𑁫. 𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀦𑀸𑀕𑀲𑀼𑀢𑁆𑀢𑀁

𑁪𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀧𑀼𑀩𑁆𑀩𑀸𑀭𑀸𑀫𑁄 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀤𑀺𑀯𑀸𑀯𑀺𑀳𑀸𑀭𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀼𑀩𑁆𑀩𑀸𑀭𑀸𑀫𑁄 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀧𑀼𑀩𑁆𑀩𑀓𑁄𑀝𑁆𑀞𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀼𑀩𑁆𑀩𑀓𑁄𑀝𑁆𑀞𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀧𑀼𑀩𑁆𑀩𑀓𑁄𑀝𑁆𑀞𑀓𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀲𑁂𑀢𑁄 𑀦𑀸𑀫 𑀦𑀸𑀕𑁄 𑀫𑀳𑀸𑀢𑀽𑀭𑀺𑀬 [𑀫𑀳𑀸𑀢𑀼𑀭𑀺𑀬 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀢𑀸𑀴𑀺𑀢𑀯𑀸𑀤𑀺𑀢𑁂𑀦 𑀧𑀼𑀩𑁆𑀩𑀓𑁄𑀝𑁆𑀞𑀓𑀸 𑀧𑀘𑁆𑀘𑀼𑀢𑁆𑀢𑀭𑀢𑀺. 𑀅𑀧𑀺𑀲𑁆𑀲𑀼 𑀢𑀁 𑀚𑀦𑁄 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀪𑀺𑀭𑀽𑀧𑁄 𑀯𑀢, 𑀪𑁄, 𑀭𑀜𑁆𑀜𑁄 𑀦𑀸𑀕𑁄; 𑀤𑀲𑁆𑀲𑀦𑀻𑀬𑁄 𑀯𑀢, 𑀪𑁄, 𑀭𑀜𑁆𑀜𑁄 𑀦𑀸𑀕𑁄; 𑀧𑀸𑀲𑀸𑀤𑀺𑀓𑁄 𑀯𑀢, 𑀪𑁄, 𑀭𑀜𑁆𑀜𑁄 𑀦𑀸𑀕𑁄; 𑀓𑀸𑀬𑀼𑀧𑀧𑀦𑁆𑀦𑁄 𑀯𑀢, 𑀪𑁄, 𑀭𑀜𑁆𑀜𑁄 𑀦𑀸𑀕𑁄’’𑀢𑀺! 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀳𑀢𑁆𑀣𑀺𑀫𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁 [𑀫𑀳𑀦𑁆𑀢𑀁 𑀩𑁆𑀭𑀼𑀳𑀦𑁆𑀢𑀁 (𑀲𑀻.), 𑀫𑀳𑀢𑁆𑀢𑀁 𑀩𑁆𑀭𑀳𑁆𑀫𑀢𑁆𑀢𑀁 (𑀓.)] 𑀓𑀸𑀬𑀼𑀧𑀧𑀦𑁆𑀦𑀁 𑀚𑀦𑁄 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘𑀦𑀸𑀕𑁄 𑀯𑀢, 𑀪𑁄, 𑀦𑀸𑀕𑁄’𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀺 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.)] 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁 𑀓𑀸𑀬𑀼𑀧𑀧𑀦𑁆𑀦𑀁 𑀚𑀦𑁄 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘𑀦𑀸𑀕𑁄 𑀯𑀢, 𑀪𑁄, 𑀦𑀸𑀕𑁄’’’𑀢𑀺? ‘‘𑀳𑀢𑁆𑀣𑀺𑀫𑁆𑀧𑀺 𑀔𑁄, 𑀉𑀤𑀸𑀬𑀺, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁 𑀓𑀸𑀬𑀼𑀧𑀧𑀦𑁆𑀦𑀁 𑀚𑀦𑁄 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘𑀦𑀸𑀕𑁄 𑀯𑀢, 𑀪𑁄, 𑀦𑀸𑀕𑁄’𑀢𑀺! 𑀅𑀲𑁆𑀲𑀫𑁆𑀧𑀺 𑀔𑁄, 𑀉𑀤𑀸𑀬𑀺, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁…𑀧𑁂… 𑀕𑁄𑀡𑀫𑁆𑀧𑀺 𑀔𑁄, 𑀉𑀤𑀸𑀬𑀺, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁…𑀧𑁂… 𑀉𑀭𑀕𑀫𑁆𑀧𑀺 [𑀦𑀸𑀕𑀫𑁆𑀧𑀺 (𑀓.)] 𑀔𑁄, 𑀉𑀤𑀸𑀬𑀺, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁…𑀧𑁂… 𑀭𑀼𑀓𑁆𑀔𑀫𑁆𑀧𑀺 𑀔𑁄, 𑀉𑀤𑀸𑀬𑀺, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁…𑀧𑁂… 𑀫𑀦𑀼𑀲𑁆𑀲𑀫𑁆𑀧𑀺 𑀔𑁄, 𑀉𑀤𑀸𑀬𑀺, 𑀫𑀳𑀦𑁆𑀢𑀁 𑀩𑁆𑀭𑀳𑀦𑁆𑀢𑀁 𑀓𑀸𑀬𑀼𑀧𑀧𑀦𑁆𑀦𑀁 𑀚𑀦𑁄 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘𑀦𑀸𑀕𑁄 𑀯𑀢, 𑀪𑁄, 𑀦𑀸𑀕𑁄’𑀢𑀺! 𑀅𑀧𑀺 𑀘, 𑀉𑀤𑀸𑀬𑀺, 𑀬𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀢𑀫𑀳𑀁 ‘𑀦𑀸𑀕𑁄’𑀢𑀺 𑀩𑁆𑀭𑀽𑀫𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋 𑀅𑀧𑀺 𑀘, 𑀉𑀤𑀸𑀬𑀺, 𑀬𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸, 𑀢𑀫𑀳𑀁 ‘𑀦𑀸𑀕𑁄’𑀢𑀺 𑀩𑁆𑀭𑀽𑀫𑀻’’𑀢𑀺. 𑀇𑀤𑀜𑁆𑀘 𑀧𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀼𑀪𑀸𑀲𑀺𑀢𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀸𑀫𑀺 𑁋

‘‘𑀫𑀦𑀼𑀲𑁆𑀲𑀪𑀽𑀢𑀁 𑀲𑀫𑁆𑀩𑀼𑀤𑁆𑀥𑀁, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀇𑀭𑀺𑀬𑀫𑀸𑀦𑀁 𑀩𑁆𑀭𑀳𑁆𑀫𑀧𑀣𑁂, 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀁.

‘‘𑀬𑀁 𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁;

𑀤𑁂𑀯𑀸𑀧𑀺 𑀢𑀁 [𑀦𑀁 (𑀲𑀻. 𑀧𑀻.)] 𑀦𑀫𑀲𑁆𑀲𑀦𑁆𑀢𑀺, 𑀇𑀢𑀺 𑀫𑁂 𑀅𑀭𑀳𑀢𑁄 𑀲𑀼𑀢𑀁.

‘‘𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑀁, 𑀯𑀦𑀸 𑀦𑀺𑀩𑁆𑀩𑀦 [𑀦𑀺𑀩𑁆𑀩𑀸𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀕𑀢𑀁;

𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀭𑀢𑀁 [𑀦𑁂𑀓𑁆𑀔𑀫𑁆𑀫𑁂 𑀭𑀢𑀁 (𑀓. 𑀲𑀻.)], 𑀫𑀼𑀢𑁆𑀢𑀁 𑀲𑁂𑀮𑀸𑀯 𑀓𑀜𑁆𑀘𑀦𑀁.

‘‘𑀲𑀩𑁆𑀩𑁂 𑀅𑀘𑁆𑀘𑀭𑀼𑀘𑀻 𑀦𑀸𑀕𑁄, 𑀳𑀺𑀫𑀯𑀸𑀜𑁆𑀜𑁂 𑀲𑀺𑀮𑀼𑀘𑁆𑀘𑀬𑁂;

𑀲𑀩𑁆𑀩𑁂𑀲𑀁 𑀦𑀸𑀕𑀦𑀸𑀫𑀸𑀦𑀁, 𑀲𑀘𑁆𑀘𑀦𑀸𑀫𑁄 𑀅𑀦𑀼𑀢𑁆𑀢𑀭𑁄.

‘‘𑀦𑀸𑀕𑀁 𑀯𑁄 [𑀢𑁂 (𑀓.)] 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀦 𑀳𑀺 𑀆𑀕𑀼𑀁 𑀓𑀭𑁄𑀢𑀺 𑀲𑁄;

𑀲𑁄𑀭𑀘𑁆𑀘𑀁 𑀅𑀯𑀺𑀳𑀺𑀁𑀲𑀸 𑀘, 𑀧𑀸𑀤𑀸 𑀦𑀸𑀕𑀲𑁆𑀲 𑀢𑁂 𑀤𑀼𑀯𑁂.

‘‘𑀢𑀧𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀡𑀸 𑀦𑀸𑀕𑀲𑁆𑀲 𑀢𑁆𑀬𑀸𑀧𑀭𑁂;

𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄, 𑀉𑀧𑁂𑀓𑁆𑀔𑀸𑀲𑁂𑀢𑀤𑀦𑁆𑀢𑀯𑀸.

‘‘𑀲𑀢𑀺 𑀕𑀻𑀯𑀸 𑀲𑀺𑀭𑁄 𑀧𑀜𑁆𑀜𑀸, 𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸;

𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀢𑀧𑁄, 𑀯𑀺𑀯𑁂𑀓𑁄 𑀢𑀲𑁆𑀲 𑀯𑀸𑀮𑀥𑀺.

‘‘𑀲𑁄 𑀛𑀸𑀬𑀻 𑀅𑀲𑁆𑀲𑀸𑀲𑀭𑀢𑁄, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄 [𑀅𑀚𑁆𑀛𑀢𑁆𑀢𑀼𑀧𑀲𑀫𑀸𑀳𑀺𑀢𑁄 (𑀲𑁆𑀬𑀸. 𑀓.)];

𑀕𑀘𑁆𑀙𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀞𑀺𑀢𑁄 𑀦𑀸𑀕𑁄 𑀲𑀫𑀸𑀳𑀺𑀢𑁄.

‘‘𑀲𑁂𑀬𑁆𑀬𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀦𑀺𑀲𑀺𑀦𑁆𑀦𑁄𑀧𑀺 𑀲𑀫𑀸𑀳𑀺𑀢𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀦𑀸𑀕𑁄, 𑀏𑀲𑀸 𑀦𑀸𑀕𑀲𑁆𑀲 𑀲𑀫𑁆𑀧𑀤𑀸.

‘‘𑀪𑀼𑀜𑁆𑀚𑀢𑀺 𑀅𑀦𑀯𑀚𑁆𑀚𑀸𑀦𑀺, 𑀲𑀸𑀯𑀚𑁆𑀚𑀸𑀦𑀺 𑀦 𑀪𑀼𑀜𑁆𑀚𑀢𑀺;

𑀖𑀸𑀲𑀫𑀘𑁆𑀙𑀸𑀤𑀦𑀁 𑀮𑀤𑁆𑀥𑀸, 𑀲𑀦𑁆𑀦𑀺𑀥𑀺𑀁 𑀧𑀭𑀺𑀯𑀚𑁆𑀚𑀬𑀁.

‘‘𑀲𑀁𑀬𑁄𑀚𑀦𑀁 𑀅𑀡𑀼𑀁 𑀣𑀽𑀮𑀁, 𑀲𑀩𑁆𑀩𑀁 𑀙𑁂𑀢𑁆𑀯𑀸𑀦 𑀩𑀦𑁆𑀥𑀦𑀁;

𑀬𑁂𑀦 𑀬𑁂𑀦𑁂𑀯 𑀕𑀘𑁆𑀙𑀢𑀺, 𑀅𑀦𑀧𑁂𑀓𑁆𑀔𑁄𑀯 𑀕𑀘𑁆𑀙𑀢𑀺.

‘‘𑀬𑀣𑀸𑀧𑀺 𑀉𑀤𑀓𑁂 𑀚𑀸𑀢𑀁, 𑀧𑀼𑀡𑁆𑀟𑀭𑀻𑀓𑀁 𑀧𑀯𑀟𑁆𑀠𑀢𑀺;

𑀦𑀼𑀧𑀮𑀺𑀧𑁆𑀧𑀢𑀺 [𑀦 𑀉𑀧𑀮𑀺𑀧𑁆𑀧𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀦𑀼𑀧𑀮𑀺𑀫𑁆𑀧𑀢𑀺 (𑀓.)] 𑀢𑁄𑀬𑁂𑀦, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

‘‘𑀢𑀣𑁂𑀯 𑀮𑁄𑀓𑁂 𑀲𑀼𑀚𑀸𑀢𑁄, 𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀳𑀭𑀢𑀺;

𑀦𑀼𑀧𑀮𑀺𑀧𑁆𑀧𑀢𑀺 𑀮𑁄𑀓𑁂𑀦, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

‘‘𑀫𑀳𑀸𑀕𑀺𑀦𑀻𑀯 𑀚𑀮𑀺𑀢𑁄 [𑀫𑀳𑀸𑀕𑁆𑀕𑀺𑀦𑀺 𑀧𑀚𑁆𑀚𑀮𑀺𑀢𑁄 (𑀲𑀻. 𑀲𑁆𑀬𑀸. 𑀓𑀁.)], 𑀅𑀦𑀸𑀳𑀸𑀭𑀽𑀧𑀲𑀫𑁆𑀫𑀢𑀺;

𑀲𑀗𑁆𑀔𑀸𑀭𑁂𑀲𑀽𑀧𑀲𑀦𑁆𑀢𑁂𑀲𑀼 [𑀅𑀗𑁆𑀕𑀸𑀭𑁂𑀲𑀼 𑀘 𑀲𑀦𑁆𑀢𑁂𑀲𑀼 (𑀓.)], 𑀦𑀺𑀩𑁆𑀩𑀼𑀢𑁄𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀅𑀢𑁆𑀣𑀲𑁆𑀲𑀸𑀬𑀁 𑀯𑀺𑀜𑁆𑀜𑀸𑀧𑀦𑀻, 𑀉𑀧𑀫𑀸 𑀯𑀺𑀜𑁆𑀜𑀽𑀳𑀺 𑀤𑁂𑀲𑀺𑀢𑀸;

𑀯𑀺𑀜𑁆𑀜𑀲𑁆𑀲𑀦𑁆𑀢𑀺 [𑀯𑀺𑀜𑁆𑀜𑀺𑀲𑁆𑀲𑀦𑁆𑀢𑀺 (𑀓.)] 𑀫𑀳𑀸𑀦𑀸𑀕𑀸, 𑀦𑀸𑀕𑀁 𑀦𑀸𑀕𑁂𑀦 𑀤𑁂𑀲𑀺𑀢𑀁.

‘‘𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄, 𑀯𑀻𑀢𑀫𑁄𑀳𑁄 𑀅𑀦𑀸𑀲𑀯𑁄;

𑀲𑀭𑀻𑀭𑀁 𑀯𑀺𑀚𑀳𑀁 𑀦𑀸𑀕𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑀺 [𑀧𑀭𑀺𑀦𑀺𑀩𑁆𑀩𑀸𑀢𑀺 (𑀧𑀻. 𑀓.)] 𑀅𑀦𑀸𑀲𑀯𑁄’’𑀢𑀺. 𑀧𑀞𑀫𑀁;

𑁨. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀁

𑁪𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑀺𑀕𑀲𑀸𑀮𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀺𑀕𑀲𑀸𑀮𑀸 [𑀫𑀺𑀕𑀲𑀸𑀡𑀸 (𑀓.) 𑀅. 𑀦𑀺. 𑁧𑁦.𑁭𑁫] 𑀉𑀧𑀸𑀲𑀺𑀓𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋

‘‘𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑀁? 𑀧𑀺𑀢𑀸 𑀫𑁂, 𑀪𑀦𑁆𑀢𑁂, 𑀧𑀼𑀭𑀸𑀡𑁄 𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀲𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑀲𑀓𑀤𑀸𑀕𑀸𑀫𑀺𑀲𑀢𑁆𑀢𑁄 [𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑁄 (𑀓. 𑀲𑁆𑀬𑀸. 𑀧𑀻.)] 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺. 𑀧𑁂𑀢𑁆𑀢𑁂𑀬𑁆𑀬𑁄𑀧𑀺 [𑀧𑁂𑀢𑁆𑀢𑀬𑁆𑀬𑁄 𑀧𑀺𑀬𑁄 (𑀲𑀻. 𑀧𑀻. 𑀓.), 𑀧𑀺𑀢𑀼 𑀧𑀺𑀬𑁄 (𑀲𑁆𑀬𑀸. 𑀓𑀁.)] 𑀫𑁂, 𑀪𑀦𑁆𑀢𑁂, 𑀇𑀲𑀺𑀤𑀢𑁆𑀢𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄. 𑀲𑁄𑀧𑀺 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺. 𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀏𑀯𑀁 𑀔𑁄 𑀧𑀦𑁂𑀢𑀁, 𑀪𑀕𑀺𑀦𑀺, 𑀪𑀕𑀯𑀢𑀸 𑀩𑁆𑀬𑀸𑀓𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀺𑀕𑀲𑀸𑀮𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑀺𑀕𑀲𑀸𑀮𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄, 𑀪𑀦𑁆𑀢𑁂, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑀁. 𑀧𑀺𑀢𑀸 𑀫𑁂, 𑀪𑀦𑁆𑀢𑁂, 𑀧𑀼𑀭𑀸𑀡𑁄 𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀲𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺. 𑀧𑁂𑀢𑁆𑀢𑁂𑀬𑁆𑀬𑁄𑀧𑀺 𑀫𑁂, 𑀪𑀦𑁆𑀢𑁂, 𑀇𑀲𑀺𑀤𑀢𑁆𑀢𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄. 𑀲𑁄𑀧𑀺 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑀲𑀓𑀤𑀸𑀕𑀸𑀫𑀺𑀧𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺. 𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀫𑀺𑀕𑀲𑀸𑀮𑀁 𑀉𑀧𑀸𑀲𑀺𑀓𑀁 𑀏𑀢𑀤𑀯𑁄𑀘𑀁 𑁋 ‘𑀏𑀯𑀁 𑀔𑁄 𑀧𑀦𑁂𑀢𑀁, 𑀪𑀕𑀺𑀦𑀺, 𑀪𑀕𑀯𑀢𑀸 𑀩𑁆𑀬𑀸𑀓𑀢’’’𑀦𑁆𑀢𑀺.

‘‘𑀓𑀸 𑀘𑀸𑀦𑀦𑁆𑀤, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀫𑁆𑀫𑀓𑀸 𑀅𑀫𑁆𑀫𑀓𑀲𑀜𑁆𑀜𑀸 [𑀅𑀫𑁆𑀩𑀓𑀸 𑀅𑀫𑁆𑀩𑀓𑀧𑀜𑁆𑀜𑀸 (𑀲𑀻. 𑀧𑀻.), 𑀅𑀫𑁆𑀩𑀓𑀸 𑀅𑀫𑁆𑀩𑀓𑀲𑀜𑁆𑀜𑀸 (𑀲𑁆𑀬𑀸. 𑀓𑀁.) 𑀅. 𑀦𑀺. 𑁧𑁦.𑁭𑁫 𑀧𑀲𑁆𑀲𑀺𑀢𑀩𑁆𑀩𑀁], 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀜𑀸𑀡𑁂? 𑀙𑀬𑀺𑀫𑁂, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀓𑀢𑀫𑁂 𑀙? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑁄𑀭𑀢𑁄 𑀳𑁄𑀢𑀺 𑀲𑀼𑀔𑀲𑀁𑀯𑀸𑀲𑁄, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀢𑁆𑀢𑀯𑀸𑀲𑁂𑀦. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺 𑀦𑁄 𑀯𑀺𑀲𑁂𑀲𑀸𑀬, 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑁄𑀭𑀢𑁄 𑀳𑁄𑀢𑀺 𑀲𑀼𑀔𑀲𑀁𑀯𑀸𑀲𑁄, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀢𑁆𑀢𑀯𑀸𑀲𑁂𑀦. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺 𑀦𑁄 𑀳𑀸𑀦𑀸𑀬, 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺 𑁋 ‘𑀇𑀫𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸 𑀅𑀧𑀭𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸, 𑀓𑀲𑁆𑀫𑀸 𑀢𑁂𑀲𑀁 𑀏𑀓𑁄 𑀳𑀻𑀦𑁄 𑀏𑀓𑁄 𑀧𑀡𑀻𑀢𑁄’𑀢𑀺! 𑀢𑀜𑁆𑀳𑀺 𑀢𑁂𑀲𑀁, 𑀆𑀦𑀦𑁆𑀤, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑁄𑀭𑀢𑁄 𑀳𑁄𑀢𑀺 𑀲𑀼𑀔𑀲𑀁𑀯𑀸𑀲𑁄, 𑀅𑀪𑀺𑀦𑀦𑁆𑀤𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀢𑁆𑀢𑀯𑀸𑀲𑁂𑀦, 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀅𑀬𑀁, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀅𑀫𑀼𑀦𑀸 𑀧𑀼𑀭𑀺𑀫𑁂𑀦 𑀧𑀼𑀕𑁆𑀕𑀮𑁂𑀦 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑀁 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀺, 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦! 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀺𑀓𑀸 𑀅𑀳𑀼𑀯𑀢𑁆𑀣; 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀺𑀢𑁆𑀣. 𑀔𑀜𑁆𑀜𑀢𑀺 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀦𑁆𑀢𑁄. 𑀅𑀳𑀁 𑀯𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁, 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀫𑀸𑀦𑁄 𑀅𑀥𑀺𑀕𑀢𑁄 [𑀅𑀯𑀺𑀕𑀢𑁄 (𑀓.)] 𑀳𑁄𑀢𑀺, 𑀲𑀫𑀬𑁂𑀦 𑀲𑀫𑀬𑀜𑁆𑀘𑀲𑁆𑀲 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺 𑀦𑁄 𑀯𑀺𑀲𑁂𑀲𑀸𑀬, 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀫𑀸𑀦𑁄 𑀅𑀥𑀺𑀕𑀢𑁄 𑀳𑁄𑀢𑀺, 𑀲𑀫𑀬𑁂𑀦 𑀲𑀫𑀬𑀜𑁆𑀘𑀲𑁆𑀲 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺…𑀧𑁂… 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺…𑀧𑁂… 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀇𑀥, 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀫𑀸𑀦𑁄 𑀅𑀥𑀺𑀕𑀢𑁄 𑀳𑁄𑀢𑀺, 𑀲𑀫𑀬𑁂𑀦 𑀲𑀫𑀬𑀜𑁆𑀘𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺 𑀦𑁄 𑀯𑀺𑀲𑁂𑀲𑀸𑀬, 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀫𑀸𑀦𑁄 𑀅𑀥𑀺𑀕𑀢𑁄 𑀳𑁄𑀢𑀺, 𑀲𑀫𑀬𑁂𑀦 𑀲𑀫𑀬𑀜𑁆𑀘𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺 𑀦𑁄 𑀳𑀸𑀦𑀸𑀬, 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺 𑁋 ‘𑀇𑀫𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸, 𑀅𑀧𑀭𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸. 𑀓𑀲𑁆𑀫𑀸 𑀢𑁂𑀲𑀁 𑀏𑀓𑁄 𑀳𑀻𑀦𑁄, 𑀏𑀓𑁄 𑀧𑀡𑀻𑀢𑁄’𑀢𑀺? 𑀢𑀜𑁆𑀳𑀺 𑀢𑁂𑀲𑀁, 𑀆𑀦𑀦𑁆𑀤, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑁄𑀥𑀫𑀸𑀦𑁄 𑀅𑀥𑀺𑀕𑀢𑁄 𑀳𑁄𑀢𑀺, 𑀲𑀫𑀬𑁂𑀦 𑀲𑀫𑀬𑀜𑁆𑀘𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀅𑀬𑀁, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀅𑀫𑀼𑀦𑀸 𑀧𑀼𑀭𑀺𑀫𑁂𑀦 𑀧𑀼𑀕𑁆𑀕𑀮𑁂𑀦 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑀁 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀺. 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦! 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀺𑀓𑀸 𑀅𑀳𑀼𑀯𑀢𑁆𑀣; 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀺𑀢𑁆𑀣. 𑀔𑀜𑁆𑀜𑀢𑀺 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀦𑁆𑀢𑁄. 𑀅𑀳𑀁 𑀯𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁, 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀓𑀸 𑀘𑀸𑀦𑀦𑁆𑀤, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀫𑁆𑀫𑀓𑀸 𑀅𑀫𑁆𑀫𑀓𑀲𑀜𑁆𑀜𑀸, 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑀜𑀸𑀡𑁂! 𑀇𑀫𑁂 𑀔𑁄, 𑀆𑀦𑀦𑁆𑀤, 𑀙 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀬𑀣𑀸𑀭𑀽𑀧𑁂𑀦, 𑀆𑀦𑀦𑁆𑀤, 𑀲𑀻𑀮𑁂𑀦 𑀧𑀼𑀭𑀸𑀡𑁄 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺, 𑀢𑀣𑀸𑀭𑀽𑀧𑁂𑀦 𑀲𑀻𑀮𑁂𑀦 𑀇𑀲𑀺𑀤𑀢𑁆𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀪𑀯𑀺𑀲𑁆𑀲. 𑀦𑀬𑀺𑀥 𑀧𑀼𑀭𑀸𑀡𑁄 𑀇𑀲𑀺𑀤𑀢𑁆𑀢𑀲𑁆𑀲 𑀕𑀢𑀺𑀫𑁆𑀧𑀺 𑀅𑀜𑁆𑀜𑀲𑁆𑀲. 𑀬𑀣𑀸𑀭𑀽𑀧𑀸𑀬 𑀘, 𑀆𑀦𑀦𑁆𑀤, 𑀧𑀜𑁆𑀜𑀸𑀬 𑀇𑀲𑀺𑀤𑀢𑁆𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺, 𑀢𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀧𑀼𑀭𑀸𑀡𑁄 𑀲𑀫𑀦𑁆𑀦𑀸𑀕𑀢𑁄 𑀅𑀪𑀯𑀺𑀲𑁆𑀲. 𑀦𑀬𑀺𑀥 𑀇𑀲𑀺𑀤𑀢𑁆𑀢𑁄 𑀧𑀼𑀭𑀸𑀡𑀲𑁆𑀲 𑀕𑀢𑀺𑀫𑁆𑀧𑀺 𑀅𑀜𑁆𑀜𑀲𑁆𑀲. 𑀇𑀢𑀺 𑀔𑁄, 𑀆𑀦𑀦𑁆𑀤, 𑀇𑀫𑁂 𑀧𑀼𑀕𑁆𑀕𑀮𑀸 𑀉𑀪𑁄 𑀏𑀓𑀗𑁆𑀕𑀳𑀻𑀦𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀇𑀡𑀲𑀼𑀢𑁆𑀢𑀁

𑁪𑁫. ‘‘𑀤𑀸𑀮𑀺𑀤𑁆𑀤𑀺𑀬𑀁 [𑀤𑀸𑀴𑀺𑀤𑁆𑀤𑀺𑀬𑀁 (𑀲𑀻.)], 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 [𑀤𑀴𑀺𑀤𑁆𑀤𑁄 (𑀲𑀻.)] 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 [𑀅𑀦𑀤𑁆𑀥𑀺𑀓𑁄 (𑀲𑁆𑀬𑀸. 𑀓𑀁.)] 𑀇𑀡𑀁 𑀆𑀤𑀺𑀬𑀢𑀺, 𑀇𑀡𑀸𑀤𑀸𑀦𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 𑀇𑀡𑀁 𑀆𑀤𑀺𑀬𑀺𑀢𑁆𑀯𑀸 𑀯𑀟𑁆𑀠𑀺𑀁 𑀧𑀝𑀺𑀲𑁆𑀲𑀼𑀡𑀸𑀢𑀺, 𑀯𑀟𑁆𑀠𑀺𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀸 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 𑀯𑀟𑁆𑀠𑀺𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑀸𑀮𑀸𑀪𑀢𑀁 [𑀓𑀸𑀮𑀕𑀢𑀁 (𑀓.)] 𑀯𑀟𑁆𑀠𑀺𑀁 𑀦 𑀤𑁂𑀢𑀺, 𑀘𑁄𑀤𑁂𑀦𑁆𑀢𑀺𑀧𑀺 𑀦𑀁; 𑀘𑁄𑀤𑀦𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀸 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 𑀘𑁄𑀤𑀺𑀬𑀫𑀸𑀦𑁄 𑀦 𑀤𑁂𑀢𑀺, 𑀅𑀦𑀼𑀘𑀭𑀦𑁆𑀢𑀺𑀧𑀺 𑀦𑀁; 𑀅𑀦𑀼𑀘𑀭𑀺𑀬𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀸 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 𑀅𑀦𑀼𑀘𑀭𑀺𑀬𑀫𑀸𑀦𑁄 𑀦 𑀤𑁂𑀢𑀺, 𑀩𑀦𑁆𑀥𑀦𑁆𑀢𑀺𑀧𑀺 𑀦𑀁; 𑀩𑀦𑁆𑀥𑀦𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀸𑀮𑀺𑀤𑁆𑀤𑀺𑀬𑀫𑁆𑀧𑀺 𑀤𑀼𑀓𑁆𑀔𑀁 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄, 𑀇𑀡𑀸𑀤𑀸𑀦𑀫𑁆𑀧𑀺 𑀤𑀼𑀓𑁆𑀔𑀁 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄, 𑀯𑀟𑁆𑀠𑀺𑀧𑀺 𑀤𑀼𑀓𑁆𑀔𑀸 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄, 𑀘𑁄𑀤𑀦𑀸𑀧𑀺 𑀤𑀼𑀓𑁆𑀔𑀸 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄, 𑀅𑀦𑀼𑀘𑀭𑀺𑀬𑀸𑀧𑀺 𑀤𑀼𑀓𑁆𑀔𑀸 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄, 𑀩𑀦𑁆𑀥𑀦𑀫𑁆𑀧𑀺 𑀤𑀼𑀓𑁆𑀔𑀁 𑀮𑁄𑀓𑀲𑁆𑀫𑀺𑀁 𑀓𑀸𑀫𑀪𑁄𑀕𑀺𑀦𑁄; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀻𑀭𑀺𑀬𑀁 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 𑀲𑀤𑁆𑀥𑀸𑀬 𑀅𑀲𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀺𑀬𑀸 𑀅𑀲𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑁂 𑀅𑀲𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀻𑀭𑀺𑀬𑁂 𑀅𑀲𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀜𑁆𑀜𑀸𑀬 𑀅𑀲𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀇𑀤𑀫𑀲𑁆𑀲 𑀇𑀡𑀸𑀤𑀸𑀦𑀲𑁆𑀫𑀺𑀁 𑀯𑀤𑀸𑀫𑀺.

‘‘𑀲𑁄 𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺 [𑀧𑀤𑀳𑀢𑀺 (𑀓.)]. ‘𑀫𑀸 𑀫𑀁 𑀚𑀜𑁆𑀜𑀽’𑀢𑀺 𑀇𑀘𑁆𑀙𑀢𑀺, ‘𑀫𑀸 𑀫𑀁 𑀚𑀜𑁆𑀜𑀽’𑀢𑀺 𑀲𑀗𑁆𑀓𑀧𑁆𑀧𑀢𑀺, ‘𑀫𑀸 𑀫𑀁 𑀚𑀜𑁆𑀜𑀽’𑀢𑀺 𑀯𑀸𑀘𑀁 𑀪𑀸𑀲𑀢𑀺, ‘𑀫𑀸 𑀫𑀁 𑀚𑀜𑁆𑀜𑀽’𑀢𑀺 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺. 𑀲𑁄 𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼…𑀧𑁂… 𑀲𑁄 𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼…𑀧𑁂… ‘𑀫𑀸 𑀫𑀁 𑀚𑀜𑁆𑀜𑀽’𑀢𑀺 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺. 𑀇𑀤𑀫𑀲𑁆𑀲 𑀯𑀟𑁆𑀠𑀺𑀬𑀸 𑀯𑀤𑀸𑀫𑀺.

‘‘𑀢𑀫𑁂𑀦𑀁 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑀜𑁆𑀘 𑀲𑁄 𑀆𑀬𑀲𑁆𑀫𑀸 𑀏𑀯𑀁𑀓𑀸𑀭𑀻 𑀏𑀯𑀁𑀲𑀫𑀸𑀘𑀸𑀭𑁄’𑀢𑀺. 𑀇𑀤𑀫𑀲𑁆𑀲 𑀘𑁄𑀤𑀦𑀸𑀬 𑀯𑀤𑀸𑀫𑀺.

‘‘𑀢𑀫𑁂𑀦𑀁 𑀅𑀭𑀜𑁆𑀜𑀕𑀢𑀁 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀁 𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀲𑀳𑀕𑀢𑀸 𑀧𑀸𑀧𑀓𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀇𑀤𑀫𑀲𑁆𑀲 𑀅𑀦𑀼𑀘𑀭𑀺𑀬𑀸𑀬 𑀯𑀤𑀸𑀫𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀦𑀺𑀭𑀬𑀩𑀦𑁆𑀥𑀦𑁂 𑀯𑀸 𑀩𑀚𑁆𑀛𑀢𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀩𑀦𑁆𑀥𑀦𑁂 𑀯𑀸. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀩𑀦𑁆𑀥𑀦𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁𑀤𑀸𑀭𑀼𑀡𑀁 𑀏𑀯𑀁𑀓𑀝𑀼𑀓𑀁 [𑀏𑀯𑀁𑀤𑀼𑀓𑁆𑀔𑀁 (𑀲𑁆𑀬𑀸. 𑀓𑀁. 𑀓.)] 𑀏𑀯𑀁𑀅𑀦𑁆𑀢𑀭𑀸𑀬𑀓𑀭𑀁 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀩𑀦𑁆𑀥𑀦𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀩𑀦𑁆𑀥𑀦𑀁 𑀯𑀸’’𑀢𑀺.

‘‘𑀤𑀸𑀮𑀺𑀤𑁆𑀤𑀺𑀬𑀁 𑀤𑀼𑀓𑁆𑀔𑀁 𑀮𑁄𑀓𑁂, 𑀇𑀡𑀸𑀤𑀸𑀦𑀜𑁆𑀘 𑀯𑀼𑀘𑁆𑀘𑀢𑀺;

𑀤𑀮𑀺𑀤𑁆𑀤𑁄 𑀇𑀡𑀫𑀸𑀤𑀸𑀬, 𑀪𑀼𑀜𑁆𑀚𑀫𑀸𑀦𑁄 𑀯𑀺𑀳𑀜𑁆𑀜𑀢𑀺.

‘‘𑀢𑀢𑁄 𑀅𑀦𑀼𑀘𑀭𑀦𑁆𑀢𑀺 𑀦𑀁, 𑀩𑀦𑁆𑀥𑀦𑀫𑁆𑀧𑀺 𑀦𑀺𑀕𑀘𑁆𑀙𑀢𑀺;

𑀏𑀢𑀜𑁆𑀳𑀺 𑀩𑀦𑁆𑀥𑀦𑀁 𑀤𑀼𑀓𑁆𑀔𑀁, 𑀓𑀸𑀫𑀮𑀸𑀪𑀸𑀪𑀺𑀚𑀧𑁆𑀧𑀺𑀦𑀁.

‘‘𑀢𑀣𑁂𑀯 𑀅𑀭𑀺𑀬𑀯𑀺𑀦𑀬𑁂, 𑀲𑀤𑁆𑀥𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀅𑀳𑀺𑀭𑀻𑀓𑁄 𑀅𑀦𑁄𑀢𑁆𑀢𑀧𑁆𑀧𑀻, 𑀧𑀸𑀧𑀓𑀫𑁆𑀫𑀯𑀺𑀦𑀺𑀩𑁆𑀩𑀬𑁄.

‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀢𑁆𑀯𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀢𑁆𑀯𑀸, ‘𑀫𑀸 𑀫𑀁 𑀚𑀜𑁆𑀜𑀽’𑀢𑀺 𑀇𑀘𑁆𑀙𑀢𑀺.

‘‘𑀲𑁄 𑀲𑀁𑀲𑀧𑁆𑀧𑀢𑀺 [𑀲𑀗𑁆𑀓𑀧𑁆𑀧𑀢𑀺 (𑀓.)] 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀧𑀸𑀧𑀓𑀫𑁆𑀫𑀁 𑀧𑀯𑀟𑁆𑀠𑁂𑀦𑁆𑀢𑁄, 𑀢𑀢𑁆𑀣 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁.

‘‘𑀲𑁄 𑀧𑀸𑀧𑀓𑀫𑁆𑀫𑁄 𑀤𑀼𑀫𑁆𑀫𑁂𑀥𑁄, 𑀚𑀸𑀦𑀁 𑀤𑀼𑀓𑁆𑀓𑀝𑀫𑀢𑁆𑀢𑀦𑁄;

𑀤𑀮𑀺𑀤𑁆𑀤𑁄 𑀇𑀡𑀫𑀸𑀤𑀸𑀬, 𑀪𑀼𑀜𑁆𑀚𑀫𑀸𑀦𑁄 𑀯𑀺𑀳𑀜𑁆𑀜𑀢𑀺.

‘‘𑀢𑀢𑁄 𑀅𑀦𑀼𑀘𑀭𑀦𑁆𑀢𑀺 𑀦𑀁, 𑀲𑀗𑁆𑀓𑀧𑁆𑀧𑀸 𑀫𑀸𑀦𑀲𑀸 𑀤𑀼𑀔𑀸;

𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀬𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀚𑀸.

‘‘𑀲𑁄 𑀧𑀸𑀧𑀓𑀫𑁆𑀫𑁄 𑀤𑀼𑀫𑁆𑀫𑁂𑀥𑁄, 𑀚𑀸𑀦𑀁 𑀤𑀼𑀓𑁆𑀓𑀝𑀫𑀢𑁆𑀢𑀦𑁄;

𑀬𑁄𑀦𑀺𑀫𑀜𑁆𑀜𑀢𑀭𑀁 𑀕𑀦𑁆𑀢𑁆𑀯𑀸, 𑀦𑀺𑀭𑀬𑁂 𑀯𑀸𑀧𑀺 𑀩𑀚𑁆𑀛𑀢𑀺.

‘‘𑀏𑀢𑀜𑁆𑀳𑀺 𑀩𑀦𑁆𑀥𑀦𑀁 𑀤𑀼𑀓𑁆𑀔𑀁, 𑀬𑀫𑁆𑀳𑀸 𑀥𑀻𑀭𑁄 𑀧𑀫𑀼𑀘𑁆𑀘𑀢𑀺;

𑀥𑀫𑁆𑀫𑀮𑀤𑁆𑀥𑁂𑀳𑀺 𑀪𑁄𑀕𑁂𑀳𑀺, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀁.

‘‘𑀉𑀪𑀬𑀢𑁆𑀣 𑀓𑀝𑀕𑁆𑀕𑀸𑀳𑁄, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘;

𑀏𑀯𑀫𑁂𑀢𑀁 𑀕𑀳𑀝𑁆𑀞𑀸𑀦𑀁, 𑀘𑀸𑀕𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺.

‘‘𑀢𑀣𑁂𑀯 𑀅𑀭𑀺𑀬𑀯𑀺𑀦𑀬𑁂, 𑀲𑀤𑁆𑀥𑀸 𑀬𑀲𑁆𑀲 𑀧𑀢𑀺𑀝𑁆𑀞𑀺𑀢𑀸;

𑀳𑀺𑀭𑀻𑀫𑀦𑁄 𑀘 𑀑𑀢𑁆𑀢𑀧𑁆𑀧𑀻, 𑀧𑀜𑁆𑀜𑀯𑀸 𑀲𑀻𑀮𑀲𑀁𑀯𑀼𑀢𑁄.

‘‘𑀏𑀲𑁄 𑀔𑁄 𑀅𑀭𑀺𑀬𑀯𑀺𑀦𑀬𑁂, ‘𑀲𑀼𑀔𑀚𑀻𑀯𑀻’𑀢𑀺 𑀯𑀼𑀘𑁆𑀘𑀢𑀺;

𑀦𑀺𑀭𑀸𑀫𑀺𑀲𑀁 𑀲𑀼𑀔𑀁 𑀮𑀤𑁆𑀥𑀸, 𑀉𑀧𑁂𑀓𑁆𑀔𑀁 𑀅𑀥𑀺𑀢𑀺𑀝𑁆𑀞𑀢𑀺.

‘‘𑀧𑀜𑁆𑀘 𑀦𑀻𑀯𑀭𑀡𑁂 𑀳𑀺𑀢𑁆𑀯𑀸, 𑀦𑀺𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑁄;

𑀛𑀸𑀦𑀸𑀦𑀺 𑀉𑀧𑀲𑀫𑁆𑀧𑀚𑁆𑀚, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄.

‘‘𑀏𑀯𑀁 𑀜𑀢𑁆𑀯𑀸 𑀬𑀣𑀸𑀪𑀽𑀢𑀁, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁂;

𑀲𑀩𑁆𑀩𑀲𑁄 𑀅𑀦𑀼𑀧𑀸𑀤𑀸𑀬, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

‘‘𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀜𑀸𑀡𑀁 𑀘𑁂 𑀳𑁄𑀢𑀺 𑀢𑀸𑀤𑀺𑀦𑁄;

‘𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀻’𑀢𑀺, 𑀪𑀯𑀲𑀁𑀬𑁄𑀚𑀦𑀓𑁆𑀔𑀬𑁂.

‘‘𑀏𑀢𑀁 𑀔𑁄 𑀧𑀭𑀫𑀁 𑀜𑀸𑀡𑀁, 𑀏𑀢𑀁 𑀲𑀼𑀔𑀫𑀦𑀼𑀢𑁆𑀢𑀭𑀁;

𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀏𑀢𑀁 𑀆𑀦𑀡𑁆𑀬𑀫𑀼𑀢𑁆𑀢𑀫’’𑀦𑁆𑀢𑀺. 𑀢𑀢𑀺𑀬𑀁;

𑁪. 𑀫𑀳𑀸𑀘𑀼𑀦𑁆𑀤𑀲𑀼𑀢𑁆𑀢𑀁

𑁪𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀘𑁂𑀢𑀻𑀲𑀼 𑀯𑀺𑀳𑀭𑀢𑀺 𑀲𑀬𑀁𑀚𑀸𑀢𑀺𑀬𑀁 [𑀲𑀳𑀚𑀸𑀢𑀺𑀬𑀁 (𑀲𑀻. 𑀧𑀻.), 𑀲𑀜𑁆𑀚𑀸𑀢𑀺𑀬𑀁 (𑀲𑁆𑀬𑀸. 𑀓𑀁.)]. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀘𑀼𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀯𑀼𑀲𑁄, 𑀥𑀫𑁆𑀫𑀬𑁄𑀕𑀸 𑀪𑀺𑀓𑁆𑀔𑀽 𑀛𑀸𑀬𑀻 𑀪𑀺𑀓𑁆𑀔𑀽 𑀅𑀧𑀲𑀸𑀤𑁂𑀦𑁆𑀢𑀺 𑁋 ‘𑀇𑀫𑁂 𑀧𑀦 𑀛𑀸𑀬𑀺𑀦𑁄𑀫𑁆𑀳𑀸, 𑀛𑀸𑀬𑀺𑀦𑁄𑀫𑁆𑀳𑀸𑀢𑀺 𑀛𑀸𑀬𑀦𑁆𑀢𑀺 𑀧𑀚𑁆𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀅𑀯𑀚𑁆𑀛𑀸𑀬𑀦𑁆𑀢𑀺 [𑀅𑀧𑀚𑁆𑀛𑀸𑀬𑀦𑁆𑀢𑀺 (𑀫. 𑀦𑀺. 𑁧.𑁫𑁦𑁮)]. 𑀓𑀺𑀫𑀺𑀫𑁂 [𑀓𑀺𑀁 𑀳𑀺𑀫𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀛𑀸𑀬𑀦𑁆𑀢𑀺, 𑀓𑀺𑀦𑁆𑀢𑀺𑀫𑁂 𑀛𑀸𑀬𑀦𑁆𑀢𑀺, 𑀓𑀣𑀁 𑀇𑀫𑁂 𑀛𑀸𑀬𑀦𑁆𑀢𑀻’𑀢𑀺? 𑀢𑀢𑁆𑀣 𑀥𑀫𑁆𑀫𑀬𑁄𑀕𑀸 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀛𑀸𑀬𑀻 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀦 𑀘 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀇𑀥 𑀧𑀦𑀸𑀯𑀼𑀲𑁄, 𑀛𑀸𑀬𑀻 𑀪𑀺𑀓𑁆𑀔𑀽 𑀥𑀫𑁆𑀫𑀬𑁄𑀕𑁂 𑀪𑀺𑀓𑁆𑀔𑀽 𑀅𑀧𑀲𑀸𑀤𑁂𑀦𑁆𑀢𑀺 𑁋 ‘𑀇𑀫𑁂 𑀧𑀦 𑀥𑀫𑁆𑀫𑀬𑁄𑀕𑀫𑁆𑀳𑀸, 𑀥𑀫𑁆𑀫𑀬𑁄𑀕𑀫𑁆𑀳𑀸𑀢𑀺 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸. 𑀓𑀺𑀫𑀺𑀫𑁂 𑀥𑀫𑁆𑀫𑀬𑁄𑀕𑀸, 𑀓𑀺𑀦𑁆𑀢𑀺𑀫𑁂 𑀥𑀫𑁆𑀫𑀬𑁄𑀕𑀸, 𑀓𑀣𑀁 𑀇𑀫𑁂 𑀥𑀫𑁆𑀫𑀬𑁄𑀕𑀸’𑀢𑀺? 𑀢𑀢𑁆𑀣 𑀛𑀸𑀬𑀻 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀥𑀫𑁆𑀫𑀬𑁄𑀕𑀸 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀦 𑀘 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀇𑀥 𑀧𑀦𑀸𑀯𑀼𑀲𑁄, 𑀥𑀫𑁆𑀫𑀬𑁄𑀕𑀸 𑀪𑀺𑀓𑁆𑀔𑀽 𑀥𑀫𑁆𑀫𑀬𑁄𑀕𑀸𑀦𑀜𑁆𑀜𑁂𑀯 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀦𑁄 𑀛𑀸𑀬𑀻𑀦𑀁 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀢𑀢𑁆𑀣 𑀥𑀫𑁆𑀫𑀬𑁄𑀕𑀸 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀛𑀸𑀬𑀻 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀦 𑀘 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀇𑀥 𑀧𑀦𑀸𑀯𑀼𑀲𑁄, 𑀛𑀸𑀬𑀻 𑀪𑀺𑀓𑁆𑀔𑀽 𑀛𑀸𑀬𑀻𑀦𑀜𑁆𑀜𑁂𑀯 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀦𑁄 𑀥𑀫𑁆𑀫𑀬𑁄𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀢𑀢𑁆𑀣 𑀛𑀸𑀬𑀻 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀥𑀫𑁆𑀫𑀬𑁄𑀕𑀸 𑀘 𑀪𑀺𑀓𑁆𑀔𑀽 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀦 𑀘 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

‘‘𑀢𑀲𑁆𑀫𑀸𑀢𑀺𑀳𑀸𑀯𑀼𑀲𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀥𑀫𑁆𑀫𑀬𑁄𑀕𑀸 𑀲𑀫𑀸𑀦𑀸 𑀛𑀸𑀬𑀻𑀦𑀁 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀆𑀯𑀼𑀲𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁, 𑀬𑁂 𑀅𑀫𑀢𑀁 𑀥𑀸𑀢𑀼𑀁 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀢𑀲𑁆𑀫𑀸𑀢𑀺𑀳𑀸𑀯𑀼𑀲𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀛𑀸𑀬𑀻 𑀲𑀫𑀸𑀦𑀸 𑀥𑀫𑁆𑀫𑀬𑁄𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀆𑀯𑀼𑀲𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀘𑁆𑀙𑀭𑀺𑀬𑀸 𑀳𑁂𑀢𑁂, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁 𑀬𑁂 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀁 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀦𑁆𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀁

𑁪𑁭. 𑀅𑀣 𑀔𑁄 𑀫𑁄𑀴𑀺𑀬𑀲𑀻𑀯𑀓𑁄 [𑀫𑁄𑀮𑀺𑀬𑀲𑀻𑀯𑀓𑁄 (𑀲𑀻. 𑀧𑀻.), 𑀫𑁄𑀴𑀺𑀲𑀻𑀯𑀓𑁄 (𑀓.)] 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑁄𑀴𑀺𑀬𑀲𑀻𑀯𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺?

‘‘𑀢𑁂𑀦 𑀳𑀺, 𑀲𑀻𑀯𑀓, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀯𑀓, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀮𑁄𑀪𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀮𑁄𑀪𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀮𑁄𑀪𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀮𑁄𑀪𑁄’𑀢𑀺 𑀧𑀚𑀸𑀦𑀸𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀁 𑀔𑁄 𑀢𑁆𑀯𑀁, 𑀲𑀻𑀯𑀓, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀮𑁄𑀪𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀮𑁄𑀪𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀮𑁄𑀪𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀮𑁄𑀪𑁄’𑀢𑀺 𑀧𑀚𑀸𑀦𑀸𑀲𑀺 𑁋 𑀏𑀯𑀫𑁆𑀧𑀺 𑀔𑁄, 𑀲𑀻𑀯𑀓, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺…𑀧𑁂….

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀻𑀯𑀓, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀤𑁄𑀲𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑁄𑀳𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀮𑁄𑀪𑀥𑀫𑁆𑀫𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀤𑁄𑀲𑀥𑀫𑁆𑀫𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑁄’𑀢𑀺 𑀧𑀚𑀸𑀦𑀸𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀁 𑀔𑁄 𑀢𑁆𑀯𑀁, 𑀲𑀻𑀯𑀓, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑁄𑀳𑀥𑀫𑁆𑀫𑁄’𑀢𑀺 𑀧𑀚𑀸𑀦𑀸𑀲𑀺 𑁋 𑀏𑀯𑀁 𑀔𑁄, 𑀲𑀻𑀯𑀓, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀉𑀧𑀸𑀲𑀓𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀁

𑁪𑁮. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄’𑀢𑀺, 𑀪𑁄 𑀕𑁄𑀢𑀫, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺?

‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀭𑀸𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀭𑀸𑀕𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀭𑀸𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀭𑀸𑀕𑁄’𑀢𑀺 𑀧𑀚𑀸𑀦𑀸𑀲𑀻’’𑀢𑀺? ‘‘𑀏𑀯𑀁, 𑀪𑁄’’. ‘‘𑀬𑀁 𑀔𑁄 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀭𑀸𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀭𑀸𑀕𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀭𑀸𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀭𑀸𑀕𑁄’𑀢𑀺 𑀧𑀚𑀸𑀦𑀸𑀲𑀺 𑁋 𑀏𑀯𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺…𑀧𑁂….

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀤𑁄𑀲𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑁄𑀳𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀬𑀲𑀦𑁆𑀤𑁄𑀲𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀘𑀻𑀲𑀦𑁆𑀤𑁄𑀲𑀁…𑀧𑁂… 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑁄’𑀢𑀺 𑀧𑀚𑀸𑀦𑀸𑀲𑀻’’𑀢𑀺? ‘‘𑀏𑀯𑀁, 𑀪𑁄’’. ‘‘𑀬𑀁 𑀔𑁄 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑁄’𑀢𑀺 𑀧𑀚𑀸𑀦𑀸𑀲𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑁄𑀲𑀦𑁆𑀤𑁄𑀲𑁄’𑀢𑀺 𑀧𑀚𑀸𑀦𑀸𑀲𑀺 𑁋 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀔𑁂𑀫𑀲𑀼𑀢𑁆𑀢𑀁

𑁪𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀔𑁂𑀫𑁄 𑀆𑀬𑀲𑁆𑀫𑀸 𑀘 𑀲𑀼𑀫𑀦𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑀺 𑀅𑀦𑁆𑀥𑀯𑀦𑀲𑁆𑀫𑀺𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀔𑁂𑀫𑁄 𑀆𑀬𑀲𑁆𑀫𑀸 𑀘 𑀲𑀼𑀫𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀔𑁂𑀫𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀅𑀢𑁆𑀣𑀺 𑀫𑁂 𑀲𑁂𑀬𑁆𑀬𑁄𑀢𑀺 𑀯𑀸 𑀅𑀢𑁆𑀣𑀺 𑀫𑁂 𑀲𑀤𑀺𑀲𑁄𑀢𑀺 𑀯𑀸 𑀅𑀢𑁆𑀣𑀺 𑀫𑁂 𑀳𑀻𑀦𑁄𑀢𑀺 𑀯𑀸’’’𑀢𑀺. 𑀇𑀤𑀫𑀯𑁄𑀘𑀸𑀬𑀲𑁆𑀫𑀸 𑀔𑁂𑀫𑁄. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀔𑁂𑀫𑁄 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀫𑀦𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀔𑁂𑀫𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀦𑀢𑁆𑀣𑀺 𑀫𑁂 𑀲𑁂𑀬𑁆𑀬𑁄𑀢𑀺 𑀯𑀸 𑀦𑀢𑁆𑀣𑀺 𑀫𑁂 𑀲𑀤𑀺𑀲𑁄𑀢𑀺 𑀯𑀸 𑀦𑀢𑁆𑀣𑀺 𑀫𑁂 𑀳𑀻𑀦𑁄𑀢𑀺 𑀯𑀸’’’𑀢𑀺. 𑀇𑀤𑀫𑀯𑁄𑀘𑀸𑀬𑀲𑁆𑀫𑀸 𑀲𑀼𑀫𑀦𑁄. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀫𑀦𑁄 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀆𑀬𑀲𑁆𑀫𑀦𑁆𑀢𑁂 𑀘 𑀔𑁂𑀫𑁂 𑀆𑀬𑀲𑁆𑀫𑀦𑁆𑀢𑁂 𑀘 𑀲𑀼𑀫𑀦𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺. 𑀅𑀢𑁆𑀣𑁄 𑀘 𑀯𑀼𑀢𑁆𑀢𑁄 𑀅𑀢𑁆𑀢𑀸 𑀘 𑀅𑀦𑀼𑀧𑀦𑀻𑀢𑁄. 𑀅𑀣 𑀘 𑀧𑀦 𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀳𑀲𑀫𑀸𑀦𑀓𑀸 [𑀳𑀲𑀫𑀸𑀦𑀓𑀁 (𑀓.) 𑀫𑀳𑀸𑀯. 𑁨𑁪𑁫] 𑀫𑀜𑁆𑀜𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺. 𑀢𑁂 𑀧𑀘𑁆𑀙𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀦 𑀉𑀲𑁆𑀲𑁂𑀲𑀼 𑀦 𑀑𑀫𑁂𑀲𑀼, 𑀲𑀫𑀢𑁆𑀢𑁂 𑀦𑁄𑀧𑀦𑀻𑀬𑀭𑁂 [𑀦𑁄𑀧𑀦𑀺𑀬𑁆𑀬𑀭𑁂 (𑀲𑁆𑀬𑀸. 𑀧𑀻. 𑀓.)];

𑀔𑀻𑀡𑀸 𑀚𑀸𑀢𑀺 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀦𑁆𑀢𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑀼𑀢𑁆𑀢𑀸’’𑀢𑀺. 𑀲𑀢𑁆𑀢𑀫𑀁;

𑁮. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀢𑁆𑀢𑀁

𑁫𑁦. [𑀅. 𑀦𑀺. 𑁫.𑁨𑁪, 𑁧𑁬𑁮; 𑁨.𑁭.𑁬𑁫] ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀻𑀮𑀁; 𑀲𑀻𑀮𑁂 𑀅𑀲𑀢𑀺 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺; 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀅𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁; 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀅𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄; 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀯𑀺𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀨𑁂𑀕𑁆𑀕𑀼𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀲𑀸𑀭𑁄𑀧𑀺 𑀦 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀅𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀧𑀦𑁆𑀦𑀲𑁆𑀲 𑀳𑀢𑀽𑀧𑀦𑀺𑀲𑀁 𑀳𑁄𑀢𑀺 𑀲𑀻𑀮𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁.

‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂, 𑀪𑀺𑀓𑁆𑀔𑀯𑁂, 𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀻𑀮𑀁; 𑀲𑀻𑀮𑁂 𑀲𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺; 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁; 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑁂 𑀲𑀢𑀺 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁄; 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑁂 𑀲𑀢𑀺 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀲𑀸𑀔𑀸𑀧𑀮𑀸𑀲𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀧𑀝𑀺𑀓𑀸𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀘𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀨𑁂𑀕𑁆𑀕𑀼𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀲𑀸𑀭𑁄𑀧𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀲𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑀲𑀫𑁆𑀧𑀦𑁆𑀦𑀁 𑀳𑁄𑀢𑀺 𑀲𑀻𑀮𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁫𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀲𑁆𑀲𑀼𑀢𑀜𑁆𑀘𑁂𑀯 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑀼𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀦 𑀲𑀫𑁆𑀫𑁄𑀲𑀁 𑀕𑀘𑁆𑀙𑀦𑁆𑀢𑀺, 𑀬𑁂 𑀘𑀲𑁆𑀲 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀘𑁂𑀢𑀲𑀸 𑀲𑀫𑁆𑀨𑀼𑀝𑁆𑀞𑀧𑀼𑀩𑁆𑀩𑀸 𑀢𑁂 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀯𑀺𑀜𑁆𑀜𑀸𑀢𑀜𑁆𑀘 𑀯𑀺𑀚𑀸𑀦𑀸𑀢𑀻’’𑀢𑀺? ‘‘𑀆𑀬𑀲𑁆𑀫𑀸 𑀔𑁄 𑀆𑀦𑀦𑁆𑀤𑁄 𑀩𑀳𑀼𑀲𑁆𑀲𑀼𑀢𑁄. 𑀧𑀝𑀺𑀪𑀸𑀢𑀼 𑀆𑀬𑀲𑁆𑀫𑀦𑁆𑀢𑀁𑀬𑁂𑀯 𑀆𑀦𑀦𑁆𑀤’’𑀦𑁆𑀢𑀺. ‘‘𑀢𑁂𑀦𑀳𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀲𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀯𑀸𑀘𑁂𑀢𑀺, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺. 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑁂𑀢𑀺. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 𑁋 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁; 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄’𑀢𑀺? 𑀢𑁂 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀲𑁆𑀲𑀼𑀢𑀜𑁆𑀘𑁂𑀯 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑀼𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀦 𑀲𑀫𑁆𑀫𑁄𑀲𑀁 𑀕𑀘𑁆𑀙𑀦𑁆𑀢𑀺, 𑀬𑁂 𑀘𑀲𑁆𑀲 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀘𑁂𑀢𑀲𑀸 𑀲𑀫𑁆𑀨𑀼𑀝𑁆𑀞𑀧𑀼𑀩𑁆𑀩𑀸 𑀢𑁂 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀯𑀺𑀜𑁆𑀜𑀸𑀢𑀜𑁆𑀘 𑀯𑀺𑀚𑀸𑀦𑀸𑀢𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦. 𑀇𑀫𑁂𑀳𑀺 𑀘 𑀫𑀬𑀁 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀥𑀸𑀭𑁂𑀫. 𑀆𑀬𑀲𑁆𑀫𑀸 𑀳𑀺 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀯𑀸𑀘𑁂𑀢𑀺, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑁂𑀢𑀺. 𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 𑁋 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁; 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄’𑀢𑀺? 𑀢𑁂 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀔𑀢𑁆𑀢𑀺𑀬𑀲𑀼𑀢𑁆𑀢𑀁

𑁫𑁨. 𑀅𑀣 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 [𑀚𑀸𑀡𑀼𑀲𑁄𑀡𑀺 (𑀓.)] 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀔𑀢𑁆𑀢𑀺𑀬𑀸, 𑀪𑁄 𑀕𑁄𑀢𑀫, 𑀓𑀺𑀁𑀅𑀥𑀺𑀧𑁆𑀧𑀸𑀬𑀸, 𑀓𑀺𑀁𑀉𑀧𑀯𑀺𑀘𑀸𑀭𑀸, 𑀓𑀺𑀁𑀅𑀥𑀺𑀝𑁆𑀞𑀸𑀦𑀸, 𑀓𑀺𑀁𑀅𑀪𑀺𑀦𑀺𑀯𑁂𑀲𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀔𑀢𑁆𑀢𑀺𑀬𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑁄𑀕𑀸𑀥𑀺𑀧𑁆𑀧𑀸𑀬𑀸 𑀧𑀜𑁆𑀜𑀽𑀧𑀯𑀺𑀘𑀸𑀭𑀸 𑀩𑀮𑀸𑀥𑀺𑀝𑁆𑀞𑀸𑀦𑀸 𑀧𑀣𑀯𑀻𑀪𑀺𑀦𑀺𑀯𑁂𑀲𑀸 𑀇𑀲𑁆𑀲𑀭𑀺𑀬𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀩𑁆𑀭𑀸𑀳𑁆𑀫𑀡𑀸 𑀧𑀦, 𑀪𑁄 𑀕𑁄𑀢𑀫, 𑀓𑀺𑀁𑀅𑀥𑀺𑀧𑁆𑀧𑀸𑀬𑀸, 𑀓𑀺𑀁𑀉𑀧𑀯𑀺𑀘𑀸𑀭𑀸, 𑀓𑀺𑀁𑀅𑀥𑀺𑀝𑁆𑀞𑀸𑀦𑀸, 𑀓𑀺𑀁𑀅𑀪𑀺𑀦𑀺𑀯𑁂𑀲𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀩𑁆𑀭𑀸𑀳𑁆𑀫𑀡𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑁄𑀕𑀸𑀥𑀺𑀧𑁆𑀧𑀸𑀬𑀸 𑀧𑀜𑁆𑀜𑀽𑀧𑀯𑀺𑀘𑀸𑀭𑀸 𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀸 𑀬𑀜𑁆𑀜𑀸𑀪𑀺𑀦𑀺𑀯𑁂𑀲𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀕𑀳𑀧𑀢𑀺𑀓𑀸 𑀧𑀦, 𑀪𑁄 𑀕𑁄𑀢𑀫, 𑀓𑀺𑀁𑀅𑀥𑀺𑀧𑁆𑀧𑀸𑀬𑀸, 𑀓𑀺𑀁𑀉𑀧𑀯𑀺𑀘𑀸𑀭𑀸, 𑀓𑀺𑀁𑀅𑀥𑀺𑀝𑁆𑀞𑀸𑀦𑀸, 𑀓𑀺𑀁𑀅𑀪𑀺𑀦𑀺𑀯𑁂𑀲𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀕𑀳𑀧𑀢𑀺𑀓𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑁄𑀕𑀸𑀥𑀺𑀧𑁆𑀧𑀸𑀬𑀸 𑀧𑀜𑁆𑀜𑀽𑀧𑀯𑀺𑀘𑀸𑀭𑀸 𑀲𑀺𑀧𑁆𑀧𑀸𑀥𑀺𑀝𑁆𑀞𑀸𑀦𑀸 𑀓𑀫𑁆𑀫𑀦𑁆𑀢𑀸𑀪𑀺𑀦𑀺𑀯𑁂𑀲𑀸 𑀦𑀺𑀝𑁆𑀞𑀺𑀢𑀓𑀫𑁆𑀫𑀦𑁆𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀇𑀢𑁆𑀣𑀻 𑀧𑀦, 𑀪𑁄 𑀕𑁄𑀢𑀫, 𑀓𑀺𑀁𑀅𑀥𑀺𑀧𑁆𑀧𑀸𑀬𑀸, 𑀓𑀺𑀁𑀉𑀧𑀯𑀺𑀘𑀸𑀭𑀸, 𑀓𑀺𑀁𑀅𑀥𑀺𑀝𑁆𑀞𑀸𑀦𑀸, 𑀓𑀺𑀁𑀅𑀪𑀺𑀦𑀺𑀯𑁂𑀲𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀇𑀢𑁆𑀣𑀻 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀸 𑀅𑀮𑀗𑁆𑀓𑀸𑀭𑀽𑀧𑀯𑀺𑀘𑀸𑀭𑀸 𑀧𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀅𑀲𑀧𑀢𑀻𑀪𑀺𑀦𑀺𑀯𑁂𑀲𑀸 𑀇𑀲𑁆𑀲𑀭𑀺𑀬𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀘𑁄𑀭𑀸 𑀧𑀦, 𑀪𑁄 𑀕𑁄𑀢𑀫, 𑀓𑀺𑀁𑀅𑀥𑀺𑀧𑁆𑀧𑀸𑀬𑀸, 𑀓𑀺𑀁𑀉𑀧𑀯𑀺𑀘𑀸𑀭𑀸, 𑀓𑀺𑀁𑀅𑀥𑀺𑀝𑁆𑀞𑀸𑀦𑀸, 𑀓𑀺𑀁𑀅𑀪𑀺𑀦𑀺𑀯𑁂𑀲𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀘𑁄𑀭𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀤𑀸𑀦𑀸𑀥𑀺𑀧𑁆𑀧𑀸𑀬𑀸 𑀕𑀳𑀦𑀽𑀧𑀯𑀺𑀘𑀸𑀭𑀸 𑀲𑀢𑁆𑀣𑀸𑀥𑀺𑀝𑁆𑀞𑀸𑀦𑀸 𑀅𑀦𑁆𑀥𑀓𑀸𑀭𑀸𑀪𑀺𑀦𑀺𑀯𑁂𑀲𑀸 𑀅𑀤𑀲𑁆𑀲𑀦𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀲𑀫𑀡𑀸 𑀧𑀦, 𑀪𑁄 𑀕𑁄𑀢𑀫, 𑀓𑀺𑀁𑀅𑀥𑀺𑀧𑁆𑀧𑀸𑀬𑀸, 𑀓𑀺𑀁𑀉𑀧𑀯𑀺𑀘𑀸𑀭𑀸, 𑀓𑀺𑀁𑀅𑀥𑀺𑀝𑁆𑀞𑀸𑀦𑀸, 𑀓𑀺𑀁𑀅𑀪𑀺𑀦𑀺𑀯𑁂𑀲𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀲𑀫𑀡𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀥𑀺𑀧𑁆𑀧𑀸𑀬𑀸 𑀧𑀜𑁆𑀜𑀽𑀧𑀯𑀺𑀘𑀸𑀭𑀸 𑀲𑀻𑀮𑀸𑀥𑀺𑀝𑁆𑀞𑀸𑀦𑀸 𑀆𑀓𑀺𑀜𑁆𑀘𑀜𑁆𑀜𑀸𑀪𑀺𑀦𑀺𑀯𑁂𑀲𑀸 [𑀅𑀓𑀺𑀜𑁆𑀘𑀦𑀸𑀪𑀺𑀦𑀺𑀯𑁂𑀲𑀸 (𑀲𑁆𑀬𑀸. 𑀓.)] 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀔𑀢𑁆𑀢𑀺𑀬𑀸𑀦𑀫𑁆𑀧𑀺 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑀜𑁆𑀘 𑀉𑀧𑀯𑀺𑀘𑀸𑀭𑀜𑁆𑀘 𑀅𑀥𑀺𑀝𑁆𑀞𑀸𑀦𑀜𑁆𑀘 𑀅𑀪𑀺𑀦𑀺𑀯𑁂𑀲𑀜𑁆𑀘 𑀧𑀭𑀺𑀬𑁄𑀲𑀸𑀦𑀜𑁆𑀘. 𑀩𑁆𑀭𑀸𑀳𑁆𑀫𑀡𑀸𑀦𑀫𑁆𑀧𑀺 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀺…𑀧𑁂… 𑀕𑀳𑀧𑀢𑀻𑀦𑀫𑁆𑀧𑀺 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀺… 𑀇𑀢𑁆𑀣𑀻𑀦𑀫𑁆𑀧𑀺 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀺… 𑀘𑁄𑀭𑀸𑀦𑀫𑁆𑀧𑀺 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀺 … 𑀲𑀫𑀡𑀸𑀦𑀫𑁆𑀧𑀺 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑀜𑁆𑀘 𑀉𑀧𑀯𑀺𑀘𑀸𑀭𑀜𑁆𑀘 𑀅𑀥𑀺𑀝𑁆𑀞𑀸𑀦𑀜𑁆𑀘 𑀅𑀪𑀺𑀦𑀺𑀯𑁂𑀲𑀜𑁆𑀘 𑀧𑀭𑀺𑀬𑁄𑀲𑀸𑀦𑀜𑁆𑀘. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀤𑀲𑀫𑀁.

𑁧𑁧. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀁

𑁫𑁩. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁, 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁, 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺.

‘‘𑀓𑀢𑀫𑁄 𑀧𑀦, 𑀪𑁄 𑀕𑁄𑀢𑀫, 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀬𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁, 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺? ‘‘𑀅𑀧𑁆𑀧𑀫𑀸𑀤𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁, 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀗𑁆𑀕𑀮𑀸𑀦𑀁 [𑀚𑀗𑁆𑀕𑀫𑀸𑀦𑀁 (𑀲𑀻. 𑀧𑀻.) 𑀅. 𑀦𑀺. 𑁧𑁦.𑁧𑁫; 𑀫. 𑀦𑀺. 𑁧.𑁩𑁦𑁦] 𑀧𑀸𑀡𑀸𑀦𑀁 𑀧𑀤𑀚𑀸𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺; 𑀳𑀢𑁆𑀣𑀺𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀫𑀸𑀤𑁄 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁, 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀓𑀽𑀝𑀸𑀕𑀸𑀭𑀲𑁆𑀲 𑀬𑀸 𑀓𑀸𑀘𑀺 𑀕𑁄𑀧𑀸𑀦𑀲𑀺𑀬𑁄 𑀲𑀩𑁆𑀩𑀸 𑀢𑀸 𑀓𑀽𑀝𑀗𑁆𑀕𑀫𑀸 𑀓𑀽𑀝𑀦𑀺𑀦𑁆𑀦𑀸 𑀓𑀽𑀝𑀲𑀫𑁄𑀲𑀭𑀡𑀸, 𑀓𑀽𑀝𑀁 𑀢𑀸𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡 …𑀧𑁂….

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀧𑀩𑁆𑀩𑀚𑀮𑀸𑀬𑀓𑁄 𑀧𑀩𑁆𑀩𑀚𑀁 [𑀩𑀩𑁆𑀩𑀚𑀮𑀸𑀬𑀓𑁄 𑀩𑀩𑁆𑀩𑀚𑀁 (𑀲𑀻. 𑀧𑀻.)] 𑀮𑀸𑀬𑀺𑀢𑁆𑀯𑀸 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀑𑀥𑀼𑀦𑀸𑀢𑀺 𑀦𑀺𑀥𑀼𑀦𑀸𑀢𑀺 𑀦𑀺𑀘𑁆𑀙𑀸𑀤𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡…𑀧𑁂….

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀅𑀫𑁆𑀩𑀧𑀺𑀡𑁆𑀟𑀺𑀬𑀸 𑀯𑀡𑁆𑀝𑀘𑁆𑀙𑀺𑀦𑁆𑀦𑀸𑀬 𑀬𑀸𑀦𑀺 𑀓𑀸𑀦𑀺𑀘𑀺 𑀅𑀫𑁆𑀩𑀸𑀦𑀺 𑀯𑀡𑁆𑀝𑀽𑀧𑀦𑀺𑀩𑀦𑁆𑀥𑀦𑀸𑀦𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀪𑀯𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡…𑀧𑁂….

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀬𑁂 𑀓𑁂𑀘𑀺 𑀔𑀼𑀤𑁆𑀤𑀭𑀸𑀚𑀸𑀦𑁄 [𑀓𑀼𑀟𑁆𑀟𑀭𑀸𑀚𑀸𑀦𑁄 (𑀲𑀻. 𑀲𑁆𑀬𑀸. 𑀅𑀝𑁆𑀞.), 𑀓𑀼𑀤𑁆𑀤𑀭𑀸𑀚𑀸𑀦𑁄 (𑀧𑀻.) 𑀅. 𑀦𑀺. 𑁧𑁦.𑁧𑁫] 𑀲𑀩𑁆𑀩𑁂𑀢𑁂 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀦𑀼𑀬𑀦𑁆𑀢𑀸 [𑀅𑀦𑀼𑀬𑀼𑀢𑁆𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀦𑁆𑀢𑀺, 𑀭𑀸𑀚𑀸 𑀢𑁂𑀲𑀁 𑀘𑀓𑁆𑀓𑀯𑀢𑁆𑀢𑀻 𑀅𑀕𑁆𑀕𑀫𑀓𑁆𑀔𑀸𑀬𑀢𑀺; 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡…𑀧𑁂….

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀬𑀸 𑀓𑀸𑀘𑀺 𑀢𑀸𑀭𑀓𑀭𑀽𑀧𑀸𑀦𑀁 𑀧𑀪𑀸 𑀲𑀩𑁆𑀩𑀸 𑀢𑀸 𑀘𑀦𑁆𑀤𑀲𑁆𑀲 𑀧𑀪𑀸𑀬 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁, 𑀘𑀦𑁆𑀤𑀧𑁆𑀧𑀪𑀸 𑀢𑀸𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀫𑀸𑀤𑁄 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄.

‘‘𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀓𑁄 𑀥𑀫𑁆𑀫𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀉𑀪𑁄 𑀅𑀢𑁆𑀣𑁂 𑀲𑀫𑀥𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘𑁂𑀯 𑀅𑀢𑁆𑀣𑀁, 𑀬𑁄 𑀘 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺.