𑁨. 𑀪𑀽𑀓𑀡𑁆𑀟

𑁧. 𑀪𑀽𑀫𑀺𑀯𑀕𑁆𑀕𑀯𑀡𑁆𑀡𑀦𑀸

𑁧𑁮𑁦. 𑀇𑀥 𑀪𑀽𑀓𑀡𑁆𑀟𑁂 𑀲𑀸𑀗𑁆𑀕𑁄𑀧𑀸𑀗𑁆𑀕𑁂𑀳𑀺 𑀪𑀽𑀫𑁆𑀬𑀸𑀤𑀻𑀳𑀺 𑀤𑀲𑀳𑀺, 𑀧𑀸𑀢𑀸𑀮𑁂𑀦 𑀘𑀸𑀢𑀺 𑀏𑀓𑀸𑀤𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀓𑀫𑀢𑁄 𑀯𑀕𑁆𑀕𑀸 𑀪𑀽𑀫𑀺𑀯𑀕𑁆𑀕𑀸𑀤𑀺𑀦𑀸𑀫𑀓𑀸 𑀯𑀕𑁆𑀕𑀸 𑀯𑀼𑀘𑁆𑀘𑀦𑁆𑀢𑁂. 𑀲𑀧𑁆𑀧𑀥𑀸𑀦𑁄𑀧𑀓𑀸𑀭𑀓𑀸𑀦𑀺 𑀅𑀗𑁆𑀕𑀸𑀦𑀺 𑀔𑀸𑀭𑀸𑀤𑀻𑀦𑀺, 𑀅𑀗𑁆𑀕𑀸𑀦𑀁 𑀉𑀧𑀓𑀸𑀭𑀓𑀸𑀦𑀺 𑀘 𑀉𑀧𑀗𑁆𑀕𑀸𑀦𑀺 𑀅𑀤𑁆𑀥𑀸𑀤𑀻𑀦𑀺.

𑁧𑁮𑁧. 𑀲𑀸𑀤𑁆𑀥𑀧𑀚𑁆𑀚𑁂𑀦 𑀪𑀽𑀫𑀺𑀬𑀸 𑀦𑀸𑀫𑀸𑀦𑀺. 𑀯𑀲𑀽𑀦𑀺 𑀭𑀢𑀦𑀸𑀦𑀺 𑀥𑀸𑀭𑀬𑀢𑀻𑀢𑀺 𑀯𑀲𑀼𑀦𑁆𑀥𑀭𑀸. 𑀔𑀫𑀼 𑀲𑀳𑀦𑁂, 𑀔𑀲𑁆𑀲 𑀙𑁄, 𑀙𑀫𑀸, 𑀅𑀣 𑀯𑀸 𑀙𑀺 𑀙𑁂𑀤𑀦𑁂, 𑀲𑀢𑁆𑀢𑀸𑀦𑀫𑀥𑁄𑀧𑀢𑀦𑀁 𑀙𑀺𑀦𑁆𑀤𑀢𑀻𑀢𑀺 𑀙𑀫𑀸, 𑀫𑁄, 𑀇𑀢𑁆𑀣𑀺𑀬𑀫𑀸 𑀘. 𑀪𑀯𑀦𑁆𑀢𑁆𑀬𑀲𑁆𑀲𑀁 𑀪𑀽𑀢𑀸𑀦𑀻𑀢𑀺 𑀪𑀽𑀫𑀺. 𑀪𑀽 𑀲𑀢𑁆𑀢𑀸𑀬𑀁, 𑀫𑀺. 𑀧𑀼𑀣𑀇𑀢𑀺 𑀧𑀸𑀝𑀺𑀧𑀤𑀺𑀓𑁂 𑀞𑀺𑀢𑁂 𑀦𑀤𑀸𑀤𑀺, 𑀈, 𑀧𑀼𑀣𑀲𑁆𑀲 𑀧𑀼𑀣𑀼𑀆𑀤𑁂𑀲𑁂, 𑀯𑀼𑀤𑁆𑀥𑀺𑀫𑁆𑀳𑀺 𑀘 𑀓𑀢𑁂 𑀧𑀼𑀣𑀯𑀻. 𑀉𑀲𑁆𑀲𑀼𑀯𑀸𑀤𑁂𑀲𑁂 𑀧𑀼𑀣𑀼𑀯𑀻. 𑀧𑀣𑀸𑀤𑁂𑀲𑁂 𑀢𑀼 𑀧𑀣𑀯𑀻, 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀯𑀸𑀕𑀫𑁄, 𑀅𑀣 𑀯𑀸 𑀣𑀯 𑀕𑀢𑀺𑀬𑀁, 𑀧𑀣𑀯𑀢𑀺 𑀏𑀢𑁆𑀣𑀸𑀢𑀺 𑀧𑀣𑀯𑀻, 𑀦𑀤𑀸𑀤𑀺, 𑀲𑀩𑁆𑀩𑀢𑁆𑀣 𑀧𑀢𑁆𑀣𑀭𑀢𑀻𑀢𑀺 𑀯𑀸 𑀧𑀣𑀯𑀻, 𑀣𑀭 𑀲𑀦𑁆𑀣𑀭𑀡𑁂 𑀧𑀧𑀼𑀩𑁆𑀩𑁄, 𑀭𑀲𑁆𑀲 𑀯𑁄, 𑀦𑀤𑀸𑀤𑀺, 𑀧𑀼𑀣𑀯𑀻, 𑀅𑀲𑁆𑀲𑀼.

‘‘𑀫𑀥𑀼𑀦𑁄 𑀓𑁂𑀝𑀪𑀲𑁆𑀲𑀸𑀧𑀺, 𑀫𑁂𑀤𑀫𑀁𑀲𑀧𑀭𑀺𑀧𑁆𑀮𑀼𑀢𑀸;

𑀢𑁂𑀦𑀸𑀬𑀁 𑀫𑁂𑀤𑀺𑀦𑀻 𑀤𑁂𑀯𑀻, 𑀯𑀼𑀘𑁆𑀘𑀢𑁂 𑀩𑁆𑀭𑀳𑁆𑀫𑀯𑀸𑀤𑀺𑀪𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁧.𑁩]. 𑁋

𑀯𑀘𑀦𑀢𑁄 𑀫𑁂𑀤𑀬𑁄𑀕𑀸 𑀫𑁂𑀤𑀺𑀦𑀻, 𑀈, 𑀇𑀦𑀻 𑀘. 𑀫𑀺𑀤 𑀲𑁆𑀦𑁂𑀳𑀦𑁂 𑀯𑀸, 𑀬𑀼, 𑀦𑀤𑀸𑀤𑀺, 𑀇𑀲𑁆𑀲𑁂𑀢𑁆𑀢𑀜𑁆𑀘. 𑀫𑀳 𑀧𑀽𑀚𑀸𑀬𑀁, 𑀦𑀤𑀸𑀤𑀺. 𑀯𑀺𑀢𑁆𑀣𑀺𑀡𑁆𑀡𑀢𑁆𑀢𑀸 𑀉𑀩𑁆𑀩𑀻, 𑀦𑀤𑀸𑀤𑀺, 𑀅𑀯𑀢𑀺 𑀪𑀽𑀢𑀸𑀦𑀻𑀢𑀺 𑀯𑀸 𑀉𑀩𑁆𑀩𑀻, 𑀅𑀲𑁆𑀲𑀼. 𑀯𑀲𑀽𑀦𑀺 𑀲𑀦𑁆𑀢𑁆𑀬𑀲𑁆𑀲𑀁 𑀯𑀲𑀼𑀫𑀢𑀻. 𑀕𑀘𑁆𑀙𑀦𑁆𑀢𑀺 𑀬𑀲𑁆𑀲𑀁 𑀮𑁄𑀓𑀸, 𑀲𑀸 𑀕𑁄, 𑀧𑀼𑀫𑀺𑀢𑁆𑀣𑀺𑀬𑀁. 𑀓𑀸 𑀲𑀤𑁆𑀤𑁂, 𑀓𑀸𑀬𑀢𑀺 𑀏𑀢𑁆𑀣, 𑀓𑀸𑀬𑀢𑀺 𑀫𑀸𑀭𑀯𑀺𑀚𑀬𑀓𑀸𑀮𑁂𑀢𑀺 𑀯𑀸 𑀓𑀼, 𑀉. 𑀯𑀲𑀽𑀦𑀺 𑀥𑀸𑀭𑀬𑀢𑀻𑀢𑀺 𑀯𑀲𑀼𑀥𑀸. 𑀲𑀩𑁆𑀩𑀁 𑀮𑁄𑀓𑀁 𑀥𑀭𑀬𑀢𑀻𑀢𑀺 𑀥𑀭𑀡𑀻, 𑀬𑀼, 𑀦𑀤𑀸𑀤𑀺. 𑀥𑀭𑀢𑀻𑀢𑀺 𑀥𑀭𑀸, 𑀇𑀢𑁆𑀣𑀺𑀬𑀁 𑀆. 𑀕𑀫𑀼 𑀕𑀫𑀦𑁂, 𑀕𑀘𑁆𑀙𑀦𑁆𑀢𑁆𑀬𑀲𑁆𑀲𑀁 𑀚𑀕𑀢𑀻, 𑀅𑀦𑁆𑀢𑀧𑀘𑁆𑀘𑀬𑁄, 𑀕𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀚𑀢𑁆𑀢𑀜𑁆𑀘, 𑀦𑀮𑁄𑀧𑁄, 𑀦𑀤𑀸𑀤𑀺. 𑀪𑀽 𑀲𑀢𑁆𑀢𑀸𑀬𑀁, 𑀭𑀺, 𑀦𑀤𑀸𑀤𑀺, 𑀓𑁆𑀯𑀺𑀫𑁆𑀳𑀺 𑀪𑀽. 𑀪𑀽𑀢𑁂 𑀲𑀢𑁆𑀢𑁂 𑀥𑀭𑀢𑀻𑀢𑀺 𑀪𑀽𑀢𑀭𑁄. 𑀅𑀯 𑀭𑀓𑁆𑀔𑀡𑁂, 𑀬𑀼, 𑀦𑀤𑀸𑀤𑀺, 𑀅𑀯𑀦𑀻.

𑁧𑁮𑁨. 𑀔𑀸𑀭𑀸 𑀮𑀯𑀡𑀭𑀲𑀸 𑀫𑀢𑁆𑀢𑀺𑀓𑀸 𑀊𑀲𑁄𑀢𑁆𑀬𑀼𑀘𑁆𑀘𑀢𑁂. 𑀔𑀸𑀤𑀢𑀻𑀢𑀺 𑀔𑀸𑀭𑀸, 𑀤𑀲𑁆𑀲 𑀭𑁄. 𑀧𑀤𑁂𑀲𑀓𑀢𑁆𑀢𑀸 𑀫𑀢𑁆𑀢𑁂𑀦 𑀧𑀫𑀸𑀡𑁂𑀦 𑀬𑀼𑀢𑁆𑀢𑀸 𑀫𑀢𑁆𑀢𑀺𑀓𑀸. 𑀊𑀲 𑀭𑀼𑀚𑀸𑀬𑀁, 𑀊𑀲𑁄. 𑀊𑀲𑀬𑁄𑀕𑀸 𑀊𑀲𑀯𑀸, 𑀯𑀦𑁆𑀢𑀼. 𑀭𑀧𑀘𑁆𑀘𑀬𑁂 𑀊𑀲𑀭𑁄. 𑀤𑁆𑀯𑁂𑀧𑀺 𑀢𑀻𑀲𑀼 𑀯𑀢𑁆𑀢𑀦𑁆𑀢𑁂.

𑀣𑀮 𑀞𑀸𑀦𑁂, 𑀅𑀥𑀺𑀓𑀭𑀡𑁂 𑀅. 𑀓𑀺𑀢𑁆𑀢𑀺𑀫𑀁 𑀣𑀮𑀁, 𑀅𑀓𑀺𑀢𑁆𑀢𑀺𑀫𑀸 𑀣𑀮𑀻, 𑀦𑀤𑀸𑀤𑀺. 𑀣𑀤𑁆𑀥𑀮𑀽𑀔𑀫𑁆𑀳𑀺 𑀪𑀽𑀪𑀸𑀕𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀚𑀗𑁆𑀕𑀮𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀢𑀢𑁆𑀣 𑀦𑀺𑀚𑁆𑀚𑀮𑀢𑁆𑀢𑀸 𑀓𑀓𑁆𑀔𑀴𑀢𑁆𑀢𑀸 𑀣𑀤𑁆𑀥𑁄. 𑀢𑀺𑀓𑁆𑀔𑀲𑀓𑁆𑀔𑀭𑀸𑀤𑀺𑀯𑀺𑀤𑀸𑀭𑀕𑀯𑀸𑀤𑀺𑀔𑀼𑀭𑀕𑀡𑁆𑀟𑀼𑀧𑁆𑀧𑀸𑀤𑀯𑀘𑁆𑀘𑀸𑀤𑀺𑀲𑀳𑀺𑀢𑀢𑁆𑀢𑀸 𑀮𑀽𑀔𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀮 𑀘𑀯𑀦𑀸𑀥𑁄𑀧𑀢𑀦𑀸𑀤𑀦𑁂𑀲𑀼. 𑀚𑀮𑀁 𑀕𑀮𑀢𑀺 𑀏𑀢𑁆𑀣, 𑀚𑀮𑁂𑀦 𑀯𑀸 𑀕𑀮𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀗𑁆𑀕𑀮𑁄, 𑀦𑀺𑀚𑁆𑀚𑀮𑁄 𑀤𑁂𑀲𑁄, ‘‘𑀚𑀗𑁆𑀕𑀮𑁄 𑀦𑀺𑀚𑁆𑀚𑀮𑁂 𑀤𑁂𑀲𑁂, 𑀢𑀺𑀮𑀺𑀗𑁆𑀕𑁄 𑀧𑀺𑀲𑀺𑀢𑁂 𑀣𑀺𑀬’’𑀦𑁆𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁩.𑁩.𑁩𑁯𑁩] 𑀳𑀺 𑀢𑀺𑀓𑀡𑁆𑀟𑀲𑁂𑀲𑁄, 𑀮𑀲𑁆𑀲 𑀮𑁄𑀧𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘.

𑁧𑁮𑁩. 𑀯𑁂𑀤𑁂𑀦 𑀧𑀜𑁆𑀜𑀸𑀬 𑀈𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑁂𑀤𑁂𑀳𑁄. 𑀲𑁄 𑀏𑀯 𑀯𑀺𑀤𑁂𑀳𑁄, 𑀇𑀫𑀁 𑀤𑀻𑀧𑀫𑀼𑀧𑀸𑀤𑀸𑀬 𑀲𑀺𑀦𑁂𑀭𑀼𑀦𑁄 𑀧𑀼𑀩𑁆𑀩𑀤𑀺𑀲𑀸𑀪𑀸𑀕𑀢𑁆𑀢𑀸 𑀧𑀼𑀩𑁆𑀩𑁄 𑀘 𑀲𑁄 𑀯𑀺𑀤𑁂𑀳𑁄 𑀘𑁂𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑁄. 𑀏𑀯𑀫𑀧𑀭𑀼𑀢𑁆𑀢𑀭𑁂𑀲𑀼. 𑀕𑀯𑁂𑀦 𑀬𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀕𑁄𑀬𑀸𑀦𑁄. 𑀅𑀧𑀭𑁄 𑀘 𑀲𑁄 𑀕𑁄𑀬𑀸𑀦𑁄 𑀘𑁂𑀢𑀺 𑀅𑀧𑀭𑀕𑁄𑀬𑀸𑀦𑁄. 𑀚𑀫𑁆𑀩𑀼𑀬𑀸 𑀮𑀓𑁆𑀔𑀺𑀢𑁄, 𑀓𑀧𑁆𑀧𑀝𑁆𑀞𑀸𑀬𑀺𑀢𑀸𑀤𑀺𑀧𑁆𑀧𑀪𑀸𑀯𑁂𑀦 𑀯𑀸 𑀢𑀧𑁆𑀧𑀥𑀸𑀦𑁄𑀤𑀻𑀧𑁄𑀢𑀺 𑀚𑀫𑁆𑀩𑀼𑀤𑀻𑀧𑁄. 𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀧𑀜𑁆𑀘𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀓𑀁 𑀲𑀼𑀔𑀁 𑀉𑀭𑀼 𑀫𑀳𑀦𑁆𑀢𑀫𑁂𑀢𑁆𑀣𑀸𑀢𑀺 𑀓𑀼𑀭𑀼, 𑀓𑀼𑀁 𑀧𑀸𑀧𑀁 𑀭𑀼𑀦𑁆𑀥𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀓𑀼𑀭𑀼, 𑀓𑁆𑀯𑀺. 𑀤𑀻𑀧 𑀤𑀺𑀢𑁆𑀢𑀺𑀧𑁆𑀧𑀓𑀸𑀲𑀦𑁂𑀲𑀼, 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀦𑁆𑀢𑀻𑀢𑀺 𑀤𑀻𑀧𑀸, 𑀤𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀫𑁆𑀫𑀸𑀢𑀺 𑀯𑀸 𑀤𑀻𑀧𑀸, 𑀧𑀫𑀸𑀡𑀢𑁄 𑀫𑀳𑀦𑁆𑀢𑀸 𑀤𑀻𑀧𑀸 𑀫𑀳𑀸𑀤𑀻𑀧𑀸.

𑁧𑁮𑁪. 𑀓𑀼𑀭𑀼𑀆𑀤𑀬𑁄 𑀏𑀓𑀯𑀻𑀲𑀢𑀺 𑀚𑀦𑀧𑀤𑀦𑁆𑀢𑀭𑀸 𑀚𑀦𑀧𑀤𑀯𑀺𑀲𑁂𑀲𑀸, 𑀆𑀤𑀺𑀦𑀸 𑀲𑀼𑀭𑀫𑀳𑀧𑀘𑁆𑀘𑀼𑀕𑁆𑀕𑀢𑀸 𑀢𑀮𑀓𑀼𑀝𑀸 𑀅𑀲𑁆𑀫𑀸𑀓𑀸𑀤𑀬𑁄 𑀘 𑀧𑀼𑀫𑁆𑀩𑀳𑀼𑀢𑁆𑀢𑁂 𑀧𑀼𑀮𑁆𑀮𑀺𑀗𑁆𑀕𑁂 𑀩𑀳𑀼𑀢𑁆𑀢𑁂 𑀘 𑀲𑀺𑀬𑀼𑀁. 𑀓𑀼𑀭𑀼 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀽𑀴𑁆𑀳𑀻𑀲𑀤𑁆𑀤𑁂𑀦 ‘‘𑀓𑀼𑀭𑀽’’𑀢𑀺 𑀩𑀳𑀼𑀯𑀘𑀦𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀭. 𑀓𑀼𑀁 𑀧𑀸𑀧𑀁 𑀭𑀼𑀦𑁆𑀥𑀢𑀻𑀢𑀺 𑀓𑀼𑀭𑀼, 𑀔𑀢𑁆𑀢𑀺𑀬𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀓𑀼𑀭𑀽, 𑀧𑀘𑁆𑀘𑀬𑀮𑁄𑀧𑀢𑁄 𑀦 𑀯𑀼𑀤𑁆𑀥𑀺, 𑀲𑀩𑁆𑀩𑀢𑁆𑀭𑁂𑀯𑀁 [𑀧𑀸𑀡𑀺𑀦𑀺 𑁧.𑁨.𑁫𑁨 𑁪.𑁨.𑁮𑁧 𑀲𑀼𑀢𑁆𑀢𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁]. 𑀅𑀭𑀺𑀯𑀺𑀚𑀬𑀮𑁄𑀓𑀫𑀭𑀺𑀬𑀸𑀤𑀸𑀢𑀺𑀓𑁆𑀓𑀫𑀸𑀤𑀻𑀲𑀼 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀓𑁆𑀓𑀸. 𑀓𑁄𑀲𑀁 𑀮𑀦𑁆𑀢𑀺 𑀕𑀡𑁆𑀳𑀦𑁆𑀢𑀺, 𑀓𑀼𑀲𑀮𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀯𑀸 𑀓𑁄𑀲𑀮𑀸. 𑀫𑀕𑁂𑀦 𑀲𑀤𑁆𑀥𑀺𑀁 𑀥𑀸𑀯𑀦𑁆𑀢𑀻𑀢𑀺 𑀫𑀕𑀥𑀸, 𑀓𑁆𑀯𑀺, 𑀫𑀁𑀲𑁂𑀲𑀼 𑀕𑀺𑀚𑁆𑀛𑀦𑁆𑀢𑀻𑀢𑀺 𑀯𑀸 𑀫𑀕𑀥𑀸. 𑀕𑀺𑀥 𑀅𑀪𑀺𑀓𑀗𑁆𑀔𑀸𑀬𑀁. 𑀲𑁂𑀯𑀦𑁆𑀢𑀺 𑀬𑁂𑀦𑀸𑀢𑀺 𑀲𑀺𑀯𑀺, 𑀲𑀺 𑀲𑁂𑀯𑀸𑀬𑀁, 𑀯𑀺. 𑀲𑀺𑀯𑀁 𑀓𑀭𑁄𑀦𑁆𑀢𑀻𑀢𑀺 𑀯𑀸 𑀲𑀺𑀯𑀻, 𑀅𑀜𑁆𑀜𑀢𑁆𑀣𑁂 𑀇. 𑀓𑀮 𑀲𑀤𑁆𑀤𑁂, 𑀇𑀗𑁆𑀕𑀧𑀘𑁆𑀘𑀬𑁄, 𑀓𑀮𑀺𑀗𑁆𑀕𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀓𑀮𑀺𑀗𑁆𑀕𑀸, 𑀉𑀢𑁆𑀢𑀭𑀸𑀧𑀣𑁄 [‘‘𑀚𑀕𑀦𑁆𑀦𑀸𑀣𑀸 𑀧𑀼𑀩𑁆𑀩𑀪𑀸𑀕𑁂 𑀓𑀡𑁆𑀳𑀸𑀢𑀻𑀭𑀦𑁆𑀢𑀭𑀁 𑀲𑀺𑀯𑁂 𑀓𑀮𑀺𑀗𑁆𑀕𑀤𑁂𑀲𑁄 𑀲𑀁𑀯𑀼𑀢𑁆𑀢𑁄’’ 𑀇𑀢𑁆𑀬𑀼𑀢𑁆𑀢𑀤𑁂𑀲𑁂 (𑀣𑁄𑀫𑀦𑀺𑀥𑀺)], 𑀓𑀮𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑀸 𑀓𑀮𑀺𑀗𑁆𑀕𑀸, 𑀓𑁆𑀯𑀺, 𑀓𑀮𑀁 𑀫𑀥𑀼𑀭𑀲𑀤𑁆𑀤𑀁 𑀕𑀸𑀬𑀦𑁆𑀢𑀻𑀢𑀺𑀯𑀸 𑀓𑀮𑀺𑀗𑁆𑀕𑀸, 𑀅𑀲𑁆𑀲𑀺𑀢𑁆𑀢𑀁, 𑀓𑁂𑀦 𑀲𑀼𑀔𑁂𑀦 𑀮𑀺𑀗𑁆𑀕𑀦𑁆𑀢𑀻𑀢𑀺 𑀯𑀸 𑀓𑀮𑀺𑀗𑁆𑀕𑀸, 𑀮𑀺𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀅𑀢𑁆𑀢𑀦𑀸 𑀔𑀸𑀤𑀺𑀢𑀁 𑀮𑀜𑁆𑀚𑀁 𑀧𑀭𑀸𑀚𑀺𑀢𑁂𑀳𑀺 𑀬𑀸𑀘𑀺𑀢𑁂𑀧𑀺 𑀧𑀼𑀦 𑀦 𑀯𑀫𑀦𑁆𑀢𑀻𑀢𑀺 𑀅𑀯𑀦𑁆𑀢𑀻. 𑀧𑀜𑁆𑀘𑀸𑀮𑀲𑁆𑀲 𑀧𑀼𑀢𑁆𑀢𑀸 𑀧𑀜𑁆𑀘𑀸𑀮𑀸. 𑀯𑀚𑁆𑀚𑁂𑀢𑀩𑁆𑀩𑀸𑀢𑀺 𑀯𑀚𑁆𑀚𑀻, ‘‘𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑁆𑀬𑀸𑀤𑀺𑀦𑀸 𑀧𑀯𑀢𑁆𑀢𑀯𑀘𑀦𑀫𑀼𑀧𑀸𑀤𑀸𑀬 𑀯𑀚𑁆𑀚𑀻𑀢𑀺 𑀮𑀤𑁆𑀥𑀦𑀸𑀫𑀸 𑀭𑀸𑀚𑀸𑀦𑁄. 𑀯𑀚𑁆𑀚𑀻𑀭𑀝𑁆𑀞𑀲𑁆𑀲 𑀯𑀸 𑀭𑀸𑀚𑀸𑀦𑁄 𑀯𑀚𑁆𑀚𑀻. 𑀭𑀝𑁆𑀞𑀲𑁆𑀲 𑀯𑀸 𑀧𑀦 𑀢𑀁𑀲𑀫𑀜𑁆𑀜𑀸 𑀢𑀁𑀦𑀺𑀯𑀸𑀲𑀺𑀭𑀸𑀚𑀓𑀼𑀫𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀕𑀁 𑀧𑀣𑀯𑀺𑀁 𑀥𑀸𑀭𑁂𑀦𑁆𑀢𑀻𑀢𑀺 𑀕𑀦𑁆𑀥𑀸𑀭𑀸, 𑀓𑀺𑀢𑁆𑀢𑀺𑀕𑀦𑁆𑀥𑁂𑀦 𑀅𑀭𑀦𑁆𑀢𑀻𑀢𑀺 𑀯𑀸 𑀕𑀦𑁆𑀥𑀸𑀭𑀸. 𑀘𑀺𑀢 𑀉𑀲𑁆𑀲𑀸𑀳𑀦𑁂, 𑀘𑁂𑀢𑀦𑁆𑀢𑀺 𑀉𑀲𑁆𑀲𑀳𑀦𑁆𑀢𑀺 𑀬𑀼𑀤𑁆𑀥𑀓𑀫𑁆𑀫𑀸𑀤𑀻𑀲𑀽𑀢𑀺 𑀘𑁂𑀢𑀬𑁄.

𑁧𑁮𑁫. 𑀯𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀯𑀺𑀲𑀺𑀝𑁆𑀞𑀸𑀦𑀺 𑀤𑁂𑀳𑀸𑀦𑀺 𑀬𑁂𑀲𑀁 𑀯𑀺𑀤𑁂𑀳𑀸, 𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑀢𑁄 𑀆𑀕𑀢𑀢𑁆𑀢𑀸 𑀯𑀸 𑀯𑀺𑀤𑁂𑀳𑀸. 𑀑𑀚 𑀤𑀺𑀢𑁆𑀢𑀺𑀬𑀁, 𑀓𑀫𑁆𑀩𑀼𑀦𑀸 𑀲𑀫𑁆𑀩𑀼𑀓𑁂𑀦 𑀑𑀚𑀦𑁆𑀢𑀺 𑀢𑀲𑁆𑀲𑀁 𑀯𑁄𑀳𑀸𑀭𑀓𑀭𑀡𑀢𑁄𑀢𑀺 𑀓𑀫𑁆𑀩𑁄𑀚𑀸, 𑀓𑀫𑁆𑀩𑀼𑀓𑀚𑁄 𑀑𑀚𑁄 𑀩𑀮𑀫𑁂𑀢𑁂𑀲𑀦𑁆𑀢𑀺 𑀯𑀸 𑀓𑀫𑁆𑀩𑁄𑀚𑀸. 𑀫𑀤 𑀫𑀤𑁆𑀤𑀦𑁂, 𑀫𑀤𑁆𑀤𑀦𑁆𑀢𑀻𑀢𑀺 𑀯𑀸 𑀫𑀤𑁆𑀤𑀸, 𑀫𑀁 𑀲𑀺𑀯𑀁 𑀤𑀤𑀦𑁆𑀢𑀻𑀢𑀺 𑀯𑀸 𑀫𑀤𑁆𑀤𑀸, 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀳𑀺 𑀫𑁄𑀤𑀦𑁆𑀢𑀻𑀢𑀺 𑀯𑀸 𑀫𑀤𑁆𑀤𑀸, 𑀫𑀤 𑀳𑀸𑀲𑁂. 𑀪𑀜𑁆𑀚 𑀅𑀯𑀫𑀤𑁆𑀤𑀦𑁂, 𑀪𑀕𑁆𑀕𑀸. 𑀅𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀲𑀻𑀳𑀁 𑀮𑀦𑁆𑀢𑀻𑀢𑀺 𑀲𑀻𑀳𑀴𑀸. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀲𑀦𑁆𑀢𑀻𑀢𑀺 𑀓𑀲𑁆𑀫𑀻𑀭𑀸, 𑀫𑀻𑀭𑁄. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀇, 𑀓𑀸𑀲𑀻. 𑀧𑀟𑀺 𑀕𑀢𑀺𑀬𑀁, 𑀧𑀡𑁆𑀟𑀼, 𑀉. 𑀅𑀣 𑀯𑀸 𑀓𑀼𑀁 𑀧𑀸𑀧𑀁 𑀭𑀼𑀦𑁆𑀥𑀢𑀺 𑀏𑀢𑁆𑀣𑀸𑀢𑀺 𑀓𑀼𑀭𑀼, 𑀇𑀢𑀺 𑀏𑀓𑁄𑀧𑀺 𑀚𑀦𑀧𑀤𑁄 𑀦𑀺𑀲𑁆𑀲𑀺𑀢𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑁂𑀦 𑀯𑀼𑀘𑁆𑀘𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣.

𑁧𑁮𑁬. 𑀤𑁆𑀯𑀬𑀁 𑀪𑀼𑀯𑀦𑁂. 𑀮𑀼𑀚 𑀅𑀤𑀲𑁆𑀲𑀦𑁂, 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀕𑀲𑁆𑀲 𑀓𑁄, 𑀚𑀲𑁆𑀲 𑀯𑁄. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀼𑀯𑀦𑀁, 𑀬𑀼. 𑀚𑀕𑀢𑀺, 𑀯𑀺𑀝𑁆𑀞𑀧𑀸𑀤𑀻𑀦𑀺𑀧𑀺 𑀪𑀼𑀯𑀦𑀧𑀭𑀺𑀬𑀸𑀬𑀸𑀦𑀺. 𑀤𑁆𑀯𑀬𑀁 𑀤𑁂𑀲𑀲𑀸𑀫𑀜𑁆𑀜𑁂. 𑀤𑀺𑀲 𑀅𑀢𑀺𑀲𑀚𑁆𑀚𑀦𑁂, 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁, ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀤𑀺𑀲𑀢𑀺 𑀅𑀧𑀤𑀺𑀲𑀢𑀻𑀢𑀺 𑀤𑁂𑀲𑁄. 𑀲𑀺 𑀲𑁂𑀯𑀸𑀬𑀁, 𑀲𑀜𑁆𑀜𑀸𑀬𑀁 𑀅, 𑀯𑀺𑀲𑀬𑁄.

𑀲𑀺𑀝𑁆𑀞𑀸𑀘𑀸𑀭𑀭𑀳𑀺𑀢𑁄 𑀫𑀺𑀮𑀓𑁆𑀔𑀤𑁂𑀲𑁄 𑀓𑀸𑀫𑀭𑀽𑀧𑀸𑀤𑀺 𑀧𑀘𑁆𑀘𑀦𑁆𑀢𑁄 𑀦𑀸𑀫. 𑀫𑀺𑀮𑀓𑁆𑀔 𑀅𑀩𑁆𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀫𑀺𑀮𑀓𑁆𑀔𑀦𑁆𑀢𑀺 𑀅𑀩𑁆𑀬𑀢𑁆𑀢𑀯𑀸𑀘𑀁 𑀪𑀸𑀲𑀦𑁆𑀢𑀻𑀢𑀺 𑀫𑀺𑀮𑀓𑁆𑀔𑀸. 𑀲𑀺𑀝𑁆𑀞𑀸𑀘𑀸𑀭𑀫𑀕𑁆𑀕𑀤𑀲𑁆𑀲𑀦𑀢𑁆𑀣𑀸𑀬 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑀸 𑀭𑀸𑀕𑀸𑀤𑀺𑀫𑀮𑀁 𑀅𑀓𑁆𑀔𑀺𑀫𑁆𑀳𑀺 𑀬𑁂𑀲𑀦𑁆𑀢𑀺 𑀯𑀸 𑀫𑀺𑀮𑀓𑁆𑀔𑀸, 𑀅𑀲𑁆𑀲𑀺𑀢𑁆𑀢𑀁, 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀫𑀺𑀮𑀓𑁆𑀔𑀤𑁂𑀲𑁄. 𑀧𑀘𑁆𑀘𑀦𑁆𑀢𑁂 𑀫𑀚𑁆𑀛𑀺𑀫𑀤𑁂𑀲𑀲𑁆𑀲 𑀩𑀳𑀺𑀤𑁆𑀥𑀸𑀪𑀸𑀕𑁂 𑀚𑀸𑀢𑁄 𑀧𑀘𑁆𑀘𑀦𑁆𑀢𑁄.

𑀩𑁆𑀬𑀯𑀢𑁆𑀣𑀸 𑀘𑀢𑀼𑀯𑀡𑁆𑀡𑀸𑀦𑀁, 𑀬𑀲𑁆𑀫𑀺𑀁 𑀤𑁂𑀲𑁂 𑀦 𑀯𑀺𑀚𑁆𑀚𑀢𑁂;

𑀫𑀺𑀮𑀓𑁆𑀔𑀤𑁂𑀲𑁄 𑀲𑁄 𑀯𑀼𑀢𑁆𑀢𑁄, 𑀫𑀚𑁆𑀛𑀪𑀽𑀫𑀺 𑀢𑀢𑁄 𑀧𑀭𑀁 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁧.𑁭].

𑀅𑀭𑀺𑀬𑀸𑀘𑀸𑀭𑀪𑀽𑀫𑀺𑀢𑁆𑀢𑀸 𑀫𑀚𑁆𑀛𑁄 𑀘 𑀲𑁄 𑀤𑁂𑀲𑁄 𑀘𑁂𑀢𑀺 𑀫𑀚𑁆𑀛𑀤𑁂𑀲𑁄, 𑀦𑀯𑀬𑁄𑀚𑀦𑀲𑀢𑀧𑀭𑀺𑀓𑁆𑀔𑁂𑀧𑁄 𑀫𑀚𑁆𑀛𑀺𑀫𑀤𑁂𑀲𑁄.

𑁧𑁮𑁭. 𑀲𑀮𑀺𑀮𑀧𑁆𑀧𑀸𑀬𑁄 𑀩𑀳𑀽𑀤𑀓𑁄 𑀤𑁂𑀲𑁄 𑀅𑀦𑀽𑀧𑁄 𑀦𑀸𑀫, 𑀅𑀦𑀼𑀕𑀢𑀸 𑀆𑀧𑀸 𑀅𑀢𑁆𑀭𑀸𑀢𑀺 𑀅𑀦𑀽𑀧𑁄, 𑀆𑀧𑀲𑁆𑀲 𑀆𑀤𑀺𑀦𑁄 𑀉𑀢𑁆𑀢𑀁, 𑀧𑀭𑀮𑁄𑀧𑁄 𑀯𑀸. 𑀓𑀘 𑀩𑀦𑁆𑀥𑀦𑁂, 𑀙𑁄, 𑀓𑀘𑁆𑀙𑀁. 𑀅𑀦𑀽𑀧𑀤𑁂𑀲𑁄 𑀘. 𑀅𑀪𑀺𑀦𑀯𑁄𑀕𑁆𑀕𑀫𑀦𑁂𑀦 𑀢𑀺𑀡𑁂𑀦 𑀮𑀓𑁆𑀔𑀺𑀢𑁂 𑀳𑀭𑀺𑀢𑁂 𑀤𑁂𑀲𑁂 𑀲𑀤𑁆𑀤𑀮𑁄, 𑀤𑀮 𑀤𑀺𑀢𑁆𑀢𑀺𑀬𑀁, 𑀪𑀸𑀯𑁂 𑀅. 𑀯𑀺𑀚𑁆𑀚𑀢𑀺 𑀤𑀮𑁄 𑀬𑀢𑁆𑀣 𑀲𑀤𑁆𑀤𑀮𑁄.

𑁧𑁮𑁮. 𑀦𑀤𑀺𑀬𑀸 𑀆𑀪𑀢𑁂𑀦 𑀅𑀫𑁆𑀩𑀼𑀦𑀸 𑀉𑀤𑀓𑁂𑀦 𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀤𑁆𑀬𑀫𑁆𑀩𑀼𑀚𑀻𑀯𑀦𑁄 𑀤𑁂𑀲𑁄 𑀦𑀤𑀻 𑀫𑀸𑀢𑀸 𑀅𑀲𑁆𑀲𑀸𑀢𑀺 𑀦𑀤𑀻𑀫𑀸𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀓𑁄. 𑀯𑀼𑀝𑁆𑀞𑀺𑀬𑀸 𑀯𑀲𑁆𑀲𑁂𑀦 𑀦𑀺𑀧𑁆𑀨𑀚𑁆𑀚𑀢𑀺 𑀲𑀲𑁆𑀲𑀫𑁂𑀢𑁆𑀣𑀸𑀢𑀺 𑀯𑀼𑀝𑁆𑀞𑀺𑀦𑀺𑀧𑁆𑀨𑀚𑁆𑀚𑀲𑀲𑁆𑀲𑀓𑁄 𑀤𑁂𑀲𑁄 𑀤𑁂𑀯𑁄 𑀫𑀸𑀢𑀸 𑀅𑀲𑁆𑀲𑀸𑀢𑀺 𑀤𑁂𑀯𑀫𑀸𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺𑀬𑁂𑀯 𑀓𑁄, 𑀤𑁂𑀯𑀲𑀤𑁆𑀤𑁄 𑀘𑁂𑀢𑁆𑀣 𑀯𑀼𑀝𑁆𑀞𑀺𑀫𑀸𑀳.

𑁧𑁮𑁯. 𑀅𑀦𑀽𑀧𑀸𑀤𑀬𑁄 𑀤𑁂𑀯𑀫𑀸𑀢𑀺𑀓𑀸𑀦𑁆𑀢𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. 𑀘𑀦𑁆𑀤𑀲𑀽𑀭𑀸𑀤𑁄 𑀘𑀦𑁆𑀤𑀲𑀽𑀭𑀺𑀬𑀲𑀺𑀦𑁂𑀭𑀼𑀧𑀩𑁆𑀩𑀢𑀸𑀤𑀺𑀫𑁆𑀳𑀺 𑀲𑀲𑁆𑀲𑀢𑀺𑀲𑀤𑁆𑀤𑁄 𑀈𑀭𑀺𑀢𑁄 𑀓𑀣𑀺𑀢𑁄. 𑀲𑀩𑁆𑀩𑀤𑀸 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀲𑀲𑁆𑀲𑀢𑀺𑀬𑁄, 𑀲𑀭 𑀕𑀢𑀺𑀬𑀁, 𑀲𑀭𑀲𑀤𑁆𑀤𑀲𑁆𑀲 𑀲𑁄,𑀢𑀺.

𑀭𑀞 𑀕𑀢𑀺𑀬𑀁, 𑀭𑀞𑀦𑁆𑀢𑀺 𑀏𑀢𑁆𑀣 𑀦𑀕𑀭𑀸𑀤𑀬𑁄𑀢𑀺 𑀭𑀝𑁆𑀞𑀁, 𑀢𑁄. 𑀦𑀸𑀕𑀭𑁂𑀳𑀺 𑀯𑀺𑀚𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀺𑀚𑀺𑀢𑀁. 𑀆𑀴𑀺𑀬𑀁 𑀧𑀯𑀢𑁆𑀢𑀫𑀸𑀦𑁄 𑀬𑁄 𑀲𑁂𑀢𑀼, 𑀲𑁄 𑀧𑀼𑀭𑀺𑀲𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀢𑀺. 𑀲𑀺 𑀩𑀦𑁆𑀥𑀦𑁂, 𑀢𑀼. 𑀅𑀮 𑀪𑀽𑀲𑀦𑁂, 𑀇, 𑀆𑀴𑀺, 𑀢𑀲𑁆𑀲𑀁 𑀆𑀴𑀺𑀬𑀁.

𑀦𑀕𑀭𑀧𑀩𑁆𑀩𑀢𑀸𑀤𑀺𑀦𑁄 𑀉𑀧𑀸𑀦𑁆𑀢𑀪𑀽 𑀲𑀫𑀻𑀧𑀪𑀽𑀫𑀺 𑀧𑀭𑀺𑀲𑀭𑁄 𑀧𑀭𑀺𑀢𑁄 𑀲𑀭𑀦𑁆𑀢𑁆𑀬𑀢𑁆𑀭𑀸𑀢𑀺, 𑀡𑁄.

𑀢𑀺𑀓𑀁 𑀯𑀚𑁂. 𑀕𑀸𑀯𑁄 𑀢𑀺𑀝𑁆𑀞𑀦𑁆𑀢𑁆𑀬𑀢𑁆𑀭𑀸𑀢𑀺 𑀕𑁄𑀝𑁆𑀞𑀁. 𑀓𑀼𑀮 𑀲𑀗𑁆𑀔𑁆𑀬𑀸𑀦𑁂, 𑀕𑀸𑀯𑁄 𑀓𑀼𑀮𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀕𑁄𑀓𑀼𑀮𑀁, 𑀕𑀼𑀦𑁆𑀦𑀁 𑀓𑀼𑀮𑀁 𑀖𑀭𑀦𑁆𑀢𑀺 𑀯𑀸 𑀕𑁄𑀓𑀼𑀮𑀁. 𑀯𑀚 𑀕𑀢𑀺𑀬𑀁, 𑀯𑀚𑀦𑁆𑀢𑀺 𑀬𑀁 𑀕𑀸𑀯𑁄 𑀦𑀺𑀯𑀸𑀲𑀦𑀢𑁆𑀣𑀸𑀬𑀸𑀢𑀺 𑀯𑀚𑁄. 𑀕𑁄𑀝𑁆𑀞𑀸𑀦𑀓𑀁, 𑀕𑁄𑀝𑁆𑀞𑀸𑀦𑀦𑁆𑀢𑀺𑀧𑀺 𑀯𑀚𑀲𑁆𑀲 𑀦𑀸𑀫𑀸𑀦𑀺.

𑁧𑁯𑁦. 𑀲𑀺𑀮𑁄𑀓𑁂𑀦 𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀺. 𑀧𑀣𑀺𑀓𑁂𑀳𑀺 𑀫𑀚𑁆𑀚𑀢𑁂 𑀦𑀺𑀢𑁆𑀢𑀺𑀡𑀁 𑀓𑀭𑀻𑀬𑀢𑁂𑀢𑀺 𑀫𑀕𑁆𑀕𑁄, 𑀫𑀚𑁆𑀚 𑀲𑀼𑀤𑁆𑀥𑀺𑀬𑀁, 𑀡𑁄, 𑀚𑀲𑁆𑀲 𑀕𑀢𑁆𑀢𑀁, 𑀧𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑁂𑀢𑀺 𑀯𑀸 𑀫𑀕𑁆𑀕𑁄, 𑀫𑀕𑁆𑀕 𑀅𑀦𑁆𑀯𑁂𑀲𑀦𑁂, 𑀫𑀁 𑀲𑀺𑀯𑀁 𑀕𑀘𑁆𑀙𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀫𑀕𑁆𑀕𑁄, ‘‘𑀫𑁄 𑀲𑀺𑀯𑁂 𑀧𑀭𑀺𑀲𑀸𑀬𑀜𑁆𑀘𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂, 𑀲𑀺𑀯𑀁 𑀕𑀫𑀦𑀁 𑀓𑀭𑁄𑀢𑀻𑀢𑁆𑀬𑀢𑁆𑀣𑁄, 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀫𑁂𑀢𑀁. 𑀧𑀣𑀺 𑀕𑀢𑀺𑀬𑀁, 𑀘𑀼𑀭𑀸𑀤𑀺, 𑀦𑀸𑀕𑀫𑁄. 𑀧𑀦𑁆𑀣𑀬𑀦𑁆𑀢𑀺 𑀬𑀦𑁆𑀢𑁆𑀬𑀦𑁂𑀦𑀸𑀢𑀺 𑀧𑀦𑁆𑀣𑁄, 𑀅, 𑀓𑀸𑀭𑀺𑀢𑀮𑁄𑀧𑁄. 𑀧𑀣𑀢𑀺 𑀬𑀸𑀢𑁆𑀬𑀦𑁂𑀦𑀸𑀢𑀺 𑀧𑀣𑁄. 𑀅𑀤 𑀕𑀫𑀦𑁂, 𑀅𑀤𑀢𑀺 𑀬𑀢𑁆𑀣 𑀲𑀸 𑀅𑀤𑁆𑀥𑀸, 𑀥𑁄, 𑀅𑀤𑁆𑀥𑀸 𑀫𑀕𑁆𑀕𑁄, 𑀅𑀤𑁆𑀥𑀸𑀲𑀤𑁆𑀤𑁄𑀬𑀁 𑀓𑀸𑀮𑁂𑀧𑀺, 𑀲𑀫𑀪𑀸𑀕𑀢𑁆𑀣𑀯𑀘𑀦𑁂 𑀢𑀼 𑀅𑀤𑁆𑀥𑀁, 𑀢𑀲𑁆𑀫𑀸 𑀅𑀤𑁆𑀥𑀲𑀤𑁆𑀤𑁄 𑀧𑀼𑀫𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑁄, 𑀭𑀸𑀚𑀸𑀤𑀺𑀢𑁆𑀢𑁂 𑀅𑀤𑁆𑀥𑀸, 𑀅𑀭𑀸𑀚𑀸𑀤𑀺𑀢𑁆𑀢𑁂 𑀅𑀤𑁆𑀥𑀁. 𑀅𑀜𑁆𑀚 𑀕𑀢𑀺𑀬𑀁, 𑀅𑀲𑁄. 𑀯𑀚 𑀕𑀢𑀺𑀬𑀁, 𑀉𑀫𑁄, 𑀚𑀲𑁆𑀲 𑀝𑁄. 𑀧𑀤 𑀕𑀢𑀺𑀬𑀁, 𑀅, 𑀤𑀲𑁆𑀲 𑀚𑁄, 𑀤𑁆𑀯𑀺𑀢𑁆𑀢𑀁, 𑀧𑀚𑁆𑀚𑁄. 𑀅𑀬 𑀕𑀢𑀺𑀬𑀁, 𑀬𑀼, 𑀧𑀤 𑀕𑀢𑀺𑀬𑀁, 𑀅𑀯𑁄, 𑀦𑀤𑀸𑀤𑀺. 𑀯𑀢𑁆𑀢 𑀯𑀢𑁆𑀢𑀦𑁂, 𑀯𑀢𑁆𑀢𑀦𑀁 𑀕𑀫𑀦𑀸𑀤𑀺, 𑀅𑀦𑀺, 𑀦𑀤𑀸𑀤𑀺, 𑀯𑀢𑁆𑀢𑀦𑀻. 𑀓𑀦𑁆𑀢𑀦𑀤𑀡𑁆𑀟𑁂 𑀧𑀼𑀦𑁆𑀦𑀧𑀼𑀁𑀲𑀓𑀁. 𑀧𑀣𑀺𑀓𑁂𑀳𑀺 𑀧𑀸𑀤𑁂𑀳𑀺 𑀳𑀜𑁆𑀜𑀢𑁂𑀢𑀺 𑀧𑀤𑁆𑀥𑀢𑀺. 𑀧𑀸𑀤𑀲𑀤𑁆𑀤𑀲𑀫𑀸𑀦𑀢𑁆𑀣𑁂𑀦 𑀧𑀤𑀲𑀤𑁆𑀤𑁂𑀦 𑀦𑀺𑀬𑀢𑀧𑁆𑀧𑀬𑁄𑀕𑀢𑁄 𑀯𑀼𑀢𑁆𑀢𑀺𑀦𑀸 𑀲𑀺𑀤𑁆𑀥𑁄, 𑀧𑀤𑀲𑀤𑁆𑀤𑀽𑀧𑀧𑀤𑁄 𑀳𑀦𑀥𑀸𑀢𑀼,𑀢𑀺, 𑀳𑀦𑀲𑁆𑀲 𑀥𑁄, 𑀅𑀮𑁄𑀧𑁄. 𑀧𑀤𑁆𑀥𑀢𑀺𑀲𑀳𑀘𑀭𑀡𑀢𑁄 𑀯𑀢𑁆𑀢𑀦𑀻, 𑀢𑀁𑀲𑀳𑀘𑀭𑀡𑀢𑁄 𑀧𑀤𑀯𑀻 𑀘 𑀇𑀢𑁆𑀣𑀺𑀬𑀁.

𑁧𑁯𑁧-𑁧𑁯𑁨. 𑀢𑀩𑁆𑀪𑁂𑀤𑀸 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀯𑀺𑀲𑁂𑀲𑀸 𑀚𑀗𑁆𑀖𑀫𑀕𑁆𑀕𑀸𑀤𑀬𑁄 𑀅𑀧𑀣𑀦𑁆𑀢𑀸. 𑀚𑀗𑁆𑀖𑀸𑀳𑀺 𑀕𑀢𑁄 𑀫𑀕𑁆𑀕𑁄 𑀚𑀗𑁆𑀖𑀫𑀕𑁆𑀕𑁄. 𑀲𑀓𑀝𑁂𑀳𑀺 𑀕𑀢𑁄 𑀫𑀕𑁆𑀕𑁄 𑀲𑀓𑀝𑀫𑀕𑁆𑀕𑁄. 𑀢𑁂 𑀚𑀗𑁆𑀖𑀫𑀕𑁆𑀕𑀲𑀓𑀝𑀫𑀕𑁆𑀕𑀸 𑀫𑀳𑀸𑀫𑀕𑁆𑀕𑁂 𑀯𑀢𑁆𑀢𑀦𑁆𑀢𑀺.

𑀏𑀢𑁆𑀣 𑀘 ‘‘𑀢𑁂𑀣𑀸’’𑀢𑀺 𑀅𑀣𑀲𑀤𑁆𑀤𑁄 𑀦 𑀯𑀢𑁆𑀢𑀩𑁆𑀩𑁄, ‘‘𑀢𑁂 𑀘𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄. ‘‘𑀫𑀢𑀸𑀤𑁆𑀥𑀦𑀻’’𑀢𑀺 𑀧𑀸𑀞𑁂 𑀧𑀦 𑀲𑀢𑀺 ‘‘𑀢𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁄𑀬𑁂𑀯, 𑀢𑀤𑀸 𑀏𑀓𑀧𑀤𑀺𑀓𑁂 𑀅𑀤𑁆𑀥𑀦𑀺 𑀫𑀕𑁆𑀕𑁂 𑀏𑀓𑀧𑀤𑀻 𑀫𑀢𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀕𑀘𑁆𑀙𑀢𑀁 𑀏𑀓𑁄 𑀅𑀲𑀳𑀸𑀬𑁄 𑀧𑀸𑀤𑁄 𑀬𑀲𑁆𑀲𑀁, 𑀦 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀬𑀫𑀓𑁄𑀢𑀺 𑀏𑀓𑀧𑀤𑀻, 𑀲𑀫𑀸𑀲𑀦𑁆𑀢𑁂 𑀦𑀺𑀘𑁆𑀘𑀫𑀻𑀧𑀘𑁆𑀘𑀬𑁄, 𑀓𑀧𑀘𑁆𑀘𑀬𑁂 𑀏𑀓𑀧𑀤𑀺𑀓𑁄, 𑀈𑀲𑁆𑀲 𑀭𑀲𑁆𑀲𑀢𑁆𑀢𑀁.

𑀘𑁄𑀭𑀓𑀡𑁆𑀝𑀓𑀸𑀤𑀺𑀤𑁄𑀲𑁂 𑀤𑀼𑀕𑁆𑀕𑀫𑁂 𑀧𑀣𑁂 𑀓𑀦𑁆𑀢𑀸𑀭𑁄, 𑀧𑀼𑀦𑁆𑀦𑀧𑀼𑀁𑀲𑀓𑁂, 𑀓𑁂𑀦 𑀧𑀸𑀦𑀻𑀬𑁂𑀦 𑀢𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀺 𑀬𑀦𑁆𑀢𑀺 𑀓𑀦𑁆𑀢𑀸𑀭𑁄, 𑀢𑀭 𑀢𑀭𑀡𑁂, 𑀘𑁄𑀭𑀓𑀦𑁆𑀢𑀸𑀭𑀸𑀤𑀻𑀲𑀼 𑀧𑀦𑀸𑀬𑀁 𑀭𑀽𑀴𑁆𑀳𑀺𑀯𑀲𑁂𑀦 𑀯𑀼𑀢𑁆𑀢𑁄, 𑀅𑀣 𑀯𑀸 𑀓𑀢𑀺 𑀙𑁂𑀤𑀦𑁂, 𑀲𑀧𑁆𑀧𑀝𑀺𑀪𑀬𑀢𑁆𑀢𑀸 𑀓𑀦𑁆𑀢𑀢𑀺 𑀦𑀺𑀘𑁆𑀘𑀕𑀫𑀦𑀸𑀕𑀫𑀦𑀫𑁂𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄, 𑀆𑀭𑁄, 𑀦𑀸𑀕𑀫𑁄 𑀘. 𑀤𑀼𑀓𑁆𑀔𑁂𑀦 𑀕𑀘𑁆𑀙𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀤𑀼𑀕𑁆𑀕𑀫𑁄.

𑁧𑁯𑁩. 𑀤𑁆𑀯𑀬𑀁 𑀧𑀝𑀺𑀫𑀕𑁆𑀕𑁂. 𑀧𑀝𑀺 𑀅𑀪𑀺𑀫𑀼𑀔𑁂𑀦 𑀕𑀦𑁆𑀢𑀩𑁆𑀩𑁄 𑀫𑀕𑁆𑀕𑁄, 𑀧𑀣𑁄 𑀘 𑀧𑀝𑀺𑀫𑀕𑁆𑀕𑁄, 𑀧𑀝𑀺𑀧𑀣𑁄 𑀘. 𑀤𑀻𑀖𑀫𑀜𑁆𑀚𑀲𑀁 𑀅𑀢𑀺𑀤𑀽𑀭𑁄 𑀫𑀕𑁆𑀕𑁄 𑀅𑀤𑁆𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑁂. 𑀅𑀤𑁆𑀥𑀸𑀦𑀁 𑀅𑀬𑀦𑀁 𑀅𑀤𑁆𑀥𑀸𑀦𑀁, 𑀅𑀘𑁆𑀘𑀸𑀬𑀢𑁄 𑀫𑀕𑁆𑀕𑁄, 𑀬𑀣𑀸 ‘‘𑀧𑀤𑀝𑁆𑀞𑀸𑀦’’𑀦𑁆𑀢𑀺, 𑀬𑀮𑁄𑀧𑁄.

𑀤𑁆𑀯𑀬𑀁 𑀧𑀲𑀢𑁆𑀣𑁂𑀤𑁆𑀥𑀦𑀺. 𑀲𑁄𑀪𑀦𑁄 𑀧𑀣𑁄, 𑀧𑀦𑁆𑀣𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀕𑀦𑁆𑀢𑀩𑁆𑀩𑀧𑀣𑀪𑀸𑀯𑀢𑁄 𑀅𑀧𑁂𑀢𑀁 𑀉𑀧𑁆𑀧𑀣𑀁, 𑀅𑀧𑀣𑀜𑁆𑀘, 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄, 𑀅𑀲𑀤𑁆𑀤𑁄 𑀅𑀢𑁆𑀭 𑀦𑀺𑀧𑀸𑀢𑁄.

𑁧𑁯𑁪-𑁧𑁯𑁬. 𑀧𑀭𑀫𑀸𑀡𑀽𑀦𑀁 𑀙𑀢𑁆𑀢𑀺𑀁𑀲 𑀏𑀓𑁄 𑀅𑀡𑀼 𑀦𑀸𑀫, 𑀅𑀡𑀼𑀢𑁄𑀧𑀺 𑀅𑀡𑀼𑀢𑀭𑀢𑁆𑀢𑀸 𑀧𑀭𑀫𑁄 𑀅𑀡𑀼, 𑀅𑀡𑀼𑀢𑁄 𑀯𑀸 𑀧𑀭𑀫𑁄𑀢𑀺 𑀧𑀭𑀫𑀸𑀡𑀼, 𑀅𑀡 𑀲𑀤𑁆𑀤𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀉. 𑀢𑁂 𑀅𑀡𑀯𑁄 𑀙𑀢𑁆𑀢𑀺𑀁𑀲 𑀢𑀚𑁆𑀚𑀸𑀭𑀻 𑀦𑀸𑀫, 𑀢𑀁 𑀢𑀁 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀫𑀮𑀻𑀦𑀓𑀭𑀡𑀯𑀲𑁂𑀦 𑀚𑀭𑀸𑀧𑁂𑀢𑀻𑀢𑀺 𑀢𑀚𑁆𑀚𑀸𑀭𑀻, 𑀚𑀭 𑀚𑀻𑀭𑀡𑁂, 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺 𑀯𑀸, 𑀅, 𑀦𑀤𑀸𑀤𑀺. 𑀢𑀸𑀧𑀺 𑀢𑀚𑁆𑀚𑀸𑀭𑀺𑀬𑁄 𑀙𑀢𑁆𑀢𑀺𑀁𑀲 𑀭𑀣𑀭𑁂𑀡𑀼 𑀦𑀸𑀫, 𑀭𑀣𑀸𑀦𑀁 𑀲𑀜𑁆𑀘𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀭𑁂𑀡𑀼 𑀭𑀣𑀭𑁂𑀡𑀼. 𑀢𑁂 𑀭𑀣𑀭𑁂𑀡𑀯𑁄 𑀙𑀢𑁆𑀢𑀺𑀁𑀲 𑀮𑀺𑀓𑁆𑀔𑀸 𑀦𑀸𑀫. 𑀮𑀓𑁆𑀔 𑀤𑀲𑁆𑀲𑀦𑁂, 𑀧𑀓𑀢𑀺𑀘𑀓𑁆𑀔𑀼𑀦𑀸𑀧𑀺 𑀮𑀓𑁆𑀔𑁆𑀬𑀢𑁂𑀢𑀺 𑀮𑀺𑀓𑁆𑀔𑀸, 𑀅𑀲𑁆𑀲𑀺𑀢𑁆𑀢𑀁.

𑀢𑀸 𑀮𑀺𑀓𑁆𑀔𑀸 𑀲𑀢𑁆𑀢 𑀊𑀓𑀸 𑀦𑀸𑀫, 𑀊𑀓𑀸𑀢𑀺 𑀯𑀼𑀘𑁆𑀘𑀢𑀺 𑀲𑀺𑀭𑁄𑀯𑀢𑁆𑀢𑀓𑀺𑀫𑀺, 𑀢𑀧𑁆𑀧𑀫𑀸𑀡𑀢𑁆𑀢𑀸 𑀊𑀓𑀸. 𑀢𑀸 𑀲𑀢𑁆𑀢 𑀊𑀓𑀸 𑀥𑀜𑁆𑀜𑀫𑀸𑀲𑁄 𑀦𑀸𑀫, 𑀥𑀜𑁆𑀜𑁄 𑀯𑀻𑀳𑀺𑀬𑁂𑀯 𑀧𑀭𑀺𑀫𑀸𑀡𑀺𑀢𑀩𑁆𑀩𑀢𑁆𑀢𑀸 𑀫𑀸𑀲𑁄 𑀘𑀸𑀢𑀺 𑀥𑀜𑁆𑀜𑀫𑀸𑀲𑁄, 𑀫𑀲𑀺 𑀧𑀭𑀺𑀫𑀸𑀡𑁂. 𑀢𑁂 𑀲𑀢𑁆𑀢 𑀥𑀜𑁆𑀜𑀫𑀸𑀲𑀸 𑀅𑀗𑁆𑀕𑀼𑀮𑀁 𑀦𑀸𑀫, 𑀅𑀗𑁆𑀕 𑀕𑀫𑀦𑀢𑁆𑀣𑁄, 𑀉𑀮𑁄, 𑀅𑀗𑁆𑀕𑀼𑀮𑀁, 𑀧𑀫𑀸𑀡𑀁, 𑀉𑀮𑀺𑀧𑀘𑁆𑀘𑀬𑁂 𑀅𑀗𑁆𑀕𑀼𑀮𑀺, 𑀓𑀭𑀲𑀸𑀔𑀸. 𑀅𑀫𑀼𑀤𑁆𑀯𑀺𑀘𑁆𑀙𑁂𑀢𑀺 𑀅𑀤𑀼𑀁 𑀤𑁆𑀯𑀸𑀤𑀲𑀗𑁆𑀕𑀼𑀮𑀁 𑀯𑀺𑀤𑀢𑁆𑀣𑀺 𑀦𑀸𑀫, 𑀓𑀡𑀺𑀝𑁆𑀞𑀲𑀳𑀺𑀢𑁂𑀦𑀗𑁆𑀕𑀼𑀝𑁆𑀞𑁂𑀦 𑀯𑀺𑀢𑁆𑀣𑀸𑀭𑀻𑀬𑀢𑁂, 𑀯𑀺𑀥𑀻𑀬𑀢𑁂𑀢𑀺 𑀯𑀸 𑀯𑀺𑀤𑀢𑁆𑀣𑀺, 𑀯𑀺𑀧𑀼𑀩𑁆𑀩𑁄 𑀢𑀦𑀼 𑀯𑀺𑀢𑁆𑀣𑀸𑀭𑁂. 𑀥𑀸 𑀥𑀸𑀭𑀡𑁂, 𑀉𑀪𑀬𑀢𑁆𑀭𑀸𑀧𑀺𑀢𑀺, 𑀧𑀼𑀩𑁆𑀩𑀧𑀓𑁆𑀔𑁂 𑀢𑀲𑁆𑀲 𑀣𑁄, 𑀦𑀲𑁆𑀲 𑀢𑁄, 𑀢𑀲𑁆𑀲 𑀤𑁄. 𑀧𑀘𑁆𑀙𑀺𑀫𑁂 𑀥𑀲𑁆𑀲 𑀤𑁄, 𑀢𑀲𑁆𑀲 𑀣𑁄, 𑀅𑀲𑀭𑀽𑀧𑀤𑁆𑀯𑀺𑀪𑀸𑀯𑁄 𑀘. 𑀢𑀸 𑀤𑀼𑀯𑁂 𑀯𑀺𑀤𑀢𑁆𑀣𑀻 𑀭𑀢𑀦𑀁 𑀲𑀺𑀬𑀼𑀁, 𑀭𑀫𑀼 𑀓𑀻𑀴𑀸𑀬𑀁, 𑀢𑀦𑁄, 𑀫𑀮𑁄𑀧𑁄. 𑀢𑀸𑀦𑀺 𑀲𑀢𑁆𑀢𑁂𑀯 𑀭𑀢𑀦𑀸𑀦𑀺 𑀬𑀝𑁆𑀞𑀺 𑀦𑀸𑀫, 𑀬𑀢 𑀧𑀬𑀢𑀦𑁂,𑀢𑀺, 𑀢𑀲𑁆𑀲 𑀞𑁄, 𑀢𑀲𑁆𑀲 𑀝𑁄. 𑀢𑀸 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄 𑀉𑀲𑀪𑀁 𑀦𑀸𑀫, 𑀉𑀲 𑀤𑀸𑀳𑁂, 𑀅𑀪𑁄. 𑀏𑀢𑁆𑀣 𑀧𑀦 𑀉𑀲𑀪𑀦𑀤𑀦𑁆𑀢𑀭𑀁 𑀉𑀲𑀪𑀁. 𑀉𑀲𑀪𑀸𑀦𑀁 𑀅𑀲𑀻𑀢𑀺𑀧𑁆𑀧𑀫𑀸𑀡𑀁 𑀕𑀸𑀯𑀼𑀢𑀁 𑀦𑀸𑀫, 𑀕𑀯𑀁, 𑀕𑀯𑁂𑀳𑀺 𑀯𑀸 𑀬𑀼𑀢𑀁 𑀕𑀸𑀯𑀼𑀢𑀁. 𑀬𑀼𑀚 𑀲𑀫𑀸𑀥𑀺𑀫𑁆𑀳𑀺, 𑀕𑁄𑀦𑀤𑀦𑁆𑀢𑀭𑁂𑀳𑀺 𑀕𑀳𑀺𑀢𑀧𑁆𑀧𑀫𑀸𑀡𑀲𑀫𑀸𑀥𑀸𑀦𑀦𑁆𑀢𑁆𑀬𑀢𑁆𑀣𑁄, 𑀢𑀁 𑀘𑀢𑀼𑀕𑀸𑀯𑀼𑀢𑀁 𑀬𑁄𑀚𑀦𑀁 𑀦𑀸𑀫, 𑀬𑀼𑀚 𑀲𑀫𑀸𑀥𑀺𑀫𑁆𑀳𑀺, 𑀬𑀼, ‘‘𑀏𑀢𑁆𑀢𑀓𑀁 𑀬𑁄𑀚𑀦𑀁 𑀦𑀸𑀫 𑀳𑁄𑀢𑀽’’𑀢𑀺 𑀘𑀢𑀼𑀕𑀸𑀯𑀼𑀢𑁂𑀳𑀺 𑀲𑀫𑀸𑀥𑀸𑀦𑀦𑁆𑀢𑁆𑀬𑀢𑁆𑀣𑁄.

𑁧𑁯𑁭. 𑀆𑀭𑁄𑀧𑀺𑀢𑀸𑀦𑀁 𑀆𑀘𑀭𑀺𑀬𑀥𑀦𑀽𑀦𑀁 𑀧𑀜𑁆𑀘𑀲𑀢𑀁 𑀓𑁄𑀲𑁄 𑀦𑀸𑀫, 𑀅𑀦𑀸𑀭𑁄𑀧𑀺𑀢𑀸𑀦𑀦𑁆𑀢𑁆𑀬𑀧𑀭𑁂. 𑀓𑀼𑀲 𑀅𑀯𑁆𑀳𑀸𑀦𑁂, 𑀡𑁄, 𑀓𑀼𑀲𑀦𑀁 𑀅𑀯𑁆𑀳𑀸𑀦𑀁 𑀓𑁄𑀲𑁄, 𑀇𑀥 𑀧𑀦 𑀓𑁄𑀲𑀧𑁆𑀧𑀫𑀸𑀡𑀢𑁆𑀢𑀸 𑀓𑁄𑀲𑁄, 𑀤𑁆𑀯𑀺𑀲𑀳𑀲𑁆𑀲𑀓𑀭𑀧𑁆𑀧𑀫𑀸𑀡𑁄. 𑀅𑀜𑁆𑀜𑀢𑁆𑀣 𑀧𑀦 𑁋

‘‘𑀘𑀢𑀼𑀓𑁆𑀓𑀸𑀥𑀺𑀯𑀻𑀲𑀢𑀺𑀬𑀸, 𑀅𑀗𑁆𑀕𑀼𑀮𑁂𑀳𑀺 𑀓𑀭𑁄 𑀪𑀯𑁂;

𑀔𑁆𑀬𑀸𑀢𑀫𑀝𑁆𑀞𑀲𑀳𑀲𑁆𑀲𑁂𑀳𑀺, 𑀓𑁄𑀲𑀫𑀸𑀦𑀁 𑀯𑀺𑀪𑀸𑀯𑀺𑀦𑀸’’𑀢𑁆𑀬𑀼𑀢𑁆𑀢𑀁.

𑀘𑀢𑀼𑀭𑀫𑁆𑀩𑀡𑀦𑁆𑀢𑀺 𑀘𑀢𑀼𑀭𑀫𑁆𑀩𑀡𑀯𑀻𑀳𑀺𑀩𑀻𑀚𑀚𑀸𑀢𑀭𑁄𑀧𑀦𑀬𑁄𑀕𑁆𑀬𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀓𑀭𑀻𑀲𑀁 𑀦𑀸𑀫, 𑀓𑀭𑁄𑀦𑁆𑀢𑀺 𑀏𑀢𑁆𑀣 𑀓𑀲𑀦𑀭𑁄𑀧𑀦𑀸𑀤𑀺𑀓𑀦𑁆𑀢𑀺 𑀓𑀭𑀻𑀲𑀁, 𑀈𑀲𑁄. 𑀘𑀢𑀼𑀭𑀫𑁆𑀩𑀡𑀩𑀻𑀚𑀚𑀸𑀢𑀸𑀦𑀺 𑀭𑁄𑀧𑁂𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀘𑀢𑀼𑀭𑀫𑁆𑀩𑀡𑀁, 𑀅𑀫𑁆𑀩𑀡𑀁 𑀏𑀓𑀸𑀤𑀲𑀤𑁄𑀡𑀫𑀢𑁆𑀢𑀁, 𑀅𑀜𑁆𑀜𑁂 𑀧𑀦 ‘‘𑀘𑀢𑀼𑀭𑀫𑁆𑀩𑀡𑀁 𑀘𑀢𑀼𑀬𑀝𑁆𑀞𑀺𑀓𑀁 𑀞𑀸𑀦𑀁 𑀓𑀭𑀻𑀲𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀭𑀻𑀲𑀩𑁆𑀪𑀦𑁆𑀢𑀭𑀸𑀦𑀁 𑀧𑀭𑀺𑀬𑀸𑀬𑀪𑀸𑀯𑀧𑁆𑀧𑀲𑀗𑁆𑀕𑀸 𑀦 𑀕𑀳𑁂𑀢𑀩𑁆𑀩𑀁.

𑀧𑀫𑀸𑀡𑀢𑁄 𑀳𑀢𑁆𑀣𑀸𑀦𑀫𑀝𑁆𑀞𑀯𑀻𑀲𑀧𑁆𑀧𑀫𑀸𑀡𑀁 𑀞𑀸𑀦𑀁 𑀅𑀩𑁆𑀪𑀦𑁆𑀢𑀭𑀁 𑀦𑀸𑀫, 𑀅𑀩𑁆𑀪𑀦𑁆𑀢𑀭𑁂 𑀅𑀦𑁆𑀢𑁄𑀓𑁄𑀝𑁆𑀞𑀸𑀲𑁂 𑀚𑀸𑀢𑀁, 𑀦 𑀩𑀳𑀺𑀓𑁄𑀝𑁆𑀞𑀸𑀲𑁂𑀢𑀺 𑀅𑀩𑁆𑀪𑀦𑁆𑀢𑀭𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀬𑁄 𑀬𑁄 𑀞𑀺𑀢𑁄, 𑀦𑀺𑀲𑀺𑀦𑁆𑀦𑁄 𑀯𑀸, 𑀢𑀢𑁆𑀣 𑀢𑀢𑁆𑀣 𑀲𑀫𑀦𑁆𑀢𑀸 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀞𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀞𑀸𑀦𑀁 𑀦𑀸𑀫. 𑀪𑀽𑀫𑁆𑀬𑀸𑀤𑀺𑀢𑁆𑀢𑀸 𑀪𑀽𑀫𑀺𑀯𑀕𑁆𑀕𑁄, 𑀅𑀣 𑀯𑀸 𑀅𑀗𑁆𑀕𑀸𑀧𑁂𑀓𑁆𑀔𑀸𑀬 𑀪𑀽𑀫𑀺𑀬𑁂𑀯 𑀧𑀥𑀸𑀦𑀁, 𑀧𑀥𑀸𑀦𑁂𑀦 𑀘 𑀩𑁆𑀬𑀧𑁆𑀧𑀤𑁂𑀲𑁄 𑀪𑀯𑀢𑀻𑀢𑀺 𑀪𑀽𑀫𑀺𑀯𑀕𑁆𑀕𑀩𑁆𑀬𑀧𑁆𑀧𑀤𑁂𑀲𑁄.

𑀪𑀽𑀫𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀼𑀭𑀯𑀕𑁆𑀕𑀯𑀡𑁆𑀡𑀦𑀸

𑁧𑁯𑁮. 𑀙𑀓𑁆𑀓𑀁 𑀦𑀕𑀭𑁂.

‘‘𑀧𑀝𑁆𑀝𑀦𑀜𑁆𑀘 𑀅𑀥𑀺𑀝𑁆𑀞𑀸𑀦𑀁, 𑀦𑀕𑀭𑀁 𑀧𑀼𑀝𑀪𑁂𑀤𑀦𑀁;

𑀣𑀺𑀬𑁄 𑀧𑀽 𑀦𑀕𑀭𑀻 𑀧𑀽𑀭𑀺𑀬𑁄, 𑀞𑀸𑀦𑀻𑀬𑀁 𑀓𑀩𑁆𑀩𑀝𑀁 𑀧𑀼𑀝’’𑀦𑁆𑀢𑀺.

𑀳𑀺 𑀲𑀺𑀮𑁄𑀓𑀧𑀭𑀺𑀬𑀸𑀬𑁂𑀲𑀼 𑀯𑁄𑀧𑀸𑀮𑀺𑀢𑁄.

‘‘𑀯𑀺𑀘𑀺𑀢𑁆𑀢𑀤𑁂𑀯𑀸𑀬𑀢𑀦𑀁, 𑀧𑀸𑀲𑀸𑀤𑀸𑀧𑀡𑀫𑀦𑁆𑀤𑀺𑀭𑀁;

𑀦𑀕𑀭𑀁 𑀤𑀲𑁆𑀲𑀬𑁂 𑀯𑀺𑀤𑁆𑀯𑀸, 𑀭𑀸𑀚𑀫𑀕𑁆𑀕𑁄𑀧𑀲𑁄𑀪𑀺𑀢’’𑀦𑁆𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧.𑁨.𑁧]. 𑁋

𑀦𑀕𑀭𑀮𑀓𑁆𑀔𑀡𑀁. 𑀧𑀼 𑀧𑀸𑀮𑀦𑁂, 𑀧𑀼𑀭 𑀧𑀸𑀮𑀦𑁂𑀢𑀺 𑀘, 𑀧𑀼𑀦𑀸𑀢𑀺 𑀧𑀼𑀭𑁂𑀢𑀺 𑀘 𑀭𑀓𑁆𑀔𑀢𑀺 𑀧𑀭𑀘𑀓𑁆𑀓𑀸 𑀤𑀼𑀕𑁆𑀕𑀢𑀸𑀬𑀸𑀢𑀺 𑀧𑀼𑀭𑀁, 𑀭𑁄, 𑀅 𑀘, 𑀧𑀼𑀭 𑀅𑀕𑁆𑀕𑀕𑀫𑀦𑁂𑀢𑀺𑀧𑀺 𑀥𑀸𑀢𑁆𑀯𑀢𑁆𑀣𑁄. 𑀦𑀕𑀸 𑀧𑀸𑀲𑀸𑀤𑀸𑀤𑀬𑁄 𑀅𑀲𑁆𑀲 𑀲𑀦𑁆𑀢𑀺 𑀦𑀕𑀭𑀁, 𑀭𑁄. 𑀯𑀸𑀓𑀸𑀭𑁂𑀦 𑀦𑀕𑀭𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺 [𑀦𑀕𑀭𑀺𑀬𑁄 𑀯𑀸 𑀧𑀢𑁆𑀢𑀦𑀁 (𑀅𑀫𑀭 𑁧.𑁨.𑁧) 𑀧𑀓𑁆𑀔𑁂 𑀧𑀢𑁆𑀢𑀦𑀲𑀸𑀳𑀘𑀭𑀺𑀬𑀸 𑀦𑀧𑀼𑀁𑀲𑀓𑀢𑁆𑀢𑀁. (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧.𑁨.𑁧)], 𑀧𑀼𑀭𑀲𑀤𑁆𑀤𑀲𑁆𑀲𑀸𑀧𑀻𑀢𑁆𑀬𑀸𑀘𑀭𑀺𑀬𑀸. 𑀅𑀓𑀼𑀢𑁄𑀪𑀬𑀢𑁆𑀢𑀸 𑀞𑀸𑀦𑀸𑀬 𑀳𑀺𑀢𑀁 𑀞𑀸𑀦𑀻𑀬𑀁, 𑀈𑀬𑁄. 𑀧𑀡𑀺𑀓𑀸𑀦𑀁 𑀧𑀼𑀝𑀸 𑀪𑀺𑀚𑁆𑀚𑀦𑁆𑀢𑁂 𑀅𑀢𑁆𑀭𑀸𑀢𑀺 𑀧𑀼𑀝𑀪𑁂𑀤𑀦𑀁.

𑀦𑀺𑀘𑁆𑀘𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀣𑀺𑀬’’𑀫𑀺𑀘𑁆𑀘𑀸𑀤𑀺. 𑀭𑀸𑀚𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀭𑀸𑀚𑀞𑀸𑀦𑀻, 𑀬𑀼, 𑀦𑀤𑀸𑀤𑀺, 𑀦𑀺𑀘𑁆𑀘𑀦𑀺𑀯𑀸𑀲𑀦𑀝𑁆𑀞𑀸𑀦𑁂𑀧𑀺 ‘‘𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀯𑀢𑀻𑀭𑀸𑀚𑀞𑀸𑀦𑀻𑀧𑀫𑀼𑀔𑀸𑀦𑀻’’𑀢𑁆𑀬𑀸𑀤𑀻𑀲𑀼 [𑀤𑀻. 𑀦𑀺. 𑁨.𑁨𑁬𑁩]. 𑀤𑀸𑀭𑀼𑀓𑁆𑀔𑀦𑁆𑀥𑀸𑀤𑀻𑀳𑀺 𑀆 𑀲𑀫𑀦𑁆𑀢𑀢𑁄 𑀯𑀭𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀔𑀦𑁆𑀥𑀸𑀯𑀸𑀭𑁄, 𑀧𑀢𑁆𑀣𑀦𑀢𑁆𑀣𑁄 𑀯𑀭𑀥𑀸𑀢𑀼 𑀆𑀧𑀼𑀩𑁆𑀩𑀢𑁆𑀢𑀸 𑀧𑀭𑀺𑀓𑁆𑀔𑀺𑀧𑀦𑀢𑁆𑀣𑁄 𑀳𑁄𑀢𑀺. 𑀧𑀜𑁆𑀘𑀓𑀁 𑀦𑀕𑀭𑁂, ‘‘𑀔𑀦𑁆𑀥𑀸𑀯𑀸𑀭𑁄’’𑀢𑀺 𑀧𑀦 𑀏𑀓𑀫𑁂𑀯 𑀅𑀘𑀺𑀭𑀦𑀺𑀯𑀸𑀲𑀦𑀝𑁆𑀞𑀸𑀦𑀲𑁆𑀲 𑀦𑀸𑀫𑀁.

𑁧𑁯𑁯. 𑀫𑀽𑀮𑀧𑀼𑀭𑀸 𑀅𑀜𑁆𑀜𑀢𑁆𑀭 𑀫𑀽𑀮𑀧𑀼𑀭𑀁 𑀯𑀚𑁆𑀚𑁂𑀢𑁆𑀯𑀸 𑀬𑀁 𑀧𑀼𑀭𑀫𑀢𑁆𑀣𑀺 𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀧𑀸𑀓𑀸𑀭𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀫𑀽𑀮𑀧𑀼𑀭𑀲𑁆𑀲 𑀢𑀭𑀼𑀝𑁆𑀞𑀸𑀦𑀺𑀬𑀲𑁆𑀲 𑀲𑀸𑀔𑀸𑀲𑀤𑀺𑀲𑀢𑁆𑀢𑀸 𑀲𑀸𑀔𑀸𑀦𑀕𑀭𑀁 𑀦𑀸𑀫.

𑁨𑁦𑁦-𑁨𑁦𑁧. 𑀲𑀸𑀤𑁆𑀥𑀧𑀚𑁆𑀚𑀤𑁆𑀯𑀬𑁂𑀦 𑀫𑀽𑀮𑀧𑀼𑀭𑀲𑁆𑀲 𑀦𑀸𑀫𑀸𑀦𑀺. 𑀯𑀸𑀦𑀭𑀲𑀻𑀲𑀁, 𑀢𑀁𑀲𑀡𑁆𑀞𑀸𑀦𑁄 𑀯𑀸 𑀧𑀸𑀲𑀸𑀡𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 ‘‘𑀯𑀸𑀦𑀭𑀲𑀻𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀲𑁆𑀲 𑀩𑀢𑁆𑀢𑀁, 𑀯𑀡𑁆𑀡𑀯𑀺𑀧𑀭𑀺𑀬𑀬𑀁, 𑀤𑀻𑀖𑀁, 𑀡𑀢𑁆𑀢𑀁, 𑀲𑀲𑁆𑀲 𑀮𑁄𑀧𑀜𑁆𑀘 𑀓𑀢𑁆𑀯𑀸 ‘‘𑀩𑀸𑀭𑀸𑀡𑀲𑀻’’𑀢𑀺 𑀯𑀼𑀢𑁆𑀢𑀁. 𑀲𑀯𑀢𑁆𑀣𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑁆𑀢𑀸 𑀲𑀸𑀯𑀢𑁆𑀣𑀺, 𑀲𑀩𑁆𑀩𑀁 𑀥𑀦𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀯𑀸 𑀲𑀸𑀯𑀢𑁆𑀣𑀺 [𑀫. 𑀦𑀺. 𑀅𑀝𑁆𑀞. 𑁧.𑁧𑁪], 𑀲𑀩𑁆𑀩𑀲𑁆𑀲 𑀲𑀸𑀯𑁄, 𑀥𑀦𑀯𑀸𑀘𑀓𑁄 𑀅𑀢𑁆𑀣𑀲𑀤𑁆𑀤𑁄, 𑀇. 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 𑀯𑁂𑀲𑀸𑀮𑀻, 𑀅𑀲𑁆𑀲𑀢𑁆𑀣𑀼𑀢𑁆𑀣𑁂 𑀈. 𑀫𑀣𑀺 𑀳𑀺𑀁𑀲𑀸𑀬𑀁, 𑀇𑀮𑁄, 𑀅𑀲𑁆𑀲𑀺𑀢𑁆𑀢𑀁, 𑀫𑀺𑀣𑀺𑀮𑀸. 𑀅𑀮𑀁 𑀪𑀽𑀲𑀦𑀫𑁂𑀢𑁆𑀣𑀸𑀢𑀺 𑀆𑀴𑀯𑀻, 𑀯𑀻, 𑀴𑀢𑁆𑀢𑀜𑁆𑀘. 𑀓𑀼𑀲 𑀅𑀯𑁆𑀳𑀸𑀦𑁂, ‘‘𑀔𑀸𑀤𑀣 𑀧𑀺𑀯𑀣𑀸’’𑀢𑁆𑀬𑀸𑀤𑀻𑀳𑀺 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀓𑁄𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑁄𑀲𑀫𑁆𑀩𑀻, 𑀩𑁄, 𑀦𑀤𑀸𑀤𑀺, 𑀓𑀼𑀲𑀫𑁆𑀩𑀭𑀼𑀓𑁆𑀔𑀯𑀦𑁆𑀢𑀢𑀸𑀬 𑀯𑀸 𑀓𑁄𑀲𑀫𑁆𑀩𑀻, 𑀓𑀼𑀲𑀫𑁆𑀩𑀲𑁆𑀲 𑀇𑀲𑀺𑀦𑁄 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀫𑀸𑀧𑀺𑀢𑀢𑁆𑀢𑀸𑀢𑀺 𑀏𑀓𑁂 [𑀉𑀤𑀸. 𑀅𑀝𑁆𑀞. 𑁩𑁫; 𑀫. 𑀦𑀺. 𑀝𑀻. 𑁧.𑁧𑁪; 𑁨.𑁨𑁮𑁪]. 𑀉𑀕𑁆𑀕𑀁 𑀭𑀺𑀧𑀼𑀁 𑀚𑀬𑀢𑀺 𑀬𑀢𑁆𑀣, 𑀲𑀸 𑀉𑀚𑁆𑀚𑁂𑀦𑀻, 𑀬𑀼, 𑀦𑀤𑀸𑀤𑀺. 𑀢𑀓𑁆𑀓 𑀊𑀳𑁂, 𑀊𑀳𑁄 𑀊𑀦𑀧𑀽𑀭𑀡𑀁, 𑀢𑀓𑁆𑀓𑀦𑀁 𑀢𑀓𑁆𑀓𑁄, 𑀲𑁄 𑀲𑀻𑀮𑀁 𑀲𑀪𑀸𑀯𑁄 𑀬𑀢𑁆𑀣 𑀲𑀸 𑀢𑀓𑁆𑀓𑀲𑀻𑀮𑀸, 𑀬𑁄 𑀳𑀺 𑀧𑀼𑀭𑀺𑀲𑀓𑀸𑀭𑁂𑀦 𑀊𑀦𑁄, 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀫𑀽𑀦𑀁 𑀧𑀽𑀭𑁂𑀢𑀻𑀢𑀺. 𑀘𑀫 𑀅𑀤𑀦𑁂, 𑀧𑁄, 𑀘𑀫𑁆𑀧𑀸. 𑀲𑀸𑀦𑀁 𑀥𑀦𑀸𑀦𑀁 𑀆𑀓𑀭𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀲𑀸𑀓𑀭𑁄, 𑀲𑁄 𑀏𑀯 𑀲𑀸𑀕𑀮𑀁. 𑀲𑀁𑀲𑀼𑀫𑀸𑀭𑀲𑀡𑁆𑀞𑀸𑀦𑁄 𑀕𑀺𑀭𑀺 𑀏𑀢𑁆𑀣𑀸𑀢𑀺 𑀲𑀁𑀲𑀼𑀫𑀸𑀭𑀕𑀺𑀭𑀁, 𑀲𑀁𑀲𑀼𑀫𑀸𑀭𑁄 𑀕𑀸𑀬𑀢𑀺 𑀏𑀢𑀲𑁆𑀲 𑀫𑀸𑀧𑀺𑀢𑀓𑀸𑀮𑁂𑀢𑀺 𑀯𑀸 𑀲𑀁𑀲𑀼𑀫𑀸𑀭𑀕𑀺𑀭𑀁, 𑀕𑁂 𑀲𑀤𑁆𑀤𑁂, 𑀇𑀭𑁄. 𑀭𑀸𑀚𑀽𑀦𑀫𑁂𑀯 𑀆𑀥𑀺𑀧𑀘𑁆𑀘𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀩𑁆𑀩𑀢𑁆𑀢𑀸 𑀭𑀸𑀚𑀕𑀳𑀁. 𑀆𑀤𑀺𑀓𑀸𑀮𑁂 𑀓𑀧𑀺𑀮𑀦𑀸𑀫𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑁆𑀢𑀸 𑀓𑀧𑀺𑀮𑀯𑀢𑁆𑀣𑀼, 𑀧𑀼𑀫𑀦𑀧𑀼𑀁𑀲𑀓𑁂.

𑀲𑀸𑀓𑁄 𑀭𑀸𑀚𑀽𑀦𑀁 𑀬𑀼𑀤𑁆𑀥𑀸𑀤𑀻𑀲𑀼 𑀲𑀢𑁆𑀢𑀺 𑀲𑀜𑁆𑀚𑀸𑀢𑀸 𑀏𑀢𑁆𑀣𑀸𑀢𑀺 𑀲𑀸𑀓𑁂𑀢𑀁, ‘‘𑀲𑀸𑀓𑁄 𑀲𑀢𑁆𑀢𑀺𑀫𑁆𑀳𑀺 𑀪𑀽𑀧𑀸𑀮𑁂, 𑀤𑀼𑀫𑀤𑀻𑀧𑀦𑁆𑀢𑀭𑁂𑀲𑀼 𑀘𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀲𑀜𑁆𑀚𑀸𑀢𑀢𑁆𑀣𑁂 𑀇𑀢𑁄, 𑀲𑀸𑀓𑁄 𑀦𑀸𑀫 𑀭𑀸𑀚𑀸, 𑀤𑀼𑀫𑁄 𑀯𑀸 𑀏𑀢𑁆𑀣 𑀆𑀤𑀺𑀓𑀸𑀮𑁂 𑀲𑀜𑁆𑀚𑀸𑀢𑁄𑀢𑀺 𑀯𑀸 𑀲𑀸𑀓𑁂𑀢𑀁. 𑀇𑀦𑁆𑀤𑀁 𑀧𑀭𑀫𑀺𑀲𑁆𑀲𑀭𑀺𑀬𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺 𑀏𑀢𑁆𑀣𑀸𑀢𑀺 𑀇𑀦𑁆𑀤𑀧𑀢𑁆𑀢𑀁, 𑀇𑀦𑁆𑀤𑁄 𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀲𑁄 𑀧𑀢𑁆𑀢𑁄 𑀏𑀢𑁆𑀣𑀸𑀢𑀺 𑀇𑀦𑁆𑀤𑀧𑀢𑁆𑀢𑀁. 𑀉𑀓𑁆𑀓𑀁 𑀥𑀸𑀭𑀬𑀢𑀺 𑀏𑀢𑀲𑁆𑀲 𑀫𑀸𑀧𑀺𑀢𑀓𑀸𑀮𑁂𑀢𑀺 𑀉𑀓𑁆𑀓𑀝𑁆𑀞𑀸, 𑀯𑀡𑁆𑀡𑀯𑀺𑀓𑀸𑀭𑁄. 𑀬𑀲𑁆𑀲 𑀫𑀸𑀧𑀺𑀢𑀝𑁆𑀞𑀸𑀦𑁂 𑀧𑀸𑀝𑀮𑀻𑀦𑀸𑀫𑀓𑁄 𑀏𑀓𑁄 𑀢𑀭𑀼𑀡𑀭𑀼𑀓𑁆𑀔𑁄 𑀅𑀢𑁆𑀣𑀻𑀢𑀺 𑀢𑀁 𑀧𑀸𑀝𑀮𑀺𑀧𑀼𑀢𑁆𑀢𑀓𑀁, 𑀅𑀣 𑀯𑀸 𑀧𑀝𑀮𑀺 𑀦𑀸𑀫 𑀏𑀓𑁄 𑀕𑀸𑀫𑀡𑀻, 𑀢𑀲𑁆𑀲 𑀧𑀼𑀢𑁆𑀢𑁄 𑀏𑀢𑁆𑀣 𑀯𑀲𑀢𑀺𑀆𑀤𑀺𑀓𑀸𑀮𑁂𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀓𑀁. 𑀘𑁂𑀢𑀺𑀬𑀭𑀝𑁆𑀞𑁂 𑀉𑀢𑁆𑀢𑀫𑀢𑁆𑀢𑀸 𑀘𑁂𑀢𑀼𑀢𑁆𑀢𑀭𑀁, ‘‘𑀚𑁂𑀢𑀼𑀢𑁆𑀢𑀭’’𑀦𑁆𑀢𑀺 𑀧𑀸𑀞𑁂 𑀧𑀦 𑀯𑀡𑁆𑀡𑀯𑀺𑀓𑀸𑀭𑁄, 𑀯𑁂𑀭𑀺𑀚𑀬𑀝𑁆𑀞𑀸𑀦𑀢𑁆𑀢𑀸 𑀚𑁂𑀢𑀜𑁆𑀘 𑀢𑀁 𑀉𑀢𑁆𑀢𑀫𑀢𑁆𑀢𑀸 𑀉𑀢𑁆𑀢𑀭𑀜𑁆𑀘𑁂𑀢𑀺 𑀯𑀸 𑀚𑁂𑀢𑀼𑀢𑁆𑀢𑀭𑀁. 𑀬𑀲𑁆𑀲 𑀫𑀸𑀧𑀺𑀢𑀓𑀸𑀮𑁂 𑀤𑀻𑀧𑁄 𑀤𑀺𑀧𑁆𑀧𑀢𑀺, 𑀢𑀁 𑀲𑀗𑁆𑀓𑀲𑁆𑀲𑀁, 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀤𑁆𑀯𑀺𑀢𑁆𑀢𑀁, 𑀲𑀫𑁆𑀫𑀸 𑀓𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀗𑁆𑀓𑀲𑁆𑀲𑀁, 𑀓𑀲 𑀯𑀺𑀮𑁂𑀔𑀦𑁂, 𑀬𑀲𑁆𑀲 𑀫𑀸𑀧𑀺𑀢𑀓𑀸𑀮𑁂 𑀦𑀺𑀫𑀺𑀢𑁆𑀢𑀫𑁄𑀮𑁄𑀓𑁂𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀓𑀼𑀲𑀳𑀢𑁆𑀣𑀁 𑀦𑀭𑀁 𑀧𑀲𑁆𑀲𑀺𑀢𑁆𑀯𑀸 𑀫𑀸𑀧𑁂𑀦𑁆𑀢𑀺, 𑀢𑀁 𑀓𑀼𑀲𑀺𑀦𑀸𑀭𑀁. 𑀆𑀤𑀺𑀦𑀸 𑀫𑀣𑀼𑀭 [𑀫𑀥𑀼𑀭, 𑀫𑀸𑀥𑀼𑀭 (𑀓.)] 𑀧𑀸𑀲𑀸𑀡𑀧𑀼𑀭𑀲𑁄𑀡𑀺𑀓𑀸𑀤𑀬𑁄𑀧𑁆𑀬𑀦𑁂𑀓𑀧𑀼𑀭𑀯𑀺𑀲𑁂𑀲𑀸 𑀲𑀗𑁆𑀕𑀳𑀺𑀢𑀸.

𑁨𑁦𑁨. 𑀘𑀢𑀼𑀓𑁆𑀓𑀁 𑀅𑀩𑁆𑀪𑀦𑁆𑀢𑀭𑀕𑀸𑀫𑀫𑀕𑁆𑀕𑁂. 𑀭𑀣𑀲𑁆𑀲 𑀳𑀺𑀢𑀸 𑀭𑀘𑁆𑀙𑀸, 𑀧𑀩𑁆𑀩𑀚𑁆𑀚𑀸𑀤𑀺. 𑀯𑀺𑀲𑀬𑀦𑁆𑀢𑁂 𑀧𑀓𑀸𑀲𑀬𑀦𑁆𑀢𑁂 𑀯𑀺𑀓𑁆𑀓𑀬𑁂𑀦 𑀤𑀩𑁆𑀩𑀸𑀦𑀺 𑀬𑀲𑁆𑀲𑀁, 𑀲𑀸 𑀯𑀺𑀲𑀺𑀔𑀸, 𑀯𑀺𑀧𑀼𑀩𑁆𑀩𑁄 𑀲𑀺 𑀲𑁂𑀯𑀸𑀬𑀁, 𑀔𑁄, 𑀯𑀺𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀯𑀺𑀲𑀺𑀔𑀸, 𑀯𑀺𑀲 𑀧𑀯𑁂𑀲𑀦𑁂, 𑀔𑁄. 𑀭𑀣𑀲𑁆𑀲 𑀳𑀺𑀢𑀸 𑀭𑀣𑀺𑀓𑀸, 𑀇𑀓𑁄. 𑀯𑀻 𑀕𑀫𑀦𑁂, 𑀣𑀺, 𑀯𑀻𑀣𑀺.

𑀅𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀦𑁆𑀢𑀭𑁂𑀦 𑀫𑀚𑁆𑀛𑁂 𑀅𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀸 𑀩𑁆𑀬𑀽𑀳𑁄 𑀦𑀸𑀫. 𑀩𑁆𑀬𑀽𑀳𑁂𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺 𑀚𑀦𑁂 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦𑀸𑀢𑀺 𑀩𑁆𑀬𑀽𑀳𑁄, 𑀊𑀳 𑀲𑀫𑁆𑀧𑀺𑀡𑁆𑀟𑀦𑁂 𑀯𑀺𑀧𑀼𑀩𑁆𑀩𑀢𑁆𑀢𑀸. 𑀦 𑀦𑀺𑀩𑁆𑀩𑀺𑀚𑁆𑀛𑀢𑁂 𑀭𑀘𑁆𑀙𑀦𑁆𑀢𑀭𑁂𑀦𑀸𑀢𑀺 𑀅𑀦𑀺𑀩𑁆𑀩𑀺𑀤𑁆𑀥𑁄, 𑀯𑀺𑀥 𑀲𑀫𑁆𑀧𑀳𑀸𑀭𑁂, 𑀅. 𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀦𑁆𑀢𑀭𑁂𑀦 𑀭𑀘𑁆𑀙𑀸 𑀧𑀣𑁄, 𑀅𑀤𑁆𑀥𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀧𑀣 𑀕𑀫𑀦𑁂, 𑀧𑀣𑁄. 𑀅𑀤 𑀕𑀫𑀦𑁂,𑀢𑀺, 𑀅𑀤𑁆𑀥𑀺.

𑁨𑁦𑁩. 𑀘𑀢𑀼𑀓𑁆𑀓𑀁 𑀘𑀘𑁆𑀘𑀭𑁂. 𑀘𑀢𑀼𑀦𑁆𑀦𑀁 𑀧𑀣𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀓𑁆𑀓𑀁, 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀘𑀭𑁄, 𑀭𑀲𑁆𑀲 𑀘𑁄, 𑀘𑀘𑁆𑀘𑀭𑀁, 𑀅𑀗𑁆𑀕𑀡𑀯𑀸𑀘𑀓𑁄 𑀘𑀸𑀬𑀁. 𑀤𑁆𑀯𑀺𑀦𑁆𑀦𑀁, 𑀘𑀢𑀼𑀦𑁆𑀦𑀁 𑀯𑀸 𑀫𑀕𑁆𑀕𑀸𑀦𑀁 𑀲𑀦𑁆𑀥𑀺 𑀫𑀕𑁆𑀕𑀲𑀦𑁆𑀥𑀺. 𑀲𑀺𑀗𑁆𑀖 𑀖𑀸𑀬𑀦𑁂, 𑀆𑀝𑀓𑁄.

𑀤𑁆𑀯𑀬𑀁 𑀯𑀧𑁆𑀧𑀲𑁆𑀲𑁄𑀧𑀭𑀺 𑀇𑀝𑁆𑀞𑀓𑀸𑀤𑀺𑀭𑀘𑀺𑀢𑁂 𑀯𑁂𑀞𑀦𑁂. 𑀯𑀧𑁆𑀧𑀁 𑀦𑀸𑀫 𑀤𑀼𑀕𑁆𑀕𑀦𑀕𑀭𑁂 𑀧𑀭𑀺𑀔𑀸𑀫𑀢𑁆𑀢𑀺𑀓𑀁 𑀓𑀽𑀝𑀁 [𑀓𑀼𑀝𑀺𑀁 (𑀓.)] 𑀓𑀢𑁆𑀯𑀸 𑀕𑁄𑀳𑀺, 𑀳𑀢𑁆𑀣𑀻𑀳𑀺 𑀘 𑀯𑀺𑀫𑀤𑁆𑀤𑀸𑀧𑁂𑀢𑁆𑀯𑀸 𑀢𑀺𑀁𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀸𑀓𑀸𑀭𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑀁, 𑀢𑀣𑀸 𑀳𑀢𑁆𑀣𑀲𑀢𑀁 𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀧𑀁𑀲𑀼𑀦𑀸 𑀯𑀧𑁆𑀧𑀁 𑀓𑀸𑀭𑀬𑁂, 𑀢𑀲𑁆𑀲𑁄𑀧𑀭𑀺 𑀧𑀸𑀓𑀸𑀭𑀦𑁆𑀢𑀺, 𑀧𑀓𑀼𑀩𑁆𑀩𑀦𑁆𑀢𑀺 𑀢𑀦𑁆𑀢𑀺 𑀧𑀸𑀓𑀸𑀭𑁄, 𑀲𑀫𑀦𑁆𑀢𑀢𑁄 𑀓𑀭𑀻𑀬𑀢𑁂𑀢𑀺 𑀯𑀸 𑀧𑀸𑀓𑀸𑀭𑁄, 𑀅𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀲𑀜𑁆𑀜𑀸𑀬𑀁 𑀡𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸. 𑀯𑀼 𑀲𑀁𑀯𑀭𑀡𑁂, 𑀯𑀼𑀡𑁄𑀢𑀻𑀢𑀺 𑀯𑀭𑀡𑁄, 𑀬𑀼, 𑀭𑀸𑀕𑀫𑁄 𑀘. ‘‘𑀲𑀸𑀮𑁄’’𑀢𑀺𑀧𑀺 𑀧𑀸𑀓𑀸𑀭𑀲𑁆𑀲 𑀦𑀸𑀫𑀁.

𑀤𑁆𑀯𑀬𑀁 𑀭𑀸𑀚𑀪𑀯𑀦𑀲𑀸𑀫𑀜𑁆𑀜𑁂. 𑀲𑀩𑁆𑀩𑀕𑁂𑀳𑀸𑀦𑀁 𑀯𑀺𑀲𑁂𑀲𑁂𑀦 𑀧𑀓𑀸𑀲𑀦𑀢𑁄 𑀉𑀤𑁆𑀤𑀸𑀧𑁄, 𑀤𑀻𑀧 𑀧𑀓𑀸𑀲𑀦𑁂, 𑀈𑀲𑁆𑀲𑀸𑀓𑀸𑀭𑁄. 𑀲𑀗𑁆𑀕𑀫𑁆𑀫 𑀓𑀭𑁄𑀦𑁆𑀢𑀺 𑀢𑀦𑁆𑀢𑀺 𑀉𑀧𑀓𑀸𑀭𑀺𑀓𑀸, 𑀡𑁆𑀯𑀼. 𑀓𑁂 𑀧𑀘𑁆𑀘𑀬𑁂 𑀣𑀻𑀓𑀢𑀸𑀓𑀸𑀭𑀧𑀭𑁂 𑀧𑀼𑀩𑁆𑀩𑁄 𑀅𑀓𑀸𑀭𑁄 𑀤𑀻𑀖𑀁 [𑀓𑀸𑀢𑀦𑁆𑀢 𑁨.𑁨.𑁬𑁫], 𑀅𑀓𑀸𑀤𑁂𑀲𑁄𑀧𑀺 𑀳𑀺 ‘‘𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀤𑁂𑀯𑀤𑀢𑁆𑀢𑁄 ‘‘𑀤𑀢𑁆𑀢𑁄’’𑀢𑀺. 𑀓𑀧𑀘𑁆𑀘𑀬𑁄 𑀯𑀸.

𑁨𑁦𑁪. 𑀤𑁆𑀯𑀬𑀁 𑀕𑁂𑀳𑀸𑀤𑀺𑀦𑁄 𑀫𑀢𑁆𑀢𑀺𑀓𑁂𑀝𑁆𑀞𑀓𑀸𑀤𑀺𑀫𑀬𑀪𑀺𑀢𑁆𑀢𑀺𑀬𑀁. 𑀓𑀼𑀝 𑀙𑁂𑀤𑀦𑁂, 𑀓𑀼𑀝𑀢𑀺 𑀙𑀺𑀦𑁆𑀤𑀢𑀺 𑀫𑀕𑁆𑀕𑀦𑁆𑀢𑀺 𑀓𑀼𑀝𑁆𑀝𑀁. 𑀪𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂,𑀢𑀺, 𑀪𑀺𑀢𑁆𑀢𑀺. 𑀕𑀼𑀦𑁆𑀦𑀁 𑀯𑀸𑀘𑀸𑀦𑀁 𑀧𑀼𑀭𑀁 𑀕𑁄𑀧𑀼𑀭𑀁. 𑀤𑁆𑀯𑀸𑀭𑀲𑀫𑀻𑀧𑁂 𑀓𑀢𑁄 𑀓𑁄𑀝𑁆𑀞𑀓𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁄, 𑀓𑀼𑀲 𑀅𑀓𑁆𑀓𑁄𑀲𑁂, 𑀞𑀓𑁄, 𑀓𑁄𑀝𑁆𑀞𑀓𑁄𑀢𑀺 𑀕𑁂𑀳𑀯𑀺𑀲𑁂𑀲𑁄.

𑀤𑁆𑀯𑀬𑀁 𑀇𑀦𑁆𑀤𑀔𑀻𑀮𑁂. 𑀇𑀲 𑀇𑀘𑁆𑀙𑀸𑀬𑀁, 𑀏𑀲 𑀕𑀯𑁂𑀲𑀦𑁂 𑀯𑀸, 𑀇𑀓𑁄. 𑀇𑀦𑁆𑀤𑀲𑁆𑀲 𑀲𑀓𑁆𑀓𑀲𑁆𑀲 𑀔𑀻𑀮𑁄 𑀓𑀡𑁆𑀝𑀓𑁄 𑀇𑀦𑁆𑀤𑀔𑀻𑀮𑁄. 𑀤𑁆𑀯𑀬𑀁 𑀤𑁆𑀯𑀸𑀭𑀧𑀲𑁆𑀲𑁄𑀧𑀲𑀸𑀮𑀸𑀬𑀁’𑀳𑀫𑁆𑀬𑀸𑀤𑀺𑀧𑀺𑀝𑁆𑀞𑁂 𑀘 𑀯𑀸𑀢𑀓𑀼𑀝𑀺𑀓𑀸𑀬𑀁. 𑀅𑀟𑁆𑀟 𑀅𑀢𑀺𑀓𑁆𑀓𑀫𑀳𑀺𑀁𑀲𑀸𑀲𑀼, 𑀅. 𑀆𑀮𑀓𑀧𑀘𑁆𑀘𑀬𑁂 𑀅𑀝𑁆𑀝𑀸𑀮𑀓𑁄.

𑁨𑁦𑁫. 𑀉𑀧𑀭𑀺 𑀫𑀸𑀮𑀸𑀤𑀺𑀬𑀼𑀢𑁆𑀢𑀁 𑀲𑁄𑀪𑀦𑀣𑀫𑁆𑀪𑀤𑁆𑀯𑀬𑀫𑀼𑀪𑀬𑀢𑁄 𑀦𑀺𑀔𑀦𑀺𑀢𑁆𑀯𑀸 𑀬𑀁 𑀩𑀳𑀺𑀤𑁆𑀯𑀸𑀭𑀁 𑀓𑀧𑁆𑀧𑀻𑀬𑀢𑁂, 𑀢𑀁 𑀢𑁄𑀭𑀡𑀁. 𑀢𑀼𑀭 𑀯𑀸𑀭𑀡𑁂, 𑀬𑀼, 𑀣𑀯𑀦𑁆𑀢𑀸 𑀯𑀸 𑀭𑀡𑀦𑁆𑀢𑁆𑀬𑀢𑁆𑀭𑀸𑀢𑀺 𑀢𑁄𑀭𑀡𑀁, 𑀢𑀼 𑀅𑀪𑀺𑀢𑁆𑀣𑀯𑁂. 𑀭𑀡 𑀲𑀤𑁆𑀤𑀢𑁆𑀣𑁄, 𑀯𑀡𑁆𑀡𑀯𑀺𑀓𑀸𑀭𑁄. 𑀤𑁆𑀯𑀸𑀭𑀲𑁆𑀲 𑀩𑀳𑀺 𑀩𑀳𑀺𑀤𑁆𑀯𑀸𑀭𑀁. 𑀧𑀭𑀺 𑀲𑀫𑀦𑁆𑀢𑀢𑁄 𑀔𑀜𑁆𑀜𑀢𑁂𑀢𑀺 𑀧𑀭𑀺𑀔𑀸. 𑀤𑀻𑀖𑀪𑀸𑀯𑁂𑀦 𑀬𑀼𑀢𑁆𑀢𑀸 𑀤𑀻𑀖𑀺𑀓𑀸.

𑁨𑁦𑁬-𑁨𑁦𑁭. 𑀲𑀤𑀼𑀫𑀦𑁆𑀢𑀁 𑀕𑁂𑀳𑁂. 𑀫𑀦𑁆𑀤 𑀫𑁄𑀤𑀦𑀣𑀼𑀢𑀺𑀚𑀴𑀢𑁆𑀢𑁂𑀲𑀼, 𑀫𑀦𑁆𑀤𑀦𑁆𑀢𑁂 𑀬𑀢𑁆𑀣𑀸𑀢𑀺 𑀫𑀦𑁆𑀤𑀺𑀭𑀁, 𑀇𑀭𑁄. 𑀲𑀻𑀤𑀦𑁆𑀢𑀺 𑀢𑀢𑁆𑀣𑀸𑀢𑀺 𑀲𑀤𑀦𑀁, 𑀬𑀼. 𑀲𑀤 𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀼. 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀕𑀸, 𑀣𑀫𑁆𑀪𑀸𑀤𑀬𑁄, 𑀢𑁂 𑀭𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀅𑀕𑀸𑀭𑀁. 𑀭𑀲𑁆𑀲𑀲𑁆𑀲 𑀤𑀻𑀖𑀢𑁆𑀢𑁂 𑀆𑀕𑀸𑀭𑀁. 𑀘𑀺 𑀘𑀬𑁂, 𑀦𑀺𑀘𑀻𑀬𑀢𑁂 𑀙𑀸𑀤𑀻𑀬𑀢𑁂𑀢𑀺 𑀦𑀺𑀓𑀸𑀬𑁄, 𑀬𑀫𑁆𑀳𑀺 𑀘𑀺𑀲𑁆𑀲 𑀓𑀸𑀤𑁂𑀲𑁄 𑀦𑀺𑀧𑀸𑀢𑀦𑀸. 𑀮𑀻 𑀲𑀺𑀮𑁂𑀲𑀦𑁂, 𑀡𑁄, 𑀦𑀺𑀮𑀬𑁄, 𑀆𑀮𑀬𑁄 𑀘. 𑀯𑀲 𑀦𑀺𑀯𑀸𑀲𑁂, 𑀆𑀯𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀆𑀯𑀸𑀲𑁄, 𑀡𑁄. 𑀪𑀽 𑀲𑀢𑁆𑀢𑀸𑀬𑀁, 𑀪𑀯𑀦𑁆𑀢𑁆𑀬𑀢𑁆𑀭𑀸𑀢𑀺 𑀪𑀯𑀦𑀁. 𑀯𑀺𑀲𑀦𑁆𑀢𑀺 𑀢𑀦𑁆𑀢𑀺 𑀯𑁂𑀲𑁆𑀫𑀁, 𑀫𑁄. 𑀓𑀺𑀢 𑀦𑀺𑀯𑀸𑀲𑁂, 𑀅𑀥𑀺𑀓𑀭𑀡𑁂 𑀬𑀼, 𑀦𑀺𑀓𑁂𑀢𑀦𑀁. 𑀦𑀺𑀯𑀺𑀲𑀦𑁆𑀢𑀺, 𑀦𑀺𑀯𑀲𑀦𑁆𑀢𑀺 𑀯𑀸 𑀬𑀢𑁆𑀭, 𑀢𑀁 𑀦𑀺𑀯𑁂𑀲𑀦𑀁. 𑀖𑀭 𑀲𑁂𑀘𑀦𑁂, 𑀖𑀭𑀢𑀺 𑀓𑀺𑀮𑁂𑀲𑀫𑁂𑀢𑁆𑀣𑀸𑀢𑀺 𑀖𑀭𑀁, 𑀕𑀬𑁆𑀳𑀢𑀻𑀢𑀺 𑀯𑀸 𑀖𑀭𑀁, 𑀡𑁄. 𑀕𑀳𑀲𑁆𑀲 𑀖𑀭𑀸𑀤𑁂𑀲𑁄. 𑀕𑀡𑁆𑀳𑀸𑀢𑀺 𑀧𑀼𑀭𑀺𑀲𑁂𑀦 𑀆𑀦𑀻𑀢𑀁 𑀥𑀦𑀦𑁆𑀢𑀺 𑀕𑀳𑀁. 𑀅𑀥𑀺𑀓𑀭𑀡𑁂 𑀣𑁄, 𑀆𑀯𑀲𑀣𑁄. 𑀲𑀭 𑀕𑀢𑀺𑀘𑀺𑀦𑁆𑀢𑀸𑀳𑀺𑀁𑀲𑀸𑀲𑀼, 𑀲𑀭𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺 𑀏𑀢𑁆𑀣 𑀲𑀼𑀪𑀸𑀲𑀼𑀪𑀓𑀫𑁆𑀫𑀸𑀦𑀺, 𑀲𑀭𑀢𑀺 𑀯𑀸 𑀲𑀽𑀭𑀺𑀬𑀲𑀦𑁆𑀢𑀸𑀧𑀸𑀤𑀺𑀓𑀦𑁆𑀢𑀺 𑀲𑀭𑀡𑀁. 𑀲𑀺 𑀲𑁂𑀯𑀸𑀬𑀁, 𑀡𑁄, 𑀧𑀢𑀺𑀲𑁆𑀲𑀬𑁄. 𑀉𑀘 𑀲𑀫𑀯𑀸𑀬𑁂, 𑀑𑀓𑀁. 𑀲𑀮 𑀕𑀫𑀦𑁂, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅, 𑀲𑀸𑀮𑀸, 𑀲𑀭𑀥𑀸𑀢𑀼𑀫𑁆𑀳𑀺 𑀲𑀢𑀺 𑀮𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀘𑀺 𑀘𑀬𑁂, 𑀓𑀫𑁆𑀫𑀦𑀺 𑀡𑁄, 𑀘𑀬𑁄. 𑀓𑀼𑀝 𑀙𑁂𑀤𑀦𑁂, 𑀇. 𑀯𑀲 𑀦𑀺𑀯𑀸𑀲𑁂,𑀢𑀺. 𑀉𑀧𑀥𑀲𑁆𑀲 𑀏𑀢𑁆𑀢𑁂 𑀕𑁂𑀳𑀁. 𑀲𑀤𑀥𑀸𑀢𑀼𑀫𑁆𑀳𑀸 𑀉𑀫𑁄, 𑀲𑀤𑀼𑀫𑀁.

𑀤𑁆𑀯𑀬𑀁 𑀫𑀼𑀔𑀭𑀳𑀺𑀢𑀤𑁂𑀯𑀓𑀼𑀮𑀲𑀤𑀺𑀲𑁂 𑀬𑀜𑁆𑀜𑀸𑀬𑀢𑀦𑁂. 𑀘𑀺𑀢 𑀧𑀽𑀚𑀸𑀬𑀁, 𑀓𑀫𑁆𑀫𑀦𑀺 𑀇𑀬𑁄. 𑀬𑀢 𑀬𑀢𑀦𑁂, 𑀆𑀬𑀢𑀦𑁆𑀢𑀺 𑀯𑀸𑀬𑀫𑀦𑁆𑀢𑀺 𑀏𑀢𑁆𑀣 𑀨𑀮𑀓𑀸𑀫𑀸𑀢𑀺 𑀆𑀬𑀢𑀦𑀁, 𑀅𑀣 𑀯𑀸 𑀆𑀬𑀦𑁆𑀢𑀻𑀢𑀺 𑀆𑀬𑀸𑀦𑀺, 𑀢𑀸𑀦𑀺 𑀢𑀦𑁄𑀢𑀻𑀢𑀺 𑀆𑀬𑀢𑀦𑀁, 𑀨𑀮𑀓𑀸𑀭𑀓𑀦𑁆𑀢𑁆𑀬𑀢𑁆𑀣𑁄. 𑀏𑀢𑁆𑀣 𑀢𑀼𑀲𑀤𑁆𑀤𑁄 𑀲𑀫𑀸𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀩𑁆𑀩𑀸𑀧𑀭𑀕𑀫𑀦𑀢𑁆𑀣𑁄. ‘‘𑀘𑁂𑀢𑀺𑀬𑀸𑀬𑀢𑀦𑀸𑀦𑀺 𑀘𑀸’’𑀢𑀺𑀧𑀺 𑀧𑀸𑀞𑁄.

𑁨𑁦𑁮. 𑀤𑁆𑀯𑀬𑀁 𑀤𑁂𑀯𑀸𑀦𑀁, 𑀦𑀭𑀧𑀢𑀻𑀦𑀜𑁆𑀘 𑀇𑀝𑁆𑀞𑀓𑀸𑀤𑀺𑀫𑀬𑁂 𑀪𑀯𑀦𑁂. 𑀅𑀜𑁆𑀜𑀲𑁆𑀲𑀸𑀧𑀺 𑀲𑀸𑀤𑀺𑀲𑁆𑀬𑀸. 𑀧𑀲𑀻𑀤𑀦𑁆𑀢𑀺 𑀦𑀬𑀦𑀫𑀦𑀸𑀦𑁆𑀬𑀢𑁆𑀭𑀸𑀢𑀺 𑀧𑀸𑀲𑀸𑀤𑁄. 𑀬𑀼 𑀫𑀺𑀲𑁆𑀲𑀦𑁂, 𑀧𑁄, 𑀤𑀻𑀖𑁄 𑀘, 𑀤𑀻𑀖𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸 𑀑𑀢𑁆𑀢𑀸𑀪𑀸𑀯𑁄.

𑀤𑁆𑀯𑀬𑀁 𑀭𑀸𑀚𑀢𑁄 𑀅𑀜𑁆𑀜𑁂𑀲𑀁 𑀥𑀦𑀻𑀦𑀁 𑀩𑁆𑀬𑀯𑀳𑀸𑀭𑀓𑀸𑀤𑀻𑀦𑀁 𑀪𑀯𑀦𑁂. 𑀫𑀼𑀡𑁆𑀟𑁄 𑀙𑀤𑀦𑀫𑁂𑀢𑀲𑁆𑀲, 𑀦 𑀧𑀸𑀲𑀸𑀤𑀲𑁆𑀲 𑀯𑀺𑀬𑀸𑀢𑀺 𑀫𑀼𑀡𑁆𑀟𑀘𑁆𑀙𑀤𑁄, 𑀤𑁆𑀯𑀺𑀢𑁆𑀢𑀁. 𑀳𑀭 𑀳𑀭𑀡𑁂, 𑀬𑁄, 𑀬𑀫𑁆𑀳𑀺 𑀫𑀺𑀆𑀕𑀫𑁄 𑀘.

𑀤𑀼𑀕𑁆𑀕𑀧𑀼𑀭𑀤𑁆𑀯𑀸𑀭𑁂 𑀯𑀸, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀫𑀢𑁆𑀢𑀺𑀓𑀸𑀤𑀺𑀫𑀬𑁂 𑀕𑀚𑀓𑀼𑀫𑁆𑀪𑀫𑁆𑀳𑀺 𑀬𑁄 𑀬𑀽𑀧𑁄 𑀧𑀸𑀲𑀸𑀤𑁄 𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀳𑀢𑁆𑀣𑀺𑀦𑀔𑁄 𑀦𑀸𑀫, 𑀳𑀢𑁆𑀣𑀺𑀲𑁆𑀲𑁂𑀯 𑀦𑀔𑁄 𑀬𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀔𑁄, 𑀦𑀔𑀲𑀤𑁆𑀤𑁂𑀦 𑀯𑀸 𑀦𑀔𑀲𑀳𑀺𑀢𑁄 𑀧𑀸𑀲𑀸𑀤𑁄 𑀕𑀬𑁆𑀳𑀢𑁂.

𑁨𑁦𑁯. 𑀲𑀼𑀧𑀡𑁆𑀡𑀲𑁆𑀲 𑀕𑀭𑀼𑀴𑀲𑁆𑀲 𑀯𑀗𑁆𑀓𑁂𑀦 𑀧𑀓𑁆𑀔𑁂𑀦 𑀲𑀤𑀺𑀲𑀙𑀤𑀦𑀁 𑀕𑁂𑀳𑀁 𑀲𑀼𑀯𑀡𑁆𑀡𑀯𑀗𑁆𑀓𑀘𑁆𑀙𑀤𑀦𑀁. 𑀯𑀗𑁆𑀓 𑀕𑀫𑀦𑁂. 𑀏𑀓𑀧𑀲𑁆𑀲𑁂𑀬𑁂𑀯 𑀙𑀤𑀦𑀢𑁄 𑀅𑀟𑁆𑀠𑀬𑁄𑀕𑁄.

𑀏𑀓𑁂𑀦𑁂𑀯 𑀓𑀽𑀝𑁂𑀦 𑀬𑀼𑀢𑁆𑀢𑁄 𑀅𑀦𑁂𑀓𑀓𑁄𑀡𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄 𑀫𑀸𑀴𑁄 𑀦𑀸𑀫, 𑀯𑀝𑁆𑀝𑀸𑀓𑀸𑀭𑁂𑀦 𑀓𑀢𑀲𑁂𑀦𑀸𑀲𑀦𑀦𑁆𑀢𑀺 𑀓𑁂𑀘𑀺. 𑀫𑀸 𑀫𑀸𑀦𑁂, 𑀴𑁄, 𑀫𑀸𑀴𑁄.

𑀘𑀢𑀼𑀭𑀲𑁆𑀲𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄 𑀧𑀸𑀲𑀸𑀤𑁄 𑀦𑀸𑀫, 𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄𑀢𑀺 𑀓𑁂𑀘𑀺.

𑁨𑁧𑁦. 𑀲𑀦𑁆𑀢𑁂𑀳𑀺 𑀪𑀸𑀢𑀺 𑀤𑀺𑀩𑁆𑀩𑀢𑀻𑀢𑀺 𑀲𑀪𑀸𑀬𑀁, 𑀲𑀪𑀸 𑀘, 𑀧𑀼𑀭𑀺𑀫𑁂 𑀬𑀧𑀘𑁆𑀘𑀬𑁄, 𑀲𑀦𑁆𑀢𑀲𑁆𑀲 𑀲𑀸𑀤𑁂𑀲𑁄 𑀢𑀽𑀪𑀬𑀢𑁆𑀭. 𑀫𑀡𑁆𑀟𑀸 𑀭𑀯𑀺𑀭𑀁𑀲𑀬𑁄, 𑀢𑁂 𑀧𑀺𑀯𑀢𑀺 𑀦𑀸𑀲𑀬𑀢𑀻𑀢𑀺 𑀫𑀡𑁆𑀟𑀧𑁄, 𑀯𑀸𑀲𑀤𑁆𑀤𑁂𑀦 𑀫𑀡𑁆𑀟𑀧𑀧𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺, 𑀚𑀦𑀸𑀦𑀁 𑀆𑀮𑀬𑁄 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀚𑀦𑀸𑀮𑀬𑁄. 𑀆𑀲𑀦𑀢𑁆𑀣𑀸𑀬 𑀓𑀢𑀸 𑀲𑀸𑀮𑀸 𑀆𑀲𑀦𑀲𑀸𑀮𑀸. 𑀧𑀝𑀺𑀓𑁆𑀓𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀝𑀺𑀓𑁆𑀓𑀫𑀦𑀁, 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂, 𑀅𑀥𑀺𑀓𑀭𑀡𑁂 𑀬𑀼.

𑁨𑁧𑁧. 𑀚𑀺𑀦𑀲𑁆𑀲 𑀯𑀸𑀲𑀪𑀽𑀢𑀁 𑀪𑀯𑀦𑀁 𑀕𑀦𑁆𑀥𑀓𑀼𑀝𑀺 𑀦𑀸𑀫, 𑀤𑀺𑀩𑁆𑀩𑀕𑀦𑁆𑀥𑁂𑀳𑀺 𑀧𑀭𑀺𑀪𑀸𑀯𑀺𑀢𑀸 𑀓𑀼𑀝𑀺 𑀕𑀦𑁆𑀥𑀓𑀼𑀝𑀺.

𑀢𑀺𑀓𑀁 𑀧𑀸𑀓𑀝𑁆𑀞𑀸𑀦𑁂. 𑀭𑀲𑀸𑀦𑀺 𑀲𑀦𑁆𑀢𑁆𑀬𑀲𑁆𑀲𑀁 𑀭𑀲𑀯𑀢𑀻, 𑀧𑀘𑀦𑀁 𑀧𑀸𑀓𑁄, 𑀢𑀲𑁆𑀲 𑀞𑀸𑀦𑀁 𑀧𑀸𑀓𑀝𑁆𑀞𑀸𑀦𑀁. 𑀫𑀳𑀦𑁆𑀢𑀸𑀦𑀺 𑀩𑀳𑀽𑀦𑀺 𑀅𑀲𑀺𑀢𑀩𑁆𑀩𑀸𑀦𑀺 𑀲𑀦𑁆𑀢𑁂𑀢𑁆𑀣 𑀫𑀳𑀸𑀦𑀲𑀁, 𑀅𑀲 𑀪𑀓𑁆𑀔𑀦𑁂, 𑀬𑀼, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄.

𑁨𑁧𑁨. 𑀲𑀼𑀯𑀡𑁆𑀡𑀓𑀸𑀭𑀸𑀤𑀺𑀲𑀺𑀧𑁆𑀧𑀻𑀦𑀁 𑀓𑀫𑁆𑀫𑀲𑀸𑀮𑀸 𑀆𑀯𑁂𑀲𑀦𑀁. 𑀆𑀯𑀺𑀲𑀦𑁆𑀢𑁆𑀬𑀲𑁆𑀫𑀺𑀁 𑀆𑀯𑁂𑀲𑀦𑀁, 𑀬𑀼. 𑀧𑀸𑀦𑀫𑀦𑁆𑀤𑀺𑀭𑀁 𑀲𑀼𑀭𑀸𑀧𑀸𑀦𑀢𑁆𑀣𑀁 𑀓𑀢𑀫𑀦𑁆𑀤𑀺𑀭𑀁 𑀲𑁄𑀡𑁆𑀟𑀸 𑀦𑀸𑀫, 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀯𑀢𑁆𑀣𑀼𑀓𑀸𑀭𑀡𑀸 𑀲𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑀁 𑀲𑀦𑁄𑀦𑁆𑀢𑀻𑀢𑀺 𑀲𑁄𑀡𑁆𑀟𑀸, 𑀲𑀦 𑀤𑀸𑀦𑁂, 𑀢𑀦𑀸𑀤𑀺. 𑀟𑁄, 𑀅𑀲𑁆𑀲𑁄𑀢𑁆𑀢𑀁, 𑀯𑀡𑁆𑀡𑀯𑀺𑀓𑀸𑀭𑁄 𑀘, 𑀢𑁂𑀲𑀁 𑀏𑀲𑀸 𑀯𑀲𑀢𑀺 𑀲𑁄𑀡𑁆𑀟𑀸. 𑀧𑀸𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀸 𑀲𑀼𑀭𑀸𑀲𑁄𑀡𑁆𑀟𑀸𑀬𑁂𑀯𑀺𑀥 𑀕𑀳𑀺𑀢𑀸. 𑀯𑀘𑁆𑀘𑀲𑁆𑀲 𑀕𑀽𑀣𑀲𑁆𑀲 𑀯𑀺𑀲𑀚𑁆𑀚𑀦𑀝𑁆𑀞𑀸𑀦𑀁 𑀯𑀘𑁆𑀘𑀝𑁆𑀞𑀸𑀦𑀁. 𑀯𑀘𑁆𑀘𑀲𑁆𑀲 𑀯𑀺𑀲𑀚𑁆𑀚𑀦𑀝𑁆𑀞𑀸𑀦𑀸 𑀓𑀼𑀝𑀺 𑀯𑀘𑁆𑀘𑀓𑀼𑀝𑀺. 𑀫𑀼𑀦𑀻𑀦𑀁 𑀇𑀲𑀻𑀦𑀁 𑀯𑀲𑀦𑀝𑁆𑀞𑀸𑀦𑀁 𑀅𑀲𑁆𑀲𑀫𑁄 𑀦𑀸𑀫, 𑀆 𑀓𑁄𑀥𑀁 𑀲𑀫𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀲𑁆𑀲𑀫𑁄, 𑀆 𑀪𑀼𑀲𑁄 𑀲𑀫𑁂𑀦𑁆𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄𑀢𑀺 𑀯𑀸 𑀅𑀲𑁆𑀲𑀫𑁄.

𑁨𑁧𑁩. 𑀢𑀺𑀓𑀁 𑀧𑀡𑁆𑀬𑀯𑀺𑀓𑁆𑀓𑀬𑀲𑀸𑀮𑀸𑀬𑀁. 𑀧𑀡 𑀩𑁆𑀬𑀯𑀳𑀸𑀭𑁂, 𑀧𑀡𑀺𑀢𑀩𑁆𑀩𑀸𑀢𑀺 𑀧𑀡𑁆𑀬𑀸, 𑀯𑀢𑁆𑀣𑀸𑀤𑀬𑁄, 𑀢𑁂 𑀏𑀢𑁆𑀣 𑀯𑀺𑀓𑁆𑀓𑀺𑀡𑀦𑁆𑀢𑀻𑀢𑀺 𑀧𑀡𑁆𑀬𑀯𑀺𑀓𑁆𑀓𑀬𑁄, 𑀓𑀻 𑀤𑀩𑁆𑀩𑀯𑀺𑀦𑀺𑀫𑀬𑁂, 𑀲𑁄 𑀏𑀯 𑀲𑀸𑀮𑀸 𑀕𑁂𑀳𑀦𑁆𑀢𑀺 𑀧𑀡𑁆𑀬𑀯𑀺𑀓𑁆𑀓𑀬𑀲𑀸𑀮𑀸. 𑀆𑀧𑀡𑀬𑀦𑁆𑀢𑁂 𑀩𑁆𑀬𑀯𑀳𑀭𑀦𑁆𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀧𑀡𑁄, 𑀡𑁄. 𑀧𑀡𑁆𑀬𑀸𑀦𑀁 𑀯𑀺𑀓𑁆𑀓𑀬𑀸𑀬 𑀦𑀻𑀬𑀫𑀸𑀦𑀸𑀦𑀁 𑀯𑀻𑀣𑀺 𑀧𑀦𑁆𑀣𑁄 𑀧𑀡𑁆𑀬𑀯𑀻𑀣𑀺𑀓𑀸. 𑀯𑀲 𑀅𑀘𑁆𑀙𑀸𑀤𑀦𑁂, 𑀢𑁄, 𑀉𑀤𑀓𑀁 𑀯𑀲𑀺𑀢𑀁 𑀅𑀘𑁆𑀙𑀸𑀤𑀦𑀁 𑀓𑀢𑀫𑀦𑁂𑀦𑀸𑀢𑀺 𑀉𑀤𑁄𑀲𑀺𑀢𑁄, 𑀯𑀲𑁆𑀲𑁄𑀢𑁆𑀢𑀁, 𑀪𑀡𑁆𑀟𑀝𑁆𑀞𑀧𑀦𑀲𑁆𑀲 𑀲𑀸𑀮𑀸 𑀪𑀡𑁆𑀟𑀲𑀸𑀮𑀸. 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂, 𑀘𑀗𑁆𑀓𑀫𑀢𑁆𑀬𑀢𑁆𑀭𑀸𑀢𑀺 𑀘𑀗𑁆𑀓𑀫𑀦𑀁, 𑀘𑀗𑁆𑀓𑀫𑁄 𑀘, 𑀤𑁆𑀯𑀺𑀢𑁆𑀢𑀸𑀤𑀺.

𑁨𑁧𑁪. 𑀚𑀮𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀦𑁆𑀢𑀸, 𑀚𑀮 𑀤𑀺𑀢𑁆𑀢𑀺𑀬𑀁, 𑀅𑀦𑁆𑀢𑁄, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅, 𑀆, 𑀮𑀮𑁄𑀧𑁄, 𑀚𑀦𑁂𑀢𑁆𑀬𑀢𑁆𑀭 𑀅𑀕𑁆𑀕𑀺𑀦𑁆𑀢𑀺 𑀯𑀸 𑀚𑀦𑁆𑀢𑀸, 𑀚𑀦 𑀚𑀦𑀦𑁂, 𑀅𑀦𑁆𑀢𑁄, 𑀲𑀸 𑀏𑀯 𑀖𑀭𑀁 𑀚𑀦𑁆𑀢𑀸𑀖𑀭𑀁. 𑀅𑀕𑁆𑀕𑀺𑀦𑁄 𑀲𑀸𑀮𑀸 𑀅𑀕𑁆𑀕𑀺𑀲𑀸𑀮𑀸. 𑀧𑀸 𑀧𑀺𑀯𑀦𑁂, 𑀧𑀧𑀺𑀯𑀦𑁆𑀢𑁆𑀬𑀲𑁆𑀲𑀦𑁆𑀢𑀺 𑀧𑀧𑀸, 𑀅. 𑀧𑀸𑀦𑀻𑀬𑀝𑁆𑀞𑀸 𑀲𑀸𑀮𑀸 𑀧𑀸𑀦𑀻𑀬𑀲𑀸𑀮𑀸, 𑀲𑀸 𑀏𑀯 𑀧𑀸𑀦𑀻𑀬𑀲𑀸𑀮𑀺𑀓𑀸.

𑀕𑀲 𑀕𑀫𑀦𑁂, 𑀪𑁄, 𑀲𑀲𑁆𑀲 𑀩𑁄. 𑀅𑀯𑀢𑀺 𑀭𑀓𑁆𑀔𑀢𑀻𑀢𑀺 𑀑𑀯𑀭𑀓𑁄, 𑀅𑀭𑁄, 𑀲𑀓𑀢𑁆𑀣𑁂 𑀓𑁄, 𑀅𑀲𑁆𑀲𑁄𑀢𑁆𑀢𑀜𑁆𑀘. 𑀯𑀲𑀦𑀁 𑀯𑀸𑀲𑁄, 𑀢𑀤𑀢𑁆𑀣𑀁 𑀅𑀕𑀸𑀭𑀁 𑀯𑀸𑀲𑀸𑀕𑀸𑀭𑀁. 𑀲𑀬𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀻, 𑀬𑀼, 𑀦𑀤𑀸𑀤𑀺, 𑀲𑀸 𑀏𑀯 𑀕𑀳𑀁 𑀲𑀬𑀦𑀺𑀕𑁆𑀕𑀳𑀁.

𑁨𑁧𑁫. 𑀘𑀢𑀼𑀓𑁆𑀓𑀁 𑀭𑀸𑀚𑀺𑀢𑁆𑀣𑀸𑀕𑀸𑀭𑁂, 𑀢𑀤𑀢𑁆𑀣𑀺𑀬𑀢𑁄 [𑀢𑀤𑀝𑁆𑀞𑀺𑀬𑀢𑁄 (𑀓.)] 𑀉𑀧𑀘𑀸𑀭𑁂𑀦 𑀭𑀸𑀚𑀺𑀢𑁆𑀣𑀻𑀲𑀼𑀧𑀺. 𑀭𑀸𑀚𑀺𑀢𑁆𑀣𑀻𑀦𑀫𑀕𑀸𑀭𑀁 𑀇𑀢𑁆𑀣𑀸𑀕𑀸𑀭𑀁. 𑀅𑀯𑀭𑀼𑀦𑁆𑀥𑀻𑀬𑀦𑁆𑀢𑁂 𑀭𑀸𑀚𑀺𑀢𑁆𑀣𑀺𑀬𑁄 𑀅𑀦𑁂𑀦𑀸𑀢𑀺 𑀑𑀭𑁄𑀥𑁄, 𑀭𑀼𑀥 𑀆𑀯𑀭𑀡𑁂. 𑀲𑀼𑀤𑁆𑀥𑀸 𑀓𑀸𑀫𑀸𑀧𑀕𑀫𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸 𑀭𑀓𑁆𑀔𑀓𑀸 𑀅𑀦𑁆𑀢𑁂 𑀲𑀫𑀻𑀧𑁂 𑀬𑀲𑁆𑀲𑀸𑀢𑀺 𑀲𑀼𑀤𑁆𑀥𑀦𑁆𑀢𑁄. 𑀅𑀦𑁆𑀢𑁂 𑀅𑀩𑁆𑀪𑀦𑁆𑀢𑀭𑁂 𑀧𑀼𑀭𑀁 𑀕𑁂𑀳𑀁 𑀅𑀦𑁆𑀢𑁂𑀧𑀼𑀭𑀁, 𑀧𑀼𑀭𑀲𑁆𑀲 𑀅𑀦𑁆𑀢𑁂𑀢𑀺 𑀯𑀸 𑀅𑀦𑁆𑀢𑁂𑀧𑀼𑀭𑀁. ‘‘𑀅𑀦𑁆𑀢𑁄𑀧𑀼𑀭’’𑀦𑁆𑀢𑀺𑀧𑀺 𑀧𑀸𑀞𑁄.

𑀭𑀜𑁆𑀜𑀁 𑀭𑀸𑀚𑀽𑀦𑀁 𑀅𑀲𑀩𑁆𑀩𑀯𑀺𑀲𑀬𑀝𑁆𑀞𑀸𑀦𑀁 𑀲𑀩𑁆𑀩𑁂𑀳𑁆𑀬𑀲𑀸𑀥𑀸𑀭𑀡𑀝𑁆𑀞𑀸𑀦𑀁 ‘‘𑀓𑀘𑁆𑀙𑀦𑁆𑀢𑀭’’𑀦𑁆𑀢𑀺 𑀫𑀢𑀁 𑀓𑀣𑀺𑀢𑀁, 𑀬𑀁 ‘‘𑀧𑀫𑀤𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀫𑀤𑀯𑀦𑀁 𑀦𑀸𑀫 𑀉𑀧𑀓𑀸𑀭𑀺𑀓𑀸𑀲𑀦𑁆𑀦𑀺𑀳𑀺𑀢𑀁 𑀯𑀸 𑀧𑀼𑀭𑀲𑀦𑁆𑀦𑀺𑀳𑀺𑀢𑀁 𑀯𑀸 𑀅𑀦𑁆𑀢𑁂𑀧𑀼𑀭𑁄𑀘𑀺𑀢𑀁, 𑀬𑀢𑁆𑀭 𑀅𑀦𑁆𑀢𑁂𑀧𑀼𑀭𑀲𑀳𑀺𑀢𑁄 𑀏𑀯 𑀭𑀸𑀚𑀸 𑀯𑀺𑀳𑀭𑀢𑀺, 𑀦𑀸𑀜𑁆𑀜𑀚𑀦𑀧𑁆𑀧𑀯𑁂𑀲𑁄 [𑀅𑀫𑀭 𑁧𑁪.𑁩]. 𑀧𑀫𑀤𑀸𑀦𑀁 𑀯𑀦𑀁 𑀧𑀫𑀤𑀯𑀦𑀁. 𑀦𑀺𑀧𑀸𑀢𑀦𑀸 𑀬𑀸𑀓𑀸𑀭𑀸𑀦𑀁 [𑀈𑀓𑀸𑀭 𑀆𑀓𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄] 𑀇𑀢𑁆𑀣𑀺𑀕𑀢𑀸𑀦𑀁 𑀭𑀲𑁆𑀲𑁄 𑀓𑁆𑀯𑀘𑀻𑀢𑀺𑀭𑀲𑁆𑀲𑁄. 𑀓𑀘𑁆𑀙𑀲𑁆𑀲 𑀧𑀓𑁄𑀝𑁆𑀞𑀲𑁆𑀲 𑀅𑀦𑁆𑀢𑀭𑀁 𑀅𑀩𑁆𑀪𑀦𑁆𑀢𑀭𑀁 𑀓𑀘𑁆𑀙𑀦𑁆𑀢𑀭𑀁. 𑀧𑀓𑁄𑀝𑁆𑀞𑀁 𑀦𑀸𑀫 𑀅𑀩𑁆𑀪𑀦𑁆𑀢𑀭𑀤𑁆𑀯𑀸𑀭𑀁.

𑁨𑁧𑁬. 𑀤𑁆𑀯𑀬𑀁 𑀇𑀝𑁆𑀞𑀓𑀸𑀤𑀺𑀭𑀘𑀺𑀢𑁂 𑀆𑀭𑁄𑀳𑀦𑁂. 𑀉𑀧𑀸𑀦𑁂𑀦 𑀲𑀳 𑀯𑀢𑁆𑀢𑀢𑁂𑀢𑀺 𑀲𑁄𑀧𑀸𑀦𑁄, 𑀲𑁄𑀧𑀸𑀦𑀁 𑀯𑀸 𑀦𑀧𑀼𑀁𑀲𑀓𑁂𑀧𑀺. 𑀆𑀭𑀽𑀬𑁆𑀳𑀢𑁂 𑀬𑁂𑀦 𑀢𑀁 𑀆𑀭𑁄𑀳𑀦𑀁, 𑀬𑀼, 𑀭𑀼𑀳 𑀚𑀦𑀦𑁂.

𑀤𑁆𑀯𑀬𑀁 𑀓𑀝𑁆𑀞𑀸𑀤𑀺𑀭𑀘𑀺𑀢𑀸𑀬𑀁. 𑀦𑀺𑀘𑁆𑀙𑀬𑁂𑀦 𑀲𑀬𑀦𑁆𑀢𑀺 𑀧𑀸𑀓𑀸𑀭𑀸𑀤𑀺𑀓𑀫𑁂𑀢𑀸𑀬𑀸𑀢𑀺 𑀦𑀺𑀲𑁆𑀲𑁂𑀡𑀻, 𑀲𑀺 𑀲𑁂𑀯𑀸𑀬𑀁, 𑀡𑀻, 𑀦𑀤𑀸𑀤𑀺. 𑀉𑀤𑁆𑀥𑀫𑀸𑀭𑁄𑀳𑀢𑁂 𑀏𑀢𑀸𑀬𑀸𑀢𑀺 𑀅𑀥𑀺𑀭𑁄𑀳𑀺𑀡𑀻, 𑀲𑀸𑀲𑀤𑁆𑀤𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁 𑀚𑁄𑀢𑁂𑀢𑀺.

𑁨𑁧𑁭. 𑀧𑀜𑁆𑀘𑀓𑀁 𑀚𑀸𑀮𑀓𑁂. 𑀯𑀸𑀢𑀁 𑀧𑀺𑀯𑀢𑀻𑀢𑀺 𑀯𑀸𑀢𑀧𑀸𑀦𑀁. 𑀕𑀯𑀁 𑀅𑀓𑁆𑀔𑀺 𑀕𑀯𑀓𑁆𑀔𑁄, 𑀲𑀫𑀸𑀲𑀦𑁆𑀢𑀢𑁆𑀢𑀸 𑀅, 𑀲𑀜𑁆𑀜𑀸𑀲𑀤𑁆𑀤𑀢𑁄 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁, 𑀅𑀓𑁆𑀔𑀺 𑀲𑀤𑁆𑀤𑁂 𑀯𑀸, 𑀕𑀯𑀁 𑀅𑀓𑁆𑀔𑀺 𑀕𑀯𑀓𑁆𑀔𑀻𑀢𑀺 𑀯𑀺𑀕𑁆𑀕𑀳𑁄. 𑀚𑀮 𑀤𑀺𑀢𑁆𑀢𑀺𑀬𑀁, 𑀚𑀸𑀮𑀁. 𑀲𑀻𑀳𑀭𑀽𑀧𑀬𑀼𑀢𑁆𑀢𑀁 𑀧𑀜𑁆𑀚𑀭𑀁 𑀲𑀻𑀳𑀧𑀜𑁆𑀚𑀭𑀁. 𑀆𑀮𑁄𑀓𑀸𑀦𑀁 𑀆𑀢𑀧𑀸𑀦𑀁 𑀧𑀯𑀺𑀲𑀦𑀝𑁆𑀞𑀸𑀦𑀁 𑀲𑀦𑁆𑀥𑀺 𑀙𑀺𑀤𑁆𑀤𑀦𑁆𑀢𑀺 𑀆𑀮𑁄𑀓𑀲𑀦𑁆𑀥𑀺, 𑀆𑀮𑁄𑀓𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀮𑁄𑀓𑁄, 𑀲𑁄 𑀏𑀯 𑀲𑀦𑁆𑀥𑀻𑀢𑀺 𑀯𑀸 𑀆𑀮𑁄𑀓𑀲𑀦𑁆𑀥𑀺.

𑀤𑁆𑀯𑀬𑀁 𑀮𑀗𑁆𑀕𑀺𑀬𑀁. 𑀮𑀕𑀺 𑀕𑀢𑁆𑀬𑀢𑁆𑀣𑁄, 𑀅, 𑀦𑀤𑀸𑀤𑀺. 𑀧𑀭𑀺 𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀸𑀕𑀫𑀦𑀯𑀲𑁂𑀦 𑀳𑀦𑁆𑀢𑀻𑀢𑀺 𑀧𑀮𑀺𑀖𑁄, 𑀡𑁄. 𑀓𑀧𑀺𑀭𑀽𑀧𑀫𑀢𑁆𑀣𑀓𑀢𑁆𑀢𑀸 𑀓𑀧𑀺𑀲𑀻𑀲𑁄. 𑀅𑀕𑁆𑀕𑀴𑀁 𑀦𑀸𑀫 𑀓𑀯𑀸𑀝𑀓𑁄 [𑀓𑀯𑀸𑀝𑀨𑀮𑀯𑀺𑀥𑀸𑀭𑀡𑁄 (𑀓.)], 𑀢𑀲𑁆𑀲 𑀣𑀫𑁆𑀪𑁄 𑀅𑀕𑁆𑀕𑀴𑀢𑁆𑀣𑀫𑁆𑀪𑁄, ‘‘𑀅𑀕𑁆𑀕𑀴𑀁 𑀢𑀻𑀲𑀼 𑀓𑀮𑁆𑀮𑁄𑀮𑁂, 𑀤𑀡𑁆𑀟𑁂 𑀘𑀸𑀦𑁆𑀢𑀓𑀯𑀸𑀝𑁂𑀲𑀽’’𑀢𑀺 𑀭𑀪𑀲𑁄, 𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄, 𑀅𑀕𑁆𑀕𑀴𑀸. 𑀦𑀺𑀲𑁆𑀲𑁂𑀲𑀢𑁄 𑀅𑀩𑁆𑀩𑀢𑀺 𑀯𑀲𑁆𑀲𑁄𑀤𑀓𑀫𑀦𑁂𑀦𑀸𑀢𑀺 𑀦𑀺𑀩𑁆𑀩𑀁, 𑀅𑀩𑁆𑀩 𑀕𑀢𑀺𑀳𑀺𑀁𑀲𑀸𑀲𑀼. 𑀙𑀤𑁆𑀤𑀲𑁆𑀲 𑀙𑀤𑀦𑀲𑁆𑀲 𑀓𑁄𑀝𑀺 𑀳𑁂𑀝𑁆𑀞𑀺𑀫𑀸𑀯𑀲𑀸𑀦𑀁 𑀙𑀤𑁆𑀤𑀓𑁄𑀝𑀺, 𑀢𑀲𑁆𑀲𑀁.

𑁨𑁧𑁮. 𑀢𑀺𑀓𑀁 𑀕𑁂𑀳𑀘𑁆𑀙𑀤𑀦𑁂. 𑀙𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀙𑀤𑀦𑀁, 𑀙𑀤 𑀲𑀁𑀯𑀭𑀡𑁂, 𑀘𑀼𑀭𑀸𑀤𑀺. 𑀧𑀝𑀕𑀫𑀦𑁂, ‘‘𑀧𑀝𑁆𑀬𑀸𑀤𑀻𑀳𑁆𑀬𑀮’’𑀦𑁆𑀢𑀺 𑀅𑀮𑁄. 𑀙𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀙𑀤𑁆𑀤𑀁, 𑀤𑁆𑀯𑀺𑀢𑁆𑀢𑀸𑀤𑀺.

𑀢𑀺𑀓𑀁 𑀕𑁂𑀳𑀗𑁆𑀕𑀡𑁂. 𑀅𑀚 𑀕𑀢𑀺𑀫𑁆𑀳𑀺, 𑀇𑀭𑁄, 𑀅𑀚𑀺𑀭𑀁. 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀘𑀭𑁄. 𑀅𑀗𑁆𑀕 𑀕𑀫𑀦𑁂, 𑀓𑀭𑀡𑀸𑀥𑀺𑀓𑀭𑀡𑁂𑀲𑀼 𑀬𑀼, 𑀯𑀡𑁆𑀡𑀯𑀺𑀓𑀸𑀭𑁄, 𑀡𑀢𑁆𑀢𑀁.

𑀧𑀜𑁆𑀘𑀓𑀁 𑀕𑁂𑀳𑀤𑁆𑀯𑀸𑀭𑀢𑁄 𑀩𑀳𑀺𑀧𑀓𑁄𑀝𑁆𑀞𑀓𑁂, 𑀯𑀻𑀣𑀺𑀬𑀁 𑀤𑁆𑀯𑀸𑀭𑀧𑀺𑀡𑁆𑀟𑀓𑁂 𑀘. 𑀅𑀮𑀺𑀦𑁆𑀤𑁄 𑀢𑁆𑀯𑀜𑁆𑀜𑀧𑀺𑀡𑁆𑀟𑀓𑁂𑀧𑀺𑀘𑁆𑀙𑀢𑁂. 𑀧𑀞𑀫𑀁 𑀳𑀦𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀖𑀸𑀡𑁄, 𑀧𑀖𑀡𑁄 𑀘, 𑀳𑀦𑀲𑁆𑀲 𑀖𑀡𑀸𑀤𑁂𑀲𑁄. 𑀅𑀮𑀺 𑀲𑀔𑀸 𑀇𑀦𑁆𑀤𑁄 𑀏𑀢𑁆𑀣𑀸𑀢𑀺 𑀅𑀮𑀺𑀦𑁆𑀤𑁄, ‘‘𑀕𑁂𑀳𑁂𑀓𑀤𑁂𑀲𑁂 𑀅𑀮𑀺𑀦𑁆𑀤𑁄, 𑀧𑀖𑀸𑀡𑁄 𑀧𑀖𑀡𑁄𑀪𑀯𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁨.𑁧𑁨] 𑀅𑀫𑀭𑀫𑀸𑀮𑀸𑀬𑀁. 𑀆𑀮𑀺𑀦𑁆𑀤𑁄, 𑀤𑀻𑀖𑀸𑀤𑀺. 𑀧𑀥𑀸𑀦𑀁 𑀫𑀼𑀔𑀁 𑀧𑀫𑀼𑀔𑀁, 𑀕𑁂𑀳𑀲𑁆𑀲 𑀳𑀺 𑀘𑀢𑀽𑀲𑀼 𑀫𑀼𑀔𑁂𑀲𑀼 𑀢𑀤𑁂𑀯 𑀧𑀥𑀸𑀦𑀁, 𑀬𑀢𑁆𑀣 𑀲𑀸𑀥𑀼𑀚𑀦𑀸𑀧𑀺 𑀆𑀕𑀦𑁆𑀢𑀼𑀓𑀸𑀧𑀺 𑀦𑀺𑀲𑀻𑀤𑀦𑁆𑀢𑀺. 𑀤𑁆𑀯𑀸𑀭𑀁 𑀩𑀦𑁆𑀥𑀢𑀺 𑀧𑀺𑀤𑀳𑀢𑀺 𑀏𑀢𑁆𑀣𑀸𑀢𑀺 𑀤𑁆𑀯𑀸𑀭𑀩𑀦𑁆𑀥𑀦𑀁.

𑁨𑁧𑁯. 𑀤𑁆𑀯𑀬𑀁 𑀤𑁆𑀯𑀸𑀭𑀩𑀸𑀳𑀸𑀬𑀁. 𑀧𑀻𑀞𑀸𑀦𑀺 𑀮𑁄𑀳𑀯𑀺𑀓𑀢𑀺𑀆𑀤𑀻𑀳𑀺 𑀲𑀗𑁆𑀖𑀝𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀻𑀞𑀲𑀗𑁆𑀖𑀸𑀝𑀓𑀁, 𑀧𑀻𑀞𑁂𑀳𑀺 𑀲𑀗𑁆𑀖𑀝𑀻𑀬𑀢𑀻𑀢𑀺 𑀯𑀸 𑀧𑀻𑀞𑀲𑀗𑁆𑀖𑀸𑀝𑀓𑀁, 𑀖𑀝 𑀖𑀝𑀦𑁂. 𑀤𑁆𑀯𑀺𑀪𑀸𑀕𑁂𑀦 𑀩𑀸𑀳𑀸𑀲𑀤𑀺𑀲𑀢𑁆𑀢𑀸 𑀩𑀸𑀳𑀸, 𑀤𑁆𑀯𑀸𑀭𑀲𑁆𑀲 𑀩𑀸𑀳𑀸 𑀤𑁆𑀯𑀸𑀭𑀩𑀸𑀳𑀸. ‘‘𑀓𑀧𑀸𑀝𑀁, 𑀓𑀯𑀸𑀝’’𑀦𑁆𑀢𑀺𑀧𑀺 𑀤𑁆𑀯𑀸𑀭𑀩𑀸𑀳𑀸𑀬 𑀦𑀸𑀫𑀸𑀦𑀺, 𑀓𑀁 𑀯𑀸𑀢𑀁 𑀧𑀸𑀝𑀬𑀢𑀺, 𑀯𑀸𑀝𑀬𑀢𑀺 𑀘𑁂𑀢𑀺 𑀓𑀫𑁆𑀫𑀦𑀺 𑀡𑁄, 𑀇𑀢𑁆𑀣𑀺𑀬𑀁 𑀓𑀧𑀸𑀝𑀻.

𑀤𑁆𑀯𑀬𑀁 𑀕𑁂𑀳𑀸𑀤𑀻𑀦𑀁 𑀓𑀽𑀝𑁂. 𑀓𑀼𑀝 𑀙𑁂𑀤𑀦𑁂, 𑀓𑀫𑁆𑀫𑀦𑀺 𑀡𑁄. 𑀦𑀬 𑀕𑀫𑀦𑀢𑁆𑀣𑁄, 𑀓𑁂 𑀲𑀻𑀲𑁂 𑀦𑀬𑀢𑀻𑀢𑀺 𑀓𑀡𑁆𑀡𑀻𑀓𑀸, 𑀡𑁆𑀯𑀼, 𑀇𑀢𑁆𑀢𑀁, 𑀡𑀢𑁆𑀢𑀜𑁆𑀘.

𑁨𑁨𑁦. 𑀤𑁆𑀯𑀬𑀁 𑀤𑁆𑀯𑀸𑀭𑁂. 𑀤𑁆𑀯𑁂 𑀅𑀭𑀦𑁆𑀢𑁆𑀬𑀢𑁆𑀭𑀸𑀢𑀺 𑀤𑁆𑀯𑀸𑀭𑀁, 𑀤𑀼𑀚𑁆𑀚𑀦𑁂 𑀯𑀸𑀭𑀬𑀦𑁆𑀢𑁆𑀬𑀲𑁆𑀫𑀸 𑀭𑀓𑁆𑀔𑀓𑀸𑀢𑀺 𑀯𑀸 𑀤𑁆𑀯𑀸𑀭𑀁, 𑀉𑀮𑁄𑀧𑁄. 𑀧𑀝𑀺𑀳𑀭𑀦𑁆𑀢𑀺 𑀅𑀧𑀦𑁂𑀦𑁆𑀢𑀺 𑀏𑀢𑀲𑁆𑀫𑀸 𑀭𑀓𑁆𑀔𑀓𑀸 𑀅𑀜𑁆𑀜𑀸𑀢𑀦𑁆𑀢𑀺 𑀧𑀝𑀺𑀳𑀭𑁄, 𑀧𑀝𑀺𑀧𑀓𑁆𑀔𑁂 𑀳𑀭𑀢𑀺 𑀏𑀢𑀲𑁆𑀫𑀸𑀢𑀺 𑀯𑀸 𑀧𑀝𑀺𑀳𑀭𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑁆𑀢𑁂 𑀧𑀝𑀺𑀳𑀸𑀭𑁄.

𑀘𑀢𑀼𑀓𑁆𑀓𑀁 𑀉𑀫𑁆𑀫𑀸𑀭𑁂, 𑀬𑀁 ‘‘𑀤𑁆𑀯𑀸𑀭𑀧𑀺𑀡𑁆𑀟𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀭 𑀕𑀢𑀺𑀫𑁆𑀳𑀺, 𑀫𑀸𑀭𑁄 𑀓𑀭𑀡𑁂. 𑀤𑁂𑀳𑀁 𑀦𑁂𑀢𑀺 𑀧𑀯𑁂𑀲𑁂𑀦𑀸𑀢𑀺 𑀤𑁂𑀳𑀦𑀻, ‘‘𑀤𑁂𑀳𑀮𑀻’’𑀢𑀺𑀧𑀺 𑀧𑀸𑀞𑁄, 𑀤𑁂𑀳𑀁 𑀮𑀸𑀢𑀺 𑀧𑀯𑁂𑀲𑁂𑀦𑀸𑀢𑀺 𑀤𑁂𑀳𑀮𑀻. 𑀇𑀮 𑀕𑀢𑀺𑀫𑁆𑀳𑀺, 𑀡𑁆𑀯𑀼. 𑀇𑀦𑁆𑀤𑁄 𑀏𑀯 𑀧𑀸𑀤𑀁 𑀔𑀺𑀧𑀢𑀺 𑀏𑀢𑁆𑀣𑀸𑀢𑀺 𑀇𑀦𑁆𑀤𑀔𑀻𑀮𑁄, 𑀔𑀺𑀧 𑀧𑁂𑀭𑀡𑁂. 𑀧𑀲𑁆𑀲 𑀮𑁄𑀧𑁄, 𑀅𑀣 𑀯𑀸 𑀇𑀁 𑀕𑀫𑀦𑀁 𑀤𑀤𑀸𑀢𑀻𑀢𑀺 𑀇𑀦𑁆𑀤𑁄, 𑀤𑁆𑀯𑀸𑀭𑀁, 𑀢𑀢𑁆𑀣 𑀞𑀧𑀺𑀢𑁄 𑀔𑀻𑀮𑁄 𑀓𑀡𑁆𑀝𑀓𑁄𑀢𑀺 𑀇𑀦𑁆𑀤𑀔𑀻𑀮𑁄, 𑀯𑁂𑀕𑀕𑀪𑀺𑀖𑀸𑀢𑀦𑀢𑁄 𑀳𑀺 𑀲𑁄 𑀔𑀻𑀮𑁄 𑀯𑀺𑀬 𑀳𑁄𑀢𑀺.

𑀣𑀫𑁆𑀪 𑀧𑀝𑀺𑀩𑀦𑁆𑀥𑀦𑁂, 𑀣𑀫𑁆𑀪𑁄, 𑀥𑀸𑀭𑁂𑀢𑀻𑀢𑀺 𑀯𑀸 𑀣𑀫𑁆𑀪𑁄, 𑀥𑀭 𑀥𑀭𑀡𑁂, 𑀭𑀫𑁆𑀪𑀧𑀘𑁆𑀘𑀬𑁄, 𑀯𑀡𑁆𑀡𑀯𑀺𑀓𑀸𑀭𑁄 𑀘. 𑀣𑀼 𑀅𑀪𑀺𑀢𑁆𑀣𑀯𑁂, 𑀉𑀡𑁄, 𑀬𑀼 𑀯𑀸, 𑀥𑀸𑀭𑁂𑀢𑀻𑀢𑀺 𑀯𑀸 𑀣𑀽𑀡𑁄, 𑀬𑀼, 𑀭𑀮𑁄𑀧𑁄, 𑀅𑀲𑁆𑀲𑀽.

𑀅𑀟𑁆𑀠𑁂𑀦𑁆𑀤𑀼𑀧𑀸𑀲𑀸𑀡𑁂 𑀅𑀤𑁆𑀥𑀘𑀦𑁆𑀤𑀸𑀓𑀸𑀭𑁂 𑀧𑀸𑀲𑀸𑀡𑁂 𑀧𑀝𑀺𑀓𑀸𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀧𑀝 𑀕𑀢𑀺𑀬𑀁, 𑀡𑁆𑀯𑀼. 𑀇𑀢𑁆𑀣𑀺𑀓𑀢𑀸𑀓𑀸𑀭𑀧𑀭𑁂 𑀓𑁂 𑀅𑀲𑁆𑀲𑀺𑀢𑁆𑀢𑀁. 𑀕𑀚𑀺 𑀲𑀤𑁆𑀤𑁂, 𑀡𑁆𑀯𑀼, 𑀅𑀲𑁆𑀲𑀺𑀢𑁆𑀢𑀁, 𑀩𑀺𑀦𑁆𑀤𑀸𑀕𑀫𑁄 𑀘. 𑀇𑀲 𑀇𑀘𑁆𑀙𑀸𑀬𑀁, 𑀞𑀓𑁄.

𑁨𑁨𑁧. 𑀯𑀮𑀪𑀻𑀢𑀺 𑀘𑀽𑀴𑀸, ‘‘𑀲𑀺𑀔𑀸𑀬𑀁 𑀯𑀮𑀪𑀻 𑀘𑀽𑀴𑁂’’𑀢𑀺 𑀭𑀼𑀤𑁆𑀤𑁄 [𑀭𑀲𑁆𑀲𑀦𑁆𑀢𑀸 𑀘, 𑀲𑀺𑀔𑀸𑀬𑀁 𑀯𑀴𑀪𑀺𑀬𑀁 𑀘𑀽𑀴𑁂𑀢𑀺 𑀭𑀼𑀤𑁆𑀤𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁨.𑁧𑁫)]. 𑀢𑀘𑁆𑀙𑀸𑀤𑀦𑁂 𑀤𑀸𑀭𑀼𑀫𑁆𑀳𑀺 𑀓𑀝𑁆𑀞𑁂 𑀕𑁄𑀧𑀸𑀦𑀲𑀻 𑀫𑀢𑀸. 𑀯𑀗𑁆𑀓𑁂𑀢𑀺 𑀤𑀸𑀭𑀼𑀯𑀺𑀲𑁂𑀲𑀦𑀁. 𑀕𑀁 𑀯𑀲𑁆𑀲𑁄𑀤𑀓𑀁, 𑀲𑀽𑀭𑀺𑀬𑀸𑀤𑀺𑀓𑀺𑀭𑀡𑀜𑁆𑀘 𑀧𑀺𑀯𑀦𑁆𑀢𑀺 𑀯𑀺𑀦𑀸𑀲𑀬𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀫𑀧𑁆𑀧𑀯𑁂𑀲𑀦𑀯𑀲𑁂𑀦𑀸𑀢𑀺 𑀕𑁄𑀧𑀸𑀦𑀸, 𑀇𑀝𑁆𑀞𑀓𑀸𑀤𑀬𑁄, 𑀢𑀸𑀦𑀺 𑀲𑀺𑀦𑁄𑀦𑁆𑀢𑀺 𑀩𑀦𑁆𑀥𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀧𑀸𑀦𑀲𑀻.

𑀲𑁄𑀥𑀸𑀤𑀺𑀕𑁂𑀳𑁂𑀲𑀼 𑀙𑁂𑀓𑀧𑀓𑁆𑀔𑀸𑀯𑀸𑀲𑀢𑁆𑀣𑀁 𑀬𑁄 𑀩𑀳𑀺 𑀓𑀭𑀺𑀬 𑀓𑀝𑁆𑀞𑁂𑀓𑀤𑁂𑀲𑁄 𑀞𑀧𑀻𑀬𑀢𑁂, 𑀲𑁄 𑀯𑀺𑀝𑀗𑁆𑀓𑁄. 𑀓𑀧𑁄𑀢𑁂 𑀧𑀸𑀮𑀬𑀢𑀻𑀢𑀺 𑀓𑀧𑁄𑀢𑀧𑀸𑀮𑀺𑀓𑀸, 𑀓𑀫𑁆𑀫𑀦𑀺 𑀡𑁆𑀯𑀼. 𑀝𑀓𑀺 𑀦𑀺𑀯𑀸𑀲𑀕𑀢𑀻𑀲𑀼. 𑀯𑀺𑀦𑁄 𑀧𑀓𑁆𑀔𑀺𑀦𑁄 𑀝𑀗𑁆𑀓𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀝𑀗𑁆𑀓𑁄. 𑀡𑁄.

𑁨𑁨𑁨. 𑀤𑁆𑀯𑀬𑀁 𑀓𑀼𑀜𑁆𑀘𑀺𑀓𑀸𑀙𑀺𑀤𑁆𑀤𑁂. 𑀓𑀼𑀜𑁆𑀘𑀺𑀓𑀸𑀬 𑀯𑀺𑀯𑀭𑀁 𑀙𑀺𑀤𑁆𑀤𑀁 𑀓𑀼𑀜𑁆𑀘𑀺𑀓𑀸𑀯𑀺𑀯𑀭𑀁. 𑀢𑀸𑀴𑀲𑁆𑀲 𑀧𑀯𑁂𑀲𑀦𑀝𑁆𑀞𑀸𑀦𑀪𑀽𑀢𑁄 𑀙𑀺𑀕𑁆𑀕𑀴𑁄 𑀙𑀺𑀤𑁆𑀤𑀁 𑀢𑀸𑀴𑀘𑁆𑀙𑀺𑀕𑁆𑀕𑀴𑁄.

𑀢𑀺𑀓𑀁 𑀓𑀼𑀜𑁆𑀘𑀺𑀓𑀸𑀬𑀁. 𑀓𑀼𑀜𑁆𑀘 𑀓𑁄𑀝𑀺𑀮𑁆𑀬𑁂, 𑀡𑁆𑀯𑀼. 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀮𑁄. 𑀅𑀮𑁄, 𑀢𑀮𑀢𑀺 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀢𑀸𑀮𑁄, 𑀢𑀮 𑀧𑀢𑀺𑀝𑁆𑀞𑀸𑀬𑀁. 𑀅𑀯𑀸𑀧𑀼𑀭𑀢𑀺 𑀯𑀺𑀯𑀭𑀢𑀺 𑀬𑁂𑀦𑀸𑀢𑀺 𑀅𑀯𑀸𑀧𑀼𑀭𑀡𑀁, 𑀯𑀭 𑀲𑀁𑀯𑀭𑀡𑁂, 𑀬𑀼, 𑀯𑀲𑁆𑀲 𑀧𑁄, 𑀉𑀢𑁆𑀢𑀁, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑀢𑀸 𑀘, ‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸’’𑀢𑀺 [𑀤𑀻. 𑀦𑀺. 𑁨.𑁭𑁧; 𑀫. 𑀦𑀺. 𑁧.𑁨𑁮𑁩] 𑀯𑀘𑀦𑀢𑁄 𑀧𑀼𑀭, 𑀧𑀸𑀭 𑀲𑀁𑀯𑀭𑀡𑁂𑀢𑀺𑀧𑀺 𑀥𑀸𑀢𑁆𑀯𑀢𑁆𑀣𑀁 𑀧𑀞𑀦𑁆𑀢𑀺. 𑀅𑀯𑀧𑀼𑀩𑁆𑀩𑁄 𑀯𑀼 𑀲𑀁𑀯𑀭𑀡𑁂𑀢𑀺𑀧𑀺 𑀥𑀸𑀢𑁆𑀯𑀢𑁆𑀣𑁂 𑀧𑀦 𑀲𑀢𑀺 𑀯𑀲𑁆𑀲 𑀭𑀢𑁆𑀢𑀁, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑀢𑀸 𑀘, ‘‘𑀅𑀧𑀸𑀭𑀼𑀢𑀸, 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸’’𑀢𑁆𑀬𑀸𑀤𑀻𑀲𑀼 𑀧𑀦 𑀧𑀓𑀸𑀭𑀯𑀡𑁆𑀡𑀸𑀕𑀫𑁂𑀦 𑀲𑀺𑀤𑁆𑀥𑁄. 𑀯𑀺𑀤 𑀮𑀸𑀪𑁂, 𑀇𑀫𑁆𑀳𑀺 𑀯𑁂𑀤𑀺𑀓𑀸, 𑀲𑀓𑀢𑁆𑀣𑁂 𑀓𑁄. 𑀇𑀢𑀭𑀢𑁆𑀣 𑀇𑀬𑁂𑀯.

𑁨𑁨𑁩. 𑀲𑀗𑁆𑀖𑀸𑀝𑀸𑀤𑀬𑁄 𑀫𑀦𑁆𑀤𑀺𑀭𑀗𑁆𑀕𑀸 𑀕𑁂𑀳𑀗𑁆𑀕𑀯𑀺𑀲𑁂𑀲𑀸. 𑀲𑀫𑁆𑀫𑀸 𑀖𑀝𑁂𑀦𑁆𑀢𑀺 𑀏𑀢𑁆𑀣 𑀕𑁄𑀧𑀸𑀦𑀲𑁆𑀬𑀸𑀤𑀬𑁄𑀢𑀺 𑀲𑀗𑁆𑀖𑀸𑀝𑁄, 𑀧𑀼𑀩𑁆𑀩𑀧𑀘𑁆𑀙𑀺𑀫𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀬𑀸𑀫𑀯𑀲𑁂𑀦 𑀣𑀫𑁆𑀪𑀸𑀦𑀫𑀼𑀧𑀭𑀺 𑀞𑀺𑀢𑁄 𑀓𑀝𑁆𑀞𑀯𑀺𑀲𑁂𑀲𑁄, 𑀢𑁂 𑀧𑀦 𑀧𑀼𑀩𑁆𑀩𑀧𑀘𑁆𑀙𑀺𑀫𑀬𑀸𑀫𑀸 𑀢𑀬𑁄 𑀓𑀝𑁆𑀞𑀸, 𑀤𑀓𑁆𑀔𑀺𑀡𑀼𑀢𑁆𑀢𑀭𑀬𑀸𑀫𑀸 𑀧𑀦 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀢𑀬𑁄 𑀓𑀝𑁆𑀞𑀸, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 𑀧𑀜𑁆𑀘𑀲𑀢𑁆𑀢𑀦𑀯𑀸𑀤𑀬𑁄𑀧𑀺. 𑀤𑁆𑀯𑀺𑀦𑁆𑀦𑀁 𑀧𑀓𑁆𑀔𑀸𑀦𑀁 𑀅𑀧𑀢𑀦𑀢𑁆𑀣𑀁 𑀩𑀦𑁆𑀥𑀦𑀢𑁄 𑀧𑀸𑀲𑁄 𑀯𑀺𑀬𑀸𑀢𑀺 𑀧𑀓𑁆𑀔𑀧𑀸𑀲𑁄. 𑀢𑀼𑀮𑀢𑀺 𑀲𑀗𑁆𑀖𑀸𑀝𑁂𑀲𑀼 𑀧𑀢𑀺𑀝𑁆𑀞𑀢𑀻𑀢𑀺 𑀢𑀼𑀮𑀸, 𑀢𑀮 𑀧𑀢𑀺𑀝𑁆𑀞𑀸𑀬𑀁, 𑀅𑀲𑁆𑀲𑀼𑀢𑁆𑀢𑀁, 𑀧𑀓𑁆𑀔𑀸𑀦𑀁 𑀯𑀸 𑀲𑀫𑀯𑀸𑀳𑀺𑀢𑀪𑀸𑀯𑀓𑀭𑀡𑀢𑁄 𑀢𑀼𑀮𑀬𑀢𑀺 𑀫𑀺𑀦𑀸𑀢𑀺 𑀏𑀢𑀸𑀬𑀸𑀢𑀺 𑀢𑀼𑀮𑀸, 𑀢𑀼𑀮 𑀉𑀫𑁆𑀫𑀸𑀦𑁂.

𑀢𑀺𑀓𑀁 𑀲𑀫𑁆𑀫𑀚𑁆𑀚𑀦𑀺𑀬𑀁. 𑀫𑀼𑀚𑀺 𑀲𑁄𑀥𑀦𑁂, 𑀬𑀼. 𑀫𑀚𑁆𑀚 𑀲𑀁𑀲𑀼𑀤𑁆𑀥𑀺𑀬𑀁, 𑀬𑀼. 𑀲𑀼𑀥 𑀲𑀼𑀤𑁆𑀥𑀺𑀬𑀁, 𑀲𑀩𑁆𑀩𑀢𑁆𑀭 𑀓𑀭𑀡𑁂 𑀬𑀼.

𑁨𑁨𑁪. 𑀢𑀺𑀓𑀁 𑀲𑀗𑁆𑀓𑀸𑀭𑀙𑀟𑁆𑀟𑀦𑀧𑁆𑀧𑀤𑁂𑀲𑁂. 𑀓𑀝 𑀙𑀟𑁆𑀟𑀦𑀫𑀤𑁆𑀤𑀦𑁂𑀲𑀼, 𑀲𑀗𑁆𑀓𑀝𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀝𑀻𑀭𑀁, 𑀈𑀭𑁄, ‘‘𑀲𑀗𑁆𑀓𑀝𑁄’’𑀢𑀺 𑀯𑀸 𑀲𑀗𑁆𑀓𑀸𑀭𑁄 𑀯𑀼𑀘𑁆𑀘𑀢𑀺, 𑀢𑀁 𑀈𑀭𑀬𑀦𑁆𑀢𑀺 𑀔𑀺𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀝𑀻𑀭𑀁, 𑀈𑀭 𑀔𑁂𑀧𑁂. 𑀲𑀗𑁆𑀓𑀸𑀭𑀲𑁆𑀲 𑀞𑀸𑀦𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑀁. 𑀲𑀗𑁆𑀓𑀸𑀭𑀁 𑀓𑀝𑀢𑀺 𑀙𑀟𑁆𑀟𑁂𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀸𑀭𑀓𑀽𑀝𑀁, 𑀅𑀲𑁆𑀲𑀽, 𑀲𑀓𑀢𑁆𑀣𑁂 𑀓𑁄.

𑀘𑀢𑀼𑀓𑁆𑀓𑀁 𑀲𑀫𑁆𑀫𑀚𑁆𑀚𑀦𑀺𑀬𑀸 𑀦𑀺𑀭𑀸𑀓𑀢𑁂 [𑀦𑀺𑀭𑀲𑁆𑀲𑀢𑁂 (𑀓.)] 𑀣𑀼𑀲𑀸𑀤𑀺𑀫𑁆𑀳𑀺. 𑀦𑀸𑀦𑀸𑀯𑀺𑀥𑁂 𑀲𑀗𑁆𑀓𑀸𑀭𑁂 𑀭𑀸𑀲𑀻𑀓𑀭𑀡𑀯𑀲𑁂𑀦 𑀓𑀘𑀢𑀺 𑀩𑀦𑁆𑀥𑀢𑀺 𑀏𑀢𑁂𑀦𑀸𑀢𑀺 𑀓𑀘𑁄, 𑀲𑁄 𑀏𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀓𑀘𑀯𑀭𑁄, 𑀯𑀭 𑀇𑀘𑁆𑀙𑀸𑀬𑀁. 𑀉𑀘𑁆𑀙𑀺𑀝𑁆𑀞𑁄 𑀓𑀮𑀸𑀧𑁄 𑀲𑀫𑀽𑀳𑁄 𑀉𑀓𑁆𑀮𑀸𑀧𑁄, 𑀓𑀲𑁆𑀲𑀸𑀓𑀸𑀭𑀮𑁄𑀧𑁄. 𑀦𑀸𑀦𑀸𑀯𑀺𑀥𑁂𑀳𑀺 𑀢𑀺𑀡𑀸𑀤𑀻𑀳𑀺 𑀲𑀗𑁆𑀓𑀭𑀻𑀬𑀢𑁂 𑀫𑀺𑀲𑁆𑀲𑀻𑀓𑀭𑀻𑀬𑀢𑁂𑀢𑀺 𑀲𑀗𑁆𑀓𑀸𑀭𑁄, 𑀡𑁄. 𑀅𑀯𑀓𑀭𑁄𑀢𑀺𑀧𑁆𑀬𑀢𑁆𑀭. 𑀅𑀯𑀓𑀭𑀻𑀬𑀢𑁂 𑀦𑀺𑀭𑀲𑁆𑀲𑀢𑁂𑀢𑀺, 𑀅. ‘‘𑀲𑀫𑁆𑀫𑀚𑁆𑀚𑁄 𑀫𑀚𑁆𑀚𑀦𑀻 𑀘𑁂𑀯, 𑀲𑀗𑁆𑀓𑀸𑀭𑁄’𑀯𑀓𑀭𑁄 𑀫𑀢𑁄’’𑀢𑀺 𑀳𑀮𑀸𑀬𑀼𑀥𑁄. 𑀓𑀲 𑀯𑀺𑀮𑁂𑀔𑀦𑁂, 𑀅𑀫𑁆𑀩𑀼.

𑁨𑁨𑁫. 𑀖𑀭𑀸𑀤𑀺𑀪𑀽𑀫𑀺 𑀖𑀭𑀔𑁂𑀢𑁆𑀢𑀯𑀺𑀳𑀸𑀭𑀸𑀤𑀻𑀦𑀁 𑀬𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀯𑀢𑁆𑀣𑀼 𑀦𑀸𑀫, 𑀢𑀁 𑀦𑀧𑀼𑀁𑀲𑀓𑁂, 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀭𑀢𑁆𑀣𑀼. 𑀕𑀲 𑀫𑀤𑀦𑁂, 𑀕𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑀸𑀫𑁄, 𑀫𑁄. 𑀲𑀁𑀯𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀲𑀁𑀯𑀲𑀣𑁄, 𑀅𑀣𑁄.

𑀧𑀸𑀓𑀝𑁄 𑀔𑁆𑀬𑀸𑀢𑁄 𑀕𑀸𑀫𑁄, 𑀲𑁄 𑀦𑀺𑀕𑀫𑁄 𑀦𑀸𑀫, 𑀅𑀢𑀺𑀭𑁂𑀓𑁄 𑀕𑀸𑀫𑁄 𑀦𑀺𑀕𑀫𑁄, 𑀪𑀼𑀲𑀢𑁆𑀣𑁄 𑀦𑀺, 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀭𑀲𑁆𑀲𑁄.

𑀉𑀧𑀪𑀼𑀜𑁆𑀚𑀺𑀢𑀩𑁆𑀩𑀪𑁄𑀕𑀫𑀦𑀼𑀲𑁆𑀲𑀸𑀤𑀻𑀳𑀺 ( ) [(𑀇𑀪𑁆𑀬𑁄) (?)] 𑀯𑀟𑁆𑀠𑀺𑀢𑁄 𑀅𑀥𑀺𑀓𑁄 𑀕𑀸𑀫𑁄 𑀦𑀺𑀕𑀫𑀢𑁄𑀧𑀺 𑀅𑀥𑀺𑀓𑀢𑀭𑀢𑁆𑀢𑀸 ‘‘𑀅𑀥𑀺𑀪𑀽’’𑀢𑀺 𑀈𑀭𑀺𑀢𑁄 𑀓𑀣𑀺𑀢𑁄, 𑀅𑀥𑀺𑀓𑁄 𑀪𑀯𑀢𑀻𑀢𑀺 𑀅𑀥𑀺𑀪𑀽.

𑁨𑁨𑁬. 𑀤𑁆𑀯𑀬𑀁 𑀕𑀸𑀫𑀸𑀤𑀺𑀧𑀭𑀺𑀬𑀦𑁆𑀢𑀪𑀸𑀕𑁂. 𑀲𑀺 𑀩𑀦𑁆𑀥𑀦𑁂, 𑀫𑁄. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀤𑀻𑀬𑀢𑁂𑀢𑀺 𑀫𑀭𑀺𑀬𑀸𑀤𑀸, 𑀧𑀲𑁆𑀲 𑀫𑁄.

𑀤𑁆𑀯𑀬𑀁 𑀆𑀪𑀻𑀭𑀓𑀼𑀝𑀺𑀬𑀁 [𑀖𑁄𑀲𑁄 𑀆𑀪𑀻𑀭𑀧𑀮𑁆𑀮𑀻 𑀲𑀺𑀬𑀸 (𑀅𑀫𑀭 𑁧𑁨.𑁨𑁦)]. 𑀖𑀼 𑀲𑀤𑁆𑀤𑁂, 𑀖𑁄𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀖𑁄𑀲𑁄. 𑀕𑁄𑀧𑀸𑀮𑀸𑀦𑀁 𑀕𑀸𑀫𑁄 𑀕𑁄𑀧𑀸𑀮𑀕𑀸𑀫𑀓𑁄, 𑀲𑀓𑀢𑁆𑀣𑁂 𑀓𑁄.

𑀧𑀼𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀭𑀯𑀕𑁆𑀕𑀯𑀡𑁆𑀡𑀦𑀸

𑁨𑁨𑁭-𑁨𑁨𑁮. 𑀧𑁄𑀭𑀺𑀲𑀦𑁆𑀢𑀸𑀦𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀦𑀸𑀫𑀸𑀦𑀺. 𑀫𑀦𑁄 𑀉𑀲𑁆𑀲𑀦𑁆𑀦𑀫𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁄, 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀸 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀸, 𑀓𑁂 𑀧𑀦 𑀢𑁂? 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺, 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 [𑀅. 𑀦𑀺. 𑁯.𑁨𑁧]. 𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀅𑀜𑁆𑀜𑁂 𑀘 𑀫𑀳𑀸𑀦𑀼𑀪𑀸𑀯𑀸 𑀲𑀢𑁆𑀢𑀸 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀧𑀦 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 𑀫𑀦𑀼𑀲𑁆𑀲𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀽𑀢𑀺 𑀏𑀓𑁂, 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀮𑁄𑀪𑀸𑀤𑀻𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀤𑀢𑀸𑀬 𑀫𑀦𑀼𑀲𑁆𑀲𑀸, 𑀬𑁂 𑀳𑀺 𑀲𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑁄𑀪𑀸𑀤𑀬𑁄, 𑀅𑀮𑁄𑀪𑀸𑀤𑀬𑁄 𑀘 𑀉𑀲𑁆𑀲𑀤𑀸, 𑀢𑁂 𑀮𑁄𑀪𑀸𑀤𑀻𑀳𑀺 𑀉𑀲𑁆𑀲𑀤𑀢𑀸𑀬 𑀅𑀧𑀸𑀬𑀫𑀕𑁆𑀕𑀁, 𑀅𑀮𑁄𑀪𑀸𑀤𑀻𑀳𑀺 𑀉𑀲𑁆𑀲𑀤𑀢𑀸𑀬 𑀲𑀼𑀕𑀢𑀺𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀜𑁆𑀘 𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀮𑁄𑀪𑀸𑀤𑀻𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀤𑀢𑀸𑀬 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀫𑀳𑀸𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀮𑁄𑀓𑀺𑀬𑀸 𑀧𑀦 𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀢𑀺 𑀯𑀤𑀦𑁆𑀢𑀺, 𑀫𑀦𑀼 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑁄 𑀮𑁄𑀓𑀫𑀭𑀺𑀬𑀸𑀤𑀸𑀬 𑀆𑀤𑀺𑀪𑀽𑀢𑁄 𑀳𑀺𑀢𑀸𑀳𑀺𑀢𑀯𑀺𑀥𑀸𑀬𑀓𑁄 𑀲𑀢𑁆𑀢𑀸𑀦𑀁 𑀧𑀺𑀢𑀼𑀝𑁆𑀞𑀸𑀦𑀺𑀬𑁄, 𑀬𑁄 𑀲𑀸𑀲𑀦𑁂 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀧𑀘𑁆𑀘𑀓𑁆𑀔𑀢𑁄, 𑀧𑀭𑀫𑁆𑀧𑀭𑀢𑀸𑀬 𑀘 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀞𑀺𑀢𑀸 𑀢𑀲𑁆𑀲 𑀧𑀼𑀢𑁆𑀢𑀲𑀤𑀺𑀲𑀢𑀸𑀬 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀏𑀯 𑀳𑀺 𑀢𑁂 ‘‘𑀫𑀸𑀦𑀯𑀸, 𑀫𑀦𑀼𑀚𑀸’’𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺, 𑀉𑀲𑁆𑀲𑀧𑀘𑁆𑀘𑀬𑁄. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀼𑀲𑁄, 𑀉𑀲𑁄. 𑀫𑀭 𑀧𑀸𑀡𑀘𑀸𑀕𑁂, 𑀘𑁄, 𑀫𑀘𑁆𑀘𑁄, 𑀧𑀩𑁆𑀩𑀚𑁆𑀚𑀸𑀤𑀺𑀦𑀸 𑀯𑀸 𑀢𑁆𑀬𑀧𑀘𑁆𑀘𑀬𑁄, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄 𑀘. 𑀢𑀢𑁄 ‘‘𑀬𑀯𑀢’’𑀫𑀺𑀘𑁆𑀘𑀸𑀤𑀺𑀦𑀸 𑀘𑁄, 𑀤𑁆𑀯𑀺𑀢𑁆𑀢𑀁. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀯𑁄. 𑀫𑀸𑀡𑀯𑁄𑀧𑁆𑀬𑀢𑁆𑀭, 𑀡𑀯𑁄. 𑀫𑀦𑀼𑀫𑁆𑀳𑀸 𑀚𑀸𑀢𑁄 𑀫𑀦𑀼𑀚𑁄. 𑀦𑀻 𑀦𑀬𑁂, 𑀦𑁂𑀢𑀻𑀢𑀺 𑀦𑀭𑁄, 𑀅𑀭𑁄. 𑀧𑀼𑀲 𑀧𑁄𑀲𑀦𑁂, 𑀡𑁄, 𑀧𑀼𑀭𑁂𑀢𑀻𑀢𑀺 𑀯𑀸 𑀧𑁄𑀲𑁄. 𑀧𑀼𑀭 𑀧𑀽𑀭𑀡𑁂, 𑀲𑁄, 𑀉𑀲𑁆𑀲𑁄𑀢𑁆𑀢𑀁, 𑀭𑀮𑁄𑀧𑁄. 𑀧𑀼𑀦𑀸𑀢𑀻𑀢𑀺 𑀧𑀼𑀫𑀸,𑀧𑀼 𑀧𑀯𑀦𑁂, 𑀫𑁄, 𑀲𑀺𑀲𑁆𑀲𑀸. 𑀧𑀼𑀭𑁂𑀢𑀻𑀢𑀺 𑀧𑀼𑀭𑀺𑀲𑁄, 𑀧𑁄𑀭𑀺𑀲𑁄 𑀘, 𑀇𑀲𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸𑀬 𑀧𑀽𑀭𑀺𑀲𑁄 𑀘. 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀸𑀤𑀺𑀧𑀜𑁆𑀘𑀓𑀁 𑀇𑀢𑁆𑀣𑀺𑀬𑀫𑁆𑀧𑀺 𑀯𑀢𑁆𑀢𑀢𑁂, 𑀦𑀭𑀸𑀤𑀬𑁄 𑀢𑀼 𑀧𑀼𑀫𑁂𑀬𑁂𑀯 𑀯𑀺𑀲𑀺𑀝𑁆𑀞𑀮𑀺𑀗𑁆𑀕𑀢𑁆𑀢𑀸. 𑀢𑀢𑁆𑀭 𑀫𑀦𑀼𑀲𑁆𑀲 𑀫𑀸𑀦𑀼𑀲 𑀫𑀦𑀼𑀚 𑀫𑀸𑀡𑀯𑁂𑀳𑀺 𑀦𑀤𑀸𑀤𑀺𑀢𑁆𑀢𑀸 𑀈𑀧𑀘𑁆𑀘𑀬𑁄, 𑀏𑀓𑀲𑀓𑀸𑀭𑀮𑁄𑀧𑁄, 𑀫𑀦𑀼𑀲𑀻, 𑀫𑀸𑀦𑀼𑀲𑀻, 𑀫𑀦𑀼𑀚𑀻, 𑀫𑀸𑀡𑀯𑀻. 𑀫𑀘𑁆𑀘𑀸, 𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄.

𑀯𑀺𑀤𑁆𑀤𑀲𑀼𑀧𑀭𑀺𑀬𑀦𑁆𑀢𑀁 𑀧𑀡𑁆𑀟𑀺𑀢𑁂. 𑀧𑀡𑁆𑀟𑀸 𑀩𑀼𑀤𑁆𑀥𑀺 𑀲𑀜𑁆𑀚𑀸𑀢𑀸 𑀅𑀲𑁆𑀲𑀸𑀢𑀺 𑀧𑀡𑁆𑀟𑀺𑀢𑁄, 𑀢𑀭𑀢𑁆𑀬𑀸𑀤𑀺. 𑀧𑀟𑀺 𑀕𑀢𑀺𑀬𑀁 𑀯𑀸, 𑀢𑁄. 𑀩𑀼𑀚𑁆𑀛𑀢𑀻𑀢𑀺 𑀩𑀼𑀥𑁄. 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺 𑀯𑀺𑀤𑁆𑀯𑀸, 𑀯𑀺𑀤 𑀜𑀸𑀡𑁂, 𑀯𑁄, 𑀲𑀺𑀲𑁆𑀲𑀸. 𑀪𑀽 𑀲𑀢𑁆𑀢𑀸𑀬𑀁, 𑀅𑀢𑁆𑀣𑁂 𑀯𑀺𑀪𑀸𑀯𑁂𑀢𑀺 𑀧𑀓𑀸𑀲𑁂𑀢𑀺 𑀲𑀻𑀮𑁂𑀦𑀸𑀢𑀺 𑀯𑀺𑀪𑀸𑀯𑀻, 𑀡𑀻. 𑀭𑀸𑀕𑀸𑀤𑀬𑁄 𑀲𑀫𑁂𑀢𑀻𑀢𑀺 𑀲𑀦𑁆𑀢𑁄, 𑀢𑁄, 𑀲𑀼𑀦𑁆𑀤𑀭𑁄 𑀅𑀦𑁆𑀢𑁄 𑀅𑀯𑀲𑀸𑀦𑀫𑁂𑀢𑀲𑁆𑀲𑀸𑀢𑀺 𑀯𑀸 𑀲𑀦𑁆𑀢𑁄. 𑀲𑀼𑀦𑁆𑀤𑀭𑀸 𑀧𑀜𑁆𑀜𑀸 𑀬𑀲𑁆𑀲 𑀲𑀧𑁆𑀧𑀜𑁆𑀜𑁄. 𑀓𑀺𑀦𑁆𑀦𑀸𑀫 𑀦 𑀯𑀺𑀦𑁆𑀤𑀢𑀻𑀢𑀺 𑀓𑁄𑀯𑀺𑀤𑁄, 𑀦𑁂𑀭𑀼𑀢𑁆𑀢𑁄, 𑀓𑀼𑀁 𑀧𑀸𑀧𑀁 𑀯𑀺𑀦𑁆𑀤𑀢𑀻𑀢𑀺 𑀯𑀸 𑀓𑁄𑀯𑀺𑀤𑁄. 𑀥𑀻 𑀧𑀜𑁆𑀜𑀸 𑀬𑀲𑁆𑀲𑀢𑁆𑀣𑀻𑀢𑀺 𑀲𑁄 𑀥𑀻𑀫𑀸, 𑀲𑁄𑀪𑀦𑀁 𑀛𑀸𑀬𑀢𑀻𑀢𑀺 𑀲𑀼𑀥𑀻, 𑀛𑁂 𑀘𑀺𑀦𑁆𑀢𑀸𑀬𑀁. 𑀛𑀲𑁆𑀲 𑀥𑁄, 𑀈, 𑀲𑀼𑀦𑁆𑀤𑀭𑀸 𑀥𑀻 𑀬𑀲𑁆𑀲𑀸𑀢𑀺 𑀯𑀸 𑀲𑀼𑀥𑀻. 𑀓𑀯𑀺 𑀯𑀡𑁆𑀡𑁂, 𑀇, 𑀇𑀢𑁆𑀣𑀺𑀬𑀁 𑀓𑀯𑀻 𑀘, 𑀓𑀼 𑀲𑀤𑁆𑀤𑁂 𑀯𑀸, 𑀇, 𑀓𑀯𑀺. 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀢𑁆𑀢𑁄, 𑀅𑀜𑁆𑀚 𑀕𑀢𑀺𑀬𑀁, 𑀢𑁄. 𑀪𑀼𑀚𑀸𑀤𑀻𑀦𑀫𑀦𑁆𑀢𑁄 𑀦𑁄 𑀤𑁆𑀯𑀺 𑀘. 𑀯𑀺𑀲𑀺𑀝𑁆𑀞𑁄 𑀅𑀢𑁆𑀢𑀸 𑀬𑀲𑁆𑀲𑀸𑀢𑀺 𑀯𑀸 𑀩𑁆𑀬𑀢𑁆𑀢𑁄. 𑀘𑀓𑁆𑀔 𑀤𑀲𑁆𑀲𑀦𑁂, 𑀬𑀼, 𑀯𑀺𑀘𑀓𑁆𑀔𑀡𑁄, 𑀯𑀺𑀘𑀸𑀭𑁂𑀢𑀻𑀢𑀺 𑀯𑀸 𑀯𑀺𑀘𑀓𑁆𑀔𑀡𑁄, 𑀦𑁂𑀭𑀼𑀢𑁆𑀢𑁄. 𑀯𑀺𑀕𑀢𑁄 𑀲𑀸𑀭𑀤𑁄 𑀏𑀢𑀲𑁆𑀫𑀸𑀢𑀺 𑀯𑀺𑀲𑀸𑀭𑀤𑁄.

𑁨𑁨𑁯. 𑀫𑁂𑀥𑀸 𑀥𑀸𑀭𑀡𑀸 𑀫𑀢𑀺 𑀧𑀜𑁆𑀜𑀸 𑀬𑀲𑁆𑀲𑀸𑀢𑀺 𑀫𑁂𑀥𑀸𑀯𑀻, 𑀯𑀻. 𑀅𑀢𑀺𑀲𑀬𑀫𑀢𑀺𑀬𑀼𑀢𑁆𑀢𑀢𑀸𑀬 𑀫𑀢𑀺𑀫𑀸. 𑀧𑀜𑁆𑀜𑀸𑀬 𑀬𑁄𑀕𑀢𑁄 𑀧𑀜𑁆𑀜𑁄. 𑀯𑀺𑀲𑁂𑀲𑀁 𑀚𑀸𑀦𑀸𑀢𑀺 𑀲𑀻𑀮𑁂𑀦𑀸𑀢𑀺 𑀯𑀺𑀜𑁆𑀜𑀽, 𑀭𑀽. 𑀯𑀺𑀤 𑀜𑀸𑀡𑁂, 𑀉𑀭𑁄, 𑀯𑀺𑀤𑀼𑀭𑁄 [𑀯𑀺𑀤𑀽𑀭𑁄 (𑀓.)]. 𑀭𑀽𑀧𑀘𑁆𑀘𑀬𑁂 𑀯𑀺𑀤𑀽. 𑀥𑀻𑀬𑁄𑀕𑀸 𑀥𑀻𑀭𑁄, 𑀭𑁄. 𑀯𑀺𑀲𑀺𑀝𑁆𑀞𑀤𑀲𑁆𑀲𑀦𑀲𑀻𑀮𑀢𑀸𑀬 𑀯𑀺𑀧𑀲𑁆𑀲𑀻, 𑀡𑀻. 𑀤𑁄𑀲𑀁 𑀚𑀸𑀦𑀸𑀢𑀻𑀢𑀺 𑀤𑁄𑀲𑀜𑁆𑀜𑀽, 𑀭𑀽. 𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑁄, 𑀢𑁄. 𑀤𑀼 𑀕𑀢𑀺𑀬𑀁, 𑀅, 𑀉𑀲𑁆𑀲𑀸𑀯𑁄 [𑀤𑀼 𑀕𑀢𑀺𑀬𑀁 𑀅𑀩𑁆𑀩𑁄 (𑀲𑀽𑀘𑀺)], 𑀤𑀩𑁆𑀩𑁄. 𑀯𑀺𑀤 𑀜𑀸𑀡𑁂, 𑀤𑀲𑀼.

𑁨𑁩𑁦-𑁨𑁩𑁧. 𑀫𑀳𑀺𑀮𑀸𑀦𑁆𑀢𑀁 𑀇𑀢𑁆𑀣𑀺𑀲𑀸𑀫𑀜𑁆𑀜𑁂. 𑀇𑀲𑀼 𑀇𑀘𑁆𑀙𑀸𑀬𑀁, 𑀢𑁄, 𑀦𑀤𑀸𑀤𑀺. 𑀲𑀻𑀫𑀲𑁆𑀲 𑀅𑀦𑁆𑀢𑁄 𑀲𑀻𑀫𑀦𑁆𑀢𑁄, 𑀓𑁂𑀲𑀯𑁂𑀲𑁄, 𑀢𑀁𑀬𑁄𑀕𑀸 𑀲𑀻𑀫𑀦𑁆𑀢𑀺𑀦𑀻, 𑀇𑀦𑀻. 𑀦𑀭𑀲𑁆𑀲𑀸𑀬𑀁 𑀦𑀸𑀭𑀻, 𑀇𑀤𑀫𑀢𑁆𑀣𑁂 𑀡𑁄. 𑀢𑀺𑀝𑁆𑀞𑀢𑀺 𑀕𑀩𑁆𑀪𑁄 𑀬𑀲𑁆𑀲𑀁, 𑀲𑀸 𑀣𑀻. 𑀥𑀸 𑀥𑀸𑀭𑀡𑁂 𑀯𑀸, 𑀯𑀡𑁆𑀡𑀯𑀺𑀓𑀸𑀭𑁄, 𑀈. 𑀩𑀦𑁆𑀥 𑀩𑀦𑁆𑀥𑀦𑁂, 𑀊, 𑀩𑀦𑁆𑀥𑀲𑁆𑀲 𑀯𑀥𑀸𑀤𑁂𑀲𑁄 𑀘 [𑀡𑁆𑀯𑀸𑀤𑀺 𑁩], 𑀯𑀥𑀽𑀲𑀤𑁆𑀤𑁄 𑀲𑀼𑀡𑀺𑀲𑀸𑀪𑀭𑀺𑀬𑀸𑀦𑀫𑁆𑀧𑀺 𑀯𑀸𑀘𑀓𑁄. 𑀯𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀢𑁄, 𑀇𑀓𑀸𑀭𑀸𑀕𑀫𑁄 𑀘. 𑀅𑀗𑁆𑀕 𑀕𑀫𑀦𑀢𑁆𑀣𑁄, 𑀬𑀼, 𑀅𑀗𑁆𑀕𑀦𑀸, 𑀯𑀺𑀲𑀺𑀝𑁆𑀞𑀦𑀸𑀭𑀺𑀬𑀫𑁆𑀧𑀺 𑀅𑀗𑁆𑀕𑀦𑀸, 𑀢𑀤𑀸 𑀓𑀮𑁆𑀬𑀸𑀡𑀗𑁆𑀕𑀦𑀸𑀭𑀻𑀮𑀓𑁆𑀔𑀡𑁄𑀧𑁂𑀢𑀁 𑀧𑀲𑀢𑁆𑀣𑀁 𑀳𑀢𑁆𑀣𑀧𑀸𑀤𑀸𑀤𑀺𑀓𑀫𑀗𑁆𑀕𑀫𑀲𑁆𑀲𑀢𑁆𑀣𑀻𑀢𑀺 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀅𑀗𑁆𑀕𑀸 𑀓𑀮𑁆𑀬𑀸𑀡𑁂 𑀦𑀧𑀘𑁆𑀘𑀬𑁄 [𑀫𑁄𑀕𑁆𑀕𑀮𑁆𑀮𑀸𑀦 𑁪.𑁯𑁨]. 𑀯𑀺𑀭𑀽𑀧𑁂𑀲𑀼𑀧𑀺 𑀫𑀤𑁄 𑀭𑀸𑀕𑀫𑀤𑁄 𑀬𑀲𑁆𑀲𑀸 𑀲𑀸 𑀧𑀫𑀤𑀸, 𑀯𑀺𑀲𑀺𑀝𑁆𑀞𑀦𑀸𑀭𑀺𑀬𑀁𑀧𑁆𑀬𑀢𑁆𑀭 𑀧𑀫𑀤𑀸, 𑀢𑀤𑀸 𑀧𑀓𑀝𑁆𑀞𑁄 𑀫𑀤𑁄 𑀭𑀽𑀧𑀲𑁄𑀪𑀕𑁆𑀕𑀚𑀦𑀺𑀢𑁄 𑀘𑁂𑀢𑁄𑀯𑀺𑀓𑀸𑀭𑁄 𑀬𑀲𑁆𑀲𑀸 𑀲𑀸 𑀧𑀫𑀤𑀸. 𑀭𑀽𑀧𑀮𑀸𑀯𑀡𑁆𑀬𑀲𑀫𑁆𑀧𑀦𑁆𑀦𑀢𑀸𑀬 𑀲𑀼𑀦𑁆𑀤𑀭𑀻, 𑀯𑀺𑀲𑀺𑀝𑁆𑀞𑀸𑀬𑀫𑁆𑀧𑀺. 𑀓𑀫𑀦𑀻𑀬𑀯𑀼𑀢𑁆𑀢𑀺𑀢𑀸𑀬 𑀓𑀦𑁆𑀢𑀸, 𑀓𑀫𑀼 𑀓𑀦𑁆𑀢𑀺𑀬𑀁, 𑀢𑁄. 𑀓𑀦𑁆𑀢𑀺𑀬𑁄𑀕𑀸 𑀯𑀸 𑀓𑀦𑁆𑀢𑀸, 𑀯𑀺𑀲𑀺𑀝𑁆𑀞𑀸𑀬𑀫𑁆𑀧𑀺. 𑀭𑀫𑀬𑀢𑀺 𑀯𑀺𑀦𑁄𑀤𑀬𑀢𑀺 𑀦𑀸𑀬𑀓𑀁, 𑀲𑀸 𑀭𑀫𑀡𑀻, 𑀦𑀦𑁆𑀤𑀸𑀤𑀻𑀳𑀺 𑀬𑀼, 𑀦𑀤𑀸𑀤𑀺, 𑀯𑀺𑀲𑀺𑀝𑁆𑀞𑀸𑀬𑀫𑁆𑀧𑀺. 𑀤𑀬 𑀭𑀓𑁆𑀔𑀡𑁂, 𑀓𑀫𑁆𑀫𑀦𑀺 𑀢𑁄. 𑀅𑀧𑁆𑀧𑀁 𑀩𑀮𑀁 𑀬𑀲𑁆𑀲𑀸 𑀲𑀸 𑀅𑀩𑀮𑀸, 𑀅𑀧𑁆𑀧𑀢𑁆𑀣𑁄𑀬𑀁 𑀅𑀓𑀸𑀭𑁄. 𑀫𑀸𑀢𑀼𑀬𑀸 𑀕𑀸𑀫𑁄 𑀯𑀺𑀬 𑀕𑀸𑀫𑁄 𑀬𑀲𑁆𑀲𑀸 𑀲𑀸 𑀫𑀸𑀢𑀼𑀕𑀸𑀫𑁄, 𑀫𑀸𑀢𑀸 𑀯𑀺𑀬 𑀕𑀘𑁆𑀙𑀢𑀻𑀢𑀺 𑀯𑀸 𑀫𑀸𑀢𑀼𑀕𑀸𑀫𑁄, 𑀕𑀫𑀼 𑀕𑀫𑀦𑁂, 𑀡𑁄, 𑀫𑀸𑀢𑀸 𑀯𑀺𑀬 𑀕𑀲𑀢𑀻𑀢𑀺 𑀯𑀸 𑀫𑀸𑀢𑀼𑀕𑀸𑀫𑁄, 𑀕𑀲 𑀅𑀤𑀦𑁂, 𑀫𑁄, 𑀫𑀸𑀢𑀸 𑀯𑀺𑀬 𑀕𑀸𑀬𑀢𑀻𑀢𑀺 𑀯𑀸 𑀫𑀸𑀢𑀼𑀕𑀸𑀫𑁄, 𑀕𑀸 𑀲𑀤𑁆𑀤𑁂, 𑀫𑁄. 𑀫𑀳𑀻 𑀯𑀺𑀬 𑀲𑀼𑀘𑀺𑀁 𑀅𑀲𑀼𑀘𑀺𑀫𑁆𑀧𑀺 𑀮𑀸𑀢𑀻𑀢𑀺 𑀫𑀳𑀺𑀮𑀸, 𑀫𑀳𑀦𑁆𑀢𑁂𑀲𑀼 𑀩𑀳𑀽𑀲𑀼𑀧𑀺 𑀭𑀢𑁆𑀢𑀘𑀺𑀢𑁆𑀢𑁂𑀲𑀼 𑀇𑀮𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀫𑀳𑀺𑀮𑀸, 𑀇𑀮 𑀕𑀫𑀦𑁂, 𑀫𑀳 𑀧𑀽𑀚𑀸𑀬𑀁 𑀯𑀸, 𑀇𑀭𑁄, 𑀮𑀢𑁆𑀢𑀁, 𑀆, 𑀫𑀳𑀺𑀮𑀸. 𑀫𑀳𑁂𑀮𑀸𑀧𑁆𑀬𑀢𑁆𑀭.

𑀢𑀺𑀓𑀁 𑀯𑀺𑀲𑀺𑀝𑁆𑀞𑀦𑀸𑀭𑀺𑀬𑀫𑁂𑀯. 𑀮𑀮 𑀯𑀺𑀮𑀸𑀲𑁂, 𑀦𑀦𑁆𑀤𑀸𑀤𑀻𑀳𑀺 𑀬𑀼. 𑀮𑀮 𑀇𑀘𑁆𑀙𑀸𑀬𑀦𑁆𑀢𑀺 𑀘𑀼𑀭𑀸𑀤𑀺𑀕𑀡𑀢𑁄 𑀯𑀸 𑀬𑀼. 𑀪𑀬𑀧𑀓𑀢𑀺 𑀪𑀻𑀭𑀼, 𑀪𑀻 𑀪𑀬𑁂, 𑀭𑀼, ‘‘𑀪𑀻𑀭𑀼 𑀅𑀢𑁆𑀢𑁂 𑀚𑀦𑁂’𑀢𑁆𑀣𑀺𑀬’’𑀦𑁆𑀢𑀺 𑀭𑀪𑀲𑁄. 𑀅𑀢𑀺𑀲𑀬𑀺𑀢𑀓𑀸𑀫𑀸 𑀓𑀸𑀫𑀺𑀦𑀻, 𑀓𑀸𑀫𑁄 𑀲𑀺𑀗𑁆𑀕𑀸𑀭𑀭𑀽𑀧𑁄 𑀫𑀤𑁄 𑀬𑀲𑁆𑀲𑀸𑀢𑁆𑀣𑀻𑀢𑀺 𑀇𑀦𑀻, 𑀲𑀩𑁆𑀩𑀢𑁆𑀭𑁂𑀯𑀁. 𑀯𑀸𑀫𑀮𑁄𑀘𑀦𑀸, 𑀪𑀸𑀯𑀺𑀦𑀻, 𑀦𑀺𑀢𑀫𑁆𑀩𑀺𑀦𑀻, 𑀭𑀸𑀫𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀺𑀲𑀺𑀝𑁆𑀞𑀦𑀸𑀭𑀻𑀦𑀸𑀫𑀸𑀦𑀺.

𑀤𑁆𑀯𑀬𑀁 𑀧𑀞𑀫𑀯𑀬𑀲𑀺 𑀯𑀢𑁆𑀢𑀫𑀸𑀦𑀸𑀬𑀁.

𑀅𑀝𑁆𑀞𑀯𑀲𑁆𑀲𑀸 𑀪𑀯𑁂 𑀕𑁄𑀭𑀻, 𑀤𑀲𑀯𑀲𑁆𑀲𑀸 𑀢𑀼 𑀓𑀜𑁆𑀜𑀓𑀸;

𑀲𑀫𑁆𑀧𑀢𑁆𑀢𑁂 𑀤𑁆𑀯𑀸𑀤𑀲𑁂 𑀯𑀲𑁆𑀲𑁂, 𑀓𑀼𑀫𑀸𑀭𑀻𑀢𑁆𑀬’𑀪𑀺𑀥𑀻𑀬𑀢𑁂 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁮].

𑀇𑀳 𑀢𑁆𑀯𑀪𑁂𑀤𑁄𑀧𑀘𑀸𑀭𑁂𑀦𑁂𑀓𑀢𑁆𑀢𑀁. 𑀅𑀜𑁆𑀜𑁂 𑀧𑀦𑀸𑀳𑀼 ‘‘𑀓𑀜𑁆𑀜𑀸𑀲𑀤𑁆𑀤𑁄𑀬𑀁 𑀧𑀼𑀫𑀼𑀦𑀸𑀪𑀺𑀲𑀫𑁆𑀩𑀦𑁆𑀥𑀧𑀼𑀩𑁆𑀩𑀓𑁂 𑀲𑀫𑁆𑀧𑀬𑁄𑀕𑁂 𑀦𑀺𑀯𑀢𑁆𑀢𑁂𑀢𑀻’’𑀢𑀺. 𑀓𑀼𑀫𑀸𑀭 𑀓𑀻𑀴𑀸𑀬𑀁, 𑀘𑀼𑀭𑀸𑀤𑀺, 𑀓𑀼𑀫𑀸𑀭𑀬𑀢𑀻𑀢𑀺 𑀓𑀼𑀫𑀸𑀭𑀻, 𑀅, 𑀦𑀤𑀸𑀤𑀺, 𑀲𑀓𑀢𑁆𑀣𑁂 𑀓𑁄, 𑀡𑁆𑀯𑀼𑀦𑀸 𑀯𑀸 𑀲𑀺𑀤𑁆𑀥𑁄. 𑀓𑀫𑀦𑀻𑀬𑀢𑁂𑀢𑀺 𑀓𑀜𑁆𑀜𑀸, 𑀓𑀦 𑀤𑀺𑀢𑁆𑀢𑀺𑀓𑀦𑁆𑀢𑀺𑀕𑀢𑀻𑀲𑀼, 𑀬𑁄, 𑀦𑁆𑀬𑀲𑁆𑀲 𑀜𑀢𑁆𑀢𑀁, 𑀅, 𑀆.

𑀬𑀼𑀯𑀲𑀤𑁆𑀤𑀢𑁄 𑀧𑀸𑀝𑀺𑀧𑀤𑀺𑀓𑀢𑁄𑀢𑀺, 𑀬𑀼𑀯𑀢𑀺. 𑀯𑀭𑀺𑀢𑁆𑀣𑀺𑀧𑀭𑀺𑀬𑀸𑀬𑀲𑀸𑀫𑀜𑁆𑀜𑁂𑀧𑀺 𑀬𑀼𑀯𑀢𑀺𑀲𑀤𑁆𑀤𑁄 𑀧𑀓𑀢𑁆𑀬𑀦𑁆𑀢𑀭𑀫𑀢𑁆𑀣𑀻𑀢𑀺. 𑀢𑀭 𑀢𑀭𑀡𑁂, 𑀬𑀼, 𑀉𑀢𑁆𑀢𑀁, 𑀈 𑀘.

𑁨𑁩𑁨. 𑀲𑀸𑀪𑀺𑀲𑁂𑀓𑀸 𑀮𑀤𑁆𑀥𑀸𑀪𑀺𑀲𑁂𑀓𑀸 𑀭𑀸𑀚𑀺𑀢𑁆𑀣𑀻 𑀫𑀳𑁂𑀲𑀻 𑀦𑀸𑀫, 𑀫𑀳 𑀧𑀽𑀚𑀸𑀬𑀁, 𑀓𑀫𑁆𑀫𑀦𑀺 𑀇𑀲𑁄, 𑀇𑀲𑁆𑀲𑁂, 𑀢𑀢𑁄 𑀈, 𑀫𑀳𑀢𑀺𑀬𑁄 𑀭𑀸𑀚𑀺𑀢𑁆𑀣𑀺𑀬𑁄 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑀸 𑀫𑀳𑁂𑀲𑀻, 𑀈𑀲 𑀇𑀲𑁆𑀲𑀭𑀺𑀬𑁂, 𑀈. 𑀫𑀳𑁂𑀲𑀺𑀢𑁄 𑀅𑀜𑁆𑀜𑀸 𑀭𑀸𑀚𑀦𑀸𑀭𑀺𑀬𑁄 𑀪𑁄𑀕𑀺𑀦𑀺𑀬𑁄 𑀪𑁄𑀕𑀬𑁄𑀕𑀸, 𑀈, 𑀇𑀦𑀻 𑀘. 𑀬𑀸𑀦𑀸𑀭𑀻 𑀧𑀼𑀭𑀺𑀲𑀲𑁆𑀲 𑀲𑀗𑁆𑀓𑁂𑀢𑀁 𑀬𑀸𑀢𑀺, 𑀲𑀸 ‘‘𑀥𑀯𑀢𑁆𑀣𑀺𑀦𑀻, 𑀅𑀪𑀺𑀲𑀸𑀭𑀺𑀓𑀸’’𑀢𑀺 𑀘𑁄𑀘𑁆𑀘𑀢𑁂. 𑀥𑀯𑀁 𑀧𑀢𑀺𑀁 𑀅𑀢𑁆𑀣𑀬𑀢𑀺 𑀇𑀘𑁆𑀙𑀢𑀻𑀢𑀺 𑀥𑀯𑀢𑁆𑀣𑀺𑀦𑀻, 𑀅𑀢𑁆𑀣 𑀬𑀸𑀘𑀦𑀺𑀘𑁆𑀙𑀸𑀲𑀼, 𑀇𑀦𑀻, 𑀅𑀲𑀢𑀻𑀯𑀺𑀲𑁂𑀲𑁄. 𑀲𑀭 𑀕𑀢𑀺𑀬𑀁, 𑀅𑀪𑀺𑀲𑀭𑀢𑀺 𑀲𑀗𑁆𑀓𑁂𑀢𑀦𑁆𑀢𑀺, 𑀡𑁆𑀯𑀼.

𑁨𑁩𑁩. 𑀙𑀓𑁆𑀓𑀁 𑀯𑁂𑀲𑀺𑀬𑀁. 𑀘𑀢𑀼𑀲𑀝𑁆𑀞𑀺𑀓𑀮𑀸𑀓𑀼𑀲𑀮𑀢𑀸𑀬, 𑀲𑀻𑀮𑀭𑀽𑀧𑀸𑀤𑀺𑀫𑀢𑁆𑀢𑀸𑀬 𑀘 𑀕𑀡𑁆𑀬𑀢𑁂 𑀆𑀤𑀻𑀬𑀢𑁂 𑀕𑀡𑀺𑀓𑀸, 𑀕𑀡 𑀲𑀗𑁆𑀔𑁆𑀬𑀸𑀦𑁂, 𑀡𑁆𑀯𑀼. 𑀯𑁂𑀲𑁄 𑀆𑀓𑀧𑁆𑀧𑁄, 𑀢𑁂𑀦𑀸𑀢𑀺𑀲𑁄𑀪𑀢𑁂, 𑀓𑀫𑁆𑀫𑀯𑁂𑀲𑁂𑀳𑀺 𑀯𑀸 𑀇𑀘𑁆𑀙𑀻𑀬𑀢𑁂𑀢𑀺. 𑀅𑀢𑀺𑀲𑁄𑀪𑀦𑁂, 𑀇𑀘𑁆𑀙𑀢𑁆𑀣𑁂 𑀯𑀸 𑀬𑀧𑀘𑁆𑀘𑀬𑁄. 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀤𑀸𑀲𑀻 𑀯𑀡𑁆𑀡𑀤𑀸𑀲𑀻, 𑀤𑀸𑀲𑀺𑀫𑁆𑀧𑀺 𑀳𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀓𑁂𑀘𑀺 𑀲𑀸𑀫𑀺𑀓𑀸 𑀥𑀦𑀮𑁄𑀪𑁂𑀦 𑀕𑀡𑀺𑀓𑀁 𑀓𑀭𑁄𑀦𑁆𑀢𑀺. 𑀦𑀕𑀭𑀁 𑀲𑁄𑀪𑁂𑀢𑀻𑀢𑀺 𑀦𑀕𑀭𑀲𑁄𑀪𑀺𑀦𑀻. 𑀭𑀽𑀧𑁂𑀦 𑀉𑀧𑀚𑀻𑀯𑀢𑀻𑀢𑀺 𑀭𑀽𑀧𑀽𑀧𑀚𑀻𑀯𑀺𑀦𑀻. 𑀅𑀢𑀺𑀲𑀬𑀯𑁂𑀲𑀬𑀼𑀢𑁆𑀢𑀢𑀸𑀬 𑀯𑁂𑀲𑀻.

𑀤𑁆𑀯𑀬𑀁 𑀅𑀲𑀢𑀻𑀲𑀸𑀫𑀜𑁆𑀜𑁂. 𑀓𑀼𑀮𑀸𑀦𑀺 𑀅𑀝𑀢𑀺 𑀦𑀸𑀲𑀬𑀢𑀻𑀢𑀺 𑀓𑀼𑀮𑀝𑀸. 𑀩𑀦𑁆𑀥𑀫𑀦𑀼𑀩𑀦𑁆𑀥𑀁 𑀓𑀸𑀬𑀢𑀻𑀢𑀺 𑀩𑀦𑁆𑀥𑀓𑀻, 𑀦𑀤𑀸𑀤𑀺.

𑁨𑁩𑁪. 𑀘𑀢𑀼𑀓𑁆𑀓𑀁 𑀉𑀢𑁆𑀢𑀫𑀦𑀸𑀭𑀺𑀬𑀁. 𑀯𑀭𑁄 𑀆𑀭𑁄𑀳𑁄 𑀲𑁄𑀡𑀺 𑀬𑀲𑁆𑀲𑀸 𑀲𑀸 𑀯𑀭𑀸𑀭𑁄𑀳𑀸. 𑀉𑀢𑁆𑀢𑀫𑀕𑀼𑀡𑀬𑁄𑀕𑀸 𑀉𑀢𑁆𑀢𑀫𑀸. 𑀲𑁄𑀡𑀺𑀕𑀸𑀭𑀯𑁂𑀦 𑀫𑀢𑁆𑀢𑀕𑀚𑁄 𑀯𑀺𑀬 𑀩𑀦𑁆𑀥𑀦𑀕𑀸𑀫𑀺𑀦𑀻 𑀫𑀢𑁆𑀢𑀓𑀸𑀲𑀺𑀦𑀻, 𑀓𑀲 𑀕𑀢𑀺𑀬𑀁. 𑀯𑀭𑀯𑀡𑁆𑀡𑀬𑁄𑀕𑀸 𑀯𑀭𑀯𑀡𑁆𑀡𑀺𑀦𑀻, 𑀇𑀦𑀻.

‘‘𑀲𑀻𑀢𑁂 𑀲𑀼𑀔𑁄𑀡𑁆𑀳𑀲𑀩𑁆𑀩𑀗𑁆𑀕𑀻, 𑀕𑀺𑀫𑁆𑀳𑁂 𑀬𑀸 𑀲𑀼𑀔𑀲𑀻𑀢𑀮𑀸;

𑀪𑀢𑁆𑀢𑀼 𑀪𑀢𑁆𑀢𑀸 𑀘 𑀬𑀸 𑀦𑀸𑀭𑀻, 𑀲𑀸 𑀪𑀯𑁂 𑀯𑀭𑀯𑀡𑁆𑀡𑀺𑀦𑀻’’𑀢𑀺. 𑀭𑀼𑀤𑁆𑀤𑁄;

𑀤𑁆𑀯𑀬𑀁 𑀅𑀔𑀡𑁆𑀟𑀺𑀢𑀘𑀭𑀺𑀢𑁆𑀭𑀸𑀬𑀁. 𑀧𑀢𑀺 𑀲𑀸𑀫𑀺𑀓𑁄𑀯 𑀓𑀫𑀦𑀻𑀬𑁄 𑀬𑀲𑁆𑀲𑀸 𑀧𑀢𑀺𑀩𑁆𑀩𑀢𑀸, 𑀧𑀢𑀺𑀫𑁆𑀳𑀺 𑀯𑀢𑀫𑀲𑁆𑀲𑀸𑀢𑀺 𑀯𑀸 𑀧𑀢𑀺𑀩𑁆𑀩𑀢𑀸. 𑀅𑀲 𑀪𑀼𑀯𑀺, 𑀅𑀦𑁆𑀢𑁄, 𑀈, 𑀆𑀤𑀺𑀮𑁄𑀧𑁄. 𑀲𑀫𑁂𑀢𑀻𑀢𑀺 𑀯𑀸 𑀲𑀢𑀻, 𑀲𑀫𑀼 𑀉𑀧𑀲𑀫𑁂, 𑀅𑀦𑁆𑀢𑁄, 𑀈.

𑀤𑁆𑀯𑀬𑀁 𑀓𑀸𑀫𑀭𑀢𑁆𑀢𑀭𑀸𑀚𑀧𑀼𑀢𑁆𑀢𑀸𑀤𑀺𑀦𑁄 𑀓𑀼𑀮𑀲𑁆𑀲 𑀦𑀺𑀬𑀢𑀧𑀢𑀺𑀬𑀁. 𑀓𑀼𑀮𑀸𑀦𑀼𑀭𑀽𑀧𑀸 𑀇𑀢𑁆𑀣𑀻 𑀓𑀼𑀮𑀺𑀢𑁆𑀣𑀻, 𑀓𑀼𑀮𑀁 𑀧𑀸𑀮𑁂𑀢𑀺 𑀭𑀓𑁆𑀔𑀢𑀻𑀢𑀺 𑀓𑀼𑀮𑀧𑀸𑀮𑀺𑀓𑀸, 𑀡𑁆𑀯𑀼.

𑁨𑁩𑁫. 𑀤𑁆𑀯𑀬𑀁 𑀫𑀢𑀪𑀢𑁆𑀢𑀺𑀓𑀸𑀬𑀁. 𑀯𑀺𑀕𑀢𑁄 𑀥𑀯𑁄 𑀪𑀢𑁆𑀢𑀸 𑀬𑀲𑁆𑀲𑀸 𑀯𑀺𑀥𑀯𑀸. 𑀧𑀢𑀺 𑀲𑀼𑀜𑁆𑀜𑁄 𑀦𑀝𑁆𑀞𑁄 𑀬𑀲𑁆𑀲𑀸𑀢𑀺 𑀧𑀢𑀺𑀲𑀼𑀜𑁆𑀜𑀸.

𑀤𑁆𑀯𑀬𑀁 𑀅𑀢𑁆𑀢𑀺𑀘𑁆𑀙𑀸𑀬 𑀧𑀢𑁆𑀬𑀦𑁆𑀯𑁂𑀲𑀺𑀦𑀺𑀬𑀁 𑀓𑀜𑁆𑀜𑀸𑀬𑀁. 𑀧𑀢𑀺𑀁 𑀯𑀭𑀢𑀺 𑀕𑀯𑁂𑀲𑀢𑀻𑀢𑀺 𑀧𑀢𑀺𑀫𑁆𑀩𑀭𑀸, 𑀤𑀼𑀢𑀺𑀬𑀸𑀬𑀸𑀮𑁄𑀧𑁄. 𑀲𑀬𑀫𑁂𑀯 𑀧𑀢𑀺𑀁 𑀯𑀭𑀢𑀻𑀢𑀺 𑀲𑀬𑀫𑁆𑀩𑀭𑀸, 𑀧𑀞𑀫𑀸𑀬𑀸𑀮𑁄𑀧𑁄, 𑀯𑀭 𑀧𑀢𑁆𑀣𑀦𑀸𑀬𑀁.

𑀘𑀢𑀼𑀓𑁆𑀓𑀁 𑀯𑀺𑀚𑀸𑀢𑀸𑀬𑀁. 𑀯𑀺𑀚𑀦𑀻 𑀕𑀩𑁆𑀪𑀯𑀺𑀫𑁄𑀓𑁆𑀔𑀦𑁂, 𑀢𑁄, 𑀯𑀺𑀚𑀸𑀬𑀺𑀢𑁆𑀣𑀸𑀢𑀺 𑀯𑀺𑀚𑀸𑀢𑀸. 𑀲𑀽 𑀅𑀪𑀺𑀲𑀯𑁂, 𑀢𑁄. 𑀚𑀸𑀢𑀁 𑀅𑀧𑀘𑁆𑀘𑀁 𑀧𑀼𑀢𑁆𑀢𑁄 𑀏𑀢𑀺𑀲𑁆𑀲𑀸𑀢𑀺 𑀚𑀸𑀢𑀸𑀧𑀘𑁆𑀘𑀸. 𑀧𑀲𑀽𑀢𑀸𑀯 𑀧𑀲𑀽𑀢𑀺𑀓𑀸, 𑀓𑀧𑀘𑁆𑀘𑀬𑁄, 𑀇𑀢𑁆𑀢𑀜𑁆𑀘.

𑁨𑁩𑁬. 𑀤𑁆𑀯𑀬𑀁 𑀤𑀽𑀢𑀺𑀬𑀁. 𑀬𑀸 𑀧𑁂𑀲𑀻𑀬𑀢𑁂, 𑀲𑀸 𑀤𑀽𑀢𑀻, 𑀤𑀼 𑀕𑀫𑀦𑁂,𑀢𑀺, 𑀈𑀫𑁆𑀳𑀺 𑀤𑀽𑀢𑀻. 𑀲𑀜𑁆𑀘𑀸𑀭𑀬𑀢𑀺 𑀬𑀣𑀸𑀪𑀺𑀫𑀢𑀦𑁆𑀢𑀺, 𑀡𑁆𑀯𑀼.

𑀢𑀺𑀓𑀁 𑀤𑀸𑀲𑀺𑀬𑀁. 𑀤𑀼 𑀓𑀼𑀘𑁆𑀙𑀺𑀢𑀁 𑀅𑀲𑀢𑀺 𑀪𑀓𑁆𑀔𑀢𑀻𑀢𑀺 𑀤𑀸𑀲𑀻, 𑀈, 𑀤𑀻𑀬𑀦𑁆𑀢𑁂 𑀢𑀸𑀬𑀸𑀢𑀺 𑀯𑀸 𑀤𑀸𑀲𑀻, 𑀤𑀸 𑀤𑀸𑀦𑁂, 𑀲𑁄, 𑀈 𑀘. 𑀘𑀺𑀝 𑀧𑁂𑀲𑀦𑁂, 𑀓𑀫𑁆𑀫𑀦𑀺 𑀡𑁄, 𑀈. 𑀓𑀼𑀝𑀁 𑀉𑀤𑀓𑀓𑀼𑀫𑁆𑀪𑀁 𑀥𑀸𑀭𑁂𑀢𑀻𑀢𑀺 𑀓𑀼𑀝𑀥𑀸𑀭𑀺𑀓𑀸, 𑀡𑁆𑀯𑀼.

𑀤𑁆𑀯𑀬𑀁 𑀲𑀼𑀪𑀸𑀲𑀼𑀪𑀦𑀺𑀭𑀽𑀧𑀺𑀦𑀺𑀬𑀁 𑀲𑀁𑀯𑀭𑀺𑀓𑀸𑀤𑀺𑀫𑁆𑀳𑀺. 𑀯𑀭 𑀕𑀢𑀺𑀬𑀁, 𑀓𑀢𑁆𑀢𑀭𑀺 𑀇𑀦𑀻. 𑀲𑀼𑀪𑀸𑀲𑀼𑀪𑀲𑁆𑀲 𑀇𑀓𑁆𑀔𑀡𑀁 𑀦𑀺𑀭𑀽𑀧𑀦𑀁 𑀬𑀲𑁆𑀲𑀸𑀢𑁆𑀣𑀻𑀢𑀺, 𑀇, 𑀲𑀓𑀢𑁆𑀣𑁂 𑀓𑁄. 𑀇𑀫𑁂 𑀤𑁆𑀯𑁂 𑀲𑀤𑁆𑀤𑀸 𑀢𑀼𑀮𑁆𑀬𑀢𑁆𑀣𑀸.

𑀬𑀸 𑀲𑀬𑀁 𑀔𑀢𑁆𑀢𑀺𑀬𑀚𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀭𑀺𑀬𑀸, 𑀲𑀸 𑀔𑀢𑁆𑀢𑀺𑀬𑀸𑀦𑀻, 𑀔𑀢𑁆𑀢𑀺𑀬𑀸 𑀘. 𑀔𑀢𑁆𑀢𑀺𑀬𑀲𑁆𑀲𑀸𑀧𑀘𑁆𑀘𑀁 𑀔𑀢𑁆𑀢𑀺𑀬𑀸𑀦𑀻, 𑀆𑀦𑁄, 𑀈. 𑀡𑀫𑁆𑀳𑀺 𑀔𑀢𑁆𑀢𑀺𑀬𑀸.

𑁨𑁩𑁭. 𑀧𑀚𑁆𑀚𑀁 𑀅𑀕𑁆𑀕𑀺𑀲𑀓𑁆𑀔𑀺𑀧𑀼𑀩𑁆𑀩𑀓𑀢𑀧𑀸𑀡𑀺𑀕𑀳𑀺𑀢𑀸𑀬𑀁 𑀪𑀭𑀺𑀬𑀸𑀬𑀁, 𑀅𑀜𑁆𑀜𑀢𑁆𑀭 𑀢𑀽𑀧𑀘𑀸𑀭𑀸. 𑀤𑀸𑀭𑀬𑀦𑁆𑀢𑁂 𑀬𑁂𑀦𑀸𑀢𑀺 𑀤𑀸𑀭𑁄, 𑀤𑀭 𑀯𑀺𑀤𑀸𑀭𑀡𑁂, 𑀅𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀲𑀜𑁆𑀜𑀸𑀬𑀁 𑀡𑁄. 𑀚𑀸𑀬𑀢𑀺 𑀧𑀼𑀢𑁆𑀢𑁄 𑀬𑀸𑀬𑀸𑀢𑀺 𑀚𑀸𑀬𑀸, 𑀚𑀦 𑀚𑀦𑀦𑁂, 𑀬𑁄, 𑀚𑀦𑀺𑀲𑁆𑀲 𑀚𑀸 𑀘, 𑀆, 𑀚𑀬𑀢𑀻𑀢𑀺 𑀯𑀸 𑀚𑀸𑀬𑀸, 𑀚𑀺 𑀚𑀬𑁂, 𑀬𑁄, 𑀚𑀺𑀲𑁆𑀲 𑀚𑀸, 𑀆, 𑀚𑀸𑀬𑀸. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀅𑀢𑁆𑀢𑁄. 𑀖𑀭𑀁 𑀦𑁂𑀢𑀻𑀢𑀺 𑀖𑀭𑀡𑀻, 𑀡𑀢𑁆𑀢𑀁. 𑀪𑀭𑀺𑀢𑀩𑁆𑀩𑀢𑁄 𑀪𑀭𑀺𑀬𑀸, 𑀪𑀭 𑀪𑀭𑀡𑁂, 𑀬𑁄. 𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀧𑀺𑀬𑀸,𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀬𑁄. 𑀧𑀚𑀁 𑀧𑀼𑀢𑁆𑀢𑀁 𑀧𑀸𑀮𑁂𑀢𑀻𑀢𑀺 𑀧𑀚𑀸𑀧𑀢𑀺, 𑀧𑀸 𑀧𑀸𑀮𑀦𑁂,𑀢𑀺, 𑀆𑀢𑁆𑀢𑀁, 𑀭𑀲𑁆𑀲𑀢𑁆𑀢𑀜𑁆𑀘. 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑀻 𑀤𑀼𑀢𑀺𑀬𑀸. 𑀧𑀞𑀫𑁄 𑀪𑀢𑁆𑀢𑀸, 𑀪𑀭𑀺𑀬𑀸 𑀤𑀼𑀢𑀺𑀬𑀸. 𑀲𑀸𑀫𑀺𑀓𑀲𑁆𑀲 𑀧𑀸𑀤𑁂 𑀧𑀭𑀺𑀘𑀭𑀢𑀻𑀢𑀺 𑀧𑀸𑀤𑀧𑀭𑀺𑀘𑀸𑀭𑀺𑀓𑀸, 𑀡𑁆𑀯𑀼. 𑀧𑀢𑀺𑀦𑀻, 𑀧𑀸𑀡𑀺𑀕𑀳𑀺𑀢𑀸, 𑀲𑀳𑀥𑀫𑁆𑀫𑀺𑀦𑀻𑀢𑀺𑀧𑀺 𑀢𑀲𑁆𑀲𑀸𑀬𑁂𑀯 𑀦𑀸𑀫𑀸𑀦𑀺.

𑁨𑁩𑁮. 𑀢𑀺𑀓𑀁 𑀲𑀔𑀺𑀬𑀁. 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀲𑀳 𑀔𑀸𑀬𑀢𑀺 𑀧𑀓𑀸𑀲𑀢𑀻𑀢𑀺 𑀲𑀔𑀻, 𑀲𑀳𑀧𑀼𑀩𑁆𑀩𑁄 𑀔𑀸 𑀧𑀓𑀸𑀲𑀦𑀓𑀣𑀦𑁂𑀲𑀼, 𑀈. 𑀅𑀮 𑀪𑀽𑀲𑀦𑁂 𑀆𑀧𑀼𑀩𑁆𑀩𑁄, 𑀇. 𑀯𑀬𑀲𑀸 𑀢𑀼𑀮𑁆𑀬𑀸 𑀯𑀬𑀲𑀸, 𑀢𑀼𑀮𑁆𑀬𑁂 𑀲𑀜𑁆𑀜𑀸𑀬𑀁 𑀲𑁄 [𑀧𑀸𑀡𑀺𑀦𑀺 𑁪.𑁪.𑁯𑁧 𑀲𑀼𑀢𑁆𑀢𑁂 𑀬𑀧𑀘𑁆𑀘𑀬𑁄 𑀤𑀺𑀲𑁆𑀲𑀢𑀺].

𑀚𑀭𑁄𑀯𑀼𑀘𑁆𑀘𑀢𑀺 𑀘𑁄𑀭𑀲𑁆𑀲𑀸𑀫𑀺𑀓𑁄, 𑀢𑀲𑁆𑀲𑀸𑀬𑀁 𑀚𑀸𑀭𑀻, 𑀡𑁄, 𑀈. 𑀲𑀸𑀫𑀺𑀓𑀁 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀢𑁆𑀭 𑀘𑀭𑀢𑀻𑀢𑀺, 𑀇𑀦𑀻.

𑁨𑁩𑁯. 𑀧𑀼𑀫𑁂 𑀢𑀽𑀢𑀺 𑀮𑀺𑀗𑁆𑀕𑀦𑁆𑀢𑁄 𑀢𑀼𑀲𑀤𑁆𑀤𑁄 𑀦 𑀧𑀼𑀩𑁆𑀩𑀁 𑀪𑀚𑀢𑁂. 𑀅𑀭 𑀕𑀫𑀦𑁂, 𑀢𑀼, 𑀅𑀭𑀲𑁆𑀲𑀼𑀢𑁆𑀢𑀁. 𑀭𑀢𑀺𑀬𑀸 𑀚𑀸𑀬𑀢𑀻𑀢𑀺 𑀭𑀚𑁄, 𑀢𑀺𑀮𑁄𑀧𑁄. 𑀧𑀼𑀧𑁆𑀨 𑀯𑀺𑀓𑀲𑀦𑁂, 𑀧𑀼𑀧𑁆𑀨𑀁.

𑀢𑀺𑀓𑀁 𑀭𑀚𑀲𑁆𑀲𑀮𑀸𑀬𑀁. 𑀉𑀢𑀼𑀬𑁄𑀕𑀸𑀉𑀢𑀼𑀦𑀻, 𑀇𑀦𑀻. 𑀭𑀚𑀬𑁄𑀕𑀸 𑀭𑀚𑀲𑁆𑀲𑀮𑀸, 𑀲𑀮𑁄. 𑀧𑀼𑀧𑁆𑀨𑀯𑀦𑁆𑀢𑀢𑀸𑀬 𑀧𑀼𑀧𑁆𑀨𑀯𑀢𑀻. 𑀣𑀻𑀥𑀫𑁆𑀫𑀺𑀦𑀻, 𑀅𑀯𑀻, 𑀅𑀢𑁆𑀢𑁂𑀬𑀻, 𑀫𑀮𑀺𑀦𑀻, 𑀉𑀢𑀼𑀫𑀢𑀻, 𑀉𑀤𑀓𑀻𑀇𑀘𑁆𑀘𑀸𑀤𑀻𑀦𑀺𑀧𑀺 𑀢𑀲𑁆𑀲𑀸 𑀦𑀸𑀫𑀸𑀦𑀺.

𑀢𑀺𑀓𑀁 𑀕𑀩𑁆𑀪𑀺𑀦𑀺𑀬𑀁. 𑀕𑀭𑀼 𑀅𑀮𑀳𑀼𑀓𑁄 𑀕𑀩𑁆𑀪𑁄 𑀓𑀼𑀘𑁆𑀙𑀺 𑀏𑀢𑀺𑀲𑁆𑀲𑀸𑀢𑀺 𑀕𑀭𑀼𑀕𑀩𑁆𑀪𑀸. 𑀆𑀧𑀦𑁆𑀦𑁄 𑀧𑀢𑁆𑀢𑁄 𑀕𑀩𑁆𑀪𑀝𑁆𑀞𑁄 𑀲𑀢𑁆𑀢𑁄 𑀏𑀢𑀸𑀬𑀸𑀢𑀺 𑀆𑀧𑀦𑁆𑀦𑀲𑀢𑁆𑀢𑀸. 𑀕𑀩𑁆𑀪𑀬𑁄𑀕𑀸 𑀕𑀩𑁆𑀪𑀺𑀦𑀻.

𑀢𑀺𑀓𑀁 𑀬𑁂𑀦 𑀯𑁂𑀞𑀺𑀢𑁄 𑀕𑀩𑁆𑀪𑁄 𑀓𑀼𑀘𑁆𑀙𑀺𑀬𑀁 𑀢𑀺𑀝𑁆𑀞𑀢𑀺, 𑀢𑀢𑁆𑀭𑀸𑀲𑀬𑁂𑀢𑀺 𑀔𑁆𑀬𑀸𑀢𑁂. 𑀕𑀩𑁆𑀪𑁄 𑀆𑀲𑀬𑀢𑁂 𑀢𑀺𑀝𑁆𑀞𑀢𑁆𑀬𑀢𑁆𑀭𑀸𑀢𑀺, 𑀡𑁄. 𑀚𑀭𑀁 𑀏𑀢𑀻𑀢𑀺 𑀚𑀮𑀸𑀩𑀼. 𑀉, 𑀭𑀲𑁆𑀲 𑀮𑁄, 𑀬𑀲𑁆𑀲 𑀩𑁄, 𑀚𑀭𑀸𑀧𑀼𑀩𑁆𑀩𑁄 𑀇 𑀕𑀢𑀺𑀬𑀁. 𑀓𑀮𑀁 𑀚𑀭𑀢𑀁 𑀮𑀸𑀢𑀻𑀢𑀺 𑀓𑀮𑀮𑁄, 𑀓𑀮 𑀲𑀗𑁆𑀔𑁆𑀬𑀸𑀦𑁂 𑀯𑀸, 𑀅𑀮𑁄.

𑁨𑁪𑁦-𑁨𑁪𑁧. 𑀲𑀢𑁆𑀢𑀓𑀁 𑀪𑀢𑁆𑀢𑀭𑀺. 𑀥𑀽 𑀓𑀫𑁆𑀧𑀦𑁂, 𑀲𑀦𑁆𑀢𑀸𑀲𑀁 𑀥𑀼𑀦𑁄𑀢𑀻𑀢𑀺 𑀥𑀯𑁄, 𑀅. 𑀲𑀁 𑀏𑀢𑀲𑁆𑀲𑀢𑁆𑀣𑀻𑀢𑀺 𑀲𑀸𑀫𑀺𑀓𑁄, 𑀆𑀫𑀺𑀧𑀘𑁆𑀘𑀬𑁄, 𑀲𑀓𑀢𑁆𑀣𑁂 𑀓𑁄, 𑀇𑀧𑀘𑁆𑀘𑀬𑁄 𑀯𑀸, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀫𑁄, 𑀅𑀲𑁆𑀲 𑀘 𑀤𑀻𑀖𑁄, 𑀲𑀸𑀫𑀺𑀓𑁄. 𑀪𑀭 𑀪𑀭𑀡𑁂, 𑀪𑀭𑀢𑀻𑀢𑀺 𑀪𑀢𑁆𑀢𑀸, 𑀭𑀺𑀢𑀼. 𑀓𑀫𑀼 𑀇𑀘𑁆𑀙𑀸𑀬𑀁, 𑀢𑁄, ‘‘𑀧𑀓𑁆𑀓𑀫𑀸𑀤𑀻𑀳𑀺 𑀦𑁆𑀢𑁄 𑀘𑀸’’𑀢𑀺 𑀦𑁆𑀢𑀢𑁆𑀢𑀁. 𑀧𑀸 𑀭𑀓𑁆𑀔𑀡𑁂, 𑀅𑀢𑀺, 𑀧𑀢𑀺. 𑀯𑀭 𑀇𑀘𑁆𑀙𑀸𑀬𑀁, 𑀅, 𑀯𑀭𑁄. 𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀬𑁄.

𑀭𑀢𑀺𑀓𑀸𑀭𑀡𑀢𑁆𑀢𑀸 𑀧𑀢𑀺𑀦𑁄 𑀉𑀧 𑀉𑀧𑀧𑀢𑀺, 𑀲𑀫𑀸𑀲𑁂 𑀓𑀢𑁂 𑀅𑀪𑀺𑀥𑀸𑀦𑀢𑁄 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀅𑀧𑁆𑀧𑀥𑀸𑀦𑀪𑀽𑀢𑁄 𑀯𑀸 𑀧𑀢𑀺 𑀉𑀧𑀧𑀢𑀺. 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺, 𑀚𑀻𑀬𑀦𑁆𑀢𑁂 𑀅𑀦𑁂𑀦𑀸𑀢𑀺 𑀚𑀸𑀭𑁄, 𑀤𑀸𑀭𑁄 𑀘.

𑀲𑀢𑁆𑀢𑀓𑀁 𑀧𑀼𑀢𑁆𑀢𑁂. 𑀦𑀭𑀓𑁂 𑀦 𑀧𑀢𑀦𑁆𑀢𑁆𑀬𑀦𑁂𑀦 𑀚𑀸𑀢𑁂𑀦𑀸𑀢𑀺 𑀅𑀧𑀘𑁆𑀘𑀁, 𑀧𑀢 𑀕𑀢𑀺𑀬𑀁, 𑀬𑁄, 𑀢𑁆𑀬𑀲𑁆𑀲 𑀘𑁄, 𑀦 𑀧𑀢𑀢𑀺 𑀦 𑀯𑀺𑀘𑁆𑀙𑀺𑀦𑁆𑀤𑀢𑀺 𑀯𑀁𑀲𑁄 𑀏𑀢𑁂𑀦𑀸𑀢𑀺 𑀯𑀸 𑀅𑀧𑀘𑁆𑀘𑀁, 𑀧𑀼𑀢𑁆𑀢𑁂, 𑀥𑀻𑀢𑀭𑀺 𑀘 𑀦𑀺𑀘𑁆𑀘𑀦𑀧𑀼𑀁𑀲𑀓𑁄𑀬𑀁. 𑀧𑀽 𑀧𑀯𑀦𑁂. 𑀧𑀼𑀦𑀸𑀢𑀺 𑀧𑀺𑀢𑀭𑁄 𑀢𑁂𑀦𑀸𑀢𑀺 𑀧𑀼𑀢𑁆𑀢𑁄. ‘‘𑀙𑀤𑀸𑀤𑀻𑀳𑀺 𑀢𑀢𑁆𑀭𑀡’’𑀢𑀺 𑀢𑁄. 𑀧𑀽𑀭𑁂𑀢𑀻𑀢𑀺 𑀯𑀸 𑀧𑀼𑀢𑁆𑀢𑁄. 𑀅𑀢𑁆𑀢𑀢𑁄 𑀚𑀸𑀢𑁄 𑀅𑀢𑁆𑀭𑀚𑁄, ‘‘𑀅𑀢𑁆𑀢𑀚𑁄’’𑀢𑀺𑀧𑀺 𑀧𑀸𑀞𑁄. 𑀲𑀼𑀬𑀢𑁂𑀢𑀺 𑀲𑀼𑀢𑁄. 𑀲𑀼 𑀅𑀪𑀺𑀲𑀯𑁂, 𑀲𑀼𑀡𑀸𑀢𑀻𑀢𑀺 𑀯𑀸 𑀲𑀼𑀢𑁄, 𑀢𑁄, 𑀲𑀼 𑀲𑀯𑀦𑁂. 𑀢𑀦𑀼𑀫𑁆𑀳𑀸 𑀚𑀸𑀢𑁄 𑀢𑀦𑀼𑀚𑁄, 𑀢𑀦𑀬𑁄 𑀘, 𑀬𑁄, 𑀢𑀦𑁄𑀢𑀺 𑀫𑀼𑀤𑀦𑁆𑀢𑀺 𑀯𑀸 𑀢𑀦𑀬𑁄, 𑀅𑀬𑁄. 𑀲𑀽𑀬𑀢𑁂𑀢𑀺 𑀲𑀽𑀦𑀼, 𑀓𑀫𑁆𑀫𑀦𑀺 𑀦𑀼, 𑀲𑀽 𑀧𑀲𑀯𑁂.

𑀧𑀼𑀢𑁆𑀢𑀸𑀤𑀬𑁄 𑀲𑀽𑀦𑀼𑀧𑀭𑀺𑀬𑀦𑁆𑀢𑀸 𑀥𑀻𑀢𑀭𑀺 𑀯𑀢𑁆𑀢𑀫𑀸𑀦𑀸 𑀇𑀢𑁆𑀣𑀺𑀬𑀁 𑀯𑀢𑁆𑀢𑀦𑁆𑀢𑀺. 𑀤𑀼𑀳𑀺𑀢𑀸, 𑀥𑀻𑀢𑀸 𑀘 𑀲𑀤𑀸 𑀦𑀸𑀭𑀺𑀬𑀫𑁂𑀯. 𑀤𑀼𑀳 𑀧𑀧𑀽𑀭𑀡𑁂, 𑀭𑀸𑀢𑀼, 𑀑𑀢𑁆𑀢𑀸𑀪𑀸𑀯𑁄, 𑀇𑀓𑀸𑀭𑀸𑀕𑀫𑁄 𑀘. 𑀥𑀸 𑀥𑀸𑀭𑀡𑁂, 𑀭𑀸𑀢𑀼, 𑀆𑀲𑁆𑀲𑀻. 𑀧𑀼𑀢𑁆𑀢𑀸𑀤𑀬𑁄 𑀘 𑀢𑁂 𑀲𑀸𑀫𑀜𑁆𑀜𑁂𑀦𑁂𑀯 𑀓𑀼𑀡𑁆𑀟𑀕𑁄𑀮𑀓𑀸𑀤𑀻𑀦𑀁 𑀯𑀸𑀘𑀓𑀸. 𑀲𑀯𑀡𑁆𑀡𑀸𑀬𑀁 𑀢𑀼 𑀊𑀠𑀸𑀬𑀁 𑀲𑀚𑀸𑀢𑁄 𑀲𑀬𑀁 𑀚𑀦𑀺𑀢𑁄 𑀲𑀼𑀢𑁄 𑀑𑀭𑀲𑁄 𑀦𑀸𑀫. 𑀲𑀚𑀸𑀢𑀲𑀤𑁆𑀤𑁂𑀦 𑀓𑀼𑀡𑁆𑀟𑀓𑀕𑁄𑀮𑀓𑀔𑀢𑁆𑀢𑀸𑀤𑀺𑀩𑁆𑀬𑀯𑀘𑁆𑀙𑁂𑀤𑁄. 𑀚𑀻𑀯𑀢𑀺 𑀪𑀢𑁆𑀢𑀭𑀺 𑀚𑀸𑀭𑀚𑁄 𑀲𑀼𑀢𑁄 𑀓𑀼𑀡𑁆𑀟𑀸𑀔𑁆𑀬𑁄. 𑀫𑀢𑁂 𑀪𑀢𑁆𑀢𑀭𑀺 𑀚𑀸𑀭𑀚𑁄 𑀕𑁄𑀮𑀓𑀸𑀔𑁆𑀬𑁄. 𑀅𑀭𑀺𑀬𑀸𑀲𑀼𑀤𑁆𑀤𑀚𑁄 𑀲𑀼𑀢𑁄 𑀔𑀢𑁆𑀢𑀸 𑀦𑀸𑀫 [𑀔𑀢𑁆𑀢𑀸 𑀅𑀭𑀺𑀬𑀸𑀲𑀼𑀤𑁆𑀤𑀸𑀦𑀁 (𑀅𑀫𑀭 𑁨𑁦.𑁩)]. 𑀆𑀤𑀺𑀦𑀸 𑀫𑀸𑀕𑀥𑀸𑀤𑀻𑀦𑀁 𑀕𑀳𑀡𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀫𑀢𑁂 𑀚𑀸𑀭𑀚𑁄 𑀓𑀼𑀡𑁆𑀟𑁄,

𑀫𑀢𑁂 𑀪𑀢𑁆𑀢𑀭𑀺 𑀕𑁄𑀮𑀓𑁄’’𑀢𑀺 [𑀅𑀫𑀭 𑁧𑁬.𑁩𑁬].

‘‘𑀫𑀸𑀕𑀥𑁄 𑀲𑀼𑀤𑁆𑀤𑀔𑀢𑁆𑀢𑀸𑀚𑁄’’𑀢𑀺 [𑀅𑀪𑀺𑀥𑀸𑀦𑀼 𑁫𑁦𑁩 𑀕𑀸𑀣𑀸] 𑀘.

𑀉𑀭𑀲𑀸 𑀫𑀦𑀲𑀸 𑀦𑀺𑀫𑁆𑀫𑀺𑀢𑁄, 𑀉𑀭𑀲𑀤𑁆𑀤𑀸 𑀢𑀢𑀺𑀬𑀦𑁆𑀢𑀸 𑀦𑀺𑀫𑁆𑀫𑀺𑀢𑀢𑁆𑀣𑁂 𑀡𑁄, 𑀦𑀺𑀯𑀺𑀝𑁆𑀞𑀢𑁆𑀢𑀸 𑀢𑁂𑀦 𑀦𑀺𑀫𑁆𑀫𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀭𑀲𑀺 𑀪𑀯𑁄𑀢𑀺 𑀯𑀸 𑀑𑀭𑀲𑁄.

𑁨𑁪𑁨. 𑀘𑀢𑀼𑀓𑁆𑀓𑀁𑀧𑀢𑀺𑀧𑀢𑀺𑀦𑀻𑀦𑀁 𑀬𑀼𑀕𑁂, ‘‘𑀤𑀸𑀭𑀸 𑀧𑀼𑀫𑁂 𑀩𑀳𑀼𑀢𑁆𑀢𑁂 𑀘, 𑀤𑀁 𑀓𑀮𑀢𑁆𑀭𑁂 𑀦𑀧𑀼𑀁𑀲𑀓𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁩𑁮] 𑀅𑀫𑀭𑀫𑀸𑀮𑀸, 𑀚𑀁𑀲𑀤𑁆𑀤𑁄 𑀢𑁆𑀯𑀩𑁆𑀬𑀬𑁄 𑀤𑀸𑀭𑀯𑀘𑀦𑁄. 𑀢𑀲𑁆𑀫𑀸 ‘‘𑀚𑀫𑁆𑀧𑀢𑀺, 𑀤𑀫𑁆𑀧𑀢𑀻’’𑀢𑀺𑀧𑀺 𑀪𑀯𑀺𑀢𑀩𑁆𑀩𑀁, 𑀇𑀥 𑀧𑀦 𑀓𑀘𑁆𑀘𑀸𑀬𑀦𑀫𑀢𑁂𑀦𑁄𑀤𑀸𑀳𑀝𑀸. 𑀚𑀸𑀬𑀸 𑀘 𑀧𑀢𑀺 𑀘 𑀚𑀸𑀬𑀸𑀧𑀢𑀺. 𑀇𑀢𑀭𑀻𑀢𑀭𑀬𑁄𑀕𑀤𑁆𑀯𑀦𑁆𑀤𑁄. 𑀚𑀸𑀬𑀸 𑀘 𑀧𑀢𑀺 𑀘 𑀚𑀸𑀦𑀺𑀧𑀢𑀺, 𑀢𑀣𑀸 𑀚𑀸𑀬𑀫𑁆𑀧𑀢𑀺𑀆𑀤𑀬𑁄, 𑀚𑀸𑀬𑀸𑀲𑀤𑁆𑀤𑀲𑁆𑀲 𑀧𑀢𑀺𑀫𑁆𑀳𑀺 𑀧𑀭𑁂 𑀚𑀸𑀦𑀺, 𑀢𑀼𑀤𑀜𑁆𑀘, 𑀚𑀸𑀬𑀜𑁆𑀘 𑀬𑀤𑀸𑀤𑀺𑀦𑀸.

𑀢𑀺𑀓𑀁 𑀦𑀧𑀼𑀁𑀲𑀓𑁂. 𑀯𑀺𑀕𑀢𑁄 𑀭𑀸𑀕𑀲𑁆𑀲𑀯𑁄 𑀬𑀲𑁆𑀫𑀸 𑀯𑀲𑁆𑀲𑀯𑀭𑁄. 𑀲𑀼 𑀲𑀯𑀦𑁂, 𑀅𑀭𑁄. 𑀧𑀡 𑀩𑁆𑀬𑀯𑀳𑀸𑀭𑁂, 𑀟𑁄, 𑀧𑀟𑀺 𑀮𑀺𑀗𑁆𑀕𑀯𑁂𑀓𑀮𑁆𑀬𑁂 𑀯𑀸, 𑀪𑀽𑀯𑀸𑀤𑀺. 𑀦 𑀇𑀢𑁆𑀣𑀻 𑀦 𑀧𑀼𑀫𑀸 𑀦𑀧𑀼𑀁𑀲𑀓𑀁, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀇𑀢𑁆𑀣𑀺𑀧𑀼𑀫𑀸𑀦𑀁 𑀧𑀼𑀁𑀲𑀓𑀪𑀸𑀯𑁄, 𑀦𑀲𑁆𑀲 𑀘 𑀧𑀓𑀢𑀺. 𑀢𑀢𑀺𑀬𑀸𑀧𑀓𑀢𑀺, 𑀲𑀡𑁆𑀟𑁄, 𑀓𑀮𑀻𑀩𑀦𑁆𑀢𑀺𑀧𑀺 𑀢𑀲𑁆𑀲 𑀦𑀸𑀫𑀸𑀦𑀺. 𑀢𑀢𑀺𑀬𑀸 𑀧𑀓𑀢𑀺 𑀢𑀢𑀺𑀬𑀧𑁆𑀧𑀓𑀸𑀭𑁄, 𑀲𑀫𑀚𑀸𑀢𑀺𑀓𑁂 𑀇𑀢𑁆𑀣𑀺𑀧𑀼𑀭𑀺𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀢𑀺𑀬𑀢𑁆𑀢𑀁 𑀧𑀓𑀸𑀭𑀲𑁆𑀲. 𑀧𑀞𑀫𑀸 𑀳𑀺 𑀧𑀓𑀢𑀺 𑀇𑀢𑁆𑀣𑀻, 𑀤𑀼𑀢𑀺𑀬𑀸 𑀧𑀓𑀢𑀺 𑀧𑀼𑀭𑀺𑀲𑁄, 𑀇𑀢𑀭𑀧𑀓𑀢𑀺 𑀢𑀢𑀺𑀬𑀸 𑀧𑀓𑀢𑀺.

𑁨𑁪𑁩. 𑀙𑀓𑁆𑀓𑀁 𑀜𑀸𑀢𑀺𑀫𑀢𑁆𑀢𑁂, 𑀩𑀦𑁆𑀥𑀼𑀬𑁂𑀯 𑀩𑀦𑁆𑀥𑀯𑁄, 𑀅, 𑀉𑀲𑁆𑀲𑀸𑀯𑁄. 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑀼, 𑀉. 𑀲𑀲𑁆𑀲 𑀅𑀢𑁆𑀢𑀦𑁄 𑀚𑀦𑁄 𑀲𑀚𑀦𑁄. 𑀲𑀫𑀸𑀦𑀁 𑀕𑁄𑀢𑁆𑀢𑀁 𑀓𑀼𑀮𑀁 𑀅𑀲𑁆𑀲𑀸𑀢𑀺 𑀲𑀕𑁄𑀢𑁆𑀢𑁄, 𑀲𑀫𑀸𑀦𑀲𑁆𑀲 𑀲𑀪𑀸𑀯𑁄. 𑀜𑀸 𑀅𑀯𑀩𑁄𑀥𑀦𑁂, 𑀓𑀫𑁆𑀫𑁂𑀢𑀺, 𑀜𑀸𑀢𑀺𑀬𑁂𑀯 𑀜𑀸𑀢𑀓𑁄, 𑀅𑀢𑁆𑀢𑀁, 𑀲𑀓𑀢𑁆𑀣𑁂 𑀓𑁄 𑀘. 𑀲𑀼𑀲𑀤𑁆𑀤𑁄𑀧𑁆𑀬𑀢𑁆𑀭 [𑀲𑁆𑀯 (𑀅𑀫𑀭 𑁧𑁬.𑁩𑁬)].

𑀤𑁆𑀯𑀬𑀁 𑀲𑀢𑁆𑀢𑀧𑀼𑀭𑀺𑀲𑀸𑀯𑀥𑀺𑀓𑁂𑀲𑀼 𑀦𑀺𑀓𑀝𑀜𑀸𑀢𑀻𑀲𑀼. 𑀮𑁄𑀳𑀺𑀢𑁂𑀦 𑀲𑀫𑁆𑀩𑀦𑁆𑀥𑁄 𑀲𑀸𑀮𑁄𑀳𑀺𑀢𑁄, 𑀲𑀫𑁆𑀩𑀦𑁆𑀥𑀲𑁆𑀲 𑀲𑀸𑀤𑁂𑀲𑁄, 𑀧𑀼𑀩𑁆𑀩𑀦𑀺𑀧𑀸𑀢𑁄 𑀘, 𑀲𑀫𑀸𑀦𑀁 𑀧𑀺𑀡𑁆𑀟𑀤𑀸𑀦𑀁 𑀬𑀲𑁆𑀲 𑀲𑀧𑀺𑀡𑁆𑀟𑁄, 𑀲𑀦𑀸𑀪𑀬𑁄𑀧𑁆𑀬𑀢𑁆𑀭 [𑀦𑀸𑀪𑀺 𑀲𑀢𑁆𑀢𑀧𑀼𑀭𑀺𑀲𑀸𑀯𑀥𑀺𑀓𑀓𑀼𑀮𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁩𑁩)]. 𑀢𑀺𑀓𑀁 𑀧𑀺𑀢𑀭𑀺. 𑀢𑀸 𑀧𑀸𑀮𑀦𑁂, 𑀢𑁄 𑀓𑀢𑁆𑀢𑀭𑀺. 𑀚𑀦𑀬𑀢𑀻𑀢𑀺 𑀚𑀦𑀓𑁄, 𑀡𑁆𑀯𑀼. 𑀧𑀸 𑀭𑀓𑁆𑀔𑀡𑁂, 𑀭𑀺𑀢𑀼, 𑀅𑀲𑁆𑀲𑀺𑀢𑁆𑀢𑀁.

𑁨𑁪𑁪. 𑀙𑀓𑁆𑀓𑀁 𑀫𑀸𑀢𑀭𑀺. 𑀅𑀫 𑀧𑀽𑀚𑀸𑀬𑀁, 𑀓𑀫𑁆𑀫𑀦𑀺 𑀫𑁄, 𑀩𑁄 𑀘, 𑀅𑀫𑁆𑀫𑀸, 𑀅𑀫𑁆𑀩𑀸. 𑀚𑀦𑀬𑀢𑀻𑀢𑀺 𑀚𑀦𑀦𑀻, 𑀬𑀼, 𑀦𑀤𑀸𑀤𑀺. 𑀫𑀸𑀦 𑀧𑀽𑀚𑀸𑀬𑀁, 𑀧𑀼𑀢𑁆𑀢𑀁 𑀫𑀸𑀦𑁂𑀢𑀻𑀢𑀺 𑀫𑀸𑀢𑀸, 𑀭𑀸𑀢𑀼, 𑀧𑀸𑀢𑀻𑀢𑀺 𑀯𑀸 𑀫𑀸𑀢𑀸, 𑀧𑀸𑀢𑀺𑀲𑁆𑀲 𑀫𑁄. 𑀚𑀦𑁂𑀢𑀻𑀢𑀺 𑀚𑀦𑁂𑀢𑁆𑀢𑀺,𑀢𑀺. 𑀚𑀦𑁂𑀢𑀻𑀢𑀺 𑀚𑀦𑀺𑀓𑀸, 𑀡𑁆𑀯𑀼, 𑀇𑀢𑁆𑀢𑀁.

𑀅𑀧𑁆𑀧𑀥𑀸𑀦𑀪𑀽𑀢𑀸 𑀫𑀸𑀢𑀸 𑀉𑀧𑀫𑀸𑀢𑀸, 𑀓𑀼𑀫𑀸𑀭𑁂 𑀥𑀸𑀭𑁂𑀢𑀻𑀢𑀺 𑀥𑀸𑀢𑀺. 𑀥𑀸 𑀥𑀸𑀭𑀡𑁂,𑀢𑀺. 𑀚𑀸𑀬𑀸𑀬 𑀪𑀭𑀺𑀬𑀸𑀬 𑀪𑀸𑀢𑀺𑀓𑁄 𑀓𑀦𑀺𑀝𑁆𑀞𑁄 𑀘 𑀚𑁂𑀝𑁆𑀞𑁄 𑀘 𑀲𑀸𑀮𑁄 𑀦𑀸𑀫, 𑀲𑀲𑁆𑀲 𑀅𑀢𑁆𑀢𑀦𑁄 𑀏𑀲𑀸 𑀲𑀸, 𑀪𑀭𑀺𑀬𑀸, 𑀢𑀲𑁆𑀲𑀸 𑀪𑀸𑀢𑀸 𑀲𑀸𑀮𑁄, 𑀚𑀸𑀬𑀸𑀬 𑀪𑀸𑀢𑀭𑀺 𑀅𑀮𑁄. 𑀲𑀭 𑀕𑀢𑀺𑀘𑀺𑀦𑁆𑀢𑀸𑀳𑀺𑀁𑀲𑀸𑀲𑀼 𑀯𑀸, 𑀡𑁄, 𑀮𑀢𑁆𑀢𑀁, 𑀲𑀸𑀮 𑀯𑀺𑀢𑀓𑁆𑀓𑁂 𑀯𑀸, 𑀘𑀼𑀭𑀸𑀤𑀺.

𑁨𑁪𑁫. 𑀲𑀸𑀫𑀺𑀦𑁄 𑀪𑀢𑁆𑀢𑀼 𑀪𑀕𑀺𑀦𑀻 𑀦𑀦𑀦𑁆𑀤𑀸 𑀦𑀸𑀫, 𑀦 𑀦𑀦𑁆𑀤𑀢𑀻𑀢𑀺 𑀦𑀦𑀦𑁆𑀤𑀸, 𑀅𑀢𑁆𑀢𑀸𑀪𑀸𑀯𑁄 𑀦𑀲𑁆𑀲 𑀯𑀺𑀪𑀸𑀲𑀸𑀥𑀺𑀓𑀸𑀭𑀸. 𑀦𑀦𑁆𑀤 𑀲𑀫𑀺𑀤𑁆𑀥𑀺𑀬𑀁, 𑀪𑀽𑀯𑀸𑀤𑀺.

𑀤𑁆𑀯𑀬𑀁 𑀅𑀬𑁆𑀬𑀺𑀓𑀸𑀬𑀁. 𑀫𑀸𑀢𑀼𑀬𑀸 𑀫𑀸𑀢𑀸 𑀫𑀸𑀢𑀸𑀫𑀳𑀻. 𑀧𑀺𑀢𑀽𑀦𑀁 𑀧𑀺𑀢𑀭𑀺 𑀘 𑀫𑀸𑀢𑀭𑀺 𑀘 𑀆𑀫𑀳𑀁 𑀬𑀤𑀸𑀤𑀺𑀦𑀸, 𑀦𑀤𑀸𑀤𑀺. 𑀅𑀭𑀳 𑀧𑀽𑀚𑀸𑀬𑀁, 𑀡𑁆𑀯𑀼, 𑀭𑀳𑀲𑁆𑀲 𑀬𑁄, 𑀅𑀬 𑀕𑀢𑀺𑀫𑁆𑀳𑀺 𑀯𑀸, 𑀡𑁆𑀯𑀼, 𑀅𑀬𑁆𑀬𑀺𑀓𑀸.