৪. চতুত্থসিক্খাপদং

১১৯৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো ইত্থালঙ্কারং ধারেন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ইত্থালঙ্কারং ধারেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ইত্থালঙ্কারং ধারেস্সন্তী’’তি …পে… সচ্চং কির, ভিক্খৰে, ছব্বগ্গিযা ভিক্খুনিযো ইত্থালঙ্কারং ধারেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো ইত্থালঙ্কারং ধারেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৯৫. ‘‘যা পন ভিক্খুনী ইত্থালঙ্কারং ধারেয্য, পাচিত্তিয’’ন্তি.

১১৯৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ইত্থালঙ্কারো নাম সীসূপগো গীৰূপগো হত্থূপগো পাদূপগো কটূপগো. ধারেয্যাতি সকিম্পি ধারেতি, আপত্তি পাচিত্তিযস্স.

১১৯৭. অনাপত্তি আবাধপচ্চযা, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.