𑁮. 𑀲𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮𑁦. 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀮𑁆𑀮𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀪𑀕𑀯𑀢𑁄 𑀓𑀺𑀭 𑀉𑀧𑀝𑁆𑀞𑀸𑀓𑁄 𑀏𑀓𑁄 𑀉𑀧𑀸𑀲𑀓𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀼𑀢𑁆𑀢𑀲𑁄𑀓𑀸𑀪𑀺𑀪𑀽𑀢𑁄 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄 𑀅𑀳𑁄𑀲𑀺. 𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑁄 𑀪𑀕𑀯𑀸 𑀢𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀲𑁄𑀓𑀯𑀺𑀦𑁄𑀤𑀦𑀢𑁆𑀣𑀁 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀅𑀦𑀺𑀫𑀢𑁆𑀢𑀦𑁆𑀢𑀺 𑀓𑀺𑀭𑀺𑀬𑀸𑀓𑀸𑀭𑀦𑀺𑀫𑀺𑀢𑁆𑀢𑀯𑀺𑀭𑀳𑀺𑀢𑀁. 𑀬𑀣𑀸 𑀳𑀺 ‘‘𑀬𑀤𑀸𑀳𑀁 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀺𑀲𑁆𑀲𑀸𑀫𑀺, 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀺𑀲𑁆𑀲𑀸𑀫𑀺, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀢𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺𑀆𑀤𑀻𑀲𑀼 𑀓𑀺𑀭𑀺𑀬𑀸𑀓𑀸𑀭𑀦𑀺𑀫𑀺𑀢𑁆𑀢𑀫𑀢𑁆𑀣𑀺, 𑀦 𑀏𑀯𑀁 𑀚𑀻𑀯𑀺𑀢𑁂. 𑀦 𑀳𑀺 𑀲𑀓𑁆𑀓𑀸 𑀮𑀤𑁆𑀥𑀼𑀁 ‘‘𑀬𑀸𑀯𑀸𑀳𑀁 𑀇𑀤𑀁 𑀯𑀸 𑀇𑀤𑀁 𑀯𑀸 𑀓𑀭𑁄𑀫𑀺, 𑀢𑀸𑀯 𑀢𑁆𑀯𑀁 𑀚𑀻𑀯, 𑀫𑀸 𑀫𑀻𑀬𑀸’’𑀢𑀺. 𑀅𑀦𑀜𑁆𑀜𑀸𑀢𑀦𑁆𑀢𑀺 𑀅𑀢𑁄 𑀏𑀯 𑀦 𑀲𑀓𑁆𑀓𑀸 𑀏𑀓𑀁𑀲𑁂𑀦 𑀅𑀜𑁆𑀜𑀸𑀢𑀼𑀁 ‘‘𑀏𑀢𑁆𑀢𑀓𑀁 𑀯𑀸 𑀏𑀢𑁆𑀢𑀓𑀁 𑀯𑀸 𑀓𑀸𑀮𑀁 𑀇𑀫𑀺𑀦𑀸 𑀚𑀻𑀯𑀺𑀢𑀩𑁆𑀩’’𑀦𑁆𑀢𑀺 𑀕𑀢𑀺𑀬𑀸 𑀆𑀬𑀼𑀧𑀭𑀺𑀬𑀦𑁆𑀢𑀯𑀲𑁂𑀦 𑀯𑀸. 𑀬𑀣𑀸 𑀳𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀦𑀁 𑀧𑀭𑀺𑀫𑀺𑀢𑀁 𑀆𑀬𑀼, 𑀦 𑀢𑀣𑀸 𑀫𑀘𑁆𑀘𑀸𑀦𑀁, 𑀏𑀯𑀫𑁆𑀧𑀺 𑀏𑀓𑀁𑀲𑁂𑀦 𑀅𑀦𑀜𑁆𑀜𑀸𑀢𑀁.

𑀓𑀲𑀺𑀭𑀦𑁆𑀢𑀺 𑀅𑀦𑁂𑀓𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀪𑀸𑀯𑀢𑁄 𑀓𑀺𑀘𑁆𑀙𑀁 𑀦 𑀲𑀼𑀔𑀬𑀸𑀧𑀦𑀻𑀬𑀁. 𑀢𑀣𑀸 𑀳𑀺 𑀢𑀁 𑀅𑀲𑁆𑀲𑀸𑀲𑀧𑀝𑀺𑀩𑀤𑁆𑀥𑀜𑁆𑀘, 𑀧𑀲𑁆𑀲𑀸𑀲𑀧𑀝𑀺𑀩𑀤𑁆𑀥𑀜𑁆𑀘, 𑀫𑀳𑀸𑀪𑀽𑀢𑀧𑀝𑀺𑀩𑀤𑁆𑀥𑀜𑁆𑀘, 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀝𑀺𑀩𑀤𑁆𑀥𑀜𑁆𑀘, 𑀉𑀲𑁆𑀫𑀸𑀧𑀝𑀺𑀩𑀤𑁆𑀥𑀜𑁆𑀘, 𑀯𑀺𑀜𑁆𑀜𑀸𑀡𑀧𑀝𑀺𑀩𑀤𑁆𑀥𑀜𑁆𑀘. 𑀅𑀦𑀲𑁆𑀲𑀲𑀦𑁆𑀢𑁄𑀧𑀺 𑀳𑀺 𑀦 𑀚𑀻𑀯𑀢𑀺 𑀅𑀧𑀲𑁆𑀲𑀲𑀦𑁆𑀢𑁄𑀧𑀺. 𑀘𑀢𑀽𑀲𑀼 𑀘 𑀥𑀸𑀢𑀽𑀲𑀼 𑀓𑀝𑁆𑀞𑀫𑀼𑀔𑀸𑀤𑀺𑀆𑀲𑀻𑀯𑀺𑀲𑀤𑀝𑁆𑀞𑁄 𑀯𑀺𑀬 𑀓𑀸𑀬𑁄 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀢𑀸𑀯 𑀣𑀤𑁆𑀥𑁄 𑀳𑁄𑀢𑀺 𑀓𑀮𑀺𑀗𑁆𑀕𑀭𑀲𑀤𑀺𑀲𑁄. 𑀬𑀣𑀸𑀳 𑁋

‘‘𑀧𑀢𑁆𑀣𑀤𑁆𑀥𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀓𑀝𑁆𑀞𑀫𑀼𑀔𑁂𑀦 𑀯𑀸;

𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀓𑀝𑁆𑀞𑀫𑀼𑀔𑁂𑀯 𑀲𑁄’’𑀢𑀺. (𑀥. 𑀲. 𑀅𑀝𑁆𑀞. 𑁫𑁮𑁪);

𑀆𑀧𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀧𑀽𑀢𑀺𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑀫𑀁𑀲𑀮𑁄𑀳𑀺𑀢𑁄 𑀅𑀝𑁆𑀞𑀺𑀘𑀫𑁆𑀫𑀸𑀯𑀲𑁂𑀲𑁄 𑀳𑁄𑀢𑀺. 𑀬𑀣𑀸𑀳 𑁋

‘‘𑀧𑀽𑀢𑀺𑀓𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀧𑀽𑀢𑀺𑀫𑀼𑀔𑁂𑀦 𑀯𑀸;

𑀆𑀧𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀧𑀽𑀢𑀺𑀫𑀼𑀔𑁂𑀯 𑀲𑁄’’𑀢𑀺. (𑀥. 𑀲. 𑀅𑀝𑁆𑀞. 𑁫𑁮𑁪);

𑀢𑁂𑀚𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀫𑀦𑁆𑀢𑀸 𑀧𑀭𑀺𑀟𑀬𑁆𑀳𑀢𑀺. 𑀬𑀣𑀸𑀳 𑁋

‘‘𑀲𑀦𑁆𑀢𑀢𑁆𑀢𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀅𑀕𑁆𑀕𑀺𑀫𑀼𑀔𑁂𑀦 𑀯𑀸;

𑀢𑁂𑀚𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀅𑀕𑁆𑀕𑀺𑀫𑀼𑀔𑁂𑀯 𑀲𑁄’’𑀢𑀺. (𑀥. 𑀲. 𑀅𑀝𑁆𑀞. 𑁫𑁮𑁪);

𑀯𑀸𑀬𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀲𑀜𑁆𑀙𑀺𑀚𑁆𑀚𑀫𑀸𑀦𑀲𑀦𑁆𑀥𑀺𑀩𑀦𑁆𑀥𑀦𑁄 𑀧𑀸𑀲𑀸𑀡𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀲𑀜𑁆𑀘𑀼𑀡𑁆𑀡𑀺𑀬𑀫𑀸𑀦𑀝𑁆𑀞𑀺𑀓𑁄 𑀯𑀺𑀬 𑀘 𑀳𑁄𑀢𑀺. 𑀬𑀣𑀸𑀳 𑁋

‘‘𑀲𑀜𑁆𑀙𑀺𑀦𑁆𑀦𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀲𑀢𑁆𑀣𑀫𑀼𑀔𑁂𑀦 𑀯𑀸;

𑀯𑀸𑀬𑁄𑀥𑀸𑀢𑀼𑀧𑁆𑀧𑀓𑁄𑀧𑁂𑀦, 𑀳𑁄𑀢𑀺 𑀲𑀢𑁆𑀣𑀫𑀼𑀔𑁂𑀯 𑀲𑁄’’𑀢𑀺. (𑀥. 𑀲. 𑀅𑀝𑁆𑀞. 𑁫𑁮𑁪);

𑀥𑀸𑀢𑀼𑀧𑁆𑀧𑀓𑁄𑀧𑀩𑁆𑀬𑀸𑀧𑀦𑁆𑀦𑀓𑀸𑀬𑁄𑀧𑀺 𑀘 𑀦 𑀚𑀻𑀯𑀢𑀺. 𑀬𑀤𑀸 𑀧𑀦 𑀢𑀸 𑀥𑀸𑀢𑀼𑀬𑁄 𑀅𑀜𑁆𑀜𑀫𑀜𑁆𑀜𑀁 𑀧𑀢𑀺𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀸𑀧𑀺 𑀲𑀫𑀁 𑀯𑀳𑀦𑁆𑀢𑀺, 𑀢𑀤𑀸 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀫𑀳𑀸𑀪𑀽𑀢𑀧𑀝𑀺𑀩𑀤𑁆𑀥𑀜𑁆𑀘 𑀚𑀻𑀯𑀺𑀢𑀁. 𑀤𑀼𑀩𑁆𑀪𑀺𑀓𑁆𑀔𑀸𑀤𑀻𑀲𑀼 𑀧𑀦 𑀆𑀳𑀸𑀭𑀼𑀧𑀘𑁆𑀙𑁂𑀤𑁂𑀦 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑁄 𑀧𑀸𑀓𑀝𑁄 𑀏𑀯. 𑀏𑀯𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀝𑀺𑀩𑀤𑁆𑀥𑀜𑁆𑀘 𑀚𑀻𑀯𑀺𑀢𑀁. 𑀢𑀣𑀸 𑀅𑀲𑀺𑀢𑀧𑀻𑀢𑀸𑀤𑀺𑀧𑀭𑀺𑀧𑀸𑀓𑁂 𑀓𑀫𑁆𑀫𑀚𑀢𑁂𑀚𑁂 𑀔𑀻𑀡𑁂 𑀲𑀢𑁆𑀢𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀸𑀧𑀺 𑀧𑀸𑀓𑀝𑀸 𑀏𑀯. 𑀏𑀯𑀁 𑀉𑀲𑁆𑀫𑀸𑀧𑀝𑀺𑀩𑀤𑁆𑀥𑀜𑁆𑀘 𑀚𑀻𑀯𑀺𑀢𑀁. 𑀯𑀺𑀜𑁆𑀜𑀸𑀡𑁂 𑀧𑀦 𑀦𑀺𑀭𑀼𑀤𑁆𑀥𑁂 𑀦𑀺𑀭𑀼𑀤𑁆𑀥𑀢𑁄 𑀧𑀪𑀼𑀢𑀺 𑀲𑀢𑁆𑀢𑀸𑀦𑀁 𑀦 𑀳𑁄𑀢𑀺 𑀚𑀻𑀯𑀺𑀢𑀦𑁆𑀢𑀺 𑀏𑀯𑀫𑁆𑀧𑀺 𑀮𑁄𑀓𑁂 𑀧𑀸𑀓𑀝𑀫𑁂𑀯. 𑀏𑀯𑀁 𑀯𑀺𑀜𑁆𑀜𑀸𑀡𑀧𑀝𑀺𑀩𑀤𑁆𑀥𑀜𑁆𑀘 𑀚𑀻𑀯𑀺𑀢𑀁. 𑀏𑀯𑀁 𑀅𑀦𑁂𑀓𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀪𑀸𑀯𑀢𑁄 𑀓𑀲𑀺𑀭𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀢𑁆𑀢𑀜𑁆𑀘𑀸𑀢𑀺 𑀅𑀧𑁆𑀧𑀓𑀁, 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀦𑀺𑀥𑀸𑀬 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀲𑀤𑀺𑀲𑀁, 𑀘𑀺𑀢𑁆𑀢𑀓𑁆𑀔𑀡𑀢𑁄 𑀉𑀤𑁆𑀥𑀁 𑀅𑀪𑀸𑀯𑁂𑀦 𑀯𑀸 𑀧𑀭𑀺𑀢𑁆𑀢𑀁. 𑀅𑀢𑀺𑀤𑀻𑀖𑀸𑀬𑀼𑀓𑁄𑀧𑀺 𑀳𑀺 𑀲𑀢𑁆𑀢𑁄 𑀅𑀢𑀻𑀢𑁂𑀦 𑀘𑀺𑀢𑁆𑀢𑁂𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂𑀦 𑀚𑀻𑀯𑀺𑀲𑁆𑀲𑀢𑀺 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀺𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦𑀢𑁆𑀯𑁂𑀯 𑀢𑁂𑀧𑀺 𑀚𑀻𑀯𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀁𑀬𑀼𑀢𑀸’’𑀢𑀺. (𑀫𑀳𑀸𑀦𑀺. 𑁧𑁦);

𑀢𑀜𑁆𑀘 𑀤𑀼𑀓𑁆𑀔𑁂𑀦 𑀲𑀁𑀬𑀼𑀢𑀦𑁆𑀢𑀺 𑀢𑀜𑁆𑀘 𑀚𑀻𑀯𑀺𑀢𑀁 𑀏𑀯𑀁 𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢𑀁 𑀓𑀲𑀺𑀭𑀁 𑀧𑀭𑀺𑀢𑁆𑀢𑀜𑁆𑀘 𑀲𑀫𑀸𑀦𑀫𑁆𑀧𑀺 𑀲𑀻𑀢𑀼𑀡𑁆𑀳𑀟𑀁𑀲𑀫𑀓𑀲𑀸𑀤𑀺𑀲𑀫𑁆𑀨𑀲𑁆𑀲𑀔𑀼𑀧𑁆𑀧𑀺𑀧𑀸𑀲𑀸𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀤𑀼𑀓𑁆𑀔𑀤𑀼𑀓𑁆𑀔𑁂𑀳𑀺 𑀲𑀁𑀬𑀼𑀢𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀸 𑀈𑀤𑀺𑀲𑀁 𑀫𑀘𑁆𑀘𑀸𑀦𑀁 𑀚𑀻𑀯𑀺𑀢𑀁, 𑀢𑀲𑁆𑀫𑀸 𑀢𑁆𑀯𑀁 𑀬𑀸𑀯 𑀢𑀁 𑀧𑀭𑀺𑀓𑁆𑀔𑀬𑀁 𑀦 𑀕𑀘𑁆𑀙𑀢𑀺, 𑀢𑀸𑀯 𑀥𑀫𑁆𑀫𑀘𑀭𑀺𑀬𑀫𑁂𑀯 𑀩𑁆𑀭𑀽𑀳𑀬, 𑀫𑀸 𑀧𑀼𑀢𑁆𑀢𑀫𑀦𑀼𑀲𑁄𑀘𑀸𑀢𑀺.

𑁫𑁮𑁧. 𑀅𑀣𑀸𑀧𑀺 𑀫𑀜𑁆𑀜𑁂𑀬𑁆𑀬𑀸𑀲𑀺 ‘‘𑀲𑀩𑁆𑀩𑀽𑀧𑀓𑀭𑀡𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀫𑁂 𑀲𑁄 𑀫𑀢𑁄, 𑀢𑁂𑀦 𑀲𑁄𑀘𑀸𑀫𑀻’’𑀢𑀺, 𑀏𑀯𑀫𑁆𑀧𑀺 𑀫𑀸 𑀲𑁄𑀘𑀺. 𑀦 𑀳𑀺 𑀲𑁄 𑀉𑀧𑀓𑁆𑀓𑀫𑁄 𑀅𑀢𑁆𑀣𑀺, 𑀬𑁂𑀦 𑀚𑀸𑀢𑀸 𑀦 𑀫𑀺𑀬𑁆𑀬𑀭𑁂, 𑀦 𑀳𑀺 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀓𑁆𑀓𑀫𑁂𑀦 𑀚𑀸𑀢𑀸 𑀲𑀢𑁆𑀢𑀸 𑀫𑀸 𑀫𑀭𑀦𑁆𑀢𑀽𑀢𑀺 𑀭𑀓𑁆𑀔𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀬𑀲𑁆𑀫𑀸 𑀲𑁄 ‘‘𑀚𑀭𑀁 𑀧𑀢𑁆𑀯𑀸 𑀦𑀸𑀫, 𑀪𑀦𑁆𑀢𑁂, 𑀫𑀭𑀡𑀁 𑀅𑀦𑀼𑀭𑀽𑀧𑀁, 𑀅𑀢𑀺𑀤𑀳𑀭𑁄 𑀫𑁂 𑀧𑀼𑀢𑁆𑀢𑁄 𑀫𑀢𑁄’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀲𑁆𑀫𑀸 𑀆𑀳 ‘‘𑀚𑀭𑀫𑁆𑀧𑀺 𑀧𑀢𑁆𑀯𑀸 𑀫𑀭𑀡𑀁, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄’’𑀢𑀺, 𑀚𑀭𑀁 𑀧𑀢𑁆𑀯𑀸𑀧𑀺 𑀅𑀧𑁆𑀧𑀢𑁆𑀯𑀸𑀧𑀺 𑀫𑀭𑀡𑀁, 𑀦𑀢𑁆𑀣𑀺 𑀏𑀢𑁆𑀣 𑀦𑀺𑀬𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁮𑁨. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀦𑀺𑀤𑀲𑁆𑀲𑀦𑁂𑀦 𑀲𑀸𑀥𑁂𑀦𑁆𑀢𑁄 ‘‘𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀨𑀮𑀸𑀦𑀁 𑀧𑀓𑁆𑀓𑀸𑀦𑀁 𑀬𑀲𑁆𑀫𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀧𑀪𑀼𑀢𑀺 𑀲𑀽𑀭𑀺𑀬𑀸𑀢𑀧𑁂𑀦 𑀲𑀦𑁆𑀢𑀧𑁆𑀧𑀫𑀸𑀦𑁂 𑀭𑀼𑀓𑁆𑀔𑁂 𑀧𑀣𑀯𑀺𑀭𑀲𑁄 𑀘 𑀆𑀧𑁄𑀭𑀲𑁄 𑀘 𑀧𑀢𑁆𑀢𑀢𑁄 𑀲𑀸𑀔𑀁 𑀲𑀸𑀔𑀢𑁄 𑀔𑀦𑁆𑀥𑀁 𑀔𑀦𑁆𑀥𑀢𑁄 𑀫𑀽𑀮𑀦𑁆𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀫𑀽𑀮𑀢𑁄 𑀧𑀣𑀯𑀺𑀫𑁂𑀯 𑀧𑀯𑀺𑀲𑀢𑀺, 𑀑𑀕𑀫𑀦𑀢𑁄 𑀧𑀪𑀼𑀢𑀺 𑀧𑀦 𑀧𑀣𑀯𑀺𑀢𑁄 𑀫𑀽𑀮𑀁 𑀫𑀽𑀮𑀢𑁄 𑀔𑀦𑁆𑀥𑀦𑁆𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀲𑀸𑀔𑀸𑀧𑀢𑁆𑀢𑀧𑀮𑁆𑀮𑀯𑀸𑀤𑀻𑀦𑀺 𑀧𑀼𑀦 𑀆𑀭𑁄𑀳𑀢𑀺, 𑀏𑀯𑀁 𑀆𑀭𑁄𑀳𑀦𑁆𑀢𑁄 𑀘 𑀧𑀭𑀺𑀧𑀸𑀓𑀕𑀢𑁂 𑀨𑀮𑁂 𑀯𑀡𑁆𑀝𑀫𑀽𑀮𑀁 𑀦 𑀧𑀯𑀺𑀲𑀢𑀺. 𑀅𑀣 𑀲𑀽𑀭𑀺𑀬𑀸𑀢𑀧𑁂𑀦 𑀢𑀧𑁆𑀧𑀫𑀸𑀦𑁂 𑀯𑀡𑁆𑀝𑀫𑀽𑀮𑁂 𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀢𑀸𑀦𑀺 𑀨𑀮𑀸𑀦𑀺 𑀧𑀸𑀢𑁄 𑀧𑀸𑀢𑁄 𑀦𑀺𑀘𑁆𑀘𑀓𑀸𑀮𑀁 𑀧𑀢𑀦𑁆𑀢𑀺, 𑀦𑁂𑀲𑀁 𑀧𑀸𑀢𑁄 𑀧𑀢𑀦𑀢𑁄 𑀪𑀬𑀁 𑀳𑁄𑀢𑀺, 𑀧𑀢𑀦𑀸 𑀪𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀚𑀸𑀢𑀸𑀦𑀁 𑀫𑀘𑁆𑀘𑀸𑀦𑀁 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀁. 𑀧𑀓𑁆𑀓𑀨𑀮𑀲𑀤𑀺𑀲𑀸 𑀳𑀺 𑀲𑀢𑁆𑀢𑀸𑀢𑀺.

𑁫𑁮𑁩-𑁬. 𑀓𑀺𑀜𑁆𑀘 𑀪𑀺𑀬𑁆𑀬𑁄 ‘‘𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲…𑀧𑁂… 𑀚𑀻𑀯𑀺𑀢’’𑀦𑁆𑀢𑀺. 𑀢𑀲𑁆𑀫𑀸 ‘‘𑀤𑀳𑀭𑀸 𑀘…𑀧𑁂… 𑀧𑀭𑀸𑀬𑀡𑀸’’𑀢𑀺 𑀏𑀯𑀁 𑀕𑀡𑁆𑀳, 𑀏𑀯𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀢𑁂𑀲𑀁 𑀫𑀘𑁆𑀘𑀼…𑀧𑁂… 𑀜𑀸𑀢𑀻 𑀯𑀸 𑀧𑀦 𑀜𑀸𑀢𑀓𑁂’’𑀢𑀺 𑀏𑀯𑀫𑁆𑀧𑀺 𑀕𑀡𑁆𑀳. 𑀬𑀲𑁆𑀫𑀸 𑀘 𑀦 𑀧𑀺𑀢𑀸 𑀢𑀸𑀬𑀢𑁂 𑀧𑀼𑀢𑁆𑀢𑀁, 𑀜𑀸𑀢𑀻 𑀯𑀸 𑀧𑀦 𑀜𑀸𑀢𑀓𑁂, 𑀢𑀲𑁆𑀫𑀸 𑀧𑁂𑀓𑁆𑀔𑀢𑀁𑀬𑁂𑀯…𑀧𑁂… 𑀦𑀻𑀬𑀢𑀺.

𑀢𑀢𑁆𑀣 𑀅𑀬𑀁 𑀬𑁄𑀚𑀦𑀸 𑁋 𑀧𑀲𑁆𑀲𑀫𑀸𑀦𑀸𑀦𑀁𑀬𑁂𑀯 𑀜𑀸𑀢𑀻𑀦𑀁 ‘‘𑀅𑀫𑁆𑀫, 𑀢𑀸𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀣𑀼 𑀅𑀦𑁂𑀓𑀧𑁆𑀧𑀓𑀸𑀭𑀓𑀁 𑀮𑀸𑀮𑀧𑀢𑀁𑀬𑁂𑀯 𑀫𑀘𑁆𑀘𑀸𑀦𑀁 𑀏𑀓𑀫𑁂𑀓𑁄 𑀫𑀘𑁆𑀘𑁄 𑀬𑀣𑀸 𑀕𑁄 𑀯𑀚𑁆𑀛𑁄 𑀏𑀯𑀁 𑀦𑀻𑀬𑀢𑀺, 𑀏𑀯𑀁 𑀧𑀲𑁆𑀲, 𑀉𑀧𑀸𑀲𑀓, 𑀬𑀸𑀯 𑀅𑀢𑀸𑀡𑁄 𑀮𑁄𑀓𑁄𑀢𑀺.

𑁫𑁮𑁭. 𑀢𑀢𑁆𑀣 𑀬𑁂 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀥𑀺𑀢𑀺𑀲𑀫𑁆𑀧𑀦𑁆𑀦𑀸, 𑀢𑁂 ‘‘𑀏𑀯𑀫𑀩𑁆𑀪𑀸𑀳𑀢𑁄 𑀮𑁄𑀓𑁄 𑀫𑀘𑁆𑀘𑀼𑀦𑀸 𑀘 𑀚𑀭𑀸𑀬 𑀘, 𑀲𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀭𑀺𑀢𑁆𑀢𑀸𑀡𑀁 𑀓𑀸𑀢𑀼’’𑀦𑁆𑀢𑀺 𑀬𑀲𑁆𑀫𑀸 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀥𑀻𑀭𑀸 𑀦 𑀲𑁄𑀘𑀦𑁆𑀢𑀺 𑀯𑀺𑀤𑀺𑀢𑁆𑀯𑀸 𑀮𑁄𑀓𑀧𑀭𑀺𑀬𑀸𑀬𑀁. 𑀇𑀫𑀁 𑀮𑁄𑀓𑀲𑀪𑀸𑀯𑀁 𑀜𑀢𑁆𑀯𑀸 𑀦 𑀲𑁄𑀘𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁮𑁮. 𑀢𑁆𑀯𑀁 𑀧𑀦 𑀬𑀲𑁆𑀲 𑀫𑀕𑁆𑀕𑀁…𑀧𑁂… 𑀧𑀭𑀺𑀤𑁂𑀯𑀲𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀁 𑀆𑀕𑀢𑀲𑁆𑀲 𑀆𑀕𑀢𑀫𑀕𑁆𑀕𑀁 𑀯𑀸 𑀇𑀢𑁄 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑀲𑁆𑀲 𑀕𑀢𑀫𑀕𑁆𑀕𑀁 𑀯𑀸 𑀦 𑀚𑀸𑀦𑀸𑀲𑀺, 𑀢𑀲𑁆𑀲 𑀇𑀫𑁂 𑀉𑀪𑁄 𑀅𑀦𑁆𑀢𑁂 𑀅𑀲𑀫𑁆𑀧𑀲𑁆𑀲𑀁 𑀦𑀺𑀭𑀢𑁆𑀣𑀁 𑀧𑀭𑀺𑀤𑁂𑀯𑀲𑀺. 𑀥𑀻𑀭𑀸 𑀧𑀦 𑀢𑁂 𑀧𑀲𑁆𑀲𑀦𑁆𑀢𑀸 𑀯𑀺𑀤𑀺𑀢𑁆𑀯𑀸 𑀮𑁄𑀓𑀧𑀭𑀺𑀬𑀸𑀬𑀁 𑀦 𑀲𑁄𑀘𑀦𑁆𑀢𑀻𑀢𑀺.

𑁫𑁮𑁯. 𑀇𑀤𑀸𑀦𑀺 ‘‘𑀦𑀺𑀭𑀢𑁆𑀣𑀁 𑀧𑀭𑀺𑀤𑁂𑀯𑀲𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀭𑀺𑀤𑁂𑀯𑀦𑀸𑀬 𑀦𑀺𑀭𑀢𑁆𑀣𑀓𑀪𑀸𑀯𑀁 𑀲𑀸𑀥𑁂𑀦𑁆𑀢𑁄 ‘‘𑀧𑀭𑀺𑀤𑁂𑀯𑀬𑀫𑀸𑀦𑁄 𑀘𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑀩𑁆𑀩𑀳𑁂𑀢𑀺 𑀉𑀩𑁆𑀩𑀳𑁂𑀬𑁆𑀬 𑀥𑀸𑀭𑁂𑀬𑁆𑀬, 𑀅𑀢𑁆𑀢𑀦𑀺 𑀲𑀜𑁆𑀚𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀽𑀴𑁆𑀳𑁄 𑀳𑀺𑀁𑀲𑀫𑀢𑁆𑀢𑀸𑀦𑀦𑁆𑀢𑀺 𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀩𑀸𑀥𑁂𑀦𑁆𑀢𑁄. 𑀓𑀬𑀺𑀭𑀸 𑀘𑁂 𑀦𑀁 𑀯𑀺𑀘𑀓𑁆𑀔𑀡𑁄𑀢𑀺 𑀬𑀤𑀺 𑀢𑀸𑀤𑀺𑀲𑁄 𑀓𑀜𑁆𑀘𑀺 𑀅𑀢𑁆𑀣𑀁 𑀉𑀤𑀩𑁆𑀩𑀳𑁂, 𑀯𑀺𑀘𑀓𑁆𑀔𑀡𑁄𑀧𑀺 𑀦𑀁 𑀧𑀭𑀺𑀤𑁂𑀯𑀁 𑀓𑀭𑁂𑀬𑁆𑀬.

𑁫𑁯𑁦. 𑀦 𑀳𑀺 𑀭𑀼𑀡𑁆𑀡𑁂𑀦𑀸𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀦 𑀧𑀦 𑀓𑁄𑀘𑀺 𑀭𑀼𑀡𑁆𑀡𑁂𑀦 𑀯𑀸 𑀲𑁄𑀓𑁂𑀦 𑀯𑀸 𑀘𑁂𑀢𑀲𑁄 𑀲𑀦𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀅𑀧𑀺𑀘 𑀔𑁄 𑀧𑀦 𑀭𑁄𑀤𑀢𑁄 𑀲𑁄𑀘𑀢𑁄 𑀘 𑀪𑀺𑀬𑁆𑀬𑁄 𑀅𑀲𑁆𑀲 𑀉𑀧𑁆𑀧𑀚𑁆𑀚𑀢𑁂 𑀤𑀼𑀓𑁆𑀔𑀁, 𑀲𑀭𑀻𑀭𑀜𑁆𑀘 𑀤𑀼𑀩𑁆𑀩𑀡𑁆𑀡𑀺𑀬𑀸𑀤𑀻𑀳𑀺 𑀉𑀧𑀳𑀜𑁆𑀜𑀢𑀻𑀢𑀺.

𑁫𑁯𑁧. 𑀦 𑀢𑁂𑀦 𑀧𑁂𑀢𑀸𑀢𑀺 𑀢𑁂𑀦 𑀧𑀭𑀺𑀤𑁂𑀯𑀦𑁂𑀦 𑀓𑀸𑀮𑀓𑀢𑀸 𑀦 𑀧𑀸𑀮𑁂𑀦𑁆𑀢𑀺 𑀦 𑀬𑀸𑀧𑁂𑀦𑁆𑀢𑀺, 𑀦 𑀢𑀁 𑀢𑁂𑀲𑀁 𑀉𑀧𑀓𑀸𑀭𑀸𑀬 𑀳𑁄𑀢𑀺. 𑀢𑀲𑁆𑀫𑀸 𑀦𑀺𑀭𑀢𑁆𑀣𑀸 𑀧𑀭𑀺𑀤𑁂𑀯𑀦𑀸𑀢𑀺.

𑁫𑁯𑁨. 𑀦 𑀓𑁂𑀯𑀮𑀜𑁆𑀘 𑀦𑀺𑀭𑀢𑁆𑀣𑀸, 𑀅𑀦𑀢𑁆𑀣𑀫𑁆𑀧𑀺 𑀆𑀯𑀳𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑁄𑀓𑀫𑀧𑁆𑀧𑀚𑀳𑀁 …𑀧𑁂… 𑀯𑀲𑀫𑀦𑁆𑀯𑀕𑀽. 𑀢𑀢𑁆𑀣 𑀅𑀦𑀼𑀢𑁆𑀣𑀼𑀦𑀦𑁆𑀢𑁄𑀢𑀺 𑀅𑀦𑀼𑀲𑁄𑀘𑀦𑁆𑀢𑁄. 𑀯𑀲𑀫𑀦𑁆𑀯𑀕𑀽𑀢𑀺 𑀯𑀲𑀁 𑀕𑀢𑁄.

𑁫𑁯𑁩. 𑀏𑀯𑀫𑁆𑀧𑀺 𑀦𑀺𑀭𑀢𑁆𑀣𑀓𑀢𑁆𑀢𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀜𑁆𑀘 𑀲𑁄𑀓𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑁄𑀓𑀯𑀺𑀦𑀬𑀢𑁆𑀣𑀁 𑀑𑀯𑀤𑀦𑁆𑀢𑁄 ‘‘𑀅𑀜𑁆𑀜𑁂𑀧𑀺 𑀧𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀫𑀺𑀦𑁂𑀢𑀺 𑀕𑀫𑀺𑀓𑁂, 𑀧𑀭𑀮𑁄𑀓𑀕𑀫𑀦𑀲𑀚𑁆𑀚𑁂 𑀞𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀨𑀦𑁆𑀤𑀦𑁆𑀢𑁂𑀯𑀺𑀥 𑀧𑀸𑀡𑀺𑀦𑁄𑀢𑀺 𑀫𑀭𑀡𑀪𑀬𑁂𑀦 𑀨𑀦𑁆𑀤𑀫𑀸𑀦𑁂𑀬𑁂𑀯 𑀇𑀥 𑀲𑀢𑁆𑀢𑁂.

𑁫𑁯𑁪. 𑀬𑁂𑀦 𑀬𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀫𑀜𑁆𑀜𑀦𑁆𑀢𑀺 ‘‘𑀤𑀻𑀖𑀸𑀬𑀼𑀓𑁄 𑀪𑀯𑀺𑀲𑁆𑀲𑀢𑀺, 𑀅𑀭𑁄𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀢𑀁 𑀅𑀜𑁆𑀜𑀣𑀸𑀬𑁂𑀯 𑀳𑁄𑀢𑀺, 𑀲𑁄 𑀏𑀯𑀁 𑀫𑀜𑁆𑀜𑀺𑀢𑁄 𑀫𑀭𑀢𑀺𑀧𑀺, 𑀭𑁄𑀕𑀻𑀧𑀺 𑀳𑁄𑀢𑀺. 𑀏𑀢𑀸𑀤𑀺𑀲𑁄 𑀅𑀬𑀁 𑀯𑀺𑀦𑀸𑀪𑀸𑀯𑁄 𑀫𑀜𑁆𑀜𑀺𑀢𑀧𑁆𑀧𑀘𑁆𑀘𑀦𑀻𑀓𑁂𑀦 𑀳𑁄𑀢𑀺, 𑀧𑀲𑁆𑀲, 𑀉𑀧𑀸𑀲𑀓, 𑀮𑁄𑀓𑀲𑀪𑀸𑀯𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁯𑁬. 𑀅𑀭𑀳𑀢𑁄 𑀲𑀼𑀢𑁆𑀯𑀸𑀢𑀺 𑀇𑀫𑀁 𑀏𑀯𑀭𑀽𑀧𑀁 𑀅𑀭𑀳𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸. 𑀦𑁂𑀲𑁄 𑀮𑀩𑁆𑀪𑀸 𑀫𑀬𑀸 𑀇𑀢𑀻𑀢𑀺 𑀲𑁄 𑀧𑁂𑀢𑁄 ‘‘𑀇𑀤𑀸𑀦𑀺 𑀫𑀬𑀸 𑀧𑀼𑀦 𑀚𑀻𑀯𑀢𑀽’’𑀢𑀺 𑀦 𑀮𑀩𑁆𑀪𑀸 𑀇𑀢𑀺 𑀧𑀭𑀺𑀚𑀸𑀦𑀦𑁆𑀢𑁄, 𑀯𑀺𑀦𑁂𑀬𑁆𑀬 𑀧𑀭𑀺𑀤𑁂𑀯𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁯𑁭. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀬𑀣𑀸 𑀲𑀭𑀡𑀫𑀸𑀤𑀺𑀢𑁆𑀢𑀁…𑀧𑁂… 𑀥𑀁𑀲𑀬𑁂’’𑀢𑀺. 𑀢𑀢𑁆𑀣 𑀥𑀻𑀭𑁄 𑀥𑀺𑀢𑀺𑀲𑀫𑁆𑀧𑀤𑀸𑀬, 𑀲𑀧𑀜𑁆𑀜𑁄 𑀲𑀸𑀪𑀸𑀯𑀺𑀓𑀧𑀜𑁆𑀜𑀸𑀬, 𑀧𑀡𑁆𑀟𑀺𑀢𑁄 𑀩𑀸𑀳𑀼𑀲𑀘𑁆𑀘𑀧𑀜𑁆𑀜𑀸𑀬, 𑀓𑀼𑀲𑀮𑁄 𑀘𑀺𑀦𑁆𑀢𑀓𑀚𑀸𑀢𑀺𑀓𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀦𑁆𑀢𑀸𑀫𑀬𑀲𑀼𑀢𑀫𑀬𑀪𑀸𑀯𑀦𑀸𑀫𑀬𑀧𑀜𑁆𑀜𑀸𑀳𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁫𑁯𑁮-𑁯. 𑀦 𑀓𑁂𑀯𑀮𑀜𑁆𑀘 𑀲𑁄𑀓𑀫𑁂𑀯, 𑀧𑀭𑀺𑀤𑁂𑀯𑀁…𑀧𑁂… 𑀲𑀮𑁆𑀮𑀫𑀢𑁆𑀢𑀦𑁄. 𑀢𑀢𑁆𑀣 𑀧𑀚𑀧𑁆𑀧𑀦𑁆𑀢𑀺 𑀢𑀡𑁆𑀳𑀁. 𑀤𑁄𑀫𑀦𑀲𑁆𑀲𑀦𑁆𑀢𑀺 𑀘𑁂𑀢𑀲𑀺𑀓𑀤𑀼𑀓𑁆𑀔𑀁. 𑀅𑀩𑁆𑀩𑀳𑁂𑀢𑀺 𑀉𑀤𑁆𑀥𑀭𑁂. 𑀲𑀮𑁆𑀮𑀦𑁆𑀢𑀺 𑀏𑀢𑀫𑁂𑀯 𑀢𑀺𑀧𑁆𑀧𑀓𑀸𑀭𑀁 𑀤𑀼𑀦𑁆𑀦𑀻𑀳𑀭𑀡𑀝𑁆𑀞𑁂𑀦 𑀅𑀦𑁆𑀢𑁄𑀯𑀺𑀚𑁆𑀛𑀦𑀝𑁆𑀞𑁂𑀦 𑀘 𑀲𑀮𑁆𑀮𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀲𑀢𑁆𑀢𑀯𑀺𑀥𑀁 𑀭𑀸𑀕𑀸𑀤𑀺𑀲𑀮𑁆𑀮𑀁 𑀯𑀸. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀩𑁆𑀩𑀽𑀴𑁆𑀳𑁂 𑀲𑀮𑁆𑀮𑁂 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄…𑀧𑁂… 𑀦𑀺𑀩𑁆𑀩𑀼𑀢𑁄𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀢𑀢𑁆𑀣 𑀅𑀲𑀺𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀦𑀺𑀲𑁆𑀲𑀺𑀢𑁄. 𑀧𑀧𑁆𑀧𑀼𑀬𑁆𑀬𑀸𑀢𑀺 𑀧𑀸𑀧𑀼𑀡𑀺𑀢𑁆𑀯𑀸. 𑀲𑁂𑀲𑀁 𑀇𑀥 𑀇𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯, 𑀢𑀲𑁆𑀫𑀸 𑀦 𑀯𑀡𑁆𑀡𑀺𑀢𑀁.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.