𑁬. 𑀅𑀭𑀜𑁆𑀜𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁫. 𑀦𑀯 𑀧𑀩𑁆𑀩𑀢𑀲𑁆𑀲 𑀦𑀸𑀫𑀸𑀦𑀺. 𑀧𑀩𑁆𑀩 𑀧𑀽𑀭𑀡𑁂, 𑀢𑁄. 𑀕𑀺𑀭 𑀦𑀺𑀕𑁆𑀕𑀺𑀭𑀡𑁂, 𑀑𑀲𑀥𑀸𑀤𑀬𑁄 𑀦𑀺𑀕𑁆𑀕𑀺𑀭𑀢𑀻𑀢𑀺 𑀕𑀺𑀭𑀺, 𑀇. 𑀲𑀺𑀮𑀸𑀦𑀁 𑀭𑀸𑀲𑀺 𑀲𑁂𑀮𑁄, 𑀲𑀺𑀮𑀸 𑀧𑀘𑀼𑀭𑀸 𑀲𑀦𑁆𑀢𑁆𑀬𑀲𑁆𑀫𑀺𑀁 𑀯𑀸 𑀲𑁂𑀮𑁄, 𑀲𑁂𑀮 𑀕𑀢𑀺𑀬𑀁 𑀯𑀸, 𑀅. 𑀅𑀤𑁆𑀤 𑀕𑀢𑀺𑀫𑁆𑀳𑀺 𑀬𑀸𑀘𑀦𑁂 𑀘, 𑀪𑀽𑀯𑀸𑀤𑀺, 𑀇, 𑀅𑀤𑁆𑀤 𑀳𑀺𑀁𑀲𑀸𑀬𑀁 𑀯𑀸, 𑀘𑀼𑀭𑀸𑀤𑀺. 𑀦 𑀕𑀘𑁆𑀙𑀢𑀻𑀢𑀺 𑀦𑀕𑁄. 𑀦 𑀘𑀮𑀢𑀻𑀢𑀺 𑀅𑀘𑀮𑁄. 𑀲𑀺𑀮𑀸𑀦𑀫𑀼𑀘𑁆𑀘𑀬𑁄 𑀉𑀩𑁆𑀩𑁂𑀥𑁄, 𑀣𑀽𑀧𑁄 𑀯𑀸 𑀲𑀺𑀮𑀼𑀘𑁆𑀘𑀬𑁄. 𑀲𑀺𑀔𑀭𑀬𑁄𑀕𑀸 𑀲𑀺𑀔𑀭𑀻, 𑀈, 𑀢𑀺𑀮𑀓𑀻𑀪𑀽𑀢𑁄. 𑀪𑀼𑀁 𑀪𑀽𑀫𑀺𑀁 𑀥𑀭𑀢𑀻𑀢𑀺 𑀪𑀽𑀥𑀭𑁄, 𑀪𑀼𑀬𑀸 𑀥𑀭𑀻𑀬𑀢𑀻𑀢𑀺 𑀯𑀸 𑀪𑀽𑀥𑀭𑁄, 𑀩𑀸𑀳𑀼𑀮𑁆𑀬𑁂𑀦 𑀅, 𑀪𑀽𑀥𑀭𑁄. 𑀅𑀳𑀸𑀭𑀺𑀬𑁄, 𑀕𑁄𑀢𑁆𑀢𑁄𑀧𑀺, 𑀤𑁂𑀲𑀦𑁆𑀢𑀭𑀁 𑀦𑁂𑀢𑀼𑀫𑀲𑀓𑁆𑀬𑀢𑁆𑀢𑀸 𑀅𑀳𑀸𑀭𑀺𑀬𑁄, 𑀕𑀯𑀁 𑀪𑀽𑀫𑀺𑀁 𑀥𑀸𑀭𑀡𑁂𑀦 𑀢𑀸𑀬𑀢𑁂 𑀕𑁄𑀢𑁆𑀢𑁄.

𑀧𑀜𑁆𑀘𑀓𑀁 𑀲𑀺𑀮𑀸𑀬𑀁. 𑀅𑀫 𑀕𑀢𑀺𑀬𑀁, 𑀪𑁄. 𑀯𑀦, 𑀲𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀧𑀲𑀦𑀢𑀺 𑀩𑁆𑀬𑀸𑀧𑁂𑀢𑀻𑀢𑀺 𑀧𑀸𑀲𑀸𑀡𑁄, 𑀦𑀺𑀧𑀸𑀢𑀦𑀸, 𑀧𑀲 𑀩𑀦𑁆𑀥𑀦𑁂 𑀯𑀸, 𑀬𑀼. 𑀅𑀲𑀼 𑀔𑁂𑀧𑀦𑁂, 𑀫𑁄, 𑀅𑀲𑁆𑀫𑀸, 𑀭𑀸𑀚𑀸𑀤𑀺, 𑀅𑀲𑀼 𑀩𑁆𑀬𑀸𑀧𑀦𑁂 𑀯𑀸. 𑀧𑀮 𑀭𑀓𑁆𑀔𑀡𑁂, 𑀉𑀧𑀮𑁄, 𑀉𑀧 𑀤𑁂𑀳𑁂 𑀯𑀸, 𑀅𑀮𑀧𑀘𑁆𑀘𑀬𑁄 𑀦𑀺𑀧𑀸𑀢𑁄. 𑀲𑀺𑀮 𑀉𑀘𑁆𑀘𑁂, 𑀅. 𑀲𑀺𑀮𑀸, 𑀦𑀸𑀭𑀻.

𑁬𑁦𑁬. 𑀕𑀺𑀚𑁆𑀛𑀓𑀽𑀝𑀸𑀤𑀬𑁄 𑀢𑀺𑀓𑀽𑀝𑀦𑁆𑀢𑀸 ‘‘𑀯𑀗𑁆𑀓𑀸𑀤𑀻’’𑀢𑀺 𑀏𑀢𑁆𑀣 𑀆𑀤𑀺𑀦𑀸 𑀫𑀮𑀬𑀤𑀤𑁆𑀤𑀼𑀭𑀸𑀤𑀬𑁄 𑀘 𑀦𑀕𑀸 𑀦𑀕𑀯𑀺𑀲𑁂𑀲𑀸. 𑀕𑀺𑀚𑁆𑀛𑀸 𑀲𑀓𑀼𑀡𑀯𑀺𑀲𑁂𑀲𑀸 𑀅𑀲𑁆𑀲 𑀓𑀽𑀝𑁂 𑀯𑀲𑀦𑁆𑀢𑀺, 𑀕𑀺𑀚𑁆𑀛𑀲𑀤𑀺𑀲𑀓𑀽𑀝𑀬𑀼𑀢𑁆𑀢𑀢𑀸𑀬 𑀯𑀸 𑀕𑀺𑀚𑁆𑀛𑀓𑀽𑀝𑁄. 𑀯𑀺𑀲𑁂𑀲𑁂𑀦 𑀪𑀸𑀢𑀻𑀢𑀺 𑀯𑁂𑀪𑀸𑀭𑁄, 𑀅𑀭𑁄. 𑀧𑀼𑀮 𑀫𑀳𑀢𑁆𑀢𑁂, 𑀯𑀺𑀲𑁂𑀲𑁂𑀦 𑀧𑀼𑀮𑀢𑀻𑀢𑀺 𑀯𑁂𑀧𑀼𑀮𑁆𑀮𑁄. 𑀇𑀲𑀬𑁄 𑀕𑀺𑀮𑀢𑀻𑀢𑀺 𑀇𑀲𑀺𑀕𑀺𑀮𑀺, 𑀇. 𑀆𑀤𑀺𑀘𑁆𑀘𑀕𑀫𑀦𑀯𑀺𑀭𑁄𑀥𑁂𑀦 𑀯𑀺𑀭𑀼𑀤𑁆𑀥𑀁 𑀛𑀸𑀬𑀢𑀻𑀢𑀺 𑀯𑀺𑀜𑁆𑀛𑁄. 𑀧𑀡𑁆𑀟𑀼𑀯𑀡𑁆𑀡𑀢𑀸𑀬 𑀧𑀡𑁆𑀟𑀯𑁄, 𑀧𑀡𑁆𑀟 𑀕𑀢𑀺𑀬𑀁 𑀯𑀸, 𑀅𑀯𑁄. 𑀓𑀼𑀝𑀺𑀮𑀢𑀸𑀬 𑀯𑀗𑁆𑀓𑁄. 𑀤𑁆𑀯𑀬𑀁 𑀉𑀤𑀬𑀕𑀺𑀭𑀺𑀫𑁆𑀳𑀺. 𑀅𑀧𑀭𑀲𑁂𑀮𑀸𑀧𑁂𑀓𑁆𑀔𑀸𑀬 𑀧𑀼𑀩𑁆𑀩𑀲𑁂𑀮𑁄. 𑀉𑀤𑀬𑀦𑁆𑀢𑁆𑀬𑀲𑁆𑀫𑀸 𑀲𑀽𑀭𑀺𑀬𑀸𑀤𑀬𑁄𑀢𑀺 𑀉𑀤𑀬𑁄, 𑀲𑀽𑀭𑀺𑀬𑀸𑀤𑀻𑀦𑀫𑀼𑀤𑀬𑀬𑁄𑀕𑀢𑁄 𑀯𑀸 𑀉𑀤𑀬𑁄.

𑀢𑀺𑀓𑀁 𑀅𑀢𑁆𑀣𑀕𑀺𑀭𑀺𑀫𑁆𑀳𑀺. 𑀫𑀦𑁆𑀤𑀬𑀢𑀺 𑀲𑀽𑀭𑀺𑀬𑁄 𑀬𑀲𑁆𑀫𑀺𑀁 𑀫𑀦𑁆𑀤𑀭𑁄. 𑀫𑀦𑁆𑀤𑀧𑁆𑀧𑀪𑁄 𑀯𑀸 𑀅𑀭𑀢𑀺 𑀬𑀲𑁆𑀫𑀺𑀁 𑀲𑀽𑀭𑀺𑀬𑁄𑀢𑀺 𑀫𑀦𑁆𑀤𑀭𑁄, 𑀅𑀢𑁆𑀣𑀁 𑀅𑀦𑀼𑀧𑀮𑀤𑁆𑀥𑀺𑀁 𑀕𑀳𑀦𑀓𑁆𑀔𑀢𑁆𑀢𑀸𑀦𑀁 𑀓𑀭𑁄𑀢𑀻𑀢𑁆𑀬𑀢𑁆𑀣𑁄, 𑀦𑀸𑀫𑀥𑀸𑀢𑀼𑀓𑀸𑀭𑀺𑀢𑀦𑁆𑀢𑀸 𑀅. 𑀤𑁆𑀯𑀬𑀁 𑀳𑀺𑀫𑀯𑀢𑀺 𑀧𑀩𑁆𑀩𑀢𑁂. 𑀳𑀺𑀫𑀧𑁆𑀧𑀘𑀼𑀭𑀢𑀸𑀬 𑀳𑀺𑀫𑀯𑀸, 𑀳𑀺𑀫𑀁 𑀯𑀸 𑀯𑀫𑀢𑀻𑀢𑀺 𑀳𑀺𑀫𑀯𑀸, 𑀓𑁆𑀯𑀺, 𑀭𑀸𑀚𑀸𑀤𑀺𑀧𑀓𑁆𑀔𑁂𑀧𑀢𑁆𑀢𑀸 𑀲𑀺𑀲𑁆𑀲𑀸. 𑀳𑀺𑀫𑀬𑀼𑀢𑁆𑀢𑁄 𑀅𑀘𑀮𑁄 𑀳𑀺𑀫𑀸𑀘𑀮𑁄.

𑁬𑁦𑁭. 𑀅𑀢𑁆𑀢𑀦𑀺 𑀲𑀜𑁆𑀚𑀸𑀢𑀕𑀦𑁆𑀥𑀤𑀩𑁆𑀩𑀸𑀦𑀁 𑀕𑀦𑁆𑀥𑁂𑀳𑀺 𑀮𑁄𑀓𑁂 𑀫𑀤𑀬𑀢𑀺, 𑀫𑁄𑀤𑀬𑀢𑀻𑀢𑀺 𑀯𑀸 𑀕𑀦𑁆𑀥𑀫𑀸𑀤𑀦𑁄, 𑀬𑀼. 𑀓𑁂𑀮𑀸𑀲𑁄 𑀯𑀼𑀢𑁆𑀢𑁄. 𑀯𑀺𑀘𑀺𑀢𑁆𑀢𑀓𑀽𑀝𑀬𑀼𑀢𑁆𑀢𑀢𑀸𑀬 𑀘𑀺𑀢𑁆𑀢𑀓𑀽𑀝𑁄. 𑀲𑀼𑀔𑀁 𑀤𑀲𑁆𑀲𑀦𑀁 𑀬𑀲𑁆𑀲, 𑀬𑀲𑁆𑀫𑀺𑀁 𑀯𑀸 𑀲𑀼𑀤𑀲𑁆𑀲𑀦𑁄, 𑀓𑀸𑀴𑀯𑀡𑁆𑀡𑀓𑀽𑀝𑀢𑀸𑀬 𑀓𑀸𑀴𑀓𑀽𑀝𑁄. 𑀢𑀻𑀡𑀺 𑀓𑀽𑀝𑀸𑀦𑁆𑀬𑀲𑁆𑀲 𑀢𑀺𑀓𑀽𑀝𑁄, 𑀙𑀴𑁂𑀢𑁂𑀧𑀺 𑀧𑀩𑁆𑀩𑀢𑀯𑀺𑀲𑁂𑀲𑀸. 𑀅𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀧𑀢𑁆𑀣𑁄 𑀲𑀫𑁄 𑀪𑀽𑀫𑀺𑀪𑀸𑀕𑁄 𑀲𑀸𑀦𑀼 𑀦𑀸𑀫, 𑀅𑀲𑁆𑀲 𑀯𑀸 𑀧𑀩𑁆𑀩𑀢𑀲𑁆𑀲 𑀲𑀫𑀸𑀬 𑀪𑀽𑀫𑀺𑀬𑀁 𑀧𑀢𑁆𑀣𑁄 𑀲𑀸𑀦𑀼 𑀘 𑀪𑀯𑀦𑁆𑀢𑀻𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀧𑀢𑀺𑀝𑁆𑀞𑀢𑁂 𑀅𑀲𑁆𑀫𑀺𑀦𑁆𑀢𑀺 𑀧𑀢𑁆𑀣𑁄, 𑀞𑀲𑁆𑀲 𑀣𑁄. 𑀲𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀡𑀼, 𑀲𑀫𑁆𑀪𑀚𑀻𑀬𑀢𑁂 𑀲𑁂𑀯𑀻𑀬𑀢𑁂𑀢𑀺 𑀲𑀸𑀦𑀼, 𑀤𑁆𑀯𑁂𑀧𑁆𑀬𑀦𑀺𑀢𑁆𑀣𑀺𑀬𑀁.

𑁬𑁦𑁮. 𑀢𑀺𑀓𑀁 𑀲𑀺𑀗𑁆𑀕𑀲𑁆𑀲 𑀦𑀸𑀫𑀁. 𑀓𑀼𑀝 𑀤𑀸𑀳𑁂, 𑀓𑀫𑁆𑀫𑀦𑀺 𑀡𑁄, 𑀯𑀸𑀓𑀸𑀭𑁂𑀦 𑀓𑀽𑀝𑀫𑁆𑀧𑀺. 𑀲𑀺𑀔𑀁 𑀭𑀼𑀳𑀢𑀻𑀢𑀺 𑀲𑀺𑀔𑀭𑀁. 𑀦𑁂𑀭𑀼𑀢𑁆𑀢𑁄. 𑀲𑀺𑀔𑀁 𑀕𑀘𑁆𑀙𑀢𑀻𑀢𑀺 𑀲𑀺𑀗𑁆𑀕𑀁, 𑀇𑀗𑁆𑀕 𑀕𑀫𑀦𑀢𑁆𑀣𑁄, 𑀔𑀮𑁄𑀧𑁄. 𑀤𑁆𑀯𑀬𑀁 𑀧𑀩𑁆𑀩𑀢𑀸𑀤𑀻𑀦𑀁 𑀧𑀧𑀢𑀦𑀝𑁆𑀞𑀸𑀦𑀲𑁆𑀲 𑀦𑀸𑀫𑀁. 𑀧𑀧𑀢𑀦𑁆𑀢𑁆𑀬𑀲𑁆𑀫𑀸, 𑀡𑁄. 𑀧𑀢 𑀅𑀥𑁄𑀕𑀫𑀦𑁂, 𑀧𑀧𑀸𑀢𑁄. 𑀢𑀝 𑀲𑀫𑀼𑀲𑁆𑀲𑀬𑁂, 𑀢𑀝𑁄.

𑀤𑁆𑀯𑀬𑀁 𑀧𑀩𑁆𑀩𑀢𑀦𑀺𑀢𑀫𑁆𑀩𑁂. 𑀦𑀺𑀢𑀫𑁆𑀩𑁄 𑀚𑀖𑀦𑁂𑀧𑀺, 𑀓𑀝 𑀯𑀲𑁆𑀲𑀸𑀯𑀭𑀡𑁂𑀲𑀼, 𑀡𑁆𑀯𑀼. 𑀧𑀩𑁆𑀩𑀢𑁂 𑀧𑀸𑀲𑀸𑀡𑀸𑀤𑀻𑀲𑀼 𑀅𑀫𑁆𑀩𑀼𑀦𑁄 𑀚𑀮𑀲𑁆𑀲 𑀧𑀲𑀯𑁄 𑀧𑀲𑀯𑀦𑀁 𑀦𑀺𑀚𑁆𑀛𑀭𑁄 𑀦𑀸𑀫, 𑀦𑀺𑀲𑁆𑀲𑀭𑀡𑀁 𑀦𑀺𑀚𑁆𑀛𑀭𑁄, 𑀲𑀲𑁆𑀲 𑀛𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁. 𑀛𑀭𑁄𑀧𑀺.

𑁬𑁦𑁯. 𑀤𑁆𑀯𑀬𑀁 𑀓𑀺𑀢𑁆𑀢𑀺𑀫𑁂 𑀅𑀓𑀺𑀢𑁆𑀢𑀺𑀫𑁂, 𑀲𑀚𑀮𑁂 𑀦𑀺𑀚𑁆𑀚𑀮𑁂 𑀯𑀸 𑀓𑀦𑁆𑀤𑀭𑁂. 𑀤𑀭 𑀯𑀺𑀤𑀸𑀭𑀡𑁂, 𑀅, 𑀈, 𑀤𑀭𑀻. 𑀓𑀁 𑀚𑀮𑀯𑀸𑀘𑀓𑀫𑀩𑁆𑀬𑀬𑀁, 𑀓𑁂𑀦 𑀤𑀭𑀻𑀬𑀢𑁂 𑀓𑀦𑁆𑀤𑀭𑁄, 𑀆, 𑀓𑀦𑁆𑀤𑀭𑀸. 𑀢𑀺𑀓𑀁 𑀤𑁂𑀯𑀔𑀸𑀢𑀩𑀺𑀮𑁂. 𑀦𑀺𑀮𑀻𑀬𑀦𑁆𑀢𑁆𑀬𑀲𑁆𑀫𑀺𑀁 𑀮𑁂𑀡𑀁, 𑀮𑀻 𑀲𑀺𑀮𑁂𑀲𑀦𑁂, 𑀬𑀼. 𑀕𑀢𑀺𑀁 𑀳𑁆𑀯𑀬𑀢𑀺 𑀓𑀼𑀝𑀺𑀮𑀬𑀢𑀻𑀢𑀺 𑀕𑀩𑁆𑀪𑀭𑀁, 𑀦𑀺𑀧𑀸𑀢𑀦𑀸. 𑀕𑀩𑁆𑀪 𑀥𑀸𑀭𑀡𑁂 𑀯𑀸, 𑀅𑀭𑁄. 𑀕𑀼𑀳𑀽 𑀲𑀁𑀯𑀭𑀡𑁂, 𑀅, 𑀕𑀼𑀳𑀸.

𑀤𑁆𑀯𑀬𑀁 𑀲𑀺𑀮𑀸𑀫𑀬𑀧𑁄𑀓𑁆𑀔𑀭𑀡𑀺𑀬𑀁. 𑀲𑁄𑀟𑀺 𑀕𑀩𑁆𑀪𑁂, 𑀈. 𑀲𑁄𑀡 𑀯𑀡𑁆𑀡𑀕𑀢𑀺𑀲𑀗𑁆𑀖𑀸𑀢𑁂𑀲𑀼 𑀯𑀸, 𑀟𑁄, 𑀈. 𑀤𑁆𑀯𑀬𑀁 𑀧𑀩𑁆𑀩𑀢𑀸𑀤𑀻𑀦𑀁 𑀕𑀩𑁆𑀪𑀭𑀤𑁂𑀲𑁂 𑀮𑀢𑀸𑀧𑀮𑁆𑀮𑀯𑀢𑀺𑀡𑀸𑀤𑀻𑀳𑀺 𑀧𑀺𑀳𑀺𑀢𑁄𑀤𑀭𑁂 𑀕𑀩𑁆𑀪𑀭𑁂. 𑀓𑀼𑀜𑁆𑀚 𑀅𑀩𑁆𑀬𑀢𑁆𑀢𑀲𑀤𑁆𑀤𑁂, 𑀓𑀭𑀡𑁂, 𑀡𑁄, 𑀦𑀺𑀓𑀼𑀜𑁆𑀚𑀁 𑀦𑀺𑀧𑀼𑀩𑁆𑀩𑁄. 𑀤𑁆𑀯𑀬𑀁𑀧𑁆𑀬𑀦𑀺𑀢𑁆𑀣𑀺𑀬𑀁. 𑀦𑀺𑀓𑀼𑀜𑁆𑀚𑀯𑀘𑀦𑀁 𑀧𑀓𑀼𑀜𑁆𑀚𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀁.

𑁬𑁧𑁦. 𑀲𑁂𑀮𑀲𑁆𑀲 𑀧𑀩𑁆𑀩𑀢𑀲𑁆𑀲 𑀉𑀤𑁆𑀥𑀁𑀪𑀽𑀫𑀺 𑀅𑀥𑀺𑀘𑁆𑀘𑀓𑀸 𑀦𑀸𑀫. 𑀲𑁂𑀮𑀲𑁆𑀲𑀸𑀥𑁄𑀪𑀸𑀕𑀸𑀲𑀦𑁆𑀦𑀪𑀽𑀫𑀺 𑀉𑀧𑀘𑁆𑀘𑀓𑀸 𑀦𑀸𑀫. 𑀅𑀢𑁆𑀭 𑀢𑁂𑀳𑀺 𑀉𑀧𑀸𑀤𑀺𑀲𑀤𑁆𑀤𑁂𑀳𑀺 𑀘𑁆𑀘𑀓𑁄 𑀬𑀤𑀸𑀤𑀺𑀦𑀸 [𑀧𑀸𑀡𑀺𑀦𑀺 𑁫.𑁨.𑁩𑁪].

𑀫𑀽𑀮𑀧𑀩𑁆𑀩𑀢𑀲𑁆𑀲𑀦𑁆𑀢𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀔𑀼𑀤𑁆𑀤𑀧𑀩𑁆𑀩𑀢𑀸 𑀧𑀸𑀤𑀸 𑀦𑀸𑀫. 𑀢𑀢𑁆𑀭 𑀧𑀸𑀤𑀸𑀤𑀺𑀤𑁆𑀯𑀬𑀁. 𑀧𑀚𑁆𑀚𑀢𑁂 𑀕𑀫𑁆𑀬𑀢𑁂𑀢𑀺, 𑀡𑁄. 𑀲𑁂𑀮𑀲𑁆𑀲 𑀉𑀧𑀦𑁆𑀢𑁄 𑀲𑀫𑀻𑀧𑁂 𑀧𑀩𑁆𑀩𑀢𑁄 𑀉𑀧𑀦𑁆𑀢𑀲𑁂𑀮𑁄.

𑀕𑁂𑀭𑀺𑀓𑀫𑀦𑁄𑀲𑀺𑀮𑀸𑀳𑀭𑀺𑀢𑀸𑀮𑀓𑀝𑁆𑀞𑀺𑀦𑁆𑀬𑀸𑀤𑀺𑀓𑁄𑀲𑀩𑁆𑀩𑁄 𑀏𑀯 𑀲𑀺𑀮𑀸𑀯𑀺𑀓𑀸𑀭𑁄 ‘‘𑀥𑀸𑀢𑀽’’𑀢𑁆𑀬𑀼𑀢𑁆𑀢𑁄, 𑀥𑀭 𑀥𑀸𑀭𑀡𑁂, 𑀢𑀼, 𑀥𑀸𑀢𑀼.

𑀲𑁂𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬𑁧𑁧. 𑀢𑀺𑀓𑀁 𑀲𑀻𑀳𑁂. 𑀓𑁂𑀲𑀭𑁄 𑀚𑀝𑀸, 𑀢𑀁𑀬𑁄𑀕𑀸, 𑀈, 𑀓𑁂𑀲𑀭𑀻. 𑀫𑀺𑀕𑁂 𑀳𑀺𑀁𑀲𑀢𑀻𑀢𑀺 𑀲𑀻𑀳𑁄, 𑀦𑀺𑀧𑀸𑀢𑀦𑀸 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀫𑀺𑀕𑁂 𑀳𑀦𑁆𑀢𑀼𑀁 𑀲𑀁𑀯𑀺𑀚𑁆𑀚𑀫𑀸𑀦𑀸 𑀈𑀳𑀸 𑀅𑀲𑁆𑀲𑀸𑀢𑀺 𑀯𑀸 𑀲𑀻𑀳𑁄, 𑀲𑀳𑀢𑀻𑀢𑀺 𑀯𑀸 𑀲𑀻𑀳𑁄. 𑀧𑀜𑁆𑀘𑀲𑁆𑀲𑁄, 𑀳𑀭𑀺𑀧𑀺. 𑀫𑀼𑀔𑀫𑀺𑀯 𑀘𑀭𑀡𑀸𑀧𑁆𑀬𑀲𑁆𑀲 𑀓𑀭𑀺𑀓𑀼𑀫𑁆𑀪𑀤𑀸𑀭𑀡𑀲𑀫𑀢𑁆𑀣𑀸𑀢𑀺 𑀢𑁂𑀳𑀺 𑀲𑀳 𑀧𑀜𑁆𑀘𑀲𑁆𑀲𑀸𑀦𑀺 𑀬𑀲𑁆𑀲. 𑀳𑀭𑀢𑀺 𑀫𑀺𑀕𑁂𑀢𑀺 𑀳𑀭𑀺, 𑀇. 𑀫𑀳𑀸𑀓𑀼𑀓𑁆𑀓𑀼𑀭𑀧𑁆𑀧𑀫𑀸𑀡𑁄 𑀓𑀼𑀓𑁆𑀓𑀼𑀭𑀸𑀓𑀢𑀺 𑀓𑀡𑁆𑀳𑀮𑁂𑀔𑀸𑀘𑀺𑀢𑁆𑀢𑀲𑀭𑀻𑀭𑁄 𑀕𑁄𑀫𑀦𑀼𑀲𑁆𑀲𑀸𑀤𑀺𑀳𑀺𑀁𑀲𑀓𑁆𑀔𑀫𑁄 𑀭𑀲𑁆𑀲𑀫𑀼𑀔𑁄 𑀢𑀭𑀘𑁆𑀙𑁄 𑀦𑀸𑀫, 𑀲𑁄 ‘‘𑀲𑀼𑀦𑀔𑀩𑁆𑀬𑀕𑁆𑀖𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀭 𑀢𑀭𑀡𑁂, 𑀙𑁄, 𑀫𑀺𑀕𑁂 𑀅𑀤𑀢𑀻𑀢𑀺 𑀫𑀺𑀕𑀸𑀤𑀦𑁄, 𑀦𑀦𑁆𑀤𑀸𑀤𑀻𑀳𑀺 𑀬𑀼.

𑀤𑁆𑀯𑀬𑀁 𑀩𑁆𑀬𑀕𑁆𑀖𑁂. 𑀯𑀺𑀦𑀺𑀳𑀦𑁆𑀢𑁆𑀯𑀸 𑀆𑀖𑀸𑀬𑀢𑀻𑀢𑀺 𑀩𑁆𑀬𑀕𑁆𑀖𑁄, 𑀖𑀸 𑀕𑀦𑁆𑀥𑁄𑀧𑀸𑀤𑀸𑀦𑁂, 𑀩𑁆𑀬𑀕𑁆𑀖𑁄 𑀤𑀻𑀧𑀺𑀦𑀺𑀧𑀺. 𑀧𑀼𑀁 𑀧𑀼𑀫𑀸𑀦𑁄 𑀤𑀸𑀮𑁂𑀢𑀻𑀢𑀺 𑀧𑀼𑀡𑁆𑀟𑀭𑀻𑀓𑁄, 𑀤𑀮 𑀯𑀺𑀤𑀸𑀭𑀡𑁂, 𑀡𑁆𑀯𑀼. 𑀤𑀲𑁆𑀲 𑀟𑁄, 𑀮𑀲𑁆𑀲 𑀭𑁄, 𑀅𑀲𑁆𑀲𑀻, 𑀧𑀼𑀡𑁆𑀟𑀭𑀻𑀓𑁄.

‘‘𑀧𑀼𑀡𑁆𑀟𑀭𑀻𑀓𑀁 𑀲𑀺𑀢𑀫𑁆𑀩𑁄𑀚𑁂,

𑀲𑀺𑀢𑀘𑁆𑀙𑀢𑁆𑀭𑁂 𑀘 𑀪𑁂𑀲𑀚𑁆𑀚𑁂;

𑀓𑁄𑀲𑀓𑀸𑀭𑀦𑁆𑀢𑀭𑁂 𑀩𑁆𑀬𑀕𑁆𑀖𑁂,

𑀲𑁄 𑀤𑀺𑀲𑀸𑀯𑀸𑀭𑀡𑀕𑁆𑀕𑀺𑀲𑀽’’𑀢𑀺. 𑁋

𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀯𑀕𑁆𑀖𑁄𑀧𑀺. 𑀤𑀻𑀧𑀺𑀦𑀺𑀯𑀺𑀲𑀬𑁂 𑀲𑀤𑁆𑀤𑀽𑀮𑁄 𑀈𑀭𑀺𑀢𑁄, 𑀲𑀭𑀢𑀻𑀢𑀺 𑀲𑀤𑁆𑀤𑀽𑀮𑁄, 𑀊𑀮𑁄, 𑀤𑁄 𑀘𑀦𑁆𑀢𑁄, 𑀲𑀤𑁆𑀤𑁂𑀦 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀲𑀤𑁆𑀤𑀽𑀮𑁄. 𑀤𑀻𑀧𑀁 𑀢𑀘𑁆𑀘𑀫𑁆𑀫𑀁, 𑀢𑀁𑀬𑁄𑀕𑀸 𑀤𑀻𑀧𑀻, 𑀢𑀲𑁆𑀫𑀺𑀁 𑀤𑀻𑀧𑀺𑀦𑀺.

𑁬𑁧𑁨. 𑀧𑀜𑁆𑀘𑀓𑀁 𑀅𑀘𑁆𑀙𑁂. 𑀅𑀲𑀼 𑀔𑁂𑀧𑀦𑁂, 𑀙𑁄. 𑀇𑀘 𑀣𑀼𑀢𑀺𑀬𑀁, 𑀅, 𑀇𑀓𑁆𑀓𑁄. 𑀪𑀮𑁆𑀮𑀼𑀓𑁄𑀧𑀺, 𑀪𑀮, 𑀪𑀮𑁆𑀮 𑀧𑀭𑀺𑀪𑀸𑀲𑀦𑀳𑀺𑀁𑀲𑀸𑀤𑀸𑀦𑁂𑀲𑀼, 𑀡𑁆𑀯𑀼, 𑀅𑀲𑁆𑀲𑀼, 𑀈𑀲 𑀕𑀢𑀺𑀳𑀺𑀁𑀲𑀸𑀤𑀸𑀦𑁂𑀲𑀼, 𑀲𑁄, 𑀭𑀲𑁆𑀲𑀸𑀤𑀺. 𑀅𑀧𑀘𑁆𑀘𑀬𑁂 𑀇𑀲𑁄.

𑀤𑁆𑀯𑀬𑀁 𑀭𑁄𑀳𑀺𑀢𑁂. 𑀮𑁄𑀳𑀺𑀢𑀯𑀡𑁆𑀡𑀢𑀸𑀬 𑀭𑁄𑀳𑀺𑀲𑁄, 𑀮𑁄𑀳𑀺𑀢𑁄 𑀘, 𑀧𑀼𑀩𑁆𑀩𑀢𑁆𑀭 𑀢𑀲𑁆𑀲 𑀲𑁄. 𑀢𑀺𑀓𑀁 𑀕𑁄𑀓𑀡𑁆𑀡𑁂. 𑀕𑀯𑀲𑁆𑀲 𑀓𑀡𑁆𑀡𑁄 𑀯𑀺𑀬 𑀬𑀲𑁆𑀲 𑀓𑀡𑁆𑀡𑁄𑀢𑀺 𑀕𑁄𑀓𑀡𑁆𑀡𑁄. 𑀕𑀡𑀬𑀼𑀢𑁆𑀢𑀢𑀸𑀬 𑀕𑀡𑀻 𑀘 𑀲𑁄 𑀓𑀡𑁆𑀝𑀓𑀲𑀤𑀺𑀲𑀲𑀺𑀗𑁆𑀕𑀢𑀸𑀬 𑀓𑀡𑁆𑀝𑀓𑁄 𑀘𑁂𑀢𑀺 𑀕𑀡𑀺𑀓𑀡𑁆𑀝𑀓𑁄, 𑀲𑀫𑀼𑀤𑀺𑀢𑀦𑀸𑀫𑀫𑁆𑀧𑀺 𑀯𑀤𑀦𑁆𑀢𑀺. 𑀕𑀡𑀺 𑀘 𑀓𑀡𑁆𑀝𑀓𑁄 𑀘 𑀕𑀡𑀺𑀓𑀡𑁆𑀝𑀓𑀸𑀢𑀺 𑀤𑁆𑀯𑁂 𑀦𑀸𑀫𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺, 𑀢𑁂𑀦𑁂𑀯 𑀳𑀺 ‘‘𑀕𑀡𑀺𑀓𑀡𑁆𑀝𑀓𑀸’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑁬𑁧𑁩-𑁬𑁧𑁪. 𑀘𑀢𑀼𑀓𑁆𑀓𑀁 𑀔𑀕𑁆𑀕𑁂. 𑀲𑀺𑀗𑁆𑀕𑀜𑁆𑀘 𑀔𑀕𑁆𑀕𑀸𑀔𑁆𑀬𑀁, 𑀢𑀁𑀬𑁄𑀕𑀸 𑀔𑀕𑁆𑀕𑁄. ‘‘𑀔𑀕𑁆𑀕𑁄 𑀕𑀡𑁆𑀟𑀓𑀲𑀺𑀗𑁆𑀕𑀸𑀲𑀺-𑀯𑀼𑀤𑁆𑀥𑀪𑁂𑀤𑁂𑀲𑀼 𑀕𑀡𑁆𑀟𑀓𑁂’’𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁫.𑁪] 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀔𑀕𑁆𑀕𑀲𑀤𑀺𑀲𑀁 𑀯𑀺𑀲𑀸𑀡𑀫𑀲𑁆𑀲 𑀲𑀡𑁆𑀞𑀸𑀦𑀢𑁄𑀢𑀺 𑀔𑀕𑁆𑀕𑀯𑀺𑀲𑀸𑀡𑁄, 𑀡𑁄. 𑀏𑀢𑁆𑀣 𑀔𑀕𑁆𑀕𑀲𑀤𑁆𑀤𑁄 𑀅𑀲𑀺𑀧𑀭𑀺𑀬𑀸𑀬𑁄. 𑀧𑀮𑀸𑀲𑀫𑀤𑀢𑀻𑀢𑀺 𑀧𑀮𑀸𑀲𑀸𑀤𑁄. 𑀕𑀡𑁆𑀟 𑀯𑀤𑀦𑁂𑀓𑀤𑁂𑀲𑁂, 𑀡𑁆𑀯𑀼, 𑀕𑀡𑁆𑀟𑀓𑁄.

𑀩𑁆𑀬𑀕𑁆𑀖𑀸𑀤𑀺𑀓𑁄 𑀲𑀩𑁆𑀩𑁄𑀧𑀺 𑀫𑀺𑀕𑀪𑁂𑀤𑁄 ‘‘𑀯𑀸𑀴𑀫𑀺𑀕𑁄, 𑀲𑀸𑀧𑀤𑁄’’𑀢𑀺 𑀘𑁄𑀘𑁆𑀘𑀢𑁂. 𑀩𑁆𑀬𑀕𑁆𑀖𑀲𑁆𑀲𑀸𑀢𑀺𑀲𑀬𑁂𑀦 𑀫𑀦𑀼𑀲𑁆𑀲𑀸𑀤𑀻𑀦𑀁 𑀳𑀺𑀁𑀲𑀦𑀢𑁄 𑀤𑀼𑀝𑁆𑀞𑀢𑀸 𑀧𑀸𑀓𑀝𑀸𑀢𑀺 𑀢𑀧𑁆𑀧𑀫𑀼𑀔𑀢𑀸 𑀯𑀼𑀢𑁆𑀢𑀸. 𑀯𑀮 𑀲𑀁𑀯𑀭𑀡𑁂, 𑀯𑀮𑀦𑁆𑀢𑁆𑀬𑀢𑁆𑀢𑀸𑀦𑀫𑀲𑁆𑀫𑀸𑀢𑀺 𑀯𑀸𑀴𑁄, 𑀡𑁄, 𑀯𑀸𑀴𑁄 𑀘 𑀲𑁄 𑀫𑀺𑀕𑁄 𑀘𑁂𑀢𑀺 𑀯𑀸𑀴𑀫𑀺𑀕𑁄, 𑀤𑀼𑀝𑁆𑀞𑀫𑀺𑀕𑁄𑀢𑁆𑀬𑀢𑁆𑀣𑁄. ‘‘𑀩𑁆𑀬𑀕𑁆𑀖𑁄 𑀢𑀁 𑀔𑀸𑀤𑀢𑀽’’𑀢𑁆𑀬𑀸𑀤𑀺𑀦𑀸 𑀲𑀧𑀦𑁆𑀢𑀺 𑀬𑁂𑀦𑀸𑀢𑀺 𑀲𑀸𑀧𑀤𑁄, 𑀲𑀧 𑀅𑀓𑁆𑀓𑁄𑀲𑁂, 𑀤𑁄, 𑀤𑀻𑀖𑀸𑀤𑀺.

𑀧𑁆𑀮𑀯𑀗𑁆𑀕𑀦𑁆𑀢𑀁 𑀫𑀓𑁆𑀓𑀝𑁂. 𑀧𑁆𑀮𑀯𑁄 𑀕𑀢𑀺𑀪𑁂𑀤𑁄, 𑀢𑁂𑀦 𑀕𑀘𑁆𑀙𑀢𑀻𑀢𑀺 𑀧𑁆𑀮𑀯𑀗𑁆𑀕𑀫𑁄, 𑀧𑁆𑀮𑀯𑀗𑁆𑀕𑁄 𑀘. 𑀫𑀭 𑀧𑀸𑀡𑀘𑀸𑀕𑁂, 𑀅𑀝𑁄, 𑀓𑁄 𑀘𑀦𑁆𑀢𑁄, 𑀫𑀓𑁆𑀓𑀝𑁄. 𑀦𑀭𑁄 𑀇𑀯 𑀯𑀸𑀦𑀭𑁄, 𑀯𑀸𑀲𑀤𑁆𑀤𑁄 𑀇𑀯𑀢𑁆𑀣𑁂, 𑀦𑀸𑀫𑀸𑀦𑀁 𑀬𑀼𑀢𑁆𑀢𑀢𑁆𑀣𑀢𑁆𑀢𑀸 𑀲𑀫𑀸𑀲𑁄. 𑀲𑀸𑀔𑀸𑀬𑀁 𑀧𑀲𑀼𑀢𑁄 𑀫𑀺𑀕𑁄 𑀲𑀸𑀔𑀸𑀫𑀺𑀕𑁄. 𑀕𑀢𑁆𑀬𑀢𑁆𑀣𑀢𑀸𑀬 𑀓𑁆𑀭𑀺𑀬𑀸𑀬 𑀧𑀬𑁄𑀕𑀸. 𑀓𑀧𑀺 𑀘𑀮𑀦𑁂, 𑀇, 𑀓𑀧𑀺. 𑀯𑀮𑀻 𑀲𑀺𑀣𑀺𑀮𑀁 𑀘𑀫𑁆𑀫𑀁 𑀫𑀼𑀔𑁂 𑀅𑀲𑁆𑀲 𑀯𑀮𑀻𑀫𑀼𑀔𑁄. 𑀓𑀺𑀲𑁄, 𑀯𑀦𑁄𑀓𑁄𑀧𑀺, 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑁂𑀢𑀻𑀢𑀺 𑀓𑀺𑀲𑁄, 𑀉𑀲𑁆𑀲𑀺. 𑀯𑀦𑀫𑁄𑀓𑀫𑀸𑀲𑀬𑁄 𑀅𑀲𑁆𑀲 𑀯𑀦𑁄𑀓𑁄. 𑀲𑁄 𑀫𑀓𑁆𑀓𑀝𑁄 𑀘𑁂 𑀓𑀡𑁆𑀳𑀢𑀼𑀡𑁆𑀟𑁄 𑀓𑀸𑀴𑀫𑀼𑀔𑁄 𑀲𑀺𑀬𑀸, 𑀢𑀤𑀸 ‘‘𑀕𑁄𑀦𑀗𑁆𑀕𑀮𑁄’’𑀢𑀺 𑀫𑀢𑁄, 𑀕𑀼𑀦𑁆𑀦𑀁 𑀦𑀗𑁆𑀕𑀮𑀲𑀤𑀺𑀲𑀢𑀸𑀬 𑀕𑁄𑀦𑀗𑁆𑀕𑀮𑁄.

𑁬𑁧𑁫. 𑀧𑀚𑁆𑀚𑀤𑁆𑀥𑀁 𑀲𑀺𑀗𑁆𑀕𑀸𑀮𑀲𑁆𑀲 𑀦𑀸𑀫𑀁. 𑀲𑀭 𑀕𑀢𑀺𑀳𑀺𑀁𑀲𑀸𑀘𑀺𑀦𑁆𑀢𑀸𑀲𑀼, 𑀅𑀮𑁄. 𑀲𑀭𑀢𑀺𑀲𑁆𑀲 𑀲𑀺𑀗𑁆𑀕𑁄. 𑀚𑀫𑀼 𑀅𑀤𑀦𑁂, 𑀡𑁆𑀯𑀼, 𑀩𑁄 𑀘𑀦𑁆𑀢𑁄, 𑀅𑀲𑁆𑀲𑀼. 𑀓𑀼𑀲 𑀅𑀓𑁆𑀓𑁄𑀲𑁂, 𑀢𑀼, 𑀣𑀼 𑀯𑀸. 𑀪𑁂𑀭𑀯𑀬𑀼𑀢𑁆𑀢𑀢𑀸𑀬 𑀪𑁂𑀭𑀯𑁄, ‘‘𑀪𑁂’’𑀇𑀢𑀺 𑀭𑀯𑀢𑀻𑀢𑀺 𑀯𑀸 𑀪𑁂𑀭𑀯𑁄. 𑀲𑀫𑀼 𑀉𑀧𑀲𑀫𑁂, 𑀇𑀯𑁄, 𑀲𑀺𑀯𑀸, 𑀦𑀸𑀭𑀻, 𑀲𑀺 𑀲𑁂𑀯𑀸𑀬𑀁 𑀯𑀸, 𑀯𑁄. 𑀫𑀺𑀕𑀥𑀼𑀢𑁆𑀢𑁄, 𑀯𑀜𑁆𑀘𑀓𑁄𑀧𑀺, 𑀫𑀺𑀕𑁂𑀲𑀼 𑀯𑀦𑀧𑀲𑀽𑀲𑀼 𑀥𑀼𑀢𑁆𑀢𑁄. 𑀩𑁆𑀭𑀸𑀳𑁆𑀫𑀡𑀁 𑀯𑀜𑁆𑀘𑁂𑀢𑀻𑀢𑀺 𑀯𑀜𑁆𑀘𑀓𑁄.

𑀢𑀺𑀓𑀁 𑀩𑀺𑀴𑀸𑀭𑁂. 𑀩𑀺𑀮 𑀪𑁂𑀤𑀦𑁂, 𑀅𑀭𑁄, 𑀴𑀢𑁆𑀢𑀁. 𑀩𑀩𑁆𑀩 𑀕𑀢𑀺𑀬𑀁, 𑀉. 𑀫𑀚 𑀲𑀼𑀤𑁆𑀥𑀺𑀬𑀁, 𑀆𑀭𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀑𑀢𑀼, 𑀆𑀔𑀼𑀪𑀼𑀚𑁄𑀧𑀺. 𑀤𑁆𑀯𑀬𑀁 𑀓𑁄𑀓𑁂, 𑀅𑀬𑀁 𑀓𑀼𑀓𑁆𑀓𑀼𑀭𑀧𑁆𑀧𑀫𑀸𑀡𑁄 𑀓𑀧𑀺𑀮𑁄 𑀳𑀭𑀺𑀡𑁄. 𑀓𑀼𑀓, 𑀯𑀓 𑀆𑀤𑀸𑀦𑁂. 𑀈𑀳𑀸𑀫𑀺𑀕𑁄𑀧𑀺, 𑀫𑀺𑀕𑁂 𑀈𑀳𑀢𑀺 𑀓𑀗𑁆𑀔𑀢𑀻𑀢𑀺, 𑀓𑀫𑁆𑀫𑀦𑀺 𑀡𑁄.

𑁬𑁧𑁬. 𑀤𑁆𑀯𑀬𑀁 𑀫𑀳𑀺𑀁𑀲𑁂. 𑀫𑀳𑀺𑀬𑀁 𑀲𑁂𑀢𑀻𑀢𑀺 𑀫𑀳𑀺𑀁𑀲𑁄, 𑀭𑀲𑁆𑀲𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀮𑀮 𑀇𑀘𑁆𑀙𑀸𑀬𑀁, 𑀉𑀤𑀓𑀁 𑀮𑀮𑀢𑀻𑀢𑀺 𑀮𑀼𑀮𑀸𑀬𑁄, 𑀦𑀺𑀧𑀸𑀢𑀦𑀸, 𑀅𑀬𑁄, 𑀅𑀲𑁆𑀲𑀼 𑀘. 𑀕𑁄 𑀯𑀺𑀬 𑀯𑀚𑀢𑀺 𑀚𑀸𑀬𑀢𑀻𑀢𑀺 𑀕𑀯𑀚𑁄. 𑀕𑁄 𑀯𑀺𑀬 𑀅𑀬𑀢𑀻𑀢𑀺 𑀕𑀯𑀬𑁄, 𑀲𑀫𑀸 𑀤𑁆𑀯𑁂 𑀢𑀼𑀮𑁆𑀬𑀢𑁆𑀣𑀸.

𑀤𑁆𑀯𑀬𑀁 𑀲𑀮𑁆𑀮𑁂. 𑀲𑀮𑁆𑀮 𑀆𑀲𑀼𑀕𑀢𑀺𑀬𑀁, 𑀅, 𑀲𑀮𑁆𑀮𑁄, 𑀲𑀓𑀢𑁆𑀣𑁂 𑀓𑁄, 𑀲𑀮𑁆𑀮𑀓𑁄 𑀅𑀢𑁆𑀢𑀦𑁄 𑀲𑀭𑀻𑀭𑀚𑀸𑀢𑁂𑀦 𑀲𑀮𑁆𑀮𑁂𑀦 𑀲𑀼𑀦𑀔𑀁 𑀲𑀮𑀢𑀺 𑀳𑀺𑀁𑀲𑀢𑀻𑀢𑀺 𑀯𑀸 𑀲𑀮𑁆𑀮𑁄, 𑀲𑀮𑁆𑀮𑀓𑁄 𑀘, 𑀅𑀬𑀁 𑀲𑀽𑀓𑀭𑀲𑀡𑁆𑀞𑀸𑀦𑁄, 𑀲𑀮𑀸𑀓𑀸𑀧𑀸𑀬𑁄 𑀘. 𑀅𑀲𑁆𑀲 𑀲𑀮𑁆𑀮𑀲𑁆𑀲 𑀮𑁄𑀫𑀫𑁆𑀳𑀺 𑀲𑀮𑀮𑀁, 𑀲𑀮𑀜𑁆𑀘 𑀪𑀯𑁂. 𑀧𑀮, 𑀲𑀮, 𑀧𑀣 𑀕𑀢𑀺𑀬𑀁, 𑀅𑀮𑁄, 𑀦𑀤𑀸𑀤𑀺𑀢𑁆𑀢𑁂 𑀲𑀮𑀮𑀻, 𑀣𑀺𑀢𑁆𑀢𑀸𑀪𑀸𑀯𑁂 𑀲𑀮𑀮𑀁, 𑀅𑀫𑁆𑀳𑀺 𑀲𑀮𑀁.

𑁬𑁧𑁭. 𑀧𑀜𑁆𑀘𑀓𑀁 𑀫𑀺𑀕𑁂, 𑀳𑀭𑀦𑁆𑀢𑁆𑀬𑀦𑁂𑀦 𑀳𑀭𑀺𑀡𑁄, 𑀳𑀭 𑀳𑀭𑀡𑁂 𑀬𑀼. 𑀡𑀢𑁆𑀢𑀫𑀺𑀢𑁆𑀢𑀜𑁆𑀘. 𑀫𑀭 𑀧𑀸𑀡𑀘𑀸𑀕𑁂, 𑀅, 𑀭𑀲𑁆𑀲 𑀕𑁄, 𑀇𑀢𑁆𑀢𑀜𑁆𑀘. 𑀲𑁂𑀦 𑀲𑀼𑀦𑀔𑁂𑀦 𑀭𑀗𑁆𑀕𑀢𑀺 𑀕𑀘𑁆𑀙𑀢𑀺 𑀧𑀮𑀸𑀬𑀢𑀻𑀢𑀺 𑀲𑀸𑀭𑀗𑁆𑀕𑁄. 𑀤𑀻𑀖𑀸𑀤𑀺, 𑀫𑀕𑁄, 𑀫𑀺𑀕𑁄 𑀘 𑀏𑀢𑁂 𑀤𑁆𑀯𑁂 𑀫𑀺𑀕𑀫𑀢𑁆𑀢𑁂𑀧𑀺. 𑀅𑀚𑀺𑀦𑀲𑁆𑀲𑁄𑀧𑀬𑀼𑀚𑁆𑀚𑀫𑀸𑀦𑀲𑁆𑀲 𑀬𑁄𑀦𑀺, 𑀢𑁂𑀦 𑀪𑀽𑀢𑀲𑁆𑀲𑀸𑀚𑀺𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀯𑀸 𑀅𑀚𑀺𑀦𑀬𑁄𑀦𑀺. 𑀅𑀬𑀫𑁆𑀧𑀺 𑀫𑀺𑀕𑀫𑀢𑁆𑀢𑁂𑀧𑀺. 𑀓𑀼𑀭𑀗𑁆𑀕𑁄, 𑀯𑀸𑀢𑀸𑀬𑀼𑀧𑀺. 𑀓𑀼𑀬𑀁 𑀧𑀣𑀯𑀺𑀬𑀁 𑀭𑀗𑁆𑀕𑀢𑀻𑀢𑀺 𑀓𑀼𑀭𑀗𑁆𑀕𑁄. 𑀯𑀸𑀢𑀫𑀬𑀢𑀻𑀢𑀺 𑀯𑀸𑀢𑀸𑀬𑀼, 𑀉.

𑀤𑁆𑀯𑀬𑀁 𑀲𑀽𑀓𑀭𑁂. 𑀲𑀼𑀦𑁆𑀤𑀭𑀁 𑀨𑀮𑀁 𑀓𑀭𑁄𑀢𑀻𑀢𑀺 𑀲𑀽𑀓𑀭𑁄. 𑀯𑀼𑀢𑁆𑀢𑀜𑁆𑀘 𑀤𑀩𑁆𑀩𑀕𑀼𑀡𑁂 𑁋

‘‘𑀲𑁆𑀦𑁂𑀳𑀦𑀁 𑀩𑁆𑀭𑀽𑀳𑀦𑀁 𑀯𑀲𑁆𑀲𑀁, 𑀢𑀣𑀸 𑀯𑀸𑀢𑀲𑀫𑀸𑀧𑀳𑀁;

𑀯𑀸𑀭𑀸𑀳𑀁 𑀧𑀺𑀲𑀺𑀢𑀁 𑀩𑀸𑀮𑁆𑀬𑀁, 𑀭𑁄𑀘𑀦𑀁 𑀲𑁂𑀤𑀦𑀁 𑀕𑀭𑀽’’𑀢𑀺 [𑀤𑀩𑁆𑀩𑀕𑀼𑀡𑀲𑀗𑁆𑀕𑀳 𑁨.𑁧𑁧-𑁨].

𑀲𑀼𑀔𑀁 𑀓𑀭𑁄𑀢𑀻𑀢𑀺 𑀯𑀸 𑀲𑀽𑀓𑀭𑁄. 𑀲𑀼𑀦𑁆𑀤𑀭𑁄 𑀓𑀭𑁄 𑀬𑀲𑁆𑀲 𑀯𑀸 𑀲𑀽𑀓𑀭𑁄. 𑀯𑀭𑁂 𑀆𑀳𑀦𑁆𑀢𑀻𑀢𑀺 𑀯𑀭𑀸𑀳𑁄, 𑀯𑀭𑁂 𑀲𑀢𑀺 𑀆𑀳𑀦𑁆𑀢𑀩𑁆𑀩𑁄𑀢𑀺 𑀯𑀸 𑀯𑀭𑀸𑀳𑁄, 𑀓𑁄𑀮𑁄, 𑀣𑀤𑁆𑀥𑀮𑁄𑀫𑁄, 𑀪𑀽𑀤𑀸𑀭𑁄𑀧𑀺. 𑀤𑁆𑀯𑀬𑀁 𑀲𑀲𑁂. 𑀧𑁂𑀮 𑀕𑀢𑀺𑀬𑀁, 𑀡𑁆𑀯𑀼. 𑀲𑀲 𑀧𑁆𑀮𑀼𑀢𑀕𑀢𑀺𑀬𑀁, 𑀅.

𑁬𑁧𑁮. 𑀤𑁆𑀯𑀬𑀁 𑀏𑀡𑀻𑀫𑀺𑀕𑁂. 𑀏𑀡𑀺𑀬𑀸 𑀫𑀺𑀕𑀺𑀬𑀸, 𑀏𑀡𑀲𑁆𑀲 𑀯𑀸 𑀅𑀧𑀘𑁆𑀘𑀁 𑀏𑀡𑁂𑀬𑁆𑀬𑁄, 𑀅𑀬𑀁 𑀘𑀫𑁆𑀫𑀸𑀤𑀻𑀲𑀼𑀧𑀺 ‘‘𑀏𑀡𑀲𑁆𑀲, 𑀏𑀡𑀺𑀬𑀸 𑀯𑀸 𑀘𑀫𑁆𑀫𑀸𑀤𑀺𑀓𑁄 𑀏𑀡𑁂𑀬𑁆𑀬𑁄’’𑀢𑀺 𑀯𑀘𑀦𑀢𑁆𑀣𑀁 𑀓𑀢𑁆𑀯𑀸. 𑀏𑀡𑀺𑀬𑀸 𑀇𑀢𑁆𑀣𑀺𑀬𑀸 𑀧𑀼𑀢𑁆𑀢𑁄 𑀫𑀺𑀕𑁄 𑀏𑀡𑀻𑀫𑀺𑀕𑁄, 𑀇 𑀕𑀢𑀺𑀬𑀁, 𑀬𑀼, 𑀦𑀤𑀸𑀤𑀺, 𑀅𑀦𑀤𑀸𑀤𑀺𑀢𑁆𑀢𑁂 𑀏𑀡𑁄, 𑀏𑀯𑀫𑁂𑀢𑁂𑀧𑁆𑀬𑀼𑀧𑁆𑀧𑀸𑀤𑀺𑀢𑀸. 𑀤𑁆𑀯𑀬𑀁 𑀧𑀫𑁆𑀧𑀝𑀓𑁂. 𑀧𑀝 𑀕𑀫𑀦𑁂, 𑀡𑁆𑀯𑀼, 𑀉𑀧𑀲𑀕𑁆𑀕𑀦𑁆𑀢𑁂 𑀩𑀺𑀦𑁆𑀤𑀸𑀕𑀫𑁄 𑀘. 𑀧𑀩𑁆𑀩 𑀕𑀢𑀺𑀬𑀁, 𑀡𑁆𑀯𑀼, 𑀩𑀺𑀦𑁆𑀤𑀸𑀕𑀫𑁄, 𑀩𑀮𑁄𑀧𑁄 𑀘.

𑀤𑁆𑀯𑀬𑀁 𑀯𑀸𑀢𑀫𑀺𑀕𑁂. 𑀕𑀫𑀦𑁂𑀦 𑀯𑀸𑀢𑀲𑀫𑁄 𑀫𑀺𑀕𑁄 𑀯𑀸𑀢𑀫𑀺𑀕𑁄. 𑀘𑀮𑀢𑀺𑀲𑁆𑀫𑀸 𑀬𑀼, 𑀦𑀤𑀸𑀤𑀺. 𑀢𑀺𑀓𑀁 𑀫𑀽𑀲𑀺𑀓𑁂. 𑀫𑀼𑀲 𑀣𑁂𑀬𑁆𑀬𑁂, 𑀡𑁆𑀯𑀼, 𑀇𑀢𑁆𑀢𑀜𑁆𑀘. 𑀆𑀧𑀼𑀩𑁆𑀩𑁄 𑀔𑀦𑀼 𑀅𑀯𑀤𑀸𑀭𑀡𑁂, 𑀉, 𑀦𑀮𑁄𑀧𑁄. 𑀉𑀦𑁆𑀤 𑀧𑀲𑀯𑀦𑀓𑁆𑀮𑁂𑀤𑀦𑁂𑀲𑀼, 𑀊𑀭𑁄.

𑁬𑁧𑁯. 𑀘𑀫𑀭𑀸𑀤𑀬𑁄, 𑀲𑀭𑀪𑀸𑀤𑀬𑁄 𑀘 𑀫𑀺𑀕𑀦𑁆𑀢𑀭𑀸 𑀫𑀺𑀕𑀯𑀺𑀲𑁂𑀲𑀸. 𑀘𑀫𑀭𑁄 𑀉𑀢𑁆𑀢𑀭𑀸𑀧𑀣𑁂 𑀔𑁆𑀬𑀸𑀢𑁄, 𑀬𑀲𑁆𑀲 𑀧𑀼𑀘𑁆𑀙𑀁 𑀘𑀸𑀫𑀭𑀁, 𑀘𑀫𑀼 𑀅𑀤𑀦𑁂, 𑀅𑀭𑁄, 𑀘𑀫𑀭𑁄, 𑀣𑀺𑀬𑀁 𑀘𑀫𑀭𑀻. 𑀧𑀲𑀤𑁄 𑀘𑀺𑀢𑁆𑀢𑀮𑁄𑀫𑀻, 𑀧𑀲 𑀩𑀦𑁆𑀥𑀦𑁂, 𑀅𑀤𑁄. 𑀓𑀼𑀬𑀁 𑀭𑀗𑁆𑀕𑀢𑀻𑀢𑀺 𑀓𑀼𑀭𑀼𑀗𑁆𑀕𑁄, 𑀅𑀲𑁆𑀲𑀼, 𑀉𑀢𑁆𑀢𑀸𑀪𑀸𑀯𑁂 𑀓𑀼𑀭𑀗𑁆𑀕𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀫𑀺𑀕𑀸𑀦𑀁 𑀫𑀸𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀫𑀺𑀕𑀫𑀸𑀢𑀼𑀓𑀸, 𑀉𑀧𑀫𑀸𑀦𑁂 𑀓𑁄. 𑀭𑀼 𑀲𑀤𑁆𑀤𑁂, 𑀭𑀼. 𑀭𑀼𑀡𑀁 𑀓𑀭𑁄𑀢𑀻𑀢𑀺 𑀭𑀗𑁆𑀓𑀼, 𑀉, 𑀡𑀲𑁆𑀲 𑀮𑁄𑀧𑁄 𑀭𑀓𑀸𑀭𑀲𑁆𑀲, 𑀉𑀲𑁆𑀲 𑀘. 𑀅𑀢𑁆𑀢𑀸𑀦𑀁 𑀦𑀻𑀘𑀁 𑀓𑀭𑁄𑀢𑀻𑀢𑀺 𑀦𑀻𑀓𑁄. 𑀲𑀭𑀢𑀺𑀲𑁆𑀫𑀸 𑀅𑀪𑁄, 𑀲𑀭𑀪𑁄. 𑀅𑀝𑁆𑀞𑀸𑀧𑀤𑁄 𑀉𑀤𑁆𑀥𑀁𑀦𑀬𑀦𑁄 𑀲𑀻𑀳𑀲𑁆𑀲𑀸𑀧𑀺 𑀳𑀦𑁆𑀢𑀸, 𑀢𑀲𑁆𑀲 𑀘 𑀧𑀸𑀤𑀘𑀢𑀼𑀓𑁆𑀓𑀁 𑀉𑀤𑁆𑀥𑀁 𑀪𑀯𑀢𑀻𑀢𑀺.

𑁬𑁨𑁦. 𑀧𑀺𑀬𑀓𑀸𑀤𑀬𑁄 𑀢𑀬𑁄, 𑀆𑀤𑀺𑀦𑀸 𑀓𑀦𑁆𑀤𑀮𑀻𑀘𑀻𑀦𑀲𑀫𑀽𑀭𑀼𑀆𑀤𑀬𑁄 𑀘 𑀘𑀫𑁆𑀫𑀬𑁄𑀦𑀬𑁄, 𑀢𑁂𑀦 𑀪𑀽𑀢𑀲𑁆𑀲 𑀘𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸, 𑀏𑀢𑁂 𑀘 𑀘𑀺𑀢𑁆𑀭𑀢𑀦𑀼𑀭𑀼𑀳𑀸𑀤𑀬𑁄 𑀓𑀫𑁆𑀩𑁄𑀚𑀸𑀤𑀺𑀫𑁆𑀳𑀺, 𑀉𑀢𑁆𑀢𑀭𑀸𑀧𑀣𑁂 𑀘 𑀚𑀸𑀬𑀦𑁆𑀢𑀺, 𑀢𑀢𑁆𑀭𑁂𑀯 𑀲𑀦𑀸𑀫𑀔𑁆𑀬𑀸𑀢𑀸. 𑀬𑀣𑀸 𑀫𑀺𑀕𑀲𑀤𑁆𑀤𑁄 𑀯𑀦𑁆𑀬𑀧𑀲𑀼𑀲𑀸𑀫𑀜𑁆𑀜𑁂, 𑀯𑀺𑀲𑁂𑀲𑁂 𑀘 𑀓𑀼𑀭𑀗𑁆𑀕𑀸𑀔𑁆𑀬𑁂 𑀯𑀢𑁆𑀢𑀢𑀺, 𑀬𑀣𑀸 𑀘 𑀮𑁄𑀳𑀲𑀤𑁆𑀤𑁄 𑀲𑀼𑀯𑀡𑁆𑀡𑀸𑀤𑀺𑀓𑁂 𑀢𑁂𑀚𑀲𑀲𑀸𑀫𑀜𑁆𑀜𑁂, 𑀯𑀺𑀲𑁂𑀲𑁂 𑀘, 𑀢𑀣𑀸 𑀘𑀫𑁆𑀫𑀬𑁄𑀦𑀺𑀅𑀚𑀺𑀦𑀬𑁄𑀦𑀺𑀲𑀤𑁆𑀤𑀸𑀧𑀺 𑀫𑀺𑀕𑀲𑀸𑀫𑀜𑁆𑀜𑁂, 𑀫𑀺𑀕𑀯𑀺𑀲𑁂𑀲𑁂 𑀘𑁂𑀢𑀺 𑀢𑀣𑀸 𑀯𑀼𑀢𑁆𑀢𑀸.

𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀡𑁆𑀯𑀼, 𑀇𑀬𑀸𑀤𑁂𑀲𑁄. 𑀊𑀭𑀼𑀫𑁆𑀳𑀺 𑀅𑀢𑀺𑀲𑀬𑀘𑀫𑁆𑀫𑀬𑀼𑀢𑁆𑀢𑀢𑀸𑀬 𑀘𑀫𑀽𑀭𑀼, 𑀏𑀓𑀲𑁆𑀲 𑀫𑀲𑁆𑀲 𑀮𑁄𑀧𑁄. 𑀓𑀤𑀺 𑀅𑀯𑁆𑀳𑀸𑀦𑁂, 𑀅𑀮𑁄, 𑀈, 𑀓𑀤𑀮𑀻 𑀘 𑀲𑁄 𑀫𑀺𑀕𑁄 𑀘𑁂𑀢𑀺 𑀓𑀤𑀮𑀻𑀫𑀺𑀕𑁄.

𑀲𑀻𑀳𑀸𑀤𑀬𑁄 𑀬𑀣𑀸𑀯𑀼𑀢𑁆𑀢𑀸, 𑀅𑀯𑀼𑀢𑁆𑀢𑀸 𑀘 𑀲𑀩𑁆𑀩𑁂 𑀘𑀢𑀼𑀧𑁆𑀧𑀤𑀸 𑀲𑀢𑁆𑀢𑀸 ‘‘𑀫𑀺𑀕𑀸, 𑀧𑀲𑀯𑁄’’𑀢𑀺 𑀘𑁄𑀘𑁆𑀘𑀦𑁆𑀢𑁂. 𑀧𑀲𑀯𑀦𑁆𑀢𑀻𑀢𑀺 𑀧𑀲𑀯𑁄, 𑀲𑀼 𑀅𑀪𑀺𑀲𑀯𑁂, 𑀧𑀲 𑀩𑀦𑁆𑀥𑀦𑁂 𑀯𑀸, 𑀉.

𑁬𑁨𑁧. 𑀘𑀢𑀼𑀓𑁆𑀓𑀁 𑀮𑀽𑀢𑀸𑀬𑀁. 𑀮𑀽 𑀙𑁂𑀤𑀦𑁂, 𑀢𑁄, 𑀮𑀽𑀢𑀸, 𑀲𑀓𑀢𑁆𑀣𑁂 𑀇𑀓𑁄, 𑀮𑀽𑀢𑀺𑀓𑀸, 𑀤𑁆𑀯𑁂 𑀦𑀸𑀭𑀺𑀬𑀁. 𑀉𑀡𑁆𑀡𑀸𑀧𑀸𑀬𑁄 𑀢𑀦𑁆𑀢𑀼 𑀉𑀡𑁆𑀡𑀸, 𑀲𑀸 𑀦𑀸𑀪𑀺𑀬𑀁 𑀅𑀲𑁆𑀲 𑀉𑀡𑁆𑀡𑀦𑀸𑀪𑀺, 𑀭𑀲𑁆𑀲𑁄. 𑀫𑀓𑁆𑀓𑀝𑁄 𑀯𑀺𑀬 𑀲𑀸𑀔𑀸𑀬𑀁 𑀅𑀢𑁆𑀢𑀦𑁄 𑀢𑀦𑁆𑀢𑀼𑀫𑁆𑀳𑀺 𑀕𑀘𑁆𑀙𑀢𑀻𑀢𑀺 𑀫𑀓𑁆𑀓𑀝𑀓𑁄.

𑀤𑁆𑀯𑀬𑀁 𑀕𑁄𑀫𑀬𑀚𑀯𑀺𑀘𑁆𑀙𑀺𑀓𑁂. 𑀯𑀺𑀘𑁆𑀙 𑀕𑀫𑀦𑁂, 𑀡𑁆𑀯𑀼, 𑀯𑀺𑀘𑁆𑀙𑀺𑀓𑁄, 𑀲𑀢𑀧𑀤𑀺𑀬𑀫𑁆𑀧𑀺, 𑀆𑀴𑀁 𑀯𑀺𑀘𑁆𑀙𑀺𑀓𑀦𑀗𑁆𑀕𑀼𑀮𑀁, 𑀢𑀁𑀬𑁄𑀕𑀸 𑀆𑀴𑀺. 𑀤𑁆𑀯𑀬𑀁 𑀖𑀭𑀕𑁄𑀥𑀸𑀬𑀁. 𑀲𑀭𑀢𑀺𑀲𑁆𑀫𑀸 𑀊, 𑀅𑀯𑁄 𑀘𑀦𑁆𑀢𑁄. 𑀖𑀭𑀁 𑀦𑀺𑀲𑁆𑀲𑀺𑀢𑀸 𑀕𑁄𑀥𑀸 𑀖𑀭𑀕𑁄𑀴𑀺𑀓𑀸, 𑀥𑀲𑁆𑀲 𑀴𑁄, 𑀲𑀓𑀢𑁆𑀣𑁂 𑀓𑁄.

𑁬𑁨𑁨. 𑀤𑁆𑀯𑀬𑀁 𑀕𑁄𑀥𑀸𑀬𑀁. 𑀕𑀼𑀥 𑀭𑁄𑀲𑁂, 𑀅, 𑀕𑁄𑀥𑀸, 𑀦𑀸𑀭𑀻. 𑀓𑀼𑀡𑁆𑀟 𑀤𑀸𑀳𑁂, 𑀅, 𑀓𑀼𑀡𑁆𑀟𑁄. 𑀤𑁆𑀯𑀬𑀁 𑀭𑀢𑁆𑀢𑀧𑀸𑀬𑀁. 𑀓𑀡𑁆𑀡𑀲𑁆𑀲 𑀚𑀮𑀽𑀓𑀸 𑀭𑀢𑁆𑀢𑀧𑀸 𑀓𑀡𑁆𑀡𑀚𑀮𑀽𑀓𑀸. 𑀲𑀢𑀁 𑀧𑀤𑀸 𑀬𑀲𑁆𑀲𑀸 𑀲𑀢𑀧𑀤𑀻, 𑀧𑀤𑀲𑀤𑁆𑀤𑁄 𑀧𑀸𑀤𑀢𑁆𑀣𑁄.

𑀤𑁆𑀯𑀬𑀁 𑀓𑀮𑀦𑁆𑀤𑀓𑁂. 𑀓𑀦𑁆𑀤 𑀅𑀯𑁆𑀳𑀸𑀦𑁂, 𑀭𑁄𑀤𑀦𑁂 𑀘, 𑀓𑀦𑁆𑀤𑀢𑀻𑀢𑀺 𑀓𑀮𑀦𑁆𑀤𑀓𑁄, 𑀮𑀫𑀚𑁆𑀛𑁄, 𑀡𑁆𑀯𑀼. 𑀓𑀸𑀴𑀯𑀡𑁆𑀡𑀢𑀸𑀬 𑀓𑀸𑀴𑀓𑀸, 𑀦𑀸𑀭𑀺𑀬𑀁. 𑀤𑁆𑀯𑀬𑀁 𑀦𑀓𑀼𑀮𑁂, 𑀦𑀢𑁆𑀣𑀺 𑀓𑀼𑀮𑀁 𑀏𑀢𑀲𑁆𑀲 𑀲𑀧𑁆𑀧𑁂𑀲𑀼 𑀦𑀓𑀼𑀮𑁄, 𑀅𑀭𑀺𑀲𑀧𑁆𑀧𑁄𑀧𑀺. 𑀦𑀓𑁆𑀓 𑀦𑀸𑀲𑀦𑁂 𑀯𑀸, 𑀉𑀮𑁄, 𑀓𑀮𑁄𑀧𑁄, 𑀲𑀧𑁆𑀧𑁂 𑀦𑀸𑀲𑁂𑀢𑀻𑀢𑀺 𑀦𑀓𑀼𑀮𑁄. 𑀫𑀗𑁆𑀕 𑀕𑀢𑁆𑀬𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀉𑀲𑁄.

𑁬𑁨𑁩. 𑀤𑁆𑀯𑀬𑀁 𑀓𑀓𑀡𑁆𑀝𑀓𑁂. 𑀓𑀼𑀘𑁆𑀙𑀺𑀢𑁄 𑀓𑀡𑁆𑀝𑀓𑁄 𑀅𑀲𑁆𑀲, 𑀉𑀲𑁆𑀲𑀢𑁆𑀢𑀁. 𑀲𑀭𑀢𑀺 𑀥𑀸𑀯𑀢𑀻𑀢𑀺 𑀲𑀭𑀝𑁄, 𑀅𑀝𑁄.

𑀘𑀢𑀼𑀓𑁆𑀓𑀁 𑀓𑀻𑀝𑁂. 𑀓𑀻𑀝 𑀩𑀦𑁆𑀥𑀦𑁂, 𑀅, 𑀓𑀻𑀝 𑀕𑀫𑀦𑁂 𑀯𑀸, 𑀤𑀻𑀖𑀸𑀤𑀺. 𑀧𑀼𑀮 𑀫𑀳𑀢𑁆𑀣𑁂, 𑀅𑀯𑁄, 𑀴𑀢𑁆𑀢𑀁. 𑀓𑀼𑀘𑁆𑀙𑀺𑀢𑀁 𑀅𑀫𑀢𑀺 𑀕𑀘𑁆𑀙𑀢𑀻𑀢𑀺 𑀓𑀺𑀫𑀺, 𑀇, 𑀅𑀲𑁆𑀲𑀺𑀢𑁆𑀢𑀁. 𑀧𑀓𑀸𑀭𑁂𑀦 𑀅𑀦𑀢𑀻𑀢𑀺 𑀧𑀸𑀡𑀓𑁄, 𑀡𑁆𑀯𑀼, 𑀡𑀢𑁆𑀢𑀁.

𑀤𑁆𑀯𑀬𑀁 𑀓𑀡𑁆𑀝𑀮𑁄𑀫𑀓𑀻𑀝𑁂. 𑀉𑀘𑁆𑀘𑀁 𑀞𑀸𑀦𑀁 𑀆𑀮𑀺𑀗𑁆𑀕𑀢𑀻𑀢𑀺 𑀉𑀘𑁆𑀘𑀸𑀮𑀺𑀗𑁆𑀕𑁄. 𑀩𑀳𑀼𑀮𑁄𑀫𑀬𑀼𑀢𑁆𑀢𑁄 𑀧𑀸𑀡𑀓𑁄 𑀮𑁄𑀫𑀲𑀧𑀸𑀡𑀓𑁄.

𑁬𑁨𑁪-𑁬𑁨𑁫. 𑀲𑀸𑀤𑁆𑀥𑀧𑀚𑁆𑀚𑁂𑀦 𑀲𑀓𑀼𑀡𑀲𑁆𑀲 𑀦𑀸𑀫𑀸𑀦𑀺. 𑀯𑀺𑀳𑁂 𑀆𑀓𑀸𑀲𑁂 𑀕𑀘𑁆𑀙𑀢𑀻𑀢𑀺 𑀯𑀺𑀳𑀗𑁆𑀕𑁄, 𑀯𑀺𑀳𑀗𑁆𑀕𑀫𑁄 𑀘, 𑀆𑀓𑀸𑀲𑀧𑀭𑀺𑀬𑀸𑀬𑁄 𑀘𑁂𑀢𑁆𑀣 𑀯𑀺𑀳𑀲𑀤𑁆𑀤𑁄, 𑀯𑁂𑀳𑀸𑀲𑀲𑁆𑀲 𑀯𑀸 𑀯𑀺𑀳𑀸𑀤𑁂𑀲𑁄. 𑀧𑀓𑁆𑀔𑀬𑀼𑀢𑁆𑀢𑀢𑀸𑀬 𑀧𑀓𑁆𑀔𑀻. 𑀔𑁂𑀦, 𑀔𑀲𑁆𑀫𑀺𑀁 𑀯𑀸 𑀕𑀘𑁆𑀙𑀢𑀻𑀢𑀺 𑀔𑀕𑁄. 𑀅𑀡𑁆𑀟𑀢𑁄 𑀚𑀸𑀢𑁄. 𑀲𑀓𑁆𑀓𑁄𑀢𑀺 𑀉𑀤𑁆𑀥𑀁 𑀕𑀦𑁆𑀢𑀼𑀦𑁆𑀢𑀺 𑀲𑀓𑀼𑀡𑁄, 𑀲𑀓𑀼𑀦𑁆𑀢𑁄, 𑀲𑀓𑀼𑀡𑀻 𑀘, 𑀲𑀓 𑀲𑀢𑁆𑀢𑀺𑀬𑀁, 𑀉𑀡𑁄, 𑀉𑀦𑁆𑀢𑁄, 𑀉𑀡𑀻 𑀘. 𑀧𑀢𑀦𑁆𑀢𑁄 𑀟𑁂𑀦𑁆𑀢𑁄, 𑀧𑀢𑁆𑀢𑁂𑀦 𑀯𑀸 𑀕𑀘𑁆𑀙𑀢𑀻𑀢𑀺 𑀧𑀢𑀗𑁆𑀕𑁄, 𑀅𑀧𑀭𑀢𑁆𑀭 𑀢𑀮𑁄𑀧𑁄. 𑀫𑀸𑀢𑀼𑀓𑀼𑀘𑁆𑀙𑀺𑀢𑁄, 𑀅𑀡𑁆𑀟𑀢𑁄 𑀘𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀬𑀢𑀻𑀢𑀺 𑀤𑁆𑀯𑀺𑀚𑁄. 𑀉𑀟𑁆𑀟𑀦𑀸𑀤𑀻𑀲𑀼 𑀯𑀓𑁆𑀓𑀁 𑀓𑀼𑀝𑀺𑀮𑀁 𑀅𑀗𑁆𑀕𑀁 𑀕𑀻𑀯𑀸𑀤𑀺𑀓𑀁 𑀏𑀢𑀲𑁆𑀲, 𑀯𑀓𑁆𑀓𑁂𑀦 𑀕𑀫𑀦𑁂𑀦 𑀅𑀗𑁆𑀕𑀢𑀻𑀢𑀺 𑀯𑀸 𑀯𑀓𑁆𑀓𑀗𑁆𑀕𑁄. 𑀧𑀢𑁆𑀢𑁂𑀦 𑀬𑀸𑀢𑀺, 𑀢𑀁 𑀯𑀸 𑀬𑀸𑀦𑀁 𑀏𑀢𑀲𑁆𑀲. 𑀧𑀢𑀢𑀺 𑀧𑀢𑀦𑁆𑀢𑁄 𑀯𑀺𑀬 𑀆𑀓𑀸𑀲𑀢𑁄 𑀳𑁄𑀢𑀻𑀢𑀺 𑀧𑀢𑀦𑁆𑀢𑁄. 𑀦𑀻𑀴𑁂 𑀓𑀼𑀮𑀸𑀯𑀓𑁂 𑀚𑀸𑀬𑀢𑀻𑀢𑀺 𑀦𑀻𑀴𑀚𑁄.

𑀯𑀝𑁆𑀝𑀓𑀸𑀤𑀬𑁄, 𑀧𑁄𑀓𑁆𑀔𑀭𑀲𑀸𑀢𑀓𑀸𑀤𑀬𑁄 𑀘 𑀢𑀩𑁆𑀪𑁂𑀤𑀸 𑀢𑁂𑀲𑀁 𑀲𑀓𑀼𑀡𑀸𑀦𑀁 𑀯𑀺𑀲𑁂𑀲𑀸. 𑀯𑀝𑁆𑀝 𑀯𑀝𑁆𑀝𑀦𑁂, 𑀡𑁆𑀯𑀼, 𑀯𑀝𑁆𑀝𑀓𑀸 𑀦𑀸𑀭𑀻. 𑀫𑀬𑀽𑀭𑀧𑁆𑀧𑀫𑀸𑀡𑁄 𑀢𑀤𑀸𑀓𑀢𑀺𑀘𑀺𑀢𑁆𑀢𑀧𑀓𑁆𑀔𑁄 𑀚𑀻𑀯𑀜𑁆𑀚𑀻𑀯𑁄 𑀤𑀓𑁆𑀔𑀺𑀡𑀧𑀣𑀸𑀤𑀻𑀲𑀼 𑀚𑀸𑀬𑀢𑁂, ‘‘𑀚𑀻𑀯𑀚𑀻𑀯𑀸’’𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀚𑀻𑀯𑀜𑁆𑀚𑀻𑀯𑁄. ‘‘𑀚𑀻𑀯𑀚𑀻𑀯𑁄’’𑀢𑀺 𑀦𑀺𑀭𑀸𑀦𑀼𑀦𑀸𑀲𑀺𑀓𑀸𑀧𑀺. 𑀘𑀦𑁆𑀤𑀺𑀓𑀸𑀬𑀼𑀢𑁆𑀢𑀭𑀢𑁆𑀢𑀺𑀧𑁆𑀧𑀺𑀬𑁄 𑀧𑀓𑁆𑀔𑀻 𑀘𑀓𑁄𑀭𑁄, 𑀘𑀓 𑀧𑀭𑀺𑀢𑀓𑁆𑀓𑀦𑁂, 𑀉𑀭𑁄, 𑀉𑀲𑁆𑀲𑁄, 𑀘𑀗𑁆𑀓𑁄𑀭𑁄𑀧𑀺. 𑀢𑀭𑀢𑀺𑀲𑁆𑀫𑀸 𑀇𑀭𑁄, 𑀤𑁆𑀯𑀺𑀢𑁆𑀢𑀫𑀺𑀢𑁆𑀢𑀜𑁆𑀘, 𑀢𑀺𑀢𑁆𑀢𑀺𑀭𑁄.

𑁬𑁨𑁬. 𑀲𑀮 𑀕𑀢𑀺𑀬𑀁, 𑀡𑀺𑀓𑁄, 𑀴𑀢𑁆𑀢𑀁, 𑀲𑀸𑀴𑀺𑀓𑀸, 𑀦𑀸𑀭𑀻. 𑀓𑀮𑀁 𑀭𑀯𑀢𑀻𑀢𑀺 𑀓𑀭𑀯𑀻𑀓𑁄, 𑀈𑀓𑁄, 𑀮𑀮𑁄𑀧𑁄. 𑀓𑀭𑀯𑀻𑀓𑁄, 𑀬𑀲𑁆𑀲 𑀲𑀭𑁄 𑀪𑀕𑀯𑀢𑁄 𑀲𑀭𑁂𑀦 𑀉𑀧𑀫𑀻𑀬𑀢𑁂, 𑀲𑁄 𑀯𑀼𑀘𑁆𑀘𑀢𑀺 ‘‘𑀓𑀭𑀯𑀻𑀓𑁄’’𑀢𑀺. 𑀚𑀯𑁂𑀦 𑀭𑀯𑀺𑀦𑀸 𑀲𑀤𑀺𑀲𑁄 𑀳𑀁𑀲𑁄 𑀭𑀯𑀺𑀳𑀁𑀲𑁄. 𑀓𑀼𑀲 𑀲𑀤𑁆𑀤𑁂, 𑀣𑀓𑁄, 𑀤𑁆𑀯𑀺𑀢𑁆𑀢𑀁, 𑀓𑀼𑀲𑀲𑁆𑀲 𑀲𑀲𑁆𑀲 𑀢𑁄,𑀓𑀼𑀓𑀼𑀢𑁆𑀣𑀓𑁄. 𑀓𑀭𑀡𑁆𑀟 𑀪𑀸𑀚𑀦𑀢𑁆𑀣𑁂, 𑀅𑀯𑁄, 𑀓𑀭𑀡𑁆𑀟𑀯𑁄, 𑀚𑀮𑀘𑀭𑁄 𑀧𑀓𑁆𑀔𑀻. 𑀩𑀺𑀮𑀼 𑀧𑀢𑀺𑀢𑁆𑀣𑀫𑁆𑀪𑁂, 𑀅, 𑀅𑀯𑀸𑀤𑁂𑀲𑁄, 𑀩𑀺𑀮𑀯𑁄, ‘‘𑀕𑀡𑁆𑀟𑀧𑁆𑀮𑀯𑁄’’𑀢𑀺 𑀔𑁆𑀬𑀸𑀢𑁄 𑀭𑀢𑁆𑀢𑀧𑀓𑁆𑀔𑁄 𑀫𑀳𑀸𑀧𑀓𑁆𑀔𑀻 𑀧𑁄𑀓𑁆𑀔𑀭𑀲𑀸𑀢𑀓𑁄, 𑀧𑁄𑀓𑁆𑀔𑀭𑀲𑁆𑀲 𑀲𑀜𑁆𑀜𑀸 𑀬𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀓𑁄, 𑀜𑁆𑀜𑀲𑁆𑀲 𑀢𑁄, 𑀤𑀻𑀖𑁄 𑀘, 𑀲𑀫𑀼𑀤𑀺𑀢𑀦𑀸𑀫𑀫𑁂𑀯 𑀯𑀸 𑀢𑀲𑁆𑀲, 𑀢𑀤𑀸 𑀲𑀸𑀤 𑀅𑀲𑁆𑀲𑀸𑀤𑀦𑁂, 𑀡𑁆𑀯𑀼, 𑀤𑀲𑁆𑀲 𑀢𑁄, 𑀧𑁄𑀓𑁆𑀔𑀭𑀲𑀸𑀢𑀓𑁄.

𑁬𑁨𑁭. 𑀲𑀢𑁆𑀢𑀓𑀁 𑀧𑀓𑁆𑀔𑁂. 𑀧𑀢𑀦𑁆𑀢𑀺 𑀅𑀦𑁂𑀦𑀸𑀢𑀺 𑀧𑀢𑀢𑁆𑀢𑀁, 𑀬𑀤𑀸𑀤𑀺𑀦𑀸 𑀢𑁄, 𑀤𑁆𑀯𑀺𑀢𑁆𑀢𑀁. 𑀉𑀔 𑀕𑀢𑀺𑀬𑀁, 𑀬𑀼, 𑀉𑀲𑁆𑀲𑁂, 𑀅𑀲𑁆𑀲𑀼, 𑀧𑁂𑀔𑀼𑀡𑀁, 𑀡𑀢𑁆𑀢𑀁. 𑀧𑀢 𑀕𑀫𑀦𑁂, 𑀢𑁄, 𑀧𑀸𑀢𑀢𑁄 𑀢𑀸𑀬𑀢𑀻𑀢𑀺 𑀯𑀸 𑀧𑀢𑁆𑀢𑀁. 𑀧𑀢 𑀕𑀫𑀦𑁂, 𑀔𑁄, 𑀢𑀲𑁆𑀲 𑀓𑁄, 𑀧𑀓𑁆𑀔𑁄. 𑀧𑀢𑀺𑀢𑀼𑀁 𑀇𑀘𑁆𑀙𑀢𑀺 𑀬𑁂𑀦 𑀧𑀺𑀜𑁆𑀙𑀁, 𑀦𑁂𑀭𑀼𑀢𑁆𑀢𑁄, 𑀧𑀢 𑀕𑀫𑀦𑁂 𑀯𑀸, 𑀙𑁄, 𑀢𑀮𑁄𑀧𑁄, 𑀩𑀺𑀦𑁆𑀤𑀸𑀕𑀫𑁄, 𑀅𑀲𑁆𑀲𑀺. 𑀙𑀸𑀤𑁆𑀬𑀢𑁂 𑀅𑀦𑁂𑀦 𑀙𑀤𑁄. 𑀕𑀺𑀭 𑀦𑀺𑀕𑁆𑀕𑀺𑀭𑀡𑁂, 𑀉, 𑀇𑀲𑁆𑀲𑀢𑁆𑀢𑀁, 𑀕𑀫𑀼 𑀕𑀫𑀦𑁂 𑀯𑀸, 𑀉, 𑀫𑀲𑁆𑀲 𑀭𑁄.

𑀧𑀓𑁆𑀔𑀻𑀦𑀁 𑀩𑀻𑀚𑁂 ‘‘𑀅𑀉’’𑀇𑀢𑀺 𑀔𑁆𑀬𑀸𑀢𑁂 𑀅𑀡𑁆𑀟𑀁, 𑀓𑀘𑁆𑀙𑀧𑀸𑀤𑀻𑀦𑀁 𑀩𑀻𑀚𑁂𑀧𑀺, ‘‘𑀅𑀡𑁆𑀟𑀁 𑀔𑀕𑀸𑀤𑀺𑀓𑁄𑀲𑁂 𑀘𑀸’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀅𑀟𑀺 𑀅𑀡𑁆𑀟𑀢𑁆𑀣𑁂, 𑀡𑁄, 𑀧𑁂𑀲𑀺, 𑀓𑁄𑀲𑁄𑀧𑀺, 𑀧𑀺𑀲 𑀅𑀯𑀬𑀯𑁂, 𑀇, 𑀧𑁂𑀲𑀺, ‘‘𑀧𑁂𑀲𑀺𑀬𑀁 𑀧𑀢𑁆𑀢𑀪𑁂𑀤𑁂 𑀘, 𑀓𑁄𑀲𑁄 𑀧𑀼𑀫𑁂𑀯 𑀇𑀘𑁆𑀙𑀺𑀢𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁫.𑁩𑁭] 𑀭𑀼𑀤𑁆𑀤𑁄. 𑀤𑁆𑀯𑀬𑀁 𑀧𑀓𑁆𑀔𑀺𑀕𑁂𑀳𑁂. 𑀦𑀻𑀮 𑀯𑀡𑁆𑀡𑁂, 𑀅, 𑀴𑀢𑁆𑀢𑀁, 𑀦𑀻 𑀦𑀬𑁂 𑀯𑀸, 𑀇𑀮𑁄. 𑀓𑀼𑀘𑁆𑀙𑀺𑀢𑀁 𑀅𑀡𑁆𑀟𑀯𑀺𑀦𑀸𑀲𑀦𑀸𑀤𑀺𑀓𑀁 𑀮𑀼𑀦𑀸𑀢𑀻𑀢𑀺 𑀓𑀼𑀮𑀸𑀯𑀓𑀁, 𑀡𑁆𑀯𑀼.

𑁬𑁨𑁮. 𑀤𑁆𑀯𑀬𑀁 𑀕𑀭𑀼𑀴𑀸𑀦𑀁 𑀫𑀸𑀢𑀭𑀺. 𑀯𑀺𑀦𑁄 𑀧𑀓𑁆𑀔𑀺𑀦𑁄 𑀦𑀫𑀦𑁆𑀢𑀺 𑀬𑀁 𑀯𑀺𑀦𑀢𑀸. 𑀣𑀻𑀧𑀼𑀫𑀤𑁆𑀯𑀬𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀤𑁆𑀯𑀬𑀁 𑀫𑀺𑀣𑀼𑀦𑀁 𑀦𑀸𑀫, 𑀲𑀗𑁆𑀔𑁆𑀬𑀸𑀦𑀲𑁆𑀲 𑀲𑀗𑁆𑀔𑁆𑀬𑁂𑀬𑁆𑀬𑀦𑀺𑀲𑁆𑀲𑀺𑀢𑀢𑀸𑀬 𑀇𑀢𑁆𑀣𑀺𑀧𑀼𑀭𑀺𑀲𑀸𑀬𑁂𑀯 𑀫𑀺𑀣𑀼𑀦𑀁, 𑀫𑀺𑀣 𑀲𑀗𑁆𑀕𑀫𑁂, 𑀉𑀦𑁄.

𑀙𑀓𑁆𑀓𑀁 𑀬𑀼𑀕𑀴𑀫𑀢𑁆𑀢𑁂. 𑀬𑀼𑀚 𑀬𑁄𑀕𑁂, 𑀅, 𑀬𑀼𑀕𑀁, 𑀅𑀮𑀧𑀘𑁆𑀘𑀬𑁂 𑀬𑀼𑀕𑀴𑀁, 𑀴𑀢𑁆𑀢𑀁, 𑀬𑀼𑀕𑀮𑀫𑁆𑀧𑀺. 𑀉𑀪 𑀧𑀽𑀭𑀡𑁂, 𑀡𑁄, 𑀤𑁆𑀯𑀦𑁆𑀤𑀸𑀤𑁂𑀲𑁄 𑀘, 𑀤𑁆𑀯𑀦𑁆𑀤𑀁, 𑀬𑀫𑀼 𑀉𑀧𑀭𑀫𑁂, 𑀡𑁆𑀯𑀼, 𑀅𑀮𑁄 𑀘, 𑀬𑀫𑀓𑀁, 𑀬𑀫𑀮𑀜𑁆𑀘, 𑀅𑀧𑀘𑁆𑀘𑀬𑁂 𑀬𑀫𑀁.

𑁬𑁨𑁯-𑁬𑁩𑁧. 𑀫𑀡𑁆𑀟𑀮𑀦𑁆𑀢𑀁 𑀲𑀫𑀽𑀳𑁂. 𑀲𑀫𑁆𑀫𑀸, 𑀯𑀺𑀲𑁂𑀲𑁂𑀦 𑀘 𑀊𑀳𑀢𑁂 𑀧𑀼𑀜𑁆𑀚𑀻𑀪𑀽𑀢𑀢𑁆𑀢𑀸𑀢𑀺 𑀲𑀫𑀽𑀳𑁄, 𑀡𑁄, 𑀲𑀫𑀁 𑀲𑀳 𑀅𑀯𑀬𑀯𑁂𑀦 𑀊𑀳𑀢𑀺 𑀢𑀺𑀝𑁆𑀞𑀢𑀻𑀢𑀺 𑀯𑀸 𑀲𑀫𑀽𑀳𑁄. 𑀕𑀡 𑀲𑀗𑁆𑀔𑁆𑀬𑀸𑀦𑁂, 𑀕𑀡𑀻𑀬𑀢𑀺 𑀅𑀯𑀬𑀯𑁂𑀦 𑀲𑀳𑀸𑀢𑀺 𑀕𑀡𑁄. 𑀲𑀳 𑀅𑀯𑀬𑀯𑁂𑀦 𑀕𑀘𑁆𑀙𑀢𑀻𑀢𑀺 𑀲𑀗𑁆𑀖𑀸𑀢𑁄, 𑀳𑀦 𑀕𑀫𑀦𑁂, 𑀡𑁄, 𑀲𑀳 𑀅𑀯𑀬𑀯𑁂𑀦 𑀉𑀤𑀬𑀢𑀻𑀢𑀺 𑀲𑀫𑀼𑀤𑀸𑀬𑁄, 𑀤𑀸𑀕𑀫𑁄, 𑀫𑀚𑁆𑀛𑁂 𑀤𑀻𑀖𑁄. 𑀲𑀜𑁆𑀘𑀺𑀦𑁄𑀢𑀺 𑀅𑀯𑀬𑀯𑀦𑁆𑀢𑀺 𑀲𑀜𑁆𑀘𑀬𑁄, 𑀘𑀺 𑀘𑀬𑁂. 𑀲𑀳 𑀅𑀯𑀬𑀯𑁂𑀦 𑀤𑀼𑀳𑀬𑀢𑀻𑀢𑀺 𑀲𑀦𑁆𑀤𑁄𑀳𑁄, 𑀤𑀼𑀳 𑀧𑀧𑀽𑀭𑀡𑁂. 𑀦𑀺𑀲𑁆𑀲𑁂𑀲𑀢𑁄 𑀯𑀳𑀢𑀺 𑀅𑀯𑀬𑀯𑀦𑁆𑀢𑀺 𑀦𑀺𑀯𑀳𑁄. 𑀅𑀯𑀬𑀯𑀁 𑀓𑀢𑁆𑀯𑀸 𑀩𑁆𑀬𑀧𑀺𑀬𑀢𑀺 𑀕𑀘𑁆𑀙𑀢𑀻𑀢𑀺 𑀑𑀖𑁄 [𑀉𑀘𑁆𑀬𑀢𑁂 𑀑𑀖𑁄 𑀉𑀘 𑀲𑀫𑀯𑀸𑀬𑁂 𑀖𑀉 𑀦𑀺𑀧𑀸𑀢𑀦𑀸 𑀘𑀲𑁆𑀲 𑀖𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁫.𑁩𑁯)]. 𑀯𑀺𑀲𑀦𑁆𑀢𑀺 𑀅𑀯𑀬𑀯𑀸 𑀬𑀲𑁆𑀫𑀺𑀦𑁆𑀢𑀺 𑀯𑀺𑀲𑀭𑁄, 𑀅𑀭𑁄. 𑀅𑀯𑀬𑀯𑀁 𑀲𑀫𑀻𑀧𑁂 𑀓𑀭𑁄𑀢𑀻𑀢𑀺 𑀦𑀺𑀓𑀭𑁄. 𑀏𑀓𑁂𑀓𑀸𑀧𑁂𑀓𑁆𑀔𑀸𑀬 𑀅𑀧𑁆𑀧𑀢𑁆𑀣𑁂𑀦 𑀓𑀲𑀗𑁆𑀔𑀸𑀢𑀸 𑀅𑀯𑀬𑀯𑀸 𑀆𑀬𑀦𑁆𑀢𑀺 𑀬𑀲𑁆𑀫𑀺𑀁 𑀓𑀸𑀬𑁄, 𑀅𑀣 𑀯𑀸 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄, 𑀲𑁄 𑀯𑀺𑀬 𑀅𑀯𑀬𑀯𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀓𑀸𑀬𑁄𑀢𑀺 𑀇𑀥 𑀲𑀫𑀽𑀳𑁄 𑀯𑀼𑀢𑁆𑀢𑁄. 𑀅𑀦𑁆𑀢𑀢𑁆𑀣𑁂𑀦 𑀔𑀁𑀲𑀗𑁆𑀔𑀸𑀢𑀁 𑀅𑀯𑀬𑀯𑀁 𑀥𑀸𑀭𑁂𑀢𑀻𑀢𑀺 𑀔𑀦𑁆𑀥𑁄, 𑀔𑀸𑀤𑀢𑀺 𑀅𑀯𑀬𑀯𑁂𑀢𑀺 𑀯𑀸 𑀔𑀦𑁆𑀥𑁄, 𑀅𑀫𑀚𑁆𑀛𑀤𑀻𑀖𑁂 𑀲𑀫𑀼𑀤𑀬𑁄. 𑀖𑀝 𑀖𑀝𑀦𑁂. 𑀖𑀝𑀦𑀁 𑀭𑀸𑀲𑀺𑀪𑀯𑀦𑀁, 𑀖𑀝𑁂𑀦𑁆𑀢𑀺 𑀅𑀲𑁆𑀲𑀁 𑀅𑀯𑀬𑀯𑀸𑀢𑀺 𑀖𑀝𑀸. 𑀲𑀳 𑀅𑀯𑀬𑀯𑁂𑀦 𑀏𑀢𑀻𑀢𑀺 𑀲𑀫𑀺𑀢𑀺,𑀢𑀺. 𑀲𑀳 𑀅𑀯𑀬𑀯𑁂𑀦 𑀕𑀘𑁆𑀙𑀢𑀻𑀢𑀺 𑀲𑀁𑀳𑀢𑀺, 𑀳𑀦 𑀕𑀢𑀺𑀬𑀁,𑀢𑀺, 𑀦𑀮𑁄𑀧𑁄. 𑀭𑀲 𑀅𑀲𑁆𑀲𑀸𑀤𑀦𑁂, 𑀇𑀡. 𑀧𑀼𑀜𑁆𑀚 𑀓𑀼𑀘𑁆𑀙𑀸𑀬𑀁. 𑀲𑀳 𑀅𑀯𑀬𑀯𑁂𑀦 𑀩𑁆𑀬𑀸𑀧𑁂𑀢𑁆𑀯𑀸 𑀅𑀬𑀢𑀻𑀢𑀺 𑀲𑀫𑀯𑀸𑀬𑁄. 𑀧𑀽𑀕𑁄 𑀢𑀫𑁆𑀩𑀽𑀮𑁂𑀧𑀺. 𑀚𑀦𑁂𑀢𑀺 𑀅𑀯𑀬𑀯𑁂𑀢𑀺 𑀚𑀸𑀢𑀁, 𑀢𑁄. 𑀓𑀁 𑀅𑀢𑁆𑀢𑀸𑀦𑀁 𑀤𑁂𑀢𑀻𑀢𑀺 𑀓𑀤𑁄, 𑀘𑀓𑁆𑀔𑀸𑀤𑀺𑀓𑁄 𑀲𑀭𑀻𑀭𑀸𑀯𑀬𑀯𑁄. 𑀓𑀤𑁄 𑀯𑀺𑀬 𑀓𑀤𑁄, 𑀅𑀯𑀬𑀯𑁄, 𑀢𑀁 𑀯𑀓𑀢𑀺 𑀆𑀤𑀤𑀸𑀢𑀻𑀢𑀺 𑀓𑀤𑀫𑁆𑀩𑀓𑀁. 𑀯𑀺𑀲𑁂𑀲𑁂𑀦 𑀊𑀳𑀦𑁆𑀢𑁆𑀬𑀲𑁆𑀫𑀺𑀁 𑀅𑀯𑀬𑀯𑀸 𑀩𑁆𑀬𑀽𑀳𑁄. 𑀯𑀺𑀢𑀦𑁄𑀢𑀺 𑀅𑀯𑀬𑀯𑁂𑀢𑀺 𑀯𑀺𑀢𑀸𑀦𑀁, 𑀡𑁄. 𑀕𑀼𑀧 𑀭𑀓𑁆𑀔𑀡𑁂, 𑀩𑁄, 𑀧𑀲𑁆𑀲 𑀫𑁄, 𑀕𑀼𑀫𑁆𑀩𑁄, 𑀕𑀼𑀫𑁆𑀩𑀫𑁆𑀧𑀺. 𑀓𑀮𑀁 𑀅𑀯𑀬𑀯𑀪𑀸𑀯𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀓𑀮𑀸𑀧𑁄, ‘‘𑀓𑀮𑀸 𑀲𑁄𑀴𑀲𑀫𑁄 𑀪𑀸𑀕𑁄’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀓𑀮𑀸𑀲𑀤𑁆𑀤𑁄 𑀪𑀸𑀕𑀢𑁆𑀣𑁄𑀧𑁆𑀬𑀢𑁆𑀣𑀻𑀢𑀺 𑀜𑀸𑀬𑀢𑀺. 𑀚𑀮 𑀤𑀺𑀢𑁆𑀢𑀺𑀬𑀁. 𑀚𑀮𑀢𑀺 𑀅𑀯𑀬𑀯𑁂𑀦𑀸𑀢𑀺 𑀚𑀸𑀮𑀁. 𑀅𑀯𑀬𑀯𑁂𑀦 𑀫𑀡𑁆𑀟𑀢𑀻𑀢𑀺 𑀫𑀡𑁆𑀟𑀮𑀁, 𑀫𑀡𑁆𑀟 𑀯𑀺𑀪𑀽𑀲𑀸𑀬𑀁, 𑀅𑀮𑁄.

𑁬𑁩𑁨. 𑀲𑀸𑀤𑁆𑀥𑀧𑀚𑁆𑀚𑁂𑀦 𑀕𑀡𑀪𑁂𑀤𑀸 𑀯𑀼𑀘𑁆𑀘𑀦𑁆𑀢𑁂. 𑀢𑀢𑁆𑀭 𑀚𑀸𑀢𑁆𑀬𑀸𑀤𑀻𑀳𑀺 𑀲𑀫𑀸𑀦𑀸𑀦𑀁 𑀧𑀸𑀡𑀻𑀦𑀁, 𑀅𑀧𑀸𑀡𑀻𑀦𑀜𑁆𑀘 𑀕𑀡𑁄 𑀯𑀕𑁆𑀕𑁄 𑀦𑀸𑀫, 𑀬𑀣𑀸 ‘‘𑀩𑀦𑁆𑀥𑀼𑀯𑀕𑁆𑀕𑁄, 𑀓𑀯𑀕𑁆𑀕𑁄’’𑀘𑁆𑀘𑀸𑀤𑀬𑁄, 𑀯𑀚𑁆𑀚 𑀯𑀚𑁆𑀚𑀦𑁂, 𑀯𑀚𑁆𑀚𑁂𑀢𑀺 𑀅𑀲𑀫𑀸𑀦𑀚𑀸𑀢𑁆𑀬𑀸𑀤𑀬𑁄𑀢𑀺 𑀯𑀕𑁆𑀕𑁄, 𑀡𑁄, 𑀚𑁆𑀚𑀲𑁆𑀲 𑀕𑁆𑀕𑁄. 𑀚𑀦𑁆𑀢𑀽𑀦𑀁 𑀲𑀫𑀸𑀦𑀚𑀸𑀢𑀺𑀬𑀸𑀦𑀁, 𑀯𑀺𑀚𑀸𑀢𑀺𑀬𑀸𑀦𑀜𑁆𑀘 𑀕𑀡𑁄 ‘‘𑀲𑀗𑁆𑀖𑁄, 𑀲𑀢𑁆𑀣𑁄’’𑀢𑀺 𑀘𑁄𑀘𑁆𑀘𑀢𑁂, 𑀬𑀣𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄, 𑀯𑀸𑀡𑀺𑀚𑀲𑀢𑁆𑀣𑁄’’𑀘𑁆𑀘𑀸𑀤𑀬𑁄. 𑀲𑀁𑀳𑀜𑁆𑀜𑀦𑁆𑀢𑁂 𑀦𑀺𑀩𑁆𑀩𑀺𑀲𑁂𑀲𑁂𑀦 𑀜𑀸𑀬𑀦𑁆𑀢𑁂 𑀅𑀯𑀬𑀯𑀸 𑀢𑀲𑁆𑀫𑀺𑀦𑁆𑀢𑀺 𑀲𑀗𑁆𑀖𑁄, 𑀭𑁄. 𑀲𑀭𑀦𑁆𑀢𑀺 𑀯𑀢𑁆𑀢𑀦𑁆𑀢𑀺 𑀅𑀯𑀬𑀯𑀸 𑀬𑀲𑁆𑀫𑀺𑀦𑁆𑀢𑀺 𑀲𑀢𑁆𑀣𑁄, 𑀣𑁄, 𑀭𑀲𑁆𑀲 𑀢𑁄.

𑀲𑀚𑀸𑀢𑀺𑀓𑀸𑀦𑀁 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀚𑀦𑁆𑀢𑀽𑀦𑀫𑁂𑀯 𑀕𑀡𑁄 𑀓𑀼𑀮𑀁 𑀦𑀸𑀫, 𑀬𑀣𑀸 ‘‘𑀔𑀢𑁆𑀢𑀺𑀬𑀓𑀼𑀮𑀁, 𑀕𑁄𑀓𑀼𑀮’’𑀫𑀺𑀘𑁆𑀘𑀸𑀤𑀬𑁄. 𑀓𑀼𑀮 𑀲𑀗𑁆𑀔𑁆𑀬𑀸𑀦𑁂, 𑀩𑀦𑁆𑀥𑀼𑀫𑁆𑀳𑀺 𑀘, 𑀅, 𑀓𑀼𑀮𑀁. 𑀲𑀥𑀫𑁆𑀫𑀻𑀦𑀁 𑀲𑀫𑀸𑀦𑀥𑀫𑁆𑀫𑀸𑀦𑀫𑁂𑀯 𑀚𑀦𑁆𑀢𑀽𑀦𑀁 𑀕𑀡𑁄 𑀦𑀺𑀓𑀸𑀬𑁄 𑀦𑀸𑀫, 𑀬𑀣𑀸 ‘‘𑀪𑀺𑀓𑁆𑀔𑀼𑀦𑀺𑀓𑀸𑀬𑁄’’𑀢𑀺. 𑀘𑀺 𑀘𑀬𑁂, 𑀡𑁄, 𑀦𑀺𑀩𑁆𑀩𑀺𑀲𑁂𑀲𑁂𑀦 𑀘𑀺𑀦𑁄𑀢𑀺 𑀅𑀯𑀬𑀯𑁂𑀢𑀺 𑀦𑀺𑀓𑀸𑀬𑁄.

𑀲𑀚𑀸𑀢𑀺𑀬𑀢𑀺𑀭𑀘𑁆𑀙𑀸𑀦𑀸𑀦𑀁𑀬𑁂𑀯 𑀕𑀡𑁄 ‘‘𑀬𑀽𑀣𑁄’’𑀢𑁆𑀬𑀼𑀘𑁆𑀘𑀢𑁂, 𑀲𑁄 𑀘𑀸𑀦𑀺𑀢𑁆𑀣𑀻, 𑀬𑀣𑀸 ‘‘𑀳𑀢𑁆𑀣𑀺𑀬𑀽𑀣𑁄, 𑀫𑀺𑀕𑀬𑀽𑀣’’𑀫𑀺𑀘𑁆𑀘𑀸𑀤𑀬𑁄, 𑀬𑀼 𑀫𑀺𑀲𑁆𑀲𑀦𑁂, 𑀣𑁄, 𑀤𑀻𑀖𑀸𑀤𑀺, 𑀬𑀽𑀣𑁄, ‘‘𑀕𑀡𑁄 𑀧𑀲𑀽𑀦𑀁 𑀲𑀫𑀚𑁄, 𑀲𑀫𑀸𑀚𑁄𑀜𑁆𑀜𑁂𑀲’𑀫𑀼𑀘𑁆𑀘𑀢𑁂’’𑀢𑀺 [𑀅𑀫𑀭 𑁧𑁫.𑁪𑁨 𑀕𑀸𑀣𑀸𑀬𑀁 𑀧𑀲𑁆𑀲𑀺𑀢𑀩𑁆𑀩𑀁] 𑀇𑀥𑀸𑀦𑀸𑀕𑀢𑀯𑀘𑀦𑀫𑁆𑀧𑀺 𑀜𑀸𑀢𑀩𑁆𑀩𑀁.

𑁬𑁩𑁩. 𑀘𑀢𑀼𑀓𑁆𑀓𑀁 𑀕𑀭𑀼𑀴𑁂. 𑀓𑀦𑀓𑀭𑀼𑀘𑀺𑀭𑀢𑁆𑀢𑀸 𑀲𑁄𑀪𑀦𑁄 𑀧𑀡𑁆𑀡𑁄 𑀧𑀓𑁆𑀔𑁄 𑀬𑀲𑁆𑀲 𑀲𑀼𑀧𑀡𑁆𑀡𑁄. 𑀯𑀺𑀦𑀪𑀸𑀬 𑀦𑀸𑀫 𑀫𑀸𑀢𑀼𑀬𑀸 𑀅𑀧𑀘𑁆𑀘𑀁 𑀯𑁂𑀦𑀢𑁂𑀬𑁆𑀬𑁄, 𑀡𑁂𑀬𑁆𑀬𑁄. 𑀕𑀭𑀁 𑀯𑀺𑀲𑀥𑀭𑀁 𑀳𑀦𑁆𑀢𑀻𑀢𑀺 𑀕𑀭𑀼𑀴𑁄, 𑀡𑁄, 𑀭𑀦𑁆𑀢𑀲𑁆𑀲𑀼, 𑀳𑀲𑁆𑀲 𑀘 𑀴𑀢𑁆𑀢𑀁, 𑀯𑀡𑁆𑀡𑀯𑀺𑀓𑀸𑀭𑁄, 𑀕𑀭𑀼𑀟𑁄. 𑀧𑀓𑁆𑀔𑀺𑀲𑀻𑀳𑁄, 𑀉𑀴𑀽𑀢𑀻𑀲𑁄, 𑀯𑀚𑀺𑀭𑀢𑀼𑀡𑁆𑀟𑁄, 𑀲𑀼𑀥𑀸𑀳𑀭𑁄, 𑀲𑀼𑀯𑀡𑁆𑀡𑀧𑀓𑁆𑀔𑁄, 𑀪𑀼𑀚𑀕𑀸𑀲𑀦𑁄𑀧𑀺 [𑀢𑀺𑀓𑀡𑁆𑀟𑀲𑁂𑀲 𑁧.𑁧.𑁪𑁨].

𑀧𑀺𑀓𑀦𑁆𑀢𑀁 𑀓𑁄𑀓𑀺𑀮𑁂. 𑀧𑀭𑁂𑀦 𑀯𑀺𑀚𑀸𑀢𑀺𑀬𑁂𑀦 𑀓𑀸𑀓𑁂𑀦 𑀧𑁄𑀲𑀺𑀢𑁄𑀢𑀺 𑀧𑀭𑀧𑀼𑀝𑁆𑀞𑁄, 𑀧𑀼𑀲 𑀧𑁄𑀲𑀦𑁂, 𑀢𑁄. 𑀧𑀭𑁂𑀦 𑀪𑀢𑁄 𑀧𑀼𑀝𑁆𑀞𑁄 𑀧𑀭𑀪𑀢𑁄, 𑀪𑀭 𑀥𑀸𑀭𑀡𑀧𑁄𑀲𑀦𑁂𑀲𑀼, 𑀢𑁄. 𑀓𑀼𑀡 𑀲𑀤𑁆𑀤𑁄𑀧𑀓𑀭𑀡𑁂𑀲𑀼, 𑀅𑀮𑁄. 𑀓𑀼𑀓, 𑀯𑀓 𑀆𑀤𑀸𑀦𑁂, 𑀇𑀮𑁄, 𑀓𑁄𑀓𑀺𑀮𑁄. 𑀅𑀧𑀺𑀳𑀺𑀢𑁄 𑀓𑀸𑀬𑀢𑀻𑀢𑀺 𑀧𑀺𑀓𑁄, 𑀅𑀧𑀺 𑀅𑀦𑁆𑀢𑀭𑀥𑀸𑀦𑁂, 𑀯𑀡𑁆𑀡𑀦𑀸𑀲𑁄, 𑀅𑀧𑀺𑀲𑁆𑀲𑀸𑀓𑀸𑀭𑀮𑁄𑀧𑁄.

𑁬𑁩𑁪. 𑀅𑀝𑁆𑀞𑀓𑀁 𑀫𑁄𑀭𑁂. 𑀫𑀼𑀭 𑀲𑀁𑀯𑀭𑀡𑁂, 𑀡𑁄. 𑀫𑀬 𑀕𑀢𑀺𑀬𑀁, 𑀊𑀭𑁄, 𑀫𑀳𑀺𑀬𑀁 𑀭𑀯𑀢𑀻𑀢𑀺 𑀯𑀸 𑀫𑀬𑀽𑀭𑁄, 𑀥𑀸𑀢𑀼𑀲𑁆𑀲 𑀅𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄𑀢𑀺 𑀦𑁂𑀭𑀼𑀢𑁆𑀢𑁄. 𑀯𑀭𑀳𑀁 𑀲𑀺𑀔𑀡𑁆𑀟𑁄, 𑀢𑀁𑀬𑁄𑀕𑀸 𑀯𑀭𑀳𑀻. 𑀦𑀻𑀮𑀸 𑀕𑀻𑀯𑀸 𑀓𑀡𑁆𑀞𑁄 𑀬𑀲𑁆𑀲, 𑀪𑀼𑀚𑀗𑁆𑀕𑀪𑀼𑀚𑁄𑀧𑀺.

𑀤𑁆𑀯𑀬𑀁 𑀫𑀬𑀽𑀭𑀫𑀢𑁆𑀣𑀓𑀲𑀺𑀔𑀸𑀬𑀁. 𑀲𑀺𑀔𑀸 𑀅𑀕𑁆𑀕𑀺𑀚𑀸𑀮𑀸𑀬𑀜𑁆𑀘, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸.

𑁬𑁩𑁫-𑁬𑁩𑁬. 𑀘𑀢𑀼𑀓𑁆𑀓𑀁 𑀫𑀬𑀽𑀭𑀓𑀮𑀸𑀧𑁂. 𑀲𑀺𑀔𑀡𑁆𑀟𑀺𑀦𑁄 𑀅𑀬𑀁 𑀲𑀺𑀔𑀡𑁆𑀟𑁄, 𑀯𑀭𑀳 𑀧𑀸𑀥𑀸𑀦𑁆𑀬𑁂, 𑀧𑀭𑀺𑀪𑀸𑀲𑀦𑀳𑀺𑀁𑀲𑀸𑀤𑀸𑀦𑁂𑀲𑀼 𑀘, 𑀓𑀭𑀡𑁂 𑀅. 𑀓𑁄 𑀫𑀬𑀽𑀭𑁄 𑀮𑀲𑀢𑀺 𑀬𑁂𑀦 𑀓𑀮𑀸𑀧𑁄, 𑀡𑁄, 𑀲𑀲𑁆𑀲 𑀧𑁄. 𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀙𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀭𑀲𑁆𑀲𑁄 𑀘. 𑀤𑁆𑀯𑀬𑀁 𑀫𑁄𑀭𑀲𑁆𑀲 𑀧𑀺𑀜𑁆𑀙𑀝𑁆𑀞𑁂 𑀅𑀓𑁆𑀔𑀺𑀲𑀡𑁆𑀞𑀸𑀦𑁂. 𑀘𑀤𑀺 𑀳𑀺𑀮𑀸𑀤𑀦𑁂, 𑀤𑀺𑀢𑁆𑀢𑀺𑀬𑀜𑁆𑀘, 𑀡𑁆𑀯𑀼. 𑀫𑁂𑀘𑀓𑁄 𑀓𑀡𑁆𑀳𑀯𑀡𑁆𑀡𑁂𑀧𑀺 𑀯𑀼𑀢𑁆𑀢𑁄.

𑀅𑀴𑁆𑀬𑀦𑁆𑀢𑀁 𑀪𑀫𑀭𑁂, 𑀙 𑀧𑀤𑀸𑀦𑀺 𑀅𑀲𑁆𑀲. 𑀫𑀥𑀼𑀁 𑀯𑀢𑀬𑀢𑀺 𑀪𑀼𑀜𑁆𑀚𑀢𑁂 𑀫𑀥𑀼𑀩𑁆𑀩𑀢𑁄, 𑀯𑀢 𑀪𑁄𑀚𑀦𑁂. 𑀪𑀫 𑀅𑀦𑀯𑀝𑁆𑀞𑀸𑀦𑁂, 𑀧𑀼𑀧𑁆𑀨𑀫𑀢𑁆𑀣𑀓𑁂 𑀪𑀫𑀢𑀻𑀢𑀺 𑀪𑀫𑀭𑁄, 𑀅𑀭𑁄. 𑀅𑀭 𑀕𑀫𑀦𑁂, 𑀇, 𑀴𑀢𑁆𑀢𑀁.

𑀘𑀢𑀼𑀓𑁆𑀓𑀁 𑀕𑁂𑀳𑀯𑀦𑀓𑀧𑁄𑀢𑁂𑀲𑀼. 𑀧𑀸𑀭𑁂𑀦 𑀲𑀩𑀮𑁂𑀦 𑀆𑀧𑀢𑀢𑀻𑀢𑀺 𑀧𑀸𑀭𑀸𑀧𑀢𑁄, 𑀧𑀸𑀭𑀯𑀢𑁄𑀧𑀺. 𑀓𑀧 𑀅𑀘𑁆𑀙𑀸𑀤𑀦𑁂, 𑀓𑀫𑁆𑀧 𑀘𑀮𑀦𑁂 𑀯𑀸. 𑀑𑀢𑁄, 𑀧𑀭𑀧𑀓𑁆𑀔𑁂 𑀫𑀮𑁄𑀧𑁄. 𑀓𑀼𑀓 𑀆𑀤𑀸𑀦𑁂, 𑀅𑀝𑁄, 𑀉𑀲𑁆𑀲𑀢𑁆𑀢𑀫𑀲𑁆𑀲𑀼𑀢𑁆𑀢𑀜𑁆𑀘. 𑀧𑀓𑀸𑀭𑁂𑀦 𑀭𑀯𑀢𑀻𑀢𑀺 𑀧𑀸𑀭𑁂𑀯𑀝𑁄, 𑀭𑀼 𑀲𑀤𑁆𑀤𑁂, 𑀅𑀝𑁄, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑁄, 𑀅𑀲𑁆𑀲𑁂, 𑀧𑀸𑀭𑁂𑀯𑀝𑁄, 𑀧𑀭𑁂𑀯𑀝𑁄𑀧𑀺.

‘‘𑀧𑀸𑀭𑀸𑀯𑀢𑁄 𑀘 𑀙𑁂𑀚𑁆𑀚𑁄 𑀘,

𑀓𑀧𑁄𑀢𑁄 𑀭𑀢𑁆𑀢𑀮𑁄𑀘𑀦𑁄;

𑀧𑀸𑀭𑀸𑀧𑀢𑁄 𑀓𑀮𑀭𑀯𑁄,

𑀧𑀢𑁆𑀢𑀻 𑀲𑁂𑀦𑁄 𑀲𑀲𑀸𑀤𑀦𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁫.𑁧𑁪]. 𑁋

𑀭𑀪𑀲𑁄.

𑁬𑁩𑁭. 𑀤𑁆𑀯𑀬𑀁 𑀕𑀺𑀚𑁆𑀛𑁂. 𑀕𑀺𑀥 𑀅𑀪𑀺𑀓𑀗𑁆𑀔𑀸𑀬𑀁, 𑀬𑁄, 𑀛𑀲𑁆𑀲 𑀛𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀛𑀧𑀘𑁆𑀘𑀬𑁂𑀦 𑀯𑀸 𑀲𑀺𑀤𑁆𑀥𑀁, 𑀢𑀣𑀸 𑀥𑀲𑁆𑀲 𑀚𑁄. 𑀕𑀺𑀥𑀢𑀺𑀲𑁆𑀫𑀸 𑀅, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀇𑀲𑁆𑀲𑀢𑁆𑀢𑀁, 𑀕𑀦𑁆𑀥𑁄. 𑀢𑀺𑀓𑀁 𑀲𑁂𑀦𑀲𑀸𑀫𑀜𑁆𑀜𑁂. 𑀓𑀼𑀓𑁆𑀓𑀼𑀝𑀸𑀤𑀻𑀦𑀁 𑀓𑀼𑀮𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀮𑀮𑁄, 𑀓𑀼𑀮 𑀲𑀦𑁆𑀢𑀸𑀦𑁂 𑀯𑀸, 𑀅𑀮𑁄. 𑀲𑁂 𑀕𑀫𑀦𑁂, 𑀦𑁄. 𑀲𑀢𑁆𑀢𑀸𑀦𑀁 𑀳𑀺𑀁𑀲𑀦𑀢𑁄 𑀩𑁆𑀬𑀕𑁆𑀖𑁄 𑀯𑀺𑀬 𑀩𑁆𑀬𑀕𑁆𑀖𑀺, 𑀲𑀢𑁆𑀢𑁂 𑀦𑀸𑀲𑁂𑀢𑀻𑀢𑀺 𑀦𑀸𑀲𑁄. 𑀩𑁆𑀬𑀕𑁆𑀖𑀺 𑀏𑀯 𑀦𑀸𑀲𑁄𑀢𑀺 𑀲𑀫𑀼𑀤𑀺𑀢𑀦𑀸𑀫𑀁.

𑀲𑀓𑀼𑀡𑀕𑁆𑀖𑀸𑀤𑀬𑁄 𑀢𑀬𑁄 𑀢𑀩𑁆𑀪𑁂𑀤𑀸 𑀢𑀲𑁆𑀲 𑀲𑁂𑀦𑀲𑁆𑀲 𑀯𑀺𑀲𑁂𑀲𑀸. 𑀲𑀓𑀼𑀡𑀁 𑀳𑀦𑁆𑀢𑀻𑀢𑀺 𑀲𑀓𑀼𑀡𑀕𑁆𑀖𑀺, 𑀲𑀺𑀦?. 𑀅𑀝 𑀕𑀫𑀦𑁂, 𑀡𑁄. 𑀆𑀝𑁄. 𑀤𑀩𑁆𑀩𑀺𑀲𑀤𑀺𑀲𑀁 𑀢𑀼𑀡𑁆𑀟𑀁 𑀬𑀲𑁆𑀲 𑀤𑁆𑀯𑀺𑀚𑀲𑁆𑀲 𑀲𑁄 𑀤𑀩𑁆𑀩𑀺𑀫𑀼𑀔𑀤𑁆𑀯𑀺𑀚𑁄. ‘‘𑀤𑀩𑁆𑀩𑀺𑀫𑀼𑀔𑀤𑁆𑀯𑀺𑀚𑁄 𑀆𑀝𑁄 𑀦𑀸𑀫𑀸’’𑀢𑀺𑀧𑁆𑀬𑁂𑀓𑁄 𑀅𑀢𑁆𑀣𑁄, 𑀢𑀤𑀸 𑀤𑁆𑀯𑁂𑀬𑁂𑀯 𑀲𑁂𑀦𑀪𑁂𑀤𑀸.

𑁬𑁩𑁮. 𑀘𑀢𑀼𑀓𑁆𑀓𑀁 𑀉𑀮𑀽𑀓𑁂. ‘‘𑀉𑀳𑀼’’𑀦𑁆𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀉𑀳𑀼𑀗𑁆𑀓𑀸𑀭𑁄. ‘‘𑀉𑀤𑁆𑀥𑀁 𑀓𑀡𑁆𑀡𑀸 𑀬𑀲𑁆𑀲 𑀉𑀤𑁆𑀥𑀁𑀓𑀡𑁆𑀡𑁄’’𑀢𑀺 𑀲𑀫𑁆𑀧𑀢𑁆𑀢𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀉𑀮𑀽𑀓𑁄 [𑀉𑀮𑀪𑀺𑀦𑁂𑀢𑁆𑀢𑁂𑀣𑀺 𑀤𑀳𑀢𑁆𑀬𑀼𑀮𑀽𑀓𑁄, 𑀉𑀤𑁆𑀥𑁄𑀮𑁄𑀓𑀦𑀸 𑀇𑀢𑀺 𑀦𑀺𑀭𑀼𑀢𑁆𑀢𑀫 (𑀅𑀫𑀭𑀓𑁄𑀲𑀼𑀕𑁆𑀖𑀸𑀝𑀦𑀝𑀻𑀓𑀸 𑁧𑁫.𑁧𑁫)], 𑀉𑀘𑀢𑀺 𑀲𑀫𑀯𑁂𑀢𑀺 𑀓𑁄𑀝𑀭𑀦𑁆𑀢𑀺 𑀯𑀸 𑀦𑀺𑀧𑀸𑀢𑀦𑀸. 𑀓𑀼𑀲 𑀅𑀓𑁆𑀓𑁄𑀲𑁂, 𑀬𑀲𑁆𑀲 𑀅𑀫𑀦𑀸𑀧𑀢𑀸𑀬 𑀲𑀤𑁆𑀤𑁂𑀦 𑀮𑁄𑀓𑀸 𑀓𑁄𑀲𑀦𑁆𑀢𑀺, 𑀲𑁄 𑀓𑁄𑀲𑀺𑀬𑁄, 𑀓𑁄𑀲𑀺𑀢𑀩𑁆𑀩𑁄𑀢𑀺 𑀓𑀢𑁆𑀯𑀸, 𑀓𑁄𑀝𑀭𑁂 𑀯𑀲𑀢𑀻𑀢𑀺 𑀯𑀸 𑀓𑁄𑀲𑀺𑀬𑁄, 𑀦𑁂𑀭𑀼𑀢𑁆𑀢𑁄, 𑀯𑀸𑀬𑀲𑀸𑀦𑀁 𑀓𑀸𑀓𑀸𑀦𑀁 𑀅𑀭𑀺 𑀲𑀢𑁆𑀢𑀼, 𑀲𑀓𑁆𑀓𑀳𑁆𑀯𑀬𑁄, 𑀤𑀺𑀯𑀸𑀦𑁆𑀥𑁄 𑀯𑀓𑁆𑀓𑀦𑀸𑀲𑀺𑀓𑁄, 𑀳𑀭𑀺𑀦𑁂𑀢𑁆𑀢𑁄, 𑀤𑀺𑀯𑀸𑀪𑀻𑀢𑁄, 𑀓𑀸𑀓𑀪𑀻𑀭𑀽, 𑀭𑀢𑁆𑀢𑀺𑀘𑀸𑀭𑀻𑀧𑀺.

𑀯𑀸𑀬𑀲𑀦𑁆𑀢𑀁 𑀓𑀸𑀓𑁂. ‘‘𑀓𑀸’’𑀇𑀢𑀺 𑀲𑀤𑁆𑀤𑀁 𑀓𑀸𑀬𑀢𑀻𑀢𑀺 𑀓𑀸𑀓𑁄. 𑀭𑀺𑀝𑁆𑀞𑀁 𑀫𑀭𑀡𑀮𑀓𑁆𑀔𑀡𑀁, 𑀢𑀤𑀲𑁆𑀲 𑀦𑀢𑁆𑀣𑀺 𑀅𑀭𑀺𑀝𑁆𑀞𑁄. 𑀥𑀗𑁆𑀓 𑀖𑁄𑀭𑀯𑀸𑀲𑀺𑀢𑁂, 𑀅. 𑀩𑀮𑀺𑀦𑀸 𑀧𑀼𑀝𑁆𑀞𑁄 𑀪𑀢𑁄. 𑀯𑀬 𑀕𑀫𑀦𑁂, 𑀯𑀬𑁄 𑀏𑀯 𑀯𑀸𑀬𑀲𑁄, 𑀲𑀓𑀢𑁆𑀣𑁂 𑀲𑁄, 𑀲𑀓𑀺𑀁𑀧𑀚𑁄, 𑀅𑀢𑁆𑀢𑀖𑁄𑀲𑁄, 𑀧𑀭𑀪𑀭𑁄, 𑀩𑀮𑀺𑀪𑀼𑀚𑁄, 𑀕𑀼𑀴𑁆𑀳𑀫𑁂𑀣𑀼𑀦𑁄𑀧𑀺. 𑀲𑀓𑀺𑀁 𑀏𑀓𑀯𑀸𑀭𑀁𑀧𑀚𑀸 𑀧𑀲𑀽𑀢𑀺 𑀬𑀲𑁆𑀲. ‘‘𑀓𑀸𑀓’’𑀇𑀘𑁆𑀘𑀢𑁆𑀢𑀸𑀦𑀁 𑀖𑁄𑀲𑀬𑀢𑀺. 𑀯𑀺𑀚𑀸𑀢𑀺𑀬𑀁 𑀓𑁄𑀓𑀺𑀮𑀁 𑀪𑀭𑀢𑀺.

𑁬𑁩𑁯. 𑀓𑀸𑀓𑁄 𑀯𑀺𑀬 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀓𑀸𑀓𑁄𑀴𑁄, 𑀴𑀢𑁆𑀢𑀁. 𑀤𑁄𑀡𑀓𑀸𑀓𑁄, 𑀤𑀤𑁆𑀥𑀓𑀸𑀓𑁄𑀧𑀺. 𑀤𑁆𑀯𑀬𑀁 ‘‘𑀩𑀻-𑀮𑁆ौ𑀁’’𑀇𑀢𑀺 𑀔𑁆𑀬𑀸𑀢𑁂 𑀲𑀓𑀼𑀡𑁂. 𑀮𑀽 𑀙𑁂𑀤𑀦𑁂, 𑀡𑁄, 𑀯𑀲𑁆𑀲 𑀧𑁄, 𑀮𑀸𑀧𑁄, 𑀮𑀸𑀯𑁄𑀧𑀺. 𑀮𑁂𑀟𑁆𑀟𑀼 𑀯𑀺𑀬 𑀅𑀓𑀢𑀻𑀢𑀺 𑀮𑀝𑀼𑀓𑀺𑀓𑀸 [𑀮𑁂𑀟𑁆𑀟𑀼𑀓𑀺𑀓𑀸 (𑀓.)], 𑀡𑁆𑀯𑀼.

𑀢𑀺𑀓𑀁 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁂. 𑀯𑀸𑀭𑀡𑀲𑀤𑀺𑀲𑀢𑁆𑀢𑀸 𑀯𑀸𑀭𑀡𑁄. 𑀳𑀢𑁆𑀣𑀺𑀦𑁄 𑀮𑀺𑀗𑁆𑀕𑀁 𑀜𑀸𑀧𑀓𑀁 𑀲𑁄𑀡𑁆𑀟𑀁 𑀬𑀲𑁆𑀫𑀺𑀁 𑀯𑀺𑀚𑁆𑀚𑀢𑀻𑀢𑀺 𑀳𑀢𑁆𑀣𑀺𑀮𑀺𑀗𑁆𑀕𑁄. 𑀳𑀢𑁆𑀣𑀺𑀲𑁄𑀡𑁆𑀟𑀁 𑀬𑀲𑁆𑀫𑀺𑀁 𑀯𑀺𑀚𑁆𑀚𑀢𑀺, 𑀲𑁄 𑀳𑀢𑁆𑀣𑀺𑀲𑁄𑀡𑁆𑀟𑁄 𑀘 𑀯𑀺𑀳𑀗𑁆𑀕𑀫𑁄 𑀘𑁂𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀯𑀺𑀳𑀗𑁆𑀕𑀫𑁄.

𑁬𑁪𑁦. 𑀤𑁆𑀯𑀬𑀁 𑀉𑀓𑁆𑀓𑀼𑀲𑁂. 𑀉𑀘𑁆𑀘𑀁 𑀓𑁄𑀲𑀢𑀻𑀢𑀺 𑀉𑀓𑁆𑀓𑀼𑀲𑁄, 𑀓𑀼𑀲 𑀲𑀤𑁆𑀤𑁂, 𑀅. 𑀓𑀼𑀭 𑀲𑀤𑁆𑀤𑁂, 𑀅𑀭𑁄, 𑀣𑀺𑀬𑀁 𑀓𑀼𑀭𑀭𑀻. 𑀓𑁄𑀮𑀝𑁆𑀞𑀺𑀧𑀓𑁆𑀔𑀺𑀫𑁆𑀳𑀺 ‘‘𑀉𑀪𑀼𑀢’’𑀇𑀢𑀺 𑀔𑁆𑀬𑀸𑀢𑁂 𑀧𑀓𑁆𑀔𑀺𑀫𑁆𑀳𑀺 𑀓𑀼𑀓𑁆𑀓𑀼𑀳𑁄. 𑀓𑁄𑀮𑀝𑁆𑀞𑀺𑀅𑀚𑁆𑀛𑁄𑀳𑀸𑀭𑀓𑁄 𑀧𑀓𑁆𑀔𑀻 𑀓𑁄𑀮𑀝𑁆𑀞𑀺𑀧𑀓𑁆𑀔𑀻. ‘‘𑀓𑀼𑀓𑁆𑀓𑀼’’𑀇𑀢𑀺 𑀲𑀤𑁆𑀤𑀸𑀬𑀢𑀻𑀢𑀺 𑀓𑀼𑀓𑁆𑀓𑀼𑀳𑁄, 𑀳𑁄, 𑀓𑀼𑀓 𑀅𑀯𑁆𑀳𑀸𑀦𑁂 𑀯𑀸, 𑀉𑀳𑁄.

𑀢𑀺𑀓𑀁 𑀲𑀼𑀯𑁂. 𑀲𑀼 𑀲𑀯𑀦𑁂. 𑀫𑀦𑀼𑀲𑁆𑀲𑀲𑀤𑁆𑀤𑀫𑁆𑀧𑀺 𑀲𑀼𑀡𑀸𑀢𑀻𑀢𑀺 𑀲𑀼𑀯𑁄, 𑀅, 𑀉𑀯𑀸𑀤𑁂𑀲𑁄. ‘‘𑀓𑀻’’𑀇𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀓𑀻𑀭𑁄. 𑀓𑀭𑁄𑀢𑀺 𑀫𑀦𑀼𑀲𑁆𑀲𑀲𑀤𑁆𑀤𑀦𑁆𑀢𑀺 𑀯𑀸 𑀓𑀻𑀭𑁄. 𑀅, 𑀅𑀲𑁆𑀲𑀻. 𑀲𑀼𑀓 𑀕𑀢𑀺𑀬𑀁, 𑀲𑀼𑀦𑁆𑀤𑀭𑀁, 𑀲𑀼𑀝𑁆𑀞𑀼 𑀯𑀸 𑀫𑀦𑀼𑀲𑁆𑀲𑀲𑀤𑁆𑀤𑀁 𑀓𑀸𑀬𑀢𑀻𑀢𑀺 𑀲𑀼𑀓𑁄. 𑀤𑁆𑀯𑀬𑀁 𑀓𑀼𑀓𑁆𑀓𑀼𑀝𑀫𑀢𑁆𑀢𑁂. 𑀢𑀫𑁆𑀩𑀸 𑀘𑀽𑀴𑀸 𑀬𑀲𑁆𑀲. 𑀓𑀼𑀓𑁆𑀓𑀼𑀝𑀢𑀻𑀢𑀺 𑀓𑀼𑀓𑁆𑀓𑀼𑀝𑁄, 𑀓𑀼𑀓, 𑀯𑀓 𑀆𑀤𑀸𑀦𑁂 𑀯𑀸, 𑀅𑀝𑁄.

𑁬𑁪𑁧. 𑀤𑁆𑀯𑀬𑀁 𑀦𑀺𑀚𑁆𑀚𑀺𑀯𑁆𑀳𑁂. 𑀦𑀢𑁆𑀣𑀺 𑀚𑀺𑀯𑁆𑀳𑀸 𑀬𑀲𑁆𑀲 𑀦𑀺𑀚𑁆𑀚𑀺𑀯𑁆𑀳𑁄. 𑀤𑁆𑀯𑀬𑀁 𑀓𑁄𑀜𑁆𑀘𑀸𑀲𑀓𑀼𑀡𑁂. 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀫𑀺𑀣𑀼𑀦𑀸𑀦𑀁 𑀦𑀸𑀫𑀸𑀦𑀺. 𑀓𑁄𑀜𑁆𑀘 𑀓𑁄𑀝𑀺𑀮𑁆𑀬𑀧𑁆𑀧𑀻𑀪𑀸𑀯𑁂𑀲𑀼, 𑀅, 𑀓𑁄𑀜𑁆𑀘𑀸. 𑀓𑀦𑁆𑀢 𑀙𑁂𑀤𑀦𑁂, 𑀬𑀼, 𑀦𑀤𑀸𑀤𑀺, 𑀅𑀲𑁆𑀲𑀼. 𑀓𑀼𑀡𑁆𑀟𑀦𑀻𑀧𑀺, 𑀓𑀼𑀡𑁆𑀟 𑀤𑀸𑀳𑁂.

𑀤𑁆𑀯𑀬𑀁 𑀘𑀓𑁆𑀓𑀯𑀸𑀓𑁂. 𑀘𑀓𑁆𑀓𑁂𑀦 𑀘𑀓𑁆𑀓𑀲𑀤𑁆𑀤𑁂𑀦 𑀉𑀘𑁆𑀘𑀢𑁂 𑀘𑀓𑁆𑀓𑀯𑀸𑀓𑁄, 𑀡𑁄. 𑀯𑀘 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀘𑀓𑁆𑀓𑀫𑀺𑀘𑁆𑀘𑀸𑀯𑁆𑀳𑀸 𑀬𑀲𑁆𑀲, 𑀭𑀣𑀗𑁆𑀕𑀸𑀯𑁆𑀳𑀬𑀦𑀸𑀫𑀓𑁄𑀧𑀺, 𑀭𑀣𑀗𑁆𑀕𑀁 𑀘𑀓𑁆𑀓𑀁, 𑀢𑀲𑁆𑀲 𑀅𑀯𑁆𑀳𑀬𑁄 𑀭𑀣𑀗𑁆𑀕𑀸𑀯𑁆𑀳𑀬𑁄, 𑀲𑁄 𑀦𑀸𑀫𑀁 𑀅𑀲𑁆𑀲 𑀭𑀣𑀗𑁆𑀕𑀸𑀯𑁆𑀳𑀬𑀦𑀸𑀫𑀓𑁄, 𑀢𑁂𑀦 𑀭𑀣𑀗𑁆𑀕𑀦𑀸𑀫𑁄 𑀭𑀣𑀘𑀭𑀡𑀲𑀫𑀸𑀦𑁄 𑀅𑀯𑁆𑀳𑀬𑁄 𑀘𑁄𑀘𑁆𑀘𑀢𑁂.

𑀮𑀓𑁆𑀔𑀺𑀢𑀮𑀓𑁆𑀔𑀡𑀸 𑀘𑀸𑀢𑁆𑀭, 𑀮𑀓𑁆𑀔𑀡𑁄𑀧𑀘𑀭𑀺𑀢𑀯𑀼𑀢𑁆𑀢𑀺𑀬𑀸, 𑀕𑁄𑀡𑀫𑀼𑀔𑁆𑀬𑀸𑀬 𑀯𑀸 𑀯𑀼𑀢𑁆𑀢𑀺𑀬𑀸 𑀮𑀓𑁆𑀔𑀺𑀢𑁂𑀦 𑀅𑀢𑁆𑀣𑁂𑀦 𑀬𑀢𑁆𑀭 𑀅𑀢𑁆𑀣𑀦𑁆𑀢𑀭𑀁 𑀮𑀓𑁆𑀔𑁆𑀬𑀢𑁂, 𑀲𑀸 𑀮𑀓𑁆𑀔𑀺𑀢𑀮𑀓𑁆𑀔𑀡𑀸. 𑀬𑀣𑀸 ‘‘𑀭𑀣𑀸𑀯𑀬𑀯𑀸𑀬𑀼𑀥𑁄’’ 𑀇𑀘𑁆𑀘𑀢𑁆𑀭 𑀭𑀣𑀸𑀯𑀬𑀯𑀲𑀤𑁆𑀤𑁂𑀦 𑀘𑀓𑁆𑀓𑀁 𑀮𑀓𑁆𑀔𑁆𑀬𑀢𑁂, 𑀦 𑀢𑀤𑀸𑀓𑀢𑀺 𑀢𑀦𑁆𑀦𑀸𑀫𑁄 𑀘𑀸𑀬𑀼𑀥𑀯𑀺𑀲𑁂𑀲𑁄. ‘‘𑀧𑀦𑁆𑀢𑀺𑀭𑀣𑁄’’𑀇𑀘𑁆𑀘𑀢𑁆𑀭 𑀧𑀦𑁆𑀢𑀺𑀲𑀤𑁆𑀤𑁂𑀦 𑀤𑀲𑀓𑁆𑀔𑀭𑀁 𑀙𑀦𑁆𑀤𑁄 𑀮𑀓𑁆𑀔𑁆𑀬𑀢𑁂, 𑀦 𑀤𑀲𑀲𑀤𑁆𑀤𑁄, 𑀢𑁂𑀳𑀺 𑀢𑀼 𑀆𑀬𑀼𑀥𑀭𑀣𑀲𑀤𑁆𑀤𑀲𑀦𑁆𑀦𑀺𑀯𑁂𑀲𑁄 ‘‘𑀘𑀓𑁆𑀓𑀸𑀯𑀬𑀯𑀸𑀬𑀼𑀥𑁄, 𑀤𑀲𑀭𑀣𑁄’’ 𑀇𑀢𑀺 𑀤𑁂𑀯𑀯𑀺𑀲𑁂𑀲𑁄, 𑀭𑀸𑀚𑀯𑀺𑀲𑁂𑀲𑁄 𑀘 𑀮𑀓𑁆𑀔𑁆𑀬𑀢𑁂, 𑀢𑀣𑀸𑀢𑁆𑀭𑀸𑀧𑀺 ‘‘𑀭𑀣𑀗𑁆𑀕’’𑀦𑁆𑀢𑁆𑀬𑀦𑁂𑀦 𑀭𑀣𑁂𑀓𑀤𑁂𑀲𑁄 𑀮𑀓𑁆𑀔𑀻𑀬𑀢𑁂, ‘‘𑀅𑀯𑁆𑀳𑀸𑀬𑀢𑁂’’𑀇𑀘𑁆𑀘𑀦𑁂𑀦 𑀘 𑀧𑀭𑀺𑀪𑀸𑀲𑀦𑀁, 𑀦 𑀢𑁂𑀦𑀸𑀧𑀺 𑀯𑀸𑀓𑀲𑀤𑁆𑀤𑁄. 𑀢𑁂𑀳𑀺 𑀘 𑀅𑀜𑁆𑀜𑀫𑀜𑁆𑀜𑀲𑀦𑁆𑀦𑀺𑀯𑁂𑀲𑁄 𑀘𑀓𑁆𑀓𑀯𑀸𑀓𑁄𑀢𑀺 𑀧𑀓𑁆𑀔𑀺𑀯𑀺𑀲𑁂𑀲𑁄 𑀮𑀓𑁆𑀔𑀻𑀬𑀢𑁂𑀢𑀺 𑀕𑀼𑀡𑀢𑁄 𑀲𑀼𑀓𑁆𑀓𑀸𑀤𑀻𑀳𑀺 𑀏𑀯𑀁𑀕𑀢𑀸 𑀕𑁄𑀡𑀻 𑀯𑀼𑀢𑁆𑀢𑀺.

𑀤𑁆𑀯𑀬𑀁 𑀘𑀸𑀢𑀓𑁂. 𑀅𑀬𑀁 𑀫𑁂𑀖𑀚𑀮𑀧𑀸𑀬𑀻, 𑀲𑀭 𑀳𑀺𑀁𑀲𑀸𑀬𑀁, 𑀲𑀭𑀡𑀁 𑀲𑀸𑀭𑁄, 𑀢𑀁 𑀕𑀘𑁆𑀙𑀢𑀻𑀢𑀺 𑀲𑀸𑀭𑀗𑁆𑀕𑁄. ‘‘𑀘𑀸𑀢𑀓𑁂 𑀳𑀭𑀺𑀡𑁂 𑀧𑀼𑀫𑁂, 𑀲𑀸𑀭𑀗𑁆𑀕𑁄 𑀲𑀩𑀮𑁂 𑀢𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁨𑁩.𑁨𑁩] 𑀭𑀪𑀲𑁄. 𑀘𑀢 𑀬𑀸𑀘𑀦𑁂, 𑀡𑁆𑀯𑀼, 𑀣𑁄𑀓𑀓𑁄𑀧𑀺, 𑀣𑁄𑀓𑀁 𑀓𑀁 𑀚𑀮𑀁 𑀈𑀳𑀦𑀻𑀬𑀝𑁆𑀞𑁂𑀦 𑀅𑀲𑁆𑀲𑀢𑁆𑀣𑀺 𑀣𑁄𑀓𑀓𑁄.

𑁬𑁪𑁨. 𑀤𑁆𑀯𑀬𑀁 𑀧𑀓𑁆𑀔𑀺𑀩𑀺𑀴𑀸𑀮𑁂. 𑀢𑀼𑀮 𑀉𑀫𑁆𑀫𑀸𑀦𑁂, 𑀇𑀬𑁄. 𑀧𑀓𑁆𑀔𑀬𑀼𑀢𑁆𑀢𑁄 𑀩𑀺𑀴𑀸𑀮𑁄, ‘‘𑀲𑀽’’.

𑀤𑁆𑀯𑀬𑀁 𑀭𑀼𑀓𑁆𑀔𑀓𑀻𑀝𑀔𑀸𑀤𑀓𑁂. 𑀲𑀢𑀁 𑀧𑀢𑁆𑀢𑀸𑀦𑀺 𑀅𑀲𑁆𑀲. 𑀲𑀭𑀢𑀺 𑀓𑀻𑀝𑁂𑀢𑀺 𑀲𑀸𑀭𑀲𑁄, 𑀲𑁄, ‘‘𑀔𑀸𑀯 𑀲𑀸’’.

𑀤𑁆𑀯𑀬𑀁 𑀓𑀸𑀓𑁂𑀳𑀺 𑀲𑀤𑁆𑀥𑀺𑀁 𑀦𑀻𑀴𑀁 𑀓𑀢𑁆𑀯𑀸 𑀯𑀲𑀦𑀓𑁂 𑀲𑀼𑀓𑁆𑀓𑀲𑀓𑀼𑀡𑁂. 𑀯𑀓 𑀆𑀤𑀸𑀦𑁂, 𑀅. 𑀲𑁂𑀢𑀯𑀡𑁆𑀡𑀢𑀸𑀬 𑀲𑀼𑀓𑁆𑀓𑁄 𑀘 𑀲𑁄 𑀓𑀸𑀓𑁂𑀳𑀺 𑀲𑀤𑁆𑀥𑀺𑀁 𑀦𑀺𑀯𑀸𑀲𑀦𑀢𑁄, 𑀓𑀸𑀓𑀲𑀡𑁆𑀞𑀸𑀦𑀢𑁆𑀢𑀸 𑀯𑀸 𑀓𑀸𑀓𑁄 𑀘𑁂𑀢𑀺 𑀲𑀼𑀓𑁆𑀓𑀓𑀸𑀓𑁄.

𑀤𑁆𑀯𑀬𑀁 𑀯𑀺𑀲𑀓𑀡𑁆𑀞𑀺𑀓𑀸𑀬𑀁. 𑀩𑀮 𑀧𑀸𑀡𑀦𑁂, 𑀡𑁆𑀯𑀼, 𑀤𑀻𑀖𑁄, 𑀆𑀓𑁄 𑀯𑀸. 𑀯𑀺𑀲𑀲𑀤𑀺𑀲𑁄 𑀓𑀸𑀴𑀯𑀡𑁆𑀡𑁄 𑀓𑀡𑁆𑀞𑁄 𑀬𑀲𑁆𑀲𑀸 𑀲𑀸 𑀯𑀺𑀲𑀓𑀡𑁆𑀞𑀺𑀓𑀸, 𑀏𑀢𑀺𑀲𑁆𑀲𑀸 𑀧𑀼𑀫𑁄 𑀦𑀸𑀫 𑀦 𑀯𑀺𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀘 𑀅𑀧𑀤𑀸𑀦𑁂 𑁋

‘‘𑀬𑀣𑀸 𑀩𑀮𑀸𑀓𑀬𑁄𑀦𑀺𑀫𑁆𑀳𑀺, 𑀦 𑀯𑀺𑀚𑁆𑀚𑀢𑀺 𑀧𑀼𑀫𑁄 𑀲𑀤𑀸;

𑀫𑁂𑀖𑁂𑀲𑀼 𑀕𑀚𑁆𑀚𑀫𑀸𑀦𑁂𑀲𑀼, 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀢𑀸 𑀢𑀤𑀸’’𑀢𑀺 [𑀅𑀧. 𑀣𑁂𑀭. 𑁧.𑁧.𑁫𑁧𑁧].

𑁬𑁪𑁩. 𑀤𑁆𑀯𑀬𑀁 𑀓𑀗𑁆𑀓𑁂. 𑀮𑁄𑀳𑀲𑀤𑀺𑀲𑁄 𑀧𑀺𑀝𑁆𑀞𑀺 𑀬𑀲𑁆𑀲 𑀮𑁄𑀳𑀧𑀺𑀝𑁆𑀞𑁄. 𑀓𑀗𑁆𑀓 𑀮𑁄𑀮𑁆𑀬𑁂, 𑀅, 𑀓𑀗𑁆𑀓𑁄.

𑀤𑁆𑀯𑀬𑀁 𑀧𑀢𑁆𑀢𑀓𑀡𑁆𑀞𑁂. 𑀔𑀜𑁆𑀚𑁄 𑀯𑀺𑀬 𑀘𑀭𑀢𑀻𑀢𑀺 𑀔𑀜𑁆𑀚𑀭𑀻𑀝𑁄, 𑀈𑀝𑁄. 𑀧𑀲𑁆𑀲𑀦𑁆𑀢𑀸𑀦𑀁 𑀔𑀁 𑀲𑀼𑀔𑀁 𑀚𑀦𑁂𑀢𑀻𑀢𑀺 𑀔𑀜𑁆𑀚𑀦𑁄. 𑀔𑀜𑁆𑀚 𑀕𑀢𑀺𑀯𑁂𑀓𑀮𑁆𑀬𑁂 𑀯𑀸, 𑀬𑀼.

𑀤𑁆𑀯𑀬𑀁 𑀕𑀸𑀫𑀘𑀸𑀝𑀓𑁂, 𑀘𑀸𑀝𑀓𑀫𑀢𑁆𑀢𑁂 𑀯𑀸. 𑀓𑀮𑀳𑀁 𑀭𑀯𑀢𑀻𑀢𑀺 𑀓𑀮𑀯𑀺𑀗𑁆𑀓𑁄, 𑀬𑀤𑀸𑀤𑀺. 𑀓𑀁 𑀲𑀼𑀔𑀁 𑀮𑀼𑀦𑀸𑀢𑀻𑀢𑀺 𑀯𑀸 𑀓𑀮𑀯𑀺𑀗𑁆𑀓𑁄, 𑀇𑀓𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀘𑀝 𑀪𑁂𑀤𑁂, 𑀡𑁆𑀯𑀼, 𑀘𑀸𑀝𑀓𑁄.

𑀤𑁆𑀯𑀬𑀁 𑀯𑁂𑀴𑀼𑀭𑀺𑀬𑀘𑁆𑀙𑀯𑀺𑀮𑁄𑀫𑁂 𑀘𑀺𑀢𑁆𑀭𑀧𑀓𑁆𑀔𑁂 ‘‘𑀲𑀼𑀯𑀡𑁆𑀡𑀘𑀽𑀴𑁂’’𑀢𑀺 𑀔𑁆𑀬𑀸𑀢𑁂. 𑀤𑀺𑀪 𑀲𑀦𑁆𑀣𑀫𑁆𑀪𑁂, 𑀤𑁆𑀯𑀺𑀢𑁆𑀢𑀁, 𑀩𑀺𑀦𑁆𑀤𑀸𑀕𑀫𑁄 𑀘. ‘‘𑀓𑀺’’𑀇𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀓𑀺𑀓𑀻, 𑀡𑀻, 𑀘𑀸𑀲𑁄, 𑀤𑀺𑀯𑀺𑀧𑀺 [𑀘𑀸𑀲𑁄 𑀓𑀺𑀓𑀻𑀤𑀺𑀯𑀺 (𑀅𑀫𑀭 𑁧𑁫.𑁧𑁬)].

𑁬𑁪𑁪. 𑀤𑁆𑀯𑀬𑀁 𑀫𑁂𑀖𑀲𑀸𑀫𑁂 ‘‘𑀝𑀻-𑀝𑁆ौ’’𑀇𑀢𑀺 𑀔𑁆𑀬𑀸𑀢𑁂. 𑀓𑀤𑀫𑁆𑀩𑀬𑁄𑀕𑀸 𑀓𑀸𑀤𑀫𑁆𑀩𑁄. 𑀓𑀸𑀴𑀯𑀡𑁆𑀡𑁄 𑀳𑀁𑀲𑁄 𑀓𑀸𑀴𑀳𑀁𑀲𑁄, 𑀓𑀸𑀮𑀳𑀁𑀲𑁄𑀧𑀺.

𑀤𑁆𑀯𑀬𑀁 ‘‘𑀗𑀳𑁂-𑀟𑁄’’𑀇𑀢𑀺 𑀔𑁆𑀬𑀸𑀢𑁂 𑀲𑀓𑀼𑀡𑁂. 𑀲𑀓𑀼𑀦𑁆𑀢𑁄 𑀯𑀼𑀢𑁆𑀢𑁄, ‘‘𑀲𑀓𑀼𑀦𑁆𑀢𑁄 𑀧𑀓𑁆𑀔𑀺𑀪𑁂𑀤𑀲𑁆𑀫𑀺𑀁, 𑀪𑀸𑀲𑀧𑀓𑁆𑀔𑀻𑀔𑀕𑁂𑀲𑀼 𑀘𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀧𑀓𑁆𑀔𑁂𑀦 𑀬𑀼𑀢𑁆𑀢𑁄 𑀲𑀓𑀼𑀡𑁄 𑀪𑀸𑀲𑀧𑀓𑁆𑀔𑀻, ‘‘𑀪𑀸𑀲𑀦𑁆𑀢𑁄 𑀲𑀼𑀦𑁆𑀤𑀭𑀸𑀓𑀸𑀭𑁂, 𑀪𑀸𑀲𑀦𑁆𑀢𑁄 𑀪𑀸𑀲𑀧𑀓𑁆𑀔𑀺𑀦𑀻’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑀤𑁆𑀯𑀬𑀁 ‘‘𑀦𑁆𑀯𑀸-𑀫𑀻-𑀲𑁆𑀯𑁂’’𑀇𑀢𑀺 𑀔𑁆𑀬𑀸𑀢𑁂 𑀦𑀻𑀮𑀧𑀓𑁆𑀔𑀺𑀦𑀺. 𑀥𑀽𑀫𑁆𑀬𑀁 𑀥𑀽𑀫𑀁 𑀅𑀝𑀢𑀺 𑀲𑀳𑀢𑀻𑀢𑀺 𑀥𑀽𑀫𑁆𑀬𑀸𑀝𑁄, 𑀡𑁄. 𑀓𑀸𑀴𑀯𑀡𑁆𑀡𑀢𑀸𑀬 𑀓𑀼𑀘𑁆𑀙𑀺𑀢𑀁 𑀮𑀺𑀗𑁆𑀕𑀁 𑀬𑀲𑁆𑀲. 𑀪𑀺𑀗𑁆𑀕𑁄𑀧𑀺.

𑀤𑁆𑀯𑀬𑀁 𑀚𑀮𑀓𑀼𑀓𑁆𑀓𑀼𑀝𑁂. 𑀤𑀸 𑀮𑀯𑀦𑁂,𑀢𑀺, 𑀤𑀸𑀢𑀺 𑀊𑀳𑀢𑀺 𑀉𑀲𑁆𑀲𑀳𑀢𑀻𑀢𑀺 𑀤𑀸𑀢𑁆𑀬𑀽𑀳𑁄, 𑀔𑀡𑁆𑀟𑀺𑀢𑀤𑁆𑀥𑀦𑀺𑀇𑀘𑁆𑀘𑀢𑁆𑀣𑁄. 𑀓𑀸𑀮𑁂 𑀲𑀲𑁆𑀲𑀫𑀼𑀢𑀼𑀫𑁆𑀳𑀺 𑀓𑀡𑁆𑀞𑁄 𑀓𑀡𑁆𑀟𑀤𑁆𑀥𑀦𑀺 𑀬𑀲𑁆𑀲 𑀓𑀸𑀴𑀓𑀡𑁆𑀞𑀓𑁄, 𑀲𑀫𑀸𑀲𑀦𑁆𑀢𑁂 𑀓𑁄.

𑁬𑁪𑁫. 𑀔𑀼𑀤𑁆𑀤𑀸𑀤𑀺 𑀫𑀥𑀼𑀘𑁆𑀙𑀺𑀝𑁆𑀞𑀓𑀭𑀸𑀤𑀺𑀓𑁄 𑀓𑀫𑁆𑀫𑀪𑀽𑀢𑁄 ‘‘𑀫𑀓𑁆𑀔𑀺𑀓𑀸𑀪𑁂𑀤𑁄’’𑀢𑁆𑀬𑀼𑀘𑁆𑀘𑀢𑁂, 𑀫𑀓𑁆𑀔𑀺 𑀲𑀗𑁆𑀖𑀸𑀢𑁂, 𑀡𑁆𑀯𑀼, 𑀫𑀓𑁆𑀔𑀺𑀓𑀸, 𑀢𑀸𑀲𑀁 𑀪𑁂𑀤𑁄 𑀫𑀓𑁆𑀔𑀺𑀓𑀸𑀪𑁂𑀤𑁄. 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀬𑀁 ‘‘𑀫𑁆𑀳𑀡’’𑀇𑀢𑀺 𑀔𑁆𑀬𑀸𑀢𑀸𑀬𑀁 𑀤𑁆𑀯𑀬𑀁. 𑀟𑀁𑀲 𑀟𑀁𑀲𑀦𑁂, 𑀟𑀁𑀲𑁄. 𑀤𑀁𑀲𑁄𑀧𑀺, 𑀟𑀁𑀲 𑀔𑀸𑀤𑀦𑁂 𑀯𑀸, 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀢𑀺𑀯𑀡𑁆𑀡𑀦𑀸𑀫𑀁.

𑀫𑀓𑁆𑀔𑀺𑀓𑀸𑀬 𑀅𑀡𑁆𑀟𑀁 𑀆𑀲𑀸𑀝𑀺𑀓𑀸 𑀦𑀸𑀫, 𑀲𑀝 𑀅𑀯𑀬𑀯𑁂, 𑀡𑁆𑀯𑀼. 𑀤𑁆𑀯𑀬𑀁 ‘‘𑀦𑁆𑀳𑀁’’𑀇𑀢𑀺 𑀔𑁆𑀬𑀸𑀢𑁂. 𑀧𑀝𑀁 𑀕𑀘𑁆𑀙𑀢𑀻𑀢𑀺 𑀧𑀝𑀗𑁆𑀕𑁄, 𑀧𑀢𑀗𑁆𑀕𑁄𑀧𑀺, 𑀲𑀭𑀢𑀺 𑀳𑀺𑀁𑀲𑀢𑀻𑀢𑀺 𑀲𑀮𑀪𑁄, 𑀅𑀪𑁄, 𑀮𑀢𑁆𑀢𑀁, 𑀲𑀮 𑀕𑀫𑀦𑁂 𑀯𑀸.

𑁬𑁪𑁬. 𑀤𑁆𑀯𑀬𑀁 ‘‘𑀙𑁂𑀁’’𑀇𑀢𑀺 𑀔𑁆𑀬𑀸𑀢𑁂, 𑀫𑀓 𑀧𑀸𑀡𑁂, 𑀅𑀲𑁄, 𑀫𑀓𑀲𑁄. 𑀤𑁆𑀯𑀬𑀁 𑀦𑀺𑀤𑀸𑀖𑁂 𑀦𑀼𑀳𑀸𑀤𑀻𑀲𑀼 𑀯𑀭𑀡𑀓𑀫𑀓𑁆𑀔𑀺𑀓𑀸𑀬𑀁. ‘‘𑀘𑀻𑀭𑀻’’𑀢𑀺 𑀲𑀤𑁆𑀤𑀸𑀬𑀢𑀻𑀢𑀺 𑀘𑀻𑀭𑀻, 𑀘𑀺𑀭𑀺 𑀳𑀺𑀁𑀲𑀸𑀬𑀁 𑀯𑀸, 𑀦𑀤𑀸𑀤𑀺, 𑀤𑀻𑀖𑀸𑀤𑀺. 𑀛𑀮𑁆𑀮 𑀲𑀤𑁆𑀤𑁂, 𑀡𑁆𑀯𑀼, 𑀛𑀮𑁆𑀮𑀺𑀓𑀸.

𑀤𑁆𑀯𑀬𑀁 𑀢𑀸𑀮𑀧𑀢𑁆𑀢𑀸𑀤𑁆𑀬𑀦𑁆𑀢𑀭𑁂𑀲𑀼 𑀦𑀺𑀮𑀻𑀦𑀸𑀬𑀁 𑀘𑀫𑁆𑀫𑀧𑀢𑁆𑀢𑀸𑀬𑀁. 𑀚𑀢𑀼 𑀯𑀺𑀬 𑀚𑀢𑀼𑀓𑀸, 𑀉𑀧𑀫𑀸𑀦𑁂 𑀓𑁄, ‘‘𑀭𑀸𑀫𑀞𑁂 𑀚𑀢𑀼𑀓𑀁 𑀘𑀫𑁆𑀫-𑀧𑀢𑁆𑀢𑀚𑀢𑀼𑀓𑀭𑁂𑀲𑀼 𑀣𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁯.𑁪𑁦] 𑀳𑀺 𑀭𑀪𑀲𑁄. 𑀅𑀚𑀺𑀦𑀁 𑀘𑀫𑁆𑀫𑀁 𑀧𑀢𑁆𑀢𑀁 𑀬𑀲𑁆𑀲𑀸 𑀅𑀚𑀺𑀦𑀧𑀢𑁆𑀢𑀸. 𑀤𑁆𑀯𑀬𑀁 𑀳𑀁𑀲𑀲𑀸𑀫𑀜𑁆𑀜𑁂. 𑀳𑀦𑁆𑀢𑀺 𑀅𑀤𑁆𑀥𑀸𑀦𑀁 𑀳𑀁𑀲𑁄. 𑀲𑁂𑀢𑁄 𑀙𑀤𑁄 𑀧𑀢𑁆𑀢𑀁 𑀬𑀲𑁆𑀲. 𑀬𑀣𑀸𑀓𑀣𑀜𑁆𑀘𑀺 𑀩𑁆𑀬𑀼𑀧𑁆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀲𑁂𑀢𑀘𑁆𑀙𑀤𑁂𑀧𑀺, 𑀘𑀓𑁆𑀓𑀗𑁆𑀕𑁄, 𑀫𑀸𑀦𑀲𑁄𑀓𑁄𑀧𑀺, 𑀘𑀓𑁆𑀓𑀲𑁆𑀲 𑀘𑀓𑁆𑀓𑀯𑀸𑀓𑀲𑁆𑀲𑁂𑀯 𑀅𑀗𑁆𑀕𑀸𑀦𑀺 𑀬𑀲𑁆𑀲. 𑀫𑀸𑀦𑀲𑀁 𑀲𑀭𑁄 𑀑𑀓𑁄 𑀬𑀲𑁆𑀲.

𑁬𑁪𑁭. 𑀬𑁂 𑀭𑀢𑁆𑀢𑁂𑀳𑀺 𑀮𑁄𑀳𑀺𑀢𑁂𑀳𑀺 𑀧𑀸𑀤𑀢𑀼𑀡𑁆𑀟𑁂𑀳𑀺 𑀘𑀭𑀡𑀘𑀜𑁆𑀘𑀽𑀳𑀺 𑀯𑀺𑀲𑀺𑀝𑁆𑀞𑀸 𑀲𑀺𑀢𑀸 𑀘 𑀲𑀭𑀻𑀭𑁂, 𑀢𑁂 𑀭𑀸𑀚𑀳𑀁𑀲𑀸 𑀦𑀸𑀫, 𑀳𑀁𑀲𑀸𑀦𑀁 𑀭𑀸𑀚𑀸𑀦𑁄 𑀭𑀸𑀚𑀳𑀁𑀲𑀸.

𑀫𑀮𑀻𑀦𑁂𑀳𑀺 𑀧𑀸𑀤𑀢𑀼𑀡𑁆𑀟𑁂𑀳𑀺 𑀯𑀺𑀲𑀺𑀝𑁆𑀞𑀸 𑀬𑁂 𑀢𑁂 𑀫𑀮𑁆𑀮𑀺𑀓𑀸𑀔𑁆𑀬𑀸, 𑀫𑀮, 𑀫𑀮𑁆𑀮 𑀥𑀸𑀭𑀡𑁂, 𑀇, 𑀲𑀜𑁆𑀜𑀸𑀬𑀁 𑀓𑁄, ‘‘𑀫𑀮𑁆𑀮𑀺𑀓𑁄 𑀳𑀁𑀲𑀪𑁂𑀤𑁂 𑀘, 𑀢𑀺𑀡𑀲𑀽𑀮𑁂 𑀘 𑀫𑀮𑁆𑀮𑀺𑀓𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁫.𑁨𑁪] 𑀭𑀼𑀤𑁆𑀤𑁄. 𑀆𑀔𑁆𑀬𑀸𑀲𑀤𑁆𑀤𑁂𑀦 𑀩𑀳𑀼𑀩𑁆𑀩𑀻𑀳𑀺. 𑀅𑀲𑀺𑀢𑁂𑀳𑀺 𑀓𑀡𑁆𑀳𑁂𑀳𑀺 𑀧𑀸𑀤𑀢𑀼𑀡𑁆𑀟𑁂𑀳𑀺 𑀯𑀺𑀲𑀺𑀝𑁆𑀞𑀸 𑀬𑁂, 𑀢𑁂 𑀥𑀢𑀭𑀝𑁆𑀞𑀸, 𑀥𑀢𑀭𑀝𑁆𑀞𑀸𑀦𑀁 𑀅𑀧𑀘𑁆𑀘𑀸𑀦𑀺 𑀥𑀢𑀭𑀝𑁆𑀞𑀸𑀢𑀺, 𑀡𑁄.

𑁬𑁪𑁮. 𑀢𑀺𑀓𑀁 𑀢𑀺𑀭𑀘𑁆𑀙𑀸𑀦𑁂. 𑀢𑀺𑀭𑀺𑀬𑀁 𑀅𑀜𑁆𑀘𑀬𑀢𑀻𑀢𑀺 𑀢𑀺𑀭𑀘𑁆𑀙𑁄, 𑀢𑀺𑀭𑀺𑀬𑀲𑁆𑀲 𑀢𑀺𑀭𑁄, 𑀅𑀜𑁆𑀘𑀢𑀺𑀲𑁆𑀲 𑀘𑁆𑀙𑁄. 𑀬𑀼𑀫𑁆𑀳𑀺 𑀢𑀺𑀭𑀘𑁆𑀙𑀸𑀦𑁄, 𑀢𑀺𑀭𑀘𑁆𑀙𑀸𑀦𑁄𑀬𑁂𑀯 𑀢𑀺𑀭𑀘𑁆𑀙𑀸𑀦𑀕𑀢𑀁, 𑀢𑀩𑁆𑀪𑀸𑀯𑀁 𑀯𑀸 𑀕𑀢𑀁 𑀧𑀢𑁆𑀢𑀁, 𑀢𑁂𑀲𑀼 𑀯𑀸 𑀕𑀢𑀁 𑀅𑀦𑁆𑀢𑁄𑀕𑀥𑀦𑁆𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀁, 𑀲𑀺𑀬𑀸𑀢𑀺 𑀧𑀓𑀢𑁆𑀬𑀸𑀦𑀧𑁂𑀓𑁆𑀔𑀓𑁆𑀭𑀺𑀬𑀸𑀧𑀤𑀁, 𑀪𑀯𑀢𑁆𑀬𑀢𑁆𑀣𑁄 𑀯𑀸 𑀳𑀺 𑀓𑀭𑁄𑀢𑁆𑀬𑀢𑁆𑀣𑁄 𑀯𑀸 𑀓𑀤𑀸𑀘𑀺 𑀧𑀓𑀢𑁆𑀬𑀸𑀦𑀧𑁂𑀓𑁆𑀔𑁄 𑀪𑀯𑀢𑀺, 𑀦 𑀧𑀦 𑀯𑀺𑀓𑀢𑁆𑀬𑀸𑀦𑀧𑁂𑀓𑁆𑀔𑁄. 𑀢𑀣𑀸 𑀓𑀤𑀸𑀘𑀺 𑀉𑀪𑀬𑀸𑀧𑁂𑀓𑁆𑀔𑁄𑀧𑀺 𑀪𑀯𑀢𑀺, 𑀦 𑀧𑀦𑀼𑀪𑀬𑀸𑀦𑀧𑁂𑀓𑁆𑀔𑁄𑀢𑀺 𑀲𑀩𑁆𑀩𑀢𑁆𑀭𑁂𑀯𑀁. 𑀲𑀻𑀳𑀸𑀤𑀺𑀯𑀕𑁆𑀕𑁄.

𑀅𑀭𑀜𑁆𑀜𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.