𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁
𑁧. 𑀪𑀡𑁆𑀟𑀕𑀸𑀫𑀯𑀕𑁆𑀕𑁄
𑁧. 𑀅𑀦𑀼𑀩𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸
𑁧. 𑀘𑀢𑀼𑀓𑁆𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀅𑀦𑀦𑀼𑀩𑁄𑀥𑀸𑀢𑀺 𑀅𑀩𑀼𑀚𑁆𑀛𑀦𑁂𑀦 𑀅𑀚𑀸𑀦𑀦𑁂𑀦. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦 𑀅𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀬. 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀘𑀺𑀭𑀓𑀸𑀮𑀁. 𑀲𑀦𑁆𑀥𑀸𑀯𑀺𑀢𑀦𑁆𑀢𑀺 𑀪𑀯𑀢𑁄 𑀪𑀯𑀁 𑀕𑀫𑀦𑀯𑀲𑁂𑀦 𑀲𑀦𑁆𑀥𑀸𑀯𑀺𑀢𑀁. 𑀲𑀁𑀲𑀭𑀺𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀸𑀕𑀫𑀦𑀯𑀲𑁂𑀦 𑀲𑀁𑀲𑀭𑀺𑀢𑀁. 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘𑀸𑀢𑀺 𑀫𑀬𑀸 𑀘 𑀢𑀼𑀫𑁆𑀳𑁂𑀳𑀺 𑀘. 𑀅𑀣 𑀯𑀸 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀦𑁆𑀢𑀺 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀅𑀳𑁄𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀲𑁆𑀲𑀸𑀢𑀺 𑀦𑀺𑀤𑁆𑀤𑁄𑀲𑀲𑁆𑀲. 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸𑀢𑀺 𑀇𑀫𑁂 𑀧𑀦 𑀢𑀬𑁄 𑀥𑀫𑁆𑀫𑀸 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀯 𑀯𑁂𑀤𑀺𑀢𑀩𑁆𑀩𑀸, 𑀯𑀺𑀫𑀼𑀢𑁆𑀢𑀺𑀦𑀸𑀫𑁂𑀦 𑀨𑀮𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀁. 𑀪𑀯𑀢𑀡𑁆𑀳𑀸𑀢𑀺 𑀪𑀯𑁂𑀲𑀼 𑀢𑀡𑁆𑀳𑀸. 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀭𑀚𑁆𑀚𑀼. 𑀢𑀡𑁆𑀳𑀸𑀬 𑀏𑀯 𑀏𑀢𑀁 𑀦𑀸𑀫𑀁. 𑀢𑀸𑀬 𑀳𑀺 𑀲𑀢𑁆𑀢𑀸 𑀕𑁄𑀡𑀸 𑀯𑀺𑀬 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀢𑀁 𑀪𑀯𑀁 𑀦𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀪𑀯𑀦𑁂𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺.
𑀅𑀦𑀼𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑁄. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀇𑀤𑀫𑀲𑁆𑀲 𑀩𑁄𑀥𑀺𑀫𑀡𑁆𑀟𑁂 𑀧𑀞𑀫𑀧𑀭𑀺𑀦𑀺𑀩𑁆𑀩𑀸𑀦𑀁, 𑀧𑀘𑁆𑀙𑀸 𑀧𑀦 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.
𑁨. 𑀧𑀧𑀢𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁨. 𑀤𑀼𑀢𑀺𑀬𑁂 𑀧𑀧𑀢𑀺𑀢𑁄𑀢𑀺 𑀧𑀢𑀺𑀢𑁄 𑀘𑀼𑀢𑁄. 𑀅𑀧𑁆𑀧𑀧𑀢𑀺𑀢𑁄𑀢𑀺 𑀅𑀧𑀢𑀺𑀢𑁄 𑀧𑀢𑀺𑀝𑁆𑀞𑀺𑀢𑁄. 𑀢𑀢𑁆𑀣 𑀮𑁄𑀓𑀺𑀬𑀫𑀳𑀸𑀚𑀦𑁄 𑀧𑀢𑀺𑀢𑁄𑀬𑁂𑀯 𑀦𑀸𑀫, 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀧𑀢𑀺𑀢𑀸 𑀦𑀸𑀫, 𑀔𑀻𑀡𑀸𑀲𑀯𑁄 𑀏𑀓𑀦𑁆𑀢𑀧𑀢𑀺𑀝𑁆𑀞𑀺𑀢𑁄 𑀦𑀸𑀫.
𑀘𑀼𑀢𑀸 𑀧𑀢𑀦𑁆𑀢𑀻𑀢𑀺 𑀬𑁂 𑀘𑀼𑀢𑀸, 𑀢𑁂 𑀧𑀢𑀦𑁆𑀢𑀺 𑀦𑀸𑀫. 𑀧𑀢𑀺𑀢𑀸𑀢𑀺 𑀬𑁂 𑀧𑀢𑀺𑀢𑀸, 𑀢𑁂 𑀘𑀼𑀢𑀸 𑀦𑀸𑀫. 𑀘𑀼𑀢𑀢𑁆𑀢𑀸 𑀧𑀢𑀺𑀢𑀸, 𑀧𑀢𑀺𑀢𑀢𑁆𑀢𑀸 𑀘𑀼𑀢𑀸𑀢𑀺 𑀅𑀢𑁆𑀣𑁄. 𑀕𑀺𑀤𑁆𑀥𑀸𑀢𑀺 𑀭𑀸𑀕𑀭𑀢𑁆𑀢𑀸. 𑀧𑀼𑀦𑀭𑀸𑀕𑀢𑀸𑀢𑀺 𑀧𑀼𑀦 𑀚𑀸𑀢𑀺𑀁 𑀧𑀼𑀦 𑀚𑀭𑀁 𑀧𑀼𑀦 𑀩𑁆𑀬𑀸𑀥𑀺𑀁 𑀧𑀼𑀦 𑀫𑀭𑀡𑀁 𑀆𑀕𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀓𑀢𑀁 𑀓𑀺𑀘𑁆𑀘𑀦𑁆𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑀁. 𑀭𑀢𑀁 𑀭𑀫𑁆𑀫𑀦𑁆𑀢𑀺 𑀭𑀫𑀺𑀢𑀩𑁆𑀩𑀬𑀼𑀢𑁆𑀢𑀓𑁂 𑀕𑀼𑀡𑀚𑀸𑀢𑁂 𑀭𑀫𑀺𑀢𑀁. 𑀲𑀼𑀔𑁂𑀦𑀸𑀦𑁆𑀯𑀸𑀕𑀢𑀁 𑀲𑀼𑀔𑀦𑁆𑀢𑀺 𑀲𑀼𑀔𑁂𑀦 𑀲𑀼𑀔𑀁 𑀅𑀦𑀼𑀆𑀕𑀢𑀁 𑀲𑀫𑁆𑀧𑀢𑁆𑀢𑀁. 𑀫𑀸𑀦𑀼𑀲𑀓𑀲𑀼𑀔𑁂𑀦 𑀤𑀺𑀩𑁆𑀩𑀲𑀼𑀔𑀁, 𑀛𑀸𑀦𑀲𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀲𑀼𑀔𑀁, 𑀯𑀺𑀧𑀲𑁆𑀲𑀦𑀸𑀲𑀼𑀔𑁂𑀦 𑀫𑀕𑁆𑀕𑀲𑀼𑀔𑀁, 𑀫𑀕𑁆𑀕𑀲𑀼𑀔𑁂𑀦 𑀨𑀮𑀲𑀼𑀔𑀁, 𑀨𑀮𑀲𑀼𑀔𑁂𑀦 𑀦𑀺𑀩𑁆𑀩𑀸𑀦𑀲𑀼𑀔𑀁 𑀲𑀫𑁆𑀧𑀢𑁆𑀢𑀁 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄.
𑁩. 𑀧𑀞𑀫𑀔𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁩. 𑀢𑀢𑀺𑀬𑀁 𑀤𑀼𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀕𑀸𑀣𑀸𑀲𑀼 𑀧𑀦 𑀦𑀺𑀦𑁆𑀤𑀺𑀬𑀦𑁆𑀢𑀺 𑀦𑀺𑀦𑁆𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀁. 𑀦𑀺𑀦𑁆𑀤𑀢𑀻𑀢𑀺 𑀕𑀭𑀳𑀢𑀺. 𑀧𑀲𑀁𑀲𑀺𑀬𑁄𑀢𑀺 𑀧𑀲𑀁𑀲𑀺𑀢𑀩𑁆𑀩𑀬𑀼𑀢𑁆𑀢𑁄. 𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀦𑁆𑀢𑀺 𑀬𑁄 𑀏𑀯𑀁 𑀧𑀯𑀢𑁆𑀢𑁄, 𑀢𑁂𑀦 𑀫𑀼𑀔𑁂𑀦 𑀓𑀮𑀺𑀁 𑀯𑀺𑀘𑀺𑀦𑀸𑀢𑀺 𑀦𑀸𑀫. 𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀢𑁂𑀦 𑀘 𑀓𑀮𑀺𑀦𑀸 𑀲𑀼𑀔𑀁 𑀦 𑀧𑀝𑀺𑀮𑀪𑀢𑀺. 𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸𑀢𑀺 𑀲𑀩𑁆𑀩𑁂𑀦𑀧𑀺 𑀲𑀓𑁂𑀦 𑀥𑀦𑁂𑀦 𑀘𑁂𑀯 𑀅𑀢𑁆𑀢𑀦𑀸 𑀘 𑀲𑀤𑁆𑀥𑀺𑀁 𑀬𑁄 𑀧𑀭𑀸𑀚𑀬𑁄, 𑀲𑁄 𑀅𑀧𑁆𑀧𑀫𑀢𑁆𑀢𑀓𑁄𑀯 𑀓𑀮𑀻𑀢𑀺 𑀅𑀢𑁆𑀣𑁄. 𑀬𑁄 𑀲𑀼𑀕𑀢𑁂𑀲𑀽𑀢𑀺 𑀬𑁄 𑀧𑀦 𑀲𑀫𑁆𑀫𑀕𑁆𑀕𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀘𑀺𑀢𑁆𑀢𑀁 𑀧𑀤𑀼𑀲𑁆𑀲𑁂𑀬𑁆𑀬, 𑀅𑀬𑀁 𑀘𑀺𑀢𑁆𑀢𑀧𑀤𑁄𑀲𑁄𑀯 𑀢𑀢𑁄 𑀓𑀮𑀺𑀢𑁄 𑀫𑀳𑀦𑁆𑀢𑀢𑀭𑁄 𑀓𑀮𑀺. 𑀇𑀤𑀸𑀦𑀺 𑀢𑀲𑁆𑀲 𑀫𑀳𑀦𑁆𑀢𑀢𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺 𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬 𑀲𑀢𑀲𑀳𑀲𑁆𑀲𑀁. 𑀙𑀢𑁆𑀢𑀺𑀁𑀲𑀢𑀻𑀢𑀺 𑀅𑀧𑀭𑀸𑀦𑀺 𑀘 𑀙𑀢𑁆𑀢𑀺𑀁𑀲𑀢𑀺 𑀦𑀺𑀭𑀩𑁆𑀩𑀼𑀤𑀸𑀦𑀺. 𑀧𑀜𑁆𑀘 𑀘𑀸𑀢𑀺 𑀅𑀩𑁆𑀩𑀼𑀤𑀕𑀡𑀦𑀸𑀬 𑀘 𑀧𑀜𑁆𑀘 𑀅𑀩𑁆𑀩𑀼𑀤𑀸𑀦𑀺. 𑀬𑀫𑀭𑀺𑀬𑀕𑀭𑀳𑀻𑀢𑀺 𑀬𑀁 𑀅𑀭𑀺𑀬𑁂 𑀕𑀭𑀳𑀦𑁆𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺, 𑀢𑀢𑁆𑀣 𑀏𑀢𑁆𑀢𑀓𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺.
𑁪. 𑀤𑀼𑀢𑀺𑀬𑀔𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁪. 𑀘𑀢𑀼𑀢𑁆𑀣𑁂 𑀫𑀸𑀢𑀭𑀺 𑀧𑀺𑀢𑀭𑀺 𑀘𑀸𑀢𑀺𑀆𑀤𑀻𑀲𑀼 𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀫𑀸𑀢𑀭𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀦𑀸𑀫, 𑀅𑀚𑀸𑀢𑀲𑀢𑁆𑀢𑀼 𑀧𑀺𑀢𑀭𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀦𑀸𑀫, 𑀤𑁂𑀯𑀤𑀢𑁆𑀢𑁄 𑀢𑀣𑀸𑀕𑀢𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀦𑀸𑀫, 𑀓𑁄𑀓𑀸𑀮𑀺𑀓𑁄 𑀢𑀣𑀸𑀕𑀢𑀲𑀸𑀯𑀓𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀦𑀸𑀫. 𑀩𑀳𑀼𑀜𑁆𑀘𑀸𑀢𑀺 𑀩𑀳𑀼𑀓𑀫𑁂𑀯. 𑀧𑀲𑀯𑀢𑀻𑀢𑀺 𑀧𑀝𑀺𑀮𑀪𑀢𑀺. 𑀢𑀸𑀬𑀸𑀢𑀺 𑀢𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀬. 𑀧𑁂𑀘𑁆𑀘𑀸𑀢𑀺 𑀇𑀢𑁄 𑀕𑀦𑁆𑀢𑁆𑀯𑀸. 𑀅𑀧𑀸𑀬𑀁 𑀕𑀘𑁆𑀙𑀢𑀻𑀢𑀺 𑀦𑀺𑀭𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀏𑀲𑁂𑀯 𑀦𑀬𑁄.
𑁫. 𑀅𑀦𑀼𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁫. 𑀧𑀜𑁆𑀘𑀫𑁂 𑀅𑀦𑀼𑀲𑁄𑀢𑀁 𑀕𑀘𑁆𑀙𑀢𑀻𑀢𑀺 𑀅𑀦𑀼𑀲𑁄𑀢𑀕𑀸𑀫𑀻. 𑀓𑀺𑀮𑁂𑀲𑀲𑁄𑀢𑀲𑁆𑀲 𑀧𑀘𑁆𑀘𑀦𑀻𑀓𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀲𑁄𑀢𑀁 𑀕𑀘𑁆𑀙𑀢𑀻𑀢𑀺 𑀧𑀝𑀺𑀲𑁄𑀢𑀕𑀸𑀫𑀻. 𑀞𑀺𑀢𑀢𑁆𑀢𑁄𑀢𑀺 𑀞𑀺𑀢𑀲𑀪𑀸𑀯𑁄. 𑀢𑀺𑀡𑁆𑀡𑁄𑀢𑀺 𑀑𑀖𑀁 𑀢𑀭𑀺𑀢𑁆𑀯𑀸 𑀞𑀺𑀢𑁄. 𑀧𑀸𑀭𑀗𑁆𑀕𑀢𑁄𑀢𑀺 𑀧𑀭𑀢𑀻𑀭𑀁 𑀕𑀢𑁄. 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀦𑀺𑀩𑁆𑀩𑀸𑀦𑀣𑀮𑁂 𑀢𑀺𑀝𑁆𑀞𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑁂𑀝𑁆𑀞𑁄 𑀦𑀺𑀤𑁆𑀤𑁄𑀲𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀓𑀸𑀫𑁂 𑀘 𑀧𑀝𑀺𑀲𑁂𑀯𑀢𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀢𑁆𑀣𑀼𑀓𑀸𑀫𑁂 𑀧𑀝𑀺𑀲𑁂𑀯𑀢𑀺. 𑀧𑀸𑀧𑀜𑁆𑀘 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀧𑀸𑀧𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀁 𑀓𑀭𑁄𑀢𑀺. 𑀧𑀸𑀧𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀻𑀢𑀺 𑀧𑀜𑁆𑀘𑀯𑁂𑀭𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀞𑀺𑀢𑀢𑁆𑀢𑁄𑀢𑀺 𑀅𑀬𑀁 𑀅𑀦𑀸𑀕𑀸𑀫𑀻 𑀧𑀼𑀕𑁆𑀕𑀮𑁄 𑀢𑀲𑁆𑀫𑀸 𑀮𑁄𑀓𑀸 𑀧𑀼𑀦 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀸𑀕𑀫𑀦𑀢𑁄 𑀞𑀺𑀢𑀢𑁆𑀢𑁄 𑀦𑀸𑀫.
𑀢𑀡𑁆𑀳𑀸𑀥𑀺𑀧𑀦𑁆𑀦𑀸𑀢𑀺 𑀢𑀡𑁆𑀳𑀸𑀬 𑀅𑀥𑀺𑀧𑀦𑁆𑀦𑀸 𑀅𑀚𑁆𑀛𑁄𑀢𑁆𑀣𑀝𑀸, 𑀢𑀡𑁆𑀳𑀁 𑀯𑀸 𑀅𑀥𑀺𑀧𑀦𑁆𑀦𑀸 𑀅𑀚𑁆𑀛𑁄𑀕𑀸𑀴𑁆𑀳𑀸. 𑀧𑀭𑀺𑀧𑀼𑀡𑁆𑀡𑀲𑁂𑀔𑁄𑀢𑀺 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀞𑀺𑀢𑁄. 𑀅𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺 𑀅𑀧𑀭𑀺𑀳𑀻𑀦𑀲𑀪𑀸𑀯𑁄. 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀘𑀺𑀢𑁆𑀢𑀯𑀲𑀻𑀪𑀸𑀯𑀁 𑀧𑀢𑁆𑀢𑁄. 𑀏𑀯𑀭𑀽𑀧𑁄 𑀔𑀻𑀡𑀸𑀲𑀯𑁄 𑀳𑁄𑀢𑀺, 𑀇𑀥 𑀧𑀦 𑀅𑀦𑀸𑀕𑀸𑀫𑀻 𑀓𑀣𑀺𑀢𑁄. 𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀲𑀫𑀸𑀳𑀺𑀢𑀙𑀴𑀺𑀦𑁆𑀤𑁆𑀭𑀺𑀬𑁄. 𑀧𑀭𑁄𑀧𑀭𑀸𑀢𑀺 𑀧𑀭𑁄𑀯𑀭𑀸 𑀉𑀢𑁆𑀢𑀫𑀮𑀸𑀫𑀓𑀸, 𑀓𑀼𑀲𑀮𑀸𑀓𑀼𑀲𑀮𑀸𑀢𑀺 𑀅𑀢𑁆𑀣𑁄. 𑀲𑀫𑁂𑀘𑁆𑀘𑀸𑀢𑀺 𑀜𑀸𑀡𑁂𑀦 𑀲𑀫𑀸𑀕𑀦𑁆𑀢𑁆𑀯𑀸. 𑀯𑀺𑀥𑀽𑀧𑀺𑀢𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀸 𑀛𑀸𑀧𑀺𑀢𑀸 𑀯𑀸. 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀲𑀺𑀢𑁆𑀯𑀸 𑀞𑀺𑀢𑁄. 𑀮𑁄𑀓𑀦𑁆𑀢𑀕𑀽𑀢𑀺 𑀢𑀺𑀯𑀺𑀥𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀕𑀢𑁄. 𑀧𑀸𑀭𑀕𑀢𑁄𑀢𑀺 𑀙𑀳𑀸𑀓𑀸𑀭𑁂𑀳𑀺 𑀧𑀸𑀭𑀕𑀢𑁄. 𑀇𑀥 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄. 𑀇𑀢𑀺 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁬. 𑀅𑀧𑁆𑀧𑀲𑁆𑀲𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸
𑁬. 𑀙𑀝𑁆𑀞𑁂 𑀅𑀦𑀼𑀧𑀧𑀦𑁆𑀦𑁄𑀢𑀺 𑀅𑀦𑀼𑀧𑀸𑀕𑀢𑁄. 𑀲𑀼𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀲𑀼𑀢𑁆𑀢𑀦𑀺𑀧𑀸𑀢𑀫𑀗𑁆𑀕𑀮𑀲𑀼𑀢𑁆𑀢𑀭𑀢𑀦𑀲𑀼𑀢𑁆𑀢- 𑀦𑀸𑀴𑀓𑀲𑀼𑀢𑁆𑀢𑀢𑀼𑀯𑀝𑀓𑀲𑀼𑀢𑁆𑀢𑀸𑀦𑀺, 𑀅𑀜𑁆𑀜𑀫𑁆𑀧𑀺 𑀘 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀲𑁂𑀲𑁂𑀦 𑀲𑀁𑀬𑀼𑀢𑁆𑀢𑀓𑁂 𑀲𑀓𑀮𑁄𑀧𑀺 𑀲𑀕𑀸𑀣𑀸𑀯𑀕𑁆𑀕𑁄. 𑀲𑀓𑀮𑀫𑁆𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀦𑀺𑀕𑁆𑀕𑀸𑀣𑀓𑀲𑀼𑀢𑁆𑀢𑀁, 𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁, 𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤-𑀣𑁂𑀭𑀕𑀸𑀣𑀸-𑀣𑁂𑀭𑀺𑀕𑀸𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀘 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑁆𑀯𑁂𑀅𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀚𑀸𑀢𑀓𑀲𑀢𑀸𑀦𑀺 𑀚𑀸𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀽𑀴𑀯𑁂𑀤𑀮𑁆𑀮𑀫𑀳𑀸𑀯𑁂𑀤𑀮𑁆𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀓𑁆𑀓𑀧𑀜𑁆𑀳𑀲𑀗𑁆𑀔𑀸𑀭𑀪𑀸𑀚𑀦𑀺𑀬𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀸𑀤𑀬𑁄 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀸 𑀲𑀼𑀢𑁆𑀢𑀦𑁆𑀢𑀸 𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀅𑀢𑁆𑀣𑀫𑀜𑁆𑀜𑀸𑀬 𑀦 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀅𑀝𑁆𑀞𑀓𑀣𑀜𑁆𑀘 𑀧𑀸𑀴𑀺𑀜𑁆𑀘 𑀅𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀁 𑀲𑀳𑀲𑀻𑀮𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀦 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀯𑀸𑀭𑁂 𑀧𑀦𑁂𑀢𑁆𑀣 𑀅𑀧𑁆𑀧𑀲𑁆𑀲𑀼𑀢𑀤𑀼𑀲𑁆𑀲𑀻𑀮𑁄 𑀓𑀣𑀺𑀢𑁄, 𑀤𑀼𑀢𑀺𑀬𑁂 𑀅𑀧𑁆𑀧𑀲𑁆𑀲𑀼𑀢𑀔𑀻𑀡𑀸𑀲𑀯𑁄, 𑀢𑀢𑀺𑀬𑁂 𑀩𑀳𑀼𑀲𑁆𑀲𑀼𑀢𑀤𑀼𑀲𑁆𑀲𑀻𑀮𑁄, 𑀘𑀢𑀼𑀢𑁆𑀣𑁂 𑀩𑀳𑀼𑀲𑁆𑀲𑀼𑀢𑀔𑀻𑀡𑀸𑀲𑀯𑁄.
𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑁄𑀢𑀺 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀻. 𑀲𑀻𑀮𑀢𑁄 𑀘 𑀲𑀼𑀢𑁂𑀦 𑀘𑀸𑀢𑀺 𑀲𑀻𑀮𑀪𑀸𑀕𑁂𑀦 𑀘 𑀲𑀼𑀢𑀪𑀸𑀕𑁂𑀦 𑀘 ‘‘𑀅𑀬𑀁 𑀤𑀼𑀲𑁆𑀲𑀻𑀮𑁄 𑀅𑀧𑁆𑀧𑀲𑁆𑀲𑀼𑀢𑁄’’𑀢𑀺 𑀏𑀯𑀁 𑀢𑀁 𑀕𑀭𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀲𑀫𑁆𑀧𑀚𑁆𑀚𑀢𑁂 𑀲𑀼𑀢𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑀲𑁆𑀫𑀸 𑀢𑁂𑀦 𑀲𑀼𑀢𑁂𑀦 𑀲𑀼𑀢𑀓𑀺𑀘𑁆𑀘𑀁 𑀓𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀲𑀼𑀢𑀁 𑀲𑀫𑁆𑀧𑀚𑁆𑀚𑀢𑀺 𑀦𑀸𑀫. 𑀦𑀸𑀲𑁆𑀲 𑀲𑀫𑁆𑀧𑀚𑁆𑀚𑀢𑁂𑀢𑀺 𑀲𑀼𑀢𑀓𑀺𑀘𑁆𑀘𑀲𑁆𑀲 𑀅𑀓𑀢𑀢𑁆𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺. 𑀥𑀫𑁆𑀫𑀥𑀭𑀦𑁆𑀢𑀺 𑀲𑀼𑀢𑀥𑀫𑁆𑀫𑀸𑀦𑀁 𑀆𑀥𑀸𑀭𑀪𑀽𑀢𑀁. 𑀲𑀧𑁆𑀧𑀜𑁆𑀜𑀦𑁆𑀢𑀺 𑀲𑀼𑀧𑀜𑁆𑀜𑀁. 𑀦𑁂𑀓𑁆𑀔𑀁 𑀚𑀫𑁆𑀩𑁄𑀦𑀤𑀲𑁆𑀲𑁂𑀯𑀸𑀢𑀺 𑀚𑀫𑁆𑀩𑀼𑀦𑀤𑀁 𑀯𑀼𑀘𑁆𑀘𑀢𑀺 𑀚𑀸𑀢𑀺𑀲𑀼𑀯𑀡𑁆𑀡𑀁, 𑀢𑀲𑁆𑀲 𑀚𑀫𑁆𑀩𑀼𑀦𑀤𑀲𑁆𑀲 𑀦𑁂𑀓𑁆𑀔𑀁 𑀯𑀺𑀬, 𑀧𑀜𑁆𑀘𑀲𑀼𑀯𑀡𑁆𑀡𑀧𑀭𑀺𑀫𑀸𑀡𑀁 𑀲𑀼𑀯𑀡𑁆𑀡𑀖𑀝𑀺𑀓𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄.
𑁭. 𑀲𑁄𑀪𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁭. 𑀲𑀢𑁆𑀢𑀫𑁂 𑀯𑀺𑀬𑀢𑁆𑀢𑀸𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀯𑀺𑀦𑀻𑀢𑀸𑀢𑀺 𑀯𑀺𑀦𑀬𑀁 𑀉𑀧𑁂𑀢𑀸 𑀲𑀼𑀯𑀺𑀦𑀻𑀢𑀸. 𑀯𑀺𑀲𑀸𑀭𑀤𑀸𑀢𑀺 𑀯𑁂𑀲𑀸𑀭𑀚𑁆𑀚𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀥𑀫𑁆𑀫𑀥𑀭𑀸𑀢𑀺 𑀲𑀼𑀢𑀥𑀫𑁆𑀫𑀸𑀦𑀁 𑀆𑀥𑀸𑀭𑀪𑀽𑀢𑀸. 𑀪𑀺𑀓𑁆𑀔𑀼 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀕𑀸𑀣𑀸𑀬 𑀓𑀺𑀜𑁆𑀘𑀸𑀧𑀺 𑀏𑀓𑁂𑀓𑀲𑁆𑀲𑁂𑀯 𑀏𑀓𑁂𑀓𑁄 𑀕𑀼𑀡𑁄 𑀓𑀣𑀺𑀢𑁄, 𑀲𑀩𑁆𑀩𑁂𑀲𑀁 𑀧𑀦 𑀲𑀩𑁆𑀩𑁂𑀧𑀺 𑀯𑀝𑁆𑀝𑀦𑁆𑀢𑀻𑀢𑀺.
𑁮. 𑀯𑁂𑀲𑀸𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸
𑁮. 𑀅𑀝𑁆𑀞𑀫𑁂 𑀯𑁂𑀲𑀸𑀭𑀚𑁆𑀚𑀸𑀦𑀻𑀢𑀺 𑀏𑀢𑁆𑀣 𑀲𑀸𑀭𑀚𑁆𑀚𑀧𑀝𑀺𑀧𑀓𑁆𑀔𑁄 𑀯𑁂𑀲𑀸𑀭𑀚𑁆𑀚𑀁, 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀭𑀚𑁆𑀚𑀸𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁. 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀦𑀺𑀲𑀪𑁄, 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀯𑀯𑀢𑁆𑀣𑀸𑀦𑀁. 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄𑀯 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.
𑀧𑀭𑀺𑀲𑀸𑀲𑀽𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺, 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀤𑀲𑁆𑀲𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀲𑀳𑀦𑀢𑁄 𑀘 𑀳𑀦𑀦𑀢𑁄 𑀘 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄 𑀧𑀭𑀧𑁆𑀧𑀯𑀸𑀤𑀸𑀦𑀜𑁆𑀘 𑀳𑀦𑀦𑀢𑁄 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀲𑀻𑀳𑀦𑀸𑀤𑀁. 𑀢𑀢𑁆𑀣 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 ‘‘𑀇𑀢𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺.
𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀯𑀺𑀲𑀼𑀤𑁆𑀥𑀁. 𑀘𑀓𑁆𑀓𑀲𑀤𑁆𑀤𑁄 𑀧𑀦𑀸𑀬𑀁 𑁋
‘‘𑀲𑀫𑁆𑀧𑀢𑁆𑀢𑀺𑀬𑀁 𑀮𑀓𑁆𑀔𑀡𑁂 𑀘, 𑀭𑀣𑀗𑁆𑀕𑁂 𑀇𑀭𑀺𑀬𑀸𑀧𑀣𑁂;
𑀤𑀸𑀦𑁂 𑀭𑀢𑀦𑀥𑀫𑁆𑀫𑀽𑀭-𑀘𑀓𑁆𑀓𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺;
𑀥𑀫𑁆𑀫𑀘𑀓𑁆𑀓𑁂 𑀇𑀥 𑀫𑀢𑁄, 𑀢𑀜𑁆𑀘 𑀤𑁆𑀯𑁂𑀥𑀸 𑀯𑀺𑀪𑀸𑀯𑀬𑁂’’.
‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁫) 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 (𑀥. 𑀧. 𑁧) 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 (𑀤𑀻. 𑀦𑀺. 𑁨.𑁨𑁪𑁩; 𑀫. 𑀦𑀺. 𑁩.𑁨𑁫𑁬) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨) 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀏𑀢𑁆𑀣 𑀉𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁬𑁧; 𑀲𑀁. 𑀦𑀺. 𑁨.𑁧𑁬𑁨) 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. 𑀇𑀥 𑀧𑀦𑀸𑀬𑀁 𑀥𑀫𑁆𑀫𑀘𑀓𑁆𑀓𑁂 𑀫𑀢𑁄.
𑀢𑀁 𑀧𑀦𑁂𑀢𑀁 𑀥𑀫𑁆𑀫𑀘𑀓𑁆𑀓𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑀜𑁆𑀘 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁, 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑀻𑀧𑀗𑁆𑀓𑀭𑀢𑁄 𑀧𑀝𑁆𑀞𑀸𑀬 𑀯𑀸 𑀬𑀸𑀯 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀑𑀭𑀲𑀜𑀸𑀡𑀁.
𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑁂 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀯𑀁 𑀧𑀝𑀺𑀚𑀸𑀦𑀢𑁄 𑀢𑀯. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀇𑀫𑁂 𑀦𑀸𑀫 𑀥𑀫𑁆𑀫𑀸 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸. 𑀢𑀢𑁆𑀭 𑀯𑀢𑀸𑀢𑀺 𑀢𑁂𑀲𑀼 ‘‘𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀯𑀁 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀦𑀸 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦. 𑀦𑀺𑀫𑀺𑀢𑁆𑀢𑀫𑁂𑀢𑀦𑁆𑀢𑀺 𑀏𑀢𑁆𑀣 𑀧𑀼𑀕𑁆𑀕𑀮𑁄𑀧𑀺 𑀥𑀫𑁆𑀫𑁄𑀧𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺, 𑀬𑁄 𑀫𑀁 𑀧𑀝𑀺𑀘𑁄𑀤𑁂𑀲𑁆𑀲𑀢𑀺. 𑀢𑀁 𑀥𑀫𑁆𑀫𑀁 𑀦 𑀧𑀲𑁆𑀲𑀸𑀫𑀺, 𑀬𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀫𑀁 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀔𑁂𑀫𑀧𑁆𑀧𑀢𑁆𑀢𑁄𑀢𑀺 𑀔𑁂𑀫𑀁 𑀧𑀢𑁆𑀢𑁄. 𑀲𑁂𑀲𑀧𑀤𑀤𑁆𑀯𑀬𑀁 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀫𑁆𑀧𑁂𑀢𑀁 𑀯𑁂𑀲𑀸𑀭𑀚𑁆𑀚𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑀩𑀮𑀲𑁆𑀲 𑀳𑀺 ‘‘𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘𑁄𑀤𑀓𑀁 𑀧𑀼𑀕𑁆𑀕𑀮𑀁 𑀯𑀸 𑀘𑁄𑀤𑀦𑀸𑀓𑀸𑀭𑀡𑀁 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀥𑀫𑁆𑀫𑀁 𑀯𑀸 𑀅𑀧𑀲𑁆𑀲𑀢𑁄 ‘‘𑀲𑀪𑀸𑀯𑀩𑀼𑀤𑁆𑀥𑁄𑀬𑁂𑀯 𑀯𑀢 𑀲𑀫𑀸𑀦𑁄 𑀅𑀳𑀁 𑀩𑀼𑀤𑁆𑀥𑁄𑀲𑁆𑀫𑀻𑀢𑀺 𑀯𑀤𑀸𑀫𑀻’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀮𑀯𑀢𑀭𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀯𑁂𑀲𑀸𑀭𑀚𑁆𑀚𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬 ‘‘𑀔𑁂𑀫𑀧𑁆𑀧𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀧𑀦 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀢𑁂 𑀅𑀢𑁆𑀣𑀢𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀺 𑀅𑀦𑁆𑀢𑀫𑀲𑁄 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑁆𑀧𑀺 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀇𑀥 𑀧𑀦 𑀫𑁂𑀣𑀼𑀦𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀫𑁂𑀣𑀼𑀦𑀁 𑀲𑁂𑀯𑀢𑁄 𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀲𑁆𑀲𑀁𑀲𑀬𑀫𑁂𑀯 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺.
𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬𑀸𑀢𑀺 𑀭𑀸𑀕𑀓𑁆𑀔𑀬𑀸𑀤𑀻𑀲𑀼 𑀬𑀲𑁆𑀲 𑀅𑀢𑁆𑀣𑀸𑀬. 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀅𑀲𑀼𑀪𑀪𑀸𑀯𑀦𑀸𑀤𑀺𑀥𑀫𑁆𑀫𑁄 𑀓𑀣𑀺𑀢𑁄. 𑀢𑀢𑁆𑀭 𑀯𑀢 𑀫𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀫𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.
𑀯𑀸𑀤𑀧𑀣𑀸𑀢𑀺 𑀯𑀸𑀤𑀸𑀬𑁂𑀯. 𑀧𑀼𑀣𑀽𑀢𑀺 𑀩𑀳𑀽. 𑀲𑀺𑀢𑀸𑀢𑀺 𑀉𑀧𑀦𑀺𑀩𑀤𑁆𑀥𑀸 𑀅𑀪𑀺𑀲𑀗𑁆𑀔𑀢𑀸. 𑀅𑀣 𑀯𑀸 𑀧𑀼𑀣𑀼𑀲𑁆𑀲𑀺𑀢𑀸𑀢𑀺 𑀧𑀼𑀣𑀼𑀪𑀸𑀯𑀁 𑀲𑀺𑀢𑀸 𑀉𑀧𑀕𑀢𑀸, 𑀧𑀼𑀣𑀽𑀳𑀺 𑀯𑀸 𑀲𑀺𑀢𑀸𑀢𑀺𑀧𑀺 𑀧𑀼𑀣𑀼𑀲𑁆𑀲𑀺𑀢𑀸. 𑀬𑀁 𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑀭𑀳𑀺𑀧𑀺 𑀬𑀁 𑀯𑀸𑀤𑀧𑀣𑀁 𑀦𑀺𑀲𑁆𑀲𑀺𑀢𑀸. 𑀦 𑀢𑁂 𑀪𑀯𑀦𑁆𑀢𑀻𑀢𑀺 𑀢𑁂 𑀯𑀸𑀤𑀧𑀣𑀸 𑀦 𑀪𑀯𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀤𑁂𑀲𑀦𑀸𑀜𑀸𑀡𑀲𑁆𑀲𑀧𑀺 𑀧𑀝𑀺𑀯𑁂𑀥𑀜𑀸𑀡𑀲𑁆𑀲𑀧𑀺 𑀏𑀢𑀁 𑀦𑀸𑀫𑀁. 𑀢𑁂𑀲𑀼 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁, 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁. 𑀓𑁂𑀯𑀮𑀻𑀢𑀺 𑀲𑀓𑀮𑀕𑀼𑀡𑀲𑀫𑀦𑁆𑀦𑀸𑀕𑀢𑁄. 𑀢𑀸𑀤𑀺𑀲𑀦𑁆𑀢𑀺 𑀢𑀣𑀸𑀯𑀺𑀥𑀁.
𑁯. 𑀢𑀡𑁆𑀳𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸
𑁯. 𑀦𑀯𑀫𑁂 𑀉𑀧𑁆𑀧𑀚𑁆𑀚𑀢𑀺 𑀏𑀢𑁂𑀲𑀽𑀢𑀺 𑀉𑀧𑁆𑀧𑀸𑀤𑀸. 𑀓𑀸 𑀉𑀧𑁆𑀧𑀚𑁆𑀚𑀢𑀺? 𑀢𑀡𑁆𑀳𑀸. 𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑀸 𑀢𑀡𑁆𑀳𑀼𑀧𑁆𑀧𑀸𑀤𑀸, 𑀢𑀡𑁆𑀳𑀸𑀯𑀢𑁆𑀣𑀽𑀦𑀺 𑀢𑀡𑁆𑀳𑀸𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀳𑁂𑀢𑀽𑀢𑀺 ‘‘𑀓𑀢𑁆𑀣 𑀫𑀦𑀸𑀧𑀁 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀻𑀯𑀭𑀓𑀸𑀭𑀡𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺𑀪𑀯𑀸𑀪𑀯𑀳𑁂𑀢𑀽𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀣𑀸 𑀘𑀻𑀯𑀭𑀸𑀤𑀺𑀳𑁂𑀢𑀼, 𑀏𑀯𑀁 𑀪𑀯𑀸𑀪𑀯𑀳𑁂𑀢𑀼𑀧𑀻𑀢𑀺 𑀅𑀢𑁆𑀣𑁄. 𑀪𑀯𑀸𑀪𑀯𑁄𑀢𑀺 𑀘𑁂𑀢𑁆𑀣 𑀧𑀡𑀻𑀢𑀢𑀭𑀸𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀼 𑀧𑀡𑀻𑀢𑀢𑀭𑀧𑀡𑀻𑀢𑀢𑀫𑀪𑀯𑁄𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯.
𑀢𑀡𑁆𑀳𑀸𑀤𑀼𑀢𑀺𑀬𑁄𑀢𑀺 𑀅𑀬𑀜𑁆𑀳𑀺 𑀲𑀢𑁆𑀢𑁄 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀲𑀁𑀲𑀭𑀦𑁆𑀢𑁄 𑀦 𑀏𑀓𑀓𑁄𑀯 𑀲𑀁𑀲𑀭𑀢𑀺, 𑀢𑀡𑁆𑀳𑀁 𑀧𑀦 𑀤𑀼𑀢𑀺𑀬𑀺𑀓𑀁 𑀮𑀪𑀦𑁆𑀢𑁄𑀯 𑀲𑀁𑀲𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀤𑀼𑀢𑀺𑀬𑁄’’𑀢𑀺. 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀏𑀢𑁆𑀣 𑀇𑀢𑁆𑀣𑀪𑀸𑀯𑁄 𑀦𑀸𑀫 𑀅𑀬𑀁 𑀅𑀢𑁆𑀢𑀪𑀸𑀯𑁄, 𑀅𑀜𑁆𑀜𑀣𑀸𑀪𑀸𑀯𑁄 𑀦𑀸𑀫 𑀅𑀦𑀸𑀕𑀢𑀢𑁆𑀢𑀪𑀸𑀯𑁄. 𑀏𑀯𑀭𑀽𑀧𑁄 𑀯𑀸 𑀅𑀜𑁆𑀜𑁄𑀧𑀺 𑀅𑀢𑁆𑀢𑀪𑀸𑀯𑁄 𑀇𑀢𑁆𑀣𑀪𑀸𑀯𑁄 𑀦𑀸𑀫, 𑀦 𑀏𑀯𑀭𑀽𑀧𑁄 𑀅𑀜𑁆𑀜𑀣𑀸𑀪𑀸𑀯𑁄 𑀦𑀸𑀫. 𑀢𑀁 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁. 𑀲𑀁𑀲𑀸𑀭𑀦𑁆𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀧𑀝𑀺𑀧𑀸𑀝𑀺𑀁. 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀦𑀸𑀢𑀺𑀓𑁆𑀓𑀫𑀢𑀺. 𑀏𑀯𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀏𑀯𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼 𑀆𑀤𑀻𑀦𑀯𑀁 𑀚𑀸𑀦𑀺𑀢𑁆𑀯𑀸. 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀦𑁆𑀢𑀺 𑀢𑀡𑁆𑀳𑀁 𑀘 ‘‘𑀅𑀬𑀁 𑀯𑀝𑁆𑀝𑀤𑀼𑀓𑁆𑀔𑀲𑀫𑁆𑀪𑀽𑀢𑁄 𑀲𑀪𑀸𑀯𑁄 𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸. 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀢𑀁 𑀔𑀻𑀡𑀸𑀲𑀯𑀁 𑀣𑁄𑀫𑁂𑀦𑁆𑀢𑁄 𑀯𑀻𑀢𑀢𑀡𑁆𑀳𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀸𑀤𑀸𑀦𑁄𑀢𑀺 𑀦𑀺𑀕𑁆𑀕𑀳𑀡𑁄. 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑁂 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀲𑀼𑀢𑁆𑀢𑀦𑁆𑀢𑁂 𑀯𑀝𑁆𑀝𑀁 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.
𑁧𑁦. 𑀬𑁄𑀕𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁦. 𑀤𑀲𑀫𑁂 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀓𑀸𑀫𑀬𑁄𑀕𑁄𑀢𑀺𑀆𑀤𑀻𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀬𑁄𑀕𑁄. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀪𑀯𑀬𑁄𑀕𑁄, 𑀢𑀣𑀸 𑀛𑀸𑀦𑀦𑀺𑀓𑀦𑁆𑀢𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀘 𑀭𑀸𑀕𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀘 𑀤𑀺𑀝𑁆𑀞𑀺𑀬𑁄𑀕𑁄. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀬𑁄𑀕𑁄. 𑀓𑀸𑀫𑁂𑀲𑀼 𑀯𑀸 𑀬𑁄𑀚𑁂𑀢𑀻𑀢𑀺 𑀓𑀸𑀫𑀬𑁄𑀕𑁄. 𑀪𑀯𑁂𑀲𑀼 𑀬𑁄𑀚𑁂𑀢𑀻𑀢𑀺 𑀪𑀯𑀬𑁄𑀕𑁄. 𑀤𑀺𑀝𑁆𑀞𑀻𑀲𑀼 𑀬𑁄𑀚𑁂𑀢𑀻𑀢𑀺 𑀤𑀺𑀝𑁆𑀞𑀺𑀬𑁄𑀕𑁄. 𑀅𑀯𑀺𑀚𑁆𑀚𑀸𑀬 𑀬𑁄𑀚𑁂𑀢𑀻𑀢𑀺 𑀅𑀯𑀺𑀚𑁆𑀚𑀸𑀬𑁄𑀕𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀥𑀫𑁆𑀫𑀸𑀦𑀁𑀬𑁂𑀯𑁂𑀢𑀁 𑀅𑀥𑀺𑀯𑀘𑀦𑀁.
𑀇𑀤𑀸𑀦𑀺 𑀢𑁂 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀼𑀤𑀬𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀁. 𑀅𑀢𑁆𑀣𑀗𑁆𑀕𑀫𑀦𑁆𑀢𑀺 𑀪𑁂𑀤𑀁. 𑀅𑀲𑁆𑀲𑀸𑀤𑀦𑁆𑀢𑀺 𑀫𑀥𑀼𑀭𑀪𑀸𑀯𑀁. 𑀆𑀤𑀻𑀦𑀯𑀦𑁆𑀢𑀺 𑀅𑀫𑀥𑀼𑀭𑀪𑀸𑀯𑀁 𑀤𑁄𑀲𑀁. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑀺𑀲𑁆𑀲𑀝𑀪𑀸𑀯𑀁. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀓𑀸𑀫𑀭𑀸𑀕𑁄𑀢𑀺 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀭𑀸𑀕𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀲𑁂𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀬𑁄𑀕𑁄𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑀁 𑀓𑀸𑀫𑁂𑀲𑀼 𑀬𑁄𑀚𑀦𑀓𑀸𑀭𑀡𑀁 𑀩𑀦𑁆𑀥𑀦𑀓𑀸𑀭𑀡𑀁 𑀯𑀼𑀘𑁆𑀘𑀢𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀓𑀸𑀭𑀡𑀸𑀦𑀁. 𑀅𑀯𑀺𑀚𑁆𑀚𑀸 𑀅𑀜𑁆𑀜𑀸𑀡𑀦𑁆𑀢𑀺 𑀜𑀸𑀡𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀅𑀯𑀺𑀚𑁆𑀚𑀸. 𑀇𑀢𑀺 𑀓𑀸𑀫𑀬𑁄𑀕𑁄𑀢𑀺 𑀏𑀢𑁆𑀣 𑀇𑀢𑀺 𑀲𑀤𑁆𑀤𑁄 𑀘𑀢𑀽𑀳𑀺𑀧𑀺 𑀬𑁄𑀕𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀏𑀯𑀁 𑀓𑀸𑀫𑀬𑁄𑀕𑁄, 𑀏𑀯𑀁 𑀪𑀯𑀬𑁄𑀕𑁄’’𑀢𑀺. 𑀲𑀁𑀬𑀼𑀢𑁆𑀢𑁄𑀢𑀺 𑀧𑀭𑀺𑀯𑀸𑀭𑀺𑀢𑁄. 𑀧𑀸𑀧𑀓𑁂𑀳𑀻𑀢𑀺 𑀮𑀸𑀫𑀓𑁂𑀳𑀺. 𑀅𑀓𑀼𑀲𑀮𑁂𑀳𑀻𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂𑀳𑀺. 𑀲𑀁𑀓𑀺𑀮𑁂𑀲𑀺𑀓𑁂𑀳𑀻𑀢𑀺 𑀲𑀁𑀓𑀺𑀮𑁂𑀲𑀦𑀓𑁂𑀳𑀺, 𑀧𑀲𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀲𑀦𑁆𑀦𑀪𑀸𑀯𑀤𑀽𑀲𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀧𑁄𑀦𑁄𑀩𑁆𑀪𑀯𑀺𑀓𑁂𑀳𑀻𑀢𑀺 𑀧𑀼𑀦𑀩𑁆𑀪𑀯𑀦𑀺𑀩𑁆𑀩𑀢𑁆𑀢𑀓𑁂𑀳𑀺. 𑀲𑀤𑀭𑁂𑀳𑀻𑀢𑀺 𑀲𑀤𑀭𑀣𑁂𑀳𑀺. 𑀤𑀼𑀓𑁆𑀔𑀯𑀺𑀧𑀸𑀓𑁂𑀳𑀻𑀢𑀺 𑀯𑀺𑀧𑀸𑀓𑀓𑀸𑀮𑁂 𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑁂𑀳𑀺. 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀓𑁂𑀳𑀻𑀢𑀺 𑀅𑀦𑀸𑀕𑀢𑁂 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀦𑀺𑀩𑁆𑀩𑀢𑁆𑀢𑀓𑁂𑀳𑀺. 𑀢𑀲𑁆𑀫𑀸 𑀅𑀬𑁄𑀕𑀓𑁆𑀔𑁂𑀫𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀲𑁆𑀫𑀸 𑀅𑀧𑁆𑀧𑀳𑀻𑀦𑀬𑁄𑀕𑁄 𑀧𑀼𑀕𑁆𑀕𑀮𑁄 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀅𑀦𑀥𑀺𑀕𑀢𑀢𑁆𑀢𑀸 𑀦 𑀬𑁄𑀕𑀓𑁆𑀔𑁂𑀫𑀻𑀢𑀺 𑀯𑀼𑀘𑁆𑀘𑀢𑀺.
𑀯𑀺𑀲𑀁𑀬𑁄𑀕𑁄𑀢𑀺 𑀯𑀺𑀲𑀁𑀬𑁄𑀚𑀦𑀓𑀸𑀭𑀡𑀸𑀦𑀺. 𑀓𑀸𑀫𑀬𑁄𑀕𑀯𑀺𑀲𑀁𑀬𑁄𑀕𑁄𑀢𑀺 𑀓𑀸𑀫𑀬𑁄𑀕𑀢𑁄 𑀯𑀺𑀲𑀁𑀬𑁄𑀚𑀦𑀓𑀸𑀭𑀡𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀲𑀼𑀪𑀚𑁆𑀛𑀸𑀦𑀁 𑀓𑀸𑀫𑀬𑁄𑀕𑀯𑀺𑀲𑀁𑀬𑁄𑀕𑁄, 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀥𑀺𑀕𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀏𑀓𑀦𑁆𑀢𑁂𑀦𑁂𑀯 𑀓𑀸𑀫𑀬𑁄𑀕𑀯𑀺𑀲𑀁𑀬𑁄𑀕𑁄 𑀦𑀸𑀫. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀪𑀯𑀬𑁄𑀕𑀯𑀺𑀲𑀁𑀬𑁄𑀕𑁄 𑀦𑀸𑀫, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀤𑀺𑀝𑁆𑀞𑀺𑀬𑁄𑀕𑀯𑀺𑀲𑀁𑀬𑁄𑀕𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀯𑀺𑀚𑁆𑀚𑀸𑀬𑁄𑀕𑀯𑀺𑀲𑀁𑀬𑁄𑀕𑁄 𑀦𑀸𑀫. 𑀇𑀤𑀸𑀦𑀺 𑀢𑁂 𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.
𑀪𑀯𑀬𑁄𑀕𑁂𑀦 𑀘𑀽𑀪𑀬𑀦𑁆𑀢𑀺 𑀪𑀯𑀬𑁄𑀕𑁂𑀦 𑀘 𑀲𑀁𑀬𑀼𑀢𑁆𑀢𑀸, 𑀓𑀺𑀜𑁆𑀘𑀺 𑀪𑀺𑀬𑁆𑀬𑁄 𑀉𑀪𑀬𑁂𑀦𑀸𑀧𑀺 𑀲𑀫𑁆𑀧𑀬𑀼𑀢𑁆𑀢𑀸, 𑀬𑁂𑀦 𑀓𑁂𑀦𑀘𑀺 𑀬𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀓𑁆𑀔𑀢𑀸𑀢𑀺 𑀧𑀼𑀭𑀢𑁄 𑀓𑀢𑀸, 𑀧𑀭𑀺𑀯𑀸𑀭𑀺𑀢𑀸 𑀯𑀸. 𑀓𑀸𑀫𑁂 𑀧𑀭𑀺𑀜𑁆𑀜𑀸𑀬𑀸𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀪𑀯𑀬𑁄𑀕𑀜𑁆𑀘 𑀲𑀩𑁆𑀩𑀲𑁄𑀢𑀺 𑀪𑀯𑀬𑁄𑀕𑀜𑁆𑀘 𑀲𑀩𑁆𑀩𑀫𑁂𑀯 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀲𑀫𑀽𑀳𑀘𑁆𑀘𑀸𑀢𑀺 𑀲𑀫𑀽𑀳𑀦𑀺𑀢𑁆𑀯𑀸. 𑀯𑀺𑀭𑀸𑀚𑀬𑀦𑁆𑀢𑀺 𑀯𑀺𑀭𑀸𑀚𑁂𑀦𑁆𑀢𑁄, 𑀯𑀺𑀭𑀸𑀚𑁂𑀢𑁆𑀯𑀸 𑀯𑀸. ‘‘𑀯𑀺𑀭𑀸𑀚𑁂𑀦𑁆𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑁂 𑀫𑀕𑁆𑀕𑁄 𑀓𑀣𑀺𑀢𑁄 𑀳𑁄𑀢𑀺, ‘‘𑀯𑀺𑀭𑀸𑀚𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 𑀨𑀮𑀁. 𑀫𑀼𑀦𑀻𑀢𑀺 𑀔𑀻𑀡𑀸𑀲𑀯𑀫𑀼𑀦𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺.
𑀪𑀡𑁆𑀟𑀕𑀸𑀫𑀯𑀕𑁆𑀕𑁄 𑀧𑀞𑀫𑁄.
𑁨. 𑀘𑀭𑀯𑀕𑁆𑀕𑁄
𑁧. 𑀘𑀭𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀥𑀺𑀯𑀸𑀲𑁂𑀢𑀻𑀢𑀺 𑀘𑀺𑀢𑁆𑀢𑀁 𑀅𑀥𑀺𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀺. 𑀦𑀧𑁆𑀧𑀚𑀳𑀢𑀻𑀢𑀺 𑀦 𑀧𑀭𑀺𑀘𑁆𑀘𑀚𑀢𑀺. 𑀦 𑀯𑀺𑀦𑁄𑀤𑁂𑀢𑀻𑀢𑀺 𑀦 𑀦𑀻𑀳𑀭𑀢𑀺. 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀻𑀢𑀺 𑀦 𑀯𑀺𑀕𑀢𑀦𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑀭𑀺𑀯𑀝𑀼𑀫𑀁 𑀓𑀭𑁄𑀢𑀺. 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀦 𑀅𑀦𑀼𑀅𑀪𑀸𑀯𑀁 𑀅𑀯𑀟𑁆𑀠𑀺𑀁 𑀯𑀺𑀦𑀸𑀲𑀁 𑀕𑀫𑁂𑀢𑀺. 𑀘𑀭𑀫𑁆𑀧𑀻𑀢𑀺 𑀘𑀭𑀦𑁆𑀢𑁄𑀧𑀺. 𑀅𑀦𑀸𑀢𑀸𑀧𑀻𑀢𑀺 𑀦𑀺𑀩𑁆𑀩𑀻𑀭𑀺𑀬𑁄. 𑀅𑀦𑁄𑀢𑁆𑀢𑀸𑀧𑀻𑀢𑀺 𑀉𑀧𑀯𑀸𑀤𑀪𑀬𑀭𑀳𑀺𑀢𑁄. 𑀲𑀢𑀢𑀦𑁆𑀢𑀺 𑀦𑀺𑀘𑁆𑀘𑀁. 𑀲𑀫𑀺𑀢𑀦𑁆𑀢𑀺 𑀦𑀺𑀭𑀦𑁆𑀢𑀭𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀁 𑀜𑀢𑁆𑀯𑀸 𑀲𑀼𑀓𑁆𑀓𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀕𑀸𑀣𑀸𑀲𑀼 𑀕𑁂𑀳𑀦𑀺𑀲𑁆𑀲𑀺𑀢𑀦𑁆𑀢𑀺 𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑀁. 𑀫𑁄𑀳𑀦𑁂𑀬𑁆𑀬𑁂𑀲𑀽𑀢𑀺 𑀫𑁄𑀳𑀚𑀦𑀓𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀅𑀪𑀩𑁆𑀩𑁄𑀢𑀺 𑀅𑀪𑀸𑀚𑀦𑀪𑀽𑀢𑁄. 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀗𑁆𑀔𑀸𑀢𑀁 𑀉𑀢𑁆𑀢𑀫𑀜𑀸𑀡𑀁 𑀨𑀼𑀲𑀺𑀢𑀼𑀁.
𑁨. 𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁨. 𑀤𑀼𑀢𑀺𑀬𑁂 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀸. 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸𑀢𑀺 𑀧𑀭𑀺𑀧𑀼𑀡𑁆𑀡𑀧𑀸𑀢𑀺𑀫𑁄𑀓𑁆𑀔𑀸. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀁𑀯𑀼𑀢𑀸 𑀧𑀺𑀳𑀺𑀢𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣. 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸𑀢𑀺 𑀆𑀘𑀸𑀭𑁂𑀦 𑀘 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑀸 𑀲𑀫𑀼𑀧𑀸𑀕𑀢𑀸 𑀪𑀯𑀣. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀽𑀢𑀺 𑀅𑀡𑀼𑀧𑁆𑀧𑀫𑀸𑀡𑁂𑀲𑀼 𑀤𑁄𑀲𑁂𑀲𑀼. 𑀪𑀬𑀤𑀲𑁆𑀲𑀸𑀯𑀺𑀦𑁄𑀢𑀺 𑀢𑀸𑀦𑀺 𑀅𑀡𑀼𑀫𑀢𑁆𑀢𑀸𑀦𑀺 𑀯𑀚𑁆𑀚𑀸𑀦𑀺 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑀸. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀣 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀲𑀫𑀸𑀤𑀸𑀢𑀩𑁆𑀩𑀁 𑀲𑀫𑀸𑀤𑀸𑀬 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀣. ‘‘𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁…𑀧𑁂… 𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 𑀏𑀢𑁆𑀢𑀓𑁂𑀦 𑀥𑀫𑁆𑀫𑀓𑁆𑀔𑀸𑀦𑁂𑀦 𑀲𑀺𑀓𑁆𑀔𑀢𑁆𑀢𑀬𑁂 𑀲𑀫𑀸𑀤𑀸𑀧𑁂𑀢𑁆𑀯𑀸 𑀘𑁂𑀯 𑀧𑀝𑀺𑀮𑀤𑁆𑀥𑀕𑀼𑀡𑁂𑀲𑀼 𑀘 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀉𑀢𑁆𑀢𑀭𑀺 𑀓𑀸𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀓𑀺𑀫𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀫𑀲𑁆𑀲𑀸𑀢𑀺 𑀓𑀺𑀁 𑀪𑀯𑁂𑀬𑁆𑀬.
𑀬𑀢𑀁 𑀘𑀭𑁂𑀢𑀺 𑀬𑀣𑀸 𑀘𑀭𑀦𑁆𑀢𑁄 𑀬𑀢𑁄 𑀳𑁄𑀢𑀺 𑀲𑀁𑀬𑀢𑁄, 𑀏𑀯𑀁 𑀘𑀭𑁂𑀬𑁆𑀬. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀘𑁆𑀙𑁂𑀢𑀺 𑀦𑀺𑀲𑀻𑀤𑁂𑀬𑁆𑀬. 𑀬𑀢𑀫𑁂𑀦𑀁 𑀧𑀲𑀸𑀭𑀬𑁂𑀢𑀺 𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀧𑀲𑀸𑀭𑁂𑀬𑁆𑀬, 𑀢𑀁 𑀬𑀢𑀁 𑀲𑀁𑀬𑀢𑀫𑁂𑀯 𑀓𑀢𑁆𑀯𑀸 𑀧𑀲𑀸𑀭𑁂𑀬𑁆𑀬. 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺. 𑀢𑀺𑀭𑀺𑀬𑀦𑁆𑀢𑀺 𑀫𑀚𑁆𑀛𑀁. 𑀅𑀧𑀸𑀘𑀻𑀦𑀦𑁆𑀢𑀺 𑀅𑀥𑁄. 𑀏𑀢𑁆𑀢𑀸𑀯𑀢𑀸 𑀅𑀢𑀻𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀦𑀸𑀕𑀢𑀸 𑀘 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀣𑀺𑀢𑀸. 𑀬𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀚𑀕𑀢𑁄 𑀕𑀢𑀻𑀢𑀺 𑀮𑁄𑀓𑀲𑁆𑀲 𑀦𑀺𑀧𑁆𑀨𑀢𑁆𑀢𑀺. 𑀲𑀫𑀯𑁂𑀓𑁆𑀔𑀺𑀢𑀸 𑀘 𑀥𑀫𑁆𑀫𑀸𑀦𑀁, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀦𑁆𑀢𑀺 𑀏𑀢𑁂𑀲𑀁 𑀲𑀩𑁆𑀩𑀮𑁄𑀓𑁂 𑀅𑀢𑀻𑀢𑀸𑀤𑀺𑀪𑁂𑀤𑀸𑀦𑀁 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀲𑀫𑀯𑁂𑀓𑁆𑀔𑀺𑀢𑀸. ‘‘𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀺, 𑀯𑀬𑀁 𑀧𑀲𑁆𑀲𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺 𑀮𑀓𑁆𑀔𑀡𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂𑀳𑀺 𑀲𑀫𑀧𑀜𑁆𑀜𑀸𑀲𑀸𑀬 𑀮𑀓𑁆𑀔𑀡𑁂𑀳𑀺 𑀲𑀫𑁆𑀫𑀸 𑀅𑀯𑁂𑀓𑁆𑀔𑀺𑀢𑀸 𑀳𑁄𑀢𑀺. 𑀘𑁂𑀢𑁄𑀲𑀫𑀣𑀲𑀸𑀫𑀻𑀘𑀺𑀦𑁆𑀢𑀺 𑀘𑀺𑀢𑁆𑀢𑀲𑀫𑀣𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀁. 𑀲𑀺𑀓𑁆𑀔𑀫𑀸𑀦𑀦𑁆𑀢𑀺 𑀧𑀝𑀺𑀧𑀚𑁆𑀚𑀫𑀸𑀦𑀁, 𑀧𑀽𑀭𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀺𑀢𑀢𑁆𑀢𑁄𑀢𑀺 𑀧𑁂𑀲𑀺𑀢𑀢𑁆𑀢𑁄. 𑀆𑀳𑀽𑀢𑀺 𑀓𑀣𑀬𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀻𑀮𑀁 𑀫𑀺𑀲𑁆𑀲𑀓𑀁 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀔𑀻𑀡𑀸𑀲𑀯𑁄 𑀓𑀣𑀺𑀢𑁄.
𑁩. 𑀧𑀥𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁩. 𑀢𑀢𑀺𑀬𑁂 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀻𑀢𑀺 𑀲𑀼𑀦𑁆𑀤𑀭𑀧𑀥𑀸𑀦𑀸𑀦𑀺 𑀉𑀢𑁆𑀢𑀫𑀯𑀻𑀭𑀺𑀬𑀸𑀦𑀺. 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀸. 𑀫𑀸𑀭𑀥𑁂𑀬𑁆𑀬𑀸𑀪𑀺𑀪𑀽𑀢𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀁 𑀫𑀸𑀭𑀥𑁂𑀬𑁆𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸. 𑀢𑁂 𑀅𑀲𑀺𑀢𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀅𑀦𑀺𑀲𑁆𑀲𑀺𑀢𑀸 𑀦𑀸𑀫. 𑀚𑀸𑀢𑀺𑀫𑀭𑀡𑀪𑀬𑀲𑁆𑀲𑀸𑀢𑀺 𑀚𑀸𑀢𑀺𑀜𑁆𑀘 𑀫𑀭𑀡𑀜𑁆𑀘 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀪𑀬𑀲𑁆𑀲, 𑀚𑀸𑀢𑀺𑀫𑀭𑀡𑀲𑀗𑁆𑀔𑀸𑀢𑀲𑁆𑀲𑁂𑀯 𑀯𑀸 𑀪𑀬𑀲𑁆𑀲. 𑀧𑀸𑀭𑀕𑀽𑀢𑀺 𑀧𑀸𑀭𑀗𑁆𑀕𑀢𑀸. 𑀢𑁂 𑀢𑀼𑀲𑀺𑀢𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀢𑀼𑀝𑁆𑀞𑀸 𑀦𑀸𑀫. 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀦𑁆𑀢𑀺 𑀲𑀲𑁂𑀦𑀓𑀁 𑀫𑀸𑀭𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀸. 𑀢𑁂 𑀅𑀦𑁂𑀚𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀏𑀚𑀸𑀬 𑀅𑀦𑁂𑀚𑀸 𑀦𑀺𑀘𑁆𑀘𑀮𑀸 𑀦𑀸𑀫. 𑀦𑀫𑀼𑀘𑀺𑀩𑀮𑀦𑁆𑀢𑀺 𑀫𑀸𑀭𑀩𑀮𑀁. 𑀉𑀧𑀸𑀢𑀺𑀯𑀢𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀲𑀼𑀔𑀺𑀢𑀸𑀢𑀺 𑀢𑁂 𑀔𑀻𑀡𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑀸 𑀦𑀸𑀫. 𑀢𑁂𑀦𑁂𑀯𑀸𑀳 𑁋
‘‘𑀲𑀼𑀔𑀺𑀢𑀸 𑀯𑀢 𑀅𑀭𑀳𑀦𑁆𑀢𑁄, 𑀢𑀡𑁆𑀳𑀸 𑀦𑁂𑀲𑀁 𑀦 𑀯𑀺𑀚𑁆𑀚𑀢𑀺;
𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀫𑁄𑀳𑀚𑀸𑀮𑀁 𑀧𑀤𑀸𑀮𑀺𑀢’’𑀦𑁆𑀢𑀺. (𑀲𑀁. 𑀦𑀺. 𑁩.𑁭𑁬);
𑁪. 𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁪. 𑀘𑀢𑀼𑀢𑁆𑀣𑁂 𑀧𑀥𑀸𑀦𑀸𑀦𑀻𑀢𑀺 𑀯𑀻𑀭𑀺𑀬𑀸𑀦𑀺. 𑀲𑀁𑀯𑀭𑀧𑁆𑀧𑀥𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀺 𑀲𑀁𑀯𑀭𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀧𑀳𑀸𑀦𑀧𑁆𑀧𑀥𑀸𑀦𑀦𑁆𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀧𑀚𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀪𑀸𑀯𑀦𑀸𑀧𑁆𑀧𑀥𑀸𑀦𑀦𑁆𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀦𑁆𑀢𑀺 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁.
𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀼 𑀯𑀺𑀯𑁂𑀓𑁄, 𑀯𑀺𑀭𑀸𑀕𑁄, 𑀦𑀺𑀭𑁄𑀥𑁄𑀢𑀺 𑀢𑀻𑀡𑀺𑀧𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀸𑀦𑀺. 𑀦𑀺𑀩𑁆𑀩𑀸𑀦𑀁 𑀳𑀺 𑀉𑀧𑀥𑀺𑀯𑀺𑀯𑁂𑀓𑀢𑁆𑀢𑀸 𑀯𑀺𑀯𑁂𑀓𑁄, 𑀢𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀯𑀺𑀭𑀚𑁆𑀚𑀦𑁆𑀢𑀻𑀢𑀺 𑀯𑀺𑀭𑀸𑀕𑁄, 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀦𑀺𑀭𑁄𑀥𑁄. 𑀢𑀲𑁆𑀫𑀸 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑀯𑀲𑁂𑀦 𑀯𑀸 𑀦𑀺𑀩𑁆𑀩𑀸𑀦𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.
𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀏𑀢𑁆𑀣 𑀤𑁆𑀯𑁂 𑀯𑁄𑀲𑁆𑀲𑀕𑁆𑀕𑀸 𑁋 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀘 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀘. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀭𑀸𑀕𑀁 𑀧𑀭𑀺𑀘𑁆𑀘𑀚𑀢𑀻𑀢𑀺 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄. 𑀫𑀕𑁆𑀕𑁄 𑀆𑀭𑀫𑁆𑀫𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄. 𑀢𑀲𑁆𑀫𑀸 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀬𑀣𑀸 𑀪𑀸𑀯𑀺𑀬𑀫𑀸𑀦𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑁄𑀲𑁆𑀲𑀕𑁆𑀕𑀢𑁆𑀣𑀸𑀬 𑀧𑀭𑀺𑀡𑀫𑀢𑀺, 𑀯𑀺𑀧𑀲𑁆𑀲𑀦𑀸𑀪𑀸𑀯𑀜𑁆𑀘 𑀫𑀕𑁆𑀕𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀢𑀁 𑀪𑀸𑀯𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀤𑁆𑀤𑀓𑀦𑁆𑀢𑀺 𑀮𑀤𑁆𑀥𑀓𑀁. 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀯𑀼𑀘𑁆𑀘𑀢𑀺 𑀅𑀝𑁆𑀞𑀺𑀓𑀲𑀜𑁆𑀜𑀸𑀤𑀺𑀯𑀲𑁂𑀦 𑀅𑀥𑀺𑀕𑀢𑁄 𑀲𑀫𑀸𑀥𑀺𑀬𑁂𑀯. 𑀅𑀦𑀼𑀭𑀓𑁆𑀔𑀢𑀻𑀢𑀺 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀥𑀫𑁆𑀫𑁂 𑀭𑀸𑀕𑀤𑁄𑀲𑀫𑁄𑀳𑁂 𑀲𑁄𑀥𑁂𑀦𑁆𑀢𑁄 𑀭𑀓𑁆𑀔𑀢𑀺. 𑀏𑀢𑁆𑀣 𑀘 𑀅𑀝𑁆𑀞𑀺𑀓𑀲𑀜𑁆𑀜𑀸𑀤𑀺𑀓𑀸 𑀧𑀜𑁆𑀘𑁂𑀯 𑀲𑀜𑁆𑀜𑀸 𑀯𑀼𑀢𑁆𑀢𑀸, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀤𑀲𑀧𑀺 𑀅𑀲𑀼𑀪𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁦𑁨 𑀆𑀤𑀬𑁄) 𑀯𑀼𑀢𑁆𑀢𑁄𑀬𑁂𑀯. 𑀕𑀸𑀣𑀸𑀬 𑀲𑀁𑀯𑀭𑀸𑀤𑀺𑀦𑀺𑀧𑁆𑀨𑀸𑀤𑀓𑀁 𑀯𑀻𑀭𑀺𑀬𑀫𑁂𑀯 𑀯𑀼𑀢𑁆𑀢𑀁. 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂𑀢𑀺 𑀤𑀼𑀓𑁆𑀔𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑁂𑀬𑁆𑀬𑀸𑀢𑀺.
𑁫. 𑀧𑀜𑁆𑀜𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁫. 𑀧𑀜𑁆𑀘𑀫𑁂 𑀅𑀕𑁆𑀕𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀉𑀢𑁆𑀢𑀫𑀧𑀜𑁆𑀜𑀢𑁆𑀢𑀺𑀬𑁄. 𑀅𑀢𑁆𑀢𑀪𑀸𑀯𑀻𑀦𑀦𑁆𑀢𑀺 𑀅𑀢𑁆𑀢𑀪𑀸𑀯𑀯𑀦𑁆𑀢𑀸𑀦𑀁. 𑀬𑀤𑀺𑀤𑀁 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄𑀢𑀺 𑀬𑁄 𑀏𑀲 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀅𑀬𑀁 𑀅𑀕𑁆𑀕𑁄𑀢𑀺. 𑀏𑀢𑁆𑀣 𑀭𑀸𑀳𑀼 𑀓𑀺𑀭 𑀅𑀲𑀼𑀭𑀺𑀦𑁆𑀤𑁄 𑀘𑀢𑁆𑀢𑀸𑀭𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀬𑁄𑀚𑀦𑀲𑀢𑀸𑀦𑀺 𑀉𑀘𑁆𑀘𑁄, 𑀩𑀸𑀳𑀦𑁆𑀢𑀭𑀫𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀸𑀦𑀺, 𑀳𑀢𑁆𑀣𑀢𑀮𑀧𑀸𑀤𑀢𑀮𑀸𑀦𑀁 𑀧𑀼𑀣𑀼𑀮𑀢𑀸 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺. 𑀅𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀺 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺, 𑀪𑀫𑀼𑀓𑀦𑁆𑀢𑀭𑀁 𑀧𑀡𑁆𑀡𑀸𑀲𑀬𑁄𑀚𑀦𑀁, 𑀦𑀮𑀸𑀝𑀁 𑀢𑀺𑀬𑁄𑀚𑀦𑀲𑀢𑀁, 𑀲𑀻𑀲𑀁 𑀦𑀯𑀬𑁄𑀚𑀦𑀲𑀢𑀁. 𑀓𑀸𑀫𑀪𑁄𑀕𑀻𑀦𑀁 𑀬𑀤𑀺𑀤𑀁 𑀭𑀸𑀚𑀸 𑀫𑀦𑁆𑀥𑀸𑀢𑀸𑀢𑀺 𑀬𑁄 𑀏𑀲 𑀭𑀸𑀚𑀸 𑀫𑀦𑁆𑀥𑀸𑀢𑀸 𑀦𑀸𑀫, 𑀅𑀬𑀁 𑀤𑀺𑀩𑁆𑀩𑁂𑀧𑀺 𑀫𑀸𑀦𑀼𑀲𑀓𑁂𑀧𑀺 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑀓𑀸𑀦𑀁 𑀲𑀢𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫. 𑀏𑀲 𑀳𑀺 𑀅𑀲𑀗𑁆𑀔𑁂𑀬𑁆𑀬𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀳𑀺𑀭𑀜𑁆𑀜𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀦𑁆𑀢𑁄 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀤𑀻𑀖𑀭𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀤𑁂𑀯𑀮𑁄𑀓𑁂 𑀧𑀦 𑀬𑀸𑀯 𑀙𑀢𑁆𑀢𑀺𑀁𑀲𑀸𑀬 𑀇𑀦𑁆𑀤𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀸𑀯 𑀧𑀡𑀻𑀢𑁂 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀻𑀢𑀺 𑀓𑀸𑀫𑀪𑁄𑀕𑀻𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀆𑀥𑀺𑀧𑀢𑁂𑀬𑁆𑀬𑀸𑀦𑀦𑁆𑀢𑀺 𑀅𑀥𑀺𑀧𑀢𑀺𑀝𑁆𑀞𑀸𑀦𑀁 𑀚𑁂𑀝𑁆𑀞𑀓𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀸𑀦𑀁. 𑀢𑀣𑀸𑀕𑀢𑁄 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀕𑀼𑀡𑁂𑀳𑀺 𑀢𑀣𑀸𑀕𑀢𑁄 𑀅𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄 𑀅𑀓𑁆𑀔𑀸𑀬𑀢𑀺.
𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀦𑁆𑀢𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑀺𑀤𑁆𑀥𑀺𑀬𑀸 𑀘 𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑁂𑀦 𑀬𑀲𑀲𑀸 𑀘 𑀚𑀮𑀦𑁆𑀢𑀸𑀦𑀁. 𑀉𑀤𑁆𑀥𑀁 𑀢𑀺𑀭𑀺𑀬𑀁 𑀅𑀧𑀸𑀘𑀻𑀦𑀦𑁆𑀢𑀺 𑀉𑀧𑀭𑀺 𑀘 𑀫𑀚𑁆𑀛𑁂 𑀘 𑀳𑁂𑀝𑁆𑀞𑀸 𑀘. 𑀬𑀸𑀯𑀢𑀸 𑀚𑀕𑀢𑁄 𑀕𑀢𑀻𑀢𑀺 𑀬𑀢𑁆𑀢𑀓𑀸 𑀮𑁄𑀓𑀦𑀺𑀧𑁆𑀨𑀢𑁆𑀢𑀺.
𑁬. 𑀲𑁄𑀔𑀼𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁬. 𑀙𑀝𑁆𑀞𑁂 𑀲𑁄𑀔𑀼𑀫𑁆𑀫𑀸𑀦𑀻𑀢𑀺 𑀲𑀼𑀔𑀼𑀫𑀮𑀓𑁆𑀔𑀡𑀧𑀝𑀺𑀯𑀺𑀚𑁆𑀛𑀦𑀓𑀸𑀦𑀺 𑀜𑀸𑀡𑀸𑀦𑀺. 𑀭𑀽𑀧𑀲𑁄𑀔𑀼𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀭𑀽𑀧𑁂 𑀲𑀡𑁆𑀳𑀲𑀼𑀔𑀼𑀫𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀧𑀭𑀫𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀢𑁂𑀦 𑀘 𑀭𑀽𑀧𑀲𑁄𑀔𑀼𑀫𑁆𑀫𑁂𑀦𑀸𑀢𑀺 𑀢𑁂𑀦 𑀬𑀸𑀯 𑀅𑀦𑀼𑀮𑁄𑀫𑀪𑀸𑀯𑀁 𑀧𑀢𑁆𑀢𑁂𑀦 𑀲𑀼𑀔𑀼𑀫𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀜𑀸𑀡𑁂𑀦. 𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀦𑀢𑁆𑀣𑀺𑀪𑀸𑀯𑁂𑀦𑁂𑀯 𑀦 𑀧𑀲𑁆𑀲𑀢𑀺. 𑀦 𑀧𑀢𑁆𑀣𑁂𑀢𑀻𑀢𑀺 𑀦𑀢𑁆𑀣𑀺𑀪𑀸𑀯𑁂𑀦𑁂𑀯 𑀦 𑀧𑀢𑁆𑀣𑁂𑀢𑀺. 𑀯𑁂𑀤𑀦𑀸𑀲𑁄𑀔𑀼𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.
𑀭𑀽𑀧𑀲𑁄𑀔𑀼𑀫𑁆𑀫𑀢𑀁 𑀜𑀢𑁆𑀯𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀡𑁆𑀳𑀲𑀼𑀔𑀼𑀫𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑁂𑀦 𑀜𑀸𑀡𑁂𑀦 𑀲𑀼𑀔𑀼𑀫𑀢𑀁 𑀚𑀸𑀦𑀺𑀢𑁆𑀯𑀸. 𑀯𑁂𑀤𑀦𑀸𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀘 𑀧𑀪𑀯𑀁 𑀚𑀸𑀦𑀺𑀢𑁆𑀯𑀸. 𑀲𑀜𑁆𑀜𑀸 𑀬𑀢𑁄 𑀲𑀫𑀼𑀤𑁂𑀢𑀻𑀢𑀺 𑀬𑀲𑁆𑀫𑀸 𑀓𑀸𑀭𑀡𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀫𑀼𑀤𑁂𑀢𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀜𑁆𑀘 𑀚𑀸𑀦𑀺𑀢𑁆𑀯𑀸. 𑀅𑀢𑁆𑀣𑀁 𑀕𑀘𑁆𑀙𑀢𑀺 𑀬𑀢𑁆𑀣 𑀘𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀭𑀼𑀚𑁆𑀛𑀢𑀺, 𑀢𑀜𑁆𑀘 𑀚𑀸𑀦𑀺𑀢𑁆𑀯𑀸. 𑀲𑀗𑁆𑀔𑀸𑀭𑁂 𑀧𑀭𑀢𑁄 𑀜𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀅𑀦𑀺𑀘𑁆𑀘𑀢𑀸𑀬 𑀮𑀼𑀚𑁆𑀚𑀦𑀪𑀸𑀯𑁂𑀦 𑀧𑀭𑀢𑁄 𑀚𑀸𑀦𑀺𑀢𑁆𑀯𑀸. 𑀇𑀫𑀺𑀦𑀸 𑀳𑀺 𑀧𑀤𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀤𑀼𑀓𑁆𑀔𑀢𑁄 𑀦𑁄 𑀘 𑀅𑀢𑁆𑀢𑀢𑁄𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀸𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀲𑀦𑁆𑀢𑁄𑀢𑀺 𑀓𑀺𑀮𑁂𑀲𑀲𑀦𑁆𑀢𑀢𑀸𑀬 𑀲𑀦𑁆𑀢𑁄. 𑀲𑀦𑁆𑀢𑀺𑀧𑀤𑁂 𑀭𑀢𑁄𑀢𑀺 𑀦𑀺𑀩𑁆𑀩𑀸𑀦𑁂 𑀭𑀢𑁄. 𑀇𑀢𑀺 𑀲𑀼𑀢𑁆𑀢𑀦𑁆𑀢𑁂 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸, 𑀕𑀸𑀣𑀸𑀲𑀼 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀧𑀻𑀢𑀺.
𑁭. 𑀧𑀞𑀫𑀅𑀕𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁧𑁭-𑁧𑁯. 𑀲𑀢𑁆𑀢𑀫𑁂 𑀅𑀕𑀢𑀺𑀕𑀫𑀦𑀸𑀦𑀻𑀢𑀺 𑀦𑀕𑀢𑀺𑀕𑀫𑀦𑀸𑀦𑀺. 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀙𑀦𑁆𑀤𑁂𑀦 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸𑀢𑀺 𑀙𑀦𑁆𑀤𑁂𑀦, 𑀤𑁄𑀲𑁂𑀦, 𑀪𑀬𑁂𑀦, 𑀫𑁄𑀳𑁂𑀦. 𑀅𑀢𑀺𑀯𑀢𑁆𑀢𑀢𑀻𑀢𑀺 𑀅𑀢𑀺𑀓𑁆𑀓𑀫𑀢𑀺. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀦𑀯𑀫𑁂 𑀢𑀣𑀸𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀤𑁆𑀯𑀻𑀳𑀺𑀧𑀺 𑀦𑀬𑁂𑀳𑀺 𑀓𑀣𑀺𑀢𑀁.
𑁧𑁦. 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁦. 𑀤𑀲𑀫𑁂 𑀪𑀢𑁆𑀢𑀼𑀤𑁆𑀤𑁂𑀲𑀓𑁄𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀁 𑀉𑀤𑁆𑀤𑁂𑀲𑀓𑁄. 𑀓𑀸𑀫𑁂𑀲𑀼 𑀅𑀲𑀁𑀬𑀢𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀳𑀺 𑀅𑀲𑀁𑀬𑀢𑀸. 𑀧𑀭𑀺𑀲𑀸𑀓𑀲𑀝𑁄 𑀘 𑀧𑀦𑁂𑀲 𑀯𑀼𑀘𑁆𑀘𑀢𑀻𑀢𑀺 𑀅𑀬𑀜𑁆𑀘 𑀧𑀦 𑀲𑁄 𑀏𑀯𑀭𑀽𑀧𑀸 𑀧𑀭𑀺𑀲𑀸𑀓𑀘𑀯𑀭𑁄 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀡𑁂𑀦𑀸𑀢𑀺 𑀩𑀼𑀤𑁆𑀥𑀲𑀫𑀡𑁂𑀦. 𑀧𑀭𑀺𑀲𑀸𑀬 𑀫𑀡𑁆𑀟𑁄 𑀘 𑀧𑀦𑁂𑀲 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑀸 𑀧𑀭𑀺𑀲𑀸 𑀯𑀺𑀧𑁆𑀧𑀲𑀦𑁆𑀦𑁂𑀦 𑀧𑀭𑀺𑀲𑀸𑀫𑀡𑁆𑀟𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.
𑀘𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.
𑁩. 𑀉𑀭𑀼𑀯𑁂𑀮𑀯𑀕𑁆𑀕𑁄
𑁧. 𑀧𑀞𑀫𑀉𑀭𑀼𑀯𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀉𑀭𑀼𑀯𑁂𑀮𑀸𑀬𑀦𑁆𑀢𑀺 𑀏𑀢𑁆𑀣 𑀉𑀭𑀼𑀯𑁂𑀮𑀸𑀢𑀺 𑀫𑀳𑀸𑀯𑁂𑀮𑀸, 𑀫𑀳𑀸𑀯𑀸𑀮𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀭𑀽𑀢𑀺 𑀯𑀸𑀮𑀼𑀓𑀸 𑀯𑀼𑀘𑁆𑀘𑀢𑀺, 𑀯𑁂𑀮𑀸𑀢𑀺 𑀫𑀭𑀺𑀬𑀸𑀤𑀸. 𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀢𑀻𑀢𑁂 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀤𑀲𑀲𑀳𑀲𑁆𑀲𑀸 𑀓𑀼𑀮𑀧𑀼𑀢𑁆𑀢𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀢𑀺𑀓𑀯𑀢𑁆𑀢𑀁 𑀅𑀓𑀁𑀲𑀼 𑁋 ‘‘𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀦𑀸𑀫 𑀧𑀭𑁂𑀲𑀫𑁆𑀧𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀫𑀦𑁄𑀓𑀫𑁆𑀫𑀁 𑀧𑀦 𑀅𑀧𑀸𑀓𑀝𑀁. 𑀢𑀲𑁆𑀫𑀸 𑀬𑁄 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀢𑀺, 𑀢𑀲𑁆𑀲 𑀅𑀜𑁆𑀜𑁄 𑀘𑁄𑀤𑀓𑁄 𑀦𑀸𑀫 𑀦𑀢𑁆𑀣𑀺. 𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀘𑁄𑀤𑁂𑀢𑁆𑀯𑀸 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀼𑀓𑀁 𑀆𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀓𑀺𑀭𑀢𑀼, 𑀇𑀤𑀫𑀲𑁆𑀲 𑀤𑀡𑁆𑀟𑀓𑀫𑁆𑀫’’𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑁄 𑀢𑀸𑀤𑀺𑀲𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀲𑁄 𑀢𑀢𑁆𑀣 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀼𑀓𑀁 𑀆𑀓𑀺𑀭𑀢𑀺, 𑀏𑀯𑀁 𑀢𑀢𑁆𑀣 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀯𑀸𑀮𑀼𑀓𑀭𑀸𑀲𑀺 𑀚𑀸𑀢𑁄. 𑀢𑀢𑁄 𑀦𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑀓𑀸𑀲𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀉𑀭𑀼𑀯𑁂𑀮𑀸𑀢𑀺 𑀫𑀳𑀸𑀯𑁂𑀮𑀸, 𑀫𑀳𑀸𑀯𑀸𑀮𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄’’𑀢𑀺. 𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀯𑀸 𑀉𑀭𑀽𑀢𑀺 𑀯𑀸𑀮𑀼𑀓𑀸 𑀯𑀼𑀘𑁆𑀘𑀢𑀺, 𑀯𑁂𑀮𑀸𑀢𑀺 𑀫𑀭𑀺𑀬𑀸𑀤𑀸, 𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺.
𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂𑀢𑀺 𑀉𑀭𑀼𑀯𑁂𑀮𑀕𑀸𑀫𑀁 𑀦𑀺𑀲𑁆𑀲𑀸𑀬 𑀦𑁂𑀭𑀜𑁆𑀚𑀭𑀸𑀦𑀤𑀻𑀢𑀻𑀭𑁂 𑀯𑀺𑀳𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂𑀢𑀺 𑀅𑀚𑀧𑀸𑀮𑀓𑀸 𑀢𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀙𑀸𑀬𑀸𑀬 𑀦𑀺𑀲𑀻𑀤𑀦𑁆𑀢𑀺𑀧𑀺 𑀢𑀺𑀝𑁆𑀞𑀦𑁆𑀢𑀺𑀧𑀺, 𑀢𑀲𑁆𑀫𑀸 𑀲𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄, 𑀢𑀲𑁆𑀲 𑀳𑁂𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀫𑁂𑀯. 𑀉𑀤𑀧𑀸𑀤𑀻𑀢𑀺 𑀅𑀬𑀁 𑀯𑀺𑀢𑀓𑁆𑀓𑁄 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀉𑀤𑀧𑀸𑀤𑀺. 𑀓𑀲𑁆𑀫𑀸 𑀉𑀤𑀧𑀸𑀤𑀻𑀢𑀺? 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀢𑁆𑀢𑀸 𑀘𑁂𑀯 𑀧𑀼𑀩𑁆𑀩𑀸𑀲𑁂𑀯𑀦𑀢𑀸𑀬 𑀘. 𑀢𑀢𑁆𑀣 𑀧𑀼𑀩𑁆𑀩𑀸𑀲𑁂𑀯𑀦𑀸𑀬 𑀧𑀓𑀸𑀲𑀦𑀢𑁆𑀣𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑀁 𑀆𑀳𑀭𑀺𑀢𑀩𑁆𑀩𑀁. 𑀳𑀢𑁆𑀣𑀺𑀯𑀸𑀦𑀭𑀢𑀺𑀢𑁆𑀢𑀺𑀭𑀸 𑀓𑀺𑀭 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑀸 ‘‘𑀬𑁄 𑀅𑀫𑁆𑀳𑀸𑀓𑀁 𑀫𑀳𑀮𑁆𑀮𑀓𑁄, 𑀢𑀲𑁆𑀫𑀺𑀁 𑀲𑀕𑀸𑀭𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀕𑁆𑀭𑁄𑀥𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀫𑀳𑀮𑁆𑀮𑀓𑁄’’𑀢𑀺 𑀯𑀻𑀫𑀁𑀲𑀦𑁆𑀢𑀸 𑀢𑀺𑀢𑁆𑀢𑀺𑀭𑀲𑁆𑀲 𑀫𑀳𑀮𑁆𑀮𑀓𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲 𑀚𑁂𑀝𑁆𑀞𑀸𑀧𑀘𑀸𑀬𑀦𑀓𑀫𑁆𑀫𑀁 𑀓𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀯𑀺𑀳𑀭𑀺𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁. 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀇𑀫𑀁 𑀕𑀸𑀣𑀫𑀸𑀳 𑁋
‘‘𑀬𑁂 𑀯𑀼𑀟𑁆𑀠𑀫𑀧𑀘𑀸𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;
𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻’’𑀢𑀺. (𑀚𑀸. 𑁧.𑁧.𑁩𑁭);
𑀏𑀯𑀁 𑀅𑀳𑁂𑀢𑀼𑀓𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀢𑀣𑀸𑀕𑀢𑁄 𑀲𑀕𑀸𑀭𑀯𑀯𑀸𑀲𑀁 𑀭𑁄𑀘𑁂𑀲𑀺, 𑀇𑀤𑀸𑀦𑀺 𑀓𑀲𑁆𑀫𑀸 𑀦 𑀭𑁄𑀘𑁂𑀲𑁆𑀲𑀢𑀻𑀢𑀺. 𑀅𑀕𑀸𑀭𑀯𑁄𑀢𑀺 𑀅𑀜𑁆𑀜𑀲𑁆𑀫𑀺𑀁 𑀕𑀸𑀭𑀯𑀭𑀳𑀺𑀢𑁄, 𑀓𑀜𑁆𑀘𑀺 𑀕𑀭𑀼𑀝𑁆𑀞𑀸𑀦𑁂 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀧𑀢𑀺𑀲𑁆𑀲𑀬𑀭𑀳𑀺𑀢𑁄, 𑀓𑀜𑁆𑀘𑀺 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀏𑀢𑁆𑀣 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸𑀬𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸𑀢𑀺 𑀲𑀓𑁆𑀓𑀸𑀭𑀜𑁆𑀘𑁂𑀯 𑀓𑀢𑁆𑀯𑀸 𑀕𑀭𑀼𑀓𑀸𑀭𑀜𑁆𑀘 𑀉𑀧𑀝𑁆𑀞𑀧𑁂𑀢𑁆𑀯𑀸.
𑀲𑀤𑁂𑀯𑀓𑁂 𑀮𑁄𑀓𑁂𑀢𑀺𑀆𑀤𑀻𑀲𑀼 𑀲𑀤𑁆𑀥𑀺𑀁 𑀤𑁂𑀯𑁂𑀳𑀺 𑀲𑀤𑁂𑀯𑀓𑁂. 𑀤𑁂𑀯𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀸𑀭𑀩𑁆𑀭𑀳𑁆𑀫𑁂𑀲𑀼 𑀕𑀳𑀺𑀢𑁂𑀲𑀼𑀧𑀺 𑀫𑀸𑀭𑁄 𑀦𑀸𑀫 𑀯𑀲𑀯𑀢𑁆𑀢𑀻 𑀲𑀩𑁆𑀩𑁂𑀲𑀁 𑀉𑀧𑀭𑀺 𑀯𑀲𑀁 𑀯𑀢𑁆𑀢𑁂𑀢𑀺, 𑀩𑁆𑀭𑀳𑁆𑀫𑀸 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄, 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀆𑀮𑁄𑀓𑀁 𑀨𑀭𑀢𑀺, 𑀤𑁆𑀯𑀻𑀳𑀺 𑀤𑁆𑀯𑀻𑀲𑀼, 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑀁 𑀨𑀭𑀢𑀺. 𑀲𑁄 𑀇𑀫𑀺𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑁄𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽𑀢𑀺 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀢𑀣𑀸 𑀲𑀫𑀡𑀸 𑀦𑀸𑀫 𑀏𑀓𑀦𑀺𑀓𑀸𑀬𑀸𑀤𑀺𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀸 𑀲𑀻𑀮𑀯𑀦𑁆𑀢𑁄 𑀧𑀡𑁆𑀟𑀺𑀢𑀸, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀺𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀸 𑀧𑀡𑁆𑀟𑀺𑀢𑀸. 𑀢𑁂 𑀇𑀫𑀺𑀦𑀸 𑀲𑀫𑁆𑀧𑀦𑁆𑀦𑀢𑀭𑀸𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽𑀢𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑀇𑀤𑀁 𑀧𑀦 𑀦𑀺𑀧𑁆𑀧𑀤𑁂𑀲𑀢𑁄 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑀺𑀘𑁂𑀢𑁆𑀣 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀮𑁄𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀧𑀚𑀸𑀯𑀲𑁂𑀦. 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀦𑁆𑀢𑀺 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀢𑀭𑀁, 𑀅𑀥𑀺𑀓𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀻𑀮𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀓𑀣𑀺𑀢𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀮𑁄𑀓𑀺𑀬𑀫𑁂𑀯. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁂𑀯 𑀳𑁂𑀢𑀁. 𑀧𑀸𑀢𑀼𑀭𑀳𑁄𑀲𑀻𑀢𑀺 ‘‘𑀅𑀬𑀁 𑀲𑀢𑁆𑀣𑀸 𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀲𑀻𑀮𑀸𑀤𑀻𑀳𑀺 𑀅𑀢𑁆𑀢𑀦𑀸 𑀅𑀥𑀺𑀓𑀢𑀭𑀁 𑀅𑀧𑀲𑁆𑀲𑀦𑁆𑀢𑁄 ‘𑀫𑀬𑀸 𑀧𑀝𑀺𑀯𑀺𑀤𑁆𑀥𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀲𑀓𑁆𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑀺, 𑀓𑀸𑀭𑀡𑀁 𑀪𑀕𑀯𑀸 𑀘𑀺𑀦𑁆𑀢𑁂𑀢𑀺, 𑀅𑀢𑁆𑀣𑀁 𑀯𑀼𑀟𑁆𑀠𑀺𑀁 𑀯𑀺𑀲𑁂𑀲𑀁 𑀘𑀺𑀦𑁆𑀢𑁂𑀢𑀺, 𑀕𑀘𑁆𑀙𑀸𑀫𑀺𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀭𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺, 𑀅𑀪𑀺𑀫𑀼𑀔𑁂 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄.
𑀯𑀺𑀳𑀁𑀲𑀼 𑀯𑀺𑀳𑀭𑀦𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀬𑁄 𑀯𑀤𑁂𑀬𑁆𑀬 𑁋 ‘‘𑀯𑀺𑀳𑀭𑀦𑁆𑀢𑀻𑀢𑀺 𑀯𑀘𑀦𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀩𑀳𑀽 𑀩𑀼𑀤𑁆𑀥𑀸’’𑀢𑀺, 𑀲𑁄 ‘‘𑀪𑀕𑀯𑀸𑀧𑀺 𑀪𑀦𑁆𑀢𑁂 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑁄.
‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;
𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀫𑀳𑀸𑀯. 𑁧𑁧; 𑀫. 𑀦𑀺. 𑁨.𑁩𑁪𑁧) 𑁋
𑀆𑀤𑀻𑀳𑀺 𑀘𑀲𑁆𑀲 𑀲𑀼𑀢𑁆𑀢𑁂𑀳𑀺 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑁄 𑀤𑀻𑀧𑁂𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀢𑀲𑁆𑀫𑀸. 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸𑀢𑀺 𑀫𑀳𑀦𑁆𑀢𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁂𑀦. 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀲𑀭𑀦𑁆𑀢𑁂𑀦.
𑀬𑀢𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀫𑀳𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀳𑀢𑁆𑀢𑀁 𑀮𑀸𑀪𑀕𑁆𑀕𑀫𑀳𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀘𑀢𑀼𑀩𑁆𑀩𑀺𑀥𑁂𑀦 𑀫𑀳𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀣 𑀫𑁂 𑀲𑀗𑁆𑀖𑁂𑀧𑀺 𑀕𑀸𑀭𑀯𑁄𑀢𑀺 𑀅𑀣 𑀫𑀬𑁆𑀳𑀁 𑀲𑀗𑁆𑀖𑁂𑀧𑀺 𑀕𑀸𑀭𑀯𑁄 𑀚𑀸𑀢𑁄. 𑀓𑀺𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀪𑀕𑀯𑀢𑀸 𑀲𑀗𑁆𑀖𑁂 𑀕𑀸𑀭𑀯𑁄 𑀓𑀢𑁄𑀢𑀺? 𑀫𑀳𑀸𑀧𑀚𑀸𑀧𑀢𑀺𑀬𑀸 𑀤𑀼𑀲𑁆𑀲𑀬𑀼𑀕𑀤𑀸𑀦𑀓𑀸𑀮𑁂. 𑀢𑀤𑀸 𑀳𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀉𑀧𑀦𑀻𑀢𑀁 𑀤𑀼𑀲𑁆𑀲𑀬𑀼𑀕𑀁 ‘‘𑀲𑀗𑁆𑀖𑁂, 𑀕𑁄𑀢𑀫𑀺, 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺 𑀯𑀤𑀦𑁆𑀢𑁄 𑀲𑀗𑁆𑀖𑁂 𑀕𑀸𑀭𑀯𑀁 𑀅𑀓𑀸𑀲𑀺 𑀦𑀸𑀫.
𑁨. 𑀤𑀼𑀢𑀺𑀬𑀉𑀭𑀼𑀯𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁨. 𑀤𑀼𑀢𑀺𑀬𑁂 𑀲𑀫𑁆𑀩𑀳𑀼𑀮𑀸𑀢𑀺 𑀩𑀳𑀼𑀓𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀳𑀼𑀳𑀼𑀓𑁆𑀓𑀚𑀸𑀢𑀺𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀆𑀕𑀢𑀸 𑀩𑁆𑀭𑀸𑀳𑁆𑀫𑀡𑀸. 𑀚𑀺𑀡𑁆𑀡𑀸𑀢𑀺 𑀚𑀭𑀸𑀚𑀺𑀡𑁆𑀡𑀸. 𑀯𑀼𑀟𑁆𑀠𑀸𑀢𑀺 𑀯𑀬𑁄𑀯𑀼𑀤𑁆𑀥𑀸. 𑀫𑀳𑀮𑁆𑀮𑀓𑀸𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑀸. 𑀅𑀤𑁆𑀥𑀕𑀢𑀸𑀢𑀺 𑀢𑀬𑁄 𑀯𑀬𑁂 𑀅𑀤𑁆𑀥𑁂 𑀅𑀢𑀺𑀓𑁆𑀓𑀦𑁆𑀢𑀸. 𑀲𑀼𑀢𑀫𑁂𑀢𑀦𑁆𑀢𑀺 𑀅𑀫𑁆𑀳𑁂𑀳𑀺 𑀲𑀼𑀢𑀁 𑀏𑀢𑀁. 𑀢𑀬𑀺𑀤𑀁 𑀪𑁄, 𑀕𑁄𑀢𑀫, 𑀢𑀣𑁂𑀯𑀸𑀢𑀺 𑀪𑁄, 𑀕𑁄𑀢𑀫, 𑀏𑀢𑀁 𑀅𑀫𑁆𑀳𑁂𑀳𑀺 𑀲𑀼𑀢𑀓𑀸𑀭𑀡𑀁 𑀢𑀣𑀸 𑀏𑀯. 𑀢𑀬𑀺𑀤𑀁 𑀪𑁄, 𑀕𑁄𑀢𑀫, 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸𑀢𑀺 𑀢𑀁 𑀏𑀢𑀁 𑀅𑀪𑀺𑀯𑀸𑀤𑀦𑀸𑀤𑀺𑀅𑀓𑀭𑀡𑀁 𑀅𑀦𑀦𑀼𑀘𑁆𑀙𑀯𑀺𑀓𑀫𑁂𑀯.
𑀅𑀓𑀸𑀮𑀯𑀸𑀤𑀻𑀢𑀺𑀆𑀤𑀻𑀲𑀼 𑀅𑀓𑀸𑀮𑁂 𑀯𑀤𑀢𑀻𑀢𑀺 𑀅𑀓𑀸𑀮𑀯𑀸𑀤𑀻. 𑀅𑀲𑀪𑀸𑀯𑀁 𑀯𑀤𑀢𑀻𑀢𑀺 𑀅𑀪𑀽𑀢𑀯𑀸𑀤𑀻. 𑀅𑀦𑀢𑁆𑀣𑀁 𑀯𑀤𑀢𑀺, 𑀦𑁄 𑀅𑀢𑁆𑀣𑀦𑁆𑀢𑀺 𑀅𑀦𑀢𑁆𑀣𑀯𑀸𑀤𑀻. 𑀅𑀥𑀫𑁆𑀫𑀁 𑀯𑀤𑀢𑀺, 𑀦𑁄 𑀥𑀫𑁆𑀫𑀦𑁆𑀢𑀺 𑀅𑀥𑀫𑁆𑀫𑀯𑀸𑀤𑀻. 𑀅𑀯𑀺𑀦𑀬𑀁 𑀯𑀤𑀢𑀺, 𑀦𑁄 𑀯𑀺𑀦𑀬𑀦𑁆𑀢𑀺 𑀅𑀯𑀺𑀦𑀬𑀯𑀸𑀤𑀻. 𑀅𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀦 𑀳𑀤𑀬𑁂 𑀦𑀺𑀥𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀯𑀸𑀘𑀁 𑀪𑀸𑀲𑀺𑀢𑀸. 𑀅𑀓𑀸𑀮𑁂𑀦𑀸𑀢𑀺 𑀓𑀣𑁂𑀢𑀼𑀁 𑀅𑀬𑀼𑀢𑁆𑀢𑀓𑀸𑀮𑁂𑀦. 𑀅𑀦𑀧𑀤𑁂𑀲𑀦𑁆𑀢𑀺 𑀅𑀧𑀤𑁂𑀲𑀭𑀳𑀺𑀢𑀁, 𑀲𑀸𑀧𑀤𑁂𑀲𑀁 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀦 𑀓𑀣𑁂𑀢𑀺. 𑀅𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀧𑀭𑀺𑀬𑀦𑁆𑀢𑀭𑀳𑀺𑀢𑀁, 𑀦 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑁂𑀢𑀺. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀓𑀣𑁂𑀢𑀺. 𑀩𑀸𑀮𑁄 𑀣𑁂𑀭𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀅𑀦𑁆𑀥𑀩𑀸𑀮𑁄 𑀣𑁂𑀭𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺.
𑀓𑀸𑀮𑀯𑀸𑀤𑀻𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀡𑁆𑀟𑀺𑀢𑁄 𑀣𑁂𑀭𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀡𑁆𑀟𑀺𑀢𑁄, 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀣𑁂𑀭𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺.
𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻𑀢𑀺 𑀩𑀳𑀼𑀁 𑀅𑀲𑁆𑀲 𑀲𑀼𑀢𑀁 𑀳𑁄𑀢𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀧𑀸𑀴𑀺𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀉𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑀥𑀭𑁄𑀢𑀺 𑀲𑀼𑀢𑀲𑁆𑀲 𑀆𑀥𑀸𑀭𑀪𑀽𑀢𑁄. 𑀬𑀲𑁆𑀲 𑀳𑀺 𑀇𑀢𑁄 𑀕𑀳𑀺𑀢𑀁 𑀇𑀢𑁄 𑀧𑀮𑀸𑀬𑀢𑀺, 𑀙𑀺𑀤𑁆𑀤𑀖𑀝𑁂 𑀉𑀤𑀓𑀁 𑀯𑀺𑀬 𑀦 𑀢𑀺𑀝𑁆𑀞𑀢𑀺, 𑀧𑀭𑀺𑀲𑀫𑀚𑁆𑀛𑁂 𑀏𑀓𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀢𑀼𑀁 𑀯𑀸 𑀯𑀸𑀘𑁂𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺, 𑀅𑀬𑀁 𑀦 𑀲𑀼𑀢𑀥𑀭𑁄 𑀦𑀸𑀫. 𑀬𑀲𑁆𑀲 𑀧𑀦 𑀉𑀕𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑀺𑀢𑀓𑀸𑀮𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀯𑀲𑁆𑀲𑀸𑀦𑀺 𑀲𑀚𑁆𑀛𑀸𑀬𑀁 𑀅𑀓𑀭𑁄𑀦𑁆𑀢𑀲𑁆𑀲 𑀦𑁂𑀯 𑀦𑀲𑁆𑀲𑀢𑀺, 𑀅𑀬𑀁 𑀲𑀼𑀢𑀥𑀭𑁄 𑀦𑀸𑀫. 𑀲𑀼𑀢𑀲𑀦𑁆𑀦𑀺𑀘𑀬𑁄𑀢𑀺 𑀲𑀼𑀢𑀲𑁆𑀲 𑀲𑀦𑁆𑀦𑀺𑀘𑀬𑀪𑀽𑀢𑁄. 𑀬𑀲𑁆𑀲 𑀳𑀺 𑀲𑀼𑀢𑀁 𑀳𑀤𑀬𑀫𑀜𑁆𑀚𑀽𑀲𑀸𑀬 𑀲𑀦𑁆𑀦𑀺𑀘𑀺𑀢𑀁 𑀲𑀺𑀮𑀸𑀬 𑀮𑁂𑀔𑀸 𑀯𑀺𑀬 𑀲𑀼𑀯𑀡𑁆𑀡𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀘 𑀢𑀺𑀝𑁆𑀞𑀢𑀺, 𑀅𑀬𑀁 𑀲𑀼𑀢𑀲𑀦𑁆𑀦𑀺𑀘𑀬𑁄 𑀦𑀸𑀫. 𑀥𑀸𑀢𑀸𑀢𑀺 𑀥𑀸𑀢𑀸 𑀧𑀕𑀼𑀡𑀸. 𑀏𑀓𑀘𑁆𑀘𑀲𑁆𑀲 𑀳𑀺 𑀉𑀕𑁆𑀕𑀳𑀺𑀢𑀩𑀼𑀤𑁆𑀥𑀯𑀘𑀦𑀁 𑀥𑀸𑀢𑀁 𑀧𑀕𑀼𑀡𑀁 𑀦𑀺𑀘𑁆𑀘𑀮𑀺𑀓𑀁 𑀦 𑀳𑁄𑀢𑀺, ‘‘𑀅𑀲𑀼𑀓𑀁 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀚𑁆𑀛𑀸𑀬𑀺𑀢𑁆𑀯𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀫𑀦𑀼𑀕𑁆𑀕𑀸𑀳𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀏𑀓𑀘𑁆𑀘𑀲𑁆𑀲 𑀥𑀸𑀢𑀁 𑀧𑀕𑀼𑀡𑀁 𑀪𑀯𑀗𑁆𑀕𑀲𑁄𑀢𑀲𑀤𑀺𑀲𑀁 𑀳𑁄𑀢𑀺, ‘‘𑀅𑀲𑀼𑀓𑀁 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑀫𑁂𑀯 𑀓𑀣𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀥𑀸𑀢𑀸’’𑀢𑀺. 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀲𑀼𑀢𑁆𑀢𑀤𑀲𑀓-𑀯𑀕𑁆𑀕𑀤𑀲𑀓𑀧𑀡𑁆𑀡𑀸𑀲𑀤𑀲𑀓𑀯𑀲𑁂𑀦 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀧𑁂𑀓𑁆𑀔𑀺𑀢𑀸. 𑀬𑀲𑁆𑀲 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀫𑀦𑀲𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀁 𑀳𑁄𑀢𑀺, 𑀫𑀳𑀸𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀞𑀺𑀢𑀲𑁆𑀲 𑀭𑀽𑀧𑀕𑀢𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀅𑀢𑁆𑀣𑀢𑁄 𑀘 𑀓𑀸𑀭𑀡𑀢𑁄 𑀘 𑀧𑀜𑁆𑀜𑀸𑀬 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸.
𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀪𑀺𑀘𑁂𑀢𑁄𑀢𑀺 𑀅𑀪𑀺𑀓𑁆𑀓𑀦𑁆𑀢𑀁 𑀯𑀺𑀲𑀼𑀤𑁆𑀥𑀁 𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀅𑀥𑀺𑀘𑀺𑀢𑁆𑀢𑀁 𑀯𑀸, 𑀅𑀪𑀺𑀘𑁂𑀢𑀲𑀺 𑀚𑀸𑀢𑀸𑀦𑀺 𑀆𑀪𑀺𑀘𑁂𑀢𑀲𑀺𑀓𑀸𑀦𑀺, 𑀅𑀪𑀺𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀻𑀢𑀺 𑀯𑀸 𑀆𑀪𑀺𑀘𑁂𑀢𑀲𑀺𑀓𑀸𑀦𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀲𑀼𑀔𑀯𑀺𑀳𑀸𑀭𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀦𑀺 𑀳𑀺 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀛𑀸𑀬𑀺𑀦𑁄 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀲𑀁𑀓𑀺𑀮𑀺𑀝𑁆𑀞𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀦𑀺𑀓𑀸𑀫𑁂𑀦 𑀮𑀸𑀪𑀻, 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀲𑁂𑀦 𑀮𑀸𑀪𑀻, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀲𑀼𑀔𑁂𑀦𑁂𑀯 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀅𑀓𑀲𑀺𑀭𑀸𑀦𑀁 𑀮𑀸𑀪𑀻 𑀯𑀺𑀧𑀼𑀮𑀸𑀦𑀁, 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀓𑀘𑁆𑀘𑁄 𑀳𑀺 𑀮𑀸𑀪𑀻𑀬𑁂𑀯 𑀳𑁄𑀢𑀺, 𑀦 𑀧𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀓𑁆𑀓𑁄𑀢𑀺 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀏𑀓𑀘𑁆𑀘𑁄 𑀲𑀓𑁆𑀓𑁄𑀢𑀺 𑀢𑀣𑀸𑀲𑀫𑀸𑀧𑀚𑁆𑀚𑀺𑀢𑀼𑀁, 𑀧𑀸𑀭𑀺𑀧𑀦𑁆𑀣𑀺𑀓𑁂 𑀘 𑀧𑀦 𑀓𑀺𑀘𑁆𑀙𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀏𑀓𑀘𑁆𑀘𑁄 𑀢𑀣𑀸 𑀘 𑀲𑀫𑀸𑀧𑀚𑁆𑀚𑀢𑀺, 𑀧𑀸𑀭𑀺𑀧𑀦𑁆𑀣𑀺𑀓𑁂 𑀘 𑀅𑀓𑀺𑀘𑁆𑀙𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀦 𑀲𑀓𑁆𑀓𑁄𑀢𑀺 𑀦𑀸𑀴𑀺𑀓𑀬𑀦𑁆𑀢𑀁 𑀯𑀺𑀬 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀬𑁂𑀯 𑀯𑀼𑀝𑁆𑀞𑀸𑀢𑀼𑀁. 𑀬𑀲𑁆𑀲 𑀧𑀦 𑀅𑀬𑀁 𑀢𑀺𑀯𑀺𑀥𑀸𑀧𑀺 𑀲𑀫𑁆𑀧𑀤𑀸 𑀅𑀢𑁆𑀣𑀺, 𑀲𑁄 ‘‘𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺 𑀯𑀼𑀘𑁆𑀘𑀢𑀺. 𑀆𑀲𑀯𑀸𑀦𑀁 𑀔𑀬𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀏𑀯𑀫𑀺𑀥 𑀲𑀻𑀮𑀫𑁆𑀧𑀺 𑀩𑀸𑀳𑀼𑀲𑀘𑁆𑀘𑀫𑁆𑀧𑀺 𑀔𑀻𑀡𑀸𑀲𑀯𑀲𑁆𑀲𑁂𑀯 𑀲𑀻𑀮𑀁 𑀩𑀸𑀳𑀼𑀲𑀘𑁆𑀘𑀜𑁆𑀘, 𑀛𑀸𑀦𑀸𑀦𑀺𑀧𑀺 𑀔𑀻𑀡𑀸𑀲𑀯𑀲𑁆𑀲𑁂𑀯 𑀯𑀴𑀜𑁆𑀚𑀦𑀓𑀚𑁆𑀛𑀸𑀦𑀸𑀦𑀺 𑀓𑀣𑀺𑀢𑀸𑀦𑀺. ‘‘𑀆𑀲𑀯𑀸𑀦𑀁 𑀔𑀬𑀸’’𑀢𑀺𑀆𑀤𑀻𑀳𑀺 𑀧𑀦 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀨𑀮𑁂𑀦 𑀘𑁂𑀢𑁆𑀣 𑀫𑀕𑁆𑀕𑀓𑀺𑀘𑁆𑀘𑀁 𑀧𑀓𑀸𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀉𑀤𑁆𑀥𑀢𑁂𑀦𑀸𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑁂𑀦. 𑀲𑀫𑁆𑀨𑀦𑁆𑀢𑀺 𑀧𑀮𑀸𑀧𑀓𑀣𑀁. 𑀅𑀲𑀫𑀸𑀳𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀅𑀝𑁆𑀞𑀧𑀺𑀢𑀲𑀗𑁆𑀓𑀧𑁆𑀧𑁄. 𑀫𑀕𑁄𑀢𑀺 𑀫𑀕𑀲𑀤𑀺𑀲𑁄. 𑀆𑀭𑀸𑀢𑀺 𑀤𑀽𑀭𑁂. 𑀣𑀸𑀯𑀭𑁂𑀬𑁆𑀬𑀫𑁆𑀳𑀸𑀢𑀺 𑀣𑀸𑀯𑀭𑀪𑀸𑀯𑀢𑁄. 𑀧𑀸𑀧𑀤𑀺𑀝𑁆𑀞𑀻𑀢𑀺 𑀮𑀸𑀫𑀓𑀤𑀺𑀝𑁆𑀞𑀺. 𑀅𑀦𑀸𑀤𑀭𑁄𑀢𑀺 𑀆𑀤𑀭𑀭𑀳𑀺𑀢𑁄. 𑀲𑀼𑀢𑀯𑀸𑀢𑀺 𑀲𑀼𑀢𑁂𑀦 𑀉𑀧𑀕𑀢𑁄. 𑀧𑀝𑀺𑀪𑀸𑀦𑀯𑀸𑀢𑀺 𑀤𑀼𑀯𑀺𑀥𑁂𑀦 𑀧𑀝𑀺𑀪𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀜𑁆𑀜𑀸𑀬𑀢𑁆𑀣𑀁 𑀯𑀺𑀧𑀲𑁆𑀲𑀢𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀢𑁆𑀣𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀢𑀺. 𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀤𑀺𑀥𑀫𑁆𑀫𑀸𑀦𑀁 𑀧𑀸𑀭𑀁 𑀕𑀢𑁄, 𑀅𑀪𑀺𑀜𑁆𑀜𑀸𑀧𑀸𑀭𑀕𑀽, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽, 𑀧𑀳𑀸𑀦𑀧𑀸𑀭𑀕𑀽, 𑀪𑀸𑀯𑀦𑀸𑀧𑀸𑀭𑀕𑀽, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽𑀢𑀺 𑀏𑀯𑀁 𑀙𑀩𑁆𑀩𑀺𑀥𑁂𑀦 𑀧𑀸𑀭𑀕𑀫𑀦𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀸𑀭𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑁄. 𑀅𑀔𑀺𑀮𑁄𑀢𑀺 𑀭𑀸𑀕𑀔𑀺𑀮𑀸𑀤𑀺𑀯𑀺𑀭𑀳𑀺𑀢𑁄. 𑀧𑀝𑀺𑀪𑀸𑀦𑀯𑀸𑀢𑀺 𑀤𑀼𑀯𑀺𑀥𑁂𑀦𑁂𑀯 𑀧𑀝𑀺𑀪𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻𑀢𑀺 𑀲𑀓𑀮𑀩𑁆𑀭𑀳𑁆𑀫𑀘𑀭𑀺𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.
𑁩. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁩. 𑀢𑀢𑀺𑀬𑁂 𑀮𑁄𑀓𑁄𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀜𑀸𑀢𑁄 𑀧𑀘𑁆𑀘𑀓𑁆𑀔𑁄 𑀓𑀢𑁄. 𑀮𑁄𑀓𑀲𑁆𑀫𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀢𑁄. 𑀧𑀳𑀻𑀦𑁄𑀢𑀺 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀧𑀳𑀻𑀦𑁄. 𑀢𑀣𑀸𑀕𑀢𑀲𑁆𑀲 𑀪𑀸𑀯𑀺𑀢𑀸𑀢𑀺 𑀢𑀣𑀸𑀕𑀢𑁂𑀦 𑀪𑀸𑀯𑀺𑀢𑀸.
𑀏𑀯𑀁 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀘𑀢𑀽𑀳𑀺 𑀲𑀘𑁆𑀘𑁂𑀳𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀣𑀸𑀕𑀢𑀪𑀸𑀯𑀁 𑀓𑀣𑁂𑀢𑀼𑀁 𑀬𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁. 𑀫𑀼𑀢𑀦𑁆𑀢𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀤𑀺 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀢𑀁. 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀁.
𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀇𑀫𑀺𑀦𑀸 𑀏𑀢𑀁 𑀤𑀲𑁆𑀲𑁂𑀢𑀺 𑁋 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺𑀆𑀤𑀺 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀣𑀸 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄𑀢𑀺𑀆𑀤𑀺 𑀲𑀤𑁆𑀤𑀸𑀭𑀫𑁆𑀫𑀡𑀁 𑀲𑁄𑀢𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀫𑀽𑀮𑀕𑀦𑁆𑀥𑁄 𑀢𑀘𑀕𑀦𑁆𑀥𑁄𑀢𑀺𑀆𑀤𑀺 𑀕𑀦𑁆𑀥𑀸𑀭𑀫𑁆𑀫𑀡𑀁 𑀖𑀸𑀦𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄𑀢𑀺𑀆𑀤𑀺 𑀭𑀲𑀸𑀭𑀫𑁆𑀫𑀡𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀓𑀓𑁆𑀔𑀴𑀁 𑀫𑀼𑀤𑀼𑀓𑀦𑁆𑀢𑀺𑀆𑀤𑀺 𑀧𑀣𑀯𑀻𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑁂𑀤𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀓𑀸𑀬𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀨𑀼𑀲𑀺𑀢𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀣𑀸 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀼𑀔𑀤𑀼𑀓𑁆𑀔𑀸𑀤𑀺𑀪𑁂𑀤𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀫𑀦𑁄𑀤𑁆𑀯𑀸𑀭𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀚𑀸𑀦𑀺𑀢𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀬𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁, 𑀢𑀢𑁆𑀣 𑀢𑀣𑀸𑀕𑀢𑁂𑀦 𑀅𑀤𑀺𑀝𑁆𑀞𑀁 𑀯𑀸 𑀅𑀲𑀼𑀢𑀁 𑀯𑀸 𑀅𑀫𑀼𑀢𑀁 𑀯𑀸 𑀅𑀯𑀺𑀜𑁆𑀜𑀸𑀢𑀁 𑀯𑀸 𑀦𑀢𑁆𑀣𑀺, 𑀇𑀫𑀲𑁆𑀲 𑀧𑀦 𑀫𑀳𑀸𑀚𑀦𑀲𑁆𑀲 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀲𑀩𑁆𑀩𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀅𑀧𑁆𑀧𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺 𑀜𑀸𑀡𑁂𑀦 𑀅𑀲𑀘𑁆𑀙𑀺𑀓𑀢𑀁.
𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀁 𑀬𑀣𑀸 𑀮𑁄𑀓𑁂𑀦 𑀕𑀢𑀁, 𑀢𑀲𑁆𑀲 𑀢𑀣𑁂𑀯 𑀕𑀢𑀢𑁆𑀢𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀕𑀢𑀲𑀤𑁆𑀤𑁂𑀦 𑀏𑀓𑀢𑁆𑀣𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀢𑀣𑀸𑀕𑀢𑁄𑀢𑀺 𑀦𑀺𑀕𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀬𑀼𑀢𑁆𑀢𑀺 𑀏𑀓𑀧𑀼𑀕𑁆𑀕𑀮𑀯𑀡𑁆𑀡𑀦𑀸𑀬𑀁 𑀢𑀣𑀸𑀕𑀢𑀲𑀤𑁆𑀤𑀯𑀺𑀢𑁆𑀣𑀸𑀭𑁂 𑀯𑀼𑀢𑁆𑀢𑀸𑀬𑁂𑀯. 𑀅𑀧𑀺𑀘𑁂𑀢𑁆𑀣 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀤𑀓𑁆𑀔𑀢𑀻𑀢𑀺 𑀤𑀲𑁄. 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻.
𑀲𑀩𑁆𑀩𑀁 𑀮𑁄𑀓𑀁 𑀅𑀪𑀺𑀜𑁆𑀜𑀸𑀢𑀺 𑀢𑁂𑀥𑀸𑀢𑀼𑀓𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑀁 𑀚𑀸𑀦𑀺𑀢𑁆𑀯𑀸. 𑀲𑀩𑁆𑀩𑀁 𑀮𑁄𑀓𑁂 𑀬𑀣𑀸𑀢𑀣𑀦𑁆𑀢𑀺 𑀢𑀲𑁆𑀫𑀺𑀁 𑀢𑁂𑀥𑀸𑀢𑀼𑀓𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀬𑀁𑀓𑀺𑀜𑁆𑀘𑀺 𑀦𑁂𑀬𑁆𑀬𑀁, 𑀲𑀩𑁆𑀩𑀁 𑀢𑀁 𑀬𑀣𑀸𑀢𑀣𑀁 𑀅𑀯𑀺𑀧𑀭𑀻𑀢𑀁 𑀚𑀸𑀦𑀺𑀢𑁆𑀯𑀸. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀢𑀼𑀦𑁆𑀦𑀁 𑀬𑁄𑀕𑀸𑀦𑀁 𑀧𑀳𑀸𑀦𑁂𑀦 𑀯𑀺𑀲𑀁𑀬𑀼𑀢𑁆𑀢𑁄. 𑀅𑀦𑀽𑀧𑀬𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀉𑀧𑀬𑁂𑀳𑀺 𑀯𑀺𑀭𑀳𑀺𑀢𑁄. 𑀲𑀩𑁆𑀩𑀸𑀪𑀺𑀪𑀽𑀢𑀺 𑀭𑀽𑀧𑀸𑀤𑀻𑀦𑀺 𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀥𑀻𑀭𑁄𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑁄. 𑀲𑀩𑁆𑀩𑀕𑀦𑁆𑀣𑀧𑁆𑀧𑀫𑁄𑀘𑀦𑁄𑀢𑀺 𑀲𑀩𑁆𑀩𑁂 𑀘𑀢𑁆𑀢𑀸𑀭𑁄𑀧𑀺 𑀕𑀦𑁆𑀣𑁂 𑀫𑁄𑀘𑁂𑀢𑁆𑀯𑀸 𑀞𑀺𑀢𑁄. 𑀨𑀼𑀝𑁆𑀞𑀲𑁆𑀲𑀸𑀢𑀺 𑀨𑀼𑀝𑁆𑀞𑀸 𑀅𑀲𑁆𑀲. 𑀇𑀤𑀜𑁆𑀘 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀧𑀭𑀫𑀸 𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀢𑁂𑀦 𑀜𑀸𑀡𑀨𑀼𑀲𑀦𑁂𑀦 𑀨𑀼𑀝𑁆𑀞𑀁. 𑀢𑁂𑀦𑁂𑀯𑀸𑀳 𑁋 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬𑀦𑁆𑀢𑀺. 𑀅𑀣 𑀯𑀸 𑀧𑀭𑀫𑀸𑀲𑀦𑁆𑀢𑀻𑀢𑀺 𑀉𑀢𑁆𑀢𑀫𑀸 𑀲𑀦𑁆𑀢𑀺. 𑀓𑀢𑀭𑀸 𑀲𑀸𑀢𑀺? 𑀦𑀺𑀩𑁆𑀩𑀸𑀦𑀁. 𑀬𑀲𑁆𑀫𑀸 𑀧𑀦 𑀦𑀺𑀩𑁆𑀩𑀸𑀦𑁂 𑀓𑀼𑀢𑁄𑀘𑀺 𑀪𑀬𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀅𑀓𑀼𑀢𑁄𑀪𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑁄 𑀉𑀧𑀥𑀺𑀲𑀗𑁆𑀔𑀬𑁂𑀢𑀺 𑀉𑀧𑀥𑀺𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀢𑀤𑀸𑀭𑀫𑁆𑀫𑀡𑀸𑀬 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄. 𑀲𑀻𑀳𑁄 𑀅𑀦𑀼𑀢𑁆𑀢𑀭𑁄𑀢𑀺 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀦𑀝𑁆𑀞𑁂𑀦 𑀓𑀺𑀮𑁂𑀲𑀸𑀦𑀜𑁆𑀘 𑀳𑀺𑀁𑀲𑀦𑀝𑁆𑀞𑁂𑀦 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑁄 𑀲𑀻𑀳𑁄 𑀦𑀸𑀫. 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁. 𑀇𑀢𑀻𑀢𑀺 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀢𑀁 𑀦𑀫𑀲𑁆𑀲𑀦𑁆𑀢𑀻𑀢𑀺 𑀢𑀁 𑀢𑀣𑀸𑀕𑀢𑀁 𑀢𑁂 𑀲𑀭𑀡𑀁 𑀕𑀢𑀸 𑀦𑀫𑀲𑁆𑀲𑀦𑁆𑀢𑀺. 𑀇𑀤𑀸𑀦𑀺 𑀬𑀁 𑀯𑀤𑀦𑁆𑀢𑀸 𑀢𑁂 𑀦𑀫𑀲𑁆𑀲𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀤𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.
𑁪. 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁪. 𑀘𑀢𑀼𑀢𑁆𑀣𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀁. 𑀓𑀢𑀭𑀸𑀬 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺? 𑀤𑀲𑀩𑀮𑀕𑀼𑀡𑀓𑀣𑀸𑀬. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀥𑀻𑀢𑀸 𑀘𑀽𑀴𑀲𑀼𑀪𑀤𑁆𑀤𑀸 ‘‘𑀲𑀸𑀓𑁂𑀢𑀦𑀕𑀭𑁂 𑀓𑀸𑀴𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀕𑁂𑀳𑀁 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀓𑀼𑀮𑀁 𑀕𑀘𑁆𑀙𑀸𑀫𑀺. 𑀲𑀘𑁂 𑀢𑀢𑁆𑀣 𑀲𑀓𑁆𑀓𑀸𑀭𑀁 𑀮𑀪𑀺𑀲𑁆𑀲𑀸𑀫𑀺, 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂 𑀧𑁂𑀲𑀺𑀬𑀫𑀸𑀦𑁂 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀫𑀁 𑀆𑀯𑀚𑁆𑀚𑁂𑀬𑁆𑀬𑀸𑀣 𑀪𑀕𑀯𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺 ‘‘𑀲𑀼𑀡𑀺𑀲𑀸 𑀫𑁂 𑀆𑀕𑀢𑀸’’𑀢𑀺 𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑁄𑀯 𑀩𑀳𑀼𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀧𑀜𑁆𑀘 𑀅𑀘𑁂𑀮𑀓𑀲𑀢𑀸𑀦𑀺 𑀦𑀺𑀫𑀦𑁆𑀢𑁂𑀲𑀺. 𑀲𑁄 𑀢𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 ‘‘𑀥𑀻𑀢𑀸 𑀫𑁂 𑀆𑀕𑀦𑁆𑀢𑁆𑀯𑀸 𑀅𑀭𑀳𑀦𑁆𑀢𑁂 𑀯𑀦𑁆𑀤𑀢𑀽’’𑀢𑀺 𑀘𑀽𑀴𑀲𑀼𑀪𑀤𑁆𑀤𑀸𑀬 𑀧𑁂𑀲𑁂𑀲𑀺. 𑀆𑀕𑀢𑀨𑀮𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀭𑀳𑀦𑁆𑀢𑁂𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 ‘‘𑀮𑀸𑀪𑀸 𑀯𑀢 𑀫𑁂’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀢𑀸 𑀢𑁂 𑀦𑀺𑀲𑁆𑀲𑀺𑀭𑀺𑀓𑀤𑀲𑁆𑀲𑀦𑁂 𑀅𑀘𑁂𑀮𑀓𑁂 𑀤𑀺𑀲𑁆𑀯𑀸𑀯 ‘‘𑀲𑀫𑀡𑀸 𑀦𑀸𑀫 𑀦 𑀏𑀯𑀭𑀽𑀧𑀸 𑀳𑁄𑀦𑁆𑀢𑀺, 𑀢𑀸𑀢, 𑀬𑁂𑀲𑀁 𑀦𑁂𑀯 𑀅𑀚𑁆𑀛𑀢𑁆𑀢𑀁 𑀳𑀺𑀭𑀻, 𑀦 𑀩𑀳𑀺𑀤𑁆𑀥𑀸 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀦 𑀇𑀫𑁂 𑀲𑀫𑀡𑀸, 𑀥𑀻𑀥𑀻’’𑀢𑀺 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸.
𑀢𑀢𑁄 𑀅𑀘𑁂𑀮𑀓𑀸 ‘‘𑀫𑀳𑀸𑀲𑁂𑀝𑁆𑀞𑀺 𑀓𑀼𑀢𑁄 𑀢𑁂 𑀏𑀯𑀭𑀽𑀧𑀸 𑀓𑀸𑀮𑀓𑀡𑁆𑀡𑀻 𑀮𑀤𑁆𑀥𑀸, 𑀓𑀺𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑀸 𑀤𑀸𑀭𑀺𑀓𑀸 𑀦𑀢𑁆𑀣𑀻’’𑀢𑀺 𑀲𑁂𑀝𑁆𑀞𑀺𑀁 𑀧𑀭𑀺𑀪𑀸𑀲𑀺𑀁𑀲𑀼. 𑀲𑁄 ‘‘𑀆𑀘𑀭𑀺𑀬𑀸 𑀚𑀸𑀦𑀺𑀢𑁆𑀯𑀸 𑀯𑀸 𑀓𑀢𑀁 𑀳𑁄𑀢𑀼 𑀅𑀚𑀸𑀦𑀺𑀢𑁆𑀯𑀸 𑀯𑀸, 𑀅𑀳𑀫𑁂𑀢𑁆𑀣 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀘𑁂𑀮𑀓𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀼𑀪𑀤𑁆𑀤𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀫, 𑀓𑀲𑁆𑀫𑀸 𑀏𑀯𑀭𑀽𑀧𑀁 𑀅𑀓𑀸𑀲𑀺, 𑀓𑀲𑁆𑀫𑀸 𑀅𑀭𑀳𑀦𑁆𑀢𑁂 𑀮𑀚𑁆𑀚𑀸𑀧𑁂𑀲𑀻’’𑀢𑀺 𑀆𑀳. 𑀢𑀸𑀢, 𑀅𑀭𑀳𑀦𑁆𑀢𑀸 𑀦𑀸𑀫 𑀏𑀯𑀭𑀽𑀧𑀸 𑀦 𑀳𑁄𑀦𑁆𑀢𑀻𑀢𑀺. 𑀅𑀣 𑀦𑀁 𑀲𑁄 𑀆𑀳 𑁋
‘‘𑀓𑀻𑀤𑀺𑀲𑀸 𑀲𑀫𑀡𑀸 𑀢𑀼𑀬𑁆𑀳𑀁, 𑀩𑀸𑀴𑁆𑀳𑀁 𑀔𑁄 𑀦𑁂 𑀧𑀲𑀁𑀲𑀲𑀺;
𑀓𑀺𑀁𑀲𑀻𑀮𑀸 𑀓𑀺𑀁𑀲𑀫𑀸𑀘𑀸𑀭𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸’’𑀢𑀺.
𑀲𑀸 𑀆𑀳 𑁋
‘‘𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀲𑀦𑁆𑀢𑀫𑀦𑀸, 𑀲𑀦𑁆𑀢𑀢𑁂𑀚𑀸 𑀕𑀼𑀡𑀫𑀕𑁆𑀕𑀲𑀡𑁆𑀞𑀺𑀢𑀸;
𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽 𑀫𑀺𑀢𑀪𑀸𑀡𑀻, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.
‘‘𑀯𑀲𑀦𑁆𑀢𑀺 𑀯𑀦𑀫𑁄𑀕𑀬𑁆𑀳, 𑀦𑀸𑀕𑁄 𑀙𑁂𑀢𑁆𑀯𑀸𑀯 𑀩𑀦𑁆𑀥𑀦𑀁;
𑀏𑀓𑀓𑀺𑀬𑀸 𑀅𑀤𑀼𑀢𑀺𑀬𑀸, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫𑀸’’𑀢𑀺.
𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀧𑀼𑀭𑁂 𑀞𑀢𑁆𑀯𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀓𑀣𑁂𑀲𑀺. 𑀲𑁂𑀝𑁆𑀞𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀬𑀤𑀺 𑀏𑀯𑀁, 𑀢𑀯 𑀲𑀫𑀡𑁂 𑀆𑀦𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀭𑁄𑀫𑀸’’𑀢𑀺. 𑀲𑀸 𑀧𑀼𑀘𑁆𑀙𑀺 ‘‘𑀓𑀤𑀸 𑀓𑀭𑀺𑀲𑁆𑀲𑀣, 𑀢𑀸𑀢𑀸’’𑀢𑀺. 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑀸𑀢𑀺 𑀯𑀼𑀢𑁆𑀢𑁂 𑀧𑁂𑀲𑁂𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀬𑁆𑀬𑀸’’𑀢𑀺. 𑀅𑀣 𑀦𑀁 ‘‘𑀲𑁆𑀯𑁂 𑀅𑀫𑁆𑀫𑀸’’𑀢𑀺 𑀆𑀳. 𑀲𑀸 𑀲𑀸𑀬𑀦𑁆𑀳𑀲𑀫𑀬𑁂 𑀉𑀧𑀭𑀺𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑀁 𑀧𑀼𑀧𑁆𑀨𑀲𑀫𑀼𑀕𑁆𑀕𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀝𑁆𑀞 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀤𑀲𑀩𑀮𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀏𑀯𑀜𑁆𑀘 𑀅𑀯𑀘 𑁋 ‘‘𑀪𑀕𑀯𑀸 𑀲𑁆𑀯𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀫𑀢𑁆𑀣𑀓𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀸 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀅𑀤𑁆𑀤𑀲. 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀫𑀳𑀸𑀲𑁂𑀝𑁆𑀞𑀺 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀫 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀘𑀽𑀴𑀲𑀼𑀪𑀤𑁆𑀤𑀸𑀬 𑀦𑀺𑀫𑀦𑁆𑀢𑀺𑀢𑀫𑁆𑀳 𑀲𑁂𑀝𑁆𑀞𑀻𑀢𑀺. 𑀦, 𑀪𑀦𑁆𑀢𑁂, 𑀓𑀜𑁆𑀘𑀺 𑀆𑀕𑀢𑀁 𑀧𑀲𑁆𑀲𑀸𑀫𑀸𑀢𑀺. 𑀆𑀫, 𑀲𑁂𑀝𑁆𑀞𑀺, 𑀲𑀤𑁆𑀥𑀸 𑀧𑀦 𑀉𑀧𑀸𑀲𑀺𑀓𑀸 𑀤𑀽𑀭𑁂 𑀬𑁄𑀚𑀦𑀲𑀢𑀫𑀢𑁆𑀣𑀓𑁂𑀧𑀺 𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀣𑀓𑁂𑀧𑀺 𑀞𑀺𑀢𑀸 𑀳𑀺𑀫𑀯𑀦𑁆𑀢𑁄 𑀯𑀺𑀬 𑀧𑀜𑁆𑀜𑀸𑀬𑀢𑀻𑀢𑀺 𑀯𑀢𑁆𑀯𑀸 𑁋
‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;
𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸’’𑀢𑀺. (𑀥. 𑀧. 𑁩𑁦𑁪) 𑁋
𑀇𑀫𑀁 𑀕𑀸𑀣𑀫𑀸𑀳. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 ‘‘𑀪𑀦𑁆𑀢𑁂, 𑀫𑀫, 𑀥𑀻𑀢𑀼 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.
𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀳𑀁, 𑀆𑀦𑀦𑁆𑀤, 𑀲𑀸𑀓𑁂𑀢𑀁 𑀕𑀫𑀺𑀲𑁆𑀲𑀸𑀫𑀺, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀮𑀸𑀓𑀁 𑀤𑁂𑀳𑀺. 𑀤𑀤𑀦𑁆𑀢𑁄 𑀘 𑀙𑀴𑀪𑀺𑀜𑁆𑀜𑀸𑀦𑀁𑀬𑁂𑀯 𑀤𑀤𑁂𑀬𑁆𑀬𑀸𑀲𑀻’’𑀢𑀺. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀘𑀽𑀴𑀲𑀼𑀪𑀤𑁆𑀤𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀩𑀳𑀼𑀓𑀺𑀘𑁆𑀘𑀸 𑀩𑀳𑀼𑀓𑀭𑀡𑀻𑀬𑀸, 𑀫𑀁 𑀲𑀮𑁆𑀮𑀓𑁆𑀔𑁂𑀬𑁆𑀬 𑀯𑀸 𑀦 𑀯𑀸, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀘𑀽𑀴𑀲𑀼𑀪𑀤𑁆𑀤𑀸𑀬 𑀓𑀣𑁂𑀲𑀺 𑁋 ‘‘𑀪𑀤𑁆𑀤𑁂, 𑀫𑀸 𑀔𑁄 𑀢𑁆𑀯𑀁 𑀯𑀺𑀫𑀦𑀸 𑀅𑀳𑁄𑀲𑀺, 𑀫𑀸 𑀤𑀼𑀫𑁆𑀫𑀦𑀸. 𑀅𑀥𑀺𑀯𑀼𑀢𑁆𑀣𑀁 𑀢𑁂 𑀪𑀕𑀯𑀢𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀲𑀸 𑀢𑀼𑀝𑁆𑀞𑀧𑀳𑀝𑁆𑀞𑀸 𑀤𑀸𑀦𑀫𑁂𑀯 𑀲𑀁𑀯𑀺𑀤𑀳𑀺. 𑀲𑀓𑁆𑀓𑁄𑀧𑀺 𑀔𑁄 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢, 𑀤𑀲𑀩𑀮𑁄 𑀘𑀽𑀴𑀲𑀼𑀪𑀤𑁆𑀤𑀸𑀬 𑀲𑀦𑁆𑀢𑀺𑀓𑀁 𑀲𑀸𑀓𑁂𑀢𑀦𑀕𑀭𑀁 𑀕𑀘𑁆𑀙𑀺𑀲𑁆𑀲𑀢𑀺, 𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀫𑀸𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀙𑀴𑀪𑀺𑀜𑁆𑀜𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀓𑀽𑀝𑀸𑀕𑀸𑀭𑀬𑀸𑀦𑁂𑀦 𑀫𑀡𑀺𑀯𑀡𑁆𑀡𑀁 𑀆𑀓𑀸𑀲𑀁 𑀯𑀺𑀮𑀺𑀔𑀦𑁆𑀢𑁄 𑀯𑀺𑀬 𑀲𑀸𑀓𑁂𑀢𑀦𑀕𑀭𑀁 𑀅𑀕𑀫𑀸𑀲𑀺.
𑀲𑀼𑀪𑀤𑁆𑀤𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀲𑀼𑀭𑀧𑀓𑁆𑀔𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀲𑀸𑀥𑀼 𑀢𑁂𑀲𑀁 𑀅𑀦𑀼𑀘𑁆𑀙𑀯𑀺𑀓𑀥𑀫𑁆𑀫𑀁 𑀓𑀣𑁂𑀣𑀸’’𑀢𑀺. 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀓𑀸𑀴𑀓𑀲𑁂𑀝𑁆𑀞𑀺 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑀁 𑀤𑀲𑀩𑀮𑀲𑁆𑀲 𑀅𑀤𑀸𑀲𑀺. 𑀅𑀘𑁂𑀮𑀓𑀸 ‘‘𑀅𑀫𑁆𑀳𑀸𑀓𑀁 𑀧𑀞𑀫𑀁 𑀤𑀺𑀦𑁆𑀦’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. ‘‘𑀕𑀘𑁆𑀙𑀣 𑀦𑀻𑀳𑀭𑀺𑀢𑀩𑁆𑀩𑀦𑀺𑀬𑀸𑀫𑁂𑀦 𑀢𑁂 𑀦𑀻𑀳𑀭𑀣𑀸’’𑀢𑀺 𑀲𑀩𑁆𑀩𑁂 𑀦𑀻𑀳𑀭𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀲𑀢𑁆𑀣𑀼 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑁂𑀬𑁆𑀬𑀁 𑀓𑀢𑁆𑀯𑀸 𑀉𑀤𑀓𑀁 𑀧𑀸𑀢𑁂𑀲𑀺. 𑀲𑁄 𑀓𑀸𑀴𑀓𑁂𑀦 𑀓𑀸𑀭𑀺𑀢𑀢𑀸𑀬 𑀓𑀸𑀴𑀓𑀸𑀭𑀸𑀫𑁄 𑀦𑀸𑀫 𑀚𑀸𑀢𑁄. 𑀪𑀕𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀢𑁆𑀣 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸𑀓𑁂𑀢𑁂 𑀯𑀺𑀳𑀭𑀢𑀺 𑀓𑀸𑀴𑀓𑀸𑀭𑀸𑀫𑁂’’𑀢𑀺.
𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺. 𑀢𑁂 𑀓𑀺𑀭 𑀲𑀸𑀓𑁂𑀢𑀦𑀕𑀭𑀯𑀸𑀲𑀺𑀦𑁄 𑀓𑀼𑀮𑀧𑀼𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀸 ‘‘𑀅𑀳𑁄 𑀩𑀼𑀤𑁆𑀥𑀕𑀼𑀡𑀸 𑀦𑀸𑀫 𑀫𑀳𑀦𑁆𑀢𑀸, 𑀏𑀯𑀭𑀽𑀧𑀁 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀁 𑀓𑀸𑀴𑀓𑀲𑁂𑀝𑁆𑀞𑀺𑀁 𑀤𑀺𑀝𑁆𑀞𑀺𑀢𑁄 𑀫𑁄𑀘𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀲𑀢𑁆𑀣𑀸𑀭𑀸 𑀤𑁂𑀯𑀮𑁄𑀓𑀲𑀤𑀺𑀲𑀁 𑀓𑀢’’𑀦𑁆𑀢𑀺 𑀤𑀲𑀩𑀮𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀕𑀼𑀡𑀁 𑀓𑀣𑁂𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀫𑀳𑀢𑀻 𑀤𑁂𑀲𑀦𑀸 𑀲𑀫𑀼𑀝𑁆𑀞𑀺𑀲𑁆𑀲𑀢𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀇𑀫𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑁂 𑀪𑀺𑀓𑁆𑀔𑀽 𑀆𑀤𑀺𑀁 𑀓𑀢𑁆𑀯𑀸 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲𑀸𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀏𑀯𑀫𑀺𑀤𑀁 𑀲𑀼𑀢𑁆𑀢𑀁 𑀕𑀼𑀡𑀓𑀣𑀸𑀬 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀢𑀢𑁆𑀣 ‘‘𑀢𑀫𑀳𑀁 𑀚𑀸𑀦𑀸𑀫𑀻’’𑀢𑀺 𑀧𑀤𑀧𑀭𑀺𑀬𑁄𑀲𑀸𑀦𑁂 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀓𑀫𑁆𑀧𑀺𑀢𑁆𑀣. 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀅𑀪𑀺𑀅𑀜𑁆𑀜𑀸𑀲𑀺𑀁, 𑀚𑀸𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀤𑀺𑀢𑀦𑁆𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀜𑀸𑀢𑀁. 𑀇𑀫𑀺𑀦𑀸 𑀏𑀢𑀁 𑀤𑀲𑁆𑀲𑁂𑀢𑀺 𑁋 𑀅𑀜𑁆𑀜𑁂 𑀚𑀸𑀦𑀦𑁆𑀢𑀺𑀬𑁂𑀯, 𑀫𑀬𑀸 𑀧𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀯𑀺𑀤𑀺𑀢𑀦𑁆𑀢𑀺. 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀜𑁆𑀜𑀼𑀢𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸. 𑀢𑀁 𑀢𑀣𑀸𑀕𑀢𑁄 𑀦 𑀉𑀧𑀝𑁆𑀞𑀸𑀲𑀻𑀢𑀺 𑀢𑀁 𑀙𑀤𑁆𑀯𑀸𑀭𑀺𑀓𑀁 𑀆𑀭𑀫𑁆𑀫𑀡𑀁 𑀢𑀣𑀸𑀕𑀢𑁄 𑀢𑀡𑁆𑀳𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀦 𑀉𑀧𑀝𑁆𑀞𑀸𑀲𑀺 𑀦 𑀉𑀧𑀕𑀜𑁆𑀙𑀺. 𑀅𑀬𑀜𑁆𑀳𑀺 𑀧𑀲𑁆𑀲𑀢𑀺 𑀪𑀕𑀯𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑁄 𑀪𑀕𑀯𑀸. 𑀲𑀼𑀡𑀸𑀢𑀺 𑀪𑀕𑀯𑀸 𑀲𑁄𑀢𑁂𑀦 𑀲𑀤𑁆𑀤𑀁. 𑀖𑀸𑀬𑀢𑀺 𑀪𑀕𑀯𑀸 𑀖𑀸𑀦𑁂𑀦 𑀕𑀦𑁆𑀥𑀁. 𑀲𑀸𑀬𑀢𑀺 𑀪𑀕𑀯𑀸 𑀚𑀺𑀯𑁆𑀳𑀸𑀬 𑀭𑀲𑀁. 𑀨𑀼𑀲𑀢𑀺 𑀪𑀕𑀯𑀸 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁. 𑀯𑀺𑀚𑀸𑀦𑀸𑀢𑀺 𑀪𑀕𑀯𑀸 𑀫𑀦𑀲𑀸 𑀥𑀫𑁆𑀫𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑁄 𑀪𑀕𑀯𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀁 𑀢𑀣𑀸𑀕𑀢𑁄 𑀦 𑀉𑀧𑀝𑁆𑀞𑀸𑀲𑀻’’𑀢𑀺. 𑀇𑀫𑀺𑀦𑀸 𑀧𑀤𑁂𑀦 𑀔𑀻𑀡𑀸𑀲𑀯𑀪𑀽𑀫𑀺 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑀢𑀁 𑀫𑀫𑀲𑁆𑀲 𑀫𑀼𑀲𑀸𑀢𑀺 𑀢𑀁 𑀫𑁂 𑀯𑀘𑀦𑀁 𑀫𑀼𑀲𑀸𑀯𑀸𑀤𑁄 𑀦𑀸𑀫 𑀪𑀯𑁂𑀬𑁆𑀬. 𑀢𑀁 𑀧𑀲𑁆𑀲 𑀢𑀸𑀤𑀺𑀲𑀫𑁂𑀯𑀸𑀢𑀺 𑀢𑀫𑁆𑀧𑀺 𑀫𑀼𑀲𑀸𑀯𑀸𑀤𑁄 𑀪𑀯𑁂𑀬𑁆𑀬. 𑀢𑀁 𑀫𑀫𑀲𑁆𑀲 𑀓𑀮𑀻𑀢𑀺 𑀢𑀁 𑀯𑀘𑀦𑀁 𑀫𑀬𑁆𑀳𑀁 𑀤𑁄𑀲𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀲𑀘𑁆𑀘𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑀤𑀝𑁆𑀞𑀸 𑀤𑀝𑁆𑀞𑀩𑁆𑀩𑀦𑁆𑀢𑀺 𑀤𑀺𑀲𑁆𑀯𑀸 𑀤𑀝𑁆𑀞𑀩𑁆𑀩𑀁. 𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀻𑀢𑀺 𑀢𑀁 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁 ‘‘𑀅𑀳𑀁 𑀫𑀳𑀸𑀚𑀦𑁂𑀦 𑀤𑀺𑀝𑁆𑀞𑀫𑁂𑀯 𑀧𑀲𑁆𑀲𑀸𑀫𑀻’’𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀦 𑀫𑀜𑁆𑀜𑀢𑀺. 𑀅𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀻𑀢𑀺 ‘‘𑀅𑀳𑀁 𑀫𑀳𑀸𑀚𑀦𑁂𑀦 𑀅𑀤𑀺𑀝𑁆𑀞𑀫𑁂𑀯 𑀏𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀫𑁆𑀧𑀺 𑀢𑀡𑁆𑀳𑀸𑀤𑀻𑀳𑀺 𑀫𑀜𑁆𑀜𑀦𑀸𑀳𑀺 𑀦 𑀫𑀜𑁆𑀜𑀢𑀺. 𑀤𑀝𑁆𑀞𑀩𑁆𑀩𑀁 𑀦 𑀫𑀜𑁆𑀜𑀢𑀻𑀢𑀺 ‘‘𑀫𑀳𑀸𑀚𑀦𑁂𑀦 𑀤𑀺𑀝𑁆𑀞𑀁 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀫𑁆𑀧𑀺 𑀢𑀸𑀳𑀺 𑀫𑀜𑁆𑀜𑀦𑀸𑀳𑀺 𑀦 𑀫𑀜𑁆𑀜𑀢𑀺. 𑀤𑀝𑁆𑀞𑀩𑁆𑀩𑀜𑁆𑀳𑀺 𑀅𑀤𑀺𑀝𑁆𑀞𑀫𑁆𑀧𑀺 𑀳𑁄𑀢𑀺𑀬𑁂𑀯. 𑀏𑀯𑀭𑀽𑀧𑀸𑀦𑀺 𑀳𑀺 𑀯𑀘𑀦𑀸𑀦𑀺 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀢𑁂𑀦𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀤𑀝𑁆𑀞𑀸𑀭𑀁 𑀦 𑀫𑀜𑁆𑀜𑀢𑀻𑀢𑀺 𑀧𑀲𑁆𑀲𑀺𑀢𑀸𑀭𑀁 𑀏𑀓𑀲𑀢𑁆𑀢𑀁 𑀦𑀸𑀫 𑀢𑀸𑀳𑀺 𑀫𑀜𑁆𑀜𑀦𑀸𑀳𑀺 𑀦 𑀫𑀜𑁆𑀜𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀝𑁆𑀞𑀸𑀦𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑀼𑀜𑁆𑀜𑀢𑀸𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸.
𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂. 𑀢𑀸𑀤𑀻𑀬𑁂𑀯 𑀢𑀸𑀤𑀻𑀢𑀺 𑀢𑀸𑀤𑀺𑀢𑀸 𑀦𑀸𑀫 𑀏𑀓𑀲𑀤𑀺𑀲𑀢𑀸. 𑀢𑀣𑀸𑀕𑀢𑁄 𑀘 𑀬𑀸𑀤𑀺𑀲𑁄 𑀮𑀸𑀪𑀸𑀤𑀻𑀲𑀼, 𑀢𑀸𑀤𑀺𑀲𑁄𑀯 𑀅𑀮𑀸𑀪𑀸𑀤𑀻𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻. 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻. 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻. 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻’’𑀢𑀺 (𑀫𑀳𑀸𑀦𑀺. 𑁩𑁮, 𑁧𑁯𑁨). 𑀇𑀫𑀸𑀬 𑀢𑀸𑀤𑀺𑀢𑀸𑀬 𑀢𑀸𑀤𑀻. 𑀢𑀫𑁆𑀳𑀸 𑀘 𑀧𑀦 𑀢𑀸𑀤𑀺𑀫𑁆𑀳𑀸𑀢𑀺 𑀢𑀢𑁄 𑀢𑀣𑀸𑀕𑀢𑀢𑀸𑀤𑀺𑀢𑁄 𑀅𑀜𑁆𑀜𑁄 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀢𑀸𑀤𑀻 𑀦𑀢𑁆𑀣𑀻𑀢𑀺 𑀏𑀢𑁆𑀢𑀸𑀯𑀢𑀸 𑀢𑀸𑀤𑀺𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸. 𑀇𑀫𑀸𑀳𑀺 𑀧𑀜𑁆𑀘𑀪𑀽𑀫𑀻𑀳𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑀲𑁆𑀲 𑀧𑀜𑁆𑀘𑀲𑀼𑀧𑀺 𑀞𑀸𑀦𑁂𑀲𑀼 𑀫𑀳𑀸𑀧𑀣𑀯𑀻 𑀲𑀓𑁆𑀔𑀺𑀪𑀸𑀯𑁂𑀦 𑀅𑀓𑀫𑁆𑀧𑀺𑀢𑁆𑀣. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑁂 𑀧𑀜𑁆𑀘𑀲𑀢𑁂 𑀅𑀥𑀼𑀦𑀸𑀧𑀩𑁆𑀩𑀚𑀺𑀢𑁂 𑀓𑀼𑀮𑀧𑀼𑀢𑁆𑀢𑁂 𑀆𑀤𑀺𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀁 𑀧𑀢𑁆𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼.
𑀪𑀕𑀯𑀸𑀧𑀺 𑀲𑀼𑀢𑁆𑀢𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀸𑀣𑀸𑀳𑀺 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀬𑀁𑀓𑀺𑀜𑁆𑀘𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑁄𑀲𑀺𑀢𑀁 𑀲𑀘𑁆𑀘𑀫𑀼𑀢𑀁 𑀧𑀭𑁂𑀲𑀦𑁆𑀢𑀺 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀧𑀭𑀧𑀢𑁆𑀢𑀺𑀬𑀸𑀬𑀦𑀸𑀬 𑀲𑀘𑁆𑀘𑀫𑀼𑀢𑀦𑁆𑀢𑀺 𑀫𑀜𑁆𑀜𑀺𑀢𑁆𑀯𑀸 𑀅𑀚𑁆𑀛𑁄𑀲𑀺𑀢𑀁 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀳𑀺𑀢𑀁. 𑀲𑀬𑀲𑀁𑀯𑀼𑀢𑁂𑀲𑀽𑀢𑀺 𑀲𑀬𑀫𑁂𑀯 𑀲𑀁𑀯𑀭𑀺𑀢𑁆𑀯𑀸 𑀧𑀺𑀬𑀸𑀬𑀺𑀢𑁆𑀯𑀸 𑀕𑀳𑀺𑀢𑀕𑀳𑀡𑁂𑀲𑀼, 𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀽𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀕𑀢𑀺𑀓𑀸 𑀳𑀺 𑀲𑀬𑀁 𑀲𑀁𑀯𑀼𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀘𑁆𑀘𑀁 𑀫𑀼𑀲𑀸 𑀯𑀸𑀧𑀺 𑀧𑀭𑀁 𑀤𑀳𑁂𑀬𑁆𑀬𑀸𑀢𑀺 𑀢𑁂𑀲𑀼 𑀲𑀬𑀁 𑀲𑀁𑀯𑀼𑀢𑀲𑀗𑁆𑀔𑀸𑀢𑁂𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀼 𑀢𑀣𑀸𑀕𑀢𑁄 𑀢𑀸𑀤𑀻 𑀢𑁂𑀲𑀁 𑀏𑀓𑀫𑁆𑀧𑀺 𑀯𑀘𑀦𑀁 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀏𑀯𑀁 𑀲𑀘𑁆𑀘𑀁 𑀫𑀼𑀲𑀸 𑀯𑀸𑀧𑀺 𑀧𑀭𑀁 𑀉𑀢𑁆𑀢𑀫𑀁 𑀓𑀢𑁆𑀯𑀸 𑀦 𑀑𑀤𑀳𑁂𑀬𑁆𑀬, 𑀦 𑀲𑀤𑁆𑀤𑀳𑁂𑀬𑁆𑀬, 𑀦 𑀧𑀢𑁆𑀢𑀺𑀬𑀸𑀬𑁂𑀬𑁆𑀬. 𑀏𑀢𑀜𑁆𑀘 𑀲𑀮𑁆𑀮𑀦𑁆𑀢𑀺 𑀏𑀢𑀁 𑀤𑀺𑀝𑁆𑀞𑀺𑀲𑀮𑁆𑀮𑀁. 𑀧𑀝𑀺𑀓𑀘𑁆𑀘 𑀤𑀺𑀲𑁆𑀯𑀸𑀢𑀺 𑀧𑀼𑀭𑁂𑀢𑀭𑀁 𑀩𑁄𑀥𑀺𑀫𑀽𑀮𑁂𑀬𑁂𑀯 𑀤𑀺𑀲𑁆𑀯𑀸. 𑀯𑀺𑀲𑀢𑁆𑀢𑀸𑀢𑀺 𑀮𑀕𑁆𑀕𑀸 𑀮𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀦𑁆𑀢𑀺 𑀬𑀣𑀸𑀬𑀁 𑀧𑀚𑀸 𑀅𑀚𑁆𑀛𑁄𑀲𑀺𑀢𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑀺𑀢𑀸, 𑀏𑀯𑀁 𑀅𑀳𑀫𑁆𑀧𑀺 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀢𑀣𑀸 𑀏𑀯𑀁 𑀬𑀣𑀸 𑀏𑀢𑀸𑀬 𑀧𑀚𑀸𑀬 𑀕𑀳𑀺𑀢𑀦𑁆𑀢𑀺 𑀏𑀯𑀁 𑀅𑀚𑁆𑀛𑁄𑀲𑀺𑀢𑀁 𑀦𑀢𑁆𑀣𑀺 𑀢𑀣𑀸𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄.
𑁫. 𑀩𑁆𑀭𑀳𑁆𑀫𑀘𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁫. 𑀧𑀜𑁆𑀘𑀫𑁂 𑀚𑀦𑀓𑀼𑀳𑀦𑀢𑁆𑀣𑀦𑁆𑀢𑀺 𑀢𑀻𑀳𑀺 𑀓𑀼𑀳𑀦𑀯𑀢𑁆𑀣𑀽𑀳𑀺 𑀚𑀦𑀲𑁆𑀲 𑀓𑀼𑀳𑀦𑀢𑁆𑀣𑀸𑀬. 𑀦 𑀚𑀦𑀮𑀧𑀦𑀢𑁆𑀣𑀦𑁆𑀢𑀺 𑀦 𑀚𑀦𑀲𑁆𑀲 𑀉𑀧𑀮𑀸𑀧𑀦𑀢𑁆𑀣𑀁. 𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸𑀦𑀺𑀲𑀁𑀲𑀢𑁆𑀣𑀦𑁆𑀢𑀺 𑀦 𑀘𑀻𑀯𑀭𑀸𑀤𑀺𑀣𑀼𑀢𑀺𑀯𑀘𑀦𑀢𑁆𑀣𑀁. 𑀦 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀢𑁆𑀣𑀦𑁆𑀢𑀺 𑀦 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀓𑀢𑀯𑀸𑀤𑀸𑀦𑀺𑀲𑀁𑀲𑀢𑁆𑀣𑀁, 𑀦 𑀯𑀸𑀤𑀲𑁆𑀲 𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀢𑁆𑀣𑀁. 𑀦 𑀇𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀦 ‘‘𑀏𑀯𑀁 𑀓𑀺𑀭 𑀏𑀲 𑀪𑀺𑀓𑁆𑀔𑀼, 𑀏𑀯𑀁 𑀓𑀺𑀭 𑀏𑀲 𑀪𑀺𑀓𑁆𑀔𑀽’’𑀢𑀺 𑀚𑀦𑀲𑁆𑀲 𑀚𑀸𑀦𑀦𑀢𑁆𑀣𑀸𑀬. 𑀲𑀁𑀯𑀭𑀢𑁆𑀣𑀦𑁆𑀢𑀺 𑀧𑀜𑁆𑀘𑀳𑀺 𑀲𑀁𑀯𑀭𑁂𑀳𑀺 𑀲𑀁𑀯𑀭𑀡𑀢𑁆𑀣𑀸𑀬. 𑀧𑀳𑀸𑀦𑀢𑁆𑀣𑀦𑁆𑀢𑀺 𑀢𑀻𑀳𑀺 𑀧𑀳𑀸𑀦𑁂𑀳𑀺 𑀧𑀚𑀳𑀦𑀢𑁆𑀣𑀸𑀬. 𑀯𑀺𑀭𑀸𑀕𑀢𑁆𑀣𑀦𑁆𑀢𑀺 𑀭𑀸𑀕𑀸𑀤𑀻𑀦𑀁 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀦𑀺𑀭𑁄𑀥𑀢𑁆𑀣𑀦𑁆𑀢𑀺 𑀢𑁂𑀲𑀁𑀬𑁂𑀯 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬. 𑀅𑀦𑀻𑀢𑀺𑀳𑀦𑁆𑀢𑀺 𑀇𑀢𑀺𑀳𑀧𑀭𑀺𑀯𑀚𑁆𑀚𑀺𑀢𑀁, 𑀅𑀧𑀭𑀧𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑁄𑀕𑀥𑀕𑀸𑀫𑀺𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑁆𑀢𑁄𑀕𑀸𑀫𑀺𑀦𑀁. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑁆𑀢𑁄𑀬𑁂𑀯 𑀯𑀢𑁆𑀢𑀢𑀺 𑀧𑀯𑀢𑁆𑀢𑀢𑀺. 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀤𑀼𑀯𑀺𑀥𑀫𑁆𑀧𑀺 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑁂𑀢𑁆𑀯𑀸 𑀕𑀸𑀣𑀸𑀲𑀼 𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁬. 𑀓𑀼𑀳𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁬. 𑀙𑀝𑁆𑀞𑁂 𑀓𑀼𑀳𑀸𑀢𑀺 𑀓𑀼𑀳𑀓𑀸. 𑀣𑀤𑁆𑀥𑀸𑀢𑀺 𑀓𑁄𑀥𑁂𑀦 𑀘 𑀫𑀸𑀦𑁂𑀦 𑀘 𑀣𑀤𑁆𑀥𑀸. 𑀮𑀧𑀸𑀢𑀺 𑀉𑀧𑀮𑀸𑀧𑀓𑀸. 𑀲𑀺𑀗𑁆𑀕𑀻𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑀺𑀗𑁆𑀕𑀁, 𑀬𑀁 𑀲𑀺𑀗𑁆𑀕𑀁 𑀲𑀺𑀗𑁆𑀕𑀸𑀭𑀢𑀸 𑀘𑀸𑀢𑀼𑀭𑀢𑀸 𑀘𑀸𑀢𑀼𑀭𑀺𑀬𑀁 𑀧𑀭𑀺𑀓𑁆𑀔𑀢𑁆𑀢𑀢𑀸 𑀧𑀸𑀭𑀺𑀓𑁆𑀔𑀢𑁆𑀢𑀺𑀬’’𑀦𑁆𑀢𑀺 (𑀯𑀺𑀪. 𑁮𑁫𑁨) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀲𑀺𑀗𑁆𑀕𑀲𑀤𑀺𑀲𑁂𑀳𑀺 𑀧𑀸𑀓𑀝𑀓𑀺𑀮𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸 𑀢𑀼𑀘𑁆𑀙𑀫𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸. 𑀅𑀲𑀫𑀸𑀳𑀺𑀢𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀫𑀢𑁆𑀢𑀲𑁆𑀲𑀸𑀧𑀺 𑀅𑀮𑀸𑀪𑀺𑀦𑁄. 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸𑀢𑀺 𑀢𑁂 𑀫𑀬𑁆𑀳𑀁 𑀪𑀺𑀓𑁆𑀔𑀽 𑀫𑀫 𑀲𑀦𑁆𑀢𑀓𑀸 𑀦 𑀳𑁄𑀦𑁆𑀢𑀺. ‘‘𑀢𑁂 𑀫𑀬𑁆𑀳’’𑀦𑁆𑀢𑀺 𑀇𑀤𑀁 𑀧𑀦 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸𑀢𑀺 𑀇𑀥𑀸𑀧𑀺 𑀫𑁂𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀤𑀢𑀺, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀢𑁆𑀢𑀸 𑀧𑀦 ‘‘𑀫𑀸𑀫𑀓𑀸’’𑀢𑀺 𑀆𑀳. 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀟𑁆𑀠𑀦𑀢𑁄 𑀯𑀼𑀤𑁆𑀥𑀺𑀁, 𑀦𑀺𑀘𑁆𑀘𑀮𑀪𑀸𑀯𑁂𑀦 𑀯𑀺𑀭𑀽𑀴𑁆𑀳𑀺𑀁, 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀢𑀸𑀬 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂 𑀧𑀦𑁂𑀢𑁂 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀯𑀺𑀭𑀼𑀳𑀦𑁆𑀢𑀺, 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁂 𑀯𑀺𑀭𑀽𑀴𑁆𑀳𑀸 𑀦𑀸𑀫 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀧𑀺 𑀕𑀸𑀣𑀸𑀲𑀼𑀧𑀺 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.
𑁭. 𑀲𑀦𑁆𑀢𑀼𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁭. 𑀲𑀢𑁆𑀢𑀫𑁂 𑀅𑀧𑁆𑀧𑀸𑀦𑀻𑀢𑀺 𑀧𑀭𑀺𑀢𑁆𑀢𑀸𑀦𑀺. 𑀲𑀼𑀮𑀪𑀸𑀦𑀻𑀢𑀺 𑀲𑀼𑀔𑁂𑀦 𑀮𑀤𑁆𑀥𑀩𑁆𑀩𑀸𑀦𑀺, 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀮𑀪𑀺𑀢𑀼𑀁. 𑀅𑀦𑀯𑀚𑁆𑀚𑀸𑀦𑀻𑀢𑀺 𑀦𑀺𑀤𑁆𑀤𑁄𑀲𑀸𑀦𑀺. 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀦𑁆𑀢𑀺 𑀚𑀗𑁆𑀖𑀸𑀧𑀺𑀡𑁆𑀟𑀺𑀬𑀩𑀮𑁂𑀦 𑀘𑀭𑀺𑀢𑁆𑀯𑀸 𑀆𑀮𑁄𑀧𑀫𑀢𑁆𑀢𑀁 𑀮𑀤𑁆𑀥𑀁 𑀪𑁄𑀚𑀦𑀁. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀫𑀼𑀢𑁆𑀢𑀁. 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀧𑀽𑀢𑀺𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀪𑀺𑀦𑀯𑀫𑁆𑀧𑀺 𑀫𑀼𑀢𑁆𑀢𑀁 𑀧𑀽𑀢𑀺𑀫𑀼𑀢𑁆𑀢𑀫𑁂𑀯.
𑀯𑀺𑀖𑀸𑀢𑁄𑀢𑀺 𑀯𑀺𑀕𑀢𑀖𑀸𑀢𑁄, 𑀘𑀺𑀢𑁆𑀢𑀲𑁆𑀲 𑀤𑀼𑀓𑁆𑀔𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀲𑀸 𑀦𑀧𑁆𑀧𑀝𑀺𑀳𑀜𑁆𑀜𑀢𑀻𑀢𑀺 𑀬𑀲𑁆𑀲 𑀳𑀺 ‘‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀢𑁄 𑀘𑀻𑀯𑀭𑀸𑀤𑀻𑀦𑀺 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀺𑀲𑀸 𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀬𑀲𑁆𑀲 𑀏𑀯𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀦𑀧𑁆𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀥𑀫𑁆𑀫𑀸𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀸. 𑀲𑀸𑀫𑀜𑁆𑀜𑀲𑁆𑀲𑀸𑀦𑀼𑀮𑁄𑀫𑀺𑀓𑀸𑀢𑀺 𑀲𑀫𑀡𑀥𑀫𑁆𑀫𑀲𑁆𑀲 𑀅𑀦𑀼𑀮𑁄𑀫𑀸. 𑀅𑀥𑀺𑀕𑁆𑀕𑀳𑀺𑀢𑀸𑀢𑀺 𑀲𑀩𑁆𑀩𑁂𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀥𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺 𑀅𑀦𑁆𑀢𑁄𑀕𑀢𑀸 𑀦 𑀧𑀭𑀺𑀩𑀸𑀳𑀺𑀭𑀸𑀢𑀺.
𑁮. 𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸
𑁨𑁮. 𑀅𑀝𑁆𑀞𑀫𑀲𑁆𑀲 𑀅𑀚𑁆𑀛𑀸𑀲𑀬𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀇𑀫𑀁 𑀓𑀺𑀭 𑀫𑀳𑀸𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀦𑁆𑀢𑀁 𑀪𑀕𑀯𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄𑀧𑀺 𑀧𑀭𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀅𑀚𑁆𑀛𑀸𑀲𑀬𑀯𑀲𑁂𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀺 𑀘𑀢𑁆𑀢𑀸𑀮𑀻𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀫𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀯𑀁𑀲𑀸𑀢𑀺 𑀆𑀭𑀪𑀺. 𑀢𑀢𑁆𑀣 𑀅𑀭𑀺𑀬𑀯𑀁𑀲𑀸𑀢𑀺 𑀅𑀭𑀺𑀬𑀸𑀦𑀁 𑀯𑀁𑀲𑀸. 𑀬𑀣𑀸 𑀳𑀺 𑀔𑀢𑁆𑀢𑀺𑀬𑀯𑀁𑀲𑁄 𑀩𑁆𑀭𑀸𑀳𑁆𑀫𑀡𑀯𑀁𑀲𑁄 𑀯𑁂𑀲𑁆𑀲𑀯𑀁𑀲𑁄 𑀲𑀼𑀤𑁆𑀤𑀯𑀁𑀲𑁄 𑀲𑀫𑀡𑀯𑀁𑀲𑁄 𑀓𑀼𑀮𑀯𑀁𑀲𑁄 𑀭𑀸𑀚𑀯𑀁𑀲𑁄, 𑀏𑀯𑀁 𑀅𑀬𑀫𑁆𑀧𑀺 𑀅𑀝𑁆𑀞𑀫𑁄 𑀅𑀭𑀺𑀬𑀯𑀁𑀲𑁄 𑀅𑀭𑀺𑀬𑀢𑀦𑁆𑀢𑀺 𑀅𑀭𑀺𑀬𑀧𑀯𑁂𑀡𑀻 𑀦𑀸𑀫 𑀳𑁄𑀢𑀺. 𑀲𑁄 𑀔𑁄 𑀧𑀦𑀸𑀬𑀁 𑀅𑀭𑀺𑀬𑀯𑀁𑀲𑁄 𑀇𑀫𑁂𑀲𑀁 𑀯𑀁𑀲𑀸𑀦𑀁 𑀫𑀽𑀮𑀕𑀦𑁆𑀥𑀸𑀤𑀻𑀦𑀁 𑀓𑀸𑀴𑀸𑀦𑀼𑀲𑀸𑀭𑀺𑀕𑀦𑁆𑀥𑀸𑀤𑀬𑁄 𑀯𑀺𑀬 𑀅𑀕𑁆𑀕𑀫𑀓𑁆𑀔𑀸𑀬𑀢𑀺.
𑀓𑁂 𑀧𑀦 𑀢𑁂 𑀅𑀭𑀺𑀬𑀸, 𑀬𑁂𑀲𑀁 𑀏𑀢𑁂 𑀯𑀁𑀲𑀸𑀢𑀺? 𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀢𑀣𑀸𑀕𑀢𑀲𑀸𑀯𑀓𑀸 𑀘, 𑀏𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑀸𑀢𑀺 𑀅𑀭𑀺𑀬𑀯𑀁𑀲𑀸. 𑀇𑀢𑁄 𑀧𑀼𑀩𑁆𑀩𑁂 𑀳𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀢𑀡𑁆𑀳𑀗𑁆𑀓𑀭𑁄, 𑀫𑁂𑀥𑀗𑁆𑀓𑀭𑁄, 𑀲𑀭𑀡𑀗𑁆𑀓𑀭𑁄, 𑀤𑀻𑀧𑀗𑁆𑀓𑀭𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑁂 𑀅𑀭𑀺𑀬𑀸, 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑀸𑀢𑀺 𑀅𑀭𑀺𑀬𑀯𑀁𑀲𑀸. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀅𑀧𑀭𑀪𑀸𑀕𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄…𑀧𑁂… 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄, 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀕𑁄𑀢𑀫𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀯𑀁𑀲𑀸𑀢𑀺 𑀅𑀭𑀺𑀬𑀯𑀁𑀲𑀸. 𑀅𑀧𑀺𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀲𑀩𑁆𑀩𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀅𑀭𑀺𑀬𑀸𑀦𑀁 𑀯𑀁𑀲𑀸𑀢𑀺 𑀅𑀭𑀺𑀬𑀯𑀁𑀲𑀸.
𑀢𑁂 𑀔𑁄 𑀧𑀦𑁂𑀢𑁂 𑀅𑀕𑁆𑀕𑀜𑁆𑀜𑀸 𑀅𑀕𑁆𑀕𑀸𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀭𑀢𑁆𑀢𑀜𑁆𑀜𑀸 𑀤𑀻𑀖𑀭𑀢𑁆𑀢𑀁 𑀧𑀯𑀢𑁆𑀢𑀸𑀢𑀺 𑀚𑀸𑀦𑀺𑀢𑀩𑁆𑀩𑀸, 𑀯𑀁𑀲𑀜𑁆𑀜𑀸 𑀯𑀁𑀲𑀸𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑁄𑀭𑀸𑀡𑀸 𑀦 𑀅𑀥𑀼𑀦𑀼𑀧𑁆𑀧𑀢𑁆𑀢𑀺𑀓𑀸. 𑀅𑀲𑀁𑀓𑀺𑀡𑁆𑀡𑀸 𑀅𑀯𑀺𑀓𑀺𑀡𑁆𑀡𑀸 𑀅𑀦𑀧𑀦𑀻𑀢𑀸. 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸 𑀅𑀢𑀻𑀢𑀩𑀼𑀤𑁆𑀥𑁂𑀳𑀺𑀧𑀺 𑀦 𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸, ‘‘𑀓𑀺 𑀇𑀫𑁂𑀳𑀻’’𑀢𑀺 𑀦 𑀅𑀧𑀦𑀻𑀢𑀧𑀼𑀩𑁆𑀩𑀸. 𑀦 𑀲𑀁𑀓𑀻𑀬𑀦𑁆𑀢𑀻𑀢𑀺 𑀇𑀤𑀸𑀦𑀺𑀧𑀺 𑀦 𑀅𑀧𑀦𑀻𑀬𑀦𑁆𑀢𑀺. 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀸𑀕𑀢𑀩𑀼𑀤𑁆𑀥𑁂𑀳𑀺𑀧𑀺 𑀦 𑀅𑀧𑀦𑀻𑀬𑀺𑀲𑁆𑀲𑀦𑁆𑀢𑀺. 𑀬𑁂 𑀮𑁄𑀓𑁂 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑁂𑀳𑀺 𑀅𑀧𑁆𑀧𑀝𑀺𑀓𑀼𑀝𑁆𑀞𑀸, 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺 𑀅𑀦𑀺𑀦𑁆𑀤𑀺𑀢𑀸 𑀅𑀕𑀭𑀳𑀺𑀢𑀸.
𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀧𑀘𑁆𑀘𑀬𑀲𑀦𑁆𑀢𑁄𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀦 𑀣𑀽𑀮𑀲𑀼𑀔𑀼𑀫𑀮𑀽𑀔𑀧𑀡𑀻𑀢𑀣𑀺𑀭𑀚𑀺𑀡𑁆𑀡𑀸𑀦𑀁 𑀬𑁂𑀦 𑀓𑁂𑀦𑀘𑀺, 𑀅𑀣 𑀔𑁄 𑀬𑀣𑀸𑀮𑀤𑁆𑀥𑀸𑀤𑀻𑀦𑀁 𑀇𑀢𑀭𑀻𑀢𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀲𑁆𑀫𑀺𑀜𑁆𑀳𑀺 𑀢𑀬𑁄 𑀲𑀦𑁆𑀢𑁄𑀲𑀸 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀲𑀦𑁆𑀢𑀼𑀝𑁆𑀞𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑁂 𑀢𑀬𑁄 𑀲𑀦𑁆𑀢𑁄𑀲𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦, 𑀬𑀣𑀸𑀮𑀤𑁆𑀥𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀘𑀻𑀯𑀭𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.
𑀏𑀢𑁆𑀣 𑀘 𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀁, 𑀘𑀻𑀯𑀭𑀓𑁆𑀔𑁂𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀧𑀁𑀲𑀼𑀓𑀽𑀮𑀁 𑀚𑀸𑀦𑀺𑀢𑀩𑁆𑀩𑀁, 𑀘𑀻𑀯𑀭𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀘𑀻𑀯𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀔𑁄𑀫𑀸𑀤𑀻𑀦𑀺 𑀙 𑀘𑀻𑀯𑀭𑀸𑀦𑀺 𑀤𑀼𑀓𑀽𑀮𑀸𑀤𑀻𑀦𑀺 𑀙 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀇𑀫𑀸𑀦𑀺 𑀤𑁆𑀯𑀸𑀤𑀲 𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺. 𑀓𑀼𑀲𑀘𑀻𑀭𑀁, 𑀯𑀸𑀓𑀘𑀻𑀭𑀁, 𑀨𑀮𑀓𑀘𑀻𑀭𑀁, 𑀓𑁂𑀲𑀓𑀫𑁆𑀩𑀮𑀁, 𑀯𑀸𑀴𑀓𑀫𑁆𑀩𑀮𑀁, 𑀧𑁄𑀢𑁆𑀣𑀓𑁄, 𑀘𑀫𑁆𑀫𑀁, 𑀉𑀮𑀽𑀓𑀧𑀓𑁆𑀔𑀁, 𑀭𑀼𑀓𑁆𑀔𑀤𑀼𑀲𑁆𑀲𑀁, 𑀮𑀢𑀸𑀤𑀼𑀲𑁆𑀲𑀁, 𑀏𑀭𑀓𑀤𑀼𑀲𑁆𑀲𑀁, 𑀓𑀤𑀮𑀺𑀤𑀼𑀲𑁆𑀲𑀁, 𑀯𑁂𑀴𑀼𑀤𑀼𑀲𑁆𑀲𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀧𑀦 𑀅𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺.
𑀘𑀻𑀯𑀭𑀓𑁆𑀔𑁂𑀢𑁆𑀢𑀦𑁆𑀢𑀺 ‘‘𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦, 𑀧𑀁𑀲𑀼𑀓𑀽𑀮𑀁 𑀯𑀸’’𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀦𑀢𑁄 𑀙 𑀔𑁂𑀢𑁆𑀢𑀸𑀦𑀺, 𑀅𑀝𑁆𑀞𑀦𑁆𑀦𑀜𑁆𑀘 𑀫𑀸𑀢𑀺𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞 𑀔𑁂𑀢𑁆𑀢𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺.
𑀧𑀁𑀲𑀼𑀓𑀽𑀮𑀦𑁆𑀢𑀺 𑀲𑁄𑀲𑀸𑀦𑀺𑀓𑀁, 𑀧𑀸𑀧𑀡𑀺𑀓𑀁, 𑀭𑀣𑀺𑀬𑀁, 𑀲𑀗𑁆𑀓𑀸𑀭𑀓𑀽𑀝𑀓𑀁, 𑀲𑁄𑀢𑁆𑀣𑀺𑀬𑀁, 𑀲𑀺𑀦𑀸𑀦𑀁, 𑀢𑀺𑀢𑁆𑀣𑀁, 𑀕𑀢𑀧𑀘𑁆𑀘𑀸𑀕𑀢𑀁, 𑀅𑀕𑁆𑀕𑀺𑀤𑀟𑁆𑀠𑀁, 𑀕𑁄𑀔𑀸𑀬𑀺𑀢𑀁, 𑀉𑀧𑀘𑀺𑀓𑀔𑀸𑀬𑀺𑀢𑀁, 𑀉𑀦𑁆𑀤𑀽𑀭𑀔𑀸𑀬𑀺𑀢𑀁, 𑀅𑀦𑁆𑀢𑀘𑁆𑀙𑀺𑀦𑁆𑀦𑀁, 𑀤𑀲𑀘𑁆𑀙𑀺𑀦𑁆𑀦𑀁, 𑀥𑀚𑀸𑀳𑀝𑀁, 𑀣𑀽𑀧𑀁, 𑀲𑀫𑀡𑀘𑀻𑀯𑀭𑀁, 𑀲𑀸𑀫𑀼𑀤𑁆𑀤𑀺𑀬𑀁, 𑀆𑀪𑀺𑀲𑁂𑀓𑀺𑀬𑀁, 𑀧𑀦𑁆𑀣𑀺𑀓𑀁, 𑀯𑀸𑀢𑀸𑀳𑀝𑀁, 𑀇𑀤𑁆𑀥𑀺𑀫𑀬𑀁, 𑀤𑁂𑀯𑀤𑀢𑁆𑀢𑀺𑀬𑀦𑁆𑀢𑀺 𑀢𑁂𑀯𑀻𑀲𑀢𑀺 𑀧𑀁𑀲𑀼𑀓𑀽𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 𑀲𑁄𑀢𑁆𑀣𑀺𑀬𑀦𑁆𑀢𑀺 𑀕𑀩𑁆𑀪𑀫𑀮𑀳𑀭𑀡𑀁. 𑀕𑀢𑀧𑀘𑁆𑀘𑀸𑀕𑀢𑀦𑁆𑀢𑀺 𑀫𑀢𑀓𑀲𑀭𑀻𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀆𑀦𑀻𑀢𑀘𑀻𑀯𑀭𑀁. 𑀥𑀚𑀸𑀳𑀝𑀦𑁆𑀢𑀺 𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀢𑁄 𑀆𑀦𑀻𑀢𑀁. 𑀣𑀽𑀧𑀦𑁆𑀢𑀺 𑀯𑀫𑁆𑀫𑀺𑀓𑁂 𑀧𑀽𑀚𑀺𑀢𑀘𑀻𑀯𑀭𑀁. 𑀲𑀸𑀫𑀼𑀤𑁆𑀤𑀺𑀬𑀦𑁆𑀢𑀺 𑀲𑀫𑀼𑀤𑁆𑀤𑀯𑀻𑀘𑀻𑀳𑀺 𑀣𑀮𑀁 𑀧𑀸𑀧𑀺𑀢𑀁. 𑀧𑀦𑁆𑀣𑀺𑀓𑀦𑁆𑀢𑀺 𑀧𑀦𑁆𑀣𑀁 𑀕𑀘𑁆𑀙𑀦𑁆𑀢𑁂𑀳𑀺 𑀘𑁄𑀭𑀪𑀬𑁂𑀦 𑀧𑀸𑀲𑀸𑀡𑁂𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀧𑀸𑀭𑀼𑀢𑀘𑀻𑀯𑀭𑀁. 𑀇𑀤𑁆𑀥𑀺𑀫𑀬𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀼𑀘𑀻𑀯𑀭𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯𑀸𑀢𑀺.
𑀘𑀻𑀯𑀭𑀲𑀦𑁆𑀢𑁄𑀲𑁄𑀢𑀺 𑀯𑀻𑀲𑀢𑀺 𑀘𑀻𑀯𑀭𑀲𑀦𑁆𑀢𑁄𑀲𑀸 𑁋 𑀘𑀻𑀯𑀭𑁂 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄, 𑀕𑀫𑀦𑀲𑀦𑁆𑀢𑁄𑀲𑁄, 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄, 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄, 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄, 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄, 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄, 𑀬𑀣𑀸𑀩𑀮𑀲𑀦𑁆𑀢𑁄𑀲𑁄, 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄, 𑀉𑀤𑀓𑀲𑀦𑁆𑀢𑁄𑀲𑁄, 𑀥𑁄𑀯𑀦𑀲𑀦𑁆𑀢𑁄𑀲𑁄, 𑀓𑀭𑀡𑀲𑀦𑁆𑀢𑁄𑀲𑁄, 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄, 𑀲𑀼𑀢𑁆𑀢𑀲𑀦𑁆𑀢𑁄𑀲𑁄, 𑀲𑀺𑀩𑁆𑀩𑀦𑀲𑀦𑁆𑀢𑁄𑀲𑁄, 𑀭𑀚𑀦𑀲𑀦𑁆𑀢𑁄𑀲𑁄, 𑀓𑀧𑁆𑀧𑀲𑀦𑁆𑀢𑁄𑀲𑁄, 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄, 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄, 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄𑀢𑀺.
𑀢𑀢𑁆𑀣 𑀲𑀸𑀤𑀓𑀪𑀺𑀓𑁆𑀔𑀼𑀦𑀸 𑀢𑁂𑀫𑀸𑀲𑀁 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺𑀢𑁆𑀯𑀸 𑀏𑀓𑀫𑀸𑀲𑀫𑀢𑁆𑀢𑀁 𑀯𑀺𑀢𑀓𑁆𑀓𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁄 𑀳𑀺 𑀧𑀯𑀸𑀭𑁂𑀢𑁆𑀯𑀸 𑀘𑀻𑀯𑀭𑀫𑀸𑀲𑁂 𑀘𑀻𑀯𑀭𑀁 𑀓𑀭𑁄𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀅𑀟𑁆𑀠𑀫𑀸𑀲𑁂𑀦𑁂𑀯 𑀓𑀭𑁄𑀢𑀺. 𑀇𑀤𑀁 𑀫𑀸𑀲𑀟𑁆𑀠𑀫𑀸𑀲𑀫𑀢𑁆𑀢𑀁 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀦𑀸𑀫. 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁂𑀦 𑀧𑀦 𑀲𑀦𑁆𑀢𑀼𑀝𑁆𑀞𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀘𑀻𑀦𑀔𑀡𑁆𑀟𑀭𑀸𑀚𑀺𑀯𑀸𑀲𑀺𑀓𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑀲𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀁.
𑀣𑁂𑀭𑁄 𑀓𑀺𑀭 ‘‘𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑁂 𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀘𑀻𑀯𑀭𑀁 𑀚𑀺𑀡𑁆𑀡𑀁, 𑀩𑀳𑀽𑀦𑀁 𑀯𑀲𑀦𑀝𑁆𑀞𑀸𑀦𑁂 𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀯𑀼𑀢𑁆𑀣𑁄 𑀧𑀼𑀦𑀤𑀺𑀯𑀲𑁂 𑀘𑀻𑀯𑀭𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺. 𑀣𑁂𑀭𑁄 ‘‘𑀓𑀺𑀁, 𑀆𑀯𑀼𑀲𑁄’’𑀢𑀺 𑀆𑀳. 𑀕𑀸𑀫𑀤𑁆𑀯𑀸𑀭𑀁, 𑀪𑀦𑁆𑀢𑁂, 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀅𑀳𑀫𑁆𑀧𑀸𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀕𑀘𑁆𑀙𑀦𑁆𑀢𑁄 𑀫𑀳𑀸𑀩𑁄𑀥𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 ‘‘𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀫𑀦𑀸𑀧𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀧𑀭𑀺𑀲𑀼𑀤𑁆𑀥𑁄 𑀫𑁂 𑀯𑀺𑀢𑀓𑁆𑀓𑁄’’𑀢𑀺 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺. 𑀧𑀼𑀦𑀤𑀺𑀯𑀲𑁂 𑀅𑀫𑁆𑀩𑀗𑁆𑀕𑀡𑀲𑀫𑀻𑀧𑀢𑁄, 𑀧𑀼𑀦𑀤𑀺𑀯𑀲𑁂 𑀫𑀳𑀸𑀘𑁂𑀢𑀺𑀬𑀲𑁆𑀲 𑀉𑀢𑁆𑀢𑀭𑀤𑁆𑀯𑀸𑀭𑀢𑁄 𑀢𑀢𑁆𑀣𑁂𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑁂 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀣𑁂𑀭𑁄 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀢𑀓𑁆𑀓𑁄 𑀦 𑀧𑀭𑀺𑀲𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀫𑀸𑀦𑁄 𑀕𑀸𑀫𑀁 𑀧𑀸𑀯𑀺𑀲𑀺. 𑀢𑀜𑁆𑀘 𑀭𑀢𑁆𑀢𑀺𑀁 𑀏𑀓𑁄 𑀫𑀦𑀼𑀲𑁆𑀲𑁄 𑀉𑀘𑁆𑀘𑀸𑀭𑀧𑀮𑀺𑀩𑀼𑀤𑁆𑀥𑁄 𑀲𑀸𑀝𑀓𑁂𑀬𑁂𑀯 𑀯𑀘𑁆𑀘𑀁 𑀓𑀢𑁆𑀯𑀸 𑀢𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑁂𑀲𑀺. 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑁄 𑀢𑀁 𑀦𑀻𑀮𑀫𑀓𑁆𑀔𑀺𑀓𑀸𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀲𑀺. 𑀫𑀳𑀸𑀣𑁂𑀭𑁄 ‘‘𑀓𑀺𑀁, 𑀆𑀯𑀼𑀲𑁄, 𑀲𑀗𑁆𑀓𑀸𑀭𑀝𑁆𑀞𑀸𑀦𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀲𑀻’’𑀢𑀺. 𑀦𑀸𑀳𑀁, 𑀪𑀦𑁆𑀢𑁂, 𑀲𑀗𑁆𑀓𑀸𑀭𑀝𑁆𑀞𑀸𑀦𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀫𑀺, 𑀫𑀬𑁆𑀳𑀁 𑀧𑀺𑀢𑀼 𑀤𑀲𑀩𑀮𑀲𑁆𑀲 𑀧𑀕𑁆𑀕𑀡𑁆𑀳𑀸𑀫𑀺, 𑀧𑀼𑀡𑁆𑀡𑀤𑀸𑀲𑀺𑀬𑀸 𑀲𑀭𑀻𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀙𑀟𑁆𑀟𑀺𑀢𑀁 𑀧𑀁𑀲𑀼𑀓𑀽𑀮𑀁 𑀢𑀼𑀫𑁆𑀩𑀫𑀢𑁆𑀢𑁂 𑀧𑀸𑀡𑀓𑁂 𑀯𑀺𑀥𑀼𑀦𑀺𑀢𑁆𑀯𑀸 𑀲𑀼𑀲𑀸𑀦𑀢𑁄 𑀕𑀡𑁆𑀳𑀦𑁆𑀢𑁂𑀦 𑀤𑀼𑀓𑁆𑀓𑀭𑀢𑀭𑀁 𑀓𑀢𑀁, 𑀪𑀦𑁆𑀢𑁂𑀢𑀺. 𑀫𑀳𑀸𑀣𑁂𑀭𑁄 ‘‘𑀧𑀭𑀺𑀲𑀼𑀤𑁆𑀥𑁄 𑀯𑀺𑀢𑀓𑁆𑀓𑁄 𑀧𑀁𑀲𑀼𑀓𑀽𑀮𑀺𑀓𑀲𑁆𑀲𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑁄𑀧𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀢𑁆𑀢𑁄 𑀢𑀁 𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀧𑀸𑀘𑀻𑀦𑀔𑀡𑁆𑀟𑀭𑀸𑀚𑀺𑀁 𑀕𑀦𑁆𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.
𑀘𑀻𑀯𑀭𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 ‘‘𑀓𑀢𑁆𑀣 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀕𑀫𑀦𑀁 𑀕𑀫𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀧𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀲𑀤𑁆𑀥𑀺𑀁 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀚𑁆𑀚𑀺𑀁 𑀧𑁂𑀲𑀮𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀏𑀯𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀆𑀳𑀭𑀺𑀬𑀫𑀸𑀦𑀁 𑀘𑀻𑀯𑀭𑀁 𑀤𑀽𑀭𑀢𑁄 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀦𑀸𑀧𑀁 𑀪𑀯𑀺𑀲𑁆𑀲𑀢𑀺, 𑀏𑀢𑀁 𑀅𑀫𑀦𑀸𑀧’’𑀦𑁆𑀢𑀺 𑀏𑀯𑀁 𑀅𑀯𑀺𑀢𑀓𑁆𑀓𑁂𑀢𑁆𑀯𑀸 𑀣𑀽𑀮𑀲𑀼𑀔𑀼𑀫𑀸𑀤𑀻𑀲𑀼 𑀬𑀣𑀸𑀮𑀤𑁆𑀥𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀦𑀁 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀦𑀸𑀫. 𑀏𑀯𑀁 𑀮𑀤𑁆𑀥𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 ‘‘𑀏𑀢𑁆𑀢𑀓𑀁 𑀤𑀼𑀧𑀝𑁆𑀝𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀏𑀓𑀧𑀝𑁆𑀝𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀧𑀳𑁄𑀦𑀓𑀫𑀢𑁆𑀢𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀦𑀁 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀧𑀦 ‘‘𑀅𑀲𑀼𑀓𑀲𑁆𑀲 𑀖𑀭𑀤𑁆𑀯𑀸𑀭𑁂 𑀫𑀦𑀸𑀧𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀡𑀁 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫.
𑀮𑀽𑀔𑀧𑀡𑀻𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀬𑀣𑀸𑀮𑀤𑁆𑀥𑁂𑀦𑁂𑀯 𑀬𑀸𑀧𑀦𑀁 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀦𑀸𑀫. 𑀅𑀢𑁆𑀢𑀦𑁄 𑀣𑀸𑀫𑀁 𑀚𑀸𑀦𑀺𑀢𑁆𑀯𑀸 𑀬𑁂𑀦 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑁂𑀦 𑀬𑀸𑀧𑀦𑀁 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀦𑀸𑀫. 𑀫𑀦𑀸𑀧𑀁 𑀅𑀜𑁆𑀜𑀲𑁆𑀲 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀬𑁂𑀦 𑀓𑁂𑀦𑀘𑀺 𑀬𑀸𑀧𑀦𑀁 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄 𑀦𑀸𑀫.
‘‘𑀓𑀢𑁆𑀣 𑀉𑀤𑀓𑀁 𑀫𑀦𑀸𑀧𑀁, 𑀓𑀢𑁆𑀣 𑀅𑀫𑀦𑀸𑀧’’𑀦𑁆𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀥𑁄𑀯𑀦𑀽𑀧𑀕𑁂𑀦 𑀉𑀤𑀓𑁂𑀦 𑀥𑁄𑀯𑀦𑀁 𑀉𑀤𑀓𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀡𑁆𑀟𑀼𑀫𑀢𑁆𑀢𑀺𑀓𑀕𑁂𑀭𑀼𑀓𑀧𑀽𑀢𑀺𑀧𑀡𑁆𑀡𑀭𑀲𑀓𑀺𑀮𑀺𑀝𑁆𑀞𑀸𑀦𑀺 𑀧𑀦 𑀉𑀤𑀓𑀸𑀦𑀺 𑀯𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀥𑁄𑀯𑀦𑁆𑀢𑀲𑁆𑀲 𑀧𑀦 𑀫𑀼𑀕𑁆𑀕𑀭𑀸𑀤𑀻𑀳𑀺 𑀅𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀫𑀤𑁆𑀤𑀺𑀢𑁆𑀯𑀸 𑀥𑁄𑀯𑀦𑀁 𑀥𑁄𑀯𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀢𑀣𑀸 𑀅𑀲𑀼𑀚𑁆𑀛𑀦𑁆𑀢𑀁 𑀧𑀡𑁆𑀡𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀧𑀺𑀢𑀉𑀤𑀓𑁂𑀦𑀸𑀧𑀺 𑀥𑁄𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀥𑁄𑀯𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 ‘‘𑀇𑀤𑀁 𑀣𑀽𑀮𑀁, 𑀇𑀤𑀁 𑀲𑀼𑀔𑀼𑀫’’𑀦𑁆𑀢𑀺 𑀅𑀓𑁄𑀧𑁂𑀢𑁆𑀯𑀸 𑀧𑀳𑁄𑀦𑀓𑀦𑀻𑀳𑀸𑀭𑁂𑀦𑁂𑀯 𑀓𑀭𑀡𑀁 𑀓𑀭𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀢𑀺𑀫𑀡𑁆𑀟𑀮𑀧𑀢𑀺𑀘𑁆𑀙𑀸𑀤𑀦𑀫𑀢𑁆𑀢𑀲𑁆𑀲𑁂𑀯 𑀓𑀭𑀡𑀁 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀘𑀻𑀯𑀭𑀓𑀭𑀡𑀢𑁆𑀣𑀸𑀬 𑀧𑀦 𑀫𑀦𑀸𑀧𑀁 𑀲𑀼𑀢𑁆𑀢𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀭𑀣𑀺𑀓𑀸𑀤𑀻𑀲𑀼 𑀯𑀸 𑀤𑁂𑀯𑀝𑁆𑀞𑀸𑀦𑁂 𑀯𑀸 𑀆𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀯𑀸 𑀞𑀧𑀺𑀢𑀁 𑀬𑀁𑀓𑀺𑀜𑁆𑀘𑀺𑀤𑁂𑀯 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀭𑀡𑀁 𑀲𑀼𑀢𑁆𑀢𑀲𑀦𑁆𑀢𑁄𑀲𑁄 𑀦𑀸𑀫.
𑀓𑀼𑀲𑀺𑀩𑀦𑁆𑀥𑀦𑀓𑀸𑀮𑁂 𑀧𑀦 𑀅𑀗𑁆𑀕𑀼𑀮𑀫𑀢𑁆𑀢𑁂 𑀲𑀢𑁆𑀢 𑀯𑀸𑀭𑁂 𑀦 𑀯𑀺𑀚𑁆𑀛𑀺𑀢𑀩𑁆𑀩𑀁. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀬𑁄 𑀪𑀺𑀓𑁆𑀔𑀼 𑀲𑀳𑀸𑀬𑁄 𑀦 𑀳𑁄𑀢𑀺, 𑀢𑀲𑁆𑀲 𑀯𑀢𑁆𑀢𑀪𑁂𑀤𑁄𑀧𑀺 𑀦𑀢𑁆𑀣𑀺. 𑀢𑀺𑀯𑀗𑁆𑀕𑀼𑀮𑀫𑀢𑁆𑀢𑁂 𑀧𑀦 𑀲𑀢𑁆𑀢 𑀯𑀸𑀭𑁂 𑀯𑀺𑀚𑁆𑀛𑀺𑀢𑀩𑁆𑀩𑀁. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀦𑀸𑀧𑀺 𑀲𑀳𑀸𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀬𑁄 𑀦 𑀳𑁄𑀢𑀺, 𑀢𑀲𑁆𑀲 𑀯𑀢𑁆𑀢𑀪𑁂𑀤𑁄. 𑀅𑀬𑀁 𑀲𑀺𑀩𑁆𑀩𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀭𑀚𑀦𑁆𑀢𑁂𑀦 𑀧𑀦 𑀓𑀸𑀴𑀓𑀘𑁆𑀙𑀓𑀸𑀤𑀻𑀦𑀺 𑀧𑀭𑀺𑀬𑁂𑀲𑀦𑁆𑀢𑁂𑀦 𑀦 𑀘𑀭𑀺𑀢𑀩𑁆𑀩𑀁, 𑀲𑁄𑀫𑀯𑀓𑁆𑀓𑀮𑀸𑀤𑀻𑀲𑀼 𑀬𑀁 𑀮𑀪𑀢𑀺, 𑀢𑁂𑀦 𑀭𑀚𑀺𑀢𑀩𑁆𑀩𑀁. 𑀅𑀮𑀪𑀦𑁆𑀢𑁂𑀦 𑀧𑀦 𑀫𑀦𑀼𑀲𑁆𑀲𑁂𑀳𑀺 𑀅𑀭𑀜𑁆𑀜𑁂 𑀯𑀸𑀓𑀁 𑀕𑀳𑁂𑀢𑁆𑀯𑀸 𑀙𑀟𑁆𑀟𑀺𑀢𑀭𑀚𑀦𑀁 𑀯𑀸 𑀪𑀺𑀓𑁆𑀔𑀽𑀳𑀺 𑀧𑀘𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁 𑀯𑀸 𑀕𑀳𑁂𑀢𑁆𑀯𑀸 𑀭𑀚𑀺𑀢𑀩𑁆𑀩𑀁. 𑀅𑀬𑀁 𑀭𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀦𑀻𑀮𑀓𑀤𑁆𑀤𑀫𑀓𑀸𑀴𑀲𑀸𑀫𑁂𑀲𑀼 𑀬𑀁𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀜𑁆𑀜𑀸𑀬𑀫𑀸𑀦𑀓𑀧𑁆𑀧𑀓𑀭𑀡𑀁 𑀓𑀧𑁆𑀧𑀲𑀦𑁆𑀢𑁄𑀲𑁄 𑀦𑀸𑀫.
𑀳𑀺𑀭𑀺𑀓𑁄𑀧𑀻𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀦𑀁 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄 𑀦𑀸𑀫. 𑀤𑀼𑀲𑁆𑀲𑀁 𑀧𑀦 𑀮𑀪𑀺𑀢𑁆𑀯𑀸 𑀲𑀼𑀢𑁆𑀢𑀁 𑀯𑀸 𑀲𑀽𑀘𑀺𑀁 𑀯𑀸 𑀓𑀸𑀭𑀓𑀁 𑀯𑀸 𑀅𑀮𑀪𑀦𑁆𑀢𑁂𑀦 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀮𑀪𑀦𑁆𑀢𑁂𑀦 𑀦 𑀯𑀝𑁆𑀝𑀢𑀺. 𑀓𑀢𑀫𑁆𑀧𑀺 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂 𑀘 𑀅𑀲𑀦𑁆𑀦𑀺𑀳𑀺𑀢𑀸, 𑀬𑀸𑀯 𑀆𑀕𑀫𑀦𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀕𑀢𑀫𑀢𑁆𑀢𑁂𑀲𑀼 𑀤𑀸𑀢𑀩𑁆𑀩𑀁. 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀲𑀢𑀺 𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀥𑀺𑀝𑁆𑀞𑀺𑀢𑀫𑁂𑀯 𑀳𑀺 𑀲𑀦𑁆𑀦𑀺𑀥𑀺 𑀳𑁄𑀢𑀺, 𑀅𑀥𑀺𑀝𑁆𑀞𑀺𑀢𑀁 𑀦 𑀳𑁄𑀢𑀻𑀢𑀺 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀆𑀳. 𑀅𑀬𑀁 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀧𑀦 𑀦 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀲𑀸𑀭𑀡𑀻𑀬𑀥𑀫𑁆𑀫𑁂 𑀞𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫.
𑀘𑀻𑀯𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀜𑁆𑀘𑁂𑀯 𑀢𑁂𑀘𑀻𑀯𑀭𑀺𑀓𑀗𑁆𑀕𑀜𑁆𑀘. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁪-𑁨𑁫) 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀘𑀻𑀯𑀭𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀁 𑀧𑀽𑀭𑀬𑀫𑀸𑀦𑁄 𑀪𑀺𑀓𑁆𑀔𑀼 𑀇𑀫𑀸𑀦𑀺 𑀤𑁆𑀯𑁂 𑀥𑀼𑀢𑀗𑁆𑀕𑀸𑀦𑀺 𑀕𑁄𑀧𑁂𑀢𑀺. 𑀇𑀫𑀸𑀦𑀺 𑀕𑁄𑀧𑁂𑀦𑁆𑀢𑁄 𑀘𑀻𑀯𑀭𑀲𑀦𑁆𑀢𑁄𑀲𑀫𑀳𑀸𑀅𑀭𑀺𑀬𑀯𑀁𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺.
𑀯𑀡𑁆𑀡𑀯𑀸𑀤𑀻𑀢𑀺 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀦 𑀓𑀣𑁂𑀢𑀺. 𑀏𑀓𑁄 𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺. 𑀏𑀓𑁄 𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺. 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀘 𑀯𑀡𑁆𑀡𑀁 𑀓𑀣𑁂𑀢𑀺. 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁.
𑀅𑀦𑁂𑀲𑀦𑀦𑁆𑀢𑀺 𑀤𑀽𑀢𑁂𑀬𑁆𑀬𑀧𑀳𑀺𑀦𑀕𑀫𑀦𑀸𑀦𑀼𑀬𑁄𑀕𑀧𑀪𑁂𑀤𑀁 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁. 𑀅𑀧𑁆𑀧𑀢𑀺𑀭𑀽𑀧𑀦𑁆𑀢𑀺 𑀅𑀬𑀼𑀢𑁆𑀢𑀁. 𑀅𑀮𑀤𑁆𑀥𑀸 𑀘𑀸𑀢𑀺 𑀅𑀮𑀪𑀺𑀢𑁆𑀯𑀸. 𑀬𑀣𑀸 𑀏𑀓𑀘𑁆𑀘𑁄 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀜𑁆𑀜𑀯𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑁄𑀳𑀜𑁆𑀜𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀲𑀢𑀺 𑀧𑀭𑀺𑀢𑀲𑁆𑀲𑀢𑀺, 𑀲𑀦𑁆𑀢𑀼𑀝𑁆𑀞𑁄 𑀪𑀺𑀓𑁆𑀔𑀼 𑀏𑀯𑀁 𑀅𑀮𑀤𑁆𑀥𑀸 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀮𑀤𑁆𑀥𑀸 𑀘𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀪𑀺𑀢𑁆𑀯𑀸. 𑀅𑀕𑀥𑀺𑀢𑁄𑀢𑀺 𑀯𑀺𑀕𑀢𑀮𑁄𑀪𑀕𑀺𑀤𑁆𑀥𑁄. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀫𑀢𑁆𑀢𑀢𑀡𑁆𑀳𑀸𑀬 𑀫𑀼𑀘𑁆𑀙𑀁 𑀅𑀦𑀸𑀧𑀦𑁆𑀦𑁄. 𑀅𑀦𑀚𑁆𑀛𑁄𑀧𑀦𑁆𑀦𑁄𑀢𑀺 𑀢𑀡𑁆𑀳𑀸𑀬 𑀅𑀦𑁄𑀢𑁆𑀣𑀢𑁄 𑀅𑀧𑀭𑀺𑀬𑁄𑀦𑀤𑁆𑀥𑁄. 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀅𑀦𑁂𑀲𑀦𑀸𑀧𑀢𑁆𑀢𑀺𑀬𑀜𑁆𑀘 𑀕𑁂𑀥𑀺𑀢𑀧𑀭𑀺𑀪𑁄𑀕𑁂 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀫𑀸𑀦𑁄. 𑀦𑀺𑀲𑁆𑀲𑀭𑀡𑀧𑀜𑁆𑀜𑁄𑀢𑀺 ‘‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀦𑀺𑀲𑁆𑀲𑀭𑀡𑀫𑁂𑀯 𑀧𑀚𑀸𑀦𑀦𑁆𑀢𑁄.
𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀘𑀻𑀯𑀭𑁂𑀦 𑀲𑀦𑁆𑀢𑀼𑀝𑁆𑀞𑀺𑀬𑀸. 𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀻𑀢𑀺 ‘‘𑀅𑀳𑀁 𑀧𑀁𑀲𑀼𑀓𑀽𑀮𑀺𑀓𑁄, 𑀫𑀬𑀸 𑀉𑀧𑀲𑀫𑁆𑀧𑀤𑀫𑀸𑀴𑁂𑀬𑁂𑀯 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀕𑀳𑀺𑀢𑀁, 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀁 𑀦 𑀓𑀭𑁄𑀢𑀺. 𑀦𑁄 𑀧𑀭𑀁 𑀯𑀫𑁆𑀪𑁂𑀢𑀻𑀢𑀺 ‘‘𑀇𑀫𑁂 𑀧𑀦𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀧𑀁𑀲𑀼𑀓𑀽𑀮𑀺𑀓𑀸’’𑀢𑀺 𑀯𑀸, ‘‘𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀫𑀢𑁆𑀢𑀫𑁆𑀧𑀺 𑀏𑀢𑁂𑀲𑀁 𑀦𑀢𑁆𑀣𑀻’’𑀢𑀺 𑀯𑀸 𑀏𑀯𑀁 𑀧𑀭𑀁 𑀦 𑀯𑀫𑁆𑀪𑁂𑀢𑀺. 𑀬𑁄 𑀳𑀺 𑀢𑀢𑁆𑀣 𑀤𑀓𑁆𑀔𑁄𑀢𑀺 𑀬𑁄 𑀢𑀲𑁆𑀫𑀺𑀁 𑀘𑀻𑀯𑀭𑀲𑀦𑁆𑀢𑁄𑀲𑁂 𑀯𑀡𑁆𑀡𑀯𑀸𑀤𑀸𑀤𑀻𑀲𑀼 𑀯𑀸 𑀤𑀓𑁆𑀔𑁄 𑀙𑁂𑀓𑁄 𑀩𑁆𑀬𑀢𑁆𑀢𑁄. 𑀅𑀦𑀮𑀲𑁄𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀆𑀮𑀲𑀺𑀬𑀯𑀺𑀭𑀳𑀺𑀢𑁄. 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄𑀢𑀺 𑀲𑀫𑁆𑀧𑀚𑀸𑀦𑀧𑀜𑁆𑀜𑀸𑀬 𑀘𑁂𑀯 𑀲𑀢𑀺𑀬𑀸 𑀘 𑀬𑀼𑀢𑁆𑀢𑁄. 𑀅𑀭𑀺𑀬𑀯𑀁𑀲𑁂 𑀞𑀺𑀢𑁄𑀢𑀺 𑀅𑀭𑀺𑀬𑀯𑀁𑀲𑁂 𑀧𑀢𑀺𑀝𑁆𑀞𑀺𑀢𑁄.
𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀺𑀡𑁆𑀟𑀧𑀸𑀢𑁂𑀦. 𑀏𑀢𑁆𑀣𑀸𑀧𑀺 𑀧𑀺𑀡𑁆𑀟𑀧𑀸𑀢𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀺𑀡𑁆𑀟𑀧𑀸𑀢𑀓𑁆𑀔𑁂𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄, 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀼𑀢𑀗𑁆𑀕𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀺𑀡𑁆𑀟𑀧𑀸𑀢𑁄𑀢𑀺 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀁 𑀔𑀻𑀭𑀁 𑀤𑀥𑀺 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀬𑀸𑀕𑀼 𑀔𑀸𑀤𑀦𑀻𑀬𑀁 𑀲𑀸𑀬𑀦𑀻𑀬𑀁 𑀮𑁂𑀳𑀦𑀻𑀬𑀦𑁆𑀢𑀺 𑀲𑁄𑀴𑀲 𑀧𑀺𑀡𑁆𑀟𑀧𑀸𑀢𑀸.
𑀧𑀺𑀡𑁆𑀟𑀧𑀸𑀢𑀓𑁆𑀔𑁂𑀢𑁆𑀢𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀕𑀫𑀺𑀓𑀪𑀢𑁆𑀢𑀁 𑀕𑀺𑀮𑀸𑀦𑀪𑀢𑁆𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁 𑀓𑀼𑀝𑀺𑀪𑀢𑁆𑀢𑀁 𑀯𑀸𑀭𑀪𑀢𑁆𑀢𑀁 𑀯𑀺𑀳𑀸𑀭𑀪𑀢𑁆𑀢𑀦𑁆𑀢𑀺 𑀧𑀦𑁆𑀦𑀭𑀲 𑀧𑀺𑀡𑁆𑀟𑀧𑀸𑀢𑀓𑁆𑀔𑁂𑀢𑁆𑀢𑀸𑀦𑀺.
𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁄𑀢𑀺 𑀧𑀺𑀡𑁆𑀟𑀧𑀸𑀢𑁂 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀕𑀫𑀦𑀲𑀦𑁆𑀢𑁄𑀲𑁄 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄 𑀉𑀧𑀓𑀸𑀭𑀲𑀦𑁆𑀢𑁄𑀲𑁄 𑀧𑀭𑀺𑀫𑀸𑀡𑀲𑀦𑁆𑀢𑁄𑀲𑁄 𑀧𑀭𑀺𑀪𑁄𑀕𑀲𑀦𑁆𑀢𑁄𑀲𑁄 𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀯𑀺𑀲𑁆𑀲𑀚𑁆𑀚𑀦𑀲𑀦𑁆𑀢𑁄𑀲𑁄𑀢𑀺 𑀧𑀦𑁆𑀦𑀭𑀲 𑀲𑀦𑁆𑀢𑁄𑀲𑀸.
𑀢𑀢𑁆𑀣 𑀲𑀸𑀤𑀓𑁄 𑀪𑀺𑀓𑁆𑀔𑀼 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑀺. 𑀧𑀺𑀡𑁆𑀟𑀧𑀸𑀢𑀺𑀓𑁂𑀦 𑀧𑀦 𑀕𑀡𑁂𑀦 𑀲𑀤𑁆𑀥𑀺𑀁 𑀘𑀭𑀢𑀸 𑀲𑀸𑀬𑀁 𑀣𑁂𑀭𑀽𑀧𑀝𑁆𑀞𑀸𑀦𑀓𑀸𑀮𑁂 ‘‘𑀲𑁆𑀯𑁂 𑀓𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸𑀢𑀺? 𑀅𑀲𑀼𑀓𑀕𑀸𑀫𑁂, 𑀪𑀦𑁆𑀢𑁂’’𑀢𑀺 𑀏𑀢𑁆𑀢𑀓𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀢𑀓𑁆𑀓𑁂𑀢𑀩𑁆𑀩𑀁. 𑀏𑀓𑀘𑀸𑀭𑀺𑀓𑁂𑀦 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀯𑀺𑀢𑀓𑁆𑀓𑁂𑀦𑁆𑀢𑁄 𑀅𑀭𑀺𑀬𑀯𑀁𑀲𑀸 𑀘𑀼𑀢𑁄 𑀳𑁄𑀢𑀺 𑀧𑀭𑀺𑀩𑀸𑀳𑀺𑀭𑁄. 𑀅𑀬𑀁 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀦𑀸𑀫.
𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁂𑀦 ‘‘𑀓𑀼𑀳𑀺𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀕𑀦𑁆𑀢𑀩𑁆𑀩𑀁. 𑀅𑀬𑀁 𑀕𑀫𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀧𑀭𑀺𑀬𑁂𑀲𑀦𑁆𑀢𑁂𑀦 𑀬𑀁 𑀯𑀸 𑀢𑀁 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀮𑀚𑁆𑀚𑀺𑀁 𑀧𑁂𑀲𑀮𑀫𑁂𑀯 𑀕𑀳𑁂𑀢𑁆𑀯𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀅𑀬𑀁 𑀧𑀭𑀺𑀬𑁂𑀲𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀤𑀽𑀭𑀢𑁄𑀯 𑀆𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀫𑀦𑀸𑀧𑀁, 𑀏𑀢𑀁 𑀅𑀫𑀦𑀸𑀧’’𑀦𑁆𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀅𑀬𑀁 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑁄 𑀦𑀸𑀫. ‘‘𑀇𑀫𑀁 𑀫𑀦𑀸𑀧𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀇𑀫𑀁 𑀅𑀫𑀦𑀸𑀧𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑀩𑁆𑀩𑀫𑁂𑀯. 𑀅𑀬𑀁 𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀦𑀸𑀫.
𑀏𑀢𑁆𑀣 𑀧𑀦 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀅𑀧𑁆𑀧𑀁 𑀕𑀳𑁂𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀧𑀫𑀸𑀡𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀩𑀳𑀼, 𑀤𑀸𑀬𑀓𑁄𑀧𑀺 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀅𑀧𑁆𑀧𑀁 𑀕𑀳𑁂𑀢𑀩𑁆𑀩𑀁. 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀩𑀳𑀼, 𑀤𑀸𑀬𑀓𑁄 𑀧𑀦 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀡𑀲𑁆𑀫𑀺𑀜𑁆𑀳𑀺 𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀁 𑀫𑀓𑁆𑀔𑁂𑀢𑀺, 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑁂𑀢𑀺, 𑀲𑀸𑀲𑀦𑀁 𑀦 𑀓𑀭𑁄𑀢𑀺, 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑀲𑀦𑁆𑀢𑁄𑀲𑁄 𑀦𑀸𑀫. 𑀅𑀟𑁆𑀠𑀓𑀼𑀮𑀸𑀦𑀺𑀬𑁂𑀯 𑀅𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑀩𑁆𑀩𑀁. 𑀅𑀬𑀁 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄 𑀦𑀸𑀫. 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑀸𑀤𑀬𑁄 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑀸 𑀏𑀯.