১০. চীৰরঅপনিধানসিক্খাপদং

৩৭৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সত্তরসৰগ্গিযা ভিক্খূ অসন্নিহিতপরিক্খারা হোন্তি. ছব্বগ্গিযা ভিক্খূ সত্তরসৰগ্গিযানং ভিক্খূনং পত্তম্পি চীৰরম্পি অপনিধেন্তি. সত্তরসৰগ্গিযা ভিক্খূ ছব্বগ্গিযে ভিক্খূ এতদৰোচুং – ‘‘দেথাৰুসো, অম্হাকং পত্তম্পি চীৰরম্পী’’তি. ছব্বগ্গিযা ভিক্খূ হসন্তি, তে রোদন্তি. ভিক্খূ এৰমাহংসু – ‘‘কিস্স তুম্হে, আৰুসো, রোদথা’’তি? ‘‘ইমে, আৰুসো, ছব্বগ্গিযা ভিক্খূ অম্হাকং পত্তম্পি চীৰরম্পি অপনিধেন্তী’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খূনং পত্তম্পি চীৰরম্পি অপনিধেস্সন্তী’’তি…পে… সচ্চং কির তুম্হে, ভিক্খৰে, ভিক্খূনং পত্তম্পি চীৰরম্পি অপনিধেথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, ভিক্খূনং পত্তম্পি চীৰরম্পি অপনিধেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৭৮. ‘‘যো পন ভিক্খু ভিক্খুস্স পত্তং ৰা চীৰরং ৰা নিসীদনং ৰা সূচিঘরং ৰা কাযবন্ধনং ৰা অপনিধেয্য ৰা অপনিধাপেয্য ৰা, অন্তমসো হসাপেক্খোপি, পাচিত্তিয’’ন্তি.

৩৭৯. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

পত্তো নাম দ্ৰে পত্তা – অযোপত্তো, মত্তিকাপত্তো.

চীৰরং নাম ছন্নং চীৰরানং অঞ্ঞতরং চীৰরং, ৰিকপ্পনুপগং পচ্ছিমং.

নিসীদনং নাম সদসং ৰুচ্চতি.

সূচিঘরং নাম সসূচিকং ৰা অসূচিকং ৰা.

কাযবন্ধনং নাম দ্ৰে কাযবন্ধনানি – পট্টিকা, সূকরন্তকং.

অপনিধেয্য ৰাতি সযং অপনিধেতি, আপত্তি পাচিত্তিযস্স.

অপনিধাপেয্য ৰাতি অঞ্ঞং আণাপেসি, আপত্তি পাচিত্তিযস্স. অপনিধাপেয্য ৰা তি অয্যং আণাপেতি, আপত্তি পাচিত্তিযস্স. সকিং আণত্তো বহুকম্পি অপনিধেতি, আপত্তি পাচিত্তিযস্স.

অন্তমসো হসাপেক্খোপীতি কীল়াধিপ্পাযো.

৩৮০. উপসম্পন্নে উপসম্পন্নসঞ্ঞী পত্তং ৰা চীৰরং ৰা নিসীদনং ৰা সূচিঘরং ৰা কাযবন্ধনং ৰা অপনিধেতি ৰা অপনিধাপেতি ৰা, অন্তমসো হসাপেক্খোপি, আপত্তি পাচিত্তিযস্স. উপসম্পন্নে ৰেমতিকো…পে… উপসম্পন্নে অনুপসম্পন্নসঞ্ঞী পত্তং ৰা চীৰরং ৰা নিসীদনং ৰা সূচিঘরং ৰা কাযবন্ধনং ৰা অপনিধেতি ৰা অপনিধাপেতি ৰা, অন্তমসো হসাপেক্খোপি, আপত্তি পাচিত্তিযস্স.

অঞ্ঞং পরিক্খারং অপনিধেতি ৰা অপনিধাপেতি ৰা, অন্তমসো হসাপেক্খোপি, আপত্তি দুক্কটস্স. অনুপসম্পন্নস্স পত্তং ৰা চীৰরং ৰা অঞ্ঞং ৰা পরিক্খারং অপনিধেতি ৰা অপনিধাপেতি ৰা, অন্তমসো হসাপেক্খোপি, আপত্তি দুক্কটস্স. অনুপসম্পন্নে উপসম্পন্নসঞ্ঞী, আপত্তি দুক্কটস্স. অনুপসম্পন্নে ৰেমতিকো, আপত্তি দুক্কটস্স. অনুপসম্পন্নে অনুপসম্পন্নসঞ্ঞী, আপত্তি দুক্কটস্স.

৩৮১. অনাপত্তি নহসাধিপ্পাযো, দুন্নিক্খিত্তং পটিসামেতি, ‘‘ধম্মিং কথং কত্ৰা দস্সামী’’তি পটিসামেতি, উম্মত্তকস্স, আদিকম্মিকস্সাতি.

চীৰরঅপনিধানসিক্খাপদং নিট্ঠিতং দসমং.

সুরাপানৰগ্গো ছট্ঠো.

তস্সুদ্দানং –

সুরা অঙ্গুলি হাসো চ [তোযঞ্চ (ইতিপি)], অনাদরিযঞ্চ ভিংসনং;

জোতিনহানদুব্বণ্ণং, সামং অপনিধেন চাতি.