৫. অচেলকৰগ্গো

১. অচেলকসিক্খাপদং

২৬৯. তেন সমযেন বুদ্ধো ভগৰা ৰেসালিযং ৰিহরতি মহাৰনে কূটাগারসালাযং. তেন খো পন সমযেন সঙ্ঘস্স খাদনীযং উস্সন্নং হোতি. অথ খো আযস্মা আনন্দো ভগৰতো এতমত্থং আরোচেসি. ‘‘তেনহানন্দ, ৰিঘাসাদানং পূৰং দেহী’’তি. ‘‘এৰং ভন্তে’’তি খো আযস্মা আনন্দো ভগৰতো পটিস্সুণিত্ৰা ৰিঘাসাদে পটিপাটিযা নিসীদাপেত্ৰা একেকং পূৰং দেন্তো অঞ্ঞতরিস্সা পরিব্বাজিকায একং মঞ্ঞমানো দ্ৰে পূৰে অদাসি. সামন্তা পরিব্বাজিকাযো তং পরিব্বাজিকং এতদৰোচুং – ‘‘জারো তে এসো সমণো’’তি. ‘‘ন মে সো সমণো জারো, একং মঞ্ঞমানো দ্ৰে পূৰে অদাসী’’তি. দুতিযম্পি খো…পে… ততিযম্পি খো আযস্মা আনন্দো একেকং পূৰং দেন্তো তস্সাযেৰ পরিব্বাজিকায একং মঞ্ঞমানো দ্ৰে পূৰে অদাসি. সামন্তা পরিব্বাজিকাযো তং পরিব্বাজিকং এতদৰোচুং – ‘‘জারো তে এসো সমণো’’তি. ‘‘ন মে সো সমণো জারো, একং মঞ্ঞমানো দ্ৰে পূৰে অদাসী’’তি. ‘‘জারো ন জারো’’তি ভণ্ডিংসু. অঞ্ঞতরোপি আজীৰকো পরিৰেসনং অগমাসি. অঞ্ঞতরো ভিক্খু পহূতেন সপ্পিনা ওদনং মদ্দিত্ৰা তস্স আজীৰকস্স মহন্তং পিণ্ডং অদাসি. অথ খো সো আজীৰকো তং পিণ্ডং আদায অগমাসি. অঞ্ঞতরো আজীৰকো তং আজীৰকং এতদৰোচ – ‘‘কুতো তযা, আৰুসো, পিণ্ডো লদ্ধো’’তি? ‘‘তস্সাৰুসো, সমণস্স গোতমস্স মুণ্ডগহপতিকস্স পরিৰেসনায লদ্ধো’’তি.

অস্সোসুং খো উপাসকা তেসং আজীৰকানং ইমং কথাসল্লাপং. অথ খো তে উপাসকা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে উপাসকা ভগৰন্তং এতদৰোচুং – ‘‘ইমে, ভন্তে, তিত্থিযা অৰণ্ণকামা বুদ্ধস্স অৰণ্ণকামা ধম্মস্স অৰণ্ণকামা সঙ্ঘস্স. সাধু, ভন্তে, অয্যা তিত্থিযানং সহত্থা ন দদেয্যু’’ন্তি. অথ খো ভগৰা তে উপাসকে ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো তে উপাসকা ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কমিংসু. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, ভিক্খূনং সিক্খাপদং পঞ্ঞপেস্সামি দস অত্থৰসে পটিচ্চ – সঙ্ঘসুট্ঠুতায, সঙ্ঘফাসুতায …পে… সদ্ধম্মট্ঠিতিযা, ৰিনযানুগ্গহায. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৭০. ‘‘যো পন ভিক্খু অচেলকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযং ৰা ভোজনীযং ৰা দদেয্য, পাচিত্তিয’’ন্তি.

২৭১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অচেলকো নাম যো কোচি পরিব্বাজকসমাপন্নো নগ্গো.

পরিব্বাজকো নাম ভিক্খুঞ্চ সামণেরঞ্চ ঠপেত্ৰা যো কোচি পরিব্বাজকসমাপন্নো.

পরিব্বাজিকা নাম ভিক্খুনিঞ্চ সিক্খমানঞ্চ সামণেরিঞ্চ ঠপেত্ৰা যা কাচি পরিব্বাজিকসমাপন্না.

খাদনীযং নাম পঞ্চ ভোজনানি – উদকদন্তপোনং ঠপেত্ৰা অৰসেসং খাদনীযং নাম.

ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং.

দদেয্যাতি কাযেন ৰা কাযপটিবদ্ধেন ৰা নিস্সগ্গিযেন ৰা দেতি, আপত্তি পাচিত্তিযস্স.

২৭২. তিত্থিযে তিত্থিযসঞ্ঞী সহত্থা খাদনীযং ৰা ভোজনীযং ৰা দেতি, আপত্তি পাচিত্তিযস্স. তিত্থিযে ৰেমতিকো সহত্থা খাদনীযং ৰা ভোজনীযং ৰা দেতি, আপত্তি পাচিত্তিযস্স. তিত্থিযে অতিত্থিযসঞ্ঞী সহত্থা খাদনীযং ৰা ভোজনীযং ৰা দেতি, আপত্তি পাচিত্তিযস্স.

উদকদন্তপোনং দেতি, আপত্তি দুক্কটস্স. অতিত্থিযে তিত্থিযসঞ্ঞী, আপত্তি দুক্কটস্স. অতিত্থিযে ৰেমতিকো, আপত্তি দুক্কটস্স. অতিত্থিযে অতিত্থিযসঞ্ঞী, অনাপত্তি.

২৭৩. অনাপত্তি দাপেতি ন দেতি, উপনিক্খিপিত্ৰা দেতি, বাহিরালেপং দেতি, উম্মত্তকস্স, আদিকম্মিকস্সাতি.

অচেলকসিক্খাপদং নিট্ঠিতং পঠমং.

২. উয্যোজনসিক্খাপদং

২৭৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো ভাতুনো সদ্ধিৰিহারিকং ভিক্খুং এতদৰোচ – ‘‘এহাৰুসো, গামং পিণ্ডায পৰিসিস্সামা’’তি. তস্স অদাপেত্ৰা উয্যোজেসি – ‘‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’’তি. অথ খো সো ভিক্খু উপকট্ঠে কালে নাসক্খি পিণ্ডায চরিতুং, পটিক্কমনেপি ভত্তৰিস্সগ্গং ন সম্ভাৰেসি, ছিন্নভত্তো অহোসি. অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো ভিক্খুং – ‘এহাৰুসো, গামং পিণ্ডায পৰিসিস্সামা’তি তস্স অদাপেত্ৰা উয্যোজেস্সতী’’তি …পে… সচ্চং কির ত্ৰং, উপনন্দ, ভিক্খুং – ‘‘এহাৰুসো, গামং পিণ্ডায পৰিসিস্সামা’’তি তস্স অদাপেত্ৰা উয্যোজেসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, ভিক্খুং – ‘‘এহাৰুসো, গামং পিণ্ডায পৰিসিস্সামা’’তি তস্স অদাপেত্ৰা উয্যোজেস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৭৫. ‘‘যো পন ভিক্খু ভিক্খুং – ‘‘এহাৰুসো, গামং ৰা নিগমং ৰা পিণ্ডায পৰিসিস্সামা’তি তস্স দাপেত্ৰা ৰা অদাপেত্ৰা ৰা উয্যোজেয্য – ‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’তি, এতদেৰ পচ্চযং করিত্ৰা অনঞ্ঞং, পাচিত্তিয’’ন্তি.

২৭৬. যো পনাতি যো, যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুন্তি অঞ্ঞং ভিক্খুং.

এহাৰুসো, গামং ৰা নিগমং ৰাতি গামোপি নিগমোপি নগরম্পি, গামো চেৰ নিগমো চ.

তস্স দাপেত্ৰাতি যাগুং ৰা ভত্তং ৰা খাদনীযং ৰা ভোজনীযং ৰা দাপেত্ৰা.

অদাপেত্ৰাতি ন কিঞ্চি দাপেত্ৰা.

উয্যোজেয্যাতি মাতুগামেন সদ্ধিং হসিতুকামো কীল়িতুকামো রহো নিসীদিতুকামো অনাচারং আচরিতুকামো এৰং ৰদেতি – ‘‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’’তি উয্যোজেতি, আপত্তি দুক্কটস্স. দস্সনূপচারং ৰা সৰনূপচারং ৰা ৰিজহন্তস্স আপত্তি দুক্কটস্স. ৰিজহিতে, আপত্তি পাচিত্তিযস্স.

এতদেৰ পচ্চযং করিত্ৰা অনঞ্ঞন্তি ন অঞ্ঞো কোচি পচ্চযো হোতি উয্যোজেতুং.

২৭৭. উপসম্পন্নে উপসম্পন্নসঞ্ঞী উয্যোজেতি, আপত্তি পাচিত্তিযস্স. উপসম্পন্নে ৰেমতিকো উয্যোজেতি, আপত্তি পাচিত্তিযস্স. উপসম্পন্নে অনুপসম্পন্নসঞ্ঞী উয্যোজেতি, আপত্তি পাচিত্তিযস্স.

কলিসাসনং আরোপেতি, আপত্তি দুক্কটস্স. অনুপসম্পন্নং উয্যোজেতি, আপত্তি দুক্কটস্স. কলিসাসনং আরোপেতি, আপত্তি দুক্কটস্স. অনুপসম্পন্নে উপসম্পন্নসঞ্ঞী, আপত্তি দুক্কটস্স. অনুপসম্পন্নে ৰেমতিকো, আপত্তি দুক্কটস্স. অনুপসম্পন্নে অনুপসম্পন্নসঞ্ঞী, আপত্তি দুক্কটস্স.

২৭৮. অনাপত্তি ‘‘উভো একতো ন যাপেস্সামা’’তি উয্যোজেতি, ‘‘মহগ্ঘং ভণ্ডং পস্সিত্ৰা লোভধম্মং উপ্পাদেস্সতী’’তি উয্যোজেতি, ‘‘মাতুগামং পস্সিত্ৰা অনভিরতিং উপ্পাদেস্সতী’’তি উয্যোজেতি, ‘‘গিলানস্স ৰা ওহিয্যকস্স ৰা ৰিহারপালস্স ৰা যাগুং ৰা ভত্তং ৰা খাদনীযং ৰা ভোজনীযং ৰা নীহরা’’তি উয্যোজেতি, ন অনাচারং আচরিতুকামো, সতি করণীযে উয্যোজেতি, উম্মত্তকস্স, আদিকম্মিকস্সাতি.

উয্যোজনসিক্খাপদং নিট্ঠিতং দুতিযং.

৩. সভোজনসিক্খাপদং

২৭৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো সহাযকস্স ঘরং গন্ত্ৰা তস্স পজাপতিযা সদ্ধিং সযনিঘরে [সযনীঘরে (স্যা.)] নিসজ্জং কপ্পেসি. অথ খো সো পুরিসো যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৰা আযস্মন্তং উপনন্দং সক্যপুত্তং অভিৰাদেত্ৰা একমন্তং নিসীদি. একমন্তং নিসিন্নো খো সো পুরিসো পজাপতিং এতদৰোচ – ‘‘দদেহায্যস্স ভিক্খ’’ন্তি. অথ খো সা ইত্থী আযস্মতো উপনন্দস্স সক্যপুত্তস্স ভিক্খং অদাসি. অথ খো সো পুরিসো আযস্মন্তং উপনন্দং সক্যপুত্তং এতদৰোচ – ‘‘গচ্ছথ, ভন্তে, যতো অয্যস্স ভিক্খা দিন্না’’তি. অথ খো সা ইত্থী সল্লক্খেত্ৰা – ‘‘পরিযুট্ঠিতো অযং পুরিসো’’তি, আযস্মন্তং উপনন্দং সক্যপুত্তং এতদৰোচ – ‘‘নিসীদথ, ভন্তে, মা অগমিত্থা’’তি. দুতিযম্পি খো সো পুরিসো…পে… ততিযম্পি খো সো পুরিসো আযস্মন্তং উপনন্দং সক্যপুত্তং এতদৰোচ – ‘‘গচ্ছথ, ভন্তে, যতো অয্যস্স ভিক্খা দিন্না’’তি. ততিযম্পি খো সা ইত্থী আযস্মন্তং উপনন্দং সক্যপুত্তং এতদৰোচ – ‘‘নিসীদথ, ভন্তে, মা অগমিত্থা’’তি.

অথ খো সো পুরিসো নিক্খমিত্ৰা ভিক্খূ উজ্ঝাপেসি – ‘‘অযং, ভন্তে, অয্যো উপনন্দো ময্হং পজাপতিযা সদ্ধিং সযনিঘরে নিসিন্নো. সো মযা উয্যোজীযমানো ন ইচ্ছতি গন্তুং. বহুকিচ্চা মযং বহুকরণীযা’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো সভোজনে কুলে অনুপখজ্জ নিসজ্জং কপ্পেস্সতী’’তি…পে… সচ্চং কির ত্ৰং, উপনন্দ, সভোজনে কুলে অনুপখজ্জ নিসজ্জং কপ্পেসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, সভোজনে কুলে অনুপখজ্জ নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৮০. ‘‘যো পন ভিক্খু সভোজনে কুলে অনুপখজ্জ নিসজ্জং কপ্পেয্য, পাচিত্তিয’’ন্তি.

২৮১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সভোজনং নাম কুলং ইত্থী চেৰ হোতি পুরিসো চ, ইত্থী চ পুরিসো চ উভো অনিক্খন্তা হোন্তি, উভো অৰীতরাগা.

অনুপখজ্জাতি অনুপৰিসিত্ৰা.

নিসজ্জং কপ্পেয্যাতি মহল্লকে ঘরে পিট্ঠসঙ্ঘাটস্স [পিট্ঠিসঙ্ঘাটস্স (স্যা.)] হত্থপাসং ৰিজহিত্ৰা নিসীদতি, আপত্তি পাচিত্তিযস্স. খুদ্দকে ঘরে পিট্ঠিৰংসং অতিক্কমিত্ৰা নিসীদতি, আপত্তি পাচিত্তিযস্স.

২৮২. সযনিঘরে সযনিঘরসঞ্ঞী সভোজনে কুলে অনুপখজ্জ নিসজ্জং কপ্পেতি, আপত্তি পাচিত্তিযস্স. সযনিঘরে ৰেমতিকো সভোজনে কুলে অনুপখজ্জ নিসজ্জং কপ্পেতি, আপত্তি পাচিত্তিযস্স. সযনিঘরে নসযনিঘরসঞ্ঞী সভোজনে কুলে অনুপখজ্জ নিসজ্জং কপ্পেতি, আপত্তি পাচিত্তিযস্স.

নসযনিঘরে সযনিঘরসঞ্ঞী, আপত্তি দুক্কটস্স. নসযনিঘরে ৰেমতিকো, আপত্তি দুক্কটস্স. নসযনিঘরে নসযনিঘরসঞ্ঞী, অনাপত্তি.

২৮৩. অনাপত্তি মহল্লকে ঘরে পিট্ঠসঙ্ঘাটস্স হত্থপাসং অৰিজহিত্ৰা নিসীদতি, খুদ্দকে ঘরে পিট্ঠিৰংসং অনতিক্কমিত্ৰা নিসীদতি, ভিক্খু দুতিযো হোতি, উভো নিক্খন্তা হোন্তি, উভো ৰীতরাগা, নসযনিঘরে, উম্মত্তকস্স, আদিকম্মিকস্সাতি.

সভোজনসিক্খাপদং নিট্ঠিতং ততিযং.

৪. রহোপটিচ্ছন্নসিক্খাপদং

২৮৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো সহাযকস্স ঘরং গন্ত্ৰা তস্স পজাপতিযা সদ্ধিং রহো পটিচ্ছন্নে আসনে নিসজ্জং কপ্পেসি. অথ খো সো পুরিসো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উপনন্দো ময্হং পজাপতিযা সদ্ধিং রহো পটিচ্ছন্নে আসনে নিসজ্জং কপ্পেস্সতী’’তি! অস্সোসুং খো ভিক্খূ তস্স পুরিসস্স উজ্ঝাযন্তস্স খিয্যন্তস্স ৰিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – কথঞ্হি নাম আযস্মা উপনন্দো সক্যপুত্তো মাতুগামেন সদ্ধিং রহো পটিচ্ছন্নে আসনে নিসজ্জং কপ্পেস্সতীতি…পে… সচ্চং কির ত্ৰং, উপনন্দ, মাতুগামেন সদ্ধিং রহো পটিচ্ছন্নে আসনে নিসজ্জং কপ্পেসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, মাতুগামেন সদ্ধিং রহো পটিচ্ছন্নে আসনে নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৮৫. ‘‘যো পন ভিক্খু মাতুগামেন সদ্ধিং রহো পটিচ্ছন্নে আসনে নিসজ্জং কপ্পেয্য, পাচিত্তিয’’ন্তি.

২৮৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী, ন যক্খী ন পেতী ন তিরচ্ছানগতা, অন্তমসো তদহুজাতাপি দারিকা, পগেৰ মহত্তরী.

সদ্ধিন্তি একতো.

[পাচি. ২০০,২৯১; পারা. ৪৪৫,৪৫৪] রহো নাম চক্খুস্স রহো সোতস্স রহো. চক্খুস্স রহো নাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং. সোতস্স রহো নাম ন সক্কা হোতি পকতিকথা সোতুং.

[পারা. ৪৪৫] পটিচ্ছন্নং নাম আসনং কুট্টেন [কুড্ডেন (সী. স্যা.)] ৰা কৰাটেন ৰা কিলঞ্জেন ৰা সাণিপাকারেন ৰা রুক্খেন ৰা থম্ভেন ৰা কোত্থল়িযা [কোট্ঠল়িযা (সী. স্যা.) কোত্থল়িকায (ক.)] ৰা, যেন কেনচি পটিচ্ছন্নং হোতি.

নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স. ভিক্খু নিসিন্নে মাতুগামো উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স. উভো ৰা নিসিন্না হোন্তি উভো ৰা নিপন্না, আপত্তি পাচিত্তিযস্স.

২৮৭. মাতুগামে মাতুগামসঞ্ঞী রহো পটিচ্ছন্নে আসনে নিসজ্জং কপ্পেতি, আপত্তি পাচিত্তিযস্স. মাতুগামে ৰেমতিকো রহো পটিচ্ছন্নে আসনে নিসজ্জং কপ্পেতি, আপত্তি পাচিত্তিযস্স. মাতুগামে অমাতুগামসঞ্ঞী রহো পটিচ্ছন্নে আসনে নিসজ্জং কপ্পেতি, আপত্তি পাচিত্তিযস্স.

যক্খিযা ৰা পেতিযা ৰা পণ্ডকেন ৰা তিরচ্ছানগতায ৰা মনুস্সৰিগ্গহিত্থিযা ৰা সদ্ধিং রহো পটিচ্ছন্নে আসনে নিসজ্জং কপ্পেতি, আপত্তি দুক্কটস্স. অমাতুগামে মাতুগামসঞ্ঞী, আপত্তি দুক্কটস্স. অমাতুগামে ৰেমতিকো, আপত্তি দুক্কটস্স. অমাতুগামে অমাতুগামসঞ্ঞী, অনাপত্তি.

২৮৮. অনাপত্তি যো কোচি ৰিঞ্ঞূ পুরিসো দুতিযো হোতি, তিট্ঠতি ন নিসীদতি, অরহোপেক্খো, অঞ্ঞৰিহিতো নিসীদতি, উম্মত্তকস্স, আদিকম্মিকস্সাতি.

রহোপটিচ্ছন্নসিক্খাপদং নিট্ঠিতং চতুত্থং.

৫. রহোনিসজ্জসিক্খাপদং

২৮৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো সহাযকস্স ঘরং গন্ত্ৰা তস্স পজাপতিযা সদ্ধিং একো একায রহো নিসজ্জং কপ্পেসি. অথ খো সো পুরিসো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উপনন্দো ময্হং পজাপতিযা সদ্ধিং একো একায রহো নিসজ্জং কপ্পেস্সতী’’তি! অস্সোসুং খো ভিক্খূ তস্স পুরিসস্স উজ্ঝাযন্তস্স খিয্যন্তস্স ৰিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো মাতুগামেন সদ্ধিং একো একায রহো নিসজ্জং কপ্পেস্সতী’’তি…পে… সচ্চং কির ত্ৰং, উপনন্দ, মাতুগামেন সদ্ধিং একো একায রহো নিসজ্জং কপ্পেসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, মাতুগামেন সদ্ধিং একো একায রহো নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পাসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৯০. ‘‘যো পন ভিক্খু মাতুগামেন সদ্ধিং একো একায রহো নিসজ্জং কপ্পেয্য, পাচিত্তিয’’ন্তি.

২৯১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী, ন যক্খী ন পেতী ন তিরচ্ছানগতা, ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

সদ্ধিন্তি একতো.

একো একাযাতি ভিক্খু চেৰ হোতি মাতুগামো চ.

[পাচি. ২০০,২৮৬; পারা. ৪৪৫,৪৫৪] রহো নাম চক্খুস্স রহো, সোতস্স রহো. চক্খুস্স রহো নাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং. সোতস্স রহো নাম ন সক্কা হোতি পকতিকথা সোতুং.

২৯২. মাতুগামে মাতুগামসঞ্ঞী একো একায রহো নিসজ্জং কপ্পেতি, আপত্তি পাচিত্তিযস্স. মাতুগামে ৰেমতিকো একো একায রহো নিসজ্জং কপ্পেতি, আপত্তি পাচিত্তিযস্স. মাতুগামে অমাতুগামসঞ্ঞী একো একায রহো নিসজ্জং কপ্পেতি, আপত্তি পাচিত্তিযস্স.

যক্খিযা ৰা পেতিযা ৰা পণ্ডকেন ৰা তিরচ্ছানগতমনুস্সৰিগ্গহিত্থিযা ৰা [তিরচ্ছানগতায ৰা মনুস্সৰিগ্গহিত্থিযা ৰা (ক.)] সদ্ধিং একো একায রহো নিসজ্জং কপ্পেতি, আপত্তি দুক্কটস্স. অমাতুগামে মাতুগামসঞ্ঞী, আপত্তি দুক্কটস্স. অমাতুগামে ৰেমতিকো, আপত্তি দুক্কটস্স. অমাতুগামে অমাতুগামসঞ্ঞী, অনাপত্তি.

২৯৩. অনাপত্তি যো কোচি ৰিঞ্ঞূ পুরিসো দুতিযো হোতি, তিট্ঠতি ন নিসীদতি, অরহোপেক্খো অঞ্ঞৰিহিতো নিসীদতি, উম্মত্তকস্স, আদিকম্মিকস্সাতি.

রহোনিসজ্জসিক্খাপদং নিট্ঠিতং পঞ্চমং.

৬. চারিত্তসিক্খাপদং

২৯৪. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আযস্মতো উপনন্দস্স সক্যপুত্তস্স উপট্ঠাককুলং আযস্মন্তং উপনন্দং সক্যপুত্তং ভত্তেন নিমন্তেসি. অঞ্ঞেপি ভিক্খূ ভত্তেন নিমন্তেসি. তেন খো পন সমযেন আযস্মা উপনন্দো সক্যপুত্তো পুরেভত্তং, কুলানি পযিরুপাসতি. অথ খো তে ভিক্খূ তে মনুস্সে এতদৰোচুং – ‘‘দেথাৰুসো ভত্ত’’ন্তি. ‘‘আগমেথ, ভন্তে, যাৰায্যো উপনন্দো আগচ্ছতী’’তি. দুতিযম্পি খো তে ভিক্খূ…পে… ততিযম্পি খো তে ভিক্খূ তে মনুস্সে এতদৰোচুং – ‘‘দেথাৰুসো, ভত্তং; পুরে কালো অতিক্কমতী’’তি. ‘‘যম্পি মযং, ভন্তে, ভত্তং করিম্হা অয্যস্স উপনন্দস্স কারণা. আগমেথ, ভন্তে, যাৰায্যো উপনন্দো আগচ্ছতী’’তি.

অথ খো আযস্মা উপনন্দো সক্যপুত্তো পুরেভত্তং কুলানি পযিরুপাসিত্ৰা দিৰা আগচ্ছতি. ভিক্খূ ন চিত্তরূপং ভুঞ্জিংসু. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো নিমন্তিতো সভত্তো সমানো পুরেভত্তং কুলেসু চারিত্তং আপজ্জিস্সতী’’তি…পে… সচ্চং কির ত্ৰং, উপনন্দ, নিমন্তিতো সভত্তো সমানো পুরেভত্তং কুলেসু চারিত্তং আপজ্জসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, নিমন্তিতো সভত্তো সমানো পুরেভত্তং কুলেসু চারিত্তং আপজ্জিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু নিমন্তিতো সভত্তো সমানো পুরেভত্তং কুলেসু চারিত্তং আপজ্জেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

২৯৫. [মহাৰ. ২৭৭] তেন খো পন সমযেন আযস্মতো উপনন্দস্স সক্যপুত্তস্স উপট্ঠাককুলং সঙ্ঘস্সত্থায খাদনীযং পাহেসি – ‘‘অয্যস্স উপনন্দস্স দস্সেত্ৰা সঙ্ঘস্স দাতব্ব’’ন্তি. তেন খো পন সমযেন আযস্মা উপনন্দো সক্যপুত্তো গামং পিণ্ডায পৰিট্ঠো হোতি. অথ খো তে মনুস্সা আরামং গন্ত্ৰা ভিক্খূ পুচ্ছিংসু – ‘‘কহং, ভন্তে, অয্যো উপনন্দো’’তি? ‘‘এসাৰুসো, আযস্মা উপনন্দো সক্যপুত্তো গামং পিণ্ডায পৰিট্ঠো’’তি. ‘‘ইদং, ভন্তে, খাদনীযং অয্যস্স উপনন্দস্স দস্সেত্ৰা সঙ্ঘস্স দাতব্ব’’ন্তি. ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, পটিগ্গহেত্ৰা নিক্খিপথ যাৰ উপনন্দো আগচ্ছতী’’তি.

অথ খো আযস্মা উপনন্দো সক্যপুত্তো – ‘‘ভগৰতা পটিক্খিত্তং পুরেভত্তং কুলেসু চারিত্তং আপজ্জিতু’’ন্তি পচ্ছাভত্তং কুলানি পযিরুপাসিত্ৰা দিৰা পটিক্কমি, খাদনীযং উস্সারিযিত্থ. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পচ্ছাভত্তং কুলেসু চারিত্তং আপজ্জিস্সতী’’তি…পে… সচ্চং কির ত্ৰং, উপনন্দ, পচ্ছাভত্তং কুলেসু চারিত্তং আপজ্জসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, পচ্ছাভত্তং কুলেসু চারিত্তং আপজ্জিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন ভিক্খৰে ইমং সিক্খাপদং উদ্দিসেয্যাথ –

‘‘যো পন ভিক্খু নিমন্তিতো সভত্তো সমানো পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

২৯৬. তেন খো পন সমযেন ভিক্খূ চীৰরদানসমযে কুক্কুচ্চাযন্তা কুলানি ন পযিরুপাসন্তি. চীৰরং পরিত্তং উপ্পজ্জতি. ভগৰতো এতমত্থং আরোচেসুং…পে… অনুজানামি, ভিক্খৰে, চীৰরদানসমযে কুলানি পযিরুপাসিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু নিমন্তিতো সভত্তো সমানো পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, অঞ্ঞত্র সমযা, পাচিত্তিযং. তত্থাযং সমযো. চীৰরদানসমযো – অযং তত্থ সমযো’’তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

২৯৭. তেন খো পন সমযেন ভিক্খূ চীৰরকম্মং করোন্তি, অত্থো চ হোতি সূচিযাপি সুত্তেনপি সত্থকেনপি. ভিক্খূ কুক্কুচ্চাযন্তা কুলানি ন পযিরুপাসন্তি. ভগৰতো এতমত্থং আরোচেসুং…পে… অনুজানামি, ভিক্খৰে, চীৰরকারসমযে কুলানি পযিরুপাসিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু নিমন্তিতো সভত্তো সমানো পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, অঞ্ঞত্র সমযা, পাচিত্তিযং. তত্থাযং সমযো. চীৰরদানসমযো, চীৰরকারসমযো – অযং তত্থ সমযো’’তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

২৯৮. তেন খো পন সমযেন ভিক্খূ গিলানা হোন্তি, অত্থো চ হোতি ভেসজ্জেহি. ভিক্খূ কুক্কুচ্চাযন্তা কুলানি ন পযিরুপাসন্তি. ভগৰতো এতমত্থং আরোচেসুং…পে… অনুজানামি, ভিক্খৰে, সন্তং ভিক্খুং আপুচ্ছা কুলানি পযিরুপাসিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৯৯. ‘‘যো পন ভিক্খু নিমন্তিতো সভত্তো সমানো সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্য, অঞ্ঞত্র সমযা, পাচিত্তিযং. তত্থাযং সমযো. চীৰরদানসমযো, চীৰরকারসমযো – অযং তত্থ সমযো’’তি.

৩০০. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

নিমন্তিতো নাম পঞ্চন্নং ভোজনানং অঞ্ঞতরেন ভোজনেন নিমন্তিতো.

সভত্তো নাম যেন নিমন্তিতো তেন সভত্তো.

সন্তং নাম ভিক্খুং সক্কা হোতি আপুচ্ছা পৰিসিতুং.

অসন্তং নাম ভিক্খুং ন সক্কা হোতি আপুচ্ছা পৰিসিতুং.

পুরেভত্তং নাম যেন নিমন্তিতো তং অভুত্তাৰী.

পচ্ছাভত্তং নাম যেন নিমন্তিতো তং অন্তমসো কুসগ্গেনপি [অরুণুগ্গমনেপি (সী.)] ভুত্তং হোতি.

কুলং নাম চত্তারি কুলানি – খত্তিযকুলং, ব্রাহ্মণকুলং, ৰেস্সকুলং, সুদ্দকুলং.

কুলেসু চারিত্তং আপজ্জেয্যাতি অঞ্ঞস্স ঘরূপচারং ওক্কমন্তস্স আপত্তি দুক্কটস্স. পঠমং পাদং উম্মারং অতিক্কামেতি, আপত্তি দুক্কটস্স. দুতিযং পাদং অতিক্কামেতি, আপত্তি পাচিত্তিযস্স.

অঞ্ঞত্র সমযাতি ঠপেত্ৰা সমযং.

চীৰরদানসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চ মাসা.

চীৰরকারসমযো নাম চীৰরে কযিরমানে.

৩০১. নিমন্তিতে নিমন্তিতসঞ্ঞী সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জতি, অঞ্ঞত্র সমযা, আপত্তি পাচিত্তিযস্স. নিমন্তিতে ৰেমতিকো সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জতি, অঞ্ঞত্র সমযা, আপত্তি পাচিত্তিযস্স. নিমন্তিতে অনিমন্তিতসঞ্ঞী সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জতি, অঞ্ঞত্র সমযা, আপত্তি পাচিত্তিযস্স.

অনিমন্তিতে নিমন্তিতসঞ্ঞী, আপত্তি দুক্কটস্স. অনিমন্তিতে ৰেমতিকো, আপত্তি দুক্কটস্স. অনিমন্তিতে অনিমন্তিতসঞ্ঞী, অনাপত্তি.

৩০২. অনাপত্তি সমযে, সন্তং ভিক্খুং আপুচ্ছা পৰিসতি, অসন্তং ভিক্খুং অনাপুচ্ছা পৰিসতি, অঞ্ঞস্স ঘরেন মগ্গো হোতি, ঘরূপচারেন মগ্গো হোতি, অন্তরারামং গচ্ছতি, ভিক্খুনুপস্সযং গচ্ছতি, তিত্থিযসেয্যং গচ্ছতি, পটিক্কমনং গচ্ছতি, ভত্তিযঘরং গচ্ছতি, আপদাসু, উম্মত্তকস্স, আদিকম্মিকস্সাতি.

চারিত্তসিক্খাপদং নিট্ঠিতং ছট্ঠং.

৭. মহানামসিক্খাপদং

৩০৩. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে. তেন খো পন সমযেন মহানামস্স সক্কস্স ভেসজ্জং উস্সন্নং হোতি. অথ খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইচ্ছামহং, ভন্তে, সঙ্ঘং চতুমাসং [চতুম্মাসং (সী.) চাতুমাসং (স্যা.)] ভেসজ্জেন পৰারেতু’’ন্তি. ‘‘সাধু সাধু, মহানাম! তেন হি ত্ৰং, মহানাম, সঙ্ঘং চতুমাসং ভেসজ্জেন পৰারেহী’’তি. ভিক্খূ কুক্কুচ্চাযন্তা নাধিৰাসেন্তি. ভগৰতো এতমত্থং আরোচেসুং…পে… অনুজানামি, ভিক্খৰে, চতুমাসং ভেসজ্জপ্পচ্চযপৰারণং সাদিতুন্তি.

৩০৪. তেন খো পন সমযেন ভিক্খূ মহানামং সক্কং পরিত্তং ভেসজ্জং ৰিঞ্ঞাপেন্তি. তথেৰ মহানামস্স সক্কস্স ভেসজ্জং উস্সন্নং হোতি. দুতিযম্পি খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইচ্ছামহং, ভন্তে, সঙ্ঘং অপরম্পি চতুমাসং ভেসজ্জেন পৰারেতু’’ন্তি. ‘‘সাধু সাধু, মহানাম! তেন হি ত্ৰং, মহানাম, সঙ্ঘং অপরম্পি চতুমাসং ভেসজ্জেন পৰারেহী’’তি. ভিক্খূ কুক্কুচ্চাযন্তা নাধিৰাসেন্তি. ভগৰতো এতমত্থং আরোচেসুং…পে… অনুজানামি, ভিক্খৰে, পুন পৰারণম্পি সাদিতুন্তি.

৩০৫. তেন খো পন সমযেন ভিক্খূ মহানামং সক্কং পরিত্তংযেৰ ভেসজ্জং ৰিঞ্ঞাপেন্তি. তথেৰ মহানামস্স সক্কস্স ভেসজ্জং উস্সন্নং হোতি. ততিযম্পি খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইচ্ছামহং, ভন্তে, সঙ্ঘং যাৰজীৰং ভেসজ্জেন পৰারেতু’’ন্তি. ‘‘সাধু সাধু, মহানাম! তেন হি ত্ৰং, মহানাম, সঙ্ঘং যাৰজীৰং ভেসজ্জেন পৰারেহী’’তি. ভিক্খূ কুক্কুচ্চাযন্তা নাধিৰাসেন্তি. ভগৰতো এতমত্থং আরোচেসুং…পে… অনুজানামি, ভিক্খৰে, নিচ্চপৰারণম্পি সাদিতুন্তি.

তেন খো পন সমযেন ছব্বগ্গিযা ভিক্খূ দুন্নিৰত্থা হোন্তি দুপ্পারুতা অনাকপ্পসম্পন্না. মহানামো সক্কো ৰত্তা হোতি – ‘‘কিস্স তুম্হে, ভন্তে, দুন্নিৰত্থা দুপ্পারুতা অনাকপ্পসম্পন্না? ননু নাম পব্বজিতেন সুনিৰত্থেন ভৰিতব্বং সুপারুতেন আকপ্পসম্পন্নেনা’’তি? ছব্বগ্গিযা ভিক্খূ মহানামে সক্কে উপনন্ধিংসু. অথ খো ছব্বগ্গিযানং ভিক্খূনং এতদহোসি – ‘‘কেন নু খো মযং উপাযেন মহানামং সক্কং মঙ্কু করেয্যামা’’তি? অথ খো ছব্বগ্গিযানং ভিক্খূনং এতদহোসি – ‘‘মহানামেন খো, আৰুসো, সক্কেন সঙ্ঘো ভেসজ্জেন পৰারিতো. হন্দ মযং, আৰুসো, মহানামং সক্কং সপ্পিং ৰিঞ্ঞাপেমা’’তি. অথ খো ছব্বগ্গিযা ভিক্খূ যেন মহানামো সক্কো তেনুপসঙ্কমিংসু; উপসঙ্কমিত্ৰা মহানামং সক্কং এতদৰোচুং – ‘‘দোণেন, আৰুসো, সপ্পিনা অত্থো’’তি. ‘‘অজ্জণ্হো, ভন্তে, আগমেথ. মনুস্সা ৰজং গতা সপ্পিং আহরিতুং. কালং আহরিস্সথা’’তি [কালে হরিস্সথাতি (স্যা.)].

দুতিযম্পি খো…পে… ততিযম্পি খো ছব্বগ্গিযা ভিক্খূ মহানামং সক্কং এতদৰোচুং – ‘‘দোণেন, আৰুসো, সপ্পিনা অত্থো’’তি. ‘‘অজ্জণ্হো, ভন্তে, আগমেথ. মনুস্সা ৰজং গতা সপ্পিং আহরিতুং. কালং আহরিস্সথা’’তি. ‘‘কিং পন তযা, আৰুসো, অদাতুকামেন পৰারিতেন, যং ত্ৰং পৰারেত্ৰা ন দেসী’’তি! অথ খো মহানামো সক্কো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা – ‘অজ্জণ্হো, ভন্তে, আগমেথা’তি ৰুচ্চমানা নাগমেস্সন্তী’’তি! অস্সোসুং খো ভিক্খূ মহানামস্স সক্কস্স উজ্ঝাযন্তস্স খিয্যন্তস্স ৰিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ মহানামেন সক্কেন – ‘অজ্জণ্হো, ভন্তে, আগমেথা’তি ৰুচ্চমানা নাগমেস্সন্তী’’তি…পে… সচ্চং কির তুম্হে, ভিক্খৰে, মহানামেন সক্কেন – ‘‘অজ্জণ্হো, ভন্তে, আগমেথা’’তি ৰুচ্চমানা নাগমেথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, মহানামেন সক্কেন – ‘‘অজ্জণ্হো, ভন্তে আগমেথা’’তি ৰুচ্চমানা নাগমেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে ইমং সিক্খাপদং উদ্দিসেয্যাথ –

৩০৬. ‘‘অগিলানেন ভিক্খুনা চতুমাসপ্পচ্চযপৰারণা সাদিতব্বা, অঞ্ঞত্র পুনপৰারণায, অঞ্ঞত্র নিচ্চপৰারণায; ততো চে উত্তরি সাদিযেয্য, পাচিত্তিয’’ন্তি.

৩০৭. অগিলানেন ভিক্খুনা চতুমাসপ্পচ্চযপৰারণা সাদিতব্বাতি গিলানপ্পচ্চযপৰারণা সাদিতব্বা.

পুনপৰারণাপি সাদিতব্বাতি যদা গিলানো ভৰিস্সামি তদা ৰিঞ্ঞাপেস্সামীতি.

নিচ্চপৰারণাপি সাদিতব্বাতি যদা গিলানো ভৰিস্সামি তদা ৰিঞ্ঞাপেস্সামীতি.

ততো চে উত্তরি সাদিযেয্যাতি অত্থি পৰারণা ভেসজ্জপরিযন্তা ন রত্তিপরিযন্তা, অত্থি পৰারণা রত্তিপরিযন্তা ন ভেসজ্জপরিযন্তা, অত্থি পৰারণা ভেসজ্জপরিযন্তা চ রত্তিপরিযন্তা চ, অত্থি পৰারণা নেৰ ভেসজ্জপরিযন্তা ন রত্তিপরিযন্তা.

ভেসজ্জপরিযন্তা নাম ভেসজ্জানি পরিগ্গহিতানি হোন্তি – ‘‘এত্তকেহি ভেসজ্জেহি পৰারেমী’’তি. রত্তিপরিযন্তা নাম রত্তিযো পরিগ্গহিতাযো হোন্তি – ‘‘এত্তকাসু রত্তীসু পৰারেমী’’তি. ভেসজ্জপরিযন্তা চ রত্তিপরিযন্তা চ নাম ভেসজ্জানি চ পরিগ্গহিতানি হোন্তি রত্তিযো চ পরিগ্গহিতাযো হোন্তি – ‘‘এত্তকেহি ভেসজ্জেহি এত্তকাসু রত্তীসু পৰারেমী’’তি. নেৰ ভেসজ্জপরিযন্তা ন রত্তিপরিযন্তা নাম ভেসজ্জানি চ অপরিগ্গহিতানি হোন্তি রত্তিযো চ অপরিগ্গহিতাযো হোন্তি.

৩০৮. ভেসজ্জপরিযন্তে – যেহি ভেসজ্জেহি পৰারিতো হোতি তানি ভেসজ্জানি ঠপেত্ৰা অঞ্ঞানি ভেসজ্জানি ৰিঞ্ঞাপেতি, আপত্তি পাচিত্তিযস্স. রত্তিপরিযন্তে – যাসু রত্তীসু পৰারিতো হোতি, তা রত্তিযো ঠপেত্ৰা অঞ্ঞাসু রত্তীসু ৰিঞ্ঞাপেতি, আপত্তি পাচিত্তিযস্স. ভেসজ্জপরিযন্তে চ রত্তিপরিযন্তে চ – যেহি ভেসজ্জেহি পৰারিতো হোতি, তানি ভেসজ্জানি ঠপেত্ৰা যাসু রত্তীসু পৰারিতো হোতি, তা রত্তিযো ঠপেত্ৰা অঞ্ঞানি ভেসজ্জানি অঞ্ঞাসু রত্তীসু ৰিঞ্ঞাপেতি, আপত্তি পাচিত্তিযস্স. নেৰ ভেসজ্জপরিযন্তে ন রত্তিপরিযন্তে, অনাপত্তি.

৩০৯. ন ভেসজ্জেন করণীযেন [করণীযে (সী. স্যা.)] ভেসজ্জং ৰিঞ্ঞাপেতি, আপত্তি পাচিত্তিযস্স. অঞ্ঞেন ভেসজ্জেন করণীযেন অঞ্ঞং ভেসজ্জং ৰিঞ্ঞাপেতি, আপত্তি পাচিত্তিযস্স. ততুত্তরি ততুত্তরিসঞ্ঞী ভেসজ্জং ৰিঞ্ঞাপেতি, আপত্তি পাচিত্তিযস্স. ততুত্তরি ৰেমতিকো ভেসজ্জং ৰিঞ্ঞাপেতি, আপত্তি পাচিত্তিযস্স. ততুত্তরি নততুত্তরিসঞ্ঞী ভেসজ্জং ৰিঞ্ঞাপেতি, আপত্তি পাচিত্তিযস্স.

নততুত্তরি ততুত্তরিসঞ্ঞী, আপত্তি দুক্কটস্স. নততুত্তরি ৰেমতিকো, আপত্তি দুক্কটস্স. নততুত্তরি নততুত্তরিসঞ্ঞী, অনাপত্তি.

৩১০. অনাপত্তি যেহি ভেসজ্জেহি পৰারিতো হোতি তানি ভেসজ্জানি ৰিঞ্ঞাপেতি, যাসু রত্তীসু পৰারিতো হোতি তাসু রত্তীসু ৰিঞ্ঞাপেতি, ‘‘ইমেহি তযা ভেসজ্জেহি পৰারিতাম্হ, অম্হাকঞ্চ ইমিনা চ ইমিনা চ ভেসজ্জেন অত্থো’’তি আচিক্খিত্ৰা ৰিঞ্ঞাপেতি, ‘‘যাসু তযা রত্তীসু পৰারিতাম্হ তাযো চ রত্তিযো ৰীতিৰত্তা অম্হাকঞ্চ ভেসজ্জেন অত্থো’’তি আচিক্খিত্ৰা ৰিঞ্ঞাপেতি, ঞাতকানং পৰারিতানং, অঞ্ঞস্সত্থায, অত্তনো ধনেন, উম্মত্তকস্স, আদিকম্মিকস্সাতি.

মহানামসিক্খাপদং নিট্ঠিতং সত্তমং.

৮. উয্যুত্তসেনাসিক্খাপদং

৩১১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন রাজা পসেনদি কোসলো সেনায অব্ভুয্যাতো হোতি. ছব্বগ্গিযা ভিক্খূ উয্যুত্তং সেনং দস্সনায অগমংসু. অদ্দসা খো রাজা পসেনদি কোসলো ছব্বগ্গিযে ভিক্খূ দূরতোৰ আগচ্ছন্তে. দিস্ৰান পক্কোসাপেত্ৰা এতদৰোচ – ‘‘কিস্স তুম্হে, ভন্তে, আগতত্থা’’তি? ‘‘মহারাজানং মযং দট্ঠুকামা’’ [মহারাজ মহারাজানং মযং দট্ঠুকামা (ক.)] তি. ‘‘কিং, ভন্তে, মং দিট্ঠেন যুদ্ধাভিনন্দিনং [যুদ্ধাভিনন্দিনা (ক.)]; ননু ভগৰা পস্সিতব্বো’’তি? মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা উয্যুত্তং সেনং দস্সনায আগচ্ছিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা সেনায আগচ্ছামা’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ উয্যুত্তং সেনং দস্সনায গচ্ছিস্সন্তী’’তি…পে… সচ্চং কির তুম্হে, ভিক্খৰে, উয্যুত্তং সেনং দস্সনায গচ্ছথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, উয্যুত্তং সেনং দস্সনায গচ্ছিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু উয্যুত্তং সেনং দস্সনায গচ্ছেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৩১২. তেন খো পন সমযেন অঞ্ঞতরস্স ভিক্খুনো মাতুলো সেনায গিলানো হোতি. সো তস্স ভিক্খুনো সন্তিকে দূতং পাহেসি – ‘‘অহঞ্হি সেনায গিলানো. আগচ্ছতু ভদন্তো. ইচ্ছামি ভদন্তস্স আগত’’ন্তি. অথ খো তস্স ভিক্খুনো এতদহোসি – ‘‘ভগৰতা সিক্খাপদং পঞ্ঞত্তং – ‘ন উয্যুত্তং সেনং দস্সনায গন্তব্ব’ন্তি. অযঞ্চ মে মাতুলো সেনায গিলানো. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, তথারূপপ্পচ্চযা সেনায গন্তুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩১৩. ‘‘যো পন ভিক্খু উয্যুত্তং সেনং দস্সনায গচ্ছেয্য, অঞ্ঞত্র তথারূপপ্পচ্চযা, পাচিত্তিয’’ন্তি.

৩১৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

উয্যুত্তা নাম সেনা গামতো নিক্খমিত্ৰা নিৰিট্ঠা ৰা হোতি পযাতা ৰা.

সেনা নাম হত্থী অস্সা রথা পত্তী. দ্ৰাদসপুরিসো হত্থী, তিপুরিসো অস্সো, চতুপুরিসো রথো, চত্তারো পুরিসা সরহত্থা পত্তি. দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি পাচিত্তিযস্স. দস্সনূপচারং ৰিজহিত্ৰা পুনপ্পুনং পস্সতি, আপত্তি পাচিত্তিযস্স.

অঞ্ঞত্র তথারূপপ্পচ্চযাতি ঠপেত্ৰা তথারূপপ্পচ্চযং.

৩১৫. উয্যুত্তে উয্যুত্তসঞ্ঞী দস্সনায গচ্ছতি, অঞ্ঞত্র তথারূপপ্পচ্চযা, আপত্তি পাচিত্তিযস্স. উয্যুত্তে ৰেমতিকো দস্সনায গচ্ছতি, অঞ্ঞত্র তথারূপপ্পচ্চযা, আপত্তি পাচিত্তিযস্স. উয্যুত্তে অনুয্যুত্তসঞ্ঞী দস্সনায গচ্ছতি, অঞ্ঞত্র তথারূপপ্পচ্চযা, আপত্তি পাচিত্তিযস্স.

একমেকং দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি দুক্কটস্স. দস্সনূপচারং ৰিজহিত্ৰা পুনপ্পুনং পস্সতি, আপত্তি দুক্কটস্স. অনুয্যুত্তে উয্যুত্তসঞ্ঞী, আপত্তি দুক্কটস্স. অনুয্যুত্তে ৰেমতিকো, আপত্তি দুক্কটস্স. অনুয্যুত্তে অনুয্যুত্তসঞ্ঞী, অনাপত্তি.

৩১৬. অনাপত্তি আরামে ঠিতো পস্সতি, ভিক্খুস্স ঠিতোকাসং ৰা নিসিন্নোকাসং ৰা নিপন্নোকাসং ৰা আগচ্ছতি, পটিপথং গচ্ছন্তো পস্সতি, তথারূপপ্পচ্চযা, আপদাসু, উম্মত্তকস্স, আদিকম্মিকস্সাতি.

উয্যুত্তসেনাসিক্খাপদং নিট্ঠিতং অট্ঠমং.

৯. সেনাৰাসসিক্খাপদং

৩১৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ সতি করণীযে সেনং গন্ত্ৰা অতিরেকতিরত্তং সেনায ৰসন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সেনায ৰসিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা সেনায পটিৰসামা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অতিরেকতিরত্তং সেনায ৰসিস্সন্তী’’তি…পে… সচ্চং কির তুম্হে, ভিক্খৰে, অতিরেকতিরত্তং সেনায ৰসথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, অতিরেকতিরত্তং সেনায ৰসিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩১৮. ‘‘সিযা চ তস্স ভিক্খুনো কোচিদেৰ পচ্চযো সেনং গমনায, দিরত্ততিরত্তং তেন ভিক্খুনা সেনায ৰসিতব্বং. ততো চে উত্তরিং ৰসেয্য, পাচিত্তিয’’ন্তি.

৩১৯. সিযা চ তস্স ভিক্খুনো কোচিদেৰ পচ্চযো সেনং গমনাযাতি সিযা পচ্চযো সিযা করণীযং.

দিরত্ততিরত্তং তেন ভিক্খুনা সেনায ৰসিতব্বন্তি দ্ৰেতিস্সো রত্তিযো ৰসিতব্বং.

ততো চে উত্তরি ৰসেয্যাতি চতুত্থে দিৰসে অত্থঙ্গতে সূরিযে সেনায ৰসতি, আপত্তি পাচিত্তিযস্স.

৩২০. অতিরেকতিরত্তে অতিরেকসঞ্ঞী সেনায ৰসতি, আপত্তি পাচিত্তিযস্স. অতিরেকতিরত্তে ৰেমতিকো সেনায ৰসতি, আপত্তি পাচিত্তিযস্স. অতিরেকতিরত্তে ঊনকসঞ্ঞী সেনায ৰসতি, আপত্তি পাচিত্তিযস্স.

ঊনকতিরত্তে অতিরেকসঞ্ঞী, আপত্তি দুক্কটস্স. ঊনকতিরত্তে ৰেমতিকো, আপত্তি দুক্কটস্স. ঊনকতিরত্তে ঊনকসঞ্ঞী, অনাপত্তি.

৩২১. অনাপত্তি দ্ৰেতিস্সো রত্তিযো ৰসতি, ঊনকদ্ৰেতিস্সো রত্তিযো ৰসতি, দ্ৰে রত্তিযো ৰসিত্ৰা ততিযায রত্তিযা পুরারুণা নিক্খমিত্ৰা পুন ৰসতি, গিলানো ৰসতি, গিলানস্স করণীযেন ৰসতি, সেনা ৰা পটিসেনায রুদ্ধা হোতি, কেনচি পলিবুদ্ধো হোতি, আপদাসু, উম্মত্তকস্স, আদিকম্মিকস্সাতি.

সেনাৰাসসিক্খাপদং নিট্ঠিতং নৰমং.

১০. উয্যোধিকসিক্খাপদং

৩২২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ দিরত্ততিরত্তং সেনায ৰসমানা উয্যোধিকম্পি বলগ্গম্পি সেনাব্যূহম্পি অনীকদস্সনম্পি গচ্ছন্তি. অঞ্ঞতরোপি ছব্বগ্গিযো ভিক্খু উয্যোধিকং গন্ত্ৰা কণ্ডেন পটিৰিদ্ধো হোতি. মনুস্সা তং ভিক্খুং উপ্পণ্ডেসুং – ‘‘কচ্চি, ভন্তে, সুযুদ্ধং অহোসি, কতি তে লক্খানি লদ্ধানী’’তি? সো ভিক্খু তেহি মনুস্সেহি উপ্পণ্ডীযমানো মঙ্কু অহোসি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা উয্যোধিকং দস্সনায আগচ্ছিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৰস্স হেতু পুত্তদারস্স কারণা উয্যোধিকং আগচ্ছামা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ উয্যোধিকং দস্সনায গচ্ছিস্সন্তী’’তি…পে… সচ্চং কির তুম্হে, ভিক্খৰে, উয্যোধিকং দস্সনায গচ্ছথাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, উয্যোধিকং দস্সনায গচ্ছিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩২৩. ‘‘দিরত্ততিরত্তং চে ভিক্খু সেনায ৰসমানো উয্যোধিকং ৰা বলগ্গং ৰা সেনাব্যূহং ৰা অনীকদস্সনং ৰা গচ্ছেয্য, পাচিত্তিয’’ন্তি.

৩২৪. দিরত্ততিরত্তং চে ভিক্খু সেনায ৰসমানোতি দ্ৰেতিস্সো রত্তিযো ৰসমানো.

উয্যোধিকং নাম যত্থ সম্পহারো দিস্সতি.

বলগ্গং নাম এত্তকা হত্থী, এত্তকা অস্সা, এত্তকা রথা, এত্তকা পত্তী.

সেনাব্যূহং নাম ইতো হত্থী হোন্তু, ইতো অস্সা হোন্তু, ইতো রথা হোন্তু, ইতো পত্তিকা হোন্তু.

অনীকং নাম হত্থানীকং, অস্সানীকং, রথানীকং, পত্তানীকং. তযো হত্থী পচ্ছিমং হত্থানীকং, তযো অস্সা পচ্ছিমং অস্সানীকং, তযো রথা পচ্ছিমং রথানীকং, চত্তারো পুরিসা সরহত্থা পত্তী পচ্ছিমং পত্তানীকং. দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি পাচিত্তিযস্স. দস্সনূপচারং ৰিজহিত্ৰা পুনপ্পুনং পস্সতি, আপত্তি পাচিত্তিযস্স.