𑁭. 𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑁂𑀮𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸. 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁂𑀧𑀺 𑀘𑀲𑁆𑀲 𑀧𑀼𑀩𑁆𑀩𑀲𑀤𑀺𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀅𑀧𑀼𑀩𑁆𑀩𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀺𑀳𑀭𑀦𑁆𑀢𑀸 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽𑀢𑀺 𑀅𑀗𑁆𑀕𑀸 𑀏𑀯 𑀲𑁄 𑀚𑀦𑀧𑀤𑁄, 𑀕𑀗𑁆𑀕𑀸𑀬 𑀧𑀦 𑀬𑀸 𑀉𑀢𑁆𑀢𑀭𑁂𑀦 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 ‘‘𑀉𑀢𑁆𑀢𑀭𑀸𑀧𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀢𑀭𑀕𑀗𑁆𑀕𑀸𑀬 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄𑀢𑀺? 𑀫𑀳𑀸𑀫𑀳𑀻𑀕𑀗𑁆𑀕𑀸𑀬.

𑀢𑀢𑁆𑀭𑀸𑀬𑀁 𑀢𑀲𑁆𑀲𑀸 𑀦𑀤𑀺𑀬𑀸 𑀆𑀯𑀺𑀪𑀸𑀯𑀢𑁆𑀣𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀡𑁆𑀡𑀦𑀸 𑁋 𑀅𑀬𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑁄 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄. 𑀢𑀢𑁆𑀣 𑀘𑀢𑀼𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄 𑀧𑀤𑁂𑀲𑁄 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 ‘‘𑀲𑀫𑀼𑀤𑁆𑀤𑁄’’𑀢𑀺 𑀲𑀗𑁆𑀔𑀁 𑀕𑀢𑁄. 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑀫𑀸𑀡𑁂 𑀫𑀦𑀼𑀲𑁆𑀲𑀸 𑀯𑀲𑀦𑁆𑀢𑀺. 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑀫𑀸𑀡𑁂 𑀳𑀺𑀫𑀯𑀸 𑀧𑀢𑀺𑀝𑁆𑀞𑀺𑀢𑁄 𑀉𑀩𑁆𑀩𑁂𑀥𑁂𑀦 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁄 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀲𑀫𑀦𑁆𑀢𑀢𑁄 𑀲𑀦𑁆𑀤𑀫𑀸𑀦𑀧𑀜𑁆𑀘𑀲𑀢𑀦𑀤𑀻𑀯𑀺𑀘𑀺𑀢𑁆𑀢𑁄. 𑀬𑀢𑁆𑀣 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀦 𑀕𑀫𑁆𑀪𑀻𑀭𑀢𑀸𑀬 𑀘 𑀧𑀜𑁆𑀜𑀸𑀲𑀧𑀜𑁆𑀜𑀸𑀲𑀬𑁄𑀚𑀦𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸 𑀧𑀽𑀭𑀴𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸 𑀅𑀦𑁄𑀢𑀢𑁆𑀢𑀸𑀤𑀬𑁄 𑀲𑀢𑁆𑀢 𑀫𑀳𑀸𑀲𑀭𑀸 𑀧𑀢𑀺𑀝𑁆𑀞𑀺𑀢𑀸.

𑀢𑁂𑀲𑀼 𑀅𑀦𑁄𑀢𑀢𑁆𑀢𑁄 𑀲𑀼𑀤𑀲𑁆𑀲𑀦𑀓𑀽𑀝𑀁, 𑀘𑀺𑀢𑁆𑀭𑀓𑀽𑀝𑀁, 𑀓𑀸𑀴𑀓𑀽𑀝𑀁, 𑀕𑀦𑁆𑀥𑀫𑀸𑀤𑀦𑀓𑀽𑀝𑀁, 𑀓𑁂𑀮𑀸𑀲𑀓𑀽𑀝𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀲𑀼𑀤𑀲𑁆𑀲𑀦𑀓𑀽𑀝𑀁 𑀲𑀼𑀯𑀡𑁆𑀡𑀫𑀬𑀁 𑀤𑁆𑀯𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀅𑀦𑁆𑀢𑁄𑀯𑀗𑁆𑀓𑀁 𑀓𑀸𑀓𑀫𑀼𑀔𑀲𑀡𑁆𑀞𑀸𑀦𑀁 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀁, 𑀘𑀺𑀢𑁆𑀭𑀓𑀽𑀝𑀁 𑀲𑀩𑁆𑀩𑀭𑀢𑀦𑀫𑀬𑀁, 𑀓𑀸𑀴𑀓𑀽𑀝𑀁 𑀅𑀜𑁆𑀚𑀦𑀫𑀬𑀁, 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀲𑀸𑀦𑀼𑀫𑀬𑀁 𑀅𑀩𑁆𑀪𑀦𑁆𑀢𑀭𑁂 𑀫𑀼𑀕𑁆𑀕𑀯𑀡𑁆𑀡𑀁 𑀦𑀸𑀦𑀧𑁆𑀧𑀓𑀸𑀭𑀑𑀲𑀥𑀲𑀜𑁆𑀙𑀦𑁆𑀦𑀁 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑀤𑀺𑀯𑀲𑁂 𑀆𑀤𑀺𑀢𑁆𑀢𑀫𑀺𑀯 𑀅𑀗𑁆𑀕𑀸𑀭𑀁 𑀚𑀮𑀦𑁆𑀢𑀁 𑀢𑀺𑀝𑁆𑀞𑀢𑀺, 𑀓𑁂𑀮𑀸𑀲𑀓𑀽𑀝𑀁 𑀭𑀚𑀢𑀫𑀬𑀁. 𑀲𑀩𑁆𑀩𑀸𑀦𑀺 𑀲𑀼𑀤𑀲𑁆𑀲𑀦𑁂𑀦 𑀲𑀫𑀸𑀦𑀼𑀩𑁆𑀩𑁂𑀥𑀲𑀡𑁆𑀞𑀸𑀦𑀸𑀦𑀺 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀤𑁂𑀯𑀸𑀦𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀪𑀸𑀯𑁂𑀦 𑀘 𑀯𑀲𑁆𑀲𑀦𑁆𑀢𑀺, 𑀦𑀤𑀺𑀬𑁄 𑀘 𑀢𑁂𑀲𑀼 𑀲𑀦𑁆𑀤𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀉𑀤𑀓𑀁 𑀅𑀦𑁄𑀢𑀢𑁆𑀢𑀫𑁂𑀯 𑀧𑀯𑀺𑀲𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀉𑀢𑁆𑀢𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀸 𑀧𑀩𑁆𑀩𑀢𑀦𑁆𑀢𑀭𑁂𑀦 𑀢𑀁 𑀑𑀪𑀸𑀲𑁂𑀦𑁆𑀢𑀺, 𑀉𑀚𑀼𑀁 𑀕𑀘𑁆𑀙𑀦𑁆𑀢𑀸 𑀦 𑀑𑀪𑀸𑀲𑁂𑀦𑁆𑀢𑀺. 𑀢𑁂𑀦𑁂𑀯𑀲𑁆𑀲 ‘‘𑀅𑀦𑁄𑀢𑀢𑁆𑀢’’𑀦𑁆𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺.

𑀢𑀢𑁆𑀣 𑀫𑀦𑁄𑀳𑀭𑀲𑀺𑀮𑀸𑀢𑀮𑀸𑀦𑀺 𑀦𑀺𑀫𑁆𑀫𑀘𑁆𑀙𑀓𑀘𑁆𑀙𑀧𑀸𑀦𑀺 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑀽𑀤𑀓𑀸𑀦𑀺 𑀦𑀳𑀸𑀦𑀢𑀺𑀢𑁆𑀣𑀸𑀦𑀺 𑀲𑀼𑀧𑁆𑀧𑀝𑀺𑀬𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀇𑀲𑀺𑀕𑀡𑀸 𑀘 𑀦𑁆𑀳𑀸𑀬𑀦𑁆𑀢𑀺, 𑀤𑁂𑀯𑀬𑀓𑁆𑀔𑀸𑀤𑀬𑁄 𑀘 𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀓𑀻𑀴𑀦𑁆𑀢𑀺.

𑀘𑀢𑀽𑀲𑀼 𑀘𑀲𑁆𑀲 𑀧𑀲𑁆𑀲𑁂𑀲𑀼 𑀲𑀻𑀳𑀫𑀼𑀔𑀁, 𑀳𑀢𑁆𑀣𑀺𑀫𑀼𑀔𑀁, 𑀅𑀲𑁆𑀲𑀫𑀼𑀔𑀁, 𑀉𑀲𑀪𑀫𑀼𑀔𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀘𑀢𑀲𑁆𑀲𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺. 𑀲𑀻𑀳𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀦𑀤𑀻𑀢𑀻𑀭𑁂 𑀲𑀻𑀳𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀫𑀼𑀔𑀸𑀤𑀻𑀳𑀺 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀸. 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀅𑀦𑁄𑀢𑀢𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀇𑀢𑀭𑀸 𑀢𑀺𑀲𑁆𑀲𑁄 𑀦𑀤𑀺𑀬𑁄 𑀅𑀦𑀼𑀧𑀕𑀫𑁆𑀫 𑀧𑀸𑀘𑀻𑀦𑀳𑀺𑀫𑀯𑀦𑁆𑀢𑁂𑀦𑁂𑀯 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀢𑀺. 𑀧𑀘𑁆𑀙𑀺𑀫𑀤𑀺𑀲𑀢𑁄 𑀘 𑀉𑀢𑁆𑀢𑀭𑀤𑀺𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀦𑀤𑀺𑀬𑁄𑀧𑀺 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀳𑀺𑀫𑀯𑀦𑁆𑀢𑁂𑀦𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂𑀦𑁂𑀯 𑀘 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀤𑀓𑁆𑀔𑀺𑀡𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀧𑀦 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦𑁂𑀯 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀡𑀸𑀳𑁂𑀦 𑀢𑀺𑀕𑀸𑀯𑀼𑀢𑀧𑀫𑀸𑀡𑀸 𑀉𑀤𑀓𑀥𑀸𑀭𑀸 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀺𑀬𑀕𑁆𑀕𑀴𑁂 𑀦𑀸𑀫 𑀧𑀸𑀲𑀸𑀡𑁂 𑀧𑀢𑀺𑀢𑀸, 𑀧𑀸𑀲𑀸𑀡𑁄 𑀉𑀤𑀓𑀥𑀸𑀭𑀸𑀯𑁂𑀕𑁂𑀦 𑀪𑀺𑀦𑁆𑀦𑁄. 𑀢𑀢𑁆𑀭 𑀧𑀜𑁆𑀜𑀸𑀲𑀬𑁄𑀚𑀦𑀧𑀫𑀸𑀡𑀸 𑀢𑀺𑀬𑀕𑁆𑀕𑀴𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀚𑀸𑀢𑀸. 𑀧𑁄𑀓𑁆𑀔𑀭𑀡𑀺𑀬𑀸 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀬 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀸. 𑀢𑀢𑁄 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀯𑀺𑀜𑁆𑀛𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀧𑀜𑁆𑀘𑀗𑁆𑀕𑀼𑀮𑀺𑀲𑀤𑀺𑀲𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑁄𑀢𑀢𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 ‘‘𑀆𑀯𑀝𑁆𑀝𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀓𑀡𑁆𑀳𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀆𑀓𑀸𑀲𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀆𑀓𑀸𑀲𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀺𑀬𑀕𑁆𑀕𑀴𑀧𑀸𑀲𑀸𑀡𑁂 𑀧𑀜𑁆𑀜𑀸𑀲𑀬𑁄𑀚𑀦𑁄𑀓𑀸𑀲𑁂 ‘‘𑀢𑀺𑀬𑀕𑁆𑀕𑀴𑀧𑁄𑀓𑁆𑀔𑀭𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀬 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀩𑀳𑀮𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺 𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 ‘‘𑀉𑀫𑀗𑁆𑀕𑀕𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀛𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀝𑁆𑀞𑀸𑀦𑁂 ‘‘𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻’’𑀢𑀺 𑀧𑀜𑁆𑀘𑀥𑀸 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀢𑀸 𑀧𑀜𑁆𑀘 𑀫𑀳𑀸𑀕𑀗𑁆𑀕𑀸 𑀳𑀺𑀫𑀯𑀢𑀸 𑀲𑀫𑁆𑀪𑀯𑀦𑁆𑀢𑀺. 𑀢𑀸𑀲𑀼 𑀬𑀸 𑀅𑀬𑀁 𑀧𑀜𑁆𑀘𑀫𑀻 𑀫𑀳𑀻 𑀦𑀸𑀫, 𑀲𑀸 𑀇𑀥 ‘‘𑀫𑀳𑀸𑀫𑀳𑀻𑀕𑀗𑁆𑀕𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀲𑀸 𑀕𑀗𑁆𑀕𑀸𑀬 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀲𑁄 𑀚𑀦𑀧𑀤𑁄 ‘‘𑀅𑀗𑁆𑀕𑀼𑀢𑁆𑀢𑀭𑀸𑀧𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼.

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀤𑁆𑀥𑀸𑀦𑀕𑀫𑀦𑀁 𑀓𑀼𑀭𑀼𑀫𑀸𑀦𑁄. 𑀢𑀢𑁆𑀣 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀘𑀸𑀭𑀺𑀓𑀸 𑀢𑀼𑀭𑀺𑀢𑀘𑀸𑀭𑀺𑀓𑀸, 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘. 𑀢𑀢𑁆𑀣 𑀤𑀽𑀭𑁂𑀧𑀺 𑀪𑀩𑁆𑀩𑀧𑀼𑀕𑁆𑀕𑀮𑁂 𑀤𑀺𑀲𑁆𑀯𑀸 𑀲𑀳𑀲𑀸 𑀕𑀫𑀦𑀁 𑀢𑀼𑀭𑀺𑀢𑀘𑀸𑀭𑀺𑀓𑀸. 𑀲𑀸 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸. 𑀢𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀳𑀺 𑀪𑀕𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀢𑀺𑀕𑀸𑀯𑀼𑀢𑀁 𑀅𑀕𑀫𑀸𑀲𑀺, 𑀆𑀴𑀯𑀓𑀤𑀫𑀦𑀢𑁆𑀣𑀁 𑀢𑀺𑀁𑀲𑀬𑁄𑀚𑀦𑀁, 𑀢𑀣𑀸 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲𑀢𑁆𑀣𑀸𑀬. 𑀧𑀼𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀦 𑀧𑀜𑁆𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁, 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀯𑀻𑀲𑀬𑁄𑀚𑀦𑀲𑀢𑀁, 𑀥𑀦𑀺𑀬𑀲𑁆𑀲𑀢𑁆𑀣𑀸𑀬 𑀲𑀢𑁆𑀢𑀬𑁄𑀚𑀦𑀲𑀢𑀁 𑀅𑀤𑁆𑀥𑀸𑀦𑀁 𑀅𑀕𑀫𑀸𑀲𑀺. 𑀅𑀬𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀕𑀸𑀫𑀦𑀺𑀕𑀫𑀦𑀕𑀭𑀧𑀝𑀺𑀧𑀸𑀝𑀺𑀬𑀸 𑀧𑀦 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀕𑀫𑀦𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀏𑀯𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀫𑀳𑀢𑀸𑀢𑀺 𑀲𑀗𑁆𑀔𑁆𑀬𑀸𑀫𑀳𑀢𑀸 𑀕𑀼𑀡𑀫𑀳𑀢𑀸 𑀘. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸𑀢𑀺 𑀲𑀫𑀡𑀕𑀡𑁂𑀦. 𑀅𑀟𑁆𑀠𑀢𑁂𑀴𑀲𑁂𑀳𑀻𑀢𑀺 𑀅𑀟𑁆𑀠𑁂𑀦 𑀢𑁂𑀴𑀲𑀳𑀺, 𑀤𑁆𑀯𑀸𑀤𑀲𑀳𑀺 𑀲𑀢𑁂𑀳𑀺 𑀧𑀜𑁆𑀜𑀸𑀲𑀸𑀬 𑀘 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀦…𑀧𑁂… 𑀢𑀤𑀯𑀲𑀭𑀻𑀢𑀺 𑀆𑀧𑀡𑀩𑀳𑀼𑀮𑀢𑀸𑀬 𑀲𑁄 𑀦𑀺𑀕𑀫𑁄 ‘‘𑀆𑀧𑀡𑁄’’ 𑀢𑁆𑀯𑁂𑀯 𑀦𑀸𑀫𑀁 𑀮𑀪𑀺. 𑀢𑀲𑁆𑀫𑀺𑀁 𑀓𑀺𑀭 𑀯𑀻𑀲𑀢𑀺𑀆𑀧𑀡𑀫𑀼𑀔𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀫𑀕𑁆𑀕𑁂𑀦 𑀯𑀸 𑀲𑁄 𑀅𑀗𑁆𑀕𑀼𑀢𑁆𑀢𑀭𑀸𑀧𑀸𑀦𑀁 𑀭𑀝𑁆𑀞𑀲𑁆𑀲 𑀦𑀺𑀕𑀫𑁄 𑀑𑀲𑀭𑀺𑀢𑀩𑁆𑀩𑁄, 𑀢𑁂𑀦 𑀅𑀯𑀲𑀭𑀺 𑀢𑀤𑀯𑀲𑀭𑀺 𑀅𑀕𑀫𑀸𑀲𑀺, 𑀢𑀁 𑀦𑀺𑀕𑀫𑀁 𑀅𑀦𑀼𑀧𑀸𑀧𑀼𑀡𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑁂𑀡𑀺𑀬𑁄 𑀚𑀝𑀺𑀮𑁄𑀢𑀺 𑀓𑁂𑀡𑀺𑀬𑁄𑀢𑀺 𑀦𑀸𑀫𑁂𑀦, 𑀚𑀝𑀺𑀮𑁄𑀢𑀺 𑀢𑀸𑀧𑀲𑁄. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄, 𑀥𑀦𑀭𑀓𑁆𑀔𑀡𑀢𑁆𑀣𑀸𑀬 𑀧𑀦 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀲𑀫𑀸𑀤𑀸𑀬 𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀯𑀲𑀢𑀺 𑀓𑀼𑀮𑀲𑀳𑀲𑁆𑀲𑀲𑁆𑀲 𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸. 𑀅𑀲𑁆𑀲𑀫𑁂𑀧𑀺 𑀘𑀲𑁆𑀲 𑀏𑀓𑁄 𑀢𑀸𑀮𑀭𑀼𑀓𑁆𑀔𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀁 𑀲𑀼𑀯𑀡𑁆𑀡𑀨𑀮𑀁 𑀫𑀼𑀜𑁆𑀘𑀢𑀻𑀢𑀺 𑀯𑀤𑀦𑁆𑀢𑀺. 𑀲𑁄 𑀤𑀺𑀯𑀸 𑀓𑀸𑀲𑀸𑀬𑀸𑀦𑀺 𑀥𑀸𑀭𑁂𑀢𑀺 𑀚𑀝𑀸 𑀘 𑀩𑀦𑁆𑀥𑀢𑀺, 𑀭𑀢𑁆𑀢𑀺𑀁 𑀬𑀣𑀸𑀲𑀼𑀔𑀁 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑀧𑀭𑀺𑀤𑀻𑀧𑀦𑀁, 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯 𑀢𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀔𑁄 𑀧𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑁄𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄, 𑀲𑁂𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀬𑁂𑀯 𑀣𑀼𑀢𑀺𑀖𑁄𑀲𑁄 𑀯𑀸.

𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺 𑀆𑀤𑀺𑀫𑁆𑀳𑀺 𑀧𑀦 𑀅𑀬𑀁 𑀢𑀸𑀯 𑀬𑁄𑀚𑀦𑀸 𑁋 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺, 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀓𑀸 𑀳𑀺 𑀲𑁄 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀫𑀕𑁆𑀕𑁂𑀦 𑀲𑀯𑀸𑀲𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸𑀢𑀺 𑀆𑀭𑀓𑀢𑁆𑀢𑀸 𑀅𑀭𑀳𑀁. 𑀢𑁂 𑀘𑀸𑀦𑁂𑀦 𑀓𑀺𑀮𑁂𑀲𑀸𑀭𑀬𑁄 𑀫𑀕𑁆𑀕𑁂𑀦 𑀳𑀢𑀸𑀢𑀺 𑀅𑀭𑀻𑀦𑀁 𑀳𑀢𑀢𑁆𑀢𑀸𑀧𑀺 𑀅𑀭𑀳𑀁. 𑀬𑀜𑁆𑀘𑁂𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀺, 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀚𑀭𑀸𑀫𑀭𑀡𑀦𑁂𑀫𑀺, 𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀪𑀯𑀭𑀣𑁂 𑀲𑀫𑀸𑀬𑁄𑀚𑀺𑀢𑀁 𑀅𑀦𑀸𑀤𑀺𑀓𑀸𑀮𑀧𑀯𑀢𑁆𑀢𑀁 𑀲𑀁𑀲𑀸𑀭𑀘𑀓𑁆𑀓𑀁. 𑀢𑀲𑁆𑀲𑀸𑀦𑁂𑀦 𑀩𑁄𑀥𑀺𑀫𑀡𑁆𑀟𑁂 𑀯𑀻𑀭𑀺𑀬𑀧𑀸𑀤𑁂𑀳𑀺 𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀤𑁆𑀥𑀸𑀳𑀢𑁆𑀣𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀅𑀭𑀸 𑀳𑀢𑀸𑀢𑀺 𑀅𑀭𑀸𑀦𑀁 𑀳𑀢𑀢𑁆𑀢𑀸𑀢𑀺𑀧𑀺 𑀅𑀭𑀳𑀁. 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂 𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀸𑀤𑀻𑀦𑀺 𑀘 𑀅𑀭𑀳𑀢𑀻𑀢𑀺 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸𑀧𑀺 𑀅𑀭𑀳𑀁. 𑀬𑀣𑀸 𑀘 𑀮𑁄𑀓𑁂 𑀓𑁂𑀘𑀺 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀩𑀸𑀮𑀸 𑀅𑀲𑀺𑀮𑁄𑀓𑀪𑀬𑁂𑀦 𑀭𑀳𑁄 𑀧𑀸𑀧𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀦𑀸𑀬𑀁 𑀓𑀤𑀸𑀘𑀺 𑀓𑀭𑁄𑀢𑀻𑀢𑀺 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀢𑁄𑀧𑀺 𑀅𑀭𑀳𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀆𑀭𑀓𑀢𑁆𑀢𑀸 𑀳𑀢𑀢𑁆𑀢𑀸 𑀘, 𑀓𑀺𑀮𑁂𑀲𑀸𑀭𑀻𑀦 𑀲𑁄 𑀫𑀼𑀦𑀺;

𑀳𑀢𑀲𑀁𑀲𑀸𑀭𑀘𑀓𑁆𑀓𑀸𑀭𑁄, 𑀧𑀘𑁆𑀘𑀬𑀸𑀤𑀻𑀦 𑀘𑀸𑀭𑀳𑁄;

𑀦 𑀭𑀳𑁄 𑀓𑀭𑁄𑀢𑀺 𑀧𑀸𑀧𑀸𑀦𑀺, 𑀅𑀭𑀳𑀁 𑀢𑁂𑀦 𑀧𑀯𑀼𑀘𑁆𑀘𑀢𑀻’’𑀢𑀺.

𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀅𑀢𑀺𑀲𑀬𑀯𑀺𑀲𑀼𑀤𑁆𑀥𑀸𑀳𑀺 𑀯𑀺𑀚𑁆𑀚𑀸𑀳𑀺 𑀅𑀩𑁆𑀪𑀼𑀢𑁆𑀢𑀫𑁂𑀦 𑀘𑀭𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄. 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸 𑀲𑀫𑁆𑀫𑀸 𑀕𑀤𑀢𑁆𑀢𑀸 𑀘 𑀲𑀼𑀕𑀢𑁄. 𑀲𑀩𑁆𑀩𑀣𑀸𑀧𑀺 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽. 𑀲𑁄 𑀳𑀺 𑀪𑀕𑀯𑀸 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀦𑀺𑀭𑁄𑀥𑀢𑁄 𑀦𑀺𑀭𑁄𑀥𑀽𑀧𑀸𑀬𑀢𑁄𑀢𑀺 𑀲𑀩𑁆𑀩𑀣𑀸 𑀔𑀦𑁆𑀥𑀸𑀬𑀢𑀦𑀸𑀤𑀺𑀪𑁂𑀤𑀁 𑀲𑀗𑁆𑀔𑀸𑀭𑀮𑁄𑀓𑀁 𑀅𑀯𑁂𑀤𑀺, ‘‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲 𑀮𑁄𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’𑀢𑀺 (𑀧𑀝𑀺. 𑀫. 𑁧.𑁧𑁧𑁨) 𑀏𑀯𑀁 𑀲𑀩𑁆𑀩𑀣𑀸 𑀲𑀗𑁆𑀔𑀸𑀭𑀮𑁄𑀓𑀁 𑀅𑀯𑁂𑀤𑀺. 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑁂 𑀅𑀪𑀩𑁆𑀩𑁂 𑀲𑀢𑁆𑀢𑁂 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀣𑀸 𑀲𑀢𑁆𑀢𑀮𑁄𑀓𑀁 𑀅𑀯𑁂𑀤𑀺. 𑀢𑀣𑀸 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀆𑀬𑀸𑀫𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀅𑀟𑁆𑀠𑀧𑀜𑁆𑀘𑀫𑀸𑀦𑀺 𑀘 𑀲𑀢𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀙𑀢𑁆𑀢𑀺𑀁𑀲 𑀲𑀢𑀲𑀳𑀲𑁆𑀲𑀸𑀦𑀺 𑀤𑀲 𑀲𑀳𑀲𑁆𑀲𑀸𑀦𑀺 𑀅𑀟𑁆𑀠𑀼𑀟𑁆𑀠𑀸𑀦𑀺 𑀘 𑀲𑀢𑀸𑀦𑀺.

𑀢𑀢𑁆𑀣 𑁋

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸.

𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀝𑁆𑀞𑁂𑀯 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀚𑀮𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁.

𑀦𑀯 𑀲𑀢𑀲𑀳𑀲𑁆𑀲𑀸𑀦𑀺, 𑀫𑀸𑀮𑀼𑀢𑁄 𑀦𑀪𑀫𑀼𑀕𑁆𑀕𑀢𑁄;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀏𑀲𑀸 𑀮𑁄𑀓𑀲𑁆𑀲 𑀲𑀡𑁆𑀞𑀺𑀢𑀺’’.

𑀏𑀯𑀁 𑀲𑀡𑁆𑀞𑀺𑀢𑁂 𑀘𑁂𑀢𑁆𑀣 𑀬𑁄𑀚𑀦𑀸𑀦𑀁 𑁋

𑀘𑀢𑀼𑀭𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂;

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀲𑀺𑀦𑁂𑀭𑀼 𑀧𑀩𑁆𑀩𑀢𑀼𑀢𑁆𑀢𑀫𑁄.

𑀢𑀢𑁄 𑀉𑀧𑀟𑁆𑀠𑀼𑀧𑀟𑁆𑀠𑁂𑀦, 𑀧𑀫𑀸𑀡𑁂𑀦 𑀬𑀣𑀸𑀓𑁆𑀓𑀫𑀁;

𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸 𑀤𑀺𑀩𑁆𑀩𑀸, 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑀸.

𑀬𑀼𑀕𑀦𑁆𑀥𑀭𑁄 𑀈𑀲𑀥𑀭𑁄, 𑀓𑀭𑀯𑀻𑀓𑁄 𑀲𑀼𑀤𑀲𑁆𑀲𑀦𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀺 𑀩𑁆𑀭𑀳𑀸.

𑀏𑀢𑁂 𑀲𑀢𑁆𑀢 𑀫𑀳𑀸𑀲𑁂𑀮𑀸, 𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄;

𑀫𑀳𑀸𑀭𑀸𑀚𑀸𑀦𑀫𑀸𑀯𑀸𑀲𑀸, 𑀤𑁂𑀯𑀬𑀓𑁆𑀔𑀦𑀺𑀲𑁂𑀯𑀺𑀢𑀸.

𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘 𑀧𑀩𑁆𑀩𑀢𑁄;

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺 𑀆𑀬𑀢𑀯𑀺𑀢𑁆𑀣𑀢𑁄.

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑁂𑀳𑀺, 𑀓𑀽𑀝𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄;

𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥-𑀧𑀭𑀺𑀓𑁆𑀔𑁂𑀧𑀸 𑀦𑀕𑀯𑁆𑀳𑀬𑀸.

𑀧𑀜𑁆𑀜𑀸𑀲𑀬𑁄𑀚𑀦𑀓𑁆𑀔𑀦𑁆𑀥-𑀲𑀸𑀔𑀸𑀬𑀸𑀫𑀸 𑀲𑀫𑀦𑁆𑀢𑀢𑁄;

𑀲𑀢𑁆𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀸, 𑀢𑀸𑀯𑀤𑁂𑀯 𑀘 𑀉𑀕𑁆𑀕𑀢𑀸.

𑀚𑀫𑁆𑀩𑀽 𑀬𑀲𑁆𑀲𑀸𑀦𑀼𑀪𑀸𑀯𑁂𑀦, 𑀚𑀫𑁆𑀩𑀼𑀤𑀻𑀧𑁄 𑀧𑀓𑀸𑀲𑀺𑀢𑁄;

𑀤𑁆𑀯𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀳𑀡𑁆𑀡𑀯𑁂.

𑀅𑀘𑁆𑀘𑀼𑀕𑁆𑀕𑀢𑁄 𑀢𑀸𑀯𑀤𑁂𑀯, 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄;

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀘𑀓𑁆𑀓𑀯𑀸𑀴𑀫𑀬𑀁 𑀞𑀺𑀢𑁄’’.

𑀢𑀢𑁆𑀣 𑀘𑀦𑁆𑀤𑀫𑀡𑁆𑀟𑀮𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀲𑀬𑁄𑀚𑀦𑀁, 𑀢𑀸𑀯𑀢𑀺𑀁𑀲𑀪𑀯𑀦𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀁, 𑀢𑀣𑀸 𑀅𑀲𑀼𑀭𑀪𑀯𑀦𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀚𑀫𑁆𑀩𑀼𑀤𑀻𑀧𑁄 𑀘. 𑀅𑀧𑀭𑀕𑁄𑀬𑀸𑀦𑀁 𑀲𑀢𑁆𑀢𑀲𑀳𑀲𑁆𑀲𑀬𑁄𑀚𑀦𑀁, 𑀢𑀣𑀸 𑀧𑀼𑀩𑁆𑀩𑀯𑀺𑀤𑁂𑀳𑁄, 𑀉𑀢𑁆𑀢𑀭𑀓𑀼𑀭𑀼 𑀅𑀝𑁆𑀞𑀲𑀳𑀲𑁆𑀲𑀬𑁄𑀚𑀦𑁄. 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀫𑀳𑀸𑀤𑀻𑀧𑁄 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀏𑀓𑀸 𑀮𑁄𑀓𑀥𑀸𑀢𑀼. 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀲𑀼 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸. 𑀏𑀯𑀁 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄, 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦 𑀅𑀜𑁆𑀜𑀸𑀲𑀻𑀢𑀺 𑀲𑀩𑁆𑀩𑀣𑀸 𑀑𑀓𑀸𑀲𑀮𑁄𑀓𑀁 𑀅𑀯𑁂𑀤𑀺. 𑀏𑀯𑀁 𑀲𑁄 𑀪𑀕𑀯𑀸 𑀲𑀩𑁆𑀩𑀣𑀸. 𑀯𑀺𑀤𑀺𑀢𑀮𑁄𑀓𑀢𑁆𑀢𑀸 𑀮𑁄𑀓𑀯𑀺𑀤𑀽𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀢𑀦𑁄 𑀧𑀦 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀢𑀭𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸 𑀅𑀦𑀼𑀢𑁆𑀢𑀭𑁄. 𑀯𑀺𑀘𑀺𑀢𑁆𑀢𑁂𑀳𑀺 𑀯𑀺𑀦𑀬𑀦𑀽𑀧𑀸𑀬𑁂𑀳𑀺 𑀧𑀼𑀭𑀺𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀅𑀦𑀼𑀲𑀸𑀲𑀢𑀺 𑀦𑀺𑀢𑁆𑀣𑀸𑀭𑁂𑀢𑀺 𑀘𑀸𑀢𑀺 𑀲𑀢𑁆𑀣𑀸. 𑀤𑁂𑀯𑀫𑀦𑀼𑀲𑁆𑀲𑀕𑁆𑀕𑀳𑀡𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀪𑀩𑁆𑀩𑀧𑀼𑀕𑁆𑀕𑀮𑀧𑀭𑀺𑀕𑁆𑀕𑀳𑀯𑀲𑁂𑀦 𑀘 𑀓𑀢𑀁, 𑀦𑀸𑀕𑀸𑀤𑀺𑀓𑁂𑀧𑀺 𑀧𑀦 𑀏𑀲 𑀮𑁄𑀓𑀺𑀬𑀢𑁆𑀣𑁂𑀦 𑀅𑀦𑀼𑀲𑀸𑀲𑀢𑀺. 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁 𑀦𑀸𑀫, 𑀲𑀩𑁆𑀩𑀲𑁆𑀲 𑀩𑀼𑀤𑁆𑀥𑀢𑁆𑀢𑀸 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀜𑀸𑀡𑀯𑀲𑁂𑀦 𑀩𑀼𑀤𑁆𑀥𑁄. 𑀬𑀢𑁄 𑀧𑀦 𑀲𑁄 𑁋

‘‘𑀪𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺.

𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀸𑀦𑀺 𑀧𑀤𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁪-𑁧𑁨𑁫) 𑀯𑀼𑀢𑁆𑀢𑀸𑀦𑀺.

𑀲𑁄 𑀇𑀫𑀁 𑀮𑁄𑀓𑀦𑁆𑀢𑀺 𑀲𑁄 𑀪𑀕𑀯𑀸 𑀇𑀫𑀁 𑀮𑁄𑀓𑀁. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀤𑁂𑀯𑀓𑀦𑁆𑀢𑀺𑀆𑀤𑀻𑀦𑀺 𑀓𑀲𑀺𑀪𑀸𑀭𑀤𑁆𑀯𑀸𑀚𑀆𑀴𑀯𑀓𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀲𑀬𑀦𑁆𑀢𑀺 𑀲𑀸𑀫𑀁 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸. 𑀅𑀪𑀺𑀜𑁆𑀜𑀸𑀢𑀺 𑀅𑀪𑀺𑀜𑁆𑀜𑀸𑀬. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀧𑀯𑁂𑀤𑁂𑀢𑀻𑀢𑀺 𑀩𑁄𑀥𑁂𑀢𑀺 𑀜𑀸𑀧𑁂𑀢𑀺 𑀧𑀓𑀸𑀲𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀦𑁆𑀢𑀺 𑀲𑁄 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀁 𑀳𑀺𑀢𑁆𑀯𑀸𑀧𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀜𑁆𑀘 𑀔𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀺. 𑀓𑀣𑀁? 𑀏𑀓𑀕𑀸𑀣𑀸𑀧𑀺 𑀳𑀺 𑀲𑀫𑀦𑁆𑀢𑀪𑀤𑁆𑀤𑀓𑀢𑁆𑀢𑀸 𑀥𑀫𑁆𑀫𑀲𑁆𑀲 𑀧𑀞𑀫𑀧𑀸𑀤𑁂𑀦 𑀆𑀤𑀺𑀓𑀮𑁆𑀬𑀸𑀡𑀸, 𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀸, 𑀧𑀘𑁆𑀙𑀺𑀫𑀧𑀸𑀤𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸. 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀦𑀺𑀤𑀸𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, 𑀦𑀺𑀕𑀫𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀁 𑀧𑀞𑀫𑀸𑀦𑀼𑀲𑀦𑁆𑀥𑀺𑀦𑀸 𑀆𑀤𑀺𑀓𑀮𑁆𑀬𑀸𑀡𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑁂𑀲𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑀁. 𑀲𑀓𑀮𑁄𑀧𑀺 𑀲𑀸𑀲𑀦𑀥𑀫𑁆𑀫𑁄 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑁂𑀦 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀻𑀮𑀲𑀫𑀸𑀥𑀻𑀳𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀳𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀸𑀬 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀢𑀁 𑀲𑀼𑀢𑁆𑀯𑀸 𑀢𑀣𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀸𑀬 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀸𑀯𑀓𑀩𑁄𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀲𑀼𑀬𑁆𑀬𑀫𑀸𑀦𑁄 𑀘𑁂𑀲 𑀦𑀻𑀯𑀭𑀡𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀢𑁄 𑀲𑀯𑀦𑁂𑀦𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀆𑀤𑀺𑀓𑀮𑁆𑀬𑀸𑀡𑁄, 𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀔𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀧𑀝𑀺𑀧𑀢𑁆𑀢𑀺𑀨𑀮𑁂 𑀦𑀺𑀝𑁆𑀞𑀺𑀢𑁂 𑀢𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀝𑀺𑀧𑀢𑁆𑀢𑀺𑀨𑀮𑁂𑀦𑀧𑀺 𑀓𑀮𑁆𑀬𑀸𑀡𑀫𑁂𑀯 𑀆𑀯𑀳𑀢𑀻𑀢𑀺 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀦𑀸𑀣𑀧𑁆𑀧𑀪𑀯𑀢𑁆𑀢𑀸 𑀘 𑀧𑀪𑀯𑀲𑀼𑀤𑁆𑀥𑀺𑀬𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀅𑀢𑁆𑀣𑀲𑀼𑀤𑁆𑀥𑀺𑀬𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄. 𑀬𑀢𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀦 𑀬𑀲𑁆𑀫𑀸 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀧𑀓𑀸𑀲𑁂𑀢𑀺, 𑀦𑀸𑀦𑀸𑀦𑀬𑁂𑀳𑀺 𑀤𑀻𑀧𑁂𑀢𑀺, 𑀢𑀜𑁆𑀘 𑀬𑀣𑀸𑀲𑀫𑁆𑀪𑀯𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄 𑀲𑀸𑀢𑁆𑀣𑀁, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣𑀁, 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦𑀁. 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀸𑀢𑁆𑀣𑀁, 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀢𑁄 𑀲𑀭𑀺𑀓𑁆𑀔𑀓𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀸𑀢𑁆𑀣𑀁, 𑀲𑀤𑁆𑀥𑁂𑀬𑁆𑀬𑀢𑁄 𑀮𑁄𑀓𑀺𑀬𑀚𑀦𑀧𑁆𑀧𑀲𑀸𑀤𑀓𑀦𑁆𑀢𑀺 𑀲𑀩𑁆𑀬𑀜𑁆𑀚𑀦𑀁. 𑀕𑀫𑁆𑀪𑀻𑀭𑀸𑀥𑀺𑀧𑁆𑀧𑀸𑀬𑀢𑁄 𑀲𑀸𑀢𑁆𑀣𑀁, 𑀉𑀢𑁆𑀢𑀸𑀦𑀧𑀤𑀢𑁄 𑀲𑀩𑁆𑀬𑀜𑁆𑀚𑀦𑀁. 𑀉𑀧𑀦𑁂𑀢𑀩𑁆𑀩𑀲𑁆𑀲𑀸𑀪𑀸𑀯𑀢𑁄 𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁, 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁. 𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀪𑀽𑀢𑁂𑀳𑀺 𑀲𑁂𑀝𑁆𑀞𑁂𑀳𑀺 𑀘𑀭𑀺𑀢𑀩𑁆𑀩𑀢𑁄 𑀢𑁂𑀲𑀜𑁆𑀘 𑀘𑀭𑀺𑀬𑀪𑀸𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀲𑁆𑀫𑀸 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀅𑀧𑀺𑀘 𑀬𑀲𑁆𑀫𑀸 𑀲𑀦𑀺𑀤𑀸𑀦𑀁 𑀲𑀉𑀧𑁆𑀧𑀢𑁆𑀢𑀺𑀓𑀜𑁆𑀘 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀁 𑀤𑁂𑀲𑁂𑀢𑀺, 𑀯𑀺𑀦𑁂𑀬𑁆𑀬𑀸𑀦𑀁 𑀅𑀦𑀼𑀭𑀽𑀧𑀢𑁄 𑀅𑀢𑁆𑀣𑀲𑁆𑀲 𑀅𑀯𑀺𑀧𑀭𑀻𑀢𑀢𑀸𑀬 𑀳𑁂𑀢𑀼𑀤𑀸𑀳𑀭𑀡𑀬𑁄𑀕𑀢𑁄 𑀘 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀲𑁄𑀢𑀽𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀦𑀺𑀕𑀫𑀦𑁂𑀦 𑀘 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁. 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀜𑁆𑀘 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀸𑀢𑁆𑀣𑀁, 𑀧𑀭𑀺𑀬𑀢𑁆𑀢𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀢𑁄 𑀲𑀩𑁆𑀬𑀜𑁆𑀚𑀦𑀁, 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀬𑀼𑀢𑁆𑀢𑀢𑁄 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑁄 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑀢𑁄 𑀘 𑀧𑀭𑀺𑀲𑀼𑀤𑁆𑀥𑀁, 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀘𑀭𑀺𑀬𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸𑀧𑀺 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦, 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀧𑀸𑀦𑀓𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬. 𑀅𑀬𑀜𑁆𑀳𑀺 𑀓𑁂𑀡𑀺𑀬𑁄 𑀲𑀸𑀬𑀦𑁆𑀳𑀲𑀫𑀬𑁂 𑀪𑀕𑀯𑀢𑁄 𑀆𑀕𑀫𑀦𑀁 𑀅𑀲𑁆𑀲𑁄𑀲𑀺. ‘‘𑀢𑀼𑀘𑁆𑀙𑀳𑀢𑁆𑀣𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀕𑀦𑁆𑀢𑀼𑀁 𑀮𑀚𑁆𑀚𑀫𑀸𑀦𑁄 𑀯𑀺𑀓𑀸𑀮𑀪𑁄𑀚𑀦𑀸 𑀯𑀺𑀭𑀢𑀸𑀦𑀫𑁆𑀧𑀺 𑀧𑀸𑀦𑀓𑀁 𑀓𑀧𑁆𑀧𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀳𑀺 𑀓𑀸𑀚𑀲𑀢𑁂𑀳𑀺 𑀲𑀼𑀲𑀗𑁆𑀔𑀢𑀁 𑀩𑀤𑀭𑀧𑀸𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀬𑀣𑀸𑀳 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 ‘‘𑀅𑀣 𑀔𑁄 𑀓𑁂𑀡𑀺𑀬𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺, 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀳𑀭𑀸𑀧𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁩𑁦𑁦) 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀦𑀁 𑀪𑀕𑀯𑀸 𑀬𑀣𑀸 𑀲𑁂𑀓𑁆𑀔𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁨𑁨 𑀆𑀤𑀬𑁄) 𑀲𑀸𑀓𑀺𑀬𑁂 𑀆𑀯𑀲𑀣𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑁂 (𑀫. 𑀦𑀺. 𑁧.𑁩𑁨𑁫 𑀆𑀤𑀬𑁄) 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬, 𑀭𑀣𑀯𑀺𑀦𑀻𑀢𑁂 (𑀫. 𑀦𑀺. 𑁧.𑁨𑁫𑁨 𑀆𑀤𑀬𑁄) 𑀚𑀸𑀢𑀺𑀪𑀽𑀫𑀓𑁂 𑀪𑀺𑀓𑁆𑀔𑀽 𑀤𑀲𑀓𑀣𑀸𑀯𑀢𑁆𑀣𑀼𑀧𑀝𑀺𑀲𑀁𑀬𑀼𑀢𑁆𑀢𑀸𑀬, 𑀏𑀯𑀁 𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬 𑀧𑀸𑀦𑀓𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬 𑀧𑀸𑀦𑀓𑀤𑀸𑀦𑀸𑀦𑀺𑀲𑀁𑀲𑀁 𑀲𑀦𑁆𑀤𑀲𑁆𑀲𑁂𑀲𑀺, 𑀢𑀣𑀸𑀭𑀽𑀧𑀸𑀦𑀁 𑀧𑀼𑀜𑁆𑀜𑀸𑀦𑀁 𑀧𑀼𑀦𑀧𑀺 𑀓𑀢𑁆𑀢𑀩𑁆𑀩𑀢𑀸𑀬 𑀦𑀺𑀬𑁄𑀚𑁂𑀦𑁆𑀢𑁄 𑀲𑀫𑀸𑀤𑀧𑁂𑀲𑀺, 𑀅𑀩𑁆𑀪𑀼𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀲𑀫𑀼𑀢𑁆𑀢𑁂𑀚𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀦 𑀨𑀮𑀯𑀺𑀲𑁂𑀲𑁂𑀦 𑀧𑀳𑀁𑀲𑁂𑀦𑁆𑀢𑁄 𑀲𑀫𑁆𑀧𑀳𑀁𑀲𑁂𑀲𑀺. 𑀢𑁂𑀦𑀸𑀳 ‘‘𑀥𑀫𑁆𑀫𑀺𑀬𑀸 𑀓𑀣𑀸𑀬…𑀧𑁂… 𑀲𑀫𑁆𑀧𑀳𑀁𑀲𑁂𑀲𑀻’’𑀢𑀺. 𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀲𑀺, 𑀪𑀕𑀯𑀸 𑀘𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀢𑁂𑀦𑀸𑀳 ‘‘𑀅𑀣 𑀔𑁄 𑀓𑁂𑀡𑀺𑀬𑁄 𑀚𑀝𑀺𑀮𑁄…𑀧𑁂… 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸’’𑀢𑀺.

𑀓𑀺𑀫𑀢𑁆𑀣𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺 𑀪𑀕𑀯𑀸𑀢𑀺? 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑀸𑀬 𑀘𑀲𑁆𑀲 𑀧𑀼𑀜𑁆𑀜𑀯𑀼𑀟𑁆𑀠𑀺 𑀪𑀯𑀺𑀲𑁆𑀲𑀢𑀺, 𑀩𑀳𑀼𑀢𑀭𑀜𑁆𑀘 𑀧𑀝𑀺𑀬𑀸𑀤𑁂𑀲𑁆𑀲𑀢𑀺, 𑀢𑀢𑁄 𑀅𑀟𑁆𑀠𑀢𑁂𑀮𑀲𑀸𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀝𑀺𑀬𑀢𑁆𑀢𑀁 𑀅𑀟𑁆𑀠𑀲𑁄𑀴𑀲𑀦𑁆𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺. 𑀓𑀼𑀢𑁄 𑀅𑀧𑀭𑀸𑀦𑀺 𑀢𑀻𑀡𑀺 𑀲𑀢𑀸𑀦𑀻𑀢𑀺 𑀘𑁂? 𑀅𑀧𑁆𑀧𑀝𑀺𑀬𑀢𑁆𑀢𑁂𑀬𑁂𑀯 𑀳𑀺 𑀪𑀢𑁆𑀢𑁂 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄 𑀢𑀻𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺. 𑀫𑀺𑀢𑁆𑀢𑀸𑀫𑀘𑁆𑀘𑁂𑀢𑀺 𑀫𑀺𑀢𑁆𑀢𑁂 𑀘 𑀓𑀫𑁆𑀫𑀓𑀭𑁂 𑀘. 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀢𑀺 𑀲𑀫𑀸𑀦𑀮𑁄𑀳𑀺𑀢𑁂 𑀏𑀓𑀬𑁄𑀦𑀺𑀲𑀫𑁆𑀩𑀦𑁆𑀥𑁂 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀅𑀯𑀲𑁂𑀲𑀩𑀦𑁆𑀥𑀯𑁂 𑀘. 𑀬𑁂𑀦𑀸𑀢𑀺 𑀬𑀲𑁆𑀫𑀸. 𑀫𑁂𑀢𑀺 𑀫𑀬𑁆𑀳𑀁. 𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀦𑁆𑀢𑀺 𑀓𑀸𑀬𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀫𑀡𑁆𑀟𑀮𑀫𑀸𑀴𑀁 𑀧𑀝𑀺𑀬𑀸𑀤𑁂𑀢𑀻𑀢𑀺 𑀲𑁂𑀢𑀯𑀺𑀢𑀸𑀦𑀫𑀡𑁆𑀟𑀧𑀁 𑀓𑀭𑁄𑀢𑀺.

𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀩𑁆𑀩𑁂𑀤𑀬𑀚𑀼𑀩𑁆𑀩𑁂𑀤𑀲𑀸𑀫𑀯𑁂𑀤𑀸𑀦𑀁. 𑀲𑀳 𑀦𑀺𑀖𑀡𑁆𑀟𑀼𑀦𑀸 𑀘 𑀓𑁂𑀝𑀼𑀪𑁂𑀦 𑀘 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁. 𑀦𑀺𑀖𑀡𑁆𑀟𑀽𑀢𑀺 𑀦𑀸𑀫𑀦𑀺𑀖𑀡𑁆𑀟𑀼𑀭𑀼𑀓𑁆𑀔𑀸𑀤𑀻𑀦𑀁 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀁 𑀲𑀢𑁆𑀣𑀁. 𑀓𑁂𑀝𑀼𑀪𑀦𑁆𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀉𑀧𑀓𑀸𑀭𑀸𑀬 𑀲𑀢𑁆𑀣𑀁. 𑀲𑀳 𑀅𑀓𑁆𑀔𑀭𑀧𑁆𑀧𑀪𑁂𑀤𑁂𑀦 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁. 𑀅𑀓𑁆𑀔𑀭𑀧𑁆𑀧𑀪𑁂𑀤𑁄𑀢𑀺 𑀲𑀺𑀓𑁆𑀔𑀸 𑀘 𑀦𑀺𑀭𑀼𑀢𑁆𑀢𑀺 𑀘. 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀦𑁆𑀢𑀺 𑀅𑀣𑀩𑁆𑀩𑀦𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 ‘‘𑀇𑀢𑀺𑀳 𑀆𑀲 𑀇𑀢𑀺𑀳 𑀆𑀲𑀸’’𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸. 𑀢𑁂𑀲𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁. 𑀧𑀤𑀁 𑀢𑀤𑀯𑀲𑁂𑀲𑀜𑁆𑀘 𑀩𑁆𑀬𑀸𑀓𑀭𑀡𑀁 𑀅𑀚𑁆𑀛𑁂𑀢𑀺 𑀯𑁂𑀤𑁂𑀢𑀺 𑀘𑀸𑀢𑀺 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄. 𑀮𑁄𑀓𑀸𑀬𑀢𑁂 𑀯𑀺𑀢𑀡𑁆𑀟𑀯𑀸𑀤𑀲𑀢𑁆𑀣𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀥𑀺𑀓𑀸𑀭𑁂 𑀘 𑀤𑁆𑀯𑀸𑀤𑀲𑀲𑀳𑀲𑁆𑀲𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀢𑁆𑀣𑁂 𑀅𑀦𑀽𑀦𑁄 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄, 𑀅𑀯𑀬𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀬𑁄 𑀦𑀸𑀫 𑀬𑁄 𑀢𑀸𑀦𑀺 𑀅𑀢𑁆𑀣𑀢𑁄 𑀘 𑀕𑀦𑁆𑀣𑀢𑁄 𑀘 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀚𑀗𑁆𑀖𑀸𑀬 𑀳𑀺𑀢𑀁 𑀯𑀺𑀳𑀸𑀭𑀁 𑀚𑀗𑁆𑀖𑀸𑀯𑀺𑀳𑀸𑀭𑀁, 𑀘𑀺𑀭𑀸𑀲𑀦𑀸𑀤𑀺𑀚𑀦𑀺𑀢𑀁 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀼𑀁 𑀚𑀗𑁆𑀖𑀸𑀧𑀲𑀸𑀭𑀡𑀢𑁆𑀣𑀁 𑀅𑀤𑀻𑀖𑀘𑀸𑀭𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀘𑀗𑁆𑀓𑀫𑀫𑀸𑀦𑁄𑀢𑀺 𑀘𑀗𑁆𑀓𑀫𑀫𑀸𑀦𑁄 𑀏𑀯. 𑀅𑀦𑀼𑀯𑀺𑀘𑀭𑀫𑀸𑀦𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀘𑀭𑀫𑀸𑀦𑁄. 𑀓𑁂𑀡𑀺𑀬𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑁄𑀢𑀺 𑀓𑁂𑀡𑀺𑀬𑀲𑁆𑀲 𑀅𑀲𑁆𑀲𑀫𑀁 𑀦𑀺𑀯𑁂𑀲𑀦𑀁. 𑀆𑀯𑀸𑀳𑁄𑀢𑀺 𑀓𑀜𑁆𑀜𑀸𑀕𑀳𑀡𑀁. 𑀯𑀺𑀯𑀸𑀳𑁄𑀢𑀺 𑀓𑀜𑁆𑀜𑀸𑀤𑀸𑀦𑀁. 𑀫𑀳𑀸𑀬𑀜𑁆𑀜𑁄𑀢𑀺 𑀫𑀳𑀸𑀬𑀚𑀦𑀁. 𑀫𑀸𑀕𑀥𑁄𑀢𑀺 𑀫𑀕𑀥𑀸𑀦𑀁 𑀇𑀲𑁆𑀲𑀭𑁄. 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁂𑀦𑀺𑀬𑁄. 𑀩𑀺𑀫𑁆𑀩𑀻𑀢𑀺 𑀲𑀼𑀯𑀡𑁆𑀡𑀁, 𑀢𑀲𑁆𑀫𑀸 𑀲𑀸𑀭𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑀢𑀸𑀬 𑀩𑀺𑀫𑁆𑀩𑀺𑀲𑀸𑀭𑁄. 𑀲𑁄 𑀫𑁂 𑀦𑀺𑀫𑀦𑁆𑀢𑀺𑀢𑁄𑀢𑀺 𑀲𑁄 𑀫𑀬𑀸 𑀦𑀺𑀫𑀦𑁆𑀢𑀺𑀢𑁄.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀧𑀼𑀩𑁆𑀩𑁂 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀩𑀼𑀤𑁆𑀥𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀅𑀫𑀢𑁂𑀦𑁂𑀯𑀸𑀪𑀺𑀲𑀺𑀢𑁆𑀢𑁄 𑀯𑀺𑀫𑁆𑀳𑀬𑀭𑀽𑀧𑀢𑁆𑀢𑀸 𑀆𑀳 𑁋 ‘‘𑀩𑀼𑀤𑁆𑀥𑁄𑀢𑀺, 𑀪𑁄 𑀓𑁂𑀡𑀺𑀬, 𑀯𑀤𑁂𑀲𑀻’’𑀢𑀺. 𑀇𑀢𑀭𑁄 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋 ‘‘𑀩𑀼𑀤𑁆𑀥𑁄𑀢𑀺, 𑀪𑁄 𑀲𑁂𑀮, 𑀯𑀤𑀸𑀫𑀻’’𑀢𑀺. 𑀢𑀢𑁄 𑀦𑀁 𑀧𑀼𑀦𑀧𑀺 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀧𑀼𑀘𑁆𑀙𑀺, 𑀇𑀢𑀭𑁄𑀧𑀺 𑀢𑀣𑁂𑀯 𑀆𑀭𑁄𑀘𑁂𑀲𑀺. 𑀅𑀣 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀳𑀺𑀧𑀺 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀤𑀼𑀮𑁆𑀮𑀪𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀖𑁄𑀲𑁄𑀧𑀺 𑀔𑁄 𑀏𑀲𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺. 𑀢𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁄 𑀏𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀲𑁄 𑀲𑀘𑁆𑀘𑀫𑁂𑀯 𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑀸𑀫𑀫𑀢𑁆𑀢𑀫𑁂𑀯𑀲𑁆𑀲 𑀩𑀼𑀤𑁆𑀥𑁄’’𑀢𑀺 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺, 𑀅𑀪𑀸𑀲𑀺 𑀏𑀯 𑀯𑀸 ‘‘𑀆𑀕𑀢𑀸𑀦𑀺 𑀔𑁄 𑀧𑀦…𑀧𑁂… 𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺. 𑀢𑀢𑁆𑀣 ‘‘𑀫𑀦𑁆𑀢𑁂𑀲𑀽’’𑀢𑀺 𑀯𑁂𑀤𑁂𑀲𑀼. ‘‘𑀢𑀣𑀸𑀕𑀢𑁄 𑀓𑀺𑀭 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀓𑀘𑁆𑀘𑁂𑀯 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀸 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀮𑀓𑁆𑀔𑀡𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀤𑁂 𑀯𑀸𑀘𑁂𑀦𑁆𑀢𑀺 ‘‘𑀢𑀤𑀦𑀼𑀲𑀸𑀭𑁂𑀦 𑀫𑀳𑁂𑀲𑀓𑁆𑀔𑀸 𑀲𑀢𑁆𑀢𑀸 𑀢𑀣𑀸𑀕𑀢𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂𑀦 𑀧𑀼𑀩𑁆𑀩𑁂 𑀯𑁂𑀤𑁂𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀆𑀕𑀘𑁆𑀙𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀢𑀣𑀸𑀕𑀢𑁂 𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺, 𑀢𑁂𑀦 𑀏𑀢𑀭𑀳𑀺 𑀦𑀢𑁆𑀣𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀡𑀺𑀥𑀺𑀲𑀫𑀸𑀤𑀸𑀦𑀜𑀸𑀡𑀲𑀫𑀸𑀤𑀸𑀦𑀓𑀭𑀼𑀡𑀸𑀤𑀺𑀕𑀼𑀡𑀫𑀳𑀢𑁄 𑀧𑀼𑀭𑀺𑀲𑀲𑁆𑀲. 𑀤𑁆𑀯𑁂𑀯 𑀕𑀢𑀺𑀬𑁄𑀢𑀺 𑀤𑁆𑀯𑁂 𑀏𑀯 𑀦𑀺𑀝𑁆𑀞𑀸. 𑀓𑀸𑀫𑀜𑁆𑀘𑀸𑀬𑀁 𑀕𑀢𑀺𑀲𑀤𑁆𑀤𑁄 ‘‘𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁩) 𑀪𑀯𑀪𑁂𑀤𑁂, ‘‘𑀕𑀢𑀻 𑀫𑀺𑀕𑀸𑀦𑀁 𑀧𑀯𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀭𑀺. 𑁩𑁩𑁯) 𑀦𑀺𑀯𑀸𑀲𑀝𑁆𑀞𑀸𑀦𑁂, ‘‘𑀏𑀯𑀁 𑀅𑀥𑀺𑀫𑀢𑁆𑀢𑀕𑀢𑀺𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁬𑁧) 𑀧𑀜𑁆𑀜𑀸𑀬𑀁, ‘‘𑀕𑀢𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁨𑁦𑁪) 𑀯𑀺𑀲𑀝𑀪𑀸𑀯𑁂 𑀯𑀢𑁆𑀢𑀢𑀺, 𑀇𑀥 𑀧𑀦 𑀦𑀺𑀝𑁆𑀞𑀸𑀬𑀁 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀺, 𑀦 𑀢𑁂𑀳𑀺 𑀏𑀯 𑀩𑀼𑀤𑁆𑀥𑁄. 𑀚𑀸𑀢𑀺𑀲𑀸𑀫𑀜𑁆𑀜𑀢𑁄 𑀧𑀦 𑀢𑀸𑀦𑀺𑀬𑁂𑀯 𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲𑀸’’𑀢𑀺.

𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻𑀢𑀺 𑀬𑀤𑀺 𑀅𑀕𑀸𑀭𑁂 𑀯𑀲𑀢𑀺. 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻𑀢𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘 𑀮𑁄𑀓𑀁 𑀭𑀜𑁆𑀚𑀦𑀢𑁄 𑀭𑀸𑀚𑀸. 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺, 𑀘𑀢𑀽𑀳𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺, 𑀯𑀢𑁆𑀢𑀢𑀺, 𑀢𑁂𑀳𑀺 𑀘 𑀧𑀭𑀁 𑀯𑀢𑁆𑀢𑁂𑀢𑀺, 𑀧𑀭𑀳𑀺𑀢𑀸𑀬 𑀘 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀘𑀓𑁆𑀓𑀯𑀢𑁆𑀢𑀺. 𑀏𑀢𑁆𑀣 𑀘 𑀭𑀸𑀚𑀸𑀢𑀺 𑀲𑀸𑀫𑀜𑁆𑀜𑀁, 𑀘𑀓𑁆𑀓𑀯𑀢𑁆𑀢𑀻𑀢𑀺 𑀯𑀺𑀲𑁂𑀲𑀦𑀁. 𑀥𑀫𑁆𑀫𑁂𑀦 𑀘𑀭𑀢𑀻𑀢𑀺 𑀥𑀫𑁆𑀫𑀺𑀓𑁄, 𑀜𑀸𑀬𑁂𑀦 𑀲𑀫𑁂𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀭𑀸𑀚𑀸 𑀚𑀸𑀢𑁄𑀢𑀺 𑀥𑀫𑁆𑀫𑀭𑀸𑀚𑀸. 𑀧𑀭𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀯𑀸 𑀥𑀫𑁆𑀫𑀺𑀓𑁄, 𑀅𑀢𑁆𑀢𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀥𑀫𑁆𑀫𑀭𑀸𑀚𑀸. 𑀘𑀢𑀼𑀭𑀦𑁆𑀢𑀸𑀬 𑀇𑀲𑁆𑀲𑀭𑁄𑀢𑀺 𑀘𑀸𑀢𑀼𑀭𑀦𑁆𑀢𑁄, 𑀘𑀢𑀼𑀲𑀫𑀼𑀤𑁆𑀤𑀦𑁆𑀢𑀸𑀬 𑀘𑀢𑁆𑀢𑀼𑀩𑁆𑀩𑀺𑀥𑀤𑀻𑀧𑀯𑀺𑀪𑀽𑀲𑀺𑀢𑀸𑀬 𑀘 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀁 𑀓𑁄𑀥𑀸𑀤𑀺𑀧𑀘𑁆𑀘𑀢𑁆𑀣𑀺𑀓𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀭𑀸𑀚𑀸𑀦𑁄 𑀯𑀺𑀚𑁂𑀲𑀻𑀢𑀺 𑀯𑀺𑀚𑀺𑀢𑀸𑀯𑀻. 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄𑀢𑀺 𑀚𑀦𑀧𑀤𑁂 𑀥𑀼𑀯𑀪𑀸𑀯𑀁 𑀣𑀸𑀯𑀭𑀪𑀸𑀯𑀁 𑀧𑀢𑁆𑀢𑁄, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀘𑀸𑀮𑁂𑀢𑀼𑀁, 𑀚𑀦𑀧𑀤𑁄 𑀯𑀸 𑀢𑀫𑁆𑀳𑀺 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀅𑀦𑀼𑀲𑁆𑀲𑀼𑀓𑁆𑀓𑁄 𑀲𑀓𑀫𑁆𑀫𑀦𑀺𑀭𑀢𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻𑀢𑀺𑀧𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀏𑀢𑀸𑀦𑀺 𑀓𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀭𑀢𑀦𑀁…𑀧𑁂… 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀦𑁆𑀢𑀺 𑀢𑀸𑀦𑀺 𑀲𑀩𑁆𑀩𑀧𑁆𑀧𑀓𑀸𑀭𑀢𑁄 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼 𑀅𑀬𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀘𑀓𑁆𑀓𑀭𑀢𑀦𑁂𑀦 𑀅𑀚𑀺𑀢𑀁 𑀚𑀺𑀦𑀸𑀢𑀺, 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑁂𑀳𑀺 𑀯𑀺𑀚𑀺𑀢𑁂 𑀬𑀣𑀸𑀲𑀼𑀔𑀫𑀦𑀼𑀯𑀺𑀘𑀭𑀢𑀺, 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺, 𑀲𑁂𑀲𑁂𑀳𑀺 𑀉𑀧𑀪𑁄𑀕𑀲𑀼𑀔𑀫𑀦𑀼𑀪𑀯𑀢𑀺. 𑀧𑀞𑀫𑁂𑀦 𑀘𑀲𑁆𑀲 𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑁄𑀕𑁄, 𑀳𑀢𑁆𑀣𑀺𑀅𑀲𑁆𑀲𑀕𑀳𑀧𑀢𑀺𑀭𑀢𑀦𑁂𑀳𑀺 𑀧𑀪𑀼𑀲𑀢𑁆𑀢𑀺𑀬𑁄𑀕𑁄, 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀫𑀦𑁆𑀢𑀲𑀢𑁆𑀢𑀺𑀬𑁄𑀕𑁄 𑀲𑀼𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀘 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁. 𑀲𑁄 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀪𑁄𑀕𑀲𑀼𑀔𑀫𑀦𑀼𑀪𑁄𑀢𑀺, 𑀲𑁂𑀲𑁂𑀳𑀺 𑀇𑀲𑁆𑀲𑀭𑀺𑀬𑀲𑀼𑀔𑀁. 𑀯𑀺𑀲𑁂𑀲𑀢𑁄 𑀘𑀲𑁆𑀲 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀺 𑀅𑀮𑁄𑀪𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦, 𑀧𑀘𑁆𑀙𑀺𑀫𑀫𑁂𑀓𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀁. 𑀲𑀽𑀭𑀸𑀢𑀺 𑀅𑀪𑀻𑀭𑀼𑀓𑀚𑀸𑀢𑀺𑀓𑀸. 𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸, 𑀏𑀯𑀁 𑀢𑀸𑀯𑁂𑀓𑁂. 𑀅𑀬𑀁 𑀧𑀦𑁂𑀢𑁆𑀣 𑀲𑀪𑀸𑀯𑁄 𑀯𑀻𑀭𑀸𑀢𑀺 𑀉𑀢𑁆𑀢𑀫𑀲𑀽𑀭𑀸 𑀯𑀼𑀘𑁆𑀘𑀦𑁆𑀢𑀺, 𑀯𑀻𑀭𑀸𑀦𑀁 𑀅𑀗𑁆𑀕𑀁 𑀯𑀻𑀭𑀗𑁆𑀕𑀁, 𑀯𑀻𑀭𑀓𑀸𑀭𑀡𑀁 𑀯𑀻𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀻𑀭𑀗𑁆𑀕𑀁 𑀭𑀽𑀧𑀁 𑀏𑀢𑁂𑀲𑀦𑁆𑀢𑀺 𑀯𑀻𑀭𑀗𑁆𑀕𑀭𑀽𑀧𑀸, 𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸𑀢𑀺 𑀲𑀘𑁂 𑀧𑀝𑀺𑀫𑀼𑀔𑀁 𑀢𑀺𑀝𑁆𑀞𑁂𑀬𑁆𑀬 𑀧𑀭𑀲𑁂𑀦𑀸, 𑀢𑀁 𑀧𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑁂𑀦𑀸𑀢𑀺 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁨𑁪𑁪; 𑀫. 𑀦𑀺. 𑁩.𑁨𑁫𑁭) 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦. 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄𑀢𑀺 𑀏𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀤𑀼𑀘𑁆𑀘𑀭𑀺𑀢𑀙𑀤𑀦𑁂𑀳𑀺 𑀲𑀢𑁆𑀢𑀳𑀺 𑀧𑀝𑀺𑀘𑁆𑀙𑀦𑁆𑀦𑁂 𑀓𑀺𑀮𑁂𑀲𑀦𑁆𑀥𑀓𑀸𑀭𑁂 𑀮𑁄𑀓𑁂 𑀢𑀁 𑀙𑀤𑀦𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀜𑁆𑀚𑀸𑀢𑀸𑀮𑁄𑀓𑁄 𑀳𑀼𑀢𑁆𑀯𑀸 𑀞𑀺𑀢𑁄𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀢𑀢𑁆𑀣 𑀧𑀞𑀫𑁂𑀦 𑀧𑀤𑁂𑀦 𑀧𑀽𑀚𑀸𑀭𑀳𑀢𑀸, 𑀤𑀼𑀢𑀺𑀬𑁂𑀦 𑀢𑀲𑁆𑀲𑀸 𑀳𑁂𑀢𑀼 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀢𑀢𑀺𑀬𑁂𑀦 𑀩𑀼𑀤𑁆𑀥𑀢𑁆𑀢𑀳𑁂𑀢𑀼 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀯𑀺𑀯𑀝𑁆𑀝𑁄 𑀘 𑀯𑀺𑀘𑁆𑀙𑀤𑁄 𑀘𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀯𑀝𑁆𑀝𑀭𑀳𑀺𑀢𑁄 𑀙𑀤𑀦𑀭𑀳𑀺𑀢𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀅𑀭𑀳𑀁 𑀯𑀝𑁆𑀝𑀸𑀪𑀸𑀯𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸𑀢𑀺 𑀏𑀯𑀁 𑀧𑀼𑀭𑀺𑀫𑀧𑀤𑀤𑁆𑀯𑀬𑀲𑁆𑀲𑁂𑀯 𑀳𑁂𑀢𑀼𑀤𑁆𑀯𑀬𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀢𑀺𑀬𑁂𑀦 𑀯𑁂𑀲𑀸𑀭𑀚𑁆𑀚𑁂𑀦 𑀘𑁂𑀢𑁆𑀣 𑀧𑀼𑀭𑀺𑀫𑀲𑀺𑀤𑁆𑀥𑀺, 𑀧𑀞𑀫𑁂𑀦 𑀤𑀼𑀢𑀺𑀬𑀲𑀺𑀤𑁆𑀥𑀺, 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀢𑀢𑀺𑀬𑀲𑀺𑀤𑁆𑀥𑀺 𑀳𑁄𑀢𑀺. 𑀧𑀼𑀭𑀺𑀫𑀜𑁆𑀘 𑀥𑀫𑁆𑀫𑀘𑀓𑁆𑀔𑀼𑀁, 𑀤𑀼𑀢𑀺𑀬𑀁 𑀩𑀼𑀤𑁆𑀥𑀘𑀓𑁆𑀔𑀼𑀁, 𑀢𑀢𑀺𑀬𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀆𑀳 𑁋 ‘‘𑀓𑀳𑀁 𑀧𑀦 𑀪𑁄…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀢𑀺𑀆𑀤𑀻𑀲𑀼 𑀬𑁂𑀦𑁂𑀲𑀸𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀏𑀲𑀸. 𑀦𑀻𑀮𑀯𑀦𑀭𑀸𑀚𑀻𑀢𑀺 𑀦𑀻𑀮𑀯𑀡𑁆𑀡𑀭𑀼𑀓𑁆𑀔𑀧𑀦𑁆𑀢𑀺. 𑀯𑀦𑀁 𑀓𑀺𑀭 𑀫𑁂𑀖𑀧𑀦𑁆𑀢𑀺𑀲𑀤𑀺𑀲𑀁. 𑀬𑀢𑁆𑀣 𑀪𑀕𑀯𑀸 𑀢𑀤𑀸 𑀯𑀺𑀳𑀸𑀲𑀺, 𑀢𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 𑁋 ‘‘𑀬𑁂𑀦𑁂𑀲𑀸 𑀪𑁄, 𑀲𑁂𑀮, 𑀦𑀻𑀮𑀯𑀦𑀭𑀸𑀚𑀻’’𑀢𑀺. 𑀢𑀢𑁆𑀣 ‘‘𑀲𑁄 𑀯𑀺𑀳𑀭𑀢𑀻’’𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀧𑀸𑀞𑀲𑁂𑀲𑁄, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁. 𑀧𑀤𑁂 𑀧𑀤𑀦𑁆𑀢𑀺 𑀧𑀤𑀲𑀫𑀻𑀧𑁂 𑀧𑀤𑀁. 𑀢𑁂𑀦 𑀢𑀼𑀭𑀺𑀢𑀕𑀫𑀦𑀁 𑀧𑀝𑀺𑀲𑁂𑀥𑁂𑀢𑀺. 𑀤𑀼𑀭𑀸𑀲𑀤𑀸 𑀳𑀻𑀢𑀺 𑀓𑀸𑀭𑀡𑀁 𑀆𑀳, 𑀬𑀲𑁆𑀫𑀸 𑀢𑁂 𑀤𑀼𑀭𑀸𑀲𑀤𑀸, 𑀢𑀲𑁆𑀫𑀸 𑀏𑀯𑀁 𑀪𑁄𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑀽𑀢𑀺. 𑀓𑀺𑀁 𑀧𑀦 𑀓𑀸𑀭𑀡𑀸 𑀤𑀼𑀭𑀸𑀲𑀤𑀸𑀢𑀺 𑀘𑁂? 𑀲𑀻𑀳𑀸𑀯 𑀏𑀓𑀘𑀭𑀸. 𑀬𑀣𑀸 𑀳𑀺 𑀲𑀻𑀳𑀸 𑀲𑀳𑀸𑀬𑀓𑀺𑀘𑁆𑀘𑀸𑀪𑀸𑀯𑀢𑁄 𑀏𑀓𑀘𑀭𑀸, 𑀏𑀯𑀁 𑀢𑁂𑀧𑀺 𑀯𑀺𑀯𑁂𑀓𑀓𑀸𑀫𑀢𑀸𑀬. ‘‘𑀬𑀤𑀸 𑀘𑀸𑀳’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀢𑁂 𑀫𑀸𑀡𑀯𑀓𑁂 𑀉𑀧𑀘𑀸𑀭𑀁 𑀲𑀺𑀓𑁆𑀔𑀸𑀧𑁂𑀢𑀺. 𑀢𑀢𑁆𑀣 𑀫𑀸 𑀑𑀧𑀸𑀢𑁂𑀣𑀸𑀢𑀺 𑀫𑀸 𑀧𑀯𑁂𑀲𑁂𑀣, 𑀫𑀸 𑀓𑀣𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀕𑀫𑁂𑀦𑁆𑀢𑀽𑀢𑀺 𑀧𑀝𑀺𑀫𑀸𑀦𑁂𑀦𑁆𑀢𑀼, 𑀬𑀸𑀯 𑀓𑀣𑀸 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺, 𑀢𑀸𑀯 𑀢𑀼𑀡𑁆𑀳𑀻 𑀪𑀯𑀦𑁆𑀢𑀽𑀢𑀺 𑀅𑀢𑁆𑀣𑁄.

𑀲𑀫𑀦𑁆𑀦𑁂𑀲𑀻𑀢𑀺 𑀕𑀯𑁂𑀲𑀺. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀩𑀳𑀼𑀓𑀸𑀦𑀺 𑀅𑀤𑁆𑀤𑀲, 𑀅𑀧𑁆𑀧𑀓𑀸𑀦𑀺 𑀦𑀸𑀤𑁆𑀤𑀲. 𑀢𑀢𑁄 𑀬𑀸𑀦𑀺 𑀦 𑀅𑀤𑁆𑀤𑀲, 𑀢𑀸𑀦𑀺 𑀤𑀻𑀧𑁂𑀦𑁆𑀢𑁄 𑀆𑀳 ‘‘𑀞𑀧𑁂𑀢𑁆𑀯𑀸 𑀤𑁆𑀯𑁂’’𑀢𑀺. 𑀓𑀗𑁆𑀔𑀢𑀻𑀢𑀺 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀢𑀺 𑀧𑀢𑁆𑀣𑀦𑀁 ‘‘𑀅𑀳𑁄 𑀯𑀢 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀢𑀢𑁄 𑀢𑀢𑁄 𑀢𑀸𑀦𑀺 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺 𑀦 𑀲𑀓𑁆𑀓𑁄𑀢𑀺 𑀤𑀝𑁆𑀞𑀼𑀁. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀢𑀢𑁄 ‘‘𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑁄 𑀅𑀬’’𑀦𑁆𑀢𑀺 𑀪𑀕𑀯𑀢𑀺 𑀧𑀲𑀸𑀤𑀁 𑀦𑀸𑀧𑀚𑁆𑀚𑀢𑀺. 𑀓𑀗𑁆𑀔𑀸𑀬 𑀯𑀸 𑀲𑀼𑀤𑀼𑀩𑁆𑀩𑀮𑀯𑀺𑀫𑀢𑀺 𑀯𑀼𑀢𑁆𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀫𑀚𑁆𑀛𑀺𑀫𑀸, 𑀅𑀦𑀥𑀺𑀫𑀼𑀘𑁆𑀘𑀦𑀢𑀸𑀬 𑀩𑀮𑀯𑀢𑀻, 𑀅𑀲𑀫𑁆𑀧𑀲𑀸𑀤𑁂𑀦 𑀢𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀲𑁆𑀲 𑀓𑀸𑀮𑀼𑀲𑁆𑀲𑀺𑀬𑀪𑀸𑀯𑁄.

𑀓𑁄𑀲𑁄𑀳𑀺𑀢𑁂𑀢𑀺 𑀯𑀢𑁆𑀣𑀺𑀓𑁄𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑁂. 𑀯𑀢𑁆𑀣𑀕𑀼𑀬𑁆𑀳𑁂𑀢𑀺 𑀅𑀗𑁆𑀕𑀚𑀸𑀢𑁂. 𑀪𑀕𑀯𑀢𑁄 𑀳𑀺 𑀯𑀭𑀯𑀸𑀭𑀡𑀲𑁆𑀲𑁂𑀯 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀤𑀼𑀫𑀕𑀩𑁆𑀪𑀲𑀫𑀸𑀦𑀁. 𑀢𑀁 𑀲𑁄 𑀯𑀢𑁆𑀣𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀅𑀧𑀲𑁆𑀲𑀦𑁆𑀢𑁄 𑀅𑀦𑁆𑀢𑁄𑀫𑀼𑀔𑀕𑀢𑀸𑀬 𑀘 𑀚𑀺𑀯𑁆𑀳𑀸𑀬 𑀧𑀳𑀽𑀢𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑁂𑀲𑀼 𑀤𑁆𑀯𑀻𑀲𑀼 𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀻 𑀅𑀳𑁄𑀲𑀺 𑀯𑀺𑀘𑀺𑀓𑀺𑀘𑁆𑀙𑀻. 𑀢𑀣𑀸𑀭𑀽𑀧𑀦𑁆𑀢𑀺 𑀓𑀣𑀁 𑀭𑀽𑀧𑀁? 𑀓𑀺𑀫𑁂𑀢𑁆𑀣 𑀅𑀫𑁆𑀳𑁂𑀳𑀺 𑀯𑀢𑁆𑀢𑀩𑁆𑀩𑀁, 𑀯𑀼𑀢𑁆𑀢𑀫𑁂𑀢𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦𑁂𑀯 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 (𑀫𑀺. 𑀧. 𑁪.𑁩.𑁩) 𑁋

‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀓𑀢𑀦𑁆𑀢𑀺. 𑀓𑀺𑀁, 𑀫𑀳𑀸𑀭𑀸𑀚𑀸𑀢𑀺? 𑀫𑀳𑀸𑀚𑀦𑁂𑀦 𑀳𑀺𑀭𑀺𑀓𑀭𑀡𑁄𑀓𑀸𑀲𑀁 𑀩𑁆𑀭𑀳𑁆𑀫𑀸𑀬𑀼𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀉𑀢𑁆𑀢𑀭𑀲𑁆𑀲 𑀘 𑀩𑀸𑀯𑀭𑀺𑀲𑁆𑀲 𑀅𑀦𑁆𑀢𑁂𑀯𑀸𑀲𑀻𑀦𑀁 𑀲𑁄𑀴𑀲𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀲𑁂𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑁆𑀢𑁂𑀯𑀸𑀲𑀻𑀦𑀁 𑀢𑀺𑀲𑀢𑀫𑀸𑀡𑀯𑀸𑀦𑀜𑁆𑀘 𑀤𑀲𑁆𑀲𑁂𑀲𑀺, 𑀪𑀦𑁆𑀢𑁂𑀢𑀺. 𑀦, 𑀫𑀳𑀸𑀭𑀸𑀚, 𑀪𑀕𑀯𑀸 𑀕𑀼𑀬𑁆𑀳𑀁 𑀤𑀲𑁆𑀲𑁂𑀢𑀺, 𑀙𑀸𑀬𑀁 𑀪𑀕𑀯𑀸 𑀤𑀲𑁆𑀲𑁂𑀢𑀺, 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀓𑀸𑀬𑀩𑀦𑁆𑀥𑀦𑀩𑀤𑁆𑀥𑀁 𑀘𑀻𑀯𑀭𑀧𑀸𑀭𑀼𑀢𑀁 𑀙𑀸𑀬𑀸𑀭𑀽𑀧𑀓𑀫𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀫𑀳𑀸𑀭𑀸𑀚𑀸𑀢𑀺. 𑀙𑀸𑀬𑀸𑀭𑀽𑀧𑁂 𑀤𑀺𑀝𑁆𑀞𑁂 𑀲𑀢𑀺 𑀤𑀺𑀝𑁆𑀞𑁄 𑀏𑀯 𑀦𑀦𑀼, 𑀪𑀦𑁆𑀢𑁂𑀢𑀺. 𑀢𑀺𑀝𑁆𑀞𑀢𑁂𑀢𑀁, 𑀫𑀳𑀸𑀭𑀸𑀚, 𑀳𑀤𑀬𑀭𑀽𑀧𑀁 𑀤𑀺𑀲𑁆𑀯𑀸 𑀩𑀼𑀚𑁆𑀛𑀦𑀓𑀲𑀢𑁆𑀢𑁄 𑀪𑀯𑁂𑀬𑁆𑀬, 𑀳𑀤𑀬𑀫𑀁𑀲𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀬𑁆𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂, 𑀦𑀸𑀕𑀲𑁂𑀦𑀸’’𑀢𑀺 (𑀫𑀺. 𑀧. 𑁪.𑁩.𑁩).

𑀦𑀺𑀦𑁆𑀦𑀸𑀫𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀓𑀡𑁆𑀡𑀲𑁄𑀢𑀸𑀦𑀼𑀫𑀲𑀦𑁂𑀦 𑀘𑁂𑀢𑁆𑀣 𑀤𑀻𑀖𑀪𑀸𑀯𑁄, 𑀦𑀸𑀲𑀺𑀓𑀸𑀲𑁄𑀢𑀸𑀦𑀼𑀫𑀲𑀦𑁂𑀦 𑀢𑀦𑀼𑀪𑀸𑀯𑁄, 𑀦𑀮𑀸𑀝𑀘𑁆𑀙𑀸𑀤𑀦𑁂𑀦 𑀧𑀼𑀣𑀼𑀮𑀪𑀸𑀯𑁄 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀦𑁆𑀢𑀺 𑀆𑀘𑀭𑀺𑀬𑀸𑀦𑀜𑁆𑀘𑁂𑀯 𑀆𑀘𑀭𑀺𑀬𑀸𑀘𑀭𑀺𑀬𑀸𑀦𑀜𑁆𑀘. 𑀲𑀓𑁂 𑀯𑀡𑁆𑀡𑁂𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂.

𑁫𑁫𑁪. 𑀧𑀭𑀺𑀧𑀼𑀡𑁆𑀡𑀓𑀸𑀬𑁄𑀢𑀺 𑀮𑀓𑁆𑀔𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀅𑀳𑀻𑀦𑀗𑁆𑀕𑀧𑀘𑁆𑀘𑀗𑁆𑀕𑀢𑀸𑀬 𑀘 𑀧𑀭𑀺𑀧𑀼𑀡𑁆𑀡𑀲𑀭𑀻𑀭𑁄. 𑀲𑀼𑀭𑀼𑀘𑀻𑀢𑀺 𑀲𑀼𑀦𑁆𑀤𑀭𑀲𑀭𑀻𑀭𑀧𑁆𑀧𑀪𑁄. 𑀲𑀼𑀚𑀸𑀢𑁄𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀦𑀺𑀩𑁆𑀩𑀢𑁆𑀢𑁄. 𑀘𑀸𑀭𑀼𑀤𑀲𑁆𑀲𑀦𑁄𑀢𑀺 𑀲𑀼𑀘𑀺𑀭𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀚𑀦𑀓𑀁 𑀅𑀧𑁆𑀧𑀝𑀺𑀓𑀽𑀮𑀁 𑀭𑀫𑀡𑀻𑀬𑀁 𑀘𑀸𑀭𑀼 𑀏𑀯 𑀤𑀲𑁆𑀲𑀦𑀁 𑀅𑀲𑁆𑀲𑀸𑀢𑀺 𑀘𑀸𑀭𑀼𑀤𑀲𑁆𑀲𑀦𑁄. 𑀓𑁂𑀘𑀺 𑀧𑀦 𑀪𑀡𑀦𑁆𑀢𑀺 ‘‘𑀘𑀸𑀭𑀼𑀤𑀲𑁆𑀲𑀦𑁄𑀢𑀺 𑀲𑀼𑀦𑁆𑀤𑀭𑀦𑁂𑀢𑁆𑀢𑁄’’𑀢𑀺. 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑁄. 𑀅𑀲𑀻𑀢𑀺 𑀪𑀯𑀲𑀺. 𑀏𑀢𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀼𑀲𑀼𑀓𑁆𑀓𑀤𑀸𑀞𑁄𑀢𑀺 𑀲𑀼𑀝𑁆𑀞𑀼 𑀲𑀼𑀓𑁆𑀓𑀤𑀸𑀞𑁄. 𑀪𑀕𑀯𑀢𑁄 𑀳𑀺 𑀤𑀸𑀞𑀸𑀳𑀺 𑀘𑀦𑁆𑀤𑀓𑀺𑀭𑀡𑀸 𑀯𑀺𑀬 𑀅𑀢𑀺𑀯𑀺𑀬 𑀧𑀡𑁆𑀟𑀭𑀭𑀁𑀲𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀲𑀼𑀲𑀼𑀓𑁆𑀓𑀤𑀸𑀞𑁄𑀲𑀻’’𑀢𑀺.

𑁫𑁫𑁫. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀸𑀦𑁂𑀯 𑀯𑀘𑀦𑀦𑁆𑀢𑀭𑁂𑀦 𑀦𑀺𑀕𑀫𑁂𑀦𑁆𑀢𑁄 𑀆𑀳.

𑁫𑁫𑁬. 𑀇𑀤𑀸𑀦𑀺 𑀢𑁂𑀲𑀼 𑀮𑀓𑁆𑀔𑀡𑁂𑀲𑀼 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀪𑀕𑀯𑀦𑁆𑀢𑀁 𑀣𑀼𑀦𑀦𑁆𑀢𑁄 𑀆𑀳 𑁋 ‘‘𑀧𑀲𑀦𑁆𑀦𑀦𑁂𑀢𑁆𑀢𑁄’’𑀢𑀺𑀆𑀤𑀺. 𑀪𑀕𑀯𑀸 𑀳𑀺 𑀧𑀜𑁆𑀘𑀯𑀡𑁆𑀡𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀦𑁂𑀢𑁆𑀢𑁄, 𑀧𑀭𑀺𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀲𑀤𑀺𑀲𑀫𑀼𑀔𑀢𑁆𑀢𑀸 𑀲𑀼𑀫𑀼𑀔𑁄, 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀩𑁆𑀭𑀳𑀸, 𑀩𑀳𑁆𑀫𑀼𑀚𑀼𑀕𑀢𑁆𑀢𑀢𑀸𑀬 𑀉𑀚𑀼, 𑀚𑀼𑀢𑀺𑀫𑀦𑁆𑀢𑀢𑀸𑀬 𑀧𑀢𑀸𑀧𑀯𑀸. 𑀬𑀫𑁆𑀧𑀺 𑀘𑁂𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 ‘‘𑀫𑀚𑁆𑀛𑁂 𑀲𑀫𑀡𑀲𑀗𑁆𑀖𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀣𑀼𑀦𑀢𑀸 𑀧𑀼𑀦 𑀯𑀼𑀢𑁆𑀢𑀁. 𑀈𑀤𑀺𑀲𑁄 𑀳𑀺 𑀏𑀯𑀁 𑀯𑀺𑀭𑁄𑀘𑀢𑀺. 𑀏𑀲 𑀦𑀬𑁄 𑀉𑀢𑁆𑀢𑀭𑀕𑀸𑀣𑀸𑀬𑀧𑀺.

𑁫𑁫𑁭-𑁮. 𑀉𑀢𑁆𑀢𑀫𑀯𑀡𑁆𑀡𑀺𑀦𑁄𑀢𑀺 𑀉𑀢𑁆𑀢𑀫𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑁆𑀲. 𑀚𑀫𑁆𑀩𑀼𑀲𑀡𑁆𑀟𑀲𑁆𑀲𑀸𑀢𑀺 𑀚𑀫𑁆𑀩𑀼𑀤𑀻𑀧𑀲𑁆𑀲. 𑀧𑀸𑀓𑀝𑁂𑀦 𑀇𑀲𑁆𑀲𑀭𑀺𑀬𑀁 𑀯𑀡𑁆𑀡𑀬𑀦𑁆𑀢𑁄 𑀆𑀳, 𑀅𑀧𑀺𑀘 𑀘𑀓𑁆𑀓𑀯𑀢𑁆𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀤𑀻𑀧𑀸𑀦𑀁 𑀇𑀲𑁆𑀲𑀭𑁄 𑀳𑁄𑀢𑀺.

𑁫𑁫𑁯. 𑀔𑀢𑁆𑀢𑀺𑀬𑀸𑀢𑀺 𑀚𑀸𑀢𑀺𑀔𑀢𑁆𑀢𑀺𑀬𑀸. 𑀪𑁄𑀚𑀸𑀢𑀺 𑀪𑁄𑀕𑀺𑀬𑀸. 𑀭𑀸𑀚𑀸𑀦𑁄𑀢𑀺 𑀬𑁂 𑀓𑁂𑀘𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸. 𑀅𑀦𑀼𑀬𑀦𑁆𑀢𑀸𑀢𑀺 𑀅𑀦𑀼𑀕𑀸𑀫𑀺𑀦𑁄 𑀲𑁂𑀯𑀓𑀸. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀭𑀸𑀚𑀽𑀦𑀁 𑀧𑀽𑀚𑀦𑀺𑀬𑁄 𑀭𑀸𑀚𑀸 𑀳𑀼𑀢𑁆𑀯𑀸, 𑀘𑀓𑁆𑀓𑀯𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀼𑀚𑀺𑀦𑁆𑀤𑁄𑀢𑀺 𑀫𑀦𑀼𑀲𑁆𑀲𑀸𑀥𑀺𑀧𑀢𑀺 𑀧𑀭𑀫𑀺𑀲𑁆𑀲𑀭𑁄 𑀳𑀼𑀢𑁆𑀯𑀸.

𑁫𑁬𑁦. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 ‘‘𑀬𑁂 𑀢𑁂 𑀪𑀯𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂 𑀲𑀓𑁂 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀁 𑀲𑁂𑀮𑀲𑁆𑀲 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀆𑀳 ‘‘𑀭𑀸𑀚𑀸𑀳𑀫𑀲𑁆𑀫𑀻’’𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀔𑁄 𑀫𑀁 𑀢𑁆𑀯𑀁 𑀲𑁂𑀮 𑀬𑀸𑀘𑀲𑀺 ‘‘𑀭𑀸𑀚𑀸 𑀅𑀭𑀳𑀲𑀺 𑀪𑀯𑀺𑀢𑀼𑀁 𑀘𑀓𑁆𑀓𑀯𑀢𑁆𑀢𑀻’’𑀢𑀺, 𑀏𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑁄𑀢𑀺, 𑀭𑀸𑀚𑀸𑀳𑀫𑀲𑁆𑀫𑀺, 𑀲𑀢𑀺 𑀘 𑀭𑀸𑀚𑀢𑁆𑀢𑁂 𑀬𑀣𑀸 𑀅𑀜𑁆𑀜𑁄 𑀭𑀸𑀚𑀸 𑀲𑀫𑀸𑀦𑁄𑀧𑀺 𑀬𑁄𑀚𑀦𑀲𑀢𑀁 𑀯𑀸 𑀅𑀦𑀼𑀲𑀸𑀲𑀢𑀺, 𑀤𑁆𑀯𑁂 𑀢𑀻𑀡𑀺 𑀯𑀸 𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘 𑀯𑀸 𑀬𑁄𑀚𑀦𑀲𑀢𑀸𑀦𑀺 𑀬𑁄𑀚𑀦𑀲𑀳𑀲𑁆𑀲𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺 𑀳𑀼𑀢𑁆𑀯𑀸𑀧𑀺 𑀘𑀢𑀼𑀤𑀻𑀧𑀧𑀭𑀺𑀬𑀦𑁆𑀢𑀫𑀢𑁆𑀢𑀁 𑀯𑀸, 𑀦𑀸𑀳𑀫𑁂𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀯𑀺𑀲𑀬𑁄. 𑀅𑀳𑀜𑁆𑀳𑀺 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄 𑀪𑀯𑀕𑁆𑀕𑀢𑁄 𑀅𑀯𑀻𑀘𑀺𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑁆𑀧𑀫𑁂𑀬𑁆𑀬𑀸 𑀮𑁄𑀓𑀥𑀸𑀢𑀼𑀬𑁄 𑀅𑀦𑀼𑀲𑀸𑀲𑀸𑀫𑀺. 𑀬𑀸𑀯𑀢𑀸 𑀳𑀺 𑀅𑀧𑀤𑀤𑁆𑀯𑀺𑀧𑀤𑀸𑀤𑀺𑀪𑁂𑀤𑀸 𑀲𑀢𑁆𑀢𑀸, 𑀅𑀳𑀁 𑀢𑁂𑀲𑀁 𑀅𑀕𑁆𑀕𑁄. 𑀦 𑀳𑀺 𑀫𑁂 𑀓𑁄𑀘𑀺 𑀲𑀻𑀮𑁂𑀦 𑀯𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀯𑀸 𑀧𑀝𑀺𑀪𑀸𑀕𑁄 𑀅𑀢𑁆𑀣𑀺. 𑀲𑁆𑀯𑀸𑀳𑀁 𑀏𑀯𑀁 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄 𑀅𑀦𑀼𑀢𑁆𑀢𑀭𑁂𑀦𑁂𑀯 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺 ‘‘𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀆𑀡𑀸𑀘𑀓𑁆𑀓𑀁, ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁪) 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀥𑀫𑁆𑀫𑀘𑀓𑁆𑀓𑀫𑁂𑀯 𑀯𑀸. 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀬𑀁 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀳𑁄𑀢𑀺 𑀲𑀫𑀡𑁂𑀦 𑀯𑀸…𑀧𑁂… 𑀓𑁂𑀦𑀘𑀺 𑀮𑁄𑀓𑀲𑁆𑀫𑀺𑀦𑁆𑀢𑀺.

𑁫𑁬𑁧-𑁨. 𑀏𑀯𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀲𑁂𑀮𑁄 𑀤𑀴𑁆𑀳𑀺𑀓𑀭𑀡𑀢𑁆𑀣𑀁 ‘‘𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀻’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑁄 𑀦𑀼 𑀲𑁂𑀦𑀸𑀧𑀢𑀻𑀢𑀺 𑀥𑀫𑁆𑀫𑀭𑀜𑁆𑀜𑁄 𑀪𑁄𑀢𑁄, 𑀥𑀫𑁆𑀫𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀅𑀦𑀼𑀧𑁆𑀧𑀯𑀢𑁆𑀢𑀓𑁄 𑀲𑁂𑀦𑀸𑀧𑀢𑀺 𑀓𑁄𑀢𑀺 𑀧𑀼𑀘𑁆𑀙𑀺.

𑁫𑁬𑁩. 𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀲𑀼𑀯𑀡𑁆𑀡𑀧𑀼𑀜𑁆𑀚𑁄 𑀯𑀺𑀬 𑀲𑀺𑀭𑀺𑀬𑀸 𑀲𑁄𑀪𑀫𑀸𑀦𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀫𑀬𑀸 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀦𑀼𑀚𑀸𑀢𑁄 𑀢𑀣𑀸𑀕𑀢𑀦𑁆𑀢𑀺 𑀢𑀣𑀸𑀕𑀢𑀳𑁂𑀢𑀼 𑀅𑀦𑀼𑀚𑀸𑀢𑁄, 𑀢𑀣𑀸𑀕𑀢𑁂𑀦 𑀳𑁂𑀢𑀼𑀦𑀸 𑀚𑀸𑀢𑁄𑀢𑀺 𑀅𑀢𑁆𑀣𑁄.

𑁫𑁬𑁪. 𑀏𑀯𑀁 ‘‘𑀓𑁄 𑀦𑀼 𑀲𑁂𑀦𑀸𑀧𑀢𑀻’’𑀢𑀺 𑀧𑀜𑁆𑀳𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀬𑀁 𑀲𑁂𑀮𑁄 𑀆𑀳 𑁋 ‘‘𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀻’’𑀢𑀺, 𑀢𑀢𑁆𑀭 𑀦𑀁 𑀦𑀺𑀓𑁆𑀓𑀗𑁆𑀔𑀁 𑀓𑀸𑀢𑀼𑀓𑀸𑀫𑁄 ‘‘𑀦𑀸𑀳𑀁 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀧𑀝𑀺𑀚𑀸𑀦𑀸𑀫𑀺, 𑀅𑀧𑀺𑀘𑀸𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀩𑀼𑀤𑁆𑀥𑁄’’𑀢𑀺 𑀜𑀸𑀧𑁂𑀢𑀼𑀁 ‘‘𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘. 𑀫𑀕𑁆𑀕𑀲𑀘𑁆𑀘𑀲𑀫𑀼𑀤𑀬𑀲𑀘𑁆𑀘𑀸𑀦𑀺 𑀧𑀦 𑀪𑀸𑀯𑁂𑀢𑀩𑁆𑀩𑀧𑀳𑀸𑀢𑀩𑁆𑀩𑀸𑀦𑀺, 𑀳𑁂𑀢𑀼𑀯𑀘𑀦𑁂𑀦 𑀧𑀦 𑀨𑀮𑀲𑀺𑀤𑁆𑀥𑀺𑀢𑁄 𑀢𑁂𑀲𑀁 𑀨𑀮𑀸𑀦𑀺 𑀦𑀺𑀭𑁄𑀥𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑁂𑀯 𑀪𑀯𑀦𑁆𑀢𑀺. 𑀬𑀢𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀘𑀢𑀼𑀲𑀘𑁆𑀘𑀪𑀸𑀯𑀦𑀸𑀨𑀮𑀜𑁆𑀘 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀼𑀚𑁆𑀛𑀺𑀢𑀩𑁆𑀩𑀁 𑀩𑀼𑀚𑁆𑀛𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄𑀲𑁆𑀫𑀻’’𑀢𑀺 𑀬𑀼𑀢𑁆𑀢𑁂𑀦 𑀳𑁂𑀢𑀼𑀦𑀸 𑀩𑀼𑀤𑁆𑀥𑀢𑁆𑀢𑀁 𑀲𑀸𑀥𑁂𑀢𑀺.

𑁫𑁬𑁫-𑁭. 𑀏𑀯𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀢𑁆𑀯𑀸 𑀅𑀢𑁆𑀢𑀦𑀺 𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀁 𑀩𑁆𑀭𑀸𑀳𑁆𑀫𑀡𑀁 𑀅𑀪𑀺𑀢𑁆𑀣𑀭𑀬𑀫𑀸𑀦𑁄 ‘‘𑀯𑀺𑀦𑀬𑀲𑁆𑀲𑀽’’𑀢𑀺 𑀕𑀸𑀣𑀸𑀢𑁆𑀢𑀬𑀫𑀸𑀳. 𑀢𑀢𑁆𑀣 𑀲𑀮𑁆𑀮𑀓𑀢𑁆𑀢𑁄𑀢𑀺 𑀭𑀸𑀕𑀲𑀮𑁆𑀮𑀸𑀤𑀺𑀲𑀢𑁆𑀢𑀲𑀮𑁆𑀮𑀓𑀢𑁆𑀢𑀦𑁄. 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀲𑁂𑀝𑁆𑀞𑀪𑀽𑀢𑁄. 𑀅𑀢𑀺𑀢𑀼𑀮𑁄𑀢𑀺 𑀢𑀼𑀮𑀁 𑀅𑀢𑀻𑀢𑁄 𑀉𑀧𑀫𑀁 𑀅𑀢𑀻𑀢𑁄, 𑀦𑀺𑀭𑀽𑀧𑀫𑁄𑀢𑀺 𑀅𑀢𑁆𑀣𑁄. 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄𑀢𑀺 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺𑀓𑀸𑀬 ‘‘𑀧𑀭𑁂 𑀘 𑀅𑀯𑀚𑀸𑀦𑀸𑀢𑀻’’𑀢𑀺 (𑀲𑀼. 𑀦𑀺. 𑁪𑁪𑁦; 𑀫𑀳𑀸𑀦𑀺. 𑁨𑁮; 𑀘𑀽𑀴𑀦𑀺. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁭) 𑀏𑀯𑀁 𑀯𑀼𑀢𑁆𑀢𑀸𑀬 𑀫𑀸𑀭𑀧𑀭𑀺𑀲𑀲𑀗𑁆𑀔𑀸𑀢𑀸𑀬 𑀫𑀸𑀭𑀲𑁂𑀦𑀸𑀬 𑀧𑀫𑀤𑁆𑀤𑀦𑁄. 𑀲𑀩𑁆𑀩𑀸𑀫𑀺𑀢𑁆𑀢𑁂𑀢𑀺 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀤𑀺𑀓𑁂 𑀲𑀩𑁆𑀩𑀧𑀘𑁆𑀘𑀢𑁆𑀣𑀺𑀓𑁂. 𑀯𑀲𑀻𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸. 𑀅𑀓𑀼𑀢𑁄𑀪𑀬𑁄𑀢𑀺 𑀓𑀼𑀢𑁄𑀘𑀺 𑀅𑀪𑀬𑁄.

𑁫𑁬𑁮-𑁭𑁦. 𑀏𑀯𑀁 𑀯𑀼𑀢𑁆𑀢𑁂 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄 𑀢𑀸𑀯𑀤𑁂𑀯 𑀪𑀕𑀯𑀢𑀺 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 ‘‘𑀇𑀫𑀁 𑀪𑀯𑀦𑁆𑀢𑁄’’𑀢𑀺 𑀕𑀸𑀣𑀸𑀢𑁆𑀢𑀬𑀫𑀸𑀳 𑀬𑀣𑀸 𑀢𑀁 𑀧𑀭𑀺𑀧𑀸𑀓𑀕𑀢𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀸 𑀘𑁄𑀤𑀺𑀬𑀫𑀸𑀦𑁄. 𑀢𑀢𑁆𑀣 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀢𑀺 𑀘𑀡𑁆𑀟𑀸𑀮𑀸𑀤𑀺𑀦𑀻𑀘𑀓𑀼𑀮𑁂 𑀚𑀸𑀢𑁄.

𑁫𑁭𑁧. 𑀢𑀢𑁄 𑀢𑁂𑀧𑀺 𑀫𑀸𑀡𑀯𑀓𑀸 𑀢𑀣𑁂𑀯 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 ‘‘𑀏𑀢𑀜𑁆𑀘𑁂 𑀭𑀼𑀘𑁆𑀘𑀢𑀺 𑀪𑁄𑀢𑁄’’𑀢𑀺 𑀕𑀸𑀣𑀫𑀸𑀳𑀁𑀲𑀼 𑀬𑀣𑀸 𑀢𑀁 𑀢𑁂𑀦 𑀲𑀤𑁆𑀥𑀺𑀁 𑀓𑀢𑀸𑀥𑀺𑀓𑀸𑀭𑀸 𑀓𑀼𑀮𑀧𑀼𑀢𑁆𑀢𑀸.

𑁫𑁭𑁨. 𑀅𑀣 𑀲𑁂𑀮𑁄 𑀢𑁂𑀲𑀼 𑀫𑀸𑀡𑀯𑀓𑁂𑀲𑀼 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀫𑀸𑀦𑁄 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀕𑀸𑀣𑀫𑀸𑀳.

𑁫𑁭𑁩. 𑀢𑀢𑁄 𑀪𑀕𑀯𑀸 𑀬𑀲𑁆𑀫𑀸 𑀲𑁂𑀮𑁄 𑀅𑀢𑀻𑀢𑁂 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀢𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀧𑀼𑀭𑀺𑀲𑀲𑀢𑀸𑀦𑀁 𑀕𑀡𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀘 𑀓𑀢𑁆𑀯𑀸 𑀓𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀧𑀘𑁆𑀙𑀺𑀫𑁂 𑀪𑀯𑁂 𑀢𑁂𑀲𑀁𑀬𑁂𑀯 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑀜𑁆𑀘 𑀦𑁂𑀲𑀁 𑀓𑀫𑁆𑀫𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀓𑀸𑀬 𑀧𑀭𑀺𑀧𑀓𑁆𑀓𑀁 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀪𑀽𑀢𑀁, 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀯 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀸𑀚𑁂𑀦𑁆𑀢𑁄 ‘‘𑀲𑁆𑀯𑀸𑀓𑁆𑀔𑀸𑀢’’𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀧𑀘𑁆𑀘𑀓𑁆𑀔𑀁. 𑀅𑀓𑀸𑀮𑀺𑀓𑀦𑁆𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀼𑀧𑁆𑀧𑀢𑁆𑀢𑀺𑀢𑁄 𑀦 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀨𑀮𑀁. 𑀬𑀢𑁆𑀣𑀸𑀢𑀺 𑀬𑀦𑁆𑀦𑀺𑀫𑀺𑀢𑁆𑀢𑀸. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀦𑀺𑀫𑀺𑀢𑁆𑀢𑀸 𑀳𑀺 𑀧𑀩𑁆𑀩𑀚𑁆𑀚𑀸 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀢𑀺𑀯𑀺𑀧𑁆𑀧𑀯𑀸𑀲𑀯𑀺𑀭𑀳𑀺𑀢𑀲𑁆𑀲 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀢𑁄 𑀅𑀫𑁄𑀖𑀸 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀲𑁆𑀯𑀸𑀓𑁆𑀔𑀸𑀢𑀁…𑀧𑁂… 𑀲𑀺𑀓𑁆𑀔𑀢𑁄’’𑀢𑀺.

𑀏𑀯𑀜𑁆𑀘 𑀯𑀢𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘. 𑀢𑁂 𑀲𑀩𑁆𑀩𑁂 𑀧𑀢𑁆𑀢𑀘𑀻𑀯𑀭𑀥𑀭𑀸 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀫𑁆𑀫 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀲𑀼𑀁. 𑀏𑀯𑀫𑀺𑀫𑀁 𑀢𑁂𑀲𑀁 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀁 𑀲𑀦𑁆𑀥𑀸𑀬 𑀲𑀗𑁆𑀕𑀻𑀢𑀺𑀓𑀸𑀭𑀸 ‘‘𑀅𑀮𑀢𑁆𑀣 𑀔𑁄 𑀲𑁂𑀮𑁄…𑀧𑁂… 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀆𑀳𑀁𑀲𑀼.

𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺𑀁, 𑀅𑀧𑀦𑀻𑀢𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 ‘‘𑀉𑀧𑀕𑀦𑁆𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀪𑀕𑀯𑀦𑁆𑀢𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻𑀢𑀺 𑀦 𑀬𑀼𑀚𑁆𑀚𑀢𑀺.

𑁫𑁭𑁪. 𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸𑀢𑀺 𑀪𑀕𑀯𑀸 𑀓𑁂𑀡𑀺𑀬𑀲𑁆𑀲 𑀘𑀺𑀢𑁆𑀢𑀸𑀦𑀼𑀓𑀽𑀮𑀯𑀲𑁂𑀦 𑀅𑀦𑀼𑀫𑁄𑀤𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀺𑀧𑀭𑀺𑀘𑀭𑀺𑀬𑀁 𑀯𑀺𑀦𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀜𑁆𑀜𑀸𑀪𑀸𑀯𑀢𑁄 ‘‘𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸 𑀬𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁. 𑀅𑀕𑁆𑀕𑀺𑀳𑀼𑀢𑁆𑀢𑀲𑁂𑀝𑁆𑀞𑀸 𑀅𑀕𑁆𑀕𑀺𑀳𑀼𑀢𑁆𑀢𑀧𑀥𑀸𑀦𑀸𑀢𑀺 𑀅𑀢𑁆𑀣𑁄. 𑀯𑁂𑀤𑁂 𑀲𑀚𑁆𑀛𑀸𑀬𑀦𑁆𑀢𑁂𑀳𑀺 𑀧𑀞𑀫𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀢𑁄 𑀲𑀸𑀯𑀺𑀢𑁆𑀢𑀻 ‘‘𑀙𑀦𑁆𑀤𑀲𑁄 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀫𑀦𑀼𑀲𑁆𑀲𑀸𑀦𑀁 𑀲𑁂𑀝𑁆𑀞𑀢𑁄 𑀭𑀸𑀚𑀸 ‘‘𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀦𑀤𑀻𑀦𑀁 𑀆𑀥𑀸𑀭𑀢𑁄 𑀧𑀝𑀺𑀲𑀭𑀡𑀢𑁄 𑀘 𑀲𑀸𑀕𑀭𑁄 ‘‘𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀘𑀦𑁆𑀤𑀬𑁄𑀕𑀯𑀲𑁂𑀦 ‘‘𑀅𑀚𑁆𑀚 𑀓𑀢𑁆𑀢𑀺𑀓𑀸 𑀅𑀚𑁆𑀚 𑀭𑁄𑀳𑀺𑀦𑀻’’𑀢𑀺 𑀲𑀜𑁆𑀚𑀸𑀦𑀦𑀢𑁄 𑀆𑀮𑁄𑀓𑀓𑀭𑀡𑀢𑁄 𑀲𑁄𑀫𑁆𑀫𑀪𑀸𑀯𑀢𑁄 𑀘 ‘‘𑀦𑀓𑁆𑀔𑀢𑁆𑀢𑀸𑀦𑀁 𑀫𑀼𑀔𑀁 𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑁄. 𑀢𑀧𑀦𑁆𑀢𑀸𑀦𑀁 𑀅𑀕𑁆𑀕𑀢𑁆𑀢𑀸 𑀆𑀤𑀺𑀘𑁆𑀘𑁄 ‘‘𑀢𑀧𑀢𑀁 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀧𑀦 𑀅𑀕𑁆𑀕𑀢𑁆𑀢𑀸 𑀯𑀺𑀲𑁂𑀲𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀲𑀦𑁆𑀥𑀸𑀬 ‘‘𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑀸𑀦𑀁, 𑀲𑀗𑁆𑀖𑁄 𑀯𑁂 𑀬𑀚𑀢𑀁 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑁂𑀦 𑀲𑀗𑁆𑀖𑁄 𑀧𑀼𑀜𑁆𑀜𑀲𑁆𑀲 𑀆𑀬𑀫𑀼𑀔𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁫𑁭𑁬. 𑀬𑀁 𑀢𑀁 𑀲𑀭𑀡𑀦𑁆𑀢𑀺 𑀅𑀜𑁆𑀜𑀩𑁆𑀬𑀸𑀓𑀭𑀡𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀪𑀕𑀯𑀸, 𑀬𑀲𑁆𑀫𑀸 𑀫𑀬𑀁 𑀇𑀢𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀁 𑀲𑀭𑀡𑀁 𑀅𑀕𑀫𑀫𑁆𑀳, 𑀢𑀲𑁆𑀫𑀸 𑀲𑀢𑁆𑀢𑀭𑀢𑁆𑀢𑁂𑀦 𑀢𑀯 𑀲𑀸𑀲𑀦𑁂 𑀅𑀦𑀼𑀢𑁆𑀢𑀭𑁂𑀦 𑀤𑀫𑀣𑁂𑀦 𑀤𑀦𑁆𑀢𑀫𑁆𑀳. 𑀅𑀳𑁄 𑀢𑁂 𑀲𑀭𑀡𑀲𑁆𑀲 𑀆𑀦𑀼𑀪𑀸𑀯𑁄𑀢𑀺.

𑁫𑁭𑁭-𑁮. 𑀢𑀢𑁄 𑀧𑀭𑀁 𑀪𑀕𑀯𑀦𑁆𑀢𑀁 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀣𑀼𑀦𑀺𑀢𑁆𑀯𑀸 𑀢𑀢𑀺𑀬𑀸𑀬 𑀯𑀦𑁆𑀤𑀦𑀁 𑀬𑀸𑀘𑀢𑀺 𑁋

𑁫𑁭𑁯. ‘‘𑀪𑀺𑀓𑁆𑀔𑀯𑁄 𑀢𑀺𑀲𑀢𑀸 𑀇𑀫𑁂, 𑀢𑀺𑀝𑁆𑀞𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸;

𑀧𑀸𑀤𑁂 𑀯𑀻𑀭 𑀧𑀲𑀸𑀭𑁂𑀳𑀺, 𑀦𑀸𑀕𑀸 𑀯𑀦𑁆𑀤𑀦𑁆𑀢𑀼 𑀲𑀢𑁆𑀣𑀼𑀦𑁄’’𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.