𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪

𑀬𑀲𑁆𑀲 𑀜𑀸𑀡𑀁 𑀲𑀤𑀸 𑀜𑀸𑀡𑀁, 𑀦𑀸𑀜𑁆𑀜𑁂𑀬𑁆𑀬𑀸 𑀜𑀸𑀡𑀓𑀁 𑀯𑀺𑀦𑀸;

𑀦𑀺𑀲𑁆𑀲𑁂𑀲𑀕𑀼𑀡𑀬𑀼𑀢𑁆𑀢𑀲𑁆𑀲, 𑀢𑀲𑁆𑀲 𑀦𑀢𑁆𑀯𑀸 𑀫𑀳𑁂𑀲𑀺𑀦𑁄.

𑀲𑀢𑁆𑀣𑀦𑁆𑀢𑀭𑀸 𑀲𑀫𑀸𑀤𑀸𑀬, 𑀲𑀸𑀭𑀁 𑀲𑀩𑁆𑀩𑀥𑀭𑀸 𑀢𑀣𑀸;

𑀓𑀭𑀺𑀬𑁆𑀬𑀢𑁂’𑀪𑀺𑀥𑀸𑀦𑀧𑁆𑀧-𑀤𑀻𑀧𑀓𑀲𑁆𑀲𑀢𑁆𑀣𑀯𑀡𑁆𑀡𑀦𑀸.

𑀧𑀡𑀸𑀫𑀸𑀤𑀺𑀯𑀡𑁆𑀡𑀦𑀸

[𑀓] 𑀇𑀥𑀸𑀬𑀁 𑀕𑀦𑁆𑀣𑀓𑀸𑀭𑁄 𑀧𑀞𑀫𑀫𑀢𑁆𑀢𑀦𑁄 𑀧𑀭𑁂𑀲𑀫𑁆𑀧𑀺 𑀲𑀫𑁆𑀫𑀸 𑀳𑀺𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀧𑀼𑀜𑁆𑀜𑀲𑀫𑁆𑀧𑀤’𑀫𑀸𑀘𑀺𑀦𑁄𑀢𑀺 ‘‘𑀢𑀣𑀸𑀕𑀢𑁄’’𑀘𑁆𑀘𑀸𑀤𑀺𑀦𑀸. 𑀢𑀢𑁆𑀣 𑀓𑀭𑀼𑀡𑀸𑀓𑀭𑁄 𑀫𑀳𑀸𑀓𑀭𑀼𑀡𑀸𑀬 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁄 𑀬𑁄 𑀢𑀣𑀸𑀕𑀢𑁄 𑀪𑀕𑀯𑀸 𑀓𑀭𑁄𑀧𑀬𑀸𑀢𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀲𑀼𑀔𑀧𑁆𑀧𑀤𑀁 𑀲𑀼𑀔𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀲𑀼𑀔𑀓𑀸𑀭𑀡𑀁 𑀯𑀸 𑀲𑀼𑀔𑀤𑀸𑀬𑀓𑀁 𑀯𑀸 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀑𑀲𑀚𑁆𑀚 𑀘𑀚𑀺𑀢𑁆𑀯𑀸 𑀓𑀮𑀺𑀲𑀫𑁆𑀪𑀯𑁂 𑀤𑀼𑀓𑁆𑀔𑀓𑀸𑀭𑀡𑀪𑀽𑀢𑁂 𑀪𑀯𑁂 𑀲𑀁𑀲𑀸𑀭𑁂 𑀓𑁂𑀯𑀮𑀤𑀼𑀓𑁆𑀓𑀭𑀁 𑀲𑀼𑀓𑀭𑁂𑀦𑀸𑀲𑀫𑁆𑀫𑀺𑀲𑁆𑀲𑀁 𑀅𑀘𑁆𑀘𑀦𑁆𑀢𑀤𑀼𑀓𑁆𑀓𑀭𑀁 𑀧𑀜𑁆𑀘𑀯𑀺𑀥𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀁 𑀓𑀭𑀁 𑀓𑀭𑁄𑀦𑁆𑀢𑁄 𑀧𑀭𑀢𑁆𑀣𑀁 𑀧𑀭𑁂𑀲𑀫𑀢𑁆𑀣𑀁𑀬𑁂𑀯 𑀅𑀓𑀸 𑀓𑀢𑀯𑀸, 𑀢𑀫𑁂𑀤𑀺𑀲𑀁 𑀢𑀣𑀸𑀕𑀢𑀁 𑀅𑀳𑀁 𑀦𑀫𑀸𑀫𑀺.

[𑀔] 𑀬𑀜𑁆𑀘 𑀥𑀫𑁆𑀫𑀁 𑀚𑀭𑀸𑀭𑀼𑀚𑀸𑀤𑀺𑀫𑀼𑀢𑁆𑀢𑀸 𑀚𑀭𑀸𑀭𑁄𑀕𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀸 𑀫𑀼𑀦𑀺𑀓𑀼𑀜𑁆𑀚𑀭𑀸 𑀫𑀼𑀦𑀺𑀲𑁂𑀝𑁆𑀞𑀸 𑀪𑀕𑀯𑀦𑁆𑀢𑁄 𑀅𑀧𑀽𑀚𑀬𑀼𑀁 𑀧𑀽𑀚𑀺𑀢𑀯𑀦𑁆𑀢𑁄, 𑀢𑀣𑀸 𑀉𑀢𑁆𑀢𑀭𑁂 𑀉𑀢𑁆𑀢𑀫𑁂 𑀲𑀢𑁆𑀢𑀸𑀦𑀁 𑀯𑀸 𑀲𑀁𑀲𑀸𑀭𑀫𑀳𑁄𑀖𑀧𑀓𑁆𑀔𑀦𑁆𑀤𑀸𑀦𑀁 𑀢𑀢𑁄 𑀉𑀢𑁆𑀢𑀭𑀡𑀲𑀫𑀢𑁆𑀣𑁂 𑀬𑀳𑀺𑀁 𑀢𑀭𑁂 𑀬𑀲𑁆𑀫𑀺𑀁 𑀥𑀫𑁆𑀫𑀧𑁆𑀮𑀯𑁂 𑀞𑀺𑀢𑀸 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀯𑀲𑁂𑀦 𑀆𑀭𑀽𑀴𑁆𑀳𑀸 𑀦𑀭𑀸𑀦𑀭𑀸 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀸 𑀘 𑀢𑀺𑀯𑀝𑁆𑀝𑀫𑁆𑀩𑀼𑀦𑀺𑀥𑀺𑀁 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀯𑀝𑁆𑀝𑁂𑀳𑀺 𑀆𑀓𑀼𑀮𑀺𑀢𑀁 𑀲𑀁𑀲𑀸𑀭𑀫𑀳𑀫𑁆𑀩𑀼𑀭𑀸𑀲𑀺𑀁 𑀢𑀭𑀺𑀁𑀲𑀼 𑀢𑀺𑀡𑁆𑀡𑀸, 𑀅𑀖𑀧𑁆𑀧𑀳𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀭𑀁, 𑀲𑀁𑀲𑀸𑀭𑀤𑀼𑀓𑁆𑀔𑀧𑁆𑀧𑀳𑀸𑀦𑀓𑀭𑀁 𑀯𑀸 𑀢𑀁 𑀥𑀫𑁆𑀫𑀫𑀧𑀺 𑀅𑀳𑀁 𑀦𑀫𑀸𑀫𑀺.

[𑀕] 𑀫𑀼𑀦𑀺𑀦𑁆𑀤𑁄𑀭𑀲𑀲𑀽𑀦𑀼𑀢𑀁 𑀪𑀕𑀯𑀢𑁄 𑀉𑀭𑁂 𑀲𑀫𑁆𑀪𑀯𑀥𑀫𑁆𑀫𑀤𑁂𑀲𑀦𑀸𑀬 𑀅𑀭𑀺𑀬𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀫𑀼𑀦𑀺𑀦𑁆𑀤𑀲𑁆𑀲 𑀑𑀭𑀲𑀧𑀼𑀢𑁆𑀢𑀪𑀸𑀯𑀁 𑀕𑀢𑀁 𑀧𑀢𑁆𑀢𑀁 𑀦𑀼𑀢𑀁 𑀓𑀺𑀮𑁂𑀲𑀔𑁂𑀧𑀦𑀓𑀁 𑀲𑀼𑀧𑀼𑀜𑁆𑀜𑀔𑁂𑀢𑁆𑀢𑀁 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀧𑀼𑀜𑁆𑀜𑀩𑀻𑀚𑀯𑀺𑀭𑀼𑀳𑀦𑀝𑁆𑀞𑀸𑀦𑀁 𑀲𑀼𑀔𑁂𑀢𑁆𑀢𑀪𑀽𑀢𑀁 𑀪𑀼𑀯𑀦𑁂 𑀮𑁄𑀓𑁂 𑀲𑀼𑀢𑀁 𑀯𑀺𑀲𑁆𑀲𑀼𑀢𑀁, 𑀲𑀼𑀢𑀥𑀭𑀁 𑀯𑀸 𑀓𑀺𑀮𑁂𑀲𑀲𑀯𑀦𑀸𑀪𑀸𑀯𑁂𑀦 𑀅𑀲𑁆𑀲𑀼𑀢𑀁 𑀅𑀧𑀸𑀡𑁄𑀧𑀺 𑀧𑀸𑀡𑁄 𑀓𑀭𑀻𑀬𑀺𑀢𑁆𑀣𑀸𑀢𑀺 𑀧𑀸𑀡𑀻𑀓𑀢𑁄, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑁄𑀯 𑀲𑀁𑀯𑀭𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀧𑀸𑀡𑀻𑀓𑀢𑀲𑀁𑀯𑀭𑁄, 𑀢𑀁 𑀧𑀸𑀡𑀻𑀓𑀢𑀲𑀁𑀯𑀭𑀁, 𑀯𑀭𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀤𑁂𑀯𑀓𑁂𑀳𑀺 𑀮𑁄𑀓𑁂𑀳𑀺 𑀧𑀢𑁆𑀣𑀦𑀻𑀬𑀁. ‘‘𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺 [𑀉𑀤𑀸. 𑁨𑁭] 𑀳𑀺 𑀯𑀼𑀢𑁆𑀢𑀁. 𑀲𑀤𑀸 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀕𑀼𑀡𑁄𑀖𑁂𑀦 𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑁂𑀦 𑀦𑀺𑀭𑀦𑁆𑀢𑀭𑀦𑁆𑀢𑀭𑀁 𑀅𑀯𑀺𑀘𑁆𑀙𑀺𑀦𑁆𑀦𑀫𑀸𑀦𑀲𑀁, 𑀧𑀭𑀺𑀧𑀼𑀡𑁆𑀡𑀘𑀺𑀢𑁆𑀢𑀁 𑀯𑀸 𑀕𑀡𑀫𑁆𑀧𑀺 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑀁 𑀅𑀧𑀺 𑀅𑀳𑀁 𑀦𑀫𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀢𑀺𑀡𑁆𑀡𑀫𑁆𑀧𑀺 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

[𑀖-𑀗] 𑀏𑀯𑀁 𑀧𑀼𑀜𑁆𑀜𑀲𑀫𑁆𑀧𑀤𑀫𑀸𑀘𑀺𑀦𑀺𑀢𑁆𑀯𑀸 𑀓𑀺𑀫𑀪𑀺𑀫𑀢𑀁 𑀲𑀸𑀥𑀦𑀻𑀬𑀫𑀺𑀘𑁆𑀘𑀸𑀳 ‘‘𑀧𑀓𑀸𑀲𑀺𑀲𑁆𑀲𑀫𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓’’𑀦𑁆𑀢𑀺. 𑀩𑀼𑀤𑁆𑀥𑀸𑀤𑀻𑀦𑀫𑀪𑀺𑀥𑀸𑀦𑀸𑀦𑀁 𑀲𑀭𑀽𑀧𑀯𑀲𑁂𑀦, 𑀮𑀺𑀗𑁆𑀕𑀯𑀲𑁂𑀦 𑀘 𑀧𑀭𑀺𑀤𑀻𑀧𑀦𑀢𑁄 𑀧𑀓𑀸𑀲𑀦𑀢𑁄 ‘‘𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀢𑁆𑀣𑀁 𑀧𑀓𑀸𑀲𑀺𑀲𑁆𑀲𑀁 𑀅𑀦𑁆𑀢𑁄𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀁 𑀩𑀳𑀺𑀪𑀸𑀯𑁂𑀦 𑀧𑀓𑀸𑀲𑀺𑀲𑁆𑀲𑀁. 𑀅𑀦𑁆𑀢𑁄𑀪𑀸𑀯𑀲𑁆𑀲 𑀳𑀺 𑀩𑀳𑀺𑀪𑀸𑀯𑀫𑀧𑁂𑀓𑁆𑀔𑀺𑀢𑁆𑀯𑀸 𑀪𑀸𑀯𑀺𑀢𑀫𑀼𑀧𑀧𑀦𑁆𑀦𑀁. 𑀦𑀦𑀼 𑀲𑀦𑁆𑀢𑁂𑀯 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁 𑀦𑀸𑀫𑀮𑀺𑀗𑁆𑀕𑀧𑁆𑀧𑀓𑀸𑀲𑀦𑀸𑀦𑁆𑀬𑀫𑀭𑀓𑁄𑀲𑀢𑀺𑀓𑀡𑁆𑀟𑁄𑀧𑁆𑀧𑀮𑀺𑀦𑁆𑀬𑀸𑀤𑁆𑀬𑀪𑀺𑀥𑀸𑀦𑀲𑀢𑁆𑀣𑀸𑀦𑀺, 𑀧𑀸𑀡𑀺𑀦𑀺 𑀩𑁆𑀬𑀸𑀟𑀺𑀯𑀭𑀭𑀼𑀘𑀺𑀘𑀦𑁆𑀤𑀕𑁄𑀫𑀺 𑀭𑀼𑀤𑁆𑀤𑀯𑀸𑀫𑀦𑀸𑀤𑀺𑀯𑀺𑀳𑀺𑀢𑀸𑀦𑀺 𑀘 𑀮𑀺𑀗𑁆𑀕𑀲𑀢𑁆𑀣𑀸𑀦𑀺, 𑀢𑀢𑁄 𑀓𑀺𑀫𑀺𑀤𑀫𑀼𑀘𑁆𑀘𑀢𑁂 𑀇𑀘𑁆𑀘𑀸𑀳 ‘‘𑀦𑀸𑀫𑀮𑀺𑀗𑁆𑀕𑀸𑀦𑀺 𑀩𑀼𑀤𑁆𑀥𑀪𑀸𑀲𑀺𑀢𑀲𑁆𑀲𑀸𑀭𑀳𑀸𑀦𑀺 𑀤𑀲𑁆𑀲𑀬𑀦𑁆𑀢𑁄’’𑀢𑀺. 𑀏𑀢𑁂𑀦 𑀲𑀦𑁆𑀢𑁂𑀲𑁆𑀯𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁 𑀲𑀢𑁆𑀣𑁂𑀲𑀼 𑀬𑀲𑁆𑀫𑀸 𑀦 𑀢𑁂𑀲𑀼 𑀦𑀸𑀫𑀮𑀺𑀗𑁆𑀕𑀸𑀦𑀺 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀤𑀦𑀼𑀭𑀽𑀧𑀸𑀦𑀺 𑀦𑀸𑀫𑀮𑀺𑀗𑁆𑀕𑀸𑀦𑀺 𑀤𑀲𑁆𑀲𑀬𑀦𑁆𑀢𑁄 𑀅𑀪𑀺𑀥𑀸𑀦𑀲𑀢𑁆𑀣𑀁 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀦𑀫𑁆𑀬𑀢𑁂 𑀅𑀪𑀺𑀥𑀻𑀬𑀢𑁂 𑀅𑀢𑁆𑀣𑁄 𑀅𑀦𑁂𑀦𑀸𑀢𑀺 𑀦𑀸𑀫𑀁, 𑀲𑀤𑁆𑀤𑀲𑀢𑁆𑀣𑁂 𑀦𑀫𑀼𑀥𑀸𑀢𑀼𑀯𑀲𑁂𑀦. 𑀮𑀺𑀗𑁆𑀕𑀬𑀢𑁂 ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑁆𑀬𑀸𑀤𑀺𑀦𑀸 𑀯𑀺𑀪𑀚𑁆𑀚𑀢𑁂𑀢𑀺, 𑀇𑀢𑁆𑀣𑀸𑀤𑀬𑁄 𑀯𑀸𑀦𑁂𑀦 𑀮𑀺𑀗𑁆𑀕𑀻𑀬𑀦𑁆𑀢𑁂 𑀩𑁆𑀬𑀜𑁆𑀚𑀻𑀬𑀦𑁆𑀢𑁂𑀢𑀺 𑀮𑀺𑀗𑁆𑀕𑀁, 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀁. 𑀓𑀺𑀫𑁂𑀢𑀲𑁆𑀲 𑀅𑀪𑀺𑀥𑀸𑀦𑀲𑀢𑁆𑀣𑀲𑁆𑀲 𑀓𑀭𑀡𑁂 𑀧𑀬𑁄𑀚𑀦𑀦𑁆𑀢𑀺 𑀧𑀼𑀘𑁆𑀙𑀸𑀬𑀁 𑀬𑀲𑁆𑀫𑀺𑀁 𑀲𑀢𑀺 𑀢𑀁 𑀲𑁄𑀢𑀸𑀭𑁄 𑀲𑁄𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀸𑀫𑀮𑀺𑀗𑁆𑀕𑁂𑀲𑁆𑀯𑀺’’𑀘𑁆𑀘𑀸𑀤𑀺. 𑀬𑀢𑁄 𑀩𑀼𑀤𑁆𑀥𑀯𑀘𑀦𑁂 𑀧𑀝𑀼𑀦𑁄 𑀪𑀸𑀯𑁄 𑀧𑀸𑀝𑀯𑀁, 𑀢𑀤𑁂𑀯 𑀅𑀢𑁆𑀣𑁄 𑀧𑀬𑁄𑀚𑀦𑀁, 𑀢𑀁 𑀇𑀘𑁆𑀙𑀦𑁆𑀢𑀻𑀢𑀺 𑀧𑀸𑀝𑀯𑀢𑁆𑀣𑀺𑀦𑁄, 𑀢𑁂𑀲𑀁 𑀧𑀸𑀝𑀯𑀢𑁆𑀣𑀻𑀦𑀁 𑀲𑁄𑀢𑀽𑀦𑀁 𑀦𑀸𑀫𑀮𑀺𑀗𑁆𑀕𑁂𑀲𑀼 𑀓𑁄𑀲𑀮𑁆𑀮𑀁 𑀓𑀼𑀲𑀮𑀢𑀸 𑀙𑁂𑀓𑀪𑀸𑀯𑁄 𑀩𑀼𑀤𑁆𑀥𑀯𑀘𑀦𑁂 𑀫𑀳𑀩𑁆𑀩𑀮𑀁 𑀅𑀢𑁆𑀣𑀲𑁆𑀲 𑀦𑀺𑀘𑁆𑀙𑀬𑀓𑀸𑀭𑀡𑀁 𑀳𑁄𑀢𑀺, 𑀅𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸 𑀩𑀼𑀤𑁆𑀥𑀪𑀸𑀲𑀺𑀢𑀲𑁆𑀲𑀸𑀭𑀳𑀸𑀦𑀺 𑀦𑀸𑀫𑀮𑀺𑀗𑁆𑀕𑀸𑀦𑀺 𑀤𑀲𑁆𑀲𑀬𑀦𑁆𑀢𑁄 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀁 𑀲𑀢𑁆𑀣𑀁 𑀧𑀓𑀸𑀲𑀺𑀲𑁆𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

[𑀘] 𑀇𑀤𑀸𑀦𑀺 𑀲𑀢𑁆𑀣𑀮𑀳𑀼𑀪𑀸𑀯𑀢𑁆𑀣𑀫𑀸𑀳 ‘‘𑀪𑀺𑀬𑁆𑀬𑁄’’𑀘𑁆𑀘𑀸𑀤𑀺. 𑀪𑀺𑀬𑁆𑀬𑁄 𑀩𑀸𑀳𑀼𑀮𑁆𑀮𑁂𑀦 𑀭𑀽𑀧𑀦𑁆𑀢𑀭𑀸 𑀭𑀽𑀧𑀪𑁂𑀤𑁂𑀦 𑀇𑀢𑁆𑀣𑀺𑀧𑀘𑁆𑀘𑀬𑀧𑀼𑀫𑁆𑀪𑀸𑀯𑀸𑀤𑀺𑀓𑀸𑀭𑀺𑀬𑀓𑀢𑁂𑀦 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁 𑀜𑁂𑀬𑁆𑀬𑀁, 𑀲𑁄 𑀘 𑀦𑀸𑀫𑀸𑀦𑀁 𑀦𑀸𑀫𑀯𑀺𑀲𑁂𑀲𑀦𑀲𑁆𑀲, 𑀦𑀸𑀫𑀧𑀭𑀸𑀫𑀲𑀺𑀲𑀩𑁆𑀩𑀦𑀸𑀫𑀲𑀤𑁆𑀤𑀲𑁆𑀲 𑀘 𑀜𑁂𑀬𑁆𑀬𑁄 𑀧𑀓𑀸𑀭𑀦𑁆𑀢𑀭𑀸𑀪𑀸𑀯𑀸. 𑀢𑀢𑁆𑀭 𑀦𑀸𑀫𑀸𑀦𑀁 𑀭𑀽𑀧𑀪𑁂𑀤𑁄 𑀬𑀣𑀸 𑁋 𑀙𑀼𑀭𑀺𑀓𑀸 𑀲𑀢𑁆𑀬’𑀲𑀺𑀧𑀼𑀢𑁆𑀢𑀺 [𑀅𑀪𑀺𑀥𑀸𑀦 𑁩𑁯𑁨 𑀕𑀸𑀣𑀸]. 𑀅𑀲𑀺 𑀔𑀕𑁆𑀕𑁄 𑀘 𑀲𑀸𑀬𑀓𑁄 [𑀅𑀪𑀺𑀥𑀸𑀦 𑁩𑁯𑁧 𑀕𑀸𑀣𑀸]. 𑀧𑀸𑀦𑀻𑀬𑀁 𑀲𑀮𑀺𑀮𑀁 𑀤𑀓𑀦𑁆𑀢𑀺 [𑀅𑀪𑀺𑀥𑀸𑀦 𑁬𑁬𑁧 𑀕𑀸𑀣𑀸]. 𑀦𑀸𑀫𑀯𑀺𑀲𑁂𑀲𑀦𑀲𑁆𑀲 𑀬𑀣𑀸 𑁋 𑀦𑀺𑀲𑀻𑀣𑁄 𑀫𑀚𑁆𑀛𑀺𑀫𑀸 𑀭𑀢𑁆𑀢𑀻𑀢𑀺 [𑀅𑀪𑀺𑀥𑀸𑀦 𑁭𑁦 𑀕𑀸𑀣𑀸]. 𑀦𑀸𑀫𑀧𑀭𑀸𑀫𑀲𑀺𑀲𑀩𑁆𑀩𑀦𑀸𑀫𑀲𑀤𑁆𑀤𑀲𑁆𑀲 𑀬𑀣𑀸 𑁋 𑀆𑀓𑀗𑁆𑀔𑀸 𑀭𑀼𑀘𑀺 𑀯𑀼𑀢𑁆𑀢𑀸 𑀲𑀸, 𑀢𑁆𑀯𑀥𑀺𑀓𑀸 𑀮𑀸𑀮𑀲𑀸 𑀤𑁆𑀯𑀺𑀲𑀽𑀢𑀺 [𑀅𑀪𑀺𑀥𑀸𑀦 𑁧𑁬𑁩 𑀕𑀸𑀣𑀸]. 𑀲𑀸𑀳𑀘𑀭𑀺𑀬𑁂𑀦 𑀦𑀺𑀬𑀢𑀮𑀺𑀗𑁆𑀕𑁂𑀦𑀸𑀯𑀺𑀧𑁆𑀧𑀬𑁄𑀕𑀢𑁄 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁 𑀜𑁂𑀬𑁆𑀬𑀁. 𑀓𑀢𑁆𑀣𑀘𑀻𑀢𑀺 𑀬𑀢𑁆𑀭 𑀭𑀽𑀧𑀪𑁂𑀤𑁄 𑀦𑀢𑁆𑀣𑀺, 𑀢𑀁 𑀬𑀣𑀸 𑁋 𑀫𑀭𑀻𑀘𑀺 𑀫𑀺𑀕𑀢𑀡𑁆𑀳𑀺𑀓𑀸 [𑀅𑀪𑀺𑀥𑀸𑀦 𑁬𑁫 𑀕𑀸𑀣𑀸]. 𑀭𑀁𑀲𑀺𑀫𑀸 𑀪𑀸𑀓𑀭𑁄 𑀪𑀸𑀦𑀼 [𑀅𑀪𑀺𑀥𑀸𑀦 𑁬𑁩 𑀕𑀸𑀣𑀸]. 𑀆𑀧𑁄 𑀧𑀬𑁄 𑀚𑀮𑀁 𑀯𑀸𑀭𑀺 [𑀅𑀪𑀺𑀥𑀸𑀦 𑁬𑁬𑁧 𑀕𑀸𑀣𑀸]. 𑀫𑀭𑀻𑀛𑀸𑀤𑀬𑁄 𑀳𑁆𑀬𑀪𑀺𑀦𑁆𑀦𑀭𑀽𑀧𑀢𑁆𑀢𑀸 𑀮𑀺𑀗𑁆𑀕𑀦𑁆𑀢𑀭𑁂𑀧𑀺 𑀲𑀫𑁆𑀪𑀸𑀯𑀺𑀬𑀦𑁆𑀢𑁂𑀳𑀺 𑀦𑀺𑀬𑀢𑀮𑀺𑀗𑁆𑀕𑁂𑀳𑀺 𑀫𑀺𑀕𑀢𑀡𑁆𑀳𑀺𑀓𑀸𑀪𑀸𑀓𑀭𑀚𑀮𑀸𑀤𑀺𑀲𑀤𑁆𑀤𑁂𑀳𑀺 𑀲𑀸𑀳𑀘𑀭𑀺𑀬𑁂𑀦 𑀢𑀁𑀮𑀺𑀗𑁆𑀕𑁂 𑀦𑀺𑀘𑁆𑀙𑀻𑀬𑀦𑁆𑀢𑁂. 𑀆𑀳𑀘𑁆𑀘𑀯𑀺𑀥𑀸𑀦𑁂𑀦 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀸𑀦𑀁 𑀯𑀺𑀲𑁂𑀲𑁂𑀢𑁆𑀯𑀸 𑀓𑀣𑀦𑁂𑀦 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁 𑀜𑁂𑀬𑁆𑀬𑀁. 𑀓𑁆𑀯𑀘𑀻𑀢𑀺 𑀬𑀢𑁆𑀭 𑀦 𑀭𑀽𑀧𑀪𑁂𑀤𑁄 𑀮𑀺𑀗𑁆𑀕𑀦𑀺𑀡𑁆𑀡𑀬𑀲𑁆𑀲 𑀦𑀺𑀫𑀺𑀢𑁆𑀢𑀁, 𑀦 𑀘 𑀲𑀸𑀳𑀘𑀭𑀺𑀬𑀁 𑀮𑀺𑀗𑁆𑀕𑀪𑁂𑀤𑁄𑀪𑀺𑀫𑀢𑁄, 𑀦𑁂𑀓𑀫𑁂𑀯 𑀯𑀸 𑀮𑀺𑀗𑁆𑀕𑀫𑀺𑀘𑁆𑀙𑀢𑁂, 𑀢𑀁 𑀬𑀣𑀸 𑁋 𑀯𑀮𑁆𑀮𑀭𑀻 𑀫𑀜𑁆𑀚𑀭𑀻 𑀦𑀸𑀭𑀻 [𑀅𑀪𑀺𑀥𑀸𑀦 𑁫𑁫𑁦 𑀕𑀸𑀣𑀸]. 𑀯𑀺𑀝𑀧𑁄 𑀯𑀺𑀝𑀪𑀻𑀢𑁆𑀣𑀺𑀬𑀁 [𑀅𑀪𑀺𑀥𑀸𑀦 𑁫𑁪𑁭 𑀕𑀸𑀣𑀸]. 𑀪𑀻𑀢𑀺𑀢𑁆𑀣𑀻 𑀪𑀬𑀫𑀼𑀢𑁆𑀢𑀸𑀲𑁄 [𑀅𑀪𑀺𑀥𑀸𑀦 𑁧𑁬𑁬 𑀕𑀸𑀣𑀸]. 𑀯𑀚𑀺𑀭𑀁 𑀧𑀼𑀦𑁆𑀦𑀧𑀼𑀁𑀲𑀓𑁂𑀘𑁆𑀘𑀸𑀤𑀺 [𑀅𑀪𑀺𑀥𑀸𑀦 𑁨𑁪 𑀕𑀸𑀣𑀸].

[𑀙] 𑀇𑀤𑀸𑀦𑀺 𑀭𑀽𑀧𑀪𑁂𑀤𑁄𑀢𑀺 𑀮𑀺𑀗𑁆𑀕𑀦𑀺𑀡𑁆𑀡𑀬𑀲𑁆𑀲 𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀓𑁄 𑀬𑁄 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁 𑀤𑁆𑀯𑀦𑁆𑀤𑁄, 𑀢𑀓𑁆𑀓𑀭𑀡𑀧𑀝𑀺𑀲𑁂𑀥𑁂𑀦 𑀅𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀫𑁂𑀯 𑀤𑁆𑀯𑀦𑁆𑀤𑁄 𑀓𑀢𑁄𑀢𑀺 𑀧𑀭𑀺𑀪𑀸𑀲𑀺𑀢𑀼𑀫𑀼𑀧𑀓𑁆𑀓𑀫𑀢𑁂 ‘‘𑀅𑀪𑀺𑀦𑁆𑀦𑀮𑀺𑀗𑁆𑀕𑀺𑀦’’𑀫𑀺𑀘𑁆𑀘𑀸𑀤𑀺. 𑀅𑀪𑀺𑀦𑁆𑀦𑀮𑀺𑀗𑁆𑀕𑀻𑀦𑀁𑀬𑁂𑀯 𑀦𑀸𑀫𑀸𑀦𑀁 𑀤𑁆𑀯𑀦𑁆𑀤𑁄 𑀓𑀢𑁄, 𑀦 𑀪𑀺𑀦𑁆𑀦𑀮𑀺𑀗𑁆𑀕𑀻𑀦𑀁, 𑀬𑀣𑀸 𑁋 𑀯𑀺𑀫𑀼𑀢𑁆𑀬𑀲𑀗𑁆𑀔𑀢𑀥𑀸𑀢𑀼, 𑀲𑀼𑀤𑁆𑀥𑀺𑀦𑀺𑀩𑁆𑀩𑀼𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 [𑀅𑀪𑀺𑀥𑀸𑀦 𑁯 𑀕𑀸𑀣𑀸]. 𑀦 𑀓𑁂𑀯𑀮𑀁 𑀤𑁆𑀯𑀦𑁆𑀤𑁄𑀬𑁂𑀯, 𑀅𑀣 𑀔𑁄 𑀏𑀓𑀲𑁂𑀲𑁄𑀧𑁆𑀬𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁𑀬𑁂𑀯 𑀓𑀢𑁄, 𑀬𑀣𑀸 𑁋 𑀦𑀕𑁆𑀕𑁄 𑀤𑀺𑀕𑀫𑁆𑀩𑀭𑀸𑀯𑀢𑁆𑀣𑀸. [𑀅𑀪𑀺𑀥𑀸𑀦 𑁭𑁩𑁪 𑀕𑀸𑀣𑀸] 𑀲𑀩𑁆𑀩𑀥𑀭𑀓𑀢𑁂 𑀧𑀦 ‘‘𑀚𑀻𑀫𑀽𑀢𑀸 𑀫𑁂𑀖𑀧𑀩𑁆𑀩𑀢𑀸’’ 𑀇𑀘𑁆𑀘𑀼𑀤𑀸𑀳𑀝𑀁. 𑀦𑀦𑀼 𑀘 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀫𑁆𑀧𑀺 𑀏𑀓𑀲𑁂𑀲𑁄 𑀓𑀢𑁄, 𑀬𑀣𑀸 𑁋 𑀫𑀸𑀢𑀸 𑀧𑀺𑀢𑀸 𑀢𑀼 𑀧𑀺𑀢𑀭𑁄, 𑀧𑀼𑀢𑁆𑀢𑀸 𑀢𑀼 𑀧𑀼𑀢𑁆𑀢𑀥𑀻𑀢𑀭𑁄 [𑀅𑀪𑀺𑀥𑀸𑀦 𑁨𑁪𑁯 𑀕𑀸𑀣𑀸]. 𑀲𑀲𑀼𑀭𑀸 𑀲𑀲𑁆𑀲𑀼 𑀲𑀲𑀼𑀭𑀸, 𑀪𑀸𑀢𑀼𑀪𑀕𑀺𑀦𑀺 𑀪𑀸𑀢𑀭𑁄𑀢𑀺 [𑀅𑀪𑀺𑀥𑀸𑀦 𑁨𑁫𑁦 𑀕𑀸𑀣𑀸]. 𑀏𑀢𑁆𑀣 𑀳𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀧𑀺𑀢𑀭𑁄, 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘 𑀧𑀼𑀢𑁆𑀢𑀸, 𑀲𑀲𑁆𑀲𑀼 𑀘 𑀲𑀲𑀼𑀭𑁄 𑀘 𑀲𑀲𑀼𑀭𑀸, 𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀪𑀸𑀢𑀭𑁄𑀢𑀺 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀫𑁆𑀧𑀺 𑀏𑀓𑀲𑁂𑀲𑁄 𑀤𑀲𑁆𑀲𑀺𑀢𑁄𑀢𑀺. 𑀞𑀸𑀦𑀦𑁆𑀢𑀭𑁂 𑀢𑁂𑀲𑀁 𑀪𑀺𑀦𑁆𑀦𑀮𑀺𑀗𑁆𑀕𑀢𑀸𑀬 𑀤𑀲𑁆𑀲𑀺𑀢𑀢𑁆𑀢𑀸 𑀦 𑀤𑁄𑀲𑁄. 𑀢𑀸𑀢𑁄 𑀢𑀼 𑀚𑀦𑀓𑁄 𑀧𑀺𑀢𑀸 [𑀅𑀪𑀺𑀥𑀸𑀦 𑁨𑁪𑁩 𑀕𑀸𑀣𑀸]. 𑀅𑀫𑁆𑀫𑀸’𑀫𑁆𑀩𑀸 𑀚𑀦𑀦𑀻 𑀫𑀸𑀢𑀸 [𑀅𑀪𑀺𑀥𑀸𑀦 𑁨𑁪𑁪 𑀕𑀸𑀣𑀸]. 𑀅𑀧𑀘𑁆𑀘𑀁 𑀧𑀼𑀢𑁆𑀢𑁄𑀢𑁆𑀭𑀚𑁄 𑀲𑀼𑀢𑁄 [𑀅𑀪𑀺𑀥𑀸𑀦 𑁨𑁪𑁦 𑀕𑀸𑀣𑀸]. 𑀦𑀸𑀭𑀺𑀬𑀁 𑀤𑀼𑀳𑀺𑀢𑀸 𑀥𑀻𑀢𑀸 [𑀅𑀪𑀺𑀥𑀸𑀦 𑁨𑁪𑁧 𑀕𑀸𑀣𑀸]. 𑀚𑀸𑀬𑀸𑀧𑀢𑀻𑀦𑀁 𑀚𑀦𑀦𑀻, 𑀲𑀲𑁆𑀲𑀼 𑀯𑀼𑀢𑁆𑀢𑀸𑀣 𑀢𑀧𑁆𑀧𑀺𑀢𑀸. 𑀲𑀲𑀼𑀭𑁄𑀢𑀺 𑀇𑀘𑁆𑀘𑀸𑀤𑀺𑀓𑀜𑁆𑀳𑀺 𑀢𑁂𑀲𑀁 [𑀅𑀪𑀺𑀥𑀸𑀦 𑁨𑁪𑁬 𑀕𑀸𑀣𑀸] 𑀞𑀸𑀦𑀦𑁆𑀢𑀭𑀦𑁆𑀢𑀺. 𑀢𑀣𑀸 𑀏𑀢𑁆𑀣 𑀓𑀫𑀁 𑀯𑀺𑀦𑀸 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁 𑀕𑀡𑀦𑀧𑀸𑀞𑁄 𑀯𑀺𑀬 𑀲𑀗𑁆𑀓𑀭𑁄𑀧𑀺 𑀦 𑀓𑀢𑁄. 𑀢𑀢𑁆𑀭 𑀳𑀺 𑀲𑀕𑁆𑀕𑀤𑀺𑀲𑀸𑀤𑀬𑁄 𑀅𑀢𑁆𑀣𑀸 𑀬𑀣𑀸𑀓𑁆𑀓𑀫𑀁 𑀢𑀁𑀲𑀫𑁆𑀩𑀦𑁆𑀥𑀸 𑀘 𑀲𑀓𑁆𑀓𑀯𑀺𑀤𑀺𑀲𑀸𑀤𑀬𑁄 𑀅𑀢𑁆𑀣𑀸 𑀲𑀓𑀲𑀓𑀲𑀫𑁆𑀩𑀦𑁆𑀥𑀲𑀳𑀺𑀢𑀸 𑀬𑀣𑀸𑀪𑀺𑀥𑀸𑀦𑀁 𑀲𑀭𑀽𑀧𑀧𑀝𑀺𑀧𑀢𑁆𑀬𑀫𑀢𑁆𑀣𑀪𑀺𑀥𑁂𑀬𑁆𑀬𑀸, 𑀢𑀣𑀸 𑀢𑀧𑁆𑀧𑀭𑀺𑀬𑀸𑀬𑀲𑀫𑁆𑀩𑀦𑁆𑀥𑀸𑀦𑀺 𑀘 𑀬𑀸𑀦𑀺 𑀦𑀸𑀫𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀢𑀤𑀪𑀺𑀥𑀸𑀦𑀸𑀯𑀲𑀭𑁂 𑀅𑀪𑀺𑀥𑁂𑀬𑁆𑀬𑀸𑀦𑀻𑀢𑀺 𑀲𑀼𑀔𑁂𑀦𑁂𑀓𑀢𑁆𑀭𑁂𑀯 𑀲𑀓𑀮𑀦𑀸𑀫𑀧𑀝𑀺𑀧𑀢𑁆𑀢𑀺 𑀲𑀭𑀽𑀧𑀧𑀝𑀺𑀧𑀢𑁆𑀢𑀺 𑀘 𑀬𑀣𑀸 𑀲𑀺𑀬𑀸𑀢𑀺𑀘𑁆𑀘𑁂𑀢𑀤𑀢𑁆𑀣𑀁 𑀓𑀫𑁄 𑀅𑀪𑁆𑀬𑀼𑀧𑀕𑀫𑁆𑀬𑀢𑁂, 𑀢𑀣𑀸 𑀘 𑀲𑀢𑁆𑀬𑀸𑀯𑀲𑁆𑀲𑀁 𑀲𑀕𑁆𑀕𑀸𑀤𑀺𑀧𑀭𑀺𑀬𑀸𑀬𑁂 𑀤𑀺𑀯𑀲𑀤𑁆𑀤𑀸𑀤𑀬𑁄, 𑀳𑀭𑀸𑀤𑁆𑀬𑀯𑀲𑀭𑁂 𑀓𑀼𑀫𑀸𑀭𑀸𑀤𑀬𑁄 𑀅𑀪𑀺𑀥𑁂𑀬𑁆𑀬𑀸 𑀇𑀢𑀺 𑀓𑀫𑀸𑀦𑀼𑀭𑁄𑀥𑁂𑀦 𑀮𑀺𑀗𑁆𑀕𑀲𑀗𑁆𑀓𑀭𑁄 𑀧𑀭𑀺𑀳𑀭𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁄, 𑀬𑀣𑀸𑀯𑀼𑀢𑁆𑀢𑀦𑁆𑀢𑀼 𑀓𑀫𑀁 𑀯𑀺𑀦𑀸 𑀦𑁂𑀳 𑀲𑀗𑁆𑀓𑀭𑁄 𑀓𑀢𑁄, 𑀇𑀢𑀺 𑀧𑀭𑀺𑀬𑀸𑀬𑁂𑀦 𑀇𑀢𑁆𑀣𑀺𑀧𑁆𑀧𑀓𑀭𑀡𑀸𑀤𑀺𑀓𑁆𑀓𑀫𑁂𑀦 𑀬𑀣𑀸𑀲𑀫𑁆𑀪𑀯𑀫𑀪𑀺𑀥𑀸𑀦𑀢𑁄, 𑀢𑀁 𑀬𑀣𑀸 𑁋 𑀈𑀢𑀺 𑀢𑁆𑀯𑀺𑀢𑁆𑀣𑀻 𑀅𑀚𑀜𑁆𑀜𑀜𑁆𑀘, 𑀉𑀧𑀲𑀕𑁆𑀕𑁄 𑀉𑀧𑀤𑁆𑀤𑀯𑁄𑀢𑀺 [𑀅𑀪𑀺𑀥𑀸𑀦 𑁪𑁦𑁧 𑀕𑀸𑀣𑀸]. 𑀅𑀢𑁆𑀭 𑀳𑀺 𑀬𑁂 𑀢𑀺𑀮𑀺𑀗𑁆𑀕𑀸, 𑀢𑁂 𑀢𑀺𑀮𑀺𑀗𑁆𑀕𑀸𑀯𑀲𑀭𑁂 𑀏𑀯 𑀦𑀺𑀩𑀤𑁆𑀥𑀸, 𑀦 𑀕𑀡𑀦𑀧𑀸𑀞𑀸 𑀯𑀺𑀬 𑀉𑀘𑁆𑀘𑀸𑀭𑀡𑀯𑀲𑁂𑀦, 𑀏𑀯𑀁 𑀲𑀩𑁆𑀩𑀢𑁆𑀭 𑀬𑀣𑀸𑀲𑀫𑁆𑀪𑀯𑀁 𑀦𑀻𑀬𑀢𑁂. 𑀯𑀼𑀢𑁆𑀢𑀜𑁆𑀘 𑁋

‘‘𑀪𑁂𑀤𑀸𑀔𑁆𑀬𑀸𑀦𑀸𑀬 𑀦 𑀤𑁆𑀯𑀦𑁆𑀤𑁄, 𑀦𑁂𑀓𑀲𑁂𑀲𑁄 𑀦 𑀲𑀗𑁆𑀓𑀭𑁄;

𑀓𑀢𑁄𑀢𑁆𑀭 𑀪𑀺𑀦𑁆𑀦𑀮𑀺𑀗𑁆𑀕𑀸𑀦-𑀫𑀯𑀼𑀢𑁆𑀢𑀸𑀦𑀁 𑀓𑀫𑀁 𑀯𑀺𑀦𑀸’’𑀢𑀺 [𑀅𑀫𑀭 𑁧.𑁪].

𑀇𑀤𑀸𑀦𑀺 𑀮𑀺𑀗𑁆𑀕𑀯𑀸𑀘𑀓𑀸𑀦𑀁 𑀞𑀸𑀦𑀯𑀲𑁂𑀦𑀢𑁆𑀣𑁂𑀲𑀼 𑀕𑀫𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀮𑀺𑀗𑁆𑀕𑀯𑀸𑀘𑀓𑁂’’𑀘𑁆𑀘𑀸𑀤𑀺. 𑀕𑀸𑀣𑀸𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸 𑀕𑀸𑀣𑀸𑀦𑀁 𑀧𑀸𑀤𑀸𑀦𑀜𑁆𑀘 𑀅𑀦𑁆𑀢𑀫𑀚𑁆𑀛𑀝𑁆𑀞𑀸 𑀮𑀺𑀗𑁆𑀕𑀯𑀸𑀘𑀓𑀸 𑀅𑀦𑁂𑀓𑀢𑁆𑀣𑀮𑀺𑀗𑁆𑀕𑀯𑀸𑀘𑀓𑀸𑀦𑀺 𑀜𑀸𑀡𑀤𑀲𑁆𑀲𑀦𑀸𑀤𑀻𑀦𑀺 𑀮𑀺𑀗𑁆𑀕𑀸𑀦𑀺 𑀧𑀼𑀩𑁆𑀩𑀫𑀢𑁆𑀣𑀁 𑀯𑀸𑀘𑀓𑀯𑀲𑁂𑀦 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀧𑀭𑁂 𑀕𑀸𑀣𑀸𑀧𑀸𑀤𑀸𑀦𑀫𑀸𑀤𑀺𑀝𑁆𑀞𑀸 𑀮𑀺𑀗𑁆𑀕𑀯𑀸𑀘𑀓𑀸 𑀧𑀭𑀫𑀢𑁆𑀣𑀁 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀢𑀁 𑀬𑀣𑀸 𑁋

𑀨𑀮𑁂 𑀯𑀺𑀧𑀲𑁆𑀲𑀦𑀸𑀤𑀺𑀩𑁆𑀩-𑀘𑀓𑁆𑀔𑀼𑀲𑀩𑁆𑀩𑀜𑁆𑀜𑀼𑀢𑀸𑀲𑀼 𑀘;

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀳𑀺, 𑀫𑀕𑁆𑀕𑁂 𑀘 𑀜𑀸𑀡𑀤𑀲𑁆𑀲𑀦𑀁 [𑀅𑀪𑀺𑀥𑀸𑀦 𑁭𑁯𑁪 𑀕𑀸𑀣𑀸].

𑀡𑀸𑀤𑁄 𑀲𑀤𑁆𑀥𑀸𑀘𑀻𑀯𑀭𑀸𑀤𑀺-𑀳𑁂𑀢𑁆𑀯𑀸𑀥𑀸𑀭𑁂𑀲𑀼 𑀧𑀘𑁆𑀘𑀬𑁄;

𑀓𑀻𑀴𑀸𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑁄, 𑀯𑀺𑀳𑀸𑀭𑁄 𑀲𑀼𑀕𑀢𑀸𑀮𑀬𑁂 [𑀅𑀪𑀺𑀥𑀸𑀦 𑁮𑁫𑁭 𑀕𑀸𑀣𑀸].

𑀔𑀕𑁆𑀕𑁂 𑀓𑀼𑀭𑀽𑀭𑁂 𑀦𑁂𑀢𑁆𑀢𑀺𑀁𑀲𑁄, 𑀧𑀭𑀲𑁆𑀫𑀺𑀜𑁆𑀘𑀸𑀢𑁆𑀭 𑀢𑀻𑀲𑁆𑀯𑀫𑀼 [𑀅𑀪𑀺𑀥𑀸𑀦 𑁧𑁦𑁮𑁯 𑀕𑀸𑀣𑀸];

𑀓𑀼𑀲𑀮𑁂 𑀲𑀼𑀓𑀢𑀁 𑀲𑀼𑀝𑁆𑀞𑀼-𑀓𑀢𑁂 𑀘 𑀲𑀼𑀓𑀢𑁄 𑀢𑀺𑀲𑀼 [𑀅𑀪𑀺𑀥𑀸𑀦 𑁯𑁩𑁮 𑀕𑀸𑀣𑀸].

𑀲𑀫𑀬𑁄 𑀲𑀫𑀯𑀸𑀬𑁂 𑀘, 𑀲𑀫𑀽𑀳𑁂 𑀓𑀸𑀭𑀡𑁂 𑀔𑀡𑁂;

𑀧𑀝𑀺𑀯𑁂𑀥𑁂 𑀲𑀺𑀬𑀸 𑀓𑀸𑀮𑁂, 𑀧𑀳𑀸𑀦𑁂 𑀮𑀸𑀪𑀤𑀺𑀝𑁆𑀞𑀺𑀲𑀼 [𑀅𑀪𑀺𑀥𑀸𑀦 𑁭𑁭𑁮 𑀕𑀸𑀣𑀸].

𑀓𑀦𑁆𑀢𑀸𑀭𑁄 𑀯𑀦𑀤𑀼𑀕𑁆𑀕𑁂𑀲𑀼 [𑀅𑀪𑀺𑀥𑀸𑀦 𑁧𑁧𑁦𑁭 𑀕𑀸𑀣𑀸].

𑀏𑀢𑁆𑀣 𑀘 𑁋

𑀬𑁂𑀪𑀼𑀬𑁆𑀬𑀢𑀸𑀩𑁆𑀬𑀸𑀫𑀺𑀲𑁆𑀲𑁂𑀲𑀼, 𑀯𑀺𑀲𑀁𑀬𑁄𑀕𑁂 𑀘 𑀓𑁂𑀯𑀮𑀁;

𑀤𑀴𑁆𑀳𑀢𑁆𑀣𑁂𑀦𑀢𑀺𑀭𑁂𑀓𑁂 𑀘𑀸-𑀦𑀯𑀲𑁂𑀲𑀫𑁆𑀳𑀺 𑀢𑀁 𑀢𑀺𑀲𑀼 [𑀅𑀪𑀺𑀥𑀸𑀦 𑁭𑁮𑁬 𑀕𑀸𑀣𑀸].

𑀲𑀫𑀸𑀥𑀺𑀲𑁆𑀫𑀺𑀁 𑀧𑀼𑀫𑁂𑀓𑀕𑁆𑀕𑁄-𑀦𑀸𑀓𑀼𑀮𑁂 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑁄 [𑀅𑀪𑀺𑀥𑀸𑀦 𑁧𑁦𑁩𑁫 𑀕𑀸𑀣𑀸].

𑀚𑀴𑁂 𑀣𑀽𑀮𑁄 𑀫𑀳𑀢𑁆𑀬𑀧𑀺 [𑀅𑀪𑀺𑀥𑀸𑀦 𑁧𑁦𑁬𑁬 𑀕𑀸𑀣𑀸] 𑀘𑁆𑀘𑀸𑀤𑀻𑀲𑀼

𑀕𑀸𑀣𑀸𑀫𑀚𑁆𑀛𑀝𑁆𑀞𑀸𑀦𑀁, 𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸𑀦𑀜𑁆𑀘 𑀮𑀺𑀗𑁆𑀕𑀯𑀸𑀘𑀓𑀸𑀦𑀁 𑀧𑀼𑀩𑁆𑀩𑀧𑀭𑀢𑁆𑀣𑁂𑀲𑁆𑀯𑀧𑀺 𑀕𑀫𑀦𑀪𑀸𑀯𑀢𑁄 ‘‘𑀧𑀼𑀩𑁆𑀩𑀁 𑀬𑀦𑁆𑀢𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀕𑀸𑀣𑀸𑀦𑀁 𑀫𑀚𑁆𑀛𑀦𑁆𑀢𑀝𑁆𑀞𑀸 𑀧𑀼𑀩𑁆𑀩𑀁 𑀬𑀦𑁆𑀢𑀺, 𑀕𑀸𑀣𑀸𑀫𑀚𑁆𑀛𑀝𑁆𑀞𑀸, 𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸 𑀘 𑀧𑀼𑀩𑁆𑀩𑀸𑀧𑀭𑀜𑁆𑀘 𑀬𑀦𑁆𑀢𑀻𑀢𑀺 𑀬𑀣𑀸𑀮𑀸𑀪𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

[𑀚] 𑀇𑀤𑀸𑀦𑀺 𑀯𑀺𑀲𑁂𑀲𑀯𑀺𑀥𑀺𑀫𑁆𑀳𑀺 𑀲𑀢𑁆𑀣𑀮𑀳𑀼𑀪𑀸𑀯𑀢𑁆𑀣𑀁 𑀧𑀭𑀺𑀪𑀸𑀲𑀢𑁂 ‘‘𑀧𑀼𑀫𑀺𑀢𑁆𑀣𑀺𑀬’’𑀫𑀺𑀘𑁆𑀘𑀸𑀤𑀺. 𑀧𑀼𑀫𑀺𑀢𑁆𑀣𑀺𑀬𑀁 ‘‘𑀤𑁆𑀯𑀻𑀲𑀽’’𑀢𑀺 𑀧𑀤𑀁 𑀜𑁂𑀬𑁆𑀬𑀁, 𑀬𑀣𑀸 𑁋 𑀅𑀲𑀦𑀺 𑀤𑁆𑀯𑀻𑀲𑀼 [𑀅𑀪𑀺𑀥𑀸𑀦 𑁨𑁪 𑀕𑀸𑀣𑀸]. 𑀲𑀩𑁆𑀩𑀮𑀺𑀗𑁆𑀕𑁂 𑀮𑀺𑀗𑁆𑀕𑀢𑁆𑀢𑀬𑁂 ‘‘𑀢𑀻𑀲𑀽’’𑀢𑀺 𑀧𑀤𑀁 𑀜𑁂𑀬𑁆𑀬𑀁, 𑀬𑀣𑀸 𑁋 𑀲𑀢𑁆𑀢𑀦𑁆𑀦𑀁 𑀧𑀽𑀭𑀡𑁂 𑀲𑁂𑀝𑁆𑀞𑁂’𑀢𑀺𑀲𑀦𑁆𑀢𑁂 𑀲𑀢𑁆𑀢𑀫𑁄 𑀢𑀺𑀲𑀼 [𑀅𑀪𑀺𑀥𑀸𑀦 𑁯𑁪𑁨 𑀕𑀸𑀣𑀸]. 𑀏𑀢𑁆𑀣 𑀘 𑀦𑀺𑀲𑀺𑀤𑁆𑀥𑀮𑀺𑀗𑁆𑀕𑀦𑀸𑀫𑀁 𑀧𑀸𑀭𑀺𑀲𑁂𑀲𑀢𑁄 ‘‘𑀲𑁂𑀲𑀮𑀺𑀗𑁆𑀕’’𑀦𑁆𑀢𑀺 𑀜𑁂𑀬𑁆𑀬𑀁 [𑀦𑀺𑀲𑀺𑀤𑁆𑀥𑀮𑀺𑀗𑁆𑀕 𑀲𑁂𑀲𑀢𑁆𑀣𑀁 (𑀅𑀫𑀭 𑁧.𑁫.)], 𑀬𑀣𑀸 𑁋 𑀯𑀲𑁆𑀲 𑀲𑀁𑀯𑀘𑁆𑀙𑀭𑀸 𑀦𑀺𑀢𑁆𑀣𑀻𑀢𑀺 [𑀅𑀪𑀺𑀥𑀸𑀦 𑁮𑁧 𑀕𑀸𑀣𑀸]. 𑀅𑀢𑁆𑀭 𑀘𑁂𑀓𑀮𑀺𑀗𑁆𑀕𑀦𑀺𑀲𑁂𑀥𑀩𑁆𑀬𑀸𑀔𑁆𑀬𑀸𑀦𑁂𑀦 𑀮𑀺𑀗𑁆𑀕𑀤𑁆𑀯𑀬𑀯𑀺𑀥𑀸𑀦𑀦𑁆𑀢𑀺 [𑀏𑀓𑀮𑀺𑀗𑁆𑀕𑀦𑀺𑀲𑁂𑀥𑀩𑁆𑀬𑀸𑀚𑁂𑀦 𑀮𑀺𑀗𑁆𑀕𑀤𑁆𑀯𑀬𑀸𑀪𑀺𑀥𑀸𑀦𑀫𑀺𑀢𑀺 (𑀅𑀫𑀭𑀓𑁄𑀲𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)].

𑀕𑀦𑁆𑀣𑀮𑀸𑀳𑀯𑀁 𑀯𑀺𑀥𑀸𑀬𑁂𑀤𑀸𑀦𑀺 𑀧𑀝𑀺𑀧𑀢𑁆𑀢𑀺𑀮𑀸𑀳𑀯𑀢𑁆𑀣𑀫𑀸𑀳 ‘‘𑀅𑀪𑀺𑀥𑀸𑀦𑀦𑁆𑀢𑀭𑀸𑀭𑀫𑁆𑀪𑁂’’𑀇𑀘𑁆𑀘𑀸𑀤𑀺. 𑀅𑀪𑀺𑀥𑀸𑀦𑀦𑁆𑀢𑀭𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀺𑀥𑀸𑀦𑀲𑁆𑀲 𑀆𑀭𑀫𑁆𑀪𑁂 𑀲𑀢𑀺, 𑀢𑀼 𑀅𑀦𑁆𑀢𑁄 𑀬𑀲𑁆𑀲 𑀅𑀪𑀺𑀥𑀸𑀦𑀲𑁆𑀲, 𑀅𑀣 𑀆𑀤𑀺 𑀬𑀲𑁆𑀲 𑀅𑀪𑀺𑀥𑀸𑀦𑀲𑁆𑀲𑀸𑀢𑀺 𑀇𑀤𑀁 𑀅𑀪𑀺𑀥𑀸𑀦𑀤𑁆𑀯𑀬𑀜𑁆𑀘 𑀜𑁂𑀬𑁆𑀬𑀁. 𑀢𑁆𑀯𑀦𑁆𑀢𑀫𑀣𑀸𑀤𑀺𑀓𑀁 𑀦𑀸𑀫𑀸𑀤𑀺𑀧𑀤𑀁 𑀧𑀼𑀩𑁆𑀩𑁂𑀦 𑀦 𑀲𑀫𑁆𑀩𑀚𑁆𑀛𑀢𑁂𑀢𑀺 𑀪𑀸𑀯𑁄. 𑀢𑀢𑁆𑀭 𑀦𑀸𑀫𑀧𑀤𑀁 𑀬𑀣𑀸 𑁋 𑀚𑀺𑀦𑁄 𑀲𑀓𑁆𑀓𑁄 𑀢𑀼 𑀲𑀺𑀤𑁆𑀥𑀢𑁆𑀣𑁄 [𑀅𑀪𑀺𑀥𑀸𑀦 𑁪 𑀕𑀸𑀣𑀸]. 𑀓𑁂𑀲𑀯𑁄 𑀘𑀓𑁆𑀓𑀧𑀸𑀡𑁆𑀬𑀣 [𑀅𑀪𑀺𑀥𑀸𑀦 𑁧𑁬 𑀕𑀸𑀣𑀸]. 𑀫𑀳𑀺𑀲𑁆𑀲𑀭𑁄 𑀲𑀺𑀯𑁄 𑀲𑀽𑀮𑀻 [𑀅𑀪𑀺𑀥𑀸𑀦 𑁧𑁬 𑀕𑀸𑀣𑀸]. 𑀮𑀺𑀗𑁆𑀕𑀧𑀤𑀁 𑀬𑀣𑀸 𑁋 𑀧𑀼𑀫𑁂 𑀢𑀼 𑀧𑀡𑁆𑀳𑀺 𑀧𑀸𑀲𑀡𑀺 [𑀅𑀪𑀺𑀥𑀸𑀦 𑁨𑁭𑁭 𑀕𑀸𑀣𑀸]. 𑀧𑀼𑀫𑁂 𑀢𑀽𑀢𑀼 𑀭𑀚𑁄 𑀧𑀼𑀧𑁆𑀨𑀁 [𑀅𑀪𑀺𑀥𑀸𑀦 𑁨𑁩𑁮 𑀕𑀸𑀣𑀸]. 𑀲𑀸 𑀢𑀺𑀭𑁄𑀓𑀭𑀡𑀻𑀧𑁆𑀬𑀣 [𑀅𑀪𑀺𑀥𑀸𑀦 𑁨𑁯𑁮 𑀕𑀸𑀣𑀸]. 𑀧𑀼𑀦𑁆𑀦𑀧𑀼𑀁𑀲𑀓𑀫𑀼𑀮𑁆𑀮𑁄𑀘𑀁 [𑀅𑀪𑀺𑀥𑀸𑀦 𑁨𑁯𑁯 𑀕𑀸𑀣𑀸]. 𑀅𑀢𑁆𑀣𑀧𑀤𑀁 𑀬𑀣𑀸 𑁋 𑀉𑀤𑀭𑁂 𑀢𑀼 𑀢𑀣𑀸 𑀧𑀸𑀘𑀸’𑀦𑀮𑀲𑁆𑀫𑀺𑀁 𑀕𑀳𑀡𑀻𑀢𑁆𑀣𑀺𑀬𑀁 [𑀅𑀪𑀺𑀥𑀸𑀦 𑁯𑁭𑁩 𑀕𑀸𑀣𑀸]. 𑀧𑀡𑀻𑀢𑁄 𑀢𑀻𑀲𑀼 𑀫𑀥𑀼𑀭𑁂, 𑀉𑀢𑁆𑀢𑀫𑁂 𑀯𑀺𑀳𑀺𑀢𑁂𑀧𑁆𑀬𑀣. 𑀅𑀜𑁆𑀚𑀲𑁂 𑀯𑀺𑀲𑀺𑀔𑀸𑀬𑀜𑁆𑀘, 𑀧𑀦𑁆𑀢𑀺𑀬𑀁 𑀯𑀻𑀣𑀺 𑀦𑀸𑀭𑀺𑀬𑀁 [𑀅𑀪𑀺𑀥𑀸𑀦 𑁯𑁪𑁦 𑀕𑀸𑀣𑀸]. 𑀅𑀣𑀲𑀤𑁆𑀤𑁂𑀦 𑀘𑀢𑁆𑀭 𑀅𑀦𑀦𑁆𑀢𑀭𑀺𑀬𑀢𑁆𑀣𑁂𑀦 𑀲𑀓𑀧𑀭𑀺𑀬𑀸𑀬𑁄𑀧𑀮𑀓𑁆𑀔𑀡𑀢𑁄 𑀅𑀣𑁄 𑀲𑀤𑁆𑀤𑀸𑀤𑀻𑀲𑀼 𑀘 𑀦 𑀧𑀼𑀩𑁆𑀩𑁂𑀦 𑀲𑀫𑁆𑀩𑀚𑁆𑀛𑀢𑁂. 𑀧𑀸𑀡𑀓𑁄 𑀘𑀸𑀧𑁆𑀬𑀣𑁄 𑀉𑀘𑁆𑀘𑀸𑀮𑀺𑀗𑁆𑀕𑁄 𑀮𑁄𑀫𑀲𑀧𑀸𑀡𑀓𑁄𑀢𑀺 [𑀅𑀪𑀺𑀥𑀸𑀦 𑁬𑁨𑁩 𑀕𑀸𑀣𑀸].

[𑀛] 𑀇𑀤𑀸𑀦𑀺 𑀩𑀼𑀤𑁆𑀥𑀯𑀘𑀦𑀸𑀦𑀫𑀦𑀼𑀭𑀽𑀧𑀸𑀦𑀫𑁆𑀧𑀺 𑀧𑀘𑀼𑀭𑀧𑁆𑀧𑀬𑁄𑀕𑀸𑀦𑀫𑁂𑀯 𑀓𑁂𑀲𑀜𑁆𑀘𑀺 𑀕𑀳𑀡𑀁 𑀅𑀢𑁆𑀢𑀦𑁄 𑀲𑀢𑁆𑀣𑀦𑁆𑀢𑀭𑀸𑀧𑀲𑀬𑁆𑀳𑀢𑀸𑀯𑀲𑁂𑀦 𑀅𑀳𑀁𑀓𑀸𑀭𑀧𑀼𑀩𑁆𑀩𑀺𑀓𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀺𑀬𑁆𑀬𑁄 𑀧𑀬𑁄𑀕’’𑀫𑀺𑀘𑁆𑀘𑀸𑀤𑀺. 𑀲𑁄𑀕𑀢𑁂 𑀲𑀼𑀕𑀢𑀲𑁆𑀲 𑀯𑀘𑀦𑀪𑀽𑀢𑁂 𑀆𑀕𑀫𑁂 𑀧𑀺𑀝𑀓𑀢𑁆𑀢𑀬𑁂, 𑀢𑀜𑁆𑀳𑀺 𑀆𑀕𑀘𑁆𑀙𑀦𑁆𑀢𑀺 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑁄 𑀏𑀢𑁂𑀦𑀸𑀢𑀺 𑀆𑀕𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀪𑀺𑀬𑁆𑀬𑁄 𑀧𑀬𑁄𑀕𑀁 𑀩𑀸𑀳𑀼𑀮𑁆𑀮𑁂𑀦 𑀧𑀬𑀼𑀚𑁆𑀚𑀢𑁂𑀢𑀺 𑀧𑀬𑁄𑀕𑁄, 𑀢𑀁 𑀆𑀕𑀫𑁆𑀫 𑀕𑀳𑁂𑀢𑁆𑀯𑀸 𑀓𑁆𑀯𑀘𑀺 𑀅𑀭𑀜𑁆𑀜𑀯𑀕𑁆𑀕𑀸𑀤𑀻𑀲𑀼 𑀦𑀺𑀖𑀡𑁆𑀝𑀼𑀬𑀼𑀢𑁆𑀢𑀺𑀜𑁆𑀘 𑀦𑀺𑀖𑀡𑁆𑀝𑀼𑀦𑀸𑀫𑀓𑁂 𑀲𑀢𑁆𑀣𑁂 𑀆𑀕𑀢𑀁 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑀁 𑀬𑀼𑀢𑁆𑀢𑀺𑀜𑁆𑀘 𑀆𑀦𑀻𑀬 𑀆𑀦𑁂𑀢𑁆𑀯𑀸 𑀦𑀸𑀫𑀮𑀺𑀗𑁆𑀕𑀁 𑀓𑀣𑀻𑀬𑀢𑀺 𑀅𑀦𑁆𑀢𑁄𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀁 𑀩𑀳𑀺𑀪𑀸𑀯𑁂𑀦 𑀧𑀓𑀸𑀲𑀻𑀬𑀢𑁂. 𑀆𑀯𑀺𑀪𑀸𑀯𑀢𑁆𑀢𑀫𑁂𑀯 𑀳𑀺 𑀚𑀜𑁆𑀜𑀢𑁆𑀢𑀁 𑀲𑀦𑁆𑀢𑀓𑀸𑀭𑀺𑀬𑀓𑀸𑀭𑀺𑀦𑁄. 𑀆𑀲𑀻𑀲𑀸𑀬𑀁 𑀯𑀸 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑁄𑀧𑀺 𑀯𑀘𑀦𑀲𑁆𑀲 𑀯𑀢𑁆𑀢𑀫𑀸𑀦𑀢𑁆𑀣𑀯𑀢𑁆𑀢𑀺𑀘𑁆𑀙𑀸𑀬 𑀯𑀢𑁆𑀢𑀫𑀸𑀦𑀢𑁆𑀢𑀁, 𑀢𑀣𑀸 𑀳𑀺 𑀮𑁄𑀓𑁂 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑁄 𑀲𑀺𑀤𑁆𑀥𑀺𑀫𑀪𑀺𑀲𑀦𑁆𑀥𑀸𑀬 𑀪𑀸𑀯𑀺𑀦𑀫𑀧𑁆𑀧𑀢𑁆𑀢𑀁 𑀯𑀢𑁆𑀢𑀫𑀸𑀦𑀢𑁆𑀢𑁂𑀦 𑀯𑀸 𑀅𑀢𑀻𑀢𑀢𑁆𑀢𑁂𑀦 𑀯𑀸 𑀯𑀢𑁆𑀢𑀼𑀫𑀺𑀘𑁆𑀙𑀢𑀺, 𑀢𑀁 𑀬𑀣𑀸 𑁋 ‘‘𑀇𑀤𑀁 𑀫𑀫𑀫𑀧𑀸𑀧𑀬𑁂’’𑀢𑀺 𑀓𑁄𑀘𑀺 𑀓𑁂𑀦𑀘𑀸𑀪𑀺𑀳𑀺𑀢𑁄 𑀲𑀦𑁆𑀢𑁄 𑀅𑀯𑀲𑁆𑀲𑀁 𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀧𑀸𑀧𑀺𑀬𑀫𑀸𑀦𑀁 𑀧𑀢𑁆𑀢𑀁 𑀯𑀸 𑀯𑀢𑁆𑀢𑀼𑀫𑀺𑀘𑁆𑀙𑀢𑀺, 𑀢𑀢𑁄𑀬𑁂𑀯 ‘‘𑀆𑀲𑀻𑀲𑀸𑀬𑀁 𑀪𑀽𑀢𑀫𑀺𑀯 𑀘𑁂’’𑀢𑀺 [𑀧𑀸𑀡𑀺𑀦𑀺 𑁩.𑁩.𑁧𑁩𑁨] 𑀢𑀤𑀢𑀺𑀤𑁂𑀲𑀯𑀘𑀦𑀁 𑀧𑀘𑁆𑀘𑀸𑀔𑁆𑀬𑀸𑀬𑀢𑁂.

𑀧𑀡𑀸𑀫𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀲𑀕𑁆𑀕𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀦𑀸𑀫 𑀧𑀜𑁆𑀜𑀢𑁆𑀢𑀺𑀧𑀭𑀫𑀢𑁆𑀣𑀢𑁆𑀣𑀯𑀲𑁂𑀦 𑀤𑀼𑀯𑀺𑀥𑁄, 𑀢𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀧𑀜𑁆𑀜𑀢𑁆𑀢𑀢𑁆𑀣𑀢𑁄 𑀧𑀭𑀫𑀢𑁆𑀣𑀢𑁆𑀣𑁄𑀯 𑀲𑁂𑀝𑁆𑀞𑁄, 𑀢𑁂𑀲𑀼𑀧𑀺 𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀭𑀢𑁆𑀢𑀸 𑀬𑀣𑀸𑀓𑁆𑀓𑀫𑀁 𑀅𑀝𑁆𑀞 𑀥𑀫𑁆𑀫𑀸 𑀲𑁂𑀝𑁆𑀞𑀸, 𑀢𑀢𑁄𑀧𑀺 𑀦𑀺𑀩𑁆𑀩𑀸𑀦𑀫𑁂𑀯 𑀲𑁂𑀝𑁆𑀞𑀁, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀲𑁂𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺 [𑀥. 𑀧. 𑁨𑁭𑁩; 𑀦𑁂𑀢𑁆𑀢𑀺. 𑁧𑁨𑁫]. 𑀏𑀢𑁆𑀣 𑀳𑀺 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 [𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦] 𑀯𑀘𑀦𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀯𑀺𑀭𑀸𑀕𑀲𑀗𑁆𑀔𑀸𑀢𑁄 𑀦𑀺𑀩𑁆𑀩𑀸𑀦𑀫𑁂𑀯 𑀲𑁂𑀝𑁆𑀞𑁄, 𑀘𑀓𑁆𑀔𑀼𑀫𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁, 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑀸𑀦𑀁 𑀤𑁆𑀯𑀺𑀧𑀤𑀸𑀦𑀜𑁆𑀘 𑀧𑀜𑁆𑀜𑀢𑁆𑀢𑀢𑁆𑀣𑀸𑀦𑀁 𑀲𑁂𑀝𑁆𑀞𑁄𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣𑀲𑁂𑀝𑁆𑀞𑀢𑁆𑀣𑀸𑀪𑀺𑀥𑀸𑀬𑀓𑀸𑀪𑀺𑀥𑀸𑀦𑀪𑀽𑀢𑀁 𑀩𑀼𑀤𑁆𑀥𑀸𑀢𑀺𑀥𑀸𑀦𑀫𑁂𑀯 𑀧𑀞𑀫𑀁 𑀲𑀕𑁆𑀕𑀓𑀡𑁆𑀟𑀲𑁆𑀲 𑀆𑀤𑀺𑀫𑁆𑀳𑀺 𑀧𑀢𑁆𑀣𑀺𑀬𑀯𑀲𑁂𑀦 [𑀲𑀢𑁆𑀣𑀺𑀬𑀯𑀲𑁂𑀦 (𑀓.)] 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀩𑀼𑀤𑁆𑀥𑁄’’𑀘𑁆𑀘𑀸𑀤𑀺. 𑀢𑀢𑁆𑀣 𑀚𑀺𑀦𑀲𑀤𑁆𑀤𑀦𑁆𑀢𑀁 𑀲𑀩𑁆𑀩𑀩𑀼𑀤𑁆𑀥𑀲𑁆𑀲 𑀦𑀸𑀫𑀁. 𑀲𑀩𑁆𑀩𑀁 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄, 𑀲𑀓𑀫𑁆𑀫𑀓𑀸 𑀓𑀢𑁆𑀢𑀭𑀺 𑀢𑀧𑀘𑁆𑀘𑀬𑁄. 𑀯𑀺𑀲𑀺𑀝𑁆𑀞𑀸 𑀩𑀼𑀤𑁆𑀥𑀺 𑀅𑀲𑁆𑀲𑀢𑁆𑀣𑀻𑀢𑀺 𑀩𑀼𑀤𑁆𑀥𑁄, 𑀧𑀲𑀁𑀲𑀸𑀬𑀁 𑀬𑀤𑀸𑀤𑀺𑀦𑀸 𑀡𑀧𑀘𑁆𑀘𑀬𑁄. 𑀤𑀸𑀦𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀬𑁄 𑀯𑀸 𑀤𑀲 𑀩𑀮𑀸𑀦𑀺 𑀬𑀲𑁆𑀲𑁂𑀢𑀺 𑀤𑀲𑀩𑀮𑁄. 𑀲𑀸𑀲𑀢𑀺 𑀯𑀺𑀦𑀬𑀢𑀺 𑀲𑀢𑁆𑀢𑁂𑀢𑀺 𑀲𑀢𑁆𑀣𑀸. 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀲𑀻𑀮𑀢𑀸𑀬 𑀲𑀩𑁆𑀩𑀜𑁆𑀜𑀽. 𑀤𑁆𑀯𑀺𑀧𑀤𑀸𑀦𑀁, 𑀤𑁆𑀯𑀺𑀧𑀤𑁂𑀲𑀼 𑀯𑀸 𑀉𑀢𑁆𑀢𑀫𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄, 𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸𑀬𑀁 [𑀩𑀼. 𑀯𑀁. 𑀅𑀝𑁆𑀞. 𑁩𑁭 𑀦𑀺𑀤𑀸𑀦𑀓𑀣𑀸] 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀬 𑀙𑀝𑁆𑀞𑀺𑀬𑀸 𑀲𑀫𑀸𑀲𑀲𑁆𑀲 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀦𑁂𑀤𑀺𑀲𑀻 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸 𑀙𑀝𑁆𑀞𑀻 𑀕𑀫𑁆𑀬𑀢𑁂. 𑀓𑀲𑁆𑀫𑀸 𑀧𑀦 𑀲𑁄 𑀢𑀢𑁆𑀣 𑀧𑀝𑀺𑀲𑀺𑀤𑁆𑀥𑁄𑀢𑀺? 𑀲𑀫𑀸𑀲𑁂 𑀬𑁂𑀪𑀼𑀬𑁆𑀬𑁂𑀦 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀯𑀺𑀓𑀮𑀸𑀪𑀸𑀯𑀢𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑀢𑁆𑀣 𑀙𑀝𑁆𑀞𑀺𑀬𑀸𑀬𑁂𑀯 𑀧𑀝𑀺𑀲𑀺𑀤𑁆𑀥𑁄, 𑀲𑀢𑁆𑀢𑀫𑀺𑀬𑀸 𑀧𑀦 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀲𑁆𑀲𑀸𑀧𑀺 𑀲𑁄 𑀧𑀝𑀺𑀲𑁂𑀥𑀦𑀻𑀬𑁄𑀬𑁂𑀯. 𑀫𑀼𑀦𑀻𑀦𑀁 𑀇𑀦𑁆𑀤𑁄 𑀭𑀸𑀚𑀸 𑀫𑀼𑀦𑀺𑀦𑁆𑀤𑁄. 𑀧𑀼𑀜𑁆𑀜𑀜𑀸𑀡𑀪𑀸𑀕𑁆𑀬𑀸𑀤𑀬𑁄 𑀪𑀕𑀁 𑀦𑀸𑀫, 𑀢𑀁𑀬𑁄𑀕𑀸 𑀪𑀕𑀯𑀸. 𑀦𑀸𑀣𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀁 𑀬𑀸𑀘𑀢𑀺, 𑀓𑀺𑀮𑁂𑀲𑁂 𑀯𑀸 𑀉𑀧𑀢𑀸𑀧𑁂𑀢𑀺, 𑀲𑀢𑁆𑀢𑁂𑀲𑀼 𑀯𑀸 𑀇𑀲𑁆𑀲𑀭𑀺𑀬𑀁 𑀓𑀭𑁄𑀢𑀺, 𑀢𑁂𑀲𑀁 𑀯𑀸 𑀳𑀺𑀢𑀁 𑀆𑀲𑀻𑀲𑀢𑀻𑀢𑀺 𑀦𑀸𑀣𑁄. 𑀩𑀼𑀤𑁆𑀥𑀥𑀫𑁆𑀫𑀲𑀫𑀦𑁆𑀢𑀜𑀸𑀡𑀤𑀺𑀩𑁆𑀩𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀓𑁆𑀔𑀼𑀫𑀸. 𑀲𑀩𑁆𑀩𑀤𑀸 𑀩𑁆𑀬𑀸𑀫𑀧𑁆𑀧𑀪𑀸𑀬 𑀓𑀸𑀬𑀢𑁄 𑀦𑀺𑀘𑁆𑀙𑀭𑀡𑀯𑀲𑁂𑀦 𑀅𑀗𑁆𑀕𑀻𑀭𑀲𑁄. 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀫𑀼𑀦𑀦𑀢𑁄 𑀫𑀼𑀦𑀺, 𑀥𑀫𑁆𑀫𑀯𑀸𑀤𑁂𑀲𑀼 𑀯𑀸 𑀫𑁄𑀦𑀓𑀭𑀡𑀢𑁄 𑀫𑀼𑀦𑀺.

𑁨. 𑀮𑁄𑀓𑀸𑀦𑀁, 𑀮𑁄𑀓𑁂𑀲𑀼 𑀯𑀸 𑀦𑀸𑀣𑁄 𑀮𑁄𑀓𑀦𑀸𑀣𑁄. 𑀅𑀢𑁆𑀢𑀦𑁄 𑀅𑀥𑀺𑀓𑀲𑁆𑀲 𑀓𑀲𑁆𑀲𑀘𑀺𑀧𑀺 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀅𑀦𑀥𑀺𑀯𑀭𑁄, 𑀲𑀩𑁆𑀩𑀧𑀭𑀺𑀬𑀦𑁆𑀢𑀕𑀢𑀢𑁆𑀢𑀪𑀸𑀯𑀢𑁆𑀢𑀸 𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀇𑀢𑁄 𑀅𑀜𑁆𑀜𑁄 𑀅𑀥𑀺𑀓𑁄 𑀧𑀢𑁆𑀣𑁂𑀢𑀩𑁆𑀩𑁄 𑀅𑀢𑁆𑀢𑀪𑀸𑀯𑁄𑀢𑀺 𑀅𑀦𑀥𑀺𑀯𑀭𑁄. 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀦𑀢𑁄 𑀕𑀯𑁂𑀲𑀦𑀢𑁄 𑀫𑀳𑁂𑀲𑀺, 𑀫𑀳𑀦𑁆𑀢𑁄 𑀯𑀸 𑀈𑀲𑁄 𑀯𑀺𑀪𑀽𑀢𑀺 𑀏𑀢𑀲𑁆𑀲𑀸𑀢𑀺 𑀫𑀳𑁂𑀲𑀺. 𑀳𑀺𑀢𑀁 𑀯𑀺𑀦𑀬𑀢𑀺 𑀅𑀦𑀼𑀲𑀸𑀲𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀯𑀺𑀲𑀺𑀝𑁆𑀞𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄. 𑀲𑀩𑁆𑀩𑀥𑀫𑁆𑀫𑀤𑀲𑁆𑀲𑀦𑀲𑀻𑀮𑀢𑀸𑀬 ‘‘𑀲𑀫𑀦𑁆𑀢𑀘𑀓𑁆𑀔𑀽’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀦𑁆𑀢𑀘𑀓𑁆𑀔𑀼. 𑀲𑁄𑀪𑀦𑀁 𑀕𑀢𑀁 𑀜𑀸𑀡𑀫𑀲𑁆𑀲, 𑀲𑀁𑀲𑀸𑀭𑀸 𑀯𑀸 𑀲𑀼𑀝𑁆𑀞𑀼 𑀅𑀧𑀼𑀦𑀭𑀸𑀯𑀢𑁆𑀢𑀺𑀬𑀸 𑀕𑀢𑀯𑀸𑀢𑀺 𑀲𑀼𑀕𑀢𑁄, 𑀲𑀧𑀭𑀲𑀼𑀔𑀲𑀺𑀤𑁆𑀥𑀢𑁆𑀣𑀁 𑀯𑀸 𑀲𑀫𑁆𑀫𑀸 𑀕𑀢𑀯𑀸𑀢𑀺 𑀲𑀼𑀕𑀢𑁄. 𑀪𑀽𑀭𑀺 𑀩𑀳𑀼𑀓𑀸 𑀧𑀜𑁆𑀜𑀸 𑀬𑀲𑁆𑀲, 𑀅𑀦𑀦𑁆𑀢𑀢𑁆𑀢𑀸 𑀯𑀸 𑀪𑀽𑀭𑀺𑀲𑀫𑀸 𑀧𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀅𑀦𑀦𑁆𑀢𑀸𑀬 𑀫𑀳𑀸𑀧𑀣𑀯𑀺𑀬𑀸 𑀲𑀤𑀺𑀲𑀧𑀜𑁆𑀜𑁄𑀢𑁆𑀬𑀢𑁆𑀣𑁄. 𑀓𑀺𑀮𑁂𑀲𑀸𑀤𑀺𑀧𑀜𑁆𑀘𑀯𑀺𑀥𑀁 𑀫𑀸𑀭𑀁 𑀚𑀺𑀢𑀯𑀸𑀢𑀺 𑀫𑀸𑀭𑀚𑀺.

𑁩. 𑀦𑀭𑀸𑀦𑀁 𑀲𑀻𑀳𑁄 𑀲𑁂𑀝𑁆𑀞𑁄, 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑀲𑀳𑀦𑀢𑁄 𑀯𑀸 𑀦𑀭𑁄 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀦𑀭𑀲𑀻𑀳𑁄, 𑀲𑀳𑀢𑀻𑀢𑀺 𑀲𑀻𑀳𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀼𑀩𑁆𑀩𑀯𑀡𑁆𑀡𑀸𑀓𑀸𑀭𑀲𑁆𑀲𑀻𑀓𑀸𑀭𑁄, 𑀲𑀻𑀳𑀲𑀤𑀺𑀲𑀢𑁆𑀢𑀸 𑀯𑀸 𑀦𑀭𑁄 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀦𑀭𑀲𑀻𑀳𑁄. 𑀬𑀣𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀲𑀩𑁆𑀩𑀲𑀢𑁆𑀢𑁂 𑀳𑀺𑀁𑀲𑀢𑀺 𑀅𑀪𑀺𑀪𑀯𑀢𑀺, 𑀢𑀣𑀸 𑀪𑀕𑀯𑀸𑀧𑀺 𑀲𑀻𑀮𑀧𑀜𑁆𑀜𑀸𑀧𑀼𑀜𑁆𑀜𑀺𑀤𑁆𑀥𑀺𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀩𑁆𑀩𑀁 𑀮𑁄𑀓𑀁 𑀳𑀺𑀁𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁. 𑀲𑀩𑁆𑀩𑀧𑀼𑀭𑀺𑀲𑀸𑀦𑀁 𑀲𑁂𑀝𑁆𑀞𑀢𑁆𑀢𑀸 𑀦𑀭𑀯𑀭𑁄, 𑀦𑀭𑀸𑀦𑀁 𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑁂𑀝𑁆𑀞𑀢𑁆𑀢𑀸 𑀦𑀭𑀯𑀭𑁄, ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺 [𑀲𑀁. 𑀦𑀺. 𑁧.𑁨𑁩] 𑀏𑀢𑁆𑀣 𑀯𑀺𑀬 𑀦𑀭𑀲𑀤𑁆𑀤𑁂𑀦 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀲𑀗𑁆𑀕𑀳𑀺𑀢𑀸. 𑀥𑀫𑁆𑀫𑀲𑁆𑀲 𑀭𑀸𑀚𑀧𑀯𑀢𑁆𑀢𑀓𑀢𑁆𑀢𑀸 𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑀢𑁄 𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀭𑀸𑀚𑀸 𑀚𑀸𑀢𑁄, 𑀦𑀸𑀥𑀫𑁆𑀫𑀢𑁄𑀢𑀺 𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑁂𑀦 𑀭𑀸𑀚𑀢𑀻𑀢𑀺 𑀯𑀸 𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑀧𑀸𑀮𑀓𑁄 𑀯𑀸 𑀭𑀸𑀚𑀸 𑀥𑀫𑁆𑀫𑀭𑀸𑀚𑀸. 𑀫𑀼𑀦𑀻𑀦𑀁 𑀲𑁂𑀝𑁆𑀞𑀢𑁆𑀢𑀸 𑀫𑀳𑀸𑀫𑀼𑀦𑀺. 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄𑀢𑀺 𑀤𑁂𑀯𑀤𑁂𑀯𑁄, 𑀤𑁂𑀯𑀸𑀦𑀁 𑀅𑀥𑀺𑀓𑁄 𑀯𑀸 𑀤𑁂𑀯𑁄 𑀤𑁂𑀯𑀤𑁂𑀯𑁄. 𑀮𑁄𑀓𑀸𑀦𑀁 𑀕𑀭𑀼 𑀆𑀘𑀭𑀺𑀬𑁄 𑀮𑁄𑀓𑀕𑀭𑀼, 𑀮𑁄𑀓𑀸𑀦𑀁 𑀕𑀭𑀼𑀪𑀸𑀚𑀦𑀢𑁆𑀢𑀸 𑀯𑀸 𑀮𑁄𑀓𑀕𑀭𑀼. 𑀥𑀫𑁆𑀫𑀲𑁆𑀲 𑀲𑀸𑀫𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀲𑁆𑀲𑀸𑀫𑀻. 𑀬𑀣𑀸 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀯𑀸 𑀲𑀫𑁆𑀫𑀸 𑀕𑀢𑀁 𑀜𑀸𑀡𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄𑀢𑁆𑀬𑀸𑀤𑀺𑀦𑀸 𑀢𑀣𑀸𑀕𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀧𑀧𑀜𑁆𑀘𑁄 𑀢𑀢𑁆𑀣 𑀢𑀢𑁆𑀣 [𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁭𑁦; 𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁩; 𑀩𑀼. 𑀯𑀁. 𑀅𑀝𑁆𑀞. 𑁨 𑀦𑀺𑀤𑀸𑀦 𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁧𑁪; 𑀧𑀝𑀺. 𑀲. 𑀅𑀝𑁆𑀞. 𑁧.𑁧.𑁩𑁭; 𑀤𑀻. 𑀦𑀺. 𑀝𑀻. 𑁧.𑁭; 𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁭; 𑀫. 𑀦𑀺. 𑀝𑀻. 𑁧.𑁧𑁨; 𑀅. 𑀦𑀺. 𑀝𑀻. 𑁧.𑁧.𑁧𑁭𑁦] 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪. 𑀲𑀬𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀢𑀺, 𑀅𑀦𑀜𑁆𑀜𑀩𑁄𑀥𑀺𑀢𑁄𑀢𑀺 𑀲𑀬𑀫𑁆𑀪𑀽. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑁂𑀦 𑀲’𑀫𑀢𑁆𑀢𑀦𑀸𑀬𑁂𑀯 𑀲𑀩𑁆𑀩𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀲𑁂𑀝𑁆𑀞𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀭𑀧𑀜𑁆𑀜𑁄. 𑀲𑀢𑁆𑀢𑁂 𑀲𑀁𑀲𑀸𑀭𑀡𑁆𑀡𑀯𑀢𑁄 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀢𑀻𑀢𑀺 𑀦𑀸𑀬𑀓𑁄. 𑀚𑀺𑀢𑀧𑀜𑁆𑀘𑀫𑀸𑀭𑀢𑁆𑀢𑀸 𑀚𑀺𑀦𑁄. 𑀏𑀢𑁆𑀣 𑀘 𑀲𑀫𑀦𑁆𑀢𑀪𑀤𑁆𑀭, 𑀮𑁄𑀓𑀚𑀺, 𑀙𑀴𑀪𑀺𑀜𑁆𑀜, 𑀅𑀤𑁆𑀯𑀬𑀯𑀸𑀤𑀻, 𑀲𑀺𑀭𑀻𑀖𑀦, 𑀅𑀓𑀦𑀺𑀝𑁆𑀞𑀕 [𑀅𑀓𑀦𑀺𑀝𑁆𑀞𑀓 (𑀓.)], 𑀥𑀫𑁆𑀫𑀘𑀓𑁆𑀓, 𑀭𑀸𑀕𑀸𑀲𑀦𑀺 [𑀭𑀸𑀕𑀸𑀭𑀺 (𑀓.)], 𑀢𑀺𑀲𑀭𑀡, 𑀔𑀲𑀫 [𑀔𑀡𑀲𑀫 (𑀓.) 𑀔𑁂𑀦 𑀆𑀓𑀸𑀲𑁂𑀦 𑀲𑀫𑀸 𑀢𑀼𑀮𑁆𑀬𑀸 𑀕𑀼𑀡𑀸 𑀬𑀲𑁆𑀲 𑀲𑁄 (𑀢𑀺𑀓𑀡𑁆𑀟𑀲𑁂𑀲𑀝𑀻𑀓𑀸 𑁧.𑁧.𑁮)], 𑀕𑀼𑀡𑀸𑀓𑀭, 𑀫𑀳𑀸𑀲𑀼𑀔, 𑀯𑀚𑀺𑀭, 𑀫𑁂𑀢𑁆𑀢𑀸𑀩𑀮, 𑀅𑀲𑀫, 𑀚𑀺𑀢𑀸𑀭𑀺, 𑀫𑀳𑀸𑀩𑁄𑀥𑀺, 𑀥𑀫𑁆𑀫𑀥𑀸𑀢𑀼, 𑀲𑁂𑀢𑀓𑁂𑀢𑀼, 𑀔𑀚𑀺, 𑀢𑀺𑀫𑀼𑀢𑁆𑀢𑀺 [𑀔𑀚𑀺𑀭𑀯𑀺𑀫𑀼𑀢𑁆𑀢𑀺 (𑀓.) 𑀔𑁂𑀦 𑀆𑀓𑀸𑀲𑀚𑁆𑀛𑀸𑀦𑁂𑀦 𑁋 𑀲𑀼𑀜𑁆𑀜𑀪𑀸𑀯𑀦𑀸𑀬𑀸𑀢𑀺 𑀪𑀸𑀯𑁄 𑁋 𑀚𑀬𑀢𑀺 𑀲𑀁𑀲𑀸𑀭𑀪𑀸𑀯𑀁 𑀬𑁄, 𑀚𑀺+ 𑀓𑁆𑀯𑀺𑀧 𑀲𑀼𑀜𑁆𑀜𑀯𑀸𑀤𑀻𑀦𑀁 𑀩𑁄𑀤𑁆𑀥𑀸𑀦𑀁 ‘‘𑀲𑀼𑀜𑁆𑀜𑀁 𑀲𑀩𑁆𑀩𑀫𑁂𑀯’’ 𑀇𑀢𑁆𑀬𑀸𑀓𑀸𑀭𑀪𑀸𑀯𑀦𑀸𑀬 𑀲𑀁𑀲𑀸𑀭𑀪𑀸𑀯𑀚𑀬𑀦𑀢𑁄 𑀢𑀣𑀸𑀪𑀸𑀯𑁄 (𑀲𑀤𑁆𑀤𑀓𑀧𑁆𑀧𑀤𑁆𑀤𑀼𑀫)], 𑀤𑀲𑀪𑀽𑀫𑀺𑀲𑁆𑀲𑀭, 𑀧𑀜𑁆𑀘𑀜𑀸𑀡, 𑀩𑀳𑀼𑀓𑁆𑀔𑀫, 𑀲𑀫𑁆𑀩𑀼𑀤𑁆𑀥, 𑀲𑀩𑁆𑀩𑀤𑀲𑁆𑀲𑀻, 𑀫𑀳𑀸𑀩𑀮, 𑀲𑀩𑁆𑀩𑀩𑁄𑀥 [𑀲𑀫𑁆𑀩𑁄𑀥𑀥𑀫𑁆𑀫 (𑀓.)], 𑀥𑀫𑁆𑀫𑀓𑀸𑀬, 𑀲𑀁𑀕𑀼𑀢𑁆𑀢, 𑀅𑀭𑀳, 𑀤𑁆𑀯𑀸𑀤𑀲𑀓𑁆𑀔, 𑀯𑀻𑀢𑀭𑀸𑀕𑀸𑀤𑀻𑀦𑀺𑀧𑀺 𑀅𑀦𑁂𑀓𑀸𑀦𑀺 𑀩𑀼𑀤𑁆𑀥𑀲𑁆𑀲 𑀦𑀸𑀫𑀸𑀦𑀺 [𑀇𑀫𑀸𑀦𑀺 𑀧𑀭𑀺𑀬𑀸𑀬𑀯𑀘𑀦𑀸𑀦𑀺 𑀧𑀸𑀬𑀲𑁄 𑀅𑀫𑀭𑀓𑁄𑀲𑀢𑁄, 𑀢𑀺𑀓𑀡𑁆𑀟𑀲𑁂𑀲𑀸𑀪𑀺𑀥𑀸𑀦𑀢𑁄 𑀘 𑀕𑀳𑀺𑀢𑀸𑀦𑀺]. 𑀲𑀫𑀦𑁆𑀢𑀢𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀢𑁄 𑀘 𑀜𑀸𑀡𑀲𑀫𑁆𑀪𑀸𑀭𑀢𑁄 𑀘 𑀪𑀤𑁆𑀭𑁄 𑀲𑁂𑀝𑁆𑀞𑁄𑀢𑀺 𑀲𑀫𑀦𑁆𑀢𑀪𑀤𑁆𑀭𑁄𑀢𑁆𑀬𑀸𑀤𑀻𑀦𑀺 𑀘 𑀦𑀺𑀩𑁆𑀩𑀘𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺 [𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬; 𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁮].

𑀢𑀢𑁆𑀣 𑀉𑀤𑁆𑀥𑁂𑀬𑁆𑀬𑀦𑁆𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄𑀢𑀺 𑀅𑀦𑁂𑀓𑁂𑀳𑀺 𑀦𑀸𑀫𑀲𑀳𑀲𑁆𑀲𑁂𑀳𑀻𑀢𑁆𑀬𑀢𑁆𑀣𑁄. 𑀲𑀩𑁆𑀩𑀩𑀼𑀤𑁆𑀥𑀦𑀸𑀫𑀓𑀣𑀸.

𑀲𑀓𑁆𑀓𑀸𑀤𑀺𑀲𑀢𑁆𑀢𑀓𑀁 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀲𑁆𑀲 𑀦𑀸𑀫𑀁. 𑀧𑀜𑁆𑀘𑀫𑀸𑀭𑁂 𑀚𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀲𑀓𑁆𑀓𑁄, 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀓𑀭𑀡𑀢𑁄 𑀯𑀸 𑀮𑁄𑀓𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀻𑀢𑀺 𑀲𑀓𑁆𑀓𑀸, 𑀲𑀸𑀓𑀺𑀬𑀭𑀸𑀚𑀽𑀦𑀁 𑀧𑀼𑀩𑁆𑀩𑀭𑀸𑀚𑀸𑀦𑁄, 𑀢𑁂𑀲𑀁 𑀯𑀁𑀲𑀪𑀽𑀢𑀢𑁆𑀢𑀸 𑀪𑀕𑀯𑀸 ‘‘𑀲𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑁆𑀲 𑀘 𑀚𑀸𑀢𑀺𑀲𑀫𑀦𑀦𑁆𑀢𑀭𑀁 𑀦𑀺𑀥𑀬𑁄 𑀭𑀢𑀦𑀸𑀦𑀺 𑀘 𑀉𑀧𑁆𑀧𑀦𑁆𑀦𑀸𑀦𑀻𑀢𑀺 𑀲𑀺𑀤𑁆𑀥𑀢𑁆𑀣𑁄𑀢𑀺 𑀦𑀸𑀫𑀁 𑀓𑀢𑀁, 𑀲𑀩𑁆𑀩𑁂𑀲𑀁 𑀯𑀸 𑀮𑁄𑀓𑀸𑀦𑀁 𑀲𑀺𑀤𑁆𑀥𑀸 𑀅𑀢𑁆𑀣𑀸 𑀏𑀢𑁂𑀦 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀲𑀺𑀤𑁆𑀥𑀢𑁆𑀣𑁄. 𑀲𑀼𑀤𑁆𑀥𑀁 𑀑𑀤𑀦𑀁 𑀅𑀲𑁆𑀲𑀸𑀢𑀺 𑀲𑀼𑀤𑁆𑀥𑁄𑀤𑀦𑁄, 𑀢𑀲𑁆𑀲 𑀅𑀧𑀘𑁆𑀘𑀁 𑀲𑀼𑀤𑁆𑀥𑁄𑀤𑀦𑀺. 𑀕𑁄𑀢𑀫𑀯𑀁𑀲𑀲𑁆𑀲 𑀓𑀧𑀺𑀮𑀲𑁆𑀲 𑀫𑀼𑀦𑀺𑀦𑁄 𑀲𑀺𑀲𑁆𑀲𑀢𑀸𑀬 𑀲𑀓𑁆𑀬𑀸 𑀕𑁄𑀢𑀫𑀸, 𑀪𑀕𑀯𑀸 𑀧𑀦 𑀕𑁄𑀢𑀫𑀯𑀁𑀲𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀕𑁄𑀢𑀫𑀲𑁆𑀲 𑀫𑀼𑀦𑀺𑀦𑁄 𑀅𑀧𑀘𑁆𑀘𑀁 𑀕𑁄𑀢𑀫𑁄.

𑁫. 𑀲𑀓𑁆𑀬𑀯𑀁𑀲𑀸𑀯𑀢𑀺𑀡𑁆𑀡𑁄 [𑀲𑀓𑁆𑀬𑀯𑀁𑀲𑀸 𑀧𑀺𑀢𑁆𑀣𑀺𑀡𑁆𑀡𑁄 (𑀓.)] 𑀲𑀓𑁆𑀬𑀫𑀼𑀦𑀺 𑀬𑁄 𑀩𑀼𑀤𑁆𑀥𑁄 𑀲𑁄 𑀲𑀓𑁆𑀬𑀲𑀻𑀳𑁄, 𑀲𑀓𑁆𑀬𑀸𑀦𑀁 𑀯𑀸 𑀲𑁂𑀝𑁆𑀞𑀢𑁆𑀢𑀸 𑀲𑀓𑁆𑀬𑀲𑀻𑀳𑁄. 𑀲𑀓𑁆𑀬𑀓𑀼𑀮𑀢𑁄 𑀚𑀸𑀢𑁄 𑀫𑀼𑀦𑀺 𑀲𑀓𑁆𑀬𑀫𑀼𑀦𑀺. 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀪𑀕𑀯𑀸 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺 𑀯𑀼𑀘𑁆𑀘𑀢𑀺, 𑀆𑀤𑀺𑀘𑁆𑀘𑀲𑁆𑀲 𑀩𑀦𑁆𑀥𑀼 𑀜𑀸𑀢𑀻𑀢𑀺 𑀦𑀺𑀩𑁆𑀩𑀘𑀦𑀁 𑀓𑀢𑁆𑀯𑀸. 𑀏𑀢𑁆𑀣𑀧𑀺 𑀫𑀸𑀬𑀸𑀤𑁂𑀯𑀻𑀲𑀼𑀢, 𑀫𑀳𑀸𑀲𑀫𑀡, 𑀓𑀮𑀺𑀲𑀸𑀲𑀦𑀸𑀤𑀻𑀦𑀺 [𑀓𑀼𑀮𑀺𑀲𑀸𑀲𑀦𑀸𑀤𑀻𑀦𑀺 (𑀓.) 𑀓𑀮𑀺𑀫𑁆𑀳𑀺 𑀬𑀼𑀕𑁂 𑀲𑀸𑀲𑀦𑀁 𑀅𑀦𑀼𑀲𑀸𑀲𑀦𑀁 𑀬𑀲𑁆𑀲 𑀲𑁄, 𑀅𑀣𑀯𑀸 𑀓𑀮𑀺𑀫𑁆𑀳𑀺 𑀧𑀸𑀧𑁂 𑀯𑀺𑀯𑀸𑀤𑁂 𑀯𑀸 𑀲𑀸𑀲𑀦𑀁 𑀳𑀺𑀢𑀲𑀸𑀥𑀦𑀁 𑀬𑀲𑁆𑀲 𑀲𑁄 (𑀢𑀺𑀓𑀡𑁆𑀟𑀲𑁂𑀲𑀝𑀻𑀓𑀸 𑁧.𑁧.𑁧𑁧)] 𑀕𑁄𑀢𑀫𑀧𑀭𑀺𑀬𑀸𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬. 𑀫𑁄𑀓𑁆𑀔𑀸𑀤𑀻𑀦𑀺 𑀦𑀺𑀩𑁆𑀩𑀼𑀢𑀺𑀧𑀭𑀺𑀬𑀦𑁆𑀢𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀦𑀸𑀫𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀸𑀦𑀺. 𑀫𑀼𑀘𑁆𑀘𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀭𑀸𑀕𑀸𑀤𑀻𑀳𑀻𑀢𑀺 𑀫𑁄𑀓𑁆𑀔𑁄. 𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄𑀢𑀺 𑀦𑀺𑀭𑁄𑀥𑁄, 𑀭𑀼𑀦𑁆𑀥𑀢𑀺 𑀯𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀭𑁄𑀥𑁄, 𑀓𑀺𑀮𑁂𑀲𑁄, 𑀲𑁄 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀭𑁄𑀥𑁄. 𑀯𑀸𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀦𑀺𑀩𑁆𑀩𑀸𑀢𑀺 𑀯𑀸 𑀏𑀢𑁂𑀦 𑀭𑀸𑀕𑀕𑁆𑀕𑀺𑀆𑀤𑀺𑀓𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀬𑀣𑀸 𑀧𑀓𑀢𑀺𑀤𑀻𑀧𑁄 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀲𑀁𑀲𑀸𑀭𑀫𑀳𑁄𑀖𑁂𑀦 𑀯𑀼𑀬𑁆𑀳𑀫𑀸𑀦𑀸𑀦𑀁 𑀧𑀢𑀺𑀝𑁆𑀞𑀸𑀢𑀺 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄, 𑀦𑀺𑀓𑁆𑀓𑀺𑀮𑁂𑀲𑀸𑀦𑀁 𑀯𑀸 𑀧𑀤𑀻𑀧𑀲𑀤𑀺𑀲𑀪𑀸𑀯𑀓𑀭𑀡𑀢𑁄 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄, ‘‘𑀦𑀺𑀩𑁆𑀩𑀦𑁆𑀢𑀺 𑀥𑀻𑀭𑀸 𑀬𑀣𑀬𑀁 𑀧𑀤𑀻𑀧𑁄’’𑀢𑀺 𑀳𑀺 𑀯𑀼𑀢𑁆𑀢𑀁, 𑀤𑀺𑀧𑁆𑀧𑀢𑀺 𑀯𑀸 𑀅𑀭𑀺𑀬𑀸𑀦𑀁 𑀜𑀸𑀡𑀘𑀓𑁆𑀔𑀼𑀲𑁆𑀲𑁂𑀯 𑀧𑀓𑀸𑀲𑀢𑀻𑀢𑀺 𑀤𑀻𑀧𑁄. 𑀢𑀡𑁆𑀳𑀸𑀦𑀁 𑀔𑀬𑀳𑁂𑀢𑀼𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑁄. 𑀭𑀸𑀕𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀢𑁆𑀢𑀸, 𑀉𑀢𑁆𑀢𑀫𑀝𑁆𑀞𑁂𑀦 𑀯𑀸 𑀧𑀭𑀁. 𑀢𑀸𑀬𑀢𑀺 𑀭𑀓𑁆𑀔𑀢𑀺 𑀅𑀧𑀸𑀬𑀸𑀤𑀺𑀢𑁄𑀢𑀺 𑀢𑀸𑀡𑀁. 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣 𑀲𑀁𑀲𑀸𑀭𑀪𑀬𑀪𑀻𑀭𑀼𑀓𑀸𑀢𑀺 𑀮𑁂𑀡𑀁. 𑀦𑀢𑁆𑀣𑀺 𑀤𑀻𑀖𑀭𑀲𑁆𑀲𑀸𑀤𑀺𑀓𑀁 𑀭𑀽𑀧𑀁 𑀲𑀡𑁆𑀞𑀸𑀦𑀫𑁂𑀢𑀲𑁆𑀲𑀸𑀢𑀺 𑀅𑀭𑀽𑀧𑀁, 𑀅𑀧𑁆𑀧𑀘𑁆𑀘𑀬𑀢𑁆𑀢𑀸 𑀯𑀸 𑀅𑀭𑀽𑀧𑀁. 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀓𑀭𑀡𑀢𑁆𑀢𑀸 𑀲𑀦𑁆𑀢𑀁. 𑀭𑀸𑀕𑀓𑁆𑀔𑀬𑀳𑁂𑀢𑀼𑀪𑀸𑀯𑁂𑀦 𑀅𑀯𑀺𑀧𑀭𑀻𑀢𑀢𑁆𑀢𑀸, 𑀘𑀢𑀼𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀸 𑀲𑀘𑁆𑀘𑀁. 𑀦𑀢𑁆𑀣𑀺 𑀆𑀮𑀬𑁄 𑀢𑀡𑁆𑀳𑀸 𑀏𑀢𑁆𑀣𑀸𑀢𑀺 𑀅𑀦𑀸𑀮𑀬𑀁.

𑁭. 𑀧𑀘𑁆𑀘𑀬𑁂𑀳𑀺 𑀦 𑀲𑀗𑁆𑀓𑀭𑀻𑀬𑀢𑁂𑀢𑀺 𑀅𑀲𑀗𑁆𑀔𑀢𑀁. 𑀲𑀺𑀯𑀁 𑀔𑁂𑀫𑀪𑀸𑀯𑀁 𑀓𑀭𑁄𑀢𑀻𑀢𑀺 𑀲𑀺𑀯𑀁, 𑀲𑀁𑀲𑀸𑀭𑀪𑀻𑀭𑀼𑀓𑁂𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀯𑀸 𑀲𑀺𑀯𑀁, 𑀬𑀤𑀸𑀤𑀺𑀦𑀸 𑀯𑀧𑀘𑁆𑀘𑀬𑁄. 𑀦𑀢𑁆𑀣𑀺 𑀏𑀢𑁆𑀣 𑀫𑀢𑀁 𑀫𑀭𑀡𑀁, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀫𑀢𑀦𑁆𑀢𑀺 𑀅𑀫𑀢𑀁. 𑀧𑀲𑁆𑀲𑀺𑀢𑀼𑀁 𑀲𑀼𑀤𑀼𑀓𑁆𑀓𑀭𑀢𑀸𑀬 𑀲𑀼𑀤𑀼𑀤𑁆𑀤𑀲𑀁. 𑀧𑀭𑁂𑀳𑀺 𑀉𑀢𑁆𑀢𑀫𑁂𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑁂𑀳𑀺 𑀅𑀬𑀺𑀢𑀩𑁆𑀩𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀭𑀸𑀬𑀡𑀁, 𑀧𑀭𑀢𑁄 𑀯𑀸 𑀅𑀬𑀺𑀢𑀩𑁆𑀩𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀭𑀸𑀬𑀡𑀁, 𑀲𑀁𑀲𑀸𑀭𑀲𑀪𑀸𑀯𑀢𑁄 𑀅𑀜𑁆𑀜𑀲𑀪𑀸𑀯𑀯𑀲𑁂𑀦 𑀩𑀼𑀚𑁆𑀛𑀺𑀢𑀩𑁆𑀩𑀦𑁆𑀢𑁆𑀬𑀢𑁆𑀣𑁄, 𑀧𑀭𑁂𑀲𑀁 𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀧𑀭𑀸𑀬𑀡𑀁. 𑀬𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀑𑀥𑀺𑀲𑁄 𑀓𑀺𑀮𑁂𑀲𑁂 𑀲𑀭𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀢𑀁 𑀥𑀫𑁆𑀫𑀁 𑀲𑀭𑀡𑀁, 𑀅𑀭𑀺𑀬𑀸𑀦𑀁 𑀯𑀲𑀺𑀢𑀕𑁂𑀳𑀢𑁆𑀢𑀸 𑀯𑀸 𑀲𑀭𑀡𑀁. 𑀈𑀢𑀺 𑀉𑀧𑀤𑁆𑀤𑀯𑁄 𑀧𑀯𑀸𑀲𑁄 𑀘 𑀢𑁂 𑀬𑀢𑁆𑀣 𑀦 𑀲𑀦𑁆𑀢𑀺, 𑀢𑀁 𑀅𑀦𑀻𑀢𑀺𑀓𑀁, 𑀲𑀢𑁆𑀢𑁂 𑀲𑀁𑀲𑀸𑀭𑀁 𑀦𑁂𑀢𑀻𑀢𑀺 ‘‘𑀦𑀻𑀢𑀻’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑀢𑁄 𑀯𑀸 𑀅𑀦𑀻𑀢𑀺𑀓𑀁. 𑀆𑀲𑀯𑀸𑀦𑀁 𑀅𑀦𑀸𑀭𑀫𑁆𑀫𑀡𑀢𑀸𑀬 𑀅𑀦𑀸𑀲𑀯𑀁. 𑀦𑀺𑀘𑁆𑀘𑀝𑁆𑀞𑁂𑀦 𑀥𑀼𑀯𑀁, 𑀥𑀯𑀢𑀺 𑀯𑀸 𑀫𑀕𑁆𑀕𑀸𑀦𑀫𑀸𑀭𑀫𑁆𑀫𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀥𑀼𑀯𑀁, ‘‘𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀽’’𑀢𑀺 𑀳𑀺 𑀓𑀸𑀢𑀦𑁆𑀢𑀥𑀸𑀢𑀼. 𑀤𑀝𑁆𑀞𑀩𑁆𑀩𑀲𑀪𑀸𑀯𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑀺𑀤𑀲𑁆𑀲𑀦𑀁. 𑀧𑀘𑁆𑀘𑀬𑁂𑀳𑀺 𑀅𑀓𑀢𑀢𑁆𑀢𑀸 𑀅𑀓𑀢𑀁. 𑀲𑀤𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀧𑀮𑀼𑀚𑁆𑀚𑀦𑀲𑀪𑀸𑀯𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀧𑀮𑁄𑀓𑀺𑀢𑀁. ‘‘𑀇𑀢𑀁 𑀕𑀢𑁂 𑀘 𑀯𑀺𑀜𑁆𑀜𑀸𑀢𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀮𑁄𑀓𑀲𑀪𑀸𑀯𑁂𑀦 𑀯𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀮𑁄𑀓𑀺𑀢𑀁, 𑀢𑀩𑁆𑀪𑀸𑀯𑀸𑀧𑀕𑀫𑀦𑀢𑁄 𑀅𑀧𑀮𑁄𑀓𑀺𑀢𑀁. 𑀲𑀡𑁆𑀳𑀝𑁆𑀞𑁂𑀦 𑀦𑀺𑀧𑀼𑀡𑀁, 𑀬𑁂𑀦 𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀑𑀥𑀺𑀲𑁄 𑀓𑀺𑀮𑁂𑀲𑁂 𑀦𑀺𑀲𑁆𑀲𑁂𑀲𑀢𑁄 𑀧𑀼𑀦𑀦𑁆𑀢𑀺 𑀲𑁄𑀥𑁂𑀦𑁆𑀢𑀺, 𑀢𑀁 𑀦𑀺𑀧𑀼𑀡𑀁. 𑀦 𑀓𑀤𑀸𑀘𑀺𑀧𑀺 𑀬𑀲𑁆𑀲 𑀅𑀦𑁆𑀢𑁄 𑀯𑀺𑀦𑀸𑀲𑁄 𑀅𑀢𑁆𑀣𑀺, 𑀢𑀁 𑀅𑀦𑀦𑁆𑀢𑀁. 𑀔𑀭𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀔𑀭𑀸, 𑀲𑀗𑁆𑀔𑀢𑀸, 𑀢𑁂 𑀬𑀢𑁆𑀣 𑀦 𑀲𑀦𑁆𑀢𑀺, 𑀢𑀁 𑀅𑀓𑁆𑀔𑀭𑀁, 𑀔𑀭𑀲𑀗𑁆𑀔𑀸𑀢𑀸𑀦𑀁 𑀯𑀸 𑀲𑀗𑁆𑀔𑀢𑀸𑀦𑀁 𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀓𑁆𑀔𑀭𑀁. 𑀏𑀢𑁆𑀣 𑀘 𑀅𑀲𑀗𑁆𑀔𑀢𑀦𑁆𑀢𑁆𑀬𑀸𑀤𑀺𑀓𑀸 𑀕𑀸𑀣𑀸 𑀭𑀼𑀘𑀺𑀭𑀸 𑀦𑀸𑀫.

𑁮. 𑀲𑀩𑁆𑀩𑀤𑀼𑀓𑁆𑀔𑀸𑀦𑀁 𑀔𑀬𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀓𑁆𑀔𑀬𑁄. 𑀩𑁆𑀬𑀸𑀩𑀸𑀥𑀢𑀻𑀢𑀺 𑀩𑁆𑀬𑀸𑀩𑀸𑀥𑁄, 𑀲𑁄 𑀏𑀯 𑀩𑁆𑀬𑀸𑀩𑀸𑀤𑁄, 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲 𑀪𑀸𑀯𑁄 𑀩𑁆𑀬𑀸𑀩𑀚𑁆𑀚𑀁, 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀸𑀤𑁆𑀬𑀢𑁆𑀣𑁄, 𑀢𑀁 𑀬𑀢𑁆𑀣 𑀦𑀢𑁆𑀣𑀺, 𑀢𑀁 𑀅𑀩𑁆𑀬𑀸𑀩𑀚𑁆𑀚𑀁, 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀩𑁆𑀬𑀸𑀧𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀩𑁆𑀬𑀸𑀧𑀸𑀤𑀸, 𑀲𑀗𑁆𑀔𑀢𑀸, 𑀢𑁂𑀲𑀁 𑀪𑀸𑀯𑁄 𑀩𑁆𑀬𑀸𑀧𑀚𑁆𑀛𑀁, 𑀲𑀗𑁆𑀔𑀢𑀸𑀦𑀁 𑀯𑀺𑀦𑀲𑁆𑀲𑀦𑀪𑀸𑀯𑁄, 𑀢𑀁 𑀬𑀢𑁆𑀣 𑀦𑀢𑁆𑀣𑀺, 𑀢𑀁 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀘 𑀤𑁆𑀬𑀲𑁆𑀲 𑀚𑁆𑀛𑀓𑀸𑀭𑁄. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀫𑀪𑀸𑀯𑀢𑁄 𑀯𑀺𑀯𑀝𑁆𑀝𑀁. 𑀦𑀺𑀩𑁆𑀪𑀬𑀝𑁆𑀞𑁂𑀦 𑀔𑁂𑀫𑀁, 𑀔𑀬𑀦𑁆𑀢𑀺 𑀯𑀸 𑀏𑀢𑁂𑀦 𑀭𑀸𑀕𑀕𑁆𑀕𑀺𑀆𑀤𑀬𑁄𑀢𑀺 𑀔𑁂𑀫𑀁. 𑀲𑀗𑁆𑀔𑀸𑀭𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬, 𑀯𑀺𑀲𑀁𑀬𑁄𑀕𑀢𑀸𑀬 𑀘 𑀓𑁂𑀯𑀮𑀁. 𑀅𑀧𑀯𑀚𑁆𑀚𑀦𑁆𑀢𑀺 𑀲𑀗𑁆𑀔𑀸𑀭𑀸 𑀏𑀢𑀲𑁆𑀫𑀸𑀢𑀺 𑀅𑀧𑀯𑀕𑁆𑀕𑁄. 𑀬𑀲𑁆𑀫𑀸 𑀭𑀸𑀕𑁄 𑀯𑀺𑀕𑀢𑁄, 𑀲𑁄 𑀯𑀺𑀭𑀸𑀕𑁄. 𑀧𑀥𑀸𑀦𑀪𑀸𑀯𑀁 𑀦𑀻𑀢𑀁 𑀧𑀡𑀻𑀢𑀁. 𑀦𑀢𑁆𑀣𑀺 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀅𑀭𑀺𑀬𑀸𑀦𑀁 𑀘𑀼𑀢𑀁 𑀘𑀯𑀦𑀦𑁆𑀢𑀺 𑀅𑀘𑁆𑀘𑀼𑀢𑀁. 𑀅𑀭𑀺𑀬𑁂𑀳𑀺 𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀕𑀦𑁆𑀢𑀩𑁆𑀩𑀢𑁆𑀢𑀸 𑀧𑀤𑀁.

𑁯. 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀔𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀬𑁄𑀕𑀓𑁆𑀔𑁂𑀫𑁄. 𑀧𑀸𑀭𑁂𑀢𑀺 𑀲𑀓𑁆𑀓𑁄𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀁 𑀲𑀫𑁂𑀢𑀼𑀦𑁆𑀢𑀺 𑀧𑀸𑀭𑀁, ‘‘𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀢𑀢𑁆𑀢𑀲𑁆𑀲𑀸’𑀮𑀁 𑀲𑀫𑁂𑀢𑀯𑁂’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀕𑀢𑀸 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸 𑀏𑀢𑀲𑁆𑀫𑀸𑀢𑀺 𑀯𑀸 𑀧𑀸𑀭𑀁. 𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀦𑀢𑁄 𑀫𑀼𑀢𑁆𑀢𑀺, 𑀦𑀺𑀓𑀸𑀬𑀦𑁆𑀢𑀭𑀺𑀬𑀸 𑀧𑀦 ‘‘𑀲𑀭𑀻𑀭𑁂𑀦𑁆𑀤𑁆𑀭𑀺𑀬𑁂𑀳𑀺 𑀅𑀢𑁆𑀢𑀦𑁄 𑀫𑀼𑀢𑁆𑀢𑀢𑁆𑀢𑀸 𑀫𑀼𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀺𑀮𑁂𑀲𑀲𑀫𑀦𑀢𑁄 𑀲𑀦𑁆𑀢𑀺. 𑀯𑀺𑀲𑀼𑀚𑁆𑀛𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬 𑀭𑀸𑀕𑀸𑀤𑀺𑀫𑀮𑁂𑀳𑀻𑀢𑀺 𑀯𑀺𑀲𑀼𑀤𑁆𑀥𑀺. 𑀲𑀩𑁆𑀩𑀲𑀗𑁆𑀔𑀸𑀭𑀸 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑀼𑀢𑁆𑀢𑀺. 𑀅𑀲𑀗𑁆𑀔𑀢𑀫𑁂𑀯 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦, 𑀲𑀦𑁆𑀢𑀺𑀮𑀓𑁆𑀔𑀡𑀥𑀸𑀭𑀡𑀢𑁄 𑀯𑀸 𑀥𑀸𑀢𑀽𑀢𑀺 𑀅𑀲𑀗𑁆𑀔𑀢𑀥𑀸𑀢𑀼. 𑀲𑀼𑀚𑁆𑀛𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬 𑀭𑀸𑀕𑀸𑀤𑀺𑀫𑀮𑁂𑀳𑀻𑀢𑀺 𑀲𑀼𑀤𑁆𑀥𑀺. 𑀆𑀯𑀼𑀡𑁄𑀢𑀺 𑀲𑀁𑀲𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦𑀸𑀢𑀺 𑀯𑀼𑀢𑀺, 𑀢𑀡𑁆𑀳𑀸, 𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀺.

𑁧𑁦. 𑀔𑀻𑀡𑀸𑀲𑀯𑀸𑀤𑀺𑀘𑀢𑀼𑀓𑁆𑀓𑀁 𑀅𑀭𑀳𑀦𑁆𑀢𑁂. 𑀔𑀻𑀡𑀸 𑀆𑀲𑀯𑀸 𑀬𑀲𑁆𑀲 𑀲𑁄 𑀔𑀻𑀡𑀸𑀲𑀯𑁄. 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄 𑀦𑀢𑁆𑀣𑀺 𑀲𑀺𑀓𑁆𑀔𑀸 𑀏𑀢𑀲𑁆𑀲𑀸𑀢𑀺 𑀅𑀲𑁂𑀓𑁆𑀔𑁄. 𑀯𑀺𑀕𑀢𑁄 𑀭𑀸𑀕𑁄 𑀬𑀲𑁆𑀫𑀸𑀢𑀺 𑀯𑀻𑀢𑀭𑀸𑀕𑁄. 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑁂 𑀳𑀢𑀯𑀸𑀢𑀺 𑀅𑀭𑀳𑀸, ‘‘𑀅𑀭𑀳’’𑀦𑁆𑀢𑀺𑀧𑀺 𑀧𑀸𑀞𑁄.

𑀤𑁂𑀯𑀮𑁄𑀓𑀸𑀤𑀺𑀧𑀜𑁆𑀘𑀓𑀁 𑀲𑀕𑁆𑀕𑀲𑁆𑀲 𑀦𑀸𑀫𑀁. 𑀤𑁂𑀯𑀸𑀦𑀁 𑀮𑁄𑀓𑁄 𑀪𑀯𑀦𑀁 𑀤𑁂𑀯𑀮𑁄𑀓𑁄. 𑀤𑀺𑀩𑁆𑀩𑀦𑁆𑀢𑁆𑀬𑀢𑁆𑀭 𑀤𑀺𑀯𑁄. 𑀅𑀚 𑀕𑀢𑀺𑀬𑀁, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀞𑀺𑀢𑀺𑀬𑀁, 𑀘𑀺𑀭𑀁 𑀞𑀺𑀬𑀢𑁂 𑀅𑀲𑁆𑀫𑀺𑀦𑁆𑀢𑀺 𑀅𑀕𑁆𑀕𑁄, 𑀞𑀸𑀦𑀁, 𑀲𑁄𑀪𑀦𑁄 𑀅𑀕𑁆𑀕𑁄 𑀲𑀕𑁆𑀕𑁄, 𑀧𑀼𑀜𑁆𑀜𑁂𑀦 𑀯𑀸 𑀲𑀼𑀝𑁆𑀞𑀼 𑀅𑀚𑀻𑀬𑀢𑁂𑀢𑀺 𑀲𑀕𑁆𑀕𑁄. 𑀢𑀬𑁄 𑀤𑁂𑀯𑀸 𑀤𑀺𑀩𑁆𑀩𑀦𑁆𑀢𑁆𑀬𑀢𑁆𑀭𑁂𑀢𑀺 𑀢𑀺𑀤𑀺𑀯𑁄. 𑀧𑀥𑀸𑀦𑀢𑁄 𑀳𑀺 𑀢𑀻𑀳𑀺 𑀳𑀭𑀺𑀳𑀭𑀩𑁆𑀭𑀳𑁆𑀫𑁂𑀳𑀺 𑀩𑁆𑀬𑀧𑀤𑁂𑀲𑁄. 𑀢𑀺𑀤𑀲𑀸𑀦𑀁 𑀤𑁂𑀯𑀸𑀦𑀁 𑀆𑀮𑀬𑁄 𑀞𑀸𑀦𑀦𑁆𑀢𑀺 𑀢𑀺𑀤𑀲𑀸𑀮𑀬𑁄. 𑀓𑁂𑀘𑀺 𑀧𑀦 ‘‘𑀤𑁂𑀯𑀮𑁄𑀓𑀸𑀤𑀺𑀢𑁆𑀢𑀬𑀁 𑀲𑀕𑁆𑀕𑀲𑀸𑀫𑀜𑁆𑀜𑀲𑁆𑀲 𑀦𑀸𑀫𑀁, 𑀢𑀺𑀤𑀺𑀯𑀸𑀤𑀺𑀤𑁆𑀯𑀬𑀁 𑀢𑀸𑀯𑀢𑀺𑀁𑀲𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀫𑀭𑀓𑁄𑀲𑀸𑀤𑀻𑀲𑀼 𑀲𑀸𑀫𑀜𑁆𑀜𑀲𑁆𑀫𑀺𑀁𑀬𑁂𑀯 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀳𑀡𑀢𑁄 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀏𑀢𑁆𑀣𑀸𑀧𑀺 𑀦𑀸𑀓, 𑀲𑀼𑀭𑀮𑁄𑀓, 𑀢𑀺𑀧𑀺𑀝𑁆𑀞𑀧 [𑀯𑀺𑀲𑀦𑁆𑀢𑀺 𑀲𑀼𑀓𑀢𑀺𑀦𑁄 𑀅𑀲𑁆𑀫𑀺𑀁 𑀇𑀢𑀺 𑀧𑀺𑀝𑁆𑀞𑀧𑀁 𑀧𑀺𑀲𑁄𑀤𑀭𑀸𑀤𑀺 𑀢𑀺𑀤𑀲𑀸𑀦𑀁 𑀧𑀺𑀝𑁆𑀞𑀧𑀥𑀺𑀢𑀺 𑀤𑀲𑀲𑀤𑁆𑀤𑀮𑁄𑀧𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀅𑀯𑀭𑁄𑀳, 𑀨𑀮𑁄𑀤𑀬 [𑀨𑀮𑀲𑁆𑀲 𑀓𑀫𑁆𑀫𑀨𑀮𑀲𑁆𑀲 𑀉𑀤𑀬𑁄 𑀤𑀺𑀝𑁆𑀞𑀺𑀬𑁄𑀕𑁆𑀬𑀝𑁆𑀞𑀸𑀦𑀁 (𑀢𑀺𑀓𑀡𑁆𑀟𑀝𑀻𑀓𑀸)], 𑀫𑀦𑁆𑀤𑀭, 𑀲𑁂𑀭𑀺𑀓, 𑀲𑀓𑁆𑀓𑀪𑀯𑀦, 𑀔𑀁, 𑀦𑀪𑀸𑀤𑀻𑀦𑀺 𑀤𑁂𑀯𑀮𑁄𑀓𑀲𑀸𑀫𑀜𑁆𑀜𑀸𑀦𑀺 𑀇𑀥𑀸𑀦𑀸𑀕𑀢𑀸𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺.

𑁧𑁧-𑁧𑁨. 𑀢𑀺𑀤𑀲𑀸𑀤𑀺𑀘𑀢𑀼𑀤𑁆𑀤𑀲𑀓𑀁 𑀤𑁂𑀯𑀢𑀸𑀲𑀸𑀫𑀜𑁆𑀜𑀲𑁆𑀲 𑀦𑀸𑀫𑀁. 𑀚𑀸𑀢𑀻𑀲𑀼 [𑀚𑀸𑀢𑀺𑀚𑀸𑀢𑀻𑀲𑀼 (𑀓.)] 𑀯𑀼𑀢𑁆𑀢𑀸𑀲𑀼 𑀩𑁆𑀬𑀢𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀩𑁆𑀬𑀢𑁆𑀢𑀻𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀚𑀸𑀢𑀺𑀲𑀢𑁆𑀢𑀸𑀯𑀺𑀦𑀸𑀲𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄 𑀤𑀲𑀸 𑀧𑀭𑀺𑀫𑀸𑀡𑀸 𑀏𑀢𑁂𑀲𑀦𑁆𑀢𑀺 𑀢𑀺𑀤𑀲𑀸. 𑀏𑀢𑁂 𑀳𑀺 𑀫𑀦𑀼𑀲𑁆𑀲𑀸𑀤𑀬𑁄 𑀯𑀺𑀬 𑀩𑀼𑀤𑁆𑀥𑀺𑀯𑀺𑀧𑀭𑀺𑀡𑀸𑀫𑀔𑀬𑁂𑀳𑀺 𑀦 𑀬𑀼𑀚𑁆𑀚𑀦𑁆𑀢𑀺, 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀬𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺 𑀘. 𑀫𑀭𑀡𑀁 𑀫𑀭𑁄, 𑀲𑁄 𑀬𑁂𑀲𑀁 𑀦𑀢𑁆𑀣𑀺, 𑀢𑁂 𑀅𑀫𑀭𑀸. 𑀤𑀺𑀩𑁆𑀩𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀻𑀢𑀺 𑀤𑁂𑀯𑀸. 𑀯𑀺𑀩𑀼𑀚𑁆𑀛𑀦𑁆𑀢𑀺 𑀦 𑀲𑀼𑀧𑀦𑁆𑀢𑀻𑀢𑀺 𑀯𑀺𑀩𑀼𑀥𑀸, 𑀅𑀢𑀻𑀢𑀸𑀦𑀸𑀕𑀢𑀚𑀸𑀢𑀺𑀁 𑀯𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀯𑀸 𑀯𑀺𑀩𑀼𑀥𑀸. 𑀲𑀼𑀥𑀸𑀪𑁄𑀚𑀦𑀪𑀼𑀜𑁆𑀚𑀦𑀲𑀻𑀮𑀢𑀸𑀬 𑀲𑀼𑀥𑀸𑀲𑀺𑀦𑁄. 𑀲𑀫𑀼𑀤𑁆𑀤𑀼𑀝𑁆𑀞𑀸 [𑀅𑀫𑀢𑀫𑀣𑀦𑁄𑀝𑁆𑀞𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀲𑀼𑀭𑀸 𑀅𑀢𑁆𑀣𑀺 𑀬𑁂𑀲𑀁, 𑀢𑁂 𑀲𑀼𑀭𑀸, 𑀲𑀼𑀭𑀦𑁆𑀢𑀺 𑀯𑀸 𑀓𑀻𑀴𑀦𑁆𑀢𑀻𑀢𑀺 𑀲𑀼𑀭𑀸, 𑀲𑀼𑀔𑁂𑀦 𑀭𑀫𑀦𑁆𑀢𑀻𑀢𑀺 𑀯𑀸 𑀲𑀼𑀭𑀸. 𑀤𑀻𑀖𑀸𑀬𑀼𑀓𑀸𑀧𑀺 𑀲𑀫𑀸𑀦𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀫𑀭𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀫𑀭𑀽. 𑀤𑀺𑀯𑁄 𑀤𑁂𑀯𑀮𑁄𑀓𑁄 𑀑𑀓𑁄 𑀆𑀲𑀬𑁄 𑀬𑁂𑀲𑀁 𑀢𑁂 𑀤𑀺𑀯𑁄𑀓𑀸. 𑀲𑀼𑀥𑀸𑀳𑀸𑀭𑀲𑁆𑀲 𑀧𑀸𑀢𑀩𑁆𑀩𑀲𑁆𑀲𑀧𑀺 𑀲𑀫𑁆𑀪𑀯𑀢𑁄 𑀅𑀫𑀢𑀁 𑀧𑀺𑀯𑀦𑁆𑀢𑀻𑀢𑀺 𑀅𑀫𑀢𑀧𑀸, 𑀅𑀫𑀢𑁄𑀲𑀥𑀁 𑀯𑀸 𑀧𑀺𑀯𑀦𑁆𑀢𑀻𑀢𑀺 𑀅𑀫𑀢𑀧𑀸. 𑀲𑀕𑁆𑀕𑁂 𑀯𑀲𑀦𑀲𑀻𑀮𑀢𑁆𑀢𑀸 𑀲𑀕𑁆𑀕𑀯𑀸𑀲𑀺𑀦𑁄. 𑀲𑀤𑀸 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀬𑀢𑁆𑀢𑀸 𑀦𑀺𑀭𑀸𑀓𑀢𑀸 𑀚𑀭𑀸 𑀏𑀢𑁂𑀲𑀦𑁆𑀢𑀺 𑀦𑀺𑀚𑁆𑀚𑀭𑀸. 𑀦 𑀦𑀺𑀫𑀺𑀲𑀦𑁆𑀢𑀻𑀢𑀺 𑀅𑀦𑀺𑀫𑀺𑀲𑀸, 𑀪𑀫𑀼𑀓𑀸 𑀦𑀺𑀘𑁆𑀘𑀮𑀁 𑀓𑀭𑁄𑀦𑁆𑀢𑀻𑀢𑁆𑀬𑀢𑁆𑀣𑁄. 𑀤𑀺𑀯𑁂 𑀯𑀲𑀦𑁆𑀢𑀻𑀢𑀺 𑀤𑀺𑀩𑁆𑀩𑀸. 𑀤𑁂𑀯𑀸 𑀏𑀯 𑀤𑁂𑀯𑀢𑀸, 𑀲𑀓𑀢𑁆𑀣𑁂 𑀤𑁂𑀯𑀲𑀤𑁆𑀤𑀢𑁄 𑀢𑀸𑀧𑀘𑁆𑀘𑀬𑁄, 𑀤𑁂𑀯𑀢𑀸 𑀏𑀯 𑀤𑁂𑀯𑀢𑀸𑀦𑀺, 𑀲𑀓𑀢𑁆𑀣𑁂 𑀦𑀺𑀧𑀘𑁆𑀘𑀬𑁄. ‘‘𑀅𑀧𑀼𑀫𑁂’’𑀢𑀺 𑀏𑀢𑁆𑀣 𑀧𑀞𑀫𑀲𑀓𑀢𑁆𑀣𑀺𑀓𑀯𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁, 𑀤𑀼𑀢𑀺𑀬𑀲𑀓𑀢𑁆𑀣𑀺𑀓𑀯𑀲𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀢𑀺𑀬𑀲𑀓𑀢𑁆𑀣𑀺𑀓𑀯𑀲𑁂𑀦𑁂𑀯 𑀯𑀸 𑀤𑁆𑀯𑀺𑀮𑀺𑀗𑁆𑀕𑀢𑁆𑀢𑀁, 𑀢𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑀧𑀓𑁆𑀔𑁂 𑀬𑀤𑀸𑀤𑀺𑀦𑀸 𑀦𑀺𑀓𑀸𑀭𑀸𑀤𑁂𑀲𑁄. 𑀅𑀫𑀭𑀓𑁄𑀲𑁂 𑀧𑀦 ‘‘𑀤𑁂𑀯𑀢𑀸𑀦𑀺 𑀧𑀼𑀫𑁂 𑀯𑀸’’𑀢𑀺 [𑀅𑀫𑀭 𑁧.𑁯] 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀤𑁂𑀯𑀢𑀸𑀦𑀺𑀲𑀤𑁆𑀤𑁄 𑀯𑀺𑀓𑀧𑁆𑀧𑁂𑀦 𑀧𑀼𑀮𑁆𑀮𑀺𑀗𑁆𑀕𑁂, 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑁂𑀢𑀺. 𑀝𑀻𑀓𑀸𑀬𑀜𑁆𑀘 ‘‘𑀲𑀓𑀢𑁆𑀣𑀺𑀓𑀸 𑀧𑀓𑀢𑀺𑀢𑁄 𑀮𑀺𑀗𑁆𑀕𑀯𑀘𑀦𑀸𑀦𑀺 𑀅𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀧𑀼𑀦𑁆𑀦𑀧𑀼𑀁𑀲𑀓𑀢𑁆𑀢’’𑀦𑁆𑀢𑀺 [𑀤𑁂𑀯𑁄 𑀏𑀯 𑀤𑁂𑀯𑀢𑀸, 𑀲𑀓𑀢𑁆𑀣𑁂 𑀢𑀸, 𑀲𑀓𑀢𑁆𑀣𑀺𑀓𑀸 𑀅𑀧𑀺 𑀧𑀘𑁆𑀘𑀬𑀸 𑀧𑀓𑀢𑀺𑀢𑁄 𑀮𑀺𑀗𑁆𑀕𑀯𑀘𑀦𑀸𑀤𑁆𑀬𑀢𑀺𑀯𑀢𑁆𑀢𑀦𑁆𑀢𑁂, 𑀅𑀧𑀻𑀢𑀺 𑀇𑀢𑁆𑀣𑀺𑀢𑁆𑀢𑀁 𑀤𑁂𑀯𑀢𑀸 𑀏𑀯 𑀤𑁂𑀯𑀢𑀁 𑀧𑀜𑁆𑀜𑀸𑀤𑀺𑀢𑁆𑀢𑀸 𑀅𑀡 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑀢𑁆𑀣𑀺𑀓𑀸𑀢𑀺 𑀤𑀼𑀢𑀺𑀬𑀲𑀓𑀢𑁆𑀣𑀺𑀓𑀁 𑀯𑀼𑀢𑁆𑀢𑀁, 𑀧𑀓𑀢𑀺𑀢𑁄𑀢𑀺 𑀧𑀞𑀫𑀲𑀓𑀢𑁆𑀣𑀺𑀓𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑁆𑀦𑀧𑀼𑀁𑀲𑀓𑀢𑁆𑀢’’𑀦𑁆𑀢𑀺, 𑀇𑀢𑀭𑀣𑀸 𑀢𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀦𑀺𑀘𑁆𑀘𑀁 𑀇𑀢𑁆𑀣𑀺𑀮𑀺𑀗𑁆𑀕𑀢𑀸𑀬 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑁂𑀯 𑀯𑀤𑁂𑀬𑁆𑀬. 𑀲𑀼𑀧𑀩𑁆𑀩𑀸, 𑀲𑀼𑀫𑀦𑀸, 𑀢𑀺𑀤𑀺𑀯𑁂𑀲𑀸, 𑀆𑀤𑀺𑀢𑁂𑀬𑁆𑀬𑀸, 𑀤𑀺𑀯𑀺𑀲𑀤𑀸, 𑀮𑁂𑀔𑀸, 𑀅𑀤𑀺𑀢𑀺𑀦𑀦𑁆𑀤𑀦𑀸, 𑀆𑀤𑀺𑀘𑁆𑀘𑀸, 𑀭𑀺𑀪𑀯𑁄 [𑀯𑀺𑀪𑀯𑀸 (𑀓.), 𑀭𑀺𑀓𑀸𑀭𑁄 𑀤𑁂𑀯𑀫𑀸𑀢𑀸 𑀲𑀺𑀬𑀸 𑀇𑀢𑀺 𑀢𑀺𑀓𑀡𑁆𑀟𑁂, 𑀢𑀢𑁄 𑀪𑀯𑀦𑁆𑀢𑀻𑀢𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀅𑀲𑁄𑀧𑁆𑀧𑀸, 𑀅𑀫𑀘𑁆𑀘𑀸 [𑀫𑀭𑀡𑀁 𑀫𑀢𑀺 𑀇𑀢𑀺 𑀢𑀺, 𑀫𑀢𑀺𑀬𑀁 𑀪𑀯𑀸 𑀫𑀘𑁆𑀘𑀸… 𑀦 𑀫𑀘𑁆𑀘𑀸 𑀅𑀫𑀘𑁆𑀘𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀅𑀫𑀢𑀸𑀲𑀦𑀸, 𑀅𑀕𑁆𑀕𑀺𑀫𑀼𑀔𑀸, 𑀳𑀯𑀺𑀪𑁄𑀚𑀦𑀸, 𑀕𑀺𑀭𑀩𑁆𑀩𑀸𑀡𑀸, 𑀤𑀸𑀦𑀯𑀸𑀭𑀬𑁄, 𑀩𑀺𑀦𑁆𑀤𑀸𑀭𑀓𑀸, 𑀧𑀽𑀚𑀺𑀬𑀸, 𑀘𑀺𑀭𑀸𑀬𑀼𑀓𑀸, 𑀲𑀕𑁆𑀕𑀺𑀦𑁄, 𑀦𑀪𑁄𑀲𑀤𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀤𑁂𑀯𑀢𑀸𑀦𑀁 𑀲𑀸𑀫𑀜𑁆𑀜𑀦𑀸𑀫𑀸𑀦𑁂𑀯.

𑁧𑁩. 𑀲𑀺𑀤𑁆𑀥𑀸𑀤𑀬𑁄 𑀇𑀫𑁂 𑀤𑁂𑀯𑀬𑁄𑀦𑀺𑀬𑁄 𑀤𑁂𑀯𑀧𑁆𑀧𑀪𑀯𑀸 𑀤𑁂𑀯𑀯𑀁𑀲𑀸 𑀏𑀢𑁂𑀲𑀫𑀼𑀧𑁆𑀧𑀢𑁆𑀢𑀺𑀬𑀁 𑀤𑁂𑀯𑀸𑀦𑀫𑁂𑀯 𑀆𑀤𑀺𑀓𑀸𑀭𑀡𑀢𑁆𑀢𑀸. 𑀅𑀡𑀺𑀫𑀸𑀤𑀺𑀕𑀼𑀡𑁄𑀧𑁂𑀢𑀢𑁆𑀢𑀸 𑀲𑀺𑀚𑁆𑀛𑀦𑁆𑀢𑀺 𑀏𑀢𑀲𑁆𑀲 𑀬𑀣𑀺𑀘𑁆𑀙𑀺𑀢𑀸 𑀅𑀢𑁆𑀣𑀸𑀢𑀺 𑀲𑀺𑀤𑁆𑀥𑁄. 𑀬𑀲𑁆𑀲 𑀪𑀸𑀲𑀸𑀬 𑀩𑁆𑀭𑀽𑀳𑀢𑀺 𑀓𑀣𑀸, 𑀲𑁄 𑀪𑀽𑀢𑁄, 𑀧𑀺𑀲𑀸𑀘𑀧𑁆𑀧𑀪𑁂𑀤𑁄 𑀅𑀥𑁄𑀫𑀼𑀔𑀸𑀤𑀺. 𑀯𑀘𑀦𑀢𑁆𑀣𑁄 𑀧𑀦 𑀪𑀯𑀦𑁆𑀢𑀺 𑀩𑁆𑀭𑀽𑀳𑀦𑁆𑀢𑀺 𑀓𑀣𑀸 𑀏𑀢𑀲𑁆𑀫𑀸𑀢𑀺 𑀪𑀽𑀢𑁄𑀢𑀺. 𑀕𑀦𑁆𑀥𑀁 𑀅𑀩𑁆𑀩𑀢𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀕𑀦𑁆𑀥𑀩𑁆𑀩𑁄, 𑀤𑁂𑀯𑀕𑀸𑀬𑀦𑀸 ‘‘𑀳𑀸𑀳𑀸 𑀳𑀽𑀳𑀽’’ 𑀧𑀪𑀼𑀢𑀬𑁄 [𑀅𑀫𑀭 𑁧.𑁫𑁫]. 𑀦𑀺𑀥𑀬𑁄 𑀕𑀼𑀬𑁆𑀳𑀢𑀻𑀢𑀺 𑀕𑀼𑀬𑁆𑀳𑀓𑁄, 𑀲𑀜𑁆𑀜𑀸𑀬𑀁 𑀓𑁄, 𑀫𑀡𑀺𑀪𑀤𑁆𑀭𑀸𑀤𑀺𑀓𑁄 𑀓𑀼𑀯𑁂𑀭𑀸𑀦𑀼𑀘𑀭𑁄. 𑀬𑀓𑁆𑀔 𑀧𑀽𑀚𑀸𑀬𑀁, 𑀬𑀓𑁆𑀔𑀻𑀬𑀢𑁂 𑀧𑀽𑀚𑀻𑀬𑀢𑁂𑀢𑀺 𑀬𑀓𑁆𑀔𑁄, 𑀓𑀼𑀯𑁂𑀭𑀸𑀤𑀺𑀓𑁄. 𑀭𑀓𑁆𑀔𑀦𑁆𑀢𑀺 𑀅𑀢𑁆𑀢𑀸𑀦𑀁 𑀏𑀢𑀲𑁆𑀫𑀸𑀢𑀺 𑀭𑀓𑁆𑀔𑀲𑁄, 𑀯𑀺𑀪𑀻𑀲𑀡𑀸𑀤𑀺. 𑀓𑀼𑀫𑁆𑀪𑀧𑁆𑀧𑀫𑀸𑀡𑀡𑁆𑀟𑀢𑀸𑀬 𑀓𑀼𑀫𑁆𑀪𑀡𑁆𑀟𑁄. 𑀧𑀺𑀲𑀺𑀢𑀁 𑀫𑀁𑀲𑀁 𑀅𑀲𑀢𑀺 𑀪𑀓𑁆𑀔𑀢𑀻𑀢𑀺 𑀧𑀺𑀲𑀸𑀘𑁄, 𑀲𑀓𑀼𑀦𑀺 𑀲𑀓𑀼𑀦𑁆𑀢𑀺𑀆𑀤𑀺𑀓𑁄 𑀓𑀼𑀯𑁂𑀭𑀸𑀦𑀼𑀘𑀭𑁄, 𑀬𑀤𑀸𑀤𑀺𑀦𑀸 𑀧𑀺𑀲𑀺𑀢𑀲𑁆𑀲 𑀧𑀺𑀪𑀸𑀯𑁄, 𑀅𑀲𑀲𑁆𑀲 𑀘 𑀲𑀸𑀘𑀸𑀤𑁂𑀲𑀪𑀸𑀯𑁄 [𑀧𑀸𑀡𑀺𑀦𑀺 𑁬.𑁩.𑁧𑁦𑁯; 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸 𑁧.𑁪𑁭]. 𑀆𑀤𑀺𑀲𑀤𑁆𑀤𑁂𑀦 𑀯𑀺𑀚𑁆𑀚𑀸𑀥𑀭, 𑀅𑀧𑀲𑀭, 𑀓𑀺𑀦𑁆𑀦𑀭𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑁆𑀚𑀁 𑀕𑀼𑀴𑀺𑀓𑀸𑀜𑁆𑀚𑀦𑀫𑀦𑁆𑀢𑀸𑀤𑀺𑀓𑀁 𑀥𑀭𑀢𑀻𑀢𑀺 𑀯𑀺𑀚𑁆𑀚𑀸𑀥𑀭𑁄. 𑀅𑀧𑀲𑀸𑀭𑀬𑀦𑁆𑀢𑀺 𑀔𑀮𑀬𑀦𑁆𑀢𑀻𑀢𑀺 𑀅𑀧𑀲𑀭𑀸, 𑀉𑀩𑁆𑀩𑀲𑁆𑀬𑀸𑀤𑀺𑀓𑀸 𑀲𑀼𑀭𑀯𑁂𑀲𑀺𑀬𑁄 [𑀅𑀫𑀭 𑁧.𑁫𑁫], 𑀅𑀧𑀲𑀭𑀲𑀤𑁆𑀤𑀲𑁆𑀲 𑀚𑀸𑀢𑀺𑀬𑀁 𑀲𑀬𑀁 𑀩𑀳𑀼𑀢𑁆𑀢𑀁, 𑀩𑁆𑀬𑀢𑁆𑀢𑀺𑀬𑀦𑁆𑀢𑀼 𑀢𑀤𑀯𑀬𑀯𑀁 𑀯𑀸 𑀲𑀬𑀁, 𑀢𑀣𑀸 𑀘 𑀩𑀳𑀼𑀢𑁆𑀢𑀁𑀯. 𑀯𑀦𑀸𑀤𑀺𑀲𑀤𑁆𑀤𑁄 𑀓𑀤𑀸𑀘𑀺 𑀚𑀸𑀢𑀺𑀬𑀁 𑀧𑀬𑀼𑀚𑁆𑀚𑀢𑁂, 𑀓𑀤𑀸𑀘𑀺 𑀩𑁆𑀬𑀢𑁆𑀢𑀺𑀬𑀁. 𑀢𑀢𑁆𑀭 𑀬𑀤𑀸 𑀚𑀸𑀢𑀺𑀬𑀁, 𑀢𑀤𑀸 𑀩𑁆𑀬𑀢𑁆𑀢𑀺𑀕𑀢𑀁 𑀲𑀗𑁆𑀔𑁆𑀬𑀫𑀸𑀤𑀸𑀬 𑀧𑀯𑀢𑁆𑀢𑀢𑀺. 𑀬𑀤𑀸 𑀩𑁆𑀬𑀢𑁆𑀢𑀺𑀬𑀁 𑀧𑀬𑀼𑀚𑁆𑀚𑀢𑁂, 𑀢𑀤𑀸 𑀢𑀁𑀩𑁆𑀬𑀢𑁆𑀢𑀸𑀯𑀬𑀯𑀸𑀦𑀁 𑀧𑀸𑀡𑀺𑀧𑀸𑀤𑀸𑀤𑀻𑀦𑀁 𑀩𑀳𑀼𑀢𑁆𑀢𑀲𑀗𑁆𑀔𑁆𑀬𑀫𑀸𑀤𑀸𑀬 𑀧𑀯𑀢𑁆𑀢𑀢𑀺. 𑀯𑀦𑀲𑀤𑁆𑀤𑁄 𑀢𑀼 𑀚𑀸𑀢𑀺𑀕𑀢𑁂𑀓𑀲𑀗𑁆𑀔𑁆𑀬𑀸𑀯𑀺𑀲𑀺𑀝𑁆𑀞𑀤𑀩𑁆𑀩𑀸𑀪𑀺𑀥𑀸𑀦𑀢𑁄 𑀥𑀯𑀸𑀤𑀺𑀩𑁆𑀬𑀢𑁆𑀢𑀺𑀕𑀢𑀚𑀸𑀢𑁆𑀬𑀸𑀪𑀺𑀥𑀸𑀦𑀢𑁄 𑀯𑀸 𑀏𑀓𑀯𑀘𑀦𑀦𑁆𑀢𑀺 𑀅𑀧𑀲𑀭𑀲𑀤𑁆𑀤𑁄 𑀯𑀸𑀫𑀦𑀸𑀤𑀺𑀫𑀢𑁂𑀦 𑀇𑀢𑁆𑀣𑀺𑀬𑀁 𑀩𑀳𑀼𑀯𑀘𑀦𑁂 𑀘, 𑀢𑀤𑀜𑁆𑀜𑁂𑀲𑀁 𑀧𑀦 𑀫𑀢𑁂𑀦 𑀧𑀼𑀫𑀺𑀢𑁆𑀣𑀺𑀬𑀁 𑀯𑀘𑀦𑀤𑁆𑀯𑀬𑁂 𑀘 𑀤𑀝𑁆𑀞𑀩𑁆𑀩𑁄. 𑀅𑀲𑁆𑀲𑀫𑀼𑀔𑀦𑀭𑀲𑀭𑀻𑀭𑀢𑁆𑀢𑀸 𑀓𑀼𑀘𑁆𑀙𑀺𑀢𑁄 𑀦𑀭𑁄, 𑀓𑀺𑀜𑁆𑀘𑀺 𑀯𑀸 𑀦𑀭𑁄, 𑀦𑀭𑀲𑀤𑀺𑀲𑀢𑁆𑀢𑀸 𑀯𑀸 𑀓𑀺𑀦𑁆𑀦𑀭𑁄. 𑀏𑀢𑀸 𑀤𑁂𑀯𑀬𑁄𑀦𑀺𑀬𑁄. 𑀕𑀡𑀤𑁂𑀯𑀢𑀸 𑀧𑀦 𑁋

‘‘𑀆𑀤𑀺𑀘𑁆𑀘𑀸 𑀯𑀺𑀲𑀼 𑀯𑀲𑀯𑁄, 𑀢𑀼𑀲𑀺𑀢𑀸’𑀪𑀲𑁆𑀲𑀭𑀸’𑀦𑀺𑀮𑀸;

𑀫𑀳𑀸𑀭𑀸𑀚𑀺𑀓𑀸 𑀲𑀸𑀥𑁆𑀬𑀸 𑀘, 𑀭𑀼𑀤𑁆𑀤𑀸 𑀘 𑀕𑀡𑀤𑁂𑀯𑀢𑀸’’𑀢𑀺 [𑀅𑀫𑀭 𑁧.𑁧𑁦].

𑀅𑀫𑀭𑀓𑁄𑀲𑁂 𑀓𑀣𑀺𑀢𑀸.

𑀢𑀢𑁆𑀭𑀸𑀤𑀺𑀘𑁆𑀘𑀸 𑀤𑁆𑀯𑀸𑀤𑀲𑀓𑀸, 𑀯𑀺𑀲𑀼𑀤𑁂𑀯𑀸 𑀤𑀲 𑀞𑀺𑀢𑀸;

𑀯𑀲𑀯𑁄 𑀅𑀝𑁆𑀞𑀲𑀗𑁆𑀔𑁆𑀬𑀸𑀢𑀸, 𑀙𑀢𑁆𑀢𑀺𑀁𑀲 𑀢𑀼𑀲𑀺𑀢𑀸 𑀫𑀢𑀸.

𑀆𑀪𑀲𑁆𑀲𑀭𑀸 𑀘𑀢𑀼𑀲𑀝𑁆𑀞𑀺, 𑀯𑀸𑀢𑀸 𑀧𑀡𑁆𑀡𑀸𑀲𑁂𑀓𑀽𑀦𑀓𑀸;

𑀫𑀳𑀸𑀭𑀸𑀚𑀺𑀓𑀦𑀸𑀫𑀸𑀬𑁄, 𑀤𑁆𑀯𑀺𑀲𑀢𑀁 𑀯𑀻𑀲𑀢𑀸𑀥𑀺𑀓𑀸.

𑀲𑀸𑀥𑁆𑀬𑀸 𑀤𑁆𑀯𑀸𑀤𑀲 𑀯𑀺𑀔𑁆𑀬𑀸𑀢𑀸, 𑀭𑀼𑀤𑁆𑀤𑀸 𑀘𑁂𑀓𑀸𑀤𑀲 𑀞𑀺𑀢𑀸;

𑀲𑀫𑀬𑀦𑁆𑀢𑀭𑀢𑁄 𑀏𑀢𑀸, 𑀯𑀺𑀜𑁆𑀜𑁂𑀬𑁆𑀬𑀸 𑀕𑀡𑀤𑁂𑀯𑀢𑀸.

𑁧𑁪. 𑀧𑀼𑀩𑁆𑀩𑀤𑁂𑀯𑀸𑀤𑀺𑀘𑀢𑀼𑀓𑁆𑀓𑀁 𑀅𑀲𑀼𑀭𑁂. 𑀧𑀼𑀩𑁆𑀩𑀁 𑀤𑁂𑀯𑀸 𑀧𑀼𑀩𑁆𑀩𑀤𑁂𑀯𑀸, 𑀤𑀼𑀢𑀺𑀬𑀸𑀲𑀫𑀸𑀲𑁄, 𑀧𑀼𑀩𑁆𑀩𑁂 𑀯𑀸 𑀤𑁂𑀯𑀸 𑀧𑀼𑀩𑁆𑀩𑀤𑁂𑀯𑀸, 𑀧𑀼𑀩𑁆𑀩𑁂 𑀳𑁆𑀬𑁂𑀢𑁂 𑀤𑁂𑀯𑀧𑀼𑀭𑁂 𑀞𑀺𑀢𑀸, 𑀅𑀦𑀦𑁆𑀢𑀭𑀁 𑀲𑀓𑁆𑀓𑀸𑀤𑀻𑀳𑀺 𑀢𑀢𑁄 𑀘𑀸𑀮𑀺𑀢𑀸. 𑀲𑀼𑀭𑀸𑀦𑀁 𑀭𑀺𑀧𑀽 𑀲𑀢𑁆𑀢𑀯𑁄 𑀲𑀼𑀭𑀭𑀺𑀧𑀽. 𑀲𑀼𑀭𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀅𑀲𑀼𑀭𑀸, 𑀤𑁂𑀯𑀸 𑀯𑀺𑀬 𑀦 𑀲𑀼𑀭𑀦𑁆𑀢𑀺 𑀦 𑀓𑀻𑀴𑀦𑁆𑀢𑀻𑀢𑀺 𑀯𑀸 𑀅𑀲𑀼𑀭𑀸, 𑀲𑀫𑀼𑀤𑁆𑀤𑀼𑀝𑁆𑀞𑀸 𑀯𑀸 𑀲𑀼𑀭𑀸 𑀤𑁂𑀯𑁂𑀳𑀺 𑀅𑀪𑁆𑀬𑀼𑀧𑀕𑀢𑀸, 𑀦𑀸𑀲𑀼𑀭𑁂𑀳𑀻𑀢𑀺 𑀦𑀢𑁆𑀣𑀺 𑀲𑀼𑀭𑀸 𑀏𑀢𑁂𑀲𑀦𑁆𑀢𑀺 𑀅𑀲𑀼𑀭𑀸𑀢𑀺 𑀦𑀺𑀓𑀸𑀬𑀦𑁆𑀢𑀭𑀺𑀬𑀸. 𑀤𑀦𑀼𑀦𑀸𑀫𑀸𑀬 𑀫𑀸𑀢𑀼𑀬𑀸 𑀅𑀧𑀘𑁆𑀘𑀁 𑀤𑀸𑀦𑀯𑀸. 𑀤𑀦𑀼 𑀦𑀸𑀫 𑀢𑁂𑀭𑀲𑀲𑀼 𑀭𑀓𑁆𑀔𑀲𑀤𑀼𑀳𑀺𑀢𑀻𑀲𑀼 𑀏𑀓𑀺𑀲𑁆𑀲𑀸 𑀤𑀼𑀳𑀺𑀢𑀼 𑀦𑀸𑀫𑀁. 𑀏𑀢𑁂 𑀧𑀼𑀩𑁆𑀩𑀤𑁂𑀯𑀸𑀤𑀬𑁄 𑀲𑀤𑀸 𑀧𑀼𑀫𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀦𑁆𑀢𑀺. 𑀤𑁂𑀘𑁆𑀘𑀸, 𑀤𑁂𑀢𑁂𑀬𑁆𑀬𑀸, 𑀤𑀦𑀼𑀚𑀸, 𑀇𑀦𑁆𑀤𑀸𑀭𑀻, 𑀲𑀼𑀭𑀤𑀺𑀲𑀸, 𑀲𑀼𑀓𑁆𑀓𑀲𑀺𑀲𑁆𑀲𑀸, 𑀤𑀺𑀢𑀺𑀲𑀼𑀢𑀸, 𑀧𑀼𑀩𑁆𑀩𑀚𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀲𑀼𑀭𑀲𑁆𑀲 𑀲𑀸𑀫𑀜𑁆𑀜𑀦𑀸𑀫𑀸𑀦𑀺.

𑀢𑀩𑁆𑀩𑀺𑀲𑁂𑀲𑀸 𑀅𑀲𑀼𑀭𑀧𑁆𑀧𑀪𑁂𑀤𑀸. 𑀲𑀼𑀭𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀢𑁆𑀣𑀁 𑀅𑀢𑁆𑀢𑀦𑁄 𑀩𑀮𑀓𑀸𑀬𑀸𑀦𑀁 𑀧𑀳𑀸𑀭𑀁 𑀆𑀬𑀼𑀥𑀁 𑀤𑀤𑀸𑀢𑀻𑀢𑀺 𑀧𑀳𑀸𑀭𑀤𑁄, 𑀲𑁄 𑀏𑀯 𑀧𑀳𑀸𑀭𑀸𑀤𑁄. 𑀲𑀁 𑀧𑀲𑀢𑁆𑀣𑁄 𑀯𑀭𑁄 𑀚𑀸𑀫𑀸𑀢𑀸 𑀬𑀲𑁆𑀲 𑀲𑁄 𑀲𑀫𑁆𑀩𑀭𑁄, 𑀢𑀲𑁆𑀲 𑀳𑀺 𑀲𑀓𑁆𑀓𑁄 𑀚𑀸𑀫𑀸𑀢𑀸 [𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁫𑁬], 𑀧𑀼𑀜𑁆𑀜𑀸𑀳𑀭𑀻𑀲𑀼 𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀁𑀯𑀼𑀡𑁄𑀢𑀻𑀢𑀺 𑀲𑀫𑁆𑀩𑀭𑁄. 𑀩𑀮𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀩𑀮𑀻, 𑀅𑀢𑀺𑀲𑀬𑀩𑀮𑀓𑀸𑀬𑀢𑁆𑀢𑀸 𑀯𑀸 𑀩𑀮𑀻, 𑀲𑁄 𑀏𑀯 𑀩𑀮𑀺, ‘‘𑀩𑀮𑀺𑀆𑀤𑀬𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀲𑁂𑀧𑀺 𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀆𑀤𑀺𑀦𑀸 𑀫𑀘𑁆𑀙𑀲𑀓𑀼𑀡𑀸𑀤𑀺𑀓𑁂𑀧𑀺 𑀓𑀼𑀜𑁆𑀘𑀸𑀤𑀺𑀓𑁂𑀧𑀺 𑀅𑀲𑀼𑀭𑀪𑁂𑀤𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁫. 𑀧𑀺𑀢𑀸𑀫𑀳𑀸𑀤𑁆𑀬𑀝𑁆𑀞𑀓𑀁 𑀩𑁆𑀭𑀳𑁆𑀫𑀦𑀺. 𑀧𑀺𑀢𑀽𑀦𑀁 𑀧𑀚𑀸𑀧𑀢𑀻𑀦𑀁 𑀮𑁄𑀓𑀧𑀺𑀢𑀽𑀦𑀫𑁆𑀧𑀺 𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀆𑀫𑀳𑀧𑀘𑁆𑀘𑀬𑁄 [𑀫𑁄𑀕𑁆𑀕𑀮𑁆𑀮𑀸𑀦 𑁪.𑁩𑁮]. 𑀲𑀩𑁆𑀩𑀮𑁄𑀓𑀸𑀦𑀁 𑀧𑀺𑀢𑀼𑀝𑁆𑀞𑀸𑀦𑀺𑀬𑀢𑁆𑀢𑀸 𑀧𑀺𑀢𑀸, 𑀲𑀩𑁆𑀩𑀮𑁄𑀓𑀁 𑀯𑀸 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀧𑀺𑀢𑀸, 𑀭𑀺𑀢𑀼𑀧𑀘𑁆𑀘𑀬𑁄. 𑀫𑀳𑀦𑁆𑀢𑀲𑀭𑀻𑀭𑀢𑀸𑀬 𑀩𑁆𑀭𑀳𑁆𑀫𑀸, 𑀩𑁆𑀭𑀳 𑀯𑀼𑀟𑁆𑀠𑀺𑀬𑀁 𑀫𑀧𑀘𑁆𑀘𑀬𑁄. 𑀮𑁄𑀓𑀸𑀦𑀁 𑀈𑀲𑁄 𑀇𑀦𑁆𑀤𑁄 𑀮𑁄𑀓𑁂𑀲𑁄. 𑀓𑀫𑀮𑀲𑀫𑁆𑀪𑀯𑀢𑁆𑀢𑀸 𑀓𑀫𑀮𑀁, 𑀧𑀤𑁆𑀫𑀁. 𑀢𑀁 𑀆𑀲𑀦𑀫𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀫𑀲𑁆𑀲 𑀓𑀫𑀮𑀸𑀲𑀦𑁄. 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀫𑀬𑀁 𑀅𑀡𑁆𑀟𑀁 𑀳𑀺𑀭𑀜𑁆𑀜𑀁, 𑀢𑀲𑁆𑀲 𑀕𑀩𑁆𑀪𑁄 𑀪𑀽𑀡𑁄 [𑀕𑀼𑀡𑁄 (𑀓.)] 𑀳𑀺𑀭𑀜𑁆𑀜𑀕𑀩𑁆𑀪𑁄. 𑀛𑀸𑀦𑀸𑀤𑀺𑀕𑀼𑀡𑁂𑀳𑀺 𑀲𑀼𑀭𑀸𑀦𑀁 𑀚𑁂𑀝𑁆𑀞𑀢𑁆𑀢𑀸 𑀲𑀼𑀭𑀚𑁂𑀝𑁆𑀞𑁄. 𑀧𑀚𑀸𑀦𑀁 𑀲𑀢𑁆𑀢𑀸𑀦𑀁 𑀧𑀢𑀺 𑀲𑀸𑀫𑀺𑀪𑀽𑀢𑁄 𑀧𑀚𑀸𑀧𑀢𑀺, 𑀧𑀚𑀁 𑀧𑀸𑀮𑁂𑀢𑀻𑀢𑀺 𑀯𑀸 𑀧𑀚𑀸𑀧𑀢𑀺. 𑀅𑀢𑁆𑀢𑀪𑀽, 𑀧𑀭𑀫𑁂𑀝𑁆𑀞𑀺, 𑀲𑀬𑀫𑁆𑀪𑀽, 𑀘𑀢𑀼𑀭𑀸𑀦𑀦𑁄, 𑀥𑀸𑀢𑀸, 𑀓𑀫𑀮𑀬𑁄𑀦𑀺, 𑀤𑀼𑀳𑀺𑀡𑁄, 𑀯𑀺𑀭𑀺𑀜𑁆𑀘𑀺, 𑀲𑀚𑀺𑀢𑀸, 𑀯𑁂𑀥𑀸, 𑀯𑀺𑀥𑀸𑀢𑀸, 𑀯𑀺𑀥𑀺, 𑀳𑀁𑀲𑀭𑀣𑁄, 𑀯𑀺𑀭𑀺𑀜𑁆𑀘𑁄, 𑀧𑀧𑀺𑀢𑀸𑀫𑀳𑁄 𑀇𑀘𑁆𑀘𑀸𑀤𑀬𑁄𑀧𑀺 𑀩𑁆𑀭𑀳𑁆𑀫𑀦𑀸𑀫𑀸𑀦𑀺.

𑁧𑁬-𑁧𑁭. 𑀯𑀸𑀲𑀼𑀤𑁂𑀯𑀸𑀤𑀺𑀧𑀜𑁆𑀘𑀓𑀁 𑀓𑀡𑁆𑀳𑁂. 𑀯𑀲𑀼𑀤𑁂𑀯𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀼𑀤𑁂𑀯𑁄. 𑀫𑀘𑁆𑀘𑀸𑀦𑀁 𑀚𑀻𑀯𑀺𑀢𑀁 𑀳𑀭𑀢𑀺 𑀲𑀻𑀮𑁂𑀦𑀸𑀢𑀺 𑀳𑀭𑀺. 𑀓𑀡𑁆𑀳𑀕𑀼𑀡𑀬𑁄𑀕𑀢𑁄 𑀓𑀡𑁆𑀳𑁄. 𑀓𑁂𑀲𑀺𑀁 𑀦𑀸𑀫 𑀅𑀲𑀼𑀭𑀁 𑀳𑀢𑀯𑀸𑀢𑀺 𑀓𑁂𑀲𑀯𑁄, 𑀈𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀳𑀦𑀲𑁆𑀲 𑀘 𑀯𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀲𑁆𑀫𑀸 𑀢𑀬𑀸 𑀳𑀢𑁄 𑀓𑁂𑀲𑀻,

𑀢𑀲𑁆𑀫𑀸 𑀫𑁂 𑀲𑀸𑀲𑀦𑀁 𑀲𑀼𑀡;

𑀓𑁂𑀲𑀯𑁄 𑀦𑀸𑀫 𑀦𑀸𑀫𑁂𑀦,

𑀲𑁂𑀬𑁆𑀬𑁄 𑀮𑁄𑀓𑁂 𑀪𑀯𑀺𑀲𑁆𑀲𑀲𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺].

𑀘𑀓𑁆𑀓𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲 𑀘𑀓𑁆𑀓𑀧𑀸𑀡𑀺. 𑀯𑀺𑀲𑀡𑀼 [𑀧𑀺𑀡𑁆𑀳𑀼 (𑀓.)], 𑀦𑀸𑀭𑀸𑀬𑀦𑁄, 𑀯𑁂𑀓𑀼𑀡𑁆𑀞𑁄, 𑀤𑀸𑀫𑁄𑀤𑀭𑁄, 𑀫𑀸𑀥𑀯𑁄, 𑀲𑀫𑁆𑀪𑀽, 𑀤𑁂𑀘𑁆𑀘𑀸𑀭𑀺, 𑀧𑀼𑀡𑁆𑀟𑀭𑀻𑀓𑀓𑁆𑀔𑁄, 𑀕𑁄𑀯𑀺𑀦𑁆𑀤𑁄, 𑀕𑀭𑀼𑀴𑀤𑁆𑀥𑀚𑁄, 𑀧𑀻𑀢𑀫𑁆𑀩𑀭𑁄, 𑀅𑀘𑁆𑀘𑀼𑀢𑁄, 𑀫𑀗𑁆𑀕𑀮𑁄, 𑀲𑀺𑀗𑁆𑀕𑀻, 𑀚𑀦𑀸𑀤𑁆𑀤𑀦𑁄, 𑀉𑀧𑁂𑀦𑁆𑀤𑁄, 𑀇𑀦𑁆𑀤𑀸𑀯𑀭𑀚𑁄, 𑀘𑀢𑀼𑀪𑀼𑀚𑁄, 𑀧𑀤𑁆𑀫𑀦𑀸𑀪𑁄, 𑀫𑀥𑀼𑀭𑀺𑀧𑀼, 𑀢𑀺𑀯𑀺𑀓𑁆𑀓𑀫𑁄, 𑀤𑁂𑀯𑀓𑀻𑀦𑀦𑁆𑀤𑀦𑁄, 𑀲𑁄𑀭𑀻, 𑀲𑀺𑀭𑀻𑀧𑀢𑀺, 𑀧𑀼𑀭𑀺𑀲𑁄𑀢𑁆𑀢𑀫𑁄, 𑀯𑀦𑀫𑀸𑀮𑀻, 𑀩𑀮𑀺𑀥𑀁𑀲𑀻, 𑀓𑀁𑀲𑀸𑀭𑀸𑀢𑀺, 𑀅𑀥𑁄𑀓𑁆𑀔𑀚𑁄, 𑀲𑀩𑁆𑀩𑀫𑁆𑀪𑀭𑁄, 𑀓𑁂𑀝𑀪𑀚𑀺 [𑀓𑁂𑀝𑀪𑀁 𑀚𑀺𑀢𑀯𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀯𑀺𑀥𑀼, 𑀲𑀲𑀩𑀺𑀦𑁆𑀤𑀼, 𑀲𑀺𑀭𑀻𑀓𑀭𑁄, 𑀲𑀺𑀭𑀻𑀯𑀭𑀸𑀳𑁄, 𑀅𑀚𑀺𑀢𑁄, 𑀧𑀭𑀧𑀼𑀭𑀺𑀲𑁄, 𑀲𑀺𑀭𑀻𑀕𑀩𑁆𑀪𑁄, 𑀙𑀩𑀺𑀦𑁆𑀤𑀼, 𑀅𑀦𑀦𑁆𑀢𑁄, 𑀦𑀭𑀓𑀚𑀺, 𑀓𑁂𑀲𑀭𑁄, 𑀚𑀸𑀢𑀺𑀓𑀻𑀮𑁄, 𑀦𑀭𑀲𑀻𑀳𑁄, 𑀧𑀼𑀭𑀸𑀡𑀧𑀼𑀭𑀺𑀲𑁄, 𑀦𑀮𑀺𑀦𑁂𑀲𑀬𑁄, 𑀯𑀸𑀲𑀼, 𑀦𑀭𑀸𑀬𑀦𑁄, 𑀧𑀼𑀦𑀩𑁆𑀩𑀲𑀼, 𑀲𑀩𑁆𑀩𑀭𑀽𑀧𑁄, 𑀥𑀭𑀡𑀻𑀥𑀭𑁄, 𑀯𑀸𑀫𑀦𑁄, 𑀏𑀓𑀲𑀺𑀗𑁆𑀕𑁄, 𑀲𑁄𑀫𑀕𑀩𑁆𑀪𑁄, 𑀆𑀤𑀺𑀤𑁂𑀯𑁄, 𑀆𑀤𑀺𑀯𑀭𑀸𑀳𑁄, 𑀲𑀼𑀯𑀡𑁆𑀡𑀩𑀺𑀦𑁆𑀤𑀼, 𑀲𑀤𑀸𑀬𑁄𑀕𑀻, 𑀲𑀦𑀸𑀢𑀦𑁄, 𑀭𑀸𑀳𑀼𑀫𑀼𑀤𑁆𑀥𑀪𑀺𑀤𑁄, 𑀓𑀸𑀴𑀦𑁂𑀫𑀺, 𑀧𑀡𑁆𑀟𑀯𑁄, 𑀯𑀟𑁆𑀠𑀫𑀸𑀦𑁄, 𑀲𑀢𑀸𑀦𑀦𑁆𑀤𑁄, 𑀧𑀚𑀸𑀦𑀸𑀣𑁄, 𑀲𑀼𑀬𑀸𑀫𑀼𑀦𑁄𑀇𑀘𑁆𑀘𑀸𑀤𑀻𑀦𑀺 𑀯𑀺𑀲𑀡𑀼𑀦𑀸𑀫𑀸𑀦𑀺. 𑀅𑀲𑁆𑀲 𑀧𑀦 𑀧𑀺𑀢𑀼 𑀦𑀸𑀫𑀸𑀦𑀺 𑀯𑀲𑀼𑀤𑁂𑀯𑁄, 𑀆𑀦𑀓𑀤𑀼𑀦𑁆𑀤𑀼𑀪𑀺 [𑀅𑀫𑀭 𑁧.𑁨𑁩] 𑀇𑀘𑁆𑀘𑀸𑀤𑀻𑀦𑀺. 𑀭𑀣𑀯𑀸𑀳𑁄 𑀧𑀦𑀲𑁆𑀲 𑀤𑀸𑀭𑀼𑀓𑁄 𑀦𑀸𑀫 [𑀢𑀺𑀓𑀡𑁆𑀟𑀲𑁂𑀲 𑁧.𑁧.𑁩𑁪]. 𑀫𑀦𑁆𑀢𑀻 𑀧𑀦 𑀧𑀯𑀦𑀩𑁆𑀬𑀸𑀥𑀺 𑀦𑀸𑀫 [𑀫𑀦𑁆𑀢𑀻 𑀧𑀯𑀦𑀩𑁆𑀬𑀸𑀫𑀺 𑀉𑀤𑁆𑀥𑀯𑁄 (𑀢𑀺𑀢𑀡𑁆𑀟𑀲𑁂𑀲 𑁧.𑁧.𑁩𑁫) 𑀧𑀯𑀦𑀩𑁆𑀬𑀸𑀥𑀺… 𑀉𑀤𑁆𑀥𑀯𑁄 𑀇𑀢𑀺 𑀤𑁆𑀯𑁂 𑀧𑀺𑀡𑁆𑀳𑀼𑀲𑁆𑀲 𑀫𑀦𑁆𑀢𑀺𑀦𑁄 (𑀓𑀝𑁆𑀝𑀻𑀓𑀸)].

𑀫𑀳𑀺𑀲𑁆𑀲𑀭𑀸𑀤𑀺𑀙𑀓𑁆𑀓𑀁 𑀳𑀭𑁂. 𑀫𑀳𑀦𑁆𑀢𑁄 𑀇𑀲𑁆𑀲𑀭𑁄 𑀯𑀺𑀪𑀽𑀢𑀺 𑀏𑀢𑀲𑁆𑀲𑀸𑀢𑀺 𑀫𑀳𑀺𑀲𑁆𑀲𑀭𑁄. 𑀕𑀼𑀡𑀸𑀯𑀢𑁆𑀣𑀸𑀭𑀳𑀺𑀢𑁄 𑀲𑀫𑁆𑀧𑀢𑀺 𑀧𑀭𑀫𑀸𑀦𑀦𑁆𑀤𑀭𑀽𑀧𑀢𑁆𑀢𑀸 𑀦𑀺𑀩𑁆𑀩𑀺𑀓𑀸𑀭𑁄 𑀲𑀫𑀢𑀺 𑀪𑀯𑀢𑀻𑀢𑀺 𑀲𑀺𑀯𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀓𑀸𑀭𑀲𑁆𑀲 𑀇𑀢𑁆𑀢𑀁, 𑀫𑀲𑁆𑀲 𑀯𑁄 𑀘. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀤𑀸𑀤𑀺𑀦𑀸 𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀲𑀽𑀮𑀧𑀸𑀡𑀺𑀢𑁆𑀢𑀸 𑀲𑀽𑀮𑀻. 𑀇𑀝𑁆𑀞𑁂 𑀧𑀪𑀯𑀢𑀻𑀢𑀺 𑀇𑀲𑁆𑀲𑀭𑁄, 𑀇𑀲𑁆𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑀸 𑀇𑀲𑁆𑀲𑀭𑁄. 𑀧𑀲𑀽𑀦𑀁 𑀧𑀫𑀣𑀸𑀦𑀁 𑀧𑀢𑀺 𑀧𑀲𑀼𑀧𑀢𑀺. ‘‘𑀧𑀲𑀼 𑀫𑀺𑀕𑀸𑀤𑁄 𑀙𑀕𑀮𑁂, 𑀧𑀫𑀣𑁂𑀧𑀺 𑀧𑀲𑀼 𑀧𑀼𑀫𑁂’’𑀢𑀺 𑀭𑀼𑀤𑁆𑀤𑁄 [𑀭𑀪𑀲𑁄 (𑀓.)]. ( ) [(𑀕𑀼𑀡𑁂) (𑀓.)] 𑀯𑀺𑀲𑀺𑀝𑁆𑀞𑀢𑀫𑁄𑀕𑀼𑀡𑀢𑁆𑀢𑀸 𑀲𑀩𑁆𑀩𑀁 𑀳𑀭𑀢𑀻𑀢𑀺 𑀳𑀭𑁄. 𑀯𑀼𑀢𑁆𑀢𑁄𑀢𑀺 𑀓𑁆𑀭𑀺𑀬𑀸𑀧𑀤𑀁. 𑀲𑀫𑁆𑀪𑀼, 𑀈𑀲𑁄, 𑀲𑀩𑁆𑀩𑁄, 𑀈𑀲𑀸𑀦𑁄, 𑀲𑀗𑁆𑀓𑀭𑁄, 𑀘𑀦𑁆𑀤𑀲𑁂𑀔𑀭𑁄, 𑀪𑀽𑀢𑁂𑀲𑁄, 𑀔𑀡𑁆𑀟𑀧𑀭𑀲𑀼, 𑀕𑀺𑀭𑀻𑀲𑁄, 𑀫𑀘𑁆𑀘𑀼𑀜𑁆𑀚𑀬𑁄, 𑀧𑀺𑀦𑀸𑀓𑀻, 𑀧𑀫𑀣𑀸𑀥𑀺𑀧𑁄, 𑀉𑀕𑁆𑀕𑁄, 𑀓𑀧𑀤𑁆𑀤𑀺, 𑀲𑀺𑀭𑀻𑀓𑀡𑁆𑀞𑁄, 𑀓𑀸𑀴𑀓𑀡𑁆𑀞𑁄, 𑀓𑀧𑀸𑀮𑀪𑀭𑁄, 𑀯𑀸𑀫𑀤𑁂𑀯𑁄, 𑀫𑀳𑀸𑀤𑁂𑀯𑁄, 𑀯𑀺𑀭𑀽𑀧𑀓𑁆𑀔𑁄, 𑀢𑀺𑀮𑁄𑀘𑀦𑁄, 𑀲𑀩𑁆𑀩𑀜𑁆𑀜𑀽, 𑀦𑀻𑀮𑀮𑁄𑀳𑀺𑀢𑁄, 𑀫𑀸𑀭𑀳𑀭𑁄, 𑀪𑀕𑁆𑀕𑁄, 𑀢𑁆𑀬𑀫𑁆𑀩𑀓𑁄, 𑀢𑀺𑀧𑀼𑀭𑀦𑁆𑀢𑀓𑁄, 𑀕𑀗𑁆𑀕𑀸𑀥𑀭𑁄, 𑀅𑀦𑁆𑀥𑀓𑀭𑀺𑀧𑀼, 𑀩𑁆𑀬𑁄𑀫𑀓𑁂𑀲𑁄, 𑀪𑀯𑁄, 𑀪𑀻𑀫𑁄, 𑀭𑀼𑀤𑁆𑀤𑁄, 𑀉𑀫𑀸𑀧𑀢𑀺, 𑀪𑀕𑀸𑀮𑀻, 𑀓𑀧𑀺𑀲𑀜𑁆𑀚𑀦𑁄, 𑀳𑀻𑀭𑁄, 𑀧𑀜𑁆𑀘𑀸𑀦𑀦𑁄, 𑀔𑀓𑀼𑀦𑁆𑀢𑀮𑁄, 𑀕𑁄𑀧𑀸𑀮𑀓𑁄, 𑀧𑀺𑀗𑁆𑀕𑀓𑁆𑀔𑁄 [𑀯𑀺𑀪𑀗𑁆𑀕𑁄 (𑀓.)], 𑀓𑀽𑀝𑀓𑀭𑁄, 𑀘𑀦𑁆𑀤𑀸𑀧𑀻𑀴𑁄, 𑀫𑀳𑀸𑀦𑀝𑁄, 𑀲𑀫𑀻𑀭𑁄, 𑀳𑁄, 𑀦𑀦𑁆𑀤𑀺𑀯𑀟𑁆𑀠𑀦𑁄, 𑀕𑀼𑀴𑀸𑀓𑁂𑀲𑁄 [𑀫𑀺𑀕𑀽𑀳𑁄 (𑀓.)], 𑀫𑀺𑀳𑀺𑀭𑀸𑀡𑁄, 𑀫𑁂𑀖𑀯𑀸𑀳𑀦𑁄, 𑀲𑀼𑀧𑁆𑀧𑀢𑀸𑀧𑁄 [𑀲𑀼𑀧𑁆𑀧𑀲𑀸𑀤𑁄 (𑀓.)], 𑀉, 𑀣𑀸𑀡𑀼 [𑀉𑀧𑀸𑀡𑁆𑀟𑁄 (𑀓.)], 𑀲𑀺𑀧𑀺𑀯𑀺𑀝𑁆𑀞𑁄, 𑀓𑀻𑀮𑁄, 𑀥𑀫𑁆𑀫𑀯𑀸𑀳𑀦𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀳𑀭𑀦𑀸𑀫𑀸𑀦𑀺.

𑀓𑀼𑀫𑀸𑀭𑀸𑀤𑀺𑀢𑁆𑀢𑀬𑀁 𑀳𑀭𑀲𑁆𑀲 𑀧𑀼𑀢𑁆𑀢𑁂. 𑀓𑀼𑀫𑀸𑀭 𑀓𑀻𑀴𑀸𑀬𑀁, 𑀓𑀼𑀫𑀸𑀭𑁂𑀢𑀺 𑀓𑀻𑀴𑀢𑀻𑀢𑀺 𑀓𑀼𑀫𑀸𑀭𑁄, 𑀲𑁄𑀴𑀲𑀯𑀲𑁆𑀲𑀺𑀓𑁄, 𑀅𑀬𑀜𑁆𑀘 𑀲𑁄𑀴𑀲𑀯𑀲𑁆𑀲𑀺𑀓𑁄. ‘‘𑀩𑀸𑀮𑁄 𑀘 𑀲𑁄𑀴𑀲 𑀪𑀯𑁂’’𑀢𑀺 𑀳𑀺 𑀯𑀼𑀢𑁆𑀢𑀁. 𑀔𑀡𑁆𑀟𑀢𑀺 𑀤𑀸𑀦𑀯𑀩𑀮𑀦𑁆𑀢𑀺 𑀔𑀦𑁆𑀤𑁄, 𑀡𑁆𑀟𑀲𑁆𑀲 𑀦𑁆𑀤𑁄. 𑀲𑀢𑁆𑀢𑀺𑀁𑀧𑀳𑀭𑀡𑀯𑀺𑀲𑁂𑀲𑀁 𑀥𑀭𑀢𑀻𑀢𑀺 𑀲𑀢𑁆𑀢𑀺𑀥𑀭𑁄, 𑀧𑀪𑀸𑀯𑀼𑀲𑁆𑀲𑀸𑀳𑀫𑀦𑁆𑀢𑀲𑀗𑁆𑀔𑀸𑀢𑀁 𑀯𑀸 𑀲𑀢𑁆𑀢𑀺𑀢𑁆𑀢𑀬𑀁 𑀥𑀭𑀢𑀻𑀢𑀺 𑀲𑀢𑁆𑀢𑀺𑀥𑀭𑁄. 𑀅𑀫𑀭𑀓𑁄𑀲𑁂 𑀧𑀦 𑁋

‘‘𑀓𑀢𑁆𑀢𑀺𑀓𑁂𑀬𑁆𑀬𑁄 𑀫𑀳𑀸𑀲𑁂𑀦𑁄,

𑀲𑀭𑀚𑀸𑀢𑁄 𑀙𑀴𑀸𑀦𑀦𑁄;

𑀧𑀩𑁆𑀩𑀢𑀻𑀦𑀦𑁆𑀤𑀦𑁄 𑀔𑀦𑁆𑀤𑁄,

𑀲𑁂𑀦𑀸𑀦𑀻 𑀅𑀕𑁆𑀕𑀺𑀪𑀽 𑀕𑀼𑀳𑁄.

𑀩𑀸𑀳𑀼𑀮𑁂𑀬𑁆𑀬𑁄 𑀢𑀸𑀭𑀓𑀚𑀺,

𑀯𑀺𑀲𑀸𑀔𑁄 𑀲𑀺𑀔𑀺𑀯𑀸𑀳𑀦𑁄;

𑀙𑀫𑀸𑀢𑀼𑀭𑁄 𑀲𑀢𑁆𑀢𑀺𑀥𑀭𑁄,

𑀓𑀼𑀫𑀸𑀭𑁄 𑀓𑁄𑀜𑁆𑀘𑀤𑀸𑀭𑀡𑁄’’𑀢𑀺 [𑀅𑀫𑀭 𑁧.𑁪𑁧-𑁨] 𑀯𑀼𑀢𑁆𑀢𑀁.

𑁧𑁮-𑁨𑁧. 𑀲𑀓𑁆𑀓𑀸𑀤𑀻𑀦𑀺 𑀯𑀻𑀲𑀢𑀺 𑀲𑀓𑁆𑀓𑀲𑁆𑀲 𑀦𑀸𑀫𑀸𑀦𑀺. 𑀅𑀲𑀼𑀭𑁂 𑀚𑁂𑀢𑀼𑀁 𑀲𑀓𑁆𑀓𑀼𑀡𑀸𑀢𑀻𑀢𑀺 𑀲𑀓𑁆𑀓𑁄. 𑀧𑀼𑀭𑁂, 𑀧𑀼𑀭𑀁 𑀯𑀸 𑀤𑀤𑀸𑀢𑀻𑀢𑀺 𑀧𑀼𑀭𑀺𑀦𑁆𑀤𑀤𑁄. 𑀤𑁂𑀯𑀸𑀦𑀁 𑀭𑀸𑀚𑀸 𑀤𑁂𑀯𑀭𑀸𑀚𑀸. 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲 𑀯𑀚𑀺𑀭𑀧𑀸𑀡𑀺. 𑀲𑀼𑀚𑀸𑀬 𑀅𑀲𑀼𑀭𑀓𑀜𑁆𑀜𑀸𑀬 𑀧𑀢𑀺 𑀲𑀼𑀚𑀫𑁆𑀧𑀢𑀺. 𑀩𑀳𑀽𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀺𑀦𑁆𑀢𑀺𑀢𑀢𑁆𑀣𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬 𑀲𑀳𑀲𑁆𑀲𑀓𑁆𑀔𑁄. 𑀫𑀳𑀢𑀁 𑀤𑁂𑀯𑀸𑀦𑀁 𑀇𑀦𑁆𑀤𑁄 𑀭𑀸𑀚𑀸 𑀫𑀳𑀺𑀦𑁆𑀤𑁄, 𑀤𑁂𑀯𑁂𑀳𑀺 𑀫𑀳𑀺𑀢𑀩𑁆𑀩𑁄 𑀯𑀸 𑀇𑀦𑁆𑀤𑁄 𑀭𑀸𑀚𑀸 𑀫𑀳𑀺𑀦𑁆𑀤𑁄, 𑀫𑀳𑀦𑁆𑀢𑁄 𑀘 𑀲𑁄 𑀇𑀦𑁆𑀤𑁄 𑀘𑀸𑀢𑀺 𑀯𑀸 𑀫𑀳𑀺𑀦𑁆𑀤𑁄. 𑀯𑀚𑀺𑀭𑀁 𑀆𑀯𑀼𑀥𑀁 𑀬𑀲𑁆𑀲 𑀯𑀚𑀺𑀭𑀸𑀯𑀼𑀥𑁄, ‘‘𑀯𑀚𑀺𑀭𑀸𑀬𑀼𑀥𑁄’’𑀢𑀺𑀧𑀺 𑀧𑀸𑀞𑁄. 𑀯𑀲𑀽𑀦𑀺 𑀭𑀢𑀦𑀸𑀦𑀺 𑀲𑀦𑁆𑀢𑁆𑀬𑀲𑁆𑀲𑁂𑀢𑀺 𑀯𑀸𑀲𑀯𑁄. 𑀤𑀲𑀲𑀢𑀸𑀦𑀺 𑀦𑀬𑀦𑀸𑀦𑀺 𑀬𑀲𑁆𑀲 𑀲𑁄 𑀤𑀲𑀲𑀢𑀦𑀬𑀦𑁄. 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀅𑀥𑀺𑀧𑀢𑀺𑀪𑀽𑀢𑀢𑁆𑀢𑀸 𑀢𑀺𑀤𑀺𑀯𑀸𑀥𑀺𑀪𑀽. 𑀲𑀼𑀭𑀸𑀦𑀁 𑀦𑀸𑀣𑁄 𑀲𑀼𑀭𑀦𑀸𑀣𑁄. 𑀯𑀚𑀺𑀭𑀁 𑀳𑀢𑁆𑀣𑁂 𑀬𑀲𑁆𑀲 𑀲𑁄 𑀯𑀚𑀺𑀭𑀳𑀢𑁆𑀣𑁄. 𑀪𑀽𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀢𑀺 𑀪𑀽𑀢𑀧𑀢𑀺. 𑀫𑀳𑀺𑀢𑀩𑁆𑀩𑀢𑁆𑀢𑀸 𑀫𑀖𑀯𑀸. 𑀫𑀳 𑀧𑀽𑀚𑀸𑀬𑀁, 𑀳𑀲𑁆𑀲 𑀖𑀯𑁄. 𑀓𑁄𑀲𑀲𑀗𑁆𑀔𑀸𑀢𑀸𑀦𑀺 𑀥𑀦𑀸𑀦𑀺 𑀲𑀦𑁆𑀢𑀺 𑀬𑀲𑁆𑀲, 𑀲𑁄 𑀓𑁄𑀲𑀺𑀬𑁄, ‘‘𑀓𑁄𑀲𑀺𑀬𑀕𑁄𑀢𑁆𑀢𑀢𑀸𑀬 𑀓𑁄𑀲𑀺𑀬𑁄’’𑀢𑀺 𑀘 𑀯𑀤𑀦𑁆𑀢𑀺. 𑀇𑀦𑁆𑀤𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑁂𑀦 𑀬𑀼𑀚𑁆𑀚𑀢𑁂𑀢𑀺 𑀇𑀦𑁆𑀤𑁄. 𑀯𑀢𑁆𑀭𑀁 𑀦𑀸𑀫 𑀅𑀲𑀼𑀭𑀁 𑀅𑀪𑀺𑀪𑀯𑀢𑀻𑀢𑀺 𑀯𑀢𑁆𑀭𑀪𑀽. 𑀧𑀸𑀓𑁄 𑀦𑀸𑀫𑀯𑀢𑁆𑀭𑀸𑀲𑀼𑀭𑀲𑁆𑀲 𑀪𑀸𑀢𑀸, 𑀢𑀲𑁆𑀲 𑀲𑀸𑀲𑀦𑀢𑁄 𑀦𑀺𑀕𑁆𑀕𑀳𑀢𑁄 𑀧𑀸𑀓𑀲𑀸𑀲𑀦𑁄. 𑀯𑀺𑀟𑀁 𑀩𑁆𑀬𑀸𑀧𑀓𑀁 𑀑𑀚𑁄 𑀏𑀢𑀲𑁆𑀲 𑀯𑀺𑀟𑁄𑀚𑁄. 𑀲𑀼𑀦𑀸𑀲𑀻𑀭𑁄, 𑀧𑀼𑀭𑀦𑁆𑀤𑀭𑁄, 𑀮𑁂𑀔𑀸𑀲𑀪𑁄 [𑀮𑁂𑀔𑀦𑀁 𑀤𑁂𑀯𑀸𑀦𑀁 𑀉𑀲𑀢𑁄 𑀉𑀢𑁆𑀢𑀫𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀤𑀺𑀯𑀧𑀢𑀺, 𑀲𑀼𑀭𑀧𑀢𑀺, 𑀩𑀮𑀸𑀭𑀸𑀢𑀺, 𑀲𑀘𑀻𑀧𑀢𑀺, 𑀚𑀫𑁆𑀪𑀪𑁂𑀤𑀻, 𑀳𑀭𑀺𑀳𑀬𑁄, 𑀦𑀫𑀼𑀘𑀺𑀲𑀽𑀤𑀦𑁄, 𑀲𑀁𑀓𑀦𑁆𑀤𑀦𑁄, 𑀫𑁂𑀖𑀯𑀸𑀳𑀦𑁄, 𑀆𑀔𑀡𑁆𑀟𑀮𑁄 [𑀆𑀔𑀡𑁆𑀟𑀬𑀢𑀺 𑀧𑀭𑀩𑀮𑀁 𑀉𑀲𑀸𑀤𑀺𑀢𑁆𑀢𑀸 𑀓𑀮𑀘 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀓𑁄𑀲𑀺𑀓𑁄, 𑀲𑀼𑀭𑀕𑀸𑀫𑀡𑀻, 𑀦𑀸𑀓𑀦𑀸𑀣𑁄, 𑀳𑀭𑀻 𑀇𑀘𑁆𑀘𑀸𑀤𑀻𑀦𑀺𑀧𑀺 𑀲𑀓𑁆𑀓𑀲𑁆𑀲 𑀦𑀸𑀫𑀸𑀦𑀺.

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀪𑀭𑀺𑀬𑀸 𑀲𑀼𑀚𑀸𑀢𑀸 𑀦𑀸𑀫. 𑀲𑀼𑀔𑁂𑀦 𑀚𑀸𑀢𑀸, 𑀲𑀼𑀦𑁆𑀤𑀭𑀸 𑀯𑀸 𑀚𑀸𑀢𑀺 𑀬𑀲𑁆𑀲𑀸 𑀲𑀸 𑀲𑀼𑀚𑀸𑀢𑀸. 𑀧𑀼𑀮𑁄𑀫𑀚𑀸, 𑀲𑀘𑀻, 𑀇𑀦𑁆𑀤𑀸𑀦𑀻 𑀇𑀘𑁆𑀘𑀸𑀤𑀻𑀦𑀺𑀧𑀺 𑀲𑀓𑁆𑀓𑀪𑀭𑀺𑀬𑀸𑀬 𑀦𑀸𑀫𑀸𑀦𑀺.

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀧𑀼𑀭𑀁 𑀫𑀲𑀓𑁆𑀓𑀲𑀸𑀭𑀸𑀤𑀬𑁄 𑀢𑀬𑁄 𑀪𑀯𑁂. 𑀫𑁄 𑀘 𑀲𑀓𑁆𑀓𑁄 𑀘 𑀫𑀲𑀓𑁆𑀓𑀸, 𑀢𑁂 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣 𑀓𑀻𑀴𑀸𑀯𑀲𑁂𑀦𑀸𑀢𑀺 𑀫𑀲𑀓𑁆𑀓𑀲𑀸𑀭𑀸, 𑀫𑀳𑀺𑀲𑁆𑀲𑀭𑀸𑀤𑀻𑀦𑀁 𑀧𑀭𑀺𑀲𑀸𑀦𑀁, 𑀲𑀓𑁆𑀓𑀲𑁆𑀲 𑀘 𑀓𑀻𑀴𑀸𑀦𑀼𑀪𑀯𑀦𑀝𑁆𑀞𑀸𑀦𑀦𑁆𑀢𑁆𑀬𑀢𑁆𑀣𑁄𑀢𑀺 𑀘𑀺𑀦𑁆𑀢𑀸𑀫𑀡𑀺𑀣𑀼𑀢𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀲𑀗𑁆𑀕𑀳𑀝𑀻𑀓𑀸𑀬𑀁 𑀧𑀦 ‘‘𑀫𑀲𑀓𑁆𑀓𑀦𑁆𑀢𑀺 𑀯𑀸 𑀯𑀲𑁄𑀓𑀦𑁆𑀢𑀺 𑀯𑀸 𑀅𑀲𑀼𑀭𑀧𑀼𑀭𑀲𑁆𑀲 𑀦𑀸𑀫𑀁, 𑀇𑀤𑀁 𑀧𑀦 𑀢𑁂𑀲𑀁 𑀉𑀢𑁆𑀢𑀫𑀢𑁆𑀢𑀸 𑀫𑀲𑀓𑁆𑀓𑀲𑀸𑀭𑁄, 𑀯𑀲𑁄𑀓𑀲𑀸𑀭𑁄𑀢𑀺 𑀘 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀫𑀭𑀸 𑀏𑀢𑀺𑀲𑁆𑀲𑀁 𑀲𑀦𑁆𑀢𑀺 𑀅𑀫𑀭𑀯𑀢𑀻, 𑀲𑀸 𑀏𑀯 𑀅𑀫𑀭𑀸𑀯𑀢𑀻, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸 [𑀧𑀸𑀡𑀺𑀦𑀻 𑁬.𑁩.𑁧𑁧𑁯].

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀧𑀸𑀲𑀸𑀤𑁄 𑀯𑁂𑀚𑀬𑀦𑁆𑀢𑁄 𑀦𑀸𑀫. 𑀯𑁂𑀚𑀬𑀦𑁆𑀢𑀻 𑀧𑀝𑀸𑀓𑀸 𑀧𑀲𑀢𑁆𑀣𑀸, 𑀪𑀽𑀢𑀸 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑁂𑀚𑀬𑀦𑁆𑀢𑁄.

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀲𑀪𑀸 𑀲𑀼𑀥𑀫𑁆𑀫𑀸 𑀫𑀢𑀸. 𑀲𑁄𑀪𑀦𑁄 𑀥𑀫𑁆𑀫𑁄 𑀅𑀲𑁆𑀲𑀸𑀢𑀺 𑀲𑀼𑀥𑀫𑁆𑀫𑀸, 𑀤𑁂𑀯𑀫𑀡𑁆𑀟𑀧𑁄.

𑁨𑁨. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀭𑀣𑁄 𑀯𑁂𑀚𑀬𑀦𑁆𑀢𑁄 𑀦𑀸𑀫. 𑀯𑁂𑀚𑀬𑀦𑁆𑀢𑀻𑀦𑀸𑀫𑀸𑀬 𑀧𑀝𑀸𑀓𑀸𑀬 𑀬𑁄𑀕𑀢𑁄 𑀯𑁂𑀚𑀬𑀦𑁆𑀢𑁄. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀲𑀸𑀭𑀣𑀺 𑀲𑀽𑀢𑁄 𑀫𑀸𑀢𑀮𑀺𑀦𑀸𑀫. 𑀫𑀢𑀮𑀲𑁆𑀲 [𑀫𑀸𑀢𑀮𑀸𑀬 (𑀓.)] 𑀅𑀧𑀘𑁆𑀘𑀁 𑀫𑀸𑀢𑀮𑀺, 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀕𑀚𑁄 𑀏𑀭𑀸𑀯𑀡𑁄 𑀦𑀸𑀫, 𑀇𑀭𑀸𑀯𑀡𑁄 𑀲𑀫𑀼𑀤𑁆𑀤𑁄, 𑀢𑀢𑁆𑀭𑀚𑀸𑀢𑁄 𑀏𑀭𑀸𑀯𑀡𑁄 [𑀇𑀭𑀸𑀯𑀢𑀺 𑀲𑀫𑀼𑀤𑁆𑀤𑁂 𑀚𑀸𑀢𑁄 (𑀏𑀭𑀸𑀯𑀢𑁄), 𑀲𑁂𑀲𑁂 𑀅𑀡… 𑀧𑀺𑀲𑁄𑀤𑀭𑀸𑀤𑀺𑀢𑁆𑀢𑀸 𑀡𑀢𑁆𑀢𑁂 𑀏𑀭𑀸𑀯𑀡𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀲𑀺𑀮𑀸𑀲𑀦𑀁 𑀧𑀡𑁆𑀟𑀼𑀓𑀫𑁆𑀩𑀮𑁄 𑀦𑀸𑀫. 𑀧𑀡𑁆𑀟𑀼𑀯𑀡𑁆𑀡𑀓𑀫𑁆𑀩𑀮𑀲𑀤𑀺𑀲𑀢𑁆𑀢𑀸 𑀧𑀡𑁆𑀟𑀼𑀓𑀫𑁆𑀩𑀮𑁄. 𑀲𑀺𑀮𑀸 𑀧𑀸𑀲𑀸𑀡𑁄 𑀏𑀯 𑀆𑀲𑀦𑀁 𑀲𑀺𑀮𑀸𑀲𑀦𑀁.

𑁨𑁩. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑀸 𑀲𑀼𑀯𑀻𑀭, 𑀚𑀬𑀦𑁆𑀢𑀇𑀘𑁆𑀘𑀸𑀤𑀬𑁄. 𑀅𑀢𑀺𑀲𑀬𑁂𑀦 𑀲𑀽𑀭𑀢𑁆𑀢𑀸 𑀲𑀼𑀯𑀻𑀭𑁄. 𑀅𑀲𑀼𑀭𑁂 𑀚𑀬𑀢𑀻𑀢𑀺 𑀚𑀬𑀦𑁆𑀢𑁄. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀧𑁄𑀓𑁆𑀔𑀭𑀡𑀻 𑀦𑀦𑁆𑀤𑀸 𑀦𑀸𑀫 𑀪𑀯𑁂. 𑀦𑀦𑁆𑀤𑀻𑀬𑀢𑀻𑀢𑀺 𑀦𑀦𑁆𑀤𑀸. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁, 𑀲𑀮𑀺𑀮𑀜𑁆𑀘, 𑀢𑁂𑀳𑀺 𑀲𑀢𑁆𑀢𑀸𑀦𑀁 𑀫𑀦𑀁 𑀅𑀢𑁆𑀢𑀸𑀦𑀁 𑀦𑀬𑀢𑀻𑀢𑀺 𑀧𑁄𑀓𑁆𑀔𑀭𑀡𑀻, 𑀧𑁄𑀓𑁆𑀔𑀭𑁂𑀦 𑀯𑀸 𑀲𑀼𑀦𑁆𑀤𑀭𑁂𑀦 𑀅𑀡𑁆𑀡𑁂𑀦 𑀚𑀮𑁂𑀦 𑀲𑀳𑀺𑀢𑀢𑁆𑀢𑀸 𑀧𑁄𑀓𑁆𑀔𑀭𑀡𑁆𑀡𑀻, 𑀲𑀸 𑀏𑀯 𑀧𑁄𑀓𑁆𑀔𑀭𑀡𑀻. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀯𑀦𑀸𑀦𑀺 𑀉𑀬𑁆𑀬𑀸𑀦𑀸𑀦𑀺 𑀦𑀦𑁆𑀤𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀦𑀦𑁆𑀤𑀬𑀢𑀻𑀢𑀺 𑀦𑀦𑁆𑀤𑀦𑀁. 𑀦𑀸𑀦𑀸𑀤𑀺𑀩𑁆𑀩𑀭𑀼𑀓𑁆𑀔𑁂𑀳𑀺 𑀫𑀺𑀲𑁆𑀲𑀓𑀢𑁆𑀢𑀸 𑀫𑀺𑀲𑁆𑀲𑀓𑀁. 𑀦𑀸𑀦𑀸𑀮𑀢𑀸𑀳𑀺 𑀯𑀮𑁆𑀮𑀻𑀳𑀺 𑀘𑀺𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀮𑀢𑀸, 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀸𑀬 𑀯𑀸 𑀮𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀺𑀢𑁆𑀢𑀮𑀢𑀸, 𑀤𑁂𑀯𑀢𑀸𑀦𑀁 𑀯𑀸 𑀘𑀺𑀢𑁆𑀢𑀸𑀲𑀸 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀸, 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸, 𑀲𑀸 𑀬𑀲𑁆𑀲 𑀅𑀢𑁆𑀣𑀺, 𑀢𑀁 𑀘𑀺𑀢𑁆𑀢𑀮𑀢𑀸. 𑀤𑁂𑀯𑀢𑀸𑀦𑀁 𑀯𑀸 𑀘𑀺𑀢𑁆𑀢𑀁 𑀮𑀦𑁆𑀢𑀺 𑀕𑀡𑁆𑀳𑀦𑁆𑀢𑀻𑀢𑀺 𑀘𑀺𑀢𑁆𑀢𑀮𑀸, 𑀤𑀺𑀩𑁆𑀩𑀭𑀼𑀓𑁆𑀔𑀸, 𑀢𑁂𑀲𑀁 𑀲𑀫𑀽𑀳𑁄 𑀘𑀺𑀢𑁆𑀢𑀮𑀢𑀸, 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀢𑀲𑁆𑀲 𑀯𑀦𑀲𑁆𑀲 𑀦𑀸𑀫𑀁, 𑀬𑀣𑀸 ‘‘𑀔𑀼𑀤𑁆𑀤𑀲𑀺𑀓𑁆𑀔𑀸’’𑀢𑀺. 𑀨𑀸𑀭𑀼𑀲𑀓𑀸𑀦𑀺 𑀬𑀢𑁆𑀣 𑀲𑀦𑁆𑀢𑀺, 𑀢𑀁 𑀨𑀸𑀭𑀼𑀲𑀓𑀁.

𑁨𑁪. 𑀅𑀲𑀦𑁆𑀬𑀸𑀤𑀺𑀢𑁆𑀢𑀬𑀁 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀆𑀬𑀼𑀥𑀁. 𑀅𑀲𑁆𑀲𑀢𑁂 𑀪𑀼𑀚𑁆𑀚𑀢𑁂 𑀮𑁄𑀓𑀥𑀸𑀢𑀼𑀓𑀫𑀦𑁂𑀦𑀸𑀬𑀼𑀥𑁂𑀦𑀸𑀢𑀺 𑀅𑀲𑀦𑀺, 𑀅𑀬𑀁 𑀅𑀲𑀦𑀺𑀲𑀤𑁆𑀤𑁄 𑀤𑁆𑀯𑀻𑀲𑀼 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑁂𑀲𑀼 𑀯𑀢𑁆𑀢𑀢𑀺. 𑀓𑀼𑀮𑀺𑀫𑁆𑀳𑀺 𑀲𑀓𑁆𑀓𑀲𑁆𑀲 𑀳𑀢𑁆𑀣𑁂 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀓𑀼𑀮𑀺𑀲𑀁, 𑀓𑀼𑀮𑀺 𑀳𑀢𑁆𑀣𑁄 𑀪𑀼𑀚𑀸𑀤𑀮𑁄𑀢𑀺 𑀳𑀺 𑀢𑀺𑀓𑀡𑁆𑀟𑀲𑁂𑀲𑁄 [𑀢𑀺𑀓𑀡𑁆𑀟𑀲𑁂𑀲 𑁨.𑁬.𑁨𑁬]. 𑀓𑀼𑀬𑀁 𑀯𑀸 𑀧𑀣𑀯𑀺𑀬𑀁 𑀮𑀺𑀲𑀢𑀺 𑀢𑀦𑀼 𑀪𑀯𑀢𑀻𑀢𑀺 𑀓𑀼𑀮𑀺𑀲𑀁. 𑀯𑀚 𑀕𑀢𑀺𑀬𑀁, 𑀯𑀚𑀢𑁂𑀯 𑀦 𑀧𑀝𑀺𑀳𑀜𑁆𑀜𑀢𑁂 𑀬𑀲𑁆𑀲 𑀕𑀫𑀦𑀁 𑀓𑁂𑀦𑀘𑀻𑀢𑀺 𑀯𑀚𑀺𑀭𑀁, 𑀇𑀭𑀧𑀘𑁆𑀘𑀬𑁄. 𑀯𑀚𑀺𑀭𑀲𑀳𑀘𑀭𑀡𑀢𑁄 𑀓𑀼𑀮𑀺𑀲𑀲𑀤𑁆𑀤𑁄𑀧𑀺 𑀧𑀼𑀦𑁆𑀦𑀧𑀼𑀁𑀲𑀓𑁂. 𑀪𑀺𑀤𑀼𑀭𑀁, 𑀧𑀯𑀺, 𑀲𑀢𑀓𑁄𑀝𑀺, 𑀲𑀼𑀭𑀼, 𑀲𑀫𑁆𑀩𑁄, 𑀤𑀫𑁆𑀪𑁄𑀮𑀺𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀚𑀺𑀭𑀲𑁆𑀲 𑀦𑀸𑀫𑀸𑀦𑀺. 𑀢𑀢𑁆𑀭 𑀪𑀺𑀤𑀼𑀭𑀁 𑀧𑀼𑀦𑁆𑀦𑀧𑀼𑀁𑀲𑀓𑁂, 𑀧𑀯𑀺𑀆𑀤𑀬𑁄 𑀧𑀼𑀫𑁂.

𑀭𑀫𑁆𑀪𑀸 𑀘 𑀅𑀮𑀫𑁆𑀩𑀼𑀲𑀸 𑀘 𑀇𑀘𑁆𑀘𑀸𑀤𑀺𑀓𑀸 𑀤𑁂𑀯𑀺𑀢𑁆𑀣𑀺𑀬𑁄 𑀅𑀘𑁆𑀙𑀭𑀸𑀬𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀸. 𑀅𑀘𑁆𑀙𑀭𑀸𑀯𑀺𑀲𑁂𑀲𑀸 𑀳𑀺 𑀏𑀢𑀸. 𑀅𑀘𑁆𑀙𑁄 𑀦𑀺𑀫𑁆𑀫𑀮𑀯𑀡𑁆𑀡𑁄 𑀏𑀢𑀸𑀲𑀫𑀢𑁆𑀣𑀻𑀢𑀺 𑀅𑀘𑁆𑀙𑀭𑀸𑀬𑁄. ‘‘𑀅𑀧𑀲𑀭𑀸’’𑀢𑀺𑀧𑀺 𑀏𑀢𑀸𑀲𑀫𑁂𑀯 𑀲𑀸𑀫𑀜𑁆𑀜𑀲𑀜𑁆𑀜𑀸. 𑀤𑁂𑀯𑀧𑀼𑀢𑁆𑀢𑀸𑀦𑀁 𑀭𑀢𑀺𑀁 𑀪𑀸𑀯𑁂𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀭𑀫𑁆𑀪𑀸, 𑀭𑀁 𑀓𑀸𑀫𑀕𑁆𑀕𑀺𑀁 𑀪𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀚𑀸𑀮𑁂𑀦𑁆𑀢𑀻𑀢𑀺 𑀯𑀸 𑀭𑀫𑁆𑀪𑀸, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀓𑀸𑀫𑀭𑀢𑀺𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑁂 𑀅𑀢𑁆𑀢𑀦𑀺 𑀯𑀲𑀸𑀧𑁂𑀢𑀼𑀁 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀅𑀮𑀫𑁆𑀩𑀼𑀲𑀸, 𑀅𑀲𑁆𑀲𑀼𑀓𑀸𑀭𑁄. 𑀤𑁂𑀯𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁, 𑀤𑁂𑀯𑀻𑀪𑀽𑀢𑀸 𑀯𑀸 𑀇𑀢𑁆𑀣𑀺𑀬𑁄 𑀤𑁂𑀯𑀺𑀢𑁆𑀣𑀺𑀬𑁄.

‘‘𑀧𑀜𑁆𑀘𑀲𑀺𑀔𑁄, 𑀳𑀸𑀳𑀸, 𑀳𑀽𑀳𑀽’’𑀇𑀘𑁆𑀘𑀸𑀤𑀬𑁄 𑀕𑀦𑁆𑀥𑀩𑁆𑀩𑀸 𑀦𑀸𑀫. 𑀧𑀜𑁆𑀘 𑀲𑀺𑀔𑀸 𑀘𑀽𑀴𑀸 𑀬𑀲𑁆𑀲 𑀲𑁄 𑀧𑀜𑁆𑀘𑀲𑀺𑀔𑁄. ‘‘𑀳𑀸’’𑀢𑀺 𑀅𑀦𑀦𑁆𑀤𑀺𑀢𑀁 𑀥𑀦𑀺𑀁 [𑀦𑀺𑀦𑁆𑀤𑀺𑀪𑀤𑁆𑀥𑀦𑀺𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀚𑀳𑀢𑀻𑀢𑀺 𑀳𑀸𑀳𑀸. ‘‘𑀳𑀽’’𑀢𑀺 𑀕𑀻𑀢𑀯𑀺𑀲𑁂𑀲𑀲𑀤𑁆𑀤𑀁 𑀳𑀽𑀬𑀢𑁂𑀢𑀺 𑀳𑀽𑀳𑀽. 𑀕𑀦𑁆𑀥𑀁 𑀅𑀩𑁆𑀩𑀦𑁆𑀢𑀺 𑀪𑀼𑀜𑁆𑀚𑀦𑁆𑀢𑀻𑀢𑀺 𑀕𑀦𑁆𑀥𑀩𑁆𑀩𑀸, 𑀕𑀸𑀬𑀦𑀁 𑀯𑀸 𑀥𑀫𑁆𑀫𑁄 𑀏𑀢𑁂𑀲𑀁 𑀕𑀦𑁆𑀥𑀩𑁆𑀩𑀸, 𑀫𑁆𑀫𑀲𑁆𑀲 𑀩𑁆𑀩𑁄.

𑁨𑁫. 𑀯𑀺𑀫𑀸𑀦𑀸𑀤𑀺𑀤𑁆𑀯𑀬𑀁 𑀯𑀺𑀫𑀸𑀦𑁂. 𑀤𑁂𑀯𑀸𑀦𑀫𑀸𑀓𑀸𑀲𑁂 𑀕𑀫𑀦𑀁 𑀬𑁂𑀦 𑀢𑀁 𑀯𑀺𑀫𑀸𑀦𑀁, 𑀯𑀺𑀕𑀢𑀁 [𑀯𑀺𑀦𑀸 (𑀓.)] 𑀫𑀸𑀦𑀁 𑀉𑀧𑀫𑀸𑀦𑀫𑀲𑁆𑀲 𑀯𑀺𑀫𑀸𑀦𑀁. 𑀯𑀺𑀳𑁂 𑀆𑀓𑀸𑀲𑁂 𑀕𑀘𑁆𑀙𑀢𑀻𑀢𑀺 𑀩𑁆𑀬𑀫𑁆𑀳𑀁, 𑀳𑀓𑀸𑀭𑀢𑁄 𑀧𑀼𑀩𑁆𑀩𑁂 𑀅𑀫𑀧𑀘𑁆𑀘𑀬𑁄. 𑀏𑀢𑁆𑀣 𑀘 𑀯𑀺𑀫𑀸𑀦𑀩𑁆𑀬𑀫𑁆𑀳𑀲𑀤𑁆𑀤𑀸 𑀤𑁆𑀯𑁂𑀧𑀺 𑀅𑀦𑀺𑀢𑁆𑀣𑀺𑀬𑀁 𑀧𑀼𑀦𑁆𑀦𑀧𑀼𑀁𑀲𑀓𑁂 𑀯𑀢𑁆𑀢𑀦𑁆𑀢𑀺.

𑀧𑀻𑀬𑀼𑀲𑀸𑀤𑀺𑀢𑁆𑀢𑀬𑀁 𑀅𑀫𑀢𑁂. 𑀧𑀻𑀬𑀢𑁂𑀢𑀺 𑀧𑀻𑀬𑀼𑀲𑀁, ‘‘𑀅𑀫𑀢𑀧𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀉𑀲𑀧𑀘𑁆𑀘𑀬𑁄 [𑀉𑀡𑀸𑀤𑀺 𑁪.𑁭𑁬 𑀡𑁆𑀯𑀸𑀤𑀺 𑁨𑁧𑁫 𑀲𑀼𑀢𑁆𑀢𑁂𑀲𑀼 𑀧𑀦 ‘‘𑀧𑀻𑀬𑀽𑀲’’𑀫𑀺𑀢𑀺 𑀤𑀺𑀲𑁆𑀲𑀢𑀺]. ‘‘𑀧𑁂𑀬𑀼𑀲𑁄’’𑀢𑀺𑀧𑀺 𑀦𑀸𑀫𑀫𑀲𑁆𑀲. 𑀦 𑀫𑀢𑀁 𑀫𑀭𑀡𑀫𑀦𑁂𑀦 𑀅𑀫𑀢𑀁. 𑀲𑀼𑀔𑁂𑀦 𑀥𑀬𑀦𑁆𑀢𑀺 𑀧𑀺𑀯𑀦𑁆𑀢𑀺 𑀢𑀁 𑀇𑀢𑀺 𑀲𑀼𑀥𑀸. 𑀏𑀢𑁆𑀣 𑀘 𑀅𑀫𑀢𑀲𑀤𑁆𑀤𑁄 𑀬𑀜𑁆𑀜𑀲𑁂𑀲𑀧𑀻𑀬𑀼𑀲𑀲𑀮𑀺𑀮𑀖𑀢𑀸𑀤𑀻𑀲𑀼 𑀦𑀧𑀼𑀁𑀲𑀓𑁂, 𑀥𑀦𑁆𑀯𑀦𑁆𑀢𑀭𑀺𑀤𑁂𑀯𑀸𑀤𑀻𑀲𑀼 𑀧𑀼𑀮𑁆𑀮𑀺𑀗𑁆𑀕𑁂, 𑀕𑀴𑁄𑀛𑀸𑀪𑀬𑀸𑀫𑀮𑀓𑁆𑀬𑀸𑀤𑀻𑀲𑀼 𑀇𑀢𑁆𑀣𑀺𑀮𑀺𑀗𑁆𑀕𑁂𑀢𑀺 𑀢𑀻𑀲𑀼 𑀯𑀢𑁆𑀢𑀢𑀺 [𑀅𑀫𑀢𑀁 𑀬𑀜𑁆𑀜𑀲𑁂𑀲𑁂 𑀘, 𑀧𑀻𑀬𑀽𑀲𑁂 𑀲𑀮𑀺𑀮𑁂 𑀖𑀢𑁂 𑀅𑀬𑀸𑀘𑀺𑀢𑁂 𑀘 𑀫𑁄𑀓𑁆𑀔𑁂 𑀘, 𑀦𑀸 𑀥𑀦𑁆𑀯𑀦𑁆𑀢𑀭𑀺𑀤𑁂𑀯𑀲𑀼 𑀅𑀫𑀢𑀸 𑀫𑀸𑀕𑀥𑀻𑀧𑀣𑁆𑀬𑀸 𑀕𑀼𑀴𑀼𑀘𑁆𑀬𑀸𑀫𑀮𑀓𑀻𑀲𑀼 𑀘 (𑀫𑁂𑀤𑀺𑀦𑀻𑀓𑁄𑀲 𑁧𑁬 𑁭𑁭-𑁮)], 𑀢𑀁𑀲𑀳𑀘𑀭𑀡𑀢𑁄 𑀧𑀻𑀬𑀼𑀲𑀲𑀤𑁆𑀤𑁄𑀧𑀺 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. 𑀲𑀼𑀥𑀸𑀲𑀤𑁆𑀤𑁄 𑀧𑀦 𑀅𑀫𑀢𑀦𑀼𑀳𑀻𑀮𑁂𑀧𑀸𑀤𑀻𑀲𑀼𑀧𑀺 𑀦𑀺𑀘𑁆𑀘𑀫𑀺𑀢𑁆𑀣𑀺𑀮𑀺𑀗𑁆𑀕𑁄𑀯 [𑀲𑀼𑀥𑀸 𑀮𑁂𑀧𑁄’𑀫𑀢𑀁 𑀦𑀼𑀳𑀻 (𑀅𑀫𑀭 𑁨𑁩.𑁧𑁦𑁧)].

𑀲𑀺𑀦𑁂𑀭𑀼𑀆𑀤𑀺𑀧𑀜𑁆𑀘𑀓𑀁 𑀧𑀩𑁆𑀩𑀢𑀭𑀸𑀚𑁂. 𑀲𑀺𑀦𑀸 𑀲𑁄𑀘𑁂𑀬𑁆𑀬𑁂, 𑀲𑀺𑀦𑀸𑀢𑀺 𑀲𑁄𑀘𑁂𑀢𑀺 𑀤𑁂𑀯𑁂𑀢𑀺 𑀲𑀺𑀦𑁂𑀭𑀼, 𑀏𑀭𑀼𑀧𑀘𑁆𑀘𑀬𑁄. 𑀫𑀻 𑀳𑀺𑀁𑀲𑀸𑀬𑀁, 𑀫𑀺𑀦𑀸𑀢𑀺 𑀳𑀺𑀁𑀲𑀢𑀺 𑀲𑀩𑁆𑀩𑁂 𑀧𑀩𑁆𑀩𑀢𑁂 𑀅𑀢𑁆𑀢𑀦𑁄 𑀉𑀘𑁆𑀘𑀢𑀭𑀝𑁆𑀞𑁂𑀦𑀸𑀢𑀺 𑀫𑁂𑀭𑀼, 𑀭𑀼𑀧𑀘𑁆𑀘𑀬𑁄. 𑀢𑀺𑀤𑀺𑀯𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀆𑀥𑀸𑀭𑁄 𑀧𑀢𑀺𑀝𑁆𑀞𑀸𑀢𑀺 𑀢𑀺𑀤𑀺𑀯𑀸𑀥𑀸𑀭𑁄. 𑀤𑁂𑀯𑁂 𑀦𑀬𑀢𑀻𑀢𑀺 𑀦𑁂𑀭𑀼. 𑀲𑀼𑀫𑁂𑀭𑀽𑀢𑀺 𑀉𑀧𑀲𑀕𑁆𑀕𑁂𑀦 𑀦𑀸𑀫𑀁 𑀯𑀟𑁆𑀠𑀺𑀢𑀁. 𑀳𑁂𑀫𑀤𑁆𑀤𑀺, 𑀭𑀢𑀦𑀲𑀸𑀦𑀼, 𑀲𑀼𑀭𑀸𑀮𑀬𑀸𑀤𑀻𑀦𑀺𑀧𑀺 𑀧𑀩𑁆𑀩𑀢𑀭𑀸𑀚𑀲𑁆𑀲 𑀦𑀸𑀫𑀸𑀦𑀺.

𑁨𑁬. 𑀬𑀼𑀕𑀦𑁆𑀥𑀭𑀸𑀤𑀻𑀦𑀺 𑀲𑀺𑀦𑁂𑀭𑀼𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀭𑀺𑀪𑀡𑁆𑀟𑀧𑀩𑁆𑀩𑀢𑀸𑀦𑀁 𑀦𑀸𑀫𑀸𑀦𑀺. 𑀘𑀦𑁆𑀤𑀲𑀽𑀭𑀺𑀬𑀲𑀗𑁆𑀔𑀸𑀢𑀁 𑀬𑀼𑀕𑀁 𑀥𑀸𑀭𑁂𑀢𑀺 𑀢𑀤𑀼𑀩𑁆𑀩𑁂𑀥𑀫𑀕𑁆𑀕𑀘𑀸𑀭𑀺𑀢𑁆𑀢𑀸𑀢𑀺 𑀬𑀼𑀕𑀦𑁆𑀥𑀭𑁄. 𑀈𑀲𑀁 𑀫𑀳𑀺𑀲𑁆𑀲𑀭𑀁 𑀥𑀸𑀭𑁂𑀢𑀺 𑀢𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸𑀢𑀺 𑀈𑀲𑀥𑀭𑁄. 𑀓𑀭𑀯𑀻𑀭𑀸 𑀅𑀲𑁆𑀲𑀫𑀸𑀭𑀓𑀸 𑀩𑀳𑀯𑁄 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀓𑀭𑀯𑀻𑀭𑁄, 𑀓𑁂 𑀯𑀸 𑀫𑀬𑀽𑀭𑀸 𑀭𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀭𑀯𑀻𑀭𑁄, ‘‘𑀓𑀭𑀯𑀻𑀓𑁄’’𑀢𑀺𑀧𑀺 𑀧𑀸𑀞𑁄, 𑀇𑀥𑀸𑀧𑀺 𑀧𑀘𑁆𑀙𑀺𑀫𑁄𑀬𑁂𑀯𑀢𑁆𑀣𑁄, 𑀓𑀭𑀯𑀻𑀓𑀲𑀓𑀼𑀡𑀸 𑀯𑀸 𑀩𑀳𑀯𑁄 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀓𑀭𑀯𑀻𑀓𑁄. 𑀲𑀼𑀤𑀲𑁆𑀲𑀦𑀸 𑀑𑀲𑀥𑀺𑀯𑀺𑀲𑁂𑀲𑀸 𑀩𑀳𑀼𑀓𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀲𑀼𑀤𑀲𑁆𑀲𑀦𑁄, 𑀲𑀼𑀔𑁂𑀦 𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀯𑀸 𑀲𑀼𑀤𑀲𑁆𑀲𑀦𑁄, 𑀲𑀼𑀦𑁆𑀤𑀭𑀁 𑀯𑀸 𑀤𑀲𑁆𑀲𑀦𑀁 𑀏𑀢𑁆𑀣𑀸𑀢𑀺 𑀲𑀼𑀤𑀲𑁆𑀲𑀦𑁄. 𑀧𑀜𑁆𑀘𑀦𑁆𑀦𑀁 𑀧𑀩𑁆𑀩𑀢𑀘𑀓𑁆𑀓𑀸𑀦𑀁 𑀦𑁂𑀫𑀺𑀲𑀤𑀺𑀲𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀥𑀸𑀭𑁂𑀢𑀻𑀢𑀺 𑀦𑁂𑀫𑀺𑀦𑁆𑀥𑀭𑁄, 𑀦𑁂𑀫𑀺𑀪𑀸𑀯𑁂𑀦 𑀯𑀸 𑀥𑀸𑀭𑁂𑀢𑀩𑁆𑀩𑁄 𑀉𑀧𑀮𑀓𑁆𑀔𑁂𑀢𑀩𑁆𑀩𑁄𑀢𑀺 𑀦𑁂𑀫𑀺𑀦𑁆𑀥𑀭𑁄, 𑀦𑁂𑀫𑀺𑀁𑀯𑀸 𑀭𑀣𑀤𑁆𑀤𑀼𑀫𑀁 𑀥𑀸𑀭𑁂𑀢𑀺 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀦𑁂𑀫𑀺𑀦𑁆𑀥𑀭𑁄. 𑀯𑀺𑀦𑀢𑀸 𑀦𑀸𑀫 𑀲𑀼𑀧𑀡𑁆𑀡𑀫𑀸𑀢𑀸, 𑀢𑀲𑁆𑀲𑀸 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀯𑀺𑀦𑀢𑀓𑁄𑀢𑀺 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸. 𑀯𑀺𑀢𑁆𑀣𑀺𑀡𑁆𑀡𑀸 𑀯𑀸 𑀦𑀢𑀸 𑀦𑀤𑀺𑀬𑁄 𑀏𑀢𑁆𑀣𑀸𑀢𑀺 𑀯𑀺𑀦𑀢𑀓𑁄. 𑀅𑀲𑁆𑀲𑀓𑀡𑁆𑀡𑀸 𑀲𑀚𑁆𑀚𑀤𑀼𑀫𑀸 𑀩𑀳𑀯𑁄 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀅𑀲𑁆𑀲𑀓𑀡𑁆𑀡𑁄, 𑀅𑀲𑁆𑀲𑀓𑀡𑁆𑀡𑀲𑀤𑀺𑀲𑀓𑀽𑀝𑀢𑁆𑀢𑀸 𑀯𑀸 𑀅𑀲𑁆𑀲𑀓𑀡𑁆𑀡𑁄. 𑀓𑀼𑀮𑀸𑀘𑀮𑀸𑀢𑀺 𑀏𑀢𑁂 𑀲𑀺𑀦𑁂𑀭𑀼𑀆𑀤𑀬𑁄 𑀅𑀝𑁆𑀞 𑀧𑀩𑁆𑀩𑀢𑀸 𑀅𑀘𑀮𑀲𑀗𑁆𑀔𑀸𑀢𑀸𑀦𑀁 𑀧𑀩𑁆𑀩𑀢𑀸𑀦𑀁 𑀓𑀼𑀮𑀸𑀦𑀺 𑀬𑁄𑀦𑀺𑀬𑁄 𑀧𑀪𑀯𑀸, 𑀏𑀢𑁂 𑀘 𑀲𑀺𑀦𑁂𑀭𑀼𑀆𑀤𑀬𑁄 𑀅𑀦𑀼𑀧𑀼𑀩𑁆𑀩𑀲𑀫𑀼𑀕𑁆𑀕𑀢𑀸, 𑀲𑀩𑁆𑀩𑀩𑀸𑀳𑀺𑀭𑁄 𑀘𑁂𑀢𑁆𑀣 𑀅𑀲𑁆𑀲𑀓𑀡𑁆𑀡𑁄. 𑀦𑀺𑀫𑀺𑀚𑀸𑀢𑀓𑁂 𑀧𑀦 𑁋

‘‘𑀲𑀼𑀤𑀲𑁆𑀲𑀦𑁄 𑀓𑀭𑀯𑀻𑀓𑁄, 𑀈𑀲𑀥𑀭𑁄 𑀬𑀼𑀕𑀦𑁆𑀥𑀭𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀺 𑀩𑁆𑀭𑀳𑀸’’𑀢𑀺 [𑀚𑀸. 𑁨.𑁨𑁨.𑁫𑁬𑁮].

𑀯𑀢𑁆𑀯𑀸 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑁆𑀲𑀓𑀡𑁆𑀡𑁄 𑀦𑀸𑀫 𑀧𑀩𑁆𑀩𑀢𑁄 𑀧𑀢𑀺𑀝𑁆𑀞𑀺𑀢𑁄, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀦𑀢𑀓𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀏𑀯𑀫𑀜𑁆𑀜𑁄𑀬𑁂𑀯𑀸𑀦𑀼𑀓𑁆𑀓𑀫𑁄 𑀓𑀣𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀓𑀣𑀺𑀢𑁄, 𑀦𑀸𑀫𑀪𑁂𑀤𑀫𑀢𑁆𑀢𑀓𑀢𑁄𑀬𑁂𑀯 𑀧𑀦𑁂𑀢𑁆𑀣 𑀪𑁂𑀤𑁄, 𑀦𑀸𑀢𑁆𑀣𑀪𑁂𑀤𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁭. 𑀆𑀓𑀸𑀲𑀯𑀸𑀳𑀻𑀕𑀗𑁆𑀕𑀸𑀬𑀁 𑀫𑁂𑀭𑀼𑀲𑀺𑀗𑁆𑀕𑁄𑀩𑁆𑀪𑀯𑀸𑀬𑀁 𑀫𑀦𑁆𑀤𑀸𑀓𑀺𑀦𑁆𑀬𑀸𑀤𑀺𑀦𑀸𑀫𑀢𑁆𑀢𑀬𑀁. 𑀫𑀦𑁆𑀤𑀁 𑀅𑀓𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀫𑀦𑁆𑀤𑀸𑀓𑀺𑀦𑀻. 𑀆𑀓𑀸𑀲𑁂 𑀲𑀦𑁆𑀤𑀫𑀸𑀦𑀸 𑀕𑀗𑁆𑀕𑀸 𑀆𑀓𑀸𑀲𑀕𑀗𑁆𑀕𑀸. 𑀲𑀼𑀭𑀸𑀦𑀁 𑀤𑁂𑀯𑀸𑀦𑀁 𑀦𑀤𑀻 𑀲𑀼𑀭𑀦𑀤𑀻. 𑀲𑀼𑀭𑀤𑀻𑀖𑀺𑀓𑀸𑀢𑀺𑀧𑀺 𑀏𑀢𑀺𑀲𑁆𑀲𑀸 𑀦𑀸𑀫𑀁.

𑁨𑁮. 𑀓𑁄𑀯𑀺𑀴𑀸𑀭𑀸𑀤𑀺𑀢𑁆𑀢𑀬𑀁 ‘‘𑀨𑀮𑀳𑀭𑁄’’𑀢𑀺𑀔𑁆𑀬𑀸𑀢𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑁂. 𑀓𑀼𑀁 𑀧𑀣𑀯𑀺𑀁 𑀯𑀺𑀤𑀸𑀭𑀬𑀢𑀺 𑀫𑀽𑀮𑁂𑀦𑀸𑀢𑀺 𑀓𑁄𑀯𑀺𑀴𑀸𑀭𑁄,𑀤𑀲𑁆𑀲 𑀴𑁄. 𑀧𑀭𑀺 𑀲𑀫𑀦𑁆𑀢𑀢𑁄 𑀙𑀢𑁆𑀢𑀁 𑀯𑀺𑀬 𑀢𑀺𑀝𑁆𑀞𑀢𑀻𑀢𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄. 𑀧𑀸𑀭𑀺𑀦𑁄 𑀲𑀫𑀼𑀤𑁆𑀤𑀲𑁆𑀲 𑀚𑀸𑀢𑁄 𑀅𑀧𑀘𑁆𑀘𑀁 𑀧𑀸𑀭𑀺𑀚𑀸𑀢𑀓𑁄, 𑀲𑀓𑀢𑁆𑀣𑁂 𑀓𑁄. 𑀧𑀸𑀭𑀺𑀪𑀤𑁆𑀤𑁄, 𑀦𑀺𑀫𑁆𑀩𑀢𑀭𑀼, 𑀫𑀦𑁆𑀤𑀸𑀭𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀦𑀸𑀫𑀸𑀦𑀺.

𑀓𑀧𑁆𑀧𑀭𑀼𑀓𑁆𑀔𑁄 𑀘 𑀲𑀦𑁆𑀢𑀸𑀦𑁄 𑀘 𑀆𑀤𑀺𑀦𑀸 𑀫𑀦𑁆𑀤𑀸𑀭𑁄 𑀧𑀸𑀭𑀺𑀚𑀸𑀢𑀓𑁄 𑀘 𑀳𑀭𑀺𑀘𑀦𑁆𑀤𑀦𑀜𑁆𑀘 𑀏𑀢𑁂 𑀧𑀜𑁆𑀘 𑀤𑁂𑀯𑀤𑁆𑀤𑀼𑀫𑀸 [𑀅𑀫𑀭 𑁧.𑁫𑁩] 𑀤𑁂𑀯𑀢𑀭𑀯𑁄 𑀤𑁂𑀯𑀪𑀽𑀫𑀻𑀲𑁆𑀯𑁂𑀯 𑀲𑀫𑁆𑀪𑀯𑀢𑁄. 𑀓𑀧𑁆𑀧𑁄 𑀲𑀗𑁆𑀓𑀧𑁆𑀧𑀺𑀢𑁄 𑀅𑀢𑁆𑀣𑁄, 𑀢𑀲𑁆𑀲 𑀭𑀼𑀓𑁆𑀔𑁄 𑀚𑀜𑁆𑀜𑀚𑀦𑀓𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄, 𑀓𑀧𑁆𑀧𑀁 𑀯𑀸 𑀞𑀺𑀢𑁄 𑀭𑀼𑀓𑁆𑀔𑁄 𑀓𑀧𑁆𑀧𑀭𑀼𑀓𑁆𑀔𑁄. 𑀢𑀦𑀦𑀁 𑀢𑀸𑀦𑁄, 𑀪𑀸𑀯𑁂 𑀡𑁄. 𑀕𑀦𑁆𑀥𑀲𑁆𑀲 𑀲𑀫𑁆𑀫𑀸 𑀢𑀸𑀦𑁄 𑀅𑀲𑁆𑀲𑁂𑀢𑀺 𑀲𑀦𑁆𑀢𑀸𑀦𑁄, 𑀲𑀺𑀭𑀻𑀲𑀭𑀼𑀓𑁆𑀔𑁄. 𑀫𑀦𑁆𑀤𑀦𑁆𑀢𑁂 𑀫𑁄𑀤𑀦𑁆𑀢𑁂 𑀤𑁂𑀯𑀸 𑀅𑀦𑁂𑀦𑀸𑀢𑀺 𑀫𑀦𑁆𑀤𑀸𑀭𑁄, 𑀆𑀭𑀧𑀘𑁆𑀘𑀬𑁄. 𑀳𑀭𑀺𑀫𑀺𑀦𑁆𑀤𑀁 𑀘𑀤𑀬𑀢𑀺 𑀲𑀼𑀔𑀬𑀢𑀻𑀢𑀺 𑀳𑀭𑀺𑀘𑀦𑁆𑀤𑀦𑀁. 𑀏𑀢𑁂 𑀧𑀜𑁆𑀘 𑀤𑁂𑀯𑀢𑀭𑀯𑁄 𑀅𑀫𑀭𑀓𑁄𑀲𑀦𑀬𑁂𑀦 𑀯𑀼𑀢𑁆𑀢𑀸, 𑀲𑁄𑀕𑀢𑀦𑀬𑁂𑀦 𑀧𑀦 𑀲𑀢𑁆𑀢 𑀤𑁂𑀯𑀢𑀭𑀯𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀸𑀝𑀮𑀻 𑀲𑀺𑀫𑁆𑀩𑀮𑀻 𑀚𑀫𑁆𑀩𑀽, 𑀤𑁂𑀯𑀸𑀦𑀁 𑀧𑀸𑀭𑀺𑀙𑀢𑁆𑀢𑀓𑁄;

𑀓𑀤𑀫𑁆𑀩𑁄 𑀓𑀧𑁆𑀧𑀭𑀼𑀓𑁆𑀔𑁄 𑀘, 𑀲𑀺𑀭𑀻𑀲𑁂𑀦 𑀪𑀯𑀢𑀺 𑀲𑀢𑁆𑀢𑀫’’𑀦𑁆𑀢𑀺 [𑀥. 𑀲. 𑀅𑀝𑁆𑀞. 𑁫𑁮𑁪; 𑀲𑀸𑀭𑀢𑁆𑀣. 𑀝𑀻. 𑁧.𑁧𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸].

𑀢𑀢𑁆𑀣 𑀧𑀸𑀝𑀮𑀻𑀢𑀺 𑀘𑀺𑀢𑁆𑀭𑀧𑀸𑀝𑀮𑀻, 𑀲𑀸 𑀅𑀲𑀼𑀭𑀮𑁄𑀓𑁂 𑀢𑀺𑀝𑁆𑀞𑀢𑀺. 𑀢𑀣𑀸 𑀲𑀺𑀫𑁆𑀩𑀮𑀻 𑀕𑀭𑀼𑀴𑁂𑀲𑀼, 𑀚𑀫𑁆𑀩𑀽 𑀚𑀫𑁆𑀩𑀼𑀤𑀻𑀧𑁂, 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀢𑀸𑀯𑀢𑀺𑀁𑀲𑁂, 𑀓𑀤𑀫𑁆𑀩𑁄 𑀅𑀧𑀭𑀕𑁄𑀬𑀸𑀦𑁂. 𑀓𑀧𑁆𑀧𑀭𑀼𑀓𑁆𑀔𑁄 𑀉𑀢𑁆𑀢𑀭𑀓𑀼𑀭𑀽𑀲𑀼, 𑀲𑀺𑀭𑀻𑀲𑁄 𑀧𑀼𑀩𑁆𑀩𑀯𑀺𑀤𑁂𑀳𑁂𑀢𑀺. 𑀏𑀢𑁂 𑀲𑀢𑁆𑀢 𑀤𑁂𑀯𑀸𑀦𑀫𑁂𑀯 𑀧𑀢𑀺𑀝𑁆𑀞𑀸𑀦𑀪𑀽𑀫𑀻𑀲𑀼 𑀲𑀫𑁆𑀪𑀯𑀢𑁄 𑀤𑁂𑀯𑀢𑀭𑀯𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺.

𑀲𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁯. 𑀧𑀼𑀩𑁆𑀩𑀧𑀘𑁆𑀙𑀺𑀫𑀉𑀢𑁆𑀢𑀭𑀸 𑀤𑀺𑀲𑀸 𑀬𑀣𑀸𑀓𑁆𑀓𑀫𑀁 𑀧𑀸𑀘𑀻 𑀧𑀢𑀻𑀘𑀻 𑀉𑀤𑀻𑀘𑀻 𑀦𑀸𑀫 𑀪𑀯𑀦𑁆𑀢𑀺. 𑀧𑀞𑀫𑀁 𑀧𑀸𑀢𑁄 𑀅𑀦𑁆𑀘𑀢𑀺 𑀭𑀯𑀺 𑀬𑀲𑁆𑀲𑀁 𑀲𑀸 𑀧𑀸𑀘𑀻, 𑀦𑀓𑀸𑀭𑀮𑁄𑀧𑁄. 𑀧𑀘𑁆𑀙𑀸 𑀤𑀺𑀯𑀸𑀯𑀲𑀸𑀦𑁂 𑀅𑀦𑁆𑀘𑀢𑀺 𑀭𑀯𑀺 𑀬𑀲𑁆𑀲𑀁 𑀲𑀸 𑀧𑀢𑀻𑀘𑀻. 𑀉𑀤𑁆𑀥𑀁 𑀅𑀦𑁆𑀘𑀢𑀺 𑀭𑀯𑀺 𑀬𑀲𑁆𑀲𑀁 𑀲𑀸 𑀉𑀤𑀻𑀘𑀻, 𑀬𑀲𑁆𑀲𑀁 𑀯𑀸 𑀲𑀻𑀢𑀯𑀺𑀬𑁄𑀕𑀁 𑀤𑀢𑁆𑀯𑀸 𑀅𑀦𑁆𑀘𑀢𑀺 𑀲𑀸 𑀉𑀤𑀻𑀘𑀻, 𑀯𑀺𑀬𑁄𑀕𑀢𑁆𑀣𑀯𑀸𑀘𑀓𑁄 𑀳𑁂𑀢𑁆𑀣 𑀉𑀓𑀸𑀭𑁄, 𑀤𑀲𑀤𑁆𑀤𑁄 𑀤𑀸𑀦𑀢𑁆𑀣𑁄. 𑀅𑀣 𑀯𑀸 𑀧𑀦𑁆𑀘𑀢𑀺 𑀧𑀼𑀩𑁆𑀩𑀪𑀸𑀯𑀫𑀸𑀧𑀚𑁆𑀚𑀢𑁂𑀢𑀺 𑀧𑀸𑀘𑀻. 𑀧𑀢𑀺𑀦𑁆𑀘𑀢𑀺 𑀧𑀘𑁆𑀙𑀸𑀪𑀸𑀯𑀫𑀸𑀧𑀚𑁆𑀚𑀢𑁂𑀢𑀺 𑀧𑀢𑀻𑀘𑀻. 𑀉𑀤𑀜𑁆𑀘𑀢𑀺 𑀲𑀻𑀢𑀯𑀺𑀬𑁄𑀕𑀤𑀸𑀦𑀢𑁆𑀢𑀫𑀸𑀧𑀚𑁆𑀚𑀢𑁂𑀢𑀺 𑀉𑀤𑀻𑀘𑀻. 𑀏𑀢𑁆𑀣 𑀘 𑀉𑀤𑀻𑀘𑀻𑀲𑀳𑀘𑀭𑀡𑀢𑁄 𑀧𑀢𑀻𑀘𑀻 𑀇𑀢𑁆𑀣𑀺𑀬𑀁, 𑀧𑀢𑀻𑀘𑀻𑀲𑀳𑀘𑀭𑀡𑀢𑁄 𑀧𑀸𑀘𑀻 𑀇𑀢𑁆𑀣𑀺𑀬𑀁 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀢𑀁𑀢𑀁𑀲𑀳𑀘𑀭𑀡𑀪𑀸𑀯𑁂𑀦 𑀢𑀲𑁆𑀲 𑀢𑀲𑁆𑀲 𑀢𑀁𑀢𑀁𑀮𑀺𑀗𑁆𑀕𑀢𑁆𑀢𑀫𑀼𑀧𑀦𑁂𑀬𑁆𑀬𑀼𑀁. 𑀧𑀼𑀩𑁆𑀩𑀧𑀘𑁆𑀙𑀺𑀫𑀉𑀢𑁆𑀢𑀭𑀸𑀢𑀺 𑀲𑀩𑁆𑀩𑀦𑀸𑀫𑀲𑁆𑀲 𑀯𑀼𑀢𑁆𑀢𑀫𑀢𑁆𑀢𑁂 𑀧𑀼𑀫𑁆𑀪𑀸𑀯𑁄.

𑀤𑀓𑁆𑀔𑀺𑀡𑀸𑀤𑀺𑀤𑁆𑀯𑀬𑀁 𑀤𑀓𑁆𑀔𑀺𑀡𑀤𑀺𑀲𑀸𑀬𑀁. 𑀫𑀚𑁆𑀛𑁂 𑀅𑀧𑀸𑀬𑀁 𑀅𑀜𑁆𑀘𑀢𑀺 𑀬𑀲𑁆𑀲𑀁 𑀭𑀯𑀺, 𑀲𑀸 𑀅𑀧𑀸𑀘𑀻. 𑀫𑀚𑁆𑀛𑀢𑁆𑀣𑁄𑀬𑀁 𑀅𑀧𑀲𑀤𑁆𑀤𑁄, 𑀬𑀣𑀸 ‘‘𑀅𑀧𑀤𑀺𑀲’’𑀦𑁆𑀢𑀺, ‘‘𑀅𑀯𑀸𑀘𑀻’’𑀢𑀺𑀧𑀺 𑀧𑀸𑀞𑁄, 𑀅𑀯𑀧𑀼𑀩𑁆𑀩𑁄 𑀅𑀜𑁆𑀘 𑀅𑀥𑁄𑀫𑀼𑀔𑀻𑀪𑀸𑀯𑁂. 𑀅𑀯𑀜𑁆𑀘𑀢𑀺 𑀅𑀥𑁄𑀫𑀼𑀔𑀻 𑀪𑀯𑀢𑀺 𑀬𑀲𑁆𑀲𑀁 𑀭𑀯𑀺, 𑀲𑀸 𑀅𑀯𑀸𑀘𑀻. 𑀉𑀡𑁆𑀳𑀸𑀤𑀺𑀓𑁂 𑀯𑀸 𑀢𑀩𑁆𑀩𑀺𑀬𑁄𑀕𑁂 𑀓𑀭𑁄𑀦𑁆𑀢𑁄 𑀬𑀲𑁆𑀲𑀁 𑀭𑀯𑀺 𑀅𑀜𑁆𑀘𑀢𑀺, 𑀲𑀸 𑀅𑀯𑀸𑀘𑀻. 𑀯𑀺𑀤𑀺𑀲𑀸𑀤𑀺𑀤𑁆𑀯𑀬𑀁 𑀤𑀺𑀲𑀸𑀫𑀚𑁆𑀛𑁂. 𑀤𑀺𑀲𑀸𑀳𑀺 𑀯𑀺𑀦𑀺𑀕𑁆𑀕𑀢𑀸 𑀯𑀺𑀤𑀺𑀲𑀸. 𑀤𑀺𑀲𑀸𑀦𑀫𑀦𑀼𑀭𑀽𑀧𑀸, 𑀅𑀦𑀼𑀯𑀢𑁆𑀢𑀓𑀸 𑀯𑀸 𑀤𑀺𑀲𑀸 𑀅𑀦𑀼𑀤𑀺𑀲𑀸. 𑀅𑀧𑀤𑀺𑀲𑀦𑁆𑀢𑀺𑀧𑀺 𑀯𑀺𑀤𑀺𑀲𑀸𑀬 𑀦𑀸𑀫𑀁 [𑀦𑀧𑀼𑀁𑀲𑀓𑀸𑀩𑁆𑀬𑀬𑀁 𑀢𑁆𑀯’𑀧𑀤𑀺𑀲𑀁 (𑀅𑀫𑀭 𑁩.𑁬)].

𑁩𑁦. 𑀏𑀭𑀸𑀯𑀢𑀸𑀤𑀬𑁄 𑀅𑀝𑁆𑀞 𑀕𑀚𑀸 𑀧𑀼𑀩𑁆𑀩𑀸𑀤𑀻𑀦𑀁 𑀤𑀺𑀲𑀸𑀦𑀁 𑀭𑀓𑁆𑀔𑀡𑀢𑁄 𑀤𑀺𑀲𑀸𑀕𑀚𑀸 𑀦𑀸𑀫, 𑀧𑀼𑀡𑁆𑀟𑀭𑀻𑀓𑀁 𑀦𑀸𑀫 𑀲𑀺𑀢𑀫𑁆𑀩𑁄𑀚𑀁, 𑀢𑀁𑀲𑀤𑀺𑀲𑀯𑀡𑁆𑀡𑀢𑀸𑀬 𑀧𑀼𑀡𑁆𑀟𑀭𑀻𑀓𑁄. 𑀭𑀲𑁆𑀲𑀲𑀭𑀻𑀭𑀢𑀸𑀬 𑀯𑀸𑀫𑀦𑁄. 𑀓𑀼𑀬𑀁 𑀧𑀣𑀯𑀺𑀬𑀁 𑀫𑁄𑀤𑀢𑁂 𑀓𑀼𑀫𑀼𑀤𑁄. 𑀅𑀜𑁆𑀚𑀦𑀯𑀡𑁆𑀡𑀢𑀸𑀬 𑀅𑀜𑁆𑀚𑀦𑁄. 𑀧𑀼𑀧𑁆𑀨𑀸 𑀧𑀓𑀸𑀲𑀫𑀸𑀦𑀸 𑀤𑀦𑁆𑀢𑀸 𑀅𑀲𑁆𑀲 𑀧𑀼𑀧𑁆𑀨𑀤𑀦𑁆𑀢𑁄. 𑀲𑀩𑁆𑀩𑀪𑀽𑀫𑀺𑀬𑀁 𑀘𑀭𑀢𑀻𑀢𑀺 𑀲𑀩𑁆𑀩𑀪𑀼𑀫𑁆𑀫𑁄, 𑀲𑀩𑁆𑀩𑀪𑀼𑀫𑁆𑀫𑁄 𑀯𑀸 𑀘𑀓𑁆𑀓𑀯𑀢𑁆𑀢𑀻 𑀢𑀲𑁆𑀲𑀸𑀦𑀼𑀭𑀽𑀧𑀢𑁆𑀢𑀸 𑀲𑀩𑁆𑀩𑀪𑀼𑀫𑁆𑀫𑁄. 𑀲𑁄𑀪𑀦𑀤𑀦𑁆𑀢𑀸𑀯𑀬𑀯𑀢𑁆𑀢𑀸 𑀲𑀼𑀧𑁆𑀧𑀢𑀻𑀓𑁄 [𑀲𑁄𑀪𑀦𑀸 𑀧𑀢𑀻𑀓𑀸 𑀅𑀯𑀬𑀯𑀸’𑀲𑁆𑀲 𑀲𑀼𑀧𑁆𑀧𑀢𑀻𑀓𑁄 (𑀓.)]. ‘‘𑀲𑀼𑀧𑁆𑀧𑀢𑀻𑀓𑁄 𑀲𑁄𑀪𑀦𑀗𑁆𑀕𑁂, 𑀪𑀯𑁂 𑀈𑀲𑀸𑀦𑀤𑀺𑀲𑀸𑀕𑀚𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀏𑀭𑀸𑀯𑀢𑀸𑀤𑀻𑀦𑀁 𑀤𑀺𑀲𑀸𑀦𑀁 𑀲𑀫𑁆𑀩𑀦𑁆𑀥𑀓𑀣𑀦𑀁 𑀧𑀸𑀘𑀻𑀯𑀸𑀭𑀡𑀸𑀤𑀺𑀦𑀸𑀫𑀲𑀽𑀘𑀦𑀢𑁆𑀣𑀁, 𑀏𑀲𑀁 𑀓𑀭𑁂𑀡𑀼𑀬𑁄 𑀧𑀦 𑁋

𑀅𑀩𑁆𑀪𑀫𑀼 𑀓𑀧𑀺𑀮𑀸 𑀘𑁂𑀯, 𑀧𑀺𑀗𑁆𑀕𑀮𑀸 𑀦𑀼𑀧𑀫𑀸 𑀫𑀢𑀸;

𑀢𑀫𑁆𑀩𑀓𑀡𑁆𑀡𑀻 𑀲𑀼𑀪𑀤𑀦𑁆𑀢𑀻, 𑀅𑀗𑁆𑀕𑀦𑀸 𑀅𑀜𑁆𑀚𑀦𑀸𑀯𑀢𑀻 [𑀅𑀫𑀭 𑁩.𑁫].

𑁩𑁧. 𑀥𑀢𑀭𑀝𑁆𑀞𑀸𑀤𑀺𑀤𑁆𑀯𑀬𑀁 𑀧𑀼𑀩𑁆𑀩𑀤𑀺𑀲𑀸𑀥𑀺𑀧𑀢𑀺𑀤𑁂𑀯𑁂. 𑀥𑀸𑀭𑀺𑀢𑀁 𑀭𑀝𑁆𑀞𑀫𑀦𑁂𑀦𑀸𑀢𑀺 𑀥𑀢𑀭𑀝𑁆𑀞𑁄, 𑀭𑀲𑁆𑀲 𑀢𑁄. 𑀧𑀜𑁆𑀘𑀲𑀺𑀔𑀸𑀤𑀻𑀦𑀁 𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑁄 𑀦𑀸𑀬𑀓𑁄 𑀕𑀦𑁆𑀥𑀩𑁆𑀩𑀸𑀥𑀺𑀧𑁄. 𑀓𑀼𑀫𑁆𑀪𑀡𑁆𑀟𑀲𑀸𑀫𑁆𑀬𑀸𑀤𑀺𑀤𑁆𑀯𑀬𑀁 𑀤𑀓𑁆𑀔𑀺𑀡𑀤𑀺𑀲𑀸𑀥𑀺𑀧𑀢𑀺𑀤𑁂𑀯𑁂. 𑀓𑀼𑀫𑁆𑀪𑀡𑁆𑀟𑀸𑀦𑀁 𑀲𑀸𑀫𑀺 𑀦𑀸𑀬𑀓𑁄 𑀓𑀼𑀫𑁆𑀪𑀡𑁆𑀟𑀲𑀸𑀫𑀺. 𑀯𑀺𑀭𑀼𑀳𑀦𑁆𑀢𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀫𑀸𑀧𑀚𑁆𑀚𑀦𑁆𑀢𑀺 𑀏𑀢𑀲𑁆𑀫𑀺𑀁 𑀓𑀼𑀫𑁆𑀪𑀡𑁆𑀟𑀸𑀢𑀺 𑀯𑀺𑀭𑀽𑀴𑁆𑀳𑀓𑁄. 𑀯𑀺𑀭𑀽𑀴𑁆𑀳𑀁 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀁 𑀯𑀸 𑀓𑀁 𑀲𑀼𑀔𑀫𑁂𑀢𑀲𑁆𑀲𑀸𑀢𑀺 𑀯𑀺𑀭𑀽𑀴𑁆𑀳𑀓𑁄. 𑀯𑀺𑀭𑀽𑀧𑀓𑁆𑀔𑀸𑀤𑀺𑀤𑁆𑀯𑀬𑀁 𑀧𑀘𑁆𑀙𑀺𑀫𑀤𑀺𑀲𑀸𑀥𑀺𑀧𑀢𑀺𑀤𑁂𑀯𑁂. 𑀯𑀺𑀭𑀽𑀧𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲 𑀯𑀺𑀭𑀽𑀧𑀓𑁆𑀔𑁄, 𑀯𑀺𑀯𑀺𑀥𑀲𑀡𑁆𑀞𑀸𑀦𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲 𑀯𑀸 𑀯𑀺𑀭𑀽𑀧𑀓𑁆𑀔𑁄. 𑀦𑀸𑀕𑀸𑀦𑀁 𑀅𑀥𑀺𑀧𑀢𑀺 𑀦𑀸𑀕𑀸𑀥𑀺𑀧𑀢𑀺.

𑁩𑁨. 𑀬𑀓𑁆𑀔𑀸𑀥𑀺𑀧𑀸𑀤𑀺𑀘𑀢𑀼𑀓𑁆𑀓𑀁 𑀓𑀼𑀯𑁂𑀭𑁂. 𑀆𑀴𑀯𑀓𑀸𑀤𑀺𑀬𑀓𑁆𑀔𑀸𑀦𑀁 𑀅𑀥𑀺𑀧𑁄 𑀬𑀓𑁆𑀔𑀸𑀥𑀺𑀧𑁄. 𑀯𑀺𑀲𑁆𑀲𑀯𑀡𑀲𑁆𑀲 𑀅𑀧𑀘𑁆𑀘𑀁 𑀯𑁂𑀲𑁆𑀲𑀯𑀡𑁄. 𑀢𑀺𑀘𑀭𑀡𑀸𑀝𑁆𑀞𑀤𑀸𑀞𑀸𑀪𑀬𑀸𑀦𑀓𑀫𑀢𑁆𑀣𑀺𑀢𑀸𑀬 𑀓𑀼𑀘𑁆𑀙𑀺𑀢𑀁 𑀯𑁂𑀭𑁄 𑀲𑀭𑀻𑀭𑀫𑀲𑁆𑀲 𑀓𑀼𑀯𑁂𑀭𑁄. 𑀔𑀼𑀤𑁆𑀤𑁂𑀦𑀸𑀲𑁆𑀲 𑀦𑀭𑀬𑀼𑀢𑁆𑀢𑀸 𑀲𑀺𑀯𑀺𑀓𑀸𑀭𑀣𑁂𑀢𑀺 𑀦𑀭𑁄 𑀯𑀸𑀳𑀦𑀫𑀲𑁆𑀲 𑀦𑀭𑀯𑀸𑀳𑀦𑁄. 𑀢𑁆𑀬𑀫𑁆𑀩𑀓𑀲𑀔𑁄, 𑀬𑀓𑁆𑀔𑀭𑀸𑀚𑁄, 𑀕𑀼𑀬𑁆𑀳𑀓𑁂𑀲𑀭𑁄, 𑀫𑀦𑀼𑀲𑁆𑀲𑀥𑀫𑁆𑀫𑀸, 𑀥𑀦𑀤𑁄, 𑀭𑀸𑀚𑀭𑀸𑀚𑁄, 𑀥𑀦𑀸𑀥𑀺𑀧𑁄, 𑀓𑀺𑀦𑁆𑀦𑀭𑁂𑀲𑁄, 𑀬𑀓𑁆𑀔𑁄, 𑀏𑀓𑀧𑀺𑀗𑁆𑀕𑀮𑁄, 𑀲𑀺𑀭𑀺𑀤𑁄, 𑀧𑀼𑀜𑁆𑀜𑀚𑀦𑁂𑀲𑁆𑀲𑀭𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀓𑀼𑀯𑁂𑀭𑀲𑁆𑀲 𑀦𑀸𑀫𑀸𑀦𑀺.

𑀅𑀲𑁆𑀲 𑀓𑀼𑀯𑁂𑀭𑀲𑁆𑀲 𑀧𑀼𑀭𑀻 ‘‘𑀅𑀴𑀓𑀸, 𑀅𑀴𑀓𑀫𑀦𑁆𑀤𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀮𑀁 𑀯𑀺𑀪𑀽𑀲𑀦𑁂, 𑀅𑀮𑀁 𑀯𑀺𑀪𑀽𑀲𑀦𑀁 𑀓𑀭𑁄𑀢𑀻𑀢𑀺 𑀅𑀮𑀓𑀸, 𑀲𑀸 𑀏𑀯 𑀅𑀴𑀓𑀸. 𑀅𑀴𑀓𑀸 𑀏𑀯 𑀫𑁄𑀤𑀓𑀭𑀡𑀢𑁄 𑀅𑀴𑀓𑀫𑀦𑁆𑀤𑀸, 𑀉𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀦𑀸𑀕𑀫𑁄 𑀘. 𑀓𑁂𑀮𑀸𑀲𑁄𑀢𑀺𑀧𑀺 𑀢𑀲𑁆𑀲 𑀦𑀸𑀫𑀁, 𑀓𑁂𑀮𑀺 𑀧𑀬𑁄𑀚𑀦𑀁 𑀅𑀲𑁆𑀲 𑀓𑁂𑀮𑁄, 𑀆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀲𑁄, 𑀓𑁂𑀮𑁄 𑀘 𑀲𑁄 𑀆𑀲𑁄 𑀘𑁂𑀢𑀺 𑀓𑁂𑀮𑀸𑀲𑁄, 𑀓𑀡𑁆𑀳𑀲𑀧𑁆𑀧𑀸𑀤𑀺 𑀯𑀺𑀬 𑀦𑀺𑀘𑁆𑀘𑀁 𑀓𑀫𑁆𑀫𑀥𑀸𑀭𑀬𑁄. 𑀅𑀲𑁆𑀲 𑀓𑀼𑀯𑁂𑀭𑀲𑁆𑀲 𑀧𑀳𑀭𑀡𑀁 𑀆𑀬𑀼𑀥𑀁 𑀕𑀤𑀸, 𑀕𑀁 𑀯𑀼𑀘𑁆𑀘𑀢𑀺 𑀯𑀚𑀺𑀭𑀁, 𑀢𑀁 𑀯𑀺𑀬 𑀤𑀼𑀓𑁆𑀔𑀁 𑀤𑀤𑀸𑀢𑀻𑀢𑀺 𑀕𑀤𑀸. 𑀇𑀫𑁂 𑀘𑀢𑁆𑀢𑀸𑀭𑁄 𑀬𑀣𑀸𑀯𑀼𑀢𑁆𑀢𑀸 𑀥𑀢𑀭𑀝𑁆𑀞𑀸𑀤𑀬𑁄 𑀤𑁂𑀯𑀸 𑀓𑀫𑀢𑁄 𑀧𑀼𑀩𑁆𑀩𑀸𑀤𑀻𑀦𑀁 𑀘𑀢𑀼𑀤𑁆𑀤𑀺𑀲𑀸𑀦𑀁 𑀅𑀥𑀺𑀧𑀸 𑀅𑀥𑀺𑀧𑀢𑀬𑁄 𑀦𑀸𑀫. 𑀅𑀫𑀭𑀓𑁄𑀲𑁂 𑀧𑀦 𑁋

‘‘𑀇𑀦𑁆𑀤𑁄 𑀅𑀕𑁆𑀕𑀺 𑀧𑀺𑀢𑀼𑀧𑀢𑀺, 𑀦𑁂𑀭𑀺𑀢𑁄 𑀯𑀭𑀼𑀡𑁄’𑀦𑀺𑀮𑁄;

𑀓𑀼𑀯𑁂𑀭𑁄 𑀈𑀲𑁄 𑀧𑀢𑀬𑁄, 𑀧𑀼𑀩𑁆𑀩𑀸𑀤𑀻𑀦𑀁 𑀇𑀫𑁂 𑀓𑀫𑀸.

𑀭𑀯𑀺 𑀲𑀼𑀓𑁆𑀓𑁄 𑀫𑀳𑀻𑀲𑀽𑀦𑀼, 𑀢𑀫𑁄 𑀘 𑀪𑀸𑀦𑀼𑀚𑁄 𑀯𑀺𑀥𑀼;

𑀩𑀼𑀥𑁄 𑀲𑀼𑀭𑀕𑀼𑀭𑀼 𑀘𑁂𑀢𑀺, 𑀤𑀺𑀲𑀸𑀥𑀺𑀧𑀸 𑀢𑀣𑀸 𑀕𑀳𑀸’’𑀢𑀺 [𑀅𑀫𑀭 𑁩.𑁩-𑁪].

𑀅𑀜𑁆𑀜𑁂𑀬𑁂𑀯 𑀤𑀺𑀲𑀸𑀥𑀺𑀧𑀢𑀬𑁄 𑀓𑀣𑀺𑀢𑀸, 𑀇𑀦𑁆𑀤𑀭𑀯𑀺𑀫𑀸𑀤𑀻𑀦𑀜𑁆𑀘 𑀤𑀺𑀲𑀸𑀥𑀺𑀧𑀘𑁆𑀘𑀓𑀣𑀦𑀁 𑀧𑀸𑀛𑀸𑀤𑀻𑀦𑀁 𑀇𑀦𑁆𑀤𑀤𑀺𑀲𑀸𑀭𑀯𑀺𑀤𑀺𑀲𑀸𑀤𑀺𑀦𑀸𑀫𑀲𑀽𑀘𑀦𑀨𑀮𑀁.

𑁩𑁩-𑁩𑁪. 𑀚𑀸𑀢𑀯𑁂𑀤𑀸𑀤𑁆𑀬𑀝𑁆𑀞𑀸𑀭𑀲𑀓𑀁 𑀅𑀕𑁆𑀕𑀺𑀫𑁆𑀳𑀺. 𑀚𑀸𑀢𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑁆𑀤𑀢𑀺 𑀖𑀸𑀢𑀬𑀢𑀻𑀢𑀺 𑀚𑀸𑀢𑀯𑁂𑀤𑁄. 𑀅𑀦𑁆𑀥𑀓𑀸𑀭𑁂 𑀚𑀸𑀢𑀁 𑀯𑀺𑀚𑁆𑀚𑀫𑀸𑀦𑀁 𑀯𑀺𑀦𑁆𑀤𑀢𑀺 𑀮𑀪𑀢𑀺, 𑀯𑀺𑀤𑀢𑀺 𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀚𑀸𑀢𑀯𑁂𑀤𑁄, 𑀚𑀦𑀦𑀁 𑀚𑀸𑀢𑀁 𑀯𑁂𑀤𑁄 𑀧𑀸𑀓𑀝𑁄 𑀬𑀲𑁆𑀲 𑀯𑀸 𑀲𑁄 𑀚𑀸𑀢𑀯𑁂𑀤𑁄. 𑀲𑀺𑀔𑀸 𑀯𑀼𑀘𑁆𑀘𑀢𑀺 𑀚𑀸𑀮𑀸, 𑀢𑀸𑀬 𑀬𑁄𑀕𑀢𑁄 𑀲𑀺𑀔𑀻. 𑀚𑁄𑀢𑀢𑀺 𑀤𑀺𑀧𑁆𑀧𑀢𑀻𑀢𑀺 𑀚𑁄𑀢𑀺. 𑀧𑀼𑀦𑀸𑀢𑀻𑀢𑀺 𑀧𑀸𑀯𑀓𑁄, 𑀡𑁆𑀯𑀼. 𑀤𑀳𑀢𑀻𑀢𑀺 𑀤𑀳𑀦𑁄. 𑀅𑀦𑀦𑁆𑀢𑀺 𑀧𑀸𑀮𑁂𑀦𑁆𑀢𑁆𑀬𑀦𑁂𑀦𑁂𑀢𑀺 𑀅𑀦𑀮𑁄, 𑀅𑀮𑀧𑀘𑁆𑀘𑀬𑁄. 𑀯𑁂𑀤𑁂 𑀳𑀼𑀢𑀁 𑀯𑀳𑀢𑀺 𑀧𑀸𑀧𑀬𑀢𑀺, 𑀲𑀬𑀁 𑀯𑀸 𑀮𑀪𑀢𑁂𑀢𑀺 𑀳𑀼𑀢𑀸𑀯𑀳𑁄. 𑀅𑀘𑁆𑀘𑀺 𑀯𑀼𑀘𑁆𑀘𑀢𑀺 𑀚𑀸𑀮𑀸, 𑀢𑀸𑀬 𑀬𑁄𑀕𑀢𑁄 𑀅𑀘𑁆𑀘𑀺𑀫𑀸. 𑀥𑀽𑀫𑁄 𑀓𑁂𑀢𑀼 𑀥𑀚𑁄 𑀬𑀲𑁆𑀲𑀸𑀢𑀺 𑀥𑀽𑀫𑀓𑁂𑀢𑀼. 𑀅𑀚𑀢𑀺 𑀚𑀮𑀫𑀸𑀦𑁄 𑀓𑀼𑀝𑀺𑀮𑀁 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑀺, 𑀇. 𑀕𑁄 𑀭𑀁𑀲𑀺 𑀏𑀢𑀲𑁆𑀲𑀢𑁆𑀣𑀻𑀢𑀺 𑀕𑀺𑀦𑀺, 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀇𑀦𑀺, 𑀅𑀕𑁆𑀕𑀺𑀦𑀻𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀕𑁆𑀕𑀺𑀲𑀤𑀺𑀲𑁄. 𑀪𑀸𑀦𑀼 𑀧𑀪𑀸 𑀬𑀲𑁆𑀲𑀢𑁆𑀣𑀺, 𑀲𑁄 𑀪𑀸𑀦𑀼𑀫𑀸. 𑀢𑁂𑀚𑁂𑀢𑀺 𑀲𑁂𑀲𑀪𑀽𑀢𑁄𑀧𑀸𑀤𑀸𑀭𑀽𑀧𑀸𑀦𑀻𑀢𑀺 𑀢𑁂𑀚𑁄. 𑀥𑀽𑀫𑁄 𑀲𑀺𑀔𑀸 𑀘𑀽𑀴𑀸 𑀬𑀲𑁆𑀲 𑀥𑀽𑀫𑀲𑀺𑀔𑁄. 𑀯𑀸𑀬𑀼 𑀲𑀔𑀸 𑀅𑀲𑁆𑀲 𑀯𑀸𑀬𑀼𑀲𑀔𑁄. 𑀤𑀳𑀺𑀢𑁆𑀯𑀸 [𑀤𑀳𑀢𑁄 (𑀓.)] 𑀕𑀘𑁆𑀙𑀢𑁄 𑀓𑀡𑁆𑀳𑀸 𑀯𑀢𑁆𑀢𑀦𑀻 𑀫𑀕𑁆𑀕𑁄 𑀬𑀲𑁆𑀲 𑀓𑀡𑁆𑀳𑀯𑀢𑁆𑀢𑀦𑀻. 𑀯𑀺𑀲𑁆𑀲𑀸𑀦𑀭𑀲𑁆𑀲 𑀇𑀲𑀺𑀦𑁄 𑀅𑀧𑀘𑁆𑀘𑀁 𑀯𑁂𑀲𑁆𑀲𑀸𑀦𑀭𑁄. 𑀳𑀼𑀢𑀁 𑀳𑀯𑀺𑀁 𑀅𑀲𑀢𑀺 𑀪𑀼𑀜𑁆𑀚𑀢𑀻𑀢𑀺 𑀳𑀼𑀢𑀸𑀲𑁄. 𑀥𑀦𑀜𑁆𑀚𑀬𑁄, 𑀚𑀮𑀦𑁄, 𑀆𑀲𑀬𑀸𑀲𑁄, 𑀭𑁄𑀳𑀺𑀢𑀲𑁆𑀲𑁄, 𑀲𑀢𑁆𑀢𑀸𑀘𑁆𑀘𑀺, 𑀲𑀼𑀓𑁆𑀓𑁄, 𑀘𑀺𑀢𑁆𑀭𑀪𑀸𑀦𑀼, 𑀯𑀺𑀪𑀸𑀯𑀲𑀼, 𑀲𑀼𑀘𑀺𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀕𑁆𑀕𑀺𑀲𑁆𑀲 𑀦𑀸𑀫𑀸𑀦𑀺.

𑀲𑀺𑀔𑀸𑀤𑀺𑀢𑁆𑀢𑀬𑀁 𑀅𑀕𑁆𑀕𑀺𑀚𑀸𑀮𑀸𑀬𑀁. 𑀲𑀺𑀦𑁄𑀢𑀺 𑀦𑀺𑀲𑀸𑀦𑀻 𑀪𑀯𑀢𑀻𑀢𑀺 𑀲𑀺𑀔𑀸, ‘‘𑀲𑀺 𑀦𑀺𑀲𑀸𑀦𑁂’’𑀢𑀺 𑀓𑀸𑀢𑀦𑁆𑀢 𑀥𑀸𑀢𑀼, 𑀔𑀧𑀘𑁆𑀘𑀬𑁄. 𑀚𑀮𑀢𑀻𑀢𑀺 𑀚𑀸𑀮𑀸. 𑀅𑀘𑁆𑀘𑀢𑁂 𑀧𑀼𑀚𑁆𑀚𑀢𑁂 𑀅𑀦𑁂𑀦𑁂𑀢𑀺 𑀅𑀘𑁆𑀘𑀺. 𑀲𑀺𑀔𑀸 𑀚𑀸𑀮𑀸 𑀪𑀺𑀬𑁆𑀬𑁄 𑀭𑀽𑀧𑀦𑁆𑀢𑀭𑀸 𑀇𑀢𑁆𑀣𑀺𑀬𑀁, 𑀅𑀘𑁆𑀘𑀺 𑀧𑀦 𑀅𑀧𑀼𑀫𑁂.

𑁩𑁫. 𑀤𑁆𑀯𑀬𑀁 𑀅𑀕𑁆𑀕𑀺𑀓𑀡𑁂 [𑀢𑀻𑀲𑀼 𑀨𑀼𑀮𑀺𑀗𑁆𑀕𑁄’𑀕𑁆𑀕𑀺𑀓𑀡𑁄 (𑀅𑀫𑀭 𑁧.𑁬𑁦) 𑀨𑀼𑀮𑀺𑀗𑁆𑀕𑀸𑀦𑀻𑀢𑀺 𑀅𑀕𑁆𑀕𑀺𑀓𑀡𑀸𑀦𑀺 (𑀫. 𑀦𑀺. 𑀝𑀻. 𑁩.𑁬𑁫)]. 𑀯𑀺𑀯𑀺𑀥𑀸𑀲𑀼 𑀤𑀺𑀲𑀸𑀲𑀼 𑀨𑀼𑀮𑁆𑀮𑀁 𑀕𑀘𑁆𑀙𑀢𑀻𑀢𑀺 𑀯𑀺𑀧𑁆𑀨𑀼𑀮𑀺𑀗𑁆𑀕𑀁. 𑀢𑀣𑀸 𑀨𑀼𑀮𑀺𑀗𑁆𑀕𑀁. 𑀲𑀩𑁆𑀩𑀥𑀭𑀓𑀢𑁂 𑀧𑀦 ‘‘𑀨𑀼𑀮𑀺𑀁 𑀕𑀘𑁆𑀙𑀢𑀻𑀢𑀺 𑀨𑀼𑀮𑀺𑀗𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀢𑀺𑀓𑀁 𑀙𑀸𑀭𑀺𑀓𑀸𑀬𑀁. 𑀫𑀮𑀻𑀦𑀓𑀁𑀲𑀯𑀢𑁆𑀣𑀸𑀤𑀻𑀦𑀁 𑀢𑀁 𑀤𑀺𑀢𑁆𑀢𑀺𑀁 𑀲𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀪𑀲𑁆𑀫𑀁, 𑀫𑀧𑀘𑁆𑀘𑀬𑁄, 𑀪𑀲𑀢𑀺 𑀯𑀸 𑀅𑀥𑁄 𑀧𑀢𑀢𑀺 𑀯𑀢𑁆𑀣𑀸𑀤𑀻𑀦𑀁 𑀫𑀮𑀫𑁂𑀢𑁂𑀦𑀸𑀢𑀺 𑀪𑀲𑁆𑀫𑀁. 𑀓𑀁𑀲𑀸𑀤𑀻𑀦𑀁 𑀲𑀼𑀓𑁆𑀓𑀪𑀸𑀯𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀝𑁆𑀞𑀺 𑀅𑀪𑀺𑀮𑀸𑀲𑁄 𑀲𑁄𑀪𑀦𑀁 𑀏𑀢𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑁂𑀝𑁆𑀞𑀺, ‘‘𑀲𑀧𑀓𑁆𑀔𑀓𑁄 𑀲𑀮𑁄𑀫𑀓𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀲𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀢𑁆𑀢𑀸. 𑀫𑀮𑀲𑁆𑀲 𑀲𑀭𑀡𑀁 𑀓𑀭𑁄𑀢𑀻𑀢𑀺 𑀲𑀸𑀭𑀺𑀓𑀸, 𑀲𑀸 𑀏𑀯 𑀙𑀸𑀭𑀺𑀓𑀸, 𑀬𑀣𑀸 ‘‘𑀲𑀴𑀸𑀬𑀢𑀦’’𑀦𑁆𑀢𑁆𑀬𑀸𑀤𑀻𑀲𑀼.

𑁩𑁬. 𑀤𑁆𑀯𑀬𑀁 𑀉𑀡𑁆𑀳𑀙𑀸𑀭𑀺𑀓𑀸𑀬𑀁. 𑀉𑀡𑁆𑀳𑀢𑁆𑀢𑀸 𑀓𑀼𑀓𑁆𑀓𑀼𑀁 𑀓𑀼𑀘𑁆𑀙𑀺𑀢𑀁 𑀮𑀸𑀢𑀻𑀢𑀺 𑀓𑀼𑀓𑁆𑀓𑀼𑀮𑁄, ‘‘𑀓𑀼𑀓𑁆𑀓𑀼 𑀯𑀺𑀤𑀢𑁆𑀣𑀺𑀬𑀁 𑀳𑀢𑁆𑀣𑁂, 𑀧𑀓𑁄𑀝𑁆𑀞𑁂 𑀓𑀼𑀘𑁆𑀙𑀺𑀢𑁂𑀧𑀺 𑀘𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀓𑀼𑀓𑁆𑀓𑀼𑀁 𑀯𑀸 𑀳𑀢𑁆𑀣𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀺 𑀤𑀳𑀢𑀻𑀢𑀺 𑀓𑀼𑀓𑁆𑀓𑀼𑀮𑁄, 𑀲𑁄 𑀏𑀯 𑀓𑀼𑀓𑁆𑀓𑀼𑀴𑁄. 𑀉𑀡𑁆𑀳𑀫𑁂𑀯 𑀪𑀲𑁆𑀫𑀁 𑀉𑀡𑁆𑀳𑀪𑀲𑁆𑀫𑀁, 𑀢𑀲𑁆𑀫𑀺𑀁. 𑀢𑀺𑀓𑀁 𑀤𑀺𑀢𑁆𑀢𑀓𑀝𑁆𑀞𑀸𑀤𑀺𑀦𑁆𑀥𑀦𑁂. 𑀅𑀗𑁆𑀕𑀢𑀺 𑀳𑀸𑀦𑀺𑀁 𑀕𑀘𑁆𑀙𑀢𑀻𑀢𑀺 𑀅𑀗𑁆𑀕𑀸𑀭𑁄, 𑀆𑀭𑀧𑀘𑁆𑀘𑀬𑁄, 𑀧𑀼𑀦𑁆𑀦𑀧𑀼𑀁𑀲𑀓𑁄𑀬𑀁. ‘‘𑀅𑀮𑀸𑀢𑁂’𑀦𑀺𑀢𑁆𑀣𑀺 𑀓𑀼𑀚𑁂’𑀗𑁆𑀕𑀸𑀭𑁄’’𑀢𑀺 𑀳𑀺 𑀢𑀺𑀓𑀡𑁆𑀟𑀲𑁂𑀲𑁂 [𑀢𑀺𑀓𑀡𑁆𑀟𑀲𑁂𑀲 𑁩.𑁩𑁨𑁯] 𑀯𑀼𑀢𑁆𑀢𑀁. 𑀳𑀸𑀦𑀺𑀫𑁂𑀯 𑀮𑀸𑀢𑀺, 𑀦 𑀞𑀺𑀢𑀺𑀁 𑀯𑀺𑀲𑁂𑀲𑀜𑁆𑀘𑀸𑀢𑀺 𑀅𑀮𑀸𑀢𑀁. 𑀉𑀤𑁆𑀥𑀁 𑀥𑀽𑀫𑀁 𑀫𑀼𑀜𑁆𑀘𑀢𑀻𑀢𑀺 𑀉𑀫𑁆𑀫𑀼𑀢𑀁, 𑀢𑀤𑁂𑀯 𑀉𑀫𑁆𑀫𑀼𑀓𑀁. 𑀧𑀜𑁆𑀘𑀓𑀁 𑀓𑀝𑁆𑀞𑀸𑀤𑀺𑀦𑁆𑀥𑀦𑁂. 𑀲𑀦𑁆𑀢𑀫𑀕𑁆𑀕𑀺𑀁 𑀏𑀥𑀬𑀢𑀺 𑀯𑀟𑁆𑀠𑀬𑀢𑀻𑀢𑀺 𑀲𑀫𑀺𑀥𑀸. 𑀏𑀥𑀬𑀢𑀻𑀢𑀺 𑀇𑀥𑀼𑀫𑀁, 𑀉𑀫𑁄. 𑀏𑀥𑀬𑀢𑀻𑀢𑀺 𑀇𑀥𑁄. 𑀉𑀧𑀸𑀤𑀺𑀬𑀢𑁂 𑀅𑀕𑁆𑀕𑀺𑀦𑁂𑀢𑀺 𑀉𑀧𑀸𑀤𑀸𑀦𑀁. 𑀏𑀥𑀬𑀢𑀻𑀢𑀺 𑀇𑀦𑁆𑀥𑀦𑀁.

𑁩𑁭. 𑀧𑀜𑁆𑀘𑀓𑀁 𑀆𑀮𑁄𑀓𑁂. 𑀑𑀪𑀸𑀲𑀢𑀺 𑀤𑀺𑀧𑁆𑀧𑀢𑀻𑀢𑀺 𑀑𑀪𑀸𑀲𑁄. 𑀧𑀓𑀸𑀲𑀢𑀺 𑀤𑀺𑀧𑁆𑀧𑀢𑀻𑀢𑀺 𑀧𑀓𑀸𑀲𑁄. 𑀆𑀮𑁄𑀘𑀬𑀢𑀺 𑀧𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀆𑀮𑁄𑀓𑁄, 𑀆𑀮𑁄𑀓𑁂𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀆𑀮𑁄𑀓𑁄, ‘‘𑀮𑁄𑀓, 𑀮𑁄𑀘 𑀤𑀲𑁆𑀲𑀦𑁂’’𑀢𑀺 𑀥𑀸𑀢𑀼𑀤𑁆𑀯𑀬𑀧𑀸𑀞𑀢𑁄. 𑀉𑀚𑁆𑀚𑁄𑀢𑀢𑀻𑀢𑀺 𑀉𑀚𑁆𑀚𑁄𑀢𑁄, 𑀅𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀚𑁄𑀢𑀢𑀻𑀢𑀺 𑀯𑀸 𑀉𑀚𑁆𑀚𑁄𑀢𑁄. 𑀆 𑀲𑀫𑀦𑁆𑀢𑀢𑁄 𑀢𑀧𑀢𑀺 𑀤𑀺𑀧𑁆𑀧𑀢𑀻𑀢𑀺 𑀆𑀢𑀧𑁄. 𑀲𑀫𑀸𑀢𑀺 𑀏𑀢𑁂 𑀧𑀜𑁆𑀘 𑀢𑀼𑀮𑁆𑀬𑀢𑁆𑀣𑀸𑀢𑀺 𑀪𑀸𑀯𑁄.

𑀤𑀲𑀓𑀁 𑀯𑀸𑀢𑁂. 𑀆𑀳𑀸𑀭𑁄 𑀯𑀺𑀬 𑀧𑀸𑀡𑀪𑀽𑀢𑁄𑀧𑀺 𑀓𑀤𑀸𑀘𑀺 𑀲𑀢𑁆𑀢𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑀼𑀢𑁄, 𑀲𑁄𑀯 𑀫𑀸𑀮𑀼𑀢𑁄. 𑀧𑀼𑀦𑀸𑀢𑀺 𑀲𑀗𑁆𑀓𑀸𑀭𑀸𑀤𑀺𑀓𑀦𑁆𑀢𑀺 𑀧𑀯𑀦𑁄. 𑀯𑀸𑀬𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸𑀬𑀼, 𑀯𑀸𑀬𑀢𑀺 𑀯𑀸 𑀧𑀼𑀧𑁆𑀨𑀸𑀤𑀻𑀦𑀁 𑀕𑀦𑁆𑀥𑁄 𑀬𑁂𑀦 𑀲𑁄 𑀯𑀸𑀬𑀼. 𑀢𑀣𑀸 𑀯𑀸𑀢𑁄. 𑀅𑀦𑀦𑁆𑀢𑀺 𑀧𑀸𑀡𑀦𑁆𑀢𑁆𑀬𑀦𑁂𑀦𑁂𑀢𑀺 𑀅𑀦𑀺𑀮𑁄, 𑀇𑀮𑁄. 𑀲𑀦𑁆𑀢𑀁 𑀦𑀺𑀘𑁆𑀘𑀮𑀁 𑀈𑀭𑀬𑀢𑀺 𑀓𑀫𑁆𑀧𑁂𑀢𑀻𑀢𑀺 𑀲𑀫𑀻𑀭𑀡𑁄, 𑀲𑀫𑀻𑀭𑀺𑀢𑀼𑀁 𑀓𑀫𑁆𑀧𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀯𑀸 𑀲𑀫𑀻𑀭𑀡𑁄. 𑀕𑀦𑁆𑀥𑀁 𑀯𑀳𑀢𑀻𑀢𑀺 𑀕𑀦𑁆𑀥𑀯𑀸𑀳𑁄, 𑀡𑁄. 𑀯𑀸𑀬𑁄 𑀯𑀸𑀬𑀼𑀲𑀤𑀺𑀲𑁄, 𑀉𑀪𑀬𑀢𑁆𑀭𑀸𑀧𑀺 𑀬𑀸𑀕𑀫𑁄. 𑀲𑀫𑀦𑁆𑀢𑀢𑁄 𑀈𑀭𑀢𑀺 𑀔𑀺𑀧𑀢𑀺 𑀭𑀼𑀓𑁆𑀔𑀸𑀤𑀬𑁄𑀢𑀺 𑀲𑀫𑀻𑀭𑁄. 𑀲𑀤𑀸 𑀲𑀩𑁆𑀩𑀤𑀸 𑀕𑀢𑀺 𑀬𑀲𑁆𑀲 𑀲𑀤𑀸𑀕𑀢𑀺. 𑀲𑀲𑀦𑁄, 𑀕𑀦𑁆𑀥𑀯𑀳𑁄, 𑀆𑀲𑀼𑀕𑁄, 𑀫𑀭𑀼𑀢𑁄, 𑀚𑀕𑀢𑀺𑀧𑀸𑀡𑁄, 𑀧𑀯𑀫𑀸𑀦𑁄, 𑀧𑀪𑀜𑁆𑀚𑀦𑁄 𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀸𑀢𑀦𑀸𑀫𑀸𑀦𑀺.

𑁩𑁮. 𑀇𑀫𑁂 𑀙 𑀯𑀓𑁆𑀔𑀫𑀸𑀦𑀸 𑀯𑀸𑀬𑀼𑀪𑁂𑀤𑀸 𑀯𑀸𑀬𑀼𑀯𑀺𑀲𑁂𑀲𑀸, 𑀉𑀤𑁆𑀥𑀁 𑀕𑀘𑁆𑀙𑀢𑀻𑀢𑀺 𑀉𑀤𑁆𑀥𑀗𑁆𑀕𑀫𑁄, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀻𑀦𑀁 𑀦𑀻𑀳𑀭𑀡𑀯𑀲𑁂𑀦 𑀅𑀥𑁄𑀪𑀸𑀕𑀁 𑀕𑀘𑁆𑀙𑀢𑀻𑀢𑀺 𑀅𑀥𑁄𑀕𑀫𑁄. 𑀓𑀼𑀘𑁆𑀙𑀺𑀫𑁆𑀳𑀺 𑀉𑀤𑀭𑁂 𑀢𑀺𑀝𑁆𑀞𑀢𑀻𑀢𑀺 𑀓𑀼𑀘𑁆𑀙𑀺𑀝𑁆𑀞𑁄. 𑀓𑁄𑀝𑁆𑀞𑁂 𑀅𑀦𑁆𑀢𑁂 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀓𑁄𑀝𑁆𑀞𑀸𑀲𑀬𑁄. 𑀧𑀼𑀦𑀧𑁆𑀧𑀼𑀦𑀁 𑀲𑀲𑀦𑁆𑀢𑀺 𑀬𑁂𑀦 𑀅𑀲𑁆𑀲𑀸𑀲𑁄, 𑀩𑀳𑀺𑀦𑀺𑀓𑁆𑀔𑀦𑁆𑀢𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀓𑀯𑀸𑀢𑁄𑀧𑀺 ‘‘𑀅𑀲𑁆𑀲𑀸𑀲𑁄’’𑀢𑀺 𑀏𑀢𑁂𑀦 𑀲𑀗𑁆𑀕𑀬𑁆𑀳𑀢𑁂 𑀲𑀳𑀘𑀸𑀭𑀺𑀢𑀢𑁆𑀢𑀸. 𑀲𑀩𑁆𑀩𑀗𑁆𑀕𑁂𑀲𑀼 𑀅𑀦𑀼𑀲𑀭𑀢𑀺 𑀲𑀻𑀮𑁂𑀦 𑀲𑁂𑀤𑀮𑁄𑀳𑀺𑀢𑀸𑀤𑀺𑀲𑀫𑁆𑀧𑀸𑀤𑀦𑀢𑁄𑀢𑀺 𑀅𑀗𑁆𑀕𑀸𑀦𑀼𑀲𑀸𑀭𑀻. 𑀅𑀫𑀭𑀓𑁄𑀲𑁂 𑀧𑀦𑀸𑀬𑀁 𑀯𑀸𑀢𑁄 𑀞𑀸𑀦𑀩𑁆𑀬𑀸𑀧𑀸𑀭𑀪𑁂𑀤𑁂𑀦 𑀧𑀜𑁆𑀘𑀥𑀸 𑀓𑀣𑀺𑀢𑁄 [𑀧𑀸𑀡𑁄’𑀧𑀸𑀦𑁄 𑀲𑀫𑀸𑀦𑁄𑀘𑁄𑀤𑀸𑀦𑀩𑁆𑀬𑀸𑀦𑀸 𑀘 𑀯𑀸𑀬𑀯𑁄 𑀲𑀭𑀻𑀭𑀝𑁆𑀞𑀸 𑀇𑀫𑁂 (𑀅𑀫𑀭 𑁧.𑁬𑁭)], 𑀝𑀻𑀓𑀸𑀬𑀜𑁆𑀘𑀲𑁆𑀲 𑁋

‘‘𑀳𑀤𑀬𑁂 𑀧𑀸𑀡𑁄 𑀕𑀼𑀤𑁂’𑀧𑀸𑀦𑁄, 𑀲𑀫𑀸𑀦𑁄 𑀦𑀸𑀪𑀺𑀫𑀚𑁆𑀛𑀝𑁆𑀞𑁄;

𑀉𑀤𑀸𑀦𑁄 𑀓𑀡𑁆𑀞𑀤𑁂𑀲𑁂 𑀢𑀼, 𑀩𑁆𑀬𑀸𑀦𑁄 𑀲𑀩𑁆𑀩𑀗𑁆𑀕𑀲𑀦𑁆𑀥𑀺𑀲𑀼 [𑀳𑀤𑀬𑁂 𑀧𑀸𑀡𑁄 𑀕𑀼𑀤𑁂’𑀧𑀸𑀦𑁄, 𑀲𑀫𑀸𑀦𑁄 𑀦𑀸𑀪𑀺𑀲𑀡𑁆𑀞𑀺𑀢𑁄; 𑀉𑀤𑀸𑀦𑁄 𑀓𑀡𑁆𑀞𑀤𑁂𑀲𑀝𑁆𑀞𑁄, 𑀩𑁆𑀬𑀸𑀦𑁄 𑀲𑀩𑁆𑀩𑀲𑀭𑀻𑀭𑀕𑁄 𑀇𑀢𑀺 𑀞𑀸𑀦𑀦𑀺𑀡𑁆𑀡𑀬𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)].

𑀢𑀢𑁆𑀭𑀧𑀸𑀡𑁄𑀅𑀦𑁆𑀦𑀧𑁆𑀧𑀯𑁂𑀲𑀸𑀤𑀺𑀓𑀭𑁄. 𑀅𑀧𑀸𑀦𑁄 𑀫𑀼𑀢𑁆𑀢𑀓𑀭𑀻𑀲𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀓𑀭𑁄. 𑀲𑀫𑀸𑀦𑁄 𑀫𑀚𑁆𑀛𑁂 𑀅𑀦𑁆𑀦𑀧𑀘𑀦𑀸𑀤𑀺𑀓𑀭𑁄. 𑀉𑀤𑀸𑀦𑁄 𑀪𑀸𑀲𑀺𑀢𑀕𑀻𑀢𑀸𑀤𑀺𑀓𑀭𑁄. 𑀩𑁆𑀬𑀸𑀦𑁄 𑀲𑁂𑀤𑀭𑀢𑁆𑀢𑀲𑀯𑀦𑀼𑀫𑁆𑀫𑁂𑀲𑀦𑀺𑀫𑁂𑀲𑀕𑀢𑁆𑀬𑀸𑀤𑀺𑀓𑀭𑁄 [𑀔𑁂𑀤𑀘𑁂𑀝𑁆𑀞𑀸𑀉𑀫𑁆𑀫𑁂𑀲𑀦𑀺𑀫𑁆𑀫𑁂𑀲𑀕𑀢𑁆𑀬𑀸𑀤𑀺𑀓𑀭𑁄 (𑀓.)]. 𑀧𑀓𑀝𑁆𑀞𑁂𑀦 𑀅𑀦𑀦𑁆𑀢𑁆𑀬𑀦𑁂𑀦 𑀪𑀢𑁆𑀢𑀸𑀤𑀺𑀧𑁆𑀧𑀯𑁂𑀲𑀦𑀢𑁄𑀢𑀺 𑀧𑀸𑀡𑁄. 𑀫𑀼𑀢𑁆𑀢𑀸𑀤𑀺𑀓𑀁 𑀅𑀧𑀦𑁂𑀢𑁆𑀯𑀸 𑀅𑀦𑀦𑁆𑀢𑁆𑀬𑀦𑁂𑀦𑀸𑀢𑀺 𑀅𑀧𑀸𑀦𑁄. 𑀲𑀫𑁆𑀫𑀸 𑀅𑀦𑀦𑁆𑀢𑀺 𑀅𑀦𑁂𑀦 𑀪𑀼𑀢𑁆𑀢𑀧𑀭𑀺𑀧𑀸𑀘𑀦𑀢𑁄𑀢𑀺 𑀲𑀫𑀸𑀦𑁄. 𑀉𑀤𑁆𑀥𑀫𑀦𑀦𑁆𑀢𑁆𑀬𑀦𑁂𑀦 𑀪𑀸𑀲𑀺𑀢𑀸𑀤𑁄 𑀲𑀸𑀫𑀢𑁆𑀣𑀺𑀬𑀚𑀦𑀦𑀢𑁄𑀢𑀺 𑀉𑀤𑀸𑀦𑁄. 𑀯𑀺𑀲𑁂𑀲𑁂𑀦 𑀅𑀦𑀦𑁆𑀢𑁆𑀬𑀦𑁂𑀦 𑀲𑁂𑀤𑀭𑀢𑁆𑀢𑀲𑁂𑀫𑁆𑀳𑀸𑀤𑀺 [𑀔𑁂𑀤𑀘𑁂𑀝𑁆𑀞𑀸𑀤𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀲𑀫𑁆𑀧𑀸𑀤𑀦𑀢𑁄𑀢𑀺 𑀩𑁆𑀬𑀸𑀦𑁄’’𑀢𑀺 [𑀢𑀁𑀩𑁆𑀬𑀸𑀧𑀸𑀭𑀸 𑀘 𑀬𑀣𑀸 𑁋 𑀅𑀦𑁆𑀦𑀧𑁆𑀧𑀯𑁂𑀲𑀦𑀁 𑀫𑀼𑀢𑁆𑀢𑀸-𑀤𑁆𑀬𑀼𑀲𑁆𑀲𑀕𑁆𑀕𑁄’𑀦𑁆𑀦𑀯𑀺𑀧𑀸𑀘𑀦𑀁 𑀪𑀸𑀲𑀡𑀸𑀤𑀺 𑀦𑀺𑀫𑁂𑀲𑀸𑀤𑀺, 𑀢𑀁𑀩𑁆𑀬𑀸𑀧𑀸𑀭𑀸 𑀓𑀫𑀸 𑀇𑀫𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀯𑀼𑀢𑁆𑀢𑀁.

𑁩𑁯. 𑀤𑁆𑀯𑀬𑀁 𑀅𑀦𑁆𑀢𑁄𑀧𑀯𑀺𑀲𑀦𑀓𑀯𑀸𑀢𑁂. 𑀆𑀦𑀁 𑀯𑀼𑀘𑁆𑀘𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄, 𑀢𑀢𑁄 𑀅𑀧𑀕𑀢𑀁 𑀅𑀧𑀸𑀦𑀁. 𑀅𑀲𑁆𑀲𑀸𑀲𑀢𑁄 𑀅𑀧𑀕𑀢𑁄 𑀧𑀲𑁆𑀲𑀸𑀲𑁄. 𑀤𑁆𑀯𑀬𑀁 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁂. 𑀆𑀤𑀺𑀫𑁆𑀳𑀺 𑀧𑀯𑀢𑁆𑀢𑁄 𑀲𑀸𑀲𑁄 𑀅𑀲𑁆𑀲𑀸𑀲𑁄. 𑀅𑀦𑀦𑁆𑀢𑀺 𑀧𑀸𑀡𑀦𑁆𑀢𑁆𑀬𑀦𑁂𑀦𑁂𑀢𑀺 𑀆𑀦𑀁, 𑀆𑀤𑀺𑀫𑁆𑀳𑀺 𑀧𑀯𑀢𑁆𑀢𑀁 𑀆𑀦𑀁 𑀆𑀦𑀁, 𑀏𑀓𑀲𑁆𑀲𑀸𑀓𑀸𑀭𑀲𑁆𑀲 𑀮𑁄𑀧𑁄.

𑁪𑁦. 𑀯𑁂𑀕𑀔𑀺𑀧𑁆𑀧𑀸𑀤𑀬𑁄 𑀯𑀸𑀢𑀥𑀫𑁆𑀫𑀢𑁆𑀢𑁂𑀦 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀓𑀸 𑀇𑀢𑀺 𑀢𑀧𑁆𑀧𑀓𑁆𑀓𑀫𑁂 [𑀢𑀧𑁆𑀧𑀓𑁆𑀓𑀫𑁂𑀦 𑀢𑀓𑁆𑀓𑀫𑁂𑀦 (𑀓.)] 𑀉𑀘𑁆𑀘𑀦𑁆𑀢𑁂. 𑀢𑀢𑁆𑀭 𑀭𑀬𑀦𑁆𑀢𑀁 𑀯𑁂𑀕𑁂. 𑀲𑀩𑁆𑀩𑀢𑁆𑀭 𑀓𑀭𑀡𑀲𑀸𑀥𑀦𑀁. 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀯𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑁂𑀕𑁄.

‘‘𑀓𑁆𑀭𑀺𑀬𑀸𑀯𑀸𑀘𑀺𑀢𑁆𑀢𑀫𑀸𑀔𑁆𑀬𑀸𑀢𑀼𑀁, 𑀏𑀓𑁂𑀓𑀢𑁆𑀣𑁄 𑀦𑀺𑀤𑀲𑁆𑀲𑀺𑀢𑁄;

𑀧𑀬𑁄𑀕𑀢𑁄𑀦𑀼𑀕𑀦𑁆𑀢𑀩𑁆𑀩𑀸, 𑀅𑀦𑁂𑀓𑀢𑁆𑀣𑀸 𑀳𑀺 𑀥𑀸𑀢𑀯𑁄’’𑀢𑀺 [𑀘𑀦𑁆𑀤𑁆𑀭𑀥𑀸𑀢𑀼𑀧𑀸𑀞𑁂].

𑀯𑀼𑀢𑁆𑀢𑀢𑁆𑀢𑀸 𑀯𑀚𑀥𑀸𑀢𑀼 𑀧𑀸𑀧𑀼𑀡𑀦𑁂𑀧𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀭, 𑀅𑀓𑀸𑀭𑀲𑁆𑀲 𑀏. 𑀚𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀚𑀯𑁄, 𑀭𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀭𑀬𑁄.

𑀔𑀺𑀧𑁆𑀧𑀸𑀤𑀺𑀦𑀯𑀓𑀁 𑀲𑀻𑀖𑁂. 𑀅𑀣 𑀚𑀯𑀲𑀻𑀖𑀸𑀦𑀁 𑀓𑁄 𑀪𑁂𑀤𑁄? 𑀲𑀯𑁂𑀕𑀕𑀢𑀺𑀯𑀘𑀦𑀸 𑀚𑀯𑀸𑀤𑀬𑁄, 𑀲𑀻𑀖𑀸𑀤𑀬𑁄 𑀢𑀼 𑀥𑀫𑁆𑀫𑀯𑀘𑀦𑀸, 𑀢𑀣𑀸 𑀘 ‘‘𑀲𑀻𑀖𑀁 𑀧𑀘𑀢𑀺 [𑀧𑀲𑁆𑀲𑀢𑀺 (𑀓.)], 𑀲𑀻𑀖𑀁 𑀕𑀘𑁆𑀙𑀢𑀻’’𑀢𑀺 𑀧𑀬𑁄𑀕𑁄, 𑀦 𑀢𑀼 ‘‘𑀚𑀯𑀁 𑀧𑀘𑀢𑀺, 𑀚𑀯𑀁𑀕𑀘𑁆𑀙𑀢𑀻’’𑀢𑀺 𑀧𑀦 𑀧𑀬𑁄𑀕𑁄. ‘‘𑀯𑁂𑀕𑁂𑀦 𑀕𑀘𑁆𑀙𑀢𑀺, 𑀚𑀯𑁂𑀦 𑀕𑀘𑁆𑀙𑀢𑀻’’𑀢𑁆𑀬𑀸𑀤𑀻𑀲𑀼 𑀓𑀣𑀁? 𑀢𑀢𑁆𑀭 𑀪𑁂𑀤𑀲𑁆𑀲 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀦 𑀤𑁄𑀲𑁄. 𑀔𑀺𑀧𑁆𑀧𑀢𑀺 𑀧𑁂𑀭𑀢𑀻𑀢𑀺 𑀔𑀺𑀧𑁆𑀧𑀁, 𑀔𑀺𑀧 𑀧𑁂𑀭𑀡𑁂. 𑀲𑀬𑀢𑀻𑀢𑀺 𑀲𑀻𑀖𑀁, 𑀲𑀻 𑀲𑀬𑁂, 𑀖𑀧𑀘𑁆𑀘𑀬𑁄. 𑀩𑁆𑀬𑀼𑀧𑁆𑀧𑀢𑁆𑀢𑀺 𑀳𑀺 𑀬𑀣𑀸 𑀓𑀣𑀜𑁆𑀘𑀺𑀧𑀺 𑀪𑀯𑀢𑀺, 𑀲𑀜𑁆𑀜𑀸 𑀢𑀼 𑀮𑁄𑀓𑀢𑁄𑀯𑀸𑀯𑀕𑀦𑁆𑀢𑀩𑁆𑀩𑀸, 𑀲𑀩𑁆𑀩𑀢𑁆𑀭𑁂𑀯𑀁. 𑀢𑀭𑀢𑀻𑀢𑀺 𑀢𑀼𑀭𑀺𑀢𑀁. 𑀮𑀗𑁆𑀖𑀢𑀻𑀢𑀺 𑀮𑀳𑀼, 𑀮𑀗𑁆𑀖 𑀕𑀢𑀺𑀲𑁄𑀲𑀦𑁂𑀲𑀼, 𑀖𑀲𑁆𑀲 𑀳𑁄, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀉𑀧𑀘𑁆𑀘𑀬𑁄 𑀘, 𑀮𑀳𑀼𑀧𑀭𑀺𑀬𑀸𑀬𑁄 𑀮𑀖𑀼𑀲𑀤𑁆𑀤𑁄𑀧𑁆𑀬𑀢𑁆𑀣𑀺. 𑀅𑀲𑀢𑀺 𑀔𑁂𑀧𑀢𑀻𑀢𑀺 𑀆𑀲𑀼, 𑀉. 𑀢𑀭𑀢𑀻𑀢𑀺 𑀢𑀼𑀡𑁆𑀡𑀁, 𑀭𑀲𑁆𑀲 𑀡𑁄. 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀁. 𑀦 𑀯𑀺𑀮𑀫𑁆𑀩𑀻𑀬𑀢𑀺 𑀦 𑀑𑀳𑀻𑀬𑀢𑀻𑀢𑀺 𑀅𑀯𑀺𑀮𑀫𑁆𑀩𑀺𑀢𑀁, 𑀮𑀩𑀺 𑀅𑀯𑀲𑀁𑀲𑀦𑁂. 𑀢𑀼𑀯𑀝𑁆𑀝𑀢𑀺 𑀲𑀬𑀢𑀻𑀢𑀺 𑀢𑀼𑀯𑀝𑁆𑀝𑀁, 𑀢𑀼𑀭𑀺𑀢𑀪𑀸𑀯𑁂𑀦 𑀯𑀢𑁆𑀢𑀢𑀻𑀢𑀺 𑀯𑀸 𑀢𑀼𑀯𑀝𑁆𑀝𑀁, 𑀭𑀺𑀢𑀮𑁄𑀧𑁄.

𑁪𑁧. 𑀅𑀭𑀺𑀬𑀸𑀲𑀸𑀫𑀜𑁆𑀜𑀲𑁆𑀲 𑀧𑀼𑀩𑁆𑀩𑀟𑁆𑀠𑀁 𑀲𑀦𑁆𑀢𑀢𑁂. 𑀏𑀢𑁆𑀣 𑀘 𑀅𑀝𑁆𑀞𑀲𑀼 𑀕𑀡𑁂𑀲𑀼 𑀙𑀝𑁆𑀞𑁄 𑀲𑀩𑁆𑀩𑀮𑀳𑀼𑀓𑁄, 𑀢𑀢𑁄𑀧𑀭𑁂 𑀙𑀕𑁆𑀕𑀡𑀸 𑀲, 𑀪, 𑀲, 𑀪, 𑀪, 𑀪𑀸, 𑀅𑀝𑁆𑀞𑀫𑁄 𑀕𑁄. 𑀲𑀫𑀦𑁆𑀢𑀢𑁄 𑀢𑀦𑁄𑀢𑀻𑀢𑀺 𑀲𑀢𑀢𑀁. 𑀦𑀸𑀲𑀪𑀸𑀯𑁂𑀦 𑀦 𑀇𑀘𑁆𑀘𑀁 𑀦 𑀕𑀦𑁆𑀢𑀩𑁆𑀩𑀁 𑀦𑀺𑀘𑁆𑀘𑀁, 𑀦𑀸𑀲𑀁 𑀯𑀸 𑀦 𑀕𑀘𑁆𑀙𑀢𑀻𑀢𑀺 𑀦𑀺𑀘𑁆𑀘𑀁. ‘‘𑀦𑀸𑀕𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀦 𑀤𑁄𑀲𑁄, 𑀢𑀲𑁆𑀲 𑀘𑁄. 𑀦 𑀯𑀺𑀭𑀫𑀢𑀻𑀢𑀺 𑀅𑀯𑀺𑀭𑀢𑀁. 𑀦 𑀆𑀭𑀫𑀢𑀻𑀢𑀺 𑀅𑀦𑀸𑀭𑀢𑀁. 𑀲𑀫𑀦𑁆𑀢𑀢𑁄, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀢𑀦𑁄𑀢𑀻𑀢𑀺 𑀲𑀦𑁆𑀢𑀢𑀁. 𑀦 𑀅𑀯𑀭𑀫𑀢𑀻𑀢𑀺 𑀅𑀦𑀯𑀭𑀢𑀁. 𑀲𑀤𑀸 𑀥𑀯𑀢𑀺 𑀕𑀘𑁆𑀙𑀢𑀻𑀢𑀺 𑀥𑀼𑀯𑀁. ‘‘𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀽’’𑀢𑀺 𑀓𑀸𑀢𑀦𑁆𑀢𑀥𑀸𑀢𑀼.

𑀯𑀺𑀧𑀼𑀮𑀸𑀟𑁆𑀠𑀁 𑀅𑀢𑀺𑀲𑀬𑁂. 𑀏𑀢𑁆𑀣 𑀳𑀺 𑀅𑀬𑀼𑀕𑀧𑀸𑀤𑁂 𑀤𑁆𑀯𑀸𑀤𑀲𑀫𑀢𑁆𑀢𑀸, 𑀬𑀼𑀕𑁂 𑀅𑀝𑁆𑀞𑀸𑀭𑀲𑀫𑀢𑁆𑀢𑀸, 𑀲𑀩𑁆𑀩𑀸𑀲𑀼 𑀅𑀭𑀺𑀬𑀸𑀲𑀼 𑀧𑀞𑀫𑁂 𑀧𑀸𑀤𑁂 𑀤𑁆𑀯𑀸𑀤𑀲𑀫𑀢𑁆𑀢𑀸, 𑀤𑀼𑀢𑀺𑀬𑁂 𑀅𑀝𑁆𑀞𑀸𑀭𑀲, 𑀢𑀢𑀺𑀬𑁂 𑀤𑁆𑀯𑀸𑀤𑀲, 𑀘𑀢𑀼𑀢𑁆𑀣𑁂 𑀧𑀜𑁆𑀘𑀤𑀲. 𑀬𑀤𑀸 𑀧𑀦 𑀧𑀞𑀫𑀢𑀢𑀺𑀬𑁂𑀲𑀼 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀤𑀸 𑀬𑀼𑀕𑁂 𑀅𑀥𑀺𑀓𑀸 𑀳𑁄𑀦𑁆𑀢𑀺, 𑀇𑀤𑀁 𑀯𑀺𑀧𑀼𑀮𑀸𑀮𑀓𑁆𑀔𑀡𑀁. 𑀅𑀣 𑀲𑀢𑀢𑀸𑀢𑀺𑀲𑀬𑀸𑀦𑀁 𑀓𑁄 𑀪𑁂𑀤𑁄? 𑀲𑀢𑀢𑀁 𑀲𑀦𑁆𑀢𑀢𑀺 𑀅𑀯𑀺𑀘𑁆𑀙𑁂𑀤𑁄𑀓𑁆𑀭𑀺𑀬𑀦𑁆𑀢𑀭𑁂𑀳𑀺 𑀅𑀩𑁆𑀬𑀯𑀥𑀸𑀦𑀁, 𑀅𑀢𑀺𑀲𑀬𑁄 𑀢𑀼 𑀧𑁄𑀦𑁄𑀧𑀼𑀜𑁆𑀜𑀁, 𑀧𑀓𑀝𑁆𑀞𑁄 𑀘. 𑀢𑁂𑀲𑀼 𑀧𑁄𑀦𑁄𑀧𑀼𑀜𑁆𑀜𑀁 𑀓𑁆𑀭𑀺𑀬𑀸𑀩𑁆𑀬𑀸𑀯𑀼𑀢𑁆𑀢𑀺, 𑀧𑀓𑀝𑁆𑀞𑁄 𑀢𑀼 𑀓𑁆𑀭𑀺𑀬𑀸𑀯𑀬𑀯𑀸𑀦𑀁 𑀉𑀓𑁆𑀓𑀁𑀲𑀢𑀸. 𑀪𑀸𑀲𑀢𑀺 𑀲𑀩𑁆𑀩𑁂𑀲𑀦𑁆𑀢𑀺 𑀪𑀼𑀲𑀁, 𑀆𑀲𑁆𑀲 𑀉. 𑀪𑀲𑁆𑀲𑀢𑀺 𑀅𑀥𑁄 𑀧𑀢𑀢𑀻𑀢𑀺 𑀯𑀸 𑀪𑀼𑀲𑀁. 𑀪𑀲 𑀅𑀥𑁄𑀧𑀢𑀦𑁂, 𑀅𑀲𑁆𑀲 𑀉. 𑀅𑀢𑀺𑀲𑀬𑀦𑀁 𑀅𑀢𑀺𑀲𑀬𑁄, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸𑀲𑀬𑀦𑀁 𑀧𑀯𑀢𑁆𑀢𑀦𑀁 𑀅𑀢𑀺𑀲𑀬𑁄. 𑀤𑀳𑀢𑀺 𑀲𑀩𑁆𑀩𑀦𑁆𑀢𑀺 𑀤𑀴𑁆𑀳𑀁, 𑀳𑀢𑁄 𑀧𑀼𑀩𑁆𑀩𑁂 𑀴𑁄, 𑀤𑀮𑀢𑀺 𑀯𑀺𑀤𑀸𑀭𑀬𑀢𑀻𑀢𑀺 𑀯𑀸 𑀤𑀴𑁆𑀳𑀁, 𑀳𑀧𑀘𑁆𑀘𑀬𑁄, 𑀤𑀳𑀦𑁆𑀢𑁄 𑀮𑀸𑀢𑀻𑀢𑀺 𑀯𑀸 𑀤𑀴𑁆𑀳𑀁, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀅𑀪𑀺𑀲𑀬𑁄 𑀘 𑀤𑀴𑁆𑀳𑀜𑁆𑀘 𑀅𑀢𑀺𑀲𑀬𑀤𑀴𑁆𑀳𑀸. 𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀢𑀺𑀩𑁆𑀩𑀁, 𑀭𑀲𑁆𑀲 𑀯𑁄, 𑀅𑀲𑁆𑀲 𑀇. 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀏𑀓𑁄, 𑀲𑁄 𑀏𑀯 𑀏𑀓𑀦𑁆𑀢𑀁, 𑀏𑀓𑀁 𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀯𑀸 𑀏𑀓𑀦𑁆𑀢𑀁. 𑀫𑀢𑁆𑀢𑀢𑁄 𑀅𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀫𑀢𑁆𑀢𑀁. 𑀩𑀳𑀼𑀁 𑀮𑀸𑀢𑀻𑀢𑀺 𑀩𑀸𑀴𑁆𑀳𑀁, 𑀉𑀮𑁄𑀧𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄 𑀘 𑀳𑀲𑀤𑁆𑀤𑁄. 𑀅𑀢𑀺𑀯𑁂𑀮𑀁, 𑀅𑀘𑁆𑀘𑀢𑁆𑀣𑀁, 𑀦𑀺𑀩𑁆𑀪𑀭𑀁, 𑀦𑀺𑀢𑀦𑁆𑀢𑀁, 𑀕𑀸𑀴𑁆𑀳𑀁𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀢𑀺𑀲𑀬𑁂.

𑀤𑀩𑁆𑀩𑀁 𑀲𑀢𑁆𑀯𑀁, 𑀢𑀁𑀯𑀺𑀧𑀭𑀻𑀢𑁂 𑀥𑀫𑁆𑀫𑀫𑀢𑁆𑀢𑁂 𑀯𑀢𑁆𑀢𑀫𑀸𑀦𑀸 𑀩𑀸𑀴𑁆𑀳𑀧𑀭𑀺𑀬𑀦𑁆𑀢𑀸 𑀔𑀺𑀧𑁆𑀧𑀸𑀤𑀬𑁄 𑀅𑀢𑀺𑀲𑀬𑀁 𑀯𑀺𑀦𑀸 𑀧𑀡𑁆𑀟𑀓𑁂 𑀦𑀧𑀼𑀁𑀲𑀓𑁂 𑀯𑀢𑁆𑀢𑀦𑁆𑀢𑀺. 𑀔𑀺𑀧𑁆𑀧𑀁 𑀪𑀯𑀢𑀺 [‘‘𑀔𑀺𑀧𑁆𑀧 𑀪𑀯𑀪𑀻’’𑀢𑀺 𑀧𑀤𑀤𑁆𑀯𑀬𑀁 𑀅𑀥𑀺𑀓𑀁 𑀯𑀺𑀬 𑀤𑀺𑀲𑁆𑀲𑀢𑀺], 𑀅𑀢𑀺𑀲𑀬𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀅𑀲𑁆𑀲 𑀕𑀼𑀡𑀲𑁆𑀲𑀸𑀢𑀺𑀲𑀬𑁄, 𑀅𑀲𑁆𑀲 𑀤𑀩𑁆𑀩𑀲𑁆𑀲𑀸𑀢𑀺𑀲𑀬𑁄 𑀇𑀢𑀺. ‘‘𑀔𑀺𑀧𑁆𑀧𑀁 𑀪𑀼𑀜𑁆𑀚𑀢𑀺, 𑀲𑀢𑀢𑀁 𑀚𑀼𑀳𑁄𑀢𑀺, 𑀲𑀢𑀢𑀁 𑀭𑀫𑀡𑀻𑀬𑁄’’𑀇𑀘𑁆𑀘𑀢𑁆𑀭 𑀢𑀼 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀢𑁆𑀢𑀸𑀬𑁂𑀯 𑀧𑀡𑁆𑀟𑀓𑀢𑁆𑀢𑀁. 𑀢𑁂𑀲𑀼 𑀔𑀺𑀧𑁆𑀧𑀸𑀤𑀻𑀲𑀼 𑀬𑁂 𑀤𑀩𑁆𑀩𑀕𑀸 𑀤𑀩𑁆𑀩𑀸𑀪𑀺𑀥𑀸𑀬𑀺𑀦𑁄, 𑀢𑁂 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. ‘‘𑀤𑀩𑁆𑀩𑀥𑀫𑁆𑀫𑁄 𑀮𑀺𑀗𑁆𑀕’’𑀦𑁆𑀢𑀺 𑀤𑀲𑁆𑀲𑀦𑀦𑁆𑀢𑀭𑀁. 𑀬𑀣𑀸 𑀔𑀺𑀧𑁆𑀧𑀸 𑀚𑀭𑀸, 𑀔𑀺𑀧𑁆𑀧𑁄 𑀫𑀘𑁆𑀘𑀼, 𑀔𑀺𑀧𑁆𑀧𑀁 𑀕𑀫𑀦𑀁. 𑀲𑀦𑁆𑀢𑀢𑀸 𑀢𑀡𑁆𑀳𑀸, 𑀲𑀦𑁆𑀢𑀢𑀁 𑀤𑀼𑀓𑁆𑀔𑀁, 𑀲𑀦𑁆𑀢𑀢𑁄 𑀆𑀓𑀸𑀲𑁄. 𑀅𑀢𑀺𑀫𑀢𑁆𑀢𑀸 𑀓𑁆𑀭𑀺𑀬𑀸, 𑀅𑀢𑀺𑀫𑀢𑁆𑀢𑁄 𑀦𑀭𑁄, 𑀅𑀢𑀺𑀫𑀢𑁆𑀢𑀁 𑀧𑀤𑀁 𑀇𑀘𑁆𑀘𑀸𑀤𑀺.

𑁪𑁨-𑁪𑁩. 𑀤𑁆𑀯𑀸𑀤𑀲𑀓𑀁 𑀫𑀸𑀭𑁂. 𑀳𑀭𑀦𑀬𑀦𑀕𑁆𑀕𑀺𑀤𑀟𑁆𑀠𑀢𑁆𑀢𑀸 [𑀢𑀺𑀦𑀬𑀦𑀕𑁆𑀕𑀺𑀤𑀟𑁆𑀠𑀢𑁆𑀢𑀸 (𑀓.)] 𑀦𑀢𑁆𑀣𑀺 𑀯𑀺𑀕𑁆𑀕𑀳𑁄 𑀲𑀭𑀻𑀭𑀫𑁂𑀢𑀲𑁆𑀲 𑀅𑀯𑀺𑀕𑁆𑀕𑀳𑁄. 𑀓𑀸𑀫𑀬𑀢𑀺 𑀭𑀢𑀺𑀘𑁆𑀙𑀁 𑀉𑀧𑁆𑀧𑀸𑀤𑀬𑀢𑀻𑀢𑀺 𑀓𑀸𑀫𑁄, 𑀓𑀸𑀭𑀺𑀢𑀦𑁆𑀢𑀸 𑀅𑀧𑀘𑁆𑀘𑀬𑁄. 𑀲𑀺𑀗𑁆𑀕𑀸𑀭𑀭𑀽𑀧𑁂𑀦 𑀧𑀸𑀡𑀻𑀦𑀁 𑀫𑀦𑀲𑀺 𑀪𑀯𑀢𑀻𑀢𑀺 𑀫𑀦𑁄𑀪𑀽. 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀫𑀤𑀬𑀢𑀻𑀢𑀺 𑀫𑀤𑀦𑁄. 𑀮𑁄𑀓𑀸𑀦𑀁 𑀅𑀦𑁆𑀢𑀁 𑀯𑀺𑀦𑀸𑀲𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑁄. 𑀯𑀲𑁂 𑀯𑀢𑁆𑀢𑁂𑀢𑀺 𑀲𑀻𑀮𑁂𑀦𑀸𑀢𑀺 𑀯𑀲𑀯𑀢𑁆𑀢𑀻. 𑀧𑀸𑀧𑀁 𑀇𑀘𑁆𑀙𑀢𑀺 𑀓𑀭𑁄𑀢𑀺, 𑀢𑁂𑀦 𑀬𑀼𑀢𑁆𑀢𑁄𑀢𑀺 𑀯𑀸 𑀧𑀸𑀧𑀺𑀫𑀸. 𑀧𑀭𑀢𑁄 𑀚𑀸𑀬𑀢𑀻𑀢𑀺 𑀧𑀚𑀸, 𑀅𑀘𑁆𑀙𑀦𑁆𑀤𑀺𑀓𑀸, 𑀢𑀸𑀲𑀁 𑀧𑀢𑀺 𑀧𑀚𑀸𑀧𑀢𑀺. 𑀬𑁂 𑀓𑀼𑀲𑀮𑀥𑀫𑁆𑀫𑁂𑀲𑀼 𑀧𑀫𑀢𑁆𑀢𑀸, 𑀢𑁂𑀲𑀫𑁂𑀯 𑀩𑀦𑁆𑀥𑀼 𑀧𑀫𑀢𑁆𑀢𑀩𑀦𑁆𑀥𑀼. 𑀓𑀡𑁆𑀳𑀥𑀫𑁆𑀫𑀬𑀼𑀢𑁆𑀢𑀢𑀸𑀬 𑀓𑀡𑁆𑀳𑁄. 𑀓𑀼𑀲𑀮𑀥𑀫𑁆𑀫𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀅𑀓𑀼𑀲𑀮𑀥𑀫𑁆𑀫𑁂 𑀦 𑀫𑀼𑀜𑁆𑀘𑀢𑀻𑀢𑀺 𑀦𑀫𑀼𑀘𑀺. 𑀫𑀻𑀦𑀓𑁂𑀢𑀦𑁄, 𑀓𑀦𑁆𑀤𑀧𑁆𑀧𑁄, 𑀤𑀧𑁆𑀧𑀓𑁄, 𑀅𑀦𑀗𑁆𑀕𑁄, 𑀧𑀜𑁆𑀘𑀲𑀭𑁄, 𑀲𑀫𑁆𑀩𑀭𑀸𑀭𑀺, 𑀫𑀦𑀲𑀺𑀚𑁄, 𑀓𑀼𑀲𑀼𑀫𑁂𑀲𑀼, 𑀅𑀦𑀜𑁆𑀜𑀚𑁄, 𑀧𑀼𑀧𑁆𑀨𑀥𑀦𑁆𑀯𑀸, 𑀭𑀢𑀺𑀧𑀢𑀺, 𑀫𑀓𑀭𑀤𑁆𑀥𑀚𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀺𑀡𑁆𑀳𑀼𑀲𑀼𑀢𑀲𑁆𑀲 𑀓𑀸𑀫𑀲𑁆𑀲 𑀦𑀸𑀫𑀸𑀦𑀺.

𑀢𑀡𑁆𑀳𑀸 𑀅𑀭𑀢𑀻 𑀭𑀕𑀸 𑀘𑁂𑀢𑀺 𑀏𑀢𑀸 𑀢𑀺𑀲𑁆𑀲𑁄 𑀢𑀲𑁆𑀲 𑀫𑀸𑀭𑀲𑁆𑀲 𑀥𑀻𑀢𑀭𑁄. 𑀬𑁄 𑀢𑀁 𑀧𑀲𑁆𑀲𑀢𑀺, 𑀢𑀁 𑀢𑀲𑀺𑀢𑀁 𑀓𑀭𑁄𑀢𑀻𑀢𑀺 𑀢𑀡𑁆𑀳𑀸, 𑀲𑀮𑁄𑀧𑁄, 𑀡𑁆𑀳𑀸 𑀘. 𑀧𑀭𑁂𑀲𑀁 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀭𑀢𑀺𑀁 𑀓𑀭𑁄𑀢𑀻𑀢𑀺 𑀅𑀭𑀢𑀻. 𑀭𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀭𑀕𑀸. 𑀢𑀲𑁆𑀲 𑀫𑀸𑀭𑀲𑁆𑀲 𑀳𑀢𑁆𑀣𑀻 𑀕𑀺𑀭𑀺𑀫𑁂𑀔𑀮𑁄 𑀦𑀸𑀫. 𑀲𑀭𑀻𑀭𑀫𑀳𑀦𑁆𑀢𑀪𑀸𑀯𑁂𑀦 𑀕𑀺𑀭𑀺𑀲𑀤𑀺𑀲𑀢𑁆𑀢𑀸 𑀕𑀺𑀭𑀺 𑀯𑀺𑀬𑀸𑀢𑀺 𑀕𑀺𑀭𑀺. 𑀫𑀸𑀭𑁂𑀦 𑀫𑀫𑀸𑀬𑀦𑀯𑀲𑁂𑀦 ‘‘𑀅𑀬𑀁 𑀫𑁂 𑀳𑀢𑁆𑀣𑀻 𑀫𑁂𑀔𑀮𑁄 𑀦𑀸𑀫 𑀳𑁄𑀢𑀽’’𑀢𑀺 𑀓𑀢𑀦𑀸𑀫𑀢𑁆𑀢𑀸 𑀫𑁂𑀔𑀮𑀸 𑀯𑀺𑀬𑀸𑀢𑀺 𑀫𑁂𑀔𑀮𑁄𑀢𑀺 𑀲𑀫𑀼𑀤𑀺𑀢𑀦𑀸𑀫𑀤𑁆𑀯𑀬𑁂𑀦 𑀏𑀓𑀫𑁂𑀯 𑀳𑀢𑁆𑀣𑀺𑀁 𑀯𑀤𑀢𑀺, 𑀬𑀣𑀸 ‘‘𑀯𑀚𑀺𑀭𑀸𑀲𑀦𑀺, 𑀲𑀻𑀢𑀼𑀡𑁆𑀳’’𑀦𑁆𑀢𑀺.

𑁪𑁪. 𑀢𑀺𑀓𑀁 𑀬𑀫𑁂. 𑀧𑀚𑀸𑀲𑀁𑀬𑀫𑀦𑀢𑁄 𑀬𑀫𑀸, 𑀫𑀘𑁆𑀘𑀼𑀧𑁆𑀧𑀪𑀼𑀢𑀬𑁄 𑀅𑀲𑁆𑀲 𑀓𑀺𑀗𑁆𑀓𑀸𑀭𑀸, 𑀢𑁂𑀲𑀼 𑀭𑀸𑀚𑀢𑁂𑀢𑀺 𑀬𑀫𑀭𑀸𑀚𑀸. 𑀢𑁂𑀥𑀸𑀢𑀼𑀓𑁂𑀲𑀼𑀧𑀺 𑀆𑀡𑀸𑀧𑀯𑀢𑁆𑀢𑀓𑀢𑁆𑀢𑀸 𑀫𑀳𑀦𑁆𑀢𑁄 𑀯𑀺𑀲𑀬𑁄 𑀏𑀢𑀲𑁆𑀲 𑀯𑀺𑀲𑀬𑀻, 𑀡𑀻, 𑀲𑁄 𑀏𑀯 𑀯𑁂𑀲𑀸𑀬𑀻. 𑀬𑀢𑁆𑀣 𑀮𑀓𑁆𑀔𑀡𑁂𑀦 𑀦 𑀲𑀺𑀚𑁆𑀛𑀢𑀺, 𑀢𑀢𑁆𑀣 𑀲𑀩𑁆𑀩𑀢𑁆𑀭 ‘‘𑀬𑀤𑀸𑀤𑀺𑀦𑀸 𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀤𑀼𑀓𑁆𑀔𑀚𑀦𑀓𑀢𑁆𑀢𑀸 𑀯𑀸 𑀯𑀺𑀲𑀤𑀺𑀲𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀲𑀸, 𑀦𑁂𑀭𑀬𑀺𑀓𑀸, 𑀢𑁂𑀲𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 𑀅𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑁂𑀲𑀸𑀬𑀻, 𑀈. 𑀬𑀫𑀸𑀦𑀁 𑀭𑀸𑀚𑀸 𑀬𑀫𑁄. 𑀥𑀫𑁆𑀫𑀭𑀸𑀚𑁄, 𑀓𑀢𑀦𑁆𑀢𑁄, 𑀲𑀫𑀯𑀢𑁆𑀢𑀻, 𑀓𑀸𑀮𑁄, 𑀤𑀡𑁆𑀟𑀥𑀭𑁄, 𑀅𑀦𑁆𑀢𑀓𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀬𑀫𑀲𑁆𑀲 𑀦𑀸𑀫𑀸𑀦𑀺. 𑀅𑀲𑁆𑀲 𑀬𑀫𑀲𑁆𑀲 𑀆𑀯𑀼𑀥𑀁 𑀦𑀬𑀦𑀫𑁂𑀯. 𑀢𑁂𑀦 𑀓𑀺𑀭 𑀓𑁄𑀥𑀘𑀺𑀢𑁆𑀢𑁂𑀦 𑀑𑀮𑁄𑀓𑀺𑀢𑀫𑀢𑁆𑀢𑁂𑀦 𑀲𑀢𑁆𑀢𑀸𑀦𑀁 𑀲𑀭𑀻𑀭𑀸𑀦𑀺 𑀆𑀢𑀧𑁂 𑀔𑀺𑀢𑁆𑀢𑀖𑀢𑀧𑀺𑀡𑁆𑀟𑀸𑀦𑀺 𑀯𑀺𑀬 𑀯𑀺𑀮𑀻𑀬𑀦𑁆𑀢𑀻𑀢𑀺.

𑀤𑁆𑀯𑀬𑀁 𑀅𑀲𑀼𑀭𑀪𑁂𑀤𑁂. 𑀏𑀢𑁂𑀲𑀜𑁆𑀳𑀺 𑀲𑀢𑀺𑀧𑀺 𑀤𑁂𑀯𑀪𑀸𑀯𑁂 𑀳𑁂𑀝𑁆𑀞𑀸 𑀦𑀺𑀯𑀸𑀲𑀺𑀢𑀪𑀸𑀯𑀲𑀸𑀫𑀜𑁆𑀜𑀢𑁄 𑀏𑀢𑁆𑀣 𑀯𑀘𑀦𑀁, 𑀫𑀸𑀭𑀲𑁆𑀲 𑀧𑀦 𑀲𑀢𑁆𑀢𑀸𑀦𑀫𑀦𑀢𑁆𑀣𑀓𑀸𑀭𑀓𑀢𑀸𑀲𑀸𑀫𑀜𑁆𑀜𑁂𑀦 𑀬𑀫𑁂𑀦 𑀲𑀤𑁆𑀥𑀺𑀁 𑀯𑀘𑀦𑀁 𑀢𑀓𑁆𑀓𑀭𑀢𑁆𑀢𑀸. 𑀬𑀼𑀤𑁆𑀥𑀸𑀤𑀻𑀲𑀼 𑀯𑁂𑀧𑀺𑀢𑀁 𑀓𑀫𑁆𑀧𑀺𑀢𑀁 𑀘𑀺𑀢𑁆𑀢𑀫𑁂𑀢𑀲𑁆𑀲 𑀯𑁂𑀧𑀘𑀺𑀢𑁆𑀢𑀺 [𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁫𑁬]. 𑀧𑀼𑀡𑁆𑀡𑀁 𑀮𑁄𑀫𑀁 𑀬𑀲𑁆𑀲 𑀲𑁄 𑀧𑀼𑀮𑁄𑀫𑁄, 𑀧𑀼𑀮𑀸𑀫𑀳𑀢𑀻 𑀉𑀫𑀸 𑀓𑀺𑀢𑁆𑀢𑀺, 𑀓𑀦𑁆𑀢𑀺 𑀯𑀸 𑀬𑀲𑁆𑀲𑀸𑀢𑀺 𑀧𑀼𑀮𑁄𑀫𑁄. ‘‘𑀉𑀫𑀸𑀢𑀲𑀻𑀳𑁂𑀫𑀯𑀢𑀺-𑀳𑀮𑀺𑀤𑁆𑀤𑀸𑀓𑀺𑀢𑁆𑀢𑀺𑀓𑀦𑁆𑀢𑀺𑀲𑀽’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀲𑀓𑁆𑀓𑀲𑁆𑀲 𑀪𑀭𑀺𑀬𑀸𑀬 𑀲𑀼𑀚𑀸𑀢𑀸𑀬 𑀧𑀺𑀢𑀸. 𑀤𑁆𑀯𑀬𑀁 𑀓𑀺𑀦𑁆𑀦𑀭𑁂. 𑀅𑀲𑁆𑀲𑀫𑀼𑀔𑀦𑀭𑀲𑀭𑀻𑀭𑀢𑀸𑀬 𑀓𑀼𑀘𑁆𑀙𑀺𑀢𑁄 𑀧𑀼𑀭𑀺𑀲𑁄, 𑀓𑀺𑀜𑁆𑀘𑀺 𑀯𑀸 𑀧𑀼𑀭𑀺𑀲𑁄, 𑀧𑀼𑀭𑀺𑀲𑀲𑀤𑀺𑀲𑁄𑀢𑀺 𑀯𑀸 𑀓𑀺𑀫𑁆𑀧𑀼𑀭𑀺𑀲𑁄. 𑀏𑀯𑀁 𑀓𑀺𑀦𑁆𑀦𑀭𑁄. 𑀢𑀼𑀭𑀗𑁆𑀕𑀯𑀤𑀦, 𑀅𑀲𑁆𑀲𑀫𑀼𑀔𑀸𑀤𑀻𑀦𑀺𑀧𑀺 𑀓𑀺𑀦𑁆𑀦𑀭𑀲𑁆𑀲 𑀦𑀸𑀫𑀸𑀦𑀺.

𑁪𑁫-𑁪𑁬. 𑀅𑀤𑁆𑀥𑀧𑀚𑁆𑀚𑁂𑀦 𑀆𑀓𑀸𑀲𑀲𑁆𑀲 𑀦𑀸𑀫𑀸𑀦𑀺. 𑀢𑁂𑀲𑀁 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀅𑀦𑁆𑀢𑀭𑀁 𑀦𑀸𑀦𑀢𑁆𑀢𑀁 𑀇𑀓𑁆𑀔𑀢𑁂 𑀮𑁄𑀓𑁄 𑀏𑀢𑁆𑀣, 𑀅𑀦𑁂𑀦𑀸𑀢𑀺 𑀯𑀸 𑀅𑀦𑁆𑀢𑀮𑀺𑀓𑁆𑀔𑀁, 𑀭𑀲𑁆𑀲 𑀮𑁄. 𑀇𑀓𑁆𑀔𑀦𑀁 𑀯𑀸 𑀤𑀲𑁆𑀲𑀦𑀁 𑀇𑀓𑁆𑀔𑀸, 𑀢𑀲𑁆𑀲 𑀅𑀦𑁆𑀢𑀭𑀁 𑀓𑀸𑀭𑀡𑀁 𑀅𑀦𑁆𑀢𑀮𑀺𑀓𑁆𑀔𑀁. 𑀔𑀦𑀢𑀺 𑀩𑁆𑀬𑀯𑀥𑀸𑀦𑀦𑁆𑀢𑀺 𑀔𑀁, 𑀓𑁆𑀯𑀺. 𑀲𑀩𑁆𑀩𑀕𑀳𑀕𑀸𑀫𑀡𑀺𑀦𑁄 𑀆𑀤𑀺𑀘𑁆𑀘𑀲𑁆𑀲 𑀧𑀣𑁄 𑀫𑀕𑁆𑀕𑁄 𑀆𑀤𑀺𑀘𑁆𑀘𑀧𑀣𑁄. 𑀦 𑀪𑀯𑀢𑀻𑀢𑀺 𑀅𑀩𑁆𑀪𑀁. 𑀕𑀘𑁆𑀙𑀦𑁆𑀢𑁆𑀬𑀦𑁂𑀦 𑀤𑁂𑀯𑀸𑀢𑀺 𑀕𑀕𑀦𑀁, 𑀬𑀼, 𑀫𑀲𑁆𑀲 𑀕𑁄. 𑀅𑀫𑁆𑀩𑀢𑁂 𑀲𑀤𑁆𑀤𑀸𑀬𑀢𑁂 𑀅𑀢𑁆𑀭𑀸𑀢𑀺 𑀅𑀫𑁆𑀩𑀭𑀁, 𑀭𑁄. 𑀳𑀬 𑀕𑀢𑀺𑀫𑁆𑀳𑀺, 𑀯𑀺𑀲𑁂𑀲𑁂𑀦 𑀳𑀬𑀢𑀺 𑀕𑀘𑁆𑀙𑀢𑀺 𑀲𑀩𑁆𑀩𑀢𑁆𑀭𑀸𑀢𑀺 𑀯𑁂𑀳𑀸𑀲𑁄, 𑀬𑀲𑁆𑀲 𑀲𑁄, 𑀯𑀺𑀕𑀢𑁄 𑀯𑀸 𑀳𑀸𑀲𑁄 𑀘𑀺𑀢𑁆𑀢𑀲𑁆𑀲 𑀏𑀢𑁆𑀣𑀸𑀭𑀫𑁆𑀫𑀡𑀸𑀮𑀸𑀪𑀢𑁄𑀢𑀺 𑀯𑁂𑀳𑀸𑀲𑁄. 𑀅𑀦𑀺𑀮𑀲𑁆𑀲 𑀯𑀸𑀢𑀲𑁆𑀲 𑀧𑀣𑁄 𑀅𑀦𑀺𑀮𑀧𑀣𑁄. 𑀪𑀼𑀲𑀁 𑀓𑀸𑀲𑀦𑁆𑀢𑁂 𑀤𑀺𑀧𑁆𑀧𑀦𑁆𑀢𑁂 𑀧𑀤𑀢𑁆𑀣𑀸 𑀏𑀢𑁂𑀦𑀸𑀢𑀺 𑀆𑀓𑀸𑀲𑁄, 𑀦 𑀓𑀲𑁆𑀲𑀢𑀺 𑀦 𑀯𑀺𑀮𑁂𑀔𑀻𑀬𑀢𑀻𑀢𑀺 𑀯𑀸 𑀆𑀓𑀸𑀲𑁄. 𑀦 𑀪𑀯𑀢𑀺 𑀏𑀢𑁆𑀣 𑀓𑀺𑀜𑁆𑀘𑀺𑀧𑀺 𑀯𑀢𑁆𑀣𑀽𑀢𑀺 𑀦𑀪𑀁, 𑀦𑀢𑁆𑀣𑀺 𑀪𑀽𑀫𑀺 𑀏𑀢𑁆𑀣𑀸𑀢𑀺 𑀯𑀸 𑀦𑀪𑀁, 𑀦 𑀪𑀸𑀬𑀦𑁆𑀢𑀺 𑀧𑀓𑁆𑀔𑀺𑀦𑁄 𑀅𑀦𑁂𑀦, 𑀏𑀢𑁆𑀣𑀸𑀢𑀺 𑀯𑀸 𑀦𑀪𑀁. 𑀯𑀺𑀦𑁄 𑀧𑀓𑁆𑀔𑀺𑀦𑁄 𑀳𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑁂𑀳𑀸𑀬𑀲𑀁, 𑀅𑀲𑁄. 𑀢𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀦𑀓𑁆𑀔𑀢𑁆𑀢𑀸𑀤𑀬𑁄, 𑀢𑁂𑀲𑀁 𑀧𑀣𑁄 𑀢𑀸𑀭𑀸𑀧𑀣𑁄. 𑀲𑀼𑀭𑀸𑀦𑀁 𑀤𑁂𑀯𑀸𑀦𑀁 𑀧𑀣𑁄 𑀲𑀼𑀭𑀧𑀣𑁄. 𑀦 𑀳𑀜𑁆𑀜𑀢𑁂𑀢𑀺 𑀅𑀖𑀁, 𑀳𑀦𑀲𑁆𑀲 𑀖𑁄. 𑀅𑀦𑀦𑁆𑀢𑀁, 𑀯𑀺𑀲𑀡𑀼𑀧𑀤𑀁𑀇𑀘𑁆𑀘𑀸𑀤𑀻𑀦𑀺𑀧𑀺 𑀆𑀓𑀸𑀲𑀲𑁆𑀲 𑀦𑀸𑀫𑀸𑀦𑀺.

𑁪𑁭-𑁪𑁮. 𑀫𑁂𑀖𑀸𑀤𑁆𑀬𑁂𑀓𑀸𑀤𑀲𑀓𑀁 𑀫𑁂𑀖𑁂. 𑀫𑁂𑀳𑀢𑀺 𑀖𑀭𑀢𑀺 𑀲𑁂𑀘𑀢𑀻𑀢𑀺 𑀫𑁂𑀖𑁄. 𑀯𑀸𑀭𑀺𑀁 𑀯𑀳𑀢𑀻𑀢𑀺 𑀯𑀮𑀸𑀳𑀓𑁄, 𑀯𑀸𑀭𑀺𑀲𑀤𑁆𑀤𑀲𑁆𑀲 𑀯𑁄, 𑀯𑀲𑁆𑀲 𑀮𑁄 [𑀧𑀸𑀡𑀺𑀦𑀺 𑁬.𑁩.𑁧𑁦𑁯; 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸 𑁧.𑁪𑁭; 𑀦𑀻𑀢𑀺-𑀲𑀼𑀢𑁆𑀢 𑁧𑁩𑁪𑁦, 𑁧𑁩𑁪𑁩]. 𑀤𑀺𑀩𑁆𑀩𑀦𑁆𑀢𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀕𑀘𑁆𑀙𑀦𑁆𑀢𑀺 𑀮𑁄𑀓𑀸 𑀅𑀦𑁂𑀦𑀸𑀢𑀺 𑀤𑁂𑀯𑁄. 𑀧𑀚𑀸𑀦𑀁 𑀮𑁄𑀓𑀸𑀦𑀁 𑀅𑀦𑁆𑀦𑀁 𑀪𑁄𑀚𑀦𑀁 𑀪𑀯𑀢𑀺 𑀏𑀢𑁂𑀦𑀸𑀢𑀺 𑀧𑀚𑁆𑀚𑀼𑀦𑁆𑀦𑁄, 𑀅𑀓𑀸𑀭𑀲𑁆𑀲𑀼𑀓𑀸𑀭𑁄. 𑀅𑀫𑁆𑀩𑀼𑀁 𑀉𑀤𑀓𑀁 𑀥𑀸𑀭𑁂𑀢𑀻𑀢𑀺 𑀅𑀫𑁆𑀩𑀼𑀥𑀭𑁄. 𑀮𑁄𑀓𑀸𑀦𑀁 𑀲𑀦𑁆𑀢𑀸𑀧𑀁 𑀳𑀦𑁆𑀢𑀻𑀢𑀺 𑀖𑀦𑁄, 𑀳𑀲𑁆𑀲 𑀖𑁄. 𑀚𑀮𑀥𑀸𑀭𑀁 𑀥𑀸𑀭𑁂𑀢𑀻𑀢𑀺 𑀥𑀸𑀭𑀸𑀥𑀭𑁄. 𑀚𑀻𑀯𑀦𑀁 𑀚𑀮𑀁 𑀫𑀽𑀢𑀁 𑀩𑀦𑁆𑀥𑀫𑀦𑁂𑀦𑁂𑀢𑀺 𑀚𑀻𑀫𑀽𑀢𑁄, 𑀯𑀦𑀲𑀤𑁆𑀤𑀮𑁄𑀧𑁄, 𑀮𑁄𑀓𑀸𑀦𑀁 𑀯𑀸 𑀚𑀻𑀯𑀺𑀢𑀁 𑀫𑀼𑀦𑀸𑀢𑀺 𑀩𑀦𑁆𑀥𑀢𑀻𑀢𑀺 𑀚𑀻𑀫𑀽𑀢𑁄, 𑀯𑀺𑀢𑀮𑁄𑀧𑁄, 𑀚𑀻𑀯𑀺𑀢𑀲𑁆𑀲 𑀚𑀻 𑀆𑀤𑁂𑀲𑁄 𑀯𑀸 [𑀧𑀸𑀡𑀺𑀦𑀺 𑁬.𑁩.𑁧𑁦𑁯; 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸 𑁧.𑁪𑁭; 𑀦𑀻𑀢𑀺-𑀲𑀼𑀢𑁆𑀢 𑁧𑁩𑁪𑁦, 𑁧𑁩𑁪𑁩]. 𑀏𑀯𑀁 𑀅𑀜𑁆𑀜𑀢𑁆𑀭. 𑀯𑀸𑀭𑀺𑀁 𑀯𑀳𑀢𑀻𑀢𑀺 𑀯𑀸𑀭𑀺𑀯𑀸𑀳𑁄. 𑀅𑀫𑁆𑀩𑀼𑀁 𑀤𑀤𑀸𑀢𑀻𑀢𑀺 𑀅𑀫𑁆𑀩𑀼𑀤𑁄. 𑀆𑀧𑀁 𑀪𑀭𑀢𑀻𑀢𑀺 𑀅𑀩𑁆𑀪𑀁, 𑀓𑁆𑀯𑀺, 𑀧𑀲𑁆𑀲 𑀩𑁄.

𑀢𑀺𑀓𑀁 𑀯𑀼𑀝𑁆𑀞𑀺𑀬𑀁. 𑀯𑀲𑁆𑀲𑀢𑀺 𑀲𑀺𑀜𑁆𑀘𑀢𑀻𑀢𑀺 𑀯𑀲𑁆𑀲𑀁, 𑀯𑀲𑁆𑀲 𑀲𑁂𑀘𑀦𑁂. 𑀏𑀯𑀁 𑀯𑀲𑁆𑀲𑀦𑀯𑀼𑀝𑁆𑀞𑀺𑀬𑁄.

𑀧𑀜𑁆𑀘𑀓𑀁 𑀯𑀺𑀚𑁆𑀚𑀼𑀬𑀁. 𑀲𑀢𑀢𑀁 𑀈𑀭𑀢𑀺 𑀓𑀫𑁆𑀧𑀢𑀻𑀢𑀺 𑀲𑀢𑁂𑀭𑁄, 𑀢𑀮𑁄𑀧𑁄, 𑀲𑁄 𑀏𑀯 𑀲𑀢𑁂𑀭𑀺𑀢𑀸. 𑀔𑀡𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀅𑀓𑁆𑀔𑀡𑀸. 𑀓𑀼𑀝𑀺𑀮𑀁 𑀅𑀘𑀺𑀭𑀝𑁆𑀞𑀸𑀬𑀺𑀢𑀢𑁆𑀢𑀸 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀚𑀯𑀢𑀻𑀢𑀺 𑀯𑀺𑀚𑁆𑀚𑀼. 𑀯𑀺𑀚𑁆𑀚𑁄𑀢𑀢𑀻𑀢𑀺 𑀯𑀺𑀚𑁆𑀚𑀼𑀢𑀸. 𑀅𑀘𑀺𑀭𑀁 𑀧𑀪𑀸 𑀬𑀲𑁆𑀲 𑀅𑀘𑀺𑀭𑀧𑁆𑀧𑀪𑀸.

𑁪𑁯. 𑀘𑀢𑀼𑀓𑁆𑀓𑀁 𑀫𑁂𑀖𑀦𑀸𑀤𑁂. 𑀫𑁂𑀖𑀸𑀦𑀁 𑀦𑀸𑀤𑁄 𑀫𑁂𑀖𑀦𑀸𑀤𑁄. 𑀥𑀦𑀻𑀬𑀢𑁂 𑀥𑀦𑀺𑀢𑀁[𑀣𑀦𑀺𑀢𑀁 (𑀲𑀻.)], 𑀥𑀦 𑀲𑀤𑁆𑀤𑁂. 𑀕𑀚𑁆𑀚𑀦𑀁 𑀕𑀚𑁆𑀚𑀺𑀢𑀁, 𑀕𑀚𑁆𑀚 𑀲𑀤𑁆𑀤𑁂. 𑀭𑀲𑀻𑀬𑀢𑁂 𑀭𑀲𑀺𑀢𑀁. 𑀆𑀤𑀺𑀦𑀸 𑀳𑀭𑀸𑀤𑀸𑀤𑀺 [𑀲𑀩𑁆𑀩𑀢𑁆𑀭 𑀦𑀧𑀼𑀁𑀲𑀓𑁂𑀪𑀸𑀯𑁂 𑀢𑁄, 𑀆𑀤𑀺𑀦𑀸 𑀲𑁆𑀯𑀦𑀺𑀢𑀥𑀦𑀺𑀢𑀸𑀤𑀬𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸), 𑀆𑀤𑀺𑀦𑀸 𑀥𑀦𑀺𑀢𑀳𑀭𑀸𑀤𑀭𑀸𑀲𑀸𑀤𑀬𑁄 (𑀩𑁆𑀬𑀸𑀔𑁆𑀬𑀸𑀲𑀼𑀥𑀸𑀝𑀻𑀓𑀸)]. 𑀤𑁆𑀯𑀬𑀁 𑀲𑀓𑁆𑀓𑀥𑀦𑀼𑀫𑁆𑀳𑀺. 𑀇𑀦𑁆𑀤𑀲𑁆𑀲 𑀆𑀯𑀼𑀥𑀁 𑀥𑀦𑀼 𑀘 𑀇𑀦𑁆𑀤𑀸𑀯𑀼𑀥𑀁, 𑀇𑀦𑁆𑀤𑀥𑀦𑀼 𑀘. 𑀯𑀸𑀢𑁂𑀦 𑀔𑀺𑀢𑁆𑀢𑀫𑀫𑁆𑀩𑀼 𑀯𑀸𑀢𑀓𑁆𑀔𑀺𑀢𑁆𑀢𑀫𑁆𑀩𑀼, 𑀩𑀺𑀦𑁆𑀤𑀼. 𑀲𑀻𑀢𑀁 𑀓𑀭𑁄𑀢𑀻𑀢𑀺 𑀲𑀻𑀓𑀭𑁄, 𑀲𑀺𑀜𑁆𑀘𑀢𑀻𑀢𑀺 𑀯𑀸 𑀲𑀻𑀓𑀭𑁄, 𑀘𑀲𑁆𑀲 𑀓𑁄, 𑀅𑀭𑁄 𑀘, 𑀯𑀸𑀢𑀯𑀲𑁂𑀦 𑀯𑀸 𑀢𑀢𑁄 𑀢𑀢𑁄 𑀲𑀭𑀢𑀻𑀢𑀺 𑀲𑀻𑀓𑀭𑁄, 𑀅𑀲𑁆𑀲 𑀈, 𑀫𑀚𑁆𑀛𑁂 𑀓𑀸𑀕𑀫𑁄 𑀘.

𑁫𑁦. 𑀢𑀺𑀓𑀁 𑀚𑀮𑀥𑀸𑀭𑀸𑀬𑀁. 𑀯𑁂𑀕𑀢𑁄 𑀚𑀮𑀥𑀸𑀭𑀸𑀦𑀁 𑀲𑀁 𑀪𑀼𑀲𑀁 𑀧𑀢𑀦𑀁 𑀆𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀁 𑀲𑀭𑀢𑀻𑀢𑀺 𑀆𑀲𑀸𑀭𑁄. 𑀯𑁂𑀕𑀁 𑀥𑀸𑀭𑁂𑀢𑀻𑀢𑀺 𑀥𑀸𑀭𑀸. 𑀅𑀥𑁄 𑀧𑀢𑀢𑀻𑀢𑀺 𑀲𑀫𑁆𑀧𑀸𑀢𑁄, 𑀲𑀁𑀲𑀤𑁆𑀤𑁄 𑀅𑀥𑁄𑀪𑀸𑀕𑁂 [𑀯𑁂𑀕𑀢𑁄 𑀚𑀮𑀥𑀸𑀭𑀸𑀦𑀁 𑀲𑀫𑁆𑀪𑀽𑀬 𑀧𑀢𑀦𑀁 𑀥𑀸𑀭𑀸𑀲𑀫𑁆𑀧𑀸𑀢𑁄, 𑀲𑀭 𑀕𑀢𑀺𑀬𑀁 𑀖𑀉 𑀇𑀢𑀺 𑀆𑀲𑀸𑀭𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. 𑀤𑁆𑀯𑀬𑀁 𑀯𑀲𑁆𑀲𑁄𑀧𑀮𑁂. 𑀓𑀭𑁂𑀦 𑀳𑀢𑁆𑀣𑁂𑀦 𑀕𑀬𑁆𑀳𑀼𑀧𑀕𑀢𑁆𑀢𑀸 𑀓𑀭𑀓𑀸, 𑀚𑀮𑀁 𑀧𑀺𑀡𑁆𑀟𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀓𑀸, ‘‘𑀯𑀲𑁆𑀲𑁄𑀧𑀮𑁂 𑀢𑀼 𑀓𑀭𑀓𑀸, 𑀓𑀭𑀓𑁄𑀧𑀺 𑀘 𑀤𑀺𑀲𑁆𑀲𑀢𑁂’’𑀢𑀺 𑀭𑀼𑀤𑁆𑀤𑁄, 𑀓𑀭𑀲𑀤𑁆𑀤𑁄𑀢𑁆𑀭. ‘‘𑀓𑀭𑁄 𑀯𑀲𑁆𑀲𑁄𑀧𑀮𑁂 𑀧𑀸𑀡𑀺-𑀲𑁄𑀡𑁆𑀟𑀸𑀧𑀘𑁆𑀘𑀸𑀬𑀭𑀁𑀲𑀺𑀲𑀽’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀖𑀦𑀢𑁄, 𑀖𑀦𑀓𑀸𑀮𑁂 𑀯𑀸 𑀲𑀜𑁆𑀚𑀸𑀢𑀁 𑀉𑀧𑀮𑀁 𑀲𑀺𑀮𑀸 𑀖𑀦𑁄𑀧𑀮𑀁. 𑀤𑀼𑀝𑁆𑀞𑀼 𑀤𑀺𑀦𑀁 𑀤𑀼𑀤𑁆𑀤𑀺𑀦𑀁, 𑀅𑀬𑀁 𑀤𑀼𑀤𑁆𑀤𑀺𑀦𑀲𑀤𑁆𑀤𑁄 𑀫𑁂𑀖𑀘𑁆𑀙𑀦𑁆𑀦𑀸𑀳𑁂 𑀯𑀢𑁆𑀢𑀢𑀺, 𑀅𑀲𑁄𑀪𑀦𑀢𑁆𑀣𑁄𑀧𑁆𑀬𑀢𑁆𑀣𑀺 𑀤𑀼𑀤𑁆𑀤𑀺𑀦𑀲𑀤𑁆𑀤𑁄, 𑀅𑀕𑀼𑀡𑀯𑀘𑀦𑀢𑀸𑀬𑀁 𑀯𑀸𑀘𑁆𑀘𑀮𑀺𑀗𑁆𑀕𑁄.

𑁫𑁧-𑁫𑁨. 𑀙𑀓𑁆𑀓𑀁 𑀢𑀺𑀭𑁄𑀥𑀸𑀦𑁂. 𑀥𑀭 𑀆𑀯𑀭𑀡𑁂, 𑀅𑀧𑀸𑀤𑀺𑀧𑀼𑀩𑁆𑀩𑁄. 𑀅𑀧𑀺𑀥𑀭𑀢𑀺 𑀆𑀯𑀼𑀡𑁄𑀢𑀻𑀢𑀺 𑀧𑀺𑀥𑀸𑀦𑀁, 𑀅𑀮𑁄𑀧𑁄. 𑀅𑀧𑀥𑀭𑀢𑀻𑀢𑀺 𑀅𑀧𑀥𑀸𑀭𑀡𑀁. 𑀢𑀺𑀭𑁄 𑀥𑀭𑀢𑀺 𑀧𑀺𑀤𑀳𑀢𑀻𑀢𑀺 𑀢𑀺𑀭𑁄𑀥𑀸𑀦𑀁. 𑀅𑀦𑁆𑀢𑀭𑀁 𑀥𑀭𑀢𑀻𑀢𑀺 𑀅𑀦𑁆𑀢𑀭𑀥𑀸𑀦𑀁, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄. 𑀅𑀧𑀺𑀥𑀭𑀢𑀻𑀢𑀺 𑀅𑀧𑀺𑀥𑀸𑀦𑀁. 𑀏𑀢𑁆𑀣 𑀘 𑀅𑀧𑀸𑀤𑀺𑀉𑀧𑀲𑀕𑁆𑀕𑀸 𑀥𑀸𑀢𑀼𑀦𑁄 𑀆𑀯𑀭𑀡𑀢𑁆𑀣𑀚𑁄𑀢𑀓𑀸. 𑀙𑀸𑀤𑀬𑀢𑀻𑀢𑀺 𑀙𑀸𑀤𑀦𑀁. 𑀩𑁆𑀬𑀯𑀥𑀸, 𑀅𑀦𑁆𑀢𑀭𑀥𑀺𑀇𑀘𑁆𑀘𑀸𑀤𑀬𑁄𑀧𑀺 𑀢𑀺𑀭𑁄𑀥𑀸𑀦𑁂.

𑀲𑀸𑀤𑁆𑀥𑀧𑀚𑁆𑀚𑁂𑀦 𑀘𑀦𑁆𑀤𑀲𑁆𑀲 𑀦𑀸𑀫𑀸𑀦𑀺. 𑀇𑀦𑁆𑀤𑀢𑀺 𑀦𑀓𑁆𑀔𑀢𑁆𑀢𑀸𑀦𑀁 𑀧𑀭𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀢𑀻𑀢𑀺 𑀇𑀦𑁆𑀤𑀼. 𑀘𑀦𑁆𑀤𑀢𑀺 𑀳𑀺𑀮𑀸𑀤𑀬𑀢𑀺 𑀲𑀼𑀔𑀬𑀢𑀺 𑀧𑀚𑀦𑁆𑀢𑀺 𑀘𑀦𑁆𑀤𑁄. 𑀦𑀓𑁆𑀔𑀢𑁆𑀢𑀸𑀦𑀁 𑀭𑀸𑀚𑀸 𑀦𑀓𑁆𑀔𑀢𑁆𑀢𑀭𑀸𑀚𑀸. 𑀉𑀫𑀸 𑀓𑀦𑁆𑀢𑀺, 𑀢𑀸𑀬 𑀲𑀳 𑀯𑀺𑀚𑁆𑀚𑀢𑀻𑀢𑀺 𑀲𑁄𑀫𑁄, 𑀲𑀼𑀔𑀁 𑀅𑀪𑀺𑀲𑁆𑀲𑀯𑀢𑀻𑀢𑀺 𑀯𑀸 𑀲𑁄𑀫𑁄, 𑀫𑀧𑀘𑁆𑀘𑀬𑁄. 𑀦𑀺𑀲𑀁 𑀭𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀢𑁆𑀣 𑀯𑀸 𑀓𑀭𑁄 𑀭𑀁𑀲𑀺 𑀏𑀢𑀲𑁆𑀲 𑀦𑀺𑀲𑀸𑀓𑀭𑁄. 𑀅𑀦𑁆𑀥𑀓𑀸𑀭𑀁 𑀉𑀲𑁂𑀦𑁆𑀢𑀺 𑀤𑀳𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀻𑀢𑀺 𑀑𑀲𑀸, 𑀭𑀁𑀲𑀬𑁄, 𑀢𑁂 𑀏𑀢𑁆𑀣 𑀥𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀑𑀲𑀥𑀺, 𑀢𑀸𑀭𑀸𑀯𑀺𑀲𑁂𑀲𑁄, 𑀢𑀲𑁆𑀲 𑀈𑀲𑁄 𑀧𑀢𑀺 𑀑𑀲𑀥𑀻𑀲𑁄. 𑀳𑀺𑀫𑁄 𑀲𑀻𑀢𑀮𑁄 𑀭𑀁𑀲𑀺 𑀬𑀲𑁆𑀲 𑀳𑀺𑀫𑀭𑀁𑀲𑀺. 𑀲𑀲𑁄 𑀅𑀗𑁆𑀓𑁄 𑀮𑀓𑁆𑀔𑀡𑀁 𑀬𑀲𑁆𑀲 𑀲𑀲𑀗𑁆𑀓𑁄. 𑀘𑀦𑁆𑀤𑀁 𑀓𑀧𑁆𑀧𑀽𑀭𑀁 𑀫𑀸𑀢𑀺 𑀲𑀤𑀺𑀲𑀁 𑀦𑀬𑀢𑀻𑀢𑀺 𑀘𑀦𑁆𑀤𑀺𑀫𑀸. 𑀇𑀓𑀸𑀭𑀸𑀤𑁂𑀲𑁄. 𑀲𑀲𑀮𑀓𑁆𑀔𑀡𑀫𑁂𑀢𑁆𑀣 𑀅𑀢𑁆𑀣𑀺 𑀲𑀲𑀻. 𑀲𑀲𑀢𑀺 𑀯𑀸 𑀳𑀺𑀁𑀲𑀢𑀺 𑀉𑀡𑁆𑀳𑀕𑀼𑀡𑀦𑁆𑀢𑀺 𑀲𑀲𑀻, 𑀈𑀧𑀘𑁆𑀘𑀬𑁄 𑀢𑀤𑀼𑀧𑀮𑀓𑁆𑀔𑀺𑀢𑁂 𑀢𑀤𑀼𑀧𑀘𑀸𑀭𑀁. 𑀲𑀻𑀢𑀸 𑀭𑀁𑀲𑀬𑁄 𑀬𑀲𑁆𑀲𑀢𑁆𑀣𑀻𑀢𑀺 𑀲𑀻𑀢𑀭𑀁𑀲𑀺. 𑀦𑀺𑀲𑀸𑀬 𑀭𑀢𑁆𑀢𑀺𑀬𑀸 𑀦𑀸𑀣𑁄 𑀢𑀤𑀸𑀮𑀗𑁆𑀓𑀸𑀭𑀪𑀸𑀯𑀢𑁄𑀢𑀺 𑀦𑀺𑀲𑀸𑀦𑀸𑀣𑁄. 𑀉𑀴𑀽𑀦𑀁 𑀢𑀸𑀭𑀸𑀦𑀁 𑀭𑀸𑀚𑀸 𑀉𑀴𑀼𑀭𑀸𑀚𑀸. 𑀫𑀸𑀢𑀺 𑀅𑀢𑁆𑀢𑀸𑀦𑀁 𑀓𑀧𑁆𑀧𑀽𑀭𑁂𑀦 𑀲𑀤𑀺𑀲𑀁 𑀓𑀭𑁄𑀢𑀻𑀢𑀺 𑀫𑀸, 𑀫𑀸𑀲𑀤𑁆𑀤𑁄𑀬𑀁 𑀧𑀼𑀫𑁂, 𑀢𑀁𑀲𑀳𑀘𑀭𑀡𑀢𑁄 𑀉𑀴𑀼𑀭𑀸𑀚𑀸𑀤𑀬𑁄𑀧𑀺. 𑀳𑀺𑀫𑀁𑀲𑀼, 𑀓𑀼𑀫𑀼𑀤𑀩𑀦𑁆𑀥𑀼, 𑀯𑀺𑀥𑀼, 𑀲𑀼𑀥𑀁𑀲𑀼, 𑀲𑀼𑀩𑁆𑀪𑀁𑀲𑀼, 𑀦𑀺𑀲𑀸𑀧𑀢𑀺, 𑀫𑀺𑀕𑀗𑁆𑀓𑁄, 𑀓𑀮𑀸𑀦𑀺𑀥𑀺, 𑀤𑁆𑀯𑀺𑀚𑀭𑀸𑀚𑁄, 𑀲𑀲𑀥𑀭𑁄, 𑀦𑀓𑁆𑀔𑀢𑁆𑀢𑁂𑀲𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀘𑀦𑁆𑀤𑀲𑁆𑀲 𑀦𑀸𑀫𑀸𑀦𑀺.