𑁭. 𑀲𑀼𑀯𑀺𑀤𑀽𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀸𑀦𑀻𑀢𑀺 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀦𑀸𑀲𑀦𑁆𑀦𑀸𑀦𑀺 𑀳𑀼𑀢𑁆𑀯𑀸 𑀲𑀼𑀯𑀺𑀤𑀽𑀭𑀸𑀦𑁂𑀯 𑀯𑀺𑀤𑀽𑀭𑀸𑀦𑀺. 𑀦𑀪𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀣𑀯𑀻 𑀘𑀸𑀢𑀺 𑀆𑀓𑀸𑀲𑀜𑁆𑀘 𑀫𑀳𑀸𑀧𑀣𑀯𑀻 𑀘. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀣𑀯𑀺𑀢𑁄 𑀆𑀓𑀸𑀲𑀁 𑀦𑀸𑀫 𑀦 𑀤𑀽𑀭𑁂, 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑁂𑀧𑀺 𑀳𑁄𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀅𑀮𑀕𑁆𑀕𑀦𑀝𑁆𑀞𑁂𑀦 𑀧𑀦 ‘‘𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂’’𑀢𑀺 𑀯𑀼𑀢𑁆𑀢𑀁. 𑀯𑁂𑀭𑁄𑀘𑀦𑁄𑀢𑀺 𑀲𑀽𑀭𑀺𑀬𑁄. 𑀲𑀢𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁄 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁄. 𑀅𑀲𑀢𑀜𑁆𑀘 𑀥𑀫𑁆𑀫𑁄𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑁂𑀤𑁄 𑀅𑀲𑁆𑀲𑀤𑁆𑀥𑀫𑁆𑀫𑁄.

𑀧𑀪𑀗𑁆𑀓𑀭𑁄𑀢𑀺 𑀆𑀮𑁄𑀓𑀓𑀭𑁄. 𑀅𑀩𑁆𑀬𑀸𑀬𑀺𑀓𑁄 𑀳𑁄𑀢𑀻𑀢𑀺 𑀅𑀯𑀺𑀕𑀘𑁆𑀙𑀦𑀲𑀪𑀸𑀯𑁄 𑀳𑁄𑀢𑀺. 𑀲𑀢𑀁 𑀲𑀫𑀸𑀕𑀫𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀲𑀫𑀸𑀕𑀫𑁄. 𑀬𑀸𑀯𑀸𑀧𑀺 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀬𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬. 𑀢𑀣𑁂𑀯 𑀳𑁄𑀢𑀻𑀢𑀺 𑀢𑀸𑀤𑀺𑀲𑁄𑀯 𑀳𑁄𑀢𑀺, 𑀧𑀓𑀢𑀺𑀁 𑀦 𑀚𑀳𑀢𑀺. 𑀔𑀺𑀧𑁆𑀧𑀁 𑀳𑀺 𑀯𑁂𑀢𑀻𑀢𑀺 𑀲𑀻𑀖𑀁 𑀯𑀺𑀕𑀘𑁆𑀙𑀢𑀺.