𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁

𑁬. 𑀫𑀳𑀸𑀯𑀕𑁆𑀕𑁄

𑁧. 𑀲𑁄𑀡𑀲𑀼𑀢𑁆𑀢𑀁

𑁫𑁫. [𑀫𑀳𑀸𑀯. 𑁨𑁪𑁩 𑀆𑀕𑀢𑀁] 𑀏𑀯𑀁, 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑁄𑀡𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀲𑀻𑀢𑀯𑀦𑀲𑁆𑀫𑀺𑀁. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀬𑁂 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀅𑀣 𑀘 𑀧𑀦 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂 𑀓𑀼𑀮𑁂 𑀪𑁄𑀕𑀸, 𑀲𑀓𑁆𑀓𑀸 𑀪𑁄𑀕𑀸 𑀘 𑀪𑀼𑀜𑁆𑀚𑀺𑀢𑀼𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑁂𑀬𑁆𑀬𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑁆𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑁆𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑀔𑁄 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀦𑁆𑀢𑀭𑀳𑀺𑀢𑁄 𑀲𑀻𑀢𑀯𑀦𑁂 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀆𑀬𑀲𑁆𑀫𑀸𑀧𑀺 𑀔𑁄 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀦𑀦𑀼 𑀢𑁂, 𑀲𑁄𑀡, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀅𑀣 𑀘 𑀧𑀦 𑀫𑁂 𑀦 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄 𑀧𑀦 𑀫𑁂 𑀓𑀼𑀮𑁂 𑀪𑁄𑀕𑀸, 𑀲𑀓𑁆𑀓𑀸 𑀪𑁄𑀕𑀸 [𑀪𑁄𑀕𑁂 (𑀫𑀳𑀸𑀯. 𑁨𑁪𑁩)] 𑀘 𑀪𑀼𑀜𑁆𑀚𑀺𑀢𑀼𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑁂𑀬𑁆𑀬𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁂𑀬𑁆𑀬’’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀓𑀼𑀲𑀮𑁄 𑀢𑁆𑀯𑀁 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄 [𑀆𑀕𑀸𑀭𑀺𑀓𑀪𑀽𑀢𑁄 (𑀲𑁆𑀬𑀸.), 𑀅𑀕𑀸𑀭𑀺𑀓𑀪𑀽𑀢𑁄 (𑀫𑀳𑀸𑀯. 𑁨𑁪𑁩)] 𑀯𑀻𑀡𑀸𑀬 𑀢𑀦𑁆𑀢𑀺𑀲𑁆𑀲𑀭𑁂’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀢𑀺𑀲𑀺𑀣𑀺𑀮𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀬𑀤𑀸 𑀧𑀦 𑀢𑁂, 𑀲𑁄𑀡, 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀦 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺 𑀦𑀸𑀢𑀺𑀲𑀺𑀣𑀺𑀮𑀸 𑀲𑀫𑁂 𑀕𑀼𑀡𑁂 𑀧𑀢𑀺𑀝𑁆𑀞𑀺𑀢𑀸, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀏𑀯𑀫𑁂𑀯𑀁 𑀔𑁄, 𑀲𑁄𑀡, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀲𑁄𑀡, 𑀯𑀻𑀭𑀺𑀬𑀲𑀫𑀣𑀁 𑀅𑀥𑀺𑀝𑁆𑀞𑀳𑀁, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛, 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑁄𑀡𑀁 𑀇𑀫𑀺𑀦𑀸 𑀑𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯𑀁 𑀔𑁄 𑁋 𑀲𑀻𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀸𑀢𑀼𑀭𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀻𑀭𑀺𑀬𑀲𑀫𑀣𑀁 𑀅𑀥𑀺𑀝𑁆𑀞𑀸𑀲𑀺, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛𑀺, 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀸𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀲𑁄𑀡𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑁄𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀬𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀲𑁄 𑀙 𑀞𑀸𑀦𑀸𑀦𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺 𑁋 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 [𑀅𑀩𑁆𑀬𑀸𑀧𑀚𑁆𑀛𑀸𑀥𑀺𑀫𑀼𑀢𑁆𑀢𑁄 (𑀓.) 𑀫𑀳𑀸𑀯. 𑁨𑁪𑁪 𑀧𑀲𑁆𑀲𑀺𑀢𑀩𑁆𑀩𑀁] 𑀳𑁄𑀢𑀺, 𑀢𑀡𑁆𑀳𑀸𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀓𑁂𑀯𑀮𑀁𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀲𑁆𑀲𑀸𑀬 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀓𑀭𑀡𑀻𑀬𑀁 𑀅𑀢𑁆𑀢𑀦𑁄 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀓𑀸𑀫𑀬𑀫𑀸𑀦𑁄 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀓𑀭𑀡𑀻𑀬𑀁 𑀅𑀢𑁆𑀢𑀦𑁄 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀧𑀯𑀺𑀯𑁂𑀓𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀲𑀺𑀬𑀸 𑀔𑁄 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀆𑀬𑀲𑁆𑀫𑀢𑁄 𑀏𑀯𑀫𑀲𑁆𑀲 𑁋 ‘𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀔𑀻𑀡𑀸𑀲𑀯𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀓𑀭𑀡𑀻𑀬𑀁 𑀅𑀢𑁆𑀢𑀦𑁄 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀓𑀢𑀲𑁆𑀲 𑀯𑀸 𑀧𑀝𑀺𑀘𑀬𑀁 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀢𑀡𑁆𑀳𑀸𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀢𑀡𑁆𑀳𑀸𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀢𑀡𑁆𑀳𑀸𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸 𑀅𑀲𑀫𑁆𑀫𑁄𑀳𑀸𑀥𑀺𑀫𑀼𑀢𑁆𑀢𑁄 𑀳𑁄𑀢𑀺.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀪𑀼𑀲𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 [𑀆𑀧𑀸𑀢𑀁 (𑀓.)] 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀪𑀼𑀲𑀸 𑀘𑁂𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁂𑀮𑁄 𑀧𑀩𑁆𑀩𑀢𑁄 𑀅𑀘𑁆𑀙𑀺𑀤𑁆𑀤𑁄 𑀅𑀲𑀼𑀲𑀺𑀭𑁄 𑀏𑀓𑀕𑁆𑀖𑀦𑁄. 𑀅𑀣 𑀧𑀼𑀭𑀢𑁆𑀣𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬, 𑀅𑀣 𑀧𑀘𑁆𑀙𑀺𑀫𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺…𑀧𑁂… 𑀅𑀣 𑀉𑀢𑁆𑀢𑀭𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺… 𑀅𑀣 𑀤𑀓𑁆𑀔𑀺𑀡𑀸𑀬 𑀘𑁂𑀧𑀺 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺 𑀦𑁂𑀯 𑀦𑀁 𑀲𑀗𑁆𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀓𑀫𑁆𑀧𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀲𑀸 𑀘𑁂𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀺. 𑀪𑀼𑀲𑀸 𑀘𑁂𑀧𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀫𑀦𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦𑁂𑀯𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀫𑀺𑀲𑁆𑀲𑀻𑀓𑀢𑀫𑁂𑀯𑀲𑁆𑀲 𑀘𑀺𑀢𑁆𑀢𑀁 𑀳𑁄𑀢𑀺 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻’’𑀢𑀺.

‘‘𑀦𑁂𑀓𑁆𑀔𑀫𑁆𑀫𑀁 𑀅𑀥𑀺𑀫𑀼𑀢𑁆𑀢𑀲𑁆𑀲, 𑀧𑀯𑀺𑀯𑁂𑀓𑀜𑁆𑀘 𑀘𑁂𑀢𑀲𑁄;

𑀅𑀩𑁆𑀬𑀸𑀧𑀚𑁆𑀚𑀸𑀥𑀺𑀫𑀼𑀢𑁆𑀢𑀲𑁆𑀲, 𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲 𑀘.

‘‘𑀢𑀡𑁆𑀳𑀸𑀓𑁆𑀔𑀬𑀸𑀥𑀺𑀫𑀼𑀢𑁆𑀢𑀲𑁆𑀲, 𑀅𑀲𑀫𑁆𑀫𑁄𑀳𑀜𑁆𑀘 𑀘𑁂𑀢𑀲𑁄;

𑀤𑀺𑀲𑁆𑀯𑀸 𑀆𑀬𑀢𑀦𑀼𑀧𑁆𑀧𑀸𑀤𑀁, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺.

‘‘𑀢𑀲𑁆𑀲 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀓𑀢𑀲𑁆𑀲 𑀧𑀝𑀺𑀘𑀬𑁄 𑀦𑀢𑁆𑀣𑀺, 𑀓𑀭𑀡𑀻𑀬𑀁 𑀦 𑀯𑀺𑀚𑁆𑀚𑀢𑀺.

‘‘𑀲𑁂𑀮𑁄 𑀬𑀣𑀸 𑀏𑀓𑀕𑁆𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀭𑀽𑀧𑀸 𑀭𑀲𑀸 𑀲𑀤𑁆𑀤𑀸, 𑀕𑀦𑁆𑀥𑀸 𑀨𑀲𑁆𑀲𑀸 𑀘 𑀓𑁂𑀯𑀮𑀸.

‘‘𑀇𑀝𑁆𑀞𑀸 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸 𑀘, 𑀦𑀧𑁆𑀧𑀯𑁂𑀥𑁂𑀦𑁆𑀢𑀺 𑀢𑀸𑀤𑀺𑀦𑁄;

𑀞𑀺𑀢𑀁 𑀘𑀺𑀢𑁆𑀢𑀁 𑀯𑀺𑀧𑁆𑀧𑀫𑀼𑀢𑁆𑀢𑀁 [𑀯𑀺𑀫𑀼𑀢𑀜𑁆𑀘 (𑀓.) 𑀫𑀳𑀸𑀯. 𑁨𑁪𑁪; 𑀓𑀣𑀸. 𑁨𑁬𑁬], 𑀯𑀬𑀜𑁆𑀘𑀲𑁆𑀲𑀸𑀦𑀼𑀧𑀲𑁆𑀲𑀢𑀻’’𑀢𑀺. 𑀧𑀞𑀫𑀁;

𑁨. 𑀨𑀕𑁆𑀕𑀼𑀦𑀲𑀼𑀢𑁆𑀢𑀁

𑁫𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀨𑀕𑁆𑀕𑀼𑀦𑁄 [𑀨𑁂𑀕𑁆𑀕𑀼𑀦𑁄 (𑀓.), 𑀨𑀕𑁆𑀕𑀼𑀡𑁄 (𑀲𑀻. 𑀲𑁆𑀬𑀸.)] 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀨𑀕𑁆𑀕𑀼𑀦𑁄 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦𑀸𑀬𑀲𑁆𑀫𑀸 𑀨𑀕𑁆𑀕𑀼𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀨𑀕𑁆𑀕𑀼𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀨𑀕𑁆𑀕𑀼𑀦𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀫𑀜𑁆𑀘𑀓𑁂 𑀲𑀫𑀥𑁄𑀲𑀺 [𑀲𑀫𑀜𑁆𑀘𑁄𑀧𑀺 (𑀲𑀻. 𑀲𑁆𑀬𑀸. 𑀧𑀻.), 𑀲𑀁 + 𑀥𑀽 + 𑀈 = 𑀲𑀫𑀥𑁄𑀲𑀺]. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀨𑀕𑁆𑀕𑀼𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀨𑀕𑁆𑀕𑀼𑀦, 𑀫𑀸 𑀢𑁆𑀯𑀁 𑀫𑀜𑁆𑀘𑀓𑁂 𑀲𑀫𑀥𑁄𑀲𑀺. 𑀲𑀦𑁆𑀢𑀺𑀫𑀸𑀦𑀺 𑀆𑀲𑀦𑀸𑀦𑀺 𑀧𑀭𑁂𑀳𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀢𑀢𑁆𑀣𑀸𑀳𑀁 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀨𑀕𑁆𑀕𑀼𑀦𑀁 𑀏𑀢𑀤𑀯𑁄𑀘 𑁋

‘‘𑀓𑀘𑁆𑀘𑀺 𑀢𑁂, 𑀨𑀕𑁆𑀕𑀼𑀦, 𑀔𑀫𑀦𑀻𑀬𑀁 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁? 𑀓𑀘𑁆𑀘𑀺 𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺; 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺? ‘‘𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁. 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺; 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀢𑀺𑀡𑁆𑀳𑁂𑀦 𑀲𑀺𑀔𑀭𑁂𑀦 𑀫𑀼𑀤𑁆𑀥𑀦𑀺 [𑀫𑀼𑀤𑁆𑀥𑀸𑀦𑀁 (𑀲𑀻. 𑀧𑀻.)] 𑀅𑀪𑀺𑀫𑀢𑁆𑀣𑁂𑀬𑁆𑀬 [𑀅𑀪𑀺𑀫𑀝𑁆𑀞𑁂𑀬𑁆𑀬 (𑀲𑁆𑀬𑀸.)]; 𑀏𑀯𑀫𑁂𑀯𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀫𑀼𑀤𑁆𑀥𑀦𑀺 [𑀳𑀦𑀦𑁆𑀢𑀺 (𑀲𑀻. 𑀧𑀻.), 𑀑𑀳𑀦𑀦𑁆𑀢𑀺 (𑀲𑁆𑀬𑀸.)] 𑀊𑀳𑀦𑀦𑁆𑀢𑀺. 𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁. 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺; 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀤𑀴𑁆𑀳𑁂𑀦 𑀯𑀭𑀢𑁆𑀢𑀓𑁆𑀔𑀡𑁆𑀟𑁂𑀦 𑀲𑀻𑀲𑀯𑁂𑀞𑀦𑀁 𑀤𑀤𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀥𑀺𑀫𑀢𑁆𑀢𑀸 𑀲𑀻𑀲𑁂 𑀲𑀻𑀲𑀯𑁂𑀤𑀦𑀸. 𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁. 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺; 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀢𑀺𑀡𑁆𑀳𑁂𑀦 𑀕𑁄𑀯𑀺𑀓𑀦𑁆𑀢𑀦𑁂𑀦 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀥𑀺𑀫𑀢𑁆𑀢𑀸 𑀯𑀸𑀢𑀸 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑀦𑁆𑀢𑀺. 𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁. 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺; 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀤𑀼𑀩𑁆𑀩𑀮𑀢𑀭𑀁 𑀧𑀼𑀭𑀺𑀲𑀁 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀲𑀦𑁆𑀢𑀸𑀧𑁂𑀬𑁆𑀬𑀼𑀁 𑀲𑀫𑁆𑀧𑀭𑀺𑀢𑀸𑀧𑁂𑀬𑁆𑀬𑀼𑀁; 𑀏𑀯𑀫𑁂𑀯𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀥𑀺𑀫𑀢𑁆𑀢𑁄 𑀓𑀸𑀬𑀲𑁆𑀫𑀺𑀁 𑀟𑀸𑀳𑁄. 𑀦 𑀫𑁂, 𑀪𑀦𑁆𑀢𑁂, 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁. 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺; 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀨𑀕𑁆𑀕𑀼𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀨𑀕𑁆𑀕𑀼𑀦𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀓𑀸𑀮𑀫𑀓𑀸𑀲𑀺. 𑀢𑀫𑁆𑀳𑀺 𑀘𑀲𑁆𑀲 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀻𑀤𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀨𑀕𑁆𑀕𑀼𑀦𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀓𑀸𑀮𑀫𑀓𑀸𑀲𑀺. 𑀢𑀫𑁆𑀳𑀺 𑀘𑀲𑁆𑀲 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀻𑀤𑀺𑀁𑀲𑀽’’𑀢𑀺.

‘‘𑀓𑀺𑀁 𑀳𑀸𑀦𑀦𑁆𑀤, 𑀨𑀕𑁆𑀕𑀼𑀦𑀲𑁆𑀲 [𑀨𑁂𑀕𑁆𑀕𑀼𑀦𑀲𑁆𑀲 𑀆𑀦𑀦𑁆𑀤 (𑀓.)] 𑀪𑀺𑀓𑁆𑀔𑀼𑀦𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦 𑀯𑀺𑀧𑁆𑀧𑀲𑀻𑀤𑀺𑀲𑁆𑀲𑀦𑁆𑀢𑀺! 𑀨𑀕𑁆𑀕𑀼𑀦𑀲𑁆𑀲, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀲 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁.

‘‘𑀙𑀬𑀺𑀫𑁂, 𑀆𑀦𑀦𑁆𑀤, 𑀆𑀦𑀺𑀲𑀁𑀲𑀸 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 [𑀥𑀫𑁆𑀫𑀲𑀯𑀡𑁂 (𑀲𑀻.)] 𑀓𑀸𑀮𑁂𑀦 𑀅𑀢𑁆𑀣𑀼𑀧𑀧𑀭𑀺𑀓𑁆𑀔𑀸𑀬. 𑀓𑀢𑀫𑁂 𑀙? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀫𑁆𑀳𑀺 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀮𑀪𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬. 𑀢𑀲𑁆𑀲 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀲𑁆𑀲 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀅𑀬𑀁, 𑀆𑀦𑀦𑁆𑀤, 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀫𑁆𑀳𑀺 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀦 𑀳𑁂𑀯 𑀔𑁄 [𑀦𑁄 𑀘 𑀔𑁄 (𑀓.)] 𑀮𑀪𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀅𑀧𑀺 𑀘 𑀔𑁄 𑀢𑀣𑀸𑀕𑀢𑀲𑀸𑀯𑀓𑀁 𑀮𑀪𑀢𑀺 𑀤𑀲𑁆𑀲𑀦𑀸𑀬. 𑀢𑀲𑁆𑀲 𑀢𑀣𑀸𑀕𑀢𑀲𑀸𑀯𑀓𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀲𑁆𑀲 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀅𑀬𑀁, 𑀆𑀦𑀦𑁆𑀤, 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀫𑁆𑀳𑀺 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀦 𑀳𑁂𑀯 𑀔𑁄 𑀮𑀪𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀦𑀧𑀺 𑀢𑀣𑀸𑀕𑀢𑀲𑀸𑀯𑀓𑀁 𑀮𑀪𑀢𑀺 𑀤𑀲𑁆𑀲𑀦𑀸𑀬; 𑀅𑀧𑀺 𑀘 𑀔𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺. 𑀢𑀲𑁆𑀲 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑀬𑀢𑁄 𑀅𑀦𑀼𑀯𑀺𑀘𑀸𑀭𑀬𑀢𑁄 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀅𑀬𑀁, 𑀆𑀦𑀦𑁆𑀤, 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀅𑀢𑁆𑀣𑀼𑀧𑀧𑀭𑀺𑀓𑁆𑀔𑀸𑀬.

‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀼𑀢𑁆𑀢𑀭𑁂 𑀘 𑀔𑁄 𑀉𑀧𑀥𑀺𑀲𑀗𑁆𑀔𑀬𑁂 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀫𑁆𑀳𑀺 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀮𑀪𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬. 𑀢𑀲𑁆𑀲 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀲𑁆𑀲 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀅𑀬𑀁, 𑀆𑀦𑀦𑁆𑀤, 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀼𑀢𑁆𑀢𑀭𑁂 𑀘 𑀔𑁄 𑀉𑀧𑀥𑀺𑀲𑀗𑁆𑀔𑀬𑁂 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀫𑁆𑀳𑀺 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀦 𑀳𑁂𑀯 𑀔𑁄 𑀮𑀪𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀅𑀧𑀺 𑀘 𑀔𑁄 𑀢𑀣𑀸𑀕𑀢𑀲𑀸𑀯𑀓𑀁 𑀮𑀪𑀢𑀺 𑀤𑀲𑁆𑀲𑀦𑀸𑀬. 𑀢𑀲𑁆𑀲 𑀢𑀣𑀸𑀕𑀢𑀲𑀸𑀯𑀓𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀲𑁆𑀲 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀅𑀬𑀁, 𑀆𑀦𑀦𑁆𑀤, 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀑𑀭𑀫𑁆𑀪𑀸𑀕𑀺𑀬𑁂𑀳𑀺 𑀲𑀁𑀬𑁄𑀚𑀦𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀼𑀢𑁆𑀢𑀭𑁂 𑀘 𑀔𑁄 𑀉𑀧𑀥𑀺𑀲𑀗𑁆𑀔𑀬𑁂 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀫𑁆𑀳𑀺 𑀲𑀫𑀬𑁂 𑀫𑀭𑀡𑀓𑀸𑀮𑁂 𑀦 𑀳𑁂𑀯 𑀔𑁄 𑀮𑀪𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀦𑀧𑀺 𑀢𑀣𑀸𑀕𑀢𑀲𑀸𑀯𑀓𑀁 𑀮𑀪𑀢𑀺 𑀤𑀲𑁆𑀲𑀦𑀸𑀬; 𑀅𑀧𑀺 𑀘 𑀔𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑁂𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑀺 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑀺. 𑀢𑀲𑁆𑀲 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀘𑁂𑀢𑀲𑀸 𑀅𑀦𑀼𑀯𑀺𑀢𑀓𑁆𑀓𑀬𑀢𑁄 𑀅𑀦𑀼𑀯𑀺𑀘𑀸𑀭𑀬𑀢𑁄 𑀫𑀦𑀲𑀸𑀦𑀼𑀧𑁂𑀓𑁆𑀔𑀢𑁄 𑀅𑀦𑀼𑀢𑁆𑀢𑀭𑁂 𑀉𑀧𑀥𑀺𑀲𑀗𑁆𑀔𑀬𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀅𑀬𑀁, 𑀆𑀦𑀦𑁆𑀤, 𑀙𑀝𑁆𑀞𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀅𑀢𑁆𑀣𑀼𑀧𑀧𑀭𑀺𑀓𑁆𑀔𑀸𑀬. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀙 𑀆𑀦𑀺𑀲𑀁𑀲𑀸 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀅𑀢𑁆𑀣𑀼𑀧𑀧𑀭𑀺𑀓𑁆𑀔𑀸𑀬𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀙𑀴𑀪𑀺𑀚𑀸𑀢𑀺𑀲𑀼𑀢𑁆𑀢𑀁

𑁫𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀽𑀭𑀡𑁂𑀦, 𑀪𑀦𑁆𑀢𑁂, 𑀓𑀲𑁆𑀲𑀧𑁂𑀦 𑀙𑀴𑀪𑀺𑀚𑀸𑀢𑀺𑀬𑁄 𑀧𑀜𑁆𑀜𑀢𑁆𑀢𑀸 𑁋 𑀓𑀡𑁆𑀳𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀦𑀻𑀮𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸.

‘‘𑀢𑀢𑁆𑀭𑀺𑀤𑀁, 𑀪𑀦𑁆𑀢𑁂, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀓𑀡𑁆𑀳𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸 𑀲𑀸𑀓𑀼𑀡𑀺𑀓𑀸 𑀫𑀸𑀕𑀯𑀺𑀓𑀸 𑀮𑀼𑀤𑁆𑀤𑀸 𑀫𑀘𑁆𑀙𑀖𑀸𑀢𑀓𑀸 𑀘𑁄𑀭𑀸 𑀘𑁄𑀭𑀖𑀸𑀢𑀓𑀸 𑀩𑀦𑁆𑀥𑀦𑀸𑀕𑀸𑀭𑀺𑀓𑀸 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸.

‘‘𑀢𑀢𑁆𑀭𑀺𑀤𑀁, 𑀪𑀦𑁆𑀢𑁂, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀦𑀻𑀮𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀪𑀺𑀓𑁆𑀔𑀽 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀓𑀫𑁆𑀫𑀯𑀸𑀤𑀸 𑀓𑁆𑀭𑀺𑀬𑀯𑀸𑀤𑀸.

‘‘𑀢𑀢𑁆𑀭𑀺𑀤𑀁, 𑀪𑀦𑁆𑀢𑁂, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀦𑀺𑀕𑀡𑁆𑀞𑀸 𑀏𑀓𑀲𑀸𑀝𑀓𑀸.

‘‘𑀢𑀢𑁆𑀭𑀺𑀤𑀁, 𑀪𑀦𑁆𑀢𑁂, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀅𑀘𑁂𑀮𑀓𑀲𑀸𑀯𑀓𑀸.

‘‘𑀢𑀢𑁆𑀭𑀺𑀤𑀁, 𑀪𑀦𑁆𑀢𑁂, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀆𑀚𑀻𑀯𑀓𑀸 𑀆𑀚𑀻𑀯𑀓𑀺𑀦𑀺𑀬𑁄.

‘‘𑀢𑀢𑁆𑀭𑀺𑀤𑀁, 𑀪𑀦𑁆𑀢𑁂, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀜𑁆𑀜𑀢𑁆𑀢𑀸, 𑀦𑀦𑁆𑀤𑁄 𑀯𑀘𑁆𑀙𑁄 𑀓𑀺𑀲𑁄 𑀲𑀁𑀓𑀺𑀘𑁆𑀘𑁄 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄. 𑀧𑀽𑀭𑀡𑁂𑀦, 𑀪𑀦𑁆𑀢𑁂, 𑀓𑀲𑁆𑀲𑀧𑁂𑀦 𑀇𑀫𑀸 𑀙𑀴𑀪𑀺𑀚𑀸𑀢𑀺𑀬𑁄 𑀧𑀜𑁆𑀜𑀢𑁆𑀢𑀸’’𑀢𑀺.

‘‘𑀓𑀺𑀁 𑀧𑀦𑀸𑀦𑀦𑁆𑀤, 𑀧𑀽𑀭𑀡𑀲𑁆𑀲 𑀓𑀲𑁆𑀲𑀧𑀲𑁆𑀲 𑀲𑀩𑁆𑀩𑁄 𑀮𑁄𑀓𑁄 𑀏𑀢𑀤𑀩𑁆𑀪𑀦𑀼𑀚𑀸𑀦𑀸𑀢𑀺 𑀇𑀫𑀸 𑀙𑀴𑀪𑀺𑀚𑀸𑀢𑀺𑀬𑁄 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀼𑀭𑀺𑀲𑁄 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀓𑁄, 𑀢𑀲𑁆𑀲 𑀅𑀓𑀸𑀫𑀓𑀲𑁆𑀲 𑀩𑀺𑀮𑀁 𑀑𑀮𑀕𑁆𑀕𑁂𑀬𑁆𑀬𑀼𑀁 𑁋 ‘𑀇𑀤𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀫𑀁𑀲𑀜𑁆𑀘 𑀔𑀸𑀤𑀺𑀢𑀩𑁆𑀩𑀁, 𑀫𑀽𑀮𑀜𑁆𑀘 𑀅𑀦𑀼𑀧𑁆𑀧𑀤𑀸𑀢𑀩𑁆𑀩’𑀦𑁆𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀦𑀦𑁆𑀤, 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀅𑀧𑁆𑀧𑀝𑀺𑀜𑁆𑀜𑀸𑀬 𑀏𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀇𑀫𑀸 𑀙𑀴𑀪𑀺𑀚𑀸𑀢𑀺𑀬𑁄 𑀧𑀜𑁆𑀜𑀢𑁆𑀢𑀸, 𑀬𑀣𑀸 𑀢𑀁 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀅𑀔𑁂𑀢𑁆𑀢𑀜𑁆𑀜𑀼𑀦𑀸 𑀅𑀓𑀼𑀲𑀮𑁂𑀦.

‘‘𑀅𑀳𑀁 𑀔𑁄 𑀧𑀦𑀸𑀦𑀦𑁆𑀤, 𑀙𑀴𑀪𑀺𑀚𑀸𑀢𑀺𑀬𑁄 𑀧𑀜𑁆𑀜𑀸𑀧𑁂𑀫𑀺. 𑀢𑀁 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀘𑀸𑀦𑀦𑁆𑀤, 𑀙𑀴𑀪𑀺𑀚𑀸𑀢𑀺𑀬𑁄? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺. 𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺. 𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺. 𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺. 𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺. 𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸 𑀦𑁂𑀲𑀸𑀤𑀓𑀼𑀮𑁂 𑀯𑀸 𑀯𑁂𑀦𑀓𑀼𑀮𑁂 [𑀯𑁂𑀡𑀓𑀼𑀮𑁂 (𑀲𑀩𑁆𑀩𑀢𑁆𑀣)] 𑀯𑀸 𑀭𑀣𑀓𑀸𑀭𑀓𑀼𑀮𑁂 𑀯𑀸 𑀧𑀼𑀓𑁆𑀓𑀼𑀲𑀓𑀼𑀮𑁂 𑀯𑀸, 𑀤𑀮𑀺𑀤𑁆𑀤𑁂 𑀅𑀧𑁆𑀧𑀦𑁆𑀦𑀧𑀸𑀦𑀪𑁄𑀚𑀦𑁂 𑀓𑀲𑀺𑀭𑀯𑀼𑀢𑁆𑀢𑀺𑀓𑁂, 𑀬𑀢𑁆𑀣 𑀓𑀲𑀺𑀭𑁂𑀦 𑀖𑀸𑀲𑀘𑁆𑀙𑀸𑀤𑁄 𑀮𑀩𑁆𑀪𑀢𑀺. 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄 𑀩𑀯𑁆𑀳𑀸𑀩𑀸𑀥𑁄 𑀓𑀸𑀡𑁄 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑁄 𑀯𑀸 𑀧𑀓𑁆𑀔𑀳𑀢𑁄 𑀯𑀸, 𑀦 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸…𑀧𑁂… 𑀲𑁄 𑀘 𑀳𑁄𑀢𑀺 𑀤𑀼𑀩𑁆𑀩𑀡𑁆𑀡𑁄 𑀤𑀼𑀤𑁆𑀤𑀲𑀺𑀓𑁄 𑀑𑀓𑁄𑀝𑀺𑀫𑀓𑁄. 𑀲𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂, 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀓𑀡𑁆𑀳𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸, 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂. 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀓𑀡𑁆𑀳𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀲𑀼𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀅𑀪𑀺𑀚𑀸𑀬𑀢𑀺.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑁋 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀯𑀸, 𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀫𑀳𑀸𑀪𑁄𑀕𑁂 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁂 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁂 𑀧𑀳𑀽𑀢𑀥𑀦𑀥𑀜𑁆𑀜𑁂. 𑀲𑁄 𑀘 𑀳𑁄𑀢𑀺 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀯𑀢𑁆𑀣𑀲𑁆𑀲 𑀬𑀸𑀦𑀲𑁆𑀲 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀲𑁆𑀲 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀲𑁆𑀲. 𑀲𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂, 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑁄 𑀲𑀫𑀸𑀦𑁄 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀦𑀺𑀩𑁆𑀩𑀸𑀦𑀁 𑀅𑀪𑀺𑀚𑀸𑀬𑀢𑀺. 𑀇𑀫𑀸 𑀔𑁄, 𑀆𑀦𑀦𑁆𑀤, 𑀙𑀴𑀪𑀺𑀚𑀸𑀢𑀺𑀬𑁄’’𑀢𑀺. 𑀢𑀢𑀺𑀬𑀁.

𑁪. 𑀆𑀲𑀯𑀲𑀼𑀢𑁆𑀢𑀁

𑁫𑁮. ‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

𑀓𑀢𑀫𑁂𑀳𑀺 𑀙𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀬𑁂 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀲𑀁𑀯𑀭𑁂𑀦 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀧𑀝𑀺𑀲𑁂𑀯𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀅𑀥𑀺𑀯𑀸𑀲𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀧𑀭𑀺𑀯𑀚𑁆𑀚𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀯𑀺𑀦𑁄𑀤𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀪𑀸𑀯𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀲𑀁𑀯𑀭𑁂𑀦 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀅𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁄𑀢𑀺𑀦𑁆𑀤𑁆𑀭𑀺𑀬…𑀧𑁂… 𑀖𑀸𑀦𑀺𑀦𑁆𑀤𑁆𑀭𑀺𑀬… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬… 𑀓𑀸𑀬𑀺𑀦𑁆𑀤𑁆𑀭𑀺𑀬… 𑀫𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀅𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀲𑀁𑀯𑀭𑁂𑀦 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀧𑀝𑀺𑀲𑁂𑀯𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑁋 ‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 [𑀟𑀁𑀲… 𑀲𑀺𑀭𑀺𑀁𑀲𑀧𑀲𑀫𑁆𑀨𑀲𑁆𑀲𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻) 𑀫. 𑀦𑀺. 𑁧.𑁨𑁩] 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁’. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺 𑁋 ‘𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬, 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘’ [𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺 𑁋 ‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁’. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺 𑁋 ‘𑀬𑀸𑀯𑀤𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬𑀸’𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺𑀲𑁂𑀯𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀧𑀝𑀺𑀲𑁂𑀯𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀧𑀝𑀺𑀲𑁂𑀯𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀅𑀥𑀺𑀯𑀸𑀲𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲, 𑀚𑀺𑀖𑀘𑁆𑀙𑀸𑀬, 𑀧𑀺𑀧𑀸𑀲𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁, 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀥𑀺𑀯𑀸𑀲𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀅𑀥𑀺𑀯𑀸𑀲𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀅𑀥𑀺𑀯𑀸𑀲𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀧𑀭𑀺𑀯𑀚𑁆𑀚𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀡𑁆𑀟𑀁 𑀳𑀢𑁆𑀣𑀺𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀡𑁆𑀟𑀁 𑀅𑀲𑁆𑀲𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀡𑁆𑀟𑀁 𑀕𑁄𑀡𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀡𑁆𑀟𑀁 𑀓𑀼𑀓𑁆𑀓𑀼𑀭𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀅𑀳𑀺𑀁 𑀔𑀸𑀡𑀼𑀁 𑀓𑀡𑁆𑀝𑀓𑀝𑁆𑀞𑀸𑀦𑀁 𑀲𑁄𑀩𑁆𑀪𑀁 𑀧𑀧𑀸𑀢𑀁 𑀘𑀦𑁆𑀤𑀦𑀺𑀓𑀁 𑀑𑀴𑀺𑀕𑀮𑁆𑀮𑀁, 𑀬𑀣𑀸𑀭𑀽𑀧𑁂 𑀅𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑀁, 𑀬𑀣𑀸𑀭𑀽𑀧𑁂 𑀅𑀕𑁄𑀘𑀭𑁂 𑀘𑀭𑀦𑁆𑀢𑀁, 𑀬𑀣𑀸𑀭𑀽𑀧𑁂 𑀧𑀸𑀧𑀓𑁂 𑀫𑀺𑀢𑁆𑀢𑁂 𑀪𑀚𑀦𑁆𑀢𑀁 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀧𑀸𑀧𑀓𑁂𑀲𑀼 𑀞𑀸𑀦𑁂𑀲𑀼 𑀑𑀓𑀧𑁆𑀧𑁂𑀬𑁆𑀬𑀼𑀁, 𑀲𑁄 𑀢𑀜𑁆𑀘 𑀅𑀦𑀸𑀲𑀦𑀁 𑀢𑀜𑁆𑀘 𑀅𑀕𑁄𑀘𑀭𑀁 𑀢𑁂 𑀘 𑀧𑀸𑀧𑀓𑁂 𑀫𑀺𑀢𑁆𑀢𑁂 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀭𑀺𑀯𑀚𑁆𑀚𑁂𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀯𑀚𑁆𑀚𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀧𑀭𑀺𑀯𑀚𑁆𑀚𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀧𑀭𑀺𑀯𑀚𑁆𑀚𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀯𑀺𑀦𑁄𑀤𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀯𑀺𑀦𑁄𑀤𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀯𑀺𑀦𑁄𑀤𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀯𑀺𑀦𑁄𑀤𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀪𑀸𑀯𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁, 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀸𑀯𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀪𑀸𑀯𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸 𑀬𑁂 𑀪𑀸𑀯𑀦𑀸𑀬 𑀧𑀳𑀻𑀦𑀸 𑀳𑁄𑀦𑁆𑀢𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀸𑀭𑀼𑀓𑀫𑁆𑀫𑀺𑀓𑀲𑀼𑀢𑁆𑀢𑀁

𑁫𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀅𑀣 𑀔𑁄 𑀤𑀸𑀭𑀼𑀓𑀫𑁆𑀫𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀤𑀸𑀭𑀼𑀓𑀫𑁆𑀫𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀧𑀺 𑀦𑀼 𑀢𑁂, 𑀕𑀳𑀧𑀢𑀺, 𑀓𑀼𑀮𑁂 𑀤𑀸𑀦𑀁 𑀤𑀻𑀬𑀢𑀻’’𑀢𑀺? ‘‘𑀤𑀻𑀬𑀢𑀺 𑀫𑁂, 𑀪𑀦𑁆𑀢𑁂, 𑀓𑀼𑀮𑁂 𑀤𑀸𑀦𑀁. 𑀢𑀜𑁆𑀘 𑀔𑁄 𑀬𑁂 𑀢𑁂 𑀪𑀺𑀓𑁆𑀔𑀽 𑀆𑀭𑀜𑁆𑀜𑀺𑀓𑀸 𑀧𑀺𑀡𑁆𑀟𑀧𑀸𑀢𑀺𑀓𑀸 𑀧𑀁𑀲𑀼𑀓𑀽𑀮𑀺𑀓𑀸 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀢𑀣𑀸𑀭𑀽𑀧𑁂𑀲𑀼 𑀫𑁂, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀲𑀼 𑀤𑀸𑀦𑀁 𑀤𑀻𑀬𑀢𑀻’’𑀢𑀺.

‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁, 𑀕𑀳𑀧𑀢𑀺, 𑀢𑀬𑀸 𑀕𑀺𑀳𑀺𑀦𑀸 𑀓𑀸𑀫𑀪𑁄𑀕𑀺𑀦𑀸 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀦, 𑀓𑀸𑀲𑀺𑀓𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁂𑀦, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀦𑁆𑀢𑁂𑀦, 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑁂𑀦 𑀇𑀫𑁂 𑀯𑀸 𑀅𑀭𑀳𑀦𑁆𑀢𑁄 𑀇𑀫𑁂 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀫𑀸𑀧𑀦𑁆𑀦𑀸𑀢𑀺.

‘‘𑀆𑀭𑀜𑁆𑀜𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀤𑁆𑀥𑀢𑁄 𑀉𑀦𑁆𑀦𑀴𑁄 𑀘𑀧𑀮𑁄 𑀫𑀼𑀔𑀭𑁄 𑀯𑀺𑀓𑀺𑀡𑁆𑀡𑀯𑀸𑀘𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀆𑀭𑀜𑁆𑀜𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀅𑀦𑀼𑀤𑁆𑀥𑀢𑁄 𑀅𑀦𑀼𑀦𑁆𑀦𑀴𑁄 𑀅𑀘𑀧𑀮𑁄 𑀅𑀫𑀼𑀔𑀭𑁄 𑀅𑀯𑀺𑀓𑀺𑀡𑁆𑀡𑀯𑀸𑀘𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀕𑀸𑀫𑀦𑁆𑀢𑀯𑀺𑀳𑀸𑀭𑀻 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀕𑀸𑀫𑀦𑁆𑀢𑀯𑀺𑀳𑀸𑀭𑀻 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀅𑀦𑀼𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀅𑀦𑀼𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀦𑁂𑀫𑀦𑁆𑀢𑀦𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀦𑁂𑀫𑀦𑁆𑀢𑀦𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀅𑀦𑀼𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀧𑀁𑀲𑀼𑀓𑀽𑀮𑀺𑀓𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀅𑀦𑀼𑀤𑁆𑀥𑀢𑁄…𑀧𑁂… 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀕𑀳𑀧𑀢𑀺𑀘𑀻𑀯𑀭𑀥𑀭𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀤𑁆𑀥𑀢𑁄 𑀉𑀦𑁆𑀦𑀴𑁄 𑀘𑀧𑀮𑁄 𑀫𑀼𑀔𑀭𑁄 𑀯𑀺𑀓𑀺𑀡𑁆𑀡𑀯𑀸𑀘𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀕𑀸𑀭𑀬𑁆𑀳𑁄. 𑀕𑀳𑀧𑀢𑀺𑀘𑀻𑀯𑀭𑀥𑀭𑁄 𑀘𑁂𑀧𑀺, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀳𑁄𑀢𑀺 𑀅𑀦𑀼𑀤𑁆𑀥𑀢𑁄 𑀅𑀦𑀼𑀦𑁆𑀦𑀴𑁄 𑀅𑀘𑀧𑀮𑁄 𑀅𑀫𑀼𑀔𑀭𑁄 𑀅𑀯𑀺𑀓𑀺𑀡𑁆𑀡𑀯𑀸𑀘𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀸𑀲𑀁𑀲𑁄.

‘‘𑀇𑀗𑁆𑀖 𑀢𑁆𑀯𑀁, 𑀕𑀳𑀧𑀢𑀺, 𑀲𑀗𑁆𑀖𑁂 𑀤𑀸𑀦𑀁 [𑀤𑀸𑀦𑀸𑀦𑀺 (𑀓.)] 𑀤𑁂𑀳𑀺. 𑀲𑀗𑁆𑀖𑁂 𑀢𑁂 𑀤𑀸𑀦𑀁 𑀤𑀤𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀺𑀲𑁆𑀲𑀢𑀺. 𑀲𑁄 𑀢𑁆𑀯𑀁 𑀧𑀲𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀲𑀻’’𑀢𑀺. ‘‘𑀏𑀲𑀸𑀳𑀁, 𑀪𑀦𑁆𑀢𑁂, 𑀅𑀚𑁆𑀚𑀢𑀕𑁆𑀕𑁂 𑀲𑀗𑁆𑀖𑁂 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁

𑁬𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀘𑀺𑀢𑁆𑀢𑀁 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀲𑀺, 𑀬𑀸𑀯 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀬𑀲𑁆𑀫𑀸 𑀘𑀺𑀢𑁆𑀢𑁄 𑀆𑀕𑀫𑁂𑀢𑀽’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀢𑁄 𑀘𑀺𑀢𑁆𑀢𑀲𑁆𑀲 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑁄𑀝𑁆𑀞𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀸𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀘𑀺𑀢𑁆𑀢𑀁 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀁 𑀅𑀧𑀲𑀸𑀤𑁂𑀲𑀺, 𑀧𑀡𑁆𑀟𑀺𑀢𑁄 𑀆𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀥𑀫𑁆𑀫𑀓𑀣𑀁 𑀓𑀣𑁂𑀢𑀼’’𑀦𑁆𑀢𑀺.

‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀧𑀭𑀲𑁆𑀲 𑀘𑁂𑀢𑁄𑀧𑀭𑀺𑀬𑀸𑀬𑀁 𑀅𑀚𑀸𑀦𑀦𑁆𑀢𑁂𑀳𑀺. 𑀇𑀥𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀸𑀯𑀤𑁂𑀯 𑀲𑁄𑀭𑀢𑀲𑁄𑀭𑀢𑁄 𑀳𑁄𑀢𑀺, 𑀦𑀺𑀯𑀸𑀢𑀦𑀺𑀯𑀸𑀢𑁄 𑀳𑁄𑀢𑀺, 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑁄 𑀳𑁄𑀢𑀺, 𑀬𑀸𑀯 𑀲𑀢𑁆𑀣𑀸𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀁 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁. 𑀬𑀢𑁄 𑀘 𑀔𑁄 𑀲𑁄 𑀯𑀧𑀓𑀲𑁆𑀲𑀢𑁂𑀯 𑀲𑀢𑁆𑀣𑀸𑀭𑀸, 𑀯𑀧𑀓𑀲𑁆𑀲𑀢𑀺 𑀕𑀭𑀼𑀝𑁆𑀞𑀸𑀦𑀺𑀬𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺, 𑀲𑁄 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀜𑁆𑀜𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺. 𑀢𑀲𑁆𑀲 𑀲𑀁𑀲𑀝𑁆𑀞𑀲𑁆𑀲 𑀯𑀺𑀲𑁆𑀲𑀢𑁆𑀣𑀲𑁆𑀲 𑀧𑀸𑀓𑀢𑀲𑁆𑀲 𑀪𑀲𑁆𑀲𑀫𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀕𑁄𑀡𑁄 𑀓𑀺𑀝𑁆𑀞𑀸𑀤𑁄 𑀤𑀸𑀫𑁂𑀦 𑀯𑀸 𑀩𑀤𑁆𑀥𑁄 [𑀆𑀭𑀸𑀫𑁂 𑀯𑀸 𑀩𑀦𑁆𑀥𑁄 (𑀓.)] 𑀯𑀚𑁂 𑀯𑀸 𑀑𑀭𑀼𑀤𑁆𑀥𑁄. 𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀤𑀸𑀦𑀸𑀬𑀁 𑀕𑁄𑀡𑁄 𑀓𑀺𑀝𑁆𑀞𑀸𑀤𑁄 𑀧𑀼𑀦𑀤𑁂𑀯 𑀓𑀺𑀝𑁆𑀞𑀁 𑀑𑀢𑀭𑀺𑀲𑁆𑀲𑀢𑀻’𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀆𑀯𑀼𑀲𑁄, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’. ‘‘𑀞𑀸𑀦𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀕𑁄𑀡𑁄 𑀓𑀺𑀝𑁆𑀞𑀸𑀤𑁄 𑀤𑀸𑀫𑀁 𑀯𑀸 𑀙𑁂𑀢𑁆𑀯𑀸 𑀯𑀚𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀅𑀣 𑀧𑀼𑀦𑀤𑁂𑀯 𑀓𑀺𑀝𑁆𑀞𑀁 𑀑𑀢𑀭𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀸𑀯𑀤𑁂𑀯 𑀲𑁄𑀭𑀢𑀲𑁄𑀭𑀢𑁄 𑀳𑁄𑀢𑀺, 𑀦𑀺𑀯𑀸𑀢𑀦𑀺𑀯𑀸𑀢𑁄 𑀳𑁄𑀢𑀺, 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑁄 𑀳𑁄𑀢𑀺 𑀬𑀸𑀯 𑀲𑀢𑁆𑀣𑀸𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀁 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁. 𑀬𑀢𑁄 𑀘 𑀔𑁄 𑀲𑁄 𑀯𑀧𑀓𑀲𑁆𑀲𑀢𑁂𑀯 𑀲𑀢𑁆𑀣𑀸𑀭𑀸, 𑀯𑀧𑀓𑀲𑁆𑀲𑀢𑀺 𑀕𑀭𑀼𑀝𑁆𑀞𑀸𑀦𑀺𑀬𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺, 𑀲𑁄 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀜𑁆𑀜𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺. 𑀢𑀲𑁆𑀲 𑀲𑀁𑀲𑀝𑁆𑀞𑀲𑁆𑀲 𑀯𑀺𑀲𑁆𑀲𑀢𑁆𑀣𑀲𑁆𑀲 𑀧𑀸𑀓𑀢𑀲𑁆𑀲 𑀪𑀲𑁆𑀲𑀫𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀇𑀥 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀘𑀸𑀢𑀼𑀫𑀳𑀸𑀧𑀣𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁄 𑀤𑁂𑀯𑁄 𑀯𑀲𑁆𑀲𑀦𑁆𑀢𑁄 [𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 (𑀓.)] 𑀭𑀚𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬, 𑀘𑀺𑀓𑁆𑀔𑀮𑁆𑀮𑀁 𑀧𑀸𑀢𑀼𑀓𑀭𑁂𑀬𑁆𑀬. 𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀤𑀸𑀦𑀺 𑀅𑀫𑀼𑀲𑁆𑀫𑀺𑀁 [𑀅𑀫𑀼𑀓𑀲𑁆𑀫𑀺𑀁 (𑀓.)] 𑀘𑀸𑀢𑀼𑀫𑀳𑀸𑀧𑀣𑁂 𑀧𑀼𑀦𑀤𑁂𑀯 𑀭𑀚𑁄 𑀧𑀸𑀢𑀼𑀪𑀯𑀺𑀲𑁆𑀲𑀢𑀻’𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀆𑀯𑀼𑀲𑁄, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’. ‘‘𑀞𑀸𑀦𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀅𑀫𑀼𑀲𑁆𑀫𑀺𑀁 𑀘𑀸𑀢𑀼𑀫𑀳𑀸𑀧𑀣𑁂 𑀫𑀦𑀼𑀲𑁆𑀲𑀸 𑀯𑀸 𑀅𑀢𑀺𑀓𑁆𑀓𑀫𑁂𑀬𑁆𑀬𑀼𑀁, 𑀕𑁄𑀧𑀲𑀽 𑀯𑀸 𑀅𑀢𑀺𑀓𑁆𑀓𑀫𑁂𑀬𑁆𑀬𑀼𑀁, 𑀯𑀸𑀢𑀸𑀢𑀧𑁄 𑀯𑀸 𑀲𑁆𑀦𑁂𑀳𑀕𑀢𑀁 𑀧𑀭𑀺𑀬𑀸𑀤𑀺𑀬𑁂𑀬𑁆𑀬, 𑀅𑀣 𑀧𑀼𑀦𑀤𑁂𑀯 𑀭𑀚𑁄 𑀧𑀸𑀢𑀼𑀪𑀯𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀇𑀥 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀢𑀴𑀸𑀓𑀁. 𑀢𑀢𑁆𑀣 𑀣𑀼𑀮𑁆𑀮𑀨𑀼𑀲𑀺𑀢𑀓𑁄 𑀤𑁂𑀯𑁄 𑀯𑀼𑀝𑁆𑀞𑁄 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀫𑁆𑀧𑀺 𑀲𑀓𑁆𑀔𑀭𑀓𑀞𑀮𑀫𑁆𑀧𑀺 𑀅𑀦𑁆𑀢𑀭𑀥𑀸𑀧𑁂𑀬𑁆𑀬. 𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀤𑀸𑀦𑀺 𑀅𑀫𑀼𑀲𑁆𑀫𑀺𑀁 𑀢𑀴𑀸𑀓𑁂 𑀧𑀼𑀦𑀤𑁂𑀯 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀸 𑀯𑀸 𑀲𑀓𑁆𑀔𑀭𑀓𑀞𑀮𑀸 𑀯𑀸 𑀧𑀸𑀢𑀼𑀪𑀯𑀺𑀲𑁆𑀲𑀦𑁆𑀢𑀻’𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀆𑀯𑀼𑀲𑁄, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’. ‘‘𑀞𑀸𑀦𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀅𑀫𑀼𑀲𑁆𑀫𑀺𑀁 𑀢𑀴𑀸𑀓𑁂 𑀫𑀦𑀼𑀲𑁆𑀲𑀸 𑀯𑀸 𑀧𑀺𑀯𑁂𑀬𑁆𑀬𑀼𑀁, 𑀕𑁄𑀧𑀲𑀽 𑀯𑀸 𑀧𑀺𑀯𑁂𑀬𑁆𑀬𑀼𑀁, 𑀯𑀸𑀢𑀸𑀢𑀧𑁄 𑀯𑀸 𑀲𑁆𑀦𑁂𑀳𑀕𑀢𑀁 𑀧𑀭𑀺𑀬𑀸𑀤𑀺𑀬𑁂𑀬𑁆𑀬, 𑀅𑀣 𑀧𑀼𑀦𑀤𑁂𑀯 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀸𑀧𑀺 𑀲𑀓𑁆𑀔𑀭𑀓𑀞𑀮𑀸𑀧𑀺 𑀧𑀸𑀢𑀼𑀪𑀯𑁂𑀬𑁆𑀬𑀼𑀦𑁆𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀇𑀥 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑀁 𑀧𑀡𑀻𑀢𑀪𑁄𑀚𑀦𑀁 𑀪𑀼𑀢𑁆𑀢𑀸𑀯𑀺𑀁 𑀆𑀪𑀺𑀤𑁄𑀲𑀺𑀓𑀁 𑀪𑁄𑀚𑀦𑀁 𑀦𑀘𑁆𑀙𑀸𑀤𑁂𑀬𑁆𑀬. 𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀤𑀸𑀦𑀺 𑀅𑀫𑀼𑀁 𑀧𑀼𑀭𑀺𑀲𑀁 𑀧𑀼𑀦𑀤𑁂𑀯 𑀪𑁄𑀚𑀦𑀁 𑀙𑀸𑀤𑁂𑀲𑁆𑀲𑀢𑀻’𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀆𑀯𑀼𑀲𑁄, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’. ‘‘𑀞𑀸𑀦𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀅𑀫𑀼𑀁 𑀧𑀼𑀭𑀺𑀲𑀁 𑀧𑀡𑀻𑀢𑀪𑁄𑀚𑀦𑀁 𑀪𑀼𑀢𑁆𑀢𑀸𑀯𑀺𑀁 𑀬𑀸𑀯𑀲𑁆𑀲 𑀲𑀸 𑀑𑀚𑀸 𑀓𑀸𑀬𑁂 𑀞𑀲𑁆𑀲𑀢𑀺 𑀢𑀸𑀯 𑀦 𑀅𑀜𑁆𑀜𑀁 𑀪𑁄𑀚𑀦𑀁 𑀙𑀸𑀤𑁂𑀲𑁆𑀲𑀢𑀺. 𑀬𑀢𑁄 𑀘 𑀔𑁆𑀯𑀲𑁆𑀲 𑀲𑀸 𑀑𑀚𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀅𑀣 𑀧𑀼𑀦𑀤𑁂𑀯 𑀢𑀁 𑀪𑁄𑀚𑀦𑀁 𑀙𑀸𑀤𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀇𑀥, 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀩𑁆𑀩𑀢𑀲𑀗𑁆𑀔𑁂𑀧𑁂 𑀉𑀤𑀓𑀭𑀳𑀤𑁄 𑀦𑀺𑀯𑀸𑀢𑁄 𑀯𑀺𑀕𑀢𑀊𑀫𑀺𑀓𑁄. 𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀤𑀸𑀦𑀺 𑀅𑀫𑀼𑀲𑁆𑀫𑀺𑀁 𑀉𑀤𑀓𑀭𑀳𑀤𑁂 𑀧𑀼𑀦𑀤𑁂𑀯 𑀊𑀫𑀺 𑀧𑀸𑀢𑀼𑀪𑀯𑀺𑀲𑁆𑀲𑀢𑀻’𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀆𑀯𑀼𑀲𑁄, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’. ‘‘𑀞𑀸𑀦𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺. 𑀲𑀸 𑀢𑀲𑁆𑀫𑀺𑀁 𑀉𑀤𑀓𑀭𑀳𑀤𑁂 𑀊𑀫𑀺𑀁 𑀚𑀦𑁂𑀬𑁆𑀬. 𑀬𑀸 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬…𑀧𑁂… 𑀬𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬… 𑀬𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀆𑀕𑀘𑁆𑀙𑁂𑀬𑁆𑀬 𑀪𑀼𑀲𑀸 𑀯𑀸𑀢𑀯𑀼𑀝𑁆𑀞𑀺. 𑀲𑀸 𑀢𑀲𑁆𑀫𑀺𑀁 𑀉𑀤𑀓𑀭𑀳𑀤𑁂 𑀊𑀫𑀺𑀁 𑀚𑀦𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺.

‘‘𑀇𑀥, 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀅𑀦𑀺𑀫𑀺𑀢𑁆𑀢𑀲𑁆𑀲 𑀘𑁂𑀢𑁄𑀲𑀫𑀸𑀥𑀺𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀜𑁆𑀜𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺. 𑀢𑀲𑁆𑀲 𑀲𑀁𑀲𑀝𑁆𑀞𑀲𑁆𑀲 𑀯𑀺𑀲𑁆𑀲𑀢𑁆𑀣𑀲𑁆𑀲 𑀧𑀸𑀓𑀢𑀲𑁆𑀲 𑀪𑀲𑁆𑀲𑀫𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀏𑀓𑀭𑀢𑁆𑀢𑀺𑀁 𑀯𑀸𑀲𑀁 𑀉𑀧𑀕𑀘𑁆𑀙𑁂𑀬𑁆𑀬. 𑀢𑀢𑁆𑀭 [𑀢𑀢𑁆𑀣 (𑀲𑀻. 𑀧𑀻.)] 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀲𑁆𑀲𑀲𑀤𑁆𑀤𑁂𑀦 𑀭𑀣𑀲𑀤𑁆𑀤𑁂𑀦 𑀧𑀢𑁆𑀢𑀺𑀲𑀤𑁆𑀤𑁂𑀦 𑀪𑁂𑀭𑀺𑀧𑀡𑀯𑀲𑀗𑁆𑀔𑀢𑀺𑀡𑀯𑀦𑀺𑀦𑁆𑀦𑀸𑀤𑀲𑀤𑁆𑀤𑁂𑀦 𑀘𑀻𑀭𑀺𑀓𑀲𑀤𑁆𑀤𑁄 [𑀘𑀺𑀭𑀺𑀴𑀺𑀓𑀸𑀲𑀤𑁆𑀤𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀦𑁆𑀢𑀭𑀥𑀸𑀬𑁂𑀬𑁆𑀬 [𑀅𑀦𑁆𑀢𑀭𑀥𑀸𑀧𑁂𑀬𑁆𑀬 (𑀲𑁆𑀬𑀸. 𑀧𑀻. 𑀓.)]. 𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀤𑀸𑀦𑀺 𑀅𑀫𑀼𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀧𑀼𑀦𑀤𑁂𑀯 𑀘𑀻𑀭𑀺𑀓𑀲𑀤𑁆𑀤𑁄 𑀧𑀸𑀢𑀼𑀪𑀯𑀺𑀲𑁆𑀲𑀢𑀻’𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀆𑀯𑀼𑀲𑁄, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’. ‘‘𑀞𑀸𑀦𑀜𑁆𑀳𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀲𑁄 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀢𑀫𑁆𑀳𑀸 𑀯𑀦𑀲𑀡𑁆𑀟𑀸 𑀧𑀓𑁆𑀓𑀫𑁂𑀬𑁆𑀬, 𑀅𑀣 𑀧𑀼𑀦𑀤𑁂𑀯 𑀘𑀻𑀭𑀺𑀓𑀲𑀤𑁆𑀤𑁄 𑀧𑀸𑀢𑀼𑀪𑀯𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 ‘𑀮𑀸𑀪𑀺𑀫𑁆𑀳𑀺 𑀅𑀦𑀺𑀫𑀺𑀢𑁆𑀢𑀲𑁆𑀲 𑀘𑁂𑀢𑁄𑀲𑀫𑀸𑀥𑀺𑀲𑁆𑀲𑀸’𑀢𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀸𑀲𑀺𑀓𑀸𑀳𑀺 𑀭𑀜𑁆𑀜𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺. 𑀢𑀲𑁆𑀲 𑀲𑀁𑀲𑀝𑁆𑀞𑀲𑁆𑀲 𑀯𑀺𑀲𑁆𑀲𑀢𑁆𑀣𑀲𑁆𑀲 𑀧𑀸𑀓𑀢𑀲𑁆𑀲 𑀪𑀲𑁆𑀲𑀫𑀦𑀼𑀬𑀼𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑀲𑁆𑀲 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑁄𑀝𑁆𑀞𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁 𑀦𑀼 𑀔𑁄 𑀆𑀬𑀲𑁆𑀫𑀢𑀸 𑀫𑀳𑀸𑀓𑁄𑀝𑁆𑀞𑀺𑀓𑁂𑀦 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑁋 ‘𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀮𑀸𑀪𑀻, 𑀅𑀣 𑀘 𑀧𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻’𑀢𑀺; 𑀉𑀤𑀸𑀳𑀼 𑀤𑁂𑀯𑀢𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘𑀘𑀺𑀢𑁆𑀢𑁄, 𑀪𑀦𑁆𑀢𑁂, 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻, 𑀅𑀣 𑀘 𑀧𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻’’’𑀢𑀺? ‘‘𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀫𑁂, 𑀆𑀯𑀼𑀲𑁄 𑁋 ‘𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻, 𑀅𑀣 𑀘 𑀧𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻’𑀢𑀺. 𑀤𑁂𑀯𑀢𑀸𑀧𑀺 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘𑀘𑀺𑀢𑁆𑀢𑁄, 𑀪𑀦𑁆𑀢𑁂, 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻, 𑀅𑀣 𑀘 𑀧𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀘𑀺𑀢𑁆𑀢𑀲𑁆𑀲 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀘𑀺𑀢𑁆𑀢𑁄, 𑀪𑀦𑁆𑀢𑁂, 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻, 𑀅𑀣 𑀘 𑀧𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀻’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑁄 𑀘𑀺𑀭𑀁 𑀲𑀭𑀺𑀲𑁆𑀲𑀢𑀺 [𑀧𑀤𑀺𑀲𑁆𑀲𑀢𑀺 (𑀓.)] 𑀦𑁂𑀓𑁆𑀔𑀫𑁆𑀫𑀲𑁆𑀲𑀸’’𑀢𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀙𑀝𑁆𑀞𑀁.

𑁭. 𑀫𑀚𑁆𑀛𑁂𑀲𑀼𑀢𑁆𑀢𑀁

𑁬𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸𑀦𑀁 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀯𑀼𑀢𑁆𑀢𑀫𑀺𑀤𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀸𑀭𑀸𑀬𑀦𑁂 𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑁂 𑁋

[𑀘𑀽𑀴𑀦𑀺. 𑀢𑀺𑀲𑁆𑀲𑀫𑀺𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸 𑁬𑁭] ‘‘𑀬𑁄 𑀉𑀪𑁄𑀦𑁆𑀢𑁂 𑀯𑀺𑀤𑀺𑀢𑁆𑀯𑀸𑀦, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺 [𑀦 𑀮𑀺𑀫𑁆𑀧𑀢𑀺 (𑀓.)];

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄𑀥 𑀲𑀺𑀩𑁆𑀩𑀺𑀦𑀺 [𑀲𑀺𑀩𑁆𑀩𑀦𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀘𑁆𑀘𑀕𑀸’’𑀢𑀺.

‘‘𑀓𑀢𑀫𑁄 𑀦𑀼 𑀔𑁄, 𑀆𑀯𑀼𑀲𑁄, 𑀏𑀓𑁄 𑀅𑀦𑁆𑀢𑁄, 𑀓𑀢𑀫𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀓𑀺𑀁 𑀫𑀚𑁆𑀛𑁂, 𑀓𑀸 𑀲𑀺𑀩𑁆𑀩𑀺𑀦𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀨𑀲𑁆𑀲𑁄 𑀔𑁄, 𑀆𑀯𑀼𑀲𑁄, 𑀏𑀓𑁄 𑀅𑀦𑁆𑀢𑁄, 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀨𑀲𑁆𑀲𑀦𑀺𑀭𑁄𑀥𑁄 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 [𑀅𑀪𑀺𑀚𑀸𑀦𑀺𑀢𑁆𑀯𑀸 (𑀓.)] 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 [𑀧𑀭𑀺𑀚𑀸𑀦𑀺𑀢𑁆𑀯𑀸 (𑀓.)] 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀢𑀻𑀢𑀁 𑀔𑁄, 𑀆𑀯𑀼𑀲𑁄, 𑀏𑀓𑁄 𑀅𑀦𑁆𑀢𑁄, 𑀅𑀦𑀸𑀕𑀢𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀼𑀔𑀸, 𑀆𑀯𑀼𑀲𑁄, 𑀯𑁂𑀤𑀦𑀸 𑀏𑀓𑁄 𑀅𑀦𑁆𑀢𑁄, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀦𑀸𑀫𑀁 𑀔𑁄, 𑀆𑀯𑀼𑀲𑁄, 𑀏𑀓𑁄 𑀅𑀦𑁆𑀢𑁄, 𑀭𑀽𑀧𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀙 𑀔𑁄, 𑀆𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀓𑁄 𑀅𑀦𑁆𑀢𑁄, 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀯𑀺𑀜𑁆𑀜𑀸𑀡𑀁 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑀸𑀬𑁄 𑀔𑁄, 𑀆𑀯𑀼𑀲𑁄, 𑀏𑀓𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄, 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑁂𑀯 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀆𑀬𑀸𑀫𑀸𑀯𑀼𑀲𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑁆𑀲𑀸𑀫. 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀲𑀩𑁆𑀩𑁂𑀳𑁂𑀯 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. ‘‘𑀓𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀪𑀸𑀲𑀺𑀢’’𑀦𑁆𑀢𑀺? ‘‘𑀲𑀩𑁆𑀩𑁂𑀲𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦, 𑀅𑀧𑀺 𑀘 𑀬𑀁 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀧𑀸𑀭𑀸𑀬𑀦𑁂 𑀫𑁂𑀢𑁆𑀢𑁂𑀬𑁆𑀬𑀧𑀜𑁆𑀳𑁂 𑁋

‘‘𑀬𑁄 𑀉𑀪𑁄𑀦𑁆𑀢𑁂 𑀯𑀺𑀤𑀺𑀢𑁆𑀯𑀸𑀦, 𑀫𑀚𑁆𑀛𑁂 𑀫𑀦𑁆𑀢𑀸 𑀦 𑀮𑀺𑀧𑁆𑀧𑀢𑀺;

𑀢𑀁 𑀩𑁆𑀭𑀽𑀫𑀺 𑀫𑀳𑀸𑀧𑀼𑀭𑀺𑀲𑁄𑀢𑀺, 𑀲𑁄𑀥 𑀲𑀺𑀩𑁆𑀩𑀺𑀦𑀺𑀫𑀘𑁆𑀘𑀕𑀸’’𑀢𑀺.

‘‘𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀨𑀲𑁆𑀲𑁄 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑁄 𑀅𑀦𑁆𑀢𑁄, 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄, 𑀨𑀲𑁆𑀲𑀦𑀺𑀭𑁄𑀥𑁄 𑀫𑀚𑁆𑀛𑁂, 𑀢𑀡𑁆𑀳𑀸 𑀲𑀺𑀩𑁆𑀩𑀺𑀦𑀻; 𑀢𑀡𑁆𑀳𑀸 𑀳𑀺 𑀦𑀁 𑀲𑀺𑀩𑁆𑀩𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀸𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀲𑀼𑀢𑁆𑀢𑀁

𑁬𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀤𑀡𑁆𑀟𑀓𑀧𑁆𑀧𑀓𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀦𑀺𑀕𑀫𑁄 𑀢𑀤𑀯𑀲𑀭𑀺. 𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀢𑁂 𑀘 𑀪𑀺𑀓𑁆𑀔𑀽 𑀤𑀡𑁆𑀟𑀓𑀧𑁆𑀧𑀓𑀁 𑀧𑀯𑀺𑀲𑀺𑀁𑀲𑀼 𑀆𑀯𑀲𑀣𑀁 𑀧𑀭𑀺𑀬𑁂𑀲𑀺𑀢𑀼𑀁.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀅𑀘𑀺𑀭𑀯𑀢𑀻 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀼 𑀔𑁄 𑀤𑁂𑀯𑀤𑀢𑁆𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑁋 ‘𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄’𑀢𑀺 [𑀘𑀽𑀴𑀯. 𑁩𑁪𑁮; 𑀅. 𑀦𑀺. 𑁮.𑁭 𑀧𑀲𑁆𑀲𑀺𑀢𑀩𑁆𑀩𑀁], 𑀉𑀤𑀸𑀳𑀼 𑀓𑁂𑀦𑀘𑀺𑀤𑁂𑀯 𑀧𑀭𑀺𑀬𑀸𑀬𑁂𑀦𑀸’𑀢𑀺? ‘‘𑀏𑀯𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀩𑁆𑀬𑀸𑀓𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀅𑀘𑀺𑀭𑀯𑀢𑀻 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀺𑀁 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄. 𑀅𑀣 𑀔𑁄, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀆𑀦𑀦𑁆𑀤 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀼 𑀔𑁄 𑀤𑁂𑀯𑀤𑀢𑁆𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑁋 𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄𑀢𑀺, 𑀉𑀤𑀸𑀳𑀼 𑀓𑁂𑀦𑀘𑀺𑀤𑁂𑀯 𑀧𑀭𑀺𑀬𑀸𑀬𑁂𑀦𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 ‘𑀏𑀯𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀩𑁆𑀬𑀸𑀓𑀢’’’𑀦𑁆𑀢𑀺.

‘‘𑀲𑁄 𑀯𑀸 [𑀲𑁄 𑀘 (𑀲𑁆𑀬𑀸.)] 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀦𑀯𑁄 𑀪𑀯𑀺𑀲𑁆𑀲𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄, 𑀣𑁂𑀭𑁄 𑀯𑀸 𑀧𑀦 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄. 𑀓𑀣𑀜𑁆𑀳𑀺 𑀦𑀸𑀫 𑀬𑀁 𑀫𑀬𑀸 𑀏𑀓𑀁𑀲𑁂𑀦 𑀩𑁆𑀬𑀸𑀓𑀢𑀁 𑀢𑀢𑁆𑀣 𑀤𑁆𑀯𑁂𑀚𑁆𑀛𑀁 𑀆𑀧𑀚𑁆𑀚𑀺𑀲𑁆𑀲𑀢𑀺! 𑀦𑀸𑀳𑀁, 𑀆𑀦𑀦𑁆𑀤, 𑀅𑀜𑁆𑀜𑀁 𑀏𑀓𑀧𑀼𑀕𑁆𑀕𑀮𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁄 𑀏𑀯𑀁 𑀫𑀬𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀩𑁆𑀬𑀸𑀓𑀢𑁄, 𑀬𑀣𑀬𑀺𑀤𑀁 𑀤𑁂𑀯𑀤𑀢𑁆𑀢𑁄. 𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀆𑀦𑀦𑁆𑀤, 𑀤𑁂𑀯𑀤𑀢𑁆𑀢𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑀫𑁆𑀧𑀺 𑀲𑀼𑀓𑁆𑀓𑀥𑀫𑁆𑀫𑀁 𑀅𑀤𑁆𑀤𑀲𑀁; 𑀦𑁂𑀯 𑀢𑀸𑀯𑀸𑀳𑀁 𑀤𑁂𑀯𑀤𑀢𑁆𑀢𑀁 𑀩𑁆𑀬𑀸𑀓𑀸𑀲𑀺𑀁 𑁋 ‘𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄’𑀢𑀺. 𑀬𑀢𑁄 𑀘 𑀔𑁄 𑀅𑀳𑀁, 𑀆𑀦𑀦𑁆𑀤, 𑀤𑁂𑀯𑀤𑀢𑁆𑀢𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑀫𑁆𑀧𑀺 𑀲𑀼𑀓𑁆𑀓𑀥𑀫𑁆𑀫𑀁 𑀦 𑀅𑀤𑁆𑀤𑀲𑀁; 𑀅𑀣𑀸𑀳𑀁 𑀤𑁂𑀯𑀤𑀢𑁆𑀢𑀁 𑀩𑁆𑀬𑀸𑀓𑀸𑀲𑀺𑀁 𑁋 ‘𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀕𑀽𑀣𑀓𑀽𑀧𑁄 𑀲𑀸𑀥𑀺𑀓𑀧𑁄𑀭𑀺𑀲𑁄 𑀧𑀽𑀭𑁄 𑀕𑀽𑀣𑀲𑁆𑀲 𑀲𑀫𑀢𑀺𑀢𑁆𑀢𑀺𑀓𑁄. 𑀢𑀢𑁆𑀭 𑀧𑀼𑀭𑀺𑀲𑁄 𑀲𑀲𑀻𑀲𑀓𑁄 𑀦𑀺𑀫𑀼𑀕𑁆𑀕𑁄 𑀅𑀲𑁆𑀲. 𑀢𑀲𑁆𑀲 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀢𑁆𑀣𑀓𑀸𑀫𑁄 𑀳𑀺𑀢𑀓𑀸𑀫𑁄 𑀬𑁄𑀕𑀓𑁆𑀔𑁂𑀫𑀓𑀸𑀫𑁄 𑀢𑀫𑁆𑀳𑀸 𑀕𑀽𑀣𑀓𑀽𑀧𑀸 𑀉𑀤𑁆𑀥𑀭𑀺𑀢𑀼𑀓𑀸𑀫𑁄. 𑀲𑁄 𑀢𑀁 𑀕𑀽𑀣𑀓𑀽𑀧𑀁 𑀲𑀫𑀦𑁆𑀢𑀸𑀦𑀼𑀧𑀭𑀺𑀕𑀘𑁆𑀙𑀦𑁆𑀢𑁄 𑀦𑁂𑀯 𑀧𑀲𑁆𑀲𑁂𑀬𑁆𑀬 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑀫𑁆𑀧𑀺 𑀕𑀽𑀣𑁂𑀦 𑀅𑀫𑀓𑁆𑀔𑀺𑀢𑀁, 𑀬𑀢𑁆𑀣 𑀢𑀁 𑀕𑀳𑁂𑀢𑁆𑀯𑀸 𑀉𑀤𑁆𑀥𑀭𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀬𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑀫𑁆𑀧𑀺 𑀲𑀼𑀓𑁆𑀓𑀥𑀫𑁆𑀫𑀁 𑀦 𑀅𑀤𑁆𑀤𑀲𑀁; 𑀅𑀣𑀸𑀳𑀁 𑀤𑁂𑀯𑀤𑀢𑁆𑀢𑀁 𑀩𑁆𑀬𑀸𑀓𑀸𑀲𑀺𑀁 𑁋 ‘𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄’𑀢𑀺. 𑀲𑀘𑁂 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀲𑀼𑀡𑁂𑀬𑁆𑀬𑀸𑀣 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀸𑀦𑀺 𑀯𑀺𑀪𑀚𑀺𑀲𑁆𑀲𑀸𑀫𑀻’’𑀢𑀺 [𑀯𑀺𑀪𑀚𑀦𑁆𑀢𑀲𑁆𑀲𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.)]?

‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄 𑀬𑀁 𑀪𑀕𑀯𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀸𑀦𑀺 𑀯𑀺𑀪𑀚𑁂𑀬𑁆𑀬. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀆𑀦𑀦𑁆𑀤, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀳𑀸 𑀢𑀲𑁆𑀲 𑀓𑀼𑀲𑀮𑀸 𑀓𑀼𑀲𑀮𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀻𑀚𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀧𑀽𑀢𑀻𑀦𑀺 𑀅𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀸𑀭𑀤𑀸𑀦𑀺 𑀲𑀼𑀔𑀲𑀬𑀺𑀢𑀸𑀦𑀺 𑀲𑀼𑀔𑁂𑀢𑁆𑀢𑁂 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀇𑀫𑀸𑀦𑀺 𑀩𑀻𑀚𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀳𑀸 𑀢𑀲𑁆𑀲 𑀓𑀼𑀲𑀮𑀸 𑀓𑀼𑀲𑀮𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀆𑀬𑀢𑀺𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺.

‘‘𑀇𑀥 𑀧𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀅𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀳𑀸 𑀢𑀲𑁆𑀲 𑀅𑀓𑀼𑀲𑀮𑀸 𑀅𑀓𑀼𑀲𑀮𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀻𑀚𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀧𑀽𑀢𑀻𑀦𑀺 𑀅𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀸𑀭𑀤𑀸𑀦𑀺 𑀲𑀼𑀔𑀲𑀬𑀺𑀢𑀸𑀦𑀺 𑀧𑀼𑀣𑀼𑀲𑀺𑀮𑀸𑀬 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀦𑀬𑀺𑀫𑀸𑀦𑀺 𑀩𑀻𑀚𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀅𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀳𑀸 𑀢𑀲𑁆𑀲 𑀅𑀓𑀼𑀲𑀮𑀸 𑀅𑀓𑀼𑀲𑀮𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀆𑀬𑀢𑀺𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺.

‘‘𑀇𑀥 𑀧𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦𑀢𑁆𑀣𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑁄𑀧𑀺 𑀲𑀼𑀓𑁆𑀓𑁄 𑀥𑀫𑁆𑀫𑁄, 𑀲𑀫𑀦𑁆𑀦𑀸𑀕𑀢𑁄𑀬𑀁 𑀧𑀼𑀕𑁆𑀕𑀮𑁄 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀩𑀻𑀚𑀸𑀦𑀺 𑀔𑀡𑁆𑀟𑀸𑀦𑀺 𑀧𑀽𑀢𑀻𑀦𑀺 𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀼𑀔𑁂𑀢𑁆𑀢𑁂 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀦𑀬𑀺𑀫𑀸𑀦𑀺 𑀩𑀻𑀚𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦𑀢𑁆𑀣𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑁄𑀧𑀺 𑀲𑀼𑀓𑁆𑀓𑁄 𑀥𑀫𑁆𑀫𑁄, 𑀲𑀫𑀦𑁆𑀦𑀸𑀕𑀢𑁄𑀬𑀁 𑀧𑀼𑀕𑁆𑀕𑀮𑁄 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀆𑀬𑀢𑀺𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀧𑀭𑁂𑀧𑀺 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀧𑁆𑀧𑀝𑀺𑀪𑀸𑀕𑀸 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀆𑀦𑀦𑁆𑀤𑀸’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀇𑀥𑀸𑀳𑀁, 𑀆𑀦𑀦𑁆𑀤, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀅𑀗𑁆𑀕𑀸𑀭𑀸𑀦𑀺 𑀆𑀤𑀺𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀦𑀺 𑀲𑀚𑁄𑀢𑀺𑀪𑀽𑀢𑀸𑀦𑀺 𑀧𑀼𑀣𑀼𑀲𑀺𑀮𑀸𑀬 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀦𑀬𑀺𑀫𑀸𑀦𑀺 𑀅𑀗𑁆𑀕𑀸𑀭𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦, 𑀆𑀦𑀦𑁆𑀤, 𑀲𑀸𑀬𑀦𑁆𑀳𑀲𑀫𑀬𑀁 [𑀲𑀸𑀬𑀦𑁆𑀳𑀲𑀫𑀬𑁂 (𑀲𑁆𑀬𑀸. 𑀓.)] 𑀲𑀽𑀭𑀺𑀬𑁂 𑀑𑀕𑀘𑁆𑀙𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀲𑁂𑀬𑁆𑀬𑀣𑀸𑀧𑀺 𑀯𑀸, 𑀧𑀦𑀸𑀦𑀦𑁆𑀤, 𑀅𑀪𑀺𑀤𑁄 𑀅𑀤𑁆𑀥𑀭𑀢𑁆𑀢𑀁 𑀪𑀢𑁆𑀢𑀓𑀸𑀮𑀲𑀫𑀬𑁂, 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀆𑀮𑁄𑀓𑁄 𑀅𑀦𑁆𑀢𑀭𑀳𑀺𑀢𑁄 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀪𑀽𑀢𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀆𑀬𑀢𑀺𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺.

‘‘𑀇𑀥 𑀧𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀅𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀅𑀗𑁆𑀕𑀸𑀭𑀸𑀦𑀺 𑀆𑀤𑀺𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀦𑀺 𑀲𑀚𑁄𑀢𑀺𑀪𑀽𑀢𑀸𑀦𑀺 𑀲𑀼𑀓𑁆𑀔𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀇𑀫𑀸𑀦𑀺 𑀅𑀗𑁆𑀕𑀸𑀭𑀸𑀦𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦𑀸𑀦𑀦𑁆𑀤, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 [𑀭𑀢𑁆𑀢𑀺𑀧𑀘𑁆𑀘𑀽𑀲𑀲𑀫𑀬𑁂 (𑀓.)] 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀆𑀮𑁄𑀓𑁄 𑀧𑀸𑀢𑀼𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀲𑁂𑀬𑁆𑀬𑀣𑀸𑀧𑀺 𑀯𑀸 𑀧𑀦𑀸𑀦𑀦𑁆𑀤, 𑀅𑀪𑀺𑀤𑁄 𑀫𑀚𑁆𑀛𑀦𑁆𑀳𑀺𑀓𑁂 𑀪𑀢𑁆𑀢𑀓𑀸𑀮𑀲𑀫𑀬𑁂, 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀳𑀺𑀢𑁄 𑀆𑀮𑁄𑀓𑁄 𑀧𑀸𑀢𑀼𑀪𑀽𑀢𑁄’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀢𑀭𑀳𑀺𑀢𑀸, 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀫𑀼𑀔𑀻𑀪𑀽𑀢𑀸. 𑀅𑀢𑁆𑀣𑀺 𑀘 𑀔𑁆𑀯𑀲𑁆𑀲 𑀅𑀓𑀼𑀲𑀮𑀫𑀽𑀮𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁, 𑀢𑀫𑁆𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀺. 𑀏𑀯𑀫𑀬𑀁 𑀧𑀼𑀕𑁆𑀕𑀮𑁄 𑀆𑀬𑀢𑀺𑀁 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀆𑀬𑀢𑀺𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺.

‘‘𑀇𑀥 𑀧𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦𑀢𑁆𑀣𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑁄𑀧𑀺 𑀅𑀓𑀼𑀲𑀮𑁄 𑀥𑀫𑁆𑀫𑁄, 𑀲𑀫𑀦𑁆𑀦𑀸𑀕𑀢𑁄𑀬𑀁 𑀧𑀼𑀕𑁆𑀕𑀮𑁄 𑀏𑀓𑀦𑁆𑀢𑀲𑀼𑀓𑁆𑀓𑁂𑀳𑀺 𑀅𑀦𑀯𑀚𑁆𑀚𑁂𑀳𑀺 𑀥𑀫𑁆𑀫𑁂𑀳𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀅𑀗𑁆𑀕𑀸𑀭𑀸𑀦𑀺 𑀲𑀻𑀢𑀸𑀦𑀺 𑀦𑀺𑀩𑁆𑀩𑀼𑀢𑀸𑀦𑀺 𑀲𑀼𑀓𑁆𑀔𑁂 𑀢𑀺𑀡𑀧𑀼𑀜𑁆𑀚𑁂 𑀯𑀸 𑀓𑀝𑁆𑀞𑀧𑀼𑀜𑁆𑀚𑁂 𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀚𑀸𑀦𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀦𑀬𑀺𑀫𑀸𑀦𑀺 𑀅𑀗𑁆𑀕𑀸𑀭𑀸𑀦𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀇𑀥𑁂𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀲𑁆𑀲 𑀔𑁄 𑀧𑀼𑀕𑁆𑀕𑀮𑀲𑁆𑀲 𑀯𑀺𑀚𑁆𑀚𑀫𑀸𑀦𑀸 𑀓𑀼𑀲𑀮𑀸𑀧𑀺 𑀥𑀫𑁆𑀫𑀸 𑀅𑀓𑀼𑀲𑀮𑀸𑀧𑀺 𑀥𑀫𑁆𑀫𑀸’𑀢𑀺. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀦𑀢𑁆𑀣𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑁄𑀧𑀺 𑀅𑀓𑀼𑀲𑀮𑁄 𑀥𑀫𑁆𑀫𑁄, 𑀲𑀫𑀦𑁆𑀦𑀸𑀕𑀢𑁄𑀬𑀁 𑀧𑀼𑀕𑁆𑀕𑀮𑁄 𑀏𑀓𑀦𑁆𑀢𑀲𑀼𑀓𑁆𑀓𑁂𑀳𑀺 𑀅𑀦𑀯𑀚𑁆𑀚𑁂𑀳𑀺 𑀥𑀫𑁆𑀫𑁂𑀳𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀜𑀸𑀡𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀁 𑀳𑁄𑀢𑀺. 𑀏𑀯𑀫𑁆𑀧𑀺 𑀔𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀆𑀬𑀢𑀺𑀁 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀳𑁄𑀢𑀺.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁂 𑀢𑁂 𑀧𑀼𑀭𑀺𑀫𑀸 𑀢𑀬𑁄 𑀧𑀼𑀕𑁆𑀕𑀮𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀏𑀓𑁄 𑀅𑀧𑀭𑀺𑀳𑀸𑀦𑀥𑀫𑁆𑀫𑁄, 𑀏𑀓𑁄 𑀧𑀭𑀺𑀳𑀸𑀦𑀥𑀫𑁆𑀫𑁄, 𑀏𑀓𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄. 𑀢𑀢𑁆𑀭𑀸𑀦𑀦𑁆𑀤, 𑀬𑁂𑀫𑁂 𑀧𑀘𑁆𑀙𑀺𑀫𑀸 𑀢𑀬𑁄 𑀧𑀼𑀕𑁆𑀕𑀮𑀸 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀏𑀓𑁄 𑀧𑀭𑀺𑀳𑀸𑀦𑀥𑀫𑁆𑀫𑁄, 𑀏𑀓𑁄 𑀅𑀧𑀭𑀺𑀳𑀸𑀦𑀥𑀫𑁆𑀫𑁄, 𑀏𑀓𑁄 𑀧𑀭𑀺𑀦𑀺𑀩𑁆𑀩𑀸𑀦𑀥𑀫𑁆𑀫𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀦𑀺𑀩𑁆𑀩𑁂𑀥𑀺𑀓𑀲𑀼𑀢𑁆𑀢𑀁

𑁬𑁩. ‘‘𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘 𑀲𑁄, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄? 𑀓𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑁄 [𑀓𑀸𑀫𑀸𑀦𑀁 𑀦𑀺𑀭𑁄𑀥𑁄 (𑀓.) 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑁄-𑀇𑀘𑁆𑀘𑀸𑀤𑀻𑀲𑀼𑀧𑀺] 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 [𑀓𑀸𑀫𑀸𑀦𑀁 𑀦𑀺𑀭𑁄𑀥𑀕𑀸𑀫𑀺𑀦𑀻 (𑀓.) 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻-𑀇𑀘𑁆𑀘𑀸𑀤𑀻𑀲𑀼𑀧𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀯𑁂𑀤𑀦𑀸𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀜𑁆𑀜𑀸𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀆𑀲𑀯𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀆𑀲𑀯𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀯𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀆𑀲𑀯𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀯𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀓𑀫𑁆𑀫𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁, 𑀓𑀫𑁆𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀲𑁆𑀲 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

‘‘‘𑀓𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁 [𑀫. 𑀦𑀺. 𑁧.𑁧𑁬𑁬; 𑀲𑀁. 𑀦𑀺. 𑁪.𑁨𑁬𑁮]? 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸 𑁋 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀅𑀧𑀺 𑀘 𑀔𑁄, 𑀪𑀺𑀓𑁆𑀔𑀯𑁂, 𑀦𑁂𑀢𑁂 𑀓𑀸𑀫𑀸 𑀓𑀸𑀫𑀕𑀼𑀡𑀸 𑀦𑀸𑀫𑁂𑀢𑁂 [𑀢𑁂 𑀓𑀸𑀫𑀕𑀼𑀡𑀸 𑀦𑀸𑀫 𑀦𑁂𑀢𑁂 𑀓𑀸𑀫𑀸 (𑀓.)] 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑀼𑀘𑁆𑀘𑀦𑁆𑀢𑀺 𑁋

[𑀓𑀣𑀸. 𑁫𑁧𑁪] ‘‘𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄,

𑀦𑁂𑀢𑁂 [𑀦 𑀢𑁂 (𑀲𑁆𑀬𑀸.)] 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂;

𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄,

𑀢𑀺𑀝𑁆𑀞𑀦𑁆𑀢𑀺 𑀘𑀺𑀢𑁆𑀭𑀸𑀦𑀺 𑀢𑀣𑁂𑀯 𑀮𑁄𑀓𑁂;

𑀅𑀣𑁂𑀢𑁆𑀣 𑀥𑀻𑀭𑀸 𑀯𑀺𑀦𑀬𑀦𑁆𑀢𑀺 𑀙𑀦𑁆𑀤’’𑀦𑁆𑀢𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀓𑀸𑀫𑁄 𑀭𑀽𑀧𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀲𑀤𑁆𑀤𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀕𑀦𑁆𑀥𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀭𑀲𑁂𑀲𑀼, 𑀅𑀜𑁆𑀜𑁄 𑀓𑀸𑀫𑁄 𑀨𑁄𑀝𑁆𑀞𑀩𑁆𑀩𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀫𑀬𑀫𑀸𑀦𑁄 𑀢𑀚𑁆𑀚𑀁 𑀢𑀚𑁆𑀚𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸 𑀅𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀸𑀫𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀫𑀦𑀺𑀭𑁄𑀥𑁄? 𑀨𑀲𑁆𑀲𑀦𑀺𑀭𑁄𑀥𑁄 [𑀨𑀲𑁆𑀲𑀦𑀺𑀭𑁄𑀥𑀸 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀓𑀸𑀫𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄 [𑀬𑀢𑁄 𑀘 𑀔𑁄 (𑀩𑀳𑀽𑀲𑀼)], 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀓𑀸𑀫𑁂 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺, 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀓𑀸𑀫𑀦𑀺𑀭𑁄𑀥𑀁. 𑀓𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀓𑀸𑀫𑀦𑀺𑀭𑁄𑀥𑀕𑀸𑀫𑀺𑀦𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀺𑀲𑀸 𑀲𑀼𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀦𑀺𑀭𑀸𑀫𑀺𑀲𑀸 𑀲𑀼𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀲𑀸𑀫𑀺𑀲𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀦𑀺𑀭𑀸𑀫𑀺𑀲𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀲𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀅𑀢𑁆𑀣𑀺 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑁄? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀬𑀫𑀸𑀦𑁄 [𑀯𑁂𑀤𑀬𑀫𑀸𑀦𑁄 (𑀲𑁆𑀬𑀸. 𑀓𑀁.) 𑀅. 𑀦𑀺. 𑁪.𑁨𑁩𑁩] 𑀢𑀚𑁆𑀚𑀁 𑀢𑀚𑁆𑀚𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸 𑀅𑀧𑀼𑀜𑁆𑀜𑀪𑀸𑀕𑀺𑀬𑀁 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀺𑀭𑁄𑀥𑁄? 𑀨𑀲𑁆𑀲𑀦𑀺𑀭𑁄𑀥𑁄 [𑀨𑀲𑁆𑀲𑀦𑀺𑀭𑁄𑀥𑀸 (𑀲𑁆𑀬𑀸. 𑀓𑀁. 𑀓.)], 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀯𑁂𑀤𑀦𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀁 𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀁 𑀯𑀺𑀧𑀸𑀓𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺. 𑀲𑁄 𑀇𑀫𑀁 𑀦𑀺𑀩𑁆𑀩𑁂𑀥𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀚𑀸𑀦𑀸𑀢𑀺 𑀯𑁂𑀤𑀦𑀸𑀦𑀺𑀭𑁄𑀥𑀁. 𑀯𑁂𑀤𑀦𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑀸…𑀧𑁂… 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑁋 𑀭𑀽𑀧𑀲𑀜𑁆𑀜𑀸, 𑀲𑀤𑁆𑀤𑀲𑀜𑁆𑀜𑀸, 𑀕𑀦𑁆𑀥𑀲𑀜𑁆𑀜𑀸, 𑀭𑀲𑀲𑀜𑁆𑀜𑀸, 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀥𑀫𑁆𑀫𑀲𑀜𑁆𑀜𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄? 𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀦𑀺𑀤𑀸𑀦𑀲𑀫𑁆𑀪𑀯𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀸? 𑀅𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀭𑀽𑀧𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀲𑀤𑁆𑀤𑁂𑀲𑀼 [𑀅𑀜𑁆𑀜𑀸 𑀪𑀺𑀓𑁆𑀔𑀯𑁂 𑀭𑀽𑀧𑁂𑀲𑀼 𑀲𑀜𑁆𑀜𑀸 𑀅𑀜𑁆𑀜𑀸 𑀲𑀤𑁆𑀤𑁂𑀲𑀼 𑀲𑀜𑁆𑀜𑀸 (𑀓.) 𑀏𑀯𑀁 𑀲𑁂𑀲𑁂𑀲𑀼𑀧𑀺], 𑀅𑀜𑁆𑀜𑀸 𑀲𑀜𑁆𑀜𑀸 𑀕𑀦𑁆𑀥𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀭𑀲𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀅𑀜𑁆𑀜𑀸 𑀲𑀜𑁆𑀜𑀸 𑀥𑀫𑁆𑀫𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑁂𑀫𑀢𑁆𑀢𑀢𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑁄? 𑀯𑁄𑀳𑀸𑀭𑀯𑁂𑀧𑀓𑁆𑀓𑀁 [𑀯𑁄𑀳𑀸𑀭𑀯𑁂𑀧𑀓𑁆𑀓𑀸𑀳𑀁 (𑀲𑁆𑀬𑀸. 𑀧𑀻.), 𑀯𑁄𑀳𑀸𑀭𑀧𑀓𑁆𑀓𑀸𑀳𑀁 (𑀲𑀻.)], 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀁 [𑀲𑀜𑁆𑀜𑀸 (𑀲𑁆𑀬𑀸. 𑀧𑀻.)] 𑀯𑀤𑀸𑀫𑀺. 𑀬𑀣𑀸 𑀬𑀣𑀸 𑀦𑀁 𑀲𑀜𑁆𑀚𑀸𑀦𑀸𑀢𑀺 𑀢𑀣𑀸 𑀢𑀣𑀸 𑀯𑁄𑀳𑀭𑀢𑀺, 𑀏𑀯𑀁 𑀲𑀜𑁆𑀜𑀻 𑀅𑀳𑁄𑀲𑀺𑀦𑁆𑀢𑀺 [𑀅𑀳𑁄𑀲𑀻𑀢𑀺 (𑀓.)]. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀦𑀁 𑀯𑀺𑀧𑀸𑀓𑁄.