𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

(𑁬) 𑁧. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸𑀢𑀺 𑀧𑀼𑀜𑁆𑀜𑀲𑁆𑀲 𑀅𑀪𑀺𑀲𑀦𑁆𑀤𑀸, 𑀧𑀼𑀜𑁆𑀜𑀧𑁆𑀧𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀪𑀺𑀲𑀦𑁆𑀤𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑁂 𑀧𑀦𑁂𑀢𑁂 𑀲𑀼𑀔𑀁 𑀆𑀳𑀭𑀦𑁆𑀢𑀻𑀢𑀺 𑀲𑀼𑀔𑀲𑁆𑀲𑀸𑀳𑀸𑀭𑀸. 𑀲𑀼𑀝𑁆𑀞𑀼 𑀅𑀕𑁆𑀕𑀸𑀦𑀁 𑀭𑀽𑀧𑀸𑀤𑀻𑀦𑀁 𑀤𑀸𑀬𑀓𑀸𑀢𑀺 𑀲𑁄𑀯𑀕𑁆𑀕𑀺𑀓𑀸. 𑀲𑀼𑀔𑁄 𑀦𑁂𑀲𑀁 𑀯𑀺𑀧𑀸𑀓𑁄𑀢𑀺 𑀲𑀼𑀔𑀯𑀺𑀧𑀸𑀓𑀸. 𑀲𑀕𑁆𑀕𑁂 𑀉𑀧𑀧𑀢𑁆𑀢𑀺 𑀲𑀕𑁆𑀕𑁄, 𑀲𑀕𑁆𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸. 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄𑀢𑀺 𑀘𑀻𑀯𑀭𑀢𑁆𑀣𑀸𑀬 𑀯𑀢𑁆𑀣𑀁 𑀮𑀪𑀺𑀢𑁆𑀯𑀸 𑀲𑀽𑀘𑀺𑀲𑀼𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁄𑀧𑀺 𑀓𑀭𑁄𑀦𑁆𑀢𑁄𑀧𑀺 𑀧𑀸𑀭𑀼𑀧𑀦𑁆𑀢𑁄𑀧𑀺 𑀚𑀺𑀡𑁆𑀡𑀓𑀸𑀮𑁂 𑀧𑀘𑁆𑀘𑀢𑁆𑀣𑀭𑀡𑀁 𑀓𑀭𑁄𑀦𑁆𑀢𑁄𑀧𑀺 𑀧𑀘𑁆𑀘𑀢𑁆𑀣𑀭𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀪𑀽𑀫𑀢𑁆𑀣𑀭𑀡𑀁 𑀓𑀭𑁄𑀦𑁆𑀢𑁄𑀧𑀺 𑀪𑀽𑀫𑀢𑁆𑀣𑀭𑀡𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀁 𑀨𑀸𑀮𑁂𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀁 𑀓𑀭𑁄𑀦𑁆𑀢𑁄𑀧𑀺 ‘‘𑀧𑀭𑀺𑀪𑀼𑀜𑁆𑀚𑀫𑀸𑀦𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀬𑀤𑀸 𑀧𑀦 ‘‘𑀧𑀸𑀤𑀧𑀼𑀜𑁆𑀙𑀦𑀫𑁆𑀧𑀺 𑀦 𑀲𑀓𑁆𑀓𑀸 𑀇𑀤’’𑀦𑁆𑀢𑀺 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀙𑀟𑁆𑀟𑀺𑀢𑀁 𑀳𑁄𑀢𑀺, 𑀢𑀤𑀸 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀦𑀸𑀫 𑀦 𑀳𑁄𑀢𑀺. 𑀅𑀧𑁆𑀧𑀫𑀸𑀡𑀁 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁. 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄𑀢𑀺 𑀇𑀫𑀺𑀦𑀸 𑀤𑀸𑀬𑀓𑀲𑁆𑀲 𑀧𑀼𑀜𑁆𑀜𑀘𑁂𑀢𑀦𑀸𑀬 𑀅𑀧𑁆𑀧𑀫𑀸𑀡𑀢𑀁 𑀓𑀣𑁂𑀢𑀺. 𑀢𑀲𑁆𑀲 𑀳𑀺 ‘‘𑀔𑀻𑀡𑀸𑀲𑀯𑁄 𑀫𑁂 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀼𑀜𑁆𑀜𑀘𑁂𑀢𑀦𑀸 𑀅𑀧𑁆𑀧𑀫𑀸𑀡𑀸 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼 𑀧𑀦 𑀬𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀫𑁆𑀧𑀺 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁄 𑀲𑀢𑁆𑀢𑀸𑀳𑀫𑁆𑀧𑀺 𑀢𑀁𑀬𑁂𑀯 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀦𑀸𑀫 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀧𑀦 𑀲𑁂𑀦𑀸𑀲𑀦𑁂 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀼 𑀘𑀗𑁆𑀓𑀫𑀦𑁆𑀢𑁄𑀧𑀺 𑀬𑀸𑀯 𑀢𑀁 𑀲𑁂𑀦𑀸𑀲𑀦𑀁 𑀧𑀳𑀸𑀬 𑀅𑀜𑁆𑀜𑀁 𑀦 𑀕𑀡𑁆𑀳𑀸𑀢𑀺, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀦𑀸𑀫 𑀳𑁄𑀢𑀺. 𑀏𑀓𑁂𑀦 𑀧𑀦 𑀪𑁂𑀲𑀚𑁆𑀚𑁂𑀦 𑀩𑁆𑀬𑀸𑀥𑀺𑀫𑁆𑀳𑀺 𑀯𑀽𑀧𑀲𑀦𑁆𑀢𑁂 𑀬𑀸𑀯 𑀅𑀜𑁆𑀜𑀁 𑀪𑁂𑀲𑀚𑁆𑀚𑀁 𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀸𑀯𑀤𑁂𑀯 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀦𑀸𑀫 𑀳𑁄𑀢𑀺.

𑀩𑀳𑀼𑀪𑁂𑀭𑀯𑀦𑁆𑀢𑀺 𑀩𑀳𑀽𑀳𑀺 𑀪𑁂𑀭𑀯𑀸𑀭𑀫𑁆𑀫𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀭𑀢𑀦𑀯𑀭𑀸𑀦𑀦𑁆𑀢𑀺 𑀲𑀢𑁆𑀢𑀦𑁆𑀦𑀫𑁆𑀧𑀺 𑀯𑀭𑀭𑀢𑀦𑀸𑀦𑀁. 𑀆𑀮𑀬𑀦𑁆𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀧𑀼𑀣𑀽 𑀲𑀯𑀦𑁆𑀢𑀻𑀢𑀺 𑀩𑀳𑀼𑀓𑀸 𑀳𑀼𑀢𑁆𑀯𑀸 𑀲𑀦𑁆𑀤𑀫𑀸𑀦𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁨. 𑀤𑀼𑀢𑀺𑀬𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑁂 𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑁂𑀳𑀺. 𑀢𑀸𑀦𑀺 𑀳𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀸𑀦𑀺 𑀳𑁄𑀦𑁆𑀢𑀺 𑀧𑀺𑀬𑀸𑀦𑀺 𑀫𑀦𑀸𑀧𑀸𑀦𑀺. 𑀲𑁂𑀲𑀁 𑀲𑀼𑀢𑁆𑀢𑀦𑁆𑀢𑁂 𑀢𑀸𑀯 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁪 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯.

𑀕𑀸𑀣𑀸𑀲𑀼 𑀧𑀦 𑀲𑀤𑁆𑀥𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀻𑀮𑀫𑁆𑀧𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀻𑀮𑀫𑁂𑀯. 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀦𑁆𑀢𑀺 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀔𑀻𑀡𑀸𑀲𑀯𑀲𑁆𑀲 𑀤𑀲𑁆𑀲𑀦𑀁 𑀉𑀚𑀼𑀪𑀽𑀢𑀤𑀲𑁆𑀲𑀦𑀁 𑀦𑀸𑀫. 𑀆𑀳𑀽𑀢𑀺 𑀓𑀣𑀬𑀦𑁆𑀢𑀺. 𑀧𑀲𑀸𑀤𑀦𑁆𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀧𑀲𑀸𑀤𑀁. 𑀥𑀫𑁆𑀫𑀤𑀲𑁆𑀲𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀁.

𑁩. 𑀧𑀞𑀫𑀲𑀁𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀢𑀢𑀺𑀬𑁂 𑀲𑀫𑁆𑀩𑀳𑀼𑀮𑀸𑀧𑀺 𑀔𑁄 𑀕𑀳𑀧𑀢𑀻 𑀘 𑀕𑀳𑀧𑀢𑀸𑀦𑀺𑀬𑁄 𑀘𑀸𑀢𑀺 𑀩𑀳𑀼𑀓𑀸 𑀕𑀳𑀧𑀢𑀬𑁄 𑀘 𑀕𑀳𑀧𑀢𑀸𑀦𑀺𑀬𑁄 𑀘 𑀆𑀯𑀸𑀳𑀯𑀺𑀯𑀸𑀳𑀓𑀭𑀡𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀲𑀁𑀯𑀸𑀲𑀸𑀢𑀺 𑀲𑀳𑀯𑀸𑀲𑀸 𑀏𑀓𑀢𑁄𑀯𑀸𑀲𑀸. 𑀙𑀯𑁄 𑀙𑀯𑀸𑀬𑀸𑀢𑀺 𑀕𑀼𑀡𑀫𑀭𑀡𑁂𑀦 𑀫𑀢𑀢𑁆𑀢𑀸 𑀙𑀯𑁄 𑀕𑀼𑀡𑀫𑀭𑀡𑁂𑀦𑁂𑀯 𑀫𑀢𑀸𑀬 𑀙𑀯𑀸𑀬 𑀲𑀤𑁆𑀥𑀺𑀁. 𑀤𑁂𑀯𑀺𑀬𑀸 𑀲𑀤𑁆𑀥𑀺𑀦𑁆𑀢𑀺 𑀕𑀼𑀡𑁂𑀳𑀺 𑀤𑁂𑀯𑀺𑀪𑀽𑀢𑀸𑀬 𑀲𑀤𑁆𑀥𑀺𑀁. 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄. 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀓𑁄, 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀲𑀦𑁆𑀢𑀚𑁆𑀚𑀦𑁂𑀦 𑀧𑀭𑀺𑀪𑀸𑀲𑀓𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀤𑀭𑀺𑀬𑀸𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀦𑁄. 𑀚𑀸𑀦𑀺𑀧𑀢𑀬𑁄𑀢𑀺 𑀚𑀬𑀫𑁆𑀧𑀢𑀺𑀓𑀸. 𑀯𑀤𑀜𑁆𑀜𑀽𑀢𑀺 𑀬𑀸𑀘𑀓𑀸𑀦𑀁 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺. 𑀲𑀜𑁆𑀜𑀢𑀸𑀢𑀺 𑀲𑀻𑀮𑀲𑀁𑀬𑀫𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀥𑀫𑁆𑀫𑀚𑀻𑀯𑀺𑀦𑁄𑀢𑀺 𑀥𑀫𑁆𑀫𑁂 𑀞𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀥𑀫𑁆𑀫𑀚𑀻𑀯𑀺𑀦𑁄. 𑀅𑀢𑁆𑀣𑀸𑀲𑀁 𑀧𑀘𑀼𑀭𑀸 𑀳𑁄𑀦𑁆𑀢𑀻𑀢𑀺 𑀯𑀟𑁆𑀠𑀺𑀲𑀗𑁆𑀔𑀸𑀢𑀸 𑀅𑀢𑁆𑀣𑀸 𑀏𑀢𑁂𑀲𑀁 𑀩𑀳𑀽 𑀳𑁄𑀦𑁆𑀢𑀺. 𑀨𑀸𑀲𑀼𑀓𑀁 𑀉𑀧𑀚𑀸𑀬𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀨𑀸𑀲𑀼𑀯𑀺𑀳𑀸𑀭𑁄 𑀚𑀸𑀬𑀢𑀺. 𑀓𑀸𑀫𑀓𑀸𑀫𑀺𑀦𑁄𑀢𑀺 𑀓𑀸𑀫𑁂 𑀓𑀸𑀫𑀬𑀫𑀸𑀦𑀸.

𑁪. 𑀤𑀼𑀢𑀺𑀬𑀲𑀁𑀯𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀘𑀢𑀼𑀢𑁆𑀣𑁂 𑀓𑀫𑁆𑀫𑀧𑀣𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀺𑀢𑀸. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀅𑀕𑀸𑀭𑀺𑀓𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺 𑀯𑀝𑁆𑀝𑀢𑀺.

𑁫-𑁬. 𑀲𑀫𑀚𑀻𑀯𑀻𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁫𑁫-𑁫𑁬. 𑀧𑀜𑁆𑀘𑀫𑁂 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀺𑀫𑀢𑁆𑀣𑀁 𑀉𑀧𑀲𑀗𑁆𑀓𑀫𑀺? 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀁. 𑀢𑀣𑀸𑀕𑀢𑁄 𑀳𑀺 𑀢𑀁 𑀭𑀝𑁆𑀞𑀁 𑀧𑀸𑀧𑀼𑀡𑀦𑁆𑀢𑁄 𑀇𑀫𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀸𑀬 𑀧𑀸𑀧𑀼𑀡𑀸𑀢𑀺. 𑀦𑀓𑀼𑀮𑀧𑀺𑀢𑀸 𑀓𑀺𑀭 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀧𑀺𑀢𑀸 𑀅𑀳𑁄𑀲𑀺, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀳𑀸𑀧𑀺𑀢𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀘𑀽𑀴𑀧𑀺𑀢𑀸. 𑀦𑀓𑀼𑀮𑀫𑀸𑀢𑀸𑀧𑀺 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀸 𑀅𑀳𑁄𑀲𑀺, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀳𑀸𑀫𑀸𑀢𑀸, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀘𑀽𑀴𑀫𑀸𑀢𑀸. 𑀢𑁂 𑀲𑀢𑁆𑀣𑀼 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 ‘‘𑀳𑀦𑁆𑀢𑀸𑀢, 𑀳𑀦𑁆𑀢𑀸𑀢𑀸’’𑀢𑀺 𑀯𑀘𑁆𑀙𑀓𑀁 𑀤𑀺𑀲𑁆𑀯𑀸 𑀯𑀘𑁆𑀙𑀕𑀺𑀤𑁆𑀥𑀺𑀦𑀻 𑀕𑀸𑀯𑀻 𑀯𑀺𑀬 𑀯𑀺𑀭𑀯𑀫𑀸𑀦𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸. 𑀦𑀺𑀯𑁂𑀲𑀦𑁂 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀲𑀤𑀸 𑀧𑀜𑁆𑀜𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀇𑀢𑀺 𑀪𑀕𑀯𑀸 𑀢𑁂𑀲𑀁 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺. 𑀅𑀢𑀺𑀘𑀭𑀺𑀢𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑀸. 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺 𑀧𑀭𑀮𑁄𑀓𑁂 𑀘. 𑀲𑀫𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀬 𑀲𑀫𑀸 𑀏𑀓𑀲𑀤𑀺𑀲𑀸. 𑀲𑀻𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀙𑀝𑁆𑀞𑀁 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁 𑀤𑁂𑀲𑀺𑀢𑀁. 𑀲𑁂𑀲𑀫𑁂𑀢𑁆𑀣 𑀢𑀸𑀤𑀺𑀲𑀫𑁂𑀯.

𑁭. 𑀲𑀼𑀧𑁆𑀧𑀯𑀸𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀲𑀢𑁆𑀢𑀫𑁂 𑀧𑀚𑁆𑀚𑀦𑀺𑀓𑀦𑁆𑀢𑀺 𑀢𑀲𑁆𑀲 𑀦𑀺𑀕𑀫𑀲𑁆𑀲 𑀦𑀸𑀫𑀁. 𑀓𑁄𑀮𑀺𑀬𑀸𑀦𑀦𑁆𑀢𑀺 𑀓𑁄𑀮𑀭𑀸𑀚𑀓𑀼𑀮𑀸𑀦𑀁. 𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸𑀢𑀺 𑀆𑀬𑀼𑀤𑀸𑀦𑀁 𑀤𑀢𑁆𑀯𑀸. 𑀆𑀬𑀼𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀻𑀢𑀺 𑀆𑀬𑀼𑀪𑀸𑀕𑀧𑀝𑀺𑀮𑀸𑀪𑀺𑀦𑀻 𑀳𑁄𑀢𑀺, 𑀆𑀬𑀼𑀁 𑀯𑀸 𑀪𑀚𑀦𑀺𑀓𑀸 𑀳𑁄𑀢𑀺, 𑀆𑀬𑀼𑀧𑁆𑀧𑀝𑀺𑀮𑀸𑀪𑀺𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀭𑀲𑀲𑀸 𑀉𑀧𑁂𑀢𑀦𑁆𑀢𑀺 𑀭𑀲𑁂𑀦 𑀉𑀧𑁂𑀢𑀁 𑀭𑀲𑀲𑀫𑁆𑀧𑀦𑁆𑀦𑀁. 𑀉𑀚𑁆𑀚𑀼𑀕𑀢𑁂𑀲𑀽𑀢𑀺 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑀢𑁆𑀢𑀸 𑀉𑀚𑀼𑀓𑀫𑁂𑀯 𑀕𑀢𑁂𑀲𑀼 𑀔𑀻𑀡𑀸𑀲𑀯𑁂𑀲𑀼. 𑀘𑀭𑀡𑀽𑀧𑀧𑀦𑁆𑀦𑁂𑀲𑀽𑀢𑀺 𑀧𑀜𑁆𑀘𑀤𑀲𑀳𑀺 𑀘𑀭𑀡𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀲𑀼. 𑀫𑀳𑀕𑁆𑀕𑀢𑁂𑀲𑀽𑀢𑀺 𑀫𑀳𑀢𑁆𑀢𑀁 𑀕𑀢𑁂𑀲𑀼. 𑀔𑀻𑀡𑀸𑀲𑀯𑀸𑀦𑀜𑁆𑀜𑁂𑀯𑁂𑀢𑀁 𑀦𑀸𑀫𑀁. 𑀧𑀼𑀜𑁆𑀜𑁂𑀦 𑀧𑀼𑀜𑁆𑀜𑀁 𑀲𑀁𑀲𑀦𑁆𑀤𑀫𑀸𑀦𑀸𑀢𑀺 𑀧𑀼𑀜𑁆𑀜𑁂𑀦 𑀲𑀤𑁆𑀥𑀺𑀁 𑀧𑀼𑀜𑁆𑀜𑀁 𑀖𑀝𑀬𑀫𑀸𑀦𑀸. 𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 𑀯𑀡𑁆𑀡𑀺𑀢𑀸𑀢𑀺 𑀏𑀯𑀭𑀽𑀧𑀸 𑀤𑀸𑀦𑀲𑀗𑁆𑀔𑀸𑀢𑀸 𑀤𑀓𑁆𑀔𑀺𑀡𑀸 𑀢𑀺𑀯𑀺𑀥𑀮𑁄𑀓𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸 𑀮𑁄𑀓𑀯𑀺𑀤𑀽𑀦𑀁 𑀩𑀼𑀤𑁆𑀥𑀸𑀦𑀁 𑀯𑀡𑁆𑀡𑀺𑀢𑀸, 𑀩𑀼𑀤𑁆𑀥𑁂𑀳𑀺 𑀧𑀲𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸𑀢𑀺 𑀬𑀜𑁆𑀜𑀁 𑀤𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑀸. 𑀯𑁂𑀤𑀚𑀸𑀢𑀸𑀢𑀺 𑀢𑀼𑀝𑁆𑀞𑀺𑀚𑀸𑀢𑀸.

𑁮. 𑀲𑀼𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀝𑁆𑀞𑀫𑁂 𑀲𑀜𑁆𑀜𑀢𑀸𑀦𑀦𑁆𑀢𑀺 𑀓𑀸𑀬𑀯𑀸𑀘𑀸𑀳𑀺 𑀲𑀁𑀬𑀢𑀸𑀦𑀁. 𑀧𑀭𑀤𑀢𑁆𑀢𑀪𑁄𑀚𑀺𑀦𑀦𑁆𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀧𑁂𑀦𑁆𑀢𑀸𑀦𑀁. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀦. 𑀲𑀓𑁆𑀓𑀘𑁆𑀘 𑀤𑀤𑀸𑀢𑀻𑀢𑀺 𑀲𑀳𑀢𑁆𑀣𑀸 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀤𑀸𑀢𑀺. 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀻𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀅𑀦𑀼𑀧𑁆𑀧𑀯𑁂𑀲𑁂𑀢𑀺 𑀤𑀤𑀸𑀢𑀺. 𑀬𑀲𑀯𑀸 𑀳𑁄𑀢𑀻𑀢𑀺 𑀫𑀳𑀸𑀧𑀭𑀺𑀯𑀸𑀭𑁄 𑀳𑁄𑀢𑀺. 𑀦𑀯𑀫𑀁 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁 𑀓𑀣𑀺𑀢𑀁. 𑀲𑁂𑀲𑀫𑁂𑀢𑁆𑀣 𑀢𑀸𑀤𑀺𑀲𑀫𑁂𑀯.

𑁧𑁦. 𑀕𑀺𑀳𑀺𑀲𑀸𑀫𑀻𑀘𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀤𑀲𑀫𑁂 𑀕𑀺𑀳𑀺𑀲𑀸𑀫𑀻𑀘𑀺𑀧𑀝𑀺𑀧𑀤𑀦𑁆𑀢𑀺 𑀕𑀺𑀳𑀻𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀢𑁆𑀢𑀺𑀁. 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀅𑀢𑀺𑀳𑀭𑀺𑀢𑁆𑀯𑀸 𑀤𑀸𑀢𑀼𑀓𑀸𑀫𑀢𑀸𑀬 𑀧𑀢𑀺𑀉𑀧𑀝𑁆𑀞𑀺𑀢𑁄 𑀳𑁄𑀢𑀺 𑀉𑀧𑀕𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀉𑀧𑀝𑁆𑀞𑀺𑀢𑀸𑀢𑀺 𑀉𑀧𑀝𑁆𑀞𑀸𑀬𑀓𑁄. 𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘𑀸𑀢𑀺 𑀬𑁂 𑀏𑀯𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀘 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀘 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺. 𑀲𑀕𑁆𑀕𑀜𑁆𑀘 𑀓𑀫𑀢𑀺𑀝𑁆𑀞𑀸𑀦𑀦𑁆𑀢𑀺 𑀢𑀸𑀤𑀺𑀲𑁄 𑀘 𑀪𑀤𑁆𑀤𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀕𑁆𑀕𑀝𑁆𑀞𑀸𑀦𑀁 𑀉𑀧𑀕𑀘𑁆𑀙𑀢𑀺. 𑀇𑀫𑁂𑀲𑀼 𑀘𑀢𑀽𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀆𑀕𑀸𑀭𑀺𑀬𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺 𑀯𑀝𑁆𑀝𑀢𑀺.

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄 𑀧𑀞𑀫𑁄.

(𑁭) 𑁨. 𑀧𑀢𑁆𑀢𑀓𑀫𑁆𑀫𑀯𑀕𑁆𑀕𑁄

𑁧. 𑀧𑀢𑁆𑀢𑀓𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀦𑀺𑀝𑁆𑀞𑀧𑀝𑀺𑀓𑁆𑀔𑁂𑀧𑁂𑀦 𑀇𑀝𑁆𑀞𑀸. 𑀫𑀦𑁂 𑀓𑀫𑀦𑁆𑀢𑀺 𑀧𑀯𑀺𑀲𑀦𑁆𑀢𑀻𑀢𑀺 𑀓𑀦𑁆𑀢𑀸. 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀺 𑀧𑀯𑀟𑁆𑀠𑁂𑀦𑁆𑀢𑀻𑀢𑀺 𑀫𑀦𑀸𑀧𑀸. 𑀤𑀼𑀮𑁆𑀮𑀪𑀸𑀢𑀺 𑀧𑀭𑀫𑀤𑀼𑀮𑁆𑀮𑀪𑀸. 𑀪𑁄𑀕𑀸𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀸 𑀭𑀽𑀧𑀸𑀤𑀬𑁄 𑀯𑀺𑀲𑀬𑀸. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑁂𑀦𑁂𑀯 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀦𑁆𑀢𑀼, 𑀫𑀸 𑀥𑀫𑁆𑀫𑀽𑀧𑀖𑀸𑀢𑀁 𑀓𑀢𑁆𑀯𑀸 𑀅𑀥𑀫𑁆𑀫𑁂𑀦𑀸𑀢𑀺. 𑀅𑀣𑀯𑀸 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀓𑀸𑀭𑀡𑁂𑀦, 𑀢𑁂𑀦 𑀢𑁂𑀦 𑀲𑁂𑀦𑀸𑀧𑀢𑀺𑀲𑁂𑀝𑁆𑀞𑀺𑀝𑁆𑀞𑀸𑀦𑀸𑀤𑀺𑀓𑀸𑀭𑀡𑁂𑀦 𑀲𑀤𑁆𑀥𑀺𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀬𑀲𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺. 𑀲𑀳 𑀜𑀸𑀢𑀻𑀪𑀻𑀢𑀺 𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁. 𑀲𑀳 𑀉𑀧𑀚𑁆𑀛𑀸𑀬𑁂𑀳𑀻𑀢𑀺 𑀲𑀼𑀔𑀤𑀼𑀓𑁆𑀔𑁂𑀲𑀼 𑀉𑀧𑀦𑀺𑀚𑁆𑀛𑀸𑀬𑀺𑀢𑀩𑁆𑀩𑀢𑁆𑀢𑀸 𑀉𑀧𑀚𑁆𑀛𑀸𑀬𑀲𑀗𑁆𑀔𑀸𑀢𑁂𑀳𑀺 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑁂𑀳𑀺 𑀲𑀤𑁆𑀥𑀺𑀁.

𑀅𑀓𑀺𑀘𑁆𑀘𑀁 𑀓𑀭𑁄𑀢𑀻𑀢𑀺 𑀅𑀓𑀸𑀢𑀩𑁆𑀩𑀁 𑀓𑀭𑁄𑀢𑀺. 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀢𑀻𑀢𑀺 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀺𑀘𑁆𑀘𑀁 𑀅𑀓𑀭𑁄𑀦𑁆𑀢𑁄 𑀢𑀁 𑀅𑀧𑀭𑀸𑀥𑁂𑀢𑀺 𑀦𑀸𑀫. 𑀥𑀁𑀲𑀢𑀻𑀢𑀺 𑀧𑀢𑀢𑀺 𑀧𑀭𑀺𑀳𑀸𑀬𑀢𑀺. 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀦𑁆𑀢𑀺 𑀅𑀪𑀺𑀚𑁆𑀛𑀸𑀲𑀗𑁆𑀔𑀸𑀢𑀁 𑀯𑀺𑀲𑀫𑀮𑁄𑀪𑀁. 𑀧𑀚𑀳𑀢𑀻𑀢𑀺 𑀦𑀼𑀤𑀢𑀺 𑀦𑀻𑀳𑀭𑀢𑀺. 𑀫𑀳𑀸𑀧𑀜𑁆𑀜𑁄𑀢𑀺 𑀫𑀳𑀦𑁆𑀢𑀧𑀜𑁆𑀜𑁄. 𑀧𑀼𑀣𑀼𑀧𑀜𑁆𑀜𑁄𑀢𑀺 𑀧𑀼𑀣𑀼𑀮𑀧𑀜𑁆𑀜𑁄. 𑀆𑀧𑀸𑀢𑀤𑀲𑁄𑀢𑀺 𑀢𑀁 𑀢𑀁 𑀅𑀢𑁆𑀣𑀁 𑀆𑀧𑀸𑀢𑁂𑀢𑀺 𑀢𑀫𑁂𑀯 𑀧𑀲𑁆𑀲𑀢𑀺, 𑀲𑀼𑀔𑀼𑀫𑀫𑁆𑀧𑀺𑀲𑁆𑀲 𑀅𑀢𑁆𑀣𑀚𑀸𑀢𑀁 𑀆𑀧𑀸𑀢𑀁 𑀆𑀕𑀘𑁆𑀙𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀻𑀢𑀺 𑀉𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑁂𑀦 𑀅𑀥𑀺𑀕𑀢𑁂𑀳𑀺. 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀻𑀢𑀺 𑀩𑀸𑀳𑀸𑀩𑀮𑁂𑀦 𑀧𑀭𑀺𑀘𑀺𑀢𑁂𑀳𑀺 𑀯𑀟𑁆𑀠𑀺𑀢𑁂𑀳𑀺. 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀻𑀢𑀺 𑀅𑀯𑀓𑁆𑀔𑀺𑀢𑁆𑀢𑀲𑁂𑀤𑁂𑀳𑀺, 𑀲𑁂𑀤𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀸𑀬𑀸𑀫𑁂𑀦 𑀧𑀬𑁄𑀕𑁂𑀦 𑀲𑀫𑀥𑀺𑀕𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀺𑀓𑁂𑀳𑀻𑀢𑀺 𑀥𑀫𑁆𑀫𑀬𑀼𑀢𑁆𑀢𑁂𑀳𑀺. 𑀥𑀫𑁆𑀫𑀮𑀤𑁆𑀥𑁂𑀳𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀅𑀓𑁄𑀧𑁂𑀢𑁆𑀯𑀸 𑀮𑀤𑁆𑀥𑁂𑀳𑀺. 𑀧𑀢𑁆𑀢𑀓𑀫𑁆𑀫𑀸𑀦𑀻𑀢𑀺 𑀬𑀼𑀢𑁆𑀢𑀓𑀫𑁆𑀫𑀸𑀦𑀺 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀸𑀦𑀺. 𑀲𑀼𑀔𑁂𑀢𑀻𑀢𑀺 𑀲𑀼𑀔𑀺𑀢𑀁 𑀓𑀭𑁄𑀢𑀺. 𑀧𑀻𑀡𑁂𑀢𑀻𑀢𑀺 𑀧𑀻𑀡𑀺𑀢𑀁 𑀩𑀮𑀲𑀫𑁆𑀧𑀦𑁆𑀦𑀁 𑀓𑀭𑁄𑀢𑀺. 𑀞𑀸𑀦𑀕𑀢𑀁 𑀳𑁄𑀢𑀻𑀢𑀺 𑀓𑀸𑀭𑀡𑀕𑀢𑀁 𑀳𑁄𑀢𑀺. 𑀓𑀺𑀁 𑀧𑀦 𑀢𑀦𑁆𑀢𑀺? 𑀘𑀢𑀽𑀲𑀼 𑀧𑀢𑁆𑀢𑀓𑀫𑁆𑀫𑁂𑀲𑀼 𑀏𑀓𑀁 𑀪𑁄𑀕𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀪𑁄𑀕𑀚𑀸𑀢𑀫𑁂𑀯 𑀞𑀸𑀦𑀕𑀢𑀁. 𑀧𑀢𑁆𑀢𑀕𑀢𑀦𑁆𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀝𑁆𑀞𑀸𑀦𑀕𑀢𑀁. 𑀆𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀦𑁆𑀢𑀺 𑀓𑀸𑀭𑀡𑁂𑀦𑁂𑀯 𑀧𑀭𑀺𑀪𑀼𑀢𑁆𑀢𑀁 𑀪𑁄𑀕𑀚𑀸𑀢𑀁 𑀳𑁄𑀢𑀺.

𑀧𑀭𑀺𑀬𑁄𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀧𑀺𑀤𑀳𑀺𑀢𑁆𑀯𑀸 𑀯𑀢𑁆𑀢𑀢𑀺. 𑀬𑀣𑀸 𑀅𑀕𑁆𑀕𑀺𑀆𑀤𑀻𑀳𑀺 𑀉𑀧𑁆𑀧𑀦𑁆𑀦𑀸𑀲𑀼 𑀆𑀧𑀤𑀸𑀲𑀼, 𑀏𑀯𑀁 𑀆𑀤𑀺𑀢𑁆𑀢𑀕𑁂𑀳𑀦𑀺𑀩𑁆𑀩𑀸𑀧𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀥𑀦𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀢𑀸𑀲𑀁 𑀆𑀧𑀤𑀸𑀦𑀁 𑀫𑀕𑁆𑀕𑀁 𑀧𑀺𑀤𑀳𑀢𑀺 𑀦𑀺𑀯𑀸𑀭𑁂𑀢𑀺. 𑀲𑁄𑀢𑁆𑀣𑀺𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀻𑀢𑀺 𑀦𑀺𑀭𑀼𑀧𑀤𑁆𑀤𑀯𑀁 𑀔𑁂𑀫𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺. 𑀜𑀸𑀢𑀺𑀩𑀮𑀺𑀦𑁆𑀢𑀺 𑀜𑀸𑀢𑀓𑀸𑀦𑀁 𑀩𑀮𑀺𑀁. 𑀅𑀢𑀺𑀣𑀺𑀩𑀮𑀺𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀩𑀮𑀺𑀁. 𑀧𑀼𑀩𑁆𑀩𑀧𑁂𑀢𑀩𑀮𑀺𑀦𑁆𑀢𑀺 𑀧𑀭𑀮𑁄𑀓𑀕𑀢𑀸𑀦𑀁 𑀜𑀸𑀢𑀓𑀸𑀦𑀁 𑀩𑀮𑀺𑀁. 𑀭𑀸𑀚𑀩𑀮𑀺𑀦𑁆𑀢𑀺 𑀭𑀜𑁆𑀜𑁄 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀭𑀸𑀚𑀩𑀮𑀺𑀁. 𑀤𑁂𑀯𑀢𑀸𑀩𑀮𑀺𑀦𑁆𑀢𑀺 𑀤𑁂𑀯𑀢𑀸𑀦𑀁 𑀓𑀢𑁆𑀢𑀩𑁆𑀩𑀩𑀮𑀺𑀁. 𑀲𑀩𑁆𑀩𑀫𑁂𑀢𑀁 𑀢𑁂𑀲𑀁 𑀢𑁂𑀲𑀁 𑀬𑀣𑀸𑀦𑀼𑀘𑁆𑀙𑀯𑀺𑀓𑀯𑀲𑁂𑀦 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀥𑀺𑀯𑀘𑀦𑀁.

𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑀜𑁆𑀘 𑀲𑀼𑀲𑀻𑀮𑀢𑀸𑀬 𑀘 𑀦𑀺𑀯𑀺𑀝𑁆𑀞𑀸. 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀻𑀢𑀺 𑀏𑀓𑀁 𑀅𑀢𑁆𑀢𑀦𑁄𑀯 𑀅𑀢𑁆𑀢𑀪𑀸𑀯𑀁 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀤𑀫𑁂𑀦𑁆𑀢𑀺. 𑀲𑀫𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀓𑀺𑀮𑁂𑀲𑀯𑀽𑀧𑀲𑀫𑀦𑁂𑀦 𑀲𑀫𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦𑁂𑀯 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀺. 𑀉𑀤𑁆𑀥𑀕𑁆𑀕𑀺𑀓𑀦𑁆𑀢𑀺𑀆𑀤𑀻𑀲𑀼 𑀉𑀧𑀭𑀽𑀧𑀭𑀺𑀪𑀽𑀫𑀻𑀲𑀼 𑀨𑀮𑀤𑀸𑀦𑀯𑀲𑁂𑀦 𑀉𑀤𑁆𑀥𑀫𑀕𑁆𑀕𑀫𑀲𑁆𑀲𑀸𑀢𑀺 𑀉𑀤𑁆𑀥𑀕𑁆𑀕𑀺𑀓𑀸. 𑀲𑀕𑁆𑀕𑀲𑁆𑀲 𑀳𑀺𑀢𑀸𑀢𑀺 𑀢𑀢𑁆𑀭𑀼𑀧𑀧𑀢𑁆𑀢𑀺𑀚𑀦𑀦𑀢𑁄 𑀲𑁄𑀯𑀕𑁆𑀕𑀺𑀓𑀸. 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀔𑁄𑀯 𑀯𑀺𑀧𑀸𑀓𑁄 𑀅𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀸. 𑀲𑀼𑀝𑁆𑀞𑀼 𑀅𑀕𑁆𑀕𑀸𑀦𑀁 𑀤𑀺𑀩𑁆𑀩𑀯𑀡𑁆𑀡𑀸𑀤𑀻𑀦𑀁 𑀤𑀲𑀦𑁆𑀦𑀁 𑀯𑀺𑀲𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀢𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸, 𑀏𑀯𑀭𑀽𑀧𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀭𑀺𑀬𑀥𑀫𑁆𑀫𑁂 𑀞𑀺𑀢𑁄𑀢𑀺 𑀧𑀜𑁆𑀘𑀲𑀻𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄. 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀲𑀕𑁆𑀕𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀢𑀺, 𑀢𑀢𑁆𑀣 𑀫𑁄𑀤𑀢𑀺. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀯𑀸 𑀳𑁄𑀦𑁆𑀢𑀼 𑀅𑀦𑀸𑀕𑀸𑀫𑀻 𑀯𑀸, 𑀲𑀩𑁆𑀩𑁂𑀲𑀁 𑀅𑀬𑀁 𑀧𑀝𑀺𑀧𑀤𑀸 𑀮𑀩𑁆𑀪𑀢𑁂𑀯𑀸𑀢𑀺.

𑁨. 𑀆𑀦𑀡𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑁂 𑀅𑀥𑀺𑀕𑀫𑀦𑀻𑀬𑀸𑀦𑀻𑀢𑀺 𑀧𑀢𑁆𑀢𑀩𑁆𑀩𑀸𑀦𑀺. 𑀓𑀸𑀫𑀪𑁄𑀕𑀺𑀦𑀸𑀢𑀺 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦. 𑀅𑀢𑁆𑀣𑀺𑀲𑀼𑀔𑀸𑀤𑀻𑀲𑀼 𑀅𑀢𑁆𑀣𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀅𑀢𑁆𑀣𑀺𑀲𑀼𑀔𑀁 𑀦𑀸𑀫. 𑀪𑁄𑀕𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀪𑁄𑀕𑀲𑀼𑀔𑀁 𑀦𑀸𑀫. 𑀅𑀦𑀡𑁄𑀲𑁆𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀆𑀦𑀡𑁆𑀬𑀲𑀼𑀔𑀁 𑀦𑀸𑀫. 𑀦𑀺𑀤𑁆𑀤𑁄𑀲𑁄 𑀅𑀦𑀯𑀚𑁆𑀚𑁄𑀲𑁆𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀅𑀦𑀯𑀚𑁆𑀚𑀲𑀼𑀔𑀁 𑀦𑀸𑀫.

𑀪𑀼𑀜𑁆𑀚𑀦𑁆𑀢𑀺 𑀪𑀼𑀜𑁆𑀚𑀫𑀸𑀦𑁄. 𑀧𑀜𑁆𑀜𑀸 𑀯𑀺𑀧𑀲𑁆𑀲𑀢𑀻𑀢𑀺 𑀧𑀜𑁆𑀜𑀸𑀬 𑀯𑀺𑀧𑀲𑁆𑀲𑀢𑀺. 𑀉𑀪𑁄 𑀪𑀸𑀕𑁂𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂, 𑀳𑁂𑀝𑁆𑀞𑀺𑀫𑀸𑀦𑀺 𑀢𑀻𑀡𑀺 𑀏𑀓𑀁 𑀓𑁄𑀝𑁆𑀞𑀸𑀲𑀁, 𑀅𑀦𑀯𑀚𑁆𑀚𑀲𑀼𑀔𑀁 𑀏𑀓𑀁 𑀓𑁄𑀝𑁆𑀞𑀸𑀲𑀦𑁆𑀢𑀺 𑀏𑀯𑀁 𑀧𑀜𑁆𑀜𑀸𑀬 𑀧𑀲𑁆𑀲𑀫𑀸𑀦𑁄 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀯𑀚𑁆𑀚𑀲𑀼𑀔𑀲𑁆𑀲𑁂𑀢𑀦𑁆𑀢𑀺 𑀏𑀢𑀁 𑀢𑀺𑀯𑀺𑀥𑀫𑁆𑀧𑀺 𑀲𑀼𑀔𑀁 𑀅𑀦𑀯𑀚𑁆𑀚𑀲𑀼𑀔𑀲𑁆𑀲 𑀲𑁄𑀴𑀲𑀺𑀁 𑀓𑀮𑀁 𑀦𑀸𑀕𑁆𑀖𑀢𑀻𑀢𑀺.

𑁩. 𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀢𑀢𑀺𑀬𑀁 𑀢𑀺𑀓𑀦𑀺𑀧𑀸𑀢𑁂 𑀯𑀡𑁆𑀡𑀺𑀢𑀫𑁂𑀯. 𑀲𑀧𑀼𑀩𑁆𑀩𑀤𑁂𑀯𑀢𑀸𑀦𑀻𑀢𑀺 𑀧𑀤𑀫𑀢𑁆𑀢𑀫𑁂𑀯 𑀏𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀘𑀢𑀼𑀢𑁆𑀣𑁂 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁫. 𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑁂 𑀭𑀽𑀧𑁂 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀭𑀽𑀧𑀧𑁆𑀧𑀫𑀸𑀡𑁄 𑀦𑀸𑀫. 𑀭𑀽𑀧𑀧𑁆𑀧𑀲𑀦𑁆𑀦𑁄𑀢𑀺 𑀢𑀲𑁆𑀲𑁂𑀯 𑀅𑀢𑁆𑀣𑀯𑀘𑀦𑀁. 𑀖𑁄𑀲𑁂 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀖𑁄𑀲𑀧𑁆𑀧𑀫𑀸𑀡𑁄 𑀦𑀸𑀫. 𑀘𑀻𑀯𑀭𑀮𑀽𑀔𑀧𑀢𑁆𑀢𑀮𑀽𑀔𑁂𑀲𑀼 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀮𑀽𑀔𑀧𑁆𑀧𑀫𑀸𑀡𑁄 𑀦𑀸𑀫. 𑀥𑀫𑁆𑀫𑁂 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑁄 𑀥𑀫𑁆𑀫𑀧𑁆𑀧𑀫𑀸𑀡𑁄 𑀦𑀸𑀫. 𑀇𑀢𑀭𑀸𑀦𑀺 𑀢𑁂𑀲𑀁𑀬𑁂𑀯 𑀅𑀢𑁆𑀣𑀯𑀘𑀦𑀸𑀦𑀺. 𑀲𑀩𑁆𑀩𑀲𑀢𑁆𑀢𑁂 𑀘 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀭𑀽𑀧𑀧𑁆𑀧𑀫𑀸𑀡𑀸, 𑀏𑀓𑁄 𑀦 𑀭𑀽𑀧𑀧𑁆𑀧𑀫𑀸𑀡𑁄. 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸 𑀖𑁄𑀲𑀧𑁆𑀧𑀫𑀸𑀡𑀸, 𑀏𑀓𑁄 𑀦 𑀖𑁄𑀲𑀧𑁆𑀧𑀫𑀸𑀡𑁄. 𑀤𑀲 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀦𑀯 𑀓𑁄𑀝𑁆𑀞𑀸𑀲𑀸 𑀮𑀽𑀔𑀧𑁆𑀧𑀫𑀸𑀡𑀸, 𑀏𑀓𑁄 𑀦 𑀮𑀽𑀔𑀧𑁆𑀧𑀫𑀸𑀡𑁄. 𑀲𑀢𑀲𑀳𑀲𑁆𑀲𑀁 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀦 𑀏𑀓𑁄 𑀓𑁄𑀝𑁆𑀞𑀸𑀲𑁄𑀯 𑀥𑀫𑁆𑀫𑀧𑁆𑀧𑀫𑀸𑀡𑁄, 𑀲𑁂𑀲𑀸 𑀦 𑀥𑀫𑁆𑀫𑀧𑁆𑀧𑀫𑀸𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑁂 𑀧𑀫𑀸𑀡𑀺𑀁𑀲𑀽𑀢𑀺 𑀬𑁂 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀸, 𑀢𑁂 𑀭𑀽𑀧𑁂 𑀧𑀫𑀸𑀡𑀺𑀁𑀲𑀼 𑀦𑀸𑀫, 𑀧𑀲𑀻𑀤𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀖𑁄𑀲𑁂𑀦 𑀅𑀦𑁆𑀯𑀕𑀽𑀢𑀺 𑀖𑁄𑀲𑁂𑀦 𑀅𑀦𑀼𑀕𑀢𑀸, 𑀖𑁄𑀲𑀧𑁆𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀭𑀸𑀕𑀯𑀲𑀽𑀧𑁂𑀢𑀸𑀢𑀺 𑀙𑀦𑁆𑀤𑀲𑁆𑀲 𑀘 𑀭𑀸𑀕𑀲𑁆𑀲 𑀘 𑀯𑀲𑀁 𑀉𑀧𑁂𑀢𑀸. 𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀻𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀢𑀲𑁆𑀲 𑀕𑀼𑀡𑀁 𑀦 𑀚𑀸𑀦𑀸𑀢𑀺. 𑀩𑀳𑀺𑀤𑁆𑀥𑀸 𑀘 𑀦 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀦 𑀧𑀲𑁆𑀲𑀢𑀺. 𑀲𑀫𑀦𑁆𑀢𑀸𑀯𑀭𑀡𑁄𑀢𑀺 𑀲𑀫𑀦𑁆𑀢𑀢𑁄 𑀆𑀯𑀸𑀭𑀺𑀢𑁄, 𑀲𑀫𑀦𑁆𑀢𑀸 𑀯𑀸 𑀆𑀯𑀭𑀡𑀫𑀲𑁆𑀲𑀸𑀢𑀺 𑀲𑀫𑀦𑁆𑀢𑀸𑀯𑀭𑀡𑁄. 𑀖𑁄𑀲𑁂𑀦 𑀯𑀼𑀬𑁆𑀳𑀢𑀻𑀢𑀺 𑀖𑁄𑀲𑁂𑀦 𑀦𑀺𑀬𑀢𑀺, 𑀦 𑀕𑀼𑀡𑁂𑀦. 𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀻𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀕𑀼𑀡𑀁 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀧𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀧𑀲𑁆𑀲𑀢𑀺. 𑀩𑀳𑀺𑀤𑁆𑀥𑀸 𑀨𑀮𑀤𑀲𑁆𑀲𑀸𑀯𑀻𑀢𑀺 𑀢𑀲𑁆𑀲 𑀧𑀭𑁂𑀳𑀺 𑀓𑀢𑀁 𑀩𑀳𑀺𑀤𑁆𑀥𑀸 𑀲𑀓𑁆𑀓𑀸𑀭𑀨𑀮𑀁 𑀧𑀲𑁆𑀲𑀦𑁆𑀢𑁄. 𑀯𑀺𑀦𑀻𑀯𑀭𑀡𑀤𑀲𑁆𑀲𑀸𑀯𑀻𑀢𑀺 𑀯𑀺𑀯𑀝𑀤𑀲𑁆𑀲𑀸𑀯𑀻. 𑀦 𑀲𑁄 𑀖𑁄𑀲𑁂𑀦 𑀯𑀼𑀬𑁆𑀳𑀢𑀻𑀢𑀺 𑀲𑁄 𑀖𑁄𑀲𑁂𑀦 𑀦 𑀦𑀻𑀬𑀢𑀺.

𑁬. 𑀲𑀭𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 𑀫𑁄𑀳𑀚𑀁 𑀘𑀸𑀧𑀯𑀺𑀤𑁆𑀤𑀲𑀽𑀢𑀺 𑀫𑁄𑀳𑀚𑀁 𑀘𑀸𑀧𑀺 𑀅𑀯𑀺𑀤𑁆𑀤𑀲𑀽 𑀅𑀧𑀡𑁆𑀟𑀺𑀢𑀸. 𑀲𑀯𑀺𑀖𑀸𑀢𑀦𑁆𑀢𑀺 𑀲𑀤𑀼𑀓𑁆𑀔𑀁. 𑀤𑀼𑀔𑀼𑀤𑁆𑀭𑀬𑀦𑁆𑀢𑀺 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀯𑀟𑁆𑀠𑀺𑀤𑀸𑀬𑀓𑀁. 𑀅𑀘𑀓𑁆𑀔𑀼𑀓𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀭𑀳𑀺𑀢𑀸. 𑀬𑀣𑀸 𑀥𑀫𑁆𑀫𑀸 𑀢𑀣𑀸 𑀲𑀦𑁆𑀢𑀸𑀢𑀺 𑀬𑀣𑀸 𑀭𑀸𑀕𑀸𑀤𑀬𑁄 𑀥𑀫𑁆𑀫𑀸 𑀞𑀺𑀢𑀸, 𑀢𑀣𑀸 𑀲𑀪𑀸𑀯𑀸𑀯 𑀳𑀼𑀢𑁆𑀯𑀸. 𑀦 𑀢𑀲𑁆𑀲𑁂𑀯𑀦𑁆𑀢𑀺 𑀫𑀜𑁆𑀜𑀭𑁂𑀢𑀺 𑀫𑀬𑀁 𑀏𑀯𑀁𑀲𑀦𑁆𑀢𑀸 𑀏𑀯𑀁𑀲𑀪𑀸𑀯𑀸𑀢𑀺 𑀢𑀲𑁆𑀲 𑀦 𑀫𑀜𑁆𑀜𑀭𑁂, 𑀦 𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁭. 𑀅𑀳𑀺𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀻𑀢𑀺 𑀇𑀤𑀁 𑀤𑀝𑁆𑀞𑀯𑀺𑀲𑀸𑀦𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂 𑀳𑀺 𑀓𑁂𑀘𑀺 𑀤𑀝𑁆𑀞𑀯𑀺𑀲𑀸, 𑀲𑀩𑁆𑀩𑁂𑀢𑁂 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀳𑀺𑀭𑀸𑀚𑀓𑀼𑀮𑀸𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀸𑀯 𑀳𑁄𑀦𑁆𑀢𑀺. 𑀅𑀢𑁆𑀢𑀕𑀼𑀢𑁆𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀕𑀼𑀢𑁆𑀢𑀢𑁆𑀣𑀸𑀬. 𑀅𑀢𑁆𑀢𑀭𑀓𑁆𑀔𑀸𑀬𑀸𑀢𑀺 𑀅𑀢𑁆𑀢𑀦𑁄 𑀭𑀓𑁆𑀔𑀡𑀢𑁆𑀣𑀸𑀬. 𑀅𑀢𑁆𑀢𑀧𑀭𑀺𑀢𑁆𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀸𑀡𑀢𑁆𑀣𑀸𑀬. 𑀧𑀭𑀺𑀢𑁆𑀢𑀁 𑀦𑀸𑀫 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸 𑀢𑀁 𑀧𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀭𑀽𑀧𑀓𑁆𑀔𑁂𑀳𑀻𑀢𑀺 𑀯𑀺𑀭𑀽𑀧𑀓𑁆𑀔𑀦𑀸𑀕𑀓𑀼𑀮𑁂𑀳𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀸𑀤𑀓𑁂𑀳𑀻𑀢𑀺 𑀅𑀧𑀸𑀤𑀓𑀲𑀢𑁆𑀢𑁂𑀳𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀑𑀤𑀺𑀲𑁆𑀲𑀓𑀫𑁂𑀢𑁆𑀢𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁄𑀤𑀺𑀲𑁆𑀲𑀓𑀫𑁂𑀢𑁆𑀢𑀁 𑀓𑀣𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀲𑀢𑁆𑀢𑀸 𑀧𑀸𑀡𑀸 𑀪𑀽𑀢𑀸𑀢𑀺 𑀲𑀩𑁆𑀩𑀸𑀦𑁂𑀢𑀸𑀦𑀺 𑀧𑀼𑀕𑁆𑀕𑀮𑀯𑁂𑀯𑀘𑀦𑀸𑀦𑁂𑀯. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀽𑀢𑀺 𑀪𑀤𑁆𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀦𑁆𑀢𑀼. 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸𑀢𑀺 𑀓𑀜𑁆𑀘𑀺 𑀲𑀢𑁆𑀢𑀁 𑀧𑀸𑀧𑀓𑀁 𑀮𑀸𑀫𑀓𑀁 𑀫𑀸 𑀆𑀕𑀘𑁆𑀙𑀢𑀼. 𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀕𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀅𑀧𑁆𑀧𑀫𑀸𑀡𑀸 𑀦𑀸𑀫. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀫𑀸𑀡𑀯𑀦𑁆𑀢𑀸𑀦𑀻𑀢𑀺 𑀕𑀼𑀡𑀧𑁆𑀧𑀫𑀸𑀡𑁂𑀦 𑀬𑀼𑀢𑁆𑀢𑀸𑀦𑀺. 𑀉𑀡𑁆𑀡𑀦𑀸𑀪𑀻𑀢𑀺 𑀮𑁄𑀫𑀲𑀦𑀸𑀪𑀺𑀓𑁄 𑀫𑀓𑁆𑀓𑀝𑀓𑁄. 𑀲𑀭𑀩𑀽𑀢𑀺 𑀖𑀭𑀕𑁄𑀮𑀺𑀓𑀸. 𑀓𑀢𑀸 𑀫𑁂 𑀭𑀓𑁆𑀔𑀸, 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸𑀢𑀺 𑀫𑀬𑀸 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀭𑀓𑁆𑀔𑀸 𑀘 𑀧𑀭𑀺𑀢𑁆𑀢𑀸𑀡𑀜𑁆𑀘 𑀓𑀢𑀁. 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀻𑀢𑀺 𑀲𑀩𑁆𑀩𑁂𑀧𑀺 𑀫𑁂 𑀓𑀢𑀧𑀭𑀺𑀢𑁆𑀢𑀸𑀡𑀸 𑀲𑀢𑁆𑀢𑀸 𑀅𑀧𑀕𑀘𑁆𑀙𑀦𑁆𑀢𑀼, 𑀫𑀸 𑀫𑀁 𑀯𑀺𑀳𑁂𑀞𑀬𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁮. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀅𑀝𑁆𑀞𑀫𑁂 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀤𑁂𑀯𑀤𑀢𑁆𑀢𑁂𑀢𑀺 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀘𑀺𑀭𑀧𑀓𑁆𑀓𑀦𑁆𑀢𑁂. 𑀧𑀭𑀸𑀪𑀯𑀸𑀬𑀸𑀢𑀺 𑀅𑀯𑀟𑁆𑀠𑀺𑀬𑀸 𑀯𑀺𑀦𑀸𑀲𑀸𑀬. 𑀅𑀲𑁆𑀲𑀢𑀭𑀻𑀢𑀺 𑀯𑀴𑀯𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀤𑁆𑀭𑀪𑀲𑁆𑀲 𑀚𑀸𑀢𑀸. 𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀻𑀢𑀺 𑀢𑀁 𑀅𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀺, 𑀲𑀸 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀺𑀚𑀸𑀬𑀺𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀻 𑀧𑀸𑀤𑁂𑀳𑀺 𑀪𑀽𑀫𑀺𑀁 𑀧𑀳𑀭𑀦𑁆𑀢𑀻 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀘𑀢𑀽𑀲𑀼 𑀔𑀸𑀡𑀽𑀲𑀼 𑀩𑀦𑁆𑀥𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀧𑁄𑀢𑀓𑀁 𑀦𑀻𑀳𑀭𑀦𑁆𑀢𑀺. 𑀲𑀸 𑀢𑀢𑁆𑀣𑁂𑀯 𑀫𑀭𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁯. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀓𑀺𑀮𑁂𑀲𑀸𑀦𑀁 𑀲𑀁𑀯𑀭𑀢𑁆𑀣𑀸𑀬 𑀧𑀯𑁂𑀲𑀦𑀤𑁆𑀯𑀸𑀭𑀁 𑀧𑀺𑀤𑀳𑀦𑀢𑁆𑀣𑀸𑀬 𑀧𑀥𑀸𑀦𑀁 𑀲𑀁𑀯𑀭𑀧𑁆𑀧𑀥𑀸𑀦𑀁, 𑀧𑀚𑀳𑀦𑀢𑁆𑀣𑀸𑀬 𑀧𑀥𑀸𑀦𑀁 𑀧𑀳𑀸𑀦𑀧𑁆𑀧𑀥𑀸𑀦𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀩𑁆𑀭𑀽𑀳𑀦𑀢𑁆𑀣𑀸𑀬 𑀯𑀟𑁆𑀠𑀦𑀢𑁆𑀣𑀸𑀬 𑀧𑀥𑀸𑀦𑀁 𑀪𑀸𑀯𑀦𑀸𑀧𑁆𑀧𑀥𑀸𑀦𑀁, 𑀢𑁂𑀲𑀁𑀬𑁂𑀯 𑀅𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀥𑀸𑀦𑀁 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁.

𑁧𑁦. 𑀅𑀥𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀻𑀢𑀺 𑀧𑁄𑀭𑀸𑀡𑀓𑀭𑀸𑀚𑀽𑀳𑀺 𑀞𑀧𑀺𑀢𑀁 𑀤𑀲𑀪𑀸𑀕𑀩𑀮𑀺𑀜𑁆𑀘𑁂𑀯 𑀅𑀧𑀭𑀸𑀥𑀸𑀦𑀼𑀭𑀽𑀧𑀜𑁆𑀘 𑀤𑀡𑁆𑀟𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀢𑀺𑀭𑁂𑀓𑀩𑀮𑀺𑀦𑁄 𑀘𑁂𑀯 𑀅𑀢𑀺𑀭𑁂𑀓𑀤𑀡𑁆𑀟𑀲𑁆𑀲 𑀘 𑀕𑀳𑀡𑁂𑀦 𑀅𑀥𑀫𑁆𑀫𑀺𑀓𑀸. 𑀭𑀸𑀚𑀸𑀬𑀼𑀢𑁆𑀢𑀸𑀢𑀺 𑀭𑀜𑁆𑀜𑁄 𑀚𑀦𑀧𑀤𑁂𑀲𑀼 𑀓𑀺𑀘𑁆𑀘𑀲𑀁𑀯𑀺𑀥𑀸𑀬𑀓𑀸 𑀆𑀬𑀼𑀢𑁆𑀢𑀓𑀧𑀼𑀭𑀺𑀲𑀸. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀢𑀺 𑀅𑀦𑁆𑀢𑁄𑀦𑀕𑀭𑀯𑀸𑀲𑀺𑀦𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀬𑁄. 𑀦𑁂𑀕𑀫𑀚𑀸𑀦𑀧𑀤𑀸𑀢𑀺 𑀦𑀺𑀕𑀫𑀯𑀸𑀲𑀺𑀦𑁄 𑀘𑁂𑀯 𑀚𑀦𑀧𑀤𑀯𑀸𑀲𑀺𑀦𑁄 𑀘. 𑀯𑀺𑀲𑀫𑀦𑁆𑀢𑀺 𑀯𑀺𑀲𑀫𑀸 𑀳𑀼𑀢𑁆𑀯𑀸, 𑀅𑀲𑀫𑀬𑁂𑀦 𑀯𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀲𑀫𑀸𑀢𑀺 𑀦 𑀲𑀫𑀸, 𑀅𑀢𑀺𑀣𑀤𑁆𑀥𑀸 𑀯𑀸 𑀅𑀢𑀺𑀫𑀼𑀤𑀼𑀓𑀸 𑀯𑀸𑀢𑀺 𑀅𑀢𑁆𑀣𑁄. 𑀅𑀧𑀜𑁆𑀚𑀲𑀸𑀢𑀺 𑀫𑀕𑁆𑀕𑀢𑁄 𑀅𑀧𑀕𑀢𑀸, 𑀉𑀫𑁆𑀫𑀕𑁆𑀕𑀕𑀸𑀫𑀺𑀦𑁄 𑀳𑀼𑀢𑁆𑀯𑀸 𑀯𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀯𑀢𑀸 𑀧𑀭𑀺𑀓𑀼𑀧𑀺𑀢𑀸 𑀪𑀯𑀦𑁆𑀢𑀻𑀢𑀺 𑀯𑀸𑀢𑁂𑀲𑀼 𑀳𑀺 𑀯𑀺𑀲𑀫𑁂𑀲𑀼 𑀅𑀧𑀜𑁆𑀚𑀲𑁂𑀲𑀼 𑀯𑀸𑀬𑀦𑁆𑀢𑁂𑀲𑀼 𑀭𑀼𑀓𑁆𑀔𑀸 𑀪𑀺𑀚𑁆𑀚𑀦𑁆𑀢𑀺, 𑀯𑀺𑀫𑀸𑀦𑀸𑀦𑀺 𑀪𑀺𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀤𑁂𑀯𑀢𑀸 𑀧𑀭𑀺𑀓𑀼𑀧𑀺𑀢𑀸 𑀪𑀯𑀦𑁆𑀢𑀺, 𑀢𑀸 𑀤𑁂𑀯𑀲𑁆𑀲 𑀲𑀫𑁆𑀫𑀸 𑀯𑀲𑁆𑀲𑀺𑀢𑀼𑀁 𑀦 𑀤𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀤𑁂𑀯𑁄 𑀦 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀻𑀢𑀺. 𑀯𑀺𑀲𑀫𑀧𑀸𑀓𑀸𑀦𑀺 𑀲𑀲𑁆𑀲𑀸𑀦𑀺 𑀪𑀯𑀦𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀕𑀩𑁆𑀪𑀻𑀦𑀺 𑀳𑁄𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀲𑀜𑁆𑀚𑀸𑀢𑀔𑀻𑀭𑀸𑀦𑀺, 𑀏𑀓𑀁 𑀞𑀸𑀦𑀁 𑀧𑀘𑁆𑀘𑀢𑀻𑀢𑀺 𑀏𑀯𑀁 𑀯𑀺𑀲𑀫𑀁 𑀧𑀸𑀓𑀸𑀦𑀺 𑀲𑀲𑁆𑀲𑀸𑀦𑀺 𑀪𑀯𑀦𑁆𑀢𑀺.

𑀲𑀫𑀁 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀬𑀣𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀫𑁂𑀯 𑀮𑀪𑀢𑀺, 𑀫𑀺𑀕𑀲𑀺𑀭𑀧𑀼𑀡𑁆𑀡𑀫𑀸 𑀫𑀺𑀕𑀲𑀺𑀭𑀦𑀓𑁆𑀔𑀢𑁆𑀢𑀫𑁂𑀯𑀸𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀫𑀸𑀲𑁂 𑀲𑀸 𑀲𑀸 𑀧𑀼𑀡𑁆𑀡𑀫𑀸 𑀢𑀁 𑀢𑀁 𑀦𑀓𑁆𑀔𑀢𑁆𑀢𑀫𑁂𑀯 𑀮𑀪𑀢𑀺, 𑀢𑀣𑀸 𑀲𑀫𑁆𑀫𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀲𑀫𑀁 𑀯𑀸𑀢𑀸 𑀯𑀸𑀬𑀦𑁆𑀢𑀻𑀢𑀺 𑀅𑀯𑀺𑀲𑀫𑀸 𑀳𑀼𑀢𑁆𑀯𑀸 𑀲𑀫𑀬𑀲𑁆𑀫𑀺𑀁𑀬𑁂𑀯 𑀯𑀸𑀬𑀦𑁆𑀢𑀺, 𑀙 𑀫𑀸𑀲𑁂 𑀉𑀢𑁆𑀢𑀭𑀸 𑀯𑀸𑀢𑀸, 𑀙 𑀫𑀸𑀲𑁂𑀤𑀓𑁆𑀔𑀺𑀡𑀸𑀢𑀺 𑀏𑀯𑀁 𑀢𑁂𑀲𑀁 𑀢𑁂𑀲𑀁 𑀚𑀦𑀧𑀤𑀸𑀦𑀁 𑀅𑀦𑀼𑀭𑀽𑀧𑁂 𑀲𑀫𑀬𑁂 𑀯𑀸𑀬𑀦𑁆𑀢𑀺. 𑀲𑀫𑀸𑀢𑀺 𑀲𑀫𑀧𑁆𑀧𑀯𑀢𑁆𑀢𑀺𑀦𑁄 𑀦𑀸𑀢𑀺𑀣𑀤𑁆𑀥𑀸 𑀦𑀸𑀢𑀺𑀫𑀼𑀤𑀽. 𑀧𑀜𑁆𑀚𑀲𑀸𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸, 𑀫𑀕𑁆𑀕𑁂𑀦𑁂𑀯 𑀯𑀸𑀬𑀦𑁆𑀢𑀺, 𑀦𑁄 𑀅𑀫𑀕𑁆𑀕𑁂𑀦𑀸𑀢𑀺 𑀅𑀢𑁆𑀣𑁄.

𑀚𑀺𑀫𑁆𑀳𑀁 𑀕𑀘𑁆𑀙𑀢𑀻𑀢𑀺 𑀓𑀼𑀝𑀺𑀮𑀁 𑀕𑀘𑁆𑀙𑀢𑀺, 𑀅𑀢𑀺𑀢𑁆𑀣𑀁 𑀕𑀡𑁆𑀳𑀸𑀢𑀺. 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀻𑀢𑀺 𑀦𑀬𑀢𑀻𑀢𑀺 𑀦𑁂𑀢𑁆𑀢𑀸. 𑀢𑀲𑁆𑀫𑀺𑀁 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀓𑀼𑀝𑀺𑀮𑀁 𑀕𑀦𑁆𑀢𑁆𑀯𑀸 𑀅𑀢𑀺𑀢𑁆𑀣𑀁 𑀕𑀡𑁆𑀳𑀦𑁆𑀢𑁂 𑀇𑀢𑀭𑀸𑀧𑀺 𑀅𑀢𑀺𑀢𑁆𑀣𑀫𑁂𑀯 𑀕𑀡𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀢𑁂𑀢𑀺𑀧𑀺 𑀧𑀸𑀞𑁄. 𑀤𑀼𑀓𑁆𑀔𑀁 𑀲𑁂𑀢𑀻𑀢𑀺 𑀤𑀼𑀓𑁆𑀔𑀁 𑀲𑀬𑀢𑀺, 𑀤𑀼𑀓𑁆𑀔𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀢𑁆𑀢𑀓𑀫𑁆𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁮) 𑁩. 𑀅𑀧𑀡𑁆𑀡𑀓𑀯𑀕𑁆𑀕𑁄

𑁧. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀧𑀡𑁆𑀡𑀓𑀧𑁆𑀧𑀝𑀺𑀧𑀤𑀦𑁆𑀢𑀺 𑀅𑀯𑀺𑀭𑀤𑁆𑀥𑀧𑁆𑀧𑀝𑀺𑀧𑀤𑀁. 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀻𑀢𑀺 𑀓𑀸𑀭𑀡𑀜𑁆𑀘𑀲𑁆𑀲 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀢𑁆𑀣𑀸𑀬. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁩. 𑀲𑀧𑁆𑀧𑀼𑀭𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀢𑀢𑀺𑀬𑁂 𑀅𑀯𑀡𑁆𑀡𑁄𑀢𑀺 𑀅𑀕𑀼𑀡𑁄. 𑀧𑀸𑀢𑀼 𑀓𑀭𑁄𑀢𑀻𑀢𑀺 𑀓𑀣𑁂𑀢𑀺, 𑀧𑀸𑀓𑀝𑀁 𑀓𑀭𑁄𑀢𑀺. 𑀧𑀜𑁆𑀳𑀸𑀪𑀺𑀦𑀻𑀢𑁄𑀢𑀺 𑀧𑀜𑁆𑀳𑀢𑁆𑀣𑀸𑀬 𑀅𑀪𑀺𑀦𑀻𑀢𑁄. 𑀅𑀳𑀸𑀧𑁂𑀢𑁆𑀯𑀸 𑀅𑀮𑀫𑁆𑀩𑀺𑀢𑁆𑀯𑀸𑀢𑀺 𑀅𑀧𑀭𑀺𑀳𑀻𑀦𑀁 𑀅𑀮𑀫𑁆𑀩𑀺𑀢𑀁 𑀓𑀢𑁆𑀯𑀸. 𑀏𑀢𑁆𑀣 𑀘 𑀅𑀲𑀧𑁆𑀧𑀼𑀭𑀺𑀲𑁄 𑀧𑀸𑀧𑀺𑀘𑁆𑀙𑀢𑀸𑀬 𑀅𑀢𑁆𑀢𑀦𑁄 𑀅𑀯𑀡𑁆𑀡𑀁 𑀙𑀸𑀤𑁂𑀢𑀺, 𑀲𑀧𑁆𑀧𑀼𑀭𑀺𑀲𑁄 𑀮𑀚𑁆𑀚𑀺𑀢𑀸𑀬 𑀅𑀢𑁆𑀢𑀦𑁄 𑀯𑀡𑁆𑀡𑀁. 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀲𑀧𑁆𑀧𑀼𑀭𑀺𑀲𑁄 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑁄 𑀲𑀁𑀯𑀸𑀲𑁂𑀦 𑀅𑀯𑀚𑀸𑀦𑀸𑀢𑀺, 𑀲𑀧𑁆𑀧𑀼𑀭𑀺𑀲𑁄 𑀧𑀦 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑀦𑁆𑀦𑀸𑀕𑀢𑁄 𑀲𑀁𑀯𑀸𑀲𑁂𑀦𑀸𑀧𑀺 𑀦𑀸𑀯𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀅𑀲𑀧𑁆𑀧𑀼𑀭𑀺𑀲𑀪𑀸𑀯𑀲𑀸𑀥𑀓𑀁 𑀅𑀥𑀼𑀦𑀸𑀕𑀢𑀯𑀥𑀼𑀓𑁄𑀧𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀥𑀼𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀥𑀼𑀓𑀸𑀢𑀺 𑀲𑀼𑀡𑀺𑀲𑀸. 𑀢𑀺𑀩𑁆𑀩𑀦𑁆𑀢𑀺 𑀩𑀳𑀮𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁪-𑁫. 𑀅𑀕𑁆𑀕𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁭𑁪-𑁭𑁫. 𑀘𑀢𑀼𑀢𑁆𑀣𑁂 𑀲𑀻𑀮𑀕𑁆𑀕𑀦𑁆𑀢𑀺 𑀅𑀕𑁆𑀕𑀧𑁆𑀧𑀢𑁆𑀢𑀁 𑀉𑀢𑁆𑀢𑀫𑀲𑀻𑀮𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀜𑁆𑀘𑀫𑁂 𑀭𑀽𑀧𑀕𑁆𑀕𑀦𑁆𑀢𑀺 𑀬𑀁 𑀭𑀽𑀧𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀇𑀤𑀁 𑀭𑀽𑀧𑀕𑁆𑀕𑀁 𑀦𑀸𑀫. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀞𑀺𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀢𑀁 𑀪𑀯𑀕𑁆𑀕𑀁 𑀦𑀸𑀫𑀸𑀢𑀺.

𑁬. 𑀓𑀼𑀲𑀺𑀦𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀉𑀧𑀯𑀢𑁆𑀢𑀦𑁂𑀢𑀺 𑀧𑀸𑀘𑀻𑀦𑀕𑀢𑀸𑀬 𑀲𑀸𑀮𑀧𑀦𑁆𑀢𑀺𑀬𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀸𑀬 𑀯𑁂𑀫𑀚𑁆𑀛𑀝𑁆𑀞𑀸𑀦𑁂. 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀸𑀮𑀭𑀼𑀓𑁆𑀔𑀸𑀦𑀁 𑀅𑀦𑁆𑀢𑀭𑁂. 𑀓𑀗𑁆𑀔𑀸𑀢𑀺 𑀤𑁆𑀯𑁂𑀴𑁆𑀳𑀓𑀁. 𑀯𑀺𑀫𑀢𑀻𑀢𑀺 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀫𑀢𑁆𑀣𑀢𑀸. ‘‘𑀩𑀼𑀤𑁆𑀥𑁄 𑀦𑀼 𑀔𑁄 𑀦 𑀩𑀼𑀤𑁆𑀥𑁄 𑀦𑀼 𑀔𑁄, 𑀥𑀫𑁆𑀫𑁄 𑀦𑀼 𑀔𑁄 𑀦 𑀥𑀫𑁆𑀫𑁄 𑀦𑀼 𑀔𑁄, 𑀲𑀗𑁆𑀖𑁄 𑀦𑀼 𑀔𑁄 𑀦 𑀲𑀗𑁆𑀖𑁄 𑀦𑀼 𑀔𑁄, 𑀫𑀕𑁆𑀕𑁄 𑀦𑀼 𑀔𑁄 𑀦 𑀫𑀕𑁆𑀕𑁄 𑀦𑀼 𑀔𑁄, 𑀧𑀝𑀺𑀧𑀤𑀸 𑀦𑀼 𑀔𑁄 𑀦 𑀧𑀝𑀺𑀧𑀤𑀸 𑀦𑀼 𑀔𑁄’’𑀢𑀺 𑀬𑀲𑁆𑀲 𑀲𑀁𑀲𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀯𑁄 𑀯𑀤𑀸𑀫𑀺 𑀧𑀼𑀘𑁆𑀙𑀣, 𑀪𑀺𑀓𑁆𑀔𑀯𑁂𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀲𑀢𑁆𑀣𑀼𑀕𑀸𑀭𑀯𑁂𑀦𑀧𑀺 𑀦 𑀧𑀼𑀘𑁆𑀙𑁂𑀬𑁆𑀬𑀸𑀣𑀸𑀢𑀺 ‘‘𑀫𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀫𑁆𑀳, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸𑀧𑀺 𑀦𑁄 𑀲𑀢𑁆𑀣𑀼 𑀲𑀦𑁆𑀢𑀓𑀸𑀯. 𑀢𑁂 𑀫𑀬𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀗𑁆𑀔𑀁 𑀅𑀓𑀢𑁆𑀯𑀸 𑀦 𑀅𑀭𑀳𑀸𑀫 𑀅𑀚𑁆𑀚 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀓𑀗𑁆𑀔𑀁 𑀓𑀸𑀢𑀼’’𑀦𑁆𑀢𑀺 𑀲𑀘𑁂 𑀏𑀯𑀁 𑀲𑀢𑁆𑀣𑀭𑀺 𑀕𑀸𑀭𑀯𑁂𑀦 𑀦 𑀧𑀼𑀘𑁆𑀙𑀣. 𑀲𑀳𑀸𑀬𑀓𑁄𑀧𑀺, 𑀪𑀺𑀓𑁆𑀔𑀯𑁂, 𑀲𑀳𑀸𑀬𑀓𑀲𑁆𑀲 𑀆𑀭𑁄𑀘𑁂𑀢𑀽𑀢𑀺 𑀢𑀼𑀫𑁆𑀳𑀸𑀓𑀁 𑀬𑁄 𑀬𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀤𑀺𑀝𑁆𑀞𑁄 𑀲𑀫𑁆𑀪𑀢𑁆𑀢𑁄, 𑀲𑁄 𑀢𑀲𑁆𑀲 𑀆𑀭𑁄𑀘𑁂𑀢𑀼, 𑀅𑀳𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀓𑀣𑁂𑀲𑁆𑀲𑀸𑀫𑀺, 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀦𑀺𑀓𑁆𑀓𑀗𑁆𑀔𑀸 𑀪𑀯𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀲𑀦𑁆𑀦𑁄𑀢𑀺 𑀏𑀯𑀁 𑀲𑀤𑁆𑀤𑀳𑀸𑀫𑀺 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀫𑁂𑀯𑀸𑀢𑀺 𑀦𑀺𑀓𑁆𑀓𑀗𑁆𑀔𑀪𑀸𑀯𑀧𑀘𑁆𑀘𑀓𑁆𑀔𑀓𑀭𑀡𑀜𑀸𑀡𑀁𑀬𑁂𑀯 𑀏𑀢𑁆𑀣 𑀢𑀣𑀸𑀕𑀢𑀲𑁆𑀲, 𑀦 𑀲𑀤𑁆𑀥𑀸𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀜𑁆𑀳𑀺, 𑀆𑀦𑀦𑁆𑀤𑀸𑀢𑀺 𑀇𑀫𑁂𑀲𑀁 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀺𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁. 𑀬𑁄 𑀧𑀘𑁆𑀙𑀺𑀫𑀓𑁄𑀢𑀺 𑀬𑁄 𑀕𑀼𑀡𑀯𑀲𑁂𑀦 𑀧𑀘𑁆𑀙𑀺𑀫𑀓𑁄, 𑀆𑀦𑀦𑁆𑀤𑀢𑁆𑀣𑁂𑀭𑀁𑀬𑁂𑀯 𑀲𑀦𑁆𑀥𑀸𑀬𑀸𑀳.

𑁭. 𑀅𑀘𑀺𑀦𑁆𑀢𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀢𑀫𑁂 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀻𑀢𑀺 𑀘𑀺𑀦𑁆𑀢𑁂𑀢𑀼𑀁 𑀅𑀬𑀼𑀢𑁆𑀢𑀸𑀦𑀺. 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀅𑀘𑀺𑀦𑁆𑀢𑁂𑀬𑁆𑀬𑀢𑁆𑀢𑀸𑀬𑁂𑀯 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺. 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄𑀢𑀺 𑀬𑀸𑀦𑀺 𑀓𑀸𑀭𑀡𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄. 𑀉𑀫𑁆𑀫𑀸𑀤𑀲𑁆𑀲𑀸𑀢𑀺 𑀉𑀫𑁆𑀫𑀢𑁆𑀢𑀓𑀪𑀸𑀯𑀲𑁆𑀲. 𑀯𑀺𑀖𑀸𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑁆𑀲. 𑀩𑀼𑀤𑁆𑀥𑀯𑀺𑀲𑀬𑁄𑀢𑀺 𑀩𑀼𑀤𑁆𑀥𑀸𑀦𑀁 𑀯𑀺𑀲𑀬𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀧𑀯𑀢𑁆𑀢𑀺 𑀘 𑀆𑀦𑀼𑀪𑀸𑀯𑁄 𑀘. 𑀛𑀸𑀦𑀯𑀺𑀲𑀬𑁄𑀢𑀺 𑀅𑀪𑀺𑀜𑁆𑀜𑀸𑀛𑀸𑀦𑀯𑀺𑀲𑀬𑁄. 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄. 𑀮𑁄𑀓𑀘𑀺𑀦𑁆𑀢𑀸𑀢𑀺 ‘‘𑀓𑁂𑀦 𑀦𑀼 𑀔𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀢𑀸, 𑀓𑁂𑀦 𑀫𑀳𑀸𑀧𑀣𑀯𑀻, 𑀓𑁂𑀦 𑀫𑀳𑀸𑀲𑀫𑀼𑀤𑁆𑀤𑁄, 𑀓𑁂𑀦 𑀲𑀢𑁆𑀢𑀸 𑀉𑀧𑁆𑀧𑀸𑀤𑀺𑀢𑀸, 𑀓𑁂𑀦 𑀧𑀩𑁆𑀩𑀢𑀸, 𑀓𑁂𑀦 𑀅𑀫𑁆𑀩𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄’’𑀢𑀺 𑀏𑀯𑀭𑀽𑀧𑀸 𑀮𑁄𑀓𑀘𑀺𑀦𑁆𑀢𑀸.

𑁮. 𑀤𑀓𑁆𑀔𑀺𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀅𑀝𑁆𑀞𑀫𑁂 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑁄𑀢𑀺 𑀤𑀸𑀦𑀲𑀗𑁆𑀔𑀸𑀢𑀸𑀬 𑀤𑀓𑁆𑀔𑀺𑀡𑀸𑀬 𑀯𑀺𑀲𑀼𑀚𑁆𑀛𑀦𑀓𑀸𑀭𑀡𑀸𑀦𑀺. 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀫𑀳𑀧𑁆𑀨𑀮𑀪𑀸𑀯𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀫𑀳𑀧𑁆𑀨𑀮𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀲𑀼𑀘𑀺𑀥𑀫𑁆𑀫𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄. 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸 𑀓𑀣𑁂𑀢𑀩𑁆𑀩𑁄. 𑀲𑁄 𑀳𑀺 𑀚𑀽𑀚𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀭𑀓𑁂 𑀤𑀢𑁆𑀯𑀸 𑀫𑀳𑀸𑀧𑀣𑀯𑀺𑀁 𑀓𑀫𑁆𑀧𑁂𑀲𑀺. 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀓𑀮𑁆𑀬𑀸𑀡𑀻𑀦𑀤𑀻𑀫𑀼𑀔𑀤𑁆𑀯𑀸𑀭𑀯𑀸𑀲𑀻 𑀓𑁂𑀯𑀝𑁆𑀝𑁄 𑀓𑀣𑁂𑀢𑀩𑁆𑀩𑁄. 𑀲𑁄 𑀓𑀺𑀭 𑀤𑀻𑀖𑀲𑀼𑀫𑀢𑁆𑀣𑁂𑀭𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 ‘‘𑀅𑀬𑁆𑀬𑀲𑁆𑀲 𑀫𑀁 𑀤𑀻𑀖𑀲𑀼𑀫𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁄 𑀉𑀤𑁆𑀥𑀭𑀢𑀻’’𑀢𑀺 𑀆𑀳. 𑀦𑁂𑀯 𑀤𑀸𑀬𑀓𑀢𑁄𑀢𑀺 𑀏𑀢𑁆𑀣 𑀯𑀟𑁆𑀠𑀫𑀸𑀦𑀯𑀸𑀲𑀻 𑀮𑀼𑀤𑁆𑀤𑀓𑁄 𑀓𑀣𑁂𑀢𑀩𑁆𑀩𑁄. 𑀲𑁄 𑀓𑀺𑀭 𑀧𑁂𑀢𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑁄 𑀏𑀓𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲𑁂𑀯 𑀢𑀬𑁄 𑀯𑀸𑀭𑁂 𑀅𑀤𑀸𑀲𑀺. 𑀢𑀢𑀺𑀬𑀯𑀸𑀭𑁂 ‘‘𑀅𑀫𑀦𑀼𑀲𑁆𑀲𑁄 𑀤𑀼𑀲𑁆𑀲𑀻𑀮𑁄 𑀫𑀁 𑀯𑀺𑀮𑀼𑀫𑁆𑀧𑀢𑀻’’𑀢𑀺 𑀯𑀺𑀭𑀯𑀺. 𑀏𑀓𑀲𑁆𑀲 𑀲𑀻𑀮𑀯𑀢𑁄 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀧𑀸𑀧𑀺𑀢𑀓𑀸𑀮𑁂𑀬𑁂𑀯𑀲𑁆𑀲 𑀧𑀸𑀧𑀼𑀡𑀺. 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘𑀸𑀢𑀺 𑀏𑀢𑁆𑀣 𑀅𑀲𑀤𑀺𑀲𑀤𑀸𑀦𑀁 𑀓𑀣𑁂𑀢𑀩𑁆𑀩𑀦𑁆𑀢𑀺.

𑁯. 𑀯𑀡𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀦𑀯𑀫𑁂 𑀢𑀸𑀤𑀺𑀲𑀸 𑀯𑀸𑀢𑀺 𑀢𑀁𑀲𑀤𑀺𑀲𑀸𑀯 𑀢𑀁𑀲𑀭𑀺𑀓𑁆𑀔𑀓𑀸𑀯. 𑀙𑁂𑀤𑀕𑀸𑀫𑀺𑀦𑀻 𑀳𑁄𑀢𑀻𑀢𑀺 𑀙𑁂𑀤𑀁 𑀕𑀘𑁆𑀙𑀢𑀺. 𑀬𑀁 𑀧𑀢𑁆𑀣𑀺𑀢𑀁, 𑀢𑀁 𑀲𑀩𑁆𑀩𑀁 𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦 𑀬𑀣𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀻𑀢𑀺 𑀬𑀣𑀸𑀚𑁆𑀛𑀸𑀲𑀬𑀸 𑀦 𑀳𑁄𑀢𑀺. 𑀧𑀭𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀻𑀢𑀺 𑀧𑀭𑀚𑁆𑀛𑀸𑀲𑀬𑀸 𑀅𑀚𑁆𑀛𑀸𑀲𑀬𑀢𑁄 𑀅𑀥𑀺𑀓𑀢𑀭𑀨𑀮𑀸 𑀳𑁄𑀢𑀺. 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀏𑀢𑁆𑀣 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀢𑀸𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀤𑀢𑀼, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀦𑀸𑀢𑀺, 𑀪𑀦𑁆𑀢𑁂, 𑀘𑀢𑀼𑀩𑁆𑀩𑀺𑀥𑁂𑀦 𑀘𑀻𑀯𑀭𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀯𑀤𑁂𑀬𑁆𑀬𑀸𑀲𑀻𑀢𑀺 𑀏𑀯𑀁 𑀧𑀯𑀸𑀭𑁂𑀢𑀺 𑀦𑀺𑀫𑀦𑁆𑀢𑁂𑀢𑀺. 𑀬𑁂𑀦 𑀧𑀯𑀸𑀭𑁂𑀢𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀢𑁆𑀢𑀓𑁂𑀦 𑀧𑀯𑀸𑀭𑁂𑀢𑀺. 𑀢𑀁 𑀦 𑀤𑁂𑀢𑀻𑀢𑀺 𑀢𑀁 𑀲𑀩𑁆𑀩𑀲𑁄𑀯 𑀦 𑀤𑁂𑀢𑀺. 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀻𑀢𑀺 𑀬𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑁄, 𑀏𑀯𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀳𑀸𑀧𑁂𑀢𑁆𑀯𑀸 𑀅𑀧𑁆𑀧𑀓𑀁 𑀤𑁂𑀢𑀺. 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀻𑀢𑀺 𑀬𑀢𑁆𑀢𑀓𑀁 𑀲𑁄 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀫𑁂𑀯 𑀤𑁂𑀢𑀺. 𑀧𑀭𑀸𑀥𑀺𑀧𑁆𑀧𑀸𑀬𑀁 𑀤𑁂𑀢𑀻𑀢𑀺 𑀅𑀧𑁆𑀧𑀓𑀁 𑀧𑀯𑀸𑀭𑁂𑀢𑁆𑀯𑀸 𑀅𑀯𑀢𑁆𑀣𑀭𑀺𑀢𑁆𑀯𑀸 𑀩𑀳𑀼𑀁 𑀤𑁂𑀢𑀺.

𑁧𑁦. 𑀓𑀫𑁆𑀩𑁄𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀤𑀲𑀫𑁂 𑀦𑁂𑀯 𑀲𑀪𑀸𑀬𑀁 𑀦𑀺𑀲𑀻𑀤𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑀓𑀭𑀡𑀢𑁆𑀣𑀁 𑀯𑀺𑀦𑀺𑀘𑁆𑀙𑀬𑀲𑀪𑀸𑀬𑀁 𑀦𑁂𑀯 𑀦𑀺𑀲𑀻𑀤𑀢𑀺. 𑀦 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀢𑀻𑀢𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀫𑀳𑀸𑀓𑀫𑁆𑀫𑀦𑁆𑀢𑀁 𑀦𑀧𑁆𑀧𑀬𑁄𑀚𑁂𑀢𑀺. 𑀦 𑀓𑀫𑁆𑀩𑁄𑀚𑀁 𑀕𑀘𑁆𑀙𑀢𑀻𑀢𑀺 𑀪𑁄𑀕𑁂 𑀲𑀫𑁆𑀪𑀭𑀡𑀢𑁆𑀣𑀸𑀬 𑀓𑀫𑁆𑀩𑁄𑀚𑀭𑀝𑁆𑀞𑀁 𑀦 𑀕𑀘𑁆𑀙𑀢𑀺. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁, 𑀬𑀁 𑀓𑀺𑀜𑁆𑀘𑀺 𑀢𑀺𑀭𑁄𑀭𑀝𑁆𑀞𑀁 𑀦 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑁄𑀥𑀦𑁄𑀢𑀺𑀆𑀤𑀻𑀲𑀼 𑀓𑁄𑀥𑀦𑀢𑀸𑀬 𑀓𑁄𑀥𑀧𑀭𑀺𑀬𑀼𑀝𑁆𑀞𑀺𑀢𑁄 𑀅𑀢𑁆𑀣𑀸𑀦𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀇𑀲𑁆𑀲𑀼𑀓𑀺𑀢𑀸𑀬 𑀧𑀭𑀲𑀫𑁆𑀧𑀢𑁆𑀢𑀺𑀁 𑀦 𑀲𑀳𑀢𑀺, 𑀫𑀘𑁆𑀙𑀭𑀺𑀢𑀸𑀬 𑀥𑀦𑀁 𑀤𑀢𑁆𑀯𑀸 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀺𑀧𑁆𑀧𑀜𑁆𑀜𑀢𑀸𑀬 𑀓𑀺𑀘𑁆𑀘𑀁 𑀲𑀁𑀯𑀺𑀥𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀏𑀢𑀸𑀦𑀺 𑀲𑀪𑀸𑀦𑀺𑀲𑀻𑀤𑀦𑀸𑀤𑀻𑀦𑀺 𑀦 𑀓𑀭𑁄𑀢𑀻𑀢𑀺.

𑀅𑀧𑀡𑁆𑀡𑀓𑀯𑀕𑁆𑀕𑁄 𑀢𑀢𑀺𑀬𑁄.

(𑁯) 𑁪. 𑀫𑀘𑀮𑀯𑀕𑁆𑀕𑁄

𑁧-𑁫. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀯𑀡𑁆𑀡𑀦𑀸

𑁮𑁧-𑁮𑁫. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀧𑀜𑁆𑀘𑀫𑁂 ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀢𑀫𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀦𑀺𑀭𑀬𑀢𑀫𑀽𑀧𑀕𑀫𑀦𑀢𑁄 𑀢𑀫𑀧𑀭𑀸𑀬𑀡𑁄. 𑀇𑀢𑀺 𑀉𑀪𑀬𑁂𑀦𑀧𑀺 𑀔𑀦𑁆𑀥𑀢𑀫𑁄𑀯 𑀓𑀣𑀺𑀢𑁄 𑀳𑁄𑀢𑀺. ‘‘𑀅𑀟𑁆𑀠𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀚𑁄𑀢𑀺𑀦𑀸 𑀬𑀼𑀢𑁆𑀢𑀢𑁄 𑀚𑁄𑀢𑀺, 𑀆𑀮𑁄𑀓𑀪𑀽𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀲𑀕𑁆𑀕𑀼𑀧𑁆𑀧𑀢𑁆𑀢𑀺𑀚𑁄𑀢𑀺𑀪𑀸𑀯𑀽𑀧𑀕𑀫𑀦𑀢𑁄 𑀚𑁄𑀢𑀺𑀧𑀭𑀸𑀬𑀡𑁄. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑁂𑀧𑀺 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸.

𑀯𑁂𑀦𑀓𑀼𑀮𑁂𑀢𑀺 𑀯𑀺𑀮𑀻𑀯𑀓𑀸𑀭𑀓𑀼𑀮𑁂. 𑀦𑁂𑀲𑀸𑀤𑀓𑀼𑀮𑁂𑀢𑀺 𑀫𑀺𑀕𑀮𑀼𑀤𑁆𑀤𑀓𑀸𑀤𑀻𑀦𑀁 𑀓𑀼𑀮𑁂. 𑀭𑀣𑀓𑀸𑀭𑀓𑀼𑀮𑁂𑀢𑀺 𑀘𑀫𑁆𑀫𑀓𑀸𑀭𑀓𑀼𑀮𑁂. 𑀧𑀼𑀓𑁆𑀓𑀼𑀲𑀓𑀼𑀮𑁂𑀢𑀺 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂. 𑀓𑀲𑀺𑀭𑀯𑀼𑀢𑁆𑀢𑀺𑀓𑁂𑀢𑀺 𑀤𑀼𑀓𑁆𑀔𑀯𑀼𑀢𑁆𑀢𑀺𑀓𑁂. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀛𑀸𑀫𑀔𑀸𑀡𑀼𑀯𑀡𑁆𑀡𑁄. 𑀤𑀼𑀤𑁆𑀤𑀲𑀺𑀓𑁄𑀢𑀺 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑀤𑀲𑁆𑀲𑀦𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄. 𑀓𑀸𑀡𑁄𑀢𑀺 𑀏𑀓𑀘𑁆𑀙𑀺𑀓𑀸𑀡𑁄 𑀯𑀸 𑀉𑀪𑀬𑀘𑁆𑀙𑀺𑀓𑀸𑀡𑁄 𑀯𑀸. 𑀓𑀼𑀡𑀻𑀢𑀺 𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸. 𑀔𑀜𑁆𑀚𑁄𑀢𑀺 𑀏𑀓𑀧𑀸𑀤𑀔𑀜𑁆𑀚𑁄 𑀯𑀸 𑀉𑀪𑀬𑀧𑀸𑀤𑀔𑀜𑁆𑀚𑁄 𑀯𑀸. 𑀧𑀓𑁆𑀔𑀳𑀢𑁄𑀢𑀺 𑀳𑀢𑀧𑀓𑁆𑀔𑁄 𑀧𑀻𑀞𑀲𑀧𑁆𑀧𑀻. 𑀧𑀤𑀻𑀧𑁂𑀬𑁆𑀬𑀲𑁆𑀲𑀸𑀢𑀺 𑀢𑁂𑀮𑀓𑀧𑀮𑁆𑀮𑀸𑀤𑀺𑀦𑁄 𑀤𑀻𑀧𑀉𑀧𑀓𑀭𑀡𑀲𑁆𑀲. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀏𑀓𑁄 𑀧𑀼𑀕𑁆𑀕𑀮𑁄 𑀩𑀳𑀺𑀤𑁆𑀥𑀸 𑀆𑀮𑁄𑀓𑀁 𑀅𑀤𑀺𑀲𑁆𑀯𑀸 𑀫𑀸𑀢𑀼 𑀓𑀼𑀘𑁆𑀙𑀺𑀫𑁆𑀳𑀺𑀬𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀲𑀓𑀮𑀫𑁆𑀧𑀺 𑀓𑀧𑁆𑀧𑀁 𑀲𑀁𑀲𑀭𑀢𑀺. 𑀲𑁄𑀧𑀺 𑀢𑀫𑁄𑀢𑀫𑀧𑀭𑀸𑀬𑀡𑁄𑀯. 𑀲𑁄 𑀧𑀦 𑀓𑀼𑀳𑀓𑀧𑀼𑀕𑁆𑀕𑀮𑁄 𑀪𑀯𑁂𑀬𑁆𑀬. 𑀓𑀼𑀳𑀓𑀲𑁆𑀲 𑀳𑀺 𑀏𑀯𑀭𑀽𑀧𑀸 𑀦𑀺𑀧𑁆𑀨𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀦𑀻𑀘𑁂 𑀓𑀼𑀮𑁂’’𑀢𑀺𑀆𑀤𑀻𑀳𑀺 𑀆𑀕𑀫𑀦𑀯𑀺𑀧𑀢𑁆𑀢𑀺 𑀘𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀺 𑀘 𑀤𑀲𑁆𑀲𑀺𑀢𑀸. ‘‘𑀤𑀮𑀺𑀤𑁆𑀤𑁂’’𑀢𑀺𑀆𑀤𑀻𑀳𑀺 𑀧𑀯𑀢𑁆𑀢𑀧𑀘𑁆𑀘𑀬𑀯𑀺𑀧𑀢𑁆𑀢𑀺, ‘‘𑀓𑀲𑀺𑀭𑀯𑀼𑀢𑁆𑀢𑀺𑀓𑁂’’𑀢𑀺𑀆𑀤𑀻𑀳𑀺 𑀆𑀚𑀻𑀯𑀼𑀧𑀸𑀬𑀯𑀺𑀧𑀢𑁆𑀢𑀺, ‘‘𑀤𑀼𑀩𑁆𑀩𑀡𑁆𑀡𑁄’’𑀢𑀺𑀆𑀤𑀻𑀳𑀺 𑀅𑀢𑁆𑀢𑀪𑀸𑀯𑀯𑀺𑀧𑀢𑁆𑀢𑀺, ‘‘𑀩𑀳𑁆𑀯𑀸𑀩𑀸𑀥𑁄’’𑀢𑀺𑀆𑀤𑀻𑀳𑀺 𑀤𑀼𑀓𑁆𑀔𑀓𑀸𑀭𑀡𑀲𑀫𑀸𑀬𑁄𑀕𑁄, ‘‘𑀦 𑀮𑀸𑀪𑀻’’𑀢𑀺𑀆𑀤𑀻𑀳𑀺 𑀲𑀼𑀔𑀓𑀸𑀭𑀡𑀯𑀺𑀧𑀢𑁆𑀢𑀺 𑀘𑁂𑀯 𑀉𑀧𑀪𑁄𑀕𑀯𑀺𑀧𑀢𑁆𑀢𑀺 𑀘, ‘‘𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢’’𑀦𑁆𑀢𑀺𑀆𑀤𑀻𑀳𑀺 𑀢𑀫𑀧𑀭𑀸𑀬𑀡𑀪𑀸𑀯𑀲𑁆𑀲 𑀓𑀸𑀭𑀡𑀲𑀫𑀸𑀬𑁄𑀕𑁄, ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺𑀆𑀤𑀻𑀳𑀺 𑀲𑀫𑁆𑀧𑀭𑀸𑀬𑀺𑀓𑀢𑀫𑀽𑀧𑀕𑀫𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁬. 𑀑𑀡𑀢𑁄𑀡𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀙𑀝𑁆𑀞𑁂 𑀑𑀡𑀢𑁄𑀡𑀢𑁄𑀢𑀺 𑀇𑀤𑀸𑀦𑀺 𑀦𑀻𑀘𑀓𑁄 𑀆𑀬𑀢𑀺𑀫𑁆𑀧𑀺 𑀦𑀻𑀘𑀓𑁄 𑀪𑀯𑀺𑀲𑁆𑀲𑀢𑀺. 𑀑𑀡𑀢𑀼𑀡𑁆𑀡𑀢𑁄𑀢𑀺 𑀇𑀤𑀸𑀦𑀺 𑀦𑀻𑀘𑁄 𑀆𑀬𑀢𑀺𑀁 𑀉𑀘𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀉𑀡𑁆𑀡𑀢𑁄𑀡𑀢𑁄𑀢𑀺 𑀇𑀤𑀸𑀦𑀺 𑀉𑀘𑁆𑀘𑁄 𑀆𑀬𑀢𑀺𑀁 𑀦𑀻𑀘𑁄 𑀪𑀯𑀺𑀲𑁆𑀲𑀢𑀺. 𑀉𑀡𑁆𑀡𑀢𑀼𑀡𑁆𑀡𑀢𑁄𑀢𑀺 𑀇𑀤𑀸𑀦𑀺 𑀉𑀘𑁆𑀘𑁄 𑀆𑀬𑀢𑀺𑀫𑁆𑀧𑀺 𑀉𑀘𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦 𑀦𑁂𑀲𑀁 𑀧𑀼𑀭𑀺𑀫𑀲𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁭. 𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀲𑀢𑁆𑀢𑀫𑁂 𑀲𑀫𑀡𑀫𑀘𑀮𑁄𑀢𑀺 𑀲𑀫𑀡𑀅𑀘𑀮𑁄, 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀦𑀺𑀘𑁆𑀘𑀮𑀲𑀫𑀡𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀢𑁆𑀢𑀯𑀺𑀥𑀫𑁆𑀧𑀺 𑀲𑁂𑀔𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀲𑀸𑀲𑀦𑁂 𑀫𑀽𑀮𑀚𑀸𑀢𑀸𑀬 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀅𑀘𑀮𑁄 𑀦𑀸𑀫. 𑀲𑀫𑀡𑀧𑀼𑀡𑁆𑀟𑀭𑀻𑀓𑁄𑀢𑀺 𑀧𑀼𑀡𑁆𑀟𑀭𑀻𑀓𑀲𑀤𑀺𑀲𑁄 𑀲𑀫𑀡𑁄. 𑀧𑀼𑀡𑁆𑀟𑀭𑀻𑀓𑀁 𑀦𑀸𑀫 𑀊𑀦𑀲𑀢𑀧𑀢𑁆𑀢𑀁 𑀲𑀭𑁄𑀭𑀼𑀳𑀁. 𑀇𑀫𑀺𑀦𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀛𑀸𑀦𑀸𑀪𑀺𑀜𑁆𑀜𑀸𑀦𑀁 𑀅𑀪𑀸𑀯𑁂𑀦 𑀅𑀧𑀭𑀺𑀧𑀼𑀡𑁆𑀡𑀕𑀼𑀡𑀢𑁆𑀢𑀸 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀦𑀸𑀫 𑀳𑁄𑀢𑀺. 𑀲𑀫𑀡𑀧𑀤𑀼𑀫𑁄𑀢𑀺 𑀧𑀤𑀼𑀫𑀲𑀤𑀺𑀲𑁄 𑀲𑀫𑀡𑁄. 𑀧𑀤𑀼𑀫𑀁 𑀦𑀸𑀫 𑀧𑀭𑀺𑀧𑀼𑀡𑁆𑀡𑀲𑀢𑀧𑀢𑁆𑀢𑀁 𑀲𑀭𑁄𑀭𑀼𑀳𑀁. 𑀇𑀫𑀺𑀦𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀛𑀸𑀦𑀸𑀪𑀺𑀜𑁆𑀜𑀸𑀦𑀁 𑀪𑀸𑀯𑁂𑀦 𑀧𑀭𑀺𑀧𑀼𑀡𑁆𑀡𑀕𑀼𑀡𑀢𑁆𑀢𑀸 𑀲𑀫𑀡𑀧𑀤𑀼𑀫𑁄 𑀦𑀸𑀫 𑀳𑁄𑀢𑀺. 𑀲𑀫𑀡𑁂𑀲𑀼 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺 𑀲𑀩𑁆𑀩𑁂𑀲𑀼𑀧𑀺 𑀏𑀢𑁂𑀲𑀼 𑀲𑀫𑀡𑁂𑀲𑀼 𑀲𑀼𑀔𑀼𑀫𑀸𑀮𑀲𑀫𑀡𑁄 𑀫𑀼𑀤𑀼𑀘𑀺𑀢𑁆𑀢𑀲𑀭𑀻𑀭𑁄 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀭𑀳𑀺𑀢𑁄 𑀏𑀓𑀦𑁆𑀢𑀲𑀼𑀔𑀻. 𑀏𑀢𑁂𑀦 𑀅𑀢𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀢𑀲𑀤𑀺𑀲𑁂 𑀘 𑀤𑀲𑁆𑀲𑁂𑀢𑀺.

𑀏𑀯𑀁 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀯𑀺𑀪𑀚𑀦𑁆𑀢𑁄 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀔𑁄𑀢𑀺 𑀲𑀢𑁆𑀢𑀯𑀺𑀥𑁄𑀧𑀺 𑀲𑁂𑀔𑁄. 𑀧𑀸𑀝𑀺𑀧𑀤𑁄𑀢𑀺 𑀧𑀝𑀺𑀧𑀦𑁆𑀦𑀓𑁄. 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀳𑀭𑀢𑀻𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀣𑀬𑀦𑁆𑀢𑁄 𑀯𑀺𑀳𑀭𑀢𑀺. 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲𑀸𑀢𑀺 𑀫𑀼𑀤𑁆𑀥𑀦𑀺 𑀅𑀯𑀲𑀺𑀢𑁆𑀢𑀲𑁆𑀲, 𑀓𑀢𑀸𑀪𑀺𑀲𑁂𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀪𑀺𑀲𑁂𑀓𑁄𑀢𑀺 𑀅𑀪𑀺𑀲𑁂𑀓𑀁 𑀓𑀸𑀢𑀼𑀁 𑀬𑀼𑀢𑁆𑀢𑁄. 𑀅𑀦𑀪𑀺𑀲𑀺𑀢𑁆𑀢𑁄𑀢𑀺 𑀦 𑀢𑀸𑀯 𑀅𑀪𑀺𑀲𑀺𑀢𑁆𑀢𑁄. 𑀫𑀘𑀮𑀧𑁆𑀧𑀢𑁆𑀢𑁄𑀢𑀺 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀧𑀼𑀢𑁆𑀢𑀪𑀸𑀯𑁂𑀦 𑀘𑁂𑀯 𑀧𑀼𑀢𑁆𑀢𑁂𑀲𑀼 𑀚𑁂𑀝𑁆𑀞𑀓𑀪𑀸𑀯𑁂𑀦 𑀘 𑀦 𑀢𑀸𑀯 𑀅𑀪𑀺𑀲𑀺𑀢𑁆𑀢𑀪𑀸𑀯𑁂𑀦 𑀘 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀺𑀅𑀢𑁆𑀣𑀸𑀬 𑀅𑀘𑀮𑀧𑁆𑀧𑀢𑁆𑀢𑁄 𑀦𑀺𑀘𑁆𑀘𑀮𑀧𑀢𑁆𑀢𑁄. 𑀫𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸𑀢𑀺 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸.

𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 ‘‘𑀇𑀤𑀁, 𑀪𑀦𑁆𑀢𑁂, 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀏𑀯𑀁 𑀤𑀸𑀬𑀓𑁂𑀳𑀺 𑀬𑀸𑀘𑀫𑀸𑀦𑁂𑀳𑁂𑀯 𑀉𑀧𑀦𑀻𑀢𑀁 𑀘𑀻𑀯𑀭𑀁 𑀩𑀳𑀼𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀓𑀺𑀜𑁆𑀘𑀺𑀤𑁂𑀯 𑀅𑀬𑀸𑀘𑀺𑀢𑀁, 𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀺𑀬. 𑀧𑀺𑀡𑁆𑀟𑀧𑀸𑀢𑀁 𑀔𑀤𑀺𑀭𑀯𑀦𑀫𑀕𑁆𑀕𑁂 𑀲𑀻𑀯𑀮𑀺𑀢𑁆𑀣𑁂𑀭𑁄 𑀯𑀺𑀬. 𑀲𑁂𑀦𑀸𑀲𑀦𑀁 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁭 𑀆𑀤𑀬𑁄; 𑀅. 𑀦𑀺. 𑁧𑁧.𑁧𑁬 𑀆𑀤𑀬𑁄) 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬. 𑀕𑀺𑀮𑀸𑀦𑀧𑀘𑁆𑀘𑀬𑀁 𑀧𑀺𑀮𑀺𑀦𑁆𑀤𑀯𑀘𑁆𑀙𑀣𑁂𑀭𑁄 𑀯𑀺𑀬. 𑀢𑁆𑀬𑀲𑁆𑀲𑀸𑀢𑀺 𑀢𑁂 𑀅𑀲𑁆𑀲. 𑀫𑀦𑀸𑀧𑁂𑀦𑁂𑀯𑀸𑀢𑀺 𑀫𑀦𑀁 𑀅𑀮𑁆𑀮𑀻𑀬𑀦𑀓𑁂𑀦. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀯𑀸. 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺 𑀉𑀧𑀦𑀻𑀬𑀦𑁆𑀢𑀺. 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀻𑀢𑀺 𑀢𑀺𑀡𑁆𑀡𑀫𑁆𑀧𑀺 𑀲𑀦𑁆𑀦𑀺𑀧𑀸𑀢𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀻𑀢𑀺 𑀉𑀢𑀼𑀧𑀭𑀺𑀡𑀸𑀫𑀢𑁄 𑀅𑀢𑀺𑀲𑀻𑀢𑀅𑀢𑀺𑀉𑀡𑁆𑀳𑀉𑀢𑀼𑀢𑁄 𑀚𑀸𑀢𑀸𑀦𑀺. 𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀻𑀢𑀺 𑀅𑀘𑁆𑀘𑀸𑀲𑀦𑀅𑀢𑀺𑀝𑁆𑀞𑀸𑀦𑀸𑀤𑀺𑀓𑀸 𑀯𑀺𑀲𑀫𑀧𑀭𑀺𑀳𑀸𑀭𑀢𑁄 𑀚𑀸𑀢𑀸𑀦𑀺. 𑀑𑀧𑀓𑁆𑀓𑀫𑀺𑀓𑀸𑀦𑀻𑀢𑀺 𑀯𑀥𑀩𑀦𑁆𑀥𑀦𑀸𑀤𑀺𑀉𑀧𑀓𑁆𑀓𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀻𑀢𑀺 𑀯𑀺𑀦𑀸𑀧𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦𑁂𑀯 𑀚𑀸𑀢𑀸𑀦𑀺. 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀦𑁆𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀫𑁆𑀧𑀺 𑀓𑀺𑀭𑀺𑀬𑀚𑁆𑀛𑀸𑀦𑀸𑀦𑁂𑀯 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑁮. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀅𑀝𑁆𑀞𑀫𑁂 𑀲𑀸𑀲𑀦𑁂 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑁄𑀯 𑀲𑀫𑀡𑀫𑀘𑀮𑁄𑀢𑀺 𑀯𑀼𑀢𑁆𑀢𑁄, 𑀦𑀸𑀢𑀺𑀩𑀳𑀼𑀕𑀼𑀡𑀢𑁆𑀢𑀸 𑀦 𑀩𑀳𑀼𑀧𑀢𑁆𑀢𑀁 𑀯𑀺𑀬 𑀲𑀭𑁄𑀭𑀼𑀳𑀁 𑀲𑀓𑀤𑀸𑀕𑀸𑀫𑀻 𑀲𑀫𑀡𑀧𑀼𑀡𑁆𑀟𑀭𑀻𑀓𑁄𑀢𑀺, 𑀢𑀢𑁄 𑀩𑀳𑀼𑀢𑀭𑀕𑀼𑀡𑀢𑁆𑀢𑀸 𑀲𑀢𑀧𑀢𑁆𑀢𑀁 𑀯𑀺𑀬 𑀲𑀭𑁄𑀭𑀼𑀳𑀁 𑀅𑀦𑀸𑀕𑀸𑀫𑀻 𑀲𑀫𑀡𑀧𑀤𑀼𑀫𑁄𑀢𑀺, 𑀣𑀤𑁆𑀥𑀪𑀸𑀯𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀫𑀼𑀤𑀼𑀪𑀸𑀯𑀧𑁆𑀧𑀢𑁆𑀢𑁄 𑀔𑀻𑀡𑀸𑀲𑀯𑁄 𑀲𑀫𑀡𑀲𑀼𑀔𑀼𑀫𑀸𑀮𑁄𑀢𑀺.

𑁯. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀦𑀯𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄𑀢𑀺𑀆𑀤𑀻𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀧𑀞𑀫𑀲𑀼𑀢𑁆𑀢𑁂 𑀯𑀺𑀬 𑀲𑀢𑁆𑀢 𑀲𑁂𑀔𑀸 𑀕𑀳𑀺𑀢𑀸. 𑀤𑀼𑀢𑀺𑀬𑀯𑀸𑀭𑁂 𑀤𑀲𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀯𑀸 𑀅𑀭𑀳𑀢𑁆𑀢𑀨𑀮𑀜𑀸𑀡𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀻𑀳𑀺 𑀲𑀤𑁆𑀥𑀺𑀁, 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀯𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁄 𑀓𑀣𑀺𑀢𑁄, 𑀢𑀢𑀺𑀬𑀯𑀸𑀭𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀘𑀢𑀼𑀢𑁆𑀣𑀯𑀸𑀭𑁂 𑀢𑀣𑀸𑀕𑀢𑁄 𑀘 𑀢𑀣𑀸𑀕𑀢𑀲𑀤𑀺𑀲𑀔𑀻𑀡𑀸𑀲𑀯𑁄 𑀘𑀸𑀢𑀺. 𑀇𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀧𑀞𑀫𑀲𑀼𑀢𑁆𑀢𑁂 𑀓𑀣𑀺𑀢𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦𑁂𑀯 𑀓𑀣𑀺𑀢𑀁, 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀧𑀦𑁂𑀢𑁆𑀣 𑀦𑀸𑀦𑀦𑁆𑀢𑀺.

𑁧𑁦. 𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀤𑀲𑀫𑁂 𑀧𑀞𑀫𑀯𑀸𑀭𑁂 𑀅𑀭𑀳𑀢𑁆𑀢𑀢𑁆𑀣𑀸𑀬 𑀧𑀬𑁄𑀕𑀁 𑀅𑀦𑀸𑀭𑀪𑀺𑀢𑁆𑀯𑀸 𑀞𑀺𑀢𑁄 𑀧𑀫𑀸𑀤𑀯𑀺𑀳𑀸𑀭𑀻 𑀲𑁂𑀔𑀧𑀼𑀕𑁆𑀕𑀮𑁄 𑀓𑀣𑀺𑀢𑁄. 𑀤𑀼𑀢𑀺𑀬𑀯𑀸𑀭𑁂 𑀅𑀦𑀼𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑁄 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀲𑁂𑀔𑀧𑀼𑀕𑁆𑀕𑀮𑁄 𑀓𑀣𑀺𑀢𑁄. 𑀢𑀢𑀺𑀬𑀯𑀸𑀭𑁂 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻 𑀲𑁂𑀔𑀧𑀼𑀕𑁆𑀕𑀮𑁄 𑀓𑀣𑀺𑀢𑁄, 𑀘𑀢𑀼𑀢𑁆𑀣𑀯𑀸𑀭𑁂 𑀧𑀭𑀫𑀲𑀼𑀔𑀼𑀫𑀸𑀮𑀔𑀻𑀡𑀸𑀲𑀯𑁄𑀢𑀺.

𑀫𑀘𑀮𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁦) 𑁫. 𑀅𑀲𑀼𑀭𑀯𑀕𑁆𑀕𑁄

𑁧. 𑀅𑀲𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀅𑀲𑀼𑀭𑁄𑀢𑀺 𑀅𑀲𑀼𑀭𑀲𑀤𑀺𑀲𑁄 𑀩𑀻𑀪𑀘𑁆𑀙𑁄. 𑀤𑁂𑀯𑁄𑀢𑀺 𑀤𑁂𑀯𑀲𑀤𑀺𑀲𑁄 𑀕𑀼𑀡𑀯𑀲𑁂𑀦 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄.

𑁨. 𑀧𑀞𑀫𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀤𑀼𑀢𑀺𑀬𑁂 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀲𑁆𑀲𑀸𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑀫𑀸𑀥𑀺𑀲𑁆𑀲. 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀸𑀳𑀓𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲. 𑀢𑀜𑁆𑀳𑀺 𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀜𑁆𑀘, 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀯𑀺𑀧𑀲𑁆𑀲𑀦𑀸𑀪𑀽𑀢𑀁, 𑀢𑀲𑁆𑀫𑀸 ‘‘𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁩. 𑀤𑀼𑀢𑀺𑀬𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀢𑀢𑀺𑀬𑁂 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸 𑀓𑀢𑁆𑀢𑀩𑁆𑀩𑀸. 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄. 𑀯𑀸𑀬𑀸𑀫𑁄𑀢𑀺 𑀧𑀬𑁄𑀕𑁄. 𑀉𑀲𑁆𑀲𑀸𑀳𑁄𑀢𑀺 𑀢𑀢𑁄 𑀅𑀥𑀺𑀫𑀢𑁆𑀢𑀢𑀭𑀁 𑀯𑀻𑀭𑀺𑀬𑀁. 𑀉𑀲𑁆𑀲𑁄𑀴𑁆𑀳𑀻𑀢𑀺 𑀧𑀗𑁆𑀓𑀮𑀕𑁆𑀕𑀲𑀓𑀝𑀉𑀤𑁆𑀥𑀭𑀡𑀲𑀤𑀺𑀲𑀁 𑀫𑀳𑀸𑀯𑀻𑀭𑀺𑀬𑀁. 𑀅𑀧𑁆𑀧𑀝𑀺𑀯𑀸𑀦𑀻𑀢𑀺 𑀅𑀦𑀺𑀯𑀢𑁆𑀢𑀦𑀢𑀸.

𑁪. 𑀢𑀢𑀺𑀬𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀘𑀢𑀼𑀢𑁆𑀣𑁂 𑀏𑀯𑀁 𑀔𑁄, 𑀆𑀯𑀼𑀲𑁄, 𑀲𑀗𑁆𑀔𑀸𑀭𑀸 𑀤𑀝𑁆𑀞𑀩𑁆𑀩𑀸𑀢𑀺𑀆𑀤𑀻𑀲𑀼, 𑀆𑀯𑀼𑀲𑁄, 𑀲𑀗𑁆𑀔𑀸𑀭𑀸 𑀦𑀸𑀫 𑀅𑀦𑀺𑀘𑁆𑀘𑀢𑁄 𑀤𑀝𑁆𑀞𑀩𑁆𑀩𑀸, 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀺𑀢𑀩𑁆𑀩𑀸, 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀺𑀢𑀩𑁆𑀩𑀸. 𑀢𑀣𑀸 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼𑀧𑀺 𑀧𑀞𑀫𑀚𑁆𑀛𑀸𑀦𑀯𑀲𑁂𑀦, 𑀆𑀯𑀼𑀲𑁄, 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀦𑁆𑀦𑀺𑀲𑀸𑀤𑁂𑀢𑀩𑁆𑀩𑀁, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀏𑀓𑁄𑀤𑀺 𑀓𑀸𑀢𑀩𑁆𑀩𑀁, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀫𑀸𑀤𑀳𑀺𑀢𑀩𑁆𑀩𑀁. 𑀢𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑀲𑁂𑀦𑀸𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀫𑁂𑀲𑀼 𑀢𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀓𑀣𑀺𑀢𑀸.

𑁫. 𑀙𑀯𑀸𑀮𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀧𑀜𑁆𑀘𑀫𑁂 𑀙𑀯𑀸𑀮𑀸𑀢𑀦𑁆𑀢𑀺 𑀲𑀼𑀲𑀸𑀦𑁂 𑀅𑀮𑀸𑀢𑀁. 𑀫𑀚𑁆𑀛𑁂 𑀕𑀽𑀣𑀕𑀢𑀦𑁆𑀢𑀺 𑀫𑀚𑁆𑀛𑀝𑁆𑀞𑀸𑀦𑁂 𑀕𑀽𑀣𑀫𑀓𑁆𑀔𑀺𑀢𑀁. 𑀦𑁂𑀯 𑀕𑀸𑀫𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀻𑀢𑀺 𑀓𑀽𑀝𑀕𑁄𑀧𑀸𑀦𑀲𑀺𑀣𑀫𑁆𑀪𑀲𑁄𑀧𑀸𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀦𑀼𑀧𑀦𑁂𑀬𑁆𑀬𑀢𑀸𑀬 𑀕𑀸𑀫𑁂 𑀦 𑀓𑀝𑁆𑀞𑀢𑁆𑀣𑀁 𑀲𑀸𑀥𑁂𑀢𑀺, 𑀔𑁂𑀢𑁆𑀢𑀓𑀼𑀝𑀺𑀧𑀸𑀤𑀁 𑀯𑀸 𑀫𑀜𑁆𑀘𑀧𑀸𑀤𑀁 𑀯𑀸 𑀓𑀸𑀢𑀼𑀁 𑀅𑀦𑀼𑀧𑀦𑁂𑀬𑁆𑀬𑀢𑀸𑀬 𑀦 𑀅𑀭𑀜𑁆𑀜𑁂 𑀓𑀝𑁆𑀞𑀢𑁆𑀣𑀁 𑀲𑀸𑀥𑁂𑀢𑀺. 𑀤𑁆𑀯𑀻𑀲𑀼 𑀓𑁄𑀝𑀻𑀲𑀼 𑀕𑀬𑁆𑀳𑀫𑀸𑀦𑀁 𑀳𑀢𑁆𑀣𑀁 𑀟𑀳𑀢𑀺, 𑀫𑀚𑁆𑀛𑁂 𑀕𑀬𑁆𑀳𑀫𑀸𑀦𑀁 𑀕𑀽𑀣𑁂𑀦 𑀫𑀓𑁆𑀔𑁂𑀢𑀺. 𑀢𑀣𑀽𑀧𑀫𑀦𑁆𑀢𑀺 𑀢𑀁𑀲𑀭𑀺𑀓𑁆𑀔𑀓𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀲𑀼𑀦𑁆𑀤𑀭𑀢𑀭𑁄. 𑀧𑀡𑀻𑀢𑀢𑀭𑁄𑀢𑀺 𑀉𑀢𑁆𑀢𑀫𑀢𑀭𑁄. 𑀕𑀯𑀸 𑀔𑀻𑀭𑀦𑁆𑀢𑀺 𑀕𑀸𑀯𑀺𑀢𑁄 𑀔𑀻𑀭𑀁. 𑀔𑀻𑀭𑀫𑁆𑀳𑀸 𑀤𑀥𑀻𑀢𑀺𑀆𑀤𑀻𑀲𑀼 𑀧𑀭𑀁 𑀧𑀭𑀁 𑀧𑀼𑀭𑀺𑀫𑀢𑁄 𑀧𑀼𑀭𑀺𑀫𑀢𑁄 𑀅𑀕𑁆𑀕𑀁, 𑀲𑀧𑁆𑀧𑀺𑀫𑀡𑁆𑀟𑁄 𑀧𑀦 𑀢𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀅𑀕𑁆𑀕𑀫𑁂𑀯. 𑀅𑀕𑁆𑀕𑁄𑀢𑀺𑀆𑀤𑀻𑀲𑀼 𑀕𑀼𑀡𑁂𑀳𑀺 𑀅𑀕𑁆𑀕𑁄 𑀘𑁂𑀯 𑀲𑁂𑀝𑁆𑀞𑁄 𑀘 𑀧𑀫𑀼𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀙𑀯𑀸𑀮𑀸𑀢𑀽𑀧𑀫𑀸𑀬 𑀦 𑀤𑀼𑀲𑁆𑀲𑀻𑀮𑁄 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄, 𑀅𑀧𑁆𑀧𑀲𑁆𑀲𑀼𑀢𑁄 𑀧𑀦 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁄 𑀕𑁄𑀡𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀙𑀝𑁆𑀞𑁂 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁭. 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭. 𑀲𑀢𑁆𑀢𑀫𑁂 𑀔𑀺𑀧𑁆𑀧𑀦𑀺𑀲𑀦𑁆𑀢𑀻𑀢𑀺 𑀔𑀺𑀧𑁆𑀧𑀦𑀺𑀲𑀸𑀫𑀦𑁄 𑀲𑀻𑀖𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄. 𑀲𑀼𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀦𑁆𑀢𑀺 𑀲𑀼𑀢𑀧𑁆𑀧𑀕𑀼𑀡𑀸𑀦𑀁 𑀢𑀦𑁆𑀢𑀺𑀥𑀫𑁆𑀫𑀸𑀦𑀁. 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀻𑀢𑀺 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀓𑁄. 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀅𑀝𑁆𑀞𑀓𑀣𑀜𑁆𑀘 𑀧𑀸𑀴𑀺𑀜𑁆𑀘 𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀦𑀼𑀭𑀽𑀧𑀥𑀫𑁆𑀫𑀪𑀽𑀢𑀁 𑀲𑀲𑀻𑀮𑀓𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄𑀢𑀺 𑀦 𑀲𑀼𑀦𑁆𑀤𑀭𑀯𑀘𑀦𑁄. 𑀦 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄𑀢𑀺 𑀦 𑀲𑀼𑀦𑁆𑀤𑀭𑀯𑀘𑀦𑀖𑁄𑀲𑁄 𑀳𑁄𑀢𑀺. 𑀧𑁄𑀭𑀺𑀬𑀸𑀢𑀺𑀆𑀤𑀻𑀳𑀺 𑀲𑀤𑁆𑀥𑀺𑀁 𑀦𑁄-𑀓𑀸𑀭𑁄 𑀬𑁄𑀚𑁂𑀢𑀩𑁆𑀩𑁄𑀬𑁂𑀯. 𑀕𑀼𑀡𑀧𑀭𑀺𑀧𑀼𑀡𑁆𑀡𑀸𑀬 𑀅𑀧𑀮𑀺𑀩𑀼𑀤𑁆𑀥𑀸𑀬 𑀅𑀤𑁄𑀲𑀸𑀬 𑀅𑀕𑀴𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀫𑀢𑁆𑀣𑀸𑀬 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮. 𑀅𑀢𑁆𑀢𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮-𑁯𑁯. 𑀅𑀝𑁆𑀞𑀫𑀁 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦𑀸𑀧𑀺 𑀤𑀲𑀩𑀮𑀲𑁆𑀲 𑀤𑁂𑀲𑀦𑀸𑀜𑀸𑀡𑀯𑀺𑀮𑀸𑀲𑁂𑀦𑀸𑀧𑀺 𑀓𑀣𑀺𑀢𑀁, 𑀦𑀯𑀫𑀁 𑀧𑀜𑁆𑀘𑀯𑁂𑀭𑀯𑀲𑁂𑀦.

𑁧𑁦. 𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀤𑀲𑀫𑁂 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂𑀦. 𑀔𑀫𑀢𑀻𑀢𑀺 𑀭𑀼𑀘𑁆𑀘𑀢𑀺. 𑀬𑀤𑀺𑀤𑀁 𑀢𑀢𑁆𑀣 𑀢𑀢𑁆𑀣 𑀓𑀸𑀮𑀜𑁆𑀜𑀼𑀢𑀸𑀢𑀺 𑀬𑀸 𑀏𑀲𑀸 𑀢𑀢𑁆𑀣 𑀢𑀢𑁆𑀣 𑀓𑀸𑀮𑀁 𑀚𑀸𑀦𑀦𑀸. 𑀢𑀁 𑀢𑀁 𑀓𑀸𑀮𑀁 𑀜𑀢𑁆𑀯𑀸 𑀳𑀺 𑀅𑀯𑀡𑁆𑀡𑀸𑀭𑀳𑀲𑁆𑀲 𑀅𑀯𑀡𑁆𑀡𑀓𑀣𑀦𑀁 𑀯𑀡𑁆𑀡𑀸𑀭𑀳𑀲𑁆𑀲 𑀘 𑀯𑀡𑁆𑀡𑀓𑀣𑀦𑀁 𑀧𑀡𑁆𑀟𑀺𑀢𑀸𑀦𑀁 𑀧𑀓𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀲𑀼𑀭𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.