𑁩. 𑀲𑀸𑀫𑀜𑁆𑀜𑀓𑀡𑁆𑀟

𑁧. 𑀯𑀺𑀲𑁂𑀲𑁆𑀬𑀸𑀥𑀻𑀦𑀯𑀕𑁆𑀕𑀯𑀡𑁆𑀡𑀦𑀸

𑁬𑁯𑁧. 𑀇𑀳 𑀯𑀓𑁆𑀔𑀫𑀸𑀦𑁂 𑀲𑀸𑀫𑀜𑁆𑀜𑀓𑀡𑁆𑀟𑁂 𑀲𑀸𑀗𑁆𑀕𑁄𑀧𑀸𑀗𑁆𑀕𑁂𑀳𑀺 𑀅𑀗𑁆𑀕𑀉𑀧𑀸𑀗𑁆𑀕𑀤𑁆𑀯𑀬𑀲𑀳𑀺𑀢𑁂𑀳𑀺 𑀯𑀺𑀲𑁂𑀲𑁆𑀬𑀸𑀥𑀻𑀦𑁂𑀳𑀺 𑀯𑀺𑀲𑁂𑀲𑁆𑀬𑀸𑀬𑀢𑁆𑀢𑁂𑀳𑀺 𑀯𑀺𑀲𑁂𑀲𑀦𑀲𑀤𑁆𑀤𑁂𑀳𑀺 𑀲𑁄𑀪𑀦𑀸𑀤𑀻𑀳𑀺 𑀲𑀁𑀓𑀺𑀡𑁆𑀡𑁂𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀚𑀸𑀢𑀺𑀬𑀢𑁆𑀣𑁂𑀳𑀺 𑀤𑀩𑁆𑀩𑀓𑁆𑀭𑀺𑀬𑀸𑀕𑀼𑀡𑀸𑀤𑀻𑀳𑀺 𑀅𑀦𑁂𑀓𑀢𑁆𑀣𑁂𑀳𑀺 𑀲𑀫𑀬𑀯𑀡𑁆𑀡𑀸𑀤𑀻𑀳𑀺 𑀅𑀩𑁆𑀬𑀬𑁂𑀳𑀺 𑀘𑀺𑀭𑀲𑁆𑀲𑀫𑀸𑀤𑀻𑀳𑀺 𑀘 𑀓𑀫𑀸 𑀓𑀫𑀢𑁄 𑀯𑀕𑁆𑀕𑀸 𑀓𑀣𑁆𑀬𑀦𑁆𑀢𑁂, 𑀢𑁂 𑀘 𑀧𑀼𑀩𑁆𑀩𑀯𑀕𑁆𑀕𑀲𑀦𑁆𑀦𑀺𑀲𑁆𑀲𑀬𑀸, 𑀢𑀣𑀸 𑀳𑀺 𑀲𑁄𑀪𑀦𑀸𑀤𑀬𑁄 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀲𑀼 𑀯𑀺𑀲𑁂𑀲𑀦𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀸, 𑀓𑁆𑀭𑀺𑀬𑀸𑀤𑀬𑁄 𑀢𑀼 𑀢𑀤𑀸𑀥𑀸𑀭𑀢𑀸𑀬, 𑀲𑀫𑀬𑀸𑀤𑀬𑁄 𑀯𑀸𑀘𑀓𑀢𑀸𑀬, 𑀘𑀺𑀭𑀲𑁆𑀲𑀫𑀸𑀤𑀬𑁄 𑀢𑀁𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑁂𑀦, 𑀢𑀢𑁄𑀬𑁂𑀯 𑀲𑀸𑀥𑀸𑀭𑀡𑀢𑁆𑀢𑀸 𑀲𑀸𑀫𑀜𑁆𑀜𑀓𑀡𑁆𑀟𑀫𑀺𑀤𑀁.

𑁬𑁯𑁨. 𑀇𑀳 𑀲𑀢𑁆𑀣𑁂 𑀪𑀺𑀬𑁆𑀬𑁄 𑀭𑀽𑀧𑀦𑁆𑀢𑀭𑀸 𑀮𑀺𑀗𑁆𑀕𑀯𑀺𑀦𑀺𑀘𑁆𑀙𑀬𑁄, 𑀲𑁄 𑀅𑀢𑁆𑀭𑀸𑀧𑀺 𑀯𑀕𑁆𑀕𑁂 𑀪𑀺𑀬𑁆𑀬𑁄 𑀭𑀽𑀧𑀦𑁆𑀢𑀭𑀸𑀬𑁂𑀯𑀸𑀢𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀦𑀺𑀭𑀸𑀲𑀢𑁆𑀣𑀁 𑀩𑁆𑀬𑀸𑀧𑀓𑀦𑁆𑀬𑀸𑀬𑀫𑀸𑀳 ‘‘𑀕𑀼𑀡𑀺’’𑀘𑁆𑀘𑀸𑀤𑀺𑀦𑀸. 𑀢𑀲𑁆𑀲𑀢𑁆𑀣𑁄 𑁋 𑀯𑀺𑀲𑁂𑀲𑀦𑀪𑀽𑀢𑀸 𑀲𑀩𑁆𑀩𑁂 𑀕𑀼𑀡𑀲𑀤𑁆𑀤𑀸, 𑀤𑀩𑁆𑀩𑀲𑀤𑁆𑀤𑀸, 𑀓𑁆𑀭𑀺𑀬𑀸𑀲𑀤𑁆𑀤𑀸 𑀘 𑀯𑀺𑀲𑁂𑀲𑁆𑀬𑀸𑀥𑀻𑀦𑀪𑀸𑀯𑁂𑀦 𑀳𑁂𑀢𑀼𑀦𑀸𑀬𑁂𑀯, 𑀦 𑀪𑀺𑀬𑁆𑀬𑁄 𑀭𑀽𑀧𑀦𑁆𑀢𑀭𑀸𑀧𑀺 𑀯𑀺𑀲𑁂𑀲𑀦𑀲𑀤𑁆𑀤𑁂𑀦 𑀲𑀫𑀮𑀺𑀗𑁆𑀕𑀺𑀦𑁄 𑀲𑀺𑀬𑀼𑀦𑁆𑀢𑀺, 𑀬𑀣𑀸 𑁋 𑀲𑁄𑀪𑀦𑀸 𑀇𑀢𑁆𑀣𑀻, 𑀲𑁄𑀪𑀦𑁄 𑀧𑀼𑀭𑀺𑀲𑁄, 𑀲𑁄𑀪𑀦𑀁 𑀘𑀺𑀢𑁆𑀢𑀁.

𑁬𑁯𑁩-𑁬𑁯𑁬. 𑀲𑀼𑀪𑀦𑁆𑀢𑀁 𑀲𑁄𑀪𑀦𑁂. 𑀲𑀼𑀪 𑀲𑁄𑀪𑀦𑁂, 𑀬𑀼. 𑀭𑀼𑀘 𑀤𑀺𑀢𑁆𑀢𑀺𑀬𑀁, 𑀇𑀭𑁄. 𑀲𑀸𑀥 𑀲𑀁𑀲𑀺𑀤𑁆𑀥𑀺𑀬𑀁, 𑀉. 𑀫𑀦𑀁 𑀢𑁄𑀲𑁂𑀢𑀻𑀢𑀺 𑀫𑀦𑀼𑀜𑁆𑀜𑀁. 𑀜𑀸 𑀧𑀭𑀺𑀫𑀸𑀡𑀢𑁄𑀲𑀦𑀦𑀺𑀲𑀸𑀫𑀦𑁂𑀲𑀼, 𑀅𑀦𑁆𑀢𑀲𑁆𑀲𑀼𑀓𑀸𑀭𑁄, 𑀫𑀦𑀁 𑀆 𑀪𑀼𑀲𑁄 𑀢𑁄𑀲𑁂𑀢𑀻𑀢𑀺 𑀯𑀸 𑀫𑀦𑀼𑀜𑁆𑀜𑀁, 𑀢𑀤𑀸 ‘‘𑀫𑀦𑁄 𑀅𑀜𑁆𑀜’’𑀦𑁆𑀢𑀺 𑀙𑁂𑀤𑁄, 𑀆𑀮𑁄𑀧𑁄. 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀡𑁆𑀯𑀼, 𑀘𑀭𑀢𑀺 𑀘𑀺𑀢𑁆𑀢𑀫𑁂𑀢𑁆𑀣𑀸𑀢𑀺 𑀘𑀸𑀭𑀼. 𑀲𑀼𑀝𑁆𑀞𑀼 𑀤𑀭𑀻𑀬𑀢𑁂 𑀲𑀼𑀦𑁆𑀤𑀭𑀁, 𑀤𑀭 𑀤𑀸𑀭𑀡𑁂. 𑀯𑀕𑁆𑀕 𑀕𑀫𑀦𑁂, 𑀉, 𑀯𑀕𑁆𑀕𑀼. 𑀫𑀦𑁄 𑀭𑀫𑀢𑀺 𑀅𑀲𑁆𑀫𑀺𑀁. 𑀓𑀫𑀼 𑀇𑀘𑁆𑀙𑀸𑀬𑀁, 𑀢𑁄. 𑀳𑀭𑀢𑀺 𑀘𑀺𑀢𑁆𑀢𑀁 𑀳𑀸𑀭𑀻, 𑀡𑀻. 𑀫𑀦 𑀜𑀸𑀡𑁂, 𑀚𑀼, 𑀫𑀦𑁄 𑀚𑀯𑀢𑀺 𑀬𑀲𑁆𑀫𑀺𑀁 𑀯𑀸 𑀫𑀜𑁆𑀚𑀼, 𑀦𑀮𑁄𑀧𑁄. 𑀧𑀺𑀬𑀲𑀻𑀮𑀬𑀼𑀢𑁆𑀢𑀢𑀸𑀬 𑀧𑁂𑀲𑀮𑀁, 𑀧𑀺𑀬𑀲𑁆𑀲 𑀧𑁂, 𑀈𑀲𑁆𑀲𑀢𑁆𑀢𑀁. 𑀪𑀤𑀺 𑀓𑀮𑁆𑀬𑀸𑀡𑁂, 𑀤𑁄. 𑀯𑀸 𑀕𑀢𑀺𑀬𑀁, 𑀫𑁄. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀬𑀸𑀡𑁄. 𑀫𑀦𑀁 𑀅𑀧𑁆𑀧𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀁, 𑀫𑀦𑁄 𑀅𑀧𑁆𑀧𑁄𑀢𑀺 𑀬𑀲𑁆𑀫𑀺𑀦𑁆𑀢𑀺 𑀯𑀸 𑀫𑀦𑀸𑀧𑀁, 𑀆𑀧 𑀧𑀸𑀧𑀼𑀡𑀦𑁂, 𑀅𑀧𑀸𑀤𑀺𑀧𑀼𑀩𑁆𑀩𑁄 𑀘. 𑀮𑀪𑀺𑀢𑀩𑁆𑀩𑀦𑁆𑀢𑀺 𑀮𑀤𑁆𑀥𑀁, 𑀢𑁄, 𑀲𑀓𑀢𑁆𑀣𑁂 𑀓𑁄. 𑀲𑀼𑀪𑀢𑀻𑀢𑀺 𑀲𑀼𑀪𑀁, 𑀲𑀼𑀦𑁆𑀤𑀭𑁂𑀦 𑀲𑀪𑀸𑀯𑁂𑀦 𑀪𑀯𑀢𑀻𑀢𑀺 𑀯𑀸 𑀲𑀼𑀪𑀁.

𑀧𑀼𑀗𑁆𑀕𑀯𑀦𑁆𑀢𑀁 𑀉𑀢𑁆𑀢𑀫𑁂, 𑀉𑀩𑁆𑀪𑀼𑀢𑁄 𑀅𑀢𑁆𑀬𑀢𑁆𑀣𑀁 𑀉𑀢𑁆𑀢𑀫𑁄, 𑀉𑀪𑀲𑀤𑁆𑀤𑀢𑁄 𑀉𑀩𑁆𑀪𑀼𑀢𑀢𑁆𑀣𑀢𑁄 𑀯𑀺𑀲𑁂𑀲𑀢𑁆𑀣𑁂 𑀢𑀫𑁄, 𑀉𑀕𑁆𑀕𑀢𑀢𑀫𑀢𑁆𑀢𑀸 𑀯𑀸 𑀉𑀢𑁆𑀢𑀫𑁄. 𑀯𑀭 𑀧𑀢𑁆𑀣𑀦𑀸𑀬𑀁, 𑀧𑀯𑀭𑁄. 𑀇𑀝𑁆𑀞𑀧𑀘𑁆𑀘𑀬𑁂 𑀯𑀼𑀟𑁆𑀠𑀲𑁆𑀲 𑀚𑀸𑀤𑁂𑀲𑁄, 𑀚𑁂𑀝𑁆𑀞𑁄. 𑀧𑀓𑀝𑁆𑀞𑀁 𑀫𑀼𑀔𑀁 𑀆𑀭𑀫𑁆𑀪𑁄 𑀅𑀲𑁆𑀲 𑀧𑀫𑀼𑀔𑁄. 𑀦𑀢𑁆𑀣𑀺 𑀉𑀢𑁆𑀢𑀭𑁄 𑀉𑀢𑁆𑀢𑀫𑁄 𑀬𑀲𑁆𑀫𑀸 𑀅𑀦𑀼𑀢𑁆𑀢𑀭𑁄. 𑀧𑀫𑀼𑀔𑁄 𑀘 𑀅𑀦𑀼𑀢𑁆𑀢𑀭𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀅𑀧𑀸𑀤𑀺𑀧𑀼𑀩𑁆𑀩𑁂 𑀯𑀭𑁄. 𑀫𑀼𑀔𑀫𑀺𑀯 𑀫𑀼𑀔𑁆𑀬𑁄, 𑀇𑀯𑀢𑁆𑀣𑁂 𑀬𑁄. 𑀧𑀤𑀥𑀸𑀢𑀻𑀢𑀺 𑀧𑀥𑀸𑀦𑀁, 𑀬𑀼. 𑀧𑀫𑀼𑀔𑀪𑀸𑀯𑁂 𑀢𑀺𑀝𑁆𑀞𑀢𑀻𑀢𑀺 𑀧𑀸𑀫𑁄𑀓𑁆𑀔𑁄, 𑀉𑀪𑀬𑀢𑁆𑀭𑀸𑀧𑀺 𑀯𑀼𑀟𑁆𑀠𑀺. 𑀧𑀓𑀝𑁆𑀞𑀁 𑀭𑀸𑀢𑀻𑀢𑀺 𑀧𑀭𑀁, 𑀡𑁄. ‘‘𑀅𑀕𑁆𑀕’’𑀦𑁆𑀢𑀺 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀕𑁆𑀕𑀜𑁆𑀜𑀁, ‘‘𑀅𑀕𑁆𑀕’’𑀦𑁆𑀢𑀺 𑀧𑀫𑀸𑀦𑀺𑀢𑀩𑁆𑀩𑀦𑁆𑀢𑀺 𑀯𑀸 𑀅𑀕𑁆𑀕𑀜𑁆𑀜𑀁. 𑀉𑀢𑁆𑀢𑀭𑁄 𑀉𑀢𑁆𑀢𑀫𑀲𑀤𑀺𑀲𑁄. 𑀧𑀥𑀸𑀦𑀪𑀸𑀯𑀁 𑀦𑀻𑀢𑀁 𑀧𑀡𑀻𑀢𑀁, 𑀦𑀻 𑀦𑀬𑁂, 𑀓𑀫𑁆𑀫𑀦𑀺 𑀡𑁄. 𑀧𑀭𑀁 𑀧𑀘𑁆𑀘𑀦𑀻𑀓𑀁 𑀫𑀸𑀭𑁂𑀢𑀻𑀢𑀺 𑀧𑀭𑀫𑀁, 𑀧𑀓𑀝𑁆𑀞𑀪𑀸𑀯𑁂 𑀭𑀫𑀢𑀻𑀢𑀺𑀯𑀸 𑀧𑀭𑀫𑀁, 𑀡𑁄. 𑀇𑀬𑀺𑀝𑁆𑀞𑁂𑀲𑀼 𑀧𑀲𑀢𑁆𑀣𑀲𑁆𑀲, 𑀯𑀼𑀟𑁆𑀠𑀲𑁆𑀲 𑀘 𑀲𑁄, 𑀲𑁂𑀬𑁆𑀬𑁄, 𑀲𑁂𑀝𑁆𑀞𑁄 𑀘, ‘‘𑀓𑁆𑀯𑀘𑀸𑀲𑀯𑀡𑁆𑀡𑀁 𑀮𑀼𑀢𑁆𑀢𑁂’’𑀢𑀺 𑀇𑀲𑁆𑀲𑁂. 𑀕𑀸𑀫𑀁 𑀦𑁂𑀢𑀻𑀢𑀺 𑀕𑀸𑀫𑀡𑀺, ‘‘𑀢𑀲𑁆𑀲𑀻𑀮𑀸𑀤𑀻𑀲𑀼 𑀡𑀻 𑀢𑁆𑀯𑀸𑀯𑀻 𑀘𑀸’’𑀢𑀺 𑀡𑀻, 𑀭𑀲𑁆𑀲𑁄, 𑀕𑀸𑀫𑀡𑀺. 𑀲𑀦𑁆𑀢𑀢𑀫𑀢𑀸𑀬 𑀲𑀢𑁆𑀢𑀫𑁄, 𑀲𑀦𑁆𑀢𑀢𑁄 𑀢𑀫𑁄, 𑀲𑀦𑁆𑀢𑀲𑁆𑀲 𑀘 𑀲𑁄. 𑀯𑀺𑀲𑁂𑀲𑀻𑀬𑀢𑁂𑀢𑀺 𑀯𑀺𑀲𑀺𑀝𑁆𑀞𑁄, 𑀲𑀺𑀲 𑀯𑀺𑀲𑁂𑀲𑀦𑁂, 𑀢𑁄. 𑀅𑀭 𑀕𑀫𑀦𑁂, 𑀡𑁆𑀬𑁄, 𑀇𑀓𑀸𑀭𑀸𑀕𑀫𑁄, 𑀅𑀭𑀺𑀬𑁄. 𑀦𑀢𑁆𑀣𑀺 𑀅𑀕𑁆𑀕𑁄 𑀬𑀲𑁆𑀫𑀸 𑀦𑀸𑀕𑁄, 𑀤𑀻𑀖𑀸𑀤𑀺, 𑀕𑀮𑁄𑀧𑁄 𑀘. 𑀇 𑀕𑀢𑀺𑀬𑀁, 𑀡𑁆𑀯𑀼, 𑀇𑀲𑁆𑀲𑁂, 𑀅𑀮𑁄𑀧𑁄 𑀘, 𑀏𑀓𑁄, 𑀲𑀤𑀺𑀲𑀭𑀳𑀺𑀢𑀢𑀸𑀬 𑀯𑀸 𑀏𑀓𑀻𑀪𑀸𑀯𑁂 𑀢𑀺𑀝𑁆𑀞𑀢𑀻𑀢𑀺 𑀏𑀓𑁄, 𑀓𑁄. 𑀉𑀲𑁆𑀲𑀸𑀧𑁂𑀢𑀺 𑀧𑀘𑁆𑀘𑀦𑀻𑀓𑁂𑀢𑀺 𑀉𑀲𑀪𑁄, 𑀉𑀲 𑀤𑀸𑀳𑁂, 𑀅𑀪𑁄. 𑀅𑀚 𑀕𑀫𑀦𑁂, 𑀅, 𑀚𑀲𑁆𑀲 𑀕𑁄, 𑀤𑁆𑀯𑀺𑀢𑁆𑀢𑀁, 𑀅𑀕𑁆𑀕𑁄. 𑀫𑀼𑀘 𑀫𑁄𑀘𑀦𑁂, 𑀳𑀻𑀦𑀫𑀚𑁆𑀛𑀺𑀫𑀪𑀸𑀯𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑀫𑁄𑀓𑁆𑀔𑁄, 𑀢𑁄, 𑀢𑀲𑁆𑀲 𑀔𑁄. 𑀫𑁄𑀓𑁆𑀔 𑀫𑁄𑀘𑀦𑁂 𑀯𑀸, 𑀅. 𑀧𑀥𑀸𑀦𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀼𑀗𑁆𑀕𑀯𑁄, 𑀬𑀤𑀸𑀤𑀺, 𑀧𑀼𑀓𑁆𑀔𑀮𑁄𑀧𑁆𑀬𑀢𑁆𑀭, 𑀧𑀼𑀲 𑀯𑀼𑀟𑁆𑀠𑀺𑀫𑁆𑀳𑀺, 𑀅𑀮𑁄, 𑀲𑀲𑁆𑀲 𑀔𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁. 𑀏𑀢𑁂 𑀘𑀼𑀢𑁆𑀢𑀫𑀸𑀤𑀬𑁄 𑀲𑀫𑀸𑀲𑀕𑀸𑀧𑀺 𑀅𑀲𑀫𑀸𑀲𑀕𑀸𑀧𑀺 𑀉𑀢𑁆𑀢𑀫𑀢𑁆𑀣𑀯𑀸𑀘𑀓𑀸. 𑀅𑀫𑀭𑀓𑁄𑀲𑁂 𑀧𑀦 𑀦𑀸𑀕𑁄𑀲𑀪𑀧𑀼𑀗𑁆𑀕𑀯𑀸𑀦𑀁 𑀲𑀫𑀸𑀲𑀕𑀢𑁆𑀢𑁂𑀬𑁂𑀯 𑀉𑀢𑁆𑀢𑀫𑀢𑁆𑀣𑀯𑀸𑀘𑀓𑀢𑀸 𑀯𑀼𑀢𑁆𑀢𑀸, 𑀯𑀼𑀢𑁆𑀢𑀜𑁆𑀘 𑁋

‘‘𑀉𑀢𑁆𑀢𑀭𑀲𑁆𑀫𑀺𑀁 𑀧𑀤𑁂 𑀩𑁆𑀬𑀕𑁆𑀖-𑀧𑀼𑀗𑁆𑀕𑀯𑁄’𑀲𑀪𑀓𑀼𑀜𑁆𑀚𑀭𑀸;

𑀲𑀻𑀳𑀲𑀤𑁆𑀤𑀽𑀮𑀦𑀸𑀕𑀸𑀤𑁆𑀬𑀸, 𑀧𑀼𑀫𑁂 𑀲𑁂𑀝𑁆𑀞𑀢𑁆𑀣𑀕𑁄𑀘𑀭𑀸’’𑀢𑀺 [𑀅𑀫𑀭 𑁨𑁧.𑁫𑁯].

𑀢𑀲𑁆𑀲𑀢𑁆𑀣𑁄 𑁋 𑀩𑁆𑀬𑀕𑁆𑀖𑀸𑀤𑀬𑁄 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀲𑀢𑀺 𑀉𑀢𑁆𑀢𑀭𑀧𑀤𑀻𑀪𑀽𑀢𑀸 𑀲𑁂𑀝𑁆𑀞𑀢𑁆𑀣𑀯𑀺𑀲𑀬𑀸 𑀧𑀼𑀩𑁆𑀩𑀧𑀤𑀲𑁆𑀲 𑀲𑁂𑀝𑁆𑀞𑀢𑁆𑀣𑀯𑀸𑀘𑀓𑀸 𑀧𑀼𑀮𑁆𑀮𑀺𑀗𑁆𑀕𑀸 𑀘 𑀪𑀯𑀦𑁆𑀢𑀺, 𑀬𑀣𑀸 ‘‘𑀧𑀼𑀭𑀺𑀲𑀩𑁆𑀬𑀕𑁆𑀖𑁄, 𑀫𑀼𑀦𑀺𑀧𑀼𑀗𑁆𑀕𑀯𑁄’’𑀇𑀘𑁆𑀘𑀸𑀤𑀺. 𑀲𑀻𑀳𑀸𑀤𑀬𑁄, 𑀆𑀤𑀺𑀦𑀸 𑀯𑀭𑀸𑀳𑀧𑀼𑀡𑁆𑀟𑀭𑀻𑀓𑀥𑁄𑀭𑀬𑁆𑀳𑀲𑁄𑀯𑀻𑀭𑀸𑀤𑀬𑁄 𑀘 𑀲𑀫𑀸𑀲𑀕𑀸 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀉𑀢𑁆𑀢𑀭𑀧𑀤𑀪𑀽𑀢𑀸 𑀲𑁂𑀝𑁆𑀞𑀢𑁆𑀣𑀯𑀸𑀘𑀓𑀸 𑀧𑀼𑀫𑁂𑀯 𑀪𑀯𑀦𑁆𑀢𑀺, 𑀬𑀣𑀸 ‘‘𑀲𑀓𑁆𑀬𑀲𑀻𑀳𑁄, 𑀓𑀯𑀺𑀓𑀼𑀜𑁆𑀚𑀭𑁄, 𑀧𑀼𑀭𑀺𑀲𑀲𑀤𑁆𑀤𑀽𑀮𑁄, 𑀧𑀼𑀭𑀺𑀲𑀯𑀭𑀸𑀳𑁄’’𑀇𑀘𑁆𑀘𑀸𑀤𑀺.

𑁬𑁯𑁭. 𑀘𑀺𑀢𑁆𑀢𑀲𑁆𑀲, 𑀅𑀓𑁆𑀔𑀺𑀦𑁄 𑀘 𑀧𑀻𑀢𑀺𑀚𑀦𑀓𑀁 𑀯𑀢𑁆𑀣𑀼 𑀅𑀩𑁆𑀬𑀸𑀲𑁂𑀓𑀁, 𑀅𑀲𑁂𑀘𑀦𑀜𑁆𑀘 𑀦𑀸𑀫, 𑀦 𑀩𑁆𑀬𑀸𑀲𑀺𑀜𑁆𑀘𑀦𑁆𑀢𑀺 𑀦𑀓𑁆𑀔𑀭𑀦𑁆𑀢𑀺 𑀦𑀬𑀦𑀫𑀦𑀸𑀦𑀺 𑀬𑀲𑁆𑀫𑀸𑀢𑀺 𑀅𑀩𑁆𑀬𑀸𑀲𑁂𑀓𑀁, 𑀅𑀲𑁂𑀘𑀦𑀜𑁆𑀘, 𑀦 𑀩𑁆𑀬𑀸𑀲𑀺𑀜𑁆𑀘𑀦𑁆𑀢𑀺 𑀘 𑀬𑀲𑁆𑀫𑀺𑀁 𑀆𑀕𑀦𑁆𑀢𑀼𑀓𑀪𑀽𑀢𑀸𑀦𑀺 𑀅𑀜𑁆𑀜𑀭𑀲𑀸𑀦𑀻𑀢𑀺 𑀯𑀸 𑀅𑀩𑁆𑀬𑀸𑀲𑁂𑀓𑀁, 𑀅𑀲𑁂𑀘𑀦𑀜𑁆𑀘. 𑀡𑁄, 𑀬𑀼 𑀘.

𑀙𑀓𑁆𑀓𑀁 𑀇𑀝𑁆𑀞𑁂 𑀯𑀢𑁆𑀣𑀼𑀫𑁆𑀳𑀺. 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀲𑀺𑀢𑀩𑁆𑀩𑀦𑁆𑀢𑀺 𑀯𑀸 𑀇𑀝𑁆𑀞𑀁, 𑀇𑀲𑀼 𑀇𑀘𑁆𑀙𑀸𑀬𑀁, 𑀇𑀲 𑀕𑀯𑁂𑀲𑀦𑁂 𑀘, 𑀢𑁄. 𑀲𑀼𑀪𑀢𑁆𑀢𑀁 𑀕𑀘𑁆𑀙𑀢𑀻𑀢𑀺 𑀲𑀼𑀪𑀕𑀁, 𑀓𑁆𑀯𑀺. 𑀳𑀤𑀬𑁂 𑀲𑀸𑀥𑀼, 𑀳𑀤𑀬𑀲𑁆𑀲 𑀯𑀸 𑀧𑀺𑀬𑀦𑁆𑀢𑀺 𑀳𑀚𑁆𑀚𑀁, 𑀡𑁄, 𑀤𑀦𑁆𑀢𑀲𑁆𑀲 𑀮𑁄𑀧𑁄, 𑀤𑁆𑀬𑀲𑁆𑀲 𑀚𑁆𑀚𑁄. 𑀤𑀬𑀺𑀢𑀩𑁆𑀩𑀁 𑀆𑀤𑀸𑀢𑀩𑁆𑀩𑀦𑁆𑀢𑀺 𑀤𑀬𑀺𑀢𑀁, 𑀢𑁄. 𑀯𑀮𑁆𑀮 𑀲𑀁𑀯𑀭𑀡𑁂, 𑀓𑀫𑁆𑀫𑀦𑀺 𑀅𑀪𑁄. 𑀧𑀺𑀬𑀸𑀬𑀺𑀢𑀩𑁆𑀩𑀦𑁆𑀢𑀺 𑀧𑀺𑀬𑀁,𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀡𑁆𑀬𑁄, 𑀭𑀲𑁆𑀲𑀸𑀤𑀺.

𑁬𑁯𑁮. 𑀢𑀺𑀓𑀁 𑀢𑀼𑀘𑁆𑀙𑁂. 𑀢𑀼𑀘 𑀯𑀺𑀦𑀸𑀲𑁂, 𑀙𑁄. 𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀩𑀚𑁆𑀛𑀦𑁂𑀲𑀼, 𑀲𑀫𑁆𑀩𑀚𑁆𑀛𑀦𑀁 𑀫𑀺𑀲𑁆𑀲𑀦𑀁, 𑀢𑁄, 𑀲𑀓𑀢𑁆𑀣𑁂 𑀓𑁄. 𑀲𑀼𑀦𑀲𑁆𑀲 𑀳𑀺𑀢𑀁 𑀲𑀼𑀜𑁆𑀜𑀁, 𑀬𑁄, 𑀦𑁆𑀬𑀲𑁆𑀲 𑀜𑁆𑀜𑁄, 𑀲𑀼𑀦 𑀕𑀢𑀺𑀬𑀁 𑀯𑀸, 𑀬𑁄. 𑀤𑁆𑀯𑀬𑀁 𑀅𑀲𑀸𑀭𑁂. 𑀨𑀮 𑀦𑀺𑀧𑁆𑀨𑀢𑁆𑀢𑀺𑀬𑀁, 𑀉, 𑀕𑀼 𑀯𑀸. 𑀧𑀼𑀩𑁆𑀩𑀢𑁆𑀭 𑀕𑁄𑀦𑁆𑀢𑁄, 𑀅𑀲𑁆𑀲𑁂, 𑀨𑁂𑀕𑁆𑀕𑀼.

𑀢𑀺𑀓𑀁 𑀧𑀯𑀺𑀢𑁆𑀢𑁂. 𑀫𑁂𑀥 𑀳𑀺𑀁𑀲𑀸𑀲𑀗𑁆𑀕𑀫𑁂𑀲𑀼, 𑀫𑁂𑀥𑀻𑀬𑀢𑁂 𑀲𑀗𑁆𑀕𑀫𑀻𑀬𑀢𑁂 𑀫𑁂𑀚𑁆𑀛𑀁, 𑀡𑁆𑀬𑁄, 𑀛𑀲𑁆𑀲 𑀛𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁. 𑀧𑀼 𑀧𑀯𑀦𑁂, 𑀢𑁄, 𑀤𑀻𑀖𑀸𑀤𑀺. 𑀯𑀼𑀟𑁆𑀠𑀸𑀯𑀸𑀤𑁂𑀲𑁄, 𑀇𑀓𑀸𑀭𑀸𑀕𑀫𑁄 𑀘. 𑀤𑁆𑀯𑀬𑀁 𑀅𑀯𑀺𑀭𑀤𑁆𑀥𑁂. 𑀦 𑀯𑀺𑀭𑀚𑁆𑀛𑀢𑀻𑀢𑀺 𑀅𑀯𑀺𑀭𑀤𑁆𑀥𑁄, 𑀭𑀥 𑀳𑀺𑀁𑀲𑀸𑀧𑀭𑀸𑀥𑀸𑀧𑀕𑀫𑀦𑁂𑀲𑀼, 𑀢𑁄. ‘‘𑀥𑀠𑀪𑀳𑁂𑀳𑀺 𑀥𑀠𑀸 𑀘𑁂’’𑀢𑀺 𑀢𑀲𑁆𑀲 𑀥𑁄. 𑀧𑀡 𑀩𑁆𑀬𑀯𑀳𑀸𑀭𑀣𑀼𑀢𑀻𑀲𑀼, 𑀡𑁆𑀯𑀼, 𑀯𑀺𑀭𑀤𑁆𑀥𑀯𑁄𑀳𑀸𑀭𑁂𑀦 𑀦 𑀧𑀡𑀸𑀫𑁂𑀢𑀻𑀢𑀺 𑀅𑀧𑀡𑁆𑀡𑀓𑁄.

𑁬𑁯𑁯-𑁭𑁦𑁧. 𑀤𑁆𑀯𑀬𑀁 𑀚𑀸𑀢𑁆𑀬𑀸𑀘𑀸𑀭𑀸𑀤𑀺𑀦𑀸 𑀅𑀦𑀺𑀦𑁆𑀤𑀺𑀢𑁂. 𑀉𑀧𑀼𑀩𑁆𑀩𑁄, 𑀧𑀧𑀼𑀩𑁆𑀩𑁄 𑀘 𑀓𑀲 𑀯𑀺𑀮𑁂𑀔𑀦𑁂, 𑀳𑀺𑀁𑀲𑀸𑀬𑀜𑁆𑀘, 𑀢𑁄, ‘‘𑀲𑀸𑀤𑀺𑀲𑀦𑁆𑀢𑀧𑀼𑀘𑁆𑀙𑀪𑀦𑁆𑀚𑀳𑀁𑀲𑀸𑀤𑀻𑀳𑀺 𑀝𑁆𑀞𑁄’’𑀢𑀺 𑀲𑀳𑀸𑀤𑀺𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲 𑀝𑁆𑀞𑁄.

𑀕𑀸𑀭𑀬𑁆𑀳𑀦𑁆𑀢𑀁 𑀚𑀸𑀢𑁆𑀬𑀸𑀘𑀸𑀭𑀸𑀤𑀺𑀦𑀸 𑀦𑀺𑀦𑁆𑀤𑀺𑀢𑁂. 𑀦𑀺𑀳𑀻𑀬𑀢𑁂𑀢𑀺 𑀦𑀺𑀳𑀻𑀦𑁄, 𑀳𑀸 𑀘𑀸𑀕𑁂, 𑀇𑀦𑁄, 𑀤𑀻𑀖𑁄. 𑀅𑀧𑀸𑀤𑀺𑀧𑀼𑀩𑁆𑀩𑁂 𑀳𑀻𑀦𑁄. 𑀮𑀫 𑀦𑀺𑀦𑁆𑀤𑀸𑀬𑀁, 𑀡𑁆𑀯𑀼, 𑀮𑀸𑀫𑀓𑁄. 𑀓𑀺𑀝 𑀕𑀢𑀺𑀬𑀁, 𑀧𑀢𑀺 𑀦𑀺𑀧𑀼𑀩𑁆𑀩𑁄 𑀢𑀼 𑀦𑀺𑀦𑁆𑀤𑀸𑀬𑀁, 𑀞𑁄, 𑀧𑀢𑀺𑀓𑀺𑀝𑁆𑀞𑀁, 𑀦𑀺𑀓𑀺𑀝𑁆𑀞𑀜𑁆𑀘. 𑀇𑀢𑁆𑀢𑀭𑀲𑀤𑁆𑀤𑁄 𑀮𑀸𑀫𑀓𑀢𑁆𑀣𑀯𑀸𑀘𑀓𑁄 𑀧𑀸𑀝𑀺𑀧𑀤𑀺𑀓𑁄, ‘‘𑀚𑀸𑀢𑁆𑀬𑀸𑀘𑀸𑀭𑀸𑀤𑀻𑀳𑀺 𑀦𑀺𑀳𑀻𑀦𑁄𑀬’’𑀦𑁆𑀢𑀺 𑀅𑀯𑀤𑀺𑀢𑀩𑁆𑀩𑁄𑀢𑀺 𑀅𑀯𑀚𑁆𑀚𑁄, 𑀢𑀩𑁆𑀪𑀸𑀯𑀢𑁆𑀣𑁄 𑀘𑁂𑀢𑁆𑀣 𑀅𑀓𑀸𑀭𑁄. 𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀡𑁆𑀬𑁄, 𑀤𑁆𑀬𑀲𑁆𑀲 𑀚𑁆𑀚𑁄. 𑀓𑀼𑀘𑁆𑀙𑀸 𑀲𑀜𑁆𑀚𑀸𑀢𑀸 𑀅𑀲𑁆𑀲 𑀓𑀼𑀘𑁆𑀙𑀺𑀢𑁄. 𑀅𑀥𑁄𑀪𑀸𑀕𑁂 𑀚𑀸𑀢𑁄 𑀅𑀥𑀫𑁄, 𑀑𑀲𑁆𑀲𑀢𑁆𑀢𑀁. 𑀉𑀫 𑀦𑀺𑀦𑁆𑀤𑀸𑀬𑀁, 𑀓𑀫𑁆𑀫𑁂 𑀅, 𑀲𑀓𑀢𑁆𑀣𑁂 𑀓𑁄, 𑀉𑀲𑁆𑀲𑁄, 𑀑𑀫𑀓𑁄. 𑀕𑀭𑀳𑀺𑀢𑀩𑁆𑀩𑁄𑀢𑀺 𑀕𑀸𑀭𑀬𑁆𑀳𑁄, 𑀕𑀭𑀳 𑀦𑀺𑀦𑁆𑀤𑀸𑀬𑀁, 𑀡𑁆𑀬𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄.

𑀤𑁆𑀯𑀬𑀁 𑀫𑀮𑀬𑀼𑀢𑁆𑀢𑁂. 𑀫𑀮𑀬𑀼𑀢𑁆𑀢𑀢𑀸𑀬 𑀫𑀮𑀻𑀦𑁄, 𑀇𑀦𑁄, 𑀤𑀻𑀖𑁄. 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀈, 𑀫𑀲𑀧𑀘𑁆𑀘𑀬𑁂 𑀫𑀮𑀻𑀫𑀲𑁄, 𑀓𑀘𑁆𑀘𑀭𑀁, 𑀫𑀮𑀤𑀽𑀲𑀺𑀢𑀫𑁆𑀧𑀺, 𑀓𑀼𑀘𑁆𑀙𑀺𑀢𑀁 𑀘𑀭𑀢𑀻𑀢𑀺 𑀓𑀘𑁆𑀘𑀭𑀁.

𑀢𑀺𑀧𑀸𑀤𑀁 𑀯𑀺𑀧𑀼𑀮𑁂. 𑀩𑁆𑀭𑀳 𑀯𑀼𑀤𑁆𑀥𑀺𑀬𑀁, 𑀭𑀸𑀚𑀸𑀤𑀺, 𑀩𑁆𑀭𑀳𑀸. 𑀫𑀳 𑀧𑀽𑀚𑀸𑀬𑀁, 𑀅𑀦𑁆𑀢𑁄. 𑀧𑀼𑀮 𑀫𑀳𑀢𑁆𑀢𑁂, 𑀯𑀺𑀧𑀼𑀮𑀁. 𑀲𑀮 𑀕𑀫𑀦𑁂, 𑀯𑀺𑀲𑀸𑀮𑀁, 𑀡𑁄. 𑀧𑀣 𑀲𑀗𑁆𑀔𑁆𑀬𑀸𑀦𑁂, 𑀉𑀮𑁄, 𑀅𑀲𑁆𑀲𑀼, 𑀧𑀼𑀣𑀼𑀮𑀁, 𑀉𑀫𑁆𑀳𑀺 𑀧𑀼𑀣𑀼. 𑀕𑀭 𑀲𑁂𑀘𑀦𑁂, 𑀉, 𑀕𑀭𑀼. 𑀅𑀭 𑀕𑀫𑀦𑁂, 𑀉, 𑀅𑀲𑁆𑀲𑀼, 𑀉𑀭𑀼. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀢𑁄, 𑀇𑀡𑁆𑀡𑀸𑀤𑁂𑀲𑁄, 𑀢𑀲𑁆𑀲 𑀣𑁄, 𑀅𑀲𑁆𑀲𑀺, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀯𑀺𑀢𑁆𑀣𑀺𑀡𑁆𑀡𑀁.

𑀯𑀞𑀭𑀦𑁆𑀢𑀁 𑀣𑀽𑀮𑁂. 𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀇𑀦𑁄. 𑀣𑀽𑀮 𑀧𑀭𑀺𑀩𑁆𑀭𑀽𑀳𑀦𑁂, 𑀅. 𑀧𑀻𑀥𑀸𑀢𑀼𑀢𑁄 𑀈𑀯𑀭𑁄, 𑀧𑀻𑀯𑀭𑀁. 𑀮𑀧𑀘𑁆𑀘𑀬𑁂 𑀣𑀼𑀮𑁆𑀮𑀁, 𑀭𑀲𑁆𑀲𑀸𑀤𑀺. 𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀯𑀤𑀢𑀻𑀢𑀺 𑀯𑀞𑀭𑀁, 𑀅𑀭𑁄, 𑀤𑀲𑁆𑀲 𑀞𑁄. 𑀣𑀽𑀮𑀫𑀼𑀧𑀘𑀺𑀢𑀫𑀁𑀲𑀯𑀺𑀧𑀼𑀮𑀸𑀬𑀢𑀫𑀁𑀲𑀸𑀤𑀺.

𑀤𑁆𑀯𑀬𑀁 𑀲𑀦𑁆𑀦𑀺𑀘𑀺𑀢𑁂. 𑀆𑀦𑀺𑀧𑀼𑀩𑁆𑀩𑁄 𑀘𑀺 𑀘𑀬𑁂, 𑀓𑀫𑁆𑀫𑁂 𑀢𑁄, 𑀆𑀘𑀺𑀢𑀁, 𑀦𑀺𑀘𑀺𑀢𑀜𑁆𑀘.

𑁭𑁦𑁨. 𑀲𑀺𑀮𑁄𑀓𑁄 𑀲𑀩𑁆𑀩𑀲𑁆𑀫𑀺𑀁. 𑀲𑀭𑀢𑀻𑀢𑀺 𑀲𑀩𑁆𑀩𑀁, 𑀯𑁄, 𑀭𑀲𑁆𑀲 𑀘 𑀯𑁄. 𑀲𑀁𑀧𑀼𑀩𑁆𑀩𑁄 𑀅𑀲𑀼 𑀔𑁂𑀧𑀦𑁂, 𑀢𑁄, 𑀲𑀫𑀢𑁆𑀢𑀁, 𑀅𑀣 𑀯𑀸 𑀲𑀫 𑀢𑀺𑀫 𑀯𑁂𑀓𑀮𑁆𑀮𑀩𑁆𑀬𑁂, 𑀢𑁄, 𑀲𑀫𑀢𑁆𑀢𑀁. 𑀦 𑀔𑀺𑀬𑀢𑀻𑀢𑀺 𑀅𑀔𑀺𑀮𑀁, 𑀮𑁄, 𑀅𑀔𑀺𑀮𑀁, 𑀦𑀺𑀔𑀺𑀮𑀜𑁆𑀘 𑀢𑀣𑀸. 𑀲𑀓 𑀲𑀢𑁆𑀢𑀺𑀬𑀁, 𑀅𑀮𑁄, 𑀓𑀮𑀸𑀪𑀺 𑀅𑀯𑀬𑀯𑁂𑀳𑀺 𑀲𑀳 𑀯𑀢𑁆𑀢𑀢𑁂𑀢𑀺 𑀯𑀸 𑀲𑀓𑀮𑀁. 𑀲𑁂𑀲𑀢𑁄 𑀅𑀯𑀲𑀺𑀝𑁆𑀞𑀢𑁄 𑀦𑀺𑀕𑁆𑀕𑀢𑀁 𑀦𑀺𑀲𑁆𑀲𑁂𑀲𑀁. 𑀓𑀲 𑀕𑀫𑀦𑁂, 𑀇𑀦𑁄, 𑀡𑀢𑁆𑀢𑀁, 𑀓𑀲𑀺𑀡𑀁. 𑀦 𑀲𑁂𑀲𑀁 𑀅𑀯𑀲𑀺𑀝𑁆𑀞𑀁 𑀅𑀲𑁂𑀲𑀁. 𑀅𑀕𑁆𑀕𑁂𑀦 𑀲𑀺𑀔𑀭𑁂𑀦 𑀲𑀗𑁆𑀕𑀢𑀁 𑀲𑀫𑀕𑁆𑀕𑀁. 𑀓𑀢𑁂 𑀲𑀫𑀸𑀲𑁂 𑀧𑀼𑀩𑁆𑀩𑀦𑀺𑀧𑀸𑀢𑁄 𑀅𑀪𑀺𑀥𑀸𑀦𑀸. 𑀊𑀦 𑀧𑀭𑀺𑀳𑀸𑀦𑁂, 𑀦 𑀊𑀦𑀁 𑀅𑀲𑁆𑀫𑀺𑀁 𑀅𑀦𑀽𑀦𑀓𑀁, 𑀓𑁄.

𑁭𑁦𑁩. 𑀩𑀳𑀼𑀮𑀦𑁆𑀢𑀁 𑀩𑀳𑀼𑀢𑁆𑀢𑁂, 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀪𑀽𑀭𑀺, 𑀪𑀽 𑀲𑀢𑁆𑀢𑀸𑀬𑀁, 𑀭𑀺, 𑀪𑀽𑀭𑀺, 𑀤𑀻𑀖𑀸𑀤𑀺, 𑀭𑀲𑁆𑀲𑀦𑁆𑀢𑁄, 𑀈𑀫𑁆𑀳𑀺 𑀪𑀽𑀭𑀻, 𑀫𑁂𑀥𑀸. 𑀧𑀳𑀼 𑀲𑀢𑁆𑀢𑀺𑀬𑀁, 𑀢𑁄, 𑀉𑀓𑀸𑀭𑀸𑀕𑀫𑁄, 𑀧𑀧𑀼𑀩𑁆𑀩𑁄 𑀳𑀽 𑀲𑀢𑁆𑀢𑀸𑀬𑀁 𑀯𑀸, 𑀭𑀲𑁆𑀲𑁄. 𑀧𑀘𑀺 𑀯𑀺𑀢𑁆𑀣𑀸𑀭𑁂, 𑀉𑀭𑁄, 𑀧𑀘𑀼𑀭𑀁. 𑀪𑀻 𑀪𑀬𑁂, 𑀪𑀸𑀬𑀢𑀺 𑀬𑀲𑁆𑀫𑀸𑀢𑀺 𑀪𑀺𑀬𑁆𑀬𑁄, 𑀤𑁆𑀯𑀺𑀢𑁆𑀢𑀁. 𑀲𑀫𑁆𑀧𑀳𑁄𑀢𑀻𑀢𑀺 𑀲𑀫𑁆𑀧𑀳𑀼𑀮𑀁, 𑀮𑁄. 𑀩𑀳 𑀯𑀼𑀟𑁆𑀠𑀺𑀬𑀁, 𑀉, 𑀩𑀳𑀼. 𑀬𑁂𑀪𑀼𑀬𑁆𑀬𑀲𑀤𑁆𑀤𑁄 𑀩𑀳𑀼𑀮𑀢𑁆𑀣𑀯𑀸𑀘𑀓𑁄 𑀧𑀸𑀝𑀺𑀧𑀤𑀺𑀓𑁄. 𑀩𑀳𑀽 𑀅𑀢𑁆𑀣𑁂 𑀮𑀸𑀪𑀻𑀢𑀺 𑀩𑀳𑀼𑀮𑀁.

𑀤𑁆𑀯𑀬𑀁 𑀩𑀳𑀺𑀕𑀢𑁂. 𑀩𑀳𑀺 𑀚𑀸𑀢𑀁 𑀩𑀸𑀳𑀺𑀭𑀁, 𑀇𑀭𑀡.

𑁭𑁦𑁪-𑁭𑁦𑁬. 𑀬𑁂𑀲𑀁 𑀧𑀤𑀢𑁆𑀣𑀸𑀦𑀁 𑀫𑀢𑁆𑀢𑀁 𑀧𑀫𑀸𑀡𑀁 𑀲𑀢𑀸𑀤𑀺𑀢𑁄 𑀧𑀭𑀁 𑀅𑀥𑀺𑀓𑀁 𑀪𑀯𑀢𑀺, 𑀢𑁂 𑀧𑀭𑁄𑀲𑀢𑀸𑀤𑀻. 𑀆𑀤𑀺𑀦𑀸 𑀧𑀭𑁄𑀲𑀳𑀲𑁆𑀲𑀸𑀤𑀺. 𑀲𑀢𑀢𑁄 𑀧𑀭𑁄 𑀧𑀭𑁄𑀲𑀢𑀁. 𑀲𑀳𑀲𑁆𑀲𑀢𑁄 𑀧𑀭𑁄 𑀧𑀭𑁄𑀲𑀳𑀲𑁆𑀲𑀁, 𑀧𑀭𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄 𑀅𑀪𑀺𑀥𑀸𑀦𑀸 𑀧𑀭𑀲𑀤𑁆𑀤𑀸 𑀑𑀓𑀸𑀭𑀸𑀕𑀫𑁄. 𑀧𑀚𑁆𑀚𑀁 𑀅𑀧𑁆𑀧𑁂. 𑀧𑀭𑀺𑀢𑁄 𑀅𑀢𑁆𑀢𑀁 𑀔𑀡𑁆𑀟𑀺𑀢𑀁 𑀧𑀭𑀺𑀢𑁆𑀢𑀁. 𑀲𑀼𑀔 𑀢𑀓𑁆𑀭𑀺𑀬𑀸𑀬𑀁, 𑀢𑀓𑁆𑀭𑀺𑀬𑀸 𑀲𑀼𑀔𑀦𑀁, 𑀉𑀫𑁄. 𑀲𑀼𑀘 𑀲𑁄𑀘𑀦𑁂 𑀯𑀸. 𑀔𑀼𑀤 𑀧𑀺𑀧𑀸𑀲𑀸𑀬𑀁, 𑀤𑁄, 𑀔𑀼𑀤𑁆𑀤𑀁. 𑀣𑀼𑀘 𑀧𑀲𑀸𑀤𑁂, 𑀡𑁄. 𑀅𑀮 𑀪𑀽𑀲𑀦𑀧𑀭𑀺𑀬𑀢𑁆𑀢𑀺𑀦𑀺𑀯𑀸𑀭𑀡𑁂𑀲𑀼, 𑀧𑁄, 𑀮𑀲𑁆𑀲 𑀧𑁄, 𑀅𑀧𑁆𑀧𑀁. 𑀓𑀺𑀲 𑀢𑀦𑀼𑀓𑀭𑀡𑁂, 𑀡𑁄. 𑀢𑀦𑀼 𑀯𑀺𑀢𑁆𑀣𑀸𑀭𑁂. 𑀘𑀺 𑀘𑀬𑁂, 𑀉𑀮𑁄, 𑀤𑁆𑀯𑀺𑀢𑁆𑀢𑀁, 𑀘𑀼𑀮𑁆𑀮𑀁, 𑀦𑀻𑀘𑁂 𑀧𑀦 𑀘𑀼𑀮𑁆𑀮𑁄. 𑀫𑀸 𑀫𑀸𑀦𑁂, 𑀙𑀤𑀸𑀤𑀻𑀳𑀺 𑀢𑁄. 𑀭𑀲𑁆𑀲𑀸𑀤𑀺, 𑀫𑀢𑁆𑀢𑀸, 𑀇𑀢𑁆𑀣𑀺𑀬𑀁. 𑀮𑀺𑀲 𑀅𑀧𑁆𑀧𑀻𑀪𑀸𑀯𑁂, 𑀅. 𑀮𑀽 𑀙𑁂𑀤𑀦𑁂, 𑀮𑀼𑀬𑀢𑁂𑀢𑀺 𑀮𑀯𑁄, 𑀅. 𑀅𑀡 𑀕𑀢𑁆𑀬𑀢𑁆𑀣𑁄, 𑀉. 𑀓𑀡 𑀲𑀤𑁆𑀤𑁂, 𑀅, 𑀓𑀡𑁄. 𑀮𑀯𑀸𑀤𑀻𑀳𑀺 𑀲𑀳 𑀓𑀡𑁄 𑀧𑀼𑀫𑁂, 𑀯𑀼𑀢𑁆𑀢𑀜𑁆𑀘 𑀅𑀫𑀭𑀓𑁄𑀲𑁂 ‘‘𑀧𑀼𑀫𑁂 𑀮𑀯𑀮𑁂𑀲𑀓𑀡𑀸𑀡𑀯𑁄’’𑀢𑀺 [𑀅𑀫𑀭 𑁨𑁧.𑁬𑁨].

𑀜𑀢𑁆𑀢𑀦𑁆𑀢𑀁 𑀲𑀫𑀻𑀧𑁂. 𑀲𑀗𑁆𑀕𑀢𑀸 𑀆𑀧𑁄 𑀬𑀲𑁆𑀫𑀺𑀁 𑀲𑀫𑀻𑀧𑀁, 𑀆𑀲𑁆𑀲𑀻. 𑀧𑀸𑀤𑀺𑀢𑁄 𑀬𑀤𑀸𑀤𑀺𑀦𑀸 𑀓𑀝𑁄, 𑀦𑀺𑀓𑀝𑁄, 𑀦𑀢𑁆𑀣𑀺 𑀓𑀝𑁄 𑀆𑀯𑀭𑀡𑀁 𑀏𑀢𑀲𑁆𑀲𑀸𑀢𑀺 𑀯𑀸 𑀦𑀺𑀓𑀝𑁄. 𑀲𑀤𑀲𑁆𑀫𑀸 𑀢𑁄, 𑀆𑀲𑀦𑁆𑀦𑁄. 𑀓𑀡𑁆𑀞𑀁 𑀲𑀫𑀻𑀧𑀁 𑀉𑀧𑀕𑀢𑀁 𑀉𑀧𑀓𑀝𑁆𑀞𑁄. ‘‘𑀓𑀡𑁆𑀞𑁄 𑀕𑀮𑁂 𑀲𑀦𑁆𑀦𑀺𑀝𑁆𑀞𑀸𑀦𑁂, 𑀲𑀤𑁆𑀤𑁂 𑀫𑀤𑀦𑀧𑀸𑀤𑀧𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄, 𑀇𑀥 𑀧𑀦 𑀓𑀡𑁆𑀞𑀲𑁆𑀲 𑀓𑀝𑁆𑀞𑀸𑀤𑁂𑀲𑁄, 𑀡𑀮𑁄𑀧𑁄 𑀯𑀸. 𑀅𑀪𑁆𑀬𑀸𑀲𑀻𑀤𑀢𑀻𑀢𑀺 𑀅𑀪𑁆𑀬𑀸𑀲𑁄. ‘‘𑀅𑀪𑁆𑀬𑀸𑀲𑁄 𑀢𑀼 𑀲𑀫𑀻𑀧𑀫𑁆𑀳𑀺, 𑀧𑀼𑀫𑀸 𑀅𑀪𑁆𑀬𑀲𑀦𑁂𑀧𑀺 𑀘𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁨𑁧.𑁬𑁭] 𑀭𑀪𑀲𑁄. 𑀲𑀳 𑀅𑀦𑁆𑀢𑁂𑀦 𑀲𑀦𑁆𑀢𑀺𑀓𑀁, 𑀲𑀓𑀢𑁆𑀣𑁂 𑀇𑀓𑁄. 𑀯𑀺𑀤𑀽𑀭𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀯𑀺𑀤𑀽𑀭𑀁. 𑀲𑀗𑁆𑀕𑀢𑀁 𑀅𑀦𑁆𑀢𑀁 𑀲𑀸𑀫𑀦𑁆𑀢𑀁, 𑀲𑀲𑀤𑁆𑀤𑀲𑁆𑀲 𑀤𑀻𑀖𑁄, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀫𑁄, 𑀲𑀁 𑀦𑀺𑀧𑀼𑀩𑁆𑀩𑁄𑀧𑀺 𑀓𑀝𑁆𑀞𑀲𑀤𑁆𑀤𑁄 𑀲𑀫𑀻𑀧𑀢𑁆𑀣𑁄𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀉𑀤𑀸𑀳𑀝𑀁, 𑀓𑀲 𑀯𑀺𑀮𑁂𑀔𑀦𑁂 𑀯𑀸, 𑀢𑁄, 𑀲𑀦𑁆𑀦𑀺𑀓𑀝𑁆𑀞𑀁. 𑀅𑀦𑁆𑀢𑀺𑀓𑀪𑀸𑀯𑀁 𑀉𑀧𑀕𑀢𑀁 𑀉𑀧𑀦𑁆𑀢𑀺𑀓𑀁. 𑀲𑀳 𑀓𑀸𑀲𑁂𑀦 𑀯𑀢𑁆𑀢𑀢𑁂 𑀲𑀓𑀸𑀲𑀁, 𑀓𑀸𑀲 𑀤𑀺𑀢𑁆𑀢𑀺𑀬𑀁. 𑀅𑀦𑁆𑀢𑀬𑁄𑀕𑀸 𑀅𑀦𑁆𑀢𑀺𑀓𑀁, 𑀇𑀓𑁄. 𑀜𑀸𑀬𑀢𑁂𑀢𑀺 𑀜𑀢𑁆𑀢𑀁, 𑀢𑁄, 𑀲𑀓𑀸𑀲𑀲𑀤𑁆𑀤𑁂𑀦 𑀲𑀦𑀺𑀟𑀲𑀤𑁂𑀲𑀲𑀯𑀺𑀥𑀲𑀫𑀭𑀺𑀬𑀸𑀤𑀲𑀯𑁂𑀲𑀸𑀧𑀺 𑀕𑀬𑁆𑀳𑀦𑁆𑀢𑀺. 𑀲𑀳 𑀦𑀺𑀟𑁂𑀦, 𑀲𑀳 𑀤𑁂𑀲𑁂𑀦, 𑀲𑀳 𑀯𑀺𑀥𑀸𑀬, 𑀲𑀳 𑀫𑀭𑀺𑀬𑀸𑀤𑀸𑀬, 𑀲𑀳 𑀯𑁂𑀲𑁂𑀦 𑀯𑀢𑁆𑀢𑀢𑁂𑀢𑀺 𑀯𑀺𑀕𑁆𑀕𑀳𑁄, 𑀩𑁆𑀬𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀭𑀽𑀴𑁆𑀳𑀻𑀲𑀤𑁆𑀤𑀸 𑀧𑀦 𑀏𑀢𑁂.

𑀤𑁆𑀯𑀬𑀁 𑀤𑀽𑀭𑀫𑀢𑁆𑀢𑁂. 𑀤𑀼𑀓𑁆𑀔𑁂𑀦 𑀅𑀭𑀢𑀺 𑀬𑀁 𑀤𑀽𑀭𑀁. 𑀯𑀺𑀧𑀧𑀼𑀩𑁆𑀩𑁄 𑀓𑀝𑁆𑀞𑀲𑀤𑁆𑀤𑁄 𑀤𑀽𑀭𑁂, 𑀲𑀓𑀢𑁆𑀣𑁂 𑀓𑁄, 𑀯𑀺𑀧𑁆𑀧𑀓𑀝𑁆𑀞𑀓𑀁.

𑁭𑁦𑁭. 𑀢𑀺𑀓𑀁 𑀖𑀦𑁂, 𑀦𑀢𑁆𑀣𑀺 𑀅𑀦𑁆𑀢𑀭𑀁 𑀙𑀺𑀤𑁆𑀤𑀁 𑀬𑀲𑁆𑀲. 𑀳𑀦𑀢𑀺𑀲𑁆𑀫𑀸 𑀅, 𑀳𑀲𑁆𑀲 𑀖𑁄 𑀘, 𑀖𑀦𑀁. 𑀲𑀫𑀼 𑀉𑀧𑀲𑀫𑁂, 𑀤𑁄, 𑀲𑀦𑁆𑀤𑀁. 𑀧𑀸𑀤𑁄 𑀯𑀺𑀭𑀴𑁂. 𑀯𑀺𑀭𑀫𑀢𑀻𑀢𑀺 𑀯𑀺𑀭𑀴𑀁, 𑀅, 𑀯𑀡𑁆𑀡𑀯𑀺𑀓𑀸𑀭𑁄. 𑀧𑀺𑀬𑁄 𑀮𑀯𑁄 𑀅𑀧𑁆𑀧𑁄 𑀬𑀲𑁆𑀫𑀺𑀁 𑀧𑁂𑀮𑀯𑀁, 𑀧𑀺𑀬𑀲𑁆𑀲 𑀧𑁂, 𑀧𑀺𑀮𑀺 𑀕𑀫𑀦𑁂 𑀯𑀸, 𑀅𑀯𑁄. 𑀢𑀦𑀼 𑀅𑀧𑁆𑀧𑀸𑀤𑀻𑀲𑀼𑀧𑀺.

𑀤𑁆𑀯𑀬𑀁 𑀤𑀻𑀖𑁂. 𑀬𑀢 𑀆𑀬𑀢𑀦𑁂, 𑀆𑀬𑀢𑀁. 𑀇 𑀕𑀫𑀦𑁂 𑀯𑀸, 𑀢𑁄, 𑀪𑀽𑀯𑀸𑀤𑀺, 𑀇𑀲𑁆𑀲𑁂, 𑀏 𑀅𑀬, 𑀤𑀻𑀖𑀸𑀤𑀺. 𑀤𑀺 𑀔𑀬𑁂, 𑀖𑁄, 𑀤𑀻𑀖𑀸𑀤𑀺. 𑀢𑀺𑀓𑀁 𑀯𑀝𑁆𑀝𑀮𑁂. 𑀦𑀺𑀕𑁆𑀕𑀢𑀁 𑀢𑀮𑀁 𑀅𑀲𑁆𑀫𑀸𑀢𑀺 𑀦𑀺𑀢𑁆𑀢𑀮𑀁. 𑀯𑀝𑁆𑀝 𑀯𑀝𑁆𑀝𑀦𑁂, 𑀯𑀝𑁆𑀝𑀁, 𑀮𑀢𑀸𑀤𑀺. 𑀉𑀮𑀧𑀘𑁆𑀘𑀬𑁂 𑀯𑀝𑁆𑀝𑀼𑀮𑀁.

𑁭𑁦𑁮. 𑀉𑀘𑁆𑀙𑀺𑀢𑀦𑁆𑀢𑀁 𑀉𑀦𑁆𑀦𑀢𑁂. 𑀘𑀺 𑀘𑀬𑁂, 𑀉𑀘𑁆𑀘𑀺𑀦𑁄𑀢𑀻𑀢𑀺 𑀉𑀘𑁆𑀘𑁄, 𑀅. 𑀉𑀦𑁆𑀦𑀫𑀢𑀻𑀢𑀺 𑀉𑀦𑁆𑀦𑀢𑁄. 𑀢𑀼𑀚 𑀳𑀺𑀁𑀲𑀸𑀬𑀁, 𑀨𑀮𑀦𑁂 𑀘, 𑀅, 𑀢𑀼𑀗𑁆𑀕𑁄. 𑀉𑀕𑁆𑀕𑀢𑀁 𑀅𑀕𑁆𑀕𑀁 𑀅𑀲𑁆𑀲 𑀉𑀤𑀕𑁆𑀕𑁄. 𑀉𑀤𑁆𑀥𑀁 𑀲𑀺𑀢𑁄 𑀉𑀘𑁆𑀙𑀺𑀢𑁄, 𑀲𑀺 𑀲𑁂𑀯𑀸𑀬𑀁, 𑀢𑁄, 𑀲𑀲𑁆𑀲 𑀙𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀉𑀘𑁆𑀙𑀺𑀢𑁄. 𑀧𑀁𑀲𑀼𑀧𑀺, 𑀧𑀓𑀝𑁆𑀞𑁄 𑀅𑀁𑀲𑀼 𑀤𑀺𑀢𑁆𑀢𑀺 𑀬𑀲𑁆𑀲 𑀧𑀁𑀲𑀼.

𑀢𑀺𑀓𑀁 𑀯𑀸𑀫𑀦𑁂. 𑀉𑀤𑁆𑀥𑀁 𑀦 𑀅𑀜𑁆𑀘𑀢𑀻𑀢𑀺 𑀦𑀻𑀘𑁄, 𑀅𑀜𑁆𑀘 𑀕𑀫𑀦𑁂, 𑀡𑁄, 𑀅𑀓𑀸𑀭𑀜𑀓𑀸𑀭𑀸𑀦𑀁 𑀮𑁄𑀧𑁄, 𑀦𑀺𑀲𑀤𑁆𑀤𑁄 𑀅𑀢𑁆𑀭 𑀦𑀺𑀲𑁂𑀥𑁂. 𑀭𑀲 𑀲𑀤𑁆𑀤𑁂, 𑀲𑁄, 𑀭𑀲𑁆𑀲𑁄. 𑀯𑀸 𑀕𑀫𑀦𑁂, 𑀫𑀦𑁄, 𑀯𑀸𑀫𑀦𑁄.

𑀢𑀺𑀓𑀁 𑀉𑀚𑀼𑀫𑁆𑀳𑀺. 𑀦 𑀚𑀺𑀫𑁆𑀳𑀁 𑀓𑀼𑀝𑀺𑀮𑀁 𑀅𑀚𑀺𑀫𑁆𑀳𑀁. 𑀢𑀲𑁆𑀫𑀺𑀁 𑀅𑀯𑀗𑁆𑀓𑀢𑀸𑀬 𑀧𑀓𑀝𑁆𑀞𑁄 𑀕𑀼𑀡𑁄 𑀬𑀲𑁆𑀲 𑀧𑀕𑀼𑀡𑁄. 𑀅𑀚 𑀕𑀫𑀦𑁂, 𑀉, 𑀅𑀲𑁆𑀲𑀼, 𑀉𑀚𑀼.

𑁭𑁦𑁯. 𑀙𑀓𑁆𑀓𑀁 𑀯𑀗𑁆𑀓𑁂. 𑀅𑀮𑀥𑀸𑀢𑀼𑀫𑁆𑀳𑀸 𑀅𑀭𑁄, 𑀴𑀢𑁆𑀢𑀁. 𑀯𑁂𑀮 𑀕𑀫𑀦𑁂, 𑀢𑁄, 𑀤𑁆𑀯𑀺𑀢𑁆𑀢𑀸𑀤𑀺, 𑀯𑀺𑀭𑀽𑀧𑁂𑀦 𑀇𑀮𑀬𑀢𑀻𑀢𑀺 𑀯𑀸 𑀯𑁂𑀮𑁆𑀮𑀺𑀢𑀁, 𑀢𑁄, 𑀇𑀮 𑀕𑀫𑀦𑁂. 𑀯𑀗𑁆𑀓 𑀓𑁄𑀝𑀺𑀮𑁆𑀬𑁂, 𑀅. 𑀓𑀼𑀝 𑀙𑁂𑀤𑀦𑁂, 𑀇𑀮𑁄, 𑀓𑀼𑀝 𑀓𑁄𑀝𑀺𑀮𑁆𑀬𑁂 𑀯𑀸. 𑀳𑀸 𑀘𑀸𑀕𑁂, 𑀓𑀢𑁆𑀢𑀭𑀺 𑀫𑁄, 𑀤𑁆𑀯𑀺𑀢𑁆𑀢𑀁, 𑀯𑀡𑁆𑀡𑀯𑀺𑀧𑀭𑀺𑀬𑀬𑀸𑀤𑀺, 𑀚𑀺𑀫𑁆𑀳𑀁. 𑀓𑀼𑀜𑁆𑀘 𑀓𑁄𑀝𑀺𑀮𑁆𑀬𑁂, 𑀢𑁄. 𑀯𑀓𑁆𑀓𑀫𑁆𑀧𑀺, 𑀯𑀓𑁆𑀓 𑀕𑀫𑀦𑁂.

𑀧𑀜𑁆𑀘𑀓𑀁 𑀥𑀼𑀯𑁂. 𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀼, 𑀅, 𑀉𑀯𑀸𑀤𑁂𑀲𑁄. 𑀲𑀲𑁆𑀲𑀢𑁂 𑀦𑀺𑀘𑁆𑀘𑁂 𑀪𑀯𑁄 𑀲𑀲𑁆𑀲𑀢𑁄. 𑀦𑀺𑀘𑁆𑀘𑁄 𑀯𑀼𑀢𑁆𑀢𑁄 [𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸]. 𑀲𑀤𑀸 𑀓𑀸𑀮𑁂 𑀪𑀯𑁄 𑀲𑀤𑀸𑀢𑀦𑁄. 𑀲𑀦𑀲𑀤𑁆𑀤𑁄 𑀦𑀺𑀘𑁆𑀘𑀢𑁆𑀣𑁄 𑀲𑀢𑁆𑀢𑀫𑁆𑀬𑀦𑁆𑀢𑁄 𑀦𑀺𑀧𑀸𑀢𑁄, 𑀲𑀦𑀁𑀲𑀤𑁆𑀤𑁄 𑀯𑀸 [𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸], 𑀢𑀢𑁆𑀭 𑀪𑀯𑁄 𑀲𑀦𑀦𑁆𑀢𑀦𑁄, 𑀉𑀪𑀬𑀢𑁆𑀭𑀸𑀧𑀺 𑀪𑀯𑀢𑁆𑀣𑁂 𑀢𑀦𑁄, 𑀧𑀼𑀩𑁆𑀩𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑁄.

𑁭𑁧𑁦. 𑀏𑀓𑁂𑀦𑁂𑀯 𑀪𑀸𑀯𑀸𑀤𑀺𑀭𑀽𑀧𑁂𑀦 𑀓𑀸𑀮𑀲𑁆𑀲 𑀩𑁆𑀬𑀸𑀧𑀓𑁄 𑀦𑀺𑀩𑁆𑀩𑀸𑀦𑀸𑀓𑀸𑀲𑀸𑀤𑀺𑀓𑀽𑀝𑀝𑁆𑀞𑁄𑀢𑀺 𑀧𑀓𑀸𑀲𑀺𑀢𑁄. 𑀫𑀸𑀬𑀸𑀦𑀺𑀘𑁆𑀘𑀮𑀬𑀦𑁆𑀢𑀸𑀤𑀻𑀲𑀼 𑀓𑀽𑀝𑀁 𑀯𑀓𑁆𑀔𑀢𑀺 [𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸]. 𑀦𑀺𑀘𑁆𑀘𑀮𑁄 𑀢𑀺𑀝𑁆𑀞𑀢𑀻𑀢𑀺 𑀓𑀽𑀝𑀝𑁆𑀞𑁄, 𑀧𑀩𑁆𑀩𑀢𑁄, 𑀓𑀽𑀝𑀝𑁆𑀞𑁄 𑀯𑀺𑀬 𑀲𑀤𑀸 𑀢𑀺𑀝𑁆𑀞𑀢𑀻𑀢𑀺 𑀓𑀽𑀝𑀝𑁆𑀞𑁄.

𑀤𑁆𑀯𑀬𑀁 𑀮𑀳𑀼𑀓𑁂. 𑀮𑀗𑁆𑀖 𑀕𑀢𑀺 𑀲𑁄𑀲𑀦𑁂𑀲𑀼, 𑀉, 𑀖𑀲𑁆𑀲 𑀳𑀢𑁆𑀢𑀁, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀮𑀳𑀼, 𑀮𑀖𑀼𑀧𑀺. 𑀲𑀁𑀧𑀼𑀩𑁆𑀩𑁂, 𑀲𑀢𑁆𑀣𑀺𑀓𑀓𑀧𑀘𑁆𑀘𑀬𑁂 𑀘 𑀲𑀮𑁆𑀮𑀳𑀼𑀓𑀁. 𑀢𑀺𑀓𑀁 𑀲𑀗𑁆𑀔𑁆𑀬𑀸𑀢𑁂. 𑀔𑁆𑀬𑀸 𑀓𑀣𑀦𑁂. 𑀕𑀡 𑀲𑀗𑁆𑀔𑁆𑀬𑀸𑀦𑁂. 𑀫𑀸 𑀧𑀭𑀺𑀫𑀸𑀡𑁂, 𑀲𑀩𑁆𑀩𑀢𑁆𑀭 𑀢𑁄.

𑁭𑁧𑁧. 𑀢𑀺𑀓𑀁 𑀢𑀺𑀔𑀺𑀡𑁂. 𑀢𑀺𑀚 𑀦𑀺𑀲𑀸𑀦𑁂, 𑀳𑁄, 𑀯𑀡𑁆𑀡𑀯𑀺𑀓𑀸𑀭𑁄, 𑀢𑀺𑀡𑁆𑀳𑀁. 𑀢𑀺𑀚 𑀦𑀺𑀲𑀸𑀦𑁂, 𑀇𑀦𑁄, 𑀚𑀲𑁆𑀲 𑀔𑁄, 𑀡𑀢𑁆𑀢𑀁, 𑀢𑀺𑀔𑀺𑀡𑀁. 𑀢𑀺𑀚𑀢𑁄𑀬𑁂𑀯 𑀯𑁄, 𑀚𑀲𑁆𑀲 𑀯𑁄, 𑀩𑀢𑁆𑀢𑀁, 𑀢𑀺𑀩𑁆𑀩𑀁. 𑀢𑀺𑀓𑀁 𑀘𑀡𑁆𑀟𑁂. 𑀘𑀡𑁆𑀟 𑀓𑁄𑀧𑁂, 𑀘𑀡𑁆𑀟𑀁. 𑀉𑀚𑁆𑀚 𑀩𑀮𑀧𑀸𑀮𑀦𑁂𑀲𑀼, 𑀅, 𑀚𑁆𑀚𑀲𑁆𑀲 𑀕𑁆𑀕𑁄, 𑀉𑀕𑁆𑀕𑀁. 𑀔𑀭 𑀯𑀺𑀦𑀸𑀲𑁂, 𑀅, 𑀔𑀭𑀁.

𑀘𑀢𑀼𑀓𑁆𑀓𑀁 𑀚𑀗𑁆𑀕𑀫𑁂. 𑀕𑀫𑀼 𑀕𑀫𑀦𑁂, 𑀤𑁆𑀯𑀺𑀢𑁆𑀢𑀸𑀤𑀺, 𑀚𑀗𑁆𑀕𑀫𑀁. 𑀘𑀭 𑀕𑀫𑀦𑁂, 𑀅, 𑀘𑀭𑀁. 𑀢𑀲𑀢𑀺 𑀘𑀮𑀢𑀻𑀢𑀺 𑀢𑀲𑀁, 𑀢𑀲 𑀉𑀩𑁆𑀩𑁂𑀕𑁂, 𑀉𑀩𑁆𑀩𑁂𑀕𑁄 𑀪𑀬𑀁, 𑀘𑀮𑀦𑀜𑁆𑀘. 𑀘𑀭𑀪𑀺𑀲𑁆𑀫𑀸 𑀘𑀭𑁄, 𑀫𑀚𑁆𑀛𑁂 𑀤𑀻𑀖𑁄, 𑀘𑀭𑀸𑀘𑀭𑀁, 𑀅𑀩𑁆𑀪𑀸𑀲𑀦𑁆𑀢𑁂 𑀯𑀸 𑀭𑀸𑀕𑀫𑁄, 𑀘𑀭𑀸𑀘𑀭𑀁, 𑀲𑀩𑁆𑀩𑀢𑁆𑀭 𑀅𑀧𑀘𑁆𑀘𑀬𑁄. 𑀇𑀗𑁆𑀕𑀫𑁆𑀧𑀺, 𑀇𑀗𑁆𑀕𑀢𑀻𑀢𑀺 𑀇𑀗𑁆𑀕𑁄, 𑀇𑀗𑁆𑀕 𑀕𑀫𑀦𑁂.

𑁭𑁧𑁨-𑁭𑁧𑁩. 𑀤𑁆𑀯𑀬𑀁 𑀘𑀮𑀦𑀫𑀢𑁆𑀢𑁂. 𑀓𑀫𑁆𑀧 𑀘𑀮𑀦𑁂. 𑀘𑀮 𑀓𑀫𑁆𑀧𑀦𑁂, 𑀲𑀩𑁆𑀩𑀢𑁆𑀭 𑀓𑀢𑁆𑀢𑀭𑀺 𑀬𑀼.

𑀤𑁆𑀯𑀬𑀁 𑀅𑀥𑀺𑀓𑁂. 𑀅𑀢𑀺𑀭𑀺𑀘𑁆𑀘𑀢𑀻𑀢𑀺 𑀅𑀢𑀺𑀭𑀺𑀢𑁆𑀢𑁄, 𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑀕𑀢𑀻𑀲𑀼, 𑀢𑁄, 𑀪𑀼𑀚𑀸𑀤𑀺. 𑀅𑀥𑀺 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀅𑀥𑀺𑀓𑁄, 𑀇 𑀕𑀫𑀦𑁂, 𑀓𑁄.

𑀚𑀗𑁆𑀕𑀫𑀸 𑀧𑀸𑀡𑀺𑀢𑁄 𑀅𑀜𑁆𑀜𑁄 𑀣𑀸𑀯𑀭𑁄 𑀦𑀸𑀫, 𑀢𑀺𑀝𑁆𑀞𑀢𑀻𑀢𑀺 𑀣𑀸𑀯𑀭𑁄, 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁, 𑀯𑀭𑁄, 𑀯𑀡𑁆𑀡𑀯𑀺𑀓𑀸𑀭𑁄, 𑀣𑀸𑀯𑀭𑁄, 𑀞𑀸𑀯𑀭𑁄𑀧𑀻𑀢𑁆𑀬𑁂𑀓𑁂.

𑀘𑀢𑀼𑀓𑁆𑀓𑀁 𑀮𑁄𑀮𑁂. 𑀮𑁄𑀮 𑀉𑀫𑁆𑀫𑀸𑀤𑀦𑁂. 𑀘𑀮 𑀓𑀫𑁆𑀧𑀦𑁂, 𑀤𑁆𑀯𑀺𑀢𑁆𑀢𑀸𑀤𑀺, 𑀘𑀜𑁆𑀘𑀮𑀁. 𑀢𑀭 𑀧𑁆𑀮𑀯𑀦𑀢𑀭𑀡𑁂𑀲𑀼, 𑀢𑀭𑀁 𑀮𑀸𑀢𑀻𑀢𑀺 𑀢𑀭𑀮𑀁, 𑀏𑀢𑁂 𑀘𑀮𑀦𑀫𑀢𑁆𑀢𑁂𑀧𑀺.

𑀘𑀢𑀼𑀓𑁆𑀓𑀁 𑀧𑀼𑀭𑀸𑀡𑁂. 𑀧𑀼𑀭𑁂 𑀪𑀯𑁄 𑀧𑀼𑀭𑀸𑀡𑁄, 𑀬𑀤𑀸𑀤𑀺𑀦𑀸 𑀦𑀧𑀘𑁆𑀘𑀬𑁄, 𑀡𑀢𑁆𑀢𑀁. 𑀧𑀼𑀭𑀸 𑀪𑀯𑁄 𑀧𑀼𑀭𑀸𑀢𑀦𑁄, 𑀢𑀦𑀧𑀘𑁆𑀘𑀬𑁄. 𑀲𑀦𑀁𑀲𑀤𑁆𑀤𑁄 𑀇𑀳 𑀲𑀢𑁆𑀢𑀫𑁆𑀬𑀦𑁆𑀢𑁄 𑀧𑀼𑀭𑀸𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁆𑀭 𑀪𑀯𑁄 𑀲𑀦𑀦𑁆𑀢𑀦𑁄, 𑀧𑀼𑀩𑁆𑀩𑁂 𑀯𑀺𑀬 𑀲𑀦𑀁𑀲𑀤𑁆𑀤𑁄 𑀯𑀸, 𑀢𑀢𑁆𑀭𑀸𑀧𑀺 𑀧𑀼𑀩𑁆𑀩𑁂 𑀯𑀺𑀬 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀘𑀺𑀭𑀁𑀲𑀤𑁆𑀤𑁄 𑀦𑀺𑀧𑀸𑀢𑁄 𑀲𑀢𑁆𑀢𑀫𑁆𑀬𑀦𑁆𑀢𑁄 𑀧𑀼𑀭𑀸𑀡𑀢𑁆𑀣𑁄 𑀇𑀳 𑀕𑀬𑁆𑀳𑀢𑁂, 𑀢𑀢𑁆𑀭 𑀪𑀯𑁄 𑀘𑀺𑀭𑀦𑁆𑀢𑀦𑁄. 𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀘𑀺𑀭𑀓𑀸𑀮𑀸𑀤𑀻𑀲𑀼.

𑀘𑀢𑀼𑀓𑁆𑀓𑀁 𑀅𑀪𑀺𑀦𑀯𑁂. 𑀧𑀢𑀺𑀢𑁄 𑀅𑀕𑁆𑀕𑁄 𑀬𑀲𑁆𑀲 𑀧𑀘𑁆𑀘𑀕𑁆𑀖𑁄, 𑀕𑀲𑁆𑀲 𑀖𑁄, 𑀩𑀳𑀼𑀓𑁄 𑀯𑀸 𑀅𑀕𑁆𑀖𑁄 𑀬𑀲𑁆𑀲 𑀧𑀘𑁆𑀘𑀕𑁆𑀖𑁄, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀳𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀩𑀳𑀼𑀓𑀢𑁆𑀣𑁄 𑀏𑀢𑁆𑀣 𑀧𑀢𑀺𑀲𑀤𑁆𑀤𑁄. 𑀦𑀯𑀲𑀤𑁆𑀤𑀸𑀲𑀓𑀢𑁆𑀣𑁂 𑀢𑀦𑁄, 𑀦𑀯𑀲𑁆𑀲 𑀦𑀼𑀪𑀸𑀯𑁄 𑀘. 𑀦𑀯𑁄 𑀏𑀯 𑀅𑀪𑀺𑀦𑀯𑁄, 𑀦𑀼 𑀣𑀼𑀢𑀺𑀬𑀁, 𑀅, 𑀦𑀯𑁄.

𑁭𑁧𑁪-𑁭𑁧𑁫. 𑀧𑀜𑁆𑀘𑀓𑀁 𑀓𑀓𑁆𑀔𑀴𑁂. 𑀓𑀦𑁆𑀢𑀢𑀻𑀢𑀺 𑀓𑀼𑀭𑀽𑀭𑀁, 𑀊𑀭𑁄, 𑀓𑀦𑁆𑀢𑀲𑁆𑀲 𑀘 𑀓𑀼𑀭𑀸𑀤𑁂𑀲𑁄, 𑀓𑀭 𑀳𑀺𑀁𑀲𑀸𑀬𑀁 𑀯𑀸, 𑀊𑀭𑁄, 𑀅𑀲𑁆𑀲𑀼. 𑀓𑀞 𑀓𑀺𑀘𑁆𑀙𑀚𑀻𑀯𑀦𑁂, 𑀫𑀼𑀤𑁆𑀥𑀚𑀤𑀼𑀢𑀺𑀬𑀦𑁆𑀢𑁄 𑀥𑀸𑀢𑀼, 𑀇𑀦𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁂 𑀓𑀣𑀺𑀦𑀦𑁆𑀢𑀺𑀧𑀺. 𑀤𑀮 𑀯𑀺𑀤𑀸𑀭𑀡𑁂, 𑀳𑁄, 𑀴𑀢𑁆𑀢𑀁, 𑀩𑀳 𑀯𑀼𑀤𑁆𑀥𑀺𑀫𑁆𑀳𑀺 𑀯𑀸, 𑀩𑀲𑁆𑀲 𑀤𑁄, 𑀴𑀦𑁆𑀢𑁄 𑀘, 𑀤𑀴𑁆𑀳𑀁 𑀤𑀳 𑀪𑀲𑁆𑀫𑀻𑀓𑀭𑀡𑁂 𑀯𑀸, 𑀅, 𑀴𑀦𑁆𑀢𑁄 𑀘. 𑀦𑀺𑀝𑁆𑀞𑀸𑀢𑀻𑀢𑀺 𑀦𑀺𑀝𑁆𑀞𑀼𑀭𑀁, 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁, 𑀉𑀭𑁄. 𑀓𑀓𑁆𑀔 𑀳𑀲𑀦𑁂, 𑀅𑀮𑁄, 𑀴𑀢𑁆𑀢𑀁. 𑀓𑀞𑁄𑀭𑀁, 𑀚𑀭𑀞𑀁, 𑀫𑀼𑀢𑁆𑀢𑀺𑀫𑀁, 𑀫𑀼𑀢𑁆𑀢𑀫𑁆𑀧𑀺, 𑀓𑀞 𑀓𑀺𑀘𑁆𑀙𑀚𑀻𑀯𑀦𑁂, 𑀑𑀭𑁄. 𑀚𑀭 𑀚𑀻𑀭𑀡𑁂, 𑀪𑀽𑀯𑀸𑀤𑀺, 𑀞𑁄. 𑀫𑀼𑀢𑁆𑀢𑀺 𑀓𑀣𑀺𑀦𑁆𑀬𑀁, 𑀢𑀁𑀬𑁄𑀕𑀸 𑀫𑀼𑀢𑁆𑀢𑀺𑀫𑀁. 𑀅𑀧𑀘𑁆𑀘𑀬𑁂 𑀫𑀼𑀢𑁆𑀢𑀁.

𑀲𑀢𑁆𑀢𑀓𑀁 𑀅𑀦𑁆𑀢𑁂. 𑀅𑀫 𑀕𑀫𑀦𑁂, 𑀢𑁄, 𑀅𑀦𑁆𑀢𑁄, 𑀅𑀦𑀺𑀢𑁆𑀣𑀻. 𑀧𑀭𑀺𑀧𑀼𑀩𑁆𑀩𑁄 𑀧𑀭𑀺𑀬𑀦𑁆𑀢𑁄. 𑀧𑀧𑀼𑀩𑁆𑀩𑁄 𑀧𑀦𑁆𑀢𑁄. 𑀧𑀘𑁆𑀙𑀸 𑀪𑀯𑁄 𑀧𑀘𑁆𑀙𑀺𑀫𑁄. 𑀅𑀦𑁆𑀢𑁂 𑀪𑀯𑁄 𑀅𑀦𑁆𑀢𑀺𑀫𑁄, 𑀇𑀫𑁄. 𑀚𑀖𑀦𑁂 𑀲𑀸𑀥𑀼 𑀚𑀺𑀖𑀜𑁆𑀜𑀁, 𑀬𑁄, 𑀅𑀲𑁆𑀲𑀺. 𑀘𑀭𑀢𑀺𑀲𑁆𑀫𑀸 𑀇𑀫𑁄. 𑀘𑀭𑀺𑀫𑀁, 𑀘𑀭𑀲𑀤𑁆𑀤𑀸 𑀯𑀸 𑀇𑀫𑁄.

𑀘𑀢𑀼𑀓𑁆𑀓𑀁 𑀧𑀞𑀫𑁂. 𑀧𑀼𑀩𑁆𑀩 𑀧𑀽𑀭𑀡𑁂, 𑀅. 𑀅𑀕𑁆𑀕𑀁 𑀲𑁂𑀝𑁆𑀞𑁂𑀧𑀺 𑀯𑀼𑀢𑁆𑀢𑀁. 𑀧𑀞 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀅𑀫𑁄, 𑀧𑀣 𑀲𑀗𑁆𑀔𑁆𑀬𑀸𑀦𑁂 𑀯𑀸, 𑀅𑀫𑁄, 𑀯𑀡𑁆𑀡𑀯𑀺𑀓𑀸𑀭𑁄, 𑀧𑀞𑀫𑀁, 𑀧𑀣𑀫𑀦𑁆𑀢𑀺𑀧𑀺. 𑀆𑀤𑀻𑀬𑀢𑁂 𑀧𑀞𑀫𑀁 𑀕𑀡𑁆𑀳𑀻𑀬𑀢𑁂𑀢𑀺 𑀆𑀤𑀺, 𑀇, 𑀧𑀼𑀫𑁂, 𑀲𑁄𑀲𑀤𑁆𑀤𑁄 𑀆𑀤𑀺𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀚𑁄𑀢𑀓𑁄, 𑀧𑀼𑀭𑀺𑀫𑀁, 𑀧𑀼𑀭𑀢𑁆𑀣𑀸𑀧𑀺, 𑀪𑀯𑀢𑁆𑀣𑁂 𑀇𑀫𑀢𑁆𑀣𑀸.

𑀤𑁆𑀯𑀬𑀁 𑀅𑀦𑀼𑀘𑁆𑀙𑀯𑀺𑀓𑁂. 𑀧𑀝𑀺𑀕𑁆𑀕𑀳𑀺𑀢𑁄 𑀭𑀽𑀧𑁄 𑀧𑀢𑀺𑀭𑀽𑀧𑁄. 𑀙𑀯𑀺𑀬𑀸 𑀅𑀦𑀼𑀭𑀽𑀧𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀲𑀓𑀢𑁆𑀣𑁂 𑀓𑁄.

𑀤𑁆𑀯𑀬𑀁 𑀦𑀺𑀭𑀢𑁆𑀣𑀓𑁂. 𑀫𑀽𑀳 𑀯𑁂𑀘𑀺𑀢𑁆𑀢𑁂, 𑀅, 𑀳𑀲𑁆𑀲 𑀖𑁄. 𑀦𑀢𑁆𑀣𑀺 𑀅𑀢𑁆𑀣𑁄 𑀬𑀲𑁆𑀲, 𑀲𑀓𑀢𑁆𑀣𑁂 𑀓𑁄.

𑁭𑁧𑁬. 𑀤𑁆𑀯𑀬𑀁 𑀧𑀸𑀓𑀝𑁂. 𑀯𑀺𑀲𑀺𑀝𑁆𑀞𑁄 𑀅𑀢𑁆𑀢𑀸 𑀬𑀲𑁆𑀲 𑀩𑁆𑀬𑀢𑁆𑀢𑀁. 𑀧𑀼𑀝 𑀧𑀓𑀸𑀲𑀦𑁂, 𑀧𑀼𑀝 𑀯𑀺𑀓𑀸𑀲𑀦𑁂 𑀯𑀸.

𑀢𑀺𑀓𑀁 𑀫𑀼𑀤𑀼𑀫𑁆𑀳𑀺. 𑀫𑀼𑀤 𑀫𑁄𑀤𑀦𑁂, 𑀉, 𑀫𑀼𑀤 𑀲𑀁𑀲𑀕𑁆𑀕𑁂 𑀯𑀸. 𑀲𑁄𑀪𑀦𑀁 𑀓𑀼𑀫𑀸𑀭𑀁 𑀓𑀦𑁆𑀢𑀺 𑀬𑀲𑁆𑀲. 𑀓𑀼 𑀲𑀤𑁆𑀤𑁂, 𑀅𑀮𑁄, 𑀫𑀦𑁆𑀢𑁄 𑀘.

𑀤𑁆𑀯𑀬𑀁 𑀇𑀦𑁆𑀤𑁆𑀭𑀺𑀬𑀕𑁆𑀕𑀬𑁆𑀳𑁂. 𑀅𑀓𑁆𑀔𑀁 𑀇𑀦𑁆𑀤𑁆𑀭𑀺𑀬𑀁 𑀧𑀢𑀺𑀕𑀢𑀁 𑀦𑀺𑀲𑁆𑀲𑀺𑀢𑀁, 𑀅𑀓𑁆𑀔𑁂𑀦 𑀯𑀸 𑀧𑀢𑀺𑀕𑀢𑀁 𑀧𑀘𑁆𑀘𑀓𑁆𑀔𑀁, 𑀓𑀢𑁂 𑀲𑀫𑀸𑀲𑁂 𑀧𑀢𑀺𑀲𑀤𑁆𑀤𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄 𑀅𑀪𑀺𑀥𑀸𑀦𑀢𑁄. 𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀸𑀤𑀺𑀓𑀁, 𑀢𑁂𑀦 𑀕𑀬𑁆𑀳𑀁 𑀇𑀦𑁆𑀤𑁆𑀭𑀺𑀬𑀕𑁆𑀕𑀬𑁆𑀳𑀁.

𑀤𑁆𑀯𑀬𑀁 𑀅𑀧𑀘𑁆𑀘𑀓𑁆𑀔𑁂. 𑀧𑀘𑁆𑀘𑀓𑁆𑀔𑀯𑀺𑀧𑀭𑀻𑀢𑀁 𑀅𑀧𑀘𑁆𑀘𑀓𑁆𑀔𑀁, 𑀧𑀭𑀫𑀸𑀡𑁆𑀯𑀸𑀤𑀺. 𑀇𑀦𑁆𑀤𑁆𑀭𑀺𑀬𑀁 𑀅𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀦𑁆𑀤𑁆𑀭𑀺𑀬𑀁.

𑁭𑁧𑁭. 𑀘𑀢𑀼𑀓𑁆𑀓𑀁 𑀅𑀜𑁆𑀜𑀢𑁆𑀣𑁂. 𑀇𑀢𑀭𑀲𑀤𑁆𑀤𑁄 𑀧𑀸𑀝𑀺𑀧𑀤𑀺𑀓𑁄 𑀅𑀜𑁆𑀜𑀢𑁆𑀣𑀯𑀸𑀘𑀓𑁄, 𑀇𑀤𑀁𑀲𑀤𑁆𑀤𑀸 𑀯𑀸 𑀢𑀭𑁄 𑀅𑀜𑁆𑀜𑀢𑁆𑀣𑁂, 𑀤𑀁𑀮𑁄𑀧𑁄 𑀘. 𑀅𑀜𑁆𑀜𑀲𑀤𑁆𑀤𑀸 𑀲𑀓𑀢𑁆𑀣𑁂 𑀢𑀭𑁄. 𑀏𑀓𑁄 𑀲𑁂𑀝𑁆𑀞𑁂𑀧𑀺 𑀯𑀼𑀢𑁆𑀢𑁄. 𑀅𑀜𑁆𑀜𑀲𑀤𑁆𑀤𑁄 𑀧𑀸𑀝𑀺𑀧𑀤𑀺𑀓𑁄 𑀪𑀺𑀦𑁆𑀦𑀢𑁆𑀣𑁄, 𑀦 𑀜𑀸𑀬𑀢𑁂𑀢𑀺 𑀯𑀸 𑀅𑀜𑁆𑀜𑁄.

𑀢𑀺𑀓𑀁 𑀦𑀸𑀦𑀧𑁆𑀧𑀓𑀸𑀭𑁂. 𑀩𑀳𑀯𑁄 𑀯𑀺𑀥𑀸 𑀧𑀓𑀸𑀭𑀸 𑀅𑀲𑁆𑀲 𑀩𑀳𑀼𑀯𑀺𑀥𑁄. 𑀯𑀺𑀘𑀺𑀢𑁆𑀢𑀸 𑀯𑀺𑀥𑀸 𑀬𑀲𑁆𑀲 𑀯𑀺𑀯𑀺𑀥𑁄.

𑀤𑁆𑀯𑀬𑀁 𑀅𑀦𑀺𑀯𑀸𑀭𑀺𑀢𑁂. 𑀦𑀢𑁆𑀣𑀺 𑀩𑀸𑀥𑁄 𑀦𑀺𑀲𑁂𑀥𑁄 𑀬𑀲𑁆𑀲 𑀅𑀩𑀸𑀥𑀁. 𑀦𑀢𑁆𑀣𑀺 𑀅𑀕𑁆𑀕𑀴𑀁 𑀅𑀲𑁆𑀲.

𑁭𑁧𑁮. 𑀘𑀢𑀼𑀓𑁆𑀓𑀁 𑀅𑀲𑀳𑀸𑀬𑁂. 𑀅𑀲𑀳𑀸𑀬𑀢𑁆𑀣𑁂 𑀏𑀓𑀢𑁄 𑀆𑀓𑀻, 𑀘𑁆𑀘𑁄, 𑀓𑁄 𑀘, 𑀏𑀓𑀸𑀓𑀻, 𑀏𑀓𑀘𑁆𑀘𑁄. 𑀅𑀜𑁆𑀜𑀢𑁆𑀣𑁂𑀧𑀺 𑀏𑀓𑀓𑁄 𑀯𑀼𑀢𑁆𑀢𑁄. 𑀲𑀫𑀸 𑀢𑀼𑀮𑁆𑀬𑀢𑁆𑀣𑀸.

𑀅𑀦𑁂𑀓𑀲𑀫𑁆𑀩𑀦𑁆𑀥𑀺𑀦𑀺 𑀲𑀸𑀥𑀸𑀭𑀡𑀸𑀤𑀺𑀤𑁆𑀯𑀬𑀁. 𑀲𑀳 𑀆𑀥𑀸𑀭𑀡𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀥𑀸𑀭𑀡𑀁, 𑀬𑀤𑀸𑀤𑀺, 𑀣𑀺𑀬𑀁 𑀲𑀸𑀥𑀸𑀭𑀡𑀻, 𑀲𑀸𑀥𑀸𑀭𑀡𑀸 𑀘. 𑀲𑀫𑀸𑀦𑀫𑁂𑀯 𑀲𑀸𑀫𑀜𑁆𑀜𑀁, 𑀬𑁄, 𑀲𑀸𑀫𑀜𑁆𑀜𑀸 𑀇𑀢𑁆𑀣𑀺𑀬𑀁.

𑀤𑁆𑀯𑀬𑀁 𑀅𑀧𑁆𑀧𑀸𑀯𑀓𑀸𑀲𑁂. 𑀲𑀫𑁆𑀩𑀸𑀥𑀢𑁂 𑀅𑀲𑁆𑀫𑀺𑀁, 𑀭𑁄. 𑀲𑀁𑀲𑀤𑁆𑀤𑀸 𑀓𑀝𑁄, 𑀬𑀤𑀸𑀤𑀺, 𑀲𑀗𑁆𑀓𑀝𑀁, 𑀲𑀳 𑀆𑀯𑀭𑀡𑁂𑀦 𑀯𑀢𑁆𑀢𑀢𑀻𑀢𑀺 𑀯𑀸 𑀲𑀗𑁆𑀓𑀝𑀁, 𑀲𑀳𑀢𑁆𑀣𑁄 𑀲𑀁𑀲𑀤𑁆𑀤𑁄.

𑁭𑁧𑁯. 𑀯𑀸𑀫𑀁 𑀓𑀴𑁂𑀯𑀭𑀁 𑀯𑀸𑀫𑀓𑀸𑀬𑁄 𑀲𑀩𑁆𑀬𑀁 𑀦𑀸𑀫. ‘‘𑀲𑀩𑁆𑀬𑀁 𑀯𑀸𑀫𑁂 𑀘 𑀤𑀓𑁆𑀔𑀺𑀡𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁨𑁧.𑁮𑁪] 𑀳𑀺 𑀅𑀚𑀬𑁄, 𑀲𑀯 𑀕𑀢𑀺𑀬𑀁, 𑀬𑁄. 𑀤𑀓𑁆𑀔𑀺𑀡𑀁 𑀓𑀴𑁂𑀯𑀭𑀁 𑀅𑀧𑀲𑀩𑁆𑀬𑀁, 𑀲𑀩𑁆𑀬𑀢𑁄 𑀅𑀧𑀕𑀢𑀁 𑀅𑀧𑀲𑀩𑁆𑀬𑀁.

𑀤𑁆𑀯𑀬𑀁 𑀯𑀺𑀧𑀭𑀻𑀢𑁂. 𑀧𑀝𑀺𑀓𑀽𑀮𑀢𑀺 𑀆𑀯𑀭𑀢𑀻𑀢𑀺 𑀧𑀝𑀺𑀓𑀽𑀮𑀁, 𑀓𑀽𑀮 𑀆𑀯𑀭𑀡𑁂. 𑀅𑀧𑀲𑀩𑁆𑀬𑀁 𑀤𑀓𑁆𑀔𑀺𑀡𑁂𑀧𑀺 𑀯𑀼𑀢𑁆𑀢𑀁.

𑀤𑀼𑀭𑀥𑀺𑀕𑀫𑀦𑁆𑀢𑁄 𑀧𑀣𑀁 𑀕𑀳𑀦𑀁, 𑀬𑀣𑀸 𑁋 𑀕𑀳𑀦𑀫𑁂𑀢𑀁 𑀲𑀢𑁆𑀣𑀁, 𑀤𑀼𑀩𑁆𑀩𑀺𑀯𑁂𑀓𑀫𑀺𑀘𑁆𑀘𑀢𑁆𑀣𑁄. 𑀕𑀘𑁆𑀙𑀦𑁆𑀢𑀁 𑀳𑀦𑁆𑀢𑀻𑀢𑀺 𑀕𑀳𑀦𑀁, 𑀕𑀳𑀡𑀫𑁆𑀧𑀺, 𑀬𑀤𑀸𑀤𑀺. 𑀓𑀮 𑀕𑀫𑀦𑁂, 𑀇𑀮𑁄, 𑀓𑀮𑀺𑀁 𑀮𑀸𑀢𑀻𑀢𑀺 𑀯𑀸 𑀓𑀮𑀺𑀮𑀁.

𑁭𑁨𑁦-𑁭𑁨𑁧. 𑀤𑁆𑀯𑀬𑀁 𑀩𑀳𑀼𑀧𑁆𑀧𑀓𑀸𑀭𑁂. 𑀉𑀘𑁆𑀘𑀜𑁆𑀘 𑀢𑀁 𑀅𑀯𑀘𑀜𑁆𑀘𑁂𑀢𑀺 𑀉𑀘𑁆𑀘𑀸𑀯𑀘𑀁, 𑀓𑀫𑁆𑀫𑀥𑀸𑀭𑀬𑁄. 𑀩𑀳𑀯𑁄 𑀪𑁂𑀤𑀸 𑀅𑀲𑁆𑀲.

𑀢𑀺𑀓𑀁 𑀚𑀦𑀸𑀤𑀺𑀦𑀺𑀭𑀦𑁆𑀢𑀭𑀕𑀢𑁂. 𑀲𑀗𑁆𑀓 𑀲𑀗𑁆𑀓𑀸𑀬𑀁, 𑀢𑁄. 𑀓𑀺𑀭 𑀧𑀓𑁆𑀔𑁂𑀧𑀯𑀺𑀓𑁆𑀔𑀺𑀧𑀦𑁂𑀲𑀼, 𑀢𑁄, 𑀇𑀡𑁆𑀡𑀸𑀤𑁂𑀲𑁄. 𑀲𑀗𑁆𑀓 𑀲𑀗𑁆𑀓𑀸𑀬𑀁, 𑀉𑀮𑁄, 𑀲𑀗𑁆𑀓𑀼𑀮𑀁, 𑀲𑀁𑀧𑀼𑀩𑁆𑀩𑁄 𑀓𑀼𑀮 𑀲𑀦𑁆𑀢𑀸𑀦𑁂 𑀯𑀸, 𑀭𑁄.

𑀲𑀺𑀮𑁄𑀓𑁄 𑀙𑁂𑀓𑁂. 𑀓𑀢𑁄 𑀅𑀪𑁆𑀬𑀸𑀲𑀺𑀢𑁄 𑀳𑀢𑁆𑀣𑁄 𑀧𑀤𑀢𑁆𑀣𑁄 𑀬𑁂𑀦 𑀓𑀢𑀳𑀢𑁆𑀣𑁄. 𑀓𑀼𑀲 𑀲𑀺𑀮𑁂𑀲𑀦𑁂, 𑀅𑀮𑁄. 𑀧𑀓𑀝𑁆𑀞𑀸 𑀯𑀻𑀡𑀸 𑀅𑀲𑁆𑀲. 𑀅𑀪𑀺𑀚𑀸𑀦𑀸𑀢𑀺 𑀅𑀪𑀺𑀜𑁆𑀜𑁄. 𑀲𑀺𑀓𑁆𑀔 𑀯𑀺𑀚𑁆𑀚𑁄𑀧𑀸𑀤𑀸𑀦𑁂, 𑀢𑁄. 𑀧𑀼𑀡 𑀓𑀫𑁆𑀫𑀦𑀺 𑀲𑀼𑀪𑁂, 𑀭𑁄. 𑀧𑀝 𑀕𑀫𑀦𑁂, 𑀉. 𑀙𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂, 𑀓𑀢𑁆𑀢𑀭𑀺 𑀅, 𑀤𑀲𑁆𑀲 𑀓𑁄. 𑀘𑀢 𑀬𑀸𑀘𑀦𑁂, 𑀉𑀭𑁄. 𑀤𑀮 𑀤𑀺𑀢𑁆𑀢𑀺𑀬𑀁, 𑀔𑁄, 𑀮𑀲𑁆𑀲 𑀓𑁄, 𑀤𑀓𑁆𑀔 𑀯𑀼𑀟𑁆𑀠𑀺𑀬𑀁 𑀯𑀸, 𑀅, 𑀤𑀓𑁆𑀔 𑀯𑀼𑀟𑁆𑀠𑀺𑀳𑀺𑀁𑀲𑀸𑀕𑀢𑀺𑀲𑀻𑀖𑁂𑀲𑀼 𑀯𑀸. 𑀧𑀺𑀲 𑀳𑀺𑀁𑀲𑀸𑀩𑀮𑀤𑀸𑀦𑀦𑀺𑀓𑁂𑀢𑀦𑁂𑀲𑀼, 𑀅𑀮𑁄, 𑀧𑁂𑀲𑀮𑁄. 𑀓𑀢𑀫𑀼𑀔𑁄, 𑀓𑀢𑀻𑀧𑀺, 𑀓𑀢𑀲𑀤𑁆𑀤𑁄 𑀅𑀪𑁆𑀬𑀸𑀲𑀺𑀢𑀢𑁆𑀣𑁄, 𑀓𑀢𑀁 𑀅𑀩𑁆𑀬𑀸𑀲𑀺𑀢𑀁 𑀫𑀼𑀔𑀁 𑀉𑀧𑀸𑀬𑁄 𑀅𑀦𑁂𑀦𑀸𑀢𑀺 𑀓𑀢𑀫𑀼𑀔𑁄. 𑀓𑀢𑀁 𑀅𑀲𑁆𑀲𑀢𑁆𑀣𑀻𑀢𑀺 𑀓𑀢𑀻.

𑀲𑀢𑁆𑀢𑀓𑀁 𑀩𑀸𑀮𑁂. 𑀩𑀮 𑀧𑀸𑀡𑀦𑁂, 𑀩𑀮𑀢𑀻𑀢𑀺 𑀩𑀸𑀮𑁄, 𑀅𑀲𑁆𑀲𑀸𑀲𑀺𑀢𑀧𑀲𑁆𑀲𑀸𑀲𑀺𑀢𑀫𑀢𑁆𑀢𑁂𑀦 𑀚𑀻𑀯𑀢𑀺, 𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑁆𑀬𑀢𑁆𑀣𑁄. 𑀤𑀸 𑀓𑀼𑀘𑁆𑀙𑀸𑀬𑀁 𑀕𑀢𑀺𑀬𑀁 𑀯𑀸, 𑀢𑀼, 𑀤𑁆𑀯𑀺𑀢𑁆𑀢𑀁, 𑀭𑀲𑁆𑀲𑀸𑀤𑀺. 𑀚𑀮 𑀥𑀜𑁆𑀜𑁂, 𑀅, 𑀴𑀢𑁆𑀢𑀁. 𑀫𑀽𑀳 𑀯𑁂𑀘𑀺𑀢𑁆𑀢𑁂, 𑀮𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀫𑀽𑀴𑁆𑀳𑁄. 𑀫𑀦𑁆𑀤 𑀚𑀴𑀢𑁆𑀢𑁂. 𑀩𑀸𑀮𑁆𑀬𑀬𑁄𑀕𑀸 𑀩𑀸𑀮𑀺𑀲𑁄, 𑀇𑀲𑁄. 𑀅𑀜𑁆𑀜𑁄, 𑀬𑀣𑀸𑀚𑀸𑀢𑁄𑀧𑀺, 𑀦 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑁄. 𑀬𑀸𑀤𑀺𑀲𑁄 𑀚𑀸𑀢𑁄 𑀯𑀺𑀯𑁂𑀓𑁄 𑀬𑀣𑀸𑀚𑀸𑀢𑁄.

𑁭𑁨𑁨. 𑀢𑀺𑀓𑀁 𑀪𑀸𑀕𑁆𑀬𑀲𑀫𑁆𑀧𑀦𑁆𑀦𑁂. 𑀧𑀼𑀜𑁆𑀜𑀁, 𑀲𑀼𑀓𑀢𑀜𑁆𑀘 𑀬𑀲𑁆𑀫𑀺𑀁 𑀅𑀢𑁆𑀣𑀺 𑀧𑀼𑀜𑁆𑀜𑀯𑀸, 𑀲𑀼𑀓𑀢𑀻, 𑀯𑀦𑁆𑀢𑀼, 𑀈 𑀘. 𑀥𑀦𑀁 𑀕𑀳𑀡𑀁 𑀮𑀤𑁆𑀥𑁄𑀢𑀺 𑀥𑀜𑁆𑀜𑁄, 𑀬𑁄. 𑀤𑁆𑀯𑀬𑀁 𑀫𑀳𑀸𑀯𑀻𑀭𑀺𑀬𑁂. 𑀫𑀳𑀸𑀥𑀺𑀢𑀺 𑀫𑀳𑀸𑀯𑀻𑀭𑀺𑀬𑁄. 𑀤𑁆𑀯𑀬𑀁 𑀫𑀳𑀺𑀘𑁆𑀙𑁂. 𑀫𑀳𑀸𑀲𑀬𑁄𑀧𑀺.

𑀤𑁆𑀯𑀬𑀁 𑀩𑀳𑀼𑀮𑀳𑀤𑀬𑁂, 𑀧𑀲𑀢𑁆𑀣𑀳𑀤𑀬𑁂 𑀘. 𑀳𑀤𑀬𑀁 𑀩𑀳𑀼𑀮𑀁, 𑀧𑀲𑀢𑁆𑀣𑀜𑁆𑀘 𑀬𑀲𑁆𑀲 𑀳𑀤𑀬𑀻, 𑀳𑀤𑀬𑀸𑀮𑀼 𑀘, 𑀢𑀩𑁆𑀩𑀳𑀼𑀮𑁂 𑀈, 𑀆𑀮𑀼 𑀘, 𑀲𑀼𑀳𑀤𑀬𑁄𑀧𑀺.

𑁭𑁨𑁩. 𑀤𑁆𑀯𑀬𑀁 𑀳𑀝𑁆𑀞𑀘𑀺𑀢𑁆𑀢𑁂. ‘‘𑀳𑀸𑀲𑀫𑀦𑁄 𑀯𑀺𑀓𑀼𑀩𑁆𑀩𑀸𑀦𑁄, 𑀧𑀫𑀸𑀦𑁄 𑀳𑀝𑁆𑀞𑀫𑀸𑀦𑀲𑁄’’𑀢𑀺 [𑀅𑀫𑀭 𑁨𑁧.𑁭] 𑀅𑀫𑀭𑀲𑀻𑀳𑁄. 𑀤𑁆𑀯𑀬𑀁 𑀤𑀼𑀫𑁆𑀫𑀦𑁂. 𑀤𑀼𑀝𑁆𑀞𑀁, 𑀤𑀼𑀓𑁆𑀔𑀺𑀢𑀁 𑀯𑀸 𑀫𑀦𑁄 𑀬𑀲𑁆𑀲. 𑀯𑀺𑀭𑀽𑀧𑀁 𑀫𑀦𑁄 𑀬𑀲𑁆𑀲. 𑀅𑀦𑁆𑀢𑀫𑀦𑁄𑀧𑀺.

𑀘𑀢𑀼𑀓𑁆𑀓𑀁 𑀩𑀳𑀼𑀧𑁆𑀧𑀤𑁂. 𑀬𑀸𑀘𑀓𑀸𑀦𑀁 𑀯𑀤𑀁 𑀯𑀘𑀦𑀁 𑀚𑀸𑀦𑀸𑀢𑀻𑀢𑀺 𑀯𑀤𑀸𑀦𑀺𑀬𑁄, 𑀯𑀤𑀜𑁆𑀜𑀽 𑀘, 𑀇𑀬𑁄, 𑀭𑀽 𑀘, 𑀧𑀼𑀩𑁆𑀩𑀢𑁆𑀭𑀜𑁆𑀜𑀲𑁆𑀲 𑀦𑀸𑀤𑁂𑀲𑁄, 𑀫𑀚𑁆𑀛𑀤𑀻𑀖𑁄 𑀘. 𑀤𑀸𑀦𑁂 𑀲𑁄𑀡𑁆𑀟𑁄 𑀧𑀲𑀼𑀢𑁄. 𑀲𑁄𑀡𑁆𑀟𑀲𑀤𑁆𑀤𑁄𑀢𑁆𑀭 𑀫𑀚𑁆𑀚𑀫𑀤𑁂𑀢𑁆𑀬𑁂𑀓𑁂, 𑀣𑀽𑀮𑀮𑀓𑁆𑀔𑁄𑀧𑁆𑀬𑀢𑁆𑀭, 𑀤𑀸𑀦𑀢𑁆𑀣𑀁 𑀣𑀽𑀮𑀁 𑀮𑀓𑁆𑀔𑀁 𑀅𑀲𑁆𑀲.

𑁭𑁨𑁪. 𑀲𑀺𑀮𑁄𑀓𑁄 𑀧𑀸𑀓𑀝𑀫𑀢𑁆𑀢𑁂. 𑀔𑁆𑀬𑀸 𑀧𑀓𑀸𑀲𑀦𑁂, 𑀢𑁄. 𑀧𑀢𑀺𑀧𑀼𑀩𑁆𑀩𑁄 𑀇 𑀕𑀫𑀦𑁂, 𑀢𑁄. 𑀅𑀪𑀺𑀫𑀼𑀔𑀁 𑀏𑀢𑀻𑀢𑀺 𑀧𑀢𑀻𑀢𑁄. 𑀜𑀸 𑀅𑀯𑀩𑁄𑀥𑀦𑁂, 𑀢𑁄, 𑀧𑀜𑁆𑀜𑀸𑀢𑁄, 𑀅𑀪𑀺𑀜𑁆𑀜𑀸𑀢𑁄 𑀘. 𑀧𑀣 𑀔𑁆𑀬𑀸𑀦𑁂. 𑀲𑀼 𑀕𑀢𑀺𑀩𑀼𑀤𑁆𑀥𑀻𑀲𑀼, 𑀢𑁄, 𑀲𑀼𑀢𑁄, 𑀯𑀺𑀲𑁆𑀲𑀼𑀢𑁄 𑀘, 𑀲𑀼 𑀲𑀯𑀦𑁂 𑀯𑀸, 𑀓𑀫𑁆𑀫𑁂 𑀢𑁄. 𑀯𑀺𑀤 𑀜𑀸𑀡𑁂, 𑀯𑀺𑀤𑀺𑀢𑁄. 𑀲𑀺𑀥𑀼 𑀲𑀁𑀭𑀸𑀥𑁂, 𑀢𑁄, 𑀲𑀺𑀥 𑀲𑀁𑀲𑀺𑀤𑁆𑀥𑀺𑀬𑀁 𑀯𑀸. 𑀓𑀝 𑀕𑀢𑀺𑀬𑀁, 𑀤𑀲𑁆𑀲𑀦𑀁 𑀓𑀝𑀢𑀻𑀢𑀺 𑀧𑀸𑀓𑀝𑁄, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑁄.

𑁭𑁨𑁫. 𑀢𑀺𑀧𑀸𑀤𑀁 𑀇𑀲𑁆𑀲𑀭𑁂. 𑀈𑀲 𑀇𑀲𑁆𑀲𑀭𑀺𑀬𑁂, 𑀈𑀲𑀢𑀻𑀢𑀺 𑀇𑀲𑁆𑀲𑀭𑁄, 𑀅𑀭𑁄, 𑀭𑀲𑁆𑀲𑀸𑀤𑀺, 𑀤𑁆𑀯𑀺𑀢𑁆𑀢𑀁. 𑀦𑀻 𑀦𑀬𑁂, 𑀡𑁆𑀯𑀼, 𑀦𑀸𑀬𑀓𑁄. 𑀲𑀁 𑀥𑀦𑀁 𑀅𑀲𑁆𑀲𑀢𑁆𑀣𑀻𑀢𑀺 𑀲𑀸𑀫𑀻, 𑀤𑀻𑀖𑀸𑀤𑀺, 𑀭𑀲𑁆𑀲𑀦𑁆𑀢𑁂 𑀲𑀸𑀫𑀺𑀧𑀺. 𑀧𑀸 𑀭𑀓𑁆𑀔𑀡𑁂,𑀢𑀺, 𑀭𑀲𑁆𑀲𑀸𑀤𑀺, 𑀧𑀢𑀺. 𑀅𑀥𑀺𑀧𑀼𑀩𑁆𑀩𑁂 𑀅𑀥𑀺𑀧𑀢𑀺. 𑀈𑀲 𑀇𑀲𑁆𑀲𑀭𑀺𑀬𑁂, 𑀅, 𑀈𑀲𑁄. 𑀧𑀪𑀯𑀢𑀻𑀢𑀺 𑀧𑀪𑀼, 𑀉, 𑀧𑀪𑀽𑀧𑀺. 𑀅𑀬 𑀕𑀫𑀦𑁂, 𑀬𑁄, 𑀅𑀬𑁆𑀬𑁄. 𑀅𑀥𑀺𑀧𑀸𑀢𑀻𑀢𑀺 𑀅𑀥𑀺𑀧𑁄, 𑀭𑁄. 𑀅𑀥𑀺𑀪𑀯𑀢𑀻𑀢𑀺 𑀅𑀥𑀺𑀪𑀽, 𑀓𑁆𑀯𑀺. 𑀦𑀻 𑀦𑀬𑁂, 𑀭𑀺𑀢𑀼, 𑀦𑁂𑀢𑀸.

𑀢𑀺𑀓𑀁 𑀩𑀳𑀼𑀥𑀦𑁂. 𑀇𑀪𑀁 𑀅𑀭𑀳𑀢𑀻𑀢𑀺 𑀇𑀩𑁆𑀪𑁄, 𑀯𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀛𑁂 𑀘𑀺𑀦𑁆𑀢𑀸𑀬𑀁, 𑀅, 𑀅𑀚𑁆𑀛𑀸𑀬𑀢𑀺 𑀥𑀦𑀁 𑀅𑀟𑁆𑀠𑁄, 𑀛𑀲𑁆𑀲 𑀠𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀭𑀲𑁆𑀲𑀸𑀤𑀺 𑀘. 𑀥𑀦𑀸 𑀅𑀢𑀺𑀲𑀬𑁂 𑀈, 𑀥𑀦𑀻.

𑁭𑁨𑁬. 𑀤𑁆𑀯𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑁂. 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀭𑀳𑀢𑀻𑀢𑀺 𑀤𑀸𑀦𑀸𑀭𑀳𑁄, 𑀤𑀓𑁆𑀔 𑀯𑀼𑀤𑁆𑀥𑀺𑀬𑀁, 𑀲𑀻𑀖𑀢𑁆𑀣𑁂 𑀘, 𑀤𑀓𑁆𑀔𑀦𑁆𑀢𑀺 𑀪𑁄𑀕𑀲𑀫𑁆𑀧𑀤𑀸𑀤𑀻𑀳𑀺 𑀬𑀸𑀬, 𑀲𑀸 𑀤𑀓𑁆𑀔𑀺𑀡𑀸, 𑀇𑀡𑁄, 𑀢𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄.

𑀤𑁆𑀯𑀬𑀁 𑀲𑁆𑀦𑁂𑀳𑀯𑀢𑀺. 𑀲𑀺𑀦𑀺𑀳 𑀧𑀻𑀢𑀺𑀬𑀁, 𑀥𑁄, 𑀳𑀲𑁆𑀲 𑀤𑁄, 𑀲𑀺𑀦𑀺𑀤𑁆𑀥𑁄, 𑀯𑀘𑁆𑀙𑁄 𑀲𑀺𑀦𑁂𑀳𑁄 𑀬𑀲𑁆𑀲𑀢𑁆𑀣𑀺 𑀯𑀘𑁆𑀙𑀮𑁄, 𑀮𑁄.

𑀧𑀫𑀸𑀡𑀺𑀓𑁄 𑀧𑀭𑀺𑀓𑁆𑀔𑀓𑁄, 𑀧𑀭𑀺𑀓𑁆𑀔𑀢𑁂 𑀅𑀯𑀥𑀸𑀭𑀬𑀢𑁂 𑀧𑀫𑀸𑀡𑁂𑀳𑀺 𑀅𑀢𑁆𑀣𑀦𑁆𑀢𑀺 𑀧𑀭𑀺𑀓𑁆𑀔𑀓𑁄, 𑀇𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀼, 𑀡𑁆𑀯𑀼. 𑀓𑀸𑀭𑀡𑀁 𑀚𑀸𑀦𑀸𑀢𑀻𑀢𑀺 𑀓𑀸𑀭𑀡𑀺𑀓𑁄, 𑀇𑀓𑁄.

𑀤𑁆𑀯𑀬𑀁 𑀆𑀲𑀢𑁆𑀢𑁂. 𑀲𑀦𑁆𑀚 𑀲𑀗𑁆𑀕𑁂, 𑀢𑁄. 𑀢𑀁 𑀢𑀁 𑀯𑀢𑁆𑀣𑀼 𑀧𑀭𑀁 𑀧𑀥𑀸𑀦𑀁 𑀅𑀲𑁆𑀲 𑀢𑀧𑁆𑀧𑀭𑁄.

𑁭𑁨𑁭. 𑀢𑀺𑀓𑀁 𑀓𑀸𑀭𑀼𑀡𑀺𑀓𑁂. 𑀓𑀭𑀼𑀡𑀸 𑀲𑀻𑀮𑀁 𑀅𑀲𑁆𑀲 𑀓𑀸𑀭𑀼𑀡𑀺𑀓𑁄. 𑀤𑀬𑀸 𑀓𑀭𑀼𑀡𑀸 𑀬𑀲𑁆𑀲𑀢𑁆𑀣𑀺 𑀤𑀬𑀸𑀮𑀼, 𑀆𑀮𑀼. 𑀤𑀼𑀓𑁆𑀔𑀺𑀢𑁂𑀲𑀼 𑀲𑀼𑀝𑁆𑀞𑀼 𑀭𑀫𑀢𑀻𑀢𑀺 𑀲𑀽𑀭𑀢𑁄, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑀢𑀸.

𑀇𑀝𑁆𑀞𑀢𑁆𑀣𑁂 𑀅𑀪𑀺𑀫𑀢𑀧𑁆𑀧𑀬𑁄𑀚𑀦𑁂 𑀉𑀬𑁆𑀬𑀼𑀢𑁄 𑀧𑀼𑀕𑁆𑀕𑀮𑁄 𑀉𑀲𑁆𑀲𑀼𑀓𑁄 𑀦𑀸𑀫, 𑀉𑀝𑁆𑀞𑀸𑀦𑀁 𑀲𑀼𑀝𑁆𑀞𑀼 𑀓𑀸𑀬𑀢𑀻𑀢𑀺 𑀉𑀲𑁆𑀲𑀼𑀓𑁄, 𑀳𑀲𑀸𑀤𑁆𑀬𑀦𑀼𑀝𑁆𑀞𑁂𑀬𑀁.

𑀬𑁄 𑀆𑀮𑀲𑁆𑀬𑀸𑀯𑀲𑀸𑀤𑀻𑀳𑀺 𑀅𑀦𑀼𑀢𑀺𑀝𑁆𑀞𑀢𑀺, 𑀲𑁄 𑀤𑀻𑀖𑀲𑀼𑀢𑁆𑀢𑁄, 𑀤𑀻𑀖𑀜𑁆𑀘 𑀢𑀁 𑀲𑀼𑀢𑁆𑀢𑀜𑁆𑀘, 𑀢𑀫𑀺𑀯 𑀘𑀭𑀢𑀻𑀢𑀺 𑀤𑀻𑀖𑀲𑀼𑀢𑁆𑀢𑀁, 𑀤𑀻𑀖𑀲𑀼𑀢𑁆𑀢𑀧𑀭𑀺𑀬𑀦𑁆𑀢𑀺𑀓𑀁 𑀓𑀸𑀭𑀺𑀬𑀁 𑀓𑀭𑁄𑀢𑀻𑀢𑀺 𑀤𑀻𑀖𑀲𑀼𑀢𑁆𑀢𑁄. 𑀘𑀺𑀭𑁂𑀦 𑀓𑁆𑀭𑀺𑀬𑀸𑀦𑀼𑀝𑁆𑀞𑀸𑀦𑀁 𑀅𑀲𑁆𑀲.

𑁭𑁨𑁮. 𑀤𑁆𑀯𑀬𑀁 𑀧𑀭𑀸𑀬𑀢𑁆𑀢𑁂, 𑀧𑀭𑀲𑁆𑀫𑀺𑀁, 𑀧𑀭𑁂𑀦 𑀯𑀸 𑀅𑀥𑀻𑀦𑁄 𑀧𑀭𑀸𑀥𑀻𑀦𑁄, 𑀅𑀛𑀦𑁆𑀢𑀸 𑀲𑀓𑀢𑁆𑀣𑁂 𑀇𑀦𑁄 𑀬𑀤𑀸𑀤𑀺𑀦𑀸. 𑀧𑀭𑀢𑀦𑁆𑀢𑁄, 𑀧𑀭𑀯𑀸, 𑀅𑀢𑁆𑀢𑀯𑀸𑀧𑀺 [𑀦𑀸𑀣𑀯𑀸 (𑀅𑀫𑀭 𑁨𑁧.𑁨𑁬], 𑀢𑀦𑁆𑀢𑀬𑀢𑀻𑀢𑀺 𑀢𑀦𑁆𑀢𑁄, 𑀢𑀦𑁆𑀢 𑀓𑀼𑀝𑀼𑀫𑁆𑀩𑀥𑀸𑀭𑀡𑁂, 𑀅, 𑀧𑀭𑁄 𑀢𑀦𑁆𑀢𑁄 𑀦𑀺𑀬𑀸𑀫𑀓𑁄 𑀬𑀲𑁆𑀲. 𑀧𑀭𑁄 𑀲𑁂𑀝𑁆𑀞𑁄 𑀦𑀸𑀬𑀓𑁄, 𑀅𑀢𑁆𑀢𑀸 𑀘 𑀅𑀢𑁆𑀣𑀻𑀢𑀺 𑀧𑀭𑀯𑀸, 𑀅𑀢𑁆𑀢𑀯𑀸 𑀘, 𑀯𑀦𑁆𑀢𑀼.

𑀆𑀬𑀢𑁆𑀢𑀢𑀸𑀫𑀢𑁆𑀢𑁂 𑀘𑀢𑀼𑀓𑁆𑀓𑀁. 𑀬𑀢 𑀧𑀬𑀢𑀦𑁂, 𑀆𑀧𑀼𑀩𑁆𑀩𑁄 𑀅𑀯𑀲𑀻𑀪𑀸𑀯𑁂, 𑀢𑁄. 𑀅𑀦𑁆𑀢𑁂𑀦 𑀲𑀫𑀻𑀧𑁂𑀦 𑀲𑀳𑀸𑀢𑀺 𑀲𑀦𑁆𑀢𑀓𑁄, 𑀲𑀓𑀢𑁆𑀣𑁂 𑀓𑁄. 𑀧𑀭𑀺𑀕𑁆𑀕𑀬𑁆𑀳𑀢𑁂 ‘‘𑀲𑀓’’𑀦𑁆𑀢𑀺 𑀓𑀭𑀻𑀬𑀢𑁂𑀢𑀺 𑀧𑀭𑀺𑀕𑁆𑀕𑀳𑁄. 𑀅𑀥𑀺𑀕𑀢𑁄 𑀇𑀦𑁄 𑀧𑀪𑀽 𑀬𑁂𑀦𑀸𑀢𑀺 𑀅𑀥𑀻𑀦𑁄.

𑀲𑁂𑀦 𑀅𑀢𑁆𑀢𑀦𑀸 𑀈𑀭𑀺𑀢𑀁 𑀲𑀻𑀮𑀁 𑀅𑀲𑁆𑀲𑀸𑀢𑀺 𑀲𑁂𑀭𑀻, 𑀢𑀲𑁆𑀫𑀺𑀁 𑀲𑁂𑀭𑀺𑀦𑀺 𑀘 𑀲𑀘𑁆𑀙𑀦𑁆𑀤𑁄 𑀯𑀢𑁆𑀢𑀢𑀺, 𑀲𑀲𑁆𑀲 𑀅𑀢𑁆𑀢𑀦𑁄 𑀙𑀦𑁆𑀤𑁄 𑀬𑀲𑁆𑀲𑀢𑁆𑀣𑀻𑀢𑀺 𑀲𑀘𑁆𑀙𑀦𑁆𑀤𑁄, 𑀅. 𑀲𑀯𑀲𑁄, 𑀲𑀬𑀁𑀯𑀲𑀻, 𑀦𑀺𑀭𑀯𑀕𑁆𑀕𑀳𑁄𑀧𑀺.

𑁭𑁨𑁯. 𑀕𑀼𑀡𑀤𑁄𑀲𑁂 𑀅𑀦𑀺𑀲𑀫𑁆𑀫 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑁄 𑀓𑀭𑁄𑀢𑀺, 𑀲𑁄 𑀚𑀫𑁆𑀫𑁄, 𑀚𑀫 𑀅𑀤𑀦𑁂, 𑀫𑁄.

𑀤𑁆𑀯𑀬𑀁 𑀅𑀢𑀺𑀢𑀡𑁆𑀳𑁂. 𑀮𑀼𑀪 𑀮𑁄𑀪𑁂, 𑀅, 𑀤𑁆𑀯𑀺𑀢𑁆𑀢𑀁, 𑀪𑀲𑁆𑀲 𑀧𑁄, 𑀮𑁄𑀮𑀼𑀧𑁄, 𑀮𑁄𑀮𑀼𑀪𑁄𑀧𑀺.

𑀢𑀺𑀓𑀁 𑀮𑀼𑀤𑁆𑀥𑁂. 𑀕𑀺𑀥 𑀅𑀪𑀺𑀓𑀗𑁆𑀔𑀸𑀬𑀁, 𑀢𑁄. 𑀮𑀼𑀪 𑀕𑀺𑀤𑁆𑀥𑀺𑀬𑀁, 𑀢𑁄. 𑀮𑁄𑀮 𑀉𑀫𑁆𑀫𑀸𑀤𑀦𑁂, 𑀅, 𑀮𑁄𑀮𑁄. 𑀅𑀣 𑀫𑀳𑀸𑀢𑀡𑁆𑀳𑀸𑀢𑀺𑀢𑀡𑁆𑀳𑀕𑀺𑀤𑁆𑀥𑀸𑀦𑀁 𑀓𑁄 𑀪𑁂𑀤𑁄? 𑀫𑀳𑀸𑀢𑀡𑁆𑀳𑁄 𑀦𑀸𑀦𑀸𑀭𑀫𑁆𑀫𑀡𑀁 𑀇𑀘𑁆𑀙𑀢𑀺, 𑀅𑀢𑀺𑀢𑀡𑁆𑀳𑁄 𑀏𑀓𑀲𑁆𑀫𑀺𑀫𑁆𑀧𑀺 𑀆𑀭𑀫𑁆𑀫𑀡𑁂 𑀅𑀦𑁂𑀓𑀯𑀸𑀭𑀁, 𑀅𑀥𑀺𑀓𑀜𑁆𑀘 𑀢𑀲𑀢𑀺, 𑀕𑀺𑀤𑁆𑀥𑁄 𑀧𑀦 𑀉𑀪𑀬𑀣𑀸𑀧𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀬𑁄 𑀓𑁆𑀭𑀺𑀬𑀸𑀲𑀼 𑀫𑀦𑁆𑀤𑁄, 𑀲𑁄 𑀓𑀼𑀡𑁆𑀞𑁄, 𑀓𑀼𑀡𑁆𑀞 𑀧𑀝𑀺𑀖𑀸𑀢𑁂, 𑀆𑀮𑀲𑁆𑀬𑁂 𑀘, 𑀅.

𑁭𑁩𑁦. 𑀧𑀜𑁆𑀘𑀓𑀁 𑀓𑀸𑀫𑀓𑁂. 𑀓𑀫𑀼 𑀇𑀘𑁆𑀙𑀸𑀬𑀁, 𑀘𑀼𑀭𑀸𑀤𑀺, 𑀭𑀺𑀢𑀼, 𑀓𑀸𑀫𑀬𑀺𑀢𑀸, 𑀓𑀸𑀭𑀺𑀢𑀮𑁄𑀧𑁂 𑀓𑀫𑀺𑀢𑀸. 𑀬𑀼𑀫𑁆𑀳𑀺 𑀓𑀸𑀫𑀦𑁄, 𑀓𑀫𑀦𑁄𑀧𑀺. 𑀡𑀻𑀧𑀘𑁆𑀘𑀬𑁂 𑀓𑀸𑀫𑀻, 𑀡𑀼𑀓𑀧𑀘𑁆𑀘𑀬𑁂 𑀓𑀸𑀫𑀼𑀓𑁄, 𑀅𑀦𑀼𑀓𑁄, 𑀅𑀪𑀺𑀓𑁄𑀧𑁆𑀬𑀢𑁆𑀭, 𑀅𑀦𑀼𑀓𑀸𑀫𑀬𑀢𑁂 𑀅𑀦𑀼𑀓𑁄, 𑀓𑁆𑀯𑀺. 𑀅𑀪𑀺𑀓𑀸𑀫𑀬𑀢𑁂 𑀅𑀪𑀺𑀓𑁄, 𑀓𑁆𑀯𑀺. 𑀅𑀢𑀺𑀓𑁄𑀧𑀺.

𑀤𑁆𑀯𑀬𑀁 𑀫𑀢𑁆𑀢𑁂. 𑀲𑀼𑀡𑁆𑀟𑀸 𑀲𑀼𑀭𑀸, 𑀢𑀢𑁆𑀭 𑀓𑀼𑀲𑀮𑁄 𑀲𑁄𑀡𑁆𑀟𑁄, 𑀧𑀸𑀦𑀸𑀕𑀸𑀭𑀁 𑀯𑀸 𑀲𑀼𑀡𑁆𑀟𑀸, 𑀢𑀢𑁆𑀭 𑀪𑀯𑁄, 𑀞𑀺𑀢𑀁 𑀯𑀸 𑀲𑁄𑀡𑁆𑀟𑁄. 𑀫𑀤 𑀉𑀫𑁆𑀫𑀸𑀤𑁂, 𑀢𑁄. 𑀉𑀓𑁆𑀓𑀝𑁄, 𑀔𑀺𑀯𑁄𑀧𑀺, 𑀫𑀤𑁂𑀦 𑀉𑀤𑁆𑀥𑀢𑁄 𑀉𑀓𑁆𑀓𑀝𑁄, 𑀬𑀤𑀸𑀤𑀺𑀦𑀸 𑀉𑀢𑁄 𑀓𑀝𑁄 𑀫𑀢𑁆𑀢𑀢𑁆𑀣𑁂 [𑀧𑀸𑀡𑀺𑀦𑀺 𑁫.𑁨.𑁨𑁯]. 𑀔𑀺𑀯 𑀫𑀤𑁂, 𑀅.

𑀢𑀺𑀓𑀁 𑀯𑀘𑀦𑀓𑀸𑀭𑀺𑀦𑀺. 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀯𑀺𑀥𑀸𑀢𑀼𑀁 𑀲𑀓𑁆𑀬𑁄 𑀯𑀺𑀥𑁂𑀬𑁆𑀬𑁄, 𑀇𑀬𑁆𑀬𑁄. 𑀆𑀤𑁂𑀲𑀺𑀢𑀁, 𑀆𑀤𑀭𑁂𑀦 𑀯𑀸 𑀲𑀼𑀡𑁄𑀢𑀻𑀢𑀺 𑀅𑀲𑁆𑀲𑀯𑁄, 𑀭𑀲𑁆𑀲𑀸𑀤𑀺, 𑀅. 𑀲𑀼𑀦𑁆𑀤𑀭𑀁 𑀯𑀘𑁄 𑀆𑀘𑀭𑀺𑀬𑀸𑀤𑀻𑀦𑀁 𑀏𑀢𑀲𑁆𑀫𑀺𑀁 𑀳𑁂𑀢𑀼𑀪𑀽𑀢𑁂𑀢𑀺 𑀲𑀼𑀩𑁆𑀩𑀘𑁄. 𑀯𑀺𑀦𑀬𑀕𑁆𑀕𑀸𑀳𑀻𑀧𑀺, 𑀯𑀺𑀦𑀬𑀁 𑀯𑀺𑀥𑀺𑀧𑀝𑀺𑀲𑁂𑀥𑀯𑀘𑀦𑀁 𑀕𑀳𑁂𑀢𑀼𑀁 𑀲𑀻𑀮𑁄 𑀯𑀺𑀦𑀬𑀕𑁆𑀕𑀸𑀳𑀻.

𑁭𑁩𑁧. 𑀢𑀗𑁆𑀔𑀡𑀼𑀧𑁆𑀧𑀢𑁆𑀢𑀺𑀜𑀸𑀡𑀁 𑀧𑀝𑀺𑀪𑀸, 𑀢𑀸𑀬 𑀬𑀼𑀢𑁆𑀢𑁄 𑀧𑀕𑀩𑁆𑀪𑁄, 𑀲𑀻𑀖𑀫𑁂𑀯 𑀕𑀩𑁆𑀪𑀢𑀻𑀢𑀺 𑀧𑀕𑀩𑁆𑀪𑁄, 𑀕𑀩𑁆𑀪 𑀥𑀸𑀭𑀡𑁂.

𑀢𑀺𑀓𑀁 𑀪𑀻𑀭𑀼𑀓𑁂. 𑀪𑀻 𑀪𑀬𑀁 𑀲𑀻𑀮𑁄 𑀬𑀲𑁆𑀲 𑀪𑀻𑀲𑀻𑀮𑁄. 𑀪𑀸𑀬𑀢𑀻𑀢𑀺 𑀪𑀻𑀭𑀼, 𑀪𑀻 𑀪𑀬𑁂, 𑀭𑀼. 𑀭𑀼𑀓𑀧𑀘𑁆𑀘𑀬𑁂 𑀪𑀻𑀭𑀼𑀓𑁄, 𑀲𑀓𑀢𑁆𑀣𑁂 𑀯𑀸 𑀓𑁄.

𑀤𑁆𑀯𑀬𑀁 𑀅𑀲𑀽𑀭𑁂. 𑀦 𑀯𑀻𑀭𑁄 𑀲𑀽𑀭𑁄 𑀅𑀯𑀻𑀭𑁄. 𑀓𑀼𑀘𑁆𑀙𑀺𑀢𑀢𑀭𑀢𑁆𑀢𑀸 𑀓𑀸𑀢𑀭𑁄, 𑀓𑀼𑀲𑁆𑀲 𑀓𑀸𑀤𑁂𑀲𑁄.

𑀤𑁆𑀯𑀬𑀁 𑀳𑀺𑀁𑀲𑀸𑀲𑀻𑀮𑁂, 𑀳𑀦𑀦𑀲𑀻𑀮𑁄 𑀳𑀺𑀁𑀲𑀸𑀲𑀻𑀮𑁄, 𑀖𑀸𑀢𑀼𑀓𑁄, 𑀉𑀓𑁄, 𑀳𑀦𑀲𑁆𑀲 𑀖𑀸𑀢𑁄. 𑀲𑀭𑀸𑀭𑀼, 𑀳𑀺𑀁𑀲𑁄𑀧𑀺.

𑁭𑁩𑁨. 𑀢𑀺𑀓𑀁 𑀓𑁄𑀥𑀬𑀼𑀢𑁆𑀢𑁂. 𑀓𑀼𑀥 𑀓𑁄𑀧𑁂, 𑀓𑀼𑀚𑁆𑀛𑀦𑀲𑀻𑀮𑁄 𑀓𑁄𑀥𑀦𑁄, 𑀬𑀼. 𑀤𑀼𑀲 𑀤𑁄𑀲𑁂, 𑀤𑁄𑀲𑀦𑁄, 𑀧𑀝𑀺𑀖𑁄, 𑀬𑀼. 𑀓𑀼𑀧 𑀓𑁄𑀧𑁂, 𑀓𑀼𑀧𑀢𑀻𑀢𑀺 𑀓𑁄𑀧𑀻, 𑀡𑀻. 𑀅𑀫𑀭𑀺𑀲𑀦𑁄𑀧𑀺, 𑀦𑀢𑁆𑀣𑀺 𑀫𑀭𑀺𑀲𑀦𑀁 𑀔𑀫𑀸 𑀅𑀲𑁆𑀲 𑀅𑀫𑀭𑀺𑀲𑀦𑁄, 𑀫𑀭𑀺𑀲 𑀅𑀲𑀳𑀦𑁂.

𑀤𑁆𑀯𑀬𑀁 𑀅𑀥𑀺𑀓𑀓𑁄𑀥𑀬𑀼𑀢𑁆𑀢𑁂. 𑀘𑀡𑁆𑀟𑀢𑁂𑀢𑀺 𑀘𑀡𑁆𑀟𑁄, 𑀅, 𑀘𑀡𑁆𑀟 𑀓𑁄𑀧𑁂. 𑀅𑀢𑀺𑀭𑁂𑀓𑀁 𑀓𑀼𑀚𑁆𑀛𑀢𑀻𑀢𑀺 𑀅𑀘𑁆𑀘𑀦𑁆𑀢𑀓𑁄𑀥𑀦𑁄. 𑀅𑀘𑁆𑀘𑀦𑁆𑀢𑀓𑁄𑀧𑀦𑁄𑀧𑀺, 𑀢𑀤𑀸 𑀓𑀼𑀧𑀢𑁄 𑀬𑀼.

𑀧𑀜𑁆𑀘𑀓𑀁 𑀔𑀦𑁆𑀢𑀺𑀬𑀼𑀢𑁆𑀢𑁂. 𑀲𑀳 𑀔𑀫𑀦𑁂, 𑀬𑀼. 𑀔𑀫𑀼 𑀲𑀳𑀦𑁂, 𑀬𑀼. 𑀢𑀼𑀫𑁆𑀳𑀺 𑀔𑀦𑁆𑀢𑀸, 𑀲𑀢𑁆𑀣𑀸𑀤𑀺. 𑀢𑀺𑀢𑀺𑀓𑁆𑀔𑀸 𑀬𑀲𑁆𑀲𑀢𑁆𑀣𑀻𑀢𑀺 𑀢𑀺𑀢𑀺𑀓𑁆𑀔𑀯𑀸. 𑀫𑀦𑁆𑀢𑀼𑀫𑁆𑀳𑀺 𑀔𑀦𑁆𑀢𑀺𑀫𑀸, 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀆.

𑁭𑁩𑁩. 𑀤𑁆𑀯𑀬𑀁 𑀲𑀤𑁆𑀥𑀸𑀬𑀼𑀢𑁆𑀢𑁂. 𑀳𑀺 𑀧𑀤𑀧𑀽𑀭𑀡𑁂. 𑀲𑀤𑁆𑀥𑀸 𑀬𑀲𑁆𑀲𑀢𑁆𑀣𑀻𑀢𑀺 𑀲𑀤𑁆𑀥𑀸𑀮𑀼. 𑀲𑀤𑁆𑀥𑀸 𑀭𑀢𑀦𑀢𑁆𑀢𑀬𑀸𑀤𑀻𑀲𑀼 𑀧𑀲𑀸𑀤𑁄, 𑀢𑀡𑁆𑀳𑀸, 𑀆𑀤𑀭𑁄 𑀘. 𑀤𑁆𑀯𑀬𑀁 𑀥𑀚𑀬𑀼𑀢𑁆𑀢𑁂. 𑀘𑀺𑀳𑀦𑁂 𑀘 𑀧𑀝𑀸𑀓𑀸𑀬𑀁, 𑀥𑀚𑁄 𑀲𑁄𑀨𑁂 𑀘 𑀲𑁄𑀡𑁆𑀟𑀺𑀓𑁂, 𑀲𑁄𑀨𑁄 𑀧𑀼𑀮𑁆𑀮𑀺𑀗𑁆𑀕𑀁.

𑀤𑁆𑀯𑀬𑀁 𑀦𑀺𑀤𑁆𑀤𑀸𑀲𑀻𑀮𑁂. 𑀦𑀺𑀤𑁆𑀤𑀸 𑀏𑀯 𑀲𑀻𑀮𑀁 𑀬𑀲𑁆𑀲 𑀲𑁄 𑀦𑀺𑀤𑁆𑀤𑀸𑀲𑀻𑀮𑁄. 𑀤𑁆𑀯𑀬𑀁 𑀧𑀪𑀸𑀬𑀼𑀢𑁆𑀢𑁂. 𑀪𑀸 𑀤𑀺𑀢𑁆𑀢𑀺𑀫𑁆𑀳𑀺, 𑀲𑀭𑀧𑀘𑁆𑀘𑀬𑁄, 𑀭𑀲𑁆𑀲𑀸𑀤𑀺, 𑀤𑁆𑀯𑀺𑀢𑁆𑀢𑀜𑁆𑀘, 𑀪𑀲𑁆𑀲𑀭𑁄, 𑀪𑀸𑀲𑀸 𑀭𑀢𑀺 𑀬𑀲𑁆𑀲𑀸𑀢𑀺 𑀯𑀸 𑀪𑀲𑁆𑀲𑀭𑁄, 𑀭𑀲𑁆𑀲𑀸𑀤𑀺 𑀏𑀯. 𑀲𑀲𑁆𑀲 𑀤𑁆𑀯𑀺𑀢𑁆𑀢𑀸𑀪𑀸𑀯𑁂 𑀪𑀸𑀲𑀼𑀭𑁄, 𑀅𑀲𑁆𑀲𑀼, 𑀪𑀸𑀲 𑀤𑀺𑀢𑁆𑀢𑀺𑀬𑀁 𑀯𑀸, 𑀉𑀭𑁄, 𑀅𑀣 𑀯𑀸 𑀤𑁆𑀯𑀬𑀁 𑀩𑀳𑀼𑀓𑀣𑀸𑀬𑀼𑀢𑁆𑀢𑁂, 𑀪𑀸𑀲𑀸𑀲𑀼 𑀲𑀩𑁆𑀩𑀸𑀲𑀼 𑀩𑀳𑀽𑀲𑀼 𑀓𑀣𑀸𑀲𑀼 𑀭𑀫𑀢𑀻𑀢𑀺 𑀪𑀲𑁆𑀲𑀭𑁄, 𑀓𑁆𑀯𑀺, 𑀪𑀸𑀲𑀢𑀻𑀢𑀺 𑀯𑀸 𑀪𑀲𑁆𑀲𑀭𑁄, 𑀅𑀭𑁄, 𑀭𑀲𑁆𑀲𑀸𑀤𑀺, 𑀤𑁆𑀯𑀺𑀢𑁆𑀢𑀜𑁆𑀘, 𑀪𑀸𑀲𑀸𑀲𑀼 𑀭𑀫𑀢𑀻𑀢𑀺 𑀯𑀸 𑀪𑀸𑀲𑀭𑁄, 𑀓𑁆𑀯𑀺, 𑀫𑀚𑁆𑀛𑀭𑀲𑁆𑀲𑁄, 𑀪𑀸𑀲𑀢𑀻𑀢𑀺 𑀯𑀸 𑀪𑀸𑀲𑀭𑁄, 𑀅𑀭𑁄, 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀲𑁆𑀲𑀼𑀢𑁆𑀢𑀸𑀪𑀸𑀯𑁄.

𑁭𑁩𑁪. 𑀢𑀺𑀓𑀁 𑀦𑀕𑁆𑀕𑁂. 𑀦 𑀕𑀘𑁆𑀙𑀢𑀻𑀢𑀺 𑀦𑀕𑁆𑀕𑁄, 𑀤𑁆𑀯𑀺𑀢𑁆𑀢𑀁, 𑀮𑀕𑁆𑀕 𑀲𑀗𑁆𑀕𑁂 𑀯𑀸, 𑀦𑀢𑁆𑀢𑀁, 𑀦𑀚𑀺 𑀮𑀚𑀺 𑀩𑀺𑀮𑁂 𑀯𑀸, 𑀡𑁄, 𑀚𑀲𑁆𑀲 𑀕𑁄, 𑀤𑁆𑀯𑀺𑀢𑁆𑀢𑀁. 𑀤𑀺𑀲𑀸 𑀏𑀯 𑀅𑀫𑁆𑀩𑀭𑀁 𑀯𑀢𑁆𑀣𑀁 𑀏𑀢𑀲𑁆𑀲, 𑀦 𑀧𑀓𑀢𑀺𑀯𑀢𑁆𑀣𑀦𑁆𑀢𑀺 𑀤𑀺𑀕𑀫𑁆𑀩𑀭𑁄. 𑀲𑀲𑁆𑀲 𑀕𑁄. 𑀦𑀢𑁆𑀣𑀺 𑀯𑀢𑁆𑀣𑀁 𑀏𑀢𑀲𑁆𑀲, 𑀅𑀣 𑀯𑀸 𑀤𑀺𑀕𑀫𑁆𑀩𑀭𑀸 𑀯𑀢𑁆𑀣𑀸, 𑀅𑀜𑁆𑀜𑀢𑀺𑀢𑁆𑀣𑀺𑀓𑁄 𑀅𑀯𑀢𑁆𑀣𑁄 𑀘𑀸𑀢𑀺 𑀏𑀢𑁂 𑀤𑁆𑀯𑁂 𑀦𑀕𑁆𑀕𑁄 𑀦𑀸𑀫, 𑀦𑀕𑁆𑀕𑀸 𑀦𑀸𑀫𑀸𑀢𑀺 𑀯𑀸, ‘‘𑀢𑁂 𑀇𑀢𑁆𑀣𑀺𑀔𑁆𑀬𑀸 𑀧𑁄, 𑀲𑀢𑁆𑀢 𑀧𑀓𑀭𑀡𑀸𑀦𑀺 𑀅𑀪𑀺𑀥𑀫𑁆𑀫𑁄 𑀦𑀸𑀫𑀸’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀲𑀜𑁆𑀜𑀸𑀲𑀜𑁆𑀜𑀻𑀲𑀤𑁆𑀤𑀸𑀦𑀁 𑀯𑀘𑀦𑀪𑁂𑀤𑀲𑁆𑀲𑀸𑀧𑀺 𑀲𑀫𑁆𑀪𑀯𑀢𑁄. 𑀦𑀕𑁆𑀕𑁄 𑀘 𑀦𑀕𑁆𑀕𑁄 𑀘 𑀦𑀕𑁆𑀕𑀸, 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀧𑀦 𑀲𑀸𑀫𑀜𑁆𑀜𑀢𑀸𑀬 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄.

𑀤𑁆𑀯𑀬𑀁 𑀪𑀓𑁆𑀔𑀓𑁂. 𑀖𑀲 𑀅𑀤𑀦𑁂, 𑀫𑀭𑁄, 𑀖𑀲𑁆𑀫𑀭𑁄. 𑀪𑀓𑁆𑀔 𑀅𑀤𑀦𑁂, 𑀡𑁆𑀯𑀼.

𑀯𑀢𑁆𑀢𑀼𑀁 𑀲𑁄𑀢𑀼𑀜𑁆𑀘 𑀅𑀓𑀼𑀲𑀮𑁄, 𑀯𑀘𑀦𑁂 𑀲𑀯𑀦𑁂 𑀘 𑀅𑀓𑀼𑀲𑀮𑁄 𑀏𑀴𑀫𑀽𑀕𑁄 𑀦𑀸𑀫, 𑀏𑀴𑁄 𑀩𑀥𑀺𑀭𑁄, 𑀫𑀽𑀕𑁄 𑀅𑀯𑀘𑀦𑁄, 𑀓𑀫𑁆𑀫𑀥𑀸𑀭𑀬𑁄, 𑀲𑀞𑁂𑀧𑀺 𑀏𑀴𑀫𑀽𑀕𑁄.

𑁭𑁩𑁫. 𑀫𑀼𑀔𑀭𑀸𑀤𑀬𑁄 𑀢𑀬𑁄 𑀅𑀧𑁆𑀧𑀺𑀬𑀯𑀸𑀤𑀺𑀦𑀺. 𑀯𑀸𑀛𑀸𑀯𑀸𑀛𑁂𑀲𑀼 𑀫𑀼𑀔𑀁 𑀅𑀲𑁆𑀲𑀢𑁆𑀣𑀺, 𑀦𑀺𑀦𑁆𑀤𑀸𑀬𑀁 𑀭𑁄. 𑀦𑀺𑀦𑁆𑀤𑀺𑀢𑀁 𑀫𑀼𑀔𑀁 𑀬𑀲𑁆𑀲 𑀤𑀼𑀫𑁆𑀫𑀼𑀔𑁄. 𑀅𑀩𑀤𑁆𑀥𑀁 𑀅𑀦𑀕𑁆𑀕𑀴𑀁 𑀫𑀼𑀔𑀁 𑀬𑀲𑁆𑀲 𑀅𑀩𑀤𑁆𑀥𑀫𑀼𑀔𑁄.

𑀩𑀳𑀼 𑀘 𑀕𑀸𑀭𑀬𑁆𑀳𑀜𑁆𑀘 𑀯𑀘𑁄 𑀬𑀲𑁆𑀲 𑀲𑁄 𑀯𑀸𑀘𑀸𑀮𑁄 𑀦𑀸𑀫. 𑀓𑀼𑀘𑁆𑀙𑀺𑀢𑀸 𑀯𑀸𑀘𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀯𑀸𑀘𑀸𑀮𑁄, 𑀦𑀺𑀦𑁆𑀤𑀸𑀬𑀁 𑀮𑁄.

𑀤𑁆𑀯𑀬𑀁 𑀲𑀼𑀯𑀘𑀦𑁂. 𑀯𑀤𑀢𑀻𑀢𑀺 𑀯𑀢𑁆𑀢𑀸, 𑀧𑀲𑀁𑀲𑀸𑀬𑀁 𑀢𑀼. 𑀯𑀤𑀢𑀻𑀢𑀺 𑀯𑀤𑁄. 𑀲𑁄 𑀧𑀤𑀧𑀽𑀭𑀡𑁂.

𑁭𑁩𑁬. 𑀢𑀺𑀓𑀁 𑀅𑀢𑁆𑀢𑀦𑀺𑀬𑁂. 𑀦𑁂𑀢𑀩𑁆𑀩𑁄𑀢𑀺 𑀦𑀺𑀬𑁄, 𑀦𑀺𑀬𑁄 𑀏𑀯 𑀦𑀺𑀚𑁄, 𑀦𑀻 𑀦𑀬𑁂, 𑀡𑁆𑀬𑁄, 𑀬𑀲𑁆𑀲 𑀚𑁄, 𑀲𑀫𑀻𑀧𑁂 𑀚𑀸𑀬𑀢𑀻𑀢𑀺 𑀯𑀸 𑀦𑀺𑀚𑁄. 𑀲𑀲𑁆𑀲 𑀅𑀢𑁆𑀢𑀦𑁄 𑀅𑀬𑀁 𑀲𑀓𑁄, 𑀇𑀤𑀫𑀢𑁆𑀣𑁂 𑀓𑁄, 𑀲𑁄 𑀏𑀯 𑀯𑀸 𑀲𑀓𑁄, 𑀲𑀲𑁆𑀲𑀸𑀬𑀁 𑀲𑀓𑁄, 𑀡𑁄. 𑀅𑀢𑁆𑀢𑀦𑀺 𑀚𑀸𑀢𑁄 𑀅𑀢𑁆𑀢𑀦𑀺𑀬𑁄, 𑀅𑀦𑀺𑀬𑁄.

𑀢𑀺𑀓𑀁 𑀅𑀘𑁆𑀙𑀭𑀺𑀬𑁂. 𑀯𑀺𑀧𑀼𑀩𑁆𑀩𑁄 𑀫𑀳 𑀧𑀽𑀚𑀸𑀬𑀁, 𑀪𑀽𑀯𑀸𑀤𑀺, 𑀡𑁆𑀬𑁄, 𑀫𑀦𑁆𑀢𑀮𑁄𑀧𑁄, 𑀯𑀺𑀫𑁆𑀳𑀬𑁄. 𑀆𑀧𑀼𑀩𑁆𑀩𑁄 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀅, 𑀘𑀭𑀲𑁆𑀲 𑀘𑁆𑀙𑀭𑀺𑀬𑁄, 𑀭𑀲𑁆𑀲𑀸𑀤𑀺 𑀘, 𑀅𑀘𑁆𑀙𑀭𑀺𑀬𑁄. 𑀦 𑀪𑀯𑀺𑀢𑁆𑀣𑀸𑀢𑀺 𑀅𑀩𑁆𑀪𑀼𑀢𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀭𑀲𑁆𑀲𑁄 𑀘, 𑀅𑀪𑀽𑀢𑁄𑀧𑀺 [𑀲𑀤𑁆𑀤𑀦𑀻𑀢𑀺𑀧𑀤𑀫𑀸𑀮𑀸𑀬𑀁 𑁩𑁪𑁦.𑁧 𑀧𑀺𑀝𑁆𑀞𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁].

𑀲𑁄𑀓𑀸𑀤𑀻𑀳𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀧𑀝𑀺𑀧𑀢𑁆𑀢𑀺𑀲𑀼𑀜𑁆𑀜𑁄 𑀯𑀺𑀳𑀢𑁆𑀣𑁄, 𑀩𑁆𑀬𑀸𑀓𑀼𑀮𑁄 𑀘. 𑀯𑀺𑀓𑁆𑀔𑀺𑀢𑁆𑀢𑁄 𑀳𑀢𑁆𑀣𑁄 𑀬𑀲𑁆𑀲 𑀯𑀺𑀳𑀢𑁆𑀣𑁄. 𑀓𑀼𑀮 𑀲𑀗𑁆𑀔𑁆𑀬𑀸𑀦𑁂 𑀯𑀺𑀆𑀧𑀼𑀩𑁆𑀩𑁄.

𑀓𑀢𑀲𑀦𑁆𑀦𑀸𑀳𑁄 𑀯𑀥𑀼𑀤𑁆𑀬𑀢𑁄 𑀳𑀦𑁆𑀢𑀼𑀫𑀼𑀤𑁆𑀬𑀢𑁄 𑀉𑀬𑁆𑀬𑀼𑀢𑁄 𑀆𑀢𑀢𑀸𑀬𑀻 𑀦𑀸𑀫. ‘‘𑀯𑀥𑀼𑀬𑁆𑀬𑀼𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀆𑀧𑀼𑀩𑁆𑀩𑁄 𑀢𑀸 𑀧𑀸𑀮𑀦𑁂, 𑀡𑀻, 𑀤𑁆𑀯𑀺𑀢𑁆𑀢𑀁, 𑀆𑀓𑀸𑀭𑀦𑁆𑀢𑀸𑀦𑀫𑀸𑀬𑁄, 𑀆𑀢𑀢𑀸𑀬𑀻.

𑁭𑁩𑁭. 𑀲𑀻𑀲𑀘𑁆𑀙𑁂𑀚𑁆𑀚𑀫𑁆𑀳𑀺 𑀲𑀻𑀲𑀘𑁆𑀙𑁂𑀤𑀸𑀭𑀳𑁂 𑀯𑀚𑁆𑀛𑁄. 𑀳𑀦𑁆𑀢𑀩𑁆𑀩𑁄𑀢𑀺 𑀯𑀚𑁆𑀛𑁄, 𑀳𑀦 𑀳𑀺𑀁𑀲𑀸𑀬𑀁, 𑀡𑁆𑀬𑁄, 𑀳𑀦𑀲𑁆𑀲 𑀯𑀥𑁄, 𑀛𑀲𑁆𑀲 𑀛𑁄. 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀯𑀚𑁆𑀛𑁄.

𑀢𑀺𑀓𑀁 𑀯𑀓𑁆𑀓𑀸𑀲𑀬𑁂. 𑀦𑀺𑀓𑀦𑁆𑀢𑀢𑀻𑀢𑀺 𑀦𑀺𑀓𑀢𑁄, 𑀓𑀦𑁆𑀢 𑀙𑁂𑀤𑀦𑁂, 𑀅, 𑀦𑀮𑁄𑀧𑁄. 𑀲𑀞 𑀓𑁂𑀢𑀯𑁂, 𑀅. 𑀦𑀢𑁆𑀣𑀺 𑀉𑀚𑀼𑀢𑀸 𑀬𑀲𑁆𑀲 𑀅𑀦𑀼𑀚𑀼.

𑀢𑀺𑀓𑀁 𑀪𑁂𑀤𑀓𑀸𑀭𑀓𑁂. 𑀲𑀽𑀘 𑀧𑁂𑀲𑀼𑀜𑁆𑀜𑁂, 𑀡𑁆𑀯𑀼. 𑀧𑀺𑀲𑀺 𑀲𑀜𑁆𑀘𑀼𑀡𑁆𑀡𑀦𑁂, 𑀧𑀺𑀲𑀺 𑀅𑀯𑀬𑀯𑁂 𑀯𑀸, 𑀧𑀺𑀲𑀢𑀻𑀢𑀺 𑀧𑀺𑀲𑀼𑀡𑁄, 𑀬𑀤𑀸𑀤𑀺𑀦𑀸 𑀉𑀦𑁄, 𑀡𑀢𑁆𑀢𑀁. 𑀓𑀡𑁆𑀡𑁂 𑀚𑀧𑀢𑀻𑀢𑀺, 𑀅𑀮𑀼𑀢𑁆𑀢𑀲𑀫𑀸𑀲𑁄, 𑀅𑀭𑀼𑀘𑀺𑀢𑀩𑁆𑀩𑀭𑁄𑀘𑀓𑁂𑀧𑀺 𑀓𑀡𑁆𑀡𑁂𑀚𑀧𑁄.

𑀤𑁆𑀯𑀬𑀁 𑀧𑀳𑀭𑀡𑀲𑀻𑀮𑁂. 𑀥𑀼𑀩𑁆𑀩𑀻 𑀳𑀺𑀁𑀲𑀸𑀬𑀁, 𑀢𑁄, 𑀪𑀼𑀚𑀸𑀤𑀺. 𑀯𑀜𑁆𑀘𑀬𑀢𑁂 𑀯𑀺𑀧𑁆𑀧𑀮𑀧𑀢𑁂𑀢𑀺 𑀯𑀜𑁆𑀘𑀓𑁄, 𑀯𑀜𑁆𑀘 𑀕𑀫𑀦𑁂.

𑁭𑁩𑁮. 𑀅𑀭𑀺𑀬𑀸𑀲𑀸𑀫𑀜𑁆𑀜𑁂𑀦 𑀘 𑀩𑀸𑀮𑀧𑀼𑀭𑀺𑀲𑀲𑁆𑀲 𑀮𑀓𑁆𑀔𑀡𑀫𑀸𑀳. 𑀳𑀺 𑀧𑀤𑀧𑀽𑀭𑀡𑁂. 𑀬𑁄 𑀧𑀼𑀭𑀺𑀲𑁄 𑀬𑁄 𑀚𑀦𑁄, 𑀚𑀦𑀧𑀭𑀺𑀬𑀸𑀬𑁄 𑀘𑁂𑀢𑁆𑀣 𑀧𑀼𑀭𑀺𑀲𑀲𑀤𑁆𑀤𑁄 ‘‘𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀸 𑀅𑀪𑀺𑀦𑀺𑀓𑁆𑀔𑀦𑁆𑀢𑀸’’𑀢𑁆𑀬𑀸𑀤𑀻𑀲𑀼 𑀯𑀺𑀬, 𑀅𑀦𑀺𑀲𑀫𑁆𑀫 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀥𑀩𑀦𑁆𑀥𑀦𑀸𑀤𑀺𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀲𑁄 𑀔𑀮𑀼 𑀏𑀓𑀦𑁆𑀢𑀢𑁄 ‘‘𑀘𑀧𑀮𑁄’’𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀓𑀲𑁆𑀫𑀸? 𑀅𑀯𑀺𑀦𑀺𑀘𑁆𑀙𑀺𑀢𑀓𑀸𑀭𑀺𑀢𑁆𑀢𑀸 𑀲𑀫𑁆𑀫𑀸 𑀅𑀯𑀺𑀦𑀺𑀘𑁆𑀙𑀺𑀢𑀲𑁆𑀲 𑀓𑀸𑀭𑀺𑀬𑀲𑁆𑀲 𑀓𑀭𑀡𑀲𑀻𑀮𑀢𑁆𑀢𑀸. 𑀘𑀧 𑀓𑀓𑁆𑀓𑀭𑀡𑁂, 𑀘𑀧 𑀲𑀦𑁆𑀢𑀸𑀦𑁂 𑀯𑀸, 𑀅𑀮𑁄, 𑀘𑀧𑀮𑁄.

𑁭𑁩𑁯. 𑀘𑀢𑀼𑀓𑁆𑀓𑀁 𑀓𑀤𑀭𑀺𑀬𑁂. 𑀓𑀼𑀘𑁆𑀙𑀺𑀢𑀁 𑀤𑀤𑀸𑀢𑀻𑀢𑀺 𑀔𑀼𑀤𑁆𑀤𑁄, 𑀤𑁄, 𑀓𑀲𑁆𑀲 𑀔𑁄, 𑀅𑀤𑀸𑀦𑀲𑀻𑀮𑀢𑀸𑀬 𑀲𑀫𑁆𑀧𑀭𑀸𑀬𑁂𑀲𑀼 𑀔𑀼𑀤𑁆𑀤𑀁 𑀩𑀼𑀪𑀼𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀯𑀸 𑀔𑀼𑀤𑁆𑀤𑁄, 𑀔𑀼𑀤 𑀩𑀼𑀪𑀼𑀓𑁆𑀔𑀸𑀬𑀁, 𑀤𑁄 𑀅𑀦𑀸𑀕𑀢𑀢𑁆𑀣𑁂. 𑀧𑀭𑀸𑀦𑀼𑀧𑀪𑁄𑀕𑁂𑀦 𑀅𑀢𑁆𑀣𑀲𑀜𑁆𑀘𑀬𑀲𑀻𑀮𑀢𑁆𑀢𑀸 𑀓𑀼𑀘𑁆𑀙𑀺𑀢𑁄 𑀅𑀭𑀺𑀬𑁄 𑀅𑀢𑁆𑀣𑀧𑀢𑀺 𑀓𑀤𑀭𑀺𑀬𑁄, 𑀅𑀤𑀸𑀬𑀓𑀢𑁆𑀢𑀸 𑀓𑀼𑀘𑁆𑀙𑀺𑀢𑀁 𑀞𑀸𑀦𑀁 𑀅𑀭𑀢𑀻𑀢𑀺 𑀯𑀸 𑀓𑀤𑀭𑀺𑀬𑁄, 𑀇𑀬𑁄. 𑀤𑀸𑀦𑀸𑀤𑀻𑀲𑀼 𑀦𑀫𑀦𑀸𑀪𑀸𑀯𑁂𑀦 𑀣𑀤𑁆𑀥𑁂𑀦 𑀫𑀘𑁆𑀙𑁂𑀭𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀲𑀳𑀺𑀢𑀢𑀸𑀬 𑀣𑀤𑁆𑀥𑀫𑀘𑁆𑀙𑀭𑀻, 𑀈. 𑀓𑀼𑀘𑁆𑀙𑀺𑀢𑁄 𑀧𑀡𑁄 𑀬𑀲𑁆𑀲 𑀓𑀧𑀡𑁄, 𑀓𑀺𑀧𑀘𑀸𑀦𑁄, 𑀫𑀺𑀢𑀧𑁆𑀧𑀘𑁄𑀧𑀺. 𑀓𑀼𑀘𑁆𑀙𑀺𑀢𑀁 𑀧𑀘𑀸𑀦𑁄𑀢𑀺 𑀤𑀼𑀢𑀺𑀬𑀸𑀲𑀫𑀸𑀲𑁄. 𑀫𑀺𑀢𑀁 𑀧𑀘𑀢𑀻𑀢𑀺 𑀫𑀺𑀢𑀧𑁆𑀧𑀘𑁄, 𑀡𑁄.

𑀅𑀤𑁆𑀥𑀁 𑀤𑀮𑀺𑀤𑁆𑀤𑁂. 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀥𑀦𑀁 𑀬𑀲𑁆𑀲 𑀅𑀓𑀺𑀜𑁆𑀘𑀦𑁄. 𑀤𑀮𑀺𑀤𑁆𑀤 𑀤𑀼𑀕𑁆𑀕𑀢𑀺𑀬𑀁, 𑀅, 𑀤𑀮 𑀯𑀺𑀤𑀸𑀭𑀡𑁂 𑀯𑀸, 𑀇𑀤𑁄, 𑀤𑁆𑀯𑀺𑀢𑁆𑀢𑀁. 𑀤𑀻𑀦 𑀤𑀼𑀕𑁆𑀕𑀢𑀪𑀸𑀯𑁂, 𑀤𑀻𑀦𑁄, 𑀤𑀺 𑀔𑀬𑁂 𑀯𑀸, 𑀈𑀦𑁄. 𑀦𑀢𑁆𑀣𑀺 𑀥𑀦𑀁 𑀅𑀲𑁆𑀲. 𑀦𑀺𑀦𑁆𑀤𑀺𑀢𑀁 𑀕𑀫𑀦𑀁 𑀅𑀲𑁆𑀲 𑀤𑀼𑀕𑁆𑀕𑀢𑁄.

𑁭𑁪𑁦. 𑀬𑀁 𑀓𑀫𑁆𑀫𑀁 ‘‘𑀇𑀤𑀫𑀳𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀲𑀫𑁆𑀪𑀸𑀯𑀺𑀢𑀁 𑀅𑀘𑀺𑀦𑁆𑀢𑀺𑀢𑀫𑁂𑀯 𑀳𑀼𑀢𑁆𑀯𑀸 𑀲𑀫𑁆𑀧𑀢𑁆𑀢𑀁, 𑀢𑀁 ‘‘𑀓𑀸𑀓𑀢𑀸𑀮𑀻𑀬’’𑀦𑁆𑀢𑁆𑀬𑀼𑀘𑁆𑀘𑀢𑁂. 𑀢𑀸𑀮𑀲𑁆𑀲 𑀇𑀤𑀁 𑀨𑀮𑀁 𑀢𑀸𑀮𑀁, 𑀓𑀸𑀓𑁄 𑀘 𑀢𑀸𑀮𑀜𑁆𑀘 𑀓𑀸𑀓𑀢𑀸𑀮𑀸𑀦𑀺, 𑀢𑁂𑀳𑀺 𑀲𑀤𑀺𑀲𑀁 𑀓𑀫𑁆𑀫𑀁 𑀓𑀸𑀓𑀢𑀸𑀮𑀺𑀬𑀁, 𑀓𑀸𑀓𑀲𑁆𑀲, 𑀢𑀸𑀮𑀨𑀮𑀲𑁆𑀲 𑀉𑀟𑁆𑀟𑀦𑀧𑀢𑀦𑀲𑀤𑀺𑀲𑀁 𑀓𑀫𑁆𑀫𑀦𑁆𑀢𑁆𑀬𑀢𑁆𑀣𑁄.

𑀘𑀢𑀼𑀓𑁆𑀓𑀁 𑀬𑀸𑀘𑀓𑁂. 𑀬𑀸𑀘𑀦𑀁 𑀓𑀭𑁄𑀢𑀻𑀢𑀺 𑀬𑀸𑀘𑀦𑀓𑁄, 𑀬𑀸𑀘𑀢𑀻𑀢𑀺 𑀯𑀸, 𑀬𑀸𑀘 𑀬𑀸𑀘𑀦𑁂, 𑀬𑀼. 𑀲𑀓𑀢𑁆𑀣𑁂 𑀓𑁄. 𑀅𑀢𑁆𑀣 𑀬𑀸𑀘𑀦𑀸𑀬𑀁, 𑀅𑀢𑁆𑀣𑀦𑀁 𑀅𑀢𑁆𑀣𑁄, 𑀲𑁄 𑀅𑀲𑁆𑀲𑀢𑁆𑀣𑀻𑀢𑀺 𑀅𑀢𑁆𑀣𑀻. 𑀡𑁆𑀯𑀼, 𑀬𑀸𑀘𑀓𑁄. ‘‘𑀫𑀸𑀤𑀺𑀲𑀲𑁆𑀲 𑀥𑀦𑀁 𑀤𑀢𑁆𑀯𑀸 𑀭𑀸𑀚𑀸 𑀲𑀕𑁆𑀕𑀁 𑀕𑀫𑀺𑀲𑁆𑀲𑀢𑀻’’𑀢𑁆𑀬𑀸𑀤𑀺𑀦𑀸 𑀤𑀸𑀦𑀨𑀮𑀁 𑀯𑀡𑁆𑀡𑁂𑀢𑁆𑀯𑀸 𑀯𑀓𑀢𑀺 𑀬𑀸𑀘𑀢𑀻𑀢𑀺 𑀯𑀦𑀺𑀩𑁆𑀩𑀓𑁄, 𑀯𑀡𑁆𑀡𑀲𑁆𑀲 𑀯𑀦𑀺, 𑀯𑀓 𑀆𑀤𑀸𑀦𑁂, 𑀆𑀤𑀸𑀦𑀫𑁂𑀢𑁆𑀣 𑀬𑀸𑀘𑀦𑀫𑁂𑀯.

𑁭𑁪𑁧. 𑀓𑀺𑀜𑁆𑀘𑀺𑀤𑀽𑀦𑀓𑀦𑁆𑀢𑀁 𑀧𑀢𑀺𑀧𑀸𑀤𑁂𑀦 𑀦𑀸𑀫𑀁. 𑀧𑀓𑁆𑀔𑀺𑀲𑀧𑁆𑀧𑀫𑀘𑁆𑀙𑀸𑀤𑀬𑁄 𑀅𑀡𑁆𑀟𑀢𑁄 𑀚𑀸𑀢𑀢𑁆𑀢𑀸 𑀅𑀡𑁆𑀟𑀚𑀸. 𑀦𑀭𑀸𑀤𑀬𑁄 𑀧𑀦 𑀕𑀩𑁆𑀪𑀸𑀲𑀬𑀲𑀗𑁆𑀔𑀸𑀢𑀚𑀮𑀸𑀩𑀼𑀢𑁄, 𑀢𑀢𑁆𑀭 𑀯𑀸 𑀚𑀸𑀢𑀢𑁆𑀢𑀸 𑀚𑀮𑀸𑀩𑀼𑀚𑀸. 𑀓𑀺𑀫𑀺 𑀘 𑀟𑀁𑀲𑀸 𑀘 𑀆𑀤𑀺𑀦𑀸 𑀫𑀓𑀲𑀫𑀗𑁆𑀕𑀼𑀭𑀸𑀤𑀬𑁄 𑀘 𑀲𑁂𑀤𑀚𑀸, 𑀲𑁂𑀤𑀓𑀸𑀭𑀡𑀢𑁆𑀢𑀸 𑀉𑀲𑁆𑀫𑀸 𑀲𑁂𑀤𑁄, 𑀢𑀢𑁄 𑀚𑀸𑀢𑀸 𑀲𑁂𑀤𑀚𑀸. 𑀤𑁂𑀯𑁄 𑀘 𑀆𑀤𑀺𑀦𑀸 𑀩𑁆𑀭𑀳𑁆𑀫𑀦𑁂𑀭𑀬𑀺𑀓𑀸𑀤𑀬𑁄 𑀘 𑀑𑀧𑀧𑀸𑀢𑀺𑀓𑀸, 𑀉𑀧𑀕𑀦𑁆𑀢𑁆𑀯𑀸 𑀧𑀢𑀢𑀻𑀢𑀺 𑀉𑀧𑀧𑀸𑀢𑀻, 𑀡𑀻, 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸𑀤𑀺𑀓𑁄 𑀅𑀢𑁆𑀢𑀪𑀸𑀯𑁄, 𑀲𑁄 𑀬𑁂𑀲𑀫𑀢𑁆𑀣𑀺, 𑀢𑁂 𑀑𑀧𑀧𑀸𑀢𑀺𑀓𑀸.

𑁭𑁪𑁨. 𑀚𑀡𑁆𑀡𑀼𑀫𑀢𑁆𑀢𑁂 𑀚𑀡𑁆𑀡𑀼𑀧𑁆𑀧𑀫𑀸𑀡𑀬𑀼𑀢𑁆𑀢𑁂 𑀉𑀤𑀓𑀸𑀤𑀺𑀫𑁆𑀳𑀺 𑀚𑀡𑁆𑀡𑀼𑀢𑀕𑁆𑀖𑁄, 𑀚𑀡𑁆𑀡𑀼𑀧𑁆𑀧𑀫𑀸𑀡𑁄 𑀚𑀡𑁆𑀡𑀼𑀢𑀕𑁆𑀖𑁄, 𑀧𑀫𑀸𑀡𑀢𑁆𑀣𑁂 𑀢𑀕𑁆𑀖𑁄, 𑀚𑀡𑁆𑀡𑀼𑀧𑁆𑀧𑀫𑀸𑀡𑁄 𑀚𑀡𑁆𑀡𑀼𑀫𑀢𑁆𑀢𑁄, 𑀧𑀫𑀸𑀡𑀢𑁆𑀣𑁂 𑀫𑀢𑁆𑀢𑁄 [𑀫𑁄𑀕𑁆𑀕𑀮𑁆𑀮𑀸𑀦𑁂 𑁪.𑁪𑁭 𑀲𑀼𑀢𑁆𑀢𑁂 𑀧𑀲𑁆𑀲𑀺𑀢𑀩𑁆𑀩𑀁], 𑀢𑀲𑁆𑀫𑀺𑀁.

𑀓𑀺𑀜𑁆𑀘𑀺𑀤𑀽𑀦𑀓𑁂 𑀅𑀧𑁆𑀧𑀫𑀢𑁆𑀢𑀓𑀬𑀼𑀢𑁆𑀢𑁂 𑀓𑀧𑁆𑀧𑁄 [𑀧𑀸𑀡𑀺𑀦𑀺 𑁫.𑁪.𑁬𑁭], 𑀊𑀦𑀲𑁆𑀲 𑀅𑀧𑁆𑀧𑀓𑀢𑀸𑀬 𑀓𑀧𑁆𑀧𑀻𑀬𑀢𑀺 𑀏𑀓𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀓𑀧𑁆𑀧𑁄, 𑀓𑀧𑁆𑀧 𑀧𑀭𑀺𑀘𑁆𑀙𑁂𑀤𑀦𑁂.

𑀘𑀢𑀼𑀓𑁆𑀓𑀁 𑀧𑀭𑀺𑀬𑀸𑀧𑀦𑁆𑀦𑁂. 𑀅𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀕𑁆𑀕𑀢𑀁, ‘‘𑀮𑁄𑀧𑀜𑁆𑀘 𑀢𑀢𑁆𑀭𑀸𑀓𑀸𑀭𑁄’’𑀢𑀺 𑀑𑀮𑁄𑀧𑁂 𑀅𑀆𑀕𑀫𑁄, 𑀤𑁆𑀯𑀺𑀢𑁆𑀢𑀁. 𑀅𑀦𑁆𑀢𑁄𑀕𑀢𑀫𑁆𑀧𑀺. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀧𑀦𑁆𑀦𑀁 𑀕𑀳𑀺𑀢𑀁 𑀧𑀭𑀺𑀬𑀸𑀧𑀦𑁆𑀦𑀁. 𑀕𑀸𑀥 𑀧𑀢𑀺𑀝𑁆𑀞𑀸𑀬𑀁, 𑀅𑀦𑁆𑀢𑁄 𑀑𑀕𑀸𑀥𑀢𑀻𑀢𑀺 𑀅𑀦𑁆𑀢𑁄𑀕𑀥𑀁, 𑀭𑀲𑁆𑀲𑁄, 𑀑𑀕𑀸𑀥𑀢𑀻𑀢𑀺 𑀑𑀕𑀥𑀁.

𑁭𑁪𑁩. 𑀤𑁆𑀯𑀬𑀁 𑀲𑀸𑀥𑀺𑀢𑁂. 𑀭𑀸𑀥 𑀲𑀸𑀥 𑀲𑀺𑀤𑁆𑀥𑀺𑀬𑀁, 𑀓𑀫𑁆𑀫𑀦𑀺 𑀢𑁄.

𑀤𑁆𑀯𑀬𑀁 𑀓𑀼𑀣𑀺𑀢𑁂. 𑀧𑀘 𑀧𑀸𑀓𑁂, 𑀅𑀢𑀻𑀢𑁂 𑀓𑀢𑁆𑀢𑀭𑀺 𑀢𑁄, 𑀢𑀲𑁆𑀲 𑀓𑁆𑀓𑁄, 𑀘𑀮𑁄𑀧𑁄. 𑀓𑀼𑀣 𑀦𑀺𑀧𑁆𑀧𑀓𑁆𑀓𑁂, 𑀢𑁄.

𑀆𑀧𑀤𑀁 𑀩𑁆𑀬𑀲𑀦𑀁 𑀧𑀢𑁆𑀢𑁄 𑀆𑀧𑀦𑁆𑀦𑁄 𑀦𑀸𑀫, 𑀅𑀢𑀺𑀧𑀻𑀴𑀦𑀁 𑀆𑀧𑀚𑁆𑀚𑀢𑀻𑀢𑀺 𑀆𑀧𑀦𑁆𑀦𑁄, ‘‘𑀆 𑀢𑀼𑀓𑁄𑀥𑀫𑀼𑀤𑀸𑀝𑁆𑀝𑀻𑀲𑀽’’𑀢𑀺 𑀳𑀺 𑀏𑀓𑀓𑁆𑀔𑀭𑀓𑁄𑀲𑁄 [𑀏𑀓𑀓𑁆𑀔𑀭𑀓𑁄𑀲 𑁧𑁪 𑀕𑀸𑀣𑀸] . 𑀧𑀤 𑀕𑀫𑀦𑁂, ‘‘𑀆𑀧𑀦𑁆𑀦𑁄 𑀘 𑀯𑀺𑀧𑀢𑁆𑀢𑀺𑀫𑁆𑀳𑀺, 𑀧𑀢𑁆𑀢𑁂 𑀘 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑁄’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄.

𑀤𑁆𑀯𑀬𑀁 𑀧𑀭𑁂𑀲𑀫𑀯𑀲𑀕𑀢𑁂. 𑀦𑀢𑁆𑀣𑀺 𑀯𑀲𑁄 𑀆𑀬𑀢𑁆𑀢𑁄 𑀧𑀭𑁂𑀲𑀁 𑀏𑀢𑀲𑁆𑀫𑀺𑀁 𑀲𑁂𑀭𑀻𑀪𑀽𑀢𑁂𑀢𑀺 𑀯𑀺𑀯𑀲𑁄, 𑀅𑀯𑀲𑁄 𑀘.

𑁭𑁪𑁪. 𑀙𑀓𑁆𑀓𑀁 𑀔𑀺𑀢𑁆𑀢𑁂. 𑀦𑀼𑀤 𑀧𑁂𑀭𑀡𑁂, 𑀦𑀼𑀤 𑀔𑁂𑀧𑁂 𑀯𑀸, 𑀢𑁄, 𑀢𑀲𑁆𑀲 𑀇𑀦𑁆𑀦𑁄. 𑀅𑀦𑀺𑀦𑁆𑀦𑀸𑀤𑁂𑀲𑁂 𑀪𑀼𑀚𑀸𑀤𑀺, 𑀦𑀼𑀢𑁆𑀢𑁄. 𑀦𑀼𑀢𑁄𑀧𑀺. 𑀅𑀲𑀼 𑀔𑁂𑀧𑀦𑁂, 𑀢𑁄, 𑀪𑀼𑀚𑀸𑀤𑀺, 𑀅𑀢𑁆𑀢𑁄. 𑀔𑀺𑀧 𑀧𑁂𑀭𑀡𑁂, 𑀢𑁄.

𑀈𑀭 𑀕𑀢𑀺𑀬𑀁, 𑀓𑀫𑁆𑀧𑀦𑁂 𑀘, 𑀇𑀢𑁄, 𑀈𑀭𑀺𑀢𑁄. 𑀆𑀧𑀼𑀩𑁆𑀩𑁄 𑀯𑀺𑀥 𑀧𑁂𑀭𑀡𑁂, 𑀢𑁄, 𑀆𑀯𑀺𑀤𑁆𑀥𑁄.

𑀘𑀢𑀼𑀓𑁆𑀓𑀁 𑀓𑀫𑁆𑀧𑀺𑀢𑁂. 𑀓𑀫𑁆𑀧 𑀘𑀮𑀦𑁂, 𑀥𑀽 𑀯𑀺𑀥𑀼𑀦𑀦𑁂, 𑀓𑀫𑁆𑀧𑀦𑁂 𑀘. 𑀥𑀽𑀢𑁄, 𑀆𑀥𑀽𑀢𑁄, 𑀘𑀮 𑀓𑀫𑁆𑀧𑀦𑁂, 𑀘𑀮𑀺𑀢𑁄. 𑀯𑁂𑀮𑁆𑀮𑀺𑀢𑁄, 𑀧𑁂𑀔𑀺𑀢𑁄𑀧𑀺. 𑀯𑁂𑀮𑁆𑀮 𑀘𑀮𑀦𑀢𑁆𑀣𑁄. 𑀧𑁂𑀔 𑀕𑀢𑁆𑀬𑀢𑁆𑀣𑁄, 𑀧𑁂𑀔𑀺𑀢𑁄.

𑀤𑁆𑀯𑀬𑀁 𑀦𑀺𑀲𑀺𑀢𑁂. 𑀦𑀺𑀲𑀺 𑀦𑀺𑀲𑀸𑀦𑁂. 𑀢𑀺𑀚 𑀦𑀺𑀲𑀸𑀦𑁂, 𑀦𑀺𑀲𑀸𑀦𑀁 𑀢𑀺𑀓𑁆𑀔𑀓𑀭𑀡𑀁, 𑀉𑀪𑀬𑀢𑁆𑀭𑀸𑀧𑀺 𑀓𑀫𑁆𑀫𑀦𑀺 𑀢𑁄.

𑁭𑁪𑁫-𑁭𑁪𑁬. 𑀢𑀺𑀓𑀁 𑀧𑀢𑁆𑀢𑀩𑁆𑀩𑁂. 𑀧𑀢 𑀕𑀫𑀦𑁂, 𑀢𑀩𑁆𑀩𑁄. 𑀕𑀫𑀼 𑀕𑀢𑀺𑀬𑀁, 𑀡𑁆𑀬𑁄, 𑀫𑁆𑀬𑀲𑁆𑀲 𑀫𑁆𑀫𑁄 𑀯𑀸, 𑀕𑀫𑁆𑀫𑀁, 𑀕𑀫𑁆𑀬𑀁, 𑀤𑁆𑀬𑀲𑁆𑀲 𑀚𑁆𑀚𑁄, 𑀆𑀧𑀚𑁆𑀚𑀁.

𑀤𑁆𑀯𑀬𑀁 𑀧𑀭𑀺𑀡𑀢𑁂. 𑀧𑀘𑀺𑀦𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀇𑀳 𑀧𑀭𑀺𑀡𑀢𑀢𑁆𑀣𑁄. 𑀦𑀫𑀼 𑀦𑀫𑀦𑁂, 𑀪𑀽𑀯𑀸𑀤𑀺, 𑀓𑀢𑁆𑀢𑀭𑀺 𑀢𑁄, 𑀲𑀫𑀸 𑀤𑁆𑀯𑁂 𑀢𑀼𑀮𑁆𑀬𑀢𑁆𑀣𑀸.

𑀧𑀜𑁆𑀘𑀓𑀁 𑀯𑁂𑀞𑀺𑀢𑁂. 𑀯𑁂𑀞 𑀯𑁂𑀞𑀦𑁂. 𑀯𑀮𑀫𑀺𑀯 𑀯𑀮𑀬𑀁, 𑀓𑀼𑀡𑁆𑀟𑀮𑀸𑀓𑀸𑀭𑀁 𑀯𑀮𑀬𑀁 𑀓𑀢𑀁 𑀯𑀮𑀬𑀺𑀢𑀁, 𑀦𑀸𑀫𑀥𑀸𑀢𑀼, 𑀓𑀸𑀭𑀺𑀢𑀦𑁆𑀢𑀸 𑀢𑁄. 𑀭𑀼𑀥 𑀆𑀯𑀭𑀡𑁂, 𑀭𑀼𑀤𑁆𑀥𑀁. 𑀲𑀁𑀧𑀼𑀩𑁆𑀩𑁄 𑀯𑀼 𑀲𑀁𑀯𑀭𑀡𑁂, 𑀲𑀁𑀯𑀼𑀢𑀁. 𑀲𑀫𑀦𑁆𑀢𑀢𑁄 𑀯𑀼𑀢𑀁 𑀆𑀯𑀼𑀢𑀁, 𑀯𑀼 𑀲𑀁𑀯𑀭𑀡𑁂, 𑀲𑀩𑁆𑀩𑀢𑁆𑀭 𑀓𑀫𑁆𑀫𑀦𑀺 𑀢𑁄.

𑀤𑁆𑀯𑀬𑀁 𑀧𑀭𑀺𑀔𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑁂. 𑀧𑀭𑀺 𑀲𑀫𑀦𑁆𑀢𑀢𑁄 𑀓𑀭𑀻𑀬𑀢𑁂𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀧𑀭𑀺𑀓𑁆𑀔𑀢𑀫𑁆𑀧𑀺. 𑀯𑀼 𑀲𑀁𑀯𑀭𑀡𑁂, 𑀦𑀺𑀯𑀼𑀢𑀁.

𑀢𑀺𑀓𑀁 𑀯𑀺𑀢𑁆𑀣𑀢𑁂. 𑀲𑀭 𑀕𑀢𑀺𑀬𑀁, 𑀢𑁄, 𑀢𑀲𑁆𑀲 𑀝𑁄, 𑀭𑀮𑁄𑀧𑁄, 𑀯𑀺𑀲𑀝𑀁. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀢𑁄, 𑀢𑀲𑁆𑀲 𑀢𑁄, 𑀦𑀮𑁄𑀧𑁄, 𑀯𑀺𑀢𑁆𑀣𑀢𑀁, 𑀢𑀢𑀁.

𑀤𑁆𑀯𑀬𑀁 𑀮𑁂𑀧𑀦𑀻𑀬𑁂. 𑀮𑀺𑀧 𑀮𑁂𑀧𑀦𑁂, 𑀤𑀺𑀳 𑀉𑀧𑀮𑁂𑀧𑀦𑁂, 𑀉𑀪𑀬𑀢𑁆𑀭𑀸𑀧𑀺 𑀓𑀫𑁆𑀫𑀦𑀺 𑀢𑁄.

𑀤𑁆𑀯𑀬𑀁 𑀕𑀼𑀴𑁆𑀳𑁂. 𑀕𑀼𑀳 𑀲𑀁𑀯𑀭𑀡𑁂, 𑀴𑁄, 𑀕𑀼𑀴𑁆𑀳𑁄. 𑀕𑀼𑀧 𑀕𑁄𑀧𑀦𑁂, 𑀕𑀼𑀢𑁆𑀢𑁄.

𑀤𑁆𑀯𑀬𑀁 𑀧𑁄𑀲𑀦𑀻𑀬𑁂. 𑀧𑀼𑀲 𑀧𑁄𑀲𑀦𑁂, 𑀢𑁄, 𑀲𑀢𑀸𑀦𑀁 𑀝𑁆𑀞𑁄, 𑀝𑁆𑀞𑀸𑀪𑀸𑀯𑁂 𑀧𑁄𑀲𑀺𑀢𑁄.

𑁭𑁪𑁭. 𑀤𑁆𑀯𑀬𑀁 𑀲𑀮𑀚𑁆𑀚𑁂. 𑀮𑀚𑁆𑀚 𑀧𑀻𑀴𑁂, 𑀧𑀻𑀴𑁄 𑀮𑀚𑁆𑀚𑀸𑀯. 𑀳𑀻𑀴 𑀦𑀺𑀦𑁆𑀤𑀸𑀮𑀚𑁆𑀚𑀸𑀲𑀼, 𑀳𑀻𑀴𑀺𑀢𑁄.

𑀤𑁆𑀯𑀬𑀁 𑀲𑀤𑁆𑀤𑁂. 𑀲𑀦 𑀥𑀦 𑀲𑀤𑁆𑀤𑁂, 𑀲𑀦𑀺𑀢𑀁, 𑀥𑀦𑀺𑀢𑀁.

𑀧𑀜𑁆𑀘𑀓𑀁 𑀩𑀦𑁆𑀥𑀦𑀻𑀬𑁂. 𑀲𑀦𑁆𑀤𑀦𑀁 𑀩𑀦𑁆𑀥𑀦𑀁, 𑀢𑀁𑀬𑁄𑀕𑀸 𑀯𑀦𑁆𑀢𑀼. 𑀲𑀦𑁆𑀤𑀸𑀦𑀯𑀦𑁆𑀢𑀁 𑀓𑀢𑀁 𑀲𑀦𑁆𑀤𑀸𑀦𑀺𑀢𑀁, 𑀦𑀸𑀫𑀥𑀸𑀢𑀼𑀫𑁆𑀳𑀸 𑀢𑁄, 𑀯𑀦𑁆𑀢𑀼𑀮𑁄𑀧𑁄. 𑀲𑀦𑁆𑀤𑀸𑀦𑀁 𑀲𑀚𑁆𑀚𑀸, 𑀢𑀫𑀲𑁆𑀲𑀸𑀢𑀺 𑀯𑀸, 𑀇𑀢𑁄. 𑀲𑀺 𑀩𑀦𑁆𑀥𑀦𑁂, 𑀢𑁄. 𑀩𑀦𑁆𑀥 𑀩𑀦𑁆𑀥𑀦𑁂, 𑀩𑀤𑁆𑀥𑁄. 𑀓𑀻𑀮 𑀩𑀦𑁆𑀥𑀦𑁂. 𑀬𑀫𑀼 𑀉𑀧𑀭𑀫𑁂, 𑀲𑀁𑀧𑀼𑀩𑁆𑀩𑁄 𑀩𑀦𑁆𑀥𑀦𑁂, 𑀲𑀩𑁆𑀩𑀢𑁆𑀭 𑀓𑀫𑁆𑀫𑀦𑀺 𑀢𑁄. 𑀫𑀽𑀢𑀁, 𑀉𑀤𑁆𑀤𑀺𑀢𑀁, 𑀲𑀤𑁆𑀤𑀺𑀢𑀫𑁆𑀧𑀺. 𑀫𑀽 𑀩𑀦𑁆𑀥𑀦𑁂. 𑀤𑀸 𑀅𑀯𑀔𑀡𑁆𑀟𑀦𑁂. 𑀉 𑀲𑀁𑀧𑀼𑀩𑁆𑀩𑁄 𑀩𑀦𑁆𑀥𑀦𑁂. 𑀯𑀼𑀢𑁆𑀢𑀜𑁆𑀘 ‘‘𑀉𑀤𑁆𑀤𑀸𑀦𑀦𑁆𑀢𑀼 𑀘 𑀩𑀦𑁆𑀥𑀦’’𑀦𑁆𑀢𑀺.

𑁭𑁪𑁮. 𑀢𑀺𑀓𑀁 𑀲𑀺𑀤𑁆𑀥𑁂. 𑀲𑀺𑀥 𑀲𑀁𑀲𑀺𑀤𑁆𑀥𑀺𑀫𑁆𑀳𑀺. 𑀧𑀤 𑀕𑀫𑀦𑁂, 𑀦𑀺𑀧𑀼𑀩𑁆𑀩𑁄 𑀲𑀺𑀤𑁆𑀥𑀺𑀬𑀁. 𑀯𑀢𑁆𑀢 𑀯𑀢𑁆𑀢𑀦𑁂, 𑀯𑀢𑁆𑀢𑀦𑀁𑀧𑁆𑀬𑀢𑁆𑀭 𑀲𑀺𑀚𑁆𑀛𑀦𑀁 𑀦𑀺𑀧𑀼𑀩𑁆𑀩𑀢𑁆𑀢𑀸.

𑀢𑀺𑀓𑀁 𑀯𑀺𑀤𑀸𑀭𑀺𑀢𑁂. 𑀤𑀭 𑀪𑀺𑀤 𑀯𑀺𑀤𑀸𑀭𑀡𑁂, 𑀇𑀦𑁆𑀦𑀸𑀤𑁂𑀲𑁄. 𑀪𑀺𑀦𑁆𑀦𑀁. 𑀅𑀦𑀺𑀦𑁆𑀦𑀸𑀤𑁂𑀲𑁂 𑀢𑀼 𑀪𑁂𑀤𑀺𑀢𑀁.

𑀤𑁆𑀯𑀬𑀁 𑀢𑀺𑀡𑀸𑀤𑀻𑀳𑀺 𑀙𑀸𑀤𑀦𑀻𑀬𑁂. 𑀙𑀤 𑀲𑀁𑀯𑀭𑀡𑁂, 𑀢𑁄, 𑀢𑀲𑁆𑀲 𑀲𑀥𑀸𑀢𑁆𑀯𑀦𑁆𑀢𑀲𑁆𑀲 𑀅𑀦𑁆𑀦𑀸𑀤𑁂𑀲𑁄.

𑀢𑀺𑀓𑀁 𑀙𑀺𑀦𑁆𑀤𑀺𑀢𑁂. 𑀯𑀺𑀥 𑀯𑁂𑀥𑀦𑁂. 𑀙𑀺𑀤𑁆𑀤 𑀓𑀡𑁆𑀡𑀪𑁂𑀤𑁂, 𑀘𑀼𑀭𑀸𑀤𑀺. 𑀯𑀺𑀥 𑀯𑁂𑀥𑀦𑁂, 𑀲𑀩𑁆𑀩𑀢𑁆𑀭 𑀓𑀫𑁆𑀫𑁂 𑀢𑁄, 𑀅𑀧𑀭𑀤𑁆𑀯𑀬𑁂 𑀘 𑀲𑀜𑁆𑀚𑀸𑀢𑀢𑁆𑀣𑁂 𑀇𑀢𑁄.

𑁭𑁪𑁯. 𑀢𑀺𑀓𑀁 𑀆𑀦𑀻𑀢𑁂. 𑀳𑀭 𑀳𑀭𑀡𑁂, 𑀪𑀭 𑀥𑀸𑀭𑀡𑀧𑁄𑀲𑀦𑁂𑀲𑀼, 𑀆𑀧𑀼𑀩𑁆𑀩𑁄 𑀦𑀻 𑀦𑀬𑁂.

𑀤𑁆𑀯𑀬𑀁 𑀤𑀫𑀬𑀼𑀢𑁆𑀢𑁂. 𑀤𑀫𑀼 𑀤𑀫𑀦𑁂, 𑀓𑀢𑁆𑀢𑀭𑀺 𑀢𑁄. 𑀧𑀓𑁆𑀓𑀫𑀸𑀤𑀻𑀳𑀺 𑀦𑁆𑀢𑁄. 𑀅𑀦𑁆𑀢𑀸𑀤𑁂𑀲𑁂 𑀤𑀫𑀺𑀢𑁄. 𑀓𑀫𑁆𑀫𑀲𑀸𑀥𑀦𑁄𑀧𑁆𑀬𑀬𑀁.

𑀤𑁆𑀯𑀬𑀁 𑀲𑀦𑁆𑀢𑁂. 𑀲𑀫𑀼 𑀉𑀧𑀲𑀫𑁂, 𑀓𑀢𑁆𑀢𑀭𑀺𑀢𑁄. 𑀅𑀦𑁆𑀢𑀸𑀤𑁂𑀲𑁂 𑀲𑀫𑀺𑀢𑁄, 𑀓𑀫𑁆𑀫𑀲𑀸𑀥𑀦𑁄𑀧𑁆𑀬𑀬𑀁.

𑀤𑁆𑀯𑀬𑀁 𑀧𑀼𑀡𑁆𑀡𑁂. 𑀧𑀽𑀭 𑀧𑀽𑀭𑀡𑁂, 𑀢𑀭𑀸𑀤𑀻𑀳𑀺 𑀇𑀡𑁆𑀡𑁄, 𑀤𑁆𑀯𑀻𑀲𑀼𑀧𑀺 𑀓𑀢𑁆𑀢𑀼𑀓𑀫𑁆𑀫𑀲𑀸𑀥𑀦𑀸𑀦𑀺 𑀮𑀩𑁆𑀪𑀦𑁆𑀢𑀺.

𑁭𑁫𑁦. 𑀢𑀺𑀧𑀸𑀤𑀁 𑀧𑀽𑀚𑀺𑀢𑁂. 𑀘𑀸𑀬 𑀧𑀽𑀚𑀸𑀦𑀺𑀲𑀸𑀫𑀦𑁂𑀲𑀼. 𑀫𑀳 𑀧𑀽𑀚𑀸𑀬𑀁, 𑀧𑀽𑀚 𑀧𑀽𑀚𑀦𑁂, 𑀅𑀭𑀳 𑀧𑀽𑀚𑀸𑀬𑀁, 𑀅𑀭𑀳𑀺𑀢𑁄. 𑀅𑀘𑁆𑀘 𑀧𑀽𑀚𑀸𑀬𑀁. 𑀫𑀸𑀦 𑀧𑀽𑀚𑀸𑀬𑀁. 𑀘𑀺 𑀘𑀬𑁂, 𑀅𑀧𑀧𑀼𑀩𑁆𑀩𑁄 𑀧𑀽𑀚𑀦𑁂. 𑀦𑀫𑀲𑁆𑀲𑀺𑀢𑁄𑀧𑀺, 𑀦𑀫𑀲𑁆𑀲𑀥𑀸𑀢𑀼 𑀧𑀽𑀚𑀸𑀬𑀁.

𑀤𑁆𑀯𑀬𑀁 𑀢𑀘𑁆𑀙𑀺𑀢𑁂 𑀤𑀸𑀭𑀼𑀆𑀤𑀺𑀫𑁆𑀳𑀺. 𑀢𑀘𑁆𑀙 𑀢𑀦𑀼𑀓𑀭𑀡𑁂, 𑀢𑀦𑀼𑀓𑀭𑀻𑀬𑀢𑁂𑀢𑀺 𑀢𑀦𑀽𑀓𑀢𑁄, 𑀤𑀻𑀖𑁄.

𑁭𑁫𑁧. 𑀤𑁆𑀯𑀬𑀁 𑀅𑀕𑁆𑀕𑀺𑀆𑀤𑀻𑀳𑀺 𑀢𑀢𑁆𑀢𑁂. 𑀢𑀧 𑀥𑀽𑀧 𑀲𑀦𑁆𑀢𑀸𑀧𑁂.