𑁪. 𑀘𑀢𑀼𑀢𑁆𑀣𑀧𑀡𑁆𑀡𑀸𑀲𑀓𑀁
(𑁧𑁬) 𑁧. 𑀇𑀦𑁆𑀤𑁆𑀭𑀺𑀬𑀯𑀕𑁆𑀕𑁄
𑁧. 𑀇𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸
𑁧𑁫𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀲𑀤𑁆𑀥𑀸𑀥𑀼𑀭𑁂𑀦 𑀇𑀦𑁆𑀤𑀝𑁆𑀞𑀁 𑀓𑀭𑁄𑀢𑀻𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀢𑀺𑀬𑁂 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀦𑀝𑁆𑀞𑁂𑀦 𑀲𑀤𑁆𑀥𑀸𑀩𑀮𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑀺𑀬𑁂 𑀅𑀦𑀯𑀚𑁆𑀚𑀩𑀮𑀦𑁆𑀢𑀺 𑀦𑀺𑀤𑁆𑀤𑁄𑀲𑀩𑀮𑀁. 𑀲𑀗𑁆𑀕𑀳𑀩𑀮𑀦𑁆𑀢𑀺 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑀬𑀼𑀢𑁆𑀢𑀓𑀸𑀦𑀁 𑀲𑀗𑁆𑀕𑀡𑁆𑀳𑀦𑀩𑀮𑀁. 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀉𑀢𑁆𑀢𑀸𑀦𑀸𑀦𑁂𑀯.
𑁬. 𑀓𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁫𑁬. 𑀙𑀝𑁆𑀞𑁂 𑀲𑀁𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀢𑀬𑁄 𑀲𑀁𑀯𑀝𑁆𑀝𑀸 𑀆𑀧𑁄𑀲𑀁𑀯𑀝𑁆𑀝𑁄, 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺. 𑀬𑀤𑀸 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀢𑁂𑀦 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀤𑀸𑀧𑀺 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁩-𑁪𑁦𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.
𑁭. 𑀭𑁄𑀕𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁫𑁭. 𑀲𑀢𑁆𑀢𑀫𑁂 𑀯𑀺𑀖𑀸𑀢𑀯𑀸𑀢𑀺 𑀫𑀳𑀺𑀘𑁆𑀙𑀸𑀧𑀘𑁆𑀘𑀬𑁂𑀦 𑀯𑀺𑀖𑀸𑀢𑁂𑀦 𑀤𑀼𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄. 𑀅𑀦𑀯𑀜𑁆𑀜𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀧𑀭𑁂𑀳𑀺 𑀅𑀦𑀯𑀚𑀸𑀦𑀦𑀲𑁆𑀲 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀲𑀼𑀲𑀗𑁆𑀔𑀢𑀘𑀢𑀼𑀧𑀘𑁆𑀘𑀬𑀲𑀗𑁆𑀔𑀸𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀘𑁂𑀯 𑀯𑀡𑁆𑀡𑀪𑀡𑀦𑀲𑀗𑁆𑀔𑀸𑀢𑀲𑁆𑀲 𑀲𑀺𑀮𑁄𑀓𑀲𑁆𑀲 𑀘 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀲𑀗𑁆𑀔𑀸𑀬 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀻𑀢𑀺 ‘‘𑀇𑀢𑀺 𑀫𑀁 𑀏𑀢𑁂 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀚𑀸𑀦𑀦𑀢𑁆𑀣𑀸𑀬 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.
𑁮. 𑀧𑀭𑀺𑀳𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁫𑁮. 𑀅𑀝𑁆𑀞𑀫𑁂 𑀕𑀫𑁆𑀪𑀻𑀭𑁂𑀲𑀽𑀢𑀺 𑀅𑀢𑁆𑀣𑀕𑀫𑁆𑀪𑀻𑀭𑁂𑀲𑀼. 𑀞𑀸𑀦𑀸𑀞𑀸𑀦𑁂𑀲𑀽𑀢𑀺 𑀓𑀸𑀭𑀡𑀸𑀓𑀸𑀭𑀡𑁂𑀲𑀼. 𑀦 𑀓𑀫𑀢𑀻𑀢𑀺 𑀦𑀸𑀯𑀕𑀸𑀳𑀢𑀺 𑀦𑀧𑁆𑀧𑀯𑀢𑁆𑀢𑀢𑀺. 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀏𑀢𑁆𑀣 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀧𑀜𑁆𑀜𑀸𑀧𑀺 𑀯𑀝𑁆𑀝𑀢𑀺, 𑀲𑀫𑁆𑀫𑀲𑀦𑀧𑁆𑀧𑀝𑀺𑀯𑁂𑀥𑀧𑀜𑁆𑀜𑀸𑀧𑀺 𑀯𑀝𑁆𑀝𑀢𑀺𑀬𑁂𑀯.
𑁯. 𑀪𑀺𑀓𑁆𑀔𑀼𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁫𑁯. 𑀦𑀯𑀫𑁂 𑀏𑀳𑀺 𑀢𑁆𑀯𑀦𑁆𑀢𑀺 𑀣𑁂𑀭𑁂 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀢𑀁 𑀧𑀳𑀺𑀡𑀺𑀢𑀼𑀁 𑀏𑀯𑀫𑀸𑀳. 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸𑀢𑀺 𑀲𑀳 𑀲𑀻𑀲𑁂𑀦 𑀓𑀸𑀬𑀁 𑀧𑀸𑀭𑀼𑀧𑀺𑀢𑁆𑀯𑀸. 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀻𑀢𑀺 𑀯𑁂𑀕𑁂𑀦 𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀺. 𑀏𑀢𑀤𑀯𑁄𑀘𑀸𑀢𑀺 𑀢𑀲𑁆𑀲𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀮𑁄𑀪𑀧𑁆𑀧𑀳𑀸𑀦𑀢𑁆𑀣𑀸𑀬 𑀲𑀡𑁆𑀳𑁂𑀦𑁂𑀯 𑀅𑀲𑀼𑀪𑀓𑀣𑀁 𑀓𑀣𑁂𑀢𑀼𑀁 𑀏𑀢𑀁 𑀅𑀯𑁄𑀘. 𑀆𑀳𑀸𑀭𑀲𑀫𑁆𑀪𑀽𑀢𑁄𑀢𑀺 𑀆𑀳𑀸𑀭𑁂𑀦 𑀲𑀫𑁆𑀪𑀽𑀢𑁄 𑀆𑀳𑀸𑀭𑀁 𑀦𑀺𑀲𑁆𑀲𑀸𑀬 𑀯𑀟𑁆𑀠𑀺𑀢𑁄. 𑀆𑀳𑀸𑀭𑀁 𑀦𑀺𑀲𑁆𑀲𑀸𑀬 𑀆𑀳𑀸𑀭𑀁 𑀧𑀚𑀳𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀦𑀺𑀲𑁆𑀲𑀸𑀬 𑀢𑀁 𑀏𑀯𑀁 𑀬𑁄𑀦𑀺𑀲𑁄 𑀲𑁂𑀯𑀫𑀸𑀦𑁄 𑀧𑀼𑀩𑁆𑀩𑀓𑀫𑁆𑀫𑀲𑀗𑁆𑀔𑀸𑀢𑀁 𑀆𑀳𑀸𑀭𑀁 𑀧𑀚𑀳𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀧𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀢𑀡𑁆𑀳𑀸 𑀧𑀚𑀳𑀺𑀢𑀩𑁆𑀩𑀸.
𑀢𑀡𑁆𑀳𑀁 𑀧𑀚𑀳𑀢𑀻𑀢𑀺 𑀇𑀤𑀸𑀦𑀺 𑀏𑀯𑀁 𑀧𑀯𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀡𑁆𑀳𑀁 𑀦𑀺𑀲𑁆𑀲𑀸𑀬 𑀯𑀝𑁆𑀝𑀫𑀽𑀮𑀺𑀓𑀁 𑀧𑀼𑀩𑁆𑀩𑀢𑀡𑁆𑀳𑀁 𑀧𑀚𑀳𑀢𑀺. 𑀅𑀬𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀡𑁆𑀳𑀸 𑀓𑀼𑀲𑀮𑀸 𑀅𑀓𑀼𑀲𑀮𑀸𑀢𑀺? 𑀅𑀓𑀼𑀲𑀮𑀸. 𑀲𑁂𑀯𑀺𑀢𑀩𑁆𑀩𑀸 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺? 𑀲𑁂𑀯𑀺𑀢𑀩𑁆𑀩𑀸. 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺 𑀦𑀸𑀓𑀟𑁆𑀠𑀢𑀻𑀢𑀺? 𑀦𑀸𑀓𑀟𑁆𑀠𑀢𑀺. 𑀏𑀢𑀺𑀲𑁆𑀲𑀸𑀧𑀺 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀲𑁂𑀯𑀺𑀢𑀩𑁆𑀩𑀢𑀡𑁆𑀳𑀸𑀬 𑀦𑀺𑀓𑀦𑁆𑀢𑀺 𑀧𑀚𑀳𑀺𑀢𑀩𑁆𑀩𑀸𑀬𑁂𑀯. 𑀲𑁄 𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀆𑀲𑀯𑀸𑀦𑀁 𑀔𑀬𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀓𑀺𑀫𑀗𑁆𑀕𑀁 𑀧𑀦𑀸𑀳𑀦𑁆𑀢𑀺 𑀏𑀢𑁆𑀣 𑀓𑀺𑀫𑀗𑁆𑀕𑀁 𑀧𑀦𑀸𑀢𑀺 𑀓𑀸𑀭𑀡𑀧𑀭𑀺𑀯𑀺𑀢𑀓𑁆𑀓𑀦𑀫𑁂𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑁄 𑀆𑀬𑀲𑁆𑀫𑀸 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀢𑀺, 𑀅𑀳𑀁 𑀓𑁂𑀦 𑀓𑀸𑀭𑀡𑁂𑀦 𑀦 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀺. 𑀲𑁄𑀧𑀺 𑀳𑀺 𑀆𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀧𑀼𑀢𑁆𑀢𑁄, 𑀅𑀳𑀫𑁆𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀧𑀼𑀢𑁆𑀢𑁄, 𑀫𑀬𑁆𑀳𑀫𑁆𑀧𑁂𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺. 𑀫𑀸𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 𑀇𑀤𑀁 𑀏𑀯𑀁 𑀉𑀧𑁆𑀧𑀦𑁆𑀦𑀲𑁂𑀯𑀺𑀢𑀩𑁆𑀩𑀫𑀸𑀦𑀁 𑀦𑀺𑀲𑁆𑀲𑀸𑀬. 𑀫𑀸𑀦𑀁 𑀧𑀚𑀳𑀢𑀻𑀢𑀺 𑀯𑀝𑁆𑀝𑀫𑀽𑀮𑀓𑀁 𑀧𑀼𑀩𑁆𑀩𑀫𑀸𑀦𑀁 𑀧𑀚𑀳𑀢𑀺. 𑀬𑀁 𑀦𑀺𑀲𑁆𑀲𑀸𑀬 𑀧𑀦𑁂𑀲 𑀢𑀁 𑀧𑀚𑀳𑀢𑀺, 𑀲𑁄𑀧𑀺 𑀢𑀡𑁆𑀳𑀸 𑀯𑀺𑀬 𑀅𑀓𑀼𑀲𑀮𑁄 𑀘𑁂𑀯 𑀲𑁂𑀯𑀺𑀢𑀩𑁆𑀩𑁄 𑀘, 𑀦𑁄 𑀘 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺. 𑀦𑀺𑀓𑀦𑁆𑀢𑀺 𑀧𑀦 𑀢𑀲𑁆𑀫𑀺𑀫𑁆𑀧𑀺 𑀧𑀚𑀳𑀺𑀢𑀩𑁆𑀩𑀸𑀯.
𑀲𑁂𑀢𑀼𑀖𑀸𑀢𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸𑀢𑀺 𑀧𑀤𑀖𑀸𑀢𑁄 𑀧𑀘𑁆𑀘𑀬𑀖𑀸𑀢𑁄 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀓𑀣𑀺𑀢𑁄. 𑀇𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀣𑁂𑀭𑁂 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁂 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀣𑁂𑀭𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀙𑀦𑁆𑀤𑀭𑀸𑀕𑁄 𑀅𑀧𑀕𑀜𑁆𑀙𑀺. 𑀲𑀸𑀧𑀺 𑀣𑁂𑀭𑀁 𑀔𑀫𑀸𑀧𑁂𑀢𑀼𑀁 𑀅𑀘𑁆𑀘𑀬𑀁 𑀤𑁂𑀲𑁂𑀲𑀺, 𑀣𑁂𑀭𑁄𑀧𑀺𑀲𑁆𑀲𑀸 𑀧𑀝𑀺𑀕𑁆𑀕𑀡𑁆𑀳𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.
𑁧𑁦. 𑀲𑀼𑀕𑀢𑀯𑀺𑀦𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁦. 𑀤𑀲𑀫𑁂 𑀤𑀼𑀕𑁆𑀕𑀳𑀺𑀢𑀦𑁆𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀳𑀺𑀢𑀁. 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀯𑀴𑀜𑁆𑀚𑁂𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀏𑀢𑁆𑀣 𑀧𑀤𑀫𑁂𑀯 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀤𑀼𑀝𑁆𑀞𑀼 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀲𑁆𑀲. 𑀅𑀢𑁆𑀣𑁄𑀧𑀺 𑀤𑀼𑀦𑁆𑀦𑀬𑁄 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸 𑀦𑀻𑀳𑀭𑀺𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺. 𑀙𑀺𑀦𑁆𑀦𑀫𑀽𑀮𑀓𑁄𑀢𑀺 𑀫𑀽𑀮𑀪𑀽𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀫𑀽𑀮𑀓𑁄. 𑀅𑀧𑁆𑀧𑀝𑀺𑀲𑀭𑀡𑁄𑀢𑀺 𑀅𑀧𑁆𑀧𑀢𑀺𑀝𑁆𑀞𑁄. 𑀩𑀸𑀳𑀼𑀮𑀺𑀓𑀸𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸. 𑀲𑀸𑀣𑀮𑀺𑀓𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀣𑀺𑀮𑀕𑁆𑀕𑀳𑀡𑁂𑀦 𑀕𑀡𑁆𑀳𑀦𑀓𑀸. 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀅𑀯𑀕𑀫𑀦𑀢𑁄 𑀑𑀓𑁆𑀓𑀫𑀦𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁆𑀣 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀅𑀢𑁆𑀣𑁄. 𑀧𑀯𑀺𑀯𑁂𑀓𑁂𑀢𑀺 𑀢𑀺𑀯𑀺𑀥𑁂 𑀯𑀺𑀯𑁂𑀓𑁂. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸𑀢𑀺 𑀦𑀺𑀩𑁆𑀩𑀻𑀭𑀺𑀬𑀸. 𑀇𑀫𑀺𑀦𑀸 𑀦𑀬𑁂𑀦 𑀧𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀇𑀦𑁆𑀤𑁆𑀭𑀺𑀬𑀯𑀕𑁆𑀕𑁄 𑀧𑀞𑀫𑁄.
(𑁧𑁭) 𑁨. 𑀧𑀝𑀺𑀧𑀤𑀸𑀯𑀕𑁆𑀕𑁄
𑁧. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀲𑀼𑀔𑀧𑀝𑀺𑀓𑁆𑀔𑁂𑀧𑁂𑀦 𑀤𑀼𑀓𑁆𑀔𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀝𑀺𑀧𑀤𑀸 𑀏𑀢𑀺𑀲𑁆𑀲𑀸𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸. 𑀅𑀲𑀻𑀖𑀧𑁆𑀧𑀯𑀢𑁆𑀢𑀺𑀢𑀸𑀬 𑀕𑀭𑀼𑀪𑀸𑀯𑁂𑀦 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀏𑀢𑀺𑀲𑁆𑀲𑀸𑀢𑀺 𑀤𑀦𑁆𑀥𑀸𑀪𑀺𑀜𑁆𑀜𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑁨. 𑀯𑀺𑀢𑁆𑀣𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁨. 𑀤𑀼𑀢𑀺𑀬𑁂 𑀅𑀪𑀺𑀓𑁆𑀔𑀡𑀦𑁆𑀢𑀺 𑀅𑀪𑀺𑀡𑁆𑀳𑀁. 𑀆𑀦𑀦𑁆𑀢𑀭𑀺𑀬𑀦𑁆𑀢𑀺 𑀅𑀦𑀦𑁆𑀢𑀭𑀯𑀺𑀧𑀸𑀓𑀤𑀸𑀬𑀓𑀁 𑀫𑀕𑁆𑀕𑀲𑀫𑀸𑀥𑀺𑀁. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀢𑁆𑀣𑀸𑀬. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀘𑀫𑀓𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀳𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀯𑀲𑁂𑀦 𑀉𑀢𑁆𑀢𑀸𑀦𑀫𑁂𑀯.
𑀇𑀫𑀸𑀲𑀁 𑀧𑀦 𑀧𑀝𑀺𑀧𑀤𑀸𑀦𑀁 𑀅𑀬𑀁 𑀆𑀯𑀺𑀪𑀸𑀯𑀓𑀣𑀸 𑁋 𑀇𑀥 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀅𑀓𑀢𑀸𑀪𑀺𑀦𑀺𑀯𑁂𑀲𑁄 𑀧𑀼𑀩𑁆𑀩𑀪𑀸𑀕𑁂 𑀭𑀽𑀧𑀧𑀭𑀺𑀕𑁆𑀕𑀳𑁂 𑀓𑀺𑀮𑀫𑀢𑀺, 𑀅𑀭𑀽𑀧𑀧𑀭𑀺𑀕𑁆𑀕𑀳𑁂 𑀓𑀺𑀮𑀫𑀢𑀺, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀓𑀺𑀮𑀫𑀢𑀺, 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀺𑀮𑀫𑀢𑀺, 𑀫𑀕𑁆𑀕𑀸𑀫𑀕𑁆𑀕𑁂 𑀓𑀺𑀮𑀫𑀢𑀺. 𑀏𑀯𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀓𑀺𑀮𑀫𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀲𑁆𑀲𑀦𑀁 𑀧𑀢𑁆𑀯𑀸𑀧𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑁂, 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑁂, 𑀪𑀬𑀢𑀼𑀧𑀝𑁆𑀞𑀸𑀦𑁂, 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑁂, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑁂, 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂, 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑁂, 𑀅𑀦𑀼𑀮𑁄𑀫𑀜𑀸𑀡𑁂, 𑀕𑁄𑀢𑁆𑀭𑀪𑀼𑀜𑀸𑀡𑁂𑀢𑀺 𑀇𑀫𑁂𑀲𑀼 𑀦𑀯𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼𑀧𑀺 𑀓𑀺𑀮𑀫𑀺𑀢𑁆𑀯𑀸𑀯 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀲 𑀲𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀏𑀯𑀁 𑀤𑀼𑀓𑁆𑀔𑁂𑀦 𑀕𑀭𑀼𑀪𑀸𑀯𑁂𑀦 𑀲𑀘𑁆𑀙𑀺𑀓𑀢𑀢𑁆𑀢𑀸 𑀤𑀼𑀓𑁆𑀔𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄 𑀦𑀸𑀫 𑀚𑀸𑀢𑁄. 𑀬𑁄 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀧𑀜𑁆𑀘𑀲𑀼 𑀜𑀸𑀡𑁂𑀲𑀼 𑀓𑀺𑀮𑀫𑀦𑁆𑀢𑁄 𑀅𑀧𑀭𑀪𑀸𑀕𑁂 𑀦𑀯𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀅𑀓𑀺𑀮𑀫𑀺𑀢𑁆𑀯𑀸𑀯 𑀫𑀕𑁆𑀕𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀲𑁆𑀲 𑀲𑁄 𑀫𑀕𑁆𑀕𑁄 𑀏𑀯𑀁 𑀤𑀼𑀓𑁆𑀔𑁂𑀦 𑀅𑀕𑀭𑀼𑀪𑀸𑀯𑁂𑀦 𑀲𑀘𑁆𑀙𑀺𑀓𑀢𑀢𑁆𑀢𑀸 𑀤𑀼𑀓𑁆𑀔𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀦𑀸𑀫 𑀚𑀸𑀢𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀇𑀢𑀭𑀸𑀧𑀺 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸.
𑀕𑁄𑀡𑀧𑀭𑀺𑀬𑁂𑀲𑀓𑀉𑀧𑀫𑀸𑀳𑀺 𑀘𑁂𑀢𑀸 𑀯𑀺𑀪𑀸𑀯𑁂𑀢𑀩𑁆𑀩𑀸 𑁋 𑀏𑀓𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀘𑀢𑁆𑀢𑀸𑀭𑁄 𑀕𑁄𑀡𑀸 𑀧𑀮𑀸𑀬𑀺𑀢𑁆𑀯𑀸 𑀅𑀝𑀯𑀺𑀁 𑀧𑀯𑀺𑀝𑁆𑀞𑀸. 𑀲𑁄 𑀲𑀓𑀡𑁆𑀝𑀓𑁂 𑀲𑀕𑀳𑀦𑁂 𑀯𑀦𑁂 𑀢𑁂 𑀧𑀭𑀺𑀬𑁂𑀲𑀦𑁆𑀢𑁄 𑀕𑀳𑀦𑀫𑀕𑁆𑀕𑁂𑀦𑁂𑀯 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀕𑀦𑁆𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀮𑀻𑀦𑁂 𑀕𑁄𑀡𑁂𑀧𑀺 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀅𑀤𑁆𑀤𑀲. 𑀏𑀓𑁄 𑀓𑀺𑀘𑁆𑀙𑁂𑀦 𑀕𑀦𑁆𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑁂 𑀔𑀺𑀧𑁆𑀧𑀫𑁂𑀯 𑀅𑀤𑁆𑀤𑀲. 𑀅𑀧𑀭𑁄 𑀅𑀩𑁆𑀪𑁄𑀓𑀸𑀲𑀫𑀕𑁆𑀕𑁂𑀦 𑀲𑀼𑀔𑁂𑀦 𑀕𑀦𑁆𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑁂 𑀦𑀺𑀮𑀻𑀦𑁂 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀅𑀤𑁆𑀤𑀲. 𑀅𑀧𑀭𑁄 𑀅𑀩𑁆𑀪𑁄𑀓𑀸𑀲𑀫𑀕𑁆𑀕𑁂𑀦𑁂𑀯 𑀲𑀼𑀔𑁂𑀦 𑀕𑀦𑁆𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑁂𑀬𑁂𑀯 𑀔𑀺𑀧𑁆𑀧𑀁 𑀅𑀤𑁆𑀤𑀲. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀕𑁄𑀡𑀸 𑀯𑀺𑀬 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀤𑀝𑁆𑀞𑀩𑁆𑀩𑀸, 𑀕𑁄𑀡𑀧𑀭𑀺𑀬𑁂𑀲𑀓𑁄 𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀕𑀳𑀦𑀫𑀕𑁆𑀕𑁂𑀦 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀕𑀫𑀦𑀁 𑀯𑀺𑀬 𑀧𑀼𑀩𑁆𑀩𑀪𑀸𑀕𑁂 𑀧𑀜𑁆𑀘𑀲𑀼 𑀜𑀸𑀡𑁂𑀲𑀼 𑀓𑀺𑀮𑀫𑀢𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀸. 𑀕𑀳𑀦𑀝𑁆𑀞𑀸𑀦𑁂 𑀦𑀺𑀮𑀻𑀦𑀸𑀦𑀁 𑀓𑀺𑀘𑁆𑀙𑁂𑀦𑁂𑀯 𑀤𑀲𑁆𑀲𑀦𑀁 𑀯𑀺𑀬 𑀅𑀧𑀭𑀪𑀸𑀕𑁂 𑀦𑀯𑀲𑀼 𑀜𑀸𑀡𑁂𑀲𑀼 𑀓𑀺𑀮𑀫𑀦𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀦𑀁 𑀤𑀲𑁆𑀲𑀦𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑁂𑀲𑀉𑀧𑀫𑀸𑀧𑀺 𑀬𑁄𑀚𑁂𑀢𑀩𑁆𑀩𑀸.
𑁩. 𑀅𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁩. 𑀢𑀢𑀺𑀬𑁂 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀓𑀸𑀬𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀢𑀦𑁄 𑀓𑀭𑀚𑀓𑀸𑀬𑁂 ‘‘𑀬𑀣𑀸 𑀏𑀢𑀁, 𑀢𑀣𑀸 𑀇𑀤’’𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀩𑀳𑀺𑀤𑁆𑀥𑀸 𑀤𑀺𑀝𑁆𑀞𑀸𑀦𑀁 𑀤𑀲𑀦𑁆𑀦𑀁 𑀅𑀲𑀼𑀪𑀸𑀦𑀁 𑀉𑀧𑀲𑀁𑀳𑀭𑀡𑀯𑀲𑁂𑀦 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀲𑀼𑀪𑀢𑁄 𑀧𑀝𑀺𑀓𑀽𑀮𑀢𑁄 𑀜𑀸𑀡𑁂𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻𑀢𑀺 𑀦𑀯𑀦𑁆𑀦𑀁 𑀧𑀸𑀝𑀺𑀓𑀼𑀮𑁆𑀬𑀸𑀦𑀁 𑀯𑀲𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻. 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀻𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀢𑁂𑀥𑀸𑀢𑀼𑀓𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑀪𑀺𑀭𑀢𑀸𑀬 𑀉𑀓𑁆𑀓𑀡𑁆𑀞𑀺𑀢𑀲𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀫𑀭𑀡𑀲𑀜𑁆𑀜𑀸𑀢𑀺 𑀫𑀭𑀡𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀅𑀚𑁆𑀛𑀢𑁆𑀢𑀁 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀻𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀲𑁂𑀔𑀩𑀮𑀸𑀦𑀻𑀢𑀺 𑀲𑀺𑀓𑁆𑀔𑀦𑀓𑀸𑀦𑀁 𑀩𑀮𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀯𑀲𑁂𑀦 𑀉𑀢𑁆𑀢𑀸𑀦𑀫𑁂𑀯. ‘‘𑀅𑀲𑀼𑀪𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀻𑀦𑀺 𑀧𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑀼𑀔𑀸𑀬. 𑀅𑀲𑀼𑀪𑀸𑀤𑀻𑀦𑀺 𑀳𑀺 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀸𑀦𑀺, 𑀢𑁂𑀲𑀼 𑀧𑀦 𑀧𑀓𑀢𑀺𑀬𑀸𑀯 𑀲𑀫𑁆𑀧𑀺𑀬𑀸𑀬𑀫𑀸𑀦𑀁 𑀘𑀺𑀢𑁆𑀢𑀁 𑀅𑀮𑁆𑀮𑀻𑀬𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀪𑀸𑀯𑁂𑀦𑁆𑀢𑁄 𑀤𑀼𑀓𑁆𑀔𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀧𑀡𑀻𑀢𑀲𑀼𑀔𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀧𑀝𑀺𑀧𑀦𑁆𑀦𑁄 𑀲𑀼𑀔𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺.
𑀅𑀬𑀁 𑀧𑀦𑁂𑀢𑁆𑀣 𑀲𑀩𑁆𑀩𑀲𑀸𑀥𑀸𑀭𑀡𑀸 𑀉𑀧𑀫𑀸 𑁋 𑀲𑀗𑁆𑀕𑀸𑀫𑀸𑀯𑀘𑀭𑀧𑀼𑀭𑀺𑀲𑁄 𑀳𑀺 𑀨𑀮𑀓𑀓𑁄𑀝𑁆𑀞𑀓𑀁 𑀓𑀢𑁆𑀯𑀸 𑀧𑀜𑁆𑀘𑀸𑀯𑀼𑀥𑀸𑀦𑀺 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀗𑁆𑀕𑀸𑀫𑀁 𑀧𑀯𑀺𑀲𑀢𑀺, 𑀲𑁄 𑀅𑀦𑁆𑀢𑀭𑀸 𑀯𑀺𑀲𑁆𑀲𑀫𑀺𑀢𑀼𑀓𑀸𑀫𑁄 𑀨𑀮𑀓𑀓𑁄𑀝𑁆𑀞𑀓𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀲𑁆𑀲𑀫𑀢𑀺 𑀘𑁂𑀯 𑀧𑀸𑀦𑀪𑁄𑀚𑀦𑀸𑀤𑀻𑀦𑀺 𑀘 𑀧𑀝𑀺𑀲𑁂𑀯𑀢𑀺. 𑀢𑀢𑁄 𑀧𑀼𑀦 𑀲𑀗𑁆𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀢𑁆𑀣 𑀲𑀗𑁆𑀕𑀸𑀫𑁄 𑀯𑀺𑀬 𑀓𑀺𑀮𑁂𑀲𑀲𑀗𑁆𑀕𑀸𑀫𑁄 𑀤𑀝𑁆𑀞𑀩𑁆𑀩𑁄, 𑀨𑀮𑀓𑀓𑁄𑀝𑁆𑀞𑀓𑁄 𑀯𑀺𑀬 𑀧𑀜𑁆𑀘𑀦𑀺𑀲𑁆𑀲𑀬𑀩𑀮𑀸𑀦𑀺, 𑀲𑀗𑁆𑀕𑀸𑀫𑀧𑀯𑀺𑀲𑀦𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀧𑀜𑁆𑀘𑀸𑀯𑀼𑀥𑀲𑀦𑁆𑀦𑀸𑀳𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀘𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀲𑀗𑁆𑀕𑀸𑀫𑀁 𑀧𑀯𑀺𑀲𑀦𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀓𑀭𑀡𑀓𑀸𑀮𑁄, 𑀯𑀺𑀲𑁆𑀲𑀫𑀺𑀢𑀼𑀓𑀸𑀫𑀲𑁆𑀲 𑀨𑀮𑀓𑀓𑁄𑀝𑁆𑀞𑀓𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀲𑁆𑀲𑀫𑀦𑀧𑀸𑀦𑀪𑁄𑀚𑀦𑀸𑀦𑀺 𑀧𑀝𑀺𑀲𑁂𑀯𑀦𑀓𑀸𑀮𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀦𑀺𑀭𑀲𑁆𑀲𑀸𑀤𑀓𑁆𑀔𑀡𑁂 𑀧𑀜𑁆𑀘 𑀩𑀮𑀸𑀦𑀺 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀦𑀓𑀸𑀮𑁄, 𑀯𑀺𑀲𑁆𑀲𑀫𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘 𑀧𑀼𑀦 𑀲𑀗𑁆𑀕𑀸𑀫𑀲𑁆𑀲 𑀧𑀯𑀺𑀲𑀦𑀓𑀸𑀮𑁄 𑀯𑀺𑀬 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀧𑀼𑀦 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀕𑁆𑀕𑀳𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀩𑀮𑀸𑀦𑀺 𑀘𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺.
𑁪. 𑀧𑀞𑀫𑀔𑀫𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁪. 𑀘𑀢𑀼𑀢𑁆𑀣𑁂 𑀅𑀓𑁆𑀔𑀫𑀸𑀢𑀺 𑀅𑀦𑀥𑀺𑀯𑀸𑀲𑀺𑀓𑀧𑀝𑀺𑀧𑀤𑀸. 𑀔𑀫𑀸𑀢𑀺 𑀅𑀥𑀺𑀯𑀸𑀲𑀺𑀓𑀧𑀝𑀺𑀧𑀤𑀸. 𑀤𑀫𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑀧𑀝𑀺𑀧𑀤𑀸. 𑀲𑀫𑀸𑀢𑀺 𑀅𑀓𑀼𑀲𑀮𑀯𑀺𑀢𑀓𑁆𑀓𑀸𑀦𑀁 𑀯𑀽𑀧𑀲𑀫𑀦𑀧𑀝𑀺𑀧𑀤𑀸. 𑀭𑁄𑀲𑀦𑁆𑀢𑀁 𑀧𑀝𑀺𑀭𑁄𑀲𑀢𑀻𑀢𑀺 𑀖𑀝𑁆𑀝𑁂𑀦𑁆𑀢𑀁 𑀧𑀝𑀺𑀖𑀝𑁆𑀝𑁂𑀢𑀺. 𑀪𑀡𑁆𑀟𑀦𑁆𑀢𑀁 𑀧𑀝𑀺𑀪𑀡𑁆𑀟𑀢𑀻𑀢𑀺 𑀧𑀳𑀭𑀦𑁆𑀢𑀁 𑀧𑀝𑀺𑀧𑀳𑀭𑀢𑀺. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.
𑁭. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁭. 𑀲𑀢𑁆𑀢𑀫𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀫𑀕𑁆𑀕𑀸 𑀲𑀼𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀅𑀳𑁂𑀲𑀼𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀤𑀼𑀓𑁆𑀔𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄. 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀬𑀸𑀬𑀁 𑀧𑀝𑀺𑀧𑀤𑀸 𑀤𑀼𑀓𑁆𑀔𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸, 𑀇𑀫𑀁 𑀫𑁂 𑀧𑀝𑀺𑀧𑀤𑀁 𑀆𑀕𑀫𑁆𑀫 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺.
𑁮. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁮. 𑀅𑀝𑁆𑀞𑀫𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀲𑁆𑀲 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀫𑀕𑁆𑀕𑀸 𑀲𑀼𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀼𑀔𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄. 𑀢𑀲𑁆𑀫𑀸 ‘‘𑀬𑀸𑀬𑀁 𑀧𑀝𑀺𑀧𑀤𑀸 𑀲𑀼𑀔𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸’’𑀢𑀺 𑀆𑀳. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀫𑀺𑀲𑁆𑀲𑀺𑀓𑀸𑀯 𑀧𑀝𑀺𑀧𑀤𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑁯. 𑀲𑀲𑀗𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬𑁯. 𑀦𑀯𑀫𑁂 𑀧𑀞𑀫𑀤𑀼𑀢𑀺𑀬𑀧𑀼𑀕𑁆𑀕𑀮𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀩𑀮𑀯𑀢𑁆𑀢𑀸 𑀇𑀥𑁂𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀏𑀓𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀼𑀩𑁆𑀩𑀮𑀢𑀸𑀬 𑀇𑀥 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀢𑀤𑁂𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀢𑀢𑀺𑀬𑀘𑀢𑀼𑀢𑁆𑀣𑀸 𑀲𑀫𑀣𑀬𑀸𑀦𑀺𑀓𑀸. 𑀢𑁂𑀲𑀁 𑀏𑀓𑁄 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀩𑀮𑀯𑀢𑁆𑀢𑀸 𑀇𑀥𑁂𑀯 𑀓𑀺𑀮𑁂𑀲𑁂 𑀔𑁂𑀧𑁂𑀢𑀺, 𑀏𑀓𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀼𑀩𑁆𑀩𑀮𑀢𑁆𑀢𑀸 𑀇𑀥 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀢𑀤𑁂𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.
𑁧𑁦. 𑀬𑀼𑀕𑀦𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁦. 𑀤𑀲𑀫𑁂 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀲𑀫𑀣𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸. 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀧𑀞𑀫𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀲𑁄 𑀢𑀁 𑀫𑀕𑁆𑀕𑀦𑁆𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀸𑀤𑀻𑀦𑀺 𑀦𑀸𑀫 𑀦𑀢𑁆𑀣𑀺, 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄 𑀧𑀦 𑀉𑀧𑁆𑀧𑀸𑀤𑁂𑀦𑁆𑀢𑁄 𑀢𑀫𑁂𑀯 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀯𑀺𑀧𑀲𑁆𑀲𑀦𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀲𑀫𑀣𑀁 𑀪𑀸𑀯𑁂𑀢𑀺, 𑀧𑀓𑀢𑀺𑀬𑀸 𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀯𑀺𑀧𑀲𑁆𑀲𑀦𑀸𑀬 𑀞𑀢𑁆𑀯𑀸 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.
𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻𑀢𑀺 𑀬𑀼𑀕𑀦𑀤𑁆𑀥𑀁 𑀓𑀢𑁆𑀯𑀸 𑀪𑀸𑀯𑁂𑀢𑀺. 𑀢𑀢𑁆𑀣 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁 𑀦 𑀲𑀓𑁆𑀓𑀸. 𑀅𑀬𑀁 𑀧𑀦 𑀬𑀸𑀯𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺, 𑀢𑀸𑀯𑀢𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀬𑀸𑀯𑀢𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺, 𑀢𑀸𑀯𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺. 𑀓𑀣𑀁? 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺, 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀼𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑀺. 𑀏𑀯𑀫𑀬𑀁 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺 𑀦𑀸𑀫.
𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼 𑀤𑀲𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀁, 𑀲𑀼𑀕𑁆𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄, 𑀆𑀯𑀼𑀲𑁄, 𑀲𑀫𑀬𑁄𑀢𑀺 𑀇𑀫𑀺𑀦𑀸 𑀲𑀢𑁆𑀢𑀦𑁆𑀦𑀁 𑀲𑀧𑁆𑀧𑀸𑀬𑀸𑀦𑀁 𑀧𑀝𑀺𑀮𑀸𑀪𑀓𑀸𑀮𑁄 𑀓𑀣𑀺𑀢𑁄. 𑀬𑀁 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀢𑀁 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁. 𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀧𑀘𑁆𑀘𑁄𑀢𑁆𑀣𑀭𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀕𑁄𑀘𑀭𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑁂 𑀲𑀦𑁆𑀢𑀺𑀝𑁆𑀞𑀢𑀺. 𑀲𑀦𑁆𑀦𑀺𑀲𑀻𑀤𑀢𑀻𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀲𑀫𑁆𑀫𑀸 𑀦𑀺𑀲𑀻𑀤𑀢𑀺. 𑀏𑀓𑁄𑀤𑀺 𑀳𑁄𑀢𑀻𑀢𑀺 𑀏𑀓𑀕𑁆𑀕𑀁 𑀳𑁄𑀢𑀺. 𑀲𑀫𑀸𑀥𑀺𑀬𑀢𑀻𑀢𑀺 𑀲𑀫𑁆𑀫𑀸 𑀆𑀥𑀺𑀬𑀢𑀺 𑀲𑀼𑀝𑁆𑀞𑀧𑀺𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.
𑀧𑀝𑀺𑀧𑀤𑀸𑀯𑀕𑁆𑀕𑁄 𑀤𑀼𑀢𑀺𑀬𑁄.
(𑁧𑁮) 𑁩. 𑀲𑀜𑁆𑀘𑁂𑀢𑀦𑀺𑀬𑀯𑀕𑁆𑀕𑁄
𑁧. 𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀓𑀸𑀬𑁂𑀢𑀺 𑀓𑀸𑀬𑀤𑁆𑀯𑀸𑀭𑁂, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀽𑀢𑀺𑀆𑀤𑀻𑀲𑀼 𑀓𑀸𑀬𑀲𑀜𑁆𑀘𑁂𑀢𑀦𑀸 𑀦𑀸𑀫 𑀓𑀸𑀬𑀤𑁆𑀯𑀸𑀭𑁂 𑀘𑁂𑀢𑀦𑀸 𑀧𑀓𑀧𑁆𑀧𑀦𑀸. 𑀲𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀲𑁂𑀦 𑀅𑀝𑁆𑀞𑀯𑀺𑀥𑀸, 𑀅𑀓𑀼𑀲𑀮𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀸𑀢𑀺 𑀯𑀻𑀲𑀢𑀺𑀯𑀺𑀥𑀸. 𑀢𑀣𑀸 𑀯𑀘𑀻𑀲𑀜𑁆𑀘𑁂𑀢𑀦𑀸, 𑀢𑀣𑀸 𑀫𑀦𑁄𑀲𑀜𑁆𑀘𑁂𑀢𑀦𑀸. 𑀅𑀧𑀺𑀘𑁂𑀢𑁆𑀣 𑀦𑀯 𑀫𑀳𑀕𑁆𑀕𑀢𑀘𑁂𑀢𑀦𑀸𑀧𑀺 𑀮𑀩𑁆𑀪𑀦𑁆𑀢𑀺. 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀽𑀢𑀺 𑀓𑀸𑀬𑀲𑀜𑁆𑀘𑁂𑀢𑀦𑀸𑀧𑀘𑁆𑀘𑀬𑀸. 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀅𑀝𑁆𑀞𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸 𑀦𑀺𑀬𑀓𑀚𑁆𑀛𑀢𑁆𑀢𑁂 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀤𑁆𑀯𑀸𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀘𑁆𑀘𑀬𑀸 𑀤𑀼𑀓𑁆𑀔𑀁. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀯𑀸𑀢𑀺 𑀅𑀯𑀺𑀚𑁆𑀚𑀸𑀓𑀸𑀭𑀡𑁂𑀦𑁂𑀯. 𑀲𑀘𑁂 𑀳𑀺 𑀅𑀯𑀺𑀚𑁆𑀚𑀸 𑀙𑀸𑀤𑀬𑀫𑀸𑀦𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀘𑁆𑀘𑀬𑀪𑀽𑀢𑀸 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀫𑀽𑀮𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁.
𑀲𑀸𑀫𑀁 𑀯𑀸𑀢𑀺𑀆𑀤𑀻𑀲𑀼 𑀧𑀭𑁂𑀳𑀺 𑀅𑀦𑀸𑀡𑀢𑁆𑀢𑁄 𑀲𑀬𑀫𑁂𑀯 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀲𑀸𑀫𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀸𑀫. 𑀬𑀁 𑀧𑀦 𑀧𑀭𑁂 𑀲𑀫𑀸𑀤𑀧𑁂𑀢𑁆𑀯𑀸 𑀆𑀡𑀸𑀧𑁂𑀢𑁆𑀯𑀸 𑀓𑀸𑀭𑁂𑀦𑁆𑀢𑀺, 𑀢𑀲𑁆𑀲 𑀢𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀭𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀦𑀸𑀫. 𑀬𑁄 𑀧𑀦 𑀓𑀼𑀲𑀮𑀁 𑀓𑀼𑀲𑀮𑀦𑁆𑀢𑀺 𑀅𑀓𑀼𑀲𑀮𑀁 𑀅𑀓𑀼𑀲𑀮𑀦𑁆𑀢𑀺 𑀓𑀼𑀲𑀮𑀯𑀺𑀧𑀸𑀓𑀁 𑀓𑀼𑀲𑀮𑀯𑀺𑀧𑀸𑀓𑁄𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀁 𑀅𑀓𑀼𑀲𑀮𑀯𑀺𑀧𑀸𑀓𑁄𑀢𑀺 𑀚𑀸𑀦𑀦𑁆𑀢𑁄 𑀓𑀸𑀬𑀤𑁆𑀯𑀸𑀭𑁂 𑀯𑀻𑀲𑀢𑀺𑀯𑀺𑀥𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀬𑀁 𑀲𑀫𑁆𑀧𑀚𑀸𑀦𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀸𑀫. 𑀬𑁄 𑀏𑀯𑀁 𑀅𑀚𑀸𑀦𑀦𑁆𑀢𑁄 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀬𑀁 𑀅𑀲𑀫𑁆𑀧𑀚𑀸𑀦𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀸𑀫. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.
𑀢𑀢𑁆𑀣 𑀅𑀲𑀫𑁆𑀧𑀚𑀸𑀦𑀓𑀫𑁆𑀫𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀤𑀳𑀭𑀤𑀸𑀭𑀓𑀸 ‘‘𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀁 𑀓𑀭𑁄𑀫𑀸’’𑀢𑀺 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑀺, 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀦𑁆𑀢𑀺, 𑀢𑁂𑀲𑀁 𑀓𑀼𑀲𑀮𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀢𑀁 𑀓𑀼𑀲𑀮𑀫𑁂𑀯 𑀳𑁄𑀢𑀺. 𑀢𑀣𑀸 𑀫𑀺𑀕𑀧𑀓𑁆𑀔𑀺𑀆𑀤𑀬𑁄 𑀢𑀺𑀭𑀘𑁆𑀙𑀸𑀦𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺, 𑀲𑀗𑁆𑀖𑀁 𑀯𑀦𑁆𑀤𑀦𑁆𑀢𑀺, 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑀺, 𑀢𑁂𑀲𑀁 𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀅𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀢𑀁 𑀓𑀼𑀲𑀮𑀫𑁂𑀯 𑀳𑁄𑀢𑀺. 𑀤𑀳𑀭𑀤𑀸𑀭𑀓𑀸 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀳𑀢𑁆𑀣𑀧𑀸𑀤𑁂𑀳𑀺 𑀧𑀳𑀭𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀢𑀮𑀲𑀢𑁆𑀢𑀺𑀓𑀁 𑀉𑀕𑁆𑀕𑀺𑀭𑀦𑁆𑀢𑀺, 𑀤𑀡𑁆𑀟𑀁 𑀔𑀺𑀧𑀦𑁆𑀢𑀺, 𑀅𑀓𑁆𑀓𑁄𑀲𑀦𑁆𑀢𑀺. 𑀕𑀸𑀯𑀺𑀬𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀲𑀼𑀦𑀔𑀸 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀟𑀁𑀲𑀦𑁆𑀢𑀺, 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺. 𑀢𑁂𑀲𑀁 𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀅𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀅𑀓𑀼𑀲𑀮𑀓𑀫𑁆𑀫𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀇𑀤𑀸𑀦𑀺 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀆𑀬𑀽𑀳𑀦𑀘𑁂𑀢𑀦𑀸 𑀲𑀫𑁄𑀥𑀸𑀦𑁂𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀬𑀤𑁆𑀯𑀸𑀭𑁂 𑀲𑀬𑀁𑀓𑀢𑀫𑀽𑀮𑀺𑀓𑀸 𑀯𑀻𑀲𑀢𑀺 𑀘𑁂𑀢𑀦𑀸, 𑀆𑀡𑀢𑁆𑀢𑀺𑀫𑀽𑀮𑀺𑀓𑀸 𑀯𑀻𑀲𑀢𑀺, 𑀲𑀫𑁆𑀧𑀚𑀸𑀦𑀫𑀽𑀮𑀺𑀓𑀸 𑀯𑀻𑀲𑀢𑀺, 𑀅𑀲𑀫𑁆𑀧𑀚𑀸𑀦𑀫𑀽𑀮𑀺𑀓𑀸 𑀯𑀻𑀲𑀢𑀻𑀢𑀺 𑀅𑀲𑀻𑀢𑀺 𑀘𑁂𑀢𑀦𑀸 𑀳𑁄𑀦𑁆𑀢𑀺, 𑀢𑀣𑀸 𑀯𑀘𑀻𑀤𑁆𑀯𑀸𑀭𑁂. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀏𑀓𑁂𑀓𑀲𑁆𑀫𑀺𑀫𑁆𑀧𑀺 𑀯𑀺𑀓𑀧𑁆𑀧𑁂 𑀏𑀓𑀽𑀦𑀢𑀺𑀁𑀲 𑀓𑀢𑁆𑀯𑀸 𑀲𑀢𑀜𑁆𑀘 𑀲𑁄𑀴𑀲 𑀘 𑀳𑁄𑀦𑁆𑀢𑀺. 𑀇𑀢𑀺 𑀲𑀩𑁆𑀩𑀸𑀧𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀤𑁆𑀯𑁂 𑀲𑀢𑀸𑀦𑀺 𑀙𑀲𑀢𑁆𑀢𑀢𑀺 𑀘 𑀘𑁂𑀢𑀦𑀸. 𑀢𑀸 𑀲𑀩𑁆𑀩𑀸𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀬𑀺𑀢𑀸𑀓𑀸𑀭𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀚𑀸𑀦𑀦𑀸𑀓𑀸𑀭𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀓𑀸𑀬𑁄 𑀉𑀧𑀸𑀤𑀸𑀭𑀽𑀧𑀁, 𑀢𑀲𑁆𑀲 𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀻𑀢𑀺 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫.
𑀇𑀫𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀯𑀺𑀚𑁆𑀚𑀸 𑀅𑀦𑀼𑀧𑀢𑀺𑀢𑀸𑀢𑀺 𑀇𑀫𑁂𑀲𑀼 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀘𑁂𑀢𑀦𑀸𑀥𑀫𑁆𑀫𑁂𑀲𑀼 𑀅𑀯𑀺𑀚𑁆𑀚𑀸 𑀲𑀳𑀚𑀸𑀢𑀯𑀲𑁂𑀦 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀅𑀦𑀼𑀧𑀢𑀺𑀢𑀸. 𑀏𑀯𑀁 𑀯𑀝𑁆𑀝𑀜𑁆𑀘𑁂𑀯 𑀯𑀝𑁆𑀝𑀫𑀽𑀮𑀺𑀓𑀸 𑀘 𑀅𑀯𑀺𑀚𑁆𑀚𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.
𑀏𑀢𑁆𑀢𑀸𑀯𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀇𑀤𑀸𑀦𑀺 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀅𑀲𑁂𑀲𑀯𑀺𑀭𑀸𑀕𑁂𑀦 𑀘𑁂𑀯 𑀅𑀲𑁂𑀲𑀦𑀺𑀭𑁄𑀥𑁂𑀦 𑀘. 𑀲𑁄 𑀓𑀸𑀬𑁄 𑀦 𑀳𑁄𑀢𑀻𑀢𑀺 𑀔𑀻𑀡𑀸𑀲𑀯𑀲𑁆𑀲 𑀓𑀸𑀬𑁂𑀦 𑀓𑀭𑀡𑀓𑀫𑁆𑀫𑀁 𑀧𑀜𑁆𑀜𑀸𑀬𑀢𑀺, 𑀘𑁂𑀢𑀺𑀬𑀗𑁆𑀕𑀡𑀲𑀫𑁆𑀫𑀚𑁆𑀚𑀦𑀁 𑀩𑁄𑀥𑀺𑀬𑀗𑁆𑀕𑀡𑀲𑀫𑁆𑀫𑀚𑁆𑀚𑀦𑀁 𑀅𑀪𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀫𑀦𑀁 𑀯𑀢𑁆𑀢𑀸𑀦𑀼𑀯𑀢𑁆𑀢𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀺. 𑀓𑀸𑀬𑀤𑁆𑀯𑀸𑀭𑁂 𑀧𑀦𑀲𑁆𑀲 𑀯𑀻𑀲𑀢𑀺 𑀘𑁂𑀢𑀦𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁄 𑀓𑀸𑀬𑁄 𑀦 𑀳𑁄𑀢𑀺, 𑀬𑀁 𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺. 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀳𑀺 𑀘𑁂𑀢𑀦𑀸 𑀇𑀥 𑀓𑀸𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀔𑁂𑀢𑁆𑀢𑀦𑁆𑀢𑀺𑀆𑀤𑀻𑀦𑀺𑀧𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀢𑀜𑁆𑀳𑀺 𑀯𑀺𑀧𑀸𑀓𑀲𑁆𑀲 𑀯𑀺𑀭𑀼𑀳𑀦𑀝𑁆𑀞𑀸𑀦𑀝𑁆𑀞𑁂𑀦 𑀔𑁂𑀢𑁆𑀢𑀁, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼, 𑀓𑀸𑀭𑀡𑀝𑁆𑀞𑁂𑀦 𑀆𑀬𑀢𑀦𑀁, 𑀅𑀥𑀺𑀓𑀭𑀡𑀝𑁆𑀞𑁂𑀦 𑀅𑀥𑀺𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.
𑀇𑀢𑀺 𑀲𑀢𑁆𑀣𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀆𑀬𑀽𑀳𑀺𑀢𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑀸𑀢𑀺 𑀧𑀝𑀺𑀮𑀤𑁆𑀥𑀅𑀢𑁆𑀢𑀪𑀸𑀯𑀸. 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀓𑀫𑀢𑀻𑀢𑀺 𑀅𑀢𑁆𑀢𑀦𑀸 𑀧𑀓𑀧𑁆𑀧𑀺𑀢𑀘𑁂𑀢𑀦𑀸 𑀯𑀳𑀢𑀺 𑀧𑀯𑀢𑁆𑀢𑀢𑀺.
𑀅𑀢𑁆𑀢𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀺 𑀳𑁄𑀢𑀻𑀢𑀺𑀆𑀤𑀻𑀲𑀼 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀤𑁂𑀯𑀸 𑀅𑀢𑁆𑀢𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀘𑀯𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀨𑀸𑀭𑀼𑀲𑀓𑀯𑀦𑀸𑀤𑀻𑀲𑀼 𑀤𑀺𑀩𑁆𑀩𑀭𑀢𑀺𑀲𑀫𑀧𑁆𑀧𑀺𑀢𑀸𑀦𑀁 𑀓𑀻𑀴𑀦𑁆𑀢𑀸𑀦𑀁 𑀧𑀸𑀦𑀪𑁄𑀚𑀦𑁂 𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺, 𑀢𑁂 𑀆𑀳𑀸𑀭𑀼𑀧𑀘𑁆𑀙𑁂𑀤𑁂𑀦 𑀆𑀢𑀧𑁂 𑀔𑀺𑀢𑁆𑀢𑀫𑀸𑀮𑀸 𑀯𑀺𑀬 𑀫𑀺𑀮𑀸𑀬𑀦𑁆𑀢𑀺. 𑀫𑀦𑁄𑀧𑀤𑁄𑀲𑀺𑀓𑀸 𑀤𑁂𑀯𑀸 𑀧𑀭𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀘𑀯𑀦𑁆𑀢𑀺, 𑀏𑀢𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸. 𑀢𑁂𑀲𑀼 𑀓𑀺𑀭 𑀏𑀓𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀲𑀧𑀭𑀺𑀯𑀸𑀭𑁄 𑀭𑀣𑁂𑀦 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀅𑀣𑀜𑁆𑀜𑁄 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑁄, 𑀅𑀬𑀁 𑀓𑀧𑀡𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑀺𑀬 𑀏𑀢𑀁 𑀤𑀺𑀲𑁆𑀯𑀸 𑀧𑀻𑀢𑀺𑀬𑀸 𑀉𑀤𑁆𑀥𑀼𑀫𑀸𑀢𑁄 𑀯𑀺𑀬 𑀕𑀚𑁆𑀚𑀫𑀸𑀦𑁄 𑀯𑀺𑀬 𑀘 𑀕𑀘𑁆𑀙𑀢𑀻’’𑀢𑀺 𑀓𑀼𑀚𑁆𑀛𑀢𑀺. 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀓𑀼𑀤𑁆𑀥𑀁 𑀤𑀺𑀲𑁆𑀯𑀸 𑀓𑀼𑀤𑁆𑀥𑀸 𑀦𑀸𑀫 𑀲𑀼𑀯𑀺𑀚𑀸𑀦𑀸 𑀳𑁄𑀦𑁆𑀢𑀻𑀢𑀺 𑀓𑀼𑀤𑁆𑀥𑀪𑀸𑀯𑀫𑀲𑁆𑀲 𑀜𑀢𑁆𑀯𑀸 ‘‘𑀢𑁆𑀯𑀁 𑀓𑀼𑀤𑁆𑀥𑁄 𑀫𑀬𑁆𑀳𑀁 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀫𑀬𑀸 𑀤𑀸𑀦𑀲𑀻𑀮𑀸𑀤𑀻𑀦𑀁 𑀯𑀲𑁂𑀦 𑀮𑀤𑁆𑀥𑀸, 𑀦 𑀢𑀼𑀬𑁆𑀳𑀁 𑀯𑀲𑁂𑀦𑀸’’𑀢𑀺 𑀧𑀝𑀺𑀓𑀼𑀚𑁆𑀛𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀼𑀤𑁆𑀥𑁂 𑀇𑀢𑀭𑁄 𑀅𑀓𑀼𑀤𑁆𑀥𑁄 𑀭𑀓𑁆𑀔𑀢𑀺, 𑀉𑀪𑁄𑀲𑀼 𑀧𑀦 𑀓𑀼𑀤𑁆𑀥𑁂𑀲𑀼 𑀏𑀓𑀲𑁆𑀲 𑀓𑁄𑀥𑁄 𑀇𑀢𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲𑀧𑀺 𑀓𑁄𑀥𑁄 𑀇𑀢𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀉𑀪𑁄 𑀓𑀦𑁆𑀤𑀦𑁆𑀢𑀸𑀦𑀁𑀬𑁂𑀯 𑀑𑀭𑁄𑀥𑀸𑀦𑀁 𑀘𑀯𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀘 𑀧𑀭𑀲𑀜𑁆𑀘𑁂𑀢𑀦𑀸 𑀘 𑀳𑁂𑀢𑀼 𑀘𑀯𑀦𑁆𑀢𑀺, 𑀅𑀢𑁆𑀢𑀲𑀜𑁆𑀘𑁂𑀢𑀦𑀸𑀬 𑀘 𑀧𑀭𑀲𑀜𑁆𑀘𑁂𑀢𑀦𑀸𑀬 𑀘 𑀳𑁂𑀢𑀼𑀪𑀽𑀢𑀸𑀬 𑀘𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸 𑀳𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀳𑀢𑁆𑀣𑁂𑀳𑀺𑀧𑀺 𑀤𑀡𑁆𑀟𑁂𑀳𑀺𑀧𑀺 𑀧𑀳𑀭𑀦𑁆𑀢𑀺, 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺𑀧𑀺 𑀩𑀦𑁆𑀥𑀦𑁆𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺, 𑀯𑀺𑀲𑀫𑁆𑀧𑀺 𑀔𑀸𑀤𑀦𑁆𑀢𑀺, 𑀧𑀧𑀸𑀢𑁂𑀧𑀺 𑀧𑀢𑀦𑁆𑀢𑀺, 𑀉𑀤𑀓𑀫𑁆𑀧𑀺 𑀧𑀯𑀺𑀲𑀦𑁆𑀢𑀺, 𑀅𑀕𑁆𑀕𑀺𑀫𑁆𑀧𑀺 𑀧𑀯𑀺𑀲𑀦𑁆𑀢𑀺, 𑀧𑀭𑁂𑀧𑀺 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑀦𑁂 𑀯𑀸 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀏𑀯𑀁 𑀢𑁂𑀲𑀼 𑀅𑀢𑁆𑀢𑀲𑀜𑁆𑀘𑁂𑀢𑀦𑀸𑀧𑀺 𑀧𑀭𑀲𑀜𑁆𑀘𑁂𑀢𑀦𑀸𑀧𑀺 𑀓𑀫𑀢𑀺.
𑀓𑀢𑀫𑁂 𑀢𑁂𑀦 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸𑀢𑀺 𑀓𑀢𑀫𑁂 𑀦𑀸𑀫 𑀢𑁂 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀸 𑀅𑀢𑁆𑀢𑀪𑀸𑀯𑁂𑀦 𑀓𑀢𑀫𑁂 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸𑀢𑀺𑀧𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀓𑀺𑀁 𑀅𑀢𑁆𑀢𑀦𑀸 𑀓𑀣𑁂𑀢𑀼𑀁 𑀦𑀧𑁆𑀧𑀳𑁄𑀢𑀻𑀢𑀺? 𑀧𑀳𑁄𑀢𑀺, 𑀇𑀤𑀁 𑀧𑀦 𑀧𑀤𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀩𑀼𑀤𑁆𑀥𑀯𑀺𑀲𑀬𑀁 𑀧𑀜𑁆𑀳𑀦𑁆𑀢𑀺 𑀣𑁂𑀭𑁄 𑀦 𑀓𑀣𑁂𑀲𑀺. 𑀢𑁂𑀦 𑀤𑀝𑁆𑀞𑀩𑁆𑀩𑀸𑀢𑀺 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀤𑀝𑁆𑀞𑀩𑁆𑀩𑀸. 𑀅𑀬𑀁 𑀧𑀦 𑀧𑀜𑁆𑀳𑁄 𑀳𑁂𑀝𑁆𑀞𑀸 𑀓𑀸𑀫𑀸𑀯𑀘𑀭𑁂𑀧𑀺 𑀭𑀽𑀧𑀸𑀯𑀘𑀭𑁂𑀧𑀺 𑀮𑀩𑁆𑀪𑀢𑀺, 𑀪𑀯𑀕𑁆𑀕𑁂𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑀺𑀢𑁄 𑀦𑀺𑀧𑁆𑀧𑀤𑁂𑀲𑁂𑀦 𑀓𑀣𑀺𑀢𑁄 𑀳𑁄𑀢𑀻𑀢𑀺 𑀪𑀕𑀯𑀢𑀸 𑀏𑀯𑀁 𑀓𑀣𑀺𑀢𑁄.
𑀆𑀕𑀦𑁆𑀢𑀸𑀭𑁄 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀢𑁆𑀣𑀪𑀸𑀯𑀁 𑀓𑀸𑀫𑀸𑀯𑀘𑀭𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀯𑀫𑁂𑀯 𑀆𑀕𑀦𑁆𑀢𑀸𑀭𑁄, 𑀦𑁂𑀯 𑀢𑀢𑁆𑀭𑀽𑀧𑀧𑀢𑁆𑀢𑀺𑀓𑀸 𑀦 𑀉𑀧𑀭𑀽𑀧𑀧𑀢𑁆𑀢𑀺𑀓𑀸 𑀳𑁄𑀦𑁆𑀢𑀺. 𑀅𑀦𑀸𑀕𑀦𑁆𑀢𑀸𑀭𑁄 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀫𑀁 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀸𑀕𑀦𑁆𑀢𑀸𑀭𑁄, 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑀸 𑀦 𑀳𑁄𑀦𑁆𑀢𑀺, 𑀢𑀢𑁆𑀭𑀽𑀧𑀧𑀢𑁆𑀢𑀺𑀓𑀸 𑀯𑀸 𑀉𑀧𑀭𑀽𑀧𑀧𑀢𑁆𑀢𑀺𑀓𑀸 𑀯𑀸 𑀢𑀢𑁆𑀣𑁂𑀯 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀳𑁂𑀝𑁆𑀞𑀺𑀫𑀪𑀯𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀯𑀲𑁂𑀦 𑀉𑀧𑀭𑀽𑀧𑀧𑀢𑁆𑀢𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀯𑀕𑁆𑀕𑁂 𑀧𑀦𑁂𑀢𑀁 𑀦𑀢𑁆𑀣𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.
𑁨. 𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁨. 𑀤𑀼𑀢𑀺𑀬𑁂 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡𑀁. 𑀑𑀥𑀺𑀲𑁄𑀢𑀺 𑀓𑀸𑀭𑀡𑀲𑁄. 𑀩𑁆𑀬𑀜𑁆𑀚𑀦𑀲𑁄𑀢𑀺 𑀅𑀓𑁆𑀔𑀭𑀲𑁄. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺. 𑀆𑀘𑀺𑀓𑁆𑀔𑀸𑀫𑀻𑀢𑀺 𑀓𑀣𑁂𑀫𑀺. 𑀤𑁂𑀲𑁂𑀫𑀻𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀫𑀺. 𑀧𑀜𑁆𑀜𑀸𑀧𑁂𑀫𑀻𑀢𑀺 𑀚𑀸𑀦𑀸𑀧𑁂𑀫𑀺. 𑀧𑀝𑁆𑀞𑀧𑁂𑀫𑀻𑀢𑀺 𑀧𑀝𑁆𑀞𑀧𑁂𑀢𑁆𑀯𑀸 𑀧𑀯𑀢𑁆𑀢𑁂𑀢𑁆𑀯𑀸 𑀓𑀣𑁂𑀫𑀺. 𑀯𑀺𑀯𑀭𑀸𑀫𑀻𑀢𑀺 𑀯𑀺𑀯𑀝𑀁 𑀓𑀢𑁆𑀯𑀸 𑀓𑀣𑁂𑀫𑀺. 𑀯𑀺𑀪𑀚𑀸𑀫𑀻𑀢𑀺 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀫𑀺. 𑀉𑀢𑁆𑀢𑀸𑀦𑀻𑀓𑀭𑁄𑀫𑀻𑀢𑀺 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀓𑀁 𑀓𑀢𑁆𑀯𑀸 𑀓𑀣𑁂𑀫𑀺. 𑀲𑁄 𑀫𑀁 𑀧𑀜𑁆𑀳𑁂𑀦𑀸𑀢𑀺 𑀲𑁄 𑀫𑀁 𑀧𑀜𑁆𑀳𑁂𑀦 𑀉𑀧𑀕𑀘𑁆𑀙𑀢𑀼. 𑀅𑀳𑀁 𑀯𑁂𑀬𑁆𑀬𑀸𑀓𑀭𑀡𑁂𑀦𑀸𑀢𑀺 𑀅𑀳𑀫𑀲𑁆𑀲 𑀧𑀜𑁆𑀳𑀓𑀣𑀦𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑁆𑀲𑀸𑀫𑀺. 𑀬𑁄 𑀦𑁄 𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄𑀢𑀺 𑀬𑁄 𑀅𑀫𑁆𑀳𑀸𑀓𑀁 𑀅𑀥𑀺𑀕𑀢𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄 𑀲𑀢𑁆𑀣𑀸, 𑀲𑁄 𑀏𑀲 𑀲𑀫𑁆𑀫𑀼𑀔𑀻𑀪𑀽𑀢𑁄. 𑀬𑀤𑀺 𑀫𑀬𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦 𑀲𑀘𑁆𑀙𑀺𑀓𑀢𑀸, ‘‘𑀲𑀘𑁆𑀙𑀺𑀓𑀭𑁄𑀳𑀺 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀫𑀁 𑀧𑀝𑀺𑀩𑀸𑀳𑀺𑀲𑁆𑀲𑀢𑀻𑀢𑀺 𑀲𑀢𑁆𑀣𑀼 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑀓𑁄𑀯 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀸𑀲𑀼 𑀘 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀸, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀢𑀺.
𑁩. 𑀫𑀳𑀸𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁩. 𑀢𑀢𑀺𑀬𑁂 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀨𑀲𑁆𑀲𑀸𑀓𑀭𑀸𑀦𑀁, 𑀨𑀲𑁆𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻𑀢𑀺 𑀏𑀢𑁂𑀲𑀼 𑀅𑀲𑁂𑀲𑀢𑁄 𑀦𑀺𑀭𑀼𑀤𑁆𑀥𑁂𑀲𑀼 𑀢𑀢𑁄 𑀧𑀭𑀁 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀮𑁂𑀲𑁄 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻𑀢𑀺 𑀇𑀥𑀸𑀧𑀺 ‘‘𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀮𑁂𑀲𑁄 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀳𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀏𑀓𑀘𑁆𑀘𑀲𑀲𑁆𑀲𑀢𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀲𑁂𑀦 𑀧𑀼𑀘𑁆𑀙𑀢𑀺. 𑀢𑁂𑀦𑀲𑁆𑀲 𑀣𑁂𑀭𑁄 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀧𑀝𑀺𑀩𑀸𑀳𑀦𑁆𑀢𑁄 𑀫𑀸 𑀳𑁂𑀯𑀦𑁆𑀢𑀺 𑀆𑀳. 𑀏𑀢𑁆𑀣 𑀳𑀺𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀯𑀁 𑀫𑀸 𑀪𑀡𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀽𑀧𑀮𑀤𑁆𑀥𑀺𑀯𑀲𑁂𑀦𑁂𑀯 ‘‘𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀺 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑁂𑀦 𑀧𑀼𑀘𑁆𑀙𑀢𑀺. 𑀓𑀺𑀁 𑀧𑀦𑁂𑀲 𑀅𑀢𑁆𑀢𑀽𑀧𑀮𑀤𑁆𑀥𑀺𑀓𑁄𑀢𑀺? 𑀦 𑀅𑀢𑁆𑀢𑀽𑀧𑀮𑀤𑁆𑀥𑀺𑀓𑁄. 𑀏𑀯𑀁𑀮𑀤𑁆𑀥𑀺𑀓𑁄 𑀧𑀦 𑀢𑀢𑁆𑀣𑁂𑀓𑁄 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄, 𑀲𑁄 𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑀦𑀢𑁆𑀣𑀁 𑀏𑀯𑀁 𑀧𑀼𑀘𑁆𑀙𑀢𑀺. 𑀬𑁂𑀧𑀺 𑀘 𑀅𑀦𑀸𑀕𑀢𑁂 𑀏𑀯𑀁𑀮𑀤𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 ‘‘𑀩𑀼𑀤𑁆𑀥𑀓𑀸𑀮𑁂𑀧𑁂𑀲𑁄 𑀧𑀜𑁆𑀳𑁄 𑀫𑀳𑀸𑀲𑀸𑀯𑀓𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑁄’’𑀢𑀺 𑀯𑀘𑀦𑁄𑀓𑀸𑀲𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀧𑀼𑀘𑁆𑀙𑀢𑀺𑀬𑁂𑀯.
𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀻𑀢𑀺 𑀦 𑀧𑀧𑀜𑁆𑀘𑁂𑀢𑀩𑁆𑀩𑀝𑁆𑀞𑀸𑀦𑁂 𑀧𑀧𑀜𑁆𑀘𑀁 𑀓𑀭𑁄𑀢𑀺, 𑀅𑀦𑀸𑀘𑀭𑀺𑀢𑀩𑁆𑀩𑀁 𑀫𑀕𑁆𑀕𑀁 𑀘𑀭𑀢𑀺. 𑀢𑀸𑀯𑀢𑀸 𑀧𑀧𑀜𑁆𑀘𑀲𑁆𑀲 𑀕𑀢𑀻𑀢𑀺 𑀬𑀢𑁆𑀢𑀓𑀸 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀕𑀢𑀺, 𑀢𑀢𑁆𑀢𑀓𑀸𑀯 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀧𑁆𑀧𑀪𑁂𑀤𑀲𑁆𑀲 𑀧𑀧𑀜𑁆𑀘𑀲𑁆𑀲 𑀕𑀢𑀺. 𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀧𑀧𑀜𑁆𑀘𑀦𑀺𑀭𑁄𑀥𑁄 𑀧𑀧𑀜𑁆𑀘𑀯𑀽𑀧𑀲𑀫𑁄𑀢𑀺 𑀏𑀢𑁂𑀲𑀼 𑀙𑀲𑀼 𑀆𑀬𑀢𑀦𑁂𑀲𑀼 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑁂𑀲𑀼 𑀧𑀧𑀜𑁆𑀘𑀸𑀧𑀺 𑀦𑀺𑀭𑀼𑀤𑁆𑀥𑀸𑀯 𑀳𑁄𑀦𑁆𑀢𑀺, 𑀯𑀽𑀧𑀲𑀦𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀼𑀧𑁆𑀧𑁂 𑀧𑀦 𑀧𑀼𑀣𑀼𑀚𑁆𑀚𑀦𑀤𑁂𑀯𑀢𑀸𑀦𑀁 𑀓𑀺𑀜𑁆𑀘𑀸𑀧𑀺 𑀧𑀜𑁆𑀘 𑀨𑀲𑁆𑀲𑀸𑀬𑀢𑀦𑀸𑀦𑀺 𑀦𑀺𑀭𑀼𑀤𑁆𑀥𑀸𑀦𑀺, 𑀙𑀝𑁆𑀞𑀲𑁆𑀲 𑀧𑀦 𑀅𑀦𑀺𑀭𑀼𑀤𑁆𑀥𑀢𑁆𑀢𑀸 𑀢𑀬𑁄𑀧𑀺 𑀧𑀧𑀜𑁆𑀘𑀸 𑀅𑀧𑁆𑀧𑀳𑀻𑀦𑀸𑀯. 𑀅𑀧𑀺𑀘 𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦𑁂𑀯 𑀧𑀜𑁆𑀳𑁄 𑀓𑀣𑀺𑀢𑁄𑀢𑀺. 𑀘𑀢𑀼𑀢𑁆𑀣𑁂 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑁫. 𑀉𑀧𑀯𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁫-𑁧𑁭𑁬. 𑀧𑀜𑁆𑀘𑀫𑁂 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀯𑀺𑀚𑁆𑀚𑀸𑀬 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑁄 𑀳𑁄𑀢𑀺, 𑀲𑀓𑀮𑀁 𑀯𑀝𑁆𑀝𑀤𑀼𑀓𑁆𑀔𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀧𑀭𑀺𑀯𑀝𑀼𑀫𑀁 𑀓𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀉𑀧𑀸𑀤𑀸𑀦𑁄𑀢𑀺 𑀲𑀕𑀳𑀡𑁄𑀯 𑀳𑀼𑀢𑁆𑀯𑀸. 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀢𑁆𑀯𑀸 𑀞𑀺𑀢𑁄 𑀅𑀪𑀯𑀺𑀲𑁆𑀲. 𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀧𑀦𑁆𑀦𑀭𑀲𑀥𑀫𑁆𑀫𑀪𑁂𑀤𑁂𑀦 𑀘𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀬𑀣𑀸𑀪𑀽𑀢𑀁 𑀚𑀸𑀦𑀁 𑀧𑀲𑁆𑀲𑀁 𑀅𑀦𑁆𑀢𑀓𑀭𑁄 𑀳𑁄𑀢𑀻𑀢𑀺 𑀬𑀣𑀸𑀲𑀪𑀸𑀯𑀁 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀢𑁆𑀯𑀸 𑀞𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀧𑀜𑁆𑀳𑀁 𑀦𑀺𑀝𑁆𑀞𑀧𑁂𑀲𑀺. 𑀙𑀝𑁆𑀞𑀁 𑀳𑁂𑀝𑁆𑀞𑀸 𑀏𑀓𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.
𑁭. 𑀭𑀸𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁭. 𑀲𑀢𑁆𑀢𑀫𑁂 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀓𑁂𑀲𑀸𑀤𑀻𑀲𑀼 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀣𑀤𑁆𑀥𑀸𑀓𑀸𑀭𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼. 𑀩𑀸𑀳𑀺𑀭𑀸𑀢𑀺 𑀩𑀳𑀺𑀤𑁆𑀥𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀧𑀸𑀲𑀸𑀡𑀧𑀩𑁆𑀩𑀢𑀸𑀤𑀻𑀲𑀼 𑀣𑀤𑁆𑀥𑀸𑀓𑀸𑀭𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑁂𑀲𑀸𑀧𑀺 𑀥𑀸𑀢𑀼𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑀇𑀤𑀁 𑀢𑀬𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀦𑁆𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑀩𑁆𑀩𑀁. 𑀤𑀺𑀲𑁆𑀯𑀸𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑁆𑀯𑀸. 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀦𑁆𑀢𑀺 𑀫𑀕𑁆𑀕𑀯𑀚𑁆𑀛𑀢𑀡𑁆𑀳𑀁 𑀲𑀫𑀽𑀮𑀓𑀁 𑀙𑀺𑀦𑁆𑀤𑀺. 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀯𑀺𑀯𑀢𑁆𑀢𑀬𑀺 𑀉𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀚𑀳𑀺. 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀦𑀯𑀯𑀺𑀥𑀲𑁆𑀲 𑀫𑀸𑀦𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑀸. 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀧𑀭𑀺𑀯𑀝𑀼𑀫𑀁 𑀅𑀓𑀸𑀲𑀺, 𑀓𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀲𑀢𑁆𑀣𑀸𑀭𑀸 𑀲𑀁𑀬𑀼𑀢𑁆𑀢𑀫𑀳𑀸𑀦𑀺𑀓𑀸𑀬𑁂 𑀭𑀸𑀳𑀼𑀮𑁄𑀯𑀸𑀤𑁂 (𑀲𑀁. 𑀦𑀺. 𑁩.𑁯𑁧 𑀆𑀤𑀬𑁄) 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑁂𑀧𑀺 (𑀫. 𑀦𑀺. 𑁩.𑁪𑁧𑁬 𑀆𑀤𑀬𑁄) 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑁂 (𑀫. 𑀦𑀺. 𑁨.𑁧𑁦𑁭 𑀆𑀤𑀬𑁄) 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 𑀓𑀣𑀺𑀢𑀸, 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑁂 (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀇𑀫𑀲𑁆𑀫𑀺𑀁 𑀅𑀗𑁆𑀕𑀼𑀢𑁆𑀢𑀭𑀫𑀳𑀸𑀦𑀺𑀓𑀸𑀬𑁂 𑀅𑀬𑀁 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸 𑀦𑀸𑀫 𑀓𑀣𑀺𑀢𑀸𑀢𑀺.
𑁮. 𑀚𑀫𑁆𑀩𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁮. 𑀅𑀝𑁆𑀞𑀫𑁂 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀲𑀫𑀸𑀧𑀢𑁆𑀢𑀺𑀁. 𑀲𑀓𑁆𑀓𑀸𑀬𑀦𑀺𑀭𑁄𑀥𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀲𑁆𑀲 𑀲𑀓𑁆𑀓𑀸𑀬𑀲𑁆𑀲 𑀦𑀺𑀭𑁄𑀥𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀦 𑀧𑀓𑁆𑀔𑀦𑁆𑀤𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀧𑀸𑀝𑀺𑀓𑀗𑁆𑀔𑁄𑀢𑀺 𑀦 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑁄. 𑀮𑁂𑀧𑀕𑀢𑁂𑀦𑀸𑀢𑀺 𑀮𑁂𑀧𑀫𑀓𑁆𑀔𑀺𑀢𑁂𑀦.
𑀇𑀫𑀲𑁆𑀫𑀺𑀜𑁆𑀘 𑀧𑀦𑀢𑁆𑀣𑁂 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀧𑀼𑀭𑀺𑀲𑁄𑀧𑀫𑁆𑀫𑀁 𑀆𑀳𑀭𑀺𑀢𑀩𑁆𑀩𑀁 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀘𑀡𑁆𑀟𑀲𑁄𑀢𑀸𑀬 𑀯𑀸𑀴𑀫𑀘𑁆𑀙𑀸𑀓𑀼𑀮𑀸𑀬 𑀦𑀤𑀺𑀬𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀑𑀭𑀺𑀫𑀁 𑀢𑀻𑀭𑀁 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀸𑀭𑀺𑀫𑀁 𑀢𑀻𑀭𑀁 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁, 𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀧𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀅𑀝𑁆𑀞 𑀓𑀓𑀼𑀥𑀭𑀼𑀓𑁆𑀔𑁂 𑀤𑀺𑀲𑁆𑀯𑀸 ‘‘𑀲𑀓𑁆𑀓𑀸 𑀇𑀫𑀸𑀬 𑀭𑀼𑀓𑁆𑀔𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑀼’’𑀦𑁆𑀢𑀺 𑀫𑀦𑀲𑀺𑀓𑀢𑁆𑀯𑀸 ‘‘𑀓𑀓𑀼𑀥𑀭𑀼𑀓𑁆𑀔𑀸 𑀦𑀸𑀫 𑀫𑀝𑁆𑀞𑀲𑀸𑀔𑀸 𑀳𑁄𑀦𑁆𑀢𑀺, 𑀲𑀸𑀔𑀸𑀬 𑀳𑀢𑁆𑀣𑀸 𑀦 𑀲𑀡𑁆𑀞𑀳𑁂𑀬𑁆𑀬𑀼’’𑀦𑁆𑀢𑀺 𑀦𑀺𑀕𑁆𑀭𑁄𑀥𑀧𑀺𑀮𑀓𑁆𑀔𑀭𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲 𑀮𑀸𑀔𑀸𑀬 𑀳𑀢𑁆𑀣𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀏𑀓𑀁 𑀲𑀸𑀔𑀁 𑀕𑀡𑁆𑀳𑀺. 𑀳𑀢𑁆𑀣𑁄 𑀢𑀢𑁆𑀣𑁂𑀯 𑀮𑀕𑀺. 𑀧𑀼𑀦 𑀯𑀸𑀫𑀳𑀢𑁆𑀣𑁂𑀦 𑀤𑀓𑁆𑀔𑀺𑀡𑀧𑀸𑀤𑁂𑀦 𑀯𑀸𑀫𑀧𑀸𑀤𑁂𑀦𑀸𑀢𑀺 𑀘𑀢𑁆𑀢𑀸𑀭𑁄𑀧𑀺 𑀳𑀢𑁆𑀣𑀧𑀸𑀤𑀸 𑀢𑀢𑁆𑀣𑁂𑀯 𑀮𑀕𑀺𑀁𑀲𑀼. 𑀲𑁄 𑀅𑀥𑁄𑀲𑀺𑀭𑁄 𑀮𑀫𑁆𑀩𑀫𑀸𑀦𑁄 𑀉𑀧𑀭𑀺𑀦𑀤𑀺𑀬𑀁 𑀤𑁂𑀯𑁂 𑀯𑀼𑀝𑁆𑀞𑁂 𑀧𑀼𑀡𑁆𑀡𑀸𑀬 𑀦𑀤𑀺𑀬𑀸 𑀲𑁄𑀢𑁂 𑀦𑀺𑀫𑀼𑀕𑁆𑀕𑁄 𑀓𑀼𑀫𑁆𑀪𑀻𑀮𑀸𑀤𑀻𑀦𑀁 𑀪𑀓𑁆𑀔𑁄 𑀅𑀳𑁄𑀲𑀺.
𑀢𑀢𑁆𑀣 𑀦𑀤𑀻𑀲𑁄𑀢𑀁 𑀯𑀺𑀬 𑀲𑀁𑀲𑀸𑀭𑀲𑁄𑀢𑀁 𑀤𑀝𑁆𑀞𑀩𑁆𑀩𑀁, 𑀲𑁄𑀢𑀲𑁆𑀲 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀑𑀭𑀺𑀫𑀢𑀻𑀭𑀁 𑀯𑀺𑀬 𑀲𑀓𑁆𑀓𑀸𑀬𑁄, 𑀧𑀸𑀭𑀺𑀫𑀢𑀻𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸 𑀅𑀝𑁆𑀞 𑀓𑀓𑀼𑀥𑀭𑀼𑀓𑁆𑀔𑀸 𑀯𑀺𑀬 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀮𑁂𑀧𑀫𑀓𑁆𑀔𑀺𑀢𑁂𑀦 𑀳𑀢𑁆𑀣𑁂𑀦 𑀲𑀸𑀔𑀸𑀕𑀳𑀡𑀁 𑀯𑀺𑀬 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀧𑀸𑀭𑀺𑀧𑀦𑁆𑀣𑀺𑀓𑁂 𑀅𑀲𑁄𑀥𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁, 𑀘𑀢𑀽𑀳𑀺 𑀳𑀢𑁆𑀣𑀧𑀸𑀤𑁂𑀳𑀺 𑀲𑀸𑀔𑀸𑀬 𑀩𑀤𑁆𑀥𑀲𑁆𑀲 𑀑𑀮𑀫𑁆𑀩𑀦𑀁 𑀯𑀺𑀬 𑀧𑀞𑀫𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀬𑀸 𑀮𑀕𑁆𑀕𑀓𑀸𑀮𑁄, 𑀉𑀧𑀭𑀺𑀲𑁄𑀢𑁂 𑀯𑀼𑀝𑁆𑀞𑀺 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁄, 𑀦𑀤𑀺𑀬𑀸 𑀧𑀼𑀡𑁆𑀡𑀸𑀬 𑀲𑁄𑀢𑁂 𑀦𑀺𑀫𑀼𑀕𑁆𑀕𑀲𑁆𑀲 𑀓𑀼𑀫𑁆𑀪𑀻𑀮𑀸𑀤𑀻𑀦𑀁 𑀪𑀓𑁆𑀔𑀪𑀽𑀢𑀓𑀸𑀮𑁄 𑀯𑀺𑀬 𑀲𑀁𑀲𑀸𑀭𑀲𑁄𑀢𑁂 𑀦𑀺𑀫𑀼𑀕𑁆𑀕𑀲𑁆𑀲 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.
𑀲𑀼𑀤𑁆𑀥𑁂𑀦 𑀳𑀢𑁆𑀣𑁂𑀦𑀸𑀢𑀺 𑀲𑀼𑀥𑁄𑀢𑁂𑀦 𑀧𑀭𑀺𑀲𑀼𑀤𑁆𑀥𑀳𑀢𑁆𑀣𑁂𑀦. 𑀇𑀫𑀲𑁆𑀫𑀺𑀫𑁆𑀧𑀺 𑀅𑀢𑁆𑀣𑁂 𑀢𑀸𑀤𑀺𑀲𑀫𑁂𑀯 𑀑𑀧𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀢𑀣𑁂𑀯 𑀳𑀺 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 ‘‘𑀓𑀓𑀼𑀥𑀭𑀼𑀓𑁆𑀔𑀸 𑀦𑀸𑀫 𑀫𑀝𑁆𑀞𑀲𑀸𑀔𑀸, 𑀓𑀺𑀮𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀳𑀢𑁆𑀣𑁄 𑀧𑀭𑀺𑀕𑀮𑁂𑀬𑁆𑀬𑀸’’𑀢𑀺 𑀳𑀢𑁆𑀣𑀧𑀸𑀤𑁂 𑀲𑀼𑀥𑁄𑀢𑁂 𑀓𑀢𑁆𑀯𑀸 𑀏𑀓𑀁 𑀲𑀸𑀔𑀁 𑀕𑀡𑁆𑀳𑀺𑀢𑁆𑀯𑀸 𑀧𑀞𑀫𑀁 𑀭𑀼𑀓𑁆𑀔𑀁 𑀆𑀭𑀼𑀴𑁆𑀳𑁄. 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀤𑀼𑀢𑀺𑀬𑀁…𑀧𑁂… 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀫𑀁, 𑀅𑀝𑁆𑀞𑀫𑀭𑀼𑀓𑁆𑀔𑀢𑁄 𑀑𑀢𑀭𑀺𑀢𑁆𑀯𑀸 𑀧𑀸𑀭𑀺𑀫𑀢𑀻𑀭𑁂 𑀔𑁂𑀫𑀦𑁆𑀢𑀪𑀽𑀫𑀺𑀁 𑀕𑀢𑁄.
𑀢𑀢𑁆𑀣 ‘‘𑀇𑀫𑁂𑀳𑀺 𑀭𑀼𑀓𑁆𑀔𑁂𑀳𑀺 𑀧𑀸𑀭𑀺𑀫𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀺𑀦𑁆𑀢𑀺𑀢𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 ‘‘𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀺𑀢𑀓𑀸𑀮𑁄, 𑀲𑀼𑀤𑁆𑀥𑁂𑀦 𑀳𑀢𑁆𑀣𑁂𑀦 𑀲𑀸𑀔𑀸𑀕𑀳𑀡𑀁 𑀯𑀺𑀬 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀧𑀸𑀭𑀺𑀧𑀦𑁆𑀣𑀺𑀓𑀥𑀫𑁆𑀫𑁂 𑀲𑁄𑀥𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁. 𑀢𑀢𑁆𑀣 𑀧𑀞𑀫𑀭𑀼𑀓𑁆𑀔𑀸𑀭𑁄𑀳𑀡𑀓𑀸𑀮𑁄 𑀯𑀺𑀬 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄, 𑀧𑀞𑀫𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀤𑀼𑀢𑀺𑀬𑀁 𑀆𑀭𑀼𑀴𑁆𑀳𑀓𑀸𑀮𑁄 𑀯𑀺𑀬 𑀧𑀞𑀫𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀬𑀸 𑀅𑀩𑀤𑁆𑀥𑀲𑁆𑀲 𑀢𑀢𑁄 𑀯𑀼𑀝𑁆𑀞𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀓𑀸𑀮𑁄…𑀧𑁂… 𑀲𑀢𑁆𑀢𑀫𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀅𑀝𑁆𑀞𑀫𑀁 𑀆𑀭𑀼𑀴𑁆𑀳𑀓𑀸𑀮𑁄 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀦𑀺𑀓𑀦𑁆𑀢𑀺𑀬𑀸 𑀅𑀩𑀤𑁆𑀥𑀲𑁆𑀲 𑀢𑀢𑁄 𑀯𑀼𑀝𑁆𑀞𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀦𑁆𑀦𑀓𑀸𑀮𑁄. 𑀅𑀝𑁆𑀞𑀫𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀧𑀸𑀭𑀺𑀫𑀢𑀻𑀭𑀁 𑀔𑁂𑀫𑀦𑁆𑀢𑀪𑀽𑀫𑀺𑀁 𑀕𑀢𑀓𑀸𑀮𑁄 𑀯𑀺𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀓𑀦𑁆𑀢𑀺𑀬𑀸 𑀅𑀩𑀤𑁆𑀥𑀲𑁆𑀲 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.
𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸𑀬 𑀕𑀡𑀩𑀳𑀮𑀫𑀳𑀸𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺. 𑀦 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀭𑀫𑁆𑀫𑀡𑀯𑀲𑁂𑀦𑁂𑀯 𑀦 𑀧𑀓𑁆𑀔𑀦𑁆𑀤𑀢𑀺. 𑀚𑀫𑁆𑀩𑀸𑀮𑀻𑀢𑀺 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀫𑀳𑀸𑀉𑀤𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑁄 𑀫𑀳𑀸𑀆𑀯𑀸𑀝𑁄. 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀸𑀢𑀺 𑀕𑀸𑀫𑀲𑁆𑀲 𑀯𑀸 𑀦𑀕𑀭𑀲𑁆𑀲 𑀯𑀸 𑀉𑀧𑁆𑀧𑀦𑁆𑀦𑀓𑀸𑀮𑁂𑀬𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑁂𑀓𑀸𑀦𑀺 𑀯𑀲𑁆𑀲𑀕𑀡𑀸𑀦𑀺 𑀉𑀧𑁆𑀧𑀦𑁆𑀦𑀸𑀬 𑀏𑀢𑀺𑀲𑁆𑀲𑀸𑀢𑀺 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀸. 𑀆𑀬𑀫𑀼𑀔𑀸𑀦𑀻𑀢𑀺 𑀘𑀢𑀲𑁆𑀲𑁄 𑀧𑀯𑀺𑀲𑀦𑀓𑀦𑁆𑀤𑀭𑀸. 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑀸𑀦𑀺. 𑀦 𑀆𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄𑀢𑀺 𑀦 𑀧𑀸𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑁄. 𑀦 𑀳𑀺 𑀢𑀢𑁄 𑀉𑀤𑀓𑀁 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀸𑀢𑀺.
𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀉𑀬𑁆𑀬𑀸𑀦𑀕𑀯𑁂𑀲𑀓𑀑𑀧𑀫𑁆𑀫𑀁 𑀆𑀳𑀭𑀺𑀢𑀩𑁆𑀩𑀁. 𑀏𑀓𑁄 𑀓𑀺𑀭 𑀦𑀕𑀭𑀯𑀸𑀲𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 𑀉𑀬𑁆𑀬𑀸𑀦𑀁 𑀕𑀯𑁂𑀲𑀦𑁆𑀢𑁄 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑁂 𑀦𑀘𑁆𑀘𑀸𑀲𑀦𑁆𑀦𑁂 𑀫𑀳𑀦𑁆𑀢𑀁 𑀚𑀫𑁆𑀩𑀸𑀮𑀺𑀁 𑀅𑀤𑁆𑀤𑀲. 𑀲𑁄 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀭𑀫𑀡𑀻𑀬𑀁 𑀉𑀬𑁆𑀬𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀼𑀤𑁆𑀤𑀸𑀮𑀁 𑀆𑀤𑀸𑀬 𑀘𑀢𑁆𑀢𑀸𑀭𑀺𑀧𑀺 𑀓𑀦𑁆𑀤𑀭𑀸𑀦𑀺 𑀧𑀺𑀥𑀸𑀬 𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑁂𑀯𑁄 𑀦 𑀲𑀫𑁆𑀫𑀸 𑀯𑀲𑁆𑀲𑀺, 𑀅𑀯𑀲𑁂𑀲𑀉𑀤𑀓𑀁 𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑁂𑀦 𑀧𑀭𑀺𑀲𑁆𑀲𑀯𑀺𑀢𑁆𑀯𑀸 𑀕𑀢𑀁. 𑀘𑀫𑁆𑀫𑀔𑀡𑁆𑀟𑀧𑀺𑀮𑁄𑀢𑀺𑀓𑀸𑀤𑀻𑀦𑀺 𑀢𑀢𑁆𑀣𑁂𑀯 𑀧𑀽𑀢𑀺𑀓𑀸𑀦𑀺 𑀚𑀸𑀢𑀸𑀦𑀺, 𑀧𑀸𑀡𑀓𑀸 𑀲𑀡𑁆𑀞𑀺𑀢𑀸, 𑀲𑀫𑀦𑁆𑀢𑀸 𑀅𑀦𑀼𑀧𑀕𑀫𑀦𑀻𑀬𑀸 𑀚𑀸𑀢𑀸. 𑀉𑀧𑀕𑀢𑀸𑀦𑀫𑁆𑀧𑀺 𑀦𑀸𑀲𑀸𑀧𑀼𑀝𑁂 𑀧𑀺𑀥𑀸𑀬 𑀧𑀓𑁆𑀓𑀫𑀺𑀢𑀩𑁆𑀩𑀁 𑀳𑁄𑀢𑀺. 𑀲𑁄 𑀓𑀢𑀺𑀧𑀸𑀳𑁂𑀦 𑀆𑀕𑀦𑁆𑀢𑁆𑀯𑀸 𑀧𑀝𑀺𑀓𑁆𑀓𑀫𑁆𑀫 𑀞𑀺𑀢𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀉𑀧𑀕𑀦𑁆𑀢𑀼’’𑀦𑁆𑀢𑀺 𑀧𑀓𑁆𑀓𑀸𑀫𑀺.
𑀢𑀢𑁆𑀣 𑀦𑀕𑀭𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄, 𑀉𑀬𑁆𑀬𑀸𑀦𑀁 𑀕𑀯𑁂𑀲𑀦𑁆𑀢𑁂𑀦 𑀕𑀸𑀫𑀤𑁆𑀯𑀸𑀭𑁂 𑀚𑀫𑁆𑀩𑀸𑀮𑀺𑀬𑀸 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑁄, 𑀆𑀬𑀫𑀼𑀔𑀸𑀦𑀁 𑀧𑀺𑀳𑀺𑀢𑀓𑀸𑀮𑁄 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑁄𑀤𑀓𑀲𑁆𑀲 𑀅𑀮𑀤𑁆𑀥𑀓𑀸𑀮𑁄, 𑀅𑀧𑀸𑀬𑀫𑀼𑀔𑀸𑀦𑀁 𑀯𑀺𑀯𑀝𑀓𑀸𑀮𑁄 𑀯𑀺𑀬 𑀙𑀤𑁆𑀯𑀸𑀭𑀺𑀓𑀲𑀁𑀯𑀭𑀲𑁆𑀲 𑀯𑀺𑀲𑁆𑀲𑀝𑁆𑀞𑀓𑀸𑀮𑁄, 𑀤𑁂𑀯𑀲𑁆𑀲 𑀲𑀫𑁆𑀫𑀸 𑀅𑀯𑀼𑀝𑁆𑀞𑀓𑀸𑀮𑁄 𑀯𑀺𑀬 𑀲𑀧𑁆𑀧𑀸𑀬𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀮𑀤𑁆𑀥𑀓𑀸𑀮𑁄, 𑀅𑀯𑀲𑁂𑀲𑀉𑀤𑀓𑀲𑁆𑀲 𑀅𑀧𑀸𑀬𑀫𑀼𑀔𑁂𑀳𑀺 𑀧𑀭𑀺𑀲𑁆𑀲𑀯𑀺𑀢𑁆𑀯𑀸 𑀕𑀢𑀓𑀸𑀮𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀕𑀼𑀡𑀸𑀦𑀁 𑀧𑀭𑀺𑀳𑀻𑀦𑀓𑀸𑀮𑁄, 𑀉𑀤𑀓𑀲𑁆𑀲 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀺𑀮𑁂𑀲𑀭𑀸𑀲𑀺𑀁 𑀯𑀺𑀥𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀢𑀼𑀁 𑀅𑀲𑀫𑀢𑁆𑀣𑀓𑀸𑀮𑁄, 𑀘𑀫𑁆𑀫𑀔𑀡𑁆𑀟𑀧𑀺𑀮𑁄𑀢𑀺𑀓𑀸𑀤𑀻𑀦𑀁 𑀢𑀢𑁆𑀣𑁂𑀯 𑀧𑀽𑀢𑀺𑀪𑀸𑀯𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀭𑀸𑀕𑀸𑀤𑀺𑀓𑀺𑀮𑁂𑀲𑁂𑀳𑀺 𑀧𑀭𑀺𑀧𑀽𑀭𑀺𑀢𑀓𑀸𑀮𑁄, 𑀢𑀲𑁆𑀲 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀕𑀢𑀓𑀸𑀮𑁄 𑀯𑀺𑀬 𑀯𑀝𑁆𑀝𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀲𑁆𑀲 𑀯𑀝𑁆𑀝𑁂 𑀅𑀪𑀺𑀭𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.
𑀆𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄𑀢𑀺 𑀧𑀸𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑁄. 𑀢𑀢𑁄 𑀳𑀺 𑀉𑀤𑀓𑀁 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.
𑀇𑀥𑀸𑀧𑀺 𑀢𑀤𑁂𑀯 𑀑𑀧𑀫𑁆𑀫𑀁 𑀆𑀳𑀭𑀺𑀢𑀩𑁆𑀩𑀁. 𑀢𑀢𑁆𑀣 𑀆𑀬𑀫𑀼𑀔𑀸𑀦𑀁 𑀯𑀺𑀯𑀝𑀓𑀸𑀮𑁄 𑀯𑀺𑀬 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀮𑀤𑁆𑀥𑀓𑀸𑀮𑁄, 𑀅𑀧𑀸𑀬𑀫𑀼𑀔𑀸𑀦𑀁 𑀧𑀺𑀳𑀺𑀢𑀓𑀸𑀮𑁄 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀮𑁄, 𑀤𑁂𑀯𑀲𑁆𑀲 𑀲𑀫𑁆𑀫𑀸 𑀯𑀼𑀝𑁆𑀞𑀓𑀸𑀮𑁄 𑀯𑀺𑀬 𑀲𑀧𑁆𑀧𑀸𑀬𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀮𑀤𑁆𑀥𑀓𑀸𑀮𑁄, 𑀉𑀤𑀓𑀲𑁆𑀲 𑀉𑀝𑁆𑀞𑀸𑀬 𑀧𑀸𑀴𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀘𑀯𑀭𑀁 𑀆𑀤𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀢𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀓𑀼𑀲𑀮𑀭𑀸𑀲𑀺𑀁 𑀯𑀺𑀥𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀓𑀸𑀮𑁄, 𑀆𑀬𑀫𑀼𑀔𑁂𑀳𑀺 𑀧𑀯𑀺𑀝𑁆𑀞𑁂𑀦 𑀉𑀤𑀓𑁂𑀦 𑀲𑀭𑀲𑁆𑀲 𑀧𑀭𑀺𑀧𑀼𑀡𑁆𑀡𑀓𑀸𑀮𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀧𑀭𑀺𑀧𑀼𑀡𑁆𑀡𑀓𑀸𑀮𑁄, 𑀲𑀫𑀦𑁆𑀢𑀢𑁄 𑀯𑀢𑀺𑀁 𑀓𑀢𑁆𑀯𑀸 𑀭𑀼𑀓𑁆𑀔𑁂 𑀭𑁄𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀫𑀚𑁆𑀛𑁂 𑀧𑀸𑀲𑀸𑀤𑀁 𑀫𑀸𑀧𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀥𑀫𑁆𑀫𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑁂𑀲𑀦𑀸 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀺𑀓𑀸 𑀓𑀣𑀺𑀢𑀸𑀢𑀺.
𑁯. 𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭𑁯. 𑀦𑀯𑀫𑁂 𑀳𑀸𑀦𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺𑀆𑀤𑀻𑀲𑀼 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀁 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁯𑁯) 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀬𑀣𑀸𑀲𑀪𑀸𑀯𑀢𑁄 𑀫𑀕𑁆𑀕𑀜𑀸𑀡𑁂𑀦 𑀦 𑀚𑀸𑀦𑀦𑁆𑀢𑀺.
𑁧𑁦. 𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁦. 𑀤𑀲𑀫𑁂 𑀪𑁄𑀕𑀦𑀕𑀭𑁂 𑀯𑀺𑀳𑀭𑀢𑀻𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀦𑀕𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺. 𑀆𑀦𑀦𑁆𑀤𑀘𑁂𑀢𑀺𑀬𑁂𑀢𑀺 𑀆𑀦𑀦𑁆𑀤𑀬𑀓𑁆𑀔𑀲𑁆𑀲 𑀪𑀯𑀦𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀯𑀺𑀳𑀸𑀭𑁂. 𑀫𑀳𑀸𑀧𑀤𑁂𑀲𑁂𑀢𑀺 𑀫𑀳𑀸𑀑𑀓𑀸𑀲𑁂 𑀫𑀳𑀸𑀅𑀧𑀤𑁂𑀲𑁂 𑀯𑀸, 𑀩𑀼𑀤𑁆𑀥𑀸𑀤𑀬𑁄 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀅𑀧𑀤𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀫𑀳𑀸𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁂𑀳𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀧𑀼𑀩𑁆𑀩𑁂𑀯 𑀦 𑀲𑁄𑀢𑀩𑁆𑀩𑀁. 𑀏𑀯𑀁 𑀓𑀢𑁂 𑀳𑀺 𑀧𑀘𑁆𑀙𑀸 ‘‘𑀇𑀤𑀁 𑀦 𑀲𑀫𑁂𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀓𑀺𑀁 𑀧𑀼𑀩𑁆𑀩𑁂𑀯 𑀅𑀬𑀁 𑀥𑀫𑁆𑀫𑁄, 𑀇𑀤𑀸𑀦𑀺 𑀦 𑀥𑀫𑁆𑀫𑁄’’𑀢𑀺 𑀯𑀢𑁆𑀯𑀸 𑀮𑀤𑁆𑀥𑀺𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀦𑁆𑀢𑀺 ‘‘𑀓𑀺𑀁 𑀏𑀲 𑀩𑀸𑀮𑁄 𑀯𑀤𑀢𑀻’’𑀢𑀺 𑀏𑀯𑀁 𑀧𑀼𑀩𑁆𑀩𑁂𑀯 𑀦 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀯𑀼𑀢𑁆𑀢𑁂 𑀳𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀫𑁆𑀧𑀺 𑀦 𑀯𑀓𑁆𑀔𑀢𑀺. 𑀢𑁂𑀦𑀸𑀳 𑁋 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸𑀢𑀺. 𑀧𑀤𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀧𑀤𑀲𑀗𑁆𑀔𑀸𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺. 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀴𑀺 𑀯𑀼𑀢𑁆𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀦𑀼𑀲𑀦𑁆𑀥𑀺 𑀓𑀣𑀺𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀼𑀩𑁆𑀩𑀸𑀧𑀭𑀁 𑀓𑀣𑀺𑀢’’𑀦𑁆𑀢𑀺 𑀲𑀼𑀝𑁆𑀞𑀼 𑀕𑀳𑁂𑀢𑁆𑀯𑀸. 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀲𑀼𑀢𑁆𑀢𑁂 𑀑𑀢𑀭𑀺𑀢𑀩𑁆𑀩𑀸𑀦𑀺. 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀻𑀢𑀺 𑀯𑀺𑀦𑀬𑁂 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀺.
𑀏𑀢𑁆𑀣 𑀘 𑀲𑀼𑀢𑁆𑀢𑀦𑁆𑀢𑀺 𑀯𑀺𑀦𑀬𑁄 𑀯𑀼𑀢𑁆𑀢𑁄. 𑀬𑀣𑀸𑀳 𑁋 ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀲𑀸𑀯𑀢𑁆𑀣𑀺𑀬𑀁 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺 (𑀘𑀽𑀴𑀯. 𑁪𑁫𑁭) 𑀯𑀺𑀦𑀬𑁄𑀢𑀺 𑀔𑀦𑁆𑀥𑀓𑁄. 𑀬𑀣𑀸𑀳 𑁋 ‘‘𑀯𑀺𑀦𑀬𑀸𑀢𑀺𑀲𑀸𑀭𑁂’’𑀢𑀺. 𑀏𑀯𑀁 𑀯𑀺𑀦𑀬𑀧𑀺𑀝𑀓𑀫𑁆𑀧𑀺 𑀦 𑀧𑀭𑀺𑀬𑀸𑀤𑀺𑀬𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑀸 𑀧𑀦 𑀲𑀼𑀢𑁆𑀢𑀁, 𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀯𑀺𑀦𑀬𑁄𑀢𑀺 𑀏𑀯𑀁 𑀯𑀺𑀦𑀬𑀧𑀺𑀝𑀓𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀅𑀣 𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀲𑀼𑀢𑁆𑀢𑀁, 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄𑀢𑀺 𑀏𑀯𑀁 𑀤𑁆𑀯𑁂𑀬𑁂𑀯 𑀧𑀺𑀝𑀓𑀸𑀦𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀺 𑀯𑀸 𑀲𑀼𑀢𑁆𑀢𑀁, 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄𑀢𑀺 𑀏𑀯𑀫𑁆𑀧𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀦 𑀢𑀸𑀯 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀲𑀼𑀢𑁆𑀢𑀦𑀸𑀫𑀓𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑀁 𑀦𑀸𑀫 𑀅𑀢𑁆𑀣𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀚𑀸𑀢𑀓𑀁 𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀤𑁆𑀤𑁂𑀲𑁄 𑀲𑀼𑀢𑁆𑀢𑀦𑀺𑀧𑀸𑀢𑁄 𑀥𑀫𑁆𑀫𑀧𑀤𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀯𑀺𑀫𑀸𑀦𑀯𑀢𑁆𑀣𑀼 𑀧𑁂𑀢𑀯𑀢𑁆𑀣𑀼 𑀣𑁂𑀭𑀕𑀸𑀣𑀸 𑀣𑁂𑀭𑀻𑀕𑀸𑀣𑀸 𑀅𑀧𑀤𑀸𑀦𑀦𑁆𑀢𑀺.
𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑁄 𑀧𑀦 ‘‘𑀅𑀲𑀼𑀢𑁆𑀢𑀦𑀸𑀫𑀓𑀁 𑀩𑀼𑀤𑁆𑀥𑀯𑀘𑀦𑀁 𑀦𑀢𑁆𑀣𑀻’’𑀢𑀺 𑀢𑀁 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀼𑀢𑁆𑀢𑀁, 𑀯𑀺𑀦𑀬𑁄 𑀧𑀦 𑀓𑀸𑀭𑀡’’𑀦𑁆𑀢𑀺 𑀆𑀳. 𑀢𑀢𑁄 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀫𑀸𑀳𑀭𑀺 𑁋
‘‘𑀬𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀭𑀸𑀕𑀸𑀬, 𑀲𑀁𑀬𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀲𑀁𑀬𑁄𑀕𑀸𑀬, 𑀲𑀉𑀧𑀸𑀤𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀦𑀼𑀧𑀸𑀤𑀸𑀦𑀸𑀬, 𑀫𑀳𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬, 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀦𑁆𑀢𑀼𑀝𑁆𑀞𑀺𑀬𑀸, 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀸𑀬, 𑀲𑀗𑁆𑀕𑀡𑀺𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀧𑀯𑀺𑀯𑁂𑀓𑀸𑀬, 𑀆𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑀘𑀬𑀸𑀬. 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀚𑀸𑀦𑁂𑀬𑁆𑀬𑀸𑀲𑀺 ‘𑀦𑁂𑀲𑁄 𑀥𑀫𑁆𑀫𑁄 𑀦𑁂𑀲𑁄 𑀯𑀺𑀦𑀬𑁄 𑀦𑁂𑀢𑀁 𑀲𑀢𑁆𑀣𑀼 𑀲𑀸𑀲𑀦’𑀦𑁆𑀢𑀺.
‘‘𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀭𑀸𑀕𑀸𑀬, 𑀯𑀺𑀲𑀁𑀬𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀁𑀬𑁄𑀕𑀸𑀬. 𑀅𑀦𑀼𑀧𑀸𑀤𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀉𑀧𑀸𑀤𑀸𑀦𑀸𑀬, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀫𑀳𑀺𑀘𑁆𑀙𑀢𑀸𑀬, 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀲𑀦𑁆𑀢𑀼𑀝𑁆𑀞𑀺𑀬𑀸, 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀓𑁄𑀲𑀚𑁆𑀚𑀸𑀬, 𑀧𑀯𑀺𑀯𑁂𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀗𑁆𑀕𑀡𑀺𑀓𑀸𑀬, 𑀅𑀧𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀆𑀘𑀬𑀸𑀬. 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀚𑀸𑀦𑁂𑀬𑁆𑀬𑀸𑀲𑀺 ‘𑀏𑀲𑁄 𑀥𑀫𑁆𑀫𑁄 𑀏𑀲𑁄 𑀯𑀺𑀦𑀬𑁄 𑀏𑀢𑀁 𑀲𑀢𑁆𑀣𑀼 𑀲𑀸𑀲𑀦’’’𑀦𑁆𑀢𑀺 (𑀘𑀽𑀴𑀯. 𑁪𑁦𑁬; 𑀅. 𑀦𑀺. 𑁮.𑁫𑁩).
𑀢𑀲𑁆𑀫𑀸 𑀲𑀼𑀢𑁆𑀢𑁂𑀢𑀺 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺. 𑀯𑀺𑀦𑀬𑁂𑀢𑀺 𑀏𑀢𑀲𑁆𑀫𑀺𑀁 𑀭𑀸𑀕𑀸𑀤𑀺𑀯𑀺𑀦𑀬𑀓𑀸𑀭𑀡𑁂 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀢𑀭𑀦𑁆𑀢𑀻𑀢𑀺 𑀲𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀓𑀢𑁆𑀣𑀘𑀺 𑀅𑀦𑀸𑀕𑀦𑁆𑀢𑁆𑀯𑀸 𑀙𑀮𑁆𑀮𑀺𑀁 𑀉𑀝𑁆𑀞𑀧𑁂𑀢𑁆𑀯𑀸 𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭-𑀕𑀼𑀴𑁆𑀳𑀉𑀫𑁆𑀫𑀕𑁆𑀕-𑀕𑀼𑀴𑁆𑀳𑀯𑀺𑀦𑀬𑀯𑁂𑀤𑀮𑁆𑀮𑀧𑀺𑀝𑀓𑀸𑀦𑀁 𑀅𑀜𑁆𑀜𑀢𑀭𑀢𑁄 𑀆𑀕𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀆𑀕𑀢𑀸𑀦𑀺 𑀳𑀺 𑀭𑀸𑀕𑀸𑀤𑀺𑀯𑀺𑀦𑀬𑁂 𑀘 𑀅𑀧𑀜𑁆𑀜𑀸𑀬𑀫𑀸𑀦𑀸𑀦𑀺 𑀙𑀟𑁆𑀟𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀢𑀺 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣𑀸’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣𑀸𑀢𑀺 𑀇𑀫𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀁 𑀥𑀸𑀭𑁂𑀬𑁆𑀬𑀸𑀣𑀸𑀢𑀺.
𑀲𑀜𑁆𑀘𑁂𑀢𑀦𑀺𑀬𑀯𑀕𑁆𑀕𑁄 𑀢𑀢𑀺𑀬𑁄.
(𑁧𑁯) 𑁪. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄
𑁧. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀞𑀸𑀦𑀓𑀼𑀲𑀮𑁄𑀢𑀺 𑀬𑁂𑀦 𑀞𑀸𑀦𑁂𑀦 𑀞𑀺𑀢𑁄 𑀅𑀯𑀺𑀭𑀸𑀥𑁂𑀢𑁆𑀯𑀸 𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀼𑀲𑀮𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.
𑁨. 𑀧𑀸𑀝𑀺𑀪𑁄𑀕𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁨. 𑀤𑀼𑀢𑀺𑀬𑁂 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄𑀢𑀺 𑀅𑀳𑀁 𑀢𑁂 𑀧𑀸𑀝𑀺𑀪𑁄𑀕𑁄𑀢𑀺 𑀏𑀯𑀁 𑀧𑀸𑀝𑀺𑀪𑁄𑀕𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀚𑀭𑀸𑀥𑀫𑁆𑀫𑀦𑁆𑀢𑀺 𑀚𑀭𑀸𑀲𑀪𑀸𑀯𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.
𑁩. 𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁩. 𑀢𑀢𑀺𑀬𑁂 𑀦𑀢𑁆𑀣𑀺 𑀢𑀢𑁄 𑀤𑁄𑀲𑁄𑀢𑀺 𑀢𑀲𑁆𑀫𑀺𑀁 𑀤𑁄𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.
𑁪. 𑀅𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁪. 𑀘𑀢𑀼𑀢𑁆𑀣𑁂 𑀓𑀺𑀘𑁆𑀙𑀸𑀚𑀻𑀯𑀺𑀢𑀓𑀸𑀭𑀡𑀝𑁆𑀞𑁂𑀦 𑀭𑁄𑀕𑁄𑀯 𑀭𑁄𑀕𑀸𑀢𑀗𑁆𑀓𑁄 𑀦𑀸𑀫. 𑀨𑀼𑀝𑁆𑀞𑀲𑁆𑀲𑀸𑀢𑀺 𑀢𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀻𑀢𑀺 𑀉𑀭𑀁 𑀢𑀸𑀴𑁂𑀢𑁆𑀯𑀸 𑀭𑁄𑀤𑀢𑀺. 𑀅𑀓𑀢𑀓𑀮𑁆𑀬𑀸𑀡𑁄𑀢𑀺𑀆𑀤𑀻𑀲𑀼 𑀓𑀮𑁆𑀬𑀸𑀡𑀁 𑀯𑀼𑀘𑁆𑀘𑀢𑀺 𑀧𑀼𑀜𑁆𑀜𑀓𑀫𑁆𑀫𑀁, 𑀢𑀁 𑀅𑀓𑀢𑀁 𑀏𑀢𑁂𑀦𑀸𑀢𑀺 𑀅𑀓𑀢𑀓𑀮𑁆𑀬𑀸𑀡𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀳𑀺 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀢𑁆𑀢𑀸 𑀓𑀼𑀲𑀮𑀁, 𑀪𑀻𑀢𑀲𑁆𑀲 𑀧𑀭𑀺𑀢𑁆𑀢𑀸𑀬𑀓𑀢𑁆𑀢𑀸 𑀪𑀻𑀭𑀼𑀢𑁆𑀢𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀢𑀧𑀸𑀧𑁄𑀢𑀺𑀆𑀤𑀻𑀲𑀼 𑀧𑀸𑀧𑀁 𑀯𑀼𑀘𑁆𑀘𑀢𑀺 𑀮𑀸𑀫𑀓𑀁 𑀅𑀓𑀼𑀲𑀮𑀓𑀫𑁆𑀫𑀁. 𑀮𑀼𑀤𑁆𑀤𑀦𑁆𑀢𑀺 𑀓𑀓𑁆𑀔𑀴𑀓𑀫𑁆𑀫𑀁. 𑀓𑀺𑀩𑁆𑀩𑀺𑀲𑀦𑁆𑀢𑀺 𑀲𑀫𑀮𑀁 𑀅𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀁. 𑀓𑀗𑁆𑀔𑀻 𑀳𑁄𑀢𑀻𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂𑀲𑀼 𑀘𑁂𑀯 𑀲𑀺𑀓𑁆𑀔𑀸𑀬 𑀘 𑀧𑀼𑀩𑁆𑀩𑀦𑁆𑀢𑁂 𑀘 𑀅𑀧𑀭𑀦𑁆𑀢𑁂 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀘𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀓𑀗𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑀸𑀲𑀦𑀲𑀤𑁆𑀥𑀫𑁆𑀫𑁂 𑀦 𑀦𑀺𑀝𑁆𑀞𑀁 𑀕𑀢𑁄, 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀦𑀺𑀝𑁆𑀞𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑁫. 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁫. 𑀧𑀜𑁆𑀘𑀫𑁂 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀻𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀸𑀦𑀺 𑀢𑀣𑀸𑀦𑀺. 𑀲𑁄 𑀢𑁂𑀦 𑀦 𑀲𑀫𑀡𑁄𑀢𑀺 𑀫𑀜𑁆𑀜𑀢𑀻𑀢𑀺 𑀲𑁄 𑀔𑀻𑀡𑀸𑀲𑀯𑁄 𑀢𑁂𑀦 𑀲𑀘𑁆𑀘𑁂𑀦 ‘‘𑀅𑀳𑀁 𑀲𑀫𑀡𑁄’’𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀦 𑀫𑀜𑁆𑀜𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀤𑁂𑀯 𑀢𑀢𑁆𑀣 𑀲𑀘𑁆𑀘𑀁, 𑀢𑀤𑀪𑀺𑀜𑁆𑀜𑀸𑀬𑀸𑀢𑀺 𑀬𑀁 𑀢𑀢𑁆𑀣 ‘‘𑀲𑀩𑁆𑀩𑁂 𑀧𑀸𑀡𑀸 𑀅𑀯𑀚𑁆𑀛𑀸’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀲𑀘𑁆𑀘𑀁 𑀢𑀣𑀁 𑀅𑀯𑀺𑀧𑀭𑀻𑀢𑀁. 𑀇𑀫𑀺𑀦𑀸 𑀯𑀘𑀻𑀲𑀘𑁆𑀘𑀁 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀤𑀪𑀺𑀜𑁆𑀜𑀸𑀬𑀸𑀢𑀺 𑀢𑀁 𑀉𑀪𑀬𑀫𑁆𑀧𑀺 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀅𑀦𑀼𑀤𑁆𑀤𑀬𑀸𑀬 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀦𑀼𑀤𑁆𑀤𑀬𑀢𑁆𑀣𑀸𑀬 𑀘 𑀅𑀦𑀼𑀓𑀫𑁆𑀧𑀢𑁆𑀣𑀸𑀬 𑀘 𑀬𑀸 𑀧𑀝𑀺𑀧𑀤𑀸, 𑀢𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀧𑀽𑀭𑁂𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀝𑀺𑀧𑀤𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.
𑀲𑀩𑁆𑀩𑁂 𑀓𑀸𑀫𑀸𑀢𑀺 𑀲𑀩𑁆𑀩𑁂 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸. 𑀇𑀢𑀺 𑀯𑀤𑀁 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀫𑀸𑀳𑀸𑀢𑀺 𑀏𑀯𑀫𑁆𑀧𑀺 𑀯𑀤𑀦𑁆𑀢𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀫𑁂𑀯 𑀆𑀳. 𑀲𑀩𑁆𑀩𑁂 𑀪𑀯𑀸𑀢𑀺 𑀓𑀸𑀫𑀪𑀯𑀸𑀤𑀬𑁄 𑀢𑀬𑁄𑀧𑀺. 𑀦𑀸𑀳𑀁 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀓𑁆𑀓𑁄𑀝𑀺𑀓𑀲𑀼𑀜𑁆𑀜𑀢𑀸 𑀓𑀣𑀺𑀢𑀸. 𑀅𑀬𑀜𑁆𑀳𑀺 ‘‘𑀦𑀸𑀳𑀁 𑀓𑁆𑀯𑀘𑀦𑀻’’𑀢𑀺 𑀓𑁆𑀯𑀘𑀺 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀪𑀸𑀢𑀺𑀝𑁆𑀞𑀸𑀦𑁂 𑀪𑀸𑀢𑀭𑀁, 𑀲𑀳𑀸𑀬𑀝𑁆𑀞𑀸𑀦𑁂 𑀲𑀳𑀸𑀬𑀁, 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀯𑀸 𑀧𑀭𑀺𑀓𑁆𑀔𑀸𑀭𑀁 𑀫𑀜𑁆𑀜𑀺𑀢𑁆𑀯𑀸 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀫𑀫 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀫𑀫𑀲𑀤𑁆𑀤𑀁 𑀢𑀸𑀯 𑀞𑀧𑁂𑀢𑁆𑀯𑀸 ‘‘𑀦 𑀘 𑀓𑁆𑀯𑀘𑀦𑀺 𑀧𑀭𑀲𑁆𑀲 𑀘 𑀅𑀢𑁆𑀢𑀸𑀦𑀁 𑀓𑁆𑀯𑀘𑀺 𑀦 𑀧𑀲𑁆𑀲𑀢𑀻’’𑀢𑀺 𑀅𑀬𑀫𑀢𑁆𑀣𑁄. 𑀇𑀤𑀸𑀦𑀺 ‘‘𑀫𑀫𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀁 𑀦𑀢𑁆𑀣𑀻’’𑀢𑀺 𑀲𑁄 𑀧𑀭𑀲𑁆𑀲 𑀅𑀢𑁆𑀢𑀸 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀪𑀸𑀯𑁂 𑀅𑀢𑁆𑀣𑀻𑀢𑀺 𑀦 𑀧𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀪𑀸𑀢𑀺𑀝𑁆𑀞𑀸𑀦𑁂 𑀪𑀸𑀢𑀭𑀁, 𑀲𑀳𑀸𑀬𑀝𑁆𑀞𑀸𑀦𑁂 𑀲𑀳𑀸𑀬𑀁, 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀯𑀸 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀇𑀫𑀺𑀦𑀸 𑀓𑀺𑀜𑁆𑀘𑀦𑀪𑀸𑀯𑁂𑀦 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀬𑀁 𑀬𑀲𑁆𑀫𑀸 𑀦𑁂𑀯 𑀓𑀢𑁆𑀣𑀘𑀺 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀻𑀢𑀺. 𑀇𑀢𑀺 𑀯𑀤𑀁 𑀩𑁆𑀭𑀸𑀳𑁆𑀫𑀡𑁄𑀢𑀺 𑀏𑀯𑀁 𑀘𑀢𑀼𑀓𑁆𑀓𑁄𑀝𑀺𑀓𑀁 𑀲𑀼𑀜𑁆𑀜𑀢𑀁 𑀯𑀤𑀦𑁆𑀢𑁄𑀧𑀺 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀧𑀝𑀺𑀧𑀤𑀸𑀬 𑀲𑀫𑁆𑀫𑀸 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀲𑀘𑁆𑀘𑀫𑁂𑀯 𑀆𑀳, 𑀦 𑀫𑀼𑀲𑀸𑀢𑀺 𑀲𑀩𑁆𑀩𑁂𑀲𑀼𑀧𑀺 𑀯𑀸𑀭𑁂𑀲𑀼 𑀫𑀜𑁆𑀜𑀦𑀸𑀦𑀁 𑀧𑀳𑀻𑀦𑀢𑁆𑀢𑀸𑀬𑁂𑀯 𑀦 𑀫𑀜𑁆𑀜𑀢𑀻𑀢𑀺 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀓𑀺𑀜𑁆𑀘𑀜𑁆𑀜𑀁𑀬𑁂𑀯 𑀧𑀝𑀺𑀧𑀤𑀦𑁆𑀢𑀺 𑀓𑀺𑀜𑁆𑀘𑀦𑀪𑀸𑀯𑀯𑀺𑀭𑀳𑀺𑀢𑀁 𑀦𑀺𑀧𑁆𑀧𑀮𑀺𑀩𑁄𑀥𑀁 𑀦𑀺𑀕𑁆𑀕𑀳𑀡𑀫𑁂𑀯 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀧𑀽𑀭𑁂𑀢𑁆𑀯𑀸 𑀞𑀺𑀢𑁄.
𑀇𑀫𑀸𑀦𑀺 𑀔𑁄 𑀧𑀭𑀺𑀩𑁆𑀩𑀸𑀚𑀓𑀸 𑀘𑀢𑁆𑀢𑀸𑀭𑀺 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻𑀢𑀺 𑀬𑀸𑀦𑀺 𑀢𑀼𑀫𑁆𑀳𑁂 𑀪𑁄𑀯𑀸𑀤𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀸𑀦𑀺 𑀯𑀤𑁂𑀣, 𑀢𑁂𑀳𑀺 𑀅𑀜𑁆𑀜𑀸𑀦𑀺 𑀫𑀬𑀸 𑀇𑀫𑀸𑀦𑀺 𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑁄𑀴𑀲𑀯𑀺𑀥𑁂𑀦 𑀓𑀺𑀘𑁆𑀘𑁂𑀦 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺 𑀤𑁂𑀲𑀺𑀢𑀸𑀦𑀺 𑀚𑁄𑀢𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀔𑀻𑀡𑀸𑀲𑀯𑀲𑁆𑀲 𑀯𑀘𑀻𑀲𑀘𑁆𑀘𑀫𑁂𑀯 𑀓𑀣𑀺𑀢𑀦𑁆𑀢𑀺.
𑁬. 𑀉𑀫𑁆𑀫𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁬. 𑀙𑀝𑁆𑀞𑁂 𑀧𑀭𑀺𑀓𑀲𑁆𑀲𑀢𑀻𑀢𑀺 𑀆𑀓𑀟𑁆𑀠𑀺𑀬𑀢𑀺. 𑀉𑀫𑁆𑀫𑀕𑁆𑀕𑁄𑀢𑀺 𑀉𑀫𑁆𑀫𑀼𑀚𑁆𑀚𑀦𑀁, 𑀧𑀜𑁆𑀜𑀸𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸 𑀏𑀯 𑀯𑀸 𑀉𑀫𑁆𑀫𑀼𑀚𑁆𑀚𑀦𑀝𑁆𑀞𑁂𑀦 𑀉𑀫𑁆𑀫𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀯 𑀧𑀝𑀺𑀪𑀸𑀦𑀝𑁆𑀞𑁂𑀦 𑀧𑀝𑀺𑀪𑀸𑀦𑀁. 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁆𑀲 𑀯𑀲𑀁 𑀕𑀘𑁆𑀙𑀢𑀻𑀢𑀺 𑀬𑁂 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁𑀬𑁂𑀯𑁂𑀢𑁆𑀣 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑀜𑁆𑀘 𑀧𑀸𑀴𑀺𑀜𑁆𑀘 𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀥𑀫𑁆𑀫𑀁 𑀲𑀳 𑀲𑀻𑀮𑁂𑀦 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄𑀢𑀺 𑀦𑀺𑀩𑁆𑀩𑀺𑀚𑁆𑀛𑀦𑀓𑀧𑀜𑁆𑀜𑁄. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀲𑁂𑀲𑀁 𑀢𑁂𑀪𑀽𑀫𑀓𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀦𑁆𑀢𑀺 𑀲𑀼𑀢𑀁 𑀳𑁄𑀢𑀺. 𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀯𑀝𑁆𑀝𑀫𑀽𑀮𑀓𑀢𑀡𑁆𑀳𑀸 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄𑀢𑀺 𑀲𑀼𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑁂𑀲𑀤𑁆𑀯𑀬𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀭𑀳𑀢𑁆𑀢𑀨𑀮𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑁭. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁭. 𑀲𑀢𑁆𑀢𑀫𑁂 𑀢𑁄𑀤𑁂𑀬𑁆𑀬𑀲𑁆𑀲𑀸𑀢𑀺 𑀢𑀼𑀤𑀺𑀕𑀸𑀫𑀯𑀸𑀲𑀺𑀓𑀲𑁆𑀲. 𑀧𑀭𑀺𑀲𑀢𑀻𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬. 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀧𑀭𑀕𑀭𑀳𑀁 𑀧𑀯𑀢𑁆𑀢𑁂𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀩𑀸𑀮𑁄 𑀅𑀬𑀁 𑀭𑀸𑀚𑀸𑀢𑀺𑀆𑀤𑀺 𑀬𑀁 𑀢𑁂 𑀉𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑀺, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀫𑀡𑁂 𑀭𑀸𑀫𑀧𑀼𑀢𑁆𑀢𑁂𑀢𑀺 𑀉𑀤𑀓𑁂 𑀭𑀸𑀫𑀧𑀼𑀢𑁆𑀢𑁂. 𑀅𑀪𑀺𑀧𑁆𑀧𑀲𑀦𑁆𑀦𑁄𑀢𑀺 𑀅𑀢𑀺𑀓𑁆𑀓𑀫𑁆𑀫 𑀧𑀲𑀦𑁆𑀦𑁄. 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀦𑁆𑀢𑀺 𑀉𑀢𑁆𑀢𑀫𑀦𑀺𑀧𑀸𑀢𑀓𑀺𑀭𑀺𑀬𑀁 𑀦𑀻𑀘𑀯𑀼𑀢𑁆𑀢𑀺𑀁. 𑀧𑀭𑀺𑀳𑀸𑀭𑀓𑀸𑀢𑀺 𑀧𑀭𑀺𑀘𑀸𑀭𑀓𑀸. 𑀬𑀫𑀓𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀢𑁂𑀲𑀼 𑀳𑀺 𑀏𑀓𑁄 𑀬𑀫𑀓𑁄 𑀦𑀸𑀫, 𑀏𑀓𑁄 𑀫𑁄𑀕𑁆𑀕𑀮𑁆𑀮𑁄 𑀦𑀸𑀫, 𑀏𑀓𑁄 𑀉𑀕𑁆𑀕𑁄 𑀦𑀸𑀫, 𑀏𑀓𑁄 𑀦𑀸𑀯𑀺𑀦𑁆𑀤𑀓𑀻 𑀦𑀸𑀫, 𑀏𑀓𑁄 𑀕𑀦𑁆𑀥𑀩𑁆𑀩𑁄 𑀦𑀸𑀫, 𑀏𑀓𑁄 𑀅𑀕𑁆𑀕𑀺𑀯𑁂𑀲𑁆𑀲𑁄 𑀦𑀸𑀫. 𑀢𑁆𑀬𑀸𑀲𑁆𑀲𑀼𑀤𑀦𑁆𑀢𑀺 𑀏𑀢𑁆𑀣 𑀅𑀲𑁆𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑁂 𑀅𑀢𑁆𑀢𑀦𑁄 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀦𑁂𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀦𑀼𑀦𑁂𑀢𑀺 𑀚𑀸𑀦𑀸𑀧𑁂𑀢𑀺. 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀽𑀢𑀺 𑀧𑀡𑁆𑀟𑀺𑀢𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼 𑀘 𑀅𑀢𑀺𑀭𑁂𑀓𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂𑀲𑀼 𑀘. 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀽𑀢𑀺 𑀯𑀢𑁆𑀢𑀩𑁆𑀩𑁂𑀲𑀼 𑀘 𑀅𑀢𑀺𑀭𑁂𑀓𑀯𑀢𑁆𑀢𑀩𑁆𑀩𑁂𑀲𑀼 𑀘. 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀻𑀢𑀺 𑀏𑀢𑁆𑀣 𑀅𑀢𑁆𑀣𑁂 𑀧𑀲𑁆𑀲𑀺𑀢𑀼𑀁 𑀲𑀫𑀢𑁆𑀣𑀸 𑀅𑀮𑀫𑀢𑁆𑀣𑀤𑀲𑀸, 𑀢𑁂 𑀅𑀢𑀺𑀲𑀺𑀢𑁆𑀯𑀸 𑀞𑀺𑀢𑀸 𑀅𑀮𑀫𑀢𑁆𑀣𑀤𑀲𑀢𑀭𑀸, 𑀢𑁂𑀳𑀺 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀺. 𑀅𑀮𑀫𑀢𑁆𑀣𑀤𑀲𑀢𑀭𑁄𑀢𑀺 𑀅𑀮𑀫𑀢𑁆𑀣𑀤𑀲𑀢𑀸𑀬 𑀉𑀢𑁆𑀢𑀭𑀺𑀢𑀭𑁄, 𑀙𑁂𑀓𑁂𑀳𑀺 𑀙𑁂𑀓𑀢𑀭𑁄 𑀧𑀡𑁆𑀟𑀺𑀢𑁂𑀳𑀺 𑀧𑀡𑁆𑀟𑀺𑀢𑀢𑀭𑁄𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀅𑀣𑀲𑁆𑀲 𑀢𑁂 𑀧𑀝𑀺𑀧𑀼𑀘𑁆𑀙𑀦𑁆𑀢𑀸 𑀏𑀯𑀁 𑀪𑁄𑀢𑀺𑀆𑀤𑀺𑀫𑀸𑀳𑀁𑀲𑀼. 𑀇𑀢𑀺 𑀩𑁆𑀭𑀸𑀳𑁆𑀫𑀡𑁄 𑀅𑀢𑁆𑀢𑀦𑁄 𑀲𑀧𑁆𑀧𑀼𑀭𑀺𑀲𑀢𑀸𑀬 𑀢𑀁 𑀏𑀴𑁂𑀬𑁆𑀬𑀭𑀸𑀚𑀸𑀦𑀫𑁆𑀧𑀺 𑀢𑀲𑁆𑀲 𑀧𑀭𑀺𑀯𑀸𑀭𑀺𑀓𑁂𑀧𑀺 𑀉𑀤𑀓𑀫𑁆𑀧𑀺 𑀭𑀸𑀫𑀧𑀼𑀢𑁆𑀢𑀁 𑀧𑀲𑀁𑀲𑀺. 𑀅𑀦𑁆𑀥𑁄 𑀯𑀺𑀬 𑀳𑀺 𑀅𑀲𑀧𑁆𑀧𑀼𑀭𑀺𑀲𑁄, 𑀘𑀓𑁆𑀔𑀼𑀫𑀸 𑀯𑀺𑀬 𑀲𑀧𑁆𑀧𑀼𑀭𑀺𑀲𑁄. 𑀬𑀣𑀸 𑀅𑀦𑁆𑀥𑁄 𑀦𑁂𑀯 𑀅𑀦𑀦𑁆𑀥𑀁 𑀦 𑀅𑀦𑁆𑀥𑀁 𑀧𑀲𑁆𑀲𑀢𑀺, 𑀏𑀯𑀁 𑀅𑀲𑀧𑁆𑀧𑀼𑀭𑀺𑀲𑁄 𑀦𑁂𑀯 𑀲𑀧𑁆𑀧𑀼𑀭𑀺𑀲𑀁 𑀦 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑀸𑀢𑀺. 𑀬𑀣𑀸 𑀘𑀓𑁆𑀔𑀼𑀫𑀸 𑀅𑀦𑁆𑀥𑀫𑁆𑀧𑀺 𑀅𑀦𑀦𑁆𑀥𑀫𑁆𑀧𑀺 𑀧𑀲𑁆𑀲𑀢𑀺, 𑀏𑀯𑀁 𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀫𑁆𑀧𑀺 𑀅𑀲𑀧𑁆𑀧𑀼𑀭𑀺𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀢𑁄𑀤𑁂𑀬𑁆𑀬𑁄𑀧𑀺 𑀲𑀧𑁆𑀧𑀼𑀭𑀺𑀲𑀢𑀸𑀬 𑀅𑀲𑀧𑁆𑀧𑀼𑀭𑀺𑀲𑁂 𑀅𑀜𑁆𑀜𑀸𑀲𑀻𑀢𑀺 𑀇𑀫𑀫𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀢𑀼𑀝𑁆𑀞𑀫𑀸𑀦𑀲𑁄 𑀩𑁆𑀭𑀸𑀳𑁆𑀫𑀡𑁄 𑀅𑀘𑁆𑀙𑀭𑀺𑀬𑀁 𑀪𑁄, 𑀕𑁄𑀢𑀫𑀸𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀪𑀸𑀲𑀺𑀢𑀁 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.
𑁮. 𑀉𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁮. 𑀅𑀝𑁆𑀞𑀫𑁂 𑀉𑀧𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑁄𑀢𑀺 𑀫𑀡𑁆𑀟𑀺𑀓𑀸𑀬 𑀧𑀼𑀢𑁆𑀢𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀤𑁂𑀯𑀤𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑁄, ‘‘𑀓𑀺𑀁 𑀦𑀼 𑀔𑁄 𑀲𑀢𑁆𑀣𑀸 𑀫𑀬𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑁂 𑀯𑀡𑁆𑀡𑀁 𑀓𑀣𑁂𑀲𑁆𑀲𑀢𑀺, 𑀉𑀤𑀸𑀳𑀼 𑀅𑀯𑀡𑁆𑀡’’𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀉𑀧𑀲𑀗𑁆𑀓𑀫𑀺. ‘‘𑀦𑁂𑀭𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄’’𑀢𑀺 (𑀘𑀽𑀴𑀯. 𑁩𑁪𑁮) 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀖𑀝𑁆𑀝𑁂𑀢𑀼𑀓𑀸𑀫𑁄 𑀉𑀧𑀲𑀗𑁆𑀓𑀫𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀢𑀻𑀢𑀺 𑀧𑀭𑀕𑀭𑀳𑀁 𑀓𑀣𑁂𑀢𑀺. 𑀲𑀩𑁆𑀩𑁄 𑀲𑁄 𑀦 𑀉𑀧𑀧𑀸𑀤𑁂𑀢𑀻𑀢𑀺 𑀲𑀩𑁆𑀩𑁄𑀧𑀺 𑀲𑁄 𑀓𑀼𑀲𑀮𑀥𑀫𑁆𑀫𑀁 𑀦 𑀉𑀧𑁆𑀧𑀸𑀤𑁂𑀢𑀺, 𑀅𑀢𑁆𑀢𑀦𑁄 𑀯𑀸 𑀯𑀘𑀦𑀁 𑀉𑀧𑀧𑀸𑀤𑁂𑀢𑀼𑀁 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀦𑀼𑀧𑀧𑀸𑀤𑁂𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀢𑀻𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀘 𑀯𑀘𑀦𑀁 𑀉𑀧𑀧𑀦𑁆𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀢𑀺. 𑀉𑀧𑀯𑀚𑁆𑀚𑁄𑀢𑀺 𑀉𑀧𑀯𑀤𑀺𑀢𑀩𑁆𑀩𑁄 𑀘 𑀳𑁄𑀢𑀺, 𑀯𑀚𑁆𑀚𑁂𑀦 𑀯𑀸 𑀉𑀧𑁂𑀢𑁄 𑀳𑁄𑀢𑀺, 𑀲𑀤𑁄𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.
𑀅𑀣 𑀪𑀕𑀯𑀸 𑀢𑀲𑁆𑀲 𑀯𑀸𑀤𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑁂𑀯 𑀕𑀻𑀯𑀸𑀬 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀧𑀭𑀽𑀧𑀸𑀭𑀫𑁆𑀪𑀦𑁆𑀢𑀺𑀆𑀤𑀺𑀫𑀸𑀳. 𑀉𑀫𑁆𑀫𑀼𑀚𑁆𑀚𑀫𑀸𑀦𑀓𑀁𑀬𑁂𑀯𑀸𑀢𑀺 𑀉𑀤𑀓𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀦𑁆𑀢𑀁𑀬𑁂𑀯. 𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸𑀢𑀺𑀆𑀤𑀻𑀲𑀼 𑀢𑀲𑁆𑀫𑀺𑀁 𑀅𑀓𑀼𑀲𑀮𑀦𑁆𑀢𑀺 𑀧𑀜𑁆𑀜𑀸𑀧𑀦𑁂 𑀧𑀤𑀸𑀦𑀺𑀧𑀺 𑀅𑀓𑁆𑀔𑀭𑀸𑀦𑀺𑀧𑀺 𑀥𑀫𑁆𑀫𑀤𑁂𑀲𑀦𑀸𑀧𑀺 𑀅𑀧𑀭𑀺𑀫𑀸𑀡𑀸𑀬𑁂𑀯. 𑀇𑀢𑀺𑀧𑀺𑀤𑀁 𑀅𑀓𑀼𑀲𑀮𑀦𑁆𑀢𑀺 𑀇𑀤𑀫𑁆𑀧𑀺 𑀅𑀓𑀼𑀲𑀮𑀁 𑀇𑀤𑀫𑁆𑀧𑀺 𑀅𑀓𑀼𑀲𑀮𑀁 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀅𑀓𑀼𑀲𑀮𑀦𑁆𑀢𑀺 𑀏𑀯𑀁 𑀅𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀬𑀁 𑀆𑀕𑀢𑀸𑀦𑀺𑀧𑀺 𑀅𑀧𑀭𑀺𑀫𑀸𑀡𑀸𑀦𑀺. 𑀅𑀣𑀸𑀧𑀺 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀢𑀣𑀸𑀕𑀢𑁄 𑀢𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀏𑀯𑀫𑁆𑀧𑀺𑀲𑁆𑀲 𑀤𑁂𑀲𑀦𑀸 𑀅𑀧𑀭𑀺𑀫𑀸𑀡𑀸 𑀪𑀯𑁂𑀬𑁆𑀬. 𑀬𑀣𑀸𑀳 𑁋 ‘‘𑀅𑀧𑀭𑀺𑀬𑀸𑀤𑀺𑀦𑁆𑀦𑀸𑀯𑀲𑁆𑀲 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀅𑀧𑀭𑀺𑀬𑀸𑀤𑀺𑀦𑁆𑀦𑀁 𑀥𑀫𑁆𑀫𑀧𑀤𑀩𑁆𑀬𑀜𑁆𑀚𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁬𑁧). 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀸𑀯 𑀥𑀁𑀲𑀻 𑀯𑀢𑀸𑀬𑀦𑁆𑀢𑀺 𑀬𑀸𑀯 𑀕𑀼𑀡𑀥𑀁𑀲𑀻 𑀯𑀢 𑀅𑀬𑀁. 𑀮𑁄𑀡𑀓𑀸𑀭𑀤𑀸𑀭𑀓𑁄𑀢𑀺 𑀮𑁄𑀡𑀓𑀸𑀭𑀕𑀸𑀫𑀤𑀸𑀭𑀓𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀳𑀺 𑀦𑀸𑀫. 𑀆𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀻𑀢𑀺 𑀖𑀝𑁆𑀝𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀺. 𑀅𑀧𑁂𑀳𑀻𑀢𑀺 𑀅𑀧𑀕𑀘𑁆𑀙, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀕𑀻𑀯𑀸𑀬 𑀕𑀡𑁆𑀳𑀸𑀧𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺𑀬𑁂𑀯𑀸𑀢𑀺.
𑁯. 𑀲𑀘𑁆𑀙𑀺𑀓𑀭𑀡𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁮𑁯. 𑀦𑀯𑀫𑁂 𑀓𑀸𑀬𑁂𑀦𑀸𑀢𑀺 𑀦𑀸𑀫𑀓𑀸𑀬𑁂𑀦. 𑀲𑀘𑁆𑀙𑀺𑀓𑀭𑀡𑀻𑀬𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑀸. 𑀲𑀢𑀺𑀬𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀸. 𑀘𑀓𑁆𑀔𑀼𑀦𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸. 𑀧𑀜𑁆𑀜𑀸𑀬𑀸𑀢𑀺 𑀛𑀸𑀦𑀧𑀜𑁆𑀜𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀫𑀕𑁆𑀕𑀧𑀜𑁆𑀜𑀸, 𑀫𑀕𑁆𑀕𑀧𑀜𑁆𑀜𑀸𑀬 𑀨𑀮𑀧𑀜𑁆𑀜𑀸, 𑀨𑀮𑀧𑀜𑁆𑀜𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀧𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀆𑀲𑀯𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀧𑀦 𑀅𑀭𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑀡𑀻𑀬𑀁 𑀦𑀸𑀫𑀸𑀢𑀺.
𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁦. 𑀤𑀲𑀫𑁂 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀬𑀢𑁄 𑀬𑀢𑁄 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀢𑀢𑁄 𑀢𑀢𑁄 𑀢𑀼𑀡𑁆𑀳𑀻𑀪𑀽𑀢𑀫𑁂𑀯. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑁂 𑀪𑀺𑀓𑁆𑀔𑀽 𑀧𑀲𑀦𑁆𑀦𑁂𑀳𑀺 𑀘𑀓𑁆𑀔𑀽𑀳𑀺 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀥𑀫𑁆𑀫𑀧𑀸𑀫𑁄𑀚𑁆𑀚𑁄 𑀣𑁄𑀫𑁂𑀢𑀼𑀓𑀸𑀫𑀢𑀸𑀬 𑀆𑀫𑀦𑁆𑀢𑁂𑀲𑀺. 𑀅𑀧𑀮𑀸𑀧𑀸𑀢𑀺 𑀧𑀮𑀸𑀧𑀭𑀳𑀺𑀢𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀼𑀤𑁆𑀥𑀸𑀢𑀺 𑀦𑀺𑀫𑁆𑀫𑀮𑀸. 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀲𑀻𑀮𑀸𑀤𑀺𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀸. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁. 𑀬𑁄𑀚𑀦𑀕𑀡𑀦𑀸𑀦𑀻𑀢𑀺 𑀏𑀓𑀁 𑀬𑁄𑀚𑀦𑀁 𑀬𑁄𑀚𑀦𑀫𑁂𑀯, 𑀤𑀲𑀧𑀺 𑀬𑁄𑀚𑀦𑀸𑀦𑀺 𑀬𑁄𑀚𑀦𑀸𑀦𑁂𑀯. 𑀢𑀢𑁄 𑀉𑀤𑁆𑀥𑀁 ‘‘𑀬𑁄𑀚𑀦𑀕𑀡𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀬𑁄𑀚𑀦𑀲𑀢𑀫𑁆𑀧𑀺 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀼𑀝𑁄𑀲𑁂𑀦𑀸𑀧𑀻𑀢𑀺 𑀧𑀼𑀝𑁄𑀲𑀁 𑀯𑀼𑀘𑁆𑀘𑀢𑀺 𑀧𑀸𑀣𑁂𑀬𑁆𑀬𑀁, 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸𑀧𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀝𑀁𑀲𑁂𑀦𑀸𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀝𑁄 𑀅𑀁𑀲𑁂 𑀅𑀲𑁆𑀲𑀸𑀢𑀺 𑀧𑀼𑀝𑀁𑀲𑁄, 𑀢𑁂𑀦 𑀧𑀼𑀝𑀁𑀲𑁂𑀦, 𑀅𑀁𑀲𑁂𑀦 𑀧𑀸𑀣𑁂𑀬𑁆𑀬𑀧𑀼𑀝𑀁 𑀯𑀳𑀦𑁆𑀢𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀇𑀤𑀸𑀦𑀺 𑀏𑀯𑀭𑀽𑀧𑁂𑀳𑀺 𑀏𑀯𑀭𑀽𑀧𑁂𑀳𑀺 𑀘 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀏𑀢𑁆𑀣 𑀪𑀺𑀓𑁆𑀔𑀽 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀦𑁆𑀢𑀺 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁂𑀯𑀧𑁆𑀧𑀢𑁆𑀢𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀦𑀺𑀩𑁆𑀩𑀢𑁆𑀢𑀓𑀁 𑀤𑀺𑀩𑁆𑀩𑀯𑀺𑀳𑀸𑀭𑀁 𑀤𑀺𑀩𑁆𑀩𑀯𑀺𑀳𑀸𑀭𑁂𑀦 𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀩𑁆𑀭𑀳𑁆𑀫𑀧𑁆𑀧𑀢𑁆𑀢𑀸𑀢𑀺 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀸𑀯𑀲𑀸𑀥𑀓𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀸𑀢𑀺 𑀅𑀦𑀺𑀜𑁆𑀚𑀦𑀪𑀸𑀯𑀲𑀸𑀥𑀓𑀁 𑀆𑀦𑁂𑀜𑁆𑀚𑀁 𑀆𑀦𑁂𑀜𑁆𑀚𑁂𑀦 𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀅𑀭𑀺𑀬𑀧𑁆𑀧𑀢𑁆𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀅𑀭𑀺𑀬𑀪𑀸𑀯𑀁 𑀧𑀢𑁆𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁂𑀯𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺𑀆𑀤𑀻𑀲𑀼 𑀏𑀯𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀞𑀢𑁆𑀯𑀸 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀤𑁂𑀯𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀘𑀢𑀽𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀞𑀢𑁆𑀯𑀸 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀩𑁆𑀭𑀳𑁆𑀫𑀧𑁆𑀧𑀢𑁆𑀢𑁄 𑀦𑀸𑀫, 𑀘𑀢𑀽𑀲𑀼 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀞𑀢𑁆𑀯𑀸 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁄 𑀦𑀸𑀫. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀢𑀲𑁆𑀫𑀸 𑀇𑀫𑀁 𑀅𑀭𑀺𑀬𑀥𑀫𑁆𑀫𑀁 𑀧𑀢𑁆𑀢𑁄 𑀪𑀺𑀓𑁆𑀔𑀼 𑀅𑀭𑀺𑀬𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺.
𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.
(𑁨𑁦) 𑁫. 𑀫𑀳𑀸𑀯𑀕𑁆𑀕𑁄
𑁧. 𑀲𑁄𑀢𑀸𑀦𑀼𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑁄𑀢𑀸𑀦𑀼𑀕𑀢𑀸𑀦𑀦𑁆𑀢𑀺 𑀧𑀲𑀸𑀤𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀜𑀸𑀡𑀲𑁄𑀢𑁂𑀦 𑀯𑀯𑀢𑁆𑀣𑀧𑀺𑀢𑀸𑀦𑀁. 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸𑀢𑀺 𑀘𑀢𑁆𑀢𑀸𑀭𑁄 𑀕𑀼𑀡𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸. 𑀇𑀤𑀁 𑀧𑀦 𑀪𑀕𑀯𑀢𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀆𑀭𑀤𑁆𑀥𑀁. 𑀓𑀢𑀭𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺? 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑁆𑀲𑀯𑀦𑀸𑀬 𑀅𑀦𑀼𑀧𑀲𑀗𑁆𑀓𑀫𑀦𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦. 𑀧𑀜𑁆𑀘𑀲𑀢𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑀺𑀗𑁆𑀕𑀯𑀘𑀦𑀯𑀺𑀪𑀢𑁆𑀢𑀺𑀧𑀤𑀩𑁆𑀬𑀜𑁆𑀚𑀦𑀸𑀤𑀻𑀳𑀺 𑀓𑀣𑁂𑀦𑁆𑀢𑁄 𑀅𑀫𑁆𑀳𑁂𑀳𑀺 𑀜𑀸𑀢𑀫𑁂𑀯 𑀓𑀣𑁂𑀲𑁆𑀲𑀢𑀺, 𑀅𑀜𑁆𑀜𑀸𑀢𑀁 𑀓𑀺𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀦 𑀕𑀘𑁆𑀙𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀣, 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀸𑀣, 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀜𑁆𑀘 𑀲𑀚𑁆𑀛𑀸𑀬𑀦𑁆𑀢𑀸𑀦𑀜𑁆𑀘 𑀇𑀫𑁂 𑀏𑀢𑁆𑀢𑀓𑀸 𑀆𑀦𑀺𑀲𑀁𑀲𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.
𑀢𑀢𑁆𑀣 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺𑀆𑀤𑀺𑀓𑀁 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀪𑀽𑀢𑀁 𑀢𑀦𑁆𑀢𑀺𑀥𑀫𑁆𑀫𑀁 𑀯𑀴𑀜𑁆𑀚𑁂𑀢𑀺. 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀻𑀢𑀺 𑀲𑁄𑀢𑀁 𑀅𑀦𑀼𑀧𑁆𑀧𑀢𑁆𑀢𑀸 𑀅𑀦𑀼𑀧𑀯𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀘𑀺𑀢𑁆𑀢𑁂𑀦 𑀑𑀮𑁄𑀓𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀅𑀢𑁆𑀣𑀢𑁄 𑀘 𑀓𑀸𑀭𑀡𑀢𑁄 𑀘 𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀸 𑀧𑀘𑁆𑀘𑀓𑁆𑀔𑀁 𑀓𑀢𑀸. 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄𑀢𑀺 𑀦𑀬𑀺𑀤𑀁 𑀩𑀼𑀤𑁆𑀥𑀯𑀘𑀦𑀁 𑀅𑀦𑀼𑀲𑁆𑀲𑀭𑀡𑀲𑀢𑀺𑀬𑀸 𑀅𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀭𑁄𑀢𑀺 𑀦𑀸𑀫. 𑀉𑀧𑀧𑀚𑁆𑀚𑀢𑀻𑀢𑀺 𑀲𑀼𑀤𑁆𑀥𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀼𑀝𑁆𑀞𑀲𑁆𑀲𑀢𑀺𑀦𑁄, 𑀬𑁂𑀧𑀺 𑀧𑀼𑀩𑁆𑀩𑁂 𑀲𑀚𑁆𑀛𑀸𑀬𑀫𑀽𑀮𑀺𑀓𑀸 𑀯𑀸𑀘𑀸𑀧𑀭𑀺𑀘𑀺𑀢𑀩𑀼𑀤𑁆𑀥𑀯𑀘𑀦𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂 𑀧𑀲𑀦𑁆𑀦𑁂 𑀆𑀤𑀸𑀲𑁂 𑀙𑀸𑀬𑀸 𑀯𑀺𑀬 𑀧𑁆𑀮𑀯𑀦𑁆𑀢𑀺, 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄𑀢𑀺 𑀩𑀼𑀤𑁆𑀥𑀯𑀘𑀦𑀸𑀦𑀼𑀲𑁆𑀲𑀭𑀡𑀲𑀢𑀺𑀬𑀸 𑀉𑀧𑁆𑀧𑀸𑀤𑁄 𑀤𑀦𑁆𑀥𑁄 𑀕𑀭𑀼. 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀕𑀸𑀫𑀻 𑀳𑁄𑀢𑀻𑀢𑀺 𑀅𑀢𑁆𑀣𑁄.
𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀇𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀘𑀺𑀢𑁆𑀢𑀲𑁆𑀲 𑀯𑀲𑀺𑀪𑀸𑀯𑀧𑀢𑁆𑀢𑁄 𑀔𑀻𑀡𑀸𑀲𑀯𑁄. 𑀅𑀬𑀁 𑀯𑀸 𑀲𑁄 𑀥𑀫𑁆𑀫𑀯𑀺𑀦𑀬𑁄𑀢𑀺 𑀏𑀢𑁆𑀣 𑀯𑀺𑀪𑀸𑀯𑀦𑀢𑁆𑀣𑁄 𑀯𑀸-𑀲𑀤𑁆𑀤𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀺𑀁. 𑀇𑀤𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀫𑀬𑀸 𑀧𑀼𑀩𑁆𑀩𑁂 𑀯𑀴𑀜𑁆𑀚𑀺𑀢𑀦𑁆𑀢𑀺 𑀩𑀼𑀤𑁆𑀥𑀯𑀘𑀦𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀤𑁂𑀯𑀧𑀼𑀢𑁆𑀢𑁄𑀢𑀺 𑀧𑀜𑁆𑀘𑀸𑀮𑀘𑀡𑁆𑀟𑁄 𑀯𑀺𑀬 𑀳𑀢𑁆𑀣𑀓𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀬 𑀲𑀦𑀗𑁆𑀓𑀼𑀫𑀸𑀭𑀩𑁆𑀭𑀳𑁆𑀫𑀸 𑀯𑀺𑀬 𑀘 𑀏𑀓𑁄 𑀥𑀫𑁆𑀫𑀓𑀣𑀺𑀓𑀤𑁂𑀯𑀧𑀼𑀢𑁆𑀢𑁄. 𑀑𑀧𑀧𑀸𑀢𑀺𑀓𑁄 𑀑𑀧𑀧𑀸𑀢𑀺𑀓𑀁 𑀲𑀸𑀭𑁂𑀢𑀻𑀢𑀺 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀤𑁂𑀯𑀧𑀼𑀢𑁆𑀢𑁄 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀁 𑀲𑀸𑀭𑁂𑀢𑀺. 𑀲𑀳𑀧𑀁𑀲𑀼𑀓𑀻𑀴𑀺𑀓𑀸𑀢𑀺 𑀏𑀢𑁂𑀦 𑀦𑁂𑀲𑀁 𑀤𑀻𑀖𑀭𑀢𑁆𑀢𑀁 𑀓𑀢𑀧𑀭𑀺𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀲𑀸𑀮𑀸𑀬 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀼𑀁. 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀲𑀸𑀮𑀸𑀬 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀞𑀫𑀢𑀭𑀁 𑀦𑀺𑀲𑀺𑀦𑁆𑀦𑁄 𑀧𑀘𑁆𑀙𑀸 𑀆𑀕𑀢𑀁 𑀏𑀯𑀁 𑀯𑀤𑁂𑀬𑁆𑀬. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.
𑁨. 𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁨. 𑀤𑀼𑀢𑀺𑀬𑁂 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀞𑀸𑀦𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀲𑁄𑀘𑁂𑀬𑁆𑀬𑀦𑁆𑀢𑀺 𑀲𑀼𑀘𑀺𑀪𑀸𑀯𑁄. 𑀲𑀁𑀯𑀲𑀫𑀸𑀦𑁄𑀢𑀺 𑀏𑀓𑀢𑁄 𑀯𑀲𑀫𑀸𑀦𑁄. 𑀦 𑀲𑀦𑁆𑀢𑀢𑀓𑀸𑀭𑀻𑀢𑀺 𑀦 𑀲𑀢𑀢𑀓𑀸𑀭𑀻. 𑀦 𑀲𑀦𑁆𑀢𑀢𑀯𑀼𑀢𑁆𑀢𑀺 𑀲𑀻𑀮𑁂𑀲𑀽𑀢𑀺 𑀲𑀢𑀢𑀁 𑀲𑀩𑁆𑀩𑀓𑀸𑀮𑀁 𑀲𑀻𑀮𑀚𑀻𑀯𑀺𑀢𑀁 𑀦 𑀚𑀻𑀯𑀢𑀻𑀢𑀺 𑀅𑀢𑁆𑀣𑁄. 𑀲𑀁𑀯𑁄𑀳𑀸𑀭𑀫𑀸𑀦𑁄𑀢𑀺 𑀓𑀣𑁂𑀦𑁆𑀢𑁄. 𑀏𑀓𑁂𑀦 𑀏𑀓𑁄 𑀯𑁄𑀳𑀭𑀢𑀻𑀢𑀺 𑀏𑀓𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀳𑀼𑀢𑁆𑀯𑀸 𑀓𑀣𑁂𑀢𑀺. 𑀯𑁄𑀓𑁆𑀓𑀫𑀢𑀻𑀢𑀺 𑀑𑀓𑁆𑀓𑀫𑀢𑀺. 𑀧𑀼𑀭𑀺𑀫𑀯𑁄𑀳𑀸𑀭𑀸 𑀧𑀘𑁆𑀙𑀺𑀫𑀯𑁄𑀳𑀸𑀭𑀦𑁆𑀢𑀺 𑀧𑀼𑀭𑀺𑀫𑀓𑀣𑀸𑀬 𑀧𑀘𑁆𑀙𑀺𑀫𑀓𑀣𑀁, 𑀧𑀼𑀭𑀺𑀫𑀓𑀣𑀸𑀬 𑀘 𑀧𑀘𑁆𑀙𑀺𑀫𑀓𑀣𑀸, 𑀧𑀘𑁆𑀙𑀺𑀫𑀓𑀣𑀸𑀬 𑀘 𑀧𑀼𑀭𑀺𑀫𑀓𑀣𑀸 𑀦 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄.
𑀜𑀸𑀢𑀺𑀩𑁆𑀬𑀲𑀦𑁂𑀦𑀸𑀢𑀺𑀆𑀤𑀻𑀲𑀼 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁, 𑀜𑀸𑀢𑀺𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀭𑁄𑀕𑀩𑁆𑀬𑀲𑀦𑁂 𑀧𑀦 𑀭𑁄𑀕𑁄𑀬𑁂𑀯 𑀆𑀭𑁄𑀕𑁆𑀬𑀯𑀺𑀦𑀸𑀲𑀦𑀢𑁄 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁. 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀮𑀸𑀪𑁄 𑀘𑀸𑀢𑀺𑀆𑀤𑀻𑀲𑀼 𑀏𑀓𑀁 𑀅𑀢𑁆𑀢𑀪𑀸𑀯𑀁 𑀮𑀸𑀪𑁄 𑀅𑀦𑀼𑀧𑀭𑀺𑀯𑀢𑁆𑀢𑀢𑀺, 𑀏𑀓𑀁 𑀅𑀮𑀸𑀪𑁄𑀢𑀺 𑀏𑀯𑀁 𑀦𑀬𑁄 𑀦𑁂𑀢𑀩𑁆𑀩𑁄. 𑀲𑀸𑀓𑀘𑁆𑀙𑀸𑀬𑀫𑀸𑀦𑁄𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀲𑀸𑀓𑀘𑁆𑀙𑀁 𑀓𑀭𑁄𑀦𑁆𑀢𑁄. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀉𑀫𑁆𑀫𑀕𑁆𑀕𑁄𑀢𑀺 𑀧𑀜𑁆𑀳𑀼𑀫𑁆𑀫𑀕𑁆𑀕𑁄. 𑀅𑀪𑀺𑀦𑀻𑀳𑀸𑀭𑁄𑀢𑀺 𑀧𑀜𑁆𑀳𑀸𑀪𑀺𑀲𑀗𑁆𑀔𑀭𑀡𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑁄. 𑀲𑀫𑀼𑀤𑀸𑀳𑀸𑀭𑁄𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑀁. 𑀲𑀦𑁆𑀢𑀦𑁆𑀢𑀺 𑀧𑀘𑁆𑀘𑀦𑀻𑀓𑀲𑀦𑁆𑀢𑀢𑀸𑀬 𑀲𑀦𑁆𑀢𑀁 𑀓𑀢𑁆𑀯𑀸 𑀦 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀡𑀻𑀢𑀦𑁆𑀢𑀺 𑀅𑀢𑀧𑁆𑀧𑀓𑀁. 𑀅𑀢𑀓𑁆𑀓𑀸𑀯𑀘𑀭𑀦𑁆𑀢𑀺 𑀬𑀣𑀸 𑀢𑀓𑁆𑀓𑁂𑀦 𑀦𑀬𑀕𑁆𑀕𑀸𑀳𑁂𑀦 𑀕𑀳𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀁 𑀦 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀧𑀼𑀡𑀦𑁆𑀢𑀺 𑀲𑀡𑁆𑀳𑀁. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀦𑁆𑀢𑀺 𑀧𑀡𑁆𑀟𑀺𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀓𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.
𑁩. 𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁩. 𑀢𑀢𑀺𑀬𑁂 𑀉𑀧𑀲𑀗𑁆𑀓𑀫𑀻𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀳𑀼𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀉𑀧𑀲𑀗𑁆𑀓𑀫𑀺. 𑀫𑀸 𑀅𑀦𑀼𑀲𑁆𑀲𑀯𑁂𑀦𑀸𑀢𑀺𑀆𑀤𑀻𑀲𑀼 𑀅𑀦𑀼𑀲𑁆𑀲𑀯𑀯𑀘𑀦𑁂𑀦 𑀫𑀫 𑀓𑀣𑀁 𑀫𑀸 𑀕𑀡𑁆𑀳𑀣𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀭𑀫𑁆𑀪𑁄𑀢𑀺 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄. 𑀅𑀮𑁄𑀪𑀸𑀤𑀬𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀲𑀮𑀥𑀫𑁆𑀫𑀽𑀧𑀲𑀫𑁆𑀧𑀤𑀸𑀬𑀸𑀢𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀫𑁆𑀧𑀸𑀤𑀦𑀢𑁆𑀣𑀸𑀬, 𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑁂 𑀘𑁂𑀧𑀺, 𑀪𑀤𑁆𑀤𑀺𑀬, 𑀫𑀳𑀸𑀲𑀸𑀮𑀸𑀢𑀺 𑀧𑀼𑀭𑀢𑁄 𑀞𑀺𑀢𑁂 𑀲𑀸𑀮𑀭𑀼𑀓𑁆𑀔𑁂 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀲𑀢𑁆𑀣𑀭𑀺 𑀧𑀦 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁂 𑀪𑀤𑁆𑀤𑀺𑀬𑁄 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄𑀢𑀺.
𑁪. 𑀲𑀸𑀫𑀼𑀕𑀺𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁪. 𑀘𑀢𑀼𑀢𑁆𑀣𑁂 𑀲𑀸𑀫𑀼𑀕𑀺𑀬𑀸𑀢𑀺 𑀲𑀸𑀫𑀼𑀕𑀦𑀺𑀕𑀫𑀯𑀸𑀲𑀺𑀦𑁄. 𑀩𑁆𑀬𑀕𑁆𑀖𑀧𑀚𑁆𑀚𑀸𑀢𑀺 𑀢𑁂 𑀆𑀮𑀧𑀦𑁆𑀢𑁄 𑀏𑀯𑀫𑀸𑀳. 𑀓𑁄𑀮𑀦𑀕𑀭𑀲𑁆𑀲 𑀳𑀺 𑀓𑁄𑀮𑀭𑀼𑀓𑁆𑀔𑁂 𑀳𑀸𑀭𑁂𑀢𑁆𑀯𑀸 𑀓𑀢𑀢𑁆𑀢𑀸 𑀓𑁄𑀮𑀦𑀕𑀭𑀦𑁆𑀢𑀺 𑀘 𑀩𑁆𑀬𑀕𑁆𑀖𑀧𑀣𑁂 𑀫𑀸𑀧𑀺𑀢𑀢𑁆𑀢𑀸 𑀩𑁆𑀬𑀕𑁆𑀖𑀧𑀚𑁆𑀚𑀦𑁆𑀢𑀺 𑀘 𑀤𑁆𑀯𑁂 𑀦𑀸𑀫𑀸𑀦𑀺. 𑀏𑀢𑁂𑀲𑀜𑁆𑀘 𑀧𑀼𑀩𑁆𑀩𑀧𑀼𑀭𑀺𑀲𑀸 𑀢𑀢𑁆𑀣 𑀯𑀲𑀺𑀁𑀲𑀽𑀢𑀺 𑀩𑁆𑀬𑀕𑁆𑀖𑀧𑀚𑁆𑀚𑀯𑀸𑀲𑀺𑀢𑀸𑀬 𑀩𑁆𑀬𑀕𑁆𑀖𑀧𑀚𑁆𑀚𑀯𑀸𑀲𑀺𑀦𑁄 𑀩𑁆𑀬𑀕𑁆𑀖𑀧𑀚𑁆𑀚𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀆𑀮𑀧𑀦𑁆𑀢𑁄 𑀏𑀯𑀫𑀸𑀳. 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀻𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀅𑀢𑁆𑀣𑀸𑀬 𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀧𑀤𑀳𑀺𑀢𑀩𑁆𑀩𑀯𑀻𑀭𑀺𑀬𑀲𑁆𑀲 𑀅𑀗𑁆𑀕𑀸𑀦𑀺, 𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺 𑀲𑀻𑀮𑀧𑀭𑀺𑀲𑁄𑀥𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀜𑁆𑀳𑀺 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀭𑀺𑀧𑀽𑀭𑀡𑀢𑁆𑀣𑀸𑀬 𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀺. 𑀬𑁄 𑀢𑀢𑁆𑀣 𑀙𑀦𑁆𑀤𑁄𑀢𑀺𑀆𑀤𑀻𑀲𑀼 𑀬𑁄 𑀢𑀲𑁆𑀫𑀺𑀁 𑀅𑀦𑀼𑀕𑁆𑀕𑀡𑁆𑀳𑀦𑁂 𑀓𑀢𑁆𑀢𑀼𑀓𑀸𑀫𑀢𑀸𑀙𑀦𑁆𑀤𑁄𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀦𑁂𑀢𑁆𑀣 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀻𑀭𑀺𑀬𑀧𑀕𑁆𑀕𑀳𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀻𑀢𑀺 𑀭𑀸𑀕𑀧𑀘𑁆𑀘𑀬𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀬𑀣𑀸 𑀘𑀺𑀢𑁆𑀢𑀁 𑀯𑀺𑀭𑀚𑁆𑀚𑀢𑀺, 𑀏𑀯𑀁 𑀓𑀭𑁄𑀢𑀺. 𑀯𑀺𑀫𑁄𑀘𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀢𑀻𑀢𑀺 𑀬𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀢𑀩𑁆𑀩𑀁, 𑀢𑁂𑀲𑀼 𑀬𑀣𑀸 𑀯𑀺𑀫𑀼𑀘𑁆𑀘𑀢𑀺, 𑀏𑀯𑀁 𑀓𑀭𑁄𑀢𑀺. 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀏𑀢𑁆𑀣 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀸𑀚𑁂𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀯𑀺𑀭𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀻𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀁 𑀜𑀸𑀡𑀨𑀲𑁆𑀲𑁂𑀦 𑀨𑀼𑀲𑀢𑀻𑀢𑀺.
𑁫. 𑀯𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁫. 𑀧𑀜𑁆𑀘𑀫𑁂 𑀯𑀧𑁆𑀧𑁄𑀢𑀺 𑀤𑀲𑀩𑀮𑀲𑁆𑀲 𑀘𑀽𑀴𑀧𑀺𑀢𑀸 𑀲𑀓𑁆𑀬𑀭𑀸𑀚𑀸. 𑀦𑀺𑀕𑀡𑁆𑀞𑀲𑀸𑀯𑀓𑁄𑀢𑀺 𑀯𑁂𑀲𑀸𑀮𑀺𑀬𑀁 𑀲𑀻𑀳𑀲𑁂𑀦𑀸𑀧𑀢𑀺 𑀯𑀺𑀬 𑀦𑀸𑀴𑀦𑁆𑀤𑀸𑀬𑀁 𑀉𑀧𑀸𑀮𑀺𑀕𑀳𑀧𑀢𑀺 𑀯𑀺𑀬 𑀘 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑁄. 𑀓𑀸𑀬𑁂𑀦 𑀲𑀁𑀯𑀼𑀢𑁄𑀢𑀺 𑀓𑀸𑀬𑀤𑁆𑀯𑀸𑀭𑀲𑁆𑀲 𑀲𑀁𑀯𑀼𑀢𑀢𑁆𑀢𑀸 𑀧𑀺𑀳𑀺𑀢𑀢𑁆𑀢𑀸 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀦𑀸𑀫. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀢𑀺 𑀅𑀯𑀺𑀚𑁆𑀚𑀸𑀬 𑀔𑀬𑀯𑀺𑀭𑀸𑀕𑁂𑀦. 𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀢𑀺 𑀫𑀕𑁆𑀕𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑁂𑀦. 𑀢𑀁 𑀞𑀸𑀦𑀦𑁆𑀢𑀺 𑀢𑀁 𑀓𑀸𑀭𑀡𑀁. 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸. 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀓𑀺𑀮𑁂𑀲𑀸 𑀅𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀤𑀼𑀢𑀺𑀬𑁂 𑀅𑀢𑁆𑀢𑀪𑀸𑀯𑁂. 𑀓𑀸𑀬𑀲𑀫𑀸𑀭𑀫𑁆𑀪𑀧𑀘𑁆𑀘𑀬𑀸𑀢𑀺 𑀓𑀸𑀬𑀓𑀫𑁆𑀫𑀧𑀘𑁆𑀘𑀬𑁂𑀦. 𑀆𑀲𑀯𑀸𑀢𑀺 𑀓𑀺𑀮𑁂𑀲𑀸. 𑀯𑀺𑀖𑀸𑀢𑀧𑀭𑀺𑀴𑀸𑀳𑀸𑀢𑀺 𑀏𑀢𑁆𑀣 𑀯𑀺𑀖𑀸𑀢𑁄𑀢𑀺 𑀤𑀼𑀓𑁆𑀔𑀁. 𑀧𑀭𑀺𑀴𑀸𑀳𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑁄 𑀧𑀭𑀺𑀴𑀸𑀳𑁄. 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀻𑀢𑀺 𑀜𑀸𑀡𑀯𑀚𑁆𑀛𑀁 𑀓𑀫𑁆𑀫𑀁 𑀜𑀸𑀡𑀨𑀲𑁆𑀲𑁂𑀦 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀔𑀬𑀁 𑀕𑀫𑁂𑀢𑀺, 𑀯𑀺𑀧𑀸𑀓𑀯𑀚𑁆𑀛𑀁 𑀓𑀫𑁆𑀫𑀁 𑀯𑀺𑀧𑀸𑀓𑀨𑀲𑁆𑀲𑁂𑀦 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀔𑀬𑀁 𑀕𑀫𑁂𑀢𑀺. 𑀦𑀺𑀚𑁆𑀚𑀭𑀸𑀢𑀺 𑀓𑀺𑀮𑁂𑀲𑀚𑀻𑀭𑀡𑀓𑀧𑀝𑀺𑀧𑀤𑀸. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀞𑀢𑁆𑀯𑀸 𑀅𑀬𑀁 𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑁄 𑀓𑀸𑀢𑀩𑁆𑀩𑁄, 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀘𑀢𑀼𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀨𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁.
𑀇𑀤𑀸𑀦𑀺 𑀧𑀦 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀲𑀢𑀢𑀯𑀺𑀳𑀸𑀭𑁂 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲. 𑀲𑀢𑀢𑀯𑀺𑀳𑀸𑀭𑀸𑀢𑀺 𑀦𑀺𑀘𑁆𑀘𑀯𑀺𑀳𑀸𑀭𑀸 𑀦𑀺𑀩𑀤𑁆𑀥𑀯𑀺𑀳𑀸𑀭𑀸. 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀻𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑀯𑀲𑁂𑀦 𑀦 𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀺. 𑀦 𑀤𑀼𑀫𑁆𑀫𑀦𑁄𑀢𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀧𑀝𑀺𑀖𑀯𑀲𑁂𑀦 𑀦 𑀤𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀺. 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀧𑀭𑀺𑀕𑁆𑀕𑀳𑀺𑀢𑀸𑀬 𑀫𑀚𑁆𑀛𑀢𑁆𑀢𑀸𑀓𑀸𑀭𑀮𑀓𑁆𑀔𑀡𑀸𑀬 𑀉𑀧𑁂𑀓𑁆𑀔𑀸𑀬 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁂𑀓𑁆𑀔𑀓𑁄 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺.
𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀦𑁆𑀢𑀺 𑀓𑀸𑀬𑀦𑁆𑀢𑀺𑀓𑀁 𑀓𑀸𑀬𑀧𑀭𑀺𑀘𑁆𑀙𑀺𑀦𑁆𑀦𑀁, 𑀬𑀸𑀯 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀯𑀢𑁆𑀢𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀦𑁆𑀢𑀺 𑀚𑀻𑀯𑀺𑀢𑀦𑁆𑀢𑀺𑀓𑀁 𑀚𑀻𑀯𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀁, 𑀬𑀸𑀯 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀯𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀭𑀼𑀚𑁆𑀛𑀢𑀺. 𑀲𑀸 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀲𑁆𑀫𑀺𑀁𑀬𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀧𑀜𑁆𑀘𑀤𑁆𑀯𑀸𑀭𑀺𑀓𑀸 𑀧𑀯𑀢𑁆𑀢𑁂 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀞𑀫𑀯𑀬𑁂 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀯𑀲𑁂𑀦 𑀅𑀥𑀺𑀫𑀢𑁆𑀢𑀸 𑀩𑀮𑀯𑀢𑀻 𑀳𑁄𑀢𑀺, 𑀧𑀡𑁆𑀡𑀸𑀲𑀯𑀲𑁆𑀲𑀓𑀸𑀮𑁂 𑀞𑀺𑀢𑀸 𑀳𑁄𑀢𑀺, 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀫𑀸𑀦𑀸, 𑀅𑀲𑀻𑀢𑀺𑀦𑀯𑀼𑀢𑀺𑀯𑀲𑁆𑀲𑀓𑀸𑀮𑁂 𑀫𑀦𑁆𑀤𑀸 𑀳𑁄𑀢𑀺. 𑀢𑀤𑀸 𑀳𑀺 𑀲𑀢𑁆𑀢𑀸 ‘‘𑀘𑀺𑀭𑀭𑀢𑁆𑀢𑀁 𑀏𑀓𑀢𑁄 𑀦𑀺𑀲𑀻𑀤𑀺𑀫𑁆𑀳𑀸 𑀦𑀺𑀧𑀚𑁆𑀚𑀺𑀫𑁆𑀳𑀸’’𑀢𑀺 𑀯𑀤𑀦𑁆𑀢𑁂𑀧𑀺 𑀦 𑀚𑀸𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀅𑀥𑀺𑀫𑀢𑁆𑀢𑀸𑀦𑀺𑀧𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 𑀦 𑀧𑀲𑁆𑀲𑀸𑀫, 𑀲𑀼𑀕𑀦𑁆𑀥𑀤𑀼𑀕𑁆𑀕𑀦𑁆𑀥𑀁 𑀯𑀸 𑀲𑀸𑀤𑀼𑀅𑀲𑀸𑀤𑀼𑀁 𑀯𑀸 𑀣𑀤𑁆𑀥𑀫𑀼𑀤𑀼𑀓𑀁 𑀯𑀸𑀢𑀺 𑀦 𑀚𑀸𑀦𑀸𑀫𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀇𑀢𑀺 𑀦𑁂𑀲𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀪𑀕𑁆𑀕𑀸 𑀳𑁄𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀸 𑀧𑀯𑀢𑁆𑀢𑀢𑀺. 𑀲𑀸𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀫𑀸𑀦𑀸 𑀫𑀭𑀡𑀲𑀫𑀬𑁂 𑀳𑀤𑀬𑀓𑁄𑀝𑀺𑀁𑀬𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺. 𑀬𑀸𑀯 𑀧𑀦𑁂𑀲𑀸 𑀧𑀯𑀢𑁆𑀢𑀢𑀺, 𑀢𑀸𑀯 𑀲𑀢𑁆𑀢𑁄 𑀚𑀻𑀯𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀤𑀸 ‘‘𑀫𑀢𑁄 𑀦𑀺𑀭𑀼𑀤𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺.
𑀲𑁆𑀯𑀸𑀬𑀫𑀢𑁆𑀣𑁄 𑀯𑀸𑀧𑀺𑀬𑀸 𑀤𑀻𑀧𑁂𑀢𑀩𑁆𑀩𑁄 𑁋 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀧𑀜𑁆𑀘𑀉𑀤𑀓𑀫𑀕𑁆𑀕𑀲𑀫𑁆𑀧𑀦𑁆𑀦𑀁 𑀯𑀸𑀧𑀺𑀁 𑀓𑀭𑁂𑀬𑁆𑀬. 𑀧𑀞𑀫𑀁 𑀤𑁂𑀯𑁂 𑀯𑀼𑀝𑁆𑀞𑁂 𑀧𑀜𑁆𑀘𑀳𑀺 𑀉𑀤𑀓𑀫𑀕𑁆𑀕𑁂𑀳𑀺 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀯𑀸𑀧𑀺𑀬𑀁 𑀆𑀯𑀸𑀝𑁂 𑀧𑀽𑀭𑁂𑀬𑁆𑀬. 𑀧𑀼𑀦𑀧𑁆𑀧𑀼𑀦𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑀫𑀕𑁆𑀕𑁂 𑀧𑀽𑀭𑁂𑀢𑁆𑀯𑀸 𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀑𑀢𑁆𑀣𑀭𑀺𑀢𑁆𑀯𑀸 𑀉𑀤𑀓𑀁 𑀢𑀺𑀝𑁆𑀞𑁂𑀬𑁆𑀬 𑀢𑀢𑁄 𑀢𑀢𑁄 𑀯𑀺𑀲𑁆𑀲𑀦𑁆𑀤𑀫𑀸𑀦𑀁. 𑀅𑀣 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑁂 𑀯𑀺𑀯𑀭𑀺𑀢𑁆𑀯𑀸 𑀔𑁂𑀢𑁆𑀢𑁂𑀲𑀼 𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀉𑀤𑀓𑀁 𑀦𑀺𑀓𑁆𑀔𑀫𑀦𑁆𑀢𑀁, 𑀲𑀲𑁆𑀲𑀧𑀸𑀓𑀓𑀸𑀮𑁂 𑀉𑀤𑀓𑀁 𑀦𑀺𑀓𑁆𑀔𑀦𑁆𑀢𑀁 𑀉𑀤𑀓𑀁 𑀧𑀭𑀺𑀳𑀻𑀦𑀁, ‘‘𑀫𑀘𑁆𑀙𑁂 𑀕𑀡𑁆𑀳𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀢𑁄 𑀓𑀢𑀺𑀧𑀸𑀳𑁂𑀦 𑀆𑀯𑀸𑀝𑁂𑀲𑀼𑀬𑁂𑀯 𑀉𑀤𑀓𑀁 𑀲𑀡𑁆𑀞𑀳𑁂𑀬. 𑀬𑀸𑀯 𑀧𑀦 𑀢𑀁 𑀆𑀯𑀸𑀝𑁂𑀲𑀼 𑀳𑁄𑀢𑀺, 𑀢𑀸𑀯 𑀫𑀳𑀸𑀯𑀸𑀧𑀺𑀬𑀁 𑀉𑀤𑀓𑀁 𑀅𑀢𑁆𑀣𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀤𑀸 𑀧𑀦 𑀢𑀢𑁆𑀣 𑀙𑀺𑀚𑁆𑀚𑀢𑀺, 𑀢𑀤𑀸 ‘‘𑀯𑀸𑀧𑀺𑀬𑀁 𑀉𑀤𑀓𑀁 𑀦𑀢𑁆𑀣𑀻’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.
𑀧𑀞𑀫𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀜𑁆𑀘𑀳𑀺 𑀫𑀕𑁆𑀕𑁂𑀳𑀺 𑀉𑀤𑀓𑁂 𑀧𑀯𑀺𑀲𑀦𑁆𑀢𑁂 𑀆𑀯𑀸𑀝𑀸𑀦𑀁 𑀧𑀽𑀭𑀡𑀓𑀸𑀮𑁄 𑀯𑀺𑀬 𑀳𑀺 𑀧𑀞𑀫𑀫𑁂𑀯 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀯𑀢𑁆𑀣𑀼𑀭𑀽𑀧𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁄, 𑀧𑀼𑀦𑀧𑁆𑀧𑀼𑀦𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀜𑁆𑀘𑀫𑀕𑁆𑀕𑀸𑀦𑀁 𑀧𑀽𑀭𑀡𑀓𑀸𑀮𑁄 𑀯𑀺𑀬 𑀧𑀯𑀢𑁆𑀢𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀧𑀯𑀢𑁆𑀢𑀺, 𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀺𑀬 𑀧𑀞𑀫𑀯𑀬𑁂 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀢𑀲𑁆𑀲 𑀅𑀥𑀺𑀫𑀢𑁆𑀢𑀩𑀮𑀯𑀪𑀸𑀯𑁄, 𑀬𑀸𑀯 𑀯𑀸𑀧𑀺𑀢𑁄 𑀉𑀤𑀓𑀁 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀧𑀽𑀭𑀸𑀬 𑀯𑀸𑀧𑀺𑀬𑀸 𑀞𑀺𑀢𑀓𑀸𑀮𑁄 𑀯𑀺𑀬 𑀧𑀜𑁆𑀜𑀸𑀲𑀯𑀲𑁆𑀲𑀓𑀸𑀮𑁂 𑀢𑀲𑁆𑀲 𑀞𑀺𑀢𑀓𑀸𑀮𑁄, 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑁂𑀲𑀼 𑀯𑀺𑀯𑀝𑁂𑀲𑀼 𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀉𑀤𑀓𑀲𑁆𑀲 𑀦𑀺𑀓𑁆𑀔𑀫𑀦𑀓𑀸𑀮𑁄 𑀯𑀺𑀬 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀧𑀭𑀺𑀳𑀸𑀦𑀺, 𑀉𑀤𑀓𑁂 𑀪𑀝𑁆𑀞𑁂 𑀉𑀤𑀓𑀫𑀕𑁆𑀕𑁂𑀲𑀼 𑀧𑀭𑀺𑀢𑁆𑀢𑀉𑀤𑀓𑀲𑁆𑀲 𑀞𑀺𑀢𑀓𑀸𑀮𑁄 𑀯𑀺𑀬 𑀅𑀲𑀻𑀢𑀺𑀦𑀯𑀼𑀢𑀺𑀓𑀸𑀮𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀫𑀦𑁆𑀤𑀓𑀸𑀮𑁄, 𑀆𑀯𑀸𑀝𑁂𑀲𑀼𑀬𑁂𑀯 𑀉𑀤𑀓𑀲𑁆𑀲 𑀧𑀢𑀺𑀝𑁆𑀞𑀺𑀢𑀓𑀸𑀮𑁄 𑀯𑀺𑀬 𑀳𑀤𑀬𑀯𑀢𑁆𑀣𑀼𑀓𑁄𑀝𑀺𑀁 𑀦𑀺𑀲𑁆𑀲𑀸𑀬 𑀫𑀦𑁄𑀤𑁆𑀯𑀸𑀭𑁂 𑀯𑁂𑀤𑀦𑀸𑀬 𑀧𑀯𑀢𑁆𑀢𑀺𑀓𑀸𑀮𑁄, 𑀆𑀯𑀸𑀝𑁂𑀲𑀼 𑀧𑀭𑀺𑀢𑁆𑀢𑁂𑀧𑀺 𑀉𑀤𑀓𑁂 𑀲𑀢𑀺 ‘‘𑀯𑀸𑀧𑀺𑀬𑀁 𑀉𑀤𑀓𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀮𑁄 𑀯𑀺𑀬 𑀬𑀸𑀯 𑀲𑀸 𑀧𑀯𑀢𑁆𑀢𑀢𑀺, 𑀢𑀸𑀯 ‘‘𑀲𑀢𑁆𑀢𑁄 𑀚𑀻𑀯𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀆𑀯𑀸𑀝𑁂𑀲𑀼 𑀉𑀤𑀓𑁂 𑀙𑀺𑀦𑁆𑀦𑁂 ‘‘𑀦𑀢𑁆𑀣𑀺 𑀯𑀸𑀧𑀺𑀬𑀁 𑀉𑀤𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀬 𑀲𑀢𑁆𑀢𑁄 𑀫𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀁 𑀯𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄’’𑀢𑀺.
𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀓𑀸𑀬𑀲𑁆𑀲 𑀪𑁂𑀤𑁂𑀦. 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀢𑀺 𑀚𑀻𑀯𑀺𑀢𑀓𑁆𑀔𑀬𑀢𑁄 𑀉𑀤𑁆𑀥𑀁. 𑀇𑀥𑁂𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀭𑀢𑁄 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯. 𑀲𑀻𑀢𑀻 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀯𑀢𑁆𑀢𑀺𑀯𑀺𑀧𑁆𑀨𑀦𑁆𑀤𑀦𑀤𑀭𑀣𑀭𑀳𑀺𑀢𑀸𑀦𑀺 𑀲𑀻𑀢𑀸𑀦𑀺 𑀅𑀧𑁆𑀧𑀯𑀢𑁆𑀢𑀦𑀥𑀫𑁆𑀫𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺.
𑀣𑀽𑀡𑀁 𑀧𑀝𑀺𑀘𑁆𑀘𑀸𑀢𑀺 𑀭𑀼𑀓𑁆𑀔𑀁 𑀧𑀝𑀺𑀘𑁆𑀘. 𑀓𑀼𑀤𑁆𑀤𑀸𑀮𑀧𑀺𑀝𑀓𑀁 𑀆𑀤𑀸𑀬𑀸𑀢𑀺 𑀓𑀼𑀤𑁆𑀤𑀸𑀮𑀜𑁆𑀘 𑀔𑀡𑀺𑀢𑁆𑀢𑀺𑀜𑁆𑀘 𑀧𑀘𑁆𑀙𑀺𑀜𑁆𑀘 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸 𑀧𑀦 𑀓𑀼𑀤𑁆𑀤𑀸𑀮𑀯𑀲𑁂𑀦𑁂𑀯 𑀓𑀢𑀸. 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀫𑀽𑀮𑀫𑁆𑀳𑀺 𑀓𑀼𑀤𑁆𑀤𑀸𑀮𑁂𑀦 𑀙𑀺𑀦𑁆𑀤𑁂𑀬𑁆𑀬. 𑀧𑀮𑀺𑀔𑀡𑁂𑀬𑁆𑀬𑀸𑀢𑀺 𑀔𑀡𑀺𑀢𑁆𑀢𑀺𑀬𑀸 𑀲𑀫𑀦𑁆𑀢𑀸 𑀔𑀡𑁂𑀬𑁆𑀬.
𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀭𑀼𑀓𑁆𑀔𑁄 𑀯𑀺𑀬 𑀳𑀺 𑀅𑀢𑁆𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄, 𑀭𑀼𑀓𑁆𑀔𑀁 𑀧𑀝𑀺𑀘𑁆𑀘 𑀙𑀸𑀬𑀸 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁, 𑀙𑀸𑀬𑀁 𑀅𑀧𑁆𑀧𑀯𑀢𑁆𑀢𑀁 𑀓𑀸𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀓𑀼𑀤𑁆𑀤𑀸𑀮𑁄 𑀯𑀺𑀬 𑀧𑀜𑁆𑀜𑀸, 𑀧𑀺𑀝𑀓𑀁 𑀯𑀺𑀬 𑀲𑀫𑀸𑀥𑀺, 𑀔𑀡𑀺𑀢𑁆𑀢𑀺 𑀯𑀺𑀬 𑀯𑀺𑀧𑀲𑁆𑀲𑀦𑀸, 𑀔𑀡𑀺𑀢𑁆𑀢𑀺𑀬𑀸 𑀫𑀽𑀮𑀸𑀦𑀁 𑀧𑀮𑀺𑀔𑀡𑀦𑀓𑀸𑀮𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀬 𑀙𑁂𑀤𑀦𑀓𑀸𑀮𑁄, 𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑀡𑀓𑀸𑀮𑁄 𑀯𑀺𑀬 𑀔𑀦𑁆𑀥𑀯𑀲𑁂𑀦 𑀤𑀺𑀝𑁆𑀞𑀓𑀸𑀮𑁄, 𑀨𑀸𑀮𑀦𑀓𑀸𑀮𑁄 𑀯𑀺𑀬 𑀆𑀬𑀢𑀦𑀯𑀲𑁂𑀦 𑀤𑀺𑀝𑁆𑀞𑀓𑀸𑀮𑁄, 𑀲𑀓𑀮𑀻𑀓𑀭𑀡𑀓𑀸𑀮𑁄 𑀯𑀺𑀬 𑀥𑀸𑀢𑀼𑀯𑀲𑁂𑀦 𑀤𑀺𑀝𑁆𑀞𑀓𑀸𑀮𑁄, 𑀯𑀸𑀢𑀸𑀢𑀧𑁂𑀦 𑀯𑀺𑀲𑁄𑀲𑀦𑀓𑀸𑀮𑁄 𑀯𑀺𑀬 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑁆𑀲 𑀯𑀻𑀭𑀺𑀬𑀲𑁆𑀲 𑀓𑀭𑀡𑀓𑀸𑀮𑁄, 𑀅𑀕𑁆𑀕𑀺𑀦𑀸 𑀟𑀳𑀦𑀓𑀸𑀮𑁄 𑀯𑀺𑀬 𑀜𑀸𑀡𑁂𑀦 𑀓𑀺𑀮𑁂𑀲𑀸𑀦𑀁 𑀟𑀳𑀦𑀓𑀸𑀮𑁄, 𑀫𑀲𑀺𑀓𑀭𑀡𑀓𑀸𑀮𑁄 𑀯𑀺𑀬 𑀯𑀢𑁆𑀢𑀫𑀸𑀦𑀓-𑀧𑀜𑁆𑀘𑀓𑁆𑀔𑀦𑁆𑀥𑀓𑀸𑀮𑁄, 𑀫𑀳𑀸𑀯𑀸𑀢𑁂 𑀑𑀨𑀼𑀦𑀦𑀓𑀸𑀮𑁄 𑀯𑀺𑀬 𑀦𑀤𑀻𑀲𑁄𑀢𑁂 𑀧𑀯𑀸𑀳𑀦𑀓𑀸𑀮𑁄 𑀯𑀺𑀬 𑀘 𑀙𑀺𑀦𑁆𑀦𑀫𑀽𑀮𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀦𑀺𑀭𑁄𑀥𑁄, 𑀑𑀨𑀼𑀦𑀦𑀧𑁆𑀧𑀯𑀸𑀳𑀦𑁂𑀳𑀺 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑁄 𑀯𑀺𑀬 𑀧𑀼𑀦𑀩𑁆𑀪𑀯𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁 𑀅𑀦𑀼𑀧𑁆𑀧𑀸𑀤𑁂𑀦 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.
𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀲𑀢𑁆𑀣𑀭𑀺 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀏𑀢𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀉𑀤𑀬𑀢𑁆𑀣𑀺𑀓𑁄𑀢𑀺 𑀯𑀟𑁆𑀠𑀺𑀅𑀢𑁆𑀣𑀺𑀓𑁄. 𑀅𑀲𑁆𑀲𑀧𑀡𑀺𑀬𑀁 𑀧𑁄𑀲𑁂𑀬𑁆𑀬𑀸𑀢𑀺 𑀧𑀜𑁆𑀘 𑀅𑀲𑁆𑀲𑀧𑁄𑀢𑀲𑀢𑀸𑀦𑀺 𑀓𑀺𑀡𑀺𑀢𑁆𑀯𑀸 𑀧𑀘𑁆𑀙𑀸 𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻𑀢𑀺 𑀧𑁄𑀲𑁂𑀬𑁆𑀬. 𑀲𑀳𑀲𑁆𑀲𑀕𑁆𑀖𑀦𑀓𑀲𑁆𑀲 𑀅𑀲𑁆𑀲𑀲𑁆𑀲 𑀧𑀜𑁆𑀘𑀲𑀢𑀫𑀢𑁆𑀢𑀁 𑀉𑀧𑀓𑀭𑀡𑀁 𑀕𑀦𑁆𑀥𑀫𑀸𑀮𑀸𑀤𑀺𑀯𑀲𑁂𑀦 𑀧𑁄𑀲𑀸𑀯𑀦𑀺𑀓𑀁𑀬𑁂𑀯 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀢𑁂 𑀅𑀲𑁆𑀲𑀸 𑀏𑀓𑀤𑀺𑀯𑀲𑁂𑀦𑁂𑀯 𑀭𑁄𑀕𑀁 𑀨𑀼𑀲𑀺𑀢𑁆𑀯𑀸 𑀲𑀩𑁆𑀩𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑁂𑀬𑁆𑀬𑀼𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳. 𑀉𑀤𑀬𑀜𑁆𑀘𑁂𑀯 𑀦𑀸𑀥𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀯𑀟𑁆𑀠𑀺𑀜𑁆𑀘 𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀫𑀽𑀮𑀜𑁆𑀘 𑀓𑀺𑀜𑁆𑀘𑀺 𑀦 𑀮𑀪𑁂𑀬𑁆𑀬. 𑀧𑀬𑀺𑀭𑀼𑀧𑀸𑀲𑀺𑀦𑁆𑀢𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀁. 𑀲𑁆𑀯𑀸𑀳𑀁 𑀉𑀤𑀬𑀜𑁆𑀘𑁂𑀯 𑀦𑀸𑀥𑀺𑀕𑀘𑁆𑀙𑀺𑀦𑁆𑀢𑀺 𑀲𑁄 𑀅𑀳𑀁 𑀦𑁂𑀯 𑀉𑀤𑀬𑀁 𑀦 𑀕𑁂𑀳𑀢𑁄 𑀤𑀺𑀦𑁆𑀦𑀥𑀦𑀁 𑀅𑀥𑀺𑀕𑀘𑁆𑀙𑀺𑀁, 𑀧𑀡𑀺𑀬𑀅𑀲𑁆𑀲𑀚𑀕𑁆𑀕𑀦𑀓𑁄 𑀦𑀸𑀫 𑀚𑀸𑀢𑁄𑀲𑁆𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.
𑁬. 𑀲𑀸𑀴𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁬. 𑀙𑀝𑁆𑀞𑁂 𑀤𑁆𑀯𑀬𑁂𑀦𑀸𑀢𑀺 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺. 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀦𑁆𑀢𑀺 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀁. 𑀢𑀧𑁄𑀚𑀺𑀕𑀼𑀘𑁆𑀙𑀸𑀳𑁂𑀢𑀽𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀗𑁆𑀔𑀸𑀢𑁂𑀦 𑀢𑀧𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀳𑁂𑀢𑀼. 𑀅𑀜𑁆𑀜𑀢𑀭𑀁 𑀲𑀸𑀫𑀜𑁆𑀜𑀗𑁆𑀕𑀦𑁆𑀢𑀺 𑀏𑀓𑀁 𑀲𑀫𑀡𑀥𑀫𑁆𑀫𑀓𑁄𑀝𑁆𑀞𑀸𑀲𑀁. 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀘𑁂𑀢𑀲𑀺𑀓𑀲𑀻𑀮𑀸𑀦𑀁 𑀅𑀧𑀭𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀺𑀫𑁂𑀦 𑀧𑀤𑁂𑀦 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀢𑀁 𑀤𑀲𑁆𑀲𑁂𑀢𑀺. 𑀜𑀸𑀡𑀤𑀲𑁆𑀲𑀦𑀸𑀬𑀸𑀢𑀺 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀸𑀬 𑀤𑀲𑁆𑀲𑀦𑀸𑀬. 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬𑀸𑀢𑀺 𑀅𑀭𑀳𑀢𑁆𑀢𑀸𑀬, 𑀅𑀭𑀳𑀢𑁆𑀢𑀜𑀸𑀡𑀨𑀲𑁆𑀲𑁂𑀦 𑀨𑀼𑀲𑀺𑀢𑀼𑀁 𑀅𑀪𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀮𑀮𑀝𑁆𑀞𑀺𑀦𑁆𑀢𑀺 𑀲𑀸𑀮𑀭𑀼𑀓𑁆𑀔𑀁. 𑀦𑀯𑀦𑁆𑀢𑀺 𑀢𑀭𑀼𑀡𑀁. 𑀅𑀓𑀼𑀓𑁆𑀓𑀼𑀘𑁆𑀘𑀓𑀚𑀸𑀢𑀦𑁆𑀢𑀺 ‘‘𑀪𑀯𑁂𑀬𑁆𑀬 𑀦𑀼 𑀔𑁄, 𑀦 𑀪𑀯𑁂𑀬𑁆𑀬𑀸’’𑀢𑀺 𑀅𑀚𑀦𑁂𑀢𑀩𑁆𑀩𑀓𑀼𑀓𑁆𑀓𑀼𑀘𑁆𑀘𑀁. 𑀮𑁂𑀔𑀡𑀺𑀬𑀸 𑀮𑀺𑀔𑁂𑀬𑁆𑀬𑀸𑀢𑀺 𑀅𑀯𑀮𑁂𑀔𑀦𑀫𑀢𑁆𑀢𑀓𑁂𑀦 𑀅𑀯𑀮𑀺𑀔𑁂𑀬𑁆𑀬. 𑀥𑁄𑀯𑁂𑀬𑁆𑀬𑀸𑀢𑀺 𑀖𑀁𑀲𑁂𑀬𑁆𑀬. 𑀅𑀦𑁆𑀢𑁄 𑀅𑀯𑀺𑀲𑀼𑀤𑁆𑀥𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀅𑀲𑀼𑀤𑁆𑀥𑀸 𑀅𑀧𑀦𑀻𑀢𑀲𑀸𑀭𑀸.
𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀲𑀸𑀮𑀮𑀝𑁆𑀞𑀺 𑀯𑀺𑀬 𑀳𑀺 𑀅𑀢𑁆𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄, 𑀦𑀤𑀻𑀲𑁄𑀢𑀁 𑀯𑀺𑀬 𑀲𑀁𑀲𑀸𑀭𑀲𑁄𑀢𑀁, 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀧𑀼𑀭𑀺𑀲𑁄 𑀯𑀺𑀬 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀞𑀺𑀢𑀧𑀼𑀭𑀺𑀲𑁄, 𑀲𑀸𑀮𑀮𑀝𑁆𑀞𑀺𑀬𑀸 𑀩𑀳𑀺𑀤𑁆𑀥𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀓𑀸𑀮𑁄 𑀯𑀺𑀬 𑀩𑀳𑀺𑀤𑁆𑀥𑀸 𑀢𑀧𑀘𑀭𑀡𑀁 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀕𑀳𑀺𑀢𑀓𑀸𑀮𑁄, 𑀅𑀦𑁆𑀢𑁄 𑀅𑀲𑀼𑀤𑁆𑀥𑀓𑀸𑀮𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀸𑀦𑀁 𑀅𑀧𑀭𑀺𑀲𑀼𑀤𑁆𑀥𑀓𑀸𑀮𑁄, 𑀲𑀸𑀮𑀮𑀝𑁆𑀞𑀺𑀬𑀸 𑀲𑀁𑀲𑀻𑀤𑀺𑀢𑁆𑀯𑀸 𑀅𑀥𑁄𑀕𑀫𑀦𑀁 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀲𑀁𑀲𑀸𑀭𑀲𑁄𑀢𑁂 𑀲𑀁𑀲𑀻𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.
𑀨𑀺𑀬𑀸𑀭𑀺𑀢𑁆𑀢𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀨𑀺𑀬𑀜𑁆𑀘 𑀅𑀭𑀺𑀢𑁆𑀢𑀜𑁆𑀘 𑀬𑁄𑀚𑁂𑀬𑁆𑀬. 𑀏𑀯𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀲𑀸𑀮𑀮𑀝𑁆𑀞𑀺 𑀯𑀺𑀬 𑀅𑀢𑁆𑀢𑀪𑀸𑀯𑁄, 𑀦𑀤𑀻𑀲𑁄𑀢𑀁 𑀯𑀺𑀬 𑀲𑀁𑀲𑀸𑀭𑀲𑁄𑀢𑀁, 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀩𑀳𑀺𑀤𑁆𑀥𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀓𑀸𑀮𑁄 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀮𑁄, 𑀅𑀦𑁆𑀢𑁄 𑀲𑀼𑀯𑀺𑀲𑁄𑀥𑀺𑀢𑀪𑀸𑀯𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀧𑀭𑀺𑀲𑀼𑀤𑁆𑀥𑀲𑀻𑀮𑀪𑀸𑀯𑁄, 𑀨𑀺𑀬𑀸𑀭𑀺𑀢𑁆𑀢𑀩𑀦𑁆𑀥𑀦𑀁 𑀯𑀺𑀬 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀓𑀭𑀡𑀁, 𑀲𑁄𑀢𑁆𑀣𑀺𑀦𑀸 𑀧𑀸𑀭𑀺𑀫𑀢𑀻𑀭𑀕𑀫𑀦𑀁 𑀯𑀺𑀬 𑀅𑀦𑀼𑀧𑀼𑀩𑁆𑀩𑁂𑀦 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀲𑀫𑀸𑀥𑀺𑀁 𑀧𑀽𑀭𑁂𑀢𑁆𑀯𑀸 𑀧𑀜𑁆𑀜𑀁 𑀧𑀽𑀭𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀫𑀦𑀁 𑀤𑀝𑁆𑀞𑀩𑁆𑀩𑀁.
𑀓𑀡𑁆𑀟𑀘𑀺𑀢𑁆𑀭𑀓𑀸𑀦𑀻𑀢𑀺 𑀲𑀭𑀮𑀝𑁆𑀞𑀺𑀲𑀭𑀭𑀚𑁆𑀚𑀼𑀲𑀭𑀧𑀸𑀲𑀸𑀤𑀲𑀭𑀲𑀸𑀡𑀺𑀲𑀭𑀧𑁄𑀓𑁆𑀔𑀭𑀡𑀺𑀲𑀭𑀧𑀤𑀼𑀫𑀸𑀦𑀻𑀢𑀺 𑀅𑀦𑁂𑀓𑀸𑀦𑀺 𑀓𑀡𑁆𑀟𑁂𑀳𑀺 𑀓𑀢𑁆𑀢𑀩𑁆𑀩𑀘𑀺𑀢𑁆𑀭𑀸𑀦𑀺. 𑀅𑀣 𑀔𑁄 𑀲𑁄 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 𑀲𑁄 𑀏𑀯𑀁 𑀩𑀳𑀽𑀦𑀺 𑀓𑀡𑁆𑀟𑀘𑀺𑀢𑁆𑀭𑀓𑀸𑀦𑀺 𑀚𑀸𑀦𑀦𑁆𑀢𑁄𑀧𑀺 𑀦 𑀭𑀸𑀚𑀸𑀭𑀳𑁄 𑀳𑁄𑀢𑀺, 𑀢𑀻𑀳𑀺𑀬𑁂𑀯 𑀧𑀦 𑀞𑀸𑀦𑁂𑀳𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀻𑀢𑀺 𑀫𑀕𑁆𑀕𑀲𑀫𑀸𑀥𑀺𑀦𑀸 𑀘 𑀨𑀮𑀲𑀫𑀸𑀥𑀺𑀦𑀸 𑀘 𑀲𑀫𑀸𑀳𑀺𑀢𑁄 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺 𑀓𑀣𑀺𑀢𑀸𑀦𑀺. 𑀅𑀬𑀁 𑀧𑀦 𑀫𑀕𑁆𑀕𑁂𑀦𑁂𑀯 𑀅𑀯𑀺𑀭𑀸𑀥𑀺𑀢𑀁 𑀯𑀺𑀚𑁆𑀛𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀯𑀺𑀚𑁆𑀚𑀸𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀤𑀸𑀮𑁂𑀢𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀳𑀺 𑀳𑁂𑀝𑁆𑀞𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄, 𑀇𑀥 𑀧𑀦 𑀧𑀤𑀸𑀮𑀺𑀢𑀁 𑀉𑀧𑀸𑀤𑀸𑀬 𑀧𑀤𑀸𑀮𑁂𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺.
𑁭. 𑀫𑀮𑁆𑀮𑀺𑀓𑀸𑀤𑁂𑀯𑀻𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁭. 𑀲𑀢𑁆𑀢𑀫𑁂 𑀫𑀮𑁆𑀮𑀺𑀓𑀸 𑀤𑁂𑀯𑀻𑀢𑀺 𑀧𑀲𑁂𑀦𑀤𑀺𑀭𑀜𑁆𑀜𑁄 𑀤𑁂𑀯𑀻. 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄𑀢𑀺 𑀬𑁂𑀦 𑀇𑀥𑁂𑀓𑀘𑁆𑀘𑀸 𑀇𑀢𑁆𑀣𑀻. 𑀤𑀼𑀩𑁆𑀩𑀡𑁆𑀡𑀸𑀢𑀺 𑀩𑀻𑀪𑀘𑁆𑀙𑀯𑀡𑁆𑀡𑀸. 𑀤𑀼𑀭𑀽𑀧𑀸𑀢𑀺 𑀤𑀼𑀲𑁆𑀲𑀡𑁆𑀞𑀺𑀢𑀸. 𑀲𑀼𑀧𑀸𑀧𑀺𑀓𑀸𑀢𑀺 𑀲𑀼𑀝𑁆𑀞𑀼 𑀧𑀸𑀧𑀺𑀓𑀸 𑀲𑀼𑀝𑁆𑀞𑀼 𑀮𑀸𑀫𑀺𑀓𑀸. 𑀤𑀲𑁆𑀲𑀦𑀸𑀬𑀸𑀢𑀺 𑀧𑀲𑁆𑀲𑀺𑀢𑀼𑀁. 𑀤𑀮𑀺𑀤𑁆𑀤𑀸𑀢𑀺 𑀥𑀦𑀤𑀮𑀺𑀤𑁆𑀤𑀸. 𑀅𑀧𑁆𑀧𑀲𑁆𑀲𑀓𑀸𑀢𑀺 𑀲𑀓𑁂𑀦 𑀥𑀦𑁂𑀦 𑀭𑀳𑀺𑀢𑀸. 𑀅𑀧𑁆𑀧𑀪𑁄𑀕𑀸𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑀓𑀭𑀳𑀺𑀢𑀸. 𑀅𑀧𑁆𑀧𑁂𑀲𑀓𑁆𑀔𑀸𑀢𑀺 𑀅𑀧𑁆𑀧𑀧𑀭𑀺𑀯𑀸𑀭𑀸. 𑀅𑀟𑁆𑀠𑀸𑀢𑀺 𑀇𑀲𑁆𑀲𑀭𑀸. 𑀫𑀳𑀤𑁆𑀥𑀦𑀸𑀢𑀺 𑀯𑀴𑀜𑁆𑀚𑀦𑀓𑀥𑀦𑁂𑀦 𑀫𑀳𑀤𑁆𑀥𑀦𑀸. 𑀫𑀳𑀸𑀪𑁄𑀕𑀸𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑀪𑁄𑀕𑁂𑀦 𑀫𑀳𑀸𑀪𑁄𑀕𑀸. 𑀫𑀳𑁂𑀲𑀓𑁆𑀔𑀸𑀢𑀺 𑀫𑀳𑀸𑀧𑀭𑀺𑀯𑀸𑀭𑀸. 𑀅𑀪𑀺𑀭𑀽𑀧𑀸𑀢𑀺 𑀉𑀢𑁆𑀢𑀫𑀭𑀽𑀧𑀸. 𑀤𑀲𑁆𑀲𑀦𑀻𑀬𑀸𑀢𑀺 𑀤𑀲𑁆𑀲𑀦𑀬𑀼𑀢𑁆𑀢𑀸. 𑀧𑀸𑀲𑀸𑀤𑀺𑀓𑀸𑀢𑀺 𑀤𑀲𑁆𑀲𑀦𑁂𑀦 𑀧𑀸𑀲𑀸𑀤𑀺𑀓𑀸. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑁂𑀦 𑀘.
𑀅𑀪𑀺𑀲𑀚𑁆𑀚𑀢𑀻𑀢𑀺 𑀮𑀕𑁆𑀕𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀧𑀓𑀢𑀺𑀁 𑀧𑀚𑀳𑀢𑀺. 𑀧𑀢𑀺𑀢𑁆𑀣𑀻𑀬𑀢𑀻𑀢𑀺 𑀓𑁄𑀥𑀯𑀲𑁂𑀦 𑀣𑀺𑀦𑀪𑀸𑀯𑀁 𑀣𑀤𑁆𑀥𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀦 𑀤𑀸𑀢𑀸 𑀳𑁄𑀢𑀻𑀢𑀺 𑀦 𑀤𑀸𑀬𑀺𑀓𑀸 𑀳𑁄𑀢𑀺. 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀲𑁂𑀬𑁆𑀬𑀸𑀢𑀺 𑀫𑀜𑁆𑀘𑀧𑀮𑁆𑀮𑀗𑁆𑀓𑀸𑀤𑀺𑀲𑀬𑀦𑀁. 𑀆𑀯𑀲𑀣𑁄𑀢𑀺 𑀆𑀯𑀲𑀣𑀸𑀕𑀸𑀭𑀁. 𑀧𑀤𑀻𑀧𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀯𑀝𑁆𑀝𑀺𑀢𑁂𑀮𑀸𑀤𑀺𑀧𑀤𑀻𑀧𑀽𑀧𑀓𑀭𑀡𑀁. 𑀇𑀲𑁆𑀲𑀸𑀫𑀦𑀺𑀓𑀸𑀢𑀺 𑀇𑀲𑁆𑀲𑀸𑀬 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀥𑀦𑀸 𑀅𑀳𑁄𑀲𑀺𑀦𑁆𑀢𑀺 𑀓𑁄𑀥𑀫𑀦𑀸 𑀅𑀳𑁄𑀲𑀺𑀁. 𑀅𑀦𑀺𑀲𑁆𑀲𑀸𑀫𑀦𑀺𑀓𑀸 𑀅𑀳𑁄𑀲𑀺𑀦𑁆𑀢𑀺 𑀇𑀲𑁆𑀲𑀸𑀯𑀺𑀭𑀳𑀺𑀢𑀘𑀺𑀢𑁆𑀢𑀸 𑀅𑀳𑁄𑀲𑀺𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.
𑁮. 𑀅𑀢𑁆𑀢𑀦𑁆𑀢𑀧𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁯𑁮. 𑀅𑀝𑁆𑀞𑀫𑁂 𑀅𑀢𑁆𑀢𑀦𑁆𑀢𑀧𑀸𑀤𑀻𑀲𑀼 𑀅𑀢𑁆𑀢𑀸𑀦𑀁 𑀢𑀧𑀢𑀺 𑀤𑀼𑀓𑁆𑀔𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁆𑀢𑀧𑁄. 𑀅𑀢𑁆𑀢𑀦𑁄 𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀧𑀭𑀁 𑀢𑀧𑀢𑀻𑀢𑀺 𑀧𑀭𑀦𑁆𑀢𑀧𑁄. 𑀧𑀭𑁂𑀲𑀁 𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀦𑀺𑀘𑁆𑀙𑀸𑀢𑁄𑀢𑀺 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀲𑀸 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀦𑀺𑀘𑁆𑀙𑀸𑀢𑁄. 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀼𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀅𑀦𑁆𑀢𑁄 𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑀸 𑀲𑀻𑀢𑀮𑁄 𑀚𑀸𑀢𑁄𑀢𑀺 𑀲𑀻𑀢𑀻𑀪𑀽𑀢𑁄. 𑀛𑀸𑀦𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀸𑀦𑀺 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻. 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸𑀢𑀺 𑀲𑁂𑀝𑁆𑀞𑀪𑀽𑀢𑁂𑀦 𑀅𑀢𑁆𑀢𑀦𑀸.
𑀅𑀘𑁂𑀮𑀓𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀑𑀭𑀩𑁆𑀪𑀺𑀓𑀸𑀤𑀻𑀲𑀼 𑀉𑀭𑀩𑁆𑀪𑀸 𑀯𑀼𑀘𑁆𑀘𑀦𑁆𑀢𑀺 𑀏𑀴𑀓𑀸, 𑀉𑀭𑀩𑁆𑀪𑁂 𑀳𑀦𑀢𑀻𑀢𑀺 𑀑𑀭𑀩𑁆𑀪𑀺𑀓𑁄. 𑀲𑀽𑀓𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑀼𑀤𑁆𑀤𑁄𑀢𑀺 𑀤𑀸𑀭𑀼𑀡𑁄 𑀓𑀓𑁆𑀔𑀴𑁄. 𑀫𑀘𑁆𑀙𑀖𑀸𑀢𑀓𑁄𑀢𑀺 𑀫𑀘𑁆𑀙𑀩𑀦𑁆𑀥𑁄 𑀓𑁂𑀯𑀝𑁆𑀝𑁄. 𑀩𑀦𑁆𑀥𑀦𑀸𑀕𑀸𑀭𑀺𑀓𑁄𑀢𑀺 𑀩𑀦𑁆𑀥𑀦𑀸𑀕𑀸𑀭𑀕𑁄𑀧𑀓𑁄. 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑀸.
𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄𑀢𑀺 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑁄. 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲𑀸𑀢𑀺 𑀦𑀕𑀭𑀢𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀬𑀜𑁆𑀜𑀲𑀸𑀮𑀁. 𑀔𑀭𑀸𑀚𑀺𑀦𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀲𑀧𑁆𑀧𑀺𑀢𑁂𑀮𑁂𑀦𑀸𑀢𑀺 𑀲𑀧𑁆𑀧𑀺𑀦𑀸 𑀘𑁂𑀯 𑀢𑁂𑀮𑁂𑀦 𑀘. 𑀞𑀧𑁂𑀢𑁆𑀯𑀸 𑀳𑀺 𑀲𑀧𑁆𑀧𑀺𑀁 𑀅𑀯𑀲𑁂𑀲𑁄 𑀬𑁄 𑀓𑁄𑀘𑀺 𑀲𑁆𑀦𑁂𑀳𑁄 𑀢𑁂𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀟𑀼𑀯𑀫𑀸𑀦𑁄𑀢𑀺 𑀦𑀔𑀸𑀦𑀁 𑀙𑀺𑀦𑁆𑀦𑀢𑁆𑀢𑀸 𑀓𑀡𑁆𑀟𑀼𑀯𑀺𑀢𑀩𑁆𑀩𑀓𑀸𑀮𑁂 𑀢𑁂𑀦 𑀓𑀡𑁆𑀟𑀼𑀯𑀫𑀸𑀦𑁄. 𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀅𑀲𑀦𑁆𑀣𑀢𑀸𑀬. 𑀲𑀭𑀽𑀧𑀯𑀘𑁆𑀙𑀸𑀬𑀸𑀢𑀺 𑀲𑀤𑀺𑀲𑀯𑀘𑁆𑀙𑀸𑀬. 𑀲𑀘𑁂 𑀕𑀸𑀯𑀻 𑀲𑁂𑀢𑀸 𑀳𑁄𑀢𑀺, 𑀯𑀘𑁆𑀙𑁄𑀧𑀺 𑀲𑁂𑀢𑀓𑁄𑀯. 𑀲𑀘𑁂 𑀓𑀧𑀺𑀮𑀸 𑀯𑀸 𑀭𑀢𑁆𑀢𑀸 𑀯𑀸, 𑀯𑀘𑁆𑀙𑀓𑁄𑀧𑀺 𑀢𑀸𑀤𑀺𑀲𑁄𑀯𑀸𑀢𑀺 𑀏𑀯𑀁 𑀲𑀭𑀽𑀧𑀯𑀘𑁆𑀙𑀸𑀬. 𑀲𑁄 𑀏𑀯𑀫𑀸𑀳𑀸𑀢𑀺 𑀲𑁄 𑀭𑀸𑀚𑀸 𑀏𑀯𑀁 𑀯𑀤𑁂𑀢𑀺. 𑀯𑀘𑁆𑀙𑀢𑀭𑀸𑀢𑀺 𑀢𑀭𑀼𑀡𑀯𑀘𑁆𑀙𑀓𑀪𑀸𑀯𑀁 𑀅𑀢𑀺𑀓𑁆𑀓𑀦𑁆𑀢𑀸 𑀩𑀮𑀯𑀯𑀘𑁆𑀙𑀸. 𑀯𑀘𑁆𑀙𑀢𑀭𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀧𑀭𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀸𑀬 𑀘𑁂𑀯 𑀬𑀜𑁆𑀜𑀪𑀽𑀫𑀺𑀬𑀁 𑀅𑀢𑁆𑀣𑀭𑀡𑀢𑁆𑀣𑀸𑀬 𑀘.
𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑁆𑀧𑀤𑀁 𑀥𑀫𑁆𑀫𑀁. 𑀲𑀼𑀡𑀸𑀢𑀺, 𑀕𑀳𑀧𑀢𑀺, 𑀯𑀸𑀢𑀺 𑀓𑀲𑁆𑀫𑀸 𑀧𑀞𑀫𑀁 𑀕𑀳𑀧𑀢𑀺𑀁 𑀦𑀺𑀤𑁆𑀤𑀺𑀲𑀢𑀺? 𑀦𑀺𑀳𑀢𑀫𑀸𑀦𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀘. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀔𑀢𑁆𑀢𑀺𑀬𑀓𑀼𑀮𑀢𑁄 𑀧𑀩𑁆𑀩𑀚𑀺𑀢𑀸 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀫𑀦𑁆𑀢𑁂 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀦𑁆𑀢𑀺, 𑀳𑀻𑀦𑀚𑀘𑁆𑀘𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀦𑁄 𑀯𑀺𑀚𑀸𑀢𑀺𑀢𑀸𑀬 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑀳𑀧𑀢𑀺𑀤𑀸𑀭𑀓𑀸 𑀧𑀦 𑀓𑀘𑁆𑀙𑁂𑀳𑀺 𑀲𑁂𑀤𑀁 𑀫𑀼𑀜𑁆𑀘𑀦𑁆𑀢𑁂𑀳𑀺 𑀧𑀺𑀝𑁆𑀞𑀺𑀬𑀸 𑀮𑁄𑀡𑀁 𑀧𑀼𑀧𑁆𑀨𑀫𑀸𑀦𑀸𑀬 𑀪𑀽𑀫𑀺𑀁 𑀓𑀲𑀺𑀢𑁆𑀯𑀸 𑀢𑀸𑀤𑀺𑀲𑀲𑁆𑀲 𑀫𑀸𑀦𑀲𑁆𑀲 𑀅𑀪𑀸𑀯𑀢𑁄 𑀦𑀺𑀳𑀢𑀫𑀸𑀦𑀤𑀧𑁆𑀧𑀸 𑀳𑁄𑀦𑁆𑀢𑀺. 𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀸𑀦𑀁 𑀯𑀸 𑀤𑀧𑁆𑀧𑀁 𑀯𑀸 𑀅𑀓𑀢𑁆𑀯𑀸 𑀬𑀣𑀸𑀩𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀼𑀁. 𑀇𑀢𑀭𑁂𑀳𑀺 𑀘 𑀓𑀼𑀮𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀦 𑀩𑀳𑀼𑀓𑀸, 𑀕𑀳𑀧𑀢𑀺𑀓𑀸𑀯 𑀩𑀳𑀼𑀓𑀸. 𑀇𑀢𑀺 𑀦𑀺𑀳𑀢𑀫𑀸𑀦𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀘 𑀧𑀞𑀫𑀁 𑀕𑀳𑀧𑀢𑀺𑀁 𑀦𑀺𑀤𑁆𑀤𑀺𑀲𑀢𑀻𑀢𑀺.
𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸𑀢𑀺 𑀇𑀢𑀭𑁂𑀲𑀁 𑀯𑀸 𑀓𑀼𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀧𑀘𑁆𑀘𑀸𑀚𑀸𑀢𑁄𑀢𑀺 𑀧𑀢𑀺𑀚𑀸𑀢𑁄. 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑀭𑀺𑀲𑀼𑀤𑁆𑀥𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑀸𑀫𑀺𑀫𑁆𑀳𑀺 𑀢𑀣𑀸𑀕𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀪𑀕𑀯𑀸’’𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄𑀢𑀺 𑀲𑀘𑁂𑀧𑀺 𑀲𑀝𑁆𑀞𑀺𑀳𑀢𑁆𑀣𑁂 𑀖𑀭𑁂 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀯𑀸 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀦𑁂𑀲𑀁 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀖𑀭𑀸𑀯𑀸𑀲𑁄 𑀲𑀫𑁆𑀩𑀸𑀥𑁄𑀯. 𑀭𑀚𑀸𑀧𑀣𑁄𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀆𑀕𑀫𑀦𑀧𑀣𑁄𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀮𑀕𑁆𑀕𑀦𑀝𑁆𑀞𑁂𑀦 𑀅𑀩𑁆𑀪𑁄𑀓𑀸𑀲𑁄 𑀯𑀺𑀬𑀸𑀢𑀺 𑀅𑀩𑁆𑀪𑁄𑀓𑀸𑀲𑁄. 𑀧𑀩𑁆𑀩𑀚𑀺𑀢𑁄 𑀳𑀺 𑀓𑀽𑀝𑀸𑀕𑀸𑀭𑀭𑀢𑀦𑀧𑀸𑀲𑀸𑀤𑀤𑁂𑀯𑀯𑀺𑀫𑀸𑀦𑀸𑀤𑀻𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑁂𑀲𑀼 𑀧𑀝𑀺𑀘𑁆𑀙𑀦𑁆𑀦𑁂𑀲𑀼 𑀯𑀲𑀦𑁆𑀢𑁄𑀧𑀺 𑀦𑁂𑀯 𑀮𑀕𑁆𑀕𑀢𑀺 𑀦 𑀲𑀚𑁆𑀚𑀢𑀺 𑀦 𑀩𑀚𑁆𑀛𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺. 𑀅𑀧𑀺𑀘 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀓𑀼𑀲𑀮𑀓𑀺𑀭𑀺𑀬𑀸𑀬 𑀬𑀣𑀸𑀲𑀼𑀔𑀁 𑀑𑀓𑀸𑀲𑀸𑀪𑀸𑀯𑀢𑁄, 𑀭𑀚𑀸𑀧𑀣𑁄 𑀅𑀲𑀁𑀯𑀼𑀢𑀲𑀗𑁆𑀓𑀸𑀭𑀝𑁆𑀞𑀸𑀦𑀁 𑀯𑀺𑀬 𑀭𑀚𑀸𑀦𑀁, 𑀓𑀺𑀮𑁂𑀲𑀭𑀚𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄. 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸 𑀓𑀼𑀲𑀮𑀓𑀺𑀭𑀺𑀬𑀸𑀬 𑀬𑀣𑀸𑀲𑀼𑀔𑀁 𑀑𑀓𑀸𑀲𑀲𑀩𑁆𑀪𑀸𑀯𑀢𑁄.
𑀦𑀬𑀺𑀤𑀁 𑀲𑀼𑀓𑀭𑀁…𑀧𑁂… 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀤𑁂𑀢𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁, 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀺𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁, 𑀲𑀗𑁆𑀔𑀮𑀺𑀔𑀺𑀢𑀁 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁. 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑁂 𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀓𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀅𑀦𑀕𑀸𑀭𑀺𑀬𑀸𑀢𑀺 𑀜𑀸𑀢𑀩𑁆𑀩𑀸, 𑀢𑀁 𑀅𑀦𑀕𑀸𑀭𑀺𑀬𑀁. 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀧𑀝𑀺𑀧𑀚𑁆𑀚𑁂𑀬𑁆𑀬𑀁.
𑀅𑀧𑁆𑀧𑀁 𑀯𑀸𑀢𑀺 𑀲𑀳𑀲𑁆𑀲𑀢𑁄 𑀳𑁂𑀝𑁆𑀞𑀸 𑀪𑁄𑀕𑀓𑁆𑀔𑀦𑁆𑀥𑁄 𑀅𑀧𑁆𑀧𑁄 𑀦𑀸𑀫 𑀳𑁄𑀢𑀺, 𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀳𑀸. 𑀆𑀩𑀦𑁆𑀥𑀦𑀝𑁆𑀞𑁂𑀦 𑀜𑀸𑀢𑀺𑀬𑁂𑀯 𑀜𑀸𑀢𑀺𑀧𑀭𑀺𑀯𑀝𑁆𑀝𑁄. 𑀲𑁄 𑀯𑀻𑀲𑀢𑀺𑀬𑀸 𑀳𑁂𑀝𑁆𑀞𑀸 𑀅𑀧𑁆𑀧𑁄 𑀦𑀸𑀫 𑀳𑁄𑀢𑀺, 𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀬 𑀫𑀳𑀸. 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀬𑀸 𑀪𑀺𑀓𑁆𑀔𑀽𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸, 𑀢𑀜𑁆𑀘, 𑀬𑀢𑁆𑀣 𑀘𑁂𑀢𑁂 𑀲𑀳 𑀚𑀻𑀯𑀦𑁆𑀢𑀺, 𑀏𑀓𑀚𑀻𑀯𑀺𑀓𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀢𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀁 𑀲𑀸𑀚𑀻𑀯𑀜𑁆𑀘 𑀢𑀢𑁆𑀣 𑀲𑀺𑀓𑁆𑀔𑀦𑀪𑀸𑀯𑁂𑀦 𑀲𑀫𑀸𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀤𑀼𑀪𑀬𑀁 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄.
𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀇𑀫𑁂𑀲𑀁 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀇𑀢𑁄𑀢𑀺 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁, 𑀢𑁂𑀲𑀁 𑀪𑁂𑀤𑀸𑀬. 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀫𑀺𑀢𑁆𑀢𑀸𑀦𑀁 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀪𑀺𑀦𑁆𑀦𑀸𑀦𑀁 𑀏𑀓𑀫𑁂𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀈𑀤𑀺𑀲𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀇𑀤𑀁 𑀦 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀦𑁆𑀥𑀸𑀦𑀁 𑀓𑀢𑁆𑀢𑀸. 𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸, 𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀏𑀯𑀭𑀽𑀧𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀫𑁂𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀲𑀫𑀕𑁆𑀕𑀸𑀭𑀸𑀫𑁄. 𑀬𑀢𑁆𑀣 𑀲𑀫𑀕𑁆𑀕𑀸 𑀦𑀢𑁆𑀣𑀺, 𑀢𑀢𑁆𑀣 𑀯𑀲𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑀭𑀸𑀫𑁄𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯 𑀅𑀢𑁆𑀣𑁄. 𑀲𑀫𑀕𑁆𑀕𑀭𑀢𑁄𑀢𑀺 𑀲𑀫𑀕𑁆𑀕𑁂𑀲𑀼 𑀭𑀢𑁄, 𑀢𑁂 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸𑀧𑀺 𑀲𑀼𑀢𑁆𑀯𑀸𑀧𑀺 𑀦𑀦𑁆𑀤𑀢𑀻𑀢𑀺 𑀲𑀫𑀕𑁆𑀕𑀦𑀦𑁆𑀤𑀻. 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀬𑀸 𑀯𑀸𑀘𑀸 𑀲𑀢𑁆𑀢𑁂 𑀲𑀫𑀕𑁆𑀕𑁂𑀬𑁂𑀯 𑀓𑀭𑁄𑀢𑀺, 𑀢𑀁 𑀲𑀸𑀫𑀕𑁆𑀕𑀺𑀕𑀼𑀡𑀧𑀭𑀺𑀤𑀻𑀧𑀺𑀓𑀫𑁂𑀯 𑀯𑀸𑀘𑀁 𑀪𑀸𑀲𑀢𑀺, 𑀦 𑀇𑀢𑀭𑀦𑁆𑀢𑀺.
𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀸𑀲𑁆𑀲𑀸 𑀏𑀮𑀦𑁆𑀢𑀺 𑀦𑁂𑀮𑀸, 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄 ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 (𑀉𑀤𑀸. 𑁬𑁫) 𑀏𑀢𑁆𑀣 𑀯𑀼𑀢𑁆𑀢𑀦𑁂𑀮𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀓𑀮𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀻𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀲𑀁𑀯𑀟𑁆𑀠𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻. 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻, 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺, 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺, 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸.
𑀓𑀸𑀮𑁂 𑀯𑀤𑀢𑀻𑀢𑀺 𑀓𑀸𑀮𑀯𑀸𑀤𑀻, 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀪𑀽𑀢𑀁 𑀢𑀘𑁆𑀙𑀁 𑀲𑀪𑀸𑀯𑀫𑁂𑀯 𑀯𑀤𑀢𑀻𑀢𑀺 𑀪𑀽𑀢𑀯𑀸𑀤𑀻. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀥𑀫𑁆𑀫𑀯𑀸𑀤𑀻. 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀯𑀺𑀦𑀬𑀯𑀸𑀤𑀻. 𑀦𑀺𑀥𑀸𑀦𑀁 𑀯𑀼𑀘𑁆𑀘𑀢𑀺 𑀞𑀧𑀦𑁄𑀓𑀸𑀲𑁄, 𑀦𑀺𑀥𑀸𑀦𑀫𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀥𑀸𑀦𑀯𑀢𑀻. 𑀳𑀤𑀬𑁂 𑀦𑀺𑀥𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀸𑀢𑀺 𑀏𑀯𑀭𑀽𑀧𑀺𑀁 𑀪𑀸𑀲𑀫𑀸𑀦𑁄𑀧𑀺 𑀘 ‘‘𑀅𑀳𑀁 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀦 𑀅𑀓𑀸𑀮𑁂𑀦 𑀪𑀸𑀲𑀢𑀺, 𑀬𑀼𑀢𑁆𑀢𑀓𑀸𑀮𑀁 𑀧𑀦 𑀅𑀯𑁂𑀓𑁆𑀔𑀺𑀢𑁆𑀯𑀸𑀯 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀧𑀤𑁂𑀲𑀦𑁆𑀢𑀺 𑀲𑀉𑀧𑀫𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸, 𑀬𑀣𑀸𑀲𑁆𑀲𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀅𑀦𑁂𑀓𑁂𑀳𑀺𑀧𑀺 𑀦𑀬𑁂𑀳𑀺 𑀯𑀺𑀪𑀚𑀦𑁆𑀢𑁂𑀦 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁 𑀪𑀸𑀲𑀢𑀺. 𑀬𑀁 𑀯𑀸 𑀲𑁄 𑀅𑀢𑁆𑀣𑀯𑀸𑀤𑀻 𑀅𑀢𑁆𑀣𑀁 𑀯𑀤𑀢𑀺, 𑀢𑁂𑀦 𑀅𑀢𑁆𑀣𑁂𑀦 𑀲𑀁𑀳𑀺𑀢𑀢𑁆𑀢𑀸 𑀅𑀢𑁆𑀣𑀲𑀁𑀳𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀅𑀜𑁆𑀜𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀪𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸𑀢𑀺 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀲𑁆𑀲 𑀩𑀻𑀚𑀕𑀸𑀫𑀲𑁆𑀲 𑀘𑁂𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀪𑀽𑀢𑀕𑀸𑀫𑀲𑁆𑀲 𑀘 𑀲𑀫𑀸𑀭𑀫𑁆𑀪𑀸, 𑀙𑁂𑀤𑀦𑀪𑁂𑀤𑀦𑀧𑀘𑀦𑀸𑀤𑀺𑀪𑀸𑀯𑁂𑀦 𑀯𑀺𑀓𑁄𑀧𑀦𑀸 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄.