𑁧𑁨. 𑀥𑀫𑁆𑀫𑀺𑀓𑀲𑀼𑀢𑁆𑀢𑀁

𑁫𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀚𑀸𑀢𑀺𑀪𑀽𑀫𑀺𑀬𑀁 𑀆𑀯𑀸𑀲𑀺𑀓𑁄 𑀳𑁄𑀢𑀺 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀲𑀼 𑀆𑀯𑀸𑀲𑁂𑀲𑀼. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀯𑀺𑀳𑀺𑀁𑀲𑀢𑀺 𑀯𑀺𑀢𑀼𑀤𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬. 𑀢𑁂 𑀘 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑀸 𑀥𑀫𑁆𑀫𑀺𑀓𑁂𑀦 𑀅𑀓𑁆𑀓𑁄𑀲𑀺𑀬𑀫𑀸𑀦𑀸 𑀧𑀭𑀺𑀪𑀸𑀲𑀺𑀬𑀫𑀸𑀦𑀸 𑀯𑀺𑀳𑁂𑀲𑀺𑀬𑀫𑀸𑀦𑀸 𑀯𑀺𑀢𑀼𑀤𑀺𑀬𑀫𑀸𑀦𑀸 𑀭𑁄𑀲𑀺𑀬𑀫𑀸𑀦𑀸 𑀯𑀸𑀘𑀸𑀬 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺 [𑀦 𑀲𑀡𑁆𑀞𑀳𑀦𑁆𑀢𑀺 (𑀲𑀻.)], 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁.

𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸𑀦𑀁 [𑀚𑀸𑀢𑀺𑀪𑀽𑀫𑀺𑀓𑀸𑀦𑀁 (𑀲𑁆𑀬𑀸. 𑀧𑀻. 𑀓.)] 𑀉𑀧𑀸𑀲𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀅𑀣 𑀘 𑀧𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁. 𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲’’𑀦𑁆𑀢𑀺? 𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀯𑀺𑀳𑀺𑀁𑀲𑀢𑀺 𑀯𑀺𑀢𑀼𑀤𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬. 𑀢𑁂 𑀘 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑀸 𑀥𑀫𑁆𑀫𑀺𑀓𑁂𑀦 𑀅𑀓𑁆𑀓𑁄𑀲𑀺𑀬𑀫𑀸𑀦𑀸 𑀧𑀭𑀺𑀪𑀸𑀲𑀺𑀬𑀫𑀸𑀦𑀸 𑀯𑀺𑀳𑁂𑀲𑀺𑀬𑀫𑀸𑀦𑀸 𑀯𑀺𑀢𑀼𑀤𑀺𑀬𑀫𑀸𑀦𑀸 𑀭𑁄𑀲𑀺𑀬𑀫𑀸𑀦𑀸 𑀯𑀸𑀘𑀸𑀬 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁. 𑀬𑀁𑀦𑀽𑀦 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸 𑀉𑀧𑀸𑀲𑀓𑀸 𑀬𑁂𑀦 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀓𑁆𑀓𑀫𑀢𑀼, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀇𑀫𑀫𑁆𑀳𑀸 𑀆𑀯𑀸𑀲𑀸; 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀢𑀫𑁆𑀳𑀸 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀧𑀺 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀯𑀺𑀳𑀺𑀁𑀲𑀢𑀺 𑀯𑀺𑀢𑀼𑀤𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬. 𑀢𑁂 𑀘 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑀸 𑀥𑀫𑁆𑀫𑀺𑀓𑁂𑀦 𑀅𑀓𑁆𑀓𑁄𑀲𑀺𑀬𑀫𑀸𑀦𑀸 𑀧𑀭𑀺𑀪𑀸𑀲𑀺𑀬𑀫𑀸𑀦𑀸 𑀯𑀺𑀳𑁂𑀲𑀺𑀬𑀫𑀸𑀦𑀸 𑀯𑀺𑀢𑀼𑀤𑀺𑀬𑀫𑀸𑀦𑀸 𑀭𑁄𑀲𑀺𑀬𑀫𑀸𑀦𑀸 𑀯𑀸𑀘𑀸𑀬 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁.

𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀅𑀣 𑀘 𑀧𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁. 𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲’’𑀦𑁆𑀢𑀺? 𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀯𑀺𑀳𑀺𑀁𑀲𑀢𑀺 𑀯𑀺𑀢𑀼𑀤𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬. 𑀢𑁂 𑀘 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑀸 𑀥𑀫𑁆𑀫𑀺𑀓𑁂𑀦 𑀅𑀓𑁆𑀓𑁄𑀲𑀺𑀬𑀫𑀸𑀦𑀸 𑀧𑀭𑀺𑀪𑀸𑀲𑀺𑀬𑀫𑀸𑀦𑀸 𑀯𑀺𑀳𑁂𑀲𑀺𑀬𑀫𑀸𑀦𑀸 𑀯𑀺𑀢𑀼𑀤𑀺𑀬𑀫𑀸𑀦𑀸 𑀭𑁄𑀲𑀺𑀬𑀫𑀸𑀦𑀸 𑀯𑀸𑀘𑀸𑀬 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁. 𑀬𑀁𑀦𑀽𑀦 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸 𑀉𑀧𑀸𑀲𑀓𑀸 𑀬𑁂𑀦𑀸𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀓𑁆𑀓𑀫𑀢𑀼, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀇𑀫𑀫𑁆𑀳𑀸𑀧𑀺 𑀆𑀯𑀸𑀲𑀸; 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀢𑀫𑁆𑀳𑀸𑀧𑀺 𑀆𑀯𑀸𑀲𑀸 𑀅𑀜𑁆𑀜𑀁 𑀆𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀧𑀺 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺 𑀯𑀺𑀳𑀺𑀁𑀲𑀢𑀺 𑀯𑀺𑀢𑀼𑀤𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬. 𑀢𑁂 𑀘 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑀸 𑀥𑀫𑁆𑀫𑀺𑀓𑁂𑀦 𑀅𑀓𑁆𑀓𑁄𑀲𑀺𑀬𑀫𑀸𑀦𑀸 𑀧𑀭𑀺𑀪𑀸𑀲𑀺𑀬𑀫𑀸𑀦𑀸 𑀯𑀺𑀳𑁂𑀲𑀺𑀬𑀫𑀸𑀦𑀸 𑀯𑀺𑀢𑀼𑀤𑀺𑀬𑀫𑀸𑀦𑀸 𑀭𑁄𑀲𑀺𑀬𑀫𑀸𑀦𑀸 𑀯𑀸𑀘𑀸𑀬 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁.

𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀅𑀣 𑀘 𑀧𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲𑀁. 𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀓𑁆𑀓𑀫𑀦𑁆𑀢𑀺, 𑀦 𑀲𑀡𑁆𑀞𑀦𑁆𑀢𑀺, 𑀭𑀺𑀜𑁆𑀘𑀦𑁆𑀢𑀺 𑀆𑀯𑀸𑀲’’𑀦𑁆𑀢𑀺? 𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺…𑀧𑁂…. 𑀬𑀁𑀦𑀽𑀦 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀫 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀳𑀺 𑀆𑀯𑀸𑀲𑁂𑀳𑀻’’𑀢𑀺. 𑀅𑀣 𑀔𑁄 𑀚𑀸𑀢𑀺𑀪𑀽𑀫𑀓𑀸 𑀉𑀧𑀸𑀲𑀓𑀸 𑀬𑁂𑀦𑀸𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀓𑁆𑀓𑀫𑀢𑀼, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀳𑀺 𑀆𑀯𑀸𑀲𑁂𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀺𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀩𑁆𑀩𑀸𑀚𑀺𑀢𑁄 𑀔𑁄𑀫𑁆𑀳𑀺 𑀚𑀸𑀢𑀺𑀪𑀽𑀫𑀓𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀳𑀺 𑀆𑀯𑀸𑀲𑁂𑀳𑀺. 𑀓𑀳𑀁 𑀦𑀼 𑀔𑁄 𑀤𑀸𑀦𑀺 𑀕𑀘𑁆𑀙𑀸𑀫𑀻’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀺𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀥𑀫𑁆𑀫𑀺𑀓𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀭𑀸𑀚𑀕𑀳𑀁 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀆𑀕𑀘𑁆𑀙𑀲𑀻’’𑀢𑀺? ‘‘𑀧𑀩𑁆𑀩𑀸𑀚𑀺𑀢𑁄 𑀅𑀳𑀁, 𑀪𑀦𑁆𑀢𑁂, 𑀚𑀸𑀢𑀺𑀪𑀽𑀫𑀓𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀳𑀺 𑀆𑀯𑀸𑀲𑁂𑀳𑀻’’𑀢𑀺. ‘‘𑀅𑀮𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀓𑀺𑀁 𑀢𑁂 𑀇𑀫𑀺𑀦𑀸, 𑀬𑀁 𑀢𑀁 𑀢𑀢𑁄 𑀢𑀢𑁄 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀲𑁄 𑀢𑁆𑀯𑀁 𑀢𑀢𑁄 𑀢𑀢𑁄 𑀧𑀩𑁆𑀩𑀸𑀚𑀺𑀢𑁄 𑀫𑀫𑁂𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑀲𑀺’’.

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀸𑀫𑀼𑀤𑁆𑀤𑀺𑀓𑀸 𑀯𑀸𑀡𑀺𑀚𑀸 𑀢𑀻𑀭𑀤𑀲𑁆𑀲𑀺𑀁 𑀲𑀓𑀼𑀡𑀁 𑀕𑀳𑁂𑀢𑁆𑀯𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑀺. 𑀢𑁂 𑀅𑀢𑀻𑀭𑀤𑀓𑁆𑀔𑀺𑀡𑀺𑀬𑀸 [𑀅𑀢𑀻𑀭𑀤𑀲𑁆𑀲𑀦𑀺𑀬𑀸 (𑀲𑁆𑀬𑀸.), 𑀅𑀢𑀻𑀭𑀤𑀲𑁆𑀲𑀺𑀬𑀸 (𑀓.)] 𑀦𑀸𑀯𑀸𑀬 𑀢𑀻𑀭𑀤𑀲𑁆𑀲𑀺𑀁 𑀲𑀓𑀼𑀡𑀁 𑀫𑀼𑀜𑁆𑀘𑀦𑁆𑀢𑀺. 𑀲𑁄 𑀕𑀘𑁆𑀙𑀢𑁂𑀯 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀢𑁆𑀢𑀭𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀤𑀓𑁆𑀔𑀺𑀡𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀤𑁆𑀥𑀁, 𑀕𑀘𑁆𑀙𑀢𑀺 𑀅𑀦𑀼𑀤𑀺𑀲𑀁. 𑀲𑀘𑁂 𑀲𑁄 𑀲𑀫𑀦𑁆𑀢𑀸 𑀢𑀻𑀭𑀁 𑀧𑀲𑁆𑀲𑀢𑀺, 𑀢𑀣𑀸𑀕𑀢𑀓𑁄𑀯 [𑀢𑀣𑀸𑀕𑀢𑁄 (𑀓.) 𑀤𑀻. 𑀦𑀺. 𑁧.𑁪𑁯𑁭 𑀧𑀲𑁆𑀲𑀺𑀢𑀩𑁆𑀩𑀁] 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀲𑀫𑀦𑁆𑀢𑀸 𑀢𑀻𑀭𑀁 𑀦 𑀧𑀲𑁆𑀲𑀢𑀺 𑀢𑀫𑁂𑀯 𑀦𑀸𑀯𑀁 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀬𑀁 𑀢𑀁 𑀢𑀢𑁄 𑀢𑀢𑁄 𑀧𑀩𑁆𑀩𑀸𑀚𑁂𑀦𑁆𑀢𑀺 𑀲𑁄 𑀢𑁆𑀯𑀁 𑀢𑀢𑁄 𑀢𑀢𑁄 𑀧𑀩𑁆𑀩𑀸𑀚𑀺𑀢𑁄 𑀫𑀫𑁂𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑀲𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑁄 𑀦𑀸𑀫 𑀦𑀺𑀕𑁆𑀭𑁄𑀥𑀭𑀸𑀚𑀸 𑀅𑀳𑁄𑀲𑀺 𑀧𑀜𑁆𑀘𑀲𑀸𑀔𑁄 𑀲𑀻𑀢𑀘𑁆𑀙𑀸𑀬𑁄 𑀫𑀦𑁄𑀭𑀫𑁄. 𑀲𑀼𑀧𑁆𑀧𑀢𑀺𑀝𑁆𑀞𑀲𑁆𑀲 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀅𑀪𑀺𑀦𑀺𑀯𑁂𑀲𑁄 𑀅𑀳𑁄𑀲𑀺, 𑀧𑀜𑁆𑀘 𑀬𑁄𑀚𑀦𑀸𑀦𑀺 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀁. 𑀲𑀼𑀧𑁆𑀧𑀢𑀺𑀝𑁆𑀞𑀲𑁆𑀲 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲 𑀢𑀸𑀯 𑀫𑀳𑀦𑁆𑀢𑀸𑀦𑀺 𑀨𑀮𑀸𑀦𑀺 𑀅𑀳𑁂𑀲𑀼𑀁; 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀆𑀴𑁆𑀳𑀓𑀣𑀸𑀮𑀺𑀓𑀸. 𑀏𑀯𑀫𑀲𑁆𑀲 𑀲𑀸𑀤𑀽𑀦𑀺 𑀨𑀮𑀸𑀦𑀺 𑀅𑀳𑁂𑀲𑀼𑀁; 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀔𑀼𑀤𑁆𑀤𑀁 𑀫𑀥𑀼𑀁 𑀅𑀦𑁂𑀮𑀓𑀁. 𑀲𑀼𑀧𑁆𑀧𑀢𑀺𑀝𑁆𑀞𑀲𑁆𑀲 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲 𑀏𑀓𑀁 𑀔𑀦𑁆𑀥𑀁 𑀭𑀸𑀚𑀸 𑀧𑀭𑀺𑀪𑀼𑀜𑁆𑀚𑀢𑀺 𑀲𑀤𑁆𑀥𑀺𑀁 𑀇𑀢𑁆𑀣𑀸𑀕𑀸𑀭𑁂𑀦, 𑀏𑀓𑀁 𑀔𑀦𑁆𑀥𑀁 𑀩𑀮𑀓𑀸𑀬𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀓𑀁 𑀔𑀦𑁆𑀥𑀁 𑀦𑁂𑀕𑀫𑀚𑀸𑀦𑀧𑀤𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀓𑀁 𑀔𑀦𑁆𑀥𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀓𑀁 𑀔𑀦𑁆𑀥𑀁 𑀫𑀺𑀕𑀸 [𑀫𑀺𑀕𑀧𑀓𑁆𑀔𑀺𑀦𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀲𑀼𑀧𑁆𑀧𑀢𑀺𑀝𑁆𑀞𑀲𑁆𑀲 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲 𑀦 𑀓𑁄𑀘𑀺 𑀨𑀮𑀸𑀦𑀺 𑀭𑀓𑁆𑀔𑀢𑀺, 𑀦 𑀘 𑀲𑀼𑀤𑀁 [𑀦 𑀘 𑀧𑀼𑀦 (𑀓.)] 𑀅𑀜𑁆𑀜𑀫𑀜𑁆𑀜𑀲𑁆𑀲 𑀨𑀮𑀸𑀦𑀺 𑀳𑀺𑀁𑀲𑀦𑁆𑀢𑀺.

‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀲𑁆𑀲 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲 𑀬𑀸𑀯𑀤𑀢𑁆𑀣𑀁 𑀨𑀮𑀸𑀦𑀺 𑀪𑀓𑁆𑀔𑀺𑀢𑁆𑀯𑀸 𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀼𑀧𑁆𑀧𑀢𑀺𑀝𑁆𑀞𑁂 𑀦𑀺𑀕𑁆𑀭𑁄𑀥𑀭𑀸𑀚𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀬𑀸𑀯 𑀧𑀸𑀧𑁄 𑀫𑀦𑀼𑀲𑁆𑀲𑁄 [𑀬𑀸𑀯 𑀧𑀸𑀧𑀫𑀦𑀼𑀲𑁆𑀲𑁄 (𑀲𑁆𑀬𑀸.), 𑀬𑀸𑀯𑀢𑀸 𑀧𑀸𑀧𑀫𑀦𑀼𑀲𑁆𑀲𑁄 (𑀓.)], 𑀬𑀢𑁆𑀭 𑀳𑀺 𑀦𑀸𑀫 𑀲𑀼𑀧𑁆𑀧𑀢𑀺𑀝𑁆𑀞𑀲𑁆𑀲 𑀦𑀺𑀕𑁆𑀭𑁄𑀥𑀭𑀸𑀚𑀲𑁆𑀲 𑀬𑀸𑀯𑀤𑀢𑁆𑀣𑀁 𑀨𑀮𑀸𑀦𑀺 𑀪𑀓𑁆𑀔𑀺𑀢𑁆𑀯𑀸 𑀲𑀸𑀔𑀁 𑀪𑀜𑁆𑀚𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀬𑀁𑀦𑀽𑀦 𑀲𑀼𑀧𑁆𑀧𑀢𑀺𑀝𑁆𑀞𑁄 𑀦𑀺𑀕𑁆𑀭𑁄𑀥𑀭𑀸𑀚𑀸 𑀆𑀬𑀢𑀺𑀁 𑀨𑀮𑀁 𑀦 𑀤𑀤𑁂𑀬𑁆𑀬𑀸’𑀢𑀺. 𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀼𑀧𑁆𑀧𑀢𑀺𑀝𑁆𑀞𑁄 𑀦𑀺𑀕𑁆𑀭𑁄𑀥𑀭𑀸𑀚𑀸 𑀆𑀬𑀢𑀺𑀁 𑀨𑀮𑀁 𑀦 𑀅𑀤𑀸𑀲𑀺.

‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀭𑀸𑀚𑀸 𑀓𑁄𑀭𑀩𑁆𑀬𑁄 𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀬𑀕𑁆𑀖𑁂, 𑀫𑀸𑀭𑀺𑀲, 𑀚𑀸𑀦𑁂𑀬𑁆𑀬𑀸𑀲𑀺 𑀲𑀼𑀧𑁆𑀧𑀢𑀺𑀝𑁆𑀞𑁄 𑀦𑀺𑀕𑁆𑀭𑁄𑀥𑀭𑀸𑀚𑀸 𑀨𑀮𑀁 𑀦 𑀤𑁂𑀢𑀻’𑀢𑀺? 𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺 [𑀅𑀪𑀺𑀲𑀗𑁆𑀔𑀸𑀭𑁂𑀲𑀺 (𑀲𑁆𑀬𑀸. 𑀓.)], 𑀬𑀣𑀸 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀆𑀕𑀦𑁆𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀁 𑀦𑀺𑀕𑁆𑀭𑁄𑀥𑀭𑀸𑀚𑀁 𑀧𑀯𑀢𑁆𑀢𑁂𑀲𑀺 [𑀧𑀸𑀢𑁂𑀲𑀺 (𑀲𑀻. 𑀧𑀻.)] 𑀉𑀫𑁆𑀫𑀽𑀮𑀫𑀓𑀸𑀲𑀺. 𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀼𑀧𑁆𑀧𑀢𑀺𑀝𑁆𑀞𑁂 𑀦𑀺𑀕𑁆𑀭𑁄𑀥𑀭𑀸𑀚𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑁂 𑀦𑀺𑀕𑁆𑀭𑁄𑀥𑀭𑀸𑀚𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑁂 𑀦𑀺𑀕𑁆𑀭𑁄𑀥𑀭𑀸𑀚𑁂 𑀅𑀥𑀺𑀯𑀢𑁆𑀣𑀁 𑀤𑁂𑀯𑀢𑀁 𑀏𑀢𑀤𑀯𑁄𑀘 𑁋 ‘𑀓𑀺𑀁 𑀦𑀼 𑀢𑁆𑀯𑀁, 𑀤𑁂𑀯𑀢𑁂, 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸’𑀢𑀺? ‘𑀢𑀣𑀸 𑀳𑀺 𑀧𑀦 𑀫𑁂, 𑀫𑀸𑀭𑀺𑀲, 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀆𑀕𑀦𑁆𑀢𑁆𑀯𑀸 𑀪𑀯𑀦𑀁 𑀧𑀯𑀢𑁆𑀢𑁂𑀲𑀺 𑀉𑀫𑁆𑀫𑀽𑀮𑀫𑀓𑀸𑀲𑀻’𑀢𑀺. ‘𑀅𑀧𑀺 𑀦𑀼 𑀢𑁆𑀯𑀁, 𑀤𑁂𑀯𑀢𑁂, 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑀸𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀆𑀕𑀦𑁆𑀢𑁆𑀯𑀸 𑀪𑀯𑀦𑀁 𑀧𑀯𑀢𑁆𑀢𑁂𑀲𑀺 𑀉𑀫𑁆𑀫𑀽𑀮𑀫𑀓𑀸𑀲𑀻’𑀢𑀺? ‘𑀓𑀣𑀁 𑀧𑀦, 𑀫𑀸𑀭𑀺𑀲, 𑀭𑀼𑀓𑁆𑀔𑁄 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑁄 𑀳𑁄𑀢𑀻’𑀢𑀺? ‘𑀇𑀥, 𑀤𑁂𑀯𑀢𑁂, 𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀫𑀽𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀢𑀘𑀁 𑀢𑀘𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀧𑀢𑁆𑀢𑀁 𑀧𑀢𑁆𑀢𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀧𑀼𑀧𑁆𑀨𑀁 𑀧𑀼𑀧𑁆𑀨𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀨𑀮𑀁 𑀨𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺. 𑀦 𑀘 𑀢𑁂𑀦 𑀤𑁂𑀯𑀢𑀸𑀬 𑀅𑀦𑀢𑁆𑀢𑀫𑀦𑀢𑀸 𑀯𑀸 𑀅𑀦𑀪𑀺𑀦𑀦𑁆𑀤𑀺 [𑀅𑀦𑀪𑀺𑀭𑀤𑁆𑀥𑀺 (𑀲𑀻.)] 𑀯𑀸 𑀓𑀭𑀡𑀻𑀬𑀸. 𑀏𑀯𑀁 𑀔𑁄, 𑀤𑁂𑀯𑀢𑁂, 𑀭𑀼𑀓𑁆𑀔𑁄 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑁄 𑀳𑁄𑀢𑀻’𑀢𑀺. ‘𑀅𑀝𑁆𑀞𑀺𑀢𑀸𑀬𑁂𑀯 𑀔𑁄 𑀫𑁂, 𑀫𑀸𑀭𑀺𑀲, 𑀭𑀼𑀓𑁆𑀔𑀥𑀫𑁆𑀫𑁂 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀆𑀕𑀦𑁆𑀢𑁆𑀯𑀸 𑀪𑀯𑀦𑀁 𑀧𑀯𑀢𑁆𑀢𑁂𑀲𑀺 𑀉𑀫𑁆𑀫𑀽𑀮𑀫𑀓𑀸𑀲𑀻’𑀢𑀺. ‘𑀲𑀘𑁂 𑀔𑁄 𑀢𑁆𑀯𑀁, 𑀤𑁂𑀯𑀢𑁂, 𑀭𑀼𑀓𑁆𑀔𑀥𑀫𑁆𑀫𑁂 𑀢𑀺𑀝𑁆𑀞𑁂𑀬𑁆𑀬𑀸𑀲𑀺, 𑀲𑀺𑀬𑀸 [𑀲𑀺𑀬𑀸𑀧𑀺 (𑀲𑀻. 𑀧𑀻.)] 𑀢𑁂 𑀪𑀯𑀦𑀁 𑀬𑀣𑀸𑀧𑀼𑀭𑁂’𑀢𑀺? ‘𑀞𑀲𑁆𑀲𑀸𑀫𑀳𑀁, [𑀢𑀺𑀝𑁆𑀞𑁂𑀬𑁆𑀬𑀸𑀫𑀳𑀁 (𑀲𑁆𑀬𑀸.)] 𑀫𑀸𑀭𑀺𑀲, 𑀭𑀼𑀓𑁆𑀔𑀥𑀫𑁆𑀫𑁂, 𑀳𑁄𑀢𑀼 𑀫𑁂 𑀪𑀯𑀦𑀁 𑀬𑀣𑀸𑀧𑀼𑀭𑁂’’’𑀢𑀺.

‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺 [𑀅𑀪𑀺𑀲𑀗𑁆𑀔𑀸𑀭𑀺 (𑀲𑁆𑀬𑀸. 𑀓.)], 𑀬𑀣𑀸 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀆𑀕𑀦𑁆𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀁 𑀦𑀺𑀕𑁆𑀭𑁄𑀥𑀭𑀸𑀚𑀁 𑀉𑀲𑁆𑀲𑀸𑀧𑁂𑀲𑀺, 𑀲𑀘𑁆𑀙𑀯𑀻𑀦𑀺 𑀫𑀽𑀮𑀸𑀦𑀺 𑀅𑀳𑁂𑀲𑀼𑀁. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀅𑀧𑀺 𑀦𑀼 𑀢𑀁 𑀲𑀫𑀡𑀥𑀫𑁆𑀫𑁂 𑀞𑀺𑀢𑀁 𑀚𑀸𑀢𑀺𑀪𑀽𑀫𑀓𑀸 𑀉𑀧𑀸𑀲𑀓𑀸 𑀧𑀩𑁆𑀩𑀸𑀚𑁂𑀲𑀼𑀁 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀳𑀺 𑀆𑀯𑀸𑀲𑁂𑀳𑀻’’𑀢𑀺? ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀫𑀡𑁄 𑀲𑀫𑀡𑀥𑀫𑁆𑀫𑁂 𑀞𑀺𑀢𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀫𑀡𑁄 𑀅𑀓𑁆𑀓𑁄𑀲𑀦𑁆𑀢𑀁 𑀦 𑀧𑀘𑁆𑀘𑀓𑁆𑀓𑁄𑀲𑀢𑀺, 𑀭𑁄𑀲𑀦𑁆𑀢𑀁 𑀦 𑀧𑀝𑀺𑀭𑁄𑀲𑀢𑀺, 𑀪𑀡𑁆𑀟𑀦𑁆𑀢𑀁 𑀦 𑀧𑀝𑀺𑀪𑀡𑁆𑀟𑀢𑀺. 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀫𑀡𑁄 𑀲𑀫𑀡𑀥𑀫𑁆𑀫𑁂 𑀞𑀺𑀢𑁄 𑀳𑁄𑀢𑀻’’𑀢𑀺. ‘‘𑀅𑀝𑁆𑀞𑀺𑀢𑀁𑀬𑁂𑀯 𑀫𑀁, 𑀪𑀦𑁆𑀢𑁂, 𑀲𑀫𑀡𑀥𑀫𑁆𑀫𑁂 𑀚𑀸𑀢𑀺𑀪𑀽𑀫𑀓𑀸 𑀉𑀧𑀸𑀲𑀓𑀸 𑀧𑀩𑁆𑀩𑀸𑀚𑁂𑀲𑀼𑀁 𑀲𑀩𑁆𑀩𑀲𑁄 𑀚𑀸𑀢𑀺𑀪𑀽𑀫𑀺𑀬𑀁 𑀲𑀢𑁆𑀢𑀳𑀺 𑀆𑀯𑀸𑀲𑁂𑀳𑀻’’𑀢𑀺.

[𑀅. 𑀦𑀺. 𑁭.𑁬𑁬; 𑁭.𑁭𑁩] ‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀼𑀦𑁂𑀢𑁆𑀢𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺 𑀢𑀺𑀢𑁆𑀣𑀓𑀭𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄. 𑀲𑀼𑀦𑁂𑀢𑁆𑀢𑀲𑁆𑀲 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀢𑁆𑀣𑀼𑀦𑁄 𑀅𑀦𑁂𑀓𑀸𑀦𑀺 𑀲𑀸𑀯𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀲𑀼𑀦𑁂𑀢𑁆𑀢𑁄 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑁂 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀦 𑀧𑀲𑀸𑀤𑁂𑀲𑀼𑀁 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑀼𑀁 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼.

‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀫𑀽𑀕𑀧𑀓𑁆𑀔𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺…𑀧𑁂… 𑀅𑀭𑀦𑁂𑀫𑀺 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺… 𑀓𑀼𑀤𑁆𑀤𑀸𑀮𑀓𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺… 𑀳𑀢𑁆𑀣𑀺𑀧𑀸𑀮𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺… 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀲𑀢𑁆𑀣𑀸 𑀅𑀳𑁄𑀲𑀺 𑀢𑀺𑀢𑁆𑀣𑀓𑀭𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄. 𑀚𑁄𑀢𑀺𑀧𑀸𑀮𑀲𑁆𑀲 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀢𑁆𑀣𑀼𑀦𑁄 𑀅𑀦𑁂𑀓𑀸𑀦𑀺 𑀲𑀸𑀯𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀚𑁄𑀢𑀺𑀧𑀸𑀮𑁄 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑁂 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀚𑁄𑀢𑀺𑀧𑀸𑀮𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀦 𑀧𑀲𑀸𑀤𑁂𑀲𑀼𑀁 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀚𑁄𑀢𑀺𑀧𑀸𑀮𑀲𑁆𑀲 𑀲𑀢𑁆𑀣𑀼𑀦𑁄 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑀼𑀁 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀬𑁄 𑀇𑀫𑁂 𑀙 𑀲𑀢𑁆𑀣𑀸𑀭𑁂 𑀢𑀺𑀢𑁆𑀣𑀓𑀭𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂, 𑀅𑀦𑁂𑀓𑀲𑀢𑀧𑀭𑀺𑀯𑀸𑀭𑁂 𑀲𑀲𑀸𑀯𑀓𑀲𑀗𑁆𑀖𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀓𑁆𑀓𑁄𑀲𑁂𑀬𑁆𑀬 𑀧𑀭𑀺𑀪𑀸𑀲𑁂𑀬𑁆𑀬, 𑀩𑀳𑀼𑀁 𑀲𑁄 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑁄 𑀔𑁄, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀇𑀫𑁂 𑀙 𑀲𑀢𑁆𑀣𑀸𑀭𑁂 𑀢𑀺𑀢𑁆𑀣𑀓𑀭𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂 𑀅𑀦𑁂𑀓𑀲𑀢𑀧𑀭𑀺𑀯𑀸𑀭𑁂 𑀲𑀲𑀸𑀯𑀓𑀲𑀗𑁆𑀖𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀓𑁆𑀓𑁄𑀲𑁂𑀬𑁆𑀬 𑀧𑀭𑀺𑀪𑀸𑀲𑁂𑀬𑁆𑀬, 𑀩𑀳𑀼𑀁 𑀲𑁄 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬. 𑀬𑁄 𑀏𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀅𑀬𑀁 𑀢𑀢𑁄 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀇𑀢𑁄 𑀩𑀳𑀺𑀤𑁆𑀥𑀸 𑀏𑀯𑀭𑀽𑀧𑀺𑀁 𑀔𑀦𑁆𑀢𑀺𑀁 [𑀏𑀯𑀭𑀽𑀧𑀁 𑀔𑀦𑁆𑀢𑀁 (𑀲𑁆𑀬𑀸.)] 𑀯𑀤𑀸𑀫𑀺, 𑀬𑀣𑀸𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼. 𑀢𑀲𑁆𑀫𑀸𑀢𑀺𑀳, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀦 𑀦𑁄 𑀲𑀫𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 [𑀦 𑀦𑁄 𑀆𑀫𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 (𑀲𑁆𑀬𑀸.), 𑀦 𑀦𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 (𑀲𑀻. 𑀧𑀻.)] 𑀘𑀺𑀢𑁆𑀢𑀸𑀦𑀺 𑀧𑀤𑀼𑀝𑁆𑀞𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’’𑀢𑀺. 𑀏𑀯𑀜𑁆𑀳𑀺 𑀢𑁂, 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺.

‘‘𑀲𑀼𑀦𑁂𑀢𑁆𑀢𑁄 𑀫𑀽𑀕𑀧𑀓𑁆𑀔𑁄 𑀘, 𑀅𑀭𑀦𑁂𑀫𑀺 𑀘 𑀩𑁆𑀭𑀸𑀳𑁆𑀫𑀡𑁄;

𑀓𑀼𑀤𑁆𑀤𑀸𑀮𑀓𑁄 𑀅𑀳𑀼 𑀲𑀢𑁆𑀣𑀸, 𑀳𑀢𑁆𑀣𑀺𑀧𑀸𑀮𑁄 𑀘 𑀫𑀸𑀡𑀯𑁄.

‘‘𑀚𑁄𑀢𑀺𑀧𑀸𑀮𑁄 𑀘 𑀕𑁄𑀯𑀺𑀦𑁆𑀤𑁄, 𑀅𑀳𑀼 𑀲𑀢𑁆𑀢𑀧𑀼𑀭𑁄𑀳𑀺𑀢𑁄;

𑀅𑀳𑀺𑀁𑀲𑀓𑀸 [𑀅𑀪𑀺𑀲𑁂𑀓𑀸 (𑀲𑁆𑀬𑀸.)] 𑀅𑀢𑀻𑀢𑀁𑀲𑁂, 𑀙 𑀲𑀢𑁆𑀣𑀸𑀭𑁄 𑀬𑀲𑀲𑁆𑀲𑀺𑀦𑁄.

‘‘𑀦𑀺𑀭𑀸𑀫𑀕𑀦𑁆𑀥𑀸 𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑀸 [𑀯𑀺𑀫𑀼𑀢𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻.)], 𑀓𑀸𑀫𑀲𑀁𑀬𑁄𑀚𑀦𑀸𑀢𑀺𑀕𑀸 [𑀓𑀸𑀫𑀲𑀁𑀬𑁄𑀚𑀦𑀸𑀢𑀺𑀢𑀸 (𑀲𑁆𑀬𑀸.)];

𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀸 𑀅𑀳𑀼𑀁 [𑀅𑀳𑀼 (𑀩𑀳𑀽𑀲𑀼), 𑀅𑀳𑀽 (𑀓. 𑀲𑀻.)].

‘‘𑀅𑀳𑁂𑀲𑀼𑀁 𑀲𑀸𑀯𑀓𑀸 𑀢𑁂𑀲𑀁, 𑀅𑀦𑁂𑀓𑀸𑀦𑀺 𑀲𑀢𑀸𑀦𑀺𑀧𑀺;

𑀦𑀺𑀭𑀸𑀫𑀕𑀦𑁆𑀥𑀸 𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑀸, 𑀓𑀸𑀫𑀲𑀁𑀬𑁄𑀚𑀦𑀸𑀢𑀺𑀕𑀸;

𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀸 𑀅𑀳𑀼𑀁 [𑀅𑀳𑀼 (𑀩𑀳𑀽𑀲𑀼), 𑀅𑀳𑀽 (𑀓. 𑀲𑀻.)].

‘‘𑀬𑁂𑀢𑁂 𑀇𑀲𑀻 𑀩𑀸𑀳𑀺𑀭𑀓𑁂, 𑀯𑀻𑀢𑀭𑀸𑀕𑁂 𑀲𑀫𑀸𑀳𑀺𑀢𑁂;

𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄, 𑀬𑁄 𑀦𑀭𑁄 𑀧𑀭𑀺𑀪𑀸𑀲𑀢𑀺;

𑀩𑀳𑀼𑀜𑁆𑀘 𑀲𑁄 𑀧𑀲𑀯𑀢𑀺, 𑀅𑀧𑀼𑀜𑁆𑀜𑀁 𑀢𑀸𑀤𑀺𑀲𑁄 𑀦𑀭𑁄.

‘‘𑀬𑁄 𑀘𑁂𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁, 𑀪𑀺𑀓𑁆𑀔𑀼𑀁 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀁;

𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄, 𑀬𑁄 𑀦𑀭𑁄 𑀧𑀭𑀺𑀪𑀸𑀲𑀢𑀺;

𑀅𑀬𑀁 𑀢𑀢𑁄 𑀩𑀳𑀼𑀢𑀭𑀁, 𑀅𑀧𑀼𑀜𑁆𑀜𑀁 𑀧𑀲𑀯𑁂 𑀦𑀭𑁄.

‘‘𑀦 𑀲𑀸𑀥𑀼𑀭𑀽𑀧𑀁 𑀆𑀲𑀻𑀤𑁂, 𑀤𑀺𑀝𑁆𑀞𑀺𑀝𑁆𑀞𑀸𑀦𑀧𑁆𑀧𑀳𑀸𑀬𑀺𑀦𑀁;

𑀲𑀢𑁆𑀢𑀫𑁄 𑀧𑀼𑀕𑁆𑀕𑀮𑁄 𑀏𑀲𑁄, 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀼𑀘𑁆𑀘𑀢𑀺.

‘‘𑀅𑀯𑀻𑀢𑀭𑀸𑀕𑁄 𑀓𑀸𑀫𑁂𑀲𑀼, 𑀬𑀲𑁆𑀲 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸 𑀫𑀼𑀤𑀽;

𑀲𑀤𑁆𑀥𑀸 𑀲𑀢𑀺 𑀘 𑀯𑀻𑀭𑀺𑀬𑀁, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸.

‘‘𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀧𑀼𑀩𑁆𑀩𑁂𑀯 𑀉𑀧𑀳𑀜𑁆𑀜𑀢𑀺;

𑀅𑀢𑁆𑀢𑀸𑀦𑀁 𑀉𑀧𑀳𑀦𑁆𑀢𑁆𑀯𑀸𑀦, 𑀧𑀘𑁆𑀙𑀸 𑀅𑀜𑁆𑀜𑀁 𑀯𑀺𑀳𑀺𑀁𑀲𑀢𑀺.

‘‘𑀬𑁄 𑀘 𑀭𑀓𑁆𑀔𑀢𑀺 𑀅𑀢𑁆𑀢𑀸𑀦𑀁, 𑀭𑀓𑁆𑀔𑀺𑀢𑁄 𑀢𑀲𑁆𑀲 𑀩𑀸𑀳𑀺𑀭𑁄;

𑀢𑀲𑁆𑀫𑀸 𑀭𑀓𑁆𑀔𑁂𑀬𑁆𑀬 𑀅𑀢𑁆𑀢𑀸𑀦𑀁, 𑀅𑀓𑁆𑀔𑀢𑁄 𑀧𑀡𑁆𑀟𑀺𑀢𑁄 𑀲𑀤𑀸’’𑀢𑀺. 𑀤𑁆𑀯𑀸𑀤𑀲𑀫𑀁;

𑀥𑀫𑁆𑀫𑀺𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.