𑁨. 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁨-𑁪𑁪. 𑀇𑀤𑀸𑀦𑀺 𑀧𑀘𑁆𑀘𑀦𑀻𑀬𑀁 𑀳𑁄𑀢𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀦 𑀳𑁂𑀢𑀼𑀧𑀘𑁆𑀘𑀬𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀳𑀺 𑀲𑀫𑀧𑁆𑀧𑀫𑀸𑀡𑁄𑀯 𑀧𑀼𑀘𑁆𑀙𑀸𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦𑁂𑀯𑁂𑀢𑁆𑀣 ‘‘𑀬𑀣𑀸 𑀅𑀦𑀼𑀮𑁄𑀫𑁂 𑀳𑁂𑀢𑀼𑀧𑀘𑁆𑀘𑀬𑁄 𑀯𑀺𑀢𑁆𑀣𑀸𑀭𑀺𑀢𑁄, 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀦𑀳𑁂𑀢𑀼𑀧𑀘𑁆𑀘𑀬𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀭𑀺𑀬𑁄𑀲𑀸𑀦𑁂 ‘‘𑀬𑀣𑀸 𑀅𑀦𑀼𑀮𑁄𑀫𑁂 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑀁, 𑀤𑀼𑀫𑀽𑀮𑀓𑀁, 𑀢𑀺𑀫𑀽𑀮𑀓𑀁, 𑀘𑀢𑀼𑀫𑀽𑀮𑀓𑀁 𑀬𑀸𑀯 𑀢𑁂𑀯𑀻𑀲𑀢𑀺𑀫𑀽𑀮𑀓𑀁, 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀯𑀻𑀲𑀢𑀺𑀫𑀽𑀮𑀓𑀦𑁆𑀢𑀺 𑀇𑀤𑀜𑁆𑀘𑁂𑀢𑁆𑀣 𑀤𑀼𑀫𑀽𑀮𑀓𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑀩𑁆𑀩𑀫𑀽𑀮𑀓𑀁 𑀘𑀢𑀼𑀯𑀻𑀲𑀢𑀺𑀫𑀽𑀮𑀓𑀫𑁆𑀧𑀺 𑀳𑁄𑀢𑀺𑀬𑁂𑀯. 𑀢𑀁 𑀲𑀩𑁆𑀩𑀁 𑀲𑀗𑁆𑀔𑀺𑀢𑁆𑀢𑀫𑁂𑀯𑀸𑀢𑀺.

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁…𑀧𑁂… 𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀢𑁆𑀣𑀸𑀧𑀺 𑀤𑁆𑀯𑁂 𑀧𑀘𑁆𑀘𑀦𑀻𑀬𑀸𑀦𑀺 𑁋 𑀥𑀫𑁆𑀫𑀧𑀘𑁆𑀘𑀦𑀻𑀬𑀜𑁆𑀘 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀜𑁆𑀘. 𑀢𑀢𑁆𑀣 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀏𑀯𑀁 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 ‘‘𑀦 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀧𑀘𑁆𑀘𑀦𑀻𑀬𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀧𑀘𑁆𑀘𑀦𑀻𑀬𑀁 𑀦𑀸𑀫. ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀦𑀻𑀬𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀁 𑀦𑀸𑀫. 𑀢𑀢𑁆𑀣 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁…𑀧𑁂… 𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀅𑀬𑀁 𑀕𑀸𑀣𑀸 𑀥𑀫𑁆𑀫𑀧𑀘𑁆𑀘𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀇𑀥 𑀧𑀦 𑀅𑀬𑀁 𑀕𑀸𑀣𑀸 𑀥𑀫𑁆𑀫𑀸𑀦𑀼𑀮𑁄𑀫𑁂𑀬𑁂𑀯 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 ‘‘𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀅𑀝𑁆𑀞𑀓𑀣𑀸𑀕𑀸𑀣𑀸𑀬 𑀥𑀫𑁆𑀫𑀧𑀘𑁆𑀘𑀦𑀻𑀬𑁂 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦𑁄𑀓𑀸𑀲𑁂 𑀦 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺 𑀏𑀯𑀁 𑀧𑀯𑀢𑁆𑀢𑁂 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑁂 𑀏𑀢𑁂 𑀥𑀫𑁆𑀫𑀸𑀦𑀼𑀮𑁄𑀫𑁂𑀬𑁂𑀯 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀼 𑀅𑀦𑀼𑀮𑁄𑀫𑀢𑀺𑀓𑀧𑀝𑁆𑀞𑀸𑀦𑁂𑀬𑁂𑀯 𑀓𑀼𑀲𑀮𑀢𑁆𑀢𑀺𑀓𑀫𑀢𑁆𑀢𑀲𑁆𑀲 𑀯𑀲𑁂𑀦 𑀅𑀬𑀁 𑀇𑀫𑀲𑁆𑀫𑀺𑀁 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀧𑀼𑀘𑁆𑀙𑀸𑀧𑀪𑁂𑀤𑁄 𑀤𑀲𑁆𑀲𑀺𑀢𑁄. 𑀲𑁂𑀲𑁂𑀲𑀼 𑀧𑀦 𑀢𑀺𑀓𑁂𑀲𑀼 𑀲𑁂𑀲𑀧𑀝𑁆𑀞𑀸𑀦𑁂𑀲𑀼 𑀘 𑀏𑀓𑀸𑀧𑀺 𑀧𑀼𑀘𑁆𑀙𑀸 𑀦 𑀤𑀲𑁆𑀲𑀺𑀢𑀸. 𑀢𑀢𑁄 𑀧𑀭𑁂𑀲𑀼 𑀧𑀦 𑀲𑀳𑀚𑀸𑀢𑀯𑀸𑀭𑀸𑀤𑀻𑀲𑀼 𑀓𑀼𑀲𑀮𑀢𑁆𑀢𑀺𑀓𑀲𑁆𑀲𑀸𑀧𑀺 𑀯𑀲𑁂𑀦 𑀧𑀼𑀘𑁆𑀙𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀓𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀤𑀲𑁆𑀲𑀺𑀢𑀁. ‘‘𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀘𑀦𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑁂 𑀙𑀧𑀺 𑀏𑀢𑁂 𑀧𑀝𑁆𑀞𑀸𑀦𑀦𑀬𑀸 𑀧𑀼𑀘𑁆𑀙𑀸𑀯𑀲𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀧𑀝𑁆𑀞𑀸𑀦𑀁 𑀯𑀡𑁆𑀡𑀬𑀦𑁆𑀢𑀸𑀦𑀜𑁆𑀳𑀺 𑀆𑀘𑀭𑀺𑀬𑀸𑀦𑀁 𑀪𑀸𑀭𑁄 𑀏𑀲𑁄𑀢𑀺.