৯১. সঙ্ঘুপোসথাদিপ্পভেদং

১৬৮. তেন খো পন সমযেন অঞ্ঞতরস্মিং আৰাসে তদহুপোসথে চত্তারো ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা পঞ্ঞত্তং ‘উপোসথো কাতব্বো’তি, মযঞ্চম্হা চত্তারো জনা, কথং নু খো অম্হেহি উপোসথো কাতব্বো’’তি? ভগৰতো এতমত্থং আরোচেসুং. অনুজানামি, ভিক্খৰে, চতুন্নং পাতিমোক্খং উদ্দিসিতুন্তি.

তেন খো পন সমযেন অঞ্ঞতরস্মিং আৰাসে তদহুপোসথে তযো ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং চতুন্নং পাতিমোক্খং উদ্দিসিতুং, মযঞ্চম্হা তযো জনা, কথং নু খো অম্হেহি উপোসথো কাতব্বো’’তি? ভগৰতো এতমত্থং আরোচেসুং. অনুজানামি, ভিক্খৰে, তিণ্ণং পারিসুদ্ধিউপোসথং কাতুং. এৰঞ্চ পন, ভিক্খৰে, কাতব্বো. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তা. অজ্জুপোসথো পন্নরসো. যদাযস্মন্তানং পত্তকল্লং, মযং অঞ্ঞমঞ্ঞং পারিসুদ্ধিউপোসথং করেয্যামা’’তি.

থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘পরিসুদ্ধো অহং, আৰুসো; পরিসুদ্ধোতি মং ধারেথ. পরিসুদ্ধো অহং, আৰুসো; পরিসুদ্ধোতি মং ধারেথ. পরিসুদ্ধো অহং, আৰুসো; পরিসুদ্ধোতি মং ধারেথা’’তি.

নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে ভিক্খূ এৰমস্সু ৰচনীযা – ‘‘পরিসুদ্ধো অহং, ভন্তে; পরিসুদ্ধোতি মং ধারেথ. পরিসুদ্ধো অহং, ভন্তে; পরিসুদ্ধোতি মং ধারেথ. পরিসুদ্ধো অহং, ভন্তে; পরিসুদ্ধোতি মং ধারেথা’’তি.

তেন খো পন সমযেন অঞ্ঞতরস্মিং আৰাসে তদহুপোসথে দ্ৰে ভিক্খূ ৰিহরন্তি. অথ খো তেসং ভিক্খূনং এতদহোসি – ‘‘ভগৰতা অনুঞ্ঞাতং চতুন্নং পাতিমোক্খং উদ্দিসিতুং, তিণ্ণন্নং পারিসুদ্ধিউপোসথং কাতুং. মযঞ্চম্হা দ্ৰে জনা. কথং নু খো অম্হেহি উপোসথো কাতব্বো’’তি? ভগৰতো এতমত্থং আরোচেসুং. অনুজানামি, ভিক্খৰে, দ্ৰিন্নং পারিসুদ্ধিউপোসথং কাতুং. এৰঞ্চ পন, ভিক্খৰে, কাতব্বো. থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা নৰো ভিক্খু এৰমস্স ৰচনীযো – ‘‘পরিসুদ্ধো অহং, আৰুসো; পরিসুদ্ধোতি মং ধারেহি. পরিসুদ্ধো অহং, আৰুসো; পরিসুদ্ধোতি মং ধারেহি. পরিসুদ্ধো অহং, আৰুসো; পরিসুদ্ধোতি মং ধারেহী’’তি.

নৰকেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা থেরো ভিক্খু এৰমস্স ৰচনীযো – ‘‘পরিসুদ্ধো অহং, ভন্তে; পরিসুদ্ধোতি মং ধারেথ. পরিসুদ্ধো অহং, ভন্তে; পরিসুদ্ধোতি মং ধারেথ. পরিসুদ্ধো অহং, ভন্তে; পরিসুদ্ধোতি মং ধারেথা’’তি.

তেন খো পন সমযেন অঞ্ঞতরস্মিং আৰাসে তদহুপোসথে একো ভিক্খু ৰিহরতি. অথ খো তস্স ভিক্খুনো এতদহোসি – ‘‘ভগৰতা অনুঞ্ঞাতং চতুন্নং পাতিমোক্খং উদ্দিসিতুং, তিণ্ণন্নং পারিসুদ্ধিউপোসথং কাতুং, দ্ৰিন্নং পারিসুদ্ধিউপোসথং কাতুং. অহঞ্চম্হি এককো. কথং নু খো মযা উপোসথো কাতব্বো’’তি? ভগৰতো এতমত্থং আরোচেসুং. ইধ পন, ভিক্খৰে, অঞ্ঞতরস্মিং আৰাসে তদহুপোসথে একো ভিক্খু ৰিহরতি. তেন, ভিক্খৰে, ভিক্খুনা যত্থ ভিক্খূ পটিক্কমন্তি উপট্ঠানসালায ৰা, মণ্ডপে ৰা, রুক্খমূলে ৰা, সো দেসো সম্মজ্জিত্ৰা পানীযং পরিভোজনীযং উপট্ঠাপেত্ৰা আসনং পঞ্ঞপেত্ৰা পদীপং কত্ৰা নিসীদিতব্বং. সচে অঞ্ঞে ভিক্খূ আগচ্ছন্তি, তেহি সদ্ধিং উপোসথো কাতব্বো. নো চে আগচ্ছন্তি, অজ্জ মে উপোসথোতি অধিট্ঠাতব্বো. নো চে অধিট্ঠহেয্য, আপত্তি দুক্কটস্স.

তত্র, ভিক্খৰে, যত্থ চত্তারো ভিক্খূ ৰিহরন্তি, ন একস্স পারিসুদ্ধিং আহরিত্ৰা তীহি পাতিমোক্খং উদ্দিসিতব্বং. উদ্দিসেয্যুং চে, আপত্তি দুক্কটস্স. তত্র, ভিক্খৰে, যত্থ তযো ভিক্খূ ৰিহরন্তি, ন একস্স পারিসুদ্ধিং আহরিত্ৰা দ্ৰীহি পারিসুদ্ধিউপোসথো কাতব্বো. করেয্যুং চে, আপত্তি দুক্কটস্স. তত্র, ভিক্খৰে, যত্থ দ্ৰে ভিক্খূ ৰিহরন্তি, ন একস্স পারিসুদ্ধিং আহরিত্ৰা একেন অধিট্ঠাতব্বো. অধিট্ঠহেয্য চে, আপত্তি দুক্কটস্সাতি.