𑁩. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁫-𑁪𑁮. 𑀇𑀤𑀸𑀦𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀳𑁄𑀢𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀳𑁂𑀢𑀼𑀧𑀘𑁆𑀘𑀬𑀸 𑀦𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀳𑁂𑀢𑀼𑀧𑀤𑀲𑁆𑀲 𑀲𑁂𑀲𑁂𑀲𑀼 𑀢𑁂𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸𑀯𑀲𑁂𑀦 𑀳𑁂𑀢𑀼𑀧𑀤𑀸𑀤𑀺𑀓𑁂 𑀏𑀓𑀫𑀽𑀮𑀓𑁂 𑀢𑁂𑀯𑀻𑀲𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀸𑀦𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑀲𑀢𑁆𑀢𑀯𑀻𑀲𑀸𑀥𑀺𑀓𑀸𑀦𑀺 𑀏𑀓𑀸𑀤𑀲 𑀧𑀼𑀘𑁆𑀙𑀸𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀤𑀼𑀫𑀽𑀮𑀓𑁂 𑀧𑀦 𑀳𑁂𑀢𑀸𑀭𑀫𑁆𑀫𑀡𑀧𑀤𑀸𑀦𑀁 𑀲𑁂𑀲𑁂𑀲𑀼 𑀤𑁆𑀯𑀸𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸𑀯𑀲𑁂𑀦 𑀤𑁆𑀯𑀸𑀯𑀻𑀲𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀸𑀦𑀻𑀢𑀺 𑀏𑀯𑀁 𑀅𑀦𑀼𑀮𑁄𑀫𑁂 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀏𑀓𑀫𑀽𑀮𑀓𑀸𑀤𑀻𑀲𑀼 𑀏𑀓𑁂𑀓𑀁 𑀧𑀤𑀁 𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀧𑀼𑀘𑁆𑀙𑀸𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀫𑀽𑀮𑀓𑀸𑀤𑀻𑀲𑀼 𑀘𑁂𑀢𑁆𑀣 𑀬𑀸 𑀧𑀼𑀘𑁆𑀙𑀸 𑀧𑀸𑀴𑀺𑀬𑀁 𑀆𑀕𑀢𑀸, 𑀬𑀸 𑀘 𑀦 𑀆𑀕𑀢𑀸, 𑀢𑀸 𑀲𑀩𑁆𑀩𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁…𑀧𑁂… 𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀢𑁆𑀣 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁆𑀯𑁂 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀸𑀦𑀺 𑁋 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀜𑁆𑀘. 𑀢𑀢𑁆𑀣 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀏𑀯𑀁 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀦𑀸𑀫. ‘‘𑀳𑁂𑀢𑀼𑀧𑀘𑁆𑀘𑀬𑀸 𑀦𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀮𑀩𑁆𑀪𑀫𑀸𑀦𑀧𑀤𑀸𑀦𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀦𑀸𑀫. 𑀢𑀢𑁆𑀣 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁…𑀧𑁂… 𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀅𑀬𑀁 𑀕𑀸𑀣𑀸 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀇𑀥 𑀧𑀦 𑀅𑀬𑀁 𑀕𑀸𑀣𑀸 𑀥𑀫𑁆𑀫𑀸𑀦𑀼𑀮𑁄𑀫𑁂𑀬𑁂𑀯 𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 ‘‘𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀅𑀝𑁆𑀞𑀓𑀣𑀸𑀕𑀸𑀣𑀸𑀬 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦𑁄𑀓𑀸𑀲𑁂 𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺 𑀏𑀯𑀁 𑀧𑀯𑀢𑁆𑀢𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀏𑀢𑁂 𑀥𑀫𑁆𑀫𑀸𑀦𑀼𑀮𑁄𑀫𑁂𑀬𑁂𑀯 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀼 𑀅𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑁂𑀬𑁂𑀯 𑀓𑀼𑀲𑀮𑀢𑁆𑀢𑀺𑀓𑀫𑀢𑁆𑀢𑀲𑁆𑀲 𑀯𑀲𑁂𑀦 𑀅𑀬𑀁 𑀇𑀫𑀲𑁆𑀫𑀺𑀁 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀧𑀼𑀘𑁆𑀙𑀸𑀧𑀪𑁂𑀤𑁄 𑀤𑀲𑁆𑀲𑀺𑀢𑁄. 𑀲𑁂𑀲𑁂𑀲𑀼 𑀧𑀦 𑀢𑀺𑀓𑁂𑀲𑀼 𑀲𑁂𑀲𑀧𑀝𑁆𑀞𑀸𑀦𑁂𑀲𑀼 𑀘 𑀏𑀓𑀸𑀧𑀺 𑀧𑀼𑀘𑁆𑀙𑀸 𑀦 𑀤𑀲𑁆𑀲𑀺𑀢𑀸. 𑀢𑀢𑁄 𑀧𑀭𑁂𑀲𑀼 𑀧𑀦 𑀲𑀳𑀚𑀸𑀢𑀯𑀸𑀭𑀸𑀤𑀻𑀲𑀼 𑀓𑀼𑀲𑀮𑀢𑁆𑀢𑀺𑀓𑀲𑁆𑀲𑀸𑀧𑀺 𑀯𑀲𑁂𑀦 𑀧𑀼𑀘𑁆𑀙𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀓𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀤𑀲𑁆𑀲𑀺𑀢𑀁. ‘‘𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀘𑀦𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀙𑀧𑀺 𑀏𑀢𑁂 𑀧𑀝𑁆𑀞𑀸𑀦𑀦𑀬𑀸 𑀧𑀼𑀘𑁆𑀙𑀸𑀯𑀲𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀧𑀝𑁆𑀞𑀸𑀦𑀁 𑀯𑀡𑁆𑀡𑀬𑀦𑁆𑀢𑀸𑀦𑀜𑁆𑀳𑀺 𑀆𑀘𑀭𑀺𑀬𑀸𑀦𑀁 𑀪𑀸𑀭𑁄 𑀏𑀲𑁄𑀢𑀺.