓𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀔𑀻𑀡𑀸𑀲𑀯𑀢𑁆𑀣𑁂𑀭𑁄𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀦𑀸𑀕𑀸𑀫𑀻 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀤𑁂𑀯𑀧𑀼𑀢𑁆𑀢𑁄 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑀸 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀥𑀻𑀢𑀸, 𑀢𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀫𑁆𑀳𑀸𑀓𑀁 𑀥𑀻𑀢𑀸 𑀲𑀫𑀬𑀦𑁆𑀢𑀭𑀁 𑀚𑀸𑀦𑀸𑀢𑀽’’𑀢𑀺 𑀏𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀼𑀁. 𑀢𑀲𑁆𑀲𑁂𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀸𑀬 𑀲𑀤𑁆𑀥𑀺𑀁 𑀯𑀺𑀧𑁆𑀧𑀝𑀺𑀧𑀚𑁆𑀚𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀢𑀁 𑀕𑀩𑁆𑀪𑀺𑀦𑀺𑀁 𑀤𑀺𑀲𑁆𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀦𑀺𑀓𑁆𑀓𑀟𑁆𑀠𑀺𑀁𑀲𑀼. 𑀲𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀪𑀸𑀬𑀁 𑀯𑀺𑀚𑀸𑀬𑀺, 𑀢𑁂𑀦𑀲𑁆𑀲 ‘‘𑀲𑀪𑀺𑀬𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀲𑁄𑀧𑀺 𑀲𑀪𑀺𑀬𑁄 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀦𑀸𑀲𑀢𑁆𑀣𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀫𑀳𑀸𑀯𑀸𑀤𑀻 𑀳𑀼𑀢𑁆𑀯𑀸 𑀯𑀸𑀤𑀓𑁆𑀔𑀺𑀢𑁆𑀢𑀢𑀸𑀬 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀺𑀘𑀭𑀦𑁆𑀢𑁄 𑀅𑀢𑁆𑀢𑀦𑁄 𑀲𑀤𑀺𑀲𑀁 𑀯𑀸𑀤𑀺𑀁 𑀅𑀤𑀺𑀲𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀅𑀲𑁆𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀢𑀢𑁆𑀣 𑀯𑀲𑀢𑀺.

𑀅𑀣 𑀪𑀕𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀆𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀺 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀲𑀪𑀺𑀬𑁄 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀦 𑀚𑀸𑀦𑀸𑀢𑀺. 𑀅𑀣 𑀲𑁄 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀇𑀫𑀸𑀳𑀁 𑀯𑀺𑀲𑁂𑀲𑀁 𑀓𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀫𑀡𑀥𑀫𑁆𑀫𑀓𑀺𑀭𑀺𑀬𑀁 𑀢𑁂 𑀘 𑀲𑀳𑀸𑀬𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀢𑁂𑀲𑀼 𑀏𑀓𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀏𑀓𑁄 𑀇𑀤𑀸𑀦𑀺 𑀓𑀢𑁆𑀣𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀫𑁆𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀜𑀢𑁆𑀯𑀸 ‘‘𑀳𑀦𑁆𑀤 𑀦𑀁 𑀩𑀼𑀤𑁆𑀥𑀼𑀧𑀲𑁂𑀯𑀦𑀸𑀬 𑀦𑀺𑀬𑁄𑀚𑁂𑀫𑀻’’𑀢𑀺 𑀯𑀻𑀲𑀢𑀺 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀢𑀲𑁆𑀲 𑀅𑀲𑁆𑀲𑀫𑀫𑀸𑀕𑀫𑁆𑀫 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀲𑀪𑀺𑀬, 𑀲𑀪𑀺𑀬𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 𑀦𑀺𑀤𑁆𑀤𑀸𑀬𑀫𑀸𑀦𑁄 𑀢𑀺𑀓𑁆𑀔𑀢𑁆𑀢𑀼𑀁 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀧𑀜𑁆𑀚𑀮𑀺𑀓𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀢𑀁 𑀩𑁆𑀭𑀳𑁆𑀫𑀸 𑀆𑀳 𑁋 ‘‘𑀅𑀳𑀁 𑀲𑀪𑀺𑀬 𑀢𑀯𑀢𑁆𑀣𑀸𑀬 𑀯𑀻𑀲𑀢𑀺 𑀧𑀜𑁆𑀳𑁂 𑀆𑀳𑀭𑀺𑀁, 𑀢𑁂 𑀢𑁆𑀯𑀁 𑀉𑀕𑁆𑀕𑀡𑁆𑀳. 𑀬𑁄 𑀘 𑀢𑁂 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸𑀲𑀻’’𑀢𑀺. 𑀇𑀫𑀁 𑀤𑁂𑀯𑀧𑀼𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬 𑀧𑀜𑁆𑀳𑀸 𑀉𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀻’’𑀢𑀺. 𑀉𑀤𑁆𑀤𑀺𑀝𑁆𑀞𑀸𑀢𑀺 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀯𑀼𑀢𑁆𑀢𑀸, 𑀦 𑀯𑀺𑀪𑀗𑁆𑀕𑁂𑀦.

𑀏𑀯𑀁 𑀯𑀼𑀢𑁆𑀢𑁂 𑀘 𑀦𑁂 𑀲𑀪𑀺𑀬𑁄 𑀏𑀓𑀯𑀘𑀦𑁂𑀦𑁂𑀯 𑀧𑀤𑀧𑀝𑀺𑀧𑀸𑀝𑀺𑀬𑀸 𑀉𑀕𑁆𑀕𑀳𑁂𑀲𑀺. 𑀅𑀣 𑀲𑁄 𑀩𑁆𑀭𑀳𑁆𑀫𑀸 𑀚𑀸𑀦𑀦𑁆𑀢𑁄𑀧𑀺 𑀢𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀦𑀸𑀘𑀺𑀓𑁆𑀔𑀺. ‘‘𑀅𑀢𑁆𑀣𑀁 𑀕𑀯𑁂𑀲𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀬𑀫𑁂𑀯 𑀲𑀢𑁆𑀣𑀸𑀭𑀁 𑀜𑀲𑁆𑀲𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀼𑀘𑁆𑀙𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸 𑀧𑀦𑀸𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳 𑁋 ‘‘𑀬𑁄 𑀢𑁂 𑀲𑀪𑀺𑀬…𑀧𑁂… 𑀘𑀭𑁂𑀬𑁆𑀬𑀸𑀲𑀻’’𑀢𑀺. 𑀣𑁂𑀭𑀕𑀸𑀣𑀸𑀲𑀼 𑀧𑀦 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀲𑀪𑀺𑀬𑀢𑁆𑀣𑁂𑀭𑀸𑀧𑀤𑀸𑀦𑀁 𑀯𑀡𑁆𑀡𑁂𑀦𑁆𑀢𑀸 𑀪𑀡𑀦𑁆𑀢𑀺 ‘‘𑀲𑀸 𑀘𑀲𑁆𑀲 𑀫𑀸𑀢𑀸 𑀅𑀢𑁆𑀢𑀦𑁄 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀚𑀺𑀕𑀼𑀘𑁆𑀙𑀫𑀸𑀦𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀸, 𑀢𑀸𑀬 𑀩𑁆𑀭𑀳𑁆𑀫𑀤𑁂𑀯𑀢𑀸𑀬 𑀢𑁂 𑀧𑀜𑁆𑀳𑀸 𑀉𑀤𑁆𑀤𑀺𑀝𑁆𑀞𑀸’’𑀢𑀺.

𑀬𑁂 𑀢𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀁 𑀉𑀤𑁆𑀤𑁂𑀲𑀧𑀘𑁆𑀘𑀼𑀤𑁆𑀤𑁂𑀲𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀘 𑀲𑀫𑀡𑀸 𑀘𑁂𑀯 𑀩𑁆𑀭𑀸𑀳𑁆𑀫𑀡𑀸 𑀘. 𑀲𑀗𑁆𑀖𑀺𑀦𑁄𑀢𑀺 𑀕𑀡𑀯𑀦𑁆𑀢𑁄. 𑀕𑀡𑀺𑀦𑁄𑀢𑀺 𑀲𑀢𑁆𑀣𑀸𑀭𑁄, ‘‘𑀲𑀩𑁆𑀩𑀜𑁆𑀜𑀼𑀦𑁄 𑀫𑀬’’𑀦𑁆𑀢𑀺 𑀏𑀯𑀁 𑀧𑀝𑀺𑀜𑁆𑀜𑀸𑀢𑀸𑀭𑁄. 𑀕𑀡𑀸𑀘𑀭𑀺𑀬𑀸𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀧𑀩𑁆𑀩𑀚𑀺𑀢𑀕𑀳𑀝𑁆𑀞𑀕𑀡𑀲𑁆𑀲 𑀆𑀘𑀭𑀺𑀬𑀸. 𑀜𑀸𑀢𑀸𑀢𑀺 𑀅𑀪𑀺𑀜𑁆𑀜𑀸𑀢𑀸, 𑀯𑀺𑀲𑁆𑀲𑀼𑀢𑀸 𑀧𑀸𑀓𑀝𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑀲𑁆𑀲𑀺𑀦𑁄𑀢𑀺 𑀮𑀸𑀪𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸. 𑀢𑀺𑀢𑁆𑀣𑀓𑀭𑀸𑀢𑀺 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑁂𑀳𑀺 𑀑𑀢𑀭𑀺𑀢𑀩𑁆𑀩𑀸𑀦𑀁 𑀑𑀕𑀸𑀳𑀺𑀢𑀩𑁆𑀩𑀸𑀦𑀁 𑀤𑀺𑀝𑁆𑀞𑀺𑀢𑀺𑀢𑁆𑀣𑀸𑀦𑀁 𑀓𑀢𑁆𑀢𑀸𑀭𑁄. 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲𑀸𑀢𑀺 ‘‘𑀲𑀸𑀥𑀯𑁄 𑀏𑀢𑁂 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀏𑀯𑀁 𑀩𑀳𑀼𑀚𑀦𑀲𑁆𑀲 𑀲𑀫𑁆𑀫𑀢𑀸.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀓𑀢𑀫𑁂 𑀢𑁂𑀢𑀺 𑀘𑁂-𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀽𑀭𑀡𑁄𑀢𑀺 𑀦𑀸𑀫𑀁, 𑀓𑀲𑁆𑀲𑀧𑁄𑀢𑀺 𑀕𑁄𑀢𑁆𑀢𑀁. 𑀲𑁄 𑀓𑀺𑀭 𑀚𑀸𑀢𑀺𑀬𑀸 𑀤𑀸𑀲𑁄, 𑀤𑀸𑀲𑀲𑀢𑀁 𑀧𑀽𑀭𑁂𑀦𑁆𑀢𑁄 𑀚𑀸𑀢𑁄. 𑀢𑁂𑀦𑀲𑁆𑀲 ‘‘𑀧𑀽𑀭𑀡𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀧𑀮𑀸𑀬𑀺𑀢𑁆𑀯𑀸 𑀧𑀦 𑀦𑀕𑁆𑀕𑁂𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀓𑀲𑁆𑀲𑀧𑁄 𑀅𑀳’’𑀦𑁆𑀢𑀺 𑀕𑁄𑀢𑁆𑀢𑀁 𑀉𑀤𑁆𑀤𑀺𑀲𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀘 𑀧𑀘𑁆𑀘𑀜𑁆𑀜𑀸𑀲𑀺. 𑀫𑀓𑁆𑀔𑀮𑀻𑀢𑀺 𑀦𑀸𑀫𑀁, 𑀕𑁄𑀲𑀸𑀮𑀸𑀬 𑀚𑀸𑀢𑀢𑁆𑀢𑀸 𑀕𑁄𑀲𑀸𑀮𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑁄𑀧𑀺 𑀓𑀺𑀭 𑀚𑀸𑀢𑀺𑀬𑀸 𑀤𑀸𑀲𑁄 𑀏𑀯, 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀘 𑀧𑀘𑁆𑀘𑀜𑁆𑀜𑀸𑀲𑀺. 𑀅𑀚𑀺𑀢𑁄𑀢𑀺 𑀦𑀸𑀫𑀁, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀓𑁂𑀲𑀓𑀫𑁆𑀩𑀮𑀁 𑀥𑀸𑀭𑁂𑀢𑀺, 𑀢𑁂𑀦 𑀓𑁂𑀲𑀓𑀫𑁆𑀩𑀮𑁄𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀧𑀓𑀼𑀥𑁄𑀢𑀺 𑀦𑀸𑀫𑀁, 𑀓𑀘𑁆𑀘𑀸𑀬𑀦𑁄𑀢𑀺 𑀕𑁄𑀢𑁆𑀢𑀁. 𑀅𑀧𑁆𑀧𑀺𑀘𑁆𑀙𑀯𑀲𑁂𑀦 𑀉𑀤𑀓𑁂 𑀚𑀻𑀯𑀲𑀜𑁆𑀜𑀸𑀬 𑀘 𑀦𑁆𑀳𑀸𑀦𑀫𑀼𑀔𑀥𑁄𑀯𑀦𑀸𑀤𑀺 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀲𑀜𑁆𑀘𑀬𑁄𑀢𑀺 𑀦𑀸𑀫𑀁, 𑀩𑁂𑀮𑀝𑁆𑀞𑁄 𑀧𑀦𑀲𑁆𑀲 𑀧𑀺𑀢𑀸, 𑀢𑀲𑁆𑀫𑀸 𑀩𑁂𑀮𑀝𑁆𑀞𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀦𑀺𑀕𑀡𑁆𑀞𑁄𑀢𑀺 𑀧𑀩𑁆𑀩𑀚𑁆𑀚𑀸𑀦𑀸𑀫𑁂𑀦, 𑀦𑀸𑀝𑀧𑀼𑀢𑁆𑀢𑁄𑀢𑀺 𑀧𑀺𑀢𑀼𑀦𑀸𑀫𑁂𑀦 𑀯𑀼𑀘𑁆𑀘𑀢𑀺. 𑀦𑀸𑀝𑁄𑀢𑀺 𑀓𑀺𑀭 𑀦𑀸𑀫𑀲𑁆𑀲 𑀧𑀺𑀢𑀸, 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀦𑀸𑀝𑀧𑀼𑀢𑁆𑀢𑁄, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀲𑀩𑁆𑀩𑁂𑀧𑀺 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀲𑀺𑀲𑁆𑀲𑀧𑀭𑀺𑀯𑀸𑀭𑀸 𑀅𑀳𑁂𑀲𑀼𑀁. 𑀢𑁂𑀢𑀺 𑀢𑁂 𑀙 𑀲𑀢𑁆𑀣𑀸𑀭𑁄. 𑀢𑁂 𑀧𑀜𑁆𑀳𑁂𑀢𑀺 𑀢𑁂 𑀯𑀻𑀲𑀢𑀺 𑀧𑀜𑁆𑀳𑁂. 𑀢𑁂𑀢𑀺 𑀢𑁂 𑀙 𑀲𑀢𑁆𑀣𑀸𑀭𑁄. 𑀦 𑀲𑀫𑁆𑀧𑀸𑀬𑀦𑁆𑀢𑀻𑀢𑀺 𑀦 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀓𑁄𑀧𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀯𑀺𑀮𑀪𑀸𑀯𑀁. 𑀤𑁄𑀲𑀦𑁆𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀢𑀁, 𑀢𑀤𑀼𑀪𑀬𑀫𑁆𑀧𑁂𑀢𑀁 𑀫𑀦𑁆𑀤𑀢𑀺𑀓𑁆𑀔𑀪𑁂𑀤𑀲𑁆𑀲 𑀓𑁄𑀥𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀧𑁆𑀧𑀢𑀻𑀢𑀢𑀸, 𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀢𑀼𑀓𑀭𑁄𑀦𑁆𑀢𑀻𑀢𑀺 𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀦 𑀧𑀓𑀸𑀲𑁂𑀦𑁆𑀢𑀺, 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺.

𑀳𑀻𑀦𑀸𑀬𑀸𑀢𑀺 𑀕𑀳𑀝𑁆𑀞𑀪𑀸𑀯𑀸𑀬. 𑀕𑀳𑀝𑁆𑀞𑀪𑀸𑀯𑁄 𑀳𑀺 𑀧𑀩𑁆𑀩𑀚𑁆𑀚𑀁 𑀉𑀧𑀦𑀺𑀥𑀸𑀬 𑀲𑀻𑀮𑀸𑀤𑀺𑀕𑀼𑀡𑀳𑀻𑀦𑀢𑁄 𑀳𑀻𑀦𑀓𑀸𑀫𑀲𑀼𑀔𑀧𑀝𑀺𑀲𑁂𑀯𑀦𑀢𑁄 𑀯𑀸 ‘‘𑀳𑀻𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀉𑀘𑁆𑀘𑀸 𑀧𑀩𑁆𑀩𑀚𑁆𑀚𑀸. 𑀆𑀯𑀢𑁆𑀢𑀺𑀢𑁆𑀯𑀸𑀢𑀺 𑀑𑀲𑀓𑁆𑀓𑀺𑀢𑁆𑀯𑀸. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀦𑁆𑀢𑀺 𑀓𑀸𑀫𑁂 𑀧𑀝𑀺𑀲𑁂𑀯𑁂𑀬𑁆𑀬𑀁. 𑀇𑀢𑀺 𑀓𑀺𑀭𑀲𑁆𑀲 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑀸𑀦𑀫𑁆𑀧𑀺 𑀧𑀩𑁆𑀩𑀚𑀺𑀢𑀸𑀦𑀁 𑀢𑀼𑀘𑁆𑀙𑀓𑀢𑁆𑀢𑀁 𑀤𑀺𑀲𑁆𑀯𑀸 𑀅𑀳𑁄𑀲𑀺. 𑀉𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦𑁂𑀯 𑀘 𑀆𑀕𑀦𑁆𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀻𑀫𑀁𑀲𑀫𑀸𑀦𑀲𑁆𑀲 𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀫𑁆𑀧𑀺 𑀔𑁄 𑀲𑀫𑀡𑁄’’𑀢𑀺 𑀘 ‘‘𑀬𑁂𑀧𑀺 𑀔𑁄 𑀢𑁂 𑀪𑁄𑀦𑁆𑀢𑁄’’𑀢𑀺 𑀘 ‘‘𑀲𑀫𑀡𑁄 𑀔𑁄 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀘𑀸𑀢𑀺 𑀏𑀯𑀫𑀸𑀤𑀺. 𑀢𑀢𑁆𑀣 𑀚𑀺𑀡𑁆𑀡𑀸𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀣𑁂𑀭𑀸𑀢𑀺 𑀅𑀢𑁆𑀢𑀦𑁄 𑀲𑀫𑀡𑀥𑀫𑁆𑀫𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸. 𑀭𑀢𑁆𑀢𑀜𑁆𑀜𑀽𑀢𑀺 𑀭𑀢𑀦𑀜𑁆𑀜𑀽, ‘‘𑀦𑀺𑀩𑁆𑀩𑀸𑀦𑀭𑀢𑀦𑀁 𑀚𑀸𑀦𑀸𑀫 𑀫𑀬’’𑀦𑁆𑀢𑀺 𑀏𑀯𑀁 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀮𑁄𑀓𑁂𑀦𑀸𑀧𑀺 𑀲𑀫𑁆𑀫𑀢𑀸, 𑀩𑀳𑀼𑀭𑀢𑁆𑀢𑀺𑀯𑀺𑀤𑀽 𑀯𑀸. 𑀘𑀺𑀭𑀁 𑀧𑀩𑁆𑀩𑀚𑀺𑀢𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑀸. 𑀦 𑀉𑀜𑁆𑀜𑀸𑀢𑀩𑁆𑀩𑁄𑀢𑀺 𑀦 𑀅𑀯𑀚𑀸𑀦𑀺𑀢𑀩𑁆𑀩𑁄, 𑀦 𑀦𑀻𑀘𑀁 𑀓𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀧𑀭𑀺𑀪𑁄𑀢𑀩𑁆𑀩𑁄𑀢𑀺 𑀦 𑀧𑀭𑀺𑀪𑀯𑀺𑀢𑀩𑁆𑀩𑁄, ‘‘𑀓𑀺𑀫𑁂𑀲 𑀜𑀲𑁆𑀲𑀢𑀻’’𑀢𑀺 𑀏𑀯𑀁 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁧𑁬. 𑀓𑀗𑁆𑀔𑀻 𑀯𑁂𑀘𑀺𑀓𑀺𑀘𑁆𑀙𑀻𑀢𑀺 𑀲𑀪𑀺𑀬𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑁄 𑀏𑀯𑀁 𑀪𑀕𑀯𑀢𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀤𑀫𑀽𑀧𑀲𑀫𑀲𑀽𑀘𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀯𑀺𑀕𑀢𑀼𑀤𑁆𑀥𑀘𑁆𑀘𑁄 𑀳𑀼𑀢𑁆𑀯𑀸 𑀆𑀳 𑁋 ‘‘𑀓𑀗𑁆𑀔𑀻 𑀯𑁂𑀘𑀺𑀓𑀺𑀘𑁆𑀙𑀻’’𑀢𑀺. 𑀢𑀢𑁆𑀣 ‘‘𑀮𑀪𑁂𑀬𑁆𑀬𑀁 𑀦𑀼 𑀔𑁄 𑀇𑀫𑁂𑀲𑀁 𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀏𑀯𑀁 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀓𑀗𑁆𑀔𑀸𑀬 𑀓𑀗𑁆𑀔𑀻. ‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲𑀺𑀫𑀲𑁆𑀲 𑀘 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄’’𑀢𑀺 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑁂𑀘𑀺𑀓𑀺𑀘𑁆𑀙𑀻. 𑀤𑀼𑀩𑁆𑀩𑀮𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀸 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑁂 𑀓𑀗𑁆𑀔𑀦𑀢𑁄 𑀓𑀗𑁆𑀔𑀻, 𑀩𑀮𑀯𑀢𑀺𑀬𑀸 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺𑀬𑁂𑀯, 𑀦 𑀲𑀓𑁆𑀓𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑁂𑀘𑀺𑀓𑀺𑀘𑁆𑀙𑀻. 𑀅𑀪𑀺𑀓𑀗𑁆𑀔𑀫𑀸𑀦𑁄𑀢𑀺 𑀅𑀢𑀺𑀯𑀺𑀬 𑀧𑀢𑁆𑀣𑀬𑀫𑀸𑀦𑁄. 𑀢𑁂𑀲𑀦𑁆𑀢𑀓𑀭𑁄𑀢𑀺 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑁄. 𑀪𑀯𑀦𑁆𑀢𑁄𑀯 𑀏𑀯𑀁 𑀪𑀯𑀸𑀳𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀳𑁂 𑀫𑁂 𑀧𑀼𑀝𑁆𑀞𑁄…𑀧𑁂… 𑀩𑁆𑀬𑀸𑀓𑀭𑁄𑀳𑀺 𑀫𑁂’’𑀢𑀺. 𑀢𑀢𑁆𑀣 𑀧𑀜𑁆𑀳𑁂 𑀫𑁂𑀢𑀺 𑀧𑀜𑁆𑀳𑁂 𑀫𑀬𑀸. 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄. 𑀅𑀦𑀼𑀧𑀼𑀩𑁆𑀩𑀦𑁆𑀢𑀺 𑀧𑀜𑁆𑀳𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑀸𑀦𑀼𑀭𑀽𑀧𑀁 𑀧𑀸𑀴𑀺𑀁 𑀆𑀭𑁄𑀧𑁂𑀦𑁆𑀢𑁄. 𑀩𑁆𑀬𑀸𑀓𑀭𑁄𑀳𑀺 𑀫𑁂𑀢𑀺 𑀫𑀬𑁆𑀳𑀁 𑀩𑁆𑀬𑀸𑀓𑀭𑁄𑀳𑀺.

𑁫𑁧𑁭. 𑀤𑀽𑀭𑀢𑁄𑀢𑀺 𑀲𑁄 𑀓𑀺𑀭 𑀇𑀢𑁄 𑀘𑀺𑀢𑁄 𑀘𑀸𑀳𑀺𑀡𑁆𑀟𑀦𑁆𑀢𑁄 𑀲𑀢𑁆𑀢𑀬𑁄𑀚𑀦𑀲𑀢𑀫𑀕𑁆𑀕𑀢𑁄 𑀆𑀕𑀢𑁄. 𑀢𑁂𑀦𑀸𑀳 𑁋 𑀪𑀕𑀯𑀸 ‘‘𑀤𑀽𑀭𑀢𑁄 𑀆𑀕𑀢𑁄𑀲𑀻’’𑀢𑀺, 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀯𑀸 𑀲𑀸𑀲𑀦𑀢𑁄 𑀆𑀕𑀢𑀢𑁆𑀢𑀸 ‘‘𑀤𑀽𑀭𑀢𑁄 𑀆𑀕𑀢𑁄𑀲𑀻’’𑀢𑀺 𑀦𑀁 𑀆𑀳.

𑁫𑁧𑁮. 𑀧𑀼𑀘𑁆𑀙 𑀫𑀦𑁆𑀢𑀺 𑀇𑀫𑀸𑀬 𑀧𑀦𑀲𑁆𑀲 𑀕𑀸𑀣𑀸𑀬 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀺. 𑀢𑀢𑁆𑀣 𑀫𑀦𑀲𑀺𑀘𑁆𑀙𑀲𑀻𑀢𑀺 𑀫𑀦𑀲𑀸 𑀇𑀘𑁆𑀙𑀲𑀺.

𑀬𑀁 𑀯𑀢𑀸𑀳𑀦𑁆𑀢𑀺 𑀬𑀁 𑀯𑀢 𑀅𑀳𑀁. 𑀅𑀢𑁆𑀢𑀫𑀦𑁄𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑁄𑀫𑀦𑀲𑁆𑀲𑁂𑀳𑀺 𑀨𑀼𑀝𑀘𑀺𑀢𑁆𑀢𑁄. 𑀉𑀤𑀕𑁆𑀕𑁄𑀢𑀺 𑀓𑀸𑀬𑁂𑀦 𑀘𑀺𑀢𑁆𑀢𑁂𑀦 𑀘 𑀅𑀩𑁆𑀪𑀼𑀦𑁆𑀦𑀢𑁄. 𑀇𑀤𑀁 𑀧𑀦 𑀧𑀤𑀁 𑀦 𑀲𑀩𑁆𑀩𑀧𑀸𑀞𑁂𑀲𑀼 𑀅𑀢𑁆𑀣𑀺. 𑀇𑀤𑀸𑀦𑀺 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀅𑀢𑁆𑀢𑀫𑀦𑁄, 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄’’𑀢𑀺.