𑁪. 𑀅𑀩𑁆𑀬𑀬𑀯𑀕𑁆𑀕𑀯𑀡𑁆𑀡𑀦𑀸

𑁧𑁧𑁩𑁬-𑁧𑁧𑁩𑁭. 𑀘𑀺𑀭𑀲𑁆𑀲𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘𑀺𑀭𑀢𑁆𑀣𑀓𑀸. 𑀘𑀺𑀭𑀸𑀬, 𑀘𑀺𑀭𑀸 𑀘𑀸𑀢𑁆𑀭. 𑀲𑀳𑀸𑀤𑀬𑁄𑀧𑀺 𑀘𑀢𑁆𑀢𑀸𑀭𑁄 𑀲𑀳𑀢𑁆𑀣𑀸. 𑀧𑀼𑀦𑀧𑁆𑀧𑀼𑀦𑀫𑀸𑀤𑀬𑁄 𑀧𑀜𑁆𑀘 𑀧𑀼𑀦𑀧𑁆𑀧𑀼𑀦𑀢𑁆𑀣𑀸. 𑀯𑀺𑀦𑀸𑀤𑀬𑁄 𑀧𑀜𑁆𑀘 𑀯𑀚𑁆𑀚𑀦𑀢𑁆𑀣𑀸.

𑁧𑁧𑁩𑁮. 𑀩𑀮𑀯𑀁 𑀲𑀼𑀝𑁆𑀞𑀼 𑀅𑀢𑀻𑀯 𑀓𑀺𑀫𑀼𑀢 𑀲𑀼 𑀅𑀢𑀺 𑀏𑀢𑁂 𑀙 𑀅𑀢𑀺𑀲𑀬𑀢𑁆𑀣𑁂. 𑀧𑀲𑀁𑀲𑀸𑀬𑀜𑁆𑀘 𑀲𑀼𑀝𑁆𑀞𑀼. 𑀧𑀜𑁆𑀳𑁂𑀧𑀺 𑀓𑀺𑀫𑀼𑀢. 𑀆𑀳𑁄 𑀓𑀺𑀁 𑀓𑀺𑀫𑀼 𑀉𑀤𑀸𑀳𑀼 𑀓𑀺𑀫𑀼𑀢 𑀉𑀤 𑀏𑀢𑁂 𑀙 𑀯𑀺𑀓𑀧𑁆𑀧𑁂 𑀯𑀺𑀢𑀓𑁆𑀓𑁂. 𑀢𑀢𑁆𑀭 𑀆𑀳𑁄𑀲𑀤𑁆𑀤𑁄 𑀤𑀻𑀖𑀸𑀤𑀺. ‘‘𑀤𑀺𑀝𑁆𑀞𑁄 𑀆𑀳𑁄 𑀉𑀤𑀸𑀳𑀼 𑀘, 𑀯𑀺𑀓𑀧𑁆𑀧𑀢𑁆𑀣𑁂 𑀯𑀺𑀪𑀸𑀯𑀦𑁂’’𑀢𑀺 𑀳𑀺 𑀪𑀸𑀕𑀼𑀭𑀺. 𑀔𑀸𑀡𑀼𑀭𑀬𑀫𑀸𑀳𑁄 𑀧𑀼𑀭𑀺𑀲𑁄. 𑀭𑀼𑀤𑁆𑀤𑁄 𑀢𑀼 𑀭𑀲𑁆𑀲𑀸𑀤𑀺𑀫𑀸𑀳 ‘‘𑀇𑀲𑁆𑀲𑀭𑁂𑀧𑁆𑀬𑀥𑀺𑀓𑁂𑀧𑀺 𑀘, 𑀯𑀺𑀓𑀧𑁆𑀧𑁂𑀯𑀺𑀫𑁆𑀳𑀬𑁂𑀧𑁆𑀬𑀳𑁄’’𑀢𑀺. 𑀓𑀺𑀫𑀼𑀲𑀤𑁆𑀤𑁄 𑀭𑀲𑁆𑀲𑀦𑁆𑀢𑁄. 𑀓𑀺𑀫𑀸𑀬𑀁 𑀔𑀸𑀡𑀼, 𑀓𑀺𑀫𑀼 𑀧𑀼𑀭𑀺𑀲𑁄. 𑀉𑀤𑀲𑀤𑁆𑀤𑁄 𑀭𑀲𑁆𑀲𑀸𑀤𑀺. 𑀥𑀽𑀫𑁄𑀬𑀫𑁄𑀤 𑀓𑀸𑀧𑁄𑀢𑀁, 𑀲𑀫𑀽𑀳𑀢𑁆𑀣𑁂 𑀡𑁄. 𑀓𑀺𑀜𑁆𑀘𑀲𑀤𑁆𑀤𑁄𑀧𑀺 𑀯𑀺𑀓𑀧𑁆𑀧𑁂. 𑀓𑀺𑀫𑀼𑀢𑀲𑀤𑁆𑀤𑁄 𑀅𑀢𑀺𑀲𑀬𑁂𑀢𑀺 𑀯𑀼𑀢𑁆𑀢𑁄.

𑁧𑁧𑁩𑁯. 𑀪𑁄 𑀅𑀭𑁂 𑀅𑀫𑁆𑀪𑁄 𑀳𑀫𑁆𑀪𑁄 𑀭𑁂 𑀚𑁂 𑀅𑀗𑁆𑀕 𑀆𑀯𑀼𑀲𑁄 𑀳𑁂 𑀳𑀭𑁂 𑀏𑀢𑁂 𑀤𑀲 𑀅𑀯𑁆𑀳𑀸𑀦𑁂. 𑀳𑀁 𑀳𑁄𑀲𑀤𑁆𑀤𑀸𑀧𑁆𑀬𑀢𑁆𑀭. 𑀓𑀣𑀁 𑀓𑀺𑀁𑀲𑀼 𑀦𑀦𑀼 𑀓𑀘𑁆𑀘𑀺 𑀦𑀼 𑀓𑀺𑀁 𑀏𑀢𑁂 𑀙 𑀲𑀫𑀸 𑀲𑀫𑀸𑀦𑀢𑁆𑀣𑀸.

𑁧𑁧𑁪𑁦. 𑀅𑀥𑀼𑀦𑀸, 𑀏𑀢𑀭𑀳𑀺, 𑀇𑀤𑀸𑀦𑀺, 𑀲𑀫𑁆𑀧𑀢𑀺 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀇𑀤𑀸𑀦𑀻𑀢𑁆𑀬𑀢𑁆𑀣𑁂. 𑀅𑀜𑁆𑀜𑀤𑀢𑁆𑀣𑀼 𑀢𑀕𑁆𑀖 𑀲𑀲𑀓𑁆𑀓𑀁 𑀅𑀤𑁆𑀥𑀸 𑀓𑀸𑀫𑀁 𑀚𑀸𑀢𑀼 𑀯𑁂 𑀳𑀯𑁂 𑀏𑀢𑁂 𑀅𑀝𑁆𑀞 𑀏𑀓𑀁𑀲𑁂 𑀏𑀓𑀁𑀲𑀢𑁆𑀣𑁂.

𑁧𑁧𑁪𑁧. 𑀬𑀸𑀯𑀢𑀸𑀤𑀬𑁄 𑀲𑀢𑁆𑀢 𑀧𑀭𑀺𑀘𑁆𑀙𑁂𑀤𑀯𑀸𑀘𑀓𑀸. 𑀢𑀢𑁆𑀭 𑀬𑀸𑀯𑀢𑀸, 𑀬𑀸𑀯𑀸𑀢𑀺 𑀤𑁆𑀯𑁂 𑀅𑀦𑀺𑀬𑀫𑀧𑀭𑀺𑀘𑁆𑀙𑁂𑀤𑀢𑁆𑀣𑀯𑀸𑀘𑀓𑀸. 𑀢𑀸𑀯𑀢𑀸, 𑀢𑀸𑀯, 𑀏𑀢𑁆𑀢𑀸𑀯𑀢𑀸𑀢𑀺 𑀦𑀺𑀬𑀫𑀧𑀭𑀺𑀘𑁆𑀙𑁂𑀤𑀢𑁆𑀣𑀯𑀸𑀘𑀓𑀸. 𑀓𑀺𑀢𑁆𑀢𑀸𑀯𑀢𑀸, 𑀓𑀻𑀯𑁂𑀢𑀺 𑀧𑀭𑀺𑀘𑁆𑀙𑁂𑀤𑀧𑀼𑀘𑁆𑀙𑀦𑀢𑁆𑀣𑀯𑀸𑀘𑀓𑀸.

𑁧𑁧𑁪𑁨-𑁧𑁧𑁪𑁩. 𑀬𑀣𑀸 𑀢𑀣𑀸 𑀬𑀣𑁂𑀯 𑀏𑀯𑀁 𑀬𑀣𑀸𑀦𑀸𑀫 𑀬𑀣𑀸𑀳𑀺 𑀲𑁂𑀬𑁆𑀬𑀣𑀸𑀧𑀺 𑀏𑀯𑀫𑁂𑀯𑀁 𑀯𑀸 𑀢𑀣𑁂𑀯 𑀬𑀣𑀸𑀧𑀺 𑀏𑀯𑀫𑁆𑀧𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀬𑀣𑀭𑀺𑀯 𑀬𑀣𑀸 𑀘 𑀯𑀺𑀬 𑀢𑀣𑀭𑀺𑀯 𑀇𑀘𑁆𑀘𑁂𑀢𑁂 𑀲𑀢𑁆𑀢𑀭𑀲 𑀧𑀝𑀺𑀪𑀸𑀕𑀢𑁆𑀣𑁂 𑀲𑀤𑀺𑀲𑀢𑁆𑀣𑁂 𑀪𑀯𑀦𑁆𑀢𑀺.

𑁧𑁧𑁪𑁪. 𑀲𑀁, 𑀲𑀸𑀫𑀁, 𑀲𑀬𑀜𑁆𑀘𑁂𑀢𑀺 𑀢𑀬𑁄 𑀲𑀬𑀫𑀺𑀘𑁆𑀘𑀢𑁆𑀣𑁂. 𑀆𑀫 𑀲𑀸𑀳𑀼 𑀮𑀳𑀼 𑀑𑀧𑀸𑀬𑀺𑀓𑀁 𑀧𑀢𑀺𑀭𑀽𑀧𑀁 𑀲𑀸𑀥𑀼 𑀏𑀯𑀁 𑀏𑀢𑁂 𑀲𑀢𑁆𑀢 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂. 𑀆𑀫𑀦𑁆𑀢𑀸𑀧𑁆𑀬𑀢𑁆𑀭.

𑁧𑁧𑁪𑁫. 𑀬𑀫𑀸𑀤𑀬𑁄 𑀙 𑀓𑀸𑀭𑀡𑀢𑁆𑀣𑁂𑀲𑀺𑀬𑀼𑀁. 𑀘𑀦𑀲𑀤𑁆𑀤𑁄, 𑀘𑀺𑀲𑀤𑁆𑀤𑁄 𑀘𑀸𑀢𑀺 𑀤𑁆𑀯𑁂 𑀅𑀲𑀸𑀓𑀮𑁆𑀬𑁂 𑀅𑀲𑀓𑀮𑀢𑁆𑀣𑁂. 𑀓𑀤𑀸𑀘𑀦𑀁, 𑀓𑀤𑀸𑀘𑀻𑀢𑁆𑀬𑀸𑀤𑀺 𑀧𑀬𑁄𑀕𑁄. 𑀫𑀼𑀥𑀸𑀲𑀤𑁆𑀤𑁄 𑀦𑀺𑀧𑁆𑀨𑀮𑁂 𑀨𑀮𑀭𑀳𑀺𑀢𑁂, 𑀦𑀺𑀧𑁆𑀧𑀬𑁄𑀚𑀦𑁂𑀢𑁆𑀬𑀢𑁆𑀣𑁄. 𑀅𑀫𑀽𑀮𑁂𑀧𑀺 𑀘 𑀫𑀼𑀥𑀸.

𑁧𑁧𑁪𑁬. 𑀚𑀸𑀢𑀼𑀲𑀤𑁆𑀤𑁄 𑀏𑀓𑀁𑀲𑁂𑀧𑀺. 𑀲𑀩𑁆𑀩𑀢𑁄, 𑀲𑀫𑀦𑁆𑀢𑀢𑁄, 𑀧𑀭𑀺𑀢𑁄, 𑀲𑀫𑀦𑁆𑀢𑀸 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀢𑀼𑀮𑁆𑀬𑀢𑁆𑀣𑀸.

𑁧𑁧𑁪𑁭. 𑀦 𑀅 𑀦𑁄 𑀫𑀸 𑀅𑀮𑀁 𑀦𑀳𑀺 𑀇𑀘𑁆𑀘𑁂𑀢𑁂 𑀙 𑀦𑀺𑀲𑁂𑀥𑁂. 𑀘𑁂, 𑀲𑀘𑁂, 𑀬𑀤𑀻𑀢𑀺 𑀢𑀬𑁄 𑀬𑀤𑁆𑀬𑀢𑁆𑀣𑁂. 𑀲𑀤𑁆𑀥𑀁𑀲𑀤𑁆𑀤𑁄 𑀅𑀦𑀼𑀓𑀽𑀮𑀢𑁆𑀣𑁂. 𑀦𑀢𑁆𑀢𑀁 𑀤𑁄𑀲𑁄 𑀘 𑀭𑀚𑀦𑀻𑀬𑀫𑀺𑀘𑁆𑀘𑀢𑁆𑀣𑁂. 𑀤𑀺𑀯𑀸𑀲𑀤𑁆𑀤𑁄 𑀅𑀳𑁂 𑀅𑀳𑀦𑀻𑀢𑁆𑀬𑀢𑁆𑀣𑁂.

𑁧𑁧𑁪𑁮. 𑀈𑀲𑀁, 𑀓𑀺𑀜𑁆𑀘𑀺, 𑀫𑀦𑀁 𑀇𑀘𑁆𑀘𑁂𑀢𑁂 𑀅𑀧𑁆𑀧𑀢𑁆𑀣𑁂. 𑀅𑀢𑀓𑁆𑀓𑀺𑀢𑁂 𑀅𑀯𑀺𑀢𑀓𑁆𑀓𑀺𑀢𑁂. 𑀩𑀮𑀓𑁆𑀓𑀸𑀭𑁂 𑀢𑀼 𑀲𑀸𑀳𑀲𑀁. 𑀅𑀕𑁆𑀕𑀢𑁄, 𑀧𑀼𑀭𑀢𑁄 𑀘 𑀧𑀼𑀭𑁂𑀇𑀘𑁆𑀘𑀢𑁆𑀣𑁂. 𑀧𑁂𑀘𑁆𑀘 𑀅𑀫𑀼𑀢𑁆𑀭𑀲𑀤𑁆𑀤𑀸 𑀪𑀯𑀦𑁆𑀢𑀭𑁂.

𑁧𑁧𑁪𑁯. 𑀅𑀳𑁄 𑀘 𑀳𑀺 𑀘𑀸𑀢𑀺 𑀏𑀢𑁂 𑀯𑀺𑀫𑁆𑀳𑀬𑁂. 𑀯𑀺𑀓𑀧𑁆𑀧𑁂𑀧𑀺 𑀅𑀳𑁄. 𑀲𑀫𑁆𑀫𑁄𑀤𑁂𑀧𑀺 𑀳𑀺. 𑀢𑀼𑀡𑁆𑀳𑀻𑀲𑀤𑁆𑀤𑁄 𑀫𑁄𑀦𑁂 𑀅𑀪𑀸𑀲𑀦𑁂. 𑀆𑀯𑀺, 𑀧𑀸𑀢𑀼 𑀘 𑀧𑀸𑀓𑀝𑀢𑁆𑀣𑁂. 𑀲𑀚𑁆𑀚𑀼 𑀲𑀧𑀤𑀺𑀲𑀤𑁆𑀤𑀸 𑀢𑀗𑁆𑀔𑀡𑁂𑀢𑁆𑀬𑀢𑁆𑀣𑁂.

𑁧𑁧𑁫𑁦. 𑀲𑀼𑀤𑀁 𑀔𑁄 𑀅𑀲𑁆𑀲𑀼 𑀬𑀕𑁆𑀖𑁂 𑀯𑁂 𑀳𑀸𑀤𑀬𑁄 𑀳𑀓𑀸𑀭𑀸𑀤𑀬𑁄 𑀘 𑀧𑀤𑀧𑀽𑀭𑀡𑁂 𑀲𑀺𑀬𑀼𑀁. 𑀅𑀦𑁆𑀢𑀭𑁂𑀦, 𑀅𑀦𑁆𑀢𑀭𑀸, 𑀅𑀦𑁆𑀢𑁄 𑀘𑀸𑀢𑀺 𑀏𑀢𑁂 𑀅𑀩𑁆𑀪𑀦𑁆𑀢𑀭𑁂𑀇𑀘𑁆𑀘𑀢𑁆𑀣𑁂. 𑀅𑀯𑀲𑁆𑀲𑀁, 𑀦𑀽𑀦 𑀘 𑀦𑀺𑀘𑁆𑀙𑀬𑀢𑁆𑀣𑁂.

𑁧𑁧𑁫𑁧. 𑀲𑀁𑀲𑀤𑁆𑀤𑁄 𑀤𑀺𑀝𑁆𑀞𑀸𑀲𑀤𑁆𑀤𑁄 𑀆𑀦𑀦𑁆𑀤𑀢𑁆𑀣𑁂. 𑀲𑀫𑀼𑀧𑀚𑁄, 𑀲𑀁𑀧𑁆𑀬𑀢𑁆𑀭. 𑀓𑀸𑀫𑀧𑁆𑀧𑀯𑁂𑀤𑀦𑁂 𑀇𑀘𑁆𑀙𑀸𑀬 𑀅𑀓𑁆𑀔𑀸𑀦𑁂 𑀓𑀘𑁆𑀘𑀺 𑀚𑀻𑀯𑀢𑀺 𑀢𑁂 𑀫𑀸𑀢𑀸, 𑀫𑀫𑁂𑀤𑀫𑀪𑀺𑀫𑀢𑀫𑀺𑀘𑁆𑀘𑀢𑁆𑀣𑁂. 𑀉𑀲𑀽𑀬𑁄𑀧𑀕𑀫𑁂 𑀉𑀲𑀽𑀬𑀸𑀧𑀼𑀩𑁆𑀩𑀓𑁂 𑀉𑀧𑀕𑀫𑁂.

‘‘𑀓𑀸𑀫𑀸𑀦𑀼𑀫𑀢𑀺𑀬𑀁 𑀓𑀸𑀫𑁄,

𑀉𑀲𑀽𑀬𑁄𑀧𑀕𑀫𑁂𑀧𑀺 𑀘𑀸’’𑀢𑀺 𑀭𑀼𑀤𑁆𑀤𑁄.

𑀉𑀲𑀽𑀬𑁄𑀧𑀕𑀫𑀸𑀦𑀼𑀜𑁆𑀜𑀸𑀡𑁂𑀧𑀺𑀘𑀸𑀬𑀁 𑀅𑀢𑁆𑀣𑁄 𑀤𑀺𑀲𑁆𑀲𑀢𑁂.

𑁧𑁧𑁫𑁨-𑁧𑁧𑁫𑁩. 𑀬𑀣𑀸𑀢𑁆𑀢𑀦𑁆𑀢𑀺 𑀲𑀘𑁆𑀘𑀁. 𑀢𑀣𑀲𑁆𑀲 𑀅𑀦𑀢𑀺𑀓𑁆𑀓𑀫𑁄 𑀬𑀣𑀸𑀢𑀣𑀁, 𑀬𑀣𑀸𑀢𑁆𑀣𑁂 𑀅𑀩𑁆𑀬𑀬𑀻𑀪𑀸𑀯𑁄. 𑀢𑀣𑀲𑀤𑁆𑀤𑁄𑀬𑀁 𑀪𑀽𑀢𑀧𑀭𑀺𑀬𑀸𑀬𑁄. 𑀲𑀤𑀸𑀲𑀤𑁆𑀤𑁄, 𑀲𑀦𑀁𑀲𑀤𑁆𑀤𑁄 𑀘𑀸𑀢𑀺 𑀦𑀺𑀘𑁆𑀘𑁂. 𑀲𑀦𑀲𑀤𑁆𑀤𑁄𑀧𑁆𑀬𑀢𑁆𑀭. 𑀧𑀸𑀬𑁄, 𑀩𑀸𑀳𑀼𑀮𑁆𑀬𑀜𑁆𑀘 𑀲𑀫𑀸. 𑀧𑀜𑁆𑀘𑀓𑀁 𑀩𑀸𑀳𑁆𑀬𑁂. 𑀲𑀡𑀺𑀓𑀁𑀲𑀤𑁆𑀤𑁄 𑀅𑀲𑀻𑀖𑁂.

𑁧𑁧𑁫𑁪. 𑀲𑀫𑁆𑀫𑀸, 𑀲𑀼𑀝𑁆𑀞𑀽𑀢𑀺 𑀤𑁆𑀯𑁂 𑀅𑀪𑀺𑀥𑀸𑀦𑀸𑀦𑀺.

𑁧𑁧𑁫𑁫. 𑀲𑀸𑀬𑀁 𑀲𑀸𑀬𑁂 𑀲𑀸𑀬𑀦𑁆𑀳𑁂. 𑀅𑀢𑁆𑀭𑀸𑀳𑁂𑀢𑀺 𑀇𑀫𑀲𑁆𑀫𑀺𑀁 𑀅𑀳𑀦𑀺 𑀅𑀚𑁆𑀚𑀲𑀤𑁆𑀤𑁄.

𑁧𑁧𑁫𑁬. 𑀬𑀢𑁆𑀣𑀸𑀤𑀬𑁄 𑀢𑀬𑁄 𑀅𑀦𑀺𑀬𑀫𑀝𑁆𑀞𑀸𑀦𑀸𑀤𑀺𑀯𑀸𑀘𑀓𑀸. 𑀢𑀢𑁆𑀣𑀸𑀤𑀬𑁄 𑀦𑀺𑀬𑀫𑀝𑁆𑀞𑀸𑀦𑀸𑀤𑀺𑀯𑀸𑀘𑀓𑀸.

𑁧𑁧𑁫𑁭. 𑀲𑀫𑁆𑀫𑀼𑀔𑀸, 𑀆𑀯𑀺, 𑀧𑀸𑀢𑀼 𑀘 𑀲𑀫𑀸𑀦𑀢𑁆𑀣𑀸.

𑁧𑁧𑁫𑁮. 𑀅𑀧𑁆𑀧𑁂𑀯𑀸𑀤𑀬𑁄 𑀢𑀬𑁄 𑀲𑀁𑀲𑀬𑀢𑁆𑀣𑀫𑁆𑀳𑀺. 𑀇𑀢𑀺 𑀇𑀢𑁆𑀣𑀁 𑀏𑀯𑀁𑀲𑀤𑁆𑀤𑀸 𑀦𑀺𑀤𑀲𑁆𑀲𑀦𑁂 𑀯𑀢𑁆𑀢𑀦𑁆𑀢𑀺. 𑀓𑀣𑀜𑁆𑀘𑀺𑀲𑀤𑁆𑀤𑁄 𑀓𑀺𑀘𑁆𑀙𑀢𑁆𑀣𑁂.

𑁧𑁧𑁫𑁯. 𑀔𑁂𑀤𑁄 𑀔𑀺𑀦𑁆𑀦𑀢𑀸. 𑀧𑀘𑁆𑀘𑀓𑁆𑀔𑁂 𑀲𑀘𑁆𑀙𑀺𑀲𑀤𑁆𑀤𑁄. 𑀣𑀺𑀭𑁂, 𑀅𑀯𑀥𑀸𑀭𑀡𑁂 𑀘 𑀥𑀼𑀯𑀁. 𑀢𑀺𑀭𑁄 𑀢𑀺𑀭𑀺𑀬𑀁𑀲𑀤𑁆𑀤𑀸 𑀲𑀫𑀸. 𑀤𑀼𑀝𑁆𑀞𑀼𑀓𑀼𑀲𑀤𑁆𑀤𑀸 𑀓𑀼𑀘𑁆𑀙𑀸𑀬𑀁.

𑁧𑁧𑁬𑁦. 𑀆𑀲𑀺𑀝𑁆𑀞𑀢𑁆𑀣𑀫𑁆𑀳𑀺 𑀲𑀼𑀯𑀢𑁆𑀣𑀺. 𑀥𑀺𑀲𑀤𑁆𑀤𑁄 𑀦𑀺𑀦𑁆𑀤𑀸𑀬𑀁. 𑀓𑀼𑀳𑀺𑀜𑁆𑀘𑀦𑀸𑀤𑀬𑁄 𑀲𑀢𑁆𑀢 𑀞𑀸𑀦𑀸𑀤𑀺𑀧𑀼𑀘𑁆𑀙𑀦𑀢𑁆𑀣𑀸.

𑁧𑁧𑁬𑁧. 𑀇𑀳 𑀇𑀥 𑀅𑀢𑁆𑀭 𑀏𑀢𑁆𑀣 𑀅𑀢𑁆𑀣 𑀏𑀢𑁂 𑀑𑀓𑀸𑀲𑀢𑁆𑀣𑀸𑀤𑀺𑀯𑀸𑀘𑀓𑀸. 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑀸𑀤𑀺𑀓𑁂 𑀲𑀩𑁆𑀩𑀢𑁆𑀭𑀸𑀤𑀺𑀤𑁆𑀯𑀬𑀁. 𑀓𑀺𑀲𑁆𑀫𑀺𑀁 𑀓𑀸𑀮𑁂 𑀓𑀤𑀸. 𑀓𑀲𑁆𑀫𑀺𑀁 𑀓𑀸𑀮𑁂 𑀓𑀼𑀤𑀸𑀘𑀦𑀁.

𑁧𑁧𑁬𑁨-𑁧𑁧𑁬𑁩. 𑀯𑀺𑀪𑀢𑁆𑀬𑀦𑁆𑀢𑀦𑀸𑀫𑀲𑀭𑀸𑀔𑁆𑀬𑀸𑀢𑀧𑀢𑀺𑀭𑀽𑀧𑀓𑁂 𑀅𑀩𑁆𑀬𑀬𑁂 𑀤𑀲𑁆𑀲𑁂𑀢𑁆𑀯𑀸 𑀢𑀤𑀜𑁆𑀜𑀪𑀸𑀯𑁂 𑀅𑀩𑁆𑀬𑀬𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀆𑀤𑀺𑀓𑀫𑁆𑀫𑁂’’𑀇𑀘𑁆𑀘𑀸𑀤𑀺. 𑀢𑀢𑁆𑀭 𑀯𑀺𑀪𑀢𑁆𑀬𑀦𑁆𑀢𑀧𑀢𑀺𑀭𑀽𑀧𑀓𑀁 𑀬𑀣𑀸 𑁋 ‘‘𑀘𑀺𑀭𑀲𑁆𑀲𑀁, 𑀘𑀺𑀭𑀁, 𑀘𑀺𑀭𑁂𑀦𑀺’’𑀘𑁆𑀘𑀸𑀤𑀺. 𑀦𑀸𑀫𑀧𑀢𑀺𑀭𑀽𑀧𑀓𑀁 𑀬𑀣𑀸 𑁋 ‘‘𑀆𑀫, 𑀲𑀸𑀳𑀼, 𑀮𑀳𑀼, 𑀑𑀧𑀸𑀬𑀺𑀓’’𑀫𑀺𑀘𑁆𑀘𑀸𑀤𑀺. 𑀲𑀭𑀧𑀢𑀺𑀭𑀽𑀧𑀓𑀁 𑀬𑀣𑀸 𑁋 ‘‘𑀅’’-𑀇𑀘𑁆𑀘𑀸𑀤𑀺. 𑀆𑀔𑁆𑀬𑀸𑀢𑀧𑀢𑀺𑀭𑀽𑀧𑀓𑀁 𑀬𑀣𑀸 𑁋 ‘‘𑀅𑀢𑁆𑀣𑀺’’𑀇𑀘𑁆𑀘𑀸𑀤𑀺.

𑀲𑀫𑁆𑀪𑀯𑁄 𑀧𑀪𑀯𑁄. 𑀉𑀤𑀺𑀡𑁆𑀡𑁂 𑀧𑀯𑀼𑀤𑁆𑀥𑁂 𑀯𑀟𑁆𑀠𑀦𑁂. 𑀢𑀺𑀲 𑀧𑀻𑀡𑀦𑁂,𑀢𑀺, 𑀢𑀺𑀢𑁆𑀢𑀺. 𑀦𑀺𑀬𑁄𑀕𑁂 𑀦𑀺𑀬𑁄𑀚𑀦𑁂. 𑀅𑀕𑁆𑀕𑁂 𑀉𑀢𑁆𑀢𑀫𑁂. 𑀢𑀧𑁆𑀧𑀭𑁂 𑀢𑀧𑁆𑀧𑀥𑀸𑀦𑁂. 𑀲𑀗𑁆𑀕𑁂 𑀮𑀕𑁆𑀕𑀦𑁂. 𑀧𑀓𑀸𑀭𑁂 𑀲𑀤𑀺𑀲𑁂, 𑀪𑁂𑀤𑁂 𑀯𑀸. 𑀅𑀦𑁆𑀢𑁄𑀪𑀸𑀯𑁂 𑀧𑀓𑁆𑀔𑀺𑀢𑁆𑀢𑁂. 𑀯𑀺𑀬𑁄𑀕𑁂 𑀧𑀯𑀸𑀲𑁂. 𑀅𑀯𑀬𑀯𑁂 𑀧𑀤𑁂𑀲𑁂. 𑀥𑀺𑀢𑀺𑀬𑀁 𑀯𑀻𑀭𑀺𑀬𑁂 𑀧𑀥𑀸𑀦𑁂. 𑀏𑀢𑁂 𑀘𑀢𑁆𑀣𑀸 𑀥𑀸𑀢𑀼𑀲𑀁𑀬𑁄𑀕𑀢𑁆𑀣𑀸 𑀯𑀸 𑀦𑀸𑀫𑀲𑀁𑀬𑁄𑀕𑀢𑁆𑀣𑀸 𑀯𑀸 𑀪𑀯𑀦𑁆𑀢𑀺. 𑀅𑀲𑀁𑀬𑁄𑀕𑀲𑁆𑀲 𑀧𑀦 𑀦𑀸𑀫𑀧𑀤𑀲𑁆𑀲 𑀅𑀢𑁆𑀣𑁄 ‘‘𑀧𑁄 𑀲𑀺𑀬𑀸 𑀧𑀭𑀫𑀢𑁆𑀣𑀲𑁆𑀫𑀺𑀁, 𑀧𑀸𑀢𑀼 𑀯𑀸𑀢𑁂𑀲𑀼 𑀧𑀸 𑀪𑀯𑁂’’𑀢𑀺 𑀏𑀓𑀓𑁆𑀔𑀭𑀓𑁄𑀲𑁂 [𑀏𑀓𑀓𑁆𑀔𑀭𑀓𑁄𑀲 𑁭𑁩 𑀕𑀸𑀣𑀸] 𑀯𑀼𑀢𑁆𑀢𑁄.

𑁧𑁧𑁬𑁪. 𑀯𑀺𑀓𑁆𑀓𑀫𑁄 𑀧𑀥𑀸𑀦𑀁.

𑁧𑁧𑁬𑁫-𑁧𑁧𑁬𑁭. 𑀲𑀦𑁆𑀬𑀸𑀲𑁂 𑀦𑀺𑀓𑁆𑀔𑀺𑀢𑁆𑀢𑁂. 𑀫𑁄𑀓𑁆𑀔𑁄 𑀦𑀺𑀩𑁆𑀩𑀸𑀦𑀁. 𑀭𑀸𑀲𑀺 𑀦𑀺𑀓𑀭𑁄. 𑀕𑁂𑀳𑁂 𑀦𑀺𑀮𑀬𑁂. 𑀆𑀤𑁂𑀲𑁄 𑀆𑀘𑀺𑀓𑁆𑀔𑀦𑀁. 𑀉𑀧𑀫𑀸𑀬 𑀲𑀦𑁆𑀦𑀺𑀪𑁂. 𑀅𑀘𑁆𑀘𑀬𑁄 𑀅𑀢𑀺𑀓𑁆𑀓𑀫𑁄. 𑀲𑀸𑀫𑀻𑀧𑁆𑀬𑁂 𑀲𑀫𑀻𑀧𑀪𑀸𑀯𑁂. 𑀉𑀧𑀭𑀢𑀺 𑀉𑀧𑀲𑀫𑁄. 𑀦𑀻𑀳𑀭𑀡𑀁 𑀅𑀧𑀦𑀬𑀦𑀁. 𑀆𑀯𑀭𑀡𑀁 𑀦𑀻𑀯𑀭𑀡𑀁 [𑀆𑀳𑀭𑀡𑀁 𑀕𑀳𑀡𑀁 (𑀓.)].

𑁧𑁧𑁬𑁮. 𑀉𑀤𑁆𑀥𑀓𑀫𑁆𑀫𑁂 𑀉𑀬𑁆𑀬𑀸𑀦𑁂. 𑀯𑀺𑀬𑁄𑀕𑁂 𑀉𑀧𑁆𑀧𑀸𑀲𑀺𑀢𑁂. 𑀅𑀢𑁆𑀣𑀮𑀸𑀪𑁄 𑀉𑀧𑁆𑀧𑀢𑁆𑀢𑀺. 𑀧𑀩𑀮𑀢𑁆𑀢𑁂 𑀫𑀳𑀸𑀩𑀳𑀮𑀢𑁆𑀢𑁂. 𑀤𑀓𑁆𑀔𑀕𑁆𑀕𑀢𑀸𑀲𑀽𑀢𑀺 𑀤𑀓𑁆𑀔𑀪𑀸𑀯𑁂, 𑀅𑀕𑁆𑀕𑀪𑀸𑀯𑁂 𑀘. 𑀲𑀢𑁆𑀢𑀺𑀬𑀁, 𑀫𑁄𑀓𑁆𑀔𑁂 𑀦𑀺𑀩𑁆𑀩𑀸𑀦𑁂 𑀘.

𑁧𑁧𑁬𑁯. 𑀤𑀼 𑀘 𑀅𑀪𑀸𑀯𑁂 𑀤𑀼𑀲𑁆𑀲𑀻𑀮𑁄, 𑀤𑀼𑀧𑁆𑀧𑀜𑁆𑀜𑁄. 𑀅𑀲𑀫𑀺𑀤𑁆𑀥𑀺𑀬𑀁 𑀤𑀼𑀩𑁆𑀪𑀺𑀓𑁆𑀔𑀁. 𑀅𑀦𑀦𑁆𑀤𑀦𑀁 𑀅𑀫𑁄𑀤𑀦𑀁.

𑁧𑁧𑁭𑁦. 𑀲𑀫𑀦𑁆𑀢𑀢𑁆𑀢𑀲𑀫𑀺𑀤𑁆𑀥𑀻𑀲𑀽𑀢𑀺 𑀲𑀫𑀦𑁆𑀢𑀪𑀸𑀯𑁂, 𑀲𑀫𑀺𑀤𑁆𑀥𑀺𑀬𑀜𑁆𑀘. 𑀲𑀗𑁆𑀕𑀢𑁂 𑀲𑀳𑀺𑀢𑁂. 𑀯𑀺𑀥𑀸𑀦𑁂 𑀓𑀭𑀡𑁂. 𑀧𑀪𑀯𑁄 𑀲𑀫𑁆𑀪𑀯𑁄. 𑀧𑀼𑀦𑀧𑁆𑀧𑀼𑀦𑀓𑁆𑀭𑀺𑀬𑀸 𑀧𑀼𑀦𑀧𑁆𑀧𑀼𑀦𑀓𑀭𑀡𑀁.

𑁧𑁧𑁭𑁧-𑁧𑁧𑁭𑁨. 𑀅𑀢𑀺𑀲𑀬𑁄 𑀅𑀢𑁆𑀭 𑀅𑀥𑀺𑀫𑀢𑁆𑀢𑀁. 𑀪𑀼𑀲𑀢𑁆𑀣𑁄 𑀲𑀫𑀦𑁆𑀢𑀢𑁆𑀣𑁄, 𑀢𑁂𑀦 𑀲𑀫𑀦𑁆𑀢 𑀧𑀭𑀺𑀬𑀸𑀬𑁄𑀧𑀺 𑀪𑀼𑀲𑀲𑀤𑁆𑀤𑁄 𑀅𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀲𑁆𑀲𑀭𑀺𑀬𑁄 𑀧𑀪𑀽𑀢𑀺. 𑀅𑀘𑁆𑀘𑀬𑁂 𑀅𑀢𑀺𑀓𑁆𑀓𑀫𑁂. 𑀓𑀮𑀳𑁂 𑀯𑀺𑀕𑁆𑀕𑀳𑁂. 𑀪𑀸𑀲𑁂 𑀓𑀣𑀦𑁂, ‘‘𑀪𑀸𑀲𑀸𑀬𑀸’’𑀢𑀺𑀧𑀺 𑀧𑀸𑀞𑁄. 𑀓𑀼𑀘𑁆𑀙𑀦𑁂 𑀓𑀼𑀘𑁆𑀙𑀸𑀬𑀁. 𑀅𑀦𑀪𑀺𑀫𑀼𑀔𑀢𑁆𑀣𑁂 𑀯𑀺𑀫𑀼𑀔𑁄. 𑀫𑁄𑀳𑁄 𑀯𑀺𑀫𑀢𑀺. 𑀧𑀥𑀸𑀦𑁂 𑀯𑀺𑀲𑀺𑀝𑁆𑀞𑁂. 𑀤𑀓𑁆𑀔𑀢𑀸 𑀙𑁂𑀓𑀢𑀸. 𑀔𑁂𑀤𑁂 𑀧𑀭𑀺𑀲𑁆𑀲𑀫𑁂.

𑁧𑁧𑁭𑁩. 𑀚𑀸𑀦𑀦𑁂 𑀅𑀯𑀕𑀢𑁂. 𑀅𑀥𑁄𑀪𑀸𑀕𑁂 𑀅𑀯𑀁𑀲𑀺𑀭𑁂. 𑀅𑀦𑀺𑀘𑁆𑀙𑀬𑁂 𑀅𑀦𑀺𑀡𑁆𑀡𑀬𑁂. 𑀧𑀭𑀺𑀪𑀯𑁂 𑀅𑀯𑀜𑁆𑀜𑀸𑀢𑁂. 𑀤𑁂𑀲𑁄 𑀘 𑀩𑁆𑀬𑀸𑀧𑀦𑀜𑁆𑀘 𑀳𑀸𑀦𑀺 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀯𑀘𑁄𑀓𑁆𑀭𑀺𑀬𑀸𑀬 𑀯𑀘𑀦𑀓𑁆𑀭𑀺𑀬𑀸𑀬𑀁. 𑀣𑁂𑀬𑁆𑀬𑁂 𑀘𑁄𑀭𑀺𑀬𑁂. 𑀅𑀜𑁆𑀜𑀸𑀡𑁂 𑀘 𑀧𑀢𑁆𑀢𑀺𑀆𑀤𑀺𑀓𑁂 𑀘.

𑁧𑁧𑁭𑁪. 𑀧𑀘𑁆𑀙𑀸𑀢𑁆𑀣𑁂 𑀅𑀦𑀼𑀘𑀭𑁄. 𑀪𑀼𑀲𑀢𑁆𑀣𑁂 𑀅𑀦𑀼𑀕𑁆𑀕𑀢𑁄. 𑀲𑀤𑀺𑀲𑁂 𑀅𑀦𑀼𑀭𑀽𑀧𑁄. 𑀅𑀦𑀼𑀯𑀢𑁆𑀢𑀺𑀬𑀁 𑀅𑀦𑁆𑀯𑁂𑀢𑀺. 𑀳𑀻𑀦𑁂 𑀅𑀦𑀼 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄. 𑀢𑀢𑀺𑀬𑀢𑁆𑀣𑁂 𑀦𑀤𑀺𑀫𑀦𑁆𑀯𑀯𑀲𑀺𑀢𑀸 𑀩𑀸𑀭𑀸𑀡𑀲𑀻. 𑀤𑁂𑀲𑁂, 𑀮𑀓𑁆𑀔𑀡𑁂, 𑀯𑀺𑀘𑁆𑀙𑀸𑀬𑀁, 𑀇𑀢𑁆𑀣𑀫𑁆𑀪𑀽𑀢𑁂, 𑀪𑀸𑀕𑀸𑀤𑀺𑀓𑁂 𑀘 𑀅𑀦𑀼. 𑀮𑀓𑁆𑀔𑀡𑁂 𑀭𑀼𑀓𑁆𑀔’𑀫𑀦𑀼 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄. 𑀯𑀺𑀘𑁆𑀙𑀸𑀬𑀁 𑀭𑀼𑀓𑁆𑀔𑀁 𑀭𑀼𑀓𑁆𑀔𑀫𑀦𑀼 𑀢𑀺𑀝𑁆𑀞𑀢𑀺. 𑀇𑀢𑁆𑀣𑀫𑁆𑀪𑀽𑀢𑁂 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭’𑀫𑀦𑀼. 𑀪𑀸𑀕𑁂 𑀬𑀤𑁂𑀢𑁆𑀣 𑀫𑀁 𑀅𑀦𑀼 𑀲𑀺𑀬𑀸.

𑁧𑁧𑁭𑁫. 𑀆𑀮𑀺𑀗𑁆𑀕𑀦𑁂 𑀧𑀭𑀺𑀲𑁆𑀲𑀚𑀢𑀺. 𑀤𑁄𑀲𑀓𑁆𑀔𑀸𑀦𑁂 𑀧𑀭𑀺𑀪𑀸𑀲𑁂𑀢𑁆𑀯𑀸. 𑀦𑀺𑀯𑀸𑀲𑀦𑁂 𑀯𑀢𑁆𑀣𑀁 𑀧𑀭𑀺𑀤𑀳𑀺𑀢𑁆𑀯𑀸. 𑀅𑀯𑀜𑁆𑀜𑁄 𑀧𑀭𑀺𑀪𑀯𑁄. 𑀆𑀥𑀸𑀭𑁂 𑀪𑁄𑀚𑀦𑁂 𑀲𑁄𑀓𑁂 𑀩𑁆𑀬𑀸𑀧𑀦𑁂. 𑀢𑀢𑁆𑀯𑁂 𑀲𑀪𑀸𑀯𑁂. 𑀮𑀓𑁆𑀔𑀡𑀸𑀤𑁄 𑀮𑀓𑁆𑀔𑀡𑀯𑀺𑀘𑁆𑀙𑀸𑀇𑀢𑁆𑀣𑀫𑁆𑀪𑀽𑀢𑀪𑀸𑀕𑁂.

𑁧𑁧𑁭𑁬. 𑀯𑀺𑀲𑀺𑀝𑁆𑀞𑁂 𑀅𑀪𑀺𑀥𑀫𑁆𑀫𑁄. 𑀉𑀤𑁆𑀥𑀓𑀫𑁆𑀫𑁂 𑀲𑀸𑀭𑀼𑀧𑁆𑀧𑁂 𑀯𑀼𑀤𑁆𑀥𑀺𑀬𑀁 𑀧𑀽𑀚𑀸𑀬𑀁 𑀅𑀥𑀺𑀓𑁂. 𑀓𑀼𑀮𑁂 𑀅𑀪𑀺𑀚𑀦𑁄. 𑀅𑀲𑀘𑁆𑀘𑁂 𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀘𑀢𑀼𑀩𑁆𑀩𑀺𑀥𑁂 [‘𑀅𑀪𑀺𑀭𑀪𑀸𑀕𑁂 (𑀧𑀸.𑁧.𑁪.𑁯𑁧)’ 𑀢𑀺 𑀅𑀪𑀺𑀲𑁆𑀲 𑀪𑀸𑀕𑀯𑀚𑁆𑀚𑀺𑀢𑁂𑀲𑀼 𑀮𑀓𑁆𑀔𑀡𑀸𑀤𑀻𑀲𑀼 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀲𑀜𑁆𑀜𑀸 𑀯𑀼𑀢𑁆𑀢𑀸 (𑀭𑀽𑀧𑀲𑀺𑀤𑁆𑀥𑀺-𑀓𑀸𑀭𑀓𑀢𑀡𑁆𑀟𑁂)].

𑁧𑁧𑁭𑁭. 𑀅𑀥𑀺𑀓𑁂 𑀇𑀲𑁆𑀲𑀭𑁂 𑀧𑀸𑀞𑁂 𑀉𑀘𑁆𑀘𑀸𑀭𑀡𑁂, 𑀅𑀥𑀺𑀝𑁆𑀞𑀸𑀦𑁂 𑀧𑀸𑀧𑀼𑀡𑀦𑁂 𑀦𑀺𑀘𑁆𑀙𑀬𑁂 𑀉𑀧𑀭𑀺𑀪𑀸𑀕𑀸𑀤𑀺𑀓𑁂 𑀪𑀝𑀦𑁂 𑀪𑀢𑁆𑀢𑀺𑀬𑀁 𑀯𑀺𑀲𑁂𑀲𑀦𑁂 𑀘 𑀅𑀥𑀺.

𑁧𑁧𑁭𑁮-𑁧𑁧𑁭𑁯. 𑀯𑀸𑀫𑀸𑀤𑀸𑀦𑁂 𑀇𑀢𑀺 𑀧𑀸𑀞𑁂 𑀯𑀸𑀫𑁂 𑀧𑀝𑀺𑀮𑁄𑀫𑁂, 𑀆𑀤𑀸𑀦𑁂 𑀕𑀳𑀡𑁂. 𑀯𑀸𑀘𑀸𑀤𑀸𑀦𑁂 𑀧𑀘𑁆𑀘𑀲𑁆𑀲𑁄𑀲𑀺. 𑀧𑀝𑀺𑀦𑀺𑀥𑀺𑀫𑁆𑀳𑀺 𑀫𑀼𑀔𑁆𑀬𑀲𑀤𑀺𑀲𑁂 𑀩𑀼𑀤𑁆𑀥𑀲𑁆𑀫𑀸 𑀧𑀢𑀺. 𑀧𑀝𑀺𑀩𑀸𑀥𑁂 𑀦𑀺𑀯𑀢𑁆𑀢𑀦𑁂. 𑀧𑀝𑀺𑀘𑁆𑀘𑀢𑁆𑀣𑁂 ‘‘𑀧𑀝𑀺𑀘𑁆𑀘𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁂. 𑀮𑀓𑁆𑀔𑀡𑀸𑀤𑀺𑀓𑁂 𑀘𑀢𑀼𑀩𑁆𑀩𑀺𑀥𑁂.

𑁧𑁧𑁮𑁦-𑁧𑁧𑁮𑁧. 𑀲𑀫𑀻𑀧𑁂 𑀆𑀤𑀺𑀓𑀫𑁆𑀫𑀦𑀺 𑀫𑀭𑀺𑀬𑀸𑀤𑁂 𑀉𑀤𑁆𑀥𑀓𑀫𑁆𑀫𑀦𑀺 𑀇𑀘𑁆𑀙𑀸𑀬𑀁 𑀩𑀦𑁆𑀥𑀦𑁂 𑀅𑀪𑀺𑀯𑀺𑀥𑀺𑀫𑁆𑀳𑀺 𑀘 𑀆. 𑀓𑀺𑀘𑁆𑀙𑁂 𑀈𑀲𑀢𑁆𑀣𑁂 𑀦𑀺𑀯𑀢𑁆𑀢𑀺𑀬𑀜𑁆𑀘 𑀅𑀧𑁆𑀧𑀲𑀸𑀤𑁂 𑀆𑀲𑀻𑀲𑀦𑁂 𑀲𑀭𑀡𑁂 𑀯𑀸𑀓𑁆𑀬𑀲𑀭𑀡𑁂 𑀆 𑀏𑀯𑀁 𑀅𑀦𑀼𑀲𑁆𑀲𑀭𑀁. 𑀧𑀢𑀺𑀝𑁆𑀞𑀸𑀬𑀁, 𑀯𑀺𑀫𑁆𑀳𑀬𑀸𑀤𑀻𑀲𑀼 𑀘 𑀆.

𑁧𑁧𑁮𑁨. 𑀪𑀽𑀢𑀪𑀸𑀯𑁂 𑀅𑀢𑀻𑀢𑁄.

𑁧𑁧𑁮𑁩. 𑀲𑀫𑁆𑀪𑀸𑀯𑀦𑁂 𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀺 [𑀥. 𑀧. 𑁧𑁮𑁭]. 𑀲𑀫𑁆𑀪𑀸𑀯𑀦𑀫𑀥𑀺𑀓𑀢𑁆𑀣𑀯𑀘𑀦𑁂𑀦 𑀅𑀜𑁆𑀜𑀢𑁆𑀭 𑀲𑀢𑁆𑀢𑀺𑀬𑀸 𑀅𑀯𑀺𑀖𑀸𑀢𑁄. 𑀲𑀁𑀯𑀭𑀡𑁂 𑀅𑀧𑀺𑀥𑀸𑀦𑀁.

𑁧𑁧𑁮𑁪-𑁧𑁧𑁮𑁫. 𑀅𑀧𑀕𑀢𑁄 𑀅𑀧𑁂𑀢𑁄. 𑀉𑀧𑀧𑀢𑁆𑀢𑀺𑀬𑀁 𑀬𑀼𑀢𑁆𑀢𑀺𑀬𑀁 𑀉𑀧𑁂𑀓𑁆𑀔𑀸. 𑀆𑀥𑀺𑀓𑁆𑀬𑁂 𑀉𑀧𑀔𑀸𑀭𑀺𑀬𑀁 𑀤𑁄𑀡𑁄. 𑀧𑀼𑀩𑁆𑀩𑀓𑀫𑁆𑀫𑀦𑀺 𑀩𑀼𑀤𑁆𑀥𑁄𑀧𑀓𑁆𑀓𑀫𑀁 𑀓𑀺𑀮𑁂𑀲𑀘𑁆𑀙𑁂𑀤𑁄. 𑀕𑀬𑁆𑀳𑀸𑀓𑀸𑀭𑁂 𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀉𑀧𑀭𑀺𑀢𑁆𑀢𑁂 𑀉𑀧𑀭𑀺𑀪𑀸𑀯𑁂 𑀉𑀧𑀧𑀦𑁆𑀦𑁄. 𑀅𑀦𑀲𑀦𑁂 𑀉𑀧𑀯𑀸𑀲𑁄.

𑁧𑁧𑁮𑁬. 𑀉𑀧𑀤𑁂𑀲𑁂 𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀁. 𑀯𑀘𑀦𑀧𑀝𑀺𑀕𑁆𑀕𑀸𑀳𑁂 𑀏𑀯𑀁 𑀳𑁄𑀢𑀼. 𑀇𑀤𑀫𑀢𑁆𑀣𑁂 𑀇𑀤𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑁂.

𑁧𑁧𑁮𑁭. 𑀲𑀫𑀼𑀘𑁆𑀘𑀬𑁂 𑀓𑁂𑀯𑀮𑀲𑀫𑀼𑀘𑁆𑀘𑀬𑁂 𑁋

𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀅𑀤𑀸𑀲𑀺 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 [𑀚𑀸. 𑁨.𑁨𑁨.𑁫𑁫𑁧].

𑀲𑀫𑀸𑀳𑀸𑀭𑁂 𑀘𑀓𑁆𑀔𑀼 𑀘 𑀲𑁄𑀢𑀜𑁆𑀘 𑀘𑀓𑁆𑀔𑀼𑀲𑁄𑀢𑀁. 𑀅𑀦𑁆𑀯𑀸𑀘𑀬𑁄 𑀏𑀓𑀁 𑀧𑀥𑀸𑀦𑀪𑀸𑀯𑁂𑀦 𑀯𑀢𑁆𑀯𑀸 𑀇𑀢𑀭𑀲𑁆𑀲 𑀅𑀧𑁆𑀧𑀥𑀸𑀦𑀪𑀸𑀯𑁂𑀦 𑀯𑀘𑀦𑀁, 𑀢𑀲𑁆𑀫𑀺𑀁. 𑀲𑀻𑀮𑀁 𑀭𑀓𑁆𑀔𑀸𑀳𑀺, 𑀤𑀸𑀦𑀜𑁆𑀘 𑀤𑁂𑀳𑀺. 𑀇𑀢𑀭𑀻𑀢𑀭𑁂 𑀲𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀢𑀢𑁆𑀭 𑀓𑁂𑀯𑀮𑀲𑀫𑀼𑀘𑁆𑀘𑀬𑁄 𑀘 𑀅𑀦𑁆𑀯𑀸𑀘𑀬𑁄 𑀘 𑀲𑀫𑀸𑀲𑁂 𑀦𑀢𑁆𑀣𑀺, 𑀇𑀢𑀭𑀤𑁆𑀯𑀬𑀁 𑀲𑀫𑀸𑀲𑁂𑀬𑁂𑀯.

𑁧𑁧𑁮𑁮. 𑀧𑀓𑀸𑀭𑁄 𑀢𑀼𑀮𑁆𑀬𑁄, 𑀪𑁂𑀤𑁄 𑀘. 𑀧𑀤𑀢𑁆𑀣𑀲𑁆𑀲 𑀯𑀺𑀧𑀮𑁆𑀮𑀸𑀲𑁂 𑀕𑁄𑀢𑀺 𑀅𑀬𑀫𑀸𑀳𑁂𑀢𑀺. 𑀲𑀫𑀸𑀧𑀦𑁂 𑀇𑀘𑁆𑀙𑀺𑀢𑀲𑁆𑀲 𑀧𑀤𑀲𑁆𑀲 𑀧𑀭𑀺𑀦𑀺𑀝𑁆𑀞𑀸𑀧𑀦𑁂.

𑁧𑁧𑁮𑁯. 𑀧𑀚𑁆𑀚𑀁 𑀯𑀸𑀲𑀤𑁆𑀤𑀲𑁆𑀲𑀢𑁆𑀣𑁂. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀬𑀁 𑀯𑀸 𑀧𑀭𑁄 𑀅𑀲𑀭𑀽𑀧𑀸. 𑀯𑀺𑀅𑀯𑀧𑀼𑀩𑁆𑀩𑁄 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁, 𑀢𑁄, 𑀞𑀸𑀢𑀺𑀲𑁆𑀲 𑀣𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀜𑁆𑀘. 𑀯𑀯𑀢𑁆𑀣𑀺𑀢𑀸 𑀦𑀺𑀬𑀫𑀺𑀢𑀸 𑀯𑀺𑀪𑀸𑀲𑀸 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸. 𑀅𑀯𑀲𑁆𑀲𑀕𑁆𑀕𑁂𑀢𑀺 𑀅𑀯𑀧𑀼𑀩𑁆𑀩𑁄 𑀲𑀚 𑀯𑀺𑀲𑁆𑀲𑀚𑁆𑀚𑀦𑀸𑀮𑀺𑀗𑁆𑀕𑀦𑀦𑀺𑀫𑁆𑀫𑀸𑀦𑁂𑀲𑀼.

𑁧𑁧𑁯𑁦. 𑀪𑀽𑀲𑀦𑁂 𑀅𑀮𑀗𑁆𑀓𑀸𑀭𑁂. 𑀯𑀸𑀭𑀡𑁂 𑀦𑀺𑀯𑀸𑀭𑀡𑁂. 𑀧𑀭𑀺𑀬𑀢𑁆𑀢𑀺 𑀧𑀭𑀺𑀬𑀸𑀧𑀼𑀡𑀦𑀢𑀸, 𑀬𑀼𑀢𑁆𑀢𑀢𑁆𑀣𑁂𑀧𑀺 𑀅𑀮𑀁. 𑀅𑀣𑁄 𑀅𑀣𑀲𑀤𑁆𑀤𑀸 𑀅𑀦𑀦𑁆𑀢𑀭𑀸𑀤𑀻𑀲𑀼 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀲𑀺𑀬𑀼𑀁.

𑁧𑁧𑁯𑁧. 𑀧𑀲𑀁𑀲𑀸𑀤𑀻𑀲𑀼 𑀢𑀻𑀲𑀼. 𑀲𑁆𑀯𑀻𑀓𑀸𑀭𑁂 𑀧𑀝𑀺𑀜𑁆𑀜𑀸𑀡𑁂. 𑀆𑀤𑀺𑀦𑀸 𑀧𑀓𑀸𑀲𑀢𑁆𑀣𑀲𑀫𑁆𑀪𑀸𑀩𑁆𑀬𑀸𑀓𑁄𑀥𑀸𑀤𑀺𑀓𑁂 𑀘𑀢𑁆𑀣𑁂 𑀦𑀸𑀫𑀲𑀤𑁆𑀤𑁄. 𑀅𑀯𑀥𑀸𑀭𑀡𑀫𑁂𑀯𑀢𑁆𑀣𑁄.

𑁧𑁧𑁯𑁨. 𑀅𑀦𑀼𑀜𑁆𑀜𑀸 𑀅𑀦𑀼𑀫𑀢𑀺. 𑀲𑀦𑁆𑀢𑀸𑀦𑀁 𑀅𑀦𑀼𑀦𑀬𑁄. 𑀆𑀮𑀧𑀦𑀁 𑀲𑀫𑁆𑀩𑁄𑀥𑀦𑀁. 𑀯𑀢𑀲𑀤𑁆𑀤𑁄 𑀏𑀓𑀁𑀲𑁂 𑀤𑀬𑀸𑀬𑀁 𑀓𑀭𑀼𑀡𑀸𑀬𑀁 𑀳𑀸𑀲𑁂 𑀧𑀳𑀸𑀲𑁂 𑀔𑁂𑀤𑁂 𑀧𑀭𑀺𑀲𑁆𑀲𑀫𑁂 𑀆𑀮𑀧𑀦𑁂 𑀯𑀺𑀫𑁆𑀳𑀬𑁂 𑀅𑀘𑁆𑀙𑀭𑀺𑀬𑁂 𑀘 𑀲𑀺𑀬𑀸.

𑁧𑁧𑁯𑁩. 𑀯𑀸𑀓𑁆𑀬𑀸𑀭𑀫𑁆𑀪𑁂 ‘‘𑀳𑀦𑁆𑀤 𑀯𑀤𑀸𑀫𑀺 𑀢𑁂’’𑀢𑀺. 𑀯𑀺𑀲𑀸𑀤𑁂 𑀔𑁂𑀤𑁂. 𑀬𑀸𑀯 𑀢𑀸𑀯 𑀢𑀽𑀢𑀺 𑀬𑀸𑀯𑀢𑀸𑀯𑀲𑀤𑁆𑀤𑀸 𑀲𑀸𑀓𑀮𑁆𑀬𑁂 𑀦𑀺𑀭𑀯𑀲𑁂𑀲𑁂. 𑀬𑀸𑀯𑀤𑀢𑁆𑀣𑀁 𑀢𑀸𑀯 𑀕𑀳𑀺𑀢𑀁. 𑀫𑀸𑀦𑁂 𑀧𑀫𑀸𑀡𑁂. ‘‘𑀬𑀸𑀯 𑀧𑀫𑀸𑀡𑀫𑀭𑀺𑀬𑀸𑀤𑀸-𑀯𑀥𑀸𑀭𑀡𑀢𑁆𑀣𑀓𑀁 𑀫𑀢’’𑀫𑀺𑀢𑀺 𑀪𑀸𑀕𑀼𑀭𑀺. 𑀅𑀯𑀥𑀺𑀫𑁆𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂.

𑁧𑁧𑁯𑁪. 𑀧𑀼𑀭𑀢𑁆𑀣𑀸𑀲𑀤𑁆𑀤𑁄 𑀧𑀸𑀘𑀺𑀬𑀁 𑀤𑀺𑀲𑀸𑀬𑀁 𑀇𑀘𑁆𑀘𑀢𑁆𑀣𑁂, 𑀧𑀼𑀭𑀢𑁆𑀣𑁂 𑀯𑀓𑁆𑀔𑀫𑀸𑀦𑁂, 𑀅𑀕𑁆𑀕𑀢𑁄 𑀲𑀫𑀼𑀤𑁆𑀥𑁂 𑀇𑀘𑁆𑀘𑀢𑁆𑀣𑁂 𑀘 𑀧𑀞𑀫𑁂𑀧𑀺 𑀆𑀤𑀺𑀫𑁆𑀳𑀺 𑀯𑀢𑁆𑀢𑀢𑀺. 𑀧𑀩𑀦𑁆𑀥𑁂 𑀯𑀸𑀓𑁆𑀬𑀭𑀘𑀦𑀸𑀬𑀁 𑀯𑀸𑀓𑁆𑀬𑀧𑀩𑀦𑁆𑀥𑁂 𑀧𑀼𑀭𑀸𑀡𑀸𑀤𑀺𑀓𑁂. 𑀘𑀺𑀭𑀦𑁆𑀢𑀭𑁂 𑀅𑀢𑀻𑀢𑀪𑀽𑀢𑁂. 𑀦𑀺𑀓𑀝𑁂 𑀲𑀦𑁆𑀦𑀺𑀳𑀺𑀢𑁂. 𑀆𑀕𑀸𑀫𑀺𑀓𑁂 𑀅𑀦𑀸𑀕𑀢𑁂.

𑁧𑁧𑁯𑁫. 𑀔𑀮𑀼𑀲𑀤𑁆𑀤𑁄 𑀦𑀺𑀲𑁂𑀥𑁂 𑀯𑀸𑀓𑁆𑀬𑀸𑀮𑀗𑁆𑀓𑀸𑀭𑁂 𑀯𑀸𑀓𑁆𑀬𑀪𑀽𑀲𑀸𑀬𑀁 𑀅𑀯𑀥𑀸𑀭𑀡𑁂 𑀏𑀯𑀢𑁆𑀣𑁂, 𑀧𑀲𑀺𑀤𑁆𑀥𑀺𑀬𑀜𑁆𑀘 𑀯𑀢𑁆𑀢𑀢𑀺. 𑀅𑀪𑀺𑀢𑁄𑀲𑀤𑁆𑀤𑁄 𑀆𑀲𑀦𑁆𑀦𑁂 𑀅𑀪𑀺𑀫𑀼𑀔𑁂 𑀉𑀪𑀬𑀢𑁄 𑀇𑀘𑁆𑀘𑀢𑁆𑀣𑁂, 𑀆𑀤𑀺𑀦𑀸 𑀲𑀻𑀖𑁂, 𑀲𑀸𑀓𑀮𑁆𑀬𑁂 𑀘 𑀅𑀢𑁆𑀣𑁂 𑀯𑀢𑁆𑀢𑀢𑀺. 𑀆𑀲𑀦𑁆𑀦𑁂 𑀅𑀪𑀺𑀢𑁄𑀬𑀁 𑀦𑀤𑀻. 𑀅𑀪𑀺𑀫𑀼𑀔𑁂 𑀅𑀪𑀺𑀢𑁄𑀯 𑀢𑀸𑀢𑀸. 𑀉𑀪𑀬𑀢𑁄𑀇𑀘𑁆𑀘𑀢𑁆𑀣𑁂 𑀅𑀪𑀺𑀢𑁄 𑀫𑀕𑁆𑀕𑀲𑁆𑀲. 𑀲𑀻𑀖𑁂 𑀅𑀪𑀺𑀢𑁄 𑀅𑀥𑀻𑀬𑀺𑀢𑁆𑀯𑀸. 𑀲𑀸𑀓𑀮𑁆𑀬𑁂 𑀅𑀪𑀺𑀢𑁄 𑀯𑀦𑀁 𑀤𑀟𑁆𑀠𑀁.

𑁧𑁧𑁯𑁬. 𑀬𑀤𑁆𑀬𑀧𑀺𑀲𑀤𑁆𑀤𑀢𑁆𑀣𑁂 𑀅𑀦𑀼𑀕𑁆𑀕𑀳𑀡𑀕𑀭𑀳𑀢𑁆𑀣𑁂. 𑀏𑀓𑀁𑀲𑀢𑁆𑀣𑁂 𑀅𑀯𑀺𑀢𑀣𑀢𑁆𑀣𑁂. 𑀅𑀣𑁄 𑀧𑀦𑀲𑀤𑁆𑀤𑁄 𑀯𑀺𑀲𑁂𑀲𑀲𑁆𑀫𑀺𑀁 𑀅𑀢𑁆𑀣𑁂, 𑀧𑀤𑀧𑀽𑀭𑀡𑀢𑁆𑀣𑁂 𑀘 𑀲𑀺𑀬𑀸.

𑁧𑁧𑁯𑁭. 𑀳𑀺𑀲𑀤𑁆𑀤𑁄 𑀓𑀸𑀭𑀡𑀸𑀤𑀻𑀲𑀼 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. 𑀢𑀼𑀲𑀤𑁆𑀤𑁄 𑀧𑀦 𑀢𑀢𑁆𑀣 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀫𑀚𑁆𑀛𑁂 𑀳𑁂𑀢𑀼𑀯𑀚𑁆𑀚𑁂 𑀢𑀺𑀓𑁂 𑀅𑀢𑁆𑀣𑁂 𑀯𑀢𑁆𑀢𑀢𑀺. 𑀓𑀼𑀲𑀤𑁆𑀤𑁄 𑀧𑀸𑀧𑁂 𑀈𑀲𑀢𑁆𑀣𑁂 𑀓𑀼𑀘𑁆𑀙𑀦𑁂 𑀚𑀺𑀕𑀼𑀘𑁆𑀙𑀸𑀬𑀜𑁆𑀘.

𑁧𑁧𑁯𑁮. 𑀦𑀼𑀓𑀸𑀭𑁄 𑀲𑀁𑀲𑀬𑁂, 𑀧𑀜𑁆𑀳𑁂 𑀘. 𑀦𑀸𑀦𑀸𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑁂, 𑀯𑀚𑁆𑀚𑀦𑁂 𑀘. 𑀓𑀺𑀁𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁, 𑀚𑀺𑀕𑀼𑀘𑁆𑀙𑀸𑀬𑀜𑁆𑀘, 𑀅𑀩𑁆𑀬𑀬𑁄. 𑀢𑀺𑀮𑀺𑀗𑁆𑀕𑁄 𑀘, 𑀦𑀺𑀬𑀫𑁂 𑀢𑀼 𑀢𑀺𑀮𑀺𑀗𑁆𑀕𑁄𑀯. 𑀯𑀸𑀭𑀺𑀫𑁆𑀳𑀺 𑀉𑀤𑀓𑁂. 𑀫𑀼𑀤𑁆𑀥𑀦𑀺 𑀲𑀻𑀲𑁂 𑀘, 𑀓𑀁 𑀲𑀼𑀔𑁂𑀧𑀺, 𑀯𑀼𑀢𑁆𑀢𑀜𑁆𑀘 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑁋

‘‘𑀓𑁄 𑀩𑁆𑀭𑀳𑁆𑀫𑀢𑁆𑀢𑀸𑀦𑀻𑀮𑀓𑁆𑀓𑁂𑀲𑀼, 𑀲𑀫𑀸𑀦𑁂 𑀲𑀩𑁆𑀩𑀦𑀸𑀫𑀺𑀓𑁂;

𑀧𑀸𑀯𑀓𑁂 𑀘 𑀫𑀬𑀽𑀭𑁂 𑀘, 𑀲𑀼𑀔𑀲𑀻𑀲𑀚𑀮𑁂𑀲𑀼 𑀓’’𑀦𑁆𑀢𑀺.

𑁧𑁧𑁯𑁯. 𑀅𑀫𑀸𑀲𑀤𑁆𑀤𑁄 𑀲𑀳𑀢𑁆𑀣𑁂, 𑀲𑀫𑀻𑀧𑀢𑁆𑀣𑁂 𑀘, 𑀅𑀫𑀸𑀯𑀸𑀲𑀻, 𑀅𑀫𑀸𑀕𑀢𑁄 𑀘. 𑀧𑀼𑀦𑀲𑀤𑁆𑀤𑁄 𑀪𑁂𑀤𑁂 𑀯𑀺𑀲𑁂𑀲𑁂. 𑀅𑀧𑀞𑀫𑁂 𑀧𑀼𑀦 𑀤𑀤𑀸𑀢𑀺. 𑀓𑀺𑀭𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑁂 𑀅𑀦𑀼𑀓𑁆𑀓𑀫𑁂𑀦 𑀲𑀯𑀦𑁂, 𑀅𑀭𑀼𑀘𑀺𑀬𑀜𑁆𑀘. 𑀉𑀤𑀲𑀤𑁆𑀤𑁄 𑀅𑀧𑁆𑀬𑀢𑁆𑀣𑁂 𑀧𑀜𑁆𑀳𑁂. 𑀯𑀺𑀓𑀧𑁆𑀧𑀦𑁂 𑀅𑀢𑁆𑀣𑀦𑁆𑀢𑀭𑀲𑁆𑀲 𑀯𑀺𑀓𑀧𑁆𑀧𑀦𑁂 𑀘.

𑁧𑁨𑁦𑁦. 𑀧𑀘𑁆𑀙𑀸𑀲𑀤𑁆𑀤𑁄 𑀧𑀢𑀻𑀘𑀺𑀬𑀁 𑀤𑀺𑀲𑀸𑀬𑀁. 𑀘𑀭𑀺𑀫𑁂 𑀅𑀦𑀸𑀕𑀢𑁂 𑀓𑀸𑀮𑁂. 𑀲𑀸𑀫𑀺𑀲𑀤𑁆𑀤𑁄 𑀢𑀼 𑀅𑀤𑁆𑀥𑁂 𑀪𑀸𑀕𑁂, 𑀚𑀺𑀕𑀼𑀘𑁆𑀙𑀦𑁂 𑀦𑀺𑀦𑁆𑀤𑀸𑀬𑀜𑁆𑀘. 𑀅𑀤𑁆𑀥𑁂 𑀪𑀸𑀕𑁂 𑀲𑀸𑀫𑀺 𑀯𑀼𑀢𑁆𑀢𑀁, 𑀚𑀺𑀕𑀼𑀘𑁆𑀙𑀦𑁂𑀧𑀺 𑀢𑀤𑁂𑀯. 𑀧𑀸𑀢𑀼 𑀧𑀓𑀸𑀲𑁂 𑀧𑀓𑀸𑀲𑀦𑀻𑀬𑁂, 𑀲𑀫𑁆𑀪𑀯𑁂 𑀉𑀧𑁆𑀧𑀢𑁆𑀢𑀺𑀬𑀜𑁆𑀘. 𑀫𑀺𑀣𑁄𑀲𑀤𑁆𑀤𑁄 𑀅𑀜𑁆𑀜𑁄𑀜𑁆𑀜𑁂𑀇𑀘𑁆𑀘𑀢𑁆𑀣𑁂, 𑀭𑀳𑁄𑀇𑀘𑁆𑀘𑀢𑁆𑀣𑁂 𑀘.

𑁧𑁨𑁦𑁧. 𑀳𑀸𑀲𑀤𑁆𑀤𑁄 𑀔𑁂𑀤𑁂, 𑀲𑁄𑀓𑁂, 𑀤𑀼𑀓𑁆𑀔𑁂 𑀘. 𑀅𑀳𑀳𑀲𑀤𑁆𑀤𑁄 𑀔𑁂𑀤𑁂, 𑀯𑀺𑀫𑁆𑀳𑀬𑁂 𑀅𑀩𑁆𑀪𑀼𑀢𑁂 𑀘. 𑀥𑀺𑀲𑀤𑁆𑀤𑁄 𑀳𑀺𑀁𑀲𑀸𑀧𑀦𑁂, 𑀦𑀺𑀦𑁆𑀤𑀸𑀬𑀜𑁆𑀘. 𑀢𑀺𑀭𑀺𑀬𑀁 𑀢𑀺𑀭𑁄𑀲𑀤𑁆𑀤𑀸 𑀧𑀺𑀥𑀸𑀦𑁂 𑀯𑀢𑁆𑀢𑀦𑁆𑀢𑀺. 𑀢𑀺𑀭𑀺𑀬𑀁 𑀓𑀢𑁆𑀯𑀸 𑀓𑀡𑁆𑀟𑀗𑁆𑀕𑀢𑁄, 𑀢𑀺𑀭𑁄𑀓𑀢𑁆𑀯𑀸 𑀯𑀸.

𑁧𑁨𑁦𑁨-𑁧𑁨𑁦𑁩. 𑀲𑀗𑁆𑀔𑁆𑀬𑀸𑀢𑀸𑀲𑀗𑁆𑀔𑁆𑀬𑀸𑀢𑀢𑁆𑀣𑀸𑀦𑀁 𑀉𑀧𑀲𑀕𑁆𑀕𑀦𑀺𑀧𑀸𑀢𑀲𑀗𑁆𑀔𑁆𑀬𑀸𑀢𑀸𑀦𑀁 𑀅𑀩𑁆𑀬𑀬𑀸𑀦𑀁 𑀧𑀲𑀺𑀤𑁆𑀥𑁂 𑀧𑀘𑀼𑀭𑀧𑁆𑀧𑀬𑁄𑀕𑁂 𑀏𑀓𑀘𑁆𑀘𑁂 𑀯𑀸 𑀤𑀲𑁆𑀲𑁂𑀢𑁆𑀯𑀸 𑀢𑀤𑀜𑁆𑀜𑁂𑀧𑀺 𑀲𑀗𑁆𑀔𑁂𑀧𑀦𑀬𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀼𑀦𑀺’’𑀘𑁆𑀘𑀸𑀤𑀺. 𑀏𑀢𑁆𑀣 𑀘 𑀢𑀼𑀦𑀸𑀤𑀺𑀲𑀤𑁆𑀤𑁂𑀳𑀺 𑀚𑁆𑀚𑀼𑀧𑀭𑀺𑀬𑀦𑁆𑀢𑁂𑀳𑀺 𑀢𑀤𑀦𑁆𑀢𑀸𑀯 𑀕𑀳𑀺𑀢𑀸, 𑀦 𑀳𑀺 𑀓𑁂𑀯𑀮𑀸𑀦𑀁 𑀏𑀢𑁂𑀲𑀁 𑀅𑀩𑁆𑀬𑀬𑀪𑀸𑀯𑁄 𑀲𑀫𑁆𑀪𑀯𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀢𑀼𑀦𑀧𑀘𑁆𑀘𑀬𑀦𑁆𑀢𑁄 𑀘 𑀢𑀣𑀸 𑀢𑁆𑀯𑀸𑀦 𑀢𑀯𑁂 𑀢𑁆𑀯𑀸 𑀢𑀼𑀁 𑀥𑀸 𑀲𑁄 𑀣𑀸 𑀓𑁆𑀔𑀢𑁆𑀢𑀼𑀁 𑀢𑁄 𑀣 𑀢𑁆𑀭 𑀳𑀺𑀜𑁆𑀘𑀦𑀁 𑀳𑀺𑀁 𑀳𑀁 𑀥𑀺 𑀳 𑀬𑀓𑀸𑀭𑀢𑁄 𑀳𑀺𑀁𑀥 𑀥𑀼𑀦𑀸 𑀭𑀳𑀺 𑀤𑀸𑀦𑀺, 𑀓𑀺𑀁𑀲𑁆𑀫𑀸 𑀯𑁄 𑀤𑀸𑀘𑀦𑀁 𑀤𑀸𑀚𑁆𑀚𑀣𑀁 𑀣𑀢𑁆𑀢𑀁 𑀚𑁆𑀛𑀚𑁆𑀚𑀼𑀧𑀘𑁆𑀘𑀬𑀦𑁆𑀢𑁄 𑀘 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀘 𑀢𑀼𑀦𑀸𑀤𑀻𑀦𑀁 𑀬𑀸𑀤𑁂𑀲𑀦𑁆𑀢𑁄 𑀘 𑀅𑀩𑁆𑀬𑀬𑀁 𑀦𑀸𑀫 𑀪𑀯𑁂𑀢𑀺. 𑀧𑀬𑁄𑀕𑁄 𑀬𑀣𑀸 𑁋 ‘‘𑀓𑀸𑀢𑀼𑀦, 𑀓𑀢𑁆𑀯𑀸𑀦, 𑀓𑀸𑀢𑀯𑁂, 𑀓𑀢𑁆𑀯𑀸, 𑀓𑀸𑀢𑀼𑀁, 𑀲𑀩𑁆𑀩𑀥𑀸, 𑀲𑀩𑁆𑀩𑀲𑁄, 𑀲𑀩𑁆𑀩𑀣𑀸, 𑀘𑀢𑀼𑀓𑁆𑀔𑀢𑁆𑀢𑀼𑀁, 𑀲𑀩𑁆𑀩𑀢𑁄, 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀢𑁆𑀭, 𑀓𑀼𑀳𑀺𑀜𑁆𑀘𑀦𑀁, 𑀓𑀼𑀳𑀺𑀁, 𑀓𑀼𑀳𑀁, 𑀲𑀩𑁆𑀩𑀥𑀺, 𑀇𑀳, 𑀬𑀳𑀺𑀁, 𑀇𑀥, 𑀅𑀥𑀼𑀦𑀸, 𑀏𑀢𑀭𑀳𑀺, 𑀇𑀤𑀸𑀦𑀺, 𑀓𑁆𑀯, 𑀓𑀼𑀤𑀸𑀘𑀦𑀁, 𑀓𑀤𑀸, 𑀅𑀚𑁆𑀚, 𑀓𑀣𑀁, 𑀅𑀜𑁆𑀜𑀣𑀢𑁆𑀢𑀁, 𑀏𑀓𑀚𑁆𑀛𑀁, 𑀲𑀚𑁆𑀚𑀼, 𑀉𑀧𑀦𑀕𑀭𑀁, 𑀅𑀦𑁆𑀢𑁄𑀧𑀸𑀲𑀸𑀤𑀁, 𑀅𑀪𑀺𑀯𑀦𑁆𑀤𑀺𑀬’’𑀇𑀘𑁆𑀘𑀸𑀤𑀺. 𑀇𑀤𑀁 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀩𑁆𑀬𑀬𑀸𑀦𑀁 𑀲𑀗𑁆𑀔𑁂𑀧𑀮𑀓𑁆𑀔𑀡𑀁.

‘‘𑀲𑀤𑀺𑀲𑀁 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼, 𑀲𑀩𑁆𑀩𑀸𑀲𑀼 𑀘 𑀯𑀺𑀪𑀢𑁆𑀢𑀺𑀲𑀼;

𑀯𑀘𑀦𑁂𑀲𑀼 𑀘 𑀲𑀩𑁆𑀩𑁂𑀲𑀼, 𑀬𑀁 𑀦 𑀩𑁆𑀬𑁂𑀢𑀺 𑀢𑀤𑀩𑁆𑀬𑀬’’𑀦𑁆𑀢𑀺.

𑀅𑀩𑁆𑀬𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀓𑀮𑀩𑁆𑀬𑀸𑀓𑀭𑀡𑀫𑀳𑀸𑀯𑀦𑀸𑀲𑀗𑁆𑀕𑀜𑀸𑀡𑀘𑀸𑀭𑀺𑀦𑀸 𑀓𑀯𑀺𑀓𑀼𑀜𑁆𑀚𑀭𑀓𑁂𑀲𑀭𑀺𑀦𑀸 𑀥𑀻𑀫𑀢𑀸 𑀲𑀺𑀭𑀺𑀫𑀳𑀸𑀘𑀢𑀼𑀭𑀗𑁆𑀕𑀩𑀮𑁂𑀦 𑀫𑀳𑀸𑀫𑀘𑁆𑀘𑁂𑀦 𑀯𑀺𑀭𑀘𑀺𑀢𑀸𑀬𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀯𑀡𑁆𑀡𑀦𑀸𑀬𑀁 𑀲𑀸𑀫𑀜𑁆𑀜𑀓𑀡𑁆𑀟𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁧. ‘‘𑀲𑀕𑁆𑀕𑀓𑀡𑁆𑀟𑁄 𑀘𑀸’’𑀢𑁆𑀬𑀸𑀤𑀺𑀦𑀸 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑀓𑀧𑀸𑀮𑀢𑁂𑀮𑀯𑀝𑁆𑀝𑀺𑀲𑀤𑀺𑀲𑁂𑀦 𑀓𑀡𑁆𑀟𑀢𑁆𑀢𑀬𑁂𑀦 𑀲𑀫𑀗𑁆𑀕𑀺𑀢𑀸 𑀤𑀻𑀧𑀺𑀢𑀸.

𑁨. ‘‘𑀢𑀺𑀤𑀺𑀯𑁂’’𑀢𑁆𑀬𑀸𑀤𑀺𑀦𑀸 𑀢𑁄𑀝𑀓𑁂𑀦 𑀢𑀲𑁆𑀲𑀸 𑀧𑀬𑁄𑀚𑀦𑀁 𑀓𑀣𑀺𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀦𑀭𑁄 𑀓𑀢𑁆𑀢𑀼𑀪𑀽𑀢𑁄 𑀢𑀺𑀤𑀺𑀯𑁂 𑀤𑁂𑀯𑀮𑁄𑀓𑁂, 𑀩𑁆𑀭𑀳𑁆𑀫𑀮𑁄𑀓𑁂 𑀘 𑀫𑀳𑀺𑀬𑀁 𑀫𑀦𑀼𑀲𑁆𑀲𑀮𑁄𑀓𑁂, 𑀪𑀼𑀚𑀕𑀸𑀯𑀲𑀣𑁂 𑀦𑀸𑀕𑀮𑁄𑀓𑁂 𑀘𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀦𑁆𑀦𑀺𑀳𑀺𑀢𑀸𑀦𑀁 𑀲𑀓𑀮𑀢𑁆𑀣𑀸𑀦𑀁 𑀲𑀩𑁆𑀩𑁂𑀲𑀁 𑀅𑀪𑀺𑀥𑁂𑀬𑁆𑀬𑀸𑀦𑀁 𑀲𑀫𑀯𑁆𑀳𑀬𑀲𑁆𑀲 𑀅𑀪𑀺𑀥𑀸𑀦𑀲𑁆𑀲 𑀤𑀻𑀧𑀦𑀺𑀬𑀁 𑀧𑀓𑀸𑀲𑀦𑀺𑀬𑀁 𑀇𑀳 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑀲𑀯𑀦𑀥𑀸𑀭𑀡𑀸𑀤𑀺𑀦𑀸 𑀓𑀼𑀲𑀮𑁄 𑀙𑁂𑀓𑁄 𑀳𑁄𑀢𑀺, 𑀲 𑀦𑀭𑁄 𑀫𑀳𑀸𑀫𑀼𑀦𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑁂 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀲𑀗𑁆𑀔𑀸𑀢𑁂 𑀯𑀘𑀦𑁂 𑀧𑀝𑀼 𑀙𑁂𑀓𑁄 𑀳𑁄𑀢𑀺, 𑀧𑀝𑀼𑀢𑁆𑀢𑀸𑀬𑁂𑀯 𑀫𑀢𑀺𑀫𑀸 𑀦𑀸𑀫 𑀳𑁄𑀢𑀻𑀢𑀺.

𑁩-𑁯. 𑀇𑀤𑀸𑀦𑀺 𑀬𑀲𑁆𑀲 𑀭𑀜𑁆𑀜𑁄 𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀅𑀬𑀁 𑀕𑀦𑁆𑀣𑁄 𑀯𑀺𑀭𑀘𑀺𑀢𑁄, 𑀢𑀲𑁆𑀲 𑀦𑀸𑀫𑀕𑀼𑀡𑀦𑀺𑀯𑀸𑀲𑀓𑀭𑀡𑀧𑁆𑀧𑀓𑀸𑀭𑀯𑀺𑀳𑀸𑀭𑀕𑀼𑀡𑀦𑀸𑀫𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀘 𑀦𑀸𑀫𑀕𑀼𑀡𑁂 𑀤𑀲𑁆𑀲𑁂𑀢𑀼𑀁 𑀲𑀢𑁆𑀢 𑀕𑀸𑀣𑀸 𑀯𑀼𑀢𑁆𑀢𑀸.

𑀢𑀢𑁆𑀭 𑀤𑀼𑀢𑀺𑀬𑀸 𑀪𑀼𑀚𑀗𑁆𑀕𑀧𑁆𑀧𑀬𑀸𑀢𑀁 𑀦𑀸𑀫. 𑀢𑀸𑀲𑀁 𑀅𑀬𑀁 𑀲𑀫𑁆𑀩𑀦𑁆𑀥𑀸𑀥𑀺𑀧𑁆𑀧𑀸𑀬𑀸 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑁄 𑀧𑀭𑀓𑁆𑀓𑀫𑀪𑀼𑀚𑁄 𑀦𑀸𑀫 𑀪𑀽𑀧𑀸𑀮𑁄 𑀭𑀸𑀚𑀸 𑀓𑀸𑀭𑁂𑀲𑀺, 𑀭𑀓𑁆𑀔𑁂𑀲𑀻𑀢𑀺 𑀘 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀺𑀁𑀕𑀼𑀡𑁄 𑀲𑁄 𑀭𑀸𑀚𑀸? 𑀕𑀼𑀡𑀪𑀽𑀲𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑀸𑀮𑀗𑁆𑀓𑀸𑀭𑀥𑀭𑁄. 𑀢𑁂𑀚𑀲𑁆𑀲𑀻 𑀢𑁂𑀚𑁄𑀬𑀼𑀢𑁆𑀢𑁄. 𑀚𑀬𑀻 𑀅𑀭𑀺𑀚𑀬𑁂𑀦 𑀬𑀼𑀢𑁆𑀢𑁄. 𑀓𑁂𑀲𑀭𑀺𑀯𑀺𑀓𑁆𑀓𑀫𑁄 𑀓𑁂𑀲𑀭𑀲𑀻𑀳𑁄 𑀯𑀺𑀬 𑀲𑀽𑀭𑀕𑀼𑀡𑀬𑀼𑀢𑁆𑀢𑁄, 𑀯𑀻𑀭𑀺𑀬𑀯𑀸 𑀘. 𑀲 𑀓𑀢𑁆𑀣 𑀦𑀺𑀯𑀸𑀲𑀻? 𑀲𑁄 𑀭𑀸𑀚𑀸 𑀮𑀗𑁆𑀓𑀸𑀬𑀫𑀸𑀲𑀺 𑀮𑀗𑁆𑀓𑀸𑀦𑀸𑀫𑀓𑁂 𑀤𑀻𑀧𑁂 𑀦𑀺𑀯𑀸𑀲𑀦𑀲𑀻𑀮𑁄. 𑀘𑀺𑀭𑀁 𑀘𑀺𑀭𑀓𑀸𑀮𑀁 𑀯𑀺𑀪𑀺𑀦𑁆𑀦𑀁 𑀢𑀺𑀥𑀸 𑀯𑀺𑀪𑀺𑀦𑁆𑀦𑀁 𑀦𑀺𑀓𑀸𑀬𑀢𑁆𑀢𑀬𑀲𑁆𑀫𑀺𑀁 𑀦𑀺𑀓𑀸𑀬𑀢𑁆𑀢𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑁆𑀫𑀸 𑀦𑀬𑁂𑀦 𑀳𑁂𑀢𑀼𑀦𑀸 𑀲𑀫𑀕𑁆𑀕𑁂 𑀲𑀫𑀕𑁆𑀕𑀁 𑀓𑀸𑀭𑁂𑀲𑀺, 𑀓𑀸𑀭𑀺𑀢𑀦𑁆𑀢𑁄𑀬𑀁 𑀓𑀭𑁄𑀢𑀻𑀢𑀺 𑀓𑀫𑁆𑀫𑀺𑀓𑁄, 𑀢𑀣𑀸 𑀲𑀤𑁂𑀳𑀁𑀯 𑀅𑀢𑁆𑀢𑀦𑁄 𑀓𑀸𑀬𑀁 𑀇𑀯 𑀦𑀺𑀘𑁆𑀘𑀸𑀤𑀭𑁄 𑀳𑀼𑀢𑁆𑀯𑀸 𑀤𑀻𑀖𑀓𑀸𑀮𑀁 𑀫𑀳𑀕𑁆𑀖𑁂𑀳𑀺 𑀘 𑀧𑀘𑁆𑀘𑀬𑁂𑀳𑀺 𑀢𑀁 𑀦𑀺𑀓𑀸𑀬𑀢𑁆𑀢𑀬𑀁 𑀭𑀓𑁆𑀔𑁂𑀲𑀺.

𑀢𑀣𑀸 𑀬𑁂𑀦 𑀭𑀜𑁆𑀜𑀸 𑀬𑀣𑀸 𑀓𑀺𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀓𑀺𑀢𑁆𑀢𑀺𑀬𑀸 𑀓𑀭𑀡𑀪𑀽𑀢𑀸𑀬 𑀮𑀗𑁆𑀓𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀪𑀽𑀢𑀸 𑀓𑀫𑁆𑀫𑀪𑀽𑀢𑀸 𑀲𑀫𑁆𑀩𑀸𑀥𑀻𑀓𑀢𑀸 𑀲𑀗𑁆𑀓𑀝𑀻𑀓𑀢𑀸 𑀅𑀦𑁄𑀓𑀸𑀲𑀻𑀓𑀢𑀸, 𑀢𑀣𑀸 𑀯𑀺𑀳𑀸𑀭𑁂𑀳𑀺 𑀕𑀸𑀫𑁂𑀳𑀺 𑀆𑀭𑀸𑀫𑁂𑀳𑀺 𑀔𑁂𑀢𑁆𑀢𑁂𑀳𑀺 𑀯𑀸𑀧𑀻𑀳𑀺 𑀘 𑀮𑀗𑁆𑀓𑀸 𑀲𑀫𑁆𑀩𑀸𑀥𑀻𑀓𑀢𑀸.

𑀢𑀣𑀸 𑀬𑀲𑁆𑀲 𑀭𑀜𑁆𑀜𑁄 𑀲𑀩𑁆𑀩𑀓𑀸𑀫𑀤𑀤𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀅𑀦𑀼𑀕𑁆𑀕𑀳𑀁 𑀧𑀢𑁆𑀯𑀸 𑀧𑀸𑀧𑀼𑀡𑀦𑀳𑁂𑀢𑀼 𑀅𑀳𑀁 𑀯𑀺𑀩𑀼𑀥𑀕𑁄𑀘𑀭𑀁 𑀧𑀡𑁆𑀟𑀺𑀢𑀯𑀺𑀲𑀬𑀁 𑀕𑀦𑁆𑀣𑀓𑀸𑀭𑀢𑁆𑀢𑀁 𑀧𑀢𑁆𑀢𑁄, 𑀢𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑁂 𑀧𑀸𑀲𑀸𑀤𑀕𑁄𑀧𑀼𑀭𑀸𑀤𑀺𑀯𑀺𑀪𑀽𑀲𑀺𑀢𑁂, 𑀲𑀕𑁆𑀕𑀓𑀡𑁆𑀟𑁂 𑀤𑁂𑀯𑀮𑁄𑀓𑀲𑁆𑀲 𑀓𑀡𑁆𑀟𑀲𑀤𑀺𑀲𑁂, 𑀲𑀢𑁄𑀬𑀸𑀲𑀬𑀲𑁆𑀫𑀺𑀁 𑀲𑀸𑀤𑀼𑀲𑀮𑀺𑀮𑀸𑀲𑀬𑀲𑀫𑀦𑁆𑀦𑀸𑀕𑀢𑁂, 𑀧𑀝𑀺𑀩𑀺𑀫𑁆𑀩𑀺𑀢𑁂 𑀪𑀕𑀯𑀢𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀲𑁆𑀲 𑀧𑀝𑀺𑀩𑀺𑀫𑁆𑀩𑀪𑀽𑀢𑁂, 𑀲𑀸𑀥𑀼𑀲𑀫𑁆𑀫𑀢𑁂 𑀲𑀸𑀥𑀼𑀯𑀺𑀳𑀸𑀭𑁄𑀢𑀺 𑀲𑀫𑁆𑀫𑀢𑁂, 𑀲𑀸𑀥𑀽𑀳𑀺 𑀯𑀸 𑀲𑀫𑁆𑀫𑀢𑁂 𑀲𑀭𑁄𑀕𑀸𑀫𑀲𑀫𑀽𑀳𑀫𑁆𑀳𑀺 𑀲𑀮𑀺𑀮𑀸𑀲𑀬𑀪𑀺𑀓𑁆𑀔𑀸𑀘𑀸𑀭𑀬𑀼𑀢𑁆𑀢𑀕𑀸𑀫𑀲𑀫𑀽𑀳𑀲𑀫𑀦𑁆𑀦𑀸𑀕𑀢𑁂 𑀫𑀳𑀸𑀚𑁂𑀢𑀯𑀦𑀸𑀔𑁆𑀬𑀫𑁆𑀳𑀺 𑀯𑀺𑀳𑀸𑀭𑁂 𑀯𑀲𑀢𑀸 𑀦𑀺𑀯𑀸𑀲𑀁 𑀓𑀼𑀩𑁆𑀩𑀢𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑀸 𑀲𑀦𑁆𑀢𑀘𑀸𑀭𑀺𑀦𑀸 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀸𑀫𑁂𑀦 𑀥𑀻𑀫𑀢𑀸 𑀅𑀢𑀺𑀲𑀬𑀜𑀸𑀡𑀬𑀼𑀢𑁆𑀢𑁂𑀦 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑀪𑀽𑀢𑀲𑁆𑀲 𑀆𑀬𑀲𑁆𑀫𑀢𑁄 𑀇𑀤𑁆𑀥𑀺𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀏𑀲𑀸 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸 𑀭𑀘𑀺𑀢𑀸𑀢𑀺.

𑀦𑀺𑀕𑀫𑀦𑀓𑀣𑀸

𑀬𑀤𑁆𑀬𑀢𑁆𑀭 𑀤𑁄𑀲𑁄𑀡𑀼𑀧𑀫𑀸𑀡𑀲𑀫𑁆𑀪𑀯𑁄,

𑀕𑀼𑀡𑀻𑀲𑀼 𑀯𑀻𑀥𑀺𑀫𑁆𑀧𑀺 𑀢𑀣𑀸 𑀯𑀺𑀕𑀸𑀳𑀢𑁂;

𑀬𑀣𑀸 𑀚𑀮𑀁 𑀪𑁄𑀚𑀦𑀫𑁆𑀧𑀺 𑀚𑀦𑁆𑀢𑀼𑀯𑀸,

𑀘𑀢𑀼𑀧𑁆𑀧𑀤𑁄 𑀯𑀸𑀧𑁆𑀬𑀘𑀭𑁄 𑀓𑀡𑀡𑁆𑀬𑀧𑀺.

𑀅𑀲𑀫𑁆𑀧𑀯𑁂𑀤𑀺𑀤𑀲𑁆𑀲𑀦𑀸𑀬 𑀪𑀸𑀲𑀺𑀢𑁂,

𑀕𑀼𑀡𑁄 𑀘 𑀤𑁄𑀲𑁄 𑀘 𑀲𑀤𑀸 𑀯𑀺𑀯𑀺𑀚𑁆𑀚𑀭𑁂;

𑀢𑀢𑁄 𑀩𑀼𑀥𑀸 𑀫𑁂 𑀦𑀯𑀥𑀸𑀦𑀢𑀸 𑀪𑀯𑀁,

𑀔𑀫𑀦𑁆𑀢𑀼 𑀤𑁄𑀲𑀁 𑀕𑀼𑀡𑀢𑀁 𑀦𑀬𑀦𑁆𑀢𑀼 𑀯𑀸.

𑀬𑁄 𑀲𑀻𑀳𑀲𑀽𑀭𑁄 𑀲𑀺𑀢𑀓𑀼𑀜𑁆𑀚𑀭𑀺𑀦𑁆𑀤𑁄,

𑀭𑀸𑀚𑀸𑀥𑀺𑀭𑀸𑀚𑀸 𑀅𑀳𑀼 𑀢𑀫𑁆𑀩𑀤𑀻𑀧𑁂;

𑀤𑀼𑀩𑁆𑀩𑀸𑀭𑀦𑀸𑀕𑀸𑀤𑀺𑀚𑀺𑀢𑁄 𑀦𑀭𑀺𑀦𑁆𑀤𑁄,

𑀲𑀼𑀓𑀦𑁆𑀢𑀪𑀻𑀫𑀸𑀤𑀺𑀕𑀼𑀡𑁄𑀧𑀧𑀦𑁆𑀦𑁄.

𑀢𑀦𑁆𑀦𑀸𑀫𑀥𑁂𑀬𑁆𑀬𑁄 𑀢𑀤𑀦𑀼𑀩𑁆𑀩𑀸𑀤𑀚𑀸𑀢𑁄,

𑀲𑀤𑁆𑀥𑀸𑀤𑀺𑀬𑀼𑀢𑁆𑀢𑁄 𑀘𑀢𑀼𑀲𑁂𑀢𑀺𑀪𑀺𑀦𑁆𑀤𑁄;

𑀦𑀸𑀕𑀸𑀤𑀺𑀣𑀸𑀫𑁄 𑀅𑀢𑀺𑀤𑀼𑀧𑁆𑀧𑀲𑀬𑁆𑀳𑁄,

𑀉𑀴𑀸𑀭𑀧𑀜𑁆𑀜𑁄 𑀥𑀺𑀢𑀺𑀫𑀸 𑀬𑀲𑀲𑁆𑀲𑀻.

𑀢𑁂𑀦𑀸𑀳𑀫𑀘𑁆𑀘𑀦𑁆𑀢𑀫𑀦𑀼𑀕𑁆𑀕𑀳𑀻𑀢𑁄,

𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀗𑁆𑀕𑀳𑁂𑀦;

𑀲𑀗𑁆𑀔𑁂𑀧𑀢𑁄𑀓𑀸𑀲𑀺𑀫𑀺𑀫𑀁 𑀯𑀺𑀲𑀼𑀤𑁆𑀥𑀺-

𑀲𑀁𑀯𑀡𑁆𑀡𑀦𑀁 𑀲𑁄𑀢𑀼𑀳𑀺𑀢𑀁 𑀲𑀼𑀩𑁄𑀥𑀁.

𑀭𑀸𑀚𑀸 𑀧𑀚𑀁 𑀭𑀓𑁆𑀔𑀢𑀼 𑀲𑀧𑁆𑀧𑀚𑀁𑀯,

𑀥𑀫𑁆𑀫𑀜𑁆𑀘 𑀮𑁄𑀓𑀸𑀧𑀺 𑀲𑀫𑀸𑀘𑀭𑀦𑁆𑀢𑀼;

𑀧𑀽𑀭𑁂𑀦𑁆𑀢𑀼 𑀅𑀢𑁆𑀣𑀸 𑀲𑀼𑀧𑀓𑀧𑁆𑀧𑀺𑀢𑀸 𑀘,

𑀓𑀸𑀮𑁂𑀦 𑀤𑁂𑀯𑁄𑀧𑀺 𑀧𑀯𑀲𑁆𑀲𑀢𑀽𑀢𑀺.

𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.