𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄

𑀙𑀓𑁆𑀓𑀦𑀺𑀧𑀸𑀢𑀧𑀸𑀴𑀺

𑁧. 𑀧𑀞𑀫𑀧𑀡𑁆𑀡𑀸𑀲𑀓𑀁

𑁧. 𑀆𑀳𑀼𑀦𑁂𑀬𑁆𑀬𑀯𑀕𑁆𑀕𑁄

𑁧. 𑀧𑀞𑀫𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀁

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺 [𑀤𑀻. 𑀦𑀺. 𑁩.𑁩𑁨𑁮; 𑀧𑀝𑀺. 𑀫. 𑁩.𑁧𑁭]? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀁

𑁨. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺 [𑀤𑀻. 𑀦𑀺. 𑁩.𑁩𑁫𑁬]? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀢𑀺 [𑀧𑀭𑀸𑀫𑀲𑀢𑀺 (𑀓.)] 𑀧𑀭𑀺𑀫𑀚𑁆𑀚𑀢𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀤𑀺𑀩𑁆𑀩𑀸𑀬, 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑁋 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘, 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘.

‘‘𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺. 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁… 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁… 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁… 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁… 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁… 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁… 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁… 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁… 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁… 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁… 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁… 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁… 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺.

‘‘𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂…. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀇𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀁

𑁩. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑁂𑀦, 𑀲𑀢𑀺𑀦𑁆𑀤𑁆𑀭𑀺𑀬𑁂𑀦, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀢𑀢𑀺𑀬𑀁.

𑁪. 𑀩𑀮𑀲𑀼𑀢𑁆𑀢𑀁

𑁪. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺? 𑀲𑀤𑁆𑀥𑀸𑀩𑀮𑁂𑀦, 𑀯𑀻𑀭𑀺𑀬𑀩𑀮𑁂𑀦, 𑀲𑀢𑀺𑀩𑀮𑁂𑀦, 𑀲𑀫𑀸𑀥𑀺𑀩𑀮𑁂𑀦, 𑀧𑀜𑁆𑀜𑀸𑀩𑀮𑁂𑀦, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀆𑀚𑀸𑀦𑀻𑀬𑀲𑀼𑀢𑁆𑀢𑀁

𑁫. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁, 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁, 𑀔𑀫𑁄 𑀥𑀫𑁆𑀫𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀆𑀚𑀸𑀦𑀻𑀬𑀲𑀼𑀢𑁆𑀢𑀁

𑁬. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁, 𑀩𑀮𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁 …𑀧𑁂… 𑀔𑀫𑁄 𑀥𑀫𑁆𑀫𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀙𑀝𑁆𑀞𑀁.

𑁭. 𑀢𑀢𑀺𑀬𑀆𑀚𑀸𑀦𑀻𑀬𑀲𑀼𑀢𑁆𑀢𑀁

𑁭. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁, 𑀔𑀫𑁄 𑀲𑀤𑁆𑀤𑀸𑀦𑀁, 𑀔𑀫𑁄 𑀕𑀦𑁆𑀥𑀸𑀦𑀁, 𑀔𑀫𑁄 𑀭𑀲𑀸𑀦𑀁, 𑀔𑀫𑁄 𑀨𑁄𑀝𑁆𑀞𑀩𑁆𑀩𑀸𑀦𑀁, 𑀚𑀯𑀲𑀫𑁆𑀧𑀦𑁆𑀦𑁄 𑀘 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀜𑁆𑀜𑁄 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀔𑀫𑁄 𑀳𑁄𑀢𑀺 𑀭𑀽𑀧𑀸𑀦𑀁…𑀧𑁂… 𑀔𑀫𑁄 𑀥𑀫𑁆𑀫𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀁

𑁮. [𑀤𑀻. 𑀦𑀺. 𑁩.𑁩𑁨𑁭] ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀢𑁆𑀢𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀙? 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁, 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀁, 𑀮𑀸𑀪𑀸𑀦𑀼𑀢𑁆𑀢𑀭𑀺𑀬𑀁, 𑀲𑀺𑀓𑁆𑀔𑀸𑀦𑀼𑀢𑁆𑀢𑀭𑀺𑀬𑀁, 𑀧𑀸𑀭𑀺𑀘𑀭𑀺𑀬𑀸𑀦𑀼𑀢𑁆𑀢𑀭𑀺𑀬𑀁, 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀲𑀼𑀢𑁆𑀢𑀁

𑁯. [𑀤𑀻. 𑀦𑀺. 𑁩.𑁩𑁨𑁭] ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀙? 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺, 𑀲𑀻𑀮𑀸𑀦𑀼𑀲𑁆𑀲𑀢𑀺, 𑀘𑀸𑀕𑀸𑀦𑀼𑀲𑁆𑀲𑀢𑀺, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻’’𑀢𑀺. 𑀦𑀯𑀫𑀁.

𑁧𑁦. 𑀫𑀳𑀸𑀦𑀸𑀫𑀲𑀼𑀢𑁆𑀢𑀁

𑁧𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄, 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁄 𑀲𑁄, 𑀪𑀦𑁆𑀢𑁂, 𑀅𑀭𑀺𑀬𑀲𑀸𑀯𑀓𑁄 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄, 𑀲𑁄 𑀓𑀢𑀫𑁂𑀦 𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀢𑀻’’𑀢𑀺?

‘‘𑀬𑁄 𑀲𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄, 𑀲𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀢𑀺. [𑀅. 𑀦𑀺. 𑁧𑁧.𑁧𑁧] 𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺; 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫 𑁋 ‘𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬 𑀲𑀫𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀬𑀸𑀧𑀚𑁆𑀚𑀸𑀬 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀚𑁄 𑀯𑀺𑀳𑀭𑀢𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺; 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀥𑀫𑁆𑀫𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢 𑀧𑀸𑀫𑁄𑀚𑁆𑀚𑀁. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫 𑁋 ‘𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬 𑀲𑀫𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀬𑀸𑀧𑀚𑁆𑀚𑀸𑀬 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀚𑁄 𑀯𑀺𑀳𑀭𑀢𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀺 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺; 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀲𑀗𑁆𑀖𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫 𑁋 ‘𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬 𑀲𑀫𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀬𑀸𑀧𑀚𑁆𑀚𑀸𑀬 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀚𑁄 𑀯𑀺𑀳𑀭𑀢𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀅𑀦𑀼𑀲𑁆𑀲𑀭𑀢𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺. 𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀁 𑀅𑀦𑀼𑀲𑁆𑀲𑀭𑀢𑀺 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺; 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀲𑀻𑀮𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫 𑁋 ‘𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬 𑀲𑀫𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀬𑀸𑀧𑀚𑁆𑀚𑀸𑀬 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀚𑁄 𑀯𑀺𑀳𑀭𑀢𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀲𑀻𑀮𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀘𑀸𑀕𑀁 𑀅𑀦𑀼𑀲𑁆𑀲𑀭𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂! 𑀬𑁄𑀳𑀁 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀸𑀬 𑀧𑀚𑀸𑀬 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀸𑀫𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄’𑀢𑀺. 𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀘𑀸𑀕𑀁 𑀅𑀦𑀼𑀲𑁆𑀲𑀭𑀢𑀺 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺; 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀘𑀸𑀕𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫 𑁋 ‘𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬 𑀲𑀫𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀬𑀸𑀧𑀚𑁆𑀚𑀸𑀬 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀚𑁄 𑀯𑀺𑀳𑀭𑀢𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀘𑀸𑀕𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺’’’.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀲𑀦𑁆𑀢𑀺 𑀤𑁂𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀲𑀦𑁆𑀢𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀲𑀦𑁆𑀢𑀺 𑀤𑁂𑀯𑀸 𑀬𑀸𑀫𑀸, 𑀲𑀦𑁆𑀢𑀺 𑀤𑁂𑀯𑀸 𑀢𑀼𑀲𑀺𑀢𑀸, 𑀲𑀦𑁆𑀢𑀺 𑀤𑁂𑀯𑀸 𑀦𑀺𑀫𑁆𑀫𑀸𑀦𑀭𑀢𑀺𑀦𑁄, 𑀲𑀦𑁆𑀢𑀺 𑀤𑁂𑀯𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄, 𑀲𑀦𑁆𑀢𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀲𑀦𑁆𑀢𑀺 𑀤𑁂𑀯𑀸 𑀢𑀢𑀼𑀢𑁆𑀢𑀭𑀺 [𑀢𑀢𑀼𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀢𑀤𑀼𑀢𑁆𑀢𑀭𑀺 (𑀓.) 𑀅. 𑀦𑀺. 𑁬.𑁨𑁫; 𑀯𑀺𑀲𑀼𑀤𑁆𑀥𑀺. 𑁧.𑁧𑁬𑁨 𑀧𑀲𑁆𑀲𑀺𑀢𑀩𑁆𑀩𑀁]. 𑀬𑀣𑀸𑀭𑀽𑀧𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸 [𑀢𑀢𑁆𑀣 𑀉𑀧𑁆𑀧𑀦𑁆𑀦𑀸 (𑀲𑀻.), 𑀢𑀢𑁆𑀣𑀽𑀧𑀧𑀦𑁆𑀦𑀸 (𑀲𑁆𑀬𑀸. 𑀓𑀁.), 𑀢𑀢𑁆𑀣𑀼𑀧𑀧𑀦𑁆𑀦𑀸 (𑀅. 𑀦𑀺. 𑁩.𑁭𑁧)], 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀲𑀤𑁆𑀥𑀸 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀁 𑀲𑀻𑀮𑀁 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀲𑀼𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀁 𑀲𑀼𑀢𑀁 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀘𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑁄 𑀘𑀸𑀕𑁄 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀧𑀜𑁆𑀜𑀸 𑀲𑀁𑀯𑀺𑀚𑁆𑀚𑀢𑀻’𑀢𑀺. 𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀘 𑀢𑀸𑀲𑀜𑁆𑀘 𑀤𑁂𑀯𑀢𑀸𑀦𑀁 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘 𑀲𑀼𑀢𑀜𑁆𑀘 𑀘𑀸𑀕𑀜𑁆𑀘 𑀧𑀜𑁆𑀜𑀜𑁆𑀘 𑀅𑀦𑀼𑀲𑁆𑀲𑀭𑀢𑀺 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺; 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀸 𑀤𑁂𑀯𑀢𑀸 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀦𑀸𑀫 𑁋 ‘𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀫𑀕𑀢𑀸𑀬 𑀧𑀚𑀸𑀬 𑀲𑀫𑀧𑁆𑀧𑀢𑁆𑀢𑁄 𑀯𑀺𑀳𑀭𑀢𑀺, 𑀲𑀩𑁆𑀬𑀸𑀧𑀚𑁆𑀚𑀸𑀬 [𑀲𑀩𑁆𑀬𑀸𑀧𑀚𑁆𑀛𑀸𑀬… 𑀅𑀩𑁆𑀬𑀸𑀧𑀚𑁆𑀛𑁄 (𑀓.)] 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀚𑁄 [𑀲𑀩𑁆𑀬𑀸𑀧𑀚𑁆𑀛𑀸𑀬… 𑀅𑀩𑁆𑀬𑀸𑀧𑀚𑁆𑀛𑁄 (𑀓.)] 𑀯𑀺𑀳𑀭𑀢𑀺, 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀢𑀺’’’.

‘‘𑀬𑁄 𑀲𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄, 𑀲𑁄 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀢𑀻’’𑀢𑀺. 𑀤𑀲𑀫𑀁.

𑀆𑀳𑀼𑀦𑁂𑀬𑁆𑀬𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀆𑀳𑀼𑀦𑁂𑀬𑁆𑀬𑀸 𑀇𑀦𑁆𑀤𑁆𑀭𑀺𑀬, 𑀩𑀮𑀸𑀦𑀺 𑀢𑀬𑁄 𑀆𑀚𑀸𑀦𑀻𑀬𑀸;

𑀅𑀦𑀼𑀢𑁆𑀢𑀭𑀺𑀬 𑀅𑀦𑀼𑀲𑁆𑀲𑀢𑀻, 𑀫𑀳𑀸𑀦𑀸𑀫𑁂𑀦 𑀢𑁂 𑀤𑀲𑀸𑀢𑀺.

𑁨. 𑀲𑀸𑀭𑀡𑀻𑀬𑀯𑀕𑁆𑀕𑁄

𑁧. 𑀧𑀞𑀫𑀲𑀸𑀭𑀡𑀻𑀬𑀲𑀼𑀢𑁆𑀢𑀁

𑁧𑁧. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀸𑀭𑀡𑀻𑀬𑀸 [𑀲𑀸𑀭𑀸𑀡𑀻𑀬𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀓𑀢𑀫𑁂 𑀙? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂 𑀢𑁂 𑀮𑀸𑀪𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀺 𑀢𑀣𑀸𑀭𑀽𑀧𑁂𑀳𑀺 𑀮𑀸𑀪𑁂𑀳𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀳𑁄𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄.

𑁨. 𑀤𑀼𑀢𑀺𑀬𑀲𑀸𑀭𑀡𑀻𑀬𑀲𑀼𑀢𑁆𑀢𑀁

𑁧𑁨. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀸𑀭𑀡𑀻𑀬𑀸 𑀧𑀺𑀬𑀓𑀭𑀡𑀸 𑀕𑀭𑀼𑀓𑀭𑀡𑀸 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀙? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺…𑀧𑁂… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄 𑀧𑀺𑀬𑀓𑀭𑀡𑁄 𑀕𑀭𑀼𑀓𑀭𑀡𑁄 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀥𑀫𑁆𑀫𑀸 𑀲𑀸𑀭𑀡𑀻𑀬𑀸 𑀧𑀺𑀬𑀓𑀭𑀡𑀸 𑀕𑀭𑀼𑀓𑀭𑀡𑀸 𑀲𑀗𑁆𑀕𑀳𑀸𑀬 𑀅𑀯𑀺𑀯𑀸𑀤𑀸𑀬 𑀲𑀸𑀫𑀕𑁆𑀕𑀺𑀬𑀸 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀦𑀺𑀲𑁆𑀲𑀸𑀭𑀡𑀻𑀬𑀲𑀼𑀢𑁆𑀢𑀁

𑁧𑁩. ‘‘𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄. 𑀓𑀢𑀫𑀸 𑀙? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀫𑁂𑀢𑁆𑀢𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸; 𑀅𑀣 𑀘 𑀧𑀦 𑀫𑁂 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’𑀢𑀺. 𑀲𑁄 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀬𑀲𑁆𑀫𑀸, 𑀏𑀯𑀁 𑀅𑀯𑀘; 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀯𑀼𑀲𑁄, 𑀅𑀦𑀯𑀓𑀸𑀲𑁄 𑀬𑀁 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬; 𑀅𑀣 𑀘 𑀧𑀦𑀲𑁆𑀲 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺 [𑀞𑀲𑁆𑀲𑀢𑀻𑀢𑀺 (𑀲𑀩𑁆𑀩𑀢𑁆𑀣) 𑀤𑀻. 𑀦𑀺. 𑁩.𑁩𑁨𑁬 𑀧𑀲𑁆𑀲𑀺𑀢𑀩𑁆𑀩𑀁], 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀩𑁆𑀬𑀸𑀧𑀸𑀤𑀲𑁆𑀲 𑀬𑀤𑀺𑀤𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’’𑀢𑀺 [𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 (𑀲𑀩𑁆𑀩𑀢𑁆𑀣)].

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀭𑀼𑀡𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸; 𑀅𑀣 𑀘 𑀧𑀦 𑀫𑁂 𑀯𑀺𑀳𑁂𑀲𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’𑀢𑀺. 𑀲𑁄 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀬𑀲𑁆𑀫𑀸, 𑀏𑀯𑀁 𑀅𑀯𑀘; 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀯𑀼𑀲𑁄, 𑀅𑀦𑀯𑀓𑀸𑀲𑁄 𑀬𑀁 𑀓𑀭𑀼𑀡𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬; 𑀅𑀣 𑀘 𑀧𑀦𑀲𑁆𑀲 𑀯𑀺𑀳𑁂𑀲𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀳𑁂𑀲𑀸𑀬 𑀬𑀤𑀺𑀤𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀫𑀼𑀤𑀺𑀢𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸; 𑀅𑀣 𑀘 𑀧𑀦 𑀫𑁂 𑀅𑀭𑀢𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’𑀢𑀺. 𑀲𑁄 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀬𑀲𑁆𑀫𑀸, 𑀏𑀯𑀁 𑀅𑀯𑀘; 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀯𑀼𑀲𑁄, 𑀅𑀦𑀯𑀓𑀸𑀲𑁄 𑀬𑀁 𑀫𑀼𑀤𑀺𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬; 𑀅𑀣 𑀘 𑀧𑀦𑀲𑁆𑀲 𑀅𑀭𑀢𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀅𑀭𑀢𑀺𑀬𑀸 𑀬𑀤𑀺𑀤𑀁 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀉𑀧𑁂𑀓𑁆𑀔𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸; 𑀅𑀣 𑀘 𑀧𑀦 𑀫𑁂 𑀭𑀸𑀕𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’𑀢𑀺. 𑀲𑁄 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀬𑀲𑁆𑀫𑀸, 𑀏𑀯𑀁 𑀅𑀯𑀘; 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀯𑀼𑀲𑁄, 𑀅𑀦𑀯𑀓𑀸𑀲𑁄 𑀬𑀁 𑀉𑀧𑁂𑀓𑁆𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬; 𑀅𑀣 𑀘 𑀧𑀦𑀲𑁆𑀲 𑀭𑀸𑀕𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀭𑀸𑀕𑀲𑁆𑀲 𑀬𑀤𑀺𑀤𑀁 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀦𑀺𑀫𑀺𑀢𑁆𑀢𑀸 𑀳𑀺 𑀔𑁄 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸; 𑀅𑀣 𑀘 𑀧𑀦 𑀫𑁂 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’𑀢𑀺. 𑀲𑁄 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀬𑀲𑁆𑀫𑀸, 𑀏𑀯𑀁 𑀅𑀯𑀘; 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀯𑀼𑀲𑁄, 𑀅𑀦𑀯𑀓𑀸𑀲𑁄 𑀬𑀁 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬; 𑀅𑀣 𑀘 𑀧𑀦𑀲𑁆𑀲 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀪𑀯𑀺𑀲𑁆𑀲𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀬𑀤𑀺𑀤𑀁 𑀅𑀦𑀺𑀫𑀺𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’’𑀢𑀺.

‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑁆𑀫𑀻𑀢𑀺 𑀔𑁄 𑀫𑁂 𑀯𑀺𑀕𑀢𑀁 [𑀯𑀺𑀕𑀢𑁂 (𑀲𑁆𑀬𑀸.)], 𑀅𑀬𑀫𑀳𑀫𑀲𑁆𑀫𑀻𑀢𑀺 𑀘 [𑀅𑀬𑀁 𑀘𑀓𑀸𑀭𑁄 𑀤𑀻. 𑀦𑀺. 𑁩.𑁩𑁨𑁬 𑀦𑀢𑁆𑀣𑀺] 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺; 𑀅𑀣 𑀘 𑀧𑀦 𑀫𑁂 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’𑀢𑀺. 𑀲𑁄 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄 𑁋 ‘𑀫𑀸𑀬𑀲𑁆𑀫𑀸, 𑀏𑀯𑀁 𑀅𑀯𑀘; 𑀫𑀸 𑀪𑀕𑀯𑀦𑁆𑀢𑀁 𑀅𑀩𑁆𑀪𑀸𑀘𑀺𑀓𑁆𑀔𑀺, 𑀦 𑀳𑀺 𑀲𑀸𑀥𑀼 𑀪𑀕𑀯𑀢𑁄 𑀅𑀩𑁆𑀪𑀓𑁆𑀔𑀸𑀦𑀁, 𑀦 𑀳𑀺 𑀪𑀕𑀯𑀸 𑀏𑀯𑀁 𑀯𑀤𑁂𑀬𑁆𑀬. 𑀅𑀝𑁆𑀞𑀸𑀦𑀫𑁂𑀢𑀁, 𑀆𑀯𑀼𑀲𑁄, 𑀅𑀦𑀯𑀓𑀸𑀲𑁄 𑀬𑀁 𑀅𑀲𑁆𑀫𑀻𑀢𑀺 𑀯𑀺𑀕𑀢𑁂 𑀅𑀬𑀫𑀳𑀫𑀲𑁆𑀫𑀻𑀢𑀺 𑀘 𑀦 𑀲𑀫𑀦𑀼𑀧𑀲𑁆𑀲𑀢𑁄; 𑀅𑀣 𑀘 𑀧𑀦𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀲𑁆𑀲 𑀬𑀤𑀺𑀤𑀁 𑀅𑀲𑁆𑀫𑀻𑀢𑀺 𑀫𑀸𑀦𑀲𑀫𑀼𑀕𑁆𑀖𑀸𑀢𑁄’𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄’’𑀢𑀺. 𑀢𑀢𑀺𑀬𑀁.

𑁪. 𑀪𑀤𑁆𑀤𑀓𑀲𑀼𑀢𑁆𑀢𑀁

𑁧𑁪. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀯𑁄’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀢𑀣𑀸 𑀢𑀣𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀦 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸 [𑀓𑀸𑀮𑀁𑀓𑀺𑀭𑀺𑀬𑀸 (𑀓.) 𑀅. 𑀦𑀺. 𑁩.𑁧𑁧𑁦]. 𑀓𑀣𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀦 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀫𑁆𑀫𑀸𑀭𑀸𑀫𑁄 𑀳𑁄𑀢𑀺 𑀓𑀫𑁆𑀫𑀭𑀢𑁄 𑀓𑀫𑁆𑀫𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀪𑀲𑁆𑀲𑀸𑀭𑀸𑀫𑁄 𑀳𑁄𑀢𑀺 𑀪𑀲𑁆𑀲𑀭𑀢𑁄 𑀪𑀲𑁆𑀲𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦𑀺𑀤𑁆𑀤𑀸𑀭𑀸𑀫𑁄 𑀳𑁄𑀢𑀺 𑀦𑀺𑀤𑁆𑀤𑀸𑀭𑀢𑁄 𑀦𑀺𑀤𑁆𑀤𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀳𑁄𑀢𑀺 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀲𑀁𑀲𑀕𑁆𑀕𑀸𑀭𑀸𑀫𑁄 𑀳𑁄𑀢𑀺 𑀲𑀁𑀲𑀕𑁆𑀕𑀭𑀢𑁄 𑀲𑀁𑀲𑀕𑁆𑀕𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀧𑀧𑀜𑁆𑀘𑀸𑀭𑀸𑀫𑁄 𑀳𑁄𑀢𑀺 𑀧𑀧𑀜𑁆𑀘𑀭𑀢𑁄 𑀧𑀧𑀜𑁆𑀘𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀦 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀦 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄 𑁋 ‘𑀪𑀺𑀓𑁆𑀔𑀼 𑀲𑀓𑁆𑀓𑀸𑀬𑀸𑀪𑀺𑀭𑀢𑁄 𑀦𑀧𑁆𑀧𑀚𑀳𑀸𑀲𑀺 [𑀦 𑀧𑀳𑀸𑀲𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀓𑁆𑀓𑀸𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬’’’.

‘‘𑀢𑀣𑀸 𑀢𑀣𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸. 𑀓𑀣𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀓𑀫𑁆𑀫𑀸𑀭𑀸𑀫𑁄 𑀳𑁄𑀢𑀺 𑀦 𑀓𑀫𑁆𑀫𑀭𑀢𑁄 𑀦 𑀓𑀫𑁆𑀫𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦 𑀪𑀲𑁆𑀲𑀸𑀭𑀸𑀫𑁄 𑀳𑁄𑀢𑀺 𑀦 𑀪𑀲𑁆𑀲𑀭𑀢𑁄 𑀦 𑀪𑀲𑁆𑀲𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦 𑀦𑀺𑀤𑁆𑀤𑀸𑀭𑀸𑀫𑁄 𑀳𑁄𑀢𑀺 𑀦 𑀦𑀺𑀤𑁆𑀤𑀸𑀭𑀢𑁄 𑀦𑀺𑀤𑁆𑀤𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀳𑁄𑀢𑀺 𑀦 𑀲𑀗𑁆𑀕𑀡𑀺𑀓𑀭𑀢𑁄 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦 𑀲𑀁𑀲𑀕𑁆𑀕𑀸𑀭𑀸𑀫𑁄 𑀳𑁄𑀢𑀺 𑀦 𑀲𑀁𑀲𑀕𑁆𑀕𑀭𑀢𑁄 𑀦 𑀲𑀁𑀲𑀕𑁆𑀕𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦 𑀧𑀧𑀜𑁆𑀘𑀸𑀭𑀸𑀫𑁄 𑀳𑁄𑀢𑀺 𑀦 𑀧𑀧𑀜𑁆𑀘𑀭𑀢𑁄 𑀦 𑀧𑀧𑀜𑁆𑀘𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀪𑀤𑁆𑀤𑀓𑀁 𑀫𑀭𑀡𑀁 𑀳𑁄𑀢𑀺, 𑀪𑀤𑁆𑀤𑀺𑀓𑀸 𑀓𑀸𑀮𑀓𑀺𑀭𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄 𑁋 ‘𑀪𑀺𑀓𑁆𑀔𑀼 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀧𑀚𑀳𑀸𑀲𑀺 𑀲𑀓𑁆𑀓𑀸𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’’𑀢𑀺.

‘‘𑀬𑁄 𑀧𑀧𑀜𑁆𑀘𑀫𑀦𑀼𑀬𑀼𑀢𑁆𑀢𑁄, 𑀧𑀧𑀜𑁆𑀘𑀸𑀪𑀺𑀭𑀢𑁄 𑀫𑀕𑁄;

𑀯𑀺𑀭𑀸𑀥𑀬𑀻 𑀲𑁄 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁.

‘‘𑀬𑁄 𑀘 𑀧𑀧𑀜𑁆𑀘𑀁 𑀳𑀺𑀢𑁆𑀯𑀸𑀦, 𑀦𑀺𑀧𑁆𑀧𑀧𑀜𑁆𑀘𑀧𑀤𑁂 𑀭𑀢𑁄;

𑀆𑀭𑀸𑀥𑀬𑀻 𑀲𑁄 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺. 𑀘𑀢𑀼𑀢𑁆𑀣𑀁;

𑁫. 𑀅𑀦𑀼𑀢𑀧𑁆𑀧𑀺𑀬𑀲𑀼𑀢𑁆𑀢𑀁

𑁧𑁫. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀣𑀸 𑀢𑀣𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀓𑀸𑀮𑀓𑀺𑀭𑀺𑀬𑀸 𑀅𑀦𑀼𑀢𑀧𑁆𑀧𑀸 𑀳𑁄𑀢𑀺. 𑀓𑀣𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀓𑀸𑀮𑀓𑀺𑀭𑀺𑀬𑀸 𑀅𑀦𑀼𑀢𑀧𑁆𑀧𑀸 𑀳𑁄𑀢𑀺?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀫𑁆𑀫𑀸𑀭𑀸𑀫𑁄 𑀳𑁄𑀢𑀺 𑀓𑀫𑁆𑀫𑀭𑀢𑁄 𑀓𑀫𑁆𑀫𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀪𑀲𑁆𑀲𑀸𑀭𑀸𑀫𑁄 𑀳𑁄𑀢𑀺…𑀧𑁂… 𑀦𑀺𑀤𑁆𑀤𑀸𑀭𑀸𑀫𑁄 𑀳𑁄𑀢𑀺… 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀳𑁄𑀢𑀺… 𑀲𑀁𑀲𑀕𑁆𑀕𑀸𑀭𑀸𑀫𑁄 𑀳𑁄𑀢𑀺… 𑀧𑀧𑀜𑁆𑀘𑀸𑀭𑀸𑀫𑁄 𑀳𑁄𑀢𑀺 𑀧𑀧𑀜𑁆𑀘𑀭𑀢𑁄 𑀧𑀧𑀜𑁆𑀘𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀓𑀸𑀮𑀓𑀺𑀭𑀺𑀬𑀸 𑀅𑀦𑀼𑀢𑀧𑁆𑀧𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄 𑁋 ‘𑀪𑀺𑀓𑁆𑀔𑀼 𑀲𑀓𑁆𑀓𑀸𑀬𑀸𑀪𑀺𑀭𑀢𑁄 𑀦𑀧𑁆𑀧𑀚𑀳𑀸𑀲𑀺 𑀲𑀓𑁆𑀓𑀸𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬’’’.

‘‘𑀢𑀣𑀸 𑀢𑀣𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀓𑀸𑀮𑀓𑀺𑀭𑀺𑀬𑀸 𑀅𑀦𑀦𑀼𑀢𑀧𑁆𑀧𑀸 𑀳𑁄𑀢𑀺. 𑀓𑀣𑀜𑁆𑀘𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀓𑀸𑀮𑀓𑀺𑀭𑀺𑀬𑀸 𑀅𑀦𑀦𑀼𑀢𑀧𑁆𑀧𑀸 𑀳𑁄𑀢𑀺?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀦 𑀓𑀫𑁆𑀫𑀸𑀭𑀸𑀫𑁄 𑀳𑁄𑀢𑀺 𑀦 𑀓𑀫𑁆𑀫𑀭𑀢𑁄 𑀦 𑀓𑀫𑁆𑀫𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄, 𑀦 𑀪𑀲𑁆𑀲𑀸𑀭𑀸𑀫𑁄 𑀳𑁄𑀢𑀺…𑀧𑁂… 𑀦 𑀦𑀺𑀤𑁆𑀤𑀸𑀭𑀸𑀫𑁄 𑀳𑁄𑀢𑀺… 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀳𑁄𑀢𑀺… 𑀦 𑀲𑀁𑀲𑀕𑁆𑀕𑀸𑀭𑀸𑀫𑁄 𑀳𑁄𑀢𑀺… 𑀦 𑀧𑀧𑀜𑁆𑀘𑀸𑀭𑀸𑀫𑁄 𑀳𑁄𑀢𑀺 𑀦 𑀧𑀧𑀜𑁆𑀘𑀭𑀢𑁄 𑀦 𑀧𑀧𑀜𑁆𑀘𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀣𑀸 𑀢𑀣𑀸 𑀯𑀺𑀳𑀸𑀭𑀁 𑀓𑀧𑁆𑀧𑁂𑀢𑀺 𑀬𑀣𑀸 𑀬𑀣𑀸𑀲𑁆𑀲 𑀯𑀺𑀳𑀸𑀭𑀁 𑀓𑀧𑁆𑀧𑀬𑀢𑁄 𑀓𑀸𑀮𑀓𑀺𑀭𑀺𑀬𑀸 𑀅𑀦𑀦𑀼𑀢𑀧𑁆𑀧𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄 𑁋 ‘𑀪𑀺𑀓𑁆𑀔𑀼 𑀦𑀺𑀩𑁆𑀩𑀸𑀦𑀸𑀪𑀺𑀭𑀢𑁄 𑀧𑀚𑀳𑀸𑀲𑀺 𑀲𑀓𑁆𑀓𑀸𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’’𑀢𑀺.

‘‘𑀬𑁄 𑀧𑀧𑀜𑁆𑀘𑀫𑀦𑀼𑀬𑀼𑀢𑁆𑀢𑁄, 𑀧𑀧𑀜𑁆𑀘𑀸𑀪𑀺𑀭𑀢𑁄 𑀫𑀕𑁄;

𑀯𑀺𑀭𑀸𑀥𑀬𑀻 𑀲𑁄 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁.

‘‘𑀬𑁄 𑀘 𑀧𑀧𑀜𑁆𑀘𑀁 𑀳𑀺𑀢𑁆𑀯𑀸𑀦, 𑀦𑀺𑀧𑁆𑀧𑀧𑀜𑁆𑀘𑀧𑀤𑁂 𑀭𑀢𑁄;

𑀆𑀭𑀸𑀥𑀬𑀻 𑀲𑁄 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺. 𑀧𑀜𑁆𑀘𑀫𑀁;

𑁬. 𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀁

𑁧𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 [𑀲𑀼𑀁𑀲𑀼𑀫𑀸𑀭𑀕𑀺𑀭𑁂 (𑀲𑀻. 𑀧𑀻.), 𑀲𑀁𑀲𑀼𑀫𑀸𑀭𑀕𑀺𑀭𑁂 (𑀓𑀢𑁆𑀣𑀘𑀺)] 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀓𑀼𑀮𑀧𑀺𑀢𑀸 𑀕𑀳𑀧𑀢𑀺 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀦𑀓𑀼𑀮𑀧𑀺𑀢𑀭𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋

‘‘𑀫𑀸 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑁄 [𑀲𑀸𑀧𑁂𑀔𑁄 (𑀧𑀻. 𑀓.)] 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀦 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀫𑀫𑀘𑁆𑀘𑀬𑁂𑀦 𑀲𑀓𑁆𑀔𑀺𑀲𑁆𑀲𑀢𑀺 [𑀦 𑀲𑀓𑁆𑀔𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀓𑀁.), 𑀲𑀓𑁆𑀓𑁄𑀢𑀺 (𑀧𑀻. 𑀓.)] 𑀤𑀸𑀭𑀓𑁂 𑀧𑁄𑀲𑁂𑀢𑀼𑀁, 𑀖𑀭𑀸𑀯𑀸𑀲𑀁 𑀲𑀦𑁆𑀥𑀭𑀺𑀢𑀼’𑀦𑁆𑀢𑀺 [𑀲𑀦𑁆𑀥𑀭𑀺𑀢𑀼𑀦𑁆𑀢𑀺 (𑀓.), 𑀲𑀡𑁆𑀞𑀭𑀺𑀢𑀼𑀁 (𑀲𑁆𑀬𑀸.)]. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑀸𑀳𑀁, 𑀕𑀳𑀧𑀢𑀺, 𑀓𑀧𑁆𑀧𑀸𑀲𑀁 𑀓𑀦𑁆𑀢𑀺𑀢𑀼𑀁 𑀯𑁂𑀡𑀺𑀁 𑀑𑀮𑀺𑀔𑀺𑀢𑀼𑀁. 𑀲𑀓𑁆𑀓𑁄𑀫𑀳𑀁, 𑀕𑀳𑀧𑀢𑀺, 𑀢𑀯𑀘𑁆𑀘𑀬𑁂𑀦 𑀤𑀸𑀭𑀓𑁂 𑀧𑁄𑀲𑁂𑀢𑀼𑀁, 𑀖𑀭𑀸𑀯𑀸𑀲𑀁 𑀲𑀦𑁆𑀥𑀭𑀺𑀢𑀼𑀁. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀕𑀳𑀧𑀢𑀺, 𑀫𑀸 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸.

‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀫𑀫𑀘𑁆𑀘𑀬𑁂𑀦 𑀅𑀜𑁆𑀜𑀁 𑀖𑀭𑀁 [𑀪𑀢𑁆𑀢𑀸𑀭𑀁 (𑀲𑁆𑀬𑀸. 𑀓𑀁.), 𑀯𑀻𑀭𑀁 (𑀲𑀻.)] 𑀕𑀫𑀺𑀲𑁆𑀲𑀢𑀻’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑁆𑀯𑀜𑁆𑀘𑁂𑀯 𑀔𑁄, 𑀕𑀳𑀧𑀢𑀺, 𑀚𑀸𑀦𑀸𑀲𑀺 𑀅𑀳𑀜𑁆𑀘, 𑀬𑀁 𑀦𑁄 [𑀬𑀤𑀸 𑀢𑁂 (𑀲𑀻.), 𑀬𑀣𑀸 (𑀲𑁆𑀬𑀸.), 𑀬𑀣𑀸 𑀦𑁄 (𑀧𑀻.)] 𑀲𑁄𑀴𑀲𑀯𑀲𑁆𑀲𑀸𑀦𑀺 𑀕𑀳𑀝𑁆𑀞𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑀸𑀘𑀺𑀡𑁆𑀡𑀁 [𑀲𑀫𑀸𑀤𑀺𑀦𑁆𑀦𑀁 (𑀲𑀻.)]. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀕𑀳𑀧𑀢𑀺, 𑀫𑀸 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸.

‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀫𑀫𑀘𑁆𑀘𑀬𑁂𑀦 𑀦 𑀤𑀲𑁆𑀲𑀦𑀓𑀸𑀫𑀸 𑀪𑀯𑀺𑀲𑁆𑀲𑀢𑀺 𑀪𑀕𑀯𑀢𑁄 𑀦 𑀤𑀲𑁆𑀲𑀦𑀓𑀸𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀅𑀳𑀜𑁆𑀳𑀺, 𑀕𑀳𑀧𑀢𑀺, 𑀢𑀯𑀘𑁆𑀘𑀬𑁂𑀦 𑀤𑀲𑁆𑀲𑀦𑀓𑀸𑀫𑀢𑀭𑀸 𑀘𑁂𑀯 𑀪𑀯𑀺𑀲𑁆𑀲𑀸𑀫𑀺 𑀪𑀕𑀯𑀢𑁄, 𑀤𑀲𑁆𑀲𑀦𑀓𑀸𑀫𑀢𑀭𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀕𑀳𑀧𑀢𑀺, 𑀫𑀸 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸.

‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀦 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀫𑀫𑀘𑁆𑀘𑀬𑁂𑀦 𑀲𑀻𑀮𑁂𑀲𑀼 [𑀦𑀓𑀼𑀮𑀫𑀸𑀢𑀸… 𑀦 𑀲𑀻𑀮𑁂𑀲𑀼 (𑀲𑀻. 𑀧𑀻.)] 𑀧𑀭𑀺𑀧𑀽𑀭𑀓𑀸𑀭𑀺𑀦𑀻’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀺𑀬𑁄, 𑀅𑀳𑀁 𑀢𑀸𑀲𑀁 𑀅𑀜𑁆𑀜𑀢𑀭𑀸. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑁋 𑀅𑀬𑀁 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑁋 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀢𑀼. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀕𑀳𑀧𑀢𑀺, 𑀫𑀸 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸.

‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀦 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀮𑀸𑀪𑀺𑀦𑀻 [𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀦 𑀮𑀸𑀪𑀺𑀦𑀻 (𑀧𑀻.)] 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀲𑁆𑀲𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀮𑀸𑀪𑀺𑀦𑀺𑀬𑁄 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀲𑁆𑀲, 𑀅𑀳𑀁 𑀢𑀸𑀲𑀁 𑀅𑀜𑁆𑀜𑀢𑀭𑀸. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑁋 𑀅𑀬𑀁 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑁋 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀢𑀼. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀕𑀳𑀧𑀢𑀺, 𑀫𑀸 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸, 𑀕𑀳𑀧𑀢𑀺, 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸.

‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀦 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀑𑀕𑀸𑀥𑀧𑁆𑀧𑀢𑁆𑀢𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀳𑀭𑀢𑀻’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀑𑀕𑀸𑀥𑀧𑁆𑀧𑀢𑁆𑀢𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀳𑀭𑀦𑁆𑀢𑀺, 𑀅𑀳𑀁 𑀢𑀸𑀲𑀁 𑀅𑀜𑁆𑀜𑀢𑀭𑀸. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑁋 𑀅𑀬𑀁 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑁋 𑀢𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀢𑀼. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀕𑀳𑀧𑀢𑀺, 𑀫𑀸 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺. 𑀤𑀼𑀓𑁆𑀔𑀸 𑀕𑀳𑀧𑀢𑀺 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸; 𑀕𑀭𑀳𑀺𑀢𑀸 𑀘 𑀪𑀕𑀯𑀢𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀓𑀺𑀭𑀺𑀬𑀸’’𑀢𑀺.

𑀅𑀣 𑀔𑁄 𑀦𑀓𑀼𑀮𑀧𑀺𑀢𑀼𑀦𑁄 𑀕𑀳𑀧𑀢𑀺𑀲𑁆𑀲 𑀦𑀓𑀼𑀮𑀫𑀸𑀢𑀭𑀸 [𑀦𑀓𑀼𑀮𑀫𑀸𑀢𑀸𑀬 (𑀲𑀻. 𑀲𑁆𑀬𑀸.), 𑀦𑀓𑀼𑀮𑀫𑀸𑀢𑀼𑀬𑀸 (𑀓.)] 𑀕𑀳𑀧𑀢𑀸𑀦𑀺𑀬𑀸 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀬𑀫𑀸𑀦𑀲𑁆𑀲 𑀲𑁄 𑀆𑀩𑀸𑀥𑁄 𑀞𑀸𑀦𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀯𑀼𑀝𑁆𑀞𑀳𑀺 [𑀯𑀼𑀝𑁆𑀞𑀸𑀢𑀺 (𑀓.)] 𑀘 𑀦𑀓𑀼𑀮𑀧𑀺𑀢𑀸 𑀕𑀳𑀧𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸; 𑀢𑀣𑀸 𑀧𑀳𑀻𑀦𑁄 𑀘 𑀧𑀦 𑀦𑀓𑀼𑀮𑀧𑀺𑀢𑀼𑀦𑁄 𑀕𑀳𑀧𑀢𑀺𑀲𑁆𑀲 𑀲𑁄 𑀆𑀩𑀸𑀥𑁄 𑀅𑀳𑁄𑀲𑀺. 𑀅𑀣 𑀔𑁄 𑀦𑀓𑀼𑀮𑀧𑀺𑀢𑀸 𑀕𑀳𑀧𑀢𑀺 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 [‘‘𑀕𑀺𑀮𑀸𑀦𑀪𑀸𑀯𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑁄, 𑀪𑀸𑀯𑀧𑁆𑀧𑀥𑀸𑀦𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄’’𑀢𑀺 𑀝𑀻𑀓𑀸𑀲𑀁𑀯𑀡𑁆𑀡𑀦𑀸] 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸 𑀤𑀡𑁆𑀟𑀫𑁄𑀮𑀼𑀩𑁆𑀪 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀦𑀓𑀼𑀮𑀧𑀺𑀢𑀭𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀮𑀸𑀪𑀸 𑀢𑁂, 𑀕𑀳𑀧𑀢𑀺, 𑀲𑀼𑀮𑀤𑁆𑀥𑀁 𑀢𑁂, 𑀕𑀳𑀧𑀢𑀺! 𑀬𑀲𑁆𑀲 𑀢𑁂 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀑𑀯𑀸𑀤𑀺𑀓𑀸 𑀅𑀦𑀼𑀲𑀸𑀲𑀺𑀓𑀸. 𑀬𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀫𑀫 𑀲𑀸𑀯𑀺𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀺𑀬𑁄, 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀢𑀸𑀲𑀁 𑀅𑀜𑁆𑀜𑀢𑀭𑀸. 𑀬𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀫𑀫 𑀲𑀸𑀯𑀺𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀮𑀸𑀪𑀺𑀦𑀺𑀬𑁄 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀲𑁆𑀲, 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀢𑀸𑀲𑀁 𑀅𑀜𑁆𑀜𑀢𑀭𑀸. 𑀬𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀫𑀫 𑀲𑀸𑀯𑀺𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀑𑀕𑀸𑀥𑀧𑁆𑀧𑀢𑁆𑀢𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀳𑀭𑀦𑁆𑀢𑀺, 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀢𑀸𑀲𑀁 𑀅𑀜𑁆𑀜𑀢𑀭𑀸. 𑀮𑀸𑀪𑀸 𑀢𑁂, 𑀕𑀳𑀧𑀢𑀺, 𑀲𑀼𑀮𑀤𑁆𑀥𑀁 𑀢𑁂, 𑀕𑀳𑀧𑀢𑀺! 𑀬𑀲𑁆𑀲 𑀢𑁂 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻 𑀅𑀦𑀼𑀓𑀫𑁆𑀧𑀺𑀓𑀸 𑀅𑀢𑁆𑀣𑀓𑀸𑀫𑀸 𑀑𑀯𑀸𑀤𑀺𑀓𑀸 𑀅𑀦𑀼𑀲𑀸𑀲𑀺𑀓𑀸’’𑀢𑀺. 𑀙𑀝𑁆𑀞𑀁.

𑁭. 𑀲𑁄𑀧𑁆𑀧𑀲𑀼𑀢𑁆𑀢𑀁

𑁧𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄…𑀧𑁂… 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀓𑀲𑁆𑀲𑀧𑁄… 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀓𑀘𑁆𑀘𑀸𑀬𑀦𑁄… 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀓𑁄𑀝𑁆𑀞𑀺𑀓𑁄 [𑀫𑀳𑀸𑀓𑁄𑀝𑁆𑀞𑀺𑀢𑁄 (𑀲𑀻. 𑀧𑀻.)] … 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀘𑀼𑀦𑁆𑀤𑁄… 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀓𑀧𑁆𑀧𑀺𑀦𑁄… 𑀆𑀬𑀲𑁆𑀫𑀸𑀧𑀺 𑀔𑁄 𑀅𑀦𑀼𑀭𑀼𑀤𑁆𑀥𑁄… 𑀆𑀬𑀲𑁆𑀫𑀸𑀧𑀺 𑀔𑁄 𑀭𑁂𑀯𑀢𑁄… 𑀆𑀬𑀲𑁆𑀫𑀸𑀧𑀺 𑀔𑁄 𑀆𑀦𑀦𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀢𑁂𑀧𑀺 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑀣𑀸𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀬𑁂 𑀧𑀦 𑀢𑀢𑁆𑀣 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀢𑁂 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀓𑀸𑀓𑀘𑁆𑀙𑀫𑀸𑀦𑀸 𑀲𑀼𑀧𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑁂 𑀪𑀺𑀓𑁆𑀔𑀽 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀓𑀸𑀓𑀘𑁆𑀙𑀫𑀸𑀦𑁂 𑀲𑀼𑀧𑀦𑁆𑀢𑁂. 𑀤𑀺𑀲𑁆𑀯𑀸 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀓𑀳𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄? 𑀓𑀳𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄? 𑀓𑀳𑀁 𑀫𑀳𑀸𑀓𑀲𑁆𑀲𑀧𑁄? 𑀓𑀳𑀁 𑀫𑀳𑀸𑀓𑀘𑁆𑀘𑀸𑀬𑀦𑁄? 𑀓𑀳𑀁 𑀫𑀳𑀸𑀓𑁄𑀝𑁆𑀞𑀺𑀓𑁄? 𑀓𑀳𑀁 𑀫𑀳𑀸𑀘𑀼𑀦𑁆𑀤𑁄? 𑀓𑀳𑀁 𑀫𑀳𑀸𑀓𑀧𑁆𑀧𑀺𑀦𑁄? 𑀓𑀳𑀁 𑀅𑀦𑀼𑀭𑀼𑀤𑁆𑀥𑁄? 𑀓𑀳𑀁 𑀭𑁂𑀯𑀢𑁄? 𑀓𑀳𑀁 𑀆𑀦𑀦𑁆𑀤𑁄? 𑀓𑀳𑀁 𑀦𑀼 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀣𑁂𑀭𑀸 𑀲𑀸𑀯𑀓𑀸 𑀕𑀢𑀸’’𑀢𑀺? ‘‘𑀢𑁂𑀧𑀺 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑀣𑀸𑀯𑀺𑀳𑀸𑀭𑀁 𑀅𑀕𑀫𑀁𑀲𑀽’’𑀢𑀺. ‘‘𑀓𑁂𑀦 𑀦𑁄 [𑀓𑁂𑀦 𑀦𑁄 (𑀓.), 𑀓𑁂 𑀦𑀼 (𑀓𑀢𑁆𑀣𑀘𑀺)] 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀣𑁂𑀭𑀸 𑀪𑀺𑀓𑁆𑀔𑀽 𑀦𑀸𑀕𑀢𑀸𑀢𑀺 [𑀪𑀺𑀓𑁆𑀔𑀽 𑀦𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀪𑀺𑀓𑁆𑀔𑀽 𑀕𑀢𑀸𑀢𑀺 (?)] 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀓𑀸𑀓𑀘𑁆𑀙𑀫𑀸𑀦𑀸 𑀲𑀼𑀧𑀣? 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 [𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 (𑀓.)] 𑀬𑀸𑀯𑀤𑀢𑁆𑀣𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀬𑀸𑀯𑀚𑀻𑀯𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀚𑀦𑀧𑀤𑀲𑁆𑀲 𑀯𑀸 𑀧𑀺𑀬𑁄 𑀫𑀦𑀸𑀧𑁄’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀬𑀸𑀯𑀤𑀢𑁆𑀣𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀬𑀸𑀯𑀚𑀻𑀯𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀚𑀦𑀧𑀤𑀲𑁆𑀲 𑀯𑀸 𑀧𑀺𑀬𑁄 𑀫𑀦𑀸𑀧𑁄’’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀭𑀝𑁆𑀞𑀺𑀓𑁄…𑀧𑁂… 𑀧𑁂𑀢𑁆𑀢𑀡𑀺𑀓𑁄… 𑀲𑁂𑀦𑀸𑀧𑀢𑀺𑀓𑁄… 𑀕𑀸𑀫𑀕𑀸𑀫𑀡𑀺𑀓𑁄 [𑀕𑀸𑀫𑀕𑀸𑀫𑀺𑀓𑁄 (𑀲𑀻. 𑀧𑀻.)] … 𑀧𑀽𑀕𑀕𑀸𑀫𑀡𑀺𑀓𑁄 𑀬𑀸𑀯𑀤𑀢𑁆𑀣𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀬𑀸𑀯𑀚𑀻𑀯𑀁 𑀧𑀽𑀕𑀕𑀸𑀫𑀡𑀺𑀓𑀢𑁆𑀢𑀁 𑀓𑀸𑀭𑁂𑀦𑁆𑀢𑁄 𑀧𑀽𑀕𑀲𑁆𑀲 𑀯𑀸 𑀧𑀺𑀬𑁄 𑀫𑀦𑀸𑀧𑁄’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀧𑀽𑀕𑀕𑀸𑀫𑀡𑀺𑀓𑁄 𑀬𑀸𑀯𑀤𑀢𑁆𑀣𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀬𑀸𑀯𑀚𑀻𑀯𑀁 𑀧𑀽𑀕𑀕𑀸𑀫𑀡𑀺𑀓𑀢𑁆𑀢𑀁 𑀯𑀸 𑀓𑀸𑀭𑁂𑀦𑁆𑀢𑁄 𑀧𑀽𑀕𑀲𑁆𑀲 𑀯𑀸 𑀧𑀺𑀬𑁄 𑀫𑀦𑀸𑀧𑁄’’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑀸𑀯𑀤𑀢𑁆𑀣𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁄 𑀅𑀯𑀺𑀧𑀲𑁆𑀲𑀓𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 [𑀩𑁄𑀥𑀧𑀓𑁆𑀔𑀺𑀬𑀸𑀦𑀁 (𑀲𑀻.), 𑀩𑁄𑀥𑀧𑀓𑁆𑀔𑀺𑀓𑀸𑀦𑀁 (𑀧𑀻.)] 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑁄’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑀸𑀯𑀤𑀢𑁆𑀣𑀁 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁄 𑀅𑀯𑀺𑀧𑀲𑁆𑀲𑀓𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑁄’’’𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀪𑀯𑀺𑀲𑁆𑀲𑀸𑀫, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄, 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑀸, 𑀯𑀺𑀧𑀲𑁆𑀲𑀓𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁, 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀫𑀘𑁆𑀙𑀩𑀦𑁆𑀥𑀲𑀼𑀢𑁆𑀢𑀁

𑁧𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀫𑀘𑁆𑀙𑀺𑀓𑀁 𑀫𑀘𑁆𑀙𑀩𑀦𑁆𑀥𑀁 𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑀁. 𑀤𑀺𑀲𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀫𑀼𑀁 𑀫𑀘𑁆𑀙𑀺𑀓𑀁 𑀫𑀘𑁆𑀙𑀩𑀦𑁆𑀥𑀁 𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀫𑀘𑁆𑀙𑀺𑀓𑁄 𑀫𑀘𑁆𑀙𑀩𑀦𑁆𑀥𑁄 𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑁄 𑀢𑁂𑀦 𑀓𑀫𑁆𑀫𑁂𑀦 𑀢𑁂𑀦 𑀆𑀚𑀻𑀯𑁂𑀦 𑀳𑀢𑁆𑀣𑀺𑀬𑀸𑀬𑀻 𑀯𑀸 𑀅𑀲𑁆𑀲𑀬𑀸𑀬𑀻 𑀯𑀸 𑀭𑀣𑀬𑀸𑀬𑀻 𑀯𑀸 𑀬𑀸𑀦𑀬𑀸𑀬𑀻 𑀯𑀸 𑀪𑁄𑀕𑀪𑁄𑀕𑀻 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀦𑁆𑀢𑁄’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀫𑀘𑁆𑀙𑀺𑀓𑁄 𑀫𑀘𑁆𑀙𑀩𑀦𑁆𑀥𑁄 𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑁄 𑀢𑁂𑀦 𑀓𑀫𑁆𑀫𑁂𑀦 𑀢𑁂𑀦 𑀆𑀚𑀻𑀯𑁂𑀦 𑀳𑀢𑁆𑀣𑀺𑀬𑀸𑀬𑀻 𑀯𑀸 𑀅𑀲𑁆𑀲𑀬𑀸𑀬𑀻 𑀯𑀸 𑀭𑀣𑀬𑀸𑀬𑀻 𑀯𑀸 𑀬𑀸𑀦𑀬𑀸𑀬𑀻 𑀯𑀸 𑀪𑁄𑀕𑀪𑁄𑀕𑀻 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀦𑁆𑀢𑁄’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑁂 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀘𑁆𑀙𑁂 𑀯𑀚𑁆𑀛𑁂 𑀯𑀥𑀸𑀬𑀼𑀧𑀦𑀻𑀢𑁂 [𑀯𑀥𑀸𑀬𑀸𑀦𑀻𑀢𑁂 (𑀲𑁆𑀬𑀸. 𑀓𑀁.), 𑀯𑀥𑀸𑀬 𑀦𑀻𑀢𑁂 (𑀓.)] 𑀧𑀸𑀧𑀓𑁂𑀦 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺, 𑀢𑀲𑁆𑀫𑀸 𑀲𑁄 𑀦𑁂𑀯 𑀳𑀢𑁆𑀣𑀺𑀬𑀸𑀬𑀻 𑀳𑁄𑀢𑀺 𑀦 𑀅𑀲𑁆𑀲𑀬𑀸𑀬𑀻 𑀦 𑀭𑀣𑀬𑀸𑀬𑀻 𑀦 𑀬𑀸𑀦𑀬𑀸𑀬𑀻 𑀦 𑀪𑁄𑀕𑀪𑁄𑀕𑀻, 𑀦 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀕𑁄𑀖𑀸𑀢𑀓𑁄 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑁄 𑀢𑁂𑀦 𑀓𑀫𑁆𑀫𑁂𑀦 𑀢𑁂𑀦 𑀆𑀚𑀻𑀯𑁂𑀦 𑀳𑀢𑁆𑀣𑀺𑀬𑀸𑀬𑀻 𑀯𑀸 𑀅𑀲𑁆𑀲𑀬𑀸𑀬𑀻 𑀯𑀸 𑀭𑀣𑀬𑀸𑀬𑀻 𑀯𑀸 𑀬𑀸𑀦𑀬𑀸𑀬𑀻 𑀯𑀸 𑀪𑁄𑀕𑀪𑁄𑀕𑀻 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀦𑁆𑀢𑁄’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀕𑁄𑀖𑀸𑀢𑀓𑁄 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑁄 𑀢𑁂𑀦 𑀓𑀫𑁆𑀫𑁂𑀦 𑀢𑁂𑀦 𑀆𑀚𑀻𑀯𑁂𑀦 𑀳𑀢𑁆𑀣𑀺𑀬𑀸𑀬𑀻 𑀯𑀸 𑀅𑀲𑁆𑀲𑀬𑀸𑀬𑀻 𑀯𑀸 𑀭𑀣𑀬𑀸𑀬𑀻 𑀯𑀸 𑀬𑀸𑀦𑀬𑀸𑀬𑀻 𑀯𑀸 𑀪𑁄𑀕𑀪𑁄𑀕𑀻 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀦𑁆𑀢𑁄’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑁂 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀕𑀸𑀯𑁄 𑀯𑀚𑁆𑀛𑁂 𑀯𑀥𑀸𑀬𑀼𑀧𑀦𑀻𑀢𑁂 𑀧𑀸𑀧𑀓𑁂𑀦 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺, 𑀢𑀲𑁆𑀫𑀸 𑀲𑁄 𑀦𑁂𑀯 𑀳𑀢𑁆𑀣𑀺𑀬𑀸𑀬𑀻 𑀳𑁄𑀢𑀺 𑀦 𑀅𑀲𑁆𑀲𑀬𑀸𑀬𑀻 𑀦 𑀭𑀣𑀬𑀸𑀬𑀻 𑀦 𑀬𑀸𑀦𑀬𑀸𑀬𑀻 𑀦 𑀪𑁄𑀕𑀪𑁄𑀕𑀻, 𑀦 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀢𑀺’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀑𑀭𑀩𑁆𑀪𑀺𑀓𑁄…𑀧𑁂… 𑀲𑀽𑀓𑀭𑀺𑀓𑁄 [𑀲𑁄𑀓𑀭𑀺𑀓𑁄 (𑀲𑁆𑀬𑀸.)] …𑀧𑁂… 𑀲𑀸𑀓𑀼𑀡𑀺𑀓𑁄…𑀧𑁂… 𑀫𑀸𑀕𑀯𑀺𑀓𑁄 𑀫𑀕𑁂 [𑀫𑀺𑀕𑁂 (𑀲𑁆𑀬𑀸. 𑀓𑀁.)] 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑁄 𑀢𑁂𑀦 𑀓𑀫𑁆𑀫𑁂𑀦 𑀢𑁂𑀦 𑀆𑀚𑀻𑀯𑁂𑀦 𑀳𑀢𑁆𑀣𑀺𑀬𑀸𑀬𑀻 𑀯𑀸 𑀅𑀲𑁆𑀲𑀬𑀸𑀬𑀻 𑀯𑀸 𑀭𑀣𑀬𑀸𑀬𑀻 𑀯𑀸 𑀬𑀸𑀦𑀬𑀸𑀬𑀻 𑀯𑀸 𑀪𑁄𑀕𑀪𑁄𑀕𑀻 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀦𑁆𑀢𑁄’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀫𑀸𑀕𑀯𑀺𑀓𑁄 𑀫𑀕𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀫𑀸𑀦𑁄 𑀢𑁂𑀦 𑀓𑀫𑁆𑀫𑁂𑀦 𑀢𑁂𑀦 𑀆𑀚𑀻𑀯𑁂𑀦 𑀳𑀢𑁆𑀣𑀺𑀬𑀸𑀬𑀻 𑀯𑀸 𑀅𑀲𑁆𑀲𑀬𑀸𑀬𑀻 𑀯𑀸 𑀭𑀣𑀬𑀸𑀬𑀻 𑀯𑀸 𑀬𑀸𑀦𑀬𑀸𑀬𑀻 𑀯𑀸 𑀪𑁄𑀕𑀪𑁄𑀕𑀻 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀦𑁆𑀢𑁄’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑁂 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀕𑁂 𑀯𑀚𑁆𑀛𑁂 𑀯𑀥𑀸𑀬𑀼𑀧𑀦𑀻𑀢𑁂 𑀧𑀸𑀧𑀓𑁂𑀦 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺, 𑀢𑀲𑁆𑀫𑀸 𑀲𑁄 𑀦𑁂𑀯 𑀳𑀢𑁆𑀣𑀺𑀬𑀸𑀬𑀻 𑀳𑁄𑀢𑀺 𑀦 𑀅𑀲𑁆𑀲𑀬𑀸𑀬𑀻 𑀦 𑀭𑀣𑀬𑀸𑀬𑀻 𑀦 𑀬𑀸𑀦𑀬𑀸𑀬𑀻 𑀦 𑀪𑁄𑀕𑀪𑁄𑀕𑀻, 𑀦 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀢𑀺. 𑀢𑁂 𑀳𑀺 (𑀦𑀸𑀫) [( ) 𑀩𑀳𑀽𑀲𑀼 𑀦𑀢𑁆𑀣𑀺] 𑀲𑁄, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑁂 𑀧𑀸𑀡𑁂 𑀯𑀚𑁆𑀛𑁂 𑀯𑀥𑀸𑀬𑀼𑀧𑀦𑀻𑀢𑁂 𑀧𑀸𑀧𑀓𑁂𑀦 𑀫𑀦𑀲𑀸𑀦𑀼𑀧𑁂𑀓𑁆𑀔𑀫𑀸𑀦𑁄 [𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺, 𑀢𑀲𑁆𑀫𑀸 𑀲𑁄 (𑀲𑁆𑀬𑀸. 𑀓.)] 𑀦𑁂𑀯 𑀳𑀢𑁆𑀣𑀺𑀬𑀸𑀬𑀻 𑀪𑀯𑀺𑀲𑁆𑀲𑀢𑀺 [𑀳𑁄𑀢𑀺 (𑀲𑁆𑀬𑀸. 𑀓.)] 𑀦 𑀅𑀲𑁆𑀲𑀬𑀸𑀬𑀻 𑀦 𑀭𑀣𑀬𑀸𑀬𑀻 𑀦 𑀬𑀸𑀦𑀬𑀸𑀬𑀻 𑀦 𑀪𑁄𑀕𑀪𑁄𑀕𑀻, 𑀦 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺 [𑀅𑀚𑁆𑀛𑀸𑀯𑀲𑀢𑀺 (𑀲𑁆𑀬𑀸. 𑀓.)]. 𑀓𑁄 𑀧𑀦 𑀯𑀸𑀤𑁄 𑀬𑀁 𑀫𑀦𑀼𑀲𑁆𑀲𑀪𑀽𑀢𑀁 𑀯𑀚𑁆𑀛𑀁 𑀯𑀥𑀸𑀬𑀼𑀧𑀦𑀻𑀢𑀁 𑀧𑀸𑀧𑀓𑁂𑀦 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺! 𑀢𑀜𑁆𑀳𑀺 𑀢𑀲𑁆𑀲 [𑀢𑀁 𑀳𑀺𑀲𑁆𑀲 (𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀁

𑁧𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 [𑀦𑀸𑀤𑀺𑀓𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀅. 𑀦𑀺. 𑁮.𑁭𑁩] 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀫𑀭𑀡𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸. 𑀪𑀸𑀯𑁂𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺?

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀲𑀗𑁆𑀔𑀸𑀤𑀺𑀢𑁆𑀯𑀸 [𑀲𑀗𑁆𑀔𑀭𑀺𑀢𑁆𑀯𑀸 (𑀓.)] 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀁 𑀆𑀮𑁄𑀧𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 [𑀲𑀁𑀳𑀭𑀺𑀢𑁆𑀯𑀸 (𑀓.)] 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀪𑀸𑀯𑁂𑀲𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀅𑀲𑁆𑀲𑀲𑀺𑀢𑁆𑀯𑀸 𑀯𑀸 𑀧𑀲𑁆𑀲𑀲𑀸𑀫𑀺 𑀧𑀲𑁆𑀲𑀲𑀺𑀢𑁆𑀯𑀸 𑀯𑀸 𑀅𑀲𑁆𑀲𑀲𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀸𑀯𑁂𑀫𑀺 𑀫𑀭𑀡𑀲𑁆𑀲𑀢𑀺’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀬𑁄 𑀘𑀸𑀬𑀁 [𑀬𑁆𑀯𑀸𑀬𑀁 (𑀧𑀻. 𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’’’𑀢𑀺.

‘‘𑀬𑁄 𑀘𑀸𑀬𑀁 [𑀬𑁄𑀧𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀤𑀺𑀯𑀲𑀁 𑀚𑀻𑀯𑁂𑀬𑁆𑀬𑀁, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’’’𑀢𑀺.

‘‘𑀬𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’’’𑀢𑀺.

‘‘𑀬𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺 𑀤𑀦𑁆𑀥𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

‘‘𑀬𑁄 𑀘 𑀔𑁆𑀯𑀸𑀬𑀁 [𑀬𑁄𑀧𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀏𑀓𑀁 𑀆𑀮𑁄𑀧𑀁 𑀲𑀗𑁆𑀔𑀸𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’’’𑀢𑀺.

‘‘𑀬𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀢𑀺 𑁋 ‘𑀅𑀳𑁄 𑀯𑀢𑀸𑀳𑀁 𑀢𑀤𑀦𑁆𑀢𑀭𑀁 𑀚𑀻𑀯𑁂𑀬𑁆𑀬𑀁 𑀬𑀤𑀦𑁆𑀢𑀭𑀁 𑀅𑀲𑁆𑀲𑀲𑀺𑀢𑁆𑀯𑀸 𑀯𑀸 𑀧𑀲𑁆𑀲𑀲𑀸𑀫𑀺 𑀧𑀲𑁆𑀲𑀲𑀺𑀢𑁆𑀯𑀸 𑀯𑀸 𑀅𑀲𑁆𑀲𑀲𑀸𑀫𑀺, 𑀪𑀕𑀯𑀢𑁄 𑀲𑀸𑀲𑀦𑀁 𑀫𑀦𑀲𑀺 𑀓𑀭𑁂𑀬𑁆𑀬𑀁, 𑀩𑀳𑀼 𑀯𑀢 𑀫𑁂 𑀓𑀢𑀁 𑀅𑀲𑁆𑀲𑀸’𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺 𑀢𑀺𑀓𑁆𑀔𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀸𑀫, 𑀢𑀺𑀓𑁆𑀔𑀁 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀲𑁆𑀲𑀸𑀫 𑀆𑀲𑀯𑀸𑀦𑀁 𑀔𑀬𑀸𑀬𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀫𑀭𑀡𑀲𑁆𑀲𑀢𑀺𑀲𑀼𑀢𑁆𑀢𑀁

𑁨𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀭𑀡𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸. 𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀫𑀭𑀡𑀲𑁆𑀲𑀢𑀺 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀯𑀲𑁂 𑀦𑀺𑀓𑁆𑀔𑀦𑁆𑀢𑁂 𑀭𑀢𑁆𑀢𑀺𑀬𑀸 𑀧𑀢𑀺𑀳𑀺𑀢𑀸𑀬 [𑀧𑀝𑀺𑀕𑀢𑀸𑀬 (𑀓.) 𑀅. 𑀦𑀺. 𑁮.𑁭𑁪] 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀩𑀳𑀼𑀓𑀸 𑀔𑁄 𑀫𑁂 𑀧𑀘𑁆𑀘𑀬𑀸 𑀫𑀭𑀡𑀲𑁆𑀲 𑁋 𑀅𑀳𑀺 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀯𑀺𑀘𑁆𑀙𑀺𑀓𑁄 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀲𑀢𑀧𑀤𑀻 𑀯𑀸 𑀫𑀁 𑀟𑀁𑀲𑁂𑀬𑁆𑀬; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄. 𑀉𑀧𑀓𑁆𑀔𑀮𑀺𑀢𑁆𑀯𑀸 𑀯𑀸 𑀧𑀧𑀢𑁂𑀬𑁆𑀬𑀁, 𑀪𑀢𑁆𑀢𑀁 𑀯𑀸 𑀫𑁂 𑀪𑀼𑀢𑁆𑀢𑀁 𑀩𑁆𑀬𑀸𑀧𑀚𑁆𑀚𑁂𑀬𑁆𑀬, 𑀧𑀺𑀢𑁆𑀢𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑁂𑀫𑁆𑀳𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸 𑀓𑀼𑀧𑁆𑀧𑁂𑀬𑁆𑀬𑀼𑀁; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸, 𑀬𑁂 𑀫𑁂 𑀅𑀲𑁆𑀲𑀼 𑀭𑀢𑁆𑀢𑀺𑀁 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸, 𑀬𑁂 𑀫𑁂 𑀅𑀲𑁆𑀲𑀼 𑀭𑀢𑁆𑀢𑀺𑀁 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀘𑁂𑀮𑁄 𑀯𑀸 𑀆𑀤𑀺𑀢𑁆𑀢𑀲𑀻𑀲𑁄 𑀯𑀸 𑀢𑀲𑁆𑀲𑁂𑀯 𑀘𑁂𑀮𑀲𑁆𑀲 𑀯𑀸 𑀲𑀻𑀲𑀲𑁆𑀲 𑀯𑀸 𑀦𑀺𑀩𑁆𑀩𑀸𑀧𑀦𑀸𑀬 𑀅𑀥𑀺𑀫𑀢𑁆𑀢𑀁 𑀙𑀦𑁆𑀤𑀜𑁆𑀘 𑀯𑀸𑀬𑀸𑀫𑀜𑁆𑀘 𑀉𑀲𑁆𑀲𑀸𑀳𑀜𑁆𑀘 𑀉𑀲𑁆𑀲𑁄𑀴𑁆𑀳𑀺𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀺𑀜𑁆𑀘 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸, 𑀬𑁂 𑀫𑁂 𑀅𑀲𑁆𑀲𑀼 𑀭𑀢𑁆𑀢𑀺𑀁 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑀸𑀬 𑀤𑀺𑀯𑀲𑁂 𑀧𑀢𑀺𑀳𑀺𑀢𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀩𑀳𑀼𑀓𑀸 𑀔𑁄 𑀫𑁂 𑀧𑀘𑁆𑀘𑀬𑀸 𑀫𑀭𑀡𑀲𑁆𑀲 𑁋 𑀅𑀳𑀺 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀯𑀺𑀘𑁆𑀙𑀺𑀓𑁄 𑀯𑀸 𑀫𑀁 𑀟𑀁𑀲𑁂𑀬𑁆𑀬, 𑀲𑀢𑀧𑀤𑀻 𑀯𑀸 𑀫𑀁 𑀟𑀁𑀲𑁂𑀬𑁆𑀬; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄. 𑀉𑀧𑀓𑁆𑀔𑀮𑀺𑀢𑁆𑀯𑀸 𑀯𑀸 𑀧𑀧𑀢𑁂𑀬𑁆𑀬𑀁, 𑀪𑀢𑁆𑀢𑀁 𑀯𑀸 𑀫𑁂 𑀪𑀼𑀢𑁆𑀢𑀁 𑀩𑁆𑀬𑀸𑀧𑀚𑁆𑀚𑁂𑀬𑁆𑀬, 𑀧𑀺𑀢𑁆𑀢𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑁂𑀫𑁆𑀳𑀁 𑀯𑀸 𑀫𑁂 𑀓𑀼𑀧𑁆𑀧𑁂𑀬𑁆𑀬, 𑀲𑀢𑁆𑀣𑀓𑀸 𑀯𑀸 𑀫𑁂 𑀯𑀸𑀢𑀸 𑀓𑀼𑀧𑁆𑀧𑁂𑀬𑁆𑀬𑀼𑀁; 𑀢𑁂𑀦 𑀫𑁂 𑀅𑀲𑁆𑀲 𑀓𑀸𑀮𑀓𑀺𑀭𑀺𑀬𑀸 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸, 𑀬𑁂 𑀫𑁂 𑀅𑀲𑁆𑀲𑀼 𑀤𑀺𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’’’𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸, 𑀬𑁂 𑀫𑁂 𑀅𑀲𑁆𑀲𑀼 𑀤𑀺𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀘𑁂𑀮𑁄 𑀯𑀸 𑀆𑀤𑀺𑀢𑁆𑀢𑀲𑀻𑀲𑁄 𑀯𑀸 𑀢𑀲𑁆𑀲𑁂𑀯 𑀘𑁂𑀮𑀲𑁆𑀲 𑀯𑀸 𑀲𑀻𑀲𑀲𑁆𑀲 𑀯𑀸 𑀦𑀺𑀩𑁆𑀩𑀸𑀧𑀦𑀸𑀬 𑀅𑀥𑀺𑀫𑀢𑁆𑀢𑀁 𑀙𑀦𑁆𑀤𑀜𑁆𑀘 𑀯𑀸𑀬𑀸𑀫𑀜𑁆𑀘 𑀉𑀲𑁆𑀲𑀸𑀳𑀜𑁆𑀘 𑀉𑀲𑁆𑀲𑁄𑀴𑁆𑀳𑀺𑀜𑁆𑀘 𑀅𑀧𑁆𑀧𑀝𑀺𑀯𑀸𑀦𑀺𑀜𑁆𑀘 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀲𑀁𑀬𑁂𑀯 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀓𑀭𑀡𑀻𑀬𑀁.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸, 𑀬𑁂 𑀫𑁂 𑀅𑀲𑁆𑀲𑀼 𑀤𑀺𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺, 𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀫𑀭𑀡𑀲𑁆𑀲𑀢𑀺 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺. 𑀤𑀲𑀫𑀁.

𑀲𑀸𑀭𑀡𑀻𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀲𑀸𑀭𑀡𑀻 𑀦𑀺𑀲𑀸𑀭𑀡𑀻𑀬𑀁, 𑀪𑀤𑁆𑀤𑀓𑀁 𑀅𑀦𑀼𑀢𑀧𑁆𑀧𑀺𑀬𑀁;

𑀦𑀓𑀼𑀮𑀁 𑀲𑁄𑀧𑁆𑀧𑀫𑀘𑁆𑀙𑀸 𑀘, 𑀤𑁆𑀯𑁂 𑀳𑁄𑀦𑁆𑀢𑀺 𑀫𑀭𑀡𑀲𑁆𑀲𑀢𑀻𑀢𑀺.

𑁩. 𑀅𑀦𑀼𑀢𑁆𑀢𑀭𑀺𑀬𑀯𑀕𑁆𑀕𑁄

𑁧. 𑀲𑀸𑀫𑀓𑀲𑀼𑀢𑁆𑀢𑀁

𑁨𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀲𑀸𑀫𑀕𑀸𑀫𑀓𑁂 𑀧𑁄𑀓𑁆𑀔𑀭𑀡𑀺𑀬𑀸𑀬𑀁. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀧𑁄𑀓𑁆𑀔𑀭𑀡𑀺𑀬𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀢𑀬𑁄𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀢𑀬𑁄? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸 𑁋 𑀇𑀫𑁂 𑀔𑁄, 𑀪𑀦𑁆𑀢𑁂, 𑀢𑀬𑁄 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀤𑀫𑀯𑁄𑀘 𑀲𑀸 𑀤𑁂𑀯𑀢𑀸. 𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀺. 𑀅𑀣 𑀔𑁄 𑀲𑀸 𑀤𑁂𑀯𑀢𑀸 ‘‘𑀲𑀫𑀦𑀼𑀜𑁆𑀜𑁄 𑀫𑁂 𑀲𑀢𑁆𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀧𑁄𑀓𑁆𑀔𑀭𑀡𑀺𑀬𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀢𑀬𑁄𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀢𑀬𑁄? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸 𑁋 𑀇𑀫𑁂 𑀔𑁄, 𑀪𑀦𑁆𑀢𑁂, 𑀢𑀬𑁄 𑀥𑀫𑁆𑀫𑀸 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺. 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀲𑀸 𑀤𑁂𑀯𑀢𑀸. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀢𑁂𑀲𑀁 𑀯𑁄 [𑀔𑁄 (𑀓.)], 𑀪𑀺𑀓𑁆𑀔𑀯𑁂, 𑀅𑀮𑀸𑀪𑀸 𑀢𑁂𑀲𑀁 𑀤𑀼𑀮𑁆𑀮𑀤𑁆𑀥𑀁, 𑀬𑁂 𑀯𑁄 𑀤𑁂𑀯𑀢𑀸𑀧𑀺 𑀚𑀸𑀦𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀬𑀫𑀸𑀦𑁂’’.

‘‘𑀅𑀧𑀭𑁂𑀧𑀺, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀤𑁄𑀯𑀘𑀲𑁆𑀲𑀢𑀸, 𑀧𑀸𑀧𑀫𑀺𑀢𑁆𑀢𑀢𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸’’.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀧𑀭𑀺𑀳𑀸𑀬𑀺𑀁𑀲𑀼 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀢𑁂 𑀇𑀫𑁂𑀳𑁂𑀯 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀬𑀺𑀁𑀲𑀼 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀢𑁂 𑀇𑀫𑁂𑀳𑁂𑀯 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀧𑀭𑀺𑀳𑀸𑀬𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀢𑁂 𑀇𑀫𑁂𑀳𑁂𑀯 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀬𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺. 𑀧𑀞𑀫𑀁.

𑁨. 𑀅𑀧𑀭𑀺𑀳𑀸𑀦𑀺𑀬𑀲𑀼𑀢𑁆𑀢𑀁

𑁨𑁨. ‘‘𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀙 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀦 𑀓𑀫𑁆𑀫𑀸𑀭𑀸𑀫𑀢𑀸, 𑀦 𑀪𑀲𑁆𑀲𑀸𑀭𑀸𑀫𑀢𑀸, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀲𑁄𑀯𑀘𑀲𑁆𑀲𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀙 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀦 𑀧𑀭𑀺𑀳𑀸𑀬𑀺𑀁𑀲𑀼 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀢𑁂 𑀇𑀫𑁂𑀳𑁂𑀯 𑀙𑀳𑀺 𑀥𑀫𑁆𑀫𑁂𑀳𑀺 𑀦 𑀧𑀭𑀺𑀳𑀸𑀬𑀺𑀁𑀲𑀼 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀦 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀢𑁂 𑀇𑀫𑁂𑀳𑁂𑀯 𑀙𑀳𑀺 𑀥𑀫𑁆𑀫𑁂𑀳𑀺 𑀦 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀦 𑀧𑀭𑀺𑀳𑀸𑀬𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀩𑁆𑀩𑁂𑀢𑁂 𑀇𑀫𑁂𑀳𑁂𑀯 𑀙𑀳𑀺 𑀥𑀫𑁆𑀫𑁂𑀳𑀺 𑀦 𑀧𑀭𑀺𑀳𑀸𑀬𑀦𑁆𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀪𑀬𑀲𑀼𑀢𑁆𑀢𑀁

𑁨𑁩. ‘‘‘𑀪𑀬’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁; ‘𑀤𑀼𑀓𑁆𑀔’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁; ‘𑀭𑁄𑀕𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁; ‘𑀕𑀡𑁆𑀟𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁; ‘𑀲𑀗𑁆𑀕𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁; ‘𑀧𑀗𑁆𑀓𑁄’𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁.

‘‘𑀓𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, ‘𑀪𑀬’𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁? 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀪𑀬𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀪𑀬𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘𑀪𑀬’𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀫𑀸 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑁆𑀢𑀺…𑀧𑁂… 𑀭𑁄𑀕𑁄𑀢𑀺… 𑀕𑀡𑁆𑀟𑁄𑀢𑀺… 𑀲𑀗𑁆𑀕𑁄𑀢𑀺… 𑀧𑀗𑁆𑀓𑁄𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁? 𑀓𑀸𑀫𑀭𑀸𑀕𑀭𑀢𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀭𑀸𑀕𑀯𑀺𑀦𑀺𑀩𑀤𑁆𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀺 𑀧𑀗𑁆𑀓𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀲𑀫𑁆𑀧𑀭𑀸𑀬𑀺𑀓𑀸𑀧𑀺 𑀧𑀗𑁆𑀓𑀸 𑀦 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘𑀧𑀗𑁆𑀓𑁄’𑀢𑀺 𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

‘‘𑀪𑀬𑀁 𑀤𑀼𑀓𑁆𑀔𑀁 𑀭𑁄𑀕𑁄 𑀕𑀡𑁆𑀟𑁄, 𑀲𑀗𑁆𑀕𑁄 𑀧𑀗𑁆𑀓𑁄 𑀘 𑀉𑀪𑀬𑀁;