৯২. আপত্তিপটিকম্মৰিধি

১৬৯. তেন খো পন সমযেন অঞ্ঞতরো ভিক্খু তদহুপোসথে আপত্তিং আপন্নো হোতি. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন সাপত্তিকেন উপোসথো কাতব্বো’তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং. ইধ পন, ভিক্খৰে, ভিক্খু তদহুপোসথে আপত্তিং আপন্নো হোতি. তেন, ভিক্খৰে, ভিক্খুনা একং ভিক্খুং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, আৰুসো, ইত্থন্নামং আপত্তিং আপন্নো, তং পটিদেসেমী’’তি. তেন ৰত্তব্বো – ‘‘পস্সসী’’তি. ‘‘আম পস্সামী’’তি. ‘‘আযতিং সংৰরেয্যাসী’’তি.

ইধ পন, ভিক্খৰে, ভিক্খু তদহুপোসথে আপত্তিযা ৰেমতিকো হোতি. তেন, ভিক্খৰে, ভিক্খুনা একং ভিক্খুং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, আৰুসো, ইত্থন্নামায আপত্তিযা ৰেমতিকো; যদা নিব্বেমতিকো ভৰিস্সামি, তদা তং আপত্তিং পটিকরিস্সামী’’তি ৰত্ৰা উপোসথো কাতব্বো, পাতিমোক্খং সোতব্বং, ন ত্ৰেৰ তপ্পচ্চযা উপোসথস্স অন্তরাযো কাতব্বোতি.

তেন খো পন সমযেন ছব্বগ্গিযা ভিক্খূ সভাগং আপত্তিং দেসেন্তি. ভগৰতো এতমত্থং আরোচেসুং. ন, ভিক্খৰে, সভাগা আপত্তি দেসেতব্বা. যো দেসেয্য, আপত্তি দুক্কটস্সাতি.

তেন খো পন সমযেন ছব্বগ্গিযা ভিক্খূ সভাগং আপত্তিং পটিগ্গণ্হন্তি. ভগৰতো এতমত্থং আরোচেসুং. ন, ভিক্খৰে, সভাগা আপত্তি পটিগ্গহেতব্বা. যো পটিগ্গণ্হেয্য, আপত্তি দুক্কটস্সাতি.