৩. নগ্গৰগ্গো

১. পঠমসিক্খাপদং

৮৮৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সম্বহুলা [মহাৰ. ৩৫০] ভিক্খুনিযো অচিরৰতিযা নদিযা ৰেসিযাহি সদ্ধিং নগ্গা একতিত্থে নহাযন্তি. ৰেসিযা তা ভিক্খুনিযো উপ্পণ্ডেসুং – ‘‘কিং নু খো নাম তুম্হাকং, অয্যে, দহরানং [দহরানং দহরানং (সী.)] ব্রহ্মচরিযং চিণ্ণেন, ননু নাম কামা পরিভুঞ্জিতব্বা! যদা জিণ্ণা ভৰিস্সথ তদা ব্রহ্মচরিযং চরিস্সথ. এৰং তুম্হাকং উভো অত্থা পরিগ্গহিতা ভৰিস্সন্তী’’তি. ভিক্খুনিযো ৰেসিযাহি উপ্পণ্ডিযমানা মঙ্কূ অহেসুং. অথ খো তা ভিক্খুনিযো উপস্সযং গন্ত্ৰা ভিক্খুনীনং এতমত্থং আরোচেসুং. ভিক্খুনিযো ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, ভিক্খুনীনং সিক্খাপদং পঞ্ঞপেস্সামি দস অত্থৰসে পটিচ্চ – সঙ্ঘসুট্ঠুতায…পে… ৰিনযানুগ্গহায. এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৮৪. ‘‘যা পন ভিক্খুনী নগ্গা নহাযেয্য, পাচিত্তিয’’ন্তি.

৮৮৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

নগ্গা নহাযেয্যাতি অনিৰত্থা ৰা অপারুতা ৰা নহাযতি, পযোগে দুক্কটং. নহানপরিযোসানে আপত্তি পাচিত্তিযস্স.

৮৮৬. অনাপত্তি অচ্ছিন্নচীৰরিকায ৰা নট্ঠচীৰরিকায ৰা, আপদাসু, উম্মত্তিকায, আদিকম্মিকাযাতি.

পঠমসিক্খাপদং নিট্ঠিতং.

২. দুতিযসিক্খাপদং

৮৮৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভগৰতা ভিক্খুনীনং [মহাৰ. ৩৫১] উদকসাটিকা অনুঞ্ঞাতা হোতি. ছব্বগ্গিযা ভিক্খুনিযো – ‘‘ভগৰতা উদকসাটিকা অনুঞ্ঞাতা’’তি অপ্পমাণিকাযো উদকসাটিকাযো ধারেসুং [ধারেন্তি (পাচি. ৫৩১-৫৪৫)]. পুরতোপি পচ্ছতোপি আকড্ঢন্তা আহিণ্ডন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো অপ্পমাণিকাযো উদকসাটিকাযো ধারেস্সন্তী’’তি…পে… সচ্চং কির, ভিক্খৰে, ছব্বগ্গিযা ভিক্খুনিযো অপ্পমাণিকাযো উদকসাটিকাযো ধারেন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ছব্বগ্গিযা ভিক্খুনিযো অপ্পমাণিকাযো উদকসাটিকাযো ধারেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৮৮. ‘‘উদকসাটিকং পন ভিক্খুনিযা কারযমানায পমাণিকা কারেতব্বা. তত্রিদং পমাণং – দীঘসো চতস্সো ৰিদত্থিযো, সুগতৰিদত্থিযা; তিরিযং দ্ৰে ৰিদত্থিযো. তং অতিক্কামেন্তিযা ছেদনকং পাচিত্তিয’’ন্তি.

৮৮৯. উদকসাটিকা নাম যায নিৰত্থা [নিৰত্থায (স্যা.)] নহাযতি.

কারযমানাযাতি করোন্তিযা ৰা কারাপেন্তিযা ৰা.

পমাণিকা কারেতব্বা. তত্রিদং পমাণং – দীঘসো চতস্সো ৰিদত্থিযো, সুগতৰিদত্থিযা; তিরিযং দ্ৰে ৰিদত্থিযো. তং অতিক্কামেত্ৰা করোতি ৰা কারাপেতি ৰা, পযোগে দুক্কটং. পটিলাভেন ছিন্দিত্ৰা পাচিত্তিযং দেসেতব্বং.

৮৯০. অত্তনা ৰিপ্পকতং অত্তনা পরিযোসাপেতি, আপত্তি পাচিত্তিযস্স. অত্তনা ৰিপ্পকতং পরেহি পরিযোসাপেতি, আপত্তি পাচিত্তিযস্স. পরেহি ৰিপ্পকতং অত্তনা পরিযোসাপেতি, আপত্তি পাচিত্তিযস্স. পরেহি ৰিপ্পকতং পরেহি পরিযোসাপেতি, আপত্তি পাচিত্তিযস্স.

অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স. অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স.

৮৯১. অনাপত্তি পমাণিকং করোতি, ঊনকং করোতি, অঞ্ঞেন কতং পমাণাতিক্কন্তং পটিলভিত্ৰা ছিন্দিত্ৰা পরিভুঞ্জতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

৮৯২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরিস্সা ভিক্খুনিযা মহগ্ঘে চীৰরদুস্সে চীৰরং দুক্কটং হোতি দুস্সিব্বিতং. থুল্লনন্দা ভিক্খুনী তং ভিক্খুনিং এতদৰোচ – ‘‘সুন্দরং খো ইদং তে, অয্যে, চীৰরদুস্সং; চীৰরঞ্চ খো দুক্কটং দুস্সিব্বিত’’ন্তি. ‘‘ৰিসিব্বেমি, অয্যে, সিব্বিস্সসী’’তি? ‘‘আমায্যে, সিব্বিস্সামী’’তি. অথ খো সা ভিক্খুনী তং চীৰরং ৰিসিব্বেত্ৰা থুল্লনন্দায ভিক্খুনিযা অদাসি. থুল্লনন্দা ভিক্খুনী – ‘‘সিব্বিস্সামি সিব্বিস্সামী’’তি নেৰ সিব্বতি ন সিব্বাপনায উস্সুক্কং করোতি. অথ খো সা ভিক্খুনী ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ভিক্খুনিযা চীৰরং ৰিসিব্বাপেত্ৰা নেৰ সিব্বিস্সতি ন সিব্বাপনায উস্সুক্কং করিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী ভিক্খুনিযা চীৰরং ৰিসিব্বাপেত্ৰা নেৰ সিব্বতি ন সিব্বাপনায উস্সুক্কং করোতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী ভিক্খুনিযা চীৰরং ৰিসিব্বাপেত্ৰা নেৰ সিব্বিস্সতি ন সিব্বাপনায উস্সুক্কং করিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৯৩. ‘‘যা পন ভিক্খুনী ভিক্খুনিযা চীৰরং ৰিসিব্বেত্ৰা ৰা ৰিসিব্বাপেত্ৰা ৰা সা পচ্ছা অনন্তরাযিকিনী নেৰ সিব্বেয্য ন সিব্বাপনায উস্সুক্কং করেয্য, অঞ্ঞত্র চতূহপঞ্চাহা, পাচিত্তিয’’ন্তি.

৮৯৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুনিযাতি অঞ্ঞায ভিক্খুনিযা.

চীৰরং নাম ছন্নং চীৰরানং অঞ্ঞতরং চীৰরং.

ৰিসিব্বেত্ৰাতি সযং ৰিসিব্বেত্ৰা. ৰিসিব্বাপেত্ৰাতি অঞ্ঞং ৰিসিব্বাপেত্ৰা.

সা পচ্ছা অনন্তরাযিকিনীতি অসতি অন্তরাযে.

নেৰ সিব্বেয্যাতি ন সযং সিব্বেয্য. ন সিব্বাপনায উস্সুক্কং করেয্যাতি ন অঞ্ঞং আণাপেয্য.

অঞ্ঞত্র চতূহপঞ্চাহাতি ঠপেত্ৰা চতূহপঞ্চাহং. ‘‘নেৰ সিব্বিস্সামি ন সিব্বাপনায উস্সুক্কং করিস্সামী’’তি ধুরং নিক্খিত্তমত্তে আপত্তি পাচিত্তিযস্স.

৮৯৫. উপসম্পন্নায উপসম্পন্নসঞ্ঞা চীৰরং ৰিসিব্বেত্ৰা ৰা ৰিসিব্বাপেত্ৰা ৰা সা পচ্ছা অনন্তরাযিকিনী নেৰ সিব্বতি ন সিব্বাপনায উস্সুক্কং করোতি, অঞ্ঞত্র চতূহপঞ্চাহা, আপত্তি পাচিত্তিযস্স. উপসম্পন্নায ৰেমতিকা চীৰরং ৰিসিব্বেত্ৰা ৰা ৰিসিব্বাপেত্ৰা ৰা সা পচ্ছা অনন্তরাযিকিনী নেৰ সিব্বতি ন সিব্বাপনায উস্সুক্কং করোতি, অঞ্ঞত্র চতূহপঞ্চাহা, আপত্তি পাচিত্তিযস্স. উপসম্পন্নায অনুপসম্পন্নসঞ্ঞা চীৰরং ৰিসিব্বেত্ৰা ৰা ৰিসিব্বাপেত্ৰা ৰা সা পচ্ছা অনন্তরাযিকিনী নেৰ সিব্বতি ন সিব্বাপনায উস্সুক্কং করোতি, অঞ্ঞত্র চতূহপঞ্চাহা, আপত্তি পাচিত্তিযস্স.

অঞ্ঞং পরিক্খারং ৰিসিব্বেত্ৰা ৰা ৰিসিব্বাপেত্ৰা ৰা সা পচ্ছা অনন্তরাযিকিনী নেৰ সিব্বতি ন সিব্বাপনায উস্সুক্কং করোতি, অঞ্ঞত্র চতূহপঞ্চাহা, আপত্তি দুক্কটস্স. অনুপসম্পন্নায চীৰরং ৰা অঞ্ঞং ৰা পরিক্খারং ৰিসিব্বেত্ৰা ৰা ৰিসিব্বাপেত্ৰা ৰা সা পচ্ছা অনন্তরাযিকিনী নেৰ সিব্বতি ন সিব্বাপনায উস্সুক্কং করোতি, অঞ্ঞত্র চতূহপঞ্চাহা, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৰেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.

৮৯৬. অনাপত্তি সতি অন্তরাযে, পরিযেসিত্ৰা ন লভতি, করোন্তী চতূহপঞ্চাহং অতিক্কামেতি, গিলানায, আপদাসু, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

৮৯৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিযো ভিক্খুনীনং হত্থে চীৰরং নিক্খিপিত্ৰা সন্তরুত্তরেন জনপদচারিকং পক্কমন্তি. তানি চীৰরানি চিরং নিক্খিত্তানি কণ্ণকিতানি হোন্তি. তানি ভিক্খুনিযো ওতাপেন্তি. ভিক্খুনিযো তা ভিক্খুনিযো এতদৰোচুং – ‘‘কস্সিমানি, অয্যে, চীৰরানি কণ্ণকিতানী’’তি? অথ খো তা ভিক্খুনিযো ভিক্খুনীনং এতমত্থং আরোচেসুং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো ভিক্খুনীনং হত্থে চীৰরং নিক্খিপিত্ৰা সন্তরুত্তরেন জনপদচারিকং পক্কমিস্সন্তী’’তি…পে… সচ্চং কির, ভিক্খৰে, ভিক্খুনিযো ভিক্খুনীনং হত্থে চীৰরং নিক্খিপিত্ৰা সন্তরুত্তরেন জনপদচারিকং পক্কমন্তীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো ভিক্খুনীনং হত্থে চীৰরং নিক্খিপিত্ৰা সন্তরুত্তরেন জনপদচারিকং পক্কমিস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৮৯৮. ‘‘যা পন ভিক্খুনী পঞ্চাহিকং সঙ্ঘাটিচারং [সঙ্ঘাটিৰারং (স্যা.)] অতিক্কামেয্য, পাচিত্তিয’’ন্তি.

৮৯৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পঞ্চাহিকং সঙ্ঘাটিচারং অতিক্কামেয্যাতি পঞ্চমং দিৰসং পঞ্চ চীৰরানি নেৰ নিৰাসেতি ন পারুপতি ন ওতাপেতি, পঞ্চমং দিৰসং অতিক্কামেতি, আপত্তি পাচিত্তিযস্স.

৯০০. পঞ্চাহাতিক্কন্তে অতিক্কন্তসঞ্ঞা, আপত্তি পাচিত্তিযস্স. পঞ্চাহাতিক্কন্তে ৰেমতিকা, আপত্তি পাচিত্তিযস্স. পঞ্চাহাতিক্কন্তে অনতিক্কন্তসঞ্ঞা, আপত্তি পাচিত্তিযস্স.

পঞ্চাহানতিক্কন্তে অতিক্কন্তসঞ্ঞা, আপত্তি দুক্কটস্স. পঞ্চাহানতিক্কন্তে ৰেমতিকা, আপত্তি দুক্কটস্স. পঞ্চাহানতিক্কন্তে অনতিক্কন্তসঞ্ঞা, অনাপত্তি.

৯০১. অনাপত্তি পঞ্চমং দিৰসং পঞ্চ চীৰরানি নিৰাসেতি ৰা পারুপতি ৰা ওতাপেতি ৰা, গিলানায, আপদাসু, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

৯০২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরা ভিক্খুনী পিণ্ডায চরিত্ৰা অল্লচীৰরং পত্থরিত্ৰা ৰিহারং পাৰিসি. অঞ্ঞতরা ভিক্খুনী তং চীৰরং পারুপিত্ৰা গামং পিণ্ডায পাৰিসি. সা নিক্খমিত্ৰা ভিক্খুনিযো পুচ্ছি – ‘‘অপায্যে, ময্হং চীৰরং পস্সেয্যাথা’’তি? ভিক্খুনিযো তস্সা ভিক্খুনিযা এতমত্থং আরোচেসুং. অথ খো সা ভিক্খুনী উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনী ময্হং চীৰরং অনাপুচ্ছা পারুপিস্সতী’’তি! অথ খো সা ভিক্খুনী ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী ভিক্খুনিযা চীৰরং অনাপুচ্ছা পারুপিস্সতী’’তি…পে… সচ্চং কির, ভিক্খৰে, ভিক্খুনী ভিক্খুনিযা চীৰরং অনাপুচ্ছা পারুপতীতি [পারুপীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী ভিক্খুনিযা চীৰরং অনাপুচ্ছা পারুপিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৯০৩. ‘‘যা পন ভিক্খুনী চীৰরসঙ্কমনীযং ধারেয্য, পাচিত্তিয’’ন্তি.

৯০৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

চীৰরসঙ্কমনীযং নাম উপসম্পন্নায পঞ্চন্নং চীৰরানং অঞ্ঞতরং চীৰরং তস্সা ৰা অদিন্নং তং ৰা অনাপুচ্ছা নিৰাসেতি ৰা পারুপতি ৰা, আপত্তি পাচিত্তিযস্স.

৯০৫. উপসম্পন্নায উপসম্পন্নসঞ্ঞা চীৰরসঙ্কমনীযং ধারেতি, আপত্তি পাচিত্তিযস্স. উপসম্পন্নায ৰেমতিকা চীৰরসঙ্কমনীযং ধারেতি, আপত্তি পাচিত্তিযস্স. উপসম্পন্নায অনুপসম্পন্নসঞ্ঞা চীৰরসঙ্কমনীযং ধারেতি, আপত্তি পাচিত্তিযস্স.

অনুপসম্পন্নায চীৰরসঙ্কমনীযং ধারেতি, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৰেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.

৯০৬. অনাপত্তি সা ৰা দেতি, তং ৰা আপুচ্ছা নিৰাসেতি ৰা পারুপতি ৰা, অচ্ছিন্নচীৰরিকায, নট্ঠচীৰরিকায, আপদাসু, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

৯০৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দায ভিক্খুনিযা উপট্ঠাককুলং থুল্লনন্দং ভিক্খুনিং এতদৰোচ – ‘‘ভিক্খুনিসঙ্ঘস্স, অয্যে, চীৰরং দস্সামা’’তি. থুল্লনন্দা ভিক্খুনী – ‘‘তুম্হে বহুকিচ্চা বহুকরণীযা’’তি অন্তরাযং অকাসি. তেন খো পন সমযেন তস্স কুলস্স ঘরং ডয্হতি. তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অম্হাকং দেয্যধম্মং অন্তরাযং করিস্সতি! উভযেনাম্হ পরিবাহিরা [পরিহীনা (সী.)], ভোগেহি চ পুঞ্ঞেন চা’’তি. অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা গণস্স চীৰরলাভং অন্তরাযং করিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী গণস্স চীৰরলাভং অন্তরাযং অকাসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী গণস্স চীৰরলাভং অন্তরাযং করিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৯০৮. ‘‘যা পন ভিক্খুনী গণস্স চীৰরলাভং অন্তরাযং করেয্য, পাচিত্তিয’’ন্তি.

৯০৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

গণো নাম ভিক্খুনিসঙ্ঘো ৰুচ্চতি.

চীৰরং নাম ছন্নং চীৰরানং অঞ্ঞতরং চীৰরং ৰিকপ্পনুপগং পচ্ছিমং.

অন্তরাযং করেয্যাতি ‘‘কথং ইমে চীৰরং ন [ইমং চীৰরং (ক.)] দদেয্যু’’ন্তি অন্তরাযং করোতি, আপত্তি পাচিত্তিযস্স. অঞ্ঞং পরিক্খারং অন্তরাযং করোতি, আপত্তি দুক্কটস্স. সম্বহুলানং ভিক্খুনীনং ৰা একভিক্খুনিযা ৰা অনুপসম্পন্নায ৰা চীৰরং ৰা অঞ্ঞং ৰা পরিক্খারং অন্তরাযং করোতি, আপত্তি দুক্কটস্স.

৯১০. অনাপত্তি আনিসংসং দস্সেত্ৰা নিৰারেতি, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

৯১১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খুনিসঙ্ঘস্স অকালচীৰরং উপ্পন্নং হোতি. অথ খো ভিক্খুনিসঙ্ঘো তং চীৰরং ভাজেতুকামো সন্নিপতি. তেন খো পন সমযেন থুল্লনন্দায ভিক্খুনিযা অন্তেৰাসিনিযো ভিক্খুনিযো পক্কন্তা হোন্তি. থুল্লনন্দা ভিক্খুনী তা ভিক্খুনিযো এতদৰোচ – ‘‘অয্যে, ভিক্খুনিযো পক্কন্তা, ন তাৰ চীৰরং ভাজীযিস্সতী’’তি. চীৰরৰিভঙ্গং পটিবাহি. ভিক্খুনিযো ন তাৰ চীৰরং ভাজীযিস্সতীতি পক্কমিংসু [ৰিপক্কমিংসু (স্যা.)]. থুল্লনন্দা ভিক্খুনী অন্তেৰাসিনীসু ভিক্খুনীসু আগতাসু তং চীৰরং ভাজাপেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ধম্মিকং চীৰরৰিভঙ্গং পটিবাহিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী ধম্মিকং চীৰরৰিভঙ্গং পটিবাহতীতি [পটিবাহীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী ধম্মিকং চীৰরৰিভঙ্গং পটিবাহিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৯১২. ‘‘যা পন ভিক্খুনী ধম্মিকং চীৰরৰিভঙ্গং পটিবাহেয্য, পাচিত্তিয’’ন্তি.

৯১৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ধম্মিকোনাম চীৰরৰিভঙ্গো সমগ্গো ভিক্খুনিসঙ্ঘো সন্নিপতিত্ৰা ভাজেতি.

পটিবাহেয্যাতি কথং ইমং চীৰরং ন ভাজেয্যাতি [চীৰরং ভাজেয্যাতি (ক.)] পটিবাহতি, আপত্তি পাচিত্তিযস্স.

৯১৪. ধম্মিকে ধম্মিকসঞ্ঞা পটিবাহতি, আপত্তি পাচিত্তিযস্স. ধম্মিকে ৰেমতিকা পটিবাহতি, আপত্তি দুক্কটস্স. ধম্মিকে অধম্মিকসঞ্ঞা পটিবাহতি, অনাপত্তি. অধম্মিকে ধম্মিকসঞ্ঞা, আপত্তি দুক্কটস্স. অধম্মিকে ৰেমতিকা, আপত্তি দুক্কটস্স. অধম্মিকে অধম্মিকসঞ্ঞা, অনাপত্তি.

৯১৫. অনাপত্তি আনিসংসং দস্সেত্ৰা পটিবাহতি, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

৯১৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দা ভিক্খুনী নটানম্পি নটকানম্পি লঙ্ঘকানম্পি সোকজ্ঝাযিকানম্পি [সোকসাযিকানম্পি (সী.)] কুম্ভথূণিকানম্পি [কুম্ভথুণিকানম্পি (ক.)] সমণচীৰরং দেতি – ‘‘ময্হং পরিসতি [পরিসতিং (সী.)] ৰণ্ণং ভাসথা’’তি. নটাপি নটকাপি লঙ্ঘকাপি সোকজ্ঝাযিকাপি কুম্ভথূণিকাপি থুল্লনন্দায ভিক্খুনিযা পরিসতি ৰণ্ণং ভাসন্তি – ‘‘অয্যা থুল্লনন্দা বহুস্সুতা ভাণিকা ৰিসারদা পট্টা ধম্মিং কথং কাতুং; দেথ অয্যায, করোথ অয্যাযা’’তি. যা তা ভিক্খুনিযো অপ্পিচ্ছা, তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অগারিকস্স সমণচীৰরং দস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী অগারিকস্স সমণচীৰরং দেতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী অগারিকস্স সমণচীৰরং দস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৯১৭. ‘‘যা পন ভিক্খুনী অগারিকস্স ৰা পরিব্বাজকস্স ৰা পরিব্বাজিকায ৰা সমণচীৰরং দদেয্য, পাচিত্তিয’’ন্তি.

৯১৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অগারিকো নাম যো কোচি অগারং অজ্ঝাৰসতি.

পরিব্বাজকো নাম ভিক্খুঞ্চ সামণেরঞ্চ ঠপেত্ৰা যো কোচি পরিব্বাজকসমাপন্নো.

পরিব্বাজিকা নাম ভিক্খুনিঞ্চ সিক্খমানঞ্চ সামণেরিঞ্চ ঠপেত্ৰা যা কাচি পরিব্বাজিকসমাপন্না.

সমণচীৰরং নাম কপ্পকতং ৰুচ্চতি. দেতি, আপত্তি পাচিত্তিযস্স.

৯১৯. অনাপত্তি মাতাপিতূনং দেতি, তাৰকালিকং দেতি, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৰমসিক্খাপদং

৯২০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দায ভিক্খুনিযা উপট্ঠাককুলং থুল্লনন্দং ভিক্খুনিং এতদৰোচ – ‘‘সচে মযং, অয্যে, সক্কোম, ভিক্খুনিসঙ্ঘস্স চীৰরং দস্সামা’’তি. তেন খো পন সমযেন ৰস্সংৰুট্ঠা ভিক্খুনিযো চীৰরং ভাজেতুকামা সন্নিপতিংসু. থুল্লনন্দা ভিক্খুনী তা ভিক্খুনিযো এতদৰোচ – ‘‘আগমেথ, অয্যে, অত্থি ভিক্খুনিসঙ্ঘস্স চীৰরপচ্চাসা’’তি. ভিক্খুনিযো থুল্লনন্দং ভিক্খুনিং এতদৰোচুং – ‘‘গচ্ছায্যে, তং চীৰরং জানাহী’’তি. থুল্লনন্দা ভিক্খুনী যেন তং কুলং তেনুপসঙ্কমি; উপসঙ্কমিত্ৰা তে মনুস্সে এতদৰোচ – ‘‘দেথাৰুসো, ভিক্খুনিসঙ্ঘস্স চীৰর’’ন্তি. ‘‘ন মযং, অয্যে, সক্কোম ভিক্খুনিসঙ্ঘস্স চীৰরং দাতু’’ন্তি. থুল্লনন্দা ভিক্খুনী ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা দুব্বলচীৰরপচ্চাসায চীৰরকালসমযং অতিক্কামেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী দুব্বলচীৰরপচ্চাসায চীৰরকালসমযং অতিক্কামেতীতি [অতিক্কামেসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী দুব্বলচীৰরপচ্চাসায চীৰরকালসমযং অতিক্কামেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৯২১. ‘‘যা পন ভিক্খুনী দুব্বলচীৰরপচ্চাসায চীৰরকালসমযং অতিক্কামেয্য, পাচিত্তিয’’ন্তি.

৯২২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

দুব্বলচীৰরপচ্চাসা নাম ‘‘সচে মযং সক্কোম, দস্সাম করিস্সামা’’তি ৰাচা ভিন্না হোতি.

চীৰরকালসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চ মাসা.

চীৰরকালসমযং অতিক্কামেয্যাতি অনত্থতে কথিনে ৰস্সানস্স পচ্ছিমং দিৰসং অতিক্কামেতি, আপত্তি পাচিত্তিযস্স. অত্থতে কথিনে কথিনুদ্ধারদিৰসং অতিক্কামেতি, আপত্তি পাচিত্তিযস্স.

৯২৩. দুব্বলচীৰরে দুব্বলচীৰরসঞ্ঞা চীৰরকালসমযং অতিক্কামেতি, আপত্তি পাচিত্তিযস্স. দুব্বলচীৰরে ৰেমতিকা চীৰরকালসমযং অতিক্কামেতি, আপত্তি দুক্কটস্স. দুব্বলচীৰরে অদুব্বলচীৰরসঞ্ঞা চীৰরকালসমযং অতিক্কামেতি, অনাপত্তি.

অদুব্বলচীৰরে দুব্বলচীৰরসঞ্ঞা, আপত্তি দুক্কটস্স. অদুব্বলচীৰরে ৰেমতিকা, আপত্তি দুক্কটস্স. অদুব্বলচীৰরে অদুব্বলচীৰরসঞ্ঞা, অনাপত্তি.

৯২৪. অনাপত্তি আনিসংসং দস্সেত্ৰা নিৰারেতি, উম্মত্তিকায, আদিকম্মিকাযাতি.

নৰমসিক্খাপদং নিট্ঠিতং.

১০. দসমসিক্খাপদং

৯২৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরেন উপাসকেন সঙ্ঘং উদ্দিস্স ৰিহারো কারাপিতো হোতি. সো তস্স ৰিহারস্স মহে উভতোসঙ্ঘস্স অকালচীৰরং দাতুকামো হোতি. তেন খো পন সমযেন উভতোসঙ্ঘস্স কথিনং অত্থতং হোতি. অথ খো সো উপাসকো সঙ্ঘং উপসঙ্কমিত্ৰা কথিনুদ্ধারং যাচি. ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, কথিনং উদ্ধরিতুং. এৰঞ্চ পন ভিক্খৰে কথিনং উদ্ধরিতব্বং. ব্যত্তেন ভিক্খুনা পটিবলেন সঙ্ঘো ঞাপেতব্বো –

৯২৬. ‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো কথিনং উদ্ধরেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো কথিনং উদ্ধরতি. যস্সাযস্মতো খমতি কথিনস্স উদ্ধারো, সো তুণ্হস্স; যস্স নক্খমতি, সো ভাসেয্য.

‘‘উব্ভতং সঙ্ঘেন কথিনং, খমতি সঙ্ঘস্স, তস্মা তুণ্হী, এৰমেতং ধারযামী’’তি.

৯২৭. অথ খো সো উপাসকো ভিক্খুনিসঙ্ঘং উপসঙ্কমিত্ৰা কথিনুদ্ধারং যাচি. থুল্লনন্দা ভিক্খুনী – ‘‘চীৰরং অম্হাকং ভৰিস্সতী’’তি কথিনুদ্ধারং পটিবাহি. অথ খো সো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো অম্হাকং কথিনুদ্ধারং ন দস্সন্তী’’তি! অস্সোসুং খো ভিক্খুনিযো তস্স উপাসকস্স উজ্ঝাযন্তস্স খিয্যন্তস্স ৰিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ধম্মিকং কথিনুদ্ধারং পটিবাহিস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী ধম্মিকং কথিনুদ্ধারং পটিবাহতীতি [পটিবাহীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী ধম্মিকং কথিনুদ্ধারং পটিবাহিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৯২৮. ‘‘যা পন ভিক্খুনী ধম্মিকং কথিনুদ্ধারং পটিবাহেয্য, পাচিত্তিয’’ন্তি.

৯২৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ধম্মিকো নাম কথিনুদ্ধারো সমগ্গো ভিক্খুনিসঙ্ঘো সন্নিপতিত্ৰা উদ্ধরতি.

পটিবাহেয্যাতি ‘‘কথং ইদং কথিনং ন উদ্ধরেয্যা’’তি [কথিনং উদ্ধরেয্যাতি (ক.)] পটিবাহতি, আপত্তি পাচিত্তিযস্স.

৯৩০. ধম্মিকে ধম্মিকসঞ্ঞা পটিবাহতি, আপত্তি পাচিত্তিযস্স. ধম্মিকে ৰেমতিকা পটিবাহতি, আপত্তি দুক্কটস্স. ধম্মিকে অধম্মিকসঞ্ঞা পটিবাহতি, অনাপত্তি. অধম্মিকে ধম্মিকসঞ্ঞা, আপত্তি দুক্কটস্স. অধম্মিকে ৰেমতিকা, আপত্তি দুক্কটস্স. অধম্মিকে অধম্মিকসঞ্ঞা, অনাপত্তি.

৯৩১. অনাপত্তি অনিসংসং দস্সেত্ৰা পটিবাহতি, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

নগ্গৰগ্গো ততিযো.