𑁫. 𑀅𑀭𑀜𑁆𑀜𑀯𑀕𑁆𑀕𑀯𑀡𑁆𑀡𑀦𑀸

𑁫𑁩𑁬. 𑀲𑀢𑁆𑀢𑀓𑀁 𑀯𑀦𑁂. 𑀅𑀭 𑀕𑀫𑀦𑁂, 𑀅𑀜𑁆𑀜𑁄, 𑀅𑀭𑀜𑁆𑀜𑀁. 𑀓𑁂𑀦 𑀚𑀮𑁂𑀦 𑀅𑀦𑀦𑀁 𑀧𑀸𑀡𑀫𑀦𑀲𑁆𑀲 𑀓𑀸𑀦𑀦𑀁, 𑀤𑀸 𑀅𑀯𑀔𑀡𑁆𑀟𑀦𑁂, 𑀤𑀸 𑀙𑁂𑀤𑀦𑁂 𑀯𑀸. 𑀅𑀥𑀺𑀓𑀭𑀡𑁂 𑀡𑁄, ‘‘𑀆𑀓𑀸𑀭𑀦𑁆𑀢𑀸𑀦𑀫𑀸𑀬𑁄’’𑀢𑀺 𑀆𑀬𑁄. 𑀤𑀬 𑀤𑀸𑀦𑀕𑀢𑀺𑀳𑀺𑀁 𑀲𑀸𑀤𑀸𑀦𑁂𑀲𑀼 𑀯𑀸, 𑀡𑁄, 𑀕𑀳 𑀉𑀧𑀸𑀤𑀸𑀦𑁂 [𑀕𑀸𑀳𑀽 𑀯𑀺𑀮𑁄𑀴𑀦𑁂 (?)], 𑀅𑀥𑀺𑀓𑀭𑀡𑁂 𑀬𑀼. 𑀯𑀧 𑀩𑀻𑀚𑀦𑀺𑀓𑁆𑀔𑁂𑀧𑁂, 𑀇𑀦𑁄, 𑀅𑀲𑁆𑀲𑀺𑀢𑁆𑀢𑀁. 𑀯𑀦 𑀲𑀫𑁆𑀪𑀢𑁆𑀢𑀺𑀲𑀤𑁆𑀤𑁂𑀲𑀼, 𑀓𑀢𑁆𑀢𑀭𑀺 𑀅, 𑀯𑀦𑀁. 𑀅𑀝𑀸 𑀅𑀯𑀬𑀯𑁄 𑀲𑁂𑀮𑀸 𑀅𑀢𑁆𑀭𑁂𑀢𑀺 𑀅𑀝𑀯𑀺, 𑀇, 𑀈𑀫𑁆𑀳𑀺 𑀅𑀝𑀯𑀻.

𑀫𑀳𑀸𑀧𑀤𑀼𑀫𑀮𑀢𑀸𑀯𑀦𑀁 𑀫𑀳𑀸𑀭𑀜𑁆𑀜𑀁, 𑀦𑀤𑀸𑀤𑀺, 𑀅𑀦𑀦𑁆𑀢𑁄 𑀘, 𑀅𑀭𑀜𑁆𑀜𑀸𑀦𑀻.

𑁫𑁩𑁭. 𑀦𑀕𑀭𑀢𑁄 𑀦𑀸𑀢𑀺𑀤𑀽𑀭𑀲𑁆𑀫𑀺𑀁 𑀞𑀸𑀦𑁂 𑀲𑀦𑁆𑀢𑁂𑀳𑀺 𑀅𑀪𑀺𑀭𑁄𑀧𑀺𑀢𑁄 𑀢𑀭𑀼𑀲𑀡𑁆𑀟𑁄 𑀧𑀽𑀕𑀧𑀦𑀲𑀸𑀤𑀺𑀢𑀭𑀼𑀲𑀫𑀽𑀳𑁄 𑀅𑀢𑁆𑀣𑀺, 𑀲𑁄 ‘‘𑀉𑀧𑀯𑀦’’𑀦𑁆𑀢𑀺 𑀘𑁄𑀘𑁆𑀘𑀢𑁂, 𑀓𑀺𑀢𑁆𑀢𑀺𑀫𑀯𑀦𑀫𑁂𑀢𑀁. 𑀆𑀭𑀫𑀦𑁆𑀢𑁆𑀬𑀲𑁆𑀫𑀺𑀦𑁆𑀢𑀺 𑀆𑀭𑀸𑀫𑁄, 𑀡𑁄. 𑀉𑀧𑀕𑀢𑀁, 𑀉𑀧𑀭𑁄𑀧𑀺𑀢𑀁 𑀯𑀸 𑀯𑀦𑀁 𑀉𑀧𑀯𑀦𑀁.

𑁫𑁩𑁮. 𑀲𑀩𑁆𑀩𑀲𑀸𑀥𑀸𑀭𑀡𑀁 𑀲𑀩𑁆𑀩𑀮𑁄𑀓𑁂𑀳𑀺 𑀲𑀸𑀥𑀸𑀭𑀡𑁄𑀧𑀪𑁄𑀕𑀁 𑀭𑀜𑁆𑀜𑀁 𑀭𑀸𑀚𑀽𑀦𑀁 𑀅𑀭𑀜𑁆𑀜𑀁 ‘‘𑀉𑀧𑀯𑀦𑀁, 𑀉𑀬𑁆𑀬𑀸𑀦’’𑀫𑀺𑀢𑁆𑀬𑀼𑀘𑁆𑀘𑀢𑁂, 𑀉𑀮𑁆𑀮𑁄𑀓𑁂𑀦𑁆𑀢𑀸 𑀬𑀦𑁆𑀢𑀺 𑀚𑀦𑀸 𑀏𑀢𑀲𑁆𑀫𑀺𑀦𑁆𑀢𑀺 𑀉𑀬𑁆𑀬𑀸𑀦𑀁, 𑀬𑀼. 𑀆𑀓𑀻𑀴𑁄𑀧𑁆𑀬𑀢𑁆𑀭.

𑀢𑀤𑁂𑀯 𑀭𑀸𑀚𑁄𑀧𑀯𑀦𑀫𑁂𑀯 𑀉𑀧𑀓𑀸𑀭𑀺𑀓𑀸𑀲𑀦𑁆𑀦𑀺𑀳𑀺𑀢𑀁, 𑀧𑀼𑀭𑀲𑀦𑁆𑀦𑀺𑀳𑀺𑀢𑀁 𑀯𑀸 𑀅𑀦𑁆𑀢𑁂𑀧𑀼𑀭𑀸𑀘𑀺𑀢𑀁 𑀧𑀫𑀤𑀯𑀦𑀸𑀔𑁆𑀬𑀁. 𑀬𑀢𑁆𑀭 𑀅𑀦𑁆𑀢𑁂𑀧𑀼𑀭𑀲𑀳𑀺𑀢𑁄 𑀏𑀯 𑀭𑀸𑀚𑀸 𑀯𑀺𑀳𑀭𑀢𑀺, 𑀦𑀸𑀜𑁆𑀜𑀚𑀦𑀧𑁆𑀧𑀯𑁂𑀲𑁄. 𑀧𑀫𑀤𑀸𑀦𑀁 𑀇𑀢𑁆𑀣𑀻𑀦𑀁 𑀯𑀦𑀁 𑀧𑀫𑀤𑀯𑀦𑀁, 𑀭𑀲𑁆𑀲𑁄.

𑁫𑁩𑁯-𑁫𑁪𑁦. 𑀲𑀸𑀦𑁆𑀢𑀭𑀸𑀴𑀸 𑀧𑀦𑁆𑀢𑀺, 𑀬𑀣𑀸 𑁋 𑀢𑀭𑀼𑀧𑀦𑁆𑀢𑀺, 𑀧𑀸𑀲𑀸𑀤𑀧𑀦𑁆𑀢𑀺, 𑀦𑀺𑀭𑀦𑁆𑀢𑀭𑀸𑀴𑀸 𑀢𑀼 𑀭𑀸𑀚𑀻𑀢𑀺. 𑀢𑀢𑁆𑀭 𑀧𑀜𑁆𑀘𑀓𑀁 𑀧𑀦𑁆𑀢𑀺𑀬𑀁. 𑀧𑀦 𑀩𑁆𑀬𑀯𑀳𑀸𑀭𑁂, 𑀣𑀼𑀢𑀺𑀫𑁆𑀳𑀺 𑀘, 𑀧𑀦𑁆𑀢𑀺. 𑀯𑀻 𑀕𑀫𑀦𑁂, 𑀣𑀺, 𑀯𑀻𑀣𑀺. 𑀯𑀮 𑀲𑀁𑀯𑀭𑀡𑁂, 𑀇, 𑀆𑀯𑀮𑀺. 𑀆𑀮𑀺𑀧𑀺, 𑀅𑀮𑀥𑀸𑀢𑀼𑀫𑁆𑀳𑀸 𑀇. 𑀲𑀺 𑀲𑁂𑀯𑀸𑀬𑀁, 𑀡𑀺, 𑀲𑁂𑀡𑀺. 𑀧𑀸 𑀭𑀓𑁆𑀔𑀡𑁂, 𑀴𑀺, 𑀧𑀸𑀴𑀺, 𑀲𑁄𑀕𑀢𑁂𑀧𑀺. 𑀤𑁆𑀯𑁂 𑀲𑀫𑀸. 𑀮𑀺𑀔 𑀮𑁂𑀔𑀦𑁂, 𑀅. 𑀭𑀸𑀚 𑀤𑀺𑀢𑁆𑀢𑀺𑀬𑀁, 𑀇.

𑀢𑀺𑀧𑀸𑀤𑀁 𑀭𑀼𑀓𑁆𑀔𑀫𑀢𑁆𑀢𑁂. 𑀧𑀸𑀤𑁂𑀦 𑀫𑀽𑀮𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄, 𑀡𑁄. 𑀯𑀺𑀝𑀧𑀬𑁄𑀕𑀸 𑀯𑀺𑀝𑀧𑀻. 𑀭𑀼𑀓𑁆𑀔 𑀯𑀭𑀡𑁂, 𑀅, 𑀭𑀼𑀳 𑀚𑀦𑀦𑁂 𑀯𑀸, 𑀔𑁄, 𑀳𑀲𑁆𑀲 𑀓𑁄. 𑀦 𑀕𑀘𑁆𑀙𑀢𑀻𑀢𑀺 𑀅𑀕𑁄. 𑀲𑀮 𑀕𑀫𑀦𑁂, 𑀡𑁄, 𑀲𑀸𑀭𑀯𑀦𑁆𑀢𑀢𑀸𑀬 𑀯𑀸 𑀲𑀸𑀭𑁄, 𑀲𑁄 𑀏𑀯 𑀲𑀸𑀮𑁄, 𑀅𑀜𑁆𑀜𑀢𑁆𑀭𑁄𑀧𑀘𑀸𑀭𑀸. 𑀫𑀳𑀺𑀬𑀁 𑀭𑀼𑀳𑀢𑀻𑀢𑀺, 𑀅. 𑀤𑀼 𑀕𑀢𑀺𑀬𑀁, 𑀫𑁄. 𑀢𑀭 𑀢𑀭𑀡𑁂, 𑀉. 𑀓𑀼𑀢𑁄 𑀪𑀽𑀫𑀺𑀢𑁄 𑀚𑀸𑀬𑀢𑀻𑀢𑀺 𑀓𑀼𑀚𑁄, 𑀅𑀗𑁆𑀕𑀸𑀭𑁂𑀧𑀺. 𑀲𑀸𑀔𑀸𑀬𑁄𑀕𑀢𑁄 𑀲𑀸𑀔𑀻.

𑀕𑀫𑀼 𑀕𑀫𑀦𑁂, 𑀡𑁄, ‘‘𑀕𑀫𑀺𑀲𑁆𑀲𑀦𑁆𑀢𑁄 𑀘𑁆𑀙𑁄 𑀯𑀸 𑀲𑀩𑁆𑀩𑀸𑀲𑀽’’𑀢𑀺 𑀘𑁆𑀙𑁄. 𑀔𑀼𑀤𑁆𑀤𑁄 𑀅𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀧𑀸𑀤𑀧𑁄 𑀔𑀼𑀤𑁆𑀤𑀧𑀸𑀤𑀧𑁄. 𑀬𑁂 𑀭𑀼𑀓𑁆𑀔𑀸 𑀧𑀼𑀧𑁆𑀨𑀁 𑀯𑀺𑀦𑀸 𑀅𑀧𑀼𑀧𑁆𑀨𑀓𑀸 𑀨𑀮𑀦𑁆𑀢𑀺, 𑀢𑁂 𑀅𑀲𑁆𑀲𑀢𑁆𑀣𑁄𑀤𑀼𑀫𑁆𑀩𑀭𑀧𑀦𑀲𑀸𑀤𑀬𑁄 ‘‘𑀯𑀦𑀧𑁆𑀧𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀯𑀦𑀸𑀦𑀁 𑀧𑀢𑀺 𑀯𑀦𑀧𑁆𑀧𑀢𑀺. 𑀧𑀼𑀧𑁆𑀨𑀢𑁄 𑀚𑀸𑀢𑀨𑀮𑀸 𑀧𑀦 𑀅𑀫𑁆𑀩𑀔𑀚𑁆𑀚𑀽𑀭𑀸𑀤𑀬𑁄 𑀯𑀸𑀦𑀧𑁆𑀧𑀢𑀬𑁄. 𑀯𑀦𑀧𑁆𑀧𑀢𑀺𑀫𑁆𑀳𑀺 𑀪𑀯𑀸 𑀯𑀸𑀦𑀧𑁆𑀧𑀢𑀬𑁄.

𑁫𑁪𑁧. 𑀬𑁄 𑀨𑀮𑀧𑀸𑀓𑀸𑀯𑀲𑀸𑀦𑁂 𑀫𑀭𑀢𑀺, 𑀲𑁄 𑀓𑀤𑀮𑀻𑀥𑀜𑁆𑀜𑀸𑀤𑀺𑀓𑁄 𑀑𑀲𑀥𑀺 𑀦𑀸𑀫 𑀪𑀯𑁂, 𑀑𑀲𑁄 𑀥𑀻𑀬𑀢𑁂 𑀬𑀲𑁆𑀲𑀁 [𑀑𑀲𑁄 𑀕𑁆𑀮𑁄𑀲𑁄 𑀤𑀺𑀢𑁆𑀢𑀺𑀩𑁆𑀩𑀸 𑀥𑀻𑀬𑀢𑁂’𑀢𑁆𑀭 𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁪.𑁬], 𑀲𑀸 𑀑𑀲𑀥𑀺, 𑀇. 𑀲𑀸𑀲𑀤𑁆𑀤𑁄 𑀑𑀲𑀥𑀺𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀤𑀻𑀧𑀓𑁄.

𑀤𑁆𑀯𑀬𑀁 𑀉𑀢𑀼𑀧𑁆𑀧𑀢𑁆𑀢𑁂𑀧𑀺 𑀨𑀮𑀳𑀻𑀦𑁂. 𑀯𑀦 𑀬𑀸𑀘𑀦𑁂, 𑀛𑁄, 𑀯𑀜𑁆𑀛𑀸, 𑀯𑀥𑀢𑀺 𑀨𑀮𑀦𑁆𑀢𑀺 𑀯𑀸 𑀯𑀜𑁆𑀛𑀸, 𑀯𑀚𑀸𑀤𑀺𑀦𑀸 𑀬𑁄, 𑀛𑀲𑁆𑀲 𑀛𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀦 𑀯𑀺𑀚𑁆𑀚𑀢𑀺 𑀨𑀮𑀫𑁂𑀢𑀺𑀲𑁆𑀲𑀸𑀢𑀺 𑀅𑀨𑀮𑀸, 𑀤𑁆𑀯𑁂 𑀢𑀻𑀲𑀼. 𑀢𑀺𑀓𑀁 𑀯𑀢𑁆𑀢𑀫𑀸𑀦𑀨𑀮𑁂 𑀭𑀼𑀓𑁆𑀔𑀸𑀤𑁄. 𑀨𑀮𑀬𑁄𑀕𑀸, 𑀇𑀦𑁄, 𑀯𑀦𑁆𑀢𑀼, 𑀈 𑀘.

𑁫𑁪𑁨. 𑀘𑀢𑀼𑀓𑁆𑀓𑀁 𑀯𑀺𑀓𑀲𑀺𑀢𑁂. 𑀨𑀼𑀮𑁆𑀮 𑀯𑀺𑀓𑀲𑀦𑁂, 𑀓𑀢𑁆𑀢𑀭𑀺 𑀢𑁄, 𑀲𑀜𑁆𑀚𑀸𑀢𑀢𑁆𑀣𑁂 𑀯𑀸 𑀇𑀢𑁄, 𑀨𑀮 𑀯𑀺𑀲𑀭𑀡𑁂 𑀯𑀸, 𑀯𑀺𑀲𑀭𑀡𑀁 𑀯𑀺𑀓𑀸𑀲𑁄, 𑀅𑀲𑁆𑀲𑀼. 𑀓𑀘 𑀩𑀦𑁆𑀥𑀦𑁂, 𑀯𑀺𑀧𑀼𑀩𑁆𑀩𑁄 𑀯𑀺𑀓𑀲𑀦𑁂, 𑀓𑀢𑁆𑀢𑀭𑀺 𑀅. 𑀯𑀺𑀓𑀘𑀢𑁂 𑀯𑀺𑀤𑀮𑀢𑀺 𑀯𑀺𑀲𑀺𑀮𑀺𑀝𑁆𑀞𑀤𑀮𑁄 𑀪𑀯𑀢𑀻𑀢𑀺 𑀯𑀸 𑀯𑀺𑀓𑀘𑁄, 𑀅, 𑀯𑀺𑀲𑀤𑁆𑀤𑁄 𑀯𑀺𑀲𑀺𑀮𑁂𑀲𑀚𑁄𑀢𑀓𑁄. 𑀓𑀲 𑀕𑀫𑀦𑁂, 𑀢𑁄. 𑀤𑀮𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀺𑀮𑁂𑀲𑀢𑁄 𑀲𑀫𑀼𑀤𑀸𑀬𑁄 ‘‘𑀯𑀺𑀓𑀲𑀺𑀢𑁄’’𑀢𑁆𑀬𑀼𑀘𑁆𑀘𑀢𑁂. 𑀨𑀼𑀝𑁄𑀧𑁆𑀬𑀢𑁆𑀭. 𑀨𑀼𑀝 𑀯𑀺𑀓𑀲𑀦𑁂.

𑀧𑀸𑀤𑁄 𑀭𑀼𑀓𑁆𑀔𑀕𑁆𑀕𑁂. ‘‘𑀦 𑀦𑀸’𑀕𑁆𑀕𑀁 𑀲𑀺𑀔𑀭𑀁 𑀲𑀺𑀭𑁄’’𑀢𑀺 𑀯𑁄𑀧𑀸𑀮𑀺𑀢𑀯𑀘𑀦𑀢𑁄 ‘‘𑀲𑀺𑀭𑀲𑁄 𑀅𑀕𑁆𑀕’’𑀦𑁆𑀢𑀺 𑀦 𑀙𑀝𑁆𑀞𑀻𑀲𑀫𑀸𑀲𑁄. 𑀲𑀺𑀭𑁄 𑀯𑀼𑀢𑁆𑀢𑁄. 𑀅𑀚 𑀕𑀫𑀦𑁂, 𑀕𑁄, 𑀅𑀕𑁆𑀕𑀁, 𑀲𑁂𑀝𑁆𑀞𑁂 𑀢𑀻𑀲𑀼. 𑀲𑀻 𑀲𑀬𑁂, 𑀔𑀭𑁄, 𑀲𑀺𑀔𑀸 𑀯𑀸 𑀘𑀽𑀴𑀸, 𑀲𑀸 𑀯𑀺𑀬 𑀚𑀸𑀬𑀢𑀻𑀢𑀺 𑀲𑀺𑀔𑀭𑁄. 𑀤𑁆𑀯𑀬𑀁 𑀲𑀸𑀔𑀸𑀬𑀁. 𑀲𑀸𑀔 𑀩𑁆𑀬𑀸𑀧𑀦𑁂, 𑀅. ‘‘𑀮𑀢𑀸 𑀯𑀮𑁆𑀮𑀻 𑀲𑀫𑀸𑀔𑁆𑀬𑀸𑀢𑀸, 𑀮𑀢𑀸 𑀲𑀸𑀔𑀸 𑀘 𑀲𑀸𑀔𑀺𑀦’’𑀦𑁆𑀢𑀺 𑀮𑀢𑀸 𑀦𑀸𑀦𑀢𑁆𑀣𑀸. 𑀮𑀸 𑀆𑀤𑀸𑀦𑁂, 𑀢𑁄, 𑀭𑀲𑁆𑀲𑁄.

𑁫𑁪𑁩. 𑀙𑀓𑁆𑀓𑀁 𑀧𑀢𑁆𑀢𑁂. 𑀤𑀮𑀢𑀺 𑀯𑀺𑀓𑀲𑀢𑀻𑀢𑀺 𑀤𑀮𑀁, 𑀅. 𑀮𑀲 𑀓𑀦𑁆𑀢𑀺𑀬𑀁, 𑀧𑀓𑀸𑀭𑁂𑀦 𑀮𑀲𑀢𑀻𑀢𑀺 𑀧𑀮𑀸𑀲𑁄, 𑀡𑁄. 𑀙𑀤 𑀲𑀁𑀯𑀭𑀡𑁂, 𑀙𑀸𑀤𑀻𑀬𑀢𑁂 𑀬𑁂𑀦 𑀙𑀤𑀦𑀁, 𑀬𑀼. 𑀧𑀽𑀭𑀬𑀢𑀻𑀢𑀺 𑀧𑀡𑁆𑀡𑀁, 𑀦𑀺𑀧𑀸𑀢𑀦𑀸, 𑀧𑀢 𑀅𑀥𑁄𑀕𑀫𑀦𑁂 𑀯𑀸, 𑀧𑀢𑀢𑁆𑀬𑀘𑀺𑀭𑁂𑀦 𑀧𑀡𑁆𑀡𑀁, 𑀧𑀢𑁆𑀢𑀜𑁆𑀘, 𑀢𑁄, 𑀧𑀼𑀫𑁂. 𑀲𑀜𑁆𑀜𑀸𑀬𑀁 𑀡𑀫𑁆𑀳𑀺 𑀙𑀤𑁄.

𑀤𑁆𑀯𑀬𑀁 𑀧𑀢𑁆𑀢𑀸𑀤𑀺𑀲𑀗𑁆𑀖𑀸𑀢𑀯𑀢𑀺 𑀲𑀸𑀔𑀸𑀬 𑀧𑀩𑁆𑀩𑁂. 𑀧𑀮𑁆𑀮 𑀕𑀫𑀦𑁂, 𑀅𑀯𑁄. 𑀓𑀺𑀲 𑀕𑀫𑀦𑁂, 𑀬𑁄, 𑀮𑀸𑀕𑀫𑁄 𑀫𑀚𑁆𑀛𑁂. 𑀤𑁆𑀯𑀬𑀁 𑀅𑀗𑁆𑀓𑀼𑀭𑁂. 𑀦𑀯𑁄 𑀏𑀯 𑀉𑀩𑁆𑀪𑀺𑀢𑁄 𑀉𑀕𑁆𑀕𑀢𑁄 𑀦𑀯𑀼𑀩𑁆𑀪𑀺𑀦𑁆𑀦𑁄. 𑀅𑀗𑁆𑀓 𑀮𑀓𑁆𑀔𑀡𑁂, 𑀉𑀭𑁄.

𑁫𑁪𑁪. 𑀧𑀓𑁆𑀓𑀁 𑀬𑀸𑀯 𑀧𑀸𑀤𑁂𑀦 𑀦𑀸𑀫𑀁. 𑀯𑀺𑀓𑀸𑀲𑁄 𑀫𑀼𑀔𑀧𑀩𑀼𑀤𑁆𑀥𑀓𑀮𑀺𑀓𑀸𑀬𑀁 𑀫𑀓𑀼𑀴𑀸𑀤𑀺𑀤𑁆𑀯𑀬𑀁. 𑀫𑀼𑀘 𑀫𑁄𑀘𑀦𑁂, 𑀉𑀮𑁄, 𑀉𑀲𑁆𑀲𑀢𑁆𑀢𑀁, 𑀘𑀲𑁆𑀲 𑀓𑁄, 𑀫𑀓𑀼𑀴𑀁, 𑀫𑀓𑀼𑀴𑁄 𑀯𑀸. 𑀓𑀼𑀝 𑀙𑁂𑀤𑀦𑁂, 𑀫𑀮𑁄, 𑀅𑀲𑁆𑀲𑀼, 𑀓𑀼𑀝𑀼𑀫𑀮𑁄, 𑀓𑀼𑀢𑀼𑀫𑀮𑁄𑀧𑀺. 𑀧𑀼𑀧𑁆𑀨𑀲𑁆𑀲 𑀘 𑀨𑀮𑀲𑁆𑀲 𑀘 𑀧𑀓𑀢𑀺𑀪𑀽𑀢𑁂 𑀚𑀸𑀮𑀧𑀢𑁆𑀢𑁂 𑀔𑀸𑀭𑀓𑀸𑀤𑀺𑀤𑁆𑀯𑀬𑀁. 𑀔𑀼𑀭 𑀯𑀺𑀦𑀸𑀲𑁂. 𑀡𑁆𑀯𑀼. 𑀚𑀮 𑀥𑀜𑁆𑀜𑁂, 𑀲𑀓𑀢𑁆𑀣𑁂 𑀓𑁄. 𑀚𑀸𑀮𑀓𑀁 𑀦𑀧𑀼𑀁𑀲𑀓𑁂. 𑀤𑁆𑀯𑀬𑀁 𑀚𑀸𑀮𑀓𑀢𑁄 𑀧𑀯𑀼𑀤𑁆𑀥𑁂 𑀧𑀼𑀧𑁆𑀨𑁂, 𑀨𑀮𑁂 𑀘. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀡𑁆𑀯𑀼, 𑀓𑀼𑀭 𑀲𑀤𑁆𑀤𑁂, 𑀡𑁆𑀯𑀼.

𑀧𑀼𑀧𑁆𑀨𑀸𑀤𑀺𑀩𑀦𑁆𑀥𑀦𑀁 𑀧𑀼𑀧𑁆𑀨𑀨𑀮𑀸𑀦𑀁 𑀩𑀦𑁆𑀥𑀦𑀁 𑀯𑀡𑁆𑀝𑀁 𑀦𑀸𑀫. 𑀩𑀦𑁆𑀥𑀻𑀬𑀢𑁂 𑀬𑁂𑀦 𑀯𑀡𑁆𑀝𑀁, 𑀯𑀚𑀸𑀤𑀺.

𑁫𑁪𑁫. 𑀢𑀺𑀓𑀁 𑀧𑀼𑀧𑁆𑀨𑁂. 𑀧𑀲𑀼 𑀧𑀸𑀡𑀺𑀕𑀩𑁆𑀪𑀯𑀺𑀫𑁄𑀘𑀦𑁂, 𑀡𑁄. 𑀔𑀧𑀡𑀓𑀪𑀸𑀲𑀸𑀬 𑀭𑀼𑀓𑁆𑀔𑁄𑀧𑀺 𑀧𑀸𑀡𑀺, 𑀯𑀼𑀤𑁆𑀥𑀸𑀤𑀺, 𑀧𑀲𑀯𑁄. 𑀓𑀼𑀲 𑀅𑀓𑁆𑀓𑁄𑀲𑁂, 𑀉𑀫𑁄, 𑀓𑀲 𑀕𑀫𑀦𑁂 𑀯𑀸, 𑀓𑀸𑀲 𑀤𑀺𑀢𑁆𑀢𑀺𑀬𑀁 𑀯𑀸, 𑀉𑀫𑁄, 𑀭𑀲𑁆𑀲𑁄. 𑀧𑀼𑀧𑁆𑀨 𑀯𑀺𑀓𑀲𑀦𑁂, 𑀧𑀼𑀧𑁆𑀨𑀢𑀻𑀢𑀺, 𑀅. 𑀧𑀼𑀧𑁆𑀨𑀚𑁄 𑀭𑀚𑁄 𑀧𑀼𑀧𑁆𑀨𑀥𑀽𑀮𑀻 𑀧𑀭𑀸𑀕𑁄 𑀦𑀸𑀫, 𑀭𑀦𑁆𑀚 𑀭𑀗𑁆𑀕𑁂, 𑀡𑁄.

𑀫𑀥𑀼𑀭𑀧𑀼𑀧𑁆𑀨𑀭𑀲𑁄 𑀫𑀓𑀭𑀦𑁆𑀤𑁄 𑀦𑀸𑀫𑀸𑀢𑀺 𑀫𑀢𑀁. 𑀫𑀓𑁆𑀔𑀺𑀓𑀸 𑀭𑀫𑀦𑁆𑀢𑀺 𑀬𑀲𑁆𑀫𑀺𑀁 𑀫𑀓𑀭𑀦𑁆𑀤𑁄, 𑀯𑀚𑀸𑀤𑀺. 𑀤𑁆𑀯𑀬𑀁 𑀓𑀮𑀺𑀓𑀸𑀪𑀺 𑀆𑀓𑀺𑀡𑁆𑀡𑁂 𑀧𑀭𑀺𑀡𑀸𑀬𑀯𑀢𑀺. 𑀣𑀼 𑀅𑀪𑀺𑀢𑁆𑀣𑀯𑁂, 𑀡𑁆𑀯𑀼, 𑀣𑀯𑀓𑁄. 𑀕𑀼𑀥 𑀧𑀭𑀺𑀯𑁂𑀥𑀦𑁂, 𑀡𑁆𑀯𑀼, 𑀥𑀲𑁆𑀲 𑀙𑁄, 𑀕𑁄𑀘𑁆𑀙𑀓𑁄.

𑁫𑁪𑁬-𑁫𑁪𑁭. 𑀆𑀫𑁂 𑀅𑀧𑀓𑁆𑀓𑁂 𑀨𑀮𑁂 𑀲𑀮𑀸𑀝𑀼 𑀉𑀢𑁆𑀢𑁄, 𑀲𑀮𑀸𑀝 𑀩𑀸𑀮𑁆𑀬𑀧𑀭𑀺𑀪𑀸𑀲𑀦𑁂𑀲𑀼, 𑀉, 𑀯𑀺𑀚𑁆𑀚𑀫𑀸𑀦𑀩𑀸𑀮𑁆𑀬𑀢𑀸𑀬 𑀲𑀮𑀸𑀝𑀼. 𑀧𑀓𑁆𑀓𑀦𑁆𑀢𑀼 𑀨𑀮𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀨𑀮’’𑀫𑀺𑀢𑁆𑀬𑀼𑀘𑁆𑀘𑀢𑁂, 𑀢𑁂𑀦 ‘‘𑀆𑀫𑀲𑁆𑀫𑀺𑀁 𑀨𑀮𑀯𑁄𑀳𑀸𑀭𑁄 𑀭𑀽𑀴𑁆𑀳𑀺𑀬𑀸 𑀧𑀯𑀢𑁆𑀢𑀢𑀻’’𑀢𑀺 𑀜𑀸𑀢𑀩𑁆𑀩𑁄, 𑀨𑀮 𑀦𑀺𑀧𑁆𑀨𑀢𑁆𑀢𑀺𑀬𑀁, 𑀦𑀺𑀧𑁆𑀨𑀢𑁆𑀢𑀺 𑀘𑀸𑀢𑁆𑀭 𑀲𑀼𑀧𑀓𑁆𑀓𑀢𑁆𑀢𑀁, 𑀲𑀼𑀓𑁆𑀔𑁂 𑀢𑀼 𑀨𑀮𑁂 𑀯𑀸𑀦𑁄. 𑀢𑀢𑁆𑀭 𑀲𑀮𑀸𑀝𑀼 𑀯𑀸𑀦𑀸 𑀢𑀻𑀲𑀼, 𑀬𑀣𑀸 𑀲𑀮𑀸𑀝𑀼 𑀚𑀫𑁆𑀩𑀽, 𑀲𑀮𑀸𑀝𑀯𑁄 𑀫𑀸𑀲𑀸, 𑀲𑀮𑀸𑀝𑀽𑀦𑀺 𑀓𑀼𑀫𑁆𑀪𑀡𑁆𑀟𑀸𑀦𑀺, 𑀯𑀸𑀦𑀸 𑀳𑀭𑀻𑀝𑀓𑀻, 𑀯𑀸𑀦𑁄 𑀫𑀼𑀕𑁆𑀕𑁄, 𑀯𑀸𑀦𑀫𑀫𑁆𑀩𑀁.

𑀘𑀫𑁆𑀧𑀓𑀸𑀤𑀺 𑀘𑀫𑁆𑀧𑀓𑀁 𑀓𑀭𑀯𑀻𑀭𑀁 𑀓𑀤𑀫𑁆𑀩𑀓𑀁 𑀅𑀲𑁄𑀓𑀁 𑀓𑀡𑁆𑀡𑀺𑀓𑀸𑀭𑀁 𑀘𑀫𑁆𑀧𑀓𑀸𑀤𑀻𑀦𑀁 𑀧𑀼𑀧𑁆𑀨𑀁 𑀯𑀺𑀓𑀸𑀭𑁄, 𑀅𑀯𑀬𑀯𑁄 𑀘𑁂𑀢𑀺 𑀅𑀜𑁆𑀜𑀢𑁆𑀣𑁂 𑀡𑁄 𑀦 𑀪𑀯𑀢𑀺, 𑀢𑀤𑀦𑁆𑀢𑀢𑁄 𑀧𑀼𑀧𑁆𑀨𑀲𑁆𑀲𑀼𑀧𑁆𑀧𑀢𑀺𑀢𑀢𑁄, 𑀏𑀯𑀁 𑀘𑀫𑁆𑀧𑀓𑀸𑀤𑀻𑀦𑀺 𑀓𑀼𑀲𑀼𑀫𑀦𑀸𑀫𑀸𑀦𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀦𑁆𑀢𑀺, 𑀅𑀫𑁆𑀩𑀸𑀤𑀺 𑀤𑀸𑀴𑀺𑀫𑀁 𑀦𑀸𑀭𑀗𑁆𑀕𑀁 𑀆𑀫𑀮𑀓𑀁 𑀓𑀼𑀯𑀮𑀁 𑀩𑀤𑀭𑀦𑁆𑀢𑀺 𑀧𑀓𑀢𑁆𑀬𑀦𑁆𑀢𑀭𑀫𑁂𑀯 𑀨𑀮𑁂 𑀯𑀢𑁆𑀢𑀢𑁂, 𑀆𑀫𑀮𑀓𑀺𑀬𑀸 𑀓𑀼𑀯𑀮𑀺𑀬𑀸 𑀩𑀤𑀭𑀺𑀬𑀸 𑀨𑀮𑀁 𑀯𑀺𑀓𑀸𑀭𑁄, 𑀅𑀯𑀬𑀯𑁄 𑀘𑁂𑀢𑀺 𑀅𑀜𑁆𑀜𑀢𑁆𑀣𑁂 𑀢𑀤𑁆𑀥𑀺𑀢𑁄𑀧𑀺 𑀦𑁄𑀧𑁆𑀧𑀚𑁆𑀚𑀢𑁂, 𑀢𑀤𑀦𑁆𑀢𑀢𑁄 𑀨𑀮𑀲𑁆𑀲𑀼𑀧𑁆𑀧𑀢𑀺𑀢𑀢𑁄, 𑀏𑀯𑀁 𑀅𑀫𑁆𑀩𑀸𑀤𑀻𑀦𑀺 𑀨𑀮𑀦𑀸𑀫𑀸𑀦𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀦𑁆𑀢𑀺. 𑀫𑀮𑁆𑀮𑀺𑀓𑀸𑀤𑀬𑁄 𑀓𑀼𑀲𑀼𑀫𑁂𑀧𑀺 𑀯𑀢𑁆𑀢𑀫𑀸𑀦𑀸 𑀲𑀮𑀺𑀗𑁆𑀕𑀸 𑀧𑀓𑀢𑀺𑀮𑀺𑀗𑁆𑀕𑀸𑀅𑀪𑁂𑀤𑁄𑀧𑀘𑀸𑀭𑁂𑀦 𑀧𑀯𑀢𑁆𑀢𑀺𑀬𑀸, 𑀬𑀣𑀸 𑁋 𑀫𑀮𑁆𑀮𑀺𑀓𑀸 𑀚𑀸𑀢𑀺, 𑀯𑀦𑀫𑀮𑁆𑀮𑀺𑀓𑀸 𑀇𑀘𑁆𑀘𑀸𑀤𑀺. 𑀯𑀻𑀳𑀬𑁄𑀧𑁆𑀬𑀪𑁂𑀤𑁄𑀧𑀘𑀸𑀭𑁂𑀦 𑀨𑀮𑁂𑀧𑀺 𑀲𑀮𑀺𑀗𑁆𑀕𑀸, 𑀬𑀣𑀸 𑀫𑀸𑀲𑀲𑁆𑀲 𑀨𑀮𑀁 𑀫𑀸𑀲𑁄, 𑀫𑀼𑀕𑁆𑀕𑀲𑁆𑀲 𑀨𑀮𑀁 𑀫𑀼𑀕𑁆𑀕𑁄, 𑀏𑀯𑀁 𑀬𑀯𑁄, 𑀢𑀺𑀮𑁄, 𑀅𑀢𑀲𑀻, 𑀓𑀗𑁆𑀕𑀼, 𑀥𑀜𑁆𑀜𑀁.

𑀢𑀺𑀓𑀁 𑀚𑀫𑁆𑀩𑀼𑀬𑀸 𑀨𑀮𑁂. 𑀢𑀢𑁆𑀭 𑀬𑀤𑀸 𑀮𑁄𑀓𑀢𑁄 𑀨𑀮𑁂 𑀯𑀼𑀢𑁆𑀢𑀺, 𑀢𑀤𑀸 𑀚𑀫𑁆𑀩𑀼𑀲𑀤𑁆𑀤𑁄 𑀧𑀓𑀢𑁆𑀬𑀦𑁆𑀢𑀭𑀫𑁂𑀯 𑀨𑀮𑁂 𑀯𑀢𑁆𑀢𑀢𑁂, 𑀬𑀤𑀸 𑀦 𑀨𑀮𑀯𑀼𑀢𑁆𑀢𑀺, 𑀢𑀤𑀸 𑀯𑀺𑀓𑀸𑀭𑁂 𑀅𑀯𑀬𑀯𑁂 𑀯𑀸𑀦𑁄, 𑀚𑀫 𑀅𑀤𑀦𑁂, 𑀩𑀽, 𑀚𑀫𑁆𑀩𑀽, 𑀧𑀓𑀢𑁆𑀬𑀦𑁆𑀢𑀭𑀸𑀨𑀮𑁂 𑀯𑀼𑀢𑁆𑀢𑀺. 𑀚𑀫𑁆𑀩𑀼𑀬𑀸 𑀨𑀮𑀁 𑀚𑀫𑁆𑀩𑀼𑀯𑀁. 𑀚𑀫𑁆𑀩𑀼 𑀘. 𑀮𑁄𑀓𑀢𑁄 𑀏𑀯 𑀨𑀮𑁂𑀧𑀺 𑀯𑀢𑁆𑀢𑀫𑀸𑀦𑀸 𑀳𑀭𑀻𑀝𑀓𑁆𑀬𑀸𑀤𑀬𑁄 𑀲𑀪𑀸𑀯𑀢𑁄 𑀇𑀢𑁆𑀣𑀺𑀬𑀁 𑀪𑀯𑀦𑁆𑀢𑀺 [𑀅𑀫𑀭 𑁧𑁪.𑁧𑁮-𑁨𑁦]. 𑀳𑀭𑀻𑀝𑀓𑀺𑀬𑀸 𑀨𑀮𑀁 𑀳𑀭𑀻𑀝𑀓𑀻, 𑀏𑀯𑀁 𑀓𑁄𑀲𑀸𑀢𑀓𑀻, 𑀲𑀮𑁆𑀮𑀓𑀻, 𑀤𑀓𑁆𑀔𑀸, 𑀓𑀡𑁆𑀟𑀓𑀸𑀭𑀺𑀓𑀸, 𑀲𑁂𑀨𑀸𑀮𑀺𑀓𑀸 𑀇𑀘𑁆𑀘𑀸𑀤𑀺, 𑀧𑀼𑀩𑁆𑀩𑁂 𑀯𑀺𑀬 𑀯𑀺𑀓𑀸𑀭𑀸𑀯𑀬𑀯𑀢𑁆𑀣𑁂𑀲𑀼 𑀧𑀘𑁆𑀘𑀬𑀸𑀪𑀸𑀯𑁄, 𑀅𑀲𑁆𑀲𑀢𑁆𑀣𑀸𑀤𑀺𑀓𑀁 𑀙𑀓𑁆𑀓𑀫𑁂𑀯 𑀢𑀤𑁆𑀥𑀺𑀢𑀦𑁆𑀢𑀁 𑀅𑀲𑁆𑀲𑀢𑁆𑀣𑀸𑀤𑀻𑀦𑀁 𑀨𑀮𑁂 𑀯𑀢𑁆𑀢𑀫𑀸𑀦𑀸𑀦𑀁 𑀦𑀧𑀼𑀁𑀲𑀓𑀁 𑀲𑀺𑀬𑀸 𑀭𑀽𑀧𑀪𑁂𑀤𑁄, 𑀬𑀣𑀸 𑁋 𑀅𑀲𑁆𑀲𑀢𑁆𑀣𑀲𑁆𑀲 𑀨𑀮𑀁 𑀅𑀲𑁆𑀲𑀢𑁆𑀣𑀁, 𑀯𑁂𑀡𑀼𑀦𑁄 𑀨𑀮𑀁 𑀯𑁂𑀡𑀯𑀁, 𑀧𑀺𑀮𑀓𑁆𑀔𑀲𑁆𑀲 𑀨𑀮𑀁 𑀧𑀺𑀮𑀓𑁆𑀔𑀁, 𑀦𑀺𑀕𑁆𑀭𑁄𑀥𑀲𑁆𑀲 𑀨𑀮𑀁 𑀦𑀺𑀕𑁆𑀭𑁄𑀥𑀁, 𑀇𑀗𑁆𑀕𑀼𑀤𑀺𑀬𑀸 𑀨𑀮𑀁 𑀇𑀗𑁆𑀕𑀼𑀤𑀁, 𑀩𑁆𑀭𑀳𑀢𑀺𑀬𑀸 𑀨𑀮𑀁 𑀩𑁆𑀭𑀸𑀳𑀢𑀁, 𑀯𑀺𑀤𑀸𑀭𑀻 𑀅𑀁𑀲𑀼𑀫𑀢𑀻 𑀕𑀫𑁆𑀪𑀭𑀺𑀬𑀸𑀤𑀬𑁄 𑀫𑀽𑀮𑁂, 𑀧𑀼𑀧𑁆𑀨𑁂𑀧𑀺 𑀲𑀮𑀺𑀗𑁆𑀕𑀸 [𑀅𑀫𑀭 𑁧𑁪.𑁧𑁮-𑁨𑁦]. 𑀧𑀸𑀝𑀮𑀸𑀲𑀤𑁆𑀤𑁄 𑀧𑀦 𑀅𑀪𑁂𑀤𑀯𑀢𑁆𑀢𑀺𑀘𑁆𑀙𑀸𑀬𑀁 𑀫𑀽𑀮𑁂 𑀧𑀼𑀧𑁆𑀨𑁂𑀧𑀺 𑀯𑀢𑁆𑀢𑀫𑀸𑀦𑁄 𑀲𑀪𑀸𑀯𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀪𑁂𑀤𑀯𑀢𑁆𑀢𑀺𑀘𑁆𑀙𑀸𑀬𑀁 𑀯𑀺𑀓𑀸𑀭𑁂 𑀅𑀯𑀬𑀯𑁂 𑀯𑀸 𑀡𑀫𑁆𑀳𑀺 𑀧𑀸𑀝𑀮𑀁 [𑀅𑀫𑀭 𑁧𑁪.𑁧𑁮-𑁨𑁦]. 𑀤𑁆𑀯𑀬𑀁 𑀲𑀸𑀔𑀸𑀧𑀮𑁆𑀮𑀯𑀸𑀤𑀺𑀲𑀫𑀼𑀤𑀸𑀬𑀮𑀓𑁆𑀔𑀡𑁂 𑀆𑀪𑁄𑀕𑁂, 𑀯𑀺𑀝 𑀯𑁂𑀥𑀦𑁂, 𑀯𑀺𑀝 𑀅𑀓𑁆𑀓𑁄𑀲𑁂 𑀯𑀸, 𑀅𑀧𑁄, 𑀧𑀲𑁆𑀲 𑀪𑀢𑁆𑀢𑁂 𑀯𑀺𑀝𑀪𑀻, 𑀦𑀤𑀸𑀤𑀺.

𑁫𑁪𑁮. 𑀫𑀽𑀮𑀫𑀸𑀭𑀩𑁆𑀪 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀲𑀸𑀔𑀦𑁆𑀢𑁄 𑀲𑀸𑀔𑀸𑀯𑀥𑀺 𑀢𑀭𑀼𑀲𑁆𑀲 𑀪𑀸𑀕𑁄 𑀔𑀦𑁆𑀥𑁄 𑀦𑀸𑀫, 𑀬𑁄 ‘‘𑀧𑀓𑀡𑁆𑀟𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀔𑀦𑀼 𑀅𑀯𑀤𑀸𑀭𑀡𑁂, 𑀥𑁄, 𑀔𑀦𑁆𑀥𑁄, 𑀔𑀸𑀤 𑀪𑀓𑁆𑀔𑀦𑁂 𑀯𑀸, 𑀓𑁄, ‘‘𑀔𑀸𑀤𑀸𑀫𑀕𑀫𑀸𑀦𑀁 𑀔𑀦𑁆𑀥𑀦𑁆𑀥𑀕𑀦𑁆𑀥𑀸’’𑀢𑀺 𑀔𑀦𑁆𑀥𑀸𑀤𑁂𑀲𑁄, 𑀓𑀮𑁄𑀧𑁄.

𑀭𑀼𑀓𑁆𑀔𑀘𑁆𑀙𑀺𑀤𑁆𑀤𑁂 𑀭𑀼𑀓𑁆𑀔𑀸𑀤𑀻𑀦𑀁 𑀯𑀺𑀯𑀭𑁂 𑀓𑁄𑀝𑀭𑁄. 𑀓𑀼𑀝 𑀙𑁂𑀤𑀦𑁂, 𑀅𑀭𑁄, 𑀓𑁄𑀝𑀭𑁄, 𑀦𑀺𑀓𑁆𑀓𑀼𑀳𑁄𑀧𑀺. 𑀤𑁆𑀯𑁂 𑀲𑀫𑀸. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀓𑀸𑀲𑀢𑁂 𑀅𑀕𑁆𑀕𑀺𑀦𑀸 𑀤𑀺𑀧𑁆𑀧𑀢𑁂𑀢𑀺 𑀓𑀝𑁆𑀞𑀁, 𑀢𑁄, 𑀢𑀲𑁆𑀲 𑀝𑁆𑀞𑁄, 𑀭𑀲𑁆𑀲𑁄 𑀘, 𑀓𑀲 𑀕𑀫𑀦𑁂 𑀯𑀸, 𑀢𑁄, 𑀓𑀝𑁆𑀞𑀁. 𑀤𑀭 𑀯𑀺𑀤𑀸𑀭𑀡𑁂, 𑀡𑀼.

𑁫𑁪𑁯. 𑀢𑀺𑀓𑀁 𑀫𑀽𑀮𑁂. 𑀯𑀼 𑀲𑀁𑀯𑀭𑀡𑁂, 𑀤𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀩𑀼𑀥 𑀕𑀫𑀦𑁂 𑀯𑀸, 𑀅, 𑀥𑀲𑁆𑀲 𑀤𑁄. 𑀫𑀽𑀮 𑀧𑀢𑀺𑀝𑁆𑀞𑀸𑀬𑀁, 𑀡𑁄, 𑀧𑀸𑀤𑀲𑀤𑁆𑀤𑁂𑀦 𑀢𑀧𑁆𑀧𑀭𑀺𑀬𑀸𑀬𑀸 𑀘𑀭𑀡𑀢𑁆𑀣𑀸 𑀲𑀩𑁆𑀩𑁂 𑀲𑀗𑁆𑀕𑀳𑀺𑀢𑀸, 𑀧𑀸𑀤𑀲𑀤𑀺𑀲𑀢𑁆𑀢𑀸 𑀧𑀸𑀤𑁄, 𑀤𑁆𑀯𑀬𑀁 𑀙𑀺𑀦𑁆𑀦𑀲𑁆𑀲 𑀢𑀭𑀼𑀓𑁆𑀔𑀦𑁆𑀥𑀲𑁆𑀲 𑀪𑀽𑀫𑀺𑀝𑁆𑀞𑀪𑀸𑀕𑁂. 𑀲𑀗𑁆𑀓 𑀲𑀗𑁆𑀓𑀸𑀬𑀁, 𑀉, 𑀲𑀓 𑀲𑀢𑁆𑀢𑀺𑀬𑀁 𑀯𑀸, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀔𑀦𑀼 𑀅𑀯𑀤𑀸𑀭𑀡𑁂, 𑀡𑀼, 𑀔𑀸𑀡𑀼. 𑀥𑀼𑀯𑁄𑀧𑀺, 𑀥𑀼𑀯𑀢𑀺 𑀣𑀺𑀭𑀸𑀬𑀢𑁂𑀢𑀺 𑀥𑀼𑀯𑁄, 𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀼, 𑀅, 𑀉𑀯𑀸𑀤𑁂𑀲𑁄.

𑀤𑁆𑀯𑀬𑀁 𑀯𑀺𑀤𑀸𑀭𑀺𑀬𑀸𑀤𑀻𑀦𑀁 𑀓𑀦𑁆𑀤𑁂. 𑀓𑀼𑀬𑀁 𑀧𑀣𑀯𑀺𑀬𑀁 𑀭𑀼𑀳𑀢𑀻𑀢𑀺 𑀓𑀼𑀭𑀼𑀳𑀸𑀝𑀁, 𑀅𑀝𑁄, 𑀓𑀦𑁆𑀤 𑀅𑀯𑁆𑀳𑀸𑀦𑁂, 𑀭𑁄𑀤𑀦𑁂 𑀘, ‘‘𑀓𑀭𑀳𑀸𑀝𑁄’𑀫𑁆𑀩𑀼𑀚𑀓𑀦𑁆𑀤𑁂, 𑀧𑀼𑀧𑁆𑀨𑀭𑀼𑀓𑁆𑀔𑀪𑀻𑀢𑁂𑀲𑀼 𑀘𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀤𑁆𑀯𑀬𑀁 𑀳𑀮𑀸𑀤𑀻𑀦𑀁 𑀓𑀮𑀻𑀭𑁂. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀈𑀭𑁄. 𑀫𑀲 𑀆𑀫𑀲𑀦𑁂, 𑀣𑀓𑁄, 𑀫𑀢𑁆𑀣𑀓𑁂 𑀲𑀻𑀲𑁂 𑀯𑀸 𑀚𑀸𑀢𑁄 𑀫𑀢𑁆𑀣𑀓𑁄.

𑁫𑁫𑁦. 𑀤𑁆𑀯𑁂 𑀲𑀫𑀸. 𑀅𑀪𑀺𑀦𑀯𑀦𑀺𑀕𑁆𑀕𑀢𑀸 𑀆𑀬𑀢𑀸 𑀲𑀓𑀼𑀲𑀼𑀫𑀸, 𑀓𑀼𑀲𑀼𑀫𑀲𑀼𑀜𑁆𑀜𑀸 𑀘 𑀫𑀜𑁆𑀚𑀭𑀻, 𑀯𑀮𑁆𑀮𑀭𑀻 𑀢𑀼 𑀢𑀤𑀜𑁆𑀜𑀸𑀧𑀺, 𑀬𑀣𑀸 𑀢𑀸𑀮𑀯𑀮𑁆𑀮𑀭𑀻, 𑀯𑀮, 𑀯𑀮𑁆𑀮 𑀲𑀁𑀯𑀭𑀡𑁂, 𑀅𑀭𑁄, 𑀦𑀤𑀸𑀤𑀺. 𑀫𑀼𑀜𑁆𑀚𑀬𑁄𑀕𑀢𑁄 𑀫𑀜𑁆𑀚𑀭𑀻, 𑀭𑁄, 𑀦𑀤𑀸𑀤𑀺, 𑀉𑀲𑁆𑀲𑀢𑁆𑀢𑀜𑁆𑀘, 𑀤𑁆𑀯𑁂𑀧𑀺 𑀦𑀸𑀭𑀻. 𑀤𑁆𑀯𑀬𑀁 𑀮𑀢𑀸𑀬𑀁. 𑀯𑀮𑁆𑀮 𑀲𑀁𑀯𑀭𑀡𑁂, 𑀦𑀤𑀸𑀤𑀺. 𑀮𑀢𑀸 𑀯𑀼𑀢𑁆𑀢𑀸, ‘‘𑀮𑀢𑀸 𑀧𑀢𑀸𑀦𑀺𑀦𑀻 𑀯𑀮𑁆𑀮𑀻 𑀫𑀢𑀓𑀻𑀣𑀸’’𑀢𑀺 𑀳𑀮𑀸𑀬𑀼𑀥𑁄.

𑀅𑀓𑁆𑀔𑀦𑁆𑀥𑁄 𑀅𑀧𑁆𑀧𑀓𑁆𑀔𑀡𑁆𑀟𑁄, 𑀩𑀳𑀼𑀧𑀢𑁆𑀢𑀢𑀘𑀤𑀡𑁆𑀟𑀺𑀓𑀸𑀤𑀺. 𑀬𑁄 𑀯𑀸 𑀢𑀦𑀼𑀧𑀓𑀡𑁆𑀟𑁄 𑀯𑀁𑀲𑀦𑀴𑀸𑀤𑀺, 𑀲𑁄 ‘‘𑀣𑀫𑁆𑀩𑁄, 𑀕𑀼𑀫𑁆𑀩𑁄’’𑀢𑀺 𑀘𑁄𑀘𑁆𑀘𑀢𑁂, 𑀣𑀓 𑀲𑀁𑀯𑀭𑀡𑁂, 𑀩𑁄, 𑀓𑀲𑁆𑀲 𑀫𑁄. 𑀕𑀼𑀧 𑀭𑀓𑁆𑀔𑀡𑁂, 𑀩𑁄, 𑀧𑀲𑁆𑀲 𑀫𑁄. 𑀧𑀢𑀸𑀦𑁄 𑀲𑀸𑀔𑀸𑀧𑀢𑁆𑀢𑀘𑀬𑁄, 𑀢𑁂𑀦 𑀬𑀼𑀢𑁆𑀢𑀸 𑀕𑁄𑀭𑀓𑁆𑀔𑀸 𑀢𑀫𑁆𑀩𑀽𑀮𑀺 𑀥𑀺𑀯𑀼𑀲𑀚𑀻𑀫𑀽𑀢 𑀕𑀴𑁄𑀛𑀸𑀤𑀺𑀓𑀸 𑀮𑀢𑀸, 𑀲𑀸 𑀯𑀻𑀭𑀼 𑀦𑀸𑀫, 𑀯𑀺𑀯𑀺𑀥𑁂𑀳𑀺 𑀭𑀼𑀳𑀢𑀻𑀢𑀺 𑀓𑀢𑁆𑀯𑀸, 𑀓𑁆𑀯𑀺, 𑀯𑀻𑀭𑀼, 𑀤𑀻𑀖𑀸𑀤𑀺, 𑀕𑀼𑀫𑁆𑀩𑀺𑀦𑀻𑀧𑀺.

𑁫𑁫𑁧. 𑀧𑀚𑁆𑀚𑁂 𑀧𑀸𑀤𑁂𑀦 𑀦𑀸𑀫𑀁. 𑀬𑀢𑁆𑀭 𑀤𑁆𑀯𑀬𑀁 ‘‘𑀩𑁄𑀥𑀺𑀭𑀼𑀓𑁆𑀔𑁄’’𑀢𑀺 𑀲𑀜𑁆𑀜𑀺𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑀝𑁆𑀞𑀸𑀦𑀪𑀽𑀢𑁂 𑀤𑀼𑀫𑀭𑀸𑀚𑁂, 𑀅𑀜𑁆𑀜𑀢𑁆𑀭 𑀢𑀽𑀧𑀘𑀸𑀭𑀸. 𑀅𑀲𑁆𑀲𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀅𑀲𑁆𑀲𑀢𑁆𑀣𑁄, 𑀞𑀲𑁆𑀲 𑀣𑁄, 𑀤𑁆𑀯𑀺𑀢𑁆𑀢𑀁, 𑀫𑀸𑀭𑀯𑀺𑀚𑀬𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑀸𑀤𑀺𑀓𑁂𑀳𑀺 𑀪𑀕𑀯𑀦𑁆𑀢𑀁 𑀅𑀲𑁆𑀲𑀸𑀲𑁂𑀢𑀻𑀢𑀺 𑀯𑀸 𑀅𑀲𑁆𑀲𑀢𑁆𑀣𑁄, 𑀆𑀧𑀼𑀩𑁆𑀩𑁄 𑀲𑀸𑀲 𑀅𑀦𑀼𑀲𑀺𑀝𑁆𑀞𑀺𑀬𑀁, 𑀢𑁄𑀲𑀦𑁂 𑀘 𑀯𑀢𑁆𑀢𑀢𑀺, 𑀢𑁄, 𑀭𑀲𑁆𑀲𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀩𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀩𑁄𑀥𑀺, 𑀩𑀼𑀥 𑀅𑀯𑀕𑀫𑀦𑁂, 𑀇, 𑀩𑁄𑀥𑀺, 𑀤𑁆𑀯𑀻𑀲𑀼. 𑀘𑀮𑀤𑀮𑁄, 𑀧𑀺𑀧𑁆𑀧𑀮𑁄, 𑀓𑀼𑀜𑁆𑀚𑀭𑀸𑀲𑀦𑁄𑀧𑀺. 𑀤𑁆𑀯𑀬𑀁 𑀩𑀳𑀼𑀧𑀸𑀤𑁂. 𑀅𑀥𑁄𑀪𑀸𑀕𑀁 𑀭𑀼𑀦𑁆𑀥𑀢𑀻𑀢𑀺 𑀦𑀺𑀕𑁆𑀭𑁄𑀥𑁄, 𑀉𑀲𑁆𑀲𑁄, 𑀕𑀸𑀕𑀫𑁄 𑀘. 𑀯𑀝 𑀯𑁂𑀥𑀦𑁂, 𑀯𑀝𑀢𑀻𑀢𑀺, 𑀅.

𑀤𑁆𑀯𑀬𑀁 𑀓𑀩𑀺𑀝𑁆𑀞𑁂. 𑀓𑀯𑀺𑀫𑁆𑀳𑀺 𑀯𑀸𑀦𑀭𑁂 𑀢𑀺𑀝𑁆𑀞𑀢𑀻𑀢𑀺 𑀓𑀩𑀺𑀝𑁆𑀞𑁄 [𑀧𑀸𑀬𑁂𑀦 𑀓𑀧𑀬𑁄 𑀢𑀺𑀝𑁆𑀞𑀦𑁆𑀢𑀺 𑀅𑀢𑁆𑀭 𑀓𑀧𑀺𑀢𑁆𑀣𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁨𑁧)] ‘‘𑀯𑀸𑀦𑀭𑁂 𑀧𑀡𑁆𑀟𑀺𑀢𑁂 𑀓𑀯𑀻’’𑀢𑀺 𑀯𑁄𑀧𑀸𑀮𑀺𑀢𑁄, 𑀢𑀣𑀸 𑀓𑀧𑀺𑀢𑁆𑀣𑁄, 𑀢𑁄, 𑀞𑀲𑁆𑀲 𑀣𑁄 𑀘. 𑀤𑀥𑀺𑀢𑁆𑀣𑁄, 𑀅𑀫𑁆𑀩𑀺𑀮𑀨𑀮𑁄𑀧𑀺. 𑀤𑁆𑀯𑀬𑀁 𑀉𑀤𑀼𑀫𑁆𑀩𑀭𑁂. 𑀬𑀜𑁆𑀜𑀓𑀫𑁆𑀫𑀸𑀦𑀫𑀗𑁆𑀕𑁄 𑀏𑀓𑀗𑁆𑀕𑀢𑁆𑀢𑀸 𑀬𑀜𑁆𑀜𑀗𑁆𑀕𑁄, 𑀤𑀼𑀩𑁆𑀩𑀻 𑀳𑀺𑀁𑀲𑀸𑀬𑀁, 𑀅𑀭𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀏𑀓𑀲𑁆𑀲 𑀩𑀲𑁆𑀲 𑀮𑁄𑀧𑁄 𑀘. 𑀚𑀦𑁆𑀢𑀼𑀨𑀮𑁄 𑀳𑁂𑀫𑀤𑀼𑀤𑁆𑀥𑁄𑀧𑀺.

𑁫𑁫𑁨. 𑀤𑁆𑀯𑀬𑀁 𑀓𑁄𑀯𑀺𑀴𑀸𑀭𑁂.

‘‘𑀲𑀼𑀓𑀧𑀤𑀸𑀘𑁆𑀙𑀭𑁄 𑀘𑀫𑁆𑀧𑁄,

𑀓𑁄𑀯𑀺𑀴𑀸𑀭𑁄 𑀢𑀼 𑀓𑀜𑁆𑀘𑀦𑁄;

𑀧𑀼𑀩𑁆𑀩𑁄 𑀲𑀺𑀢𑁄 𑀧𑀭𑁄 𑀭𑀢𑁆𑀢𑁄,

𑀬𑀼𑀕𑀧𑀢𑁆𑀢𑀸 𑀉𑀪𑁄𑀧𑀺𑀢𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁨𑁨].

𑀳𑀺 𑀭𑀢𑀦𑀓𑁄𑀲𑁄, 𑀓𑀜𑁆𑀚𑀦𑀸𑀮𑀓𑁄𑀧𑁆𑀬𑀢𑁆𑀭. 𑀬𑀼𑀕𑀁 𑀬𑀫𑀓𑀁 𑀧𑀢𑁆𑀢𑀫𑀲𑁆𑀲.

𑀢𑀺𑀧𑀸𑀤𑀁 𑀉𑀤𑁆𑀤𑀸𑀮𑁂. 𑀯𑀸𑀢𑀁 𑀉𑀤𑁆𑀤𑀸𑀮𑀢𑀻𑀢𑀺 𑀉𑀤𑁆𑀤𑀸𑀮𑁄. 𑀲𑀺𑀗𑁆𑀕𑀸𑀭𑀸𑀤𑀻𑀦𑀁 𑀲𑀜𑁆𑀜𑀸𑀯𑀲𑁂𑀦 𑀭𑀼𑀓𑁆𑀔𑀸𑀦𑀁 𑀭𑀸𑀚𑀸 𑀭𑀸𑀚𑀭𑀼𑀓𑁆𑀔𑁄, 𑀯𑀸𑀢𑀭𑁄𑀕𑀳𑀦𑀦𑁂 𑀭𑀸𑀚𑀪𑀽𑀢𑁄 𑀭𑀼𑀓𑁆𑀔𑁄 𑀯𑀸 𑀭𑀸𑀚𑀭𑀼𑀓𑁆𑀔𑁄. 𑀓𑀢𑀸 𑀫𑀸𑀮𑀸 𑀅𑀲𑁆𑀲 𑀧𑀼𑀧𑁆𑀨𑁂𑀳𑀻𑀢𑀺 𑀓𑀢𑀫𑀸𑀮𑁄, 𑀲𑀺𑀗𑁆𑀕𑀸𑀭𑀧𑁆𑀧𑀓𑀸𑀲𑁄. 𑀇𑀦𑁆𑀤𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀢𑀺 𑀯𑀸𑀢𑀳𑀦𑀦𑁂𑀢𑀺 𑀇𑀦𑁆𑀤𑀻𑀯𑀭𑁄, 𑀈𑀯𑀭𑁄, 𑀇𑀦𑁆𑀤𑀺𑀬𑀸 𑀲𑀓𑁆𑀓𑀲𑁆𑀲 𑀪𑀭𑀺𑀬𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀸 𑀇𑀦𑁆𑀤𑀻𑀯𑀭𑁄. 𑀘𑀢𑀼𑀭𑀗𑁆𑀕𑀼𑀮𑁄, 𑀆𑀭𑁂𑀯𑀢𑁄, 𑀲𑀼𑀯𑀡𑁆𑀡𑀓𑁄𑀧𑀺.

𑁫𑁫𑁩. 𑀤𑁆𑀯𑀬𑀁 𑀚𑀫𑁆𑀪𑀻𑀭𑁂, 𑀬𑀲𑁆𑀲 𑀨𑀮𑀫𑀫𑁆𑀩𑀺𑀮𑀁 𑀳𑁄𑀢𑀺. 𑀅𑀫𑁆𑀩𑀺𑀮𑀢𑁆𑀢𑀸 𑀤𑀦𑁆𑀢𑀲𑁆𑀲 𑀲𑀞𑁄 𑀤𑀦𑁆𑀢𑀲𑀞𑁄. 𑀲𑀞 𑀓𑁂𑀢𑀯𑀳𑀺𑀁𑀲𑀸𑀲𑀁𑀓𑀺𑀮𑁂𑀲𑁂𑀲𑀼, 𑀅. 𑀚𑀫𑀼 𑀅𑀤𑀦𑁂, 𑀈𑀭𑁄, 𑀪𑀦𑁆𑀢𑁄 𑀘, 𑀚𑀫𑁆𑀪 𑀕𑀢𑁆𑀢𑀯𑀺𑀦𑀸𑀫𑁂 𑀯𑀸, 𑀚𑀫𑁆𑀪𑁄, 𑀚𑀫𑁆𑀪𑀮𑁄, 𑀚𑀫𑁆𑀩𑀻𑀭𑁄𑀧𑀺. 𑀤𑁆𑀯𑀬𑀁 𑀯𑀭𑀡𑁂. 𑀯𑀭 𑀇𑀘𑁆𑀙𑀸𑀬𑀁, 𑀬𑀼. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀇𑀭𑁄, 𑀦𑀤𑀸𑀤𑀺, 𑀭𑀲𑁆𑀲𑀦𑁆𑀢𑁄. 𑀯𑀭𑀼𑀡𑁄, 𑀢𑀺𑀢𑁆𑀢𑀲𑀸𑀓𑁄𑀧𑀺.

𑀤𑁆𑀯𑀬𑀁 𑀨𑀮𑀳𑀭𑁂. ‘‘𑀓𑁄 𑀅𑀬𑀁, 𑀲𑀼𑀓𑁄’’𑀢𑀺 𑀯𑀺𑀫𑀢𑀼𑀧𑁆𑀧𑀢𑁆𑀢𑀺𑀓𑀭𑀧𑀢𑁆𑀢𑀓𑀼𑀲𑀼𑀫𑀢𑀸𑀬 𑀓𑀺𑀁𑀲𑀼𑀓𑁄. 𑀧𑀸𑀭𑀺 𑀲𑀫𑀼𑀤𑁆𑀤𑁄, 𑀢𑀢𑁆𑀭 𑀪𑀤𑁆𑀤𑁄 𑀧𑀸𑀭𑀺𑀪𑀤𑁆𑀤𑁄, 𑀲𑁄 𑀏𑀯 𑀧𑀸𑀴𑀺𑀪𑀤𑁆𑀤𑁄, 𑀓𑁄𑀯𑀺𑀴𑀸𑀭𑁄, 𑀢𑀁𑀲𑀡𑁆𑀞𑀸𑀦𑀧𑀢𑁆𑀢𑀓𑀼𑀲𑀼𑀫𑀢𑀸𑀬 𑀧𑀸𑀴𑀺𑀪𑀤𑁆𑀤𑁄. 𑀤𑁆𑀯𑀬𑀁 𑀯𑀺𑀤𑀼𑀮𑁂, 𑀬𑁄 𑀅𑀩𑁆𑀪𑀲𑀫𑀬𑁂 𑀧𑀼𑀧𑁆𑀨𑀢𑀺. 𑀯𑀚 𑀕𑀫𑀦𑁂, 𑀉𑀮𑁄. 𑀯𑀻 𑀧𑀚𑀦𑁂, 𑀅𑀲𑁄, 𑀢𑁄𑀦𑁆𑀢𑁄 𑀘, 𑀯𑀺𑀧𑀼𑀩𑁆𑀩𑁄 𑀅𑀢 𑀲𑀸𑀢𑀘𑁆𑀘𑀕𑀫𑀦𑁂 𑀯𑀸, 𑀅𑀲𑁄. 𑀯𑀸𑀦𑀻𑀭𑁄𑀧𑀺.

𑁫𑁫𑁪. 𑀤𑁆𑀯𑀬𑀁 𑀧𑀻𑀢𑀦𑁂, 𑀬𑀲𑁆𑀲 𑀧𑀢𑁆𑀢𑀨𑀮𑀸𑀦𑀺 𑀅𑀫𑁆𑀩𑀺𑀮𑀸𑀦𑀺, 𑀧𑀽𑀕𑀨𑀮𑀧𑁆𑀧𑀫𑀸𑀡𑀜𑁆𑀘 𑀨𑀮𑀁, 𑀲𑀮𑁆𑀮𑀓𑀻𑀭𑀼𑀓𑁆𑀔𑀲𑀡𑁆𑀞𑀸𑀦𑁄 𑀘, 𑀲𑁄 𑀭𑀼𑀓𑁆𑀔𑁄. 𑀅𑀫𑁆𑀩 𑀲𑀤𑁆𑀤𑁂, 𑀅𑀝𑁄, 𑀲𑀓𑀢𑁆𑀣𑁂 𑀓𑁄. 𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀢𑀦𑁄, 𑀧𑀻𑀢𑀺𑀁 𑀯𑀸 𑀢𑀦𑁄𑀢𑀻𑀢𑀺 𑀧𑀻𑀢𑀦𑁄, 𑀲𑀓𑀢𑁆𑀣𑁂 𑀓𑁄. 𑀤𑁆𑀯𑀬𑀁 𑀕𑀼𑀴𑀧𑀼𑀧𑁆𑀨𑁂. 𑀫𑀦 𑀜𑀸𑀡𑁂, 𑀓𑁄, 𑀫𑀥𑁆𑀯𑀸𑀤𑁂𑀲𑁄 𑀘. 𑀫𑀥𑀼𑀦𑀸𑀫𑁄 𑀤𑀼𑀫𑁄 𑀫𑀥𑀼𑀤𑁆𑀤𑀼𑀫𑁄. 𑀤𑁆𑀯𑀬𑀁 ‘‘𑀮𑀫𑁆𑀩𑀽’’𑀢𑀺 𑀔𑁆𑀬𑀸𑀢𑁂. 𑀕𑀼𑀴𑁄 𑀯𑀺𑀬 𑀲𑀸𑀢𑁂𑀦 𑀨𑀮𑀫𑀲𑁆𑀲 𑀕𑀼𑀴𑀨𑀮𑁄. 𑀧𑀻𑀮 𑀧𑀢𑀺𑀢𑁆𑀣𑀫𑁆𑀪𑁂, 𑀉. 𑀤𑁆𑀯𑀬𑀁 𑀢𑀺𑀓𑁆𑀔𑀕𑀦𑁆𑀥𑁂. 𑀲𑁄𑀪𑀁 𑀚𑀦𑁂𑀢𑀻𑀢𑀺 𑀲𑁄𑀪𑀜𑁆𑀚𑀦𑁄, 𑀲𑁄𑀪𑀁 𑀯𑀺𑀲𑀜𑁆𑀚𑀦𑀫𑁂𑀢𑁂𑀦 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀯𑀸 𑀲𑁄𑀪𑀜𑁆𑀚𑀦𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀺𑀭𑀻𑀲𑀧𑀼𑀧𑁆𑀨𑀲𑁆𑀲 𑀭𑀲𑁂𑀦 𑀪𑀸𑀯𑀺𑀢𑀁,

𑀲𑀳𑀲𑁆𑀲𑀯𑀸𑀭𑀁 𑀫𑀭𑀻𑀘𑀁 𑀲𑀺𑀢𑀯𑁆𑀳𑀬𑀁;

𑀏𑀢𑁂𑀦 𑀲𑀫𑀦𑁆𑀢𑀺 𑀯𑀺𑀲𑀸𑀳𑀺 𑀲𑀫𑁆𑀪𑀯𑀸,

𑀓𑀢𑀜𑁆𑀚𑀦𑀲𑁆𑀦𑁂𑀳𑀦𑀧𑀸𑀤𑀦𑀢𑁆𑀣𑀼𑀢𑁄’’𑀢𑀺.

𑀲𑀺 𑀲𑁂𑀯𑀸𑀬𑀁, 𑀯𑀺𑀤𑁆𑀥𑀯𑀺𑀦𑀸𑀲𑀦𑀢𑁆𑀣𑀁 𑀲𑁂𑀯𑀻𑀢𑁂𑀢𑀺 𑀲𑀺𑀕𑁆𑀕𑀼, 𑀕𑀼, 𑀣𑀻. 𑀘𑀺𑀢𑁆𑀢𑀳𑀸𑀭𑀻, 𑀧𑀪𑀜𑁆𑀚𑀦𑁄, 𑀯𑀺𑀤𑁆𑀥𑀯𑀺𑀦𑀸𑀲𑀦𑁄𑀧𑀺.

𑁫𑁫𑁫. 𑀤𑁆𑀯𑀬𑀁 𑀯𑀺𑀲𑀸𑀮𑀢𑀘𑁂, 𑀬𑁄 𑀲𑀭𑀤𑁂 𑀧𑀼𑀧𑁆𑀨𑀢𑀺 𑀧𑀼𑀧𑁆𑀨𑀁. 𑀲𑀢𑁆𑀢𑀧𑀡𑁆𑀡𑀸𑀦𑁆𑀬𑀲𑁆𑀲 𑀲𑀢𑁆𑀢𑀧𑀡𑁆𑀡𑀻 𑀧𑀼𑀫𑁂. 𑀙𑀢𑁆𑀢𑀫𑀺𑀯 𑀧𑀡𑁆𑀡𑀫𑀲𑁆𑀲 𑀙𑀢𑁆𑀢𑀧𑀡𑁆𑀡𑁄. 𑀯𑀺𑀲𑀫𑀘𑁆𑀙𑀤𑁄𑀧𑀺, 𑀲𑀢𑁆𑀢𑀧𑀡𑁆𑀡𑀢𑁆𑀢𑀸 𑀯𑀺𑀲𑀫𑀘𑁆𑀙𑀤𑁄. 𑀤𑁆𑀯𑀬𑀁 𑀭𑀣𑀤𑁆𑀤𑀼𑀫𑁂. 𑀭𑀣𑀁 𑀢𑀦𑁄𑀢𑀺 𑀬𑁂𑀦 𑀢𑀺𑀦𑀺𑀲𑁄, 𑀇𑀲𑁄. 𑀅𑀢𑀺𑀧𑀫𑀼𑀘𑁆𑀘𑀢𑀺 𑀤𑀸𑀳𑀧𑀺𑀢𑁆𑀢𑀫𑀦𑁂𑀦𑁂𑀢𑀺 𑀅𑀢𑀺𑀫𑀼𑀢𑁆𑀢𑀓𑁄. 𑀘𑀺𑀢𑁆𑀢𑀓𑀺𑀧𑀺.

𑀤𑁆𑀯𑀬𑀁 𑀯𑀸𑀢𑀧𑁄𑀣𑁂, 𑀧𑀁 𑀯𑀸𑀢𑀁 𑀮𑀼𑀦𑀸𑀢𑀻𑀢𑀺 𑀧𑀮𑀸𑀲𑁄, 𑀅𑀲𑁄. ‘‘𑀧𑀢𑁆𑀢𑁂 𑀧𑀮𑀸𑀲𑀁 𑀲𑁄 𑀭𑀼𑀓𑁆𑀔𑁂, 𑀧𑀻𑀢𑀳𑀭𑀺𑀢𑀓𑀺𑀁 𑀲𑀼𑀓𑁂’’𑀢𑀺 𑀳𑀺 𑀭𑀼𑀤𑁆𑀤𑁄. 𑀯𑀸𑀢𑀧𑁄𑀣𑁄𑀧𑀺, 𑀯𑀸𑀢𑀲𑁆𑀲 𑀧𑁄𑀣𑁄 𑀯𑀸𑀢𑀧𑁄𑀣𑁄, 𑀧𑀼𑀣 𑀳𑀺𑀁𑀲𑀸𑀬𑀁.

𑀤𑁆𑀯𑀬𑀁 ‘‘𑀧𑀼𑀢𑀻𑀢𑀺’’ 𑀔𑁆𑀬𑀸𑀢𑁂. 𑀳𑀢𑀚𑀦𑁆𑀢𑀼𑀧𑀫𑁄𑀳𑀲𑀗𑁆𑀔𑀸𑀢𑀸𑀭𑀺𑀨𑀮𑀢𑀸𑀬 𑀅𑀭𑀺𑀝𑁆𑀞𑁄, 𑀦𑀺𑀧𑀸𑀢𑀦𑀸 𑀳𑀦𑁆𑀢𑀺𑀲𑁆𑀲 𑀝𑁆𑀞𑁄, 𑀢𑀁𑀭𑁄𑀕𑀸𑀭𑀺𑀯𑀦𑁆𑀢𑀚𑀦𑁂𑀳𑀺 𑀇𑀘𑁆𑀙𑀺𑀢𑀩𑁆𑀩𑀨𑀮𑀢𑁆𑀢𑀸 𑀯𑀸 𑀅𑀭𑀺𑀝𑁆𑀞𑁄, 𑀇𑀲𑀼 𑀇𑀘𑁆𑀙𑀸𑀬𑀁. 𑀨𑀡 𑀕𑀢𑀺𑀬𑀁, 𑀇𑀮𑁄, 𑀅𑀲𑁆𑀲𑁂.

𑁫𑁫𑁬. 𑀢𑀺𑀓𑀁 𑀲𑀺𑀭𑀺𑀨𑀮𑁂. 𑀫𑀮 𑀥𑀸𑀭𑀡𑁂, 𑀊𑀭𑁄. 𑀩𑀺𑀮 𑀪𑁂𑀤𑀦𑁂, 𑀡𑀼𑀯𑁄, 𑀩𑁂𑀮𑀼𑀯𑁄. 𑀮𑀧𑀘𑁆𑀘𑀬𑁂 𑀩𑀺𑀮𑁆𑀮𑁄. 𑀲𑀡𑁆𑀟𑀺𑀮𑁆𑀬𑁄, 𑀲𑁂𑀮𑀼𑀲𑁄𑀧𑀺. ‘‘𑀫𑀼𑀦𑀺𑀧𑁆𑀧𑀪𑁂𑀤𑁂 𑀫𑀸𑀮𑀽𑀭𑁂, 𑀲𑀡𑁆𑀟𑀺𑀮𑁆𑀬𑁄 𑀧𑀸𑀤𑀧𑀦𑁆𑀢𑀭𑁂, 𑀦𑀝𑁂 𑀩𑀺𑀮𑁆𑀮𑁂 𑀘 𑀲𑁂𑀮𑀼𑀲𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁩𑁨] 𑀭𑀪𑀲𑁄.

𑀤𑁆𑀯𑀬𑀁 𑀢𑀼𑀗𑁆𑀕𑁂. 𑀧𑀼𑀫𑀦𑀸𑀫𑁄 𑀦𑀸𑀕𑁄 𑀭𑀼𑀓𑁆𑀔𑁄 𑀧𑀼𑀦𑁆𑀦𑀸𑀕𑁄. ‘‘𑀧𑀼𑀦𑁆𑀦𑀸𑀕𑁂 𑀧𑀼𑀭𑀺𑀲𑁄 𑀢𑀼𑀗𑁆𑀕𑁄, 𑀓𑁂𑀲𑀭𑁄 𑀤𑁂𑀯𑀯𑀮𑁆𑀮𑀪𑁄’’𑀢𑀺 [𑀅𑀫𑀭 𑁧𑁪.𑁨𑁫] 𑀳𑁆𑀬𑀫𑀭𑀲𑀻𑀳𑁄, 𑀤𑀻𑀖𑁄, ‘‘𑀧𑀼𑀫𑀲𑁆𑀲 𑀮𑀺𑀗𑁆𑀕𑀸𑀤𑀻𑀲𑀼 𑀲𑀫𑀸𑀲𑁂𑀲𑀽’’𑀢𑀺 𑀅𑀓𑀸𑀭𑀮𑁄𑀧𑁄 𑀘. 𑀅𑀢𑀺𑀲𑀬𑀧𑀼𑀧𑁆𑀨𑀓𑁂𑀲𑀭𑀯𑀦𑁆𑀢𑀢𑀸𑀬 𑀓𑁂𑀲𑀭𑁄, 𑀓𑀺𑀲 𑀢𑀦𑀼𑀓𑀭𑀡𑁂 𑀯𑀸, 𑀅𑀭𑁄, 𑀧𑀼𑀧𑁆𑀨𑀓𑁂𑀲𑀬𑀼𑀢𑁆𑀢𑀢𑀸𑀬 𑀯𑀸 𑀓𑁂𑀲𑀭𑁄, 𑀭𑁄.

𑀤𑁆𑀯𑀬𑀁 𑀮𑁄𑀤𑁆𑀤𑀫𑀢𑁆𑀢𑁂. 𑀲𑀮 𑀕𑀫𑀦𑀢𑁆𑀣𑁄, 𑀅𑀯𑁄. 𑀭𑀢𑁆𑀢𑀓𑀨𑀧𑀺𑀢𑁆𑀢𑀲𑁄𑀢𑁂 𑀮𑀼𑀦𑀸𑀢𑀻𑀢𑀺 𑀮𑁄𑀤𑁆𑀤𑁄, 𑀤𑁆𑀤𑁄. 𑀢𑀺𑀭𑀺𑀝𑁄, 𑀲𑀸𑀯𑀭𑁄𑀧𑀺. ‘‘𑀲𑀸𑀯𑀭𑁄 𑀅𑀧𑀭𑀸𑀥𑁂 𑀘, 𑀮𑁄𑀤𑁆𑀤𑁂 𑀧𑀸𑀧𑁂 𑀘 𑀓𑀣𑁆𑀬𑀢𑁂’’ [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁩𑁩] 𑀢𑁆𑀬𑀚𑀬𑁄. 𑀤𑁆𑀯𑀬𑀁 𑀥𑀦𑀼𑀧𑀝𑁆𑀝𑁂 𑀨𑀮𑀺𑀦𑀺. 𑀧𑀻 𑀧𑀸𑀦𑁂, 𑀅𑀮𑁄, 𑀈𑀲𑁆𑀲 𑀇𑀬𑀸𑀤𑁂𑀲𑁄. 𑀲𑀦𑁆𑀦𑀓𑀸 𑀢𑀸𑀧𑀲𑀸, 𑀢𑁂𑀲𑀁 𑀤𑀼 𑀤𑀼𑀫𑁄 𑀲𑀦𑁆𑀦𑀓𑀤𑁆𑀤𑀼, ‘‘𑀲𑀦𑁆𑀦𑀓𑀤𑁆𑀤𑀼 𑀘𑀸𑀧𑀧𑀝𑀸, 𑀯𑀭𑀡𑁄 𑀢𑀸𑀧𑀲𑀧𑁆𑀧𑀺𑀬𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁩𑁫] 𑀳𑀺 𑀓𑁄𑀲𑀦𑁆𑀢𑀭𑁂.

𑁫𑁫𑁭. 𑀤𑁆𑀯𑀬𑀁 ‘‘𑀫𑁆𑀳𑀦𑀓𑀽’’𑀇𑀢𑀺 𑀔𑁆𑀬𑀸𑀢𑁂. 𑀮𑀺𑀓𑀼𑀘𑁄 𑀦𑀸𑀫 𑀟𑀳𑀼𑀭𑀼𑀓𑁆𑀔𑁄, 𑀢𑀕𑁆𑀕𑀼𑀡𑀢𑁆𑀢𑀸 𑀮𑀺𑀓𑁄𑀘𑀓𑁄, 𑀲𑀜𑁆𑀜𑀸𑀬𑀁 𑀓𑁄. 𑀅𑀗𑁆𑀓 𑀮𑀓𑁆𑀔𑀡𑁂, 𑀑𑀮𑁄, 𑀅𑀗𑁆𑀓𑁄𑀮𑁄. 𑀤𑁆𑀯𑀬𑀁 𑀓𑀼𑀫𑁆𑀪𑁂. 𑀭𑁄𑀕𑀳𑀭𑀡𑁂 𑀕𑀭𑀼𑀦𑁄𑀧𑀺 𑀯𑁂𑀚𑁆𑀚𑀲𑁆𑀲 𑀕𑀭𑀼 𑀕𑀼𑀕𑁆𑀕𑀼𑀮𑀼, 𑀦𑀺𑀧𑀸𑀢𑀦𑀸. 𑀓𑀼𑀲 𑀙𑁂𑀤𑀦𑁂, 𑀡𑁆𑀯𑀼. 𑀓𑀼𑀫𑁆𑀪𑁄, 𑀧𑀼𑀭𑁄𑀧𑀺.

‘‘𑀭𑀸𑀲𑀺𑀪𑁂𑀤𑁂 𑀕𑀚𑀫𑀼𑀤𑁆𑀥𑀁𑀲𑁂,

𑀓𑀼𑀫𑁆𑀪𑀓𑀡𑁆𑀡𑀲𑀼𑀓𑁂 𑀖𑀝𑁂;

𑀓𑀸𑀫𑀼𑀓𑁂 𑀯𑀸𑀭𑀦𑀸𑀭𑀺𑀬𑀜𑁆𑀘,

𑀓𑀼𑀫𑁆𑀪𑁄 𑀓𑁆𑀮𑀻𑀯𑀦𑁆𑀢𑀼 𑀯𑀕𑁆𑀕𑀼𑀮𑀼𑀫𑁆𑀳𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁩𑁪].

𑀭𑀪𑀲𑁄. 𑀧𑀼𑀭 𑀅𑀕𑁆𑀕𑀕𑀫𑀦𑁂, 𑀡𑁄, 𑀧𑀼𑀭𑁄.

𑀤𑁆𑀯𑀬𑀁 𑀅𑀫𑁆𑀩𑁂. 𑀅𑀫 𑀕𑀢𑀺𑀬𑀁, 𑀩𑁄, 𑀅𑀫𑁆𑀩 𑀲𑀤𑁆𑀤𑁂 𑀯𑀸, 𑀅. 𑀘𑀼𑀢𑀺 𑀆𑀲𑁂𑀘𑀦𑁂, 𑀭𑀓𑁆𑀔𑀡𑁂 𑀘, 𑀅, 𑀘𑀼 𑀘𑀯𑀦𑁂 𑀯𑀸, 𑀢𑁄, 𑀤𑀻𑀖𑀸𑀤𑀺. 𑀭𑀲𑀸𑀮𑁄𑀧𑀺, 𑀭𑀲𑀁 𑀮𑀸𑀢𑀻𑀢𑀺 𑀭𑀲𑀸𑀮𑁄, 𑀤𑀻𑀖𑁄. 𑀏𑀲𑁄 𑀅𑀫𑁆𑀩𑁄 𑀲𑀼𑀕𑀦𑁆𑀥𑀯𑀸 𑀅𑀢𑀺𑀲𑀬𑀕𑀦𑁆𑀥𑀬𑀼𑀢𑁆𑀢𑁄 𑀲𑀫𑀸𑀦𑁄 ‘‘𑀲𑀳𑁄, 𑀲𑀳𑀓𑀸𑀭𑁄’’𑀢𑀺 𑀘𑁄𑀘𑁆𑀘𑀢𑁂. 𑀲𑀳 𑀲𑀢𑁆𑀢𑀺𑀬𑀁, 𑀲𑀼𑀕𑀦𑁆𑀥𑀁 𑀓𑀢𑁆𑀢𑀼𑀁 𑀲𑀳𑀢𑀻𑀢𑀺 𑀲𑀳𑁄, 𑀅. 𑀲𑀳𑀦𑀁 𑀲𑀳𑁄, 𑀢𑀁 𑀓𑀭𑁄𑀢𑀻𑀢𑀺 𑀲𑀳𑀓𑀸𑀭𑁄, 𑀳𑀸 𑀯𑀸 𑀧𑀫𑀼𑀤𑀸, 𑀢𑀸𑀬 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀳𑁄, 𑀲𑀳𑀁 𑀲𑀫𑀼𑀤𑀁 𑀓𑀭𑁄𑀢𑀻𑀢𑀺 𑀲𑀳𑀓𑀸𑀭𑁄.

𑁫𑁫𑁮. 𑀤𑁆𑀯𑀬𑀁 𑀲𑁂𑀢𑀫𑁆𑀩𑁂. 𑀧𑀼𑀡𑁆𑀟 𑀧𑀼𑀡𑁆𑀟𑀦𑁂. 𑀧𑀼𑀡𑁆𑀟 𑀔𑀡𑁆𑀟𑀦𑁂𑀢𑁆𑀬𑁂𑀓𑁂, 𑀡𑁆𑀯𑀼, 𑀅𑀲𑁆𑀲𑀻, 𑀅𑀭𑀸𑀕𑀫𑁄 𑀘. 𑀲𑁂𑀢𑀯𑀡𑁆𑀡𑁄 𑀅𑀫𑁆𑀩𑁄 𑀲𑁂𑀢𑀫𑁆𑀩𑁄. 𑀤𑁆𑀯𑀬𑀁 𑀩𑀳𑀼𑀯𑀸𑀭𑀓𑁂, 𑀬𑀲𑁆𑀲 𑀨𑀮𑀸𑀦𑀺 𑀅𑀢𑀺𑀧𑀺𑀘𑁆𑀙𑀺𑀮𑀸𑀦𑀺. 𑀲𑀺 𑀩𑀦𑁆𑀥𑀦𑁂, 𑀮𑀼, 𑀲𑀮 𑀕𑀫𑀦𑀢𑁆𑀣𑁄 𑀯𑀸, 𑀉, 𑀅𑀲𑁆𑀲𑁂. 𑀧𑀺𑀘𑁆𑀙𑀺𑀮𑀢𑁆𑀢𑀸 𑀩𑀳𑀽𑀦𑀺 𑀯𑀸𑀭𑀻𑀦𑀺 𑀬𑀲𑁆𑀫𑀺𑀁 𑀩𑀳𑀼𑀯𑀸𑀭𑀓𑁄, 𑀲𑀜𑁆𑀜𑀸𑀬𑀁 𑀓𑁄. 𑀲𑀻𑀢𑁄, 𑀉𑀤𑁆𑀤𑀸𑀮𑁄, 𑀓𑀨𑀮𑁄𑀧𑀺.

𑀤𑁆𑀯𑀬𑀁 𑀓𑀸𑀲𑁆𑀫𑀭𑀺𑀬𑀁. 𑀲𑀺𑀭𑀺𑀫𑀦𑁆𑀢𑀸𑀦𑀺 𑀧𑀡𑁆𑀡𑀸𑀦𑀺 𑀬𑀲𑁆𑀲𑀸 𑀲𑁂𑀧𑀡𑁆𑀡𑀻, 𑀦𑀤𑀸𑀤𑀺, 𑀲𑀺𑀭𑀻𑀲𑀤𑁆𑀤𑀲𑁆𑀲 𑀲𑁂. 𑀓𑀲𑁆𑀫𑀻𑀭𑀤𑁂𑀲𑀚𑀢𑁆𑀢𑀸 𑀓𑀸𑀲𑁆𑀫𑀭𑀻, 𑀓𑀸𑀲 𑀤𑀺𑀢𑁆𑀢𑀺𑀬𑀁 𑀯𑀸, 𑀫𑀭𑁄, 𑀦𑀤𑀸𑀤𑀺. 𑀫𑀥𑀼𑀧𑀡𑁆𑀡𑀻, 𑀪𑀤𑁆𑀤𑀧𑀡𑁆𑀡𑀻𑀧𑀺. 𑀤𑁆𑀯𑀬𑀁 𑀲𑀓𑀡𑁆𑀝𑀓𑀫𑁆𑀩𑀺𑀮𑀨𑀮𑀭𑀼𑀓𑁆𑀔𑁂. 𑀲𑀓𑀡𑁆𑀝𑀓𑀢𑁆𑀢𑀸 𑀓𑀼𑀘𑁆𑀙𑀺𑀢𑀁 𑀮𑀸𑀢𑀻𑀢𑀺 𑀓𑁄𑀮𑀻, 𑀦𑀤𑀸𑀤𑀺. 𑀯𑀤 𑀣𑁂𑀭𑀺𑀬𑁂, 𑀅𑀭𑁄, 𑀦𑀤𑀸𑀤𑀺. 𑀓𑀼𑀯𑀮𑀻, 𑀓𑀓𑁆𑀓𑀦𑁆𑀥𑀽𑀧𑀺.

𑁫𑁫𑁯. 𑀤𑁆𑀯𑀬𑀁 𑀢𑀲𑁆𑀲𑀸 𑀓𑁄𑀮𑀺𑀬𑀸 𑀨𑀮𑁂. 𑀓𑁄𑀮𑀺𑀬𑀸 𑀨𑀮𑀁 𑀓𑁄𑀮𑀁. 𑀩𑀤𑀭𑀺𑀬𑀸 𑀅𑀬𑀁 𑀅𑀯𑀬𑀯𑁄 𑀩𑀤𑀭𑁄. 𑀓𑀼𑀯𑀮𑀁, 𑀨𑁂𑀦𑀺𑀮𑀁, 𑀲𑁄𑀯𑀻𑀭𑀫𑁆𑀧𑀺. ‘‘𑀲𑁄𑀢𑀜𑁆𑀚𑀦𑁂 𑀢𑀼 𑀲𑁄𑀯𑀻𑀭𑀁, 𑀓𑀜𑁆𑀚𑀺𑀓𑁂 𑀩𑀤𑀭𑁂𑀧𑀺 𑀘𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁩𑁬] 𑀭𑀪𑀲𑁄. 𑀤𑁆𑀯𑀬𑀁 𑀅𑀲𑁆𑀲𑀢𑁆𑀣𑀓𑀼𑀮𑀲𑀫𑁆𑀪𑀽𑀢𑁂 𑀭𑀼𑀓𑁆𑀔𑀧𑀸𑀲𑀸𑀡𑀸𑀤𑀻𑀲𑀼 𑀲𑀜𑁆𑀚𑀸𑀢𑀭𑀼𑀓𑁆𑀔𑁂. 𑀧𑀺𑀮𑀁 𑀧𑀭𑀁 𑀦𑀺𑀲𑁆𑀲𑀬𑀪𑀽𑀢𑀁 𑀓𑀲𑀢𑀻𑀢𑀺 𑀧𑀺𑀮𑀓𑁆𑀔𑁄, 𑀓𑀲 𑀯𑀺𑀮𑁂𑀔𑀦𑁂, 𑀲𑀲𑁆𑀲 𑀔𑀢𑁆𑀢𑀸𑀤𑀺 𑀦𑀺𑀧𑀸𑀢𑀦𑀸. 𑀅𑀔𑀸𑀤𑀦𑀻𑀬𑀨𑀮𑀢𑀸𑀬 𑀯𑀺𑀭𑀽𑀧𑀁 𑀨𑀮𑀫𑀲𑁆𑀲𑀢𑁆𑀣𑀻𑀢𑀺 𑀧𑀺𑀧𑁆𑀨𑀮𑀻, 𑀈, 𑀦𑀤𑀸𑀤𑀺, 𑀯𑀺𑀲𑁆𑀲𑀧𑀺 𑀘.

𑀤𑁆𑀯𑀬𑀁 𑀢𑁄𑀬𑀸𑀤𑀺𑀯𑀸𑀧𑀺𑀦𑀺𑀬𑀁, 𑀬𑀲𑁆𑀲𑀸 𑀫𑀽𑀮𑀁 𑀫𑀳𑀸𑀧𑀜𑁆𑀘𑀫𑀽𑀮𑁂 𑀧𑀯𑀺𑀝𑁆𑀞𑀁. 𑀧𑀝 𑀕𑀫𑀦𑁂, 𑀅𑀮𑁄, 𑀦𑀤𑀸𑀤𑀺, 𑀧𑀸𑀝𑀮𑀻, 𑀧𑀸𑀝𑀮𑀸𑀧𑀺. 𑀓𑀡𑁆𑀳𑀁 𑀧𑀼𑀧𑁆𑀨𑀯𑀡𑁆𑀝𑀁 𑀬𑀲𑁆𑀲𑀸 𑀲𑀸 𑀓𑀡𑁆𑀳𑀯𑀡𑁆𑀝𑀸, 𑀓𑀸𑀲𑁆𑀫𑀭𑀺𑀬𑀫𑁆𑀧𑀺. 𑀅𑀮𑀺𑀧𑁆𑀧𑀺𑀬𑀁, 𑀢𑀫𑁆𑀩𑀧𑀼𑀧𑁆𑀨𑀺𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀕𑀦𑁆𑀥𑀺𑀮𑁂. 𑀲𑀸𑀤𑀼𑀨𑀮𑀢𑀸𑀬 𑀲𑀸𑀤𑀼 𑀘 𑀲𑁄 𑀓𑀡𑁆𑀝𑀲𑀳𑀺𑀢𑀢𑀸𑀬 𑀓𑀡𑁆𑀝𑁄 𑀘𑁂𑀢𑀺 𑀲𑀸𑀤𑀼𑀓𑀡𑁆𑀝𑁄. 𑀲𑀓𑀡𑁆𑀝𑀓𑀢𑀸𑀬 𑀅𑀢𑁆𑀢𑀸𑀦𑀁 𑀯𑀺𑀭𑀽𑀧𑀁 𑀓𑀭𑁄𑀢𑀻𑀢𑀺 𑀯𑀺𑀓𑀗𑁆𑀓𑀢𑁄, 𑀤𑁆𑀯𑀺𑀢𑁆𑀢𑀁, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘.

𑁫𑁬𑁦. 𑀘𑀢𑀼𑀓𑁆𑀓𑀁 𑀢𑀺𑀦𑁆𑀤𑀼𑀓𑁂. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀉𑀓𑁄, 𑀤𑀦𑁆𑀢𑁄 𑀘. 𑀢𑀺𑀤𑀺 𑀳𑀺𑀁𑀲𑀸𑀬𑀁 𑀯𑀸, 𑀉, 𑀲𑀜𑁆𑀜𑀸𑀬𑀁 𑀓𑁄. 𑀓𑀸𑀴𑁄 𑀔𑀦𑁆𑀥𑁄 𑀧𑀓𑀡𑁆𑀟𑁄 𑀬𑀲𑁆𑀲𑀸𑀢𑀺. 𑀢𑀺𑀫 𑀅𑀤𑁆𑀤𑀪𑀸𑀯𑁂, 𑀊𑀲𑁄, 𑀲𑀓𑀢𑁆𑀣𑁂 𑀓𑁄, 𑀯𑀭𑀦𑁆𑀢𑁄 𑀘. 𑀉𑀧𑀘𑁆𑀘𑀬𑁂 𑀢𑀺𑀫𑁆𑀩𑀭𑀼.

𑀤𑁆𑀯𑀬𑀁 𑀢𑀫𑁆𑀩𑀨𑀮𑁂. 𑀇𑀭𑀸𑀯𑀢𑀻 𑀦𑀤𑀻, 𑀧𑀞𑀫𑀓𑀸𑀮𑁂 𑀢𑀲𑁆𑀲𑀸 𑀢𑀻𑀭𑁂 𑀚𑀸𑀢𑁄 𑀏𑀭𑀸𑀯𑀢𑁄. 𑀦𑀸𑀭𑀁 𑀯𑀼𑀘𑁆𑀘𑀢𑀺 𑀦𑀻𑀭𑀁, 𑀢𑀁 𑀕𑀘𑁆𑀙𑀢𑀻𑀢𑀺 𑀦𑀸𑀭𑀗𑁆𑀕𑁄. 𑀤𑁆𑀯𑀬𑀁 𑀫𑀓𑁆𑀓𑀝𑀢𑀺𑀦𑁆𑀤𑀼𑀓𑁂. 𑀓𑀼𑀮 𑀲𑀗𑁆𑀔𑁆𑀬𑀸𑀦𑁂, 𑀡𑁆𑀯𑀼. 𑀓𑀸𑀓𑁂𑀦𑁆𑀤𑀼, 𑀓𑀸𑀓𑀮𑀼𑀓𑁄𑀧𑀺.

𑁫𑁬𑁧. 𑀢𑀺𑀓𑀁 𑀓𑀤𑀫𑁆𑀩𑁂. 𑀓𑀁 𑀯𑀸𑀢𑀁 𑀤𑀫𑁂𑀢𑀻𑀢𑀺 𑀓𑀤𑀫𑁆𑀩𑁄, 𑀩𑁄. 𑀧𑀺𑀦𑁂𑀢𑀻𑀢𑀺 𑀧𑀺𑀬𑀓𑁄, 𑀡𑁆𑀯𑀼, 𑀇𑀬𑀸𑀤𑁂𑀲𑁄. 𑀦𑀬𑀢𑀺 𑀫𑀼𑀤𑀁 𑀦𑀻𑀧𑁄, 𑀧𑁄. 𑀤𑁆𑀯𑀬𑀁, 𑀯𑀺𑀤𑀭𑀼𑀓𑁆𑀔𑁂, 𑀬𑀲𑁆𑀲 𑀦𑀺𑀬𑁆𑀬𑀸𑀲𑁂𑀦 𑀧𑁂𑀴𑀸𑀤𑀬𑁄 𑀮𑀺𑀫𑁆𑀧𑀦𑁆𑀢𑀺. 𑀪𑀮, 𑀪𑀮𑁆𑀮 𑀧𑀭𑀺𑀪𑀸𑀲𑀦𑀳𑀺𑀁𑀲𑀸𑀤𑀸𑀦𑁂𑀲𑀼, 𑀦𑀤𑀸𑀤𑀺, 𑀅𑀜𑁆𑀜𑀢𑁆𑀭 𑀢𑁄, 𑀓𑀦𑁆𑀢𑁄 𑀘, 𑀪𑀮𑁆𑀮𑀸𑀢𑀓𑁄, 𑀢𑀻𑀲𑁆𑀯𑀬𑀁. 𑀅𑀭𑀼𑀓𑀭𑁄, 𑀅𑀕𑁆𑀕𑀺𑀫𑀼𑀔𑁄𑀧𑀺.

𑀤𑁆𑀯𑀬𑀁 ‘‘𑀧𑀸𑀯𑀼𑀲𑀸’’𑀇𑀢𑀺 𑀔𑁆𑀬𑀸𑀢𑁂. 𑀛𑀧 𑀤𑀸𑀳𑁂, 𑀡𑁆𑀯𑀼. 𑀧𑀲𑁆𑀲 𑀯𑁄. 𑀧𑀘 𑀧𑀸𑀓𑁂, 𑀉𑀮𑁄. 𑀤𑁆𑀯𑀬𑀁 𑀲𑀺𑀭𑀺𑀫𑀢𑀺, 𑀬𑀲𑁆𑀲 𑀨𑀮𑀸𑀦𑀺 𑀫𑀭𑀻𑀘𑀧𑁆𑀧𑀫𑀸𑀡𑀸𑀦𑀺, 𑀅𑀫𑁆𑀩𑀺𑀮𑀸𑀦𑀺 𑀘. 𑀢𑀺𑀮 𑀕𑀫𑀦𑁂, 𑀡𑁆𑀯𑀼. 𑀔𑀼𑀭 𑀙𑁂𑀤𑀦𑁂, 𑀡𑁆𑀯𑀼.

𑁫𑁬𑁨. 𑀤𑁆𑀯𑀬𑀁 𑀅𑀫𑁆𑀩𑀺𑀮𑀺𑀓𑀸𑀬𑀁. 𑀘𑀺 𑀘𑀬𑀦𑁂, 𑀘𑁄, 𑀘𑀺𑀘 𑀆𑀤𑀸𑀦𑀲𑀁𑀯𑀭𑀡𑁂𑀲𑀼 𑀯𑀸. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀅𑀫𑁆𑀩𑀺𑀮𑀭𑀲𑀁 𑀢𑀦𑁄𑀢𑀻𑀢𑀺 𑀢𑀺𑀦𑁆𑀢𑀺𑀡𑀻, 𑀤𑁆𑀯𑀺𑀢𑁆𑀢𑀫𑀺𑀢𑁆𑀢𑀁, 𑀡𑀢𑁆𑀢𑀜𑁆𑀘, 𑀦𑀤𑀸𑀤𑀺. 𑀤𑁆𑀯𑀬𑀁 𑀅𑀫𑁆𑀩𑀺𑀮𑀗𑁆𑀓𑀼𑀭𑀨𑀮𑁂 𑀲𑁂𑀢𑀭𑀼𑀓𑁆𑀔𑁂. 𑀕𑀤𑁆𑀭𑀪𑀡𑁆𑀟𑀧𑁆𑀧𑀫𑀸𑀡𑀨𑀮𑀢𑁆𑀢𑀸 𑀕𑀤𑁆𑀤𑀪𑀡𑁆𑀟𑁄, 𑀭𑀮𑁄𑀧𑁄. 𑀓𑀧𑀺 𑀘𑀮𑀦𑁂, 𑀢𑀦𑁄, 𑀤𑀻𑀖𑁄 𑀆𑀕𑀫𑀲𑁆𑀲. 𑀓𑀦𑁆𑀤𑀭𑀸𑀮𑁄, 𑀧𑀺𑀮𑀓𑁆𑀔𑁄𑀧𑀺.

𑀢𑀺𑀓𑀁 𑀲𑀸𑀮𑀭𑀼𑀓𑁆𑀔𑁂. 𑀲𑀮 𑀕𑀫𑀦𑁂, 𑀡𑁄, 𑀲𑀸𑀭𑀯𑀦𑁆𑀢𑀢𑀸𑀬 𑀯𑀸 𑀲𑀸𑀮𑁄. 𑀅𑀲𑁆𑀲𑀓𑀡𑁆𑀡𑀲𑀤𑀺𑀲𑀧𑀡𑁆𑀡𑀢𑀸𑀬 𑀅𑀲𑁆𑀲𑀓𑀡𑁆𑀡𑁄. 𑀲𑀦𑁆𑀚 𑀲𑀗𑁆𑀕𑁂, 𑀅, 𑀲𑀚𑁆𑀚 𑀅𑀤𑀦𑁂 𑀯𑀸, 𑀅. 𑀤𑁆𑀯𑀬𑀁 𑀦𑀤𑀻𑀲𑀚𑁆𑀚𑁂. 𑀅𑀚𑁆𑀚 𑀅𑀚𑁆𑀚𑀦𑁂, 𑀉𑀦𑁄. 𑀓𑀓 𑀮𑁄𑀮𑁆𑀬𑁂, 𑀉𑀥𑁄. 𑀯𑀻𑀭𑀢𑀭𑀼, 𑀇𑀦𑁆𑀤𑀤𑀼𑀫𑁄𑀧𑀺.

𑁫𑁬𑁩. 𑀢𑀺𑀓𑀁 𑀫𑀼𑀘𑀮𑀺𑀦𑁆𑀤𑁂. 𑀘𑀼𑀮 𑀦𑀺𑀫𑀼𑀚𑁆𑀚𑀦𑁂. 𑀫𑀼𑀘𑀮 𑀲𑀗𑁆𑀕𑀸𑀢𑁂, 𑀇𑀦𑁆𑀤𑁄. 𑀦𑀻𑀧𑁄 𑀓𑀤𑀫𑁆𑀩𑁂𑀧𑀺. 𑀢𑀺𑀓𑀁 𑀧𑀻𑀢𑀲𑀸𑀮𑁂. 𑀧𑀺𑀬𑀓𑁄 𑀓𑀤𑀫𑁆𑀩𑁂𑀧𑀺. 𑀅𑀲 𑀪𑀓𑁆𑀔𑀦𑁂, 𑀬𑀼, 𑀧𑀻𑀢𑀧𑀼𑀧𑁆𑀨𑁄 𑀲𑀸𑀮𑁄 𑀭𑀼𑀓𑁆𑀔𑁄 𑀧𑀻𑀢𑀲𑀸𑀮𑁄. 𑀩𑀦𑁆𑀥𑀽𑀓𑀧𑀼𑀧𑁆𑀨𑁄, 𑀚𑀻𑀯𑀓𑁄𑀧𑀺.

𑀤𑁆𑀯𑀬𑀁 𑀛𑀸𑀝𑀮𑀺𑀬𑀁. 𑀕𑀸𑀯𑁄 𑀮𑀺𑀳𑀦𑁆𑀢𑀻𑀢𑀺 𑀕𑁄𑀮𑀻𑀲𑁄, 𑀳𑀲𑁆𑀲 𑀲𑁄. 𑀛𑀝 𑀲𑀗𑁆𑀖𑀸𑀢𑁂, 𑀅𑀮𑁄. 𑀛𑀸𑀝𑀮𑁄, 𑀧𑀸𑀝𑀮𑀺𑀧𑀼𑀧𑁆𑀨𑀸𑀓𑀸𑀭𑁄 𑀤𑀻𑀖𑀨𑀮𑁄 𑀭𑀼𑀓𑁆𑀔𑁄. 𑀧𑀫𑁄𑀓𑁆𑀔𑁄𑀧𑀺.

𑁫𑁬𑁪. 𑀤𑁆𑀯𑀬𑀁 𑀭𑀸𑀚𑀸𑀬𑀢𑀦𑁂, 𑀔𑀻𑀭𑀯𑀦𑁆𑀢𑀢𑀸𑀬 𑀔𑀻𑀭𑀺𑀓𑀸. 𑀤𑁂𑀯𑀭𑀸𑀚𑀲𑁆𑀲 𑀦𑀺𑀯𑀸𑀲𑀦𑀝𑁆𑀞𑀸𑀦𑀪𑀽𑀢𑀢𑁆𑀢𑀸 𑀭𑀸𑀚𑀸𑀬𑀢𑀦𑀁, 𑀧𑀺𑀬𑀸𑀮𑁂𑀧𑀺. 𑀤𑁆𑀯𑀬𑀁 𑀓𑀧𑁆𑀨𑀮𑁂. 𑀓𑀼𑀘𑁆𑀙𑀺𑀢𑁂𑀦 𑀨𑀮𑁂𑀦 𑀉𑀫𑁆𑀪𑀢𑀺 𑀧𑀽𑀭𑀢𑀻𑀢𑀺 𑀓𑀼𑀫𑁆𑀪𑁄. 𑀓𑀼𑀘𑁆𑀙𑀺𑀢𑁂𑀦 𑀫𑁄𑀤𑀢𑀻𑀢𑀺 𑀓𑀼𑀫𑀼𑀤𑀺𑀓𑀸, 𑀡𑁆𑀯𑀼.

𑀤𑁆𑀯𑀬𑀁 𑀕𑀼𑀯𑀸𑀓𑀭𑀼𑀓𑁆𑀔𑁂, 𑀬𑀲𑁆𑀲 𑀨𑀮𑁂𑀦 𑀢𑀫𑁆𑀩𑀽𑀮𑀦𑀸𑀫𑀁 𑀚𑀸𑀬𑀢𑀺. 𑀧𑀽𑀚 𑀧𑀽𑀚𑀸𑀬𑀁, 𑀡𑁄, 𑀚𑀲𑁆𑀲 𑀕𑁄. 𑀓𑀫𑀼 𑀇𑀘𑁆𑀙𑀸𑀬𑀁, 𑀳𑁂𑀢𑀼𑀓𑀢𑁆𑀢𑀭𑀺 𑀡𑁆𑀯𑀼. 𑀔𑀧𑀼𑀭𑁄𑀧𑀺. 𑀤𑁆𑀯𑀬𑀁 𑀮𑁄𑀳𑀺𑀢𑀮𑁄𑀤𑁆𑀤𑁂. 𑀧𑀝𑁆𑀝𑀺𑀇𑀢𑁆𑀬𑀸𑀔𑁆𑀬𑀸 𑀬𑀲𑁆𑀲 𑀧𑀝𑁆𑀝𑀺. ‘‘𑀧𑀤𑁆𑀥𑀻’’𑀢𑀺𑀧𑀺 𑀧𑀸𑀞𑁄. 𑀅𑀲𑁆𑀫𑀺𑀁 𑀧𑀓𑁆𑀔𑀺𑀢𑁆𑀢𑁂 𑀮𑀸𑀔𑀸 𑀭𑀢𑁆𑀢𑀸 𑀪𑀯𑀢𑀻𑀢𑀺 𑀮𑀸𑀔𑀸𑀧𑀲𑀸𑀤𑀦𑁄. 𑀓𑀫𑀼𑀓𑁄𑀧𑀺.

𑁫𑁬𑁫. 𑀤𑁆𑀯𑀬𑀁 𑀇𑀗𑁆𑀕𑀼𑀤𑀺𑀬𑀁, 𑀅𑀬𑀜𑁆𑀘 𑀓𑀡𑁆𑀝𑀓𑀻 𑀩𑀸𑀳𑀼𑀮𑁆𑀬𑁂𑀦 𑀫𑀚𑁆𑀛𑀺𑀫𑀤𑁂𑀲𑁂 𑀚𑀸𑀬𑀢𑁂. 𑀇𑀗𑁆𑀕 𑀕𑀫𑀦𑀢𑁆𑀣𑁄, 𑀇𑀤𑁄, 𑀇𑀲𑁆𑀲𑀼, 𑀦𑀤𑀸𑀤𑀺. 𑀢𑀸𑀧𑀲𑁄 𑀧𑀬𑀼𑀚𑁆𑀚𑀫𑀸𑀦𑀨𑀮𑀓𑀢𑀸𑀬 𑀢𑀸𑀧𑀲𑀢𑀭𑀼. 𑀤𑁆𑀯𑀬𑀁 ‘‘𑀪𑀼𑀚𑀧𑀢𑁆𑀢𑁄’’𑀇𑀢𑀺𑀔𑁆𑀬𑀸𑀢𑁂 𑀲𑀼𑀦𑁆𑀤𑀭𑀢𑀘𑁂 𑀭𑀼𑀓𑁆𑀔𑁂, 𑀬𑀲𑁆𑀲 𑀢𑀘𑁂 𑀫𑀦𑁆𑀢𑀓𑁆𑀔𑀭𑀸𑀦𑀺 𑀮𑀺𑀔𑀦𑁆𑀢𑀺. 𑀪𑀼𑀚𑁄 𑀧𑀸𑀡𑀺, 𑀢𑀁𑀲𑀤𑀺𑀲𑀧𑀢𑁆𑀢𑀢𑀸𑀬 𑀪𑀼𑀚𑀧𑀢𑁆𑀢𑁄. 𑀫𑀦𑁆𑀢𑀮𑁂𑀔𑀓𑁂𑀳𑀺 𑀆𑀪𑀼𑀚𑀺𑀢𑀢𑀘𑀯𑀦𑁆𑀢𑀢𑀸𑀬 𑀆𑀪𑀼𑀚𑀻. 𑀪𑀽𑀚𑁄, 𑀘𑀫𑁆𑀫𑀻, 𑀫𑀼𑀤𑀼𑀢𑁆𑀢𑀘𑁄𑀧𑀺.

𑀤𑁆𑀯𑀬𑀁 𑀲𑀺𑀫𑁆𑀩𑀮𑀺𑀬𑀁. 𑀧𑀺𑀘𑁆𑀙𑀸𑀬𑁄𑀕𑀸 𑀧𑀺𑀘𑁆𑀙𑀺𑀮𑀸, 𑀇𑀮𑁄. 𑀲𑀫𑁆𑀩 𑀫𑀡𑁆𑀟𑀮𑁂, 𑀅𑀮𑀺, 𑀅𑀲𑁆𑀲𑀺. ‘‘𑀧𑀺𑀘𑁆𑀙𑀺𑀮𑀸 𑀧𑀽𑀭𑀡𑀻 𑀫𑁄𑀘𑀸, 𑀣𑀺𑀭𑀸𑀬𑀼 𑀲𑀺𑀫𑁆𑀩𑀮𑀻 𑀤𑁆𑀯𑀺𑀲𑀽’’𑀢𑀺 [𑀅𑀫𑀭 𑁧𑁪.𑁪𑁬] 𑀅𑀫𑀭𑀓𑁄𑀲𑁄. 𑀤𑁆𑀯𑀬𑀁 𑀧𑀺𑀘𑁆𑀙𑀺𑀮𑀸𑀓𑀸𑀭𑁂 𑀓𑀡𑁆𑀝𑀓𑀲𑀳𑀺𑀢𑁂 𑀭𑀼𑀓𑁆𑀔𑁂. 𑀭𑀼𑀘 𑀤𑀺𑀢𑁆𑀢𑀺𑀬𑀁, 𑀳𑁂𑀢𑀼𑀓𑀢𑁆𑀢𑀭𑀺 𑀬𑀼, 𑀓𑀼𑀝 𑀓𑁄𑀝𑀺𑀮𑁆𑀬𑁂, 𑀓𑀢𑁆𑀢𑀭𑀺 𑀡𑁄, 𑀓𑁄𑀝𑁄 𑀅𑀲𑀺𑀫𑁆𑀩𑀮𑀺 𑀲𑀫𑀸𑀦𑁄𑀧𑀺 𑀲𑀺𑀫𑁆𑀩𑀮𑀺𑀲𑀤𑀺𑀲𑀸𑀓𑀸𑀭𑀤𑀲𑁆𑀲𑀦𑀢𑁄 𑀓𑁄𑀝𑀲𑀺𑀫𑁆𑀩𑀮𑀺, 𑀧𑀼𑀫𑁂. 𑀓𑀲𑀫𑁆𑀩𑀮𑁄𑀧𑀺.

𑁫𑁬𑁬. 𑀤𑁆𑀯𑀬𑀁 ‘‘𑀓𑀡𑁆𑀝𑀓𑀭𑀜𑁆𑀚’’𑀇𑀢𑀺 𑀔𑁆𑀬𑀸𑀢𑁂 𑀓𑀡𑁆𑀝𑀓𑀺𑀦𑀺 𑀓𑀭𑀜𑁆𑀚𑀕𑀼𑀫𑁆𑀩𑁂, 𑀬𑀁 𑀮𑁄𑀓𑁂 ‘‘𑀓𑀮𑀺𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀭 𑀳𑀺𑀁𑀲𑀸𑀬𑀁, 𑀓𑀭𑀢𑁄 𑀭𑀺𑀭𑀺𑀬𑀸. 𑀧𑀽 𑀧𑀯𑀦𑁂, 𑀇𑀓𑁄, 𑀢𑁄𑀦𑁆𑀢𑁄 𑀘. 𑀧𑀽𑀢𑀺𑀓𑀭𑀚𑁄, 𑀓𑀮𑀺𑀫𑀸𑀭𑀓𑁄𑀧𑀺, 𑀓𑀮𑀺𑀦𑁄. 𑀤𑁆𑀯𑀬𑀁 𑀤𑀸𑀮𑀺𑀫𑀧𑀼𑀧𑁆𑀨𑀸𑀓𑀸𑀭𑁂 𑀧𑀻𑀢𑀦𑀸𑀲𑀓𑀭𑀼𑀓𑁆𑀔𑁂. 𑀭𑀼𑀳 𑀚𑀦𑀦𑁂, 𑀡𑀻. 𑀮𑁄𑀳𑀺𑀢𑀧𑀼𑀧𑁆𑀨𑀢𑀸𑀬 𑀭𑁄𑀳𑀺𑀢𑀓𑁄.

𑀤𑁆𑀯𑀬𑀁 𑀏𑀭𑀡𑁆𑀟𑁂. 𑀏𑀭𑀟𑀺 𑀳𑀺𑀁𑀲𑀸𑀬𑀁. 𑀯𑀸𑀢𑀁 𑀏𑀭𑀡𑁆𑀟𑀢𑀻𑀢𑀺 𑀏𑀭𑀡𑁆𑀟𑁄, 𑀡𑁄. 𑀫𑀡𑁆𑀟 𑀪𑀽𑀲𑀦𑁂, 𑀈𑀲𑀁𑀧𑀲𑀦𑁆𑀦𑀢𑁂𑀮𑀢𑀸𑀬 𑀯𑀸 𑀆𑀫𑀡𑁆𑀟𑁄, 𑀆𑀫𑀁 𑀯𑀸 𑀯𑀸𑀢𑀁, 𑀢𑀁 𑀤𑀸𑀬𑀢𑀻𑀢𑀺 𑀆𑀫𑀡𑁆𑀟𑁄. 𑀤𑀸 𑀅𑀯𑀔𑀡𑁆𑀟𑀦𑁂, 𑀤𑀸𑀲𑁆𑀲 𑀟𑁄. 𑀘𑀺𑀢𑁆𑀢𑀓𑁄, 𑀘𑀜𑁆𑀘𑀼𑀧𑀺.

‘‘𑀅𑀕𑁆𑀕𑀺𑀲𑀜𑁆𑀜𑁂𑀧𑀺 𑀘𑀺𑀢𑁆𑀢𑀓𑁄, 𑀧𑀼𑀫𑁂 𑀏𑀭𑀡𑁆𑀟𑀓𑁂 𑀘𑀜𑁆𑀘𑀼.

𑀧𑀓𑁆𑀔𑀺𑀢𑀼𑀡𑁆𑀟𑁂 𑀣𑀺𑀬𑀁 𑀫𑀢𑁄’’.

𑀤𑁆𑀯𑀬𑀁 𑀲𑀺𑀯𑀸𑀭𑀼𑀓𑁆𑀔𑁂. 𑀲𑀢𑁆𑀢𑀼𑀬𑀼𑀢𑁆𑀢𑀨𑀮𑀢𑀸𑀬 𑀲𑀢𑁆𑀢𑀼𑀨𑀮𑀸. 𑀕𑀡𑁆𑀟𑀁 𑀲𑀫𑁂𑀢𑀻𑀢𑀺 𑀲𑀫𑀻, 𑀅, 𑀦𑀤𑀸𑀤𑀺, 𑀧𑀸𑀭𑀺𑀪𑀤𑁆𑀤𑀓𑁂𑀧𑀺. 𑀕𑀭𑀼𑀤𑀸𑀭𑀼, 𑀧𑀽𑀢𑀺𑀓𑀝𑁆𑀞𑀫𑁆𑀧𑀺.

𑁫𑁬𑁭. 𑀤𑁆𑀯𑀬𑀁 𑀓𑀭𑀜𑁆𑀚𑁂. 𑀦𑀢𑁆𑀢𑀁 𑀭𑀢𑁆𑀢𑀸 𑀫𑀸𑀮𑀸 𑀬𑀲𑁆𑀲. 𑀓𑀁 𑀭𑀜𑁆𑀚𑀬𑀢𑀻𑀢𑀺 𑀓𑀭𑀜𑁆𑀚𑁄, 𑀡𑁄. 𑀘𑀺𑀮𑁆𑀮𑀯𑀺𑀮𑁆𑀮𑁄, 𑀓𑀭𑀚𑁄𑀧𑀺. 𑀤𑁆𑀯𑀬𑀁 𑀔𑀤𑀺𑀭𑁂. 𑀔𑀤 𑀳𑀺𑀁𑀲𑀸𑀬𑀁, 𑀣𑁂𑀭𑀺𑀬𑁂 𑀘. 𑀔𑀤𑀦𑁆𑀢𑀺 𑀤𑀦𑁆𑀢𑀸 𑀬𑁂𑀦𑀸𑀢𑀺 𑀔𑀤𑀺𑀭𑁄, 𑀇𑀭𑁄. 𑀤𑀦𑁆𑀢𑀸 𑀥𑀸𑀯𑀦𑁆𑀢𑀺 𑀬𑁂𑀦 𑀦𑀺𑀭𑁄𑀕𑀢𑁆𑀢𑀸𑀢𑀺 𑀤𑀦𑁆𑀢𑀥𑀸𑀯𑀦𑁄, 𑀬𑀼, 𑀥𑀸𑀯 𑀕𑀢𑀺𑀲𑀼𑀤𑁆𑀥𑀺𑀬𑀁. 𑀕𑀸𑀬𑀢𑁆𑀢𑀻, 𑀩𑀸𑀮𑀢𑀦𑀬𑁄𑀧𑀺. ‘‘𑀕𑀸𑀬𑀢𑁆𑀢𑀻 𑀔𑀤𑀺𑀭𑁂 𑀇𑀢𑁆𑀣𑀻, 𑀙𑀦𑁆𑀤𑀲𑀺𑀧𑀺 𑀙𑀴𑀓𑁆𑀔𑀭𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁪𑁯 𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁪.𑁫𑁦] 𑀭𑀪𑀲𑁄. 𑀩𑀸𑀮𑁄 𑀲𑀼𑀔𑀼𑀫𑁄 𑀧𑀢𑁆𑀢𑀲𑀜𑁆𑀜𑀺𑀢𑁄 𑀢𑀦𑀬𑁄 𑀬𑀲𑁆𑀲 𑀩𑀸𑀮𑀢𑀦𑀬𑁄. 𑀤𑁆𑀯𑀬𑀁 𑀧𑀻𑀢𑀲𑀸𑀭𑁂 𑀔𑀤𑀺𑀭𑁂. 𑀔𑀤𑀺𑀭𑀸𑀤𑀺𑀓𑀦𑁆𑀢𑀼 𑀧𑀻𑀢𑀲𑀸𑀭𑁂. 𑀲𑁂𑀢𑀯𑀡𑁆𑀡𑀢𑀸𑀬 𑀲𑁄𑀫𑁄 𑀓𑀧𑁆𑀧𑀽𑀭𑀲𑀤𑀺𑀲𑁄 𑀯𑀓𑁆𑀓𑁄 𑀯𑀓𑁆𑀓𑀮𑀫𑁂𑀢𑀲𑁆𑀲 𑀲𑁄𑀫𑀯𑀓𑁆𑀓𑁄. ‘‘𑀲𑁄𑀫𑁄 𑀓𑀼𑀯𑁂𑀭𑁂 𑀧𑀺𑀢𑀼𑀤𑁂𑀯𑀢𑀸𑀬𑀁, 𑀯𑀲𑀼𑀧𑁆𑀧𑀪𑁂𑀤𑁂 𑀯𑀲𑀼𑀥𑀸𑀓𑀭𑁂 𑀘. 𑀤𑀺𑀩𑁆𑀩𑁄𑀲𑀥𑀻 𑀲𑁄𑀫𑀮𑀢𑀸 𑀲𑀫𑀻𑀭𑀡𑁂, 𑀓𑀧𑁆𑀧𑀽𑀭𑀦𑀻𑀭𑁂𑀲𑀼 𑀘 𑀯𑀸𑀦𑀭𑁂 𑀘𑀸’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄. 𑀈𑀲𑀁 𑀔𑀼𑀤𑁆𑀤𑀓𑀁 𑀤𑀮𑀫𑁂𑀢𑀲𑁆𑀲 𑀓𑀤𑀭𑁄, 𑀮𑀲𑁆𑀲 𑀭𑁄. 𑀤𑁆𑀯𑀬𑀁 𑀧𑀺𑀡𑁆𑀟𑀻𑀢𑀓𑁂. 𑀲𑀮 𑀕𑀫𑀦𑁂, 𑀮𑁄. 𑀫𑀤 𑀉𑀫𑁆𑀫𑀸𑀤𑁂, 𑀬𑀼. ‘‘𑀧𑀺𑀡𑁆𑀟𑀻𑀢𑀓𑁄 𑀫𑀭𑀯𑀓𑁄, 𑀲𑀲𑀦𑁄 𑀓𑀭𑀳𑀸𑀝𑀓𑁄’’𑀢𑁆𑀬𑀫𑀭𑀓𑁄𑀲𑁂 [𑀅𑀫𑀭 𑁧𑁪.𑁫𑁨].

𑁫𑁬𑁮. 𑀢𑀺𑀓𑀁 𑀇𑀦𑁆𑀤𑀲𑀸𑀮𑁂. 𑀲𑀸𑀮𑀸𑀦𑀁 𑀭𑀼𑀓𑁆𑀔𑀸𑀦𑀁 𑀇𑀦𑁆𑀤𑁄 𑀭𑀸𑀚𑀸 𑀇𑀦𑁆𑀤𑀲𑀸𑀮𑁄, 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀲𑀤𑁆𑀤𑁄 𑀯𑀺𑀬 𑀅𑀥𑀺𑀯𑀘𑀦𑀫𑀢𑁆𑀢𑀫𑀺𑀤𑀁. 𑀇𑀦𑁆𑀤𑀲𑁆𑀲 𑀲𑀓𑁆𑀓𑀲𑁆𑀲 𑀲𑀸𑀮𑁄𑀢𑀺𑀧𑀺 𑀇𑀦𑁆𑀤𑀲𑀸𑀮𑁄. 𑀲𑀮𑁆𑀮𑀢𑁄 𑀡𑁆𑀯𑀼, 𑀦𑀤𑀸𑀤𑀺, 𑀲𑀮𑁆𑀮𑀓𑀻. 𑀔𑀭 𑀙𑁂𑀤𑀦𑀯𑀺𑀦𑀸𑀲𑀦𑁂𑀲𑀼, 𑀡𑁆𑀯𑀼.

𑀤𑁆𑀯𑀬𑀁 𑀤𑁂𑀯𑀤𑀸𑀭𑀼𑀫𑁆𑀳𑀺. 𑀤𑁂𑀯𑀸𑀦𑀁 𑀤𑀸𑀭𑀼. 𑀪𑀤𑁆𑀤𑀢𑁆𑀢𑀸 𑀪𑀤𑁆𑀤𑀤𑀸𑀭𑀼. 𑀲𑀓𑁆𑀓𑀧𑀸𑀤𑀧𑁄, 𑀧𑀸𑀭𑀺𑀪𑀤𑁆𑀤𑀓𑁄, 𑀧𑀻𑀢𑀤𑀸𑀭𑀼, 𑀤𑀸𑀭𑀼, 𑀧𑀽𑀢𑀺𑀓𑀝𑁆𑀞𑀫𑁆𑀧𑀺. 𑀤𑁆𑀯𑀬𑀁 𑀳𑁂𑀫𑀧𑀼𑀧𑁆𑀨𑀓𑁂. 𑀧𑀞𑀫𑀓𑀸𑀮𑁂 𑀘𑀫𑁆𑀧𑀸𑀦𑀕𑀭𑁂 𑀚𑀸𑀢𑁄 𑀘𑀫𑁆𑀧𑁂𑀬𑁆𑀬𑁄, 𑀡𑁂𑀬𑁆𑀬𑁄. 𑀓𑀧𑀘𑁆𑀘𑀬𑁂 𑀘𑀫𑁆𑀧𑀓𑁄.

𑁫𑁬𑁯. 𑀤𑁆𑀯𑀬𑀁 𑀧𑀦𑀲𑁂. 𑀧𑀦 𑀩𑁆𑀬𑀯𑀳𑀸𑀭𑁂, 𑀣𑀼𑀢𑀺𑀫𑁆𑀳𑀺 𑀘, 𑀅𑀲𑁄. 𑀓𑀡𑁆𑀝𑀓𑀬𑀼𑀢𑁆𑀢𑀁 𑀨𑀮𑀫𑀲𑁆𑀲 𑀓𑀡𑁆𑀝𑀓𑀺𑀨𑀮𑁄. 𑀤𑁆𑀯𑀬𑀁 𑀲𑀺𑀯𑀸𑀬𑀁. 𑀦 𑀯𑀺𑀚𑁆𑀚𑀢𑁂 𑀭𑁄𑀕𑀪𑀬𑀁, 𑀭𑁄𑀕𑀩𑁆𑀬𑀣𑁄 𑀘𑁄𑀧𑀬𑀼𑀚𑁆𑀚𑀫𑀸𑀦𑀸𑀬𑀫𑀲𑁆𑀲𑀦𑁆𑀢𑀺 𑀅𑀪𑀬𑀸. 𑀭𑁄𑀕𑀪𑀬𑀁 𑀳𑀭𑀢𑀺 𑀅𑀧𑀦𑁂𑀢𑀻𑀢𑀺 𑀳𑀭𑀻𑀢𑀓𑀻, 𑀢𑁄, 𑀲𑀓𑀢𑁆𑀣𑁂 𑀓𑁄, 𑀦𑀤𑀸𑀤𑀺. 𑀳𑀭𑀺𑀢𑁆𑀢𑀓𑀻𑀧𑀺. 𑀅𑀩𑁆𑀬𑀣𑀸, 𑀧𑀼𑀢𑀦𑀸, 𑀅𑀫𑀢𑀸, 𑀳𑁂𑀫𑀯𑀢𑀻, 𑀘𑁂𑀢𑀓𑀻, 𑀲𑀺𑀯𑀸𑀧𑀺.

𑀤𑁆𑀯𑀬𑀁 𑀓𑀭𑀺𑀲𑀨𑀮𑁂. 𑀭𑁄𑀕𑀁 𑀅𑀲𑀢𑀺 𑀪𑀓𑁆𑀔𑀢𑀻𑀢𑀺 𑀅𑀓𑁆𑀔𑁄, 𑀔𑁄, 𑀲𑀲𑁆𑀲 𑀓𑁄. 𑀭𑁄𑀕𑀁 𑀯𑀺𑀪𑀽𑀢𑀁 𑀓𑀭𑁄𑀢𑀻𑀢𑀺 𑀯𑀺𑀪𑀻𑀢𑀓𑁄, 𑀯𑀺𑀪𑀻𑀝𑀓𑁄𑀧𑀺. 𑀪𑀽𑀢𑀸𑀯𑀸𑀲𑁄, 𑀓𑀮𑀺𑀤𑁆𑀤𑀼𑀫𑁄𑀧𑀺, 𑀓𑀮𑀺𑀲𑁆𑀲 𑀆𑀲𑀬𑀪𑀽𑀢𑁄 𑀤𑀼𑀫𑁄 𑀓𑀮𑀺𑀤𑁆𑀤𑀼𑀫𑁄. 𑀤𑁆𑀯𑀬𑀁 𑀧𑀼𑀲𑁆𑀲𑀨𑀮𑁂. 𑀦𑀢𑁆𑀣𑀺 𑀫𑀢𑀫𑁂𑀢𑀺𑀲𑁆𑀲𑀁 𑀳𑁂𑀢𑀼𑀪𑀽𑀢𑀸𑀬𑀁 𑀅𑀫𑀢𑀸. 𑀫𑀮 𑀥𑀸𑀭𑀡𑁂, 𑀡𑁆𑀯𑀼, 𑀦𑀤𑀸𑀤𑀺, 𑀆𑀫𑀮𑀓𑀻. 𑀯𑀬𑀝𑁆𑀞𑀸𑀧𑀺. 𑀯𑀬𑁄 𑀢𑀺𑀝𑁆𑀞𑀢𑀺 𑀣𑀺𑀭𑀻𑀪𑀯𑀢𑁆𑀬𑁂𑀢𑀸𑀬𑀸𑀢𑀺 𑀯𑀬𑀝𑁆𑀞𑀸.

𑁫𑁭𑁦. 𑀤𑁆𑀯𑀬𑀁 𑀟𑀳𑀼𑀭𑀼𑀓𑁆𑀔𑁂. 𑀮𑀩𑀼𑀦𑀸𑀫𑀓𑁂 𑀧𑀩𑁆𑀩𑀢𑁂 𑀚𑀸𑀬𑀢𑀻𑀢𑀺 𑀮𑀩𑀼𑀚𑁄. 𑀔𑀼𑀤𑁆𑀤𑀓𑀢𑁆𑀢𑀸 𑀮𑀻𑀦𑀁 𑀅𑀧𑀸𑀓𑀝𑀁 𑀓𑀼𑀘𑀲𑀗𑁆𑀔𑀸𑀢𑀁 𑀨𑀮𑀫𑁂𑀢𑀲𑁆𑀲 𑀮𑀺𑀓𑀼𑀘𑁄, 𑀦𑀺𑀧𑀸𑀢𑀦𑀸. 𑀤𑁆𑀯𑀬𑀁 𑀧𑀻𑀢𑀧𑀼𑀧𑁆𑀨𑁂. 𑀅𑀕𑀦𑁆𑀥𑀧𑀼𑀧𑁆𑀨𑀢𑀸𑀬 𑀅𑀢𑁆𑀢𑀸𑀦𑀁 𑀓𑀡𑀺𑀝𑁆𑀞𑀁 𑀓𑀭𑁄𑀢𑀻𑀢𑀺 𑀓𑀡𑀺𑀓𑀸𑀭𑁄, 𑀝𑁆𑀞𑀮𑁄𑀧𑁄, 𑀧𑀤𑀼𑀫𑀧𑁆𑀧𑀫𑀸𑀡𑀧𑀼𑀧𑁆𑀨𑀤𑀼𑀫𑀢𑀸𑀬 𑀤𑀼𑀫𑀼𑀧𑁆𑀧𑀮𑁄.

𑀢𑀺𑀓𑀁 𑀳𑀺𑀗𑁆𑀕𑀼𑀦𑀺𑀬𑁆𑀬𑀸𑀲𑁂. 𑀦𑀻 𑀦𑀬𑁂, 𑀩𑁄, 𑀫𑁄𑀦𑁆𑀢𑁄 𑀘. 𑀢𑀺𑀢𑁆𑀢𑀭𑀲𑀢𑁆𑀢𑀸 𑀅𑀭𑀺𑀪𑀸𑀯𑁂 𑀢𑀺𑀝𑁆𑀞𑀢𑀻𑀢𑀺 𑀅𑀭𑀺𑀝𑁆𑀞𑁄. 𑀧𑀼𑀘𑀺𑀁 𑀓𑀼𑀝𑁆𑀞𑀁 𑀫𑀤𑁆𑀤𑀢𑀻𑀢𑀺 𑀧𑀼𑀘𑀺𑀫𑀦𑁆𑀤𑁄, 𑀇𑀢𑁆𑀢𑀁, 𑀩𑀺𑀦𑁆𑀤𑀸𑀕𑀫𑁄. 𑀥𑀫𑁆𑀫𑀲𑁂𑀦𑁄, 𑀫𑀸𑀮𑀓𑁄𑀧𑀺. 𑀫𑀮𑀢𑁂 𑀭𑁄𑀕𑀁 𑀫𑀸𑀮𑀓𑁄, 𑀡𑁆𑀯𑀼. 𑀤𑁆𑀯𑀬𑀁 𑀭𑀢𑁆𑀢𑀧𑀼𑀧𑁆𑀨𑁂. 𑀓𑀭𑁄𑀢𑀺𑀲𑁆𑀫𑀸 𑀡𑁆𑀯𑀼. 𑀤𑀮 𑀯𑀺𑀤𑀸𑀭𑀡𑁂, 𑀫𑁄, 𑀇𑀓𑀸𑀭𑀸𑀕𑀫𑁄. 𑀤𑀸𑀴𑀺𑀫𑁄𑀧𑀺.

𑁫𑁭𑁧. 𑀤𑁆𑀯𑀬𑀁 𑀧𑀻𑀢𑀤𑁆𑀤𑀼𑀫𑁂. 𑀲𑀭𑀢𑀺 𑀓𑀸𑀮𑀦𑁆𑀢𑀭𑀁 𑀲𑀭𑀮𑁄, 𑀅𑀮𑁄. 𑀧𑀽𑀢𑀺𑀬𑁂𑀯 𑀓𑀝𑁆𑀞𑀁 𑀧𑀽𑀢𑀺𑀓𑀝𑁆𑀞𑀁, 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀬𑀣𑀸. 𑀤𑁆𑀯𑀬𑀁 𑀧𑀺𑀘𑁆𑀙𑀺𑀮𑀸𑀬𑀁. 𑀓𑀧𑀺 𑀘𑀮𑀦𑁂, 𑀇𑀮𑁄. 𑀲𑀸𑀲 𑀅𑀦𑀼𑀲𑀺𑀝𑁆𑀞𑀺𑀬𑀁, 𑀲𑀺𑀲 𑀇𑀘𑁆𑀙𑀸𑀬𑀁 𑀯𑀸, 𑀅𑀧𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀲𑀺𑀁𑀲𑀧𑀸. 𑀅𑀕𑀼𑀭𑀼𑀧𑀺.

𑀢𑀺𑀓𑀁 𑀨𑀮𑀺𑀦𑀺𑀬𑀁. 𑀲𑀸 𑀢𑀦𑀼𑀓𑀭𑀡𑁂, 𑀫𑁄. 𑀧𑀺𑀬𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀺𑀬𑀗𑁆𑀕𑀼, 𑀉. 𑀓𑀫𑀦𑀻𑀬𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀓𑀗𑁆𑀕𑀼, 𑀉, 𑀦𑀺𑀧𑀸𑀢𑀦𑀸. 𑀫𑀳𑀺𑀮𑀸𑀯𑁆𑀳𑀬𑀸, 𑀮𑀢𑀸, 𑀕𑀼𑀦𑁆𑀤𑀸, 𑀕𑀦𑁆𑀥𑀨𑀮𑀻, 𑀓𑀸𑀭𑀫𑁆𑀪𑀸𑀧𑀺. 𑀤𑁆𑀯𑀬𑀁 𑀲𑀺𑀭𑀻𑀲𑁂. 𑀲𑀭𑀢𑀺 𑀭𑁄𑀕𑀁 𑀳𑀺𑀁𑀲𑀢𑀻𑀢𑀺 𑀲𑀺𑀭𑀻𑀲𑁄. 𑀈𑀲𑁄, 𑀅𑀲𑁆𑀲𑀺. 𑀪𑀡𑁆𑀟 𑀧𑀭𑀺𑀪𑀸𑀲𑀦𑁂, 𑀇𑀮𑁄. 𑀓𑀧𑀻𑀢𑀦𑁄𑀧𑀺. 𑀅𑀫𑁆𑀩𑀸𑀝𑀓𑁂, 𑀕𑀤𑁆𑀤𑀪𑀡𑁆𑀟𑁂 𑀘 𑀓𑀧𑀻𑀢𑀦𑁄.

𑁫𑁭𑁨. 𑀤𑁆𑀯𑀬𑀁 𑀫𑀡𑁆𑀟𑀽𑀓𑀧𑀡𑁆𑀡𑁂. 𑀲𑀼𑀡 𑀕𑀢𑀺𑀬𑀁, 𑀡𑁆𑀯𑀼, 𑀤𑀻𑀖𑀁 𑀨𑀮𑀯𑀡𑁆𑀝𑀁 𑀬𑀲𑁆𑀲. 𑀦𑀝𑁄 𑀓𑀼𑀝𑀦𑁆𑀦𑀝𑀸𑀧𑀺. 𑀤𑁆𑀯𑀬𑀁 𑀩𑀓𑀼𑀮𑁂. 𑀯𑀓 𑀆𑀤𑀸𑀦𑁂, 𑀉𑀮𑁄. 𑀓𑁂𑀲𑀭𑀬𑀼𑀢𑁆𑀢𑀧𑀼𑀧𑁆𑀨𑀢𑀸𑀬 𑀓𑁂𑀲𑀭𑁄.

𑀤𑁆𑀯𑀬𑀁 𑀫𑀮𑀧𑀼𑀧𑁆𑀨𑀲𑁆𑀫𑀺𑀁. 𑀓𑀸𑀓𑀸𑀦𑀁 𑀉𑀤𑀼𑀫𑁆𑀩𑀭𑁄 𑀓𑀸𑀓𑁄𑀤𑀼𑀫𑁆𑀩𑀭𑁄, 𑀲𑁄 𑀏𑀯 𑀓𑀸𑀓𑁄𑀤𑀼𑀫𑁆𑀩𑀭𑀺𑀓𑀸, 𑀲𑀓𑀢𑁆𑀣𑁂 𑀇𑀓𑁄. 𑀨𑀮 𑀦𑀺𑀧𑁆𑀨𑀢𑁆𑀢𑀺𑀬𑀁, 𑀕𑀼, 𑀮𑀲𑁆𑀲 𑀕𑁄. 𑀤𑁆𑀯𑀬𑀁 𑀦𑀸𑀕𑀭𑀼𑀓𑁆𑀔𑁂. 𑀦 𑀕𑀘𑁆𑀙𑀢𑀻𑀢𑀺 𑀦𑀸𑀕𑁄, 𑀤𑀻𑀖𑀸𑀤𑀺. 𑀦𑀸𑀕𑀸𑀦𑀁 𑀫𑀸𑀮𑀸, 𑀲𑀸 𑀲𑀜𑁆𑀚𑀸𑀢𑀸 𑀬𑀢𑁆𑀭 𑀦𑀸𑀕𑀫𑀸𑀮𑀺𑀓𑀸.

𑁫𑁭𑁩. 𑀤𑁆𑀯𑀬𑀁 𑀅𑀲𑁄𑀓𑁂. 𑀦𑀢𑁆𑀣𑀺 𑀲𑁄𑀓𑁄 𑀬𑁂𑀦. 𑀯𑀚 𑀕𑀫𑀦𑁂, 𑀉𑀮𑁄. 𑀤𑁆𑀯𑀬𑀁 𑀚𑀬𑀸𑀬𑀁. 𑀢𑀁𑀢𑀁𑀭𑁄𑀕𑀚𑀬𑀸𑀤𑀺𑀓𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀸𑀭𑀻, 𑀡𑀻. 𑀯𑀺𑀲𑁂𑀲𑁂𑀦 𑀚𑀬𑀢𑀻𑀢𑀺 𑀯𑁂𑀚𑀬𑀦𑁆𑀢𑀺𑀓𑀸, 𑀅𑀦𑁆𑀢𑁄, 𑀦𑀤𑀸𑀤𑀺, 𑀲𑀓𑀢𑁆𑀣𑁂 𑀓𑁄. ‘‘𑀚𑀬𑀸 𑀚𑀬𑀦𑁆𑀢𑀻 𑀢𑀓𑁆𑀓𑀸𑀭𑀻, 𑀦𑀸𑀤𑁂𑀬𑀻 𑀯𑁂𑀚𑀬𑀦𑁆𑀢𑀺𑀓𑀸’’𑀢𑁆𑀬𑀫𑀭𑀓𑁄𑀲𑁄 [𑀅𑀫𑀭 𑁧𑁪.𑁬𑁫].

𑀤𑁆𑀯𑀬𑀁 𑀲𑀫𑀼𑀤𑁆𑀤𑀲𑀫𑀻𑀧𑀤𑁂𑀲𑀚𑁂 𑀲𑀸𑀫𑀤𑀮𑁂 𑀢𑀫𑀸𑀮𑀦𑀸𑀫𑁂 𑀢𑀭𑀼𑀫𑁆𑀳𑀺. 𑀢𑀸𑀧𑀺𑀬𑀁 𑀚𑀸𑀬𑀢𑀻𑀢𑀺 𑀢𑀸𑀧𑀺𑀜𑁆𑀙𑁄, 𑀅𑀜𑁆𑀜𑀢𑁆𑀣𑁂 𑀙𑁄, 𑀩𑀺𑀦𑁆𑀤𑀸𑀕𑀫𑁄, ‘‘𑀢𑀸𑀧𑀻 𑀢𑀼 𑀲𑀭𑀺𑀢𑀸𑀦𑁆𑀢𑀭𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁄. 𑀢𑀫𑀼 𑀓𑀗𑁆𑀔𑀸𑀬𑀁, 𑀅𑀮𑁄. 𑀤𑁆𑀯𑀬𑀁 𑀓𑀼𑀝𑀚𑁂. 𑀭𑁄𑀕𑀁 𑀙𑀺𑀦𑁆𑀤𑀢𑀻𑀢𑀺 𑀓𑀼𑀝𑀚𑁄, 𑀚𑁄. 𑀕𑀺𑀭𑀺𑀫𑁆𑀳𑀺 𑀚𑀸𑀢𑀸 𑀫𑀮𑁆𑀮𑀺𑀓𑀸 𑀕𑀺𑀭𑀺𑀫𑀮𑁆𑀮𑀺𑀓𑀸, 𑀲𑀓𑁆𑀓𑀧𑀭𑀺𑀬𑀸𑀬𑁄𑀧𑁆𑀬𑀢𑁆𑀭.

𑁫𑁭𑁪. 𑀢𑀲𑁆𑀲 𑀓𑀼𑀝𑀚𑀲𑁆𑀲 𑀨𑀮𑁂 𑀇𑀦𑁆𑀤𑀬𑀯𑁄. 𑀇𑀦𑁆𑀤𑀲𑁆𑀲 𑀲𑀓𑁆𑀓𑀲𑁆𑀲 𑀬𑀯𑁄 𑀥𑀜𑁆𑀜𑀯𑀺𑀲𑁂𑀲𑁄 𑀇𑀦𑁆𑀤𑀬𑀯𑁄. 𑀓𑀮𑀺𑀗𑁆𑀕𑀁, 𑀓𑀤𑁆𑀤𑀬𑀯𑀫𑁆𑀧𑀺.

‘‘𑀧𑀽𑀢𑀺𑀓𑀭𑀜𑁆𑀚 𑀥𑀽𑀫𑁆𑀬𑀸𑀝𑁂, 𑀤𑁂𑀲𑀪𑁂𑀤𑁂 𑀧𑀼𑀫𑀸 𑀪𑀯𑁂;

𑀓𑀼𑀝𑀚𑀲𑁆𑀲 𑀨𑀮𑁂 𑀓𑁆𑀮𑀻𑀯𑀁, 𑀓𑀮𑀺𑀗𑁆𑀕𑀁 𑀣𑀻 𑀢𑀼 𑀦𑀸𑀭𑀺𑀬’’𑀦𑁆𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁬𑁭]. 𑁋

𑀭𑀪𑀲𑁄. 𑀅𑀫𑀭𑀫𑀸𑀮𑀸𑀬𑀦𑁆𑀢𑀼 ‘‘𑀓𑀮𑀺𑀗𑁆𑀕𑁂’𑀦𑁆𑀤𑀬𑀯𑁄 𑀧𑀼𑀫𑀸’’𑀢𑀺 𑀇𑀢𑁆𑀣𑀺𑀓𑀡𑁆𑀟𑁂 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑀓𑀮𑀺𑀗𑁆𑀕𑀸 𑀇𑀢𑁆𑀣𑀻, 𑀇𑀦𑁆𑀤𑀬𑀯𑁄 𑀧𑀼𑀫𑀸. 𑀤𑁆𑀯𑀬𑀁 𑀓𑀡𑀺𑀓𑀸𑀭𑀺𑀓𑀸𑀬𑀁. 𑀅𑀕𑁆𑀕𑀺 𑀅𑀦𑁂𑀦 𑀫𑀦𑁆𑀣𑁆𑀬𑀢𑁂 𑀅𑀕𑁆𑀕𑀺𑀫𑀦𑁆𑀣𑁄, 𑀡𑁄. 𑀢𑀁 𑀓𑀝𑁆𑀞𑁂𑀳𑀺 𑀖𑀁𑀲𑀺𑀬𑀫𑀸𑀦𑁂 𑀅𑀕𑁆𑀕𑀺 𑀉𑀝𑁆𑀞𑀳𑀢𑀺. 𑀓𑀡 𑀕𑀢𑀺𑀬𑀁, 𑀡𑁆𑀯𑀼. 𑀚𑀬𑀸𑀧𑁆𑀬𑀢𑁆𑀭. ‘‘𑀯𑀺𑀚𑀬𑁂 𑀲𑁄 𑀚𑀬𑀸 𑀤𑀼𑀕𑁆𑀕𑀸, 𑀚𑀬𑀦𑁆𑀢𑀻 𑀕𑀡𑀺𑀓𑀸𑀭𑀺𑀓𑁂’’𑀢𑀺 𑀚𑀬𑀸 𑀦𑀸𑀦𑀸𑀢𑁆𑀣𑀸.

𑀤𑁆𑀯𑀬𑀁 𑀦𑀺𑀕𑁆𑀕𑀼𑀡𑁆𑀟𑀺𑀬𑀁. 𑀦𑀢𑁆𑀣𑀺 𑀕𑀼𑀡𑁆𑀟𑀁 𑀕𑀩𑁆𑀪𑀩𑀦𑁆𑀥𑀦𑀫𑁂𑀢𑀸𑀬𑀸𑀢𑀺 𑀦𑀺𑀕𑁆𑀕𑀼𑀡𑁆𑀟𑀻. 𑀲𑀺 𑀩𑀦𑁆𑀥𑀦𑁂, 𑀤𑀼, 𑀲𑀺𑀦𑁆𑀤𑀼𑀁 𑀕𑀩𑁆𑀪𑀩𑀦𑁆𑀥𑀦𑀁 𑀯𑀸𑀭𑁂𑀢𑀻𑀢𑀺 𑀲𑀺𑀦𑁆𑀤𑀼𑀯𑀸𑀭𑁄. 𑀇𑀦𑁆𑀤𑀸𑀦𑀻𑀧𑁆𑀬𑀢𑁆𑀭. 𑀇𑀦𑁆𑀤𑀸𑀦𑀻𑀓𑀭𑀡𑁂 𑀣𑀻𑀦𑀁, 𑀲𑀺𑀦𑁆𑀤𑀼𑀯𑀸𑀭𑁂𑀦𑁆𑀤𑀦𑀸𑀭𑀺𑀲𑀼. 𑀤𑁆𑀯𑀬𑀁 𑀫𑀮𑁆𑀮𑀺𑀓𑀸𑀬𑀁. 𑀢𑀺𑀡𑀸𑀦𑀺 𑀲𑀽𑀮𑀦𑁆𑀢𑀺 𑀬𑀲𑁆𑀫𑀺𑀦𑁆𑀢𑀺 𑀢𑀺𑀡𑀲𑀽𑀮𑀁, 𑀲𑀽𑀮 𑀭𑀼𑀚𑀸𑀬𑀁. 𑀬𑀢𑁆𑀭 𑀢𑀁 𑀚𑀸𑀬𑀢𑀺, 𑀢𑀢𑁆𑀭 𑀢𑀺𑀡𑀸𑀦𑀺 𑀭𑁄𑀕𑀻𑀦𑀺 𑀪𑀯𑀦𑁆𑀢𑀻𑀢𑁆𑀬𑀢𑁆𑀣𑁄. ‘‘𑀢𑀺𑀡𑀲𑀽𑀮𑀁 𑀫𑀮𑁆𑀮𑀺𑀓𑀸𑀬𑀁, 𑀧𑀡𑁆𑀟𑀓𑀁 𑀓𑁂𑀢𑀓𑀻𑀨𑀮𑁂’’. 𑀫𑀮𑁆𑀮𑀢𑁂 𑀥𑀸𑀭𑀻𑀬𑀢𑁂 𑀲𑀩𑁆𑀩𑁂𑀳𑀻𑀢𑀺 𑀫𑀮𑁆𑀮𑀺𑀓𑀸, 𑀫𑀮𑁆𑀮 𑀥𑀸𑀭𑀡𑁂, 𑀇, 𑀲𑀓𑀢𑁆𑀣𑁂 𑀓𑁄. 𑀪𑀽𑀧𑀤𑀻, 𑀲𑀻𑀢𑀪𑀻𑀭𑀼 𑀘.

𑁫𑁭𑁫. 𑀤𑁆𑀯𑀬𑀁 𑀓𑀡𑁆𑀳𑀧𑀼𑀧𑁆𑀨𑀲𑁂𑀨𑀸𑀮𑀺𑀓𑀸𑀬𑀁. 𑀲𑀺𑀨𑀸 𑀚𑀝𑀸 𑀬𑀲𑁆𑀲𑀢𑁆𑀣𑀺 𑀲𑁂𑀨𑀸𑀮𑀺𑀓𑀸, 𑀇𑀓𑁄, 𑀮𑀫𑀚𑁆𑀛𑁄. 𑀦𑀻𑀮𑀧𑀼𑀧𑁆𑀨𑀢𑀸𑀬 𑀦𑀻𑀮𑀺𑀓𑀸. 𑀲𑀼𑀯𑀳𑀸, 𑀦𑀺𑀕𑁆𑀕𑀼𑀡𑁆𑀟𑀻𑀧𑀺. ‘‘𑀲𑀺𑀦𑁆𑀤𑀼𑀯𑀸𑀭𑁂𑀧𑀺 𑀦𑀺𑀕𑁆𑀕𑀼𑀡𑁆𑀟𑀻, 𑀦𑀻𑀮𑀲𑁂𑀨𑀸𑀮𑀺𑀓𑀸𑀬 𑀘𑁂’’𑀢𑀺 𑀭𑀼𑀤𑁆𑀤𑁄. 𑀤𑁆𑀯𑀬𑀁 𑀯𑀦𑀫𑀮𑁆𑀮𑀺𑀓𑀸𑀬𑀁. 𑀨𑀼𑀝 𑀯𑀺𑀓𑀲𑀦𑁂, 𑀆 𑀪𑀼𑀲𑁄 𑀨𑀼𑀝𑀢𑀻𑀢𑀺 𑀅𑀧𑁆𑀨𑁄𑀝𑀸, 𑀭𑀲𑁆𑀲𑀸𑀤𑀺.

𑀘𑀢𑀼𑀓𑁆𑀓𑀁 𑀭𑀢𑁆𑀢𑀧𑀼𑀧𑁆𑀨𑁂. 𑀩𑀦𑁆𑀥 𑀩𑀦𑁆𑀥𑀦𑁂, 𑀉, 𑀲𑀓𑀢𑁆𑀣𑁂 𑀓𑁄. 𑀚𑀬𑀢𑁆𑀣𑀁 𑀲𑀼𑀫𑀦𑀁 𑀚𑀬𑀲𑀼𑀫𑀦𑀁. 𑀪𑀡𑁆𑀟𑀢𑀺𑀲𑁆𑀫𑀸 𑀇𑀓𑁄, 𑀪𑀡𑁆𑀟𑀺𑀓𑁄. 𑀚𑀻𑀯𑀢𑀻𑀢𑀺 𑀚𑀻𑀯𑀓𑁄, 𑀚𑀻𑀯 𑀧𑀸𑀡𑀥𑀸𑀭𑀡𑁂, 𑀡𑁆𑀯𑀼. 𑀚𑀻𑀯𑀓𑀲𑀤𑁆𑀤𑀲𑁆𑀲 𑀧𑀻𑀢𑀲𑀸𑀮𑀸𑀤𑀻𑀲𑁆𑀯𑀧𑀺 𑀧𑀯𑀢𑁆𑀢𑀦𑀢𑁄 𑀩𑀦𑁆𑀥𑀼 𑀏𑀯 𑀚𑀻𑀯𑀓𑁄 𑀩𑀦𑁆𑀥𑀼𑀚𑀻𑀯𑀓𑁄𑀢𑀺 𑀩𑀦𑁆𑀥𑀼𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀫𑀼𑀤𑀺𑀢𑁂𑀦 𑀯𑀸 𑀦𑀸𑀫𑀫𑀺𑀤𑀫𑁂𑀓𑀲𑁆𑀲. ‘‘𑀩𑀦𑁆𑀥𑀼 𑀩𑀦𑁆𑀥𑀼𑀓𑀧𑀼𑀧𑁆𑀨𑁂 𑀘, 𑀩𑀦𑁆𑀥𑀼𑀪𑀸𑀢𑀭𑀺 𑀩𑀦𑁆𑀥𑀯𑁂’’𑀢𑀺 𑀯𑀘𑀦𑀢𑁄,

‘‘𑀚𑀻𑀯𑀓𑁄 𑀧𑀻𑀢𑀲𑀸𑀮𑁂 𑀘, 𑀔𑁂𑀧𑀦𑁂 𑀯𑀼𑀤𑁆𑀥𑀺𑀚𑀻𑀯𑀺𑀦𑀺;

𑀲𑁂𑀯𑀺𑀦𑀺 𑀧𑀸𑀡𑀓𑁂 𑀨𑀸𑀢𑀺-𑀓𑀼𑀡𑁆𑀟𑀺𑀓𑁂 𑀧𑀸𑀤𑀧𑀦𑁆𑀢𑀭𑁂’’𑀢𑀺. 𑁋

𑀯𑀘𑀦𑀢𑁄 𑀘 ‘‘𑀩𑀦𑁆𑀥𑀼𑀚𑀻𑀯𑀓𑁄’’𑀢𑀺 𑀏𑀢𑁆𑀣 𑀤𑁆𑀯𑁂 𑀦𑀸𑀫𑀸𑀦𑀺𑀧𑀺 𑀤𑀝𑁆𑀞𑀩𑁆𑀩𑀸𑀦𑀺.

𑁫𑁭𑁬. 𑀧𑀜𑁆𑀘𑀓𑀁 𑀲𑀼𑀫𑀦𑀸𑀬𑀁. 𑀲𑀼𑀦𑁆𑀤𑀭𑀁 𑀫𑀦𑁄 𑀬𑀲𑁆𑀲𑀁. 𑀲𑀼𑀕𑀦𑁆𑀥𑀢𑁆𑀢𑀸 𑀚𑀸𑀢𑀺𑀲𑀼𑀫𑀦𑀸𑀢𑀺 𑀲𑀫𑀼𑀤𑀺𑀢𑀦𑀸𑀫𑀁. 𑀫𑀮 𑀥𑀸𑀭𑀡𑁂, 𑀢𑁄, 𑀦𑀤𑀸𑀤𑀺. 𑀚𑀦 𑀚𑀦𑀦𑁂,𑀢𑀺. 𑀯𑀲𑁆𑀲𑀓𑀸𑀮𑀲𑀜𑁆𑀚𑀸𑀢𑀧𑀼𑀧𑁆𑀨𑀢𑀸𑀬 𑀯𑀲𑁆𑀲𑀺𑀓𑀻. 𑀇𑀓𑁄, 𑀦𑀤𑀸𑀤𑀺.

𑀤𑁆𑀯𑀬𑀁 ‘‘𑀘𑀫𑁆𑀧𑁂𑀬𑁆𑀬’’𑀇𑀢𑀺 𑀔𑁆𑀬𑀸𑀢𑁂. 𑀬𑀼𑀣 𑀳𑀺𑀁𑀲𑀸𑀬𑀁, 𑀇, 𑀲𑀓𑀢𑁆𑀣𑁂 𑀓𑁄, 𑀤𑀻𑀖𑀸𑀤𑀺. 𑀫𑀕𑀥𑁂 𑀪𑀯𑀸 𑀫𑀸𑀕𑀥𑀻. 𑀕𑀡𑀺𑀓𑀸, 𑀅𑀫𑁆𑀩𑀝𑁆𑀞𑀸𑀧𑀺. 𑀤𑁆𑀯𑀬𑀁 ‘‘𑀤𑁂𑀯𑀸𑀮𑀺’’𑀇𑀢𑀺 𑀔𑁆𑀬𑀸𑀢𑀸𑀬𑀁. 𑀲𑀼𑀦𑁆𑀤𑀭𑀁 𑀤𑀮𑀫𑁂𑀢𑀺𑀲𑁆𑀲𑀸 𑀲𑀢𑁆𑀢𑀮𑀸, 𑀤𑀲𑁆𑀲 𑀢𑁄, 𑀲𑀢𑁆𑀢 𑀤𑀮𑀸𑀦𑀺 𑀬𑀲𑁆𑀲𑀸 𑀯𑀸 𑀲𑀢𑁆𑀢𑀮𑀸. 𑀦𑀯𑀸 𑀦𑀽𑀢𑀦𑀸 𑀫𑀮𑁆𑀮𑀺𑀓𑀸 𑀦𑀯𑀫𑀮𑁆𑀮𑀺𑀓𑀸. 𑀦𑀯𑀫𑀸𑀮𑀺𑀓𑀸𑀧𑀺.

𑁫𑁭𑁭. 𑀤𑁆𑀯𑀬𑀁 𑀧𑀼𑀡𑁆𑀟𑀓𑁂 ‘‘𑀮𑀁𑀲𑁆𑀯𑀡’’𑀇𑀢𑀺 𑀔𑁆𑀬𑀸𑀢𑁂. 𑀯𑀲𑀦𑁆𑀢𑁂 𑀧𑀼𑀧𑁆𑀨𑀢𑀺 𑀯𑀸𑀲𑀦𑁆𑀢𑀻. 𑀅𑀢𑀺𑀫𑀼𑀤𑀁 𑀢𑀦𑁄𑀢𑀻𑀢𑀺 𑀅𑀢𑀺𑀫𑀼𑀢𑁆𑀢𑁄, 𑀦𑀺𑀧𑀸𑀢𑀦𑀸. 𑀫𑀸𑀥𑀯𑀻, 𑀮𑀢𑀸𑀧𑀺. 𑀫𑀥𑀼𑀫𑁆𑀳𑀺 𑀘𑀺𑀢𑁆𑀢𑁂, 𑀯𑁂𑀲𑀸𑀔𑁂 𑀯𑀸 𑀧𑀼𑀧𑁆𑀨𑀢𑀻𑀢𑀺 𑀫𑀸𑀥𑀯𑀻.

‘‘𑀮𑀢𑀸 𑀚𑁄𑀢𑀺𑀫𑀢𑀻𑀧𑀓𑁆𑀓-𑀲𑀸𑀔𑀸𑀯𑀮𑁆𑀮𑀻𑀧𑀺𑀬𑀗𑁆𑀕𑀼𑀲𑀼;

𑀮𑀢𑀸 𑀓𑀢𑁆𑀣𑀽𑀭𑀺𑀓𑀸𑀬𑀜𑁆𑀘, 𑀲𑀸 𑀤𑀼𑀩𑁆𑀩𑀸𑀫𑀸𑀥𑀯𑀻𑀲𑀼 𑀘𑀸’’𑀢𑀺.

𑀮𑀢𑀸 𑀅𑀦𑁂𑀓𑀢𑁆𑀣𑀸. 𑀤𑁆𑀯𑀬𑀁 𑀓𑀭𑀯𑀻𑀭𑁂. 𑀓𑀼𑀘𑁆𑀙𑀺𑀢𑀁 𑀭𑀯𑀦𑁆𑀢𑀺 𑀅𑀲𑁆𑀲𑀸 𑀬𑁂𑀦 𑀓𑀭𑀯𑀻𑀭𑁄, 𑀈𑀭𑁄. 𑀅𑀲𑁆𑀲𑁂 𑀫𑀸𑀭𑁂𑀢𑀻𑀢𑀺 𑀅𑀲𑁆𑀲𑀫𑀸𑀭𑀓𑁄. 𑀧𑀝𑀺𑀳𑀸𑀲𑁄𑀧𑀺.

𑀤𑁆𑀯𑀬𑀁 𑀫𑀸𑀢𑀼𑀮𑀼𑀗𑁆𑀕𑁂. 𑀫𑀢𑁆𑀢𑁄 𑀮𑀼𑀚𑁆𑀚𑀢𑀺 𑀬𑁂𑀦 𑀫𑀸𑀢𑀼𑀮𑀼𑀗𑁆𑀕𑁄, 𑀮𑀼𑀚 𑀯𑀺𑀦𑀸𑀲𑁂. 𑀧𑀭𑀺𑀧𑀼𑀡𑁆𑀡𑀩𑀻𑀚𑀢𑀸𑀬 𑀩𑀻𑀚𑀧𑀽𑀭𑁄. 𑀭𑀼𑀘𑀓𑁄𑀧𑀺, 𑀭𑀼𑀘 𑀤𑀺𑀢𑁆𑀢𑀺𑀬𑀁, 𑀡𑁆𑀯𑀼. 𑀤𑁆𑀯𑀬𑀁 𑀥𑀼𑀢𑁆𑀢𑀼𑀭𑁂. 𑀉𑀕𑁆𑀕𑀁 𑀫𑀚𑁆𑀚𑀢𑀺 𑀬𑁂𑀦 𑀉𑀫𑁆𑀫𑀢𑁆𑀢𑁄, 𑀫𑀤 𑀉𑀫𑁆𑀫𑀸𑀤𑁂. 𑀫𑀸𑀭𑁂𑀢𑀻𑀢𑀺 𑀫𑀸𑀢𑀼𑀮𑁄, 𑀉𑀮𑁄, 𑀭𑀲𑁆𑀲 𑀢𑁄. ‘‘𑀉𑀫𑁆𑀫𑀢𑁆𑀢𑁄 𑀓𑀺𑀢𑀯𑁄 𑀥𑀼𑀢𑁆𑀢𑁄, 𑀥𑀢𑁆𑀢𑀽𑀭𑁄 𑀓𑀦𑀓𑀸𑀯𑁆𑀳𑀬𑁄, 𑀫𑀸𑀢𑀼𑀮𑁄 𑀫𑀤𑀦𑁄’’𑀢𑁆𑀬𑀫𑀭𑀓𑁄𑀲𑁄 [𑀅𑀫𑀭 𑁧𑁪.𑁭𑁭].

𑁫𑁭𑁮. 𑀤𑁆𑀯𑀬𑀁 𑀓𑀡𑁆𑀳𑀧𑀸𑀓𑀨𑀮𑁂. 𑀓𑀭𑀁 𑀳𑀢𑁆𑀣𑀁 𑀫𑀤𑁆𑀤𑀢𑀺 𑀓𑀡𑁆𑀝𑀓𑁂𑀦 𑀓𑀭𑀫𑀦𑁆𑀤𑁄. 𑀓𑀭𑀫𑀤𑁆𑀤𑁄𑀧𑀺. 𑀲𑀼𑀝𑁆𑀞𑀼 𑀲𑀺𑀦𑁄𑀢𑀻𑀢𑀺 𑀲𑀼𑀲𑁂𑀦𑁄, 𑀲𑀺 𑀩𑀦𑁆𑀥𑀦𑁂, 𑀬𑀼. 𑀤𑁆𑀯𑀬𑀁 𑀓𑀼𑀦𑁆𑀤𑁂. 𑀓𑀼𑀡 𑀲𑀗𑁆𑀓𑁄𑀘𑀦𑁂, 𑀤𑁄, 𑀦𑀢𑁆𑀢𑀁, 𑀓𑀼𑀡 𑀲𑀤𑁆𑀤𑁄𑀧𑀓𑀭𑀡𑁂𑀲𑀼 𑀯𑀸. 𑀫𑀸𑀖𑁂 𑀪𑀯𑀁 𑀫𑀸𑀖𑁆𑀬𑀁, 𑀬𑁄, 𑀢𑀲𑁆𑀫𑀺𑀁 𑀓𑀸𑀮𑁂 𑀳𑀺 𑀧𑀼𑀧𑁆𑀨𑀸𑀤𑀺𑀲𑀫𑀺𑀤𑁆𑀥𑀺 𑀪𑀯𑀢𑀻𑀢𑀺 𑀢𑀩𑁆𑀪𑀯𑀢𑁆𑀢𑁂𑀦 𑀩𑁆𑀬𑀧𑀤𑁂𑀲𑁄.

𑀤𑁆𑀯𑀬𑀁 𑀤𑁂𑀯𑀢𑀸𑀲𑁂. 𑀤𑁂𑀯𑀢𑀸 𑀆𑀲𑀦𑁆𑀢𑀺 𑀬𑀁 𑀤𑁂𑀯𑀢𑀸𑀲𑁄. 𑀚𑀻𑀫𑀽𑀢𑀓𑀸𑀮𑁂 𑀲𑀜𑁆𑀚𑀸𑀢𑀢𑁆𑀢𑀸 𑀚𑀻𑀫𑀽𑀢𑁄, 𑀫𑁆𑀳𑀦𑀮𑀸. 𑀤𑁆𑀯𑀬𑀁 𑀲𑀦𑀸𑀫𑀧𑀲𑀺𑀤𑁆𑀥𑁂 𑀧𑀼𑀧𑁆𑀨𑀯𑀺𑀝𑀧𑁂. 𑀧𑀼𑀧𑁆𑀨𑀫𑀸𑀲𑀼𑀁 𑀦 𑀫𑀺𑀮𑀸𑀢𑀫𑀲𑁆𑀲 𑀪𑀯𑀢𑀻𑀢𑀺 𑀅𑀫𑀺𑀮𑀸𑀢𑁄. 𑀫𑀳𑀦𑁆𑀢𑀫𑁆𑀧𑀺 𑀓𑀸𑀮𑀁 𑀲𑀳𑀢𑀻𑀢𑀺 𑀫𑀳𑀸𑀲𑀳𑀸.

𑁫𑁭𑁯. 𑀘𑀢𑀼𑀓𑁆𑀓𑀁 𑀛𑀺𑀡𑁆𑀟𑀺𑀲𑀸𑀫𑀜𑁆𑀜𑁂. 𑀲𑀺𑀭𑀻 𑀯𑀢𑁆𑀢𑀢𑀺 𑀬𑁂𑀦 𑀲𑁂𑀭𑁂𑀬𑁆𑀬𑀓𑁄, 𑀡𑁂𑀬𑁆𑀬𑀓𑁄. 𑀤𑀸𑀲𑀦𑀸𑀫𑀓𑀢𑁆𑀢𑀸 𑀤𑀸𑀲𑀻. 𑀓𑀺𑀭 𑀯𑀺𑀓𑁆𑀓𑀺𑀭𑀡𑁂, 𑀆𑀢𑁄, 𑀤𑁆𑀯𑀺𑀢𑁆𑀢𑀁. 𑀓𑀼𑀭 𑀲𑀤𑁆𑀤𑁂, 𑀟𑁄, 𑀲𑀓𑀢𑁆𑀣𑁂 𑀓𑁄.

𑀤𑁆𑀯𑀬𑀁 𑀓𑀡𑁆𑀝𑁂𑀦, 𑀧𑀢𑁆𑀭𑁂𑀦 𑀘 𑀲𑀺𑀢𑁂 𑀧𑀡𑁆𑀡𑀸𑀲𑁂. 𑀅𑀚 𑀕𑀫𑀦𑁂, 𑀉𑀓𑁄. 𑀲𑀺𑀢𑁄 𑀲𑀼𑀓𑁆𑀓𑁄 𑀧𑀡𑁆𑀡𑀸𑀲𑁄 𑀲𑀺𑀢𑀧𑀡𑁆𑀡𑀸𑀲𑁄. 𑀤𑁆𑀯𑀬𑀁 𑀅𑀧𑁆𑀧𑀧𑀢𑁆𑀢𑁂 𑀧𑀡𑁆𑀡𑀸𑀲𑁂. 𑀈𑀭 𑀓𑀫𑁆𑀧𑀦𑁂, 𑀬𑀼. 𑀨𑀡𑀺𑀁 𑀚𑀬𑀢𑀺 𑀨𑀡𑀺𑀚𑁆𑀚𑀓𑁄, 𑀬𑀲𑁆𑀲 𑀓𑁄.

𑁫𑁮𑁦. 𑀤𑁆𑀯𑀬𑀁 𑀚𑀧𑀸𑀓𑀼𑀲𑀼𑀫𑁂. 𑀚𑀧𑀢𑀺 𑀬𑀸𑀬 𑀚𑀧𑀸, 𑀚𑀼 𑀚𑀯𑀦𑁂 𑀯𑀸, 𑀧𑁄, 𑀉𑀲𑁆𑀲𑀢𑁆𑀢𑀁. 𑀫𑀭𑀼𑀤𑁂𑀲𑀚𑁂 𑀓𑀡𑁆𑀝𑀓𑀺𑀦𑀺 𑀓𑀭𑀪𑀧𑁆𑀧𑀺𑀬𑁂 𑀢𑀭𑀼𑀯𑀺𑀲𑁂𑀲𑁂 𑀓𑀭𑀻𑀭𑀸𑀤𑀺𑀤𑁆𑀯𑀬𑀁. 𑀓𑀭𑁄𑀢𑀺𑀲𑁆𑀫𑀸 𑀈𑀭𑁄. 𑀓𑀘 𑀩𑀦𑁆𑀥𑀦𑁂, 𑀤𑁆𑀯𑀺𑀢𑁆𑀢𑀁, 𑀓𑀓𑀘𑁄, 𑀕𑀦𑁆𑀣𑀺𑀮𑁄𑀧𑀺.

𑀤𑁆𑀯𑀬𑀁 𑀭𑀼𑀓𑁆𑀔𑁄𑀧𑀭𑀺𑀚𑀸𑀢𑁂 𑀯𑀺𑀚𑀸𑀢𑀺𑀬𑁂 𑀧𑀮𑁆𑀮𑀯𑁂. 𑀭𑀼𑀓𑁆𑀔𑁂 𑀚𑀸𑀬𑀫𑀸𑀦𑀸 𑀢𑀁 𑀅𑀤𑁆𑀤𑀢𑀺 𑀳𑀺𑀁𑀲𑀢𑀻𑀢𑀺 𑀭𑀼𑀓𑁆𑀔𑀸𑀤𑀦𑀻, 𑀅𑀤𑁆𑀤 𑀳𑀺𑀁𑀲𑀸𑀬𑀁, 𑀬𑀼, 𑀦𑀤𑀸𑀤𑀺, 𑀤𑀮𑁄𑀧𑁄. 𑀯𑀦𑁆𑀤 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀼, 𑀅, 𑀇𑀢𑁆𑀣𑀺𑀬𑀁, 𑀲𑀓𑀢𑁆𑀣𑁂 𑀓𑁄, 𑀅𑀲𑁆𑀲 𑀤𑀻𑀖𑁄. 𑀭𑀼𑀓𑁆𑀔𑀭𑀼𑀳𑀸, 𑀚𑀻𑀯𑀦𑁆𑀢𑀺𑀓𑀸𑀧𑀺. 𑀤𑁆𑀯𑀬𑀁 𑀘𑀺𑀢𑁆𑀢𑀓𑁂. 𑀘𑀺𑀢𑀺 𑀳𑀺𑀁𑀲𑀸𑀬𑀁, 𑀕𑀦𑁆𑀥𑁂 𑀘, 𑀡𑁆𑀯𑀼. 𑀅𑀕𑁆𑀕𑀺𑀲𑀜𑁆𑀜𑀺𑀢𑁄𑀢𑀺 𑀅𑀕𑁆𑀕𑀺𑀧𑀭𑀺𑀬𑀸𑀬𑀦𑀸𑀫𑀓𑁄. 𑀧𑀸𑀞𑀻𑀧𑀺, 𑀧𑀼𑀫𑁂’𑀬𑀁.

𑁫𑁮𑁧. 𑀤𑁆𑀯𑀬𑀁 𑀕𑀡𑀭𑀽𑀧𑁂. 𑀅𑀓𑁆𑀓𑁄 𑀲𑀽𑀭𑀺𑀬𑁄, 𑀢𑀧𑁆𑀧𑀭𑀺𑀬𑀸𑀬𑀦𑀸𑀫𑀓𑀢𑁆𑀢𑀸 𑀅𑀓𑁆𑀓𑁄. 𑀯𑀺𑀓𑀭𑁄𑀢𑀻𑀢𑀺 𑀯𑀺𑀓𑀺𑀭𑀡𑁄, 𑀬𑀼. 𑀅𑀲𑁆𑀲𑀺. 𑀅𑀓𑁆𑀓𑀯𑁆𑀳𑁄, 𑀯𑀲𑀼𑀓𑁄, 𑀅𑀧𑁆𑀨𑁄𑀝𑁄, 𑀫𑀦𑁆𑀤𑀸𑀭𑁄, 𑀅𑀓𑁆𑀓𑀧𑀡𑁆𑀡𑁄𑀧𑀺. ‘‘𑀧𑀼𑀫𑁂 𑀅𑀓𑁆𑀓𑀯𑁆𑀳𑁄 𑀅𑀧𑁆𑀨𑁄𑀝𑁄, 𑀯𑀦𑀫𑀸𑀮𑁆𑀬𑀧𑀭𑀸𑀚𑀺𑀢𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁮𑁦] 𑀭𑀼𑀤𑁆𑀤𑁄. 𑀫𑀦𑁆𑀤𑀸𑀭𑁄 𑀤𑁂𑀯𑀤𑀼𑀫𑀫𑁆𑀳𑀺 𑀧𑀸𑀭𑀺𑀪𑀤𑁆𑀤𑀓𑁂𑀧𑀺. 𑀢𑀲𑁆𑀫𑀺𑀁 𑀅𑀓𑁆𑀓𑁂 𑀬𑁄 𑀲𑁂𑀢𑀧𑀼𑀧𑁆𑀨𑀓𑁄, 𑀢𑀲𑁆𑀫𑀺𑀁 𑀅𑀴𑀓𑁆𑀓𑁄. 𑀲𑁂𑀢𑀧𑀼𑀧𑁆𑀨𑀢𑀸𑀬 𑀅𑀮𑀁𑀪𑀽𑀢𑁄 𑀅𑀓𑁆𑀓𑁄 𑀅𑀴𑀓𑁆𑀓𑁄, 𑀅𑀮 𑀪𑀽𑀲𑀦𑁂, 𑀴𑀢𑁆𑀢𑀁. 𑀧𑀢𑀸𑀧𑀲𑁄𑀧𑀺. 𑀤𑁆𑀯𑀬𑀁 𑀙𑀺𑀦𑁆𑀦𑀭𑀼𑀳𑀸𑀬𑀁. 𑀢𑀺𑀢𑁆𑀢𑀭𑀲𑀢𑁆𑀢𑀸 𑀧𑀽𑀢𑀺𑀪𑀽𑀢𑀸 𑀮𑀢𑀸 𑀧𑀽𑀢𑀺𑀮𑀢𑀸, 𑀧𑀽 𑀧𑀯𑀦𑁂 𑀯𑀸,𑀢𑀺. 𑀭𑁄𑀕𑀫𑀮𑀁 𑀧𑀼𑀦𑀸𑀢𑀻𑀢𑀺 𑀧𑀽𑀢𑀺, 𑀲𑀸 𑀏𑀯 𑀮𑀢𑀸 𑀧𑀽𑀢𑀺𑀮𑀢𑀸. 𑀕𑀼𑀴 𑀭𑀓𑁆𑀔𑀡𑁂, 𑀘𑁄, 𑀦𑀤𑀸𑀤𑀺. 𑀕𑀭 𑀲𑁂𑀘𑀦𑁂 𑀯𑀸. 𑀅𑀫𑀢𑀸, 𑀫𑀥𑀼𑀧𑀡𑁆𑀡𑀻𑀧𑀺. 𑀫𑀥𑀼 𑀇𑀯 𑀧𑀡𑁆𑀡𑀫𑀲𑁆𑀲𑀸 𑀫𑀥𑀼𑀧𑀡𑁆𑀡𑀻. 𑀤𑁆𑀯𑀬𑀁 𑀥𑀦𑀼𑀲𑁂𑀦𑀺𑀬𑀁, 𑀬𑀸 𑀧𑀢𑁆𑀢𑁂𑀳𑀺 𑀯𑀘𑀸𑀲𑀤𑀺𑀲𑀻, 𑀢𑀢𑁆𑀢𑀘𑁄 𑀢𑀦𑁆𑀢𑀥𑀦𑀼𑀕𑀼𑀡𑁄𑀧𑀬𑀼𑀢𑁆𑀢𑁄. 𑀫𑀼𑀩𑁆𑀩𑀸𑀯𑀺𑀓𑀸𑀭𑀢𑀸𑀬𑁂𑀯 𑀥𑀦𑀼𑀚𑀺𑀬𑀸 ‘‘𑀫𑀼𑀩𑁆𑀩𑀻’’𑀢𑁆𑀬𑀼𑀘𑁆𑀘𑀢𑁂, 𑀫𑀼𑀩𑁆𑀩 𑀩𑀦𑁆𑀥𑀦𑁂, 𑀅, 𑀫𑀼𑀩𑁆𑀩𑀸. 𑀫𑀥𑀼𑀭𑀲𑀢𑁆𑀢𑀸 𑀫𑀥𑀼𑀭𑀲𑀸. 𑀤𑁂𑀯𑀻, 𑀫𑁄𑀭𑀝𑀸𑀧𑀺. 𑀫𑀼𑀭 𑀧𑀯𑁂𑀥𑀦𑁂, 𑀅𑀝𑁄, 𑀫𑁄𑀭𑀝𑀸.

𑁫𑁮𑁨. 𑀤𑁆𑀯𑀬𑀁 𑀫𑀓𑁆𑀓𑀝𑀺𑀬𑀁. 𑀓𑀧𑀻𑀦𑀁 𑀯𑀸𑀦𑀭𑀸𑀦𑀁 𑀓𑀘𑁆𑀙𑀼𑀁 𑀚𑀦𑁂𑀢𑀻𑀢𑀺 𑀓𑀧𑀺𑀓𑀘𑁆𑀙𑀼. 𑀓𑀧𑀺𑀓𑀘𑁆𑀘𑀼𑀧𑀺. 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀢𑀸𑀬 𑀤𑀼𑀨𑀲𑁆𑀲𑁄. 𑀅𑀢𑁆𑀢𑀕𑀼𑀢𑁆𑀢𑀸, 𑀚𑀟𑀸, 𑀅𑀩𑁆𑀬𑀡𑁆𑀟𑀸, 𑀓𑀡𑁆𑀟𑀽𑀭𑀸, 𑀧𑀸𑀯𑀼𑀲𑀸𑀬𑀺𑀦𑀻, 𑀲𑀽𑀓𑀲𑀺𑀫𑁆𑀩𑀺𑀧𑀺. ‘‘𑀅𑀬𑀁 𑀨𑀲𑁆𑀲𑁂𑀦 𑀓𑀡𑁆𑀟𑀼𑀁 𑀚𑀦𑀬𑀢𑀻’’𑀢𑀺 𑀬𑀸 𑀮𑁄𑀓𑁂𑀳𑀺 𑀧𑀭𑀺𑀳𑀭𑀻𑀬𑀢𑁂, 𑀢𑀢𑁄 𑀅𑀬𑀁 𑀅𑀢𑁆𑀢𑀦𑀸 𑀕𑀼𑀢𑁆𑀢𑀸 𑀭𑀓𑁆𑀔𑀺𑀢𑀸 𑀅𑀢𑁆𑀢𑀕𑀼𑀢𑁆𑀢𑀸. 𑀧𑀸𑀯𑀼𑀲𑀸𑀬𑀁 𑀉𑀢𑀼𑀬𑀁 𑀏𑀢𑀺 𑀚𑀸𑀬𑀢𑁂, 𑀡𑁄, 𑀇𑀦𑀻. 𑀲𑀽𑀓𑀲𑀳𑀺𑀢𑀸 𑀲𑀺𑀫𑁆𑀩𑀺 𑀅𑀲𑁆𑀲𑀸 𑀲𑀽𑀓𑀲𑀺𑀫𑁆𑀩𑀺, 𑀭𑀲𑁆𑀲𑀦𑁆𑀢𑁄. 𑀤𑁆𑀯𑀬𑀁 𑀫𑀡𑁆𑀟𑀽𑀓𑀧𑀡𑁆𑀡𑀺𑀬𑀁. 𑀫𑀚 𑀲𑀼𑀤𑁆𑀥𑀺𑀬𑀁, 𑀞𑁄. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀓𑀭𑀡𑁂 𑀅, 𑀭𑀲𑁆𑀲𑁄. 𑀲𑀫𑀗𑁆𑀕𑀸, 𑀬𑁄𑀚𑀦𑀯𑀮𑁆𑀮𑀻𑀧𑀺. 𑀲𑀫𑀗𑁆𑀕𑀢𑀻𑀢𑀺 𑀲𑀫𑀗𑁆𑀕𑀸, 𑀅. 𑀬𑁄𑀚𑀦𑀁 𑀯𑀮𑁆𑀮𑀻 𑀬𑀲𑁆𑀲𑀸 𑀬𑁄𑀚𑀦𑀯𑀮𑁆𑀮𑀻.

𑀤𑁆𑀯𑀬𑀁 𑀯𑀦𑀢𑀺𑀢𑁆𑀢𑀺𑀓𑀸𑀬𑀁. 𑀅𑀫𑁆𑀩 𑀲𑀤𑁆𑀤𑁂, 𑀞𑁄, 𑀅𑀯 𑀭𑀓𑁆𑀔𑀡𑁂 𑀯𑀸, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀧𑀸 𑀭𑀓𑁆𑀔𑀡𑁂, 𑀞𑁄. 𑀲𑁂𑀢𑀸, 𑀧𑀸𑀧𑀘𑁂𑀮𑀻𑀧𑀺. 𑀲𑁂𑀢𑀭𑀲𑁂𑀦 𑀬𑀼𑀚𑁆𑀚𑀢𑁂𑀢𑀺, 𑀅. 𑀤𑁆𑀯𑀬𑀁 𑀓𑀝𑀼𑀓𑀭𑁄𑀳𑀺𑀡𑀺𑀬𑀁. 𑀓𑀝 𑀯𑀲𑁆𑀲𑀸𑀯𑀭𑀡𑀕𑀢𑀻𑀲𑀼. 𑀉, 𑀓𑀝𑀼, 𑀦𑀸𑀭𑀻. 𑀓𑀝𑀼𑀓𑀭𑀲𑀸 𑀳𑀼𑀢𑁆𑀯𑀸 𑀭𑀼𑀳𑀢𑀻𑀢𑀺 𑀓𑀝𑀼𑀓𑀭𑁄𑀳𑀺𑀡𑀻, 𑀭𑀼𑀳 𑀚𑀦𑀦𑁂, 𑀬𑀼, 𑀦𑀤𑀸𑀤𑀺. ‘‘𑀓𑀝𑀼𑀓𑀭𑁄𑀳𑀺𑀡𑀻’’𑀢𑀺 𑀲𑀫𑀼𑀤𑀺𑀢𑁂𑀦 𑀦𑀸𑀫𑀫𑀺𑀤𑀁. 𑀓𑀝𑀼𑀭𑁄𑀳𑀺𑀡𑀻𑀧𑀺.

𑁫𑁮𑁩. 𑀤𑁆𑀯𑀬𑀁 𑀔𑀭𑀫𑀜𑁆𑀚𑀭𑀺𑀬𑀁 ‘‘𑀘𑀘𑀲𑀺𑀫’’𑀇𑀢𑀺 𑀔𑁆𑀬𑀸𑀢𑀸𑀬𑀁. 𑀅𑀧𑀫𑀚𑁆𑀚𑀦𑁆𑀢𑀺 𑀯𑀢𑁆𑀣𑀸𑀤𑀺𑀓’𑀫𑀦𑁂𑀦𑁂𑀢𑀺 𑀅𑀧𑀸𑀫𑀕𑁆𑀕𑁄, 𑀤𑀻𑀖𑁄 𑀉𑀧𑀲𑀕𑁆𑀕𑀲𑁆𑀲. 𑀲𑀺𑀔𑀭𑀫𑀲𑁆𑀲𑀸𑀢𑀺 𑀲𑁂𑀔𑀭𑀺𑀓𑁄. 𑀥𑀸𑀫𑀕𑁆𑀕𑀯𑁄, 𑀯𑀺𑀫𑀼𑀔𑀧𑀼𑀧𑁆𑀨𑀻𑀧𑀺. ‘‘𑀖𑁄𑀲𑀓𑁂 𑀔𑀭𑀫𑀜𑁆𑀚𑀭𑀺𑀬𑀁, 𑀥𑀸𑀫𑀕𑁆𑀕𑀯𑁄 𑀧𑀼𑀫𑁂 𑀫𑀢𑁄’’. 𑀯𑀺𑀫𑀼𑀔𑀁 𑀧𑀼𑀧𑁆𑀨𑀫𑀲𑁆𑀲𑀸. 𑀤𑁆𑀯𑀬𑀁 𑀓𑀡𑀸𑀬𑀁. 𑀧𑀺𑀢𑁆𑀢𑀁 𑀨𑀮𑀢𑀺 𑀓𑀼𑀧𑁆𑀧𑀢𑀺 𑀬𑀸𑀬 𑀧𑀺𑀧𑁆𑀨𑀮𑀻, 𑀦𑀤𑀸𑀤𑀺. 𑀫𑀕𑀥𑁂 𑀪𑀯𑀸 𑀫𑀸𑀕𑀥𑀻, 𑀫𑀕𑀥𑀸𑀦𑀁 𑀅𑀬𑀁 𑀯𑀸 𑀫𑀸𑀕𑀥𑀻, 𑀢𑀢𑁆𑀭 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸, 𑀩𑀸𑀳𑀼𑀮𑁆𑀬𑁂𑀦 𑀯𑀸 𑀢𑀢𑁆𑀭 𑀚𑀸𑀬𑀫𑀸𑀦𑀢𑁆𑀢𑀸 𑀢𑀁𑀲𑀫𑀜𑁆𑀜𑀸𑀬 𑀩𑁆𑀬𑀧𑀤𑀺𑀲𑁆𑀲𑀢𑁂. 𑀯𑁂𑀤𑁂𑀳𑀻, 𑀓𑀡𑀸, 𑀓𑁄𑀮𑀸𑀧𑀺. 𑀯𑁂𑀤𑁂𑀳𑀸𑀦𑀫𑀬𑀁 𑀯𑁂𑀤𑁂𑀳𑀻. 𑀓𑀡𑀸 𑀦𑀸𑀦𑀢𑁆𑀣𑀸, 𑀯𑀼𑀢𑁆𑀢𑀜𑁆𑀘 ‘‘𑀓𑀡𑀸 𑀧𑀺𑀧𑁆𑀨𑀮𑀺’𑀚𑀸𑀚𑀻 𑀘𑁂’’𑀢𑀺.

𑀤𑁆𑀯𑀬𑀁 𑀢𑀺𑀓𑀡𑁆𑀝𑀓𑁂. 𑀕𑀯𑀁 𑀓𑀡𑁆𑀝𑀓𑁄 𑀕𑁄𑀓𑀡𑁆𑀝𑀓𑁄, 𑀧𑀣𑀯𑀺𑀬𑀁 𑀯𑀸 𑀮𑀕𑁆𑀕𑁄 𑀓𑀡𑁆𑀝𑀓𑁄 𑀕𑁄𑀓𑀡𑁆𑀝𑀓𑁄. 𑀲𑀺𑀗𑁆𑀖 𑀖𑀸𑀬𑀦𑁂, 𑀆𑀝𑁄. 𑀧𑀮𑀗𑁆𑀓𑀲𑀸, 𑀲𑀸𑀤𑀼𑀓𑀡𑁆𑀝𑁄𑀧𑀺. 𑀬𑀼𑀢𑁆𑀢𑀭𑀸𑀲𑁆𑀦𑀸𑀬𑀁 𑀧𑀮𑀸𑀲𑁂 𑀘 𑀧𑀮𑀗𑁆𑀓𑀲𑀸 𑀣𑀺𑀬𑀁. 𑀲𑀸𑀤𑀼𑀓𑀡𑁆𑀝𑁄 𑀯𑀺𑀓𑀗𑁆𑀓𑀢𑁂𑀧𑀺. 𑀤𑁆𑀯𑀬𑀁 𑀳𑀢𑁆𑀣𑀺𑀧𑀺𑀧𑁆𑀨𑀮𑀺𑀬𑀁. 𑀓𑁄𑀮𑀸𑀓𑀸𑀭𑀸, 𑀢𑀁𑀦𑀸𑀫𑀺𑀓𑀸 𑀯𑀸 𑀯𑀮𑁆𑀮𑀻 𑀓𑁄𑀮𑀯𑀮𑁆𑀮𑀺, 𑀭𑀲𑁆𑀲𑁄. 𑀇𑀪𑀸𑀦𑀁 𑀳𑀢𑁆𑀣𑀻𑀦𑀁 𑀧𑀺𑀧𑁆𑀨𑀮𑀻 𑀇𑀪𑀧𑀺𑀧𑁆𑀨𑀮𑀻. 𑀓𑀧𑀺𑀯𑀮𑁆𑀮𑀻, 𑀯𑀲𑀺𑀭𑁄𑀧𑀺. 𑀯𑀲𑀺𑀭𑁄 𑀦𑀸𑀦𑀢𑁆𑀣𑁄. 𑀯𑀲𑀺𑀭𑁄 𑀅𑀧𑀸𑀫𑀕𑁆𑀕𑁄 𑀲𑀸𑀫𑀼𑀤𑁆𑀤𑀮𑀯𑀡𑀁 𑀳𑀢𑁆𑀣𑀺𑀧𑀺𑀧𑁆𑀨𑀮𑀺 𑀘𑁂𑀢𑀺. 𑀧𑀼𑀫𑁂’𑀬𑀁.

𑁫𑁮𑁪. 𑀤𑁆𑀯𑀬𑀁 𑀙𑀕𑀦𑁆𑀣𑀸𑀬𑀁, 𑀬𑀸 ‘‘𑀉𑀕𑁆𑀕𑀕𑀦𑁆𑀥𑀸’’𑀢𑀺𑀧𑁆𑀬𑀼𑀘𑁆𑀘𑀢𑁂. 𑀕𑀼𑀦𑁆𑀦𑀁 𑀮𑁄𑀫𑀲𑀫𑁆𑀧𑀸𑀢𑀦𑀝𑁆𑀞𑀸𑀦𑁂 𑀚𑀸𑀢𑀸 𑀕𑁄𑀮𑁄𑀫𑀻, 𑀯𑀘 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀓𑀭𑀡𑁂 𑀅, 𑀲𑀢𑀧𑀩𑁆𑀩𑀺𑀓𑀸𑀧𑀺. 𑀯𑀘𑀸 𑀲𑀼𑀓𑁆𑀓𑀮𑁄𑀳𑀺𑀢𑀫𑀽𑀮𑀪𑁂𑀤𑁂𑀦 𑀤𑀼𑀯𑀺𑀥𑀸, 𑀢𑀢𑁆𑀭𑀲𑀼𑀓𑁆𑀓𑀸 ‘‘𑀳𑁂𑀫𑀯𑀢𑀻’’𑀢𑁆𑀬𑀼𑀘𑁆𑀘𑀢𑁂 𑀅𑀫𑀭𑀓𑁄𑀲𑁂 [𑀅𑀫𑀭 𑁧𑁪.𑁧𑁦𑁨-𑁩]. 𑀤𑁆𑀯𑀬𑀁 𑀅𑀧𑁆𑀨𑁄𑀝𑀸𑀬𑀁. 𑀓𑀡𑁆𑀡𑀲𑀡𑁆𑀞𑀸𑀦𑀧𑀼𑀧𑁆𑀨𑀢𑀸𑀬 𑀓𑀡𑁆𑀡𑀻. 𑀕𑀺𑀭𑀺𑀫𑁆𑀳𑀺 𑀚𑀸𑀢𑀸 𑀓𑀡𑁆𑀡𑀻 𑀕𑀺𑀭𑀺𑀓𑀡𑁆𑀡𑀻. 𑀭𑁄𑀕𑀸𑀤𑀺𑀚𑀺𑀢𑀢𑁆𑀢𑀸 𑀅𑀧𑀭𑀸𑀚𑀺𑀢𑀸.

𑀤𑁆𑀯𑀬𑀁 𑀓𑀮𑀲𑀺𑀬𑀁. 𑀲𑀻𑀳𑀧𑀼𑀘𑁆𑀙𑀸𑀓𑀸𑀭𑀓𑀼𑀲𑀼𑀫𑀫𑀜𑁆𑀚𑀭𑀺𑀢𑀸𑀬 𑀲𑀻𑀳𑀧𑀼𑀘𑁆𑀙𑀺. 𑀧𑀜𑁆𑀳𑀺 𑀅𑀧𑁆𑀧𑀢𑀦𑀼 𑀯𑀼𑀘𑁆𑀘𑀢𑁂. 𑀧𑀜𑁆𑀳𑀺 𑀧𑀡𑁆𑀡𑀁 𑀬𑀲𑁆𑀲𑀸 𑀧𑀜𑁆𑀳𑀺𑀧𑀡𑁆𑀡𑀻. 𑀧𑀼𑀣𑀼𑀧𑀡𑁆𑀡𑀻, 𑀕𑀼𑀳𑀸𑀧𑀺, 𑀧𑀼𑀣𑀼 𑀅𑀲𑀺𑀮𑀺𑀝𑁆𑀞𑀁 𑀧𑀡𑁆𑀡𑀫𑀲𑁆𑀲𑀸 𑀧𑀼𑀣𑀼𑀧𑀡𑁆𑀡𑀻. 𑀕𑀳𑁆𑀯𑀭𑁂 𑀲𑀻𑀳𑀧𑀼𑀘𑁆𑀙𑀜𑁆𑀘, 𑀣𑀺𑀬𑀁 𑀙𑀫𑀸𑀢𑀼𑀓𑁂 𑀕𑀼𑀳𑁄 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁯𑁩]. 𑀤𑁆𑀯𑀬𑀁 𑀲𑀸𑀮𑀧𑀡𑁆𑀡𑀺𑀬𑀁. 𑀲𑀸𑀮𑀧𑀡𑁆𑀡𑀲𑀤𑀺𑀲𑀯𑀺𑀝𑀢𑀸𑀬 𑀲𑀸𑀮𑀧𑀡𑁆𑀡𑀻. 𑀲𑀸𑀮𑀁 𑀲𑁄𑀪𑀦𑀬𑀼𑀢𑁆𑀢𑀁 𑀧𑀡𑁆𑀡𑀫𑀲𑁆𑀲𑀸 𑀯𑀸 𑀲𑀸𑀮𑀧𑀡𑁆𑀡𑀻. 𑀣𑀼 𑀕𑀢𑀺𑀣𑁂𑀭𑀺𑀬𑁂𑀲𑀼, 𑀇𑀭𑁄, 𑀣𑀺𑀭𑁄.

𑁫𑁮𑁫. 𑀤𑁆𑀯𑀬𑀁 𑀓𑀡𑁆𑀝𑀓𑀸𑀭𑀺𑀓𑀸𑀬𑀁. 𑀦𑀺𑀤𑁆𑀤𑀳𑀢𑀺 𑀓𑀡𑁆𑀝𑀓𑀫𑀼𑀝𑁆𑀞𑁂𑀢𑀺 𑀦𑀺𑀤𑀺𑀤𑁆𑀥𑀺𑀓𑀸, 𑀡𑁆𑀯𑀼. 𑀪𑀬𑀓𑀭𑀡𑀯𑀲𑁂𑀦 𑀩𑁆𑀬𑀕𑁆𑀖𑀲𑀤𑀺𑀲𑀢𑀸𑀬 𑀩𑁆𑀬𑀕𑁆𑀖𑀻, 𑀩𑁆𑀭𑀳𑀢𑀻, 𑀔𑀼𑀤𑁆𑀤𑀸𑀧𑀺. 𑀤𑁆𑀯𑀬𑀁 𑀦𑀻𑀮𑀺𑀭𑀼𑀓𑁆𑀔𑁂. 𑀦𑀻𑀮 𑀯𑀡𑁆𑀡𑁂. 𑀦𑀻𑀮𑀯𑀡𑁆𑀡𑀢𑀸𑀬 𑀦𑀻𑀮𑀻, 𑀦𑀤𑀸𑀤𑀺, 𑀇𑀦𑀻, 𑀦𑀻𑀮𑀺𑀦𑀻, 𑀓𑀸𑀴𑀸, 𑀢𑀼𑀢𑁆𑀣𑀸𑀧𑀺.

𑀓𑀸𑀴𑀸 𑀓𑀡𑁆𑀳𑀢𑀺𑀯𑀼𑀢𑀸𑀬𑀁, 𑀦𑀻𑀮𑀻 𑀬𑁄𑀚𑀦𑀯𑀮𑁆𑀮𑀺𑀲𑀼;

𑀧𑀡𑁆𑀟𑁂 𑀭𑀲𑀜𑁆𑀚𑀦𑁂 𑀢𑀼𑀢𑁆𑀣𑀸, 𑀲𑀼𑀔𑀼𑀫𑁂𑀮𑀸𑀬 𑀦𑀻𑀮𑀺𑀬𑀁 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁯𑁪-𑁫].

𑀤𑁆𑀯𑀬𑀁 𑀕𑀼𑀜𑁆𑀚𑀸𑀬𑀁. 𑀚𑀜𑁆𑀚 𑀬𑀼𑀤𑁆𑀥𑁂, 𑀉𑀓𑁄, 𑀅𑀲𑁆𑀲𑀺, 𑀕𑀼𑀚 𑀲𑀤𑁆𑀤𑁂, 𑀅, 𑀩𑀺𑀦𑁆𑀤𑀸𑀕𑀫𑁄. 𑀦𑀸𑀫𑀦𑁆𑀢𑀭𑀸𑀦𑀺 𑀘𑀲𑁆𑀲 𑁋

𑀤𑀼𑀫𑁂 𑀲𑀸 𑀭𑀢𑁆𑀢𑀺𑀓𑀸 𑀭𑀢𑁆𑀢-𑀤𑀮𑀸 𑀘𑀽𑀴𑀸𑀫𑀡𑀻 𑀘 𑀲𑀸;

𑀓𑀸𑀓𑀘𑀺𑀜𑁆𑀘𑀻 𑀢𑀼𑀮𑀸𑀩𑀻𑀚𑀁, 𑀓𑀡𑁆𑀳𑀮𑀸 𑀘 𑀲𑀺𑀔𑀡𑁆𑀟𑀺𑀦𑀻.

𑀤𑁆𑀯𑀬’𑀫𑀳𑁂𑀭𑀼𑀬𑀁. 𑀅𑀬𑀫𑀳𑁂𑀭𑀼𑀇𑀘𑁆𑀘𑁂𑀯 𑀔𑁆𑀬𑀸𑀢𑀓𑀡𑁆𑀝𑀓𑀯𑀢𑀻 𑀪𑀯𑀢𑀺. 𑀲𑀢𑀁 𑀫𑀽𑀮𑀸𑀦𑀺 𑀬𑀲𑁆𑀲 𑀲𑀢𑀫𑀽𑀮𑀻. 𑀲𑀢𑀁 𑀭𑁄𑀕𑁂 𑀆𑀯𑀭𑀢𑀻𑀢𑀺 𑀲𑀢𑀸𑀯𑀭𑀻, 𑀯𑀭 𑀆𑀯𑀭𑀡𑀺𑀘𑁆𑀙𑀸𑀲𑀼, 𑀅𑀣 𑀯𑀸 ‘‘𑀲𑀢𑀸’’𑀢𑀺 𑀘 ‘‘𑀆𑀯𑀭𑀻’’𑀢𑀺 𑀘 𑀤𑁆𑀯𑁂 𑀦𑀸𑀫𑀸𑀦𑀺 𑀢𑀲𑁆𑀲𑀸. ‘‘𑀲𑀢𑀫𑀽𑀮𑀻 𑀩𑀳𑀼𑀲𑀼𑀢𑀸-𑀪𑀻𑀭𑀼 𑀇𑀦𑁆𑀤𑀻𑀯𑀭𑀻 𑀯𑀭𑀻’’𑀢𑀺 [𑀅𑀫𑀭 𑁧𑁪.𑁧𑁦𑁦] 𑀳𑀺 𑀯𑀼𑀢𑁆𑀢𑀁.

𑁫𑁮𑁬. 𑀤𑁆𑀯𑀬𑀁 𑀅𑀢𑀺𑀯𑀺𑀲𑀸𑀬𑀁. 𑀫𑀳𑀸𑀯𑀻𑀭𑀺𑀬𑀁 𑀑𑀲𑀥𑀁 𑀫𑀳𑁄𑀲𑀥𑀁. ‘‘𑀮𑀲𑀼𑀡𑁂 𑀢𑀺𑀯𑀺𑀲𑀸𑀬𑀜𑁆𑀘, 𑀲𑀼𑀡𑁆𑀞𑀺𑀬𑀫𑁆𑀧𑀺 𑀫𑀳𑁄𑀲𑀥’’𑀦𑁆𑀢𑀺 𑀭𑀼𑀤𑁆𑀤𑁄. 𑀅𑀢𑀻𑀯 𑀯𑀺𑀲𑀢𑀺 𑀪𑁂𑀲𑀚𑁆𑀚𑀧𑀬𑁄𑀕𑁂𑀲𑀽𑀢𑀺 𑀅𑀢𑀺𑀯𑀺𑀲𑀸, 𑀯𑀺𑀲𑀸, 𑀅𑀭𑀼𑀡𑀸, 𑀲𑀺𑀗𑁆𑀕𑀻𑀧𑀺.

‘‘𑀅𑀭𑀼𑀡𑁄 𑀓𑀺𑀜𑁆𑀘𑀺𑀭𑀢𑁆𑀢𑀓𑁆𑀓𑁂, 𑀲𑀜𑁆𑀛𑀸𑀭𑀸𑀕𑁂 𑀅𑀦𑀽𑀭𑀼𑀓𑁂;

𑀦𑀺𑀲𑀤𑁆𑀤𑁂 𑀓𑀧𑀺𑀮𑁂 𑀓𑀼𑀝𑁆𑀞𑁂, 𑀤𑀩𑁆𑀩𑁂𑀯 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑁄’’.

‘‘𑀅𑀭𑀼𑀡𑀸𑀢𑀺𑀯𑀺𑀲𑀸𑀲𑀸𑀫𑀸, 𑀫𑀜𑁆𑀚𑀝𑁆𑀞𑀸𑀢𑀺𑀯𑀼𑀢𑀸𑀲𑀼 𑀘;

𑀉𑀲𑀻𑀭𑁂𑀢𑀺𑀯𑀺𑀲𑀸𑀬𑀜𑁆𑀘, 𑀲𑀺𑀗𑁆𑀕𑀺𑀫𑀕𑁆𑀕𑀼𑀭𑀯𑀮𑁆𑀮𑀪𑀸’’𑀢𑀺.

𑀤𑁆𑀯𑀬𑀁 𑀲𑁄𑀫𑀭𑀸𑀚𑀺𑀬𑀁. 𑀯𑀓 𑀆𑀤𑀸𑀦𑁂, 𑀅𑀘𑁄, 𑀲𑁄𑀫𑀲𑀫𑀢𑀸𑀬 𑀓𑀸𑀭𑀺𑀢𑀸 𑀯𑀮𑁆𑀮𑀺𑀓𑀸 𑀲𑁄𑀫𑀯𑀮𑁆𑀮𑀺𑀓𑀸, 𑀲𑀓𑀢𑁆𑀣𑁂 𑀓𑁄, 𑀓𑀡𑁆𑀳𑀨𑀮𑀸, 𑀧𑀽𑀢𑀺𑀨𑀮𑀸𑀧𑀺.

𑀤𑁆𑀯𑀬𑀁 𑀤𑀸𑀭𑀼𑀳𑀮𑀺𑀤𑁆𑀤𑀸𑀭𑀼𑀓𑁆𑀔𑁂. 𑀤𑀭 𑀯𑀺𑀤𑀸𑀭𑀡𑁂, 𑀩𑁄, 𑀭𑀲𑁆𑀲 𑀩𑁄, 𑀤𑀸𑀩𑁆𑀩𑀻, 𑀤𑀻𑀖𑀸𑀤𑀺, 𑀦𑀤𑀸𑀤𑀺. 𑀳𑀮𑀺𑀤𑁆𑀤𑀯𑀡𑁆𑀡𑀤𑀸𑀭𑀼𑀢𑀸𑀬 𑀤𑀸𑀭𑀼𑀳𑀮𑀺𑀤𑁆𑀤𑀸, 𑀳𑀮𑀺𑀤𑁆𑀤𑀸𑀧𑀺. 𑀤𑁆𑀯𑀬𑀁 𑀩𑀺𑀴𑀗𑁆𑀕𑁂. 𑀅𑀗𑁆𑀕, 𑀭𑀗𑁆𑀕, 𑀮𑀗𑁆𑀕, 𑀕𑀢𑁆𑀬𑀢𑁆𑀣𑀸 𑀤𑀡𑁆𑀟𑀓𑀸 𑀥𑀸𑀢𑀽, 𑀅, 𑀴𑀢𑁆𑀢𑀁, 𑀩𑀺𑀴𑀗𑁆𑀕𑀁. 𑀘𑀺𑀢𑁆𑀭𑀸𑀦𑀺 𑀢𑀡𑁆𑀟𑀼𑀮𑀸𑀦𑀺 𑀬𑀲𑁆𑀲𑀸, 𑀢𑀡𑁆𑀟𑀼𑀮𑁄, 𑀓𑀺𑀫𑀺𑀲𑀢𑁆𑀢𑀼𑀧𑀺.

𑁫𑁮𑁭. 𑀤𑁆𑀯𑀬𑀁 𑀲𑀫𑀦𑁆𑀢𑀤𑀼𑀤𑁆𑀥𑀸𑀬𑀁, 𑀦𑀼𑀳 𑀉𑀕𑁆𑀕𑀺𑀭𑀡𑁂, 𑀦𑀤𑀸𑀤𑀺, 𑀫𑀳𑀦𑁆𑀢𑀁 𑀦𑀸𑀫𑀫𑀲𑁆𑀲. 𑀲𑀻𑀳𑀼𑀡𑁆𑀟𑁄, 𑀯𑀚𑀺𑀭𑀤𑀼𑀫𑁄, 𑀕𑀼𑀴𑀸𑀧𑀺. 𑀤𑁆𑀯𑀬𑀁 𑀤𑀓𑁆𑀔𑀸𑀬𑀁. 𑀫𑀼𑀤𑀼𑀕𑀼𑀡𑀬𑁄𑀕𑀸 𑀫𑀼𑀤𑁆𑀤𑀺𑀓𑀸, 𑀫𑀥𑀼𑀭𑀲𑁄 𑀲𑀸𑀤𑀼, 𑀢𑁂𑀦 𑀯𑀼𑀢𑁆𑀢𑀁 𑀯𑁂𑀚𑁆𑀚𑀕𑀦𑁆𑀣𑁂 ‘‘𑀲𑀸𑀤𑀼 𑀮𑀯𑀡𑀢𑀺𑀢𑁆𑀢𑀫𑁆𑀩𑀺𑀮𑀓𑀝𑀼𑀓𑀲𑀸𑀬𑀓𑀸’’𑀇𑀢𑀺, 𑀢𑀁𑀬𑁄𑀕𑀸 𑀫𑀥𑀼𑀭𑀲𑀸. 𑀕𑁄𑀢𑁆𑀣𑀦𑀻, 𑀤𑀓𑁆𑀔𑀸𑀧𑀺. 𑀢𑀺𑀓𑀁 𑀬𑀝𑁆𑀞𑀺𑀫𑀥𑀼𑀓𑀸𑀬𑀁. 𑀫𑀥𑀼𑀭𑀲𑀢𑀸𑀬 𑀫𑀥𑀼𑀓𑀁, 𑀉𑀧𑀫𑀸𑀦𑁂 𑀓𑁄. 𑀤𑀡𑁆𑀟𑀸𑀓𑀸𑀭𑀢𑁆𑀢𑀸 𑀬𑀝𑁆𑀞𑀺 𑀘 𑀲𑀸 𑀫𑀥𑀼𑀭𑀲𑀢𑁆𑀢𑀸 𑀫𑀥𑀼𑀓𑀸 𑀘𑁂𑀢𑀺 𑀬𑀝𑁆𑀞𑀺𑀫𑀥𑀼𑀓𑀸. 𑀫𑀥𑀼𑀭𑀲𑀪𑀸𑀯𑁂 𑀢𑀺𑀝𑁆𑀞𑀢𑀻𑀢𑀺 𑀫𑀥𑀼𑀮𑀝𑁆𑀞𑀺𑀓𑀸, 𑀭𑀲𑁆𑀲 𑀮𑁄, 𑀲𑀓𑀢𑁆𑀣𑁂 𑀓𑁄 𑀘. ‘‘𑀫𑀥𑀼𑀬𑀝𑁆𑀞𑀺𑀓𑀸’’𑀢𑀺𑀧𑀺 𑀧𑀸𑀞𑁄, 𑀯𑀼𑀢𑁆𑀢𑀜𑁆𑀘 ‘‘𑀫𑀥𑀼𑀓𑀁 𑀓𑁆𑀮𑀻𑀢𑀓𑀁 𑀬𑀝𑁆𑀞𑀺-𑀫𑀥𑀼𑀓𑀁 𑀫𑀥𑀼𑀬𑀝𑁆𑀞𑀺𑀓𑀸’’𑀢𑀺 [𑀅𑀫𑀭 𑁧𑁪.𑁧𑁦𑁯].

𑁫𑁮𑁮. 𑀤𑁆𑀯𑀬𑀁 𑀯𑀸𑀢𑀺𑀗𑁆𑀕𑀡𑁂. 𑀯𑀸𑀢𑀳𑀭𑀢𑁆𑀢𑁂𑀦 𑀕𑀡𑀻𑀬𑀢𑁂𑀢𑀺 𑀯𑀸𑀢𑀺𑀗𑁆𑀕𑀡𑁄, 𑀪𑀡𑁆𑀟 𑀧𑀭𑀺𑀪𑀸𑀲𑀦𑁂, 𑀡𑁆𑀯𑀼, 𑀦𑀤𑀸𑀤𑀺. 𑀝𑀓𑀸𑀭𑀓𑀭𑀡𑁂 𑀪𑀡𑁆𑀝𑀸𑀓𑀻𑀧𑀺, 𑀩𑁆𑀭𑀳𑀢𑀺𑀬𑀫𑁆𑀧𑀺 𑀅𑀬𑀁.

‘‘𑀯𑀸𑀢𑀺𑀗𑁆𑀕𑀡𑁄 𑀢𑀼 𑀯𑀸𑀢𑁆𑀢𑀸𑀓𑀼,

𑀯𑀸𑀢𑁆𑀢𑀸𑀓𑁄 𑀲𑀸𑀓𑀯𑁂𑀴𑀼 𑀘;

𑀪𑀡𑁆𑀟𑀸𑀓𑀻 𑀭𑀸𑀚𑀓𑀼𑀫𑁆𑀪𑀡𑁆𑀟𑁄,

𑀯𑀸𑀢𑁆𑀢𑀸𑀓𑀻 𑀤𑀼𑀧𑁆𑀧𑀳𑀸𑀲𑀺𑀦𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁪.𑁧𑁧𑁪].

𑀭𑀪𑀲𑁄. 𑀤𑁆𑀯𑀬𑀁 𑀩𑁆𑀭𑀳𑀢𑀺𑀬𑀁. 𑀯𑀸𑀢𑁆𑀢𑀁 𑀦𑀺𑀭𑀸𑀫𑀬𑀁 𑀓𑀭𑁄𑀢𑀻𑀢𑀺 𑀯𑀸𑀢𑁆𑀢𑀸𑀓𑀻, 𑀯𑀸𑀢𑀺𑀗𑁆𑀕𑀡𑁂𑀧𑀺. 𑀩𑁆𑀭𑀳 𑀯𑀼𑀢𑁆𑀢𑀺𑀬𑀁, 𑀢𑁄, 𑀦𑀤𑀸𑀤𑀺.

𑀤𑁆𑀯𑀬𑀁 𑀕𑁄𑀭𑀓𑁆𑀔𑀢𑀡𑁆𑀟𑀼𑀮𑁂, 𑀯𑀼𑀢𑁆𑀢𑀜𑁆𑀘 𑀢𑀦𑁆𑀢𑀦𑁆𑀢𑀭𑁂 ‘‘𑀕𑀗𑁆𑀕𑁂𑀭𑀼𑀓𑀻 𑀦𑀸𑀕𑀩𑀮𑀸, 𑀢𑀣𑀸 𑀕𑁄𑀭𑀓𑁆𑀔𑀢𑀡𑁆𑀟𑀼𑀮𑀸’’𑀢𑀺. 𑀦𑀸𑀕𑀲𑁆𑀲 𑀩𑀮𑀫𑀺𑀯 𑀩𑀮𑀫𑁂𑀢𑀺𑀲𑁆𑀲𑀸 𑀭𑁄𑀕𑀳𑀭𑀡𑀢𑁆𑀢𑀸 𑀦𑀸𑀕𑀩𑀮𑀸, 𑀛𑀲 𑀳𑀺𑀁𑀲𑀢𑁆𑀣𑁄, 𑀅. 𑀤𑁆𑀯𑀬𑀁 𑀅𑀕𑁆𑀕𑀺𑀲𑀺𑀔𑀸𑀬𑀁. 𑀦𑀗𑁆𑀕𑀮𑀲𑀤𑀺𑀲𑀫𑀽𑀮𑀢𑀸𑀬 𑀮𑀸𑀗𑁆𑀕𑀮𑀻, 𑀦𑀲𑁆𑀲 𑀮𑁄, 𑀤𑀻𑀖𑁄 𑀘. ‘‘𑀦𑀗𑁆𑀕𑀮𑀻’’𑀢𑀺𑀧𑀺 𑀧𑀸𑀞𑁄, 𑀲𑀭𑀤𑀓𑀸𑀮𑁂 𑀲𑀜𑁆𑀚𑀸𑀢𑀢𑁆𑀢𑀸 𑀲𑀸𑀭𑀤𑀻.

𑁫𑁮𑁯. 𑀢𑀺𑀓𑀁 𑀓𑀤𑀮𑀺𑀬𑀁. 𑀭𑀫𑀦𑁆𑀢𑀺 𑀬𑀲𑁆𑀲𑀁 𑀭𑀫𑁆𑀪𑀸, 𑀪𑁄. 𑀓𑀤 𑀫𑀸𑀭𑀡𑁂, 𑀅𑀮𑁄, 𑀦𑀤𑀸𑀤𑀺. 𑀫𑀼𑀘 𑀫𑁄𑀘𑀦𑁂, 𑀡𑁄. 𑀤𑁆𑀯𑀬𑀁 𑀓𑀧𑁆𑀧𑀸𑀲𑀺𑀬𑀁, 𑀬𑀲𑁆𑀲𑀸 𑀨𑀮𑀁 𑀓𑀧𑁆𑀧𑀸𑀲𑀁 𑀓𑀭𑁄𑀢𑀺 𑀮𑁄𑀓𑀸𑀦𑀫𑀼𑀧𑀓𑀸𑀭𑀦𑁆𑀢𑀺 𑀓𑀧𑁆𑀧𑀸𑀲𑀻, 𑀓𑀭𑁄𑀢𑀺𑀲𑁆𑀫𑀸 𑀧𑀸𑀲𑁄, 𑀦𑀤𑀸𑀤𑀺. 𑀯𑀤 𑀣𑁂𑀭𑀺𑀬𑁂, 𑀅𑀭𑁄, 𑀲𑀫𑀼𑀤𑁆𑀤𑀦𑁆𑀢𑀸𑀧𑀺.

𑀲𑀫𑀼𑀤𑁆𑀤𑀦𑁆𑀢𑀸 𑀢𑀼 𑀓𑀧𑁆𑀧𑀸𑀲𑀻, 𑀲𑀺𑀓𑁆𑀓𑀸𑀤𑀼𑀭𑀸𑀮𑀪𑀸𑀲𑀼 𑀘;

𑀓𑀧𑁆𑀧𑀸𑀲𑀻 𑀯𑀦𑀲𑀫𑁆𑀪𑀯𑀸 𑀘𑁂, 𑀪𑀸𑀭𑀤𑁆𑀯𑀸𑀚𑀻𑀢𑀺 𑀯𑀼𑀘𑁆𑀘𑀢𑀺.

𑀤𑁆𑀯𑀬𑀁 𑀧𑀡𑁆𑀡𑀮𑀢𑀸𑀬𑀁. 𑀦𑀸𑀕𑀮𑁄𑀓𑁂 𑀚𑀸𑀢𑀸 𑀮𑀢𑀸 𑀦𑀸𑀕𑀮𑀢𑀸. 𑀢𑀫𑁆𑀩𑀯𑀡𑁆𑀡𑀁 𑀮𑀸𑀢𑀻𑀢𑀺 𑀢𑀫𑁆𑀩𑀽𑀮𑀻, 𑀅𑀲𑁆𑀲𑀽, 𑀦𑀤𑀸𑀤𑀺. 𑀢𑀫𑁆𑀩𑀽𑀮𑀲𑁆𑀲 𑀅𑀬𑀁 𑀯𑀸 𑀢𑀫𑁆𑀩𑀽𑀮𑀻. 𑀢𑀫𑁆𑀩𑀽𑀮𑀯𑀮𑁆𑀮𑀻, 𑀦𑀸𑀕𑀯𑀮𑁆𑀮𑀻𑀧𑀺, 𑀢𑀫𑁆𑀩𑀽𑀮𑀁 𑀦𑀸𑀫 𑀨𑀮𑀧𑀢𑁆𑀢𑀘𑀼𑀡𑁆𑀡𑀸𑀤𑀺𑀬𑁄𑀕𑀲𑀫𑀽𑀳𑀸𑀦𑀁 𑀦𑀸𑀫𑀁, 𑀢𑀤𑀢𑁆𑀣𑀸 𑀯𑀮𑁆𑀮𑀻 𑀢𑀫𑁆𑀩𑀽𑀮𑀯𑀮𑁆𑀮𑀻, 𑀦𑀸𑀕𑀮𑁄𑀓𑀲𑁆𑀲 𑀯𑀮𑁆𑀮𑀻. 𑀤𑁆𑀯𑀬𑀁 𑀥𑀸𑀢𑀓𑀺𑀬𑀁, 𑀅𑀬𑀁 𑀢𑀫𑁆𑀩𑀧𑀼𑀧𑁆𑀨𑀻, 𑀫𑀚𑁆𑀚𑁄𑀧𑀬𑀼𑀢𑁆𑀢𑀸. 𑀧𑀼𑀧𑁆𑀨𑀸 𑀲𑀼𑀕𑀦𑁆𑀥𑀺𑀓𑀸 𑀥𑀸𑀢𑀓𑀺𑀘𑁆𑀘𑁂𑀯 𑀔𑁆𑀬𑀸𑀢𑀸. 𑀅𑀕𑁆𑀕𑀺𑀚𑀸𑀮𑀲𑀫𑀸𑀦𑀧𑀼𑀧𑁆𑀨𑀢𑀸𑀬 𑀅𑀕𑁆𑀕𑀺𑀚𑀸𑀮𑀸. 𑀅𑀢𑀺𑀲𑀬𑀁 𑀞𑀺𑀢𑀺𑀁 𑀓𑀭𑁄𑀢𑀻𑀢𑀺 𑀥𑀸𑀢𑀓𑀻, 𑀦𑀤𑀸𑀤𑀺.

𑁫𑁯𑁦. 𑀤𑁆𑀯𑀬𑀁 𑀲𑀼𑀓𑁆𑀓𑀢𑀺𑀯𑀼𑀢𑀸𑀬𑀁. 𑀢𑀺𑀲𑁆𑀲𑁄 𑀯𑀼𑀢𑀸 𑀢𑀘𑀭𑀸𑀚𑀺𑀬𑁄 𑀬𑀲𑁆𑀲𑀸 𑀢𑀺𑀯𑀼𑀢𑀸. 𑀢𑀺𑀲𑁆𑀲𑁄 𑀧𑀼𑀝𑀸 𑀢𑀘𑀭𑀸𑀚𑀺𑀬𑁄 𑀬𑀲𑁆𑀲𑀸 𑀢𑀺𑀧𑀼𑀝𑀸. 𑀲𑀭𑀮𑀸, 𑀢𑀺𑀪𑀡𑁆𑀟𑀻, 𑀭𑁄𑀘𑀦𑀻𑀧𑀺 [𑀤𑁂𑀯𑀦𑀻𑀧𑀺 (𑀓.)]. 𑀤𑁆𑀯𑀬𑀁 𑀓𑀡𑁆𑀳𑀢𑀺𑀯𑀼𑀢𑀸𑀬𑀁. 𑀲𑀸 𑀢𑀦𑀼𑀓𑀭𑀡𑁂, 𑀯𑀺𑀭𑁂𑀘𑀦𑀓𑀭𑀡𑁂𑀦 𑀓𑀸𑀬𑀁, 𑀭𑁄𑀕𑀜𑁆𑀘 𑀲𑀸𑀬𑀢𑀻𑀢𑀺 𑀲𑀸𑀫𑀸.

‘‘𑀲𑀸𑀫𑀸 𑀢𑀼 𑀫𑁂𑀘𑀓𑁂 𑀯𑀼𑀤𑁆𑀥-𑀤𑀸𑀭𑀓𑁂 𑀳𑀭𑀺𑀢𑁂 𑀦𑀤𑀺;