৯. পণীতভোজনসিক্খাপদং

২৫৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ পণীতভোজনানি অত্তনো অত্থায ৰিঞ্ঞাপেত্ৰা ভুঞ্জন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিস্সন্তি! কস্স সম্পন্নং ন মনাপং, কস্স সাদুং ন রুচ্চতী’’তি!! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিস্সন্তী’’তি …পে… সচ্চং কির তুম্হে, ভিক্খৰে, পণীতভোজনানি অত্তনো অত্থায ৰিঞ্ঞাপেত্ৰা ভুঞ্জথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা …পে… কথঞ্হি নাম তুম্হে, মোঘপুরিসা, পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যানি খো পন তানি পণীতভোজনানি, সেয্যথিদং – সপ্পি নৰনীতং তেলং মধু ফাণিতং মচ্ছো মংসং খীরং দধি. যো পন ভিক্খু এৰরূপানি পণীতভোজনানি অত্তনো অত্থায ৰিঞ্ঞাপেত্ৰা ভুঞ্জেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

২৫৮. তেন খো পন সমযেন ভিক্খূ গিলানা হোন্তি. গিলানপুচ্ছকা ভিক্খূ গিলানে ভিক্খূ এতদৰোচুং – ‘‘কচ্চাৰুসো খমনীযং, কচ্চি যাপনীয’’ন্তি? ‘‘পুব্বে মযং, আৰুসো, পণীতভোজনানি অত্তনো অত্থায ৰিঞ্ঞাপেত্ৰা ভুঞ্জাম, তেন নো ফাসু হোতি; ইদানি পন ‘‘ভগৰতা পটিক্খিত্ত’’ন্তি কুক্কুচ্চাযন্তা ন ৰিঞ্ঞাপেম, তেন নো ন ফাসু হোতী’’তি. ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৫৯. ‘‘যানি খো পন তানি পণীতভোজনানি, সেয্যথিদং – সপ্পি নৰনীতং তেলং মধু ফাণিতং মচ্ছো মংসং খীরং দধি. যো পন ভিক্খু এৰরূপানি পণীতভোজনানি অগিলানো অত্তনো অত্থায ৰিঞ্ঞাপেত্ৰা ভুঞ্জেয্য, পাচিত্তিয’’ন্তি.

২৬০. যানি খো পন তানি পণীতভোজনানীতি সপ্পি নাম গোসপ্পি ৰা অজিকাসপ্পি ৰা মহিংসসপ্পি ৰা, যেসং মংসং কপ্পতি তেসং সপ্পি.

নৰনীতং নাম তেসঞ্ঞেৰ নৰনীতং.

তেলং নাম তিলতেলং সাসপতেলং মধুকতেলং এরণ্ডতেলং ৰসাতেলং.

মধু নাম মক্খিকামধু.

ফাণিতং নাম উচ্ছুম্হা নিব্বত্তং.

মচ্ছো নাম উদকো [উদকচরো (স্যা. ক.)] ৰুচ্চতি.

মংসং নাম যেসং মংসং কপ্পতি, তেসং মংসং.

খীরং নাম গোখীরং ৰা অজিকাখীরং ৰা মহিংসখীরং ৰা, যেসং মংসং কপ্পতি, তেসং খীরং.

দধি নাম তেসঞ্ঞেৰ দধি.

যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

এৰরূপানি পণীতভোজনানীতি তথারূপানি পণীতভোজনানি.

অগিলানো নাম যস্স ৰিনা পণীতভোজনানি ফাসু হোতি.

গিলানো নাম যস্স ৰিনা পণীতভোজনানি ন ফাসু হোতি.

অগিলানো অত্তনো অত্থায ৰিঞ্ঞাপেতি, পযোগে [পযোগে পযোগে (ক.)] দুক্কটং. পটিলাভেন ‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি পাচিত্তিযস্স.

২৬১. অগিলানো অগিলানসঞ্ঞী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স. অগিলানো ৰেমতিকো পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স. অগিলানো গিলানসঞ্ঞী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স.

গিলানো অগিলানসঞ্ঞী, আপত্তি দুক্কটস্স. গিলানো ৰেমতিকো, আপত্তি দুক্কটস্স. গিলানো গিলানসঞ্ঞী অনাপত্তি.

২৬২. অনাপত্তি গিলানস্স, গিলানো হুত্ৰা ৰিঞ্ঞাপেত্ৰা অগিলানো ভুঞ্জতি, গিলানস্স সেসকং ভুঞ্জতি, ঞাতকানং পৰারিতানং অঞ্ঞস্সত্থায অত্তনো ধনেন, উম্মত্তকস্স, আদিকম্মিকস্সাতি.

পণীতভোজনসিক্খাপদং নিট্ঠিতং নৰমং.