𑁧𑁦. 𑀇𑀦𑁆𑀤𑁆𑀭𑀺𑀬𑀬𑀫𑀓𑀁

𑀇𑀤𑀸𑀦𑀺 𑀢𑁂𑀲𑀜𑁆𑀜𑁂𑀯 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑀸𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀮𑀩𑁆𑀪𑀫𑀸𑀦𑀯𑀲𑁂𑀦 𑀏𑀓𑀤𑁂𑀲𑀁 𑀲𑀁𑀕𑀡𑁆𑀳𑀺𑀢𑁆𑀯𑀸 𑀥𑀫𑁆𑀫𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀬𑀫𑀓𑀲𑁆𑀲 𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀧𑀺 𑀳𑀺 𑀧𑀡𑁆𑀡𑀢𑁆𑀢𑀺𑀯𑀸𑀭𑀸𑀤𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸 𑀅𑀯𑀲𑁂𑀲𑀸 𑀅𑀦𑁆𑀢𑀭𑀯𑀸𑀭𑀸 𑀘 𑀲𑀤𑁆𑀥𑀺𑀁 𑀓𑀸𑀮𑀧𑁆𑀧𑀪𑁂𑀤𑀸𑀤𑀻𑀳𑀺 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀆𑀕𑀢𑀲𑀤𑀺𑀲𑀸𑀯. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀩𑀳𑀼𑀢𑀸𑀬 𑀥𑀸𑀢𑀼𑀬𑀫𑀓𑀢𑁄𑀧𑀺 𑀩𑀳𑀼𑀢𑀭𑀸𑀦𑀺 𑀬𑀫𑀓𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀧𑀦 𑀳𑁂𑀝𑁆𑀞𑀸 𑀧𑀼𑀕𑁆𑀕𑀮𑀯𑀸𑀭𑀸𑀤𑀻𑀲𑀼 𑀘𑀓𑁆𑀔𑀸𑀬𑀢𑀦𑀘𑀓𑁆𑀔𑀼𑀥𑀸𑀢𑀼𑀫𑀽𑀮𑀓𑁂 𑀦𑀬𑁂 𑀘𑀓𑁆𑀔𑀸𑀬𑀢𑀦𑀘𑀓𑁆𑀔𑀼𑀥𑀸𑀢𑀽𑀳𑀺 𑀲𑀤𑁆𑀥𑀺𑀁 𑀚𑀺𑀯𑁆𑀳𑀸𑀬𑀢𑀦𑀓𑀸𑀬𑀸𑀬𑀢𑀦𑀸𑀦𑀺 𑀦 𑀬𑁄𑀚𑀺𑀢𑀸𑀦𑀺. 𑀚𑀺𑀯𑁆𑀳𑀸𑀬𑀢𑀦𑀓𑀸𑀬𑀸𑀬𑀢𑀦𑀫𑀽𑀮𑀓𑀸𑀦𑀺 𑀘 𑀬𑀫𑀓𑀸𑀦𑁂𑀯 𑀦 𑀕𑀳𑀺𑀢𑀸𑀦𑀺, 𑀢𑀣𑀸 𑀇𑀥𑀸𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀦𑀬𑁂 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀓𑀸𑀬𑀺𑀦𑁆𑀤𑁆𑀭𑀺𑀬𑀸𑀦𑀺 𑀦 𑀬𑁄𑀚𑀺𑀢𑀸𑀦𑀺, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀓𑀸𑀬𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑀸𑀦𑀺 𑀘 𑀬𑀫𑀓𑀸𑀦𑁂𑀯 𑀦 𑀕𑀳𑀺𑀢𑀸𑀦𑀺. 𑀢𑁂𑀲𑀁 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀧𑀦 𑀬𑀣𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀳𑀺 𑀢𑀣𑁂𑀯 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀳𑀺𑀧𑀺 𑀲𑀤𑁆𑀥𑀺𑀁 𑀬𑀲𑁆𑀫𑀸 𑀬𑁄𑀚𑀦𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦𑀺𑀓𑁆𑀔𑀺𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀅𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑁂𑀳𑀺𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑁄𑀲𑀸𑀦𑁂 𑀬𑁄𑀚𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂𑀦 𑀲𑀤𑁆𑀥𑀺𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀬𑁄𑀚𑀺𑀢𑀸𑀦𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁 𑀦𑀢𑁆𑀣𑀻𑀢𑀺 𑀦 𑀕𑀳𑀺𑀢𑀸𑀦𑀺. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀕𑀳𑀺𑀢𑀸𑀦𑀺. 𑀢𑀣𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀜𑁆𑀘. 𑀮𑁄𑀓𑀼𑀢𑁆𑀢𑀭𑀸𑀦𑀺 𑀢𑀻𑀡𑀺 𑀧𑀝𑀺𑀲𑀦𑁆𑀥𑀺𑀬𑀁 𑀅𑀪𑀸𑀯𑁂𑀦𑁂𑀯 𑀦 𑀕𑀳𑀺𑀢𑀸𑀦𑀺. 𑀇𑀢𑀺 𑀬𑀸𑀦𑀺 𑀕𑀳𑀺𑀢𑀸𑀦𑀺, 𑀢𑁂𑀲𑀁 𑀯𑀲𑁂𑀦𑁂𑀢𑁆𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀦𑀬𑁂 𑀬𑀫𑀓𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣. 𑀬𑀸𑀦𑀺 𑀧𑀦 𑀦 𑀕𑀳𑀺𑀢𑀸𑀦𑀺, 𑀢𑁂𑀲𑀁 𑀯𑀲𑁂𑀦 𑀬𑀫𑀓𑀸𑀦𑀺 𑀦 𑀕𑀡𑁂𑀢𑀩𑁆𑀩𑀸𑀦𑀺. 𑀕𑀡𑁂𑀦𑁆𑀢𑁂𑀦 𑀯𑀸 𑀫𑁄𑀖𑀧𑀼𑀘𑁆𑀙𑀸𑀯𑀲𑁂𑀦 𑀕𑀡𑁂𑀢𑀩𑁆𑀩𑀸𑀦𑀻𑀢𑀺 𑀏𑀯𑀁 𑀢𑀸𑀯 𑀲𑀩𑁆𑀩𑀯𑀸𑀭𑁂𑀲𑀼 𑀧𑀸𑀴𑀺𑀯𑀯𑀢𑁆𑀣𑀸𑀦𑀫𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧-𑁮𑁬. 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀧𑀦𑁂𑀢𑁆𑀣 𑀇𑀤𑀁 𑀦𑀬𑀫𑀼𑀔𑀁 𑁋 𑀲𑀘𑀓𑁆𑀔𑀼𑀓𑀸𑀦𑀁 𑀦 𑀇𑀢𑁆𑀣𑀻𑀦𑀦𑁆𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀜𑁆𑀘𑁂𑀯 𑀭𑀽𑀧𑀻𑀦𑀁 𑀧𑀼𑀭𑀺𑀲𑀦𑀧𑀼𑀁𑀲𑀓𑀸𑀦𑀜𑁆𑀘 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀦 𑀧𑀼𑀭𑀺𑀲𑀸𑀦𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑀜𑁆𑀘𑁂𑀯 𑀇𑀢𑁆𑀣𑀺𑀦𑀧𑀼𑀁𑀲𑀓𑀸𑀦𑀜𑁆𑀘 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀘𑀓𑁆𑀔𑀼𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀓𑀯𑁄𑀓𑀸𑀭𑀘𑀢𑀼𑀯𑁄𑀓𑀸𑀭𑀓𑀸𑀫𑀥𑀸𑀢𑀼𑀲𑀢𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑀓𑁆𑀔𑀼𑀓𑀸𑀦𑀁 𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑀓𑁆𑀔𑀼𑀓𑀸𑀦𑀁 𑀯𑀺𑀦𑀸 𑀉𑀧𑁂𑀓𑁆𑀔𑀸𑀬𑀸𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀧𑁂𑀓𑁆𑀔𑀸𑀬 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀳𑁂𑀢𑀼𑀓𑀸𑀦𑀦𑁆𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀺. 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀺. 𑀲𑀳𑁂𑀢𑀼𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀘𑁂𑀯 𑀅𑀭𑀽𑀧𑀻𑀯𑀲𑁂𑀦 𑀘 𑀯𑀼𑀢𑁆𑀢𑀁. 𑀅𑀜𑁆𑀜𑁄 𑀳𑀺 𑀲𑀳𑁂𑀢𑀼𑀓𑁄 𑀅𑀘𑀓𑁆𑀔𑀼𑀓𑁄 𑀦𑀸𑀫 𑀦𑀢𑁆𑀣𑀺. 𑀲𑀘𑀓𑁆𑀔𑀼𑀓𑀸𑀦𑀁 𑀅𑀳𑁂𑀢𑀼𑀓𑀸𑀦𑀦𑁆𑀢𑀺 𑀅𑀧𑀸𑀬𑁂 𑀑𑀧𑀧𑀸𑀢𑀺𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑀓𑁆𑀔𑀼𑀓𑀸𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀓𑀸𑀫𑀥𑀸𑀢𑀼𑀬𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑀓𑁆𑀔𑀼𑀓𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑁄 𑀘𑁂𑀯 𑀓𑀸𑀫𑀸𑀯𑀘𑀭𑀤𑁂𑀯𑀫𑀦𑀼𑀲𑁆𑀲𑁂 𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀅𑀭𑀽𑀧𑀺𑀦𑁄 𑀘 𑀢𑀺𑀳𑁂𑀢𑀼𑀓𑀕𑀩𑁆𑀪𑀲𑁂𑀬𑁆𑀬𑀓𑁂 𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁯𑁦. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀤𑁆𑀯𑁂𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀯𑀢𑁆𑀢𑁂 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣𑀸𑀧𑀺 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀲𑀼𑀧𑀺 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦𑁂𑀯𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀝𑀺𑀮𑁄𑀫𑀦𑀬𑁂 𑀧𑀦 𑀦𑀺𑀭𑁄𑀥𑀯𑀸𑀭𑁂 𑀘 𑀏𑀢𑁂𑀲𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀬𑀣𑀸𑀮𑀸𑀪𑀯𑀲𑁂𑀦 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼 𑀢𑀻𑀲𑀼𑀧𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁮𑁧. 𑀅𑀦𑀸𑀕𑀢𑀯𑀸𑀭𑁂 𑀏𑀢𑁂𑀦𑁂𑀯 𑀪𑀸𑀯𑁂𑀦𑀸𑀢𑀺 𑀏𑀢𑁂𑀦 𑀧𑀼𑀭𑀺𑀲𑀪𑀸𑀯𑁂𑀦𑁂𑀯, 𑀅𑀦𑁆𑀢𑀭𑀸 𑀇𑀢𑁆𑀣𑀺𑀪𑀸𑀯𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀲𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀢𑀺𑀘𑀺 𑀪𑀯𑁂 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑀺𑀘𑀺 𑀧𑀝𑀺𑀲𑀦𑁆𑀥𑀺𑀬𑁄 𑀕𑀳𑁂𑀢𑁆𑀯𑀸 𑀇𑀢𑁆𑀣𑀺𑀪𑀸𑀯𑀁 𑀅𑀧𑁆𑀧𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑁩𑁬𑁧. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀅𑀢𑀻𑀢𑀯𑀸𑀭𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀘𑀺𑀢𑁆𑀢𑀬𑀫𑀓𑁂 𑀯𑀺𑀬 𑀉𑀧𑁆𑀧𑀸𑀤𑀓𑁆𑀔𑀡𑀸𑀢𑀺𑀓𑁆𑀓𑀫𑀯𑀲𑁂𑀦 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀪𑀯𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀯𑀲𑁂𑀦 𑀕𑀳𑁂𑀢𑀩𑁆𑀩𑁄𑀢𑀺. 𑀇𑀫𑀺𑀦𑀸 𑀦𑀬𑀫𑀼𑀔𑁂𑀦 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀧𑀯𑀢𑁆𑀢𑀺𑀯𑀸𑀭𑁂 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁪𑁩𑁫-𑁪𑁮𑁨. 𑀧𑀭𑀺𑀜𑁆𑀜𑀸𑀯𑀸𑀭𑁂 𑀧𑀦 𑀘𑀓𑁆𑀔𑀼𑀫𑀽𑀮𑀓𑀸𑀤𑀻𑀲𑀼 𑀏𑀓𑀫𑁂𑀯 𑀘𑀓𑁆𑀔𑀼𑀲𑁄𑀢𑀬𑀫𑀓𑀁 𑀤𑀲𑁆𑀲𑀺𑀢𑀁. 𑀬𑀲𑁆𑀫𑀸 𑀧𑀦 𑀲𑁂𑀲𑀸𑀦𑀺𑀧𑀺 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑀸𑀦𑀺 𑀘𑁂𑀯 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑀫𑀺𑀲𑁆𑀲𑀓𑀸𑀦𑀺 𑀘 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑁂𑀯, 𑀢𑀲𑁆𑀫𑀸 𑀢𑀸𑀦𑀺 𑀅𑀦𑀼𑀧𑀤𑀺𑀝𑁆𑀞𑀸𑀦𑀺𑀧𑀺 𑀇𑀫𑀺𑀦𑀸𑀯 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀓𑀼𑀲𑀮𑀁 𑀏𑀓𑀦𑁆𑀢𑀢𑁄 𑀧𑀳𑀸𑀢𑀩𑁆𑀩𑀫𑁂𑀯, 𑀏𑀓𑀦𑁆𑀢𑀁 𑀓𑀼𑀲𑀮𑀁 𑀪𑀸𑀯𑁂𑀢𑀩𑁆𑀩𑀫𑁂𑀯, 𑀮𑁄𑀓𑀼𑀢𑁆𑀢𑀭𑀸𑀩𑁆𑀬𑀸𑀓𑀢𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀚𑀳𑀢𑀻’’𑀢𑀺 ‘‘𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀻’’𑀢𑀺 ‘‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀦 𑀪𑀸𑀯𑁂𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀫𑁆𑀧𑀺, 𑀢𑀁 𑀪𑀸𑀯𑀦𑀸𑀯𑀲𑁂𑀦𑁂𑀯 𑀕𑀳𑀺𑀢𑀁. 𑀢𑀢𑁆𑀣 𑀤𑁆𑀯𑁂 𑀧𑀼𑀕𑁆𑀕𑀮𑀸𑀢𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑀫𑀗𑁆𑀕𑀻 𑀘, 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑀗𑁆𑀕𑀻 𑀘. 𑀢𑁂𑀲𑀼 𑀏𑀓𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀧𑀚𑀳𑀢𑀺 𑀦𑀸𑀫. 𑀏𑀓𑁄 𑀧𑀳𑀻𑀦𑀤𑁄𑀲𑀢𑁆𑀢𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑀁 𑀆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀧𑀭𑀺𑀚𑀸𑀦𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸.

𑀇𑀦𑁆𑀤𑁆𑀭𑀺𑀬𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀬𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸, 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀲𑁆𑀲 𑀓𑀺𑀘𑁆𑀘𑀲𑀫𑁆𑀧𑀦𑁆𑀦𑁄;

𑀬𑀼𑀯𑀢𑀺𑀚𑀦𑁄𑀧𑀺 𑀅𑀢𑀻𑀢𑁄, 𑀲𑀼𑀯𑀺𑀳𑀺𑀢𑀦𑀺𑀬𑀫𑁄 𑀬𑀫𑀲𑁆𑀲𑀸𑀡𑀁.

𑀤𑁂𑀯𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀤𑁂𑀯𑀧𑀼𑀭𑁂 𑀲𑀩𑁆𑀩𑀤𑁂𑀯𑀤𑁂𑀯𑁂𑀦;

𑀬𑀫𑀓𑀁 𑀦𑀸𑀫 𑀧𑀓𑀸𑀲𑀺𑀢𑀁, 𑀬𑀫𑀸𑀫𑀮𑀮𑁄𑀫𑁂𑀦 𑀬𑀁 𑀢𑁂𑀦.

𑀧𑀸𑀴𑀺𑀯𑀯𑀢𑁆𑀣𑀸𑀦𑀯𑀺𑀥𑀺𑀁, 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀘 𑀅𑀢𑁆𑀣𑀦𑀬𑀁;

𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀸, 𑀬𑀫𑀓𑀅𑀝𑁆𑀞𑀓𑀣𑀸 𑀫𑀬𑀸 𑀢𑀲𑁆𑀲.

𑀲𑀸 𑀲𑀼𑀩𑀳𑀼𑀅𑀦𑁆𑀢𑀭𑀸𑀬𑁂, 𑀮𑁄𑀓𑀫𑁆𑀳𑀺 𑀬𑀣𑀸 𑀅𑀦𑀦𑁆𑀢𑀭𑀸𑀬𑁂𑀦;

𑀅𑀬𑀫𑀚𑁆𑀚 𑀧𑀜𑁆𑀘𑀫𑀢𑁆𑀢𑁂𑀳𑀺, 𑀢𑀦𑁆𑀢𑀺𑀬𑀸 𑀪𑀸𑀡𑀯𑀸𑀭𑁂𑀳𑀺.

𑀦𑀺𑀝𑁆𑀞𑀁 𑀧𑀢𑁆𑀢𑀸 𑀏𑀯𑀁, 𑀦𑀺𑀝𑁆𑀞𑀸𑀦𑀁 𑀧𑀸𑀧𑀼𑀡𑀦𑁆𑀢𑀼 𑀲𑀩𑁆𑀩𑁂𑀧𑀺;

𑀳𑀺𑀢𑀲𑀼𑀔𑀦𑀺𑀩𑁆𑀩𑀢𑁆𑀢𑀺𑀓𑀭𑀸, 𑀫𑀦𑁄𑀭𑀣𑀸 𑀲𑀩𑁆𑀩𑀲𑀢𑁆𑀢𑀸𑀦𑀦𑁆𑀢𑀺.

𑀬𑀫𑀓𑀧𑁆𑀧𑀓𑀭𑀡-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀧𑀝𑁆𑀞𑀸𑀦𑀧𑁆𑀧𑀓𑀭𑀡-𑀅𑀝𑁆𑀞𑀓𑀣𑀸

𑀤𑁂𑀯𑀸𑀢𑀺𑀤𑁂𑀯𑁄 𑀤𑁂𑀯𑀸𑀦𑀁, 𑀤𑁂𑀯𑀤𑀸𑀦𑀯𑀧𑀽𑀚𑀺𑀢𑁄,

𑀤𑁂𑀲𑀬𑀺𑀢𑁆𑀯𑀸 𑀧𑀓𑀭𑀡𑀁, 𑀬𑀫𑀓𑀁 𑀲𑀼𑀤𑁆𑀥𑀲𑀁𑀬𑀫𑁄.

𑀅𑀢𑁆𑀣𑀢𑁄 𑀥𑀫𑁆𑀫𑀢𑁄 𑀘𑁂𑀯, 𑀕𑀫𑁆𑀪𑀻𑀭𑀲𑁆𑀲𑀸𑀣 𑀢𑀲𑁆𑀲 𑀬𑀁,

𑀅𑀦𑀦𑁆𑀢𑀭𑀁 𑀫𑀳𑀸𑀯𑀻𑀭𑁄, 𑀲𑀢𑁆𑀢𑀫𑀁 𑀇𑀲𑀺𑀲𑀢𑁆𑀢𑀫𑁄.

𑀧𑀝𑁆𑀞𑀸𑀦𑀁 𑀦𑀸𑀫 𑀦𑀸𑀫𑁂𑀦, 𑀦𑀸𑀫𑀭𑀽𑀧𑀦𑀺𑀭𑁄𑀥𑀦𑁄,

𑀤𑁂𑀲𑁂𑀲𑀺 𑀅𑀢𑀺𑀕𑀫𑁆𑀪𑀻𑀭-𑀦𑀬𑀫𑀡𑁆𑀟𑀺𑀢𑀤𑁂𑀲𑀦𑀁.

𑀇𑀤𑀸𑀦𑀺 𑀢𑀲𑁆𑀲 𑀲𑀫𑁆𑀧𑀢𑁆𑀢𑁄, 𑀬𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄,

𑀢𑀲𑁆𑀫𑀸 𑀦𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁, 𑀲𑀢𑀁 𑀤𑀼𑀓𑁂 𑀦𑀺𑀲𑁆𑀲𑀸𑀬 𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀢𑁄 𑀧𑀭𑀁 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀕𑀳𑁂𑀢𑁆𑀯𑀸 𑀤𑀼𑀓𑀲𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀢𑀢𑁄 𑀧𑀭𑀁 𑀤𑀼𑀓𑀲𑀢𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀢𑀺𑀓𑁂 𑀧𑀦 𑀢𑀺𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀤𑀼𑀓𑁂 𑀘 𑀤𑀼𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑀺𑀢𑀁. 𑀏𑀯𑀁 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀁 𑀢𑀺𑀓𑀜𑁆𑀘𑁂𑀯 𑀢𑀺𑀓𑀁 𑀤𑀼𑀓𑀜𑁆𑀘;

𑀢𑀺𑀓𑀁 𑀢𑀺𑀓𑀜𑁆𑀘𑁂𑀯 𑀤𑀼𑀓𑀁 𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺.

𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂𑀧𑀺 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀦𑀺𑀲𑁆𑀲𑀸𑀬 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑀲𑀢𑀁 𑀦𑀺𑀲𑁆𑀲𑀸𑀬 𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀤𑀼𑀓𑀲𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑀲𑀢𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀺𑀓𑁂 𑀢𑀺𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀤𑀼𑀓𑁂 𑀤𑀼𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀏𑀯𑀁 𑀧𑀘𑁆𑀘𑀦𑀻𑀬𑁂𑀧𑀺 𑀙𑀳𑀺 𑀦𑀬𑁂𑀳𑀺 𑀧𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀁 𑀢𑀺𑀓𑀜𑁆𑀘𑁂𑀯 𑀢𑀺𑀓𑀁 𑀤𑀼𑀓𑀜𑁆𑀘;

𑀢𑀺𑀓𑀁 𑀢𑀺𑀓𑀜𑁆𑀘𑁂𑀯 𑀤𑀼𑀓𑀁 𑀤𑀼𑀓𑀜𑁆𑀘,

𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺.

𑀢𑀢𑁄 𑀧𑀭𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂𑀧𑀺 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀙 𑀦𑀬𑀸 𑀤𑀲𑁆𑀲𑀺𑀢𑀸. 𑀢𑁂𑀦𑀸𑀳 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀁 𑀢𑀺𑀓𑀜𑁆𑀘𑁂𑀯 𑀢𑀺𑀓𑀁 𑀤𑀼𑀓𑀜𑁆𑀘;

𑀢𑀺𑀓𑀁 𑀢𑀺𑀓𑀜𑁆𑀘𑁂𑀯 𑀤𑀼𑀓𑀁 𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺.

𑀢𑀤𑀦𑀦𑁆𑀢𑀭𑀁 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀫𑁆𑀳𑀺 𑀏𑀢𑁂𑀳𑁂𑀯 𑀙𑀳𑀺 𑀦𑀬𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀢𑁂𑀦𑀸𑀳 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀁 𑀢𑀺𑀓𑀜𑁆𑀘𑁂𑀯 𑀢𑀺𑀓𑀁 𑀤𑀼𑀓𑀜𑁆𑀘;

𑀢𑀺𑀓𑀁 𑀢𑀺𑀓𑀜𑁆𑀘𑁂𑀯 𑀤𑀼𑀓𑀁 𑀤𑀼𑀓𑀜𑁆𑀘,

𑀙 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺.

𑀏𑀯𑀁 𑀅𑀦𑀼𑀮𑁄𑀫𑁂 𑀙 𑀧𑀝𑁆𑀞𑀸𑀦𑀸𑀦𑀺, 𑀧𑀘𑁆𑀘𑀦𑀻𑀬𑁂 𑀙, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀙, 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀙 𑀧𑀝𑁆𑀞𑀸𑀦𑀸𑀦𑀻𑀢𑀺 𑀇𑀤𑀁 ‘‘𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀁 𑀦𑀸𑀫𑀸’’𑀢𑀺 𑀳𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀁 𑀲𑀫𑁄𑀥𑀸𑀦𑀯𑀲𑁂𑀦𑁂𑀢𑀁 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀁 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁, 𑀢𑁂𑀲𑀜𑁆𑀘𑁂𑀯 𑀇𑀫𑀲𑁆𑀲 𑀘 𑀧𑀓𑀭𑀡𑀲𑁆𑀲 𑀦𑀸𑀫𑀢𑁆𑀣𑁄 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀦𑁆𑀢𑀺? 𑀦𑀸𑀦𑀧𑁆𑀧𑀓𑀸𑀭𑀧𑀘𑁆𑀘𑀬𑀝𑁆𑀞𑁂𑀦. ‘𑀧-𑀓𑀸𑀭𑁄’ 𑀳𑀺 𑀦𑀸𑀦𑀧𑁆𑀧𑀓𑀸𑀭𑀢𑁆𑀣𑀁 𑀤𑀻𑀧𑁂𑀢𑀺, 𑀞𑀸𑀦𑀲𑀤𑁆𑀤𑁄 𑀧𑀘𑁆𑀘𑀬𑀢𑁆𑀣𑀁. 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺𑀆𑀤𑀻𑀲𑀼 𑀳𑀺 𑀧𑀘𑁆𑀘𑀬𑁄 𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀇𑀫𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀁 𑀧𑀝𑁆𑀞𑀸𑀦𑀁 𑀦𑀸𑀫. 𑀇𑀫𑁂𑀲𑀁 𑀧𑀦 𑀧𑀝𑁆𑀞𑀸𑀦𑀸𑀦𑀁 𑀲𑀫𑀽𑀳𑀢𑁄 𑀲𑀩𑁆𑀩𑀫𑁆𑀧𑁂𑀢𑀁 𑀧𑀓𑀭𑀡𑀁 𑀧𑀝𑁆𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 𑀓𑁂𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀦𑁆𑀢𑀺? 𑀯𑀺𑀪𑀚𑀦𑀝𑁆𑀞𑁂𑀦. ‘‘𑀧𑀜𑁆𑀜𑀸𑀧𑀦𑀸 𑀧𑀝𑁆𑀞𑀧𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫’’𑀦𑁆𑀢𑀺 (𑀫. 𑀦𑀺. 𑁧.𑁩𑁭𑁧) 𑀆𑀕𑀢𑀝𑁆𑀞𑀸𑀦𑀲𑁆𑀫𑀺𑀜𑁆𑀳𑀺 𑀯𑀺𑀪𑀚𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀇𑀢𑀺 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀢𑁆𑀢𑀸 𑀇𑀫𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀁 𑀧𑀝𑁆𑀞𑀸𑀦𑀁 𑀦𑀸𑀫. 𑀇𑀫𑁂𑀲𑀁 𑀧𑀦 𑀧𑀝𑁆𑀞𑀸𑀦𑀸𑀦𑀁 𑀲𑀫𑀽𑀳𑀢𑁄 𑀲𑀩𑁆𑀩𑀫𑁆𑀧𑁂𑀢𑀁 𑀧𑀓𑀭𑀡𑀁 𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑁄 𑀦𑀬𑁄 𑁋 𑀓𑁂𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀦𑁆𑀢𑀺? 𑀧𑀝𑁆𑀞𑀺𑀢𑀢𑁆𑀣𑁂𑀦. 𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀕𑁄𑀝𑁆𑀞𑀸 𑀧𑀝𑁆𑀞𑀺𑀢𑀕𑀸𑀯𑁄’’𑀢𑀺 (𑀫. 𑀦𑀺. 𑁧.𑁧𑁫𑁬) 𑀆𑀕𑀢𑀝𑁆𑀞𑀸𑀦𑀲𑁆𑀫𑀺𑀜𑁆𑀳𑀺 𑀬𑁂𑀦 𑀧𑀝𑁆𑀞𑀸𑀦𑁂𑀦 𑀧𑀝𑁆𑀞𑀺𑀢𑀕𑀸𑀯𑁄𑀢𑀺 𑀯𑀼𑀢𑁆𑀢𑁄, 𑀢𑀁 𑀅𑀢𑁆𑀣𑀢𑁄 𑀕𑀫𑀦𑀁 𑀳𑁄𑀢𑀺. 𑀇𑀢𑀺 𑀦𑀸𑀢𑀺𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀲𑀼 𑀥𑀫𑁆𑀫𑀲𑀗𑁆𑀕𑀡𑀻𑀆𑀤𑀻𑀲𑀼 𑀅𑀦𑀺𑀲𑁆𑀲𑀗𑁆𑀕𑀕𑀫𑀦𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀓𑀼𑀲𑀮𑀸𑀤𑀻𑀲𑀼 𑀯𑀺𑀢𑁆𑀣𑀸𑀭𑀺𑀢𑀦𑀬𑀮𑀸𑀪𑀢𑁄 𑀦𑀺𑀲𑁆𑀲𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀕𑀫𑀦𑀢𑁆𑀢𑀸 𑀇𑀫𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀦𑁂𑀲𑀼 𑀏𑀓𑁂𑀓𑀁 𑀧𑀝𑁆𑀞𑀸𑀦𑀁 𑀦𑀸𑀫. 𑀇𑀫𑁂𑀲𑀁 𑀧𑀦 𑀧𑀝𑁆𑀞𑀸𑀦𑀸𑀦𑀁 𑀲𑀫𑀽𑀳𑀢𑁄 𑀲𑀩𑁆𑀩𑀫𑁆𑀧𑁂𑀢𑀁 𑀧𑀓𑀭𑀡𑀁 𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀅𑀦𑀼𑀮𑁄𑀫𑀫𑁆𑀳𑀺 𑀢𑀸𑀯 𑀧𑀞𑀫𑀁 𑀢𑀺𑀓𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫. 𑀢𑀲𑁆𑀲 𑀧𑀤𑀘𑁆𑀙𑁂𑀤𑁄 𑁋 𑀢𑀺𑀓𑀸𑀦𑀁 𑀧𑀝𑁆𑀞𑀸𑀦𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀢𑀺𑀓𑀧𑀝𑁆𑀞𑀸𑀦𑀁. 𑀢𑀺𑀓𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀓𑀸 𑀧𑀘𑁆𑀘𑀬𑀸 𑀏𑀢𑀺𑀲𑁆𑀲𑀸 𑀤𑁂𑀲𑀦𑀸𑀬 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂𑀧𑀺 𑀢𑀺𑀓𑀸𑀦𑀁 𑀧𑀝𑁆𑀞𑀸𑀦𑀦𑁆𑀢𑁆𑀯𑁂𑀯 𑀢𑀺𑀓𑀧𑀝𑁆𑀞𑀸𑀦𑀁. 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀢𑀺𑀓𑀸𑀦𑀁 𑀯𑀺𑀪𑀚𑀦𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀯𑀺𑀓𑀧𑁆𑀧𑁂 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑀸𑀬 𑀮𑀤𑁆𑀥𑀯𑀺𑀢𑁆𑀣𑀸𑀭𑀸 𑀢𑀺𑀓𑀸 𑀏𑀯 𑀧𑀝𑁆𑀞𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀗𑁆𑀕𑀕𑀫𑀦𑀪𑀽𑀫𑀻𑀢𑀺 𑀅𑀢𑁆𑀣𑁄. 𑀤𑀼𑀓𑀧𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀅𑀦𑀼𑀮𑁄𑀫𑁂 𑀙𑀧𑀝𑁆𑀞𑀸𑀦𑀸𑀦𑀺 𑀯𑀺𑀤𑀺𑀢𑁆𑀯𑀸 𑀧𑀘𑁆𑀘𑀦𑀻𑀬𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀅𑀦𑀼𑀮𑁄𑀫𑁂, 𑀧𑀘𑁆𑀘𑀦𑀻𑀬𑁂, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂, 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂𑀢𑀺 𑀲𑀫𑀦𑁆𑀢𑀸 𑀙 𑀙 𑀳𑀼𑀢𑁆𑀯𑀸 𑀘𑀢𑀼𑀯𑀻𑀲𑀢𑀺 𑀳𑁄𑀦𑁆𑀢𑀺; 𑀢𑀲𑁆𑀫𑀸 ‘‘𑀘𑀢𑀼𑀯𑀻𑀲𑀢𑀺 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀢𑀺 𑀇𑀫𑁂𑀲𑀁 𑀘𑀢𑀼𑀯𑀻𑀲𑀢𑀺𑀬𑀸 𑀔𑀼𑀤𑁆𑀤𑀓𑀧𑀝𑁆𑀞𑀸𑀦𑀲𑀗𑁆𑀔𑀸𑀢𑀸𑀦𑀁 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀁 𑀲𑀫𑁄𑀥𑀸𑀦𑀯𑀲𑁂𑀦𑁂𑀢𑀁 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑀁 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀁 𑀦𑀸𑀫.

𑀢𑀁 𑀧𑀦𑁂𑀢𑀁 𑀬𑁂 𑀢𑀺𑀓𑀸𑀤𑀬𑁄 𑀦𑀺𑀲𑁆𑀲𑀸𑀬 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀢𑀺𑀓𑀧𑀝𑁆𑀞𑀸𑀦𑀁 𑀤𑀼𑀓𑀧𑀝𑁆𑀞𑀸𑀦𑀁…𑀧𑁂… 𑀤𑀼𑀓𑀤𑀼𑀓𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀬𑁂𑀲𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀢𑁂 𑀢𑀺𑀓𑀸𑀤𑀬𑁄 𑀯𑀺𑀪𑀢𑁆𑀢𑀸 𑀢𑁂 𑀧𑀘𑁆𑀘𑀬𑁂 𑀤𑀲𑁆𑀲𑁂𑀢𑀼𑀁 𑀆𑀤𑀺𑀢𑁄 𑀢𑀸𑀯𑀲𑁆𑀲 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑀯𑀸𑀭𑁄 𑀦𑀸𑀫 𑀯𑀼𑀢𑁆𑀢𑁄; 𑀧𑀘𑁆𑀘𑀬𑀯𑀺𑀪𑀗𑁆𑀕𑀯𑀸𑀭𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀲𑁄 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀢𑁄 𑀤𑀼𑀯𑀺𑀥𑁄. 𑀢𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁄…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀅𑀬𑀁 𑀉𑀤𑁆𑀤𑁂𑀲𑁄.

𑀢𑀢𑁆𑀣 𑀳𑁂𑀢𑀼 𑀘 𑀲𑁄 𑀧𑀘𑁆𑀘𑀬𑁄 𑀘𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄. 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄, 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀳𑁂𑀢𑀽𑀢𑀺 𑀯𑀘𑀦𑀸𑀯𑀬𑀯𑀓𑀸𑀭𑀡𑀫𑀽𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀧𑀝𑀺𑀜𑁆𑀜𑀸 𑀳𑁂𑀢𑀽’’𑀢𑀺𑀆𑀤𑀻𑀲𑀼 𑀳𑀺 𑀮𑁄𑀓𑁂 𑀯𑀘𑀦𑀸𑀯𑀬𑀯𑁄 𑀳𑁂𑀢𑀽𑀢𑀺, 𑀯𑀼𑀘𑁆𑀘𑀢𑀺. 𑀲𑀸𑀲𑀦𑁂 𑀧𑀦 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁬𑁦) 𑀓𑀸𑀭𑀡𑀁. ‘‘𑀢𑀬𑁄 𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀸 𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁫𑁯) 𑀫𑀽𑀮𑀁 𑀳𑁂𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀯𑀘𑀦𑀢𑁆𑀣𑁄 𑁋 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀦𑀁 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀥𑀫𑁆𑀫𑁄 𑀬𑀁 𑀥𑀫𑁆𑀫𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀢𑀺𑀝𑁆𑀞𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀮𑀓𑁆𑀔𑀡𑀢𑁄 𑀧𑀦 𑀉𑀧𑀓𑀸𑀭𑀓𑀮𑀓𑁆𑀔𑀡𑁄 𑀧𑀘𑁆𑀘𑀬𑁄, 𑀬𑁄 𑀳𑀺 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀯𑀸 𑀉𑀧𑁆𑀧𑀢𑁆𑀢𑀺𑀬𑀸 𑀯𑀸 𑀉𑀧𑀓𑀸𑀭𑀓𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀬𑁄, 𑀳𑁂𑀢𑀼; 𑀓𑀸𑀭𑀡𑀁 𑀦𑀺𑀤𑀸𑀦𑀁 𑀲𑀫𑁆𑀪𑀯𑁄, 𑀧𑀪𑀯𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁. 𑀇𑀢𑀺 𑀫𑀽𑀮𑀝𑁆𑀞𑁂𑀦 𑀳𑁂𑀢𑀼, 𑀉𑀧𑀓𑀸𑀭𑀓𑀝𑁆𑀞𑁂𑀦 𑀧𑀘𑁆𑀘𑀬𑁄𑀢𑀺 𑀲𑀗𑁆𑀔𑁂𑀧𑀢𑁄 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄. 𑀲𑁄 𑀳𑀺 𑀲𑀸𑀮𑀺𑀆𑀤𑀻𑀦𑀁 𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀯𑀺𑀬, 𑀫𑀡𑀺𑀧𑁆𑀧𑀪𑀸𑀤𑀻𑀦𑀁 𑀯𑀺𑀬 𑀘 𑀫𑀡𑀺𑀯𑀡𑁆𑀡𑀸𑀤𑀬𑁄 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀓𑁄𑀢𑀺 𑀆𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀦𑁆𑀢𑁂 𑀧𑀦 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺. 𑀦 𑀳𑀺 𑀲𑁄 𑀢𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑀁 𑀲𑀸𑀥𑁂𑀢𑀺, 𑀦 𑀘 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀜𑁆𑀘 𑀯𑀺𑀦𑀸 𑀏𑀢𑁂𑀦 𑀅𑀩𑁆𑀬𑀸𑀓𑀢𑀪𑀸𑀯𑁄 𑀲𑀺𑀤𑁆𑀥𑁄.

𑀲𑀳𑁂𑀢𑀼𑀓𑀸𑀦𑀫𑁆𑀧𑀺 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄 𑀦 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀧𑀝𑀺𑀩𑀤𑁆𑀥𑁄. 𑀬𑀤𑀺 𑀘 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀽𑀲𑀼 𑀲𑀪𑀸𑀯𑀢𑁄𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀲𑀺𑀬𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀅𑀮𑁄𑀪𑁄 𑀓𑀼𑀲𑀮𑁄 𑀯𑀸 𑀲𑀺𑀬𑀸 𑀅𑀩𑁆𑀬𑀸𑀓𑀢𑁄 𑀯𑀸. 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼, 𑀏𑀯𑀁 𑀳𑁂𑀢𑀽𑀲𑀼𑀧𑀺 𑀓𑀼𑀲𑀮𑀸𑀤𑀺𑀢𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑀯𑀲𑁂𑀦 𑀧𑀦 𑀳𑁂𑀢𑀽𑀦𑀁 𑀫𑀽𑀮𑀝𑁆𑀞𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀯𑀲𑁂𑀦 𑀕𑀬𑁆𑀳𑀫𑀸𑀦𑁂 𑀦 𑀓𑀺𑀜𑁆𑀘𑀺 𑀯𑀺𑀭𑀼𑀚𑁆𑀛𑀢𑀺. 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀼𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀣𑀺𑀭𑀸 𑀳𑁄𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀅𑀳𑁂𑀢𑀼𑀓𑀸 𑀧𑀦 𑀢𑀺𑀮𑀩𑀻𑀚𑀓𑀸𑀤𑀺𑀲𑁂𑀯𑀸𑀮𑀸 𑀯𑀺𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸. 𑀇𑀢𑀺 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁄 𑀧𑀭𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀲𑁄 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀆𑀭𑀪𑀺𑀢𑁆𑀯𑀸𑀧𑀺 ‘‘𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀑𑀲𑀸𑀧𑀺𑀢𑀢𑁆𑀢𑀸 𑀦 𑀓𑁄𑀘𑀺 𑀥𑀫𑁆𑀫𑁄 𑀦 𑀳𑁄𑀢𑀺. 𑀬𑀣𑀸 𑀳𑀺 𑀤𑀼𑀩𑁆𑀩𑀮𑁄 𑀧𑀼𑀭𑀺𑀲𑁄 𑀤𑀡𑁆𑀟𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀆𑀮𑀫𑁆𑀩𑀺𑀢𑁆𑀯𑀸𑀯 𑀉𑀝𑁆𑀞𑀳𑀢𑀺 𑀘𑁂𑀯 𑀢𑀺𑀝𑁆𑀞𑀢𑀺 𑀘, 𑀏𑀯𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀆𑀭𑀩𑁆𑀪𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘. 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀚𑁂𑀝𑁆𑀞𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄. 𑀲𑁄 𑀲𑀳𑀚𑀸𑀢𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀙𑀦𑁆𑀤𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀲𑀗𑁆𑀔𑀸𑀢𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦𑁄 𑀘 𑀔𑁄 𑀏𑀓𑀢𑁄. 𑀬𑀤𑀸 𑀳𑀺 𑀙𑀦𑁆𑀤𑀁 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀤𑀸 𑀙𑀦𑁆𑀤𑁄𑀯 𑀅𑀥𑀺𑀧𑀢𑀺, 𑀦 𑀇𑀢𑀭𑁂. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀁 𑀧𑀦 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀭𑀽𑀧𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀲𑁄 𑀦𑁂𑀲𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀁 𑀬𑀁 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸 𑀬𑁂 𑀬𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀢𑁂 𑀢𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀲𑀫𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄. 𑀇𑀤𑀜𑁆𑀘 𑀧𑀘𑁆𑀘𑀬𑀤𑁆𑀯𑀬𑀁 𑀩𑀳𑀼𑀥𑀸 𑀧𑀧𑀜𑁆𑀘𑀬𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄 𑁋 𑀬𑁄 𑀳𑀺 𑀏𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀸 𑀫𑀦𑁄𑀥𑀸𑀢𑀼, 𑀫𑀦𑁄𑀥𑀸𑀢𑀼𑀅𑀦𑀦𑁆𑀢𑀭𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺𑀆𑀤𑀺 𑀘𑀺𑀢𑁆𑀢𑀦𑀺𑀬𑀫𑁄, 𑀲𑁄 𑀬𑀲𑁆𑀫𑀸 𑀧𑀼𑀭𑀺𑀫𑀘𑀺𑀢𑁆𑀢𑀯𑀲𑁂𑀦𑁂𑀯 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑁄𑀯 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺.

𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀲𑁆𑀯𑁂𑀯 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄. 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀦𑀸𑀦𑀁, 𑀉𑀧𑀘𑀬𑀲𑀦𑁆𑀢𑀢𑀺𑀆𑀤𑀻𑀲𑀼 𑀯𑀺𑀬, 𑀅𑀥𑀺𑀯𑀘𑀦𑀦𑀺𑀭𑀼𑀢𑁆𑀢𑀺𑀤𑀼𑀓𑀸𑀤𑀻𑀲𑀼 𑀯𑀺𑀬 𑀘, 𑀅𑀢𑁆𑀣𑀢𑁄 𑀧𑀦 𑀦𑀸𑀦𑀁 𑀦𑀢𑁆𑀣𑀺. 𑀬𑀫𑁆𑀧𑀺 ‘‘𑀅𑀤𑁆𑀥𑀸𑀦𑀦𑁆𑀢𑀭𑀢𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄’’𑀢𑀺 𑀆𑀘𑀭𑀺𑀬𑀸𑀦𑀁 𑀫𑀢𑀁, 𑀢𑀁 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀳𑀺 𑀯𑀺𑀭𑀼𑀚𑁆𑀛𑀢𑀺. 𑀬𑀫𑁆𑀧𑀺 𑀢𑀢𑁆𑀣 𑀯𑀤𑀦𑁆𑀢𑀺 𑁋 ‘‘𑀥𑀫𑁆𑀫𑀸𑀦𑀁 𑀲𑀫𑀼𑀝𑁆𑀞𑀸𑀧𑀦𑀲𑀫𑀢𑁆𑀣𑀢𑀸 𑀦 𑀧𑀭𑀺𑀳𑀸𑀬𑀢𑀺, 𑀪𑀸𑀯𑀦𑀸𑀩𑀮𑁂𑀦 𑀧𑀦 𑀯𑀸𑀭𑀺𑀢𑀢𑁆𑀢𑀸 𑀥𑀫𑁆𑀫𑀸 𑀲𑀫𑀦𑀦𑁆𑀢𑀭𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺, 𑀢𑀫𑁆𑀧𑀺 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀅𑀪𑀸𑀯𑀫𑁂𑀯 𑀲𑀸𑀥𑁂𑀢𑀺. 𑀪𑀸𑀯𑀦𑀸𑀩𑀮𑁂𑀦 𑀳𑀺 𑀢𑀢𑁆𑀣 𑀓𑀸𑀮𑀸𑀦𑀦𑁆𑀢𑀭𑀢𑀸 𑀦𑀢𑁆𑀣𑀻𑀢𑀺, 𑀫𑀬𑀫𑁆𑀧𑀺 𑀏𑀢𑀤𑁂𑀯 𑀯𑀤𑀸𑀫. 𑀬𑀲𑁆𑀫𑀸 𑀘 𑀓𑀸𑀮𑀸𑀦𑀦𑁆𑀢𑀭𑀢𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀦 𑀬𑀼𑀚𑁆𑀚𑀢𑀺. 𑀓𑀸𑀮𑀸𑀦𑀦𑁆𑀢𑀭𑀢𑀸𑀬 𑀳𑀺 𑀢𑁂𑀲𑀁 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀮𑀤𑁆𑀥𑀺. 𑀢𑀲𑁆𑀫𑀸 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀩𑁆𑀬𑀜𑁆𑀚𑀦𑀫𑀢𑁆𑀢𑀢𑁄𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀦 𑀅𑀢𑁆𑀣𑀢𑁄. 𑀓𑀣𑀁? 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀺 𑀳𑀺 𑀅𑀦𑀦𑁆𑀢𑀭𑀸. 𑀲𑀡𑁆𑀞𑀸𑀦𑀸𑀪𑀸𑀯𑀢𑁄 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀸𑀢𑀺 𑀲𑀫𑀦𑀦𑁆𑀢𑀭𑀸.

𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀧𑀓𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬. 𑀲𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁…𑀧𑁂… 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁…𑀧𑁂… 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁…𑀧𑁂… 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁…𑀧𑁂… 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀓𑀺𑀜𑁆𑀘𑀺𑀓𑀸𑀮𑁂 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀓𑀺𑀜𑁆𑀘𑀺 𑀓𑀸𑀮𑁂 𑀦 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀇𑀤𑀁 𑀳𑀤𑀬𑀯𑀢𑁆𑀣𑀼𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀅𑀜𑁆𑀜𑀫𑀜𑁆𑀜𑀁 𑀉𑀧𑁆𑀧𑀸𑀤𑀦𑀼𑀧𑀢𑁆𑀣𑀫𑁆𑀪𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄. 𑀅𑀜𑁆𑀜𑀫𑀜𑁆𑀜𑀼𑀧𑀢𑁆𑀣𑀫𑁆𑀪𑀓𑀁 𑀢𑀺𑀤𑀡𑁆𑀟𑀁 𑀯𑀺𑀬. 𑀲𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸…𑀧𑁂… 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀅𑀥𑀺𑀝𑁆𑀞𑀸𑀦𑀸𑀓𑀸𑀭𑁂𑀦 𑀦𑀺𑀲𑁆𑀲𑀬𑀸𑀓𑀸𑀭𑁂𑀦 𑀘 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀢𑀭𑀼𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀁 𑀧𑀣𑀯𑀻𑀧𑀝𑀸𑀤𑀬𑁄 𑀯𑀺𑀬. 𑀲𑁄 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀲𑀳𑀚𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀙𑀝𑁆𑀞𑁄 𑀧𑀦𑁂𑀢𑁆𑀣 𑀓𑁄𑀝𑁆𑀞𑀸𑀲𑁄 ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑁄.

𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀥 𑀧𑀦 𑀅𑀬𑀁 𑀢𑀸𑀯 𑀯𑀘𑀦𑀢𑁆𑀣𑁄 𑁋 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑁂𑀦 𑀦𑀺𑀲𑁆𑀲𑀺𑀢𑁄, 𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦𑀺𑀲𑁆𑀲𑀬𑁄. 𑀬𑀣𑀸 𑀧𑀦 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄, 𑀏𑀯𑀁 𑀪𑀼𑀲𑁄 𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑁄. 𑀩𑀮𑀯𑀓𑀸𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 𑀩𑀮𑀯𑀓𑀸𑀭𑀡𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 ‘‘𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀲𑁂𑀓𑁆𑀔𑀸 𑀕𑁄𑀢𑁆𑀭𑀪𑀼𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀯𑁄𑀤𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀲𑁂𑀓𑁆𑀔𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸 𑀯𑀺𑀪𑀢𑁆𑀢𑁄. 𑀢𑀢𑁆𑀣 𑀬𑀁 𑀆𑀭𑀫𑁆𑀫𑀡𑀁 𑀕𑀭𑀼𑀁 𑀓𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦𑀺𑀬𑀫𑀢𑁄 𑀢𑁂𑀲𑀁 𑀆𑀭𑀫𑁆𑀫𑀡𑁂𑀲𑀼 𑀩𑀮𑀯𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀇𑀢𑀺 𑀕𑀭𑀼𑀓𑀸𑀢𑀩𑁆𑀩𑀫𑀢𑁆𑀢𑀝𑁆𑀞𑁂𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀧𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀸𑀦𑀢𑁆𑀢𑀁 𑀅𑀓𑀢𑁆𑀯𑀸𑀯 𑀯𑀺𑀪𑀢𑁆𑀢𑁄. 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑁂 𑀧𑀦 𑀦𑁂𑀲𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀦𑁆𑀢𑀭𑀲𑁆𑀲 𑀘 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀲𑁆𑀲 𑀘 𑀆𑀕𑀢𑀢𑁆𑀢𑀸 𑀦𑀺𑀓𑁆𑀔𑁂𑀧𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀲𑁄𑀧𑀺 𑀅𑀢𑁆𑀣𑀢𑁄 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸𑀬 𑀅𑀦𑀦𑁆𑀢𑀭𑀢𑀸 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀘 𑀧𑀘𑁆𑀙𑀺𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂 𑀩𑀮𑀯𑀢𑀸𑀬 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀯𑀺𑀦𑀸𑀧𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀏𑀯𑀁 𑀅𑀦𑀦𑁆𑀢𑀭𑀘𑀺𑀢𑁆𑀢𑀁, 𑀯𑀺𑀦𑀸 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀅𑀦𑀼𑀭𑀽𑀧𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄, 𑀩𑀮𑀯𑀓𑀸𑀭𑀡𑀯𑀲𑁂𑀦 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀫𑁂𑀢𑁂𑀲𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀦 𑀧𑀓𑀢𑁄 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑁄 𑀦𑀸𑀫 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑀺𑀧𑁆𑀨𑀸𑀤𑀺𑀢𑁄 𑀯𑀸 𑀲𑀤𑁆𑀥𑀸𑀲𑀻𑀮𑀸𑀤𑀺; 𑀉𑀧𑀲𑁂𑀯𑀺𑀢𑁄 𑀯𑀸 𑀉𑀢𑀼𑀪𑁄𑀚𑀦𑀸𑀤𑀺. 𑀧𑀓𑀢𑀺𑀬𑀸𑀬𑁂𑀯 𑀯𑀸 𑀉𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄, 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 ‘‘𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀻𑀮𑀁… 𑀲𑀼𑀢𑀁… 𑀘𑀸𑀕𑀁… 𑀧𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀤𑁆𑀥𑀸… 𑀲𑀻𑀮𑀁… 𑀲𑀼𑀢𑀁… 𑀘𑀸𑀕𑁄… 𑀧𑀜𑁆𑀜𑀸 𑀲𑀤𑁆𑀥𑀸𑀬… 𑀲𑀻𑀮𑀲𑁆𑀲… 𑀲𑀼𑀢𑀲𑁆𑀲… 𑀘𑀸𑀕𑀲𑁆𑀲… 𑀧𑀜𑁆𑀜𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀓𑁄 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀇𑀫𑁂 𑀲𑀤𑁆𑀥𑀸𑀤𑀬𑁄 𑀧𑀓𑀢𑀸 𑀘𑁂𑀯 𑀩𑀮𑀯𑀓𑀸𑀭𑀡𑀝𑁆𑀞𑁂𑀦 𑀉𑀧𑀦𑀺𑀲𑁆𑀲𑀬𑀸 𑀘𑀸𑀢𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺.

𑀧𑀞𑀫𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀣𑀸𑀭𑀫𑁆𑀫𑀡𑀳𑀤𑀬𑀯𑀢𑁆𑀣𑀼𑀯𑀲𑁂𑀦 𑀏𑀓𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑀤𑁆𑀤… 𑀕𑀦𑁆𑀥… 𑀭𑀲… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀓𑀺𑀜𑁆𑀘𑀺 𑀓𑀸𑀮𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀓𑀺𑀜𑁆𑀘𑀺 𑀓𑀸𑀮𑁂 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀧𑀼𑀭𑁂𑀚𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀅𑀭𑀽𑀧𑀥𑀫𑁆𑀫𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄, 𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸𑀘𑁂𑀢𑀦𑀸 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑀆𑀲𑁂𑀯𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑀸𑀦𑀁 𑀧𑀕𑀼𑀡𑀩𑀮𑀯𑀪𑀸𑀯𑀸𑀬 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄, 𑀕𑀦𑁆𑀣𑀸𑀤𑀻𑀲𑀼 𑀧𑀼𑀭𑀺𑀫𑀸𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀯𑀺𑀬. 𑀲𑁄 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀓𑀼𑀲𑀮𑀸…𑀧𑁂… 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀘𑀺𑀢𑁆𑀢𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀺𑀭𑀺𑀬𑀸𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀓𑀫𑁆𑀫𑀧𑀘𑁆𑀘𑀬𑁄. 𑀲𑁄 𑀦𑀸𑀦𑀸𑀓𑁆𑀔𑀡𑀺𑀓𑀸𑀬 𑀘𑁂𑀯 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬 𑀲𑀳𑀚𑀸𑀢𑀸𑀬 𑀘 𑀲𑀩𑁆𑀩𑀸𑀬𑀧𑀺 𑀘𑁂𑀢𑀦𑀸𑀬 𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁 𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑁂𑀦 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀬 𑀉𑀧𑀓𑀸𑀭𑀓𑁄 𑀯𑀺𑀧𑀸𑀓𑀥𑀫𑁆𑀫𑁄 𑀯𑀺𑀧𑀸𑀓𑀧𑀘𑁆𑀘𑀬𑁄. 𑀲𑁄 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁, 𑀲𑀩𑁆𑀩𑀢𑁆𑀣 𑀘 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸𑀳 𑁋 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁, 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄…𑀧𑁂… 𑀤𑁆𑀯𑁂 𑀔𑀦𑁆𑀥𑀸 𑀤𑁆𑀯𑀺𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀬𑀣𑀸𑀳 𑁋 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀼𑀢𑁆𑀢𑀁.

𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀉𑀧𑀓𑀸𑀭𑀓𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸 𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀢𑀢𑁆𑀣 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀬𑁄 𑀧𑀜𑁆𑀘 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯, 𑀲𑁂𑀲𑀸 𑀭𑀽𑀧𑀸𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀼𑀢𑁆𑀢𑀁.

𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸𑀦𑀺 𑀞𑀧𑁂𑀢𑁆𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀤𑁆𑀯𑀬𑀁 𑀲𑀩𑁆𑀩𑀸𑀦𑀺𑀧𑀺 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀺 𑀲𑀢𑁆𑀢 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀧𑀘𑁆𑀘𑀬𑁄. 𑀬𑀣𑀸𑀳 𑁋 𑀛𑀸𑀦𑀗𑁆𑀕𑀸𑀦𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀼𑀢𑁆𑀢𑀁.

𑀬𑀢𑁄 𑀢𑀢𑁄 𑀯𑀸 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑀸𑀦𑀺 𑀓𑀼𑀲𑀮𑀸𑀤𑀺𑀪𑁂𑀤𑀸𑀦𑀺 𑀤𑁆𑀯𑀸𑀤𑀲 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀧𑀘𑁆𑀘𑀬𑁄. 𑀬𑀣𑀸𑀳 𑁋 ‘‘𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. 𑀦 𑀏𑀢𑁂 𑀧𑀦 𑀤𑁆𑀯𑁂𑀧𑀺 𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀬𑀣𑀸𑀲𑀗𑁆𑀔𑁆𑀬𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀲𑀗𑁆𑀔𑀸𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀸 𑀅𑀭𑀽𑀧𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀬𑀣𑀸𑀳 𑁋 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺.

𑀏𑀓𑀯𑀢𑁆𑀣𑀼𑀓𑀸𑀤𑀺𑀪𑀸𑀯𑀸𑀦𑀼𑀧𑀕𑀫𑁂𑀦 𑀉𑀧𑀓𑀸𑀭𑀓𑀸 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁, 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀻𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁄 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀅𑀩𑁆𑀬𑀸𑀓𑀢𑀧𑀤𑀲𑁆𑀲 𑀧𑀦 𑀲𑀳𑀚𑀸𑀢𑀯𑀺𑀪𑀗𑁆𑀕𑁂 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲, 𑀯𑀢𑁆𑀣𑀼 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑁂𑀚𑀸𑀢𑀁 𑀧𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀯𑀢𑁆𑀣𑀼𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳 𑁋 𑀧𑀼𑀭𑁂𑀚𑀸𑀢𑀁 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀔𑀦𑁆𑀥𑀸𑀦𑀁 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁, 𑀯𑀢𑁆𑀣𑀼 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑀓𑁆𑀔𑀡𑁂𑀦 𑀅𑀢𑁆𑀣𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀢𑀲𑁆𑀲 𑀅𑀭𑀽𑀧𑀓𑁆𑀔𑀦𑁆𑀥𑀫𑀳𑀸𑀪𑀽𑀢𑀦𑀸𑀫𑀭𑀽𑀧𑀘𑀺𑀢𑁆𑀢𑀘𑁂𑀢𑀲𑀺𑀓𑀫𑀳𑀸𑀪𑀽𑀢𑀸𑀬𑀢𑀦𑀯𑀢𑁆𑀣𑀼𑀯𑀲𑁂𑀦 𑀲𑀢𑁆𑀢𑀥𑀸 𑀫𑀸𑀢𑀺𑀓𑀸 𑀦𑀺𑀓𑁆𑀔𑀺𑀢𑁆𑀢𑀸. 𑀬𑀣𑀸𑀳 𑁋 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁, 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀁, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁, 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸…𑀧𑁂… 𑀓𑀸𑀬𑀸𑀬𑀢𑀦𑀁…𑀧𑁂… 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀦𑁄𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀺, 𑀢𑀁 𑀭𑀽𑀧𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀲𑀳𑀚𑀸𑀢𑀁, 𑀧𑀼𑀭𑁂𑀚𑀸𑀢𑀁, 𑀧𑀘𑁆𑀙𑀸𑀚𑀸𑀢𑀁, 𑀆𑀳𑀸𑀭𑀁, 𑀇𑀦𑁆𑀤𑁆𑀭𑀺𑀬𑀦𑁆𑀢𑀺𑀧𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀚𑀸𑀢𑁂 𑀢𑀸𑀯 ‘‘𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀧𑀼𑀭𑁂𑀚𑀸𑀢𑁂 𑀧𑀼𑀭𑁂𑀚𑀸𑀢𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀧𑀘𑁆𑀙𑀸𑀚𑀸𑀢𑁂 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑁂𑀲𑀼 𑀧𑀦 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺.

𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀲𑁆𑀲 𑀤𑀸𑀦𑁂𑀦 𑀉𑀧𑀓𑀸𑀭𑀓𑀸 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀅𑀭𑀽𑀧𑀥𑀫𑁆𑀫𑀸 𑀦𑀢𑁆𑀣𑀺𑀧𑀘𑁆𑀘𑀬𑁄. 𑀬𑀣𑀸𑀳 𑁋 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀢𑁂 𑀏𑀯 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀯𑀺𑀕𑀢𑀧𑀘𑁆𑀘𑀬𑁄. 𑀬𑀣𑀸𑀳 𑁋 𑀲𑀫𑀦𑀦𑁆𑀢𑀭𑀯𑀺𑀕𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀅𑀢𑁆𑀣𑀺𑀧𑀘𑁆𑀘𑀬𑀥𑀫𑁆𑀫𑀸 𑀏𑀯 𑀅𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑁆𑀢𑀸 𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀧𑀦 𑀢𑀣𑀸 𑀯𑀺𑀦𑁂𑀢𑀩𑁆𑀩𑀯𑁂𑀦𑁂𑀬𑁆𑀬𑀯𑀲𑁂𑀦 𑀯𑀸 𑀅𑀬𑀁 𑀤𑀼𑀓𑁄 𑀯𑀼𑀢𑁆𑀢𑁄; 𑀲𑀳𑁂𑀢𑀼𑀓𑀤𑀼𑀓𑀁 𑀯𑀢𑁆𑀯𑀸𑀧𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀯𑀺𑀬𑀸𑀢𑀺.

𑀇𑀫𑁂𑀲𑀼 𑀧𑀦 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑁋

𑀥𑀫𑁆𑀫𑀢𑁄 𑀓𑀸𑀮𑀢𑁄 𑀘𑁂𑀯, 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄;

𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀘𑁂𑀯, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀥𑀫𑁆𑀫𑀢𑁄𑀢𑀺 𑁋 𑀇𑀫𑁂𑀲𑀼 𑀳𑀺 𑀧𑀘𑁆𑀘𑀬𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑁄 𑀢𑀸𑀯 𑀦𑀸𑀫𑀭𑀽𑀧𑀥𑀫𑁆𑀫𑁂𑀲𑀼 𑀦𑀸𑀫𑀥𑀫𑁆𑀫𑁂𑀓𑀤𑁂𑀲𑁄. 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀲𑀤𑁆𑀥𑀺𑀁 𑀧𑀜𑁆𑀜𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂𑀦 𑀲𑀩𑁆𑀩𑁂𑀧𑀺 𑀦𑀸𑀫𑀭𑀽𑀧𑀥𑀫𑁆𑀫𑀸. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀲𑀳𑀚𑀸𑀢𑀸𑀥𑀺𑀧𑀢𑀺 𑀦𑀸𑀫𑀥𑀫𑁆𑀫𑁂𑀓𑀤𑁂𑀲𑁄, 𑀢𑀣𑀸 𑀓𑀫𑁆𑀫𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀲𑀩𑁆𑀩𑁂𑀧𑀺 𑀕𑀭𑀼𑀓𑀸𑀢𑀩𑁆𑀩𑀸 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀙𑀸𑀚𑀸𑀢𑀆𑀲𑁂𑀯𑀦𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀦𑀸𑀫𑀥𑀫𑁆𑀫𑀸𑀯. 𑀦𑀺𑀩𑁆𑀩𑀸𑀦𑀲𑁆𑀲 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀦𑀸𑀫𑀥𑀫𑁆𑀫𑁂𑀓𑀤𑁂𑀲𑁄𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑁂𑀓𑀤𑁂𑀲𑁄. 𑀲𑁂𑀲𑀸 𑀬𑀣𑀸𑀮𑀸𑀪𑀯𑀲𑁂𑀦 𑀦𑀸𑀫𑀭𑀽𑀧𑀥𑀫𑁆𑀫𑀸𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀥𑀫𑁆𑀫𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀸𑀮𑀢𑁄𑀢𑀺 𑁋

𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑁂𑀢𑁆𑀣, 𑀧𑀘𑁆𑀘𑀬𑀸 𑀤𑀲 𑀧𑀜𑁆𑀘 𑀘;

𑀅𑀢𑀻𑀢𑀸 𑀏𑀯 𑀧𑀜𑁆𑀘𑁂𑀓𑁄, 𑀢𑁂 𑀓𑀸𑀮𑁂 𑀤𑁆𑀯𑁂𑀧𑀺 𑀦𑀺𑀲𑁆𑀲𑀺𑀢𑁄;

𑀢𑀬𑁄 𑀢𑀺𑀓𑀸𑀮𑀺𑀓𑀸 𑀘𑁂𑀯, 𑀯𑀺𑀫𑀼𑀢𑁆𑀢𑀸 𑀘𑀸𑀧𑀺 𑀓𑀸𑀮𑀢𑁄𑀢𑀺.

𑀏𑀢𑁂𑀲𑀼 𑀳𑀺 𑀳𑁂𑀢𑀼𑀧𑀘𑁆𑀘𑀬𑁄 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀧𑀘𑁆𑀘𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀯 𑀳𑁄𑀦𑁆𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁄𑀢𑀺 𑀇𑀫𑁂 𑀧𑀜𑁆𑀘 𑀅𑀢𑀻𑀢𑀸𑀬𑁂𑀯 𑀳𑁄𑀦𑁆𑀢𑀺. 𑀏𑀓𑁄 𑀧𑀦 𑀓𑀫𑁆𑀫𑀧𑀘𑁆𑀘𑀬𑁄, 𑀲𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑁂 𑀤𑁆𑀯𑁂𑀧𑀺 𑀓𑀸𑀮𑁂 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺. 𑀲𑁂𑀲𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀫𑁂 𑀢𑀬𑁄 𑀧𑀘𑁆𑀘𑀬𑀸 𑀢𑁂𑀓𑀸𑀮𑀺𑀓𑀸𑀧𑀺 𑀳𑁄𑀦𑁆𑀢𑀺, 𑀧𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀸𑀮𑀯𑀺𑀫𑀼𑀢𑁆𑀢𑀸𑀧𑀻𑀢𑀺. 𑀏𑀯𑀫𑁂𑀢𑁆𑀣 𑀓𑀸𑀮𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀢𑀺 𑀇𑀫𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺.

𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸.

𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄

𑁧. 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀲𑀩𑁆𑀩𑁂𑀧𑀺 𑀢𑁂 𑀧𑀘𑁆𑀘𑀬𑁂 𑀉𑀤𑁆𑀤𑀺𑀝𑁆𑀞𑀧𑀝𑀺𑀧𑀸𑀝𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀧𑀞𑀫𑀁 𑀪𑀸𑀚𑁂𑀢𑀩𑁆𑀩𑀲𑁆𑀲 𑀧𑀤𑀼𑀤𑁆𑀥𑀸𑀭𑁄. 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀞𑀫𑀁 𑀪𑀸𑀚𑁂𑀢𑀩𑁆𑀩𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑁋 𑀬𑁄 𑀧𑀘𑁆𑀘𑀬𑀼𑀤𑁆𑀤𑁂𑀲𑁂 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄, 𑀲𑁄 𑀦𑀺𑀤𑁆𑀤𑁂𑀲𑀢𑁄 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀘𑁆𑀘𑀬𑁂𑀲𑀼 𑀪𑀸𑀚𑁂𑀢𑀩𑁆𑀩𑀲𑁆𑀲 𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀧𑀘𑁆𑀘𑀬𑀲𑁆𑀲 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀯𑀯𑀢𑁆𑀣𑀸𑀧𑀦𑀢𑁄. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬. 𑀏𑀯𑀁 𑀲𑀦𑁆𑀢𑁂 𑀅𑀲𑀼𑀓𑁄 𑀦𑀸𑀫 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀧𑀘𑁆𑀘𑀬𑀯𑀯𑀢𑁆𑀣𑀸𑀦𑀁 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀅𑀣𑀸𑀧𑀺 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀳𑁂𑀢𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄𑀧𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀬𑁂𑀯, 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀸𑀤𑀬𑁄𑀧𑀺. 𑀢𑀢𑁆𑀣 𑀅𑀬𑀁 𑀳𑁂𑀢𑀼 𑀅𑀲𑀼𑀓𑀲𑁆𑀲 𑀦𑀸𑀫 𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀢𑀲𑁆𑀫𑀸 𑀧𑀘𑁆𑀘𑀬𑀜𑁆𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀯𑀯𑀢𑁆𑀣𑀸𑀧𑁂𑀦𑁆𑀢𑁄 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑁄 𑀳𑁂𑀢𑀼 𑀲𑀫𑁆𑀧𑀬𑀼𑀢𑁆𑀢𑀓𑁄, 𑀲𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀢𑀢𑁆𑀭𑀸𑀧𑀺 ‘‘𑀧𑀘𑁆𑀘𑀬𑁄’’𑀢𑀺 𑀅𑀯𑀢𑁆𑀯𑀸 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦𑀸’’𑀢𑀺 𑀯𑀘𑀦𑀁 𑀳𑁂𑀢𑀼𑀦𑁄 𑀅𑀜𑁆𑀜𑀣𑀸 𑀧𑀘𑁆𑀘𑀬𑀪𑀸𑀯𑀧𑀝𑀺𑀲𑁂𑀥𑀦𑀢𑁆𑀣𑀁. 𑀅𑀬𑀜𑁆𑀳𑀺 𑀳𑁂𑀢𑀼 𑀳𑁂𑀢𑀼𑀧𑀘𑁆𑀘𑀬𑁂𑀦𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦𑀸𑀧𑀺. 𑀢𑀢𑁆𑀭𑀸𑀲𑁆𑀲 𑀬𑁆𑀯𑀸𑀬𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑀪𑀸𑀯𑁄, 𑀢𑀲𑁆𑀲 𑀧𑀝𑀺𑀲𑁂𑀥𑀦𑀢𑁆𑀣𑀁 𑀳𑁂𑀢𑀼𑀧𑀘𑁆𑀘𑀬𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑀲𑁆𑀫𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀅𑀧𑀸𑀓𑀝𑀢𑁆𑀢𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀬𑁂𑀦 𑀢𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀬𑀁 𑀦𑀸𑀫 𑀲𑁄𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀅𑀧𑀸𑀓𑀝𑁄. 𑀢𑀲𑁆𑀲 𑀅𑀧𑀸𑀓𑀝𑀢𑁆𑀢𑀸 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀢𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀲𑀭𑀽𑀧𑀢𑁄𑀯 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀧𑀸𑀓𑀝𑀢𑁆𑀢𑀸 𑀢𑀁-𑀕𑀳𑀡𑀁 𑀓𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀢𑁂 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁, 𑀳𑁂𑀢𑀼𑀢𑁄 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀕𑀡𑁆𑀳𑀸𑀢𑀺. 𑀓𑀺𑀁 𑀧𑀦 𑀢𑀁 𑀘𑀺𑀢𑁆𑀢𑀢𑁄 𑀅𑀜𑁆𑀜𑁂𑀦𑀧𑀺 𑀲𑀫𑀼𑀝𑁆𑀞𑀸𑀢𑀻𑀢𑀺? 𑀆𑀫, 𑀲𑀫𑀼𑀝𑁆𑀞𑀸𑀢𑀺. 𑀲𑀩𑁆𑀩𑁂𑀧𑀺 𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀮𑁄𑀓𑀺𑀬𑀥𑀫𑁆𑀫𑀤𑁂𑀲𑀦𑀸𑀬𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀅𑀥𑀺𑀓𑀪𑀸𑀯𑀢𑁄 𑀢𑀣𑀸𑀯𑀺𑀥𑀁 𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.

𑀬𑀤𑀺 𑀏𑀯𑀁 𑀇𑀥𑀸𑀧𑀺 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑀢𑁄. 𑀧𑀜𑁆𑀳𑀸𑀯𑀸𑀭𑀲𑁆𑀫𑀺𑀜𑁆𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀆𑀕𑀢𑀁’’. 𑀢𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀇𑀥 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀅𑀯𑀢𑁆𑀯𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀘𑀺𑀢𑁆𑀢𑀚𑀭𑀽𑀧𑀁 𑀅𑀚𑀦𑀬𑀫𑀸𑀦𑀸𑀧𑀺 𑀢𑁂 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀚𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀜𑁆𑀜𑁂𑀲𑀼𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀲𑁆𑀫𑀸 𑀧𑀦𑀸𑀬𑀁 𑀳𑁂𑀢𑀼 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀯𑀢𑁆𑀢𑁂𑀢𑀺? 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬. 𑀧𑀝𑀺𑀲𑀦𑁆𑀥𑀺𑀬𑀜𑁆𑀳𑀺 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀧𑀯𑀢𑁆𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀘𑀺𑀢𑁆𑀢𑀁 𑀘𑀺𑀢𑁆𑀢𑀚𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀦𑀺𑀧𑀺 𑀯𑀺𑀦𑀸 𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁩𑁯). 𑀧𑀯𑀢𑁆𑀢𑀺𑀬𑀁 𑀧𑀦 𑀢𑁂𑀲𑀁 𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑀫𑁆𑀫𑀧𑀝𑀺𑀩𑀤𑁆𑀥𑀸𑀯 𑀧𑀯𑀢𑁆𑀢𑀺, 𑀦 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸. 𑀅𑀯𑀺𑀚𑁆𑀚𑀫𑀸𑀦𑁂 𑀘𑀸𑀧𑀺 𑀘𑀺𑀢𑁆𑀢𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯.

𑀓𑀲𑁆𑀫𑀸 𑀧𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀺𑀢𑁆𑀢𑀁 𑀘𑀺𑀢𑁆𑀢𑀚𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑀸𑀬 𑀘𑁂𑀯 𑀅𑀧𑁆𑀧𑀢𑀺𑀝𑁆𑀞𑀺𑀢𑀯𑀢𑁆𑀣𑀼𑀢𑀸𑀬 𑀘 𑀤𑀼𑀩𑁆𑀩𑀮𑀢𑁆𑀢𑀸. 𑀢𑀜𑁆𑀳𑀺 𑀢𑀤𑀸 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀁 𑀅𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀢𑁆𑀢𑀸 𑀘 𑀅𑀧𑁆𑀧𑀢𑀺𑀝𑁆𑀞𑀺𑀢𑀯𑀢𑁆𑀣𑀼𑀓𑀦𑁆𑀢𑀺 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀢𑀲𑁆𑀫𑀸 𑀧𑀧𑀸𑀢𑁂 𑀧𑀢𑀺𑀢𑀫𑀢𑁆𑀢𑁄 𑀧𑀼𑀭𑀺𑀲𑁄 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀓𑀸𑀢𑀼𑀁 𑀯𑀺𑀬 𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀓𑀫𑁆𑀫𑀚𑀭𑀽𑀧𑀫𑁂𑀯 𑀧𑀦𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀢𑀜𑁆𑀘 𑀓𑀫𑁆𑀫𑀚𑀭𑀽𑀧𑀲𑁆𑀲𑁂𑀯 𑀩𑀻𑀚𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀓𑀫𑁆𑀫𑀁 𑀧𑀦𑀲𑁆𑀲 𑀔𑁂𑀢𑁆𑀢𑀲𑀤𑀺𑀲𑀁, 𑀓𑀺𑀮𑁂𑀲𑀸 𑀆𑀧𑀲𑀤𑀺𑀲𑀸. 𑀢𑀲𑁆𑀫𑀸 𑀲𑀦𑁆𑀢𑁂𑀧𑀺 𑀔𑁂𑀢𑁆𑀢𑁂 𑀆𑀧𑁂 𑀘 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀁 𑀩𑀻𑀚𑀸𑀦𑀼𑀪𑀸𑀯𑁂𑀦 𑀭𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀯𑀺𑀬 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀭𑀽𑀧𑀓𑀸𑀬𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀩𑀻𑀚𑁂 𑀧𑀦 𑀯𑀺𑀕𑀢𑁂𑀧𑀺 𑀧𑀣𑀯𑀻𑀆𑀧𑀸𑀦𑀼𑀪𑀸𑀯𑁂𑀦 𑀭𑀼𑀓𑁆𑀔𑀲𑁆𑀲 𑀉𑀧𑀭𑀽𑀧𑀭𑀺 𑀧𑀯𑀢𑁆𑀢𑀺 𑀯𑀺𑀬; 𑀯𑀺𑀦𑀸 𑀘𑀺𑀢𑁆𑀢𑁂𑀦 𑀓𑀫𑁆𑀫𑀢𑁄𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀓𑀫𑁆𑀫𑀁 𑀔𑁂𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁 𑀢𑀡𑁆𑀳𑀸 𑀲𑁆𑀦𑁂𑀳𑁄’’𑀢𑀺 (𑀅. 𑀦𑀺. 𑁩.𑁭𑁭).

𑀅𑀬𑀜𑁆𑀘 𑀧𑀦𑀢𑁆𑀣𑁄 𑀑𑀓𑀸𑀲𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑁄. 𑀢𑀬𑁄 𑀳𑀺 𑀑𑀓𑀸𑀲𑀸 𑁋 𑀦𑀸𑀫𑁄𑀓𑀸𑀲𑁄, 𑀭𑀽𑀧𑁄𑀓𑀸𑀲𑁄, 𑀦𑀸𑀫𑀭𑀽𑀧𑁄𑀓𑀸𑀲𑁄𑀢𑀺. 𑀢𑀢𑁆𑀣 𑀅𑀭𑀽𑀧𑀪𑀯𑁄 𑀦𑀸𑀫𑁄𑀓𑀸𑀲𑁄 𑀦𑀸𑀫. 𑀢𑀢𑁆𑀭 𑀳𑀺 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀫𑁆𑀧𑀺 𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀅𑀭𑀽𑀧𑀥𑀫𑁆𑀫𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀲𑀜𑁆𑀜𑀪𑀯𑁄 𑀭𑀽𑀧𑁄𑀓𑀸𑀲𑁄 𑀦𑀸𑀫. 𑀢𑀢𑁆𑀭 𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑀢𑁆𑀢𑀫𑁆𑀧𑀺 𑀅𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀭𑀽𑀧𑀥𑀫𑁆𑀫𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀦𑀸𑀫𑀭𑀽𑀧𑁄𑀓𑀸𑀲𑁄 𑀦𑀸𑀫. 𑀢𑀢𑁆𑀭 𑀳𑀺 𑀯𑀢𑁆𑀣𑀼𑀭𑀽𑀧𑀫𑀢𑁆𑀢𑀫𑁆𑀧𑀺 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀬𑀁 𑀅𑀭𑀽𑀧𑀥𑀫𑁆𑀫𑀸, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀯𑀺𑀦𑀸 𑀓𑀫𑁆𑀫𑀚𑀸𑀧𑀺 𑀭𑀽𑀧𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀼𑀕𑀦𑀤𑁆𑀥𑀸𑀯 𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀬𑀣𑀸 𑀳𑀺 𑀲𑀲𑁆𑀲𑀸𑀫𑀺𑀓𑁂 𑀲𑀭𑀸𑀚𑀓𑁂 𑀕𑁂𑀳𑁂 𑀲𑀤𑁆𑀯𑀸𑀭𑀧𑀸𑀮𑀓𑁂 𑀭𑀸𑀚𑀸𑀡𑀢𑁆𑀢𑀺𑀁 𑀯𑀺𑀦𑀸 𑀧𑀞𑀫𑀧𑁆𑀧𑀯𑁂𑀲𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑀭𑀪𑀸𑀕𑁂 𑀧𑀦 𑀯𑀺𑀦𑀸𑀧𑀺 𑀆𑀡𑀢𑁆𑀢𑀺𑀁 𑀧𑀼𑀭𑀺𑀫𑀸𑀡𑀢𑁆𑀢𑀺𑀆𑀦𑀼𑀪𑀸𑀯𑁂𑀦𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀧𑀜𑁆𑀘𑀯𑁄𑀓𑀸𑀭𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀭𑀸𑀚𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀁 𑀯𑀺𑀦𑀸 𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀞𑀫𑀼𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀅𑀧𑀭𑀪𑀸𑀕𑁂 𑀧𑀦 𑀯𑀺𑀦𑀸𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸𑀦𑀼𑀪𑀸𑀯𑀁 𑀧𑀼𑀭𑀺𑀫𑀸𑀦𑀼𑀪𑀸𑀯𑀯𑀲𑁂𑀦 𑀮𑀤𑁆𑀥𑀧𑁆𑀧𑀯𑁂𑀲𑀲𑁆𑀲 𑀓𑀫𑁆𑀫𑀢𑁄 𑀧𑀯𑀢𑁆𑀢𑀺 𑀳𑁄𑀢𑀺. 𑀅𑀲𑀜𑁆𑀜𑀪𑀯𑁄 𑀧𑀦 𑀬𑀲𑁆𑀫𑀸 𑀅𑀭𑀽𑀧𑁄𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀦𑀸𑀯 𑀅𑀭𑀽𑀧𑀧𑀘𑁆𑀘𑀬𑀸 𑀅𑀲𑀜𑁆𑀜𑁄𑀓𑀸𑀲𑀢𑁆𑀢𑀸 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀅𑀲𑁆𑀲𑀸𑀫𑀺𑀓𑁂 𑀲𑀼𑀜𑁆𑀜𑀕𑁂𑀳𑁂 𑀅𑀢𑁆𑀢𑀦𑁄 𑀕𑁂𑀳𑁂 𑀘 𑀧𑀼𑀭𑀺𑀲𑀲𑁆𑀲 𑀧𑀯𑁂𑀲𑁄 𑀯𑀺𑀬. 𑀅𑀭𑀽𑀧𑀪𑀯𑁄𑀧𑀺 𑀬𑀲𑁆𑀫𑀸 𑀭𑀽𑀧𑁄𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀦𑀸𑀯 𑀭𑀽𑀧𑀧𑀘𑁆𑀘𑀬𑀸 𑀅𑀜𑁆𑀜𑁄𑀓𑀸𑀲𑀢𑁆𑀢𑀸 𑀅𑀭𑀽𑀧𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺. 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀧𑀦 𑀭𑀽𑀧𑀸𑀭𑀽𑀧𑁄𑀓𑀸𑀲𑁄𑀢𑀺 𑀦𑀢𑁆𑀣𑁂𑀢𑁆𑀣 𑀅𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀻𑀢𑀺. 𑀇𑀢𑀺 𑀅𑀬𑀁 𑀳𑁂𑀢𑀼 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀯𑀢𑁆𑀢𑁂𑀢𑀺.

𑀦𑀦𑀼 ‘‘𑀳𑁂𑀢𑀽 𑀲𑀳𑀚𑀸𑀢𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁄𑀧𑀺 𑀅𑀬𑀫𑀢𑁆𑀣𑁄 𑀕𑀳𑀺𑀢𑁄 𑀳𑁄𑀢𑀺, 𑀅𑀣 𑀓𑀲𑁆𑀫𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦’’𑀦𑁆𑀢𑀺 𑀇𑀤𑀁 𑀕𑀳𑀺𑀢𑀦𑁆𑀢𑀺? 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑀧𑀝𑀺𑀩𑀸𑀳𑀦𑀢𑁄. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀧𑀯𑀢𑁆𑀢𑀺𑀬𑀁 𑀳𑁂𑀢𑀼𑀦𑀸 𑀲𑀳 𑀏𑀓𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀘𑁂𑀯 𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀺 𑀘 𑀚𑀸𑀬𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀦 𑀘 𑀲𑁄 𑀢𑁂𑀲𑀁 𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑀲𑁆𑀲 𑀧𑀝𑀺𑀩𑀸𑀳𑀦𑀢𑁆𑀣𑀫𑁂𑀢𑀁 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 ‘‘𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄𑀢𑀺 𑀅𑀬𑀜𑁆𑀳𑀺 𑀳𑁂𑀢𑀼 𑀦𑀸𑀫 𑀚𑀸𑀢𑀺𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀓𑀼𑀲𑀮𑀳𑁂𑀢𑀼 𑀪𑀽𑀫𑀦𑁆𑀢𑀭𑀢𑁄 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀅𑀓𑀼𑀲𑀮𑀳𑁂𑀢𑀼 𑀓𑀸𑀫𑀸𑀯𑀘𑀭𑁄𑀯 𑀯𑀺𑀧𑀸𑀓𑀳𑁂𑀢𑀼 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀓𑀺𑀭𑀺𑀬𑀳𑁂𑀢𑀼 𑀓𑀸𑀫𑀸𑀯𑀘𑀭𑁄 𑀭𑀽𑀧𑀸𑀯𑀘𑀭𑁄 𑀅𑀭𑀽𑀧𑀸𑀯𑀘𑀭𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀦𑀸𑀫𑀢𑁄 𑀅𑀮𑁄𑀪𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄. 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑀳𑁂𑀢𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀓𑀼𑀲𑀮𑀳𑁂𑀢𑀼 𑀮𑁄𑀪𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄. 𑀯𑀺𑀧𑀸𑀓𑀓𑀺𑀭𑀺𑀬𑀳𑁂𑀢𑀽 𑀧𑀦 𑀅𑀮𑁄𑀪𑀸𑀤𑀺𑀯𑀲𑁂𑀦 𑀢𑀬𑁄 𑀢𑀬𑁄 𑀳𑁄𑀦𑁆𑀢𑀺. 𑀢𑀁𑀢𑀁𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀯𑀲𑁂𑀦 𑀧𑀦 𑀢𑁂𑀲𑀁 𑀢𑁂𑀲𑀁 𑀳𑁂𑀢𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑁄𑀬𑁂𑀯𑀸𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑁂𑀲𑀁 𑀦𑀸𑀫 𑀥𑀫𑁆𑀫𑀸𑀦𑀁 𑀅𑀬𑀁 𑀧𑀘𑁆𑀘𑀬𑁄𑀢𑀺 𑀏𑀯𑀫𑁆𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀢𑀸𑀯 𑀳𑁂𑀢𑀼𑀧𑀘𑁆𑀘𑀬𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀭𑀽𑀧𑀪𑀯𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁𑀬𑁂𑀯. 𑀭𑀽𑀧𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼𑀬𑁂𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀳𑁂𑀢𑀼𑀲𑀤𑀺𑀲𑁄𑀯. 𑀢𑀣𑀸 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀳𑁂𑀢𑀼, 𑀢𑀣𑀸 𑀅𑀓𑀼𑀲𑀮𑀳𑁂𑀢𑀼. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀳𑁂𑀢𑀼 𑀧𑀦 𑀓𑀸𑀫𑀪𑀯𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑁄. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀳𑁂𑀢𑀼 𑀭𑀽𑀧𑀪𑀯𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀜𑁆𑀜𑁂𑀯 𑀳𑁂𑀢𑀼𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀳𑁂𑀢𑀼 𑀅𑀭𑀽𑀧𑀪𑀯𑁂 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀜𑁂𑀯 𑀳𑁂𑀢𑀼𑀧𑀘𑁆𑀘𑀬𑁄. 𑀅𑀧𑀭𑀺𑀬𑀸𑀧𑀦𑁆𑀦𑀯𑀺𑀧𑀸𑀓𑀳𑁂𑀢𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀅𑀭𑀽𑀧𑀪𑀯𑁂 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀳𑁂𑀢𑀼𑀧𑀘𑁆𑀘𑀬𑁄. 𑀓𑀺𑀭𑀺𑀬𑀳𑁂𑀢𑀽𑀲𑀼 𑀧𑀦 𑀢𑁂𑀪𑀽𑀫𑀓𑁂𑀲𑀼𑀧𑀺 𑀓𑀼𑀲𑀮𑀳𑁂𑀢𑀼𑀲𑀤𑀺𑀲𑁄𑀯 𑀧𑀘𑁆𑀘𑀬𑁄𑀢𑀺. 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀭𑀽𑀧𑀸𑀬𑀢𑀦𑀦𑁆𑀢𑀺 𑀭𑀽𑀧𑀲𑀗𑁆𑀔𑀸𑀢𑀁 𑀆𑀬𑀢𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸𑀬 𑀥𑀸𑀢𑀼𑀬𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀭𑀽𑀧𑀸𑀬𑀢𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄𑀥𑀸𑀢𑀼𑀬𑀸𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬 𑀢𑀺𑀯𑀺𑀥𑀸𑀬𑀧𑀺 𑀫𑀦𑁄𑀥𑀸𑀢𑀼𑀬𑀸 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑁄 𑀘 𑀔𑁄 𑀏𑀓𑀓𑁆𑀔𑀡𑁂. 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀏𑀢𑀸𑀦𑀺 𑀘 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀅𑀯𑀲𑁂𑀲𑀸 𑀘 𑀲𑀩𑁆𑀩𑁂𑀧𑀺 𑀜𑁂𑀬𑁆𑀬𑀥𑀫𑁆𑀫𑀸 𑀇𑀫𑀸 𑀙 𑀥𑀸𑀢𑀼𑀬𑁄 𑀞𑀧𑁂𑀢𑁆𑀯𑀸 𑀲𑁂𑀲𑀸𑀬 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸𑀢𑀺 𑀇𑀫𑀺𑀦𑀸 𑀬𑁂 𑀏𑀢𑁂 𑀏𑀢𑀸𑀲𑀁 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀆𑀭𑀫𑁆𑀫𑀡𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀢𑀸𑀲𑀁 𑀥𑀸𑀢𑀽𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂𑀬𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀳𑁄𑀦𑁆𑀢𑀸𑀧𑀺 𑀘 𑀦 𑀏𑀓𑀢𑁄 𑀳𑁄𑀦𑁆𑀢𑀺, 𑀬𑀁 𑀬𑀁 𑀆𑀭𑀩𑁆𑀪 𑀬𑁂 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀢𑁂 𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺𑀧𑀺 𑀤𑀻𑀧𑁂𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀬𑀣𑀸 𑀦𑀚𑁆𑀚𑁄 𑀲𑀦𑁆𑀤𑀦𑁆𑀢𑀺, 𑀧𑀩𑁆𑀩𑀢𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀩𑁆𑀩𑀓𑀸𑀮𑀲𑀗𑁆𑀕𑀳𑀯𑀲𑁂𑀦, 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀬𑁂𑀧𑀺 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀬𑁂𑀧𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀺𑀁𑀲𑀼 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀢𑀺 𑀇𑀤𑀁 ‘‘𑀬𑁂 𑀬𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀭𑀽𑀧𑀢𑁄 𑀦𑀺𑀤𑀲𑁆𑀲𑀦𑀁. 𑀢𑁂 𑀢𑁂 𑀥𑀫𑁆𑀫𑀸𑀢𑀺 𑀢𑁂 𑀢𑁂 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀁. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.

𑀇𑀤𑀁 𑀧𑀦 𑀆𑀭𑀫𑁆𑀫𑀡𑀁 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀁 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀓𑁄𑀝𑁆𑀞𑀸𑀲𑀢𑁄 𑀙𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀺𑀁 𑀅𑀯𑀲𑁂𑀲𑀁 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑀁…𑀧𑁂… 𑀅𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁; 𑀭𑀽𑀧𑀸𑀯𑀘𑀭𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀢𑁄 𑀢𑀺𑀯𑀺𑀥𑀁, 𑀢𑀣𑀸 𑀅𑀭𑀽𑀧𑀸𑀯𑀘𑀭𑀁, 𑀅𑀧𑀭𑀺𑀬𑀸𑀧𑀦𑁆𑀦𑀁 𑀓𑀼𑀲𑀮𑀯𑀺𑀧𑀸𑀓𑀦𑀺𑀩𑁆𑀩𑀸𑀦𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀲𑀩𑁆𑀩𑀫𑁂𑀯 𑀯𑀸 𑀏𑀢𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀪𑁂𑀤𑀢𑁄 𑀲𑀢𑁆𑀢𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀼𑀲𑀮𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺, 𑀅𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀯𑀺𑀧𑀸𑀓𑀁 𑀘𑀢𑀼𑀪𑀽𑀫𑀓𑀁, 𑀓𑀺𑀭𑀺𑀬𑀁 𑀢𑀺𑀪𑀽𑀫𑀓𑀁, 𑀭𑀽𑀧𑀁 𑀏𑀓𑀪𑀽𑀫𑀓𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀏𑀓𑀪𑀽𑀫𑀓𑀁 𑀅𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀧𑀜𑁆𑀜𑀢𑁆𑀢𑀺 𑀪𑀽𑀫𑀺𑀯𑀺𑀦𑀺𑀫𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀁 𑀢𑁂𑀲𑀼 𑀙𑀲𑀼 𑀭𑀸𑀲𑀻𑀲𑀼 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑀚𑁆𑀚𑀸𑀦𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀅𑀭𑀽𑀧𑀸𑀯𑀭𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀢𑁄 𑀓𑀼𑀲𑀮𑀓𑀺𑀭𑀺𑀬𑀸𑀦𑀫𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀫𑁆𑀧𑀺 𑀇𑀫𑁂𑀲𑀁𑀬𑁂𑀯 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀜𑁆𑀜𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑀁 𑀇𑀫𑁂𑀲𑀼 𑀙𑀲𑀼 𑀭𑀸𑀲𑀻𑀲𑀼 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑀚𑁆𑀚𑀸𑀦𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑀁 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀓𑀼𑀲𑀮𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀓𑁂𑀘𑀺 𑀦𑀺𑀘𑁆𑀙𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀺𑀢𑁄 𑀉𑀧𑀥𑀸𑀭𑁂𑀢𑀩𑁆𑀩𑀁. 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀁 𑀢𑁂𑀪𑀽𑀫𑀓𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀦𑀯𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀬𑁂𑀲𑀁 𑀬𑁂𑀲𑀁 𑀧𑀘𑁆𑀘𑀬𑁄, 𑀢𑁂 𑀢𑁂 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁩. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀙𑀦𑁆𑀤𑀸𑀥𑀺𑀧𑀢𑀻𑀢𑀺 𑀙𑀦𑁆𑀤𑀲𑀗𑁆𑀔𑀸𑀢𑁄 𑀅𑀥𑀺𑀧𑀢𑀺. 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑀲𑁆𑀲 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸 𑀧𑀦 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺? 𑀏𑀓𑀓𑁆𑀔𑀡𑁂 𑀅𑀪𑀸𑀯𑀢𑁄. 𑀧𑀼𑀭𑀺𑀫𑀦𑀬𑀲𑁆𑀫𑀺𑀜𑁆𑀳𑀺 𑀤𑁆𑀯𑁂 𑀢𑀬𑁄 𑀳𑁂𑀢𑀽 𑀏𑀓𑀓𑁆𑀔𑀡𑁂𑀧𑀺 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀦𑁆𑀢𑀺 𑀫𑀽𑀮𑀝𑁆𑀞𑁂𑀦. 𑀉𑀧𑀓𑀸𑀭𑀓𑀪𑀸𑀯𑀲𑁆𑀲 𑀅𑀯𑀺𑀚𑀳𑀦𑀢𑁄. 𑀅𑀥𑀺𑀧𑀢𑀺 𑀧𑀦 𑀚𑁂𑀝𑁆𑀞𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄, 𑀦 𑀘 𑀏𑀓𑀓𑁆𑀔𑀡𑁂 𑀩𑀳𑀽 𑀚𑁂𑀝𑁆𑀞𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀢𑁄 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀦𑁂𑀲𑀁 𑀏𑀓𑀓𑁆𑀔𑀡𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺. 𑀢𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀏𑀓𑀓𑁆𑀔𑀡𑁂 𑀅𑀪𑀸𑀯𑀢𑁄 𑀇𑀥 𑀏𑀯𑀁 𑀤𑁂𑀲𑀦𑀸 𑀓𑀢𑀸𑀢𑀺.

𑀏𑀯𑀁 𑀲𑀳𑀚𑀸𑀢𑀸𑀥𑀺𑀧𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀁 𑀤𑀲𑁆𑀲𑁂𑀢𑀼𑀁 𑀬𑀁 𑀬𑀁 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀬𑀁 𑀥𑀫𑁆𑀫𑀦𑁆𑀢𑀺 𑀬𑀁 𑀬𑀁 𑀆𑀭𑀫𑁆𑀫𑀡𑀥𑀫𑁆𑀫𑀁. 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀕𑀭𑀼𑀓𑀸𑀭𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑀯𑀲𑁂𑀦 𑀯𑀸 𑀕𑀭𑀼𑀁 𑀪𑀸𑀭𑀺𑀬𑀁 𑀮𑀤𑁆𑀥𑀩𑁆𑀩𑀁 𑀅𑀯𑀺𑀚𑀳𑀺𑀢𑀩𑁆𑀩𑀁 𑀅𑀦𑀯𑀜𑁆𑀜𑀸𑀢𑀁 𑀓𑀢𑁆𑀯𑀸. 𑀢𑁂 𑀢𑁂 𑀥𑀫𑁆𑀫𑀸𑀢𑀺 𑀢𑁂 𑀢𑁂 𑀕𑀭𑀼𑀓𑀸𑀢𑀩𑁆𑀩𑀥𑀫𑁆𑀫𑀸. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀕𑀭𑀼𑀓𑀸𑀭𑀓𑀥𑀫𑁆𑀫𑀸𑀦𑀁. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀅𑀥𑀺𑀧𑀢𑀺 𑀦𑀸𑀫 𑀲𑀳𑀚𑀸𑀢𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑁄 𑀙𑀦𑁆𑀤𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑁂𑀲𑀼 𑀏𑀓𑁂𑀓𑁄 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑁄 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀢𑀺𑀯𑀺𑀥𑁄. 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀧𑀦𑁂𑀢𑁆𑀣 𑀯𑀻𑀫𑀁𑀲𑀸𑀥𑀺𑀧𑀢𑀺 𑀦 𑀮𑀩𑁆𑀪𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑁄 𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀤𑀼𑀯𑀺𑀥𑁄, 𑀅𑀧𑀭𑀺𑀬𑀸𑀧𑀦𑁆𑀦𑁄 𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀧𑀦 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑁄𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀲𑀳𑀚𑀸𑀢𑀸𑀥𑀺𑀧𑀢𑀺𑀫𑁆𑀳𑀺 𑀢𑀸𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀅𑀥𑀺𑀧𑀢𑀺 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀙𑀦𑁆𑀤𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀲𑀗𑁆𑀔𑀸𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀮𑀩𑁆𑀪𑀢𑀺. 𑀦 𑀳𑀺 𑀢𑁂 𑀥𑀫𑁆𑀫𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀁 𑀯𑀺𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀧𑀦 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀸𑀯𑀘𑀭𑀅𑀥𑀺𑀧𑀢𑀺𑀲𑀤𑀺𑀲𑁄𑀯 𑀘𑀢𑀼𑀯𑁄𑀓𑀸𑀭𑁂 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀲𑀩𑁆𑀩𑁄𑀧𑀺 𑀓𑀸𑀫𑀸𑀯𑀘𑀭𑀸𑀥𑀺𑀧𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑁄 𑀓𑀼𑀲𑀮𑀢𑁄𑀧𑀺 𑀯𑀺𑀧𑀸𑀓𑀢𑁄𑀧𑀺 𑀧𑀜𑁆𑀘𑀯𑁄𑀓𑀸𑀭𑁂 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯. 𑀅𑀓𑀼𑀲𑀮𑁄 𑀓𑀸𑀫𑀪𑀯𑁂 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀘𑀺𑀢𑁆𑀢𑁂𑀲𑀼 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀦𑀺𑀬𑀢𑁄 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼 𑀅𑀢𑁆𑀢𑀦𑁄 𑀅𑀥𑀺𑀧𑀢𑀺𑀓𑀸𑀮𑁂 𑀢𑁂𑀲𑀜𑁆𑀜𑁂𑀯. 𑀅𑀭𑀽𑀧𑀪𑀯𑁂 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀬𑀁 𑀢𑀸𑀯 𑀲𑀳𑀚𑀸𑀢𑀸𑀥𑀺𑀧𑀢𑀺𑀫𑁆𑀳𑀺 𑀦𑀬𑁄.

𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑁆𑀳𑀺 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀧𑀺 𑀓𑀼𑀲𑀮𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑁆𑀳𑀺 𑀏𑀲𑁂𑀯 𑀦𑀬𑁄. 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑁄 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲 𑀘𑁂𑀯 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑁄 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀦𑀸𑀫 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀘𑁆𑀘𑀢𑀺. 𑀲𑁄 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑁄 𑀧𑀦 𑀯𑀺𑀧𑀸𑀓𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀸𑀥𑀺𑀧𑀢𑀺. 𑀮𑁄𑀓𑀼𑀢𑁆𑀢𑀭𑁄 𑀧𑀦 𑀯𑀺𑀧𑀸𑀓𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀓𑀺𑀭𑀺𑀬𑀸𑀦𑀜𑁆𑀜𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀧𑀦 𑀢𑀺𑀯𑀺𑀥𑁄𑀧𑀺 𑀓𑀺𑀭𑀺𑀬𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑀗𑁆𑀔𑀸𑀢𑁄 𑀭𑀽𑀧𑀓𑁆𑀔𑀦𑁆𑀥𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀁 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀲𑁆𑀲 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀫𑀦𑁄𑀥𑀸𑀢𑀼𑀬𑀸𑀢𑀺 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀸𑀬 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀢𑀢𑁄 𑀧𑀭𑀁 𑀧𑀦 𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀓𑀺𑀘𑁆𑀘𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀢𑀸 𑀅𑀯𑀼𑀢𑁆𑀢𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀲𑀗𑁆𑀔𑀺𑀢𑁆𑀢𑀸. ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀓𑁂 𑀘 𑀙𑀝𑁆𑀞𑀦𑀬𑁂 𑀢𑀸 𑀲𑀗𑁆𑀕𑀳𑀺𑀢𑀸𑀢𑀺𑀧𑀺 𑀇𑀥 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀅𑀦𑀦𑁆𑀢𑀭𑀸𑀢𑀻𑀢𑀸 𑀓𑀼𑀲𑀮𑀚𑀯𑀦𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸. 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀦𑁆𑀢𑀺 𑀅𑀦𑀦𑁆𑀢𑀭𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀜𑁆𑀜𑁂𑀯. 𑀓𑀼𑀲𑀮𑀸𑀦𑀦𑁆𑀢𑀺 𑀲𑀤𑀺𑀲𑀓𑀼𑀲𑀮𑀸𑀦𑀁. 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀇𑀤𑀁 𑀧𑀦 𑀓𑀼𑀲𑀮𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀫𑀽𑀮𑀓𑁂 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀲𑀗𑁆𑀔𑀸𑀢𑀸𑀦𑀜𑁆𑀜𑁂𑀯. 𑀅𑀩𑁆𑀬𑀸𑀓𑀢𑀫𑀽𑀮𑀓𑁂 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀆𑀯𑀚𑁆𑀚𑀦𑀚𑀯𑀦𑀯𑀲𑁂𑀦 𑀯𑀸 𑀪𑀯𑀗𑁆𑀕𑀯𑀲𑁂𑀦 𑀯𑀸 𑀧𑀯𑀢𑁆𑀢𑀸𑀦𑀁 𑀓𑀺𑀭𑀺𑀬𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀢𑁄 𑀧𑀝𑁆𑀞𑀸𑀬 𑀧𑀦 𑀬𑀸𑀯 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀸𑀯 𑀧𑀯𑀢𑁆𑀢𑁂𑀲𑀼 𑀯𑀻𑀣𑀺𑀘𑀺𑀢𑁆𑀢𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑁂𑀯. 𑀓𑀼𑀲𑀮𑀸𑀦𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀸𑀦𑀦𑁆𑀢𑀭𑀸𑀦𑀁 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀸𑀦𑁆𑀢𑀭𑀸𑀦𑀁 𑀧𑀞𑀫𑀚𑀯𑀦𑀓𑀼𑀲𑀮𑀸𑀦𑀁. 𑀅𑀓𑀼𑀲𑀮𑀸𑀦𑀦𑁆𑀢𑀺 𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀲𑀁 𑀬𑁂𑀲𑀦𑁆𑀢𑀺 𑀇𑀤𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀲𑀗𑁆𑀔𑁂𑀧𑀮𑀓𑁆𑀔𑀡𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀘𑀢𑀼𑀪𑀽𑀫𑀓𑁄 𑀅𑀭𑀽𑀧𑀥𑀫𑁆𑀫𑀭𑀸𑀲𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀢𑁄 𑀘𑀢𑀼𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺, 𑀅𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑁄𑀯 𑀯𑀺𑀧𑀸𑀓𑁄 𑀘𑀢𑀼𑀪𑀽𑀫𑀓𑁄, 𑀓𑀺𑀭𑀺𑀬𑀸𑀦𑀦𑁆𑀢𑀭𑀧𑀘𑁆𑀘𑀬𑁄 𑀧𑀦 𑀢𑁂 𑀪𑀽𑀫𑀓𑁄𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲𑁂𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀘 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑁄 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑁄 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀸𑀓𑀸𑀦𑀁 𑀅𑀢𑁆𑀢𑀦𑁄 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲 𑀘𑀸𑀢𑀺 𑀅𑀯𑀺𑀲𑁂𑀲𑁂𑀦 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑁄 𑀅𑀦𑀸𑀕𑀸𑀫𑀺𑀨𑀮𑀲𑀗𑁆𑀔𑀸𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑁄 𑀅𑀯𑀺𑀲𑁂𑀲𑁂𑀦 𑀅𑀓𑀼𑀲𑀮𑀲𑁆𑀲 𑀘𑁂𑀯 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀘. 𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀲𑀼𑀔𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁄 𑀅𑀓𑀼𑀲𑀮𑁄 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁄 𑀯𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀸 𑀯𑀺𑀧𑀸𑀓𑁄 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑁄 𑀧𑀦𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲𑀸𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁄 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲𑀸𑀢𑀺 𑀦𑀯𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑀸𑀢𑀺 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁫. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄𑀧𑀺 𑀇𑀫𑀺𑀦𑀸 𑀲𑀫𑀸𑀦𑀕𑀢𑀺𑀓𑁄𑀯. 𑀇𑀫𑁂 𑀧𑀦 𑀤𑁆𑀯𑁂 𑀧𑀘𑁆𑀘𑀬𑀸 𑀫𑀳𑀸𑀯𑀺𑀢𑁆𑀣𑀸𑀭𑀸, 𑀢𑀲𑁆𑀫𑀸 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀢𑁂𑀲𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁬. 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬. 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲. 𑀇𑀫𑀺𑀦𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑀜𑁆𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀦𑀸𑀫𑀭𑀽𑀧𑀁 𑀑𑀓𑁆𑀓𑀦𑁆𑀢𑀁 𑀯𑀺𑀬 𑀧𑀓𑁆𑀔𑀦𑁆𑀤𑀦𑁆𑀢𑀁 𑀯𑀺𑀬 𑀧𑀭𑀮𑁄𑀓𑀢𑁄 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀦𑁆𑀢𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑁄 𑀔𑀡𑁄 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀦𑀸𑀫𑀲𑁆𑀲, 𑀦𑀸𑀫𑀜𑁆𑀘 𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑀝𑁆𑀞𑀁 𑀨𑀭𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀢𑀺 𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀝𑁆𑀞𑀁 𑀦 𑀨𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀢𑀣𑀸 𑀉𑀧𑀸𑀤𑀸𑀭𑀽𑀧𑀸 𑀪𑀽𑀢𑀸𑀦𑀁. 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀳𑀤𑀬𑀯𑀢𑁆𑀣𑀼 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀓𑀺𑀜𑁆𑀘𑀺 𑀓𑀸𑀮𑁂𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂. 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀅𑀬𑀁 𑀧𑀦 ‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’𑀢𑀺 𑀏𑀯𑀁 𑀙𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀞𑀺𑀢𑁄. 𑀢𑀢𑁆𑀣 𑀢𑀬𑁄 𑀓𑁄𑀝𑁆𑀞𑀸𑀲𑀸 𑀅𑀜𑁆𑀜𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀬𑁄 𑀦 𑀅𑀜𑁆𑀜𑀫𑀜𑁆𑀜𑀯𑀲𑁂𑀦. 𑀢𑀢𑁆𑀣 𑀧𑀞𑀫𑀓𑁄𑀝𑁆𑀞𑀸𑀲𑁂 𑀅𑀭𑀽𑀧𑀫𑁂𑀯 𑀧𑀘𑁆𑀘𑀬𑁄 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘, 𑀤𑀼𑀢𑀺𑀬𑁂 𑀭𑀽𑀧𑀫𑁂𑀯, 𑀢𑀢𑀺𑀬𑁂 𑀦𑀸𑀫𑀭𑀽𑀧𑀁, 𑀘𑀢𑀼𑀢𑁆𑀣𑁂 𑀧𑀘𑁆𑀘𑀬𑁄 𑀅𑀭𑀽𑀧𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀭𑀽𑀧𑀁; 𑀧𑀜𑁆𑀘𑀫𑁂 𑀧𑀘𑁆𑀘𑀬𑁄𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁆𑀧𑀺 𑀭𑀽𑀧𑀫𑁂𑀯; 𑀙𑀝𑁆𑀞𑁂 𑀧𑀘𑁆𑀘𑀬𑁄 𑀭𑀽𑀧𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀅𑀭𑀽𑀧𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.

𑀅𑀬𑀁 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀁 𑀭𑀽𑀧𑀦𑁆𑀢𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺, 𑀅𑀓𑀼𑀲𑀮𑁄 𑀏𑀓𑀯𑀺𑀥𑁄𑀯 𑀯𑀺𑀧𑀸𑀓𑁄 𑀘𑀢𑀼𑀩𑁆𑀩𑀺𑀥𑁄, 𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀢𑀺𑀯𑀺𑀥𑁄, 𑀭𑀽𑀧𑀁 𑀏𑀓𑀯𑀺𑀥𑀁 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀅𑀓𑀼𑀲𑀮𑀁. 𑀬𑀁 𑀧𑀦𑁂𑀢𑁆𑀣 𑀅𑀭𑀽𑀧𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘𑀸𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀸𑀦𑀜𑁆𑀜𑁂𑀯. 𑀓𑀸𑀫𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀸𑀦𑀜𑁆𑀜𑁂𑀯. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀏𑀓𑀦𑁆𑀢𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺.

𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲 𑀭𑀽𑀧𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑁂 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀧𑀦 𑀫𑀳𑀸𑀪𑀽𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀜𑁆𑀘𑁂𑀯 𑀉𑀧𑀸𑀤𑀸𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.

𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.

𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀲𑁆𑀲 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀧𑀸𑀴𑀺 𑀆𑀕𑀢𑀸. 𑀢𑀲𑁆𑀲𑀸 𑀢𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑀸𑀯 𑀯𑀡𑁆𑀡𑀦𑀸𑀢𑀺 𑀧𑀼𑀦 𑀦 𑀕𑀳𑀺𑀢𑀸. 𑀅𑀬𑀫𑁆𑀧𑀺 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀁 𑀭𑀽𑀧𑀦𑁆𑀢𑀺 𑀧𑀜𑁆𑀘𑀥𑀸 𑀪𑀺𑀦𑁆𑀦𑁄. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.