𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑀏𑀯𑀁 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀸𑀤𑀻𑀲𑀼 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑀫𑁄𑀥𑀸𑀦𑁂 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑁂 𑀬𑁂 𑀢𑀺𑀓𑀸𑀤𑀬𑁄 𑀦𑀺𑀲𑁆𑀲𑀸𑀬 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀏𑀢𑀁 𑀢𑀺𑀓𑀧𑀝𑁆𑀞𑀸𑀦𑀁, 𑀤𑀼𑀓𑀧𑀝𑁆𑀞𑀸𑀦𑀁…𑀧𑁂… 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀬𑁂𑀲𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀢𑁂 𑀢𑀺𑀓𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀢𑁂 𑀧𑀘𑁆𑀘𑀬𑁂 𑀏𑀯 𑀢𑀸𑀯 𑀇𑀫𑀺𑀦𑀸 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑀧𑀘𑁆𑀘𑀬𑀯𑀺𑀪𑀗𑁆𑀕𑀲𑀗𑁆𑀔𑀸𑀢𑁂𑀦 𑀯𑀸𑀭𑁂𑀦 𑀉𑀤𑁆𑀤𑁂𑀲𑀢𑁄 𑀘 𑀦𑀺𑀤𑁆𑀤𑁂𑀲𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸, 𑀇𑀤𑀸𑀦𑀺 𑀬𑁂 𑀢𑀺𑀓𑀸𑀤𑀬𑁄 𑀦𑀺𑀲𑁆𑀲𑀸𑀬 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀏𑀢𑀁 𑀢𑀺𑀓𑀧𑀝𑁆𑀞𑀸𑀦𑀁, 𑀤𑀼𑀓𑀧𑀝𑁆𑀞𑀸𑀦𑀁…𑀧𑁂… 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂 𑀢𑀺𑀓𑀸𑀤𑀬𑁄 𑀇𑀫𑁂𑀲𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀏𑀓𑁂𑀓𑀁 𑀢𑀺𑀓𑀤𑀼𑀓𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀳𑀺 𑀫𑀳𑀸𑀯𑀸𑀭𑁂𑀳𑀺 𑀤𑁂𑀲𑀦𑀸 𑀓𑀢𑀸. 𑀢𑁂𑀲𑀁 𑀇𑀫𑀸𑀦𑀺 𑀦𑀸𑀫𑀸𑀦𑀺 𑁋 𑀧𑀝𑀺𑀘𑁆𑀘𑀯𑀸𑀭𑁄, 𑀲𑀳𑀚𑀸𑀢𑀯𑀸𑀭𑁄, 𑀧𑀘𑁆𑀘𑀬𑀯𑀸𑀭𑁄, 𑀦𑀺𑀲𑁆𑀲𑀬𑀯𑀸𑀭𑁄, 𑀲𑀁𑀲𑀝𑁆𑀞𑀯𑀸𑀭𑁄, 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁄, 𑀧𑀜𑁆𑀳𑀸𑀯𑀸𑀭𑁄𑀢𑀺.

𑀢𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀧𑀝𑀺𑀘𑁆𑀘𑀸𑀪𑀺𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑁄 𑀧𑀝𑀺𑀘𑁆𑀘𑀯𑀸𑀭𑁄 𑀦𑀸𑀫. 𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀲𑀳𑀚𑀸𑀢𑀸𑀪𑀺𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑁄 𑀲𑀳𑀚𑀸𑀢𑀯𑀸𑀭𑁄 𑀦𑀸𑀫. 𑀲𑁄 𑀧𑀼𑀭𑀺𑀫𑁂𑀦 𑀧𑀝𑀺𑀘𑁆𑀘𑀯𑀸𑀭𑁂𑀦 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑁄. 𑀧𑀝𑀺𑀘𑁆𑀘𑀸𑀪𑀺𑀥𑀸𑀦𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀧𑀦 𑀧𑀞𑀫𑁄 𑀯𑀼𑀢𑁆𑀢𑁄, 𑀲𑀳𑀚𑀸𑀢𑀸𑀪𑀺𑀥𑀸𑀦𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀤𑀼𑀢𑀺𑀬𑁄. 𑀤𑁆𑀯𑀻𑀲𑀼𑀧𑀺 𑀘𑁂𑀢𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑀯𑀲𑁂𑀦 𑀧𑀘𑁆𑀘𑀬𑀸 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀘 𑀔𑁄 𑀲𑀳𑀚𑀸𑀢𑀸𑀯, 𑀦 𑀧𑀼𑀭𑁂𑀚𑀸𑀢𑀧𑀘𑁆𑀙𑀸𑀚𑀸𑀢𑀸 𑀮𑀩𑁆𑀪𑀦𑁆𑀢𑀺. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀧𑀘𑁆𑀘𑀬𑀸𑀪𑀺𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑁄 𑀧𑀦 𑀧𑀘𑁆𑀘𑀬𑀯𑀸𑀭𑁄 𑀦𑀸𑀫. 𑀲𑁄𑀧𑀺 𑀧𑀼𑀭𑀺𑀫𑀯𑀸𑀭𑀤𑁆𑀯𑀬𑀁 𑀯𑀺𑀬 𑀭𑀽𑀧𑀸𑀭𑀽𑀧𑀥𑀫𑁆𑀫𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀬𑁄 𑀧𑀦𑁂𑀢𑁆𑀣 𑀧𑀼𑀭𑁂𑀚𑀸𑀢𑁄𑀧𑀺 𑀮𑀩𑁆𑀪𑀢𑀺. 𑀅𑀬𑀫𑀲𑁆𑀲 𑀧𑀼𑀭𑀺𑀫𑀯𑀸𑀭𑀤𑁆𑀯𑀬𑀢𑁄 𑀯𑀺𑀲𑁂𑀲𑁄. 𑀢𑀤𑀦𑀦𑁆𑀢𑀭𑁄 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀦𑀺𑀲𑁆𑀲𑀬𑀸𑀪𑀺𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑁄 𑀦𑀺𑀲𑁆𑀲𑀬𑀯𑀸𑀭𑁄 𑀦𑀸𑀫. 𑀲𑁄 𑀧𑀼𑀭𑀺𑀫𑁂𑀦 𑀧𑀘𑁆𑀘𑀬𑀯𑀸𑀭𑁂𑀦 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑁄. 𑀧𑀘𑁆𑀘𑀬𑀸𑀪𑀺𑀥𑀸𑀦𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀧𑀦 𑀧𑀞𑀫𑁄 𑀯𑀼𑀢𑁆𑀢𑁄, 𑀦𑀺𑀲𑁆𑀲𑀬𑀸𑀪𑀺𑀥𑀸𑀦𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀤𑀼𑀢𑀺𑀬𑁄. 𑀢𑀢𑁄 𑀧𑀭𑀁 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀁𑀲𑀝𑁆𑀞𑁄 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀲𑀁𑀲𑀝𑁆𑀞𑀸𑀪𑀺𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑁄 𑀲𑀁𑀲𑀝𑁆𑀞𑀯𑀸𑀭𑁄 𑀦𑀸𑀫. ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀫𑁆𑀧𑀬𑀼𑀢𑁆𑀢𑁄 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀸𑀪𑀺𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁄 𑀦𑀸𑀫. 𑀲𑁄 𑀧𑀼𑀭𑀺𑀫𑁂𑀦 𑀲𑀁𑀲𑀝𑁆𑀞𑀯𑀸𑀭𑁂𑀦 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑁄. 𑀲𑀁𑀲𑀝𑁆𑀞𑀸𑀪𑀺𑀥𑀸𑀦𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀧𑀦 𑀧𑀞𑀫𑁄 𑀯𑀼𑀢𑁆𑀢𑁄, 𑀲𑀫𑁆𑀧𑀬𑀼𑀢𑁆𑀢𑀸𑀪𑀺𑀥𑀸𑀦𑀯𑀲𑁂𑀦 𑀤𑀼𑀢𑀺𑀬𑁄. 𑀤𑁆𑀯𑀻𑀲𑀼𑀧𑀺 𑀘𑁂𑀢𑁂𑀲𑀼 𑀅𑀭𑀽𑀧𑀥𑀫𑁆𑀫𑀯𑀲𑁂𑀦𑁂𑀯 𑀧𑀘𑁆𑀘𑀬𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀫𑀯𑀸𑀭𑁂 𑀧𑀦 𑀬𑀲𑁆𑀫𑀸 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂 𑀢𑁂 𑀧𑀜𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 ‘‘𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑁂𑀧𑀺 𑀢𑁂 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸 𑀦𑀺𑀕𑁆𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀯𑀺𑀪𑀢𑁆𑀢𑀸, 𑀢𑀲𑁆𑀫𑀸 𑀲𑁄 𑀯𑀸𑀭𑁄 𑀧𑀜𑁆𑀳𑀸𑀦𑀁 𑀲𑀸𑀥𑀼𑀓𑀁 𑀯𑀺𑀪𑀢𑁆𑀢𑀢𑁆𑀢𑀸 𑀧𑀜𑁆𑀳𑀸𑀯𑀸𑀭𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄. 𑀭𑀽𑀧𑀸𑀭𑀽𑀧𑀥𑀫𑁆𑀫𑀯𑀲𑁂𑀦𑁂𑀯 𑀧𑀦𑁂𑀢𑁆𑀣 𑀧𑀘𑁆𑀘𑀬𑀸𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀬𑁄 𑀢𑀸𑀯 𑀏𑀲 𑀲𑀩𑁆𑀩𑀧𑀞𑀫𑁄 𑀧𑀝𑀺𑀘𑁆𑀘𑀯𑀸𑀭𑁄 𑀦𑀸𑀫, 𑀲𑁄 𑀉𑀤𑁆𑀤𑁂𑀲𑀢𑁄 𑀦𑀺𑀤𑁆𑀤𑁂𑀲𑀢𑁄 𑀘 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀤𑁆𑀤𑁂𑀲𑀯𑀸𑀭𑁄 𑀧𑀞𑀫𑁄, 𑀧𑀼𑀘𑁆𑀙𑀸𑀯𑀸𑀭𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀲𑁄 𑀳𑀺 𑀓𑀼𑀲𑀮𑀸𑀤𑀬𑁄 𑀧𑀝𑀺𑀘𑁆𑀘 𑀓𑀼𑀲𑀮𑀸𑀤𑀻𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀦𑀁 𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀉𑀤𑁆𑀤𑁂𑀲𑀯𑀸𑀭𑁄, 𑀓𑀼𑀲𑀮𑀸𑀤𑀬𑁄 𑀧𑀝𑀺𑀘𑁆𑀘 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀼𑀘𑁆𑀙𑀺𑀢𑀢𑁆𑀢𑀸 𑀧𑀼𑀘𑁆𑀙𑀸𑀯𑀸𑀭𑁄, 𑀓𑀼𑀲𑀮𑀸𑀤𑀬𑁄 𑀧𑀝𑀺𑀘𑁆𑀘 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀧𑀺𑀢𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀯𑀸𑀭𑁄𑀢𑀺𑀧𑀺 𑀯𑀼𑀢𑁆𑀢𑁄.

𑁨𑁫-𑁩𑁪. 𑀢𑀢𑁆𑀣 𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸, 𑀓𑀺𑀁 𑀲𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀺𑀬𑀸𑀢𑀺 𑀅𑀣 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑁄 𑀳𑁂𑀢𑀼𑀧𑀘𑁆𑀘𑀬𑀸 𑀲𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀢𑁆𑀣 𑀧𑀝𑀻𑀢𑀺 𑀲𑀤𑀺𑀲𑀢𑁆𑀣𑁂 𑀯𑀢𑁆𑀢𑀢𑀺. 𑀲𑀤𑀺𑀲𑀧𑀼𑀕𑁆𑀕𑀮𑁄 𑀳𑀺 𑀧𑀝𑀺𑀧𑀼𑀕𑁆𑀕𑀮𑁄, 𑀲𑀤𑀺𑀲𑀪𑀸𑀕𑁄 𑀘 𑀧𑀝𑀺𑀪𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀘𑁆𑀘𑀸𑀢𑀺 𑀕𑀫𑀦𑀼𑀲𑁆𑀲𑀼𑀓𑁆𑀓𑀯𑀘𑀦𑀫𑁂𑀢𑀁. 𑀉𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀧𑀝𑀺𑀘𑁆𑀘𑀸𑀢𑀺 𑀧𑀝𑀺𑀕𑀦𑁆𑀢𑁆𑀯𑀸 𑀲𑀳𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀲𑀤𑀺𑀲𑀪𑀸𑀯𑁂𑀦 𑀧𑀢𑁆𑀯𑀸, 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀲𑀮𑁄 𑀥𑀫𑁆𑀫𑁄𑀢𑀺 𑀏𑀯𑀁 𑀲𑀳𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀯𑀸 𑀧𑀝𑀺𑀘𑁆𑀘𑀸𑀢𑀺 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀢𑀁 𑀧𑀦 𑀧𑀘𑁆𑀘𑀬𑀓𑀭𑀡𑀁 𑀧𑀼𑀭𑁂𑀚𑀸𑀢𑁂𑀧𑀺 𑀧𑀘𑁆𑀘𑀬𑁂 𑀮𑀩𑁆𑀪𑀢𑀺 𑀲𑀳𑀚𑀸𑀢𑁂𑀧𑀺. 𑀇𑀥 𑀲𑀳𑀚𑀸𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀳𑀚𑀸𑀢𑀯𑀲𑁂𑀦 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀓𑀼𑀲𑀮𑁄 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦 𑀧𑀼𑀘𑁆𑀙𑀸𑀯𑀸𑀭𑁂 𑀬𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑀁 𑀅𑀢𑁆𑀣𑀢𑁄 𑀮𑀩𑁆𑀪𑀢𑀺, 𑀬𑀫𑁆𑀧𑀺 𑀦 𑀮𑀩𑁆𑀪𑀢𑀺, 𑀢𑀁 𑀲𑀩𑁆𑀩𑀁 𑀧𑀼𑀘𑁆𑀙𑀸𑀯𑀲𑁂𑀦 𑀉𑀤𑁆𑀥𑀝𑀁. 𑀧𑀭𑀢𑁄 𑀧𑀦 𑀯𑀺𑀲𑁆𑀲𑀚𑁆𑀚𑀦𑁂 𑀬𑀁 𑀦 𑀮𑀩𑁆𑀪𑀢𑀺, 𑀢𑀁 𑀧𑀳𑀸𑀬 𑀬𑀁 𑀮𑀩𑁆𑀪𑀢𑀺, 𑀢𑀤𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀁.

𑀏𑀯𑀫𑁂𑀢𑁆𑀣 𑀧𑀼𑀘𑁆𑀙𑀸𑀦𑀁 𑀅𑀢𑁆𑀣𑀜𑁆𑀘𑁂𑀯 𑀧𑀼𑀘𑁆𑀙𑀸𑀕𑀢𑀺𑀜𑁆𑀘 𑀜𑀢𑁆𑀯𑀸 𑀇𑀤𑀸𑀦𑀺 𑀕𑀡𑀦𑀯𑀲𑁂𑀦 𑀧𑀼𑀘𑁆𑀙𑀸𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺 𑀓𑀼𑀲𑀮𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸, 𑀧𑀼𑀦 𑀢𑀤𑁂𑀯𑀸𑀤𑀺𑀁 𑀓𑀢𑁆𑀯𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀯𑀲𑁂𑀦 𑀤𑀼𑀓𑀧𑁆𑀧𑀪𑁂𑀤𑀦𑁆𑀢𑀸 𑀢𑀺𑀲𑁆𑀲𑁄, 𑀧𑀼𑀦 𑀢𑀤𑁂𑀯𑀸𑀤𑀺𑀁 𑀓𑀢𑁆𑀯𑀸 𑀢𑀺𑀓𑀦𑁆𑀢𑀸 𑀘 𑀏𑀓𑀸, 𑀏𑀯𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀓𑀼𑀲𑀮𑀸𑀤𑀺𑀓𑀸 𑀲𑀢𑁆𑀢 𑀧𑀼𑀘𑁆𑀙𑀸, 𑀢𑀣𑀸 𑀅𑀓𑀼𑀲𑀮𑀸𑀤𑀺𑀓𑀸, 𑀢𑀣𑀸 𑀅𑀩𑁆𑀬𑀸𑀓𑀢𑀸𑀤𑀺𑀓𑀸, 𑀢𑀣𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀓𑀸, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀓𑀸, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀓𑀸, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀓𑀸𑀢𑀺 𑀲𑀩𑁆𑀩𑀸𑀧𑀺 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀓𑀸𑀦𑀁 𑀯𑀲𑁂𑀦 𑀓𑀼𑀲𑀮𑀢𑁆𑀢𑀺𑀓𑀁 𑀦𑀺𑀲𑁆𑀲𑀸𑀬 𑀳𑁂𑀢𑀼𑀧𑀘𑁆𑀘𑀬𑁂 𑀏𑀓𑀽𑀦𑀧𑀜𑁆𑀜𑀸𑀲𑀁 𑀧𑀼𑀘𑁆𑀙𑀸.

𑀢𑀢𑁆𑀣 𑀏𑀓𑀫𑀽𑀮𑀓𑀸𑀯𑀲𑀸𑀦𑀸 𑀦𑀯, 𑀏𑀓𑀫𑀽𑀮𑀤𑀼𑀓𑀸𑀯𑀲𑀸𑀦𑀸 𑀦𑀯, 𑀏𑀓𑀫𑀽𑀮𑀢𑀺𑀓𑀸𑀯𑀲𑀸𑀦𑀸 𑀢𑀺𑀲𑁆𑀲𑁄, 𑀤𑀼𑀓𑀫𑀽𑀮𑀏𑀓𑀸𑀯𑀲𑀸𑀦𑀸 𑀦𑀯, 𑀤𑀼𑀓𑀫𑀽𑀮𑀤𑀼𑀓𑀸𑀯𑀲𑀸𑀦𑀸 𑀦𑀯, 𑀤𑀼𑀓𑀫𑀽𑀮𑀢𑀺𑀓𑀸𑀯𑀲𑀸𑀦𑀸 𑀢𑀺𑀲𑁆𑀲𑁄, 𑀢𑀺𑀓𑀫𑀽𑀮𑀏𑀓𑀸𑀯𑀲𑀸𑀦𑀸 𑀢𑀺𑀲𑁆𑀲𑁄, 𑀢𑀺𑀓𑀫𑀽𑀮𑀤𑀼𑀓𑀸𑀯𑀲𑀸𑀦𑀸 𑀢𑀺𑀲𑁆𑀲𑁄, 𑀢𑀺𑀓𑀫𑀽𑀮𑀢𑀺𑀓𑀸𑀯𑀲𑀸𑀦𑀸 𑀏𑀓𑀸𑀢𑀺 𑀏𑀯𑀫𑁂𑀢𑀸 𑀫𑀽𑀮𑀯𑀲𑁂𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀳𑁂𑀢𑀼𑀧𑀘𑁆𑀘𑀬𑁂 𑀏𑀓𑀽𑀦𑀧𑀜𑁆𑀜𑀸𑀲𑀁, 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀢𑀣𑁂𑀯𑀸𑀢𑀺 𑀲𑀩𑁆𑀩𑁂𑀲𑀼𑀧𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑁋

𑀲𑀳𑀲𑁆𑀲𑀫𑁂𑀓𑀜𑁆𑀘 𑀲𑀢𑀁, 𑀙𑀲𑀢𑁆𑀢𑀢𑀺 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀲𑀫𑁆𑀧𑀺𑀡𑁆𑀟𑀺𑀢𑀸 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀏𑀓𑀫𑀽𑀮𑀓𑁂.

𑁩𑁫-𑁩𑁬. 𑀢𑀢𑁄 𑀧𑀭𑀁 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀢𑀺 𑀤𑀼𑀫𑀽𑀮𑀓𑀦𑀬𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁄…𑀧𑁂… 𑀳𑁂𑀢𑀼𑀅𑀯𑀺𑀕𑀢𑀤𑀼𑀓𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀢𑁂𑀯𑀻𑀲𑀢𑀺 𑀤𑀼𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀳𑁂𑀢𑀼𑀧𑀘𑁆𑀘𑀬𑁂 𑀯𑀺𑀬 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂𑀧𑀺 𑀏𑀓𑀽𑀦𑀧𑀜𑁆𑀜𑀸𑀲𑀁 𑀧𑀼𑀘𑁆𑀙𑀸, 𑀢𑀸𑀲𑀼 𑀧𑀸𑀴𑀺𑀬𑀁 𑀤𑁆𑀯𑁂𑀬𑁂𑀯 𑀤𑀲𑁆𑀲𑀺𑀢𑀸. 𑀬𑀣𑀸 𑀘 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀁 𑀢𑀣𑀸 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑀸𑀤𑀻𑀲𑀼𑀧𑀺. 𑀢𑀢𑁆𑀣 𑀧𑀞𑀫𑀧𑀼𑀘𑁆𑀙𑀸𑀯𑀲𑁂𑀦 𑀳𑁂𑀢𑀸𑀥𑀺𑀧𑀢𑀺𑀤𑀼𑀓𑁄, 𑀳𑁂𑀢𑀸𑀦𑀦𑁆𑀢𑀭𑀤𑀼𑀓𑁄, 𑀳𑁂𑀢𑀼𑀲𑀫𑀦𑀦𑁆𑀢𑀭𑀤𑀼𑀓𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀤𑀼𑀓𑁂 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀳𑁂𑀢𑀼𑀅𑀯𑀺𑀕𑀢𑀤𑀼𑀓𑁄 𑀤𑀲𑁆𑀲𑀺𑀢𑁄, 𑀲𑁂𑀲𑀁 𑀲𑀗𑁆𑀔𑀺𑀢𑁆𑀢𑀁. 𑀧𑀼𑀘𑁆𑀙𑀸𑀧𑀭𑀺𑀘𑁆𑀙𑁂𑀤𑁄 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄.

𑀲𑀳𑀲𑁆𑀲𑀫𑁂𑀓𑀜𑁆𑀘 𑀲𑀢𑀁, 𑀲𑀢𑁆𑀢𑀯𑀻𑀲𑀢𑀺𑀫𑁂𑀯 𑀘;

𑀤𑀼𑀓𑁂𑀲𑀼 𑀢𑁂𑀯𑀻𑀲𑀢𑀺𑀬𑀸, 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺 𑀤𑀼𑀫𑀽𑀮𑀓𑁂.

𑁩𑁭. 𑀢𑀢𑁄 𑀧𑀭𑀁 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀢𑀺 𑀢𑀺𑀫𑀽𑀮𑀓𑀦𑀬𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂𑀦 𑀲𑀤𑁆𑀥𑀺𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀤𑀻𑀲𑀼 𑀩𑀸𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀩𑀸𑀯𑀻𑀲𑀢𑀺 𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀞𑀫𑀧𑀼𑀘𑁆𑀙𑀸𑀯𑀲𑁂𑀦 𑀧𑀞𑀫𑀢𑁆𑀢𑀺𑀓𑀜𑁆𑀘 𑀤𑀼𑀢𑀺𑀬𑀢𑁆𑀢𑀺𑀓𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀢𑀺𑀓𑁄 𑀤𑀲𑁆𑀲𑀺𑀢𑁄, 𑀲𑁂𑀲𑀁 𑀲𑀗𑁆𑀔𑀺𑀢𑁆𑀢𑀁. 𑀬𑀣𑀸 𑀧𑀦 𑀤𑀼𑀓𑁂𑀲𑀼, 𑀏𑀯𑀁 𑀢𑀺𑀓𑁂𑀲𑀼𑀧𑀺 𑀏𑀓𑀫𑁂𑀓𑀲𑁆𑀫𑀺𑀁 𑀢𑀺𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀼𑀧𑀺 𑀩𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑁋

𑀲𑀳𑀲𑁆𑀲𑀫𑁂𑀓𑀁 𑀧𑀼𑀘𑁆𑀙𑀸𑀦𑀁, 𑀅𑀝𑁆𑀞𑀲𑀢𑁆𑀢𑀢𑀺𑀫𑁂𑀯 𑀘;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀢𑀺𑀓𑀫𑀽𑀮𑀓𑁂.

𑁩𑁮. 𑀢𑀢𑁄 𑀧𑀭𑀁 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀢𑀺 𑀘𑀢𑀼𑀫𑀽𑀮𑀓𑀦𑀬𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀧𑀞𑀫𑀢𑁆𑀢𑀺𑀓𑁂𑀦 𑀲𑀤𑁆𑀥𑀺𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀲𑀼 𑀏𑀓𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀏𑀓𑀯𑀻𑀲𑀢𑀺 𑀘𑀢𑀼𑀓𑁆𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀤𑁆𑀯𑁂 𑀘𑀢𑀼𑀓𑁆𑀓𑁂 𑀤𑀲𑁆𑀲𑁂𑀢𑁆𑀯𑀸 𑀲𑁂𑀲𑀁 𑀲𑀗𑁆𑀔𑀺𑀢𑁆𑀢𑀁. 𑀇𑀥𑀸𑀧𑀺 𑀏𑀓𑀫𑁂𑀓𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀼𑀧𑀺 𑀏𑀓𑀯𑀻𑀲𑀢𑀺𑀬𑀸 𑀘𑀢𑀼𑀓𑁆𑀓𑁂𑀲𑀼 𑁋

𑀲𑀳𑀲𑁆𑀲𑀫𑁂𑀓𑀁 𑀧𑀼𑀘𑁆𑀙𑀸𑀦𑀁, 𑀏𑀓𑀽𑀦𑀢𑀺𑀁𑀲 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀘𑀢𑀼𑀫𑀽𑀮𑀓𑁂.

𑀢𑀢𑁄 𑀧𑀭𑀁 𑀧𑀜𑁆𑀘𑀫𑀽𑀮𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀩𑁆𑀩𑀫𑀽𑀮𑀓𑀸 𑀤𑁂𑀲𑀦𑀸 𑀓𑀢𑀸, 𑀢𑀁 𑀲𑀩𑁆𑀩𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀜𑁆𑀘 𑀉𑀧𑀭𑀺 𑀯𑀢𑁆𑀢𑀩𑁆𑀩𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀏𑀓𑀫𑀽𑀮𑀓𑀁, 𑀤𑀼𑀫𑀽𑀮𑀓𑀁, 𑀢𑀺𑀫𑀽𑀮𑀓𑀁, 𑀘𑀢𑀼𑀫𑀽𑀮𑀓𑀁, 𑀧𑀜𑁆𑀘𑀫𑀽𑀮𑀓𑀁, 𑀲𑀩𑁆𑀩𑀫𑀽𑀮𑀓𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀦𑀬𑁄 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀏𑀓𑀫𑀽𑀮𑀓𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀼𑀢𑁆𑀢𑀫𑁂𑀯. 𑀧𑀜𑁆𑀘𑀫𑀽𑀮𑀓𑁂 𑀧𑀦 𑀧𑀞𑀫𑀘𑀢𑀼𑀓𑁆𑀓𑁂𑀦 𑀲𑀤𑁆𑀥𑀺𑀁 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀻𑀲𑀼 𑀲𑀫𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀲𑀫𑀯𑀻𑀲𑀢𑀺 𑀧𑀜𑁆𑀘𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀦𑀯 𑀧𑀼𑀘𑁆𑀙𑀸𑀦𑀁, 𑀅𑀲𑀻𑀢𑀺 𑀘 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀧𑀜𑁆𑀘𑀫𑀽𑀮𑀓𑁂.

𑀙𑀫𑀽𑀮𑀓𑁂 𑀧𑀞𑀫𑀧𑀜𑁆𑀘𑀓𑁂𑀦 𑀲𑀤𑁆𑀥𑀺𑀁 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀻𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀏𑀓𑀽𑀦𑀯𑀻𑀲𑀢𑀺 𑀙𑀓𑁆𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀦𑀯 𑀧𑀼𑀘𑁆𑀙𑀸𑀦𑀁, 𑀏𑀓𑀢𑀺𑀁𑀲 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀙𑀓𑁆𑀓𑀫𑀽𑀮𑀓𑁂.

𑀲𑀢𑁆𑀢𑀫𑀽𑀮𑀓𑁂 𑀧𑀞𑀫𑀙𑀓𑁆𑀓𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀤𑀻𑀲𑀼 𑀅𑀝𑁆𑀞𑀸𑀭𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀅𑀝𑁆𑀞𑀸𑀭𑀲 𑀲𑀢𑁆𑀢𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀅𑀝𑁆𑀞 𑀧𑀼𑀘𑁆𑀙𑀸𑀦𑀁, 𑀤𑁆𑀯𑀸𑀲𑀻𑀢𑀺 𑀘 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀲𑀢𑁆𑀢𑀫𑀽𑀮𑀓𑁂.

𑀅𑀝𑁆𑀞𑀫𑀽𑀮𑀓𑁂 𑀧𑀞𑀫𑀲𑀢𑁆𑀢𑀓𑁂𑀦 𑀲𑀤𑁆𑀥𑀺𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀻𑀲𑀼 𑀲𑀢𑁆𑀢𑀭𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀲𑀢𑁆𑀢𑀭𑀲 𑀅𑀝𑁆𑀞𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀅𑀝𑁆𑀞 𑀧𑀼𑀘𑁆𑀙𑀸𑀦𑀁, 𑀢𑁂𑀢𑁆𑀢𑀺𑀁𑀲𑀸 𑀘 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀅𑀝𑁆𑀞𑀫𑀽𑀮𑀓𑁂.

𑀦𑀯𑀫𑀽𑀮𑀓𑁂 𑀧𑀞𑀫𑀅𑀝𑁆𑀞𑀓𑁂𑀦 𑀲𑀤𑁆𑀥𑀺𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀻𑀲𑀼 𑀲𑁄𑀴𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀲𑁄𑀴𑀲 𑀦𑀯𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀲𑀢𑁆𑀢 𑀧𑀼𑀘𑁆𑀙𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀦𑀯𑀫𑀽𑀮𑀓𑁂.

𑀤𑀲𑀫𑀽𑀮𑀓𑁂 𑀧𑀞𑀫𑀦𑀯𑀓𑁂𑀦 𑀲𑀤𑁆𑀥𑀺𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸𑀤𑀻𑀲𑀼 𑀧𑀦𑁆𑀦𑀭𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀧𑀦𑁆𑀦𑀭𑀲 𑀤𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀲𑀢𑁆𑀢 𑀧𑀼𑀘𑁆𑀙𑀸𑀦𑀁, 𑀧𑀜𑁆𑀘𑀢𑀺𑀁𑀲 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑀫𑁆𑀳𑀺 𑀤𑀲𑀫𑀽𑀮𑀓𑁂.

𑀏𑀓𑀸𑀤𑀲𑀫𑀽𑀮𑀓𑁂 𑀧𑀞𑀫𑀤𑀲𑀓𑁂𑀦 𑀲𑀤𑁆𑀥𑀺𑀁 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀤𑀻𑀲𑀼 𑀘𑀼𑀤𑁆𑀤𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀘𑀼𑀤𑁆𑀤𑀲 𑀏𑀓𑀸𑀤𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀙 𑀲𑀢𑀸𑀦𑀺 𑀘 𑀧𑀼𑀘𑁆𑀙𑀸𑀦𑀁, 𑀙𑀴𑀸𑀲𑀻𑀢𑀺 𑀢𑀢𑁄𑀧𑀭𑀸;

𑀦𑀬𑀫𑁆𑀳𑀺 𑀧𑀼𑀘𑁆𑀙𑀸 𑀕𑀡𑀺𑀢𑀸, 𑀏𑀓𑀸𑀤𑀲𑀓𑀫𑀽𑀮𑀓𑁂.

𑀤𑁆𑀯𑀸𑀤𑀲𑀫𑀽𑀮𑀓𑁂 𑀧𑀞𑀫𑀏𑀓𑀸𑀤𑀲𑀓𑁂𑀦 𑀲𑀤𑁆𑀥𑀺𑀁 𑀆𑀲𑁂𑀯𑀦𑀧𑀘𑁆𑀘𑀬𑀸𑀤𑀻𑀲𑀼 𑀢𑁂𑀭𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀢𑁂𑀭𑀲 𑀤𑁆𑀯𑀸𑀤𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀙 𑀲𑀢𑀸𑀦𑀺 𑀘 𑀧𑀼𑀘𑁆𑀙𑀸𑀦𑀁, 𑀲𑀢𑁆𑀢𑀢𑀺𑀁𑀲 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀤𑁆𑀯𑀸𑀤𑀲𑀫𑀽𑀮𑀓𑁂.

𑀢𑁂𑀭𑀲𑀫𑀽𑀮𑀓𑁂 𑀧𑀞𑀫𑀤𑁆𑀯𑀸𑀤𑀲𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀧𑀘𑁆𑀘𑀬𑀸𑀤𑀻𑀲𑀼 𑀤𑁆𑀯𑀸𑀤𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀤𑁆𑀯𑀸𑀤𑀲 𑀢𑁂𑀭𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀧𑀜𑁆𑀘 𑀧𑀼𑀘𑁆𑀙𑀸𑀦𑀁, 𑀅𑀝𑁆𑀞𑀸𑀲𑀻𑀢𑀺 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀢𑁂𑀭𑀲𑀫𑀽𑀮𑀓𑁂.

𑀘𑀼𑀤𑁆𑀤𑀲𑀫𑀽𑀮𑀓𑁂 𑀧𑀞𑀫𑀢𑁂𑀭𑀲𑀓𑁂𑀦 𑀲𑀤𑁆𑀥𑀺𑀁 𑀯𑀺𑀧𑀸𑀓𑀧𑀘𑁆𑀘𑀬𑀸𑀤𑀻𑀲𑀼 𑀏𑀓𑀸𑀤𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀏𑀓𑀸𑀤𑀲 𑀘𑀼𑀤𑁆𑀤𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀧𑀜𑁆𑀘 𑀧𑀼𑀘𑁆𑀙𑀸𑀦𑀁, 𑀢𑀺𑀁𑀲 𑀘𑀸𑀣 𑀦𑀯𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀘𑀼𑀤𑁆𑀤𑀲𑀫𑀽𑀮𑀓𑁂.

𑀧𑀦𑁆𑀦𑀭𑀲𑀫𑀽𑀮𑀓𑁂 𑀧𑀞𑀫𑀘𑀼𑀤𑁆𑀤𑀲𑀓𑁂𑀦 𑀲𑀤𑁆𑀥𑀺𑀁 𑀆𑀳𑀸𑀭𑀧𑀘𑁆𑀘𑀬𑀸𑀤𑀻𑀲𑀼 𑀤𑀲𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀤𑀲 𑀧𑀦𑁆𑀦𑀭𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀼𑀘𑁆𑀙𑀸𑀦𑀁, 𑀦𑀯𑀼𑀢𑀺 𑀘 𑀢𑀢𑁄𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀧𑀦𑁆𑀦𑀭𑀲𑀫𑀽𑀮𑀓𑁂.

𑀲𑁄𑀴𑀲𑀫𑀽𑀮𑀓𑁂 𑀧𑀞𑀫𑀧𑀦𑁆𑀦𑀭𑀲𑀓𑁂𑀦 𑀲𑀤𑁆𑀥𑀺𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀤𑀻𑀲𑀼 𑀦𑀯𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀦𑀯 𑀲𑁄𑀴𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸-𑀮𑀻𑀲𑁂𑀓𑀸 𑀘𑁂𑀯 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀲𑁄𑀴𑀲𑀫𑀽𑀮𑀓𑁂.

𑀲𑀢𑁆𑀢𑀭𑀲𑀫𑀽𑀮𑀓𑁂 𑀧𑀞𑀫𑀲𑁄𑀴𑀲𑀓𑁂𑀦 𑀲𑀤𑁆𑀥𑀺𑀁 𑀛𑀸𑀦𑀧𑀘𑁆𑀘𑀬𑀸𑀤𑀻𑀲𑀼 𑀅𑀝𑁆𑀞𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀅𑀝𑁆𑀞 𑀲𑀢𑁆𑀢𑀭𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀢𑀻𑀡𑀺 𑀧𑀼𑀘𑁆𑀙𑀸𑀦𑀁, 𑀦𑀯𑀼𑀢𑀺 𑀤𑁆𑀯𑁂 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀲𑀢𑁆𑀢𑀭𑀲𑀫𑀽𑀮𑀓𑁂.

𑀅𑀝𑁆𑀞𑀸𑀭𑀲𑀫𑀽𑀮𑀓𑁂 𑀧𑀞𑀫𑀲𑀢𑁆𑀢𑀭𑀲𑀓𑁂𑀦 𑀲𑀤𑁆𑀥𑀺𑀁 𑀫𑀕𑁆𑀕𑀧𑀘𑁆𑀘𑀬𑀸𑀤𑀻𑀲𑀼 𑀲𑀢𑁆𑀢𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀲𑀢𑁆𑀢 𑀅𑀝𑁆𑀞𑀸𑀭𑀲𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀸𑀦𑀺 𑀢𑀻𑀡𑀺 𑀧𑀼𑀘𑁆𑀙𑀸𑀦𑀁, 𑀢𑁂𑀘𑀢𑁆𑀢𑀸𑀭𑀻𑀲𑀫𑁂𑀯 𑀘;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀅𑀝𑁆𑀞𑀸𑀭𑀲𑀫𑀽𑀮𑀓𑁂.

𑀏𑀓𑀽𑀦𑀯𑀻𑀲𑀢𑀺𑀫𑀽𑀮𑀓𑁂 𑀧𑀞𑀫𑀅𑀝𑁆𑀞𑀸𑀭𑀲𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀤𑀻𑀲𑀼 𑀙𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀙 𑀏𑀓𑀽𑀦𑀯𑀻𑀲𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀤𑁆𑀯𑁂 𑀲𑀢𑀸 𑀦𑀯𑀼𑀢𑀺 𑀘𑁂𑀯, 𑀘𑀢𑀲𑁆𑀲𑁄 𑀘 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀏𑀓𑀽𑀦𑀯𑀻𑀲𑀢𑀺𑀓𑁂.

𑀯𑀻𑀲𑀢𑀺𑀫𑀽𑀮𑀓𑁂 𑀧𑀞𑀫𑀏𑀓𑀽𑀦𑀯𑀻𑀲𑀢𑀺𑀓𑁂𑀦 𑀲𑀤𑁆𑀥𑀺𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀤𑀻𑀲𑀼 𑀧𑀜𑁆𑀘𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀤𑁆𑀯𑁂 𑀲𑀢𑀸 𑀳𑁄𑀦𑁆𑀢𑀺 𑀧𑀼𑀘𑁆𑀙𑀸𑀦𑀁, 𑀘𑀢𑁆𑀢𑀸𑀮𑀻𑀲𑀸 𑀘 𑀧𑀜𑁆𑀘 𑀘;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀯𑀻𑀲𑀢𑀺𑀫𑀽𑀮𑀓𑁂.

𑀏𑀓𑀯𑀻𑀲𑀢𑀺𑀫𑀽𑀮𑀓𑁂 𑀧𑀞𑀫𑀯𑀻𑀲𑀢𑀺𑀓𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀺𑀧𑀘𑁆𑀘𑀬𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀘𑀢𑁆𑀢𑀸𑀭𑁄 𑀏𑀓𑀯𑀻𑀲𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀲𑀢𑀁 𑀙𑀦𑀯𑀼𑀢𑀺 𑀘𑁂𑀯, 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸;

𑀕𑀡𑀺𑀢𑀸 𑀮𑀓𑁆𑀔𑀡𑀜𑁆𑀜𑀽𑀳𑀺, 𑀏𑀓𑀯𑀻𑀲𑀢𑀺𑀓𑁂 𑀦𑀬𑁂.

𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁂 𑀧𑀞𑀫𑀏𑀓𑀯𑀻𑀲𑀢𑀺𑀓𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺𑀧𑀘𑁆𑀘𑀬𑀸𑀤𑀻𑀲𑀼 𑀢𑀻𑀲𑀼 𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀢𑀬𑁄 𑀤𑁆𑀯𑀸𑀯𑀻𑀲𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀁 𑀲𑀢𑀁, 𑀲𑀢𑁆𑀢 𑀘𑁂𑀯 𑀧𑀼𑀦𑀸𑀧𑀭𑀸;

𑀧𑀼𑀘𑁆𑀙𑀸 𑀕𑀡𑀦𑀢𑁄 𑀳𑁄𑀦𑁆𑀢𑀺, 𑀦𑀬𑁂 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁂.

𑀢𑁂𑀯𑀻𑀲𑀢𑀺𑀫𑀽𑀮𑀓𑁂 𑀧𑀞𑀫𑀤𑁆𑀯𑀸𑀯𑀻𑀲𑀢𑀺𑀓𑁂𑀦 𑀲𑀤𑁆𑀥𑀺𑀁 𑀤𑁆𑀯𑀻𑀲𑀼 𑀯𑀺𑀕𑀢𑀸𑀯𑀺𑀕𑀢𑀧𑀘𑁆𑀘𑀬𑁂𑀲𑀼 𑀏𑀓𑀫𑁂𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀤𑁆𑀯𑁂 𑀢𑁂𑀯𑀻𑀲𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑁋

𑀅𑀝𑁆𑀞𑀦𑀯𑀼𑀢𑀺𑀫𑁂𑀯𑀺𑀥, 𑀧𑀼𑀘𑁆𑀙𑀸 𑀕𑀡𑀦𑀢𑁄 𑀫𑀢𑀸;

𑀦𑀬𑀫𑁆𑀳𑀺 𑀢𑁂𑀯𑀻𑀲𑀢𑀺𑀫𑁂, 𑀢𑁂𑀯𑀻𑀲𑀢𑀺𑀓𑀫𑀽𑀮𑀓𑁂.

𑀘𑀢𑀼𑀯𑀻𑀲𑀢𑀺𑀫𑀽𑀮𑀓𑁄 𑀧𑀦 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀲𑀫𑁄𑀥𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑁂𑀯 𑀲𑀩𑁆𑀩𑀫𑀽𑀮𑀓𑁄𑀢𑀺 𑀯𑀼𑀢𑁆𑀢𑁄. 𑀢𑀢𑁆𑀣 𑀏𑀓𑀽𑀦𑀧𑀜𑁆𑀜𑀸𑀲𑀫𑁂𑀯 𑀧𑀼𑀘𑁆𑀙𑀸 𑀳𑁄𑀦𑁆𑀢𑀻𑀢𑀺 𑀲𑀩𑁆𑀩𑀸𑀧𑁂𑀢𑀸 𑀳𑁂𑀢𑀼𑀧𑀘𑁆𑀘𑀬𑀧𑀤𑀫𑁂𑀯 𑀕𑀳𑁂𑀢𑁆𑀯𑀸 𑀏𑀓𑀫𑀽𑀮𑀓𑀸𑀤𑀻𑀦𑀁 𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑀸𑀦𑀁 𑀯𑀲𑁂𑀦 𑀲𑀢𑁆𑀣𑀸𑀭𑀸 𑀤𑁂𑀯𑀧𑀭𑀺𑀲𑀢𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀢𑁆𑀢𑀸 𑀧𑀼𑀘𑁆𑀙𑀸 𑀇𑀥 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑀸.

𑀢𑀸𑀲𑀁 𑀧𑀦 𑀲𑀩𑁆𑀩𑀸𑀲𑀫𑁆𑀧𑀺 𑀅𑀬𑀁 𑀕𑀡𑀦𑀧𑀺𑀡𑁆𑀟𑁄 𑁋 𑀏𑀓𑀫𑀽𑀮𑀓𑀦𑀬𑀲𑁆𑀫𑀺𑀜𑁆𑀳𑀺 𑀏𑀓𑀸𑀤𑀲 𑀲𑀢𑀸𑀦𑀺 𑀙𑀲𑀢𑁆𑀢𑀢𑀺 𑀘 𑀧𑀼𑀘𑁆𑀙𑀸 𑀆𑀕𑀢𑀸. 𑀳𑁂𑀢𑀼𑀧𑀘𑁆𑀘𑀬𑀦𑀬𑁂 𑀢𑁂𑀦𑁂𑀯 𑀫𑀽𑀮𑀓𑁂𑀦 𑀏𑀓𑀽𑀦𑀧𑀜𑁆𑀜𑀸𑀲𑀁 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀳𑁂𑀢𑀼𑀧𑀘𑁆𑀘𑀬𑀫𑀽𑀮𑀓𑁂 𑀕𑀳𑁂𑀢𑀩𑁆𑀩𑀸, 𑀲𑁂𑀲𑀸 𑀲𑁂𑀲𑀧𑀘𑁆𑀘𑀬𑀫𑀽𑀮𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀸. 𑀤𑀼𑀫𑀽𑀮𑀓𑁂 𑀲𑀢𑁆𑀢𑀯𑀻𑀲𑀸𑀦𑀺 𑀏𑀓𑀸𑀤𑀲 𑀲𑀢𑀸𑀦𑀺, 𑀢𑀺𑀫𑀽𑀮𑀓𑁂 𑀲𑀳𑀲𑁆𑀲𑀁 𑀅𑀝𑁆𑀞𑀲𑀢𑁆𑀢𑀢𑀺 𑀘, 𑀘𑀢𑀼𑀫𑀽𑀮𑀓𑁂 𑀲𑀳𑀲𑁆𑀲𑀁 𑀏𑀓𑀽𑀦𑀢𑀺𑀁𑀲𑀜𑁆𑀘, 𑀧𑀜𑁆𑀘𑀫𑀽𑀮𑀓𑁂 𑀅𑀲𑀻𑀢𑀸𑀥𑀺𑀓𑀸𑀦𑀺 𑀦𑀯 𑀲𑀢𑀸𑀦𑀺, 𑀙𑀫𑀽𑀮𑀓𑁂 𑀏𑀓𑀢𑀺𑀁𑀲𑀸𑀦𑀺 𑀦𑀯 𑀲𑀢𑀸𑀦𑀺, 𑀲𑀢𑁆𑀢𑀫𑀽𑀮𑀓𑁂 𑀤𑁆𑀯𑀸𑀲𑀻𑀢𑀸𑀦𑀺 𑀅𑀝𑁆𑀞 𑀲𑀢𑀸𑀦𑀺, 𑀅𑀝𑁆𑀞𑀫𑀽𑀮𑀓𑁂 𑀢𑁂𑀢𑁆𑀢𑀺𑀁𑀲𑀸𑀦𑀺 𑀅𑀝𑁆𑀞 𑀲𑀢𑀸𑀦𑀺, 𑀦𑀯𑀫𑀽𑀮𑀓𑁂 𑀘𑀢𑀼𑀭𑀸𑀲𑀻𑀢𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺, 𑀤𑀲𑀫𑀽𑀮𑀓𑁂 𑀧𑀜𑁆𑀘𑀢𑀺𑀁𑀲𑀸𑀦𑀺 𑀲𑀢𑁆𑀢 𑀲𑀢𑀸𑀦𑀺, 𑀏𑀓𑀸𑀤𑀲𑀫𑀽𑀮𑀓𑁂 𑀙𑀸𑀲𑀻𑀢𑀸𑀦𑀺 𑀙 𑀲𑀢𑀸𑀦𑀺, 𑀤𑁆𑀯𑀸𑀤𑀲𑀫𑀽𑀮𑀓𑁂 𑀲𑀢𑁆𑀢𑀢𑀺𑀁𑀲𑀸𑀦𑀺 𑀙 𑀲𑀢𑀸𑀦𑀺, 𑀢𑁂𑀭𑀲𑀫𑀽𑀮𑀓𑁂 𑀅𑀝𑁆𑀞𑀸𑀲𑀻𑀢𑀸𑀦𑀺 𑀧𑀜𑁆𑀘 𑀲𑀢𑀸𑀦𑀺, 𑀘𑀼𑀤𑁆𑀤𑀲𑀫𑀽𑀮𑀓𑁂 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸𑀦𑀺 𑀧𑀜𑁆𑀘 𑀲𑀢𑀸𑀦𑀺, 𑀧𑀦𑁆𑀦𑀭𑀲𑀫𑀽𑀮𑀓𑁂 𑀦𑀯𑀼𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺, 𑀲𑁄𑀴𑀲𑀫𑀽𑀮𑀓𑁂 𑀏𑀓𑀘𑀢𑁆𑀢𑀸𑀮𑀻𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑁆𑀢𑀸𑀦𑀺, 𑀲𑀢𑁆𑀢𑀭𑀲𑀫𑀽𑀮𑀓𑁂 𑀤𑁆𑀯𑀸𑀦𑀯𑀼𑀢𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺, 𑀅𑀝𑁆𑀞𑀸𑀭𑀲𑀫𑀽𑀮𑀓𑁂 𑀢𑁂𑀘𑀢𑁆𑀢𑀸𑀮𑀻𑀲𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺, 𑀏𑀓𑀽𑀦𑀯𑀻𑀲𑀢𑀺𑀫𑀽𑀮𑀓𑁂 𑀘𑀢𑀼𑀦𑀯𑀼𑀢𑀸𑀦𑀺 𑀤𑁆𑀯𑁂 𑀲𑀢𑀸𑀦𑀺, 𑀯𑀻𑀲𑀢𑀺𑀫𑀽𑀮𑀓𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀦𑀺 𑀤𑁆𑀯𑁂 𑀲𑀢𑀸𑀦𑀺, 𑀏𑀓𑀯𑀻𑀲𑀢𑀺𑀫𑀽𑀮𑀓𑁂 𑀙𑀦𑀯𑀼𑀢𑀺𑀲𑀢𑀁, 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁂 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀲𑀢𑀁, 𑀢𑁂𑀯𑀻𑀲𑀢𑀺𑀫𑀽𑀮𑀓𑁂 𑀅𑀝𑁆𑀞𑀦𑀯𑀼𑀢𑀺, 𑀲𑀩𑁆𑀩𑀫𑀽𑀮𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀸𑀢𑀺 𑀏𑀯𑀁 𑀳𑁂𑀢𑀼𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑁂𑀲𑀼 𑀏𑀓𑀫𑀽𑀮𑀓𑀸𑀤𑀻𑀲𑀼 𑁋

𑀘𑀼𑀤𑁆𑀤𑀲𑁂𑀯 𑀲𑀳𑀲𑁆𑀲𑀸𑀦𑀺, 𑀧𑀼𑀦 𑀲𑀢𑁆𑀢 𑀲𑀢𑀸𑀦𑀺 𑀘;

𑀧𑀼𑀘𑁆𑀙𑀸 𑀳𑁂𑀢𑀼𑀧𑀤𑀲𑁆𑀲𑁂𑀯, 𑀏𑀓𑀫𑀽𑀮𑀸𑀤𑀺𑀪𑁂𑀤𑀢𑁄𑀢𑀺.

𑁩𑁯-𑁪𑁦. 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀫𑀽𑀮𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀩𑁆𑀩𑀫𑀽𑀮𑀓𑀦𑀬𑀸 𑀧𑀼𑀘𑁆𑀙𑀸𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀏𑀢𑁆𑀢𑀸𑀯𑀢𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀬𑁄𑀲𑀸𑀦𑁄 𑀏𑀓𑀫𑀽𑀮𑀓𑀦𑀬𑁄 𑀤𑀲𑁆𑀲𑀺𑀢𑁄. 𑀢𑀢𑁄 𑀧𑀭𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸𑀢𑀺 𑀤𑀼𑀓𑀫𑀽𑀮𑀓𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀇𑀫𑀁 𑀧𑀞𑀫𑀤𑀼𑀓𑀜𑁆𑀘𑁂𑀯 𑀆𑀭𑀫𑁆𑀫𑀡𑀸𑀯𑀺𑀕𑀢𑀤𑀼𑀓𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀲𑁂𑀲𑀁 𑀲𑀗𑁆𑀔𑀺𑀢𑁆𑀢𑀁. 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀅𑀬𑀁 𑀑𑀲𑀸𑀦𑀤𑀼𑀓𑁄𑀧𑀺 𑀦 𑀤𑀲𑁆𑀲𑀺𑀢𑁄. 𑀲𑀘𑁂 𑀧𑀦 𑀓𑀢𑁆𑀣𑀘𑀺 𑀯𑀸𑀘𑀦𑀸𑀫𑀕𑁆𑀕𑁂 𑀲𑀦𑁆𑀤𑀺𑀲𑁆𑀲𑀢𑀺, 𑀲𑁆𑀯𑁂𑀯 𑀯𑀸𑀘𑀦𑀸𑀫𑀕𑁆𑀕𑁄 𑀕𑀳𑁂𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦 𑀢𑀺𑀓𑀫𑀽𑀮𑀓𑀸𑀤𑀬𑁄 𑀅𑀤𑀲𑁆𑀲𑁂𑀢𑁆𑀯𑀸𑀯 𑀅𑀥𑀺𑀧𑀢𑀺𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀓𑀸𑀤𑀬𑁄 𑀤𑀲𑁆𑀲𑁂𑀢𑀼𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑀸, 𑀅𑀦𑀦𑁆𑀢𑀭𑀧𑀘𑁆𑀘𑀬𑀸, 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀸, 𑀲𑀳𑀚𑀸𑀢𑀧𑀘𑁆𑀘𑀬𑀸, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀏𑀓𑀫𑀽𑀮𑀓𑀯𑀲𑁂𑀦 𑀯𑀸 𑀲𑀩𑁆𑀩𑀫𑀽𑀮𑀓𑀯𑀲𑁂𑀦 𑀯𑀸 𑀯𑁂𑀤𑀺𑀢𑀩𑁆𑀩𑀁.

𑁪𑁧. 𑀢𑀢𑁄 𑀧𑀭𑀁 𑀅𑀯𑀺𑀕𑀢𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀤𑀼𑀫𑀽𑀮𑀓𑀫𑁂𑀯 𑀤𑀲𑁆𑀲𑁂𑀢𑀼𑀁 𑁋 𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀯𑀺𑀕𑀢𑀳𑁂𑀢𑀼𑀤𑀼𑀓𑁄, 𑀅𑀯𑀺𑀕𑀢𑀸𑀭𑀫𑁆𑀫𑀡𑀤𑀼𑀓𑁄, 𑀅𑀯𑀺𑀕𑀢𑀸𑀥𑀺𑀧𑀢𑀺𑀤𑀼𑀓𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀤𑀼𑀓𑁂 𑀯𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀘 𑀅𑀯𑀺𑀕𑀢𑀯𑀺𑀕𑀢𑀤𑀼𑀓𑁄 𑀏𑀓𑁄 𑀤𑀼𑀓𑁄 𑀤𑀲𑁆𑀲𑀺𑀢𑁄. 𑀢𑀢𑁄 𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀢𑀺𑀫𑀽𑀮𑀓𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸, 𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸, 𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀢𑀺𑀓𑁂 𑀯𑀢𑁆𑀯𑀸 ‘‘𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀢𑁆𑀢𑀺𑀓𑁄 𑀯𑀼𑀢𑁆𑀢𑁄. 𑀢𑀢𑁄 𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦𑁂𑀯 𑀘𑀢𑀼𑀫𑀽𑀮𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸, 𑀅𑀯𑀺𑀕𑀢𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀸’’𑀢𑀺 𑀤𑁆𑀯𑁂 𑀘𑀢𑀼𑀓𑁆𑀓𑁂 𑀯𑀢𑁆𑀯𑀸 ‘‘𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀁, 𑀲𑁂𑀲𑀁 𑀲𑀩𑁆𑀩𑀁 𑀲𑀗𑁆𑀔𑀺𑀢𑁆𑀢𑀁. 𑀢𑀲𑁆𑀲 𑀲𑀗𑁆𑀔𑀺𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑀁, 𑀤𑀼𑀫𑀽𑀮𑀓𑀁, 𑀢𑀺𑀫𑀽𑀮𑀓𑀁, 𑀲𑀩𑁆𑀩𑀫𑀽𑀮𑀓𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀳𑁂𑀢𑀼𑀆𑀤𑀺𑀧𑀤𑀯𑀲𑁂𑀦 𑀏𑀓𑀫𑀽𑀮𑀓𑁂 𑀏𑀓𑀸𑀤𑀲 𑀧𑀼𑀘𑁆𑀙𑀸𑀲𑀢𑀸𑀦𑀺 𑀙𑀲𑀢𑁆𑀢𑀢𑀺 𑀘 𑀧𑀼𑀘𑁆𑀙𑀸…𑀧𑁂… 𑀲𑀩𑁆𑀩𑀫𑀽𑀮𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀁, 𑀏𑀯𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀓𑀫𑁂𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀆𑀭𑀫𑁆𑀫𑀡𑀸𑀤𑀺𑀧𑀤𑀯𑀲𑁂𑀦 𑀏𑀓𑀫𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑁂 𑀏𑀓𑀸𑀤𑀲 𑀧𑀼𑀘𑁆𑀙𑀸𑀲𑀢𑀸𑀦𑀺 𑀙𑀲𑀢𑁆𑀢𑀢𑀺 𑀘 𑀧𑀼𑀘𑁆𑀙𑀸…𑀧𑁂… 𑀲𑀩𑁆𑀩𑀫𑀽𑀮𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀸𑀢𑀺 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑀸𑀤𑀺𑀪𑁂𑀤𑁂 𑀲𑀢𑁆𑀢𑀲𑀢𑀸𑀥𑀺𑀓𑀸𑀦𑀺 𑀘𑀼𑀤𑁆𑀤𑀲 𑀧𑀼𑀘𑁆𑀙𑀸 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀲𑀁 𑀲𑀩𑁆𑀩𑁂𑀲𑀼𑀧𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀬𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑁋

𑀤𑁆𑀯𑀸𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦-𑀝𑁆𑀞𑀲𑀢𑀸𑀦𑀺 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺;

𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀧𑀼𑀘𑁆𑀙𑀸, 𑀅𑀦𑀼𑀮𑁄𑀫𑀦𑀬𑀫𑁆𑀳𑀺 𑀲𑀼𑀯𑀺𑀪𑀢𑁆𑀢𑀸.

𑀬𑀣𑀸 𑀘 𑀓𑀼𑀲𑀮𑀢𑁆𑀢𑀺𑀓𑀲𑁆𑀲, 𑀏𑀯𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀦𑀫𑁆𑀧𑀻𑀢𑀺 𑀲𑀩𑁆𑀩𑁂𑀲𑀼𑀧𑀺 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑁋

𑀏𑀓𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀙 𑀲𑀢𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺;

𑀲𑀢𑀲𑀳𑀲𑁆𑀲𑀸𑀦𑀺 𑀧𑀼𑀘𑁆𑀙𑀸𑀦𑀁, 𑀢𑀺𑀓𑀪𑁂𑀤𑁂 𑀧𑀪𑁂𑀤𑀢𑁄.

𑀲𑀗𑁆𑀔𑀺𑀢𑁆𑀢𑀸 𑀯𑀸𑀘𑀦𑀸𑀫𑀕𑁆𑀕𑁂.

𑀤𑀼𑀓𑁂𑀲𑀼 𑀧𑀦 ‘‘𑀲𑀺𑀬𑀸 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼, 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼, 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀘 𑀦𑀳𑁂𑀢𑀼 𑀘, 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼, 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼, 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀘 𑀦𑀳𑁂𑀢𑀼 𑀘, 𑀳𑁂𑀢𑀼𑀜𑁆𑀘 𑀦𑀳𑁂𑀢𑀼𑀜𑁆𑀘 𑀧𑀝𑀺𑀘𑁆𑀘 𑀳𑁂𑀢𑀼, 𑀳𑁂𑀢𑀼𑀜𑁆𑀘 𑀦𑀳𑁂𑀢𑀼𑀜𑁆𑀘 𑀧𑀝𑀺𑀘𑁆𑀘 𑀦𑀳𑁂𑀢𑀼, 𑀳𑁂𑀢𑀼𑀜𑁆𑀘 𑀦𑀳𑁂𑀢𑀼𑀜𑁆𑀘 𑀧𑀝𑀺𑀘𑁆𑀘 𑀳𑁂𑀢𑀼 𑀘 𑀦𑀳𑁂𑀢𑀼 𑀘𑀸𑀢𑀺 𑀏𑀓𑀫𑁂𑀓𑀲𑁆𑀫𑀺𑀁 𑀤𑀼𑀓𑁂 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀦𑀯 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀸𑀲𑀼 𑀳𑁂𑀢𑀼𑀧𑀘𑁆𑀘𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀫𑀽𑀮𑀓𑁂 𑀤𑁆𑀯𑁂𑀲𑀢𑀸𑀦𑀺 𑀲𑁄𑀴𑀲 𑀘 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀸𑀲𑀼 𑀳𑁂𑀢𑀼𑀧𑀘𑁆𑀘𑀬𑀲𑁆𑀲𑁂𑀯 𑀅𑀜𑁆𑀜𑁂𑀦 𑀅𑀲𑀫𑁆𑀫𑀺𑀲𑁆𑀲𑀸 𑀦𑀯 𑀧𑀼𑀘𑁆𑀙𑀸 𑀕𑀳𑁂𑀢𑀩𑁆𑀩𑀸, 𑀲𑁂𑀲𑀸 𑀅𑀝𑁆𑀞 𑀯𑀸𑀭𑁂𑀦 𑀕𑀳𑀺𑀢𑀸.

𑀢𑀸𑀲𑀁 𑀤𑀼𑀓𑀫𑀽𑀮𑀓𑀸𑀤𑀻𑀲𑀼 𑀢𑁂𑀯𑀻𑀲𑀢𑀺𑀬𑀸 𑀯𑀸𑀭𑁂𑀲𑀼 𑀏𑀓𑁂𑀓𑀁 𑀦𑀯𑀓𑀁 𑀅𑀧𑀦𑁂𑀢𑁆𑀯𑀸 𑀬𑀸𑀯 𑀲𑀩𑁆𑀩𑀫𑀽𑀮𑀓𑀸 𑀅𑀬𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑁋 𑀤𑀼𑀓𑀫𑀽𑀮𑀓𑁂 𑀢𑀸𑀯 𑀏𑀓𑀫𑀽𑀮𑀓𑁂 𑀤𑀲𑁆𑀲𑀺𑀢𑁂𑀲𑀼 𑀤𑁆𑀯𑀻𑀲𑀼 𑀲𑁄𑀴𑀲𑀸𑀥𑀺𑀓𑁂𑀲𑀼 𑀧𑀼𑀘𑁆𑀙𑀸𑀲𑀢𑁂𑀲𑀼 𑀦𑀯 𑀅𑀧𑀦𑁂𑀢𑁆𑀯𑀸 𑀤𑁆𑀯𑁂𑀲𑀢𑀸𑀦𑀺 𑀲𑀢𑁆𑀢 𑀘 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺, 𑀢𑀢𑁄 𑀦𑀯 𑀅𑀧𑀦𑁂𑀢𑁆𑀯𑀸 𑀢𑀺𑀫𑀽𑀮𑀓𑁂 𑀅𑀝𑁆𑀞𑀦𑀯𑀼𑀢𑀺𑀲𑀢𑀁. 𑀏𑀯𑀁 𑀧𑀼𑀭𑀺𑀫𑀧𑀼𑀭𑀺𑀫𑀢𑁄 𑀦𑀯 𑀦𑀯 𑀅𑀧𑀦𑁂𑀢𑁆𑀯𑀸 𑀘𑀢𑀼𑀫𑀽𑀮𑀓𑁂 𑀏𑀓𑀽𑀦𑀦𑀯𑀼𑀢𑀺𑀲𑀢𑀁, 𑀧𑀜𑁆𑀘𑀫𑀽𑀮𑀓𑁂 𑀅𑀲𑀻𑀢𑀺𑀲𑀢𑀁, 𑀙𑀫𑀽𑀮𑀓𑁂 𑀏𑀓𑀲𑀢𑁆𑀢𑀢𑀺𑀲𑀢𑀁, 𑀲𑀢𑁆𑀢𑀫𑀽𑀮𑀓𑁂 𑀤𑁆𑀯𑀸𑀲𑀝𑁆𑀞𑀺𑀲𑀢𑀁, 𑀅𑀝𑁆𑀞𑀫𑀽𑀮𑀓𑁂 𑀢𑁂𑀧𑀡𑁆𑀡𑀸𑀲𑀲𑀢𑀁, 𑀦𑀯𑀫𑀽𑀮𑀓𑁂 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀢𑀁, 𑀤𑀲𑀫𑀽𑀮𑀓𑁂 𑀧𑀜𑁆𑀘𑀢𑀺𑀁𑀲𑀲𑀢𑀁, 𑀏𑀓𑀸𑀤𑀲𑀫𑀽𑀮𑀓𑁂 𑀙𑀩𑁆𑀩𑀻𑀲𑀲𑀢𑀁, 𑀤𑁆𑀯𑀸𑀤𑀲𑀫𑀽𑀮𑀓𑁂 𑀲𑀢𑁆𑀢𑀭𑀲𑀸𑀥𑀺𑀓𑀲𑀢𑀁, 𑀢𑁂𑀭𑀲𑀫𑀽𑀮𑀓𑁂 𑀅𑀝𑁆𑀞𑀸𑀥𑀺𑀓𑀲𑀢𑀁, 𑀘𑀼𑀤𑁆𑀤𑀲𑀫𑀽𑀮𑀓𑁂 𑀦𑀯𑀦𑀯𑀼𑀢𑀺, 𑀧𑀦𑁆𑀦𑀭𑀲𑀫𑀽𑀮𑀓𑁂 𑀦𑀯𑀼𑀢𑀺, 𑀲𑁄𑀴𑀲𑀫𑀽𑀮𑀓𑁂 𑀏𑀓𑀸𑀲𑀻𑀢𑀺, 𑀲𑀢𑁆𑀢𑀭𑀲𑀫𑀽𑀮𑀓𑁂 𑀤𑁆𑀯𑀸𑀲𑀢𑁆𑀢𑀢𑀺, 𑀅𑀝𑁆𑀞𑀸𑀭𑀲𑀫𑀽𑀮𑀓𑁂 𑀢𑁂𑀲𑀝𑁆𑀞𑀺, 𑀏𑀓𑀽𑀦𑀯𑀻𑀲𑀢𑀺𑀫𑀽𑀮𑀓𑁂 𑀘𑀢𑀼𑀧𑀜𑁆𑀜𑀸𑀲𑀁, 𑀯𑀻𑀲𑀢𑀺𑀫𑀽𑀮𑀓𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀁, 𑀏𑀓𑀯𑀻𑀲𑀢𑀺𑀫𑀽𑀮𑀓𑁂 𑀙𑀢𑁆𑀢𑀺𑀁𑀲𑀁, 𑀤𑁆𑀯𑀸𑀯𑀻𑀲𑀢𑀺𑀫𑀽𑀮𑀓𑁂 𑀲𑀢𑁆𑀢𑀯𑀻𑀲, 𑀢𑁂𑀯𑀻𑀲𑀢𑀺𑀫𑀽𑀮𑀓𑁂 𑀅𑀝𑁆𑀞𑀸𑀭𑀲, 𑀲𑀩𑁆𑀩𑀫𑀽𑀮𑀓𑁂 𑀦𑀯𑀸𑀢𑀺. 𑀬𑀣𑀸 𑀧𑀦𑁂𑀢𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀏𑀓𑀫𑀽𑀮𑀓𑁂 𑀲𑁄𑀴𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀧𑀼𑀘𑁆𑀙𑀸𑀲𑀢𑀸𑀦𑀺…𑀧𑁂… 𑀲𑀩𑁆𑀩𑀫𑀽𑀮𑀓𑁂 𑀦𑀯, 𑀏𑀯𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀓𑀫𑁂𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀆𑀭𑀫𑁆𑀫𑀡𑀸𑀤𑀺𑀧𑀤𑀯𑀲𑁂𑀦 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑁂 𑀲𑁄𑀴𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀧𑀼𑀘𑁆𑀙𑀸𑀲𑀢𑀸𑀦𑀺…𑀧𑁂… 𑀲𑀩𑁆𑀩𑀫𑀽𑀮𑀓𑁂 𑀦𑀯𑀸𑀢𑀺 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀏𑀓𑀫𑀽𑀮𑀓𑀸𑀤𑀺𑀪𑁂𑀤𑁂 𑀤𑁆𑀯𑁂 𑀧𑀼𑀘𑁆𑀙𑀸 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀲𑀢𑀸𑀦𑀺 𑀘 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀸𑀲𑀁 𑀲𑀩𑁆𑀩𑁂𑀲𑀼𑀧𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀬𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑁋

𑀘𑀢𑀼𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀧𑀼𑀦 𑀅𑀝𑁆𑀞𑀲𑀢𑀸𑀦𑀺 𑀘;

𑀧𑀼𑀘𑁆𑀙𑀸 𑀳𑁂𑀢𑀼𑀤𑀼𑀓𑀲𑁆𑀲𑁂𑀯, 𑀅𑀦𑀼𑀮𑁄𑀫𑀦𑀬𑁂 𑀫𑀢𑀸.

𑀬𑀣𑀸 𑀘 𑀳𑁂𑀢𑀼𑀤𑀼𑀓𑀲𑁆𑀲, 𑀏𑀯𑀁 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀦𑀫𑁆𑀧𑀻𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀤𑀼𑀓𑀲𑀢𑁂 𑁋

𑀲𑀝𑁆𑀞𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀘 𑀢𑀢𑁄𑀧𑀭𑀁;

𑀅𑀲𑀻𑀢𑀺 𑀘 𑀲𑀳𑀲𑁆𑀲𑀸𑀦𑀺, 𑀧𑀼𑀘𑁆𑀙𑀸 𑀤𑀼𑀓𑀲𑀢𑁂 𑀯𑀺𑀤𑀽.

𑀅𑀬𑀁 𑀢𑀸𑀯 𑀲𑀼𑀤𑁆𑀥𑀺𑀓𑁂 𑀢𑀺𑀓𑀧𑀝𑁆𑀞𑀸𑀦𑁂 𑀘𑁂𑀯 𑀤𑀼𑀓𑀧𑀝𑁆𑀞𑀸𑀦𑁂 𑀘 𑀧𑀼𑀘𑁆𑀙𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄.

𑀬𑀁 𑀧𑀦 𑀢𑀢𑁄 𑀧𑀭𑀁 𑀤𑁆𑀯𑀸𑀯𑀻𑀲𑀢𑀺 𑀢𑀺𑀓𑁂 𑀕𑀳𑁂𑀢𑁆𑀯𑀸 𑀤𑀼𑀓𑀲𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀺𑀢𑀁, 𑀢𑀢𑁆𑀣 ‘‘𑀲𑀺𑀬𑀸 𑀳𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀸𑀦𑀁 𑀲𑀢𑁂𑀦 𑀲𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀲𑀁 𑀏𑀓𑀫𑀽𑀮𑀓𑀸𑀤𑀻𑀦𑀁 𑀯𑀲𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀫𑁆𑀧𑀺 𑀢𑀢𑁄 𑀧𑀭𑀁 𑀤𑀼𑀓𑀲𑀢𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀺𑀢𑀁, 𑀢𑀢𑁆𑀣𑀸𑀧𑀺 ‘‘𑀲𑀺𑀬𑀸 𑀓𑀼𑀲𑀮𑀁 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀤𑀼𑀓𑀲𑀢𑁂 𑀏𑀓𑁂𑀓𑀁 𑀤𑀼𑀓𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀲𑀁 𑀏𑀓𑀫𑀽𑀮𑀓𑀸𑀤𑀻𑀦𑀁 𑀯𑀲𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀫𑁆𑀧𑀺 𑀢𑀢𑁄 𑀧𑀭𑀁 𑀢𑀺𑀓𑁂 𑀢𑀺𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀺𑀢𑀁, 𑀢𑀢𑁆𑀣𑀸𑀧𑀺 ‘‘𑀲𑀺𑀬𑀸 𑀓𑀼𑀲𑀮𑀁 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀏𑀓𑁂𑀓𑀁 𑀢𑀺𑀓𑀁 𑀲𑁂𑀲𑁂𑀳𑀺 𑀏𑀓𑀯𑀻𑀲𑀢𑀺𑀬𑀸 𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀲𑀁 𑀏𑀓𑀫𑀽𑀮𑀓𑀸𑀤𑀻𑀦𑀁 𑀯𑀲𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀫𑁆𑀧𑀺 𑀢𑀢𑁄 𑀧𑀭𑀁 𑀤𑀼𑀓𑁂 𑀤𑀼𑀓𑁂𑀲𑀼𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀺𑀢𑀁, 𑀢𑀢𑁆𑀣𑀸𑀧𑀺 ‘‘𑀲𑀺𑀬𑀸 𑀳𑁂𑀢𑀼𑀁 𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀤𑀼𑀓𑀲𑀢𑁂 𑀏𑀓𑁂𑀓𑀁 𑀤𑀼𑀓𑀁 𑀲𑁂𑀲𑁂𑀳𑀺 𑀦𑀯𑀦𑀯𑀼𑀢𑀺𑀬𑀸 𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑁂𑀲𑀁 𑀏𑀓𑀫𑀽𑀮𑀓𑀸𑀤𑀻𑀦𑀁 𑀯𑀲𑁂𑀦 𑀕𑀳𑁂𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸𑀕𑀢𑁂𑀦 𑀳𑀺 𑀲𑀩𑁆𑀩𑀫𑁆𑀧𑁂𑀢𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸𑀯 𑀤𑁂𑀯𑀧𑀭𑀺𑀲𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀧𑀦 𑀢𑁂𑀦 ‘‘𑀅𑀚𑁆𑀚 𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀲𑀺𑀢’’𑀦𑁆𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀦𑀬𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀤𑁂𑀲𑀦𑀸 𑀅𑀓𑁆𑀔𑀸𑀢𑀸. 𑀣𑁂𑀭𑁂𑀦𑀸𑀧𑀺 𑀲𑀗𑁆𑀔𑀺𑀧𑀺𑀢𑁆𑀯𑀸𑀯 𑀯𑀸𑀘𑀦𑀸𑀫𑀕𑁆𑀕𑁄 𑀧𑀯𑀢𑁆𑀢𑀺𑀢𑁄, 𑀲𑁄 𑀣𑁂𑀭𑁂𑀦 𑀧𑀯𑀢𑁆𑀢𑀺𑀢𑀦𑀬𑁂𑀦𑁂𑀯 𑀲𑀗𑁆𑀕𑀻𑀢𑀺𑀓𑀸𑀮𑁂 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑁄.

𑀢𑀁 𑀧𑀦𑀲𑁆𑀲 𑀲𑀗𑁆𑀔𑁂𑀧𑀦𑀬𑀁 𑀤𑀲𑁆𑀲𑁂𑀢𑀼𑀁 𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀞𑀧𑀺𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀦𑁆𑀢𑀺 𑀧𑀯𑀭𑀁 𑀢𑀺𑀓𑀧𑀝𑁆𑀞𑀸𑀦𑀜𑁆𑀘. 𑀤𑀼𑀓𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀤𑀼𑀓𑀧𑀝𑁆𑀞𑀸𑀦𑀜𑁆𑀘. 𑀤𑀼𑀓𑀢𑀺𑀓𑀜𑁆𑀘𑁂𑀯𑀸𑀢𑀺 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀜𑁆𑀘. 𑀢𑀺𑀓𑀤𑀼𑀓𑀜𑁆𑀘𑀸𑀢𑀺 𑀢𑀺𑀓𑀤𑀼𑀓𑀧𑀝𑁆𑀞𑀸𑀦𑀜𑁆𑀘. 𑀢𑀺𑀓𑀢𑀺𑀓𑀜𑁆𑀘𑁂𑀯𑀸𑀢𑀺 𑀢𑀺𑀓𑀢𑀺𑀓𑀧𑀝𑁆𑀞𑀸𑀦𑀜𑁆𑀘. 𑀤𑀼𑀓𑀤𑀼𑀓𑀜𑁆𑀘𑀸𑀢𑀺 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀜𑁆𑀘. 𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀢𑁂 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀲𑀼𑀝𑁆𑀞𑀼 𑀕𑀫𑁆𑀪𑀻𑀭𑀸 𑀙 𑀦𑀬𑀸 𑀅𑀦𑀼𑀮𑁄𑀫𑀫𑁆𑀳𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀤𑁆𑀯𑁂 𑀅𑀦𑀼𑀮𑁄𑀫𑀸𑀦𑀺 𑁋 𑀥𑀫𑁆𑀫𑀸𑀦𑀼𑀮𑁄𑀫𑀜𑁆𑀘 𑀧𑀘𑁆𑀘𑀬𑀸𑀦𑀼𑀮𑁄𑀫𑀜𑁆𑀘. 𑀢𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀸𑀦𑀼𑀮𑁄𑀫𑀁 𑀦𑀸𑀫. ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀸𑀦𑀁 𑀅𑀦𑀼𑀮𑁄𑀫𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀦𑀸𑀫.

𑀢𑀢𑁆𑀣 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁…𑀧𑁂… 𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀅𑀬𑀁 𑀕𑀸𑀣𑀸 𑀥𑀫𑁆𑀫𑀸𑀦𑀼𑀮𑁄𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀇𑀥 𑀧𑀦 𑀅𑀬𑀁 𑀕𑀸𑀣𑀸 𑀢𑀲𑁆𑀫𑀺𑀁 𑀥𑀫𑁆𑀫𑀸𑀦𑀼𑀮𑁄𑀫𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀸 ‘‘𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀅𑀝𑁆𑀞𑀓𑀣𑀸𑀕𑀸𑀣𑀸𑀬 𑀥𑀫𑁆𑀫𑀸𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦𑁄𑀓𑀸𑀲𑁂 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀏𑀢𑁂 𑀥𑀫𑁆𑀫𑀸𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 ‘‘𑀙 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼 𑀅𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑀫𑀢𑁆𑀢𑀲𑁆𑀲𑁂𑀯 𑀯𑀲𑁂𑀦 𑀅𑀬𑀁 𑀇𑀫𑀲𑁆𑀫𑀺𑀁 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀲𑀗𑁆𑀔𑀺𑀧𑀺𑀢𑁆𑀯𑀸 𑀧𑀼𑀘𑁆𑀙𑀸𑀧𑀪𑁂𑀤𑁄 𑀤𑀲𑁆𑀲𑀺𑀢𑁄. 𑀲𑁂𑀲𑁂𑀲𑀼 𑀧𑀦 𑀢𑀺𑀓𑁂𑀲𑀼 𑀲𑁂𑀲𑀧𑀝𑁆𑀞𑀸𑀦𑁂𑀲𑀼 𑀘 𑀏𑀓𑀸𑀧𑀺 𑀧𑀼𑀘𑁆𑀙𑀸 𑀦 𑀤𑀲𑁆𑀲𑀺𑀢𑀸. 𑀢𑀢𑁄 𑀧𑀭𑁂𑀲𑀼 𑀧𑀦 𑀲𑀳𑀚𑀸𑀢𑀯𑀸𑀭𑀸𑀤𑀻𑀲𑀼 𑀓𑀼𑀲𑀮𑀢𑁆𑀢𑀺𑀓𑀲𑁆𑀲𑀸𑀧𑀺 𑀯𑀲𑁂𑀦 𑀧𑀼𑀘𑁆𑀙𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀮𑀩𑁆𑀪𑀫𑀸𑀦𑀓𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀤𑀲𑁆𑀲𑀺𑀢𑀁. ‘‘𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺 𑀯𑀘𑀦𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀙𑀧𑀺 𑀏𑀢𑁂 𑀧𑀝𑁆𑀞𑀸𑀦𑀦𑀬𑀸 𑀧𑀼𑀘𑁆𑀙𑀸𑀯𑀲𑁂𑀦 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀧𑀝𑁆𑀞𑀸𑀦𑀁 𑀯𑀡𑁆𑀡𑀬𑀦𑁆𑀢𑀸𑀦𑀜𑁆𑀳𑀺 𑀆𑀘𑀭𑀺𑀬𑀸𑀦𑀁 𑀪𑀸𑀭𑁄 𑀏𑀲𑁄𑀢𑀺.