৭. গব্ভিনীৰগ্গো

১. পঠমসিক্খাপদং

১০৬৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো গব্ভিনিং ৰুট্ঠাপেন্তি. সা পিণ্ডায চরতি. মনুস্সা এৰমাহংসু – ‘‘দেথায্যায ভিক্খং, গরুভারা [গরুগব্ভা (স্যা.)] অয্যা’’তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো গব্ভিনিং ৰুট্ঠাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো গব্ভিনিং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো গব্ভিনিং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো গব্ভিনিং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১০৬৮. ‘‘যা পন ভিক্খুনী গব্ভিনিং ৰুট্ঠাপেয্য, পাচিত্তিয’’ন্তি.

১০৬৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

গব্ভিনী নাম আপন্নসত্তা ৰুচ্চতি. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১০৭০. গব্ভিনিযা গব্ভিনিসঞ্ঞা ৰুট্ঠাপেতি, আপত্তি পাচিত্তিযস্স. গব্ভিনিযা ৰেমতিকা ৰুট্ঠাপেতি, আপত্তি দুক্কটস্স. গব্ভিনিযা অগব্ভিনিসঞ্ঞা ৰুট্ঠাপেতি, অনাপত্তি. অগব্ভিনিযা গব্ভিনিসঞ্ঞা, আপত্তি দুক্কটস্স. অগব্ভিনিযা ৰেমতিকা, আপত্তি দুক্কটস্স. অগব্ভিনিযা অগব্ভিনিসঞ্ঞা, অনাপত্তি.

১০৭১. অনাপত্তি গব্ভিনিং অগব্ভিনিসঞ্ঞা ৰুট্ঠাপেতি, অগব্ভিনিং অগব্ভিনিসঞ্ঞা ৰুট্ঠাপেতি, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

১০৭২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো পাযন্তিং ৰুট্ঠাপেন্তি. সা পিণ্ডায চরতি. মনুস্সা এৰমাহংসু – ‘‘দেথায্যায ভিক্খং, সদুতিযিকা অয্যা’’তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পাযন্তিং ৰুট্ঠাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পাযন্তিং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো পাযন্তিং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো পাযন্তিং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১০৭৩. ‘‘যা পন ভিক্খুনী পাযন্তিং ৰুট্ঠাপেয্য, পাচিত্তিয’’ন্তি.

১০৭৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পাযন্তী নাম মাতা ৰা হোতি [হোতু (ক.)] ধাতি [ধাতী (সী. স্যা.)] ৰা.

ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১০৭৫. পাযন্তিযা পাযন্তিসঞ্ঞা ৰুট্ঠাপেতি, আপত্তি পাচিত্তিযস্স. পাযন্তিযা ৰেমতিকা ৰুট্ঠাপেতি, আপত্তি দুক্কটস্স. পাযন্তিযা অপাযন্তিসঞ্ঞা ৰুট্ঠাপেতি, অনাপত্তি. অপাযন্তিযা পাযন্তিসঞ্ঞা, আপত্তি দুক্কটস্স. অপাযন্তিযা ৰেমতিকা, আপত্তি দুক্কটস্স. অপাযন্তিযা অপাযন্তিসঞ্ঞা, অনাপত্তি.

১০৭৬. অনাপত্তি পাযন্তিং অপাযন্তিসঞ্ঞা ৰুট্ঠাপেতি, অপাযন্তিং অপাযন্তিসঞ্ঞা ৰুট্ঠাপেতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

১০৭৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো দ্ৰে ৰস্সানি ছসু ধম্মেসু অসিক্খিতসিক্খং সিক্খমানং ৰুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো দ্ৰে ৰস্সানি ছসু ধম্মেসু অসিক্খিতসিক্খং সিক্খমানং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো দ্ৰে ৰস্সানি ছসু ধম্মেসু অসিক্খিতসিক্খং সিক্খমানং ৰুট্ঠাপেন্তী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো দ্ৰে ৰস্সানি ছসু ধম্মেসু অসিক্খিতসিক্খং সিক্খমানং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, সিক্খমানায দ্ৰে ৰস্সানি ছসু ধম্মেসু সিক্খাসম্মুতিং দাতুং. এৰঞ্চ পন, ভিক্খৰে, দাতব্বা. তায সিক্খমানায সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – অহং, অয্যে, ইত্থন্নামা ইত্থন্নামায অয্যায সিক্খমানা. সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৭৮. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায সিক্খমানা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায সিক্খমানায দ্ৰে ৰস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায সিক্খমানা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায সিক্খমানায দ্ৰে ৰস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায সিক্খমানায দ্ৰে ৰস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায সিক্খমানায দ্ৰে ৰস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

১০৭৯. সা সিক্খমানা ‘‘এৰং ৰদেহী’’তি ৰত্তব্বা – ‘‘পাণাতিপাতা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি. অদিন্নাদানা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি. অব্রহ্মচরিযা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি. মুসাৰাদা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি. সুরামেরযমজ্জপ্পমাদট্ঠানা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি. ৰিকালভোজনা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামী’’তি.

অথ খো ভগৰা তা ভিক্খুনিযো অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১০৮০. ‘‘যা পন ভিক্খুনী দ্ৰে ৰস্সানি ছসু ধম্মেসু অসিক্খিতসিক্খং সিক্খমানং ৰুট্ঠাপেয্য, পাচিত্তিয’’ন্তি.

১০৮১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

দ্ৰে ৰস্সানীতি দ্ৰে সংৰচ্ছরানি. অসিক্খিতসিক্খা নাম সিক্খা ৰা ন দিন্না হোতি, দিন্না ৰা সিক্খা কুপিতা. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১০৮২. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১০৮৩. অনাপত্তি দ্ৰে ৰস্সানি ছসু ধম্মেসু সিক্খিতসিক্খং সিক্খমানং ৰুট্ঠাপেতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

১০৮৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৰুট্ঠাপেন্তি. ভিক্খুনিযো এৰমাহংসু – ‘‘এথ, সিক্খমানা, ইমং জানাথ, ইমং দেথ, ইমং আহরথ, ইমিনা অত্থো, ইমং কপ্পিযং করোথা’’তি. তা এৰমাহংসু – ‘‘ন মযং, অয্যে, সিক্খমানা. ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, দ্ৰে ৰস্সানি ছসু ধম্মেসু সিক্খিতসিক্খায সিক্খমানায ৰুট্ঠানসম্মুতিং দাতুং. এৰঞ্চ পন, ভিক্খৰে, দাতব্বা. তায দ্ৰে ৰস্সানি ছসু ধম্মেসু সিক্খিতসিক্খায সিক্খমানায সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, অয্যে, ইত্থন্নামা ইত্থন্নামায অয্যায দ্ৰে ৰস্সানি ছসু ধম্মেসু সিক্খিতসিক্খা সিক্খমানা সঙ্ঘং ৰুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৮৫. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায দ্ৰে ৰস্সানি ছসু ধম্মেসু সিক্খিতসিক্খা সিক্খমানা সঙ্ঘং ৰুট্ঠানসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায দ্ৰে ৰস্সানি ছসু ধম্মেসু সিক্খিতসিক্খায সিক্খমানায ৰুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায দ্ৰে ৰস্সানি ছসু ধম্মেসু সিক্খিতসিক্খা সিক্খমানা সঙ্ঘং ৰুট্ঠানসম্মুতিং যাচতি. সঙ্ঘো ইত্থন্নামায দ্ৰে ৰস্সানি ছসু ধম্মেসু সিক্খিতসিক্খায সিক্খমানায ৰুট্ঠানসম্মুতিং দেতি. যস্সা অয্যায খমতি ইত্থন্নামায দ্ৰে ৰস্সানি ছসু ধম্মেসু সিক্খিতসিক্খায সিক্খমানায ৰুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায দ্ৰে ৰস্সানি ছসু ধম্মেসু সিক্খিতসিক্খায সিক্খমানায ৰুট্ঠানসম্মুতি; খমতি সঙ্ঘস্স, তস্মা তুণ্হী, এৰমেতং ধারযামী’’তি.

অথ খো ভগৰা তা ভিক্খুনিযো অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১০৮৬. ‘‘যা পন ভিক্খুনী দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন অসম্মতং ৰুট্ঠাপেয্য, পাচিত্তিয’’ন্তি.

১০৮৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

দ্ৰে ৰস্সানীতি দ্ৰে সংৰচ্ছরানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৰুট্ঠানসম্মুতি ন দিন্নাহোতি. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১০৮৮. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১০৮৯. অনাপত্তি দ্ৰে ৰস্সানি ছসু ধম্মেসু সিক্খিতসিক্খং সিক্খমানং সঙ্ঘেন সম্মতং ৰুট্ঠাপেতি, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

১০৯০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ঊনদ্ৰাদসৰস্সং গিহিগতং ৰুট্ঠাপেন্তি. তা অক্খমা হোন্তি সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং. উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অনধিৰাসকজাতিকা হোন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ঊনদ্ৰাদসৰস্সং গিহিগতং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো ঊনদ্ৰাদসৰস্সং গিহিগতং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ঊনদ্ৰাদসৰস্সং গিহিগতং ৰুট্ঠাপেস্সন্তি! ঊনদ্ৰাদসৰস্সা [ঊনদ্ৰাদসৰস্সাহি (ক.)], ভিক্খৰে, গিহিগতা অক্খমা হোতি সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং. উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অনধিৰাসকজাতিকা হোতি. দ্ৰাদসৰস্সাৰ [দ্ৰাদসৰস্সা চ (স্যা. ক.)] খো, ভিক্খৰে, গিহিগতা খমা হোতি সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং. উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসকজাতিকা হোতি. নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১০৯১. ‘‘যা পন ভিক্খুনী ঊনদ্ৰাদসৰস্সং গিহিগতং ৰুট্ঠাপেয্য, পাচিত্তিয’’ন্তি.

১০৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ঊনদ্ৰাদসৰস্সা নাম অপ্পত্তদ্ৰাদসৰস্সা. গিহিগতা নাম পুরিসন্তরগতা ৰুচ্চতি. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১০৯৩. ঊনদ্ৰাদসৰস্সায ঊনদ্ৰাদসৰস্সসঞ্ঞা ৰুট্ঠাপেতি, আপত্তি পাচিত্তিযস্স. ঊনদ্ৰাদসৰস্সায ৰেমতিকা ৰুট্ঠাপেতি, আপত্তি দুক্কটস্স. ঊনদ্ৰাদসৰস্সায পরিপুণ্ণসঞ্ঞা ৰুট্ঠাপেতি, অনাপত্তি.

পরিপুণ্ণদ্ৰাদসৰস্সায ঊনদ্ৰাদসৰস্সসঞ্ঞা, আপত্তি দুক্কটস্স. পরিপুণ্ণদ্ৰাদসৰস্সায ৰেমতিকা, আপত্তি দুক্কটস্স. পরিপুণ্ণদ্ৰাদসৰস্সায পরিপুণ্ণসঞ্ঞা, অনাপত্তি.

১০৯৪. অনাপত্তি ঊনদ্ৰাদসৰস্সং পরিপুণ্ণসঞ্ঞা ৰুট্ঠাপেতি, পরিপুণ্ণদ্ৰাদসৰস্সং পরিপুণ্ণসঞ্ঞা ৰুট্ঠাপেতি, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

১০৯৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেন্তি. তা বালা হোন্তি অব্যত্তা ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খাসম্মুতিং দাতুং. এৰঞ্চ পন, ভিক্খৰে, দাতব্বা. তায পরিপুণ্ণদ্ৰাদসৰস্সায গিহিগতায সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – অহং, অয্যে, ইত্থন্নামা ইত্থন্নামায অয্যায পরিপুণ্ণদ্ৰাদসৰস্সা গিহিগতা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

১০৯৬. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পরিপুণ্ণদ্ৰাদসৰস্সা গিহিগতা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচতি. যদি সঙ্ঘস্স পত্তকল্লং সঙ্ঘো ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খাসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পরিপুণ্ণদ্ৰাদসৰস্সা গিহিগতা সঙ্ঘং দ্ৰে ৰস্সানি ছসু ধম্মেসু সিক্খাসম্মুতিং যাচতি. সঙ্ঘো ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খাসম্মুতিং দেতি. যস্সা অয্যায খমতি ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খাসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খাসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

সা পরিপুণ্ণদ্ৰাদসৰস্সা গিহিগতা এৰং ৰদেহীতি ৰত্তব্বা – ‘‘পাণাতিপাতা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি…পে… ৰিকালভোজনা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামী’’তি.

অথ খো ভগৰা তা ভিক্খুনিযো অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১০৯৭. ‘‘যা পন ভিক্খুনী পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু অসিক্খিতসিক্খং ৰুট্ঠাপেয্য, পাচিত্তিয’’ন্তি.

১০৯৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পরিপুণ্ণদ্ৰাদসৰস্সা নাম পত্তদ্ৰাদসৰস্সা. গিহিগতা নাম পুরিসন্তরগতা ৰুচ্চতি. দ্ৰে ৰস্সানীতি দ্ৰে সংৰচ্ছরানি. অসিক্খিতসিক্খা নাম সিক্খা ৰা ন দিন্না হোতি, দিন্না ৰা সিক্খা কুপিতা. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১০৯৯. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা ৰুট্ঠাপেতি, আপত্তি দুক্কটস্স. অধম্মকম্মে ৰেমতিকা ৰুট্ঠাপেতি, আপত্তি দুক্কটস্স. অধম্মকম্মে অধম্মকম্মসঞ্ঞা ৰুট্ঠাপেতি, আপত্তি দুক্কটস্স.

১১০০. অনাপত্তি পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং ৰুট্ঠাপেতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

১১০১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেন্তি. ভিক্খুনিযো এৰমাহংসু – ‘‘এথ সিক্খমানা, ইমং জানাথ, ইমং দেথ, ইমং আহরথ, ইমিনা অত্থো, ইমং কপ্পিযং করোথা’’তি. তা এৰমাহংসু – ‘‘ন মযং, অয্যে, সিক্খমানা, ভিক্খুনিযো ময’’ন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেস্সন্তী’’তি…পে… সচ্চং কির, ভিক্খৰে, ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মত্তং ৰুট্ঠাপেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ভিক্খৰে ভিক্খুনিযো পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেস্সন্তি! নেতং, ভিক্খৰে, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিং দাতুং. এৰঞ্চ পন, ভিক্খৰে, দাতব্বা. তায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খিতসিক্খায সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – অহং, অয্যে, ইত্থন্নামা ইত্থন্নামায অয্যায পরিপুণ্ণদ্ৰাদসৰস্সা গিহিগতা দ্ৰে ৰস্সানি ছসু ধম্মেসু সিক্খিতসিক্খা, সঙ্ঘং ৰুট্ঠানসম্মুতিং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো.

১১০২. ‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পরিপুণ্ণদ্ৰাদসৰস্সা গিহিগতা দ্ৰে ৰস্সানি ছসু ধম্মেসু সিক্খিতসিক্খা সঙ্ঘং ৰুট্ঠানসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিং দদেয্য. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ইত্থন্নামায অয্যায পরিপুণ্ণদ্ৰাদসৰস্সা গিহিগতা দ্ৰে ৰস্সানি ছসু ধম্মেসু সিক্খিতসিক্খা সঙ্ঘং ৰুট্ঠানসম্মুতিং যাচতি. সঙ্ঘো ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিং দেতি. যস্সা অয্যায খমতি ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতিযা দানং, সা তুণ্হস্স; যস্সা নক্খমতি, সা ভাসেয্য.

‘‘দিন্না সঙ্ঘেন ইত্থন্নামায পরিপুণ্ণদ্ৰাদসৰস্সায গিহিগতায দ্ৰে ৰস্সানি ছসু ধম্মেসু সিক্খিতসিক্খায ৰুট্ঠানসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

অথ খো ভগৰা তা ভিক্খুনিযো অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১০৩. ‘‘যা পন ভিক্খুনী পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন অসম্মতং ৰুট্ঠাপেয্য, পাচিত্তিয’’ন্তি.

১১০৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পরিপুণ্ণদ্ৰাদসৰস্সা নাম পত্তদ্ৰাদসৰস্সা. গিহিগতা নাম পুরিসন্তরগতা ৰুচ্চতি. দ্ৰে ৰস্সানীতি দ্ৰে সংৰচ্ছরানি. সিক্খিতসিক্খা নাম ছসু ধম্মেসু সিক্খিতসিক্খা. অসম্মতা নাম ঞত্তিদুতিযেন কম্মেন ৰুট্ঠানসম্মুতি ন দিন্না হোতি. ৰুট্ঠাপেয্যাতি উপসম্পাদেয্য.

‘‘ৰুট্ঠাপেস্সামী’’তি গণং ৰা আচরিনিং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং. দ্ৰীহি কম্মৰাচাহি দুক্কটা. কম্মৰাচাপরিযোসানে উপজ্ঝাযায আপত্তি পাচিত্তিযস্স. গণস্স চ আচরিনিযা চ আপত্তি দুক্কটস্স.

১১০৫. ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স. ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

১১০৬. অনাপত্তি পরিপুণ্ণদ্ৰাদসৰস্সং গিহিগতং দ্ৰে ৰস্সানি ছসু ধম্মেসু সিক্খিতসিক্খং সঙ্ঘেন সম্মতং ৰুট্ঠাপেতি, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

১১০৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হাতি ন অনুগ্গণ্হাপেতি. তা বালা হোন্তি অব্যত্তা; ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হিস্সতি ন অনুগ্গণ্হাপেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হাতি ন অনুগ্গণ্হাপেতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হিস্সতি ন অনুগ্গণ্হাপেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১০৮. ‘‘যা পন ভিক্খুনী সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হেয্য ন অনুগ্গণ্হাপেয্য, পাচিত্তিয’’ন্তি.

১১০৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সহজীৰিনী নাম সদ্ধিৰিহারিনী ৰুচ্চতি. ৰুট্ঠাপেত্ৰাতি উপসম্পাদেত্ৰা. দ্ৰে ৰস্সানীতি দ্ৰে সংৰচ্ছরানি.

নেৰ অনুগ্গণ্হেয্যাতি ন সযং অনুগ্গণ্হেয্য উদ্দেসেন পরিপুচ্ছায ওৰাদেন অনুসাসনিযা.

ন অনুগ্গণ্হাপেয্যাতি ন অঞ্ঞং আণাপেয্য ‘‘দ্ৰে ৰস্সানি নেৰ অনুগ্গণ্হিস্সামি ন অনুগ্গণ্হাপেস্সামী’’তি ধুরং নিক্খিত্তমত্তে আপত্তি পাচিত্তিযস্স.

১১১০. অনাপত্তি সতি অন্তরাযে, পরিযেসিত্ৰা ন লভতি, গিলানায, আপদাসু, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৰমসিক্খাপদং

১১১১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ৰুট্ঠাপিতং পৰত্তিনিং দ্ৰে ৰস্সানি নানুবন্ধন্তি. তা বালা হোন্তি অব্যত্তা; ন জানন্তি কপ্পিযং ৰা অকপ্পিযং ৰা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ৰুট্ঠাপিতং পৰত্তিনিং দ্ৰে ৰস্সানি নানুবন্ধিস্সন্তী’’তি…পে… সচ্চং কির, ভিক্খৰে, ভিক্খুনিযো ৰুট্ঠাপিতং পৰত্তিনিং দ্ৰে ৰস্সানি নানুবন্ধন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ৰুট্ঠাপিতং পৰত্তিনিং দ্ৰে ৰস্সানি নানুবন্ধিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১১২. ‘‘যা পন ভিক্খুনী ৰুট্ঠাপিতং পৰত্তিনিং দ্ৰে ৰস্সানি নানুবন্ধেয্য, পাচিত্তিয’’ন্তি.

১১১৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৰুট্ঠাপিতন্তি উপসম্পাদিতং. পৰত্তিনী নাম উপজ্ঝাযা ৰুচ্চতি. দ্ৰে ৰস্সানীতি দ্ৰে সংৰচ্ছরানি. নানুবন্ধেয্যাতি ন সযং উপট্ঠহেয্য. দ্ৰে ৰস্সানি নানুবন্ধিস্সামীতি ধুরং নিক্খিত্তমত্তে আপত্তি পাচিত্তিযস্স.

১১১৪. অনাপত্তি উপজ্ঝাযা বালা ৰা হোতি অলজ্জিনী ৰা, গিলানায, আপদাসু, উম্মত্তিকায, আদিকম্মিকাযাতি.

নৰমসিক্খাপদং নিট্ঠিতং.

১০. দসমসিক্খাপদং

১১১৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী সহজীৰিনিং ৰুট্ঠাপেত্ৰা নেৰ ৰূপকাসেতি ন ৰূপকাসাপেতি. সামিকো অগ্গহেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা সহজীৰিনিং ৰুট্ঠাপেত্ৰা নেৰ ৰূপকাসেস্সতি ন ৰূপকাসাপেস্সতি, সামিকো অগ্গহেসি! সচাযং ভিক্খুনী পক্কন্তা অস্স, ন চ সামিকো গণ্হেয্যা’’তি…পে… সচ্চং কির, ভিক্খৰে, থুল্লনন্দা ভিক্খুনী সহজীৰিনিং ৰুট্ঠাপেত্ৰা নেৰ ৰূপকাসেতি ন ৰূপকাসাপেতি […সি (ক.)], সামিকো অগ্গহেসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী সহজীৰিনিং ৰুট্ঠাপেত্ৰা নেৰ ৰূপকাসেস্সতি ন ৰূপকাসাপেস্সতি, সামিকো অগ্গহেসি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

১১১৬. ‘‘যা পন ভিক্খুনী সহজীৰিনিং ৰুট্ঠাপেত্ৰা নেৰ ৰূপকাসেয্য ন ৰূপকাসাপেয্য অন্তমসো ছপ্পঞ্চযোজনানিপি, পাচিত্তিয’’ন্তি.

১১১৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সহজীৰিনী নাম সদ্ধিৰিহারিনী ৰুচ্চতি. ৰুট্ঠাপেত্ৰাতি উপসম্পাদেত্ৰা. নেৰ ৰূপকাসেয্যাতি ন সযং ৰূপকাসেয্য. ন ৰূপকাসাপেয্যাতি ন অঞ্ঞং আণাপেয্য. ‘‘নেৰ ৰূপকাসেস্সামি ন ৰূপকাসাপেস্সামি অন্তমসো ছপ্পঞ্চযোজনানিপী’’তি ধুরং নিক্খিত্তমত্তে আপত্তি পাচিত্তিযস্স.

১১১৮. অনাপত্তি সতি অন্তরাযে, পরিযেসিত্ৰা দুতিযিকং ভিক্খুনিং ন লভতি, গিলানায, আপদাসু, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

গব্ভিনিৰগ্গো সত্তমো.