৮. কুমারীভূতৰগ্গো

১. পঠমসিক্খাপদং

১১১৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ঊনৰীসতিৰস্সং কুমারিভূতং ৰুট্ঠাপেন্তি. তা অক্খমা হোন্তি সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং. উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অনধিৰাসকজাতিকা হোন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ঊনৰীসতিৰস্সং কুমারিভূতং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো ঊনৰীসতিৰস্সং কুমারিভূতং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ঊনৰীসতিৰস্সং কুমারিভূতং ৰুট্ঠাপেস্সন্তি! ঊনৰীসতিৰস্সা, ভিক্খৰে, কুমারিভূতা অক্খমা হোতি সীতস্স উণ্হস্স…পে… পাণহরানং অনধিৰাসকজাতিকা হোতি. ৰীসতিৰস্সাৰ খো, ভিক্খৰে, কুমারিভূতা খমা হোতি সীতস্স উণ্হস্স…পে… পাণহরানং অধিৰাসকজাতিকা হোতি. নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১২০. ‘‘যা পন ভিক্খুনী ঊনৰীসতিৰস্সং কুমারিভূতং ৰুট্ঠাপেয্য, পাচিত্তিয’’ন্তি.

১১২১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ঊনৰীসতিৰস্সা নাম অপ্পত্তৰীসতিৰস্সা. কুমারিভূতা নাম সামণেরী ৰুচ্চতি. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১১২২. ঊনৰীসতিৰস্সায ঊনৰীসতিৰস্সসঞ্ঞা ৰুট্ঠাপেতি, আপত্তি পাচিত্তিযস্স. ঊনৰীসতিৰস্সায ৰেমতিকা ৰুট্ঠাপেতি, আপত্তি দুক্কটস্স. ঊনৰীসতিৰস্সায পরিপুণ্ণসঞ্ঞা ৰুট্ঠাপেতি, অনাপত্তি. পরিপুণ্ণৰীসতিৰস্সায ঊনৰীসতিৰস্সসঞ্ঞা, আপত্তি দুক্কটস্স. পরিপুণ্ণৰীসতিৰস্সায ৰেমতিকা, আপত্তি দুক্কটস্স. পরিপুণ্ণৰীসতিৰস্সায পরিপুণ্ণসঞ্ঞা, অনাপত্তি.

১১২৩. অনাপত্তি ঊনৰীসতিৰস্সং পরিপুণ্ণসঞ্ঞা ৰুট্ঠাপেতি, পরিপুণ্ণৰীসতিৰস্সং পরিপুণ্ণসঞ্ঞা ৰুট্ঠাপেতি, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

১১২৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেন্তি. তা বালা হোন্তি অব্যত্তা; ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, অট্ঠারসৰস্সায কুমারিভূতায দ্ৰে ৰস্সানি ছসু ধম্মেসু সিক্খাসম্মুতিং দাতুং. এৰঞ্চ পন ভিক্খৰে দাতব্বা. তায অট্ঠারসৰস্সায কুমারিভূতায সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – অহং, অয্যে, ইত্থন্নামা ইত্থন্নামায অয্যায অট্ঠারসৰস্সা কুমারিভূতা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১১২৫. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায অট্ঠারসৰস্সা কুমারিভূতা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায অট্ঠারসৰস্সায কুমারিভূতায দ্ৰে ৰস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায অট্ঠারসৰস্সা কুমারিভূতা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায অট্ঠারসৰস্সায কুমারিভূতায দ্ৰে ৰস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায অট্ঠারসৰস্সায কুমারিভূতায দ্ৰে ৰস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায অট্ঠারসৰস্সায কুমারিভূতায দ্ৰে ৰস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

সা অট্ঠারসৰস্সা কুমারিভূতা এৰং ৰদেহীতি ৰত্তব্বা – ‘‘পাণাতিপাতা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি…পে… ৰিকালভোজনা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামী’’তি.

অথ খো ভগৰা তা ভিক্খুনিযো অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১২৬. ‘‘যা পন ভিক্খুনী পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেয্য, পাচিত্তিয’’ন্তি.

১১২৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পরিপুণ্ণৰীসতিৰস্সা নাম পত্তৰীসতিৰস্সা. কুমারিভূতা নাম সামণেরী ৰুচ্চতি. দ্ৰে ৰস্সানীতি দ্ৰে সংৰচ্ছরানি. অসিক্খিতসিক্খা নাম সিক্খা ৰা ন দিন্না হোতি, দিন্না ৰা সিক্খা কুপিতা. ৰুট্ঠাপেয্যাতি উপসম্পাদেয্য.

১১২৮. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১১২৯. অনাপত্তি পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং ৰুট্ঠাপেতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

১১৩০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেন্তি. ভিক্খুনিযো এৰমাহংসু – ‘‘এথ সিক্খমানা, ইমং জানাথ, ইমং দেথ, ইমং আহরথ, ইমিনা অত্থো, ইমং কপ্পিযং করোথা’’তি. তা এৰমাহংসু – ‘‘ন মযং, অয্যে, সিক্খমানা; ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, পরিপুণ্ণৰীসতিৰস্সায কুমারিভূতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিং দাতুং. এৰঞ্চ পন, ভিক্খৰে, দাতব্বা. তায পরিপুণ্ণৰীসতিৰস্সায কুমারিভূতায দ্ৰে ৰস্সানি ছসু ধম্মেসু সিক্খিতসিক্খায সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – অহং, অয্যে, ইত্থন্নামা ইত্থন্নামায অয্যায পরিপুণ্ণৰীসতিৰস্সা কুমারিভূতা দ্ৰে ৰস্সানি ছসু ধম্মেসু সিক্খিতসিক্খা সঙ্ঘং ৰুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১১৩১. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পরিপুণ্ণৰীসতিৰস্সা কুমারিভূতা দ্ৰে ৰস্সানি ছসু ধম্মেসু সিক্খিতসিক্খা সঙ্ঘং ৰুট্ঠানসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায পরিপুণ্ণৰীসতিৰস্সায কুমারিভূতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পরিপুণ্ণৰীসতিৰস্সা কুমারিভূতা দ্ৰে ৰস্সানি ছসু ধম্মেসু সিক্খিতসিক্খা সঙ্ঘং ৰুট্ঠানসম্মুতিং যাচতি. সঙ্ঘো ইত্থন্নামায পরিপুণ্ণৰীসতিৰস্সায কুমারিভূতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিং দেতি. যস্সা অয্যায খমতি ইত্থন্নামায পরিপুণ্ণৰীসতিৰস্সায কুমারিভূতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পরিপুণ্ণৰীসতিৰস্সায কুমারিভূতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

১১৩২. ‘‘যা পন ভিক্খুনী পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেয্য, পাচিত্তিয’’ন্তি.

১১৩৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পরিপুণ্ণৰীসতিৰস্সা নাম পত্তৰীসতিৰস্সা. কুমারিভূতা নাম সামণেরী ৰুচ্চতি. দ্ৰে ৰস্সানীতি দ্ৰে সংৰচ্ছরানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৰুট্ঠানসম্মুতি ন দিন্না হোতি. ৰুট্ঠাপেয্যাতি উপসম্পাদেয্য.

১১৩৪. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

১১৩৫. অনাপত্তি পরিপুণ্ণৰীসতিৰস্সং কুমারিভূতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন সম্মতং ৰুট্ঠাপেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

১১৩৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ঊনদ্ৰাদসৰস্সা ৰুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৰা অকপ্পিযং ৰা. সদ্ধিৰিহারিনিযোপি বালা হোন্তি অব্যত্তা; ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ঊনদ্ৰাদসৰস্সা ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো ঊনদ্ৰাদসৰস্সা ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ঊনদ্ৰাদসৰস্সা ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৩৭. ‘‘যা পন ভিক্খুনী ঊনদ্ৰাদসৰস্সা ৰুট্ঠাপেয্য, পাচিত্তিয’’ন্তি.

১১৩৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ঊনদ্ৰাদসৰস্সা নাম অপ্পত্তদ্ৰাদসৰস্সা.

ৰুট্ঠাপেয্যাতি উপসম্পাদেয্য.

১১৩৯. অনাপত্তি পরিপুণ্ণদ্ৰাদসৰস্সা ৰুট্ঠাপেতি, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

১১৪০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেন্তি. তা বালা হোন্তি অব্যত্তা; ন জানন্তি কপ্পিযং ৰা অকপ্পিযং ৰা. সদ্ধিৰিহারিনিযোপি বালা হোন্তি অব্যত্তা; ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, পরিপুণ্ণদ্ৰাদসৰস্সায ভিক্খুনিযা ৰুট্ঠাপনসম্মুতিং দাতুং. এৰঞ্চ পন, ভিক্খৰে, দাতব্বা. তায পরিপুণ্ণদ্ৰাদসৰস্সায ভিক্খুনিযা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – অহং, অয্যে, ইত্থন্নামা পরিপুণ্ণদ্ৰাদসৰস্সা ভিক্খুনী সঙ্ঘং ৰুট্ঠাপনসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. সা ভিক্খুনী সঙ্ঘেন পরিচ্ছিন্দিতব্বা – ‘‘ব্যত্তাযং ভিক্খুনী লজ্জিনী’’তি. সচে বালা চ হোতি অলজ্জিনী চ, ন দাতব্বা. সচে বালা হোতি লজ্জিনী, ন দাতব্বা. সচে ব্যত্তা হোতি অলজ্জিনী, ন দাতব্বা. সচে ব্যত্তা চ হোতি লজ্জিনী চ, দাতব্বা. এৰঞ্চ পন, ভিক্খৰে, দাতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১১৪১. ‘‘সুণাতু মে, অয্যে, সঙ্ঘো. অযং ইত্থন্নামা পরিপুণ্ণদ্ৰাদসৰস্সা ভিক্খুনী সঙ্ঘং ৰুট্ঠাপনসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায পরিপুণ্ণদ্ৰাদসৰস্সায ভিক্খুনিযা ৰুট্ঠাপনসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা পরিপুণ্ণদ্ৰাদসৰস্সা ভিক্খুনী সঙ্ঘং ৰুট্ঠাপনসম্মুতিং যাচতি. সঙ্ঘো ইত্থন্নামায পরিপুণ্ণদ্ৰাদসৰস্সায ভিক্খুনিযা ৰুট্ঠাপনসম্মুতিং দেতি. যস্সা অয্যায খমতি ইত্থন্নামায পরিপুণ্ণদ্ৰাদসৰস্সায ভিক্খুনিযা ৰুট্ঠাপনসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পরিপুণ্ণদ্ৰাদসৰস্সায ভিক্খুনিযা ৰুট্ঠাপনসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

১১৪২. ‘‘যা পন ভিক্খুনী পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেয্য, পাচিত্তিয’’ন্তি.

১১৪৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পরিপুণ্ণদ্ৰাদসৰস্সা নাম পত্তদ্ৰাদসৰস্সা.

অসম্মতা নাম ঞত্তিদুতিযেন কম্মেন ৰুট্ঠাপনসম্মুতি ন দিন্না হোতি. ৰুট্ঠাপেয্যাতি উপসম্পাদেয্য.

১১৪৪. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

১১৪৫. অনাপত্তি পরিপুণ্ণদ্ৰাদসৰস্সা সঙ্ঘেন সম্মতা ৰুট্ঠাপেতি, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

১১৪৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন চণ্ডকাল়ী ভিক্খুনী ভিক্খুনিসঙ্ঘং উপসঙ্কমিত্ৰা ৰুট্ঠাপনসম্মুতিং যাচতি. অথ খো ভিক্খুনিসঙ্ঘো চণ্ডকাল়িং ভিক্খুনিং পরিচ্ছিন্দিত্ৰা – ‘‘অলং তাৰ তে, অয্যে, ৰুট্ঠাপিতেনা’’তি, ৰুট্ঠাপনসম্মুতিং ন অদাসি. চণ্ডকাল়ী ভিক্খুনী ‘সাধূ’তি পটিস্সুণি. তেন খো পন সমযেন ভিক্খুনিসঙ্ঘো অঞ্ঞাসং ভিক্খুনীনং ৰুট্ঠাপনসম্মুতিং দেতি. চণ্ডকাল়ী ভিক্খুনী উজ্ঝাযতি খিয্যতি ৰিপাচেতি – ‘‘অহমেৰ নূন বালা, অহমেৰ নূন অলজ্জিনী; যং সঙ্ঘো অঞ্ঞাসং ভিক্খুনীনং ৰুট্ঠাপনসম্মুতিং দেতি, ময্হমেৰ ন দেতী’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা চণ্ডকাল়ী – ‘অলং তাৰ তে, অয্যে, ৰুট্ঠাপিতেনা’তি ৰুচ্চমানা ‘সাধূ’তি পটিস্সুণিত্ৰা পচ্ছা খীযনধম্মং আপজ্জিস্সতী’’তি…পে… সচ্চং কির, ভিক্খৰে, ‘চণ্ডকাল়ী ভিক্খুনী অলং তাৰ তে অয্যে ৰুট্ঠাপিতেনা’তি ৰুচ্চমানা ‘‘সাধূ’’তি পটিস্সুণিত্ৰা পচ্ছা খীযনধম্মং আপজ্জতীতি [আপজ্জীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, চণ্ডকাল়ী ভিক্খুনী – ‘‘অলং তাৰ তে, অয্যে, ৰুট্ঠাপিতেনা’’তি ৰুচ্চমানা ‘সাধূ’তি পটিস্সুণিত্ৰা পচ্ছা খীযনধম্মং আপজ্জিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৪৭. ‘‘যা পন ভিক্খুনী – ‘অলং তাৰ তে, অয্যে, ৰুট্ঠাপিতেনা’তি ৰুচ্চমানা ‘সাধূ’তি পটিস্সুণিত্ৰা পচ্ছা খীযনধম্মং আপজ্জেয্য, পাচিত্তিয’’ন্তি.

১১৪৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অলং তাৰ তে অয্যে ৰুট্ঠাপিতেনাতি অলং তাৰ তে, অয্যে, উপসম্পাদিতেন. ‘সাধূ’তি পটিস্সুণিত্ৰা পচ্ছা খীযনধম্মং আপজ্জতি, আপত্তি পাচিত্তিযস্স.

১১৪৯. অনাপত্তি পকতিযা ছন্দা দোসা মোহা ভযা করোন্তং খিয্যতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

১১৫০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা সিক্খমানা থুল্লনন্দং ভিক্খুনিং উপসঙ্কমিত্ৰা উপসম্পদং যাচি. থুল্লনন্দা ভিক্খুনী তং সিক্খমানং – ‘‘সচে মে ত্ৰং, অয্যে, চীৰরং দস্সসি এৰাহং তং ৰুট্ঠাপেস্সামী’’তি ৰত্ৰা, নেৰ ৰুট্ঠাপেতি ন ৰুট্ঠাপনায উস্সুক্কং করোতি. অথ খো সা সিক্খমানা ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা সিক্খমানং – ‘সচে মে ত্ৰং, অয্যে, চীৰরং দস্সসি এৰাহং তং ৰুট্ঠাপেস্সামী’তি ৰত্ৰা, নেৰ ৰুট্ঠাপেস্সতি ন ৰুট্ঠাপনায উস্সুক্কং করিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী সিক্খমানং – ‘‘সচে মে ত্ৰং, অয্যে, চীৰরং দস্সসি এৰাহং তং ৰুট্ঠাপেস্সামী’’তি ৰত্ৰা, নেৰ ৰুট্ঠাপেতি ন ৰুট্ঠাপনায উস্সুক্কং করোতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী সিক্খমানং – ‘‘সচে মে ত্ৰং, অয্যে, চীৰরং দস্সসি এৰাহং তং ৰুট্ঠাপেস্সামী’’তি ৰত্ৰা, নেৰ ৰুট্ঠাপেস্সতি ন ৰুট্ঠাপনায উস্সুক্কং করিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৫১. ‘‘যা পন ভিক্খুনী সিক্খমানং – ‘সচে মে ত্ৰং, অয্যে, চীৰরং দস্সসি, এৰাহং তং ৰুট্ঠাপেস্সামী’তি ৰত্ৰা, সা পচ্ছা অনন্তরাযিকিনী নেৰ ৰুট্ঠাপেয্য ন ৰুট্ঠাপনায উস্সুক্কং করেয্য, পাচিত্তিয’’ন্তি.

১১৫২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা.

সচে মে ত্ৰং অয্যে চীৰরং দস্সসি এৰাহং তং ৰুট্ঠাপেস্সামীতি এৰাহং তং উপসম্পাদেস্সামি.

সা পচ্ছা অনন্তরাযিকিনীতি অসতি অন্তরাযে.

নেৰ ৰুট্ঠাপেয্যাতি ন সযং ৰুট্ঠাপেয্য.

ন ৰুট্ঠাপনায উস্সুক্কং করেয্যাতি ন অঞ্ঞং আণাপেয্য. ‘‘নেৰ ৰুট্ঠাপেস্সামি ন ৰুট্ঠাপনায উস্সুক্কং করিস্সামী’’তি ধুরং নিক্খিত্তমত্তে আপত্তি পাচিত্তিযস্স.

১১৫৩. অনাপত্তি সতি অন্তরাযে, পরিযেসিত্ৰা ন লভতি, গিলানায, আপদাসু, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

১১৫৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা সিক্খমানা থুল্লনন্দং ভিক্খুনিং উপসঙ্কমিত্ৰা উপসম্পদং যাচি. থুল্লনন্দা ভিক্খুনী তং সিক্খমানং ‘‘সচে মং ত্ৰং, অয্যে, দ্ৰে ৰস্সানি অনুবন্ধিস্সসি এৰাহং তং ৰুট্ঠাপেস্সামী’’তি ৰত্ৰা, নেৰ ৰুট্ঠাপেতি ন ৰুট্ঠাপনায উস্সুক্কং করোতি. অথ খো সা সিক্খমানা ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা সিক্খমানং – সচে মং ত্ৰং, অয্যে, দ্ৰে ৰস্সানি অনুবন্ধিস্সসি এৰাহং তং ৰুট্ঠাপেস্সামীতি ৰত্ৰা, নেৰ ৰুট্ঠাপেস্সতি ন ৰুট্ঠাপনায উস্সুক্কং করিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী সিক্খমানং – ‘‘সচে মং ত্ৰং অয্যে দ্ৰে ৰস্সানি অনুবন্ধিস্সসি এৰাহং তং ৰুট্ঠাপেস্সামী’’তি ৰত্ৰা, নেৰ ৰুট্ঠাপেতি ন ৰুট্ঠাপনায উস্সুক্কং করোতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী সিক্খমানং – ‘‘সচে মং ত্ৰং, অয্যে, দ্ৰে ৰস্সানি অনুবন্ধিস্সসি এৰাহং তং ৰুট্ঠাপেস্সামী’’তি ৰত্ৰা, নেৰ ৰুট্ঠাপেস্সতি ন ৰুট্ঠাপনায উস্সুক্কং করিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৫৫. ‘‘যা পন ভিক্খুনী সিক্খমানং – ‘সচে মং ত্ৰং অয্যে দ্ৰে ৰস্সানি অনুবন্ধিস্সসি এৰাহং তং ৰুট্ঠাপেস্সামী’তি ৰত্ৰা, সা পচ্ছা অনন্তরাযিকিনী নেৰ ৰুট্ঠাপেয্য ন ৰুট্ঠাপনায উস্সুক্কং করেয্য, পাচিত্তিয’’ন্তি.

১১৫৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা.

সচে মং ত্ৰং অয্যে দ্ৰে ৰস্সানি অনুবন্ধিস্সসীতি দ্ৰে সংৰচ্ছরানি উপট্ঠহিস্সসি.

এৰাহং তং ৰুট্ঠাপেস্সামীতি এৰাহং তং উপসম্পাদেস্সামি.

সা পচ্ছা অনন্তরাযিকিনীতি অসতি অন্তরাযে.

নেৰ ৰুট্ঠাপেয্যাতি ন সযং ৰুট্ঠাপেয্য.

ন ৰুট্ঠাপনায উস্সুক্কং করেয্যাতি ন অঞ্ঞং আণাপেয্য. ‘‘নেৰ ৰুট্ঠাপেস্সামি ন ৰুট্ঠাপনায উস্সুক্কং করিস্সামী’’তি ধুরং নিক্খিত্তমত্তে আপত্তি পাচিত্তিযস্স.

১১৫৭. অনাপত্তি সতি অন্তরাযে, পরিযেসিত্ৰা ন লভতি, গিলানায, আপদাসু, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৰমসিক্খাপদং

১১৫৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী পুরিসসংসট্ঠং কুমারকসংসট্ঠং চণ্ডিং সোকাৰাসং [সোকৰস্সং (সী.) সোকাৰস্সং (স্যা.)] চণ্ডকাল়িং সিক্খমানং ৰুট্ঠাপেতি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা পুরিসসংসট্ঠং কুমারকসংসট্ঠং চণ্ডিং সোকাৰাসং [সোকৰস্সং (সী.) সোকাৰস্সং (স্যা.)] চণ্ডকাল়িং সিক্খমানং ৰুট্ঠাপেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী পুরিসসংসট্ঠং কুমারকসংসট্ঠং চণ্ডিং সোকাৰাসং [সোকৰস্সং (সী.) সোকাৰস্সং (স্যা.)] চণ্ডকাল়িং সিক্খমানং ৰুট্ঠাপেতীতি [ৰুট্ঠাপেসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী পুরিসসংসট্ঠং কুমারকসংসট্ঠং চণ্ডিং সোকাৰাসং চণ্ডকাল়িং সিক্খমানং ৰুট্ঠাপেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৫৯. ‘‘যা পন ভিক্খুনী পুরিসসংসট্ঠং কুমারকসংসট্ঠং চণ্ডিং সোকাৰাসং সিক্খমানং ৰুট্ঠাপেয্য, পাচিত্তিয’’ন্তি.

১১৬০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পুরিসো নাম পত্তৰীসতিৰস্সো. কুমারকো নাম অপ্পত্তৰীসতিৰস্সো. সংসট্ঠা নাম অননুলোমিকেন কাযিকৰাচসিকেন সংসট্ঠা. চণ্ডী নাম কোধনা ৰুচ্চতি.

সোকাৰাসা নাম পরেসং দুক্খং উপ্পাদেতি, সোকং আৰিসতি. সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স; গণস্স চ আচরিনিযা চ আপত্তি দুক্কটস্স.

১১৬১. অনাপত্তি অজানন্তী ৰুট্ঠাপেতি, উম্মত্তিকায, আদিকম্মিকাযাতি.

নৰমসিক্খাপদং নিট্ঠিতং.

১০. দসমসিক্খাপদং

১১৬২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী মাতাপিতূহিপি সামিকেনপি অননুঞ্ঞাতং সিক্খমানং ৰুট্ঠাপেতি. মাতাপিতরোপি সামিকোপি উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অম্হেহি অননুঞ্ঞাতং সিক্খমানং ৰুট্ঠাপেস্সতী’’তি! অস্সোসুং খো ভিক্খুনিযো মাতাপিতূনম্পি সামিকস্সপি উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা মাতাপিতূহিপি সামিকেনপি অননুঞ্ঞাতং সিক্খমানং ৰুট্ঠাপেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী, মাতাপিতূহিপি সামিকেনপি অননুঞ্ঞাতং সিক্খমানং ৰুট্ঠাপেতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী মাতাপিতূহিপি সামিকেনপি অননুঞ্ঞাতং সিক্খমানং ৰুট্ঠাপেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৬৩. ‘‘যা পন ভিক্খুনী মাতাপিতূহি ৰা সামিকেন ৰা অননুঞ্ঞাতং সিক্খমানং ৰুট্ঠাপেয্য, পাচিত্তিয’’ন্তি.

১১৬৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

মাতাপিতরো নাম জনকা ৰুচ্চন্তি. সামিকো নাম যেন পরিগ্গহিতা হোতি. অননুঞ্ঞাতাতি অনাপুচ্ছা. সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা. ৰুট্ঠাপেয্যাতি উপসম্পাদেয্য.

ৰুট্ঠাপেস্সামীতি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১১৬৫. অনাপত্তি অজানন্তী ৰুট্ঠাপেতি, অপলোকেত্ৰা ৰুট্ঠাপেতি, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

১১. একাদসমসিক্খাপদং

১১৬৬. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন থুল্লনন্দা ভিক্খুনী – ‘‘সিক্খমানং ৰুট্ঠাপেস্সামী’’তি থেরে ভিক্খূ সন্নিপাতেত্ৰা পহূতং খাদনীযং ভোজনীযং পস্সিত্ৰা – ‘‘ন তাৰাহং, অয্যা, সিক্খমানং ৰুট্ঠাপেস্সামী’’তি থেরে ভিক্খূ উয্যোজেত্ৰা দেৰদত্তং কোকালিকং কটমোদকতিস্সকং খণ্ডদেৰিযা পুত্তং সমুদ্দদত্তং সন্নিপাতেত্ৰা সিক্খমানং ৰুট্ঠাপেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা পারিৰাসিকছন্দদানেন সিক্খমানং ৰুট্ঠাপেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী পারিৰাসিকছন্দদানেন সিক্খমানং ৰুট্ঠাপেতীতি [ৰুট্ঠাপেসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী পারিৰাসিকছন্দদানেন সিক্খমানং ৰুট্ঠাপেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৬৭. ‘‘যা পন ভিক্খুনী পারিৰাসিকছন্দদানেন সিক্খমানং ৰুট্ঠাপেয্য, পাচিত্তিয’’ন্তি.

১১৬৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পারিৰাসিকছন্দদানেনাতি ৰুট্ঠিতায পরিসায. সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা. ৰুট্ঠাপেয্যাতি উপসম্পাদেয্য.

১১৬৯. অনাপত্তি অৰুট্ঠিতায পরিসায ৰুট্ঠাপেতি, উম্মত্তিকায, আদিকম্মিকাযাতি.

একাদসমসিক্খাপদং নিট্ঠিতং.

১২. দ্ৰাদসমসিক্খাপদং

১১৭০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো অনুৰস্সং ৰুট্ঠাপেন্তি, উপস্সযো ন সম্মতি. মনুস্সা [মনুস্সা ৰিহারচারিকং আহিণ্ডন্তা পস্সিত্ৰা (সী.)] উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো অনুৰস্সং ৰুট্ঠাপেস্সন্তি, উপস্সযো ন সম্মতী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো অনুৰস্সং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো অনুৰস্সং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো অনুৰস্সং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৭১. ‘‘যা পন ভিক্খুনী অনুৰস্সং ৰুট্ঠাপেয্য, পাচিত্তিয’’ন্তি.

১১৭২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অনুৰস্সন্তি অনুসংৰচ্ছরং. ৰুট্ঠাপেয্যাতি উপসম্পাদেয্য.

১১৭৩. অনাপত্তি একন্তরিকং ৰুট্ঠাপেতি, উম্মত্তিকায, আদিকম্মিকাযাতি.

দ্ৰাদসমসিক্খাপদং নিট্ঠিতং.

১৩. তেরসমসিক্খাপদং

১১৭৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো একং ৰস্সং দ্ৰে ৰুট্ঠাপেন্তি. উপস্সযো তথেৰ ন সম্মতি. মনুস্সা [মনুস্সা ৰিহারচারিকং আহিণ্ডন্তা পস্সিত্ৰা (সী.)] তথেৰ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো একং ৰস্সং দ্ৰে ৰুট্ঠাপেস্সন্তি! উপস্সযো তথেৰ ন সম্মতী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো একং ৰস্সং দ্ৰে ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো একং ৰস্সং দ্ৰে ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো একং ৰস্সং দ্ৰে ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১৭৫. ‘‘যা পন ভিক্খুনী একং ৰস্সং দ্ৰে ৰুট্ঠাপেয্য, পাচিত্তিয’’ন্তি.

১১৭৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

একং ৰস্সন্তি একং সংৰচ্ছরং. দ্ৰে ৰুট্ঠাপেয্যাতি দ্ৰে উপসম্পাদেয্য.

‘‘দ্ৰে ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১১৭৭. অনাপত্তি একন্তরিকং একং ৰুট্ঠাপেতি, উম্মত্তিকায, আদিকম্মিকাযাতি.

তেরসমসিক্খাপদং নিট্ঠিতং.

কুমারীভূতৰগ্গো অট্ঠমো.