৯. ছত্তুপাহনৰগ্গো

১. পঠমসিক্খাপদং

১১৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো ছত্তুপাহনং ধারেন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ছত্তুপাহনং ধারেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ছত্তুপাহনং ধারেস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো ছত্তুপাহনং ধারেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো ছত্তুপাহনং ধারেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী ছত্তুপাহনং ধারেয্য, পাচিত্তিয’’ন্তি.

এৰঞ্চিদং ভগৰতা ভিক্খুনীনং সিক্খাপদং পঞ্ঞত্তং হোতি.

১১৭৯. তেন খো পন সমযেন অঞ্ঞতরা ভিক্খুনী গিলানা হোতি. তস্সা ৰিনা ছত্তুপাহনং ন ফাসু হোতি…পে… ভগৰতো এতমত্থং আরোচেসুং…পে… অনুজানামি, ভিক্খৰে, গিলানায ভিক্খুনিযা ছত্তুপাহনং. এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৮০. ‘‘যা পন ভিক্খুনী অগিলানা ছত্তুপাহনং ধারেয্য, পাচিত্তিয’’ন্তি.

১১৮১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অগিলানা নাম যস্সা ৰিনা ছত্তুপাহনং ফাসু হোতি.

গিলানা নাম যস্সা ৰিনা ছত্তুপাহনং ন ফাসু হোতি.

ছত্তং নাম তীণি ছত্তানি – সেতচ্ছত্তং, কিলঞ্জচ্ছত্তং, পণ্ণচ্ছত্তং মণ্ডলবদ্ধং সলাকবদ্ধং. ধারেয্যাতি সকিম্পি ধারেতি, আপত্তি পাচিত্তিযস্স.

১১৮২. অগিলানা অগিলানসঞ্ঞা ছত্তুপাহনং ধারেতি, আপত্তি পাচিত্তিযস্স. অগিলানা ৰেমতিকা ছত্তুপাহনং ধারেতি, আপত্তি পাচিত্তিযস্স. অগিলানা গিলানসঞ্ঞা ছত্তুপাহনং ধারেতি, আপত্তি পাচিত্তিযস্স.

ছত্তং ধারেতি ন উপাহনং, আপত্তি দুক্কটস্স. উপাহনং ধারেতি ন ছত্তং, আপত্তি দুক্কটস্স. গিলানা অগিলানসঞ্ঞা, আপত্তি দুক্কটস্স. গিলানা ৰেমতিকা, আপত্তি দুক্কটস্স. গিলানা গিলানসঞ্ঞা, অনাপত্তি.

১১৮৩. অনাপত্তি গিলানায, আরামে আরামূপচারে ধারেতি, আপদাসু, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

১১৮৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো যানেন যাযন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো যানেন যাযিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে. … তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো যানেন যাযিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো যানেন যাযন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো যানেন যাযিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী যানেন যাযেয্য, পাচিত্তিয’’ন্তি.

এৰঞ্চিদং ভগৰতা ভিক্খুনীনং সিক্খাপদং পঞ্ঞত্তং হোতি.

১১৮৫. তেন খো পন সমযেন অঞ্ঞতরা ভিক্খুনী গিলানা হোতি, ন সক্কোতি পদসা গন্তুং…পে… ভগৰতো এতমত্থং আরোচেসুং…পে… অনুজানামি, ভিক্খৰে, গিলানায ভিক্খুনিযা যানং. এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৮৬. ‘‘যা পন ভিক্খুনী অগিলানা যানেন যাযেয্য, পাচিত্তিয’’ন্তি.

১১৮৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অগিলানা নাম সক্কোতি পদসা গন্তুং.

গিলানা নাম ন সক্কোতি পদসা গন্তুং.

যানং নাম ৰয্হং রথো সকটং সন্দমানিকা সিৰিকা পাটঙ্কী.

যাযেয্যাতি সকিম্পি যানেন যাযতি, আপত্তি পাচিত্তিযস্স.

১১৮৮. অগিলানা অগিলানসঞ্ঞা যানেন যাযতি, আপত্তি পাচিত্তিযস্স. অগিলানা ৰেমতিকা যানেন যাযতি, আপত্তি পাচিত্তিযস্স. অগিলানা গিলানসঞ্ঞা যানেন যাযতি, আপত্তি পাচিত্তিযস্স.

গিলানা অগিলানসঞ্ঞা, আপত্তি দুক্কটস্স. গিলানা ৰেমতিকা, আপত্তি দুক্কটস্স. গিলানা গিলানসঞ্ঞা, অনাপত্তি.

১১৮৯. অনাপত্তি গিলানায, আপদাসু, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

১১৯০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা ভিক্খুনী অঞ্ঞতরিস্সা ইত্থিযা কুলূপিকা হোতি. অথ খো সা ইত্থী তং ভিক্খুনিং এতদৰোচ – ‘‘হন্দায্যে, ইমং সঙ্ঘাণিং অমুকায নাম ইত্থিযা দেহী’’তি. অথ খো সা ভিক্খুনী – ‘‘সচাহং পত্তেন আদায গচ্ছামি ৰিস্সরো মে ভৰিস্সতী’’তি পটিমুঞ্চিত্ৰা অগমাসি. তস্সা রথিকায সুত্তকে ছিন্নে ৰিপ্পকিরিযিংসু. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো সঙ্ঘাণিং ধারেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে. … তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী সঙ্ঘাণিং ধারেস্সতী’’তি…পে… সচ্চং কির, ভিক্খৰে, ভিক্খুনী সঙ্ঘাণিং ধারেতী’’তি [ধারেসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী সঙ্ঘাণিং ধারেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৯১. ‘‘যা পন ভিক্খুনী সঙ্ঘাণিং ধারেয্য, পাচিত্তিয’’ন্তি.

১১৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সঙ্ঘাণি নাম যা কাচি কটূপগা.

ধারেয্যাতি সকিম্পি ধারেতি, আপত্তি পাচিত্তিযস্স.

১১৯৩. অনাপত্তি আবাধপ্পচ্চযা, কটিসুত্তকং ধারেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

১১৯৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো ইত্থালঙ্কারং ধারেন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ইত্থালঙ্কারং ধারেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ইত্থালঙ্কারং ধারেস্সন্তী’’তি …পে… সচ্চং কির, ভিক্খৰে, ছব্বগ্গিযা ভিক্খুনিযো ইত্থালঙ্কারং ধারেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো ইত্থালঙ্কারং ধারেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৯৫. ‘‘যা পন ভিক্খুনী ইত্থালঙ্কারং ধারেয্য, পাচিত্তিয’’ন্তি.

১১৯৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ইত্থালঙ্কারো নাম সীসূপগো গীৰূপগো হত্থূপগো পাদূপগো কটূপগো. ধারেয্যাতি সকিম্পি ধারেতি, আপত্তি পাচিত্তিযস্স.

১১৯৭. অনাপত্তি আবাধপচ্চযা, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

১১৯৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো গন্ধৰণ্ণকেন নহাযন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো গন্ধৰণ্ণকেন নহাযিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো গন্ধৰণ্ণকেন নহাযিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো গন্ধৰণ্ণকেন নহাযন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো গন্ধৰণ্ণকেন নহাযিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৯৯. ‘‘যা পন ভিক্খুনী গন্ধৰণ্ণকেন নহাযেয্য, পাচিত্তিয’’ন্তি.

১২০০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

গন্ধো নাম যো কোচি গন্ধো. ৰণ্ণকং নাম যং কিঞ্চি ৰণ্ণকং. নহাযেয্যাতি নহাযতি. পযোগে দুক্কটং, নহানপরিযোসানে আপত্তি পাচিত্তিযস্স.

১২০১. অনাপত্তি আবাধপ্পচ্চযা, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

১২০২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো ৰাসিতকেন পিঞ্ঞাকেন নহাযন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ৰাসিতকেন পিঞ্ঞাকেন নহাযিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো ৰাসিতকেন পিঞ্ঞাকেন নহাযিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো ৰাসিতকেন পিঞ্ঞাকেন নহাযন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো ৰাসিতকেন পিঞ্ঞাকেন নহাযিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১২০৩. ‘‘যা পন ভিক্খুনী ৰাসিতকেন পিঞ্ঞাকেন নহাযেয্য, পাচিত্তিয’’ন্তি.

১২০৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৰাসিতকং নাম যং কিঞ্চি গন্ধৰাসিতকং. পিঞ্ঞাকং নাম তিলপিট্ঠং ৰুচ্চতি. নহাযেয্যাতি নহাযতি. পযোগে দুক্কটং, নহানপরিযোসানে আপত্তি পাচিত্তিযস্স.

১২০৫. অনাপত্তি আবাধপ্পচ্চযা, পকতিপিঞ্ঞাকেন নহাযতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

১২০৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ভিক্খুনিযা উম্মদ্দাপেন্তিপি পরিমদ্দাপেন্তিপি. মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ভিক্খুনিযা উম্মদ্দাপেস্সন্তিপি পরিমদ্দাপেস্সন্তিপি সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ভিক্খুনিযা উম্মদ্দাপেস্সন্তিপি পরিমদ্দাপেস্সন্তিপী’’তি…পে… সচ্চং কির, ভিক্খৰে, ভিক্খুনিযো ভিক্খুনিযা উম্মদ্দাপেন্তিপি পরিমদ্দাপেন্তিপীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ভিক্খুনিযা উম্মদ্দাপেস্সন্তিপি পরিমদ্দাপেস্সন্তিপি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১২০৭. ‘‘যা পন ভিক্খুনী ভিক্খুনিযা উম্মদ্দাপেয্য ৰা পরিমদ্দাপেয্য ৰা, পাচিত্তিয’’ন্তি.

১২০৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুনিযাতি অঞ্ঞায ভিক্খুনিযা. উম্মদ্দাপেয্য ৰাতি উম্মদ্দাপেতি [উব্বট্টাপেতি (সী.)], আপত্তি পাচিত্তিযস্স. পরিমদ্দাপেয্য ৰাতি সম্বাহাপেতি, আপত্তি পাচিত্তিযস্স.

১২০৯. অনাপত্তি গিলানায, আপদাসু, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮-৯-১০. অট্ঠম-নৰম-দসমসিক্খাপদং

১২১০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো সিক্খমানায উম্মদ্দাপেন্তিপি পরিমদ্দাপেন্তিপি…পে… সামণেরিযা উম্মদ্দাপেন্তিপি পরিমদ্দাপেন্তিপি…পে… গিহিনিযা উম্মদ্দাপেন্তিপি পরিমদ্দাপেন্তিপি. মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো গিহিনিযা উম্মদ্দাপেস্সন্তিপি পরিমদ্দাপেস্সন্তিপি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – কথঞ্হি নাম ভিক্খুনিযো গিহিনিযা উম্মদ্দাপেস্সন্তিপি পরিমদ্দাপেস্সন্তিপীতি…পে… সচ্চং কির, ভিক্খৰে, ভিক্খুনিযো গিহিনিযা উম্মদ্দাপেন্তিপি পরিমদ্দাপেন্তিপীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো গিহিনিযা উম্মদ্দাপেস্সন্তিপি পরিমদ্দাপেস্সন্তিপি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১২১১. ‘‘যা পন ভিক্খুনী (সিক্খমানায…পে… সামণেরিযা…পে…) গিহিনিযা উম্মদ্দাপেয্য ৰা পরিমদ্দাপেয্য ৰা, পাচিত্তিয’’ন্তি.

১২১২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা.

সামণেরী নাম দসসিক্খাপদিকা.

গিহিনী নাম অগারিনী ৰুচ্চতি.

উম্মদ্দাপেয্য ৰাতি উম্মদ্দাপেতি, আপত্তি পাচিত্তিযস্স.

পরিমদ্দাপেয্য ৰাতি সম্বাহাপেতি, আপত্তি পাচিত্তিযস্স.

১২১৩. অনাপত্তি গিলানায [আবাধপ্পচ্চযা (ক.)], আপদাসু, উম্মত্তিকায, আদিকম্মিকাযাতি.

অট্ঠম নৰম দসমসিক্খাপদানি নিট্ঠিতানি.

১১. একাদসমসিক্খাপদং

১২১৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ভিক্খুস্স পুরতো অনাপুচ্ছা আসনে নিসীদন্তি. ভিক্খূ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ভিক্খুস্স পুরতো অনাপুচ্ছা আসনে নিসীদিস্সন্তী’’তি…পে… সচ্চং কির, ভিক্খৰে, ভিক্খুনিযো ভিক্খুস্স পুরতো অনাপুচ্ছা আসনে নিসীদন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ভিক্খুস্স পুরতো অনাপুচ্ছা আসনে নিসীদিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১২১৫. ‘‘যা পন ভিক্খুনী ভিক্খুস্স পুরতো অনাপুচ্ছা আসনে নিসীদেয্য, পাচিত্তিয’’ন্তি.

১২১৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুস্স পুরতোতি উপসম্পন্নস্স পুরতো. অনাপুচ্ছাতি অনপলোকেত্ৰা. আসনে নিসীদেয্যাতি অন্তমসো ছমাযপি নিসীদতি, আপত্তি পাচিত্তিযস্স.

১২১৭. অনাপুচ্ছিতে অনাপুচ্ছিতসঞ্ঞা আসনে নিসীদতি, আপত্তি পাচিত্তিযস্স. অনাপুচ্ছিতে ৰেমতিকা আসনে নিসীদতি, আপত্তি পাচিত্তিযস্স. অনাপুচ্ছিতে আপুচ্ছিতসঞ্ঞা আসনে নিসীদতি, আপত্তি পাচিত্তিযস্স.

আপুচ্ছিতে অনাপুচ্ছিতসঞ্ঞা, আপত্তি দুক্কটস্স. আপুচ্ছিতে ৰেমতিকা, আপত্তি দুক্কটস্স. আপুচ্ছিতে আপুচ্ছিতসঞ্ঞা, অনাপত্তি.

১২১৮. অনাপত্তি আপুচ্ছা আসনে নিসীদতি, গিলানায, আপদাসু, উম্মত্তিকায, আদিকম্মিকাযাতি.

একাদসমসিক্খাপদং নিট্ঠিতং.

১২. দ্ৰাদসমসিক্খাপদং

১২১৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো অনোকাসকতং ভিক্খুং পঞ্হং পুচ্ছন্তি. ভিক্খূ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো অনোকাসকতং ভিক্খুং পঞ্হং পুচ্ছিস্সন্তী’’তি…পে… সচ্চং কির, ভিক্খৰে, ভিক্খুনিযো অনোকাসকতং ভিক্খুং পঞ্হং পুচ্ছন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো অনোকাসকতং ভিক্খুং পঞ্হং পুচ্ছিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১২২০. ‘‘যা পন ভিক্খুনী অনোকাসকতং ভিক্খুং পঞ্হং পুচ্ছেয্য, পাচিত্তিয’’ন্তি.

১২২১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অনোকাসকতন্তি অনাপুচ্ছা. ভিক্খুন্তি উপসম্পন্নং. পঞ্হং পুচ্ছেয্যাতি সুত্তন্তে ওকাসং কারাপেত্ৰা ৰিনযং ৰা অভিধম্মং ৰা পুচ্ছতি, আপত্তি পাচিত্তিযস্স. ৰিনযে ওকাসং কারাপেত্ৰা সুত্তন্তং ৰা অভিধম্মং ৰা পুচ্ছতি, আপত্তি পাচিত্তিযস্স. অভিধম্মে ওকাসং কারাপেত্ৰা সুত্তন্তং ৰা ৰিনযং ৰা পুচ্ছতি, আপত্তি পাচিত্তিযস্স.

১২২২. অনাপুচ্ছিতে অনাপুচ্ছিতসঞ্ঞা পঞ্হং পুচ্ছতি, আপত্তি পাচিত্তিযস্স. অনাপুচ্ছিতে ৰেমতিকা পঞ্হং পুচ্ছতি, আপত্তি পাচিত্তিযস্স. অনাপুচ্ছিতে আপুচ্ছিতসঞ্ঞা পঞ্হং পুচ্ছতি, আপত্তি পাচিত্তিযস্স.

আপুচ্ছিতে অনাপুচ্ছিতসঞ্ঞা, আপত্তি দুক্কটস্স. আপুচ্ছিতে ৰেমতিকা, আপত্তি দুক্কটস্স. আপুচ্ছিতে আপুচ্ছিতসঞ্ঞা, অনাপত্তি.

১২২৩. অনাপত্তি ওকাসং কারাপেত্ৰা পুচ্ছতি, অনোদিস্স ওকাসং কারাপেত্ৰা যত্থ কত্থচি পুচ্ছতি, উম্মত্তিকায, আদিকম্মিকাযাতি.

দ্ৰাদসমসিক্খাপদং নিট্ঠিতং.

১৩. তেরসমসিক্খাপদং

১২২৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা ভিক্খুনী অসঙ্কচ্চিকা [অসঙ্কচ্ছিকা (স্যা.)] গামং পিণ্ডায পাৰিসি. তস্সা রথিকায ৰাতমণ্ডলিকা সঙ্ঘাটিযো উক্খিপিংসু. মনুস্সা উক্কুট্ঠিং অকংসু – ‘‘সুন্দরা অয্যায থনুদরা’’তি. সা ভিক্খুনী তেহি মনুস্সেহি উপ্পণ্ডিযমানা মঙ্কু অহোসি. অথ খো সা ভিক্খুনী উপস্সযং গন্ত্ৰা ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী অসঙ্কচ্চিকা গামং পৰিসিস্সতী’’তি…পে… সচ্চং কির, ভিক্খৰে, ভিক্খুনী অসঙ্কচ্চিকা গামং পাৰিসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী অসঙ্কচ্চিকা গামং পৰিসিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১২২৫. ‘‘যা পন ভিক্খুনী অসঙ্কচ্চিকা [অসঙ্কচ্ছিকা (স্যা.)] গামং পৰিসেয্য, পাচিত্তিয’’ন্তি.

১২২৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অসঙ্কচ্চিকাতি ৰিনা সঙ্কচ্চিকং.

সঙ্কচ্চিকং নাম অধক্খকং উব্ভনাভি, তস্স পটিচ্ছাদনত্থায.

গামং পৰিসেয্যাতি পরিক্খিত্তস্স গামস্স পরিক্খেপং অতিক্কামেন্তিযা আপত্তি পাচিত্তিযস্স. অপরিক্খিত্তস্স গামস্স উপচারং ওক্কমন্তিযা আপত্তি পাচিত্তিযস্স.

১২২৭. অনাপত্তি অচ্ছিন্নচীৰরিকায, নট্ঠচীৰরিকায, গিলানায, অস্সতিযা, অজানন্তিযা, আপদাসু, উম্মত্তিকায, আদিকম্মিকাযাতি.

তেরসমসিক্খাপদং নিট্ঠিতং.

ছত্তুপাহনৰগ্গো নৰমো.

উদ্দিট্ঠা খো, অয্যাযো, ছসট্ঠিসতা পাচিত্তিযা ধম্মা. তত্থায্যাযো পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থায্যাযো, তস্মা তুণ্হী, এৰমেতং ধারযামীতি.

খুদ্দকং সমত্তং.

ভিক্খুনিৰিভঙ্গে পাচিত্তিযকণ্ডং নিট্ঠিতং.