𑁮. 𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀧𑀜𑁆𑀘𑀸𑀮𑀧𑀼𑀢𑁆𑀢𑁄𑀢𑀺 𑀧𑀜𑁆𑀘𑀸𑀮𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀧𑁄𑀭𑀺𑀬𑀸 𑀯𑀸𑀘𑀸𑀬𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀸𑀘𑀸𑀬. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀅𑀧𑀮𑀺𑀩𑀼𑀤𑁆𑀥𑀸𑀬. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀦𑀺𑀤𑁆𑀤𑁄𑀲𑀸𑀬 𑀘𑁂𑀯 𑀅𑀕𑀴𑀺𑀢𑀸𑀬 𑀘 𑀅𑀧𑀢𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬. 𑀧𑀭𑀺𑀬𑀸𑀧𑀦𑁆𑀦𑀸𑀬𑀸𑀢𑀺 𑀯𑀺𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑀸𑀬. 𑀅𑀦𑀺𑀲𑁆𑀲𑀺𑀢𑀸𑀬𑀸𑀢𑀺 𑀯𑀝𑁆𑀝𑀁 𑀅𑀦𑀺𑀲𑁆𑀲𑀺𑀢𑀸𑀬. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀓𑀣𑁂𑀢𑀺, 𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀦 𑀓𑀣𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀦𑀸𑀪𑀸𑀲𑀫𑀸𑀦𑀦𑁆𑀢𑀺 𑀦 𑀅𑀓𑀣𑁂𑀦𑁆𑀢𑀁. 𑀅𑀫𑀢𑀁 𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀤𑀁. 𑀪𑀸𑀲𑀬𑁂𑀢𑀺 𑀑𑀪𑀸𑀲𑁂𑀬𑁆𑀬. 𑀚𑁄𑀢𑀬𑁂𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀕𑁆𑀕𑀡𑁆𑀳𑁂 𑀇𑀲𑀺𑀦𑀁 𑀥𑀚𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀇𑀲𑀻𑀦𑀁 𑀥𑀚𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀫𑁂𑀯 𑀧𑀕𑁆𑀕𑀡𑁆𑀳𑁂𑀬𑁆𑀬 𑀉𑀓𑁆𑀔𑀺𑀧𑁂𑀬𑁆𑀬, 𑀉𑀘𑁆𑀘𑀁 𑀓𑀢𑁆𑀯𑀸 𑀓𑀣𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀻𑀧𑀓𑀁 𑀲𑀼𑀪𑀸𑀲𑀺𑀢𑀁 𑀥𑀚𑁄 𑀏𑀢𑁂𑀲𑀦𑁆𑀢𑀺 𑀲𑀼𑀪𑀸𑀲𑀺𑀢𑀥𑀚𑀸. 𑀇𑀲𑀬𑁄𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸. 𑀥𑀫𑁆𑀫𑁄 𑀳𑀺 𑀇𑀲𑀺𑀦𑀁 𑀥𑀚𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀇𑀲𑀻𑀦𑀁 𑀥𑀚𑁄 𑀦𑀸𑀫𑀸𑀢𑀺.