৯৩. আপত্তিআৰিকরণৰিধি

১৭০. তেন খো পন সমযেন অঞ্ঞতরো ভিক্খু পাতিমোক্খে উদ্দিস্সমানে আপত্তিং সরতি. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন সাপত্তিকেন উপোসথো কাতব্বো’তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং.

ইধ পন, ভিক্খৰে, ভিক্খু পাতিমোক্খে উদ্দিস্সমানে আপত্তিং সরতি. তেন, ভিক্খৰে, ভিক্খুনা সামন্তো ভিক্খু এৰমস্স ৰচনীযো – ‘‘অহং, আৰুসো, ইত্থন্নামং আপত্তিং আপন্নো. ইতো ৰুট্ঠহিত্ৰা তং আপত্তিং পটিকরিস্সামী’’তি ৰত্ৰা উপোসথো কাতব্বো, পাতিমোক্খং সোতব্বং, ন ত্ৰেৰ তপ্পচ্চযা উপোসথস্স অন্তরাযো কাতব্বো.

ইধ পন, ভিক্খৰে, ভিক্খু পাতিমোক্খে উদ্দিস্সমানে আপত্তিযা ৰেমতিকো হোতি. তেন, ভিক্খৰে, ভিক্খুনা সামন্তো ভিক্খু এৰমস্স ৰচনীযো – ‘‘অহং, আৰুসো, ইত্থন্নামায আপত্তিযা ৰেমতিকো. যদা নিব্বেমতিকো ভৰিস্সামি, তদা তং আপত্তিং পটিকরিস্সামী’’তি ৰত্ৰা উপোসথো কাতব্বো, পাতিমোক্খং সোতব্বং; ন ত্ৰেৰ তপ্পচ্চযা উপোসথস্স অন্তরাযো কাতব্বোতি.