৮. সন্নিধিকারকসিক্খাপদং

২৫২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মতো আনন্দস্স উপজ্ঝাযো আযস্মা বেলট্ঠসীসো [বেলট্ঠিসীসো (সী.) ৰেল়ট্ঠসীসো (স্যা.)] অরঞ্ঞে ৰিহরতি. সো পিণ্ডায চরিত্ৰা সুক্খকুরং আরামং হরিত্ৰা সুক্খাপেত্ৰা নিক্খিপতি. যদা আহারেন অত্থো হোতি, তদা উদকেন তেমেত্ৰা তেমেত্ৰা ভুঞ্জতি, চিরেন গামং পিণ্ডায পৰিসতি. ভিক্খূ আযস্মন্তং বেলট্ঠসীসং এতদৰোচুং – ‘‘কিস্স ত্ৰং, আৰুসো, চিরেন গামং পিণ্ডায পৰিসসী’’তি? অথ খো আযস্মা বেলট্ঠসীসো ভিক্খূনং এতমত্থং আরোচেসি. ‘‘কিং পন ত্ৰং, আৰুসো, সন্নিধিকারকং ভোজনং ভুঞ্জসী’’তি? ‘‘এৰমাৰুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা বেলট্ঠসীসো সন্নিধিকারকং ভোজনং ভুঞ্জিস্সতী’’তি…পে… সচ্চং কির ত্ৰং, বেলট্ঠসীস, সন্নিধিকারকং ভোজনং ভুঞ্জসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, বেলট্ঠসীস, সন্নিধিকারকং ভোজনং ভুঞ্জিস্সসি! নেতং, বেলট্ঠসীস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৫৩. ‘‘যো পন ভিক্খু সন্নিধিকারকং খাদনীযং ৰা ভোজনীযং ৰা খাদেয্য ৰা ভুঞ্জেয্য ৰা, পাচিত্তিয’’ন্তি.

২৫৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সন্নিধিকারকং নাম অজ্জ পটিগ্গহিতং অপরজ্জু খাদিতং হোতি.

খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম.

ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং.

‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি পাচিত্তিযস্স.

২৫৫. সন্নিধিকারকে সন্নিধিকারকসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স. সন্নিধিকারকে ৰেমতিকো খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স. সন্নিধিকারকে অসন্নিধিকারকসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স.

যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি দুক্কটস্স. অসন্নিধিকারকে সন্নিধিকারকসঞ্ঞী, আপত্তি দুক্কটস্স. অসন্নিধিকারকে ৰেমতিকো, আপত্তি দুক্কটস্স. অসন্নিধিকারকে অসন্নিধিকারকসঞ্ঞী, অনাপত্তি.

২৫৬. অনাপত্তি যাৰকালিকং যাৰকালে নিদহিত্ৰা ভুঞ্জতি, যামকালিকং যামে নিদহিত্ৰা ভুঞ্জতি, সত্তাহকালিকং সত্তাহং নিদহিত্ৰা ভুঞ্জতি, যাৰজীৰিকং সতি পচ্চযে পরিভুঞ্জতি, উম্মত্তকস্স, আদিকম্মিকস্সাতি.

সন্নিধিকারকসিক্খাপদং নিট্ঠিতং অট্ঠমং.