𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄
𑁧. 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧. 𑀇𑀤𑀸𑀦𑀺 𑀲𑀩𑁆𑀩𑁂𑀧𑀺 𑀢𑁂 𑀧𑀘𑁆𑀘𑀬𑁂 𑀉𑀤𑁆𑀤𑀺𑀝𑁆𑀞𑀧𑀝𑀺𑀧𑀸𑀝𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀧𑀞𑀫𑀁 𑀪𑀸𑀚𑁂𑀢𑀩𑁆𑀩𑀲𑁆𑀲 𑀧𑀤𑀼𑀤𑁆𑀥𑀸𑀭𑁄. 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀞𑀫𑀁 𑀪𑀸𑀚𑁂𑀢𑀩𑁆𑀩𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑁋 𑀬𑁄 𑀧𑀘𑁆𑀘𑀬𑀼𑀤𑁆𑀤𑁂𑀲𑁂 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄, 𑀲𑁄 𑀦𑀺𑀤𑁆𑀤𑁂𑀲𑀢𑁄 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀘𑁆𑀘𑀬𑁂𑀲𑀼 𑀪𑀸𑀚𑁂𑀢𑀩𑁆𑀩𑀲𑁆𑀲 𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.
𑀇𑀤𑀸𑀦𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀧𑀘𑁆𑀘𑀬𑀲𑁆𑀲 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀯𑀯𑀢𑁆𑀣𑀸𑀧𑀦𑀢𑁄. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬. 𑀏𑀯𑀁 𑀲𑀦𑁆𑀢𑁂 𑀅𑀲𑀼𑀓𑁄 𑀦𑀸𑀫 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀧𑀘𑁆𑀘𑀬𑀯𑀯𑀢𑁆𑀣𑀸𑀦𑀁 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀅𑀣𑀸𑀧𑀺 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀳𑁂𑀢𑀼𑀦𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄𑀧𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀬𑁂𑀯, 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀸𑀤𑀬𑁄𑀧𑀺. 𑀢𑀢𑁆𑀣 𑀅𑀬𑀁 𑀳𑁂𑀢𑀼 𑀅𑀲𑀼𑀓𑀲𑁆𑀲 𑀦𑀸𑀫 𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀯𑀢𑁆𑀣𑀸𑀦𑀁 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀢𑀲𑁆𑀫𑀸 𑀧𑀘𑁆𑀘𑀬𑀜𑁆𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀯𑀯𑀢𑁆𑀣𑀸𑀧𑁂𑀦𑁆𑀢𑁄 ‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑁄 𑀳𑁂𑀢𑀼 𑀲𑀫𑁆𑀧𑀬𑀼𑀢𑁆𑀢𑀓𑁄, 𑀲𑁄 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀢𑀢𑁆𑀭𑀸𑀧𑀺 ‘‘𑀧𑀘𑁆𑀘𑀬𑁄’’𑀢𑀺 𑀅𑀯𑀢𑁆𑀯𑀸 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦𑀸’’𑀢𑀺 𑀯𑀘𑀦𑀁 𑀳𑁂𑀢𑀼𑀦𑁄 𑀅𑀜𑁆𑀜𑀣𑀸 𑀧𑀘𑁆𑀘𑀬𑀪𑀸𑀯𑀧𑀝𑀺𑀲𑁂𑀥𑀦𑀢𑁆𑀣𑀁. 𑀅𑀬𑀜𑁆𑀳𑀺 𑀳𑁂𑀢𑀼 𑀳𑁂𑀢𑀼𑀧𑀘𑁆𑀘𑀬𑁂𑀦𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀦𑀸𑀧𑀺. 𑀢𑀢𑁆𑀭𑀸𑀲𑁆𑀲 𑀬𑁆𑀯𑀸𑀬𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀅𑀜𑁆𑀜𑀣𑀸𑀧𑀺 𑀧𑀘𑁆𑀘𑀬𑀪𑀸𑀯𑁄, 𑀢𑀲𑁆𑀲 𑀧𑀝𑀺𑀲𑁂𑀥𑀦𑀢𑁆𑀣𑀁 𑀳𑁂𑀢𑀼𑀧𑀘𑁆𑀘𑀬𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑀲𑁆𑀫𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀅𑀧𑀸𑀓𑀝𑀢𑁆𑀢𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀬𑁂𑀦 𑀢𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀬𑀁 𑀦𑀸𑀫 𑀲𑁄𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀅𑀧𑀸𑀓𑀝𑁄. 𑀢𑀲𑁆𑀲 𑀅𑀧𑀸𑀓𑀝𑀢𑁆𑀢𑀸 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀢𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀲𑀭𑀽𑀧𑀢𑁄𑀯 𑀤𑀲𑁆𑀲𑁂𑀢𑀼𑀁 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.
𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀧𑀸𑀓𑀝𑀢𑁆𑀢𑀸 𑀢𑀁-𑀕𑀳𑀡𑀁 𑀓𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀢𑁂 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁, 𑀳𑁂𑀢𑀼𑀢𑁄 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀕𑀡𑁆𑀳𑀸𑀢𑀺. 𑀓𑀺𑀁 𑀧𑀦 𑀢𑀁 𑀘𑀺𑀢𑁆𑀢𑀢𑁄 𑀅𑀜𑁆𑀜𑁂𑀦𑀧𑀺 𑀲𑀫𑀼𑀝𑁆𑀞𑀸𑀢𑀻𑀢𑀺? 𑀆𑀫, 𑀲𑀫𑀼𑀝𑁆𑀞𑀸𑀢𑀺. 𑀲𑀩𑁆𑀩𑁂𑀧𑀺 𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀮𑁄𑀓𑀺𑀬𑀥𑀫𑁆𑀫𑀤𑁂𑀲𑀦𑀸𑀬𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀅𑀥𑀺𑀓𑀪𑀸𑀯𑀢𑁄 𑀢𑀣𑀸𑀯𑀺𑀥𑀁 𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.
𑀬𑀤𑀺 𑀏𑀯𑀁 𑀇𑀥𑀸𑀧𑀺 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑀢𑁄. 𑀧𑀜𑁆𑀳𑀸𑀯𑀸𑀭𑀲𑁆𑀫𑀺𑀜𑁆𑀳𑀺 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀆𑀕𑀢𑀁’’. 𑀢𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀇𑀥 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀅𑀯𑀢𑁆𑀯𑀸 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀘𑀺𑀢𑁆𑀢𑀚𑀭𑀽𑀧𑀁 𑀅𑀚𑀦𑀬𑀫𑀸𑀦𑀸𑀧𑀺 𑀢𑁂 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀲𑀫𑀼𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑁂𑀲𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀚𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀜𑁆𑀘 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀅𑀜𑁆𑀜𑁂𑀲𑀼𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀓𑀲𑁆𑀫𑀸 𑀧𑀦𑀸𑀬𑀁 𑀳𑁂𑀢𑀼 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀯𑀢𑁆𑀢𑁂𑀢𑀺? 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬. 𑀧𑀝𑀺𑀲𑀦𑁆𑀥𑀺𑀬𑀜𑁆𑀳𑀺 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀧𑀯𑀢𑁆𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀘𑀺𑀢𑁆𑀢𑀁 𑀘𑀺𑀢𑁆𑀢𑀚𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀦𑀺𑀧𑀺 𑀯𑀺𑀦𑀸 𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁩𑁯). 𑀧𑀯𑀢𑁆𑀢𑀺𑀬𑀁 𑀧𑀦 𑀢𑁂𑀲𑀁 𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑀫𑁆𑀫𑀧𑀝𑀺𑀩𑀤𑁆𑀥𑀸𑀯 𑀧𑀯𑀢𑁆𑀢𑀺, 𑀦 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸. 𑀅𑀯𑀺𑀚𑁆𑀚𑀫𑀸𑀦𑁂 𑀘𑀸𑀧𑀺 𑀘𑀺𑀢𑁆𑀢𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯.
𑀓𑀲𑁆𑀫𑀸 𑀧𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀺𑀢𑁆𑀢𑀁 𑀘𑀺𑀢𑁆𑀢𑀚𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑀸𑀬 𑀘𑁂𑀯 𑀅𑀧𑁆𑀧𑀢𑀺𑀝𑁆𑀞𑀺𑀢𑀯𑀢𑁆𑀣𑀼𑀢𑀸𑀬 𑀘 𑀤𑀼𑀩𑁆𑀩𑀮𑀢𑁆𑀢𑀸. 𑀢𑀜𑁆𑀳𑀺 𑀢𑀤𑀸 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀁 𑀅𑀧𑀼𑀭𑁂𑀚𑀸𑀢𑀯𑀢𑁆𑀣𑀼𑀓𑀢𑁆𑀢𑀸 𑀘 𑀅𑀧𑁆𑀧𑀢𑀺𑀝𑁆𑀞𑀺𑀢𑀯𑀢𑁆𑀣𑀼𑀓𑀦𑁆𑀢𑀺 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀢𑀲𑁆𑀫𑀸 𑀧𑀧𑀸𑀢𑁂 𑀧𑀢𑀺𑀢𑀫𑀢𑁆𑀢𑁄 𑀧𑀼𑀭𑀺𑀲𑁄 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀓𑀸𑀢𑀼𑀁 𑀯𑀺𑀬 𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀓𑀫𑁆𑀫𑀚𑀭𑀽𑀧𑀫𑁂𑀯 𑀧𑀦𑀲𑁆𑀲 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀢𑀜𑁆𑀘 𑀓𑀫𑁆𑀫𑀚𑀭𑀽𑀧𑀲𑁆𑀲𑁂𑀯 𑀩𑀻𑀚𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀓𑀫𑁆𑀫𑀁 𑀧𑀦𑀲𑁆𑀲 𑀔𑁂𑀢𑁆𑀢𑀲𑀤𑀺𑀲𑀁, 𑀓𑀺𑀮𑁂𑀲𑀸 𑀆𑀧𑀲𑀤𑀺𑀲𑀸. 𑀢𑀲𑁆𑀫𑀸 𑀲𑀦𑁆𑀢𑁂𑀧𑀺 𑀔𑁂𑀢𑁆𑀢𑁂 𑀆𑀧𑁂 𑀘 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀁 𑀩𑀻𑀚𑀸𑀦𑀼𑀪𑀸𑀯𑁂𑀦 𑀭𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀯𑀺𑀬 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀭𑀽𑀧𑀓𑀸𑀬𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀩𑀻𑀚𑁂 𑀧𑀦 𑀯𑀺𑀕𑀢𑁂𑀧𑀺 𑀧𑀣𑀯𑀻𑀆𑀧𑀸𑀦𑀼𑀪𑀸𑀯𑁂𑀦 𑀭𑀼𑀓𑁆𑀔𑀲𑁆𑀲 𑀉𑀧𑀭𑀽𑀧𑀭𑀺 𑀧𑀯𑀢𑁆𑀢𑀺 𑀯𑀺𑀬; 𑀯𑀺𑀦𑀸 𑀘𑀺𑀢𑁆𑀢𑁂𑀦 𑀓𑀫𑁆𑀫𑀢𑁄𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀓𑀫𑁆𑀫𑀁 𑀔𑁂𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀩𑀻𑀚𑀁 𑀢𑀡𑁆𑀳𑀸 𑀲𑁆𑀦𑁂𑀳𑁄’’𑀢𑀺 (𑀅. 𑀦𑀺. 𑁩.𑁭𑁭).
𑀅𑀬𑀜𑁆𑀘 𑀧𑀦𑀢𑁆𑀣𑁄 𑀑𑀓𑀸𑀲𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑁄. 𑀢𑀬𑁄 𑀳𑀺 𑀑𑀓𑀸𑀲𑀸 𑁋 𑀦𑀸𑀫𑁄𑀓𑀸𑀲𑁄, 𑀭𑀽𑀧𑁄𑀓𑀸𑀲𑁄, 𑀦𑀸𑀫𑀭𑀽𑀧𑁄𑀓𑀸𑀲𑁄𑀢𑀺. 𑀢𑀢𑁆𑀣 𑀅𑀭𑀽𑀧𑀪𑀯𑁄 𑀦𑀸𑀫𑁄𑀓𑀸𑀲𑁄 𑀦𑀸𑀫. 𑀢𑀢𑁆𑀭 𑀳𑀺 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀫𑁆𑀧𑀺 𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀅𑀭𑀽𑀧𑀥𑀫𑁆𑀫𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀲𑀜𑁆𑀜𑀪𑀯𑁄 𑀭𑀽𑀧𑁄𑀓𑀸𑀲𑁄 𑀦𑀸𑀫. 𑀢𑀢𑁆𑀭 𑀳𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑀢𑁆𑀢𑀫𑁆𑀧𑀺 𑀅𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀭𑀽𑀧𑀥𑀫𑁆𑀫𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀦𑀸𑀫𑀭𑀽𑀧𑁄𑀓𑀸𑀲𑁄 𑀦𑀸𑀫. 𑀢𑀢𑁆𑀭 𑀳𑀺 𑀯𑀢𑁆𑀣𑀼𑀭𑀽𑀧𑀫𑀢𑁆𑀢𑀫𑁆𑀧𑀺 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀬𑀁 𑀅𑀭𑀽𑀧𑀥𑀫𑁆𑀫𑀸, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀯𑀺𑀦𑀸 𑀓𑀫𑁆𑀫𑀚𑀸𑀧𑀺 𑀭𑀽𑀧𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀼𑀕𑀦𑀤𑁆𑀥𑀸𑀯 𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀬𑀣𑀸 𑀳𑀺 𑀲𑀲𑁆𑀲𑀸𑀫𑀺𑀓𑁂 𑀲𑀭𑀸𑀚𑀓𑁂 𑀕𑁂𑀳𑁂 𑀲𑀤𑁆𑀯𑀸𑀭𑀧𑀸𑀮𑀓𑁂 𑀭𑀸𑀚𑀸𑀡𑀢𑁆𑀢𑀺𑀁 𑀯𑀺𑀦𑀸 𑀧𑀞𑀫𑀧𑁆𑀧𑀯𑁂𑀲𑁄 𑀦𑀸𑀫 𑀦𑀢𑁆𑀣𑀺, 𑀅𑀧𑀭𑀪𑀸𑀕𑁂 𑀧𑀦 𑀯𑀺𑀦𑀸𑀧𑀺 𑀆𑀡𑀢𑁆𑀢𑀺𑀁 𑀧𑀼𑀭𑀺𑀫𑀸𑀡𑀢𑁆𑀢𑀺𑀆𑀦𑀼𑀪𑀸𑀯𑁂𑀦𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀧𑀜𑁆𑀘𑀯𑁄𑀓𑀸𑀭𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀭𑀸𑀚𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑀁 𑀯𑀺𑀦𑀸 𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀞𑀫𑀼𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀅𑀧𑀭𑀪𑀸𑀕𑁂 𑀧𑀦 𑀯𑀺𑀦𑀸𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸𑀦𑀼𑀪𑀸𑀯𑀁 𑀧𑀼𑀭𑀺𑀫𑀸𑀦𑀼𑀪𑀸𑀯𑀯𑀲𑁂𑀦 𑀮𑀤𑁆𑀥𑀧𑁆𑀧𑀯𑁂𑀲𑀲𑁆𑀲 𑀓𑀫𑁆𑀫𑀢𑁄 𑀧𑀯𑀢𑁆𑀢𑀺 𑀳𑁄𑀢𑀺. 𑀅𑀲𑀜𑁆𑀜𑀪𑀯𑁄 𑀧𑀦 𑀬𑀲𑁆𑀫𑀸 𑀅𑀭𑀽𑀧𑁄𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀦𑀸𑀯 𑀅𑀭𑀽𑀧𑀧𑀘𑁆𑀘𑀬𑀸 𑀅𑀲𑀜𑁆𑀜𑁄𑀓𑀸𑀲𑀢𑁆𑀢𑀸 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀅𑀲𑁆𑀲𑀸𑀫𑀺𑀓𑁂 𑀲𑀼𑀜𑁆𑀜𑀕𑁂𑀳𑁂 𑀅𑀢𑁆𑀢𑀦𑁄 𑀕𑁂𑀳𑁂 𑀘 𑀧𑀼𑀭𑀺𑀲𑀲𑁆𑀲 𑀧𑀯𑁂𑀲𑁄 𑀯𑀺𑀬. 𑀅𑀭𑀽𑀧𑀪𑀯𑁄𑀧𑀺 𑀬𑀲𑁆𑀫𑀸 𑀭𑀽𑀧𑁄𑀓𑀸𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀦𑀸𑀯 𑀭𑀽𑀧𑀧𑀘𑁆𑀘𑀬𑀸 𑀅𑀜𑁆𑀜𑁄𑀓𑀸𑀲𑀢𑁆𑀢𑀸 𑀅𑀭𑀽𑀧𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺. 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀧𑀦 𑀭𑀽𑀧𑀸𑀭𑀽𑀧𑁄𑀓𑀸𑀲𑁄𑀢𑀺 𑀦𑀢𑁆𑀣𑁂𑀢𑁆𑀣 𑀅𑀭𑀽𑀧𑀧𑀘𑁆𑀘𑀬𑀁 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀻𑀢𑀺. 𑀇𑀢𑀺 𑀅𑀬𑀁 𑀳𑁂𑀢𑀼 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀧𑀯𑀢𑁆𑀢𑁂𑀢𑀺.
𑀦𑀦𑀼 ‘‘𑀳𑁂𑀢𑀽 𑀲𑀳𑀚𑀸𑀢𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁄𑀧𑀺 𑀅𑀬𑀫𑀢𑁆𑀣𑁄 𑀕𑀳𑀺𑀢𑁄 𑀳𑁄𑀢𑀺, 𑀅𑀣 𑀓𑀲𑁆𑀫𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦’’𑀦𑁆𑀢𑀺 𑀇𑀤𑀁 𑀕𑀳𑀺𑀢𑀦𑁆𑀢𑀺? 𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑀧𑀝𑀺𑀩𑀸𑀳𑀦𑀢𑁄. 𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀧𑀯𑀢𑁆𑀢𑀺𑀬𑀁 𑀳𑁂𑀢𑀼𑀦𑀸 𑀲𑀳 𑀏𑀓𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀸𑀦𑀺 𑀘𑁂𑀯 𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀺 𑀘 𑀚𑀸𑀬𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀦 𑀘 𑀲𑁄 𑀢𑁂𑀲𑀁 𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑀲𑁆𑀲 𑀧𑀝𑀺𑀩𑀸𑀳𑀦𑀢𑁆𑀣𑀫𑁂𑀢𑀁 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀇𑀤𑀸𑀦𑀺 ‘‘𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀢𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄𑀢𑀺 𑀅𑀬𑀜𑁆𑀳𑀺 𑀳𑁂𑀢𑀼 𑀦𑀸𑀫 𑀚𑀸𑀢𑀺𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀓𑀼𑀲𑀮𑀳𑁂𑀢𑀼 𑀪𑀽𑀫𑀦𑁆𑀢𑀭𑀢𑁄 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀅𑀓𑀼𑀲𑀮𑀳𑁂𑀢𑀼 𑀓𑀸𑀫𑀸𑀯𑀘𑀭𑁄𑀯 𑀯𑀺𑀧𑀸𑀓𑀳𑁂𑀢𑀼 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀓𑀺𑀭𑀺𑀬𑀳𑁂𑀢𑀼 𑀓𑀸𑀫𑀸𑀯𑀘𑀭𑁄 𑀭𑀽𑀧𑀸𑀯𑀘𑀭𑁄 𑀅𑀭𑀽𑀧𑀸𑀯𑀘𑀭𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀦𑀸𑀫𑀢𑁄 𑀅𑀮𑁄𑀪𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄. 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑀳𑁂𑀢𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀓𑀼𑀲𑀮𑀳𑁂𑀢𑀼 𑀮𑁄𑀪𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄. 𑀯𑀺𑀧𑀸𑀓𑀓𑀺𑀭𑀺𑀬𑀳𑁂𑀢𑀽 𑀧𑀦 𑀅𑀮𑁄𑀪𑀸𑀤𑀺𑀯𑀲𑁂𑀦 𑀢𑀬𑁄 𑀢𑀬𑁄 𑀳𑁄𑀦𑁆𑀢𑀺. 𑀢𑀁𑀢𑀁𑀘𑀺𑀢𑁆𑀢𑀲𑀫𑁆𑀧𑀬𑁄𑀕𑀯𑀲𑁂𑀦 𑀧𑀦 𑀢𑁂𑀲𑀁 𑀢𑁂𑀲𑀁 𑀳𑁂𑀢𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑁄𑀬𑁂𑀯𑀸𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑁂𑀲𑀁 𑀦𑀸𑀫 𑀥𑀫𑁆𑀫𑀸𑀦𑀁 𑀅𑀬𑀁 𑀧𑀘𑁆𑀘𑀬𑁄𑀢𑀺 𑀏𑀯𑀫𑁆𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀢𑀸𑀯 𑀳𑁂𑀢𑀼𑀧𑀘𑁆𑀘𑀬𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀭𑀽𑀧𑀪𑀯𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁𑀬𑁂𑀯. 𑀭𑀽𑀧𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼𑀬𑁂𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀳𑁂𑀢𑀼 𑀓𑀸𑀫𑀸𑀯𑀘𑀭𑀓𑀼𑀲𑀮𑀳𑁂𑀢𑀼𑀲𑀤𑀺𑀲𑁄𑀯. 𑀢𑀣𑀸 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀳𑁂𑀢𑀼, 𑀢𑀣𑀸 𑀅𑀓𑀼𑀲𑀮𑀳𑁂𑀢𑀼. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀳𑁂𑀢𑀼 𑀧𑀦 𑀓𑀸𑀫𑀪𑀯𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑁄. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀳𑁂𑀢𑀼 𑀭𑀽𑀧𑀪𑀯𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀜𑁆𑀜𑁂𑀯 𑀳𑁂𑀢𑀼𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀳𑁂𑀢𑀼 𑀅𑀭𑀽𑀧𑀪𑀯𑁂 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀜𑁂𑀯 𑀳𑁂𑀢𑀼𑀧𑀘𑁆𑀘𑀬𑁄. 𑀅𑀧𑀭𑀺𑀬𑀸𑀧𑀦𑁆𑀦𑀯𑀺𑀧𑀸𑀓𑀳𑁂𑀢𑀼 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀅𑀭𑀽𑀧𑀪𑀯𑁂 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀳𑁂𑀢𑀼𑀧𑀘𑁆𑀘𑀬𑁄. 𑀓𑀺𑀭𑀺𑀬𑀳𑁂𑀢𑀽𑀲𑀼 𑀧𑀦 𑀢𑁂𑀪𑀽𑀫𑀓𑁂𑀲𑀼𑀧𑀺 𑀓𑀼𑀲𑀮𑀳𑁂𑀢𑀼𑀲𑀤𑀺𑀲𑁄𑀯 𑀧𑀘𑁆𑀘𑀬𑁄𑀢𑀺. 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀭𑀽𑀧𑀸𑀬𑀢𑀦𑀦𑁆𑀢𑀺 𑀭𑀽𑀧𑀲𑀗𑁆𑀔𑀸𑀢𑀁 𑀆𑀬𑀢𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀸𑀬 𑀥𑀸𑀢𑀼𑀬𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀢𑀸𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀭𑀽𑀧𑀸𑀬𑀢𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄𑀥𑀸𑀢𑀼𑀬𑀸𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬 𑀢𑀺𑀯𑀺𑀥𑀸𑀬𑀧𑀺 𑀫𑀦𑁄𑀥𑀸𑀢𑀼𑀬𑀸 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑁄 𑀘 𑀔𑁄 𑀏𑀓𑀓𑁆𑀔𑀡𑁂. 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀏𑀢𑀸𑀦𑀺 𑀘 𑀭𑀽𑀧𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀅𑀯𑀲𑁂𑀲𑀸 𑀘 𑀲𑀩𑁆𑀩𑁂𑀧𑀺 𑀜𑁂𑀬𑁆𑀬𑀥𑀫𑁆𑀫𑀸 𑀇𑀫𑀸 𑀙 𑀥𑀸𑀢𑀼𑀬𑁄 𑀞𑀧𑁂𑀢𑁆𑀯𑀸 𑀲𑁂𑀲𑀸𑀬 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀬 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀬𑀁 𑀬𑀁 𑀥𑀫𑁆𑀫𑀁 𑀆𑀭𑀩𑁆𑀪𑀸𑀢𑀺 𑀇𑀫𑀺𑀦𑀸 𑀬𑁂 𑀏𑀢𑁂 𑀏𑀢𑀸𑀲𑀁 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀆𑀭𑀫𑁆𑀫𑀡𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀢𑀸𑀲𑀁 𑀥𑀸𑀢𑀽𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑁆𑀔𑀡𑁂𑀬𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀳𑁄𑀦𑁆𑀢𑀸𑀧𑀺 𑀘 𑀦 𑀏𑀓𑀢𑁄 𑀳𑁄𑀦𑁆𑀢𑀺, 𑀬𑀁 𑀬𑀁 𑀆𑀭𑀩𑁆𑀪 𑀬𑁂 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀢𑁂𑀲𑀁 𑀢𑁂 𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺𑀧𑀺 𑀤𑀻𑀧𑁂𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀬𑀣𑀸 𑀦𑀚𑁆𑀚𑁄 𑀲𑀦𑁆𑀤𑀦𑁆𑀢𑀺, 𑀧𑀩𑁆𑀩𑀢𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀩𑁆𑀩𑀓𑀸𑀮𑀲𑀗𑁆𑀕𑀳𑀯𑀲𑁂𑀦, 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀬𑁂𑀧𑀺 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀬𑁂𑀧𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦𑁂𑀯 𑀉𑀧𑁆𑀧𑀚𑁆𑀚𑀺𑀁𑀲𑀼 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀢𑀺 𑀇𑀤𑀁 ‘‘𑀬𑁂 𑀬𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀭𑀽𑀧𑀢𑁄 𑀦𑀺𑀤𑀲𑁆𑀲𑀦𑀁. 𑀢𑁂 𑀢𑁂 𑀥𑀫𑁆𑀫𑀸𑀢𑀺 𑀢𑁂 𑀢𑁂 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀁. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀇𑀤𑀁 𑀧𑀦 𑀆𑀭𑀫𑁆𑀫𑀡𑀁 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀁 𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀓𑁄𑀝𑁆𑀞𑀸𑀲𑀢𑁄 𑀙𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀺𑀁 𑀅𑀯𑀲𑁂𑀲𑀁 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑀁…𑀧𑁂… 𑀅𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑀁; 𑀭𑀽𑀧𑀸𑀯𑀘𑀭𑀁 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀢𑁄 𑀢𑀺𑀯𑀺𑀥𑀁, 𑀢𑀣𑀸 𑀅𑀭𑀽𑀧𑀸𑀯𑀘𑀭𑀁, 𑀅𑀧𑀭𑀺𑀬𑀸𑀧𑀦𑁆𑀦𑀁 𑀓𑀼𑀲𑀮𑀯𑀺𑀧𑀸𑀓𑀦𑀺𑀩𑁆𑀩𑀸𑀦𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀲𑀩𑁆𑀩𑀫𑁂𑀯 𑀯𑀸 𑀏𑀢𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀪𑁂𑀤𑀢𑁄 𑀲𑀢𑁆𑀢𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀼𑀲𑀮𑀁 𑀪𑀽𑀫𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺, 𑀅𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀯𑀺𑀧𑀸𑀓𑀁 𑀘𑀢𑀼𑀪𑀽𑀫𑀓𑀁, 𑀓𑀺𑀭𑀺𑀬𑀁 𑀢𑀺𑀪𑀽𑀫𑀓𑀁, 𑀭𑀽𑀧𑀁 𑀏𑀓𑀪𑀽𑀫𑀓𑀁 𑀓𑀸𑀫𑀸𑀯𑀘𑀭𑀫𑁂𑀯, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀏𑀓𑀪𑀽𑀫𑀓𑀁 𑀅𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀧𑀜𑁆𑀜𑀢𑁆𑀢𑀺 𑀪𑀽𑀫𑀺𑀯𑀺𑀦𑀺𑀫𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀁 𑀢𑁂𑀲𑀼 𑀙𑀲𑀼 𑀭𑀸𑀲𑀻𑀲𑀼 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑀚𑁆𑀚𑀸𑀦𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀅𑀭𑀽𑀧𑀸𑀯𑀭𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲, 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀢𑁄 𑀓𑀼𑀲𑀮𑀓𑀺𑀭𑀺𑀬𑀸𑀦𑀫𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.
𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀫𑁆𑀧𑀺 𑀇𑀫𑁂𑀲𑀁𑀬𑁂𑀯 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀯𑀺𑀧𑀸𑀓𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀜𑁆𑀜𑁂𑀯 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺.
𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑀁 𑀇𑀫𑁂𑀲𑀼 𑀙𑀲𑀼 𑀭𑀸𑀲𑀻𑀲𑀼 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑀚𑁆𑀚𑀸𑀦𑀁 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸𑀭𑀫𑁆𑀫𑀡𑀁 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀓𑀼𑀲𑀮𑀯𑀺𑀧𑀸𑀓𑀲𑁆𑀲, 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀦𑀁 𑀓𑁂𑀘𑀺 𑀦𑀺𑀘𑁆𑀙𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀺𑀢𑁄 𑀉𑀧𑀥𑀸𑀭𑁂𑀢𑀩𑁆𑀩𑀁. 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀁 𑀢𑁂𑀪𑀽𑀫𑀓𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀦𑀯𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀬𑁂𑀲𑀁 𑀬𑁂𑀲𑀁 𑀧𑀘𑁆𑀘𑀬𑁄, 𑀢𑁂 𑀢𑁂 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀆𑀭𑀫𑁆𑀫𑀡𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁩. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁩. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀙𑀦𑁆𑀤𑀸𑀥𑀺𑀧𑀢𑀻𑀢𑀺 𑀙𑀦𑁆𑀤𑀲𑀗𑁆𑀔𑀸𑀢𑁄 𑀅𑀥𑀺𑀧𑀢𑀺. 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑀲𑁆𑀲 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀲𑁆𑀫𑀸 𑀧𑀦 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺? 𑀏𑀓𑀓𑁆𑀔𑀡𑁂 𑀅𑀪𑀸𑀯𑀢𑁄. 𑀧𑀼𑀭𑀺𑀫𑀦𑀬𑀲𑁆𑀫𑀺𑀜𑁆𑀳𑀺 𑀤𑁆𑀯𑁂 𑀢𑀬𑁄 𑀳𑁂𑀢𑀽 𑀏𑀓𑀓𑁆𑀔𑀡𑁂𑀧𑀺 𑀳𑁂𑀢𑀼𑀧𑀘𑁆𑀘𑀬𑁄 𑀳𑁄𑀦𑁆𑀢𑀺 𑀫𑀽𑀮𑀝𑁆𑀞𑁂𑀦. 𑀉𑀧𑀓𑀸𑀭𑀓𑀪𑀸𑀯𑀲𑁆𑀲 𑀅𑀯𑀺𑀚𑀳𑀦𑀢𑁄. 𑀅𑀥𑀺𑀧𑀢𑀺 𑀧𑀦 𑀚𑁂𑀝𑁆𑀞𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄, 𑀦 𑀘 𑀏𑀓𑀓𑁆𑀔𑀡𑁂 𑀩𑀳𑀽 𑀚𑁂𑀝𑁆𑀞𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀢𑁄 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀦𑁂𑀲𑀁 𑀏𑀓𑀓𑁆𑀔𑀡𑁂 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺. 𑀢𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀲𑁆𑀲 𑀏𑀓𑀓𑁆𑀔𑀡𑁂 𑀅𑀪𑀸𑀯𑀢𑁄 𑀇𑀥 𑀏𑀯𑀁 𑀤𑁂𑀲𑀦𑀸 𑀓𑀢𑀸𑀢𑀺.
𑀏𑀯𑀁 𑀲𑀳𑀚𑀸𑀢𑀸𑀥𑀺𑀧𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀁 𑀤𑀲𑁆𑀲𑁂𑀢𑀼𑀁 𑀬𑀁 𑀬𑀁 𑀥𑀫𑁆𑀫𑀁 𑀕𑀭𑀼𑀁 𑀓𑀢𑁆𑀯𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀬𑀁 𑀥𑀫𑁆𑀫𑀦𑁆𑀢𑀺 𑀬𑀁 𑀬𑀁 𑀆𑀭𑀫𑁆𑀫𑀡𑀥𑀫𑁆𑀫𑀁. 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀕𑀭𑀼𑀓𑀸𑀭𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑀯𑀲𑁂𑀦 𑀯𑀸 𑀕𑀭𑀼𑀁 𑀪𑀸𑀭𑀺𑀬𑀁 𑀮𑀤𑁆𑀥𑀩𑁆𑀩𑀁 𑀅𑀯𑀺𑀚𑀳𑀺𑀢𑀩𑁆𑀩𑀁 𑀅𑀦𑀯𑀜𑁆𑀜𑀸𑀢𑀁 𑀓𑀢𑁆𑀯𑀸. 𑀢𑁂 𑀢𑁂 𑀥𑀫𑁆𑀫𑀸𑀢𑀺 𑀢𑁂 𑀢𑁂 𑀕𑀭𑀼𑀓𑀸𑀢𑀩𑁆𑀩𑀥𑀫𑁆𑀫𑀸. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀕𑀭𑀼𑀓𑀸𑀭𑀓𑀥𑀫𑁆𑀫𑀸𑀦𑀁. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀅𑀥𑀺𑀧𑀢𑀺 𑀦𑀸𑀫 𑀲𑀳𑀚𑀸𑀢𑀸𑀭𑀫𑁆𑀫𑀡𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑁄 𑀙𑀦𑁆𑀤𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑁂𑀲𑀼 𑀏𑀓𑁂𑀓𑁄 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀓𑀸𑀫𑀸𑀯𑀘𑀭𑁄 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀢𑀺𑀯𑀺𑀥𑁄. 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀧𑀦𑁂𑀢𑁆𑀣 𑀯𑀻𑀫𑀁𑀲𑀸𑀥𑀺𑀧𑀢𑀺 𑀦 𑀮𑀩𑁆𑀪𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑁄 𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀤𑀼𑀯𑀺𑀥𑁄, 𑀅𑀧𑀭𑀺𑀬𑀸𑀧𑀦𑁆𑀦𑁄 𑀓𑀼𑀲𑀮𑀯𑀺𑀧𑀸𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀧𑀦 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀯𑀲𑁂𑀦 𑀙𑀩𑁆𑀩𑀺𑀥𑁄𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀲𑀳𑀚𑀸𑀢𑀸𑀥𑀺𑀧𑀢𑀺𑀫𑁆𑀳𑀺 𑀢𑀸𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀅𑀥𑀺𑀧𑀢𑀺 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀙𑀦𑁆𑀤𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀲𑀗𑁆𑀔𑀸𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀮𑀩𑁆𑀪𑀢𑀺. 𑀦 𑀳𑀺 𑀢𑁂 𑀥𑀫𑁆𑀫𑀸 𑀲𑀳𑀚𑀸𑀢𑀸𑀥𑀺𑀧𑀢𑀺𑀁 𑀯𑀺𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀧𑀦 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀸𑀯𑀘𑀭𑀅𑀥𑀺𑀧𑀢𑀺𑀲𑀤𑀺𑀲𑁄𑀯 𑀘𑀢𑀼𑀯𑁄𑀓𑀸𑀭𑁂 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀲𑀩𑁆𑀩𑁄𑀧𑀺 𑀓𑀸𑀫𑀸𑀯𑀘𑀭𑀸𑀥𑀺𑀧𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑁄 𑀓𑀼𑀲𑀮𑀢𑁄𑀧𑀺 𑀯𑀺𑀧𑀸𑀓𑀢𑁄𑀧𑀺 𑀧𑀜𑁆𑀘𑀯𑁄𑀓𑀸𑀭𑁂 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯. 𑀅𑀓𑀼𑀲𑀮𑁄 𑀓𑀸𑀫𑀪𑀯𑁂 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀘𑀺𑀢𑁆𑀢𑁂𑀲𑀼 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀦𑀺𑀬𑀢𑁄 𑀓𑀸𑀫𑀪𑀯𑀭𑀽𑀧𑀪𑀯𑁂𑀲𑀼 𑀅𑀢𑁆𑀢𑀦𑁄 𑀅𑀥𑀺𑀧𑀢𑀺𑀓𑀸𑀮𑁂 𑀢𑁂𑀲𑀜𑁆𑀜𑁂𑀯. 𑀅𑀭𑀽𑀧𑀪𑀯𑁂 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀬𑀁 𑀢𑀸𑀯 𑀲𑀳𑀚𑀸𑀢𑀸𑀥𑀺𑀧𑀢𑀺𑀫𑁆𑀳𑀺 𑀦𑀬𑁄.
𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑁆𑀳𑀺 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀧𑀺 𑀓𑀼𑀲𑀮𑀸𑀭𑀫𑁆𑀫𑀡𑀸𑀥𑀺𑀧𑀢𑀺𑀫𑁆𑀳𑀺 𑀏𑀲𑁂𑀯 𑀦𑀬𑁄. 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑁄 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲 𑀘𑁂𑀯 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀲𑁆𑀲 𑀘 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑁄 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀦𑀸𑀫 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀼𑀘𑁆𑀘𑀢𑀺. 𑀲𑁄 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑁄 𑀧𑀦 𑀯𑀺𑀧𑀸𑀓𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀸𑀥𑀺𑀧𑀢𑀺. 𑀮𑁄𑀓𑀼𑀢𑁆𑀢𑀭𑁄 𑀧𑀦 𑀯𑀺𑀧𑀸𑀓𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀓𑀺𑀭𑀺𑀬𑀸𑀦𑀜𑁆𑀜𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀧𑀦 𑀢𑀺𑀯𑀺𑀥𑁄𑀧𑀺 𑀓𑀺𑀭𑀺𑀬𑀸𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑀗𑁆𑀔𑀸𑀢𑁄 𑀭𑀽𑀧𑀓𑁆𑀔𑀦𑁆𑀥𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀮𑁄𑀪𑀲𑀳𑀕𑀢𑀸𑀓𑀼𑀲𑀮𑀲𑁆𑀲𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀁 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀺𑀭𑀺𑀬𑀲𑁆𑀲 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀫𑀦𑁄𑀥𑀸𑀢𑀼𑀬𑀸𑀢𑀺 𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀬𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀸𑀬 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸. 𑀢𑀢𑁄 𑀧𑀭𑀁 𑀧𑀦 𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀓𑀺𑀘𑁆𑀘𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀢𑀸 𑀅𑀯𑀼𑀢𑁆𑀢𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀲𑀗𑁆𑀔𑀺𑀢𑁆𑀢𑀸. ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀓𑁂 𑀘 𑀙𑀝𑁆𑀞𑀦𑀬𑁂 𑀢𑀸 𑀲𑀗𑁆𑀕𑀳𑀺𑀢𑀸𑀢𑀺𑀧𑀺 𑀇𑀥 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼𑀧𑀺 𑀅𑀦𑀦𑁆𑀢𑀭𑀸𑀢𑀻𑀢𑀸 𑀓𑀼𑀲𑀮𑀚𑀯𑀦𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸. 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀦𑁆𑀢𑀺 𑀅𑀦𑀦𑁆𑀢𑀭𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀜𑁆𑀜𑁂𑀯. 𑀓𑀼𑀲𑀮𑀸𑀦𑀦𑁆𑀢𑀺 𑀲𑀤𑀺𑀲𑀓𑀼𑀲𑀮𑀸𑀦𑀁. 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀇𑀤𑀁 𑀧𑀦 𑀓𑀼𑀲𑀮𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀫𑀽𑀮𑀓𑁂 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀪𑀯𑀗𑁆𑀕𑀲𑀗𑁆𑀔𑀸𑀢𑀸𑀦𑀜𑁆𑀜𑁂𑀯. 𑀅𑀩𑁆𑀬𑀸𑀓𑀢𑀫𑀽𑀮𑀓𑁂 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀺 𑀆𑀯𑀚𑁆𑀚𑀦𑀚𑀯𑀦𑀯𑀲𑁂𑀦 𑀯𑀸 𑀪𑀯𑀗𑁆𑀕𑀯𑀲𑁂𑀦 𑀯𑀸 𑀧𑀯𑀢𑁆𑀢𑀸𑀦𑀁 𑀓𑀺𑀭𑀺𑀬𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀢𑁄 𑀧𑀝𑁆𑀞𑀸𑀬 𑀧𑀦 𑀬𑀸𑀯 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀸𑀯 𑀧𑀯𑀢𑁆𑀢𑁂𑀲𑀼 𑀯𑀻𑀣𑀺𑀘𑀺𑀢𑁆𑀢𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑁂𑀯. 𑀓𑀼𑀲𑀮𑀸𑀦𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀸𑀦𑀦𑁆𑀢𑀭𑀸𑀦𑀁 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀸𑀦𑁆𑀢𑀭𑀸𑀦𑀁 𑀧𑀞𑀫𑀚𑀯𑀦𑀓𑀼𑀲𑀮𑀸𑀦𑀁. 𑀅𑀓𑀼𑀲𑀮𑀸𑀦𑀦𑁆𑀢𑀺 𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀲𑀁 𑀬𑁂𑀲𑀦𑁆𑀢𑀺 𑀇𑀤𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀲𑀗𑁆𑀔𑁂𑀧𑀮𑀓𑁆𑀔𑀡𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀘𑀢𑀼𑀪𑀽𑀫𑀓𑁄 𑀅𑀭𑀽𑀧𑀥𑀫𑁆𑀫𑀭𑀸𑀲𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀢𑁄 𑀘𑀢𑀼𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺, 𑀅𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑁄𑀯 𑀯𑀺𑀧𑀸𑀓𑁄 𑀘𑀢𑀼𑀪𑀽𑀫𑀓𑁄, 𑀓𑀺𑀭𑀺𑀬𑀸𑀦𑀦𑁆𑀢𑀭𑀧𑀘𑁆𑀘𑀬𑁄 𑀧𑀦 𑀢𑁂 𑀪𑀽𑀫𑀓𑁄𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲𑁂𑀯 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀓𑀼𑀲𑀮𑁄 𑀘 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑁄 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑁄 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀸𑀓𑀸𑀦𑀁 𑀅𑀢𑁆𑀢𑀦𑁄 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀲𑁆𑀲 𑀘𑀸𑀢𑀺 𑀅𑀯𑀺𑀲𑁂𑀲𑁂𑀦 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑁄 𑀅𑀦𑀸𑀕𑀸𑀫𑀺𑀨𑀮𑀲𑀗𑁆𑀔𑀸𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀧𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑁄 𑀅𑀯𑀺𑀲𑁂𑀲𑁂𑀦 𑀅𑀓𑀼𑀲𑀮𑀲𑁆𑀲 𑀘𑁂𑀯 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀲𑁆𑀲 𑀘. 𑀯𑀺𑀲𑁂𑀲𑁂𑀦 𑀧𑀦𑁂𑀢𑁆𑀣 𑀲𑀼𑀔𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁄 𑀅𑀓𑀼𑀲𑀮𑁄 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺.
𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁄 𑀯𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀸 𑀯𑀺𑀧𑀸𑀓𑁄 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑁄 𑀧𑀦𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲𑀸𑀧𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲𑀸𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁄 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺.
𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲𑀸𑀢𑀺 𑀦𑀯𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑀸𑀢𑀺 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀁 𑀢𑀺𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑀸𑀢𑀺 𑀧𑀜𑁆𑀘𑀦𑁆𑀦𑀁 𑀭𑀸𑀲𑀻𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁫. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁫. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄𑀧𑀺 𑀇𑀫𑀺𑀦𑀸 𑀲𑀫𑀸𑀦𑀕𑀢𑀺𑀓𑁄𑀯. 𑀇𑀫𑁂 𑀧𑀦 𑀤𑁆𑀯𑁂 𑀧𑀘𑁆𑀘𑀬𑀸 𑀫𑀳𑀸𑀯𑀺𑀢𑁆𑀣𑀸𑀭𑀸, 𑀢𑀲𑁆𑀫𑀸 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀢𑁂𑀲𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄𑀢𑀺.
𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁬. 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁬. 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲. 𑀇𑀫𑀺𑀦𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑀜𑁆𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀦𑀸𑀫𑀭𑀽𑀧𑀁 𑀑𑀓𑁆𑀓𑀦𑁆𑀢𑀁 𑀯𑀺𑀬 𑀧𑀓𑁆𑀔𑀦𑁆𑀤𑀦𑁆𑀢𑀁 𑀯𑀺𑀬 𑀧𑀭𑀮𑁄𑀓𑀢𑁄 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀦𑁆𑀢𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑁄 𑀔𑀡𑁄 ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀦𑀸𑀫𑀲𑁆𑀲, 𑀦𑀸𑀫𑀜𑁆𑀘 𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑀝𑁆𑀞𑀁 𑀨𑀭𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀢𑀺 𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀝𑁆𑀞𑀁 𑀦 𑀨𑀭𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀢𑀣𑀸 𑀉𑀧𑀸𑀤𑀸𑀭𑀽𑀧𑀸 𑀪𑀽𑀢𑀸𑀦𑀁. 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀳𑀤𑀬𑀯𑀢𑁆𑀣𑀼 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁. 𑀓𑀺𑀜𑁆𑀘𑀺 𑀓𑀸𑀮𑁂𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂. 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.
𑀅𑀬𑀁 𑀧𑀦 ‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’𑀢𑀺 𑀏𑀯𑀁 𑀙𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀞𑀺𑀢𑁄. 𑀢𑀢𑁆𑀣 𑀢𑀬𑁄 𑀓𑁄𑀝𑁆𑀞𑀸𑀲𑀸 𑀅𑀜𑁆𑀜𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀬𑁄 𑀦 𑀅𑀜𑁆𑀜𑀫𑀜𑁆𑀜𑀯𑀲𑁂𑀦. 𑀢𑀢𑁆𑀣 𑀧𑀞𑀫𑀓𑁄𑀝𑁆𑀞𑀸𑀲𑁂 𑀅𑀭𑀽𑀧𑀫𑁂𑀯 𑀧𑀘𑁆𑀘𑀬𑁄 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘, 𑀤𑀼𑀢𑀺𑀬𑁂 𑀭𑀽𑀧𑀫𑁂𑀯, 𑀢𑀢𑀺𑀬𑁂 𑀦𑀸𑀫𑀭𑀽𑀧𑀁, 𑀘𑀢𑀼𑀢𑁆𑀣𑁂 𑀧𑀘𑁆𑀘𑀬𑁄 𑀅𑀭𑀽𑀧𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀭𑀽𑀧𑀁; 𑀧𑀜𑁆𑀘𑀫𑁂 𑀧𑀘𑁆𑀘𑀬𑁄𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁆𑀧𑀺 𑀭𑀽𑀧𑀫𑁂𑀯; 𑀙𑀝𑁆𑀞𑁂 𑀧𑀘𑁆𑀘𑀬𑁄 𑀭𑀽𑀧𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀅𑀭𑀽𑀧𑀦𑁆𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀲𑀳𑀚𑀸𑀢𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀁 𑀭𑀽𑀧𑀦𑁆𑀢𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺, 𑀅𑀓𑀼𑀲𑀮𑁄 𑀏𑀓𑀯𑀺𑀥𑁄𑀯 𑀯𑀺𑀧𑀸𑀓𑁄 𑀘𑀢𑀼𑀩𑁆𑀩𑀺𑀥𑁄, 𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀢𑀺𑀯𑀺𑀥𑁄, 𑀭𑀽𑀧𑀁 𑀏𑀓𑀯𑀺𑀥𑀁 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀅𑀓𑀼𑀲𑀮𑀁. 𑀬𑀁 𑀧𑀦𑁂𑀢𑁆𑀣 𑀅𑀭𑀽𑀧𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺.
𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘𑀸𑀧𑀺 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀸𑀦𑀜𑁆𑀜𑁂𑀯. 𑀓𑀸𑀫𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀸𑀦𑀜𑁆𑀜𑁂𑀯. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀏𑀓𑀦𑁆𑀢𑁂𑀦 𑀲𑀳𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺.
𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲 𑀭𑀽𑀧𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑁂 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀧𑀦 𑀫𑀳𑀸𑀪𑀽𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀜𑁆𑀘𑁂𑀯 𑀉𑀧𑀸𑀤𑀸𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀲𑁆𑀲 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀧𑀸𑀴𑀺 𑀆𑀕𑀢𑀸. 𑀢𑀲𑁆𑀲𑀸 𑀢𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑀸𑀯 𑀯𑀡𑁆𑀡𑀦𑀸𑀢𑀺 𑀧𑀼𑀦 𑀦 𑀕𑀳𑀺𑀢𑀸. 𑀅𑀬𑀫𑁆𑀧𑀺 𑀘 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀁 𑀭𑀽𑀧𑀦𑁆𑀢𑀺 𑀧𑀜𑁆𑀘𑀥𑀸 𑀪𑀺𑀦𑁆𑀦𑁄. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄. 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀘𑀢𑀼𑀪𑀽𑀫𑀓𑀁 𑀓𑀼𑀲𑀮𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀢𑀣𑀸 𑀅𑀓𑀼𑀲𑀮𑀁. 𑀯𑀺𑀧𑀸𑀓𑁂 𑀧𑀦 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀭𑀽𑀧𑀲𑁆𑀲, 𑀧𑀯𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀅𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑀩𑁆𑀩𑀫𑁆𑀧𑀺 𑀓𑀺𑀭𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑀁 𑀯𑀢𑁆𑀣𑀼𑀭𑀽𑀧𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀫𑀳𑀸𑀪𑀽𑀢𑀸𑀦𑁂𑀯 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁮. 𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁮. 𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀲𑀳𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀲𑁆𑀲 𑀧𑀼𑀭𑀺𑀫𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑁄𑀝𑁆𑀞𑀸𑀲𑀸𑀦𑀁 𑀯𑀲𑁂𑀦 𑀲𑀳𑀚𑀸𑀢𑀦𑀺𑀲𑁆𑀲𑀬𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀙𑀝𑁆𑀞𑁂𑀦 𑀓𑁄𑀝𑁆𑀞𑀸𑀲𑁂𑀦 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀦𑀬𑀁 𑀤𑀲𑁆𑀲𑁂𑀢𑀼𑀁 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬𑀸𑀢𑀺 𑀯𑀢𑁆𑀣𑀼𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀢𑀺𑀯𑀺𑀥𑀸 𑀫𑀦𑁄𑀥𑀸𑀢𑀼, 𑀞𑀧𑁂𑀢𑁆𑀯𑀸 𑀅𑀭𑀽𑀧𑀯𑀺𑀧𑀸𑀓𑀁 𑀤𑁆𑀯𑀸𑀲𑀢𑁆𑀢𑀢𑀺𑀯𑀺𑀥𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀫𑀸𑀦𑀺 𑀧𑀜𑁆𑀘𑀲𑀢𑁆𑀢𑀢𑀺 𑀘𑀺𑀢𑁆𑀢𑀸𑀦𑀺 𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀅𑀬𑀫𑁆𑀧𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀪𑁂𑀤𑀢𑁄 𑀧𑀜𑁆𑀘𑀥𑀸𑀯 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀘𑀢𑀼𑀩𑁆𑀩𑀺𑀥𑁄𑀯 𑀅𑀓𑀼𑀲𑀮𑁄 𑀏𑀓𑀯𑀺𑀥𑁄 𑀯𑀺𑀧𑀸𑀓𑁄 𑀘𑀢𑀼𑀩𑁆𑀩𑀺𑀥𑁄, 𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀢𑀺𑀯𑀺𑀥𑁄, 𑀭𑀽𑀧𑀁 𑀏𑀓𑀯𑀺𑀥𑀫𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀁 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀅𑀓𑀼𑀲𑀮𑀁. 𑀬𑀁 𑀧𑀦𑁂𑀢𑁆𑀣 𑀆𑀭𑀼𑀧𑁆𑀧𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀯𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲𑀸𑀧𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀧𑀜𑁆𑀘𑀯𑁄𑀓𑀸𑀭𑁂; 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀲𑁆𑀲𑁂𑀯 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀸𑀫𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀸𑀦𑀜𑁆𑀜𑁂𑀯. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀏𑀓𑀦𑁆𑀢𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺.
𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑁆𑀲 𑀘 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑁂 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀁, 𑀯𑀢𑁆𑀣𑀼𑀭𑀽𑀧𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑁆𑀲, 𑀅𑀓𑀼𑀲𑀮𑀲𑁆𑀲, 𑀞𑀧𑁂𑀢𑁆𑀯𑀸 𑀆𑀭𑀼𑀧𑁆𑀧𑀯𑀺𑀧𑀸𑀓𑀜𑁆𑀘𑁂𑀯 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀘 𑀲𑁂𑀲𑀢𑁂𑀪𑀽𑀫𑀓𑀯𑀺𑀧𑀸𑀓𑀲𑁆𑀲, 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲𑀸𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀥𑀫𑁆𑀫𑀭𑀸𑀲𑀻𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘 𑀲𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑁂𑀲𑀼 𑀧𑀦 𑀫𑀳𑀸𑀪𑀽𑀢𑀸 𑀫𑀳𑀸𑀪𑀽𑀢𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀭𑀽𑀧𑀲𑁆𑀲 𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁯. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁯. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀲𑀫𑀦𑀦𑁆𑀢𑀭𑀸𑀢𑀻𑀢𑀸 𑀮𑀩𑁆𑀪𑀦𑁆𑀢𑀺, 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀲𑀼 𑀦𑀸𑀦𑀸𑀯𑀻𑀣𑀺𑀯𑀲𑁂𑀦 𑀧𑀼𑀭𑀺𑀫𑀢𑀭𑀸. 𑀢𑁂 𑀢𑀬𑁄𑀧𑀺 𑀭𑀸𑀲𑀬𑁄 𑀓𑀼𑀲𑀮𑀯𑀲𑁂𑀦 𑀓𑀼𑀲𑀮𑀧𑀤𑁂 𑀮𑀩𑁆𑀪𑀦𑁆𑀢𑀺, 𑀓𑀼𑀲𑀮𑁂𑀦 𑀧𑀦 𑀅𑀓𑀼𑀲𑀮𑁂 𑀲𑀫𑀦𑀦𑁆𑀢𑀭𑀸𑀢𑀻𑀢𑀸 𑀦 𑀮𑀩𑁆𑀪𑀦𑁆𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀓𑁂𑀲𑀜𑁆𑀘𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀇𑀤𑀜𑁆𑀳𑀺 𑁋 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑁋 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀛𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀲𑀻𑀮𑀁 𑀲𑀼𑀢𑀁 𑀘𑀸𑀕𑀁 𑀧𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲 𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀬𑀸 𑀧𑀢𑁆𑀣𑀦𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑀁 𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑁂 𑀢𑀬𑁄𑀧𑀺 𑀮𑀩𑁆𑀪𑀦𑁆𑀢𑀺, 𑀢𑀣𑀸 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑁂.
𑀅𑀓𑀼𑀲𑀮𑁂𑀦 𑀧𑀦 𑀓𑀼𑀲𑀮𑁂 𑀲𑀫𑀦𑀦𑁆𑀢𑀭𑀸𑀢𑀻𑀢𑀸 𑀦 𑀮𑀩𑁆𑀪𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀓𑁂𑀲𑀜𑁆𑀘𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀇𑀤𑀫𑁆𑀧𑀺 𑀳𑀺 𑁋 ‘‘𑀅𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺 𑀯𑀺𑀧𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀪𑀺𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺; 𑀤𑁄𑀲𑀁 𑀫𑁄𑀳𑀁 𑀫𑀸𑀦𑀁 𑀤𑀺𑀝𑁆𑀞𑀺𑀁 𑀧𑀢𑁆𑀣𑀦𑀁 𑀉𑀧𑀦𑀺𑀲𑁆𑀲𑀸𑀬 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀧𑀢𑁆𑀣𑀦𑀸 𑀲𑀤𑁆𑀥𑀸𑀬 𑀲𑀻𑀮𑀲𑁆𑀲 𑀲𑀼𑀢𑀲𑁆𑀲 𑀘𑀸𑀕𑀲𑁆𑀲 𑀧𑀜𑁆𑀜𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀸𑀡𑀁 𑀳𑀦𑁆𑀢𑁆𑀯𑀸 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀳𑀸𑀯𑀸𑀭𑁂 𑀆𑀕𑀢𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀁 𑀧𑀦 𑀓𑀼𑀲𑀮𑀲𑁆𑀲 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺 𑀬𑀣𑀸 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄, 𑀏𑀯𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀧𑁂𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀧𑀤𑁂 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄𑀯 𑀦 𑀮𑀩𑁆𑀪𑀢𑀺. 𑀦 𑀳𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀅𑀓𑀼𑀲𑀮𑀁 𑀕𑀭𑀼𑀁 𑀓𑀭𑁄𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀦𑁆𑀢𑀭𑀢𑀸 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀏𑀢𑁆𑀣 ‘‘𑀓𑁂𑀲𑀜𑁆𑀘𑀻’’𑀢𑀺 𑀦 𑀯𑀼𑀢𑁆𑀢𑀁. 𑀅𑀩𑁆𑀬𑀸𑀓𑀢𑁂𑀦 𑀧𑀦 𑀅𑀩𑁆𑀬𑀸𑀓𑀢𑁂 𑀓𑀼𑀲𑀮𑁂 𑀅𑀓𑀼𑀲𑀮𑁂𑀢𑀺 𑀢𑀻𑀲𑀼 𑀦𑀬𑁂𑀲𑀼 𑀢𑀬𑁄𑀧𑀺 𑀉𑀧𑀦𑀺𑀲𑁆𑀲𑀬𑀸 𑀮𑀩𑁆𑀪𑀦𑁆𑀢𑁂𑀯. 𑀧𑀼𑀕𑁆𑀕𑀮𑁄𑀧𑀺 𑀲𑁂𑀦𑀸𑀲𑀦𑀫𑁆𑀧𑀻𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀓𑀼𑀲𑀮𑀸𑀓𑀼𑀲𑀮𑀧𑀯𑀢𑁆𑀢𑀺𑀬𑀸 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀘𑁆𑀘𑀬𑀪𑀸𑀯𑁄 𑀘𑀲𑁆𑀲 𑀧𑀦𑁂𑀢𑁆𑀣 𑀧𑀭𑀺𑀬𑀸𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦𑀸𑀫 𑀲𑀤𑁆𑀥𑀺𑀁 𑀏𑀓𑀘𑁆𑀘𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀲𑀩𑁆𑀩𑁂𑀧𑀺 𑀘𑀢𑀼𑀪𑀽𑀫𑀓𑀥𑀫𑁆𑀫𑀸. 𑀯𑀺𑀪𑀸𑀕𑀢𑁄 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸 𑀦𑀺𑀦𑁆𑀦𑀸𑀦𑀸𑀓𑀭𑀡𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀕𑀳𑁂𑀢𑀩𑁆𑀩𑁄. 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑁄, 𑀲𑁄𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀦𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀦 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀪𑁂𑀤𑀢𑁄 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺, 𑀓𑀼𑀲𑀮𑀸𑀤𑀻𑀦𑀁 𑀧𑀦 𑀪𑀽𑀫𑀺𑀪𑁂𑀤𑀢𑁄 𑀅𑀦𑁂𑀓𑀯𑀺𑀥𑁄𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀢𑁂𑀪𑀽𑀫𑀓𑀓𑀼𑀲𑀮𑁄 𑀘𑀢𑀼𑀪𑀽𑀫𑀓𑀲𑁆𑀲𑀸𑀧𑀺 𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀓𑀺𑀭𑀺𑀬𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀭𑀸𑀲𑀻𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑁄 𑀅𑀓𑀼𑀲𑀮𑀲𑁆𑀲𑁂𑀯 𑀦 𑀳𑁄𑀢𑀺. 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁂𑀦 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀅𑀜𑁆𑀜𑁂𑀲𑀁 𑀅𑀓𑀼𑀲𑀮𑀲𑁆𑀲𑀸𑀧𑀺 𑀳𑁄𑀢𑀺. 𑀬𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀇𑀫𑀺𑀦𑀸 𑀦𑀬𑁂𑀦 𑀳𑁄𑀢𑀺𑀬𑁂𑀯. 𑀅𑀓𑀼𑀲𑀮𑁄 𑀲𑀩𑁆𑀩𑁂𑀲𑀫𑁆𑀧𑀺 𑀘𑀢𑀼𑀪𑀽𑀫𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀢𑀣𑀸 𑀢𑁂𑀪𑀽𑀫𑀓𑀯𑀺𑀧𑀸𑀓𑁄. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁂 𑀳𑁂𑀝𑁆𑀞𑀺𑀫𑀸𑀦𑀺 𑀢𑀻𑀡𑀺 𑀨𑀮𑀸𑀦𑀺 𑀅𑀓𑀼𑀲𑀮𑀲𑁆𑀲𑁂𑀯 𑀦 𑀳𑁄𑀦𑁆𑀢𑀺, 𑀉𑀧𑀭𑀺𑀝𑁆𑀞𑀺𑀫𑀁 𑀓𑀼𑀲𑀮𑀲𑁆𑀲𑀸𑀧𑀺. 𑀧𑀼𑀭𑀺𑀫𑀦𑀬𑁂𑀦 𑀧𑀦 𑀅𑀜𑁆𑀜𑁂𑀲𑀁 𑀯𑀸 𑀬𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀲𑀩𑁆𑀩𑁄𑀧𑀺 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁄 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀤𑀻𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀓𑀺𑀭𑀺𑀬𑀲𑀗𑁆𑀔𑀸𑀢𑁄𑀧𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀘𑀢𑀼𑀪𑀽𑀫𑀓𑀸𑀦𑀁 𑀅𑀓𑀼𑀲𑀮𑀸𑀤𑀺𑀔𑀦𑁆𑀥𑀸𑀦𑀁 𑀳𑁄𑀢𑀺𑀬𑁂𑀯, 𑀢𑀣𑀸 𑀭𑀽𑀧𑀲𑀗𑁆𑀔𑀸𑀢𑁄. 𑀲𑀬𑀁 𑀧𑀦 𑀭𑀽𑀧𑀁 𑀇𑀫𑀲𑁆𑀫𑀺𑀁 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑁂 𑀆𑀕𑀢𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀦 𑀮𑀪𑀢𑀺, 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀦 𑀮𑀪𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁦. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁦. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀼𑀭𑁂𑀚𑀸𑀢𑀁 𑀦𑀸𑀫 𑀬𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀢𑁄 𑀧𑀼𑀭𑀺𑀫𑀢𑀭𑀁 𑀚𑀸𑀢𑀁 𑀚𑀸𑀢𑀺𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀓𑁆𑀔𑀡𑀧𑁆𑀧𑀢𑁆𑀢𑀁. 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀭𑀽𑀧𑀸𑀬𑀢𑀦𑀦𑁆𑀢𑀺𑀆𑀤𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀯𑀲𑁂𑀦. 𑀓𑀺𑀜𑁆𑀘𑀺𑀓𑀸𑀮𑁂 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀺𑀓𑀸𑀮𑁂 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦, 𑀫𑀦𑁄𑀤𑁆𑀯𑀸𑀭𑁂 𑀯𑀢𑁆𑀣𑀼𑀯𑀲𑁂𑀦𑁂𑀯𑀸𑀬𑀁 𑀧𑀸𑀴𑀺 𑀆𑀕𑀢𑀸, 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑁋 𑀲𑁂𑀓𑁆𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀻’’𑀢𑀺 𑀆𑀕𑀢𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀮𑀩𑁆𑀪𑀢𑁂𑀯. 𑀇𑀥 𑀧𑀦 𑀲𑀸𑀯𑀲𑁂𑀲𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀲𑀼𑀤𑁆𑀥𑀭𑀽𑀧𑀫𑁂𑀯 𑀳𑁄𑀢𑀺. 𑀢𑀜𑁆𑀘 𑀔𑁄 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀁 𑀅𑀝𑁆𑀞𑀸𑀭𑀲𑀯𑀺𑀥𑀁 𑀭𑀽𑀧𑀭𑀽𑀧𑀫𑁂𑀯. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑁆𑀢𑀺 𑀤𑁆𑀯𑀺𑀥𑀸 𑀞𑀺𑀢𑀁. 𑀢𑀢𑁆𑀣 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁 𑀯𑀢𑁆𑀣𑀼𑀭𑀽𑀧𑀦𑁆𑀢𑀺 𑀇𑀤𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑀦𑀸𑀫. 𑀲𑁂𑀲𑀁 𑀇𑀫𑀸𑀬 𑀧𑀸𑀴𑀺𑀬𑀸 𑀆𑀕𑀢𑀜𑁆𑀘 𑀅𑀦𑀸𑀕𑀢𑀜𑁆𑀘 𑀯𑀡𑁆𑀡𑁄 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀢𑀻𑀡𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀤𑁆𑀯𑀸𑀤𑀲𑀯𑀺𑀥𑀁 𑀭𑀽𑀧𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀦𑀸𑀫𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀓𑁆𑀔𑀸𑀬𑀢𑀦𑀁 𑀤𑁆𑀯𑀺𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀢𑀣𑀸 𑀇𑀢𑀭𑀸𑀦𑀺 𑀘𑀢𑁆𑀢𑀸𑀭𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀯𑀢𑁆𑀣𑀼𑀭𑀽𑀧𑀁 𑀧𑀦 𑀞𑀧𑁂𑀢𑁆𑀯𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀘𑀢𑁆𑀢𑀸𑀭𑁄 𑀘 𑀆𑀭𑀼𑀧𑁆𑀧𑀯𑀺𑀧𑀸𑀓𑁂 𑀲𑁂𑀲𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀘𑀢𑀼𑀪𑀽𑀫𑀓𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀤𑀻𑀦𑀺 𑀧𑀦 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑁂𑀯 𑀫𑀦𑁄𑀥𑀸𑀢𑀽𑀦𑀜𑁆𑀘 𑀏𑀓𑀦𑁆𑀢𑁂𑀦𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀝𑁆𑀞𑀸𑀭𑀲𑀯𑀺𑀥𑀫𑁆𑀧𑀺 𑀧𑀦𑁂𑀢𑀁 𑀭𑀽𑀧𑀭𑀽𑀧𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲 𑀭𑀽𑀧𑀸𑀯𑀘𑀭𑀢𑁄 𑀅𑀪𑀺𑀜𑁆𑀜𑀸𑀓𑀼𑀲𑀮𑀲𑁆𑀲 𑀅𑀓𑀼𑀲𑀮𑀲𑁆𑀲 𑀢𑀤𑀸𑀭𑀫𑁆𑀫𑀡𑀪𑀸𑀯𑀺𑀦𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀭𑀽𑀧𑀸𑀯𑀘𑀭𑀢𑁄 𑀅𑀪𑀺𑀜𑁆𑀜𑀸𑀓𑀺𑀭𑀺𑀬𑀲𑁆𑀲𑀸𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀭𑀸𑀲𑀻𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁧. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁧. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀧𑀘𑁆𑀙𑀸𑀚𑀸𑀢𑀸𑀢𑀺 𑀬𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑁂 𑀚𑀸𑀢𑀸. 𑀧𑀼𑀭𑁂𑀚𑀸𑀢𑀲𑁆𑀲𑀸𑀢𑀺 𑀢𑁂𑀲𑀁 𑀉𑀧𑁆𑀧𑀸𑀤𑀢𑁄 𑀧𑀞𑀫𑀢𑀭𑀁 𑀚𑀸𑀢𑀲𑁆𑀲 𑀚𑀸𑀢𑀺𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲. 𑀇𑀫𑀲𑁆𑀲 𑀓𑀸𑀬𑀲𑁆𑀲𑀸𑀢𑀺 𑀇𑀫𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀪𑀽𑀢𑀉𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀲𑁆𑀲. 𑀏𑀢𑁆𑀣 𑀘 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄𑀢𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀁 𑀓𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀅𑀬𑀁 𑀧𑀦 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀞𑀧𑁂𑀢𑁆𑀯𑀸 𑀆𑀭𑀼𑀧𑁆𑀧𑀯𑀺𑀧𑀸𑀓𑁂 𑀅𑀯𑀲𑁂𑀲𑀸 𑀘𑀢𑀼𑀪𑀽𑀫𑀓𑀸 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀲𑁄 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑁂𑀦 𑀘𑀢𑀼𑀥𑀸 𑀪𑀺𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀉𑀧𑁆𑀧𑀦𑁆𑀦𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀧𑀸𑀓𑁂𑀧𑀺 𑀞𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀁 𑀅𑀯𑀲𑁂𑀲𑁄 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀢𑀲𑁆𑀲𑁂𑀯 𑀏𑀓𑀦𑁆𑀢𑁂𑀦 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑁄𑀧𑀺 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀦𑁆𑀦𑀯𑀺𑀧𑀸𑀓𑁄 𑀢𑀲𑁆𑀲𑁂𑀯 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀪𑀽𑀫𑀓𑀓𑀺𑀭𑀺𑀬𑀸𑀧𑀺 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀦𑁆𑀦𑀸𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁨. 𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁨. 𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸𑀢𑀺 𑀲𑀩𑁆𑀩𑀦𑀬𑁂𑀲𑀼 𑀲𑀫𑀦𑀦𑁆𑀢𑀭𑀸𑀢𑀻𑀢𑀸𑀯 𑀤𑀝𑁆𑀞𑀩𑁆𑀩𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀯𑀺𑀬 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀺𑀦𑁆𑀦𑀚𑀸𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁄𑀢𑀺? 𑀅𑀢𑁆𑀢𑀦𑁄 𑀕𑀢𑀺𑀁 𑀕𑀸𑀳𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬. 𑀪𑀺𑀦𑁆𑀦𑀚𑀸𑀢𑀺𑀓𑀸 𑀳𑀺 𑀪𑀺𑀦𑁆𑀦𑀚𑀸𑀢𑀺𑀓𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀕𑀼𑀡𑁂𑀦 𑀧𑀕𑀼𑀡𑀩𑀮𑀯𑀪𑀸𑀯𑀁 𑀲𑀸𑀥𑀬𑀫𑀸𑀦𑀸 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀁 𑀕𑀢𑀺𑀁 𑀕𑀸𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀬𑁂 𑀬𑁂𑀲𑀁 𑀯𑀸𑀲𑀦𑀸𑀲𑀗𑁆𑀔𑀸𑀢𑁂𑀦 𑀆𑀲𑁂𑀯𑀦𑁂𑀦 𑀧𑀕𑀼𑀡𑀢𑀭𑀩𑀮𑀯𑀢𑀭𑀪𑀸𑀯𑀯𑀺𑀲𑀺𑀝𑁆𑀞𑀁 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀪𑀸𑀯𑀲𑀗𑁆𑀔𑀸𑀢𑀁 𑀕𑀢𑀺𑀁 𑀕𑀸𑀳𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀲𑀁 𑀢𑁂𑀳𑀺 𑀲𑀫𑀸𑀦𑀚𑀸𑀢𑀺𑀓𑁂𑀳𑁂𑀯 𑀲𑀤𑁆𑀥𑀺𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀓𑀲𑁆𑀫𑀸 𑀦 𑀕𑀳𑀺𑀢𑀦𑁆𑀢𑀺? 𑀆𑀲𑁂𑀯𑀦𑀸𑀪𑀸𑀯𑁂𑀦. 𑀯𑀺𑀧𑀸𑀓𑀜𑁆𑀳𑀺 𑀓𑀫𑁆𑀫𑀯𑀲𑁂𑀦 𑀯𑀺𑀧𑀸𑀓𑀪𑀸𑀯𑀧𑁆𑀧𑀢𑁆𑀢𑀁 𑀓𑀫𑁆𑀫𑀧𑀭𑀺𑀡𑀸𑀫𑀺𑀢𑀁 𑀳𑀼𑀢𑁆𑀯𑀸 𑀯𑀢𑁆𑀢𑀢𑀺 𑀦𑀺𑀭𑀼𑀲𑁆𑀲𑀸𑀳𑀁 𑀤𑀼𑀩𑁆𑀩𑀮𑀦𑁆𑀢𑀺 𑀢𑀁 𑀆𑀲𑁂𑀯𑀦𑀕𑀼𑀡𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀭𑀺𑀪𑀸𑀯𑁂𑀢𑁆𑀯𑀸 𑀦𑁂𑀯 𑀅𑀜𑁆𑀜𑀁 𑀯𑀺𑀧𑀸𑀓𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀧𑀼𑀭𑀺𑀫𑀯𑀺𑀧𑀸𑀓𑀸𑀦𑀼𑀪𑀸𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀢𑀼𑀦𑁆𑀢𑀺. 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀁 𑀧𑀦 𑀧𑀢𑀺𑀢𑀁 𑀯𑀺𑀬 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀩𑁆𑀩𑀣𑀸𑀧𑀺 𑀯𑀺𑀧𑀸𑀓𑁂 𑀆𑀲𑁂𑀯𑀦𑀁 𑀦𑀢𑁆𑀣𑀻𑀢𑀺 𑀆𑀲𑁂𑀯𑀦𑀸𑀪𑀸𑀯𑁂𑀦 𑀯𑀺𑀧𑀸𑀓𑀁 𑀦 𑀕𑀳𑀺𑀢𑀁. 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀘𑁂𑀢𑀁 𑀓𑀫𑁆𑀫𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀆𑀲𑁂𑀯𑀦𑀕𑀼𑀡𑀁 𑀦 𑀕𑀡𑁆𑀳𑀸𑀢𑀻𑀢𑀺 𑀓𑀼𑀲𑀮𑀸𑀤𑀬𑁄𑀧𑀺𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀅𑀧𑀺𑀘 𑀦𑀸𑀦𑀸𑀚𑀸𑀢𑀺𑀓𑀢𑁆𑀢𑀸𑀧𑁂𑀢𑁂 𑀦 𑀳𑁄𑀦𑁆𑀢𑀺𑀬𑁂𑀯. 𑀪𑀽𑀫𑀺𑀢𑁄 𑀧𑀦 𑀆𑀭𑀫𑁆𑀫𑀡𑀢𑁄 𑀯𑀸 𑀦𑀸𑀦𑀸𑀚𑀸𑀢𑀺𑀓𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀓𑀺𑀭𑀺𑀬𑀸𑀫𑀳𑀕𑁆𑀕𑀢𑀓𑀼𑀲𑀮𑀓𑀺𑀭𑀺𑀬𑀸𑀦𑀫𑁆𑀧𑀺, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀜𑁆𑀘 𑀅𑀦𑀼𑀮𑁄𑀫𑀓𑀼𑀲𑀮𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀕𑁄𑀢𑁆𑀭𑀪𑀼𑀓𑀼𑀲𑀮𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀅𑀬𑀁 𑀧𑀦 𑀆𑀲𑁂𑀯𑀦𑀧𑀘𑁆𑀘𑀬𑁄 𑀚𑀸𑀢𑀺𑀢𑁄 𑀢𑀸𑀯 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁄𑀢𑀺 𑀢𑀺𑀥𑀸 𑀞𑀺𑀢𑁄. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑁄 𑀭𑀽𑀧𑀸𑀯𑀘𑀭𑁄 𑀅𑀭𑀽𑀧𑀸𑀯𑀘𑀭𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺, 𑀅𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑁄𑀯 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁄 𑀓𑀸𑀫𑀸𑀯𑀘𑀭𑁄 𑀭𑀽𑀧𑀸𑀯𑀘𑀭𑁄 𑀅𑀭𑀽𑀧𑀸𑀯𑀘𑀭𑁄𑀢𑀺 𑀢𑀺𑀯𑀺𑀥𑁄𑀯, 𑀮𑁄𑀓𑀼𑀢𑁆𑀢𑀭𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀲𑁆𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲𑁂𑀯. 𑀬𑀁 𑀧𑀦𑁂𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀢𑀁 𑀅𑀢𑁆𑀢𑀦𑀸 𑀲𑀤𑀺𑀲𑀯𑁂𑀤𑀦𑀲𑁆𑀲 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲𑀸𑀢𑀺 𑀇𑀫𑁂𑀲𑀁 𑀭𑀸𑀲𑀻𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲𑁂𑀯. 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲𑁂𑀯. 𑀅𑀓𑀼𑀲𑀮𑀁 𑀧𑀦 𑀅𑀓𑀼𑀲𑀮𑀲𑁆𑀲𑁂𑀯 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀺𑀭𑀺𑀬𑀢𑁄 𑀧𑀦 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀢𑀸𑀯 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑁂𑀯. 𑀬𑁄 𑀧𑀦𑁂𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁄, 𑀲𑁄 𑀅𑀢𑁆𑀢𑀦𑀸 𑀲𑀤𑀺𑀲𑀯𑁂𑀤𑀦𑀲𑁆𑀲 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑀸𑀢𑀺 𑀇𑀫𑁂𑀲𑀁 𑀭𑀸𑀲𑀻𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺. 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀧𑀦 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑁂𑀯, 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲𑁂𑀯 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀧𑀸𑀓𑁄 𑀧𑀦 𑀏𑀓𑀥𑀫𑁆𑀫𑀲𑁆𑀲𑀸𑀧𑀺 𑀏𑀓𑀥𑀫𑁆𑀫𑁄𑀧𑀺 𑀯𑀸 𑀓𑁄𑀘𑀺 𑀯𑀺𑀧𑀸𑀓𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀢𑁆𑀣𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀆𑀲𑁂𑀯𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁩. 𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁩. 𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀓𑀫𑁆𑀫𑀦𑁆𑀢𑀺 𑀘𑁂𑀢𑀦𑀸𑀓𑀫𑁆𑀫𑀫𑁂𑀯. 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀦𑁆𑀢𑀺 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑁆𑀧𑀦𑁆𑀦𑀭𑀽𑀧𑀸𑀦𑀁. 𑀓𑀫𑁆𑀫𑀧𑀘𑁆𑀘𑀬𑁂𑀦𑀸𑀢𑀺 𑀅𑀦𑁂𑀓𑀸𑀦𑀫𑁆𑀧𑀺 𑀓𑀧𑁆𑀧𑀓𑁄𑀝𑀻𑀦𑀁 𑀫𑀢𑁆𑀣𑀓𑁂 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁂𑀦 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀓𑀼𑀲𑀮𑀜𑁆𑀳𑀺 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂 𑀨𑀮𑀁 𑀦 𑀤𑁂𑀢𑀺. 𑀬𑀤𑀺 𑀤𑀤𑁂𑀬𑁆𑀬, 𑀬𑀁 𑀫𑀦𑀼𑀲𑁆𑀲𑁄 𑀤𑁂𑀯𑀮𑁄𑀓𑀽𑀧𑀕𑀁 𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀤𑁂𑀯𑁄 𑀪𑀯𑁂𑀬𑁆𑀬. 𑀬𑀲𑁆𑀫𑀺𑀁 𑀧𑀦 𑀔𑀡𑁂 𑀢𑀁 𑀓𑀢𑀁, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀔𑀡𑁂 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑁂𑀯𑀮𑀁 𑀓𑀝𑀢𑁆𑀢𑀸𑀬𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀲𑀢𑀺 𑀨𑀮𑀁 𑀉𑀧𑁆𑀧𑀸𑀤𑁂𑀢𑀺 𑀦𑀺𑀭𑀼𑀤𑁆𑀥𑀸𑀧𑀺 𑀧𑀼𑀭𑀺𑀫𑀲𑀺𑀧𑁆𑀧𑀸𑀤𑀺𑀓𑀺𑀭𑀺𑀬𑀸 𑀯𑀺𑀬 𑀓𑀸𑀮𑀦𑁆𑀢𑀭𑁂 𑀧𑀘𑁆𑀙𑀺𑀫𑀲𑀺𑀧𑁆𑀧𑀸𑀤𑀺𑀓𑀺𑀭𑀺𑀬𑀸𑀬. 𑀢𑀲𑁆𑀫𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑀸 𑀓𑀸𑀘𑀺 𑀘𑁂𑀢𑀦𑀸 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀕𑀡𑁆𑀳𑀸𑀢𑀺. 𑀓𑀫𑁆𑀫𑀧𑀘𑁆𑀘𑀬𑁂𑀦𑀸𑀢𑀺 𑀇𑀤𑀁 𑀲𑀳𑀚𑀸𑀢𑀘𑁂𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀲𑀮𑀸𑀤𑀻𑀲𑀼 𑀳𑀺 𑀬𑀸 𑀓𑀸𑀘𑀺 𑀲𑀳𑀚𑀸𑀢𑀘𑁂𑀢𑀦𑀸 𑀲𑁂𑀲𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀺𑀭𑀺𑀬𑀸𑀪𑀸𑀯𑁂𑀦 𑀉𑀧𑀓𑀸𑀭𑀺𑀓𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀓𑀫𑁆𑀫𑀧𑀘𑁆𑀘𑀬𑁄 𑀅𑀢𑁆𑀣𑀢𑁄 𑀘𑀢𑀼𑀪𑀽𑀫𑀺𑀓𑀘𑁂𑀢𑀦𑀸𑀫𑀢𑁆𑀢𑀫𑁂𑀯. 𑀲𑁄 𑀳𑀺 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑁄 𑀅𑀓𑀼𑀲𑀮𑁄 𑀯𑀺𑀧𑀸𑀓𑁄 𑀓𑀺𑀭𑀺𑀬𑀸𑀢𑀺 𑀘𑀢𑀼𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀘𑀢𑀼𑀥𑀸 𑀪𑀺𑀚𑁆𑀚𑀢𑀺. 𑀅𑀓𑀼𑀲𑀮𑁄 𑀏𑀓𑀥𑀸𑀯 𑀯𑀺𑀧𑀸𑀓𑁄 𑀘𑀢𑀼𑀥𑀸, 𑀓𑀺𑀭𑀺𑀬𑀸 𑀢𑀺𑀥𑀸𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀲𑀳𑀚𑀸𑀢𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀧𑀜𑁆𑀘𑀯𑁄𑀓𑀸𑀭𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀘𑀢𑀼𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀧𑀦 𑀅𑀢𑁆𑀢𑀦𑁄 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀸 𑀘 𑀔𑁄 𑀧𑀜𑁆𑀘𑀯𑁄𑀓𑀸𑀭𑁂𑀬𑁂𑀯, 𑀦 𑀅𑀜𑁆𑀜𑀢𑁆𑀣. 𑀲𑀳𑀚𑀸𑀢𑀸 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀏𑀓𑀦𑁆𑀢𑁂𑀦𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀧𑀦 𑀅𑀢𑁆𑀢𑀦𑁄 𑀯𑀺𑀧𑀸𑀓𑀸𑀦𑀜𑁆𑀘𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸 𑀘 𑀲𑀳𑀚𑀸𑀢𑀸 𑀓𑀼𑀲𑀮𑀘𑁂𑀢𑀦𑀸 𑀧𑀜𑁆𑀘𑀯𑁄𑀓𑀸𑀭𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘, 𑀘𑀢𑀼𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀧𑀦𑁂𑀲𑀸 𑀤𑀼𑀯𑀺𑀥𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑀳𑀚𑀸𑀢𑀸 𑀅𑀓𑀼𑀲𑀮𑀘𑁂𑀢𑀦𑀸 𑀧𑀜𑁆𑀘𑀯𑁄𑀓𑀸𑀭𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀧𑀦 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.
𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀢𑁄 𑀯𑀺𑀧𑀸𑀓𑀘𑁂𑀢𑀦𑀸 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑁂𑀢𑀦𑀸 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑁂𑀢𑀦𑀸 𑀧𑀜𑁆𑀘𑀯𑁄𑀓𑀸𑀭𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀘𑀢𑀼𑀯𑁄𑀓𑀸𑀭𑁂 𑀅𑀭𑀽𑀧𑀲𑁆𑀲𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀢𑁂𑀪𑀽𑀫𑀺𑀓𑀸 𑀓𑀺𑀭𑀺𑀬𑀘𑁂𑀢𑀦𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑀸 𑀧𑀦𑁂𑀢𑁆𑀣 𑀆𑀭𑀼𑀧𑁆𑀧𑁂 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀓𑀫𑁆𑀫𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁪. 𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁪. 𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀯𑀺𑀧𑀸𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺 𑀬𑀲𑁆𑀫𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀧𑀺 𑀭𑀽𑀧𑀸 𑀯𑀺𑀧𑀸𑀓𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑀺𑀧𑀸𑀓𑀸’’𑀢𑀺 𑀯𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀬𑀁 𑀧𑀸𑀴𑀺 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀜𑁂𑀯 𑀯𑀺𑀧𑀸𑀓𑀧𑀘𑁆𑀘𑀬𑀯𑀲𑁂𑀦 𑀆𑀕𑀢𑀸. 𑀧𑀜𑁆𑀳𑀸𑀯𑀸𑀭𑁂 𑀧𑀦 ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀆𑀕𑀢𑀢𑁆𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀫𑁆𑀧𑀺 𑀯𑀺𑀧𑀸𑀓𑀧𑀘𑁆𑀘𑀬𑁄 𑀮𑀩𑁆𑀪𑀢𑀺. 𑀇𑀥 𑀧𑀦 𑀲𑀸𑀯𑀲𑁂𑀲𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀅𑀬𑀁 𑀧𑀦 𑀯𑀺𑀧𑀸𑀓𑀧𑀘𑁆𑀘𑀬𑁄 𑀯𑀺𑀧𑀸𑀓𑀪𑀸𑀯𑁂𑀦 𑀚𑀸𑀢𑀺𑀢𑁄 𑀏𑀓𑀯𑀺𑀥𑁄, 𑀪𑀽𑀫𑀺𑀪𑁂𑀤𑀢𑁄 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀘𑀢𑀼𑀥𑀸 𑀪𑀺𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀜𑁆𑀘 𑀯𑀺𑀧𑀸𑀓𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁄 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀘𑀢𑀼𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀯𑀺𑀧𑀸𑀓𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁫. 𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁫. 𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀘𑀢𑀼𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑁂 𑀭𑀽𑀧𑁂 𑀑𑀚𑀸 𑀆𑀳𑀸𑀭𑁄 𑀦𑀸𑀫. 𑀲𑁄 𑀧𑀦 𑀬𑀲𑁆𑀫𑀸 𑀓𑀩𑀴𑀁 𑀓𑀭𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑁄𑀯 𑀆𑀳𑀸𑀭𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀦 𑀩𑀳𑀺 𑀞𑀺𑀢𑁄, 𑀢𑀲𑁆𑀫𑀸 𑀆𑀳𑀸𑀭𑁄𑀢𑀺 𑀅𑀯𑀢𑁆𑀯𑀸 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀓𑀩𑀴𑀁 𑀓𑀭𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀓𑀢𑁆𑀢𑀸 𑀯𑀸 𑀓𑀩𑀴𑀻𑀓𑀸𑀭𑁄𑀢𑀺 𑀦𑀸𑀫𑀫𑁂𑀢𑀁 𑀢𑀲𑁆𑀲. 𑀅𑀭𑀽𑀧𑀺𑀦𑁄 𑀆𑀳𑀸𑀭𑀸𑀢𑀺 𑀨𑀲𑁆𑀲𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀳𑀸𑀭𑀸. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀥𑀸𑀧𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺 𑀕𑀳𑀺𑀢𑀸𑀦𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 𑁋 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀆𑀳𑀸𑀭𑀧𑀘𑁆𑀘𑀬𑁄 𑀲𑀗𑁆𑀔𑁂𑀧𑀢𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀨𑀲𑁆𑀲𑁄, 𑀘𑁂𑀢𑀦𑀸, 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀢𑁆𑀢𑀸𑀭𑁄𑀯 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀲𑁂𑀲𑀸 𑀢𑀬𑁄 𑀅𑀭𑀽𑀧𑀸𑀳𑀸𑀭𑀸 𑀚𑀸𑀢𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀪𑁂𑀤𑀢𑁄 𑀘𑀢𑀼𑀥𑀸 𑀪𑀺𑀚𑁆𑀚𑀦𑁆𑀢𑀺. 𑀧𑀼𑀦 𑀪𑀽𑀫𑀺𑀪𑁂𑀤𑁂𑀦 𑀓𑀼𑀲𑀮𑁄 𑀘𑀢𑀼𑀥𑀸, 𑀅𑀓𑀼𑀲𑀮𑁄 𑀏𑀓𑀥𑀸, 𑀯𑀺𑀧𑀸𑀓𑁄 𑀘𑀢𑀼𑀥𑀸, 𑀓𑀺𑀭𑀺𑀬𑀸 𑀢𑀺𑀥𑀸𑀢𑀺 𑀏𑀯𑀁 𑀅𑀦𑁂𑀓𑀥𑀸 𑀪𑀺𑀚𑁆𑀚𑀦𑁆𑀢𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀧𑀦 𑀚𑀸𑀢𑀺𑀢𑁄 𑀅𑀩𑁆𑀬𑀸𑀓𑀢𑁄, 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑁄𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀸𑀧𑀺 𑀢𑀬𑁄 𑀓𑀼𑀲𑀮𑀸𑀳𑀸𑀭𑀸 𑀧𑀜𑁆𑀘𑀯𑁄𑀓𑀸𑀭𑁂 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀞𑀧𑁂𑀢𑁆𑀯𑀸 𑀧𑀦 𑀭𑀽𑀧𑀸𑀯𑀘𑀭𑀁 𑀅𑀯𑀲𑁂𑀲𑀸 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀓𑀼𑀲𑀮𑀸𑀳𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀸𑀳𑀸𑀭𑀸 𑀧𑀦 𑀲𑀩𑁆𑀩𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸 𑀧𑀦𑁂𑀢𑁆𑀣 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲𑀸𑀧𑀺 𑀆𑀳𑀸𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑁂𑀯, 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀸 𑀭𑀽𑀧𑀲𑁆𑀲 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀢𑁂𑀪𑀽𑀫𑀓𑀸𑀧𑀺 𑀢𑀬𑁄 𑀓𑀺𑀭𑀺𑀬𑀸𑀳𑀸𑀭𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀓𑀸𑀫𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸 𑀧𑀦 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑀼𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀓𑀺𑀜𑁆𑀘𑀸𑀧𑀺 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲𑀸’’𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑁄, 𑀯𑀺𑀲𑁂𑀲𑀢𑁄 𑀧𑀦𑀸𑀬𑀫𑁂𑀢𑁆𑀣 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀚𑀦𑀓𑁄 𑀘𑁂𑀯 𑀅𑀦𑀼𑀧𑀸𑀮𑀓𑁄 𑀘 𑀳𑀼𑀢𑁆𑀯𑀸 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁂𑀲𑀢𑀺𑀲𑀦𑁆𑀢𑀢𑀺𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀦𑀼𑀧𑀸𑀮𑀓𑁄𑀯 𑀳𑀼𑀢𑁆𑀯𑀸 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀆𑀳𑀸𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁬. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁬. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀓𑁆𑀔𑀼𑀲𑀗𑁆𑀔𑀸𑀢𑀁 𑀇𑀦𑁆𑀤𑁆𑀭𑀺𑀬𑀁. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦𑀸𑀢𑀺 𑀲𑀬𑀁 𑀧𑀼𑀭𑁂𑀚𑀸𑀢𑁄 𑀳𑀼𑀢𑁆𑀯𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸𑀢𑀺 𑀏𑀢𑁆𑀣 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀝𑀢𑁆𑀢𑀸𑀭𑀽𑀧𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 𑁋 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.
𑀅𑀬𑀁 𑀧𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀯𑀚𑁆𑀚𑀸𑀦𑀁 𑀲𑀫𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀞𑀺𑀢𑁄. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑀺 𑀓𑀺𑀜𑁆𑀘𑀸𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀦𑀁 𑀩𑀻𑀚𑀪𑀽𑀢𑀸𑀦𑀺, 𑀓𑀮𑀮𑀸𑀤𑀺𑀓𑀸𑀮𑁂 𑀧𑀦 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀢𑁂𑀲𑀼 𑀇𑀢𑁆𑀣𑀺𑀮𑀺𑀗𑁆𑀕𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀻𑀦𑀁 𑀅𑀪𑀸𑀯𑀸 𑀢𑀸𑀦𑀺 𑀦𑁂𑀯 𑀢𑁂𑀲𑀁, 𑀦 𑀅𑀜𑁆𑀜𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀨𑀭𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀳𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀅𑀨𑀭𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀬𑁂𑀲𑀁 𑀧𑀦𑁂𑀢𑀸𑀦𑀺 𑀩𑀻𑀚𑀪𑀽𑀢𑀸𑀦𑀺, 𑀢𑁂𑀲𑀁 𑀢𑀸𑀦𑀺 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑀺. 𑀇𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀲𑀫𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀞𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀚𑀸𑀢𑀺𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀯𑀲𑁂𑀦 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀪𑀽𑀫𑀺𑀯𑀲𑁂𑀦 𑀘𑀢𑀼𑀥𑀸, 𑀅𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑁄𑀯 𑀯𑀺𑀧𑀸𑀓𑁄 𑀘𑀢𑀼𑀥𑀸𑀯 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁄 𑀢𑀺𑀥𑀸, 𑀭𑀽𑀧𑀁 𑀓𑀸𑀫𑀸𑀯𑀘𑀭𑀫𑁂𑀯𑀸𑀢𑀺 𑀏𑀯𑀁 𑀅𑀦𑁂𑀓𑀥𑀸 𑀪𑀺𑀚𑁆𑀚𑀢𑀻𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑁄𑀧𑀺 𑀓𑀼𑀲𑀮𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀢𑀣𑀸 𑀅𑀓𑀼𑀲𑀮𑁄. 𑀞𑀧𑁂𑀢𑁆𑀯𑀸 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀢𑀼𑀪𑀽𑀫𑀓𑁄 𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀸 𑀧𑀦𑁂𑀢𑁆𑀣 𑀧𑀜𑁆𑀘𑀯𑁄𑀓𑀸𑀭𑁂 𑀉𑀧𑁆𑀧𑀚𑁆𑀚𑀦𑀢𑁄 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲𑀸𑀧𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑁂𑀯. 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀸 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀸 𑀇𑀦𑁆𑀤𑁆𑀭𑀺𑀬𑀸 𑀭𑀽𑀧𑀲𑁆𑀲 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀢𑁂𑀪𑀽𑀫𑀓𑀸 𑀓𑀺𑀭𑀺𑀬𑀺𑀦𑁆𑀤𑁆𑀭𑀺𑀬𑀸 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀓𑀸𑀫𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀸 𑀧𑀦 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀨𑀭𑀦𑁆𑀢𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑁂 𑀭𑀽𑀧𑀺𑀦𑁆𑀤𑁆𑀭𑀺𑀬𑁂 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀢𑀣𑀸𑀯𑀺𑀥𑀸𑀦𑀜𑁆𑀜𑁂𑀯 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁, 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀅𑀢𑁆𑀢𑀦𑀸 𑀲𑀳𑀚𑀸𑀢𑀭𑀽𑀧𑀸𑀦𑀁 𑀞𑀺𑀢𑀺𑀓𑁆𑀔𑀡𑁂 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑀳𑀚𑀸𑀢𑀧𑀘𑁆𑀘𑀬𑀢𑀸 𑀧𑀦 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁭. 𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁭. 𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀛𑀸𑀦𑀗𑁆𑀕𑀸𑀦𑀻𑀢𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑁂𑀲𑀼 𑀲𑁂𑀲𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑀸𑀦𑀺 𑀲𑀢𑁆𑀢 𑀅𑀗𑁆𑀕𑀸𑀦𑀺. 𑀧𑀜𑁆𑀘𑀦𑁆𑀦𑀁 𑀧𑀦 𑀯𑀺𑀜𑁆𑀜𑀸𑀡𑀓𑀸𑀬𑀸𑀦𑀁 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑁆𑀢𑀸 𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑀸𑀦𑀺 𑀉𑀧𑀦𑀺𑀚𑁆𑀛𑀸𑀦𑀸𑀓𑀸𑀭𑀲𑁆𑀲 𑀅𑀪𑀸𑀯𑀢𑁄 𑀛𑀸𑀦𑀗𑁆𑀕𑀸𑀦𑀻𑀢𑀺 𑀦 𑀉𑀤𑁆𑀥𑀝𑀸𑀦𑀺. 𑀢𑀢𑁆𑀣 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀦 𑀲𑁂𑀲𑀸𑀳𑁂𑀢𑀼𑀓𑁂𑀲𑀼𑀧𑀺 𑀛𑀸𑀦𑀗𑁆𑀕𑀁 𑀦 𑀉𑀤𑁆𑀥𑀝𑀫𑁂𑀯. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀥𑀸𑀧𑀺 𑀓𑀝𑀢𑁆𑀢𑀸𑀭𑀽𑀧𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 𑁋 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀅𑀬𑀁 𑀧𑀦 𑀛𑀸𑀦𑀧𑀘𑁆𑀘𑀬𑁄 𑀲𑀢𑁆𑀢𑀦𑁆𑀦𑀁 𑀛𑀸𑀦𑀗𑁆𑀕𑀸𑀦𑀁 𑀯𑀲𑁂𑀦 𑀞𑀺𑀢𑁄𑀧𑀺 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀘𑀢𑀼𑀥𑀸 𑀪𑀺𑀚𑁆𑀚𑀢𑀺, 𑀧𑀼𑀦 𑀪𑀽𑀫𑀺𑀯𑀲𑁂𑀦 𑀘𑀢𑀼𑀥𑀸; 𑀏𑀓𑀥𑀸, 𑀘𑀢𑀼𑀥𑀸, 𑀢𑀺𑀥𑀸𑀢𑀺 𑀤𑁆𑀯𑀸𑀤𑀲𑀥𑀸 𑀪𑀺𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀛𑀸𑀦𑀗𑁆𑀕𑀁 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀞𑀧𑁂𑀢𑁆𑀯𑀸 𑀭𑀽𑀧𑀸𑀯𑀘𑀭𑀁 𑀅𑀯𑀲𑁂𑀲𑀁 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀓𑀼𑀲𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀯𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀧𑀝𑀺𑀲𑀦𑁆𑀥𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀘, 𑀆𑀭𑀼𑀧𑁆𑀧𑀯𑀺𑀧𑀸𑀓𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯, 𑀬𑀜𑁆𑀘 𑀆𑀭𑀼𑀧𑁆𑀧𑁂 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘. 𑀧𑀜𑁆𑀘𑀯𑁄𑀓𑀸𑀭𑁂 𑀧𑀦 𑀢𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀧𑀺 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀪𑀽𑀫𑀓𑀫𑁆𑀧𑀺 𑀓𑀺𑀭𑀺𑀬𑀛𑀸𑀦𑀗𑁆𑀕𑀁 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘. 𑀬𑀁 𑀧𑀦𑁂𑀢𑁆𑀣 𑀆𑀭𑀼𑀧𑁆𑀧𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀛𑀸𑀦𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁮. 𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁮. 𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀫𑀕𑁆𑀕𑀗𑁆𑀕𑀸𑀦𑀻𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀚𑁆𑀚𑁂𑀲𑀼 𑀲𑁂𑀲𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀺 𑀧𑀜𑁆𑀜𑀸, 𑀯𑀺𑀢𑀓𑁆𑀓𑁄, 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸, 𑀯𑀻𑀭𑀺𑀬𑀁, 𑀲𑀢𑀺, 𑀲𑀫𑀸𑀥𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀢𑀺 𑀇𑀫𑀸𑀦𑀺 𑀤𑁆𑀯𑀸𑀤𑀲𑀗𑁆𑀕𑀸𑀦𑀺. 𑀫𑀕𑁆𑀕𑀲𑁆𑀲 𑀧𑀦 𑀳𑁂𑀢𑀼𑀧𑀘𑁆𑀙𑀺𑀫𑀓𑀢𑁆𑀢𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀉𑀤𑁆𑀥𑀝𑀸𑀦𑀺. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀇𑀥𑀸𑀧𑀺 𑀓𑀝𑀢𑁆𑀢𑀸𑀭𑀽𑀧𑀁 𑀲𑀗𑁆𑀕𑀳𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 𑁋 ‘‘𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀫𑀕𑁆𑀕𑀧𑀘𑁆𑀘𑀬𑁄 𑀤𑁆𑀯𑀸𑀤𑀲𑀦𑁆𑀦𑀁 𑀫𑀕𑁆𑀕𑀗𑁆𑀕𑀸𑀦𑀁 𑀯𑀲𑁂𑀦 𑀞𑀺𑀢𑁄𑀧𑀺 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑀸𑀤𑀺𑀯𑀲𑁂𑀦 𑀘𑀢𑀼𑀥𑀸, 𑀓𑀼𑀲𑀮𑀸𑀤𑀻𑀦𑀜𑁆𑀘 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀪𑁂𑀤𑀢𑁄 𑀤𑁆𑀯𑀸𑀤𑀲𑀥𑀸 𑀪𑀺𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀫𑀕𑁆𑀕𑀗𑁆𑀕𑀁 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀞𑀧𑁂𑀢𑁆𑀯𑀸 𑀭𑀽𑀧𑀸𑀯𑀘𑀭𑀁 𑀅𑀯𑀲𑁂𑀲𑀁 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀜𑁂𑀯 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀲𑀩𑁆𑀩𑀁 𑀛𑀸𑀦𑀧𑀘𑁆𑀘𑀬𑁂 𑀯𑀺𑀬 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀫𑀕𑁆𑀕𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁧𑁯. 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁧𑁯. 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀧𑀸𑀴𑀺 𑀉𑀢𑁆𑀢𑀸𑀦𑀢𑁆𑀣𑀸 𑀏𑀯. 𑀅𑀬𑀁 𑀧𑀦 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂𑀧𑀺 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀧𑀪𑁂𑀤𑀢𑁄 𑀧𑀦𑁂𑀲 𑀚𑀸𑀢𑀺𑀢𑁄 𑀓𑀼𑀲𑀮𑀸𑀤𑀻𑀦𑀁, 𑀪𑀽𑀫𑀺𑀢𑁄 𑀘 𑀓𑀸𑀫𑀸𑀯𑀘𑀭𑀸𑀤𑀻𑀦𑀁 𑀯𑀲𑁂𑀦 𑀅𑀦𑁂𑀓𑀥𑀸 𑀪𑀺𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑁂𑀲𑀼𑀧𑀺 𑀓𑀼𑀲𑀮𑀓𑁆𑀔𑀦𑁆𑀥𑁂𑀲𑀼 𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀢𑀬𑁄 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀓𑁆𑀔𑀦𑁆𑀥𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁨𑁦. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁨𑁦. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀻𑀦𑀦𑁆𑀢𑀺 𑀇𑀤𑀁 𑀢𑀸𑀯 𑀳𑀤𑀬𑀯𑀢𑁆𑀣𑀼𑀦𑁄 𑀘𑁂𑀯 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀥𑀫𑁆𑀫𑁂𑀲𑀼 𑀳𑀺 𑀏𑀢𑁂𑀬𑁂𑀯 𑀙 𑀓𑁄𑀝𑁆𑀞𑀸𑀲𑀸 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀽𑀧𑀸𑀬𑀢𑀦𑀸𑀤𑀬𑁄 𑀧𑀦 𑀆𑀭𑀫𑁆𑀫𑀡𑀥𑀫𑁆𑀫𑀸 𑀓𑀺𑀜𑁆𑀘𑀸𑀧𑀺 𑀯𑀺𑀧𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀧𑀦 𑀦 𑀳𑁄𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄. 𑀅𑀭𑀽𑀧𑀺𑀦𑁄 𑀳𑀺 𑀔𑀦𑁆𑀥𑀸 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀅𑀩𑁆𑀪𑀦𑁆𑀢𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀯𑀺𑀬 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀆𑀲𑀗𑁆𑀓𑀸 𑀳𑁄𑀢𑀺 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑁂 𑀏𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀉𑀤𑀸𑀳𑀼 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺. 𑀆𑀭𑀫𑁆𑀫𑀡𑀥𑀫𑁆𑀫𑀸 𑀧𑀦 𑀯𑀢𑁆𑀣𑀼𑀦𑀺𑀲𑁆𑀲𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀆𑀭𑀫𑁆𑀫𑀡𑀫𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀦𑀢𑁆𑀣𑀺 𑀢𑁂𑀲𑀼 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸. 𑀇𑀢𑀺 𑀲𑀫𑁆𑀧𑀬𑁄𑀕𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀦 𑀢𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸. 𑀳𑀤𑀬𑀯𑀢𑁆𑀣𑀼𑀆𑀤𑀻𑀲𑀼 𑀏𑀯 𑀧𑀦𑀸𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 𑁋 𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀲𑁄𑀢… 𑀖𑀸𑀦… 𑀚𑀺𑀯𑁆𑀳𑀸… 𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺.
𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀭𑀽𑀧𑀻𑀦𑀦𑁆𑀢𑀺 𑀇𑀤𑀁 𑀧𑀦 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀳𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀯 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀧𑀦 𑀅𑀭𑀽𑀧𑀫𑁆𑀧𑀺 𑀲𑀫𑀸𑀦𑀁 𑀭𑀽𑀧𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀢𑀺. ‘‘𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑁄 𑀘𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀇𑀢𑀺 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀜𑁆𑀳𑀸𑀯𑀸𑀭𑁂 𑁋 𑀲𑀳𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀙𑀸𑀚𑀸𑀢𑀸 𑀓𑀼𑀲𑀮𑀸 𑀔𑀦𑁆𑀥𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀔𑀦𑁆𑀥𑀸 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀔𑀦𑁆𑀥𑀸 𑀯𑀢𑁆𑀣𑀼𑀲𑁆𑀲𑀸𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸.
𑀅𑀬𑀁 𑀧𑀦 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀢𑁆𑀢𑀫𑀸𑀦𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸. 𑀢𑁂𑀲𑀼 𑀭𑀽𑀧𑀁 𑀯𑀢𑁆𑀣𑀼𑀦𑁄 𑀘𑀓𑁆𑀔𑀸𑀤𑀻𑀦𑀜𑁆𑀘 𑀯𑀲𑁂𑀦 𑀙𑀥𑀸 𑀪𑀺𑀦𑁆𑀦𑀁, 𑀅𑀭𑀽𑀧𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀉𑀧𑁆𑀧𑀦𑁆𑀦𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀯𑀲𑁂𑀦 𑀘𑀢𑀼𑀥𑀸 𑀪𑀺𑀦𑁆𑀦𑀁. 𑀢𑀲𑁆𑀲 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀘𑀢𑀼𑀥𑀸, 𑀏𑀓𑀥𑀸, 𑀢𑀺𑀥𑀸, 𑀢𑀺𑀥𑀸𑀢𑀺 𑀏𑀓𑀤𑀲𑀥𑀸 𑀪𑁂𑀤𑁄 𑀳𑁄𑀢𑀺. 𑀆𑀭𑀼𑀧𑁆𑀧𑀯𑀺𑀧𑀸𑀓𑀜𑁆𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀉𑀧𑁆𑀧𑀦𑁆𑀦𑀁 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀁 𑀅𑀓𑀼𑀲𑀮𑀜𑁆𑀘 𑀅𑀢𑁆𑀢𑀦𑀸 𑀲𑀫𑀼𑀝𑁆𑀞𑀸𑀧𑀺𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑀁 𑀧𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀓𑁆𑀔𑀡𑀁 𑀧𑀢𑁆𑀢𑀲𑁆𑀲 𑀧𑀼𑀭𑁂𑀚𑀸𑀢𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀢𑁆𑀣 𑀘 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁄𑀢𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀁 𑀓𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀁 𑀧𑀦 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲, 𑀧𑀝𑀺𑀲𑀦𑁆𑀥𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑁂𑀯. 𑀢𑀺𑀯𑀺𑀥𑀫𑁆𑀧𑀺 𑀧𑀦𑁂𑀢𑀁 𑀧𑀼𑀭𑁂𑀚𑀸𑀢𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀢𑁂𑀪𑀽𑀫𑀓𑀫𑁆𑀧𑀺 𑀓𑀺𑀭𑀺𑀬𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀼𑀭𑁂𑀚𑀸𑀢𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀙𑀥𑀸 𑀞𑀺𑀢𑁂𑀲𑀼 𑀧𑀦 𑀭𑀽𑀧𑁂𑀲𑀼 𑀯𑀢𑁆𑀣𑀼𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀁 𑀲𑀳𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀧𑀯𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀘𑀢𑀼𑀪𑀽𑀫𑀓𑀓𑀼𑀲𑀮𑀸𑀦𑀁 𑀅𑀓𑀼𑀲𑀮𑀸𑀦𑀁 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀸𑀦𑀁 𑀢𑁂𑀪𑀽𑀫𑀓𑀯𑀺𑀧𑀸𑀓𑀸𑀦𑀁 𑀢𑁂𑀪𑀽𑀫𑀓𑀓𑀺𑀭𑀺𑀬𑀸𑀦𑀜𑁆𑀘 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁨𑁧. 𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁨𑁧. 𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺𑀆𑀤𑀻𑀳𑀺 𑀲𑀳𑀚𑀸𑀢𑀯𑀲𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀻𑀳𑀺 𑀧𑀼𑀭𑁂𑀚𑀸𑀢𑀯𑀲𑁂𑀦. 𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬𑀸𑀢𑀺 𑀏𑀢𑁆𑀣 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀯𑀫𑀬𑀁 𑀧𑀸𑀴𑀺 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀸𑀦𑀜𑁆𑀜𑁂𑀯 𑀅𑀢𑁆𑀣𑀺𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀆𑀕𑀢𑀸. 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀲𑀳𑀚𑀸𑀢𑀁, 𑀧𑀼𑀭𑁂𑀚𑀸𑀢𑀁, 𑀧𑀘𑁆𑀙𑀸𑀚𑀸𑀢𑀁, 𑀆𑀳𑀸𑀭𑀁, 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀆𑀕𑀢𑀢𑁆𑀢𑀸 𑀧𑀘𑁆𑀙𑀸𑀚𑀸𑀢𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀧𑀺 𑀅𑀢𑁆𑀣𑀺𑀧𑀘𑁆𑀘𑀬𑁄 𑀮𑀩𑁆𑀪𑀢𑀺. 𑀇𑀥 𑀧𑀦 𑀲𑀸𑀯𑀲𑁂𑀲𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸.
𑀅𑀬𑀁 𑀧𑀦 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀸𑀫 𑀤𑀼𑀯𑀺𑀥𑁄 𑁋 𑀅𑀜𑁆𑀜𑀫𑀜𑁆𑀜𑀢𑁄, 𑀦 𑀅𑀜𑁆𑀜𑀫𑀜𑁆𑀜𑀢𑁄. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀢𑀺𑀯𑀺𑀥𑀁 𑁋 𑀅𑀭𑀽𑀧𑀁 𑀅𑀭𑀽𑀧𑁂𑀦, 𑀭𑀽𑀧𑀁 𑀭𑀽𑀧𑁂𑀦, 𑀭𑀽𑀧𑀸𑀭𑀽𑀧𑀁 𑀭𑀽𑀧𑀸𑀭𑀽𑀧𑁂𑀦. ‘‘𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀭𑀽𑀧𑀺𑀦𑁄’’𑀢𑀺 𑀏𑀢𑁆𑀣 𑀳𑀺 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀭𑀽𑀧𑀁 𑀅𑀭𑀽𑀧𑁂𑀦 𑀯𑀼𑀢𑁆𑀢𑀁. ‘‘𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸’’𑀢𑀺 𑀏𑀢𑁆𑀣 𑀲𑀩𑁆𑀩𑀲𑀦𑁆𑀢𑀢𑀺𑀯𑀲𑁂𑀦 𑀭𑀽𑀧𑀁 𑀭𑀽𑀧𑁂𑀦. ‘‘𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀔𑀦𑁆𑀥𑀸𑀦𑀜𑁆𑀘𑁂𑀯 𑀯𑀢𑁆𑀣𑀼𑀦𑁄 𑀘 𑀯𑀲𑁂𑀦 𑀭𑀽𑀧𑀸𑀭𑀽𑀧𑀁 𑀭𑀽𑀧𑀸𑀭𑀽𑀧𑁂𑀦 𑀯𑀼𑀢𑁆𑀢𑀁. 𑀦 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀢𑀺𑀯𑀺𑀥𑀁 𑁋 ‘‘𑀅𑀭𑀽𑀧𑀁 𑀭𑀽𑀧𑀲𑁆𑀲, 𑀭𑀽𑀧𑀁 𑀭𑀽𑀧𑀲𑁆𑀲, 𑀭𑀽𑀧𑀁 𑀅𑀭𑀽𑀧𑀲𑁆𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 𑀏𑀢𑁆𑀣 𑀳𑀺 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀅𑀭𑀽𑀧𑀁 𑀭𑀽𑀧𑀲𑁆𑀲 𑀯𑀼𑀢𑁆𑀢𑀁. ‘‘𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀲𑀦𑁆𑀢𑀢𑀺𑀯𑀲𑁂𑀦 𑀭𑀽𑀧𑀁 𑀭𑀽𑀧𑀲𑁆𑀲. ‘‘𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺𑀆𑀤𑀻𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀭𑀽𑀧𑀁 𑀅𑀭𑀽𑀧𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁.
𑀅𑀧𑀺𑀘𑁂𑀲 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀔𑀡𑀢𑁆𑀢𑀬𑀧𑁆𑀧𑀢𑁆𑀢𑀁 𑀦𑀸𑀫𑀜𑁆𑀘𑁂𑀯 𑀭𑀽𑀧𑀜𑁆𑀘, 𑀯𑀢𑁆𑀢𑀫𑀸𑀦𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑁄 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀯𑀲𑁂𑀦 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀓𑀼𑀲𑀮𑁄 𑀲𑀳𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺, 𑀢𑀣𑀸 𑀅𑀓𑀼𑀲𑀮𑁄 𑀯𑀺𑀧𑀸𑀓𑀓𑀺𑀭𑀺𑀬𑀲𑀗𑁆𑀔𑀸𑀢𑁄 𑀘. 𑀢𑁂𑀲𑀼 𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁂𑀦 𑀘𑀢𑀼𑀥𑀸 𑀪𑀺𑀚𑁆𑀚𑀢𑀺, 𑀅𑀓𑀼𑀲𑀮𑁄 𑀓𑀸𑀫𑀸𑀯𑀘𑀭𑁄𑀯 𑀯𑀺𑀧𑀸𑀓𑁄 𑀘𑀢𑀼𑀪𑀽𑀫𑀓𑁄, 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁄 𑀢𑀺𑀪𑀽𑀫𑀓𑁄. 𑀭𑀽𑀧𑀲𑀗𑁆𑀔𑀸𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀓𑀸𑀫𑀸𑀯𑀘𑀭𑁄𑀯. 𑀲𑁄 𑀧𑀦 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀆𑀭𑀫𑁆𑀫𑀡𑀸𑀦𑀺 𑀘 𑀧𑀼𑀭𑁂𑀚𑀸𑀢𑀸𑀦𑁂𑀯, 𑀳𑀤𑀬𑀯𑀢𑁆𑀣𑀼 𑀲𑀳𑀚𑀸𑀢𑀁 𑀯𑀸 𑀳𑁄𑀢𑀺 𑀧𑀼𑀭𑁂𑀚𑀸𑀢𑀁 𑀯𑀸. 𑀧𑀜𑁆𑀳𑀸𑀯𑀸𑀭𑁂 𑀧𑀦 𑀆𑀕𑀢𑁄 𑀆𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀜𑁆𑀘 𑀲𑀳𑀚𑀸𑀢𑀸𑀤𑀺𑀪𑁂𑀤𑀁 𑀦 𑀮𑀪𑀢𑀻𑀢𑀺 𑀏𑀯𑀫𑁂𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀪𑁂𑀤𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀯𑀁 𑀪𑀺𑀦𑁆𑀦𑁂 𑀧𑀦𑁂𑀢𑁆𑀣 𑀘𑀢𑀼𑀪𑀽𑀫𑀓𑀓𑀼𑀲𑀮𑁄𑀧𑀺 𑀲𑀳𑀚𑀸𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀧𑀜𑁆𑀘𑀯𑁄𑀓𑀸𑀭𑁂 ‘‘𑀏𑀓𑁄 𑀔𑀦𑁆𑀥𑁄 𑀢𑀺𑀡𑁆𑀡𑀦𑁆𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀫𑀜𑁆𑀜𑀁 𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀞𑀧𑁂𑀢𑁆𑀯𑀸 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀯𑀲𑁂𑀲𑁄 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀓𑀼𑀲𑀮𑁄 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀢𑀼𑀪𑀽𑀫𑀓𑁄 𑀧𑀦𑁂𑀲 𑀧𑀜𑁆𑀘𑀯𑁄𑀓𑀸𑀭𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑁄 𑀓𑀼𑀲𑀮𑁄 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀓𑀼𑀲𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁄𑀧𑀺 𑀳𑀺 𑀧𑀜𑁆𑀘𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘, 𑀘𑀢𑀼𑀯𑁄𑀓𑀸𑀭𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀸𑀓𑀼𑀲𑀮𑁄 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀜𑁆𑀘𑀯𑁄𑀓𑀸𑀭𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀸𑀓𑀼𑀲𑀮𑁄 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.
𑀯𑀺𑀧𑀸𑀓𑀢𑁄 𑀧𑀦 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀺𑀬𑀫𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀔𑀦𑁆𑀥𑀸𑀦𑀜𑁆𑀘𑁂𑀯 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀯𑀢𑁆𑀢𑁂 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀞𑀺𑀢𑀺𑀧𑁆𑀧𑀢𑁆𑀢𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀧𑀦 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁄 𑀘 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀜𑁆𑀘𑀯𑁄𑀓𑀸𑀭𑁂 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁄 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀺𑀭𑀺𑀬𑀢𑁄 𑀭𑀽𑀧𑀸𑀯𑀘𑀭𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀘𑁂𑀯 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀘 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀓𑀸𑀫𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁄 𑀧𑀦 𑀆𑀭𑀼𑀧𑁆𑀧𑁂 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯, 𑀧𑀜𑁆𑀘𑀯𑁄𑀓𑀸𑀭𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀸𑀧𑀺 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀢𑁆𑀣𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄.
𑀭𑀽𑀧𑀲𑀗𑁆𑀔𑀸𑀢𑁄 𑀧𑀦 𑀅𑀢𑁆𑀣𑀺𑀧𑀘𑁆𑀘𑀬𑁄 𑀲𑀳𑀚𑀸𑀢𑁄, 𑀧𑀼𑀭𑁂𑀚𑀸𑀢𑁄, 𑀆𑀳𑀸𑀭𑁄, 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀲𑀳𑀚𑀸𑀢𑀭𑀽𑀧𑀢𑁆𑀣𑀺𑀧𑀘𑁆𑀘𑀬𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀘𑀢𑀼𑀥𑀸 𑀞𑀺𑀢𑁄. 𑀢𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀦𑁆𑀢𑀺 𑀏𑀯𑀁 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀁 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀲𑀫𑁆𑀧𑀺 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀢𑀺𑀡𑁆𑀡𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁, 𑀢𑀻𑀡𑀺 𑀏𑀓𑀲𑁆𑀲, 𑀤𑁆𑀯𑁂 𑀤𑁆𑀯𑀺𑀦𑁆𑀦𑀁, 𑀫𑀳𑀸𑀪𑀽𑀢𑀸 𑀉𑀧𑀸𑀤𑀸𑀭𑀽𑀧𑀸𑀦𑀦𑁆𑀢𑀺 𑀏𑀯𑀁 𑀲𑀳𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀼𑀭𑁂𑀚𑀸𑀢𑀢𑁆𑀣𑀺𑀧𑀘𑁆𑀘𑀬𑁄 𑀧𑀦 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀲𑁄 𑀤𑀼𑀯𑀺𑀥𑁄𑀧𑀺 𑀳𑁂𑀝𑁆𑀞𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄. 𑀆𑀳𑀸𑀭𑀢𑁆𑀣𑀺𑀧𑀘𑁆𑀘𑀬𑁄𑀧𑀺 𑀳𑁂𑀝𑁆𑀞𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀘𑁆𑀘𑀬𑁂 𑀬𑁄𑀚𑀺𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑁄. 𑀇𑀥 𑀧𑀦𑁂𑀲 𑀅𑀢𑁆𑀢𑀦𑁄 𑀅𑀦𑀺𑀭𑀼𑀤𑁆𑀥𑀓𑁆𑀔𑀡𑁂 𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁄. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀳𑁂𑀝𑁆𑀞𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑁄𑀚𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀇𑀥 𑀧𑀦𑁂𑀢𑀫𑁆𑀧𑀺 𑀅𑀢𑁆𑀢𑀦𑁄 𑀅𑀦𑀺𑀭𑀼𑀤𑁆𑀥𑀓𑁆𑀔𑀡𑁂𑀬𑁂𑀯 𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁨𑁨. 𑀦𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁨𑁨. 𑀦𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸𑀢𑀺 𑀅𑀜𑁆𑀜𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀅𑀦𑀦𑁆𑀢𑀭𑀺𑀓𑀸 𑀳𑀼𑀢𑁆𑀯𑀸 𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸. 𑀧𑀝𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁. 𑀇𑀫𑀺𑀦𑀸 𑀦𑀢𑁆𑀣𑀺𑀧𑀘𑁆𑀘𑀬𑀲𑁆𑀲 𑀑𑀓𑀸𑀲𑀤𑀸𑀦𑀝𑁆𑀞𑁂𑀦 𑀦𑀢𑁆𑀣𑀺𑀧𑀘𑁆𑀘𑀬𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀼𑀭𑀺𑀫𑁂𑀲𑀼 𑀳𑀺 𑀦𑀺𑀭𑁄𑀥𑀯𑀲𑁂𑀦 𑀧𑀘𑁆𑀙𑀺𑀫𑀸𑀦𑀁 𑀧𑀯𑀢𑁆𑀢𑀦𑁄𑀓𑀸𑀲𑀁 𑀅𑀤𑁂𑀦𑁆𑀢𑁂𑀲𑀼 𑀢𑁂𑀲𑀁 𑀧𑀝𑀼𑀧𑁆𑀧𑀦𑁆𑀦𑀪𑀸𑀯𑁄 𑀦 𑀲𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀲𑁂𑀲𑀁 𑀲𑀩𑁆𑀩𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀘𑀬𑀮𑀓𑁆𑀔𑀡𑀫𑁂𑀯 𑀳𑁂𑀢𑁆𑀣 𑀦𑀸𑀦𑀁, 𑀧𑀘𑁆𑀘𑀬𑀸𑀦𑀁 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺. 𑀓𑁂𑀯𑀮𑀁 𑀧𑀦 𑀢𑀢𑁆𑀣 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀘 𑀥𑀫𑁆𑀫𑀸 𑀫𑀦𑁄𑀥𑀸𑀢𑀼𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀘𑁆𑀘𑀬𑀸 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀸. 𑀇𑀥 𑀧𑀦 ‘‘𑀲𑀫𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀝𑀼𑀧𑁆𑀧𑀦𑁆𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀦𑀺𑀭𑁄𑀥𑀼𑀧𑁆𑀧𑀸𑀤𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑀺𑀢𑀸𑀢𑀺.
𑀦𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁨𑁩. 𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁨𑁩. 𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀲𑀫𑀦𑀦𑁆𑀢𑀭𑀯𑀺𑀕𑀢𑀸𑀢𑀺 𑀲𑀫𑀦𑀦𑁆𑀢𑀭𑀫𑁂𑀯 𑀯𑀺𑀕𑀢𑀸. 𑀇𑀫𑀺𑀦𑀸 𑀯𑀺𑀕𑀢𑀧𑀘𑁆𑀘𑀬𑀲𑁆𑀲 𑀯𑀺𑀕𑀘𑁆𑀙𑀫𑀸𑀦𑀪𑀸𑀯𑁂𑀦𑁂𑀯 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀢𑀺 𑀦𑀢𑁆𑀣𑀺𑀧𑀘𑁆𑀘𑀬𑀲𑁆𑀲 𑀘 𑀇𑀫𑀲𑁆𑀲 𑀘 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀬𑁂𑀯 𑀦𑀸𑀦𑀢𑁆𑀢𑀁, 𑀦 𑀅𑀢𑁆𑀣𑁂𑀢𑀺.
𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑁨𑁪. 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸
𑁨𑁪. 𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺𑀆𑀤𑀻𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀲𑀧𑀺 𑀳𑀺 𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀬𑁂𑀯 𑀦𑀸𑀦𑀢𑁆𑀢𑀁, 𑀦 𑀅𑀢𑁆𑀣𑁂𑀢𑀺.
𑀅𑀯𑀺𑀕𑀢𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸.
𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸
𑀇𑀤𑀸𑀦𑀺 𑀏𑀯𑀁 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀢𑁄 𑀤𑀲𑁆𑀲𑀺𑀢𑁂𑀲𑀼 𑀇𑀫𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀜𑀸𑀡𑀘𑀸𑀭𑀲𑁆𑀲 𑀯𑀺𑀲𑀤𑀪𑀸𑀯𑀢𑁆𑀣𑀁 𑀅𑀦𑁂𑀓𑀥𑀫𑁆𑀫𑀸𑀦𑀁 𑀏𑀓𑀧𑀘𑁆𑀘𑀬𑀪𑀸𑀯𑀢𑁄, 𑀏𑀓𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄, 𑀏𑀓𑀧𑀘𑁆𑀘𑀬𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄, 𑀧𑀘𑁆𑀘𑀬𑀲𑀪𑀸𑀕𑀢𑁄, 𑀧𑀘𑁆𑀘𑀬𑀯𑀺𑀲𑀪𑀸𑀕𑀢𑁄, 𑀬𑀼𑀕𑀴𑀓𑀢𑁄, 𑀚𑀦𑀓𑀸𑀚𑀦𑀓𑀢𑁄, 𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀲𑀩𑁆𑀩𑀝𑁆𑀞𑀸𑀦𑀺𑀓𑀢𑁄, 𑀭𑀽𑀧𑀁 𑀭𑀽𑀧𑀲𑁆𑀲𑀸𑀢𑀺𑀆𑀤𑀺𑀯𑀺𑀓𑀧𑁆𑀧𑀢𑁄, 𑀪𑀯𑀪𑁂𑀤𑀢𑁄𑀢𑀺 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑁂𑀓𑀥𑀫𑁆𑀫𑀸𑀦𑀁 𑀏𑀓𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀞𑀧𑁂𑀢𑁆𑀯𑀸 𑀓𑀫𑁆𑀫𑀧𑀘𑁆𑀘𑀬𑀁 𑀅𑀯𑀲𑁂𑀲𑁂𑀲𑀼 𑀢𑁂𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀦𑁂𑀓𑀥𑀫𑁆𑀫𑀸 𑀏𑀓𑀢𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀫𑁆𑀫𑀧𑀘𑁆𑀘𑀬𑁄 𑀧𑀦 𑀏𑀓𑁄 𑀘𑁂𑀢𑀦𑀸𑀥𑀫𑁆𑀫𑁄𑀬𑁂𑀯𑀸𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀦𑁂𑀓𑀥𑀫𑁆𑀫𑀸𑀦𑀁 𑀏𑀓𑀧𑀘𑁆𑀘𑀬𑀪𑀸𑀯𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.
𑀏𑀓𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑁂 𑀢𑀸𑀯 𑀅𑀫𑁄𑀳𑁄 𑀏𑀓𑁄 𑀥𑀫𑁆𑀫𑁄. 𑀲𑁄 𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀛𑀸𑀦𑀧𑀘𑁆𑀘𑀬𑁄𑀯 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀮𑁄𑀪𑀸𑀤𑁄𑀲𑀸 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸𑀧𑀺 𑀦 𑀳𑁄𑀦𑁆𑀢𑀺, 𑀲𑁂𑀲𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀮𑁄𑀪𑀫𑁄𑀳𑀸 𑀯𑀺𑀧𑀸𑀓𑀧𑀘𑁆𑀘𑀬𑀸𑀧𑀺 𑀦 𑀳𑁄𑀦𑁆𑀢𑀺, 𑀲𑁂𑀲𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀤𑁄𑀲𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄𑀧𑀺 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀲𑁄𑀴𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄; 𑀢𑀣𑀸 𑀫𑀦𑁄𑀥𑀸𑀢𑀼𑀬𑀸 𑀅𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘. 𑀲𑀳𑁂𑀢𑀼𑀓𑀸𑀬 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂𑀲𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.
𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑀚𑀸𑀢𑀸𑀥𑀺𑀧𑀢𑀻𑀲𑀼 𑀯𑀻𑀫𑀁𑀲𑀸 𑀅𑀫𑁄𑀳𑀳𑁂𑀢𑀼 𑀯𑀺𑀬 𑀯𑀻𑀲𑀢𑀺𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀙𑀦𑁆𑀤𑁄 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀺𑀢𑁆𑀢𑀁 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀻𑀭𑀺𑀬𑀁 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀛𑀸𑀦𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺.
𑀅𑀦𑀦𑁆𑀢𑀭𑀧𑀘𑁆𑀘𑀬𑁂 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀫𑀕𑁆𑀕𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀇𑀦𑁆𑀤𑁆𑀭𑀺𑀬𑀛𑀸𑀦𑀧𑀘𑁆𑀘𑀬𑁄𑀧𑀺 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂 𑀳𑁂𑀢𑀽 𑀳𑁂𑀢𑀼𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦, 𑀙𑀦𑁆𑀤𑀯𑀻𑀭𑀺𑀬𑀸𑀦𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀨𑀲𑁆𑀲𑁄 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑁂𑀢𑀦𑀸 𑀳𑁂𑀢𑀼𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀲𑁂𑀲𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀢𑀓𑁆𑀓𑁄 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀘𑀸𑀭𑁄 𑀫𑀕𑁆𑀕𑀧𑀘𑁆𑀘𑀬𑁄𑀧𑀺 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀻𑀢𑀺 𑀢𑁂𑀲𑀜𑁆𑀜𑁂𑀯 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀯𑀻𑀲𑀢𑀺𑀬𑀸 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀤𑁆𑀥𑀸 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀸𑀳𑀸𑀭𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁂𑀲𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀢𑀺 𑀢𑁂𑀳𑀺 𑀘𑁂𑀯 𑀫𑀕𑁆𑀕𑀧𑀘𑁆𑀘𑀬𑁂𑀦 𑀘𑀸𑀢𑀺 𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀸𑀬 𑀯𑀼𑀢𑁆𑀢𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀳𑀺𑀭𑁄𑀢𑁆𑀢𑀧𑁆𑀧𑀁 𑀢𑀢𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀓𑀸𑀬𑀧𑀲𑁆𑀲𑀤𑁆𑀥𑀸𑀤𑀻𑀦𑀺 𑀬𑀼𑀕𑀴𑀓𑀸𑀦𑀺, 𑀬𑁂𑀯𑀸𑀧𑀦𑀓𑁂𑀲𑀼 𑀅𑀥𑀺𑀫𑁄𑀓𑁆𑀔𑀫𑀦𑀲𑀺𑀓𑀸𑀭𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀓𑀭𑀼𑀡𑀸𑀫𑀼𑀤𑀺𑀢𑀸 𑀘. 𑀯𑀺𑀭𑀢𑀺𑀬𑁄 𑀧𑀦 𑀢𑁂𑀳𑀺 𑀘𑁂𑀯 𑀫𑀕𑁆𑀕𑀧𑀘𑁆𑀘𑀬𑁂𑀦 𑀘𑀸𑀢𑀺 𑀅𑀝𑁆𑀞𑀸𑀭𑀲𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀢𑁄 𑀯𑀺𑀧𑀸𑀓𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀲𑀢𑁆𑀢𑀭𑀲𑀥𑀸, 𑀫𑀺𑀘𑁆𑀙𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀢𑁂𑀳𑀺 𑀘𑁂𑀯 𑀓𑀫𑁆𑀫𑀸𑀳𑀸𑀭𑀧𑀘𑁆𑀘𑀬𑁂𑀳𑀺 𑀘𑀸𑀢𑀺 𑀏𑀓𑀽𑀦𑀯𑀻𑀲𑀢𑀺𑀥𑀸. 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁 𑀫𑀸𑀦𑁄 𑀣𑀺𑀦𑀁 𑀫𑀺𑀤𑁆𑀥𑀁 𑀉𑀤𑁆𑀥𑀘𑁆𑀘𑀦𑁆𑀢𑀺 𑀇𑀫𑁂 𑀳𑁂𑀢𑀼𑀧𑀼𑀭𑁂𑀚𑀸𑀢𑀓𑀫𑁆𑀫𑀯𑀺𑀧𑀸𑀓𑀸𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀲𑁂𑀲𑀸𑀦𑀁 𑀧𑀦 𑀲𑁄𑀴𑀲𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀢𑀢𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀧𑀦𑁆𑀦𑀭𑀲𑀥𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀧𑀺 𑀏𑀲𑁂𑀯 𑀦𑀬𑁄.
𑀲𑀳𑀚𑀸𑀢𑀧𑀘𑁆𑀘𑀬𑁂 𑀘𑀢𑀽𑀲𑀼 𑀢𑀸𑀯 𑀔𑀦𑁆𑀥𑁂𑀲𑀼 𑀏𑀓𑁂𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀳𑀤𑀬𑀯𑀢𑁆𑀣𑀼 𑀢𑁂𑀲𑀜𑁆𑀘𑁂𑀯 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀘 𑀯𑀲𑁂𑀦 𑀤𑀲𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀉𑀧𑀦𑀺𑀲𑁆𑀲𑀬𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀬𑀢𑀦𑀸𑀦𑀺 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀢𑁆𑀢𑀓𑀫𑁂𑀯𑁂𑀢𑁆𑀣 𑀅𑀧𑀼𑀩𑁆𑀩𑀁. 𑀧𑀘𑁆𑀙𑀸𑀚𑀸𑀢𑀸𑀤𑀻𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀆𑀳𑀸𑀭𑀧𑀘𑁆𑀘𑀬𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀆𑀳𑀸𑀭𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀙𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. 𑀏𑀯𑀫𑁂𑀢𑁆𑀣 𑀏𑀓𑀥𑀫𑁆𑀫𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀏𑀓𑀧𑀘𑁆𑀘𑀬𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀬𑁂𑀦𑀸𑀓𑀸𑀭𑁂𑀦 𑀬𑁂𑀦𑀢𑁆𑀣𑁂𑀦 𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀁 𑀆𑀓𑀸𑀭𑀁 𑀢𑀁 𑀅𑀢𑁆𑀣𑀁 𑀅𑀯𑀺𑀚𑀳𑀺𑀢𑁆𑀯𑀸𑀯 𑀅𑀜𑁆𑀜𑁂𑀳𑀺𑀧𑀺 𑀬𑁂𑀳𑀸𑀓𑀸𑀭𑁂𑀳𑀺 𑀬𑁂𑀳𑀺 𑀅𑀢𑁆𑀣𑁂𑀳𑀺 𑀲𑁄 𑀢𑀲𑁆𑀫𑀺𑀜𑁆𑀜𑁂𑀯 𑀔𑀡𑁂 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺, 𑀢𑀢𑁄 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀫𑁄𑀳𑁄 𑀳𑁂𑀢𑀼𑀧𑀘𑁆𑀘𑀬𑁄, 𑀲𑁄 𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀏𑀓𑀸𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀮𑁄𑀪𑀸𑀤𑁄𑀲𑀸 𑀢𑀢𑁄 𑀅𑀥𑀺𑀧𑀢𑀺𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑁂 𑀢𑀬𑁄 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀁 𑀯𑀺𑀧𑀸𑀓𑀳𑁂𑀢𑀽𑀲𑀼𑀬𑁂𑀯 𑀮𑀩𑁆𑀪𑀢𑀺, 𑀓𑀼𑀲𑀮𑀓𑀺𑀭𑀺𑀬𑁂𑀲𑀼 𑀧𑀦 𑀯𑀺𑀧𑀸𑀓𑀧𑀘𑁆𑀘𑀬𑀢𑀸 𑀧𑀭𑀺𑀳𑀸𑀬𑀢𑀺. 𑀮𑁄𑀪𑀤𑁄𑀲𑀫𑁄𑀳𑀸 𑀢𑁂 𑀢𑀬𑁄 𑀯𑀺𑀧𑀸𑀓𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑁄 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀲𑁂𑀦 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺.
𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀢𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀁𑀬𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀬𑀫𑁂𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄, 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀯𑀸 𑀭𑀽𑀧𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀫𑀢𑁆𑀢𑀜𑁆𑀜𑁂𑀯 𑀉𑀢𑁆𑀢𑀭𑀺 𑀮𑀩𑁆𑀪𑀢𑀺. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀻𑀫𑀁𑀲𑀸 𑀅𑀫𑁄𑀳𑀲𑀤𑀺𑀲𑀸. 𑀙𑀦𑁆𑀤𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀯𑀻𑀭𑀺𑀬𑀁 𑀢𑁂𑀲𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀧𑀘𑁆𑀘𑀬𑀸𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀘𑀺𑀢𑁆𑀢𑀁 𑀢𑀢𑁄 𑀫𑀕𑁆𑀕𑀧𑀘𑁆𑀘𑀬𑀁 𑀅𑀧𑀦𑁂𑀢𑁆𑀯𑀸 𑀆𑀳𑀸𑀭𑀧𑀘𑁆𑀘𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁 𑀯𑀲𑁂𑀦 𑀅𑀥𑀺𑀧𑀢𑀺𑀧𑀘𑁆𑀘𑀬𑀢𑁄 𑀉𑀢𑁆𑀢𑀭𑀺 𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑁄 𑀧𑀦 𑀳𑁂𑀝𑁆𑀞𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.
𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀸𑀯 𑀉𑀧𑀦𑀺𑀲𑁆𑀲𑀬𑀓𑀫𑁆𑀫𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸𑀬𑁂𑀯 𑀘𑁂𑀢𑁆𑀣 𑀓𑀫𑁆𑀫𑀧𑀘𑁆𑀘𑀬𑀢𑀁 𑀮𑀪𑀢𑀺, 𑀦 𑀲𑁂𑀲𑀥𑀫𑁆𑀫𑀸. 𑀲𑀳𑀚𑀸𑀢𑀧𑀘𑁆𑀘𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀳𑁂𑀢𑀼𑀅𑀥𑀺𑀧𑀢𑀺𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀬𑀫𑁆𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀯𑀢𑁆𑀣𑀼𑀲𑀳𑀚𑀸𑀢𑀸𑀤𑀻𑀦𑀁 𑀧𑀦 𑀯𑀲𑁂𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀦𑀁 𑀅𑀪𑀸𑀯𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀧𑀺 𑀏𑀲𑁂𑀯 𑀦𑀬𑁄.
𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀜𑁆𑀘𑁂𑀯 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀧𑀘𑁆𑀙𑀸𑀚𑀸𑀢𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁂 𑀘 𑀙 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀲𑀢𑁆𑀢𑀭𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀬𑀫𑁆𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀯 𑀯𑀢𑁆𑀣𑀼𑀦𑀺𑀲𑁆𑀲𑀬𑀸𑀤𑀻𑀦𑀁 𑀧𑀦 𑀯𑀲𑁂𑀦𑁂𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀦𑀁 𑀆𑀪𑀸𑀯𑁄𑀧𑀺 𑀯𑁂𑀤𑀺𑀢𑀩𑁆𑀩𑁄.
𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀤𑀺𑀲𑁄. 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀓𑀫𑁆𑀫𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀙𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸𑀬𑁂𑀯 𑀘𑁂𑀢𑁆𑀣 𑀓𑀫𑁆𑀫𑀧𑀘𑁆𑀘𑀬𑀢𑀁 𑀮𑀪𑀢𑀺, 𑀦 𑀲𑁂𑀲𑀥𑀫𑁆𑀫𑀸. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀯. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀅𑀢𑁆𑀢𑀦𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀬𑀫𑁆𑀧𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄𑀯 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁂 𑀧𑀦𑁂𑀢𑁆𑀣 𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑀸 𑀦 𑀮𑀩𑁆𑀪𑀢𑀺. 𑀇𑀢𑁄 𑀉𑀢𑁆𑀢𑀭𑀺𑀧𑀺 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀅𑀢𑁆𑀢𑀦𑁄 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀪𑀸𑀯𑀁 𑀅𑀯𑀺𑀚𑀳𑀦𑁆𑀢𑁄𑀯 𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀢𑀻𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀆𑀲𑁂𑀯𑀦𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺.
𑀓𑀫𑁆𑀫𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀏𑀓𑀓𑁆𑀔𑀡𑀺𑀓𑁄 𑀢𑀸𑀯 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀦𑀯𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀦𑀸𑀦𑀸𑀓𑁆𑀔𑀡𑀺𑀓𑁄 𑀉𑀧𑀦𑀺𑀲𑁆𑀲𑀬𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀦𑀢𑁆𑀣𑀺𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀯𑀺𑀧𑀸𑀓𑀧𑀘𑁆𑀘𑀬𑁄 𑀯𑀺𑀧𑀸𑀓𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀳𑁂𑀢𑀼𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀆𑀳𑀸𑀭𑀧𑀘𑁆𑀘𑀬𑁂 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀲𑁂𑀲𑀸 𑀢𑀬𑁄 𑀆𑀳𑀸𑀭𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀸𑀯 𑀬𑀣𑀸𑀦𑀼𑀭𑀽𑀧𑀁 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀏𑀓𑀸𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺.
𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂 𑀭𑀽𑀧𑀺𑀦𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀸𑀯 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀜𑁆𑀜𑁂𑀯 𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸𑀦𑀺𑀧𑀺 𑀬𑀣𑀸𑀦𑀼𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑀸𑀦𑁂𑀯 𑀳𑁂𑀢𑀼𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀆𑀳𑀸𑀭𑀛𑀸𑀦𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀢𑁂𑀭𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀛𑀸𑀦𑀧𑀘𑁆𑀘𑀬𑁄 𑀛𑀸𑀦𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀬𑀣𑀸𑀦𑀼𑀭𑀽𑀧𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀫𑀕𑁆𑀕𑀧𑀘𑁆𑀘𑀬𑁄 𑀫𑀕𑁆𑀕𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀬𑀣𑀸𑀦𑀼𑀭𑀽𑀧𑀁 𑀛𑀸𑀦𑀧𑀘𑁆𑀘𑀬𑁂 𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀳𑁂𑀢𑀼𑀅𑀥𑀺𑀧𑀢𑀻𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀤𑁆𑀯𑀸𑀤𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺.
𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀬𑀣𑀸𑀦𑀼𑀭𑀽𑀧𑀁 𑀳𑁂𑀢𑀼𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀯𑀺𑀧𑀸𑀓𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀅𑀢𑁆𑀣𑀺𑀅𑀯𑀺𑀕𑀢𑀸𑀦𑀁 𑀯𑀲𑁂𑀦 𑀅𑀧𑀭𑁂𑀳𑀺𑀧𑀺 𑀢𑁂𑀭𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀲𑀗𑁆𑀔𑀸𑀢𑁂 𑀙 𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀁 𑀅𑀧𑀭𑁂𑀳𑀺𑀧𑀺 𑀲𑀢𑁆𑀢𑀭𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀭𑀽𑀧𑀲𑁆𑀲 𑀘 𑀅𑀭𑀽𑀧𑀲𑁆𑀲 𑀘 𑀧𑀘𑁆𑀘𑀬𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑁆𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀲𑀗𑁆𑀔𑀸𑀢𑁂 𑀧𑀜𑁆𑀘 𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸𑀦𑀁 𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀁 𑀅𑀧𑀭𑁂𑀳𑀺 𑀅𑀝𑁆𑀞𑀸𑀭𑀲𑀳𑀸𑀓𑀸𑀭𑁂𑀳𑀺 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀁 𑀕𑀘𑁆𑀙𑀢𑀺. 𑀦𑀢𑁆𑀣𑀺𑀧𑀘𑁆𑀘𑀬𑀯𑀺𑀕𑀢𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑀤𑀺𑀲𑀸. 𑀅𑀯𑀺𑀕𑀢𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑀲𑀤𑀺𑀲𑁄𑀬𑁂𑀯𑀸𑀢𑀺 𑀏𑀯𑀫𑁂𑀢𑁆𑀣 𑀏𑀓𑀧𑀘𑁆𑀘𑀬𑀲𑁆𑀲 𑀅𑀦𑁂𑀓𑀧𑀘𑁆𑀘𑀬𑀪𑀸𑀯𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀧𑀘𑁆𑀘𑀬𑀲𑀪𑀸𑀕𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑀸 𑀲𑀪𑀸𑀕𑀸, 𑀢𑀣𑀸 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦𑁂𑀢𑁆𑀣 𑀧𑀘𑁆𑀘𑀬𑀲𑀪𑀸𑀕𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀧𑀘𑁆𑀘𑀬𑀯𑀺𑀲𑀪𑀸𑀕𑀢𑁄𑀢𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀦𑁂𑀢𑁆𑀣 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀯𑀺𑀲𑀪𑀸𑀕𑁄, 𑀢𑀣𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦, 𑀅𑀢𑁆𑀣𑀺𑀧𑀘𑁆𑀘𑀬𑁄 𑀦𑀢𑁆𑀣𑀺𑀧𑀘𑁆𑀘𑀬𑁂𑀦, 𑀯𑀺𑀕𑀢𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁂𑀦𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦𑁂𑀢𑁆𑀣 𑀧𑀘𑁆𑀘𑀬𑀯𑀺𑀲𑀪𑀸𑀕𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀬𑀼𑀕𑀴𑀓𑀢𑁄𑀢𑀺 𑀏𑀢𑁂𑀲𑀼 𑀘 𑀅𑀢𑁆𑀣𑀲𑀭𑀺𑀓𑁆𑀔𑀢𑀸𑀬, 𑀲𑀤𑁆𑀤𑀲𑀭𑀺𑀓𑁆𑀔𑀢𑀸𑀬, 𑀓𑀸𑀮𑀧𑀝𑀺𑀧𑀓𑁆𑀔𑀢𑀸𑀬, 𑀳𑁂𑀢𑀼𑀨𑀮𑀢𑀸𑀬, 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀢𑀸𑀬𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀬𑀼𑀕𑀴𑀓𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸 𑀳𑀺 𑀅𑀢𑁆𑀣𑀲𑀭𑀺𑀓𑁆𑀔𑀢𑀸𑀬 𑀏𑀓𑀁 𑀬𑀼𑀕𑀴𑀓𑀁 𑀦𑀸𑀫; 𑀦𑀺𑀲𑁆𑀲𑀬𑀽𑀧𑀦𑀺𑀲𑁆𑀲𑀬𑀸 𑀲𑀤𑁆𑀤𑀲𑀭𑀺𑀓𑁆𑀔𑀢𑀸𑀬, 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸 𑀓𑀸𑀮𑀧𑀝𑀺𑀧𑀓𑁆𑀔𑀢𑀸𑀬, 𑀓𑀫𑁆𑀫𑀧𑀘𑁆𑀘𑀬𑀯𑀺𑀧𑀸𑀓𑀧𑀘𑁆𑀘𑀬𑀸 𑀳𑁂𑀢𑀼𑀨𑀮𑀢𑀸𑀬, 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀢𑀸𑀬 𑀏𑀓𑀁 𑀬𑀼𑀕𑀴𑀓𑀁 𑀦𑀸𑀫, 𑀢𑀣𑀸 𑀅𑀢𑁆𑀣𑀺𑀦𑀢𑁆𑀣𑀺𑀧𑀘𑁆𑀘𑀬𑀸, 𑀯𑀺𑀕𑀢𑀸𑀯𑀺𑀕𑀢𑀧𑀘𑁆𑀘𑀬𑀸 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀬𑀼𑀕𑀴𑀓𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄. 𑀚𑀦𑀓𑀸𑀚𑀦𑀓𑀢𑁄𑀢𑀺 𑀏𑀢𑁂𑀲𑀼 𑀘 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀧𑀘𑁆𑀘𑀬𑀸 𑀦𑀸𑀦𑀸𑀓𑁆𑀔𑀡𑀺𑀓𑁄, 𑀓𑀫𑁆𑀫𑀧𑀘𑁆𑀘𑀬𑁄, 𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸𑀢𑀺 𑀇𑀫𑁂 𑀧𑀘𑁆𑀘𑀬𑀸 𑀚𑀦𑀓𑀸𑀬𑁂𑀯, 𑀦 𑀅𑀚𑀦𑀓𑀸. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀓𑁂𑀯𑀮𑀁 𑀉𑀧𑀢𑁆𑀣𑀫𑁆𑀪𑀓𑁄𑀬𑁂𑀯, 𑀦 𑀚𑀦𑀓𑁄. 𑀲𑁂𑀲𑀸 𑀚𑀦𑀓𑀸 𑀘 𑀅𑀚𑀦𑀓𑀸 𑀘 𑀉𑀧𑀢𑁆𑀣𑀫𑁆𑀪𑀓𑀸 𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀚𑀦𑀓𑀸𑀚𑀦𑀓𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀲𑀩𑁆𑀩𑀝𑁆𑀞𑀸𑀦𑀺𑀓𑀢𑁄𑀢𑀺 𑀏𑀢𑁂𑀲𑀼 𑀘 𑀲𑀳𑀚𑀸𑀢𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀸 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀦𑀸𑀫, 𑀲𑀩𑁆𑀩𑁂𑀲𑀁 𑀲𑀗𑁆𑀔𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀞𑀸𑀦𑀪𑀽𑀢𑀸 𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀏𑀓𑀥𑀫𑁆𑀫𑁄𑀧𑀺 𑀦𑀢𑁆𑀣𑀻𑀢𑀺. 𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑀸 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀦𑀸𑀫. 𑀦 𑀲𑀩𑁆𑀩𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀞𑀸𑀦𑀪𑀽𑀢𑀸, 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀜𑁆𑀜𑁂𑀯 𑀧𑀦 𑀞𑀸𑀦𑀪𑀽𑀢𑀸 𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀅𑀭𑀽𑀧𑀥𑀫𑁆𑀫𑀸𑀬𑁂𑀯 𑀳𑀺 𑀏𑀢𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀭𑀽𑀧𑀥𑀫𑁆𑀫𑀸. 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸𑀧𑀺 𑀅𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀅𑀭𑀽𑀧𑀭𑀽𑀧𑀸𑀦𑀜𑁆𑀜𑁂𑀯 𑀬𑀣𑀸𑀓𑁆𑀓𑀫𑁂𑀦 𑀧𑀘𑁆𑀘𑀬𑀪𑀸𑀯𑀢𑁄. 𑀯𑀼𑀢𑁆𑀢𑀸𑀯𑀲𑁂𑀲𑀸𑀧𑀺 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 𑀦 𑀲𑀩𑁆𑀩𑀝𑁆𑀞𑀸𑀦𑀺𑀓𑀸𑀢𑀺 𑀏𑀯𑀫𑁂𑀢𑁆𑀣 𑀲𑀩𑁆𑀩𑀝𑁆𑀞𑀸𑀦𑀺𑀓𑀸 𑀲𑀩𑁆𑀩𑀝𑁆𑀞𑀸𑀦𑀺𑀓𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀭𑀽𑀧𑀁 𑀭𑀽𑀧𑀲𑁆𑀲𑀸𑀢𑀺𑀆𑀤𑀺𑀯𑀺𑀓𑀧𑁆𑀧𑀢𑁄𑀢𑀺 𑀏𑀢𑁂𑀲𑀼 𑀘 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑀧𑀘𑁆𑀘𑀬𑁄𑀧𑀺 𑀏𑀓𑀦𑁆𑀢𑁂𑀦 𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦 𑀧𑀦 𑀭𑀽𑀧𑀁 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫 𑀅𑀢𑁆𑀣𑀺. 𑀓𑀢𑀭𑁄 𑀧𑀦𑁂𑀲𑁄𑀢𑀺? 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑀺 𑀏𑀓𑀦𑁆𑀢𑁂𑀦 𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀓𑀦𑁆𑀢𑁂𑀦 𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀸𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫𑀸𑀢𑀺𑀧𑀺 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦 𑀧𑀦 𑀅𑀭𑀽𑀧𑀁 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫 𑀅𑀢𑁆𑀣𑀺. 𑀓𑀢𑀭𑁄 𑀧𑀦𑁂𑀲𑁄𑀢𑀺? 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀆𑀲𑁂𑀯𑀦𑀲𑀫𑁆𑀧𑀬𑀼𑀢𑁆𑀢𑀦𑀢𑁆𑀣𑀺𑀯𑀺𑀕𑀢𑀯𑀲𑁂𑀦 𑀙𑀩𑁆𑀩𑀺𑀥𑁄. 𑀲𑁄 𑀳𑀺 𑀲𑀩𑁆𑀩𑁄𑀧𑀺 𑀏𑀓𑀦𑁆𑀢𑁂𑀦 𑀅𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀓𑀦𑁆𑀢𑁂𑀦 𑀅𑀭𑀽𑀧𑀫𑁂𑀯 𑀳𑀼𑀢𑁆𑀯𑀸𑀧𑀺 𑀏𑀓𑀦𑁆𑀢𑁂𑀦 𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫𑀸𑀢𑀺𑀧𑀺 𑀅𑀢𑁆𑀣𑀺. 𑀓𑀢𑀭𑁄 𑀧𑀦𑁂𑀲𑁄𑀢𑀺? 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀳𑀺 𑀏𑀓𑀦𑁆𑀢𑁂𑀦 𑀅𑀭𑀽𑀧𑀁 𑀳𑀼𑀢𑁆𑀯𑀸 𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺; 𑀏𑀓𑀦𑁆𑀢𑁂𑀦 𑀧𑀦 𑀅𑀭𑀽𑀧𑀥𑀫𑁆𑀫𑁄𑀯 𑀳𑀼𑀢𑁆𑀯𑀸 𑀭𑀽𑀧𑀸𑀭𑀽𑀧𑀸𑀦𑀁 𑀧𑀘𑁆𑀘𑀬𑁄𑀧𑀺 𑀅𑀢𑁆𑀣𑀺. 𑀓𑀢𑀭𑁄 𑀧𑀦𑁂𑀲𑁄𑀢𑀺? 𑀳𑁂𑀢𑀼𑀓𑀫𑁆𑀫𑀯𑀺𑀧𑀸𑀓𑀛𑀸𑀦𑀫𑀕𑁆𑀕𑀯𑀲𑁂𑀦 𑀧𑀜𑁆𑀘𑀯𑀺𑀥𑁄. 𑀲𑁄 𑀳𑀺 𑀲𑀩𑁆𑀩𑁄𑀧𑀺 𑀏𑀓𑀦𑁆𑀢𑁂𑀦 𑀅𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀥𑀫𑁆𑀫𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀓𑀦𑁆𑀢𑁂𑀦 𑀧𑀦 𑀭𑀽𑀧𑀸𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫𑀸𑀢𑀺𑀧𑀺 𑀦𑀢𑁆𑀣𑀺, 𑀅𑀭𑀽𑀧𑀲𑁆𑀲𑁂𑀯 𑀧𑀦 𑀳𑁄𑀢𑀺. 𑀓𑀢𑀭𑁄 𑀧𑀦𑁂𑀲𑁄𑀢𑀺? 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀘. 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀏𑀓𑀦𑁆𑀢𑁂𑀦 𑀭𑀽𑀧𑀸𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀅𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀓𑀦𑁆𑀢𑁂𑀦 𑀭𑀽𑀧𑀸𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀧𑀦 𑀭𑀽𑀧𑀸𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀦𑀸𑀫𑀸𑀢𑀺𑀧𑀺 𑀅𑀢𑁆𑀣𑀺. 𑀓𑀢𑀭𑁄 𑀧𑀦𑁂𑀲𑁄𑀢𑀺? 𑀅𑀥𑀺𑀧𑀢𑀺𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀆𑀳𑀸𑀭𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀦𑀯𑀯𑀺𑀥𑁄. 𑀲𑁄 𑀳𑀺 𑀲𑀩𑁆𑀩𑁄𑀧𑀺 𑀏𑀓𑀦𑁆𑀢𑁂𑀦 𑀭𑀽𑀧𑀸𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀭𑀽𑀧𑀸𑀭𑀽𑀧𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀭𑀽𑀧𑀁 𑀭𑀽𑀧𑀲𑁆𑀲𑀸𑀢𑀺𑀆𑀤𑀺𑀯𑀺𑀓𑀧𑁆𑀧𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.
𑀪𑀯𑀪𑁂𑀤𑀢𑁄𑀢𑀺 𑀇𑀫𑁂𑀲𑀼 𑀧𑀦 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀢𑀸𑀯 𑀦 𑀓𑁄𑀘𑀺 𑀧𑀘𑁆𑀘𑀬𑁄 𑀦 𑀮𑀩𑁆𑀪𑀢𑀺 𑀦𑀸𑀫. 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀦 𑀢𑀬𑁄 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸 𑀏𑀓𑀯𑀻𑀲𑀢𑀺𑀫𑁂𑀯 𑀮𑀩𑁆𑀪𑀦𑁆𑀢𑀺. 𑀏𑀓𑀯𑁄𑀓𑀸𑀭𑀪𑀯𑁂 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀓𑀫𑁆𑀫𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀲𑀢𑁆𑀢𑁂𑀯 𑀮𑀩𑁆𑀪𑀦𑁆𑀢𑀺. 𑀩𑀸𑀳𑀺𑀭𑁂 𑀧𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀧𑀜𑁆𑀘𑁂𑀯 𑀮𑀩𑁆𑀪𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀪𑀯𑀪𑁂𑀤𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺.
𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.