𑁬. 𑀲𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀪𑀺𑀬𑀲𑀼𑀢𑁆𑀢𑀁. 𑀓𑀸 𑀉𑀧𑁆𑀧𑀢𑁆𑀢𑀺? 𑀅𑀬𑀫𑁂𑀯 𑀬𑀸𑀲𑁆𑀲 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸. 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁂𑀧𑀺 𑀘𑀲𑁆𑀲 𑀧𑀼𑀩𑁆𑀩𑀲𑀤𑀺𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀅𑀧𑀼𑀩𑁆𑀩𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀺𑀳𑀭𑀦𑁆𑀢𑀸 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀦𑀸𑀫𑀁. 𑀢𑀁 𑀓𑀺𑀭 𑀯𑁂𑀴𑀽𑀳𑀺 𑀘 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀘 𑀧𑀸𑀓𑀸𑀭𑁂𑀦, 𑀕𑁄𑀧𑀼𑀭𑀤𑁆𑀯𑀸𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁, 𑀢𑁂𑀦 ‘‘𑀯𑁂𑀴𑀼𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼, 𑀢𑁂𑀦 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸 𑀦𑀸𑀫 𑀓𑀸𑀴𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀢𑁆𑀣 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀆𑀕𑀢𑁄 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀺𑀯𑀸𑀲𑁂𑀬𑁆𑀬𑀁 𑀲𑀼𑀧𑀺. 𑀧𑀭𑀺𑀚𑀦𑁄𑀧𑀺𑀲𑁆𑀲 ‘‘𑀲𑀼𑀢𑁆𑀢𑁄 𑀭𑀸𑀚𑀸’’𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀸𑀫𑀺. 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀲𑀼𑀲𑀺𑀭𑀭𑀼𑀓𑁆𑀔𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀓𑀸𑀴𑀓𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺, 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀫𑀫 𑀓𑀸𑀴𑀓𑀸𑀬 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 𑀢𑀢𑁆𑀣 𑀦𑀺𑀯𑀸𑀧𑀁 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀦𑀜𑁆𑀘 𑀖𑁄𑀲𑀸𑀧𑁂𑀲𑀺. 𑀢𑀲𑁆𑀫𑀸 𑀢𑀁 𑀢𑀢𑁄 𑀧𑀪𑀼𑀢𑀺 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧𑁄’’𑀢𑀺 𑀲𑀗𑁆𑀔𑀁 𑀕𑀢𑀁.

𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑀸𑀢𑀺 𑀲𑀪𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀩𑀸𑀳𑀺𑀭 𑀧𑀩𑁆𑀩𑀚𑁆𑀚𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬𑀸𑀢𑀺 𑀦 𑀫𑀸𑀢𑀸 𑀦 𑀧𑀺𑀢𑀸, 𑀅𑀧𑀺𑀘 𑀔𑁄 𑀧𑀦𑀲𑁆𑀲 𑀫𑀸𑀢𑀸 𑀯𑀺𑀬 𑀧𑀺𑀢𑀸 𑀯𑀺𑀬 𑀘 𑀳𑀺𑀢𑀚𑁆𑀛𑀸𑀲𑀬𑀢𑁆𑀢𑀸 𑀲𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸 𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀺𑀭 𑀓𑀲𑁆𑀲𑀧𑁂 𑀪𑀕𑀯𑀢𑀺 𑀧𑀢𑀺𑀝𑁆𑀞𑀺𑀢𑁂 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀼𑀔𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀘𑀭𑀺𑀬𑀸𑀦𑀼𑀭𑀽𑀧𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀘 𑀦𑀕𑀭𑀁 𑀕𑀘𑁆𑀙𑀦𑁆𑀢𑀺. 𑀅𑀧𑀭𑁂𑀦 𑀘 𑀲𑀫𑀬𑁂𑀦 𑀢𑀸𑀯𑀢𑀓𑀫𑁆𑀧𑀺 𑀅𑀭𑀜𑁆𑀜𑁂 𑀯𑀺𑀧𑁆𑀧𑀯𑀸𑀲𑀁 𑀅𑀭𑁄𑀘𑀬𑀫𑀸𑀦𑀸 𑀢𑀢𑁆𑀣𑁂𑀯 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀁𑀲𑀼, 𑀏𑀯𑀁 𑀯𑀺𑀳𑀭𑀦𑁆𑀢𑀸𑀧𑀺 𑀦 𑀘 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀁𑀲𑀼. 𑀢𑀢𑁄 𑀦𑁂𑀲𑀁 𑀅𑀳𑁄𑀲𑀺 𑁋 ‘‘𑀫𑀬𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑀦𑁆𑀢𑀸 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑀸 𑀳𑁄𑀫, 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑁂𑀦 𑀘 𑀦 𑀲𑀓𑁆𑀓𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀥𑀺𑀕𑀦𑁆𑀢𑀼𑀁, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀸𑀧𑀺 𑀤𑀼𑀓𑁆𑀔𑀸, 𑀳𑀦𑁆𑀤 𑀫𑀬𑀁 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼.

𑀅𑀣 𑀦𑁂𑀲𑀁 𑀫𑀳𑀸𑀣𑁂𑀭𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀤𑀳𑁂𑀯 𑀙𑀴𑀪𑀺𑀜𑁆𑀜𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀇𑀤𑁆𑀥𑀺𑀬𑀸 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀅𑀦𑁄𑀢𑀢𑁆𑀢𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀽𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀼𑀦 𑀅𑀜𑁆𑀜𑀫𑁆𑀧𑀺 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀦𑁄𑀢𑀢𑁆𑀢𑀉𑀤𑀓𑀜𑁆𑀘 𑀦𑀸𑀕𑀮𑀢𑀸𑀤𑀦𑁆𑀢𑀧𑁄𑀡𑀜𑁆𑀘 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀧𑀲𑁆𑀲𑀣𑀸𑀯𑀼𑀲𑁄 𑀫𑀫𑀸𑀦𑀼𑀪𑀸𑀯𑀁, 𑀅𑀬𑀁 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑁄, 𑀇𑀤𑀁 𑀳𑀺𑀫𑀯𑀦𑁆𑀢𑀢𑁄 𑀉𑀤𑀓𑀤𑀦𑁆𑀢𑀧𑁄𑀡𑀁 𑀆𑀪𑀢𑀁, 𑀇𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣, 𑀏𑀯𑀸𑀳𑀁 𑀢𑀼𑀫𑁆𑀳𑁂 𑀲𑀤𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀁 𑀲𑀼𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀓𑀢𑀓𑀺𑀘𑁆𑀘𑀸, 𑀢𑀼𑀫𑁆𑀳𑁂𑀳𑀺 𑀲𑀳 𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀅𑀫𑁆𑀳𑀸𑀓𑀁 𑀧𑀧𑀜𑁆𑀘𑁄, 𑀫𑀸 𑀤𑀸𑀦𑀺 𑀢𑀼𑀫𑁆𑀳𑁂 𑀧𑀼𑀦 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀫𑀺𑀢𑁆𑀣𑀸’’𑀢𑀺. 𑀲𑁄 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑁂 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀓𑁆𑀓𑀸𑀫𑀺.

𑀢𑀢𑁄 𑀢𑁂𑀲𑀁 𑀏𑀓𑁄 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀧𑀜𑁆𑀘𑀸𑀪𑀺𑀜𑁆𑀜𑁄 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀲𑁄𑀧𑀺 𑀢𑀣𑁂𑀯 𑀅𑀓𑀸𑀲𑀺, 𑀇𑀢𑀭𑁂𑀦 𑀘 𑀧𑀝𑀺𑀓𑁆𑀔𑀺𑀢𑁆𑀢𑁄 𑀢𑀣𑁂𑀯 𑀅𑀕𑀫𑀸𑀲𑀺. 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀧𑀩𑁆𑀩𑀢𑀁 𑀆𑀭𑀼𑀳𑀦𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀦𑀥𑀺𑀕𑀦𑁆𑀢𑁆𑀯𑀸𑀯 𑀓𑀸𑀮𑀓𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀔𑀻𑀡𑀸𑀲𑀯𑀢𑁆𑀣𑁂𑀭𑁄𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀦𑀸𑀕𑀸𑀫𑀻 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀺. 𑀤𑁂𑀯𑀧𑀼𑀢𑁆𑀢𑁄 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀲𑀸 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀥𑀻𑀢𑀸, 𑀢𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀫𑁆𑀳𑀸𑀓𑀁 𑀥𑀻𑀢𑀸 𑀲𑀫𑀬𑀦𑁆𑀢𑀭𑀁 𑀚𑀸𑀦𑀸𑀢𑀽’’𑀢𑀺 𑀏𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀼𑀁. 𑀢𑀲𑁆𑀲𑁂𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀸𑀬 𑀲𑀤𑁆𑀥𑀺𑀁 𑀯𑀺𑀧𑁆𑀧𑀝𑀺𑀧𑀚𑁆𑀚𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀢𑀁 𑀕𑀩𑁆𑀪𑀺𑀦𑀺𑀁 𑀤𑀺𑀲𑁆𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀦𑀺𑀓𑁆𑀓𑀟𑁆𑀠𑀺𑀁𑀲𑀼. 𑀲𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀪𑀸𑀬𑀁 𑀯𑀺𑀚𑀸𑀬𑀺, 𑀢𑁂𑀦𑀲𑁆𑀲 ‘‘𑀲𑀪𑀺𑀬𑁄’’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀲𑁄𑀧𑀺 𑀲𑀪𑀺𑀬𑁄 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀦𑀸𑀲𑀢𑁆𑀣𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀫𑀳𑀸𑀯𑀸𑀤𑀻 𑀳𑀼𑀢𑁆𑀯𑀸 𑀯𑀸𑀤𑀓𑁆𑀔𑀺𑀢𑁆𑀢𑀢𑀸𑀬 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀺𑀘𑀭𑀦𑁆𑀢𑁄 𑀅𑀢𑁆𑀢𑀦𑁄 𑀲𑀤𑀺𑀲𑀁 𑀯𑀸𑀤𑀺𑀁 𑀅𑀤𑀺𑀲𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀅𑀲𑁆𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀤𑀬𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀢𑀢𑁆𑀣 𑀯𑀲𑀢𑀺.

𑀅𑀣 𑀪𑀕𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀆𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀺 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀲𑀪𑀺𑀬𑁄 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀦 𑀚𑀸𑀦𑀸𑀢𑀺. 𑀅𑀣 𑀲𑁄 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀇𑀫𑀸𑀳𑀁 𑀯𑀺𑀲𑁂𑀲𑀁 𑀓𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀫𑀡𑀥𑀫𑁆𑀫𑀓𑀺𑀭𑀺𑀬𑀁 𑀢𑁂 𑀘 𑀲𑀳𑀸𑀬𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀢𑁂𑀲𑀼 𑀏𑀓𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀏𑀓𑁄 𑀇𑀤𑀸𑀦𑀺 𑀓𑀢𑁆𑀣𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑁂 𑀉𑀧𑁆𑀧𑀦𑁆𑀦𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀫𑁆𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀜𑀢𑁆𑀯𑀸 ‘‘𑀳𑀦𑁆𑀤 𑀦𑀁 𑀩𑀼𑀤𑁆𑀥𑀼𑀧𑀲𑁂𑀯𑀦𑀸𑀬 𑀦𑀺𑀬𑁄𑀚𑁂𑀫𑀻’’𑀢𑀺 𑀯𑀻𑀲𑀢𑀺 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀢𑀲𑁆𑀲 𑀅𑀲𑁆𑀲𑀫𑀫𑀸𑀕𑀫𑁆𑀫 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀲𑀪𑀺𑀬, 𑀲𑀪𑀺𑀬𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 𑀦𑀺𑀤𑁆𑀤𑀸𑀬𑀫𑀸𑀦𑁄 𑀢𑀺𑀓𑁆𑀔𑀢𑁆𑀢𑀼𑀁 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀧𑀜𑁆𑀚𑀮𑀺𑀓𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀢𑀁 𑀩𑁆𑀭𑀳𑁆𑀫𑀸 𑀆𑀳 𑁋 ‘‘𑀅𑀳𑀁 𑀲𑀪𑀺𑀬 𑀢𑀯𑀢𑁆𑀣𑀸𑀬 𑀯𑀻𑀲𑀢𑀺 𑀧𑀜𑁆𑀳𑁂 𑀆𑀳𑀭𑀺𑀁, 𑀢𑁂 𑀢𑁆𑀯𑀁 𑀉𑀕𑁆𑀕𑀡𑁆𑀳. 𑀬𑁄 𑀘 𑀢𑁂 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸𑀲𑀻’’𑀢𑀺. 𑀇𑀫𑀁 𑀤𑁂𑀯𑀧𑀼𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬 𑀧𑀜𑁆𑀳𑀸 𑀉𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀻’’𑀢𑀺. 𑀉𑀤𑁆𑀤𑀺𑀝𑁆𑀞𑀸𑀢𑀺 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯 𑀯𑀼𑀢𑁆𑀢𑀸, 𑀦 𑀯𑀺𑀪𑀗𑁆𑀕𑁂𑀦.

𑀏𑀯𑀁 𑀯𑀼𑀢𑁆𑀢𑁂 𑀘 𑀦𑁂 𑀲𑀪𑀺𑀬𑁄 𑀏𑀓𑀯𑀘𑀦𑁂𑀦𑁂𑀯 𑀧𑀤𑀧𑀝𑀺𑀧𑀸𑀝𑀺𑀬𑀸 𑀉𑀕𑁆𑀕𑀳𑁂𑀲𑀺. 𑀅𑀣 𑀲𑁄 𑀩𑁆𑀭𑀳𑁆𑀫𑀸 𑀚𑀸𑀦𑀦𑁆𑀢𑁄𑀧𑀺 𑀢𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀦𑀸𑀘𑀺𑀓𑁆𑀔𑀺. ‘‘𑀅𑀢𑁆𑀣𑀁 𑀕𑀯𑁂𑀲𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀬𑀫𑁂𑀯 𑀲𑀢𑁆𑀣𑀸𑀭𑀁 𑀜𑀲𑁆𑀲𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀼𑀘𑁆𑀙𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸 𑀧𑀦𑀸𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳 𑁋 ‘‘𑀬𑁄 𑀢𑁂 𑀲𑀪𑀺𑀬…𑀧𑁂… 𑀘𑀭𑁂𑀬𑁆𑀬𑀸𑀲𑀻’’𑀢𑀺. 𑀣𑁂𑀭𑀕𑀸𑀣𑀸𑀲𑀼 𑀧𑀦 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀲𑀪𑀺𑀬𑀢𑁆𑀣𑁂𑀭𑀸𑀧𑀤𑀸𑀦𑀁 𑀯𑀡𑁆𑀡𑁂𑀦𑁆𑀢𑀸 𑀪𑀡𑀦𑁆𑀢𑀺 ‘‘𑀲𑀸 𑀘𑀲𑁆𑀲 𑀫𑀸𑀢𑀸 𑀅𑀢𑁆𑀢𑀦𑁄 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀚𑀺𑀕𑀼𑀘𑁆𑀙𑀫𑀸𑀦𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀸, 𑀢𑀸𑀬 𑀩𑁆𑀭𑀳𑁆𑀫𑀤𑁂𑀯𑀢𑀸𑀬 𑀢𑁂 𑀧𑀜𑁆𑀳𑀸 𑀉𑀤𑁆𑀤𑀺𑀝𑁆𑀞𑀸’’𑀢𑀺.

𑀬𑁂 𑀢𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀁 𑀉𑀤𑁆𑀤𑁂𑀲𑀧𑀘𑁆𑀘𑀼𑀤𑁆𑀤𑁂𑀲𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀘 𑀲𑀫𑀡𑀸 𑀘𑁂𑀯 𑀩𑁆𑀭𑀸𑀳𑁆𑀫𑀡𑀸 𑀘. 𑀲𑀗𑁆𑀖𑀺𑀦𑁄𑀢𑀺 𑀕𑀡𑀯𑀦𑁆𑀢𑁄. 𑀕𑀡𑀺𑀦𑁄𑀢𑀺 𑀲𑀢𑁆𑀣𑀸𑀭𑁄, ‘‘𑀲𑀩𑁆𑀩𑀜𑁆𑀜𑀼𑀦𑁄 𑀫𑀬’’𑀦𑁆𑀢𑀺 𑀏𑀯𑀁 𑀧𑀝𑀺𑀜𑁆𑀜𑀸𑀢𑀸𑀭𑁄. 𑀕𑀡𑀸𑀘𑀭𑀺𑀬𑀸𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀧𑀩𑁆𑀩𑀚𑀺𑀢𑀕𑀳𑀝𑁆𑀞𑀕𑀡𑀲𑁆𑀲 𑀆𑀘𑀭𑀺𑀬𑀸. 𑀜𑀸𑀢𑀸𑀢𑀺 𑀅𑀪𑀺𑀜𑁆𑀜𑀸𑀢𑀸, 𑀯𑀺𑀲𑁆𑀲𑀼𑀢𑀸 𑀧𑀸𑀓𑀝𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑀲𑁆𑀲𑀺𑀦𑁄𑀢𑀺 𑀮𑀸𑀪𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸. 𑀢𑀺𑀢𑁆𑀣𑀓𑀭𑀸𑀢𑀺 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑁂𑀳𑀺 𑀑𑀢𑀭𑀺𑀢𑀩𑁆𑀩𑀸𑀦𑀁 𑀑𑀕𑀸𑀳𑀺𑀢𑀩𑁆𑀩𑀸𑀦𑀁 𑀤𑀺𑀝𑁆𑀞𑀺𑀢𑀺𑀢𑁆𑀣𑀸𑀦𑀁 𑀓𑀢𑁆𑀢𑀸𑀭𑁄. 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲𑀸𑀢𑀺 ‘‘𑀲𑀸𑀥𑀯𑁄 𑀏𑀢𑁂 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀏𑀯𑀁 𑀩𑀳𑀼𑀚𑀦𑀲𑁆𑀲 𑀲𑀫𑁆𑀫𑀢𑀸.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀓𑀢𑀫𑁂 𑀢𑁂𑀢𑀺 𑀘𑁂-𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀽𑀭𑀡𑁄𑀢𑀺 𑀦𑀸𑀫𑀁, 𑀓𑀲𑁆𑀲𑀧𑁄𑀢𑀺 𑀕𑁄𑀢𑁆𑀢𑀁. 𑀲𑁄 𑀓𑀺𑀭 𑀚𑀸𑀢𑀺𑀬𑀸 𑀤𑀸𑀲𑁄, 𑀤𑀸𑀲𑀲𑀢𑀁 𑀧𑀽𑀭𑁂𑀦𑁆𑀢𑁄 𑀚𑀸𑀢𑁄. 𑀢𑁂𑀦𑀲𑁆𑀲 ‘‘𑀧𑀽𑀭𑀡𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀧𑀮𑀸𑀬𑀺𑀢𑁆𑀯𑀸 𑀧𑀦 𑀦𑀕𑁆𑀕𑁂𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀓𑀲𑁆𑀲𑀧𑁄 𑀅𑀳’’𑀦𑁆𑀢𑀺 𑀕𑁄𑀢𑁆𑀢𑀁 𑀉𑀤𑁆𑀤𑀺𑀲𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀘 𑀧𑀘𑁆𑀘𑀜𑁆𑀜𑀸𑀲𑀺. 𑀫𑀓𑁆𑀔𑀮𑀻𑀢𑀺 𑀦𑀸𑀫𑀁, 𑀕𑁄𑀲𑀸𑀮𑀸𑀬 𑀚𑀸𑀢𑀢𑁆𑀢𑀸 𑀕𑁄𑀲𑀸𑀮𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑁄𑀧𑀺 𑀓𑀺𑀭 𑀚𑀸𑀢𑀺𑀬𑀸 𑀤𑀸𑀲𑁄 𑀏𑀯, 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀘 𑀧𑀘𑁆𑀘𑀜𑁆𑀜𑀸𑀲𑀺. 𑀅𑀚𑀺𑀢𑁄𑀢𑀺 𑀦𑀸𑀫𑀁, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀓𑁂𑀲𑀓𑀫𑁆𑀩𑀮𑀁 𑀥𑀸𑀭𑁂𑀢𑀺, 𑀢𑁂𑀦 𑀓𑁂𑀲𑀓𑀫𑁆𑀩𑀮𑁄𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀧𑀓𑀼𑀥𑁄𑀢𑀺 𑀦𑀸𑀫𑀁, 𑀓𑀘𑁆𑀘𑀸𑀬𑀦𑁄𑀢𑀺 𑀕𑁄𑀢𑁆𑀢𑀁. 𑀅𑀧𑁆𑀧𑀺𑀘𑁆𑀙𑀯𑀲𑁂𑀦 𑀉𑀤𑀓𑁂 𑀚𑀻𑀯𑀲𑀜𑁆𑀜𑀸𑀬 𑀘 𑀦𑁆𑀳𑀸𑀦𑀫𑀼𑀔𑀥𑁄𑀯𑀦𑀸𑀤𑀺 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀲𑀜𑁆𑀘𑀬𑁄𑀢𑀺 𑀦𑀸𑀫𑀁, 𑀩𑁂𑀮𑀝𑁆𑀞𑁄 𑀧𑀦𑀲𑁆𑀲 𑀧𑀺𑀢𑀸, 𑀢𑀲𑁆𑀫𑀸 𑀩𑁂𑀮𑀝𑁆𑀞𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀦𑀺𑀕𑀡𑁆𑀞𑁄𑀢𑀺 𑀧𑀩𑁆𑀩𑀚𑁆𑀚𑀸𑀦𑀸𑀫𑁂𑀦, 𑀦𑀸𑀝𑀧𑀼𑀢𑁆𑀢𑁄𑀢𑀺 𑀧𑀺𑀢𑀼𑀦𑀸𑀫𑁂𑀦 𑀯𑀼𑀘𑁆𑀘𑀢𑀺. 𑀦𑀸𑀝𑁄𑀢𑀺 𑀓𑀺𑀭 𑀦𑀸𑀫𑀲𑁆𑀲 𑀧𑀺𑀢𑀸, 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀦𑀸𑀝𑀧𑀼𑀢𑁆𑀢𑁄, 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀘𑁆𑀘𑀜𑁆𑀜𑀸𑀲𑀺. 𑀲𑀩𑁆𑀩𑁂𑀧𑀺 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀲𑀺𑀲𑁆𑀲𑀧𑀭𑀺𑀯𑀸𑀭𑀸 𑀅𑀳𑁂𑀲𑀼𑀁. 𑀢𑁂𑀢𑀺 𑀢𑁂 𑀙 𑀲𑀢𑁆𑀣𑀸𑀭𑁄. 𑀢𑁂 𑀧𑀜𑁆𑀳𑁂𑀢𑀺 𑀢𑁂 𑀯𑀻𑀲𑀢𑀺 𑀧𑀜𑁆𑀳𑁂. 𑀢𑁂𑀢𑀺 𑀢𑁂 𑀙 𑀲𑀢𑁆𑀣𑀸𑀭𑁄. 𑀦 𑀲𑀫𑁆𑀧𑀸𑀬𑀦𑁆𑀢𑀻𑀢𑀺 𑀦 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀓𑁄𑀧𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀆𑀯𑀺𑀮𑀪𑀸𑀯𑀁. 𑀤𑁄𑀲𑀦𑁆𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀢𑀁, 𑀢𑀤𑀼𑀪𑀬𑀫𑁆𑀧𑁂𑀢𑀁 𑀫𑀦𑁆𑀤𑀢𑀺𑀓𑁆𑀔𑀪𑁂𑀤𑀲𑁆𑀲 𑀓𑁄𑀥𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀧𑁆𑀧𑀢𑀻𑀢𑀢𑀸, 𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀢𑀼𑀓𑀭𑁄𑀦𑁆𑀢𑀻𑀢𑀺 𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀦 𑀧𑀓𑀸𑀲𑁂𑀦𑁆𑀢𑀺, 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺.

𑀳𑀻𑀦𑀸𑀬𑀸𑀢𑀺 𑀕𑀳𑀝𑁆𑀞𑀪𑀸𑀯𑀸𑀬. 𑀕𑀳𑀝𑁆𑀞𑀪𑀸𑀯𑁄 𑀳𑀺 𑀧𑀩𑁆𑀩𑀚𑁆𑀚𑀁 𑀉𑀧𑀦𑀺𑀥𑀸𑀬 𑀲𑀻𑀮𑀸𑀤𑀺𑀕𑀼𑀡𑀳𑀻𑀦𑀢𑁄 𑀳𑀻𑀦𑀓𑀸𑀫𑀲𑀼𑀔𑀧𑀝𑀺𑀲𑁂𑀯𑀦𑀢𑁄 𑀯𑀸 ‘‘𑀳𑀻𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀉𑀘𑁆𑀘𑀸 𑀧𑀩𑁆𑀩𑀚𑁆𑀚𑀸. 𑀆𑀯𑀢𑁆𑀢𑀺𑀢𑁆𑀯𑀸𑀢𑀺 𑀑𑀲𑀓𑁆𑀓𑀺𑀢𑁆𑀯𑀸. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀦𑁆𑀢𑀺 𑀓𑀸𑀫𑁂 𑀧𑀝𑀺𑀲𑁂𑀯𑁂𑀬𑁆𑀬𑀁. 𑀇𑀢𑀺 𑀓𑀺𑀭𑀲𑁆𑀲 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑀸𑀦𑀫𑁆𑀧𑀺 𑀧𑀩𑁆𑀩𑀚𑀺𑀢𑀸𑀦𑀁 𑀢𑀼𑀘𑁆𑀙𑀓𑀢𑁆𑀢𑀁 𑀤𑀺𑀲𑁆𑀯𑀸 𑀅𑀳𑁄𑀲𑀺. 𑀉𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦𑁂𑀯 𑀘 𑀆𑀕𑀦𑁆𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀻𑀫𑀁𑀲𑀫𑀸𑀦𑀲𑁆𑀲 𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀫𑁆𑀧𑀺 𑀔𑁄 𑀲𑀫𑀡𑁄’’𑀢𑀺 𑀘 ‘‘𑀬𑁂𑀧𑀺 𑀔𑁄 𑀢𑁂 𑀪𑁄𑀦𑁆𑀢𑁄’’𑀢𑀺 𑀘 ‘‘𑀲𑀫𑀡𑁄 𑀔𑁄 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄’’𑀢𑀺 𑀘𑀸𑀢𑀺 𑀏𑀯𑀫𑀸𑀤𑀺. 𑀢𑀢𑁆𑀣 𑀚𑀺𑀡𑁆𑀡𑀸𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀣𑁂𑀭𑀸𑀢𑀺 𑀅𑀢𑁆𑀢𑀦𑁄 𑀲𑀫𑀡𑀥𑀫𑁆𑀫𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸. 𑀭𑀢𑁆𑀢𑀜𑁆𑀜𑀽𑀢𑀺 𑀭𑀢𑀦𑀜𑁆𑀜𑀽, ‘‘𑀦𑀺𑀩𑁆𑀩𑀸𑀦𑀭𑀢𑀦𑀁 𑀚𑀸𑀦𑀸𑀫 𑀫𑀬’’𑀦𑁆𑀢𑀺 𑀏𑀯𑀁 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀮𑁄𑀓𑁂𑀦𑀸𑀧𑀺 𑀲𑀫𑁆𑀫𑀢𑀸, 𑀩𑀳𑀼𑀭𑀢𑁆𑀢𑀺𑀯𑀺𑀤𑀽 𑀯𑀸. 𑀘𑀺𑀭𑀁 𑀧𑀩𑁆𑀩𑀚𑀺𑀢𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑀸. 𑀦 𑀉𑀜𑁆𑀜𑀸𑀢𑀩𑁆𑀩𑁄𑀢𑀺 𑀦 𑀅𑀯𑀚𑀸𑀦𑀺𑀢𑀩𑁆𑀩𑁄, 𑀦 𑀦𑀻𑀘𑀁 𑀓𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀧𑀭𑀺𑀪𑁄𑀢𑀩𑁆𑀩𑁄𑀢𑀺 𑀦 𑀧𑀭𑀺𑀪𑀯𑀺𑀢𑀩𑁆𑀩𑁄, ‘‘𑀓𑀺𑀫𑁂𑀲 𑀜𑀲𑁆𑀲𑀢𑀻’’𑀢𑀺 𑀏𑀯𑀁 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁧𑁬. 𑀓𑀗𑁆𑀔𑀻 𑀯𑁂𑀘𑀺𑀓𑀺𑀘𑁆𑀙𑀻𑀢𑀺 𑀲𑀪𑀺𑀬𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑁄 𑀏𑀯𑀁 𑀪𑀕𑀯𑀢𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀤𑀫𑀽𑀧𑀲𑀫𑀲𑀽𑀘𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀯𑀺𑀕𑀢𑀼𑀤𑁆𑀥𑀘𑁆𑀘𑁄 𑀳𑀼𑀢𑁆𑀯𑀸 𑀆𑀳 𑁋 ‘‘𑀓𑀗𑁆𑀔𑀻 𑀯𑁂𑀘𑀺𑀓𑀺𑀘𑁆𑀙𑀻’’𑀢𑀺. 𑀢𑀢𑁆𑀣 ‘‘𑀮𑀪𑁂𑀬𑁆𑀬𑀁 𑀦𑀼 𑀔𑁄 𑀇𑀫𑁂𑀲𑀁 𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀏𑀯𑀁 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀓𑀗𑁆𑀔𑀸𑀬 𑀓𑀗𑁆𑀔𑀻. ‘‘𑀓𑁄 𑀦𑀼 𑀔𑁄 𑀇𑀫𑀲𑁆𑀲𑀺𑀫𑀲𑁆𑀲 𑀘 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄’’𑀢𑀺 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑁂𑀘𑀺𑀓𑀺𑀘𑁆𑀙𑀻. 𑀤𑀼𑀩𑁆𑀩𑀮𑀯𑀺𑀘𑀺𑀓𑀺𑀘𑁆𑀙𑀸𑀬 𑀯𑀸 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑁂 𑀓𑀗𑁆𑀔𑀦𑀢𑁄 𑀓𑀗𑁆𑀔𑀻, 𑀩𑀮𑀯𑀢𑀺𑀬𑀸 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺𑀬𑁂𑀯, 𑀦 𑀲𑀓𑁆𑀓𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑁂𑀘𑀺𑀓𑀺𑀘𑁆𑀙𑀻. 𑀅𑀪𑀺𑀓𑀗𑁆𑀔𑀫𑀸𑀦𑁄𑀢𑀺 𑀅𑀢𑀺𑀯𑀺𑀬 𑀧𑀢𑁆𑀣𑀬𑀫𑀸𑀦𑁄. 𑀢𑁂𑀲𑀦𑁆𑀢𑀓𑀭𑁄𑀢𑀺 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑁄. 𑀪𑀯𑀦𑁆𑀢𑁄𑀯 𑀏𑀯𑀁 𑀪𑀯𑀸𑀳𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀳𑁂 𑀫𑁂 𑀧𑀼𑀝𑁆𑀞𑁄…𑀧𑁂… 𑀩𑁆𑀬𑀸𑀓𑀭𑁄𑀳𑀺 𑀫𑁂’’𑀢𑀺. 𑀢𑀢𑁆𑀣 𑀧𑀜𑁆𑀳𑁂 𑀫𑁂𑀢𑀺 𑀧𑀜𑁆𑀳𑁂 𑀫𑀬𑀸. 𑀧𑀼𑀝𑁆𑀞𑁄𑀢𑀺 𑀧𑀼𑀘𑁆𑀙𑀺𑀢𑁄. 𑀅𑀦𑀼𑀧𑀼𑀩𑁆𑀩𑀦𑁆𑀢𑀺 𑀧𑀜𑁆𑀳𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑀸𑀦𑀼𑀭𑀽𑀧𑀁 𑀧𑀸𑀴𑀺𑀁 𑀆𑀭𑁄𑀧𑁂𑀦𑁆𑀢𑁄. 𑀩𑁆𑀬𑀸𑀓𑀭𑁄𑀳𑀺 𑀫𑁂𑀢𑀺 𑀫𑀬𑁆𑀳𑀁 𑀩𑁆𑀬𑀸𑀓𑀭𑁄𑀳𑀺.

𑁫𑁧𑁭. 𑀤𑀽𑀭𑀢𑁄𑀢𑀺 𑀲𑁄 𑀓𑀺𑀭 𑀇𑀢𑁄 𑀘𑀺𑀢𑁄 𑀘𑀸𑀳𑀺𑀡𑁆𑀟𑀦𑁆𑀢𑁄 𑀲𑀢𑁆𑀢𑀬𑁄𑀚𑀦𑀲𑀢𑀫𑀕𑁆𑀕𑀢𑁄 𑀆𑀕𑀢𑁄. 𑀢𑁂𑀦𑀸𑀳 𑁋 𑀪𑀕𑀯𑀸 ‘‘𑀤𑀽𑀭𑀢𑁄 𑀆𑀕𑀢𑁄𑀲𑀻’’𑀢𑀺, 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀯𑀸 𑀲𑀸𑀲𑀦𑀢𑁄 𑀆𑀕𑀢𑀢𑁆𑀢𑀸 ‘‘𑀤𑀽𑀭𑀢𑁄 𑀆𑀕𑀢𑁄𑀲𑀻’’𑀢𑀺 𑀦𑀁 𑀆𑀳.

𑁫𑁧𑁮. 𑀧𑀼𑀘𑁆𑀙 𑀫𑀦𑁆𑀢𑀺 𑀇𑀫𑀸𑀬 𑀧𑀦𑀲𑁆𑀲 𑀕𑀸𑀣𑀸𑀬 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀺. 𑀢𑀢𑁆𑀣 𑀫𑀦𑀲𑀺𑀘𑁆𑀙𑀲𑀻𑀢𑀺 𑀫𑀦𑀲𑀸 𑀇𑀘𑁆𑀙𑀲𑀺.

𑀬𑀁 𑀯𑀢𑀸𑀳𑀦𑁆𑀢𑀺 𑀬𑀁 𑀯𑀢 𑀅𑀳𑀁. 𑀅𑀢𑁆𑀢𑀫𑀦𑁄𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑁄𑀫𑀦𑀲𑁆𑀲𑁂𑀳𑀺 𑀨𑀼𑀝𑀘𑀺𑀢𑁆𑀢𑁄. 𑀉𑀤𑀕𑁆𑀕𑁄𑀢𑀺 𑀓𑀸𑀬𑁂𑀦 𑀘𑀺𑀢𑁆𑀢𑁂𑀦 𑀘 𑀅𑀩𑁆𑀪𑀼𑀦𑁆𑀦𑀢𑁄. 𑀇𑀤𑀁 𑀧𑀦 𑀧𑀤𑀁 𑀦 𑀲𑀩𑁆𑀩𑀧𑀸𑀞𑁂𑀲𑀼 𑀅𑀢𑁆𑀣𑀺. 𑀇𑀤𑀸𑀦𑀺 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀅𑀢𑁆𑀢𑀫𑀦𑁄, 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄’’𑀢𑀺.

𑁫𑁧𑁯. 𑀓𑀺𑀁 𑀧𑀢𑁆𑀢𑀺𑀦𑀦𑁆𑀢𑀺 𑀓𑀺𑀁 𑀧𑀢𑁆𑀢𑀁 𑀓𑀺𑀫𑀥𑀺𑀕𑀢𑀁. 𑀲𑁄𑀭𑀢𑀦𑁆𑀢𑀺 𑀲𑀼𑀯𑀽𑀧𑀲𑀦𑁆𑀢𑀁. ‘‘𑀲𑀼𑀭𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑀼𑀝𑁆𑀞𑀼 𑀉𑀧𑀭𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀦𑁆𑀢𑀺 𑀤𑀫𑀺𑀢𑀁. 𑀩𑀼𑀤𑁆𑀥𑁄𑀢𑀺 𑀯𑀺𑀩𑀼𑀤𑁆𑀥𑁄, 𑀩𑀼𑀤𑁆𑀥𑀩𑁄𑀤𑁆𑀥𑀩𑁆𑀩𑁄 𑀯𑀸. 𑀏𑀯𑀁 𑀲𑀪𑀺𑀬𑁄 𑀏𑀓𑁂𑀓𑀸𑀬 𑀕𑀸𑀣𑀸𑀬 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀧𑀜𑁆𑀘𑀳𑀺 𑀕𑀸𑀣𑀸𑀳𑀺 𑀯𑀻𑀲𑀢𑀺 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀪𑀕𑀯𑀸 𑀧𑀦𑀲𑁆𑀲 𑀏𑀓𑀫𑁂𑀓𑀁 𑀧𑀜𑁆𑀳𑀁 𑀏𑀓𑀫𑁂𑀓𑀸𑀬 𑀕𑀸𑀣𑀸𑀬 𑀓𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀯𑀻𑀲𑀢𑀺𑀬𑀸 𑀕𑀸𑀣𑀸𑀳𑀺 𑀩𑁆𑀬𑀸𑀓𑀸𑀲𑀺.

𑁫𑁨𑁦. 𑀢𑀢𑁆𑀣 𑀬𑀲𑁆𑀫𑀸 𑀪𑀺𑀦𑁆𑀦𑀓𑀺𑀮𑁂𑀲𑁄 𑀧𑀭𑀫𑀢𑁆𑀣𑀪𑀺𑀓𑁆𑀔𑀼, 𑀲𑁄 𑀘 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀲𑁆𑀲 ‘‘𑀓𑀺𑀁 𑀧𑀢𑁆𑀢𑀺𑀦𑀫𑀸𑀳𑀼 𑀪𑀺𑀓𑁆𑀔𑀼𑀦’’𑀦𑁆𑀢𑀺 𑀇𑀫𑀁 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 ‘‘𑀧𑀚𑁆𑀚𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀅𑀢𑁆𑀢𑀦𑀸 𑀪𑀸𑀯𑀺𑀢𑁂𑀦 𑀫𑀕𑁆𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑀢𑁆𑀢𑀸 𑀏𑀯 𑀘 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀳𑀸𑀦𑀺𑀩𑀼𑀤𑁆𑀥𑀺𑀉𑀘𑁆𑀙𑁂𑀤𑀲𑀲𑁆𑀲𑀢𑀅𑀧𑀼𑀜𑁆𑀜𑀧𑀼𑀜𑁆𑀜𑀪𑁂𑀤𑀁 𑀯𑀺𑀪𑀯𑀜𑁆𑀘 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬, 𑀫𑀕𑁆𑀕𑀯𑀸𑀲𑀁 𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄𑀢𑀺 𑀘 𑀏𑀢𑁂𑀲𑀁 𑀣𑀼𑀢𑀺𑀯𑀘𑀦𑀸𑀦𑀁 𑀅𑀭𑀳𑁄, 𑀲𑁄 𑀪𑀺𑀓𑁆𑀔𑀽𑀢𑀺.

𑁫𑁨𑁧. 𑀬𑀲𑁆𑀫𑀸 𑀧𑀦 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀢𑁄 𑀲𑀼𑀝𑁆𑀞𑀼 𑀉𑀧𑀭𑀢𑀪𑀸𑀯𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀘 𑀲𑁄𑀭𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀼𑀢𑀺𑀬𑀧𑀜𑁆𑀳𑀩𑁆𑀬𑀸𑀓𑀭𑀡𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀲𑀩𑁆𑀩𑀢𑁆𑀣 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺, 𑀦 𑀤𑀼𑀫𑁆𑀫𑀦𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄, 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸𑀬 𑀲𑀢𑀺𑀬𑀸 𑀲𑀢𑀺𑀫𑀸, 𑀦 𑀲𑁄 𑀳𑀺𑀁𑀲𑀢𑀺 𑀦𑁂𑀯 𑀳𑀺𑀁𑀲𑀢𑀺 𑀓𑀜𑁆𑀘𑀺 𑀢𑀲𑀣𑀸𑀯𑀭𑀸𑀤𑀺𑀪𑁂𑀤𑀁 𑀲𑀢𑁆𑀢𑀁 𑀲𑀩𑁆𑀩𑀮𑁄𑀓𑁂 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀮𑁄𑀓𑁂, 𑀢𑀺𑀡𑁆𑀡𑁄𑀖𑀢𑁆𑀢𑀸 𑀢𑀺𑀡𑁆𑀡𑁄, 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄, 𑀆𑀯𑀺𑀮𑀲𑀗𑁆𑀓𑀧𑁆𑀧𑀧𑁆𑀧𑀳𑀸𑀦𑀸 𑀅𑀦𑀸𑀯𑀺𑀮𑁄. 𑀬𑀲𑁆𑀲 𑀘𑀺𑀫𑁂 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀲𑀗𑁆𑀔𑀸𑀢𑀸 𑀲𑀢𑁆𑀢𑀼𑀲𑁆𑀲𑀤𑀸 𑀓𑁂𑀘𑀺 𑀑𑀴𑀸𑀭𑀺𑀓𑀸 𑀯𑀸 𑀲𑀼𑀔𑀼𑀫𑀸 𑀯𑀸 𑀦 𑀲𑀦𑁆𑀢𑀺, 𑀲𑁄 𑀇𑀫𑀸𑀬 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀢𑀸𑀬 𑀲𑀢𑀺𑀯𑁂𑀧𑀼𑀮𑁆𑀮𑀢𑀸𑀬 𑀅𑀳𑀺𑀁𑀲𑀓𑀢𑀸𑀬 𑀘 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀢𑁄 𑀲𑀼𑀝𑁆𑀞𑀼 𑀉𑀧𑀭𑀢𑀪𑀸𑀯𑁂𑀦 𑀇𑀫𑀺𑀦𑀸 𑀑𑀖𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀘 𑀲𑁄𑀭𑀢𑁄𑀢𑀺.

𑁫𑁨𑁨. 𑀬𑀲𑁆𑀫𑀸 𑀘 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀦𑀺𑀩𑁆𑀪𑀬𑁄 𑀦𑀺𑀩𑁆𑀩𑀺𑀓𑀸𑀭𑁄 𑀤𑀦𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀕𑀸𑀣𑀸𑀬 𑀢𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀘𑀓𑁆𑀔𑀸𑀤𑀻𑀦𑀺 𑀙𑀴𑀺𑀦𑁆𑀤𑁆𑀭𑀺𑀬𑀸𑀦𑀺 𑀕𑁄𑀘𑀭𑀪𑀸𑀯𑀦𑀸𑀬 𑀅𑀦𑀺𑀘𑁆𑀘𑀸𑀤𑀺𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑀦𑀸𑀪𑀸𑀯𑀦𑀸𑀬 𑀲𑀢𑀺𑀲𑀫𑁆𑀧𑀚𑀜𑁆𑀜𑀕𑀦𑁆𑀥𑀁 𑀕𑀸𑀳𑀸𑀧𑁂𑀢𑁆𑀯𑀸 𑀘 𑀪𑀸𑀯𑀺𑀢𑀸𑀦𑀺, 𑀢𑀸𑀦𑀺 𑀘 𑀔𑁄 𑀬𑀣𑀸 𑀅𑀚𑁆𑀛𑀢𑁆𑀢𑀁 𑀕𑁄𑀘𑀭𑀪𑀸𑀯𑀦𑀸𑀬, 𑀏𑀯𑀁 𑀧𑀦 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂𑀢𑀺 𑀬𑀢𑁆𑀣 𑀬𑀢𑁆𑀣 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑁂𑀓𑀮𑁆𑀮𑀢𑀸 𑀯𑁂𑀓𑀮𑁆𑀮𑀢𑀸𑀬 𑀯𑀸 𑀲𑀫𑁆𑀪𑀯𑁄, 𑀢𑀢𑁆𑀣 𑀢𑀢𑁆𑀣 𑀦𑀸𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀪𑀸𑀯𑀺𑀢𑀸𑀦𑀻𑀢𑀺 𑀏𑀯𑀁 𑀦𑀺𑀩𑁆𑀩𑀺𑀚𑁆𑀛 𑀜𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀓𑀲𑀦𑁆𑀢𑀢𑀺𑀓𑁆𑀔𑀦𑁆𑀥𑀮𑁄𑀓𑀁 𑀧𑀭𑀲𑀦𑁆𑀢𑀢𑀺𑀓𑁆𑀔𑀦𑁆𑀥𑀮𑁄𑀓𑀜𑁆𑀘 𑀅𑀤𑀦𑁆𑀥𑀫𑀭𑀡𑀁 𑀫𑀭𑀺𑀢𑀼𑀓𑀸𑀫𑁄 𑀓𑀸𑀮𑀁 𑀓𑀗𑁆𑀔𑀢𑀺, 𑀚𑀻𑀯𑀺𑀢𑀓𑁆𑀔𑀬𑀓𑀸𑀮𑀁 𑀆𑀕𑀫𑁂𑀢𑀺 𑀧𑀢𑀺𑀫𑀸𑀦𑁂𑀢𑀺, 𑀦 𑀪𑀸𑀬𑀢𑀺 𑀫𑀭𑀡𑀲𑁆𑀲. 𑀬𑀣𑀸𑀳 𑀣𑁂𑀭𑁄 𑁋

‘‘𑀫𑀭𑀡𑁂 𑀫𑁂 𑀪𑀬𑀁 𑀦𑀢𑁆𑀣𑀺, 𑀦𑀺𑀓𑀦𑁆𑀢𑀺 𑀦𑀢𑁆𑀣𑀺 𑀚𑀻𑀯𑀺𑀢𑁂’’; (𑀣𑁂𑀭𑀕𑀸. 𑁨𑁦);

‘‘𑀦𑀸𑀪𑀺𑀓𑀗𑁆𑀔𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸’’𑀢𑀺. (𑀣𑁂𑀭𑀕𑀸. 𑁬𑁦𑁬);

𑀪𑀸𑀯𑀺𑀢𑁄 𑀲 𑀤𑀦𑁆𑀢𑁄𑀢𑀺 𑀏𑀯𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀲𑁄 𑀤𑀦𑁆𑀢𑁄𑀢𑀺.

𑁫𑁨𑁩. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑁄 𑀦𑀸𑀫 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀓𑀺𑀮𑁂𑀲𑀦𑀺𑀤𑁆𑀤𑀸 𑀯𑀺𑀩𑀼𑀤𑁆𑀥𑁄 𑀘, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀧𑁆𑀧𑀸𑀦𑀻’’𑀢𑀺 𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀓𑀧𑁆𑀧𑀸𑀦𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄. 𑀢𑀸 𑀳𑀺 𑀢𑀣𑀸 𑀢𑀣𑀸 𑀯𑀺𑀓𑀧𑁆𑀧𑀦𑀢𑁄 ‘‘𑀓𑀧𑁆𑀧𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀘𑁂𑀬𑁆𑀬𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀲𑀫𑁆𑀫𑀲𑀺𑀢𑁆𑀯𑀸. 𑀓𑁂𑀯𑀮𑀸𑀦𑀻𑀢𑀺 𑀲𑀓𑀮𑀸𑀦𑀺. 𑀲𑀁𑀲𑀸𑀭𑀦𑁆𑀢𑀺 𑀬𑁄 𑀘𑀸𑀬𑀁 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑁋

𑀏𑀯𑀁 𑀔𑀦𑁆𑀥𑀸𑀤𑀺𑀧𑀝𑀺𑀧𑀸𑀝𑀺𑀲𑀗𑁆𑀔𑀸𑀢𑁄 𑀲𑀁𑀲𑀸𑀭𑁄, 𑀢𑀁 𑀲𑀁𑀲𑀸𑀭𑀜𑁆𑀘 𑀓𑁂𑀯𑀮𑀁 𑀯𑀺𑀘𑁂𑀬𑁆𑀬. 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑁂𑀲𑀼 𑀓𑀫𑁆𑀫𑀓𑀺𑀮𑁂𑀲𑁂𑀲𑀼 𑀔𑀦𑁆𑀥𑁂𑀲𑀼 𑀘𑀸𑀢𑀺 𑀏𑀯𑀁 𑀢𑀻𑀲𑀼𑀧𑀺 𑀯𑀝𑁆𑀝𑁂𑀲𑀼 𑀯𑀺𑀧𑀲𑁆𑀲𑀦𑀁 𑀆𑀳. 𑀤𑀼𑀪𑀬𑀁 𑀘𑀼𑀢𑀽𑀧𑀧𑀸𑀢𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀁 𑀉𑀧𑀧𑀸𑀢𑀦𑁆𑀢𑀺 𑀇𑀫𑀜𑁆𑀘 𑀉𑀪𑀬𑀁 𑀯𑀺𑀘𑁂𑀬𑁆𑀬 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀘𑀼𑀢𑀽𑀧𑀧𑀸𑀢𑀜𑀸𑀡𑀁 𑀆𑀳. 𑀯𑀺𑀕𑀢𑀭𑀚𑀫𑀦𑀗𑁆𑀕𑀡𑀁 𑀯𑀺𑀲𑀼𑀤𑁆𑀥𑀦𑁆𑀢𑀺 𑀭𑀸𑀕𑀸𑀤𑀺𑀭𑀚𑀸𑀦𑀁 𑀯𑀺𑀕𑀫𑀸 𑀅𑀗𑁆𑀕𑀡𑀸𑀦𑀁 𑀅𑀪𑀸𑀯𑀸 𑀫𑀮𑀸𑀦𑀜𑁆𑀘 𑀯𑀺𑀕𑀫𑀸 𑀯𑀺𑀕𑀢𑀭𑀚𑀫𑀦𑀗𑁆𑀕𑀡𑀁 𑀯𑀺𑀲𑀼𑀤𑁆𑀥𑀁. 𑀧𑀢𑁆𑀢𑀁 𑀚𑀸𑀢𑀺𑀔𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀁. 𑀢𑀫𑀸𑀳𑀼 𑀩𑀼𑀤𑁆𑀥𑀦𑁆𑀢𑀺 𑀢𑀁 𑀇𑀫𑀸𑀬 𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀬 𑀘𑀼𑀢𑀽𑀧𑀧𑀸𑀢𑀜𑀸𑀡𑀪𑁂𑀤𑀸𑀬 𑀩𑀼𑀤𑁆𑀥𑀺𑀬𑀸 𑀲𑀫𑁆𑀧𑀦𑁆𑀦𑀢𑁆𑀢𑀸 𑀇𑀫𑀸𑀬 𑀘 𑀯𑀺𑀕𑀢𑀭𑀚𑀸𑀤𑀺𑀢𑀸𑀬 𑀓𑀺𑀮𑁂𑀲𑀦𑀺𑀤𑁆𑀤𑀸 𑀯𑀺𑀩𑀼𑀤𑁆𑀥𑀢𑁆𑀢𑀸 𑀢𑀸𑀬 𑀧𑀝𑀺𑀧𑀤𑀸𑀬 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑀁 𑀩𑀼𑀤𑁆𑀥𑀫𑀸𑀳𑀼.

𑀅𑀣 𑀯𑀸 𑀓𑀧𑁆𑀧𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀻𑀢𑀺 ‘‘𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀫𑀼𑀢𑁆𑀭𑀸𑀲𑀺’’𑀦𑁆𑀢𑀺𑀆𑀤𑀺𑀦𑀸 (𑀇𑀢𑀺𑀯𑀼. 𑁯𑁯; 𑀧𑀸𑀭𑀸. 𑁧𑁨) 𑀦𑀬𑁂𑀦 𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀧𑀞𑀫𑀯𑀺𑀚𑁆𑀚𑀫𑀸𑀳. 𑀲𑀁𑀲𑀸𑀭𑀁 𑀤𑀼𑀪𑀬𑀁 𑀘𑀼𑀢𑀽𑀧𑀧𑀸𑀢𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀁 𑀉𑀧𑀧𑀸𑀢𑀦𑁆𑀢𑀺 𑀇𑀫𑀜𑁆𑀘 𑀉𑀪𑀬𑀁 𑀲𑀁𑀲𑀸𑀭𑀁 ‘‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀤𑀼𑀢𑀺𑀬𑀯𑀺𑀚𑁆𑀚𑀫𑀸𑀳. 𑀅𑀯𑀲𑁂𑀲𑁂𑀦 𑀢𑀢𑀺𑀬𑀯𑀺𑀚𑁆𑀚𑀫𑀸𑀳. 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀳𑀺 𑀯𑀺𑀕𑀢𑀭𑀚𑀸𑀤𑀺𑀢𑀸 𑀘 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺 𑀘 𑀳𑁄𑀢𑀻𑀢𑀺. 𑀢𑀫𑀸𑀳𑀼 𑀩𑀼𑀤𑁆𑀥𑀦𑁆𑀢𑀺 𑀏𑀯𑀁 𑀯𑀺𑀚𑁆𑀚𑀢𑁆𑀢𑀬𑀪𑁂𑀤𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀁 𑀢𑀁 𑀩𑀼𑀤𑁆𑀥𑀫𑀸𑀳𑀽𑀢𑀺.

𑁫𑁨𑁫. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀼𑀢𑀺𑀬𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂𑀲𑀼𑀧𑀺 𑀬𑀲𑁆𑀫𑀸 𑀩𑁆𑀭𑀳𑁆𑀫𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑁄 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀢𑀲𑀩𑁆𑀩𑀧𑀸𑀧𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀸𑀳𑀺𑀢𑁆𑀯𑀸’’𑀢𑀺 𑀕𑀸𑀣𑀸𑀬 𑀧𑀞𑀫𑀁 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺 𑀞𑀺𑀢𑀢𑁆𑀢𑁄, 𑀞𑀺𑀢𑁄 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀏𑀯 𑀘 𑀯𑀺𑀫𑀮𑁄, 𑀯𑀺𑀫𑀮𑀪𑀸𑀯𑀁 𑀩𑁆𑀭𑀳𑁆𑀫𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀫𑀸𑀥𑀺𑀯𑀺𑀓𑁆𑀔𑁂𑀧𑀓𑀭𑀓𑀺𑀮𑁂𑀲𑀫𑀮𑁂𑀦 𑀅𑀕𑁆𑀕𑀨𑀮𑀲𑀫𑀸𑀥𑀺𑀦𑀸 𑀲𑀸𑀥𑀼𑀲𑀫𑀸𑀳𑀺𑀢𑁄, 𑀲𑀁𑀲𑀸𑀭𑀳𑁂𑀢𑀼𑀲𑀫𑀢𑀺𑀓𑁆𑀓𑀫𑁂𑀦 𑀲𑀁𑀲𑀸𑀭𑀫𑀢𑀺𑀘𑁆𑀘 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀓𑁂𑀯𑀮𑀻, 𑀲𑁄 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀲𑀺𑀢𑁄, 𑀮𑁄𑀓𑀥𑀫𑁆𑀫𑁂𑀳𑀺 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸 ‘‘𑀢𑀸𑀤𑀻’’𑀢𑀺 𑀘 𑀧𑀯𑀼𑀘𑁆𑀘𑀢𑀺. 𑀏𑀯𑀁 𑀣𑀼𑀢𑀺𑀭𑀳𑁄 𑀲 𑀩𑁆𑀭𑀳𑁆𑀫𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄𑀢𑀺.

𑁫𑁨𑁬. 𑀬𑀲𑁆𑀫𑀸 𑀧𑀦 𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑁄, 𑀦𑁆𑀳𑀸𑀢𑀧𑀸𑀧𑀢𑀸𑀬 𑀦𑁆𑀳𑀸𑀢𑀓𑁄, 𑀆𑀕𑀽𑀦𑀁 𑀅𑀓𑀭𑀡𑁂𑀦 𑀘 𑀦𑀸𑀕𑁄𑀢𑀺 𑀧𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁄 𑀅𑀧𑀭𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺 𑀢𑀬𑁄 𑀧𑀜𑁆𑀳𑁂 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀲𑀫𑀺𑀢𑀸𑀯𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀲𑀫𑁂𑀢𑁆𑀯𑀸 𑀞𑀺𑀢𑁄. 𑀲𑀫𑀡𑁄 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺 𑀢𑀣𑀸𑀭𑀽𑀧𑁄 𑀲𑀫𑀡𑁄 𑀧𑀯𑀼𑀘𑁆𑀘𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀜𑁆𑀳𑁄 𑀩𑁆𑀬𑀸𑀓𑀢𑁄 𑀳𑁄𑀢𑀺, 𑀲𑁂𑀲𑀁 𑀢𑀲𑁆𑀫𑀺𑀁 𑀲𑀫𑀡𑁂 𑀲𑀪𑀺𑀬𑀲𑁆𑀲 𑀩𑀳𑀼𑀫𑀸𑀦𑀚𑀦𑀦𑀢𑁆𑀣𑀁 𑀣𑀼𑀢𑀺𑀯𑀘𑀦𑀁. 𑀬𑁄 𑀳𑀺 𑀲𑀫𑀺𑀢𑀸𑀯𑀻, 𑀲𑁄 𑀧𑀼𑀜𑁆𑀜𑀧𑀸𑀧𑀸𑀦𑀁 𑀅𑀧𑀝𑀺𑀲𑀦𑁆𑀥𑀺𑀓𑀭𑀡𑁂𑀦 𑀧𑀳𑀸𑀬 𑀧𑀼𑀜𑁆𑀜𑀧𑀸𑀧𑀁 𑀭𑀚𑀸𑀦𑀁 𑀯𑀺𑀕𑀫𑁂𑀦 𑀯𑀺𑀭𑀚𑁄, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀜𑀢𑁆𑀯𑀸 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁 𑀚𑀸𑀢𑀺𑀫𑀭𑀡𑀁 𑀉𑀧𑀸𑀢𑀺𑀯𑀢𑁆𑀢𑁄 𑀢𑀸𑀤𑀺 𑀘 𑀳𑁄𑀢𑀺.

𑁫𑁨𑁭. 𑀦𑀺𑀦𑁆𑀳𑀸𑀬…𑀧𑁂… 𑀦𑁆𑀳𑀸𑀢𑀓𑁄𑀢𑀺 𑀏𑀢𑁆𑀣 𑀧𑀦 𑀬𑁄 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀗𑁆𑀔𑀸𑀢𑁂 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀆𑀬𑀢𑀦𑀮𑁄𑀓𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀭𑀳𑀸𑀦𑀺 𑀲𑀩𑁆𑀩𑀧𑀸𑀧𑀓𑀸𑀦𑀺 𑀫𑀕𑁆𑀕𑀜𑀸𑀡𑁂𑀦 𑀦𑀺𑀦𑁆𑀳𑀸𑀬 𑀥𑁄𑀯𑀺𑀢𑁆𑀯𑀸 𑀢𑀸𑀬 𑀦𑀺𑀦𑁆𑀳𑀸𑀢𑀧𑀸𑀧𑀓𑀢𑀸𑀬 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑁂𑀳𑀺 𑀓𑀧𑁆𑀧𑀺𑀬𑁂𑀲𑀼 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀓𑀧𑁆𑀧𑀁 𑀦 𑀏𑀢𑀺, 𑀢𑀁 𑀦𑁆𑀳𑀸𑀢𑀓𑀫𑀸𑀳𑀽𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁫𑁨𑁮. 𑀘𑀢𑀼𑀢𑁆𑀣𑀕𑀸𑀣𑀸𑀬𑀧𑀺 𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂𑀢𑀺 𑀬𑁄 𑀮𑁄𑀓𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀸𑀧𑀲𑀗𑁆𑀔𑀸𑀢𑀁 𑀆𑀕𑀼𑀁 𑀦 𑀓𑀭𑁄𑀢𑀺, 𑀦𑀸𑀕𑁄 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀜𑁆𑀳𑁄 𑀩𑁆𑀬𑀸𑀓𑀢𑁄 𑀳𑁄𑀢𑀺, 𑀲𑁂𑀲𑀁 𑀧𑀼𑀩𑁆𑀩𑀦𑀬𑁂𑀦𑁂𑀯 𑀣𑀼𑀢𑀺𑀯𑀘𑀦𑀁. 𑀬𑁄 𑀳𑀺 𑀫𑀕𑁆𑀕𑁂𑀦 𑀧𑀳𑀻𑀦𑀆𑀕𑀼𑀢𑁆𑀢𑀸 𑀆𑀕𑀼𑀁 𑀦 𑀓𑀭𑁄𑀢𑀺, 𑀲𑁄 𑀓𑀸𑀫𑀬𑁄𑀕𑀸𑀤𑀺𑀓𑁂 𑀲𑀩𑁆𑀩𑀬𑁄𑀕𑁂 𑀤𑀲𑀲𑀜𑁆𑀜𑁄𑀚𑀦𑀪𑁂𑀤𑀸𑀦𑀺 𑀘 𑀲𑀩𑁆𑀩𑀩𑀦𑁆𑀥𑀦𑀸𑀦𑀺 𑀯𑀺𑀲𑀚𑁆𑀚 𑀚𑀳𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀲𑀗𑁆𑀕𑁂𑀦 𑀦 𑀲𑀚𑁆𑀚𑀢𑀺, 𑀤𑁆𑀯𑀻𑀳𑀺 𑀘 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑁄, 𑀢𑀸𑀤𑀺 𑀘 𑀳𑁄𑀢𑀻𑀢𑀺.

𑁫𑁩𑁦. 𑀏𑀯𑀁 𑀤𑀼𑀢𑀺𑀬𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑀺𑀬𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂𑀲𑀼𑀧𑀺 𑀬𑀲𑁆𑀫𑀸 ‘‘𑀔𑁂𑀢𑁆𑀢𑀸𑀦𑀻’’𑀢𑀺 𑀆𑀬𑀢𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋 ‘‘𑀘𑀓𑁆𑀔𑀼𑀧𑁂𑀢𑀁 𑀘𑀓𑁆𑀔𑀸𑀬𑀢𑀦𑀁𑀧𑁂𑀢𑀁…𑀧𑁂… 𑀔𑁂𑀢𑁆𑀢𑀫𑁆𑀧𑁂𑀢𑀁 𑀯𑀢𑁆𑀣𑀼𑀧𑁂𑀢’’𑀦𑁆𑀢𑀺 (𑀥. 𑀲. 𑁫𑁯𑁬-𑁫𑁯𑁮). 𑀢𑀸𑀦𑀺 𑀯𑀺𑀚𑁂𑀬𑁆𑀬 𑀯𑀺𑀚𑁂𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸, 𑀯𑀺𑀘𑁂𑀬𑁆𑀬 𑀯𑀸 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀸𑀦𑀺 𑀅𑀦𑀯𑀲𑁂𑀲𑀸𑀦𑀺, 𑀯𑀺𑀲𑁂𑀲𑀢𑁄 𑀧𑀦 𑀲𑀗𑁆𑀕𑀳𑁂𑀢𑀼𑀪𑀽𑀢𑀁 𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀜𑁆𑀘 𑀩𑁆𑀭𑀳𑁆𑀫𑀔𑁂𑀢𑁆𑀢𑀁, 𑀬𑀁 𑀤𑀺𑀩𑁆𑀩𑀁 𑀤𑁆𑀯𑀸𑀤𑀲𑀸𑀬𑀢𑀦𑀪𑁂𑀤𑀁 𑀢𑀣𑀸 𑀫𑀸𑀦𑀼𑀲𑀓𑀜𑁆𑀘, 𑀬𑀜𑁆𑀘 𑀩𑁆𑀭𑀳𑁆𑀫𑀔𑁂𑀢𑁆𑀢𑀁 𑀙𑀴𑀸𑀬𑀢𑀦𑁂 𑀘𑀓𑁆𑀔𑀸𑀬𑀢𑀦𑀸𑀤𑀺𑀤𑁆𑀯𑀸𑀤𑀲𑀸𑀬𑀢𑀦𑀪𑁂𑀤𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀚𑁂𑀬𑁆𑀬 𑀯𑀺𑀘𑁂𑀬𑁆𑀬 𑀯𑀸. 𑀬𑀢𑁄 𑀬𑀤𑁂𑀢𑀁 𑀲𑀩𑁆𑀩𑁂𑀲𑀁 𑀔𑁂𑀢𑁆𑀢𑀸𑀦𑀁 𑀫𑀽𑀮𑀩𑀦𑁆𑀥𑀦𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀤𑀺, 𑀢𑀲𑁆𑀫𑀸 𑀲𑀩𑁆𑀩𑀔𑁂𑀢𑁆𑀢𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄. 𑀏𑀯𑀫𑁂𑀢𑁂𑀲𑀁 𑀔𑁂𑀢𑁆𑀢𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 𑀯𑀺𑀘𑀺𑀦𑀺𑀢𑀢𑁆𑀢𑀸 𑀯𑀸 𑀔𑁂𑀢𑁆𑀢𑀚𑀺𑀦𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀔𑁂𑀢𑁆𑀢𑀸𑀦𑀻’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀞𑀫𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀓𑁂𑀘𑀺 ‘‘𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁, 𑀢𑀡𑁆𑀳𑀸 𑀲𑁆𑀦𑁂𑀳𑁄’’𑀢𑀺 (𑀅. 𑀦𑀺. 𑁩.𑁭𑁭) 𑀯𑀘𑀦𑀢𑁄 𑀓𑀫𑁆𑀫𑀸𑀦𑀺 𑀔𑁂𑀢𑁆𑀢𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀜𑁆𑀘 𑀩𑁆𑀭𑀳𑁆𑀫𑀔𑁂𑀢𑁆𑀢𑀦𑁆𑀢𑀺 𑀏𑀢𑁆𑀣 𑀘 𑀤𑁂𑀯𑀽𑀧𑀕𑀁 𑀓𑀫𑁆𑀫𑀁 𑀤𑀺𑀩𑁆𑀩𑀁, 𑀫𑀦𑀼𑀲𑁆𑀲𑀽𑀧𑀕𑀁 𑀓𑀫𑁆𑀫𑀁 𑀫𑀸𑀦𑀼𑀲𑀓𑀁, 𑀩𑁆𑀭𑀳𑁆𑀫𑀽𑀧𑀕𑀁 𑀓𑀫𑁆𑀫𑀁 𑀩𑁆𑀭𑀳𑁆𑀫𑀔𑁂𑀢𑁆𑀢𑀦𑁆𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁫𑁩𑁧. 𑀬𑀲𑁆𑀫𑀸 𑀧𑀦 𑀲𑀓𑀝𑁆𑀞𑁂𑀦 𑀓𑁄𑀲𑀲𑀤𑀺𑀲𑀢𑁆𑀢𑀸 ‘‘𑀓𑁄𑀲𑀸𑀦𑀻’’𑀢𑀺 𑀓𑀫𑁆𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀜𑁆𑀘 𑀮𑀼𑀦𑀦𑀸 𑀲𑀫𑀼𑀘𑁆𑀙𑁂𑀤𑀦𑀸 𑀓𑀼𑀲𑀮𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁄𑀲𑀸𑀦𑀻’’𑀢𑀺 𑀕𑀸𑀣𑀸𑀬 𑀤𑀼𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀬𑀢𑁄 𑀓𑀺𑀘𑁆𑀘𑀢𑁄 𑀘 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀗𑁆𑀔𑀸𑀢𑀸𑀦𑀺 𑀓𑁄𑀲𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, 𑀯𑀺𑀲𑁂𑀲𑀢𑁄 𑀧𑀦 𑀲𑀗𑁆𑀕𑀳𑁂𑀢𑀼𑀪𑀽𑀢𑀁 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑀁 𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀜𑁆𑀘 𑀦𑀯𑀫𑀳𑀕𑁆𑀕𑀢𑀓𑀼𑀲𑀮𑀘𑁂𑀢𑀦𑀸𑀪𑁂𑀤𑀜𑁆𑀘 𑀩𑁆𑀭𑀳𑁆𑀫𑀓𑁄𑀲𑀁 𑀯𑀺𑀘𑁂𑀬𑁆𑀬. 𑀢𑀢𑁄 𑀇𑀫𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀤𑀺𑀪𑁂𑀤𑀸 𑀲𑀩𑁆𑀩𑀓𑁄𑀲𑀸𑀦𑀁 𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄, 𑀏𑀯𑀫𑁂𑀢𑁂𑀲𑀁 𑀓𑁄𑀲𑀸𑀦𑀁 𑀮𑀼𑀦𑀦𑀸 ‘‘𑀓𑀼𑀲𑀮𑁄’’𑀢𑀺 𑀧𑀯𑀼𑀘𑁆𑀘𑀢𑀺, 𑀢𑀣𑀢𑁆𑀢𑀸 𑀢𑀸𑀤𑀻 𑀘 𑀳𑁄𑀢𑀻𑀢𑀺. 𑀅𑀣 𑀯𑀸 𑀲𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀜𑁆𑀘 𑀦𑀺𑀯𑀸𑀲𑀝𑁆𑀞𑁂𑀦 𑀅𑀲𑀺𑀓𑁄𑀲𑀲𑀤𑀺𑀲𑀢𑁆𑀢𑀸 ‘‘𑀓𑁄𑀲𑀸𑀦𑀻’’𑀢𑀺 𑀢𑀬𑁄 𑀪𑀯𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁫𑁩𑁨. 𑀬𑀲𑁆𑀫𑀸 𑀘 𑀦 𑀓𑁂𑀯𑀮𑀁 𑀧𑀡𑁆𑀟𑀢𑀻𑀢𑀺 𑀇𑀫𑀺𑀦𑀸𑀯 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀅𑀧𑀺𑀘 𑀔𑁄 𑀧𑀦 𑀧𑀡𑁆𑀟𑀭𑀸𑀦𑀺 𑀇𑀢𑁄 𑀉𑀧𑀕𑀢𑁄 𑀧𑀯𑀺𑀘𑀬𑀧𑀜𑁆𑀜𑀸𑀬 𑀅𑀮𑁆𑀮𑀻𑀦𑁄𑀢𑀺𑀧𑀺 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀪𑀬𑀸𑀦𑀻’’𑀢𑀺 𑀕𑀸𑀣𑀸𑀬 𑀢𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀏𑀯𑀁 𑀉𑀪𑀬𑀸𑀦𑀺 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀯𑀺𑀘𑁂𑀬𑁆𑀬. 𑀧𑀡𑁆𑀟𑀭𑀸𑀦𑀻𑀢𑀺 𑀆𑀬𑀢𑀦𑀸𑀦𑀺. 𑀢𑀸𑀦𑀺 𑀳𑀺 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀭𑀼𑀴𑁆𑀳𑀺𑀬𑀸 𑀘 𑀏𑀯𑀁 𑀯𑀼𑀘𑁆𑀘𑀦𑁆𑀢𑀺, 𑀢𑀸𑀦𑀺 𑀯𑀺𑀘𑁂𑀬𑁆𑀬 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀤𑁆𑀥𑀦𑁆𑀢𑀫𑀮𑀢𑁆𑀢𑀸 𑀲𑀼𑀤𑁆𑀥𑀺𑀧𑀜𑁆𑀜𑁄 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀺 𑀢𑀣𑀢𑁆𑀢𑀸, 𑀬𑀲𑁆𑀫𑀸 𑀢𑀸𑀦𑀺 𑀧𑀡𑁆𑀟𑀭𑀸𑀦𑀺 𑀧𑀜𑁆𑀜𑀸𑀬 𑀇𑀢𑁄 𑀳𑁄𑀢𑀺, 𑀲𑁂𑀲𑀫𑀲𑁆𑀲 𑀣𑀼𑀢𑀺𑀯𑀘𑀦𑀁. 𑀲𑁄 𑀳𑀺 𑀧𑀸𑀧𑀧𑀼𑀜𑁆𑀜𑀲𑀗𑁆𑀔𑀸𑀢𑀁 𑀓𑀡𑁆𑀳𑀲𑀼𑀓𑁆𑀓𑀁 𑀉𑀧𑀸𑀢𑀺𑀯𑀢𑁆𑀢𑁄 𑀢𑀸𑀤𑀻 𑀘 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀣𑀼𑀢𑁄.

𑁫𑁩𑁩. 𑀬𑀲𑁆𑀫𑀸 𑀧𑀦 ‘‘𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀫𑀼𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀢𑀜𑁆𑀘𑀸’’𑀢𑀺 𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁆𑀯𑀸𑀬𑀁 𑀅𑀓𑀼𑀲𑀮𑀓𑀼𑀲𑀮𑀧𑁆𑀧𑀪𑁂𑀤𑁄 𑀅𑀲𑀢𑀜𑁆𑀘 𑀲𑀢𑀜𑁆𑀘 𑀥𑀫𑁆𑀫𑁄, 𑀢𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀩𑁆𑀩𑀮𑁄𑀓𑁂 𑀧𑀯𑀺𑀘𑀬𑀜𑀸𑀡𑁂𑀦 𑀅𑀲𑀢𑀜𑁆𑀘 𑀲𑀢𑀜𑁆𑀘 𑀜𑀢𑁆𑀯𑀸 𑀥𑀫𑁆𑀫𑀁 𑀢𑀲𑁆𑀲 𑀜𑀸𑀢𑀢𑁆𑀢𑀸 𑀏𑀯 𑀭𑀸𑀕𑀸𑀤𑀺𑀪𑁂𑀤𑀢𑁄 𑀲𑀢𑁆𑀢𑀯𑀺𑀥𑀁 𑀲𑀗𑁆𑀕𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀪𑁂𑀤𑀢𑁄 𑀤𑀼𑀯𑀺𑀥𑀁 𑀚𑀸𑀮𑀜𑁆𑀘 𑀅𑀢𑀺𑀘𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀢𑁂𑀦 𑀫𑁄𑀦𑀲𑀗𑁆𑀔𑀸𑀢𑁂𑀦 𑀧𑀯𑀺𑀘𑀬𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀦𑀺. 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀦𑀻𑀬𑁄𑀢𑀺 𑀇𑀤𑀁 𑀧𑀦𑀲𑁆𑀲 𑀣𑀼𑀢𑀺𑀯𑀘𑀦𑀁. 𑀲𑁄 𑀳𑀺 𑀔𑀻𑀡𑀸𑀲𑀯𑀫𑀼𑀦𑀺𑀢𑁆𑀢𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀽𑀚𑀸𑀭𑀳𑁄 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀣𑀼𑀢𑁄.

𑁫𑁩𑁫. 𑀏𑀯𑀁 𑀢𑀢𑀺𑀬𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀼𑀢𑁆𑀣𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂𑀲𑀼𑀧𑀺 𑀬𑀲𑁆𑀫𑀸 𑀬𑁄 𑀘𑀢𑀽𑀳𑀺 𑀫𑀕𑁆𑀕𑀜𑀸𑀡𑀯𑁂𑀤𑁂𑀳𑀺 𑀓𑀺𑀮𑁂𑀲𑀓𑁆𑀔𑀬𑀁 𑀓𑀭𑁄𑀦𑁆𑀢𑁄 𑀕𑀢𑁄, 𑀲𑁄 𑀧𑀭𑀫𑀢𑁆𑀣𑀢𑁄 𑀯𑁂𑀤𑀕𑀽 𑀦𑀸𑀫 𑀳𑁄𑀢𑀺. 𑀬𑁄 𑀘 𑀲𑀩𑁆𑀩𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀢𑁆𑀣𑀲𑀜𑁆𑀜𑀺𑀢𑀸𑀦𑀺 𑀯𑁂𑀤𑀸𑀦𑀺, 𑀢𑀸𑀬𑁂𑀯 𑀫𑀕𑁆𑀕𑀪𑀸𑀯𑀦𑀸𑀬 𑀓𑀺𑀘𑁆𑀘𑀢𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀘𑁂𑀬𑁆𑀬. 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀢𑀫𑁂𑀯 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀬𑀸 𑀯𑁂𑀤𑀧𑀘𑁆𑀘𑀬𑀸 𑀯𑀸 𑀅𑀜𑁆𑀜𑀣𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑁂𑀤𑀦𑀸, 𑀢𑀸𑀲𑀼 𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀧𑀢𑁆𑀢𑀺𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀯𑁂𑀤𑀸𑀦𑀻’’𑀢𑀺 𑀕𑀸𑀣𑀸𑀬 𑀧𑀞𑀫𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀬𑀲𑁆𑀫𑀸 𑀯𑀸 𑀬𑁄 𑀧𑀯𑀺𑀘𑀬𑀧𑀜𑁆𑀜𑀸𑀬 𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬, 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑀢𑁆𑀢𑀢𑀺, 𑀲𑁄 𑀲𑀢𑁆𑀣𑀲𑀜𑁆𑀜𑀺𑀢𑀸𑀦𑀺 𑀯𑁂𑀤𑀸𑀦𑀺 𑀕𑀢𑁄 𑀜𑀸𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀘 𑀳𑁄𑀢𑀺. 𑀬𑁄 𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄, 𑀲𑁄𑀧𑀺 𑀯𑁂𑀤𑀦𑀸𑀲𑀜𑁆𑀜𑀺𑀢𑀸𑀦𑀺 𑀯𑁂𑀤𑀸𑀦𑀺 𑀕𑀢𑁄 𑀅𑀢𑀺𑀓𑁆𑀓𑀦𑁆𑀢𑁄 𑀘 𑀳𑁄𑀢𑀺. 𑀯𑁂𑀤𑀸𑀦𑀺 𑀕𑀢𑁄𑀢𑀺𑀧𑀺 𑀯𑁂𑀤𑀕𑀽, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀧𑀢𑁆𑀢𑀺𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀧𑀞𑀫𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺.

𑁫𑁩𑁬. 𑀬𑀲𑁆𑀫𑀸 𑀧𑀦 𑀤𑀼𑀢𑀺𑀬𑀧𑀜𑁆𑀳𑁂 ‘‘𑀅𑀦𑀼𑀯𑀺𑀤𑀺𑀢𑁄’’𑀢𑀺 𑀅𑀦𑀼𑀩𑀼𑀤𑁆𑀥𑁄 𑀯𑀼𑀘𑁆𑀘𑀢𑀺, 𑀲𑁄 𑀘 𑀅𑀦𑀼𑀯𑀺𑀘𑁆𑀘 𑀧𑀧𑀜𑁆𑀘𑀦𑀸𑀫𑀭𑀽𑀧𑀁 𑀅𑀚𑁆𑀛𑀢𑁆𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀪𑁂𑀤𑀁 𑀧𑀧𑀜𑁆𑀘𑀁 𑀢𑀧𑁆𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀜𑁆𑀘 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀅𑀦𑀼𑀯𑀺𑀘𑁆𑀘 𑀅𑀦𑀼𑀯𑀺𑀤𑀺𑀢𑁆𑀯𑀸, 𑀦 𑀓𑁂𑀯𑀮𑀜𑁆𑀘 𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸 𑀘 𑀭𑁄𑀕𑀫𑀽𑀮𑀁, 𑀧𑀭𑀲𑀦𑁆𑀢𑀸𑀦𑁂 𑀘 𑀇𑀫𑀲𑁆𑀲 𑀦𑀸𑀫𑀭𑀽𑀧𑀭𑁄𑀕𑀲𑁆𑀲 𑀫𑀽𑀮𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀤𑀺𑀁, 𑀢𑀫𑁂𑀯 𑀯𑀸 𑀧𑀧𑀜𑁆𑀘𑀁 𑀅𑀦𑀼𑀯𑀺𑀘𑁆𑀘 𑀢𑀸𑀬 𑀪𑀸𑀯𑀦𑀸𑀬 𑀲𑀩𑁆𑀩𑁂𑀲𑀁 𑀭𑁄𑀕𑀸𑀦𑀁 𑀫𑀽𑀮𑀩𑀦𑁆𑀥𑀦𑀸, 𑀲𑀩𑁆𑀩𑀲𑁆𑀫𑀸 𑀯𑀸 𑀭𑁄𑀕𑀸𑀦𑀁 𑀫𑀽𑀮𑀩𑀦𑁆𑀥𑀦𑀸, 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀤𑀺𑀪𑁂𑀤𑀸, 𑀢𑀲𑁆𑀫𑀸 𑀏𑀯 𑀯𑀸 𑀧𑀧𑀜𑁆𑀘𑀸 𑀧𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀯𑀺𑀘𑁆𑀘𑀸’’𑀢𑀺 𑀕𑀸𑀣𑀸𑀬 𑀤𑀼𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺.

𑁫𑁩𑁭. ‘‘𑀓𑀣𑀜𑁆𑀘 𑀯𑀻𑀭𑀺𑀬𑀯𑀸’’𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀬𑁄 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀧𑀸𑀧𑀓𑁂𑀳𑀺 𑀯𑀺𑀭𑀢𑁄, 𑀢𑀣𑀸 𑀯𑀺𑀭𑀢𑀢𑁆𑀢𑀸 𑀘 𑀆𑀬𑀢𑀺𑀁 𑀅𑀧𑀝𑀺𑀲𑀦𑁆𑀥𑀺𑀢𑀸𑀬 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀞𑀺𑀢𑁄 𑀯𑀻𑀭𑀺𑀬𑀯𑀸𑀲𑁄 𑀯𑀻𑀭𑀺𑀬𑀦𑀺𑀓𑁂𑀢𑁄, 𑀲𑁄 𑀔𑀻𑀡𑀸𑀲𑀯𑁄 ‘‘𑀯𑀻𑀭𑀺𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀭𑀢𑁄’’𑀢𑀺 𑀕𑀸𑀣𑀸𑀬 𑀢𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀧𑀥𑀸𑀦𑀯𑀸 𑀥𑀻𑀭𑁄 𑀢𑀸𑀤𑀻𑀢𑀺 𑀇𑀫𑀸𑀦𑀺 𑀧𑀦𑀲𑁆𑀲 𑀣𑀼𑀢𑀺𑀯𑀘𑀦𑀸𑀦𑀺. 𑀲𑁄 𑀳𑀺 𑀧𑀥𑀸𑀦𑀯𑀸 𑀫𑀕𑁆𑀕𑀛𑀸𑀦𑀧𑀥𑀸𑀦𑁂𑀦, 𑀥𑀻𑀭𑁄 𑀓𑀺𑀮𑁂𑀲𑀸𑀭𑀺𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀢𑀸𑀬, 𑀢𑀸𑀤𑀻 𑀦𑀺𑀩𑁆𑀩𑀺𑀓𑀸𑀭𑀢𑀸𑀬, 𑀢𑀲𑁆𑀫𑀸 𑀏𑀯𑀁 𑀣𑀼𑀢𑁄. 𑀲𑁂𑀲𑀁 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

𑁫𑁩𑁮. ‘‘𑀆𑀚𑀸𑀦𑀺𑀬𑁄 𑀓𑀺𑀦𑁆𑀢𑀺 𑀦𑀸𑀫 𑀳𑁄𑀢𑀻’’𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀧𑀳𑀻𑀦𑀲𑀩𑁆𑀩𑀯𑀗𑁆𑀓𑀤𑁄𑀲𑁄 𑀓𑀸𑀭𑀡𑀸𑀓𑀸𑀭𑀡𑀜𑁆𑀜𑀽 𑀅𑀲𑁆𑀲𑁄 𑀯𑀸 𑀳𑀢𑁆𑀣𑀻 𑀯𑀸 ‘‘𑀆𑀚𑀸𑀦𑀺𑀬𑁄 𑀳𑁄𑀢𑀻’’𑀢𑀺 𑀮𑁄𑀓𑁂 𑀯𑀼𑀘𑁆𑀘𑀢𑀺, 𑀦 𑀘 𑀢𑀲𑁆𑀲 𑀲𑀩𑁆𑀩𑀲𑁄 𑀢𑁂 𑀤𑁄𑀲𑀸 𑀧𑀳𑀻𑀦𑀸 𑀏𑀯, 𑀔𑀻𑀡𑀸𑀲𑀯𑀲𑁆𑀲 𑀧𑀦 𑀢𑁂 𑀧𑀳𑀻𑀦𑀸, 𑀢𑀲𑁆𑀫𑀸 𑀲𑁄 ‘‘𑀆𑀚𑀸𑀦𑀺𑀬𑁄’’𑀢𑀺 𑀧𑀭𑀫𑀢𑁆𑀣𑀢𑁄 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲𑀸’’𑀢𑀺 𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀜𑁆𑀜𑁄𑀚𑀦𑀲𑀗𑁆𑀔𑀸𑀢𑀸𑀦𑀺 𑀬𑀲𑁆𑀲 𑀅𑀲𑁆𑀲𑀼 𑀮𑀼𑀦𑀸𑀦𑀺 𑀩𑀦𑁆𑀥𑀦𑀸𑀦𑀺 𑀧𑀜𑁆𑀜𑀸𑀲𑀢𑁆𑀣𑁂𑀦 𑀙𑀺𑀦𑁆𑀦𑀸𑀦𑀺 𑀧𑀤𑀸𑀮𑀺𑀢𑀸𑀦𑀺. 𑀲𑀗𑁆𑀕𑀫𑀽𑀮𑀦𑁆𑀢𑀺 𑀬𑀸𑀦𑀺 𑀢𑁂𑀲𑀼 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀲𑀗𑁆𑀕𑀲𑁆𑀲 𑀲𑀚𑁆𑀚𑀦𑀸𑀬 𑀅𑀦𑀢𑀺𑀓𑁆𑀓𑀫𑀦𑀸𑀬 𑀫𑀽𑀮𑀁 𑀳𑁄𑀦𑁆𑀢𑀺, 𑀅𑀣 𑀯𑀸 𑀬𑀲𑁆𑀲 𑀅𑀲𑁆𑀲𑀼 𑀮𑀼𑀦𑀸𑀦𑀺 𑀭𑀸𑀕𑀸𑀤𑀻𑀦𑀺 𑀩𑀦𑁆𑀥𑀦𑀸𑀦𑀺 𑀬𑀸𑀦𑀺 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀗𑁆𑀕𑀫𑀽𑀮𑀸𑀦𑀺 𑀳𑁄𑀦𑁆𑀢𑀺, 𑀲𑁄 𑀲𑀩𑁆𑀩𑀲𑁆𑀫𑀸 𑀲𑀗𑁆𑀕𑀸𑀦𑀁 𑀫𑀽𑀮𑀪𑀽𑀢𑀸 𑀲𑀩𑁆𑀩𑀲𑀗𑁆𑀕𑀸𑀦𑀁 𑀯𑀸 𑀫𑀽𑀮𑀪𑀽𑀢𑀸 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄 ‘‘𑀆𑀚𑀸𑀦𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀢𑁆𑀢𑀸 𑀢𑀸𑀤𑀺 𑀘 𑀳𑁄𑀢𑀻𑀢𑀺.

𑁫𑁪𑁦. 𑀏𑀯𑀁 𑀘𑀢𑀼𑀢𑁆𑀣𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀫𑀕𑀸𑀣𑀸𑀬 𑀯𑀼𑀢𑁆𑀢𑀧𑀜𑁆𑀳𑁂𑀲𑀼𑀧𑀺 𑀬𑀲𑁆𑀫𑀸 𑀬𑀁 𑀙𑀦𑁆𑀤𑀚𑁆𑀛𑁂𑀦𑀫𑀢𑁆𑀢𑁂𑀦 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀲𑁄𑀢𑁆𑀢𑀺𑀬𑀁 𑀯𑀡𑁆𑀡𑀬𑀦𑁆𑀢𑀺, 𑀯𑁄𑀳𑀸𑀭𑀫𑀢𑁆𑀢𑀲𑁄𑀢𑁆𑀢𑀺𑀬𑁄 𑀲𑁄. 𑀅𑀭𑀺𑀬𑁄 𑀧𑀦 𑀩𑀸𑀳𑀼𑀲𑀘𑁆𑀘𑁂𑀦 𑀦𑀺𑀲𑁆𑀲𑀼𑀢𑀧𑀸𑀧𑀢𑀸𑀬 𑀘 𑀧𑀭𑀫𑀢𑁆𑀣𑀲𑁄𑀢𑁆𑀢𑀺𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀧𑀢𑁆𑀢𑀺𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀲𑀼𑀢𑁆𑀯𑀸’’𑀢𑀺 𑀕𑀸𑀣𑀸𑀬 𑀧𑀞𑀫𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀼𑀢𑀫𑀬𑀧𑀜𑁆𑀜𑀸𑀓𑀺𑀘𑁆𑀘𑀯𑀲𑁂𑀦 𑀲𑀼𑀢𑁆𑀯𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀯𑀲𑁂𑀦 𑀯𑀸 𑀲𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀽𑀧𑀕𑀁 𑀲𑀩𑁆𑀩𑀥𑀫𑁆𑀫𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀪𑀺𑀜𑁆𑀜𑀸𑀬 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺, 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀓𑀺𑀮𑁂𑀲𑁂 𑀓𑀺𑀮𑁂𑀲𑀝𑁆𑀞𑀸𑀦𑀺𑀬𑁂 𑀘 𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀅𑀪𑀺𑀪𑀽𑀢𑀺 𑀲𑀗𑁆𑀔𑀁 𑀕𑀢𑁄, 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀮𑁄𑀓𑁂 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀪𑀺𑀪𑀼𑀁 𑀲𑀼𑀢𑀯𑀢𑁆𑀢𑀸 𑀲𑁄𑀢𑁆𑀢𑀺𑀬𑁄𑀢𑀺 𑀆𑀳𑀼. 𑀬𑀲𑁆𑀫𑀸 𑀘 𑀬𑁄 𑀅𑀓𑀣𑀁𑀓𑀣𑀻 𑀓𑀺𑀮𑁂𑀲𑀩𑀦𑁆𑀥𑀦𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀭𑀸𑀕𑀸𑀤𑀻𑀳𑀺 𑀈𑀖𑁂𑀳𑀺 𑀅𑀦𑀻𑀖𑁄 𑀘 𑀳𑁄𑀢𑀺 𑀲𑀩𑁆𑀩𑀥𑀺 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼, 𑀢𑀲𑁆𑀫𑀸 𑀢𑀁 𑀅𑀓𑀣𑀁𑀓𑀣𑀺𑀁 𑀯𑀺𑀫𑀼𑀢𑁆𑀢𑀁 𑀅𑀦𑀻𑀖𑀁 𑀲𑀩𑁆𑀩𑀥𑀺 𑀦𑀺𑀲𑁆𑀲𑀼𑀢𑀧𑀸𑀧𑀓𑀢𑁆𑀢𑀸𑀧𑀺 ‘‘𑀲𑁄𑀢𑁆𑀢𑀺𑀬𑁄’’𑀢𑀺 𑀆𑀳𑀽𑀢𑀺.

𑁫𑁪𑁧. 𑀬𑀲𑁆𑀫𑀸 𑀧𑀦 𑀳𑀺𑀢𑀓𑀸𑀫𑁂𑀦 𑀚𑀦𑁂𑀦 𑀅𑀭𑀡𑀻𑀬𑀢𑁄 𑀅𑀭𑀺𑀬𑁄 𑀳𑁄𑀢𑀺, 𑀅𑀪𑀺𑀕𑀫𑀦𑀻𑀬𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀬𑁂𑀳𑀺 𑀕𑀼𑀡𑁂𑀳𑀺 𑀲𑁄 𑀅𑀭𑀡𑀻𑀬𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑀸 ‘‘𑀙𑁂𑀢𑁆𑀯𑀸’’𑀢𑀺 𑀕𑀸𑀣𑀸𑀬 𑀤𑀼𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀘𑀢𑁆𑀢𑀸𑀭𑀺 𑀆𑀲𑀯𑀸𑀦𑀺 𑀤𑁆𑀯𑁂 𑀘 𑀆𑀮𑀬𑀸𑀦𑀺 𑀧𑀜𑁆𑀜𑀸𑀲𑀢𑁆𑀣𑁂𑀦 𑀙𑁂𑀢𑁆𑀯𑀸 𑀯𑀺𑀤𑁆𑀯𑀸 𑀯𑀺𑀜𑁆𑀜𑀽 𑀯𑀺𑀪𑀸𑀯𑀻 𑀘𑀢𑀼𑀫𑀕𑁆𑀕𑀜𑀸𑀡𑀻 𑀲𑁄 𑀧𑀼𑀦𑀩𑁆𑀪𑀯𑀯𑀲𑁂𑀦 𑀦 𑀉𑀧𑁂𑀢𑀺 𑀕𑀩𑁆𑀪𑀲𑁂𑀬𑁆𑀬𑀁, 𑀓𑀜𑁆𑀘𑀺 𑀬𑁄𑀦𑀺𑀁 𑀦 𑀉𑀧𑀕𑀘𑁆𑀙𑀢𑀺, 𑀓𑀸𑀫𑀸𑀤𑀺𑀪𑁂𑀤𑀜𑁆𑀘 𑀲𑀜𑁆𑀜𑀁 𑀢𑀺𑀯𑀺𑀥𑀁. 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀜𑁆𑀘 𑀧𑀗𑁆𑀓𑀁 𑀧𑀦𑀼𑀚𑁆𑀚 𑀧𑀦𑀼𑀤𑀺𑀢𑁆𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀺 𑀓𑀧𑁆𑀧𑀁 𑀦 𑀏𑀢𑀺, 𑀏𑀯𑀁 𑀆𑀲𑀯𑀘𑁆𑀙𑁂𑀤𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀢𑀫𑀸𑀳𑀼 𑀅𑀭𑀺𑀬𑁄𑀢𑀺. 𑀬𑀲𑁆𑀫𑀸 𑀯𑀸 𑀧𑀸𑀧𑀓𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄 𑀳𑁄𑀢𑀺 𑀅𑀦𑀬𑁂 𑀘 𑀅𑀦𑀺𑀭𑀻𑀬𑀦𑀸, 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀤𑀼𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀆𑀲𑀯𑀸𑀤𑀬𑁄 𑀳𑀺 𑀧𑀸𑀧𑀓𑀸 𑀥𑀫𑁆𑀫𑀸 𑀅𑀦𑀬𑀲𑀫𑁆𑀫𑀢𑀸, 𑀢𑁂 𑀘𑀸𑀦𑁂𑀦 𑀙𑀺𑀦𑁆𑀦𑀸 𑀧𑀦𑀼𑀦𑁆𑀦𑀸, 𑀦 𑀘 𑀢𑁂𑀳𑀺 𑀓𑀫𑁆𑀧𑀢𑀺, 𑀇𑀘𑁆𑀘𑀲𑁆𑀲 𑀢𑁂 𑀆𑀭𑀓𑀸 𑀳𑁄𑀦𑁆𑀢𑀺, 𑀦 𑀘 𑀢𑁂𑀲𑀼 𑀇𑀭𑀻𑀬𑀢𑀺 𑀢𑀲𑁆𑀫𑀸 𑀆𑀭𑀓𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀥𑀫𑁆𑀫𑀸𑀢𑀺 𑀇𑀫𑀺𑀦𑀸𑀧𑀢𑁆𑀣𑁂𑀦. 𑀅𑀦𑀬𑁂 𑀦 𑀇𑀭𑀻𑀬𑀢𑀻𑀢𑀺 𑀇𑀫𑀺𑀦𑀸𑀧𑀢𑁆𑀣𑁂𑀦 𑀢𑀫𑀸𑀳𑀼 𑀅𑀭𑀺𑀬𑁄𑀢𑀺 𑀘 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀯𑀺𑀤𑁆𑀯𑀸 𑀲𑁄 𑀦 𑀉𑀧𑁂𑀢𑀺 𑀕𑀩𑁆𑀪𑀲𑁂𑀬𑁆𑀬’’𑀦𑁆𑀢𑀺 𑀇𑀤𑀁 𑀧𑀦 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀣𑀼𑀢𑀺𑀯𑀘𑀦𑀫𑁂𑀯 𑀳𑁄𑀢𑀺.

𑁫𑁪𑁨. ‘‘𑀓𑀣𑀁 𑀘𑀭𑀡𑀯𑀸’’𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀘𑀭𑀡𑁂𑀳𑀺 𑀧𑀢𑁆𑀢𑀩𑁆𑀩𑀁 𑀧𑀢𑁆𑀢𑁄 ‘‘𑀘𑀭𑀡𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀇𑀥𑀸’’𑀢𑀺 𑀕𑀸𑀣𑀸𑀬 𑀢𑀢𑀺𑀬𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀬𑁄 𑀇𑀥𑀸𑀢𑀺 𑀬𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀘𑀭𑀡𑁂𑀲𑀽𑀢𑀺 𑀲𑀻𑀮𑀸𑀤𑀻𑀲𑀼 𑀳𑁂𑀫𑀯𑀢𑀲𑀼𑀢𑁆𑀢𑁂 (𑀲𑀼. 𑀦𑀺. 𑁧𑁫𑁩 𑀆𑀤𑀬𑁄) 𑀯𑀼𑀢𑁆𑀢𑀧𑀦𑁆𑀦𑀭𑀲𑀥𑀫𑁆𑀫𑁂𑀲𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀧𑀢𑁆𑀢𑀺𑀧𑀢𑁆𑀢𑁄𑀢𑀺 𑀧𑀢𑁆𑀢𑀩𑁆𑀩𑀁 𑀧𑀢𑁆𑀢𑁄. 𑀬𑁄 𑀘𑀭𑀡𑀦𑀺𑀫𑀺𑀢𑁆𑀢𑀁 𑀘𑀭𑀡𑀳𑁂𑀢𑀼 𑀘𑀭𑀡𑀧𑀘𑁆𑀘𑀬𑀸 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀭𑀡𑀯𑀸 𑀲𑁄𑀢𑀺 𑀲𑁄 𑀇𑀫𑀸𑀬 𑀘𑀭𑀡𑁂𑀳𑀺 𑀧𑀢𑁆𑀢𑀩𑁆𑀩𑀧𑀢𑁆𑀢𑀺𑀬𑀸 𑀘𑀭𑀡𑀯𑀸 𑀳𑁄𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀜𑁆𑀳𑁄 𑀩𑁆𑀬𑀸𑀓𑀢𑁄 𑀳𑁄𑀢𑀺, 𑀲𑁂𑀲𑀫𑀲𑁆𑀲 𑀣𑀼𑀢𑀺𑀯𑀘𑀦𑀁. 𑀬𑁄 𑀳𑀺 𑀘𑀭𑀡𑁂𑀳𑀺 𑀧𑀢𑁆𑀢𑀺𑀧𑀢𑁆𑀢𑁄, 𑀲𑁄 𑀓𑀼𑀲𑀮𑁄 𑀘 𑀳𑁄𑀢𑀺 𑀙𑁂𑀓𑁄, 𑀲𑀩𑁆𑀩𑀤𑀸 𑀘 𑀆𑀚𑀸𑀦𑀸𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀁, 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀘𑀺𑀢𑁆𑀢𑀢𑀸𑀬 𑀲𑀩𑁆𑀩𑀢𑁆𑀣 𑀘 𑀔𑀦𑁆𑀥𑀸𑀤𑀻𑀲𑀼 𑀦 𑀲𑀚𑁆𑀚𑀢𑀺. 𑀤𑁆𑀯𑀻𑀳𑀺 𑀘 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀝𑀺𑀖𑀸 𑀬𑀲𑁆𑀲 𑀦 𑀲𑀦𑁆𑀢𑀻𑀢𑀺.

𑁫𑁪𑁩. 𑀬𑀲𑁆𑀫𑀸 𑀧𑀦 𑀓𑀫𑁆𑀫𑀸𑀤𑀻𑀦𑀁 𑀧𑀭𑀺𑀩𑁆𑀩𑀸𑀚𑀦𑁂𑀦 𑀧𑀭𑀺𑀩𑁆𑀩𑀸𑀚𑀓𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀓𑁆𑀔𑀯𑁂𑀧𑀓𑁆𑀓’’𑀦𑁆𑀢𑀺 𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀯𑀺𑀧𑀸𑀓𑁄 𑀏𑀯 𑀯𑁂𑀧𑀓𑁆𑀓𑀁, 𑀤𑀼𑀓𑁆𑀔𑀁 𑀯𑁂𑀧𑀓𑁆𑀓𑀫𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑁂𑀧𑀓𑁆𑀓𑀁. 𑀧𑀯𑀢𑁆𑀢𑀺𑀤𑀼𑀓𑁆𑀔𑀚𑀦𑀦𑀢𑁄 𑀲𑀩𑁆𑀩𑀫𑁆𑀧𑀺 𑀢𑁂𑀥𑀸𑀢𑀼𑀓𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀉𑀤𑁆𑀥𑀦𑁆𑀢𑀺 𑀅𑀢𑀻𑀢𑀁. 𑀅𑀥𑁄𑀢𑀺 𑀅𑀦𑀸𑀕𑀢𑀁. 𑀢𑀺𑀭𑀺𑀬𑀁 𑀯𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀢𑀜𑁆𑀳𑀺 𑀦 𑀉𑀤𑁆𑀥𑀁 𑀦 𑀅𑀥𑁄, 𑀢𑀺𑀭𑀺𑀬𑀁 𑀉𑀪𑀺𑀦𑁆𑀦𑀜𑁆𑀘 𑀅𑀦𑁆𑀢𑀭𑀸, 𑀢𑁂𑀦 ‘‘𑀫𑀚𑁆𑀛𑁂’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀩𑁆𑀩𑀸𑀚𑀬𑀺𑀢𑁆𑀯𑀸𑀢𑀺 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀦𑀺𑀤𑁆𑀥𑀫𑁂𑀢𑁆𑀯𑀸. 𑀧𑀭𑀺𑀜𑁆𑀜𑀘𑀸𑀭𑀻𑀢𑀺 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘𑀭𑀦𑁆𑀢𑁄. 𑀅𑀬𑀁 𑀢𑀸𑀯 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀅𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀬𑁄𑀚𑀦𑀸 𑁋 𑀬𑁄 𑀢𑀺𑀬𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀤𑀼𑀓𑁆𑀔𑀚𑀦𑀓𑀁 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺 𑀓𑀫𑁆𑀫𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑁂𑀦 𑀢𑀡𑁆𑀳𑀸𑀯𑀺𑀚𑁆𑀚𑀸𑀲𑀺𑀦𑁂𑀳𑁂 𑀲𑁄𑀲𑁂𑀦𑁆𑀢𑁄 𑀅𑀧𑀝𑀺𑀲𑀦𑁆𑀥𑀺𑀚𑀦𑀓𑀪𑀸𑀯𑀓𑀭𑀡𑁂𑀦 𑀧𑀭𑀺𑀩𑁆𑀩𑀸𑀚𑀬𑀺𑀢𑁆𑀯𑀸 𑀢𑀣𑀸 𑀧𑀭𑀺𑀩𑁆𑀩𑀸𑀚𑀺𑀢𑀢𑁆𑀢𑀸 𑀏𑀯 𑀘 𑀢𑀁 𑀓𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀘𑀭𑀡𑀢𑁄 𑀧𑀭𑀺𑀜𑁆𑀜𑀘𑀸𑀭𑀻. 𑀦 𑀓𑁂𑀯𑀮𑀜𑁆𑀘 𑀓𑀫𑁆𑀫𑀫𑁂𑀯, 𑀫𑀸𑀬𑀁 𑀫𑀸𑀦𑀫𑀣𑁄𑀧𑀺 𑀮𑁄𑀪𑀓𑁄𑀥𑀁 𑀇𑀫𑁂𑀧𑀺 𑀥𑀫𑁆𑀫𑁂 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀘𑀸𑀭𑀻, 𑀧𑀭𑀺𑀬𑀦𑁆𑀢𑀫𑀓𑀸𑀲𑀺 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀲𑁆𑀲 𑀘 𑀧𑀭𑀺𑀬𑀦𑁆𑀢𑀫𑀓𑀸𑀲𑀺 𑀧𑀭𑀺𑀩𑁆𑀩𑀸𑀚𑁂𑀲𑀺 𑀇𑀘𑁆𑀘𑁂𑀯𑀢𑁆𑀣𑁄. 𑀇𑀫𑁂𑀲𑀁 𑀓𑀫𑁆𑀫𑀸𑀤𑀻𑀦𑀁 𑀧𑀭𑀺𑀩𑁆𑀩𑀸𑀚𑀦𑁂𑀦 𑀢𑀁 𑀧𑀭𑀺𑀩𑁆𑀩𑀸𑀚𑀓𑀫𑀸𑀳𑀼. 𑀧𑀢𑁆𑀢𑀺𑀧𑀢𑁆𑀢𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲 𑀣𑀼𑀢𑀺𑀯𑀘𑀦𑀁.

𑁫𑁪𑁪. 𑀏𑀯𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑀲𑁆𑀲 𑀧𑀦 𑀲𑀪𑀺𑀬𑀲𑁆𑀲 ‘‘𑀬𑀸𑀦𑀺 𑀘 𑀢𑀻𑀡𑀻’’𑀢𑀺𑀆𑀤𑀻𑀲𑀼 𑀅𑀪𑀺𑀢𑁆𑀣𑀯𑀦𑀕𑀸𑀣𑀸𑀲𑀼 𑀑𑀲𑀭𑀡𑀸𑀦𑀻𑀢𑀺 𑀑𑀕𑀳𑀡𑀸𑀦𑀺 𑀢𑀺𑀢𑁆𑀣𑀸𑀦𑀺, 𑀤𑀺𑀝𑁆𑀞𑀺𑀬𑁄𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀬𑀲𑁆𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀳 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺 𑀕𑀳𑁂𑀢𑁆𑀯𑀸 𑀢𑁂𑀲𑀝𑁆𑀞𑀺 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀢𑀸𑀦𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀡𑀸𑀦𑀁 𑀧𑀯𑀸𑀤𑀪𑀽𑀢𑀸𑀦𑀺 𑀲𑀢𑁆𑀣𑀸𑀦𑀺 𑀲𑀺𑀢𑀸𑀦𑀺 𑀉𑀧𑀤𑀺𑀲𑀺𑀢𑀩𑁆𑀩𑀯𑀲𑁂𑀦, 𑀦 𑀉𑀧𑁆𑀧𑀢𑁆𑀢𑀺𑀯𑀲𑁂𑀦. 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀬𑀤𑁂𑀢𑀁 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀲𑀜𑁆𑀜𑀓𑁆𑀔𑀭𑀁 𑀯𑁄𑀳𑀸𑀭𑀦𑀸𑀫𑀁, 𑀬𑀸 𑀘𑀸𑀬𑀁 𑀫𑀺𑀘𑁆𑀙𑀸𑀧𑀭𑀺𑀯𑀺𑀢𑀓𑁆𑀓𑀸𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 ‘‘𑀏𑀯𑀭𑀽𑀧𑁂𑀦 𑀅𑀢𑁆𑀢𑀦𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀩𑀸𑀮𑀸𑀦𑀁 𑀯𑀺𑀧𑀭𑀻𑀢𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀼𑀪𑀬𑀦𑀺𑀲𑁆𑀲𑀺𑀢𑀸𑀦𑀺 𑀢𑁂𑀲𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑀸𑀦𑀺. 𑀢𑀸𑀦𑀺 𑀘 𑀪𑀕𑀯𑀸 𑀯𑀺𑀦𑁂𑀬𑁆𑀬 𑀯𑀺𑀦𑀬𑀺𑀢𑁆𑀯𑀸 𑀑𑀖𑀢𑀫𑀕𑀸 𑀑𑀖𑀢𑀫𑀁 𑀑𑀖𑀦𑁆𑀥𑀓𑀸𑀭𑀁 𑀅𑀕𑀸 𑀅𑀢𑀺𑀓𑁆𑀓𑀦𑁆𑀢𑁄. ‘‘𑀑𑀖𑀦𑁆𑀢𑀫𑀕𑀸’’𑀢𑀺𑀧𑀺 𑀧𑀸𑀞𑁄, 𑀑𑀖𑀸𑀦𑀁 𑀅𑀦𑁆𑀢𑀁 𑀅𑀕𑀸, 𑀢𑀲𑁆𑀫𑀸 𑀆𑀳 ‘‘𑀬𑀸𑀦𑀺 𑀘 𑀢𑀻𑀡𑀺…𑀧𑁂… 𑀢𑀫𑀕𑀸’’𑀢𑀺.

𑁫𑁪𑁫. 𑀢𑀢𑁄 𑀧𑀭𑀁 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀧𑀸𑀭𑀜𑁆𑀘 𑀦𑀺𑀩𑁆𑀩𑀸𑀦𑀁 𑀢𑀧𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀸𑀪𑀸𑀯𑀢𑁄 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀘 𑀢𑀁 𑀲𑀦𑁆𑀥𑀸𑀬𑀸𑀳, ‘‘𑀅𑀦𑁆𑀢𑀕𑀽𑀲𑀺 𑀧𑀸𑀭𑀕𑀽 𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀅𑀣 𑀯𑀸 𑀧𑀸𑀭𑀕𑀽 𑀪𑀕𑀯𑀸 𑀦𑀺𑀩𑁆𑀩𑀸𑀦𑀁 𑀕𑀢𑀢𑁆𑀢𑀸, 𑀢𑀁 𑀆𑀮𑀧𑀦𑁆𑀢𑁄 𑀆𑀳, ‘‘𑀧𑀸𑀭𑀕𑀽 𑀅𑀦𑁆𑀢𑀕𑀽𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀅𑀬𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀫𑀸 𑀘 𑀩𑀼𑀤𑁆𑀥𑁄 𑀲𑀸𑀫𑀜𑁆𑀘 𑀩𑀼𑀤𑁆𑀥𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑀁 𑀫𑀜𑁆𑀜𑁂𑀢𑀺 𑀢𑀫𑁂𑀯 𑀫𑀜𑁆𑀜𑀸𑀫𑀺, 𑀦 𑀅𑀜𑁆𑀜𑀦𑁆𑀢𑀺 𑀅𑀘𑁆𑀘𑀸𑀤𑀭𑁂𑀦 𑀪𑀡𑀢𑀺. 𑀚𑀼𑀢𑀺𑀫𑀸𑀢𑀺 𑀧𑀭𑁂𑀲𑀫𑁆𑀧𑀺 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 𑀚𑀼𑀢𑀺𑀲𑀫𑁆𑀧𑀦𑁆𑀦𑁄. 𑀫𑀼𑀢𑀺𑀫𑀸𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑀜𑁂𑀬𑁆𑀬𑀜𑀸𑀡𑀲𑀫𑀢𑁆𑀣𑀸𑀬 𑀫𑀼𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑁆𑀧𑀦𑁆𑀦𑁄. 𑀧𑀳𑀽𑀢𑀧𑀜𑁆𑀜𑁄𑀢𑀺 𑀅𑀦𑀦𑁆𑀢𑀧𑀜𑁆𑀜𑁄. 𑀇𑀥 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀥𑀺𑀧𑁆𑀧𑁂𑀢𑀁. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸𑀢𑀺 𑀆𑀫𑀦𑁆𑀢𑁂𑀦𑁆𑀢𑁄 𑀆𑀳. 𑀅𑀢𑀸𑀭𑁂𑀲𑀺 𑀫𑀦𑁆𑀢𑀺 𑀓𑀗𑁆𑀔𑀸𑀢𑁄 𑀫𑀁 𑀢𑀸𑀭𑁂𑀲𑀺.

𑁫𑁪𑁬-𑁯. 𑀬𑀁 𑀫𑁂𑀢𑀺𑀆𑀤𑀺𑀕𑀸𑀣𑀸𑀬 𑀦𑀫𑀓𑁆𑀓𑀸𑀭𑀓𑀭𑀡𑀁 𑀪𑀡𑀢𑀺. 𑀢𑀢𑁆𑀣 𑀓𑀗𑁆𑀔𑀺𑀢𑁆𑀢𑀦𑁆𑀢𑀺 𑀯𑀻𑀲𑀢𑀺𑀧𑀜𑁆𑀳𑀦𑀺𑀲𑁆𑀲𑀺𑀢𑀁 𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀢𑁂𑀦 𑀓𑀗𑁆𑀔𑀺𑀢𑁄 𑀅𑀳𑁄𑀲𑀺. 𑀫𑁄𑀦𑀧𑀣𑁂𑀲𑀽𑀢𑀺 𑀜𑀸𑀡𑀧𑀣𑁂𑀲𑀼. 𑀯𑀺𑀦𑀴𑀻𑀓𑀢𑀸𑀢𑀺 𑀯𑀺𑀕𑀢𑀦𑀴𑀸 𑀓𑀢𑀸, 𑀉𑀘𑁆𑀙𑀺𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀸𑀕 𑀦𑀸𑀕𑀲𑁆𑀲𑀸𑀢𑀺 𑀏𑀓𑀁 𑀆𑀫𑀦𑁆𑀢𑀦𑀯𑀘𑀦𑀁, 𑀏𑀓𑀲𑁆𑀲 ‘‘𑀪𑀸𑀲𑀢𑁄 𑀅𑀦𑀼𑀫𑁄𑀤𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀥𑀫𑁆𑀫𑀤𑁂𑀲𑀦’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀲𑀩𑁆𑀩𑁂 𑀤𑁂𑀯𑀸𑀢𑀺 𑀆𑀓𑀸𑀲𑀝𑁆𑀞𑀸 𑀘 𑀪𑀽𑀫𑀝𑁆𑀞𑀸 𑀘. 𑀦𑀸𑀭𑀤𑀧𑀩𑁆𑀩𑀢𑀸𑀢𑀺 𑀢𑁂𑀧𑀺 𑀓𑀺𑀭 𑀤𑁆𑀯𑁂 𑀤𑁂𑀯𑀕𑀡𑀸 𑀧𑀜𑁆𑀜𑀯𑀦𑁆𑀢𑁄, 𑀢𑁂𑀧𑀺 𑀅𑀦𑀼𑀫𑁄𑀤𑀦𑁆𑀢𑀻𑀢𑀺 𑀲𑀩𑁆𑀩𑀁 𑀧𑀲𑀸𑀤𑁂𑀦 𑀘 𑀦𑀫𑀓𑁆𑀓𑀸𑀭𑀓𑀭𑀡𑀁 𑀪𑀡𑀢𑀺.

𑁫𑁫𑁦-𑁫𑁩. 𑀅𑀦𑀼𑀫𑁄𑀤𑀦𑀸𑀭𑀳𑀁 𑀩𑁆𑀬𑀸𑀓𑀭𑀡𑀲𑀫𑁆𑀧𑀤𑀁 𑀲𑀼𑀢𑁆𑀯𑀸 ‘‘𑀦𑀫𑁄 𑀢𑁂’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀆𑀳. 𑀧𑀼𑀭𑀺𑀲𑀸𑀚𑀜𑁆𑀜𑀸𑀢𑀺 𑀧𑀼𑀭𑀺𑀲𑁂𑀲𑀼 𑀚𑀸𑀢𑀺𑀲𑀫𑁆𑀧𑀦𑁆𑀦𑀁. 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀧𑀝𑀺𑀪𑀸𑀕𑁄 𑀧𑀼𑀕𑁆𑀕𑀮𑁄 𑀢𑀼𑀯𑀁 𑀩𑀼𑀤𑁆𑀥𑁄 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑁂𑀦, 𑀲𑀢𑁆𑀣𑀸 𑀅𑀦𑀼𑀲𑀸𑀲𑀦𑀺𑀬𑀸 𑀲𑀢𑁆𑀣𑀯𑀸𑀳𑀢𑀸𑀬 𑀘, 𑀫𑀸𑀭𑀸𑀪𑀺𑀪𑀽 𑀘𑀢𑀼𑀫𑀸𑀭𑀸𑀪𑀺𑀪𑀯𑁂𑀦, 𑀫𑀼𑀦𑀺 𑀩𑀼𑀤𑁆𑀥𑀫𑀼𑀦𑀺. 𑀉𑀧𑀥𑀻𑀢𑀺 𑀔𑀦𑁆𑀥𑀓𑀺𑀮𑁂𑀲𑀓𑀸𑀫𑀕𑀼𑀡𑀸𑀪𑀺𑀲𑀗𑁆𑀔𑀸𑀭𑀪𑁂𑀤𑀸 𑀘𑀢𑁆𑀢𑀸𑀭𑁄. 𑀯𑀕𑁆𑀕𑀽𑀢𑀺 𑀅𑀪𑀺𑀭𑀽𑀧𑀁. 𑀧𑀼𑀜𑁆𑀜𑁂 𑀘𑀸𑀢𑀺 𑀮𑁄𑀓𑀺𑀬𑁂 𑀦 𑀮𑀺𑀫𑁆𑀧𑀲𑀺 𑀢𑁂𑀲𑀁 𑀅𑀓𑀭𑀡𑁂𑀦, 𑀧𑀼𑀩𑁆𑀩𑁂 𑀓𑀢𑀸𑀦𑀫𑁆𑀧𑀺 𑀯𑀸 𑀆𑀬𑀢𑀺𑀁 𑀨𑀮𑀽𑀧𑀪𑁄𑀕𑀸𑀪𑀸𑀯𑁂𑀦. 𑀢𑀁𑀦𑀺𑀫𑀺𑀢𑁆𑀢𑁂𑀦 𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀦. 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄𑀢𑀺 𑀏𑀯𑀁 𑀪𑀡𑀦𑁆𑀢𑁄 𑀕𑁄𑀧𑁆𑀨𑀓𑁂𑀲𑀼 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑀁 𑀯𑀦𑁆𑀤𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁄 𑀏𑀯. 𑀆𑀓𑀗𑁆𑀔𑀢𑀻𑀢𑀺 𑀇𑀘𑁆𑀙𑀢𑀺. 𑀆𑀭𑀤𑁆𑀥𑀘𑀺𑀢𑁆𑀢𑀸𑀢𑀺 𑀅𑀪𑀺𑀭𑀸𑀥𑀺𑀢𑀘𑀺𑀢𑁆𑀢𑀸. 𑀅𑀧𑀺𑀘 𑀫𑁂𑀢𑁆𑀣 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸𑀢𑀺 𑀅𑀧𑀺𑀘 𑀫𑀬𑀸 𑀏𑀢𑁆𑀣 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀯𑀸𑀲𑁂 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀁 𑀯𑀺𑀤𑀺𑀢𑀁, 𑀦 𑀲𑀩𑁆𑀩𑁂𑀦𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀦𑁆𑀢𑀺. 𑀓𑁂𑀦 𑀧𑀦 𑀦 𑀧𑀭𑀺𑀯𑀲𑀺𑀢𑀩𑁆𑀩𑀁? 𑀅𑀕𑁆𑀕𑀺𑀬𑁂𑀳𑀺 𑀚𑀝𑀺𑀮𑁂𑀳𑀺, 𑀲𑀸𑀓𑀺𑀬𑁂𑀦 𑀚𑀸𑀢𑀺𑀬𑀸, 𑀮𑀺𑀗𑁆𑀕𑀁 𑀯𑀺𑀚𑀳𑀺𑀢𑁆𑀯𑀸 𑀆𑀕𑀢𑁂𑀦. 𑀅𑀯𑀺𑀚𑀳𑀺𑀢𑁆𑀯𑀸 𑀆𑀕𑀢𑁄𑀧𑀺 𑀘 𑀬𑁄 𑀫𑀕𑁆𑀕𑀨𑀮𑀧𑀝𑀺𑀮𑀸𑀪𑀸𑀬 𑀳𑁂𑀢𑀼𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀸𑀤𑀺𑀲𑁄𑀯 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄. 𑀢𑀲𑁆𑀫𑀸 𑀪𑀕𑀯𑀸 ‘‘𑀢𑀯 𑀧𑀦, 𑀲𑀪𑀺𑀬, 𑀢𑀺𑀢𑁆𑀣𑀺𑀬𑀯𑀢𑁆𑀢𑀧𑀽𑀭𑀡𑀢𑁆𑀣𑀸𑀬 𑀧𑀭𑀺𑀯𑀸𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀅𑀢𑁆𑀣𑀢𑁆𑀣𑀺𑀓𑁄 𑀢𑁆𑀯𑀁 ‘𑀫𑀕𑁆𑀕𑀨𑀮𑀧𑀝𑀺𑀮𑀸𑀪𑀸𑀬 𑀳𑁂𑀢𑀼𑀲𑀫𑁆𑀧𑀦𑁆𑀦𑁄’𑀢𑀺 𑀯𑀺𑀤𑀺𑀢𑀫𑁂𑀢𑀁 𑀫𑀬𑀸’’𑀢𑀺 𑀢𑀲𑁆𑀲 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀦𑁆𑀢𑁄 𑀆𑀳 𑁋 ‘‘𑀅𑀧𑀺𑀘 𑀫𑁂𑀢𑁆𑀣 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸’’𑀢𑀺. 𑀲𑀪𑀺𑀬𑁄 𑀧𑀦 𑀅𑀢𑁆𑀢𑀦𑁄 𑀆𑀤𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀪𑀦𑁆𑀢𑁂’’𑀢𑀺. 𑀢𑀁 𑀲𑀩𑁆𑀩𑀁 𑀅𑀜𑁆𑀜𑀜𑁆𑀘 𑀢𑀣𑀸𑀭𑀽𑀧𑀁 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀘 𑀇𑀥 𑀦 𑀯𑀡𑁆𑀡𑀺𑀢𑀁, 𑀬𑀢𑁄 𑀧𑀼𑀩𑁆𑀩𑁂 𑀯𑀡𑁆𑀡𑀺𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓-𑀅𑀝𑁆𑀞𑀓𑀣𑀸𑀬

𑀲𑀼𑀢𑁆𑀢𑀦𑀺𑀧𑀸𑀢-𑀅𑀝𑁆𑀞𑀓𑀣𑀸𑀬 𑀲𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.