মহাসীলৰণ্ণনা

২১. অঙ্গানি আরব্ভ পৰত্তত্তা অঙ্গসহচরিতং সত্থং ‘‘অঙ্গ’’ন্তি ৰুত্তং উত্তরপদলোপেন ৰা. নিমিত্তন্তি এত্থাপি এসেৰ নযো, তেনাহ ‘‘হত্থপাদাদীসূ’’তিআদি. কেচি পন ‘‘অঙ্গন্তি অঙ্গৰিকারং পরেসং অঙ্গৰিকারদস্সনেনাপি লাভালাভাদিৰিজানন’’ন্তি ৰদন্তি. নিমিত্তসত্থন্তি নিমিত্তেন সঞ্জাননপ্পকারদীপকং সত্থং, তং ৰত্থুনা ৰিভাৰেতুং ‘‘পণ্ডুরাজা’’তিআদিমাহ. পণ্ডুরাজাতি চ ‘‘দক্খিণারামাধিপতি’’ ইচ্চেৰ ৰুত্তং. সীহল়দীপে দক্খিণারামনামকস্স সঙ্ঘারামস্স কারকোতি ৰদন্তি. ‘‘দক্খিণমধুরাধিপতী’’তি চ কত্থচি লিখিতং, দক্খিণমধুরনগরস্স অধিপতীতি অত্থো. মুত্তাযোতি মুত্তিকা. মুট্ঠিযাতি হত্থমুদ্দায. ঘরগোলিকাযাতি সরবুনা. সো ‘‘মুত্তা’’তি সঞ্ঞানিমিত্তেনাহ, সঙ্খ্যানিমিত্তেন পন ‘‘তিস্সো’’তি.

‘‘মহন্তান’’ন্তি এতেন অপ্পকং নিমিত্তমেৰ, মহন্তং পন উপ্পাদোতি নিমিত্তুপ্পাদানং ৰিসেসং দস্সেতি. উপ্পতিতন্তি উপ্পতনং. সুভাসুভফলং পকাসেন্তো উপ্পজ্জতি গচ্ছতীতি উপ্পাদো, উপ্পাতোপি, সুভাসুভসূচিকা ভূতৰিকতি. সো হি ধূমো ৰিয অগ্গিস্স কম্মফলস্স পকাসনমত্তমেৰ করোতি, ন তু তমুপ্পাদেতীতি. ইদন্তি ইদং নাম ফলং. এৰন্তি ইমিনা নাম আকারেন. আদিসন্তীতি নিদ্দিসন্তি. পুব্বণ্হসমযেতি কালৰসেন. ইদং নামাতি ৰত্থুৰসেন ৰদতি. যো ৰসভং, কুঞ্জরং, পাসাদং, পব্বতং ৰা আরুল়্হমত্তানং সুপিনে পস্সতি, তস্স ‘‘ইদং নাম ফল’’ন্তিআদিনা হি ৰত্থুকিত্তনং হোতি. সুপিনকন্তি সুপিনসত্থং. অঙ্গসম্পত্তিৰিপত্তিদস্সনমত্তেন পুব্বে ‘‘অঙ্গ’’ন্তি ৰুত্তং, ইধ পন মহানুভাৰতাদিনিপ্ফাদকলক্খণৰিসেসদস্সনেন ‘‘লক্খণ’’ন্তি অযমেতেসং ৰিসেসো, তেনাহ ‘‘ইমিনা লক্খণেনা’’তিআদি. লক্খণন্তি হি অঙ্গপচ্চঙ্গেসু দিস্সমানাকারৰিসেসং সত্তিসিরিৰচ্ছগদাপাসাদাদিকমধিপ্পেতং তং তং ফলং লক্খীযতি অনেনাতি কত্ৰা, সত্থং পন তপ্পকাসনতো লক্খণং. আহতেতি পুরাণে. অনাহতেতি নৰে. অহতেতি পন পাঠে ৰুত্তৰিপরিযাযেন অত্থো. ইতো পট্ঠাযাতি দেৰরক্খসমনুস্সাদিভেদেন যথাফলং পরিকপ্পিতেন ৰিৰিধৰত্থভাগে ইতো ৰা এত্তো ৰা সঞ্ছিন্নে ইদং নাম ভোগাদিফলং হোতি. এৰরূপেন দারুনাতি পলাসসিরিফলাদিদারুনা, তথা দব্বিযা. যদি দব্বিহোমাদীনিপি অগ্গিহোমানেৰ, অথ কস্মা ৰিসুং ৰুত্তানীতি আহ ‘‘এৰরূপাযা’’তিআদি. দব্বিহোমাদীনি হোমোপকরণাদিৰিসেসেহি ফলৰিসেসদস্সনৰসেন ৰুত্তানি, অগ্গিহোমং পন ৰুত্তাৰসেসসাধনৰসেন ৰুত্তন্তি অধিপ্পাযো. তেনাহ ‘‘দব্বিহোমাদীনী’’তিআদি.

কুণ্ডকোতি তণ্ডুলখণ্ডং, তিলস্স ইদন্তি তেলং, সমাসতদ্ধিতপদানি পসিদ্ধেসু সামঞ্ঞভূতানীতি ৰিসেসকরণত্থং ‘‘তিলতেলাদিক’’ন্তি ৰুত্তং. পক্খিপনন্তি পক্খিপনত্থং. ‘‘পক্খিপনৰিজ্জ’’ন্তিপি পাঠো, পক্খিপনহেতুভূতং ৰিজ্জন্তি অত্থো. দক্খিণক্খকজণ্ণুলোহিতাদীহীতি দক্খিণক্খকলোহিতদক্খিণজণ্ণুলোহিতাদীহি. ‘‘পুব্বে’’তিআদিনা অঙ্গঅঙ্গৰিজ্জানং ৰিসেসদস্সনেন পুনরুত্তভাৰমপনেতি. অঙ্গুলট্ঠিং দিস্ৰাতি অঙ্গুলিভূতং, অঙ্গুলিযা ৰা জাতং অট্ঠিং পস্সিত্ৰা, অঙ্গুলিচ্ছৰিমত্তং অপস্সিত্ৰা তদট্ঠিৰিপস্সনৰসেনেৰ ব্যাকরোন্তীতি ৰুত্তং হোতি. ‘‘অঙ্গলট্ঠিন্তি সরীর’’ন্তি (দী. নি. টী. ১.২১) পন আচরিযধম্মপালত্থেরেন ৰুত্তং, এৰং সতি অঙ্গপচ্চঙ্গানং ৰিরুহনভাৰেন লট্ঠিসদিসত্তা সরীরমেৰ অঙ্গলট্ঠীতি ৰিঞ্ঞাযতি. কুলপুত্তোতি জাতিকুলপুত্তো, আচারকুলপুত্তো চ. দিস্ৰাপীতি এত্থ অপি-সদ্দো অদিস্ৰাপীতি সম্পিণ্ডনত্থো. অব্ভিনো সত্থং অব্ভেয্যং. মাসুরক্খেন কতো গন্থো মাসুরক্খো. রাজূহি পরিভূত্তং সত্থং রাজসত্থং. সব্বানিপেতানি খত্তৰিজ্জাপকরণানি. সিৰ-সদ্দো সন্তিঅত্থোতি আহ ‘‘সন্তিকরণৰিজ্জা’’তি, উপসগ্গূপসমনৰিজ্জাতি অত্থো. সিৰা-সদ্দমেৰ রস্সং কত্ৰা এৰমহাতি সন্ধায ‘‘সিঙ্গালরুতৰিজ্জা’’তি ৰদন্তি, সিঙ্গালানং রুতে সুভাসুভসঞ্জাননৰিজ্জাতি অত্থো. ‘‘ভূতৰেজ্জমন্তোতি ভূতৰসীকরণমন্তো. ভূরিঘরেতি অন্তোপথৰিযং কতঘরে, মত্তিকামযঘরে ৰা. ‘‘ভূরিৰিজ্জা সস্সবুদ্ধিকরণৰিজ্জা’’তি সারসমাসে. সপ্পাৰ্হাযনৰিজ্জাতি সপ্পাগমনৰিজ্জা. ৰিসৰন্তমেৰ ৰাতি ৰিসৰমানমেৰ ৰা. ভাৰনিদ্দেসস্স হি মান-সদ্দস্স অন্তব্যপ্পদেসো. যায করোন্তি, সা ৰিসৰিজ্জাতি যোজনা. ‘‘ৰিসতন্ত্রমেৰ ৰা’’তিপি পাঠো. এৰং সতি সরূপদস্সনং হোতি, ৰিসৰিচারণগন্থোযেৰাতি অত্থো. তন্ত্রন্তি হি গন্থস্স পরসমঞ্ঞা. সপক্খকঅপক্খকদ্ৰিপদচতুপ্পদানন্তি পিঙ্গলমক্খিকাদিসপক্খকঘরগোলিকাদিঅপক্খকদেৰমনুস্সচঙ্গোরাদিদ্ৰিপদ- কণ্টসসজম্বুকাদিচতুপ্পদানং. রুতং ৰস্সিতং. গতং গমনং, এতেন ‘‘সকুণৰিজ্জা’’তি ইধ মিগসদ্দস্স লোপং, নিদস্সনমত্তং ৰা দস্সেতি. সকুণঞাণন্তি সকুণৰসেন সুভাসুভফলস্স জাননং. ননু সকুণৰিজ্জায এৰ ৰাযসৰিজ্জাপৰিট্ঠাতি আহ ‘‘তং ৰিসুঞ্ঞেৰ সত্থ’’ন্তি. তংতংপকাসকসত্থানুরূপৰসেন হি ইধ তস্স তস্স ৰচনন্তি দট্ঠব্বং.

পরিপক্কগতভাৰো অত্তভাৰস্স, জীৰিতকালস্স চ ৰসেন গহেতব্বোতি দস্সেতি ‘‘ইদানী’’তিআদিনা. আদিট্ঠঞানন্তি আদিসিতব্বস্স ঞাণং. সররক্খণন্তি সরতো অত্তানং, অত্ততো ৰা সরস্স রক্খণং. ‘‘সব্বসঙ্গাহিক’’ন্তি ইমিনা মিগ-সদ্দস্স সব্বসকুণচতুপ্পদেসু পৰত্তিং দস্সেতি, একসেসনিদ্দেসো ৰা এস চতুপ্পদেস্ৰেৰ মিগ-সদ্দস্স নিরুল়্হত্তা. সব্বেসম্পি সকুণচতুপ্পদানং রুতজাননসত্থস্স মিগচক্কসমঞ্ঞা, যথা তং সুভাসুভজাননপ্পকারে সব্বতো ভদ্রং চক্কাদিসমঞ্ঞাতি আহ ‘‘সব্ব…পে… ৰুত্ত’’ন্তি.

২২. ‘‘সামিনো’’তিআদি পসট্ঠাপসট্ঠকারণৰচনং. লক্খণন্তি তেসং লক্খণপ্পকাসকসত্থং. পারিসেসনযেন অৰসেসং আৰুধং. ‘‘যম্হি কুলে’’তিআদিনা ইমস্মিং ঠানে তথাজাননহেতু এৰ সেসং লক্খণন্তি দস্সেতি. অযং ৰিসেসোতি ‘‘লক্খণ’’ন্তি হেট্ঠা ৰুত্তা লক্খণতো ৰিসেসো. তদত্থাৰিকরণত্থং ‘‘ইদঞ্চেত্থ ৰত্থূ’’তি ৰুত্তং অগ্গিং ধমমানন্তি অগ্গিং মুখৰাতেন জালেন্তং. মক্খেসীতি ৰিনাসেতি. পিল়ন্ধনকণ্ণিকাযাতি কণ্ণালঙ্কারস্স. গেহকণ্ণিকাযাতি গেহকূটস্স, এতেন একসেসনযং, সামঞ্ঞনিদ্দেসং ৰা উপেতং. কচ্ছপলক্খণন্তি কুম্মলক্খণং. সব্বচতুপ্পদানন্তি মিগ-সদ্দস্স চতুপ্পদৰাচকত্তমাহ.

২৩. অসুকদিৰসেতি দুতিযাততিযাদিতিথিৰসেন ৰুত্তং. অসুকনক্খত্তেনাতি অস্সযুজভরণীকত্তিকারোহণীআদিনক্খত্তযোগৰসেন. ৰিপ্পৰুত্থানন্তি ৰিপ্পৰসিতানং সদেসতো নিক্খন্তানং. উপসঙ্কমনং উপযানং. অপযানং পটিক্কমনং. দুতিযপদেপীতি ‘‘বাহিরানং রঞ্ঞং…পে… ভৰিস্সতী’’তি ৰুত্তে দুতিযৰাক্যেপি. ‘‘অব্ভন্তরানং রঞ্ঞং জযো’’তিআদীহি দ্ৰীহি ৰাক্যেহি ৰুত্তা জযপরাজযা পাকটাযেৰ.

২৪. রাহূতি রাহু নাম অসুরিস্সরো অসুররাজা. তথা হি মহাসমযসুত্তে অসুরনিকাযে ৰুত্তং –

‘‘সতঞ্চ বলিপুত্তানং, সব্বে ৰেরোচনামকা;

সন্নয্হিত্ৰা বলিসেনং, রাহুভদ্দমুপাগমু’’ন্তি. (দী. নি. ২.৩৩৯);

তস্স চন্দিমসূরিযানং গহণং সংযুত্তনিকাযে চন্দিমসুত্তসূরিযসুত্তেহি দীপেতব্বং. ইতি-সদ্দো চেত্থ আদিঅত্থো ‘‘চন্দগ্গাহাদযো’’তি ৰুত্তত্তা, তেন সূরিযগ্গাহনক্খত্তগ্গাহা সঙ্গয্হন্তি. তস্মা চন্দিমসূরিযানমিৰ নক্খত্তানম্পি রাহুনা গহণং ৰেদিতব্বং. ততো এৰ হি ‘‘অপি চা’’তিআদিনা নক্খত্তগাহে দুতিযনযো ৰুত্তো. অঙ্গারকাদিগাহসমাযোগোপীতি অগ্গহিতগ্গহণেন অঙ্গারকসসিপুত্তসূরগরুসুক্করৰিসুতকেতুসঙ্খাতানং গাহানং সমাযোগো অপি নক্খত্তগাহোযেৰ সহ পযোগেন গহণতো. সহপযোগোপি হি ৰেদসমযেন গহণন্তি ৰুচ্চতি. উক্কানং পতনন্তি উক্কোভাসানং পতনং. ৰাতসঙ্ঘাতেসু হি ৰেগেন অঞ্ঞমঞ্ঞং সঙ্ঘট্টেন্তেসু দীপিকোভাসো ৰিয ওভাসো উপ্পজ্জিত্ৰা আকাসতো পততি, তত্রাযং উক্কাপাতৰোহারো. জোতিসত্থেপি ৰুত্তং –

‘‘মহাসিখা চ সুক্খগ্গা-রত্তানিলসিখোজ্জলা;

পোরিসী চ পমাণেন, উক্কা নানাৰিধা মতা’’তি.

দিসাকালুসিযন্তি দিসাসু খোভনং, তং সরূপতো দস্সেতি ‘‘অগ্গিসিখধূমসিখাদীহি আকুলভাৰো ৰিযা’’তি ইমিনা, অগ্গিসিখধূমসিখাদীনং বহুধা পাতুভাৰো এৰ দিসাদাহো নামাতি ৰুত্তং হোতি. তদেৰ ‘‘ধূমকেতূ’’তি লোকিযা ৰদন্তি. ৰুত্তঞ্চ জোতিসত্থে –

‘‘কেতু ৰিয সিখাৰতী, জোতি উপ্পাতরূপিনী’’তি.

সুক্খৰলাহকগজ্জনন্তি ৰুট্ঠিমন্তরেন ৰাযুৰেগচলিতস্স ৰলাহকস্স নদনং. যং লোকিযা ‘‘নিঘাতো’’তি ৰদন্তি. ৰুত্তঞ্চ জোতিসত্থে –

‘‘যদান্তলিক্খে বলৰা, মারুতো মারুতাহতো;

পতত্যধো স নীঘাতো, জাযতে ৰাযুসম্ভৰো’’তি.

উদযনন্তি লগ্গনমাযূহনং.

‘‘যদোদেতি তদা লগনং, রাসীনমন্ৰযং কমা’’তি –

হি ৰুত্তং. অত্থঙ্গমনম্পি ততো সত্তমরাসিপ্পমাণৰসেন ৰেদিতব্বং. অব্ভা ধূমো রজো রাহূতি ইমেহি চতূহি কারণেহি অৰিসুদ্ধতা. তব্বিনিমুত্ততা ৰোদানং. ৰুত্তঞ্চ ‘‘চত্তারোমে ভিক্খৰে, চন্দিমসূরিযানং উপক্কিলেসা, যেহি উপক্কিলেসেহি উপক্কিলিট্ঠা চন্দিমসূরিযা ন তপন্তি ন ভাসন্তি ন ৰিরোচন্তি. কতমে চত্তারো? অব্ভা ভিক্খৰে, চন্দিমসূরিযানং উপক্কিলেসা, যেন…পে… ধূমো…পে… রজো…পে… রাহু ভিক্খৰে…পে… ইমে খো…পে… ন ৰিরোচন্তী’’তি (অ. নি. ৪.৫০).

২৫. দেৰস্সাতি মেঘস্স. ধারানুপ্পৰেচ্ছনং ৰস্সনং. অৰগ্গাহোতি ধারায অৰগ্গহণং দুগ্গহণং, তেনাহ ‘‘ৰস্সৰিবন্ধো’’তি. হত্থমুদ্দাতি হত্থেন অধিপ্পেতৰিঞ্ঞাপনং, তং পন অঙ্গুলিসঙ্কোচনেন গণনাযেৰাতি আচরিযধম্মপালত্থেরেন (দী. নি. টী. ১.২১) ৰুত্তং. আচরিযসারিপুত্তত্থেরেন পন ‘‘হত্থমুদ্দা নাম অঙ্গুলিপব্বেসু সঞ্ঞং ঠপেত্ৰা গণনা’’তি দস্সিতা. গণনা ৰুচ্চতি অচ্ছিদ্দকগণনা পরিসেসঞাযেন, সা পন পাদসিকমিলক্খকাদযো ৰিয ‘‘একং দ্ৰে’’তিআদিনা নৰন্তৰিধিনা নিরন্তরগণনাতি ৰেদিতব্বা. সমূহনং সঙ্কলনং ৰিসুং উপ্পাদনং অপনযনং পটুপ্পাদনং [সটুপ্পাদনং (অট্ঠকথাযং)] ‘‘সদুপ্পাদন’’ন্তিপি পঠন্তি, সম্মা উপ্পাদনন্তি অত্থো. আদি-সদ্দেন ৰোকলনভাগহারাদিকে সঙ্গণ্হাতি. তত্থ ৰোকলনং ৰিসুং সমূহকরণং, ৰোমিস্সনন্তি অত্থো. ভাগকরণং ভাগো. ভুঞ্জনং ৰিভজনং হারো. সাতি যথাৰুত্তা পিণ্ডগণনা দিস্ৰাতি এত্থ দিট্ঠমত্তেন গণেত্ৰাতি অত্থো গহেতব্বো.

পটিভানকৰীতি এত্থ অঙ্গুত্তরাগমে (অ. নি. ৪.২৩১) ৰুত্তানন্তি সেসো, কৰীনং কব্যকরণন্তি সম্বন্ধো, এতেন কৰীহি কতং, কৰীনং ৰা ইদং কাৰেয্যন্তি অত্থং দস্সেতি. ‘‘অত্তনো চিন্তাৰসেনা’’তিআদি তেসং সভাৰদস্সনং. তথা হি ৰত্থুং, অনুসন্ধিঞ্চ সযমেৰ চিরেন চিন্তেত্ৰা করণৰসেন চিন্তাকৰি ৰেদিতব্বো. কিঞ্চি সুত্ৰা সুতেন অসুতং অনুসন্ধেত্ৰা করণৰসেন সুতকৰি, কিঞ্চি অত্থং উপধারেত্ৰা তস্স সঙ্খিপনৰিত্থারণাদিৰসেন অত্থকৰি, যং কিঞ্চি পরেন কতং কব্বং ৰা নাটকং ৰা দিস্ৰা তংসদিসমেৰ অঞ্ঞং অত্তনো ঠানুপ্পত্তিকপটিভানেন করণৰসেন পটিভানকৰীতি. ন্তি তমত্থং. তপ্পটিভাগন্তি তেন দিট্ঠেন সদিসং. ‘‘কত্তব্ব’’ন্তি এত্থ ৰিসেসনং, ‘‘করিস্সামী’’তি এত্থ ৰা ভাৰনপুংসকং. ঠানুপ্পত্তিকপটিভানৰসেনাতি কারণানুরূপং পৰত্তনকঞাণৰসেন. জীৰিকত্থাযাতি পকরণাধিগতৰসেনেৰ ৰুত্তং. কৰীনং ইদন্তি কব্যং, যং ‘‘গীত’’ন্তি ৰুচ্চতি.

২৬. পরিগ্গহভাৰেন দারিকায গণ্হনং আৰাহনং. তথা দানং ৰিৰাহনং. ইধ পন তথাকরণস্স উত্তরপদলোপেন নিদ্দেসো, হেতুগব্ভৰসেন ৰা, তেনাহ ‘‘ইমস্স দারকস্সা’’তিআদি. ইতীতি এৰংহোন্তেসু, এৰংভাৰতো ৰা. উট্ঠানন্তি খেত্তাদিতো উপ্পন্নমাযং. ইণন্তি ধনৰড্ঢনত্থং পরস্স দিন্নং পরিযুদঞ্চনং. পুব্বে পরিচ্ছিন্নকালে অসম্পত্তেপি উদ্ধরিতমিণং উট্ঠানং, যথাপরিচ্ছিন্নকালে পন সম্পত্তে ইণন্তি কেচি, তদযুত্তমেৰ ইণগহণেনেৰ সিজ্ঝনতো. পরেসং দিন্নং ইণং ৰা ধনন্তি সম্বন্ধো. থাৰরন্তি চিরট্ঠিতিকং. দেসন্তরে দিগুণতিগুণাদিগহণৰসেন ভণ্ডপ্পযোজনং পযোগো. তত্থ ৰা অঞ্ঞত্থ ৰা যথাকালপরিচ্ছেদং ৰড্ঢিগহণৰসেন পযোজনং উদ্ধারো. ‘‘ভণ্ডমূলরহিতানং ৰাণিজং কত্ৰা এত্তকেন উদযেন সহ মূলং দেথা’তি ধনদানং পযোগো, তাৰকালিকদানং উদ্ধারো’’তিপি ৰদন্তি. অজ্জ পযোজিতং দিগুণং চতুগুণং হোতীতি যদি অজ্জ পযোজিতং ভণ্ডং, এৰং অপরজ্জ দিগুণং, অজ্জ চতুগুণং হোতীতি অত্থো. সুভস্স, সুভেন ৰা গমনং পৰত্তনং সুভগো, তস্স করণং সুভগকরণং, তং পন পিযমনাপস্স, সস্সিরীকস্স ৰা করণমেৰাতি আহ ‘‘পিযমনাপকরণ’’ন্তিআদি. সস্সিরীককরণন্তি সরীরসোভগ্গকরণং. ৰিলীনস্সাতি পতিট্ঠহিত্ৰাপি পরিপক্কমপাপুণিত্ৰা ৰিলোপস্স. তথা পরিপক্কভাৰেন অট্ঠিতস্স. পরিযাযৰচনমেতং পদচতুক্কং. ভেসজ্জদানন্তি গব্ভসণ্ঠাপনভেসজ্জস্স দানং. তীহি কারণেহীতি এত্থ ৰাতেন, পাণকেহি ৰা গব্ভে ৰিনস্সন্তে ন পুরিমকম্মুনা ওকাসো কতো, তপ্পচ্চযা এৰ কম্মং ৰিপচ্চতি, সযমেৰ পন কম্মুনা ওকাসে কতে ন একন্তেন ৰাতা, পাণকা ৰা অপেক্খিতব্বাতি কম্মস্স ৰিসুং কারণভাৰো ৰুত্তোতি দট্ঠব্বং. ৰিনযট্ঠকথাযং (ৰি. অট্ঠ. ২.১৮৫) পন ৰাতেন পাণকেহি ৰা গব্ভো ৰিনস্সন্তো কম্মং ৰিনা ন ৰিনস্সতীতি অধিপ্পাযেন তমঞ্ঞাত্র দ্ৰীহি কারণেহীতি ৰুত্তং. নিব্বাপনীযন্তি উপসমকরং. পটিকম্মন্তি যথা তে ন খাদন্তি, তথা পটিকরণং.

বন্ধকরণন্তি যথা জিং চালেতুং ন সক্কোতি, এৰং অনালোল়িতকরণং. পরিৰত্তনত্থন্তি আৰুধাদিনা সহ উক্খিত্তহত্থানং অঞ্ঞত্থ পরিৰত্তনত্থং, অত্তনা গোপিতট্ঠানে অখিপেত্ৰা পরত্থ খিপনত্থন্তি ৰুত্তং হোতি. খিপতীতি চ অঞ্ঞত্থ খিপতীতি অত্থো. ৰিনিচ্ছযট্ঠানেতি অড্ডৰিনিচ্ছযট্ঠানে. ইচ্ছিতত্থস্স দেৰতায কণ্ণে কথনৰসেন জপ্পনং কণ্ণজপ্পনন্তি চ ৰদন্তি. দেৰতং ওতারেত্ৰাতি এত্থ মন্তজপ্পনেন দেৰতায ওতারণং. জীৰিকত্থাযাতি যথা পারিচরিযং কত্ৰা জীৰিতৰুত্তি হোতি, তথা জীৰিতৰুত্তিকরণত্থায. আদিচ্চপারিচরিযাতি করমালাহি পূজং কত্ৰা সকলদিৰসং আদিচ্চাভিমুখাৰট্ঠানেন আদিচ্চস্স পরিচরণং. ‘‘তথেৰা’’তি ইমিনা ‘‘জীৰিকত্থাযা’’তি পদমাকড্ঢতি. সিরিৰ্হাযনন্তি ঈ-কারতো অ-কারলোপেন সন্ধিনিদ্দেসো, তেনাহ ‘‘সিরিযা অৰ্হাযন’’ন্তি. ‘‘সিরেনা’’তি পন ঠানৰসেন অৰ্হাযনাকারং দস্সেতি. যে তু অ-কারতো অ-কারস্স লোপং কত্ৰা ‘‘সিরৰ্হাযন’’ন্তি পঠন্তি, তেসং পাঠে অযমত্থো ‘‘মন্তং জপ্পেত্ৰা সিরসা ইচ্ছিতস্স অত্থস্স অৰ্হাযন’’ন্তি.

২৭. দেৰট্ঠানন্তি দেৰাযতনং. উপহারন্তি পূজং. সমিদ্ধিকালেতি আযাচিতস্স অত্থস্স সিদ্ধকালে. সন্তিপটিস্সৰকম্মন্তি দেৰতাযাচনায যা সন্তি পটিকত্তব্বা, তস্সা পটিস্সৰকরণং. সন্তীতি চেত্থ মন্তজপ্পনেন পূজাকরণং, তায সন্তিযা আযাচনপ্পযোগোতি অত্থো. তস্মিন্তি যং ‘‘সচে মে ইদং নাম সমিজ্ঝিস্সতী’’তি ৰুত্তং, তস্মিং পটিস্সৰফলভূতে যথাভিপত্থিতকম্মস্মিং. তস্সাতি যো ‘‘পণিধী’’তি চ ৰুত্তো, তস্স পটিস্সৰস্স. যথাপটিস্সৰঞ্হি উপহারে কতে পণিধিআযাচনা কতা নিয্যাতিতা হোতীতি. গহিতমন্তস্সাতি উগ্গহিতমন্তস্স. পযোগকরণন্তি উপচারকম্মকরণং. ইতীতি কারণত্থে নিপাতো, তেন ৰস্সৰোস্স-সদ্দানং পুরিসপণ্ডকেসু পৰত্তিং কারণভাৰেন দস্সেতি, পণ্ডকতো ৰিসেসেন অসতি ভৰতীতি ৰস্সো. পুরিসলিঙ্গতো ৰিরহেন অৰঅসতি হীল়িতো হুত্ৰা ভৰতীতি ৰোস্সো. ৰিসেসো রাগস্সৰো যস্সাতি ৰস্সো. ৰিগতো রাগস্সৰো যস্সাতি ৰোস্সোতি নিরুত্তিনযেন পদসিদ্ধীতিপি ৰদন্তি. ৰস্সকরণং তদনুরূপভেসজ্জেন. ৰোস্সকরণং পন উদ্ধতবীজতাদিনাপি, তেনেৰ জাতকট্ঠকথাযং ‘‘ৰোস্সৰরাতি উদ্ধতবীজা ওরোধপালকা’’তি ৰুত্তং. অচ্ছন্দিকভাৰমত্তন্তি ইত্থিযা অকামভাৰমত্তং. লিঙ্গন্তি পুরিসনিমিত্তং.

ৰত্থুবলিকম্মকরণন্তি ঘরৰত্থুস্মিং বলিকম্মস্স করণং, তং পন উপদ্দৰপটিবাহনত্থং, ৰড্ঢনত্থঞ্চ করোন্তি, মন্তজপ্পনেন অত্তনো, অঞ্ঞেসঞ্চ মুখসুদ্ধিকরণং.তেসন্তি অঞ্ঞেসং. যোগন্তি ভেসজ্জপযোগং. ৰমনন্তি পচ্ছিন্দনং. উদ্ধংৰিরেচনন্তি ৰমনভেদমেৰ ‘‘উদ্ধং দোসানং নীহরণ’’ন্তি ৰুত্তত্তা. ৰিরেচনন্তি পকতিৰিরেচনমেৰ. অধোৰিরেচনন্তি সুদ্ধৰত্থিকসাৰৰত্থিআদিৰত্থিকিরিযা ‘‘অধো দোসানং নীহরণ’’ন্তি ৰুত্তত্তা. অথো ৰমনং উগ্গিরণমেৰ, উদ্ধংৰিরেচনং দোসনীহরণং. তথা ৰিরেচনং ৰিরেকোৰ, অধোৰিরেচনং দোসনীহরণন্তি অযমেতেসং ৰিসেসো পাকটো হোতি. দোসানন্তি চ পিত্তাদিদোসানন্তি অত্থো. সেম্হনীহরণাদি সিরোৰিরেচনং.কণ্ণবন্ধনত্থন্তি ছিন্নকণ্ণানং সঙ্ঘটনত্থং. ৰণহরণত্থন্তি অরুপনযনত্থং. অক্খিতপ্পনতেলন্তি অক্খীসু উসুমস্স নীহরণতেলং. যেন অক্খিম্হি অঞ্জিতে উণ্হং উসুমং নিক্খমতি. যং নাসিকায গণ্হীযতি, তং নত্থু.পটলানীতি অক্খিপটলানি. নীহরণসমত্থন্তি অপনযনসমত্থং. খারঞ্জনন্তি খারকমঞ্জনং. সীতমেৰ সচ্চং নিরুত্তিনযেন, তস্স কারণং অঞ্জনং সচ্চঞ্জনন্তি আহ ‘‘সীতলভেসজ্জঞ্জন’’ন্তি. সলাকৰেজ্জকম্মন্তি অক্খিরোগৰেজ্জকম্মং. সলাকসদিসত্তা সলাকসঙ্খাতস্স অক্খিরোগস্স ৰেজ্জকম্মন্তি হি সালাকিযং. ইদং পন ৰুত্তাৰসেসস্স অক্খিরোগপটিকম্মস্স সঙ্গহণত্থং ৰুত্তং ‘‘তপ্পনাদযোপি হি সালাকিযানেৰা’’তি. পটিৰিদ্ধস্স সলাকস্স নিক্খমনত্থং ৰেজ্জকম্মং সলাকৰেজ্জকম্মন্তি কেচি, তং পন সল্লকত্তিযপদেনেৰ সঙ্গহিতন্তি দট্ঠব্বং.

সল্লস্স পটিৰিদ্ধস্স কত্তনং উব্বাহনং সল্লকত্তং, তদত্থায ৰেজ্জকম্মং সল্লকত্তৰেজ্জকম্মং. কুমারং ভরতীতি কুমারভতো, তস্স ভাৰো কোমারভচ্চং, কুমারো এৰ ৰা কোমারো, ভতনং ভচ্চং, তস্স ভচ্চং তথা, তদভিনিপ্ফাদকং ৰেজ্জকম্মন্তি অত্থো. মূলানি পধানানি রোগূপসমনে সমত্থানি ভেসজ্জানি মূলভেসজ্জানি, মূলানং ৰা ব্যাধীনং ভেসজ্জানি তথা. মূলানুবন্ধৰসেন হি দুৰিধো ব্যাধি. তত্র মূলব্যাধিম্হি তিকিচ্ছিতে যেভুয্যেন ইতরং ৰূপসমতি, তেনাহ ‘‘কাযতিকিচ্ছতংদস্সেতী’’তিআদি. তত্থ কাযতিকিচ্ছতন্তি মূলভাৰতো সরীরভূতেহি ভেসজ্জেহি, সরীরভূতানং ৰা রোগানং তিকিচ্ছকভাৰং. খারাদীনীতি খারোদকাদীনি. তদনুরূপে ৰণেতি ৰূপসমিতস্স মূলব্যাধিনো অনুচ্ছৰিকে অরুম্হি. তেসন্তি মূলভেসজ্জানং. অপনযনং অপহরণং, তেহি অতিকিচ্ছনন্তি ৰুত্তং হোতি. ইদঞ্চ কোমারভচ্চসল্লকত্তসালাকিযাদিৰিসেসভূতানং তন্তীনং পুব্বে ৰুত্তত্তা পারিসেসৰসেন ৰুত্তং, তস্মা তদৰসেসায তন্তিযা ইধ সঙ্গহো দট্ঠব্বো, সব্বানি চেতানি আজীৰহেতুকানিযেৰ ইধাধিপ্পেতানি ‘‘মিচ্ছাজীৰেন জীৰিকং কপ্পেন্তী’’তি (দী. নি. ১.২১) ৰুত্তত্তা. যং পন তত্থ তত্থ পাল়িযং ‘‘ইতি ৰা’’তি ৰুত্তং. তত্থ ইতী-তি পকারত্থে নিপাতো, ৰা-তি ৰিকপ্পনত্থে. ইদং ৰুত্তং হোতি – ইমিনা পকারেন, ইতো অঞ্ঞেন ৰাতি. তেন যানি ইতো বাহিরকপব্বজিতা সিপ্পাযতনৰিজ্জাট্ঠানাদীনি জীৰিকোপাযভূতানি আজীৰিকপকতা উপজীৰন্তি, তেসং পরিগ্গহো কতোতি ৰেদিতব্বং.

মহাসীলৰণ্ণনা নিট্ঠিতা.