৪. পাচিত্তিযকণ্ডং (ভিক্খুনীৰিভঙ্গো)

১. লসুণৰগ্গো

১. পঠমসিক্খাপদং

ইমে খো পনায্যাযো ছসট্ঠিসতা পাচিত্তিযা

ধম্মা উদ্দেসং আগচ্ছন্তি.

৭৯৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরেন উপাসকেন ভিক্খুনিসঙ্ঘো লসুণেন পৰারিতো হোতি – ‘‘যাসং অয্যানং লসুণেন অত্থো, অহং লসুণেনা’’তি. খেত্তপালো চ আণত্তো হোতি – ‘‘সচে ভিক্খুনিযো আগচ্ছন্তি, একমেকায ভিক্খুনিযা দ্ৰেতযো ভণ্ডিকে দেহী’’তি. তেন খো পন সমযেন সাৰত্থিযং উস্সৰো হোতি. যথাভতং লসুণং পরিক্খযং অগমাসি. ভিক্খুনিযো তং উপাসকং উপসঙ্কমিত্ৰা এতদৰোচুং – ‘‘লসুণেন, আৰুসো, অত্থো’’তি. ‘‘নত্থায্যে. যথাভতং লসুণং পরিক্খীণং. খেত্তং গচ্ছথা’’তি. থুল্লনন্দা ভিক্খুনী খেত্তং গন্ত্ৰা ন মত্তং জানিত্ৰা বহুং লসুণং হরাপেসি. খেত্তপালো উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো ন মত্তং জানিত্ৰা বহুং লসুণং হরাপেস্সন্তী’’তি! অস্সোসুং খো ভিক্খুনিযো তস্স খেত্তপালস্স উজ্ঝাযন্তস্স খিয্যন্তস্স ৰিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ন মত্তং জানিত্ৰা বহুং লসুণং হরাপেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী ন মত্তং জানিত্ৰা বহুং লসুণং হরাপেতীতি [হরাপেসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী ন মত্তং জানিত্ৰা বহুং লসুণং হরাপেস্সতি! নেতং, ভিক্খৰে, অপ্পসন্নানং ৰা পসাদায…পে… ধম্মিং কথং কত্ৰা ভিক্খূ আমন্তেসি –

‘‘ভূতপুব্বং, ভিক্খৰে, থুল্লনন্দা ভিক্খুনী অঞ্ঞতরস্স ব্রাহ্মণস্স পজাপতি অহোসি. তিস্সো চ ধীতরো – নন্দা, নন্দৰতী, সুন্দরীনন্দা. অথ খো, ভিক্খৰে, সো ব্রাহ্মণো কালঙ্কত্ৰা অঞ্ঞতরং হংসযোনিং উপপজ্জি. তস্স সব্বসোৰণ্ণমযা পত্তা অহেসুং. সো তাসং একেকং পত্তং দেতি. অথ খো, ভিক্খৰে, থুল্লনন্দা ভিক্খুনী ‘‘অযং হংসো অম্হাকং একেকং পত্তং দেতী’’তি তং হংসরাজং গহেত্ৰা নিপ্পত্তং অকাসি. তস্স পুন জাযমানা পত্তা সেতা সম্পজ্জিংসু. তদাপি, ভিক্খৰে, থুল্লনন্দা ভিক্খুনী অতিলোভেন সুৰণ্ণা পরিহীনা. ইদানি লসুণা পরিহাযিস্সতী’’তি.

[জা. ১.১.১৩৬ সুৰণ্ণহংসজাতকেপি] ‘‘যং লদ্ধং তেন তুট্ঠব্বং, অতিলোভো হি পাপকো;

হংসরাজং গহেত্ৰান, সুৰণ্ণা পরিহাযথা’’তি.

অথ খো ভগৰা থুল্লনন্দং ভিক্খুনিং অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৭৯৪. ‘‘যা পন ভিক্খুনী লসুণং খাদেয্য পাচিত্তিয’’ন্তি.

৭৯৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

লসুণং নাম মাগধকং ৰুচ্চতি.

‘‘খাদিস্সামীতি পটিগ্গণ্হা’’তি, আপত্তি দুক্কটস্স. অজ্ঝোহারে অজ্ঝোহারে আপত্তি পাচিত্তিযস্স.

৭৯৬. লসুণে লসুণসঞ্ঞা খাদতি, আপত্তি পাচিত্তিযস্স. লসুণে ৰেমতিকা খাদতি, আপত্তি পাচিত্তিযস্স. লসুণে অলসুণসঞ্ঞা খাদতি, আপত্তি পাচিত্তিযস্স.

অলসুণে লসুণসঞ্ঞা খাদতি, আপত্তি দুক্কটস্স. অলসুণে ৰেমতিকা খাদতি, আপত্তি দুক্কটস্স. অলসুণে অলসুণসঞ্ঞা খাদতি, অনাপত্তি.

৭৯৭. অনাপত্তি পলণ্ডুকে, ভঞ্জনকে, হরীতকে, চাপলসুণে, সূপসম্পাকে, মংসসম্পাকে, তেলসম্পাকে, সাল়ৰে, উত্তরিভঙ্গে, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

৭৯৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো সম্বাধে লোমং সংহরাপেত্ৰা অচিরৰতিযা নদিযা ৰেসিযাহি সদ্ধিং নগ্গা একতিত্থে নহাযন্তি. ৰেসিযা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো সম্বাধে লোমং সংহরাপেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তাসং ৰেসিযানং উজ্ঝাযন্তীনং খিয্যন্তীনং ৰিপাচেন্তীনং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো সম্বাধে লোমং সংহরাপেস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো সম্বাধে লোমং সংহরাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো সম্বাধে লোমং সংহরাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৭৯৯. ‘‘যা পন ভিক্খুনী সম্বাধে লোমং সংহরাপেয্য, পাচিত্তিয’’ন্তি.

৮০০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সম্বাধো নাম উভো উপকচ্ছকা, মুত্তকরণং.

সংহরাপেয্যাতি একম্পি লোমং সংহরাপেতি, আপত্তি পাচিত্তিযস্স. বহুকেপি লোমে সংহরাপেতি, আপত্তি পাচিত্তিযস্স.

৮০১. অনাপত্তি আবাধপচ্চযা, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

৮০২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন দ্ৰে ভিক্খুনিযো অনভিরতিযা পীল়িতা ওৰরকং পৰিসিত্ৰা তলঘাতকং করোন্তি. ভিক্খুনিযো তেন সদ্দেন উপধাৰিত্ৰা তা ভিক্খুনিযো এতদৰোচুং – ‘‘কিস্স তুম্হে, অয্যে, পুরিসেন সদ্ধিং সম্পদুস্সথা’’তি? ‘‘ন মযং, অয্যে, পুরিসেন সদ্ধিং সম্পদুস্সামা’’তি. ভিক্খুনীনং এতমত্থং আরোচেসুং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো তলঘাতকং করিস্সন্তী’’তি…পে… সচ্চং কির, ভিক্খৰে, ভিক্খুনিযো তলঘাতকং করোন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো তলঘাতকং করিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮০৩. ‘‘তলঘাতকে পাচিত্তিয’’ন্তি.

৮০৪. তলঘাতকং নাম সম্ফস্সং সাদিযন্তী অন্তমসো উপ্পলপত্তেনপি মুত্তকরণে পহারং দেতি, আপত্তি পাচিত্তিযস্স.

৮০৫. অনাপত্তি আবাধপচ্চযা, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

৮০৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা পুরাণরাজোরোধা ভিক্খুনীসু পব্বজিতা [অঞ্ঞতরো পুরাণরাজোরোধো ভিক্খুনীসু পব্বজিতো (স্যা.)] হোতি. অঞ্ঞতরা ভিক্খুনী অনভিরতিযা পীল়িতা যেন সা ভিক্খুনী তেনুপসঙ্কমি; উপসঙ্কমিত্ৰা তং ভিক্খুনিং এতদৰোচ – ‘‘রাজা খো, অয্যে, তুম্হে চিরাচিরং গচ্ছতি. কথং তুম্হে ধারেথা’’তি? ‘‘জতুমট্ঠকেন, অয্যে’’তি. ‘‘কিং এতং, অয্যে, জতুমট্ঠক’’ন্তি? অথ খো সা ভিক্খুনী তস্সা ভিক্খুনিযা জতুমট্ঠকং আচিক্খি. অথ খো সা ভিক্খুনী জতুমট্ঠকং আদিযিত্ৰা ধোৰিতুং ৰিস্সরিত্ৰা একমন্তং ছড্ডেসি. ভিক্খুনিযো মক্খিকাহি সম্পরিকিণ্ণং পস্সিত্ৰা এৰমাহংসু – ‘‘কস্সিদং কম্ম’’ন্তি? সা এৰমাহ – ‘‘ময্হিদং কম্ম’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী জতুমট্ঠকং আদিযিস্সতী’’তি…পে… সচ্চং কির, ভিক্খৰে, ভিক্খুনী জতুমট্ঠকং আদিযতীতি [আদিযীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী জতুমট্ঠকং আদিযিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮০৭. ‘‘জতুমট্ঠকে [জতুমট্টকে (সী.)] পাচিত্তিয’’ন্তি.

৮০৮. জতুমট্ঠকং নাম জতুমযং কট্ঠমযং পিট্ঠমযং মত্তিকামযং.

আদিযেয্যাতি সম্ফস্সং সাদিযন্তী অন্তমসো উপ্পলপত্তম্পি মুত্তকরণং পৰেসেতি, আপত্তি পাচিত্তিযস্স.

৮০৯. অনাপত্তি আবাধপচ্চযা, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

৮১০. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে. অথ খো মহাপজাপতি গোতমী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা অধোৰাতে অট্ঠাসি – ‘‘দুগ্গন্ধো, ভগৰা, মাতুগামো’’তি. অথ খো ভগৰা – ‘‘আদিযন্তু খো ভিক্খুনিযো উদকসুদ্ধিক’’ন্তি, মহাপজাপতিং গোতমিং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো মহাপজাপতি গোতমী ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ভিক্খুনীনং উদকসুদ্ধিক’’ন্তি. তেন খো পন সমযেন অঞ্ঞতরা ভিক্খুনী – ‘‘ভগৰতা উদকসুদ্ধিকা অনুঞ্ঞাতা’’তি অতিগম্ভীরং উদকসুদ্ধিকং আদিযন্তী মুত্তকরণে ৰণং অকাসি. অথ খো সা ভিক্খুনী ভিক্খুনীনং এতমত্থং আরোচেতি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – কথঞ্হি নাম ভিক্খুনী অতিগম্ভীরং উদকসুদ্ধিকং আদিযিস্সতীতি…পে… সচ্চং কির, ভিক্খৰে, ভিক্খুনী অতিগম্ভীরং উদকসুদ্ধিকং আদিযতী’’তি [আদিযীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী অতিগম্ভীরং উদকসুদ্ধিকং আদিযিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮১১. ‘‘উদকসুদ্ধিকং পন ভিক্খুনিযা আদিযমানায দ্ৰঙ্গুলপব্বপরমং আদাতব্বং. তং অতিক্কামেন্তিযা পাচিত্তিয’’ন্তি.

৮১২. উদকসুদ্ধিকং নাম মুত্তকরণস্স ধোৰনা ৰুচ্চতি.

আদিযমানাযাতি ধোৰন্তিযা.

দ্ৰঙ্গুলপব্বপরমং আদাতব্বন্তি দ্ৰীসু অঙ্গুলেসু দ্ৰে পব্বপরমা আদাতব্বা.

তং অতিক্কামেন্তিযাতি সম্ফস্সং সাদিযন্তী অন্তমসো কেসগ্গমত্তম্পি অতিক্কামেতি, আপত্তি পাচিত্তিযস্স.

৮১৩. অতিরেকদ্ৰঙ্গুলপব্বে অতিরেকসঞ্ঞা আদিযতি, আপত্তি পাচিত্তিযস্স. অতিরেকদ্ৰঙ্গুলপব্বে ৰেমতিকা আদিযতি, আপত্তি পাচিত্তিযস্স. অতিরেকদ্ৰঙ্গুলপব্বে ঊনকসঞ্ঞা আদিযতি, আপত্তি পাচিত্তিযস্স.

ঊনকদ্ৰঙ্গুলপব্বে অতিরেকসঞ্ঞা, আপত্তি দুক্কটস্স. ঊনকদ্ৰঙ্গুলপব্বে ৰেমতিকা, আপত্তি দুক্কটস্স. ঊনকদ্ৰঙ্গুলপব্বে ঊনকসঞ্ঞা, অনাপত্তি.

৮১৪. অনাপত্তি দ্ৰঙ্গুলপব্বপরমং আদিযতি, ঊনকদ্ৰঙ্গুলপব্বপরমং আদিযতি, আবাধপচ্চযা, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

৮১৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আরোহন্তো নাম মহামত্তো ভিক্খূসু পব্বজিতো হোতি. তস্স পুরাণদুতিযিকা ভিক্খুনীসু পব্বজিতা হোতি. তেন খো পন সমযেন সো ভিক্খু তস্সা ভিক্খুনিযা সন্তিকে ভত্তৰিস্সগ্গং করোতি. অথ খো সা ভিক্খুনী তস্স ভিক্খুনো ভুঞ্জন্তস্স পানীযেন চ ৰিধূপনেন চ উপতিট্ঠিত্ৰা অচ্চাৰদতি. অথ খো সো ভিক্খু তং ভিক্খুনিং অপসাদেতি – ‘‘মা, ভগিনি, এৰরূপং অকাসি. নেতং কপ্পতী’’তি. ‘‘পুব্বে মং ত্ৰং এৰঞ্চ এৰঞ্চ করোসি, ইদানি এত্তকং ন সহসী’’তি – পানীযথালকং মত্থকে আসুম্ভিত্ৰা ৰিধূপনেন পহারং অদাসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী ভিক্খুস্স পহারং দস্সতী’’তি…পে… সচ্চং কির, ভিক্খৰে, ভিক্খুনী ভিক্খুস্স পহারং অদাসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী ভিক্খুস্স পহারং দস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮১৬. ‘‘যা পন ভিক্খুনী ভিক্খুস্স ভুঞ্জন্তস্স পানীযেন ৰা ৰিধূপনেন ৰা উপতিট্ঠেয্য, পাচিত্তিয’’ন্তি.

৮১৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুস্সাতি উপসম্পন্নস্স.

ভুঞ্জন্তস্সাতি পঞ্চন্নং ভোজনানং অঞ্ঞতরং ভোজনং ভুঞ্জন্তস্স.

পানীযং নাম যং কিঞ্চি পানীযং.

ৰিধূপনং নাম যা কাচি বীজনী.

উপতিট্ঠেয্যাতি হত্থপাসে তিট্ঠতি, আপত্তি পাচিত্তিযস্স.

৮১৮. উপসম্পন্নে উপসম্পন্নসঞ্ঞা পানীযেন ৰা ৰিধূপনেন ৰা উপতিট্ঠতি, আপত্তি পাচিত্তিযস্স. উপসম্পন্নে ৰেমতিকা পানীযেন ৰা ৰিধূপনেন ৰা উপতিট্ঠতি, আপত্তি পাচিত্তিযস্স. উপসম্পন্নে অনুপসম্পন্নসঞ্ঞা পানীযেন ৰা ৰিধূপনেন ৰা উপতিট্ঠতি, আপত্তি পাচিত্তিযস্স.

হত্থপাসং ৰিজহিত্ৰা উপতিট্ঠতি, আপত্তি দুক্কটস্স. খাদনীযং খাদন্তস্স উপতিট্ঠতি, আপত্তি দুক্কটস্স. অনুপসম্পন্নস্স উপতিট্ঠতি, আপত্তি দুক্কটস্স. অনুপসম্পন্নে উপসম্পন্নসঞ্ঞা, আপত্তি দুক্কটস্স. অনুপসম্পন্নে ৰেমতিকা, আপত্তি দুক্কটস্স. অনুপসম্পন্নে অনুপসম্পন্নসঞ্ঞা, আপত্তি দুক্কটস্স.

৮১৯. অনাপত্তি দেতি, দাপেতি, অনুপসম্পন্নং আণাপেতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

৮২০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো সস্সকালে আমকধঞ্ঞং ৰিঞ্ঞাপেত্ৰা নগরং অতিহরন্তি দ্ৰারট্ঠানে – ‘‘দেথায্যে, ভাগ’’ন্তি. পলিবুন্ধেত্ৰা মুঞ্চিংসু. অথ খো তা ভিক্খুনিযো উপস্সযং গন্ত্ৰা ভিক্খুনীনং এতমত্থং আরোচেসুং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো আমকধঞ্ঞং ৰিঞ্ঞাপেস্সন্তী’’তি…পে… সচ্চং কির, ভিক্খৰে, ভিক্খুনিযো আমকধঞ্ঞং ৰিঞ্ঞাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো আমকধঞ্ঞং ৰিঞ্ঞাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮২১. ‘‘যা পন ভিক্খুনী আমকধঞ্ঞং ৰিঞ্ঞত্ৰা ৰা ৰিঞ্ঞাপেত্ৰা ৰা ভজ্জিত্ৰা ৰা ভজ্জাপেত্ৰা ৰা কোট্টেত্ৰা ৰা কোট্টাপেত্ৰা ৰা পচিত্ৰা ৰা পচাপেত্ৰা ৰা ভুঞ্জেয্য, পাচিত্তিয’’ন্তি.

৮২২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

আমকধঞ্ঞং নাম সালি ৰীহি যৰো গোধুমো কঙ্গু ৰরকো কুদ্রুসকো.

ৰিঞ্ঞত্ৰাতি সযং ৰিঞ্ঞত্ৰা. ৰিঞ্ঞাপেত্ৰাতি অঞ্ঞং ৰিঞ্ঞাপেত্ৰা.

ভজ্জিত্ৰাতি সযং ভজ্জিত্ৰা. ভজ্জাপেত্ৰাতি অঞ্ঞং ভজ্জাপেত্ৰা.

কোট্টেত্ৰাতি সযং কোট্টেত্ৰা. কোট্টাপেত্ৰাতি অঞ্ঞং কোট্টাপেত্ৰা.

পচিত্ৰাতি সযং পচিত্ৰা. পচাপেত্ৰাতি অঞ্ঞং পচাপেত্ৰা.

‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি পাচিত্তিযস্স.

৮২৩. অনাপত্তি আবাধপচ্চযা, অপরণ্ণং ৰিঞ্ঞাপেতি, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

৮২৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরো ব্রাহ্মণো নিব্বিট্ঠরাজভটো ‘‘তঞ্ঞেৰ ভটপথং যাচিস্সামী’’তি সীসং নহাযিত্ৰা ভিক্খুনুপস্সযং নিস্সায রাজকুলং গচ্ছতি. অঞ্ঞতরা ভিক্খুনী কটাহে ৰচ্চং কত্ৰা তিরোকুট্টে ছড্ডেন্তী তস্স ব্রাহ্মণস্স মত্থকে আসুম্ভি. অথ খো সো ব্রাহ্মণো উজ্ঝাযতি খিয্যতি ৰিপাচেতি – ‘‘অস্সমণিযো ইমা মুণ্ডা বন্ধকিনিযো. কথঞ্হি নাম গূথকটাহং মত্থকে আসুম্ভিস্সন্তি! ইমাসং উপস্সযং ঝাপেস্সামী’’তি! উম্মুকং গহেত্ৰা উপস্সযং পৰিসতি. অঞ্ঞতরো উপাসকো উপস্সযা নিক্খমন্তো অদ্দস তং ব্রাহ্মণং উম্মুকং গহেত্ৰা উপস্সযং পৰিসন্তং. দিস্ৰান তং ব্রাহ্মণং এতদৰোচ – ‘‘কিস্স ত্ৰং, ভো, উম্মুকং গহেত্ৰা উপস্সযং পৰিসসী’’তি? ‘‘ইমা মং, ভো, মুণ্ডা বন্ধকিনিযো গূথকটাহং মত্থকে আসুম্ভিংসু. ইমাসং উপস্সযং ঝাপেস্সামী’’তি. ‘‘গচ্ছ, ভো ব্রাহ্মণ, মঙ্গলং এতং. সহস্সং লচ্ছসি তঞ্চ ভটপথ’’ন্তি. অথ খো সো ব্রাহ্মণো সীসং নহাযিত্ৰা রাজকুলং গন্ত্ৰা সহস্সং অলত্থ তঞ্চ ভটপথং. অথ খো সো উপাসকো উপস্সযং পৰিসিত্ৰা ভিক্খুনীনং এতমত্থং আরোচেত্ৰা পরিভাসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো উচ্চারং তিরোকুট্টে ছড্ডেস্সন্তী’’তি…পে… সচ্চং কির, ভিক্খৰে, ভিক্খুনিযো উচ্চারং তিরোকুট্টে ছড্ডেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো উচ্চারং তিরোকুট্টে ছড্ডেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮২৫. ‘‘যা পন ভিক্খুনী উচ্চারং ৰা পস্সাৰং ৰা সঙ্কারং ৰা ৰিঘাসং ৰা তিরোকুট্টে ৰা তিরোপাকারে ৰা ছড্ডেয্য ৰা ছড্ডাপেয্য ৰা, পাচিত্তিয’’ন্তি.

৮২৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

উচ্চারো নাম গূথো ৰুচ্চতি. পস্সাৰো নাম মুত্তং ৰুচ্চতি.

সঙ্কারং নাম কচৰরং ৰুচ্চতি.

ৰিঘাসং নাম চলকানি ৰা অট্ঠিকানি ৰা উচ্ছিট্ঠোদকং ৰা.

কুট্টো নাম তযো কুট্টা – ইট্ঠকাকুট্টো, সিলাকুট্টো, দারুকুট্টো.

পাকারো নাম তযো পাকারা – ইট্ঠকাপাকারো, সিলাপাকারো, দারুপাকারো.

তিরোকুট্টেতি কুট্টস্স পরতো. তিরোপাকারেতি পাকারস্স পরতো.

ছড্ডেয্যাতি সযং ছড্ডেতি, আপত্তি পাচিত্তিযস্স.

ছড্ডাপেয্যাতি অঞ্ঞং আণাপেতি, আপত্তি দুক্কটস্স. সকিং আণত্তা বহুকম্পি ছড্ডেতি, আপত্তি পাচিত্তিযস্স.

৮২৭. অনাপত্তি ওলোকেত্ৰা ছড্ডেতি, অৰল়ঞ্জে ছড্ডেতি, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৰমসিক্খাপদং

৮২৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরস্স ব্রাহ্মণস্স ভিক্খুনূপস্সযং নিস্সায যৰখেত্তং হোতি. ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি খেত্তে ছড্ডেন্তি. অথ খো সো ব্রাহ্মণো উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো অম্হাকং যৰখেত্তং দূসেস্সন্তী’’তি! অস্সোসুং খো ভিক্খুনিযো তস্স ব্রাহ্মণস্স উজ্ঝাযন্তস্স খিয্যন্তস্স ৰিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেস্সন্তী’’তি…পে… সচ্চং কির, ভিক্খৰে, ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো উচ্চারম্পি পস্সাৰম্পি সঙ্কারম্পি ৰিঘাসম্পি হরিতে ছড্ডেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮২৯. ‘‘যা পন ভিক্খুনী উচ্চারং ৰা পস্সাৰং ৰা সঙ্কারং ৰা ৰিঘাসং ৰা হরিতে ছড্ডেয্য ৰা ছড্ডাপেয্য ৰা, পাচিত্তিয’’ন্তি.

৮৩০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

উচ্চারো নাম গূথো ৰুচ্চতি. পস্সাৰো নাম মুত্তং ৰুচ্চতি.

সঙ্কারং নাম কচৰরং ৰুচ্চতি.

ৰিঘাসং নাম চলকানি ৰা অট্ঠিকানি ৰা উচ্ছিট্ঠোদকং ৰা.

হরিতং নাম পুব্বণ্ণং অপরণ্ণং যং মনুস্সানং উপভোগপরিভোগং রোপিমং.

ছড্ডেয্যাতি সযং ছড্ডেতি, আপত্তি পাচিত্তিযস্স.

ছড্ডাপেয্যাতি অঞ্ঞং আণাপেতি, আপত্তি দুক্কটস্স. সকিং আণত্তা বহুকম্পি ছড্ডেতি, আপত্তি পাচিত্তিযস্স.

৮৩১. হরিতে হরিতসঞ্ঞা ছড্ডেতি ৰা ছড্ডাপেতি ৰা, আপত্তি পাচিত্তিযস্স. হরিতে ৰেমতিকা ছড্ডেতি ৰা ছড্ডাপেতি ৰা, আপত্তি পাচিত্তিযস্স. হরিতে অহরিতসঞ্ঞা ছড্ডেতি ৰা ছড্ডাপেতি ৰা, আপত্তি পাচিত্তিযস্স.

অহরিতে হরিতসঞ্ঞা, আপত্তি দুক্কটস্স. অহরিতে ৰেমতিকা, আপত্তি দুক্কটস্স. অহরিতে অহরিতসঞ্ঞা, অনাপত্তি.

৮৩২. অনাপত্তি ওলোকেত্ৰা ছড্ডেতি, খেত্তমরিযাদে [ছড্ডিতখেত্তে (?) অট্ঠকথা ওলোকেতব্বা] ছড্ডেতি সামিকে আপুচ্ছিত্ৰা অপলোকেত্ৰা ছড্ডেতি, উম্মত্তিকায, আদিকম্মিকাযাতি.

নৰমসিক্খাপদং নিট্ঠিতং.

১০. দসমসিক্খাপদং

৮৩৩. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন রাজগহে গিরগ্গসমজ্জো হোতি. ছব্বগ্গিযা ভিক্খুনিযো গিরগ্গসমজ্জং দস্সনায অগমংসু. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো নচ্চম্পি গীতম্পি ৰাদিতম্পি দস্সনায গচ্ছিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো নচ্চম্পি গীতম্পি ৰাদিতম্পি দস্সনায গচ্ছিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো নচ্চম্পি গীতম্পি ৰাদিতম্পি দস্সনায গচ্ছন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো নচ্চম্পি গীতম্পি ৰাদিতম্পি দস্সনায গচ্ছিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৩৪. ‘‘যা পন ভিক্খুনী নচ্চং ৰা গীতং ৰা ৰাদিতং ৰা দস্সনায গচ্ছেয্য, পাচিত্তিয’’ন্তি.

৮৩৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

নচ্চং নাম যং কিঞ্চি নচ্চং. গীতং নাম যং কিঞ্চি গীতং. ৰাদিতং নাম যং কিঞ্চি ৰাদিতং.

৮৩৬. দস্সনায গচ্ছতি, আপত্তি দুক্কটস্স. যত্থ ঠিতা পস্সতি ৰা সুণাতি ৰা, আপত্তি পাচিত্তিযস্স. দস্সনূপচারং ৰিজহিত্ৰা পুনপ্পুনং পস্সতি ৰা সুণাতি ৰা, আপত্তি পাচিত্তিযস্স. একমেকং দস্সনায গচ্ছতি, আপত্তি দুক্কটস্স. যত্থ ঠিতা পস্সতি ৰা সুণাতি ৰা, আপত্তি পাচিত্তিযস্স. দস্সনূপচারং ৰিজহিত্ৰা পুনপ্পুনং পস্সতি ৰা সুণাতি ৰা, আপত্তি পাচিত্তিযস্স.

৮৩৭. অনাপত্তি আরামে ঠিতা পস্সতি ৰা সুণাতি ৰা, ভিক্খুনিযা ঠিতোকাসং ৰা নিসিন্নোকাসং ৰা নিপন্নোকাসং ৰা আগন্ত্ৰা নচ্চন্তি ৰা গাযন্তি ৰা ৰাদেন্তি ৰা, পটিপথং গচ্ছন্তী পস্সতি ৰা সুণাতি ৰা, সতি করণীযে গন্ত্ৰা পস্সতি ৰা সুণাতি ৰা, আপদাসু, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

লসুণৰগ্গো পঠমো.

২. অন্ধকারৰগ্গো

১. পঠমসিক্খাপদং

৮৩৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভদ্দায কাপিলানিযা অন্তেৰাসিনিযা ভিক্খুনিযা ঞাতকো পুরিসো গামকা সাৰত্থিং অগমাসি কেনচিদেৰ করণীযেন. অথ খো সা ভিক্খুনী তেন পুরিসেন সদ্ধিং রত্তন্ধকারে অপ্পদীপে একেনেকা সন্তিট্ঠতিপি সল্লপতিপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠিস্সতিপি সল্লপিস্সতিপী’’তি…পে… সচ্চং কির, ভিক্খৰে, ভিক্খুনী রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠতিপি সল্লপতিপীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠিস্সতিপি সল্লপিস্সতিপি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৩৯. ‘‘যা পন ভিক্খুনী রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠেয্য ৰা সল্লপেয্য ৰা, পাচিত্তিয’’ন্তি.

৮৪০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

রত্তন্ধকারেতি ওগ্গতে সূরিযে. অপ্পদীপেতি অনালোকে.

পুরিসো নাম মনুস্সপুরিসো ন যক্খো ন পেতো ন তিরচ্ছানগতো ৰিঞ্ঞূ পটিবলো সন্তিট্ঠিতুং সল্লপিতুং.

সদ্ধিন্তি একতো. একেনেকাতি পুরিসো চেৰ হোতি ভিক্খুনী চ.

সন্তিট্ঠেয্য ৰাতি পুরিসস্স হত্থপাসে তিট্ঠতি, আপত্তি পাচিত্তিযস্স.

সল্লপেয্য ৰাতি পুরিসস্স হত্থপাসে ঠিতা সল্লপতি, আপত্তি পাচিত্তিযস্স.

হত্থপাসং ৰিজহিত্ৰা সন্তিট্ঠতি ৰা সল্লপতি ৰা, আপত্তি দুক্কটস্স. যক্খেন ৰা পেতেন ৰা পণ্ডকেন ৰা তিরচ্ছানগতমনুস্সৰিগ্গহেন ৰা সদ্ধিং সন্তিট্ঠতি ৰা সল্লপতি ৰা, আপত্তি দুক্কটস্স.

৮৪১. অনাপত্তি যো কোচি ৰিঞ্ঞূ দুতিযো [যা কাচি ৰিঞ্ঞূ দুতিযা (স্যা.)] হোতি, অরহোপেক্খা, অঞ্ঞৰিহিতা সন্তিট্ঠতি ৰা সল্লপতি ৰা, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

৮৪২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভদ্দায কাপিলানিযা অন্তেৰাসিনিযা ভিক্খুনিযা ঞাতকো পুরিসো গামকা সাৰত্থিং অগমাসি কেনচিদেৰ করণীযেন. অথ খো সা ভিক্খুনী – ‘‘ভগৰতা পটিক্খিত্তং রত্তন্ধকারে অপ্পদীপে পুরিসেন সদ্ধিং একেনেকা সন্তিট্ঠিতুং সল্লপিতু’’ন্তি তেনেৰ পুরিসেন সদ্ধিং পটিচ্ছন্নে ওকাসে একেনেকা সন্তিট্ঠতিপি সল্লপতিপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী পটিচ্ছন্নে ওকাসে পুরিসেন সদ্ধিং একেনেকা সন্তিট্ঠিস্সতিপি সল্লপিস্সতিপী’’তি…পে… সচ্চং কির, ভিক্খৰে, ভিক্খুনী পটিচ্ছন্নে ওকাসে পুরিসেন সদ্ধিং একেনেকা সন্তিট্ঠতিপি সল্লপতিপীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী পটিচ্ছন্নে ওকাসে পুরিসেন সদ্ধিং একেনেকা সন্তিট্ঠিস্সতিপি সল্লপিস্সতিপি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৪৩. ‘‘যা পন ভিক্খুনী পটিচ্ছন্নে ওকাসে পুরিসেন সদ্ধিং একেনেকা সন্তিট্ঠেয্য ৰা সল্লপেয্য ৰা, পাচিত্তিয’’ন্তি.

৮৪৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পটিচ্ছন্নো নাম ওকাসো কুট্টেন ৰা কৰাটেন ৰা কিলঞ্জেন ৰা সাণিপাকারেন ৰা রুক্খেন ৰা থম্ভেন ৰা কোত্থল়িযা ৰা যেন কেনচি পটিচ্ছন্নো হোতি.

পুরিসো নাম মনুস্সপুরিসো ন যক্খো ন পেতো ন তিরচ্ছানগতো ৰিঞ্ঞূ পটিবলো সন্তিট্ঠিতুং সল্লপিতুং.

সদ্ধিন্তি একতো. একেনেকাতি পুরিসো চেৰ হোতি ভিক্খুনী চ.

সন্তিট্ঠেয্য ৰাতি পুরিসস্স হত্থপাসে তিট্ঠতি, আপত্তি পাচিত্তিযস্স.

সল্লপেয্য ৰাতি পুরিসস্স হত্থপাসে ঠিতা সল্লপতি, আপত্তি পাচিত্তিযস্স.

হত্থপাসং ৰিজহিত্ৰা সন্তিট্ঠতি ৰা সল্লপতি ৰা, আপত্তি দুক্কটস্স. যক্খেন ৰা পেতেন ৰা পণ্ডকেন ৰা তিরচ্ছানগতমনুস্সৰিগ্গহেন ৰা সদ্ধিং সন্তিট্ঠতি ৰা সল্লপতি ৰা, আপত্তি দুক্কটস্স.

৮৪৫. অনাপত্তি যো কোচি ৰিঞ্ঞূ দুতিযো হোতি, অরহোপেক্খা, অঞ্ঞৰিহিতা সন্তিট্ঠতি ৰা সল্লপতি ৰা, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

৮৪৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভদ্দায কাপিলানিযা অন্তেৰাসিনিযা ভিক্খুনিযা ঞাতকো পুরিসো গামকা সাৰত্থিং অগমাসি কেনচিদেৰ করণীযেন. অথ খো সা ভিক্খুনী – ‘‘ভগৰতা পটিক্খিত্তং পটিচ্ছন্নে ওকাসে পুরিসেন সদ্ধিং একেনেকা সন্তিট্ঠিতুং সল্লপিতু’’ন্তি তেনেৰ পুরিসেন সদ্ধিং অজ্ঝোকাসে একেনেকা সন্তিট্ঠতিপি সল্লপতিপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী অজ্ঝোকাসে পুরিসেন সদ্ধিং একেনেকা সন্তিট্ঠিস্সতিপি সল্লপিস্সতিপী’’তি…পে… সচ্চং কির, ভিক্খৰে, ভিক্খুনী অজ্ঝোকাসে পুরিসেন সদ্ধিং একেনেকা সন্তিট্ঠতিপি সল্লপতিপীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী অজ্ঝোকাসে পুরিসেন সদ্ধিং একেনেকা সন্তিট্ঠিস্সতিপি সল্লপিস্সতিপি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৪৭. ‘‘যা পন ভিক্খুনী অজ্ঝোকাসে পুরিসেন সদ্ধিং একেনেকা সন্তিট্ঠেয্য ৰা সল্লপেয্য ৰা, পাচিত্তিয’’ন্তি.

৮৪৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অজ্ঝোকাসো নাম অপ্পটিচ্ছন্নো হোতি কুট্টেন ৰা কৰাটেন ৰা কিলঞ্জেন ৰা সাণিপাকারেন ৰা রুক্খেন ৰা থম্ভেন ৰা কোত্থল়িযা ৰা, যেন কেনচি অপ্পটিচ্ছন্নো হোতি.

পুরিসো নাম মনুস্সপুরিসো, ন যক্খো ন পেতো ন তিরচ্ছানগতো, ৰিঞ্ঞূ পটিবলো সন্তিট্ঠিতুং সল্লপিতুং.

সদ্ধিন্তি একতো. একেনেকাতি পুরিসো চেৰ হোতি ভিক্খুনী চ.

সন্তিট্ঠেয্য ৰাতি পুরিসস্স হত্থপাসে তিট্ঠতি, আপত্তি পাচিত্তিযস্স.

সল্লপেয্য ৰাতি পুরিসস্স হত্থপাসে ঠিতা সল্লপতি, আপত্তি পাচিত্তিযস্স.

হত্থপাসং ৰিজহিত্ৰা সন্তিট্ঠতি ৰা সল্লপতি ৰা, আপত্তি দুক্কটস্স. যক্খেন ৰা পেতেন ৰা পণ্ডকেন ৰা তিরচ্ছাগতমনুস্সৰিগ্গহেন ৰা সদ্ধিং সন্তিট্ঠতি ৰা সল্লপতি ৰা, আপত্তি দুক্কটস্স.

৮৪৯. অনাপত্তি যো কোচি ৰিঞ্ঞূ দুতিযো হোতি, অরহোপেক্খা, অঞ্ঞৰিহিতা সন্তিট্ঠতি ৰা সল্লপতি ৰা, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং