১০. দন্তপোনসিক্খাপদং

২৬৩. তেন সমযেন বুদ্ধো ভগৰা ৰেসালিযং ৰিহরতি মহাৰনে কূটাগারসালাযং. তেন খো পন সমযেন অঞ্ঞতরো ভিক্খু সব্বপংসুকূলিকো সুসানে ৰিহরতি. সো মনুস্সেহি দিয্যমানং ন ইচ্ছতি পটিগ্গহেতুং, সুসানেপি রুক্খমূলেপি উম্মারেপি অয্যৰোসাটিতকানি সামং গহেত্ৰা পরিভুঞ্জতি [ভুঞ্জতি (স্যা.)]. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অযং ভিক্খু অম্হাকং অয্যৰোসাটিতকানি সামং গহেত্ৰা পরিভুঞ্জিস্সতি! থেরোযং ভিক্খু ৰঠরো মনুস্সমংসং মঞ্ঞে খাদতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু অদিন্নং মুখদ্ৰারং আহারং আহরিস্সতী’’তি…পে… সচ্চং কির ত্ৰং, ভিক্খু, অদিন্নং মুখদ্ৰারং আহারং আহরসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, অদিন্নং মুখদ্ৰারং আহারং আহরিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু অদিন্নং মুখদ্ৰারং আহারং আহরেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

২৬৪. তেন খো পন সমযেন ভিক্খূ উদকদন্তপোনে [উদকদন্তপোণে (স্যা. ক.)] কুক্কুচ্চাযন্তি. ভগৰতো এতমত্থং আরোচেসুং…পে… ‘‘অনুজানামি, ভিক্খৰে, উদকদন্তপোনং সামং গহেত্ৰা পরিভুঞ্জিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৬৫. ‘‘যো পন ভিক্খু অদিন্নং মুখদ্ৰারং আহারং আহরেয্য, অঞ্ঞত্র উদকদন্তপোনা, পাচিত্তিয’’ন্তি.

২৬৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অদিন্নং নাম অপ্পটিগ্গহিতকং ৰুচ্চতি.

দিন্নং নাম কাযেন ৰা কাযপটিবদ্ধেন ৰা নিস্সগ্গিযেন ৰা দেন্তে হত্থপাসে ঠিতো কাযেন ৰা কাযপটিবদ্ধেন ৰা পটিগ্গণ্হাতি, এতং দিন্নং নাম.

আহারো নাম উদকদন্তপোনং ঠপেত্ৰা যংকিঞ্চি অজ্ঝোহরণীযং, এসো আহারো নাম.

অঞ্ঞত্র উদকদন্তপোনাতি ঠপেত্ৰা উদকদন্তপোনং.

‘‘খাদিস্সামি ভুঞ্জিস্সামী’’তি গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি পাচিত্তিযস্স.

২৬৭. অপ্পটিগ্গহিতকে অপ্পটিগ্গহিতকসঞ্ঞী অদিন্নং মুখদ্ৰারং আহারং আহারেতি, অঞ্ঞত্র উদকদন্তপোনা, আপত্তি পাচিত্তিযস্স. অপ্পটিগ্গহিতকে ৰেমতিকো অদিন্নং মুখদ্ৰারং আহারং আহারেতি, অঞ্ঞত্র উদকদন্তপোনা, আপত্তি পাচিত্তিযস্স. অপ্পটিগ্গহিতকে পটিগ্গহিতকসঞ্ঞী অদিন্নং মুখদ্ৰারং আহারং আহারেতি, অঞ্ঞত্র উদকদন্তপোনা, আপত্তি পাচিত্তিযস্স.

পটিগ্গহিতকে অপ্পটিগ্গহিতকসঞ্ঞী, আপত্তি দুক্কটস্স. পটিগ্গহিতকে ৰেমতিকো, আপত্তি দুক্কটস্স. পটিগ্গহিতকে পটিগ্গহিতকসঞ্ঞী, অনাপত্তি.

২৬৮. অনাপত্তি উদকদন্তপোনে, চত্তারি মহাৰিকতানি সতি পচ্চযে অসতি কপ্পিযকারকে সামং গহেত্ৰা পরিভুঞ্জতি, উম্মত্তকস্স, আদিকম্মিকস্সাতি.

দন্তপোনসিক্খাপদং নিট্ঠিতং দসমং.

ভোজনৰগ্গো চতুত্থো.

তস্সুদ্দানং –

পিণ্ডো গণং পরং পূৰং, দ্ৰে চ ৰুত্তা পৰারণা;

ৰিকালে সন্নিধী খীরং, দন্তপোনেন তে দসাতি.