𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀯𑀮𑀸𑀳𑀓𑀯𑀕𑁆𑀕𑁄

𑁧-𑁨. 𑀯𑀮𑀸𑀳𑀓𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁧𑁦𑁧-𑁨. 𑀢𑀢𑀺𑀬𑀧𑀡𑁆𑀡𑀸𑀲𑀓𑀲𑁆𑀲 𑀧𑀞𑀫𑁂 𑀯𑀮𑀸𑀳𑀓𑀸𑀢𑀺 𑀫𑁂𑀖𑀸. 𑀪𑀸𑀲𑀺𑀢𑀸 𑀳𑁄𑀢𑀺 𑀦𑁄 𑀓𑀢𑁆𑀢𑀸𑀢𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑁂𑀯𑀮𑀁 𑀪𑀸𑀲𑀢𑀺𑀬𑁂𑀯, 𑀦 𑀓𑀭𑁄𑀢𑀺. 𑀓𑀢𑁆𑀢𑀸 𑀳𑁄𑀢𑀺 𑀦𑁄 𑀪𑀸𑀲𑀺𑀢𑀸𑀢𑀺 𑀅𑀓𑀣𑁂𑀢𑁆𑀯𑀸𑀯 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀬𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀢𑁆𑀢𑀸 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀓𑀼𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀢𑀢𑀺𑀬𑁂 𑀓𑀼𑀫𑁆𑀪𑀸𑀢𑀺 𑀖𑀝𑀸. 𑀢𑀼𑀘𑁆𑀙𑁄 𑀧𑀺𑀳𑀺𑀢𑁄𑀢𑀺 𑀭𑀺𑀢𑁆𑀢𑀓𑁄 𑀧𑀺𑀳𑀺𑀢𑀫𑀼𑀔𑁄. 𑀧𑀽𑀭𑁄 𑀯𑀺𑀯𑀝𑁄𑀢𑀺 𑀉𑀤𑀓𑀧𑀼𑀡𑁆𑀡𑁄 𑀅𑀧𑀸𑀭𑀼𑀢𑀫𑀼𑀔𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁪. 𑀉𑀤𑀓𑀭𑀳𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀘𑀢𑀼𑀢𑁆𑀣𑁂 𑀉𑀢𑁆𑀢𑀸𑀦𑁄 𑀕𑀫𑁆𑀪𑀻𑀭𑁄𑀪𑀸𑀲𑁄𑀢𑀺𑀆𑀤𑀻𑀲𑀼 𑀧𑀼𑀭𑀸𑀡𑀧𑀡𑁆𑀡𑀭𑀲𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑁄 𑀓𑀸𑀴𑀉𑀤𑀓𑁄 𑀕𑀫𑁆𑀪𑀻𑀭𑁄𑀪𑀸𑀲𑁄 𑀦𑀸𑀫, 𑀅𑀘𑁆𑀙𑀯𑀺𑀧𑁆𑀧𑀲𑀦𑁆𑀦𑀫𑀡𑀺𑀯𑀡𑁆𑀡𑀉𑀤𑀓𑁄 𑀉𑀢𑁆𑀢𑀸𑀦𑁄𑀪𑀸𑀲𑁄 𑀦𑀸𑀫.

𑁫-𑁬. 𑀅𑀫𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫-𑁬. 𑀧𑀜𑁆𑀘𑀫𑁂 𑀆𑀫𑀁 𑀧𑀓𑁆𑀓𑀯𑀡𑁆𑀡𑀻𑀢𑀺 𑀆𑀫𑀓𑀁 𑀳𑀼𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀧𑀓𑁆𑀓𑀲𑀤𑀺𑀲𑀁 𑀔𑀸𑀬𑀢𑀺. 𑀏𑀯𑀁 𑀲𑀩𑁆𑀩𑀧𑀤𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁭. 𑀫𑀽𑀲𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀲𑀢𑁆𑀢𑀫𑁂 𑀬𑁄 𑀆𑀯𑀸𑀝𑀁 𑀔𑀡𑀢𑀺, 𑀦 𑀘 𑀢𑀢𑁆𑀣 𑀯𑀲𑀢𑀺, 𑀲𑁄 𑀕𑀸𑀥𑀁 𑀓𑀢𑁆𑀢𑀸 𑀦𑁄 𑀯𑀲𑀺𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀔𑀦𑁆𑀢𑀸𑀢𑀺𑀧𑀺 𑀧𑀸𑀞𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁮. 𑀩𑀮𑀻𑀩𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮. 𑀅𑀝𑁆𑀞𑀫𑁂 𑀬𑁄 𑀅𑀢𑁆𑀢𑀦𑁄 𑀕𑁄𑀕𑀡𑀁 𑀫𑀤𑁆𑀤𑀢𑀺, 𑀦 𑀧𑀭𑀕𑁄𑀕𑀡𑀁, 𑀅𑀬𑀁 𑀲𑀕𑀯𑀘𑀡𑁆𑀟𑁄 𑀦𑁄 𑀧𑀭𑀕𑀯𑀘𑀡𑁆𑀟𑁄𑀢𑀺 𑀏𑀯𑀁 𑀲𑀩𑁆𑀩𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀉𑀩𑁆𑀩𑁂𑀚𑁂𑀢𑀸 𑀳𑁄𑀢𑀻𑀢𑀺 𑀖𑀝𑁆𑀝𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀉𑀩𑁆𑀩𑁂𑀕𑀧𑀢𑁆𑀢𑀁 𑀓𑀭𑁄𑀢𑀺.

𑁯. 𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯. 𑀦𑀯𑀫𑁂 𑀨𑁂𑀕𑁆𑀕𑀼 𑀨𑁂𑀕𑁆𑀕𑀼𑀧𑀭𑀺𑀯𑀸𑀭𑁄𑀢𑀺 𑀦𑀺𑀲𑁆𑀲𑀸𑀭𑁄 𑀨𑁂𑀕𑁆𑀕𑀼𑀭𑀼𑀓𑁆𑀔𑁄 𑀨𑁂𑀕𑁆𑀕𑀼𑀭𑀼𑀓𑁆𑀔𑁂𑀳𑁂𑀯 𑀧𑀭𑀺𑀯𑀼𑀢𑁄. 𑀲𑀸𑀭𑀧𑀭𑀺𑀯𑀸𑀭𑁄𑀢𑀺 𑀔𑀤𑀺𑀭𑀸𑀤𑀻𑀳𑀺 𑀲𑀸𑀭𑀭𑀼𑀓𑁆𑀔𑁂𑀳𑁂𑀯 𑀧𑀭𑀺𑀯𑀼𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁧𑁦. 𑀆𑀲𑀻𑀯𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦. 𑀤𑀲𑀫𑁂 𑀆𑀕𑀢𑀯𑀺𑀲𑁄 𑀦 𑀖𑁄𑀭𑀯𑀺𑀲𑁄𑀢𑀺 𑀬𑀲𑁆𑀲 𑀯𑀺𑀲𑀁 𑀆𑀕𑀘𑁆𑀙𑀢𑀺, 𑀖𑁄𑀭𑀁 𑀧𑀦 𑀦 𑀳𑁄𑀢𑀺, 𑀘𑀺𑀭𑀓𑀸𑀮𑀁 𑀦 𑀧𑀻𑀴𑁂𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀯𑀮𑀸𑀳𑀓𑀯𑀕𑁆𑀕𑁄 𑀧𑀞𑀫𑁄.

(𑁧𑁨) 𑁨. 𑀓𑁂𑀲𑀺𑀯𑀕𑁆𑀕𑁄

𑁧. 𑀓𑁂𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀓𑁂𑀲𑀻𑀢𑀺 𑀢𑀲𑁆𑀲 𑀦𑀸𑀫𑀁. 𑀅𑀲𑁆𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺. 𑀲𑀡𑁆𑀳𑁂𑀦𑀧𑀺 𑀯𑀺𑀦𑁂𑀢𑀻𑀢𑀺𑀆𑀤𑀻𑀲𑀼 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀫𑀥𑀼𑀭𑀧𑀸𑀦𑀁 𑀧𑀸𑀬𑁂𑀢𑁆𑀯𑀸 𑀫𑀼𑀤𑀼𑀯𑀘𑀦𑁂𑀦 𑀲𑀫𑀼𑀤𑀸𑀘𑀭𑀺𑀢𑁆𑀯𑀸 𑀤𑀫𑁂𑀦𑁆𑀢𑁄 𑀲𑀡𑁆𑀳𑁂𑀦 𑀤𑀫𑁂𑀢𑀺 𑀦𑀸𑀫, 𑀚𑀸𑀡𑀼𑀩𑀦𑁆𑀥𑀦𑀫𑀼𑀔𑀩𑀦𑁆𑀥𑀦𑀸𑀤𑀻𑀳𑀺 𑀘𑁂𑀯 𑀧𑀢𑁄𑀤𑀯𑀺𑀚𑁆𑀛𑀦𑀓𑀲𑀸𑀪𑀺𑀖𑀸𑀢𑀨𑀭𑀼𑀲𑀯𑀘𑀦𑁂𑀳𑀺 𑀘 𑀤𑀫𑁂𑀦𑁆𑀢𑁄 𑀨𑀭𑀼𑀲𑁂𑀦 𑀤𑀫𑁂𑀢𑀺 𑀦𑀸𑀫, 𑀓𑀸𑀮𑁂𑀦 𑀓𑀸𑀮𑀁 𑀢𑀤𑀼𑀪𑀬𑀁 𑀓𑀭𑁄𑀦𑁆𑀢𑁄 𑀲𑀡𑁆𑀳𑀨𑀭𑀼𑀲𑁂𑀦 𑀤𑀫𑁂𑀢𑀺 𑀦𑀸𑀫.

𑁨. 𑀚𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀤𑀼𑀢𑀺𑀬𑁂 𑀅𑀚𑁆𑀚𑀯𑁂𑀦𑀸𑀢𑀺 𑀉𑀚𑀼𑀓𑀪𑀸𑀯𑁂𑀦. 𑀚𑀯𑁂𑀦𑀸𑀢𑀺 𑀧𑀤𑀯𑁂𑀕𑁂𑀦. 𑀔𑀦𑁆𑀢𑀺𑀬𑀸𑀢𑀺 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑀸. 𑀲𑁄𑀭𑀘𑁆𑀘𑁂𑀦𑀸𑀢𑀺 𑀲𑀼𑀘𑀺𑀪𑀸𑀯𑀲𑀻𑀮𑁂𑀦. 𑀧𑀼𑀕𑁆𑀕𑀮𑀕𑀼𑀡𑀗𑁆𑀕𑁂𑀲𑀼 𑀚𑀯𑁂𑀦𑀸𑀢𑀺 𑀜𑀸𑀡𑀚𑀯𑁂𑀦. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩. 𑀧𑀢𑁄𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀢𑀢𑀺𑀬𑁂 𑀧𑀢𑁄𑀤𑀘𑁆𑀙𑀸𑀬𑀦𑁆𑀢𑀺 𑀯𑀺𑀚𑁆𑀛𑀦𑀢𑁆𑀣𑀁 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀢𑁄𑀤𑀲𑁆𑀲 𑀙𑀸𑀬𑀁. 𑀲𑀁𑀯𑀺𑀚𑁆𑀚𑀢𑀻𑀢𑀺 ‘‘𑀚𑀯𑁄 𑀫𑁂 𑀕𑀳𑁂𑀢𑀩𑁆𑀩𑁄’’𑀢𑀺 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀁𑀯𑀺𑀚𑁆𑀚𑀢𑀺. 𑀲𑀁𑀯𑁂𑀕𑀁 𑀆𑀧𑀚𑁆𑀚𑀢𑀻𑀢𑀺 𑀲𑀁𑀯𑁂𑀕𑀁 𑀧𑀝𑀺𑀧𑀚𑁆𑀚𑀢𑀺 𑀮𑁄𑀫𑀯𑁂𑀥𑀯𑀺𑀤𑁆𑀥𑁄𑀢𑀺 𑀮𑁄𑀫𑀓𑀽𑀧𑁂 𑀧𑀢𑁄𑀤𑀯𑁂𑀥𑁂𑀦 𑀯𑀺𑀤𑁆𑀥𑀫𑀢𑁆𑀢𑁄. 𑀘𑀫𑁆𑀫𑀯𑁂𑀥𑀯𑀺𑀤𑁆𑀥𑁄𑀢𑀺 𑀙𑀯𑀺𑀘𑀫𑁆𑀫𑀁 𑀙𑀺𑀦𑁆𑀤𑀦𑁆𑀢𑁂𑀦 𑀧𑀢𑁄𑀤𑀯𑁂𑀥𑁂𑀦 𑀯𑀺𑀤𑁆𑀥𑁄. 𑀅𑀝𑁆𑀞𑀺𑀯𑁂𑀥𑀯𑀺𑀤𑁆𑀥𑁄𑀢𑀺 𑀅𑀝𑁆𑀞𑀺𑀁 𑀪𑀺𑀦𑁆𑀤𑀦𑁆𑀢𑁂𑀦 𑀯𑁂𑀥𑁂𑀦 𑀯𑀺𑀤𑁆𑀥𑁄. 𑀓𑀸𑀬𑁂𑀦𑀸𑀢𑀺 𑀦𑀸𑀫𑀓𑀸𑀬𑁂𑀦. 𑀧𑀭𑀫𑀲𑀘𑁆𑀘𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀧𑀲𑁆𑀲𑀢𑀺. 𑀧𑀜𑁆𑀜𑀸𑀬𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬.

𑁪. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀘𑀢𑀼𑀢𑁆𑀣𑁂 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀝𑁆𑀞𑀺𑀓𑁄 𑀳𑀼𑀢𑁆𑀯𑀸. 𑀢𑀺𑀡𑀯𑀦𑀺𑀦𑁆𑀦𑀸𑀤𑀲𑀤𑁆𑀤𑀸𑀦𑀦𑁆𑀢𑀺 𑀏𑀢𑁆𑀣 𑀢𑀺𑀡𑀯𑁄𑀢𑀺 𑀟𑀺𑀡𑁆𑀟𑀺𑀫𑁄, 𑀦𑀺𑀦𑁆𑀦𑀸𑀤𑀲𑀤𑁆𑀤𑁄𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀏𑀓𑀢𑁄𑀫𑀺𑀲𑁆𑀲𑀺𑀢𑁄 𑀫𑀳𑀸𑀲𑀤𑁆𑀤𑁄. 𑀟𑀁𑀲𑀸𑀤𑀻𑀲𑀼 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸, 𑀫𑀓𑀲𑀸 𑀫𑀓𑀲𑀸𑀯. 𑀔𑀺𑀧𑁆𑀧𑀜𑁆𑀜𑁂𑀯 𑀕𑀦𑁆𑀢𑀸 𑀳𑁄𑀢𑀻𑀢𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀻𑀖𑀫𑁂𑀯 𑀕𑀦𑁆𑀢𑀸 𑀳𑁄𑀢𑀺.

𑁫. 𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀧𑀜𑁆𑀘𑀫𑁂 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀳𑀺𑀢𑀸𑀬 𑀅𑀯𑀟𑁆𑀠𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀏𑀢𑁆𑀣 𑀘 𑀧𑀞𑀫𑀁 𑀑𑀧𑀸𑀢𑀓𑁆𑀔𑀡𑀦𑀫𑀘𑁆𑀙𑀩𑀦𑁆𑀥𑀦𑀲𑀦𑁆𑀥𑀺𑀘𑁆𑀙𑁂𑀤𑀦𑀸𑀤𑀺𑀪𑁂𑀤𑀁 𑀲𑀤𑀼𑀓𑁆𑀔𑀁 𑀲𑀯𑀺𑀖𑀸𑀢𑀁 𑀧𑀸𑀧𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀢𑀺𑀬𑀁 𑀲𑀫𑀚𑀻𑀯𑀺𑀓𑀸𑀦𑀁 𑀕𑀺𑀳𑀻𑀦𑀁 𑀧𑀼𑀧𑁆𑀨𑀘𑁆𑀙𑀟𑁆𑀟𑀓𑀸𑀤𑀺𑀓𑀫𑁆𑀫𑀁 𑀲𑀼𑀥𑀸𑀓𑁄𑀝𑁆𑀝𑀦-𑀕𑁂𑀳𑀘𑁆𑀙𑀸𑀤𑀦𑀅𑀲𑀼𑀘𑀺𑀝𑁆𑀞𑀸𑀦𑀲𑀫𑁆𑀫𑀚𑁆𑀚𑀦𑀸𑀤𑀺𑀓𑀫𑁆𑀫𑀜𑁆𑀘 𑀯𑁂𑀤𑀺𑀢𑀩𑁆𑀩𑀁, 𑀢𑀢𑀺𑀬𑀁 𑀲𑀼𑀭𑀸𑀧𑀸𑀦𑀕𑀦𑁆𑀥𑀯𑀺𑀮𑁂𑀧𑀦𑀫𑀸𑀮𑀸𑀧𑀺𑀴𑀦𑁆𑀥𑀦𑀸𑀤𑀺𑀓𑀫𑁆𑀫𑀜𑁆𑀘𑁂𑀯 𑀅𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀜𑁆𑀘 𑀯𑁂𑀤𑀺𑀢𑀩𑁆𑀩𑀁, 𑀘𑀢𑀼𑀢𑁆𑀣𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀕𑀫𑀦𑀓𑀸𑀮𑁂 𑀲𑀼𑀤𑁆𑀥𑀯𑀢𑁆𑀣𑀘𑁆𑀙𑀸𑀤𑀦-𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀁 𑀆𑀤𑀸𑀬 𑀕𑀫𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀁 𑀩𑁄𑀥𑀺𑀯𑀦𑁆𑀤𑀦𑀁 𑀫𑀥𑀼𑀭𑀥𑀫𑁆𑀫𑀓𑀣𑀸𑀲𑀯𑀦𑀁 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀲𑀣𑀸𑀫𑁂𑀢𑀺 𑀧𑀼𑀭𑀺𑀲𑀲𑁆𑀲 𑀜𑀸𑀡𑀣𑀸𑀫𑀲𑁆𑀫𑀺𑀁. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁬. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀙𑀝𑁆𑀞𑁂 𑀬𑀢𑁄 𑀔𑁄𑀢𑀺 𑀬𑀤𑀸 𑀔𑁄. 𑀲𑀫𑁆𑀧𑀭𑀸𑀬𑀺𑀓𑀲𑁆𑀲𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀔𑀻𑀡𑀸𑀲𑀯𑁄 𑀧𑀦 𑀦𑁂𑀯 𑀲𑀫𑁆𑀧𑀭𑀸𑀬𑀺𑀓𑀲𑁆𑀲, 𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲 𑀫𑀭𑀡𑀲𑁆𑀲 𑀪𑀸𑀬𑀢𑀺. 𑀲𑁄𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀓𑁂𑀘𑀺 𑀧𑀦 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀸𑀯𑀺𑀢𑀸𑀢𑀺 𑀯𑀘𑀦𑀢𑁄 𑀲𑁄𑀢𑀸𑀧𑀦𑁆𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀤𑀦𑁆𑀢𑀺.

𑁭. 𑀆𑀭𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀲𑀢𑁆𑀢𑀫𑁂 𑀅𑀢𑁆𑀢𑀭𑀽𑀧𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀅𑀦𑀼𑀘𑁆𑀙𑀯𑀺𑀓𑁂𑀦, 𑀳𑀺𑀢𑀓𑀸𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀭𑀚𑀦𑀻𑀬𑁂𑀲𑀽𑀢𑀺 𑀭𑀸𑀕𑀲𑁆𑀲 𑀧𑀘𑁆𑀘𑀬𑀪𑀽𑀢𑁂𑀲𑀼. 𑀥𑀫𑁆𑀫𑁂𑀲𑀽𑀢𑀺 𑀲𑀪𑀸𑀯𑁂𑀲𑀼, 𑀇𑀝𑁆𑀞𑀸𑀭𑀫𑁆𑀫𑀡𑁂𑀲𑀽𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀭𑀚𑁆𑀚𑀢𑀻𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀭𑀚𑁆𑀚𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀘 𑀧𑀦 𑀲𑀫𑀡𑀯𑀘𑀦𑀳𑁂𑀢𑀼𑀧𑀺 𑀕𑀘𑁆𑀙𑀢𑀻𑀢𑀺 𑀲𑀫𑀡𑀸𑀦𑀁 𑀧𑀭𑀯𑀸𑀤𑀻𑀦𑀁 𑀯𑀘𑀦𑀳𑁂𑀢𑀼𑀧𑀺 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀧𑀳𑀸𑀬 𑀢𑁂𑀲𑀁 𑀤𑀺𑀝𑁆𑀞𑀺𑀯𑀲𑁂𑀦 𑀦 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀔𑀻𑀡𑀸𑀲𑀯𑁄𑀯 𑀅𑀥𑀺𑀧𑁆𑀧𑁂𑀢𑁄.

𑁮-𑁧𑁦. 𑀲𑀁𑀯𑁂𑀚𑀦𑀻𑀬𑀸𑀤𑀺𑀲𑀼𑀢𑁆𑀢𑀢𑁆𑀢𑀬𑀯𑀡𑁆𑀡𑀦𑀸

𑁧𑁧𑁮-𑁧𑁨𑁦. 𑀅𑀝𑁆𑀞𑀫𑁂 𑀤𑀲𑁆𑀲𑀦𑀻𑀬𑀸𑀦𑀻𑀢𑀺 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀦𑀺. 𑀲𑀁𑀯𑁂𑀚𑀦𑀻𑀬𑀸𑀦𑀻𑀢𑀺 𑀲𑀁𑀯𑁂𑀕𑀚𑀦𑀓𑀸𑀦𑀺. 𑀦𑀯𑀫𑁂 𑀚𑀸𑀢𑀺𑀪𑀬𑀦𑁆𑀢𑀺 𑀚𑀸𑀢𑀺𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀲𑀫𑁂 𑀅𑀕𑁆𑀕𑀺𑀪𑀬𑀦𑁆𑀢𑀺 𑀅𑀕𑁆𑀕𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑁂𑀲𑀺𑀯𑀕𑁆𑀕𑁄 𑀤𑀼𑀢𑀺𑀬𑁄.

(𑁧𑁩) 𑁩. 𑀪𑀬𑀯𑀕𑁆𑀕𑁄

𑁧. 𑀅𑀢𑁆𑀢𑀸𑀦𑀼𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀦𑁆𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀯𑀤𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀧𑀭𑀸𑀦𑀼𑀯𑀸𑀤𑀪𑀬𑀦𑁆𑀢𑀺 𑀧𑀭𑀲𑁆𑀲 𑀅𑀦𑀼𑀯𑀸𑀤𑀢𑁄 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀤𑀡𑁆𑀟𑀪𑀬𑀦𑁆𑀢𑀺 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀦𑁆𑀢𑀺𑀆𑀤𑀻𑀲𑀼 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁 𑀢𑀸𑀯 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀳𑀺𑀭𑀻 𑀲𑀫𑀼𑀝𑁆𑀞𑀸𑀢𑀺, 𑀲𑀸𑀲𑁆𑀲 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀚𑀦𑁂𑀢𑀺, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀢𑀺. 𑀧𑀭𑀸𑀦𑀼𑀯𑀸𑀤𑀪𑀬𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀳𑀺𑀤𑁆𑀥𑀸 𑀑𑀢𑁆𑀢𑀧𑁆𑀧𑀁 𑀲𑀫𑀼𑀝𑁆𑀞𑀸𑀢𑀺, 𑀢𑀤𑀲𑁆𑀲 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀚𑀦𑁂𑀢𑀺, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀢𑀺. 𑀤𑀼𑀕𑁆𑀕𑀢𑀺𑀪𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀳𑀺𑀭𑀻 𑀲𑀫𑀼𑀝𑁆𑀞𑀸𑀢𑀺, 𑀲𑀸𑀲𑁆𑀲 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀚𑀦𑁂𑀢𑀺, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀳𑁄𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀢𑀺.

𑁨. 𑀊𑀫𑀺𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀤𑀼𑀢𑀺𑀬𑁂 𑀉𑀤𑀓𑁄𑀭𑁄𑀳𑀦𑁆𑀢𑀲𑁆𑀲𑀸𑀢𑀺 𑀉𑀤𑀓𑀁 𑀑𑀢𑀭𑀦𑁆𑀢𑀲𑁆𑀲. 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀲𑀼𑀲𑀼𑀓𑀸𑀪𑀬𑀦𑁆𑀢𑀺 𑀘𑀡𑁆𑀟𑀫𑀘𑁆𑀙𑀪𑀬𑀁. 𑀫𑀼𑀔𑀸𑀯𑀭𑀡𑀁 𑀫𑀜𑁆𑀜𑁂 𑀓𑀭𑁄𑀦𑁆𑀢𑀻𑀢𑀺 𑀫𑀼𑀔𑀧𑀺𑀤𑀳𑀦𑀁 𑀯𑀺𑀬 𑀓𑀭𑁄𑀦𑁆𑀢𑀺. 𑀑𑀤𑀭𑀺𑀓𑀢𑁆𑀢𑀲𑁆𑀲𑀸𑀢𑀺 𑀫𑀳𑁄𑀤𑀭𑀢𑀸𑀬 𑀫𑀳𑀕𑁆𑀖𑀲𑀪𑀸𑀯𑀲𑁆𑀲. 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸𑀢𑀺𑀆𑀤𑀻𑀲𑀼 𑀓𑀸𑀬𑀤𑁆𑀯𑀸𑀭𑁂 𑀢𑀺𑀯𑀺𑀥𑀲𑁆𑀲 𑀲𑀁𑀯𑀭𑀲𑁆𑀲 𑀅𑀪𑀸𑀯𑀢𑁄 𑀅𑀭𑀓𑁆𑀔𑀺𑀢𑁂𑀦 𑀓𑀸𑀬𑁂𑀦. 𑀯𑀘𑀻𑀤𑁆𑀯𑀸𑀭𑁂 𑀘𑀢𑀼𑀩𑁆𑀩𑀺𑀥𑀲𑁆𑀲 𑀲𑀁𑀯𑀭𑀲𑁆𑀲 𑀅𑀪𑀸𑀯𑀢𑁄 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬.

𑁩. 𑀧𑀞𑀫𑀦𑀸𑀦𑀸𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀢𑀢𑀺𑀬𑁂 𑀢𑀤𑀲𑁆𑀲𑀸𑀤𑁂𑀢𑀻𑀢𑀺 𑀢𑀁 𑀛𑀸𑀦𑀁 𑀲𑀼𑀔𑀲𑁆𑀲𑀸𑀤𑁂𑀦 𑀅𑀲𑁆𑀲𑀸𑀤𑁂𑀢𑀺. 𑀦𑀺𑀓𑀸𑀫𑁂𑀢𑀻𑀢𑀺 𑀧𑀢𑁆𑀣𑁂𑀢𑀺. 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀢𑀼𑀝𑁆𑀞𑀺𑀁 𑀆𑀧𑀚𑁆𑀚𑀢𑀺. 𑀢𑀤𑀥𑀺𑀫𑀼𑀢𑁆𑀢𑁄𑀢𑀺 𑀢𑀲𑁆𑀫𑀺𑀁 𑀅𑀥𑀺𑀫𑀼𑀢𑁆𑀢𑁄, 𑀢𑀁 𑀯𑀸 𑀅𑀥𑀺𑀫𑀼𑀢𑁆𑀢𑁄. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀻𑀢𑀺 𑀢𑁂𑀦 𑀛𑀸𑀦𑁂𑀦 𑀩𑀳𑀼𑀮𑀁 𑀯𑀺𑀳𑀭𑀦𑁆𑀢𑁄. 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻𑀢𑀺 𑀲𑀳𑀪𑀸𑀯𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀅𑀢𑁆𑀣𑀺 𑀳𑀻𑀦𑀁, 𑀅𑀢𑁆𑀣𑀺 𑀫𑀚𑁆𑀛𑀺𑀫𑀁, 𑀅𑀢𑁆𑀣𑀺 𑀧𑀡𑀻𑀢𑀁. 𑀢𑀢𑁆𑀣 𑀳𑀻𑀦𑁂𑀦 𑀉𑀧𑁆𑀧𑀦𑁆𑀦𑀸𑀦𑀁 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀓𑁄𑀝𑁆𑀞𑀸𑀲𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀫𑀚𑁆𑀛𑀺𑀫𑁂𑀦 𑀉𑀧𑀟𑁆𑀠𑀓𑀧𑁆𑀧𑁄, 𑀧𑀡𑀻𑀢𑁂𑀦 𑀓𑀧𑁆𑀧𑁄. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀺𑀭𑀬𑀫𑁆𑀧𑀺 𑀕𑀘𑁆𑀙𑀢𑀻𑀢𑀺 𑀦𑀺𑀭𑀬𑀕𑀫𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀧𑀭𑀸𑀧𑀭𑀁 𑀕𑀘𑁆𑀙𑀢𑀺, 𑀦 𑀅𑀦𑀦𑁆𑀢𑀭𑀫𑁂𑀯. 𑀢𑀲𑁆𑀫𑀺𑀁𑀬𑁂𑀯 𑀪𑀯𑁂 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀭𑀽𑀧𑀪𑀯𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀦 𑀳𑁂𑀝𑁆𑀞𑀸 𑀑𑀢𑀭𑀢𑀺. 𑀬𑀤𑀺𑀤𑀁 𑀕𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸 𑀲𑀢𑀻𑀢𑀺 𑀬𑀁 𑀇𑀤𑀁 𑀕𑀢𑀺𑀬𑀸 𑀘 𑀉𑀧𑀧𑀢𑁆𑀢𑀺𑀬𑀸 𑀘 𑀲𑀢𑀺 𑀲𑁂𑀔𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀳𑁂𑀝𑁆𑀞𑀸 𑀅𑀦𑁄𑀢𑀭𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀭𑀽𑀧𑀪𑀯𑁂 𑀉𑀧𑀭𑀺 𑀤𑀼𑀢𑀺𑀬𑀢𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀦 𑀦𑀺𑀭𑀬𑀸𑀤𑀺𑀕𑀫𑀦𑀁, 𑀇𑀤𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀤𑁆𑀯𑁂 𑀓𑀧𑁆𑀧𑀸𑀢𑀺 𑀏𑀢𑁆𑀣𑀸𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀡𑀻𑀢𑀪𑀸𑀯𑀦𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀁 𑀅𑀝𑁆𑀞𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁, 𑀫𑀚𑁆𑀛𑀺𑀫𑁂𑀦 𑀘𑀢𑁆𑀢𑀸𑀭𑁄, 𑀳𑀻𑀦𑁂𑀦 𑀤𑁆𑀯𑁂. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸𑀢𑀺 𑀏𑀢𑁆𑀣 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 ‘‘𑀓𑀧𑁆𑀧𑁄, 𑀤𑁆𑀯𑁂 𑀓𑀧𑁆𑀧𑀸’’𑀢𑀺, 𑀢𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀧𑁆𑀧𑁄𑀢𑀺 𑀘 𑀕𑀼𑀡𑀲𑁆𑀲𑀧𑀺 𑀦𑀸𑀫𑀁, 𑀢𑀲𑁆𑀫𑀸 𑀓𑀧𑁆𑀧𑁄 𑀤𑁆𑀯𑁂 𑀓𑀧𑁆𑀧𑀸 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀧𑀞𑀫𑀁 𑀯𑀼𑀢𑁆𑀢𑁄 𑀓𑀧𑁆𑀧𑁄, 𑀲𑁄 𑀤𑁆𑀯𑁂 𑀯𑀸𑀭𑁂 𑀕𑀡𑁂𑀢𑁆𑀯𑀸 𑀏𑀓𑁂𑀦 𑀕𑀼𑀡𑁂𑀦 𑀤𑁆𑀯𑁂 𑀓𑀧𑁆𑀧𑀸 𑀳𑁄𑀦𑁆𑀢𑀺, 𑀤𑀼𑀢𑀺𑀬𑁂𑀦 𑀘𑀢𑁆𑀢𑀸𑀭𑁄, 𑀧𑀼𑀦 𑀢𑁂 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀕𑀼𑀡𑁂𑀳𑀺 𑀕𑀼𑀡𑀺𑀢𑀸 𑀏𑀓𑁂𑀦 𑀕𑀼𑀡𑁂𑀦 𑀅𑀝𑁆𑀞 𑀳𑁄𑀦𑁆𑀢𑀺, 𑀤𑀼𑀢𑀺𑀬𑁂𑀦 𑀲𑁄𑀴𑀲, 𑀢𑀢𑀺𑀬𑁂𑀦 𑀤𑁆𑀯𑀢𑁆𑀢𑀺𑀁𑀲, 𑀘𑀢𑀼𑀢𑁆𑀣𑁂𑀦 𑀘𑀢𑀼𑀲𑀝𑁆𑀞𑀻𑀢𑀺. 𑀏𑀯𑀫𑀺𑀥 𑀧𑀡𑀻𑀢𑀚𑁆𑀛𑀸𑀦𑀯𑀲𑁂𑀦 𑀘𑀢𑀼𑀲𑀝𑁆𑀞𑀺 𑀓𑀧𑁆𑀧𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀻𑀢𑀺 𑀇𑀤𑀁 𑀧𑀡𑀻𑀢𑀲𑁆𑀲𑁂𑀯 𑀉𑀧𑀧𑀢𑁆𑀢𑀺𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀯𑁂𑀳𑀧𑁆𑀨𑀮𑁂𑀲𑀼 𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀆𑀤𑀻𑀲𑀼 𑀯𑀺𑀬 𑀢𑀺𑀡𑁆𑀡𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀅𑀪𑀸𑀯𑀢𑁄 𑀏𑀢𑁆𑀢𑀓𑀫𑁂𑀯 𑀆𑀬𑀼𑀧𑁆𑀧𑀫𑀸𑀡𑀁. 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁.

𑁪. 𑀤𑀼𑀢𑀺𑀬𑀦𑀸𑀦𑀸𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀘𑀢𑀼𑀢𑁆𑀣𑁂 𑀭𑀽𑀧𑀫𑁂𑀯 𑀭𑀽𑀧𑀕𑀢𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀘𑁆𑀘𑀢𑁄𑀢𑀺𑀆𑀤𑀻𑀲𑀼 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀢𑁄, 𑀆𑀩𑀸𑀥𑀝𑁆𑀞𑁂𑀦 𑀭𑁄𑀕𑀢𑁄, 𑀅𑀦𑁆𑀢𑁄 𑀧𑀤𑀼𑀲𑁆𑀲𑀦𑀝𑁆𑀞𑁂𑀦 𑀕𑀡𑁆𑀟𑀢𑁄, 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑀮𑁆𑀮𑀢𑁄, 𑀲𑀤𑀼𑀓𑁆𑀔𑀝𑁆𑀞𑁂𑀦 𑀅𑀖𑀢𑁄, 𑀲𑀫𑁆𑀧𑀻𑀴𑀦𑀝𑁆𑀞𑁂𑀦 𑀆𑀩𑀸𑀥𑀢𑁄, 𑀅𑀯𑀺𑀥𑁂𑀬𑁆𑀬𑀝𑁆𑀞𑁂𑀦 𑀧𑀭𑀢𑁄, 𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀮𑁄𑀓𑀢𑁄, 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀲𑀼𑀜𑁆𑀜𑀢𑁄, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀢𑁄. 𑀏𑀢𑁆𑀣 𑀘 ‘‘𑀅𑀦𑀺𑀘𑁆𑀘𑀢𑁄 𑀧𑀮𑁄𑀓𑀢𑁄’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀓𑀣𑀺𑀢𑀁, ‘‘𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄’’𑀢𑀺 𑀤𑁆𑀯𑀻𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁, 𑀲𑁂𑀲𑁂𑀳𑀺 𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀜𑀸𑀡𑁂𑀦 𑀧𑀲𑁆𑀲𑀢𑀺. 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑁄 𑀢𑀬𑁄 𑀫𑀕𑁆𑀕𑁂 𑀢𑀻𑀡𑀺 𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺. 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻𑀢𑀺 𑀢𑀢𑁆𑀣 𑀞𑀺𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀚𑁆𑀚𑀢𑀺.

𑁫-𑁬. 𑀫𑁂𑀢𑁆𑀢𑀸𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸

𑁧𑁨𑁫-𑁧𑁨𑁬. 𑀧𑀜𑁆𑀘𑀫𑁂 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀫𑁂𑀢𑁆𑀢𑀸, 𑀤𑀼𑀢𑀺𑀬𑀸𑀤𑀺𑀯𑀲𑁂𑀦 𑀓𑀭𑀼𑀡𑀸𑀤𑀬𑁄 𑀤𑀲𑁆𑀲𑀺𑀢𑀸. 𑀙𑀝𑁆𑀞𑀁 𑀘𑀢𑀼𑀢𑁆𑀣𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁭. 𑀧𑀞𑀫𑀢𑀣𑀸𑀕𑀢𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀲𑀢𑁆𑀢𑀫𑁂 𑀧𑀸𑀢𑀼𑀪𑀸𑀯𑀸𑀢𑀺 𑀧𑀸𑀢𑀼𑀪𑀸𑀯𑁂𑀦. 𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻𑀢𑀺 𑀏𑀢𑁆𑀣 𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀑𑀓𑁆𑀓𑀦𑁆𑀢𑁂 𑀳𑀺 𑀢𑀲𑁆𑀫𑀺𑀁 𑀏𑀯𑀁 𑀳𑁄𑀢𑀺, 𑀦 𑀑𑀓𑁆𑀓𑀫𑀫𑀸𑀦𑁂. 𑀅𑀧𑁆𑀧𑀫𑀸𑀡𑁄𑀢𑀺 𑀯𑀼𑀟𑁆𑀠𑀺𑀧𑁆𑀧𑀫𑀸𑀡𑁄, 𑀯𑀺𑀧𑀼𑀮𑁄𑀢𑀺 𑀅𑀢𑁆𑀣𑁄. 𑀉𑀴𑀸𑀭𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀏𑀢𑁆𑀣 𑀤𑁂𑀯𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑁋 𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲 𑀧𑀪𑀸 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀨𑀭𑀢𑀺, 𑀢𑀣𑀸 𑀲𑀭𑀻𑀭𑀲𑁆𑀲, 𑀢𑀣𑀸 𑀯𑀺𑀫𑀸𑀦𑀲𑁆𑀲, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀦𑁆𑀢𑀭𑀺𑀓𑀸𑀢𑀺 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑀸 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀲𑀓𑀝𑀘𑀓𑁆𑀓𑀸𑀦𑀁 𑀧𑀢𑁆𑀢𑀸𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀳𑀘𑁆𑀘 𑀞𑀧𑀺𑀢𑀸𑀦𑀁 𑀫𑀚𑁆𑀛𑁂 𑀑𑀓𑀸𑀲𑁄 𑀯𑀺𑀬. 𑀲𑁄 𑀧𑀦 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄 𑀧𑀭𑀺𑀫𑀸𑀡𑀢𑁄 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁄 𑀳𑁄𑀢𑀺. 𑀅𑀖𑀸𑀢𑀺 𑀦𑀺𑀘𑁆𑀘𑀯𑀺𑀯𑀝𑀸. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸. 𑀅𑀦𑁆𑀥𑀓𑀸𑀭𑀸𑀢𑀺 𑀢𑀫𑀪𑀽𑀢𑀸. 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀅𑀦𑁆𑀥𑀪𑀸𑀯𑀓𑀭𑀡𑀢𑀺𑀫𑀺𑀲𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁆𑀣 𑀓𑀺𑀭 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺. 𑀏𑀯𑀁𑀫𑀳𑀺𑀤𑁆𑀥𑀺𑀓𑀸𑀦𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀺𑀭 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁𑀫𑀳𑀺𑀤𑁆𑀥𑀺𑀓𑀸. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯 𑀦𑀯 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀦𑁆𑀢𑀺, 𑀏𑀯𑀁𑀫𑀳𑀸𑀦𑀼𑀪𑀸𑀯𑀸. 𑀆𑀪𑀸 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀧𑀪𑀸 𑀦𑀧𑁆𑀧𑀳𑁄𑀦𑁆𑀢𑀺. 𑀢𑁂 𑀓𑀺𑀭 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀘𑀭𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀮𑁄𑀓𑀦𑁆𑀢𑀭𑀦𑀺𑀭𑀬𑀸. 𑀢𑀲𑁆𑀫𑀸 𑀢𑁂𑀲𑀁 𑀢𑀢𑁆𑀣 𑀆𑀪𑀸 𑀦𑀧𑁆𑀧𑀳𑁄𑀦𑁆𑀢𑀺.

𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸𑀢𑀺 𑀬𑁂𑀧𑀺 𑀢𑀲𑁆𑀫𑀺𑀁 𑀮𑁄𑀓𑀦𑁆𑀢𑀭𑀫𑀳𑀸𑀦𑀺𑀭𑀬𑁂 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸. 𑀓𑀺𑀁 𑀧𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀪𑀸𑀭𑀺𑀬𑀁 𑀤𑀸𑀭𑀼𑀡𑀁 𑀫𑀸𑀢𑀸𑀧𑀺𑀢𑀽𑀦𑀁 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀉𑀧𑀭𑀺 𑀅𑀧𑀭𑀸𑀥𑀁, 𑀅𑀜𑁆𑀜𑀜𑁆𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀡𑀯𑀥𑀸𑀤𑀺𑀲𑀸𑀳𑀲𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀪𑀬𑀘𑁄𑀭𑀦𑀸𑀕𑀘𑁄𑀭𑀸𑀤𑀬𑁄 𑀯𑀺𑀬. 𑀢𑁂𑀲𑀁 𑀅𑀢𑁆𑀢𑀪𑀸𑀯𑁄 𑀢𑀺𑀕𑀸𑀯𑀼𑀢𑀺𑀓𑁄 𑀳𑁄𑀢𑀺, 𑀯𑀕𑁆𑀕𑀼𑀮𑀻𑀦𑀁 𑀯𑀺𑀬 𑀤𑀻𑀖𑀦𑀔𑀸 𑀳𑁄𑀦𑁆𑀢𑀺. 𑀢𑁂 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺𑀬𑁄 𑀯𑀺𑀬 𑀦𑀔𑁂𑀳𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀸𑀤𑁂 𑀮𑀕𑁆𑀕𑀦𑁆𑀢𑀺. 𑀬𑀤𑀸 𑀲𑀁𑀲𑀧𑁆𑀧𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀕𑀢𑀸 𑀳𑁄𑀦𑁆𑀢𑀺, 𑀅𑀣 ‘‘𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀩𑁆𑀬𑀸𑀯𑀝𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀓𑀲𑀦𑁆𑀥𑀸𑀭𑀓𑀉𑀤𑀓𑁂 𑀧𑀢𑀦𑁆𑀢𑀺, 𑀯𑀸𑀢𑁂 𑀧𑀳𑀭𑀦𑁆𑀢𑁂𑀧𑀺 𑀫𑀥𑀼𑀓𑀨𑀮𑀸𑀦𑀺 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂 𑀧𑀢𑀦𑁆𑀢𑀺, 𑀧𑀢𑀺𑀢𑀫𑀢𑁆𑀢𑀸𑀯 𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂 𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀯𑀺𑀮𑀻𑀬𑀦𑁆𑀢𑀺. 𑀅𑀜𑁆𑀜𑁂𑀧𑀺 𑀓𑀺𑀭 𑀪𑁄 𑀲𑀦𑁆𑀢𑀺 𑀲𑀢𑁆𑀢𑀸𑀢𑀺 𑀪𑁄 𑀬𑀣𑀸 𑀫𑀬𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫, 𑀏𑀯𑀁 𑀅𑀜𑁆𑀜𑁂𑀧𑀺 𑀓𑀺𑀭 𑀲𑀢𑁆𑀢𑀸 𑀇𑀤𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑀢𑁆𑀣𑀸𑀬 𑀇𑀥𑀽𑀧𑀧𑀦𑁆𑀦𑀸𑀢𑀺 𑀢𑀁𑀤𑀺𑀯𑀲𑀁 𑀧𑀲𑁆𑀲𑀦𑁆𑀢𑀺. 𑀅𑀬𑀁 𑀧𑀦 𑀑𑀪𑀸𑀲𑁄 𑀏𑀓𑀬𑀸𑀕𑀼𑀧𑀸𑀦𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺. 𑀬𑀸𑀯𑀢𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀤𑁆𑀥𑁄 𑀆𑀭𑀫𑁆𑀫𑀡𑀁 𑀯𑀺𑀪𑀸𑀯𑁂𑀢𑀺, 𑀢𑀢𑁆𑀢𑀓𑀁 𑀓𑀸𑀮𑀁 𑀳𑁄𑀢𑀺. 𑀤𑀻𑀖𑀪𑀸𑀡𑀓𑀸 𑀧𑀦 ‘‘𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁂𑀯 𑀯𑀺𑀚𑁆𑀚𑀼𑀑𑀪𑀸𑀲𑁄 𑀯𑀺𑀬 𑀦𑀺𑀘𑁆𑀙𑀭𑀺𑀢𑁆𑀯𑀸 𑀓𑀺𑀁 𑀇𑀤𑀦𑁆𑀢𑀺 𑀪𑀡𑀦𑁆𑀢𑀸𑀦𑀁𑀬𑁂𑀯 𑀅𑀦𑁆𑀢𑀭𑀥𑀸𑀬𑀢𑀻’’𑀢𑀺 𑀯𑀤𑀦𑁆𑀢𑀺.

𑁮. 𑀤𑀼𑀢𑀺𑀬𑀢𑀣𑀸𑀕𑀢𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. 𑀅𑀝𑁆𑀞𑀫𑁂 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀮𑁆𑀮𑀻𑀬𑀺𑀢𑀩𑁆𑀩𑀝𑁆𑀞𑁂𑀦 𑀆𑀮𑀬𑁄𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀲𑀓𑀮𑀫𑁂𑀯 𑀯𑀸 𑀯𑀝𑁆𑀝𑀁. 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄, 𑀆𑀮𑀬𑁄 𑀆𑀭𑀸𑀫𑁄 𑀏𑀢𑀺𑀲𑁆𑀲𑀸𑀢𑀺 𑀆𑀮𑀬𑀸𑀭𑀸𑀫𑀸. 𑀆𑀮𑀬𑁂 𑀭𑀢𑀸𑀢𑀺 𑀆𑀮𑀬𑀭𑀢𑀸. 𑀆𑀮𑀬𑁂 𑀲𑀫𑁆𑀫𑀼𑀤𑀺𑀢𑀸𑀢𑀺 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀅𑀦𑀸𑀮𑀬𑁂 𑀥𑀫𑁆𑀫𑁂𑀢𑀺 𑀆𑀮𑀬𑀧𑀝𑀺𑀧𑀓𑁆𑀔𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑁂 𑀅𑀭𑀺𑀬𑀥𑀫𑁆𑀫𑁂. 𑀲𑀼𑀲𑁆𑀲𑀽𑀲𑀢𑀻𑀢𑀺 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄𑀢𑀁 𑀑𑀤𑀳𑀢𑀻𑀢𑀺 𑀲𑁄𑀢𑀁 𑀞𑀧𑁂𑀢𑀺. 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀻𑀢𑀺 𑀆𑀚𑀸𑀦𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺. 𑀫𑀸𑀦𑁄𑀢𑀺 𑀫𑀜𑁆𑀜𑀦𑀸, 𑀫𑀜𑁆𑀜𑀺𑀢𑀩𑁆𑀩𑀝𑁆𑀞𑁂𑀦 𑀯𑀸 𑀲𑀓𑀮𑀁 𑀯𑀝𑁆𑀝𑀫𑁂𑀯. 𑀫𑀸𑀦𑀯𑀺𑀦𑀬𑁂 𑀥𑀫𑁆𑀫𑁂𑀢𑀺 𑀫𑀸𑀦𑀯𑀺𑀦𑀬𑀥𑀫𑁆𑀫𑁂. 𑀉𑀧𑀲𑀫𑀧𑀝𑀺𑀧𑀓𑁆𑀔𑁄 𑀅𑀦𑀼𑀧𑀲𑀫𑁄, 𑀅𑀦𑀼𑀧𑀲𑀦𑁆𑀢𑀝𑁆𑀞𑁂𑀦 𑀯𑀸 𑀯𑀝𑁆𑀝𑀫𑁂𑀯 𑀅𑀦𑀼𑀧𑀲𑀫𑁄 𑀦𑀸𑀫. 𑀑𑀧𑀲𑀫𑀺𑀓𑁂𑀢𑀺 𑀉𑀧𑀲𑀫𑀓𑀭𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑁂. 𑀅𑀯𑀺𑀚𑁆𑀚𑀸𑀬 𑀕𑀢𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀯𑀺𑀚𑁆𑀚𑀸𑀕𑀢𑀸. 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂𑀦 𑀧𑀭𑀺𑀬𑁄𑀦𑀤𑁆𑀥𑀢𑁆𑀢𑀸 𑀅𑀡𑁆𑀟𑀁 𑀯𑀺𑀬 𑀪𑀽𑀢𑀸𑀢𑀺 𑀅𑀡𑁆𑀟𑀪𑀽𑀢𑀸. 𑀲𑀫𑀦𑁆𑀢𑀢𑁄 𑀑𑀦𑀤𑁆𑀥𑀸𑀢𑀺 𑀧𑀭𑀺𑀬𑁄𑀦𑀤𑁆𑀥𑀸. 𑀅𑀯𑀺𑀚𑁆𑀚𑀸𑀯𑀺𑀦𑀬𑁂𑀢𑀺 𑀅𑀯𑀺𑀚𑁆𑀚𑀸𑀯𑀺𑀦𑀬𑁄 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀁, 𑀢𑀁𑀦𑀺𑀲𑁆𑀲𑀺𑀢𑁂 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀝𑁆𑀝𑀁, 𑀘𑀢𑀽𑀲𑀼 𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁯. 𑀆𑀦𑀦𑁆𑀤𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀦𑀯𑀫𑁂 𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬𑀸𑀢𑀺 𑀬𑁂 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀬𑁂 𑀯𑀸 ‘‘𑀆𑀬𑀲𑁆𑀫𑀸 𑀓𑀺𑀭𑀸𑀦𑀦𑁆𑀤𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀩𑀳𑀼𑀲𑁆𑀲𑀼𑀢𑁄 𑀲𑀗𑁆𑀖𑀲𑁄𑀪𑀦𑁄’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑁂 𑀲𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 ‘‘𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀢𑁆𑀢𑀫𑀦𑀸𑀢𑀺 ‘‘𑀲𑀯𑀦𑁂𑀦 𑀦𑁄 𑀤𑀲𑁆𑀲𑀦𑀁 𑀲𑀫𑁂𑀢𑀻’’𑀢𑀺 𑀲𑀓𑀫𑀦𑀸 𑀢𑀼𑀝𑁆𑀞𑀘𑀺𑀢𑁆𑀢𑀸. 𑀥𑀫𑁆𑀫𑀦𑁆𑀢𑀺 ‘‘𑀓𑀘𑁆𑀘𑀺, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀓𑀫𑁆𑀫𑀁 𑀓𑀭𑁄𑀣, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀧𑀽𑀭𑁂𑀣𑀸’’𑀢𑀺 𑀏𑀯𑀭𑀽𑀧𑀁 𑀧𑀝𑀺𑀲𑀦𑁆𑀣𑀸𑀭𑀥𑀫𑁆𑀫𑀁. 𑀢𑀢𑁆𑀣 𑀪𑀺𑀓𑁆𑀔𑀼𑀦𑀻𑀲𑀼 ‘‘𑀓𑀘𑁆𑀘𑀺, 𑀪𑀕𑀺𑀦𑀺𑀬𑁄, 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀣𑀸’’𑀢𑀺 𑀇𑀤𑀫𑁆𑀧𑀺 𑀦𑀸𑀦𑀸𑀓𑀭𑀡𑀁 𑀳𑁄𑀢𑀺. 𑀉𑀧𑀸𑀲𑀓𑁂𑀲𑀼 ‘‘𑀲𑁆𑀯𑀸𑀕𑀢𑀁, 𑀉𑀧𑀸𑀲𑀓, 𑀦 𑀢𑁂 𑀓𑀺𑀜𑁆𑀘𑀺 𑀲𑀻𑀲𑀁 𑀯𑀸 𑀅𑀗𑁆𑀕𑀁 𑀯𑀸 𑀭𑀼𑀚𑁆𑀚𑀢𑀺, 𑀅𑀭𑁄𑀕𑀸 𑀢𑁂 𑀧𑀼𑀢𑁆𑀢𑀪𑀸𑀢𑀭𑁄’’𑀢𑀺 𑀦 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺, 𑀏𑀯𑀁 𑀧𑀦 𑀓𑀭𑁄𑀢𑀺 𑁋 ‘‘𑀓𑀣𑀁, 𑀉𑀧𑀸𑀲𑀓𑀸, 𑀢𑀻𑀡𑀺 𑀲𑀭𑀡𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀣, 𑀫𑀸𑀲𑀲𑁆𑀲 𑀅𑀝𑁆𑀞 𑀉𑀧𑁄𑀲𑀣𑁂 𑀓𑀭𑁄𑀣, 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀯𑀢𑁆𑀢𑀁 𑀧𑀽𑀭𑁂𑀣, 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀝𑀺𑀚𑀕𑁆𑀕𑀣𑀸’’𑀢𑀺. 𑀉𑀧𑀸𑀲𑀺𑀓𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁦. 𑀘𑀓𑁆𑀓𑀯𑀢𑁆𑀢𑀺𑀅𑀘𑁆𑀙𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁦. 𑀤𑀲𑀫𑁂 𑀔𑀢𑁆𑀢𑀺𑀬𑀧𑀭𑀺𑀲𑀸𑀢𑀺 𑀅𑀪𑀺𑀲𑀺𑀢𑁆𑀢𑀸 𑀅𑀦𑀪𑀺𑀲𑀺𑀢𑁆𑀢𑀸 𑀘 𑀔𑀢𑁆𑀢𑀺𑀬𑀸. 𑀢𑁂 𑀳𑀺 𑀓𑀺𑀭 ‘‘𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄 𑀳𑁄𑀢𑀺, 𑀆𑀓𑀸𑀲𑁂𑀦 𑀯𑀺𑀘𑀭𑀦𑁆𑀢𑁄 𑀭𑀚𑁆𑀚𑀁 𑀅𑀦𑀼𑀲𑀸𑀲𑀢𑀺, 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸’’𑀢𑀺 𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀲𑀯𑀦𑁂𑀦 𑀤𑀲𑁆𑀲𑀦𑀫𑁆𑀳𑀺 𑀲𑀫𑁂𑀦𑁆𑀢𑁂 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀪𑀸𑀲𑀢𑀻𑀢𑀺 ‘‘𑀓𑀣𑀁, 𑀢𑀸𑀢𑀸, 𑀭𑀸𑀚𑀥𑀫𑁆𑀫𑀁 𑀧𑀽𑀭𑁂𑀣, 𑀧𑀯𑁂𑀡𑀺𑀁 𑀭𑀓𑁆𑀔𑀣𑀸’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀩𑁆𑀭𑀸𑀳𑁆𑀫𑀡𑁂𑀲𑀼 𑀧𑀦 ‘‘𑀓𑀣𑀜𑁆𑀘, 𑀆𑀘𑀭𑀺𑀬𑀸, 𑀫𑀦𑁆𑀢𑁂 𑀯𑀸𑀘𑁂𑀣, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀫𑀦𑁆𑀢𑁂 𑀕𑀡𑁆𑀳𑀦𑁆𑀢𑀺, 𑀤𑀓𑁆𑀔𑀺𑀡𑀁 𑀯𑀸 𑀯𑀢𑁆𑀣𑀸𑀦𑀺 𑀯𑀸 𑀲𑀻𑀮𑀁 𑀯𑀸 𑀮𑀪𑀣𑀸’’𑀢𑀺 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀕𑀳𑀧𑀢𑀻𑀲𑀼 ‘‘𑀓𑀣𑀁, 𑀢𑀸𑀢𑀸, 𑀦 𑀯𑁄 𑀭𑀸𑀚𑀓𑀼𑀮𑀢𑁄 𑀤𑀡𑁆𑀟𑁂𑀦 𑀯𑀸 𑀩𑀦𑁆𑀥𑀦𑁂𑀦 𑀯𑀸 𑀧𑀻𑀴𑀸 𑀅𑀢𑁆𑀣𑀺, 𑀲𑀫𑁆𑀫𑀸 𑀤𑁂𑀯𑁄 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺, 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀲𑀫𑀡𑁂𑀲𑀼 ‘‘𑀓𑀣𑀁, 𑀪𑀦𑁆𑀢𑁂, 𑀓𑀘𑁆𑀘𑀺 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀼𑀮𑀪𑀸, 𑀲𑀫𑀡𑀥𑀫𑁆𑀫𑁂 𑀦𑀧𑁆𑀧𑀫𑀚𑁆𑀚𑀣𑀸’’𑀢𑀺 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀻𑀢𑀺.

𑀪𑀬𑀯𑀕𑁆𑀕𑁄 𑀢𑀢𑀺𑀬𑁄.

(𑁧𑁪) 𑁪. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁧. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀻𑀢𑀺 𑀬𑁂𑀳𑀺 𑀅𑀦𑀦𑁆𑀢𑀭𑀸 𑀉𑀧𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀻𑀢𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀘𑁆𑀘𑀬𑀸𑀦𑀺. 𑀲𑀓𑀤𑀸𑀕𑀸𑀫𑀺𑀲𑁆𑀲𑀸𑀢𑀺 𑀇𑀤𑀁 𑀅𑀧𑁆𑀧𑀳𑀻𑀦𑀲𑀁𑀬𑁄𑀚𑀦𑁂𑀲𑀼 𑀅𑀭𑀺𑀬𑁂𑀲𑀼 𑀉𑀢𑁆𑀢𑀫𑀓𑁄𑀝𑀺𑀬𑀸 𑀕𑀳𑀺𑀢𑀁. 𑀬𑀲𑁆𑀫𑀸 𑀧𑀦 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲 𑀅𑀦𑁆𑀢𑀭𑀸 𑀉𑀧𑀧𑀢𑁆𑀢𑀺 𑀦𑀢𑁆𑀣𑀺, 𑀬𑀁 𑀧𑀦 𑀲𑁄 𑀢𑀢𑁆𑀣 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀁 𑀓𑀼𑀲𑀮𑀢𑁆𑀢𑀸 ‘‘𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀧𑀘𑁆𑀘𑀬𑁄’’ 𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸𑀲𑁆𑀲 ‘‘𑀉𑀧𑀧𑀢𑁆𑀢𑀺𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺, 𑀪𑀯𑀧𑀝𑀺𑀮𑀸𑀪𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀑𑀭𑀫𑁆𑀪𑀸𑀕𑀺𑀬𑁂𑀲𑀼 𑀘 𑀅𑀧𑁆𑀧𑀳𑀻𑀦𑀁 𑀉𑀧𑀸𑀤𑀸𑀬 𑀲𑀓𑀤𑀸𑀕𑀸𑀫𑀺𑀲𑁆𑀲 𑀅𑀯𑀺𑀲𑁂𑀲𑁂𑀦 ‘‘𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁨. 𑀧𑀝𑀺𑀪𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀤𑀼𑀢𑀺𑀬𑁂 𑀬𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄 𑀦𑁄 𑀫𑀼𑀢𑁆𑀢𑀧𑁆𑀧𑀝𑀺𑀪𑀸𑀦𑁄𑀢𑀺 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀬𑀼𑀢𑁆𑀢𑀫𑁂𑀯 𑀓𑀣𑁂𑀢𑀺, 𑀲𑀻𑀖𑀁 𑀧𑀦 𑀦 𑀓𑀣𑁂𑀢𑀺, 𑀲𑀡𑀺𑀓𑀫𑁂𑀯 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁩. 𑀉𑀕𑁆𑀖𑀝𑀺𑀢𑀜𑁆𑀜𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀢𑀢𑀺𑀬𑁂 𑀘𑀢𑀼𑀦𑁆𑀦𑀫𑁆𑀧𑀺 𑀧𑀼𑀕𑁆𑀕𑀮𑀸𑀦𑀁 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄. 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄 𑀩𑀳𑀼𑀫𑁆𑀧𑀺 𑀪𑀡𑀢𑁄 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄 𑀩𑀳𑀼𑀫𑁆𑀧𑀺 𑀯𑀸𑀘𑀬𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄’’𑀢𑀺 (𑀧𑀼. 𑀧. 𑁧𑁪𑁮-𑁧𑁫𑁧).

𑁪. 𑀉𑀝𑁆𑀞𑀸𑀦𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀘𑀢𑀼𑀢𑁆𑀣𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦𑁂𑀯 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀫𑀢𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 𑀮𑀪𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀁 𑀧𑀦 𑀉𑀝𑁆𑀞𑀸𑀦𑀁 𑀆𑀕𑀫𑁆𑀫 𑀓𑀺𑀜𑁆𑀘𑀺 𑀧𑀼𑀜𑁆𑀜𑀨𑀮𑀁 𑀦𑀧𑁆𑀧𑀝𑀺𑀮𑀪𑀢𑀺, 𑀅𑀬𑀁 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻 𑀦 𑀓𑀫𑁆𑀫𑀨𑀮𑀽𑀧𑀚𑀻𑀯𑀻 𑀦𑀸𑀫. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀧𑀦 𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀤𑁂𑀯𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦 𑀯𑀺𑀦𑀸 𑀧𑀼𑀜𑁆𑀜𑀨𑀮𑀲𑁆𑀲𑁂𑀯 𑀉𑀧𑀚𑀻𑀯𑀦𑀢𑁄 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄 𑀦 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄 𑀦𑀸𑀫. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄 𑀘 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄 𑀘. 𑀦𑁂𑀭𑀬𑀺𑀓𑀲𑀢𑁆𑀢𑀸 𑀦𑁂𑀯 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄 𑀦 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀜𑁆𑀜𑀨𑀮𑀫𑁂𑀯 𑀓𑀫𑁆𑀫𑀨𑀮𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀢𑁂𑀲𑀁 𑀦𑀢𑁆𑀣𑀺.

𑁫. 𑀲𑀸𑀯𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀧𑀜𑁆𑀘𑀫𑁂 𑀧𑀞𑀫𑁄 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑁄, 𑀤𑀼𑀢𑀺𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀓𑀼𑀲𑀮𑀓𑀸𑀭𑀓𑁄 𑀮𑁄𑀓𑀺𑀬𑀧𑀼𑀣𑀼𑀚𑁆𑀚𑀦𑁄, 𑀢𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄𑀧𑀺 𑀏𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀘𑀢𑀼𑀢𑁆𑀣𑁄 𑀔𑀻𑀡𑀸𑀲𑀯𑁄. 𑀲𑁄 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀅𑀦𑀯𑀚𑁆𑀚𑁄.

𑁬-𑁭. 𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁬-𑁧𑁩𑁭. 𑀙𑀝𑁆𑀞𑁂 𑀧𑀞𑀫𑁄 𑀮𑁄𑀓𑀺𑀬𑀫𑀳𑀸𑀚𑀦𑁄, 𑀤𑀼𑀢𑀺𑀬𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀲𑁄𑀢𑀸𑀧𑀦𑁆𑀦𑁄 𑀘 𑀲𑀓𑀤𑀸𑀕𑀸𑀫𑀻 𑀘, 𑀢𑀢𑀺𑀬𑁄 𑀅𑀦𑀸𑀕𑀸𑀫𑀻. 𑀲𑁄 𑀳𑀺 𑀬𑀲𑁆𑀫𑀸 𑀢𑀗𑁆𑀔𑀡𑀺𑀓𑀫𑁆𑀧𑀺 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀁 𑀛𑀸𑀦𑀁 𑀧𑀝𑀺𑀮𑀪𑀢𑀺𑀬𑁂𑀯, 𑀢𑀲𑁆𑀫𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀧𑀺 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻𑀬𑁂𑀯. 𑀘𑀢𑀼𑀢𑁆𑀣𑁄 𑀔𑀻𑀡𑀸𑀲𑀯𑁄𑀬𑁂𑀯. 𑀲𑁄 𑀳𑀺 𑀲𑀩𑁆𑀩𑁂𑀲𑀁 𑀲𑀻𑀮𑀸𑀤𑀺𑀧𑀘𑁆𑀘𑀦𑀻𑀓𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀢𑁆𑀣 𑀧𑀭𑀺𑀧𑀽𑀭𑀓𑀸𑀭𑀻 𑀦𑀸𑀫. 𑀲𑀢𑁆𑀢𑀫𑁂𑀧𑀺 𑀙𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀕𑁆𑀕𑀮𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁮. 𑀦𑀺𑀓𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁮. 𑀅𑀝𑁆𑀞𑀫𑁂 𑀦𑀺𑀓𑀝𑁆𑀞𑀓𑀸𑀬𑁄𑀢𑀺 𑀦𑀺𑀕𑁆𑀕𑀢𑀓𑀸𑀬𑁄. 𑀅𑀦𑀺𑀓𑀝𑁆𑀞𑀘𑀺𑀢𑁆𑀢𑁄𑀢𑀺 𑀅𑀦𑀼𑀧𑀯𑀺𑀝𑁆𑀞𑀘𑀺𑀢𑁆𑀢𑁄. 𑀓𑀸𑀬𑁂𑀦𑁂𑀯 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑁄, 𑀘𑀺𑀢𑁆𑀢𑁂𑀦 𑀅𑀭𑀜𑁆𑀜𑁂 𑀯𑀲𑀦𑁆𑀢𑁄𑀧𑀺 𑀕𑀸𑀫𑀫𑁂𑀯 𑀧𑀯𑀺𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀦𑀯𑀫𑁂 𑀅𑀲𑀳𑀺𑀢𑀦𑁆𑀢𑀺 𑀅𑀢𑁆𑀣𑁂𑀦 𑀅𑀲𑀁𑀬𑀼𑀢𑁆𑀢𑀁. 𑀦 𑀓𑀼𑀲𑀮𑀸 𑀳𑁄𑀢𑀻𑀢𑀺 𑀦 𑀙𑁂𑀓𑀸 𑀳𑁄𑀢𑀺. 𑀲𑀳𑀺𑀢𑀸𑀲𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑀦𑀺𑀲𑁆𑀲𑀺𑀢𑀲𑁆𑀲 𑀯𑀸 𑀅𑀦𑀺𑀲𑁆𑀲𑀺𑀢𑀲𑁆𑀲 𑀯𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀯𑀸𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀤𑀲𑀫𑁂 𑀅𑀢𑁆𑀣𑀢𑁄 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀻𑀢𑀺 𑀅𑀝𑁆𑀞𑀓𑀣𑀁 𑀧𑀼𑀘𑁆𑀙𑀺𑀢𑁄 𑀧𑀭𑀺𑀬𑀸𑀤𑀸𑀦𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑁄 𑀩𑁆𑀬𑀜𑁆𑀚𑀦𑀢𑁄𑀢𑀺 𑀩𑁆𑀬𑀜𑁆𑀚𑀦𑀁 𑀧𑀦𑀲𑁆𑀲 𑀧𑀯𑀢𑁆𑀢𑀢𑀺 𑀦 𑀧𑀭𑀺𑀬𑀸𑀤𑀺𑀬𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺.

𑀧𑀼𑀕𑁆𑀕𑀮𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

(𑁧𑁫) 𑁫. 𑀆𑀪𑀸𑀯𑀕𑁆𑀕𑁄

𑁧. 𑀆𑀪𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀆𑀪𑀸𑀲𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀸𑀪𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨-𑁫. 𑀧𑀪𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁨-𑁧𑁪𑁫. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀧𑀪𑀸𑀲𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀧𑁆𑀧𑀪𑀸. 𑀆𑀮𑁄𑀓𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀸𑀮𑁄𑀓𑁄. 𑀑𑀪𑀸𑀲𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑁄𑀪𑀸𑀲𑁄. 𑀧𑀚𑁆𑀚𑁄𑀢𑀦𑀯𑀲𑁂𑀦 𑀘𑀦𑁆𑀤𑁄𑀯 𑀘𑀦𑁆𑀤𑀧𑀚𑁆𑀚𑁄𑀢𑁄𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁬. 𑀧𑀞𑀫𑀓𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀙𑀝𑁆𑀞𑁂 𑀓𑀸𑀮𑀸𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑀸. 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀓𑀸𑀮𑁂 𑀥𑀫𑁆𑀫𑀲𑁆𑀲𑀯𑀦𑀁. 𑀥𑀫𑁆𑀫𑀲𑀸𑀓𑀘𑁆𑀙𑀸𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀁𑀲𑀦𑁆𑀤𑀦𑀓𑀣𑀸.

𑁭. 𑀤𑀼𑀢𑀺𑀬𑀓𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀲𑀢𑁆𑀢𑀫𑁂 𑀓𑀸𑀮𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀪𑀸𑀯𑀺𑀬𑀦𑁆𑀢𑀺 𑀘𑁂𑀯 𑀅𑀦𑀼𑀧𑀭𑀺𑀯𑀢𑁆𑀢𑀺𑀬𑀦𑁆𑀢𑀺 𑀘. 𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁯-𑁧𑁦. 𑀲𑀼𑀘𑀭𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁯-𑁧𑁫𑁦. 𑀦𑀯𑀫𑁂 𑀲𑀡𑁆𑀳𑀸 𑀯𑀸𑀘𑀸𑀢𑀺 𑀫𑀼𑀤𑀼𑀓𑀯𑀸𑀘𑀸. 𑀫𑀦𑁆𑀢𑀪𑀸𑀲𑀸𑀢𑀺 𑀫𑀦𑁆𑀢𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑀺𑀢𑀓𑀣𑀸. 𑀤𑀲𑀫𑁂 𑀲𑀻𑀮𑀲𑀸𑀭𑁄𑀢𑀺 𑀲𑀸𑀭𑀲𑀫𑁆𑀧𑀸𑀧𑀓𑀁 𑀲𑀻𑀮𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀪𑀸𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.