নমো তস্স ভগৰতো অরহতো সম্মাসম্বুদ্ধস্স

ৰিনযপিটকে

পাচিত্তিযপাল়ি

৫. পাচিত্তিযকণ্ডং

১. মুসাৰাদৰগ্গো

১. মুসাৰাদসিক্খাপদং

ইমে খো পনাযস্মন্তো দ্ৰেনৰুতি পাচিত্তিযা

ধম্মা উদ্দেসং আগচ্ছন্তি.

১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন হত্থকো সক্যপুত্তো ৰাদক্খিত্তো হোতি. সো তিত্থিযেহি সদ্ধিং সল্লপন্তো অৰজানিত্ৰা পটিজানাতি, পটিজানিত্ৰা অৰজানাতি, অঞ্ঞেনঞ্ঞং পটিচরতি, সম্পজানমুসা ভাসতি, সঙ্কেতং কত্ৰা ৰিসংৰাদেতি. তিত্থিযা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম হত্থকো সক্যপুত্তো অম্হেহি সদ্ধিং সল্লপন্তো অৰজানিত্ৰা পটিজানিস্সতি, পটিজানিত্ৰা অৰজানিস্সতি, অঞ্ঞেনঞ্ঞং পটিচরিস্সতি, সম্পজানমুসা ভাসিস্সতি, সঙ্কেতং কত্ৰা ৰিসংৰাদেস্সতী’’তি!

অস্সোসুং খো ভিক্খূ তেসং তিত্থিযানং উজ্ঝাযন্তানং খিয্যন্তানং ৰিপাচেন্তানং. অথ খো তে ভিক্খূ যেন হত্থকো সক্যপুত্তো তেনুপসঙ্কমিংসু; উপসঙ্কমিত্ৰা হত্থকং সক্যপুত্তং এতদৰোচুং – ‘‘সচ্চং কির ত্ৰং, আৰুসো হত্থক, তিত্থিযেহি সদ্ধিং সল্লপন্তো অৰজানিত্ৰা পটিজানাসি, পটিজানিত্ৰা অৰজানাসি, অঞ্ঞেনঞ্ঞং পটিচরসি, সম্পজানমুসা ভাসসি, সঙ্কেতং কত্ৰা ৰিসংৰাদেসী’’তি? ‘‘এতে খো, আৰুসো, তিত্থিযা নাম যেন কেনচি জেতব্বা; নেৰ তেসং জযো দাতব্বো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম হত্থকো সক্যপুত্তো তিত্থিযেহি সদ্ধিং সল্লপন্তো অৰজানিত্ৰা পটিজানিস্সতি, পটিজানিত্ৰা অৰজানিস্সতি, অঞ্ঞেনঞ্ঞং পটিচরিস্সতি, সম্পজানমুসা ভাসিস্সতি, সঙ্কেতং কত্ৰা ৰিসংৰাদেস্সতী’’তি!

অথ খো তে ভিক্খূ হত্থকং সক্যপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা হত্থকং সক্যপুত্তং পটিপুচ্ছি – ‘‘সচ্চং কির ত্ৰং, হত্থক, তিত্থিযেহি সদ্ধিং সল্লপন্তো অৰজানিত্ৰা পটিজানাসি, পটিজানিত্ৰা অৰজানাসি, অঞ্ঞেনঞ্ঞং পটিচরসি, সম্পজানমুসা ভাসসি, সঙ্কেতং কত্ৰা ৰিসংৰাদেসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, তিত্থিযেহি সদ্ধিং সল্লপন্তো অৰজানিত্ৰা পটিজানিস্সসি, পটিজানিত্ৰা অৰজানিস্সসি, অঞ্ঞেনঞ্ঞং পটিচরিস্সসি, সম্পজানমুসা ভাসিস্সসি, সঙ্কেতং কত্ৰা ৰিসংৰাদেস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২. ‘‘সম্পজানমুসাৰাদে পাচিত্তিয’’ন্তি.

৩. সম্পজানমুসাৰাদো নাম ৰিসংৰাদনপুরেক্খারস্স ৰাচা, গিরা, ব্যপ্পথো, ৰচীভেদো, ৰাচসিকা ৰিঞ্ঞত্তি, অট্ঠ অনরিযৰোহারা – অদিট্ঠং দিট্ঠং মেতি, অস্সুতং সুতং মেতি, অমুতং মুতং মেতি, অৰিঞ্ঞাতং ৰিঞ্ঞাতং মেতি, দিট্ঠং অদিট্ঠং মেতি, সুতং অস্সুতং মেতি, মুতং অমুতং মেতি, ৰিঞ্ঞাতং অৰিঞ্ঞাতং মেতি.

অদিট্ঠং নাম ন চক্খুনা দিট্ঠং. অস্সুতং নাম ন সোতেন সুতং. অমুতং নাম ন ঘানেন ঘাযিতং, ন জিৰ্হায সাযিতং, ন কাযেন ফুট্ঠং. অৰিঞ্ঞাতং নাম ন মনসা ৰিঞ্ঞাতং. দিট্ঠং নাম চক্খুনা দিট্ঠং. সুতং নাম সোতেন সুতং. মুতং নাম ঘানেন ঘাযিতং, জিৰ্হায সাযিতং, কাযেন ফুট্ঠং. ৰিঞ্ঞাতং নাম মনসা ৰিঞ্ঞাতং.

৪. তীহাকারেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি.

চতূহাকারেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৰিনিধায দিট্ঠিং.

পঞ্চহাকারেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৰিনিধায দিট্ঠিং, ৰিনিধায খন্তিং.

ছহাকারেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৰিনিধায দিট্ঠিং, ৰিনিধায খন্তিং, ৰিনিধায রুচিং.

সত্তহাকারেহি ‘‘অদিট্ঠং দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স’’ – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৰিনিধায দিট্ঠিং, ৰিনিধায খন্তিং, ৰিনিধায রুচিং, ৰিনিধায ভাৰং.

৫. তীহাকারেহি ‘‘অস্সুতং সুতং মে’’তি…পে… অমুতং মুতং মেতি…পে… অৰিঞ্ঞাতং ৰিঞ্ঞাতং মেতি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি.

চতূহাকারেহি…পে… পঞ্চহাকারেহি…পে… ছহাকারেহি…পে… সত্তহাকারেহি ‘‘অৰিঞ্ঞাতং ৰিঞ্ঞাতং মে’’তি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিতন্তি, ৰিনিধায দিট্ঠিং, ৰিনিধায খন্তিং, ৰিনিধায রুচিং, ৰিনিধায ভাৰং.

৬. তীহাকারেহি ‘‘অদিট্ঠং দিট্ঠঞ্চ মে সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি ‘‘অদিট্ঠং দিট্ঠঞ্চ মে মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি ‘‘অদিট্ঠং দিট্ঠঞ্চ মে ৰিঞ্ঞাতঞ্চা’’তি সম্পজানমুসা ভণন্তস্স আপত্তি পাচিত্তিযস্স …পে… তীহাকারেহি অদিট্ঠং ‘‘দিট্ঠঞ্চ মে সুতঞ্চ মুতঞ্চা’’তি…পে… তীহাকারেহি অদিট্ঠং ‘‘দিট্ঠঞ্চ মে সুতঞ্চ ৰিঞ্ঞাতঞ্চা’’তি…পে… তীহাকারেহি অদিট্ঠং ‘‘দিট্ঠঞ্চ মে সুতঞ্চ মুতঞ্চ ৰিঞ্ঞাতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকারেহি অস্সুতং ‘‘সুতঞ্চ মে মুতঞ্চা’’তি…পে… তীহাকারেহি অস্সুতং ‘‘সুতঞ্চ মে ৰিঞ্ঞাতঞ্চা’’তি…পে… তীহাকারেহি অস্সুতং ‘‘সুতঞ্চ মে দিট্ঠঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি অস্সুতং ‘‘সুতঞ্চ মে মুতঞ্চ ৰিঞ্ঞাতঞ্চা’’তি…পে… তীহাকারেহি অস্সুতং ‘‘সুতঞ্চ মে মুতঞ্চ দিট্ঠঞ্চা’’তি…পে… তীহাকারেহি অস্সুতং ‘‘সুতঞ্চ মে মুতঞ্চ ৰিঞ্ঞাতঞ্চ দিট্ঠঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকারেহি অমুতং ‘‘মুতঞ্চ মে ৰিঞ্ঞাতঞ্চা’’তি…পে… তীহাকারেহি অমুতং ‘‘মুতঞ্চ মে দিট্ঠঞ্চা’’তি…পে… তীহাকারেহি অমুতং ‘‘মুতঞ্চ মে সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি অমুতং ‘‘মুতঞ্চ মে ৰিঞ্ঞাতঞ্চ দিট্ঠঞ্চা’’তি…পে… তীহাকারেহি অমুতং ‘‘মুতঞ্চ মে ৰিঞ্ঞাতঞ্চ সুতঞ্চা’’তি…পে… তীহাকারেহি অমুতং ‘‘মুতঞ্চ মে ৰিঞ্ঞাতঞ্চ দিট্ঠঞ্চ সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকারেহি অৰিঞ্ঞাতং ‘‘ৰিঞ্ঞাতঞ্চ মে দিট্ঠঞ্চা’’তি…পে… তীহাকারেহি অৰিঞ্ঞাতং ‘‘ৰিঞ্ঞাতঞ্চ মে সুতঞ্চা’’তি…পে… তীহাকারেহি অৰিঞ্ঞাতং ‘‘ৰিঞ্ঞাতঞ্চ মে মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি অৰিঞ্ঞাতং ‘‘ৰিঞ্ঞাতঞ্চ মে দিট্ঠঞ্চ সুতঞ্চা’’তি…পে… তীহাকারেহি অৰিঞ্ঞাতং ‘‘ৰিঞ্ঞাতঞ্চ মে দিট্ঠঞ্চ মুতঞ্চা’’তি…পে… তীহাকারেহি অৰিঞ্ঞাতং ‘‘ৰিঞ্ঞাতঞ্চ মে দিট্ঠঞ্চ সুতঞ্চ মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

৭. তীহাকারেহি দিট্ঠং ‘‘অদিট্ঠং মে’’তি…পে… সুতং ‘‘অস্সুতং মে’’তি…পে… মুতং ‘‘অমুতং মে’’তি…পে… ৰিঞ্ঞাতং ‘‘অৰিঞ্ঞাতং মে’’তি সম্পজানমুসা ভণন্তস্স আপত্তি পাচিত্তিযস্স…পে….

৮. তীহাকারেহি দিট্ঠং ‘‘সুতং মে’’তি…পে… তীহাকারেহি দিট্ঠং ‘‘মুতং মে’’তি…পে… তীহাকারেহি দিট্ঠং ‘‘ৰিঞ্ঞাতং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি দিট্ঠং ‘‘সুতঞ্চ মে মুতঞ্চা’’তি…পে… তীহাকারেহি দিট্ঠং ‘‘সুতঞ্চ মে ৰিঞ্ঞাতঞ্চা’’তি…পে… তীহাকারেহি দিট্ঠং ‘‘সুতঞ্চ মে মুতঞ্চ ৰিঞ্ঞাতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকারেহি সুতং ‘‘মুতং মে’’তি…পে… তীহাকারেহি সুতং ‘‘ৰিঞ্ঞাতং মে’’তি…পে… তীহাকারেহি সুতং ‘‘দিট্ঠং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি সুতং ‘‘মুতঞ্চ মে ৰিঞ্ঞাতঞ্চা’’তি…পে… তীহাকারেহি সুতং ‘‘মুতঞ্চ মে দিট্ঠঞ্চা’’তি…পে… তীহাকারেহি সুতং ‘‘মুতঞ্চ মে ৰিঞ্ঞাতঞ্চ দিট্ঠঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকারেহি মুতং ‘‘ৰিঞ্ঞাতং মে’’তি…পে… তীহাকারেহি মুতং ‘‘দিট্ঠং মে’’তি…পে… তীহাকারেহি মুতং ‘‘সুতং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি মুতং ‘‘ৰিঞ্ঞাতঞ্চ মে দিট্ঠঞ্চা’’তি…পে… তীহাকারেহি মুতং ‘‘ৰিঞ্ঞাতঞ্চ মে সুতঞ্চা’’তি…পে… তীহাকারেহি মুতং ‘‘ৰিঞ্ঞাতঞ্চ মে দিট্ঠঞ্চ সুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

তীহাকারেহি ৰিঞ্ঞাতং ‘‘দিট্ঠং মে’’তি…পে… তীহাকারেহি ৰিঞ্ঞাতং ‘‘সুতং মে’’তি …পে… তীহাকারেহি ৰিঞ্ঞাতং ‘‘মুতং মে’’তি সম্পজানমুসা ভণন্তস্স আপত্তি পাচিত্তিযস্স…পে… তীহাকারেহি ৰিঞ্ঞাতং ‘‘দিট্ঠঞ্চ মে সুতঞ্চা’’তি…পে… তীহাকারেহি ৰিঞ্ঞাতং ‘‘দিট্ঠঞ্চ মে মুতঞ্চা’’তি…পে… তীহাকারেহি ৰিঞ্ঞাতং ‘‘দিট্ঠঞ্চ মে সুতঞ্চ মুতঞ্চা’’তি সম্পজানমুসা ভণন্তস্স আপত্তি পাচিত্তিযস্স…পে….

৯. তীহাকারেহি দিট্ঠে ৰেমতিকো দিট্ঠং নোকপ্পেতি, দিট্ঠং নস্সরতি, দিট্ঠং পমুট্ঠো হোতি…পে… সুতে ৰেমতিকো সুতং নোকপ্পেতি, সুতং নস্সরতি, সুতং পমুট্ঠো হোতি…পে… মুতে ৰেমতিকো মুতং নোকপ্পেতি, মুতং নস্সরতি, মুতং পমুট্ঠো হোতি…পে… ৰিঞ্ঞাতে ৰেমতিকো ৰিঞ্ঞাতং নোকপ্পেতি, ৰিঞ্ঞাতং নস্সরতি, ৰিঞ্ঞাতং পমুট্ঠো হোতি… ৰিঞ্ঞাতঞ্চ মে দিট্ঠঞ্চাতি…পে… ৰিঞ্ঞাতং পমুট্ঠো হোতি ৰিঞ্ঞাতঞ্চ মে সুতঞ্চাতি…পে… ৰিঞ্ঞাতং পমুট্ঠো হোতি; ৰিঞ্ঞাতঞ্চ মে মুতঞ্চাতি…পে… ৰিঞ্ঞাতং পমুট্ঠো হোতি; ৰিঞ্ঞাতঞ্চ মে দিট্ঠঞ্চ সুতঞ্চাতি…পে… ৰিঞ্ঞাতং পমুট্ঠো হোতি; ৰিঞ্ঞাতঞ্চ মে দিট্ঠঞ্চ মুতঞ্চাতি…পে… ৰিঞ্ঞাতং পমুট্ঠো হোতি; ৰিঞ্ঞাতঞ্চ মে দিট্ঠঞ্চ সুতঞ্চ মুতঞ্চাতি সম্পজানমুসা ভণন্তস্স আপত্তি পাচিত্তিযস্স.

১০. চতূহাকারেহি…পে… পঞ্চহাকারেহি…পে… ছহাকারেহি…পে… সত্তহাকারেহি…পে… ৰিঞ্ঞাতং পমুট্ঠো হোতি, ৰিঞ্ঞাতঞ্চ মে দিট্ঠঞ্চ সুতঞ্চ মুতঞ্চাতি সম্পজানমুসা ভণন্তস্স আপত্তি পাচিত্তিযস্স – পুব্বেৰস্স হোতি ‘‘মুসা ভণিস্স’’ন্তি, ভণন্তস্স হোতি ‘‘মুসা ভণামী’’তি, ভণিতস্স হোতি ‘‘মুসা মযা ভণিত’’ন্তি, ৰিনিধায দিট্ঠিং, ৰিনিধায খন্তিং, ৰিনিধায রুচিং, ৰিনিধায ভাৰং.

১১. অনাপত্তি দৰা ভণতি, রৰা ভণতি [দৰায ভণতি, রৰায ভণতি (স্যা.)]. ‘‘দৰা ভণতি নাম সহসা ভণতি. রৰা ভণতি নাম ‘অঞ্ঞং ভণিস্সামী’তি অঞ্ঞং ভণতি’’. উম্মত্তকস্স, আদিকম্মিকস্সাতি.

মুসাৰাদসিক্খাপদং নিট্ঠিতং পঠমং.

২. ওমসৰাদসিক্খাপদং

১২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ পেসলেহি ভিক্খূহি সদ্ধিং ভণ্ডন্তা [ভণ্ডেন্তা (ইতিপি)] পেসলে ভিক্খূ ওমসন্তি – জাতিযাপি, নামেনপি, গোত্তেনপি, কম্মেনপি, সিপ্পেনপি, আবাধেনপি, লিঙ্গেনপি, কিলেসেনপি, আপত্তিযাপি; হীনেনপি অক্কোসেন খুংসেন্তি ৰম্ভেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ পেসলেহি ভিক্খূহি সদ্ধিং ভণ্ডন্তা পেসলে ভিক্খূ ওমসিস্সন্তি – জাতিযাপি, নামেনপি, গোত্তেনপি, কম্মেনপি, সিপ্পেনপি, আবাধেনপি, লিঙ্গেনপি, কিলেসেনপি, আপত্তিযাপি; হীনেনপি অক্কোসেন খুংসেস্সন্তি ৰম্ভেস্সন্তী’’তি!

অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… সচ্চং কির তুম্হে, ভিক্খৰে, পেসলেহি ভিক্খূহি সদ্ধিং ভণ্ডন্তা পেসলে ভিক্খূ ওমসথ – জাতিযাপি…পে… হীনেনপি অক্কোসেন খুংসেথ ৰম্ভেথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, পেসলেহি ভিক্খূহি সদ্ধিং ভণ্ডন্তা পেসলে ভিক্খূ ওমসিস্সথ – জাতিযাপি…পে… হীনেনপি অক্কোসেন খুংসেস্সথ ৰম্ভেস্সথ! নেতং, মোঘপুরিসা, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি –

১৩. ‘‘ভূতপুব্বং, ভিক্খৰে, তক্কসিলাযং [তক্কসীলাযং (ক.)] অঞ্ঞতরস্স ব্রাহ্মণস্স নন্দিৰিসালো নাম বলীবদ্দো [বলিৰদ্দো (সী.), বলিবদ্দো (স্যা.)] অহোসি. অথ খো, ভিক্খৰে, নন্দিৰিসালো বলীবদ্দো তং ব্রাহ্মণং এতদৰোচ – ‘‘গচ্ছ ত্ৰং, ব্রাহ্মণ, সেট্ঠিনা সদ্ধিং সহস্সেন অব্ভুতং করোহি – ময্হং বলীবদ্দো সকটসতং অতিবদ্ধং পৰট্টেস্সতী’’তি. অথ খো, ভিক্খৰে, সো ব্রাহ্মণো সেট্ঠিনা সদ্ধিং সহস্সেন অব্ভুতং অকাসি – ময্হং বলীবদ্দো সকটসতং অতিবদ্ধং পৰট্টেস্সতীতি. অথ খো, ভিক্খৰে, সো ব্রাহ্মণো সকটসতং অতিবন্ধিত্ৰা নন্দিৰিসালং বলীবদ্দং যুঞ্জিত্ৰা এতদৰোচ – ‘‘গচ্ছ, কূট [অঞ্ছ কূট (সী. স্যা.)], ৰহস্সু, কূটা’তি. অথ খো, ভিক্খৰে, নন্দিৰিসালো বলীবদ্দো তত্থেৰ অট্ঠাসি. অথ খো, ভিক্খৰে, সো ব্রাহ্মণো সহস্সেন পরাজিতো পজ্ঝাযি. অথ খো, ভিক্খৰে, নন্দিৰিসালো বলীবদ্দো তং ব্রাহ্মণং এতদৰোচ – ‘‘কিস্স ত্ৰং, ব্রাহ্মণ, পজ্ঝাযসী’’তি? ‘তথা হি পনাহং, ভো, তযা সহস্সেন পরাজিতো’’তি. ‘কিস্স পন মং ত্ৰং, ব্রাহ্মণ, অকূটং কূটৰাদেন পাপেসি? গচ্ছ ত্ৰং, ব্রাহ্মণ, সেট্ঠিনা সদ্ধিং দ্ৰীহি সহস্সেহি অব্ভুতং করোহি – ‘‘ময্হং বলীবদ্দো সকটসতং অতিবদ্ধং পৰট্টেস্সতী’’তি. ‘‘মা চ মং অকূটং কূটৰাদেন পাপেসী’’তি. অথ খো, ভিক্খৰে, সো ব্রাহ্মণো সেট্ঠিনা সদ্ধিং দ্ৰীহি সহস্সেহি অব্ভুতং অকাসি – ‘‘ময্হং বলীবদ্দো সকটসতং অতিবদ্ধং পৰট্টেস্সতী’’তি. অথ খো, ভিক্খৰে, সো ব্রাহ্মণো সকটসতং অতিবন্ধিত্ৰা নন্দিৰিসালং বলীবদ্দং যুঞ্জিত্ৰা এতদৰোচ – ‘‘অচ্ছ, ভদ্র, ৰহস্সু, ভদ্রা’’তি. অথ খো, ভিক্খৰে, নন্দিৰিসালো বলীবদ্দো সকটসতং অতিবদ্ধং পৰট্টেসি.

[জা. ১.১.২৮ নন্দিৰিসালজাতকেপি, তত্থ পন মনুঞ্ঞসদ্দো দিস্সতি] ‘‘মনাপমেৰ ভাসেয্য, না, মনাপং কুদাচনং;

মনাপং ভাসমানস্স, গরুং ভারং উদব্বহি;

ধনঞ্চ নং অলাভেসি, তেন চ, ত্তমনো অহূতি.

‘‘তদাপি মে, ভিক্খৰে, অমনাপা খুংসনা ৰম্ভনা. কিমঙ্গং পন এতরহি মনাপা ভৰিস্সতি খুংসনা ৰম্ভনা? নেতং, ভিক্খৰে, অপ্পসন্নানং ৰা পসাদায…পে…. ‘‘এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৪. ‘‘ওমসৰাদে পাচিত্তিয’’ন্তি.

১৫. ওমসৰাদো নাম দসহি আকারেহি ওমসতি – জাতিযাপি, নামেনপি, গোত্তেনপি, কম্মেনপি, সিপ্পেনপি, আবাধেনপি, লিঙ্গেনপি, কিলেসেনপি, আপত্তিযাপি, অক্কোসেনপি.

জাতি নাম দ্ৰে জাতিযো – হীনা চ জাতি উক্কট্ঠা চ জাতি. হীনা নাম জাতি – চণ্ডালজাতি, ৰেনজাতি, নেসাদজাতি, রথকারজাতি, পুক্কুসজাতি. এসা হীনা নাম জাতি. উক্কট্ঠা নাম জাতি – খত্তিযজাতি, ব্রাহ্মণজাতি. এসা উক্কট্ঠা নাম জাতি.

নামং নাম দ্ৰে নামানি – হীনঞ্চ নামং উক্কট্ঠঞ্চ নামং. হীনং নাম নামং – অৰকণ্ণকং, জৰকণ্ণকং, ধনিট্ঠকং, সৰিট্ঠকং, কুলৰড্ঢকং, তেসু তেসু ৰা পন জনপদেসু ওঞ্ঞাতং অৰঞ্ঞাতং হীল়িতং পরিভূতং অচিত্তীকতং, এতং হীনং নাম নামং. উক্কট্ঠং নাম নামং – বুদ্ধপ্পটিসংযুত্তং, ধম্মপ্পটিসংযুত্তং, সঙ্ঘপ্পটিসংযুত্তং, তেসু তেসু ৰা পন জনপদেসু অনোঞ্ঞাতং অনৰঞ্ঞাতং অহীল়িতং অপরিভূতং চিত্তীকতং, এতং উক্কট্ঠং নাম নামং.

গোত্তং নাম দ্ৰে গোত্তানি – হীনঞ্চ গোত্তং উক্কট্ঠঞ্চ গোত্তং. হীনং নাম গোত্তং – কোসিযগোত্তং, ভারদ্ৰাজগোত্তং, তেসু তেসু ৰা পন জনপদেসু ওঞ্ঞাতং অৰঞ্ঞাতং হীল়িতং পরিভূতং অচিত্তীকতং, এতং হীনং নাম গোত্তং. উক্কট্ঠং নাম গোত্তং – গোতমগোত্তং, মোগ্গল্লানগোত্তং, কচ্চানগোত্তং, ৰাসিট্ঠগোত্তং, তেসু তেসু ৰা পন জনপদেসু অনোঞ্ঞাতং অনৰঞ্ঞাতং অহীল়িতং অপরিভূতং চিত্তীকতং, এতং উক্কট্ঠং নাম গোত্তং.

কম্মং নাম দ্ৰে কম্মানি – হীনঞ্চ কম্মং উক্কট্ঠঞ্চ কম্মং. হীনং নাম কম্মং – কোট্ঠককম্মং, পুপ্ফছড্ডককম্মং, তেসু তেসু ৰা পন জনপদেসু ওঞ্ঞাতং অৰঞ্ঞাতং হীল়িতং পরিভূতং অচিত্তীকতং, এতং হীনং নাম কম্মং. উক্কট্ঠং নাম কম্মং – কসি, ৰণিজ্জা, গোরক্খা, তেসু তেসু ৰা পন জনপদেসু অনোঞ্ঞাতং অনৰঞ্ঞাতং অহীল়িতং অপরিভূতং চিত্তীকতং. এতং উক্কট্ঠং নাম কম্মং.

সিপ্পং নাম দ্ৰে সিপ্পানি – হীনঞ্চ সিপ্পং উক্কট্ঠঞ্চ সিপ্পং. হীনং নাম সিপ্পং – নল়কারসিপ্পং, কুম্ভকারসিপ্পং, পেসকারসিপ্পং, চম্মকারসিপ্পং, নহাপিতসিপ্পং, তেসু তেসু ৰা পন জনপদেসু ওঞ্ঞাতং অৰঞ্ঞাতং হীল়িতং পরিভূতং অচিত্তীকতং. এতং হীনং নাম সিপ্পং. উক্কট্ঠং নাম সিপ্পং – মুদ্দা, গণনা, লেখা, তেসু তেসু ৰা পন জনপদেসু অনোঞ্ঞাতং অনৰঞ্ঞাতং অহীল়িতং অপরিভূতং চিত্তীকতং, এতং উক্কট্ঠং নাম সিপ্পং.

সব্বেপি আবাধা হীনা, অপিচ মধুমেহো আবাধো উক্কট্ঠো.

লিঙ্গং নাম দ্ৰে লিঙ্গানি – হীনঞ্চ লিঙ্গং উক্কট্ঠঞ্চ লিঙ্গং. হীনং নাম লিঙ্গং – অতিদীঘং, অতিরস্সং, অতিকণ্হং, অচ্চোদাতং, এতং হীনং নাম লিঙ্গং. উক্কট্ঠং নাম লিঙ্গং – নাতিদীঘং, নাতিরস্সং, নাতিকণ্হং, নাচ্চোদাতং. এতং উক্কট্ঠং নাম লিঙ্গং.

সব্বেপি কিলেসা হীনা.

সব্বাপি আপত্তিযো হীনা. অপিচ, সোতাপত্তিসমাপত্তি উক্কট্ঠা.

অক্কোসো নাম দ্ৰে অক্কোসা – হীনো চ অক্কোসো উক্কট্ঠো চ অক্কোসো. হীনো নাম অক্কোসো – ওট্ঠোসি, মেণ্ডোসি, গোণোসি, গদ্রভোসি, তিরচ্ছানগতোসি, নেরযিকোসি; নত্থি তুয্হং সুগতি, দুগ্গতি যেৰ তুয্হং পাটিকঙ্খাতি, যকারেন ৰা ভকারেন ৰা, কাটকোটচিকায ৰা, এসো হীনো নাম অক্কোসো. উক্কট্ঠো নাম অক্কোসো – পণ্ডিতোসি, ব্যত্তোসি, মেধাৰীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতিযেৰ তুয্হং পাটিকঙ্খাতি, এসো উক্কট্ঠো নাম অক্কোসো.

১৬. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, চণ্ডালং ৰেনং নেসাদং রথকারং পুক্কুসং – ‘‘চণ্ডালোসি, ৰেনোসি, নেসাদোসি, রথকারোসি, পুক্কুসোসী’’তি ভণতি [ৰদেতীতি উদ্দেসো. ভণতীতি ৰিত্থারো (ৰজিরবুদ্ধি)], আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, খত্তিযং ব্রাহ্মণং – ‘‘চণ্ডালোসি, ৰেনোসি, নেসাদোসি, রথকারোসি, পুক্কুসোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, চণ্ডালং ৰেনং নেসাদং রথকারং পুক্কুসং – ‘‘খত্তিযোসি, ব্রাহ্মণোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, খত্তিযং ব্রাহ্মণং – ‘‘খত্তিযোসি, ব্রাহ্মণোসী’’তি ভণতি, আপত্তি ৰাচায, ৰাচায পাচিত্তিযস্স.

১৭. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, অৰকণ্ণকং জৰকণ্ণকং ধনিট্ঠকং সৰিট্ঠকং কুলৰড্ঢকং – ‘‘অৰকণ্ণকোসি, জৰকণ্ণকোসি, ধনিট্ঠকোসি, সৰিট্ঠকোসি, কুলৰড্ঢকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, বুদ্ধরক্খিতং ধম্মরক্খিতং সঙ্ঘরক্খিতং – ‘‘অৰকণ্ণকোসি, জৰকণ্ণকোসি, ধনিট্ঠকোসি, সৰিট্ঠকোসি, কুলৰড্ঢকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, অৰকণ্ণকং জৰকণ্ণকং ধনিট্ঠকং সৰিট্ঠকং কুলৰড্ঢকং – ‘‘বুদ্ধরক্খিতোসি, ধম্মরক্খিতোসি, সঙ্ঘরক্খিতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উকট্ঠং ৰদেতি, বুদ্ধরক্খিতং ধম্মরক্খিতং সঙ্ঘরক্খিতং – ‘‘বুদ্ধরক্খিতোসি, ধম্মরক্খিতোসি, সঙ্ঘরক্খিতোসী’’তি ভণতি, আপত্তি ৰাচায, ৰাচায পাচিত্তিযস্স.

১৮. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, কোসিযং ভারদ্ৰাজং – ‘‘কোসিযোসি, ভারদ্ৰাজোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, গোতমং মোগ্গল্লানং কচ্চানং ৰাসিট্ঠং – ‘‘কোসিযোসি, ভারদ্ৰাজোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, কোসিযং ভারদ্ৰাজং – ‘‘গোতমোসি, মোগ্গল্লানোসি, কচ্চানোসি, ৰাসিট্ঠোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, গোতমং মোগ্গল্লানং কচ্চানং ৰাসিট্ঠং – ‘‘গোতমোসি, মোগ্গল্লানোসি, কচ্চানোসি, ৰাসিট্ঠোসী’’তি ভণতি, আপত্তি ৰাচায, ৰাচায পাচিত্তিযস্স.

১৯. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, কোট্ঠকং পুপ্ফছড্ডকং – ‘‘কোট্ঠকোসি, পুপ্ফছড্ডকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, কস্সকং ৰাণিজং গোরক্খং – ‘‘কোট্ঠকোসি, পুপ্ফছড্ডকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, কোট্ঠকং পুপ্ফছড্ডকং – ‘‘কস্সকোসি, ৰাণিজোসি, গোরক্খোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, কস্সকং ৰাণিজং গোরক্খং – ‘‘কস্সকোসি, ৰাণিজোসি, গোরক্খোসী’’তি ভণতি, আপত্তি ৰাচায, ৰাচায পাচিত্তিযস্স.

২০. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, নল়কারং কুম্ভকারং পেসকারং চম্মকারং নহাপিতং – ‘‘নল়কারোসি, কুম্ভকারোসি, পেসকারোসি, চম্মকারোসি, নহাপিতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, মুদ্দিকং গণকং লেখকং – ‘‘নল়কারোসি, কুম্ভকারোসি, পেসকারোসি, চম্মকারোসি, নহাপিতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, নল়কারং কুম্ভকারং পেসকারং চম্মকারং নহাপিতং – ‘‘মুদ্দিকোসি, গণকোসি, লেখকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, মুদ্দিকং গণকং লেখকং – ‘‘মুদ্দিকোসি, গণকোসি, লেখকোসী’’তি ভণতি, আপত্তি ৰাচায, ৰাচায পাচিত্তিযস্স.

২১. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, কুট্ঠিকং গণ্ডিকং কিলাসিকং সোসিকং অপমারিকং – ‘‘কুট্ঠিকোসি, গণ্ডিকোসি, কিলাসিকোসি, সোসিকোসি, অপমারিকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, মধুমেহিকং – ‘‘কুট্ঠিকোসি, গণ্ডিকোসি, কিলাসিকোসি, সোসিকোসি, অপমারিকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, কুট্ঠিকং গণ্ডিকং কিলাসিকং সোসিকং অপমারিকং – ‘‘মধুমেহিকোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, মধুমেহিকং – ‘‘মধুমেহিকোসী’’তি ভণতি, আপত্তি ৰাচায, ৰাচায পাচিত্তিযস্স.

২২. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, অতিদীঘং অতিরস্সং অতিকণ্হং অচ্চোদাতং – ‘‘অতিদীঘোসি, অতিরস্সোসি, অতিকণ্হোসি, অচ্চোদাতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, নাতিদীঘং নাতিরস্সং নাতিকণ্হং নাচ্চোদাতং – ‘‘অতিদীঘোসি, অতিরস্সোসি, অতিকণ্হোসি, অচ্চোদাতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, অতিদীঘং অতিরস্সং অতিকণ্হং অচ্চোদাতং – ‘‘নাতিদীঘোসি, নাতিরস্সোসি, নাতিকণ্হোসি, নাচ্চোদাতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, নাতিদীঘং নাতিরস্সং নাতিকণ্হং নাচ্চোদাতং – ‘‘নাতিদীঘোসি, নাতিরস্সোসি, নাতিকণ্হোসি, নাচ্চোদাতোসী’’তি ভণতি, আপত্তি ৰাচায, ৰাচায পাচিত্তিযস্স.

২৩. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, রাগপরিযুট্ঠিতং দোসপরিযুট্ঠিতং মোহপরিযুট্ঠিতং – ‘‘রাগপরিযুট্ঠিতোসি, দোসপরিযুট্ঠিতোসি, মোহপরিযুট্ঠিতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, ৰীতরাগং ৰীতদোসং ৰীতমোহং – ‘‘রাগপরিযুট্ঠিতোসি, দোসপরিযুট্ঠিতোসি, মোহপরিযুট্ঠিতোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, রাগপরিযুট্ঠিতং দোসপরিযুট্ঠিতং মোহপরিযুট্ঠিতং – ‘‘ৰীতরাগোসি, ৰীতদোসোসি, ৰীতমোহোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, ৰীতরাগং ৰীতদোসং ৰীতমোহং – ‘‘ৰীতরাগোসি, ৰীতদোসোসি, ৰীতমোহোসী’’তি ভণতি, আপত্তি ৰাচায, ৰাচায পাচিত্তিযস্স.

২৪. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, পারাজিকং অজ্ঝাপন্নং সঙ্ঘাদিসেসং অজ্ঝাপন্নং থুল্লচ্চযং অজ্ঝাপন্নং পাচিত্তিযং অজ্ঝাপন্নং পাটিদেসনীযং অজ্ঝাপন্নং দুক্কটং অজ্ঝাপন্নং দুব্ভাসিতং অজ্ঝাপন্নং – ‘‘পারাজিকং অজ্ঝাপন্নোসি, সঙ্ঘাদিসেসং অজ্ঝাপন্নোসি, থুল্লচ্চযং অজ্ঝাপন্নোসি, পাচিত্তিযং অজ্ঝাপন্নোসি, পাটিদেসনীযং অজ্ঝাপন্নোসি, দুক্কটং অজ্ঝাপন্নোসি, দুব্ভাসিতং অজ্ঝাপন্নোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, সোতাপন্নং – ‘‘পারাজিকং অজ্ঝাপন্নোসি…পে… দুব্ভাসিতং অজ্ঝাপন্নোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, পারাজিকং অজ্ঝাপন্নং…পে… দুব্ভাসিতং অজ্ঝাপন্নং – ‘‘সোতাপন্নোসী’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, সোতাপন্নং – ‘‘সোতাপন্নোসী’’তি ভণতি, আপত্তি ৰাচায, ৰাচায পাচিত্তিযস্স.

২৫. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি, ওট্ঠং মেণ্ডং গোণং গদ্রভং তিরচ্ছানগতং নেরযিকং – ‘‘ওট্ঠোসি, মেণ্ডোসি, গোণোসি, গদ্রভোসি, তিরচ্ছানগতোসি, নেরযিকোসি, নত্থি তুয্হং সুগতি, দুগ্গতি যেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন উক্কট্ঠং ৰদেতি, পণ্ডিতং ব্যত্তং মেধাৰি বহুস্সুতং ধম্মকথিকং – ‘‘ওট্ঠোসি, মেণ্ডোসি, গোণোসি, গদ্রভোসি, তিরচ্ছানগতোসি, নেরযিকোসি; নত্থি তুয্হং সুগতি, দুগ্গতি যেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন হীনং ৰদেতি, ওট্ঠং মেণ্ডং গোণং গদ্রভং তিরচ্ছানগতং নেরযিকং – ‘‘পণ্ডিতোসি, ব্যত্তোসি, মেধাৰীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতি যেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো উক্কট্ঠেন উক্কট্ঠং ৰদেতি, পণ্ডিতং ব্যত্তং মেধাৰিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৰীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতি যেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায পাচিত্তিযস্স.

২৬. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘সন্তি ইধেকচ্চে চণ্ডালা ৰেনা নেসাদা রথকারা পুক্কুসা’’তি ভণতি, আপত্তি ৰাচায, ৰাচায দুক্কটস্স.

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘সন্তি ইধেকচ্চে খত্তিযা, ব্রাহ্মণা’’তি ভণতি, আপত্তি ৰাচায, ৰাচায দুক্কটস্স.

২৭. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘সন্তি ইধেকচ্চে অৰকণ্ণকা জৰকণ্ণকা ধনিট্ঠকা সৰিট্ঠকা কুলৰড্ঢকা’’তি ভণতি…পে…. ‘‘সন্তি ইধেকচ্চে বুদ্ধরক্খিতা ধম্মরক্খিতা সঙ্ঘরক্খিতা’’তি ভণতি …পে…. ‘‘সন্তি ইধেকচ্চে কোসিযা ভারদ্ৰাজা’’তি ভণতি…পে…. ‘‘সন্তি ইধেকচ্চে গোতমা মোগ্গল্লানা কচ্চানা ৰাসিট্ঠা’’তি ভণতি…পে…. ‘‘সন্তি ইধেকচ্চে কোট্ঠকা পুপ্ফছড্ডকা’’তি ভণতি…পে…. ‘‘সন্তি ইধেকচ্চে কস্সকা ৰাণিজা গোরক্খা’’তি ভণতি…পে…. ‘‘সন্তি ইধেকচ্চে নল়কারা কুম্ভকারা পেসকারা চম্মকারা নহাপিতা’’তি ভণতি…পে…. ‘‘সন্তি ইধেকচ্চে মুদ্দিকা গণকা লেখকা’’তি ভণতি…পে…. ‘‘সন্তি ইধেকচ্চে কুট্ঠিকা গণ্ডিকা কিলাসিকা সোসিকা অপমারিকা’’তি ভণতি…পে…. ‘‘সন্তি ইধেকচ্চে মধুমেহিকা’’তি ভণতি…পে…. ‘‘সন্তি ইধেকচ্চে অতিদীঘা অতিরস্সা অতিকণ্হা অচ্চোদাতা’’তি ভণতি…পে…. ‘‘সন্তি ইধেকচ্চে নাতিদীঘা নাতিরস্সা নাতিকণ্হা নাচ্চোদাতা’’তি ভণতি…পে…. ‘‘সন্তি ইধেকচ্চে রাগপরিযুট্ঠিতা দোসপরিযুট্ঠিতা মোহপরিযুট্ঠিতা’’তি ভণতি…পে…. ‘‘সন্তি ইধেকচ্চে ৰীতরাগা ৰীতদোসা ৰীতমোহা’’তি ভণতি…পে…. ‘‘সন্তি ইধেকচ্চে পারাজিকং অজ্ঝাপন্না…পে… দুব্ভাসিতং অজ্ঝাপন্না’’তি ভণতি…পে…. ‘‘সন্তি ইধেকচ্চে সোতাপন্না’’তি ভণতি…পে…. ‘‘সন্তি ইধেকচ্চে ওট্ঠা মেণ্ডা গোণা গদ্রভা তিরচ্ছানগতা নেরযিকা, নত্থি তেসং সুগতি, দুগ্গতিযেৰ তেসং পাটিকঙ্খা’’তি ভণতি, আপত্তি ৰাচায, ৰাচায দুক্কটস্স.

২৮. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘সন্তি ইধেকচ্চে পণ্ডিতা ব্যত্তা, মেধাৰী বহুস্সুতা ধম্মকথিকা, নত্থি তেসং দুগ্গতি, সুগতিযেৰ তেসং পাটিকঙ্খা’’তি ভণতি, আপত্তি ৰাচায, ৰাচায দুক্কটস্স.

২৯. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘যে নূন চণ্ডালা ৰেনা নেসাদা রথকারা পুক্কুসা’’তি ভণতি, আপত্তি ৰাচায, ৰাচায দুক্কটস্স…পে….

উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘যে নূন পণ্ডিতা ব্যত্তা মেধাৰী বহুস্সুতা ধম্মকথিকা’’তি ভণতি, আপত্তি ৰাচায, ৰাচায দুক্কটস্স.

৩০. উপসম্পন্নো উপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘ন মযং চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৰী বহুস্সুতা ধম্মকথিকা, নত্থম্হাকং দুগ্গতি, সুগতিযেৰ অম্হাকং পাটিকঙ্খা’’তি ভণতি. আপত্তি ৰাচায, ৰাচায দুক্কটস্স.

৩১. উপসম্পন্নো অনুপসম্পন্নং খুংসেতুকামো ৰম্ভেতুকামো মঙ্কুকত্তুকামো হীনেন হীনং ৰদেতি,…পে… হীনেন উক্কট্ঠং ৰদেতি…পে… উক্কট্ঠেন হীনং ৰদেতি…পে… উক্কট্ঠেন উক্কট্ঠং ৰদেতি, পণ্ডিতং ব্যত্তং মেধাৰিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৰীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতিযেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায দুক্কটস্স.

উপসম্পন্নো অনুপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘সন্তি ইধেকচ্চে চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘সন্তি ইধেকচ্চে পণ্ডিতা ব্যত্তা মেধাৰী বহুস্সুতা ধম্মকথিকা, নত্থি তেসং দুগ্গতি, সুগতিযেৰ তেসং পাটিকঙ্খা’’তি ভণতি, আপত্তি ৰাচায, ৰাচায দুক্কটস্স.

উপসম্পন্নো অনুপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘যে নূন চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘যে নূন পণ্ডিতা ব্যত্তা মেধাৰী বহুস্সুতা ধম্মকথিকা’’তি ভণতি, আপত্তি ৰাচায, ৰাচায দুক্কটস্স.

উপসম্পন্নো অনুপসম্পন্নং খুংসেতুকামো ৰম্ভেতুকামো মঙ্কুকত্তুকামো এৰং ৰদেতি, ‘‘ন মযং চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৰী বহুস্সুতা ধম্মকথিকা, নত্থম্হাকং দুগ্গতি, সুগতিযেৰ অম্হাকং পাটিকঙ্খা’’তি ভণতি. আপত্তি ৰাচায, ৰাচায দুক্কটস্স.

৩২. উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা হীনেন হীনং ৰদেতি, চণ্ডালং ৰেনং নেসাদং রথকারং পুক্কুসং – ‘‘চণ্ডালোসি, ৰেনোসি, নেসাদোসি, রথকারোসি, পুক্কুসোসী’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা হীনেন উক্কট্ঠং ৰদেতি, খত্তিযং ব্রাহ্মণং – ‘‘চণ্ডালোসি, ৰেনোসি, নেসাদোসি, রথকারোসি, পুক্কুসোসী’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা উক্কট্ঠেন হীনং ৰদেতি, চণ্ডালং ৰেনং নেসাদং রথকারং পুক্কুসং – ‘‘খত্তিযোসি, ব্রাহ্মণোসী’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা উক্কট্ঠেন উক্কট্ঠং ৰদেতি, খত্তিযং ব্রাহ্মণং – ‘‘খত্তিযোসি, ব্রাহ্মণোসী’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা হীনেন হীনং ৰদেতি…পে… হীনেন উক্কট্ঠং ৰদেতি…পে… উক্কট্ঠেন হীনং ৰদেতি…পে… উক্কট্ঠেন উক্কট্ঠং ৰদেতি, পণ্ডিতং ব্যত্তং মেধাৰিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৰীসি, বহুস্সুতোসি, ধম্মকথিকোসি, নত্থি তুয্হং দুগ্গতি, সুগতি যেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায দুব্ভাসিতস্স.

৩৩. উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা এৰং ৰদেতি, ‘‘সন্তি ইধেকচ্চে চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘সন্তি ইধেকচ্চে পণ্ডিতা ব্যত্তা মেধাৰী বহুস্সুতা ধম্মকথিকা, নত্থি তেসং দুগ্গতি, সুগতি যেৰ তেসং পাটিকঙ্খা’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা এৰং ৰদেতি, ‘‘যে নূন চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘যে নূন পণ্ডিতা ব্যত্তা মেধাৰী বহুস্সুতা ধম্মকথিকা’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো উপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা এৰং ৰদেতি, ‘‘ন মযং চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৰী বহুস্সুতা ধম্মকথিকা, নত্থম্হাকং দুগ্গতি, সুগতিযেৰ অম্হাকং পাটিকঙ্খা’’তি ভণতি. আপত্তি ৰাচায, ৰাচায দুব্ভাসিতস্স.

৩৪. উপসম্পন্নো অনুপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা হীনেন হীনং ৰদেতি…পে… হীনেন উক্কট্ঠং ৰদেতি…পে… উক্কট্ঠেন হীনং ৰদেতি…পে… উক্কট্ঠেন উক্কট্ঠং ৰদেতি, পণ্ডিতং ব্যত্তং মেধাৰিং বহুস্সুতং ধম্মকথিকং – ‘‘পণ্ডিতোসি, ব্যত্তোসি, মেধাৰীসি, বহুস্সুতোসি ধম্মকথিকোসি, নত্থি তুয্হং দুগ্গতি; সুগতি যেৰ তুয্হং পাটিকঙ্খা’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো অনুপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা এৰং ৰদেতি, ‘‘সন্তি ইধেকচ্চে চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘সন্তি ইধেকচ্চে পণ্ডিতা ব্যত্তা মেধাৰী বহুস্সুতা ধম্মকথিকা, নত্থি তেসং দুগ্গতি, সুগতি যেৰ তেসং পাটিকঙ্খা’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো অনুপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা এৰং ৰদেতি, ‘‘যে নূন চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘যে নূন পণ্ডিতা ব্যত্তা মেধাৰী বহুস্সুতা ধম্মকথিকা’’তি ভণতি, আপত্তি ৰাচায, ৰাচায দুব্ভাসিতস্স.

উপসম্পন্নো অনুপসম্পন্নং ন খুংসেতুকামো ন ৰম্ভেতুকামো ন মঙ্কুকত্তুকামো, দৰকম্যতা এৰং ৰদেতি, ‘‘ন মযং চণ্ডালা ৰেনা নেসাদা রথকারা পুক্কুসা’’তি ভণতি…পে…. ‘‘ন মযং পণ্ডিতা ব্যত্তা মেধাৰী বহুস্সুতা ধম্মকথিকা, নত্থম্হাকং দুগ্গতি, সুগতি যেৰ অম্হাকং পাটিকঙ্খা’’তি ভণতি, আপত্তি ৰাচায, ৰাচায দুব্ভাসিতস্স.

৩৫. অনাপত্তি অত্থপুরেক্খারস্স, ধম্মপুরেক্খারস্স, অনুসাসনিপুরেক্খারস্স, উম্মত্তকস্স, খিত্তচিত্তস্স, ৰেদনাট্টস্স, আদিকম্মিকস্সাতি.

ওমসৰাদসিক্খাপদং নিট্ঠিতং দুতিযং.

৩. পেসুঞ্ঞসিক্খাপদং

৩৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ ভিক্খূনং ভণ্ডনজাতানং কলহজাতানং ৰিৰাদাপন্নানং পেসুঞ্ঞং উপসংহরন্তি; ইমস্স সুত্ৰা অমুস্স অক্খাযন্তি, ইমস্স ভেদায; অমুস্স সুত্ৰা ইমস্স অক্খাযন্তি, অমুস্স ভেদায. তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খূনং ভণ্ডনজাতানং কলহজাতানং ৰিৰাদাপন্নানং পেসুঞ্ঞং উপসংহরিস্সন্তি, ইমস্স সুত্ৰা অমুস্স অক্খাযিস্সন্তি, ইমস্স ভেদায; অমুস্স সুত্ৰা ইমস্স অক্খাযিস্সন্তি, অমুস্স ভেদায! তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তী’’তি. অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, ভিক্খূনং ভণ্ডনজাতানং কলহজাতানং ৰিৰাদাপন্নানং পেসুঞ্ঞং উপসংহরথ, ইমস্স সুত্ৰা অমুস্স অক্খাযথ, ইমস্স ভেদায, অমুস্স সুত্ৰা ইমস্স অক্খাযথ, অমুস্স ভেদায? তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, ভিক্খূনং ভণ্ডনজাতানং কলহজাতানং ৰিৰাদাপন্নানং পেসুঞ্ঞং উপসংহরিস্সথ! ইমস্স সুত্ৰা অমুস্স অক্খাযিস্সথ, ইমস্স ভেদায! অমুস্স সুত্ৰা ইমস্স অক্খাযিস্সথ, অমুস্স ভেদায! তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি. নেতং, মোঘপুরিসা, অপ্পসন্নানং ৰা পসাদায. পসন্নানং ৰা ভিয্যোভাৰায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৭. ‘‘ভিক্খুপেসুঞ্ঞে পাচিত্তিয’’ন্তি.

৩৮. পেসুঞ্ঞং নাম দ্ৰীহাকারেহি পেসুঞ্ঞং হোতি – পিযকম্যস্স ৰা ভেদাধিপ্পাযস্স ৰা. দসহাকারেহি পেসুঞ্ঞং উপসংহরতি – জাতিতোপি, নামতোপি, গোত্ততোপি, কম্মতোপি, সিপ্পতোপি, আবাধতোপি, লিঙ্গতোপি, কিলেসতোপি, আপত্তিতোপি, অক্কোসতোপি.

জাতি নাম দ্ৰে জাতিযো – হীনা চ জাতি উক্কট্ঠা চ জাতি. হীনা নাম জাতি – চণ্ডালজাতি ৰেনজাতি নেসাদজাতি রথকারজাতি পুক্কুসজাতি. এসা হীনা নাম জাতি. উক্কট্ঠা নাম জাতি – খত্তিযজাতি ব্রাহ্মণজাতি. এসা উক্কট্ঠা নাম জাতি…পে….

অক্কোসো নাম দ্ৰে অক্কোসা – হীনো চ অক্কোসো উক্কট্ঠো চ অক্কোসো. হীনো নাম অক্কোসো – ওট্ঠোসি, মেণ্ডোসি, গোণোসি, গদ্রভোসি, তিরচ্ছানগতোসি, নেরযিকোসি; নত্থি তুয্হং সুগতি; দুগ্গতি যেৰ তুয্হং পাটিকঙ্খাতি, যকারেন ৰা ভকারেন ৰা কাটকোটচিকায ৰা. এসো হীনো নাম অক্কোসো. উক্কট্ঠো নাম অক্কোসো – পণ্ডিতোসি, ব্যত্তোসি, মেধাৰীসি, বহুস্সুতোসি, ধম্মকথিকোসি; নত্থি তুয্হং দুগ্গতি; সুগতি যেৰ তুয্হং পাটিকঙ্খাতি. এসো উক্কট্ঠো নাম অক্কোসো.

৩৯. উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘চণ্ডালো ৰেনো নেসাদো রথকারো পুক্কুসো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘খত্তিযো ব্রাহ্মণো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘অৰকণ্ণকো জৰকণ্ণকো ধনিট্ঠকো সৰিট্ঠকো কুলৰড্ঢকো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘বুদ্ধরক্খিতো ধম্মরক্খিতো সঙ্ঘরক্খিতো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘কোসিযো ভারদ্ৰাজো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘গোতমো মোগ্গল্লানো কচ্চানো ৰাসিট্ঠো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘কোট্ঠকো পুপ্ফছড্ডকো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘কস্সকো ৰাণিজো গোরক্খো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘নল়কারো কুম্ভকারো পেসকারো চম্মকারো নহাপিতো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘মুদ্দিকো গণকো লেখকো’তি ভণতী’’তি. আপত্তি ৰাচায, ৰাচায পাচিত্তিযস্স.

৪০. উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘কুট্ঠিকো গণ্ডিকো কিলাসিকো সোসিকো অপমারিকো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘মধুমেহিকো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘অতিদীঘো অতিরস্সো অতিকণ্হো অচ্চোদাতো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘নাতিদীঘো নাতিরস্সো নাতিকণ্হো নাচ্চোদাতো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘রাগপরিযুট্ঠিতো দোসপরিযুট্ঠিতো মোহপরিযুট্ঠিতো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘ৰীতরাগো ৰীতদোসো ৰীতমোহো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘পারাজিকং অজ্ঝাপন্নো, সঙ্ঘাদিসেসং অজ্ঝাপন্নো, থুল্লচ্চযং অজ্ঝাপন্নো, পাচিত্তিযং অজ্ঝাপন্নো, পাটিদেসনীযং অজ্ঝাপন্নো, দুক্কটং অজ্ঝাপন্নো, দুব্ভাসিতং অজ্ঝাপন্নো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘সোতাপন্নো’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘ওট্ঠো মেণ্ডো গোণো গদ্রভো তিরচ্ছানগতো নেরযিকো, নত্থি তস্স সুগতি, দুগ্গতিযেৰ তস্স পাটিকঙ্খা’তি ভণতী’’তি. আপত্তি ৰাচায, ৰাচায পাচিত্তিযস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো তং ‘পণ্ডিতো ব্যত্তো মেধাৰী বহুস্সুতো ধম্মকথিকো, নত্থি তস্স দুগ্গতি, সুগতি যেৰ তস্স পাটিকঙ্খা’তি ভণতী’’তি. আপত্তি ৰাচায, ৰাচায পাচিত্তিযস্স.

৪১. উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো ‘সন্তি ইধেকচ্চে চণ্ডালা ৰেনা নেসাদা রথকারা, পুক্কুসা’তি ভণতি, ন সো অঞ্ঞং ভণতি, তঞ্ঞেৰ ভণতী’’তি. আপত্তি ৰাচায, ৰাচায দুক্কটস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো ‘সন্তি ইধেকচ্চে খত্তিযা ব্রাহ্মণা’তি ভণতি, ন সো অঞ্ঞং ভণতি, তঞ্ঞেৰ ভণতী’তি. আপত্তি ৰাচায, ৰাচায দুক্কটস্স…পে….

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো ‘সন্তি ইধেকচ্চে পণ্ডিতা ব্যত্তা মেধাৰী বহুস্সুতা ধম্মকথিকা, নত্থি তেসং দুগ্গতি, সুগতি যেৰ তেসং পাটিকঙ্খা’তি ভণতি, ন সো অঞ্ঞং ভণতি, তঞ্ঞেৰ ভণতী’’তি. আপত্তি ৰাচায, ৰাচায দুক্কটস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো ‘যে নূন চণ্ডালা ৰেনা নেসাদা রথকারা পুক্কুসা’তি ভণতি, ন সো অঞ্ঞং ভণতি, তঞ্ঞেৰ ভণতী’’তি. আপত্তি ৰাচায, ৰাচায দুক্কটস্স.

উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি – ‘‘ইত্থন্নামো ‘যে নূন পণ্ডিতা ব্যত্তা মেধাৰী বহুস্সুতা ধম্মকথিকা’তি ভণতি, ন সো অঞ্ঞং ভণতি, তঞ্ঞেৰ ভণতী’’তি. আপত্তি ৰাচায, ৰাচায দুক্কটস্স.