𑁩. 𑀅𑀦𑁂𑀓𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸

𑁭𑁭𑁭. 𑀇𑀤𑀸𑀦𑀺 𑀲𑀁𑀓𑀺𑀡𑁆𑀡𑀯𑀕𑁆𑀕𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀸𑀢𑁄, 𑀕𑀸𑀣𑀸𑀬 𑀅𑀤𑁆𑀥𑀢𑁄, 𑀧𑀸𑀤𑀢𑁄 𑀘𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀅𑀦𑁂𑀓𑀢𑁆𑀣𑁂 𑀦𑀸𑀦𑀢𑁆𑀣𑁂 𑀲𑀫𑀬𑀸𑀤𑀺𑀓𑁂 𑀲𑀤𑁆𑀤𑁂 𑀓𑀫𑀸 𑀓𑀫𑀢𑁄 𑀧𑀯𑀓𑁆𑀔𑀸𑀫𑀺. 𑀏𑀢𑁆𑀣 𑀅𑀦𑁂𑀓𑀢𑁆𑀣𑀯𑀕𑁆𑀕𑁂 𑀏𑀓𑀲𑁆𑀲 𑀪𑀽𑀢𑀲𑀤𑁆𑀤𑀸𑀤𑀺𑀓𑀲𑁆𑀲 𑀬𑀸 𑀧𑀼𑀦𑀭𑀼𑀢𑁆𑀢𑀢𑀸, 𑀲𑀸 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀲𑀗𑁆𑀔𑀸𑀢𑀮𑀺𑀗𑁆𑀕𑀯𑀺𑀲𑁂𑀲𑀢𑁆𑀣𑀁 𑀓𑀢𑀸.

𑁭𑁭𑁮. 𑀲𑀫𑀯𑀸𑀬𑀢𑁆𑀣𑀸𑀤𑀺𑀯𑀸𑀘𑀓𑁂 𑀩𑀳𑀯𑁄 𑀲𑀫𑀬𑀲𑀤𑁆𑀤𑁂 𑀚𑀸𑀢𑀺𑀬𑀸 𑀲𑀗𑁆𑀕𑀬𑁆𑀳 ‘‘𑀲𑀫𑀬𑁄’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀭 ‘‘𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑁆𑀬𑀸𑀤𑀻𑀲𑀼 [𑀤𑀻. 𑀦𑀺. 𑁧.𑁪𑁪𑁭] 𑀲𑀫𑀯𑀸𑀬𑁂 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺𑀁, 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸’’𑀢𑁆𑀬𑀸𑀤𑀻𑀲𑀼 𑀲𑀫𑀽𑀳𑁂. ‘‘𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁄’’𑀢𑁆𑀬𑀸𑀤𑀻𑀲𑀼 [𑀫. 𑀦𑀺. 𑁨.𑁧𑁩𑁫] 𑀓𑀸𑀭𑀡𑁂. ‘‘𑀏𑀓𑁄𑀬𑁂𑀯 𑀘 𑀔𑁄 𑀔𑀡𑁄 𑀘 𑀲𑀫𑀬𑁄 𑀘𑀸’’𑀢𑁆𑀬𑀸𑀤𑀻𑀲𑀼 [𑀅. 𑀦𑀺. 𑁮.𑁨𑁯] 𑀔𑀡𑁂 𑀑𑀓𑀸𑀲𑁂. ‘‘𑀅𑀪𑀺𑀲𑀫𑀬𑀢𑁆𑀣𑁄’’𑀢𑁆𑀬𑀸𑀤𑀻𑀲𑀼 𑀧𑀝𑀺𑀯𑁂𑀥𑁂. ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸’’𑀢𑁆𑀬𑀸𑀤𑀻𑀲𑀼 [𑀤𑀻. 𑀦𑀺. 𑁧.𑁧] 𑀓𑀸𑀮𑁂. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸’’𑀢𑁆𑀬𑀸𑀤𑀻𑀲𑀼 [𑀫. 𑀦𑀺. 𑁧.𑁨𑁮] 𑀧𑀳𑀸𑀦𑁂. ‘‘𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄’’𑀢𑁆𑀬𑀸𑀤𑀻𑀲𑀼 𑀮𑀸𑀪𑁂 [𑀲𑀁. 𑀦𑀺. 𑁧.𑁧𑁨𑁯]. ‘‘𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀺𑀭𑁂’’𑀢𑁆𑀬𑀸𑀤𑀻𑀲𑀼 [𑀫. 𑀦𑀺. 𑁨.𑁨𑁦𑁮] 𑀤𑀺𑀝𑁆𑀞𑀺𑀬𑀁.

𑀢𑀢𑁆𑀣 𑀲𑀳𑀓𑀸𑀭𑀻𑀓𑀸𑀭𑀡𑀢𑀸𑀬 𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄, 𑀬𑀣𑀸 𑁋 𑀲𑀫𑀼𑀤𑀸𑀬𑁄𑀢𑀺 𑀅𑀯𑀬𑀯𑀲𑀳𑀸𑀯𑀢𑁆𑀣𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀓𑀸𑀭𑀡𑀁, 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀲𑀫𑁂𑀢𑀺𑀲𑀫𑀸𑀕𑀘𑁆𑀙𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀯𑀕𑀦𑁆𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄. 𑀲𑀫𑁂𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀗𑁆𑀕𑀘𑁆𑀙𑀢𑀺 𑀲𑀢𑁆𑀢𑁄, 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀯𑀺𑀬, 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄, 𑀲𑀫𑁂𑀢𑀺 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺, 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀪𑀺𑀲𑀫𑀬𑀲𑀤𑁆𑀤𑀲𑁆𑀲 𑀉𑀤𑀸𑀳𑀭𑀡𑀁 𑀲𑁄𑀧𑀲𑀕𑁆𑀕𑁄, 𑀅𑀦𑀼𑀧𑀲𑀕𑁆𑀕𑁄 𑀘 𑀲𑀫𑀬𑀲𑀤𑁆𑀤𑁄 𑀲𑀫𑀯𑀸𑀬𑀸𑀤𑁆𑀬𑀢𑁆𑀣𑀯𑀸𑀘𑀓𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁 𑀲𑀩𑁆𑀩𑀢𑁆𑀭 𑀉𑀤𑀸𑀳𑀭𑀡𑀁 𑀢𑀁𑀢𑀤𑀢𑁆𑀣𑀸𑀦𑀼𑀭𑀽𑀧𑀦𑀺𑀩𑁆𑀩𑀘𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸.

𑁭𑁭𑁯. 𑀲𑀡𑁆𑀞𑀸𑀦𑀁 𑀤𑀻𑀖𑀭𑀲𑁆𑀲𑀸𑀤𑀺. 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁, 𑀚𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀁. 𑀙𑀯𑀺 𑀩𑀳𑀺𑀘𑀫𑁆𑀫𑀁, 𑀧𑀫𑀸𑀡𑀁 𑀫𑀭𑀺𑀬𑀸𑀤𑁄. 𑀅𑀓𑁆𑀔𑀭𑀁 𑀅𑀓𑀸𑀭𑀸𑀤𑀺, 𑀬𑀲𑁄 𑀧𑀭𑀺𑀯𑀸𑀭𑁄, 𑀓𑀺𑀢𑁆𑀢𑀺 𑀘. 𑀕𑀼𑀡𑁄 𑀲𑀻𑀮𑀸𑀤𑀺, 𑀢𑀧𑀦𑀺𑀬𑁂𑀧𑀺 𑀯𑀡𑁆𑀡𑁄.

𑁭𑁮𑁦. 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀤𑀼𑀯𑀺𑀥𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀉𑀤𑁆𑀤𑁂𑀲𑁂 ‘‘𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’’𑀢𑀺 [𑀫𑀳𑀸𑀯. 𑁧𑁩𑁪]. 𑀧𑀡𑁆𑀡𑀢𑁆𑀢𑀺𑀬𑀁 ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺 [𑀤𑀻. 𑀦𑀺. 𑁨.𑁨𑁪𑁬]. 𑀉𑀧𑀯𑀸𑀲𑁄 𑀯𑀼𑀢𑁆𑀢𑁄. 𑀅𑀝𑁆𑀞𑀗𑁆𑀕𑁄 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺’’𑀆𑀤𑀺. 𑀉𑀧𑁄𑀲𑀣𑀤𑀺𑀦𑀁 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄’’𑀢𑁆𑀬𑀸𑀤𑀻𑀲𑀼 [𑀫𑀳𑀸𑀯. 𑁧𑁬𑁮].

𑁭𑁮𑁧-𑁭𑁮𑁨. 𑀭𑀣𑀗𑁆𑀕𑀁 𑀘𑀓𑁆𑀓𑀤𑁆𑀯𑀬𑀁. 𑀮𑀓𑁆𑀔𑀡𑀁 𑀘𑀓𑁆𑀓𑀮𑀓𑁆𑀔𑀡𑀁. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑁆𑀬𑀸𑀤𑀻𑀲𑀼 [𑀲𑀼. 𑀦𑀺. 𑁫𑁬𑁨] 𑀥𑀫𑁆𑀫𑀘𑀓𑁆𑀓𑁂. 𑀉𑀭𑀘𑀓𑁆𑀓𑀁 𑀦𑀸𑀫 𑀔𑀼𑀭𑀘𑀓𑁆𑀓𑀁 ‘‘𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 [𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁦]. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑁆𑀬𑀸𑀤𑀻𑀲𑀼 [𑀲𑀁. 𑀦𑀺. 𑁧.𑁨𑁯] 𑀇𑀭𑀺𑀬𑀸𑀧𑀣𑀘𑀓𑁆𑀓𑁂. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑁆𑀬𑀸𑀤𑀻𑀲𑀼 [𑀅. 𑀦𑀺. 𑁪.𑁧𑁩𑁧] 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂. ‘‘𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀅𑀦𑀼𑀯𑀢𑁆𑀢𑁂𑀢𑀻’’𑀢𑁆𑀬𑀸𑀤𑀻𑀲𑀼 [𑀅. 𑀦𑀺. 𑁫.𑁧𑁩𑁨] 𑀘𑀓𑁆𑀓𑀭𑀢𑀦𑁂. 𑀫𑀡𑁆𑀟𑀮𑀁 ‘‘𑀅𑀮𑀸𑀢𑀘𑀓𑁆𑀓’’𑀦𑁆𑀢𑁆𑀬𑀸𑀤𑀻𑀲𑀼 ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 [𑀤𑀻. 𑀦𑀺. 𑁩.𑁬𑁧; 𑀲𑀁. 𑀦𑀺. 𑁨.𑁧𑁬𑁨] 𑀘. 𑀩𑀮𑀁 𑀣𑀸𑀫𑁄. 𑀓𑀼𑀮𑀸𑀮𑁄 𑀓𑀼𑀫𑁆𑀪𑀓𑀸𑀭𑁄, 𑀢𑀲𑁆𑀲 𑀪𑀡𑁆𑀟𑁂 𑀓𑀼𑀮𑀸𑀮𑀘𑀓𑁆𑀓𑀦𑁆𑀢𑀺. 𑀆𑀡𑀸𑀬𑀁 ‘‘𑀘𑀓𑁆𑀓𑀁 𑀯𑀢𑁆𑀢𑀬𑀢𑀺 𑀧𑀸𑀡𑀻𑀦’’𑀦𑁆𑀢𑀺 [𑀚𑀸. 𑁧.𑁭.𑁧𑁪𑁯]. 𑀆𑀬𑀼𑀥𑁂 𑀘𑀓𑁆𑀓𑀸𑀓𑀸𑀭𑁂 𑀆𑀬𑀼𑀥𑁂. 𑀤𑀸𑀦𑀁 𑀤𑁂𑀬𑁆𑀬𑀥𑀫𑁆𑀫𑁄. 𑀭𑀸𑀲𑀺 𑀔𑀦𑁆𑀥𑁄. 𑀲𑀤𑁆𑀥𑀕𑀸𑀣𑀸𑀧𑀺 𑀕𑀸𑀣𑀸𑀬𑁂𑀯.

‘‘𑀤𑀡𑁆𑀟𑀓𑀸 𑀘𑀡𑁆𑀟𑀯𑀼𑀝𑁆𑀞𑁆𑀬𑀸𑀤𑀺, 𑀧𑀸𑀤𑁂𑀳𑀺 𑀙𑀳𑀺 𑀢𑀻𑀳𑀺 𑀢𑀼;

𑀕𑀸𑀣𑀸𑀢𑀺 𑀘 𑀧𑀭𑀢𑁆𑀣𑁂𑀯𑀁, 𑀙𑀦𑁆𑀤𑁄𑀲𑀜𑁆𑀜𑀸 𑀧𑀓𑀸𑀲𑀺𑀢𑀸.

𑀅𑀦𑀦𑁆𑀢𑀭𑁄𑀤𑀺𑀢𑀁 𑀘𑀜𑁆𑀜-𑀫𑁂𑀢𑀁 𑀲𑀸𑀫𑀜𑁆𑀜𑀦𑀸𑀫𑀢𑁄;

𑀕𑀸𑀣𑀸𑀇𑀘𑁆𑀘𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀫𑀼𑀦𑀺𑀦𑁆𑀤𑀯𑀘𑀦𑁂 𑀧𑀦𑀸’’𑀢𑀺 [𑀯𑀼𑀢𑁆𑀢𑁄𑀤𑀬 𑁧𑁪-𑁧𑁫 𑀕𑀸𑀣𑀸] 𑀳𑀺 𑀯𑀼𑀢𑁆𑀢𑀁.

𑁭𑁮𑁩. ‘‘𑀓𑀺𑀁 𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀺𑀚𑀼𑀢𑀺𑀩𑀮𑀯𑀺𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀢𑁂 𑀦𑀸𑀕 𑀫𑀳𑀸𑀯𑀺𑀫𑀸𑀦𑀁.

𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂,

𑀲𑀤𑁆𑀥𑀸 𑀉𑀪𑁄 𑀤𑀸𑀦𑀧𑀢𑀻 𑀅𑀳𑀼𑀫𑁆𑀳;

𑀑𑀧𑀸𑀦𑀪𑀽𑀢𑀁 𑀫𑁂 𑀖𑀭𑀁 𑀢𑀤𑀸𑀲𑀺,

𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀺𑀚𑀼𑀢𑀺𑀩𑀮𑀯𑀺𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀫𑁂 𑀥𑀻𑀭 𑀫𑀳𑀸𑀯𑀺𑀫𑀸𑀦’’𑀦𑁆𑀢𑀺 [𑀚𑀸. 𑁨.𑁨𑁨.𑁧𑁫𑁯𑁨, 𑁧𑁫𑁯𑁩, 𑁧𑁫𑁯𑁫]

𑀇𑀫𑀲𑁆𑀫𑀺𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑀚𑀸𑀢𑀓𑁂 𑀤𑀸𑀦𑀲𑁆𑀫𑀺𑀁 𑀆𑀕𑀢𑁄.

‘‘𑀢𑀁 𑀔𑁄 𑀧𑀦 𑀧𑀜𑁆𑀘𑀲𑀺𑀔 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀬𑀸𑀯𑀤𑁂𑀯 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺 [𑀤𑀻. 𑀦𑀺. 𑁨.𑁩𑁨𑁯] 𑀇𑀫𑀲𑁆𑀫𑀺𑀁 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 𑀅𑀧𑁆𑀧𑀫𑀜𑁆𑀜𑀸𑀲𑀼. ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯𑀤𑁂𑀯 𑀫𑀦𑀼𑀲𑁆𑀲𑁂𑀲𑀼 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺 [𑀤𑀻. 𑀦𑀺. 𑁩.𑁧𑁭𑁪] 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑁂 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑁂 𑀲𑀓𑀮𑀲𑁆𑀫𑀺𑀁 𑀲𑀸𑀲𑀦𑁂. ‘‘𑀧𑀭𑁂 𑀅𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀸𑀫𑀸’’𑀢𑀺 [𑀫. 𑀦𑀺. 𑁧.𑁮𑁩] 𑀇𑀫𑀲𑁆𑀫𑀺𑀁 𑀲𑀮𑁆𑀮𑁂𑀔𑀲𑀼𑀢𑁆𑀢𑁂 𑀫𑁂𑀣𑀼𑀦𑀸 𑀯𑀺𑀭𑀢𑀺𑀬𑀁.

‘‘𑀓𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀓𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻’’𑀢𑀺 [𑀧𑁂. 𑀯. 𑁨𑁭𑁫]. 𑁋

𑀇𑀫𑀲𑁆𑀫𑀺𑀁 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼𑀫𑁆𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑁂.

‘‘𑀫𑀬𑀜𑁆𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫,

𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫,

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀺𑀬𑁆𑀬𑀭𑁂’’𑀢𑀺 [𑀚𑀸. 𑁧.𑁧𑁦.𑁯𑁭]. 𑁋

𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑁂 𑀲𑀤𑀸𑀭𑀢𑀼𑀝𑁆𑀞𑀺𑀬𑀁.

‘‘𑀏𑀯𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀢𑀺𑀭𑀺𑀬𑀁 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀳𑁄𑀲𑀻’’𑀢𑀺 [𑀘𑀽𑀴𑀯. 𑁩𑁧𑁧] 𑀇𑀫𑀲𑁆𑀫𑀺𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑁂 𑀧𑀜𑁆𑀘𑀲𑀻𑀮𑁂.

‘‘𑀇𑀤𑀁 𑀔𑁄 𑀧𑀦 𑀧𑀜𑁆𑀘𑀲𑀺𑀔 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬…𑀧𑁂… 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 [𑀤𑀻. 𑀦𑀺. 𑁨.𑁩𑁨𑁯] 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂𑀬𑁂𑀯 𑀅𑀭𑀺𑀬𑀫𑀕𑁆𑀕𑁂.

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺 [𑀚𑀸. 𑁧.𑁮.𑁭𑁫]. 𑁋

𑀦𑀺𑀫𑀺𑀚𑀸𑀢𑀓𑁂 𑀅𑀢𑁆𑀢𑀤𑀫𑀦𑀯𑀲𑁂𑀦 𑀓𑀢𑁂 𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑁂.

‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀢𑀧𑀲𑁆𑀲𑀺 𑀲𑀼𑀤𑀁 𑀳𑁄𑀫𑀻’’𑀢𑀺 [𑀫. 𑀦𑀺. 𑁧.𑁧𑁫𑁫] 𑀮𑁄𑀫𑀳𑀁𑀲𑀲𑀼𑀢𑁆𑀢𑁂 𑀥𑀺𑀢𑀺𑀲𑀗𑁆𑀔𑀸𑀢𑁂 𑀯𑀻𑀭𑀺𑀬𑁂.

𑁭𑁮𑁪. 𑀲𑀪𑀸𑀯𑁄 𑀅𑀯𑀺𑀧𑀭𑀻𑀢𑀢𑁆𑀣𑁄. 𑀧𑀭𑀺𑀬𑀢𑁆𑀢𑀺 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸 𑀯𑀺𑀦𑀬𑀸𑀪𑀺𑀥𑀫𑁆𑀫𑀲𑀼𑀢𑁆𑀢𑀦𑁆𑀢𑀸. 𑀜𑀸𑀬𑁄 𑀬𑀼𑀢𑁆𑀢𑀺, 𑀲𑀧𑁆𑀧𑀝𑀺𑀧𑀤𑀸 𑀯𑀸 𑀫𑀕𑁆𑀕𑀸𑀤𑀬𑁄. 𑀜𑁂𑀬𑁆𑀬𑁂 𑀲𑀗𑁆𑀔𑀸𑀭𑀯𑀺𑀓𑀸𑀭𑀮𑀓𑁆𑀔𑀡𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁂 𑀜𑁂𑀬𑁆𑀬𑁂. 𑀦𑀺𑀲𑁆𑀲𑀢𑁆𑀢𑀢𑀸 𑀲𑀢𑁆𑀢𑀲𑀪𑀸𑀯𑀲𑁆𑀲 𑀅𑀪𑀸𑀯𑀢𑀸. 𑀆𑀧𑀢𑁆𑀢𑀺𑀬𑀁 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫’’𑀦𑁆𑀢𑀺. ‘‘𑀲𑀳 𑀥𑀫𑁆𑀫𑁂𑀦 𑀦𑀺𑀕𑁆𑀕𑀬𑁆𑀳𑀸’’𑀢𑁆𑀬𑀸𑀤𑀻𑀲𑀼 𑀓𑀸𑀭𑀡𑁂. 𑀆𑀤𑀺𑀦𑀸 𑀲𑀫𑀬𑀜𑁆𑀜𑀽𑀧𑀫𑀸𑀳𑀺𑀁𑀲𑀸𑀤𑀻𑀲𑀼𑀧𑀺 𑀥𑀫𑁆𑀫𑁄.

𑁭𑁮𑁫. 𑀧𑀬𑁄𑀚𑀦𑀁 𑀨𑀮𑀁. 𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁂 𑀲𑀤𑁆𑀤𑀢𑁆𑀣𑁂. 𑀯𑀼𑀟𑁆𑀠𑀺𑀬𑀁 𑀯𑀟𑁆𑀠𑀦𑁂. 𑀯𑀢𑁆𑀣𑀼𑀫𑁆𑀳𑀺 𑀤𑀩𑁆𑀩𑁂. 𑀦𑀸𑀲𑁂 𑀯𑀺𑀦𑀸𑀲𑁂. 𑀧𑀘𑁆𑀙𑀺𑀫𑀧𑀩𑁆𑀩𑀢𑁂 𑀅𑀢𑁆𑀣𑀕𑀺𑀭𑀺𑀫𑁆𑀳𑀺. 𑀦𑀺𑀯𑀢𑁆𑀢𑀺𑀯𑀺𑀲𑀬𑀼𑀧𑁆𑀧𑀢𑁆𑀢𑀺𑀲𑀪𑀸𑀯𑀸𑀤𑀻𑀲𑀼𑀧𑀺.

𑁭𑁮𑁬. 𑀬𑁂𑀪𑀼𑀬𑁆𑀬𑀢𑀸 𑀩𑀸𑀳𑀼𑀮𑁆𑀬𑀢𑀸. 𑀅𑀩𑁆𑀬𑀸𑀫𑀺𑀲𑁆𑀲𑀁 𑀅𑀲𑀫𑁆𑀫𑀺𑀲𑁆𑀲𑀁. 𑀯𑀺𑀲𑀁𑀬𑁄𑀕𑁂 𑀯𑀺𑀧𑁆𑀧𑀬𑁄𑀕𑁂. 𑀤𑀴𑁆𑀳𑀢𑁆𑀣𑁂 𑀤𑀴𑁆𑀳𑀲𑀤𑁆𑀤𑀲𑁆𑀲 𑀅𑀢𑁆𑀣𑁂. 𑀅𑀦𑀢𑀺𑀭𑁂𑀓𑁂 𑀅𑀢𑀺𑀭𑁂𑀓𑀸𑀪𑀸𑀯𑁂. 𑀅𑀦𑀯𑀲𑁂𑀲𑀫𑁆𑀳𑀺 𑀲𑀩𑁆𑀩𑀲𑁆𑀫𑀺𑀁, 𑀢𑀁 𑀓𑁂𑀯𑀮𑀯𑀘𑀦𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼.

𑁭𑁮𑁭. 𑀧𑀝𑀮𑀁 ‘‘𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸’’𑀢𑁆𑀬𑀸𑀤𑀻𑀲𑀼 [𑀫𑀳𑀸𑀯. 𑁩𑁪𑁮]. ‘‘𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 [𑀲𑀁. 𑀦𑀺. 𑁧.𑁪] 𑀭𑀸𑀲𑀺𑀫𑁆𑀳𑀺. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 [𑀫. 𑀦𑀺. 𑁩.𑁩𑁭𑁯] 𑀆𑀦𑀺𑀲𑀁𑀲𑁂. 𑀩𑀦𑁆𑀥𑀦𑀁 𑀓𑀸𑀫𑀕𑀼𑀡𑀁. 𑀅𑀧𑁆𑀧𑀥𑀸𑀦𑁂 𑀯𑀺𑀲𑁂𑀲𑀦𑁂. 𑀚𑀺𑀬𑀸𑀬 𑀥𑀦𑀼𑀦𑁄.

𑁭𑁮𑁮-𑁭𑁮𑁯. 𑀭𑀼𑀓𑁆𑀔𑀸𑀤𑁄 𑀤𑀼𑀫𑀸𑀤𑀺𑀫𑁆𑀳𑀺. 𑀯𑀺𑀚𑁆𑀚𑀫𑀸𑀦𑁂 𑀪𑀽𑀢𑀕𑀼𑀡𑁂. 𑀅𑀭𑀳𑀦𑁆𑀢𑁂 ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄, 𑀲𑀪𑀽𑀢𑀧𑀘𑀺𑀦𑀺𑀁 𑀧𑀘𑀻’’𑀢𑀺 [𑀚𑀸. 𑁧.𑁨.𑁧𑁯𑁦]. 𑀔𑀦𑁆𑀥𑀧𑀜𑁆𑀘𑀓𑁂 ‘‘𑀪𑀽𑀢𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺 [𑀫. 𑀦𑀺. 𑁧.𑁪𑁦𑁧]. 𑀲𑀢𑁆𑀢𑁂 𑀧𑀸𑀡𑀺𑀫𑁆𑀳𑀺. 𑀫𑀳𑀸𑀪𑀽𑀢𑁂 𑀧𑀣𑀯𑀸𑀤𑀺𑀓𑁂. 𑀅𑀫𑀦𑀼𑀲𑁆𑀲𑁄 𑀤𑁂𑀯𑀭𑀓𑁆𑀔𑀲𑀸𑀤𑀺. 𑀯𑀺𑀚𑁆𑀚𑀫𑀸𑀦𑀢𑁆𑀣𑀯𑀚𑁆𑀚𑀺𑀢𑁂 𑀭𑀼𑀓𑁆𑀔𑀸𑀤𑁄 𑀦𑀸𑀭𑀺𑀬𑀁 𑀦 𑀪𑀯𑀢𑀺, 𑀯𑀺𑀚𑁆𑀚𑀫𑀸𑀦𑀢𑁆𑀣𑁂, 𑀧𑀦 𑀅𑀢𑀻𑀢𑀸𑀤𑀻𑀲𑀼 𑀘 𑀯𑀸𑀘𑁆𑀘𑀮𑀺𑀗𑁆𑀕𑁄. 𑀧𑀢𑁆𑀢𑁂 𑀲𑀫𑁆𑀧𑀢𑁆𑀢𑁂. 𑀲𑀫𑁂 𑀢𑀼𑀮𑁆𑀬𑀢𑁆𑀣𑁂.

𑁭𑁯𑁦. 𑀲𑀚𑁆𑀚𑀦𑁂 𑀲𑀧𑁆𑀧𑀼𑀭𑀺𑀲𑁂.

𑁭𑁯𑁧. 𑀧𑀤𑀧𑀽𑀭𑀡𑁂 ‘‘𑀲𑀼𑀢𑁆𑀢𑀦𑁆𑀢 𑀯𑀦𑀦𑁆𑀢𑀸’’𑀢𑁆𑀬𑀸𑀤𑀻𑀲𑀼. 𑀤𑁂𑀳𑀸𑀯𑀬𑀯𑁂 ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡’’𑀦𑁆𑀢𑁆𑀬𑀸𑀤𑀻𑀲𑀼 [𑀔𑀼. 𑀧𑀸. 𑁩.𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭]. 𑀤𑁂𑀳𑁄 𑀘 𑀅𑀯𑀬𑀯𑁄 𑀘𑀸𑀢𑀺 𑀏𑀓𑁂. 𑀓𑁄𑀝𑁆𑀞𑀸𑀲𑁂 ‘‘𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑁆𑀬𑀸𑀤𑀻𑀲𑀼 [𑀅. 𑀦𑀺. 𑁬.𑁬𑁧]. 𑀮𑀸𑀫𑀓𑀁 𑀦𑀺𑀳𑀻𑀦𑀓𑀁.

𑁭𑁯𑁨. 𑀦𑀺𑀓𑀸𑀬𑁄 𑀲𑀥𑀫𑁆𑀫𑀻𑀦𑀁 𑀕𑀡𑁄. 𑀲𑀦𑁆𑀥𑀺 𑀧𑀝𑀺𑀲𑀦𑁆𑀥𑀺. 𑀲𑀸𑀫𑀜𑁆𑀜𑁂 𑀯𑀺𑀲𑁂𑀲𑀸𑀥𑀸𑀭𑁂. 𑀧𑀲𑀽𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀁, 𑀓𑀼𑀮𑀁 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀁. 𑀪𑀯𑁄 𑀪𑀯𑀦𑀓𑁆𑀭𑀺𑀬𑀸. 𑀯𑀺𑀲𑁂𑀲𑁆𑀬𑁄 𑀉𑀧𑀸𑀥𑀺, 𑀬𑀲𑁆𑀲 𑀯𑀲𑁂𑀦 𑀪𑀺𑀦𑁆𑀦𑁂𑀲𑀼 𑀲𑀩𑀮𑀸𑀤𑀻𑀲𑀼 𑀅𑀪𑀺𑀦𑁆𑀦𑀸 𑀥𑀻𑀲𑀤𑁆𑀤𑀸 𑀯𑀢𑁆𑀢𑀦𑁆𑀢𑁂. 𑀲𑀼𑀫𑀦𑀸𑀬𑀁 𑀫𑀸𑀮𑀢𑀺𑀬𑀁. 𑀲𑀗𑁆𑀔𑀢𑀮𑀓𑁆𑀔𑀡𑁂 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑁂.

𑁭𑁯𑁩. 𑀪𑀯𑀪𑁂𑀤𑁄 𑀓𑀸𑀫𑀪𑀯𑀸𑀤𑀺. 𑀧𑀢𑀺𑀝𑁆𑀞𑀸𑀬𑀁 𑀦𑀺𑀲𑁆𑀲𑀬𑁂. 𑀦𑀺𑀝𑁆𑀞𑀸 𑀦𑀺𑀧𑁆𑀨𑀢𑁆𑀢𑀺. 𑀅𑀚𑁆𑀛𑀸𑀲𑀬𑁄 𑀅𑀥𑀺𑀧𑁆𑀧𑀸𑀬𑁄. 𑀩𑀼𑀤𑁆𑀥𑀺 𑀜𑀸𑀡𑀁. 𑀯𑀸𑀲𑀝𑁆𑀞𑀸𑀦𑀁 𑀯𑀲𑀦𑀝𑁆𑀞𑀸𑀦𑀁. 𑀯𑀺𑀲𑀭𑀢𑁆𑀢𑀁 𑀯𑀺𑀲𑀭𑀡𑀪𑀸𑀯𑁄. ‘‘𑀯𑀺𑀲𑀤𑀢𑁆𑀣𑁂’’𑀢𑀺𑀧𑀺 𑀧𑀸𑀞𑁄, 𑀢𑀤𑀸 𑀲𑀤𑀥𑀸𑀢𑀼𑀲𑁆𑀲 𑀯𑀺𑀲𑀭𑀡𑀢𑁆𑀣𑀢𑀸 𑀤𑀝𑁆𑀞𑀩𑁆𑀩𑀸.

𑁭𑁯𑁪. 𑀨𑀮𑁂 𑀲𑁄𑀢𑀸𑀧𑀢𑁆𑀢𑀸𑀤𑀺𑀓𑁂. 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸 𑀦𑀸𑀫. 𑀫𑀕𑁆𑀕𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀓𑁂.

𑁭𑁯𑁫. 𑀓𑀫𑁆𑀫𑀸𑀭𑀼𑀤𑁆𑀥𑀦𑀁 𑀓𑀫𑁆𑀫𑀸𑀭𑀸𑀦𑀁 𑀉𑀤𑁆𑀥𑀦𑀁, 𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸𑀢𑀺. 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀅𑀗𑁆𑀕𑀸𑀭𑀸𑀦𑀁 𑀪𑀸𑀚𑀦𑀁. 𑀤𑀻𑀧𑀺𑀓𑀸 𑀦𑀸𑀫 𑀫𑀥𑀼𑀘𑁆𑀙𑀺𑀝𑁆𑀞𑀸𑀤𑀺𑀫𑀬𑀸 𑀧𑀤𑀻𑀧𑀓𑀺𑀘𑁆𑀘𑀓𑀸𑀭𑀺𑀓𑀸. 𑀲𑀼𑀯𑀡𑁆𑀡𑀓𑀸𑀭𑀫𑀽𑀲𑀸 𑀫𑀢𑁆𑀢𑀺𑀓𑀫𑀬𑀸 𑀏𑀓𑀸 𑀪𑀸𑀚𑀦𑀯𑀺𑀓𑀢𑀺. 𑀯𑀸𑀬𑀼𑀦𑁄 𑀯𑁂𑀕𑁂 𑀘 𑀉𑀓𑁆𑀓𑀸𑀲𑀤𑁆𑀤𑁄, 𑀬𑁄 ‘‘𑀤𑁂𑀯𑀤𑀼𑀤𑁆𑀭𑀪𑀻’’𑀢𑀺 𑀯𑀼𑀢𑁆𑀢𑁄.

𑁭𑁯𑁬. 𑀓𑁂𑀲𑁄𑀳𑀸𑀭𑀡𑀁 𑀓𑁂𑀲𑀸𑀦𑀁 𑀮𑀯𑀦𑀁. 𑀚𑀻𑀯𑀺𑀢𑀯𑀼𑀢𑁆𑀢𑀺 𑀚𑀻𑀯𑀺𑀢𑀲𑁆𑀲 𑀯𑀢𑁆𑀢𑀦𑀁. 𑀯𑀧𑀦𑀁 𑀩𑀻𑀚𑀲𑁆𑀲 𑀯𑀧𑀦𑀁. 𑀯𑀸𑀧𑀲𑀫𑀓𑀭𑀡𑀁 𑀯𑀧𑀺𑀢𑀲𑁆𑀲 𑀩𑀻𑀚𑀲𑁆𑀲 𑀲𑀫𑀓𑀭𑀡𑀁. 𑀧𑀯𑀼𑀢𑁆𑀢𑀪𑀸𑀯𑁄 𑀩𑀦𑁆𑀥𑀦𑀸 𑀫𑀼𑀢𑁆𑀢𑀺.

𑁭𑁯𑁭-𑁭𑁯𑁮. 𑀲𑀼𑀢𑁄 𑀯𑀺𑀲𑁆𑀲𑀼𑀢𑁂 𑀧𑀸𑀓𑀝𑁂. 𑀅𑀯𑀥𑀸𑀭𑀺𑀢𑁂 𑀉𑀧𑀮𑀓𑁆𑀔𑀺𑀢𑁂. 𑀉𑀧𑀘𑀺𑀢𑁂 𑀭𑀸𑀲𑀻𑀓𑀢𑁂. 𑀅𑀦𑀼𑀬𑁄𑀕𑁄 𑀧𑀼𑀘𑁆𑀙𑀸. 𑀓𑀺𑀮𑀺𑀦𑁆𑀦𑁂 𑀢𑀺𑀦𑁆𑀢𑁂. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀁 𑀲𑀤𑁆𑀤𑀸𑀬𑀢𑀦𑀁. 𑀲𑀢𑁆𑀣𑀁 𑀲𑀤𑁆𑀤𑀲𑀢𑁆𑀣𑀸𑀤𑀺, 𑀲𑀼𑀢𑀦𑀸𑀫𑀓𑁄 𑀯𑀸 𑀏𑀓𑁄 𑀲𑀢𑁆𑀣𑀯𑀺𑀲𑁂𑀲𑁄. 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀲𑀼𑀢𑀁 𑀦𑀧𑀼𑀁𑀲𑀓𑀁. 𑀧𑀼𑀢𑁆𑀢𑁂 𑀲𑀼𑀢𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀭𑀸𑀚𑀺𑀦𑀺𑀧𑀺 𑀲𑀼𑀢𑁄.

𑁭𑁯𑁯. 𑀬𑀼𑀕𑁂 𑀓𑀢𑀸𑀤𑀺𑀘𑀢𑀼𑀓𑁆𑀓𑁂. 𑀮𑁂𑀲𑁄 𑀅𑀦𑀼𑀫𑀸𑀦𑀜𑀸𑀡𑀯𑀺𑀲𑀬𑁄. 𑀧𑀜𑁆𑀜𑀢𑁆𑀢𑀺𑀬𑀁 ‘‘𑀓𑀧𑁆𑀧𑀢𑁆𑀣𑁂𑀭𑁄’’𑀢𑀺. 𑀧𑀭𑀫𑀸𑀬𑀼𑀫𑁆𑀳𑀺 ‘‘𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻’’𑀢𑀺. 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸𑀤𑀻𑀲𑀼 𑀧𑀼𑀮𑁆𑀮𑀺𑀗𑁆𑀕𑁂. 𑀲𑀤𑀺𑀲𑁂 𑀧𑀦 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. 𑀲𑀫𑀡𑀯𑁄𑀳𑀸𑀭𑁄 𑀯𑀺𑀦𑀬𑀸𑀕𑀢𑁄 𑀲𑀫𑀡𑀸𑀦𑀁 𑀯𑁄𑀳𑀸𑀭𑁄. 𑀓𑀧𑁆𑀧𑀩𑀺𑀦𑁆𑀤𑀼 𑀘𑀻𑀯𑀭𑁂 𑀓𑀢𑀩𑀺𑀦𑁆𑀤𑀼. 𑀲𑀫𑀦𑁆𑀢𑀢𑁆𑀢𑁂 𑀲𑀫𑀦𑁆𑀢𑀪𑀸𑀯𑁂. 𑀅𑀦𑁆𑀢𑀭𑀓𑀧𑁆𑀧𑁄 𑀫𑀳𑀸𑀓𑀧𑁆𑀧𑀲𑁆𑀲 𑀅𑀲𑀻𑀢𑀺𑀫𑁄 𑀪𑀸𑀕𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀳𑀸𑀓𑀧𑁆𑀧𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀓𑁆𑀓𑁂 𑀯𑀺𑀢𑀓𑁆𑀓𑁂. 𑀯𑀺𑀥𑀺 𑀯𑀺𑀥𑀸𑀦𑀁.

𑁮𑁦𑁦. 𑀯𑀺𑀭𑀢𑀺 𑀯𑀺𑀭𑀢𑀺𑀢𑁆𑀢𑀬𑀁. 𑀲𑀧𑀣𑁄 𑀅𑀓𑁆𑀓𑁄𑀲𑁄. 𑀢𑀘𑁆𑀙𑁂 𑀢𑀣𑀪𑀸𑀯𑁂. 𑀅𑀭𑀺𑀬𑀲𑀘𑁆𑀘𑀫𑁆𑀳𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀓𑁂. 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑁮𑁦𑁧. 𑀲𑀜𑁆𑀚𑀸𑀢𑀺𑀤𑁂𑀲𑁄 ‘‘𑀓𑀫𑁆𑀩𑁄𑀚𑁄 𑀅𑀲𑁆𑀲𑀸𑀬𑀢𑀦’’𑀦𑁆𑀢𑀺. 𑀯𑀸𑀲𑀝𑁆𑀞𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 ‘‘𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦’’𑀦𑁆𑀢𑀺. 𑀆𑀓𑀭𑁄𑀢𑀺 𑀬𑀢𑁆𑀣 𑀲𑀼𑀯𑀡𑁆𑀡𑀭𑀚𑀢𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀫𑁄𑀲𑀭𑀡𑀝𑁆𑀞𑀸𑀦𑀁 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁. 𑀧𑀤𑀧𑀽𑀭𑀡𑁂 ‘‘𑀓𑀫𑁆𑀫𑀸𑀬𑀢𑀦𑀁, 𑀲𑀺𑀧𑁆𑀧𑀸𑀬𑀢𑀦’’𑀦𑁆𑀢𑀺.

𑁮𑁦𑁨. 𑀯𑀢𑁆𑀣𑀁 𑀅𑀫𑁆𑀩𑀭𑀁. 𑀅𑀜𑁆𑀜𑁄 𑀬𑁄 𑀲𑀓𑁄 𑀦 𑀳𑁄𑀢𑀺. 𑀑𑀥𑀺 𑀫𑀭𑀺𑀬𑀸𑀤𑁄. 𑀪𑁂𑀤𑁄 𑀯𑀺𑀲𑁂𑀲𑁄. 𑀫𑀦𑀲𑀺𑀧𑀺 𑀘𑀺𑀢𑁆𑀢𑁂𑀧𑀺.

𑁮𑁦𑁩. 𑀯𑀺𑀧𑀸𑀓𑁂 𑀇𑀝𑁆𑀞𑀯𑀺𑀧𑀸𑀓𑁂 𑀓𑀼𑀲𑀮𑁄. 𑀅𑀦𑀯𑀚𑁆𑀚𑀸𑀤𑀻𑀲𑀼 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑁄.

𑁮𑁦𑁪. 𑀤𑁆𑀭𑀯𑁄 𑀫𑀥𑁆𑀯𑀸𑀤𑀺. 𑀫𑀥𑀼𑀭𑀸𑀤𑀻𑀲𑀼 𑀙𑀲𑀼 𑀭𑀲𑁂𑀲𑀼. 𑀧𑀸𑀭𑀤𑁄 𑀲𑀽𑀢𑁄. 𑀲𑀺𑀗𑁆𑀕𑀸𑀭𑀸𑀤𑁄 𑀦𑀯 𑀦𑀸𑀝𑁆𑀬𑀭𑀲𑁂. 𑀭𑀲𑀭𑀢𑁆𑀢𑀫𑀁𑀲𑀫𑁂𑀤𑀝𑁆𑀞𑀺𑀲𑀼𑀓𑁆𑀓𑀝𑁆𑀞𑀺𑀫𑀺𑀜𑁆𑀚𑀯𑀲𑁂𑀦 𑀲𑀢𑁆𑀢 𑀥𑀸𑀢𑀯𑁄, 𑀢𑀩𑁆𑀪𑁂𑀤𑁂. 𑀓𑀺𑀘𑁆𑀘𑁂 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀲𑀗𑁆𑀖𑀝𑁆𑀝𑀦𑀸𑀤𑀺𑀓𑀺𑀘𑁆𑀘𑁂. 𑀲𑀫𑁆𑀧𑀢𑁆𑀢𑀺 𑀢𑁂𑀲𑀁𑀬𑁂𑀯.

𑁮𑁦𑁫. 𑀩𑁄𑀥𑀺𑀲𑀤𑁆𑀤𑁄 𑀜𑀸𑀡𑀤𑁆𑀯𑀬𑁂 𑀦𑀸𑀭𑀺𑀬𑀁, 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑀁 𑀧𑀼𑀫𑁂. 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑁂 𑀧𑀼𑀫𑀺𑀢𑁆𑀣𑀺𑀬𑀁.

𑁮𑁦𑁬. 𑀬𑁂𑀦 𑀓𑀢𑁆𑀢𑀼𑀪𑀽𑀢𑁂𑀦 𑀬𑁄 𑀓𑀫𑁆𑀫𑀪𑀽𑀢𑁄 𑀦𑀺𑀘𑁆𑀘𑀲𑁂𑀯𑀺𑀢𑁄, 𑀢𑀢𑁆𑀣𑀸𑀧𑀺 𑀓𑀫𑁆𑀫𑀪𑀽𑀢𑁂. 𑀯𑀺𑀲𑀬𑁄 𑀅𑀦𑀜𑁆𑀜𑀣𑀸𑀪𑀸𑀯𑁄. 𑀚𑀦𑀧𑀤𑁂 𑀓𑀼𑀭𑀼𑀆𑀤𑀺𑀓𑁂. 𑀕𑁄𑀘𑀭𑁂 𑀢𑀩𑁆𑀩𑀳𑀼𑀮𑀸𑀘𑀸𑀭𑁂.

𑁮𑁦𑁭. 𑀲𑀢𑁆𑀢𑀸𑀬𑀁 𑀯𑀺𑀚𑁆𑀚𑀫𑀸𑀦𑀢𑀸𑀬𑀁.

𑁮𑁦𑁮. 𑀩𑀦𑁆𑀥𑀯𑁂 𑀲𑁄 𑀧𑀼𑀫𑁂. 𑀅𑀢𑁆𑀢𑀦𑀺 𑀲𑀁 𑀦𑀧𑀼𑀁𑀲𑀓𑁂. 𑀥𑀦𑀲𑁆𑀫𑀺𑀁 𑀲𑁄 𑀲𑀁 𑀅𑀦𑀺𑀢𑁆𑀣𑀺𑀬𑀁. 𑀲𑀼𑀦𑀔𑁂 𑀲𑀸 𑀧𑀼𑀫𑁂 𑀯𑀼𑀢𑁆𑀢𑁄. 𑀅𑀢𑁆𑀢𑀦𑀺𑀬𑁂 𑀲𑁄 𑀢𑀺𑀮𑀺𑀗𑁆𑀕𑀺𑀓𑁄.

𑁮𑁦𑁯. 𑀙𑀯𑀺𑀲𑀫𑁆𑀧𑀢𑁆𑀢𑀺𑀬𑀁 𑀙𑀯𑀺𑀬𑀸 𑀲𑀫𑁆𑀧𑀢𑁆𑀢𑀺𑀬𑀁.

𑁮𑁧𑁦. 𑀚𑀸𑀫𑀸𑀢𑀸 𑀥𑀻𑀢𑀼𑀲𑀸𑀫𑀺𑀓𑁄. 𑀫𑀦𑁆𑀤𑀧𑁆𑀧𑀺𑀬𑁂 𑀅𑀧𑁆𑀧𑀧𑀺𑀬𑁂 𑀯𑀭𑀁 𑀅𑀩𑁆𑀬𑀬𑀁.

𑁮𑁧𑁧. 𑀫𑀓𑀼𑀮𑁂 𑀅𑀯𑀺𑀓𑀸𑀲𑀲𑀫𑁆𑀧𑀢𑁆𑀢𑁂. 𑀦𑁂𑀢𑁆𑀢𑀺𑀁𑀲𑀸𑀤𑀺𑀧𑀺𑀥𑀸𑀦𑁂 𑀔𑀕𑁆𑀕𑀸𑀤𑀻𑀦𑀁 𑀕𑁂𑀳𑁂.

𑁮𑁧𑁨. 𑀧𑀺𑀢𑀸𑀫𑀳𑁄 𑀩𑁆𑀭𑀳𑁆𑀫𑀸. 𑀧𑀺𑀢𑀽𑀲𑀼 𑀫𑀸𑀢𑀸𑀧𑀺𑀢𑀽𑀲𑀼. 𑀢𑀣𑀸 𑀧𑀓𑁆𑀔𑀦𑁆𑀢𑀭𑁂. 𑀢𑀧𑀲𑀺 𑀲𑀻𑀮𑁂.

𑁮𑁧𑁩-𑁮𑁧𑁪. 𑀫𑀚𑁆𑀛𑀩𑀦𑁆𑀥𑁂 𑀉𑀭𑁄𑀩𑀦𑁆𑀥𑀦𑁂. 𑀧𑀓𑁄𑀝𑁆𑀞𑁄 𑀓𑀧𑁆𑀧𑀭𑀲𑁆𑀲𑀸𑀥𑁄𑀪𑀸𑀕𑁄. 𑀓𑀘𑁆𑀙𑀩𑀦𑁆𑀥𑀦𑀁 𑀅𑀥𑁄𑀫𑁆𑀩𑀭𑀲𑁆𑀲 𑀤𑀴𑁆𑀳𑀩𑀦𑁆𑀥𑀦𑀁. 𑀫𑁂𑀔𑀮𑀸𑀬𑀜𑁆𑀘𑀸𑀢𑀺 𑀓𑀘𑁆𑀙𑀸 𑀘𑀢𑀽𑀲𑁆𑀯𑀢𑁆𑀣𑁂𑀲𑀼. 𑀓𑀘𑁆𑀙𑁄 𑀮𑀢𑀸𑀤𑀻𑀲𑀼. 𑀓𑀘𑁆𑀙𑁄 𑀩𑀸𑀳𑀼𑀫𑀽𑀮𑀫𑁆𑀳𑀺 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑁂, ‘‘𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀜𑁆𑀘𑀦𑁆𑀢𑀻’’𑀢𑀺. 𑀅𑀦𑀽𑀧𑁄 𑀩𑀳𑀽𑀤𑀓𑀤𑁂𑀲𑁄.

𑁮𑁧𑁫. 𑀫𑀸𑀦𑀁 𑀢𑀼𑀮𑀸𑀧𑀢𑁆𑀣𑀗𑁆𑀕𑀼𑀮𑀻𑀳𑀺. 𑀧𑀫𑀸𑀢𑀭𑀺 𑀧𑀫𑀸𑀡𑀲𑁆𑀲 𑀓𑀢𑁆𑀢𑀭𑀺.

𑁮𑁧𑁬. 𑀤𑀩𑁆𑀩𑀁 𑀥𑀦𑀁. 𑀅𑀢𑁆𑀢𑀪𑀸𑀯𑁄 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀽𑀳𑁄. 𑀧𑀸𑀡𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀤𑀩𑁆𑀩𑀸𑀤𑀻𑀲𑀼 𑀘𑀢𑀽𑀲𑀼 𑀲𑀢𑁆𑀢𑀁. 𑀲𑀢𑁆𑀢𑀸𑀬𑀁 𑀯𑀺𑀚𑁆𑀚𑀫𑀸𑀦𑀢𑀸𑀬𑀁 𑀲𑀢𑁆𑀢𑀸. 𑀚𑀦𑁂 𑀲𑀢𑁆𑀢𑁄. 𑀲𑁄 𑀲𑀢𑁆𑀢𑀲𑀤𑁆𑀤𑁄, 𑀆𑀲𑀢𑁆𑀢𑁂 𑀮𑀕𑁆𑀕𑀺𑀢𑁂 𑀢𑀺𑀮𑀺𑀗𑁆𑀕𑀺𑀓𑁄.

𑁮𑁧𑁭. 𑀲𑁂𑀫𑁆𑀳𑀸𑀤𑁄 𑀢𑀺𑀤𑁄𑀲𑁂. 𑀭𑀲𑀭𑀢𑁆𑀢𑀸𑀤𑀺 𑀧𑀼𑀩𑁆𑀩𑁂𑀯𑀼𑀢𑁆𑀢𑁄. 𑀧𑀪𑀸𑀤𑀺𑀓𑁂 𑀭𑀽𑀧𑀥𑀸𑀢𑀼𑀫𑁆𑀳𑀺. 𑀘𑀓𑁆𑀔𑀸𑀤𑀺𑀓𑁂 𑀯𑀺𑀲𑀬𑀥𑀸𑀢𑀼𑀫𑁆𑀳𑀺.

𑁮𑁧𑁮. 𑀅𑀫𑀘𑁆𑀘𑀸𑀤𑀺𑀓𑀸 𑀲𑀢𑁆𑀢 𑀧𑀓𑀢𑀺𑀬𑁄 𑀯𑀼𑀢𑁆𑀢𑀸. 𑀲𑀢𑁆𑀢𑀸𑀤𑀺𑀲𑀸𑀫𑁆𑀬𑀯𑀢𑁆𑀣𑀸 𑀲𑀢𑁆𑀢𑀭𑀚𑀢𑀫𑀪𑀽𑀢𑀸𑀦𑀁 𑀢𑀺𑀡𑁆𑀡𑀁 𑀕𑀼𑀡𑀸𑀦𑀁 𑀲𑀸𑀫𑁆𑀬𑀯𑀢𑁆𑀣𑀸. 𑀧𑀘𑁆𑀘𑀬𑀸 𑀡𑀧𑀘𑁆𑀘𑀬𑀸𑀤𑀺𑀢𑁄 𑀧𑀞𑀫𑁂 𑀧𑀞𑀫𑀲𑀡𑁆𑀞𑀺𑀢𑁂 𑀓𑀭𑁄𑀢𑁆𑀬𑀸𑀤𑀺𑀥𑀸𑀢𑀼𑀫𑁆𑀳𑀺.

𑁮𑁧𑁯. 𑀧𑀭𑀺𑀢𑁆𑀢𑀸𑀡𑀁 𑀭𑀓𑁆𑀔𑀡𑀁. 𑀯𑀢𑁆𑀣𑀼𑀫𑁆𑀳𑀺 𑀑𑀓𑀸𑀲𑁂. 𑀢𑀮𑁆𑀮𑀜𑁆𑀙𑀦𑀁 𑀧𑀸𑀤𑀲𑁆𑀲 𑀞𑀸𑀦𑀁.

𑁮𑁨𑁦. 𑀮𑁄𑀳𑀫𑀼𑀕𑁆𑀕𑀭𑁂 𑀮𑁄𑀳𑀫𑀬𑁂 𑀫𑀼𑀕𑁆𑀕𑀭𑁂. 𑀢𑀸𑀴𑀸𑀤𑀺𑀓𑁂 𑀲𑀫𑁆𑀫𑀢𑀸𑀴𑀓𑀁𑀲𑀢𑀸𑀴𑀸𑀤𑀺𑀓𑁂. 𑀓𑀞𑀺𑀦𑁂 𑀓𑀓𑁆𑀔𑀴𑁂.

𑁮𑁨𑁧. 𑀫𑀓𑁆𑀔𑀺𑀓𑀸 𑀦𑀻𑀮𑀫𑀓𑁆𑀔𑀺𑀓𑀸𑀤𑀺𑀓𑀸. 𑀢𑀸𑀲𑀁 𑀪𑁂𑀤𑀸 𑀲𑀯𑀺𑀲𑀸 𑀫𑀥𑀼𑀓𑀢𑀸 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀫𑀥𑀼𑀫𑁆𑀳𑀺 𑀔𑀼𑀤𑁆𑀤𑀁 𑀅𑀧𑁆𑀧𑀓𑀸𑀤𑀻𑀲𑀼 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. 𑀅𑀥𑀫𑁄 𑀦𑀺𑀳𑀻𑀦𑁄. 𑀓𑀧𑀡𑁄 𑀏𑀓𑀘𑀸𑀭𑀻.

𑁮𑁨𑁨. 𑀢𑀓𑁆𑀓𑁂 𑀕𑁄𑀭𑀲𑀯𑀺𑀲𑁂𑀲𑁂. 𑀫𑀭𑀡𑀮𑀺𑀗𑁆𑀕𑁂 𑀫𑀭𑀡𑀜𑀸𑀧𑀓𑀮𑀓𑁆𑀔𑀡𑁂. 𑀅𑀲𑀼𑀪𑁂, 𑀲𑀼𑀪𑁂 𑀘𑀸𑀢𑀺 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀅𑀭𑀺𑀝𑁆𑀞𑀁. 𑀆𑀲𑀯𑁄 𑀫𑀚𑁆𑀚𑀯𑀺𑀲𑁂𑀲𑁄. 𑀨𑁂𑀡𑀺𑀮𑀤𑁆𑀤𑀼𑀫𑁄 ‘‘𑀩𑀟𑀻-𑀬𑁆ौ-𑀔𑁄’’.

𑁮𑁨𑁩. 𑀕𑁂𑀳𑀸𑀦𑀁 𑀤𑀸𑀭𑀼𑀩𑀦𑁆𑀥𑀧𑁆𑀧𑀬𑁄𑀚𑀦𑀁 𑀧𑀻𑀞𑀺𑀓𑀸 𑀦𑀸𑀫. 𑀧𑀓𑁆𑀔𑀦𑁆𑀤𑀤𑁆𑀯𑀬𑀲𑁆𑀲, 𑀓𑀡𑁆𑀡𑀺𑀓𑀸𑀤𑀻𑀦𑀜𑁆𑀘 𑀦𑀺𑀲𑁆𑀲𑀬𑀪𑀽𑀢𑀸 𑀧𑀻𑀞𑀺𑀓𑀸.

𑁮𑁨𑁪. 𑀫𑀺𑀢𑁆𑀢𑀸𑀓𑀸𑀭𑁂 𑀅𑀫𑀺𑀢𑁆𑀢𑀲𑁆𑀲𑀸𑀧𑀺 𑀫𑀺𑀢𑁆𑀢𑀲𑀡𑁆𑀞𑀸𑀦𑁂. 𑀩𑀮𑁂, 𑀭𑀸𑀲𑀺𑀫𑁆𑀳𑀺, 𑀯𑀺𑀧𑀢𑁆𑀢𑀺𑀬𑀜𑁆𑀘, ‘‘𑀩𑀮𑀲𑁆𑀲 𑀭𑀸𑀲𑀻’’𑀢𑀺𑀧𑀺 𑀏𑀓𑁂.

𑁮𑁨𑁫. 𑀔𑀦𑁆𑀥𑁂 𑀭𑀽𑀧𑀓𑁆𑀔𑀦𑁆𑀥𑁂. 𑀪𑀯𑁂 𑀭𑀽𑀧𑀪𑀯𑁂. 𑀦𑀺𑀫𑀺𑀢𑁆𑀢𑀫𑁆𑀳𑀺 𑀓𑀸𑀭𑀡𑁂. 𑀯𑀧𑀼 𑀲𑀭𑀻𑀭𑀁.

𑁮𑁨𑁬. 𑀯𑀢𑁆𑀣𑀼𑀓𑀺𑀮𑁂𑀲𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼. 𑀫𑀤𑀦𑁂 𑀫𑀸𑀭𑀤𑁂𑀯𑀧𑀼𑀢𑁆𑀢𑁂. 𑀭𑀢𑁂 𑀫𑁂𑀣𑀼𑀦𑁂. 𑀦𑀺𑀓𑀸𑀫𑁂 𑀇𑀘𑁆𑀙𑀸𑀭𑀳𑀺𑀢𑁂 𑀓𑀸𑀫𑀁 𑀦𑀧𑀼𑀁𑀲𑀓𑁂. 𑀅𑀦𑀼𑀜𑁆𑀜𑀸𑀬𑀁 𑀓𑀸𑀫𑀫𑀩𑁆𑀬𑀬𑀁 𑀪𑀯𑁂.

𑁮𑁨𑁭. 𑀯𑀚𑁆𑀚𑀪𑀡𑁆𑀟𑀫𑀼𑀔𑁂 𑀯𑀻𑀡𑀸𑀤𑁄𑀡𑀺𑀫𑀼𑀔𑁂. 𑀫𑀸𑀢𑀗𑁆𑀕𑀲𑁆𑀲 𑀳𑀢𑁆𑀣𑀺𑀦𑁄 𑀓𑀭𑀓𑁄𑀝𑀺 𑀳𑀢𑁆𑀣𑀕𑁆𑀕𑀁.

𑁮𑁨𑁮. 𑀭𑀫𑁆𑀪𑁄 𑀲𑀞𑁆𑀬𑀁, 𑀓𑁂𑀢𑀯𑀦𑁆𑀢𑁆𑀬𑀢𑁆𑀣𑁄. 𑀅𑀲𑀘𑁆𑀘𑀁 𑀫𑀼𑀲𑀸. 𑀅𑀬𑁄𑀖𑀦𑀁 𑀬𑁂𑀦 𑀧𑀳𑀭𑀢𑀺. 𑀕𑀺𑀭𑀺𑀲𑀺𑀗𑁆𑀕𑀫𑁆𑀳𑀺 𑀕𑀺𑀭𑀕𑁆𑀕𑁂. 𑀲𑀻𑀭𑀗𑁆𑀕𑁂 𑀨𑀸𑀮𑀗𑁆𑀕𑁂. 𑀬𑀦𑁆𑀢𑁂 𑀓𑀽𑀝𑀬𑀦𑁆𑀢𑁂.

𑁮𑁩𑁦. 𑀧𑀝𑀺𑀯𑀸𑀓𑁆𑀬𑁂 𑀧𑀝𑀺𑀯𑀘𑀦𑁂. 𑀉𑀢𑁆𑀢𑀭𑀸𑀲𑀗𑁆𑀕𑁂 𑀉𑀧𑀭𑀺𑀯𑀢𑁆𑀣𑁂. 𑀲𑁂𑀝𑁆𑀞𑀸𑀤𑀻𑀲𑀼 𑀉𑀢𑁆𑀢𑀭𑁄 𑀢𑀻𑀲𑀼, 𑀧𑀭𑀲𑁆𑀫𑀺𑀁 𑀉𑀧𑀭𑀺𑀲𑁆𑀫𑀺𑀜𑁆𑀘 𑀈𑀭𑀺𑀢𑁄.

𑁮𑁩𑁧. 𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀁 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀺𑀧𑀺.

𑁮𑁩𑁨. 𑀲𑀗𑁆𑀔𑀢𑁂 𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀢𑁂 𑀥𑀫𑁆𑀫𑁂. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺. 𑀧𑀬𑁄𑀕𑁄 𑀉𑀲𑁆𑀲𑀸𑀳𑁄. 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑀸𑀤𑀺. 𑀅𑀪𑀺𑀲𑀗𑁆𑀔𑀭𑀡𑀁 𑀅𑀪𑀺𑀲𑀗𑁆𑀔𑀭𑀡𑀓𑁆𑀭𑀺𑀬𑀸.

𑁮𑁩𑁩. 𑀢𑀩𑁆𑀪𑀸𑀯𑁂 𑀤𑀺𑀝𑁆𑀞𑀺𑀲𑀳𑀕𑀢𑀁.

𑁮𑁩𑁪. 𑀧𑀢𑀺𑀭𑀽𑀧𑁂 𑀬𑀼𑀢𑁆𑀢𑁂. 𑀙𑀸𑀤𑀺𑀢𑁂 𑀢𑀺𑀡𑀸𑀤𑀻𑀳𑀺. 𑀭𑀳𑁄 𑀲𑀼𑀜𑁆𑀜𑀝𑁆𑀞𑀸𑀦𑀁. 𑀧𑀜𑁆𑀜𑀢𑁆𑀢𑀺𑀬𑀁 𑀙𑀦𑁆𑀦𑁄 𑀪𑀺𑀓𑁆𑀔𑀼, 𑀧𑀜𑁆𑀜𑀢𑁆𑀢𑀺𑀬𑀁𑀬𑁂𑀯 𑀧𑀼𑀫𑁂.

𑁮𑁩𑁫. 𑀩𑀼𑀤𑁆𑀥𑀘𑀓𑁆𑀔𑀼 𑀩𑀼𑀤𑁆𑀥𑀸𑀦𑀁 𑀘𑀓𑁆𑀔𑀼. 𑀲𑀫𑀦𑁆𑀢𑀘𑀓𑁆𑀔𑀼 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀥𑀫𑁆𑀫𑀘𑀓𑁆𑀔𑀼 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑁂 𑀜𑀸𑀡𑀁.

𑁮𑁩𑁬. 𑀅𑀪𑀺𑀓𑁆𑀓𑀫𑁄 𑀅𑀪𑀺𑀓𑁆𑀓𑀫𑀦𑀻𑀬𑁄.

𑁮𑁩𑁭. 𑀯𑁂𑀯𑀘𑀦𑀁 𑀅𑀪𑀺𑀦𑁆𑀦𑀢𑁆𑀣𑁄 𑀲𑀤𑁆𑀤𑁄. 𑀧𑀓𑀸𑀭𑀲𑁆𑀫𑀺𑀁 𑀪𑁂𑀤𑁂. 𑀅𑀯𑀲𑀭𑁄 𑀅𑀯𑀓𑀸𑀲𑁄.

𑁮𑁩𑁮. 𑀘𑀺𑀢𑁆𑀢𑀓𑀫𑁆𑀫𑀁 𑀘𑀺𑀢𑁆𑀢𑀓𑀸𑀭𑀸𑀦𑀁 𑀓𑀫𑁆𑀫𑀁. 𑀯𑀺𑀘𑀺𑀢𑁆𑀢𑁂 𑀦𑀸𑀦𑀸𑀯𑀺𑀥𑁂. 𑀧𑀜𑁆𑀜𑀢𑁆𑀢𑀺𑀬𑀁 𑀘𑀺𑀢𑁆𑀢𑁄 𑀥𑀦𑀼𑀥𑀭𑁄𑀬𑁂𑀯. 𑀘𑀺𑀢𑁆𑀢𑀫𑀸𑀲𑁄 𑀧𑀼𑀡𑁆𑀡𑁂𑀦𑁆𑀤𑀼𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀦𑀓𑁆𑀔𑀢𑁆𑀢𑁂𑀦 𑀮𑀓𑁆𑀔𑀺𑀢𑁄 𑀫𑀸𑀲𑁄. 𑀢𑀸𑀭𑀦𑁆𑀢𑀭𑁂 𑀘𑀺𑀢𑁆𑀢𑀦𑀓𑁆𑀔𑀢𑁆𑀢𑁂. 𑀣𑀺𑀬𑀁 𑀦𑀸𑀭𑀺𑀬𑀁.

𑁮𑁩𑁯. 𑀲𑀸𑀫𑀮𑁂 𑀦𑀻𑀮𑁂. 𑀲𑀬𑀫𑀢𑁆𑀣𑁂 𑀲𑀬𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑁂. 𑀲𑀸𑀭𑀺𑀯𑀸 𑀉𑀧𑀸𑀲𑀓𑀸.

𑁮𑁪𑁦. ‘‘𑀧𑀼𑀫𑁂’’𑀢𑁆𑀬𑀸𑀤𑀺𑀦𑀸 𑀧𑀼𑀩𑁆𑀩𑀤𑁆𑀥𑁂𑀦 𑀕𑀼𑀭𑀼𑀲𑀤𑁆𑀤𑀲𑁆𑀲 𑀅𑀢𑁆𑀣𑀸 𑀯𑀼𑀢𑁆𑀢𑀸, 𑀅𑀧𑀭𑀤𑁆𑀥𑁂𑀦 𑀕𑀭𑀼𑀲𑀤𑁆𑀤𑀲𑁆𑀲, ‘‘𑀏𑀓𑀤𑁂𑀲𑁂𑀓𑀢𑁆𑀢𑀫𑀦𑀜𑁆𑀜𑀁𑀯𑁂’’𑀢𑀺 𑀦𑁆𑀬𑀸𑀬𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀢𑁆𑀢𑀫𑀜𑁆𑀜𑀫𑀸𑀦𑁂𑀦 𑀕𑀸𑀣𑀸𑀦𑁂𑀓𑀢𑁆𑀣𑀯𑀕𑁆𑀕𑁂 𑀓𑀣𑀺𑀢𑀸. 𑀫𑀳𑀦𑁆𑀢𑁂 𑀩𑀳𑀼𑀢𑁆𑀢𑁂. 𑀤𑀼𑀚𑁆𑀚𑀭𑁂 𑀚𑀻𑀭𑀸𑀧𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁂, 𑀤𑀼𑀓𑁆𑀓𑀭𑁂 𑀯𑀸.

𑁮𑁪𑁧. 𑀅𑀘𑁆𑀘𑀺𑀢𑁂 𑀧𑀽𑀚𑀺𑀢𑁂. 𑀔𑀺𑀦𑁆𑀦𑁂 𑀓𑀺𑀮𑀫𑀣𑀧𑁆𑀧𑀢𑁆𑀢𑁂. 𑀲𑀫𑀺𑀢𑁂 𑀉𑀧𑀲𑀫𑀺𑀢𑁂.

𑀕𑀸𑀣𑀸𑀦𑁂𑀓𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁪𑁨. 𑀯𑀺𑀲𑀼𑀤𑁆𑀥𑀺𑀤𑁂𑀯𑁄, 𑀲𑀫𑁆𑀫𑀼𑀢𑀺𑀤𑁂𑀯𑁄, 𑀉𑀧𑀧𑀢𑁆𑀢𑀺𑀤𑁂𑀯𑁄 𑀘𑀸𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀤𑀺. 𑀦𑀪𑀁 𑀆𑀓𑀸𑀲𑁄.

𑀢𑀭𑀼𑀡𑀸𑀤𑀻𑀲𑀼 𑀢𑀻𑀲𑁆𑀯𑀢𑁆𑀣𑁂𑀲𑀼 𑀫𑀸𑀡𑀯𑁄.

𑁮𑁪𑁩. 𑀆𑀤𑁆𑀬𑀢𑁆𑀣𑀸𑀤𑀻𑀲𑀼 𑀅𑀕𑁆𑀕𑀁. 𑀯𑀭𑁂 𑀲𑁂𑀝𑁆𑀞𑁂 𑀢𑀻𑀲𑀼.

𑀧𑀘𑁆𑀘𑀦𑀻𑀓𑁄 𑀲𑀢𑁆𑀢𑀼. 𑀅𑀜𑁆𑀜𑁂 𑀅𑀜𑁆𑀜𑀢𑁆𑀣𑁂. 𑀧𑀘𑁆𑀙𑀸𑀪𑀸𑀕𑁂 ‘‘𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸’’𑀢𑀺.

𑁮𑁪𑁪. 𑀬𑁄𑀦𑀺 𑀇𑀢𑁆𑀣𑀻𑀦𑀁 𑀬𑁄𑀦𑀺𑀫𑀕𑁆𑀕𑁄. 𑀓𑀸𑀫𑁄 𑀇𑀘𑁆𑀙𑀸. 𑀲𑀺𑀭𑀻 𑀧𑀜𑁆𑀜𑀸, 𑀧𑀼𑀜𑁆𑀜𑁄 𑀘. 𑀇𑀲𑁆𑀲𑀭𑀁 𑀧𑀪𑀼𑀢𑀸. 𑀥𑀫𑁆𑀫𑁄 𑀲𑀻𑀮𑀸𑀤𑀺. 𑀉𑀬𑁆𑀬𑀸𑀫𑁄 𑀯𑀻𑀭𑀺𑀬𑀁. 𑀬𑀲𑁄 𑀧𑀭𑀺𑀯𑀸𑀭𑁄, 𑀓𑀺𑀢𑁆𑀢𑀺 𑀘.

𑁮𑁪𑁫. 𑀲𑀫𑀗𑁆𑀕𑀺𑀦𑀺 𑀲𑀫𑀦𑁆𑀦𑀸𑀕𑀢𑁂.

𑁮𑁪𑁬. 𑀞𑀺𑀢𑀺 𑀞𑀸𑀦𑀓𑁆𑀭𑀺𑀬𑀸.

𑁮𑁪𑁮. 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀅𑀡𑁆𑀟𑀚𑀸𑀤𑀺𑀘𑀢𑀼𑀓𑁆𑀓𑀁. 𑀧𑀲𑁆𑀲𑀸𑀯𑀫𑀕𑁆𑀕𑁄 𑀇𑀢𑁆𑀣𑀻𑀦𑀁 𑀬𑁄𑀦𑀺. 𑀲𑁄 𑀧𑀼𑀮𑁆𑀮𑀺𑀗𑁆𑀕𑁄. 𑀓𑀽𑀮𑁂 𑀢𑀻𑀭𑁂.

𑁮𑁪𑁯. 𑀦𑀸𑀕𑁄𑀢𑀼𑀦𑀸𑀕𑀲𑀤𑁆𑀤𑁄 𑀢𑀼. 𑀉𑀭𑀕𑁂 𑀲𑀧𑁆𑀧𑁂, 𑀳𑀢𑁆𑀣𑀺𑀦𑀺 𑀘.

𑁮𑁫𑁦. 𑀲𑀗𑁆𑀔𑁆𑀬𑀸 𑀕𑀡𑀦𑀸. ‘‘𑀅𑀜𑁆𑀜𑀢𑁆𑀣𑁂’’𑀢𑁆𑀬𑁂𑀓𑁂 𑀯𑀤𑀦𑁆𑀢𑀺.

𑁮𑁫𑁧. 𑀪𑁂 𑀦𑀓𑁆𑀔𑀢𑁆𑀢𑀯𑀺𑀲𑁂𑀲𑁂. 𑀲𑀦𑁆𑀢𑀺𑀓𑁂 𑀲𑀫𑀻𑀧𑁂. 𑀫𑀽𑀮𑀫𑀽𑀮𑁂 𑀮𑁄𑀪𑀸𑀤𑀺𑀓𑁂. 𑀧𑀸𑀪𑀢𑁂 𑀫𑀽𑀮𑀥𑀦𑁂. 𑀅𑀁𑀲𑁄 𑀲𑀭𑀻𑀭𑀸𑀯𑀬𑀯𑁄. 𑀧𑀓𑀡𑁆𑀟𑁂 𑀭𑀼𑀓𑁆𑀔𑀸𑀤𑀻𑀦𑀁 𑀲𑀭𑀻𑀭𑁂.

𑁮𑁫𑁨. 𑀓𑀫𑁆𑀫𑁂 𑀓𑁆𑀭𑀺𑀬𑀸𑀬𑀁. 𑀯𑀺𑀓𑁄𑀧𑀦𑀁 𑀯𑀺𑀤𑁆𑀥𑀁𑀲𑀦𑀁.

𑁮𑁫𑁩. 𑀧𑀘𑁆𑀙𑀸𑀢𑀸𑀧𑁄 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀅𑀦𑀼𑀩𑀦𑁆𑀥𑁄 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀦𑀁. 𑀭𑀸𑀕𑀸𑀤𑁄 𑀲𑀢𑁆𑀢𑀓𑁂. 𑀫𑀸𑀢𑀗𑁆𑀕𑀲𑁆𑀲 𑀫𑀼𑀤𑁆𑀥𑀦𑀺 𑀧𑀺𑀡𑁆𑀟𑀤𑁆𑀯𑀬𑁂 𑀓𑀼𑀫𑁆𑀪𑁄.

𑁮𑁫𑁪. 𑀔𑀕𑁆𑀕𑀓𑁄𑀲𑁂 𑀔𑀕𑁆𑀕𑀧𑀺𑀥𑀸𑀦𑁂. 𑀧𑀝𑀺𑀘𑁆𑀙𑀤𑁂 𑀲𑀫𑀦𑁆𑀢𑀢𑁄 𑀙𑀸𑀤𑀦𑁂. 𑀲𑀸𑀭𑀫𑁆𑀪𑁂 𑀓𑁄𑀮𑀸𑀳𑀮𑁂.

𑁮𑁫𑁫. 𑀓𑀸𑀮𑀯𑀺𑀲𑁂𑀲𑁄 𑀤𑀲𑀘𑁆𑀙𑀭𑀓𑀸𑀮𑁄. 𑀦𑀺𑀩𑁆𑀬𑀸𑀧𑀸𑀭𑀝𑁆𑀞𑀺𑀢𑀺 𑀅𑀘𑀺𑀭𑀝𑁆𑀞𑀺𑀢𑀺, 𑀅𑀘𑀺𑀭𑀝𑁆𑀞𑀺𑀢𑀻𑀢𑀺 𑀤𑀲𑀘𑁆𑀙𑀭𑀢𑁄𑀧𑀺 𑀊𑀦𑀝𑁆𑀞𑀺𑀢𑀺.

𑀉𑀧𑁆𑀧𑀢𑁆𑀢𑀺𑀪𑀽𑀫𑀺 𑀚𑀸𑀢𑀺𑀪𑀽𑀫𑀺.

𑁮𑁫𑁬. 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀻𑀲𑀼 𑀘𑀢𑀽𑀲𑀼.

𑁮𑁫𑁭. 𑀲𑀤𑁆𑀥𑀸𑀬 𑀅𑀧𑀭𑀧𑁆𑀧𑀘𑁆𑀘𑀬𑁂. 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼. 𑀆𑀥𑀸𑀭𑁄 𑀦𑀺𑀲𑁆𑀲𑀬𑁄.

𑀤𑀺𑀩𑁆𑀩𑀯𑀺𑀳𑀸𑀭𑁄, 𑀅𑀭𑀺𑀬𑀯𑀺𑀳𑀸𑀭𑁄, 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀘𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀺. 𑀲𑀼𑀕𑀢𑀸𑀮𑀬𑁂 𑀪𑀺𑀓𑁆𑀔𑀽𑀦𑀫𑀸𑀯𑀸𑀲𑁂.

𑁮𑁫𑁮. 𑀲𑀫𑀢𑁆𑀢𑀦𑁂 𑀦𑀺𑀝𑁆𑀞𑀸𑀬𑀁. 𑀘𑀓𑀸𑀭𑁂𑀦 𑀦𑀺𑀬𑀫𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀗𑁆𑀕𑁂 𑀮𑀕𑁆𑀕𑁂. 𑀓𑀸𑀫𑀸𑀤𑁄 𑀘𑀢𑀼𑀓𑁆𑀓𑁂.

𑁮𑁫𑁯. 𑀲𑀧𑁆𑀧𑀨𑀡𑀗𑁆𑀕𑁂𑀲𑀽𑀢𑀺 𑀲𑀧𑁆𑀧𑀲𑁆𑀲 𑀨𑀡𑁂, 𑀅𑀗𑁆𑀕𑁂 𑀘 𑀲𑀭𑀻𑀭𑁂. 𑀓𑁄𑀝𑀺𑀮𑁆𑀮𑁂 𑀓𑀼𑀝𑀺𑀮𑀢𑀸𑀬. 𑀪𑀼𑀜𑁆𑀚𑀦𑀁 𑀪𑁄𑀚𑀦𑀓𑁆𑀭𑀺𑀬𑀸.

𑀪𑀽𑀫𑀺𑀪𑀸𑀕𑁂 𑀭𑀸𑀚𑀗𑁆𑀕𑀡𑀸𑀤𑀺𑀫𑁆𑀳𑀺. 𑀓𑀺𑀮𑁂𑀲𑁂 𑀲𑀁𑀓𑀺𑀮𑁂𑀲𑁂. 𑀫𑀮𑁂 𑀭𑀸𑀕𑀸𑀤𑀺𑀓𑁂.

𑁮𑁬𑁦. 𑀥𑀦𑀸𑀤𑀺𑀤𑀧𑁆𑀧𑁂𑀢𑀺 𑀥𑀦𑀸𑀤𑀺𑀓𑁂 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁂 𑀤𑀧𑁆𑀧𑁂.

𑀦𑀺𑀫𑀺𑀢𑁆𑀢𑁂 𑀓𑀸𑀭𑀡𑁂. 𑀙𑀮𑁂 𑀲𑀞𑁆𑀬𑁂.

𑁮𑁬𑁧. 𑀲𑁄 𑀧𑀼𑀮𑁆𑀮𑀺𑀗𑁆𑀕𑁄. 𑀧𑀭𑀫𑀢𑁆𑀢𑀦𑀺 𑀤𑀺𑀝𑁆𑀞𑀻𑀦𑀁 𑀕𑀸𑀳𑀮𑀤𑁆𑀥𑁂 𑀅𑀢𑁆𑀢𑀦𑀺. 𑀣𑀫𑁆𑀪𑀲𑁆𑀫𑀺𑀁 𑀕𑁂𑀳𑀸𑀤𑀻𑀦𑀁 𑀣𑀫𑁆𑀪𑁂. 𑀩𑀮𑀲𑀚𑁆𑀚𑀦𑀁 𑀬𑀼𑀤𑁆𑀥𑀓𑀸𑀮𑁂 𑀩𑀮𑀲𑁆𑀲 𑀲𑀚𑁆𑀚𑀦𑀁.

𑁮𑁬𑁨. 𑀓𑀼𑀲𑀽𑀮𑁄 𑀥𑀜𑁆𑀜𑀸𑀤𑀻𑀦𑀁 𑀕𑁂𑀳𑀁.

𑀲𑁄𑀧𑀸𑀦𑀗𑁆𑀕𑀫𑁆𑀳𑀺 𑀲𑁄𑀧𑀸𑀦𑀲𑀻𑀲𑁂.

𑁮𑁬𑁩. 𑀦𑀺𑀬𑁆𑀬𑀸𑀲𑁂 𑀲𑀺𑀮𑁂𑀲𑁂. 𑀲𑁂𑀔𑀭𑁂 𑀲𑀻𑀲𑁂. 𑀦𑀸𑀕𑀤𑀦𑁆𑀢𑀓𑁂 𑀪𑀺𑀢𑁆𑀢𑀺𑀆𑀤𑀻𑀲𑀼 𑀧𑀯𑁂𑀲𑀺𑀢𑁂 𑀦𑀸𑀕𑀤𑀦𑁆𑀢𑀸𑀓𑀸𑀭𑁂 𑀤𑀡𑁆𑀟𑁂.

𑀲𑀺𑀔𑀡𑁆𑀟𑁄 𑀧𑀺𑀜𑁆𑀙𑀁. 𑀢𑀽𑀡𑀻𑀭𑁂 𑀉𑀲𑀼𑀦𑀺𑀥𑀺𑀫𑁆𑀳𑀺. 𑀦𑀺𑀓𑀭𑁂 𑀲𑀫𑀽𑀳𑁂.

𑁮𑁬𑁪. 𑀲𑀁𑀬𑀢𑀓𑁂𑀲𑁂𑀲𑀼 𑀩𑀦𑁆𑀥𑀺𑀢𑀓𑁂𑀲𑁂𑀲𑀼.

𑀓𑀫𑁆𑀩𑀼 𑀚𑀮𑀚𑀦𑁆𑀢𑀼𑀯𑀺𑀲𑁂𑀲𑁄. 𑀦𑀮𑀸𑀝𑀝𑁆𑀞𑀺 𑀦𑀮𑀸𑀝𑁂 𑀚𑀸𑀢𑀝𑁆𑀞𑀺. 𑀕𑁄𑀧𑁆𑀨𑀓𑁂 𑀧𑀸𑀤𑀕𑀡𑁆𑀞𑀺𑀫𑁆𑀳𑀺.

𑁮𑁬𑁫. 𑀓𑀸𑀮𑁂 𑀧𑀜𑁆𑀘𑀤𑀲𑀻𑀤𑀺𑀯𑀲𑀧𑀭𑀺𑀫𑀸𑀡𑁂. 𑀲𑀸𑀥𑁆𑀬𑁂 𑀧𑀢𑁆𑀢𑀲𑀸𑀥𑀦𑀻𑀬𑁂. 𑀲𑀔𑀻 𑀲𑀳𑀸𑀬𑁄. 𑀯𑀸𑀚𑁄 𑀧𑀢𑁆𑀢𑀁. 𑀧𑀗𑁆𑀕𑀼𑀴𑁄 𑀧𑀻𑀞𑀲𑀫𑁆𑀧𑀻.

𑀤𑁂𑀲𑁂 𑀤𑁂𑀲𑀯𑀺𑀲𑁂𑀲𑁂. 𑀅𑀡𑁆𑀡𑀯𑁂 𑀲𑀫𑀼𑀤𑁆𑀤𑁂, 𑀏𑀢𑁂 𑀧𑀼𑀫𑁂. 𑀲𑁄 𑀲𑀺𑀦𑁆𑀥𑀼𑀲𑀤𑁆𑀤𑁄 𑀲𑀭𑀺𑀢𑀸𑀬𑀁 𑀦𑀤𑀺𑀬𑀁 𑀪𑀯𑁂.

𑁮𑁬𑁬. 𑀓𑀭𑁂𑀡𑀼𑀲𑀤𑁆𑀤𑁄 𑀕𑀚𑁂 𑀳𑀢𑁆𑀣𑀺𑀫𑁆𑀳𑀺, 𑀧𑀼𑀭𑀺𑀲𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀢𑀺. 𑀳𑀢𑁆𑀣𑀺𑀦𑀺𑀬𑀁 𑀢𑀼 𑀇𑀢𑁆𑀣𑀺𑀬𑀁.

𑀭𑀢𑀦𑁂 𑀭𑀢𑀦𑀯𑀺𑀲𑁂𑀲𑁂. 𑀫𑀡𑀺𑀯𑁂𑀥𑁄 𑀦𑀸𑀫 𑀬𑀁 𑀮𑁄𑀓𑁂 ‘‘𑀘𑀺𑀦’’ 𑀇𑀢𑀺 𑀯𑀼𑀘𑁆𑀘𑀢𑀺. 𑀇𑀦𑁆𑀤𑀳𑁂𑀢𑀺 𑀇𑀦𑁆𑀤𑀸𑀯𑀼𑀥𑁄.

𑁮𑁬𑁭. 𑀓𑁄𑀝𑀺𑀬𑀁 𑀅𑀦𑁆𑀢𑁂. 𑀯𑀸𑀤𑀺𑀢𑁆𑀢𑀯𑀸𑀤𑀦𑁂 𑀯𑀻𑀡𑀸𑀤𑀺𑀯𑀸𑀤𑀺𑀢𑁆𑀢𑀯𑀸𑀤𑀦𑁄𑀧𑀸𑀬𑁂.

‘‘𑀓𑁄𑀡𑁄 𑀯𑀚𑁆𑀚𑀧𑁆𑀧𑀪𑁂𑀤𑁂 𑀘,

𑀓𑁄𑀡𑁄 𑀲𑁂𑀮𑀕𑀼𑀴𑁂 𑀇𑀚𑁂;

𑀯𑀻𑀡𑀸𑀤𑀺𑀯𑀸𑀤𑀦𑁄𑀧𑀸𑀬𑁂,

𑀏𑀓𑀤𑁂𑀲𑁂 𑀕𑀢𑀲𑁆𑀲 𑀘𑁂’’𑀢𑀺. 𑁋

𑀢𑀺𑀓𑀡𑁆𑀟𑀲𑁂𑀲𑁄 [𑀢𑀺𑀓𑀡𑁆𑀟𑀲𑁂𑀲 𑁩.𑁩.𑁧𑁨𑁫].

𑁮𑁬𑁮. 𑀯𑀡𑀺𑀧𑁆𑀧𑀣𑁂 𑀯𑀸𑀡𑀺𑀚𑀸𑀦𑀁 𑀯𑁄𑀳𑀸𑀭𑀓𑀫𑁆𑀫𑀧𑀣𑁂. 𑀯𑁂𑀤𑁂 𑀯𑁂𑀤𑀯𑀺𑀲𑁂𑀲𑁂, 𑀯𑀸𑀡𑀺𑀚𑁂𑀧𑀺 𑀦𑀺𑀕𑀫𑁄.

𑀯𑀺𑀯𑀸𑀤𑀸𑀤𑁄 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡’’ [𑀧𑀸𑀘𑀺. 𑁩𑁯𑁪] 𑀦𑁆𑀢𑁆𑀬𑀸𑀤𑀻𑀲𑀼. 𑀆𑀥𑀸𑀭𑁄 𑀓𑀸𑀭𑀓𑀯𑀺𑀲𑁂𑀲𑁄, 𑀦𑀺𑀲𑁆𑀲𑀬𑁄 𑀘. 𑀓𑀸𑀭𑀡𑁂 ‘‘𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦’’𑀦𑁆𑀢𑀺 [𑀥. 𑀲. 𑁧𑁩𑁫𑁪].

𑁮𑁬𑁯. 𑀧𑀲𑀼𑀫𑁆𑀳𑀺 𑀕𑁄𑀡𑁂. 𑀯𑀲𑀼𑀥𑀸 𑀧𑀣𑀯𑀻. 𑀯𑀸𑀘𑀸 𑀯𑀘𑀦𑀁. 𑀆𑀤𑀺𑀦𑀸 𑀲𑀕𑁆𑀕𑀭𑀁𑀲𑀺𑀯𑀚𑀺𑀭𑀘𑀦𑁆𑀤𑀚𑀮𑀸𑀤𑀬𑁄 𑀕𑀳𑀺𑀢𑀸.

𑀳𑀭𑀺𑀢𑁂 𑀲𑀼𑀓𑀧𑀢𑁆𑀢𑀲𑀤𑀺𑀲𑁂 𑀯𑀡𑁆𑀡𑀯𑀺𑀲𑁂𑀲𑁂. 𑀯𑀸𑀲𑀼𑀤𑁂𑀯𑁂 𑀓𑀡𑁆𑀳𑁂.

𑁮𑁭𑁦. 𑀆𑀬𑀢𑁆𑀢𑁂 𑀦𑀺𑀲𑁆𑀲𑀬𑁂.

𑀓𑀡𑁆𑀡𑀧𑀽𑀭𑁄 𑀓𑀡𑁆𑀡𑀸𑀮𑀗𑁆𑀓𑀸𑀭𑁄. 𑀲𑁂𑀔𑀭𑁂 𑀅𑀕𑁆𑀕𑁂. 𑀏𑀢𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸.

𑁮𑁭𑁧. 𑀯𑀺𑀚𑁆𑀚𑀼𑀬𑀁 𑀘𑀜𑁆𑀘𑀮𑀸𑀬𑀁. 𑀇𑀢𑁆𑀣𑀺𑀧𑀼𑀭𑀺𑀲𑁂 𑀧𑀼𑀭𑀺𑀲𑀺𑀢𑁆𑀣𑀺𑀬𑀁.

𑀓𑁄𑀡𑁂 𑀅𑀲𑁆𑀲𑁂. 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁄 ‘‘𑀓𑁄𑀝𑀺𑀧𑀓𑁄𑀝𑀻’’𑀢𑁆𑀬𑀸𑀤𑀻𑀲𑀼. 𑀉𑀓𑁆𑀓𑀁𑀲𑁂 𑀧𑀭𑀺𑀬𑁄𑀲𑀸𑀦𑁂.

𑁮𑁭𑁨. 𑀚𑀸𑀮𑀸 𑀅𑀕𑁆𑀕𑀺𑀚𑀸𑀮𑀸. 𑀅𑀕𑁆𑀕𑀁 𑀓𑁄𑀝𑀺.

𑀦𑀸𑀭𑀻 𑀆𑀲𑀻𑀲𑀤𑁆𑀤𑁄 𑀲𑀧𑁆𑀧𑀤𑀸𑀞𑀸𑀬𑀁. 𑀇𑀝𑁆𑀞𑀲𑁆𑀲 𑀯𑀢𑁆𑀣𑀼𑀦𑁄 𑀆𑀲𑀻𑀲𑀦𑀸𑀬𑀁 𑀧𑀢𑁆𑀣𑀦𑀸𑀬𑀫𑁆𑀧𑀺 𑀇𑀢𑁆𑀣𑀻 𑀏𑀯.

𑁮𑁭𑁩. 𑀯𑀺𑀮𑀻𑀦𑀢𑁂𑀮𑁂 𑀯𑀺𑀲𑀭𑀡𑀢𑁂𑀮𑁂. 𑀯𑀲𑀕𑀸 𑀯𑀲𑀁 𑀕𑀘𑁆𑀙𑀦𑁆𑀢𑀻 𑀦𑀸𑀭𑀻. 𑀯𑀜𑁆𑀘𑁆𑀬𑀕𑀸𑀯𑀻 𑀅𑀦𑀯𑀘𑁆𑀙𑀸 𑀲𑁄𑀭𑀪𑁂𑀬𑀻.

𑀅𑀪𑀺𑀮𑀸𑀲𑁂 𑀇𑀘𑁆𑀙𑀸𑀬𑀁. 𑀓𑀺𑀭𑀡𑁂 𑀭𑀁𑀲𑀺𑀫𑁆𑀳𑀺. 𑀅𑀪𑀺𑀲𑀗𑁆𑀕𑁂 𑀮𑀕𑁆𑀕𑀦𑁂.