𑁭. 𑀧𑀸𑀢𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁬𑁪𑁯-𑁬𑁫𑁦. 𑀘𑀢𑀼𑀓𑁆𑀓𑀁 𑀧𑀸𑀢𑀸𑀮𑁂. 𑀅𑀥𑀭𑀁 𑀪𑀼𑀯𑀦𑀁 𑀅𑀥𑁄𑀪𑀼𑀯𑀦𑀁. 𑀧𑀢𑀦𑁆𑀢𑀺 𑀅𑀲𑁆𑀫𑀺𑀁 𑀧𑀸𑀢𑀸𑀮𑀁, 𑀅𑀮𑁄, 𑀫𑀚𑁆𑀛𑁂 𑀤𑀻𑀖𑁄. 𑀦𑀸𑀕𑀸𑀦𑀁 𑀮𑁄𑀓𑁄. 𑀭𑀲𑀸𑀬 𑀢𑀮𑀁 𑀭𑀲𑀸𑀢𑀮𑀁.

𑀲𑁄𑀩𑁆𑀪𑀦𑁆𑀢𑀁 𑀙𑀺𑀤𑁆𑀤𑀫𑀢𑁆𑀢𑁂. 𑀭𑀡 𑀲𑀤𑁆𑀤𑁂, 𑀥𑁄, 𑀦𑀢𑁆𑀢𑀁, 𑀬𑀤𑀸𑀤𑀺. 𑀯𑀭 𑀤𑀺𑀢𑁆𑀢𑀺𑀬𑀁. 𑀯𑀺𑀕𑀢𑁄 𑀯𑀭𑁄 𑀯𑀸𑀭𑀡𑀁 𑀅𑀲𑁆𑀲 𑀯𑀺𑀯𑀭𑀁, 𑀙𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂, 𑀤𑁄. 𑀓𑀼𑀳 𑀯𑀺𑀫𑁆𑀳𑀬𑀦𑁂, 𑀅𑀭𑁄. 𑀲𑀼𑀲 𑀲𑁄𑀲𑀦𑁂, 𑀇𑀭𑁄. 𑀩𑀺𑀮 𑀪𑁂𑀤𑀦𑁂, 𑀅. 𑀲𑀼𑀲𑀢𑁄 𑀇, 𑀲𑀼𑀲𑀺. 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀙𑀺𑀕𑁆𑀕𑀮𑀁, 𑀬𑀤𑀸𑀤𑀺. 𑀲𑀼𑀝𑁆𑀞𑀼 𑀅𑀩𑁆𑀪𑀁 𑀆𑀓𑀸𑀲𑀁 𑀅𑀲𑁆𑀫𑀺𑀁 𑀲𑁄𑀩𑁆𑀪𑀁.

‘‘𑀲𑀼𑀲𑀺𑀭’’𑀦𑁆𑀢𑀺 𑀙𑀺𑀤𑁆𑀤𑀲𑀸𑀫𑀜𑁆𑀜𑁂 𑀬𑀁 𑀦𑀧𑀼𑀁𑀲𑀓𑀯𑀘𑀦𑀁, 𑀢𑀁 𑀲𑀘𑁆𑀙𑀺𑀤𑁆𑀤𑁂 𑀙𑀺𑀤𑁆𑀤𑀯𑀢𑀺 𑀤𑀩𑁆𑀩𑁂 𑀢𑀻𑀲𑀼, 𑀬𑀣𑀸 ‘‘𑀲𑀼𑀲𑀺𑀭𑁄 𑀭𑀼𑀓𑁆𑀔𑁄, 𑀲𑀼𑀲𑀺𑀭𑀸 𑀘𑀺𑀜𑁆𑀘𑀸, 𑀲𑀼𑀲𑀺𑀭𑀁 𑀓𑀝𑁆𑀞’’𑀦𑁆𑀢𑀺.

𑀤𑁆𑀯𑀬𑀁 𑀪𑀽𑀫𑀺𑀙𑀺𑀤𑁆𑀤𑁂. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀉. 𑀅𑀯 𑀭𑀓𑁆𑀔𑀡𑁂, 𑀅𑀝𑁄, 𑀆𑀯𑀸𑀝𑁄, 𑀅𑀯𑀸𑀝𑁄𑀧𑀺. 𑀤𑁆𑀯𑀬𑀁 𑀲𑀧𑁆𑀧𑀸𑀦𑀁 𑀭𑀸𑀚𑀺𑀦𑀺. 𑀯𑀲𑀼 𑀭𑀢𑀦𑀁 𑀬𑀲𑁆𑀲𑀢𑁆𑀣𑀻𑀢𑀺 𑀯𑀸𑀲𑀼𑀓𑀻.

𑁬𑁫𑁧. 𑀤𑁆𑀯𑀬𑀁 𑀦𑀸𑀕𑀸𑀦𑀁 𑀭𑀸𑀚𑀺𑀦𑀺. 𑀤𑁂𑀯𑁂𑀳𑀺𑀧𑁆𑀬𑀲𑁆𑀲𑀦𑁆𑀢𑁄 𑀦𑁄𑀧𑀮𑀤𑁆𑀥𑁄𑀢𑀺 𑀅𑀦𑀦𑁆𑀢𑁄, 𑀲𑁂𑀲𑁄𑀧𑀺, 𑀲𑀺𑀲 𑀳𑀺𑀁𑀲𑀸𑀬𑀁, 𑀲𑀺𑀲𑀢𑀺 𑀓𑀧𑁆𑀧𑀦𑁆𑀢𑁂𑀢𑀺 𑀲𑁂𑀲𑁄, 𑀅.

𑀤𑁆𑀯𑀬𑀁 𑀅𑀚𑀕𑀭𑁂. 𑀯𑀳𑀢𑀺𑀲𑁆𑀫𑀸 𑀅𑀲𑁄, 𑀯𑀸𑀳𑀲𑁄. 𑀅𑀚𑀁 𑀙𑀸𑀕𑀁 𑀕𑀺𑀮𑀢𑀻𑀢𑀺 𑀅𑀚𑀕𑀭𑁄, 𑀅, 𑀇𑀲𑁆𑀲𑀢𑁆𑀢𑀁, 𑀮𑀲𑁆𑀲 𑀭𑀢𑁆𑀢𑀜𑁆𑀘. 𑀲𑀬𑀻𑀧𑀺, 𑀲𑀬𑀦𑀲𑀻𑀮𑁄 𑀲𑀬𑀻.

𑀤𑁆𑀯𑀬𑀁 𑀕𑁄𑀦𑀲𑀲𑀧𑁆𑀧𑁂 ‘‘𑀗𑀸-𑀘𑁆𑀯𑁂’’𑀇𑀢𑀺 𑀔𑁆𑀬𑀸𑀢𑁂. 𑀕𑀯𑀲𑁆𑀲𑁂𑀯 𑀦𑀸𑀲𑀸 𑀅𑀲𑁆𑀲𑀸𑀢𑀺 𑀕𑁄𑀦𑀲𑁄, 𑀲𑀜𑁆𑀜𑀸𑀬𑀁 𑀦𑀸𑀲𑀲𑀤𑁆𑀤𑀲𑁆𑀲 𑀦𑀲𑁄 𑀓𑀢𑁄 [𑀧𑀸𑀡𑀺𑀦𑀺 𑁫.𑁪.𑁧𑁧𑁯]. 𑀢𑀺𑀮𑀁 𑀇𑀘𑁆𑀙𑀢𑀻𑀢𑀺 𑀢𑀺𑀮𑀺𑀘𑁆𑀙𑁄, 𑀢𑀺𑀭𑀺𑀬𑀁 𑀅𑀜𑁆𑀘𑀢𑀻𑀢𑀺 𑀯𑀸 𑀢𑀺𑀮𑀺𑀘𑁆𑀙𑁄, 𑀬𑀤𑀸𑀤𑀺.

𑀤𑁆𑀯𑀬𑀁 𑀤𑁂𑀟𑁆𑀟𑀼𑀪𑁂, 𑀬𑁄 ‘‘𑀚𑀮𑀲𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀤𑁂𑀟𑁆𑀟𑀼𑀦𑀸 𑀭𑀸𑀚𑀺𑀬𑀸 𑀉𑀪𑀢𑀻𑀢𑀺 𑀤𑁂𑀟𑁆𑀟𑀼𑀪𑁄. 𑀧𑀺𑀝𑁆𑀞𑁂 𑀭𑀸𑀚𑀺𑀬𑁄𑀕𑀸 𑀭𑀸𑀚𑀼𑀮𑁄, 𑀉𑀮𑁄, 𑀩𑀥𑀺𑀭𑀲𑀧𑁆𑀧𑁂𑀧𑁆𑀬𑁂𑀢𑁂.

𑁬𑁫𑁨. 𑀓𑀫𑁆𑀩𑀮𑁄 𑀘 𑀅𑀲𑁆𑀲𑀢𑀭𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀦𑀸𑀕𑀓𑀼𑀮𑀸 𑀫𑁂𑀭𑀼𑀧𑀸𑀤𑁂 𑀯𑀲𑀦𑁆𑀢𑀺.

𑀤𑁆𑀯𑀬𑀁 𑀯𑁂𑀲𑁆𑀫𑀦𑀺𑀯𑀼𑀝𑁆𑀞𑀲𑀧𑁆𑀧𑁂. ‘‘𑀯𑀫𑁆𑀫𑀦𑀻’’𑀢𑀺𑀧𑀺 𑀧𑀸𑀞𑁄. ‘‘𑀅𑀲𑀼𑀤𑁆𑀤𑁄 𑀖𑀭𑀲𑀧𑁆𑀧𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀺𑀲𑀢𑀸𑀬 𑀅𑀫𑀸𑀭𑀺𑀢𑀢𑁆𑀢𑀸 𑀲𑀻𑀮𑀬𑀼𑀢𑁆𑀢𑀁 𑀅𑀢𑁆𑀢𑀸 𑀫𑀦𑁄 𑀬𑀲𑁆𑀫𑀺𑀁 𑀲𑀺𑀮𑀼𑀢𑁆𑀢𑁄, 𑀅𑀲𑁆𑀲𑀼, 𑀭𑀲𑁆𑀲𑀸𑀤𑀺.

𑀤𑁆𑀯𑀬𑀁 𑀭𑀼𑀓𑁆𑀔𑀕𑁆𑀕𑀸𑀤𑀻𑀲𑀼 𑀦𑀺𑀯𑀼𑀝𑁆𑀞𑀲𑀧𑁆𑀧𑁂. 𑀦𑀻𑀮𑁄 𑀳𑀭𑀺𑀢𑁄 𑀲𑀧𑁆𑀧𑁄𑀢𑀺 𑀦𑀻𑀮𑀲𑀧𑁆𑀧𑁄. ‘‘𑀦𑀻𑀮𑁄 𑀓𑀡𑁆𑀳𑀫𑁆𑀳𑀺 𑀳𑀭𑀺𑀢𑁂’’𑀢𑀺 𑀳𑀺 𑀢𑀸𑀭𑀧𑀸𑀮𑁄. 𑀧𑀞𑀫𑀓𑀸𑀮𑁂 𑀲𑀺𑀮𑀸𑀬𑀁 𑀪𑀯𑀢𑀻𑀢𑀺 𑀲𑀺𑀮𑀸𑀪𑀼.

𑁬𑁫𑁩-𑁬𑁫𑁪. 𑀯𑀺𑀲𑀥𑀭𑀦𑁆𑀢𑀁 𑀲𑀧𑁆𑀧𑀫𑀢𑁆𑀢𑁂. 𑀆𑀲𑀺𑀬𑀁 𑀯𑀺𑀲𑀁 𑀏𑀢𑀲𑁆𑀲 𑀆𑀲𑀻𑀯𑀺𑀲𑁄, 𑀆𑀲𑀻 𑀲𑀧𑁆𑀧𑀤𑀸𑀞𑀸. 𑀪𑀼𑀚 𑀓𑁄𑀝𑀺𑀮𑁆𑀬𑁂, 𑀓𑀼𑀝𑀺𑀮𑀸𑀬𑀫𑀸𑀦𑁄 𑀕𑀘𑁆𑀙𑀢𑀻𑀢𑀺 𑀪𑀼𑀚𑀗𑁆𑀕𑁄, 𑀏𑀯𑀁 𑀪𑀼𑀚𑀕𑁄, 𑀪𑀼𑀚𑀗𑁆𑀕𑀫𑁄 𑀘. 𑀅𑀳𑀺 𑀕𑀫𑀦𑁂, 𑀇. 𑀲𑀭𑀦𑁆𑀢𑁄 𑀲𑀧𑁆𑀧𑀢𑀺 𑀕𑀘𑁆𑀙𑀢𑀻𑀢𑀺 𑀲𑀭𑀻𑀲𑀧𑁄, 𑀅𑀲𑁆𑀲𑀻, 𑀲𑀁𑀬𑁄𑀕𑀮𑁄𑀧𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁, 𑀪𑀼𑀚𑀗𑁆𑀕𑀪𑀼𑀚𑀗𑁆𑀕𑀫𑀸𑀧𑀺, 𑀲𑀩𑁆𑀩𑀥𑀭𑀓𑀢𑁂 𑀧𑀦 ‘‘𑀪𑀼𑀲𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀓𑀼𑀝𑀺𑀮𑀁 𑀲𑀧𑁆𑀧𑀢𑀻𑀢𑀺 𑀲𑀭𑀻𑀲𑀧𑁄’’𑀢𑀺 𑀯𑀼𑀢𑁆𑀢𑀁. 𑀨𑀡𑀬𑁄𑀕𑀸, 𑀈, 𑀨𑀡𑀻. 𑀲𑀧𑁆𑀧𑀢𑀺𑀲𑁆𑀫𑀸 𑀅, 𑀪𑀽𑀫𑀺𑀨𑀼𑀝𑁆𑀞𑁂𑀦 𑀕𑀢𑁆𑀢𑁂𑀦 𑀕𑀢𑀺 𑀲𑀧𑁆𑀧𑀦𑀁. 𑀅𑀭𑀁 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀅𑀮𑀕𑀤𑁆𑀤𑁄, 𑀫𑀲𑁆𑀲 𑀤𑁄, 𑀭𑀲𑁆𑀲 𑀮𑀢𑁆𑀢𑀜𑁆𑀘, 𑀅𑀮𑀕𑀤𑁆𑀤𑁄, 𑀚𑀮𑀲𑀧𑁆𑀧𑁂𑀧𑁆𑀬𑀬𑀁, ‘‘𑀅𑀮𑀕𑀤𑁆𑀤𑁄 𑀚𑀮𑀯𑀸𑀴𑁄’’𑀢𑀺 [𑀅𑀫𑀭 𑁮.𑁫] 𑀳𑀺 𑀅𑀫𑀭𑀲𑀻𑀳𑁄. 𑀪𑁄𑀕𑁄 𑀨𑀡𑀺𑀓𑀸𑀬𑁄, 𑀢𑀁𑀬𑁄𑀕𑀸 𑀪𑁄𑀕𑀻. 𑀧𑀦𑁆𑀦𑀁 𑀕𑀘𑁆𑀙𑀢𑀻𑀢𑀺 𑀧𑀦𑁆𑀦𑀕𑁄, 𑀧𑀸𑀤𑁂𑀳𑀺 𑀯𑀸 𑀦 𑀕𑀘𑁆𑀙𑀢𑀻𑀢𑀺 𑀧𑀦𑁆𑀦𑀕𑁄. 𑀤𑁆𑀯𑁂 𑀚𑀺𑀯𑁆𑀳𑀸 𑀅𑀲𑁆𑀲. 𑀉𑀭𑀲𑀸 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄. 𑀯𑀺𑀲𑁂𑀲𑁂𑀦 𑀆𑀮𑀸𑀢𑀺 𑀕𑀡𑁆𑀳𑀸𑀢𑀺 𑀆𑀬𑀼𑀦𑁆𑀢𑀺 𑀯𑀸𑀴𑁄, 𑀮𑀲𑁆𑀲 𑀴𑀢𑁆𑀢𑀁, 𑀯𑀸 𑀕𑀫𑀦𑁂 𑀯𑀸, 𑀅𑀮𑁄. 𑀤𑀻𑀖𑀲𑀭𑀻𑀭𑀢𑀸𑀬 𑀤𑀻𑀖𑁄. 𑀤𑀻𑀖𑀸 𑀧𑀺𑀝𑁆𑀞𑀺 𑀬𑀲𑁆𑀲, 𑀲𑀫𑀸𑀲𑁂 𑀓𑁄. 𑀉𑀤𑀭𑀫𑁂𑀯 𑀧𑀸𑀤𑁄 𑀬𑀲𑁆𑀲. 𑀯𑀺𑀲𑀁 𑀥𑀭𑀢𑀺. 𑀘𑀓𑁆𑀓𑀻, 𑀓𑀼𑀡𑁆𑀟𑀮𑀻, 𑀕𑀽𑀴𑁆𑀳𑀧𑀸𑀤𑁄, 𑀘𑀓𑁆𑀔𑀼𑀲𑁆𑀲𑀯𑁄, 𑀓𑀸𑀓𑁄𑀤𑀭𑁄, 𑀤𑀩𑁆𑀩𑀻𑀓𑀭𑁄, 𑀩𑀺𑀮𑁂𑀲𑀬𑁄, 𑀚𑀺𑀫𑁆𑀳𑀕𑁄, 𑀧𑀯𑀦𑀸𑀲𑀦𑁄𑀧𑀺. 𑀲𑀺𑀭𑀲𑀺 𑀘𑀓𑁆𑀓𑀬𑁄𑀕𑀸 𑀘𑀓𑁆𑀓𑀻. 𑀓𑀼𑀡𑁆𑀟𑀮𑀫𑀺𑀯 𑀯𑀧𑀼 𑀅𑀲𑁆𑀲𑀢𑁆𑀣𑀻𑀢𑀺 𑀢𑀁𑀬𑁄𑀕𑀸 𑀓𑀼𑀡𑁆𑀟𑀮𑀻. 𑀘𑀓𑁆𑀔𑀼𑀦𑀸 𑀲𑀼𑀡𑁄𑀢𑀻𑀢𑀺 𑀘𑀓𑁆𑀔𑀼𑀲𑁆𑀲𑀯𑁄. 𑀓𑀸𑀓𑁄𑀤𑀭𑀫𑀺𑀯 𑀉𑀤𑀭𑀁 𑀅𑀲𑁆𑀲. 𑀤𑀩𑁆𑀩𑀺𑀕𑀢𑀺𑀓𑀢𑁆𑀢𑀸 𑀨𑀡𑀸 𑀤𑀩𑁆𑀩𑀻, 𑀢𑀁 𑀓𑀭𑁄𑀢𑀺 𑀩𑀦𑁆𑀥𑀢𑀻𑀢𑀺 𑀤𑀩𑁆𑀩𑀻𑀓𑀭𑁄. 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀧𑀺 𑀓𑀡𑁆𑀳𑀲𑀧𑁆𑀧𑀸𑀤𑀺𑀬𑁂𑀯 𑀤𑀩𑁆𑀩𑀻𑀓𑀭𑁄. 𑀚𑀺𑀫𑁆𑀳𑀁 𑀓𑀼𑀝𑀺𑀮𑀁 𑀕𑀘𑁆𑀙𑀢𑀻𑀢𑀺. 𑀧𑀯𑀦𑀸𑀲𑀦𑁄 𑀯𑀸𑀢𑀪𑁄𑀚𑀻.

𑀨𑀡𑀺𑀦𑁄 𑀲𑀧𑁆𑀧𑀲𑁆𑀲 𑀢𑀦𑀼 𑀓𑀸𑀬𑁄 𑀪𑁄𑀕𑁄 𑀦𑀸𑀫. 𑀪𑀼𑀚𑀢𑀻𑀢𑀺 𑀪𑁄𑀕𑁄, 𑀪𑀼𑀚 𑀓𑁄𑀝𑀺𑀮𑁆𑀬𑁂, 𑀡𑁄.

𑁬𑁫𑁫-𑁬𑁫𑁬. 𑀤𑁆𑀯𑀬𑀁 𑀲𑀧𑁆𑀧𑀲𑁆𑀲 𑀤𑀸𑀞𑀸𑀬𑀁. 𑀅𑀲𑀢𑀺 𑀬𑁂𑀦 𑀅𑀲𑀁, 𑀫𑀼𑀔𑀁, 𑀢𑀲𑁆𑀫𑀺𑀁 𑀪𑀯𑀸 𑀆𑀲𑀻, 𑀲𑀧𑁆𑀧𑀲𑁆𑀲 𑀤𑀸𑀞𑀸 𑀤𑀦𑁆𑀢𑀼𑀢𑁆𑀢𑀫𑀸. 𑀤𑁆𑀯𑀬𑀁 𑀲𑀧𑁆𑀧𑀲𑁆𑀲 𑀚𑀺𑀡𑁆𑀡𑀢𑀘𑁂, 𑀦𑀺𑀫𑀼𑀘𑁆𑀘𑀢𑁂 𑀬𑀲𑁆𑀫𑀸 𑀲𑀧𑁆𑀧𑁄𑀢𑀺, 𑀡𑁄. 𑀓𑀜𑁆𑀘𑀼𑀓𑀲𑀤𑀺𑀲𑀢𑁆𑀢𑀸 𑀓𑀜𑁆𑀘𑀼𑀓𑁄. 𑀲𑀫𑀸 𑀢𑀼𑀮𑁆𑀬𑀢𑁆𑀣𑀸.

𑀤𑁆𑀯𑀬𑀁 𑀯𑀺𑀲𑀫𑀢𑁆𑀢𑁂. 𑀲𑁄𑀡𑀺𑀧𑀣𑀕𑀢𑀁 𑀯𑀺𑀲𑀢𑀺 𑀤𑁂𑀳𑀦𑁆𑀢𑀺 𑀯𑀺𑀲𑀁, 𑀯𑀺𑀲 𑀧𑀯𑁂𑀲𑀦𑁂. 𑀕𑀺𑀭𑀢𑀻𑀢𑀺 𑀕𑀭𑀴𑀁, 𑀅𑀴𑁄.

𑀳𑀮𑀸𑀳𑀮𑁄, 𑀓𑀸𑀴𑀓𑀽𑀝𑁄, 𑀆𑀤𑀺𑀦𑀸 𑀓𑀸𑀓𑁄𑀮𑀸𑀤𑀬𑁄 𑀘 𑀲𑀢𑁆𑀢𑀸𑀢𑀺 𑀇𑀫𑁂 𑀦𑀯 𑀢𑀩𑁆𑀪𑁂𑀤𑀸 𑀢𑀲𑁆𑀲 𑀯𑀺𑀲𑀲𑁆𑀲 𑀪𑁂𑀤𑀸. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀼𑀫𑁂 𑀧𑀡𑁆𑀟𑁂 𑀘 𑀓𑀸𑀓𑁄𑀮-𑀓𑀸𑀴𑀓𑀽𑀝𑀳𑀮𑀸𑀳𑀮𑀸;

𑀲𑁄𑀭𑀝𑁆𑀞𑀺𑀓𑁄 𑀲𑀼𑀓𑁆𑀓𑀺𑀓𑁂𑀬𑁆𑀬𑁄, 𑀩𑁆𑀭𑀳𑁆𑀫𑀧𑀼𑀢𑁆𑀢𑁄 𑀧𑀤𑀻𑀧𑀦𑁄;

𑀤𑀸𑀭𑀤𑁄 𑀯𑀘𑁆𑀙𑀦𑀸𑀪𑁄 𑀘, 𑀯𑀺𑀲𑀪𑁂𑀤𑀸 𑀇𑀫𑁂 𑀦𑀯𑀸’’𑀢𑀺 [𑀅𑀫𑀭 𑁮.𑁧𑁦-𑁧𑁧].

𑀢𑀢𑁆𑀭 𑀳𑀮𑀸𑀳𑀮𑁄 𑀧𑀼𑀫𑁂, 𑀯𑀸𑀓𑀸𑀭𑁂𑀦 𑀦𑀧𑀼𑀁𑀲𑀓𑁂𑀧𑀺, ‘‘𑀳𑀸𑀮𑀸𑀳𑀮’’𑀦𑁆𑀢𑀺 𑀳𑀺 𑀢𑀺𑀓𑀡𑁆𑀟𑀲𑁂𑀲𑁂 [𑀢𑀺𑀓𑀡𑁆𑀟𑀲𑁂𑀲 𑁧.𑁮.𑁫] 𑀤𑀻𑀖𑀸𑀤𑀺𑀧𑀺. 𑀢𑀸𑀮𑀧𑀢𑁆𑀭𑀲𑀡𑁆𑀞𑀸𑀦𑁄 𑀦𑀻𑀮𑀧𑀢𑁆𑀭𑁄 𑀕𑁄𑀣𑀦𑀸𑀓𑀢𑀺𑀨𑀮𑁄 𑀕𑀘𑁆𑀙𑁄 𑀳𑀮𑀸𑀳𑀮𑁄. 𑀅𑀲𑁆𑀲 𑀘 𑀲𑀫𑀻𑀧𑁂 𑀭𑀼𑀓𑁆𑀔𑀸𑀤𑀬𑁄 𑀟𑀬𑁆𑀳𑀦𑁆𑀢𑁂. 𑀳𑀺𑀫𑀯𑀢𑀺, 𑀓𑀺𑀓𑁆𑀓𑀺𑀦𑁆𑀤𑀸𑀬𑀁, 𑀓𑁄𑀗𑁆𑀓𑀡𑁂𑀲𑀼, 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑁂 𑀘 𑀚𑀸𑀬𑀢𑁂, 𑀳𑀦𑀢𑀻𑀢𑀺 𑀳𑀮𑁄, 𑀅, 𑀦𑀲𑁆𑀲 𑀮𑁄, 𑀳𑀮𑀸𑀦𑀫𑁆𑀧𑀺 𑀳𑀮𑁄 𑀳𑀮𑀸𑀳𑀮𑁄, 𑀫𑀚𑁆𑀛𑀤𑀻𑀖𑁄. 𑀢𑀺𑀭𑀺𑀬𑀮𑁂𑀔𑀸𑀬 𑀘𑀺𑀢𑀁 𑀤𑁆𑀯𑀺𑀚𑀧𑀤𑁂𑀳𑀺 𑀬𑀼𑀢𑁆𑀢𑀁, 𑀢𑀣𑀸 𑀕𑀡𑁆𑀞𑀺𑀪𑀺 𑀩𑁆𑀬𑀸𑀧𑀺𑀢𑀁 𑀩𑀺𑀦𑁆𑀤𑀼𑀪𑀺𑀤𑁂𑀯 𑀬𑀁 𑀖𑀦𑀢𑀭𑁂𑀳𑀺, 𑀢𑀁 𑀓𑀸𑀴𑀓𑀽𑀝𑀁. 𑀇𑀤𑀜𑁆𑀘 𑀧𑀼𑀣𑀼𑀫𑀸𑀮𑀺𑀦𑀸𑀫𑀲𑁆𑀲𑀸𑀲𑀼𑀭𑀲𑁆𑀲 𑀲𑁄𑀡𑀺𑀢𑀫𑁆𑀳𑀸 𑀏𑀯 𑀅𑀲𑀼𑀭𑀲𑀫𑀬𑁂 [𑀤𑁂𑀯𑀸𑀲𑀼𑀭𑀭𑀡𑁂 (?)] 𑀲𑀫𑀼𑀧𑁆𑀧𑀦𑁆𑀦𑀲𑁆𑀲 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀲𑀤𑀺𑀲𑀲𑁆𑀲 𑀭𑀼𑀓𑁆𑀔𑀲𑁆𑀲 𑀦𑀺𑀬𑁆𑀬𑀸𑀲𑁄, 𑀅𑀳𑀺𑀘𑁆𑀙𑀢𑁆𑀢𑀫𑀮𑀬𑀓𑁄𑀗𑁆𑀓𑀡𑀲𑀺𑀗𑁆𑀕𑀯𑁂𑀭𑀧𑀩𑁆𑀩𑀢𑀸𑀤𑀻𑀲𑀼 𑀘𑁄𑀧𑁆𑀧𑀚𑁆𑀚𑀢𑁂. 𑀯𑀡𑁆𑀡𑁂𑀦 𑀓𑀸𑀴𑀜𑁆𑀘 𑀢𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀳𑀭𑀡𑀢𑁄 𑀮𑁄𑀳𑀫𑀼𑀕𑁆𑀕𑀭𑀲𑀤𑀺𑀲𑀢𑀸𑀬 𑀓𑀽𑀝𑀜𑁆𑀘𑁂𑀢𑀺 𑀓𑀸𑀴𑀓𑀽𑀝𑀁.

𑀩𑁆𑀭𑀳𑁆𑀫𑀧𑀼𑀢𑁆𑀢𑁄 𑀢𑀼 𑀓𑀧𑀺𑀮𑁄, 𑀫𑀮𑀬𑀤𑁆𑀤𑀺𑀪𑀯𑁄 𑀔𑀭𑁄;

𑀧𑀤𑀻𑀧𑀦𑁄 𑀢𑀼 𑀤𑀳𑀦𑁄, 𑀭𑀢𑁆𑀢𑀯𑀡𑁆𑀡𑁄’𑀜𑁆𑀚𑀦𑀤𑁆𑀤𑀺𑀚𑁄 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁮.𑁧𑁦-𑁧𑁧].

𑀤𑀭𑀤𑁂 𑀪𑀯𑁄 𑀤𑀸𑀭𑀤𑁄, 𑀲𑀼𑀧𑁆𑀧𑀪𑀦𑀸𑀫𑀓𑁄 𑀢𑀁𑀤𑁂𑀲𑀧𑀲𑀺𑀤𑁆𑀥𑁄 𑀘. 𑀯𑀘𑁆𑀙𑀦𑀸𑀪𑁄 𑀲𑀺𑀦𑁆𑀤𑀼𑀯𑀸𑀭𑀧𑀢𑁆𑀢𑀲𑀤𑀺𑀲𑁄 𑀘 𑀢𑀁𑀲𑀫𑀻𑀧𑁂 𑀭𑀼𑀓𑁆𑀔𑁄 𑀦 𑀯𑀤𑁆𑀥𑀢𑁂, 𑀢𑀁𑀲𑀫𑁆𑀨𑀲𑁆𑀲𑀯𑀸𑀬𑀼 𑀘 𑀚𑀭𑀬𑀢𑀺, 𑀯𑀺𑀜𑁆𑀛𑀸𑀬𑀁, 𑀓𑀺𑀓𑁆𑀓𑀺𑀦𑁆𑀤𑀸𑀬𑀜𑁆𑀘 𑀚𑀸𑀬𑀢𑁂, 𑀏𑀯𑀁 𑀯𑀺𑀲𑀦𑁆𑀢𑀭𑀸𑀦𑀫𑁆𑀧𑀺 𑀲𑀭𑀽𑀧𑀁 𑀆𑀕𑀫𑀢𑁄 𑀯𑀺𑀜𑁆𑀜𑁂𑀬𑁆𑀬𑀁.

𑀤𑁆𑀯𑀬𑀁 𑀥𑀦𑀢𑁆𑀣𑀁 𑀲𑀧𑁆𑀧𑀕𑁆𑀕𑀸𑀳𑁂. 𑀯𑀸𑀴𑀁 𑀲𑀧𑁆𑀧𑀁 𑀕𑀡𑁆𑀳𑀦𑀲𑀻𑀮𑀢𑀸𑀬 𑀯𑀸𑀴𑀕𑀸𑀳𑀻. 𑀅𑀳𑀺𑀦𑁄 𑀢𑀼𑀡𑁆𑀟𑁂𑀦 𑀫𑀼𑀔𑁂𑀦 𑀤𑀺𑀩𑁆𑀩𑀢𑀻𑀢𑀺 𑀅𑀳𑀺𑀢𑀼𑀡𑁆𑀟𑀺𑀓𑁄, 𑀡𑀺𑀓𑁄, ‘‘𑀯𑀸𑀴𑀕𑁆𑀕𑀸𑀳𑁄’𑀳𑀺𑀢𑀼𑀡𑁆𑀟𑀺𑀓𑁄’’𑀢𑀺 [𑀅𑀫𑀭𑀓𑁄𑀲𑁂 𑁮.𑁧𑁧-𑀕𑀸𑀣𑀸𑀬𑀫𑁆𑀧𑀺] 𑀅𑀫𑀭𑀫𑀸𑀮𑀸.

𑁬𑁫𑁭. 𑀢𑀺𑀓𑀁 𑀦𑀺𑀭𑀬𑁂. 𑀅𑀬𑁄 𑀇𑀝𑁆𑀞𑀨𑀮𑀁, 𑀲𑁄 𑀦𑀺𑀕𑁆𑀕𑀢𑁄 𑀅𑀲𑁆𑀫𑀸𑀢𑀺 𑀦𑀺𑀭𑀬𑁄, 𑀦𑀺𑀦𑁆𑀤𑀺𑀢𑁄 𑀭𑀬𑁄 𑀕𑀫𑀦𑀁 𑀏𑀢𑁆𑀣𑀸𑀢𑀺 𑀯𑀸 𑀦𑀺𑀭𑀬𑁄. 𑀤𑀼𑀝𑁆𑀞𑀸 𑀕𑀢𑀺 𑀤𑀼𑀕𑁆𑀕𑀢𑀺. 𑀅𑀧𑀼𑀜𑁆𑀜𑁂 𑀦𑁂𑀢𑀻𑀢𑀺 𑀦𑀭𑀓𑁄, 𑀡𑁆𑀯𑀼, 𑀭𑀦𑁆𑀢𑁄 𑀘, 𑀦𑀭𑀓𑁄.

𑀢𑁂𑀲𑀼 𑀦𑀺𑀭𑀬𑁂𑀲𑀼 𑀬𑁄 ‘‘𑀫𑀳𑀸𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀅𑀝𑁆𑀞𑀥𑀸 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀺 ‘‘𑀲𑀜𑁆𑀚𑀻𑀯𑁄’’𑀘𑁆𑀘𑀸𑀤𑀺𑀦𑀸 𑀲𑀺𑀮𑁄𑀓𑁂𑀦. 𑀫𑀭𑀦𑁆𑀢𑀸𑀧𑀺 𑀓𑀫𑁆𑀫𑀨𑀮𑀸𑀦𑀼𑀪𑀯𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀚𑀻𑀯𑀦𑁆𑀢𑀺 𑀅𑀲𑁆𑀫𑀺𑀁 𑀲𑀜𑁆𑀚𑀻𑀯𑁄. 𑀬𑀢𑁆𑀣 𑀦𑀺𑀭𑀬𑁂 𑀦𑁂𑀭𑀬𑀺𑀓𑀸𑀦𑀁 𑀲𑀭𑀻𑀭𑀸𑀦𑀺 𑀯𑀟𑁆𑀠𑀓𑀻𑀦𑀁 𑀓𑀸𑀴𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀯𑀸𑀲𑀺𑀬𑀸 𑀢𑀘𑁆𑀙𑀦𑁆𑀢𑀺, 𑀲𑁄 𑀓𑀸𑀴𑀲𑀼𑀢𑁆𑀢𑁄. 𑀪𑀼𑀲𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀤𑀼𑀓𑁆𑀔𑀺𑀢𑀲𑀤𑁆𑀤𑁂𑀦 𑀭𑀯𑀦𑁆𑀢𑀺 𑀅𑀲𑁆𑀫𑀺𑀁 𑀭𑁄𑀭𑀼𑀯𑁄, 𑀫𑀳𑀦𑁆𑀢𑁄 𑀘 𑀲𑁄 𑀭𑁄𑀭𑀼𑀯𑁄 𑀘𑀸𑀢𑀺 𑀫𑀳𑀸𑀭𑁄𑀭𑀼𑀯𑁄. 𑀧𑀼𑀦 ‘‘𑀭𑁄𑀭𑀼𑀯𑁄’’𑀢𑀺 𑀘𑀽𑀴𑀭𑁄𑀭𑀼𑀯𑁄 𑀯𑀼𑀢𑁆𑀢𑁄. 𑀪𑀼𑀲𑀁 𑀧𑀢𑀦𑁆𑀢𑀺 𑀅𑀲𑁆𑀫𑀺𑀁 𑀧𑀢𑀸𑀧𑀦𑁄, ‘‘𑀯𑀻𑀘𑀺 𑀢𑀭𑀗𑁆𑀕𑁂 𑀅𑀧𑁆𑀧𑁂 𑀘𑀸’’𑀢𑀺 𑀭𑀼𑀤𑁆𑀤𑁄, 𑀦𑀢𑁆𑀣𑀺 𑀲𑀼𑀔𑀲𑁆𑀲 𑀯𑀻𑀘𑀺 𑀮𑁂𑀲𑁄𑀧𑀺 𑀅𑀢𑁆𑀭𑀸𑀢𑀺 𑀅𑀯𑀻𑀘𑀺, ‘‘𑀯𑀻𑀘𑀺 𑀲𑀼𑀔𑀢𑀭𑀗𑁆𑀕𑁂𑀲𑀽’’𑀢𑀺 𑀢𑀺𑀓𑀡𑁆𑀟𑀲𑁂𑀲𑁄 [𑀢𑀺𑀓𑀡𑁆𑀟𑀲𑁂𑀲 𑁩.𑁩.𑁭𑁮], 𑀢𑀲𑁆𑀫𑀸 𑀦𑀢𑁆𑀣𑀺 𑀯𑀻𑀘𑀺 𑀲𑀼𑀔𑀁 𑀏𑀢𑁆𑀣𑀸𑀢𑀺 𑀅𑀯𑀻𑀘𑀺. 𑀲𑀫𑀦𑁆𑀢𑀢𑁄 𑀆𑀕𑀢𑁂𑀳𑀺 𑀧𑀩𑁆𑀩𑀢𑁂𑀳𑀺 𑀳𑀜𑁆𑀜𑀦𑁆𑀢𑀺 𑀅𑀢𑁆𑀭𑀸𑀢𑀺 𑀲𑀗𑁆𑀖𑀸𑀢𑁄. 𑀢𑀧𑀦𑁆𑀢𑀺 𑀅𑀢𑁆𑀭 𑀢𑀸𑀧𑀦𑁄, 𑀇𑀢𑀺𑀲𑀤𑁆𑀤𑁄 𑀅𑀝𑁆𑀞𑀦𑁆𑀦𑀁 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑁬𑁫𑁮. 𑀢𑀢𑁆𑀣 𑀦𑀺𑀭𑀬𑁂𑀲𑀼 𑀯𑁂𑀢𑀭𑀡𑀻 𑀘 𑀮𑁄𑀳𑀓𑀼𑀫𑁆𑀪𑀻 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀦𑀺𑀭𑀬𑀸 𑀚𑀮𑀸𑀲𑀬𑀸 𑀚𑀮𑀸𑀥𑀸𑀭𑀸, 𑀢𑁂 𑀘 𑀣𑀺𑀬𑀁, 𑀢𑀭𑀡𑀻 𑀦𑀸𑀯𑀸, 𑀲𑀸 𑀦𑀢𑁆𑀣𑀺 𑀬𑀲𑁆𑀲𑀁 𑀯𑁂𑀢𑀭𑀡𑀻. 𑀮𑁄𑀳𑀫𑀬𑀸 𑀓𑀼𑀫𑁆𑀪𑀻 𑀮𑁄𑀳𑀓𑀼𑀫𑁆𑀪𑀻.

𑀤𑁆𑀯𑀬𑀁 𑀦𑀺𑀭𑀬𑀧𑀸𑀮𑁂. 𑀓𑀸𑀭𑀡𑀸 𑀬𑀸𑀢𑀦𑀸, 𑀲𑀸 𑀘 𑀢𑀺𑀩𑁆𑀩𑀯𑁂𑀤𑀦𑀸, 𑀢𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀺𑀓𑁄. 𑀦𑀺𑀭𑀬𑀕𑀢𑀲𑀢𑁆𑀢𑁂 𑀧𑀸𑀢𑀻𑀢𑀺 𑀦𑀺𑀭𑀬𑀧𑁄.

𑀤𑁆𑀯𑀬𑀁 𑀦𑀺𑀭𑀬𑀕𑀢𑀲𑀢𑁆𑀢𑁂. 𑀦𑀺𑀭𑀬𑀁 𑀕𑀘𑁆𑀙𑀢𑀻𑀢𑀺 𑀦𑁂𑀭𑀬𑀺𑀓𑁄. 𑀦𑀭𑀓𑀁 𑀕𑀘𑁆𑀙𑀢𑀻𑀢𑀺 𑀦𑀸𑀭𑀓𑁄.

𑁬𑁫𑁯. 𑀉𑀤𑀥𑀺 𑀧𑀭𑀺𑀬𑀦𑁆𑀢𑀁 𑀲𑀫𑀼𑀤𑁆𑀤𑀲𑁆𑀲 𑀦𑀸𑀫𑀁. 𑀅𑀡𑁆𑀡𑁄 𑀚𑀮𑀁, 𑀲𑁄 𑀯𑀸𑀢𑀺 𑀕𑀘𑁆𑀙𑀢𑀺 𑀬𑀲𑁆𑀫𑀺𑀁 𑀅𑀡𑁆𑀡𑀯𑁄, 𑀅𑀡𑁆𑀡𑁄 𑀬𑀲𑁆𑀫𑀺𑀁 𑀯𑀺𑀚𑁆𑀚𑀢𑀻𑀢𑀺 𑀯𑀸 𑀅𑀡𑁆𑀡𑀯𑁄, 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀯𑁄. 𑀲𑀕𑀭𑁂𑀳𑀺 𑀭𑀸𑀚𑀓𑀼𑀫𑀸𑀭𑁂𑀳𑀺 𑀔𑀢𑁄 𑀲𑀸𑀕𑀭𑁄, 𑀲𑀸𑀦𑀁 𑀥𑀦𑀸𑀦𑀁 𑀆𑀓𑀭𑁄𑀢𑀺 𑀯𑀸 𑀲𑀸𑀕𑀭𑁄, 𑀓𑀲𑁆𑀲 𑀕𑁄, 𑀲𑀸𑀕 𑀲𑀁𑀯𑀭𑀡𑁂 𑀯𑀸, 𑀅𑀭𑁄. 𑀲𑀦𑁆𑀤𑀢𑁂𑀢𑀺 𑀲𑀺𑀦𑁆𑀥𑀼, 𑀲𑀦𑁆𑀤 𑀲𑀯𑀦𑁂, 𑀬𑀤𑀸𑀤𑀺. 𑀉𑀤𑀺 𑀓𑁆𑀮𑁂𑀤𑀦𑁂, 𑀲𑀫𑁆𑀫𑀸 𑀓𑁆𑀮𑀺𑀤𑀦𑁆𑀢𑀺 𑀘𑀦𑁆𑀤𑁄𑀤𑀬𑁂 𑀅𑀲𑁆𑀫𑀸 𑀆𑀧𑀸𑀦𑀻𑀢𑀺 𑀲𑀫𑀼𑀤𑁆𑀤𑁄. 𑀚𑀮𑀸𑀦𑀺, 𑀉𑀤𑀓𑀸𑀦𑀺 𑀘 𑀦𑀺𑀥𑀻𑀬𑀦𑁆𑀢𑁂, 𑀥𑀻𑀬𑀦𑁆𑀢𑁂 𑀘𑀸𑀢𑁆𑀭𑀸𑀢𑀺 𑀚𑀮𑀦𑀺𑀥𑀺, 𑀉𑀤𑀥𑀺 𑀘, 𑀉𑀤𑀓𑀲𑁆𑀲 𑀉𑀤𑀸𑀤𑁂𑀲𑁄.

𑀢𑀲𑁆𑀲 𑀲𑀫𑀼𑀤𑁆𑀤𑀲𑁆𑀲 𑀔𑀻𑀭𑀡𑁆𑀡𑀯𑁄, 𑀆𑀤𑀺𑀦𑀸 𑀮𑀯𑀡𑁄𑀤𑁄, 𑀤𑀥𑁆𑀬𑀼𑀤𑁄, 𑀖𑀢𑁄𑀤𑁄, 𑀉𑀘𑁆𑀙𑀼𑀭𑀲𑁄𑀤𑁄, 𑀫𑀤𑀺𑀭𑁄𑀤𑁄, 𑀲𑀸𑀤𑀼𑀤𑀓𑁄 𑀘𑀸𑀢𑀺 𑀇𑀫𑁂 𑀲𑀢𑁆𑀢 𑀫𑀳𑀡𑁆𑀡𑀯𑀯𑀺𑀲𑁂𑀲𑀸 𑀪𑀯𑀦𑁆𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁧𑁦.𑁨]. 𑀔𑀻𑀭𑀯𑀡𑁆𑀡𑁄 𑀅𑀡𑁆𑀡𑀯𑁄 𑀔𑀻𑀭𑀡𑁆𑀡𑀯𑁄.

𑁬𑁬𑁦. 𑀅𑀲𑁆𑀲 𑀲𑀫𑀼𑀤𑁆𑀤𑀲𑁆𑀲 𑀓𑀽𑀮𑀤𑁂𑀲𑁄 𑀢𑀻𑀭𑀤𑁂𑀲𑁄 𑀯𑁂𑀮𑀸 𑀦𑀸𑀫, 𑀯𑀺𑀕𑀘𑁆𑀙𑀦𑁆𑀢𑀺 𑀇𑀭𑀸 𑀬𑀲𑁆𑀲𑀁 𑀯𑁂𑀮𑀸, 𑀮𑀢𑁆𑀢𑀁. 𑀘𑀓𑁆𑀓𑀫𑀺𑀯 𑀲𑀮𑀺𑀮𑀸𑀦𑀁 𑀚𑀮𑀸𑀦𑀁 𑀪𑀫𑁄 𑀪𑀫𑀦𑀁 𑀆𑀯𑀝𑁆𑀝𑁄 𑀦𑀸𑀫, 𑀆𑀯𑀝𑁆𑀝𑀦𑁆𑀢𑀺 𑀚𑀮𑀸𑀦𑀺 𑀅𑀢𑁆𑀭𑀸𑀢𑀺 𑀆𑀯𑀝𑁆𑀝𑁄.

𑀢𑀺𑀓𑀁 𑀩𑀺𑀦𑁆𑀤𑀼𑀫𑁆𑀳𑀺. 𑀣𑀼 𑀅𑀪𑀺𑀢𑁆𑀣𑀯𑁂, 𑀯𑁄, 𑀉𑀲𑁆𑀲𑁂. 𑀯𑀺𑀤𑀺 𑀅𑀯𑀬𑀯𑁂, 𑀉, 𑀩𑀺𑀦𑁆𑀤𑀼. 𑀨𑀼𑀲 𑀨𑀼𑀲𑀦𑁂, 𑀢𑁄, 𑀨𑀼𑀲𑀺𑀢𑀁. 𑀧𑀸𑀓𑀸𑀭𑁂, 𑀕𑁂𑀳𑀸𑀤𑀺𑀢𑀺𑀢𑁆𑀢𑀺𑀬𑀜𑁆𑀘 𑀚𑀮𑀦𑀺𑀕𑁆𑀕𑀫𑁄 𑀪𑀫𑁄 𑀦𑀸𑀫, 𑀪𑀫𑀼 𑀅𑀦𑀯𑀝𑁆𑀞𑀸𑀦𑁂.

𑁬𑁬𑁧. 𑀲𑀺𑀮𑁄𑀓𑁄 𑀉𑀤𑀓𑁂. 𑀆𑀧 𑀩𑁆𑀬𑀸𑀧𑀦𑁂, 𑀅𑀧𑁆𑀧𑁄𑀢𑀺 𑀲𑀩𑁆𑀩𑀢𑁆𑀭𑀸𑀢𑀺 𑀆𑀧𑁄. 𑀧𑀸𑀢𑀩𑁆𑀩𑀦𑁆𑀢𑀺 𑀧𑀬𑁄, 𑀧𑀸 𑀧𑀸𑀦𑁂, 𑀡𑁆𑀬𑁄. 𑀭𑀲𑁆𑀲𑁄, 𑀧𑀬𑁄. 𑀚𑀮 𑀥𑀜𑁆𑀜𑁂, 𑀅. 𑀯𑀸𑀭𑀬𑀢𑀺 𑀦𑀺𑀦𑁆𑀦𑁄𑀦𑀢𑀦𑁆𑀢𑀺 𑀯𑀸𑀭𑀺, 𑀯𑀭 𑀦𑀺𑀲𑁂𑀥𑁂, 𑀡𑀺, 𑀯𑀸𑀭𑀬𑀢𑀺 𑀧𑀺𑀧𑀸𑀲𑀦𑁆𑀢𑀺 𑀯𑀸 𑀯𑀸𑀭𑀺. 𑀧𑀻𑀬𑀢𑁂𑀢𑀺 𑀧𑀸𑀦𑀻𑀬𑀁, 𑀅𑀦𑀻𑀬𑁄. 𑀲𑀮𑀢𑀻𑀢𑀺 𑀲𑀮𑀺𑀮𑀁, 𑀲𑀮 𑀕𑀢𑀺𑀬𑀁, 𑀇𑀮𑁄. 𑀉𑀤𑀺 𑀓𑁆𑀮𑁂𑀤𑀦𑁂, 𑀡𑁆𑀯𑀼, 𑀉𑀮𑁄𑀧𑁄, 𑀤𑀓𑀁 𑀧𑀺𑀧𑀸𑀲𑀘𑁆𑀙𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀤𑀓𑀁, ‘‘𑀤𑀸 𑀤𑀸𑀦𑀘𑁆𑀙𑁂𑀤𑀥𑀸𑀢𑀽’’𑀢𑀺 [𑀏𑀓𑀓𑁆𑀔𑀭𑀓𑁄𑀲 𑁨𑁦 𑀕𑀸𑀣𑀸] 𑀳𑀺 𑀏𑀓𑀓𑁆𑀔𑀭𑀓𑁄𑀲𑁂, 𑀭𑀲𑁆𑀲𑁄. 𑀅𑀦 𑀲𑀤𑁆𑀤𑁂, 𑀅, 𑀤𑁆𑀯𑀺𑀢𑁆𑀢𑀁, 𑀅𑀭 𑀕𑀫𑀦𑁂 𑀯𑀸, 𑀢𑁄, 𑀅𑀦𑁆𑀦𑀸𑀤𑁂𑀲𑁄, 𑀡𑀢𑁆𑀢𑀁. 𑀦𑀻 𑀦𑀬𑁂, 𑀈𑀭𑁄. 𑀯𑀦 𑀲𑀫𑁆𑀪𑀢𑁆𑀢𑀺𑀬𑀁. 𑀯𑀦𑀻𑀬𑀢𑁂 𑀧𑀺𑀧𑀸𑀲𑁂𑀳𑀻𑀢𑀺 𑀯𑀦𑀁. 𑀯𑀸 𑀕𑀫𑀦𑁂, 𑀅𑀮𑁄. 𑀢𑀸𑀬𑀢𑁂 𑀧𑀸𑀮𑀬𑀢𑁂𑀢𑀺 𑀢𑁄𑀬𑀁, 𑀢𑀸 𑀧𑀸𑀮𑀦𑁂, 𑀘𑀼𑀭𑀸𑀤𑀺, 𑀬𑁄, 𑀆𑀓𑀸𑀭𑀲𑁆𑀲𑁄𑀢𑁆𑀢𑀁. 𑀅𑀫𑁆𑀩 𑀲𑀤𑁆𑀤𑁂, 𑀉, 𑀅𑀫𑁆𑀩𑀼. 𑀉𑀤𑀺 𑀧𑀲𑀯𑀦𑀓𑁆𑀮𑁂𑀤𑀦𑁂𑀲𑀼, 𑀡𑁆𑀯𑀼, 𑀉𑀤𑀓𑀁. 𑀓𑀭 𑀓𑀭𑀡𑁂, 𑀓𑁆𑀯𑀺, 𑀓𑀁. 𑀓𑀫𑀮𑀁, 𑀔𑀻𑀭𑀫𑁆𑀧𑀺, 𑀓𑀫𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼, 𑀅𑀮𑁄. 𑀔𑀦𑀼 𑀳𑀺𑀁𑀲𑀸𑀬𑀁, 𑀈𑀭𑁄, 𑀦𑀮𑁄𑀧𑁄, 𑀔𑀻 𑀔𑀬𑁂 𑀯𑀸, 𑀔𑀻𑀭𑀁.

𑁬𑁬𑁨. 𑀘𑀢𑀼𑀓𑁆𑀓𑀁 𑀢𑀭𑀗𑁆𑀕𑁂. 𑀢𑀭𑀦𑁆𑀢𑁄 𑀕𑀘𑁆𑀙𑀢𑀺, 𑀢𑀻𑀭𑀁 𑀯𑀸 𑀕𑀘𑁆𑀙𑀢𑀻𑀢𑀺 𑀢𑀭𑀗𑁆𑀕𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄, 𑀧𑀭𑀢𑁆𑀭 𑀈𑀲𑁆𑀲𑀢𑁆𑀢𑀁. 𑀲𑀬𑀫𑁂𑀯 𑀪𑀺𑀚𑁆𑀚𑀢𑁂𑀢𑀺 𑀪𑀗𑁆𑀕𑁄, 𑀅. 𑀊𑀳 𑀯𑀺𑀢𑀓𑁆𑀓𑁂, 𑀫𑀺, 𑀳𑀮𑁄𑀧𑁄, 𑀊𑀫𑀺, 𑀅𑀭 𑀕𑀫𑀦𑁂 𑀯𑀸, 𑀫𑀺, 𑀅𑀲𑁆𑀲𑀽, 𑀭𑀮𑁄𑀧𑁄. 𑀯𑀺𑀫𑁆𑀳𑀬𑀁 𑀯𑀺𑀘𑀺𑀢𑁆𑀢𑀁 𑀘𑀺𑀦𑁄𑀢𑀻𑀢𑀺 𑀯𑀻𑀘𑀺, 𑀇, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑁄, 𑀏𑀢𑁂 𑀤𑁆𑀯𑁂 𑀧𑀼𑀫𑀺𑀢𑁆𑀣𑀺𑀬𑀁.

𑀉𑀮𑁆𑀮𑁄𑀮𑁄, 𑀓𑀮𑁆𑀮𑁄𑀮𑁄 𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀫𑀳𑀸𑀯𑀻𑀘𑀻𑀲𑀼 𑀓𑀣𑁆𑀬𑀢𑁂, 𑀮𑁄𑀮 𑀉𑀫𑁆𑀫𑀸𑀤𑀦𑁂, 𑀉𑀮𑁆𑀮𑁄𑀮𑀬𑀢𑀻𑀢𑀺 𑀉𑀮𑁆𑀮𑁄𑀮𑁄, 𑀡𑁄, 𑀉𑀮 𑀕𑀫𑀦𑁂 𑀯𑀸, 𑀑𑀮𑁄, 𑀤𑁆𑀯𑀺𑀢𑁆𑀢𑀁. 𑀓𑀮𑁆𑀮 𑀲𑀤𑁆𑀤𑁂, 𑀑𑀮𑁄, 𑀓𑀮𑁆𑀮𑁄𑀮𑁄.

𑁬𑁬𑁩. 𑀲𑀺𑀮𑁄𑀓𑀤𑁆𑀥𑀁 𑀓𑀤𑁆𑀤𑀫𑁂. 𑀚𑀮𑀁 𑀩𑀮𑀢𑁂 𑀚𑀫𑁆𑀩𑀸𑀮𑁄, 𑀓𑀫𑁆𑀫𑀦𑀺 𑀡𑁄, 𑀫𑀓𑀸𑀭𑁄 𑀯𑀡𑁆𑀡𑀯𑀺𑀓𑀸𑀭𑁄. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀅𑀮𑁄. 𑀧𑀘 𑀯𑀺𑀢𑁆𑀣𑀸𑀭𑀯𑀘𑀦𑁂, 𑀓𑀫𑁆𑀫𑀦𑀺 𑀡𑁄. 𑀘𑀺𑀓𑁆𑀔 𑀯𑀘𑀦𑁂, 𑀅𑀮𑁄, 𑀤𑁆𑀯𑀺𑀢𑁆𑀢𑀁. 𑀓𑀤 𑀫𑀤𑁆𑀤𑁂, 𑀅𑀫𑁄, 𑀤𑁆𑀯𑀺𑀢𑁆𑀢𑀁.

𑀙𑀓𑁆𑀓𑀁 𑀯𑀸𑀮𑀼𑀓𑀸𑀬𑀁. 𑀧𑀼𑀮 𑀫𑀳𑀢𑁆𑀣𑁂, 𑀇𑀦𑁄, 𑀴𑀢𑁆𑀢𑀁. 𑀯𑀮 𑀲𑀁𑀯𑀭𑀡𑁂, 𑀡𑁆𑀯𑀼, 𑀅𑀲𑁆𑀲𑀼, 𑀯𑀸𑀮𑀼𑀓𑀸, 𑀣𑀻. 𑀯𑀡𑁆𑀡 𑀲𑀤𑁆𑀤𑁂, 𑀯𑀡𑁆𑀡𑁄. 𑀫𑀭 𑀧𑀸𑀡𑀘𑀸𑀕𑁂, 𑀉, 𑀫𑀭𑀼, 𑀤𑁂𑀯𑁂𑀧𑀺. 𑀅𑀭 𑀕𑀫𑀦𑁂, 𑀉, 𑀅𑀲𑁆𑀲𑀼, 𑀉𑀭𑀼, 𑀫𑀳𑀦𑁆𑀢𑁂𑀧𑀺, 𑀯𑀡𑁆𑀡𑁄 𑀘 𑀫𑀭𑀼 𑀘 𑀉𑀭𑀼 𑀘 𑀯𑀡𑁆𑀡𑀫𑀭𑀽𑀭𑀼. 𑀲𑀺𑀘 𑀧𑀕𑁆𑀖𑀭𑀡𑁂, 𑀢𑁄, 𑀲𑀺𑀓𑀢𑀸, 𑀣𑀻.

𑁬𑁬𑁪. 𑀚𑀮𑀫𑀚𑁆𑀛𑀕𑀢𑀁 𑀢𑀮𑀁 𑀓𑀫𑁆𑀫𑀪𑀽𑀢𑀁 ‘‘𑀅𑀦𑁆𑀢𑀭𑀻𑀧𑀁, 𑀤𑀻𑀧𑁄’’𑀢𑀺 𑀘𑁄𑀘𑁆𑀘𑀢𑁂. 𑀤𑁆𑀯𑀺𑀥𑀸𑀕𑀢𑀸𑀦𑀁 𑀆𑀧𑀸𑀦𑀁 𑀅𑀦𑁆𑀢𑀭𑀕𑀢𑀁 𑀅𑀦𑁆𑀢𑀭𑀻𑀧𑀁, 𑀆𑀓𑀸𑀭𑀲𑁆𑀲𑀻. ‘‘𑀅𑀦𑁆𑀢𑀭𑀻𑀬’’𑀦𑁆𑀢𑀺 𑀯𑀸 𑀧𑀸𑀞𑁄, 𑀢𑀤𑀸 𑀤𑁆𑀯𑀺𑀥𑀸𑀕𑀢𑀸𑀦𑀁 𑀆𑀧𑀸𑀦𑀁 𑀅𑀦𑁆𑀢𑀭𑁂 𑀪𑀯𑀁 𑀅𑀦𑁆𑀢𑀭𑀻𑀬𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀅𑀓𑀸𑀭𑀲𑁆𑀲𑀻. 𑀤𑁆𑀯𑀺𑀥𑀸𑀕𑀢𑀸𑀦𑀺 𑀆𑀧𑀸𑀦𑀺 𑀅𑀲𑁆𑀫𑀺𑀁 𑀳𑁂𑀢𑀼𑀪𑀽𑀢𑁂𑀢𑀺 𑀤𑀻𑀧𑁄. 𑀯𑀓𑀸𑀭𑀆𑀓𑀸𑀭𑀸𑀦𑀁 𑀮𑁄𑀧𑁄, 𑀇𑀲𑁆𑀲𑀻 𑀘, 𑀤𑀻𑀧𑁄, 𑀯𑀸𑀓𑀸𑀭𑁂𑀦 𑀤𑀻𑀧𑀫𑁆𑀧𑀺.

𑀧𑀜𑁆𑀘𑀓𑀁 𑀢𑀻𑀭𑀲𑁆𑀲 𑀦𑀸𑀫𑀁. 𑀧𑀸𑀭 𑀢𑀻𑀭 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀁, 𑀘𑀼𑀭𑀸𑀤𑀺, 𑀅. 𑀓𑀽𑀮 𑀆𑀯𑀭𑀡𑁂, 𑀡𑁄. 𑀭𑀼𑀥 𑀆𑀯𑀭𑀡𑁂, 𑀭𑁄𑀥𑀁. 𑀅𑀜𑁆𑀜𑀧𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀢𑀻𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀝 𑀉𑀲𑁆𑀲𑀬𑁂, 𑀅, 𑀣𑀺𑀬𑀁, 𑀢𑀝𑀻.

𑁬𑁬𑁫. 𑀧𑀭𑀫𑁆𑀳𑀺 𑀢𑀻𑀭𑀲𑁆𑀫𑀺𑀁 𑀧𑀸𑀭𑀲𑀤𑁆𑀤𑁄, 𑀲𑁄 𑀘 𑀦𑀧𑀼𑀁𑀲𑀓𑁂, 𑀧𑀸𑀭 𑀢𑀻𑀭 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀁, 𑀧𑀸𑀭 𑀲𑀸𑀫𑀢𑁆𑀣𑀺𑀬𑁂 𑀯𑀸, 𑀧𑀸𑀭𑀬𑀢𑀺 𑀢𑀭𑀗𑁆𑀕𑀸𑀤𑀬𑁄 𑀯𑀸𑀭𑁂𑀢𑀼𑀦𑁆𑀢𑀺 𑀧𑀸𑀭𑀁. 𑀑𑀭𑀦𑁆𑀢𑀼𑀢𑀻𑀭𑀁 ‘‘𑀅𑀧𑀸𑀭’’𑀦𑁆𑀢𑁆𑀬𑀼𑀘𑁆𑀘𑀢𑁂, 𑀅𑀯𑀭𑁂 𑀢𑀻𑀭𑀤𑁂𑀲𑁂 𑀪𑀯𑀁 𑀑𑀭𑀁, 𑀡𑁄. 𑀧𑀸𑀭𑀢𑁄 𑀅𑀜𑁆𑀜𑀁 𑀢𑀻𑀭𑀁 𑀅𑀧𑀸𑀭𑀁.

𑀧𑀜𑁆𑀘𑀓𑀁 𑀉𑀴𑀼𑀫𑁆𑀧𑁂. 𑀉𑀴𑀼𑀢𑁄 𑀤𑀓𑀢𑁄 𑀧𑀸𑀢𑀺 𑀭𑀓𑁆𑀔𑀢𑀺 𑀉𑀴𑀼𑀧𑁄, 𑀲𑁄𑀬𑁂𑀯 𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦 𑀉𑀴𑀼𑀫𑁆𑀧𑁄. 𑀧𑁆𑀮𑀯𑀢𑀺, 𑀧𑁆𑀮𑀯𑀦𑁆𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀧𑁆𑀮𑀯𑁄, 𑀧𑁆𑀮𑀯 𑀕𑀫𑀦𑁂, 𑀕𑀫𑀦𑀁 𑀅𑀢𑁆𑀭 𑀚𑀮𑀕𑀫𑀦𑀁. 𑀓𑀼𑀮 𑀲𑀦𑁆𑀢𑀸𑀦𑁂, 𑀅, 𑀓𑁂 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀓𑀼𑀮𑁆𑀮𑁄, 𑀅, 𑀤𑁆𑀯𑀺𑀢𑁆𑀢𑀁. 𑀢𑀭𑀦𑁆𑀢𑀺 𑀅𑀦𑁂𑀦 𑀢𑀭𑁄, 𑀢𑀭 𑀧𑁆𑀮𑀯𑀢𑀭𑀡𑁂𑀲𑀼. 𑀕𑀫𑀦𑀸𑀕𑀫𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀚𑀮𑁂 𑀅𑀭𑀦𑁆𑀢𑀺 𑀬𑀸𑀬, 𑀲𑀸 𑀧𑀘𑁆𑀘𑀭𑀻, 𑀅, 𑀦𑀤𑀸𑀤𑀺.

𑁬𑁬𑁬. 𑀢𑀺𑀓𑀁 𑀦𑀸𑀯𑀸𑀬𑀁. 𑀢𑀭𑀦𑁆𑀢𑀺 𑀬𑀸𑀬 𑀢𑀭𑀡𑀻, 𑀬𑀼, 𑀦𑀤𑀸𑀤𑀺, 𑀇𑀧𑀘𑁆𑀘𑀬𑁂 𑀢𑀭𑀺, 𑀈𑀫𑁆𑀳𑀺 𑀢𑀼 𑀢𑀭𑀻. 𑀦𑀼 𑀣𑀼𑀢𑀺𑀬𑀁, 𑀅, 𑀯𑀼𑀟𑁆𑀠𑀸𑀯𑀸𑀤𑁂𑀲𑀸, 𑀦𑀸𑀯𑀸. 𑀤𑁆𑀯𑀬𑀁 𑀮𑀗𑁆𑀓𑀸𑀭𑀣𑀫𑁆𑀪𑁂. 𑀓𑀽𑀧 𑀕𑀫𑀦𑁂, 𑀡𑁆𑀯𑀼, 𑀓𑀽𑀧𑀓𑁄, 𑀅𑀧𑀘𑁆𑀘𑀬𑁄 𑀯𑀸, 𑀢𑀤𑀸 𑀲𑀓𑀢𑁆𑀣𑁂 𑀓𑁄. 𑀓𑀫𑀼 𑀇𑀘𑁆𑀙𑀸𑀬𑀁, 𑀪𑁄, 𑀲𑀓𑀢𑁆𑀣𑁂 𑀓𑁄, 𑀅𑀲𑁆𑀲𑀼 𑀘, 𑀓𑀼𑀫𑁆𑀪𑀓𑀁.

𑀤𑁆𑀯𑀬𑀁 ‘‘𑀧𑁂 𑀲𑁂𑀁’’𑀇𑀢𑀺 𑀔𑁆𑀬𑀸𑀢𑁂. 𑀢𑀭𑀲𑁆𑀲 𑀧𑀘𑁆𑀙𑀸𑀪𑀸𑀕𑁂 𑀩𑀦𑁆𑀥𑀺𑀢𑀩𑁆𑀩𑁄𑀢𑀺 𑀧𑀘𑁆𑀙𑀸𑀩𑀦𑁆𑀥𑁄. 𑀕’𑀫𑀺𑀘𑁆𑀙𑀺𑀢𑀤𑀺𑀲𑀁 𑀅𑀝𑀢𑀺 𑀬𑁂𑀦 𑀕𑁄𑀝𑀯𑀺𑀲𑁄, 𑀇𑀲𑁄, 𑀅𑀯𑀦𑁆𑀢𑁄 𑀘 𑀅𑀲𑁆𑀲𑁄𑀢𑁆𑀢𑀜𑁆𑀘, 𑀕𑁄𑀝𑀯𑀺𑀲𑁄. 𑀤𑁆𑀯𑀬𑀁 ‘‘𑀧𑁂 𑀢𑀫𑀸’’𑀇𑀢𑀺 𑀔𑁆𑀬𑀸𑀢𑁂. 𑀦𑀸𑀯𑀸𑀬 𑀓𑀡𑁆𑀡𑁄 𑀯𑀺𑀬 𑀓𑀡𑁆𑀡𑁄, 𑀫𑀳𑀦𑁆𑀢𑁄 𑀓𑁂𑀦𑀺𑀧𑀸𑀢𑁄, 𑀢𑁂𑀦 𑀧𑀯𑀳𑀡𑀧𑀢𑀺𑀲𑀯𑀦𑀢𑁄, 𑀢𑀁 𑀥𑀭𑀢𑀻𑀢𑀺, 𑀓𑀫𑁆𑀫𑀦𑀺 𑀡𑁄. 𑀦𑀸𑀯𑀸𑀬 𑀬𑀼𑀢𑁆𑀢𑁄 𑀦𑀸𑀯𑀺𑀓𑁄.

𑁬𑁬𑁭. 𑀤𑁆𑀯𑀬𑀁 𑀦𑀸𑀯𑀸𑀬 𑀕𑀫𑀦𑁄𑀧𑀸𑀬𑁂. 𑀅𑀭𑀢𑀺 𑀬𑁂𑀦𑀸𑀢𑀺 𑀅𑀭𑀺𑀢𑁆𑀢𑀁, 𑀙𑀤𑀸𑀤𑀻𑀳𑀺 𑀢𑀢𑁆𑀭𑀡, 𑀇𑀓𑀸𑀭𑀸𑀕𑀫𑁄, 𑀤𑁆𑀯𑀺𑀢𑁆𑀢𑀜𑁆𑀘. 𑀓𑁂 𑀚𑀮𑁂 𑀦𑀺𑀧𑀸𑀢𑀺𑀬𑀢𑁂 𑀓𑁂𑀦𑀺𑀧𑀸𑀢𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁.

𑀤𑁆𑀯𑀬𑀁 𑀦𑀺𑀬𑀸𑀫𑀓𑁂. 𑀧𑁄𑀢𑁄 𑀧𑀯𑀳𑀦𑀁, 𑀢𑀁 𑀯𑀸𑀳𑀬𑀢𑀻𑀢𑀺 𑀧𑁄𑀢𑀯𑀸𑀳𑁄. 𑀦𑀺𑀬𑀘𑁆𑀙𑀢𑀺 𑀧𑁄𑀢𑀦𑁆𑀢𑀺 𑀦𑀺𑀬𑀸𑀫𑀓𑁄, 𑀬𑀫𑀼 𑀉𑀧𑀭𑀫𑁂, 𑀦𑀺𑀧𑀼𑀩𑁆𑀩𑁄 𑀕𑀫𑀦𑁂, 𑀡𑁆𑀯𑀼, 𑀦𑀺𑀬𑀸𑀫𑀓𑁄, 𑀘𑀼𑀭𑀸𑀤𑀺. 𑀦𑀺𑀬𑀸𑀫𑀓𑁂𑀧𑀺.

𑀬𑁂 𑀯𑀸𑀡𑀺𑀚𑀸 𑀦𑀸𑀯𑀸𑀬 𑀯𑀸𑀡𑀺𑀚𑀓𑀫𑁆𑀫𑀁 𑀆𑀘𑀭𑀦𑁆𑀢𑀺, 𑀢𑁂 𑀲𑀁𑀬𑀢𑁆𑀢𑀺𑀓𑀸 𑀦𑀸𑀫, 𑀲𑀁𑀬𑀸𑀦𑀁 𑀲𑀁𑀬𑀸𑀢𑁆𑀭𑀸, 𑀤𑀻𑀧𑀦𑁆𑀢𑀭𑀕𑀫𑀦𑀁, 𑀢𑁆𑀭𑀡, 𑀲𑀸 𑀧𑀬𑁄𑀚𑀦𑀫𑁂𑀢𑁂𑀲𑀁 𑀲𑀁𑀬𑀢𑁆𑀢𑀺𑀓𑀸, 𑀡𑀺𑀓𑁄, 𑀭𑀮𑁄𑀧𑁄, 𑀭𑀲𑁆𑀲𑁄 𑀘. 𑀢𑀧𑀘𑁆𑀘𑀬𑁂𑀦 𑀯𑀸 𑀲𑀺𑀤𑁆𑀥𑀁. 𑀧𑁄𑀢𑀯𑀸𑀡𑀺𑀚𑀸𑀧𑀺, 𑀧𑁄𑀢𑁄 𑀧𑀯𑀳𑀦𑀁, 𑀢𑀲𑁆𑀲 𑀯𑀸𑀡𑀺𑀚𑀸.

𑁬𑁬𑁮. 𑀮𑀗𑁆𑀓𑀸𑀭𑀸𑀤𑀬𑁄, 𑀨𑀺𑀬𑀸𑀤𑀬𑁄 𑀘 𑀦𑀸𑀯𑀸𑀬 𑀅𑀗𑁆𑀕𑀸 𑀅𑀯𑀬𑀯𑀸. 𑀮𑁄 𑀇𑀦𑁆𑀤𑁄, 𑀢𑀲𑁆𑀲 𑀓𑀸𑀭𑀡𑀁 𑀮𑀗𑁆𑀓𑀸𑀭𑁄. 𑀯𑀝𑁄 𑀯𑀼𑀘𑁆𑀘𑀢𑀺 𑀲𑀺𑀯𑀝𑁄, 𑀢𑀤𑀸𑀓𑀸𑀭𑀢𑀸𑀬 𑀯𑀝𑀸𑀓𑀸𑀭𑁄. ‘‘𑀯𑀝𑁄 𑀓𑀫𑀤𑁆𑀤𑁂 𑀦𑀺𑀕𑁆𑀭𑁄𑀥𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄. 𑀨𑀸 𑀯𑀼𑀟𑁆𑀠𑀺𑀬𑀁, 𑀇𑀬𑁄, 𑀨𑀺𑀬𑁄.

𑀤𑁆𑀯𑀬𑀁 ‘‘𑀢𑀮𑀓’’𑀇𑀢𑀺 𑀔𑁆𑀬𑀸𑀢𑁂. 𑀧𑀽 𑀧𑀯𑀦𑁂, 𑀢𑁄, 𑀯𑀼𑀟𑁆𑀠𑀺, 𑀧𑀯𑀳𑀢𑀺 𑀦𑀺𑀬𑀸𑀫𑀓𑁂𑀢𑀺 𑀧𑀯𑀳𑀦𑀁. 𑀯𑀼𑀢𑁆𑀢𑀦𑁆𑀢𑀺 𑀓𑁆𑀭𑀺𑀬𑀸𑀧𑀤𑀁. 𑀤𑁆𑀯𑀬𑀁 𑀓𑀝𑁆𑀞𑀫𑁆𑀩𑀼𑀯𑀸𑀳𑀺𑀦𑀺𑀬𑀁, 𑀤𑀼𑀡 𑀕𑀢𑀺𑀳𑀺𑀁𑀲𑀸𑀲𑀼, 𑀅, 𑀦𑀤𑀸𑀤𑀺, 𑀯𑀼𑀟𑁆𑀠𑀺, 𑀤𑁄𑀡𑀻. 𑀅𑀫𑁆𑀩𑀼𑀁 𑀦𑁂𑀢𑀺 𑀬𑁂𑀦 𑀅𑀫𑁆𑀩𑀡𑀁, 𑀉𑀲𑁆𑀲𑀢𑁆𑀢𑀁, 𑀡𑀢𑁆𑀢𑀜𑁆𑀘, 𑀅𑀫𑁆𑀩 𑀲𑀤𑁆𑀤𑁂 𑀯𑀸, 𑀬𑀼.

𑁬𑁬𑁯. 𑀢𑀺𑀓𑀁 𑀕𑀫𑁆𑀪𑀻𑀭𑁂. 𑀕𑀫𑀼 𑀕𑀫𑀦𑁂, 𑀈𑀭𑁄, 𑀪𑁄𑀦𑁆𑀢𑁄 𑀘 𑀫𑀮𑁄𑀧𑁄 𑀘, 𑀕𑀪𑀻𑀭𑁄. 𑀫𑀸𑀮𑁄𑀧𑁂 𑀢𑀼 𑀕𑀫𑁆𑀪𑀻𑀭𑁄, 𑀕𑀘𑁆𑀙𑀦𑁆𑀢𑀸 𑀪𑀸𑀬𑀦𑁆𑀢𑀺 𑀅𑀲𑁆𑀫𑀺𑀦𑁆𑀢𑀺 𑀯𑀸 𑀕𑀪𑀻𑀭𑁄, 𑀕𑀫𑁆𑀪𑀻𑀭𑁄 𑀘. 𑀦𑀺𑀧𑀼𑀩𑁆𑀩𑁄 𑀫𑀦 𑀅𑀪𑁆𑀬𑀸𑀲𑁂, 𑀡𑁄, 𑀫𑀲𑁆𑀲 𑀦𑁄. 𑀢𑀩𑁆𑀩𑀺𑀧𑀓𑁆𑀔𑀢𑁄 𑀕𑀫𑁆𑀪𑀻𑀭𑀯𑀺𑀧𑀭𑀻𑀢𑀢𑁄 𑀉𑀢𑁆𑀢𑀸𑀦𑀁 𑀦𑀸𑀫, 𑀉𑀕𑁆𑀕𑀢𑀁 𑀢𑀸𑀦𑀁 𑀧𑀫𑀸𑀡𑀁 𑀅𑀲𑁆𑀲 𑀉𑀢𑁆𑀢𑀸𑀦𑀁, 𑀅𑀕𑀫𑁆𑀪𑀻𑀭𑀁.

𑀤𑁆𑀯𑀬𑀁 𑀅𑀕𑀸𑀥𑁂. 𑀕𑀸𑀥 𑀧𑀢𑀺𑀝𑁆𑀞𑀸𑀓𑀗𑁆𑀔𑀸𑀲𑀼, 𑀕𑀦𑁆𑀣𑁂 𑀘, 𑀦𑀢𑁆𑀣𑀺 𑀕𑀸𑀥𑀁 𑀬𑀢𑁆𑀭 𑀅𑀕𑀸𑀥𑀁. 𑀦 𑀳𑁂𑀝𑁆𑀞𑀺𑀫𑀢𑀮𑀁 𑀨𑀼𑀲𑀢𑀺 𑀬𑀢𑁆𑀭 𑀅𑀢𑀮𑀫𑁆𑀨𑀲𑁆𑀲𑀁.

𑀢𑀺𑀓𑀁 𑀅𑀧𑁆𑀧𑀲𑀦𑁆𑀦𑁂. 𑀦𑀢𑁆𑀣𑀺 𑀅𑀘𑁆𑀙𑀪𑀸𑀯𑁄 𑀅𑀢𑁆𑀭 𑀅𑀦𑀘𑁆𑀙𑁄. 𑀓𑀮𑀼𑀲𑀁 𑀧𑀸𑀧𑁂𑀧𑀺 𑀯𑀼𑀢𑁆𑀢𑀁. 𑀯𑀺𑀮 𑀪𑁂𑀤𑀦𑁂, 𑀡𑁄, 𑀆𑀯𑀺𑀮𑁄. 𑀅𑀯 𑀭𑀓𑁆𑀔𑀡𑁂 𑀯𑀸, 𑀇𑀮𑁄.

𑁬𑁭𑁦. 𑀢𑀺𑀓𑀁 𑀦𑀺𑀫𑁆𑀫𑀮𑁂. 𑀙𑁄 𑀙𑁂𑀤𑀦𑁂, 𑀦 𑀙𑀺𑀦𑁆𑀤𑀢𑀺 𑀤𑀲𑁆𑀲𑀦𑀦𑁆𑀢𑀺 𑀅𑀘𑁆𑀙𑁄, 𑀡𑁄, 𑀲𑀘𑁆𑀙𑁄𑀧𑀺, 𑀲𑀭 𑀯𑀺𑀲𑀭𑀡𑁂, 𑀢𑁄, 𑀅𑀦𑁆𑀦𑀸𑀤𑁂𑀲𑁄. 𑀦𑀢𑁆𑀣𑀺 𑀫𑀮𑀁 𑀏𑀢𑀲𑁆𑀫𑀺𑀁 𑀯𑀺𑀫𑀮𑁄. 𑀕𑀪𑀻𑀭𑀧𑁆𑀧𑀪𑀼𑀢𑀻 𑀕𑀪𑀻𑀭𑀸𑀤𑀬𑁄 𑀯𑀺𑀫𑀮𑀦𑁆𑀢𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼.

𑀧𑀜𑁆𑀘𑀓𑀁 𑀓𑁂𑀯𑀝𑁆𑀝𑁂. 𑀥𑀸 𑀥𑀸𑀭𑀡𑁂, 𑀈𑀯𑀭𑁄. 𑀫𑀘𑁆𑀙𑁂 𑀳𑀦𑁆𑀢𑁆𑀯𑀸 𑀚𑀻𑀯𑀢𑀻𑀢𑀺 𑀫𑀘𑁆𑀙𑀺𑀓𑁄, 𑀇𑀓𑁄. 𑀫𑀘𑁆𑀙𑁂 𑀩𑀦𑁆𑀥𑀢𑀺 𑀚𑀸𑀮𑁂𑀦𑀸𑀢𑀺 𑀫𑀘𑁆𑀙𑀩𑀦𑁆𑀥𑁄, 𑀫𑀘𑁆𑀙𑁂 𑀯𑀥𑀢𑀻𑀢𑀺 𑀯𑀸 𑀫𑀘𑁆𑀙𑀩𑀦𑁆𑀥𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀓𑀁 𑀚𑀮𑀁, 𑀢𑀲𑁆𑀲 𑀈𑀮𑀓𑁆𑀔𑀻, 𑀢𑀸𑀬 𑀯𑀝𑁆𑀝𑁄 𑀯𑀝𑁆𑀝𑀦𑀁 𑀅𑀲𑁆𑀲𑀢𑁆𑀣𑀻𑀢𑀺 𑀓𑁂𑀯𑀝𑁆𑀝𑁄. 𑀓𑁂𑀯𑀢𑁆𑀢𑁄𑀧𑀺, 𑀡𑁄. 𑀚𑀸𑀮𑁂 𑀦𑀺𑀬𑀼𑀢𑁆𑀢𑁄, 𑀚𑀸𑀮𑁂𑀦 𑀳𑀦𑁆𑀢𑀻𑀢𑀺 𑀯𑀸 𑀚𑀸𑀮𑀺𑀓𑁄, 𑀤𑀸𑀲𑁄𑀧𑁆𑀬𑀢𑁆𑀭, 𑀤𑀸𑀲 𑀤𑀸𑀦𑁂, 𑀅, ‘‘𑀤𑀸𑀲𑁄 𑀓𑁂𑀯𑀝𑁆𑀝𑀪𑀘𑁆𑀘𑁂𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁦.𑁧𑁫] 𑀭𑀼𑀤𑁆𑀤𑁄.

𑁬𑁭𑁧-𑁬𑁭𑁨. 𑀛𑀲𑀸𑀦𑁆𑀢𑀁 𑀫𑀘𑁆𑀙𑁂. 𑀫𑀲 𑀆𑀫𑀲𑀦𑁂, 𑀙𑁄, 𑀫𑀭𑀥𑀸𑀢𑀼𑀯𑀲𑁂𑀦 𑀯𑀸 𑀲𑀺𑀤𑁆𑀥𑁄, 𑀫𑀭 𑀧𑀸𑀡𑀘𑀸𑀕𑁂, 𑀇𑀦𑁄, 𑀭𑀮𑁄𑀧𑁄. 𑀫𑀼𑀔𑀧𑁆𑀧𑀤𑁂𑀲𑁂 𑀧𑀼𑀣𑀽𑀦𑀺 𑀮𑁄𑀫𑀸𑀦𑀺 𑀅𑀲𑁆𑀲 𑀧𑀼𑀣𑀼𑀮𑁄𑀫𑁄. 𑀧𑀸𑀞𑀻𑀦𑀸𑀤𑀻𑀦𑀁 𑀫𑀘𑁆𑀙𑀢𑁆𑀢𑀸 𑀯𑀺𑀲𑁂𑀲𑀢𑁄 𑀅𑀮𑁄𑀫𑀓𑁂𑀧𑁆𑀬𑀲𑁆𑀲 𑀯𑀼𑀢𑁆𑀢𑀺. 𑀛𑀲 𑀳𑀺𑀁𑀲𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀅, 𑀛𑀲𑁄. 𑀅𑀡𑁆𑀟𑀚𑁄, 𑀯𑀺𑀲𑀸𑀭𑁄, 𑀲𑀓𑀮𑀻𑀧𑀺, 𑀯𑀺𑀘𑀺𑀢𑁆𑀭𑀁 𑀲𑀭𑀢𑀺 𑀅𑀦𑁂𑀦 𑀯𑀺𑀲𑀸𑀭𑁄, 𑀡𑁄. 𑀭𑁄𑀳𑀺𑀢𑀸𑀤𑀻𑀦𑀁 𑀯𑀓𑁆𑀓𑀮𑀧𑁆𑀧𑀸𑀬𑁄 [𑀩𑀢𑁆𑀢𑀮𑀧𑁆𑀧𑀸𑀬𑁄 (𑀓.)] 𑀢𑀘𑁄 𑀲𑀓𑀮𑀁. 𑀢𑀁𑀬𑁄𑀕𑀸, 𑀈, 𑀲𑀓𑀮𑀻.

𑀭𑁄𑀳𑀺𑀢𑀸𑀤𑀬𑁄, 𑀫𑀓𑀭𑀸𑀤𑀬𑁄 𑀘 𑀫𑀘𑁆𑀙𑀧𑁆𑀧𑀪𑁂𑀤𑀸. 𑀭𑀼𑀳 𑀚𑀦𑀦𑁂, 𑀢𑁄, 𑀭𑁄𑀳𑀺𑀢𑁄. 𑀯𑀺𑀧𑀸𑀓𑁂 𑀫𑀥𑀼𑀭𑀲𑀢𑁆𑀢𑀸 𑀫𑀕𑁆𑀕𑀼𑀭𑁄, 𑀯𑀡𑁆𑀡𑀯𑀺𑀓𑀸𑀭𑁄, 𑀫𑀚𑁆𑀚𑀢𑀻𑀢𑀺 𑀯𑀸 𑀫𑀕𑁆𑀕𑀼𑀭𑁄, 𑀊𑀭𑁄, 𑀫𑀚𑁆𑀚 𑀲𑀼𑀤𑁆𑀥𑀺𑀬𑀁, 𑀚𑁆𑀚𑀲𑁆𑀲 𑀕𑁆𑀕𑀢𑁆𑀢𑀁, 𑀭𑀲𑁆𑀲𑁄 𑀘, 𑀫𑀕𑁆𑀕𑀼𑀭𑁄, ‘‘𑀗𑀸 𑀔𑀽’’. 𑀲𑀺𑀗𑁆𑀕𑀬𑀼𑀢𑁆𑀢𑀢𑀸𑀬 𑀲𑀺𑀗𑁆𑀕𑀻, 𑀡𑁄, 𑀦𑀤𑀸𑀤𑀺, 𑀲𑀗𑁆𑀕𑀼𑀧𑀺, 𑀲𑀭𑀢𑀺 𑀯𑀸𑀢𑀦𑁆𑀢𑀺 𑀯𑀸 𑀲𑀺𑀗𑁆𑀕𑀻, 𑀲𑀭 𑀳𑀺𑀁𑀲𑀸𑀬𑀁, 𑀅, 𑀭𑀲𑁆𑀲 𑀕𑁄, 𑀅𑀲𑁆𑀲𑀺, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀦𑀤𑀸𑀤𑀺, 𑀲𑀺𑀗𑁆𑀕𑀻, ‘‘𑀗 𑀘𑁆𑀯𑁂’’. 𑀩𑀮 𑀲𑀁𑀯𑀭𑀡𑁂, 𑀅𑀮𑁄, 𑀮𑀲𑁆𑀲 𑀚𑁄, 𑀩𑀮𑀚𑁄,’’𑀗 𑀧𑀸’’. 𑀫𑀼𑀜𑁆𑀚 𑀲𑀤𑁆𑀤𑀢𑁆𑀣𑁄, 𑀫𑀼𑀜𑁆𑀚𑁄. 𑀧𑀽 𑀧𑀯𑀦𑁂, 𑀉𑀲𑁄, 𑀯𑀼𑀤𑁆𑀥𑁆𑀬𑀸𑀯𑀸𑀤𑁂𑀲𑀸, 𑀧𑀸𑀯𑀼𑀲𑁄, 𑀫𑀳𑀸𑀫𑀼𑀔𑀫𑀘𑁆𑀙𑁄, ‘‘𑀗 𑀝𑀸’’.

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀗𑁆𑀓𑀢𑀻𑀢𑀺 𑀲𑀢𑁆𑀢𑀯𑀗𑁆𑀓𑁄, ‘‘𑀗 𑀲𑁂’’. 𑀲𑀳 𑀯𑀗𑁆𑀓𑁂𑀦, 𑀲𑀁𑀯𑀺𑀚𑁆𑀚𑀫𑀸𑀦𑁄 𑀯𑀸 𑀯𑀗𑁆𑀓𑁄 𑀬𑀲𑁆𑀲 𑀲𑀯𑀗𑁆𑀓𑁄, ‘‘𑀗 𑀫𑁆𑀯𑁂’’. 𑀦𑀴𑀲𑀡𑁆𑀞𑀸𑀦𑁄 𑀫𑀻𑀦𑁄 𑀦𑀴𑀫𑀻𑀦𑁄, ‘‘𑀗 𑀨𑁆ौ-𑀬𑁄’’. 𑀓𑀟𑀺 𑀲𑀦𑁆𑀦𑀺𑀘𑀬𑀯𑀤𑀦𑁂𑀓𑀤𑁂𑀲𑁂𑀲𑀼, 𑀡𑁆𑀯𑀼, 𑀕𑀡𑁆𑀟𑀓𑁄, ‘‘𑀗 𑀫𑀸’’. 𑀲𑀲𑀼 𑀳𑀺𑀁𑀲𑀸𑀬𑀁, 𑀉, 𑀅𑀲𑁆𑀲𑀼, 𑀲𑀼𑀲𑀼𑀓𑀸, 𑀲𑀓𑀢𑁆𑀣𑁂𑀓𑁄, ‘‘𑀗-𑀧𑁆ौ-𑀝𑀬𑁂’’. 𑀲𑀬𑀦𑀢𑁄 𑀧𑀲𑁆𑀲𑁂𑀦 𑀨𑀭𑀢𑀻𑀢𑀺 𑀲𑀨𑀭𑀻, 𑀦𑀤𑀸𑀤𑀺, 𑀨𑀭 𑀨𑀭𑀡𑁂, 𑀲𑀨𑀭𑀻 𑀤𑁆𑀯𑀻𑀲𑀼, ‘‘𑀗 𑀔𑀽-𑀫𑀸’’. 𑀧𑀸𑀡𑀺𑀕𑁆𑀕𑀳𑀡𑁂 𑀫𑀼𑀔𑀁 𑀓𑀺𑀭𑀢𑀻𑀢𑀺 𑀫𑀓𑀭𑁄, 𑀬𑀤𑀸𑀤𑀺.

𑁬𑁭𑁩. 𑀢𑀺𑀫𑀺𑀆𑀤𑀬𑁄 𑀲𑀢𑁆𑀢 𑀫𑀳𑀸𑀫𑀘𑁆𑀙𑀸 𑀦𑀸𑀫. 𑀢𑀺𑀫 𑀅𑀤𑁆𑀤𑀪𑀸𑀯𑁂, 𑀢𑀺𑀫𑀢𑀻𑀢𑀺 𑀢𑀺𑀫𑀺, 𑀇, 𑀢𑀺𑀫𑀺 𑀫𑀘𑁆𑀙𑀫𑀢𑁆𑀢𑁂𑀧𑀺. 𑀕𑀺𑀭 𑀦𑀺𑀕𑁆𑀕𑀺𑀭𑀡𑁂, 𑀡𑁄, 𑀮𑀢𑁆𑀢𑀁, 𑀇𑀲𑁆𑀲𑀢𑁆𑀢𑀁. 𑀢𑀺𑀫𑀺𑀦𑁄 𑀕𑀮𑁄 𑀢𑀺𑀫𑀺𑀗𑁆𑀕𑀮𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀯𑀡𑁆𑀡𑁂𑀦 𑀧𑀺𑀗𑁆𑀕𑀮𑀢𑀺𑀫𑀺𑀭𑀲𑀤𑀺𑀲𑀢𑀸𑀬 𑀢𑀺𑀫𑀺𑀭𑀧𑀺𑀗𑁆𑀕𑀮𑁄. 𑀆 𑀪𑀼𑀲𑁄 𑀦𑀦𑁆𑀤𑀢𑀻𑀢𑀺 𑀆𑀦𑀦𑁆𑀤𑁄, 𑀦𑀦𑁆𑀤 𑀲𑀫𑀺𑀤𑁆𑀥𑀺𑀬𑀁. 𑀢𑀺𑀫𑀺𑀦𑁄 𑀫𑀘𑁆𑀙𑁂 𑀦𑀦𑁆𑀤𑀬𑀢𑀻𑀢𑀺 𑀢𑀺𑀫𑀺𑀦𑀦𑁆𑀤𑁄. ‘‘𑀢𑀺𑀫𑀺𑀦𑁆𑀤𑁄’’𑀢𑀺𑀧𑀺 𑀧𑀸𑀞𑁄, 𑀢𑀺𑀫𑀻𑀦𑀁 𑀫𑀘𑁆𑀙𑀸𑀦𑀁 𑀇𑀦𑁆𑀤𑁄 𑀢𑀺𑀫𑀺𑀦𑁆𑀤𑁄. 𑀅𑀥𑀺𑀓𑁄 𑀆𑀭𑁄𑀳𑁄 𑀬𑀲𑁆𑀲 𑀅𑀚𑁆𑀛𑀸𑀭𑁄𑀳𑁄. 𑀫𑀳𑀦𑁆𑀢𑁄 𑀢𑀺𑀫𑀺 𑀫𑀘𑁆𑀙𑁄 𑀫𑀳𑀸𑀢𑀺𑀫𑀺.

𑁬𑁭𑁪. 𑀤𑁆𑀯𑀬𑀁 ‘‘𑀗 𑀨𑁂’’𑀇𑀢𑀺 𑀔𑁆𑀬𑀸𑀢𑁂. 𑀧𑀸𑀲𑀸𑀡𑀲𑀤𑀺𑀲𑀲𑀡𑁆𑀞𑀸𑀦𑁄 𑀫𑀘𑁆𑀙𑁄 𑀧𑀸𑀲𑀸𑀡𑀫𑀘𑁆𑀙𑁄. 𑀧𑀞 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀇𑀦𑁄, 𑀉𑀪𑀬𑀢𑁆𑀭 𑀤𑀻𑀖𑁄, 𑀧𑀸𑀞𑀻𑀦𑁄, ‘‘𑀗-𑀧𑁆ौ’’𑀢𑀺 𑀘 𑀯𑀤𑀦𑁆𑀢𑀺. 𑀤𑁆𑀯𑀬𑀁 𑀩𑀴𑀺𑀲𑁂. 𑀯𑀗𑁆𑀓𑀢𑀻𑀢𑀺 𑀯𑀗𑁆𑀓𑁄, 𑀯𑀗𑁆𑀓 𑀓𑁄𑀝𑀺𑀮𑁆𑀬𑁂. 𑀩𑀮 𑀲𑀁𑀯𑀭𑀡𑁂, 𑀇𑀲𑁄, 𑀴𑀢𑁆𑀢𑀁. 𑀫𑀘𑁆𑀙𑀯𑁂𑀥𑀦𑀫𑁆𑀧𑀺, 𑀯𑀺𑀥 𑀯𑀺𑀥𑀸𑀦𑁂, 𑀪𑁂𑀤𑀦𑁂 𑀘, 𑀅𑀦𑁂𑀓𑀢𑁆𑀣𑀢𑁆𑀢𑀸, 𑀬𑀼.

𑀢𑀺𑀓𑀁 𑀓𑀼𑀫𑁆𑀪𑀻𑀮𑁂. ‘‘𑀲𑀼𑀁𑀲𑀼𑀫𑀸𑀭𑁄’’𑀢𑀺 𑀲𑀫𑀼𑀤𑀺𑀢𑀦𑀸𑀫𑀁, 𑀲𑀲𑀢𑀻𑀢𑀺 𑀲𑀼𑀲𑀼. 𑀲𑀼𑀲𑀼 𑀏𑀯 𑀲𑀼𑀁𑀲𑀼, 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄, 𑀲𑀼𑀁𑀲𑀼 𑀏𑀯 𑀫𑀸𑀭𑁄 𑀲𑀼𑀁𑀲𑀼𑀫𑀸𑀭𑁄. 𑀓𑁂𑀦 𑀉𑀪𑀢𑀺 𑀧𑀽𑀭𑁂𑀢𑀻𑀢𑀺 𑀓𑀼𑀫𑁆𑀪𑁄, 𑀚𑀮𑀸𑀲𑀬𑁄, 𑀢𑀢𑁆𑀭 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀓𑀼𑀫𑁆𑀪𑀻𑀮𑁄, 𑀓𑀼𑀫𑁆𑀪𑀻 𑀯𑀸 𑀖𑀝𑁄, 𑀢𑀁 𑀮𑀸𑀢𑀻𑀢𑀺 𑀓𑀼𑀫𑁆𑀪𑀻𑀮𑁄. 𑀦 𑀓𑀫𑀢𑀻𑀢𑀺 𑀦𑀓𑁆𑀓𑁄, 𑀓𑁆𑀯𑀺, 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀦𑀲𑁆𑀲 𑀧𑀓𑀢𑀺, 𑀦𑀓𑁆𑀓 𑀦𑀸𑀲𑀦𑁂 𑀯𑀸, 𑀘𑀼𑀭𑀸𑀤𑀺.

𑀤𑁆𑀯𑀬𑀁 𑀓𑀘𑁆𑀙𑀧𑁂. 𑀓𑀼𑀘𑁆𑀙𑀺𑀢𑁄 𑀊𑀫𑀺 𑀯𑁂𑀕𑁄 𑀅𑀲𑁆𑀲 𑀓𑀼𑀫𑁆𑀫𑁄, ‘‘𑀧𑀓𑀸𑀲𑁂 𑀯𑁂𑀕𑀪𑀗𑁆𑀕𑁂𑀲𑀼, 𑀢𑀭𑀗𑁆𑀕𑁂 𑀊𑀫𑀺 𑀧𑀼𑀁𑀣𑀺𑀬’’𑀦𑁆𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁦.𑁨𑁧] 𑀭𑀪𑀲𑁄, ‘‘𑀯𑁂𑀕𑁂 𑀪𑀗𑁆𑀕𑀧𑁆𑀧𑀓𑀸𑀲𑁂𑀲𑀼, 𑀩𑀺𑀮𑀸𑀬𑀁 𑀊𑀫𑀺 𑀯𑀻𑀘𑀺𑀬’’𑀦𑁆𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄. 𑀓𑀘𑁆𑀙𑁂𑀦 𑀧𑀺𑀯𑀢𑀻𑀢𑀺 𑀓𑀘𑁆𑀙𑀧𑁄, 𑀡𑁄, 𑀓𑀫𑀞𑁄𑀧𑁆𑀬𑀢𑁆𑀭, 𑀓𑀫𑀼 𑀇𑀘𑁆𑀙𑀸𑀬𑀁, 𑀅𑀞𑁄.

𑁬𑁭𑁫. 𑀤𑁆𑀯𑀬𑀁 𑀓𑀓𑁆𑀓𑀝𑁂. 𑀓𑀓𑀢𑀻𑀢𑀺 𑀓𑀓𑁆𑀓𑀝𑀓𑁄. 𑀲𑀓𑀢𑁆𑀣𑁂 𑀓𑁄, 𑀓𑀼𑀓 𑀆𑀤𑀸𑀦𑁂 𑀯𑀸, 𑀅𑀝𑁄, 𑀉𑀲𑁆𑀲𑀢𑁆𑀢𑀁. 𑀓𑀼𑀮 𑀲𑀦𑁆𑀢𑀸𑀦𑁂, 𑀩𑀦𑁆𑀥𑀼𑀫𑁆𑀳𑀺 𑀘, 𑀈𑀭𑁄, 𑀓𑀼𑀁 𑀯𑀸 𑀧𑀣𑀯𑀺𑀁 𑀮𑀼𑀦𑀸𑀢𑀻𑀢𑀺 𑀓𑀼𑀴𑀻𑀭𑁄, 𑀈𑀭𑁄. 𑀤𑁆𑀯𑀬𑀁 𑀭𑀢𑁆𑀢𑀧𑁂. 𑀚𑀮𑀲𑁆𑀲 𑀊𑀓𑀸 𑀓𑀺𑀫𑀺𑀯𑀺𑀲𑁂𑀲𑁄 𑀚𑀮𑀽𑀓𑀸, 𑀚𑀮𑀁 𑀑𑀓𑀁 𑀕𑁂𑀳𑀁 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀚𑀮𑀽𑀓𑀸, 𑀑𑀲𑁆𑀲𑀽, 𑀉𑀘 𑀲𑀫𑀯𑀸𑀬𑁂, 𑀡𑁄, 𑀑𑀓𑀁. 𑀭𑀢𑁆𑀢𑀁 𑀭𑀼𑀥𑀺𑀭𑀁 𑀧𑀺𑀯𑀢𑀻𑀢𑀺 𑀭𑀢𑁆𑀢𑀧𑀸.

𑀢𑀺𑀓𑀁 𑀫𑀡𑁆𑀟𑀽𑀓𑁂. 𑀫𑀡𑁆𑀟 𑀪𑀽𑀲𑀦𑁂, 𑀉𑀓𑁄, 𑀤𑀻𑀖𑁄. 𑀤𑀤 𑀤𑀸𑀦𑁂, 𑀉𑀭𑁄, 𑀤𑁆𑀯𑀺𑀢𑁆𑀢𑀁. 𑀪𑀻 𑀪𑀬𑁂, 𑀲𑀧𑁆𑀧𑀢𑁄 𑀪𑀸𑀬𑀢𑀻𑀢𑀺 𑀪𑁂𑀓𑁄, 𑀇𑀓𑁄, 𑀈𑀲𑁆𑀲𑁂. 𑀯𑀲𑁆𑀲𑀸𑀪𑀽, 𑀲𑀸𑀮𑀼𑀭𑁄, 𑀧𑁆𑀮𑀯𑁄𑀧𑀺. 𑀤𑁆𑀯𑀬𑀁 ‘‘𑀢𑀻’’𑀇𑀢𑀺 𑀔𑁆𑀬𑀸𑀢𑁂. 𑀕𑀡𑁆𑀟𑀁 𑀯𑀘𑁆𑀘𑀲𑀦𑁆𑀦𑀺𑀘𑀬𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀕𑀡𑁆𑀟𑀼𑀧𑁆𑀧𑀸𑀤𑁄. 𑀫𑀳𑀺𑀬𑀸 𑀮𑀢𑀸 𑀫𑀳𑀻𑀮𑀢𑀸, 𑀓𑀺𑀜𑁆𑀘𑀼𑀮𑀼𑀓𑁄𑀧𑀺. 𑀓𑀺𑀜𑁆𑀘 𑀘𑀼𑀮𑀢𑀻𑀢𑀺 𑀓𑀺𑀜𑁆𑀘𑀼𑀮𑀼𑀓𑁄, 𑀉𑀓𑁄.

𑁬𑁭𑁬. 𑀤𑁆𑀯𑀬𑀁 𑀫𑀼𑀢𑁆𑀢𑀸𑀨𑁄𑀝𑁂. 𑀲𑀧𑁆𑀧 𑀕𑀫𑀦𑁂, 𑀇, 𑀅𑀲𑁆𑀲𑀺, 𑀲𑀺𑀧𑁆𑀧𑀺, 𑀣𑀻. 𑀲𑀼 𑀅𑀪𑀺𑀲𑀯𑁂, 𑀢𑁆𑀢𑀺, 𑀲𑀼𑀢𑁆𑀢𑀺. 𑀤𑁆𑀯𑀬𑀁 𑀲𑀗𑁆𑀔𑁂. 𑀔𑀦𑀼 𑀅𑀯𑀤𑀸𑀭𑀡𑁂, 𑀓𑁆𑀯𑀺, 𑀲𑀗𑁆𑀔𑁄. 𑀲𑀫𑀼 𑀉𑀧𑀲𑀫𑁂 𑀯𑀸, 𑀔𑁄, 𑀲𑀗𑁆𑀔𑁄. 𑀓𑀁 𑀯𑀸𑀢𑀺 𑀕𑀘𑁆𑀙𑀢𑀻𑀢𑀺 𑀓𑀼𑀫𑁆𑀩𑀼, 𑀉, 𑀤𑁆𑀯𑁂𑀧𑁆𑀬𑀦𑀺𑀢𑁆𑀣𑀺𑀬𑀁.

𑀤𑁆𑀯𑀬𑀁 𑀔𑀼𑀤𑁆𑀤𑀲𑀗𑁆𑀔𑀚𑀸𑀢𑀺𑀬𑀁. 𑀲𑀗𑁆𑀔𑀲𑁆𑀲 𑀦𑀔𑁄 𑀇𑀯 𑀲𑀗𑁆𑀔𑀦𑀔𑁄. 𑀤𑁆𑀯𑀬𑀁 ‘‘𑀔𑀭𑀼’’𑀇𑀢𑀺 𑀔𑁆𑀬𑀸𑀢𑁂. 𑀚𑀮𑁂 𑀲𑀯𑀢𑀻𑀢𑀺 𑀚𑀮𑀲𑀼𑀢𑁆𑀢𑀺, 𑀲𑀼 𑀧𑀲𑀯𑁂, 𑀢𑁆𑀢𑀺. 𑀲𑀫𑀢𑀻𑀢𑀺 𑀲𑀫𑁆𑀩𑀼𑀓𑁄, 𑀉𑀓𑁄, 𑀩𑁄𑀦𑁆𑀢𑁄 𑀘, ‘‘𑀲𑀫𑁆𑀩𑀼𑀓𑁄 𑀚𑀮𑀲𑀼𑀢𑁆𑀢𑀺’𑀢𑁆𑀣𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁦.𑁨𑁩] 𑀧𑀼𑀁𑀓𑀡𑁆𑀟𑁂 𑀯𑁄𑀧𑀸𑀮𑀺𑀢𑁄.

𑁬𑁭𑁭. 𑀤𑁆𑀯𑀬𑀁 𑀚𑀮𑀸𑀲𑀬𑁂. 𑀚𑀮𑀸𑀦𑀁 𑀆𑀲𑀬𑁄 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀚𑀮𑀸𑀲𑀬𑁄. 𑀢𑁂𑀲𑀼 𑀚𑀮𑀸𑀲𑀬𑁂𑀲𑀼 𑀫𑀚𑁆𑀛𑁂 𑀬𑁄 𑀕𑀫𑁆𑀪𑀻𑀭𑁄 𑀅𑀕𑀸𑀥𑁄, 𑀲𑁄 𑀭𑀳𑀤𑀸𑀔𑁆𑀬𑁄, 𑀳𑀭 𑀳𑀭𑀡𑁂, 𑀪𑀽𑀯𑀸𑀤𑀺, 𑀤𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀭𑀳𑀤𑁄.

𑀤𑁆𑀯𑀬𑀁 𑀉𑀤𑀧𑀸𑀦𑁂. 𑀉𑀤𑀓𑀁 𑀧𑀺𑀯𑀦𑁆𑀢𑀺 𑀅𑀲𑁆𑀫𑀺𑀁, 𑀬𑀼, 𑀓𑀮𑁄𑀧𑁄. 𑀧𑀺𑀯𑀦𑁆𑀢𑀺 𑀅𑀲𑁆𑀫𑀺𑀁 𑀧𑀸𑀦𑁄, 𑀲𑁄 𑀏𑀯 𑀓𑀽𑀧𑁄 𑀧𑀸𑀦𑀓𑀽𑀧𑁄, 𑀓𑀼 𑀲𑀤𑁆𑀤𑁂, 𑀧𑁄, 𑀤𑀻𑀖𑀸𑀤𑀺, 𑀓𑀽𑀧𑁄, 𑀓𑁂𑀦 𑀉𑀪𑀢𑀻𑀢𑀺 𑀯𑀸 𑀓𑀽𑀧𑁄, 𑀪𑀲𑁆𑀲 𑀧𑁄. 𑀅𑀦𑁆𑀥𑀼𑀧𑀺, 𑀅𑀦𑁆𑀥 𑀤𑀲𑁆𑀲𑀦𑀼𑀧𑀲𑀗𑁆𑀖𑀸𑀢𑁂, 𑀘𑀼𑀭𑀸𑀤𑀺, 𑀉. 𑀤𑁆𑀯𑀬𑀁 𑀲𑀫𑀘𑀢𑀼𑀭𑀲𑁆𑀲𑀧𑁄𑀓𑁆𑀔𑀭𑀡𑀺𑀬𑀁. 𑀔𑀦𑀼 𑀅𑀯𑀤𑀸𑀭𑀡𑁂, 𑀓𑀫𑁆𑀫𑁂 𑀢𑁄, 𑀦𑀮𑁄𑀧𑁄, 𑀤𑀻𑀖𑀸𑀤𑀺. 𑀧𑁄𑀓𑁆𑀔𑀭𑀁 𑀚𑀮𑀁, 𑀢𑀁𑀬𑁄𑀕𑀸 𑀅𑀦𑁄, 𑀦𑀤𑀸𑀤𑀺, 𑀧𑁄𑀓𑁆𑀔𑀭𑀡𑀻.

𑁬𑁭𑁮. 𑀢𑀺𑀧𑀸𑀤𑁂𑀦 𑀫𑀳𑀢𑁄 𑀲𑀤𑀸 𑀅𑀕𑀸𑀥𑀚𑀮𑀲𑁆𑀲 𑀧𑀤𑁆𑀫𑀝𑁆𑀞𑀸𑀦𑀲𑁆𑀲 𑀘 𑀧𑀤𑁆𑀫𑀲𑀼𑀜𑁆𑀜𑀲𑁆𑀲 𑀘 𑀬𑁄𑀕𑁆𑀬𑀢𑀸𑀬 𑀦𑀸𑀫𑀁 [𑀅𑀫𑀭 𑁧𑁦.𑁨𑁮 𑀕𑀸𑀣𑀸𑀬𑀁 𑀧𑀲𑁆𑀲𑀺𑀢𑀩𑁆𑀩𑀁]. 𑀢𑀴 𑀆𑀖𑀸𑀢𑁂, 𑀢𑀮 𑀧𑀢𑀺𑀝𑁆𑀞𑀸𑀬𑀁 𑀯𑀸, 𑀆𑀓𑁄, 𑀅𑀧𑀭𑀧𑀓𑁆𑀔𑁂 𑀴𑀢𑁆𑀢𑀁. 𑀲𑀭 𑀕𑀫𑀦𑁂, 𑀅, 𑀲𑀭𑁄. 𑀯𑀧 𑀩𑀻𑀚𑀦𑀺𑀓𑁆𑀔𑁂𑀧𑁂, 𑀯𑀧𑀦𑁆𑀢𑀺 𑀬𑀸𑀬 𑀯𑀸𑀧𑀻, 𑀆𑀬𑀢𑀘𑀢𑀼𑀭𑀲𑁆𑀲𑀸𑀬𑀫𑁆𑀧𑀺. 𑀲𑀭𑀢𑀺𑀲𑁆𑀫𑀸 𑀅𑀲𑁄, 𑀦𑀤𑀸𑀤𑀺, 𑀲𑀭𑀲𑀻. 𑀤𑀳 𑀪𑀲𑁆𑀫𑀻𑀓𑀭𑀡𑁂, 𑀅, 𑀤𑀥 𑀥𑀸𑀭𑀡𑁂 𑀯𑀸, 𑀥𑀲𑁆𑀲 𑀳𑁄. 𑀅𑀫𑁆𑀩𑀼𑀚𑀸𑀦𑀁 𑀧𑀤𑁆𑀥𑀸𑀦𑀁 𑀆𑀓𑀭𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁.

𑀔𑀼𑀤𑁆𑀤𑀓𑁄 𑀲𑀭𑁄 ‘‘𑀧𑀮𑁆𑀮𑀮’’𑀦𑁆𑀢𑁆𑀬𑀼𑀘𑁆𑀘𑀢𑁂. 𑀬𑀢𑁆𑀭 𑀯𑀲𑁆𑀲𑀸𑀲𑀼 𑀅𑀥𑀺𑀓𑀁 𑀚𑀮𑀁, 𑀕𑀺𑀫𑁆𑀳𑁂𑀲𑀼 𑀚𑀸𑀡𑀼𑀫𑀢𑁆𑀢𑀁, 𑀲𑀼𑀓𑁆𑀔𑀢𑁆𑀬𑁂𑀯 𑀯𑀸, 𑀧𑀮𑁆𑀮 𑀭𑀓𑁆𑀔𑀡𑁂, 𑀘𑀼𑀭𑀸𑀤𑀺, 𑀅𑀮𑁄, 𑀧𑀮𑁆𑀮𑀮𑀁.

𑁬𑁭𑁯-𑁬𑁮𑁦. 𑀅𑀦𑁄𑀢𑀢𑁆𑀢𑀸𑀤𑀬𑁄 𑀏𑀢𑁂 𑀲𑀢𑁆𑀢 𑀫𑀳𑀸𑀲𑀭𑀸 𑀦𑀸𑀫. 𑀢𑀢𑁆𑀭 𑀲𑀽𑀭𑀺𑀬𑀭𑀁𑀲𑀺𑀲𑀫𑁆𑀨𑀼𑀝𑁆𑀞𑀸𑀪𑀸𑀯𑁂𑀦 𑀦 𑀅𑀯𑀢𑀧𑀢𑀺 𑀉𑀤𑀓𑀫𑁂𑀢𑁆𑀣𑀸𑀢𑀺 𑀅𑀦𑁄𑀢𑀢𑁆𑀢𑁄. 𑀓𑀡𑁆𑀡𑀫𑀼𑀡𑁆𑀟𑀧𑀩𑁆𑀩𑀢𑀲𑀫𑀻𑀧𑀢𑁆𑀢𑀸 𑀓𑀡𑁆𑀡𑀫𑀼𑀡𑁆𑀟𑁄. 𑀭𑀣𑀁 𑀓𑀭𑁄𑀢𑀻𑀢𑀺 𑀭𑀣𑀓𑀸𑀭𑀓𑁄, 𑀬𑀣𑀸𑀓𑀣𑀜𑁆𑀘𑀺 𑀅𑀬𑀁 𑀩𑁆𑀬𑀼𑀧𑁆𑀧𑀢𑁆𑀢𑀺 𑀦𑀸𑀫, 𑀲𑀜𑁆𑀜𑀸 𑀧𑀦 𑀮𑁄𑀓𑀢𑁄𑀬𑁂𑀯𑀸𑀯𑀕𑀦𑁆𑀢𑀩𑁆𑀩𑀸. 𑀙𑀩𑁆𑀩𑀡𑁆𑀡𑀤𑀦𑁆𑀢𑀯𑀦𑁆𑀢𑀢𑀸𑀬 𑀙𑀤𑁆𑀤𑀦𑁆𑀢𑁄, 𑀦𑀸𑀕𑀭𑀸𑀚𑀸, 𑀢𑀲𑁆𑀲 𑀦𑀺𑀯𑀸𑀲𑀦𑀝𑁆𑀞𑀸𑀦𑀲𑀫𑀻𑀧𑀢𑁆𑀢𑀸 𑀙𑀤𑁆𑀤𑀦𑁆𑀢𑁄, 𑀲𑀭𑁄. 𑀓𑀼𑀡𑀸𑀮𑀲𑀓𑀼𑀡𑀸 𑀩𑀳𑀯𑁄 𑀬𑀢𑁆𑀣 𑀲𑀦𑁆𑀢𑀺 𑀓𑀼𑀡𑀸𑀮𑁄. 𑀫𑀦𑁆𑀤𑀸𑀓𑀺𑀦𑀻 𑀆𑀓𑀸𑀲𑀕𑀗𑁆𑀕𑀸𑀬𑀫𑁆𑀧𑀺 𑀯𑀼𑀢𑁆𑀢𑀸. 𑀩𑀳𑀯𑁄 𑀲𑀻𑀳𑀸 𑀧𑀧𑀢𑀦𑁆𑀢𑀺 𑀅𑀲𑁆𑀫𑀺𑀁 𑀲𑀻𑀳𑀧𑁆𑀧𑀧𑀸𑀢𑁄.

𑀤𑁆𑀯𑀬𑀁 𑀚𑀮𑀧𑁆𑀧𑀸𑀬𑁂 𑀤𑁂𑀲𑁂 𑀓𑀽𑀧𑀦𑀺𑀓𑀝𑁂 𑀧𑀲𑀼𑀧𑀸𑀦𑀢𑁆𑀣𑀁 𑀧𑀢𑁆𑀣𑀸𑀭𑀸𑀤𑀺𑀭𑀘𑀺𑀢𑁂 𑀚𑀮𑀸𑀲𑀬𑁂. 𑀆𑀳𑀽𑀬𑀦𑁆𑀢𑁂 𑀧𑀲𑀯𑁄 𑀅𑀢𑁆𑀭 𑀧𑀸𑀦𑀸𑀬𑀸𑀢𑀺 𑀆𑀳𑀸𑀯𑁄, 𑀡𑁄, 𑀯𑀼𑀟𑁆𑀠𑀸𑀯𑀸𑀤𑁂𑀲𑁄. 𑀦𑀺𑀧𑀺𑀯𑀦𑁆𑀢𑀺 𑀅𑀲𑁆𑀫𑀺𑀁 𑀦𑀺𑀧𑀸𑀦𑀁, 𑀬𑀼. 𑀤𑁆𑀯𑀬𑀁 𑀲𑀼𑀭𑀔𑀸𑀢𑁂, 𑀅𑀧𑁄𑀭𑀺𑀲𑁂 𑀤𑁂𑀯𑀦𑀺𑀫𑁆𑀫𑀺𑀢𑁂𑀢𑀺 𑀪𑀸𑀯𑁄, 𑀲𑁄𑀡𑁆𑀟𑁂𑀇𑀘𑁆𑀘𑀜𑁆𑀜𑁂. ‘‘𑀅𑀔𑀸𑀢𑁄 𑀤𑁂𑀯𑀔𑀸𑀢𑀓𑁄’’𑀢𑀺 [𑀅𑀫𑀭 𑁧𑁦.𑁨𑁭] 𑀳𑀺 𑀅𑀫𑀭𑀫𑀸𑀮𑀸𑀬𑀁 𑀧𑀼𑀁𑀲𑀓𑀡𑁆𑀟𑀁.

𑁬𑁮𑁧. 𑀦𑀤𑁆𑀬𑀦𑁆𑀢𑀁 𑀦𑀤𑀻𑀬𑀁. 𑀲𑀯𑀢𑀻𑀢𑀺, 𑀅𑀦𑁆𑀢𑁄, 𑀦𑀤𑀸𑀤𑀺, 𑀲𑀯𑀦𑁆𑀢𑀻. 𑀦𑀺𑀦𑁆𑀦𑀝𑁆𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀦𑀺𑀦𑁆𑀦𑀕𑀸, 𑀓𑁆𑀯𑀺. 𑀲𑀦𑁆𑀤 𑀧𑀲𑀯𑀦𑁂, 𑀉, 𑀅𑀲𑁆𑀲𑀺𑀢𑁆𑀢𑀁, 𑀯𑀡𑁆𑀡𑀯𑀺𑀓𑀸𑀭𑁄, 𑀲𑀺𑀦𑁆𑀥𑀼. 𑀲𑀭 𑀕𑀫𑀦𑁂, 𑀢𑁄, 𑀇𑀓𑀸𑀭𑀸𑀕𑀫𑁄, 𑀲𑀭𑀺𑀢𑀸. 𑀆𑀧𑀸𑀦𑀁 𑀦𑀺𑀯𑀸𑀲𑁄 𑀆𑀧𑁄, 𑀲𑀫𑀼𑀤𑁆𑀤𑁄, 𑀡𑁄, 𑀢𑀁 𑀕𑀘𑁆𑀙𑀢𑀻𑀢𑀺 𑀆𑀧𑀕𑀸. 𑀦𑀤 𑀅𑀩𑁆𑀬𑀢𑁆𑀢𑀲𑀤𑁆𑀤𑁂, 𑀦𑀤𑀢𑀻𑀢𑀺 𑀦𑀤𑀻, 𑀦𑀤𑀸𑀤𑀺, 𑀢𑀭𑀗𑁆𑀕𑀦𑀻𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀕𑀗𑁆𑀕𑀸𑀬𑀁. 𑀪𑀕𑀻𑀭𑀣𑁂𑀦 𑀭𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑀺𑀢𑀸 𑀪𑀸𑀕𑀻𑀭𑀣𑀻𑀢𑀺 𑀮𑁄𑀓𑀺𑀬𑀸, 𑀅𑀲𑁆𑀫𑀸𑀓𑀦𑁆𑀢𑀼 𑀫𑀢𑁂𑀦 𑀦𑀸𑀫𑀫𑀢𑁆𑀢𑀫𑁂𑀯𑁂𑀢𑀁 𑀢𑀲𑁆𑀲𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁, 𑀏𑀯𑀁 𑀲𑀩𑁆𑀩𑀢𑁆𑀭. 𑀕𑀘𑁆𑀙𑀢𑀻𑀢𑀺 𑀕𑀗𑁆𑀕𑀸, 𑀕𑀫𑀺𑀢𑁄 𑀕𑁄, 𑀢𑀺𑀧𑀣𑀕𑀢𑀸𑀧𑀺, 𑀢𑀬𑁄 𑀲𑀕𑁆𑀕𑀫𑀘𑁆𑀘𑀧𑀸𑀢𑀸𑀮𑀧𑀣𑁂 𑀕𑀢𑀸 𑀢𑀺𑀧𑀣𑀕𑀢𑀸. 𑀲𑀺𑀦𑁆𑀥𑀽𑀦𑀁 𑀦𑀤𑀻𑀦𑀁 𑀲𑀗𑁆𑀕𑀫𑁄 𑀫𑁂𑀮𑀓𑁄 𑀲𑀫𑁆𑀪𑁂𑀤𑁄. 𑀲𑀫𑁆𑀫𑀸 𑀪𑀺𑀚𑁆𑀚𑀦𑁆𑀢𑀺 𑀅𑀲𑁆𑀫𑀺𑀁 𑀲𑀫𑁆𑀪𑁂𑀤𑁄, 𑀲𑀁𑀧𑀼𑀩𑁆𑀩𑁄 𑀪𑀺𑀤𑀺 𑀫𑁂𑀮𑀦𑁂, 𑀡𑁄.

𑁬𑁮𑁨. 𑀕𑀗𑁆𑀕𑀸𑀤𑀺𑀓𑀸 𑀇𑀫𑀸 𑀧𑀜𑁆𑀘 𑀦𑀤𑀺𑀬𑁄 𑀫𑀳𑀸𑀦𑀤𑀻 𑀦𑀸𑀫. 𑀅𑀘𑀺𑀭𑀁 𑀲𑀻𑀖𑀕𑀫𑀦𑀁 𑀏𑀢𑀺𑀲𑁆𑀲𑀫𑀢𑁆𑀣𑀻𑀢𑀺 𑀅𑀘𑀺𑀭𑀯𑀢𑀻. 𑀬𑀫𑀼 𑀉𑀧𑀭𑀫𑁂, 𑀉𑀦𑁄, 𑀬𑀫𑀲𑁆𑀲 𑀪𑀕𑀺𑀦𑀻 𑀯𑀸 𑀬𑀫𑀼𑀦𑀸, 𑀪𑀕𑀺𑀦𑁆𑀬𑀢𑁆𑀣𑁂 𑀉𑀦𑁄. 𑀲𑀭𑀸𑀦𑀺 𑀪𑀯𑀦𑁆𑀢𑀺 𑀬𑀸𑀬 𑀅𑀯𑀥𑀺𑀪𑀽𑀢𑀸𑀬𑀸𑀢𑀺 𑀲𑀭𑀪𑀽, 𑀲𑀭 𑀕𑀢𑀺𑀳𑀺𑀁𑀲𑀸𑀘𑀺𑀦𑁆𑀢𑀸𑀲𑀼 𑀯𑀸, 𑀊, 𑀅𑀪𑁄𑀦𑁆𑀢𑁄 𑀘, 𑀲𑀭𑀪𑀽. 𑀫𑀳 𑀧𑀽𑀚𑀸𑀬𑀁, 𑀅, 𑀦𑀤𑀸𑀤𑀺.

𑀘𑀦𑁆𑀤𑀪𑀸𑀕𑀸𑀤𑀺𑀓𑀸 𑀦𑀺𑀦𑁆𑀦𑀕𑀸 𑀧𑀜𑁆𑀘 𑀫𑀳𑀸𑀦𑀤𑀺𑀢𑁄 𑀅𑀜𑁆𑀜𑀸𑀲𑀁 𑀦𑀤𑀻𑀦𑀁 𑀪𑁂𑀤𑀸. 𑀘𑀦𑁆𑀤𑀪𑀸𑀕𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀪𑀯𑀢𑀻𑀢𑀺 𑀘𑀦𑁆𑀤𑀪𑀸𑀕𑀸. 𑀲𑀭𑀬𑁄𑀕𑀸 𑀯𑀦𑁆𑀢𑀼, 𑀫𑀚𑁆𑀛𑁂 𑀲𑀓𑀸𑀭𑀸𑀕𑀫𑁄, 𑀦𑀤𑀸𑀤𑀺, 𑀲𑀭𑀲𑁆𑀯𑀢𑀻. 𑀯𑀦𑁆𑀢𑀼𑀭𑀢𑁆𑀭𑀸𑀢𑀺𑀲𑀬𑁂.

𑁬𑁮𑁩. 𑀦𑀺𑀤𑁆𑀤𑁄𑀲𑀁 𑀚𑀮𑀁 𑀅𑀲𑁆𑀲𑀁 𑀦𑁂𑀭𑀜𑁆𑀚𑀭𑀸, 𑀬𑀤𑀸𑀤𑀺, 𑀅𑀣 𑀯𑀸 𑀦𑁂𑀭𑀜𑁆𑀚𑀭𑀸 𑀦𑀸𑀫 𑀢𑀽𑀭𑀺𑀬𑀯𑀺𑀲𑁂𑀲𑁄, 𑀢𑀁𑀲𑀫𑀸𑀦𑀲𑀤𑁆𑀤𑀢𑀸𑀬 𑀅𑀬𑀁 𑀦𑀤𑀻 𑀦𑁂𑀭𑀜𑁆𑀚𑀭𑀸 𑀦𑀸𑀫. 𑀦𑀸𑀦𑀸𑀕𑀸𑀳𑀸𑀓𑀼𑀮𑀻𑀪𑀽𑀢𑀢𑀸𑀬 𑀓𑀼𑀘𑁆𑀙𑀺𑀢𑀁 𑀯𑁂𑀭𑀁 𑀅𑀲𑁆𑀲𑀸 𑀓𑀸𑀯𑁂𑀭𑀻, 𑀦𑀤𑀸𑀤𑀺. 𑀦𑀫𑁆𑀫𑀁 𑀲𑀼𑀔𑀁 𑀤𑀤𑀸𑀢𑀻𑀢𑀺 𑀦𑀫𑁆𑀫𑀤𑀸, 𑀡𑁄. 𑀆𑀤𑀺𑀦𑀸 𑀲𑀭𑀸𑀯𑀢𑀻 𑀯𑁂𑀢𑁆𑀢𑀯𑀢𑀻 𑀓𑀡𑁆𑀝𑀓𑀻 𑀓𑁄𑀲𑀺𑀓𑀻𑀆𑀤𑀺𑀓𑀸 𑀅𑀦𑁂𑀓𑀸 𑀦𑀤𑀻𑀪𑁂𑀤𑀸 𑀲𑀗𑁆𑀕𑀳𑀺𑀢𑀸.

𑀤𑁆𑀯𑀬𑀁 𑀳𑀫𑁆𑀫𑀺𑀬𑀤𑁂𑀯𑀸𑀮𑀬𑀸𑀤𑀻𑀲𑀼 𑀚𑀮𑀫𑀕𑁆𑀕𑁂. 𑀯𑀸𑀭𑀺𑀦𑁄 𑀦𑀺𑀓𑁆𑀔𑀫𑀦𑀫𑀕𑁆𑀕𑁄 𑀯𑀸𑀭𑀺𑀫𑀕𑁆𑀕𑁄. 𑀦𑀮 𑀕𑀦𑁆𑀥𑁂, 𑀅, 𑀦𑀤𑀸𑀤𑀺, 𑀴𑀢𑁆𑀢𑀁, 𑀧𑀦𑀸𑀴𑀺, 𑀅𑀬𑀁 𑀇𑀢𑁆𑀣𑀺𑀬𑀁, 𑀧𑀼𑀫𑁂 𑀘.

𑀢𑀺𑀓𑀁 𑀕𑀸𑀫𑀤𑁆𑀯𑀸𑀭𑀫𑁆𑀳𑀺 𑀅𑀲𑀼𑀘𑀺𑀧𑀽𑀢𑀺𑀧𑀗𑁆𑀓𑀲𑀫𑁆𑀧𑀼𑀡𑁆𑀡𑀸𑀬𑀁 𑀓𑀸𑀲𑀼𑀬𑀁. 𑀘𑀺𑀢𑁆𑀢𑀁 𑀤𑀼𑀦𑁄𑀢𑀻𑀢𑀺 𑀘𑀦𑁆𑀤𑀦𑀺𑀓𑀸, 𑀬𑀤𑀸𑀤𑀺.

𑁬𑁮𑁪-𑁬𑁮𑁫. 𑀚𑀫𑀼 𑀅𑀤𑀦𑁂, 𑀅𑀮𑁄, 𑀦𑀤𑀸𑀤𑀺, 𑀩𑁄𑀦𑁆𑀢𑁄 𑀘, 𑀴𑀢𑁆𑀢𑀁, 𑀚𑀫𑁆𑀩𑀸𑀴𑀻. 𑀅𑀯𑀮𑀕𑁆𑀕𑀦𑁆𑀢𑀺 𑀅𑀲𑁆𑀫𑀺𑀁 𑀑𑀴𑀺𑀕𑀮𑁆𑀮𑁄, 𑀮𑀕𑁆𑀕 𑀲𑀗𑁆𑀕𑁂, 𑀅𑀮𑁄, 𑀴𑀢𑁆𑀢𑀁, 𑀅𑀲𑁆𑀲𑀺, 𑀕𑀮𑁄𑀧𑁄, 𑀤𑁆𑀯𑀺𑀢𑁆𑀢𑀜𑁆𑀘. 𑀲𑀸𑀤𑁆𑀥𑀧𑀚𑁆𑀚𑁂𑀦 𑀧𑀤𑀼𑀫𑀲𑁆𑀲 𑀦𑀸𑀫𑀁. 𑀲𑀭𑀲𑀺 𑀭𑀼𑀳𑀢𑀻𑀢𑀺 𑀲𑀭𑁄𑀭𑀼𑀳𑀁, 𑀭𑁄. 𑀲𑀢𑀁 𑀧𑀢𑁆𑀢𑀸𑀦𑀺 𑀅𑀲𑁆𑀲, 𑀧𑀤𑁆𑀫𑀯𑀺𑀲𑁂𑀲𑀢𑁆𑀣𑁂𑀧𑁆𑀬𑀲𑁆𑀲 𑀧𑀤𑁆𑀫𑀢𑁆𑀢𑀸 𑀯𑀺𑀲𑁂𑀲𑀢𑁄 𑀅𑀪𑁂𑀤𑁄. 𑀅𑀭𑀁 𑀯𑀺𑀦𑁆𑀤𑀢𑀻𑀢𑀺 𑀅𑀭𑀯𑀺𑀦𑁆𑀤𑀁. 𑀧𑀤 𑀕𑀫𑀦𑁂, 𑀉𑀫𑁄. 𑀧𑀤𑀼𑀫𑀁, 𑀅𑀦𑀺𑀢𑁆𑀣𑀻. 𑀧𑀗𑁆𑀓𑁂 𑀓𑀤𑁆𑀤𑀫𑁂 𑀭𑀼𑀳𑀢𑀻𑀢𑀺 𑀧𑀗𑁆𑀓𑁂𑀭𑀼𑀳𑀁, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁. 𑀦𑀮 𑀕𑀦𑁆𑀥𑁂, 𑀇𑀦𑁄, 𑀴𑀢𑁆𑀢𑀁. 𑀧𑀼𑀲 𑀯𑀼𑀟𑁆𑀠𑀺𑀫𑁆𑀳𑀺, 𑀔𑀭𑁄, 𑀯𑀼𑀟𑁆𑀠𑀺, 𑀲𑀲𑁆𑀲 𑀓𑁄, 𑀧𑁄𑀓𑁆𑀔𑀭𑁂 𑀚𑀮𑁂 𑀚𑀸𑀢𑀦𑁆𑀢𑀺 𑀯𑀸 𑀧𑁄𑀓𑁆𑀔𑀭𑀁. 𑀫𑀼𑀴𑀸𑀮𑀢𑁄𑀧𑀺 𑀉𑀕𑁆𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀢𑀺 𑀫𑀼𑀴𑀸𑀮𑀧𑀼𑀧𑁆𑀨𑀁. 𑀓𑀁 𑀚𑀮𑀁 𑀅𑀮𑀬𑀢𑀺 𑀪𑀽𑀲𑀬𑀢𑀻𑀢𑀺 𑀓𑀫𑀮𑀁, 𑀅𑀮 𑀪𑀽𑀲𑀦𑁂. 𑀪𑀺𑀲𑀢𑁄𑀧𑀺 𑀉𑀕𑁆𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀢𑀻𑀢𑀺 𑀪𑀺𑀲𑀧𑀼𑀧𑁆𑀨𑀁. 𑀓𑀼𑀲𑁂 𑀚𑀮𑁂 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀓𑀼𑀲𑁂𑀲𑀬𑀁, 𑀭𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄. 𑀢𑀸𑀫𑀭𑀲𑀫𑁆𑀧𑀺, 𑀢𑀸𑀫𑀭𑀁 𑀚𑀮𑀁, ‘‘𑀢𑀸𑀫𑀭𑀁 𑀖𑀢𑀫𑀡𑁆𑀡𑁄 𑀘𑁂’’𑀢𑀺 𑀢𑀦𑁆𑀢𑀢𑀦𑁆𑀢𑀭𑀁, 𑀢𑀢𑁆𑀭 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀢𑀸𑀫𑀭𑀲𑀁, 𑀭𑁄.

𑁬𑁮𑁬. 𑀲𑀺𑀢𑀁 𑀲𑁂𑀢𑀁 𑀓𑀫𑀮𑀁 ‘‘𑀧𑀼𑀡𑁆𑀟𑀭𑀻𑀓’’𑀦𑁆𑀢𑁆𑀬𑀼𑀘𑁆𑀘𑀢𑁂, 𑀧𑀼𑀟𑀺 𑀔𑀡𑁆𑀟𑀦𑁂, 𑀫𑀼𑀟𑀺𑀭𑀺𑀢𑁆𑀬𑁂𑀓𑁂, 𑀇𑀓𑁄, 𑀅𑀭𑀸𑀕𑀫𑁄 𑀘, 𑀫𑀲𑁆𑀲 𑀧𑁄, 𑀇𑀲𑁆𑀲𑀻𑀓𑀸𑀭𑁄 𑀘, 𑀧𑀼𑀡𑁆𑀟𑀭𑀻𑀓𑀁. 𑀭𑀢𑁆𑀢𑀁 𑀢𑀼 𑀓𑀫𑀮𑀁 ‘‘𑀓𑁄𑀓𑀦𑀤𑀁, 𑀓𑁄𑀓𑀸𑀲𑀓𑁄’’𑀢𑀺 𑀘𑁄𑀘𑁆𑀘𑀢𑁂. 𑀓𑁄𑀓𑁂 𑀦𑀸𑀤𑀬𑀢𑀻𑀢𑀺 𑀓𑁄𑀓𑀦𑀸𑀤𑀁, 𑀡𑁄. 𑀭𑀢𑁆𑀢𑀼𑀧𑁆𑀧𑀮𑁂 𑀘, ‘‘𑀓𑁄𑀓𑀦𑀤𑀁, 𑀓𑁄𑀓𑀦𑀼𑀤’’𑀦𑁆𑀢𑀺𑀧𑀺 𑀧𑀸𑀞𑁄, 𑀓𑁂 𑀓𑀦𑀢𑀺 𑀤𑀺𑀩𑁆𑀩𑀢𑀻𑀢𑀺 𑀯𑀸 𑀓𑁄𑀓𑀦𑀤𑀁, 𑀪𑀽𑀯𑀸𑀤𑀺, 𑀤𑁄, 𑀅𑀲𑁆𑀲𑁄. 𑀓𑀦 𑀤𑀺𑀢𑁆𑀢𑀺𑀓𑀦𑁆𑀢𑀺𑀕𑀢𑀻𑀲𑀼, 𑀓𑁂 𑀓𑀸𑀲𑀢𑀻𑀢𑀺 𑀓𑁄𑀓𑀸𑀲𑀓𑁄, 𑀡𑁆𑀯𑀼, 𑀓𑀸𑀲 𑀤𑀺𑀢𑁆𑀢𑀺𑀬𑀁.

𑀤𑁆𑀯𑀬𑀁 𑀓𑁂𑀲𑀭𑁂, 𑀓𑁂 𑀚𑀸𑀬𑀢𑀻𑀢𑀺 𑀓𑀺, 𑀓𑀫𑀮𑀸𑀤𑀺, 𑀢𑀲𑁆𑀫𑀺𑀁 𑀚𑀸𑀬𑀢𑀺, 𑀚𑀮𑀢𑀻𑀢𑀺 𑀯𑀸 𑀓𑀺𑀜𑁆𑀚𑀓𑁆𑀔𑁄, 𑀔𑁄, 𑀦𑀲𑁆𑀲, 𑀮𑀲𑁆𑀲 𑀯𑀸 𑀓𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀓𑁂 𑀲𑀭𑀢𑀻𑀢𑀺, 𑀅, 𑀲𑀢𑁆𑀢𑀫𑀺𑀬𑀸 𑀅𑀮𑁄𑀧𑁄, 𑀤𑁆𑀯𑀬𑀫𑀦𑀺𑀢𑁆𑀣𑀻. 𑀤𑁆𑀯𑀬𑀁 𑀧𑀤𑁆𑀫𑀸𑀤𑀺𑀤𑀡𑁆𑀟𑁂. 𑀤𑀡𑁆𑀟𑀲𑀤𑀺𑀲𑀢𑀸𑀬 𑀤𑀡𑁆𑀟𑁄. 𑀦𑀮 𑀕𑀦𑁆𑀥𑁂, 𑀡𑁄.

𑁬𑁮𑁭. 𑀤𑁆𑀯𑀬𑀁 𑀫𑀼𑀴𑀸𑀮𑁂. 𑀯𑀺𑀲 𑀧𑁂𑀭𑀡𑁂, 𑀯𑀲𑁆𑀲 𑀪𑁄, 𑀪𑀺𑀲𑀁, 𑀪𑀸𑀲 𑀤𑀺𑀢𑁆𑀢𑀺𑀬𑀁 𑀯𑀸, 𑀆𑀓𑀸𑀭𑀲𑁆𑀲𑀺. 𑀫𑀽𑀮𑁂 𑀚𑀸𑀬𑀢𑀻𑀢𑀺 𑀫𑀼𑀴𑀸𑀮𑁄, 𑀅𑀜𑁆𑀜𑀢𑁆𑀣𑁂 𑀅𑀮𑁄, 𑀭𑀲𑁆𑀲𑀸𑀤𑀺, 𑀴𑀢𑁆𑀢𑀜𑁆𑀘, 𑀫𑀽𑀮 𑀧𑀢𑀺𑀝𑁆𑀞𑀸𑀬𑀁 𑀯𑀸, 𑀅𑀮𑁄, 𑀲𑁂𑀲𑀁 𑀧𑀼𑀩𑁆𑀩𑀲𑀤𑀺𑀲𑀁, 𑀤𑁆𑀯𑀬𑀁𑀧𑁆𑀬𑀦𑀺𑀢𑁆𑀣𑀻.

𑀤𑁆𑀯𑀬𑀁 𑀓𑀡𑁆𑀡𑀺𑀓𑀸𑀬𑀁. 𑀩𑀻𑀚𑀲𑁆𑀲 𑀓𑁄𑀲𑁄 𑀆𑀓𑀭𑁄 𑀩𑀻𑀚𑀓𑁄𑀲𑁄. 𑀓𑀡𑁆𑀡𑁂 𑀓𑀭𑀻𑀬𑀢𑀻𑀢𑀺 𑀓𑀡𑁆𑀡𑀺𑀓𑀸, 𑀓𑀡𑁆𑀡𑀸𑀮𑀗𑁆𑀓𑀸𑀭𑁄, 𑀢𑀁𑀲𑀤𑀺𑀲𑀲𑀡𑁆𑀞𑀸𑀦𑀢𑀸𑀬 𑀓𑀡𑁆𑀡𑀺𑀓𑀸, 𑀧𑀤𑀼𑀫𑀸𑀤𑀻𑀦𑀁 𑀲𑀫𑀽𑀳𑁂 𑀕𑀳𑀦𑁂 𑀯𑀦𑁂𑀢𑁆𑀬𑀢𑁆𑀣𑁄. 𑀲𑀡 𑀤𑀸𑀦𑁂, 𑀟𑁄, 𑀲𑀡𑁆𑀟𑀁, ‘‘𑀲𑀡𑁆𑀟𑀁 𑀧𑀤𑁆𑀥𑀸𑀤𑀺𑀲𑀗𑁆𑀖𑀸𑀢𑁂, 𑀕𑁄𑀧𑀢𑀺𑀫𑁆𑀳𑀺 𑀧𑀼𑀫𑁂 𑀪𑀯𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄.

𑁬𑁮𑁮. 𑀤𑁆𑀯𑀬𑀁 𑀧𑀤𑁆𑀫𑀓𑀼𑀫𑀼𑀤𑀸𑀤𑀺𑀲𑀸𑀫𑀜𑁆𑀜𑁂, 𑀢𑀣𑀸 𑀳𑀺 𑀧𑀤𑁆𑀫𑀁 𑀫𑀳𑁄𑀧𑁆𑀧𑀮𑀁 𑀲𑀺𑀢𑁄𑀧𑁆𑀧𑀮𑀫𑀼𑀘𑁆𑀘𑀢𑁂, ‘‘𑀓𑀼𑀯𑀮𑀬𑀁 𑀉𑀧𑁆𑀧𑀮𑀜𑁆𑀘, 𑀦𑀻𑀮𑀫𑀺𑀦𑁆𑀤𑀻𑀯𑀭𑀦𑁆𑀢𑀺 𑀳𑀺’’𑀇𑀢𑀺 𑀩𑁆𑀬𑀸𑀟𑀺, ‘‘𑀉𑀧𑁆𑀧𑀮𑀜𑁆𑀘 𑀓𑀼𑀯𑀮𑀬𑀁, 𑀦𑀻𑀮𑀫𑀺𑀦𑁆𑀤𑀻𑀯𑀭𑀁 𑀫𑀢’’𑀦𑁆𑀢𑀺 𑀪𑀸𑀕𑀼𑀭𑀺 𑀘, ‘‘𑀭𑁄𑀫𑁄 𑀲𑀺𑀢𑀺 𑀘 𑀦𑀻𑀮𑁄, 𑀓𑀼𑀯𑀮𑀬𑀫𑀺𑀦𑁆𑀤𑀻𑀯𑀭𑀜𑁆𑀘 𑀦𑀻𑀮𑀫𑁆𑀩𑀼𑀚’’𑀦𑁆𑀢𑀺 𑀢𑀼 𑀯𑀭𑀭𑀼𑀘𑀺. ‘‘𑀓𑀼𑀯𑀮𑀬𑀤𑀮𑀲𑀸𑀫𑁄𑀧𑁆𑀬𑀗𑁆𑀕𑀤𑀥𑀺𑀢𑀺 𑀧𑀭𑀺𑀥𑀽 𑀲𑀭’’𑀦𑁆𑀢𑀺 𑀫𑀸𑀮𑀥𑀺, 𑀫𑀸𑀥𑀯𑁄 𑀘, 𑀢𑀢𑁆𑀭 𑀧𑀼𑀩𑁆𑀩𑀓𑀫𑀢𑀫𑀺𑀳 𑀦𑀺𑀲𑁆𑀲𑀻𑀬𑀢𑁂. 𑀬𑀤𑁆𑀬𑁂𑀯𑀁 𑀓𑀣𑀫𑀼𑀧𑁆𑀧𑀮𑀲𑀤𑁆𑀤𑁂𑀦 𑀦𑀻𑀮𑀼𑀧𑁆𑀧𑀮𑀸𑀤𑀻𑀲𑁆𑀯𑁂𑀯 𑀩𑀼𑀤𑁆𑀥𑀺, 𑀦 𑀧𑀦 𑀫𑀳𑁄𑀧𑁆𑀧𑀮𑀸𑀤𑀺𑀫𑁆𑀳𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀸𑀫𑀜𑁆𑀜𑁂𑀧𑀺 𑀥𑀜𑁆𑀜𑀢𑁆𑀢𑁂 𑀬𑀣𑀸 𑀥𑀜𑁆𑀜𑀲𑀤𑁆𑀤𑁂𑀦 𑀓𑀮𑀫𑀸𑀤𑀻𑀲𑁆𑀯𑁂𑀯 𑀩𑀼𑀤𑁆𑀥𑀺, 𑀦 𑀧𑀦 𑀫𑀼𑀕𑁆𑀕𑀸𑀤𑀻𑀲𑀼, 𑀏𑀯𑀫𑀺𑀳𑀸𑀧𑀺. 𑀉𑀧𑀼𑀩𑁆𑀩𑁄 𑀧𑀸 𑀧𑀸𑀦𑁂, 𑀅𑀮𑁄, 𑀤𑁆𑀯𑀺𑀢𑁆𑀢𑀁, 𑀉𑀤𑀓𑁂 𑀧𑁆𑀮𑀯𑀢𑀻𑀢𑀺 𑀯𑀸 𑀉𑀧𑁆𑀧𑀮𑀁, 𑀬𑀤𑀸𑀤𑀺. 𑀓𑀼𑀬𑀸 𑀧𑀣𑀯𑀺𑀬𑀸 𑀯𑀮𑀬𑀁 𑀇𑀯 𑀲𑁄𑀪𑀸𑀓𑀭𑀢𑁆𑀢𑀸 𑀓𑀼𑀯𑀮𑀬𑀁.

𑀤𑁆𑀯𑀬𑀁 𑀦𑀻𑀮𑀼𑀧𑁆𑀧𑀮𑁂. 𑀦𑀻𑀮𑀯𑀡𑁆𑀡𑁂, 𑀅, 𑀦𑀻𑀮𑀁, 𑀇𑀦𑁆𑀤𑀢𑀻𑀢𑀺 𑀇𑀦𑁆𑀤𑀻, 𑀦𑀤𑀸𑀤𑀺, 𑀇𑀦𑁆𑀤𑀻 𑀮𑀓𑁆𑀔𑀻, 𑀢𑀲𑁆𑀲𑀸 𑀯𑀭𑀁 𑀇𑀦𑁆𑀤𑀻𑀯𑀭𑀁, 𑀇𑀦𑁆𑀤 𑀧𑀭𑀫𑀺𑀲𑁆𑀲𑀭𑀺𑀬𑁂 𑀯𑀸, 𑀈𑀭𑁄.

𑀅𑀲𑁆𑀫𑀺𑀁 𑀦𑀻𑀮𑀼𑀧𑁆𑀧𑀮𑁂 𑀲𑁂𑀢𑁂 𑀓𑀼𑀫𑀼𑀤𑀁 𑀦𑀸𑀫. 𑀓𑀼𑀬𑀁 𑀫𑁄𑀤𑀢𑁂 𑀓𑀼𑀫𑀼𑀤𑀁, 𑀡𑁄. 𑀅𑀲𑁆𑀲 𑀧𑀤𑀼𑀫𑀸𑀤𑀺𑀦𑁄 𑀓𑀦𑁆𑀤𑁄 𑀲𑀸𑀮𑀽𑀓𑀫𑀼𑀘𑁆𑀘𑀢𑁂. 𑀓𑀁 𑀲𑀼𑀔𑀁 𑀤𑀤𑀸𑀢𑀻𑀢𑀺 𑀓𑀦𑁆𑀤𑁄, 𑀓𑀦𑁆𑀤 𑀅𑀯𑁆𑀳𑀸𑀦𑁂 𑀯𑀸 𑀭𑁄𑀤𑀦𑁂 𑀘. 𑀲𑀮 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀉𑀓𑁄, 𑀤𑀻𑀖𑁄, 𑀲𑀸𑀮𑀽𑀓𑀁.

𑁬𑁮𑁯. 𑀢𑀺𑀓𑀁 𑀭𑀢𑁆𑀢𑀸𑀭𑀢𑁆𑀢𑀲𑀸𑀫𑀜𑁆𑀜𑁂. 𑀓𑀫𑀮𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀚𑀮𑀓𑀼𑀲𑀼𑀫𑁂, 𑀦 𑀢𑀼 𑀭𑀢𑁆𑀢𑁂𑀬𑁂𑀯, 𑀲𑀼𑀕𑀦𑁆𑀥𑁂𑀦 𑀬𑀼𑀢𑁆𑀢𑀁 𑀲𑁄𑀕𑀦𑁆𑀥𑀺𑀓𑀁. 𑀓𑀲𑁆𑀲 𑀳𑀸𑀭𑀁 𑀇𑀯 𑀲𑁄𑀪𑀸𑀓𑀭𑀢𑁆𑀢𑀸 𑀓𑀮𑁆𑀮𑀳𑀸𑀭𑀁, 𑀮𑀸𑀕𑀫𑁄, 𑀤𑁆𑀯𑀺𑀢𑁆𑀢𑀜𑁆𑀘. 𑀤𑀓𑀁 𑀲𑀻𑀢𑀮𑀁 𑀓𑀭𑁄𑀢𑀻𑀢𑀺 𑀤𑀓𑀲𑀻𑀢𑀮𑀺𑀓𑀁.

𑀤𑁆𑀯𑀬𑀁 𑀲𑁂𑀯𑀸𑀮𑁂. 𑀉𑀤𑀓𑀁 𑀲𑁂𑀯𑀢𑀻𑀢𑀺 𑀲𑁂𑀯𑀸𑀮𑁄, 𑀅𑀮𑁄, 𑀯𑀓𑀸𑀭𑀸𑀕𑀫𑁄, 𑀇𑀲𑁆𑀲𑁂 𑀘. 𑀦𑀻𑀮𑀢𑀻𑀢𑀺 𑀦𑀻𑀮𑀺𑀓𑀸, 𑀦𑀻𑀮 𑀯𑀡𑁆𑀡𑁂, 𑀇𑀓𑁄, 𑀦𑀻𑀮𑀯𑀡𑁆𑀡𑀬𑁄𑀕𑀢𑁄 𑀯𑀸 𑀦𑀻𑀮𑀺𑀓𑀸, 𑀲𑁂𑀯𑀮𑁄𑀧𑀺, 𑀤𑁆𑀯𑀬𑀁 𑀧𑀤𑁆𑀫𑀬𑀼𑀢𑁆𑀢𑁂 𑀤𑁂𑀲𑁂, 𑀧𑀤𑁆𑀫𑀲𑀫𑀽𑀳𑁂 𑀘. 𑀦𑀴𑀺𑀦𑀻 𑀘 𑀧𑀗𑁆𑀓𑀚𑀺𑀦𑀻 𑀯𑀺𑀲𑀺𑀦𑀻 𑀘 𑀲𑀭𑁄𑀚𑀺𑀦𑀻 𑀧𑀤𑁆𑀫𑀺𑀦𑀻𑀢𑀺 𑀧𑀭𑀺𑀬𑀸𑀬𑀸. ‘‘𑀧𑀤𑁆𑀫𑀲𑀡𑁆𑀟𑀁 𑀢𑀤𑀸𑀓𑀭𑁂’’𑀢𑀺 𑀳𑀺 𑀧𑀭𑀺𑀬𑀸𑀬𑀁 𑀭𑀢𑀦𑀫𑀸𑀮𑀸𑀬𑀁 𑀫𑀸𑀥𑀯𑁄, 𑀯𑀺𑀲𑀁 𑀲𑀫𑀁, 𑀢𑀩𑁆𑀩𑀦𑁆𑀢𑀢𑀸𑀬 𑀯𑀺𑀲𑀺𑀦𑀻, 𑀇𑀦𑁄, 𑀦𑀤𑀸𑀤𑀺. 𑀅𑀫𑁆𑀩𑀼𑀚𑀬𑁄𑀕𑀢𑁄, 𑀅𑀫𑁆𑀩𑀼𑀚𑀸𑀦𑀁 𑀲𑀫𑀽𑀳𑀢𑁄 𑀯𑀸 𑀅𑀫𑁆𑀩𑀼𑀚𑀺𑀦𑀻.

𑁬𑁯𑁦. 𑀢𑀺𑀮𑀩𑀻𑀚𑀸𑀤𑀬𑁄 𑀲𑁂𑀯𑀸𑀮𑁄 𑀦𑀸𑀫. 𑀢𑀢𑁆𑀭 𑀢𑀺𑀮𑀩𑀻𑀚𑀧𑁆𑀧𑀫𑀸𑀡𑀁 𑀚𑀮𑀲𑀡𑁆𑀞𑀺𑀢𑀁 𑀦𑀻𑀮𑀸𑀤𑀺𑀯𑀡𑁆𑀡𑀬𑀼𑀢𑁆𑀢𑀁 𑀢𑀺𑀮𑀩𑀻𑀚𑀁 𑀦𑀸𑀫. 𑀲𑀗𑁆𑀔𑁄 𑀦𑀸𑀫 𑀲𑀧𑀢𑁆𑀢𑁄 𑀅𑀧𑁆𑀧𑀓𑀡𑁆𑀟𑁄 𑀉𑀔𑀸𑀧𑀺𑀥𑀸𑀦𑀸𑀤𑀺𑀧𑁆𑀧𑀫𑀸𑀡𑁄 𑀲𑀫𑀽𑀮𑁄 𑀏𑀓𑁄 𑀲𑁂𑀯𑀸𑀮𑀯𑀺𑀲𑁂𑀲𑁄. 𑀧𑀡𑀓𑁄 𑀦𑀸𑀫 𑀪𑀫𑀭𑀲𑀡𑁆𑀞𑀸𑀦𑁄 𑀦𑀻𑀮𑀯𑀡𑁆𑀡𑁄 𑀏𑀓𑁄 𑀲𑁂𑀯𑀸𑀮𑀯𑀺𑀲𑁂𑀲𑁄, 𑀧𑀡 𑀲𑀗𑁆𑀔𑀸𑀢𑁂, 𑀡𑁆𑀯𑀼, 𑀧𑀡𑀓𑁄.

𑀧𑀸𑀢𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀓𑀮𑀩𑁆𑀬𑀸𑀓𑀭𑀡𑀫𑀳𑀸𑀯𑀦𑀸𑀲𑀗𑁆𑀕𑀜𑀸𑀡𑀘𑀸𑀭𑀺𑀦𑀸 𑀓𑀯𑀺𑀓𑀼𑀜𑁆𑀚𑀭𑀓𑁂𑀲𑀭𑀺𑀦𑀸 𑀥𑀻𑀫𑀢𑀸 𑀲𑀺𑀭𑀺𑀫𑀳𑀸𑀘𑀢𑀼𑀭𑀗𑁆𑀕𑀩𑀮𑁂𑀦 𑀫𑀳𑀸𑀫𑀘𑁆𑀘𑁂𑀦 𑀯𑀺𑀭𑀘𑀺𑀢𑀸𑀬𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀯𑀡𑁆𑀡𑀦𑀸𑀬𑀁 𑀪𑀽𑀓𑀡𑁆𑀟𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.