৫. চিত্তাগারৰগ্গো
১. পঠমসিক্খাপদং
৯৭৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন রঞ্ঞো পসেনদিস্স কোসলস্স উয্যানে চিত্তাগারে পটিভানচিত্তং কতং হোতি. বহূ মনুস্সা চিত্তাগারং দস্সনায গচ্ছন্তি. ছব্বগ্গিযাপি ভিক্খুনিযো চিত্তাগারং দস্সনায অগমংসু. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো চিত্তাগারং দস্সনায গচ্ছিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো চিত্তাগারং দস্সনায গচ্ছিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো চিত্তাগারং দস্সনায গচ্ছন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো চিত্তাগারং দস্সনায গচ্ছিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
৯৭৮. ‘‘যা পন ভিক্খুনী রাজাগারং ৰা চিত্তাগারং ৰা আরামং ৰা উয্যানং ৰা পোক্খরণিং ৰা দস্সনায গচ্ছেয্য, পাচিত্তিয’’ন্তি.
৯৭৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
রাজাগারং নাম যত্থ কত্থচি রঞ্ঞো কীল়িতুং রমিতুং কতং হোতি.
চিত্তাগারং নাম যত্থ কত্থচি মনুস্সানং কীল়িতুং রমিতুং কতং হোতি.
আরামো নাম যত্থ কত্থচি মনুস্সানং কীল়িতুং রমিতুং কতো হোতি.
উয্যানং নাম যত্থ কত্থচি মনুস্সানং কীল়িতুং রমিতুং কতং হোতি.
পোক্খরণী নাম যত্থ কত্থচি মনুস্সানং কীল়িতুং রমিতুং কতা হোতি.
৯৮০. দস্সনায গচ্ছতি, আপত্তি দুক্কটস্স. যত্থ ঠিতা পস্সতি, আপত্তি পাচিত্তিযস্স. দস্সনূপচারং ৰিজহিত্ৰা পুনপ্পুনং পস্সতি, আপত্তি পাচিত্তিযস্স. একমেকং দস্সনায গচ্ছতি, আপত্তি দুক্কটস্স. যত্থ ঠিতা পস্সতি, আপত্তি পচিত্তিযস্স. দস্সনূপচারং ৰিজহিত্ৰা পুনপ্পুনং পস্সতি, আপত্তি পাচিত্তিযস্স.
৯৮১. অনাপত্তি আরামে ঠিতা পস্সতি, গচ্ছন্তী ৰা আগচ্ছন্তী ৰা পস্সতি, সতি করণীযে গন্ত্ৰা পস্সতি, আপদাসু, উম্মত্তিকায, আদিকম্মিকাযাতি.
পঠমসিক্খাপদং নিট্ঠিতং.
২. দুতিযসিক্খাপদং
৯৮২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো আসন্দিম্পি পল্লঙ্কম্পি পরিভুঞ্জন্তি. মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো আসন্দিম্পি পল্লঙ্কম্পি পরিভুঞ্জিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো আসন্দিম্পি পল্লঙ্কম্পি পরিভুঞ্জিস্সন্তী’’তি…পে… সচ্চং কির, ভিক্খৰে, ভিক্খুনিযো আসন্দিম্পি পল্লঙ্কম্পি পরিভুঞ্জন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো আসন্দিম্পি পল্লঙ্কম্পি পরিভুঞ্জিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
৯৮৩. ‘‘যা পন ভিক্খুনী আসন্দিং ৰা পল্লঙ্কং ৰা পরিভুঞ্জেয্য, পাচিত্তিয’’ন্তি.
৯৮৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
আসন্দী নাম অতিক্কন্তপ্পমাণা ৰুচ্চতি.
পল্লঙ্কো নাম আহরিমেহি [‘‘অসংহারিমেহি’’ ইতি কঙ্খাৰিতরণিযা সমেতি] ৰাল়েহি কতো হোতি.
পরিভুঞ্জেয্যাতি তস্মিং অভিনিসীদতি ৰা অভিনিপজ্জতি ৰা, আপত্তি পাচিত্তিযস্স.
৯৮৫. অনাপত্তি আসন্দিযা পাদে ছিন্দিত্ৰা পরিভুঞ্জতি, পল্লঙ্কস্স ৰাল়ে ভিন্দিত্ৰা পরিভুঞ্জতি, উম্মত্তিকায, আদিকম্মিকাযাতি.
দুতিযসিক্খাপদং নিট্ঠিতং.
৩. ততিযসিক্খাপদং
৯৮৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো সুত্তং কন্তন্তি. মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো সুত্তং কন্তিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা …পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো সুত্তং কন্তিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো সুত্তং কন্তন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো সুত্তং কন্তিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
৯৮৭. ‘‘যা পন ভিক্খুনী সুত্তং কন্তেয্য, পাচিত্তিয’’ন্তি.
৯৮৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
সুত্তং নাম ছ সুত্তানি – খোমং, কপ্পাসিকং, কোসেয্যং, কম্বলং, সাণং, ভঙ্গং.
কন্তেয্যাতি সযং কন্ততি, পযোগে দুক্কটং. উজ্জৰুজ্জৰে আপত্তি পাচিত্তিযস্স.
৯৮৯. অনাপত্তি কন্তিতসুত্তং কন্ততি, উম্মত্তিকায, আদিকম্মিকাযাতি.
ততিযসিক্খাপদং নিট্ঠিতং.
৪. চতুত্থসিক্খাপদং
৯৯০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো গিহিৰেয্যাৰচ্চং করোন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো গিহিৰেয্যাৰচ্চং করিস্সন্তী’’তি…পে… সচ্চং কির, ভিক্খৰে, ভিক্খুনিযো গিহিৰেয্যাৰচ্চং করোন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো গিহিৰেয্যাৰচ্চং করিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
৯৯১. ‘‘যা পন ভিক্খুনী গিহিৰেয্যাৰচ্চং করেয্য, পাচিত্তিয’’ন্তি.
৯৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
গিহিৰেয্যাৰচ্চং নাম অগারিকস্স যাগুং ৰা ভত্তং ৰা খাদনীযং ৰা পচতি, সাটকং ৰা ৰেঠনং ৰা ধোৰতি, আপত্তি পাচিত্তিযস্স.
৯৯৩. অনাপত্তি যাগুপানে, সঙ্ঘভত্তে, চেতিযপূজায, অত্তনো ৰেয্যাৰচ্চকরস্স যাগুং ৰা ভত্তং ৰা খাদনীযং ৰা পচতি, সাটকং ৰা ৰেঠনং ৰা ধোৰতি, উম্মত্তিকায, আদিকম্মিকাযাতি.
চতুত্থসিক্খাপদং নিট্ঠিতং.
৫. পঞ্চমসিক্খাপদং
৯৯৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা ভিক্খুনী থুল্লনন্দং ভিক্খুনিং উপসঙ্কমিত্ৰা এতদৰোচ – ‘‘এহায্যে, ইমং অধিকরণং ৰূপসমেহী’’তি. থুল্লনন্দা ভিক্খুনী ‘সাধূ’তি পটিস্সুণিত্ৰা নেৰ ৰূপসমেতি ন ৰূপসমায উস্সুক্কং করোতি. অথ খো সা ভিক্খুনী ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ভিক্খুনিযা – ‘এহায্যে’, ইমং অধিকরণং ৰূপসমেহী’তি ৰুচ্চমানা – ‘সাধূ’তি পটিস্সুণিত্ৰা, নেৰ ৰূপসমেস্সতি ন ৰূপসমায উস্সুক্কং করিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী ভিক্খুনিযা – ‘‘এহায্যে, ইমং অধিকরণং ৰূপসমেহী’’তি ৰুচ্চমানা – ‘‘সাধূ’’তি পটিস্সুণিত্ৰা, নেৰ ৰূপসমেতি ন ৰূপসমায উস্সুক্কং করোতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী ভিক্খুনিযা – ‘‘এহায্যে, ইমং অধিকরণং ৰূপসমেহী’’তি ৰুচ্চমানা – ‘‘সাধূ’’তি পটিস্সুণিত্ৰা, নেৰ ৰূপসমেস্সতি ন ৰূপসমায উস্সুক্কং করিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
৯৯৫. ‘‘যা পন ভিক্খুনী ভিক্খুনিযা – ‘এহায্যে, ইমং অধিকরণং ৰূপসমেহী’তি ৰুচ্চমানা – ‘সাধূ’তি পটিস্সুণিত্ৰা সা পচ্ছা অনন্তরাযিকিনী নেৰ ৰূপসমেয্য ন ৰূপসমায উস্সুক্কং করেয্য, পাচিত্তিয’’ন্তি.
৯৯৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
ভিক্খুনিযাতি অঞ্ঞায ভিক্খুনিযা.
অধিকরণং নাম চত্তারি অধিকরণানি – ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং.
এহায্যে ইমং অধিকরণং ৰূপসমেহীতি এহায্যে ইমং অধিকরণং ৰিনিচ্ছেহি.
সা পচ্ছা অনন্তরাযিকিনীতি অসতি অন্তরাযে.
নেৰ ৰূপসমেয্যাতি ন সযং ৰূপসমেয্য.
ন ৰূপসমায উস্সুক্কং করেয্যাতি ন অঞ্ঞং আণাপেয্য. ‘‘নেৰ ৰূপসমেস্সামি ন ৰূপসমায উস্সুক্কং করিস্সামী’’তি ধুরং নিক্খিত্তমত্তে, আপত্তি পাচিত্তিযস্স.
৯৯৭. উপসম্পন্নায উপসম্পন্নসঞ্ঞা অধিকরণং নেৰ ৰূপসমেতি ন ৰূপসমায উস্সুক্কং করোতি, আপত্তি পাচিত্তিযস্স. উপসম্পন্নায ৰেমতিকা অধিকরণং নেৰ ৰূপসমেতি, ন ৰূপসমায উস্সুক্কং করোতি, আপত্তি পাচিত্তিযস্স. উপসম্পন্নায অনুপসম্পন্নসঞ্ঞা অধিকরণং নেৰ ৰূপসমেতি, ন ৰূপসমায উস্সুক্কং করোতি, আপত্তি পাচিত্তিযস্স.
অনুপসম্পন্নায অধিকরণং নেৰ ৰূপসমেতি, ন ৰূপসমায উস্সুক্কং করোতি, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৰেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.
৯৯৮. অনাপত্তি সতি অন্তরাযে, পরিযেসিত্ৰা ন লভতি, গিলানায, আপদাসু, উম্মত্তিকায, আদিকম্মিকাযাতি.
পঞ্চমসিক্খাপদং নিট্ঠিতং.
৬. ছট্ঠসিক্খাপদং
৯৯৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী নটানম্পি নটকানম্পি লঙ্ঘকানম্পি সোকজ্ঝাযিকানম্পি কুম্ভথূণিকানম্পি সহত্থা খাদনীযং ভোজনীযং দেতি – ‘‘ময্হং পরিসতি ৰণ্ণং ভাসথা’’তি. নটাপি নটকাপি লঙ্ঘকাপি সোকজ্ঝাযিকাপি কুম্ভথূণিকাপি থুল্লনন্দায ভিক্খুনিযা পরিসতি ৰণ্ণং ভাসন্তি – ‘‘অয্যা থুল্লনন্দা বহুস্সুতা ভাণিকা ৰিসারদা পট্টা ধম্মিং কথং কাতুং; দেথ অয্যায, করোথ অয্যাযা’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – কথঞ্হি নাম অয্যা থুল্লনন্দা অগারিকস্স সহত্থা খাদনীযং ভোজনীযং দস্সতীতি…পে… সচ্চং কির, ভিক্খৰে, থুল্লনন্দা ভিক্খুনী অগারিকস্স সহত্থা খাদনীযং ভোজনীযং দেতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী অগারিকস্স সহত্থা খাদনীযং ভোজনীযং দস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
১০০০. ‘‘যা পন ভিক্খুনী অগারিকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দদেয্য, পাচিত্তিয’’ন্তি.
১০০১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
অগারিকো নাম যো কোচি অগারং অজ্ঝাৰসতি.
পরিব্বাজকো নাম ভিক্খুঞ্চ সামণেরঞ্চ ঠপেত্ৰা যো কোচি পরিব্বাজকসমাপন্নো.
পরিব্বাজিকা নাম ভিক্খুনিঞ্চ সিক্খমানঞ্চ সামণেরিঞ্চ ঠপেত্ৰা যা কাচি পরিব্বাজিকসমাপন্না.
খাদনীযং নাম পঞ্চ ভোজনানি – উদকদন্তপোনং ঠপেত্ৰা অৰসেসং খাদনীযং নাম.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং.
দদেয্যাতি কাযেন ৰা কাযপটিবদ্ধেন ৰা নিস্সগ্গিযেন ৰা দেতি, আপত্তি পাচিত্তিযস্স. উদকদন্তপোনং দেতি, আপত্তি দুক্কটস্স.
১০০২. অনাপত্তি দাপেতি ন দেতি, উপনিক্খিপিত্ৰা দেতি, বাহিরালেপং দেতি, উম্মত্তিকায, আদিকম্মিকাযাতি.
ছট্ঠসিক্খাপদং নিট্ঠিতং.
৭. সত্তমসিক্খাপদং
১০০৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী আৰসথচীৰরং অনিস্সজ্জিত্ৰা পরিভুঞ্জতি. অঞ্ঞা উতুনিযো ভিক্খুনিযো ন লভন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা আৰসথচীৰরং অনিস্সজ্জিত্ৰা পরিভুঞ্জিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী আৰসথচীৰরং অনিস্সজ্জিত্ৰা পরিভুঞ্জতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী আৰসথচীৰরং অনিস্সজ্জিত্ৰা পরিভুঞ্জিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
১০০৪. ‘‘যা পন ভিক্খুনী আৰসথচীৰরং অনিস্সজ্জিত্ৰা পরিভুঞ্জেয্য, পাচিত্তিয’’ন্তি.
১০০৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
আৰসথচীৰরং নাম ‘‘উতুনিযো ভিক্খুনিযো পরিভুঞ্জন্তূ’’তি দিন্নং হোতি.
অনিস্সজ্জিত্ৰা পরিভুঞ্জেয্যাতি দ্ৰেতিস্সো রত্তিযো পরিভুঞ্জিত্ৰা চতুত্থদিৰসে ধোৰিত্ৰা ভিক্খুনিযা ৰা সিক্খমানায ৰা সামণেরিযা ৰা অনিস্সজ্জিত্ৰা পরিভুঞ্জতি, আপত্তি পাচিত্তিযস্স.
১০০৬. অনিস্সজ্জিতে অনিস্সজ্জিতসঞ্ঞা পরিভুঞ্জতি, আপত্তি পাচিত্তিযস্স. অনিস্সজ্জিতে ৰেমতিকা পরিভুঞ্জতি, আপত্তি পাচিত্তিযস্স. অনিস্সজ্জিতে নিস্সজ্জিতসঞ্ঞা পরিভুঞ্জতি, আপত্তি পাচিত্তিযস্স.
নিস্সজ্জিতে অনিস্সজ্জিতসঞ্ঞা, আপত্তি দুক্কটস্স. নিস্সজ্জিতে ৰেমতিকা, আপত্তি দুক্কটস্স. নিস্সজ্জিতে নিস্সজ্জিতসঞ্ঞা অনাপত্তি.
১০০৭. অনাপত্তি নিস্সজ্জিত্ৰা পরিভুঞ্জতি, পুন পরিযাযেন পরিভুঞ্জতি, অঞ্ঞা উতুনিযো ভিক্খুনিযো ন হোন্তি, অচ্ছিন্নচীৰরিকায, নট্ঠচীৰরিকায, আপদাসু, উম্মত্তিকায, আদিকম্মিকাযাতি.
সত্তমসিক্খাপদং নিট্ঠিতং.
৮. অট্ঠমসিক্খাপদং
১০০৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী আৰসথং অনিস্সজ্জিত্ৰা চারিকং পক্কামি. তেন খো পন সমযেন থুল্লনন্দায ভিক্খুনিযা আৰসথো ডয্হতি. ভিক্খুনিযো এৰমাহংসু – ‘‘হন্দায্যে, ভণ্ডকং নীহরামা’’তি. একচ্চা এৰমাহংসু – ‘‘ন মযং, অয্যে, নীহরিস্সাম. যং কিঞ্চি নট্ঠং সব্বং অম্হে অভিযুঞ্জিস্সতী’’তি. থুল্লনন্দা ভিক্খুনী পুনদেৰ তং আৰসথং পচ্চাগন্ত্ৰা ভিক্খুনিযো পুচ্ছি – ‘‘অপায্যে, ভণ্ডকং নীহরিত্থা’’তি? ‘‘ন মযং, অয্যে, নীহরিম্হা’’তি. থুল্লনন্দা ভিক্খুনী উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো আৰসথে ডয্হমানে ভণ্ডকং ন নীহরিস্সন্তী’’তি! যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা আৰসথং অনিস্সজ্জিত্ৰা চারিকং পক্কমিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী আৰসথং অনিস্সজ্জিত্ৰা চারিকং পক্কমতীতি [পক্কমীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী আৰসথং অনিস্সজ্জিত্ৰা চারিকং পক্কমিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
১০০৯. ‘‘যা পন ভিক্খুনী আৰসথং অনিস্সজ্জিত্ৰা চারিকং পক্কমেয্য, পাচিত্তিয’’ন্তি.
১০১০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
আৰসথো নাম কৰাটবদ্ধো ৰুচ্চতি.
অনিস্সজ্জিত্ৰা চারিকং পক্কমেয্যাতি ভিক্খুনিযা ৰা সিক্খমানায ৰা সামণেরিযা ৰা অনিস্সজ্জিত্ৰা পরিক্খিত্তস্স আৰসথস্স পরিক্খেপং অতিক্কামেন্তিযা আপত্তি পাচিত্তিযস্স. অপরিক্খিত্তস্স আৰসথস্স উপচারং অতিক্কামেন্তিযা আপত্তি পাচিত্তিযস্স.
১০১১. অনিস্সজ্জিতে অনিস্সজ্জিতসঞ্ঞা পক্কমতি, আপত্তি পাচিত্তিযস্স. অনিস্সজ্জিতে ৰেমতিকা পক্কমতি, আপত্তি পাচিত্তিযস্স. অনিস্সজ্জিতে নিস্সজ্জিতসঞ্ঞা পক্কমতি, আপত্তি পাচিত্তিযস্স.
অকৰাটবদ্ধং অনিস্সজ্জিত্ৰা পক্কমতি, আপত্তি দুক্কটস্স. নিস্সজ্জিতে অনিস্সজ্জিতসঞ্ঞা, আপত্তি দুক্কটস্স. নিস্সজ্জিতে ৰেমতিকা, আপত্তি দুক্কটস্স. নিস্সজ্জিতে নিস্সজ্জিতসঞ্ঞা, অনাপত্তি.
১০১২. অনাপত্তি নিস্সজ্জিত্ৰা পক্কমতি, সতি অন্তরাযে, পরিযেসিত্ৰা ন লভতি, গিলানায, আপদাসু, উম্মত্তিকায, আদিকম্মিকাযাতি.
অট্ঠমসিক্খাপদং নিট্ঠিতং.
৯. নৰমসিক্খাপদং
১০১৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো তিরচ্ছানৰিজ্জং পরিযাপুণন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো তিরচ্ছানৰিজ্জং পরিযাপুণিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো তিরচ্ছানৰিজ্জং পরিযাপুণিস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো তিরচ্ছানৰিজ্জং পরিযাপুণন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো তিরচ্ছানৰিজ্জং পরিযাপুণিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
১০১৪. ‘‘যা পন ভিক্খুনী তিরচ্ছানৰিজ্জং পরিযাপুণেয্য, পাচিত্তিয’’ন্তি.
১০১৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
তিরচ্ছানৰিজ্জা [তিরচ্ছানৰিজ্জং (ক.)] নাম যং কিঞ্চি বাহিরকং অনত্থসংহিতং.
পরিযাপুণেয্যাতি পদেন পরিযাপুণাতি, পদে পদে আপত্তি পাচিত্তিযস্স. অক্খরায পরিযাপুণাতি, অক্খরক্খরায আপত্তি পাচিত্তিযস্স.
১০১৬. অনাপত্তি লেখং পরিযাপুণাতি, ধারণং পরিযাপুণাতি, গুত্তত্থায পরিত্তং পরিযাপুণাতি, উম্মত্তিকায, আদিকম্মিকাযাতি.
নৰমসিক্খাপদং নিট্ঠিতং.
১০. দসমসিক্খাপদং
১০১৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খুনিযো তিরচ্ছানৰিজ্জং ৰাচেন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো তিরচ্ছানৰিজ্জং ৰাচেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো তিরচ্ছানৰিজ্জং ৰাচেস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো তিরচ্ছানৰিজ্জং ৰাচেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো তিরচ্ছানৰিজ্জং ৰাচেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
১০১৮. ‘‘যা পন ভিক্খুনী তিরচ্ছানৰিজ্জং ৰাচেয্য, পাচিত্তিয’’ন্তি.
১০১৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
তিরচ্ছানৰিজ্জা [তিরচ্ছানৰিজ্জং (ক.)] নাম যং কিঞ্চি বাহিরকং অনত্থসংহিতং.
ৰাচেয্যাতি পদেন ৰাচেতি, পদে পদে আপত্তি পাচিত্তিযস্স. অক্খরায ৰাচেতি, অক্খরক্খরায আপত্তি পাচিত্তিযস্স.
১০২০. অনাপত্তি লেখং ৰাচেতি, ধারণং ৰাচেতি, গুত্তত্থায পরিত্তং ৰাচেতি, উম্মত্তিকায, আদিকম্মিকাযাতি.
দসমসিক্খাপদং নিট্ঠিতং.
চিত্তাগারৰগ্গো পঞ্চমো.