𑁫. 𑀭𑁄𑀳𑀺𑀢𑀲𑁆𑀲𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀜𑀸𑀡𑀤𑀲𑁆𑀲𑀦𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀮𑀸𑀪𑀸𑀬. 𑀤𑀺𑀯𑀸𑀲𑀜𑁆𑀜𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑀤𑀺𑀯𑀸𑀢𑀺 𑀏𑀯𑀁 𑀲𑀜𑁆𑀜𑀁 𑀅𑀥𑀺𑀝𑁆𑀞𑀸𑀢𑀺. 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀦𑁆𑀢𑀺 𑀬𑀣𑀸 𑀤𑀺𑀯𑀸 𑀆𑀮𑁄𑀓𑀲𑀜𑁆𑀜𑀸 𑀫𑀦𑀲𑀺 𑀓𑀢𑀸, 𑀢𑀣𑁂𑀯 𑀢𑀁 𑀭𑀢𑁆𑀢𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀧𑁆𑀧𑀪𑀸𑀲𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁄𑀪𑀸𑀲𑁂𑀦 𑀲𑀳𑁄𑀪𑀸𑀲𑀁. 𑀓𑀺𑀜𑁆𑀘𑀸𑀧𑀺 𑀆𑀮𑁄𑀓𑀲𑀤𑀺𑀲𑀁 𑀓𑀢𑀁, 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀦 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀮𑁄𑀓𑁄 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑁄.

𑀯𑀺𑀤𑀺𑀢𑀸𑀢𑀺 𑀧𑀸𑀓𑀝𑀸 𑀳𑀼𑀢𑁆𑀯𑀸. 𑀓𑀣𑀁 𑀧𑀦 𑀯𑁂𑀤𑀦𑀸 𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻𑀢𑀺? 𑀇𑀥 𑀪𑀺𑀓𑁆𑀔𑀼 𑀯𑀢𑁆𑀣𑀼𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀸𑀭𑀫𑁆𑀫𑀡𑀢𑀸𑀬 𑀢𑀸 𑀯𑁂𑀤𑀦𑀸 ‘‘𑀏𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀯𑀁 𑀞𑀢𑁆𑀯𑀸 𑀏𑀯𑀁 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. 𑀲𑀜𑁆𑀜𑀸𑀯𑀺𑀢𑀓𑁆𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻𑀢𑀺 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀲𑁆𑀲𑀦𑁆𑀢𑁄. 𑀇𑀢𑀺 𑀭𑀽𑀧𑀦𑁆𑀢𑀺 𑀏𑀯𑀁 𑀭𑀽𑀧𑀁 𑀏𑀢𑁆𑀢𑀓𑀁 𑀭𑀽𑀧𑀁 𑀦 𑀇𑀢𑁄 𑀧𑀭𑀁 𑀭𑀽𑀧𑀁 𑀅𑀢𑁆𑀣𑀻𑀢𑀺. 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄𑀢𑀺 𑀏𑀯𑀁 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄. 𑀅𑀢𑁆𑀣𑀗𑁆𑀕𑀫𑁄𑀢𑀺 𑀧𑀦 𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀜𑁆𑀘 𑀧𑀦 𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀏𑀢𑀁 𑀧𑀼𑀡𑁆𑀡𑀓𑀧𑀜𑁆𑀳𑁂 ‘‘𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀪𑀸𑀲𑀺𑀢𑀁, 𑀢𑀁 𑀇𑀤𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. 𑀧𑀭𑁄𑀧𑀭𑀸𑀦𑀻𑀢𑀺 𑀉𑀘𑁆𑀘𑀸𑀯𑀘𑀸𑀦𑀺 𑀉𑀢𑁆𑀢𑀫𑀸𑀥𑀫𑀸𑀦𑀺. 𑀇𑀜𑁆𑀚𑀺𑀢𑀦𑁆𑀢𑀺 𑀘𑀮𑀺𑀢𑀁. 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺 𑀮𑁄𑀓𑀲𑁆𑀫𑀺𑀁 𑀓𑀢𑁆𑀣𑀘𑀺 𑀏𑀓𑀓𑁆𑀔𑀦𑁆𑀥𑁂𑀧𑀺 𑀏𑀓𑀸𑀬𑀢𑀦𑁂𑀧𑀺 𑀏𑀓𑀥𑀸𑀢𑀼𑀬𑀸𑀧𑀺 𑀏𑀓𑀸𑀭𑀫𑁆𑀫𑀡𑁂𑀧𑀺 𑀦𑀢𑁆𑀣𑀺. 𑀲𑀦𑁆𑀢𑁄𑀢𑀺 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀯𑀺𑀥𑀽𑀫𑁄𑀢𑀺 𑀓𑁄𑀥𑀥𑀽𑀫𑁂𑀦 𑀯𑀺𑀕𑀢𑀥𑀽𑀫𑁄. 𑀏𑀯𑀫𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑁂 𑀫𑀕𑁆𑀕𑁂𑀓𑀕𑁆𑀕𑀢𑀫𑁆𑀧𑀺 𑀓𑀣𑁂𑀢𑁆𑀯𑀸 𑀕𑀸𑀣𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀓𑀣𑀺𑀢𑀸𑀢𑀺.

𑁨. 𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑀼𑀢𑀺𑀬𑁂 𑀬𑁄 𑀘 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣, 𑀚𑀸𑀦𑀸𑀢𑀺 𑀅𑀦𑀼𑀥𑀫𑁆𑀫𑀢𑀦𑁆𑀢𑀺 𑀬𑁄 𑀏𑀢𑁂𑀲𑀁 𑀧𑀜𑁆𑀳𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀩𑁆𑀬𑀸𑀓𑀭𑀡𑀁 𑀚𑀸𑀦𑀸𑀢𑀺. 𑀘𑀢𑀼𑀧𑀜𑁆𑀳𑀲𑁆𑀲 𑀓𑀼𑀲𑀮𑁄, 𑀆𑀳𑀼 𑀪𑀺𑀓𑁆𑀔𑀼𑀁 𑀢𑀣𑀸𑀯𑀺𑀥𑀦𑁆𑀢𑀺 𑀢𑀣𑀸𑀯𑀺𑀥𑀁 𑀪𑀺𑀓𑁆𑀔𑀼𑀁 𑀢𑁂𑀲𑀼 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀓𑀼𑀲𑀮𑁄𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀤𑀼𑀭𑀸𑀲𑀤𑁄 𑀤𑀼𑀧𑁆𑀧𑀲𑀳𑁄𑀢𑀺 𑀧𑀭𑁂𑀳𑀺 𑀖𑀝𑁆𑀝𑁂𑀢𑀼𑀁 𑀯𑀸 𑀅𑀪𑀺𑀪𑀯𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸. 𑀕𑀫𑁆𑀪𑀻𑀭𑁄𑀢𑀺 𑀲𑀢𑁆𑀢𑀲𑀻𑀤𑀦𑁆𑀢𑀭𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀕𑀫𑁆𑀪𑀻𑀭𑁄. 𑀤𑀼𑀧𑁆𑀧𑀥𑀁𑀲𑀺𑀬𑁄𑀢𑀺 𑀤𑀼𑀫𑁆𑀫𑁄𑀘𑀸𑀧𑀬𑁄, 𑀕𑀳𑀺𑀢𑀕𑁆𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁂 𑀅𑀦𑀢𑁆𑀣𑁂 𑀘𑀸𑀢𑀺 𑀯𑀟𑁆𑀠𑀺𑀬𑀜𑁆𑀘 𑀅𑀯𑀟𑁆𑀠𑀺𑀬𑀜𑁆𑀘. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀅𑀢𑁆𑀣𑀲𑀫𑀸𑀕𑀫𑁂𑀦. 𑀥𑀻𑀭𑁄 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 ‘‘𑀧𑀡𑁆𑀟𑀺𑀢𑁄 𑀅𑀬’’𑀦𑁆𑀢𑀺 𑀏𑀯𑀁 𑀧𑀯𑀼𑀘𑁆𑀘𑀢𑀺.

𑁩-𑁪. 𑀓𑁄𑀥𑀕𑀭𑀼𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁪𑁩-𑁪𑁪. 𑀢𑀢𑀺𑀬𑁂 𑀓𑁄𑀥𑀕𑀭𑀼 𑀦 𑀲𑀤𑁆𑀥𑀫𑁆𑀫𑀕𑀭𑀽𑀢𑀺 𑀓𑁄𑀥𑀁 𑀕𑀸𑀭𑀯𑁂𑀦 𑀕𑀭𑀼𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀦 𑀲𑀤𑁆𑀥𑀫𑁆𑀫𑀁, 𑀲𑀤𑁆𑀥𑀫𑁆𑀫𑀁 𑀧𑀦 𑀅𑀕𑀸𑀭𑀯𑁂𑀦 𑀮𑀸𑀫𑀓𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀺𑀭𑀽𑀳𑀦𑁆𑀢𑀻𑀢𑀺 𑀯𑀟𑁆𑀠𑀦𑁆𑀢𑀺, 𑀲𑀜𑁆𑀚𑀸𑀢𑀫𑀽𑀮𑀸𑀬 𑀯𑀸 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀳𑀦𑁆𑀢𑀺 𑀅𑀘𑀮𑀸 𑀪𑀯𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀓𑁄𑀥𑀕𑀭𑀼𑀢𑀸𑀢𑀺 𑀓𑁄𑀥𑀫𑁆𑀳𑀺 𑀲𑀕𑀸𑀭𑀯𑀢𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁫. 𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀧𑀜𑁆𑀘𑀫𑁂 𑀬𑀢𑁆𑀣𑀸𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀏𑀓𑁄𑀓𑀸𑀲𑁂 𑀪𑀼𑀫𑁆𑀫𑀁. 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀇𑀤𑀁 𑀅𑀧𑀭𑀸𑀧𑀭𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀕𑀳𑀺𑀢𑀁. 𑀕𑀫𑀦𑁂𑀦𑀸𑀢𑀺 𑀧𑀤𑀕𑀫𑀦𑁂𑀦. 𑀮𑁄𑀓𑀲𑁆𑀲 𑀅𑀦𑁆𑀢𑀦𑁆𑀢𑀺 𑀲𑀢𑁆𑀣𑀸 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀜𑀸𑀢𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼 𑀜𑀸𑀢𑀩𑁆𑀩𑀁 𑀤𑀝𑁆𑀞𑀩𑁆𑀩𑀁 𑀧𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺 𑀤𑁂𑀯𑀧𑀼𑀢𑁆𑀢𑁂𑀦 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀼𑀘𑁆𑀙𑀺𑀢𑁄, 𑀲𑀢𑁆𑀣𑀸𑀭𑀸 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀓𑀣𑀺𑀢𑁄. 𑀲𑁄 𑀧𑀦 ‘‘𑀅𑀢𑁆𑀢𑀦𑁄 𑀧𑀜𑁆𑀳𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀩𑁆𑀬𑀸𑀓𑀭𑀡𑀁 𑀲𑀫𑁂𑀢𑀻’’𑀢𑀺 𑀲𑀜𑁆𑀜𑀸𑀬 𑀲𑀫𑁆𑀧𑀳𑀁𑀲𑀦𑁆𑀢𑁄 𑀅𑀘𑁆𑀙𑀭𑀺𑀬𑀦𑁆𑀢𑀺𑀆𑀤𑀺𑀫𑀸𑀳.

𑀤𑀴𑁆𑀳𑀥𑀫𑁆𑀫𑀸𑀢𑀺 𑀤𑀴𑁆𑀳𑀥𑀦𑀼 𑀉𑀢𑁆𑀢𑀫𑀧𑁆𑀧𑀫𑀸𑀡𑁂𑀦 𑀥𑀦𑀼𑀦𑀸 𑀲𑀫𑀦𑁆𑀦𑀸𑀕𑀢𑁄. 𑀥𑀦𑀼𑀕𑁆𑀕𑀳𑁄𑀢𑀺 𑀥𑀦𑀼𑀆𑀘𑀭𑀺𑀬𑁄. 𑀲𑀺𑀓𑁆𑀔𑀺𑀢𑁄𑀢𑀺 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀥𑀦𑀼𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁄. 𑀓𑀢𑀳𑀢𑁆𑀣𑁄𑀢𑀺 𑀉𑀲𑀪𑀧𑁆𑀧𑀫𑀸𑀡𑁂𑀧𑀺 𑀯𑀸𑀮𑀕𑁆𑀕𑀁 𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀓𑀢𑀳𑀢𑁆𑀣𑁄. 𑀓𑀢𑀽𑀧𑀸𑀲𑀦𑁄𑀢𑀺 𑀓𑀢𑀲𑀭𑀓𑁆𑀔𑁂𑀧𑁄 𑀤𑀲𑁆𑀲𑀺𑀢𑀲𑀺𑀧𑁆𑀧𑁄. 𑀅𑀲𑀦𑁂𑀦𑀸𑀢𑀺 𑀓𑀡𑁆𑀟𑁂𑀦. 𑀅𑀢𑀺𑀧𑀸𑀢𑁂𑀬𑁆𑀬𑀸𑀢𑀺 𑀅𑀢𑀺𑀓𑁆𑀓𑀫𑁂𑀬𑁆𑀬. 𑀬𑀸𑀯𑀢𑀸 𑀲𑁄 𑀢𑀸𑀮𑀘𑁆𑀙𑀸𑀤𑀺𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀢𑀸𑀯𑀢𑀸 𑀓𑀸𑀮𑁂𑀦 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀅𑀢𑀺𑀓𑁆𑀓𑀫𑀸𑀫𑀻𑀢𑀺 𑀅𑀢𑁆𑀢𑀦𑁄 𑀚𑀯𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸 𑀧𑀘𑁆𑀙𑀺𑀫𑁄𑀢𑀺 𑀬𑀣𑀸 𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑁄 𑀤𑀽𑀭𑁂, 𑀏𑀯𑀁 𑀫𑁂 𑀤𑀽𑀭𑁂 𑀧𑀤𑀯𑀻𑀢𑀺𑀳𑀸𑀭𑁄 𑀅𑀳𑁄𑀲𑀻𑀢𑀺 𑀯𑀤𑀢𑀺. 𑀲𑁄 𑀓𑀺𑀭 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑁄 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀅𑀢𑀺𑀓𑁆𑀓𑀫𑀢𑀺, 𑀧𑀼𑀦 𑀤𑀼𑀢𑀺𑀬𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀧𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀅𑀢𑀺𑀓𑁆𑀓𑀫𑀢𑀺. 𑀇𑀘𑁆𑀙𑀸𑀕𑀢𑀦𑁆𑀢𑀺 𑀇𑀘𑁆𑀙𑀸 𑀏𑀯. 𑀅𑀜𑁆𑀜𑀢𑁆𑀭𑁂𑀯𑀸𑀢𑀺 𑀦𑀺𑀧𑁆𑀧𑀧𑀜𑁆𑀘𑀢𑀁 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀓𑀺𑀭𑁂𑀲 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀢𑀢𑁆𑀣 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀼𑀦 𑀚𑀯𑀢𑀺. 𑀯𑀲𑁆𑀲𑀲𑀢𑀸𑀬𑀼𑀓𑁄𑀢𑀺 𑀢𑀤𑀸 𑀤𑀻𑀖𑀸𑀬𑀼𑀓𑀓𑀸𑀮𑁄 𑀳𑁄𑀢𑀺, 𑀅𑀬𑀁 𑀧𑀦 𑀯𑀲𑁆𑀲𑀲𑀢𑀸𑀯𑀲𑀺𑀝𑁆𑀞𑁂 𑀆𑀬𑀼𑀫𑁆𑀳𑀺 𑀕𑀫𑀦𑀁 𑀆𑀭𑀪𑀺. 𑀯𑀲𑁆𑀲𑀲𑀢𑀚𑀻𑀯𑀻𑀢𑀺 𑀢𑀁 𑀯𑀲𑁆𑀲𑀲𑀢𑀁 𑀅𑀦𑀦𑁆𑀢𑀭𑀸𑀬𑁂𑀦 𑀚𑀻𑀯𑀦𑁆𑀢𑁄. 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀗𑁆𑀓𑀢𑁄𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀫𑀢𑁄. 𑀲𑁄 𑀧𑀦 𑀢𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸𑀧𑀺 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀺.

𑀅𑀧𑁆𑀧𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀧𑁆𑀧𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀅𑀦𑁆𑀢𑀓𑀺𑀭𑀺𑀬𑀦𑁆𑀢𑀺 𑀧𑀭𑀺𑀬𑀦𑁆𑀢𑀓𑀭𑀡𑀁. 𑀓𑀴𑁂𑀯𑀭𑁂𑀢𑀺 𑀅𑀢𑁆𑀢𑀪𑀸𑀯𑁂. 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂𑀢𑀺 𑀲𑀲𑀜𑁆𑀜𑁂 𑀲𑀘𑀺𑀢𑁆𑀢𑀓𑁂. 𑀮𑁄𑀓𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀮𑁄𑀓𑀲𑀫𑀼𑀤𑀬𑀦𑁆𑀢𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀁. 𑀇𑀢𑀺 ‘‘𑀦𑀸𑀳𑀁, 𑀆𑀯𑀼𑀲𑁄, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀢𑀺𑀡𑀓𑀝𑁆𑀞𑀸𑀤𑀻𑀲𑀼 𑀧𑀜𑁆𑀜𑀧𑁂𑀫𑀺, 𑀇𑀫𑀲𑁆𑀫𑀺𑀁 𑀧𑀦 𑀘𑀢𑀼𑀫𑀳𑀸𑀪𑀽𑀢𑀺𑀓𑁂 𑀓𑀸𑀬𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀧𑁂𑀫𑀻’’𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀺𑀢𑀸𑀯𑀻𑀢𑀺 𑀲𑀫𑀺𑀢𑀧𑀸𑀧𑁄. 𑀦𑀸𑀲𑀻𑀲𑀢𑀻𑀢𑀺 𑀦 𑀧𑀢𑁆𑀣𑁂𑀢𑀺. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁭. 𑀲𑀼𑀯𑀺𑀤𑀽𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑀸𑀦𑀻𑀢𑀺 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀦𑀸𑀲𑀦𑁆𑀦𑀸𑀦𑀺 𑀳𑀼𑀢𑁆𑀯𑀸 𑀲𑀼𑀯𑀺𑀤𑀽𑀭𑀸𑀦𑁂𑀯 𑀯𑀺𑀤𑀽𑀭𑀸𑀦𑀺. 𑀦𑀪𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀣𑀯𑀻 𑀘𑀸𑀢𑀺 𑀆𑀓𑀸𑀲𑀜𑁆𑀘 𑀫𑀳𑀸𑀧𑀣𑀯𑀻 𑀘. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀣𑀯𑀺𑀢𑁄 𑀆𑀓𑀸𑀲𑀁 𑀦𑀸𑀫 𑀦 𑀤𑀽𑀭𑁂, 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑁂𑀧𑀺 𑀳𑁄𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀅𑀮𑀕𑁆𑀕𑀦𑀝𑁆𑀞𑁂𑀦 𑀧𑀦 ‘‘𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂’’𑀢𑀺 𑀯𑀼𑀢𑁆𑀢𑀁. 𑀯𑁂𑀭𑁄𑀘𑀦𑁄𑀢𑀺 𑀲𑀽𑀭𑀺𑀬𑁄. 𑀲𑀢𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁄 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁄. 𑀅𑀲𑀢𑀜𑁆𑀘 𑀥𑀫𑁆𑀫𑁄𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑁂𑀤𑁄 𑀅𑀲𑁆𑀲𑀤𑁆𑀥𑀫𑁆𑀫𑁄.

𑀧𑀪𑀗𑁆𑀓𑀭𑁄𑀢𑀺 𑀆𑀮𑁄𑀓𑀓𑀭𑁄. 𑀅𑀩𑁆𑀬𑀸𑀬𑀺𑀓𑁄 𑀳𑁄𑀢𑀻𑀢𑀺 𑀅𑀯𑀺𑀕𑀘𑁆𑀙𑀦𑀲𑀪𑀸𑀯𑁄 𑀳𑁄𑀢𑀺. 𑀲𑀢𑀁 𑀲𑀫𑀸𑀕𑀫𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀲𑀫𑀸𑀕𑀫𑁄. 𑀬𑀸𑀯𑀸𑀧𑀺 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀬𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬. 𑀢𑀣𑁂𑀯 𑀳𑁄𑀢𑀻𑀢𑀺 𑀢𑀸𑀤𑀺𑀲𑁄𑀯 𑀳𑁄𑀢𑀺, 𑀧𑀓𑀢𑀺𑀁 𑀦 𑀚𑀳𑀢𑀺. 𑀔𑀺𑀧𑁆𑀧𑀁 𑀳𑀺 𑀯𑁂𑀢𑀻𑀢𑀺 𑀲𑀻𑀖𑀁 𑀯𑀺𑀕𑀘𑁆𑀙𑀢𑀺.

𑁮. 𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀧𑀜𑁆𑀘𑀸𑀮𑀧𑀼𑀢𑁆𑀢𑁄𑀢𑀺 𑀧𑀜𑁆𑀘𑀸𑀮𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀧𑁄𑀭𑀺𑀬𑀸 𑀯𑀸𑀘𑀸𑀬𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀸𑀘𑀸𑀬. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀅𑀧𑀮𑀺𑀩𑀼𑀤𑁆𑀥𑀸𑀬. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀦𑀺𑀤𑁆𑀤𑁄𑀲𑀸𑀬 𑀘𑁂𑀯 𑀅𑀕𑀴𑀺𑀢𑀸𑀬 𑀘 𑀅𑀧𑀢𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬. 𑀧𑀭𑀺𑀬𑀸𑀧𑀦𑁆𑀦𑀸𑀬𑀸𑀢𑀺 𑀯𑀺𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑀸𑀬. 𑀅𑀦𑀺𑀲𑁆𑀲𑀺𑀢𑀸𑀬𑀸𑀢𑀺 𑀯𑀝𑁆𑀝𑀁 𑀅𑀦𑀺𑀲𑁆𑀲𑀺𑀢𑀸𑀬. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀓𑀣𑁂𑀢𑀺, 𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀦 𑀓𑀣𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀦𑀸𑀪𑀸𑀲𑀫𑀸𑀦𑀦𑁆𑀢𑀺 𑀦 𑀅𑀓𑀣𑁂𑀦𑁆𑀢𑀁. 𑀅𑀫𑀢𑀁 𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀤𑀁. 𑀪𑀸𑀲𑀬𑁂𑀢𑀺 𑀑𑀪𑀸𑀲𑁂𑀬𑁆𑀬. 𑀚𑁄𑀢𑀬𑁂𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀕𑁆𑀕𑀡𑁆𑀳𑁂 𑀇𑀲𑀺𑀦𑀁 𑀥𑀚𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀇𑀲𑀻𑀦𑀁 𑀥𑀚𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀫𑁂𑀯 𑀧𑀕𑁆𑀕𑀡𑁆𑀳𑁂𑀬𑁆𑀬 𑀉𑀓𑁆𑀔𑀺𑀧𑁂𑀬𑁆𑀬, 𑀉𑀘𑁆𑀘𑀁 𑀓𑀢𑁆𑀯𑀸 𑀓𑀣𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀻𑀧𑀓𑀁 𑀲𑀼𑀪𑀸𑀲𑀺𑀢𑀁 𑀥𑀚𑁄 𑀏𑀢𑁂𑀲𑀦𑁆𑀢𑀺 𑀲𑀼𑀪𑀸𑀲𑀺𑀢𑀥𑀚𑀸. 𑀇𑀲𑀬𑁄𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸. 𑀥𑀫𑁆𑀫𑁄 𑀳𑀺 𑀇𑀲𑀺𑀦𑀁 𑀥𑀚𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀇𑀲𑀻𑀦𑀁 𑀥𑀚𑁄 𑀦𑀸𑀫𑀸𑀢𑀺.

𑁯. 𑀯𑀺𑀧𑀮𑁆𑀮𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀸𑀢𑀺 𑀲𑀜𑁆𑀜𑀸𑀬 𑀯𑀺𑀧𑀮𑁆𑀮𑀢𑁆𑀣𑀪𑀸𑀯𑀸, 𑀘𑀢𑀲𑁆𑀲𑁄 𑀯𑀺𑀧𑀭𑀻𑀢𑀲𑀜𑁆𑀜𑀸𑀬𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀘𑁆𑀘𑁂, 𑀪𑀺𑀓𑁆𑀔𑀯𑁂, 𑀦𑀺𑀘𑁆𑀘𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄𑀢𑀺 𑀅𑀦𑀺𑀘𑁆𑀘𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀦𑀺𑀘𑁆𑀘𑀁 𑀇𑀤’’𑀦𑁆𑀢𑀺 𑀏𑀯𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸, 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑀢𑁆𑀢𑀦𑀺 𑀘 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀏𑀯𑀁𑀲𑀜𑁆𑀜𑀺𑀦𑁄𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀸𑀢𑀺 𑀦 𑀓𑁂𑀯𑀮𑀁 𑀲𑀜𑁆𑀜𑀺𑀦𑁄𑀯, 𑀲𑀜𑁆𑀜𑀸𑀬 𑀯𑀺𑀬 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸𑀧𑀺 𑀳𑀢𑀸. 𑀔𑀺𑀢𑁆𑀢𑀘𑀺𑀢𑁆𑀢𑀸𑀢𑀺 𑀢𑁂 𑀲𑀜𑁆𑀜𑀸𑀤𑀺𑀝𑁆𑀞𑀺𑀬𑁄 𑀯𑀺𑀬 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀯𑀺𑀲𑀜𑁆𑀜𑀺𑀦𑁄𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀯𑀺𑀧𑀭𑀻𑀢𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺𑀦𑁄𑀢𑀺 𑀅𑀢𑁆𑀣𑁄. 𑀢𑁂 𑀬𑁄𑀕𑀬𑀼𑀢𑁆𑀢𑀸 𑀫𑀸𑀭𑀲𑁆𑀲𑀸𑀢𑀺 𑀢𑁂 𑀫𑀸𑀭𑀲𑁆𑀲 𑀬𑁄𑀕𑁂 𑀬𑀼𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀬𑁄𑀕𑀓𑁆𑀔𑁂𑀫𑀺𑀦𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀅𑀧𑁆𑀧𑀢𑁆𑀢𑀸. 𑀲𑀢𑁆𑀢𑀸𑀢𑀺 𑀧𑀼𑀕𑁆𑀕𑀮𑀸. 𑀩𑀼𑀤𑁆𑀥𑀸𑀢𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀸. 𑀇𑀫𑀁 𑀥𑀫𑁆𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀲𑀘𑀺𑀢𑁆𑀢𑀁 𑀧𑀘𑁆𑀘𑀮𑀤𑁆𑀥𑀸𑀢𑀺 𑀲𑀓𑀁 𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸. 𑀅𑀦𑀺𑀘𑁆𑀘𑀢𑁄 𑀤𑀓𑁆𑀔𑀼𑀦𑁆𑀢𑀺 𑀅𑀦𑀺𑀘𑁆𑀘𑀪𑀸𑀯𑁂𑀦 𑀅𑀤𑁆𑀤𑀲𑀁𑀲𑀼. 𑀅𑀲𑀼𑀪𑀢𑀤𑁆𑀤𑀲𑀼𑀦𑁆𑀢𑀺 𑀅𑀲𑀼𑀪𑀁 𑀅𑀲𑀼𑀪𑀢𑁄𑀬𑁂𑀯 𑀅𑀤𑁆𑀤𑀲𑀁𑀲𑀼. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸𑀢𑀺 𑀕𑀳𑀺𑀢𑀲𑀫𑁆𑀫𑀸𑀤𑀲𑁆𑀲𑀦𑀸. 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀉𑀧𑀘𑁆𑀘𑀕𑀼𑀦𑁆𑀢𑀺 𑀲𑀓𑀮𑀁 𑀯𑀝𑁆𑀝𑀤𑀼𑀓𑁆𑀔𑀁 𑀲𑀫𑀢𑀺𑀓𑁆𑀓𑀦𑁆𑀢𑀸.

𑁧𑁦. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀺𑀭𑁄𑀘𑀺𑀢𑀼𑀁 𑀅𑀤𑀢𑁆𑀯𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀓𑀭𑀡𑁂𑀦 𑀉𑀧𑀓𑁆𑀓𑀺𑀮𑁂𑀲𑀸. 𑀫𑀳𑀺𑀓𑀸𑀢𑀺 𑀳𑀺𑀫𑀁. 𑀥𑀽𑀫𑁄 𑀭𑀚𑁄𑀢𑀺 𑀥𑀽𑀫𑁄 𑀘 𑀭𑀚𑁄 𑀘. 𑀭𑀸𑀳𑀽𑀢𑀺 𑀧𑀼𑀭𑀺𑀫𑀸 𑀢𑀬𑁄 𑀅𑀲𑀫𑁆𑀧𑀢𑁆𑀢𑀉𑀧𑀓𑁆𑀓𑀺𑀮𑁂𑀲𑀸, 𑀭𑀸𑀳𑀼 𑀧𑀦 𑀲𑀫𑁆𑀧𑀢𑁆𑀢𑀉𑀧𑀓𑁆𑀓𑀺𑀮𑁂𑀲𑀯𑀲𑁂𑀦 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀻𑀢𑀺 𑀕𑀼𑀡𑀧𑁆𑀧𑀢𑀸𑀧𑁂𑀦 𑀦 𑀢𑀧𑀦𑁆𑀢𑀺, 𑀕𑀼𑀡𑁄𑀪𑀸𑀲𑁂𑀦 𑀦 𑀪𑀸𑀲𑀦𑁆𑀢𑀺, 𑀕𑀼𑀡𑀯𑀺𑀭𑁄𑀘𑀦𑁂𑀦 𑀦 𑀯𑀺𑀭𑁄𑀘𑀦𑁆𑀢𑀺. 𑀲𑀼𑀭𑀸𑀫𑁂𑀭𑀬𑀧𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑀸𑀢𑀺 𑀧𑀜𑁆𑀘𑀯𑀺𑀥𑀸𑀬 𑀲𑀼𑀭𑀸𑀬 𑀘𑀢𑀼𑀩𑁆𑀩𑀺𑀥𑀲𑁆𑀲 𑀫𑁂𑀭𑀬𑀲𑁆𑀲 𑀘 𑀧𑀸𑀦𑀢𑁄 𑀅𑀯𑀺𑀭𑀢𑀸.

𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀸𑀢𑀺 𑀅𑀯𑀺𑀚𑁆𑀚𑀸𑀬 𑀦𑀺𑀯𑀸𑀭𑀺𑀢𑀸 𑀧𑀺𑀳𑀺𑀢𑀸. 𑀧𑀺𑀬𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑁄𑀢𑀺 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀅𑀪𑀺𑀦𑀦𑁆𑀤𑀫𑀸𑀦𑀸 𑀢𑀼𑀲𑁆𑀲𑀫𑀸𑀦𑀸. 𑀲𑀸𑀤𑀺𑀬𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀅𑀯𑀺𑀤𑁆𑀤𑀲𑀽𑀢𑀺 𑀅𑀦𑁆𑀥𑀩𑀸𑀮𑀸. 𑀲𑀦𑁂𑀢𑁆𑀢𑀺𑀓𑀸𑀢𑀺 𑀢𑀡𑁆𑀳𑀸𑀬𑁄𑀢𑁆𑀢𑁂𑀦𑁂𑀯 𑀲𑀬𑁄𑀢𑁆𑀢𑀸. 𑀓𑀝𑀲𑀺𑀦𑁆𑀢𑀺 𑀅𑀢𑁆𑀢𑀪𑀸𑀯𑀁. 𑀖𑁄𑀭𑀦𑁆𑀢𑀺 𑀓𑀓𑁆𑀔𑀴𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺.

𑀭𑁄𑀳𑀺𑀢𑀲𑁆𑀲𑀯𑀕𑁆𑀕𑁄 𑀧𑀜𑁆𑀘𑀫𑁄.