𑁪. 𑀘𑀢𑀼𑀩𑁆𑀩𑀡𑁆𑀡𑀯𑀕𑁆𑀕𑀯𑀡𑁆𑀡𑀦𑀸

𑁩𑁩𑁨. 𑀲𑀦𑁆𑀢𑀢𑀺𑀧𑀭𑀺𑀬𑀦𑁆𑀢𑀁 𑀯𑀁𑀲𑁂. 𑀓𑀼𑀮 𑀲𑀦𑁆𑀢𑀸𑀦𑀩𑀦𑁆𑀥𑀽𑀲𑀼, 𑀪𑀽𑀯𑀸𑀤𑀺, 𑀡𑁄, 𑀓𑀼𑀮𑀁, 𑀯𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀲𑁄. 𑀲𑀁𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀡𑁄. 𑀅𑀪𑀺𑀫𑀼𑀔𑀁 𑀚𑀦𑁂𑀢𑀻𑀢𑀺 𑀅𑀪𑀺𑀚𑀦𑁄, 𑀡𑁄. 𑀕𑁄 𑀯𑀼𑀘𑁆𑀘𑀢𑀺 𑀅𑀪𑀺𑀥𑀸𑀦𑀁, 𑀩𑀼𑀤𑁆𑀥𑀺 𑀘, 𑀢𑁂 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑁆𑀭𑀫𑁆𑀧𑀺. 𑀕𑀯𑀁 𑀲𑀤𑁆𑀤𑀁 𑀢𑀸𑀬𑀢𑀻𑀢𑀺 𑀯𑀸 𑀕𑁄𑀢𑁆𑀢𑀁, 𑀢𑀸 𑀧𑀸𑀮𑀦𑁂. 𑀅𑀦𑀼𑀧𑀼𑀩𑁆𑀩𑁄 𑀇 𑀕𑀢𑀺𑀬𑀁, 𑀓𑀭𑀡𑁂 𑀅. 𑀢𑀦𑁄𑀢𑀺𑀲𑁆𑀫𑀸𑀢𑀺, 𑀲𑀦𑁆𑀢𑀢𑀺, 𑀦𑀮𑁄𑀧𑁄, 𑀇𑀢𑁆𑀣𑀺𑀬𑀁.

𑀲𑀦𑁆𑀢𑀢𑀺 𑀧𑀦𑁆𑀢𑀺𑀯𑀺𑀢𑁆𑀣𑀸𑀭-𑀕𑁄𑀢𑁆𑀢𑁂𑀲𑀼 𑀓𑀯𑀺𑀪𑀻 𑀫𑀢𑀸;

𑀧𑀭𑀫𑁆𑀧𑀭𑀸 𑀪𑀯𑁂 𑀘𑀸𑀧𑀺, 𑀧𑀼𑀢𑁆𑀢𑀓𑀜𑁆𑀜𑀸𑀲𑀼 𑀲𑀦𑁆𑀢𑀢𑀺.

𑀔𑀢𑁆𑀢𑀺𑀬𑀸𑀤𑀬𑁄 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀸 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀓𑀼𑀮𑀸𑀦𑀺 𑀪𑀯𑀦𑁆𑀢𑀺, 𑀏𑀢𑁂 𑀳𑀺 𑀅𑀜𑁆𑀜𑀫𑀜𑁆𑀜𑀫𑀲𑀗𑁆𑀓𑀭𑀢𑁄 𑀯𑀡𑁆𑀡𑁂𑀢𑀩𑁆𑀩𑀢𑁄 𑀞𑀧𑁂𑀢𑀩𑁆𑀩𑀢𑁄 𑀯𑀡𑁆𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑁂. 𑀯𑀡𑁆𑀡 𑀞𑀧𑀦𑁂.

𑁩𑁩𑁩-𑁩𑁩𑁪. 𑀙𑀓𑁆𑀓𑀁 𑀓𑀼𑀮𑀻𑀦𑁂. 𑀓𑀼𑀮𑀲𑁆𑀲𑀸𑀧𑀘𑁆𑀘𑀁 𑀓𑀼𑀮𑀺𑀦𑁄, 𑀇𑀦𑁄 𑀅𑀧𑀘𑁆𑀘𑁂. 𑀲𑁄𑀪𑀦𑁄 𑀚𑀦𑁄 𑀲𑀚𑁆𑀚𑀦𑁄. 𑀲𑀧𑀭𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀲𑀸𑀥𑀼, 𑀲𑀸𑀥 𑀲𑀁𑀲𑀺𑀤𑁆𑀥𑀺𑀫𑁆𑀳𑀺, 𑀉. 𑀲𑀪𑀸𑀬𑀁 𑀲𑀸𑀥𑀼 𑀲𑀪𑁆𑀬𑁄. 𑀲𑀸𑀥𑁆𑀯𑀢𑁆𑀣𑁂 𑀬𑁄. 𑀅𑀬 𑀕𑀢𑀺𑀬𑀁. 𑀅𑀬𑀺𑀢𑀩𑁆𑀩𑁄 𑀉𑀧𑀕𑀦𑁆𑀢𑀩𑁆𑀩𑁄𑀢𑀺 𑀅𑀬𑁆𑀬𑁄, 𑀓𑀫𑁆𑀫𑀦𑀺 𑀬𑁄. 𑀫𑀳𑀸𑀓𑀼𑀮𑀲𑁆𑀲𑀸𑀧𑀘𑁆𑀘𑀁 𑀫𑀳𑀸𑀓𑀼𑀮𑁄, 𑀡𑁄.

𑀪𑀽𑀪𑀼𑀚𑀦𑁆𑀢𑀁 𑀭𑀸𑀚𑀲𑀸𑀫𑀜𑁆𑀜𑁂. 𑀅𑀢𑀺𑀢𑁂𑀚𑀯𑀦𑁆𑀢𑀢𑀸𑀬 𑀯𑀺𑀲𑁂𑀲𑁂𑀦 𑀭𑀸𑀚𑀢𑁂 𑀤𑀺𑀩𑁆𑀩𑀢𑁂𑀢𑀺 𑀭𑀸𑀚𑀸, 𑀭𑀸𑀚 𑀤𑀺𑀢𑁆𑀢𑀺𑀬𑀁. 𑀪𑀼𑀬𑀸 𑀪𑀽𑀫𑀺𑀬𑀸 𑀧𑀢𑀺 𑀪𑀽𑀧𑀢𑀺, 𑀪𑀼𑀁 𑀧𑀸𑀮𑁂𑀢𑀻𑀢𑀺 𑀯𑀸 𑀪𑀽𑀧𑀢𑀺, 𑀧𑀸 𑀭𑀓𑁆𑀔𑀡𑁂,𑀢𑀺, 𑀭𑀲𑁆𑀲𑁄. 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄 𑀧𑀢𑁆𑀣𑀺𑀯𑁄, 𑀡𑁄, 𑀤𑁆𑀯𑀺𑀢𑁆𑀢𑀁, 𑀇𑀢𑁆𑀢𑀜𑁆𑀘. 𑀚𑀕𑀢𑀺𑀁 𑀪𑀽𑀫𑀺𑀁 𑀧𑀸𑀮𑁂𑀢𑀻𑀢𑀺 𑀚𑀕𑀢𑀺𑀧𑀸𑀮𑁄, 𑀓𑀫𑁆𑀫𑀦𑀺 𑀡𑁄. 𑀤𑀺𑀲𑀸𑀦𑀁 𑀧𑀢𑀺 𑀤𑀺𑀲𑀫𑁆𑀧𑀢𑀺, 𑀤𑀺𑀲𑀸, 𑀤𑀺𑀲𑀝𑁆𑀞𑁂 𑀯𑀸 𑀧𑀸𑀮𑁂𑀢𑀻𑀢𑀺 𑀤𑀺𑀲𑀫𑁆𑀧𑀢𑀺, 𑀭𑀲𑁆𑀲𑀢𑁆𑀢𑀁, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀪𑀼𑀁 𑀪𑀽𑀫𑀺𑀁 𑀪𑀼𑀜𑁆𑀚𑀢𑀻𑀢𑀺 𑀪𑀽𑀪𑀼𑀚𑁄, 𑀪𑀼𑀚 𑀧𑀸𑀮𑀦𑀚𑁆𑀛𑁄𑀳𑀭𑀡𑁂𑀲𑀼, 𑀇𑀥 𑀧𑀸𑀮𑀦𑁂, 𑀭𑀼𑀥𑀸𑀤𑀺. 𑀫𑀳𑀺𑀔𑀺𑀢𑁄𑀧𑁆𑀬𑀢𑁆𑀭. 𑀔𑀺 𑀦𑀺𑀯𑀸𑀲𑀕𑀢𑀻𑀲𑀼, 𑀫𑀳𑀺𑀁 𑀅𑀔𑀺 𑀕𑀢𑀯𑀸 𑀫𑀳𑀻𑀔𑀺𑀢𑁄.

𑁩𑁩𑁫. 𑀧𑀚𑁆𑀚𑀤𑁆𑀥𑀁 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁂 𑀚𑀸𑀢𑀺𑀔𑀢𑁆𑀢𑀺𑀬𑁂, ‘‘𑀭𑀸𑀚𑀚𑀘𑁆𑀘𑁂 𑀘 𑀔𑀢𑁆𑀢𑀺𑀬𑁂’’𑀢𑀺 𑀯𑀘𑀦𑀢𑁄. 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲𑀸𑀧𑀘𑁆𑀘𑀁 𑀭𑀸𑀚𑀜𑁆𑀜𑁄, 𑀜𑁆𑀜𑁄 𑀅𑀧𑀘𑁆𑀘𑁂. ‘‘𑀔𑀢𑁆𑀢𑀺𑀬𑁄 𑀢𑀼 𑀯𑀺𑀭𑀸 𑀔𑀢𑁆𑀢𑀁, 𑀭𑀸𑀚𑀜𑁆𑀜𑀤𑁆𑀯𑀺𑀚𑀮𑀺𑀗𑁆𑀕𑀦𑁄’’𑀢𑀺 𑀭𑀪𑀲, 𑀭𑀢𑀦𑀓𑁄𑀲𑁂𑀲𑀼 𑀧𑀭𑀺𑀬𑀸𑀬𑀸. 𑀔𑀢𑁆𑀢𑀲𑁆𑀲𑀸𑀧𑀘𑁆𑀘𑀁 𑀔𑀢𑁆𑀢𑀺𑀬𑁄, 𑀅𑀧𑀘𑁆𑀘𑁂 𑀇𑀬𑀧𑀘𑁆𑀘𑀬𑁄 𑀤𑀺𑀲𑁆𑀲𑀢𑁂, 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀪𑀽𑀢𑀢𑁆𑀢𑀸 𑀯𑀸 𑀔𑀢𑁆𑀢𑀺𑀬𑁄𑀢𑀺𑀆𑀤𑀺𑀓𑀧𑁆𑀧𑀺𑀓𑀭𑀸𑀚𑀸 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀪𑀯𑀢𑁆𑀢𑀸 𑀧𑀦 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁂𑀲𑁆𑀯𑀧𑀺 𑀢𑀁𑀲𑀫𑀜𑁆𑀜𑀸, 𑀏𑀲𑁆𑀲𑀢𑁆𑀢𑀁. 𑀔𑀢𑁆𑀢𑀲𑁆𑀲𑀸𑀧𑀘𑁆𑀘𑀁 𑀔𑀢𑁆𑀢𑀁, 𑀡𑁄. 𑀭𑀚𑁆𑀚𑀸𑀭𑁄𑀧𑀦𑀲𑀫𑀬𑁂 𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑁄𑀤𑀓𑁂𑀦 𑀕𑀗𑁆𑀕𑀸𑀦𑀻𑀢𑁂𑀦 𑀫𑀼𑀤𑁆𑀥𑀦𑀺 𑀔𑀢𑁆𑀢𑀺𑀬𑀓𑀜𑁆𑀜𑀸𑀤𑀻𑀳𑀺 𑀅𑀪𑀺𑀲𑀺𑀢𑁆𑀢𑀢𑁆𑀢𑀸 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄, 𑀧𑀞𑀫𑀔𑀢𑁆𑀢𑀺𑀬𑁄. 𑀢𑀧𑁆𑀧𑀪𑀯𑀢𑀸𑀬 𑀧𑀦 𑀅𑀦𑀪𑀺𑀲𑀺𑀢𑁆𑀢𑀸 𑀘 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀸𑀔𑁆𑀬𑀸, 𑀬𑀣𑀸 𑁋 𑀩𑁆𑀭𑀳𑁆𑀫𑀩𑀸𑀳𑀼𑀚𑀲𑁆𑀲 𑀯𑀁𑀲𑁂 𑀚𑀸𑀢𑀲𑁆𑀲𑀸𑀧𑀺 𑀩𑁆𑀭𑀳𑁆𑀫𑀩𑀸𑀳𑀼𑀚𑁄. 𑀩𑁆𑀭𑀳𑁆𑀫𑀩𑀸𑀳𑀼𑀢𑁄 𑀚𑀸𑀢𑀢𑁆𑀢𑀸 𑀩𑀸𑀳𑀼𑀚𑁄𑀢𑀺 𑀳𑀺 𑀦𑀺𑀓𑀸𑀬𑀦𑁆𑀢𑀭𑀺𑀓𑀸𑀦𑀁 𑀮𑀤𑁆𑀥𑀺. 𑀬𑀲𑁆𑀫𑀺𑀁 𑀧𑀦 𑀭𑀸𑀚𑀺𑀦𑀺 𑀅𑀲𑁂𑀲𑀸 𑀲𑀸𑀫𑀦𑁆𑀢𑀸 𑀧𑀡𑀫𑀦𑁆𑀢𑀺, 𑀲𑁄 𑀅𑀥𑀺𑀲𑁆𑀲𑀭𑀸𑀔𑁆𑀬𑁄 [𑀅𑀫𑀭 𑁧𑁮.𑁨]. 𑀲𑀁 𑀲𑀢𑁆𑀢𑁄 𑀮𑀕𑁆𑀕𑁄 𑀅𑀦𑁆𑀢𑁄 𑀬𑀲𑁆𑀲𑀸 𑀲𑀸 𑀲𑀫𑀦𑁆𑀢𑀸, 𑀲𑀯𑀺𑀲𑀬𑀸𑀦𑀦𑁆𑀢𑀭𑀸 𑀪𑀽𑀫𑀺, 𑀲𑀫𑀦𑁆𑀢𑀸𑀬 𑀇𑀫𑁂 𑀲𑀸𑀫𑀦𑁆𑀢𑀸, 𑀅𑀦𑀦𑁆𑀢𑀭𑀭𑀸𑀚𑀸𑀦𑁄.

𑀤𑁆𑀯𑀬𑀁 𑀘𑀓𑁆𑀓𑀯𑀢𑁆𑀢𑀺𑀦𑀺. 𑀲𑀩𑁆𑀩𑀪𑀽𑀫𑀺𑀬𑀸 𑀇𑀲𑁆𑀲𑀭𑁄 𑀲𑀩𑁆𑀩𑀪𑀼𑀫𑁆𑀫𑁄, 𑀡𑁆𑀬𑁄. 𑀧𑀼𑀜𑁆𑀜𑁄𑀧𑀦𑀻𑀢𑁂𑀦 𑀘𑀓𑁆𑀓𑀭𑀢𑀦𑁂𑀦 𑀯𑀢𑁆𑀢𑀢𑁂 𑀅𑀲𑀸𑀥𑀼𑀤𑀫𑀦𑀺𑀓𑀸𑀤𑀺𑀭𑀸𑀚𑀯𑀢𑁆𑀢𑀁 𑀅𑀦𑀼𑀢𑀺𑀝𑁆𑀞𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀡𑀻, 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺 𑀆𑀓𑀸𑀲𑁂 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀕𑀫𑀬𑀢𑀻𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻, 𑀧𑀼𑀜𑁆𑀜𑀘𑀓𑁆𑀓𑀁, 𑀘𑀢𑀼𑀘𑀓𑁆𑀓𑀁 𑀯𑀸 𑀲𑀢𑁆𑀢𑁂𑀲𑀼 𑀯𑀢𑁆𑀢𑁂𑀢𑀺, 𑀢𑁂 𑀯𑀸 𑀅𑀲𑁆𑀫𑀺𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀘𑀓𑁆𑀓𑀭𑀢𑀦𑀼𑀧𑁆𑀧𑀸𑀤𑀦𑀢𑁆𑀣𑀁 𑀤𑁆𑀯𑀸𑀤𑀲𑀯𑀲𑁆𑀲𑀘𑀭𑀺𑀢𑀁 𑀤𑀲𑀭𑀸𑀚𑀥𑀫𑁆𑀫𑀁 𑀯𑀢𑁆𑀢𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻. 𑀢𑀢𑁆𑀣 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀩𑀮𑀓𑀸𑀬𑁂 𑀥𑀫𑁆𑀫𑀺𑀓𑀸𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀲𑀁𑀯𑀺𑀥𑀸𑀦𑀁, 𑀔𑀢𑁆𑀢𑀺𑀬𑁂𑀲𑀼, 𑀅𑀦𑀼𑀬𑀼𑀢𑁆𑀢𑁂𑀲𑀼, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼, 𑀦𑁂𑀕𑀫𑀚𑀸𑀦𑀧𑀤𑁂𑀲𑀼, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼, 𑀫𑀺𑀕𑀧𑀓𑁆𑀔𑀻𑀲𑀼, 𑀅𑀥𑀫𑁆𑀫𑀓𑀸𑀭𑀧𑀝𑀺𑀓𑁆𑀔𑁂𑀧𑁄, 𑀅𑀥𑀦𑀸𑀦𑀁 𑀥𑀦𑀼𑀧𑁆𑀧𑀸𑀤𑀦𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑀇𑀤𑀁 𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁, 𑀇𑀤𑀫𑁂𑀯 𑀘 𑀕𑀳𑀧𑀢𑀺𑀓𑁂, 𑀧𑀓𑁆𑀔𑀺𑀚𑀸𑀢𑁂 𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀳𑀡𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀤𑀻𑀧𑁂𑀲𑀼. 𑀘𑀢𑀽𑀲𑁆𑀯𑀧𑀺 𑀤𑀻𑀧𑁂𑀲𑀼 𑀆𑀡𑀸𑀥𑀫𑁆𑀫𑀘𑀓𑁆𑀓𑀸𑀦𑀺 𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑁂𑀢𑀻𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻. 𑀅𑀜𑁆𑀜𑁄 𑀅𑀲𑀩𑁆𑀩𑀪𑀼𑀫𑁆𑀫𑁄 𑀅𑀦𑀯𑀓𑀸𑀲𑁄 𑀲𑀸𑀫𑀦𑁆𑀢𑁄 𑀪𑀽𑀧𑁄 𑀫𑀡𑁆𑀟𑀮𑀺𑀲𑁆𑀲𑀭𑁄 𑀦𑀸𑀫. 𑀲𑀬𑀫𑀸𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲𑁂𑀯 𑀫𑀡𑁆𑀟𑀮𑀲𑁆𑀲 𑀇𑀲𑁆𑀲𑀭𑁄, 𑀦 𑀲𑀩𑁆𑀩𑀫𑀡𑁆𑀟𑀮𑀲𑁆𑀲𑀸𑀢𑀺 𑀫𑀡𑁆𑀟𑀮𑀺𑀲𑁆𑀲𑀭𑁄𑀢𑀺𑀧𑀺. 𑀏𑀢𑁆𑀣 𑀘 ‘‘𑀲𑀩𑁆𑀩𑀪𑀼𑀫𑁆𑀫𑁄, 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀘𑀢𑀼𑀤𑀻𑀧𑀺𑀲𑁆𑀲𑀭𑁄 𑀭𑀸𑀚𑀸 𑀤𑀻𑀧𑀺𑀢𑁄, 𑀇𑀥𑀸𑀦𑀸𑀕𑀢𑁂𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀺𑀢𑁂𑀦 𑀅𑀥𑀺𑀲𑁆𑀲𑀭𑀧𑀤𑁂𑀦 𑀏𑀓𑀤𑀻𑀧𑀺𑀲𑁆𑀲𑀭𑁄 𑀭𑀸𑀚𑀸, 𑀫𑀡𑁆𑀟𑀮𑀺𑀲𑁆𑀲𑀭𑀧𑀤𑁂𑀦 𑀧𑀤𑁂𑀲𑀺𑀲𑁆𑀲𑀭𑁄 𑀭𑀸𑀚𑀸 𑀤𑀻𑀧𑀺𑀢𑁄. 𑀅𑀣 𑀯𑀸 𑀫𑀡𑁆𑀟𑀮𑀺𑀲𑁆𑀲𑀭𑀧𑀤𑁂𑀦 𑀏𑀓𑀤𑀻𑀧𑀺𑀲𑁆𑀲𑀭𑁄 𑀭𑀸𑀚𑀸, 𑀲𑁂𑀲𑁂𑀳𑀺 𑀭𑀸𑀚𑀭𑀸𑀚𑀜𑁆𑀜𑀸𑀤𑀻𑀳𑀺 𑀩𑀸𑀳𑀼𑀚𑀧𑀭𑀺𑀬𑀦𑁆𑀢𑁂𑀳𑀺 𑀧𑀤𑁂𑀲𑀺𑀲𑁆𑀲𑀭𑁄 𑀤𑀻𑀧𑀺𑀢𑁄.

𑁩𑁩𑁬. 𑀤𑁆𑀯𑀬𑀁 𑀭𑀸𑀚𑀪𑁂𑀤𑁂. 𑀲𑀼𑀔𑀼𑀫𑀢𑀸𑀬 𑀮𑀻𑀦𑀸 𑀅𑀧𑀸𑀓𑀝𑀸 𑀙𑀯𑀺𑀬𑁄 𑀬𑁂𑀲𑀁 𑀢𑁂 𑀮𑀺𑀘𑁆𑀙𑀯𑀺𑀦𑁄. 𑀮𑀺𑀘𑁆𑀙𑀯𑀻 𑀘 𑀯𑀚𑁆𑀚𑀻 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀤𑁆𑀯𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀼𑀮𑁂 𑀭𑀸𑀚𑀺𑀦𑀺. 𑀧𑀼𑀭𑀺𑀫𑀢𑀭𑀲𑀫𑁆𑀪𑀽𑀢𑁂 𑀲𑀓𑁆𑀬𑀓𑀼𑀮𑁂 𑀲𑀜𑁆𑀚𑀸𑀢𑀢𑁆𑀢𑀸 𑀲𑀓𑁆𑀬𑁄, 𑀡𑁄. 𑀲𑀓𑁆𑀓𑁄𑀧𑀺. 𑀲𑀓𑁆𑀬𑁂 𑀪𑀯𑁄 𑀲𑀸𑀓𑀺𑀬𑁄, 𑀇𑀬𑁄, 𑀬𑀮𑁄𑀧𑁄, 𑀤𑀻𑀖𑁄 𑀘.

𑀧𑀜𑁆𑀘𑀓𑀁 𑀩𑀼𑀤𑁆𑀥𑀧𑀼𑀢𑁆𑀢𑀲𑁆𑀲𑀸𑀬𑀲𑁆𑀫𑀢𑁄 𑀭𑀸𑀳𑀼𑀮𑀲𑁆𑀲 𑀫𑀸𑀢𑀭𑀺. 𑀪𑀤𑁆𑀤 𑀓𑀮𑁆𑀬𑀸𑀡𑁂, 𑀲𑁄𑀔𑁆𑀬𑁂 𑀘. 𑀓𑀼𑀮𑀸𑀘𑀸𑀭𑀭𑀽𑀧𑀸𑀤𑀺𑀯𑀲𑁂𑀦 𑀓𑀮𑁆𑀬𑀸𑀡𑀢𑁆𑀢𑀸 𑀪𑀤𑁆𑀤𑀸. 𑀓𑀘𑁆𑀘𑀲𑁆𑀲𑀸𑀧𑀘𑁆𑀘𑀁 𑀓𑀘𑁆𑀘𑀸𑀦𑀸, 𑀅𑀧𑀘𑁆𑀘𑀲𑀤𑁆𑀤𑁄𑀬𑀁 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑁂 𑀧𑀼𑀢𑁆𑀢𑁂, 𑀧𑀼𑀢𑁆𑀢𑀺𑀬𑀜𑁆𑀘 𑀪𑀯𑀢𑀻𑀢𑀺. ‘‘𑀭𑀸𑀳𑀼 𑀯𑀺𑀬 𑀘𑀦𑁆𑀤𑀁 𑀫𑀫 𑀦𑀺𑀓𑁆𑀔𑀫𑀦𑀁 𑀮𑀸𑀢𑀼𑀓𑀸𑀫𑁄 𑀘𑀸𑀬𑀁 𑀫𑁂 𑀧𑀼𑀢𑁆𑀢𑁄𑀢𑀺 𑀭𑀸𑀳𑀼𑀮𑁄𑀢𑀺 𑀦𑀸𑀫𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀧𑀺𑀢𑀭𑀸 𑀯𑀼𑀢𑁆𑀢𑁄 𑀲𑀺𑀓𑁆𑀔𑀸𑀓𑀸𑀫𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄𑀬𑁂𑀯𑁂𑀢𑁆𑀣 𑀭𑀸𑀳𑀼𑀮𑁄, 𑀢𑀲𑁆𑀲 𑀫𑀸𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀩𑀺𑀫𑁆𑀩𑀁 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁, 𑀅𑀢𑀺𑀲𑀬𑀯𑀡𑁆𑀡𑀲𑀭𑀻𑀭𑀬𑀼𑀢𑁆𑀢𑀢𑀸𑀬 𑀩𑀺𑀫𑁆𑀩𑀸, 𑀯𑀫𑀺𑀥𑀸𑀢𑀼𑀫𑁆𑀳𑀸 𑀯𑀸 𑀩𑁄, 𑀯𑀲𑁆𑀲 𑀩𑀢𑁆𑀢𑀁. 𑀬𑀲𑁄 𑀯𑀼𑀘𑁆𑀘𑀢𑀺 𑀧𑀭𑀺𑀯𑀸𑀭𑁄, 𑀓𑀺𑀢𑁆𑀢𑀺 𑀘, 𑀢𑁂 𑀥𑀸𑀭𑁂𑀢𑀻𑀢𑀺 𑀬𑀲𑁄𑀥𑀭𑀸, 𑀫𑀦𑀸𑀤𑀺𑀢𑁆𑀢𑀸 𑀅𑀲𑁆𑀲𑁄.

𑁩𑁩𑁭-𑁩𑁩𑁯. 𑀬𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀥𑀦𑀁 𑀲𑀢𑀁 𑀳𑁄𑀢𑀺, 𑀓𑀻𑀤𑀺𑀲𑀁 𑀢𑀁 𑀥𑀦𑀁? 𑀦𑀺𑀥𑀸𑀦𑀕𑀁 𑀧𑀣𑀯𑀸𑀤𑀻𑀲𑀼 𑀦𑀺𑀥𑀸𑀦𑀯𑀲𑁂𑀦 𑀕𑀢𑀁 𑀧𑀯𑀢𑁆𑀢𑀁, 𑀢𑁂𑀲𑀁 𑀥𑀦𑀸𑀦𑀁 𑀲𑀢𑀁 𑀓𑀳𑀸𑀧𑀡𑀸𑀦𑀁, 𑀓𑀺𑀢𑁆𑀢𑀓𑀧𑁆𑀧𑀫𑀸𑀡𑀸𑀦𑀁? 𑀓𑁄𑀝𑀻𑀦𑀁 𑀲𑀢𑀁. 𑀓𑁂𑀦 𑀧𑀭𑀺𑀘𑁆𑀙𑁂𑀤𑁂𑀦? 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀳𑁂𑀝𑁆𑀞𑀺𑀫𑀓𑁄𑀝𑁆𑀞𑀸𑀲𑁂𑀦, 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀓𑁄𑀝𑀻𑀦𑀁 𑀲𑀢𑀁 𑀳𑁄𑀢𑀺. 𑀤𑀺𑀯𑀲𑀯𑀴𑀜𑁆𑀚𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀴𑀜𑁆𑀚𑀺𑀢𑀩𑁆𑀩𑁄 𑀧𑀦 𑀓𑀳𑀸𑀧𑀡𑁄 𑀯𑀻𑀲𑀢𑀫𑁆𑀩𑀡𑀫𑀢𑁆𑀢𑀁 𑀳𑁄𑀢𑀺, 𑀢𑁂 𑀔𑀢𑁆𑀢𑀺𑀬𑀸 ‘‘𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸’’𑀢𑁆𑀬𑀼𑀘𑁆𑀘𑀦𑁆𑀢𑁂. 𑀫𑀳𑀦𑁆𑀢𑁄 𑀥𑀦𑀲𑀸𑀭𑁄 𑀬𑁂𑀲𑀦𑁆𑀢𑁂 𑀫𑀳𑀸𑀲𑀸𑀮𑀸, 𑀮𑀢𑁆𑀢𑀁, 𑀅𑀫𑁆𑀩𑀡𑀫𑀢𑁆𑀭 𑀏𑀓𑀸𑀤𑀲𑀤𑁄𑀡𑀫𑀢𑁆𑀢𑀁.

𑀬𑁂𑀲𑀁 𑀤𑁆𑀯𑀺𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀥𑀸𑀦𑀕𑀸𑀦𑀺 𑀦𑀺𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀸𑀦𑀺 𑀳𑁄𑀦𑁆𑀢𑀺, 𑀤𑀺𑀯𑀲𑀯𑀴𑀜𑁆𑀚𑁄 𑀧𑀦 𑀓𑀳𑀸𑀧𑀡𑁄 𑀤𑀲𑀫𑁆𑀩𑀡𑀫𑀢𑁆𑀢𑀁 𑀳𑁄𑀢𑀺, 𑀢𑁂 𑀤𑁆𑀯𑀺𑀚𑀸 ‘‘𑀤𑁆𑀯𑀺𑀚𑀫𑀳𑀸𑀲𑀸𑀮𑀸’’𑀢𑁆𑀬𑀼𑀘𑁆𑀘𑀦𑁆𑀢𑁂.

𑀦𑀺𑀥𑀸𑀦𑀕𑁂, 𑀯𑀴𑀜𑁆𑀚𑁂 𑀘 𑀥𑀦𑁂 𑀢𑀤𑀼𑀧𑀟𑁆𑀠𑁂 𑀢𑁂𑀲𑀁 𑀤𑁆𑀯𑀺𑀚𑀫𑀳𑀸𑀲𑀸𑀮𑀸𑀦𑀁 𑀥𑀦𑀲𑁆𑀲 𑀉𑀧𑀟𑁆𑀠𑀪𑀸𑀕𑁂 𑀲𑀢𑀺 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀦𑀸𑀫 𑀲𑀺𑀬𑀼𑀁, 𑀉𑀪𑀬𑀢𑁆𑀭𑀸𑀧𑀺 𑀳𑁂𑀝𑁆𑀞𑀺𑀫𑀦𑁆𑀢𑁂𑀦𑁂𑀯 𑀥𑀦𑀧𑀭𑀺𑀘𑁆𑀙𑁂𑀤𑁄.

𑁩𑁪𑁦. 𑀬𑁄 𑀦 𑀳𑀻𑀦𑁄, 𑀦 𑀘𑀼𑀓𑁆𑀓𑀝𑁆𑀞𑁄, 𑀫𑀚𑁆𑀛𑀺𑀫𑀸𑀥𑀺𑀓𑀸𑀭𑀩𑁆𑀬𑀯𑀝𑁆𑀞𑀺𑀢𑁄 𑀭𑀸𑀚𑀧𑀼𑀢𑁆𑀢𑀲𑁂𑀦𑀸𑀧𑀢𑀺𑀫𑀳𑀸𑀓𑀡𑀺𑀢𑁆𑀣𑀭𑀸𑀤𑀺, 𑀲𑁄 𑀫𑀳𑀸𑀫𑀢𑁆𑀢𑁄. 𑀫𑀳𑀢𑀻 𑀫𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑁄 𑀬𑀲𑁆𑀲 𑀫𑀳𑀸𑀫𑀢𑁆𑀢𑁄, 𑀭𑀽𑀧𑀪𑁂𑀤𑁂𑀦 𑀧𑀝𑁆𑀞𑀸𑀦𑀁 𑀓𑁆𑀮𑀻𑀯𑀁.

‘‘𑀧𑀓𑀢𑀺𑀬𑀁 𑀫𑀳𑀸𑀫𑀢𑁆𑀢𑁂, 𑀧𑀜𑁆𑀜𑀸𑀬𑀁 𑀧𑀭𑀫𑀢𑁆𑀢𑀦𑀺;

𑀦𑀧𑀼𑀁𑀲𑀓𑀁 𑀧𑀥𑀸𑀦𑀁 𑀢𑀁, 𑀏𑀓𑀢𑁆𑀢𑁂 𑀢𑀼’𑀢𑁆𑀢𑀫𑁂 𑀲𑀤𑀸’’𑀢𑀺.

𑀭𑀪𑀲𑁄 𑀘. ‘‘𑀫𑀳𑀸𑀫𑀢𑁆𑀢𑁄, 𑀧𑀝𑁆𑀞𑀸𑀦𑁄 𑀘𑀸’’𑀢𑀺 𑀢𑀼 𑀧𑀼𑀁𑀲𑀓𑀡𑁆𑀟𑁂 𑀯𑁄𑀧𑀸𑀮𑀺𑀢𑁄. 𑀧𑀓𑀝𑁆𑀞𑁂 𑀢𑀺𑀝𑁆𑀞𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀬𑀼 [𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸 𑀝𑀻𑀓𑀸 𑁯𑁮𑁩, 𑁧𑁧𑁨𑁩 𑀕𑀸𑀣𑀸𑀲𑀼𑀧𑀺 𑀧𑀲𑁆𑀲𑀺𑀢𑀩𑁆𑀩𑀁].

𑀧𑀜𑁆𑀘𑀓𑀁 𑀫𑀦𑁆𑀢𑀺𑀦𑀺𑀫𑁆𑀳𑀺. 𑀫𑀢𑀺𑀧𑁆𑀧𑀥𑀸𑀦𑁄 𑀲𑀘𑀺𑀯𑁄 𑀲𑀳𑀸𑀬𑁄. 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀯𑀥𑀸𑀭𑀡𑀁 𑀫𑀦𑁆𑀢𑁄, 𑀢𑀁𑀬𑁄𑀕𑀸 𑀫𑀦𑁆𑀢𑀺𑀦𑀻. 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀇𑀦𑀻, 𑀅𑀣 𑀯𑀸 𑀫𑀦𑁆𑀢𑁂𑀦 𑀦𑀬𑀢𑀻𑀢𑀺 𑀫𑀦𑁆𑀢𑀺𑀦𑀻, 𑀅𑀣 𑀯𑀸 𑀫𑀦𑁆𑀢𑀬𑁄𑀕𑀸 𑀫𑀦𑁆𑀢𑀺, 𑀦𑁂𑀢𑀻𑀢𑀺 𑀦𑀻, 𑀫𑀦𑁆𑀢𑀺 𑀘 𑀦𑀻 𑀘𑀸𑀢𑀺 𑀫𑀦𑁆𑀢𑀺𑀦𑀻. ‘‘𑀫𑀢𑀺𑀲𑀘𑀺𑀯𑀫𑀦𑁆𑀢𑀺𑀦𑀻’’𑀢𑀺𑀧𑀺 𑀧𑀸𑀞𑁄, 𑀢𑀤𑀸 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀤𑁆𑀯𑀦𑁆𑀤𑁄. 𑀭𑀜𑁆𑀜𑀸 𑀲𑀳 𑀚𑀻𑀯𑀢𑀻𑀢𑀺 𑀲𑀚𑀻𑀯𑁄. 𑀲𑀘𑀢𑁂 𑀲𑀫𑀯𑁂𑀢𑁄 𑀪𑀯𑀢𑀻𑀢𑀺 𑀲𑀘𑀺𑀯𑁄. 𑀲𑀘 𑀲𑀫𑀯𑀸𑀬𑁂, 𑀯𑁄, 𑀇𑀓𑀸𑀭𑀸𑀕𑀫𑁄 𑀘. 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀭𑀜𑁆𑀜𑀸 𑀫𑀦𑁆𑀢𑁂𑀦 𑀅𑀫𑀸 𑀲𑀳 𑀪𑀯𑀢𑀻𑀢𑀺 𑀅𑀫𑀘𑁆𑀘𑁄, 𑀅𑀫𑀸𑀲𑀤𑁆𑀤𑁄𑀬𑀁 𑀦𑀺𑀧𑀸𑀢𑁄 𑀲𑀳𑀢𑁆𑀣𑁂 𑀘𑁆𑀘𑀧𑀘𑁆𑀘𑀬𑁄. 𑀲𑀚𑀻𑀯𑀫𑀢𑁆𑀢𑁂 𑀘𑀸𑀫𑀘𑁆𑀘𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀤𑁆𑀯𑀬𑀁 𑀲𑁂𑀦𑀸𑀧𑀢𑀺𑀫𑁆𑀳𑀺. 𑀲𑁂𑀦𑀁 𑀦𑀬𑀢𑀻𑀢𑀺 𑀲𑁂𑀦𑀸𑀦𑀻. 𑀘𑀫𑀽𑀦𑀁 𑀲𑁂𑀦𑀸𑀦𑀁 𑀧𑀢𑀺 𑀘𑀫𑀽𑀧𑀢𑀺.

𑁩𑁪𑁧. 𑀦𑁆𑀬𑀸𑀲𑀸𑀤𑀻𑀦𑀁 𑀇𑀡𑀸𑀤𑀸𑀦𑀤𑀸𑀬𑀯𑀺𑀪𑀸𑀕𑀸𑀤𑀻𑀦𑀁 𑀯𑀺𑀯𑀸𑀤𑀸𑀦𑀁 𑀯𑁄𑀳𑀸𑀭𑀸𑀦𑀁 𑀉𑀧𑀤𑀝𑁆𑀞𑀭𑀺 𑀉𑀧𑀤𑀲𑁆𑀲𑀺𑀢𑁂 𑀅𑀓𑁆𑀔𑀤𑀲𑁆𑀲𑁄, 𑀅𑀓𑁆𑀔𑁂 𑀯𑁄𑀳𑀸𑀭𑁂 𑀧𑀲𑁆𑀲𑀢𑀻𑀢𑀺 𑀅𑀓𑁆𑀔𑀤𑀲𑁆𑀲𑁄, 𑀡𑁄, 𑀥𑀫𑁆𑀫𑀸𑀥𑀺𑀓𑀭𑀡𑀺𑀬𑁄. 𑀧𑀼𑀘𑁆𑀙𑀸𑀯𑀺𑀯𑀸𑀓𑁄, 𑀧𑀜𑁆𑀳𑀯𑀺𑀯𑀸𑀓𑁄𑀧𑁆𑀬𑀢𑁆𑀭.

𑀧𑀚𑁆𑀚𑀟𑁆𑀠𑀁 𑀧𑀝𑀺𑀳𑀸𑀭𑁂. 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄, 𑀡𑀺𑀓𑁄, 𑀑𑀓𑀸𑀭𑀸𑀕𑀫𑁄. 𑀧𑀝𑀺𑀳𑀭𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑁂𑀦𑀸𑀢𑀺 𑀧𑀝𑀺𑀳𑀸𑀭𑁄, 𑀡𑁄. 𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀻𑀢𑀺 𑀤𑁆𑀯𑀸𑀭𑀝𑁆𑀞𑁄, 𑀲𑀓𑀢𑁆𑀣𑁂 𑀓𑁄. 𑀤𑁆𑀯𑀸𑀭𑀧𑀸𑀮𑀓𑁄. 𑀤𑁆𑀯𑀸𑀭𑀝𑁆𑀞𑀺𑀢𑁄, 𑀤𑀲𑁆𑀲𑀓𑁄𑀧𑁆𑀬𑀢𑁆𑀭.

𑁩𑁪𑁨. 𑀭𑀸𑀚𑀽𑀦𑀁 𑀅𑀗𑁆𑀕𑀭𑀓𑁆𑀔𑀕𑀡𑁄 𑀅𑀦𑀻𑀓𑀝𑁆𑀞𑁄𑀢𑀺 𑀫𑀢𑁄. ‘‘𑀭𑀓𑁆𑀔𑀺𑀯𑀕𑁆𑀕𑁄 𑀢𑀼 𑀬𑁄 𑀭𑀜𑁆𑀜𑀁, 𑀲𑁄’𑀦𑀻𑀓𑀝𑁆𑀞𑁄’𑀪𑀺𑀥𑀻𑀬𑀢𑁂’’𑀢𑀺 𑀅𑀫𑀭𑀫𑀸𑀮𑀸𑀬𑀜𑁆𑀘, 𑀅𑀦𑀻𑀓𑁂𑀦 𑀲𑀫𑀽𑀳𑁂𑀦 𑀢𑀺𑀝𑁆𑀞𑀢𑀻𑀢𑀺 𑀅𑀦𑀻𑀓𑀝𑁆𑀞𑁄, 𑀡𑁄.

𑀤𑁆𑀯𑀬𑀁 𑀫𑀳𑀮𑁆𑀮𑀓𑁂. 𑀓𑀜𑁆𑀘𑀼𑀓𑀁 𑀘𑁄𑀴𑀁, 𑀢𑀁𑀬𑁄𑀕𑀸 𑀓𑀜𑁆𑀘𑀼𑀓𑀻. 𑀲𑁄𑀓𑀁 𑀯𑀺𑀦𑁆𑀤𑀢𑀻𑀢𑀺 𑀲𑁄𑀯𑀺𑀤𑀮𑁆𑀮𑁄. 𑀯𑀺𑀤 𑀮𑁄𑀪𑁂, 𑀮𑁄, 𑀓𑀮𑁄𑀧𑁄. 𑀣𑀸𑀧𑀢𑀺, 𑀲𑁄𑀯𑀺𑀤𑁄𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀲𑁂𑀯𑀓𑁂. 𑀧𑀪𑀼𑀦𑁄 𑀧𑀘𑁆𑀙𑀸 𑀚𑀻𑀯𑀢𑀻𑀢𑀺 𑀅𑀦𑀼𑀚𑀻𑀯𑀻, 𑀡𑀻. 𑀲𑁂𑀯 𑀲𑁂𑀯𑀦𑁂, 𑀪𑀽, 𑀡𑁆𑀯𑀼. 𑀅𑀢𑁆𑀣𑀻𑀧𑁆𑀬𑀢𑁆𑀭. 𑀅𑀢𑁆𑀣 𑀬𑀸𑀘𑀦𑀸𑀬𑀁. 𑀅𑀢𑁆𑀣𑀦𑀫𑀢𑁆𑀣𑁄, 𑀆𑀲𑀻𑀲𑁄, 𑀢𑀁𑀬𑁄𑀕𑀸 𑀅𑀢𑁆𑀣𑀻.

𑁩𑁪𑁩. 𑀤𑁆𑀯𑀬𑀁 𑀅𑀥𑀺𑀓𑀫𑀢𑁆𑀢𑁂. 𑀕𑀸𑀫𑁂𑀲𑀼 𑀅𑀥𑀺𑀓𑀢𑁆𑀢𑀸 𑀅𑀥𑀺𑀓𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀫𑁂𑀢𑀲𑁆𑀲 𑀅𑀚𑁆𑀛𑀓𑁆𑀔𑁄, 𑀇𑀲𑁆𑀲𑀢𑁆𑀢𑀁. 𑀅𑀥𑀺𑀓𑀁 𑀓𑀭𑁄𑀢𑀻𑀢𑀺 𑀅𑀥𑀺𑀓𑀢𑁄. 𑀇𑀤𑀁 𑀤𑁆𑀯𑀬𑀁 𑀣𑀸𑀬𑀼𑀓𑀕𑁄𑀧𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀫𑀁. 𑀢𑀢𑁆𑀭 𑀏𑀓𑀕𑀸𑀫𑁂 𑀅𑀥𑀺𑀓𑀢𑁄 𑀣𑀸𑀬𑀼𑀓𑁄, 𑀩𑀳𑀽𑀲𑀼 𑀕𑀸𑀫𑁂𑀲𑁆𑀯𑀥𑀺𑀓𑀢𑁄 𑀕𑁄𑀧𑁄. 𑀯𑀼𑀢𑁆𑀢𑀜𑁆𑀘𑀸𑀫𑀭𑀓𑁄𑀲𑁂 ‘‘𑀣𑀸𑀬𑀼𑀓𑁄𑀥𑀺𑀓𑀢𑁄 𑀕𑀸𑀫𑁂, 𑀕𑁄𑀧𑁄 𑀕𑀸𑀫𑁂𑀲𑀼 𑀪𑀽𑀭𑀺𑀲𑀽’’𑀢𑀺. [𑀅𑀫𑀭 𑁧𑁮.𑁭] 𑀭𑀼𑀤𑁆𑀤𑁂𑀦𑀸𑀧𑀺 𑀯𑀼𑀢𑁆𑀢𑀁 ‘‘𑀕𑀸𑀫𑁂𑀲𑁆𑀯𑀥𑀺𑀓𑀢𑁂 𑀕𑁄𑀧𑁄, 𑀕𑁄𑀝𑁆𑀞𑀚𑁆𑀛𑀓𑁆𑀔𑁂𑀧𑀺 𑀯𑀮𑁆𑀮𑀪𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁭].

𑀤𑁆𑀯𑀬𑀁 𑀲𑀼𑀯𑀡𑁆𑀡𑀭𑀚𑀢𑀚𑁆𑀛𑀓𑁆𑀔𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀫𑀁. 𑀳𑀺𑀭𑀜𑁆𑀜𑀁 𑀯𑀼𑀘𑁆𑀘𑀢𑀺 𑀅𑀓𑀢𑀲𑀼𑀯𑀡𑁆𑀡𑀸𑀤𑀺, 𑀢𑀢𑁆𑀭 𑀦𑀺𑀬𑀼𑀢𑁆𑀢𑁄 𑀳𑁂𑀭𑀜𑁆𑀜𑀺𑀓𑁄. 𑀓𑀦 𑀤𑀺𑀢𑁆𑀢𑀺𑀕𑀢𑀺𑀓𑀦𑁆𑀢𑀻𑀲𑀼, 𑀦𑀺𑀧𑀼𑀩𑁆𑀩𑁄, 𑀔𑁄, 𑀦𑀺𑀓𑁆𑀔𑁄, 𑀲𑀼𑀯𑀡𑁆𑀡𑀸𑀤𑀺𑀯𑀺𑀓𑀸𑀭𑁄, 𑀢𑀢𑁆𑀭 𑀦𑀺𑀬𑁄𑀕𑁄 𑀦𑀺𑀓𑁆𑀔𑀺𑀓𑁄. 𑀯𑀺𑀲𑁂𑀲𑀢𑁄 𑀧𑀦 𑀲𑀼𑀯𑀡𑁆𑀡𑀚𑁆𑀛𑀓𑁆𑀔𑁂 𑀪𑁄𑀭𑀺𑀓𑁄. 𑀪𑀽𑀭𑀺𑀲𑀤𑁆𑀤𑁄 𑀲𑀼𑀯𑀡𑁆𑀡𑁂, 𑀢𑀁𑀬𑁄𑀕𑀸 𑀪𑁄𑀭𑀺𑀓𑁄. 𑀭𑀽𑀧𑁆𑀬𑀸𑀚𑁆𑀛𑀓𑁆𑀔𑁂𑀦𑀺𑀓𑁆𑀔𑀺𑀓𑁄, 𑀢𑀲𑁆𑀫𑀸’𑀬’𑀫𑀼𑀪𑀬𑀢𑁆𑀭𑀸𑀧𑀺 𑀳𑁂𑀭𑀜𑁆𑀜𑀺𑀓𑁄𑀢𑀺 𑀲𑀸𑀫𑀜𑁆𑀜𑀲𑁆𑀫𑀺𑀁𑀬𑁂𑀯. 𑀯𑀼𑀢𑁆𑀢𑀜𑁆𑀘 𑁋

‘‘𑀪𑁄𑀭𑀺𑀓𑁄 𑀓𑀦𑀓𑀸𑀚𑁆𑀛𑀓𑁆𑀔𑁄,

𑀭𑀽𑀧𑁆𑀬𑀸’𑀚𑁆𑀛𑀓𑁆𑀔𑁄 𑀢𑀼 𑀦𑀺𑀓𑁆𑀔𑀺𑀓𑁄’’𑀢𑀺 [𑀅𑀫𑀭 𑁧𑁮.𑁭].

𑀲𑀲𑁆𑀲 𑀅𑀢𑁆𑀢𑀦𑁄 𑀯𑀺𑀚𑀺𑀕𑀻𑀲𑀪𑀽𑀢𑀲𑁆𑀲 𑀤𑁂𑀲𑀸𑀦𑀦𑁆𑀢𑀭𑁄 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀻𑀪𑀽𑀢𑁄 𑀭𑀸𑀚𑀸 𑀲𑀢𑁆𑀢𑀼𑀭𑀼𑀘𑁆𑀘𑀢𑁂 𑀏𑀓𑀢𑁆𑀣𑀸𑀪𑀺𑀦𑀺𑀯𑁂𑀲𑀺𑀢𑀢𑁆𑀢𑀸. 𑀢𑀢𑁄 𑀧𑀭𑀁 𑀯𑀺𑀚𑀺𑀕𑀻𑀲𑀪𑀽𑀫𑁆𑀬𑁂𑀓𑀦𑁆𑀢𑀭𑀺𑀓𑁄 𑀫𑀺𑀢𑁆𑀢𑁄 𑀏𑀓𑀢𑁆𑀣𑀓𑀸𑀭𑀺𑀢𑁆𑀢𑀦𑁄𑀧𑀓𑀸𑀭𑀢𑁆𑀢𑀸. 𑀅𑀭𑀺𑀯𑀺𑀚𑀺𑀕𑀻𑀲𑀫𑀺𑀢𑁆𑀢𑀸𑀦𑀁 𑀧𑀦 𑀫𑀡𑁆𑀟𑀮𑀸𑀦𑀁 𑀩𑀳𑀺𑀪𑀽𑀢𑁄 𑀤𑀽𑀭𑀫𑀡𑁆𑀟𑀮𑀝𑁆𑀞𑁄 𑀯𑀺𑀚𑀺𑀕𑀻𑀲𑀪𑀽𑀫𑀺𑀬𑀸 𑀅𑀘𑁆𑀘𑀦𑁆𑀢𑀩𑁆𑀬𑀯𑀳𑀺𑀢𑁄 𑀩𑀮𑀸𑀥𑀺𑀓𑁄𑀧𑀺 𑀬𑁄 𑀦𑀸𑀧𑀓𑀭𑁄𑀢𑁆𑀬𑀼𑀧𑀓𑀸𑀭𑁄𑀢𑀺 𑀯𑀸, 𑀲 𑀉𑀤𑀸𑀲𑀻𑀦𑁄 𑀤𑀽𑀭𑀫𑀡𑁆𑀟𑀮𑀢𑁆𑀢𑁂𑀦𑁄𑀧𑀓𑀸𑀭𑀢𑁆𑀢𑀸. 𑀤𑀽𑀭𑀫𑀡𑁆𑀟𑀮𑁂 𑀆𑀲𑀢𑀻𑀢𑀺 𑀉𑀤𑀸𑀲𑀻𑀦𑁄, 𑀉𑀧𑀼𑀩𑁆𑀩𑁄 𑀆𑀲 𑀉𑀧𑀲𑁂𑀯𑀦𑁂, 𑀬𑀼, 𑀅𑀲𑁆𑀲𑀺, 𑀤𑀸𑀕𑀫𑁄 𑀘. 𑀲𑀢𑁆𑀢𑀼𑀫𑀪𑀺𑀬𑀼𑀜𑁆𑀚𑀫𑀸𑀦𑀲𑁆𑀲 𑀯𑀺𑀚𑀺𑀕𑀻𑀲𑀲𑁆𑀲 𑀲𑀢𑁆𑀢𑀼𑀳𑀺𑀢𑀸𑀬 𑀬𑁄 𑀧𑀡𑁆𑀳𑀺𑀁 𑀕𑀡𑁆𑀳𑀢𑀺 𑀧𑀺𑀝𑁆𑀞𑀺𑀢𑁄 𑀯𑀢𑁆𑀢𑀢𑀺, 𑀲𑁄 𑀧𑀡𑁆𑀳𑀺𑀕𑁆𑀕𑀸𑀳𑁄. ‘‘𑀧𑀡𑁆𑀳𑀺 𑀧𑀘𑁆𑀙𑀸 𑀧𑀤𑀁 𑀯𑀺𑀚𑀺𑀕𑀻𑀲𑀲𑁆𑀲𑀸’’𑀢𑀺 𑀭𑀢𑀦𑀓𑁄𑀲𑁂. ‘‘𑀧𑀡𑁆𑀳𑀺𑀧𑀸𑀤𑁂 𑀩𑁆𑀬𑀽𑀳𑀧𑀺𑀝𑁆𑀞𑁂’’𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁩.𑁩.𑁧𑁩𑁪] 𑀢𑀺𑀓𑀡𑁆𑀟𑀲𑁂𑀲𑁄. ‘‘𑀧𑀡𑁆𑀳𑀺 𑀧𑀘𑁆𑀙𑀺𑀫𑀪𑀸𑀕𑁂 𑀘, 𑀧𑀸𑀤𑀫𑀽𑀮𑁄𑀫𑀤𑀺𑀝𑁆𑀞𑀺𑀲𑀼. 𑀲𑁂𑀦𑀸𑀧𑀺𑀝𑁆𑀞𑁂 𑀓𑀼𑀫𑁆𑀪𑀺𑀬𑀜𑁆𑀘𑁂’’𑀢𑀺 𑀢𑀼 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑁩𑁪𑁪-𑁩𑁪𑁫. 𑀤𑀺𑀝𑁆𑀞𑀦𑁆𑀢𑀁 𑀭𑀺𑀧𑀼𑀫𑁆𑀳𑀺. 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀫𑀺𑀢𑁆𑀢𑁄, 𑀭𑀧𑀢𑁆𑀬𑀯𑀡𑁆𑀡𑀁 𑀭𑀚𑀢𑁂𑀢𑀺 𑀭𑀺𑀧𑀼, 𑀉, 𑀇𑀢𑁆𑀢𑀁, 𑀭𑀧, 𑀮𑀧, 𑀚𑀧, 𑀚𑀧𑁆𑀧 𑀯𑀘𑀦𑁂 𑀯𑀸. 𑀯𑁂𑀭𑀁 𑀯𑀺𑀭𑁄𑀥𑁄 𑀬𑀲𑁆𑀲𑀢𑁆𑀣𑀻𑀢𑀺 𑀯𑁂𑀭𑀻, 𑀈, 𑀤𑀼𑀓𑁆𑀔𑀳𑁂𑀢𑀼𑀢𑁆𑀢𑀸 𑀲𑀧𑀢𑁆𑀢𑀺 𑀇𑀯 𑀲𑀧𑀢𑁆𑀢𑁄, 𑀇𑀯𑀢𑁆𑀣𑁂 𑀅𑀓𑀸𑀭𑀧𑀘𑁆𑀘𑀬𑁄. 𑀅𑀭 𑀕𑀫𑀦𑁂,𑀢𑀺, 𑀪𑀽𑀯𑀸𑀤𑀺𑀢𑁆𑀢𑀸 𑀆𑀕𑀫𑁄. 𑀲𑀤 𑀲𑀸𑀤𑀦𑁂, 𑀢𑀼, 𑀪𑀽𑀯𑀸𑀤𑀺, 𑀲𑀢𑁆𑀢𑀼, 𑀬𑀯𑀸𑀤𑀺𑀘𑀼𑀡𑁆𑀡𑁂𑀧𑀺. 𑀅𑀭 𑀕𑀫𑀦𑁂, 𑀯𑁂𑀭𑀫𑀭𑀢𑀻𑀢𑀺 𑀅𑀭𑀺, 𑀭𑀲𑁆𑀲𑀦𑁆𑀢𑁄 𑀇. 𑀲𑀧𑀢𑁆𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀤𑁆𑀯𑀦𑁆𑀤𑁄, ‘‘𑀩𑁆𑀬𑀜𑁆𑀚𑀦𑁄 𑀘 𑀯𑀺𑀲𑀁𑀬𑁄𑀕𑁄’’𑀢𑀺 𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑁂𑀦 𑀏𑀓𑀢𑀓𑀸𑀭𑀲𑁆𑀲 𑀮𑁄𑀧𑁄 𑀘. 𑀧𑀢𑀺𑀬𑀫𑀢𑁆𑀣𑀦𑀁 𑀧𑀘𑁆𑀘𑀢𑁆𑀣𑁄, 𑀢𑀁𑀬𑁄𑀕𑀸 𑀧𑀘𑁆𑀘𑀢𑁆𑀣𑀺𑀓𑁄, 𑀧𑀢𑀺𑀬𑀁 𑀯𑀺𑀧𑀭𑀻𑀢𑀕𑀫𑀦𑀁. 𑀧𑀦𑁆𑀣 𑀕𑀢𑀺𑀬𑀁, 𑀘𑀼𑀭𑀸𑀤𑀺. 𑀧𑀭𑀺𑀧𑀦𑁆𑀣𑁄 𑀧𑀭𑀺𑀲𑁆𑀲𑀯𑀝𑁆𑀞𑀸𑀦𑀁, 𑀢𑀁𑀬𑁄𑀕𑀸 𑀧𑀭𑀺𑀧𑀦𑁆𑀣𑀻. 𑀧𑀝𑀺𑀯𑀺𑀭𑀼𑀤𑁆𑀥𑁄 𑀧𑀓𑁆𑀔𑁄 𑀲𑀳𑀸𑀬𑁄 𑀧𑀝𑀺𑀧𑀓𑁆𑀔𑁄, 𑀢𑀣𑀸 𑀯𑀺𑀧𑀓𑁆𑀔𑁄. 𑀦 𑀳𑀺𑀢𑁄 𑀅𑀳𑀺𑀢𑁄. 𑀳𑀺𑀁𑀲𑀸𑀬𑀁 𑀭𑀫𑀢𑀻𑀢𑀺 [𑀧𑀭𑀢𑀻𑀢𑀺 (?)] 𑀧𑀭𑁄, 𑀓𑁆𑀯𑀺. 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀫𑀢𑀺 𑀕𑀘𑁆𑀙𑀢𑀻𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑁄, 𑀅𑀫 𑀕𑀫𑀦𑁂, 𑀢𑁄, 𑀤𑁆𑀯𑀺𑀢𑁆𑀢𑀁. 𑀦𑀢𑁆𑀣𑀺 𑀏𑀢𑀲𑁆𑀫𑀸 𑀈𑀢𑀺 𑀉𑀧𑀤𑁆𑀤𑀯𑁄𑀢𑀺 𑀅𑀦𑀻𑀢𑁄, 𑀫𑀺𑀢𑁆𑀢𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀧𑀘𑁆𑀘𑀦𑀻𑀢𑁄, 𑀲𑁄 𑀏𑀯 𑀧𑀘𑁆𑀘𑀦𑀻𑀓𑁄, 𑀢𑀲𑁆𑀲 𑀓𑁄, 𑀬𑀣𑀸 𑀦𑀺𑀬𑀓𑁄. 𑀯𑀺𑀭𑁄𑀥𑁄𑀲𑁆𑀲𑀢𑁆𑀣𑀻𑀢𑀺 𑀯𑀺𑀭𑁄𑀥𑀻, 𑀈. 𑀤𑀺𑀲, 𑀤𑀼𑀲 𑀅𑀧𑁆𑀧𑀻𑀢𑀺𑀬𑀁, 𑀤𑀺𑀯𑀸𑀤𑀺. 𑀯𑀺𑀤𑀼𑀲𑁆𑀲𑀦𑀲𑀻𑀮𑀢𑀸𑀬 𑀯𑀺𑀤𑁆𑀤𑁂𑀲𑀻, 𑀤𑁆𑀯𑀺𑀢𑁆𑀢𑀁, 𑀇𑀲𑁆𑀲𑁂𑀢𑁆𑀢𑀁. 𑀤𑀼𑀲𑁆𑀲𑀢𑀻𑀢𑀺 𑀤𑀺𑀲𑁄, 𑀅. 𑀢𑀧𑀘𑁆𑀘𑀬𑁂 𑀤𑀺𑀝𑁆𑀞𑁄, 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳 𑀝𑁆𑀞𑀸𑀤𑁂𑀲𑁄. 𑀤𑁆𑀯𑁂𑀲𑀡𑁄, 𑀤𑀼𑀳𑀤𑀬𑁄, 𑀤𑀲𑁆𑀲𑀼, 𑀲𑀸𑀢𑁆𑀢𑀯𑁄, 𑀅𑀪𑀺𑀖𑀸𑀢𑀻𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀅𑀦𑀼𑀓𑀽𑀮𑀦𑁂. 𑀅𑀦𑀼𑀭𑁄𑀥𑀦𑀁 𑀅𑀦𑀼𑀭𑁄𑀥𑁄, 𑀡𑁄. 𑀭𑀼𑀥 𑀆𑀯𑀭𑀡𑁂. 𑀅𑀦𑀼𑀭𑀽𑀧𑀁 𑀧𑀯𑀢𑁆𑀢𑀦𑀁 𑀅𑀦𑀼𑀯𑀢𑁆𑀢𑀦𑀁, 𑀯𑀢𑀼 𑀯𑀢𑁆𑀢𑀦𑁂, 𑀪𑀽, 𑀬𑀼.

𑁩𑁪𑁬. 𑀧𑀜𑁆𑀘𑀓𑀁 𑀫𑀺𑀢𑁆𑀢𑀲𑀸𑀫𑀜𑁆𑀜𑁂. 𑀫𑀺𑀤 𑀲𑁆𑀦𑁂𑀳𑁂, 𑀪𑀽𑀯𑀸𑀤𑀺, 𑀢𑁄, 𑀯𑀬𑀲𑀸 𑀢𑀼𑀮𑁆𑀬𑁄 𑀯𑀬𑀲𑁄, 𑀫𑀽𑀮𑀯𑀬𑁄𑀲𑀤𑁆𑀤𑁂𑀳𑀺 𑀲𑀜𑁆𑀜𑀸𑀬𑀁 𑀲𑀧𑀘𑁆𑀘𑀬𑁄 [𑀬𑀧𑀘𑁆𑀘𑀬𑁄 (?) 𑀧𑀸𑀡𑀺𑀦𑀺 𑁪.𑁪.𑁯𑁧 𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁], 𑀲𑀩𑁆𑀩𑀓𑀸𑀭𑀺𑀬𑁂𑀲𑀼 𑀲𑀳 𑀯𑀬𑀢𑀻𑀢𑀺 𑀯𑀸 𑀯𑀬𑀲𑁄, 𑀯𑀬 𑀕𑀫𑀦𑁂, 𑀲𑀳𑀲𑁆𑀲 𑀲𑁄 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀲𑀳 𑀅𑀬𑀢𑀺 𑀓𑀺𑀘𑁆𑀘𑁂𑀲𑀽𑀢𑀺 𑀲𑀳𑀸𑀬𑁄, 𑀅𑀬 𑀕𑀫𑀦𑁂, 𑀲𑀳𑀲𑁆𑀲 𑀲𑀸𑀪𑀸𑀯𑁄, 𑀬𑀣𑀸 𑀲𑀳𑀥𑀫𑁆𑀫𑀺𑀓𑁄. 𑀲𑀳 𑀯𑀸 𑀳𑀸𑀦𑀺, 𑀅𑀬𑁄 𑀯𑀸 𑀯𑀼𑀟𑁆𑀠𑀺 𑀬𑀲𑁆𑀲 𑀲𑀳𑀸𑀬𑁄, 𑀢𑀺𑀧𑀤𑀩𑀳𑀼𑀩𑁆𑀩𑀻𑀳𑀺, 𑀬𑀣𑀸 𑀧𑀭𑀓𑁆𑀓𑀫𑀸𑀥𑀺𑀕𑀢𑀲𑀫𑁆𑀧𑀤𑀸. 𑀅𑀣 𑀯𑀸 𑀳𑀸𑀦𑀺 𑀘 𑀆𑀬𑁄 𑀘 𑀳𑀸𑀬𑀸, 𑀦𑀺𑀮𑁄𑀧𑁄, 𑀢𑁂 𑀬𑀲𑁆𑀲 𑀅𑀢𑁆𑀣𑀺, 𑀲𑁄 𑀲𑀳𑀸𑀬𑁄, ‘‘𑀲𑀧𑀓𑁆𑀔𑀓𑁄, 𑀲𑀮𑁄𑀫𑀓𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀲𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀢𑁆𑀢𑀸. 𑀲𑀼𑀦𑁆𑀤𑀭𑀁 𑀳𑀤𑀬𑀫𑁂𑀢𑀲𑁆𑀲𑀸𑀢𑀺 𑀲𑀼𑀳𑀤𑀬𑁄, 𑀅𑀮𑁄𑀧𑁄, 𑀤𑁆𑀬𑀲𑁆𑀲 𑀚𑁄, 𑀲𑁄𑀯 𑀲𑀼𑀳𑀚𑁆𑀚𑁄. 𑀲𑀳 𑀧𑀭𑀺𑀲𑀳𑀦𑁂. 𑀧𑀭𑀺𑀲𑀳𑀦𑀁 𑀅𑀤𑀼𑀲𑁆𑀲𑀦𑀁, 𑀔𑁄, 𑀳𑀮𑁄𑀧𑁄, 𑀲𑀔𑀸, 𑀭𑀸𑀚𑀸𑀤𑀺, 𑀲𑀫𑀸𑀦𑁄 𑀔𑁆𑀬𑀸𑀢𑁄 𑀧𑀢𑀻𑀢𑁄 𑀯𑀸 𑀲𑀔𑀸, 𑀬𑀮𑁄𑀧𑁄, 𑀲𑀫𑀸𑀦𑀲𑁆𑀲 𑀘 𑀲𑀪𑀸𑀯𑁄. 𑀲𑀺𑀦𑀺𑀤𑁆𑀥𑁄, 𑀲𑁆𑀦𑀺𑀤𑁆𑀥𑁄, 𑀲𑀯𑀬𑁄𑀧𑁆𑀬𑀢𑁆𑀭. 𑀲𑀔𑁆𑀬𑀲𑀢𑁆𑀢𑀧𑀤𑀺𑀦𑀸 𑀧𑀦 𑀫𑁂𑀢𑁆𑀢𑀺𑀬𑀁 𑀯𑀢𑁆𑀢𑀦𑁆𑀢𑀺. 𑀲𑀔𑀺𑀫𑁆𑀳𑀺 𑀪𑀯𑀁 𑀲𑀔𑁆𑀬𑀁. 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀅𑀯𑀕𑀫𑁆𑀬𑀢𑁂𑀢𑀺 𑀲𑀢𑁆𑀢𑀧𑀤𑀺𑀦𑀁 [𑀲𑀢𑁆𑀢𑀧𑀤𑀻𑀦 (𑀅𑀫𑀭 𑁧𑁮.𑁧𑁨)], 𑀇𑀦𑁄.

𑀤𑁆𑀯𑀬𑀁 𑀅𑀪𑁂𑀚𑁆𑀚𑀫𑀺𑀢𑁆𑀢𑁂. 𑀲𑀩𑁆𑀩𑀓𑀸𑀮𑀁 𑀪𑀚𑀢𑀻𑀢𑀺 𑀲𑀫𑁆𑀪𑀢𑁆𑀢𑁄, 𑀪𑀚 𑀲𑁂𑀯𑀸𑀬𑀁, 𑀪𑀽𑀯𑀸𑀤𑀺. 𑀤𑀴𑁆𑀳𑁄 𑀣𑀺𑀭𑁄 𑀫𑀺𑀢𑁆𑀢𑁄 𑀤𑀴𑁆𑀳𑀫𑀺𑀢𑁆𑀢𑁄. 𑀤𑁆𑀯𑀬𑀁 𑀤𑀺𑀝𑁆𑀞𑀫𑀢𑁆𑀢𑀫𑀺𑀢𑁆𑀢𑁂. 𑀓𑀺𑀜𑁆𑀘𑀺 𑀓𑀸𑀮𑀁 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑁄. 𑀲𑀁𑀲𑀤𑁆𑀤𑁄𑀬𑀫𑀧𑁆𑀧𑀢𑁆𑀣𑁄. 𑀤𑀺𑀲 𑀧𑁂𑀓𑁆𑀔𑀦𑁂, 𑀤𑀲𑁆𑀲𑀦𑀁 𑀤𑀺𑀝𑁆𑀞𑀁, 𑀢𑀁 𑀫𑀢𑁆𑀢𑀸 𑀧𑀫𑀸𑀡𑀫𑁂𑀢𑀲𑁆𑀲 𑀤𑀺𑀝𑁆𑀞𑀫𑀢𑁆𑀢𑀓𑁄, 𑀲𑀓𑀢𑁆𑀣𑁂 𑀓𑁄.

𑁩𑁪𑁭. 𑀤𑁆𑀯𑀬𑀁 𑀘𑀭𑀧𑀼𑀭𑀺𑀲𑁂 𑀢𑀸𑀧𑀲𑀸𑀤𑀺𑀭𑀽𑀧𑁂𑀦 𑀘𑀭𑀫𑀢𑁆𑀢𑁂. 𑀘𑀭𑀢𑀺 𑀚𑀸𑀦𑀸𑀢𑀺 𑀧𑀭𑀘𑀓𑁆𑀓𑀦𑁆𑀢𑀺 𑀘𑀭𑁄, 𑀅, 𑀘𑀸𑀭𑁄𑀧𑀺, 𑀡𑁄. 𑀕𑀼𑀴𑁆𑀳𑀧𑀼𑀭𑀺𑀲𑁄 𑀕𑀼𑀢𑁆𑀢𑀧𑀼𑀭𑀺𑀲𑁄. 𑀬𑀣𑀸𑀭𑀳𑀯𑀡𑁆𑀡𑁄, 𑀧𑀡𑀺𑀥𑀺, 𑀅𑀧𑁆𑀧𑀲𑀧𑁄, 𑀨𑀲𑁆𑀲𑁄𑀧𑁆𑀬𑀢𑁆𑀭. 𑀢𑀢𑁆𑀭𑀸𑀤𑀺𑀤𑁆𑀯𑀬𑀁 𑀯𑀸𑀡𑀺𑀚𑀓𑀲𑀺𑀩𑀮𑀮𑀺𑀗𑁆𑀕𑀪𑀺𑀓𑁆𑀔𑀼𑀓𑀘𑁆𑀘𑀸𑀬𑀦𑀸𑀤𑀺𑀮𑁂𑀲𑁂𑀦 𑀣𑀸𑀬𑀺𑀦𑀺𑀘𑀭𑁂. 𑀇𑀢𑀭𑁂 𑀇𑀥𑀸𑀕𑀢𑀲𑀤𑀺𑀲𑀢𑁆𑀣𑁂. 𑀯𑀡𑁆𑀡𑁄 𑀧𑀓𑀸𑀭𑁄, 𑀬𑀣𑀸𑀭𑀳𑀯𑀡𑁆𑀡𑁄 𑀬𑀣𑀸𑀭𑀳𑀧𑁆𑀧𑀓𑀸𑀭𑁄. 𑀬𑁂𑀦 𑀧𑀭𑀘𑀓𑁆𑀓𑀁 𑀲𑀓𑁆𑀓𑀸 𑀜𑀸𑀢𑀼𑀁 𑀢𑀧𑁆𑀧𑀓𑀸𑀭𑀯𑀸 𑀇𑀘𑁆𑀘𑀢𑁆𑀣𑁄. 𑀧𑀡𑀺𑀥𑀺𑀬𑁆𑀬𑀢𑁂 𑀜𑁂𑀬𑁆𑀬𑀫𑀲𑁆𑀫𑀺𑀁 𑀧𑀡𑀺𑀥𑀺, 𑀇. 𑀅𑀧𑀓𑀝𑁆𑀞𑀁 𑀲𑀧𑁆𑀧𑀢𑀺 𑀘𑀭𑀢𑀻𑀢𑀺 𑀅𑀧𑀲𑀧𑁆𑀧𑁄, 𑀅. 𑀨𑀼𑀲 𑀩𑀸𑀥𑀦𑀨𑀼𑀲𑀦𑁂𑀲𑀼, 𑀅, 𑀨𑀲𑁆𑀲𑁄.

𑀢𑀺𑀓𑀁 𑀧𑀣𑀺𑀓𑁂. 𑀧𑀣𑁂 𑀕𑀘𑁆𑀙𑀢𑀻𑀢𑀺 𑀧𑀣𑀸𑀯𑀻, 𑀯𑀻, 𑀤𑀻𑀖𑁄. 𑀇𑀓𑁄, 𑀧𑀣𑀺𑀓𑁄. 𑀅𑀤𑁆𑀥𑀦𑀺 𑀫𑀕𑁆𑀕𑁂 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀅𑀤𑁆𑀥𑀕𑀽. 𑀅𑀤𑁆𑀥𑀕𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀤𑀽𑀢𑁂. 𑀤𑀼 𑀧𑀭𑀺𑀢𑀸𑀧𑁂, 𑀢𑁄. 𑀲𑀦𑁆𑀤𑁂𑀲𑀁 𑀯𑀸𑀘𑀺𑀓𑀁 𑀳𑀭𑀢𑁆𑀬𑀦𑁂𑀦𑁂𑀢𑀺 [𑀳𑀭𑀢𑀻𑀢𑀺 (?)].

𑀤𑁆𑀯𑀬𑀁 𑀚𑁄𑀢𑀺𑀲𑀺𑀓𑁂. 𑀕𑀡𑀬𑀢𑀻𑀢𑀺 𑀕𑀡𑀓𑁄, 𑀡𑁆𑀯𑀼. 𑀫𑀼𑀳𑀼𑀢𑁆𑀢𑀁 𑀓𑀸𑀮𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀫𑀼𑀳𑀼𑀢𑁆𑀢𑀺𑀓𑁄, 𑀯𑀸𑀕𑁆𑀕𑀳𑀡𑁂𑀦 𑀦 𑀯𑀼𑀤𑁆𑀥𑀺. 𑀲𑀁𑀯𑀘𑁆𑀙𑀭𑁄, 𑀚𑁄𑀢𑀺𑀲𑀺𑀓𑁄, 𑀤𑁂𑀯𑀜𑁆𑀜𑀽, 𑀫𑁄𑀳𑀼𑀢𑁆𑀢𑁄, 𑀜𑀸𑀡𑀺𑀓𑁄, 𑀓𑀸𑀢𑀦𑁆𑀢𑀺𑀓𑁄𑀧𑁆𑀬𑀢𑁆𑀭. 𑀓𑀢𑀦𑁆𑀢𑁄 𑀤𑁂𑀯𑀫𑀢𑁆𑀢𑀁, 𑀢𑀁 𑀚𑀸𑀦𑀸𑀢𑀻𑀢𑀺 𑀓𑀸𑀢𑀦𑁆𑀢𑀺𑀓𑁄.

𑁩𑁪𑁮. 𑀤𑁆𑀯𑀬𑀁 𑀮𑁂𑀔𑀓𑁂. 𑀮𑀺𑀔 𑀮𑁂𑀔𑀦𑁂, 𑀪𑀽, 𑀡𑁆𑀯𑀼. 𑀮𑀺𑀧𑁂𑀦 𑀫𑀲𑁆𑀬𑁄𑀧𑀤𑁂𑀲𑁂𑀦 𑀪𑀯𑀢𑀻𑀢𑀺 𑀮𑀺𑀧𑀺, 𑀇, 𑀯𑀡𑁆𑀡𑀲𑀡𑁆𑀞𑀸𑀦𑁄, 𑀢𑀁 𑀓𑀭𑁄𑀢𑀻𑀢𑀺 𑀮𑀺𑀧𑀺𑀓𑀸𑀭𑁄. 𑀅𑀓𑁆𑀔𑀭𑀘𑀡𑁄, 𑀅𑀓𑁆𑀔𑀭𑀘𑀼𑀜𑁆𑀘𑀼𑀧𑁆𑀬𑀢𑁆𑀭. 𑀘𑀦 𑀤𑀸𑀦𑁂, 𑀪𑀽. 𑀘𑀜𑁆𑀘𑀼 𑀕𑀢𑀺𑀬𑀁.

𑀫𑁂𑀮𑀸𑀦𑀦𑁆𑀤𑀸 𑀫𑀲𑀺𑀫𑀡𑀺, 𑀫𑁂𑀮𑀦𑁆𑀥𑀼 𑀯𑀡𑁆𑀡𑀓𑀽𑀧𑀺𑀓𑀸;

𑀫𑀲𑀺𑀚𑀮𑀦𑁆𑀢𑀼 𑀫𑁂𑀮𑀸 𑀘, 𑀧𑀢𑁆𑀢𑀜𑁆𑀚𑀦𑀁 𑀫𑀲𑀺 𑀤𑁆𑀯𑀺𑀲𑀼.

𑀮𑁂𑀔𑀦𑀻 𑀯𑀡𑁆𑀡𑀢𑀽𑀮𑀻 𑀘, 𑀯𑀡𑁆𑀡𑀓𑀓𑁆𑀔𑀭𑀢𑀽𑀮𑀺𑀓𑀸;

𑀯𑀡𑁆𑀡𑀤𑀽𑀢𑁄 𑀲𑁄𑀢𑁆𑀣𑀺𑀫𑀼𑀔𑁄, 𑀮𑁂𑀔𑁄 𑀯𑀸𑀘𑀺𑀓𑀳𑀸𑀭𑀓𑁄.

𑀓𑀸𑀘𑀦𑀓𑀺𑀢𑀮𑀺𑀓𑁄 𑀘, 𑀓𑀸𑀘𑀦𑀁 𑀢𑀦𑁆𑀦𑀺𑀩𑀦𑁆𑀥𑀦𑀁;

𑀮𑁂𑀔𑁆𑀬𑀝𑁆𑀞𑀸𑀦𑀁 𑀕𑀦𑁆𑀣𑀓𑀼𑀝𑀺, 𑀫𑀼𑀤𑁆𑀤𑀸 𑀧𑀘𑁆𑀘𑀬𑀓𑀸𑀭𑀺𑀦𑀻 [𑀢𑀺𑀓𑀡𑁆𑀟𑀲𑁂𑀲 𑁨.𑁮.𑁨𑁭, 𑁨𑁮, 𑁨𑁯].

𑀤𑁆𑀯𑀬𑀁 𑀯𑀡𑁆𑀡𑁂. 𑀯𑀡𑁆𑀡𑀻𑀬𑀢𑀺 𑀧𑀓𑀸𑀲𑀻𑀬𑀢𑀺 𑀅𑀢𑁆𑀣𑁄 𑀬𑁂𑀦, 𑀲𑁄 𑀯𑀡𑁆𑀡𑁄, 𑀯𑀡𑁆𑀡 𑀧𑀓𑀸𑀲𑀦𑁂. 𑀦 𑀔𑀭𑀢𑀺 𑀦 𑀔𑀻𑀬𑀢𑀻𑀢𑀺 𑀅𑀓𑁆𑀔𑀭𑁄, 𑀔𑀭 𑀯𑀺𑀦𑀸𑀲𑁂, 𑀔𑀺 𑀔𑀬𑁂 𑀯𑀸, 𑀢𑀤𑀸 𑀅𑀭𑁄. 𑀮𑀺𑀔𑀦𑀁, 𑀮𑀺𑀧𑀺, 𑀮𑀺𑀔𑀺 𑀇𑀫𑁂 𑀯𑀡𑁆𑀡𑀲𑀡𑁆𑀞𑀸𑀦𑁂 𑀯𑀢𑁆𑀢𑀦𑁆𑀢𑀺. 𑀮𑀺𑀧𑀺𑀮𑀺𑀔𑀺𑀬𑁄 𑀇𑀢𑁆𑀣𑀺𑀬𑀁.

𑀪𑁂𑀤𑀸𑀤𑀬𑁄 𑀇𑀫𑁂 𑀘𑀢𑀼𑀭𑁄 𑀉𑀧𑀸𑀬𑀸 𑀲𑀢𑁆𑀢𑀼𑀯𑀺𑀚𑀬𑀓𑀸𑀭𑀡𑀸𑀦𑀺. 𑀲𑀢𑁆𑀢𑀼𑀯𑀺𑀚𑀬𑀫𑀼𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀳𑀻𑀢𑀺 𑀉𑀧𑀸𑀬𑀸. 𑀧𑀭𑀲𑁆𑀫𑀸 𑀯𑀺𑀲𑀺𑀮𑁂𑀲𑀦𑀁 𑀪𑁂𑀤𑁄.

𑀲𑁆𑀦𑁂𑀳𑀭𑀸𑀕𑀸𑀧𑀦𑀬𑀦𑀁, 𑀲𑀁𑀳𑀸𑀲𑁄𑀧𑁆𑀧𑀸𑀤𑀦𑀁 𑀢𑀣𑀸;

𑀲𑀦𑁆𑀢𑀚𑁆𑀚𑀦𑀜𑁆𑀘 𑀪𑁂𑀤𑁄𑀬𑀁, 𑀯𑀺𑀜𑁆𑀜𑀽𑀳𑀺 𑀢𑀺𑀯𑀺𑀥𑁄 𑀫𑀢𑁄 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁮].

𑀢𑀢𑁆𑀭𑀸𑀬𑀁 𑀢𑀯𑀸𑀦𑀼𑀕𑁆𑀕𑀢𑁂𑀦 𑀧𑀯𑀼𑀤𑁆𑀥𑁄 𑀧𑀸𑀲𑀸𑀤𑀢𑀭𑀯𑁄 𑀯𑀺𑀬 𑀅𑀢𑁆𑀢𑀸𑀦𑀜𑁆𑀘𑁄𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀲𑀗𑁆𑀓𑀸𑀬𑀁 𑀚𑀦𑀺𑀢𑀸𑀬𑀁 𑀲𑁆𑀦𑁂𑀳𑀪𑀢𑁆𑀢𑀺𑀜𑁆𑀘𑀸𑀧𑀦𑀬𑀢𑀺. 𑀅𑀪𑀺𑀪𑀯𑀦𑀜𑁆𑀘𑁄𑀧𑀸𑀤𑀬𑀢𑀺 [𑀧𑀤𑁆𑀥𑀜𑁆𑀘𑁄𑀧𑀸𑀤𑀬𑀢𑀺 (𑀓.)]. 𑀅𑀜𑁆𑀜𑀲𑁆𑀲 𑀘 𑀧𑀭𑀺𑀬𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀼𑀕𑁆𑀕𑀳𑀡𑀲𑁆𑀲 𑀫𑀭𑀡𑀫𑁂𑀯𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑁆𑀬𑁂𑀯𑀁𑀧𑀓𑀸𑀭𑀫𑀪𑀺𑀪𑀬𑀦𑀁 𑀲𑀦𑁆𑀢𑀚𑁆𑀚𑀦𑀁.

𑀯𑀥𑁄𑀢𑁆𑀣𑀕𑁆𑀕𑀳𑀡𑀜𑁆𑀘𑁂𑀯, 𑀧𑀭𑀺𑀓𑁆𑀮𑁂𑀲𑁄 𑀢𑀣𑁂𑀯 𑀘;

𑀇𑀢𑀺 𑀤𑀡𑁆𑀟𑀯𑀺𑀥𑀜𑁆𑀜𑀽𑀳𑀺, 𑀤𑀡𑁆𑀟𑁄𑀧𑀺 𑀢𑀺𑀯𑀺𑀥𑁄 𑀫𑀢𑁄 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁯].

𑀧𑀭𑀺𑀓𑁆𑀮𑁂𑀲𑁄 𑀩𑀦𑁆𑀥𑀦𑀢𑀸𑀴𑀦𑀸𑀤𑀺.

𑀅𑀜𑁆𑀜𑀫𑀜𑁆𑀜𑁄𑀧𑀓𑀸𑀭𑀸𑀦𑀁, 𑀤𑀲𑁆𑀲𑀦𑀁 𑀕𑀼𑀡𑀓𑀺𑀢𑁆𑀢𑀦𑀁;

𑀲𑀫𑁆𑀩𑀦𑁆𑀥𑀲𑁆𑀲 𑀲𑀫𑀓𑁆𑀔𑀸𑀦𑀁, 𑀆𑀬𑀢𑀺𑀁 𑀲𑀫𑁆𑀧𑀓𑀸𑀲𑀦𑀁.

𑀯𑀸𑀘𑀸 𑀧𑁂𑀲𑀮𑀬𑀸 𑀲𑀸𑀥𑀼, 𑀢𑀯𑀸𑀳𑀫𑀺𑀢𑀺 𑀘𑀧𑁆𑀧𑀡𑀁;

𑀇𑀢𑀺 𑀲𑀸𑀫𑀯𑀺𑀥𑀜𑁆𑀜𑀽𑀳𑀺, 𑀲𑀸𑀫𑀁 𑀧𑀜𑁆𑀘𑀯𑀺𑀥𑀁 𑀫𑀢𑀁 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁪-𑁫].

‘‘𑀅𑀲𑁆𑀫𑀺𑀁 𑀏𑀯𑀁 𑀓𑀢𑁂 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀲𑀸𑀤𑀲𑁆𑀲𑀦𑀁 𑀆𑀬𑀢𑀺𑀲𑀫𑁆𑀧𑀓𑀸𑀲𑀦𑀁. 𑀅𑀧𑁆𑀧𑀡𑀫𑀺𑀢𑁆𑀬𑀗𑁆𑀕𑀲𑁆𑀲 𑀤𑀸𑀦𑀁.

𑀤𑀸𑀦𑀜𑁆𑀘 𑀧𑀜𑁆𑀘𑀥𑀸 𑀲𑀸𑀭𑀲𑁆𑀲𑀸𑀲𑀸𑀭𑀲𑁆𑀲 𑀘 𑀤𑀩𑁆𑀩𑀲𑁆𑀲 𑀕𑀳𑀺𑀢𑀲𑁆𑀲 𑀲𑀫𑀧𑁆𑀧𑀡𑀁, 𑀢𑀣𑀸𑀕𑀳𑀺𑀢𑀲𑁆𑀲𑀸𑀦𑀼𑀫𑁄𑀤𑀦𑀁, 𑀢𑀣𑀸 𑀅𑀧𑀼𑀩𑁆𑀩𑀤𑀸𑀦𑀁, 𑀢𑀣𑀸 ‘‘𑀅𑀫𑀼𑀲𑁆𑀲 𑀤𑀩𑁆𑀩𑀁 𑀕𑀡𑁆𑀳𑀸𑀳𑀺, 𑀢𑀣𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀲𑁂𑀲𑀼 𑀲𑀬𑀁 𑀕𑀸𑀳𑀧𑁆𑀧𑀯𑀢𑁆𑀢𑀦𑀁, 𑀢𑀣𑀸 𑀇𑀡𑀧𑁆𑀧𑀫𑁄𑀘𑀦𑀜𑁆𑀘𑁂𑀢𑀺. 𑀬𑀣𑀸𑀳 𑁋

‘‘𑀬𑁄 𑀲𑀫𑁆𑀧𑀢𑁆𑀢𑀥𑀦𑁄𑀲𑁆𑀲𑀕𑁆𑀕𑁄, 𑀉𑀢𑁆𑀢𑀫𑀫𑀚𑁆𑀛𑀺𑀫𑀸𑀥𑀫𑁄;

𑀧𑀢𑀺𑀤𑀸𑀦𑀁 𑀢𑀣𑀸 𑀢𑀲𑁆𑀲, 𑀕𑀳𑀺𑀢𑀲𑁆𑀲𑀸𑀦𑀼𑀫𑁄𑀤𑀦𑀁.

𑀤𑀩𑁆𑀩𑀤𑀸𑀦’𑀫𑀧𑀼𑀩𑁆𑀩𑀜𑁆𑀘, 𑀲𑀬𑀁 𑀕𑀸𑀳𑀧𑁆𑀧𑀯𑀢𑁆𑀢𑀦𑀁;

𑀤𑁂𑀬𑁆𑀬𑀲𑁆𑀲 𑀧𑀝𑀺𑀫𑁄𑀓𑁆𑀔𑁄 𑀘, 𑀤𑀸𑀦𑀁 𑀧𑀜𑁆𑀘𑀯𑀺𑀥𑀁 𑀫𑀢’’𑀦𑁆𑀢𑀺 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁬-𑁭].

𑀏𑀢𑁂 𑀘𑀢𑁆𑀢𑀸𑀭𑁄 𑀉𑀧𑀸𑀬𑀸 𑀫𑀸𑀬𑀸𑀤𑀻𑀲𑁆𑀯𑁂𑀯𑀦𑁆𑀢𑁄𑀕𑀥𑀸, 𑀢𑀣𑀸 𑀳𑀺 𑀫𑀸𑀬𑁄𑀧𑁂𑀓𑁆𑀔𑀸 𑀘 𑀤𑀡𑁆𑀟𑀦𑁆𑀢𑁄𑀕𑀥𑀸. 𑀇𑀦𑁆𑀤𑀚𑀸𑀮𑀜𑁆𑀘 𑀪𑁂𑀤𑁂 𑀅𑀦𑁆𑀢𑁄𑀕𑀥𑀁. 𑀓𑁂𑀘𑀺 𑀧𑀦𑀸𑀳𑀼

‘‘𑀲𑀸𑀫𑀁 𑀤𑀸𑀦𑀜𑁆𑀘 𑀪𑁂𑀤𑁄 𑀘, 𑀤𑀡𑁆𑀟𑁄 𑀘𑁂𑀢𑀺 𑀘𑀢𑀼𑀓𑁆𑀓𑀓𑀁;

𑀫𑀸𑀬𑁄𑀧𑁂𑀓𑁆𑀔𑀺𑀦𑁆𑀤𑀚𑀸𑀮𑀜𑁆𑀘, 𑀲𑀢𑁆𑀢𑁄𑀧𑀸𑀬𑀸 𑀧𑀓𑀺𑀢𑁆𑀢𑀺𑀢𑀸’’𑀢𑀺 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁩].

𑁩𑁪𑁯. 𑀦𑀸𑀫𑀫𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀁 𑀪𑁂𑀤𑀸𑀤𑀻𑀦𑀫𑀺𑀤𑀸𑀦𑀺 𑀧𑀭𑀺𑀬𑀸𑀬𑀸𑀦𑁆𑀬𑀸𑀳. 𑀢𑀢𑁆𑀭 𑀤𑁆𑀯𑀬𑀁 𑀪𑁂𑀤𑁂. 𑀚𑀧 𑀫𑀸𑀦𑀲𑁂 𑀘 [𑀚𑀧𑁄 𑀘𑀺𑀦𑁆𑀢𑀦𑀯𑀸𑀘𑀸𑀲𑀼 (𑀥𑀸𑀢𑁆𑀯𑀢𑁆𑀣𑀲𑀗𑁆𑀕𑀳, 𑁧𑁩𑁫 𑀕𑀸𑀣𑀸)], 𑀪𑀽, 𑀡𑁄. 𑀪𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂, 𑀡𑁄.

𑀢𑀺𑀓𑀁 𑀤𑀡𑁆𑀟𑁂. 𑀤𑀡𑁆𑀟 𑀦𑀺𑀧𑀸𑀢𑀦𑁂, 𑀘𑀼𑀭𑀸𑀤𑀺. 𑀲𑀳𑁄 𑀯𑀼𑀘𑁆𑀘𑀢𑀺 𑀩𑀮𑀁, 𑀢𑀩𑁆𑀪𑀯𑀁 𑀲𑀸𑀳𑀲𑀁. 𑀤𑀫𑀦𑀁 𑀤𑀫𑁄, 𑀤𑀻𑀖𑀧𑀝𑀺𑀲𑁂𑀥𑁄.

𑁩𑁫𑁦. 𑀲𑀸𑀫𑀁 𑀲𑀼𑀤𑁆𑀤𑀯𑀕𑁆𑀕𑁂, 𑀤𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀓𑀣𑁂𑀲𑁆𑀲𑀢𑀺. 𑀲𑀸𑀫𑁆𑀬𑀸𑀤𑀬𑁄 𑀲𑀢𑁆𑀢𑀭𑁂𑀯𑀸𑀘𑀭𑀺𑀬𑀫𑀢𑁂. 𑀧𑀭𑀫𑁆𑀧𑀭𑁄𑀧𑀓𑀸𑀭𑀺𑀢𑁆𑀢𑀸 𑀭𑀚𑁆𑀚𑀲𑁆𑀲𑀗𑁆𑀕𑀸𑀦𑀺. 𑀧𑀓𑀝𑁆𑀞𑀫𑀼𑀧𑀓𑀼𑀩𑁆𑀩𑀦𑁆𑀢𑀺 𑀭𑀚𑁆𑀚𑀦𑁆𑀢𑀺 𑀧𑀓𑀢𑀺𑀬𑁄𑀢𑀺 𑀘𑁄𑀘𑁆𑀘𑀦𑁆𑀢𑁂. 𑀯𑀼𑀢𑁆𑀢𑀜𑁆𑀘 𑀓𑀸𑀫𑀦𑁆𑀤𑀓𑀻𑀬𑁂 𑁋

‘‘𑀲𑀸𑀫𑁆𑀬’𑀫𑀘𑁆𑀘𑀜𑁆𑀘 𑀭𑀝𑁆𑀞𑀜𑁆𑀘, 𑀤𑀼𑀕𑁆𑀕𑀁 𑀓𑁄𑀲𑁄 𑀩𑀮𑀁 𑀲𑀔𑀸;

𑀧𑀭𑀫𑁆𑀧𑀭𑁄𑀧𑀓𑀸𑀭𑀻𑀤𑀁, 𑀲𑀢𑁆𑀢𑀗𑁆𑀕𑀁 𑀭𑀚𑁆𑀚𑀫𑀼𑀘𑁆𑀘𑀢𑁂 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁪.𑁧].

𑀅𑀫𑀘𑁆𑀘𑀭𑀝𑁆𑀞𑀤𑀼𑀕𑁆𑀕𑀸𑀦𑀺, 𑀓𑁄𑀲𑁄 𑀤𑀡𑁆𑀟𑁄 𑀘 𑀧𑀜𑁆𑀘𑀫𑁄;

𑀏𑀢𑀸 𑀧𑀓𑀢𑀺𑀬𑁄 𑀯𑀼𑀢𑁆𑀢𑀸, 𑀯𑀺𑀚𑀺𑀕𑀻𑀲𑀲𑁆𑀲 𑀭𑀸𑀚𑀺𑀦𑁄.

𑀏𑀢𑀸 𑀧𑀜𑁆𑀘 𑀢𑀣𑀸 𑀫𑀺𑀢𑁆𑀢𑀁, 𑀲𑀢𑁆𑀢𑀫𑁄 𑀧𑀣𑀯𑀻𑀧𑀢𑀺;

𑀲𑀢𑁆𑀢𑀧𑁆𑀧𑀓𑀢𑀺𑀓𑀁 𑀭𑀚𑁆𑀚𑀁, 𑀇𑀘𑁆𑀘𑀸𑀳 𑀲𑀽𑀭𑀧𑀽𑀚𑀺𑀢𑁄’’𑀢𑀺.

𑀢𑀢𑁆𑀭 𑀧𑁄𑀭𑀲𑁂𑀡𑀻𑀦𑀁 𑀧𑀥𑀸𑀦𑀪𑀸𑀯𑁂𑀧𑀺 𑀲𑀢𑀺 𑀭𑀝𑁆𑀞𑀕𑁆𑀕𑀳𑀡𑁂𑀦, 𑀩𑀮𑀕𑁆𑀕𑀳𑀡𑁂𑀦 𑀯𑀸 𑀕𑀳𑀡𑀲𑀺𑀤𑁆𑀥𑀦𑁆𑀢𑀺 𑀦𑁂𑀳 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁, 𑀅𑀫𑀭𑀓𑁄𑀲𑁂 𑀧𑀦 𑀤𑁆𑀯𑀻𑀳𑀺 𑀕𑀳𑀡𑁂 𑀲𑀺𑀤𑁆𑀥𑁂𑀧𑀺 𑀧𑀥𑀸𑀦𑀢𑁆𑀢𑀸𑀔𑁆𑀬𑀸𑀧𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀺𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀭 𑁋

‘‘𑀲𑀸𑀫𑁆𑀬’𑀫𑀘𑁆𑀘𑁄 𑀲𑀔𑀸 𑀓𑁄𑀲𑁄, 𑀭𑀚𑁆𑀚𑀤𑀼𑀕𑁆𑀕𑀩𑀮𑀸𑀦𑀺 𑀘;

𑀭𑀚𑁆𑀚𑀗𑁆𑀕𑀸𑀦𑀺 𑀧𑀓𑀢𑀬𑁄, 𑀧𑁄𑀭𑀸𑀦𑀁 𑀲𑁂𑀡𑀺𑀬𑁄𑀧𑀺 𑀘𑁂’’𑀢𑀺 [𑀅𑀫𑀭 𑁧𑁮.𑁧𑁭].

𑀏𑀲𑀜𑁆𑀘 𑀲𑀸𑀫𑁆𑀬𑀫𑀘𑁆𑀘𑀭𑀝𑁆𑀞𑀤𑀼𑀕𑁆𑀕𑀓𑁄𑀲𑀩𑀮𑀲𑀔𑀻𑀦𑀁 𑀧𑀼𑀩𑁆𑀩𑀢𑀭𑀲𑁆𑀲 𑀕𑀭𑀼𑀢𑁆𑀢𑀁 𑀯𑀺𑀜𑁆𑀜𑁂𑀬𑁆𑀬𑀁, 𑀇𑀳 𑀢𑀼 𑀦𑀸𑀫𑀮𑀺𑀗𑁆𑀕𑀸𑀦𑀼𑀲𑀸𑀲𑀦𑁂 𑀅𑀪𑀺𑀥𑀸𑀦𑀲𑀢𑁆𑀣𑁂 𑀅𑀦𑀼𑀧𑀬𑁄𑀕𑀢𑁄 𑀬𑀣𑀸𑀓𑁆𑀓𑀫𑀁 𑀕𑀭𑀼𑀢𑁆𑀢𑀁 𑀦 𑀯𑀢𑁆𑀢𑀼𑀫𑀺𑀘𑁆𑀙𑀢𑀻𑀢𑀺 𑀩𑁆𑀬𑀢𑀺𑀓𑁆𑀓𑀫𑁂𑀦𑁄𑀧𑀜𑁆𑀜𑀸𑀲𑁄 𑀓𑀢𑁄.

𑀲𑀼𑀯𑀡𑁆𑀡𑀸𑀤𑀺𑀫𑀬𑀪𑀡𑁆𑀟𑀸𑀕𑀸𑀭𑀁 𑀓𑁄𑀲𑁄, 𑀧𑀩𑁆𑀩𑀢𑁄𑀤𑀓𑀭𑀼𑀓𑁆𑀔𑀸𑀤𑀻𑀳𑀺 𑀤𑀼𑀕𑁆𑀕𑀫𑀁 𑀧𑀼𑀭𑀁 𑀤𑀼𑀕𑁆𑀕𑀁, 𑀯𑀺𑀚𑀺𑀢𑀁 𑀚𑀦𑀧𑀤𑀯𑀢𑀻 𑀪𑀽𑀫𑀺, 𑀩𑀮𑀁 𑀘𑀓𑁆𑀓𑀁, 𑀢𑀜𑁆𑀘 𑀫𑁄𑀮𑀪𑀢𑀲𑁂𑀡𑀺𑀲𑀳𑀸𑀬𑀸𑀫𑀺𑀢𑁆𑀢𑀸𑀝𑀯𑀺𑀓𑀪𑁂𑀤𑁂𑀦 𑀙𑀩𑁆𑀩𑀺𑀥𑀁. 𑀢𑀢𑁆𑀭 𑀓𑀫𑀸𑀕𑀢𑀁 𑀫𑁄𑀮𑀁, 𑀯𑁂𑀢𑀦𑀲𑀫𑁆𑀩𑀦𑁆𑀥𑀁 𑀪𑀢𑀁, 𑀧𑁄𑀭𑀁 𑀩𑀮𑀁 𑀲𑁂𑀡𑀻, 𑀲𑀳𑀸𑀬𑀪𑀽𑀢𑀁 𑀲𑀳𑀸𑀬𑁄, 𑀅𑀫𑀺𑀢𑁆𑀢𑀪𑀽𑀢𑀁 𑀅𑀫𑀺𑀢𑁆𑀢𑀁, 𑀅𑀝𑀯𑀺𑀓𑀁 𑀅𑀝𑀯𑀺𑀲𑀳𑀸𑀬𑁄 𑀫𑀺𑀢𑁆𑀢𑀁. 𑀢𑀤𑀧𑀺 𑀲𑀳𑀚𑁆𑀚𑀁, 𑀧𑀸𑀓𑀢𑀁, 𑀓𑀺𑀢𑁆𑀢𑀺𑀫𑀜𑁆𑀘𑁂𑀢𑀺 𑀢𑀺𑀯𑀺𑀥𑀁. ‘‘𑀮𑀺𑀗𑁆𑀕𑁂 𑀲𑀪𑀸𑀯𑁂 𑀧𑀓𑀢𑀺, 𑀧𑁄𑀭𑀸𑀫𑀘𑁆𑀘𑀸𑀤𑀺𑀬𑁄𑀦𑀺𑀲𑀼. 𑀢𑀺𑀮𑀺𑀗𑁆𑀕𑀁 𑀕𑀼𑀡𑀲𑀸𑀫𑁆𑀬𑁂𑀧𑀻’’𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁪.𑁨𑁯] 𑀭𑀼𑀤𑁆𑀤𑁄.

𑁩𑁫𑁧. 𑀧𑀪𑀸𑀯𑀸𑀤𑀻𑀦𑀁 𑀯𑀲𑀸 𑀲𑀢𑁆𑀢𑀺𑀬𑁄 𑀦𑀸𑀫 𑀢𑀺𑀲𑁆𑀲𑁄 𑀪𑀯𑀦𑁆𑀢𑀺. 𑀲𑀓 𑀲𑀢𑁆𑀢𑀺𑀬𑀁,𑀢𑀺. 𑀢𑀢𑁆𑀭 𑀬𑀁 𑀲𑀦𑁆𑀥𑀸𑀤𑀻𑀦𑀁, 𑀪𑁂𑀤𑀸𑀤𑀻𑀦𑀜𑁆𑀘 𑀬𑀸𑀣𑀸𑀯𑀢𑁄 𑀅𑀯𑀝𑁆𑀞𑀸𑀧𑀦𑀁, 𑀢𑀁 𑀜𑀸𑀡𑀩𑀮𑀁 𑀫𑀦𑁆𑀢𑀲𑀢𑁆𑀢𑀺, 𑀲𑀓𑀲𑀫𑁆𑀧𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀁 𑀓𑁄𑀲𑀤𑀡𑁆𑀟𑀸 𑀧𑀪𑀽𑀲𑀢𑁆𑀢𑀺, 𑀢𑁂𑀲𑀁𑀬𑁂𑀯 𑀧𑀪𑀼𑀢𑁆𑀢𑀲𑀫𑁆𑀧𑀸𑀤𑀦𑁂 𑀲𑀸𑀫𑀢𑁆𑀣𑀺𑀬𑀢𑁄. 𑀯𑀼𑀢𑁆𑀢𑀜𑁆𑀘 ‘‘𑀓𑁄𑀲𑀤𑀡𑁆𑀟𑀩𑀮𑀁 𑀧𑀪𑀽𑀲𑀢𑁆𑀢𑀺’’𑀭𑀺𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺]. 𑀩𑀮𑀯𑀢𑀻 𑀉𑀲𑁆𑀲𑀸𑀳𑀘𑁂𑀝𑁆𑀞𑀸 𑀉𑀲𑁆𑀲𑀸𑀳𑀲𑀢𑁆𑀢𑀺. 𑀯𑀼𑀢𑁆𑀢𑀜𑁆𑀘 ‘‘𑀯𑀺𑀓𑁆𑀓𑀫𑀩𑀮𑀫𑀼𑀲𑁆𑀲𑀸𑀳𑀲𑀢𑁆𑀢𑀺’’𑀭𑀺𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁮.𑁧𑁯 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺].

𑀧𑀪𑀸𑀯𑀸𑀤𑀻𑀦𑀁 𑀲𑀓𑀸𑀭𑀡𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀪𑀸𑀯𑁄’’𑀘𑁆𑀘𑀸𑀤𑀺. 𑀤𑀫𑀦𑀁 𑀤𑀡𑁆𑀟𑁄, 𑀢𑀤𑀢𑁆𑀣𑀺𑀬𑀸 𑀩𑀮𑀫𑁆𑀧𑀺 𑀤𑀡𑁆𑀟𑁄. 𑀢𑀢𑁄 𑀚𑀸𑀢𑀁 𑀬𑀁 𑀢𑁂𑀚𑁄, 𑀢𑀁 𑀧𑀪𑀸𑀯𑁄. 𑀢𑀢𑁄 𑀚𑀸𑀢𑁄 𑀬𑁄 𑀢𑁂𑀚𑁄, 𑀲𑁄 ‘‘𑀧𑀪𑀸𑀯𑁄’’𑀢𑀺𑀧𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀬𑁄𑀚𑀦𑀻𑀬𑀁. 𑀧𑀪𑀯𑀦𑁆𑀢𑀺 𑀢𑁂𑀚𑀲𑁆𑀲𑀺𑀦𑁄 𑀅𑀦𑁂𑀦𑁂𑀢𑀺 𑀧𑀪𑀸𑀯𑁄, 𑀡𑁄. 𑀧𑀓𑀝𑁆𑀞𑁄 𑀯𑀸 𑀪𑀸𑀯𑁄 𑀧𑀪𑀸𑀯𑁄. 𑀓𑁄𑀲𑁄 𑀥𑀦𑀁, 𑀢𑀢𑁄 𑀚𑀸𑀢𑁄 𑀬𑁄 𑀢𑁂𑀚𑁄, 𑀲𑁄 𑀧𑀪𑀸𑀯𑁄 𑀦𑀸𑀫. 𑀢𑀣𑀸 𑀓𑁄𑀲𑀚𑁄 𑀢𑁂𑀚𑁄 𑀥𑀦𑁂𑀦 𑀲𑀢𑁆𑀢𑀽𑀦𑀫𑀼𑀧𑀓𑀭𑀡𑀁. 𑀧𑀢𑀧𑀦𑁆𑀢𑀺 𑀢𑁂𑀚𑀲𑁆𑀲𑀺𑀦𑁄 𑀪𑀯𑀦𑁆𑀢𑁆𑀬𑀦𑁂𑀦𑁂𑀢𑀺 𑀧𑀢𑀸𑀧𑁄, 𑀡𑁄.

𑁩𑁫𑁨. 𑀤𑁆𑀯𑀬𑀁 𑀫𑀦𑁆𑀢𑁂. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀲𑀸 𑀏𑀢𑀲𑁆𑀫𑀺𑀁 𑀯𑀺𑀚𑁆𑀚𑀢𑀺 𑀢𑀸𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁆𑀢𑀸𑀢𑀺 𑀫𑀦𑁆𑀢𑁄, 𑀅𑀣 𑀯𑀸 𑀫𑀦𑁆𑀢 𑀕𑀼𑀢𑁆𑀢𑀪𑀸𑀲𑀦𑁂, 𑀪𑀸𑀯𑁂 𑀡𑁄. 𑀇𑀢𑀭𑀢𑁆𑀭 𑀪𑀸𑀯𑁂 𑀬𑀼.

𑀲𑁄 𑀫𑀦𑁆𑀢𑁄 𑀤𑁆𑀯𑀺𑀕𑁄𑀘𑀭𑁄 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀯𑀺𑀲𑀬𑀪𑀽𑀢𑁄 𑀘𑀢𑀼𑀓𑁆𑀓𑀡𑁆𑀡𑁄 𑀦𑀸𑀫. 𑀘𑀢𑁆𑀢𑀸𑀭𑁄 𑀓𑀡𑁆𑀡𑀸 𑀏𑀢𑁆𑀣 𑀘𑀢𑀼𑀓𑁆𑀓𑀡𑁆𑀡𑁄. 𑀲𑁄 𑀫𑀦𑁆𑀢𑁄 𑀢𑀺𑀕𑁄𑀘𑀭𑁄 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀯𑀺𑀲𑀬𑀪𑀽𑀢𑁄 𑀙𑀓𑁆𑀓𑀡𑁆𑀡𑁄 𑀦𑀸𑀫. 𑀫𑀦𑁆𑀢𑁄 𑀦𑀸𑀫 𑀘𑀢𑀼𑀓𑁆𑀓𑀡𑁆𑀡𑁄 𑀯𑀸 𑀙𑀓𑁆𑀓𑀡𑁆𑀡𑁄 𑀯𑀸 𑀓𑀢𑁆𑀢𑀩𑁆𑀩𑁄, 𑀦 𑀢𑀢𑁄 𑀧𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁂𑀯𑁂𑀢𑁆𑀣 𑀕𑀳𑀡𑀁. 𑀅𑀫𑀭𑀓𑁄𑀲𑁂 𑀧𑀦 𑀙𑀓𑁆𑀓𑀡𑁆𑀡𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀅𑀙𑀓𑁆𑀓𑀡𑁆𑀡𑁄, 𑀬𑁄 𑀢𑀢𑀺𑀬𑀸𑀤𑁆𑀬𑀕𑁄𑀘𑀭𑁄’’𑀢𑀺 [𑀅𑀫𑀭 𑁧𑁮.𑁨𑁨].

𑀲𑀩𑁆𑀩𑀧𑀸𑀭𑀺𑀲𑀤𑀢𑁆𑀢𑀸 [𑀲𑀩𑁆𑀩𑀧𑀸𑀞𑀺𑀧𑀤𑀢𑁆𑀢𑀸 (𑀓.)] 𑀩𑁆𑀬𑀸𑀓𑀭𑀡𑀲𑁆𑀲 𑀲𑁄𑀢𑀽𑀦𑀁 𑀲𑀫𑀬𑀦𑁆𑀢𑀭𑁂𑀲𑁆𑀯𑀧𑀺 𑀧𑀝𑀼𑀪𑀸𑀯𑀚𑀦𑀦𑀢𑁆𑀣𑀁 𑀇𑀥𑀸𑀦𑀸𑀕𑀢𑀸𑀧𑀺 𑀙𑀕𑁆𑀕𑀼𑀡𑀸𑀤𑀬𑁄 𑀆𑀦𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑀩𑁆𑀩𑀧𑀸𑀭𑀺𑀲𑀤𑀁 [𑀲𑀩𑁆𑀩𑀧𑀸𑀝𑀺𑀧𑀤𑀁 (𑀓.)] 𑀳𑀺𑀤𑀁, 𑀲𑀩𑁆𑀩𑀲𑀢𑁆𑀣’𑀫𑀢𑁄 𑀫𑀢𑀁;

𑀦𑀺𑀲𑁆𑀲𑀻𑀬𑀢𑁂 𑀓𑁆𑀯𑀘𑀺 𑀓𑀺𑀜𑁆𑀘𑀺, 𑀲𑀩𑁆𑀩𑁂𑀲’𑀫𑀢𑁆𑀭 𑀯𑀸𑀤𑀺𑀦’’𑀦𑁆𑀢𑀺.

𑀬𑀣𑀸 𑀙𑀕𑁆𑀕𑀼𑀡𑀸 𑀲𑀦𑁆𑀥𑀺 𑀯𑀺𑀕𑁆𑀕𑀳𑀬𑀸𑀦𑀸𑀲𑀦𑀤𑁆𑀯𑁂𑀥𑀸𑀲𑀬𑀸 [𑀅𑀫𑀭 𑁧𑁮.𑁧𑁮-𑁯]. 𑀢𑀢𑁆𑀭 𑀲𑀦𑁆𑀥𑀺 𑀉𑀧𑀳𑀸𑀭𑀮𑀓𑁆𑀔𑀡𑁄 𑀢𑀺𑀯𑀺𑀥𑁄 𑀓𑁄𑀲𑀤𑀡𑁆𑀟𑀪𑀽𑀫𑀺𑀧𑁆𑀧𑀤𑀸𑀦𑀳𑁂𑀢𑀼𑀓𑁄. 𑀅𑀧𑀳𑀸𑀭𑀮𑀓𑁆𑀔𑀡𑁄 𑀯𑀺𑀕𑁆𑀕𑀳𑁄, 𑀲𑁄𑀧𑀺 𑀢𑀺𑀯𑀺𑀥𑁄 𑀧𑀓𑀸𑀲𑀬𑀼𑀤𑁆𑀥𑀁 𑀓𑀽𑀝𑀬𑀼𑀤𑁆𑀥𑀁 𑀢𑀼𑀡𑁆𑀳𑀺𑀬𑀼𑀤𑁆𑀥𑀦𑁆𑀢𑀺.

𑀧𑀭𑀩𑁆𑀬𑀲𑀦𑀢𑀸𑀲𑀧𑀢𑁆𑀢𑀺𑀤𑁂𑀲𑀓𑀸𑀮𑀸𑀢𑁆𑀬𑀼𑀤𑀬𑀸𑀯𑀸𑀧𑀬𑀸𑀦𑀫𑀢𑁆𑀢𑁂𑀦 𑀲𑀸𑀤𑁆𑀥𑁂 𑀧𑀭𑀲𑁆𑀫𑀺𑀁 𑀓𑀢𑀸𑀘𑀭𑀲𑁆𑀲 𑀕𑀼𑀡𑀸𑀦𑀼𑀭𑀢𑁆𑀢𑀧𑀓𑀢𑀺𑀲𑁆𑀲 𑀯𑀺𑀚𑀺𑀕𑀻𑀲𑀲𑁆𑀲 𑀬𑀸𑀢𑁆𑀭𑀸 𑀬𑀸𑀦𑀁 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭𑁂 𑁧𑁧 𑀲𑀕𑁆𑀕𑁂 𑀧𑀲𑁆𑀲𑀺𑀢𑀩𑁆𑀩𑀁], 𑀢𑀜𑁆𑀘 𑀯𑀺𑀕𑁆𑀕𑀬𑁆𑀳𑀬𑀸𑀦𑀁 𑀲𑀦𑁆𑀥𑀸𑀬𑀬𑀸𑀦𑀁 𑀲𑀫𑁆𑀪𑀽𑀬𑀬𑀸𑀦𑀁 𑀧𑀲𑀗𑁆𑀕𑀬𑀸𑀦𑀁 𑀉𑀧𑁂𑀓𑁆𑀔𑀺𑀬𑀬𑀸𑀦𑀫𑀺𑀢𑀺 𑀧𑀜𑁆𑀘𑀯𑀺𑀥𑀁. 𑀧𑀢𑀺𑀕𑁆𑀕𑀸𑀳𑀻𑀦𑀁 𑀦𑀺𑀕𑁆𑀕𑀬𑁆𑀳, 𑀲𑀦𑁆𑀥𑀸𑀬, 𑀉𑀧𑁂𑀓𑁆𑀔𑀺𑀬 𑀯𑀸 𑀬𑀁 𑀬𑀸𑀦𑀁, 𑀢𑀁 𑀯𑀺𑀕𑁆𑀕𑀬𑁆𑀳𑀬𑀸𑀦𑀸𑀤𑀺. 𑀬𑀤𑀸 𑀦 𑀲𑀓𑁆𑀓𑁄𑀢𑀺, 𑀢𑀤𑀸 𑀲𑀸𑀫𑀦𑁆𑀢𑁂𑀳𑀺 𑀲𑀳𑁂𑀓𑀻𑀪𑀽𑀬 𑀬𑀸𑀦𑀁 𑀲𑀫𑁆𑀪𑀽𑀬𑀬𑀸𑀦𑀁. 𑀅𑀜𑁆𑀜𑀢𑁆𑀭 𑀕𑀦𑁆𑀢𑀩𑁆𑀩𑁂 𑀅𑀜𑁆𑀜𑀲𑁆𑀫𑀺𑀁 𑀧𑀲𑀗𑁆𑀕𑀢𑁄 𑀕𑀫𑀦𑀁 𑀧𑀲𑀗𑁆𑀕𑀬𑀸𑀦𑀁.

‘‘𑀦 𑀫𑀁 𑀧𑀭𑁄 𑀳𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀦𑀸𑀳𑀫𑁆𑀧𑀺 𑀧𑀭’’𑀫𑀺𑀢𑀺 𑀓𑀸𑀮𑀸𑀤𑀺𑀓𑁂 𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀚𑀺𑀕𑀻𑀲𑀲𑁆𑀲 𑀤𑀼𑀕𑁆𑀕𑀸𑀤𑀻𑀦𑀺 𑀯𑀟𑁆𑀠𑀬𑀢𑁄 𑀞𑀺𑀢𑀺 𑀆𑀲𑀦𑀁, 𑀢𑀤𑀧𑀺 𑀯𑀺𑀕𑁆𑀕𑀬𑁆𑀳𑀸𑀲𑀦𑀲𑀦𑁆𑀥𑀸𑀬𑀸𑀲𑀦𑀸𑀤𑀺𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀁. 𑀩𑀮𑀻𑀦𑀁 𑀲𑀢𑁆𑀢𑀽𑀦𑀁 𑀫𑀚𑁆𑀛𑁂 𑀓𑀸𑀓𑀓𑁆𑀔𑀺𑀯𑀸’𑀮𑀓𑁆𑀔𑀺𑀢𑀲𑁆𑀲𑁄’𑀪𑀬𑀢𑁆𑀭 𑀯𑀘𑀦𑁂𑀦𑀢𑁆𑀢𑀦𑁄 𑀲𑀫𑀧𑁆𑀧𑀡𑀁 𑀤𑁆𑀯𑁂𑀥𑀁. 𑀅𑀜𑁆𑀜𑀢𑀭𑁂𑀦 𑀯𑀸 𑀩𑀮𑀯𑀢𑀭𑁂𑀦 𑀲𑀦𑁆𑀥𑀺, 𑀅𑀜𑁆𑀜𑀢𑀭𑁂𑀦 𑀅𑀩𑀮𑁂𑀦 𑀯𑀺𑀕𑁆𑀕𑀳𑁄 𑀤𑁆𑀯𑁂𑀥𑀁. 𑀲𑀢𑁆𑀢𑀼𑀦𑁄 𑀯𑀸 𑀧𑀓𑀢𑀻𑀳𑀺 𑀲𑀦𑁆𑀥𑀸𑀬 𑀬𑁄 𑀢𑁂𑀦 𑀯𑀺𑀕𑁆𑀕𑀳𑁄, 𑀲𑀢𑁆𑀢𑀼𑀦𑁂𑀯 𑀯𑀸 𑀬𑁄 𑀲𑀦𑁆𑀥𑀺𑀯𑀺𑀕𑁆𑀕𑀳𑀲𑀫𑀼𑀤𑀸𑀬𑀳𑁂𑀢𑀼𑀓𑁄 [𑀲𑀢𑁆𑀢𑀼𑀦𑁄𑀯 𑀯𑀸 𑀲𑀦𑁆𑀥𑀺𑀯𑀺𑀕𑁆𑀕𑀳𑀲𑀫𑀼𑀤𑀸𑀬𑀳𑁂𑀢𑀼𑀦𑁄 (𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁮.𑁧𑁮)] 𑀤𑀼𑀕𑁆𑀕𑀸𑀲𑀬𑀲𑁆𑀲 𑀩𑁆𑀬𑀸𑀧𑀸𑀭𑁄, 𑀲𑁄𑀧𑀺 𑀤𑁆𑀯𑁂𑀥𑀁. 𑀧𑀭𑀲𑀦𑁆𑀢𑀸𑀦𑀫𑀧𑁆𑀬𑁄𑀪𑀬𑀯𑁂𑀤𑀦𑀸𑀦𑀁 𑀉𑀪𑀬𑀢𑁄 𑀯𑀼𑀢𑁆𑀢𑀺 𑀤𑁆𑀯𑁂𑀥𑀫𑀼𑀘𑁆𑀘𑀢𑁂.

‘‘𑀉𑀘𑁆𑀙𑀺𑀚𑁆𑀚𑀫𑀸𑀦𑁄 𑀭𑀺𑀧𑀼𑀦𑀸 𑀦𑀺𑀭𑀼𑀧𑀸𑀬 𑀧𑀢𑀺𑀓𑁆𑀭𑀺𑀬𑁄. 𑀲𑀢𑁆𑀢𑀺𑀳𑀻𑀦𑁄 𑀲𑀫𑀸𑀲𑀺𑀬𑀢𑁂’’𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁮.𑁧𑁮] 𑀳𑀻𑀦𑁂𑀦𑀸𑀜𑁆𑀜𑀲𑁆𑀲 𑀩𑀮𑀯𑀢𑀭𑀲𑁆𑀲 𑀥𑀫𑁆𑀫𑀯𑀺𑀚𑀬𑀺𑀦𑁄 𑀲𑀫𑀸𑀲𑀬𑀦𑀁 [𑀩𑀮𑀯𑀢𑀸 𑀅𑀭𑀺𑀦𑀸 𑀉𑀘𑁆𑀙𑀺𑀚𑁆𑀚𑀫𑀸𑀦𑀲𑁆𑀲 𑀳𑀻𑀦𑀲𑀢𑁆𑀢𑀺𑀦𑁄 𑀬𑀁 𑀩𑀮𑀯𑀥𑀫𑁆𑀫𑀯𑀺𑀚𑀬𑀺𑀲𑀫𑀸𑀲𑀬𑀦𑀁 (𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁮.𑁧𑁮)], 𑀢𑀲𑁆𑀲𑁂𑀯 𑀯𑀸 𑀩𑀮𑀺𑀦𑁄 𑀲𑀢𑁆𑀢𑀼𑀦𑁄 𑀓𑁄𑀲𑀸𑀤𑀺𑀧𑁆𑀧𑀤𑀸𑀦𑁂𑀦 𑀆𑀲𑀬𑀦𑀁 𑀆𑀲𑀬𑁄 𑀯𑀼𑀘𑁆𑀘𑀢𑁂. 𑀏𑀢𑁂 𑀙𑀕𑁆𑀕𑀼𑀡𑀸.

𑀬𑀲𑁆𑀫𑀺𑀜𑁆𑀘 𑀕𑀼𑀡𑁂 𑀞𑀺𑀢𑁄 𑀯𑀺𑀚𑀺𑀕𑀻𑀲𑁄 𑀲𑀓𑁆𑀓𑁄𑀢𑁆𑀬𑀢𑁆𑀢𑀦𑁄 𑀅𑀝𑁆𑀞𑀯𑀕𑁆𑀕𑀺𑀬𑀓𑀫𑁆𑀫𑀸𑀦𑀺 𑀧𑀯𑀢𑁆𑀢𑀬𑀺𑀢𑀼𑀁, 𑀧𑀭𑀲𑁆𑀲 𑀘𑁂𑀢𑀸𑀦𑁆𑀬𑀼𑀧𑀳𑀦𑁆𑀢𑀼𑀁, 𑀕𑀼𑀡𑀫𑀸𑀥𑀺𑀝𑁆𑀞𑁂𑀬𑁆𑀬, 𑀲𑀸 𑀯𑀼𑀟𑁆𑀠𑀺.

𑀓𑀲𑀺 𑀯𑀡𑀺𑀚𑁆𑀚𑀁 𑀧𑀣𑁄 𑀤𑀼𑀕𑁆𑀕𑀁, 𑀲𑁂𑀢𑀼 𑀓𑀼𑀜𑁆𑀚𑀭𑀩𑀦𑁆𑀥𑀦𑀁;

𑀔𑀦𑁆𑀬𑀸𑀓𑀭𑀥𑀦𑀸𑀤𑀸𑀦𑀁, 𑀲𑀼𑀜𑁆𑀜𑀸𑀦𑀜𑁆𑀘 𑀦𑀺𑀯𑁂𑀲𑀦𑀁 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁫.𑁭𑁮].

𑀇𑀢𑁆𑀬𑁂𑀲𑁄 𑀅𑀝𑁆𑀞𑀯𑀕𑁆𑀕𑁄.

𑀬𑀲𑁆𑀫𑀺𑀁 𑀯𑀸 𑀕𑀼𑀡𑁂 𑀞𑀺𑀢𑁄 𑀲𑀓𑀫𑁆𑀫𑀸𑀦𑀁 𑀯𑀼𑀟𑁆𑀠𑀺, 𑀔𑀬𑀁 𑀯𑀸 𑀦𑀸𑀪𑀺𑀧𑀲𑁆𑀲𑀢𑀺, 𑀢𑀁 𑀞𑀸𑀦𑀁, 𑀬𑀲𑁆𑀫𑀺𑀁 𑀯𑀸 𑀕𑀼𑀡𑁂 𑀞𑀺𑀢𑁄 𑀲𑀓𑀫𑁆𑀫𑀸𑀦𑀫𑀼𑀧𑀖𑀸𑀢𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀦 𑀢𑀺𑀝𑁆𑀞𑁂𑀬𑁆𑀬, 𑀲𑁄 𑀔𑀬𑁄, 𑀅𑀬𑀁 𑀦𑀻𑀢𑀺𑀯𑁂𑀤𑀻𑀦𑀁 𑀢𑀺𑀯𑀕𑁆𑀕𑁄 [𑀅𑀫𑀭 𑁧𑁮.𑁧𑁯]. 𑀇𑀢𑀭𑁂𑀲𑀁 𑀥𑀫𑁆𑀫𑀢𑁆𑀣𑀓𑀸𑀫𑀸 𑀢𑀺𑀯𑀕𑁆𑀕𑁄.

𑀤𑁆𑀯𑀬𑀁 𑀕𑀼𑀬𑁆𑀳𑁂. 𑀭𑀳𑀲𑀺 𑀪𑀯𑀁 𑀭𑀳𑀲𑁆𑀲𑀁, 𑀲𑁄, 𑀭𑀳𑁂 𑀯𑀸 𑀪𑀯𑀁 𑀭𑀳𑀲𑁆𑀲𑀁. 𑀕𑀼𑀳 𑀲𑀁𑀯𑀭𑀡𑁂, 𑀓𑀫𑁆𑀫𑀦𑀺 𑀬𑁄. 𑀇𑀤𑀁 𑀤𑁆𑀯𑀬𑀁 𑀢𑀻𑀲𑀼. 𑀭𑀳𑀲𑁆𑀲𑁄 𑀫𑀦𑁆𑀢𑁄, 𑀭𑀳𑀲𑁆𑀲𑀸 𑀯𑀸𑀘𑀸, 𑀭𑀳𑀲𑁆𑀲𑀁 𑀫𑀦𑁆𑀢𑀦𑀁.

𑁩𑁫𑁩. 𑀧𑀜𑁆𑀘𑀓𑀁 𑀯𑀺𑀚𑀦𑁂. 𑀯𑀺𑀚𑀺 𑀧𑀼𑀣𑀪𑀸𑀯𑁂, 𑀪𑀽, 𑀢𑁄 𑀘. 𑀯𑀺𑀘𑀺 𑀯𑀺𑀯𑁂𑀘𑀦𑁂, 𑀧𑀼𑀣𑀼𑀪𑀸𑀯𑁂 𑀘 𑀯𑀸. ‘‘𑀯𑀺𑀯𑀺𑀢𑁆𑀢𑀁 𑀢𑀻𑀲𑀼 𑀯𑀺𑀚𑀦𑁂, 𑀅𑀲𑀁𑀧𑀓𑁆𑀓𑀧𑀯𑀺𑀢𑁆𑀢𑁂𑀲𑀽’’𑀢𑀺 𑀭𑀼𑀤𑁆𑀤𑁄. 𑀯𑀺𑀕𑀢𑁄 𑀚𑀦𑁄 𑀅𑀲𑁆𑀫𑀸𑀢𑀺 𑀯𑀺𑀚𑀦𑁄. 𑀙𑀸𑀤𑁂𑀢𑀻𑀢𑀺 𑀙𑀦𑁆𑀦𑁄. 𑀙𑀤 𑀲𑀁𑀯𑀭𑀡𑁂. 𑀯𑀺𑀢𑁆𑀢𑀫𑀭𑀳𑀢𑀻𑀢𑀺 𑀭𑀳𑁄, 𑀭𑀳 𑀘𑀸𑀕𑁂, 𑀭𑀫𑀦𑁆𑀢𑁂 𑀅𑀲𑁆𑀫𑀺𑀦𑁆𑀢𑀺 𑀯𑀸 𑀭𑀳𑁄, 𑀯𑀡𑁆𑀡𑀯𑀺𑀓𑀸𑀭𑁄. ‘‘𑀭𑀳𑁄 𑀦𑀺𑀥𑀼𑀯𑀦𑁂 𑀘𑀸𑀧𑀺, 𑀭𑀳𑁄 𑀕𑀼𑀬𑁆𑀳𑁂 𑀦𑀧𑀼𑀁𑀲𑀓’’𑀦𑁆𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁮.𑁨𑁨] 𑀭𑀪𑀲𑁄. 𑀤𑀼𑀢𑀺𑀬𑁄 𑀭𑀳𑁄𑀲𑀤𑁆𑀤𑁄 𑀅𑀩𑁆𑀬𑀬𑀁. 𑀦𑀺𑀲𑁆𑀲𑀮𑀸𑀓𑀸, 𑀉𑀧𑀸𑀲𑀼𑀧𑁆𑀬𑀢𑁆𑀭. 𑀦𑀺𑀲𑁆𑀲𑀮𑀸𑀓𑀸 𑀣𑀻, 𑀉𑀧𑀸𑀲𑀼 𑀅𑀩𑁆𑀬𑀬𑀁.

𑀤𑁆𑀯𑀬𑀁 𑀯𑀺𑀲𑁆𑀲𑀸𑀲𑁂. 𑀲𑀲 𑀧𑀸𑀮𑀦𑁂, 𑀡𑁄. 𑀲𑀫𑁆𑀪 𑀯𑀺𑀲𑁆𑀲𑀸𑀲𑁂. ‘‘𑀯𑀺𑀲𑁆𑀲𑀫𑁆𑀪𑁄 𑀓𑁂𑀮𑀺𑀓𑀮𑀳𑁂, 𑀯𑀺𑀲𑁆𑀲𑀸𑀲𑁂’𑀧𑀡𑀬𑁂𑀧𑀺 𑀘𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺] 𑀭𑀼𑀤𑁆𑀤𑁄.

𑀤𑁆𑀯𑀬𑀁 𑀦𑁆𑀬𑀸𑀬𑁂. 𑀬𑀼𑀚 𑀲𑀫𑀸𑀥𑀺𑀫𑁆𑀳𑀺, 𑀲𑀫𑀸𑀥𑀺 𑀅𑀪𑁆𑀬𑀼𑀧𑀕𑀫𑁄, 𑀢𑁄. 𑀉𑀧𑀕𑀦𑁆𑀢𑀩𑁆𑀩𑀢𑁆𑀢𑀸 𑀉𑀧𑀸𑀬𑀺𑀓𑀁. 𑀉𑀧𑀸𑀬𑀸 𑀲𑀓𑀢𑁆𑀣𑁂 𑀇𑀓𑁄, 𑀑𑀧𑀸𑀬𑀺𑀓𑀁, 𑀑𑀧𑀬𑀺𑀓𑀫𑁆𑀧𑀺 [𑀧𑀸𑀡𑀺𑀦𑀺 𑁫.𑁪.𑁩𑁪 (𑀕𑀡)], 𑀮𑀩𑁆𑀪𑀁, 𑀪𑀚𑀫𑀸𑀦𑀁, 𑀅𑀪𑀺𑀦𑀻𑀢𑀁, 𑀦𑁆𑀬𑀸𑀬𑀁, 𑀜𑀸𑀬𑀁𑀧𑁆𑀬𑀢𑁆𑀭.

𑁩𑁫𑁪. 𑀲𑀺𑀮𑁄𑀓𑀁 𑀑𑀯𑀸𑀤𑁂. 𑀅𑀯𑀧𑀼𑀩𑁆𑀩𑁄 𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀪𑀸𑀯𑁂 𑀡𑁄. 𑀲𑀸𑀲 𑀅𑀦𑀼𑀲𑀺𑀝𑁆𑀞𑀺𑀫𑁆𑀳𑀺,𑀢𑀺, 𑀆𑀲𑁆𑀲𑀺, 𑀅𑀦𑀼𑀲𑀺𑀝𑁆𑀞𑀺. 𑀅𑀦𑀼𑀲𑀸𑀲𑀢𑁂 𑀅𑀦𑀼𑀲𑀸𑀲𑀦𑀁. 𑀧𑀼𑀫𑀯𑀚𑁆𑀚𑁂 𑀇𑀢𑁆𑀣𑀺𑀬𑀁, 𑀦𑀧𑀼𑀁𑀲𑀓𑁂 𑀘. 𑀏𑀢𑁆𑀣 𑀘 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀪𑀺𑀦𑁆𑀦𑀮𑀺𑀗𑁆𑀕𑁂𑀳𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀓𑀣𑀦𑀁 𑀦 𑀓𑁂𑀯𑀮𑀁 𑀯𑀸𑀘𑁆𑀘𑀮𑀺𑀗𑁆𑀕𑁄𑀬𑁂𑀯 𑀲𑀤𑁆𑀤𑁄, 𑀅𑀣 𑀔𑁄 𑀯𑀸𑀘𑀓𑀮𑀺𑀗𑁆𑀕𑁄𑀧𑁆𑀬𑀢𑁆𑀣𑀻𑀢𑀺 𑀤𑀻𑀧𑀦𑀢𑁆𑀣𑀁.

𑀤𑁆𑀯𑀬𑀁 𑀆𑀡𑀸𑀬𑀁. 𑀆𑀡 𑀧𑁂𑀲𑀦𑁂, 𑀪𑀸𑀯𑁂 𑀅, 𑀆𑀡𑀸, 𑀇𑀢𑁆𑀣𑀻. 𑀅𑀯𑀯𑀸𑀤𑁄, 𑀦𑀺𑀤𑁆𑀤𑁂𑀲𑁄, 𑀲𑀺𑀝𑁆𑀞𑀺𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀩𑀦𑁆𑀥𑀦𑁂. 𑀤𑀸 𑀤𑀸𑀦𑁂, 𑀪𑀸𑀯𑁂 𑀬𑀼, 𑀤𑀸 𑀅𑀯𑀔𑀡𑁆𑀟𑀦𑁂 𑀯𑀸, 𑀯𑀺𑀬𑁄𑀕𑀤𑀸𑀦𑀢𑁄 𑀉𑀤𑁆𑀤𑀸𑀦𑀁.

𑁩𑁫𑁫-𑁩𑁫𑁬. 𑀤𑁆𑀯𑀬𑀁 𑀅𑀧𑀭𑀸𑀥𑁂. 𑀅𑀧𑀕𑀘𑁆𑀙𑀦𑁆𑀢𑁆𑀬𑀦𑁂𑀦𑀸𑀢𑀺 𑀆𑀕𑀼, 𑀡𑀼, 𑀧𑀮𑁄𑀧𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸, 𑀦𑀧𑀼𑀁𑀲𑀓𑁂 𑀆𑀕𑀼. 𑀅𑀧𑀕𑀢𑁄 𑀭𑀸𑀥𑁄 𑀬𑁂𑀦 𑀅𑀧𑀭𑀸𑀥𑁄, 𑀭𑀸𑀥 𑀲𑀁𑀲𑀺𑀤𑁆𑀥𑀺𑀫𑁆𑀳𑀺. 𑀤𑁆𑀯𑀬𑀁 𑀭𑀸𑀚𑀕𑀬𑁆𑀳𑁂. 𑀓𑀺𑀭 𑀯𑀺𑀓𑀺𑀭𑀡𑁂, 𑀓𑀢𑁆𑀢𑀭𑀺 𑀅, 𑀅𑀢𑁆𑀢𑀁. 𑀩𑀮 𑀧𑀸𑀡𑀦𑁂, 𑀇. 𑀓𑀭𑀲𑀸𑀳𑀘𑀭𑀺𑀬𑀢𑁄 𑀩𑀮𑀺 𑀧𑀼𑀮𑁆𑀮𑀺𑀗𑁆𑀕𑁂. 𑀪𑀸𑀕𑀥𑁂𑀬𑁆𑀬𑁄𑀧𑁆𑀬𑀢𑁆𑀭. 𑀪𑀸𑀕𑀸𑀲𑀓𑀢𑁆𑀣𑁂 𑀥𑁂𑀬𑁆𑀬𑁄 [𑀧𑀸𑀡𑀺𑀦𑀺 𑁫.𑁪.𑁩𑁬 (𑀯𑀸.)], 𑀪𑀸𑀕𑀢𑁆𑀢𑁂𑀦 𑀢𑀺𑀝𑁆𑀞𑀢𑀻𑀢𑀺 𑀯𑀸 𑀪𑀸𑀕𑀥𑁂𑀬𑁆𑀬𑁄, 𑀇𑀬𑁄.

𑀤𑁆𑀯𑀬𑀁 𑀢𑀼𑀝𑁆𑀞𑀺𑀤𑀸𑀬𑁂. 𑀫𑀦𑁄𑀭𑀣𑀧𑀼𑀡𑁆𑀡𑀢𑁆𑀢𑀸 𑀧𑀢𑁆𑀢𑀩𑁆𑀩𑁄 𑀪𑀸𑀕𑁄 𑀧𑀼𑀡𑁆𑀡𑀧𑀢𑁆𑀢𑁄. 𑀢𑀼𑀲𑁆𑀲𑀦𑀁 𑀢𑀼𑀝𑁆𑀞𑁄, 𑀲𑁄𑀲𑁆𑀲𑀢𑁆𑀣𑀻𑀢𑀺 𑀢𑀼𑀝𑁆𑀞𑀻, 𑀢𑁂𑀦 𑀤𑀸𑀢𑀩𑁆𑀩𑁄 𑀤𑀸𑀬𑁄 𑀢𑀼𑀝𑁆𑀞𑀺𑀤𑀸𑀬𑁄, 𑀆𑀓𑀸𑀭𑀦𑁆𑀢𑀸𑀦𑀫𑀸𑀬𑁄.

𑀙𑀓𑁆𑀓𑀁 𑀧𑀸𑀪𑀢𑁂. 𑀢𑀣𑀸 𑀳𑀺 𑁋

‘‘𑀳𑁂𑀫𑀁 𑀲𑀻𑀳𑀸𑀲𑀦𑀁 𑀯𑁂𑀲𑀁, 𑀯𑀼𑀢𑁆𑀢𑀁 𑀪𑀤𑁆𑀤𑀸𑀲𑀦𑀁 𑀢𑀣𑀸;

𑀉𑀧𑀸𑀬𑀦’𑀫𑀼𑀧𑀕𑁆𑀕𑀬𑁆𑀳𑀁, 𑀧𑀸𑀪𑀢𑀜𑁆𑀘𑁄’𑀧𑀤𑀸 𑀣𑀺𑀬’’𑀦𑁆𑀢𑀺.

𑀲𑀺𑀮𑁄𑀓𑀸𑀤𑁆𑀥𑀁 𑀦𑀸𑀫 𑀅𑀫𑀭𑀫𑀸𑀮𑀸.

𑀉𑀧𑀕𑀦𑁆𑀢𑁆𑀯𑀸𑀤𑀸𑀢𑀩𑁆𑀩𑀸𑀢𑀺 𑀉𑀧𑀤𑀸, 𑀅, 𑀇𑀢𑁆𑀣𑀻, 𑀢𑀁 𑀢𑀫𑀢𑁆𑀣𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀆𑀪𑀭𑀻𑀬𑀢𑁂 𑀆𑀦𑀻𑀬𑀢𑁂𑀢𑀺 𑀧𑀸𑀪𑀢𑀁, 𑀧𑀢𑁆𑀣𑀦𑀢𑁆𑀣𑀚𑁄𑀢𑀓𑁄𑀬𑀁 𑀧𑀲𑀤𑁆𑀤𑁄. 𑀉𑀧𑁂𑀬𑁆𑀬𑀢𑁂𑀢𑀺 𑀉𑀧𑀸𑀬𑀦𑀁, 𑀇𑀢𑁄 𑀬𑀼, 𑀉𑀧𑀕𑀘𑁆𑀙𑀢𑀺 𑀬𑁂𑀦𑀸𑀢𑀺 𑀯𑀸 𑀉𑀧𑀸𑀬𑀦𑀁. 𑀓𑀼𑀘 𑀲𑀗𑁆𑀓𑁄𑀘𑀦𑁂, 𑀡𑁄, 𑀯𑀺𑀕𑀢𑁄 𑀓𑁄𑀘𑁄 𑀬𑁂𑀦 𑀉𑀓𑁆𑀓𑁄𑀘𑁄. 𑀧𑀡𑁆𑀡𑁂𑀦 𑀲𑀢𑁆𑀣𑀧𑀡𑁆𑀡𑁂𑀦 𑀲𑀤𑁆𑀥𑀺𑀁 𑀆𑀓𑀭𑀻𑀬𑀢𑁂 𑀆𑀦𑀻𑀬𑀢𑁂𑀢𑀺 𑀧𑀡𑁆𑀡𑀸𑀓𑀸𑀭𑁄, 𑀅𑀜𑁆𑀜𑀢𑁆𑀭 𑀉𑀧𑀘𑀸𑀭𑀸. 𑀧𑀳𑀺𑀡𑀦𑁆𑀢𑁆𑀬𑀦𑁂𑀦𑁂𑀢𑀺 𑀧𑀳𑁂𑀡𑀓𑀁, 𑀳𑀺 𑀕𑀢𑀺𑀬𑀁, 𑀬𑀼, 𑀲𑀓𑀢𑁆𑀣𑁂 𑀓𑁄. 𑀧𑀤𑁂𑀲𑀦𑀁, 𑀉𑀧𑀕𑁆𑀕𑀬𑁆𑀳𑀁, 𑀉𑀧𑀳𑀸𑀭𑁄𑀧𑁆𑀬𑀢𑁆𑀭.

𑀕𑀼𑀫𑁆𑀩𑀸𑀤𑀺𑀤𑁂𑀬𑁆𑀬𑁄 𑀕𑀼𑀫𑁆𑀩𑀖𑀝𑀸𑀤𑀺𑀓𑁄 [𑀕𑀼𑀫𑁆𑀩𑀖𑀝𑀸𑀤𑀺𑀢𑁄 (?)] 𑀤𑁂𑀬𑁆𑀬𑁄𑀲𑀼𑀗𑁆𑀓𑀁, 𑀅𑀦𑀺𑀢𑁆𑀣𑀻, 𑀕𑀼𑀫𑁆𑀩𑁄 𑀦𑀸𑀫 𑀚𑀮𑀣𑀮𑀫𑀕𑁆𑀕𑀸𑀤𑀻𑀲𑀼 𑀮𑀤𑁆𑀥𑀩𑁆𑀩𑀪𑀸𑀕𑁄, 𑀢𑀣𑀸 𑀖𑀝𑁆𑀝𑁄𑀧𑀺, 𑀲𑀫𑀸𑀦𑀢𑁆𑀣𑀸 𑀳𑁂𑀢𑁂. 𑀆𑀤𑀺𑀦𑀸 𑀧𑀸𑀪𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀗𑁆𑀓 𑀕𑀫𑀦𑁂, 𑀲𑀼𑀗𑁆𑀓𑀢𑀺 𑀬𑁂𑀦, 𑀢𑀁 𑀲𑀼𑀗𑁆𑀓𑀁. 𑀕𑀫𑀼 𑀕𑀫𑀦𑁂, 𑀩𑁄, 𑀅𑀲𑁆𑀲𑀼, 𑀕𑀼𑀫𑁆𑀩𑁄. 𑀤𑁆𑀯𑀬𑀁 𑀕𑀸𑀫𑀚𑀦𑀧𑀤𑀸𑀤𑀺𑀢𑁄 𑀮𑀤𑁆𑀥𑀩𑁆𑀩𑀪𑀸𑀕𑁂. 𑀅𑀬 𑀕𑀫𑀦𑁂, 𑀡𑁄, 𑀆𑀬𑁄. 𑀅𑀧𑀘𑁆𑀘𑀬𑁂 𑀅𑀬𑁄. 𑀥𑀦𑀸𑀦𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀆𑀕𑀫𑁄 𑀥𑀦𑀸𑀕𑀫𑁄.

𑁩𑁫𑁭. 𑀤𑁆𑀯𑀬𑀁 𑀙𑀢𑁆𑀢𑀲𑀸𑀫𑀜𑁆𑀜𑁂. 𑀆𑀢𑀧𑀢𑁄 𑀲𑀽𑀭𑀺𑀬𑀸𑀮𑁄𑀓𑀢𑁄 𑀢𑀸𑀬𑀢𑀻𑀢𑀺 𑀆𑀢𑀧𑀢𑁆𑀢𑀁, 𑀢𑁄. 𑀙𑀸𑀤𑀬𑀢𑀻𑀢𑀺 𑀙𑀢𑁆𑀢𑀁, 𑀙𑀤 𑀅𑀧𑀯𑀸𑀭𑀡𑁂, 𑀢𑁄, 𑀢𑁆𑀭𑀡𑀧𑀘𑁆𑀘𑀬𑁂 𑀙𑀢𑁆𑀭𑀁, 𑀳𑁂𑀫𑀁 𑀲𑀼𑀯𑀡𑁆𑀡𑀔𑀘𑀺𑀢𑀁 𑀭𑀜𑁆𑀜𑀁 𑀭𑀸𑀚𑀽𑀦𑀁 𑀆𑀲𑀦𑀁 𑀲𑀻𑀳𑀸𑀲𑀦𑀸𑀔𑁆𑀬𑀁. 𑀲𑀻𑀳𑀸𑀓𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀲𑀻𑀳𑀸𑀓𑀢𑀺𑀧𑁆𑀧𑀥𑀸𑀦𑀁 𑀆𑀲𑀦𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀤𑁆𑀯𑀬𑀁 𑀘𑀸𑀫𑀭𑁂. 𑀯𑀸𑀮𑁂𑀦 𑀓𑀢𑀸 𑀩𑀻𑀚𑀦𑀻 𑀯𑀸𑀮𑀩𑀻𑀚𑀦𑀻. 𑀘𑀫𑀭𑁄 𑀫𑀺𑀕𑁄 𑀢𑀲𑁆𑀲𑁂𑀤𑀁 𑀘𑀸𑀫𑀭𑀻. ‘‘𑀘𑀸𑀫𑀭𑀸 𑀘𑀸𑀫𑀭𑀁 𑀭𑁄𑀫𑀁, 𑀕𑀼𑀘𑁆𑀙𑀓𑀜𑁆𑀘𑀸𑀯𑀘𑀽𑀮𑀓’’𑀦𑁆𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁨.𑁮.𑁪𑁦𑁬] 𑀢𑀺𑀓𑀡𑁆𑀟𑀲𑁂𑀲𑁄. 𑀧𑀓𑀺𑀡𑁆𑀡𑀓𑀁𑀧𑁆𑀬𑀢𑁆𑀭. 𑀧𑀓𑀭𑀻𑀬𑀢𑁂 𑀯𑀺𑀓𑁆𑀔𑀺𑀧𑀢𑁂 𑀧𑀓𑀺𑀡𑁆𑀡𑀓𑀁, 𑀲𑀓𑀢𑁆𑀣𑁂 𑀓𑁄.

𑁩𑁫𑁮. 𑀔𑀕𑁆𑀕𑀸𑀤𑀬𑁄 𑀇𑀫𑁂 𑀧𑀜𑁆𑀘 𑀭𑀸𑀚𑀽𑀦𑀁 𑀓𑀓𑀼𑀥𑀪𑀡𑁆𑀟𑀸𑀦𑀺 𑀪𑀯𑀦𑁆𑀢𑀺. 𑀓𑀼𑀓 𑀆𑀤𑀸𑀦𑁂, 𑀥𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀭𑀜𑁆𑀜𑁄 𑀕𑀫𑀦𑀓𑀸𑀮𑁂 𑀲𑀤𑀸 𑀆𑀤𑀸𑀢𑀩𑁆𑀩𑀢𑁄 𑀓𑀓𑀼𑀥𑀸𑀦𑀺 𑀘 𑀢𑀸𑀦𑀺 𑀭𑀸𑀚𑀥𑀦𑀢𑁆𑀢𑀸 𑀪𑀡𑁆𑀟𑀸𑀦𑀺 𑀘𑁂𑀢𑀺 𑀓𑀓𑀼𑀥𑀪𑀡𑁆𑀟𑀸𑀦𑀺.

𑁩𑁫𑁯. 𑀤𑁆𑀯𑀬𑀁 𑀧𑀼𑀡𑁆𑀡𑀖𑀝𑁂. 𑀚𑀮𑀧𑀼𑀡𑁆𑀡𑀢𑁆𑀢𑀸 𑀪𑀤𑁆𑀤𑁄 𑀓𑀮𑁆𑀬𑀸𑀡𑁄 𑀓𑀼𑀫𑁆𑀪𑁄 𑀪𑀤𑁆𑀤𑀓𑀼𑀫𑁆𑀪𑁄. 𑀤𑁆𑀯𑀬𑀁 𑀳𑁂𑀫𑀪𑀸𑀚𑀦𑁂. 𑀪𑀭 𑀪𑀭𑀡𑁂, 𑀪𑀭𑀡𑀁 𑀥𑀸𑀭𑀡𑀁 𑀧𑁄𑀲𑀦𑀜𑁆𑀘, 𑀥𑀸𑀭𑀡𑀢𑁆𑀣𑀲𑁆𑀲 𑀪𑀭𑀢𑀺𑀲𑁆𑀲 𑀪𑀺𑀗𑁆𑀕𑀸𑀤𑁂𑀲𑁄, 𑀪𑀭𑀢𑀺 𑀤𑀥𑀸𑀢𑀺 𑀉𑀤𑀓𑀦𑁆𑀢𑀺 𑀪𑀺𑀗𑁆𑀕𑀸𑀭𑁄, 𑀆𑀭𑁄. 𑀓𑀭𑀓𑁄, 𑀓𑀼𑀡𑁆𑀟𑀺𑀓𑀸𑀧𑁆𑀬𑀢𑁆𑀭.

𑀳𑀢𑁆𑀣𑀻 𑀘 𑀅𑀲𑁆𑀲𑁄 𑀘 𑀭𑀣𑁄 𑀘 𑀧𑀢𑁆𑀢𑀺 𑀘, 𑀢𑁂𑀲𑀁 𑀲𑀫𑀽𑀳𑁄 𑀳𑀢𑁆𑀣𑀺𑀲𑁆𑀲𑀭𑀣𑀧𑀢𑁆𑀢𑀺 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸𑀢𑁆𑀬𑀼𑀘𑁆𑀘𑀢𑁂, 𑀲𑁂𑀦𑀗𑁆𑀕𑀢𑁆𑀢𑀸 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄𑀬𑀁. 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀬𑀲𑁆𑀲𑀁 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀲𑀸 𑀘𑀢𑀼𑀭𑀗𑁆𑀕𑀺𑀦𑀻, 𑀈, 𑀇𑀦𑀻.

𑁩𑁬𑁦. 𑀤𑀦𑁆𑀢𑁆𑀬𑀦𑁆𑀢𑀁 𑀳𑀢𑁆𑀣𑀺𑀦𑀺. 𑀓𑀼𑀜𑁆𑀚𑁄 𑀳𑀦𑀼, 𑀤𑀦𑁆𑀢𑁄 𑀘, 𑀢𑀁𑀬𑁄𑀕𑀸 𑀓𑀼𑀜𑁆𑀚𑀭𑁄, 𑀅𑀢𑀺𑀲𑀬𑁂 𑀭𑁄, 𑀓𑀼𑀁 𑀧𑀣𑀯𑀺𑀁 𑀚𑀭𑀸𑀧𑁂𑀢𑀻𑀢𑀺 𑀯𑀸 𑀓𑀼𑀜𑁆𑀚𑀭𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄, 𑀓𑀼𑀜𑁆𑀚𑁂 𑀯𑀸 𑀕𑀺𑀭𑀺𑀓𑀽𑀝𑁂 𑀭𑀫𑀢𑀺, 𑀓𑁄𑀜𑁆𑀘𑀦𑀸𑀤𑀁 𑀦𑀤𑀦𑁆𑀢𑁄 𑀯𑀸 𑀘𑀭𑀢𑀺, 𑀓𑀼𑀁 𑀯𑀸 𑀧𑀣𑀯𑀺𑀁 𑀢𑀤𑀸𑀖𑀸𑀢𑁂𑀦 𑀚𑀭𑀬𑀢𑀻𑀢𑀺 𑀓𑀼𑀜𑁆𑀚𑀭𑁄. 𑀯𑀸𑀭𑀬𑀢𑀺 𑀧𑀭𑀩𑀮𑀁 𑀯𑀸𑀭𑀡𑁄, 𑀦𑀦𑁆𑀤𑀸𑀤𑀻𑀳𑀺 𑀬𑀼. 𑀳𑀢𑁆𑀣𑀬𑁄𑀕𑀸 𑀳𑀢𑁆𑀣𑀻. 𑀫𑀢𑀗𑁆𑀕𑀲𑁆𑀲 𑀇𑀲𑀺𑀦𑁄 𑀅𑀧𑀘𑁆𑀘𑀁 𑀫𑀸𑀢𑀗𑁆𑀕𑁄, 𑀫𑀳𑀦𑁆𑀢𑀁 𑀅𑀗𑁆𑀕𑀁 𑀲𑀭𑀻𑀭𑀫𑁂𑀢𑀲𑁆𑀲𑀸𑀢𑀺 𑀯𑀸 𑀫𑀸𑀢𑀗𑁆𑀕𑁄, 𑀳 𑀦𑀮𑁄𑀧𑁄, 𑀅𑀲𑁆𑀲𑀸𑀓𑀸𑀭𑁄 𑀘. 𑀤𑁆𑀯𑁂 𑀭𑀤𑀸 𑀤𑀦𑁆𑀢𑀸 𑀬𑀲𑁆𑀲 𑀤𑁆𑀯𑀺𑀭𑀤𑁄, ‘‘𑀭𑀤 𑀯𑀺𑀮𑁂𑀔𑀦𑁂 𑀤𑀦𑁆𑀢𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀕𑀚 𑀲𑀤𑁆𑀤𑁂, 𑀕𑀚𑀢𑀻𑀢𑀺, 𑀅. 𑀦𑀕𑁄 𑀧𑀩𑁆𑀩𑀢𑁄, 𑀲𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀦𑀸𑀕𑁄, 𑀡𑁄. 𑀓𑀭𑁂𑀦, 𑀫𑀼𑀔𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀧𑀺𑀯𑀢𑀻𑀢𑀺 𑀤𑁆𑀯𑀺𑀧𑁄. 𑀇 𑀕𑀫𑀦𑁂, 𑀪𑁄. 𑀤𑀦𑁆𑀢𑀬𑁄𑀕𑀸 𑀤𑀦𑁆𑀢𑀻. 𑀲𑀝𑁆𑀞𑀺𑀳𑀸𑀬𑀦𑁄, 𑀤𑀦𑁆𑀢𑀸𑀯𑀮𑁄, 𑀅𑀦𑁂𑀓𑀧𑁄, 𑀫𑀢𑀗𑁆𑀕𑀚𑁄, 𑀓𑀭𑀻, 𑀣𑀫𑁆𑀪𑁂𑀭𑀫𑁄, 𑀧𑀤𑁆𑀫𑀻, 𑀫𑀳𑀸𑀫𑀺𑀕𑁄, 𑀧𑀻𑀮𑀼, 𑀲𑀺𑀦𑁆𑀥𑀼𑀭𑁄, 𑀤𑀻𑀖𑀫𑀸𑀭𑀼𑀢𑁄, 𑀭𑀸𑀚𑀻𑀯𑁄, 𑀚𑀮𑀓𑀓𑁆𑀔𑁄, 𑀦𑀺𑀮𑁆𑀮𑀼𑀭𑁄, 𑀓𑀭𑀝𑀻, 𑀯𑀭𑀗𑁆𑀕𑁄, 𑀲𑀼𑀧𑁆𑀧𑀓𑀡𑁆𑀡𑁄 𑀇𑀘𑁆𑀘𑀸𑀤𑀻𑀦𑀺𑀧𑀺 𑀳𑀢𑁆𑀣𑀺𑀦𑁄 𑀦𑀸𑀫𑀸𑀦𑀺. 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀢𑀸, 𑀚𑀸𑀢𑀺𑀬𑀸 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂 𑀣𑀸𑀫𑁂𑀦 𑀳𑀸𑀬𑀦𑀢𑁄 𑀯𑀸 𑀲𑀝𑁆𑀞𑀺𑀳𑀸𑀬𑀦𑁄.

𑀯𑀦𑀓𑀭𑀻𑀦𑀁 𑀬𑁄 𑀬𑀽𑀣𑀚𑁂𑀝𑁆𑀞𑁄, 𑀲𑁄 𑀲𑀬𑀽𑀣𑀸𑀦𑀁 𑀚𑁂𑀝𑁆𑀞𑀢𑁆𑀢𑀸 𑀬𑀽𑀣𑀚𑁂𑀝𑁆𑀞𑁄. 𑀲𑀬𑀽𑀣𑁂 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀬𑀽𑀣𑀧𑁄𑀢𑀺 𑀘𑁄𑀘𑁆𑀘𑀢𑁂.

𑁩𑁬𑁧. 𑀓𑀸𑀴𑀸𑀯𑀓𑀸𑀤𑀻𑀦𑀺 𑀏𑀢𑀸𑀦𑀺 𑀳𑀢𑁆𑀣𑀺𑀭𑀸𑀚𑀸𑀦𑀁 𑀓𑀼𑀮𑀸𑀦𑀺. 𑀓𑀮𑀫𑁆𑀩𑀢𑁂 𑀲𑀤𑁆𑀤𑀸𑀬𑀢𑁂𑀢𑀺 𑀓𑀸𑀴𑀸𑀯𑀓𑁄, 𑀡𑁆𑀯𑀼, 𑀫𑀮𑁄𑀧𑁄. 𑀕𑀗𑁆𑀕𑀸𑀬𑀁 𑀚𑀸𑀢𑁄 𑀕𑀗𑁆𑀕𑁂𑀬𑁆𑀬𑁄, 𑀞𑀸𑀦𑀯𑀲𑁂𑀦 𑀲𑀸 𑀲𑀜𑁆𑀜𑀸. 𑀧𑀡𑁆𑀟𑀭𑀯𑀡𑁆𑀡𑀢𑀸𑀬 𑀧𑀡𑁆𑀟𑀭𑁄. 𑀯𑀡𑁆𑀡𑀯𑀲𑁂𑀦 𑀢𑀫𑁆𑀩𑀯𑀡𑁆𑀡𑀢𑀸𑀬 𑀢𑀫𑁆𑀩𑁄. 𑀧𑀺𑀗𑁆𑀕𑀮𑀯𑀡𑁆𑀡𑀢𑀸𑀬 𑀧𑀺𑀗𑁆𑀕𑀮𑁄. 𑀕𑀦𑁆𑀥𑀬𑀼𑀢𑁆𑀢𑀢𑀸𑀬 𑀕𑀦𑁆𑀥𑁄. 𑀫𑀗𑁆𑀕 𑀕𑀫𑀦𑀢𑁆𑀣𑁄, 𑀲𑁄𑀪𑀦𑀕𑀫𑀦𑀬𑀼𑀢𑁆𑀢𑀢𑀸𑀬 𑀫𑀗𑁆𑀕𑀮𑁄, 𑀅𑀢𑀺𑀲𑀸𑀬𑀦𑁂, 𑀧𑀲𑀁𑀲𑀸𑀬𑀁 𑀯𑀸 𑀮𑁄. 𑀳𑁂𑀫𑀯𑀡𑁆𑀡𑀢𑀸𑀬 𑀳𑁂𑀫𑁄. 𑀉𑀧𑁄𑀲𑀣𑀓𑀼𑀮𑁂 𑀚𑀸𑀢𑀢𑁆𑀢𑀸 𑀉𑀧𑁄𑀲𑀣𑁄, 𑀉𑀧𑀕𑀦𑁆𑀢𑁆𑀯𑀸 𑀅𑀭𑀬𑁄 𑀉𑀲𑀢𑀻𑀢𑀺 𑀯𑀸 𑀉𑀧𑁄𑀲𑀣𑁄, 𑀣𑁄, 𑀉𑀲 𑀤𑀸𑀳𑁂, 𑀉𑀧𑀧𑀼𑀩𑁆𑀩𑁄 𑀯𑀲 𑀦𑀺𑀯𑀸𑀲𑁂 𑀯𑀸, 𑀯𑀲𑁆𑀲𑁄, 𑀉𑀧𑁄𑀲𑀣𑁄, 𑀢𑀺𑀣𑀻𑀯𑀺𑀲𑁂𑀲𑁄 𑀘. 𑀙𑀩𑁆𑀩𑀡𑁆𑀡𑀤𑀦𑁆𑀢𑀢𑀸𑀬 𑀙𑀤𑁆𑀤𑀦𑁆𑀢𑁄. 𑀏𑀢𑁂𑀲𑀜𑁆𑀘 𑀓𑀸𑀴𑀸𑀯𑀓𑁄 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀩𑀮𑀁 𑀥𑀸𑀭𑁂𑀢𑀺, 𑀕𑀗𑁆𑀕𑁂𑀬𑁆𑀬𑁄 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁, 𑀏𑀯𑀁 𑀬𑀸𑀯𑀙𑀤𑁆𑀤𑀦𑁆𑀢𑀸 𑀦𑁂𑀢𑀩𑁆𑀩𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀩𑀮𑀁 𑀥𑀸𑀭𑁂𑀢𑀺, 𑀢𑁂𑀦𑁂𑀯 𑀪𑀕𑀯𑀸 𑀓𑀸𑀴𑀸𑀯𑀓𑀳𑀢𑁆𑀣𑀺𑀕𑀡𑀦𑀸𑀬 𑀓𑁄𑀝𑀺𑀲𑀳𑀲𑁆𑀲𑀩𑀮𑀁 𑀥𑀸𑀭𑁂𑀢𑀺, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁.

𑁩𑁬𑁨. 𑀧𑀸𑀤𑁄 𑀓𑀭𑀺𑀧𑁄𑀢𑁂. 𑀧𑀜𑁆𑀘𑀯𑀲𑁆𑀲𑀸𑀦𑀺 𑀬𑀸𑀯 𑀓𑀮𑀪𑁄, 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀅𑀪𑁄, 𑀓𑀮𑀪𑁄, 𑀴𑀢𑁆𑀢𑁂 𑀓𑀴𑀪𑁄, 𑀫𑀸𑀢𑀸𑀧𑀺𑀢𑀽𑀳𑀺 𑀪𑀭𑀺𑀢𑀩𑁆𑀩𑀢𑁆𑀢𑀸 𑀪𑀺𑀗𑁆𑀓𑁄, 𑀪𑀭𑀢𑀺𑀲𑁆𑀲 𑀪𑀺𑀗𑁆𑀓𑁄. 𑀓𑀭𑀺𑀲𑀸𑀯𑀓𑁄𑀧𑁆𑀬𑀢𑁆𑀭. 𑀧𑀸𑀤𑁄 𑀫𑀢𑁆𑀢𑀫𑀸𑀢𑀗𑁆𑀕𑁂. 𑀤𑀸𑀦𑀁 𑀧𑀪𑀺𑀦𑁆𑀦𑁄 𑀬𑀲𑁆𑀲 𑀧𑀪𑀺𑀦𑁆𑀦𑁄. 𑀫𑀚𑁆𑀚𑀢𑀻𑀢𑀺 𑀫𑀢𑁆𑀢𑁄, 𑀫𑀤 𑀉𑀫𑁆𑀫𑀸𑀤𑁂. 𑀕𑀚𑁂 𑀚𑀸𑀬𑀢𑀻𑀢𑀺 𑀕𑀚𑁆𑀚𑁄, 𑀡𑁆𑀬𑁄, 𑀫𑀤𑁄. 𑀲𑁄 𑀲𑀜𑁆𑀚𑀸𑀢𑁄 𑀬𑀲𑁆𑀲 𑀕𑀚𑁆𑀚𑀺𑀢𑁄.

𑀤𑁆𑀯𑀬𑀁 𑀳𑀢𑁆𑀣𑀺𑀲𑀫𑀽𑀳𑁂. 𑀳𑀢𑁆𑀣𑀻𑀦𑀁 𑀲𑀫𑀽𑀳𑁄 𑀳𑀢𑁆𑀣𑀺𑀖𑀝𑀸. 𑀕𑀚𑀸𑀦𑀁 𑀲𑀫𑀽𑀳𑁄 𑀕𑀚𑀢𑀸, 𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀸𑀤𑀻𑀳𑀺 𑀢𑀸. 𑀧𑀸𑀤𑁄 𑀳𑀢𑁆𑀣𑀺𑀦𑀺𑀬𑀁. 𑀳𑀢𑁆𑀣𑀬𑁄𑀕𑀸 𑀳𑀢𑁆𑀣𑀺𑀦𑀻, 𑀈, 𑀇𑀦𑀻. 𑀓𑀡 𑀲𑀤𑁆𑀤𑁂, 𑀇𑀭𑀼, 𑀲𑀓𑀢𑁆𑀣𑁂 𑀓𑁄. 𑀓𑀭𑁂𑀡𑀼𑀓𑀸𑀢𑀺𑀧𑀺, 𑀢𑀤𑀸 𑀓𑀭𑀬𑁄𑀕𑀸 𑀓𑀭𑁂𑀡𑀼𑀓𑀸, 𑀇𑀡𑀼. 𑀓𑀭𑀺𑀡𑀻, 𑀥𑁂𑀦𑀼𑀓𑀸, 𑀯𑀲𑀸, 𑀓𑀭𑁂𑀡𑀼𑀧𑁆𑀬𑀢𑁆𑀭.

𑁩𑁬𑁩. 𑀳𑀢𑁆𑀣𑀺𑀲𑀺𑀭𑁄𑀧𑀺𑀡𑁆𑀟𑀸 𑀳𑀢𑁆𑀣𑀺𑀦𑁄 𑀲𑀺𑀭𑀲𑀺 𑀤𑁆𑀯𑁂 𑀧𑀺𑀡𑁆𑀟𑀸 𑀓𑀼𑀫𑁆𑀪𑀸𑀔𑁆𑀬𑀸. 𑀓𑁂 𑀲𑀺𑀭𑀲𑀺 𑀪𑀯𑀢𑀻𑀢𑀺 𑀓𑀼𑀫𑁆𑀪𑁄, 𑀅𑀲𑁆𑀲𑀼, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀤𑁆𑀯𑀺𑀦𑁆𑀦𑀁 𑀧𑀦 𑀓𑀼𑀫𑁆𑀪𑀸𑀦𑀁 𑀫𑀚𑁆𑀛𑀺𑀫𑀁 𑀯𑀺𑀤𑀼 𑀦𑀸𑀫 [𑀅𑀫𑀭 𑁧𑁮.𑁩𑁭]. 𑀅𑀗𑁆𑀓𑀼𑀲𑀲𑀗𑁆𑀖𑀸𑀢𑀁 𑀯𑀺𑀦𑁆𑀤𑀢𑁆𑀬𑀲𑁆𑀫𑀺𑀦𑁆𑀢𑀺 𑀯𑀺𑀤𑀼, 𑀧𑀼𑀫𑁂, 𑀉. 𑀤𑁆𑀯𑀬𑀁 𑀓𑀡𑁆𑀡𑀫𑀽𑀮𑁂. 𑀘𑀽𑀴 𑀦𑀺𑀫𑀚𑁆𑀚𑀦𑁂, 𑀡𑁆𑀯𑀼, 𑀘𑀽𑀴𑀺𑀓𑀸, 𑀘𑀼𑀤 𑀲𑀜𑁆𑀘𑁄𑀤𑀦𑁂 𑀯𑀸, 𑀘𑁄𑀤𑁂𑀦𑁆𑀢𑀺 𑀏𑀢𑁆𑀣 𑀅𑀗𑁆𑀓𑀼𑀲𑀸𑀤𑀻𑀳𑀺 𑀅𑀤𑀦𑁆𑀢𑀦𑁆𑀢𑀺 𑀘𑀽𑀴𑀺𑀓𑀸, 𑀤𑀲𑁆𑀲 𑀴𑁄, 𑀡𑁆𑀯𑀼.

𑀆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀲𑀦𑀁, 𑀔𑀦𑁆𑀥𑀤𑁂𑀲𑁄. 𑀔𑀦𑁆𑀥𑁄 𑀏𑀯 𑀤𑁂𑀲𑁄 𑀔𑀦𑁆𑀥𑀤𑁂𑀲𑁄, 𑀢𑀲𑁆𑀫𑀺𑀁. 𑀤𑁆𑀯𑀬𑀁 𑀧𑀼𑀘𑁆𑀙𑀫𑀽𑀮𑁂. 𑀧𑀼𑀘𑁆𑀙𑀲𑁆𑀲 𑀫𑀽𑀮𑀁 𑀳𑁂𑀝𑁆𑀞𑀺𑀫𑀪𑀸𑀕𑁄.

𑁩𑁬𑁪. 𑀢𑀺𑀓𑀁 𑀕𑀚𑀩𑀦𑁆𑀥𑀦𑀣𑀫𑁆𑀪𑁂. 𑀆𑀮𑀦𑁆𑀢𑁆𑀬𑀲𑁆𑀫𑀺𑀁, 𑀅𑀦𑁂𑀦 𑀯𑀸 𑀩𑀦𑁆𑀥𑀦𑁆𑀢𑀺 𑀆𑀮𑀸𑀦𑀁, 𑀬𑀼. 𑀆𑀧𑀼𑀩𑁆𑀩𑁄 𑀩𑀦𑁆𑀥𑀦𑀢𑁆𑀣𑁄 𑀮𑀸𑀥𑀸𑀢𑀼. 𑀆𑀳𑀦𑀦𑁆𑀢𑀺 𑀩𑀦𑁆𑀥𑀦𑁆𑀢𑁆𑀬𑀲𑁆𑀫𑀺𑀁, 𑀅𑀦𑁂𑀦 𑀯𑀸 𑀆𑀴𑁆𑀳𑀓𑁄, 𑀳𑀦𑀥𑀸𑀢𑀼, 𑀦𑀲𑁆𑀲 𑀴𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄 𑀘, 𑀡𑁆𑀯𑀼. 𑀣𑀫𑁆𑀪 𑀧𑀝𑀺𑀩𑀦𑁆𑀥𑀦𑁂. 𑀩𑀦𑁆𑀥𑁄𑀧𑁆𑀬𑀢𑁆𑀭.

𑀢𑀺𑀓𑀁 𑀲𑀗𑁆𑀔𑀮𑁂. 𑀅𑀦𑀺𑀢𑁆𑀣𑀻 𑀢𑀽𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀕𑀮 𑀲𑁂𑀘𑀦𑁂. 𑀦𑀺𑀕𑀴𑀢𑀺 𑀩𑀦𑁆𑀥𑀢𑀺 𑀬𑁂𑀦𑀸𑀢𑀺 𑀦𑀺𑀕𑀴𑁄, 𑀅, 𑀓𑀢𑁆𑀢𑀼𑀲𑀸𑀥𑀦𑀁 𑀯𑀸. 𑀅𑀤𑀺 𑀩𑀦𑁆𑀥𑀦𑁂, 𑀅𑀦𑁆𑀤𑀢𑀻𑀢𑀺 𑀅𑀦𑁆𑀤𑀼𑀓𑁄. 𑀡𑁆𑀯𑀼, 𑀅𑀲𑁆𑀲𑀼. 𑀪𑀼𑀲𑀁 𑀔𑀮𑀢𑁆𑀬𑀦𑁂𑀦 𑀲𑀗𑁆𑀔𑀮𑀁, 𑀓𑀝𑀺 𑀯𑀢𑁆𑀣𑀩𑀦𑁆𑀥𑀦𑁂𑀧𑀺, ‘‘𑀣𑀻𑀓𑀝𑀻𑀯𑀢𑁆𑀣𑀩𑀦𑁆𑀥𑁂𑀧𑀺, 𑀦𑀺𑀕𑀴𑁂 𑀲𑀗𑁆𑀔𑀮𑀁 𑀢𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁪𑁧] 𑀭𑀪𑀲𑁄. 𑀲𑀗𑁆𑀔𑀮𑀺𑀓𑀸𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀕𑀚𑀕𑀡𑁆𑀟𑁂. 𑀕𑀡𑁆𑀟 𑀯𑀤𑀦𑁂𑀓𑀤𑁂𑀲𑁂, 𑀅𑀥𑀸𑀢𑀽𑀦𑀫𑁆𑀧𑀺 𑀥𑀸𑀢𑀽𑀲𑀼 𑀧𑀸𑀞𑁄, 𑀥𑀸𑀢𑀼 𑀳𑀺 𑀓𑁆𑀭𑀺𑀬𑀢𑁆𑀣𑁄. 𑀕𑀡𑁆𑀟𑁄 𑀓𑀧𑁄𑀮𑀲𑀸𑀫𑀜𑁆𑀜𑁂𑀧𑀺. 𑀓𑀝 𑀯𑀲𑁆𑀲𑀸𑀯𑀭𑀡𑁂𑀲𑀼, 𑀅. 𑀤𑁆𑀯𑀬𑀁 𑀓𑀭𑀺𑀫𑀤𑀚𑀮𑁂. 𑀤𑀻𑀬𑀢𑁂𑀢𑀺 𑀤𑀸𑀦𑀁. 𑀫𑀤 𑀉𑀫𑁆𑀫𑀸𑀤𑁂, 𑀓𑀭𑀡𑁂 𑀅.

𑁩𑁬𑁫. 𑀤𑁆𑀯𑀬𑀁 𑀳𑀢𑁆𑀣𑀺𑀓𑀭𑁂. 𑀲𑁄𑀡 𑀯𑀡𑁆𑀡𑀕𑀢𑀻𑀲𑀼, 𑀟𑁄, 𑀲𑁄𑀟 𑀕𑀩𑁆𑀩𑁂 𑀯𑀸, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀡𑁄 𑀘. 𑀤𑁆𑀯𑀻𑀲𑀼 𑀤𑁆𑀯𑁂𑀧𑀺.

𑀤𑁆𑀯𑀬𑀁 𑀲𑁄𑀡𑁆𑀟𑀕𑁆𑀕𑁂. 𑀓𑀭𑀲𑁆𑀲 𑀲𑁄𑀡𑁆𑀟𑀲𑁆𑀲 𑀅𑀕𑁆𑀕𑀁. 𑀧𑀼𑀲 𑀧𑁄𑀲𑀦𑁂. 𑀔𑀭𑁄, 𑀲𑀲𑁆𑀲 𑀓𑁄, 𑀉𑀲𑁆𑀲𑁄𑀢𑁆𑀢𑀁, 𑀧𑀼𑀲 𑀯𑀼𑀟𑁆𑀠𑀺𑀫𑁆𑀳𑀺 𑀯𑀸, 𑀪𑀽, 𑀧𑀼𑀲 𑀲𑁆𑀦𑁂𑀳𑀲𑁂𑀘𑀦𑀧𑀽𑀭𑀡𑁂𑀲𑀼 𑀯𑀸, 𑀓𑀺𑀬𑀸𑀤𑀺, 𑀧𑀼𑀲 𑀥𑀸𑀭𑀡𑁂 𑀯𑀸, 𑀘𑀼𑀭𑀸𑀤𑀺.

𑀳𑀢𑁆𑀣𑀺𑀲𑁆𑀲 𑀓𑀸𑀬𑀫𑀚𑁆𑀛𑀫𑁆𑀳𑀺 𑀩𑀦𑁆𑀥𑀦𑀭𑀚𑁆𑀚𑀼 𑀓𑀘𑁆𑀙𑀸 𑀦𑀸𑀫. 𑀓𑀘 𑀩𑀦𑁆𑀥𑀦𑁂, 𑀙𑁄. 𑀤𑀽𑀲𑀸, 𑀯𑀭𑀢𑁆𑀭𑀸𑀧𑁆𑀬𑀢𑁆𑀭. 𑀓𑀼𑀣𑁄 𑀦𑀸𑀫 𑀳𑀢𑁆𑀣𑀺𑀧𑀺𑀝𑁆𑀞𑀢𑁆𑀣𑀭𑀺𑀢𑀘𑀺𑀢𑁆𑀭𑀓𑀫𑁆𑀩𑀮𑀁, 𑀲𑁄 𑀆𑀤𑀺 𑀬𑁂𑀲𑀦𑁆𑀢𑁂 𑀓𑀼𑀣𑀸𑀤𑀬𑁄. 𑀓𑀼𑀣𑀸𑀤𑀬𑁄 𑀏𑀯 𑀓𑀧𑁆𑀧𑀦𑁄 𑀦𑀸𑀫 𑀪𑀯𑀦𑁆𑀢𑀺. 𑀓𑀧𑁆𑀧 𑀲𑀸𑀫𑀢𑁆𑀣𑀺𑀬𑁂, 𑀲𑀚𑁆𑀚𑀦𑀸𑀬𑀜𑁆𑀘, 𑀓𑀭𑀡𑁂 𑀬𑀼. 𑀓𑀧𑁆𑀧𑀦𑀸𑀧𑀺. 𑀓𑀘 𑀲𑀚𑁆𑀚𑀦𑀸𑀬𑀁, 𑀣𑁄, 𑀓𑀼𑀣𑁄, 𑀢𑀻𑀲𑀼. ‘‘𑀦𑀧𑀼𑀁𑀲𑀓𑀫𑀢𑁆𑀣𑀭𑀡𑀁, 𑀣𑀻 𑀧𑀯𑁂𑀡𑀻 𑀓𑀼𑀣𑀁 𑀢𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁪𑁨] 𑀳𑀺 𑀯𑁄𑀧𑀸𑀮𑀺𑀢𑁄. 𑀧𑀯𑁂𑀡𑀻, 𑀅𑀢𑁆𑀣𑀭𑀡𑀁, 𑀯𑀡𑁆𑀡𑁄, 𑀧𑀭𑀺𑀢𑁆𑀣𑁄𑀫𑁄𑀢𑀺 𑀏𑀢𑁂 𑀓𑀼𑀣𑀧𑀭𑀺𑀬𑀸𑀬𑀸.

𑁩𑁬𑁬. 𑀤𑁆𑀯𑀬𑀁 𑀭𑀸𑀚𑀸𑀭𑀳𑁂 𑀳𑀢𑁆𑀣𑀺𑀦𑀺. 𑀭𑀸𑀚𑀸𑀦𑀫𑀼𑀧𑀕𑀦𑁆𑀢𑁆𑀯𑀸 𑀯𑀳𑀺𑀢𑀼𑀫𑀭𑀳𑀢𑀻𑀢𑀺 𑀑𑀧𑀯𑀬𑁆𑀳𑁄, 𑀅𑀭𑀳𑀢𑁆𑀣𑁂 𑀡𑁆𑀬𑁄. 𑀭𑀸𑀚𑀸𑀦𑀁 𑀯𑀳𑀺𑀢𑀼𑀁 𑀅𑀭𑀳𑀢𑀻𑀢𑀺 𑀭𑀸𑀚𑀯𑀬𑁆𑀳𑁄, 𑀡𑁆𑀬𑁄. 𑀤𑁆𑀯𑀬𑀁 𑀓𑀧𑁆𑀧𑀺𑀢𑀳𑀢𑁆𑀣𑀺𑀦𑀺. 𑀲𑀚𑁆𑀚𑀸 𑀲𑀚𑁆𑀚𑀦𑀸 𑀲𑀜𑁆𑀚𑀸𑀢𑀸 𑀬𑀲𑁆𑀫𑀺𑀁 𑀲𑀚𑁆𑀚𑀺𑀢𑁄. 𑀓𑀧𑁆𑀧𑀸 𑀓𑀧𑁆𑀧𑀦𑀸 𑀲𑀜𑁆𑀚𑀸𑀢𑀸 𑀬𑀲𑁆𑀫𑀺𑀁 𑀓𑀧𑁆𑀧𑀺𑀢𑁄. 𑀏𑀢𑀲𑁆𑀫𑀸𑀬𑁂𑀯 𑀧𑀸𑀞𑀸 𑀲𑀚𑁆𑀚𑀓𑀧𑁆𑀧𑀸 𑀲𑀚𑁆𑀚𑀦𑀸𑀓𑀧𑁆𑀧𑀦𑀸𑀦𑀁 𑀧𑀭𑀺𑀬𑀸𑀬𑀸𑀢𑀺 𑀜𑁂𑀬𑁆𑀬𑀸.

𑀳𑀢𑁆𑀣𑀺𑀦𑁄 𑀧𑀸𑀤𑁂 𑀯𑀺𑀚𑁆𑀛𑀦𑀓𑀡𑁆𑀝𑀓𑁄 ‘‘𑀢𑁄𑀫𑀭𑁄’’𑀢𑁆𑀬𑀼𑀘𑁆𑀘𑀢𑁂. 𑀢𑀼𑀚𑁆𑀚𑀢𑁂𑀦𑁂𑀦𑁂𑀢𑀺 𑀢𑁄𑀫𑀭𑁄, 𑀢𑀼𑀤 𑀩𑁆𑀬𑀣𑀦𑁂, 𑀅𑀭𑁄, 𑀤𑀲𑁆𑀲 𑀫𑁄, 𑀑𑀢𑁆𑀢𑀁. 𑀯𑁂𑀡𑀼𑀓𑀁𑀧𑁆𑀬𑀢𑁆𑀭 [𑀓𑁄𑀢𑁆𑀭𑀁 𑀯𑁂𑀡𑀼𑀓𑀫𑀸𑀮𑀸𑀦𑀁 (𑀅𑀫𑀭 𑁧𑁮.𑁪𑁧)], 𑀓𑁆𑀯𑀘𑀺 𑀯𑁂𑀴𑀼𑀓𑀦𑁆𑀢𑀺𑀧𑀺 𑀧𑀸𑀞𑁄.

𑁩𑁬𑁭. 𑀳𑀢𑁆𑀣𑀺𑀦𑁄 𑀓𑀡𑁆𑀡𑀫𑀽𑀮𑀫𑁆𑀳𑀺 𑀯𑀺𑀚𑁆𑀛𑀦𑀓𑀡𑁆𑀝𑀓𑁄 ‘‘𑀢𑀼𑀢𑁆𑀢’’𑀫𑀺𑀢𑁆𑀬𑀼𑀘𑁆𑀘𑀢𑁂. 𑀢𑀼𑀚𑁆𑀚𑀢𑁂𑀦𑁂𑀦𑁂𑀢𑀺 𑀢𑀼𑀢𑁆𑀢𑀁, 𑀢𑁄. 𑀳𑀢𑁆𑀣𑀺𑀦𑁄 𑀫𑀢𑁆𑀣𑀓𑀫𑁆𑀳𑀺 𑀯𑀺𑀚𑁆𑀛𑀦𑀓𑀡𑁆𑀝𑀓𑁄 ‘‘𑀅𑀗𑁆𑀓𑀼𑀲𑁄’’𑀢𑁆𑀬𑀼𑀘𑁆𑀘𑀢𑁂. 𑀅𑀗𑁆𑀓𑀢𑁂 𑀅𑀦𑁂𑀦𑁂𑀢𑀺 𑀅𑀗𑁆𑀓𑀼𑀲𑁄, 𑀅𑀗𑁆𑀓 𑀮𑀓𑁆𑀔𑀡𑁂, 𑀲𑁄, 𑀅𑀲𑁆𑀲𑀼.

𑀧𑀚𑁆𑀚𑀤𑁆𑀥𑀁 𑀳𑀢𑁆𑀣𑀸𑀭𑁄𑀳𑁂. 𑀫𑀟𑀺 𑀪𑀽𑀲𑀸𑀬𑀁, 𑀳𑀢𑁆𑀣𑀺𑀁 𑀫𑀡𑁆𑀟𑀬𑀢𑀺 𑀭𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀫𑀡𑁆𑀟𑁄, 𑀲𑁄𑀯 𑀳𑀢𑁆𑀣𑀺𑀫𑁂𑀡𑁆𑀟𑁄, 𑀫𑀺 𑀳𑀺𑀁𑀲𑀸𑀬𑀁 𑀯𑀸, 𑀟𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀳𑀢𑁆𑀣𑀺𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀧𑁄, 𑀓𑀫𑁆𑀫𑀦𑀺 𑀡𑁄. 𑀳𑀢𑁆𑀣𑀺𑀁 𑀕𑁄𑀧𑀬𑀢𑀺 𑀭𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀕𑁄𑀧𑀓𑁄. 𑀕𑀼𑀧 𑀭𑀓𑁆𑀔𑀡𑁂, 𑀲𑀓𑀢𑁆𑀣𑁂 𑀓𑁄. 𑀆𑀥𑁄𑀭𑀡𑁄, 𑀦𑀺𑀲𑀸𑀤𑀺𑀦𑁄𑀧𑁆𑀬𑀢𑁆𑀭.

𑁩𑁬𑁮. 𑀫𑀸𑀢𑀗𑁆𑀕𑀳𑀬𑀸𑀤𑀻𑀦𑀁 𑀕𑀫𑀦𑀸𑀤𑀺𑀓𑁆𑀭𑀺𑀬𑀸𑀲𑀺𑀓𑁆𑀔𑀸𑀧𑀓𑁄 𑀆𑀘𑀭𑀺𑀬𑁄 ‘‘𑀕𑀸𑀫𑀡𑀻𑀬𑁄’’𑀢𑁆𑀬𑀼𑀘𑁆𑀘𑀢𑁂. 𑀕𑀫𑀦𑀁 𑀕𑀸𑀫𑁄, 𑀪𑀸𑀯𑁂 𑀡𑁄. 𑀳𑀢𑁆𑀣𑀸𑀤𑀻𑀦𑀁 𑀕𑀫𑀦𑀓𑁆𑀭𑀺𑀬𑀸 𑀕𑀸𑀫𑁄, 𑀢𑀁 𑀦𑁂𑀢𑀺 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀕𑀸𑀫𑀡𑀻𑀬𑁄, 𑀅𑀜𑁆𑀜𑀓𑁆𑀭𑀺𑀬𑀸𑀲𑀺𑀓𑁆𑀔𑀸𑀧𑀦𑁂𑀢𑀽𑀧𑀘𑀸𑀭𑀸, 𑀕𑀸𑀫𑀁 𑀯𑀸 𑀳𑀢𑁆𑀣𑀸𑀤𑀺𑀲𑀫𑀽𑀳𑀁 𑀦𑁂𑀢𑀻𑀢𑀺 𑀕𑀸𑀫𑀡𑀻𑀬𑁄, 𑀕𑀫𑀦𑀁 𑀯𑀸 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀕𑀸𑀫𑀡𑀻𑀬𑁄, 𑀲𑀩𑁆𑀩𑀢𑁆𑀭 𑀦𑀲𑁆𑀲 𑀡𑀢𑁆𑀢𑀁.

𑀧𑀸𑀤𑀤𑁆𑀯𑀬𑀁 𑀅𑀲𑁆𑀲𑁂. 𑀳𑀬 𑀕𑀢𑀺𑀬𑀁, 𑀅. 𑀢𑀼𑀭𑀁 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀢𑀼𑀭𑀗𑁆𑀕𑁄, 𑀓𑁆𑀯𑀺, 𑀩𑀺𑀦𑁆𑀤𑀸𑀮𑁄𑀧𑁄, 𑀮𑁄𑀧𑁂 𑀲𑀢𑀺 𑀢𑀼𑀭𑀕𑁄. 𑀯𑀸𑀳 𑀧𑀬𑀢𑀦𑁂, 𑀅. 𑀅𑀲 𑀪𑀓𑁆𑀔𑀦𑁂, 𑀅. 𑀲𑀺𑀦𑁆𑀥𑀽𑀦𑀫𑀤𑀽𑀭𑀪𑀯𑁄 𑀚𑀦𑀧𑀤𑁄𑀧𑀺 𑀲𑀺𑀦𑁆𑀥𑀯𑁄, 𑀢𑀢𑁆𑀭 𑀪𑀯𑁄 𑀲𑀺𑀦𑁆𑀥𑀯𑁄, 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀦 𑀯𑀼𑀤𑁆𑀥𑀺. 𑀖𑁄𑀝𑀓𑁄, 𑀧𑀻𑀢𑀺, 𑀢𑀼𑀭𑀗𑁆𑀕𑀫𑁄, 𑀯𑀸𑀚𑀻, 𑀕𑀦𑁆𑀥𑀩𑁆𑀩𑁄, 𑀲𑀢𑁆𑀢𑀺𑀭𑀺𑀘𑁆𑀘𑀸𑀤𑀻𑀦𑀺𑀧𑀺 𑀅𑀲𑁆𑀲𑁂. 𑀖𑀼𑀝 𑀧𑀭𑀺𑀯𑀢𑁆𑀢𑀦𑁂, 𑀡𑁆𑀯𑀼. 𑀧𑀸 𑀧𑀸𑀦𑁂,𑀢𑀺. ‘‘𑀧𑀸𑀦𑁂 𑀣𑀻 𑀧𑀻𑀢𑀺 𑀅𑀲𑁆𑀲𑁂 𑀲𑁄’’𑀢𑀺 𑀭𑀼𑀤𑁆𑀤𑁄. 𑀯𑀸𑀚𑀬𑁄𑀕𑀸 𑀯𑀸𑀚𑀻, 𑀈. ‘‘𑀏𑀲𑀜𑁆𑀘 𑀧𑀼𑀩𑁆𑀩𑀁 𑀧𑀓𑁆𑀔𑁄 𑀆𑀲𑀺, 𑀲 𑀢𑀼 𑀤𑁂𑀯𑁂𑀢𑁆𑀬𑀢𑁆𑀬𑀢𑁆𑀣𑀺𑀢𑁂𑀦 𑀲𑀸𑀮𑀻𑀪𑀽𑀢𑀫𑀼𑀦𑀺𑀦𑀸 𑀲𑀓𑁆𑀓𑀁 𑀧𑀬𑁄𑀚𑁂𑀢𑁆𑀯𑀸 𑀯𑀚𑀺𑀭𑀙𑁂𑀤𑀺𑀢𑁄’’𑀢𑀺 𑀦𑀺𑀓𑀸𑀬𑀦𑁆𑀢𑀭𑀺𑀬𑀸. 𑀲𑀧 𑀲𑀫𑀯𑀸𑀬𑁂,𑀢𑀺, 𑀲𑀢𑁆𑀢𑀺, 𑀲𑀸𑀫𑀢𑁆𑀣𑀺𑀬𑁂𑀧𑀺.

𑁩𑁬𑁯. 𑀢𑀲𑁆𑀲 𑀅𑀲𑁆𑀲𑀲𑁆𑀲 𑀪𑁂𑀤𑁄 𑀯𑀺𑀲𑁂𑀲𑁄 𑀅𑀲𑁆𑀲𑀢𑀭𑁄, 𑀅𑀲𑁆𑀲𑀁 𑀢𑀭𑀢𑀻𑀢𑀺 𑀅𑀲𑁆𑀲𑀢𑀭𑁄, 𑀢𑀭 𑀅𑀢𑀺𑀓𑁆𑀓𑀫𑀦𑁂, 𑀢𑀭𑀧𑀘𑁆𑀘𑀬𑁂𑀦𑀸𑀧𑀺 𑀲𑀺𑀤𑁆𑀥𑀁. 𑀧𑀥𑀸𑀦𑀲𑁆𑀲𑀪𑀽𑀫𑀺𑀪𑀯𑁄 𑀲𑀼𑀚𑀸𑀢𑀺𑀓𑁄 𑀅𑀯𑀺𑀓𑀸𑀭𑀻 𑀓𑀼𑀮𑀻𑀦𑀓𑁄 𑀅𑀲𑁆𑀲𑁄 𑀆𑀚𑀸𑀦𑀻𑀬𑁄 𑀦𑀸𑀫, 𑀆 𑀪𑀼𑀲𑁄 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀸𑀢𑀻𑀢𑀺 𑀆𑀚𑀸𑀦𑀻𑀬𑁄, 𑀅𑀦𑀻𑀬𑁄, 𑀡𑁆𑀬𑀧𑀘𑁆𑀘𑀬𑁂𑀦 𑀯𑀸 𑀲𑀺𑀤𑁆𑀥𑀁, 𑀢𑀤𑀸 ‘‘𑀓𑀺𑀬𑀸𑀤𑀺𑀢𑁄 𑀦𑀸’’𑀢𑀺 𑀦𑀸𑀕𑀫𑁄, 𑀈𑀓𑀸𑀭𑀸𑀕𑀫𑁄 𑀘 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁪𑁪 𑀕𑀸𑀣𑀸𑀬𑀫𑁆𑀧𑀺 𑀧𑀲𑁆𑀲𑀺𑀢𑀩𑁆𑀩𑀁]. 𑀓𑀼𑀮𑁂 𑀲𑀫𑁆𑀪𑀽𑀢𑁄 𑀓𑀼𑀮𑀻𑀦𑀓𑁄, 𑀈𑀦𑁄, 𑀲𑀓𑀢𑁆𑀣𑁂 𑀓𑁄. 𑀲𑀗𑁆𑀕𑀸𑀫𑁂 𑀕𑀭𑀼𑀲𑀢𑁆𑀣𑀧𑁆𑀧𑀳𑀸𑀭𑁂𑀦 𑀦𑀺𑀳𑀢𑁄 𑀲𑀦𑁆𑀢𑁄 𑀧𑀺𑀬𑁄 𑀲𑀸𑀫𑀺𑀓𑀁 𑀦 𑀚𑀳𑀢𑀺 𑀲𑀼𑀔𑀁 𑀯𑀳𑀦𑀲𑀻𑀮𑁄 𑀬𑁄 𑀅𑀲𑁆𑀲𑁄, 𑀲𑁄 𑀯𑀺𑀦𑀻𑀢𑀲𑀤𑁆𑀤𑁂𑀦𑁄𑀘𑁆𑀘𑀢𑁂. 𑀯𑀺𑀲𑁂𑀲𑁂𑀦 𑀤𑀫𑁆𑀫𑀢𑀁 𑀦𑁂𑀢𑀺 𑀬𑀦𑁆𑀢𑀺 𑀯𑀺𑀦𑀻𑀢𑁄.

𑀤𑁆𑀯𑀬𑀁 𑀅𑀲𑁆𑀲𑀧𑁄𑀢𑁂. 𑀓𑀲 𑀕𑀫𑀦𑁂, 𑀑𑀭𑁄, 𑀅𑀲𑁆𑀲𑀺, 𑀓𑀺𑀜𑁆𑀘𑀺 𑀲𑀭𑀢𑀻𑀢𑀺 𑀯𑀸 𑀓𑀺𑀲𑁄𑀭𑁄, 𑀩𑀺𑀦𑁆𑀤𑀼𑀮𑁄𑀧𑁄, 𑀅𑀲𑁆𑀲𑁄 𑀘, 𑀳𑀬𑁄 𑀏𑀯 𑀩𑀸𑀮𑀢𑁆𑀢𑀸 𑀳𑀬𑀧𑁄𑀢𑀓𑁄, 𑀅𑀧𑁆𑀧𑀢𑁆𑀣𑁂 𑀓𑁄.

𑁩𑁭𑁦. 𑀤𑁆𑀯𑀬𑀁 𑀅𑀣𑀸𑀫𑀲𑁆𑀲𑁂. 𑀖𑀼𑀝 𑀧𑀭𑀺𑀯𑀢𑁆𑀢𑀦𑁂, 𑀡𑁆𑀯𑀼, 𑀖𑁄𑀝𑀓𑁄, 𑀅𑀲𑁆𑀲𑀲𑀸𑀫𑀜𑁆𑀜𑁂𑀧𑁆𑀬𑀬𑀁, 𑀔𑀭𑀁 𑀕𑀘𑁆𑀙𑀢𑀻𑀢𑀺 𑀔𑀮𑀼𑀗𑁆𑀕𑁄, 𑀲𑁄 𑀏𑀯 𑀔𑀴𑀼𑀗𑁆𑀓𑁄, 𑀕𑀓𑀸𑀭𑀲𑁆𑀲 𑀓𑀓𑀸𑀭𑀁 𑀓𑀢𑁆𑀯𑀸, 𑀭𑀲𑁆𑀲 𑀮𑁄, 𑀴𑀢𑁆𑀢𑀫𑀼𑀢𑁆𑀢𑀜𑁆𑀘, 𑀔𑀴𑀼𑀓𑁄𑀢𑀺𑀧𑀺. 𑀚𑀯𑁂𑀦 𑀲𑀩𑁆𑀩𑁂𑀲𑀫𑀥𑀺𑀓𑁄 𑀅𑀲𑁆𑀲𑁄 𑀚𑀯𑀦𑁄, 𑀬𑀼.

𑀤𑁆𑀯𑀬𑀁 𑀓𑀯𑀻𑀢𑀺𑀔𑁆𑀬𑀸𑀢𑁂 𑀫𑀼𑀔𑀩𑀦𑁆𑀥𑀦𑁂. 𑀫𑀼𑀔𑀫𑀸𑀢𑀺𑀝𑁆𑀞𑀢𑀻𑀢𑀺 𑀫𑀼𑀔𑀸𑀞𑀸𑀦𑀁. 𑀔𑁂 𑀫𑀼𑀔𑀯𑀺𑀯𑀭𑁂 𑀮𑀻𑀦𑁄 𑀔𑀮𑀻𑀦𑁄. ‘‘𑀓𑀯𑀺𑀓𑀸 𑀢𑀼 𑀔𑀮𑀻𑀦𑁄𑀢𑀺 [𑀔𑀮𑀻𑀦𑁂 𑀣𑀻 (?)], 𑀓𑀯𑀺𑀬𑀁 𑀓𑀣𑀦𑀁𑀢𑁆𑀬𑀧𑀻’’𑀢𑀺 𑀭𑀪𑀲𑁄. 𑀓𑀯𑀺, 𑀓𑀯𑀺𑀓𑀸𑀧𑁆𑀬𑀢𑁆𑀭. 𑀓𑀼 𑀲𑀤𑁆𑀤𑁂. 𑀇, 𑀈 𑀘, 𑀲𑀓𑀢𑁆𑀣𑁂 𑀓𑁄. 𑀯𑀸𑀲𑀤𑁆𑀤𑁂𑀦 𑀦𑀧𑀼𑀁𑀲𑀓𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀯𑀼𑀢𑁆𑀢𑀜𑁆𑀘 𑀅𑀫𑀭𑀓𑁄𑀲𑁂 ‘‘𑀓𑀯𑀺𑀓𑀸 𑀢𑀼 𑀔𑀮𑀻𑀦𑁄’𑀦𑀺𑀢𑁆𑀣𑀻’’𑀢𑀺 [𑀅𑀫𑀭 𑁧𑁮.𑁪𑁯].

𑀅𑀲𑁆𑀲𑀸𑀪𑀺𑀢𑀸𑀴𑀺𑀦𑀻 𑀯𑁂𑀢𑁆𑀢𑀯𑀺𑀓𑀢𑀸𑀤𑀺 𑀓𑀲𑀸 𑀦𑀸𑀫. 𑀓𑀲 𑀕𑀫𑀦𑁂, 𑀅, 𑀓𑀭𑀡𑀲𑀸𑀥𑀦𑀁.

𑁩𑁭𑁧. 𑀅𑀲𑁆𑀲𑀲𑁆𑀲 𑀦𑀸𑀲𑀸𑀕𑀢𑀭𑀚𑁆𑀚𑀼𑀫𑁆𑀳𑀺 𑀓𑀼𑀲𑀸, 𑀓𑀼𑀲 𑀲𑀺𑀮𑁂𑀲𑀦𑁂. 𑀤𑁆𑀯𑀬𑀁 𑀅𑀲𑁆𑀲𑀸𑀬𑀁. 𑀯𑀮 𑀲𑀁𑀯𑀭𑀡𑁂, 𑀯𑁄, 𑀴𑀢𑁆𑀢𑀁, 𑀆, 𑀯𑀴𑀯𑀸. 𑀅𑀲𑀢𑀻𑀢𑀺 𑀅𑀲𑁆𑀲𑀸, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅, 𑀆 𑀘, 𑀅𑀲𑁆𑀲𑀸. 𑀯𑀸𑀫𑀻𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀔𑀼𑀭𑁂. 𑀔𑀼𑀭 𑀙𑁂𑀤𑀦𑁂. 𑀲𑀁 𑀲𑀼𑀔𑀁 𑀨𑀭𑀢𑁆𑀬𑀦𑁂𑀦 𑀲𑀨𑀁, 𑀦𑁂𑀭𑀼𑀢𑁆𑀢𑁄. ‘‘𑀲𑀨𑀁 𑀓𑁆𑀮𑀻𑀯𑁂 𑀔𑀼𑀭𑁄 𑀧𑀼𑀫𑀸’’𑀢𑀺 [𑀅𑀫𑀭 𑁧𑁮.𑁪𑁯] 𑀅𑀫𑀭𑀓𑁄𑀲𑁄.

𑀤𑁆𑀯𑀬𑀁 𑀧𑀼𑀘𑁆𑀙𑀫𑀢𑁆𑀢𑁂. 𑀧𑀼𑀘𑁆𑀙 𑀧𑀫𑀸𑀤𑁂. 𑀦 𑀕𑀘𑁆𑀙𑀢𑀻𑀢𑀺 𑀦𑀗𑁆𑀕𑀼𑀝𑁆𑀞𑁄, 𑀅𑀗𑁆𑀕 𑀕𑀫𑀦𑁂, 𑀞𑁄, 𑀅𑀲𑁆𑀲𑀼, 𑀤𑁆𑀯𑁂𑀧𑀺 𑀅𑀦𑀺𑀢𑁆𑀣𑀺𑀬𑀁. 𑀮𑀽𑀫𑀁𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀓𑁂𑀲𑀯𑀢𑀺 𑀦𑀗𑁆𑀕𑀼𑀝𑁆𑀞𑀫𑀢𑁆𑀢𑁂, 𑀦 𑀢𑀼 𑀳𑀢𑁆𑀣𑀺𑀦𑁄 𑀏𑀯. 𑀯𑀸𑀮𑀲𑀫𑀽𑀳𑀬𑁄𑀕𑀸 𑀯𑀸𑀮𑀳𑀢𑁆𑀣𑁄, 𑀬𑀣𑀸 𑀓𑁂𑀲𑀳𑀢𑁆𑀣𑁄 𑀘𑀬𑁂, 𑀢𑀣𑀸𑀢𑁆𑀭𑀸𑀧𑀺. 𑀯𑀸𑀮𑁄 𑀥𑀺𑀬𑁆𑀬𑀢𑁂 𑀅𑀲𑁆𑀫𑀺𑀦𑁆𑀢𑀺 𑀯𑀸𑀮𑀥𑀺, 𑀇.

𑀏𑀢𑁆𑀣𑀸𑀦𑀸𑀕𑀢𑀸𑀧𑀺 𑀅𑀲𑁆𑀲𑀲𑁆𑀲 𑀥𑀸𑀭𑀸𑀔𑁆𑀬𑀸 [𑀥𑀸𑀯𑀸𑀔𑁆𑀬𑀸 (𑀓.)] 𑀧𑀜𑁆𑀘 𑀕𑀢𑀺𑀬𑁄 𑀓𑀣𑁂𑀢𑀩𑁆𑀩𑀸. 𑀬𑀣𑀸 𑁋

𑀅𑀓𑁆𑀓𑀦𑁆𑀤𑀺𑀢𑀁 𑀥𑁄𑀭𑀺𑀢𑀓𑀁, 𑀭𑁂𑀘𑀺𑀢𑀁 𑀯𑀕𑁆𑀕𑀺𑀢𑀁 𑀧𑁆𑀮𑀼𑀢𑀁;

𑀕𑀢𑀺𑀬𑁄𑀫𑁂 𑀧𑀜𑁆𑀘 𑀥𑀸𑀭𑀸 [𑀥𑀸𑀯𑀸 (𑀓.)], 𑀅𑀲𑁆𑀲𑀸𑀦𑀁 𑀯𑀺𑀜𑁆𑀜𑀼𑀦𑀸 𑀫𑀢𑀸 [𑀅𑀫𑀭 𑁧𑁮.𑁪𑁮-𑁯].

𑀢𑀢𑁆𑀣 𑀯𑀺𑀢𑁆𑀣𑀫𑁆𑀪𑀸 𑀲𑀫𑀸𑀯𑀕𑀢𑀺 𑀅𑀓𑁆𑀓𑀦𑁆𑀤𑀺𑀢𑀁, 𑀓𑀦𑁆𑀤𑀺 𑀕𑀢𑀺𑀲𑁄𑀲𑀦𑁂𑀲𑀼, 𑀢𑁄. 𑀢𑀢𑁄 𑀅𑀥𑀺𑀓𑀸 𑀘𑀢𑀼𑀭𑀸𑀕𑀢𑀺 𑀥𑁄𑀭𑀺𑀢𑀓𑀁, 𑀥𑁄𑀭 𑀕𑀢𑀺𑀘𑀸𑀢𑀼𑀭𑀺𑀬𑁂, 𑀢𑁄, 𑀲𑀓𑀢𑁆𑀣𑁂 𑀓𑁄. 𑀫𑀡𑁆𑀟𑀮𑀺𑀓𑀸𑀬𑀸𑀦𑁂𑀦 𑀕𑀫𑀦𑀁 𑀭𑁂𑀘𑀺𑀢𑀁, 𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀩𑀚𑁆𑀛𑀦𑁂𑀲𑀼, 𑀲𑀫𑁆𑀩𑀚𑁆𑀛𑀦𑀁 𑀫𑀺𑀲𑁆𑀲𑀦𑀁. 𑀯𑁂𑀕𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀧𑀭𑀺𑀘𑀭𑀡𑀁 𑀯𑀕𑁆𑀕𑀺𑀢𑀁, 𑀯𑀕𑁆𑀕 𑀕𑀫𑀦𑀢𑁆𑀣𑁄. 𑀢𑀼𑀭𑀁 𑀲𑀫𑁂𑀦 𑀕𑀫𑀦𑀁 𑀧𑁆𑀮𑀼𑀢𑀁, 𑀧𑁆𑀮𑀼 𑀕𑀢𑀺𑀬𑀁. 𑀢’𑀤𑀼𑀢𑁆𑀢’𑀫𑀲𑁆𑀲𑀲𑀢𑁆𑀣𑁂 ‘‘𑀲𑀫𑁄’𑀥𑀺𑀓𑁄 𑀮𑀬𑁄 𑀯𑁂𑀕𑀻, 𑀢𑀼𑀭𑀺𑀢𑀲𑁆𑀲𑁄 𑀪𑀯𑁂 𑀓𑀫𑀸’’𑀢𑀺.

𑁩𑁭𑁨. 𑀤𑁆𑀯𑀬𑀁 𑀬𑀼𑀤𑁆𑀥𑀢𑁆𑀣𑁂 𑀘𑀓𑁆𑀓𑀬𑀼𑀢𑁆𑀢𑀬𑀸𑀦𑁂. 𑀲𑀦𑁆𑀤 𑀕𑀫𑀦𑁂, 𑀲𑀦𑁆𑀤𑀢𑁂 𑀕𑀫𑁆𑀬𑀢𑁂𑀦𑁂𑀦𑁂𑀢𑀺 𑀲𑀦𑁆𑀤𑀦𑁄, 𑀬𑀼. 𑀭𑀫𑀢𑁂𑀦𑁂𑀦𑁂𑀢𑀺 𑀭𑀣𑁄, 𑀣𑁄, 𑀫𑀮𑁄𑀧𑁄. 𑀲𑀢𑀗𑁆𑀕𑁄𑀧𑁆𑀬𑀢𑁆𑀭. 𑀲𑀢𑀫𑀗𑁆𑀕𑀸𑀦𑁆𑀬𑀲𑁆𑀲.

𑀬𑀁 𑀦 𑀭𑀡𑀸𑀬 𑀬𑀼𑀤𑁆𑀥𑀢𑁆𑀣𑀁 𑀘𑀓𑁆𑀓𑀬𑀼𑀢𑁆𑀢𑀁 𑀬𑀸𑀦𑀁, 𑀅𑀧𑀺 𑀢𑀼 𑀓𑀻𑀴𑀸𑀪𑀫𑀦𑀸𑀤𑁆𑀬𑀢𑁆𑀣𑀁, 𑀲𑁄 𑀧𑀼𑀲𑁆𑀲𑀭𑀣𑁄. 𑀯𑀼𑀢𑁆𑀢𑀜𑁆𑀘 𑀅𑀫𑀭𑀓𑁄𑀲𑁂 ‘‘𑀅𑀬𑀁 𑀧𑀼𑀲𑁆𑀲𑀭𑀣𑁄 𑀘𑀓𑁆𑀓-𑀬𑀸𑀦𑀁 𑀦 𑀲𑀫𑀭𑀸𑀬 𑀬’’𑀦𑁆𑀢𑀺 [𑀅𑀫𑀭 𑁧𑁮.𑁫𑁧]. 𑀧𑀼𑀲 𑀧𑀸𑀲𑀦𑁂, 𑀲𑁄, 𑀧𑀼𑀲𑀦𑀸𑀫𑀓𑁂𑀦 𑀨𑀮𑀯𑀺𑀲𑁂𑀲𑁂𑀦 𑀬𑀼𑀢𑁆𑀢𑁄 𑀭𑀣𑁄 𑀧𑀼𑀲𑁆𑀲𑀭𑀣𑁄, 𑀧𑀼𑀲𑁆𑀲𑀦𑀓𑁆𑀔𑀢𑁆𑀢𑁂𑀦 𑀓𑀢𑁄, 𑀲𑀚𑁆𑀚𑀺𑀢𑁄 𑀯𑀸 𑀭𑀣𑁄𑀢𑀺 𑀧𑀼𑀲𑁆𑀲𑀭𑀣𑁄.

𑀩𑁆𑀬𑀕𑁆𑀖𑀲𑁆𑀲 𑀘𑀫𑁆𑀫𑀸𑀯𑀼𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀭𑀣𑁄 𑀯𑁂𑀬𑁆𑀬𑀕𑁆𑀖𑁄 𑀦𑀸𑀫, 𑀩𑁆𑀬𑀕𑁆𑀖𑀲𑁆𑀲 𑀯𑀺𑀓𑀸𑀭𑁄 𑀘𑀫𑁆𑀫𑀁 𑀯𑁂𑀬𑁆𑀬𑀕𑁆𑀖𑀁, 𑀡𑁄, 𑀢𑁂𑀦 𑀧𑀭𑀺𑀯𑀼𑀢𑁄 𑀭𑀣𑁄 𑀯𑁂𑀬𑁆𑀬𑀕𑁆𑀖𑁄, 𑀡𑁄, 𑀉𑀪𑀬𑀢𑁆𑀭𑀸𑀧𑀺 𑀯𑀼𑀟𑁆𑀠𑀸𑀕𑀫𑁄. ‘‘𑀧𑀘𑁆𑀘𑀢𑁆𑀢𑀁 [𑀧𑀘𑁆𑀘𑀢𑁆𑀣𑀁 (𑀓.)] 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀘𑀦𑀢𑁆𑀣𑀢𑁄 𑀧𑀘𑁆𑀘𑀢𑁆𑀢𑀫𑁂𑀯 [𑀧𑀘𑁆𑀘𑀢𑁆𑀣𑀫𑁂𑀯 (?)] 𑀧𑀘𑁆𑀘𑀬𑀸 𑀪𑀯𑀦𑁆𑀢𑀺, 𑀬𑀣𑀸 𑀓𑀸𑀭𑀺𑀢𑀦𑁆𑀢𑀲𑁆𑀫𑀸𑀧𑀺 𑀧𑀬𑁄𑀚𑀓𑀯𑀲𑁂𑀦 𑀅𑀦𑁂𑀓𑀓𑀸𑀭𑀺𑀢𑀧𑀘𑁆𑀘𑀬𑀸. 𑀤𑀻𑀧𑀺𑀦𑁄 𑀘𑀫𑁆𑀫𑀸𑀯𑀼𑀢𑁄 𑀭𑀣𑁄 𑀤𑀻𑀧𑁄 𑀦𑀸𑀫, 𑀤𑀻𑀧𑀺𑀦𑁄 𑀯𑀺𑀓𑀸𑀭𑁄 𑀘𑀫𑁆𑀫𑀁 𑀤𑀻𑀧𑀁, 𑀡𑁄, 𑀢𑁂𑀦 𑀧𑀭𑀺𑀯𑀼𑀢𑁄 𑀭𑀣𑁄 𑀤𑀻𑀧𑁄, 𑀡𑁄.

𑁩𑁭𑁩. 𑀤𑁆𑀯𑀬𑀁 𑀧𑀼𑀭𑀺𑀲𑀬𑀼𑀢𑁆𑀢𑀬𑀸𑀦𑁂. 𑀲𑀺 𑀲𑁂𑀯𑀸𑀬𑀁. 𑀲𑀼𑀔𑀢𑁆𑀣𑀺𑀓𑁂𑀳𑀺 𑀲𑁂𑀯𑀻𑀬𑀢𑁂𑀢𑀺 𑀲𑀺𑀯𑀺𑀓𑀸, 𑀡𑁆𑀯𑀼, 𑀯𑀸𑀕𑀫𑁄, 𑀇𑀢𑁆𑀢𑀁, 𑀓𑀺𑀢𑀧𑀘𑁆𑀘𑀬𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀓𑀫𑁆𑀫𑀸𑀤𑀻𑀲𑀼𑀧𑀺 𑀯𑀢𑁆𑀢𑀦𑁆𑀢𑀺, 𑀓𑀺𑀘𑁆𑀘𑀧𑀘𑁆𑀘𑀬𑀸 𑀘 𑀓𑀢𑁆𑀢𑀭𑀺𑀧𑀺, 𑀬𑀣𑀸 ‘‘𑀯𑀺𑀦𑀬𑁄, 𑀦𑀺𑀲𑁆𑀲𑀬𑁄, 𑀢𑀧𑀦𑀻𑀬𑀸 𑀥𑀫𑁆𑀫𑀸’’𑀢𑁆𑀬𑀸𑀤𑀻𑀲𑀼, 𑀫𑀳𑀸𑀧𑀤𑁂𑀲𑁂𑀦 𑀯𑀸 𑀓𑀺𑀢𑀓𑀺𑀘𑁆𑀘𑀧𑀘𑁆𑀘𑀬𑀸𑀦𑀁 𑀓𑀢𑁆𑀢𑀼𑀓𑀫𑁆𑀫𑀸𑀤𑀻𑀲𑁆𑀯𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀺𑀯𑀁 𑀓𑀭𑁄𑀢𑀻𑀢𑀺 𑀯𑀸 𑀲𑀺𑀯𑀺𑀓𑀸, 𑀇𑀓𑁄. 𑀬𑀸𑀧𑁆𑀬𑁂𑀳𑀺 𑀅𑀥𑀫𑁂𑀳𑀺 𑀬𑀸𑀬𑀢𑁂 𑀦𑀺𑀬𑁆𑀬𑀢𑁂𑀢𑀺 𑀬𑀸𑀧𑁆𑀬𑀬𑀸𑀦𑀁. ‘‘𑀬𑀸𑀧𑁆𑀬 𑀧𑀸𑀦𑀻𑀬𑀓𑁂 𑀦𑀺𑀦𑁆𑀤𑁆𑀬𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑀤𑁆𑀯𑀬𑀁 𑀲𑀓𑀝𑁂. 𑀅𑀦𑀺𑀢𑁆𑀣𑀻 𑀢𑀽𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀲𑀓 𑀲𑀢𑁆𑀢𑀺𑀬𑀁, 𑀅𑀝𑁄. 𑀅𑀦 𑀧𑀸𑀡𑀦𑁂, 𑀓𑀭𑀡𑀲𑀸𑀥𑀦𑀁, 𑀦𑀢𑁆𑀣𑀺 𑀦𑀸𑀲𑀸 𑀬𑀲𑁆𑀲𑀸𑀢𑀺 𑀯𑀸 𑀅𑀦𑀁, 𑀲𑀸𑀮𑁄𑀧𑁄, 𑀭𑀲𑁆𑀲𑁄 𑀘. 𑀓𑁆𑀮𑀻𑀯𑁂’𑀦𑀁, 𑀲𑀓𑀝𑁄, 𑀦𑀺𑀢𑁆𑀣𑀻𑀢𑁆𑀬𑀫𑀭𑀓𑁄𑀲𑁄 [𑀅𑀫𑀭 𑁧𑁮.𑁫𑁨].

𑀤𑁆𑀯𑀬𑀁 𑀘𑀓𑁆𑀓𑁂. 𑀓𑀭𑁄𑀢𑀺 𑀕𑀫𑀦𑀫𑀦𑁂𑀦𑁂𑀢𑀺 𑀘𑀓𑁆𑀓𑀁, 𑀤𑁆𑀯𑀺𑀢𑁆𑀢𑀁, 𑀘𑀓𑁆𑀓𑀸𑀤𑀺. 𑀭𑀣𑀲𑁆𑀲 𑀅𑀗𑁆𑀕𑀁 𑀭𑀣𑀗𑁆𑀕𑀁. 𑀢𑀲𑁆𑀲 𑀘𑀓𑁆𑀓𑀲𑁆𑀲 𑀅𑀦𑁆𑀢𑁄 𑀅𑀯𑀲𑀸𑀦𑀁 𑀦𑁂𑀫𑀺, 𑀲𑀸 𑀦𑀸𑀭𑀺𑀬𑀁 𑀇𑀢𑁆𑀣𑀺𑀬𑀁. 𑀦𑀬𑀢𑀺 𑀘𑀓𑁆𑀓𑀁 𑀦𑁂𑀫𑀺. 𑀬𑀸 𑀪𑀽𑀫𑀺𑀁 𑀨𑀼𑀲𑀢𑀺, 𑀦𑀻 𑀦𑀬𑁂, 𑀫𑀺, 𑀈𑀧𑀘𑁆𑀘𑀬𑁂 𑀦𑁂𑀫𑀻 𑀘. 𑀧𑀥𑀺𑀧𑁆𑀬𑀢𑁆𑀭.

𑁩𑁭𑁪. 𑀢𑀫𑁆𑀫𑀚𑁆𑀛𑁂 𑀢𑀲𑁆𑀲 𑀭𑀣𑀲𑁆𑀲, 𑀘𑀓𑁆𑀓𑀲𑁆𑀲 𑀯𑀸 𑀫𑀚𑁆𑀛𑁂 𑀘𑀓𑁆𑀓𑀸𑀓𑀸𑀭𑁄 𑀧𑀺𑀡𑁆𑀟𑀺𑀓𑀸, 𑀬𑀲𑁆𑀲𑀁 𑀲𑀩𑁆𑀩𑀸𑀦𑀺 𑀓𑀝𑁆𑀞𑀸𑀦𑀺 𑀆𑀲𑀚𑁆𑀚𑀦𑁆𑀢𑁂. 𑀧𑀺𑀡𑁆𑀟𑀺𑀓𑀸𑀲𑀸𑀳𑀘𑀭𑀺𑀬𑀸 𑀦𑀸𑀪𑀺 𑀇𑀢𑁆𑀣𑀻, 𑀈𑀧𑀘𑁆𑀘𑀬𑁂 𑀦𑀸𑀪𑀻 𑀘. 𑀲𑀩𑁆𑀩𑀸𑀦𑀺 𑀓𑀝𑁆𑀞𑀸𑀦𑀺 𑀧𑀺𑀡𑁆𑀟𑁂𑀢𑀻𑀢𑀺 𑀧𑀺𑀡𑁆𑀟𑀺𑀓𑀸, 𑀧𑀺𑀡𑁆𑀟 𑀲𑀗𑁆𑀖𑀸𑀢𑁂, 𑀅, 𑀲𑀓𑀢𑁆𑀣𑁂 𑀓𑁄. 𑀧𑀺𑀡𑁆𑀟𑀻𑀧𑀺, 𑀦𑀸𑀪𑀺 𑀯𑀺𑀬𑀸𑀢𑀺 𑀦𑀸𑀪𑀺.